𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁨𑁨𑁭. 𑀏𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲, 𑀚𑀸𑀦𑀺𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑁂;

𑀓𑀗𑁆𑀔𑀸 𑀢𑀻𑀲𑀼 𑀧𑀦𑀤𑁆𑀥𑀸𑀲𑀼, 𑀯𑀺𑀢𑀭𑀺𑀢𑁆𑀯𑀸 𑀞𑀺𑀢𑀁 𑀧𑀦.

𑁧𑁨𑁨𑁮. 𑀓𑀗𑁆𑀔𑀸𑀯𑀺𑀢𑀭𑀡𑀁 𑀦𑀸𑀫, 𑀜𑀸𑀡𑀁 𑀢𑀁 𑀲𑀫𑀼𑀤𑀻𑀭𑀺𑀢𑀁;

𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦, 𑀅𑀢𑁆𑀣𑀓𑀸𑀫𑁂𑀦 𑀪𑀺𑀓𑁆𑀔𑀼𑀦𑀸.

𑁧𑁨𑁨𑁯. 𑀦𑀸𑀫𑀭𑀽𑀧𑀲𑁆𑀲 𑀓𑁄 𑀳𑁂𑀢𑀼, 𑀓𑁄𑀦𑀼 𑀯𑀸 𑀧𑀘𑁆𑀘𑀬𑁄 𑀪𑀯𑁂;

𑀆𑀯𑀚𑁆𑀚𑀺𑀢𑁆𑀯𑀸 𑀢𑀫𑀺𑀘𑁆𑀘𑁂𑀯𑀁, 𑀭𑀽𑀧𑀓𑀸𑀬𑀲𑁆𑀲 𑀢𑀸𑀯𑀤𑁂.

𑁧𑁨𑁩𑁦. 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸, 𑀢𑀘𑁄 𑀫𑀁𑀲𑀁 𑀦𑀳𑀸𑀭𑀼 𑀘;

𑀅𑀝𑁆𑀞𑀺𑀫𑀺𑀜𑁆𑀚𑀜𑁆𑀘 𑀯𑀓𑁆𑀓𑀜𑁆𑀘, 𑀳𑀤𑀬𑀁 𑀬𑀓𑀦𑀫𑁆𑀧𑀺 𑀘.

𑁧𑁨𑁩𑁧. 𑀇𑀘𑁆𑀘𑁂𑀯𑀫𑀸𑀤𑀺𑀩𑀸𑀢𑁆𑀢𑀺𑀁𑀲-𑀓𑁄𑀝𑁆𑀞𑀸𑀲𑀧𑀘𑁆𑀘𑀬𑀲𑁆𑀲 𑀳𑀺;

𑀧𑀭𑀺𑀕𑁆𑀕𑀡𑁆𑀳𑀢𑀺 𑀓𑀸𑀬𑀲𑁆𑀲, 𑀫𑀦𑀲𑀸 𑀳𑁂𑀢𑀼𑀧𑀘𑁆𑀘𑀬𑁂.

𑁧𑁨𑁩𑁨. 𑀅𑀯𑀺𑀚𑁆𑀚𑀸 𑀢𑀡𑁆𑀳𑀼𑀧𑀸𑀤𑀸𑀦𑀁, 𑀓𑀫𑁆𑀫𑀁 𑀳𑁂𑀢𑀼 𑀘𑀢𑀼𑀩𑁆𑀩𑀺𑀥𑁄;

𑀏𑀢𑀲𑁆𑀲 𑀭𑀽𑀧𑀓𑀸𑀬𑀲𑁆𑀲, 𑀆𑀳𑀸𑀭𑁄 𑀧𑀘𑁆𑀘𑀬𑁄 𑀫𑀢𑁄.

𑁧𑁨𑁩𑁩. 𑀚𑀦𑀓𑁄 𑀳𑁂𑀢𑀼 𑀅𑀓𑁆𑀔𑀸𑀢𑁄,

𑀧𑀘𑁆𑀘𑀬𑁄 𑀅𑀦𑀼𑀧𑀸𑀮𑀓𑁄;

𑀳𑁂𑀢𑁆𑀯𑀗𑁆𑀓𑀼𑀭𑀲𑁆𑀲 𑀩𑀻𑀚𑀁 𑀢𑀼,

𑀧𑀘𑁆𑀘𑀬𑀸 𑀧𑀣𑀯𑀸𑀤𑀬𑁄.

𑁧𑁨𑁩𑁪. 𑀇𑀢𑀺𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀳𑀺, 𑀳𑁂𑀢𑀼𑀧𑀘𑁆𑀘𑀬𑀢𑀁 𑀕𑀢𑀸;

𑀅𑀯𑀺𑀚𑁆𑀚𑀸𑀤𑀬𑁄 𑀢𑀬𑁄 𑀢𑀢𑁆𑀣, 𑀫𑀸𑀢𑀸𑀯 𑀉𑀧𑀦𑀺𑀲𑁆𑀲𑀬𑀸.

𑁧𑁨𑁩𑁫. 𑀚𑀦𑀓𑀁 𑀧𑀦 𑀓𑀫𑁆𑀫𑀁 𑀢𑀼, 𑀧𑀼𑀢𑁆𑀢𑀲𑁆𑀲 𑀳𑀺 𑀧𑀺𑀢𑀸 𑀯𑀺𑀬;

𑀥𑀸𑀢𑀻 𑀯𑀺𑀬 𑀓𑀼𑀫𑀸𑀭𑀲𑁆𑀲, 𑀆𑀳𑀸𑀭𑁄 𑀥𑀸𑀭𑀓𑁄 𑀪𑀯𑁂.

𑁧𑁨𑁩𑁬. 𑀇𑀘𑁆𑀘𑁂𑀯𑀁 𑀭𑀽𑀧𑀓𑀸𑀬𑀲𑁆𑀲, 𑀲𑁄 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁;

𑀓𑀢𑁆𑀯𑀸 𑀧𑀼𑀦𑀧𑀺 ‘‘𑀘𑀓𑁆𑀔𑀼𑀜𑁆𑀘, 𑀭𑀽𑀧𑀫𑀸𑀮𑁄𑀓𑀫𑁂𑀯 𑀘.

𑁧𑁨𑁩𑁭. 𑀧𑀝𑀺𑀘𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀳𑁄𑀢𑀺’’𑀇𑀘𑁆𑀘𑁂𑀯𑀫𑀸𑀤𑀺𑀦𑀸;

𑀦𑀬𑁂𑀦 𑀦𑀸𑀫𑀓𑀸𑀬𑀲𑁆𑀲, 𑀧𑀘𑁆𑀘𑀬𑀁 𑀧𑀭𑀺𑀕𑀡𑁆𑀳𑀢𑀺.

𑁧𑁨𑁩𑁮. 𑀲𑁄 𑀏𑀯𑀁 𑀦𑀸𑀫𑀭𑀽𑀧𑀲𑁆𑀲, 𑀯𑀼𑀢𑁆𑀢𑀺𑀁 𑀤𑀺𑀲𑁆𑀯𑀸𑀦 𑀧𑀘𑁆𑀘𑀬𑀸;

𑀬𑀣𑀸 𑀏𑀢𑀭𑀳𑀺𑀤𑀁 𑀢𑀼, 𑀅𑀢𑀻𑀢𑁂𑀧𑀺 𑀢𑀣𑁂𑀯𑀺𑀤𑀁.

𑁧𑁨𑁩𑁯. 𑀧𑀘𑁆𑀘𑀬𑀸 𑀘 𑀧𑀯𑀢𑁆𑀢𑀺𑀢𑁆𑀣, 𑀢𑀣𑁂𑀯𑀸𑀦𑀸𑀕𑀢𑁂𑀧𑀺 𑀘;

𑀧𑀯𑀢𑁆𑀢𑀺𑀲𑁆𑀲𑀢𑀺 𑀅𑀤𑁆𑀥𑀸𑀲𑀼, 𑀢𑀻𑀲𑁆𑀯𑁂𑀯𑀁 𑀅𑀦𑀼𑀧𑀲𑁆𑀲𑀢𑀺.

𑁧𑁨𑁪𑁦. 𑀢𑀲𑁆𑀲𑁂𑀯𑀁 𑀧𑀲𑁆𑀲𑀢𑁄 𑀬𑀸 𑀲𑀸, 𑀧𑀼𑀩𑁆𑀩𑀦𑁆𑀢𑁂 𑀧𑀜𑁆𑀘𑀥𑀸 𑀢𑀣𑀸;

𑀅𑀧𑀭𑀦𑁆𑀢𑁂 𑀲𑀺𑀬𑀸 𑀓𑀗𑁆𑀔𑀸, 𑀧𑀜𑁆𑀘𑀥𑀸 𑀲𑀫𑀼𑀤𑀻𑀭𑀺𑀢𑀸.

𑁧𑁨𑁪𑁧. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀅𑀤𑁆𑀥𑀸𑀦𑁂, 𑀙𑀩𑁆𑀩𑀺𑀥𑀸 𑀧𑀭𑀺𑀓𑀺𑀢𑁆𑀢𑀺𑀢𑀸;

𑀲𑀩𑁆𑀩𑀸 𑀘𑀸𑀦𑀯𑀲𑁂𑀲𑀸𑀯, 𑀬𑁄𑀕𑀺𑀦𑁄 𑀲𑀸 𑀧𑀳𑀺𑀬𑁆𑀬𑀢𑀺.

𑁧𑁨𑁪𑁨. 𑀏𑀓𑁄 𑀓𑀫𑁆𑀫𑀯𑀺𑀧𑀸𑀓𑀸𑀦𑀁, 𑀯𑀲𑁂𑀦𑀸𑀧𑀺 𑀘 𑀧𑀡𑁆𑀟𑀺𑀢𑁄;

𑀏𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲, 𑀧𑀘𑁆𑀘𑀬𑀁 𑀧𑀭𑀺𑀕𑀡𑁆𑀳𑀢𑀺.

𑁧𑁨𑁪𑁩. 𑀓𑀫𑁆𑀫𑀁 𑀘𑀢𑀼𑀩𑁆𑀩𑀺𑀥𑀁 𑀤𑀺𑀝𑁆𑀞-𑀥𑀫𑁆𑀫𑀯𑁂𑀤𑀦𑀺𑀬𑀁 𑀢𑀣𑀸;

𑀉𑀧𑀧𑀚𑁆𑀚𑀸𑀧𑀭𑀸𑀧𑀭𑀺𑀬𑀸-𑀳𑁄𑀲𑀺𑀓𑀫𑁆𑀫𑀯𑀲𑀸 𑀧𑀦.

𑀢𑀢𑁆𑀣 𑀏𑀓𑀚𑀯𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀘𑀺𑀢𑁆𑀢𑁂𑀲𑀼 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀧𑀦 ‘‘𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀇𑀫𑀲𑁆𑀲 𑀢𑀺𑀓𑀲𑁆𑀲 𑀯𑀲𑁂𑀦 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀅𑀢𑁆𑀣𑀲𑀸𑀥𑀺𑀓𑀸 𑀧𑀦 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀫𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀯𑀼𑀢𑁆𑀢𑀦𑀬𑁂𑀦 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀧𑀜𑁆𑀘𑀚𑀯𑀦𑀘𑁂𑀢𑀦𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀫𑀦𑀸𑀕𑀢𑁂 𑀬𑀤𑀸 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀯𑀺𑀧𑀸𑀓𑀁 𑀤𑁂𑀢𑀺, 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺.

𑁧𑁨𑁪𑁪. 𑀅𑀧𑀭𑀁 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁, 𑀕𑀭𑀼𑀓𑀁 𑀩𑀳𑀼𑀮𑀫𑁆𑀧𑀺 𑀘;

𑀆𑀲𑀦𑁆𑀦𑀜𑁆𑀘 𑀓𑀝𑀢𑁆𑀢𑀸 𑀘, 𑀓𑀫𑁆𑀫𑀦𑁆𑀢𑀺 𑀲𑀫𑀼𑀤𑀻𑀭𑀺𑀢𑀁.

𑁧𑁨𑁪𑁫. 𑀅𑀜𑁆𑀜𑀁 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁, 𑀚𑀦𑀓𑀁 𑀉𑀧𑀣𑀫𑁆𑀪𑀓𑀁;

𑀢𑀣𑀽𑀧𑀧𑀻𑀴𑀓𑀁 𑀓𑀫𑁆𑀫-𑀫𑀼𑀧𑀖𑀸𑀢𑀓𑀫𑁂𑀯 𑀘.

𑀢𑀢𑁆𑀣 𑀚𑀦𑀓𑀁 𑀦𑀸𑀫 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀯𑀢𑁆𑀢𑁂𑀧𑀺 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀓𑁆𑀔𑀦𑁆𑀥𑁂 𑀚𑀦𑁂𑀢𑀺. 𑀉𑀧𑀢𑁆𑀣𑀫𑁆𑀪𑀓𑀁 𑀧𑀦 𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀺𑀢𑁂 𑀯𑀺𑀧𑀸𑀓𑁂 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀉𑀧𑀧𑀻𑀴𑀓𑀁 𑀧𑀦 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀺𑀢𑁂 𑀯𑀺𑀧𑀸𑀓𑁂 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀺 𑀩𑀸𑀥𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀺. 𑀉𑀧𑀖𑀸𑀢𑀓𑀁 𑀧𑀦 𑀲𑀬𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺 𑀲𑀫𑀸𑀦𑀁 𑀅𑀜𑁆𑀜𑀁 𑀤𑀼𑀩𑁆𑀩𑀮𑀓𑀫𑁆𑀫𑀁 𑀖𑀸𑀢𑁂𑀢𑁆𑀯𑀸 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺. 𑀏𑀯𑀁 𑀧𑀦 𑀓𑀫𑁆𑀫𑁂𑀦 𑀑𑀓𑀸𑀲𑁂 𑀓𑀢𑁂 𑀢𑀁𑀯𑀺𑀧𑀸𑀓𑀫𑀼𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀇𑀢𑀺 𑀇𑀫𑀁 𑀤𑁆𑀯𑀸𑀤𑀲𑀯𑀺𑀥𑀁 𑀓𑀫𑁆𑀫𑀁 𑀓𑀫𑁆𑀫𑀯𑀝𑁆𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀯𑀫𑁂𑀓𑁄 𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺.

𑀇𑀢𑀺 𑀏𑀯𑀁 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀬𑀣𑀸 𑀇𑀤𑀁 𑀏𑀢𑀭𑀳𑀺, 𑀏𑀯𑀫𑀢𑀻𑀢𑁂𑀧𑀺 𑀅𑀤𑁆𑀥𑀸𑀦𑁂 𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀧𑀘𑁆𑀘𑀬𑀢𑁄 𑀧𑀯𑀢𑁆𑀢𑀺𑀢𑁆𑀣, 𑀅𑀦𑀸𑀕𑀢𑁂𑀧𑀺 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀇𑀢𑀺 𑀓𑀫𑁆𑀫𑀜𑁆𑀘𑁂𑀯 𑀯𑀺𑀧𑀸𑀓𑁄 𑀘𑀸𑀢𑀺 𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀮𑁄𑀓𑁄 𑀧𑀯𑀢𑁆𑀢𑀢𑀻𑀢𑀺 𑀢𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲𑁂𑀯𑀁 𑀲𑀫𑀦𑀼𑀧𑀲𑁆𑀲𑀢𑁄 𑀲𑀩𑁆𑀩𑀸 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸 𑀧𑀳𑀺𑀬𑁆𑀬𑀢𑀺.

𑁧𑁨𑁪𑁬. 𑀳𑁂𑀢𑀼𑀨𑀮𑀲𑁆𑀲 𑀲𑀫𑁆𑀩𑀦𑁆𑀥𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺;

𑀓𑁂𑀯𑀮𑀁 𑀦𑀸𑀫𑀭𑀽𑀧𑀦𑁆𑀢𑀺, 𑀲𑀫𑁆𑀫𑀸 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁨𑁪𑁭. 𑀏𑀯𑀁 𑀓𑀸𑀭𑀡𑀢𑁄 𑀉𑀤𑁆𑀥𑀁, 𑀓𑀸𑀭𑀡𑀁 𑀦 𑀘 𑀧𑀲𑁆𑀲𑀢𑀺;

𑀧𑀸𑀓𑀧𑀯𑀢𑁆𑀢𑀺𑀢𑁄 𑀉𑀤𑁆𑀥𑀁, 𑀦 𑀧𑀸𑀓𑀧𑀝𑀺𑀯𑁂𑀤𑀓𑀁.

𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑁧𑁨𑁪𑁮. ‘‘𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀺, 𑀯𑀺𑀧𑀸𑀓𑀲𑁆𑀲 𑀘 𑀯𑁂𑀤𑀓𑁄;

𑀲𑀼𑀤𑁆𑀥𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀏𑀯𑁂𑀢𑀁 𑀲𑀫𑁆𑀫𑀤𑀲𑁆𑀲𑀦𑀁.

𑁧𑁨𑁪𑁯. 𑀏𑀯𑀁 𑀓𑀫𑁆𑀫𑁂 𑀯𑀺𑀧𑀸𑀓𑁂 𑀘, 𑀯𑀢𑁆𑀢𑀫𑀸𑀦𑁂 𑀲𑀳𑁂𑀢𑀼𑀓𑁂;

𑀩𑀻𑀚𑀭𑀼𑀓𑁆𑀔𑀸𑀤𑀺𑀓𑀸𑀦𑀁𑀯, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀦𑀸𑀬𑀢𑀺.

𑁧𑁨𑁫𑁦. 𑀅𑀦𑀸𑀕𑀢𑁂𑀧𑀺 𑀲𑀁𑀲𑀸𑀭𑁂, 𑀅𑀧𑁆𑀧𑀯𑀢𑁆𑀢𑀺 𑀦 𑀤𑀺𑀲𑁆𑀲𑀢𑀺;

𑀏𑀢𑀫𑀢𑁆𑀣𑀫𑀦𑀜𑁆𑀜𑀸𑀬, 𑀢𑀺𑀢𑁆𑀣𑀺𑀬𑀸 𑀅𑀲𑀬𑀁𑀯𑀲𑀻.

𑁧𑁨𑁫𑁧. 𑀲𑀢𑁆𑀢𑀲𑀜𑁆𑀜𑀁 𑀕𑀳𑁂𑀢𑁆𑀯𑀸𑀦, 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀲𑁆𑀲𑀺𑀦𑁄;

𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀺𑀦𑁄.

𑁧𑁨𑁫𑁨. 𑀤𑀺𑀝𑁆𑀞𑀺𑀩𑀦𑁆𑀥𑀦𑀩𑀤𑁆𑀥𑀸 𑀢𑁂, 𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀭𑁂;

𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀦𑁆𑀢𑀸, 𑀦 𑀢𑁂 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀭𑁂.

𑁧𑁨𑁫𑁩. 𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀲𑀼𑀜𑁆𑀜𑀁, 𑀧𑀘𑁆𑀘𑀬𑀁 𑀧𑀝𑀺𑀯𑀺𑀚𑁆𑀛𑀢𑀺.

𑁧𑁨𑁫𑁪. 𑀓𑀫𑁆𑀫𑀁 𑀦𑀢𑁆𑀣𑀺 𑀯𑀺𑀧𑀸𑀓𑀫𑁆𑀳𑀺, 𑀧𑀸𑀓𑁄 𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑀺;

𑀅𑀜𑁆𑀜𑀫𑀜𑁆𑀜𑀁 𑀉𑀪𑁄 𑀲𑀼𑀜𑁆𑀜𑀸, 𑀦 𑀘 𑀓𑀫𑁆𑀫𑀁 𑀯𑀺𑀦𑀸 𑀨𑀮𑀁.

𑁧𑁨𑁫𑁫. 𑀬𑀣𑀸 𑀦 𑀲𑀽𑀭𑀺𑀬𑁂 𑀅𑀕𑁆𑀕𑀺, 𑀦 𑀫𑀡𑀺𑀫𑁆𑀳𑀺 𑀦 𑀕𑁄𑀫𑀬𑁂;

𑀦 𑀢𑁂𑀲𑀁 𑀩𑀳𑀺 𑀲𑁄 𑀅𑀢𑁆𑀣𑀺, 𑀲𑀫𑁆𑀪𑀸𑀭𑁂𑀳𑀺 𑀘 𑀚𑀸𑀬𑀢𑀺.

𑁧𑁨𑁫𑁬. 𑀢𑀣𑀸 𑀦 𑀅𑀦𑁆𑀢𑁄 𑀓𑀫𑁆𑀫𑀲𑁆𑀲, 𑀯𑀺𑀧𑀸𑀓𑁄 𑀉𑀧𑀮𑀩𑁆𑀪𑀢𑀺;

𑀩𑀳𑀺𑀤𑁆𑀥𑀸𑀧𑀺 𑀦 𑀓𑀫𑁆𑀫𑀲𑁆𑀲, 𑀦 𑀓𑀫𑁆𑀫𑀁 𑀢𑀢𑁆𑀣 𑀯𑀺𑀚𑁆𑀚𑀢𑀺.

𑁧𑁨𑁫𑁭. 𑀨𑀮𑁂𑀦 𑀲𑀼𑀜𑁆𑀜𑀁 𑀢𑀁 𑀓𑀫𑁆𑀫𑀁, 𑀨𑀮𑀁 𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑀺;

𑀓𑀫𑁆𑀫𑀜𑁆𑀘 𑀔𑁄 𑀉𑀧𑀸𑀤𑀸𑀬, 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑁂 𑀨𑀮𑀁.

𑁧𑁨𑁫𑁮. 𑀦 𑀳𑁂𑀢𑁆𑀣 𑀤𑁂𑀯𑁄 𑀩𑁆𑀭𑀳𑁆𑀫𑀸 𑀯𑀸,

𑀲𑀁𑀲𑀸𑀭𑀲𑁆𑀲𑀢𑁆𑀣𑀺 𑀓𑀸𑀭𑀓𑁄;

𑀲𑀼𑀤𑁆𑀥𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺,

𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑀸’’𑀢𑀺.

𑁧𑁨𑁫𑁯. 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺, 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀁;

𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀤𑁆𑀥𑀸𑀲𑀼, 𑀢𑀭𑀺𑀢𑁆𑀯𑀸 𑀓𑀗𑁆𑀔𑀫𑀼𑀝𑁆𑀞𑀺𑀢𑀁.

𑁧𑁨𑁬𑁦. 𑀓𑀗𑁆𑀔𑀸𑀯𑀺𑀢𑀭𑀡𑀁 𑀦𑀸𑀫, 𑀜𑀸𑀡𑀁 𑀢𑀁 𑀲𑀫𑀼𑀤𑀻𑀭𑀺𑀢𑀁;

𑀥𑀫𑁆𑀫𑀝𑁆𑀞𑀺𑀢𑀺 𑀬𑀣𑀸𑀪𑀽𑀢𑀁, 𑀢𑀁 𑀲𑀫𑁆𑀫𑀸𑀤𑀲𑁆𑀲𑀦𑀦𑁆𑀢𑀺𑀧𑀺.

𑁧𑁨𑁬𑁧. 𑀇𑀫𑀺𑀦𑀸 𑀧𑀦 𑀜𑀸𑀡𑁂𑀦,

𑀲𑀁𑀬𑀼𑀢𑁆𑀢𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀳𑁄𑀢𑀺 𑀮𑀤𑁆𑀥𑀧𑀢𑀺𑀝𑁆𑀞𑁄𑀯,

𑀲𑁄𑀢𑀸𑀧𑀦𑁆𑀦𑁄 𑀳𑀺 𑀘𑀽𑀴𑀓𑁄.

𑁧𑁨𑁬𑁨. 𑀢𑀲𑁆𑀫𑀸 𑀲𑀧𑀜𑁆𑀜𑁄 𑀧𑀦 𑀅𑀢𑁆𑀣𑀓𑀸𑀫𑁄,

𑀬𑁄 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀸𑀦𑀺;

𑀧𑀭𑀺𑀕𑁆𑀕𑀳𑀁 𑀲𑀸𑀥𑀼 𑀓𑀭𑁄𑀢𑀺 𑀥𑀻𑀭𑁄,

𑀔𑀺𑀧𑁆𑀧𑀁 𑀲 𑀦𑀺𑀩𑁆𑀩𑀸𑀦𑀧𑀼𑀭𑀁 𑀉𑀧𑁂𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.