𑁧𑁬. 𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑁄

𑁧𑁦𑁪𑁩. 𑀇𑀢𑁄 𑀧𑀭𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀜𑁆𑀜𑀸𑀲𑀼𑀤𑁆𑀥𑀺𑀓𑀭𑀁 𑀧𑀭𑀁;

𑀧𑀜𑁆𑀘𑀦𑁆𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁, 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁.

𑁧𑁦𑁪𑁪. 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀻,

𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀦𑀝𑁆𑀞𑀧𑀺;

𑀮𑁄𑀓𑀺𑀓𑀸𑀧𑀺 𑀅𑀪𑀺𑀜𑁆𑀜𑀸𑀬𑁄,

𑀪𑀸𑀯𑁂𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁧𑁦𑁪𑁫. 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀢𑁆𑀢𑁂𑀧𑀺, 𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀲𑀢𑀸;

𑀅𑀦𑀼𑀬𑁄𑀕𑀫𑀪𑀺𑀜𑁆𑀜𑀸𑀲𑀼, 𑀓𑀸𑀢𑀼𑀁 𑀯𑀢𑁆𑀢𑀢𑀺 𑀬𑁄𑀕𑀺𑀦𑁄.

𑁧𑁦𑁪𑁬. 𑀅𑀪𑀺𑀜𑁆𑀜𑀸 𑀦𑀸𑀫 𑀪𑀺𑀓𑁆𑀔𑀽𑀦𑀁, 𑀲𑀸𑀪𑀺𑀜𑁆𑀜𑀸𑀦𑀁 𑀅𑀦𑀼𑀢𑁆𑀢𑀭𑁄;

𑀅𑀮𑀗𑁆𑀓𑀸𑀭𑁄 𑀳𑀺 𑀢𑀸𑀡𑀦𑁆𑀢𑀺, 𑀲𑀢𑁆𑀣𑀦𑁆𑀢𑀺 𑀘 𑀧𑀯𑀼𑀘𑁆𑀘𑀢𑀺.

𑁧𑁦𑁪𑁭. 𑀦𑀺𑀩𑁆𑀩𑀢𑁆𑀢𑀺𑀢𑀸𑀲𑁆𑀯𑀪𑀺𑀜𑁆𑀜𑀸𑀲𑀼, 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀼𑀦𑀸;

𑀲𑀫𑀸𑀥𑀺𑀪𑀸𑀯𑀦𑀸 𑀳𑀺𑀲𑁆𑀲, 𑀢𑀤𑀸 𑀦𑀺𑀝𑁆𑀞𑀗𑁆𑀕𑀢𑀸 𑀲𑀺𑀬𑀸.

𑁧𑁦𑁪𑁮. 𑀤𑀺𑀩𑁆𑀩𑀸𑀦𑀺 𑀘𑀓𑁆𑀔𑀼𑀲𑁄𑀢𑀸𑀦𑀺, 𑀇𑀤𑁆𑀥𑀺𑀘𑀺𑀢𑁆𑀢𑀯𑀺𑀚𑀸𑀦𑀦𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀦𑁆𑀢𑀺, 𑀧𑀜𑁆𑀘𑀸𑀪𑀺𑀜𑁆𑀜𑀸 𑀇𑀫𑀸 𑀲𑀺𑀬𑀼𑀁.

𑁧𑁦𑁪𑁯. 𑀓𑀲𑀺𑀡𑀸𑀦𑀼𑀮𑁄𑀫𑀢𑀸𑀤𑀻𑀳𑀺, 𑀘𑀢𑀼𑀤𑁆𑀤𑀲𑀦𑀬𑁂𑀳𑀺 𑀘;

𑀤𑀫𑁂𑀢𑀩𑁆𑀩𑀫𑀪𑀺𑀜𑁆𑀜𑀸𑀬𑁄, 𑀧𑀢𑁆𑀢𑀼𑀓𑀸𑀫𑁂𑀦 𑀫𑀸𑀦𑀲𑀁.

𑁧𑁦𑁫𑁦. 𑀤𑀦𑁆𑀢𑁂 𑀲𑀫𑀸𑀳𑀺𑀢𑁂 𑀲𑀼𑀤𑁆𑀥𑁂, 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂;

𑀦𑀼𑀧𑀓𑁆𑀮𑁂𑀲𑁂 𑀫𑀼𑀤𑀼𑀪𑀽𑀢𑁂, 𑀓𑀫𑁆𑀫𑀦𑀻𑀬𑁂 𑀞𑀺𑀢𑀸𑀘𑀮𑁂.

𑁧𑁦𑁫𑁧. 𑀇𑀢𑀺 𑀅𑀝𑁆𑀞𑀗𑁆𑀕𑀲𑀫𑁆𑀧𑀦𑁆𑀦𑁂, 𑀘𑀺𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑀸𑀬 𑀘;

𑀅𑀪𑀺𑀦𑀻𑀳𑀭𑀢𑀺 𑀘𑁂 𑀘𑀺𑀢𑁆𑀢𑀁, 𑀲𑀺𑀚𑁆𑀛𑀢𑀺𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁.

𑁧𑁦𑁫𑁨. 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑀸𑀧𑀚𑁆𑀚 𑀢𑀢𑁄 𑀧𑀦;

𑀯𑀼𑀝𑁆𑀞𑀸𑀬 𑀳𑀺 𑀲𑀢𑀁 𑀯𑀸𑀧𑀺, 𑀲𑀳𑀲𑁆𑀲𑀁 𑀯𑀸 𑀬𑀤𑀺𑀘𑁆𑀙𑀢𑀺.

𑁧𑁦𑁫𑁩. ‘‘𑀲𑀢𑀁 𑀳𑁄𑀫𑀺 𑀲𑀢𑀁 𑀳𑁄𑀫𑀻’’-𑀘𑁆𑀘𑁂𑀯𑀁 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑀸𑀧𑀚𑁆𑀚 𑀢𑀢𑁄 𑀧𑀦.

𑁧𑁦𑁫𑁪. 𑀯𑀼𑀝𑁆𑀞𑀸𑀬 𑀧𑀼𑀦𑀥𑀺𑀝𑁆𑀞𑀸𑀢𑀺,

𑀲𑀳𑀸𑀥𑀺𑀝𑁆𑀞𑀸𑀦𑀘𑁂𑀢𑀲𑀸;

𑀲𑀢𑀁 𑀳𑁄𑀢𑀺 𑀳𑀺 𑀲𑁄 𑀬𑁄𑀕𑀻,

𑀲𑀳𑀲𑁆𑀲𑀸𑀤𑀻𑀲𑁆𑀯𑀬𑀁 𑀦𑀬𑁄.

𑁧𑁦𑁫𑁫. 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀢𑀼, 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸;

𑀧𑀭𑀺𑀓𑀫𑁆𑀫𑀫𑀦𑀸𑀦𑁂𑀢𑁆𑀣, 𑀲𑀢𑀸𑀭𑀫𑁆𑀫𑀡𑀺𑀓𑀸𑀦𑀺 𑀢𑀼.

𑁧𑁦𑁫𑁬. 𑀢𑀤𑀸𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑁆𑀧𑀺, 𑀲𑀢𑀸𑀭𑀫𑁆𑀫𑀡𑀫𑁂𑀯 𑀢𑀁;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀦𑀸𑀘𑀺𑀢𑁆𑀢𑀁, 𑀯𑀺𑀬 𑀕𑁄𑀢𑁆𑀭𑀪𑀼𑀦𑀦𑁆𑀢𑀭𑀁.

𑁧𑁦𑁫𑁭. 𑀢𑀫𑁂𑀓𑀁 𑀚𑀸𑀬𑀢𑁂 𑀢𑀢𑁆𑀣, 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀫𑀦𑁄;

𑀧𑀭𑀺𑀓𑀫𑁆𑀫𑀯𑀺𑀲𑁂𑀲𑁄𑀯, 𑀲𑁂𑀲𑀁 𑀧𑀼𑀩𑁆𑀩𑀲𑀫𑀁 𑀇𑀥.

𑀇𑀤𑁆𑀥𑀺𑀯𑀺𑀥𑀜𑀸𑀡𑀁.

𑁧𑁦𑁫𑁮. 𑀤𑀺𑀩𑁆𑀩𑀲𑁄𑀢𑀫𑀺𑀤𑀁 𑀢𑀢𑁆𑀣, 𑀪𑀸𑀯𑁂𑀢𑀩𑁆𑀩𑀁 𑀓𑀣𑀁 𑀲𑀺𑀬𑀸;

𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑀸𑀧𑀚𑁆𑀚 𑀢𑀢𑁄 𑀧𑀼𑀦.

𑁧𑁦𑁫𑁯. 𑀯𑀼𑀝𑁆𑀞𑀸𑀬 𑀧𑀭𑀺𑀓𑀫𑁆𑀫𑁂𑀦, 𑀓𑀸𑀫𑀸𑀯𑀘𑀭𑀘𑁂𑀢𑀲𑀸;

𑀲𑀤𑁆𑀤𑁄 𑀆𑀯𑀚𑁆𑀚𑀺𑀢𑀩𑁆𑀩𑁄𑀯, 𑀫𑀳𑀦𑁆𑀢𑁄 𑀲𑀼𑀔𑀼𑀫𑁄𑀧𑀺 𑀘.

𑁧𑁦𑁬𑁦. 𑀢𑀲𑁆𑀲𑁂𑀯𑀁 𑀧𑀦 𑀲𑀤𑁆𑀤𑀲𑁆𑀲, 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀼𑀩𑁆𑀩𑀢𑁄;

𑀤𑀺𑀩𑁆𑀩𑀲𑁄𑀢𑀫𑀺𑀤𑀸𑀦𑀺𑀲𑁆𑀲, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀇𑀢𑀺.

𑁧𑁦𑁬𑁧. 𑀲𑀤𑁆𑀤𑁂𑀲𑁆𑀯𑀜𑁆𑀜𑀢𑀭𑀁 𑀲𑀤𑁆𑀤𑀁, 𑀓𑀢𑁆𑀯𑀸 𑀆𑀭𑀫𑁆𑀫𑀡𑀁 𑀢𑀢𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀢𑀼, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂 𑀧𑀼𑀦.

𑁧𑁦𑁬𑁨. 𑀚𑀯𑀦𑀸𑀦𑀺 𑀳𑀺 𑀚𑀸𑀬𑀦𑁆𑀢𑁂, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸;

𑀧𑀼𑀭𑀺𑀫𑀸𑀦𑁂𑀢𑁆𑀣 𑀘𑀺𑀢𑁆𑀢𑁂𑀲𑀼, 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀧𑀦.

𑁧𑁦𑁬𑁩. 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼-𑀮𑁄𑀫𑀕𑁄𑀢𑁆𑀭𑀪𑀼𑀦𑀸𑀫𑀓𑀸;

𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸𑀧𑀺, 𑀅𑀧𑁆𑀧𑀦𑀸𑀘𑀺𑀢𑁆𑀢𑀫𑀻𑀭𑀺𑀢𑀁.

𑁧𑁦𑁬𑁪. 𑀲𑀳𑀚𑀸𑀢𑀁 𑀢𑀼 𑀬𑀁 𑀜𑀸𑀡𑀁, 𑀅𑀧𑁆𑀧𑀦𑀸𑀫𑀸𑀦𑀲𑁂𑀦 𑀳𑀺;

𑀢𑀁 𑀜𑀸𑀡𑀁 𑀤𑀺𑀩𑁆𑀩𑀲𑁄𑀢𑀦𑁆𑀢𑀺, 𑀯𑀤𑀦𑁆𑀢𑀺 𑀲𑀼𑀢𑀓𑁄𑀯𑀺𑀤𑀸.

𑁧𑁦𑁬𑁫. 𑀣𑀸𑀫𑀚𑀸𑀢𑀁 𑀓𑀭𑁄𑀦𑁆𑀢𑁂𑀦, 𑀢𑀁 𑀜𑀸𑀡𑀁 𑀢𑁂𑀦 𑀬𑁄𑀕𑀺𑀦𑀸;

‘‘𑀏𑀢𑁆𑀣𑀦𑁆𑀢𑀭𑀕𑀢𑀁 𑀲𑀤𑁆𑀤𑀁, 𑀲𑀼𑀡𑀸𑀫𑀻’’𑀢𑀺 𑀘 𑀘𑁂𑀢𑀲𑀸.

𑁧𑁦𑁬𑁬. 𑀅𑀗𑁆𑀕𑀼𑀮𑀁 𑀤𑁆𑀯𑀗𑁆𑀕𑀼𑀮𑀁 𑀪𑀺𑀬𑁆𑀬𑁄,

𑀯𑀺𑀤𑀢𑁆𑀣𑀺 𑀭𑀢𑀦𑀁 𑀢𑀣𑀸;

𑀕𑀸𑀫𑁄 𑀤𑁂𑀲𑁄 𑀢𑀢𑁄 𑀬𑀸𑀯,

𑀘𑀓𑁆𑀓𑀯𑀸𑀴𑀸 𑀢𑀢𑁄 𑀧𑀭𑀁.

𑁧𑁦𑁬𑁭. 𑀇𑀘𑁆𑀘𑁂𑀯𑀁 𑀢𑀼 𑀧𑀭𑀺𑀘𑁆𑀙𑀺𑀚𑁆𑀚, 𑀯𑀟𑁆𑀠𑁂𑀢𑀩𑁆𑀩𑀁 𑀬𑀣𑀸𑀓𑁆𑀓𑀫𑀁;

𑀏𑀲𑁄 𑀅𑀥𑀺𑀕𑀢𑀸𑀪𑀺𑀜𑁆𑀜𑁄, 𑀧𑀸𑀤𑀓𑀸𑀭𑀫𑁆𑀫𑀡𑁂𑀦 𑀢𑀼.

𑁧𑁦𑁬𑁮. 𑀨𑀼𑀝𑁆𑀞𑁄𑀓𑀸𑀲𑀕𑀢𑁂 𑀲𑀤𑁆𑀤𑁂, 𑀲𑀩𑁆𑀩𑁂 𑀧𑀦 𑀲𑀼𑀡𑀸𑀢𑀺 𑀲𑁄;

𑀲𑀼𑀡𑀦𑁆𑀢𑁄 𑀧𑀸𑀝𑀺𑀬𑁂𑀓𑁆𑀓𑀫𑁆𑀧𑀺, 𑀲𑀮𑁆𑀮𑀓𑁆𑀔𑁂𑀢𑀼𑀁 𑀧𑀳𑁄𑀢𑀺 𑀲𑁄.

𑀤𑀺𑀩𑁆𑀩𑀲𑁄𑀢𑀜𑀸𑀡𑀁.

𑁧𑁦𑁬𑁯. 𑀓𑀣𑀁 𑀧𑀦𑀼𑀧𑁆𑀧𑀸𑀤𑁂𑀢𑀩𑁆𑀩𑀁, 𑀘𑁂𑀢𑁄𑀧𑀭𑀺𑀬𑀫𑀸𑀦𑀲𑀁;

𑀤𑀺𑀩𑁆𑀩𑀘𑀓𑁆𑀔𑀼𑀯𑀲𑁂𑀦𑁂𑀯, 𑀇𑀤𑀁 𑀜𑀸𑀡𑀁 𑀧𑀦𑀺𑀚𑁆𑀛𑀢𑀺.

𑁧𑁦𑁭𑁦. 𑀆𑀮𑁄𑀓𑀁 𑀧𑀦 𑀯𑀟𑁆𑀠𑁂𑀢𑁆𑀯𑀸, 𑀢𑀲𑁆𑀫𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸;

𑀳𑀤𑀬𑀁 𑀧𑀦 𑀦𑀺𑀲𑁆𑀲𑀸𑀬, 𑀯𑀢𑁆𑀢𑀫𑀸𑀦𑀁 𑀢𑀼 𑀮𑁄𑀳𑀺𑀢𑀁.

𑁧𑁦𑁭𑁧. 𑀤𑀺𑀲𑁆𑀯𑀸 𑀧𑀭𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑀁,

𑀳𑁄𑀢𑀺 𑀘𑀺𑀢𑁆𑀢𑀁 𑀢𑀼 𑀪𑀺𑀓𑁆𑀔𑀼𑀦𑀸;

𑀲𑁄𑀫𑀦𑀲𑁆𑀲𑀬𑀼𑀢𑁂 𑀘𑀺𑀢𑁆𑀢𑁂,

𑀮𑁄𑀳𑀺𑀢𑀁 𑀮𑁄𑀳𑀺𑀢𑀁 𑀲𑀺𑀬𑀸.

𑁧𑁦𑁭𑁨. 𑀤𑁄𑀫𑀦𑀲𑁆𑀲𑀬𑀼𑀢𑁂 𑀘𑀺𑀢𑁆𑀢𑁂, 𑀯𑀢𑁆𑀢𑀫𑀸𑀦𑁂 𑀢𑀼 𑀓𑀸𑀴𑀓𑀁;

𑀉𑀧𑁂𑀓𑁆𑀔𑀸𑀲𑀳𑀺𑀢𑁂 𑀘𑀺𑀢𑁆𑀢𑁂, 𑀢𑀺𑀮𑀢𑁂𑀮𑀽𑀧𑀫𑀁 𑀲𑀺𑀬𑀸.

𑁧𑁦𑁭𑁩. 𑀢𑀲𑁆𑀫𑀸 𑀧𑀭𑀲𑁆𑀲 𑀲𑀢𑁆𑀢𑀲𑁆𑀲, 𑀤𑀺𑀲𑁆𑀯𑀸 𑀳𑀤𑀬𑀮𑁄𑀳𑀺𑀢𑀁;

𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀢𑀁, 𑀓𑀸𑀢𑀩𑁆𑀩𑀁 𑀣𑀸𑀫𑀢𑀁 𑀕𑀢𑀁.

𑁧𑁦𑁭𑁪. 𑀏𑀯𑀁 𑀣𑀸𑀫𑀕𑀢𑁂 𑀢𑀲𑁆𑀫𑀺𑀁, 𑀬𑀣𑀸𑀦𑀼𑀓𑁆𑀓𑀫𑀢𑁄 𑀧𑀦;

𑀘𑀺𑀢𑁆𑀢𑀫𑁂𑀯 𑀯𑀺𑀚𑀸𑀦𑀸𑀢𑀺, 𑀯𑀺𑀦𑀸 𑀮𑁄𑀳𑀺𑀢𑀤𑀲𑁆𑀲𑀦𑀁.

𑁧𑁦𑁭𑁫. 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀜𑁆𑀘, 𑀭𑀽𑀧𑀸𑀭𑀽𑀧𑁂𑀲𑀼 𑀫𑀸𑀦𑀲𑀁;

𑀲𑀩𑁆𑀩𑀫𑁂𑀯 𑀯𑀺𑀚𑀸𑀦𑀸𑀢𑀺, 𑀲𑀭𑀸𑀕𑀸𑀤𑀺𑀧𑁆𑀧𑀪𑁂𑀤𑀓𑀁.

𑀘𑁂𑀢𑁄𑀧𑀭𑀺𑀬𑀜𑀸𑀡𑀁.

𑁧𑁦𑁭𑁬. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦, 𑀓𑀢𑁆𑀢𑀩𑁆𑀩𑀸 𑀢𑀤𑀦𑀼𑀲𑁆𑀲𑀢𑀺;

𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦, 𑀆𑀤𑀺𑀓𑀫𑁆𑀫𑀺𑀓𑀪𑀺𑀓𑁆𑀔𑀼𑀦𑀸;

𑀛𑀸𑀦𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺, 𑀲𑀫𑀸𑀧𑀚𑁆𑀚𑀸𑀦𑀼𑀧𑀼𑀩𑁆𑀩𑀢𑁄.

𑁧𑁦𑁭𑁭. 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀸, 𑀯𑀼𑀝𑁆𑀞𑀸𑀬 𑀳𑀺 𑀢𑀢𑁄 𑀧𑀼𑀦;

𑀪𑀺𑀓𑁆𑀔𑀼𑀦𑀸 𑀯𑀚𑁆𑀚𑀺𑀢𑀩𑁆𑀩𑀸𑀯, 𑀦𑀺𑀲𑀚𑁆𑀚𑀸 𑀲𑀩𑁆𑀩𑀧𑀘𑁆𑀙𑀺𑀫𑀸.

𑁧𑁦𑁭𑁮. 𑀢𑀢𑁄 𑀧𑀪𑀼𑀢𑀺 𑀲𑀩𑁆𑀩𑀫𑁆𑀧𑀺, 𑀧𑀝𑀺𑀮𑁄𑀫𑀓𑁆𑀓𑀫𑀸 𑀧𑀦;

𑀲𑀩𑁆𑀩𑀫𑀸𑀯𑀚𑁆𑀚𑀺𑀢𑀩𑁆𑀩𑀁 𑀢𑀁, 𑀤𑀺𑀯𑀲𑁂 𑀭𑀢𑁆𑀢𑀺𑀬𑀁 𑀓𑀢𑀁.

𑁧𑁦𑁭𑁯. 𑀧𑀝𑀺𑀮𑁄𑀫𑀓𑁆𑀓𑀫𑁂𑀦𑁂𑀯, 𑀤𑀼𑀢𑀺𑀬𑁂 𑀢𑀢𑀺𑀬𑁂𑀧𑀺 𑀘;

𑀤𑀺𑀯𑀲𑁂 𑀧𑀓𑁆𑀔𑀫𑀸𑀲𑁂𑀲𑀼, 𑀢𑀣𑀸 𑀲𑀁𑀯𑀘𑁆𑀙𑀭𑁂𑀲𑀼𑀧𑀺.

𑁧𑁦𑁮𑁦. 𑀬𑀸𑀯 𑀅𑀲𑁆𑀫𑀺𑀁 𑀪𑀯𑁂 𑀲𑀦𑁆𑀥𑀺, 𑀢𑀸𑀯 𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸;

𑀓𑀢𑀫𑀸𑀯𑀚𑁆𑀚𑀺𑀢𑀩𑁆𑀩𑀁 𑀢𑀁, 𑀧𑀼𑀭𑀺𑀫𑀲𑁆𑀫𑀺𑀁 𑀪𑀯𑁂𑀧𑀺 𑀘.

𑁧𑁦𑁮𑁧. 𑀘𑀼𑀢𑀺𑀓𑁆𑀔𑀡𑁂𑀧𑀺 𑀦𑀺𑀩𑁆𑀩𑀢𑁆𑀢𑀁, 𑀦𑀸𑀫𑀭𑀽𑀧𑀜𑁆𑀘 𑀲𑀸𑀥𑀼𑀓𑀁;

𑀏𑀯𑀫𑀸𑀯𑀚𑁆𑀚𑀺𑀢𑁂 𑀢𑀲𑁆𑀫𑀺𑀁, 𑀦𑀸𑀫𑀭𑀽𑀧𑁂 𑀬𑀤𑀸 𑀧𑀦.

𑁧𑁦𑁮𑁨. 𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀦𑀸𑀫𑀭𑀽𑀧𑀁 𑀘𑀼𑀢𑀺𑀓𑁆𑀔𑀡𑁂;

𑀫𑀦𑁄𑀤𑁆𑀯𑀸𑀭𑁂 𑀫𑀦𑀓𑁆𑀓𑀸𑀭𑁄, 𑀉𑀧𑁆𑀧𑀚𑁆𑀚𑀢𑀺 𑀢𑀤𑀸 𑀧𑀦.

𑁧𑁦𑁮𑁩. 𑀆𑀯𑀚𑁆𑀚𑀦𑁂 𑀦𑀺𑀭𑀼𑀤𑁆𑀥𑀲𑁆𑀫𑀺𑀁, 𑀢𑀤𑁂𑀯𑀸𑀭𑀫𑁆𑀫𑀡𑀁 𑀧𑀦;

𑀓𑀢𑁆𑀯𑀸 𑀚𑀯𑀦𑀘𑀺𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑁂𑀲𑀁 𑀜𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸.

𑁧𑁦𑁮𑁪. 𑀧𑀭𑀺𑀓𑀫𑁆𑀫𑀸𑀤𑀺𑀦𑀸𑀫𑀸𑀦𑀺, 𑀧𑀼𑀭𑀺𑀫𑀸𑀦𑀺 𑀪𑀯𑀦𑁆𑀢𑀺 𑀢𑀼;

𑀧𑀘𑁆𑀙𑀺𑀫𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀁, 𑀭𑀽𑀧𑀸𑀯𑀘𑀭𑀺𑀓𑀁 𑀪𑀯𑁂.

𑁧𑁦𑁮𑁫. 𑀢𑁂𑀦 𑀘𑀺𑀢𑁆𑀢𑁂𑀦 𑀬𑀁 𑀜𑀸𑀡𑀁, 𑀲𑀁𑀬𑀼𑀢𑁆𑀢𑀁 𑀢𑁂𑀦 𑀬𑀸 𑀧𑀦;

𑀲𑀁𑀬𑀼𑀢𑁆𑀢𑀸 𑀲𑀢𑀺 𑀲𑀸 𑀧𑀼𑀩𑁆𑀩𑁂-𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀭𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁.

𑁧𑁦𑁮𑁬. 𑀭𑀽𑀧𑀁 𑀧𑀲𑁆𑀲𑀺𑀢𑀼𑀓𑀸𑀫𑁂𑀦, 𑀪𑀺𑀓𑁆𑀔𑀼𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸;

𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁, 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀧𑀦.

𑁧𑁦𑁮𑁭. 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸, 𑀢𑁂𑀚𑁄𑀓𑀲𑀺𑀡𑀫𑁂𑀯 𑀯𑀸;

𑀑𑀤𑀸𑀢𑀓𑀲𑀺𑀡𑀁 𑀯𑀸𑀧𑀺, 𑀆𑀮𑁄𑀓𑀓𑀲𑀺𑀡𑀫𑁆𑀧𑀺 𑀯𑀸.

𑁧𑁦𑁮𑁮. 𑀇𑀫𑁂𑀲𑀼 𑀓𑀢𑀧𑀼𑀜𑁆𑀜𑁂𑀳𑀺, 𑀓𑀲𑀺𑀡𑁂𑀲𑀼 𑀘 𑀢𑀻𑀲𑀼𑀧𑀺;

𑀆𑀮𑁄𑀓𑀓𑀲𑀺𑀡𑀁 𑀏𑀢𑁆𑀣, 𑀲𑁂𑀝𑁆𑀞𑀦𑁆𑀢𑀺 𑀧𑀭𑀺𑀤𑀻𑀧𑀺𑀢𑀁.

𑁧𑁦𑁮𑁯. 𑀢𑀲𑁆𑀫𑀸 𑀢𑀫𑀺𑀢𑀭𑀁 𑀯𑀸𑀧𑀺, 𑀉𑀧𑁆𑀧𑀸𑀤𑁂𑀢𑁆𑀯𑀸 𑀬𑀣𑀸𑀓𑁆𑀓𑀫𑀁;

𑀉𑀧𑀘𑀸𑀭𑀪𑀽𑀫𑀺𑀬𑀁𑀬𑁂𑀯, 𑀞𑀢𑁆𑀯𑀸 𑀢𑀁 𑀧𑀦 𑀧𑀡𑁆𑀟𑀺𑀢𑁄.

𑁧𑁦𑁯𑁦. 𑀯𑀟𑁆𑀠𑁂𑀢𑁆𑀯𑀸𑀦 𑀞𑀧𑁂𑀢𑀩𑁆𑀩𑀁, 𑀦 𑀉𑀧𑁆𑀧𑀸𑀤𑁂𑀬𑁆𑀬 𑀅𑀧𑁆𑀧𑀦𑀁;

𑀉𑀧𑁆𑀧𑀸𑀤𑁂𑀢𑀺 𑀲𑀘𑁂 𑀳𑁄𑀢𑀺, 𑀧𑀸𑀤𑀓𑀚𑁆𑀛𑀸𑀦𑀦𑀺𑀲𑁆𑀲𑀺𑀢𑀁.

𑁧𑁦𑁯𑁧. 𑀛𑀸𑀦𑀲𑁆𑀲 𑀯𑀟𑁆𑀠𑀺𑀢𑀲𑁆𑀲𑀦𑁆𑀢𑁄-𑀕𑀢𑀁 𑀭𑀽𑀧𑀁 𑀢𑀼 𑀬𑁄𑀕𑀺𑀦𑀸;

𑀧𑀲𑁆𑀲𑀺𑀢𑀩𑁆𑀩𑀁 𑀪𑀯𑁂 𑀭𑀽𑀧𑀁, 𑀧𑀲𑁆𑀲𑀢𑁄 𑀧𑀦 𑀢𑀲𑁆𑀲 𑀢𑀁.

𑁧𑁦𑁯𑁨. 𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑁄 𑀳𑀺, 𑀅𑀢𑀺𑀓𑁆𑀓𑀫𑀢𑀺 𑀢𑀸𑀯𑀤𑁂;

𑀆𑀮𑁄𑀓𑁄𑀧𑀺 𑀢𑀢𑁄 𑀢𑀲𑁆𑀲, 𑀔𑀺𑀧𑁆𑀧𑀫𑀦𑁆𑀢𑀭𑀥𑀸𑀬𑀢𑀺.

𑁧𑁦𑁯𑁩. 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀭𑀽𑀧-𑀕𑀢𑀫𑁆𑀧𑀺 𑀘 𑀦 𑀤𑀺𑀲𑁆𑀲𑀢𑀺;

𑀢𑁂𑀦𑀸𑀣 𑀧𑀸𑀤𑀓𑀚𑁆𑀛𑀸𑀦𑀁, 𑀧𑀯𑀺𑀲𑀺𑀢𑁆𑀯𑀸 𑀢𑀢𑁄 𑀧𑀼𑀦.

𑁧𑁦𑁯𑁪. 𑀯𑀼𑀝𑁆𑀞𑀸𑀬 𑀧𑀦 𑀆𑀮𑁄𑀓𑁄, 𑀨𑀭𑀺𑀢𑀩𑁆𑀩𑁄𑀯 𑀪𑀺𑀓𑁆𑀔𑀼𑀦𑀸;

𑀏𑀯𑀁 𑀅𑀦𑀼𑀓𑁆𑀓𑀫𑁂𑀦𑁂𑀯, 𑀆𑀮𑁄𑀓𑁄 𑀣𑀸𑀫𑀯𑀸 𑀲𑀺𑀬𑀸.

𑁧𑁦𑁯𑁫. ‘‘𑀆𑀮𑁄𑀓𑁄 𑀏𑀢𑁆𑀣 𑀳𑁄𑀢𑀽’’𑀢𑀺,

𑀬𑀢𑁆𑀢𑀓𑀁 𑀞𑀸𑀦𑀫𑁂𑀯 𑀲𑁄;

𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀢𑀢𑁆𑀣𑁂𑀯,

𑀆𑀮𑁄𑀓𑁄 𑀧𑀦 𑀢𑀺𑀝𑁆𑀞𑀢𑀺.

𑁧𑁦𑁯𑁬. 𑀤𑀺𑀯𑀲𑀫𑁆𑀧𑀺 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀲𑁆𑀲𑀢𑁄 𑀳𑁄𑀢𑀺 𑀤𑀲𑁆𑀲𑀦𑀁;

𑀢𑀺𑀡𑀼𑀓𑁆𑀓𑀸𑀬 𑀕𑀢𑁄 𑀫𑀕𑁆𑀕𑀁, 𑀧𑀼𑀭𑀺𑀲𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑁧𑁦𑁯𑁭. 𑀉𑀧𑁆𑀧𑀸𑀤𑀦𑀓𑁆𑀓𑀫𑁄𑀧𑀺𑀲𑁆𑀲, 𑀢𑀢𑁆𑀭𑀸𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑁄;

𑀯𑀼𑀢𑁆𑀢𑀧𑁆𑀧𑀓𑀸𑀭𑀭𑀽𑀧𑀁 𑀢𑀁, 𑀓𑀢𑁆𑀯𑀸 𑀆𑀭𑀫𑁆𑀫𑀡𑀁 𑀧𑀦.

𑁧𑁦𑁯𑁮. 𑀫𑀦𑁄𑀤𑁆𑀯𑀸𑀭𑁂 𑀫𑀦𑀓𑁆𑀓𑀸𑀭𑁂, 𑀚𑀸𑀢𑁂 𑀬𑀸𑀦𑀺 𑀢𑀤𑁂𑀯 𑀘;

𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀚𑀸𑀬𑀦𑁆𑀢𑀺 𑀚𑀯𑀦𑀸𑀦𑀺 𑀳𑀺.

𑁧𑁦𑁯𑁯. 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸;

𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑁂𑀲𑀁 𑀜𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸.

𑁧𑁧𑁦𑁦. 𑀅𑀢𑁆𑀣𑀲𑀸𑀥𑀓𑀘𑀺𑀢𑁆𑀢𑀁 𑀢𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀫𑀢𑀁;

𑀢𑀁𑀘𑀺𑀢𑁆𑀢𑀲𑀁𑀬𑀼𑀢𑀁 𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁦𑁧. 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲, 𑀬𑀣𑀸𑀓𑀫𑁆𑀫𑀼𑀧𑀕𑀲𑁆𑀲 𑀘;

𑀧𑀭𑀺𑀓𑀫𑁆𑀫𑀁 𑀯𑀺𑀲𑀼𑀁 𑀦𑀢𑁆𑀣𑀺, 𑀇𑀚𑁆𑀛𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸.

𑁧𑁧𑁦𑁨. 𑀘𑀼𑀢𑀽𑀧𑀧𑀸𑀢𑀜𑀸𑀡𑀫𑁆𑀧𑀺, 𑀤𑀺𑀩𑁆𑀩𑀘𑀓𑁆𑀔𑀼𑀦𑁆𑀢𑀺 𑀯𑀸 𑀧𑀦;

𑀅𑀢𑁆𑀣𑀢𑁄 𑀏𑀓𑀫𑁂𑀯𑁂𑀤𑀁, 𑀩𑁆𑀬𑀜𑁆𑀚𑀦𑁂 𑀧𑀦 𑀦𑀸𑀦𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁.

𑁧𑁧𑁦𑁩. 𑀬𑁄𑀥 𑀲𑀼𑀡𑀸𑀢𑀺 𑀓𑀭𑁄𑀢𑀺 𑀘 𑀘𑀺𑀢𑁆𑀢𑁂,

𑀕𑀦𑁆𑀣𑀫𑀺𑀫𑀁 𑀧𑀭𑀫𑀁 𑀧𑀦 𑀪𑀺𑀓𑁆𑀔𑀼;

𑀲𑁄 𑀅𑀪𑀺𑀥𑀫𑁆𑀫𑀫𑀳𑀡𑁆𑀡𑀯𑀧𑀸𑀭𑀁,

𑀬𑀸𑀢𑀺 𑀅𑀦𑁂𑀦 𑀢𑀭𑁂𑀦 𑀢𑀭𑀺𑀢𑁆𑀯𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑁄 𑀦𑀸𑀫

𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.