𑁧𑁮. 𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁧𑁭𑁦. 𑀲𑀫𑀸𑀥𑀺𑀁 𑀧𑀦 𑀲𑀸𑀪𑀺𑀜𑁆𑀜𑀁, 𑀪𑀸𑀯𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁;

𑀪𑀸𑀯𑁂𑀢𑀩𑁆𑀩𑀸 𑀬𑀢𑁄 𑀧𑀜𑁆𑀜𑀸, 𑀪𑀺𑀓𑁆𑀔𑀼𑀦𑀸 𑀢𑁂𑀦 𑀥𑀻𑀫𑀢𑀸.

𑁧𑁧𑁭𑁧. 𑀢𑀢𑁄𑀳𑀁 𑀤𑀸𑀦𑀺 𑀯𑀓𑁆𑀔𑀸𑀫𑀺, 𑀧𑀜𑁆𑀜𑀸𑀪𑀸𑀯𑀦𑀫𑀼𑀢𑁆𑀢𑀫𑀁;

𑀲𑀫𑀸𑀲𑁂𑀦𑁂𑀯 𑀪𑀺𑀓𑁆𑀔𑀽𑀦𑀁, 𑀧𑀭𑀁 𑀧𑀻𑀢𑀺𑀲𑀼𑀔𑀸𑀯𑀳𑀁.

𑁧𑁧𑁭𑁨. 𑀓𑀸 𑀧𑀜𑁆𑀜𑀸 𑀧𑀦 𑀓𑁄 𑀘𑀢𑁆𑀣𑁄,

𑀓𑀺𑀫𑀲𑁆𑀲𑀸 𑀮𑀓𑁆𑀔𑀡𑀸𑀤𑀺𑀓𑀁;

𑀓𑀢𑀺𑀥𑀸 𑀲𑀸 𑀓𑀣𑀁 𑀢𑁂𑀦,

𑀪𑀸𑀯𑁂𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀢𑁂. 𑁋

𑁧𑁧𑁭𑁩. 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸, 𑀧𑀼𑀜𑁆𑀜𑀘𑀺𑀢𑁆𑀢𑀲𑀫𑀸𑀬𑀼𑀢𑀸;

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸 𑀲𑀸, 𑀚𑀸𑀦𑀦𑀸 𑀯𑀸 𑀧𑀓𑀸𑀭𑀢𑁄.

𑁧𑁧𑁭𑁪. 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁, 𑀓𑁄 𑀯𑀺𑀲𑁂𑀲𑁄 𑀓𑀺𑀫𑀦𑁆𑀢𑀭𑀁;

𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁, 𑀚𑀸𑀦𑀦𑀢𑁆𑀢𑁂 𑀲𑀫𑁂𑀧𑀺 𑀘.

𑁧𑁧𑁭𑁫. 𑀬𑀸 𑀲𑀜𑁆𑀚𑀸𑀦𑀦𑀫𑀢𑁆𑀢𑀁𑀯, 𑀲𑀜𑁆𑀜𑀸 𑀦𑀻𑀮𑀸𑀤𑀺𑀢𑁄 𑀧𑀦;

𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀁 𑀢𑀼, 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺 𑀦𑁂𑀯 𑀲𑀸.

𑁧𑁧𑁭𑁬. 𑀯𑀺𑀜𑁆𑀜𑀸𑀡𑀁 𑀧𑀦 𑀚𑀸𑀦𑀸𑀢𑀺, 𑀦𑀻𑀮𑀧𑀻𑀢𑀸𑀤𑀺𑀕𑁄𑀘𑀭𑀁;

𑀲𑀓𑁆𑀓𑁄𑀢𑀺𑀧𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁.

𑁧𑁧𑁭𑁭. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑀁 𑀧𑀸𑀧𑁂𑀢𑀼𑀫𑁂𑀯 𑀢𑀁;

𑀧𑀜𑁆𑀜𑀸 𑀯𑀼𑀢𑁆𑀢𑀦𑀬𑀁 𑀓𑀸𑀢𑀼𑀁, 𑀲𑀓𑁆𑀓𑁄𑀢𑀺 𑀢𑀺𑀯𑀺𑀥𑀫𑁆𑀧𑀺 𑀢𑀁.

𑁧𑁧𑁭𑁮. 𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺, 𑀯𑀺𑀲𑁂𑀲𑁄 𑀲𑀫𑀼𑀤𑀻𑀭𑀺𑀢𑁄;

𑀲𑀩𑁆𑀩𑁂𑀲𑀁 𑀧𑀦 𑀥𑀫𑁆𑀫𑀸𑀦𑀁, 𑀲𑀪𑀸𑀯𑀧𑀝𑀺𑀯𑁂𑀥𑀦𑀁.

𑁧𑁧𑁭𑁯. 𑀮𑀓𑁆𑀔𑀡𑀁 𑀧𑀦 𑀧𑀜𑁆𑀜𑀸𑀬, 𑀮𑀓𑁆𑀔𑀡𑀜𑁆𑀜𑀽𑀳𑀺 𑀤𑀻𑀧𑀺𑀢𑀁;

𑀲𑀫𑁆𑀫𑁄𑀳𑀦𑀦𑁆𑀥𑀓𑀸𑀭𑀲𑁆𑀲, 𑀯𑀺𑀤𑁆𑀥𑀁𑀲𑀦𑀭𑀲𑀸 𑀫𑀢𑀸.

𑁧𑁧𑁮𑁦. 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀫𑀸𑀥𑀸𑀲𑀦𑁆𑀦𑀓𑀸𑀭𑀡𑀸;

𑀏𑀯𑀫𑁂𑀢𑁆𑀣 𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀧𑀜𑁆𑀜𑀸𑀬 𑀮𑀓𑁆𑀔𑀡𑀸𑀤𑀺𑀓𑀸.

𑀓𑀢𑀺𑀥𑀸𑀢𑀺 𑀏𑀢𑁆𑀣 𑁋

𑁧𑁧𑁮𑁧. 𑀮𑀓𑁆𑀔𑀡𑁂𑀦𑁂𑀓𑀥𑀸 𑀯𑀼𑀢𑁆𑀢𑀸,

𑀮𑁄𑀓𑀺𑀓𑀸𑀮𑁄𑀓𑀺𑀓𑀸 𑀤𑁆𑀯𑀺𑀥𑀸;

𑀮𑁄𑀓𑀺𑀬𑁂𑀦𑁂𑀢𑁆𑀣 𑀫𑀕𑁆𑀕𑁂𑀦,

𑀬𑀼𑀢𑁆𑀢𑀸 𑀲𑀸 𑀮𑁄𑀓𑀺𑀓𑀸 𑀲𑀺𑀬𑀸.

𑁧𑁧𑁮𑁨. 𑀮𑁄𑀓𑀼𑀢𑁆𑀢𑀭𑁂𑀦 𑀫𑀕𑁆𑀕𑁂𑀦, 𑀬𑀼𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸 𑀫𑀢𑀸;

𑀢𑀺𑀯𑀺𑀥𑀸𑀧𑀺 𑀲𑀺𑀬𑀸 𑀧𑀜𑁆𑀜𑀸, 𑀘𑀺𑀦𑁆𑀢𑀸𑀲𑀼𑀢𑀫𑀬𑀸𑀤𑀺𑀢𑁄.

𑁧𑁧𑁮𑁩. 𑀢𑀢𑁆𑀣𑀢𑁆𑀢𑀦𑁄𑀯 𑀘𑀺𑀦𑁆𑀢𑀸𑀬, 𑀦𑀺𑀧𑁆𑀨𑀦𑁆𑀦𑀢𑁆𑀢𑀸𑀢𑀺 𑀢𑀲𑁆𑀲 𑀲𑀸;

𑀳𑁄𑀢𑀺 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸, 𑀪𑀽𑀭𑀺𑀧𑀜𑁆𑀜𑁂𑀦 𑀤𑁂𑀲𑀺𑀢𑀸.

𑁧𑁧𑁮𑁪. 𑀧𑀭𑀢𑁄 𑀧𑀦 𑀲𑀼𑀢𑁆𑀯𑀸𑀦, 𑀮𑀤𑁆𑀥𑀸 𑀧𑀜𑁆𑀜𑀸 𑀅𑀬𑀁 𑀇𑀥;

𑀲𑀼𑀢𑁂𑀦𑁂𑀯 𑀘 𑀦𑀺𑀧𑁆𑀨𑀦𑁆𑀦𑀸, 𑀧𑀜𑁆𑀜𑀸 𑀲𑀼𑀢𑀫𑀬𑀸 𑀫𑀢𑀸.

𑁧𑁧𑁮𑁫. 𑀬𑀣𑀸 𑀯𑀸𑀧𑀺 𑀢𑀣𑀸 𑀘𑁂𑀢𑁆𑀣, 𑀪𑀸𑀯𑀦𑀸𑀬 𑀯𑀲𑁂𑀦 𑀢𑀼;

𑀦𑀺𑀧𑁆𑀨𑀦𑁆𑀦𑀸 𑀅𑀧𑁆𑀧𑀦𑀸𑀧𑀢𑁆𑀢𑀸, 𑀧𑀜𑁆𑀜𑀸 𑀲𑀸 𑀪𑀸𑀯𑀦𑀸𑀫𑀬𑀸.

𑁧𑁧𑁮𑁬. 𑀧𑀝𑀺𑀲𑀫𑁆𑀪𑀺𑀤𑀸𑀘𑀢𑀼𑀓𑁆𑀓𑀲𑁆𑀲, 𑀯𑀲𑁂𑀦 𑀘𑀢𑀼𑀥𑀸 𑀲𑀺𑀬𑀸;

𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀜𑀸𑀡𑀁 𑀜𑀸𑀡𑁂𑀲𑀼 𑀢𑀻𑀲𑀼𑀧𑀺.

𑁧𑁧𑁮𑁭. 𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀯𑀺𑀧𑀸𑀓𑀸 𑀘 𑀓𑁆𑀭𑀺𑀬𑀸 𑀢𑀣𑀸;

𑀦𑀺𑀩𑁆𑀩𑀸𑀦𑀁 𑀪𑀸𑀲𑀺𑀢𑀢𑁆𑀣𑁄 𑀘, 𑀧𑀜𑁆𑀘𑁂𑀢𑁂 𑀅𑀢𑁆𑀣𑀲𑀜𑁆𑀜𑀺𑀢𑀸.

𑁧𑁧𑁮𑁮. 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀅𑀭𑀺𑀬𑀫𑀕𑁆𑀕𑁄 𑀘 𑀪𑀸𑀲𑀺𑀢𑀁;

𑀓𑀼𑀲𑀮𑀸𑀓𑀼𑀲𑀮𑀜𑁆𑀘𑁂𑀢𑀺, 𑀧𑀜𑁆𑀘𑁂𑀢𑁂 𑀥𑀫𑁆𑀫𑀲𑀜𑁆𑀜𑀺𑀢𑀸.

𑁧𑁧𑁮𑁯. 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀬𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀢𑀼;

𑀦𑀺𑀭𑀼𑀢𑁆𑀢𑀻𑀢𑀺 𑀘 𑀦𑀺𑀤𑁆𑀤𑀺𑀝𑁆𑀞𑀸, 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁂𑀦 𑀲𑀸.

𑁧𑁧𑁯𑁦. 𑀜𑀸𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀢𑁄;

𑀢𑁂𑀲𑀼 𑀜𑀸𑀡𑁂𑀲𑀼 𑀬𑀁 𑀜𑀸𑀡𑀁, 𑀧𑀝𑀺𑀪𑀸𑀦𑀦𑁆𑀢𑀺 𑀢𑀁 𑀫𑀢𑀁.

𑁧𑁧𑁯𑁧. 𑀧𑀭𑀺𑀬𑀢𑁆𑀢𑀺𑀧𑀭𑀺𑀧𑀼𑀘𑁆𑀙𑀸𑀳𑀺, 𑀲𑀯𑀦𑀸𑀥𑀺𑀕𑀫𑁂𑀳𑀺 𑀘;

𑀧𑀼𑀩𑁆𑀩𑀬𑁄𑀕𑁂𑀦 𑀕𑀘𑁆𑀙𑀦𑁆𑀢𑀺, 𑀧𑀪𑁂𑀤𑀁 𑀧𑀝𑀺𑀲𑀫𑁆𑀪𑀺𑀤𑀸.

𑀓𑀣𑀁 𑀪𑀸𑀯𑁂𑀢𑀩𑁆𑀩𑀸𑀢𑀺 𑀏𑀢𑁆𑀣 𑁋

𑁧𑁧𑁯𑁨. 𑀔𑀦𑁆𑀥𑀸𑀤𑀻𑀲𑀼 𑀳𑀺 𑀥𑀫𑁆𑀫𑁂𑀲𑀼, 𑀪𑀽𑀫𑀺𑀪𑀽𑀢𑁂𑀲𑀼 𑀬𑁄𑀕𑀺𑀦𑀸;

𑀉𑀕𑁆𑀕𑀳𑀸𑀤𑀺𑀯𑀲𑁂𑀦𑁂𑀢𑁆𑀣, 𑀓𑀢𑁆𑀯𑀸 𑀧𑀭𑀺𑀘𑀬𑀁 𑀧𑀦.

𑁧𑁧𑁯𑁩. 𑀲𑀻𑀮𑀁 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀜𑁆𑀘, 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀢𑁄 𑀧𑀭𑀁;

𑀤𑀺𑀝𑁆𑀞𑀺𑀲𑀼𑀤𑁆𑀥𑀸𑀤𑀬𑁄 𑀧𑀜𑁆𑀘, 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀲𑀼𑀤𑁆𑀥𑀺𑀬𑀸.

𑁧𑁧𑁯𑁪. 𑀢𑀸𑀬 𑀧𑀜𑁆𑀜𑀸𑀬 𑀬𑀼𑀢𑁆𑀢𑁂𑀦, 𑀪𑀻𑀢𑁂𑀦 𑀚𑀦𑀦𑀸𑀤𑀺𑀢𑁄;

𑀪𑀸𑀯𑁂𑀢𑀩𑁆𑀩𑀸 𑀪𑀯𑀸𑀪𑀸𑀯𑀁, 𑀧𑀢𑁆𑀣𑀬𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸.

𑁧𑁧𑁯𑁫. 𑀭𑀽𑀧𑀜𑁆𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸 𑀘𑁂𑀯 𑀲𑀩𑁆𑀩𑀲𑁄;

𑀯𑀺𑀜𑁆𑀜𑀸𑀡𑀜𑁆𑀘𑁂𑀢𑀺 𑀧𑀜𑁆𑀘𑁂𑀢𑁂, 𑀔𑀦𑁆𑀥𑀸 𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀸.

𑁧𑁧𑁯𑁬. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀢𑀁, 𑀅𑀢𑀻𑀢𑀸𑀦𑀸𑀕𑀢𑀸𑀤𑀺𑀓𑀁;

𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸, 𑀲𑀼𑀔𑀼𑀫𑁄𑀴𑀸𑀭𑀺𑀓𑀫𑁆𑀧𑀺 𑀯𑀸.

𑁧𑁧𑁯𑁭. 𑀳𑀻𑀦𑀁 𑀯𑀸𑀧𑀺 𑀧𑀡𑀻𑀢𑀁 𑀯𑀸, 𑀬𑀁 𑀤𑀽𑀭𑁂 𑀬𑀜𑁆𑀘 𑀲𑀦𑁆𑀢𑀺𑀓𑁂;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁯𑁮. 𑀇𑀢𑀭𑁂𑀲𑀼𑀧𑀺 𑀬𑀁 𑀓𑀺𑀜𑁆𑀘𑀺, 𑀢𑀁 𑀯𑁂𑀤𑀬𑀺𑀢𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀯𑁂𑀤𑀦𑀸𑀓𑁆𑀔𑀦𑁆𑀥𑀢𑀸 𑀓𑀢𑀸.

𑁧𑁧𑁯𑁯. 𑀘𑀺𑀢𑁆𑀢𑀚𑀁 𑀧𑀦 𑀬𑀁 𑀓𑀺𑀜𑁆𑀘𑀺, 𑀢𑀁 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁨𑁦𑁦. 𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀲𑀫𑁆𑀪𑀽𑀢𑀁, 𑀅𑀪𑀺𑀲𑀗𑁆𑀔𑀸𑀭𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀢𑀸 𑀓𑀢𑀸.

𑁧𑁨𑁦𑁧. 𑀢𑀢𑁆𑀣 𑀘𑀺𑀢𑁆𑀢𑀁 𑀢𑀼 𑀬𑀁 𑀓𑀺𑀜𑁆𑀘𑀺, 𑀢𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑁂𑀓𑀢𑁄 𑀓𑀢𑁆𑀯𑀸, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀢𑀸 𑀓𑀢𑀸.

𑁧𑁨𑁦𑁨. 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸, 𑀉𑀧𑀸𑀤𑀸 𑀘𑀢𑀼𑀯𑀻𑀲𑀢𑀺;

𑀅𑀝𑁆𑀞𑀯𑀻𑀲𑀢𑀺𑀥𑀸 𑀘𑁂𑀢𑀁, 𑀭𑀽𑀧𑀁 𑀭𑀽𑀧𑀦𑁆𑀢𑀺 𑀕𑀡𑁆𑀳𑀢𑀺.

𑁧𑁨𑁦𑁩. 𑀏𑀓𑀸𑀲𑀻𑀢𑀺𑀬𑀸 𑀘𑀺𑀢𑁆𑀢𑁂𑀦, 𑀲𑀁𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄;

𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭-𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑀜𑁆𑀜𑀺𑀢𑀸.

𑁧𑁨𑁦𑁪. 𑀘𑀢𑁆𑀢𑀸𑀭𑁄𑀭𑀽𑀧𑀺𑀦𑁄 𑀔𑀦𑁆𑀥𑁂, 𑀦𑀸𑀫𑀦𑁆𑀢𑀺 𑀧𑀭𑀺𑀕𑀡𑁆𑀳𑀢𑀺;

𑀭𑀽𑀧𑀓𑁆𑀔𑀦𑁆𑀥𑁄 𑀪𑀯𑁂 𑀭𑀽𑀧𑀁, 𑀦𑀸𑀫𑀓𑁆𑀔𑀦𑁆𑀥𑀸 𑀅𑀭𑀽𑀧𑀺𑀦𑁄.

𑁧𑁨𑁦𑁫. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀦𑀸𑀫𑀁 𑀦𑀫𑀦𑀮𑀓𑁆𑀔𑀡𑀁;

𑀇𑀢𑀺 𑀲𑀗𑁆𑀔𑁂𑀧𑀢𑁄 𑀦𑀸𑀫-𑀭𑀽𑀧𑀁 𑀲𑁄 𑀧𑀭𑀺𑀕𑀡𑁆𑀳𑀢𑀺.

𑁧𑁨𑁦𑁬. 𑀨𑀸𑀮𑁂𑀦𑁆𑀢𑁄 𑀯𑀺𑀬 𑀢𑀸𑀮𑀲𑁆𑀲, 𑀓𑀦𑁆𑀤𑀁 𑀢𑀼 𑀬𑀫𑀓𑀁 𑀤𑁆𑀯𑀺𑀥𑀸;

𑀯𑀯𑀢𑁆𑀣𑀧𑁂𑀢𑀺 𑀦𑀸𑀫𑀜𑁆𑀘, 𑀭𑀽𑀧𑀜𑁆𑀘𑀸𑀢𑀺 𑀤𑁆𑀯𑀺𑀥𑀸 𑀧𑀦.

𑁧𑁨𑁦𑁭. 𑀦𑀸𑀫𑀢𑁄 𑀭𑀽𑀧𑀢𑁄 𑀅𑀜𑁆𑀜𑁄,

𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄𑀧𑀺 𑀯𑀸;

𑀅𑀢𑁆𑀢𑀸 𑀯𑀸 𑀓𑁄𑀘𑀺 𑀦𑀢𑁆𑀣𑀻𑀢𑀺,

𑀦𑀺𑀝𑁆𑀞𑀁 𑀕𑀘𑁆𑀙𑀢𑀺 𑀲𑀩𑁆𑀩𑀤𑀸.

𑁧𑁨𑁦𑁮. 𑀏𑀯𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑁄, 𑀦𑀸𑀫𑀭𑀽𑀧𑀁 𑀲𑀪𑀸𑀯𑀢𑁄;

𑀲𑀢𑁆𑀢𑀲𑀫𑁆𑀫𑁄𑀳𑀖𑀸𑀢𑀢𑁆𑀣𑀁, 𑀩𑀳𑀼𑀲𑀼𑀢𑁆𑀢𑀯𑀲𑁂𑀦𑀺𑀥.

𑁧𑁨𑁦𑁯. 𑀦𑀸𑀫𑀭𑀽𑀧𑀫𑀢𑁆𑀢𑀜𑁆𑀜𑁂𑀯, 𑀦𑀢𑁆𑀣𑀺 𑀓𑁄𑀘𑀺𑀥 𑀧𑀼𑀕𑁆𑀕𑀮𑁄;

𑀏𑀯𑀫𑁂𑀢𑁆𑀣 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀯𑀯𑀢𑁆𑀣𑀧𑁂𑀢𑀺 𑀢𑀁 𑀧𑀦.

𑀯𑀼𑀢𑁆𑀢𑀁 𑀳𑁂𑀢𑀁 𑁋

𑁧𑁨𑁧𑁦. ‘‘𑀬𑀣𑀸𑀧𑀺 𑀅𑀗𑁆𑀕𑀲𑀫𑁆𑀪𑀸𑀭𑀸,

𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼,

𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀻’’𑀢𑀺.

𑁧𑁨𑁧𑁧. 𑀬𑀣𑀸𑀧𑀺 𑀤𑀸𑀭𑀼𑀬𑀦𑁆𑀢𑀫𑁆𑀧𑀺, 𑀦𑀺𑀚𑁆𑀚𑀻𑀯𑀜𑁆𑀘 𑀦𑀺𑀭𑀻𑀳𑀓𑀁;

𑀤𑀸𑀭𑀼𑀭𑀚𑁆𑀚𑀼𑀲𑀫𑀸𑀬𑁄𑀕𑁂, 𑀢𑀁 𑀕𑀘𑁆𑀙𑀢𑀺𑀧𑀺 𑀢𑀺𑀝𑁆𑀞𑀢𑀺.

𑁧𑁨𑁧𑁨. 𑀢𑀣𑁂𑀤𑀁 𑀦𑀸𑀫𑀭𑀽𑀧𑀫𑁆𑀧𑀺, 𑀦𑀺𑀚𑁆𑀚𑀻𑀯𑀜𑁆𑀘 𑀦𑀺𑀭𑀻𑀳𑀓𑀁;

𑀅𑀜𑁆𑀜𑀫𑀜𑁆𑀜𑀲𑀫𑀸𑀬𑁄𑀕𑁂, 𑀢𑀁 𑀕𑀘𑁆𑀙𑀢𑀺𑀧𑀺 𑀢𑀺𑀝𑁆𑀞𑀢𑀺.

𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑁧𑁨𑁧𑁩. ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀇𑀥𑀢𑁆𑀣𑀺 𑀲𑀘𑁆𑀘𑀢𑁄,

𑀦 𑀳𑁂𑀢𑁆𑀣 𑀲𑀢𑁆𑀢𑁄 𑀫𑀦𑀼𑀚𑁄 𑀘 𑀯𑀺𑀚𑁆𑀚𑀢𑀺;

𑀲𑀼𑀜𑁆𑀜𑀁 𑀇𑀤𑀁 𑀬𑀦𑁆𑀢𑀫𑀺𑀯𑀸𑀪𑀺𑀲𑀗𑁆𑀔𑀢𑀁,

𑀤𑀼𑀓𑁆𑀔𑀲𑁆𑀲 𑀧𑀼𑀜𑁆𑀚𑁄 𑀢𑀺𑀡𑀓𑀝𑁆𑀞𑀲𑀸𑀤𑀺𑀲𑁄’’𑀢𑀺.

𑁧𑁨𑁧𑁪. 𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀸𑀬, 𑀤𑀡𑁆𑀟𑀓𑁂𑀲𑀼 𑀞𑀺𑀢𑁂𑀲𑀼 𑀳𑀺;

𑀏𑀓𑀲𑁆𑀫𑀺𑀁 𑀧𑀢𑀫𑀸𑀦𑁂 𑀢𑀼, 𑀢𑀣𑁂𑀯 𑀧𑀢𑀢𑀻𑀢𑀭𑁄.

𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑁧𑁨𑁧𑁫. ‘‘𑀬𑀫𑀓𑀁 𑀦𑀸𑀫𑀭𑀽𑀧𑀜𑁆𑀘, 𑀉𑀪𑁄 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸;

𑀏𑀓𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀉𑀪𑁄 𑀪𑀺𑀚𑁆𑀚𑀦𑁆𑀢𑀺 𑀧𑀘𑁆𑀘𑀬𑀸’’𑀢𑀺.

𑁧𑁨𑁧𑁬. 𑀉𑀢𑀺𑀦𑁆𑀦𑀁 𑀦𑀸𑀫𑀭𑀽𑀧𑀸𑀦𑀁, 𑀦𑀸𑀫𑀁 𑀦𑀺𑀢𑁆𑀢𑁂𑀚𑀫𑁂𑀢𑁆𑀣 𑀢𑀁;

𑀲𑀓𑁂𑀦𑁂𑀯 𑀳𑀺 𑀢𑁂𑀚𑁂𑀦, 𑀦 𑀲𑀓𑁆𑀓𑁄𑀢𑀺 𑀧𑀯𑀢𑁆𑀢𑀺𑀢𑀼𑀁.

𑁧𑁨𑁧𑁭. 𑀦 𑀩𑁆𑀬𑀸𑀳𑀭𑀢𑀺 𑀦𑁄 𑀲𑁂𑀢𑀺, 𑀦 𑀢𑀺𑀝𑁆𑀞𑀢𑀺 𑀦 𑀕𑀘𑁆𑀙𑀢𑀺;

𑀦 𑀪𑁂𑀤𑁂𑀢𑀺 𑀦 𑀘𑁄𑀭𑁂𑀢𑀺, 𑀦 𑀪𑀼𑀜𑁆𑀚𑀢𑀺 𑀦 𑀔𑀸𑀤𑀢𑀺.

𑁧𑁨𑁧𑁮. 𑀢𑀣𑀸 𑀭𑀽𑀧𑀫𑁆𑀧𑀺 𑀦𑀺𑀢𑁆𑀢𑁂𑀚𑀁, 𑀯𑀺𑀦𑀸 𑀦𑀸𑀫𑀜𑁆𑀘 𑀲𑀩𑁆𑀩𑀣𑀸;

𑀲𑀓𑁂𑀦𑁂𑀯 𑀳𑀺 𑀢𑁂𑀚𑁂𑀦, 𑀦 𑀲𑀓𑁆𑀓𑁄𑀢𑀺 𑀧𑀯𑀢𑁆𑀢𑀺𑀢𑀼𑀁.

𑁧𑁨𑁧𑁯. 𑀪𑀼𑀜𑁆𑀚𑀸𑀫𑀻𑀢𑀺 𑀧𑀺𑀯𑀸𑀫𑀻𑀢𑀺, 𑀔𑀸𑀤𑀸𑀫𑀻𑀢𑀺 𑀢𑀣𑁂𑀯 𑀘;

𑀭𑁄𑀤𑀸𑀫𑀻𑀢𑀺 𑀳𑀲𑀸𑀫𑀻𑀢𑀺, 𑀭𑀽𑀧𑀲𑁆𑀲𑁂𑀢𑀁 𑀦 𑀯𑀺𑀚𑁆𑀚𑀢𑀺.

𑁧𑁨𑁨𑁦. 𑀦𑀸𑀫𑀁 𑀦𑀺𑀲𑁆𑀲𑀸𑀬 𑀭𑀽𑀧𑀁 𑀢𑀼, 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀦𑀸𑀫𑀓𑀁;

𑀧𑀯𑀢𑁆𑀢𑀢𑀺 𑀲𑀤𑀸 𑀲𑀩𑁆𑀩𑀁, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁.

𑁧𑁨𑁨𑁧. 𑀇𑀫𑀲𑁆𑀲 𑀧𑀦 𑀅𑀢𑁆𑀣𑀲𑁆𑀲, 𑀆𑀯𑀺𑀪𑀸𑀯𑀢𑁆𑀣𑀫𑁂𑀯 𑀘;

𑀚𑀘𑁆𑀘𑀦𑁆𑀥𑀧𑀻𑀞𑀲𑀧𑁆𑀧𑀻𑀦𑀁, 𑀯𑀢𑁆𑀢𑀩𑁆𑀩𑀸 𑀉𑀧𑀫𑀸 𑀇𑀥.

𑁧𑁨𑁨𑁨. 𑀬𑀣𑀸 𑀳𑀺 𑀦𑀸𑀯𑀁 𑀦𑀺𑀲𑁆𑀲𑀸𑀬, 𑀫𑀦𑀼𑀲𑁆𑀲𑀸 𑀬𑀦𑁆𑀢𑀺 𑀅𑀡𑁆𑀡𑀯𑁂;

𑀏𑀯𑀁 𑀭𑀽𑀧𑀫𑁆𑀧𑀺 𑀦𑀺𑀲𑁆𑀲𑀸𑀬, 𑀦𑀸𑀫𑀓𑀸𑀬𑁄 𑀧𑀯𑀢𑁆𑀢𑀢𑀺.

𑁧𑁨𑁨𑁩. 𑀬𑀣𑀸 𑀫𑀦𑀼𑀲𑁆𑀲𑁂 𑀦𑀺𑀲𑁆𑀲𑀸𑀬, 𑀦𑀸𑀯𑀸 𑀕𑀘𑁆𑀙𑀢𑀺 𑀅𑀡𑁆𑀡𑀯𑁂;

𑀏𑀯𑀁 𑀦𑀸𑀫𑀫𑁆𑀧𑀺 𑀦𑀺𑀲𑁆𑀲𑀸𑀬, 𑀭𑀽𑀧𑀓𑀸𑀬𑁄 𑀧𑀯𑀢𑁆𑀢𑀢𑀺.

𑁧𑁨𑁨𑁪. 𑀲𑀢𑁆𑀢𑀲𑀜𑁆𑀜𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀦𑀸𑀫𑀭𑀽𑀧𑀲𑁆𑀲 𑀲𑀩𑁆𑀩𑀣𑀸;

𑀬𑀸𑀣𑀸𑀯𑀤𑀲𑁆𑀲𑀦𑀁 𑀏𑀢𑀁, ‘‘𑀤𑀺𑀝𑁆𑀞𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺.

𑁧𑁨𑁨𑁫. 𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀘, 𑀤𑀼𑀓𑁆𑀔𑀢𑁄 𑀚𑀸𑀢𑀺𑀆𑀤𑀺𑀢𑁄;

𑀅𑀦𑁆𑀢𑀤𑁆𑀯𑀬𑀁 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀪𑀸𑀯𑀬𑁂 𑀧𑀦 𑀧𑀡𑁆𑀟𑀺𑀢𑁄.

𑁧𑁨𑁨𑁬. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀫𑀺𑀫𑀁 𑀧𑀭𑀺𑀲𑀼𑀤𑁆𑀥𑀁,

𑀲𑀼𑀝𑁆𑀞𑀼𑀢𑀭𑀁 𑀢𑀼 𑀓𑀭𑁄𑀢𑀺 𑀦𑀭𑁄 𑀬𑁄;

𑀤𑀺𑀝𑁆𑀞𑀺𑀕𑀢𑀸𑀦𑀺 𑀫𑀮𑀸𑀦𑀺 𑀅𑀲𑁂𑀲𑀁,

𑀦𑀸𑀲𑀫𑀼𑀧𑁂𑀦𑁆𑀢𑀺 𑀳𑀺 𑀢𑀲𑁆𑀲 𑀦𑀭𑀲𑁆𑀲.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.