𑁧. 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀦𑀸𑀫𑀢𑁆𑀢𑀬𑀯𑀺𑀪𑀸𑀕𑁄

𑁩. 𑀢𑀢𑁆𑀣 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀫𑀢𑀁 𑀢𑀺𑀥𑀸;

𑀦𑀸𑀫𑀁 𑀭𑀽𑀧𑀁 𑀢𑀼 𑀤𑀼𑀯𑀺𑀥𑀁, 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀢𑁄.

𑁪. 𑀓𑀸𑀫𑀪𑀽𑀫𑀸𑀤𑀺𑀪𑁂𑀤𑁂𑀦, 𑀢𑀢𑁆𑀣 𑀘𑀺𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁;

𑀘𑁂𑀢𑁄𑀬𑀼𑀢𑁆𑀢𑀸 𑀤𑁆𑀯𑀺𑀧𑀜𑁆𑀜𑀸𑀲, 𑀥𑀫𑁆𑀫𑀸 𑀘𑁂𑀢𑀲𑀺𑀓𑀸 𑀫𑀢𑀸.

𑁫. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸-𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄;

𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀜𑁆𑀘, 𑀢𑀣𑀸 𑀲𑀦𑁆𑀢𑀻𑀭𑀡𑀤𑁆𑀯𑀬𑀁.

𑁬. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁, 𑀉𑀧𑁂𑀓𑁆𑀔𑀸𑀲𑀳𑀺𑀢𑀦𑁆𑀢𑀺 𑀘;

𑀇𑀘𑁆𑀘𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺, 𑀧𑀼𑀜𑁆𑀜𑀧𑀸𑀓𑀸𑀦𑀺 𑀅𑀝𑁆𑀞𑀥𑀸.

𑁭. 𑀲𑁄𑀫𑀦𑀲𑁆𑀲𑀬𑀼𑀢𑀁 𑀢𑀢𑁆𑀣, 𑀳𑀺𑀢𑁆𑀯𑀸 𑀲𑀦𑁆𑀢𑀻𑀭𑀡𑀁 𑀢𑀣𑀸;

𑀲𑀢𑁆𑀢𑀸𑀓𑀼𑀲𑀮𑀧𑀸𑀓𑀸𑀦𑀺, 𑀢𑀸𑀦𑁂𑀯𑀸𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁮. 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀳𑀲𑀦𑀦𑁆𑀢𑀺 𑀘;

𑀓𑁆𑀭𑀺𑀬𑀘𑀺𑀢𑁆𑀢𑀫𑀼𑀤𑀻𑀭𑀺𑀢𑀁, 𑀢𑀺𑀯𑀺𑀥𑀫𑁆𑀧𑀺 𑀅𑀳𑁂𑀢𑀼𑀓𑀁.

𑁯. 𑀏𑀯𑀁 𑀅𑀝𑁆𑀞𑀸𑀭𑀲𑀯𑀺𑀥𑀁, 𑀫𑀸𑀦𑀲𑀁 𑀳𑁄𑀢𑀺𑀳𑁂𑀢𑀼𑀓𑀁;

𑀫𑀽𑀮𑀪𑁂𑀤𑁂𑀦𑀸𑀓𑀼𑀲𑀮𑀁, 𑀘𑀺𑀢𑁆𑀢𑀁 𑀢𑀼 𑀢𑀺𑀯𑀺𑀥𑀁 𑀫𑀢𑀁.

𑁧𑁦. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁, 𑀉𑀧𑁂𑀓𑁆𑀔𑀸𑀲𑀳𑀺𑀢𑀁 𑀢𑀣𑀸;

𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁, 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀪𑁂𑀤𑀺𑀢𑀁.

𑁧𑁧. 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀫𑀺𑀢𑀺 𑀪𑀺𑀦𑁆𑀦𑀁 𑀧𑀦𑀝𑁆𑀞𑀥𑀸;

𑀮𑁄𑀪𑀫𑀽𑀮𑀁 𑀧𑀓𑀸𑀲𑁂𑀦𑁆𑀢𑀺, 𑀢𑀢𑁆𑀣𑀸𑀓𑀼𑀲𑀮𑀫𑀸𑀦𑀲𑀁.

𑁧𑁨. 𑀤𑁄𑀫𑀦𑀲𑁆𑀲𑀲𑀳𑀕𑀢𑀁, 𑀧𑀝𑀺𑀖𑁂𑀦 𑀲𑀫𑀸𑀬𑀼𑀢𑀁;

𑀤𑁄𑀲𑀫𑀽𑀮𑀫𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀦𑁆𑀢𑀺𑀧𑀺 𑀤𑁆𑀯𑀺𑀥𑀸.

𑁧𑁩. 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁, 𑀉𑀤𑁆𑀥𑀘𑁆𑀘𑀲𑀳𑀺𑀢𑀦𑁆𑀢𑀺 𑀘;

𑀫𑁄𑀳𑀫𑀽𑀮𑀜𑁆𑀘 𑀤𑀼𑀯𑀺𑀥𑀁, 𑀉𑀧𑁂𑀓𑁆𑀔𑀸𑀬 𑀲𑀫𑀸𑀬𑀼𑀢𑀁.

𑁧𑁪. 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑁂𑀯𑀁, 𑀘𑀺𑀢𑁆𑀢𑀸𑀦𑀻𑀢𑀺 𑀯𑀺𑀪𑀸𑀯𑀬𑁂;

𑀳𑀺𑀢𑁆𑀯𑀸𑀳𑁂𑀢𑀼𑀓𑀧𑀸𑀧𑀸𑀦𑀺, 𑀲𑁄𑀪𑀦𑀸𑀦𑀺 𑀢𑀢𑁄 𑀧𑀭𑀁.

𑁧𑁫. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁, 𑀉𑀧𑁂𑀓𑁆𑀔𑀸𑀲𑀳𑀺𑀢𑀁 𑀢𑀣𑀸;

𑀤𑁆𑀯𑀺𑀥𑀸 𑀜𑀸𑀡𑁂𑀦 𑀲𑀁𑀬𑀼𑀢𑁆𑀢𑀁, 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀪𑁂𑀤𑀺𑀢𑀁.

𑁧𑁬. 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀫𑀺𑀢𑀺 𑀪𑀺𑀦𑁆𑀦𑀁 𑀧𑀦𑀝𑁆𑀞𑀥𑀸;

𑀲𑀳𑁂𑀢𑀼𑀓𑀸𑀫𑀸𑀯𑀘𑀭-𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸 𑀪𑀯𑁂.

𑁧𑁭. 𑀓𑀸𑀫𑁂 𑀢𑁂𑀯𑀻𑀲 𑀧𑀸𑀓𑀸𑀦𑀺, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀯𑀻𑀲𑀢𑀺;

𑀏𑀓𑀸𑀤𑀲 𑀓𑁆𑀭𑀺𑀬𑀸 𑀘𑁂𑀢𑀺, 𑀘𑀢𑀼𑀧𑀜𑁆𑀜𑀸𑀲 𑀲𑀩𑁆𑀩𑀣𑀸.

𑁧𑁮. 𑀢𑀓𑁆𑀓𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀦;

𑀧𑀞𑀫𑀚𑁆𑀛𑀸𑀦𑀓𑀼𑀲𑀮𑀁, 𑀯𑀺𑀧𑀸𑀓𑀜𑁆𑀘 𑀓𑁆𑀭𑀺𑀬𑀸 𑀢𑀣𑀸.

𑁧𑁯. 𑀤𑀼𑀢𑀺𑀬𑀁 𑀢𑀓𑁆𑀓𑀢𑁄 𑀳𑀻𑀦𑀁, 𑀢𑀢𑀺𑀬𑀁 𑀢𑀼 𑀯𑀺𑀘𑀸𑀭𑀢𑁄;

𑀘𑀢𑀼𑀢𑁆𑀣𑀁 𑀧𑀻𑀢𑀺𑀢𑁄 𑀳𑀻𑀦𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑀼𑀢𑀁.

𑁨𑁦. 𑀧𑀜𑁆𑀘𑀫𑀁 𑀧𑀜𑁆𑀘𑀤𑀲𑀥𑀸, 𑀭𑀽𑀧𑀸𑀯𑀘𑀭𑀫𑀻𑀭𑀺𑀢𑀁;

𑀧𑀜𑁆𑀘𑀫𑀚𑁆𑀛𑀸𑀦𑀫𑁂𑀯𑁂𑀓𑀫𑀭𑀽𑀧𑀸𑀯𑀘𑀭𑀁 𑀧𑀦.

𑁨𑁧. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸 𑀢𑀣𑀸;

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀜𑁆𑀘, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀁;

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀤𑁆𑀯𑀸𑀤𑀲𑀥𑀸 𑀪𑀯𑁂.

𑁨𑁨. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀨𑀮𑀘𑀺𑀢𑁆𑀢𑀁 𑀢𑀣𑀸𑀧𑀭𑀁;

𑀲𑀓𑀤𑀸𑀕𑀸𑀫𑀸𑀦𑀸𑀕𑀸𑀫𑀺, 𑀅𑀭𑀳𑀢𑁆𑀢𑀦𑁆𑀢𑀺 𑀅𑀝𑁆𑀞𑀥𑀸.

𑁨𑁩. 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑁂𑀦, 𑀓𑀢𑁆𑀯𑁂𑀓𑁂𑀓𑀁 𑀢𑀼 𑀧𑀜𑁆𑀘𑀥𑀸;

𑀯𑀺𑀢𑁆𑀣𑀸𑀭𑀸𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀁, 𑀘𑀢𑁆𑀢𑀸𑀮𑀻𑀲𑀯𑀺𑀥𑀁 𑀪𑀯𑁂.

𑁨𑁪. 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀕𑀬𑁆𑀳𑀦𑁆𑀢𑀸𑀦𑀼𑀢𑁆𑀢𑀭𑀸𑀦𑀺 𑀘;

𑀧𑀞𑀫𑀸𑀤𑀺𑀚𑁆𑀛𑀸𑀦𑀪𑁂𑀤𑁂, 𑀆𑀭𑀼𑀧𑁆𑀧𑀜𑁆𑀘𑀸𑀧𑀺 𑀧𑀜𑁆𑀘𑀫𑁂.

𑁨𑁫. 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑁂𑀯𑀁, 𑀓𑀼𑀲𑀮𑀸𑀦𑁂𑀓𑀯𑀻𑀲𑀢𑀺;

𑀙𑀢𑁆𑀢𑀺𑀁𑀲𑁂𑀯 𑀯𑀺𑀧𑀸𑀓𑀸𑀦𑀺, 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑀻𑀲𑀢𑀺.

𑁨𑁬. 𑀏𑀓𑀯𑀻𑀲𑀲𑀢𑀁 𑀯𑀸𑀣, 𑀏𑀓𑀽𑀦𑀦𑀯𑀼𑀢𑀻𑀯𑀺𑀥𑀁;

𑀘𑀺𑀢𑁆𑀢𑀁 𑀢𑀁𑀲𑀫𑁆𑀧𑀬𑁄𑀕𑁂𑀦, 𑀪𑀺𑀦𑁆𑀦𑀸 𑀘𑁂𑀢𑀲𑀺𑀓𑀸 𑀢𑀣𑀸.

𑁨𑁭. 𑀨𑀲𑁆𑀲𑁄 𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑁂𑀓𑀕𑁆𑀕𑀢𑀸 𑀢𑀣𑀸;

𑀚𑀻𑀯𑀺𑀢𑀁 𑀫𑀦𑀲𑀻𑀓𑀸𑀭𑁄, 𑀲𑀩𑁆𑀩𑀲𑀸𑀥𑀸𑀭𑀡𑀸 𑀫𑀢𑀸.

𑁨𑁮. 𑀢𑀓𑁆𑀓𑀘𑀸𑀭𑀸𑀥𑀺𑀫𑁄𑀓𑁆𑀔𑀸 𑀘, 𑀯𑀻𑀭𑀺𑀬𑀁 𑀙𑀦𑁆𑀤𑀧𑀻𑀢𑀺𑀬𑁄;

𑀧𑀓𑀺𑀡𑁆𑀡𑀓𑀸 𑀙 𑀅𑀓𑁆𑀔𑀸𑀢𑀸, 𑀢𑁂𑀭𑀲𑀜𑁆𑀜𑀲𑀫𑀸𑀦𑀢𑀸.

𑁨𑁯. 𑀧𑀓𑀺𑀡𑁆𑀡𑀓𑀸 𑀦 𑀯𑀺𑀜𑁆𑀜𑀸𑀡𑁂, 𑀯𑀺𑀢𑀓𑁆𑀓𑁄 𑀤𑀼𑀢𑀺𑀬𑀸𑀤𑀺𑀲𑀼;

𑀯𑀺𑀘𑀸𑀭𑁄 𑀢𑀢𑀺𑀬𑀸𑀤𑀺𑀫𑁆𑀳𑀺, 𑀅𑀥𑀺𑀫𑁄𑀓𑁆𑀔𑁄 𑀢𑀼 𑀓𑀗𑁆𑀔𑀺𑀢𑁂.

𑁩𑁦. 𑀲𑀦𑁆𑀢𑀻𑀭𑀡𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑁂𑀲𑀼 𑀯𑀻𑀭𑀺𑀬𑀁 𑀢𑀣𑀸;

𑀘𑀢𑀼𑀢𑁆𑀣𑀲𑀼𑀔𑀺𑀢𑁂 𑀧𑀻𑀢𑀺, 𑀙𑀦𑁆𑀤𑁄𑀳𑁂𑀢𑀼𑀫𑁆𑀳𑀺 𑀫𑁄𑀫𑀼𑀳𑁂.

𑁩𑁧. 𑀙𑀲𑀝𑁆𑀞𑀺 𑀧𑀜𑁆𑀘𑀧𑀜𑁆𑀜𑀸𑀲, 𑀏𑀓𑀸𑀤𑀲 𑀘 𑀲𑁄𑀴𑀲;

𑀲𑀢𑁆𑀢𑀢𑀺 𑀯𑀻𑀲𑀢𑀺 𑀘𑁂𑀯, 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀤𑀻𑀧𑀬𑁂.

𑁩𑁨. 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧-𑀫𑀼𑀤𑁆𑀥𑀘𑁆𑀘𑀁 𑀲𑀩𑁆𑀩𑀧𑀸𑀧𑀚𑀁;

𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀤𑁄𑀲𑀸 𑀢𑀼 𑀧𑀝𑀺𑀖𑁂 𑀢𑀣𑀸.

𑁩𑁩. 𑀮𑁄𑀪𑁄 𑀮𑁄𑀪𑁂 𑀢𑀼 𑀤𑀺𑀝𑁆𑀞𑀺 𑀘, 𑀤𑀺𑀝𑁆𑀞𑀺𑀬𑀼𑀢𑁆𑀢𑁂 𑀯𑀺𑀬𑀼𑀢𑁆𑀢𑀓𑁂;

𑀫𑀸𑀦𑁄 𑀘 𑀣𑀺𑀦𑀫𑀺𑀤𑁆𑀥𑀁 𑀢𑀼, 𑀲𑀲𑀗𑁆𑀔𑀸𑀭𑁂𑀲𑀼 𑀧𑀜𑁆𑀘𑀲𑀼.

𑁩𑁪. 𑀓𑀗𑁆𑀔𑀺𑀢𑁂 𑀯𑀺𑀘𑀺𑀓𑀺𑀘𑁆𑀙𑀸𑀢𑀺, 𑀘𑀼𑀤𑁆𑀤𑀲𑀸𑀓𑀼𑀲𑀮𑀸𑀦𑀺𑀫𑁂;

𑀤𑁆𑀯𑀸𑀤𑀲𑀸𑀓𑀼𑀲𑀮𑁂𑀲𑁆𑀯𑁂𑀯, 𑀦𑀺𑀬𑀫𑁂𑀦 𑀯𑀯𑀢𑁆𑀣𑀺𑀢𑀸.

𑁩𑁫. 𑀲𑀤𑁆𑀥𑀸 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀅𑀮𑁄𑀪𑀸𑀤𑁄𑀲𑀫𑀚𑁆𑀛𑀢𑀸;

𑀓𑀸𑀬𑀘𑀺𑀢𑁆𑀢𑀸𑀦𑀁 𑀧𑀲𑁆𑀲𑀤𑁆𑀥𑀺, 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀢𑀣𑀸.

𑁩𑁬. 𑀓𑀫𑁆𑀫𑀜𑁆𑀜𑀢𑀸 𑀘 𑀧𑀸𑀕𑀼𑀜𑁆𑀜𑀉𑀚𑀼𑀢𑀸𑀢𑀺 𑀬𑀼𑀕𑀸 𑀙 𑀘;

𑀏𑀓𑀽𑀦𑀯𑀻𑀲𑀢𑀺 𑀥𑀫𑁆𑀫𑀸, 𑀅𑀜𑁆𑀜𑀫𑀜𑁆𑀜𑀸𑀯𑀺𑀬𑁄𑀕𑀺𑀦𑁄;

𑀏𑀓𑀽𑀦𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼, 𑀲𑁄𑀪𑀦𑁂𑀲𑀼 𑀧𑀯𑀢𑁆𑀢𑀺𑀢𑀸.

𑁩𑁭. 𑀲𑀫𑁆𑀫𑀸𑀯𑀸𑀘𑀸 𑀘 𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀢𑀺 𑀯𑀺𑀭𑀢𑀻 𑀇𑀫𑀸;

𑀮𑁄𑀓𑀼𑀢𑁆𑀢𑀭𑁂 𑀲𑀤𑀸 𑀲𑀩𑁆𑀩𑀸, 𑀲𑀳 𑀓𑀸𑀫𑀲𑀼𑀪𑁂 𑀯𑀺𑀲𑀼𑀁.

𑁩𑁮. 𑀓𑀭𑀼𑀡𑀸𑀫𑀼𑀤𑀺𑀢𑀸 𑀦𑀸𑀦𑀸, 𑀭𑀽𑀧𑁂 𑀧𑀜𑁆𑀘𑀫𑀯𑀚𑁆𑀚𑀺𑀢𑁂;

𑀓𑀤𑀸𑀘𑀺 𑀓𑀸𑀫𑁂 𑀓𑀼𑀲𑀮𑁂, 𑀓𑁆𑀭𑀺𑀬𑀘𑀺𑀢𑁆𑀢𑁂 𑀲𑀳𑁂𑀢𑀼𑀓𑁂.

𑁩𑁯. 𑀢𑀺𑀳𑁂𑀢𑀼𑀓𑁂𑀲𑀼 𑀘𑀺𑀢𑁆𑀢𑁂𑀲𑀼, 𑀧𑀜𑁆𑀜𑀸 𑀲𑀩𑁆𑀩𑀢𑁆𑀣 𑀮𑀩𑁆𑀪𑀢𑀺;

𑀏𑀢𑁂 𑀲𑀤𑁆𑀥𑀸𑀤𑀬𑁄 𑀥𑀫𑁆𑀫𑀸, 𑀧𑀜𑁆𑀘𑀯𑀻𑀲𑀢𑀺 𑀲𑁄𑀪𑀦𑀸.

𑁪𑁦. 𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀯𑀺𑀭𑀢𑀻𑀓𑀭𑀼𑀡𑀸𑀤𑀬𑁄;

𑀦𑀸𑀦𑀸 𑀓𑀤𑀸𑀘𑀺 𑀫𑀸𑀦𑁄 𑀘, 𑀣𑀺𑀦𑀫𑀺𑀤𑁆𑀥𑀁 𑀢𑀣𑀸 𑀲𑀳.

𑁪𑁧. 𑀲𑀢𑁆𑀢 𑀲𑀩𑁆𑀩𑀢𑁆𑀣 𑀚𑀸𑀬𑀦𑁆𑀢𑀺, 𑀙 𑀢𑀼 𑀥𑀫𑁆𑀫𑀸 𑀬𑀣𑀸𑀭𑀳𑀁;

𑀘𑀼𑀤𑁆𑀤𑀲𑀸𑀓𑀼𑀲𑀮𑁂𑀲𑁆𑀯𑁂𑀯, 𑀲𑁄𑀪𑀦𑁂𑀲𑁆𑀯𑁂𑀯 𑀲𑁄𑀪𑀦𑀸.

𑁪𑁨. 𑀤𑁆𑀯𑁂𑀧𑀜𑁆𑀜𑀸𑀲 𑀧𑀦𑀺𑀘𑁆𑀘𑁂𑀯𑀁, 𑀥𑀫𑁆𑀫𑁂 𑀲𑀗𑁆𑀕𑀬𑁆𑀳 𑀫𑀸𑀦𑀲𑁂;

𑀮𑀩𑁆𑀪𑀫𑀸𑀦𑁂 𑀯𑀺𑀪𑀸𑀯𑁂𑀬𑁆𑀬, 𑀧𑀘𑁆𑀘𑁂𑀓𑀫𑁆𑀧𑀺 𑀯𑀺𑀘𑀓𑁆𑀔𑀡𑁄.

𑁪𑁩. 𑀲𑁄𑀪𑀦𑀜𑁆𑀜𑀲𑀫𑀸𑀦𑀸 𑀘, 𑀧𑀞𑀫𑁂 𑀯𑀺𑀭𑀢𑀻 𑀯𑀺𑀦𑀸;

𑀤𑀼𑀢𑀺𑀬𑀸𑀤𑀻𑀲𑀼 𑀢𑀓𑁆𑀓𑀜𑁆𑀘, 𑀯𑀺𑀘𑀸𑀭𑀁 𑀢𑀢𑀺𑀬𑀸𑀤𑀺𑀲𑀼.

𑁪𑁪. 𑀘𑀢𑀼𑀢𑁆𑀣𑀸𑀤𑀻𑀲𑀼 𑀧𑀻𑀢𑀺𑀜𑁆𑀘, 𑀓𑀭𑀼𑀡𑀸𑀤𑀺𑀜𑁆𑀘 𑀧𑀜𑁆𑀘𑀫𑁂;

𑀳𑀺𑀢𑁆𑀯𑀸 𑀦𑁂𑀯 𑀯𑀺𑀬𑁄𑀚𑁂𑀬𑁆𑀬, 𑀲𑀗𑁆𑀔𑀺𑀧𑀺𑀢𑁆𑀯𑀸𑀦 𑀧𑀜𑁆𑀘𑀥𑀸.

𑁪𑁫. 𑀧𑀜𑁆𑀘𑀢𑀺𑀁𑀲 𑀘𑀢𑀼𑀢𑁆𑀢𑀺𑀁𑀲, 𑀢𑁂𑀢𑁆𑀢𑀺𑀁𑀲 𑀘 𑀬𑀣𑀸𑀓𑁆𑀓𑀫𑀁;

𑀤𑁆𑀯𑀢𑁆𑀢𑀺𑀁𑀲 𑀢𑀺𑀁𑀲 𑀏𑀯𑀸𑀣, 𑀚𑀸𑀬𑀦𑁆𑀢𑀻𑀢𑀺 𑀫𑀳𑀕𑁆𑀕𑀢𑁂.

𑁪𑁬. 𑀕𑀳𑁂𑀢𑁆𑀯𑀸 𑀯𑀺𑀭𑀢𑀻 𑀲𑀩𑁆𑀩𑀸, 𑀳𑀺𑀢𑁆𑀯𑀸𑀦 𑀓𑀭𑀼𑀡𑀸𑀤𑀬𑁄;

𑀧𑀞𑀫𑁂 𑀤𑀼𑀢𑀺𑀬𑀸𑀤𑀺𑀫𑁆𑀳𑀺, 𑀯𑀺𑀢𑀓𑁆𑀓𑀸𑀤𑀺𑀁 𑀯𑀺𑀦𑀸 𑀢𑀣𑀸.

𑁪𑁭. 𑀧𑀜𑁆𑀘𑀥𑀸𑀯 𑀕𑀡𑁂𑀬𑁆𑀬𑁂𑀯𑀁, 𑀙𑀢𑁆𑀢𑀺𑀁𑀲𑀸 𑀘 𑀬𑀣𑀸𑀓𑁆𑀓𑀫𑀁;

𑀧𑀜𑁆𑀘𑀢𑀺𑀁𑀲 𑀘𑀢𑀼𑀢𑁆𑀢𑀺𑀁𑀲, 𑀢𑁂𑀢𑁆𑀢𑀺𑀁𑀲𑀤𑁆𑀯𑀬𑀫𑀼𑀢𑁆𑀢𑀭𑁂.

𑁪𑁮. 𑀲𑁄𑀪𑀦𑀜𑁆𑀜𑀲𑀫𑀸𑀦𑀸 𑀘, 𑀓𑀸𑀫𑁂𑀲𑀼 𑀓𑀼𑀲𑀮𑁂 𑀓𑁆𑀭𑀺𑀬𑁂;

𑀳𑀺𑀢𑁆𑀯𑀸 𑀯𑀺𑀭𑀢𑀺𑀬𑁄 𑀧𑀸𑀓𑁂, 𑀯𑀺𑀭𑀢𑀻𑀓𑀭𑀼𑀡𑀸𑀤𑀬𑁄.

𑁪𑁯. 𑀜𑀸𑀡𑀬𑀼𑀢𑁆𑀢𑁂 𑀲𑁄𑀫𑀦𑀲𑁆𑀲𑁂, 𑀯𑀺𑀬𑀼𑀢𑁆𑀢𑁂 𑀜𑀸𑀡𑀯𑀚𑁆𑀚𑀺𑀢𑀸;

𑀉𑀧𑁂𑀓𑁆𑀔𑀓𑁂 𑀧𑀻𑀢𑀺𑀳𑀻𑀦𑀸, 𑀯𑀺𑀧𑁆𑀧𑀬𑀼𑀢𑁆𑀢𑁂 𑀤𑁆𑀯𑀬𑀁 𑀯𑀺𑀦𑀸.

𑁫𑁦. 𑀘𑀢𑀼𑀥𑀸 𑀢𑀺𑀯𑀺𑀥𑁂𑀲𑁆𑀯𑁂𑀯𑀁, 𑀯𑀺𑀕𑀡𑁂𑀬𑁆𑀬 𑀤𑁆𑀯𑀬𑀁 𑀤𑁆𑀯𑀬𑀁;

𑀦 𑀲𑀦𑁆𑀢𑀼𑀧𑁂𑀓𑁆𑀔𑀸𑀲𑀳𑀺𑀢𑁂, 𑀓𑀭𑀼𑀡𑀸𑀤𑀻𑀢𑀺 𑀓𑁂𑀘𑀦.

𑁫𑁧. 𑀅𑀝𑁆𑀞𑀢𑀺𑀁𑀲 𑀲𑀢𑁆𑀢𑀢𑀺𑀁𑀲𑀤𑁆𑀯𑀬𑀁 𑀙𑀢𑁆𑀢𑀺𑀁𑀲𑀓𑀁 𑀲𑀼𑀪𑁂;

𑀧𑀜𑁆𑀘𑀢𑀺𑀁𑀲 𑀘𑀢𑀼𑀢𑁆𑀢𑀺𑀁𑀲𑀤𑁆𑀯𑀬𑀁 𑀢𑁂𑀢𑁆𑀢𑀺𑀁𑀲𑀓𑀁 𑀓𑁆𑀭𑀺𑀬𑁂.

𑁫𑁨. 𑀢𑁂𑀢𑁆𑀢𑀺𑀁𑀲 𑀧𑀸𑀓𑁂 𑀤𑁆𑀯𑀢𑁆𑀢𑀺𑀁𑀲𑀤𑁆𑀯𑀬𑁂𑀓𑀢𑀺𑀁𑀲𑀓𑀁 𑀪𑀯𑁂;

𑀲𑀳𑁂𑀢𑀼𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸𑀫𑀦𑁂.

𑁫𑁩. 𑀫𑁄𑀳𑀸𑀤𑀬𑁄 𑀲𑀫𑀸𑀦𑀸 𑀘, 𑀧𑀞𑀫𑁂 𑀮𑁄𑀪𑀤𑀺𑀝𑁆𑀞𑀺𑀬𑀸;

𑀢𑀢𑀺𑀬𑁂 𑀮𑁄𑀪𑀫𑀸𑀦𑁂𑀦, 𑀚𑀸𑀬𑀦𑁆𑀢𑁂𑀓𑀽𑀦𑀯𑀻𑀲𑀢𑀺.

𑁫𑁪. 𑀅𑀝𑁆𑀞𑀸𑀭𑀲 𑀧𑀻𑀢𑀺𑀳𑀻𑀦𑀸, 𑀧𑀜𑁆𑀘𑀫𑁂 𑀲𑀢𑁆𑀢𑀫𑁂 𑀢𑀣𑀸;

𑀦𑀯𑀫𑁂 𑀤𑁄𑀲𑀓𑀼𑀓𑁆𑀓𑀼𑀘𑁆𑀘𑀫𑀘𑁆𑀙𑀭𑀺𑀲𑁆𑀲𑀸𑀳𑀺 𑀯𑀻𑀲𑀢𑀺.

𑁫𑁫. 𑀧𑀞𑀫𑀸𑀤𑀻𑀲𑀼 𑀯𑀼𑀢𑁆𑀢𑀸𑀯, 𑀤𑀼𑀢𑀺𑀬𑀸𑀤𑀻𑀲𑀼 𑀚𑀸𑀬𑀭𑁂;

𑀣𑀺𑀦𑀫𑀺𑀤𑁆𑀥𑁂𑀦𑁂𑀓𑀯𑀻𑀲, 𑀯𑀻𑀲 𑀤𑁆𑀯𑁂𑀯𑀻𑀲𑀢𑀺𑀓𑁆𑀓𑀫𑀸.

𑁫𑁬. 𑀙𑀦𑁆𑀤𑀧𑀻𑀢𑀺𑀁 𑀯𑀺𑀦𑀼𑀤𑁆𑀥𑀘𑁆𑀘𑁂, 𑀓𑀗𑁆𑀔𑀺𑀢𑁂 𑀦𑀺𑀘𑁆𑀙𑀬𑀁 𑀯𑀺𑀦𑀸;

𑀧𑀜𑁆𑀘𑀤𑀲𑁂𑀯 𑀓𑀗𑁆𑀔𑀸𑀬, 𑀅𑀲𑀼𑀪𑁂𑀲𑀼 𑀯𑀺𑀪𑀸𑀯𑀬𑁂.

𑁫𑁭. 𑀲𑀺𑀢𑁂 𑀲𑀫𑀸𑀦𑀸 𑀦𑀺𑀘𑁆𑀙𑀦𑁆𑀤𑀸, 𑀤𑁆𑀯𑀸𑀤𑀲𑁂𑀓𑀸𑀤𑀲𑁂𑀯 𑀢𑀼;

𑀧𑀻𑀢𑀺𑀁 𑀳𑀺𑀢𑁆𑀯𑀸𑀦 𑀯𑁄𑀝𑁆𑀞𑀩𑁆𑀩𑁂, 𑀯𑀻𑀭𑀺𑀬𑀁 𑀲𑀼𑀔𑀢𑀻𑀭𑀡𑁂.

𑁫𑁮. 𑀤𑁆𑀯𑀬𑀁 𑀳𑀺𑀢𑁆𑀯𑀸 𑀫𑀦𑁄𑀥𑀸𑀢𑀼, 𑀉𑀧𑁂𑀓𑁆𑀔𑀸𑀢𑀻𑀭𑀡𑁂 𑀤𑀲;

𑀲𑀢𑁆𑀢 𑀲𑀸𑀥𑀸𑀭𑀡𑀸 𑀏𑀯, 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀪𑀯𑀸.

𑁫𑁯. 𑀇𑀢𑀺 𑀘𑁂𑀢𑀲𑀺 𑀲𑀫𑁆𑀪𑀽𑀢𑀸,

𑀤𑁆𑀯𑁂𑀧𑀜𑁆𑀜𑀸𑀲 𑀬𑀣𑀸𑀭𑀳𑀁;

𑀜𑁂𑀬𑁆𑀬𑀸 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸,

𑀘𑁂𑀢𑁄𑀪𑁂𑀤𑀧𑁆𑀧𑀪𑁂𑀤𑀺𑀦𑁄.

𑁬𑁦. 𑀲𑀼𑀜𑁆𑀜𑀢𑀜𑁆𑀘𑀸𑀦𑀺𑀫𑀺𑀢𑁆𑀢𑀜𑁆𑀘, 𑀢𑀣𑀸𑀧𑀡𑀺𑀳𑀺𑀢𑀦𑁆𑀢𑀺 𑀘;

𑀢𑀺𑀯𑀺𑀥𑀸𑀓𑀸𑀭𑀫𑀻𑀭𑁂𑀦𑁆𑀢𑀺, 𑀦𑀺𑀩𑁆𑀩𑀸𑀦𑀫𑀫𑀢𑀁 𑀩𑀼𑀥𑀸.

𑁬𑁧. 𑀬𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀁, 𑀢𑀢𑁆𑀣𑀸𑀦𑀼𑀢𑁆𑀢𑀭𑀫𑀸𑀦𑀲𑀁;

𑀲𑀼𑀜𑁆𑀜𑀢𑀸𑀤𑀺𑀯𑀺𑀫𑁄𑀓𑁆𑀔𑁄𑀢𑀺, 𑀦𑀸𑀫𑀫𑀸𑀮𑀫𑁆𑀩𑀢𑁄 𑀮𑀪𑁂.

𑁬𑁨. 𑀲𑁄𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀘𑁂𑀯 𑀢𑀣𑀸𑀧𑀭𑀸;

𑀅𑀦𑀼𑀧𑀸𑀤𑀺𑀲𑁂𑀲𑀸 𑀘𑀸𑀢𑀺, 𑀤𑀼𑀯𑀺𑀥𑀸 𑀧𑀭𑀺𑀬𑀸𑀬𑀢𑁄.

𑁬𑁩. 𑀢𑀤𑁂𑀢𑀁 𑀯𑀸𑀦𑀦𑀺𑀓𑁆𑀔𑀦𑁆𑀢𑀫𑀘𑁆𑀘𑀦𑁆𑀢𑀁 𑀲𑀦𑁆𑀢𑀺𑀮𑀓𑁆𑀔𑀡𑀁;

𑀅𑀲𑁆𑀲𑀸𑀲𑀓𑀭𑀡𑀭𑀲𑀁, 𑀔𑁂𑀫𑀪𑀸𑀯𑁂𑀦 𑀕𑀬𑁆𑀳𑀢𑀺.

𑁬𑁪. 𑀢𑀁 𑀦𑀸𑀫𑁂𑀢𑀻𑀢𑀺 𑀦𑀺𑀩𑁆𑀩𑀸𑀦𑀁, 𑀦𑀫𑀦𑁆𑀢𑀻𑀢𑀺 𑀢𑀢𑁄𑀧𑀭𑁂;

𑀢𑁂𑀧𑀜𑁆𑀜𑀸𑀲𑀸𑀢𑀺 𑀦𑀸𑀫𑀸𑀦𑀺, 𑀘𑀢𑀼𑀧𑀜𑁆𑀜𑀸𑀲 𑀲𑀩𑁆𑀩𑀣𑀸.

𑁬𑁫. 𑀘𑀺𑀢𑁆𑀢𑀘𑁂𑀢𑀲𑀺𑀓𑀬𑁄𑀚𑀦𑀸𑀦𑀬𑀁,

𑀘𑀺𑀢𑁆𑀢𑀫𑀼𑀢𑁆𑀢𑀫𑀫𑀺𑀤𑀁 𑀧𑀓𑀸𑀲𑀺𑀢𑀁;

𑀲𑀸𑀥𑀼 𑀘𑁂𑀢𑀲𑀺 𑀦𑀺𑀥𑀸𑀬 𑀧𑀡𑁆𑀟𑀺𑀢𑀸,

𑀲𑀸𑀥𑀼 𑀲𑀸𑀲𑀦𑀥𑀭𑀸 𑀪𑀯𑀦𑁆𑀢𑀺 𑀢𑁂.

𑁬𑁬. 𑀩𑀼𑀤𑁆𑀥𑀧𑁆𑀧𑀯𑀢𑁆𑀢𑀫𑀯𑀕𑀸𑀳𑀺𑀢𑀩𑁄𑀥𑀺𑀜𑀸𑀡-

𑀫𑀺𑀘𑁆𑀘𑀸𑀪𑀺𑀥𑀫𑁆𑀫𑀫𑀯𑀕𑀸𑀳𑀺𑀢𑀲𑀩𑁆𑀩𑀥𑀫𑁆𑀫𑀁;

𑀑𑀕𑀬𑁆𑀳 𑀦𑀸𑀫𑀕𑀢𑀭𑀸𑀲𑀺𑀫𑀲𑁂𑀲𑀬𑀺𑀢𑁆𑀯𑀸,

𑀲𑀗𑁆𑀕𑀬𑁆𑀳 𑀲𑀩𑁆𑀩𑀫𑀺𑀥 𑀬𑁄𑀚𑀺𑀢𑀫𑀸𑀤𑀭𑁂𑀦.

𑀇𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀦𑀸𑀫𑀢𑁆𑀢𑀬𑀯𑀺𑀪𑀸𑀕𑁄 𑀦𑀸𑀫

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.