𑁨. 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑁄

𑁬𑁭. 𑀘𑀺𑀢𑁆𑀢𑀸𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀸, 𑀬𑁂 𑀘 𑀘𑁂𑀢𑀲𑀺𑀓𑀸 𑀫𑀬𑀸;

𑀢𑁂𑀲𑀁 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀯𑀺𑀪𑀸𑀚𑀦𑀫𑀺𑀢𑁄 𑀧𑀭𑀁.

𑀢𑀢𑁆𑀣 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸, 𑀘𑀺𑀢𑁆𑀢𑁂 𑀪𑀯𑀸 𑀯𑀸 𑀘𑁂𑀢𑀲𑀺𑀓𑀸. 𑀢𑁂𑀧𑀺 𑀘𑀺𑀢𑁆𑀢𑀁 𑀯𑀺𑀬 𑀲𑀸𑀭𑀫𑁆𑀫𑀡𑀢𑁄 𑀏𑀓𑀯𑀺𑀥𑀸, 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀢𑁄 𑀤𑀼𑀯𑀺𑀥𑀸, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑁂𑀤𑀢𑁄 𑀢𑀺𑀯𑀺𑀥𑀸, 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸.

𑀢𑀢𑁆𑀣 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀓𑀸𑀫𑀸𑀯𑀘𑀭𑀸. 𑀢𑁂𑀲𑀼 𑀓𑀸𑀫𑀸𑀯𑀘𑀭𑀧𑀞𑀫𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀦𑀺𑀬𑀢𑀸 𑀲𑀭𑀽𑀧𑁂𑀦 𑀆𑀕𑀢𑀸 𑀏𑀓𑀽𑀦𑀢𑀺𑀁𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀤𑁆𑀥𑀸 𑀲𑀢𑀺 𑀯𑀻𑀭𑀺𑀬𑀁 𑀧𑀜𑁆𑀜𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺 𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢𑀮𑀳𑀼𑀢𑀸 𑀓𑀸𑀬𑀫𑀼𑀤𑀼𑀢𑀸 𑀘𑀺𑀢𑁆𑀢𑀫𑀼𑀤𑀼𑀢𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀓𑀸𑀬𑀼𑀚𑀼𑀓𑀢𑀸 𑀘𑀺𑀢𑁆𑀢𑀼𑀚𑀼𑀓𑀢𑀸𑀢𑀺. 𑀧𑀼𑀦 𑀙𑀦𑁆𑀤𑁄, 𑀅𑀥𑀺𑀫𑁄𑀓𑁆𑀔𑁄, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸, 𑀫𑀦𑀲𑀺𑀓𑀸𑀭𑁄 𑀘𑀸𑀢𑀺 𑀘𑀢𑁆𑀢𑀸𑀭𑁄 𑀦𑀺𑀬𑀢𑀬𑁂𑀯𑀸𑀧𑀦𑀓𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀢𑁂𑀢𑁆𑀢𑀺𑀁𑀲 𑀳𑁄𑀦𑁆𑀢𑀺. 𑀧𑀼𑀦 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀺 𑀘𑁂𑀢𑀺 𑀇𑀫𑁂 𑀧𑀜𑁆𑀘 𑀅𑀦𑀺𑀬𑀢𑀸. 𑀇𑀫𑁂 𑀧𑀦 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀇𑀫𑁂𑀲𑀼 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀲𑁂𑀦 𑀪𑀸𑀯𑀦𑀸𑀓𑀸𑀮𑁂 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀯𑀸 𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑁄 𑀯𑀸 𑀏𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀧𑀦𑁂𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀸 𑀧𑀦 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸𑀤𑀻𑀳𑀺 𑀯𑀺𑀭𑀫𑀢𑀺, 𑀢𑀤𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀤𑀻𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀏𑀓𑀸 𑀯𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀓𑀭𑀼𑀡𑀸𑀫𑀼𑀤𑀺𑀢𑀸𑀳𑀺 𑀲𑀳, 𑀅𑀜𑁆𑀜𑀫𑀜𑁆𑀜𑁂𑀦 𑀘 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁂𑀲𑀼 𑀏𑀓𑁂𑀦 𑀲𑀳 𑀘𑀢𑀼𑀢𑁆𑀢𑀺𑀁𑀲𑁂𑀯 𑀥𑀫𑁆𑀫𑀸 𑀳𑁄𑀦𑁆𑀢𑀺.

𑁬𑁮. 𑀆𑀤𑀺𑀦𑀸 𑀧𑀼𑀜𑁆𑀜𑀘𑀺𑀢𑁆𑀢𑁂𑀦, 𑀢𑁂𑀢𑁆𑀢𑀺𑀁𑀲 𑀦𑀺𑀬𑀢𑀸 𑀫𑀢𑀸;

𑀓𑀭𑀼𑀡𑀸𑀫𑀼𑀤𑀺𑀢𑁂𑀓𑁂𑀦, 𑀘𑀢𑀼𑀢𑁆𑀢𑀺𑀁𑀲 𑀪𑀯𑀦𑁆𑀢𑀺 𑀢𑁂.

𑁬𑁯. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑁂𑀢𑁆𑀢𑀸 𑀘, 𑀉𑀧𑁂𑀓𑁆𑀔𑀸 𑀘 𑀦 𑀉𑀤𑁆𑀥𑀝𑀸;

𑀬𑁂𑀯𑀸𑀧𑀦𑀓𑀥𑀫𑁆𑀫𑁂𑀲𑀼, 𑀥𑀫𑁆𑀫𑀭𑀸𑀚𑁂𑀦 𑀲𑀢𑁆𑀣𑀼𑀦𑀸.

𑁭𑁦. 𑀅𑀩𑁆𑀬𑀸𑀧𑀸𑀤𑁂𑀦 𑀫𑁂𑀢𑁆𑀢𑀸𑀧𑀺, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀘;

𑀉𑀧𑁂𑀓𑁆𑀔𑀸 𑀕𑀳𑀺𑀢𑀸 𑀬𑀲𑁆𑀫𑀸, 𑀢𑀲𑁆𑀫𑀸 𑀦 𑀕𑀳𑀺𑀢𑀸 𑀉𑀪𑁄.

𑁭𑁧. 𑀓𑀲𑁆𑀫𑀸 𑀬𑁂𑀯𑀸𑀧𑀦𑀸 𑀥𑀫𑁆𑀫𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀲𑀭𑀽𑀧𑁂𑀦𑁂𑀯 𑀲𑀩𑁆𑀩𑁂𑀢𑁂, 𑀧𑀸𑀴𑀺𑀬𑀁 𑀦 𑀘 𑀉𑀤𑁆𑀥𑀝𑀸.

𑁭𑁨. 𑀬𑀲𑁆𑀫𑀸 𑀅𑀦𑀺𑀬𑀢𑀸 𑀓𑁂𑀘𑀺, 𑀬𑀲𑁆𑀫𑀸 𑀭𑀸𑀲𑀺𑀁 𑀪𑀚𑀦𑁆𑀢𑀺 𑀦;

𑀬𑀲𑁆𑀫𑀸 𑀘 𑀤𑀼𑀩𑁆𑀩𑀮𑀸 𑀓𑁂𑀘𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀸 𑀦 𑀧𑀸𑀴𑀺𑀬𑀁.

𑁭𑁩. 𑀙𑀦𑁆𑀤𑀸𑀥𑀺𑀫𑁄𑀓𑁆𑀔𑀫𑀼𑀤𑀺𑀢𑀸 𑀫𑀦𑀲𑀺 𑀘 𑀓𑀸𑀭𑁄,

𑀫𑀚𑁆𑀛𑀢𑁆𑀢𑀢𑀸 𑀘 𑀓𑀭𑀼𑀡𑀸 𑀯𑀺𑀭𑀢𑀺𑀢𑁆𑀢𑀬𑀁 𑀘;

𑀧𑀼𑀜𑁆𑀜𑁂𑀲𑀼 𑀢𑁂𑀦 𑀦𑀺𑀬𑀢𑀸𑀦𑀺𑀬𑀢𑀸 𑀘 𑀲𑀩𑁆𑀩𑁂,

𑀬𑁂𑀯𑀸𑀧𑀦𑀸 𑀫𑀼𑀦𑀺𑀯𑀭𑁂𑀦 𑀦 𑀘𑁂𑀯 𑀯𑀼𑀢𑁆𑀢𑀸.

𑁭𑁪. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀨𑀲𑁆𑀲𑁄𑀯, 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑁄;

𑀧𑀞𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸, 𑀘𑀺𑀢𑁆𑀢𑀲𑁆𑀲𑀸𑀭𑀫𑁆𑀫𑀡𑁂 𑀓𑀺𑀭.

𑁭𑁫. 𑀨𑀼𑀲𑀺𑀢𑁆𑀯𑀸 𑀧𑀦 𑀨𑀲𑁆𑀲𑁂𑀦, 𑀯𑁂𑀤𑀦𑀸𑀬 𑀘 𑀯𑁂𑀤𑀬𑁂;

𑀲𑀜𑁆𑀚𑀸𑀦𑀸𑀢𑀺 𑀘 𑀲𑀜𑁆𑀜𑀸𑀬, 𑀘𑁂𑀢𑀦𑀸𑀬 𑀘 𑀘𑁂𑀢𑀬𑁂.

𑁭𑁬. 𑀩𑀮𑀯𑀧𑀘𑁆𑀘𑀬𑀢𑁆𑀢𑀸 𑀘, 𑀲𑀳𑀚𑀸𑀢𑀸𑀦𑀫𑁂𑀯 𑀳𑀺;

𑀨𑀲𑁆𑀲𑁄𑀯 𑀧𑀞𑀫𑀁 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀥 𑀫𑀳𑁂𑀲𑀺𑀦𑀸.

𑁭𑁭. 𑀅𑀓𑀸𑀭𑀡𑀫𑀺𑀤𑀁 𑀲𑀩𑁆𑀩𑀁, 𑀘𑀺𑀢𑁆𑀢𑀸𑀦𑀁 𑀢𑀼 𑀲𑀳𑁂𑀯 𑀘;

𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑁂𑀦, 𑀘𑀺𑀢𑁆𑀢𑀚𑀸𑀦𑀁 𑀧𑀯𑀢𑁆𑀢𑀺𑀢𑁄.

𑁭𑁮. 𑀅𑀬𑀁 𑀢𑀼 𑀧𑀞𑀫𑀼𑀧𑁆𑀧𑀦𑁆𑀦𑁄, 𑀅𑀬𑀁 𑀧𑀘𑁆𑀙𑀸𑀢𑀺 𑀦𑀢𑁆𑀣𑀺𑀤𑀁;

𑀩𑀮𑀯𑀧𑀘𑁆𑀘𑀬𑀢𑁆𑀢𑁂𑀧𑀺, 𑀓𑀸𑀭𑀡𑀜𑁆𑀘 𑀦 𑀤𑀺𑀲𑁆𑀲𑀢𑀺.

𑁭𑁯. 𑀤𑁂𑀲𑀦𑀸𑀓𑁆𑀓𑀫𑀢𑁄 𑀘𑁂𑀯, 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑁄;

𑀇𑀘𑁆𑀘𑁂𑀯𑀁 𑀧𑀦 𑀯𑀺𑀜𑁆𑀜𑁂𑀬𑁆𑀬𑀁, 𑀯𑀺𑀜𑁆𑀜𑀼𑀦𑀸 𑀦 𑀯𑀺𑀲𑁂𑀲𑀢𑁄.

𑁮𑁦. 𑀦 𑀘 𑀧𑀭𑀺𑀬𑁂𑀲𑀺𑀢𑀩𑁆𑀩𑁄𑀬𑀁, 𑀢𑀲𑁆𑀫𑀸 𑀧𑀼𑀩𑁆𑀩𑀸𑀧𑀭𑀓𑁆𑀓𑀫𑁄;

𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀳𑀺, 𑀥𑀫𑁆𑀫𑀸 𑀏𑀯 𑀯𑀺𑀚𑀸𑀦𑀢𑀸.

𑀬𑀲𑁆𑀫𑀸 𑀧𑀦 𑀇𑀫𑁂 𑀥𑀫𑁆𑀫𑀸 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀳𑀺 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯, 𑀢𑀲𑁆𑀫𑀸 𑀢𑁂𑀲𑀁 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀦𑀺 𑀧𑀯𑀓𑁆𑀔𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀨𑀮𑀝𑁆𑀞𑁂𑀦 𑀯𑁂𑀤𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸, 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄. 𑀅𑀬𑀁 𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂𑀲𑀼 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀲𑁄 𑀤𑁆𑀯𑀺𑀦𑁆𑀦𑀁 𑀫𑁂𑀡𑁆𑀟𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀲𑀼𑀦𑁆𑀤𑀭𑀁 𑀫𑀦𑁄𑀢𑀺 𑀲𑀼𑀫𑀦𑁄, 𑀲𑀼𑀫𑀦𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲𑀁, 𑀲𑁄𑀫𑀦𑀲𑁆𑀲𑀫𑁂𑀯 𑀯𑁂𑀤𑀦𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀇𑀝𑁆𑀞𑀸𑀓𑀸𑀭𑀸𑀦𑀼𑀪𑀯𑀦𑀭𑀲𑀸 𑀭𑀸𑀚𑀸 𑀯𑀺𑀬 𑀲𑀼𑀪𑁄𑀚𑀦𑀭𑀲𑀁, 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀸.

𑀦𑀻𑀮𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸. 𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀓𑀭𑀡𑀭𑀲𑀸 𑀯𑀟𑁆𑀠𑀓𑀺𑀲𑁆𑀲 𑀅𑀪𑀺𑀜𑁆𑀜𑀸𑀡𑀓𑀭𑀡𑀫𑀺𑀯, 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀓𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀬𑀣𑁄𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸.

𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸. 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀆𑀬𑀽𑀳𑀦𑀭𑀲𑀸, 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀲𑀓𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀓𑀸 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀺𑀆𑀤𑀬𑁄 𑀯𑀺𑀬.

𑀯𑀺𑀢𑀓𑁆𑀓𑁂𑀢𑀻𑀢𑀺 𑀯𑀺𑀢𑀓𑁆𑀓𑁄. 𑀯𑀺𑀢𑀓𑁆𑀓𑀦𑀁 𑀯𑀸 𑀯𑀺𑀢𑀓𑁆𑀓𑁄. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄, 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄, 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀆𑀭𑀫𑁆𑀫𑀡𑁂 𑀢𑁂𑀦 𑀘𑀺𑀢𑁆𑀢𑀁 𑀯𑀺𑀘𑀭𑀢𑀻𑀢𑀺 𑀯𑀺𑀘𑀸𑀭𑁄. 𑀯𑀺𑀘𑀭𑀡𑀁 𑀯𑀸 𑀯𑀺𑀘𑀸𑀭𑁄. 𑀅𑀦𑀼𑀲𑀜𑁆𑀘𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄, 𑀢𑀢𑁆𑀣 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀩𑀦𑁆𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀧𑀺𑀦𑀬𑀢𑀻𑀢𑀺 𑀧𑀻𑀢𑀺. 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀧𑀻𑀡𑀦𑀭𑀲𑀸, 𑀨𑀭𑀡𑀭𑀲𑀸 𑀯𑀸, 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀪𑀸𑀯𑁄 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀲𑀫𑀸𑀥𑀺𑀲𑁆𑀲𑁂𑀢𑀁 𑀦𑀸𑀫𑀁. 𑀲𑁄 𑀅𑀯𑀺𑀲𑀸𑀭𑀮𑀓𑁆𑀔𑀡𑁄, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀯𑀸, 𑀲𑀳𑀚𑀸𑀢𑀸𑀦𑀁 𑀲𑀫𑁆𑀧𑀺𑀡𑁆𑀟𑀦𑀭𑀲𑁄 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀦𑀁 𑀉𑀤𑀓𑀁 𑀯𑀺𑀬, 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀯𑀺𑀲𑁂𑀲𑀢𑁄 𑀲𑀼𑀔𑀧𑀤𑀝𑁆𑀞𑀸𑀦𑁄.

𑀲𑀤𑁆𑀤𑀳𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀲𑀤𑁆𑀤𑀳𑀢𑀺, 𑀲𑀤𑁆𑀤𑀳𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀤𑁆𑀥𑀸. 𑀲𑀸 𑀧𑀦𑁂𑀲𑀸 𑀲𑀤𑁆𑀤𑀳𑀦𑀮𑀓𑁆𑀔𑀡𑀸, 𑀧𑀲𑀸𑀤𑀦𑀭𑀲𑀸 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬, 𑀅𑀓𑀸𑀮𑀼𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸.

𑀲𑀭𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀲𑀭𑀢𑀺, 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀢𑀺. 𑀲𑀸 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸, 𑀅𑀲𑀫𑁆𑀫𑁄𑀲𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸.

𑀯𑀻𑀭𑀪𑀸𑀯𑁄 𑀯𑀻𑀭𑀺𑀬𑀁. 𑀯𑀻𑀭𑀸𑀦𑀁 𑀯𑀸 𑀓𑀫𑁆𑀫𑀁 𑀯𑀻𑀭𑀺𑀬𑀁. 𑀢𑀁 𑀧𑀦𑁂𑀢𑀁 𑀉𑀲𑁆𑀲𑀸𑀳𑀦𑀮𑀓𑁆𑀔𑀡𑀁, 𑀲𑀳𑀚𑀸𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁.

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀲𑀸 𑀧𑀦𑁂𑀲𑀸 𑀯𑀺𑀚𑀸𑀦𑀦𑀮𑀓𑁆𑀔𑀡𑀸, 𑀯𑀺𑀲𑀬𑁄𑀪𑀸𑀲𑀦𑀭𑀲𑀸 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬.

𑀚𑀻𑀯𑀦𑁆𑀢𑀺 𑀢𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀢𑀺 𑀚𑀻𑀯𑀺𑀢𑀁. 𑀢𑀁 𑀧𑀦 𑀅𑀢𑁆𑀢𑀦𑀸 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀁𑀬𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀁. 𑀲𑀦𑁆𑀢𑁂𑀧𑀺 𑀘 𑀢𑁂𑀲𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀸𑀤𑀺𑀫𑁆𑀳𑀺 𑀯𑀺𑀥𑀸𑀦𑁂 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀢𑀁 𑀢𑁂 𑀥𑀫𑁆𑀫𑁂 𑀅𑀦𑀼𑀧𑀸𑀮𑁂𑀢𑀺 𑀉𑀤𑀓𑀁 𑀯𑀺𑀬 𑀉𑀧𑁆𑀧𑀮𑀸𑀤𑀻𑀦𑀺, 𑀬𑀣𑀸𑀲𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀧𑀺 𑀘 𑀥𑀫𑁆𑀫𑁂 𑀅𑀦𑀼𑀧𑀸𑀮𑁂𑀢𑀺 𑀥𑀸𑀢𑀺 𑀯𑀺𑀬 𑀓𑀼𑀫𑀸𑀭𑀁, 𑀲𑀬𑀁𑀧𑀯𑀢𑁆𑀢𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀧𑀯𑀢𑁆𑀢𑀢𑀺 𑀦𑀺𑀬𑀸𑀫𑀓𑁄 𑀯𑀺𑀬, 𑀦 𑀪𑀗𑁆𑀕𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀬𑀢𑀺 𑀅𑀢𑁆𑀢𑀦𑁄 𑀘 𑀧𑀯𑀢𑁆𑀢𑀬𑀺𑀢𑀩𑁆𑀩𑀸𑀦𑀜𑁆𑀘 𑀅𑀪𑀸𑀯𑀸, 𑀦 𑀪𑀗𑁆𑀕𑀓𑁆𑀔𑀡𑁂 𑀞𑀧𑁂𑀢𑀺 𑀲𑀬𑀁 𑀪𑀺𑀚𑁆𑀚𑀫𑀸𑀦𑀢𑁆𑀢𑀸 𑀔𑀻𑀬𑀫𑀸𑀦𑁄 𑀯𑀺𑀬 𑀯𑀢𑁆𑀢𑀺𑀲𑁆𑀦𑁂𑀳𑁄𑀯 𑀧𑀤𑀻𑀧𑀲𑀺𑀔𑀦𑁆𑀢𑀺.

𑀦 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀦 𑀮𑀼𑀩𑁆𑀪𑀢𑀺, 𑀅𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀮𑁄𑀪𑁄. 𑀲𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀮𑀕𑁆𑀕𑀪𑀸𑀯𑀮𑀓𑁆𑀔𑀡𑁄 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬, 𑀅𑀧𑀭𑀺𑀕𑁆𑀕𑀳𑀭𑀲𑁄 𑀫𑀼𑀢𑁆𑀢𑀪𑀺𑀓𑁆𑀔𑀼 𑀯𑀺𑀬, 𑀅𑀦𑀮𑁆𑀮𑀻𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀲𑀼𑀘𑀺𑀫𑁆𑀳𑀺 𑀧𑀢𑀺𑀢𑀧𑀼𑀭𑀺𑀲𑁄 𑀯𑀺𑀬.

𑀦 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀦 𑀤𑀼𑀲𑁆𑀲𑀢𑀺, 𑀅𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀤𑁄𑀲𑁄. 𑀲𑁄 𑀅𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄, 𑀅𑀯𑀺𑀭𑁄𑀥𑀮𑀓𑁆𑀔𑀡𑁄 𑀯𑀸 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀯𑀺𑀬, 𑀆𑀖𑀸𑀢𑀯𑀺𑀦𑀬𑀦𑀭𑀲𑁄, 𑀧𑀭𑀺𑀴𑀸𑀳𑀯𑀺𑀦𑀬𑀦𑀭𑀲𑁄 𑀯𑀸 𑀘𑀦𑁆𑀤𑀦𑀁 𑀯𑀺𑀬, 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬.

𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀻𑀬𑀢𑀻𑀢𑀺 𑀳𑀺𑀭𑀻. 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀺𑀬𑁂𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁. 𑀧𑀸𑀧𑀢𑁄 𑀉𑀩𑁆𑀩𑁂𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻, 𑀑𑀢𑁆𑀢𑀸𑀲𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁. 𑀉𑀪𑁄𑀧𑀺 𑀧𑀸𑀧𑀸𑀦𑀁 𑀅𑀓𑀭𑀡𑀭𑀲𑀸, 𑀧𑀸𑀧𑀢𑁄 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀢𑁆𑀢𑀕𑀸𑀭𑀯𑀧𑀭𑀕𑀸𑀭𑀯𑀧𑀤𑀝𑁆𑀞𑀸𑀦𑀸. 𑀇𑀫𑁂 𑀥𑀫𑁆𑀫𑀸 𑀮𑁄𑀓𑀧𑀸𑀮𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀧𑀲𑁆𑀲𑀫𑁆𑀪𑀦𑀁 𑀓𑀸𑀬𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀧𑀲𑁆𑀲𑀫𑁆𑀪𑀦𑀁 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀉𑀪𑁄𑀧𑀺 𑀧𑀦𑁂𑀢𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀤𑀭𑀣𑀦𑀺𑀫𑁆𑀫𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀧𑀭𑀺𑀧𑁆𑀨𑀦𑁆𑀤𑀦𑀲𑀻𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀯𑀽𑀧𑀲𑀫𑀢𑀸𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀮𑀳𑀼𑀪𑀸𑀯𑁄 𑀓𑀸𑀬𑀮𑀳𑀼𑀢𑀸. 𑀘𑀺𑀢𑁆𑀢𑀮𑀳𑀼𑀪𑀸𑀯𑁄 𑀘𑀺𑀢𑁆𑀢𑀮𑀳𑀼𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑀭𑀼𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀕𑀭𑀼𑀪𑀸𑀯𑀦𑀺𑀫𑁆𑀫𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀤𑀦𑁆𑀥𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑀭𑀼𑀪𑀸𑀯𑀓𑀭𑀣𑀺𑀦𑀫𑀺𑀤𑁆𑀥𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀫𑀼𑀤𑀼𑀪𑀸𑀯𑁄 𑀓𑀸𑀬𑀫𑀼𑀤𑀼𑀢𑀸. 𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑁄 𑀘𑀺𑀢𑁆𑀢𑀫𑀼𑀤𑀼𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀦𑀺𑀫𑁆𑀫𑀤𑀦𑀭𑀲𑀸, 𑀅𑀧𑁆𑀧𑀝𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀓𑀭𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀓𑀫𑁆𑀫𑀜𑁆𑀜𑀪𑀸𑀯𑁄 𑀓𑀸𑀬𑀓𑀫𑁆𑀫𑀜𑁆𑀜𑀢𑀸. 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀪𑀸𑀯𑁄 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀦𑀺𑀫𑁆𑀫𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀁, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀓𑀭𑀅𑀯𑀲𑁂𑀲𑀦𑀻𑀯𑀭𑀡𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀧𑀸𑀕𑀼𑀜𑁆𑀜𑀪𑀸𑀯𑁄 𑀓𑀸𑀬𑀧𑀸𑀕𑀼𑀜𑁆𑀜𑀢𑀸. 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀪𑀸𑀯𑁄 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀕𑁂𑀮𑀜𑁆𑀜𑀪𑀸𑀯𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑁂𑀮𑀜𑁆𑀜𑀦𑀺𑀫𑁆𑀫𑀤𑀦𑀭𑀲𑀸, 𑀦𑀺𑀭𑀸𑀤𑀻𑀦𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑁂𑀮𑀜𑁆𑀜𑀪𑀸𑀯𑀓𑀭𑀅𑀲𑁆𑀲𑀤𑁆𑀥𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀲𑁆𑀲 𑀉𑀚𑀼𑀓𑀪𑀸𑀯𑁄 𑀓𑀸𑀬𑀼𑀚𑀼𑀓𑀢𑀸. 𑀘𑀺𑀢𑁆𑀢𑀲𑁆𑀲 𑀉𑀚𑀼𑀓𑀪𑀸𑀯𑁄 𑀘𑀺𑀢𑁆𑀢𑀼𑀚𑀼𑀓𑀢𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀼𑀝𑀺𑀮𑀪𑀸𑀯𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀚𑁆𑀚𑀯𑀮𑀓𑁆𑀔𑀡𑀸 𑀯𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀦𑀺𑀫𑁆𑀫𑀤𑀦𑀭𑀲𑀸, 𑀅𑀚𑀺𑀫𑁆𑀳𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀓𑀭𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀓𑀺𑀮𑁂𑀲𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀲𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀮𑀓𑁆𑀔𑀡𑁄 𑀙𑀦𑁆𑀤𑁄, 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀢𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑁄.

𑀅𑀥𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑁄𑀓𑁆𑀔𑁄. 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄, 𑀅𑀲𑀁𑀲𑀧𑁆𑀧𑀦𑀭𑀲𑁄, 𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀦𑁆𑀦𑀺𑀝𑁆𑀞𑁂𑀬𑁆𑀬𑀥𑀫𑁆𑀫𑀧𑀤𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀪𑀸𑀯𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸, 𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀭𑀲𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸 𑀯𑀸, 𑀫𑀚𑁆𑀛𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀓𑀺𑀭𑀺𑀬𑀸 𑀓𑀸𑀭𑁄, 𑀫𑀦𑀲𑁆𑀫𑀺𑀁 𑀓𑀸𑀭𑁄 𑀫𑀦𑀲𑀺𑀓𑀸𑀭𑁄. 𑀧𑀼𑀭𑀺𑀫𑀫𑀦𑀢𑁄 𑀯𑀺𑀲𑀤𑀺𑀲𑀁 𑀫𑀦𑀁 𑀓𑀭𑁄𑀢𑀻𑀢𑀺 𑀘 𑀫𑀦𑀲𑀺𑀓𑀸𑀭𑁄.

𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄, 𑀯𑀻𑀣𑀺𑀧𑀝𑀺𑀧𑀸𑀤𑀓𑁄, 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀢𑀺𑀧𑁆𑀧𑀓𑀸𑀭𑁄. 𑀢𑀢𑁆𑀣 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀫𑀦𑀲𑁆𑀫𑀺𑀁 𑀓𑀸𑀭𑁄 𑀫𑀦𑀲𑀺𑀓𑀸𑀭𑁄. 𑀲𑁄 𑀲𑀸𑀭𑀡𑀮𑀓𑁆𑀔𑀡𑁄, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂 𑀲𑀁𑀬𑁄𑀚𑀦𑀭𑀲𑁄, 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑀧𑀤𑀝𑁆𑀞𑀸𑀦𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀸𑀭𑀣𑀻 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀻𑀣𑀺𑀧𑀝𑀺𑀧𑀸𑀤𑀓𑁄𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀦 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀓𑀭𑀼𑀡𑀸𑀢𑀺 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦𑀁 𑀓𑀭𑁄𑀢𑀻𑀢𑀺 𑀓𑀭𑀼𑀡𑀸, 𑀓𑀺𑀦𑀸𑀢𑀺 𑀯𑀺𑀦𑀸𑀲𑁂𑀢𑀺 𑀯𑀸 𑀧𑀭𑀤𑀼𑀓𑁆𑀔𑀦𑁆𑀢𑀺 𑀓𑀭𑀼𑀡𑀸. 𑀲𑀸 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸, 𑀧𑀭𑀤𑀼𑀓𑁆𑀔𑀸𑀲𑀳𑀦𑀭𑀲𑀸, 𑀅𑀯𑀺𑀳𑀺𑀁𑀲𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀦𑀁 𑀅𑀦𑀸𑀣𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸.

𑀫𑁄𑀤𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀫𑁄𑀤𑀢𑀻𑀢𑀺 𑀫𑀼𑀤𑀺𑀢𑀸. 𑀲𑀸 𑀧𑀫𑁄𑀤𑀦𑀮𑀓𑁆𑀔𑀡𑀸, 𑀅𑀦𑀺𑀲𑁆𑀲𑀸𑀬𑀦𑀭𑀲𑀸, 𑀅𑀭𑀢𑀺𑀯𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀓𑁂𑀘𑀺 𑀧𑀦 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀬𑁄𑀧𑀺 𑀅𑀦𑀺𑀬𑀢𑁂 𑀇𑀘𑁆𑀙𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀣𑀢𑁄 𑀳𑀺 𑀅𑀤𑁄𑀲𑁄 𑀏𑀯 𑀫𑁂𑀢𑁆𑀢𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬𑁂𑀯 𑀉𑀧𑁂𑀓𑁆𑀔𑀸𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺 𑀤𑁆𑀯𑀻𑀲𑀼. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀏𑀢𑀸 𑀢𑀺𑀲𑁆𑀲𑁄𑀧𑀺 𑀯𑀺𑀭𑀢𑀺𑀬𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀸, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀼𑀢𑁄 𑀲𑀗𑁆𑀓𑁄𑀘𑀦𑀭𑀲𑀸, 𑀅𑀓𑀺𑀭𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀤𑁆𑀥𑀸𑀳𑀺𑀭𑀺𑀑𑀢𑁆𑀢𑀧𑁆𑀧𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀧𑀤𑀝𑁆𑀞𑀸𑀦𑀸. 𑀓𑁂𑀘𑀺 𑀧𑀦 𑀇𑀫𑀸𑀲𑀼 𑀏𑀓𑁂𑀓𑀁 𑀦𑀺𑀬𑀢𑀁 𑀯𑀺𑀭𑀢𑀺𑀁 𑀇𑀘𑁆𑀙𑀦𑁆𑀢𑀺. 𑀏𑀯𑀁 𑀓𑀸𑀫𑀸𑀯𑀘𑀭𑀧𑀞𑀫𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑁂𑀦 𑀇𑀫𑁂 𑀢𑁂𑀢𑁆𑀢𑀺𑀁𑀲 𑀯𑀸 𑀘𑀢𑀼𑀢𑁆𑀢𑀺𑀁𑀲 𑀯𑀸 𑀥𑀫𑁆𑀫𑀸 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 𑀘 𑀧𑀞𑀫𑁂𑀦, 𑀏𑀯𑀁 𑀤𑀼𑀢𑀺𑀬𑀘𑀺𑀢𑁆𑀢𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀳𑀺 𑀏𑀢𑁆𑀣 𑀯𑀺𑀲𑁂𑀲𑁄. 𑀧𑀼𑀦 𑀢𑀢𑀺𑀬𑁂𑀦 𑀜𑀸𑀡𑀯𑀺𑀧𑁆𑀧𑀬𑁄𑀕𑀢𑁄 𑀞𑀧𑁂𑀢𑁆𑀯𑀸 𑀅𑀫𑁄𑀳𑀁 𑀅𑀯𑀲𑁂𑀲𑀸 𑀤𑁆𑀯𑀢𑁆𑀢𑀺𑀁𑀲 𑀯𑀸 𑀢𑁂𑀢𑁆𑀢𑀺𑀁𑀲 𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀘𑀢𑀼𑀢𑁆𑀣𑁂𑀦𑀸𑀧𑀺 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄, 𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀧𑀦 𑀞𑀧𑁂𑀢𑁆𑀯𑀸 𑀧𑀻𑀢𑀺𑀁 𑀅𑀯𑀲𑁂𑀲𑀸 𑀧𑀜𑁆𑀘𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀺. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀘𑁂𑀢𑁆𑀣 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀧𑀯𑀺𑀝𑁆𑀞𑀸. 𑀲𑀸 𑀧𑀦 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸. 𑀬𑀣𑀸 𑀘 𑀧𑀜𑁆𑀘𑀫𑁂𑀦, 𑀏𑀯𑀁 𑀙𑀝𑁆𑀞𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀫𑀢𑁆𑀢𑀫𑁂𑀯 𑀳𑁄𑀢𑀺 𑀯𑀺𑀲𑁂𑀲𑁄. 𑀲𑀢𑁆𑀢𑀫𑁂𑀦 𑀧𑀦 𑀞𑀧𑁂𑀢𑁆𑀯𑀸 𑀧𑀜𑁆𑀜𑀁 𑀅𑀯𑀲𑁂𑀲𑀸 𑀏𑀓𑀢𑀺𑀁𑀲 𑀯𑀸 𑀤𑁆𑀯𑀢𑁆𑀢𑀺𑀁𑀲 𑀯𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀣𑀸 𑀅𑀝𑁆𑀞𑀫𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀏𑀯𑀁 𑀢𑀸𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑁮𑁧. 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼, 𑀦 𑀤𑀼𑀓𑁆𑀔𑀲𑀼𑀔𑀧𑀻𑀢𑀺𑀬𑁄;

𑀚𑀸𑀬𑀦𑁆𑀢𑁂𑀯 𑀯𑀺𑀲𑀼𑀁 𑀧𑀜𑁆𑀘, 𑀓𑀭𑀼𑀡𑀸𑀫𑀼𑀤𑀺𑀢𑀸𑀤𑀬𑁄.

𑀅𑀯𑀲𑁂𑀲𑁂𑀲𑀼 𑀧𑀦 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀭𑀽𑀧𑀸𑀯𑀘𑀭𑀸, 𑀢𑀢𑁆𑀣 𑀧𑀞𑀫𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀓𑀸𑀫𑀸𑀯𑀘𑀭𑀧𑀞𑀫𑀘𑀺𑀢𑁆𑀢𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀭𑀢𑀺𑀬𑁄 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀮𑁄𑀓𑀼𑀢𑁆𑀢𑀭𑁂𑀲𑁆𑀯𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑁂𑀲𑀼. 𑀤𑀼𑀢𑀺𑀬𑁂𑀦 𑀯𑀺𑀢𑀓𑁆𑀓𑀯𑀚𑁆𑀚𑀸 𑀤𑁆𑀯𑀢𑁆𑀢𑀺𑀁𑀲 𑀯𑀸 𑀢𑁂𑀢𑁆𑀢𑀺𑀁𑀲 𑀯𑀸. 𑀢𑀢𑀺𑀬𑁂𑀦 𑀯𑀺𑀘𑀸𑀭𑀯𑀚𑁆𑀚𑀸 𑀏𑀓𑀢𑀺𑀁𑀲 𑀯𑀸 𑀤𑁆𑀯𑀢𑁆𑀢𑀺𑀁𑀲 𑀯𑀸. 𑀘𑀢𑀼𑀢𑁆𑀣𑁂𑀦 𑀢𑀢𑁄 𑀧𑀻𑀢𑀺𑀯𑀚𑁆𑀚𑀸 𑀢𑀺𑀁𑀲 𑀯𑀸 𑀏𑀓𑀢𑀺𑀁𑀲 𑀯𑀸. 𑀧𑀜𑁆𑀘𑀫𑁂𑀦 𑀢𑀢𑁄 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀚𑁆𑀚𑀸 𑀢𑀺𑀁𑀲 𑀳𑁄𑀦𑁆𑀢𑀺, 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀉𑀧𑁂𑀓𑁆𑀔𑀸 𑀧𑀯𑀺𑀝𑁆𑀞𑀸. 𑀏𑀯𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀸, 𑀢𑁂 𑀧𑀦 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀽𑀧𑀸𑀯𑀘𑀭𑀪𑀸𑀯𑁄𑀯𑁂𑀢𑁆𑀣 𑀯𑀺𑀲𑁂𑀲𑁄.

𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸, 𑀢𑁂 𑀧𑀦 𑀧𑀞𑀫𑀚𑁆𑀛𑀸𑀦𑀺𑀓𑁂 𑀫𑀕𑁆𑀕𑀘𑀺𑀢𑁆𑀢𑁂 𑀧𑀞𑀫𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀪𑁂𑀤𑁂𑀧𑀺 𑀫𑀕𑁆𑀕𑀘𑀺𑀢𑁆𑀢𑁂 𑀤𑀼𑀢𑀺𑀬𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀫𑀪𑀸𑀯𑁄 𑀘 𑀦𑀺𑀬𑀢𑀯𑀺𑀭𑀢𑀺𑀪𑀸𑀯𑁄 𑀘 𑀮𑁄𑀓𑀼𑀢𑁆𑀢𑀭𑀪𑀸𑀯𑁄 𑀘𑁂𑀢𑁆𑀣 𑀯𑀺𑀲𑁂𑀲𑁄. 𑀏𑀯𑀁 𑀢𑀸𑀯 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀓𑀼𑀲𑀮𑀸 𑀧𑀦 𑀘𑁂𑀢𑀲𑀺𑀓𑀸 𑀪𑀽𑀫𑀺𑀢𑁄 𑀏𑀓𑀯𑀺𑀥𑀸 𑀓𑀸𑀫𑀸𑀯𑀘𑀭𑀸𑀬𑁂𑀯, 𑀢𑁂𑀲𑀼 𑀮𑁄𑀪𑀫𑀽𑀮𑀧𑀞𑀫𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀦𑀺𑀬𑀢𑀸 𑀲𑀭𑀽𑀧𑁂𑀦𑀸𑀕𑀢𑀸 𑀧𑀦𑁆𑀦𑀭𑀲, 𑀬𑁂𑀯𑀸𑀧𑀦𑀓𑀸 𑀦𑀺𑀬𑀢𑀸 𑀘𑀢𑁆𑀢𑀸𑀭𑁄𑀢𑀺 𑀏𑀓𑀽𑀦𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀅𑀦𑀺𑀬𑀢𑀸 𑀙 𑀬𑁂𑀯𑀸𑀧𑀦𑀓𑀸𑀢𑀺 𑀲𑀩𑁆𑀩𑁂 𑀧𑀜𑁆𑀘𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀯𑀻𑀭𑀺𑀬𑀁 𑀚𑀻𑀯𑀺𑀢𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀮𑁄𑀪𑁄 𑀫𑁄𑀳𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀲𑀭𑀽𑀧𑁂𑀦𑀸𑀕𑀢𑀸 𑀧𑀦𑁆𑀦𑀭𑀲, 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀉𑀤𑁆𑀥𑀘𑁆𑀘𑀁 𑀫𑀦𑀲𑀺𑀓𑀸𑀭𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀦𑀺𑀬𑀢𑀬𑁂𑀯𑀸𑀧𑀦𑀓𑀸, 𑀇𑀫𑁂 𑀧𑀦 𑀧𑀝𑀺𑀧𑀸𑀝𑀺𑀬𑀸 𑀤𑀲𑀲𑀼 𑀘𑀺𑀢𑁆𑀢𑁂𑀲𑀼 𑀦𑀺𑀬𑀢𑀸 𑀳𑁄𑀦𑁆𑀢𑀺, 𑀫𑀸𑀦𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀓𑀼𑀓𑁆𑀓𑀼𑀘𑁆𑀘𑀁 𑀣𑀺𑀦𑀫𑀺𑀤𑁆𑀥𑀦𑁆𑀢𑀺 𑀇𑀫𑁂 𑀙𑀬𑁂𑀯 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑀸.

𑁮𑁨. 𑀏𑀯𑀁 𑀬𑁂𑀯𑀸𑀧𑀦𑀸 𑀲𑀩𑁆𑀩𑁂, 𑀦𑀺𑀬𑀢𑀸𑀦𑀺𑀬𑀢𑀸 𑀤𑀲;

𑀦𑀺𑀤𑁆𑀤𑀺𑀝𑁆𑀞𑀸 𑀧𑀸𑀧𑀘𑀺𑀢𑁆𑀢𑁂𑀲𑀼, 𑀳𑀢𑀧𑀸𑀧𑁂𑀦 𑀢𑀸𑀤𑀺𑀦𑀸.

𑀢𑀢𑁆𑀣 𑀨𑀲𑁆𑀲𑁄𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀲𑀳𑀚𑀸𑀢𑁄 𑀨𑀲𑁆𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀦 𑀳𑀺𑀭𑀻𑀬𑀢𑀻𑀢𑀺 𑀅𑀳𑀺𑀭𑀺𑀓𑁄, 𑀅𑀳𑀺𑀭𑀺𑀓𑀲𑁆𑀲 𑀪𑀸𑀯𑁄 𑀅𑀳𑀺𑀭𑀺𑀓𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁, 𑀦 𑀑𑀢𑁆𑀢𑀧𑁆𑀧𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀢𑀢𑁆𑀣 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀁, 𑀅𑀮𑀚𑁆𑀚𑀸𑀮𑀓𑁆𑀔𑀡𑀁 𑀯𑀸 𑀅𑀳𑀺𑀭𑀺𑀓𑀁, 𑀅𑀦𑁄𑀢𑁆𑀢𑀧𑁆𑀧𑀁 𑀢𑁂𑀳𑁂𑀯 𑀅𑀲𑀸𑀭𑀚𑁆𑀚𑀦𑀮𑀓𑁆𑀔𑀡𑀁, 𑀅𑀦𑀼𑀢𑁆𑀢𑀸𑀲𑀮𑀓𑁆𑀔𑀡𑀁 𑀯𑀸.

𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀮𑁄𑀪𑁄. 𑀲𑁄 𑀆𑀭𑀫𑁆𑀫𑀡𑀕𑀳𑀡𑀮𑀓𑁆𑀔𑀡𑁄 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬, 𑀅𑀪𑀺𑀲𑀗𑁆𑀕𑀭𑀲𑁄 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀫𑀁𑀲𑀧𑁂𑀲𑀺 𑀯𑀺𑀬, 𑀅𑀧𑀭𑀺𑀘𑁆𑀘𑀸𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀢𑁂𑀮𑀜𑁆𑀚𑀦𑀭𑀸𑀕𑁄 𑀯𑀺𑀬, 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑁄.

𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄. 𑀲𑁄 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀪𑀸𑀯𑀮𑀓𑁆𑀔𑀡𑁄, 𑀅𑀜𑁆𑀜𑀸𑀡𑀮𑀓𑁆𑀔𑀡𑁄 𑀯𑀸, 𑀅𑀲𑀫𑁆𑀧𑀝𑀺𑀯𑁂𑀥𑀭𑀲𑁄, 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀭𑀲𑁄 𑀯𑀸, 𑀅𑀦𑁆𑀥𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑁄.

𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀫𑀺𑀘𑁆𑀙𑀸 𑀧𑀲𑁆𑀲𑀢𑀺, 𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 𑀅𑀬𑁄𑀦𑀺𑀲𑁄𑀅𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀸, 𑀧𑀭𑀸𑀫𑀸𑀲𑀭𑀲𑀸, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀺𑀧𑀤𑀝𑁆𑀞𑀸𑀦𑀸.

𑀉𑀤𑁆𑀥𑀢𑀪𑀸𑀯𑁄 𑀉𑀤𑁆𑀥𑀘𑁆𑀘𑀁. 𑀢𑀁 𑀅𑀯𑀽𑀧𑀲𑀫𑀮𑀓𑁆𑀔𑀡𑀁 𑀯𑀸𑀢𑀸𑀪𑀺𑀖𑀸𑀢𑀘𑀮𑀚𑀮𑀁 𑀯𑀺𑀬, 𑀅𑀦𑀯𑀝𑁆𑀞𑀸𑀦𑀭𑀲𑀁 𑀯𑀸𑀢𑀸𑀪𑀺𑀖𑀸𑀢𑀘𑀮𑀥𑀚𑀧𑀝𑀸𑀓𑀸 𑀯𑀺𑀬, 𑀪𑀦𑁆𑀢𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀧𑀸𑀲𑀸𑀡𑀸𑀪𑀺𑀖𑀸𑀢𑀲𑀫𑀼𑀤𑁆𑀥𑀢𑀪𑀲𑁆𑀫𑀁 𑀯𑀺𑀬, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁.

𑀫𑀜𑁆𑀜𑀢𑀻𑀢𑀺 𑀫𑀸𑀦𑁄. 𑀲𑁄 𑀉𑀡𑁆𑀡𑀢𑀺𑀮𑀓𑁆𑀔𑀡𑁄, 𑀲𑀫𑁆𑀧𑀕𑁆𑀕𑀳𑀡𑀭𑀲𑁄, 𑀓𑁂𑀢𑀼𑀓𑀫𑁆𑀬𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀧𑀤𑀝𑁆𑀞𑀸𑀦𑁄.

𑀇𑀲𑁆𑀲𑀢𑀻𑀢𑀺 𑀇𑀲𑁆𑀲𑀸. 𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦𑀁 𑀉𑀲𑀽𑀬𑀦𑀮𑀓𑁆𑀔𑀡𑀸, 𑀢𑀢𑁆𑀣𑁂𑀯 𑀅𑀦𑀪𑀺𑀭𑀢𑀺𑀭𑀲𑀸, 𑀢𑀢𑁄 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀭𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀸.

𑀫𑀘𑁆𑀙𑀭𑀪𑀸𑀯𑁄 𑀫𑀘𑁆𑀙𑀭𑀺𑀬𑀁. 𑀢𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀕𑀼𑀳𑀡𑀮𑀓𑁆𑀔𑀡𑀁, 𑀢𑀸𑀲𑀁𑀬𑁂𑀯 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀅𑀓𑁆𑀔𑀫𑀦𑀭𑀲𑀁, 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁.

𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀢𑀁 𑀧𑀘𑁆𑀙𑀸𑀦𑀼𑀢𑀸𑀧𑀮𑀓𑁆𑀔𑀡𑀁, 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀭𑀲𑀁, 𑀯𑀺𑀧𑁆𑀧𑀝𑀺𑀲𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀢𑀸𑀓𑀢𑀧𑀤𑀝𑁆𑀞𑀸𑀦𑀁.

𑀣𑀺𑀦𑀢𑀸 𑀣𑀺𑀦𑀁. 𑀫𑀺𑀤𑁆𑀥𑀢𑀸 𑀫𑀺𑀤𑁆𑀥𑀁. 𑀅𑀦𑀼𑀲𑁆𑀲𑀸𑀳𑀦𑀲𑀁𑀲𑀻𑀤𑀦𑀢𑀸, 𑀅𑀲𑀢𑁆𑀢𑀺𑀯𑀺𑀖𑀸𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀣𑀺𑀦𑀜𑁆𑀘 𑀫𑀺𑀤𑁆𑀥𑀜𑁆𑀘 𑀣𑀺𑀦𑀫𑀺𑀤𑁆𑀥𑀁. 𑀢𑀢𑁆𑀣 𑀣𑀺𑀦𑀁 𑀅𑀦𑀼𑀲𑁆𑀲𑀸𑀳𑀦𑀮𑀓𑁆𑀔𑀡𑀁, 𑀯𑀻𑀭𑀺𑀬𑀯𑀺𑀦𑁄𑀤𑀦𑀭𑀲𑀁, 𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀫𑀺𑀤𑁆𑀥𑀁 𑀅𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀁, 𑀑𑀦𑀳𑀦𑀭𑀲𑀁, 𑀮𑀻𑀦𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀉𑀪𑀬𑀫𑁆𑀧𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀲𑁂𑀲𑀸 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀧𑀦 𑀯𑀺𑀢𑀓𑁆𑀓𑀯𑀻𑀭𑀺𑀬𑀲𑀫𑀸𑀥𑀻𑀦𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀫𑀺𑀘𑁆𑀙𑀸𑀯𑀸𑀬𑀸𑀫𑀫𑀺𑀘𑁆𑀙𑀸𑀲𑀫𑀸𑀥𑀬𑁄 𑀯𑀺𑀲𑁂𑀲𑀓𑀸. 𑀇𑀢𑀺 𑀇𑀫𑁂 𑀏𑀓𑀽𑀦𑀯𑀻𑀲𑀢𑀺 𑀘𑁂𑀢𑀲𑀺𑀓𑀸 𑀧𑀞𑀫𑀸𑀓𑀼𑀲𑀮𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀧𑀞𑀫𑁂𑀦, 𑀏𑀯𑀁 𑀤𑀼𑀢𑀺𑀬𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀪𑀸𑀯𑁄 𑀘𑁂𑀢𑁆𑀣 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀬𑀢𑀪𑀸𑀯𑁄 𑀘 𑀯𑀺𑀲𑁂𑀲𑁄. 𑀢𑀢𑀺𑀬𑁂𑀦 𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀲𑁂𑀲𑀸 𑀅𑀝𑁆𑀞𑀸𑀭𑀲 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀦𑁄 𑀧𑀦𑁂𑀢𑁆𑀣 𑀅𑀦𑀺𑀬𑀢𑁄 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸 𑀲𑀳 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀘𑀢𑀼𑀢𑁆𑀣𑁂𑀦 𑀤𑀼𑀢𑀺𑀬𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀘 𑀫𑀸𑀦𑁄 𑀅𑀦𑀺𑀬𑀢𑁄 𑀳𑁄𑀢𑀺. 𑀧𑀜𑁆𑀘𑀫𑁂𑀦 𑀧𑀞𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀧𑀻𑀢𑀺𑀁 𑀅𑀯𑀲𑁂𑀲𑀸 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀧𑀦𑁂𑀢𑁆𑀣 𑀉𑀧𑁂𑀓𑁆𑀔𑀸 𑀧𑀯𑀺𑀝𑁆𑀞𑀸. 𑀙𑀝𑁆𑀞𑁂𑀦𑀸𑀧𑀺 𑀧𑀜𑁆𑀘𑀫𑁂 𑀯𑀼𑀢𑁆𑀢𑀲𑀤𑀺𑀲𑀸 𑀏𑀯. 𑀲𑀲𑀗𑁆𑀔𑀸𑀭𑀢𑀸, 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀬𑀢𑀪𑀸𑀯𑁄 𑀘 𑀯𑀺𑀲𑁂𑀲𑁄. 𑀲𑀢𑁆𑀢𑀫𑁂𑀦 𑀧𑀜𑁆𑀘𑀫𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀦𑁄 𑀧𑀦𑁂𑀢𑁆𑀣 𑀅𑀦𑀺𑀬𑀢𑁄. 𑀅𑀝𑁆𑀞𑀫𑁂𑀦 𑀙𑀝𑁆𑀞𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀫𑀸𑀦𑁄 𑀅𑀦𑀺𑀬𑀢𑁄 𑀳𑁄𑀢𑀺. 𑀏𑀯𑀁 𑀮𑁄𑀪𑀫𑀽𑀮𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀤𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀤𑁄𑀲𑀫𑀽𑀮𑁂𑀲𑀼 𑀤𑁆𑀯𑀻𑀲𑀼 𑀧𑀞𑀫𑁂𑀦 𑀅𑀲𑀗𑁆𑀔𑀸𑀭𑀺𑀓𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀦𑀺𑀬𑀢𑀸 𑀲𑀭𑀽𑀧𑁂𑀦𑀸𑀕𑀢𑀸 𑀢𑁂𑀭𑀲. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀤𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀯𑀻𑀭𑀺𑀬𑀁 𑀚𑀻𑀯𑀺𑀢𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀤𑁄𑀲𑁄 𑀫𑁄𑀳𑁄 𑀘𑁂𑀢𑀺 𑀇𑀫𑁂 𑀢𑁂𑀭𑀲 𑀥𑀫𑁆𑀫𑀸 𑀙𑀦𑁆𑀤𑀸𑀤𑀻𑀳𑀺 𑀘𑀢𑀽𑀳𑀺 𑀦𑀺𑀬𑀢𑀬𑁂𑀯𑀸𑀧𑀦𑀓𑁂𑀳𑀺 𑀲𑀢𑁆𑀢𑀭𑀲 𑀳𑁄𑀦𑁆𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑁂𑀲𑀼 𑀅𑀦𑀺𑀬𑀢𑁂𑀲𑀼 𑀢𑀻𑀲𑀼 𑀏𑀓𑁂𑀦 𑀲𑀳 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺, 𑀏𑀢𑁂𑀧𑀺 𑀢𑀬𑁄 𑀦 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀢𑀢𑁆𑀣 𑀤𑀼𑀝𑁆𑀞𑀼 𑀫𑀦𑁄𑀢𑀺 𑀤𑀼𑀫𑀦𑁄, 𑀤𑀼𑀫𑀦𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁, 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦 𑀲𑀳𑀕𑀢𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀁. 𑀢𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁, 𑀅𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀘𑁂𑀢𑀲𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀏𑀓𑀦𑁆𑀢𑁂𑀦𑁂𑀯 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁.

𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀤𑀼𑀲𑁆𑀲𑀢𑀺, 𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀤𑁄𑀲𑁄. 𑀲𑁄 𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄 𑀧𑀳𑀢𑀸𑀲𑀻𑀯𑀺𑀲𑁄 𑀯𑀺𑀬, 𑀯𑀺𑀲𑀧𑁆𑀧𑀦𑀭𑀲𑁄 𑀯𑀺𑀲𑀦𑀺𑀧𑀸𑀢𑁄 𑀯𑀺𑀬, 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀯𑀸 𑀤𑀸𑀯𑀕𑁆𑀕𑀺 𑀯𑀺𑀬, 𑀤𑀼𑀲𑁆𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀮𑀤𑁆𑀥𑁄𑀓𑀸𑀲𑁄 𑀯𑀺𑀬 𑀲𑀧𑀢𑁆𑀢𑁄, 𑀆𑀖𑀸𑀢𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄. 𑀅𑀯𑀲𑁂𑀲𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯. 𑀇𑀢𑀺 𑀇𑀫𑁂 𑀲𑀢𑁆𑀢𑀭𑀲 𑀯𑀸 𑀅𑀝𑁆𑀞𑀸𑀭𑀲 𑀯𑀸 𑀦𑀯𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀦𑀯𑀫𑁂𑀦, 𑀏𑀯𑀁 𑀤𑀲𑀫𑁂𑀦𑀸𑀧𑀺. 𑀲𑀲𑀗𑁆𑀔𑀸𑀭𑀢𑀸, 𑀧𑀦𑁂𑀢𑁆𑀣 𑀣𑀺𑀦𑀫𑀺𑀤𑁆𑀥𑀲𑀫𑁆𑀪𑀯𑁄 𑀘 𑀯𑀺𑀲𑁂𑀲𑁄.

𑀤𑁆𑀯𑀻𑀲𑀼 𑀧𑀦 𑀫𑁄𑀳𑀫𑀽𑀮𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂𑀦 𑀏𑀓𑀸𑀤𑀲𑀫𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀨𑀲𑁆𑀲𑁄 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀯𑀻𑀭𑀺𑀬𑀁 𑀚𑀻𑀯𑀺𑀢𑀁 𑀘𑀺𑀢𑁆𑀢𑀝𑁆𑀞𑀺𑀢𑀺 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀫𑁄𑀳𑁄 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀲𑀭𑀽𑀧𑁂𑀦𑀸𑀕𑀢𑀸 𑀢𑁂𑀭𑀲, 𑀉𑀤𑁆𑀥𑀘𑁆𑀘𑀁 𑀫𑀦𑀲𑀺𑀓𑀸𑀭𑁄𑀢𑀺 𑀤𑁆𑀯𑁂 𑀬𑁂𑀯𑀸𑀧𑀦𑀓𑀸 𑀦𑀺𑀬𑀢𑀸. 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀦𑁆𑀦𑀭𑀲 𑀳𑁄𑀦𑁆𑀢𑀺.

𑀢𑀢𑁆𑀣 𑀧𑀯𑀢𑁆𑀢𑀝𑁆𑀞𑀺𑀢𑀺𑀫𑀢𑁆𑀢𑀸 𑀏𑀓𑀕𑁆𑀕𑀢𑀸. 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀪𑀸𑀯𑀁 𑀯𑀺𑀘𑀺𑀦𑀦𑁆𑀢𑁄 𑀏𑀢𑀸𑀬 𑀓𑀺𑀘𑁆𑀙𑀢𑀺 𑀓𑀺𑀮𑀫𑀢𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀲𑀁𑀲𑀬𑀮𑀓𑁆𑀔𑀡𑀸, 𑀓𑀫𑁆𑀧𑀦𑀭𑀲𑀸, 𑀅𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀸. 𑀲𑁂𑀲𑀸 𑀯𑀼𑀢𑁆𑀢𑀦𑀬𑀸 𑀏𑀯.

𑀤𑁆𑀯𑀸𑀤𑀲𑀫𑁂𑀦 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀲𑀭𑀽𑀧𑁂𑀦𑀸𑀕𑀢𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂 𑀯𑀼𑀢𑁆𑀢𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀳𑀻𑀦𑀸 𑀉𑀤𑁆𑀥𑀘𑁆𑀘𑀁 𑀲𑀭𑀽𑀧𑁂𑀦 𑀆𑀕𑀢𑀁, 𑀢𑀲𑁆𑀫𑀸 𑀢𑁂𑀭𑀲𑁂𑀯 𑀳𑁄𑀦𑁆𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀧𑀦𑁂𑀢𑁆𑀣 𑀅𑀥𑀺𑀫𑁄𑀓𑁆𑀔𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀘𑀼𑀤𑁆𑀤𑀲 𑀳𑁄𑀦𑁆𑀢𑀺. 𑀅𑀥𑀺𑀫𑁄𑀓𑁆𑀔𑀲𑀫𑁆𑀪𑀯𑀢𑁄 𑀲𑀫𑀸𑀥𑀺 𑀩𑀮𑀯𑀸 𑀳𑁄𑀢𑀺, 𑀅𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑀸 𑀤𑁆𑀯𑁂 𑀬𑁂𑀯𑀸𑀧𑀦𑀓𑀸, 𑀢𑁂𑀳𑀺 𑀲𑀳 𑀧𑀦𑁆𑀦𑀭𑀲𑁂𑀯 𑀳𑁄𑀦𑁆𑀢𑀺. 𑀏𑀯𑀁 𑀢𑀸𑀯 𑀅𑀓𑀼𑀲𑀮𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀅𑀩𑁆𑀬𑀸𑀓𑀢𑀸 𑀯𑀼𑀘𑁆𑀘𑀦𑁆𑀢𑀺, 𑀅𑀩𑁆𑀬𑀸𑀓𑀢𑀸 𑀧𑀦 𑀤𑀼𑀯𑀺𑀥𑀸 𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀢𑁄. 𑀢𑀢𑁆𑀣 𑀯𑀺𑀧𑀸𑀓𑀸 𑀓𑀼𑀲𑀮𑀸 𑀯𑀺𑀬 𑀪𑀽𑀫𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀼𑀢𑁆𑀢𑀭𑀜𑁆𑀘𑁂𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀲𑁂𑀦 𑀤𑀼𑀯𑀺𑀥𑀸. 𑀢𑀢𑁆𑀣 𑀲𑀳𑁂𑀢𑀼𑀓𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀸 𑀲𑀳𑁂𑀢𑀼𑀓𑀸. 𑀢𑁂 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀲𑀤𑀺𑀲𑀸. 𑀬𑀸 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸 𑀅𑀦𑀺𑀬𑀢𑀸, 𑀢𑀸 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀯𑀺𑀧𑀸𑀓𑁂𑀲𑀼 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀯𑀺𑀭𑀢𑀺𑀬𑁄 𑀧𑀦𑁂𑀢𑁆𑀣 𑀏𑀓𑀦𑁆𑀢𑀓𑀼𑀲𑀮𑀢𑁆𑀢𑀸 𑀦 𑀮𑀩𑁆𑀪𑀦𑁆𑀢𑀺. 𑀯𑀺𑀪𑀗𑁆𑀕𑁂 ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸𑀬𑁂𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀯𑀁 𑀓𑀸𑀫𑀸𑀯𑀘𑀭𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑁮𑁩. 𑀢𑁂𑀢𑁆𑀢𑀺𑀁𑀲𑀸𑀤𑀺𑀤𑁆𑀯𑀬𑁂 𑀥𑀫𑁆𑀫𑀸, 𑀤𑁆𑀯𑀢𑁆𑀢𑀺𑀁𑀲𑁂𑀯 𑀢𑀢𑁄 𑀧𑀭𑁂;

𑀩𑀸𑀢𑁆𑀢𑀺𑀁𑀲 𑀧𑀜𑁆𑀘𑀫𑁂 𑀙𑀝𑁆𑀞𑁂, 𑀏𑀓𑀢𑀺𑀁𑀲 𑀢𑀢𑁄 𑀧𑀭𑁂.

𑀅𑀳𑁂𑀢𑀼𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀅𑀳𑁂𑀢𑀼𑀓𑀸. 𑀢𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀸𑀯 𑀨𑀲𑁆𑀲𑁄 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀚𑀻𑀯𑀺𑀢𑀁 𑀘𑀺𑀢𑁆𑀢𑀝𑁆𑀞𑀺𑀢𑀻𑀢𑀺 𑀲𑀭𑀽𑀧𑁂𑀦𑀸𑀕𑀢𑀸 𑀙, 𑀫𑀦𑀲𑀺𑀓𑀸𑀭𑁂𑀦 𑀘 𑀲𑀢𑁆𑀢 𑀳𑁄𑀦𑁆𑀢𑀺. 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀲𑀢𑁆𑀢 𑀲𑀢𑁆𑀢𑁂𑀯 𑀘𑁂𑀢𑀲𑀺𑀓𑀸. 𑀢𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀧𑀦 𑀉𑀧𑁂𑀓𑁆𑀔𑀸𑀞𑀸𑀦𑁂 𑀲𑀼𑀔𑀯𑁂𑀤𑀦𑀸 𑀧𑀯𑀺𑀝𑁆𑀞𑀸. 𑀲𑀸 𑀓𑀸𑀬𑀺𑀓𑀲𑀸𑀢𑀮𑀓𑁆𑀔𑀡𑀸, 𑀧𑀻𑀡𑀦𑀭𑀲𑀸, 𑀲𑁂𑀲𑀸 𑀯𑀼𑀢𑁆𑀢𑀦𑀬𑀸 𑀏𑀯.

𑁮𑁪. 𑀇𑀝𑁆𑀞𑀸𑀭𑀫𑁆𑀫𑀡𑀬𑁄𑀕𑀲𑁆𑀫𑀺𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀺𑀲𑀼;

𑀲𑀢𑀺 𑀓𑀲𑁆𑀫𑀸 𑀉𑀧𑁂𑀓𑁆𑀔𑀸𑀯, 𑀯𑀼𑀢𑁆𑀢𑀸 𑀘𑀢𑀽𑀲𑀼 𑀲𑀢𑁆𑀣𑀼𑀦𑀸.

𑁮𑁫. 𑀉𑀧𑀸𑀤𑀸𑀬 𑀘 𑀭𑀽𑀧𑁂𑀦, 𑀉𑀧𑀸𑀤𑀸𑀭𑀽𑀧𑀓𑁂 𑀧𑀦;

𑀲𑀗𑁆𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲, 𑀤𑀼𑀩𑁆𑀩𑀮𑀢𑁆𑀢𑀸𑀢𑀺 𑀤𑀻𑀧𑀬𑁂.

𑁮𑁬. 𑀧𑀲𑀸𑀤𑀁 𑀧𑀦𑀢𑀺𑀓𑁆𑀓𑀫𑁆𑀫, 𑀓𑀽𑀝𑀁𑀯 𑀧𑀺𑀘𑀼𑀧𑀺𑀡𑁆𑀟𑀓𑀁;

𑀪𑀽𑀢𑀭𑀽𑀧𑁂𑀦 𑀪𑀽𑀢𑀸𑀦𑀁, 𑀖𑀝𑁆𑀝𑀦𑀸𑀬 𑀲𑀼𑀔𑀸𑀤𑀺𑀓𑀁.

𑀢𑀲𑁆𑀫𑀸 𑀓𑀸𑀬𑀯𑀺𑀜𑁆𑀜𑀸𑀡𑀁 𑀲𑀼𑀔𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀦𑁄𑀥𑀸𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸 𑀲𑀭𑀽𑀧𑁂𑀦𑀸𑀕𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀯𑀼𑀢𑁆𑀢𑀸 𑀙, 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀲𑀳 𑀅𑀝𑁆𑀞, 𑀅𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑁂𑀳𑀺 𑀤𑁆𑀯𑀻𑀳𑀺 𑀬𑁂𑀯𑀸𑀧𑀦𑀓𑁂𑀳𑀺 𑀤𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀣𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦. 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀦 𑀧𑀻𑀢𑀺𑀅𑀥𑀺𑀓𑀸 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀜𑁆𑀘 𑀦𑀸𑀦𑀢𑁆𑀢𑀁. 𑀢𑀲𑁆𑀫𑀸𑀯𑁂𑀢𑁆𑀣 𑀏𑀓𑀸𑀤𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀏𑀯𑀁 𑀅𑀳𑁂𑀢𑀼𑀓𑀸𑀧𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀭𑀽𑀧𑀸𑀯𑀘𑀭𑀸. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀸. 𑀢𑁂 𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀲𑀤𑀺𑀲𑀸𑀬𑁂𑀯𑀸𑀢𑀺.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸. 𑀢𑁂 𑀲𑀩𑁆𑀩𑁂 𑀢𑁂𑀲𑀁𑀬𑁂𑀯 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀲𑀤𑀺𑀲𑀸 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀘𑁂𑀢𑀲𑀺𑀓𑁂𑀳𑀺 𑀲𑀤𑀺𑀲𑀸. 𑀏𑀯𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀘𑁂𑀢𑀲𑀺𑀓𑀸 𑀦𑀸𑀫. 𑀢𑁂 𑀧𑀦 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀯𑀼𑀢𑁆𑀢𑀘𑁂𑀢𑀲𑀺𑀓𑀲𑀤𑀺𑀲𑀸. 𑀏𑀢𑁆𑀣 𑀧𑀦 𑀓𑀸𑀬𑀯𑀺𑀜𑁆𑀜𑀸𑀡𑁂 𑀤𑀼𑀓𑁆𑀔𑀯𑁂𑀤𑀦𑀸 𑀧𑀯𑀺𑀝𑁆𑀞𑀸. 𑀲𑀸 𑀓𑀸𑀬𑀺𑀓𑀸𑀩𑀸𑀥𑀮𑀓𑁆𑀔𑀡𑀸. 𑀲𑁂𑀲𑀸 𑀯𑀼𑀢𑁆𑀢𑀦𑀬𑀸𑀬𑁂𑀯𑀸𑀢𑀺. 𑀏𑀯𑀁 𑀙𑀢𑁆𑀢𑀺𑀁𑀲 𑀯𑀺𑀧𑀸𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀘 𑀘𑁂𑀢𑀲𑀺𑀓𑀸 𑀪𑀽𑀫𑀺𑀢𑁄 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀸 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀢𑁄 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀲𑀳𑁂𑀢𑀼𑀓𑀸, 𑀢𑁂 𑀧𑀦 𑀅𑀝𑁆𑀞𑀳𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑁂𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀳𑁂𑀢𑀼𑀓𑀸, 𑀢𑁂 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑁂 𑀧𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀓𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀫𑁆𑀪𑀯𑀢𑁄 𑀧𑀦𑁂𑀢𑁆𑀣 𑀩𑀮𑀧𑁆𑀧𑀢𑁆𑀢𑁄 𑀲𑀫𑀸𑀥𑀺 𑀳𑁄𑀢𑀺. 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀧𑀻𑀢𑀺𑀬𑀸 𑀲𑀳. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄.

𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀭𑀽𑀧𑀸𑀯𑀘𑀭𑀸. 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀸. 𑀢𑁂 𑀲𑀩𑁆𑀩𑁂𑀧𑀺 𑀲𑀓𑀲𑀓𑀪𑀽𑀫𑀺𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸𑀢𑀺. 𑀏𑀯𑀁 𑀯𑀻𑀲𑀢𑀺 𑀓𑀺𑀭𑀺𑀬𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘 𑀘𑁂𑀢𑀲𑀺𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀢𑀸𑀯𑀢𑀸 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀪𑀺𑀦𑁆𑀦𑁂𑀦 𑀏𑀓𑀽𑀦𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀲𑀺𑀓𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺.

𑁮𑁭. 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀯𑀺𑀧𑀸𑀓𑀓𑁆𑀭𑀺𑀬𑀸-

𑀳𑀤𑀬𑁂𑀳𑀺 𑀬𑀼𑀢𑀸 𑀧𑀦 𑀘𑁂𑀢𑀲𑀺𑀓𑀸;

𑀲𑀓𑀮𑀸𑀧𑀺 𑀘 𑀲𑀸𑀥𑀼 𑀫𑀬𑀸 𑀓𑀣𑀺𑀢𑀸,

𑀲𑀼𑀕𑀢𑁂𑀦 𑀫𑀳𑀸𑀫𑀼𑀦𑀺𑀦𑀸 𑀓𑀣𑀺𑀢𑀸.

𑁮𑁮. 𑀅𑀯𑀕𑀘𑁆𑀙𑀢𑀺 𑀬𑁄 𑀇𑀫𑀁 𑀅𑀦𑀼𑀦𑀁,

𑀧𑀭𑀫𑀁 𑀢𑀲𑁆𑀲 𑀲𑀫𑀦𑁆𑀢𑀢𑁄 𑀫𑀢𑀺;

𑀅𑀪𑀺𑀥𑀫𑁆𑀫𑀦𑀬𑁂 𑀤𑀽𑀭𑀸𑀲𑀤𑁂,

𑀅𑀢𑀺𑀕𑀫𑁆𑀪𑀻𑀭𑀞𑀸𑀦𑁂 𑀯𑀺𑀚𑀫𑁆𑀪𑀢𑁂.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑁄 𑀦𑀸𑀫

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.