𑁨𑁪. 𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄

𑁧𑁩𑁯𑁫. 𑀬𑁂𑀲𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁, 𑀯𑀲𑀸 𑀲𑀧𑁆𑀧𑀘𑁆𑀘𑀬𑀸 𑀇𑀫𑁂;

𑀥𑀫𑁆𑀫𑀸 𑀢𑁂 𑀧𑀘𑁆𑀘𑀬𑁂 𑀘𑀸𑀳𑀁, 𑀤𑀲𑁆𑀲𑀬𑀺𑀲𑁆𑀲𑀸𑀫𑀺𑀢𑁄 𑀧𑀭𑀁.

𑀓𑀢𑀫𑁂 𑀧𑀘𑁆𑀘𑀬𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀳𑁂𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀲𑀳𑀚𑀸𑀢- 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀽𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀲𑁂𑀯𑀦𑀓𑀫𑁆𑀫𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬- 𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀦𑀢𑁆𑀣𑀺𑀯𑀺𑀕𑀢𑀸𑀯𑀺𑀕𑀢𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀯𑀺𑀥𑀸 𑀳𑁄𑀦𑁆𑀢𑀺.

𑀢𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀢𑀺 𑀇𑀫𑁂 𑀙 𑀥𑀫𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑀸. 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄.

𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀲𑀳𑀚𑀸𑀢𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑀸𑀥𑀺𑀧𑀢𑀺 𑀙𑀦𑁆𑀤𑀘𑀺𑀢𑁆𑀢𑀯𑀻𑀭𑀺𑀬𑀯𑀻𑀫𑀁𑀲𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀧𑀦 𑀤𑁄𑀫𑀦𑀲𑁆𑀲𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀓𑀼𑀲𑀮𑀯𑀺𑀧𑀸𑀓𑁂 𑀘 𑀅𑀦𑀺𑀝𑁆𑀞𑀲𑀫𑁆𑀫𑀢𑀜𑁆𑀘 𑀭𑀽𑀧𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁. 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺 𑀅𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸. 𑀢𑀣𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄𑀧𑀺.

𑀲𑀳𑀚𑀸𑀢𑀧𑀘𑁆𑀘𑀬𑁄𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸, 𑀫𑀳𑀸𑀪𑀽𑀢𑀸 𑀘𑁂𑀯 𑀳𑀤𑀬𑀯𑀢𑁆𑀣𑀼 𑀘. 𑀢𑀣𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄𑀧𑀺. 𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀯𑀢𑁆𑀣𑀼𑀭𑀽𑀧𑀸𑀦𑀺 𑀘𑁂𑀯 𑀫𑀳𑀸𑀪𑀽𑀢𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀘. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀢𑀺𑀯𑀺𑀥𑁄. 𑀢𑀢𑁆𑀣 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀬𑁂𑀯, 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀯, 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀧𑀦 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀉𑀢𑀼𑀪𑁄𑀚𑀦𑀲𑁂𑀦𑀸𑀲𑀦𑀧𑀼𑀕𑁆𑀕𑀮𑀸 𑀲𑀤𑁆𑀥𑀸𑀲𑀻𑀮𑀲𑀼𑀢𑀘𑀸𑀕𑀧𑀜𑁆𑀜𑀸𑀭𑀸𑀕𑀤𑁄𑀲𑀫𑁄𑀳𑀸𑀤𑀬𑁄 𑀘.

𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀦𑀸𑀫 𑀯𑀢𑁆𑀣𑀼𑀭𑀽𑀧𑀸𑀦𑀺, 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁄 𑀦𑀸𑀫 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀤𑀻𑀦𑁂𑀯. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀘. 𑀆𑀲𑁂𑀯𑀦𑀧𑀘𑁆𑀘𑀬𑁄𑀢𑀺 𑀞𑀧𑁂𑀢𑁆𑀯𑀸 𑀆𑀯𑀚𑁆𑀚𑀦𑀤𑁆𑀯𑀬𑀁 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸𑀯.

𑀓𑀫𑁆𑀫𑀧𑀘𑁆𑀘𑀬𑁄𑀢𑀺 𑀲𑀳𑀚𑀸𑀢𑀦𑀸𑀦𑀓𑁆𑀔𑀡𑀺𑀓𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀏𑀯, 𑀦𑀸𑀦𑀓𑁆𑀔𑀡𑀺𑀓𑀸 𑀧𑀦 𑀲𑀸𑀲𑀯𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸, 𑀅𑀦𑀸𑀲𑀯𑀓𑀼𑀲𑀮𑀘𑁂𑀢𑀦𑀸 𑀅𑀦𑀦𑁆𑀢𑀭𑀫𑁂𑀯 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀧𑀸𑀓𑀧𑀘𑁆𑀘𑀬𑁄𑀢𑀺 𑀯𑀺𑀧𑀸𑀓𑀘𑀺𑀢𑁆𑀢𑀘𑁂𑀢𑀲𑀺𑀓𑀸. 𑀆𑀳𑀸𑀭𑀧𑀘𑁆𑀘𑀬𑁄𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀨𑀲𑁆𑀲𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄.

𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄𑀢𑀺 𑀭𑀽𑀧𑀲𑀢𑁆𑀢𑀓𑀫𑀦𑀚𑀻𑀯𑀺𑀢𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀲𑀤𑁆𑀥𑀸𑀯𑀻𑀭𑀺𑀬- 𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀸𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀅𑀜𑁆𑀜𑀢𑀸𑀯𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀲𑀼 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺. 𑀛𑀸𑀦𑀧𑀘𑁆𑀘𑀬𑁄𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀲𑁂𑀦 𑀧𑀜𑁆𑀘𑀯𑀺𑀥𑁄. 𑀫𑀕𑁆𑀕𑀧𑀘𑁆𑀘𑀬𑁄𑀢𑀺 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀺𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀦𑀯𑀯𑀺𑀥𑁄.

𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀯. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄𑀢𑀺 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀸𑀦𑀺 𑀘𑁂𑀯 𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀘. 𑀅𑀢𑁆𑀣𑀺𑀧𑀘𑁆𑀘𑀬𑁄𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀩𑀴𑀻𑀓𑀸𑀭𑀆𑀳𑀸𑀭𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸𑀦𑀺 𑀘𑁂𑀯 𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀯𑀼𑀢𑁆𑀢𑀥𑀫𑁆𑀫𑀸𑀧𑀺 𑀘. 𑀦𑀢𑁆𑀣𑀺𑀧𑀘𑁆𑀘𑀬𑁄𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀯. 𑀢𑀣𑀸 𑀯𑀺𑀕𑀢𑀧𑀘𑁆𑀘𑀬𑁄 𑀘. 𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑁄𑀯. 𑀏𑀯𑀫𑀺𑀫𑁂 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸 𑀦𑀸𑀫.

𑀏𑀢𑁆𑀣 𑀧𑀦 𑀓𑀢𑀺𑀳𑀸𑀓𑀸𑀭𑁂𑀳𑀺 𑀭𑀽𑀧𑀁 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺? 𑀬𑀣𑀸𑀭𑀳𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀭𑀽𑀧𑀁 𑀅𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀽𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧- 𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺.

𑀭𑀽𑀧𑀁 𑀭𑀽𑀧𑀸𑀭𑀽𑀧𑀲𑁆𑀲𑀸𑀢𑀺 𑀦𑀢𑁆𑀣𑀺.

𑁧𑁩𑁯𑁬. 𑀲𑀢𑁆𑀢𑀥𑀸 𑀭𑀽𑀧𑀁 𑀭𑀽𑀧𑀲𑁆𑀲, 𑀪𑀯𑀢𑁂𑀓𑀸𑀤𑀲𑁂𑀳𑀺 𑀢𑀁;

𑀧𑀘𑁆𑀘𑀬𑁄 𑀦𑀸𑀫𑀥𑀫𑁆𑀫𑀲𑁆𑀲, 𑀫𑀺𑀲𑁆𑀲𑀓𑀲𑁆𑀲 𑀦 𑀓𑀺𑀜𑁆𑀘𑀺 𑀢𑀼.

𑀅𑀭𑀽𑀧𑀁 𑀅𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀳𑁂𑀢𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀽𑀧𑀦𑀺𑀲𑁆𑀲𑀬𑀸- 𑀲𑁂𑀯𑀦𑀓𑀫𑁆𑀫𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀦𑀢𑁆𑀣𑀺𑀯𑀺𑀕𑀢𑀸𑀯𑀺𑀕𑀢- 𑀯𑀲𑁂𑀦 𑀏𑀓𑀯𑀻𑀲𑀢𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀭𑀽𑀧𑀁 𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀳𑁂𑀢𑀸𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀧𑀘𑁆𑀙𑀸𑀚𑀸𑀢𑀓𑀫𑁆𑀫𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬- 𑀛𑀸𑀦𑀫𑀕𑁆𑀕𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀦𑁆𑀦𑀭𑀲𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀭𑀽𑀧𑀁 𑀭𑀽𑀧𑀸𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀳𑁂𑀢𑀸𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕- 𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀢𑁂𑀭𑀲𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑁧𑁩𑁯𑁭. 𑀏𑀓𑀯𑀻𑀲𑀢𑀺𑀥𑀸 𑀦𑀸𑀫𑀁, 𑀧𑀘𑁆𑀘𑀬𑁄 𑀪𑀯𑀢𑀢𑁆𑀢𑀦𑁄;

𑀢𑀺𑀧𑀜𑁆𑀘𑀳𑀺 𑀢𑀁 𑀭𑀽𑀧𑀲𑁆𑀲, 𑀉𑀪𑀺𑀦𑁆𑀦𑀁 𑀢𑁂𑀭𑀲𑀥𑀸 𑀧𑀦.

𑀭𑀽𑀧𑀸𑀭𑀽𑀧𑀁 𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑀢𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀭𑀽𑀧𑀸𑀭𑀽𑀧𑀁 𑀅𑀭𑀽𑀧𑀲𑁆𑀲 𑀬𑀣𑀸𑀭𑀳𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀺𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀭𑀽𑀧𑀸𑀭𑀽𑀧𑀁 𑀭𑀽𑀧𑀲𑁆𑀲𑀸𑀢𑀺 𑀦𑀢𑁆𑀣𑀺.

𑁧𑁩𑁯𑁮. 𑀉𑀪𑁄𑀧𑀺 𑀭𑀽𑀧𑀥𑀫𑁆𑀫𑀲𑁆𑀲, 𑀘𑀢𑀼𑀥𑀸 𑀳𑁄𑀦𑁆𑀢𑀺 𑀧𑀘𑁆𑀘𑀬𑀸;

𑀙𑀩𑁆𑀩𑀺𑀥𑀸 𑀦𑀸𑀫𑀥𑀫𑁆𑀫𑀲𑁆𑀲, 𑀫𑀺𑀲𑁆𑀲𑀓𑀲𑁆𑀲 𑀦 𑀓𑀺𑀜𑁆𑀘𑀺 𑀢𑀼.

𑀏𑀢𑁂𑀲𑀼 𑀧𑀦 𑀧𑀘𑁆𑀘𑀬𑁂𑀲𑀼 𑀓𑀢𑀺 𑀭𑀽𑀧𑀸, 𑀓𑀢𑀺 𑀅𑀭𑀽𑀧𑀸, 𑀓𑀢𑀺𑀫𑀺𑀲𑁆𑀲𑀓𑀸𑀢𑀺? 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀏𑀓𑁄 𑀭𑀽𑀧𑀥𑀫𑁆𑀫𑁄𑀯, 𑀳𑁂𑀢𑀼𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀙𑀸𑀚𑀸𑀢𑀸𑀲𑁂𑀯𑀦𑀓𑀫𑁆𑀫𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺- 𑀯𑀺𑀕𑀢𑀸𑀦𑀁 𑀯𑀲𑁂𑀦 𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀅𑀭𑀽𑀧𑀥𑀫𑁆𑀫𑀸𑀯, 𑀲𑁂𑀲𑀸 𑀧𑀦 𑀏𑀓𑀸𑀤𑀲 𑀧𑀘𑁆𑀘𑀬𑀸 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀦 𑀓𑀸𑀮𑀯𑀲𑁂𑀦 𑀳𑁂𑀢𑀼𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕- 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀧𑀦𑁆𑀦𑀭𑀲 𑀧𑀘𑁆𑀘𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀳𑁄𑀦𑁆𑀢𑀺. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀅𑀢𑀻𑀢𑀸𑀯, 𑀓𑀫𑁆𑀫𑀧𑀘𑁆𑀘𑀬𑁄 𑀅𑀢𑀻𑀢𑁄 𑀯𑀸 𑀳𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀯𑀸, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀧𑀦 𑀢𑀺𑀓𑀸𑀮𑀺𑀓𑀸 𑀳𑁄𑀦𑁆𑀢𑀺 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀸 𑀘.

𑁧𑁩𑁯𑁯. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀳𑁄𑀦𑁆𑀢𑁂𑀢𑁆𑀣,

𑀧𑀘𑁆𑀘𑀬𑀸 𑀤𑀲 𑀧𑀜𑁆𑀘 𑀘;

𑀅𑀢𑀻𑀢𑀸 𑀏𑀯 𑀧𑀜𑁆𑀘𑁂𑀓𑁄,

𑀤𑁆𑀯𑁂𑀓𑀸𑀮𑀺𑀓𑁄𑀯 𑀤𑀲𑁆𑀲𑀺𑀢𑁄;

𑀢𑀬𑁄 𑀢𑀺𑀓𑀸𑀮𑀺𑀓𑀸 𑀘𑁂𑀯,

𑀯𑀺𑀦𑀺𑀫𑀼𑀢𑁆𑀢𑀸𑀧𑀺 𑀓𑀸𑀮𑀢𑁄.

𑀲𑀩𑁆𑀩𑁂 𑀧𑀦𑀺𑀫𑁂 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸 𑀬𑀣𑀸𑀭𑀳𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀓𑀫𑁆𑀫𑀅𑀢𑁆𑀣𑀺𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄 𑀦𑀸𑀫

𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀕𑀫𑀦𑀓𑀣𑀸

𑁧𑁪𑁦𑁦. 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄𑀬𑀁, 𑀯𑀭𑁄 𑀧𑀭𑀫𑀕𑀫𑁆𑀪𑀻𑀭𑁄;

𑀇𑀘𑁆𑀙𑀢𑀸 𑀦𑀺𑀧𑀼𑀡𑀁 𑀩𑀼𑀤𑁆𑀥𑀺𑀁, 𑀪𑀺𑀓𑁆𑀔𑀼𑀦𑀸 𑀧𑀦 𑀲𑁄𑀢𑀩𑁆𑀩𑁄.

𑁧𑁪𑁦𑁧. 𑀲𑀼𑀫𑀢𑀺𑀫𑀢𑀺𑀯𑀺𑀘𑀸𑀭𑀩𑁄𑀥𑀦𑁄,

𑀯𑀺𑀫𑀢𑀺𑀯𑀺𑀫𑁄𑀳𑀯𑀺𑀦𑀸𑀲𑀦𑁄 𑀅𑀬𑀁;

𑀓𑀼𑀫𑀢𑀺𑀫𑀢𑀺𑀫𑀳𑀸𑀢𑀫𑁄𑀦𑀸𑀲𑁄,

𑀧𑀝𑀼𑀫𑀢𑀺𑀪𑀸𑀲𑀓𑀭𑁄 𑀫𑀢𑁄 𑀫𑀬𑀸.

𑁧𑁪𑁦𑁨. 𑀬𑀢𑁄 𑀲𑀼𑀫𑀢𑀺𑀦𑀸 𑀫𑀢𑁄 𑀦𑀸𑀫𑀢𑁄,

𑀆𑀬𑀸𑀘𑀺𑀢𑀲𑀫𑁆𑀫𑀸𑀦𑀢𑁄 𑀫𑀸𑀦𑀢𑁄;

𑀢𑀢𑁄 𑀳𑀺 𑀭𑀘𑀺𑀢𑁄 𑀲𑀤𑀸 𑀢𑁄𑀲𑀤𑀸,

𑀫𑀬𑀸 𑀳𑀺𑀢𑀯𑀺𑀪𑀸𑀯𑀦𑀸 𑀪𑀸𑀯𑀦𑀸.

𑁧𑁪𑁦𑁩. 𑀅𑀢𑁆𑀣𑀢𑁄 𑀕𑀦𑁆𑀣𑀢𑁄 𑀘𑀸𑀧𑀺, 𑀬𑀼𑀢𑁆𑀢𑀺𑀢𑁄 𑀘𑀸𑀧𑀺 𑀏𑀢𑁆𑀣 𑀘;

𑀅𑀬𑀼𑀢𑁆𑀢𑀁 𑀯𑀸 𑀯𑀺𑀭𑀼𑀤𑁆𑀥𑀁 𑀯𑀸, 𑀬𑀤𑀺 𑀤𑀺𑀲𑁆𑀲𑀢𑀺 𑀓𑀺𑀜𑁆𑀘𑀺𑀧𑀺.

𑁧𑁪𑁦𑁪. 𑀧𑀼𑀩𑁆𑀩𑀸𑀧𑀭𑀁 𑀯𑀺𑀮𑁄𑀓𑁂𑀢𑁆𑀯𑀸, 𑀯𑀺𑀘𑀸𑀭𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁;

𑀥𑀻𑀫𑀢𑀸 𑀲𑀗𑁆𑀕𑀳𑁂𑀢𑀩𑁆𑀩𑀁, 𑀕𑀳𑁂𑀢𑀩𑁆𑀩𑀁 𑀦 𑀤𑁄𑀲𑀢𑁄.

𑁧𑁪𑁦𑁫. 𑀢𑀺𑀯𑀺𑀥𑀸 𑀩𑁆𑀬𑀧𑁆𑀧𑀣𑀸𑀦𑀜𑁆𑀳𑀺, 𑀕𑀢𑀺𑀬𑁄 𑀤𑀼𑀩𑁆𑀩𑀺𑀥𑀸𑀧𑀺 𑀘𑁂;

𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀯𑁂𑀤𑀺𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑁧𑁪𑁦𑁬. 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺, 𑀅𑀲𑀫𑁆𑀫𑀺𑀲𑁆𑀲𑁄 𑀅𑀦𑀸𑀓𑀼𑀮𑁄;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑁄.

𑁧𑁪𑁦𑁭. 𑀫𑀥𑀼𑀭𑀓𑁆𑀔𑀭𑀲𑀁𑀬𑀼𑀢𑁆𑀢𑁄, 𑀅𑀢𑁆𑀣𑁄 𑀬𑀲𑁆𑀫𑀸 𑀧𑀓𑀸𑀲𑀺𑀢𑁄;

𑀢𑀲𑁆𑀫𑀸 𑀳𑀺𑀢𑀢𑁆𑀣𑀓𑀸𑀫𑁂𑀦, 𑀓𑀸𑀢𑀩𑁆𑀩𑁄 𑀏𑀢𑁆𑀣 𑀆𑀤𑀭𑁄.

𑁧𑁪𑁦𑁮. 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦, 𑀓𑀭𑁄𑀦𑁆𑀢𑁂𑀦 𑀘 𑀬𑀁 𑀫𑀬𑀸;

𑀧𑀼𑀜𑁆𑀜𑀫𑀥𑀺𑀕𑀢𑀁 𑀢𑁂𑀦, 𑀲𑀼𑀔𑀁 𑀧𑀧𑁆𑀧𑁄𑀦𑁆𑀢𑀼 𑀧𑀸𑀡𑀺𑀦𑁄.

𑁧𑁪𑁦𑁯. 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀘𑀸𑀬𑀁, 𑀬𑀣𑀸𑀲𑀺𑀤𑁆𑀥𑀺𑀫𑀼𑀧𑀸𑀕𑀢𑁄;

𑀢𑀣𑀸 𑀓𑀮𑁆𑀬𑀸𑀡𑀲𑀗𑁆𑀓𑀧𑁆𑀧𑀸, 𑀲𑀺𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀼 𑀧𑀸𑀡𑀺𑀦𑀁.

𑁧𑁪𑁧𑁦. 𑀦𑀭𑀦𑀸𑀭𑀺𑀕𑀡𑀸𑀓𑀺𑀡𑁆𑀡𑁂, 𑀅𑀲𑀁𑀓𑀺𑀡𑁆𑀡𑀓𑀼𑀮𑀸𑀓𑀼𑀮𑁂;

𑀨𑀻𑀢𑁂 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁂, 𑀲𑀼𑀧𑀲𑀦𑁆𑀦𑀲𑀺𑀢𑁄𑀤𑀓𑁂.

𑁧𑁪𑁧𑁧. 𑀦𑀸𑀦𑀸𑀭𑀢𑀦𑀲𑀫𑁆𑀧𑀼𑀡𑁆𑀡𑁂, 𑀯𑀺𑀯𑀺𑀥𑀸𑀧𑀡𑀲𑀗𑁆𑀓𑀝𑁂;

𑀓𑀸𑀯𑁂𑀭𑀧𑀝𑁆𑀝𑀦𑁂 𑀭𑀫𑁆𑀫𑁂, 𑀦𑀸𑀦𑀸𑀭𑀸𑀫𑁄𑀧𑀲𑁄𑀪𑀺𑀢𑁂.

𑁧𑁪𑁧𑁨. 𑀓𑁂𑀮𑀸𑀲𑀲𑀺𑀔𑀭𑀸𑀓𑀸𑀭𑀧𑀸𑀲𑀸𑀤𑀧𑀝𑀺𑀫𑀡𑁆𑀟𑀺𑀢𑁂;

𑀓𑀸𑀭𑀺𑀢𑁂 𑀓𑀡𑁆𑀳𑀤𑀸𑀲𑁂𑀦, 𑀤𑀲𑁆𑀲𑀦𑀻𑀬𑁂 𑀫𑀦𑁄𑀭𑀫𑁂.

𑁧𑁪𑁧𑁩. 𑀯𑀺𑀳𑀸𑀭𑁂 𑀯𑀺𑀯𑀺𑀥𑀸𑀓𑀸𑀭𑀘𑀸𑀭𑀼𑀧𑀸𑀓𑀸𑀭𑀕𑁄𑀧𑀼𑀭𑁂;

𑀢𑀢𑁆𑀣 𑀧𑀸𑀘𑀻𑀦𑀧𑀸𑀲𑀸𑀤𑁂, 𑀫𑀬𑀸 𑀦𑀺𑀯𑀲𑀢𑀸 𑀲𑀤𑀸.

𑁧𑁪𑁧𑁪. 𑀅𑀲𑀮𑁆𑀮𑁂𑀔𑀫𑀲𑀸𑀔𑀮𑁆𑀬𑁂, 𑀲𑀻𑀮𑀸𑀤𑀺𑀕𑀼𑀡𑀲𑁄𑀪𑀺𑀦𑀸;

𑀅𑀬𑀁 𑀲𑀼𑀫𑀢𑀺𑀦𑀸 𑀲𑀸𑀥𑀼, 𑀬𑀸𑀘𑀺𑀢𑁂𑀦 𑀓𑀢𑁄 𑀲𑀢𑀸.

𑁧𑁪𑁧𑁫. 𑀤𑁂𑀯𑀸 𑀓𑀸𑀮𑁂𑀦 𑀯𑀲𑁆𑀲𑀦𑁆𑀢𑀼, 𑀯𑀲𑁆𑀲𑀁 𑀯𑀲𑁆𑀲𑀯𑀮𑀸𑀳𑀓𑀸;

𑀧𑀸𑀮𑀬𑀦𑁆𑀢𑀼 𑀫𑀳𑀻𑀧𑀸𑀮𑀸, 𑀥𑀫𑁆𑀫𑀢𑁄 𑀲𑀓𑀮𑀁 𑀫𑀳𑀺𑀁.

𑁧𑁪𑁧𑁬. 𑀬𑀸𑀯 𑀢𑀺𑀝𑁆𑀞𑀢𑀺 𑀮𑁄𑀓𑀲𑁆𑀫𑀺𑀁, 𑀳𑀺𑀫𑀯𑀸 𑀧𑀩𑁆𑀩𑀢𑀼𑀢𑁆𑀢𑀫𑁄;

𑀢𑀸𑀯 𑀢𑀺𑀝𑁆𑀞𑀢𑀼 𑀲𑀤𑁆𑀥𑀫𑁆𑀫𑁄, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀢𑁆𑀣𑀼𑀦𑁄𑀢𑀺.

𑀉𑀭𑀕𑀧𑀼𑀭𑀦𑀺𑀯𑀲𑀦𑁂𑀦 𑀆𑀘𑀭𑀺𑀬𑁂𑀦 𑀪𑀤𑀦𑁆𑀢𑀩𑀼𑀤𑁆𑀥𑀤𑀢𑁆𑀢𑁂𑀦 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁂𑀦 𑀓𑀢𑁄 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄 𑀦𑀸𑀫𑀸𑀬𑀁.

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑁧. 𑀲𑀫𑁆𑀫𑀸 𑀲𑀫𑁆𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀥𑀫𑁆𑀫𑀧𑁆𑀧𑀓𑀸𑀲𑀦𑀁;

𑀲𑀁𑀖𑀁 𑀲𑀁𑀖𑀼𑀢𑁆𑀢𑀫𑀁 𑀮𑁄𑀓𑁂, 𑀯𑀦𑁆𑀤𑀺𑀢𑁆𑀯𑀸 𑀯𑀦𑁆𑀤𑀦𑀸𑀭𑀳𑀁.

𑁨. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀁, 𑀧𑀯𑀓𑁆𑀔𑀸𑀫𑀺 𑀲𑀫𑀸𑀲𑀢𑁄;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀡𑁆𑀡𑀦𑀸𑀦𑀬𑀦𑀺𑀲𑁆𑀲𑀺𑀢𑀁.