𑁧𑁭. 𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀪𑀺𑀜𑁆𑀜𑀸𑀭𑀫𑁆𑀫𑀡𑀦𑀺𑀤𑁆𑀤𑁂𑀲𑁄

𑁧𑁧𑁦𑁪. 𑀅𑀦𑀸𑀕𑀢𑀁𑀲𑀜𑀸𑀡𑀜𑁆𑀘, 𑀬𑀣𑀸𑀓𑀫𑁆𑀫𑀼𑀧𑀕𑀫𑁆𑀧𑀺 𑀘;

𑀧𑀜𑁆𑀘 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀺, 𑀲𑀢𑁆𑀢𑀸𑀪𑀺𑀜𑁆𑀜𑀸 𑀇𑀫𑀸 𑀧𑀦.

𑁧𑁧𑁦𑁫. 𑀏𑀢𑀸𑀲𑀁 𑀧𑀦 𑀲𑀢𑁆𑀢𑀦𑁆𑀦𑀁, 𑀅𑀪𑀺𑀜𑁆𑀜𑀸𑀦𑀫𑀺𑀢𑁄 𑀧𑀭𑀁;

𑀧𑀯𑀓𑁆𑀔𑀸𑀫𑀺 𑀲𑀫𑀸𑀲𑁂𑀦, 𑀆𑀭𑀫𑁆𑀫𑀡𑀯𑀺𑀦𑀺𑀘𑁆𑀙𑀬𑀁.

𑁧𑁧𑁦𑁬. 𑀆𑀭𑀫𑁆𑀫𑀡𑀢𑁆𑀢𑀺𑀓𑀸 𑀯𑀼𑀢𑁆𑀢𑀸, 𑀬𑁂 𑀘𑀢𑁆𑀢𑀸𑀭𑁄 𑀫𑀳𑁂𑀲𑀺𑀦𑀸;

𑀲𑀢𑁆𑀢𑀦𑁆𑀦𑀫𑁂𑀢𑁆𑀣 𑀜𑀸𑀡𑀸𑀦𑀁, 𑀲𑀫𑁆𑀧𑀯𑀢𑁆𑀢𑀺𑀁 𑀲𑀼𑀡𑀸𑀣 𑀫𑁂.

𑁧𑁧𑁦𑁭. 𑀢𑀢𑁆𑀣 𑀇𑀤𑁆𑀥𑀺𑀯𑀺𑀥𑀜𑀸𑀡𑀁, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀲𑀢𑁆𑀢𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁦𑁮. 𑀓𑀸𑀬𑁂𑀦𑀸𑀤𑀺𑀲𑁆𑀲𑀫𑀸𑀦𑁂𑀦, 𑀕𑀦𑁆𑀢𑀼𑀓𑀸𑀫𑁄 𑀬𑀤𑀸𑀪𑀯𑁂;

𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸, 𑀓𑀸𑀬𑀁 𑀘𑀺𑀢𑁆𑀢𑀯𑀲𑁂𑀦 𑀢𑀁.

𑁧𑁧𑁦𑁯. 𑀫𑀳𑀕𑁆𑀕𑀢𑁂 𑀘 𑀘𑀺𑀢𑁆𑀢𑀲𑁆𑀫𑀺𑀁, 𑀲𑀫𑀸𑀭𑁄𑀧𑁂𑀢𑀺 𑀲𑁄 𑀢𑀤𑀸;

𑀓𑀸𑀬𑀸𑀭𑀫𑁆𑀫𑀡𑀢𑁄 𑀜𑀸𑀡𑀁, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁧𑁧𑁧𑁦. 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦, 𑀕𑀦𑁆𑀢𑀼𑀓𑀸𑀫𑁄 𑀬𑀤𑀸 𑀪𑀯𑁂;

𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸, 𑀘𑀺𑀢𑁆𑀢𑀁 𑀓𑀸𑀬𑀯𑀲𑁂𑀦 𑀢𑀁.

𑁧𑁧𑁧𑁧. 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀢𑀁, 𑀓𑀸𑀬𑁂 𑀭𑁄𑀧𑁂𑀢𑀺 𑀲𑁄 𑀢𑀤𑀸;

𑀛𑀸𑀦𑀸𑀭𑀫𑁆𑀫𑀡𑀢𑁄 𑀜𑀸𑀡𑀁, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁧𑁧𑁧𑁨. 𑀅𑀦𑀸𑀕𑀢𑀫𑀢𑀻𑀢𑀜𑁆𑀘, 𑀓𑀭𑁄𑀢𑀺 𑀯𑀺𑀲𑀬𑀁 𑀬𑀤𑀸;

𑀅𑀢𑀻𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀤𑀸𑀦𑀸𑀕𑀢𑀕𑁄𑀘𑀭𑀁.

𑁧𑁧𑁧𑁩. 𑀓𑀸𑀬𑁂𑀦 𑀤𑀺𑀲𑁆𑀲𑀫𑀸𑀦𑁂𑀦, 𑀕𑀫𑀦𑁂 𑀧𑀦 𑀪𑀺𑀓𑁆𑀔𑀼𑀦𑁄;

𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀪𑀯𑁂 𑀢𑀲𑁆𑀲, 𑀕𑁄𑀘𑀭𑁄𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁧𑁧𑁧𑁪. 𑀓𑀸𑀬𑀁 𑀘𑀺𑀢𑁆𑀢𑀯𑀲𑁂𑀦𑀸𑀧𑀺, 𑀘𑀺𑀢𑁆𑀢𑀁 𑀓𑀸𑀬𑀯𑀲𑁂𑀦 𑀯𑀸;

𑀧𑀭𑀺𑀡𑀸𑀫𑀦𑀓𑀸𑀮𑀲𑁆𑀫𑀺𑀁, 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁧𑁧𑁧𑁫. 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀩𑀳𑀺𑀤𑁆𑀥𑀸𑀭𑀽𑀧𑀤𑀲𑁆𑀲𑀦𑁂;

𑀏𑀯𑀫𑀺𑀤𑁆𑀥𑀺𑀯𑀺𑀥𑀁 𑀜𑀸𑀡𑀁, 𑀲𑀫𑁆𑀧𑀯𑀢𑁆𑀢𑀢𑀺 𑀲𑀢𑁆𑀢𑀲𑀼.

𑁧𑁧𑁧𑁬. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀭𑀺𑀢𑁆𑀢𑁂 𑀘, 𑀩𑀳𑀺𑀤𑁆𑀥𑀚𑁆𑀛𑀢𑁆𑀢𑀺𑀓𑁂𑀲𑀼𑀧𑀺;

𑀘𑀢𑀽𑀲𑁆𑀯𑁂𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀤𑀺𑀩𑁆𑀩𑀲𑁄𑀢𑀁 𑀧𑀯𑀢𑁆𑀢𑀢𑀺.

𑁧𑁧𑁧𑁭. 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀧𑀭𑀺𑀢𑁆𑀢𑁄 𑀘, 𑀲𑀤𑁆𑀤𑁄 𑀆𑀭𑀫𑁆𑀫𑀡𑀁 𑀬𑀢𑁄;

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀧𑀘𑁆𑀘𑀼-𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀁 𑀕𑀢𑀁.

𑁧𑁧𑁧𑁮. 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀲𑀤𑁆𑀤𑀲𑁆𑀲, 𑀲𑀯𑀦𑁂𑀧𑀺 𑀧𑀭𑀲𑁆𑀲 𑀘;

𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀜𑁆𑀘𑁂𑀯, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀫𑁆𑀧𑀺 𑀘.

𑁧𑁧𑁧𑁯. 𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀅𑀝𑁆𑀞𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁨𑁦. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀧𑀭𑀺𑀢𑁆𑀢𑀸𑀦𑀁 𑀧𑀚𑀸𑀦𑀦𑁂;

𑀚𑀸𑀦𑀦𑁂 𑀫𑀚𑁆𑀛𑀺𑀫𑀸𑀦𑀁 𑀢𑀼, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁧𑁧𑁨𑁧. 𑀚𑀸𑀦𑀦𑁂 𑀧𑀦 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲𑀸𑀧𑀺 𑀧𑀚𑀸𑀦𑀦𑁂;

𑀢𑀤𑀸 𑀧𑀦𑀲𑁆𑀲 𑀜𑀸𑀡𑀲𑁆𑀲, 𑀅𑀧𑁆𑀧𑀫𑀸𑀡𑁄𑀯 𑀕𑁄𑀘𑀭𑁄.

𑁧𑁧𑁨𑁨. 𑀢𑀁 𑀫𑀕𑁆𑀕𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀚𑀸𑀦𑀦𑁂;

𑀧𑀭𑀺𑀬𑀸𑀬𑁂𑀦𑁂𑀯𑁂𑀢𑀲𑁆𑀲, 𑀫𑀕𑁆𑀕𑀸𑀭𑀫𑁆𑀫𑀡𑀢𑀸 𑀫𑀢𑀸.

𑁧𑁧𑁨𑁩. 𑀅𑀢𑀻𑀢𑁂 𑀲𑀢𑁆𑀢𑀤𑀺𑀯𑀲-𑀩𑁆𑀪𑀦𑁆𑀢𑀭𑁂 𑀘 𑀬𑀤𑀸 𑀧𑀦;

𑀅𑀦𑀸𑀕𑀢𑁂 𑀢𑀣𑀸 𑀲𑀢𑁆𑀢-𑀤𑀺𑀯𑀲𑀩𑁆𑀪𑀦𑁆𑀢𑀭𑁂𑀧𑀺 𑀘.

𑁧𑁧𑁨𑁪. 𑀧𑀭𑁂𑀲𑀁 𑀧𑀦 𑀘𑀺𑀢𑁆𑀢𑀲𑁆𑀲, 𑀚𑀸𑀦𑀦𑁂 𑀲𑀫𑀼𑀤𑀻𑀭𑀺𑀢𑀁;

𑀅𑀢𑀻𑀢𑀸𑀭𑀫𑁆𑀫𑀡𑀜𑁆𑀘𑁂𑀯, 𑀢𑀤𑀸𑀦𑀸𑀕𑀢𑀕𑁄𑀘𑀭𑀁.

𑁧𑁧𑁨𑁫. 𑀓𑀣𑀜𑁆𑀘 𑀧𑀦 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑁄𑀘𑀭𑀢𑀁 𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀺𑀥𑀸 𑀯𑀼𑀢𑁆𑀢𑀁, 𑀔𑀡𑀲𑀦𑁆𑀢𑀢𑀺𑀅𑀤𑁆𑀥𑀢𑁄.

𑁧𑁧𑁨𑁬. 𑀢𑀢𑁆𑀣 𑀢𑀺𑀓𑁆𑀔𑀡𑀲𑀫𑁆𑀧𑀢𑁆𑀢𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀔𑀡𑀸𑀤𑀺𑀓𑀁;

𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀫𑀺𑀤𑀁 𑀧𑀦.

𑁧𑁧𑁨𑁭. 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺, 𑀆𑀳𑀼 𑀲𑀦𑁆𑀢𑀢𑀺𑀓𑁄𑀯𑀺𑀤𑀸;

𑀏𑀓𑀩𑁆𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀘𑁆𑀙𑀺𑀫𑀁.

𑁧𑁧𑁨𑁮. 𑀔𑀡𑀸𑀤𑀺𑀓𑀢𑁆𑀢𑀬𑀁 𑀧𑀘𑁆𑀘𑀼-𑀧𑁆𑀧𑀦𑁆𑀦𑀁 𑀢𑀫𑀸𑀳𑀼 𑀓𑁂𑀘𑀺𑀥;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀳𑁄𑀢𑀺 𑀆𑀭𑀫𑁆𑀫𑀡𑀁 𑀇𑀢𑀺.

𑁧𑁧𑁨𑁯. 𑀬𑀣𑀸 𑀘 𑀧𑀼𑀧𑁆𑀨𑀫𑀼𑀝𑁆𑀞𑀺𑀫𑁆𑀳𑀺, 𑀉𑀓𑁆𑀔𑀺𑀢𑁆𑀢𑁂 𑀕𑀕𑀦𑁂 𑀧𑀦;

𑀅𑀯𑀲𑁆𑀲𑀁 𑀏𑀓𑀫𑁂𑀓𑀲𑁆𑀲, 𑀯𑀡𑁆𑀝𑀁 𑀯𑀡𑁆𑀝𑁂𑀦 𑀯𑀺𑀚𑁆𑀛𑀢𑀺.

𑁧𑁧𑁩𑁦. 𑀏𑀯𑀁 𑀫𑀳𑀸𑀚𑀦𑀲𑁆𑀲𑀸𑀧𑀺, 𑀘𑀺𑀢𑁆𑀢𑁂 𑀆𑀯𑀚𑁆𑀚𑀺𑀢𑁂 𑀧𑀦;

𑀏𑀓𑀲𑁆𑀲 𑀘𑀺𑀢𑁆𑀢𑀫𑁂𑀓𑁂𑀦, 𑀅𑀯𑀲𑁆𑀲𑀁 𑀧𑀦 𑀯𑀺𑀚𑁆𑀛𑀢𑀺.

𑁧𑁧𑁩𑁧. 𑀬𑁂𑀦𑀸𑀯𑀚𑁆𑀚𑀢𑀺 𑀘𑀺𑀢𑁆𑀢𑁂𑀦, 𑀬𑁂𑀦 𑀚𑀸𑀦𑀸𑀢𑀺 𑀘𑁂𑀢𑀲𑀸;

𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀳𑀝𑁆𑀞𑀸𑀦𑀸-𑀪𑀸𑀯𑀢𑁄 𑀢𑀁 𑀦 𑀬𑀼𑀚𑁆𑀚𑀢𑀺.

𑁧𑁧𑁩𑁨. 𑀚𑀯𑀦𑀸𑀯𑀚𑁆𑀚𑀦𑀸𑀦𑀁 𑀢𑀼, 𑀦𑀸𑀦𑀸𑀭𑀫𑁆𑀫𑀡𑀧𑀢𑁆𑀢𑀺𑀢𑁄;

𑀅𑀦𑀺𑀝𑁆𑀞𑁂 𑀧𑀦 𑀳𑀺 𑀞𑀸𑀦𑁂, 𑀅𑀬𑀼𑀢𑁆𑀢𑀦𑁆𑀢𑀺 𑀧𑀓𑀸𑀲𑀺𑀢𑀁.

𑁧𑁧𑁩𑁩. 𑀢𑀲𑁆𑀫𑀸 𑀲𑀦𑁆𑀢𑀢𑀺𑀅𑀤𑁆𑀥𑀸𑀦-𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀫𑁂𑀯 𑀢𑀼;

𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀁, 𑀳𑁄𑀢𑀺 𑀆𑀭𑀫𑁆𑀫𑀡𑀁 𑀇𑀤𑀁.

𑁧𑁧𑁩𑁪. 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀅𑀤𑁆𑀥𑀸𑀔𑁆𑀬𑀁, 𑀇𑀤𑀁 𑀚𑀯𑀦𑀯𑀸𑀭𑀢𑁄;

𑀤𑀻𑀧𑁂𑀢𑀩𑁆𑀩𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀢𑁆𑀭𑀸𑀬𑀁 𑀤𑀻𑀧𑀦𑀸𑀦𑀬𑁄.

𑁧𑁧𑁩𑁫. 𑀬𑀤𑀸 𑀧𑀭𑀲𑁆𑀲 𑀘𑀺𑀢𑁆𑀢𑀜𑁆𑀳𑀺, 𑀜𑀸𑀢𑀼𑀫𑀸𑀯𑀚𑁆𑀚𑀢𑀺𑀤𑁆𑀥𑀺𑀫𑀸;

𑀆𑀯𑀚𑁆𑀚𑀦𑀫𑀦𑁄 𑀢𑀲𑁆𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀔𑀡𑀯𑁆𑀳𑀬𑀁.

𑁧𑁧𑁩𑁬. 𑀆𑀭𑀫𑁆𑀫𑀡𑀁 𑀢𑀤𑀸 𑀓𑀢𑁆𑀯𑀸, 𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺;

𑀚𑀯𑀦𑀸𑀦𑀺 𑀳𑀺 𑀚𑀸𑀬𑀦𑁆𑀢𑁂, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸.

𑁧𑁧𑁩𑁭. 𑀏𑀢𑁂𑀲𑀁 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁, 𑀇𑀤𑁆𑀥𑀺𑀘𑀺𑀢𑁆𑀢𑀫𑀼𑀤𑀻𑀭𑀺𑀢𑀁;

𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀲𑁂𑀲𑀸𑀦𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁧𑁧𑁩𑁮. 𑀏𑀢𑁂𑀲𑀁 𑀧𑀦 𑀲𑀩𑁆𑀩𑁂𑀲𑀁, 𑀦𑀺𑀭𑀼𑀤𑁆𑀥𑀁 𑀢𑀼 𑀢𑀤𑁂𑀯 𑀘;

𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀢𑀸𑀦𑀺𑀧𑀺.

𑁧𑁧𑁩𑁯. 𑀏𑀓𑀸𑀭𑀫𑁆𑀫𑀡𑀢𑀁 𑀬𑀦𑁆𑀢𑀺, 𑀦 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀳𑀺;

𑀅𑀤𑁆𑀥𑀸𑀯𑀲𑀸 𑀪𑀯𑁂 𑀧𑀘𑁆𑀘𑀼-𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁄 𑀧𑀦.

𑁧𑁧𑁪𑁦. 𑀏𑀓𑀸𑀭𑀫𑁆𑀫𑀡𑀪𑀸𑀯𑁂𑀧𑀺, 𑀇𑀤𑁆𑀥𑀺𑀫𑀸𑀦𑀲𑀫𑁂𑀯 𑀘;

𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀦𑁂𑀢𑀭𑀸𑀦𑀺 𑀬𑀣𑀸 𑀧𑀦.

𑁧𑁧𑁪𑁧. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀼 𑀯𑀺𑀜𑁆𑀜𑀸𑀡𑀁, 𑀭𑀽𑀧𑀁 𑀧𑀲𑁆𑀲𑀢𑀺 𑀦𑁂𑀢𑀭𑀁;

𑀏𑀯𑀫𑁂𑀯 𑀘 𑀢𑀁 𑀇𑀤𑁆𑀥𑀺-𑀘𑀺𑀢𑁆𑀢𑀫𑁂𑀯 𑀘 𑀚𑀸𑀦𑀸𑀢𑀺.

𑁧𑁧𑁪𑁨. 𑀧𑀭𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀲𑀺𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺, 𑀅𑀝𑁆𑀞𑀲𑁆𑀯𑁂𑀯 𑀧𑀯𑀢𑁆𑀢𑀢𑀺.

𑁧𑁧𑁪𑁩. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀫𑁆𑀧𑀺, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀅𑀝𑁆𑀞𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁪𑁪. 𑀓𑀸𑀫𑀸𑀯𑀘𑀭𑀔𑀦𑁆𑀥𑀸𑀦𑀁, 𑀲𑀫𑀦𑀼𑀲𑁆𑀲𑀭𑀡𑁂 𑀧𑀦;

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁𑀬𑁂𑀯, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀬𑁂.

𑁧𑁧𑁪𑁫. 𑀭𑀽𑀧𑀸𑀯𑀘𑀭𑀺𑀓𑀸𑀭𑀼𑀧𑁆𑀧𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑁂 𑀧𑀦;

𑀪𑀯𑀢𑀻𑀢𑀺 𑀳𑀺 𑀜𑀸𑀢𑀩𑁆𑀩𑀁, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁧𑁧𑁪𑁬. 𑀅𑀢𑀻𑀢𑁂 𑀅𑀢𑁆𑀢𑀦𑀸 𑀫𑀕𑁆𑀕𑀁, 𑀪𑀸𑀯𑀺𑀢𑀁 𑀢𑀼 𑀨𑀮𑀫𑁆𑀧𑀺 𑀯𑀸;

𑀲𑀫𑀦𑀼𑀲𑁆𑀲𑀭𑀢𑁄 𑀏𑀯-𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁧𑁧𑁪𑁭. 𑀲𑀫𑀦𑀼𑀲𑁆𑀲𑀭𑀢𑁄 𑀫𑀕𑁆𑀕𑀁, 𑀫𑀕𑁆𑀕𑀸𑀭𑀫𑁆𑀫𑀡𑀫𑁂𑀯 𑀢𑀁;

𑀅𑀢𑀻𑀢𑀸𑀭𑀫𑁆𑀫𑀡𑀁𑀬𑁂𑀯, 𑀳𑁄𑀢𑀺 𑀏𑀓𑀦𑁆𑀢𑀢𑁄 𑀇𑀤𑀁.

𑁧𑁧𑁪𑁮. 𑀘𑁂𑀢𑁄𑀧𑀭𑀺𑀬𑀜𑀸𑀡𑀫𑁆𑀧𑀺, 𑀬𑀣𑀸𑀓𑀫𑁆𑀫𑀼𑀧𑀕𑀫𑁆𑀧𑀺 𑀘;

𑀅𑀢𑀻𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀅𑀣 𑀔𑁄 𑀧𑀦.

𑁧𑁧𑁪𑁯. 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀲𑀢𑁆𑀢𑀤𑁆𑀤𑀺𑀯𑀲𑀩𑁆𑀪𑀦𑁆𑀢𑀭𑀁;

𑀅𑀢𑀻𑀢𑀁 𑀘𑀺𑀢𑁆𑀢𑀫𑁂𑀯𑀲𑁆𑀲, 𑀆𑀭𑀫𑁆𑀫𑀡𑀫𑀼𑀤𑀻𑀭𑀺𑀢𑀁.

𑁧𑁧𑁫𑁦. 𑀅𑀢𑀻𑀢𑁂 𑀘𑁂𑀢𑀦𑀸𑀫𑀢𑁆𑀢𑀁, 𑀬𑀣𑀸𑀓𑀫𑁆𑀫𑀼𑀧𑀕𑀲𑁆𑀲𑀧𑀺;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀕𑁄𑀘𑀭𑀁.

𑁧𑁧𑁫𑁧. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀅𑀢𑁆𑀢-𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑁂 𑀲𑀺𑀬𑀸;

𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀅𑀜𑁆𑀜-𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑁂 𑀪𑀯𑁂.

𑁧𑁧𑁫𑁨. 𑀲𑀭𑀡𑁂 𑀦𑀸𑀫𑀕𑁄𑀢𑁆𑀢𑀲𑁆𑀲, 𑀢𑀁 𑀦𑀯𑀢𑁆𑀢𑀩𑁆𑀩𑀕𑁄𑀘𑀭𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀫𑁆𑀧𑀺, 𑀅𑀝𑁆𑀞𑀲𑁆𑀯𑁂𑀯 𑀧𑀯𑀢𑁆𑀢𑀢𑀺.

𑁧𑁧𑁫𑁩. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀭𑀺𑀢𑁆𑀢𑁂 𑀘, 𑀩𑀳𑀺𑀤𑁆𑀥𑀚𑁆𑀛𑀢𑁆𑀢𑀺𑀓𑁂𑀲𑀼𑀧𑀺;

𑀘𑀢𑀽𑀲𑁆𑀯𑁂𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀤𑀺𑀩𑁆𑀩𑀘𑀓𑁆𑀔𑀼 𑀧𑀯𑀢𑁆𑀢𑀢𑀺.

𑁧𑁧𑁫𑁪. 𑀤𑀺𑀩𑁆𑀩𑀲𑁄𑀢𑀲𑀫𑀁 𑀤𑀺𑀩𑁆𑀩-𑀘𑀓𑁆𑀔𑀼𑀆𑀭𑀫𑁆𑀫𑀡𑀓𑁆𑀓𑀫𑁂;

𑀭𑀽𑀧𑀁 𑀲𑀤𑁆𑀤𑁄𑀢𑀺 𑀤𑁆𑀯𑀺𑀦𑁆𑀦𑀁 𑀢𑀼, 𑀅𑀬𑀫𑁂𑀯 𑀯𑀺𑀲𑁂𑀲𑀢𑀸.

𑁧𑁧𑁫𑁫. 𑀅𑀦𑀸𑀕𑀢𑀁𑀲𑀜𑀸𑀡𑀫𑁆𑀧𑀺, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀅𑀝𑁆𑀞𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁫𑁬. 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀬𑀁 𑀓𑀸𑀫𑀸-𑀯𑀘𑀭𑁂𑀢𑀺 𑀧𑀚𑀸𑀦𑀢𑁄;

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀭𑀽𑀧𑀸𑀭𑀽𑀧𑁂𑀲𑁆𑀯𑀦𑀸𑀕𑀢𑁂.

𑁧𑁧𑁫𑁭. 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀬𑀜𑁆𑀘𑀸𑀧𑀺, 𑀲𑀺𑀬𑀸 𑀫𑀳𑀕𑁆𑀕𑀢𑀕𑁄𑀘𑀭𑀁;

𑀪𑀸𑀯𑁂𑀲𑁆𑀲𑀢𑀺 𑀅𑀬𑀁 𑀫𑀕𑁆𑀕𑀁, 𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺.

𑁧𑁧𑁫𑁮. 𑀏𑀯𑀁 𑀧𑀚𑀸𑀦𑀦𑁂 𑀅𑀧𑁆𑀧-𑀫𑀸𑀡𑀸𑀭𑀫𑁆𑀫𑀡𑀢𑀁 𑀪𑀯𑁂;

𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺𑀘𑁆𑀘𑁂𑀯, 𑀚𑀸𑀦𑀦𑁂 𑀫𑀕𑁆𑀕𑀕𑁄𑀘𑀭𑀁.

𑁧𑁧𑁫𑁯. 𑀏𑀓𑀦𑁆𑀢𑁂𑀦 𑀇𑀤𑀁 𑀜𑀸𑀡𑀁, 𑀳𑁄𑀢𑀸𑀦𑀸𑀕𑀢𑀕𑁄𑀘𑀭𑀁;

𑀘𑁂𑀢𑁄𑀧𑀭𑀺𑀬𑀁 𑀢𑀼 𑀓𑀺𑀜𑁆𑀘𑀸𑀧𑀺, 𑀳𑁄𑀢𑀸𑀦𑀸𑀕𑀢𑀕𑁄𑀘𑀭𑀁.

𑁧𑁧𑁬𑁦. 𑀅𑀣 𑀔𑁄 𑀧𑀦 𑀢𑀁 𑀲𑀢𑁆𑀢-𑀤𑀺𑀯𑀲𑀩𑁆𑀪𑀦𑁆𑀢𑀭𑀁 𑀧𑀦;

𑀘𑀺𑀢𑁆𑀢𑀫𑁂𑀯 𑀘 𑀚𑀸𑀦𑀸𑀢𑀺, 𑀦 𑀳𑀺 𑀢𑀁 𑀅𑀜𑁆𑀜𑀕𑁄𑀘𑀭𑀁.

𑁧𑁧𑁬𑁧. 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲, 𑀅𑀦𑀸𑀕𑀢𑀁𑀲𑀕𑁄𑀘𑀭𑀁;

‘‘𑀅𑀳𑀁 𑀤𑁂𑀯𑁄 𑀪𑀯𑀺𑀲𑁆𑀲𑀸𑀫𑀺’’-𑀘𑁆𑀘𑁂𑀯𑀫𑀚𑁆𑀛𑀢𑁆𑀢𑀕𑁄𑀘𑀭𑀁.

𑁧𑁧𑁬𑁨. ‘‘𑀢𑀺𑀲𑁆𑀲𑁄 𑀨𑀼𑀲𑁆𑀲𑁄 𑀅𑀫𑀼𑀢𑁆𑀭𑀸𑀬𑀁,

𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺𑀦𑀸𑀕𑀢𑁂’’;

𑀇𑀘𑁆𑀘𑁂𑀯𑀁 𑀚𑀸𑀦𑀦𑁂 𑀢𑀲𑁆𑀲,

𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁧𑁧𑁬𑁩. 𑀚𑀸𑀦𑀦𑁂 𑀦𑀸𑀫𑀕𑁄𑀢𑁆𑀢𑀲𑁆𑀲, 𑀬𑀲𑁆𑀲 𑀓𑀲𑁆𑀲𑀘𑀺𑀦𑀸𑀕𑀢𑁂;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁𑀯, 𑀢𑀁 𑀦𑀯𑀢𑁆𑀢𑀩𑁆𑀩𑀕𑁄𑀘𑀭𑀁.

𑁧𑁧𑁬𑁪. 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀧𑀜𑁆𑀘𑀲𑀼;

𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀲𑀼, 𑀧𑀯𑀢𑁆𑀢𑀢𑀺 𑀓𑀣𑀁 𑀧𑀦.

𑁧𑁧𑁬𑁫. 𑀚𑀸𑀦𑀦𑁂 𑀓𑀸𑀫𑀓𑀫𑁆𑀫𑀲𑁆𑀲, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸;

𑀢𑀣𑀸 𑀫𑀳𑀕𑁆𑀕𑀢𑀓𑀫𑁆𑀫𑀲𑁆𑀲, 𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁.

𑁧𑁧𑁬𑁬. 𑀅𑀢𑀻𑀢𑀫𑁂𑀯 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀘𑀸𑀢𑀻𑀢𑀕𑁄𑀘𑀭𑀁;

𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀅𑀢𑁆𑀢𑀦𑁄 𑀓𑀫𑁆𑀫𑀚𑀸𑀦𑀦𑁂.

𑁧𑁧𑁬𑁭. 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀧𑀭𑀓𑀫𑁆𑀫𑀧𑀚𑀸𑀦𑀦𑁂;

𑀏𑀯𑀁 𑀧𑀯𑀢𑁆𑀢𑀺 𑀜𑀸𑀢𑀩𑁆𑀩𑀸, 𑀬𑀣𑀸𑀓𑀫𑁆𑀫𑀼𑀧𑀕𑀲𑁆𑀲𑀧𑀺.

𑁧𑁧𑁬𑁮. 𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁, 𑀯𑀼𑀢𑁆𑀢𑁄 𑀆𑀭𑀫𑁆𑀫𑀡𑀓𑁆𑀓𑀫𑁄;

𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁧𑁧𑁬𑁯. 𑀯𑀺𑀯𑀺𑀥𑀢𑁆𑀣𑀯𑀡𑁆𑀡𑀧𑀤𑁂𑀳𑀺 𑀲𑀫𑁆𑀧𑀦𑁆𑀦𑀁,

𑀫𑀥𑀼𑀭𑀢𑁆𑀣𑀫𑀢𑀺𑀦𑀻𑀳𑀭𑀁 𑀕𑀦𑁆𑀣𑀁;

𑀲𑁄𑀢𑀼𑀚𑀦𑀲𑁆𑀲 𑀳𑀤𑀬𑀧𑀻𑀢𑀺𑀓𑀭𑀁,

𑀲𑀼𑀡𑁂𑀬𑁆𑀬 𑀓𑁄𑀘𑀺 𑀫𑀦𑀼𑀚𑁄 𑀲𑀘𑁂𑀢𑀦𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀅𑀪𑀺𑀜𑁆𑀜𑀸𑀭𑀫𑁆𑀫𑀡𑀦𑀺𑀤𑁆𑀤𑁂𑀲𑁄 𑀦𑀸𑀫

𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.