𑁨. 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀮𑀓𑁆𑀔𑀡𑀭𑀲𑀼𑀧𑀝𑁆𑀞𑀸𑀦𑀯𑀺𑀪𑀸𑀕𑁄

𑁬𑁭. 𑀲𑀪𑀸𑀯𑁄 𑀮𑀓𑁆𑀔𑀡𑀁 𑀦𑀸𑀫, 𑀓𑀺𑀘𑁆𑀘𑀲𑀫𑁆𑀧𑀚𑁆𑀚𑀦𑀸 𑀭𑀲𑁄;

𑀕𑀬𑁆𑀳𑀸𑀓𑀸𑀭𑁄 𑀉𑀧𑀝𑁆𑀞𑀸𑀦𑀁, 𑀧𑀤𑀝𑁆𑀞𑀸𑀦𑀁 𑀢𑀼 𑀧𑀘𑁆𑀘𑀬𑁄.

𑁬𑁮. 𑀅𑀢𑁆𑀢𑀼𑀧𑀮𑀤𑁆𑀥𑀺𑀲𑀗𑁆𑀔𑀸𑀢𑀸, 𑀲𑀫𑁆𑀧𑀢𑁆𑀢𑀸 𑀘 𑀧𑀦𑀢𑁆𑀣𑀢𑁄;

𑀮𑀓𑁆𑀔𑀡𑀭𑀲𑀼𑀧𑀝𑁆𑀞𑀸𑀦𑀸, 𑀯𑁄𑀳𑀸𑀭𑀸𑀪𑁄𑀕𑀪𑁂𑀤𑀺𑀢𑀸.

𑁬𑁯. 𑀢𑁂𑀧𑀜𑁆𑀜𑀸𑀲𑀲𑀪𑀸𑀯𑁂𑀲𑀼, 𑀢𑀲𑁆𑀫𑀸 𑀪𑁂𑀤𑀁 𑀬𑀣𑀸𑀭𑀳𑀁;

𑀮𑀓𑁆𑀔𑀡𑀸𑀤𑀺𑀧𑁆𑀧𑀓𑀸𑀭𑁂𑀳𑀺, 𑀧𑀯𑀓𑁆𑀔𑀸𑀫𑀺 𑀇𑀢𑁄 𑀧𑀭𑀁.

𑁭𑁦. 𑀘𑀺𑀦𑁆𑀢𑁂𑀢𑀻𑀢𑀺 𑀪𑀯𑁂 𑀘𑀺𑀢𑁆𑀢𑀁, 𑀘𑀺𑀦𑁆𑀢𑀦𑀫𑀢𑁆𑀢𑀫𑁂𑀯 𑀯𑀸;

𑀲𑀫𑁆𑀧𑀬𑀼𑀢𑁆𑀢𑀸𑀣 𑀯𑀸 𑀢𑁂𑀦, 𑀘𑀺𑀦𑁆𑀢𑁂𑀦𑁆𑀢𑀻𑀢𑀺 𑀘 𑀕𑁄𑀘𑀭𑀁.

𑁭𑁧. 𑀨𑀼𑀲𑀢𑀻𑀢𑀺 𑀪𑀯𑁂 𑀨𑀲𑁆𑀲𑁄, 𑀨𑀼𑀲𑀦𑀁 𑀯𑀸𑀣 𑀓𑁂𑀯𑀮𑀁;

𑀲𑀫𑁆𑀧𑀬𑀼𑀢𑁆𑀢𑀸𑀣 𑀯𑀸 𑀢𑁂𑀦, 𑀨𑀼𑀲𑀦𑁆𑀢𑀻𑀢𑀺 𑀘 𑀕𑁄𑀘𑀭𑀁.

𑁭𑁨. 𑀏𑀯𑀁 𑀓𑀢𑁆𑀢𑀭𑀺 𑀪𑀸𑀯𑁂 𑀘, 𑀓𑀭𑀡𑁂 𑀘 𑀬𑀣𑀸𑀭𑀳𑀁;

𑀢𑁂𑀧𑀜𑁆𑀜𑀸𑀲𑀲𑀪𑀸𑀯𑁂𑀲𑀼, 𑀲𑀤𑁆𑀤𑀦𑀺𑀩𑁆𑀩𑀘𑀦𑀁 𑀦𑀬𑁂.

𑁭𑁩. 𑀆𑀮𑀫𑁆𑀩𑀡𑀫𑀦𑀁 𑀘𑀺𑀢𑁆𑀢𑀁, 𑀢𑀁𑀯𑀺𑀚𑀸𑀦𑀦𑀮𑀓𑁆𑀔𑀡𑀁;

𑀲𑀳𑀚𑀸𑀥𑀺𑀝𑁆𑀞𑀸𑀦𑀭𑀲𑀁, 𑀘𑀺𑀦𑁆𑀢𑀸𑀓𑀧𑁆𑀧𑁄𑀢𑀺 𑀕𑀬𑁆𑀳𑀢𑀺.

𑁭𑁪. 𑀆𑀮𑀫𑁆𑀩𑀡𑀲𑀫𑁄𑀥𑀸𑀦𑁄,

𑀨𑀲𑁆𑀲𑁄 𑀨𑀼𑀲𑀦𑀮𑀓𑁆𑀔𑀡𑁄;

𑀲𑀗𑁆𑀖𑀝𑁆𑀝𑀦𑀭𑀲𑁄 𑀢𑀢𑁆𑀣,

𑀲𑀦𑁆𑀦𑀺𑀧𑀸𑀢𑁄𑀢𑀺 𑀕𑀬𑁆𑀳𑀢𑀺.

𑁭𑁫. 𑀯𑁂𑀤𑀦𑀸𑀮𑀫𑁆𑀩𑀡𑀭𑀲𑀸, 𑀲𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸;

𑀕𑁄𑀘𑀭𑀸𑀦𑀼𑀪𑀯𑀭𑀲𑀸, 𑀅𑀦𑀼𑀪𑀼𑀢𑁆𑀢𑀻𑀢𑀺 𑀕𑀬𑁆𑀳𑀢𑀺.

𑁭𑁬. 𑀆𑀓𑀸𑀭𑀕𑀳𑀡𑀁 𑀲𑀜𑁆𑀜𑀸, 𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸;

𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀭𑀲𑀸, 𑀉𑀧𑀮𑀓𑁆𑀔𑀸𑀢𑀺 𑀕𑀬𑁆𑀳𑀢𑀺.

𑁭𑁭. 𑀘𑁂𑀢𑀦𑀸 𑀘𑀺𑀢𑁆𑀢𑀯𑀺𑀧𑁆𑀨𑀸𑀭𑀸, 𑀲𑀸𑀬𑀁 𑀩𑁆𑀬𑀸𑀧𑀸𑀭𑀮𑀓𑁆𑀔𑀡𑀸;

𑀓𑀫𑁆𑀫𑀦𑁆𑀢𑀸𑀬𑀽𑀳𑀦𑀭𑀲𑀸, 𑀲𑀁𑀯𑀺𑀥𑀸𑀦𑀦𑁆𑀢𑀺 𑀕𑀬𑁆𑀳𑀢𑀺.

𑁭𑁮. 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄, 𑀲𑀸𑀯𑀺𑀲𑀸𑀳𑀸𑀭𑀮𑀓𑁆𑀔𑀡𑀸;

𑀲𑀫𑁆𑀧𑀺𑀡𑁆𑀟𑀦𑀭𑀲𑀸 𑀘𑀺𑀢𑁆𑀢𑀁, 𑀲𑀫𑁄𑀥𑀸𑀦𑀦𑁆𑀢𑀺 𑀕𑀬𑁆𑀳𑀢𑀺.

𑁭𑁯. 𑀬𑀸𑀧𑀦𑀁 𑀲𑀳𑀚𑀸𑀢𑀸𑀦-𑀫𑀦𑀼𑀧𑀸𑀮𑀦𑀮𑀓𑁆𑀔𑀡𑀁;

𑀚𑀻𑀯𑀺𑀢𑀁 𑀚𑀻𑀯𑀦𑀭𑀲𑀁, 𑀆𑀬𑀼𑀩𑀦𑁆𑀥𑁄𑀢𑀺 𑀕𑀬𑁆𑀳𑀢𑀺.

𑁮𑁦. 𑀲𑀸𑀭𑀡𑀸 𑀫𑀦𑀲𑀻𑀓𑀸𑀭𑁄, 𑀲𑀫𑀦𑁆𑀦𑀸𑀳𑀸𑀭𑀮𑀓𑁆𑀔𑀡𑁄;

𑀲𑀁𑀬𑁄𑀚𑀦𑀭𑀲𑁄 𑀘𑀺𑀢𑁆𑀢-𑀧𑀝𑀺𑀧𑀢𑁆𑀢𑀻𑀢𑀺 𑀕𑀬𑁆𑀳𑀢𑀺.

𑁮𑁧. 𑀲𑀗𑁆𑀓𑀧𑁆𑀧𑀦𑀮𑀓𑁆𑀔𑀡𑁄 𑀢𑀓𑁆𑀓𑁄, 𑀲𑀳𑀚𑀸𑀪𑀺𑀦𑀺𑀭𑁄𑀧𑀦𑁄;

𑀆𑀮𑀫𑁆𑀩𑀸𑀳𑀦𑀦𑀭𑀲𑁄, 𑀲𑀦𑁆𑀦𑀺𑀭𑀼𑀚𑁆𑀛𑁄𑀢𑀺 𑀕𑀬𑁆𑀳𑀢𑀺.

𑁮𑁨. 𑀯𑀺𑀘𑀸𑀭𑁄 𑀅𑀦𑀼𑀲𑀦𑁆𑀥𑀸𑀦𑁄, 𑀅𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄;

𑀘𑀺𑀢𑁆𑀢𑀸𑀦𑀼𑀬𑁄𑀚𑀦𑀭𑀲𑁄, 𑀅𑀦𑀼𑀧𑁂𑀓𑁆𑀔𑀸𑀢𑀺 𑀕𑀬𑁆𑀳𑀢𑀺.

𑁮𑁩. 𑀅𑀥𑀺𑀫𑁄𑀓𑁆𑀔𑁄 𑀅𑀲𑀁𑀲𑀧𑁆𑀧𑁄, 𑀲𑀼𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄;

𑀦𑀺𑀘𑁆𑀘𑀮𑀸𑀧𑀸𑀤𑀦𑀭𑀲𑁄, 𑀤𑀴𑁆𑀳𑀯𑀼𑀢𑁆𑀢𑀻𑀢𑀺 𑀕𑀬𑁆𑀳𑀢𑀺.

𑁮𑁪. 𑀯𑀻𑀭𑀺𑀬𑀁 𑀧𑀦 𑀯𑀸𑀬𑀸𑀫𑁄, 𑀫𑀳𑀼𑀲𑁆𑀲𑀸𑀳𑀦𑀮𑀓𑁆𑀔𑀡𑁄;

𑀓𑀺𑀘𑁆𑀘𑀸𑀲𑀁𑀲𑀻𑀤𑀦𑀭𑀲𑁄, 𑀉𑀧𑀢𑁆𑀣𑀫𑁆𑀪𑁄𑀢𑀺 𑀕𑀬𑁆𑀳𑀢𑀺.

𑁮𑁫. 𑀆𑀮𑀫𑁆𑀩𑀢𑁆𑀣𑀺𑀓𑀢𑀸 𑀙𑀦𑁆𑀤𑁄, 𑀓𑀢𑁆𑀢𑀼𑀓𑀸𑀫𑀢𑀮𑀓𑁆𑀔𑀡𑁄;

𑀆𑀮𑀫𑁆𑀩𑀡𑁂𑀲𑀦𑀭𑀲𑁄, 𑀳𑀢𑁆𑀣𑀸𑀤𑀸𑀦𑀦𑁆𑀢𑀺 𑀕𑀬𑁆𑀳𑀢𑀺.

𑁮𑁬. 𑀲𑀳𑀚𑀸𑀢𑀸𑀦𑀼𑀨𑀭𑀡𑀸, 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸;

𑀲𑀫𑁆𑀧𑀻𑀦𑀦𑀭𑀲𑀸 𑀧𑀻𑀢𑀺, 𑀧𑀸𑀫𑁄𑀚𑁆𑀚𑀫𑀺𑀢𑀺 𑀕𑀬𑁆𑀳𑀢𑀺.

𑁮𑁭. 𑀘𑁂𑀢𑁄𑀲𑀤𑁆𑀤𑀳𑀦𑀁 𑀲𑀤𑁆𑀥𑀸, 𑀪𑀽𑀢𑁄𑀓𑀧𑁆𑀧𑀦𑀮𑀓𑁆𑀔𑀡𑀸;

𑀳𑀺𑀢𑀧𑀓𑁆𑀔𑀦𑁆𑀤𑀦𑀭𑀲𑀸, 𑀅𑀥𑀺𑀫𑀼𑀢𑁆𑀢𑀻𑀢𑀺 𑀕𑀬𑁆𑀳𑀢𑀺.

𑁮𑁮. 𑀅𑀲𑀫𑁆𑀫𑁄𑀲𑀸 𑀲𑀪𑀸𑀯𑁂𑀲𑀼, 𑀲𑀢𑀺 𑀥𑀸𑀭𑀡𑀮𑀓𑁆𑀔𑀡𑀸;

𑀥𑀫𑁆𑀫𑀸𑀧𑀺𑀮𑀸𑀧𑀦𑀭𑀲𑀸, 𑀅𑀧𑁆𑀧𑀫𑀸𑀤𑁄𑀢𑀺 𑀕𑀬𑁆𑀳𑀢𑀺.

𑁮𑁯. 𑀳𑀺𑀭𑀻 𑀚𑁂𑀕𑀼𑀘𑁆𑀙𑀸 𑀧𑀸𑀧𑁂𑀲𑀼, 𑀲𑀸 𑀳𑀭𑀸𑀬𑀦𑀮𑀓𑁆𑀔𑀡𑀸;

𑀳𑀻𑀴𑀲𑀁𑀓𑁄𑀘𑀦𑀭𑀲𑀸, 𑀧𑀸𑀧𑀮𑀚𑁆𑀚𑀸𑀢𑀺 𑀕𑀬𑁆𑀳𑀢𑀺.

𑁯𑁦. 𑀧𑀸𑀧𑀲𑀸𑀭𑀚𑁆𑀚𑀫𑁄𑀢𑁆𑀢𑀧𑁆𑀧𑀁, 𑀉𑀩𑁆𑀩𑁂𑀕𑀼𑀢𑁆𑀢𑀸𑀲𑀮𑀓𑁆𑀔𑀡𑀁;

𑀪𑀬𑀲𑀗𑁆𑀓𑁄𑀘𑀦𑀭𑀲𑀁, 𑀅𑀯𑀺𑀲𑁆𑀲𑀸𑀲𑁄𑀢𑀺 𑀕𑀬𑁆𑀳𑀢𑀺.

𑁯𑁧. 𑀅𑀮𑁄𑀪𑁄 𑀅𑀦𑀪𑀺𑀲𑀗𑁆𑀕𑁄, 𑀅𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑁄;

𑀫𑀼𑀢𑁆𑀢𑀧𑁆𑀧𑀯𑀢𑁆𑀢𑀦𑀭𑀲𑁄, 𑀅𑀲𑀁𑀲𑀕𑁆𑀕𑁄𑀢𑀺 𑀕𑀬𑁆𑀳𑀢𑀺.

𑁯𑁨. 𑀅𑀤𑁄𑀲𑁄 𑀘𑀺𑀢𑁆𑀢𑀲𑀸𑀔𑀮𑁆𑀬𑀁, 𑀅𑀩𑁆𑀬𑀸𑀧𑀚𑁆𑀚𑀦𑀮𑀓𑁆𑀔𑀡𑁄;

𑀲𑀡𑁆𑀳𑀧𑁆𑀧𑀯𑀢𑁆𑀢𑀦𑀭𑀲𑁄, 𑀲𑁄𑀫𑁆𑀫𑀪𑀸𑀯𑁄𑀢𑀺 𑀕𑀬𑁆𑀳𑀢𑀺.

𑁯𑁩. 𑀅𑀫𑁄𑀳𑁄 𑀔𑀮𑀺𑀢𑀸𑀪𑀸𑀯𑁄, 𑀧𑀝𑀺𑀯𑀺𑀚𑁆𑀛𑀦𑀮𑀓𑁆𑀔𑀡𑁄;

𑀯𑀺𑀲𑀬𑁄𑀪𑀸𑀲𑀦𑀭𑀲𑁄, 𑀧𑀝𑀺𑀩𑁄𑀥𑁄𑀢𑀺 𑀕𑀬𑁆𑀳𑀢𑀺.

𑁯𑁪. 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑁄𑀧𑁂𑀓𑁆𑀔𑀸, 𑀲𑀫𑀻𑀓𑀭𑀡𑀮𑀓𑁆𑀔𑀡𑀸;

𑀅𑀧𑀓𑁆𑀔𑀧𑀸𑀢𑀦𑀭𑀲𑀸, 𑀲𑀫𑀯𑀸𑀳𑁄𑀢𑀺 𑀕𑀬𑁆𑀳𑀢𑀺.

𑁯𑁫. 𑀧𑀲𑁆𑀲𑀤𑁆𑀥𑀺 𑀓𑀸𑀬𑀘𑀺𑀢𑁆𑀢𑀸𑀦𑀁, 𑀤𑀭𑀣𑀸𑀪𑀸𑀯𑀮𑀓𑁆𑀔𑀡𑀸;

𑀅𑀧𑀭𑀺𑀧𑁆𑀨𑀦𑁆𑀤𑀦𑀭𑀲𑀸, 𑀲𑀻𑀢𑀺𑀪𑀸𑀯𑁄𑀢𑀺 𑀕𑀬𑁆𑀳𑀢𑀺.

𑁯𑁬. 𑀮𑀳𑀼𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁, 𑀅𑀤𑀦𑁆𑀥𑀸𑀓𑀸𑀭𑀮𑀓𑁆𑀔𑀡𑀸;

𑀅𑀯𑀺𑀢𑁆𑀣𑀸𑀭𑀭𑀲𑀸 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀻𑀢𑀺 𑀕𑀬𑁆𑀳𑀢𑀺.

𑁯𑁭. 𑀫𑀼𑀤𑀼𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁, 𑀓𑀓𑁆𑀔𑀴𑀸𑀪𑀸𑀯𑀮𑀓𑁆𑀔𑀡𑀸;

𑀓𑀺𑀘𑁆𑀘𑀸𑀯𑀺𑀭𑁄𑀥𑀦𑀭𑀲𑀸, 𑀅𑀦𑀼𑀓𑀼𑀮𑁆𑀬𑀦𑁆𑀢𑀺 𑀕𑀬𑁆𑀳𑀢𑀺.

𑁯𑁮. 𑀓𑀫𑁆𑀫𑀜𑁆𑀜𑀢𑀸 𑀉𑀪𑀺𑀦𑁆𑀦𑀫𑁆𑀧𑀺, 𑀅𑀮𑀁𑀓𑀺𑀘𑁆𑀘𑀲𑁆𑀲 𑀮𑀓𑁆𑀔𑀡𑀸;

𑀧𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀭𑀲𑀸, 𑀬𑁄𑀕𑀪𑀸𑀯𑁄𑀢𑀺 𑀕𑀬𑁆𑀳𑀢𑀺.

𑁯𑁯. 𑀢𑀣𑀸 𑀧𑀸𑀕𑀼𑀜𑁆𑀜𑀢𑀸 𑀤𑁆𑀯𑀺𑀦𑁆𑀦𑀁, 𑀯𑀺𑀲𑀤𑀸𑀓𑀸𑀭𑀮𑀓𑁆𑀔𑀡𑀸;

𑀲𑀼𑀔𑀧𑁆𑀧𑀯𑀢𑁆𑀢𑀦𑀭𑀲𑀸, 𑀲𑁂𑀭𑀺𑀪𑀸𑀯𑁄𑀢𑀺 𑀕𑀬𑁆𑀳𑀢𑀺.

𑁧𑁦𑁦. 𑀉𑀚𑀼𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁, 𑀓𑀼𑀝𑀺𑀮𑀸𑀪𑀸𑀯𑀮𑀓𑁆𑀔𑀡𑀸;

𑀚𑀺𑀫𑁆𑀳𑀦𑀺𑀫𑁆𑀫𑀤𑀦𑀭𑀲𑀸, 𑀉𑀚𑀼𑀯𑀼𑀢𑁆𑀢𑀻𑀢𑀺 𑀕𑀬𑁆𑀳𑀢𑀺.

𑁧𑁦𑁧. 𑀲𑀫𑁆𑀫𑀸𑀯𑀸𑀘𑀸 𑀯𑀘𑀻𑀲𑀼𑀤𑁆𑀥𑀺, 𑀯𑀸𑀘𑀸𑀲𑀁𑀬𑀫𑀮𑀓𑁆𑀔𑀡𑀸;

𑀫𑀺𑀘𑁆𑀙𑀸𑀯𑀸𑀘𑁄𑀭𑀫𑀭𑀲𑀸, 𑀯𑀘𑀻𑀯𑁂𑀮𑀸𑀢𑀺 𑀕𑀬𑁆𑀳𑀢𑀺.

𑁧𑁦𑁨. 𑀲𑀫𑁆𑀫𑀸𑀓𑀫𑁆𑀫𑀁 𑀓𑁆𑀭𑀺𑀬𑀸𑀲𑀼𑀤𑁆𑀥𑀁, 𑀲𑀫𑁆𑀫𑀸𑀓𑀭𑀡𑀮𑀓𑁆𑀔𑀡𑀁;

𑀫𑀺𑀘𑁆𑀙𑀸𑀓𑀫𑁆𑀫𑁄𑀭𑀫𑀭𑀲𑀁, 𑀓𑁆𑀭𑀺𑀬𑀸𑀯𑁂𑀮𑀸𑀢𑀺 𑀕𑀬𑁆𑀳𑀢𑀺.

𑁧𑁦𑁩. 𑀲𑀫𑁆𑀫𑀸𑀚𑀻𑀯𑁄 𑀯𑀺𑀲𑀼𑀤𑁆𑀥𑁂𑀝𑁆𑀞𑀺, 𑀅𑀮𑁆𑀮𑀺𑀝𑁆𑀞𑀸𑀚𑀻𑀯𑀮𑀓𑁆𑀔𑀡𑁄;

𑀫𑀺𑀘𑁆𑀙𑀸𑀚𑀻𑀯𑁄𑀭𑀫𑀭𑀲𑁄, 𑀲𑀫𑁆𑀫𑀸𑀯𑀼𑀢𑁆𑀢𑀻𑀢𑀺 𑀕𑀬𑁆𑀳𑀢𑀺.

𑁧𑁦𑁪. 𑀓𑀭𑀼𑀡𑀸 𑀤𑀻𑀦𑀲𑀢𑁆𑀢𑁂𑀲𑀼, 𑀤𑀼𑀓𑁆𑀔𑀸𑀧𑀦𑀬𑀮𑀓𑁆𑀔𑀡𑀸;

𑀲𑁄𑀢𑁆𑀣𑀺𑀢𑀸𑀧𑀢𑁆𑀣𑀦𑀭𑀲𑀸, 𑀅𑀦𑀼𑀓𑀫𑁆𑀧𑀸𑀢𑀺 𑀕𑀬𑁆𑀳𑀢𑀺.

𑁧𑁦𑁫. 𑀲𑀼𑀔𑀝𑁆𑀞𑀺𑀢𑁂𑀲𑀼 𑀫𑀼𑀤𑀺𑀢𑀸, 𑀅𑀦𑀼𑀫𑁄𑀤𑀦𑀮𑀓𑁆𑀔𑀡𑀸;

𑀘𑁂𑀢𑁄𑀯𑀺𑀓𑀸𑀲𑀦𑀭𑀲𑀸, 𑀅𑀯𑀺𑀭𑁄𑀥𑁄𑀢𑀺 𑀕𑀬𑁆𑀳𑀢𑀺.

𑁧𑁦𑁬. 𑀘𑁂𑀢𑁄𑀲𑀸𑀭𑀚𑁆𑀚𑀦𑀸 𑀮𑁄𑀪𑁄, 𑀅𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑁄;

𑀆𑀮𑀫𑁆𑀩𑀕𑀺𑀚𑁆𑀛𑀦𑀭𑀲𑁄, 𑀅𑀪𑀺𑀮𑀕𑁆𑀕𑁄𑀢𑀺 𑀕𑀬𑁆𑀳𑀢𑀺.

𑁧𑁦𑁭. 𑀘𑁂𑀢𑁄𑀩𑁆𑀬𑀸𑀧𑀚𑁆𑀚𑀦𑀁 𑀤𑁄𑀲𑁄, 𑀲𑀫𑁆𑀧𑀤𑀼𑀲𑁆𑀲𑀦𑀮𑀓𑁆𑀔𑀡𑁄;

𑀆𑀮𑀫𑁆𑀩𑀡𑀖𑀸𑀢𑀭𑀲𑁄, 𑀘𑀡𑁆𑀟𑀺𑀓𑁆𑀓𑀫𑀺𑀢𑀺 𑀕𑀬𑁆𑀳𑀢𑀺.

𑁧𑁦𑁮. 𑀘𑁂𑀢𑁄𑀲𑀫𑁆𑀫𑀼𑀬𑁆𑀳𑀦𑀁 𑀫𑁄𑀳𑁄,

𑀲𑁄 𑀲𑀫𑁆𑀫𑀼𑀬𑁆𑀳𑀦𑀮𑀓𑁆𑀔𑀡𑁄;

𑀲𑀪𑀸𑀯𑀘𑁆𑀙𑀸𑀤𑀦𑀭𑀲𑁄,

𑀅𑀦𑁆𑀥𑀪𑀸𑀯𑁄𑀢𑀺 𑀕𑀬𑁆𑀳𑀢𑀺.

𑁧𑁦𑁯. 𑀧𑀸𑀧𑀸𑀚𑀺𑀕𑀼𑀘𑁆𑀙𑀸𑀳𑀺𑀭𑀺𑀓𑀁, 𑀦𑀺𑀮𑁆𑀮𑀚𑁆𑀚𑀸𑀓𑀸𑀭𑀮𑀓𑁆𑀔𑀡𑀁;

𑀧𑀸𑀧𑁄𑀧𑀮𑀸𑀧𑀦𑀭𑀲𑀁, 𑀫𑀮𑀕𑁆𑀕𑀸𑀳𑁄𑀢𑀺 𑀕𑀬𑁆𑀳𑀢𑀺.

𑁧𑁧𑁦. 𑀅𑀲𑀸𑀭𑀚𑁆𑀚𑀦𑀫𑀦𑁄𑀢𑁆𑀢𑀧𑁆𑀧𑀫𑀦𑀼𑀢𑁆𑀢𑀸𑀲𑀦𑀮𑀓𑁆𑀔𑀡𑀁;

𑀧𑀸𑀧𑀧𑀓𑁆𑀔𑀦𑁆𑀤𑀦𑀭𑀲𑀁, 𑀧𑀸𑀕𑀩𑁆𑀪𑀫𑀺𑀢𑀺 𑀕𑀬𑁆𑀳𑀢𑀺.

𑁧𑁧𑁧. 𑀤𑀺𑀝𑁆𑀞𑀺 𑀤𑀴𑁆𑀳𑀯𑀺𑀧𑀮𑁆𑀮𑀸𑀲𑁄, 𑀲𑀸 𑀧𑀭𑀸𑀫𑀸𑀲𑀮𑀓𑁆𑀔𑀡𑀸;

𑀢𑀼𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀭𑀲𑀸, 𑀫𑀺𑀘𑁆𑀙𑀸𑀕𑀸𑀳𑁄𑀢𑀺 𑀕𑀬𑁆𑀳𑀢𑀺.

𑁧𑁧𑁨. ‘‘𑀅𑀳𑀲𑁆𑀫𑀻’’𑀢𑀺 𑀫𑀜𑁆𑀜𑀫𑀸𑀦𑁄, 𑀲𑁄 𑀲𑀫𑀼𑀦𑁆𑀦𑀢𑀺𑀮𑀓𑁆𑀔𑀡𑁄;

𑀓𑁂𑀢𑀼𑀲𑀫𑁆𑀧𑀕𑁆𑀕𑀳𑀭𑀲𑁄, 𑀅𑀳𑀁𑀓𑀸𑀭𑁄𑀢𑀺 𑀕𑀬𑁆𑀳𑀢𑀺.

𑁧𑁧𑁩. 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀇𑀲𑁆𑀲𑀸, 𑀅𑀓𑁆𑀔𑀫𑀸𑀓𑀸𑀭𑀮𑀓𑁆𑀔𑀡𑀸;

𑀘𑁂𑀢𑁄𑀯𑀺𑀓𑀼𑀘𑀦𑀭𑀲𑀸, 𑀯𑀺𑀫𑀼𑀔𑀢𑁆𑀢𑀦𑁆𑀢𑀺 𑀕𑀬𑁆𑀳𑀢𑀺.

𑁧𑁧𑁪. 𑀧𑀭𑀺𑀕𑁆𑀕𑀳𑁂𑀲𑀼 𑀫𑀘𑁆𑀙𑁂𑀭𑀁, 𑀲𑀦𑁆𑀦𑀺𑀕𑀽𑀳𑀦𑀮𑀓𑁆𑀔𑀡𑀁;

𑀲𑀸𑀫𑀜𑁆𑀜𑀸𑀲𑀳𑀦𑀭𑀲𑀁, 𑀯𑁂𑀯𑀺𑀘𑁆𑀙𑀫𑀺𑀢𑀺 𑀕𑀬𑁆𑀳𑀢𑀺.

𑁧𑁧𑁫. 𑀘𑁂𑀢𑁄𑀧𑀳𑀦𑀦𑀁 𑀣𑀻𑀦𑀁, 𑀢𑀁 𑀲𑀁𑀲𑀻𑀤𑀦𑀮𑀓𑁆𑀔𑀡𑀁;

𑀉𑀲𑁆𑀲𑀸𑀳𑀪𑀜𑁆𑀚𑀦𑀭𑀲𑀁, 𑀲𑀁𑀔𑀺𑀢𑁆𑀢𑀢𑁆𑀢𑀦𑁆𑀢𑀺 𑀕𑀬𑁆𑀳𑀢𑀺.

𑁧𑁧𑁬. 𑀯𑀺𑀖𑀸𑀢𑁄 𑀲𑀳𑀚𑀸𑀢𑀸𑀦𑀁, 𑀫𑀺𑀤𑁆𑀥𑀁 𑀫𑁄𑀳𑀦𑀮𑀓𑁆𑀔𑀡𑀁;

𑀲𑀢𑁆𑀢𑀺𑀲𑀁𑀪𑀜𑁆𑀚𑀦𑀭𑀲𑀁, 𑀆𑀢𑀼𑀭𑀢𑁆𑀢𑀦𑁆𑀢𑀺 𑀕𑀬𑁆𑀳𑀢𑀺.

𑁧𑁧𑁭. 𑀉𑀤𑁆𑀥𑀘𑁆𑀘𑀁 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄, 𑀅𑀯𑀽𑀧𑀲𑀫𑀮𑀓𑁆𑀔𑀡𑀁;

𑀘𑁂𑀢𑁄𑀦𑀯𑀝𑁆𑀞𑀸𑀦𑀭𑀲𑀁, 𑀪𑀦𑁆𑀢𑀢𑁆𑀢𑀫𑀺𑀢𑀺 𑀕𑀬𑁆𑀳𑀢𑀺.

𑁧𑁧𑁮. 𑀯𑀺𑀧𑁆𑀧𑀝𑀺𑀲𑀸𑀭𑁄 𑀓𑀼𑀓𑁆𑀓𑀼𑀘𑁆𑀘𑀫𑀦𑀼𑀲𑁄𑀘𑀦𑀮𑀓𑁆𑀔𑀡𑀁;

𑀅𑀢𑁆𑀢𑀸𑀦𑀼𑀲𑁄𑀘𑀦𑀭𑀲𑀁, 𑀧𑀘𑁆𑀙𑀸𑀢𑀸𑀧𑁄𑀢𑀺 𑀕𑀬𑁆𑀳𑀢𑀺.

𑁧𑁧𑁯. 𑀓𑀗𑁆𑀔𑀸𑀬𑀦𑀸 𑀯𑀺𑀘𑀺𑀓𑀺𑀘𑁆𑀙𑀸, 𑀅𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑀸;

𑀅𑀦𑁂𑀓𑀕𑀸𑀳𑀦𑀭𑀲𑀸, 𑀅𑀧𑁆𑀧𑀢𑀺𑀝𑁆𑀞𑀸𑀢𑀺 𑀕𑀬𑁆𑀳𑀢𑀺.

𑁧𑁨𑁦. 𑀇𑀘𑁆𑀘𑁂𑀯𑀁 𑀮𑀓𑁆𑀔𑀡𑀸𑀤𑀻𑀳𑀺, 𑀯𑀺𑀪𑀸𑀯𑁂𑀬𑁆𑀬 𑀯𑀺𑀘𑀓𑁆𑀔𑀡𑁄;

𑀢𑁂𑀧𑀜𑁆𑀜𑀸𑀲𑀲𑀪𑀸𑀯𑁂𑀲𑀼, 𑀲𑀪𑀸𑀯𑀸𑀓𑀸𑀭𑀮𑀓𑁆𑀔𑀡𑀁.

𑁧𑁨𑁧. 𑀮𑀓𑁆𑀔𑀡𑀢𑁆𑀣𑀓𑀼𑀲𑀮𑀸 𑀲𑀮𑀓𑁆𑀔𑀡𑁂,

𑀮𑀓𑁆𑀔𑀡𑀢𑁆𑀣𑀧𑀭𑀫𑁂𑀧𑀺 𑀓𑁂𑀯𑀮𑀁;

𑀮𑀓𑁆𑀔𑀡𑀼𑀕𑁆𑀕𑀳𑀲𑀼𑀔𑀸𑀬 𑀯𑀡𑁆𑀡𑀬𑀼𑀁,

𑀮𑀓𑁆𑀔𑀡𑀸𑀤𑀺𑀫𑀼𑀔𑀢𑁄 𑀲𑀮𑀓𑁆𑀔𑀡𑀁.

𑁧𑁨𑁨. 𑀅𑀢𑁆𑀣𑀁 𑀢𑀫𑁂𑀯𑀫𑀦𑀼𑀕𑀫𑁆𑀫 𑀫𑀬𑁂𑀢𑁆𑀣 𑀯𑀼𑀢𑁆𑀢-

𑀫𑀢𑁆𑀣𑀸𑀦𑀫𑀢𑁆𑀣𑀦𑀬𑀦𑀢𑁆𑀣𑀫𑀦𑁂𑀓𑀥𑀸𑀧𑀺;

𑀧𑀢𑁆𑀣𑁂𑀬𑁆𑀬 𑀫𑁂𑀢𑁆𑀣 𑀯𑀘𑀦𑀢𑁆𑀣𑀦𑀬𑁂𑀳𑀺 𑀜𑀸𑀡-

𑀫𑀢𑁆𑀣𑁂𑀲𑀼 𑀩𑀼𑀤𑁆𑀥𑀯𑀘𑀦𑀢𑁆𑀣𑀦𑀬𑀢𑁆𑀣𑀺𑀓𑁂𑀳𑀺.

𑀇𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀮𑀓𑁆𑀔𑀡𑀭𑀲𑀼𑀧𑀝𑁆𑀞𑀸𑀦𑀯𑀺𑀪𑀸𑀕𑁄 𑀦𑀸𑀫

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.