𑁨𑁩. 𑀢𑁂𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀣𑀸

𑁧𑁩𑁭𑁫. 𑀏𑀢𑁂𑀲𑀼 𑀬𑁂𑀦 𑀬𑁂 𑀥𑀫𑁆𑀫𑀸, 𑀧𑀳𑀸𑀢𑀩𑁆𑀩𑀸 𑀪𑀯𑀦𑁆𑀢𑀺 𑀳𑀺;

𑀢𑁂𑀲𑀁 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀧𑀓𑀸𑀲𑀦𑀫𑀺𑀢𑁄 𑀧𑀭𑀁.

𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀫𑀕𑁆𑀕𑀜𑀸𑀡𑁂𑀲𑀼 𑀬𑁂 𑀥𑀫𑁆𑀫𑀸 𑀬𑁂𑀦 𑀜𑀸𑀡𑁂𑀦 𑀧𑀳𑀸𑀢𑀩𑁆𑀩𑀸, 𑀢𑁂𑀲𑀁 𑀧𑀳𑀸𑀦𑀫𑁂𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀸𑀦𑀺 𑀳𑀺 𑀬𑀣𑀸𑀬𑁄𑀕𑀁 𑀲𑀁𑀬𑁄𑀚𑀦𑀓𑀺𑀮𑁂𑀲𑀫𑀺𑀘𑁆𑀙𑀢𑁆𑀢𑀮𑁄𑀓𑀥𑀫𑁆𑀫𑀫𑀘𑁆𑀙𑀭𑀺𑀬𑀯𑀺𑀧𑀮𑁆𑀮𑀸𑀲𑀕𑀦𑁆𑀣𑀸𑀕𑀢𑀺𑀆𑀲𑀯- 𑀑𑀖𑀬𑁄𑀕𑀦𑀻𑀯𑀭𑀡𑀧𑀭𑀸𑀫𑀸𑀲𑀉𑀧𑀸𑀤𑀸𑀦𑀸𑀦𑀼𑀲𑀬𑀫𑀮𑀅𑀓𑀼𑀲𑀮𑀓𑀫𑁆𑀫𑀧𑀣- 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀸𑀦𑀁 𑀧𑀳𑀸𑀦𑀓𑀭𑀸𑀦𑀺.

𑀢𑀢𑁆𑀣 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸𑀢𑀺 𑀇𑀫𑁂 𑀧𑀜𑁆𑀘 𑀉𑀤𑁆𑀥𑀁𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀦𑀸𑀫. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀫𑀭𑀸𑀕𑁄 𑀧𑀝𑀺𑀖𑁄𑀢𑀺 𑀇𑀫𑁂 𑀧𑀜𑁆𑀘 𑀅𑀥𑁄𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀦𑀸𑀫.

𑀓𑀺𑀮𑁂𑀲𑀸𑀢𑀺 𑀤𑀲 𑀓𑀺𑀮𑁂𑀲𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺.

𑀫𑀺𑀘𑁆𑀙𑀢𑁆𑀢𑀸𑀢𑀺 𑀤𑀲 𑀫𑀺𑀘𑁆𑀙𑀢𑁆𑀢𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀲𑀢𑀺 𑀫𑀺𑀘𑁆𑀙𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀜𑀸𑀡𑀁 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺.

𑀮𑁄𑀓𑀥𑀫𑁆𑀫𑀸𑀢𑀺 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺. 𑀇𑀥 𑀧𑀦 𑀓𑀸𑀭𑀡𑀽𑀧𑀘𑀸𑀭𑁂𑀦 𑀮𑀸𑀪𑀸𑀤𑀺𑀯𑀢𑁆𑀣𑀼𑀓𑀲𑁆𑀲 𑀅𑀦𑀼𑀦𑀬𑀲𑁆𑀲, 𑀅𑀮𑀸𑀪𑀸𑀤𑀺𑀯𑀢𑁆𑀣𑀼𑀓𑀲𑁆𑀲 𑀧𑀝𑀺𑀖𑀲𑁆𑀲 𑀘𑁂𑀢𑀁 𑀮𑁄𑀓𑀥𑀫𑁆𑀫𑀕𑀳𑀡𑁂𑀦 𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀘𑁆𑀙𑀭𑀺𑀬𑀸𑀦𑀻𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀓𑀼𑀮𑀫𑀘𑁆𑀙𑀭𑀺𑀬𑀁 𑀮𑀸𑀪𑀫𑀘𑁆𑀙𑀭𑀺𑀬𑀁 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀯𑀡𑁆𑀡𑀫𑀘𑁆𑀙𑀭𑀺𑀬𑀦𑁆𑀢𑀺. 𑀇𑀫𑀸𑀦𑀺 𑀆𑀯𑀸𑀲𑀸𑀤𑀻𑀲𑀼 𑀅𑀜𑁆𑀜𑁂𑀲𑀁 𑀲𑀸𑀥𑀸𑀭𑀡𑀪𑀸𑀯𑀁 𑀅𑀲𑀳𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀺 𑀫𑀘𑁆𑀙𑀭𑀺𑀬𑀸𑀦𑀺.

𑀯𑀺𑀧𑀮𑁆𑀮𑀸𑀲𑀸𑀢𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀅𑀲𑀼𑀪𑁂𑀲𑀼𑀬𑁂𑀯 𑀯𑀢𑁆𑀣𑀽𑀲𑀼 ‘‘𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸 𑀲𑀼𑀪’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄𑀢𑀺 𑀇𑀫𑁂 𑀢𑀬𑁄 𑀯𑀺𑀧𑀮𑁆𑀮𑀸𑀲𑀸.

𑀕𑀦𑁆𑀣𑀸𑀢𑀺 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄𑀢𑀺.

𑀅𑀕𑀢𑀻𑀢𑀺 𑀙𑀦𑁆𑀤𑀤𑁄𑀲𑀫𑁄𑀳𑀪𑀬𑀸𑀦𑀺. 𑀆𑀲𑀯𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀭𑀸𑀕𑀪𑀯𑀭𑀸𑀕𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀲𑀯𑁄𑀢𑀺. 𑀑𑀖𑀬𑁄𑀕𑀸𑀦𑀻𑀢𑀺𑀧𑀺 𑀢𑁂𑀲𑀫𑁂𑀯𑀸𑀥𑀺𑀯𑀘𑀦𑀁. 𑀦𑀻𑀯𑀭𑀡𑀸𑀦𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄. 𑀧𑀭𑀸𑀫𑀸𑀲𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀅𑀥𑀺𑀯𑀘𑀦𑀁.

𑀉𑀧𑀸𑀤𑀸𑀦𑀸𑀢𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀻𑀢𑀺. 𑀅𑀦𑀼𑀲𑀬𑀸𑀢𑀺 𑀲𑀢𑁆𑀢 𑀅𑀦𑀼𑀲𑀬𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀝𑀺𑀖𑀫𑀸𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀪𑀯𑀭𑀸𑀕𑀸𑀯𑀺𑀚𑁆𑀚𑀸𑀦𑀼𑀲𑀬𑁄𑀢𑀺. 𑀫𑀮𑀸𑀢𑀺 𑀢𑀬𑁄 𑀫𑀮𑀸 𑁋 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄𑀢𑀺.

𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀢𑀺 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑁄 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀤𑀲.

𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀮𑁄𑀪𑀫𑀽𑀮𑀸𑀦𑀺 𑀅𑀝𑁆𑀞, 𑀤𑁄𑀲𑀫𑀽𑀮𑀸𑀦𑀺 𑀤𑁆𑀯𑁂, 𑀫𑁄𑀳𑀫𑀽𑀮𑀸𑀦𑀺 𑀤𑁆𑀯𑁂𑀢𑀺 𑀇𑀫𑁂 𑀤𑁆𑀯𑀸𑀤𑀲𑀸𑀢𑀺.

𑀏𑀢𑁂𑀲𑀁 𑀲𑀁𑀬𑁄𑀚𑀦𑀸𑀤𑀻𑀦𑀁 𑀏𑀢𑀸𑀦𑀺 𑀬𑀣𑀸𑀲𑀫𑁆𑀪𑀯𑀁 𑀧𑀳𑀸𑀦𑀓𑀭𑀸𑀦𑀺. 𑀓𑀣𑀁? 𑀲𑀁𑀬𑁄𑀚𑀦𑁂𑀲𑀼 𑀢𑀸𑀯 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀅𑀧𑀸𑀬𑀕𑀫𑀦𑀻𑀬𑀸 𑀓𑀸𑀫𑀭𑀸𑀕𑀧𑀝𑀺𑀖𑀸𑀢𑀺 𑀏𑀢𑁂 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀲𑁂𑀲𑀸 𑀓𑀸𑀫𑀭𑀸𑀕𑀧𑀝𑀺𑀖𑀸 𑀑𑀴𑀸𑀭𑀺𑀓𑀸 𑀤𑀼𑀢𑀺𑀬𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀲𑀼𑀔𑀼𑀫𑀸 𑀢𑀢𑀺𑀬𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀭𑀽𑀧𑀭𑀸𑀕𑀸𑀤𑀬𑁄 𑀧𑀜𑁆𑀘𑀧𑀺 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀚𑁆𑀛𑀸 𑀏𑀯.

𑀓𑀺𑀮𑁂𑀲𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀤𑁄𑀲𑁄 𑀢𑀢𑀺𑀬𑀫𑀕𑁆𑀕𑀜𑀸𑀡𑀯𑀚𑁆𑀛𑁄, 𑀮𑁄𑀪𑀫𑁄𑀳𑀫𑀸𑀦𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀦𑀺 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀚𑁆𑀛𑀸𑀦𑀺.

𑀫𑀺𑀘𑁆𑀙𑀢𑁆𑀢𑁂𑀲𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀼𑀲𑀸𑀯𑀸𑀤𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄𑀢𑀺 𑀇𑀫𑁂 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸𑀢𑀺 𑀇𑀫𑁂 𑀢𑀢𑀺𑀬𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀘𑁂𑀢𑀦𑀸𑀬𑁂𑀯 𑀘𑁂𑀢𑁆𑀣 𑀫𑀺𑀘𑁆𑀙𑀸𑀯𑀸𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀫𑁆𑀨𑀧𑁆𑀧𑀮𑀸𑀧𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀸𑀦𑀺 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀚𑁆𑀛𑀸𑀦𑀺.

𑀮𑁄𑀓𑀥𑀫𑁆𑀫𑁂𑀲𑀼 𑀧𑀝𑀺𑀖𑁄 𑀢𑀢𑀺𑀬𑀫𑀕𑁆𑀕𑀜𑀸𑀡𑀯𑀚𑁆𑀛𑁄, 𑀅𑀦𑀼𑀦𑀬𑁄 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀚𑁆𑀛𑁄, 𑀬𑀲𑁂 𑀧𑀲𑀁𑀲𑀸𑀬 𑀘 𑀅𑀦𑀼𑀦𑀬𑁄 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀚𑁆𑀛𑁄𑀢𑀺 𑀏𑀓𑁂.

𑀫𑀘𑁆𑀙𑀭𑀺𑀬𑀸𑀦𑀺 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸𑀦𑀺 𑀏𑀯.

𑀯𑀺𑀧𑀮𑁆𑀮𑀸𑀲𑁂𑀲𑀼 𑀧𑀦 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀁, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀘 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀸, 𑀤𑀼𑀓𑁆𑀔𑁂 𑀲𑀼𑀔𑀁, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄 𑀘𑀸𑀢𑀺 𑀇𑀫𑁂 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀢𑀢𑀺𑀬𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀚𑁆𑀛𑀸.

𑀕𑀦𑁆𑀣𑁂𑀲𑀼 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀸 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄 𑀢𑀢𑀺𑀬𑀫𑀕𑁆𑀕𑀜𑀸𑀡𑀯𑀚𑁆𑀛𑁄, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀚𑁆𑀛𑁄𑀯.

𑀅𑀕𑀢𑀺𑀬𑁄 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸.

𑀆𑀲𑀯𑁂𑀲𑀼 𑀤𑀺𑀝𑁆𑀞𑀸𑀲𑀯𑁄 𑀧𑀞𑀫𑀜𑀸𑀡𑀯𑀚𑁆𑀛𑁄, 𑀓𑀸𑀫𑀸𑀲𑀯𑁄 𑀢𑀢𑀺𑀬𑀜𑀸𑀡𑀯𑀚𑁆𑀛𑁄, 𑀇𑀢𑀭𑁂 𑀤𑁆𑀯𑁂 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸. 𑀑𑀖𑀬𑁄𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑀻𑀯𑀭𑀡𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀧𑀞𑀫𑀜𑀸𑀡𑀯𑀚𑁆𑀛𑀁, 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀢𑀻𑀡𑀺 𑀢𑀢𑀺𑀬𑀜𑀸𑀡𑀯𑀚𑁆𑀛𑀸𑀦𑀺, 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀸𑀦𑀺 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀦𑀺.

𑀧𑀭𑀸𑀫𑀸𑀲𑁄 𑀧𑀞𑀫𑀜𑀸𑀡𑀯𑀚𑁆𑀛𑁄.

𑀉𑀧𑀸𑀤𑀸𑀦𑁂𑀲𑀼 𑀲𑀩𑁆𑀩𑁂𑀲𑀫𑁆𑀧𑀺 𑀮𑁄𑀓𑀺𑀬𑀥𑀫𑁆𑀫𑀸𑀦𑀁 𑀯𑀢𑁆𑀣𑀼𑀓𑀸𑀫𑀯𑀲𑁂𑀦 ‘‘𑀓𑀸𑀫𑀸’’𑀢𑀺 𑀆𑀕𑀢𑀢𑁆𑀢𑀸 𑀭𑀽𑀧𑀸𑀭𑀽𑀧𑁂𑀲𑀼 𑀭𑀸𑀕𑁄𑀧𑀺 𑀓𑀸𑀫𑀼𑀧𑀸𑀤𑀸𑀦𑁂 𑀧𑀢𑀢𑀺, 𑀢𑀲𑁆𑀫𑀸 𑀢𑀜𑁆𑀘 𑀓𑀸𑀫𑀼𑀧𑀸𑀤𑀸𑀦𑀁 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀁, 𑀲𑁂𑀲𑀸𑀦𑀺 𑀧𑀞𑀫𑀜𑀸𑀡𑀯𑀚𑁆𑀛𑀸𑀦𑀺.

𑀅𑀦𑀼𑀲𑀬𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 𑀧𑀞𑀫𑀜𑀸𑀡𑀯𑀚𑁆𑀛𑀸, 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀫𑀸𑀦𑀪𑀯𑀭𑀸𑀕𑀸𑀯𑀺𑀚𑁆𑀚𑀸𑀦𑀼𑀲𑀬𑀸 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸.

𑀫𑀮𑁂𑀲𑀼 𑀤𑁄𑀲𑀫𑀮𑀁 𑀢𑀢𑀺𑀬𑀜𑀸𑀡𑀯𑀚𑁆𑀛𑀁, 𑀇𑀢𑀭𑀸𑀦𑀺 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀦𑁂𑀯.

𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀫𑀺𑀘𑁆𑀙𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀧𑀞𑀫𑀜𑀸𑀡𑀯𑀚𑁆𑀛𑀸, 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀩𑁆𑀬𑀸𑀧𑀸𑀤𑁄𑀢𑀺 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄 𑀅𑀪𑀺𑀚𑁆𑀛𑀸 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀯.

𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁄 𑀘𑀸𑀢𑀺 𑀧𑀜𑁆𑀘 𑀧𑀞𑀫𑀜𑀸𑀡𑀯𑀚𑁆𑀛𑀸, 𑀤𑁆𑀯𑁂 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀲𑁂𑀲𑀸 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀢𑀺.

𑀬𑀜𑁆𑀘 𑀬𑁂𑀦 𑀯𑀚𑁆𑀛𑀁, 𑀢𑀁 𑀢𑁂𑀦 𑀧𑀳𑀸𑀢𑀩𑁆𑀩𑀁 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁂𑀲𑀁 𑀲𑀁𑀬𑁄𑀚𑀦𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀏𑀢𑀸𑀦𑀺 𑀬𑀣𑀸𑀬𑁄𑀕𑀁 𑀧𑀳𑀸𑀦𑀓𑀭𑀸𑀦𑀻’’𑀢𑀺.

𑁧𑁩𑁭𑁬. 𑀏𑀢𑁂𑀲𑀼 𑀜𑀸𑀡𑁂𑀲𑀼 𑀘 𑀬𑁂𑀦 𑀬𑁂𑀦,

𑀬𑁄 𑀬𑁄 𑀳𑀺 𑀥𑀫𑁆𑀫𑁄 𑀲𑀫𑀼𑀧𑁂𑀢𑀺 𑀖𑀸𑀢𑀁;

𑀲𑁄 𑀲𑁄 𑀅𑀲𑁂𑀲𑁂𑀦 𑀘 𑀢𑁂𑀦 𑀢𑁂𑀦,

𑀲𑀦𑁆𑀤𑀲𑁆𑀲𑀺𑀢𑁄 𑀲𑀸𑀥𑀼 𑀫𑀬𑀸 𑀧𑀦𑁂𑀯𑀁.

𑀓𑀺𑀮𑁂𑀲𑀧𑀳𑀸𑀦𑀓𑁆𑀓𑀫𑀓𑀣𑀸𑀬𑀁.

𑁧𑁩𑁭𑁭. 𑀧𑀭𑀺𑀜𑁆𑀜𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀺, 𑀬𑀸𑀦𑀺 𑀯𑀼𑀢𑁆𑀢𑀸𑀦𑀺 𑀲𑀢𑁆𑀣𑀼𑀦𑀸;

𑀲𑀘𑁆𑀘𑀸𑀪𑀺𑀲𑀫𑀬𑁂 𑀢𑀸𑀦𑀺, 𑀧𑀯𑀓𑁆𑀔𑀸𑀫𑀺 𑀇𑀢𑁄 𑀧𑀭𑀁.

𑁧𑁩𑁭𑁮. 𑀏𑀓𑁂𑀓𑀲𑁆𑀲 𑀧𑀦𑁂𑀢𑁂𑀲𑀼,

𑀜𑀸𑀡𑀲𑁆𑀲𑁂𑀓𑀓𑁆𑀔𑀡𑁂 𑀲𑀺𑀬𑀸;

𑀧𑀭𑀺𑀜𑁆𑀜𑀸 𑀘 𑀧𑀳𑀸𑀦𑀜𑁆𑀘,

𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀪𑀸𑀯𑀦𑀸.

𑁧𑁩𑁭𑁯. 𑀧𑀭𑀺𑀜𑁆𑀜𑀸𑀤𑀻𑀦𑀺 𑀏𑀢𑀸𑀦𑀺, 𑀓𑀺𑀘𑁆𑀘𑀸𑀦𑁂𑀓𑀓𑁆𑀔𑀡𑁂 𑀧𑀦;

𑀬𑀣𑀸𑀲𑀪𑀸𑀯𑀢𑁄 𑀢𑀸𑀦𑀺, 𑀚𑀸𑀦𑀺𑀢𑀩𑁆𑀩𑀸𑀦𑀺 𑀯𑀺𑀜𑁆𑀜𑀼𑀦𑀸.

𑁧𑁩𑁮𑁦. 𑀧𑀤𑀻𑀧𑁄 𑀳𑀺 𑀬𑀣𑀸 𑀮𑁄𑀓𑁂, 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀇𑀥;

𑀘𑀢𑁆𑀢𑀸𑀭𑀺 𑀧𑀦 𑀓𑀺𑀘𑁆𑀘𑀸𑀦𑀺, 𑀓𑀭𑁄𑀢𑁂𑀓𑀓𑁆𑀔𑀡𑁂 𑀧𑀦.

𑁧𑁩𑁮𑁧. 𑀆𑀮𑁄𑀓𑀜𑁆𑀘 𑀯𑀺𑀤𑀁𑀲𑁂𑀢𑀺, 𑀦𑀸𑀲𑁂𑀢𑀺 𑀢𑀺𑀫𑀺𑀭𑀫𑁆𑀧𑀺 𑀘;

𑀧𑀭𑀺𑀬𑀸𑀤𑀺𑀬𑀢𑀺 𑀢𑁂𑀮𑀜𑁆𑀘, 𑀯𑀝𑁆𑀝𑀺𑀁 𑀛𑀸𑀧𑁂𑀢𑀺 𑀏𑀓𑀢𑁄.

𑁧𑁩𑁮𑁨. 𑀏𑀯𑀁 𑀢𑀁 𑀫𑀕𑁆𑀕𑀜𑀸𑀡𑀫𑁆𑀧𑀺, 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀧𑀦;

𑀘𑀢𑁆𑀢𑀸𑀭𑀺𑀧𑀺 𑀘 𑀓𑀺𑀘𑁆𑀘𑀸𑀦𑀺, 𑀓𑀭𑁄𑀢𑁂𑀓𑀓𑁆𑀔𑀡𑁂 𑀧𑀦.

𑁧𑁩𑁮𑁩. 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦𑁂𑀯, 𑀤𑀼𑀓𑁆𑀔𑀁 𑀅𑀪𑀺𑀲𑀫𑁂𑀢𑀺 𑀲𑁄;

𑀧𑀳𑀸𑀦𑀸𑀪𑀺𑀲𑀫𑀬𑁂𑀦𑁂𑀯, 𑀢𑀣𑀸 𑀲𑀫𑀼𑀤𑀬𑀫𑁆𑀧𑀺 𑀘.

𑁧𑁩𑁮𑁪. 𑀪𑀸𑀯𑀦𑀸𑀯𑀺𑀥𑀺𑀦𑀸𑀬𑁂𑀯, 𑀫𑀕𑁆𑀕𑀁 𑀅𑀪𑀺𑀲𑀫𑁂𑀢𑀺 𑀢𑀁;

𑀆𑀭𑀫𑁆𑀫𑀡𑀓𑁆𑀭𑀺𑀬𑀸𑀬𑁂𑀯, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀺 𑀲𑁄.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁 𑀤𑀼𑀓𑁆𑀔𑁂𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬𑀧𑁂𑀢𑀁 𑀜𑀸𑀡’’𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀧𑀤𑀻𑀧𑁄 𑀯𑀝𑁆𑀝𑀺𑀁 𑀛𑀸𑀧𑁂𑀢𑀺, 𑀏𑀯𑀁 𑀫𑀕𑁆𑀕𑀜𑀸𑀡𑀁 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺. 𑀬𑀣𑀸 𑀅𑀦𑁆𑀥𑀓𑀸𑀭𑀁 𑀦𑀸𑀲𑁂𑀢𑀺, 𑀏𑀯𑀁 𑀲𑀫𑀼𑀤𑀬𑀁 𑀧𑀚𑀳𑀢𑀺. 𑀬𑀣𑀸 𑀆𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀏𑀯𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀬 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀬𑀣𑀸 𑀢𑁂𑀮𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀏𑀯𑀁 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂𑀦 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁩𑁮𑁫. 𑀉𑀕𑁆𑀕𑀘𑁆𑀙𑀦𑁆𑀢𑁄 𑀬𑀣𑀸𑀤𑀺𑀘𑁆𑀘𑁄, 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀧𑀦;

𑀘𑀢𑁆𑀢𑀸𑀭𑀺 𑀧𑀦 𑀓𑀺𑀘𑁆𑀘𑀸𑀦𑀺, 𑀓𑀭𑁄𑀢𑁂𑀓𑀓𑁆𑀔𑀡𑁂 𑀇𑀥.

𑁧𑁩𑁮𑁬. 𑀑𑀪𑀸𑀲𑁂𑀢𑀺 𑀘 𑀭𑀽𑀧𑀸𑀦𑀺, 𑀦𑀸𑀲𑁂𑀢𑀺 𑀢𑀺𑀫𑀺𑀭𑀫𑁆𑀧𑀺 𑀘;

𑀆𑀮𑁄𑀓𑀜𑁆𑀘 𑀯𑀺𑀤𑀁𑀲𑁂𑀢𑀺, 𑀲𑀻𑀢𑀜𑁆𑀘 𑀧𑀝𑀺𑀳𑀜𑁆𑀜𑀢𑀺.

𑁧𑁩𑁮𑁭. 𑀬𑀣𑀸 𑀘 𑀫𑀳𑀢𑀻 𑀦𑀸𑀯𑀸, 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀧𑀦;

𑀘𑀢𑁆𑀢𑀸𑀭𑀺 𑀧𑀦 𑀓𑀺𑀘𑁆𑀘𑀸𑀦𑀺, 𑀓𑀭𑁄𑀢𑁂𑀓𑀓𑁆𑀔𑀡𑁂 𑀧𑀦.

𑁧𑁩𑁮𑁮. 𑀚𑀳𑀢𑀻 𑀑𑀭𑀺𑀫𑀁 𑀢𑀻𑀭𑀁, 𑀲𑁄𑀢𑀁 𑀙𑀺𑀦𑁆𑀤𑀢𑀺 𑀲𑀸 𑀧𑀦;

𑀢𑀣𑀸 𑀯𑀳𑀢𑀺 𑀪𑀡𑁆𑀟𑀜𑁆𑀘, 𑀢𑀻𑀭𑀫𑀧𑁆𑀧𑁂𑀢𑀺 𑀧𑀸𑀭𑀺𑀫𑀁.

𑁧𑁩𑁮𑁯. 𑀦𑀸𑀯𑀸𑀬𑁄𑀭𑀺𑀫𑀢𑀻𑀭𑀲𑁆𑀲, 𑀬𑀣𑀸 𑀧𑀚𑀳𑀦𑀁 𑀧𑀦;

𑀢𑀣𑁂𑀯 𑀫𑀕𑁆𑀕𑀜𑀸𑀡𑀲𑁆𑀲, 𑀤𑀼𑀓𑁆𑀔𑀲𑁆𑀲 𑀧𑀭𑀺𑀚𑀸𑀦𑀦𑀁.

𑁧𑁩𑁯𑁦. 𑀬𑀣𑀸 𑀙𑀺𑀦𑁆𑀤𑀢𑀺 𑀢𑀁 𑀲𑁄𑀢𑀁, 𑀢𑀡𑁆𑀳𑀁 𑀚𑀳𑀢𑀺 𑀢𑀁 𑀢𑀣𑀸;

𑀬𑀣𑀸 𑀯𑀳𑀢𑀺 𑀢𑀁 𑀪𑀡𑁆𑀟𑀁, 𑀲𑀳𑀚𑀸𑀢𑀸𑀤𑀺𑀦𑀸 𑀧𑀦.

𑁧𑁩𑁯𑁧. 𑀢𑀣𑁂𑀯 𑀧𑀘𑁆𑀘𑀬𑀢𑁆𑀢𑁂𑀦, 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀦𑀸𑀫 𑀲𑁄;

𑀬𑀣𑀸 𑀧𑀸𑀭𑀁 𑀧𑀦 𑀏𑀯𑀁, 𑀦𑀺𑀭𑁄𑀥𑀸𑀭𑀫𑁆𑀫𑀡𑀁 𑀪𑀯𑁂.

𑁧𑁩𑁯𑁨. 𑀮𑁄𑀓𑀼𑀢𑁆𑀢𑀭𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀬𑀸 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸;

𑀲𑀸 𑀲𑀗𑁆𑀔𑁂𑀧𑀦𑀬𑁂𑀦𑁂𑀯𑀁, 𑀫𑀬𑀸 𑀲𑀸𑀥𑀼 𑀧𑀓𑀸𑀲𑀺𑀢𑀸.

𑁧𑁩𑁯𑁩. 𑀓𑁄 𑀳𑀺 𑀦𑀸𑀫 𑀦𑀭𑁄 𑀮𑁄𑀓𑁂,

𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀯𑀳𑀁;

𑀪𑀸𑀯𑀦𑀁 𑀧𑀦 𑀧𑀜𑁆𑀜𑀸𑀬,

𑀦 𑀘 𑀪𑀸𑀯𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁧𑁩𑁯𑁪. 𑀇𑀫𑀁 𑀯𑀺𑀤𑀺𑀢𑁆𑀯𑀸 𑀳𑀺𑀢𑀪𑀸𑀯𑀦𑀁 𑀯𑀦𑀁,

𑀉𑀧𑁂𑀢𑀺 𑀬𑁄 𑀯𑁂 𑀲𑀼𑀔𑀲𑀁𑀳𑀺𑀢𑀁 𑀳𑀺𑀢𑀁;

𑀯𑀺𑀥𑀽𑀬 𑀘𑀺𑀢𑁆𑀢𑀲𑁆𑀲 𑀅𑀦𑀼𑀢𑁆𑀢𑀫𑀁 𑀢𑀫𑀁,

𑀉𑀧𑁂𑀢𑀺 𑀘𑀸𑀯𑀺𑀕𑁆𑀕𑀳𑀓𑀫𑁆𑀧𑀤𑀁 𑀧𑀤𑀁.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀢𑁂𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.