𑁨𑁧. 𑀏𑀓𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁨𑁯𑁮. 𑀅𑀝𑁆𑀞𑀜𑀸𑀡𑀯𑀲𑁂𑀦𑁂𑀯, 𑀲𑀺𑀔𑀸𑀧𑀓𑁆𑀓𑀸 𑀯𑀺𑀧𑀲𑁆𑀲𑀦𑀸;

𑀦𑀯𑀫𑀁 𑀧𑀝𑀺𑀧𑀤𑀸𑀜𑀸𑀡-𑀤𑀲𑁆𑀲𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁨𑁯𑁯. 𑀅𑀝𑁆𑀞 𑀜𑀸𑀡𑀸𑀦𑀺 𑀦𑀸𑀫𑁂𑀢𑁆𑀣, 𑀯𑁂𑀤𑀺𑀢𑀩𑁆𑀩𑀸𑀦𑀺 𑀯𑀺𑀜𑁆𑀜𑀼𑀦𑀸;

𑀉𑀧𑀓𑁆𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀁, 𑀜𑀸𑀡𑀁 𑀲𑀼𑀯𑀺𑀲𑀤𑀁 𑀧𑀦.

𑁧𑁩𑁦𑁦. 𑀉𑀤𑀬𑀩𑁆𑀩𑀬𑁂 𑀘 𑀪𑀗𑁆𑀕𑁂 𑀘, 𑀪𑀬𑁂 𑀆𑀤𑀻𑀦𑀯𑁂 𑀢𑀣𑀸;

𑀦𑀺𑀩𑁆𑀩𑀺𑀤𑀸𑀧𑀲𑁆𑀲𑀦𑀸𑀜𑀸𑀡𑀁, 𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸.

𑁧𑁩𑁦𑁧. 𑀧𑀝𑀺𑀲𑀗𑁆𑀔𑀸 𑀘 𑀲𑀗𑁆𑀔𑀸𑀭𑁂, 𑀉𑀧𑁂𑀓𑁆𑀔𑀸𑀜𑀸𑀡𑀫𑀝𑁆𑀞𑀫𑀁;

𑀇𑀫𑀸𑀦𑀺 𑀅𑀝𑁆𑀞 𑀜𑀸𑀡𑀸𑀦𑀺, 𑀦𑀯𑀫𑀁 𑀲𑀘𑁆𑀘𑀸𑀦𑀼𑀮𑁄𑀫𑀓𑀁.

𑁧𑁩𑁦𑁨. 𑀲𑀘𑁆𑀘𑀸𑀦𑀼𑀮𑁄𑀫𑀜𑀸𑀡𑀦𑁆𑀢𑀺, 𑀅𑀦𑀼𑀮𑁄𑀫𑀁 𑀧𑀯𑀼𑀘𑁆𑀘𑀢𑀺;

𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦, 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀼𑀦𑀸.

𑁧𑁩𑁦𑁩. 𑀉𑀤𑀬𑀩𑁆𑀩𑀬𑀜𑀸𑀡𑀁 𑀢𑀁, 𑀆𑀤𑀺𑀁 𑀓𑀢𑁆𑀯𑀸 𑀧𑀦𑀝𑁆𑀞𑀲𑀼;

𑀏𑀢𑁂𑀲𑀼 𑀧𑀦 𑀜𑀸𑀡𑁂𑀲𑀼, 𑀬𑁄𑀕𑁄 𑀓𑀭𑀡𑀺𑀬𑁄 𑀧𑀦.

𑁧𑁩𑁦𑁪. 𑀬𑀣𑀸𑀦𑀼𑀓𑁆𑀓𑀫𑀢𑁄 𑀢𑀲𑁆𑀲, 𑀢𑁂𑀲𑀼 𑀜𑀸𑀡𑁂𑀲𑀼 𑀅𑀝𑁆𑀞𑀲𑀼;

𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦𑁂𑀯, 𑀬𑁄𑀕𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀳𑀺.

𑁧𑁩𑁦𑁫. 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺, 𑀲𑀗𑁆𑀔𑀸𑀭𑁂 𑀅𑀦𑀼𑀧𑀲𑁆𑀲𑀢𑁄;

𑀅𑀝𑁆𑀞𑀦𑁆𑀦𑀁 𑀧𑀦 𑀜𑀸𑀡𑀸𑀦𑀁, 𑀯𑀲𑁂𑀦 𑀧𑀦 𑀬𑁄𑀕𑀺𑀦𑁄.

𑁧𑁩𑁦𑁬. 𑀯𑀺𑀧𑀲𑁆𑀲𑀦𑀸 𑀲𑀺𑀔𑀸𑀧𑀢𑁆𑀢𑀸, 𑀳𑁄𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻;

𑀲𑀘𑁆𑀘𑀸𑀦𑀼𑀮𑁄𑀫𑀜𑀸𑀡𑀦𑁆𑀢𑀺, 𑀅𑀬𑀫𑁂𑀯 𑀧𑀯𑀼𑀘𑁆𑀘𑀢𑀺.

𑁧𑁩𑁦𑁭. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀢𑀁, 𑀆𑀲𑁂𑀯𑀦𑁆𑀢𑀲𑁆𑀲 𑀬𑁄𑀕𑀺𑀦𑁄;

𑀇𑀤𑀸𑀦𑀺 𑀢𑀲𑁆𑀲 𑀫𑀕𑁆𑀕𑁄 𑀘, 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀳𑀺.

𑁧𑁩𑁦𑁮. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀗𑁆𑀔𑀸𑀭𑁂, 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸𑀢𑀺 𑀯𑀸 𑀢𑀣𑀸;

𑀲𑀫𑁆𑀫𑀲𑀺𑀢𑁆𑀯𑀸 𑀪𑀯𑀗𑁆𑀕𑀁 𑀢𑀼, 𑀧𑀼𑀦 𑀯𑁄𑀢𑀭𑀢𑁂𑀯 𑀲𑀸.

𑁧𑁩𑁦𑁯. 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀲𑀗𑁆𑀔𑀸𑀭𑀼-𑀧𑁂𑀓𑁆𑀔𑀸𑀕𑀢𑀦𑀬𑁂𑀦 𑀢𑀼;

𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦𑁂𑀯, 𑀲𑀗𑁆𑀔𑀸𑀭𑁂 𑀧𑀦 𑀕𑁄𑀘𑀭𑀁.

𑁧𑁩𑁧𑁦. 𑀓𑀼𑀭𑀼𑀫𑀸𑀦𑀁 𑀫𑀦𑁄𑀤𑁆𑀯𑀸𑀭𑁂, 𑀚𑀸𑀬𑀢𑀸𑀯𑀚𑁆𑀚𑀦𑀁 𑀢𑀢𑁄;

𑀪𑀯𑀗𑁆𑀕𑀸𑀯𑀝𑁆𑀝𑀦𑀁 𑀓𑀢𑁆𑀯𑀸, 𑀚𑀸𑀢𑀲𑁆𑀲𑀸𑀦𑀦𑁆𑀢𑀭𑀁 𑀧𑀦.

𑁧𑁩𑁧𑁧. 𑀲𑀗𑁆𑀔𑀸𑀭𑁂 𑀕𑁄𑀘𑀭𑀁 𑀓𑀢𑁆𑀯𑀸, 𑀧𑀞𑀫𑀁 𑀚𑀯𑀦𑀫𑀸𑀦𑀲𑀁;

𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀁 𑀘𑀺𑀢𑁆𑀢𑀁, 𑀧𑀭𑀺𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁩𑁧𑁨. 𑀢𑀤𑀦𑀦𑁆𑀢𑀭𑀫𑁂𑀯𑀜𑁆𑀜𑀁, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀧𑀼𑀦;

𑀤𑀼𑀢𑀺𑀬𑀁 𑀚𑀯𑀦𑀁 𑀳𑁄𑀢𑀺, 𑀉𑀧𑀘𑀸𑀭𑀦𑁆𑀢𑀺 𑀢𑀁 𑀫𑀢𑀁.

𑁧𑁩𑁧𑁩. 𑀢𑀤𑀦𑀦𑁆𑀢𑀭𑀁 𑀢𑀁 𑀳𑁄𑀢𑀺, 𑀢𑀣𑀸 𑀲𑀗𑁆𑀔𑀸𑀭𑀕𑁄𑀘𑀭𑀁;

𑀢𑀢𑀺𑀬𑀁 𑀚𑀯𑀦𑀘𑀺𑀢𑁆𑀢𑀁, 𑀅𑀦𑀼𑀮𑁄𑀫𑀦𑁆𑀢𑀺 𑀲𑀜𑁆𑀜𑀺𑀢𑀁.

𑁧𑁩𑁧𑁪. 𑀧𑀼𑀭𑀺𑀫𑀸𑀦𑀁 𑀧𑀦𑀝𑁆𑀞𑀦𑁆𑀦𑀁, 𑀜𑀸𑀡𑀸𑀦𑀁 𑀅𑀦𑀼𑀮𑁄𑀫𑀢𑁄;

𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁, 𑀉𑀤𑁆𑀥𑀜𑁆𑀘 𑀅𑀦𑀼𑀮𑁄𑀫𑀢𑁄.

𑁧𑁩𑁧𑁫. 𑀢𑁂𑀦𑁂𑀯 𑀢𑀁 𑀳𑀺 𑀲𑀘𑁆𑀘𑀸𑀦𑀼𑀮𑁄𑀫𑀜𑀸𑀡𑀁 𑀧𑀯𑀼𑀘𑁆𑀘𑀢𑀺;

𑀇𑀤𑀁 𑀳𑀺 𑀧𑀦 𑀲𑀘𑁆𑀘𑀸𑀦𑀼-𑀮𑁄𑀫𑀜𑀸𑀡𑀁 𑀫𑀳𑁂𑀲𑀺𑀦𑀸.

𑁧𑁩𑁧𑁬. ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀬𑀸 𑀳𑀺, 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀪𑀸𑀲𑀺𑀢𑀁;

𑀜𑁂𑀬𑁆𑀬𑀁 𑀲𑀩𑁆𑀩𑀧𑀓𑀸𑀭𑁂𑀦, 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀕𑁄𑀢𑁆𑀭𑀪𑀼.

𑁧𑁩𑁧𑁭. 𑀇𑀢𑀺𑀦𑁂𑀓𑁂𑀳𑀺 𑀦𑀸𑀫𑁂𑀳𑀺, 𑀓𑀺𑀢𑁆𑀢𑀺𑀢𑀸𑀬𑀸 𑀫𑀳𑁂𑀲𑀺𑀦𑀸;

𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀲𑀦𑁆𑀢𑀸, 𑀧𑀭𑀺𑀲𑀼𑀤𑁆𑀥𑀸 𑀯𑀺𑀧𑀲𑁆𑀲𑀦𑀸.

𑁧𑁩𑁧𑁮. 𑀯𑀼𑀝𑁆𑀞𑀸𑀢𑀼𑀓𑀸𑀫𑁄 𑀲𑀁𑀲𑀸𑀭𑀤𑀼𑀓𑁆𑀔𑀧𑀗𑁆𑀓𑀸 𑀫𑀳𑀩𑁆𑀪𑀬𑀸;

𑀓𑀭𑁂𑀬𑁆𑀬 𑀲𑀢𑀢𑀁 𑀢𑀢𑁆𑀣, 𑀬𑁄𑀕𑀁 𑀧𑀡𑁆𑀟𑀺𑀢𑀚𑀸𑀢𑀺𑀓𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀏𑀓𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.