𑁨𑁦. 𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁨𑁬𑁩. 𑀓𑀮𑀸𑀧𑀲𑀫𑁆𑀫𑀲𑀦𑁂𑀦𑁂𑀯,

𑀬𑁄𑀕𑁄 𑀓𑀭𑀡𑀺𑀬𑁄 𑀲𑀺𑀬𑀸;

𑀫𑀕𑁆𑀕𑀸𑀫𑀕𑁆𑀕𑁂 𑀢𑀼 𑀜𑀸𑀡𑀁 𑀢-

𑀫𑀥𑀺𑀕𑀦𑁆𑀢𑀼𑀁 𑀧𑀦𑀺𑀘𑁆𑀙𑀢𑀸.

𑁧𑁨𑁬𑁪. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲, 𑀦𑀺𑀩𑁆𑀩𑀢𑁆𑀢𑀺 𑀉𑀤𑀬𑁄 𑀫𑀢𑁄;

𑀯𑀬𑁄 𑀯𑀺𑀧𑀭𑀺𑀡𑀸𑀫𑁄𑀢𑀺, 𑀢𑀲𑁆𑀲𑁂𑀯 𑀲𑀫𑀼𑀤𑀻𑀭𑀺𑀢𑀸.

𑁧𑁨𑁬𑁫. 𑀅𑀦𑀼𑀧𑀲𑁆𑀲𑀦𑀸𑀧𑀺 𑀜𑀸𑀡𑀦𑁆𑀢𑀺, 𑀯𑀭𑀜𑀸𑀡𑁂𑀦 𑀤𑁂𑀲𑀺𑀢𑀁;

𑀲𑁄 𑀧𑀦𑁂𑀯𑀁 𑀧𑀚𑀸𑀦𑀸𑀢𑀺, 𑀬𑁄𑀕𑀸𑀯𑀘𑀭𑀫𑀸𑀡𑀯𑁄.

𑁧𑁨𑁬𑁬. 𑀇𑀫𑀲𑁆𑀲 𑀦𑀸𑀫𑀭𑀽𑀧𑀲𑁆𑀲, 𑀧𑀼𑀩𑁆𑀩𑁂 𑀉𑀧𑁆𑀧𑀢𑁆𑀢𑀺𑀢𑁄 𑀧𑀦;

𑀦𑀺𑀘𑀬𑁄 𑀭𑀸𑀲𑀺 𑀯𑀸 𑀦𑀢𑁆𑀣𑀺, 𑀢𑀣𑀸 𑀉𑀧𑁆𑀧𑀚𑁆𑀚𑀢𑁄𑀧𑀺 𑀘.

𑁧𑁨𑁬𑁭. 𑀭𑀸𑀲𑀺𑀢𑁄 𑀦𑀺𑀘𑀬𑀸 𑀯𑀸𑀧𑀺, 𑀦𑀢𑁆𑀣𑀺 𑀆𑀕𑀫𑀦𑀦𑁆𑀢𑀺 𑀘;

𑀢𑀣𑀸 𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲, 𑀦 𑀤𑀺𑀲𑀸𑀕𑀫𑀦𑀦𑁆𑀢𑀺 𑀘.

𑁧𑁨𑁬𑁮. 𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺 𑀏𑀓𑀲𑁆𑀫𑀺𑀁, 𑀞𑀸𑀦𑁂 𑀦𑀢𑁆𑀣𑀺 𑀘𑀬𑁄𑀢𑀺 𑀘;

𑀏𑀢𑁆𑀣 𑀯𑀻𑀡𑀽𑀧𑀫𑀸 𑀯𑀼𑀢𑁆𑀢𑀸, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑁂.

𑁧𑁨𑁬𑁯. 𑀉𑀤𑀩𑁆𑀩𑀬𑀫𑀦𑀓𑁆𑀓𑀸𑀭𑀫𑁂𑀯𑀁 𑀲𑀗𑁆𑀔𑁂𑀧𑀢𑁄 𑀧𑀦;

𑀓𑀢𑁆𑀯𑀸 𑀢𑀲𑁆𑀲𑁂𑀯 𑀜𑀸𑀡𑀲𑁆𑀲, 𑀯𑀺𑀪𑀗𑁆𑀕𑀲𑁆𑀲 𑀯𑀲𑁂𑀦 𑀢𑀼.

𑁧𑁨𑁭𑁦. ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 𑀳𑀺 𑀆𑀤𑀺𑀦𑀸;

𑀦𑀬𑁂𑀦𑁂𑀓𑁂𑀓𑀔𑀦𑁆𑀥𑀲𑁆𑀲, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂.

𑁧𑁨𑁭𑁧. 𑀤𑀲 𑀤𑀲𑀸𑀢𑀺 𑀓𑀢𑁆𑀯𑀸𑀦, 𑀯𑀼𑀢𑁆𑀢𑀸 𑀧𑀜𑁆𑀜𑀸𑀲𑀮𑀓𑁆𑀔𑀡𑀸;

𑀢𑁂𑀲𑀁 𑀧𑀦 𑀯𑀲𑁂𑀦𑀸𑀧𑀺, 𑀥𑀫𑁆𑀫𑁂 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁨𑁭𑁨. 𑀏𑀯𑀁 𑀭𑀽𑀧𑀼𑀤𑀬𑁄 𑀳𑁄𑀢𑀺, 𑀏𑀯𑀫𑀲𑁆𑀲 𑀯𑀬𑁄 𑀇𑀢𑀺;

𑀉𑀤𑁂𑀢𑀺 𑀏𑀯𑀁 𑀭𑀽𑀧𑀫𑁆𑀧𑀺, 𑀏𑀯𑀁 𑀭𑀽𑀧𑀁 𑀢𑀼 𑀯𑁂𑀢𑀺 𑀘.

𑁧𑁨𑁭𑁩. 𑀏𑀯𑀁 𑀧𑀘𑁆𑀘𑀬𑀢𑁄𑀧𑁂𑀢𑁆𑀣, 𑀔𑀡𑀢𑁄 𑀉𑀤𑀬𑀩𑁆𑀩𑀬𑀁;

𑀧𑀲𑁆𑀲𑀢𑁄 𑀲𑀩𑁆𑀩𑀥𑀫𑁆𑀫𑀸 𑀘, 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀢𑀲𑁆𑀲 𑀢𑁂.

𑁧𑁨𑁭𑁪. 𑀉𑀤𑀓𑁂 𑀤𑀡𑁆𑀟𑀭𑀸𑀚𑀻𑀯, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄;

𑀯𑀺𑀚𑁆𑀚𑀼𑀧𑁆𑀧𑀸𑀤𑀸𑀯 𑀥𑀫𑁆𑀫𑀸 𑀢𑁂, 𑀧𑀭𑀺𑀢𑁆𑀢𑀝𑁆𑀞𑀸𑀬𑀺𑀦𑁄 𑀲𑀺𑀬𑀼𑀁.

𑁧𑁨𑁭𑁫. 𑀓𑀤𑀮𑀻𑀲𑀼𑀧𑀺𑀦𑀸𑀮𑀸𑀢𑀘𑀓𑁆𑀓𑀫𑀸𑀬𑀼𑀧𑀫𑀸 𑀇𑀫𑁂;

𑀅𑀲𑀸𑀭𑀸 𑀧𑀦 𑀦𑀺𑀲𑁆𑀲𑀸𑀭𑀸, 𑀳𑀼𑀢𑁆𑀯𑀸 𑀔𑀸𑀬𑀦𑁆𑀢𑀺 𑀬𑁄𑀕𑀺𑀦𑁄.

𑁧𑁨𑁭𑁬. 𑀏𑀯𑀫𑁂𑀢𑁆𑀢𑀸𑀯𑀢𑀸 𑀢𑁂𑀦, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀮𑀓𑁆𑀔𑀡𑀸𑀦𑀺 𑀘 𑀧𑀜𑁆𑀜𑀸𑀲, 𑀧𑀝𑀺𑀯𑀺𑀚𑁆𑀛 𑀞𑀺𑀢𑀁 𑀧𑀦.

𑁧𑁨𑁭𑁭. 𑀜𑀸𑀡𑀁 𑀅𑀥𑀺𑀕𑀢𑀁 𑀳𑁄𑀢𑀺, 𑀢𑀭𑀼𑀡𑀁 𑀧𑀞𑀫𑀁 𑀧𑀦;

𑀬𑀲𑁆𑀲 𑀘𑀸𑀥𑀺𑀕𑀫𑀸 𑀬𑁄𑀕𑀻, 𑀳𑁄𑀢𑀸𑀭𑀤𑁆𑀥𑀯𑀺𑀧𑀲𑁆𑀲𑀓𑁄.

𑁧𑁨𑁭𑁮. 𑀯𑀺𑀧𑀲𑁆𑀲𑀦𑀸𑀬 𑀳𑁂𑀢𑀸𑀬,

𑀓𑀭𑀼𑀡𑀸𑀬𑀸𑀣 𑀬𑁄𑀕𑀺𑀦𑁄;

𑀯𑀺𑀧𑀲𑁆𑀲𑀓𑀲𑁆𑀲 𑀚𑀸𑀬𑀦𑁆𑀢𑁂,

𑀉𑀧𑀓𑁆𑀮𑁂𑀲𑀸 𑀤𑀲𑁂𑀯𑀺𑀫𑁂.

𑁧𑁨𑁭𑁯. 𑀑𑀪𑀸𑀲𑁄 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺, 𑀜𑀸𑀡𑀁 𑀲𑀤𑁆𑀥𑀸 𑀲𑀢𑀻 𑀲𑀼𑀔𑀁;

𑀉𑀧𑁂𑀓𑁆𑀔𑀸 𑀯𑀻𑀭𑀺𑀬𑀁 𑀦𑀺𑀓𑀦𑁆𑀢𑀻𑀢𑀺, 𑀉𑀧𑀓𑁆𑀮𑁂𑀲𑀸 𑀤𑀲𑁂𑀯𑀺𑀫𑁂.

𑁧𑁨𑁮𑁦. 𑀲𑀫𑁆𑀧𑀢𑁆𑀢𑀧𑀝𑀺𑀯𑁂𑀥𑀲𑁆𑀲, 𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑁄𑀧𑀺 𑀘;

𑀢𑀣𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀲𑁆𑀲, 𑀉𑀧𑀓𑁆𑀮𑁂𑀲𑀸 𑀦 𑀚𑀸𑀬𑀭𑁂.

𑁧𑁨𑁮𑁧. 𑀲𑀫𑁆𑀫𑀸𑀯 𑀧𑀝𑀺𑀧𑀦𑁆𑀦𑀲𑁆𑀲, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀲𑀤𑀸 𑀯𑀺𑀧𑀲𑁆𑀲𑀓𑀲𑁆𑀲𑁂𑀯, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀺𑀭𑀲𑁆𑀲𑀼 𑀢𑁂.

𑁧𑁨𑁮𑁨. 𑀯𑀺𑀧𑀲𑁆𑀲𑀦𑀸𑀬 𑀑𑀪𑀸𑀲𑁄, 𑀑𑀪𑀸𑀲𑁄𑀢𑀺 𑀧𑀯𑀼𑀘𑁆𑀘𑀢𑀺;

𑀢𑀲𑁆𑀫𑀺𑀁 𑀧𑀦 𑀲𑀫𑀼𑀧𑁆𑀧𑀦𑁆𑀦𑁂, 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀼 𑀲𑁄.

𑁧𑁨𑁮𑁩. 𑀫𑀕𑁆𑀕𑀧𑁆𑀧𑀢𑁆𑀢𑁄 𑀨𑀮𑀧𑁆𑀧𑀢𑁆𑀢𑁄, 𑀅𑀳𑀫𑀲𑁆𑀫𑀻𑀢𑀺 𑀕𑀡𑁆𑀳𑀢𑀺;

𑀅𑀫𑀕𑁆𑀕𑀁𑀬𑁂𑀯 𑀫𑀕𑁆𑀕𑁄𑀢𑀺, 𑀢𑀲𑁆𑀲𑁂𑀯𑀁 𑀧𑀦 𑀕𑀡𑁆𑀳𑀢𑁄.

𑁧𑁨𑁮𑁪. 𑀏𑀯𑀁 𑀯𑀺𑀧𑀲𑁆𑀲𑀦𑀸𑀯𑀻𑀣𑀺,

𑀑𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺 𑀲𑀸;

𑀑𑀪𑀸𑀲𑀫𑁂𑀯 𑀲𑁄 𑀪𑀺𑀓𑁆𑀔𑀼,

𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀺.

𑁧𑁨𑁮𑁫. 𑀧𑀻𑀢𑀺 𑀯𑀺𑀧𑁆𑀧𑀲𑁆𑀲𑀦𑀸𑀧𑀻𑀢𑀺, 𑀢𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀧𑀦;

𑀢𑀤𑀸 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺, 𑀚𑀸𑀬𑀦𑁆𑀢𑁂 𑀔𑀼𑀤𑁆𑀤𑀺𑀓𑀸𑀤𑀺𑀓𑀸.

𑁧𑁨𑁮𑁬. 𑀯𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀻𑀢𑀺 𑀧𑀯𑀼𑀘𑁆𑀘𑀢𑀺;

𑀬𑁄𑀕𑀺𑀦𑁄 𑀓𑀸𑀬𑀘𑀺𑀢𑁆𑀢𑀸𑀦𑀺, 𑀧𑀲𑁆𑀲𑀤𑁆𑀥𑀸𑀦𑁂𑀯 𑀳𑁄𑀦𑁆𑀢𑀺 𑀳𑀺.

𑁧𑁨𑁮𑁭. 𑀮𑀳𑀽𑀦𑀺 𑀘 𑀫𑀼𑀤𑀽𑀦𑁂𑀯, 𑀓𑀫𑁆𑀫𑀜𑁆𑀜𑀸𑀦𑁂𑀯 𑀳𑁄𑀦𑁆𑀢𑀺 𑀳𑀺;

𑀧𑀲𑁆𑀲𑀤𑁆𑀥𑀸𑀤𑀻𑀳𑀺 𑀲𑁄 𑀪𑀺𑀓𑁆𑀔𑀼, 𑀅𑀦𑀼𑀕𑁆𑀕𑀳𑀺𑀢𑀫𑀸𑀦𑀲𑁄.

𑁧𑁨𑁮𑁮. 𑀅𑀫𑀸𑀦𑀼𑀲𑀺𑀁 𑀭𑀢𑀺𑀁 𑀦𑀸𑀫,

𑀅𑀦𑀼𑀪𑁄𑀢𑀺 𑀅𑀦𑀼𑀢𑁆𑀢𑀭𑀁;

𑀬𑀁 𑀲𑀦𑁆𑀥𑀸𑀬 𑀘 𑀕𑀸𑀣𑀸𑀬𑁄,

𑀪𑀸𑀲𑀺𑀢𑀸 𑀳𑀺 𑀫𑀳𑁂𑀲𑀺𑀦𑀸.

𑁧𑁨𑁮𑁯. ‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀺 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑁧𑁨𑁯𑁦. ‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺.

𑁧𑁨𑁯𑁧. 𑀜𑀸𑀡𑀸𑀤𑀬𑁄 𑀉𑀧𑀓𑁆𑀮𑁂𑀲𑀸, 𑀜𑁂𑀬𑁆𑀬𑀸 𑀯𑀼𑀢𑁆𑀢𑀦𑀬𑁂𑀦𑀺𑀥;

𑀏𑀢𑁂 𑀤𑀲 𑀉𑀧𑀓𑁆𑀮𑁂𑀲𑀸, 𑀯𑀚𑁆𑀚𑀦𑀻𑀬𑀸𑀯 𑀬𑁄𑀕𑀺𑀦𑀸.

𑁧𑁨𑁯𑁨. 𑀏𑀢𑁆𑀣𑁄𑀪𑀸𑀲𑀸𑀤𑀬𑁄 𑀥𑀫𑁆𑀫𑀸,

𑀉𑀧𑀓𑁆𑀮𑁂𑀲𑀲𑁆𑀲 𑀯𑀢𑁆𑀣𑀼𑀢𑁄;

𑀉𑀧𑀓𑁆𑀮𑁂𑀲𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑀸,

𑀉𑀧𑀓𑁆𑀮𑁂𑀲𑀦𑀺𑀓𑀦𑁆𑀢𑀺 𑀢𑀼.

𑁧𑁨𑁯𑁩. 𑀢𑀁 𑀢𑀫𑀸𑀯𑀚𑁆𑀚𑀫𑀸𑀦𑀲𑁆𑀲, 𑀪𑀸𑀯𑀦𑀸 𑀧𑀭𑀺𑀳𑀸𑀬𑀢𑀺;

𑀅𑀲𑀢𑁆𑀢𑁂 𑀲𑀢𑁆𑀢𑀲𑀜𑁆𑀜𑀻 𑀘, 𑀳𑁄𑀢𑀺 𑀅𑀧𑁆𑀧𑀲𑁆𑀲𑀼𑀢𑁄 𑀦𑀭𑁄.

𑁧𑁨𑁯𑁪. 𑀲𑀩𑁆𑀩𑁄𑀪𑀸𑀲𑀸𑀤𑀬𑁄 𑀥𑀫𑁆𑀫𑁂, 𑀦 𑀫𑀕𑁆𑀕𑁄𑀢𑀺 𑀯𑀺𑀘𑀸𑀭𑀬𑀁;

𑀫𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀇𑀘𑁆𑀘𑁂𑀯𑀁 𑀧𑀦 𑀧𑀡𑁆𑀟𑀺𑀢𑁄.

𑁧𑁨𑁯𑁫. 𑀯𑀯𑀢𑁆𑀣𑀧𑁂𑀢𑀺 𑀫𑀕𑁆𑀕𑀜𑁆𑀘, 𑀅𑀫𑀕𑁆𑀕𑀜𑁆𑀘𑁂𑀯 𑀘𑁂𑀢𑀲𑀸;

𑀢𑀲𑁆𑀲 𑀘𑁂𑀯𑀁 𑀅𑀬𑀁 𑀫𑀕𑁆𑀕𑁄, 𑀦𑀸𑀬𑀁 𑀫𑀕𑁆𑀕𑁄𑀢𑀺 𑀬𑁄𑀕𑀺𑀦𑁄.

𑁧𑁨𑁯𑁬. 𑀫𑀕𑁆𑀕𑀸𑀫𑀕𑁆𑀕𑀜𑁆𑀘 𑀯𑀺𑀜𑁆𑀜𑀸𑀬, 𑀞𑀺𑀢𑀜𑀸𑀡𑀫𑀺𑀤𑀁 𑀧𑀦;

𑀫𑀕𑁆𑀕𑀸𑀫𑀕𑁆𑀕𑁂𑀲𑀼𑀜𑀸𑀡𑀦𑁆𑀢𑀺, 𑀪𑀽𑀭𑀺𑀜𑀸𑀡𑁂𑀦 𑀤𑁂𑀲𑀺𑀢𑀁.

𑁧𑁨𑁯𑁭. 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑁂𑀲𑀼 𑀓𑁄𑀯𑀺𑀤𑀸,

𑀲𑀸𑀭𑀸𑀲𑀸𑀭𑀯𑁂𑀤𑀺𑀦𑁄 𑀲𑀫𑀸𑀳𑀺𑀢𑀸𑀳𑀺𑀢𑀸;

𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀢𑀁 𑀇𑀤𑀁,

𑀩𑀼𑀤𑁆𑀥𑀸 𑀩𑀼𑀤𑁆𑀥𑀲𑀸𑀯𑀓𑀸 𑀯𑀤𑀦𑁆𑀢𑀺 𑀯𑀸𑀤𑀺𑀦𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑀦𑀸𑀫 𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.