𑁨𑁨. 𑀩𑀸𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁩𑁧𑁯. 𑀇𑀢𑁄 𑀧𑀭𑀁 𑀢𑀼 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀕𑁄𑀢𑁆𑀭𑀪𑀼𑀫𑀸𑀦𑀲𑀁;

𑀆𑀯𑀚𑁆𑀚𑀦𑀺𑀬𑀞𑀸𑀦𑀢𑁆𑀢𑀸, 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀢𑀁 𑀧𑀦.

𑁧𑁩𑁨𑁦. 𑀦 𑀘𑀧𑁆𑀧𑀝𑀺𑀧𑀤𑀸𑀜𑀸𑀡-𑀤𑀲𑁆𑀲𑀦𑀁 𑀯𑀸 𑀢𑀣𑁂𑀯 𑀘;

𑀜𑀸𑀡𑀤𑀲𑁆𑀲𑀦𑀲𑀼𑀤𑁆𑀥𑀺𑀁 𑀯𑀸, 𑀪𑀚𑀢𑁂 𑀦 𑀓𑀼𑀤𑀸𑀘𑀦𑀁.

𑁧𑁩𑁨𑁧. 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 𑀏𑀢𑀁, 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯 𑀢𑀁;

𑀯𑀺𑀧𑀲𑁆𑀲𑀦𑀸𑀬 𑀲𑁄𑀢𑀲𑁆𑀫𑀺𑀁, 𑀧𑀢𑀺𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸.

𑁧𑁩𑁨𑁨. 𑀧𑁄𑀣𑀼𑀚𑁆𑀚𑀦𑀺𑀓𑀕𑁄𑀢𑁆𑀢𑀁 𑀯𑀸, 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀺𑀢𑁄;

𑀕𑁄𑀢𑁆𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀢𑁄 𑀪𑀯𑀢𑀺 𑀕𑁄𑀢𑁆𑀭𑀪𑀼.

𑁧𑁩𑁨𑁩. 𑀜𑀸𑀡𑀁 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼, 𑀜𑀸𑀡𑀤𑀲𑁆𑀲𑀦𑀲𑀼𑀤𑁆𑀥𑀺𑀓𑀁;

𑀢𑀢𑁆𑀣 𑀢𑀁 𑀧𑀞𑀫𑀁 𑀫𑀕𑁆𑀕𑀁, 𑀲𑀫𑁆𑀧𑀸𑀤𑁂𑀢𑀼𑀁 𑀧𑀦𑀺𑀘𑁆𑀙𑀢𑀸.

𑁧𑁩𑁨𑁪. 𑀅𑀜𑁆𑀜𑀁 𑀓𑀺𑀜𑁆𑀘𑀺𑀧𑀺 𑀓𑀸𑀢𑀩𑁆𑀩𑀁, 𑀪𑀺𑀓𑁆𑀔𑀼𑀦𑀸 𑀢𑁂𑀦 𑀦𑀢𑁆𑀣𑀺 𑀢𑀁;

𑀬𑀜𑁆𑀳𑀺 𑀢𑁂𑀦 𑀘 𑀓𑀸𑀢𑀩𑁆𑀩𑀁, 𑀲𑀺𑀬𑀸 𑀢𑀁 𑀓𑀢𑀫𑁂𑀯 𑀢𑀼.

𑁧𑁩𑁨𑁫. 𑀅𑀦𑀼𑀮𑁄𑀫𑀸𑀯𑀲𑀸𑀦𑀜𑁆𑀳𑀺, 𑀲𑀽𑀭𑀁 𑀢𑀺𑀓𑁆𑀔𑀁 𑀯𑀺𑀧𑀲𑁆𑀲𑀦𑀁;

𑀉𑀧𑁆𑀧𑀸𑀤𑁂𑀦𑁆𑀢𑁂𑀦 𑀢𑀁 𑀲𑀩𑁆𑀩𑀁, 𑀓𑀢𑀫𑁂𑀯 𑀘 𑀬𑁄𑀕𑀺𑀦𑀸.

𑁧𑁩𑁨𑁬. 𑀢𑀲𑁆𑀲𑀸𑀦𑀼𑀮𑁄𑀫𑀜𑀸𑀡𑀲𑁆𑀲, 𑀅𑀦𑁆𑀢𑁂 𑀢𑀼 𑀅𑀦𑀺𑀫𑀺𑀢𑁆𑀢𑀓𑀁;

𑀯𑀺𑀲𑀗𑁆𑀔𑀸𑀭𑀁 𑀦𑀺𑀭𑁄𑀥𑀜𑁆𑀘, 𑀦𑀺𑀩𑁆𑀩𑀸𑀦𑀁 𑀅𑀫𑀢𑀁 𑀧𑀤𑀁.

𑁧𑁩𑁨𑁭. 𑀕𑁄𑀘𑀭𑀁 𑀓𑀼𑀭𑀼𑀫𑀸𑀦𑀁 𑀢𑀁, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀧𑀦;

𑀧𑀞𑀫𑀸𑀯𑀚𑁆𑀚𑀦𑀜𑁆𑀘𑁂𑀯, 𑀧𑀞𑀫𑀸𑀪𑁄𑀕𑀢𑀸𑀧𑀺 𑀘.

𑁧𑁩𑁨𑁮. 𑀫𑀕𑁆𑀕𑀲𑁆𑀲𑀸𑀦𑀦𑁆𑀢𑀭𑀸𑀤𑀻𑀳𑀺, 𑀧𑀘𑁆𑀘𑀬𑁂𑀳𑀺 𑀧𑀦𑀘𑁆𑀙𑀳𑀺;

𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑀜𑁆𑀘, 𑀲𑀸𑀥𑀬𑀦𑁆𑀢𑀁 𑀢𑀢𑁄 𑀧𑀦.

𑁧𑁩𑁨𑁯. 𑀯𑀺𑀧𑀲𑁆𑀲𑀦𑀸𑀬 𑀫𑀼𑀤𑁆𑀥𑀜𑁆𑀳𑀺, 𑀲𑀺𑀔𑀸𑀧𑀢𑁆𑀢𑀸𑀬 𑀢𑀸𑀬 𑀢𑀁;

𑀉𑀧𑁆𑀧𑀚𑁆𑀚𑀢𑀺 𑀅𑀦𑀸𑀯𑀢𑁆𑀢𑀁-𑀭𑀫𑁆𑀫𑀡𑀁 𑀢𑀲𑁆𑀲 𑀕𑁄𑀢𑁆𑀭𑀪𑀼.

𑁧𑁩𑁩𑁦. 𑀏𑀓𑁂𑀦𑀸𑀯𑀚𑁆𑀚𑀦𑁂𑀦𑁂𑀯, 𑀏𑀓𑀺𑀲𑁆𑀲𑀸𑀬𑁂𑀯 𑀯𑀻𑀣𑀺𑀬𑀸;

𑀦𑀸𑀦𑀸𑀭𑀫𑁆𑀫𑀡𑀢𑀸 𑀘𑀸𑀦𑀼-𑀮𑁄𑀫𑀕𑁄𑀢𑁆𑀭𑀪𑀼𑀘𑁂𑀢𑀲𑀁.

𑁧𑁩𑁩𑁧. 𑀞𑀢𑁆𑀯𑀸 𑀆𑀯𑀚𑁆𑀚𑀦𑀝𑁆𑀞𑀸𑀦𑁂, 𑀢𑀫𑀦𑀸𑀯𑀚𑁆𑀚𑀦𑀫𑁆𑀧𑀺 𑀘;

𑀫𑀕𑁆𑀕𑀲𑁆𑀲 𑀧𑀦 𑀢𑀁 𑀲𑀜𑁆𑀜𑀁, 𑀤𑀢𑁆𑀯𑀸 𑀯𑀺𑀬 𑀦𑀺𑀭𑀼𑀚𑁆𑀛𑀢𑀺.

𑁧𑁩𑁩𑁨. 𑀫𑀕𑁆𑀕𑁄𑀧𑀺 𑀢𑁂𑀦 𑀢𑀁 𑀤𑀺𑀦𑁆𑀦𑀁, 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀜𑁆𑀳𑀺𑀢𑀁;

𑀢𑀁 𑀜𑀸𑀡𑀫𑀦𑀼𑀩𑀦𑁆𑀥𑀦𑁆𑀢𑁄, 𑀚𑀸𑀬𑀢𑁂 𑀢𑀤𑀦𑀦𑁆𑀢𑀭𑀁.

𑁧𑁩𑁩𑁩. 𑀓𑀤𑀸𑀘𑀺𑀧𑀺 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀫𑀕𑁆𑀕𑁄 𑀧𑀦𑁂𑀲 𑀳𑀺;

𑀮𑁄𑀪𑀁 𑀤𑁄𑀲𑀜𑁆𑀘 𑀫𑁄𑀳𑀜𑁆𑀘, 𑀯𑀺𑀤𑁆𑀥𑀁𑀲𑀦𑁆𑀢𑁄𑀯 𑀚𑀸𑀬𑀢𑀺.

𑁧𑁩𑁩𑁪. 𑀦 𑀓𑁂𑀯𑀮𑀫𑀬𑀁 𑀫𑀕𑁆𑀕𑁄, 𑀤𑁄𑀲𑀦𑀸𑀲𑀦𑀫𑁂𑀯 𑀘;

𑀓𑀭𑁄𑀢𑀺 𑀅𑀣 𑀔𑁄𑀧𑀸𑀬𑀤𑁆𑀯𑀸𑀭𑀸𑀦𑀺𑀧𑀺 𑀧𑀺𑀥𑁂𑀢𑀺 𑀘.

𑁧𑁩𑁩𑁫. 𑀅𑀦𑀸𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀫𑀳𑁄𑀤𑀥𑀺𑀁;

𑀅𑀧𑀸𑀭𑀫𑀢𑀺𑀖𑁄𑀭𑀜𑁆𑀘, 𑀲𑁄𑀲𑁂𑀢𑀺 𑀘 𑀅𑀲𑁂𑀲𑀢𑁄.

𑁧𑁩𑁩𑁬. 𑀫𑀺𑀘𑁆𑀙𑀸𑀫𑀕𑁆𑀕𑀁 𑀧𑀦𑀝𑁆𑀞𑀗𑁆𑀕𑀁, 𑀚𑀸𑀬𑀫𑀸𑀦𑁄 𑀘 𑀉𑀚𑁆𑀛𑀢𑀺;

𑀲𑀩𑁆𑀩𑀯𑁂𑀭𑀪𑀬𑀸𑀦𑁂𑀢𑁆𑀣, 𑀦𑀺𑀘𑁆𑀘𑀁 𑀯𑀽𑀧𑀲𑀫𑁂𑀢𑀺 𑀘.

𑁧𑁩𑁩𑁭. 𑀩𑀼𑀤𑁆𑀥𑀲𑁆𑀲𑁄𑀭𑀲𑀧𑀼𑀢𑁆𑀢𑀢𑁆𑀢𑀁, 𑀉𑀧𑀦𑁂𑀢𑀺 𑀦𑀬𑀁 𑀧𑀦;

𑀆𑀦𑀺𑀲𑀁𑀲𑁂 𑀅𑀦𑁂𑀓𑁂𑀧𑀺, 𑀧𑀯𑀢𑁆𑀢𑀬𑀢𑀺 𑀬𑁄𑀕𑀺𑀦𑁄.

𑁧𑁩𑁩𑁮. 𑀤𑀸𑀬𑀓𑁂𑀦𑀸𑀦𑀺𑀲𑀁𑀲𑀸𑀦𑀁, 𑀅𑀦𑁂𑀓𑁂𑀲𑀫𑀦𑁂𑀦 𑀘;

𑀆𑀤𑀺𑀫𑀕𑁆𑀕𑁂𑀦 𑀲𑀁𑀬𑀼𑀢𑁆𑀢𑀁, 𑀜𑀸𑀡𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀁.

𑀧𑀞𑀫𑀫𑀕𑁆𑀕𑀜𑀸𑀡𑀁.

𑁧𑁩𑁩𑁯. 𑀢𑀲𑁆𑀲𑁂𑀯𑀸𑀦𑀦𑁆𑀢𑀭𑀁 𑀢𑀲𑁆𑀲, 𑀯𑀺𑀧𑀸𑀓𑀸 𑀤𑁆𑀯𑁂𑀧𑀺 𑀢𑀻𑀡𑀺 𑀯𑀸;

𑀨𑀮𑀘𑀺𑀢𑁆𑀢𑀸𑀦𑀺 𑀚𑀸𑀬𑀦𑁆𑀢𑁂, 𑀦 𑀚𑀸𑀬𑀦𑁆𑀢𑁂 𑀢𑀢𑁄 𑀧𑀭𑀁.

𑁧𑁩𑁪𑁦. 𑀓𑁂𑀘𑀺 𑀏𑀓𑀜𑁆𑀘 𑀤𑁆𑀯𑁂 𑀢𑀻𑀡𑀺, 𑀘𑀢𑁆𑀢𑀸𑀭𑀻𑀢𑀺 𑀯𑀤𑀦𑁆𑀢𑀺 𑀢𑀼;

𑀦 𑀧𑀦𑁂𑀢𑀁 𑀕𑀳𑁂𑀢𑀩𑁆𑀩𑀁, 𑀅𑀚𑀸𑀦𑀺𑀢𑁆𑀯𑀸 𑀯𑀤𑀦𑁆𑀢𑀺 𑀢𑁂.

𑁧𑁩𑁪𑁧. 𑀏𑀓𑀲𑁆𑀲𑀸𑀲𑁂𑀯𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑁆𑀯𑁂 𑀅𑀦𑀼𑀮𑁄𑀫𑀓𑀸;

𑀢𑁂𑀳𑀺 𑀆𑀲𑁂𑀯𑀦𑀁 𑀮𑀤𑁆𑀥𑀸, 𑀢𑀢𑀺𑀬𑀁 𑀳𑁄𑀢𑀺 𑀕𑁄𑀢𑁆𑀭𑀪𑀼.

𑁧𑁩𑁪𑁨. 𑀘𑀢𑀼𑀢𑁆𑀣𑀁 𑀫𑀕𑁆𑀕𑀘𑀺𑀢𑁆𑀢𑀁 𑀢𑀼,

𑀢𑀲𑁆𑀫𑀸 𑀢𑀻𑀡𑀺 𑀨𑀮𑀸𑀦𑀺 𑀳𑀺;

𑀅𑀦𑀼𑀮𑁄𑀫𑀸 𑀢𑀬𑁄 𑀳𑁄𑀦𑁆𑀢𑀺,

𑀘𑀢𑀼𑀢𑁆𑀣𑀁 𑀳𑁄𑀢𑀺 𑀕𑁄𑀢𑁆𑀭𑀪𑀼.

𑁧𑁩𑁪𑁩. 𑀧𑀜𑁆𑀘𑀫𑀁 𑀫𑀕𑁆𑀕𑀘𑀺𑀢𑁆𑀢𑀜𑁆𑀘, 𑀨𑀮𑀸𑀦𑀺 𑀤𑁆𑀯𑁂 𑀢𑀢𑁄 𑀧𑀦;

𑀲𑀢𑁆𑀢𑀘𑀺𑀢𑁆𑀢𑀧𑀭𑀫𑀸𑀯, 𑀏𑀓𑀸𑀯𑀚𑁆𑀚𑀦𑀯𑀻𑀣𑀺 𑀳𑀺.

𑁧𑁩𑁪𑁪. 𑀏𑀢𑁆𑀢𑀸𑀯𑀢𑀸 𑀧𑀦𑁂𑀲𑁄 𑀳𑀺, 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺;

𑀨𑀮𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀪𑀯𑀗𑁆𑀕𑁄𑀢𑁆𑀢𑀭𑀡𑀁 𑀲𑀺𑀬𑀸.

𑁧𑁩𑁪𑁫. 𑀢𑀢𑁄 𑀪𑀯𑀗𑁆𑀕𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀫𑀕𑁆𑀕𑀧𑁂𑀓𑁆𑀔𑀦𑀳𑁂𑀢𑀼𑀓𑀁;

𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀤𑁆𑀯𑀸𑀭𑁂, 𑀆𑀯𑀚𑁆𑀚𑀦𑀫𑀦𑁄 𑀧𑀦.

𑁧𑁩𑁪𑁬. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀫𑀕𑁆𑀕𑀲𑁆𑀲, 𑀧𑀘𑁆𑀘𑀯𑁂𑀓𑁆𑀔𑀡𑀲𑀜𑁆𑀜𑀺𑀢𑀸;

𑀚𑀯𑀦𑀸𑀦𑀺 𑀳𑀺 𑀚𑀸𑀬𑀦𑁆𑀢𑁂, 𑀲𑀢𑁆𑀢𑁂𑀯 𑀧𑀝𑀺𑀧𑀸𑀝𑀺𑀬𑀸.

𑁧𑁩𑁪𑁭. 𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀨𑀮𑀸𑀤𑀻𑀦𑀫𑁆𑀧𑀺 𑀧𑁂𑀓𑁆𑀔𑀦𑁂;

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀪𑀯𑀦𑁆𑀢𑁂𑀓𑀽𑀦𑀯𑀻𑀲𑀢𑀺.

𑁧𑁩𑁪𑁮. 𑀫𑀕𑁆𑀕𑁄 𑀨𑀮𑀁 𑀧𑀳𑀻𑀦𑀸 𑀘, 𑀓𑀺𑀮𑁂𑀲𑀸 𑀅𑀯𑀲𑀺𑀝𑁆𑀞𑀓𑀸;

𑀦𑀺𑀩𑁆𑀩𑀸𑀦𑀜𑁆𑀘𑁂𑀢𑀺 𑀧𑀜𑁆𑀘𑁂𑀢𑁂, 𑀧𑀘𑁆𑀘𑀯𑁂𑀓𑁆𑀔𑀡𑀪𑀽𑀫𑀺𑀬𑁄.

𑁧𑁩𑁪𑁯. 𑀏𑀯𑀁 𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀲𑁄𑀢𑀸𑀧𑀦𑁆𑀦𑁄𑀧𑀧𑀢𑁆𑀢𑀺𑀬𑀸;

𑀬𑁄𑀕𑀫𑀸𑀭𑀪𑀢𑁂 𑀥𑀻𑀭𑁄, 𑀤𑀼𑀢𑀺𑀬𑀸𑀬 𑀘 𑀪𑀽𑀫𑀺𑀬𑀸.

𑁧𑁩𑁫𑁦. 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀁, 𑀢𑀁 𑀲𑀗𑁆𑀔𑀸𑀭𑀕𑀢𑀁 𑀧𑀼𑀦;

𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺, 𑀜𑀸𑀡𑁂𑀦 𑀧𑀭𑀺𑀫𑀚𑁆𑀚𑀢𑀺.

𑁧𑁩𑁫𑁧. 𑀢𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺-𑀫𑁄𑀕𑀸𑀳𑀢𑀺 𑀘 𑀢𑀸𑀯𑀤𑁂;

𑀢𑀲𑁆𑀲𑁂𑀯𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀢𑀼.

𑁧𑁩𑁫𑁨. 𑀢𑀢𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬, 𑀅𑀯𑀲𑀸𑀦𑁂 𑀢𑀣𑁂𑀯 𑀘;

𑀏𑀓𑀸𑀯𑀚𑁆𑀚𑀦𑀯𑀸𑀭𑀲𑁆𑀫𑀺𑀁, 𑀕𑁄𑀢𑁆𑀭𑀪𑀼𑀲𑁆𑀲 𑀅𑀦𑀦𑁆𑀢𑀭𑀁.

𑁧𑁩𑁫𑁩. 𑀩𑁆𑀬𑀸𑀧𑀸𑀤𑀓𑀸𑀫𑀭𑀸𑀕𑀸𑀦𑀁, 𑀢𑀦𑀼𑀪𑀸𑀯𑀁 𑀢𑀼 𑀲𑀸𑀥𑀬𑀁;

𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄𑀬𑀁, 𑀚𑀸𑀬𑀢𑁂 𑀤𑀼𑀢𑀺𑀬𑁄 𑀧𑀦.

𑀤𑀼𑀢𑀺𑀬𑀫𑀕𑁆𑀕𑀜𑀸𑀡𑀁.

𑁧𑁩𑁫𑁪. 𑀇𑀫𑀲𑁆𑀲𑀸𑀧𑀺 𑀘 𑀜𑀸𑀡𑀲𑁆𑀲, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑀺𑀥;

𑀨𑀮𑀘𑀺𑀢𑁆𑀢𑀸𑀦𑀺 𑀜𑁂𑀬𑁆𑀬𑀸𑀦𑀺, 𑀯𑀺𑀜𑁆𑀜𑀼𑀦𑀸 𑀤𑁆𑀯𑁂𑀧𑀺 𑀢𑀻𑀡𑀺 𑀯𑀸.

𑁧𑁩𑁫𑁫. 𑀏𑀢𑁆𑀢𑀸𑀯𑀢𑀸 𑀧𑀦𑁂𑀲𑁄 𑀳𑀺, 𑀲𑀓𑀤𑀸𑀕𑀸𑀫𑀺 𑀦𑀸𑀫𑀬𑀁;

𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁, 𑀆𑀕𑀦𑁆𑀢𑁆𑀯𑀸𑀦𑁆𑀢𑀓𑀭𑁄 𑀪𑀯𑁂.

𑁧𑁩𑁫𑁬. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀧𑀜𑁆𑀘𑀥𑀸 𑀧𑀘𑁆𑀘𑀯𑁂𑀓𑁆𑀔𑀡𑀁;

𑀏𑀯𑀁 𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀲𑀓𑀤𑀸𑀕𑀸𑀫𑀺𑀧𑀢𑁆𑀢𑀺𑀬𑀸.

𑁧𑁩𑁫𑁭. 𑀬𑁄𑀕𑀫𑀸𑀭𑀪𑀢𑁂 𑀥𑀻𑀭𑁄, 𑀢𑀢𑀺𑀬𑀸𑀬 𑀘 𑀪𑀽𑀫𑀺𑀬𑀸;

𑀩𑁆𑀬𑀸𑀧𑀸𑀤𑀓𑀸𑀫𑀭𑀸𑀕𑀸𑀦𑀁, 𑀧𑀳𑀸𑀦𑀸𑀬 𑀘 𑀧𑀡𑁆𑀟𑀺𑀢𑁄.

𑁧𑁩𑁫𑁮. 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀁, 𑀢𑀁 𑀲𑀗𑁆𑀔𑀸𑀭𑀕𑀢𑀁 𑀧𑀦;

𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺, 𑀜𑀸𑀡𑁂𑀦 𑀧𑀭𑀺𑀫𑀚𑁆𑀚𑀢𑀺.

𑁧𑁩𑁫𑁯. 𑀢𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺-𑀫𑁄𑀕𑀸𑀳𑀢𑀺 𑀘 𑀢𑀸𑀯𑀤𑁂;

𑀢𑀲𑁆𑀲𑁂𑀯𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀢𑀼.

𑁧𑁩𑁬𑁦. 𑀢𑀢𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬, 𑀅𑀯𑀲𑀸𑀦𑁂 𑀢𑀣𑁂𑀯 𑀘;

𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀫𑁆𑀳𑀺, 𑀕𑁄𑀢𑁆𑀭𑀪𑀼𑀲𑁆𑀲 𑀅𑀦𑀦𑁆𑀢𑀭𑀁.

𑁧𑁩𑁬𑁧. 𑀩𑁆𑀬𑀸𑀧𑀸𑀤𑀓𑀸𑀫𑀭𑀸𑀕𑀸𑀦𑀁, 𑀫𑀽𑀮𑀖𑀸𑀢𑀁 𑀢𑀼 𑀲𑀸𑀥𑀬𑀁;

𑀢𑀲𑁆𑀲𑀸𑀦𑀸𑀕𑀸𑀫𑀺𑀫𑀕𑁆𑀕𑁄𑀬𑀁, 𑀚𑀸𑀬𑀢𑁂 𑀢𑀢𑀺𑀬𑁄 𑀧𑀦.

𑀢𑀢𑀺𑀬𑀫𑀕𑁆𑀕𑀜𑀸𑀡𑀁.

𑁧𑁩𑁬𑁨. 𑀇𑀫𑀲𑁆𑀲𑀸𑀧𑀺 𑀘 𑀜𑀸𑀡𑀲𑁆𑀲, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑀺𑀥;

𑀧𑀯𑀢𑁆𑀢𑀺 𑀨𑀮𑀘𑀺𑀢𑁆𑀢𑀸𑀦𑀁, 𑀯𑁂𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁧𑁩𑁬𑁩. 𑀏𑀢𑁆𑀢𑀸𑀯𑀢𑀸 𑀧𑀦𑁂𑀲𑁄𑀧𑀺, 𑀳𑁄𑀢𑀺𑀦𑀸𑀕𑀸𑀫𑀺 𑀦𑀸𑀫𑀬𑀁;

𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀦𑀸𑀯𑀢𑁆𑀢𑀺𑀲𑀪𑀸𑀯𑀢𑁄.

𑁧𑁩𑁬𑁪. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀧𑀜𑁆𑀘𑀥𑀸 𑀧𑀘𑁆𑀘𑀯𑁂𑀓𑁆𑀔𑀡𑀁;

𑀏𑀯𑀁 𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀅𑀦𑀸𑀕𑀸𑀫𑀺𑀭𑀺𑀬𑀲𑀸𑀯𑀓𑁄.

𑁧𑁩𑁬𑁫. 𑀬𑁄𑀕𑀫𑀸𑀭𑀪𑀢𑁂 𑀥𑀻𑀭𑁄, 𑀘𑀢𑀼𑀢𑁆𑀣𑀸𑀬 𑀘 𑀪𑀽𑀫𑀺𑀬𑀸;

𑀧𑀢𑁆𑀢𑀺𑀬𑀸𑀭𑀽𑀧𑀭𑀸𑀕𑀸𑀤𑀺-𑀧𑀳𑀸𑀦𑀸𑀬 𑀘 𑀧𑀡𑁆𑀟𑀺𑀢𑁄.

𑁧𑁩𑁬𑁬. 𑀢𑀣𑁂𑀯 𑀲𑀗𑁆𑀔𑀸𑀭𑀕𑀢𑀁, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑁄;

𑀧𑀭𑀺𑀯𑀢𑁆𑀢𑀢𑀺 𑀜𑀸𑀡𑁂𑀦, 𑀢𑀣𑁂𑀯 𑀧𑀭𑀺𑀫𑀚𑁆𑀚𑀢𑀺.

𑁧𑁩𑁬𑁭. 𑀢𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺-𑀫𑁄𑀕𑀸𑀳𑀢𑀺 𑀘 𑀢𑀸𑀯𑀤𑁂;

𑀢𑀲𑁆𑀲𑁂𑀯𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀢𑀼.

𑁧𑁩𑁬𑁮. 𑀢𑀢𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬, 𑀅𑀯𑀲𑀸𑀦𑁂 𑀢𑀣𑁂𑀯 𑀘;

𑀏𑀓𑀸𑀯𑀚𑁆𑀚𑀦𑀯𑀸𑀭𑀲𑁆𑀫𑀺𑀁, 𑀕𑁄𑀢𑁆𑀭𑀪𑀼𑀲𑁆𑀲 𑀅𑀦𑀦𑁆𑀢𑀭𑀁.

𑁧𑁩𑁬𑁯. 𑀢𑀲𑁆𑀲𑀸𑀭𑀳𑀢𑁆𑀢𑀫𑀕𑁆𑀕𑁄𑀬𑀁,

𑀚𑀸𑀬𑀢𑁂 𑀢𑀼 𑀢𑀢𑁄 𑀧𑀭𑀁;

𑀭𑀽𑀧𑀭𑀸𑀕𑀸𑀤𑀺𑀤𑁄𑀲𑀸𑀦𑀁,

𑀯𑀺𑀤𑁆𑀥𑀁𑀲𑀸𑀬 𑀓𑀭𑁄 𑀧𑀦.

𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀁.

𑁧𑁩𑁭𑁦. 𑀇𑀫𑀲𑁆𑀲𑀸𑀧𑀺 𑀘 𑀜𑀸𑀡𑀲𑁆𑀲, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑀺𑀥;

𑀧𑀯𑀢𑁆𑀢𑀺 𑀨𑀮𑀘𑀺𑀢𑁆𑀢𑀸𑀦𑀁, 𑀯𑁂𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁧𑁩𑁭𑁧. 𑀏𑀢𑁆𑀢𑀸𑀯𑀢𑀸 𑀧𑀦𑁂𑀲𑁄 𑀳𑀺,

𑀅𑀭𑀳𑀸 𑀦𑀸𑀫 𑀅𑀝𑁆𑀞𑀫𑁄;

𑀅𑀭𑀺𑀬𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺,

𑀫𑀳𑀸𑀔𑀻𑀡𑀸𑀲𑀯𑁄 𑀅𑀬𑀁.

𑁧𑁩𑁭𑁨. 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀘,

𑀔𑀻𑀡𑀲𑀁𑀬𑁄𑀚𑀦𑁄 𑀫𑀼𑀦𑀺;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲,

𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀦𑀼𑀢𑁆𑀢𑀭𑁄.

𑁧𑁩𑁭𑁩. 𑀏𑀢𑁆𑀢𑀸𑀯𑀢𑀸 𑀘𑀢𑀲𑁆𑀲𑁄𑀧𑀺, 𑀜𑀸𑀡𑀤𑀲𑁆𑀲𑀦𑀲𑀼𑀤𑁆𑀥𑀺𑀬𑁄;

𑀳𑀺𑀢𑀢𑁆𑀣𑀸𑀬 𑀘 𑀪𑀺𑀓𑁆𑀔𑀽𑀦𑀁, 𑀲𑀗𑁆𑀔𑁂𑀧𑁂𑀦𑁂𑀯 𑀤𑀲𑁆𑀲𑀺𑀢𑀸.

𑁧𑁩𑁭𑁪. 𑀲𑀤𑁆𑀥𑁂𑀦 𑀲𑀫𑁆𑀫𑀸 𑀧𑀦 𑀪𑀸𑀯𑀦𑀻𑀬𑀸,

𑀅𑀭𑀺𑀬𑀸𑀬 𑀧𑀜𑁆𑀜𑀸𑀬 𑀘 𑀪𑀸𑀯𑀦𑀸𑀬;

𑀯𑀺𑀲𑀼𑀤𑁆𑀥𑀺𑀓𑀸𑀫𑁂𑀦 𑀢𑀧𑁄𑀥𑀦𑁂𑀦,

𑀪𑀯𑀓𑁆𑀔𑀬𑀁 𑀧𑀢𑁆𑀣𑀬𑀢𑀸 𑀩𑀼𑀥𑁂𑀦.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀩𑀸𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.