𑁩. 𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀪𑁂𑀤𑀲𑀗𑁆𑀕𑀳𑀯𑀺𑀪𑀸𑀕𑁄

𑁧𑁨𑁩. 𑀏𑀯𑀁 𑀪𑁂𑀤𑀲𑀪𑀸𑀯𑁂𑀲𑀼, 𑀢𑁂𑀲𑁆𑀯𑁂𑀯 𑀧𑀼𑀦 𑀲𑀗𑁆𑀕𑀳𑀁;

𑀲𑀪𑀸𑀯𑀢𑁆𑀣𑀯𑀺𑀲𑁂𑀲𑁂𑀳𑀺, 𑀧𑀯𑀓𑁆𑀔𑀸𑀫𑀺 𑀇𑀢𑁄 𑀧𑀭𑀁.

𑁧𑁨𑁪. 𑀅𑀲𑀸𑀥𑀸𑀭𑀡𑀜𑀸𑀡𑁂𑀳𑀺, 𑀲𑀢𑁆𑀣𑀸 𑀯𑀢𑁆𑀣𑀼𑀯𑀺𑀯𑁂𑀘𑀓𑁄;

𑀲𑀗𑁆𑀕𑀳𑁂𑀢𑁆𑀯𑀸 𑀲𑀪𑀸𑀕𑁂𑀳𑀺, 𑀥𑀫𑁆𑀫𑁂 𑀤𑀲𑁆𑀲𑁂𑀲𑀺 𑀘𑀓𑁆𑀔𑀼𑀫𑀸.

𑁧𑁨𑁫. 𑀤𑀺𑀝𑁆𑀞𑀺𑀪𑀺𑀦𑀺𑀯𑁂𑀲𑀝𑁆𑀞𑁂𑀦, 𑀬𑀣𑀸𑀪𑀽𑀢𑀲𑀪𑀸𑀯𑀢𑁄;

𑀧𑀭𑀫𑀸𑀫𑀲𑀢𑀺𑀘𑁆𑀘𑁂𑀓𑀸, 𑀧𑀭𑀸𑀫𑀸𑀲𑁄𑀢𑀺 𑀪𑀸𑀲𑀺𑀢𑀸.

𑁧𑁨𑁬. 𑀓𑀺𑀮𑁂𑀲𑀸𑀲𑀼𑀘𑀺𑀪𑀸𑀯𑁂𑀦, 𑀯𑀡𑀲𑁆𑀲𑀸𑀯𑀭𑀲𑁄 𑀯𑀺𑀬;

𑀆𑀮𑀺𑀫𑁆𑀧𑀦𑁆𑀢𑀸𑀯 𑀲𑀦𑁆𑀢𑀸𑀦𑀁, 𑀲𑀯𑀦𑁆𑀢𑀻𑀢𑀺 𑀧𑀓𑀸𑀲𑀺𑀢𑀸.

𑁧𑁨𑁭. 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸, 𑀤𑀺𑀝𑁆𑀞𑀸𑀯𑀺𑀚𑁆𑀚𑀸𑀢𑀺 𑀆𑀲𑀯𑀸;

𑀘𑀢𑁆𑀢𑀸𑀭𑁄 𑀆𑀲𑀯𑀝𑁆𑀞𑁂𑀦, 𑀢𑀬𑁄 𑀥𑀫𑁆𑀫𑀸 𑀲𑀪𑀸𑀯𑀢𑁄.

𑁧𑁨𑁮. 𑀏𑀢𑁂𑀯𑁄 𑀖𑀸𑀢𑀺 𑀯𑀼𑀢𑁆𑀢𑀸𑀯, 𑀤𑁆𑀯𑀸𑀭𑀸𑀮𑀫𑁆𑀩𑀸𑀪𑀺𑀯𑀸𑀳𑀺𑀦𑁄;

𑀑𑀢𑁆𑀣𑀭𑀺𑀢𑁆𑀯𑀸 𑀧𑀭𑀸𑀪𑀽𑀢𑁂, 𑀳𑀭𑀦𑁆𑀢𑀸 𑀧𑀸𑀡𑀺𑀦𑁄 𑀪𑀯𑁂.

𑁧𑁨𑁯. 𑀬𑁄𑀕𑀸𑀢𑀺 𑀘𑀸𑀳𑀼 𑀢𑁂 𑀏𑀯, 𑀧𑀸𑀡𑀺𑀦𑁄 𑀪𑀯𑀬𑀦𑁆𑀢𑀓𑁂;

𑀤𑁆𑀯𑀸𑀭𑀸𑀮𑀫𑁆𑀩𑀸𑀪𑀺𑀲𑀫𑁆𑀩𑀦𑁆𑀥𑀸, 𑀬𑀦𑁆𑀢𑀩𑀦𑁆𑀥𑀸𑀯 𑀬𑁄𑀚𑀺𑀢𑀸.

𑁧𑁩𑁦. 𑀲𑀦𑁆𑀢𑀸𑀦𑀫𑀥𑀺𑀕𑀡𑁆𑀳𑀦𑁆𑀢𑀸, 𑀫𑀸𑀮𑀼𑀯𑀸𑀯 𑀫𑀳𑀸𑀢𑀭𑀼𑀁;

𑀕𑀡𑁆𑀳𑀦𑁆𑀢𑀸 𑀤𑀴𑁆𑀳𑀫𑀸𑀮𑀫𑁆𑀩𑀁, 𑀫𑀡𑁆𑀟𑀽𑀓𑀫𑀺𑀯 𑀧𑀦𑁆𑀦𑀕𑁄.

𑁧𑁩𑁧. 𑀓𑀸𑀫𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘, 𑀉𑀧𑀸𑀤𑀸𑀦𑀸 𑀘𑀢𑀼𑀩𑁆𑀩𑀺𑀥𑀸;

𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀲𑀻𑀮𑀩𑁆𑀩𑀢-𑀫𑀢𑁆𑀢𑀯𑀸𑀤𑁄𑀢𑀺 𑀪𑁂𑀤𑀺𑀢𑀸.

𑁧𑁩𑁨. 𑀓𑀸𑀬𑁂𑀦 𑀓𑀸𑀬𑀁 𑀕𑀦𑁆𑀣𑁂𑀦𑁆𑀢𑀸, 𑀤𑀼𑀧𑁆𑀧𑀫𑀼𑀜𑁆𑀘𑀸𑀦𑀼𑀯𑁂𑀞𑀺𑀦𑁄;

𑀓𑀣𑀺𑀢𑀸 𑀓𑀸𑀬𑀕𑀦𑁆𑀣𑀸𑀢𑀺, 𑀢𑀡𑁆𑀳𑀸𑀩𑁆𑀬𑀸𑀧𑀸𑀤𑀤𑀺𑀝𑁆𑀞𑀺𑀬𑁄.

𑁧𑁩𑁩. 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀇𑀢𑀺 𑀤𑀺𑀝𑁆𑀞𑀺 𑀯𑀺𑀪𑁂𑀤𑀺𑀢𑀸;

𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄, 𑀇𑀢𑀺 𑀘𑁂𑀯𑀁 𑀘𑀢𑀼𑀩𑁆𑀩𑀺𑀥𑀸.

𑁧𑁩𑁪. 𑀦𑁂𑀓𑁆𑀔𑀫𑁆𑀫𑀁 𑀧𑀮𑀺𑀩𑁄𑀥𑁂𑀦𑁆𑀢𑀸, 𑀪𑀸𑀯𑀦𑀸𑀧𑀭𑀺𑀧𑀦𑁆𑀣𑀓𑀸;

𑀲𑀦𑁆𑀢𑀸𑀦𑀫𑀡𑁆𑀟𑀓𑁄𑀲𑀸𑀯, 𑀧𑀭𑀺𑀬𑁄𑀦𑀦𑁆𑀥𑀓𑀸𑀢𑀺 𑀘.

𑁧𑁩𑁫. 𑀓𑀸𑀫𑀘𑁆𑀙𑀦𑁆𑀤𑁄 𑀘 𑀩𑁆𑀬𑀸𑀧𑀸𑀤𑁄, 𑀣𑀺𑀦𑀫𑀺𑀤𑁆𑀥𑀜𑁆𑀘 𑀲𑀁𑀲𑀬𑁄;

𑀅𑀯𑀺𑀚𑁆𑀚𑀼𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑀺𑀢𑀺 𑀦𑀻𑀯𑀭𑀡𑀸 𑀫𑀢𑀸.

𑁧𑁩𑁬. 𑀆𑀕𑀸𑀴𑁆𑀳𑀁 𑀧𑀭𑀺𑀬𑀸𑀤𑀸𑀬, 𑀑𑀕𑀬𑁆𑀳𑀦𑀼𑀧𑁆𑀧𑀯𑀢𑁆𑀢𑀺𑀦𑁄;

𑀬𑁄𑀧𑁆𑀧𑀭𑁄𑀕𑀸𑀯 𑀲𑀦𑁆𑀢𑀸𑀦-𑀫𑀦𑀼𑀲𑁂𑀦𑁆𑀢𑀻𑀢𑀺 𑀪𑀸𑀲𑀺𑀢𑀸.

𑁧𑁩𑁭. 𑀓𑀸𑀫𑀭𑀸𑀕𑁄 𑀪𑀯𑀭𑀸𑀕𑁄, 𑀧𑀝𑀺𑀖𑁄 𑀫𑀸𑀦𑀤𑀺𑀝𑁆𑀞𑀺𑀬𑁄;

𑀓𑀗𑁆𑀔𑀸𑀯𑀺𑀚𑁆𑀚𑀸𑀢𑀺 𑀲𑀢𑁆𑀢𑁂𑀯, 𑀙 𑀥𑀫𑁆𑀫𑀸𑀦𑀼𑀲𑀬𑀸 𑀫𑀢𑀸.

𑁧𑁩𑁮. 𑀤𑁆𑀯𑀸𑀭𑀸𑀮𑀫𑁆𑀩𑀡𑀩𑀦𑁆𑀥𑁂𑀦, 𑀧𑀸𑀡𑀻𑀦𑀁 𑀪𑀯𑀫𑀡𑁆𑀟𑀮𑁂;

𑀲𑀁𑀬𑁄𑀚𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀧𑀸𑀲𑀩𑀦𑁆𑀥𑀸𑀯 𑀧𑀓𑁆𑀔𑀺𑀦𑀁.

𑁧𑁩𑁯. 𑀓𑀸𑀫𑀭𑀽𑀧𑀸𑀭𑀽𑀧𑀭𑀸𑀕𑀸, 𑀧𑀝𑀺𑀖𑁄 𑀫𑁄𑀳𑀲𑀁𑀲𑀬𑁄;

𑀤𑀺𑀝𑁆𑀞𑀺 𑀲𑀻𑀮𑀩𑁆𑀩𑀢𑀁 𑀫𑀸𑀦𑁄, 𑀉𑀤𑁆𑀥𑀘𑁆𑀘𑁂𑀦 𑀤𑀲𑀸 𑀪𑀯𑁂.

𑁧𑁪𑁦. 𑀭𑀽𑀧𑀸𑀭𑀽𑀧𑀭𑀸𑀕𑀼𑀤𑁆𑀥𑀘𑁆𑀘𑀁, 𑀅𑀪𑀺𑀥𑀫𑁆𑀫𑁂 𑀯𑀺𑀦𑀸 𑀧𑀼𑀦;

𑀪𑀯𑀭𑀸𑀕𑀺𑀲𑁆𑀲 𑀫𑀘𑁆𑀙𑁂𑀭𑀁, 𑀕𑀳𑁂𑀢𑁆𑀯𑀸 𑀤𑀲𑀥𑀸 𑀲𑀺𑀬𑀼𑀁.

𑁧𑁪𑁧. 𑀲𑀁𑀓𑁆𑀮𑁂𑀧𑀬𑀦𑁆𑀢𑀺 𑀲𑀦𑁆𑀢𑀸𑀦𑀁, 𑀉𑀧𑀖𑀸𑀢𑁂𑀦𑁆𑀢𑀺 𑀧𑀸𑀡𑀺𑀦𑁄;

𑀲𑀳𑀚𑀸𑀢𑁂𑀓𑁆𑀮𑁂𑀲𑁂𑀦𑁆𑀢𑀻𑀢𑀺, 𑀓𑀺𑀮𑁂𑀲𑀸𑀢𑀺 𑀧𑀓𑀸𑀲𑀺𑀢𑀸.

𑁧𑁪𑁨. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀤𑀺𑀝𑁆𑀞𑀺 𑀫𑀸𑀦𑁄 𑀘 𑀲𑀁𑀲𑀬𑁄;

𑀣𑀺𑀦𑀸𑀳𑀺𑀭𑀺𑀓𑀦𑁄𑀢𑁆𑀢𑀧𑁆𑀧-

𑀫𑀼𑀤𑁆𑀥𑀘𑁆𑀘𑁂𑀦 𑀲𑀺𑀬𑀼𑀁 𑀤𑀲.

𑁧𑁪𑁩. 𑀦𑀯𑀲𑀗𑁆𑀕𑀳𑀺𑀢𑀸 𑀏𑀢𑁆𑀣, 𑀤𑀺𑀝𑁆𑀞𑀺𑀮𑁄𑀪𑀸 𑀧𑀓𑀸𑀲𑀺𑀢𑀸;

𑀲𑀢𑁆𑀢𑀲𑀗𑁆𑀕𑀳𑀺𑀢𑀸𑀯𑀺𑀚𑁆𑀚𑀸, 𑀧𑀝𑀺𑀖𑁄 𑀧𑀜𑁆𑀘𑀲𑀗𑁆𑀕𑀳𑁄.

𑁧𑁪𑁪. 𑀘𑀢𑀼𑀲𑀗𑁆𑀕𑀳𑀺𑀢𑀸 𑀓𑀗𑁆𑀔𑀸, 𑀫𑀸𑀦𑀼𑀤𑁆𑀥𑀘𑁆𑀘𑀸 𑀢𑀺𑀲𑀗𑁆𑀕𑀳𑀸;

𑀤𑀼𑀓𑀲𑀗𑁆𑀕𑀳𑀺𑀢𑀁 𑀣𑀻𑀦𑀁, 𑀓𑀼𑀓𑁆𑀓𑀼𑀘𑁆𑀘𑀫𑁂𑀓𑀲𑀗𑁆𑀕𑀳𑀁.

𑁧𑁪𑁫. 𑀤𑁆𑀯𑀺𑀥𑀸𑀳𑀺𑀭𑀺𑀓𑀦𑁄𑀢𑁆𑀢𑀧𑁆𑀧-𑀫𑀺𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀢𑀣𑀸;

𑀇𑀘𑁆𑀘𑁂𑀯𑀁 𑀤𑀲𑀥𑀸 𑀯𑀼𑀢𑁆𑀢𑀸, 𑀧𑀸𑀧𑀓𑁂𑀲𑁆𑀯𑁂𑀯 𑀲𑀗𑁆𑀕𑀳𑀸.

𑁧𑁪𑁬. 𑀧𑀭𑀸𑀫𑀸𑀲𑀸𑀲𑀯𑁄𑀖𑀸 𑀘, 𑀬𑁄𑀕𑀼𑀧𑀸𑀤𑀸𑀦𑀕𑀦𑁆𑀣𑀢𑁄;

𑀦𑀻𑀯𑀸𑀭𑀡𑀸𑀦𑀼𑀲𑀬𑀢𑁄, 𑀲𑀁𑀬𑁄𑀚𑀦𑀓𑀺𑀮𑁂𑀲𑀢𑁄.

𑁧𑁪𑁭. 𑀘𑀼𑀤𑁆𑀤𑀲𑁂𑀯 𑀢𑀼 𑀲𑀗𑁆𑀔𑁂𑀧𑀸, 𑀲𑀢𑁆𑀢𑀧𑀜𑁆𑀜𑀸𑀲 𑀪𑁂𑀤𑀢𑁄;

𑀬𑀣𑀸𑀥𑀫𑁆𑀫𑀸𑀦𑀼𑀲𑀸𑀭𑁂𑀦, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀬𑁄𑀚𑀬𑁂.

𑁧𑁪𑁮. 𑀢𑀢𑁄𑀧𑀭𑁂 𑀦𑁄𑀧𑀭𑀸𑀫𑀸-𑀲𑀸𑀤𑀺𑀪𑁂𑀤𑀺𑀢𑀲𑀗𑁆𑀕𑀳𑀸;

𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀫𑀺𑀢𑀺 𑀤𑀻𑀧𑀬𑁂.

𑁧𑁪𑁯. 𑀇𑀘𑁆𑀘𑀸𑀓𑀼𑀲𑀮𑀥𑀫𑁆𑀫𑀸𑀦𑀁, 𑀜𑀢𑁆𑀯𑀸 𑀲𑀗𑁆𑀕𑀳𑀫𑀼𑀢𑁆𑀢𑀭𑀁;

𑀫𑀺𑀲𑁆𑀲𑀓𑀸 𑀦𑀸𑀫 𑀯𑀺𑀜𑁆𑀜𑁂𑀬𑁆𑀬𑀸, 𑀬𑀣𑀸𑀲𑀫𑁆𑀪𑀯𑀢𑁄 𑀓𑀣𑀁;

𑁧𑁫𑁦. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀏𑀓𑀦𑁆𑀢𑀸𑀓𑀼𑀲𑀮𑀸 𑀢𑀬𑁄;

𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑁄 𑀘,

𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀢𑀣𑀸.

𑁧𑁫𑁧. 𑀧𑀸𑀤𑀧𑀲𑁆𑀲𑁂𑀯 𑀫𑀽𑀮𑀸𑀦𑀺, 𑀣𑀺𑀭𑀪𑀸𑀯𑀸𑀬 𑀧𑀘𑁆𑀘𑀬𑀸;

𑀫𑀽𑀮𑀪𑀸𑀯𑁂𑀦 𑀥𑀫𑁆𑀫𑀸𑀦𑀁, 𑀳𑁂𑀢𑀽 𑀥𑀫𑁆𑀫𑀸 𑀙 𑀤𑀻𑀧𑀺𑀢𑀸.

𑁧𑁫𑁨. 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘, 𑀧𑀻𑀢𑀺 𑀘𑁂𑀓𑀕𑁆𑀕𑀢𑀸 𑀢𑀣𑀸;

𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁, 𑀉𑀧𑁂𑀓𑁆𑀔𑀸𑀢𑀺 𑀘 𑀯𑁂𑀤𑀦𑀸.

𑁧𑁫𑁩. 𑀆𑀳𑀘𑁆𑀘𑀼𑀧𑀦𑀺𑀚𑁆𑀛𑀸𑀬𑀦𑁆𑀢𑀸, 𑀦𑀺𑀚𑁆𑀛𑀸𑀦𑀝𑁆𑀞𑁂𑀦 𑀧𑀘𑁆𑀘𑀬𑀸;

𑀛𑀸𑀦𑀥𑀫𑁆𑀫𑀸𑀢𑀺 𑀲𑀢𑁆𑀣𑀸𑀳, 𑀧𑀜𑁆𑀘 𑀯𑀢𑁆𑀣𑀼𑀲𑀪𑀸𑀯𑀢𑁄.

𑁧𑁫𑁪. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 𑀲𑀗𑁆𑀓𑀧𑁆𑀧𑁄, 𑀯𑀸𑀬𑀸𑀫𑁄 𑀯𑀺𑀭𑀢𑀺𑀢𑁆𑀢𑀬𑀁;

𑀲𑀫𑁆𑀫𑀸𑀲𑀢𑀺 𑀲𑀫𑀸𑀥𑀻 𑀘, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀲𑀫𑁆𑀪𑀯𑀸.

𑁧𑁫𑁫. 𑀲𑀫𑁆𑀫𑀸𑀫𑀺𑀘𑁆𑀙𑀸 𑀘 𑀦𑀻𑀬𑀦𑁆𑀢𑀸, 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀧𑀘𑁆𑀘𑀬𑀸;

𑀫𑀕𑁆𑀕𑀗𑁆𑀕𑀸 𑀤𑁆𑀯𑀸𑀤𑀲𑀓𑁆𑀔𑀸𑀢𑀸, 𑀦𑀯 𑀥𑀫𑁆𑀫𑀸 𑀲𑀪𑀸𑀯𑀢𑁄.

𑁧𑁫𑁬. 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀦𑁆𑀢𑀸, 𑀑𑀚𑀝𑁆𑀞𑀫𑀓𑀯𑁂𑀤𑀦𑀁;

𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧-𑀫𑀸𑀳𑀭𑀦𑁆𑀢𑀸 𑀬𑀣𑀸𑀓𑁆𑀓𑀫𑀁.

𑁧𑁫𑁭. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄,

𑀨𑀲𑁆𑀲𑁄 𑀲𑀜𑁆𑀘𑁂𑀢𑀦𑀸 𑀢𑀣𑀸;

𑀯𑀺𑀜𑁆𑀜𑀸𑀡𑀫𑀺𑀢𑀺 𑀘𑀢𑁆𑀢𑀸𑀭𑁄,

𑀆𑀳𑀸𑀭𑀸𑀢𑀺 𑀧𑀓𑀸𑀲𑀺𑀢𑀸.

𑁧𑁫𑁮. 𑀥𑀫𑁆𑀫𑀸𑀦𑀁 𑀲𑀳𑀚𑀸𑀢𑀸𑀦𑀁, 𑀇𑀦𑁆𑀤𑁆𑀭𑀺𑀬𑀝𑁆𑀞𑁂𑀦 𑀧𑀘𑁆𑀘𑀬𑀸;

𑀅𑀢𑁆𑀢𑀸𑀦𑀫𑀺𑀲𑁆𑀲𑀭𑀝𑁆𑀞𑁂𑀦, 𑀅𑀦𑀼𑀯𑀢𑁆𑀢𑀸𑀧𑀓𑀸 𑀢𑀣𑀸.

𑁧𑁫𑁯. 𑀲𑀤𑁆𑀥𑀸 𑀘 𑀲𑀢𑀺 𑀧𑀜𑁆𑀜𑀸 𑀘, 𑀯𑀻𑀭𑀺𑀬𑁂𑀓𑀕𑁆𑀕𑀢𑀸𑀧𑀺 𑀘;

𑀯𑁂𑀤𑀦𑀸 𑀚𑀻𑀯𑀺𑀢𑀁 𑀘𑀺𑀢𑁆𑀢𑀁, 𑀅𑀝𑁆𑀞 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀘.

𑁧𑁬𑁦. 𑀓𑀣𑀁 𑀚𑀻𑀯𑀺𑀢𑀫𑁂𑀓𑀁 𑀢𑀼, 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀦𑀸;

𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁, 𑀉𑀧𑁂𑀓𑁆𑀔𑀸𑀢𑀺 𑀘 𑀪𑁂𑀤𑀺𑀢𑀸.

𑁧𑁬𑁧. 𑀧𑀜𑁆𑀜𑀸𑀤𑀺𑀫𑀕𑁆𑀕𑁂𑀦𑀜𑁆𑀜𑀸𑀢-𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀪𑀯𑁂;

𑀫𑀚𑁆𑀛𑁂 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀫𑀦𑁆𑀢𑁂, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀢𑀣𑀸.

𑁧𑁬𑁨. 𑀲𑁄𑀴𑀲𑁂𑀯 𑀲𑀪𑀸𑀯𑁂𑀦, 𑀇𑀦𑁆𑀤𑁆𑀭𑀺𑀬𑀝𑁆𑀞𑀯𑀺𑀪𑀸𑀕𑀢𑁄;

𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀩𑀸𑀯𑀻𑀲𑀢𑀺 𑀯𑀺𑀪𑀸𑀯𑀬𑁂.

𑁧𑁬𑁩. 𑀤𑀴𑁆𑀳𑀸𑀥𑀺𑀝𑁆𑀞𑀺𑀢𑀲𑀦𑁆𑀢𑀸𑀦𑀸, 𑀯𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀸;

𑀩𑀮𑀯𑀦𑁆𑀢𑀲𑀪𑀸𑀯𑁂𑀦, 𑀩𑀮𑀥𑀫𑁆𑀫𑀸 𑀧𑀓𑀸𑀲𑀺𑀢𑀸.

𑁧𑁬𑁪. 𑀲𑀤𑁆𑀥𑀸 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀯𑀻𑀭𑀺𑀬𑁂𑀓𑀕𑁆𑀕𑀢𑀸 𑀢𑀣𑀸;

𑀧𑀜𑁆𑀜𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧-𑀫𑀺𑀘𑁆𑀘𑁂𑀯𑀁 𑀦𑀯𑀥𑀸 𑀫𑀢𑀸.

𑁧𑁬𑁫. 𑀚𑁂𑀝𑁆𑀞𑀸 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦, 𑀧𑀼𑀜𑁆𑀜𑀸𑀧𑀼𑀜𑁆𑀜𑀧𑀯𑀢𑁆𑀢𑀺𑀬𑀁;

𑀧𑀘𑁆𑀘𑀬𑀸𑀥𑀺𑀧𑁆𑀧𑀢𑁂𑀬𑁆𑀬𑁂𑀦, 𑀲𑀳𑀚𑀸𑀦𑀁 𑀬𑀣𑀸𑀭𑀳𑀁.

𑁧𑁬𑁬. 𑀘𑀢𑁆𑀢𑀸𑀭𑁄𑀥𑀺𑀧𑀢𑀻 𑀯𑀼𑀢𑁆𑀢𑀸, 𑀆𑀥𑀺𑀧𑁆𑀧𑀘𑁆𑀘𑀲𑀪𑀸𑀯𑀢𑁄;

𑀙𑀦𑁆𑀤𑁄 𑀘𑀺𑀢𑁆𑀢𑀜𑁆𑀘 𑀯𑀻𑀭𑀺𑀬𑀁, 𑀯𑀻𑀫𑀁𑀲𑀸𑀢𑀺 𑀘 𑀢𑀸𑀤𑀺𑀦𑀸.

𑁧𑁬𑁭. 𑀧𑀜𑁆𑀘𑀲𑀗𑁆𑀕𑀳𑀺𑀢𑀸 𑀧𑀜𑁆𑀜𑀸, 𑀯𑀸𑀬𑀸𑀫𑁂𑀓𑀕𑁆𑀕𑀢𑀸 𑀧𑀦;

𑀘𑀢𑀼𑀲𑀗𑁆𑀕𑀳𑀺𑀢𑀸 𑀘𑀺𑀢𑁆𑀢𑀁, 𑀲𑀢𑀺 𑀘𑁂𑀯 𑀢𑀺𑀲𑀗𑁆𑀕𑀳𑀸.

𑁧𑁬𑁮. 𑀲𑀗𑁆𑀓𑀧𑁆𑀧𑁄 𑀯𑁂𑀤𑀦𑀸 𑀲𑀤𑁆𑀥𑀸, 𑀤𑀼𑀓𑀲𑀗𑁆𑀕𑀳𑀺𑀢𑀸 𑀫𑀢𑀸;

𑀏𑀓𑁂𑀓𑀲𑀗𑁆𑀕𑀳𑀸 𑀲𑁂𑀲𑀸, 𑀅𑀝𑁆𑀞𑀯𑀻𑀲𑀢𑀺 𑀪𑀸𑀲𑀺𑀢𑀸;

𑀇𑀘𑁆𑀘𑁂𑀯𑀁 𑀲𑀢𑁆𑀢𑀥𑀸 𑀪𑁂𑀤𑁄, 𑀯𑀼𑀢𑁆𑀢𑁄 𑀫𑀺𑀲𑁆𑀲𑀓𑀲𑀗𑁆𑀕𑀳𑁄.

𑁧𑁬𑁯. 𑀳𑁂𑀢𑀼𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸, 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀢𑁄 𑀢𑀣𑀸;

𑀩𑀮𑀸𑀥𑀺𑀧𑁆𑀧𑀢𑀺𑀢𑁄 𑀘𑁂𑀯, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀤𑀺𑀫𑀺𑀲𑁆𑀲𑀢𑀸;

𑀙𑀢𑁆𑀢𑀺𑀁𑀲𑁂𑀯 𑀲𑀪𑀸𑀯𑁂𑀦, 𑀘𑀢𑀼𑀲𑀝𑁆𑀞𑀺 𑀧𑀪𑁂𑀤𑀢𑁄.

𑁧𑁭𑁦. 𑀇𑀘𑁆𑀘𑁂𑀯𑀁 𑀲𑀗𑁆𑀕𑀳𑁂𑀢𑁆𑀯𑀸𑀦, 𑀯𑀺𑀪𑀸𑀯𑁂𑀬𑁆𑀬 𑀢𑀢𑁄 𑀧𑀭𑀁;

𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀪𑁂𑀤𑁂𑀲𑀼, 𑀬𑀣𑀸𑀲𑀫𑁆𑀪𑀯𑀢𑁄 𑀓𑀣𑀁.

𑁧𑁭𑁧. 𑀲𑀺𑀢𑀸𑀯𑀚𑁆𑀚𑀦𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀝𑀺𑀘𑁆𑀙𑀦𑀢𑀻𑀭𑀡𑀸;

𑀅𑀝𑁆𑀞𑀸𑀭𑀲𑀸𑀳𑁂𑀢𑀼𑀓𑀸𑀯, 𑀫𑁄𑀫𑀽𑀳𑀸 𑀏𑀓𑀳𑁂𑀢𑀼𑀓𑀸.

𑁧𑁭𑁨. 𑀲𑁂𑀲𑀸 𑀢𑀼 𑀓𑀼𑀲𑀮𑀸 𑀜𑀸𑀡𑀯𑀺𑀬𑀼𑀢𑁆𑀢𑀸 𑀘 𑀤𑁆𑀯𑀺𑀳𑁂𑀢𑀼𑀓𑀸;

𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀧𑀭𑁂 𑀲𑀢𑁆𑀢-𑀘𑀢𑁆𑀢𑀸𑀮𑀻𑀲 𑀢𑀺𑀳𑁂𑀢𑀼𑀓𑀸.

𑁧𑁭𑁩. 𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀚𑁆𑀛𑀸𑀦𑀁, 𑀤𑁆𑀯𑀺𑀛𑀸𑀦𑀗𑁆𑀕𑀺𑀓𑀫𑀻𑀭𑀺𑀢𑀁;

𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀁, 𑀢𑀺𑀛𑀸𑀦𑀁 𑀢𑀢𑀺𑀬𑀁 𑀫𑀢𑀸.

𑁧𑁭𑁪. 𑀘𑀢𑀼𑀛𑀸𑀦𑀁 𑀢𑀼 𑀤𑀼𑀢𑀺𑀬𑀁, 𑀓𑀸𑀫𑁂 𑀘 𑀲𑀼𑀔𑀯𑀚𑁆𑀚𑀺𑀢𑀸;

𑀧𑀜𑁆𑀘𑀛𑀸𑀦𑀁 𑀢𑀼 𑀧𑀞𑀫𑀁, 𑀓𑀸𑀫𑁂 𑀘 𑀲𑀼𑀔𑀺𑀢𑀸 𑀫𑀢𑀸.

𑁧𑁭𑁫. 𑀧𑀞𑀫𑀸𑀦𑀼𑀢𑁆𑀢𑀭𑀁 𑀛𑀸𑀦𑀁, 𑀅𑀝𑁆𑀞𑀫𑀕𑁆𑀕𑀗𑁆𑀕𑀺𑀓𑀁 𑀫𑀢𑀁;

𑀲𑀢𑁆𑀢𑀫𑀕𑁆𑀕𑀗𑁆𑀕𑀺𑀓𑀁 𑀦𑀸𑀫, 𑀲𑁂𑀲𑀛𑀸𑀦𑀫𑀦𑀼𑀢𑁆𑀢𑀭𑀁.

𑁧𑁭𑁬. 𑀮𑁄𑀓𑀺𑀬𑀁 𑀧𑀞𑀫𑀁 𑀛𑀸𑀦𑀁, 𑀢𑀣𑀸 𑀓𑀸𑀫𑁂 𑀢𑀺𑀳𑁂𑀢𑀼𑀓𑀸;

𑀧𑀜𑁆𑀘𑀫𑀕𑁆𑀕𑀗𑁆𑀕𑀺𑀓𑀸 𑀦𑀸𑀫, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀓𑀸𑀲𑀺𑀢𑀸.

𑁧𑁭𑁭. 𑀲𑁂𑀲𑀁 𑀫𑀳𑀕𑁆𑀕𑀢𑀁 𑀛𑀸𑀦𑀁, 𑀲𑀫𑁆𑀧𑀬𑀼𑀢𑁆𑀢𑀸 𑀘 𑀤𑀺𑀝𑁆𑀞𑀺𑀬𑀸;

𑀜𑀸𑀡𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀘𑀢𑀼𑀫𑀕𑁆𑀕𑀗𑁆𑀕𑀺𑀓𑀸 𑀫𑀢𑀸.

𑁧𑁭𑁮. 𑀧𑀝𑀺𑀖𑀼𑀤𑁆𑀥𑀘𑁆𑀘𑀬𑀼𑀢𑁆𑀢𑀸 𑀘, 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘 𑀤𑀺𑀝𑁆𑀞𑀺𑀬𑀸;

𑀢𑀺𑀫𑀕𑁆𑀕𑀗𑁆𑀕𑀁 𑀤𑀼𑀫𑀕𑁆𑀕𑀗𑁆𑀕𑀁, 𑀓𑀗𑁆𑀔𑀺𑀢𑀁 𑀲𑀫𑀼𑀤𑀻𑀭𑀺𑀢𑀁.

𑁧𑁭𑁯. 𑀦 𑀳𑁄𑀦𑁆𑀢𑀸𑀳𑁂𑀢𑀼𑀓𑁂 𑀫𑀕𑁆𑀕𑀸, 𑀘𑀺𑀢𑁆𑀢𑀝𑁆𑀞𑀺𑀢𑀺 𑀘 𑀓𑀗𑁆𑀔𑀺𑀢𑁂;

𑀯𑀺𑀤𑀺𑀢𑀸 𑀦𑀺𑀬𑀢𑀢𑀸 𑀘, 𑀮𑁄𑀓𑀺𑀬𑁂𑀲𑀼 𑀦 𑀉𑀤𑁆𑀥𑀝𑀸.

𑁧𑁮𑁦. 𑀓𑀸𑀫𑁂𑀲𑀼 𑀓𑀩𑀴𑀻𑀓𑀸𑀭𑁄, 𑀅𑀦𑀸𑀳𑀸𑀭𑁄 𑀅𑀲𑀜𑁆𑀜𑀺𑀦𑁄;

𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀩𑁆𑀩𑀢𑁆𑀣, 𑀆𑀳𑀸𑀭𑀢𑁆𑀢𑀬𑀫𑀻𑀭𑀺𑀢𑀁.

𑁧𑁮𑁧. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀪𑀸𑀯𑁂𑀬𑁆𑀬, 𑀦𑀯𑀥𑀸𑀦𑀼𑀢𑁆𑀢𑀭𑁂 𑀩𑀼𑀥𑁄;

𑀅𑀝𑁆𑀞𑀥𑀸 𑀲𑀫𑀼𑀤𑀻𑀭𑁂𑀬𑁆𑀬, 𑀮𑁄𑀓𑀺𑀬𑁂𑀲𑀼 𑀢𑀺𑀳𑁂𑀢𑀼𑀓𑁂.

𑁧𑁮𑁨. 𑀲𑀢𑁆𑀢𑀥𑀸 𑀧𑀦 𑀜𑀸𑀡𑁂𑀦, 𑀯𑀺𑀧𑁆𑀧𑀬𑀼𑀢𑁆𑀢𑁂 𑀧𑀓𑀸𑀲𑀬𑁂;

𑀲𑀺𑀢𑀯𑁄𑀝𑁆𑀞𑀩𑁆𑀩𑀦𑀸𑀧𑀼𑀜𑁆𑀜𑁂, 𑀧𑀜𑁆𑀘𑀥𑀸 𑀓𑀗𑁆𑀔𑀺𑀢𑁂 𑀧𑀦.

𑁧𑁮𑁩. 𑀘𑀢𑀼𑀥𑀸 𑀢𑀺𑀯𑀺𑀥𑀸 𑀲𑁂𑀲𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀫𑀻𑀭𑀬𑁂;

𑀢𑀺𑀳𑁂𑀢𑀼𑀓𑀸 𑀲𑀢𑁆𑀢𑀩𑀮𑀸, 𑀙𑀩𑀮𑀸 𑀢𑀼 𑀤𑀼𑀳𑁂𑀢𑀼𑀓𑀸.

𑁧𑁮𑁪. 𑀘𑀢𑀼𑀩𑀮𑀸 𑀅𑀓𑀼𑀲𑀮𑀸, 𑀓𑀗𑁆𑀔𑀺𑀢𑀁 𑀢𑀺𑀩𑀮𑀁 𑀫𑀢𑀁;

𑀤𑁆𑀯𑀺𑀩𑀮𑀁 𑀲𑀺𑀢𑀯𑁄𑀝𑁆𑀞𑀩𑁆𑀩-𑀫𑀩𑀮𑀁 𑀲𑁂𑀲𑀫𑀻𑀭𑀺𑀢𑀁.

𑁧𑁮𑁫. 𑀚𑀯𑀦𑁂𑀥𑀺𑀧𑀢𑀻𑀦𑀁 𑀢𑀼, 𑀬𑁄 𑀓𑁄𑀘𑁂𑀓𑁄 𑀢𑀺𑀳𑁂𑀢𑀼𑀓𑁂;

𑀤𑁆𑀯𑀺𑀳𑁂𑀢𑀼𑀓𑁂 𑀯𑀸 𑀓𑀼𑀲𑀮𑁂, 𑀯𑀻𑀫𑀁𑀲𑀸 𑀦𑁄𑀧𑀮𑀩𑁆𑀪𑀢𑀺.

𑁧𑁮𑁬. 𑀮𑁄𑀓𑀺𑀬𑁂𑀲𑀼 𑀯𑀺𑀧𑀸𑀓𑁂𑀲𑀼,

𑀫𑁄𑀳𑀫𑀽𑀮𑁂 𑀅𑀳𑁂𑀢𑀼𑀓𑁂;

𑀬𑀣𑀸𑀲𑀫𑁆𑀪𑀯𑀯𑀼𑀢𑁆𑀢𑀺𑀢𑁆𑀢𑀸,

𑀦𑀢𑁆𑀣𑀸𑀥𑀺𑀧𑀢𑀺 𑀓𑁄𑀘𑀺𑀧𑀺.

𑁧𑁮𑁭. 𑀲𑀫𑁆𑀪𑁄𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑁂, 𑀧𑀼𑀜𑁆𑀜𑀧𑀸𑀓𑁂 𑀲𑀼𑀔𑀺𑀦𑁆𑀤𑁆𑀭𑀺𑀬𑀁;

𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀢𑀢𑁆𑀣𑁂𑀯, 𑀧𑀸𑀧𑀧𑀸𑀓𑀫𑁆𑀳𑀺 𑀪𑀸𑀲𑀺𑀢𑀁.

𑁧𑁮𑁮. 𑀲𑀦𑁆𑀢𑀻𑀭𑀡𑀜𑁆𑀘 𑀳𑀲𑀦𑀁, 𑀲𑁄𑀫𑀦𑀲𑁆𑀲𑀸𑀦𑀺 𑀲𑁄𑀴𑀲;

𑀧𑀞𑀫𑀸𑀤𑀺𑀘𑀢𑀼𑀚𑁆𑀛𑀸𑀦𑀁, 𑀲𑁄𑀫𑀦𑀲𑁆𑀲𑀬𑀼𑀢𑀁 𑀪𑀯𑁂.

𑁧𑁮𑁯. 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀸 𑀤𑁆𑀯𑁂𑀯, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀓𑀸𑀲𑀺𑀢𑀸;

𑀢𑀤𑀜𑁆𑀜𑁂 𑀧𑀦 𑀲𑀩𑁆𑀩𑁂𑀧𑀺, 𑀧𑀜𑁆𑀘𑀧𑀜𑁆𑀜𑀸𑀲𑀼𑀧𑁂𑀓𑁆𑀔𑀓𑀸.

𑁧𑁯𑁦. 𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑀜𑁆𑀘, 𑀯𑀺𑀦𑀺𑀩𑁆𑀪𑀼𑀚𑁆𑀚𑁂𑀯𑀫𑀝𑁆𑀞𑀥𑀸;

𑀳𑁂𑀢𑀼𑀬𑁄𑀕𑀸𑀤𑀺𑀪𑁂𑀤𑁂𑀳𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀓𑀸𑀲𑀺𑀢𑀸.

𑁧𑁯𑁧. 𑀢𑀁𑀢𑀁𑀯𑀺𑀬𑁄𑀕𑀪𑁂𑀤𑀜𑁆𑀘, 𑀧𑀘𑁆𑀘𑁂𑀓𑀫𑀣 𑀫𑀺𑀲𑁆𑀲𑀺𑀢𑀁;

𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀬𑀣𑀸𑀲𑀫𑁆𑀪𑀯𑀢𑁄 𑀦𑀬𑁂.