𑁧. 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁄

𑁮. 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑀺𑀭𑀼𑀢𑁆𑀢𑀭𑁄;

𑀘𑀢𑀼𑀥𑀸 𑀤𑁂𑀲𑀬𑀻 𑀥𑀫𑁆𑀫𑁂, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁄.

𑀢𑀢𑁆𑀣 𑀘𑀺𑀢𑁆𑀢𑀦𑁆𑀢𑀺 𑀯𑀺𑀲𑀬𑀯𑀺𑀚𑀸𑀦𑀦𑀁 𑀘𑀺𑀢𑁆𑀢𑀁, 𑀢𑀲𑁆𑀲 𑀧𑀦 𑀓𑁄 𑀯𑀘𑀦𑀢𑁆𑀣𑁄? 𑀯𑀼𑀘𑁆𑀘𑀢𑁂 𑁋 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀧𑀦 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁, 𑀅𑀢𑁆𑀢𑀲𑀦𑁆𑀢𑀸𑀦𑀁 𑀯𑀸 𑀘𑀺𑀦𑁄𑀢𑀻𑀢𑀺𑀧𑀺 𑀘𑀺𑀢𑁆𑀢𑀁.

𑁯. 𑀯𑀺𑀘𑀺𑀢𑁆𑀢𑀓𑀭𑀡𑀸 𑀘𑀺𑀢𑁆𑀢𑀁, 𑀅𑀢𑁆𑀢𑀦𑁄 𑀘𑀺𑀢𑁆𑀢𑀢𑀸𑀬 𑀯𑀸;

𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀯𑀺𑀜𑁆𑀜𑀸𑀡𑁂, 𑀯𑀺𑀘𑀺𑀢𑁆𑀢𑁂 𑀘𑀺𑀢𑁆𑀢𑀓𑀫𑁆𑀫𑀓𑁂;

𑀘𑀺𑀢𑁆𑀢𑀲𑀫𑁆𑀫𑀼𑀢𑀺 𑀤𑀝𑁆𑀞𑀩𑁆𑀩𑀸, 𑀯𑀺𑀜𑁆𑀜𑀸𑀡𑁂 𑀇𑀥 𑀯𑀺𑀜𑁆𑀜𑀼𑀦𑀸.

𑀢𑀁 𑀧𑀦 𑀲𑀸𑀭𑀫𑁆𑀫𑀡𑀢𑁄 𑀏𑀓𑀯𑀺𑀥𑀁, 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀯𑀺𑀧𑀸𑀓𑀁 𑀦𑀸𑀫 𑀓𑀼𑀲𑀮𑀸𑀓𑀼𑀲𑀮𑀁, 𑀅𑀯𑀺𑀧𑀸𑀓𑀁 𑀅𑀩𑁆𑀬𑀸𑀓𑀢𑀁. 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀚𑀸𑀢𑀺𑀪𑁂𑀤𑀢𑁄 𑀢𑀺𑀯𑀺𑀥𑀁.

𑀢𑀢𑁆𑀣 𑀓𑀼𑀲𑀮𑀦𑁆𑀢𑀺 𑀧𑀦𑁂𑀢𑀲𑁆𑀲 𑀓𑁄 𑀯𑀘𑀦𑀢𑁆𑀣𑁄?

𑁧𑁦. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀢𑁄, 𑀓𑀼𑀲𑀸𑀦𑀁 𑀮𑀯𑀦𑁂𑀦 𑀯𑀸;

𑀓𑀼𑀲𑁂𑀦 𑀮𑀸𑀢𑀩𑁆𑀩𑀢𑁆𑀢𑀸 𑀯𑀸, 𑀓𑀼𑀲𑀮𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁧. 𑀙𑁂𑀓𑁂 𑀓𑀼𑀲𑀮𑀲𑀤𑁆𑀤𑁄𑀬𑀁, 𑀆𑀭𑁄𑀕𑁆𑀬𑁂 𑀅𑀦𑀯𑀚𑁆𑀚𑀓𑁂;

𑀤𑀺𑀝𑁆𑀞𑁄 𑀇𑀝𑁆𑀞𑀯𑀺𑀧𑀸𑀓𑁂𑀧𑀺, 𑀅𑀦𑀯𑀚𑁆𑀚𑀸𑀤𑀺𑀓𑁂 𑀇𑀥.

𑀢𑀲𑁆𑀫𑀸 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁 𑀓𑀼𑀲𑀮𑀁, 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀁, 𑀯𑁄𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀦𑀯𑀚𑁆𑀚𑀮𑀓𑁆𑀔𑀡𑀁 𑀯𑀸 𑀓𑀼𑀲𑀮𑀁, 𑀯𑁄𑀤𑀸𑀦𑀪𑀸𑀯𑀭𑀲𑀁, 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀲𑀸𑀯𑀚𑁆𑀚𑀸𑀦𑀺𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀫𑀓𑀼𑀲𑀮𑀁. 𑀢𑀤𑀼𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀫𑀩𑁆𑀬𑀸𑀓𑀢𑀁, 𑀅𑀯𑀺𑀧𑀸𑀓𑀸𑀭𑀳𑀁 𑀯𑀸.

𑀢𑀢𑁆𑀣 𑀓𑀼𑀲𑀮𑀘𑀺𑀢𑁆𑀢𑀁 𑀏𑀓𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺, 𑀢𑀤𑀺𑀤𑀁 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺 𑁋 𑀓𑀸𑀫𑀸𑀯𑀘𑀭𑀁, 𑀭𑀽𑀧𑀸𑀯𑀘𑀭𑀁, 𑀅𑀭𑀽𑀧𑀸𑀯𑀘𑀭𑀁, 𑀮𑁄𑀓𑀼𑀢𑁆𑀢𑀭𑀜𑁆𑀘𑁂𑀢𑀺.

𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀪𑀽𑀫𑀺𑀢𑁄 𑀏𑀓𑀯𑀺𑀥𑀁, 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀪𑁂𑀤𑀢𑁄 𑀤𑀼𑀯𑀺𑀥𑀁, 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄 𑀢𑀺𑀯𑀺𑀥𑀁, 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺 𑀇𑀤𑀁 𑀅𑀝𑁆𑀞𑀯𑀺𑀥𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀸𑀫.

𑁧𑁨. 𑀉𑀤𑁆𑀤𑀸𑀦𑀢𑁄 𑀤𑀼𑀯𑁂 𑀓𑀸𑀫𑀸, 𑀓𑁆𑀮𑁂𑀲𑀯𑀢𑁆𑀣𑀼𑀯𑀲𑀸 𑀧𑀦;

𑀓𑀺𑀮𑁂𑀲𑁄 𑀙𑀦𑁆𑀤𑀭𑀸𑀕𑁄𑀯, 𑀯𑀢𑁆𑀣𑀼 𑀢𑁂𑀪𑀽𑀫𑀯𑀝𑁆𑀝𑀓𑀁.

𑁧𑁩. 𑀓𑀺𑀮𑁂𑀲𑀓𑀸𑀫𑁄 𑀓𑀸𑀫𑁂𑀢𑀺, 𑀯𑀢𑁆𑀣𑀼 𑀓𑀸𑀫𑀻𑀬𑀢𑀻𑀢𑀺 𑀘;

𑀲𑀺𑀚𑁆𑀛𑀢𑀺 𑀤𑀼𑀯𑀺𑀥𑁄𑀧𑁂𑀲, 𑀓𑀸𑀫𑁄 𑀯𑁄 𑀓𑀸𑀭𑀓𑀤𑁆𑀯𑀬𑁂.

𑁧𑁪. 𑀬𑀲𑁆𑀫𑀺𑀁 𑀧𑀦 𑀧𑀤𑁂𑀲𑁂 𑀲𑁄, 𑀓𑀸𑀫𑁄𑀬𑀁 𑀤𑀼𑀯𑀺𑀥𑁄𑀧𑀺 𑀘;

𑀲𑀫𑁆𑀧𑀢𑁆𑀢𑀻𑀦𑀁 𑀯𑀲𑁂𑀦𑀸𑀯-𑀘𑀭𑀢𑀻𑀢𑀺 𑀘 𑀲𑁄 𑀧𑀦.

𑁧𑁫. 𑀧𑀤𑁂𑀲𑁄 𑀘𑀢𑀼𑀧𑀸𑀬𑀸𑀦𑀁, 𑀙𑀦𑁆𑀦𑀁 𑀤𑁂𑀯𑀸𑀦𑀫𑁂𑀯 𑀘;

𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦𑁂𑀯, 𑀏𑀓𑀸𑀤𑀲𑀯𑀺𑀥𑁄 𑀧𑀦.

𑁧𑁬. 𑀓𑀸𑀫𑁄𑀯𑀘𑀭𑀢𑀻𑀢𑁂𑀢𑁆𑀣, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑁄;

𑀅𑀲𑁆𑀲𑀸𑀪𑀺𑀮𑀓𑁆𑀔𑀺𑀢𑀢𑁆𑀢𑀸 𑀳𑀺, 𑀲𑀲𑀢𑁆𑀣𑀸𑀯𑀘𑀭𑁄 𑀯𑀺𑀬.

𑁧𑁭. 𑀲𑁆𑀯𑀸𑀬𑀁 𑀭𑀽𑀧𑀪𑀯𑁄 𑀭𑀽𑀧𑀁, 𑀏𑀯𑀁 𑀓𑀸𑀫𑁄𑀢𑀺 𑀲𑀜𑁆𑀜𑀺𑀢𑁄;

𑀉𑀢𑁆𑀢𑀭𑀲𑁆𑀲 𑀧𑀤𑀲𑁆𑀲𑁂𑀯, 𑀮𑁄𑀧𑀁 𑀓𑀢𑁆𑀯𑀸 𑀉𑀤𑀻𑀭𑀺𑀢𑁄.

𑁧𑁮. 𑀢𑀲𑁆𑀫𑀺𑀁 𑀓𑀸𑀫𑁂 𑀇𑀤𑀁 𑀘𑀺𑀢𑁆𑀢𑀁, 𑀲𑀤𑀸𑀯𑀘𑀭𑀢𑀻𑀢𑀺 𑀘;

𑀓𑀸𑀫𑀸𑀯𑀘𑀭𑀫𑀺𑀘𑁆𑀘𑁂𑀯𑀁, 𑀓𑀣𑀺𑀢𑀁 𑀓𑀸𑀫𑀖𑀸𑀢𑀺𑀦𑀸.

𑁧𑁯. 𑀧𑀝𑀺𑀲𑀦𑁆𑀥𑀺𑀁 𑀪𑀯𑁂 𑀓𑀸𑀫𑁂, 𑀅𑀯𑀘𑀸𑀭𑀬𑀢𑀻𑀢𑀺 𑀯𑀸;

𑀓𑀸𑀫𑀸𑀯𑀘𑀭𑀫𑀺𑀘𑁆𑀘𑁂𑀯𑀁, 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀢𑀢𑁆𑀭 𑀯𑀸.

𑁨𑁦. 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁;

𑀤𑀲𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀼-𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺.

𑁨𑁧. 𑀤𑀸𑀦𑀁 𑀲𑀻𑀮𑀁 𑀪𑀸𑀯𑀦𑀸 𑀧𑀢𑁆𑀢𑀺𑀤𑀸𑀦𑀁,

𑀯𑁂𑀬𑁆𑀬𑀸𑀯𑀘𑁆𑀘𑀁 𑀤𑁂𑀲𑀦𑀸 𑀘𑀸𑀦𑀼𑀫𑁄𑀤𑁄;

𑀤𑀺𑀝𑁆𑀞𑀺𑀚𑁆𑀚𑀼𑀢𑁆𑀢𑀁 𑀲𑀁𑀲𑀼𑀢𑀺𑀘𑁆𑀘𑀸𑀧𑀘𑀸𑀬𑁄,

𑀜𑁂𑀬𑁆𑀬𑁄 𑀏𑀯𑀁 𑀧𑀼𑀜𑁆𑀜𑀯𑀢𑁆𑀣𑀼𑀧𑁆𑀧𑀪𑁂𑀤𑁄.

𑁨𑁨. 𑀕𑀘𑁆𑀙𑀦𑁆𑀢𑀺 𑀲𑀗𑁆𑀕𑀳𑀁 𑀤𑀸𑀦𑁂, 𑀧𑀢𑁆𑀢𑀺𑀤𑀸𑀦𑀸𑀦𑀼𑀫𑁄𑀤𑀦𑀸;

𑀢𑀣𑀸 𑀲𑀻𑀮𑀫𑀬𑁂 𑀧𑀼𑀜𑁆𑀜𑁂, 𑀯𑁂𑀬𑁆𑀬𑀸𑀯𑀘𑁆𑀘𑀸𑀧𑀘𑀸𑀬𑀦𑀸.

𑁨𑁩. 𑀤𑁂𑀲𑀦𑀸 𑀲𑀯𑀦𑀁 𑀤𑀺𑀝𑁆𑀞𑀺-𑀉𑀚𑀼𑀓𑀸 𑀪𑀸𑀯𑀦𑀸𑀫𑀬𑁂;

𑀧𑀼𑀦 𑀢𑀻𑀡𑁂𑀯 𑀲𑀫𑁆𑀪𑁄𑀦𑁆𑀢𑀺, 𑀤𑀲 𑀧𑀼𑀜𑁆𑀜𑀓𑁆𑀭𑀺𑀬𑀸𑀧𑀺 𑀘.

𑁨𑁪. 𑀲𑀩𑁆𑀩𑀸𑀦𑀼𑀲𑁆𑀲𑀢𑀺𑀧𑀼𑀜𑁆𑀜𑀜𑁆𑀘, 𑀧𑀲𑀁𑀲𑀸 𑀲𑀭𑀡𑀢𑁆𑀢𑀬𑀁;

𑀬𑀦𑁆𑀢𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀲𑁆𑀫𑀺𑀁, 𑀲𑀗𑁆𑀕𑀳𑀁 𑀦𑀢𑁆𑀣𑀺 𑀲𑀁𑀲𑀬𑁄.

𑁨𑁫. 𑀧𑀼𑀭𑀺𑀫𑀸 𑀫𑀼𑀜𑁆𑀘𑀦𑀸 𑀘𑁂𑀯, 𑀧𑀭𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸;

𑀳𑁄𑀢𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁, 𑀏𑀯𑀁 𑀲𑁂𑀲𑁂𑀲𑀼 𑀤𑀻𑀧𑀬𑁂.

𑀇𑀤𑀸𑀦𑀺 𑀅𑀲𑁆𑀲 𑀧𑀦𑀝𑁆𑀞𑀯𑀺𑀥𑀲𑁆𑀲𑀸𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀅𑀬𑀫𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀸 𑀳𑀺 𑀬𑁄 𑀤𑁂𑀬𑁆𑀬𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀁, 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀼𑀁 𑀆𑀕𑀫𑁆𑀫 𑀳𑀝𑁆𑀞𑀧𑀳𑀝𑁆𑀞𑁄 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁 𑀧𑀞𑀫𑀁 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀝𑁆𑀞𑀧𑀳𑀝𑁆𑀞𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑁄 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀢𑀫𑁂𑀯 𑀘𑀺𑀢𑁆𑀢𑀁 𑀲𑀲𑀗𑁆𑀔𑀸𑀭𑀺𑀓𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀗𑁆𑀔𑀸𑀭𑁄𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀧𑀯𑀢𑁆𑀢𑀲𑁆𑀲 𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑁆𑀲𑀸𑀥𑀺𑀯𑀘𑀦𑀁. 𑀬𑀤𑀸 𑀧𑀦 𑀜𑀸𑀢𑀺𑀚𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀚𑀸𑀢𑀧𑀭𑀺𑀘𑀬𑀸 𑀩𑀸𑀮𑀓𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀳𑀲𑀸 𑀬𑀁 𑀓𑀺𑀜𑁆𑀘𑀺 𑀳𑀢𑁆𑀣𑀕𑀢𑀁 𑀤𑀤𑀦𑁆𑀢𑀺 𑀯𑀸 𑀯𑀦𑁆𑀤𑀦𑁆𑀢𑀺 𑀯𑀸, 𑀢𑀤𑀸 𑀢𑁂𑀲𑀁 𑀢𑀢𑀺𑀬𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀢𑁂 ‘‘𑀤𑁂𑀣 𑀯𑀦𑁆𑀤𑀣, 𑀅𑀬𑁆𑀬𑁂’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀜𑀸𑀢𑀺𑀚𑀦𑁂𑀦 𑀉𑀲𑁆𑀲𑀸𑀳𑀺𑀢𑀸 𑀳𑀼𑀢𑁆𑀯𑀸 𑀳𑀢𑁆𑀣𑀕𑀢𑀁 𑀤𑀤𑀦𑁆𑀢𑀺 𑀯𑀸 𑀯𑀦𑁆𑀤𑀦𑁆𑀢𑀺 𑀯𑀸, 𑀢𑀤𑀸 𑀢𑁂𑀲𑀁 𑀘𑀢𑀼𑀢𑁆𑀣𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀤𑁂𑀬𑁆𑀬𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀤𑀻𑀦𑀁 𑀅𑀲𑀫𑁆𑀧𑀢𑁆𑀢𑀺𑀁 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑀁 𑀆𑀕𑀫𑁆𑀫 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁨𑁬. 𑀤𑀲𑀧𑀼𑀜𑁆𑀜𑀓𑁆𑀭𑀺𑀬𑀸𑀤𑀻𑀦𑀁, 𑀯𑀲𑁂𑀦 𑀘 𑀩𑀳𑀽𑀦𑀺𑀧𑀺;

𑀏𑀢𑀸𑀦𑀺 𑀧𑀦 𑀘𑀺𑀢𑁆𑀢𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀬𑁂.

𑁨𑁭. 𑀲𑀢𑁆𑀢𑀭𑀲 𑀲𑀳𑀲𑁆𑀲𑀸𑀦𑀺, 𑀤𑁆𑀯𑁂 𑀲𑀢𑀸𑀦𑀺 𑀅𑀲𑀻𑀢𑀺 𑀘;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑀢𑀁 𑀧𑀦 𑀬𑀣𑀸𑀦𑀼𑀭𑀽𑀧𑀁 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬𑀁 𑀪𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺.

𑀇𑀢𑀭𑁂𑀲𑀼 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀲𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀁, 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀤𑀼𑀯𑀺𑀥𑀁, 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄 𑀢𑀺𑀯𑀺𑀥𑀁, 𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁, 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀧𑁆𑀧𑀳𑀻𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁, 𑀯𑀺𑀢𑀓𑁆𑀓𑀯𑀺𑀧𑁆𑀧𑀳𑀻𑀦𑀁 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀺𑀧𑁆𑀧𑀳𑀻𑀦𑀁 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀯𑀺𑀧𑁆𑀧𑀳𑀻𑀦𑀁 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀯𑀺𑀧𑁆𑀧𑀳𑀻𑀦𑀁 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀦𑁆𑀢𑀺 𑀇𑀤𑀁 𑀧𑀜𑁆𑀘𑀯𑀺𑀥𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀸𑀫.

𑀢𑀁 𑀧𑀦 𑀬𑀣𑀸𑀲𑀫𑁆𑀪𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁 𑀳𑁄𑀢𑀺. 𑀲𑀩𑁆𑀩𑀁 𑀧𑀦𑁂𑀢𑀁 𑀭𑀽𑀧𑀸𑀯𑀘𑀭𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀁 𑀬𑀣𑀸𑀦𑀼𑀭𑀽𑀧𑀁 𑀭𑀽𑀧𑀸𑀯𑀘𑀭𑀽𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀓𑀁 𑀳𑁄𑀢𑀺. 𑀏𑀯𑀁 𑀢𑀸𑀯 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀲𑁂𑀲𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀢𑀸𑀯 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑁄𑀕𑀪𑁂𑀤𑀢𑁄 𑀏𑀓𑀯𑀺𑀥𑀁, 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀪𑁂𑀤𑀢𑁄 𑀤𑀼𑀯𑀺𑀥𑀁, 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄 𑀢𑀺𑀯𑀺𑀥𑀁, 𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁, 𑀢𑀢𑁆𑀣 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀅𑀧𑀕𑀫𑁄, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀤𑀫𑀲𑁆𑀲 𑀘𑀢𑀼𑀩𑁆𑀩𑀺𑀥𑀫𑀸𑀭𑀫𑁆𑀫𑀡𑀁. 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀏𑀢𑀲𑁆𑀲𑀸𑀭𑀫𑁆𑀫𑀡𑀲𑁆𑀲 𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀸𑀫. 𑀲𑀩𑁆𑀩𑀁 𑀧𑀦𑁂𑀢𑀁 𑀅𑀭𑀽𑀧𑀸𑀯𑀘𑀭𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀁 𑀬𑀣𑀸𑀦𑀼𑀭𑀽𑀧𑀁 𑀅𑀭𑀽𑀧𑀽𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀓𑀁 𑀳𑁄𑀢𑀺. 𑀏𑀯𑀁 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀭𑀁 𑀧𑀦 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁄 𑀏𑀓𑀯𑀺𑀥𑀁, 𑀦𑀺𑀬𑀢𑀸𑀦𑀺𑀬𑀢𑀯𑀢𑁆𑀣𑀼𑀓𑀪𑁂𑀤𑀢𑁄 𑀤𑀼𑀯𑀺𑀥𑀁, 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀧𑀢𑁆𑀢𑀩𑁆𑀩𑀢𑁄 𑀢𑀺𑀯𑀺𑀥𑀁, 𑀘𑀢𑀼𑀫𑀕𑁆𑀕𑀬𑁄𑀕𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀜𑁆𑀜𑁄𑀚𑀦𑀧𑁆𑀧𑀳𑀸𑀦𑀓𑀭𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀓𑀭𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁, 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀓𑀭𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁, 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀧𑀳𑀸𑀦𑀓𑀭𑀁 𑀅𑀭𑀳𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀦𑁆𑀢𑀺 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀁 𑀦𑀸𑀫. 𑀏𑀓𑁂𑀓𑀁 𑀧𑀦𑁂𑀢𑁆𑀣 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺. 𑀲𑀩𑁆𑀩𑀁 𑀧𑀦𑁂𑀢𑀁 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀁 𑀫𑀕𑁆𑀕𑀸𑀦𑀼𑀭𑀽𑀧𑀨𑀮𑀧𑁆𑀧𑀯𑀢𑁆𑀢𑀺𑀬𑀸 𑀘𑀢𑁆𑀢𑀸𑀭𑁄 𑀅𑀭𑀺𑀬𑀧𑀼𑀕𑁆𑀕𑀮𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁.

𑁨𑁮. 𑀓𑀸𑀫𑁂 𑀅𑀝𑁆𑀞𑁂𑀯 𑀭𑀽𑀧𑁂 𑀘, 𑀧𑀜𑁆𑀘 𑀘𑀢𑁆𑀢𑀸𑀭𑀺𑀭𑀽𑀧𑀺𑀲𑀼;

𑀘𑀢𑁆𑀢𑀸𑀭𑀸𑀦𑀼𑀢𑁆𑀢𑀭𑀸𑀦𑁂𑀯𑀁, 𑀓𑀼𑀲𑀮𑀸𑀦𑁂𑀓𑀯𑀻𑀲𑀢𑀺.

𑁨𑁯. 𑀓𑀼𑀲𑀮𑀸𑀓𑀼𑀲𑀮𑀸𑀧𑀕𑀢𑁂𑀦 𑀲𑀢𑀸,

𑀓𑀼𑀲𑀮𑁂 𑀓𑀼𑀲𑀮𑁂𑀦 𑀘 𑀬𑀁 𑀓𑀼𑀲𑀮𑀁;

𑀘𑀢𑀼𑀪𑀽𑀫𑀺𑀕𑀢𑀁 𑀫𑀼𑀦𑀺𑀦𑀸 𑀯𑀲𑀺𑀦𑀸,

𑀮𑀧𑀺𑀢𑀁 𑀮𑀧𑀺𑀢𑀁 𑀲𑀓𑀮𑀫𑁆𑀧𑀺 𑀫𑀬𑀸.

𑀅𑀓𑀼𑀲𑀮𑀁 𑀧𑀦 𑀪𑀽𑀫𑀺𑀢𑁄 𑀏𑀓𑀯𑀺𑀥𑀁 𑀓𑀸𑀫𑀸𑀯𑀘𑀭𑀫𑁂𑀯, 𑀦𑀺𑀬𑀢𑀸𑀦𑀺𑀬𑀢𑀯𑀢𑁆𑀣𑀼𑀯𑀲𑁂𑀦 𑀘 𑀏𑀓𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀯𑀲𑁂𑀦 𑀘 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀚𑀦𑀓𑀯𑀲𑁂𑀦 𑀘 𑀤𑀼𑀯𑀺𑀥𑀁, 𑀢𑀻𑀳𑀺 𑀯𑁂𑀤𑀦𑀸𑀳𑀺 𑀬𑁄𑀕𑀢𑁄 𑀘 𑀮𑁄𑀪𑀫𑀽𑀮𑀁 𑀤𑁄𑀲𑀫𑀽𑀮𑀁 𑀫𑁄𑀳𑀫𑀽𑀮𑀦𑁆𑀢𑀺 𑀫𑀽𑀮𑀢𑁄 𑀘 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀮𑁄𑀪𑀫𑀽𑀮𑀁 𑀧𑀦 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺.

𑀬𑀤𑀸 𑀳𑀺 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀯𑀮𑀁 𑀳𑀝𑁆𑀞𑀢𑀼𑀝𑁆𑀞𑁄 𑀓𑀸𑀫𑁂 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀺 𑀯𑀸 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸𑀲𑁆𑀲 𑀧𑀞𑀫𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦, 𑀢𑀤𑀸 𑀤𑀼𑀢𑀺𑀬𑀁. 𑀬𑀤𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀯𑀮𑀁 𑀳𑀝𑁆𑀞𑀢𑀼𑀝𑁆𑀞𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀭𑀲𑀫𑁆𑀧𑀢𑁆𑀢𑀺𑀁 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀧𑀭𑀲𑁆𑀲 𑀪𑀡𑁆𑀟𑀁 𑀯𑀸 𑀳𑀭𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀢𑀢𑀺𑀬𑀁. 𑀬𑀤𑀸 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦, 𑀢𑀤𑀸 𑀘𑀢𑀼𑀢𑁆𑀣𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀓𑀸𑀫𑀸𑀦𑀁 𑀯𑀸 𑀅𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑁂𑀦 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀏𑀯𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀮𑁄𑀪𑀫𑀽𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀤𑁄𑀲𑀫𑀽𑀮𑀁 𑀧𑀦 𑀏𑀓𑀦𑁆𑀢𑀲𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀁, 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀪𑁂𑀤𑀢𑁄 𑀤𑀼𑀯𑀺𑀥𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀦𑁆𑀢𑀺. 𑀅𑀲𑁆𑀲 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀢𑀺𑀓𑁆𑀔𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀫𑁄𑀳𑀫𑀽𑀮𑀫𑁆𑀧𑀺 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀬𑁄𑀕𑀢𑁄 𑀤𑀼𑀯𑀺𑀥𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺. 𑀢𑀲𑁆𑀲 𑀅𑀲𑀦𑁆𑀦𑀺𑀝𑁆𑀞𑀸𑀦𑀯𑀺𑀓𑁆𑀔𑁂𑀧𑀓𑀸𑀮𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀏𑀯𑀁 𑀢𑀸𑀯 𑀤𑁆𑀯𑀸𑀤𑀲𑀯𑀺𑀥𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀩𑁆𑀩𑀁 𑀧𑀦𑁂𑀢𑀁 𑀬𑀣𑀸𑀦𑀼𑀭𑀽𑀧𑀁 𑀅𑀧𑀸𑀬𑁂𑀲𑀼 𑀉𑀧𑀧𑀢𑁆𑀢𑀺𑀬𑀸, 𑀲𑀼𑀕𑀢𑀺𑀬𑀫𑁆𑀧𑀺 𑀤𑀼𑀓𑁆𑀔𑀯𑀺𑀲𑁂𑀲𑀲𑁆𑀲 𑀅𑀪𑀺𑀦𑀺𑀧𑁆𑀨𑀸𑀤𑀓𑀁 𑀳𑁄𑀢𑀺.

𑁩𑁦. 𑀮𑁄𑀪𑀫𑀽𑀮𑀯𑀲𑁂𑀦𑀝𑁆𑀞, 𑀤𑁄𑀲𑀫𑀽𑀮𑀯𑀲𑀸 𑀤𑀼𑀯𑁂;

𑀫𑁄𑀳𑀫𑀽𑀮𑀯𑀲𑁂𑀦 𑀤𑁆𑀯𑁂, 𑀏𑀯𑀁 𑀤𑁆𑀯𑀸𑀤𑀲𑀥𑀸 𑀲𑀺𑀬𑀼𑀁.

𑁩𑁧. 𑀧𑀸𑀧𑀸𑀧𑀸𑀧𑁂𑀲𑁆𑀯𑀧𑀸𑀧𑁂𑀦, 𑀬𑀁 𑀯𑀼𑀢𑁆𑀢𑀁 𑀧𑀸𑀧𑀫𑀸𑀦𑀲𑀁;

𑀧𑀸𑀧𑀸𑀧𑀸𑀧𑀧𑁆𑀧𑀳𑀻𑀦𑁂𑀦, 𑀢𑀁 𑀫𑀬𑀸 𑀲𑀫𑀼𑀤𑀸𑀳𑀝𑀁.

𑀇𑀢𑀭𑀁 𑀧𑀦 𑀅𑀩𑁆𑀬𑀸𑀓𑀢𑀫𑀯𑀺𑀧𑀸𑀓𑀸𑀭𑀳𑀢𑁄 𑀏𑀓𑀯𑀺𑀥𑀁 𑀳𑁄𑀢𑀺, 𑀚𑀸𑀢𑀺𑀪𑁂𑀤𑀢𑁄 𑀤𑀼𑀯𑀺𑀥𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀓𑀺𑀭𑀺𑀬𑀘𑀺𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀯𑀺𑀧𑀸𑀓𑀘𑀺𑀢𑁆𑀢𑀁 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀤𑀼𑀯𑀺𑀥𑀁 𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑀦𑁆𑀢𑀺. 𑀓𑀼𑀲𑀮𑀯𑀺𑀧𑀸𑀓𑀁 𑀤𑀼𑀯𑀺𑀥𑀁 𑀲𑀳𑁂𑀢𑀼𑀓𑀫𑀳𑁂𑀢𑀼𑀓𑀜𑁆𑀘𑁂𑀢𑀺.

𑀢𑀢𑁆𑀣 𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀲𑀓𑀓𑀼𑀲𑀮𑀁 𑀯𑀺𑀬 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀲𑀲𑀗𑁆𑀔𑀸𑀭𑀦𑁆𑀢𑀺 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀲𑀳𑁂𑀢𑀼𑀓𑀯𑀺𑀧𑀸𑀓𑀁 𑀦𑀸𑀫.

𑀬𑀣𑀸 𑀧𑀦𑀲𑁆𑀲 𑀓𑀼𑀲𑀮𑀁 𑀤𑀸𑀦𑀸𑀤𑀺𑀯𑀲𑁂𑀦 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺, 𑀦 𑀇𑀤𑀁 𑀢𑀣𑀸. 𑀇𑀤𑀁 𑀳𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀭𑀺𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑁂𑀲𑀼𑀬𑁂𑀯 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀯𑀺𑀲𑁂𑀲𑁂 𑀅𑀲𑀢𑀺𑀧𑀺 𑀆𑀤𑀸𑀲𑀢𑀮𑀸𑀤𑀻𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀧𑀸𑀓𑀁, 𑀫𑀼𑀔𑀁 𑀯𑀺𑀬 𑀲𑀉𑀲𑁆𑀲𑀸𑀳𑀁 𑀓𑀼𑀲𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀲𑀁 𑀧𑀦 𑀯𑀺𑀧𑀘𑁆𑀘𑀦𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸𑀦𑀺 𑀳𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀸𑀦𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀦𑁆𑀢𑀺.

𑁩𑁨. 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁, 𑀫𑀦𑀼𑀲𑁆𑀲𑀸𑀦𑀁 𑀇𑀫𑁂 𑀧𑀦;

𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀽𑀦𑀁, 𑀪𑀯𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑁄.

𑁩𑁩. 𑀢𑀢𑁄 𑀧𑀯𑀢𑁆𑀢𑀺𑀬𑀁 𑀳𑀼𑀢𑁆𑀯𑀸, 𑀪𑀯𑀗𑁆𑀕𑀁 𑀬𑀸𑀯𑀢𑀸𑀬𑀼𑀓𑀁;

𑀩𑀮𑀯𑀸𑀭𑀫𑁆𑀫𑀡𑁂 𑀳𑀼𑀢𑁆𑀯𑀸, 𑀢𑀤𑀸𑀭𑀫𑁆𑀫𑀡𑀫𑁂𑀯 𑀘.

𑁩𑁪. 𑀢𑀢𑁄 𑀫𑀭𑀡𑀓𑀸𑀮𑀲𑁆𑀫𑀺𑀁, 𑀘𑀼𑀢𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀭𑁂;

𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼, 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀦𑀺𑀤𑁆𑀤𑀺𑀲𑁂.

𑁩𑁫. 𑀲𑀪𑀽𑀫𑀺𑀓𑀼𑀲𑀮𑁂𑀳𑁂𑀯, 𑀫𑀳𑀸𑀧𑀸𑀓𑀸 𑀲𑀫𑀸 𑀯𑀺𑀦𑀸;

𑀓𑀫𑁆𑀫𑀤𑁆𑀯𑀸𑀭𑀜𑁆𑀘 𑀓𑀫𑁆𑀫𑀜𑁆𑀘, 𑀧𑀼𑀜𑁆𑀜𑀸𑀦𑀁 𑀓𑁆𑀭𑀺𑀬𑀯𑀢𑁆𑀣𑀼𑀓𑀁.

𑁩𑁬. 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀢𑁆𑀢𑀸 𑀳𑀺, 𑀅𑀯𑀺𑀧𑀸𑀓𑀲𑀪𑀸𑀯𑀢𑁄;

𑀅𑀧𑁆𑀧𑀯𑀢𑁆𑀢𑀦𑀢𑁄 𑀘𑁂𑀯, 𑀧𑀸𑀓𑀸 𑀧𑀼𑀜𑁆𑀜𑁂𑀳𑀺 𑀦𑁄 𑀲𑀫𑀸.

𑁩𑁭. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀳𑀺, 𑀢𑁂𑀲𑀫𑁂𑀓𑀦𑁆𑀢𑀢𑁄 𑀧𑀦;

𑀓𑀭𑀼𑀡𑀸𑀫𑀼𑀤𑀺𑀢𑀸 𑀢𑁂𑀲𑀼, 𑀦 𑀚𑀸𑀬𑀦𑁆𑀢𑀺 𑀓𑀤𑀸𑀘𑀺𑀧𑀺.

𑁩𑁮. 𑀢𑀣𑀸 𑀯𑀺𑀭𑀢𑀺𑀬𑁄 𑀢𑀺𑀲𑁆𑀲𑁄, 𑀦 𑀧𑀦𑁂𑀢𑁂𑀲𑀼 𑀚𑀸𑀬𑀭𑁂;

𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀯𑀼𑀢𑁆𑀢𑀸, 𑀓𑀼𑀲𑀮𑀸𑀢𑀺 𑀳𑀺 𑀲𑀢𑁆𑀣𑀼𑀦𑀸.

𑁩𑁯. 𑀢𑀣𑀸𑀥𑀺𑀧𑀢𑀺𑀦𑁄𑀧𑁂𑀢𑁆𑀣, 𑀦 𑀲𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂;

𑀙𑀦𑁆𑀤𑀸𑀤𑀻𑀦𑀺 𑀥𑀼𑀭𑀁 𑀓𑀢𑁆𑀯𑀸, 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀧𑀦.

𑁪𑁦. 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭-𑀯𑀺𑀥𑀸𑀦𑀁 𑀧𑀦 𑀧𑀼𑀜𑁆𑀜𑀢𑁄;

𑀜𑁂𑀬𑁆𑀬𑀁 𑀧𑀘𑁆𑀘𑀬𑀢𑁄 𑀘𑁂𑀯, 𑀯𑀺𑀧𑀸𑀓𑁂𑀲𑀼 𑀘 𑀯𑀺𑀜𑁆𑀜𑀼𑀦𑀸.

𑁪𑁧. 𑀳𑀻𑀦𑀸𑀤𑀻𑀦𑀁 𑀯𑀺𑀧𑀸𑀓𑀢𑁆𑀢𑀸, 𑀧𑀼𑀜𑁆𑀜𑀸𑀦𑀁 𑀧𑀼𑀜𑁆𑀜𑀯𑀸𑀤𑀺𑀦𑀸;

𑀳𑀻𑀦𑀸𑀤𑀬𑁄 𑀪𑀯𑀦𑁆𑀢𑀻𑀢𑀺, 𑀯𑀺𑀧𑀸𑀓𑀸 𑀧𑀭𑀺𑀤𑀻𑀧𑀺𑀢𑀸.

𑁪𑁨. 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁, 𑀏𑀓𑀦𑁆𑀢𑁂𑀦 𑀲𑀯𑀢𑁆𑀣𑀼𑀓𑀁;

𑀚𑀸𑀬𑀢𑁂 𑀓𑀸𑀫𑀮𑁄𑀓𑀲𑁆𑀫𑀺𑀁, 𑀦 𑀧𑀦𑀜𑁆𑀜𑀢𑁆𑀣 𑀚𑀸𑀬𑀢𑁂.

𑀏𑀯𑀁 𑀢𑀸𑀯 𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀧𑀦 𑀅𑀮𑁄𑀪𑀸𑀤𑀺𑀳𑁂𑀢𑀼𑀯𑀺𑀭𑀳𑀺𑀢𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀲𑀫𑁆𑀧𑀝𑀺𑀘𑁆𑀙𑀦𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀦𑁆𑀢𑀻𑀭𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀦𑁆𑀢𑀻𑀭𑀡𑀦𑁆𑀢𑀺 𑀇𑀤𑀁 𑀧𑀦 𑀅𑀝𑁆𑀞𑀯𑀺𑀥𑀁 𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀦𑀸𑀫.

𑀇𑀤𑀁 𑀧𑀦 𑀅𑀝𑁆𑀞𑀯𑀺𑀥𑀁 𑀦𑀺𑀬𑀢𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀁, 𑀦𑀺𑀬𑀢𑀸𑀦𑀺𑀬𑀢𑀸𑀭𑀫𑁆𑀫𑀡𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀧𑀜𑁆𑀘𑀓𑀁 𑀦𑀺𑀬𑀢𑀸𑀭𑀫𑁆𑀫𑀡𑀁, 𑀲𑁂𑀲𑀢𑁆𑀢𑀬𑀁 𑀅𑀦𑀺𑀬𑀢𑀸𑀭𑀫𑁆𑀫𑀡𑀁. 𑀲𑀼𑀔𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑁄𑀕𑀢𑁄 𑀢𑀺𑀯𑀺𑀥𑀁. 𑀢𑀢𑁆𑀣 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀲𑀦𑁆𑀢𑀻𑀭𑀡𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀬𑀼𑀢𑁆𑀢𑀁, 𑀲𑁂𑀲𑀫𑀼𑀧𑁂𑀓𑁆𑀔𑀸𑀬𑀼𑀢𑁆𑀢𑀦𑁆𑀢𑀺.

𑀤𑀺𑀝𑁆𑀞𑀸𑀭𑀫𑁆𑀫𑀡𑀲𑀼𑀢𑀸𑀭𑀫𑁆𑀫𑀡𑀫𑀼𑀢𑀸𑀭𑀫𑁆𑀫𑀡𑀤𑀺𑀝𑁆𑀞𑀲𑀼𑀢𑀫𑀼𑀢𑀸𑀭𑀫𑁆𑀫𑀡𑀤𑀺𑀝𑁆𑀞-𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀸𑀭𑀫𑁆𑀫𑀡𑀯𑀲𑁂𑀦 𑀧𑀜𑁆𑀘𑀯𑀺𑀥𑀁. 𑀢𑀢𑁆𑀣 𑀤𑀺𑀝𑁆𑀞𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑀼𑀢𑀸𑀭𑀫𑁆𑀫𑀡𑀁 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀫𑀼𑀢𑀸𑀭𑀫𑁆𑀫𑀡𑀁 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀢𑁆𑀢𑀬𑀁, 𑀤𑀺𑀝𑁆𑀞𑀲𑀼𑀢𑀫𑀼𑀢𑀸𑀭𑀫𑁆𑀫𑀡𑀁 𑀫𑀦𑁄𑀥𑀸𑀢𑀼𑀲𑀫𑁆𑀧𑀝𑀺𑀘𑁆𑀙𑀦𑀁, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀸𑀭𑀫𑁆𑀫𑀡𑀁 𑀲𑁂𑀲𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀦𑁆𑀢𑀺.

𑀯𑀢𑁆𑀣𑀼𑀢𑁄 𑀙𑀩𑁆𑀩𑀺𑀥𑀁. 𑀓𑀣𑀁? 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀘𑀓𑁆𑀔𑀼𑀫𑁂𑀯 𑀯𑀢𑁆𑀣𑀼, 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼, 𑀅𑀯𑀲𑁂𑀲𑀢𑁆𑀢𑀬𑀲𑁆𑀲 𑀳𑀤𑀬𑀯𑀢𑁆𑀣𑀼𑀫𑁂𑀯𑀸𑀢𑀺.

𑀆𑀭𑀫𑁆𑀫𑀡𑀢𑁄 𑀲𑀢𑁆𑀢𑀯𑀺𑀥𑀁 𑀳𑁄𑀢𑀺. 𑀓𑀣𑀁? 𑀭𑀽𑀧𑀸𑀭𑀫𑁆𑀫𑀡𑀫𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀣𑀸 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺, 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀸 𑀫𑀦𑁄𑀥𑀸𑀢𑀼, 𑀲𑁂𑀲𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀁 𑀙𑀴𑀸𑀭𑀫𑁆𑀫𑀡𑀦𑁆𑀢𑀺.

𑀢𑀁 𑀲𑀩𑁆𑀩𑀁 𑀧𑀦 𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀁 𑀓𑀺𑀘𑁆𑀘𑀢𑁄 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀓𑀣𑀁? 𑀤𑀲𑁆𑀲𑀦𑀓𑀺𑀘𑁆𑀘𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀺 𑀅𑀯𑀲𑁂𑀲𑀸𑀦𑀺.

𑀢𑀢𑁆𑀣 𑀘𑀓𑁆𑀔𑀼𑀢𑁄 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀫𑁆𑀳𑀺 𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀣𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺. 𑀢𑀢𑁆𑀣 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀭𑀽𑀧𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀭𑀽𑀧𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀁, 𑀭𑀽𑀧𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀭𑀽𑀧𑀸𑀭𑀫𑁆𑀫𑀡𑀸𑀬 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀬𑀸 𑀅𑀧𑀕𑀫𑀧𑀤𑀝𑁆𑀞𑀸𑀦𑀁. 𑀢𑀣𑀸 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺 𑀲𑁄𑀢𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀲𑀤𑁆𑀤𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀸𑀦𑀺, 𑀲𑀤𑁆𑀤𑀸𑀤𑀺𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀸𑀦𑀺, 𑀲𑀤𑁆𑀤𑀸𑀤𑀻𑀲𑀼 𑀅𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺, 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀽𑀦𑀁 𑀅𑀧𑀕𑀫𑀧𑀤𑀝𑁆𑀞𑀸𑀦𑀸𑀦𑀺. 𑀫𑀦𑁄𑀥𑀸𑀢𑀼𑀲𑀫𑁆𑀧𑀝𑀺𑀘𑁆𑀙𑀦𑀁 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀸 𑀭𑀽𑀧𑀸𑀤𑀺𑀯𑀺𑀚𑀸𑀦𑀦𑀮𑀓𑁆𑀔𑀡𑀁, 𑀭𑀽𑀧𑀸𑀤𑀺𑀲𑀫𑁆𑀧𑀝𑀺𑀘𑁆𑀙𑀦𑀭𑀲𑀁, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀧𑀕𑀫𑀧𑀤𑀝𑁆𑀞𑀸𑀦𑀁.

𑀲𑁂𑀲𑀸 𑀧𑀦 𑀤𑁆𑀯𑁂 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀙𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀲𑀦𑁆𑀢𑀻𑀭𑀡𑀸𑀤𑀺𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀞𑀫𑀸 𑀏𑀓𑀦𑁆𑀢𑀫𑀺𑀝𑁆𑀞𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸𑀯 𑀳𑀼𑀢𑁆𑀯𑀸 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀞𑀢𑁆𑀯𑀸 𑀯𑀺𑀧𑀘𑁆𑀘𑀢𑀺, 𑀙𑀲𑀼 𑀧𑀦 𑀤𑁆𑀯𑀸𑀭𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀤𑀼𑀢𑀺𑀬𑀸 𑀧𑀦 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑀼𑀢𑁆𑀯𑀸 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀺. 𑀓𑀣𑀁? 𑀫𑀦𑀼𑀲𑁆𑀲𑀮𑁄𑀓𑁂 𑀢𑀸𑀯 𑀚𑀘𑁆𑀘𑀦𑁆𑀥𑀚𑀘𑁆𑀘𑀩𑀥𑀺𑀭𑀚𑀘𑁆𑀘𑀚𑀴𑀚𑀘𑁆𑀘𑀼𑀫𑁆𑀫𑀢𑁆𑀢𑀓𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀦𑀧𑀼𑀁𑀲𑀓𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀧𑀝𑀺𑀲𑀦𑁆𑀥𑀺𑀬𑀸 𑀯𑀻𑀢𑀺𑀯𑀢𑁆𑀢𑀸𑀬 𑀧𑀯𑀢𑁆𑀢𑀺𑀬𑀁 𑀬𑀸𑀯𑀢𑀸𑀬𑀼𑀓𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀧𑀜𑁆𑀘𑀸𑀭𑀫𑁆𑀫𑀡𑀯𑀻𑀣𑀺𑀬𑀸 𑀲𑀦𑁆𑀢𑀻𑀭𑀡𑀁 𑀳𑀼𑀢𑁆𑀯𑀸, 𑀩𑀮𑀯𑀸𑀭𑀫𑁆𑀫𑀡𑁂 𑀙𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀫𑀭𑀡𑀓𑀸𑀮𑁂 𑀘𑀼𑀢𑀺 𑀳𑀼𑀢𑁆𑀯𑀸𑀢𑀺 𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀻𑀢𑀺. 𑀏𑀯𑀁 𑀢𑀸𑀯 𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪𑁩. 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀲𑁆𑀲, 𑀯𑀺𑀧𑀸𑀓𑀸 𑀳𑁄𑀦𑁆𑀢𑀺 𑀲𑁄𑀴𑀲;

𑀢𑀁 𑀢𑀺𑀳𑁂𑀢𑀼𑀓𑀧𑀼𑀜𑁆𑀜𑀲𑁆𑀲, 𑀯𑀲𑁂𑀦 𑀧𑀭𑀺𑀤𑀻𑀧𑀬𑁂.

𑀇𑀤𑀸𑀦𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀦𑀺 𑀦𑀺𑀬𑀢𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀸𑀦𑀺, 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀸𑀦𑀺. 𑀓𑀣𑀁? 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀁, 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀁, 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀁, 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘𑀧𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀉𑀧𑀧𑀢𑁆𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺.

𑀇𑀤𑀸𑀦𑀺 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀦𑀺 𑀲𑀓𑀓𑀼𑀲𑀮𑀸𑀦𑀺 𑀯𑀺𑀬 𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁? 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺.

𑁪𑁪. 𑀓𑀼𑀲𑀮𑀸𑀦𑀼𑀕𑀢𑀁 𑀓𑀢𑁆𑀯𑀸, 𑀪𑀸𑀚𑀺𑀢𑀁 𑀓𑀺𑀁 𑀫𑀳𑀕𑁆𑀕𑀢𑀁;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁𑀯, 𑀦𑀸𑀲𑀫𑀸𑀦𑀨𑀮𑀁 𑀬𑀢𑁄.

𑁪𑁫. 𑀅𑀢𑁆𑀢𑀦𑁄 𑀓𑀼𑀲𑀮𑁂𑀳𑁂𑀯, 𑀲𑀫𑀸𑀦𑀁 𑀲𑀩𑁆𑀩𑀣𑀸 𑀇𑀤𑀁;

𑀕𑀚𑀸𑀤𑀻𑀦𑀁 𑀬𑀣𑀸 𑀙𑀸𑀬𑀸, 𑀕𑀚𑀸𑀤𑀺𑀲𑀤𑀺𑀲𑀸 𑀢𑀣𑀸.

𑁪𑁬. 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁𑀯, 𑀦𑀸𑀧𑀭𑀸𑀧𑀭𑀺𑀬𑀯𑁂𑀤𑀦𑀁;

𑀛𑀸𑀦𑀸 𑀅𑀧𑀭𑀺𑀳𑀻𑀦𑀲𑁆𑀲, 𑀲𑀢𑁆𑀢𑀲𑁆𑀲 𑀪𑀯𑀕𑀸𑀫𑀺𑀦𑁄.

𑁪𑁭. 𑀓𑀼𑀲𑀮𑀸𑀦𑀦𑁆𑀢𑀭𑀁𑀬𑁂𑀯, 𑀨𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘;

𑀜𑀸𑀧𑀦𑀢𑁆𑀣𑀁 𑀧𑀦𑁂𑀢𑀲𑁆𑀲, 𑀓𑀼𑀲𑀮𑀸𑀦𑀼𑀕𑀢𑀁 𑀓𑀢𑀁.

𑁪𑁮. 𑀧𑀝𑀺𑀧𑁆𑀧𑀤𑀸𑀓𑁆𑀓𑀫𑁄 𑀘𑁂𑀯, 𑀳𑀻𑀦𑀸𑀤𑀻𑀦𑀜𑁆𑀘 𑀪𑁂𑀤𑀢𑁄;

𑀛𑀸𑀦𑀸𑀕𑀫𑀦𑀢𑁄 𑀘𑁂𑀢𑁆𑀣, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁪𑁯. 𑀅𑀪𑀸𑀯𑁄𑀥𑀺𑀧𑀢𑀻𑀦𑀜𑁆𑀘, 𑀅𑀬𑀫𑁂𑀯 𑀯𑀺𑀲𑁂𑀲𑀓𑁄;

𑀲𑁂𑀲𑀁 𑀲𑀩𑁆𑀩𑀁 𑀘 𑀲𑁂𑀲𑁂𑀦, 𑀓𑀼𑀲𑀮𑁂𑀦 𑀲𑀫𑀁 𑀫𑀢𑀁. 𑁋

𑀏𑀯𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀘𑀢𑀼𑀫𑀕𑁆𑀕𑀬𑀼𑀢𑁆𑀢𑀘𑀺𑀢𑁆𑀢𑀨𑀮𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀘𑀺𑀢𑁆𑀢𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀨𑀮𑀘𑀺𑀢𑁆𑀢𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀨𑀮𑀘𑀺𑀢𑁆𑀢𑀁, 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀘𑀺𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀦𑁂𑀢𑁆𑀣 𑀏𑀓𑁂𑀓𑀁 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁, 𑀧𑀼𑀦 𑀫𑀕𑁆𑀕𑀯𑀻𑀣𑀺𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀤𑀼𑀯𑀺𑀥𑀁. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁫𑁦. 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀦𑁆𑀢𑀺, 𑀢𑀣𑀸𑀧𑀡𑀺𑀳𑀺𑀢𑀦𑁆𑀢𑀺𑀧𑀺;

𑀏𑀢𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺, 𑀫𑀕𑁆𑀕𑀲𑁆𑀲𑀸𑀦𑀦𑁆𑀢𑀭𑁂 𑀨𑀮𑁂.

𑁫𑁧. 𑀮𑀩𑁆𑀪𑀦𑁆𑀢𑀺 𑀧𑀭𑀪𑀸𑀕𑀲𑁆𑀫𑀺𑀁, 𑀯𑀴𑀜𑁆𑀚𑀦𑀨𑀮𑁂𑀲𑀼 𑀦;

𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯, 𑀢𑀸𑀦𑀺 𑀦𑀸𑀫𑀸𑀦𑀺 𑀮𑀩𑁆𑀪𑀭𑁂.

𑁫𑁨. 𑀳𑁄𑀦𑁆𑀢𑀺 𑀲𑀸𑀥𑀺𑀧𑀢𑀻𑀦𑁂𑀯, 𑀮𑁄𑀓𑀼𑀢𑁆𑀢𑀭𑀨𑀮𑀸𑀦𑀺 𑀢𑀼;

𑀯𑀺𑀧𑀸𑀓𑁂𑀥𑀺𑀧𑀢𑀻 𑀦𑀢𑁆𑀣𑀺, 𑀞𑀧𑁂𑀢𑁆𑀯𑀸 𑀢𑀼 𑀅𑀦𑀸𑀲𑀯𑁂.

𑁫𑁩. 𑀅𑀢𑁆𑀢𑀦𑁄 𑀫𑀕𑁆𑀕𑀪𑀸𑀯𑁂𑀦, 𑀫𑀕𑁆𑀕𑁄 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺;

𑀨𑀮𑀁 𑀫𑀕𑁆𑀕𑀫𑀼𑀧𑀸𑀤𑀸𑀬, 𑀫𑀕𑁆𑀕𑁄 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑁋

𑀏𑀯𑀁 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀲𑀢𑁆𑀢𑀸𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀲𑀫𑁆𑀧𑀝𑀺𑀘𑁆𑀙𑀦𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀦𑁆𑀢𑀻𑀭𑀡𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀅𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺.

𑀏𑀢𑁆𑀣 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀏𑀓𑀸𑀤𑀲𑀯𑀺𑀥𑁂𑀦𑀸𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺, 𑀧𑀝𑀺𑀲𑀦𑁆𑀥𑀺𑀬𑀸 𑀯𑀻𑀢𑀺𑀯𑀢𑁆𑀢𑀸𑀬 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑀁 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀢𑀸𑀬𑀼𑀓𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸, 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀬 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀲𑀦𑁆𑀢𑀻𑀭𑀡𑀁 𑀳𑀼𑀢𑁆𑀯𑀸, 𑀩𑀮𑀯𑀸𑀭𑀫𑁆𑀫𑀡𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀫𑀭𑀡𑀓𑀸𑀮𑁂 𑀘𑀼𑀢𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺. 𑀏𑀯𑀁 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀢𑀺. 𑀓𑁂𑀯𑀮𑀁 𑀳𑀺 𑀢𑀸𑀦𑀺 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀸𑀦𑀺, 𑀇𑀫𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀸𑀦𑀺. 𑀅𑀬𑀫𑀺𑀫𑁂𑀲𑀁, 𑀢𑁂𑀲𑀜𑁆𑀘 𑀯𑀺𑀲𑁂𑀲𑁄.

𑁫𑁪. 𑀅𑀦𑀺𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂 𑀯𑀢𑁆𑀢𑀭𑁂 𑀇𑀫𑁂;

𑀲𑀼𑀔𑀸𑀤𑀺𑀢𑁆𑀢𑀬𑀬𑀼𑀢𑁆𑀢𑀸 𑀢𑁂, 𑀤𑀼𑀓𑁆𑀔𑀼𑀧𑁂𑀓𑁆𑀔𑀸𑀬𑀼𑀢𑀸 𑀇𑀫𑁂.

𑀏𑀯𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑀳𑁂𑀢𑀼𑀓𑀫𑀝𑁆𑀞𑀯𑀺𑀥𑀁, 𑀅𑀳𑁂𑀢𑀼𑀓𑀫𑀝𑁆𑀞𑀯𑀺𑀥𑀁, 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀧𑀜𑁆𑀘𑀯𑀺𑀥𑀁, 𑀆𑀭𑀫𑁆𑀫𑀡𑀪𑁂𑀤𑀢𑁄 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀘𑀢𑀼𑀩𑁆𑀩𑀺𑀥𑀁, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀨𑀮𑀪𑁂𑀤𑀢𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀘𑀢𑀼𑀩𑁆𑀩𑀺𑀥𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀪𑁂𑀤𑀢𑁄 𑀅𑀓𑀼𑀲𑀮𑀯𑀺𑀧𑀸𑀓𑀁 𑀲𑀢𑁆𑀢𑀯𑀺𑀥𑀦𑁆𑀢𑀺 𑀙𑀢𑁆𑀢𑀺𑀁𑀲𑀯𑀺𑀥𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁫𑁫. 𑀏𑀯𑀁 𑀙𑀢𑁆𑀢𑀺𑀁𑀲𑀥𑀸 𑀧𑀸𑀓𑀁, 𑀧𑀸𑀓𑀲𑀸𑀲𑀦𑀧𑀽𑀚𑀺𑀢𑁄;

𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑁂𑀲𑀼, 𑀓𑀼𑀲𑀮𑁄 𑀲𑀼𑀕𑀢𑁄𑀩𑁆𑀭𑀯𑀺.

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀁 𑀧𑀦 𑀅𑀯𑀺𑀧𑀸𑀓𑀢𑁄 𑀏𑀓𑀯𑀺𑀥𑀁, 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀢𑁄 𑀤𑀼𑀯𑀺𑀥𑀁, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀪𑁂𑀤𑀢𑁄 𑀢𑀺𑀯𑀺𑀥𑀁. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀤𑀼𑀯𑀺𑀥𑀁 𑀲𑀳𑁂𑀢𑀼𑀓𑀫𑀳𑁂𑀢𑀼𑀓𑀦𑁆𑀢𑀺. 𑀢𑀢𑁆𑀣 𑀲𑀳𑁂𑀢𑀼𑀓𑀁 𑀏𑀓𑀯𑀺𑀥𑀁 𑀅𑀭𑀳𑀢𑁄 𑀏𑀯 𑀉𑀧𑁆𑀧𑀚𑁆𑀚𑀦𑀢𑁄. 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀯𑀺𑀬 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀲𑀗𑁆𑀔𑀸𑀭𑀺𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀲𑀗𑁆𑀔𑀸𑀭𑀺𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀲𑀗𑁆𑀔𑀸𑀭𑀺𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀏𑀢𑀸𑀦𑀺 𑀧𑀦 𑀬𑀣𑀸𑀦𑀼𑀭𑀽𑀧𑀁 𑀤𑀸𑀦𑀸𑀤𑀺𑀯𑀲𑁂𑀦 𑀔𑀻𑀡𑀸𑀲𑀯𑀸𑀦𑀁𑀬𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀁 𑀧𑀦 𑀢𑀺𑀯𑀺𑀥𑀁 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯𑀚𑁆𑀚𑀦𑀘𑀺𑀢𑁆𑀢𑀁, 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀁, 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑁄𑀝𑁆𑀞𑀩𑁆𑀩𑀦𑀘𑀺𑀢𑁆𑀢𑀦𑁆𑀢𑀺.

𑀢𑀢𑁆𑀣 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀆𑀯𑀚𑁆𑀚𑀦𑀯𑀲𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀼𑀭𑁂𑀘𑀸𑀭𑀻 𑀳𑀼𑀢𑁆𑀯𑀸 𑀪𑀯𑀗𑁆𑀕𑀁 𑀆𑀯𑀝𑁆𑀝𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀭𑀸 𑀧𑀦 𑀤𑁆𑀯𑁂 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀸𑀢𑀺 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀲𑀸𑀥𑀸𑀭𑀡𑀸 𑀧𑀦 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀔𑀻𑀡𑀸𑀲𑀯𑀲𑁆𑀲𑁂𑀯 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀙𑀲𑀼 𑀅𑀦𑀼𑀴𑀸𑀭𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀳𑀲𑀺𑀢𑀼𑀧𑁆𑀧𑀸𑀤𑀓𑀺𑀘𑁆𑀘𑀸 𑀦𑀺𑀬𑀢𑀯𑀢𑁆𑀣𑀼𑀓𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀸𑀥𑀸𑀭𑀡𑀸 𑀧𑀦 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀙𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀸 𑀢𑀻𑀲𑀼 𑀪𑀯𑁂𑀲𑀼 𑀲𑀩𑁆𑀩𑁂𑀲𑀁 𑀲𑀘𑀺𑀢𑁆𑀢𑀓𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸, 𑀦 𑀓𑀲𑁆𑀲𑀘𑀺 𑀧𑀦 𑀲𑀘𑀺𑀢𑁆𑀢𑀓𑀲𑁆𑀲 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀦𑀸𑀬𑀁 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀲𑀼 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀓𑀺𑀘𑁆𑀘𑀸 𑀉𑀧𑁆𑀧𑀚𑁆𑀚𑀢𑀺. 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺𑀧𑀺 𑀏𑀢𑀸𑀬 𑀕𑀳𑀺𑀢𑀸𑀭𑀫𑁆𑀫𑀡𑀫𑁂𑀯 𑀕𑀡𑁆𑀳𑀦𑁆𑀢𑀺. 𑀲𑀩𑁆𑀩𑀸𑀭𑀫𑁆𑀫𑀡𑀕𑀳𑀡𑀲𑀫𑀢𑁆𑀣𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀸𑀦𑀺 𑀢𑀻𑀡𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺.

𑀇𑀥 𑀞𑀢𑁆𑀯𑀸 𑀳𑀲𑀦𑀘𑀺𑀢𑁆𑀢𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀸𑀦𑀺. 𑀢𑁂𑀭𑀲 𑀳𑀲𑀦𑀘𑀺𑀢𑁆𑀢𑀸𑀦𑀺. 𑀓𑀼𑀲𑀮𑀢𑁄 𑀘𑀢𑀽𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺, 𑀅𑀓𑀼𑀲𑀮𑀢𑁄 𑀘𑀢𑀽𑀳𑀻𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀘𑀺𑀢𑁆𑀢𑁂𑀳𑀺 𑀧𑀼𑀣𑀼𑀚𑁆𑀚𑀦𑀸 𑀳𑀲𑀦𑁆𑀢𑀺, 𑀲𑁂𑀔𑀸 𑀧𑀦 𑀓𑀼𑀲𑀮𑀢𑁄 𑀘𑀢𑀽𑀳𑀺, 𑀅𑀓𑀼𑀲𑀮𑀢𑁄 𑀤𑁆𑀯𑀻𑀳𑀺 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀻𑀢𑀺 𑀙𑀳𑀺 𑀳𑀲𑀦𑁆𑀢𑀺, 𑀔𑀻𑀡𑀸𑀲𑀯𑀸 𑀓𑀺𑀭𑀺𑀬𑀢𑁄 𑀧𑀜𑁆𑀘𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺 𑀳𑀲𑀦𑁆𑀢𑀻𑀢𑀺.

𑁫𑁬. 𑀲𑁄𑀫𑀦𑀲𑁆𑀲𑀬𑀼𑀢𑀸𑀦𑀝𑁆𑀞, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀘;

𑀓𑁆𑀭𑀺𑀬𑀢𑁄 𑀧𑀦 𑀧𑀜𑁆𑀘𑁂𑀯𑀁, 𑀳𑀸𑀲𑀘𑀺𑀢𑁆𑀢𑀸𑀦𑀺 𑀢𑁂𑀭𑀲.

𑁫𑁭. 𑀧𑀼𑀣𑀼𑀚𑁆𑀚𑀦𑀸 𑀳𑀲𑀦𑁆𑀢𑁂𑀢𑁆𑀣, 𑀘𑀺𑀢𑁆𑀢𑁂𑀳𑀺 𑀧𑀦 𑀅𑀝𑁆𑀞𑀳𑀺;

𑀙𑀳𑀺 𑀲𑁂𑀔𑀸 𑀅𑀲𑁂𑀔𑀸 𑀘, 𑀳𑀲𑀦𑁆𑀢𑀺 𑀧𑀦 𑀧𑀜𑁆𑀘𑀳𑀺.

𑀇𑀤𑀸𑀦𑀺 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀁, 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀁, 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀁, 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺.

𑀇𑀤𑀸𑀦𑀺 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀇𑀫𑀸𑀦𑀺 𑀧𑀦 𑀭𑀽𑀧𑀸𑀭𑀽𑀧𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀲𑀓𑀲𑀓𑀪𑀽𑀫𑀺𑀓𑀼𑀲𑀮𑀲𑀤𑀺𑀲𑀸𑀦𑀺. 𑀓𑁂𑀯𑀮𑀁 𑀧𑀦𑁂𑀢𑀸𑀦𑀺 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀔𑀻𑀡𑀸𑀲𑀯𑀸𑀦𑀁𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀼𑀲𑀮𑀸𑀦𑀺 𑀧𑀦 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁. 𑀇𑀫𑀸𑀦𑀺 𑀘 𑀔𑀻𑀡𑀸𑀲𑀯𑀸𑀦𑀁 𑀪𑀸𑀯𑀦𑀸𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀦 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀸𑀦𑀻𑀢𑀺 𑀅𑀬𑀫𑁂𑀯 𑀇𑀫𑁂𑀲𑀁, 𑀢𑁂𑀲𑀜𑁆𑀘 𑀯𑀺𑀲𑁂𑀲𑁄.