𑁧𑁫. 𑀧𑀦𑁆𑀦𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄

𑁯𑁮𑁦. 𑀭𑀽𑀧𑀸𑀭𑀽𑀧𑀫𑀢𑀻𑀢𑁂𑀦, 𑀭𑀽𑀧𑀸𑀭𑀽𑀧𑀸𑀤𑀺𑀯𑁂𑀤𑀺𑀦𑀸;

𑀬𑀸𑀦𑀺 𑀘𑀸𑀭𑀽𑀧𑀧𑀼𑀜𑁆𑀜𑀸𑀦𑀺, 𑀲𑀭𑀽𑀧𑁂𑀦𑀻𑀭𑀺𑀢𑀸𑀦𑀺 𑀢𑀼.

𑁯𑁮𑁧. 𑀢𑁂𑀲𑀁 𑀤𑀸𑀦𑀺 𑀧𑀯𑀓𑁆𑀔𑀸𑀫𑀺, 𑀪𑀸𑀯𑀦𑀸𑀦𑀬𑀫𑀼𑀢𑁆𑀢𑀫𑀁;

𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽𑀦𑀁, 𑀳𑀺𑀢𑀢𑁆𑀣𑀸𑀬 𑀲𑀫𑀸𑀲𑀢𑁄.

𑁯𑁮𑁨. ‘‘𑀭𑀽𑀧𑁂 𑀔𑁄 𑀯𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀤𑀡𑁆𑀟𑀸𑀤𑀸𑀦𑀸𑀤𑀬𑁄 𑀲𑀺𑀬𑀼𑀁;

𑀅𑀦𑁂𑀓𑀸𑀧𑀺 𑀧𑀦𑀸𑀩𑀸𑀥𑀸, 𑀘𑀓𑁆𑀔𑀼𑀭𑁄𑀕𑀸𑀤𑀬𑁄’’𑀇𑀢𑀺.

𑁯𑁮𑁩. 𑀭𑀽𑀧𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀭𑀽𑀧𑁂 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑀲𑁄;

𑀢𑀲𑁆𑀲𑀸𑀢𑀺𑀓𑁆𑀓𑀫𑀦𑀢𑁆𑀣𑀸𑀬, 𑀅𑀭𑀽𑀧𑀁 𑀧𑀝𑀺𑀧𑀚𑁆𑀚𑀢𑀺.

𑁯𑁮𑁪. 𑀢𑀫𑁆𑀳𑀸 𑀓𑀲𑀺𑀡𑀭𑀽𑀧𑀸𑀧𑀺, 𑀲𑁄 𑀦𑀺𑀩𑁆𑀩𑀺𑀚𑁆𑀚 𑀯𑀺𑀲𑀸𑀭𑀤𑁄;

𑀅𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀘, 𑀲𑀽𑀓𑀭𑀸𑀪𑀺𑀳𑀢𑁄𑀯 𑀲𑀸.

𑁯𑁮𑁫. 𑀘𑀢𑀼𑀢𑁆𑀣𑁂 𑀧𑀦 𑀛𑀸𑀦𑀲𑁆𑀫𑀺𑀁, 𑀳𑀼𑀢𑁆𑀯𑀸 𑀘𑀺𑀡𑁆𑀡𑀯𑀲𑀻 𑀯𑀲𑀻;

𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀥𑀻𑀫𑀸, 𑀯𑀼𑀝𑁆𑀞𑀸𑀬 𑀯𑀺𑀥𑀺𑀦𑀸 𑀧𑀼𑀦.

𑁯𑁮𑁬. 𑀓𑀭𑁄𑀢𑀺 𑀧𑀦𑀺𑀤𑀁 𑀘𑀺𑀢𑁆𑀢𑀁, 𑀭𑀽𑀧𑀫𑀸𑀭𑀫𑁆𑀫𑀡𑀁 𑀬𑀢𑁄;

𑀆𑀲𑀦𑁆𑀦𑀲𑁄𑀫𑀦𑀲𑁆𑀲𑀜𑁆𑀘, 𑀣𑀽𑀮𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑁄.

𑁯𑁮𑁭. 𑀇𑀢𑀺 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀘𑀢𑀼𑀢𑁆𑀣𑁂 𑀢𑀢𑁆𑀣 𑀲𑀩𑁆𑀩𑀲𑁄;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀧𑀞𑀫𑀸𑀭𑀼𑀧𑁆𑀧𑀜𑁆𑀘 𑀲𑀦𑁆𑀢𑀢𑁄.

𑁯𑁮𑁮. 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁, 𑀬𑀢𑁆𑀢𑀓𑀁 𑀯𑀸 𑀧𑀦𑀺𑀘𑁆𑀙𑀢𑀺;

𑀢𑀢𑁆𑀢𑀓𑀁 𑀧𑀢𑁆𑀣𑀭𑀺𑀢𑁆𑀯𑀸𑀦, 𑀨𑀼𑀝𑁆𑀞𑁄𑀓𑀸𑀲𑀜𑁆𑀘 𑀢𑁂𑀦 𑀢𑀁.

𑁯𑁮𑁯. 𑀆𑀓𑀸𑀲𑁄 𑀇𑀢𑀺 𑀯𑀸𑀦𑀦𑁆𑀢𑁄,

𑀆𑀓𑀸𑀲𑁄 𑀇𑀢𑀺 𑀯𑀸 𑀧𑀼𑀦;

𑀫𑀦𑀲𑀸 𑀳𑀺 𑀓𑀭𑁄𑀦𑁆𑀢𑁄𑀯,

𑀉𑀕𑁆𑀖𑀸𑀝𑁂𑀢𑀺 𑀧𑀯𑀼𑀘𑁆𑀘𑀢𑀺.

𑁯𑁯𑁦. 𑀉𑀕𑁆𑀖𑀸𑀝𑁂𑀦𑁆𑀢𑁄 𑀳𑀺 𑀓𑀲𑀺𑀡𑀁, 𑀦 𑀲𑀁𑀯𑁂𑀮𑁆𑀮𑁂𑀢𑀺 𑀢𑀁 𑀧𑀦;

𑀦 𑀘𑀼𑀤𑁆𑀥𑀭𑀢𑀺 𑀲𑁄 𑀬𑁄𑀕𑀻, 𑀧𑀽𑀯𑀁 𑀯𑀺𑀬 𑀓𑀧𑀸𑀮𑀢𑁄.

𑁯𑁯𑁧. 𑀓𑁂𑀯𑀮𑀁 𑀧𑀦 𑀢𑀁 𑀦𑁂𑀯, 𑀆𑀯𑀚𑁆𑀚𑀢𑀺 𑀦 𑀧𑁂𑀓𑁆𑀔𑀢𑀺;

𑀦𑀸𑀯𑀚𑁆𑀚𑀦𑁆𑀢𑁄 𑀦𑀧𑁂𑀓𑁆𑀔𑀦𑁆𑀢𑁄, 𑀉𑀕𑁆𑀖𑀸𑀝𑁂𑀢𑀺 𑀳𑀺 𑀦𑀸𑀫𑀲𑁄.

𑁯𑁯𑁨. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁, 𑀦𑀺𑀫𑀺𑀢𑁆𑀢𑀁 𑀧𑀦 𑀢𑀁𑀯 𑀲𑁄;

𑀆𑀓𑀸𑀲𑁄 𑀇𑀢𑀺 𑀘𑀺𑀢𑁆𑀢𑁂𑀦, 𑀆𑀯𑀚𑁆𑀚𑀢𑀺 𑀧𑀼𑀦𑀧𑁆𑀧𑀼𑀦𑀁.

𑁯𑁯𑁩. 𑀆𑀯𑀚𑁆𑀚𑀢𑁄 𑀳𑀺 𑀢𑀲𑁆𑀲𑁂𑀯𑀁,

𑀓𑀭𑁄𑀢𑁄 𑀢𑀓𑁆𑀓𑀸𑀳𑀢𑀫𑁆𑀧𑀺 𑀘;

𑀧𑀜𑁆𑀘 𑀦𑀻𑀯𑀭𑀡𑀸 𑀢𑀲𑁆𑀲,

𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀳𑀺 𑀲𑀩𑁆𑀩𑀲𑁄.

𑁯𑁯𑁪. 𑀆𑀲𑁂𑀯𑀢𑀺 𑀘 𑀪𑀸𑀯𑁂𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀓𑀭𑁄𑀢𑁄 𑀧𑀦 𑀢𑀲𑁆𑀲𑁂𑀯, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀬𑁄𑀕𑀺𑀦𑁄.

𑁯𑁯𑁫. 𑀢𑀢𑁆𑀭𑀸𑀓𑀸𑀲𑁂 𑀧𑀦𑀸𑀧𑁆𑀧𑁂𑀢𑀺, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑀁;

𑀇𑀥𑀸𑀧𑀺 𑀧𑀼𑀭𑀺𑀫𑁂 𑀪𑀸𑀕𑁂, 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀧𑀦.

𑁯𑁯𑁬. 𑀚𑀯𑀦𑀸𑀦𑀺 𑀉𑀧𑁂𑀓𑁆𑀔𑀸𑀬, 𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺 𑀳𑀺;

𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸𑀧𑀺, 𑀳𑁄𑀢𑀺 𑀆𑀭𑀼𑀧𑁆𑀧𑀫𑀸𑀦𑀲𑀁.

𑁯𑁯𑁭. 𑀧𑀼𑀦 𑀪𑀸𑀯𑁂𑀢𑀼𑀓𑀸𑀫𑁂𑀦, 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑀁;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀳𑀼𑀢𑁆𑀯𑀸, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑁂.

𑁯𑁯𑁮. 𑀆𑀲𑀦𑁆𑀦𑀭𑀽𑀧𑀸𑀯𑀘𑀭-𑀚𑁆𑀛𑀸𑀦𑀧𑀘𑁆𑀘𑀢𑁆𑀣𑀺𑀓𑀦𑁆𑀢𑀺 𑀘;

𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀁𑀯, 𑀦 𑀘 𑀲𑀦𑁆𑀢𑀫𑀺𑀤𑀦𑁆𑀢𑀺 𑀘.

𑁯𑁯𑁯. 𑀏𑀯𑀫𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑁂;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀤𑀼𑀢𑀺𑀬𑀁 𑀲𑀦𑁆𑀢𑀢𑁄 𑀧𑀦.

𑁧𑁦𑁦𑁦. 𑀢𑀫𑀸𑀓𑀸𑀲𑀁 𑀨𑀭𑀺𑀢𑁆𑀯𑀸𑀦, 𑀧𑀯𑀢𑁆𑀢𑀫𑀸𑀦𑀲𑀁 𑀧𑀦;

𑀢𑀜𑁆𑀘 𑀯𑀺𑀜𑁆𑀜𑀸𑀡𑀫𑀺𑀘𑁆𑀘𑁂𑀯𑀁, 𑀓𑀢𑁆𑀢𑀩𑁆𑀩𑀁 𑀫𑀦𑀲𑀸 𑀩𑀳𑀼𑀁.

𑁧𑁦𑁦𑁧. 𑀆𑀯𑀚𑁆𑀚𑀦𑀜𑁆𑀘 𑀓𑀢𑁆𑀢𑀩𑁆𑀩𑀁, 𑀢𑀣𑀸 𑀢𑀓𑁆𑀓𑀸𑀳𑀢𑀫𑁆𑀧𑀺 𑀘;

‘‘𑀅𑀦𑀦𑁆𑀢’’𑀦𑁆𑀢𑀺 ‘‘𑀅𑀦𑀦𑁆𑀢’’𑀦𑁆𑀢𑀺, 𑀓𑀸𑀢𑀩𑁆𑀩𑀁 𑀫𑀦𑀲𑀸 𑀦𑀺𑀥.

𑁧𑁦𑁦𑁨. 𑀢𑀲𑁆𑀫𑀺𑀁 𑀧𑀦 𑀦𑀺𑀫𑀺𑀢𑁆𑀢𑀲𑁆𑀫𑀺𑀁, 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀫𑀸𑀦𑀲𑀁;

𑀉𑀧𑀘𑀸𑀭𑁂𑀦 𑀢𑀁 𑀘𑀺𑀢𑁆𑀢𑀁, 𑀲𑀫𑀸𑀥𑀺𑀬𑀢𑀺 𑀬𑁄𑀕𑀺𑀦𑁄.

𑁧𑁦𑁦𑁩. 𑀆𑀲𑁂𑀯𑀢𑀺 𑀘 𑀪𑀸𑀯𑁂𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀲𑁆𑀲 𑀘𑁂𑀯𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑁄.

𑁧𑁦𑁦𑁪. 𑀆𑀓𑀸𑀲𑀁 𑀨𑀼𑀲𑀯𑀺𑀜𑁆𑀜𑀸𑀡𑁂, 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑀁;

𑀅𑀧𑁆𑀧𑁂𑀢𑀺 𑀅𑀧𑁆𑀧𑀦𑀸 𑀬𑀲𑁆𑀫𑀺𑀁, 𑀦𑀬𑁄 𑀯𑀼𑀢𑁆𑀢𑀦𑀬𑁄𑀯 𑀲𑁄.

𑁧𑁦𑁦𑁫. 𑀆𑀓𑀸𑀲𑁄𑀬𑀫𑀦𑀦𑁆𑀢𑁄𑀢𑀺, 𑀏𑀯𑀫𑀸𑀓𑀸𑀲𑀫𑁂𑀯 𑀢𑀁;

𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁, ‘‘𑀯𑀺𑀜𑁆𑀜𑀸𑀡𑀜𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁦𑁬. 𑀫𑀦𑀓𑁆𑀓𑀸𑀭𑀯𑀲𑁂𑀦𑀸𑀧𑀺, 𑀅𑀦𑀦𑁆𑀢𑀁 𑀧𑀭𑀺𑀤𑀻𑀧𑀺𑀢𑀁;

‘‘𑀯𑀺𑀜𑁆𑀜𑀸𑀡𑀸𑀦𑀦𑁆𑀢’’𑀫𑀺𑀘𑁆𑀘𑁂𑀯, 𑀯𑀢𑁆𑀢𑀩𑁆𑀩𑀁 𑀧𑀦𑀺𑀤𑀁 𑀲𑀺𑀬𑀸.

𑁧𑁦𑁦𑁭. 𑀅𑀣 𑀪𑀸𑀯𑁂𑀢𑀼𑀓𑀸𑀫𑁂𑀦, 𑀢𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑀁;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀳𑀼𑀢𑁆𑀯𑀸, 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑁂.

𑁧𑁦𑁦𑁮. 𑀆𑀲𑀦𑁆𑀦𑀧𑀞𑀫𑀸𑀭𑀼𑀧𑁆𑀧-𑀘𑀺𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀦𑁆𑀢𑀺 𑀘;

𑀢𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀁𑀯, 𑀦 𑀘 𑀲𑀦𑁆𑀢𑀫𑀺𑀤𑀦𑁆𑀢𑀺 𑀘.

𑁧𑁦𑁦𑁯. 𑀏𑀯𑀫𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑁂;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀢𑀢𑀺𑀬𑀁 𑀲𑀦𑁆𑀢𑀢𑁄 𑀧𑀦.

𑁧𑁦𑁧𑁦. 𑀏𑀯𑀁 𑀫𑀦𑀲𑀺 𑀓𑀢𑁆𑀯𑀸𑀦, 𑀓𑀸𑀢𑀩𑁆𑀩𑁄 𑀫𑀦𑀲𑀸 𑀧𑀼𑀦;

𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸-𑀪𑀸𑀯𑁄 𑀢𑀲𑁆𑀲𑁂𑀯 𑀲𑀼𑀜𑁆𑀜𑀢𑁄.

𑁧𑁦𑁧𑁧. 𑀢𑀁 𑀧𑀦𑀸𑀓𑀸𑀲𑀯𑀺𑀜𑁆𑀜𑀸𑀡𑀁, 𑀅𑀓𑀢𑁆𑀯𑀸 𑀫𑀦𑀲𑀸 𑀧𑀼𑀦;

‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀯𑀸𑀢𑁂𑀦, ‘‘𑀲𑀼𑀜𑁆𑀜𑀁 𑀲𑀼𑀜𑁆𑀜’’𑀦𑁆𑀢𑀺 𑀯𑀸 𑀢𑀢𑁄.

𑁧𑁦𑁧𑁨. 𑀆𑀯𑀚𑁆𑀚𑀺𑀢𑀩𑁆𑀩𑀫𑁂𑀯𑀜𑁆𑀳𑀺, 𑀓𑀢𑁆𑀢𑀩𑁆𑀩𑀁 𑀫𑀦𑀲𑀸𑀧𑀺 𑀘;

𑀢𑀓𑁆𑀓𑀸𑀳𑀢𑀜𑁆𑀘 𑀓𑀸𑀢𑀩𑁆𑀩𑀁, 𑀧𑀼𑀦𑀧𑁆𑀧𑀼𑀦𑀁𑀯 𑀥𑀻𑀫𑀢𑀸.

𑁧𑁦𑁧𑁩. 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀢𑀲𑁆𑀲𑁂𑀯𑀁, 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀫𑀸𑀦𑀲𑀁;

𑀲𑀢𑀺 𑀢𑀺𑀝𑁆𑀞𑀢𑀺 𑀪𑀺𑀬𑁆𑀬𑁄𑀧𑀺, 𑀲𑀫𑀸𑀥𑀺𑀬𑀢𑀺 𑀫𑀸𑀦𑀲𑀁.

𑁧𑁦𑁧𑁪. 𑀆𑀲𑁂𑀯𑀢𑀺 𑀘 𑀪𑀸𑀯𑁂𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀲𑁆𑀲 𑀘𑁂𑀯𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑁄.

𑁧𑁦𑁧𑁫. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁, 𑀨𑀭𑀺𑀢𑁆𑀯𑀸𑀦 𑀲𑀫𑀦𑁆𑀢𑀢𑁄;

𑀯𑀺𑀜𑁆𑀜𑀸𑀡𑀲𑁆𑀲 𑀧𑀯𑀢𑁆𑀢𑀲𑁆𑀲, 𑀦𑀢𑁆𑀣𑀺𑀪𑀸𑀯𑁂 𑀅𑀪𑀸𑀯𑀓𑁂.

𑁧𑁦𑁧𑁬. 𑀢𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁,

𑀢𑀁 𑀧𑀦𑀸𑀧𑁆𑀧𑁂𑀢𑀺 𑀬𑁄𑀕𑀺𑀦𑁄;

𑀅𑀧𑁆𑀧𑀦𑀸𑀬 𑀦𑀬𑁄𑀧𑁂𑀢𑁆𑀣,

𑀳𑁄𑀢𑀺 𑀯𑀼𑀢𑁆𑀢𑀦𑀬𑁄𑀯 𑀲𑁄.

𑁧𑁦𑁧𑁭. 𑀆𑀓𑀸𑀲𑀕𑀢𑀯𑀺𑀜𑁆𑀜𑀸𑀡𑀁, 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀓𑁆𑀔𑀼𑀦𑀸;

𑀧𑀲𑁆𑀲𑀦𑁆𑀢𑁄 𑀯𑀺𑀳𑀭𑀺𑀢𑁆𑀯𑀸𑀦, ‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸.

𑁧𑁦𑁧𑁮. 𑀧𑀭𑀺𑀓𑀫𑁆𑀫𑀫𑀦𑀓𑁆𑀓𑀸𑀭𑁂, 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀧𑀦;

𑀢𑀲𑁆𑀲𑀸𑀧𑀕𑀫𑀫𑀢𑁆𑀢𑀁𑀯, 𑀧𑀲𑁆𑀲𑀦𑁆𑀢𑁄 𑀯𑀲𑀢𑀻 𑀘 𑀲𑁄.

𑁧𑁦𑁧𑁯. 𑀲𑀦𑁆𑀦𑀺𑀧𑀸𑀢𑀁 𑀬𑀣𑀸 𑀓𑁄𑀘𑀺, 𑀤𑀺𑀲𑁆𑀯𑀸 𑀲𑀗𑁆𑀖𑀲𑁆𑀲 𑀓𑀢𑁆𑀣𑀘𑀺;

𑀕𑀢𑁂 𑀲𑀗𑁆𑀖𑁂 𑀢𑀼 𑀢𑀁 𑀞𑀸𑀦𑀁, 𑀲𑀼𑀜𑁆𑀜𑀫𑁂𑀯𑀸𑀦𑀼𑀧𑀲𑁆𑀲𑀢𑀺.

𑁧𑁦𑁨𑁦. 𑀧𑀼𑀦 𑀪𑀸𑀯𑁂𑀢𑀼𑀓𑀸𑀫𑁂𑀦, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀸𑀦𑀲𑀁;

𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀳𑀼𑀢𑁆𑀯𑀸, 𑀢𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑁂.

𑁧𑁦𑁨𑁧. 𑀆𑀲𑀦𑁆𑀦𑀤𑀼𑀢𑀺𑀬𑀸𑀭𑀼𑀧𑁆𑀧-𑀘𑀺𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀦𑁆𑀢𑀺 𑀘;

𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑀺𑀢𑁆𑀢𑀁𑀯, 𑀦 𑀘 𑀲𑀦𑁆𑀢𑀫𑀺𑀤𑀦𑁆𑀢𑀺 𑀘.

𑁧𑁦𑁨𑁨. 𑀏𑀯𑀫𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀢𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑁂;

𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬, 𑀘𑀢𑀼𑀢𑁆𑀣𑀁 𑀲𑀦𑁆𑀢𑀢𑁄 𑀧𑀦.

𑁧𑁦𑁨𑁩. 𑀏𑀯𑀁 𑀫𑀦𑀲𑀺 𑀓𑀢𑁆𑀯𑀸𑀦, 𑀧𑀼𑀦 𑀢𑀢𑁆𑀣𑁂𑀯 𑀥𑀻𑀫𑀢𑀸;

𑀅𑀪𑀸𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀲𑀫𑁆𑀧𑀯𑀢𑁆𑀢𑀫𑀺𑀤𑀁 𑀫𑀦𑁄.

𑁧𑁦𑁨𑁪. ‘‘𑀲𑀦𑁆𑀢𑀁 𑀲𑀦𑁆𑀢𑀫𑀺𑀤𑀁 𑀘𑀺𑀢𑁆𑀢’’-𑀫𑀺𑀘𑁆𑀘𑁂𑀯𑀁 𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀳𑁄𑀢𑀺 𑀆𑀯𑀚𑁆𑀚𑀺𑀢𑀩𑁆𑀩𑀜𑁆𑀘, 𑀓𑀸𑀢𑀩𑁆𑀩𑀁 𑀫𑀦𑀲𑀸𑀧𑀺 𑀘.

𑁧𑁦𑁨𑁫. 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀢𑀲𑁆𑀲𑁂𑀯𑀁, 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀫𑀸𑀦𑀲𑀁;

𑀲𑀢𑀺 𑀢𑀺𑀝𑁆𑀞𑀢𑀺 𑀪𑀺𑀬𑁆𑀬𑁄𑀧𑀺, 𑀲𑀫𑀸𑀥𑀺𑀬𑀢𑀺 𑀫𑀸𑀦𑀲𑀁.

𑁧𑁦𑁨𑁬. 𑀆𑀲𑁂𑀯𑀢𑀺 𑀘 𑀪𑀸𑀯𑁂𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀲𑁆𑀲 𑀘𑁂𑀯𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑁄.

𑁧𑁦𑁨𑁭. 𑀢𑀢𑀺𑀬𑀸𑀭𑀼𑀧𑁆𑀧𑀲𑀗𑁆𑀔𑀸𑀢-𑀔𑀦𑁆𑀥𑁂𑀲𑀼 𑀘 𑀘𑀢𑀽𑀲𑀼𑀧𑀺;

𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁, 𑀢𑀁 𑀧𑀦𑀸𑀧𑁆𑀧𑁂𑀢𑀺 𑀬𑁄𑀕𑀺𑀦𑁄.

𑁧𑁦𑁨𑁮. 𑀅𑀧𑁆𑀧𑀦𑀸𑀬 𑀦𑀬𑁄𑀧𑁂𑀢𑁆𑀣, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀽𑀧𑀫𑁄;

𑀅𑀧𑀺𑀘𑁂𑀢𑁆𑀣 𑀯𑀺𑀲𑁂𑀲𑁄𑀬𑀁, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁧𑁦𑁨𑁯. ‘‘𑀅𑀳𑁄 𑀲𑀦𑁆𑀢𑀸 𑀯𑀢𑀸𑀬’’𑀦𑁆𑀢𑀺, 𑀲𑀫𑀸𑀧𑀢𑁆𑀢𑀺 𑀧𑀤𑀺𑀲𑁆𑀲𑀢𑀺;

𑀬𑀸 𑀧𑀦𑀸𑀪𑀸𑀯𑀫𑀢𑁆𑀢𑀫𑁆𑀧𑀺, 𑀓𑀢𑁆𑀯𑀸 𑀞𑀲𑁆𑀲𑀢𑀺 𑀕𑁄𑀘𑀭𑀁.

𑁧𑁦𑁩𑁦. 𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬𑁂𑀯, ‘‘𑀲𑀦𑁆𑀢𑀸𑀬’’𑀦𑁆𑀢𑀺 𑀯𑀺𑀧𑀲𑁆𑀲𑀢𑀺;

𑀲𑀦𑁆𑀢𑀢𑁄 𑀘𑁂 𑀫𑀦𑀓𑁆𑀓𑀸𑀭𑁄, 𑀓𑀣𑀜𑁆𑀘 𑀲𑀫𑀢𑀺𑀓𑁆𑀓𑀫𑁄.

𑁧𑁦𑁩𑁧. 𑀅𑀦𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑁆𑀢𑀸, 𑀳𑁄𑀢𑁂𑀯 𑀲𑀫𑀢𑀺𑀓𑁆𑀓𑀫𑁄;

‘‘𑀲𑀫𑀸𑀧𑀚𑁆𑀚𑀸𑀫𑀳𑀫𑁂𑀢’’-𑀫𑀺𑀘𑁆𑀘𑀸𑀪𑁄𑀕𑁄 𑀦 𑀯𑀺𑀚𑁆𑀚𑀢𑀺.

𑁧𑁦𑁩𑁨. 𑀲𑀦𑁆𑀢𑀢𑁄 𑀢𑀁 𑀓𑀭𑁄𑀦𑁆𑀢𑁄 𑀳𑀺, 𑀫𑀦𑀲𑀸 𑀲𑀼𑀔𑀼𑀫𑀁 𑀧𑀭𑀁;

𑀅𑀲𑀜𑁆𑀜𑀁 𑀧𑀦 𑀤𑀼𑀩𑁆𑀩𑀮𑁆𑀬𑀁, 𑀧𑀸𑀧𑀼𑀡𑀸𑀢𑀺 𑀫𑀳𑀕𑁆𑀕𑀢𑀁.

𑁧𑁦𑁩𑁩. 𑀦𑁂𑀯𑀲𑀜𑁆𑀜𑀻 𑀘 𑀦𑀸𑀲𑀜𑁆𑀜𑀻,

𑀬𑀸𑀬 𑀲𑀜𑁆𑀜𑀸𑀬 𑀳𑁄𑀢𑀺 𑀲𑁄;

𑀦 𑀓𑁂𑀯𑀮𑀁 𑀢𑀼 𑀲𑀜𑁆𑀜𑀸𑀯,

𑀏𑀤𑀺𑀲𑀻 𑀅𑀣 𑀔𑁄 𑀧𑀦.

𑁧𑁦𑁩𑁪. 𑀏𑀯𑀫𑁂𑀯 𑀪𑀯𑀦𑁆𑀢𑁂𑀢𑁆𑀣, 𑀲𑀼𑀔𑀼𑀫𑀸 𑀯𑁂𑀤𑀦𑀸𑀤𑀬𑁄;

𑀧𑀢𑁆𑀢𑀫𑀓𑁆𑀔𑀦𑀢𑁂𑀮𑁂𑀦, 𑀫𑀕𑁆𑀕𑀲𑁆𑀫𑀺𑀁 𑀉𑀤𑀓𑁂𑀦 𑀘.

𑁧𑁦𑁩𑁫. 𑀲𑀸𑀯𑁂𑀢𑀩𑁆𑀩𑁄 𑀅𑀬𑀁 𑀅𑀢𑁆𑀣𑁄, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀩𑁄𑀥𑀦𑁂;

𑀧𑀝𑀼𑀲𑀜𑁆𑀜𑀸𑀬 𑀓𑀺𑀘𑁆𑀘𑀲𑁆𑀲, 𑀦𑁂𑀯𑀓𑁆𑀓𑀭𑀡𑀢𑁄 𑀅𑀬𑀁.

𑁧𑁦𑁩𑁬. ‘‘𑀦𑁂𑀯𑀲𑀜𑁆𑀜𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀫𑁆𑀪𑀯𑀸;

𑀧𑀝𑀼𑀲𑀜𑁆𑀜𑀸𑀬 𑀓𑀺𑀘𑁆𑀘𑀁 𑀲𑀸, 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺 𑀦𑁂𑀯 𑀘.

𑁧𑁦𑁩𑁭. 𑀬𑀣𑀸 𑀤𑀳𑀦𑀓𑀺𑀘𑁆𑀘𑀁 𑀢𑀼, 𑀢𑁂𑀚𑁄𑀥𑀸𑀢𑀼 𑀲𑀼𑀔𑁄𑀤𑀓𑁂;

𑀲𑀸 𑀲𑀗𑁆𑀔𑀸𑀭𑀸𑀯𑀲𑁂𑀲𑀢𑁆𑀢𑀸, 𑀲𑀼𑀔𑀼𑀫𑀢𑁆𑀢𑁂𑀦 𑀯𑀺𑀚𑁆𑀚𑀢𑀺;

𑀢𑀲𑁆𑀫𑀸 𑀧𑀦 𑀘 𑀲𑀸 𑀲𑀜𑁆𑀜𑀸, ‘‘𑀦𑀸𑀲𑀜𑁆𑀜𑀸’’𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁩𑁮. 𑀏𑀢𑀸 𑀳𑀺 𑀭𑀽𑀧𑀫𑀸𑀓𑀸𑀲𑀁,

𑀯𑀺𑀜𑁆𑀜𑀸𑀡𑀁 𑀢𑀤𑀪𑀸𑀯𑀓𑀁;

𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀫𑀢𑁄,

𑀘𑀢𑀲𑁆𑀲𑁄 𑀳𑁄𑀦𑁆𑀢𑀺 𑀆𑀳 𑀘.

𑁧𑁦𑁩𑁯. ‘‘𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄, 𑀘𑀢𑀲𑁆𑀲𑁄𑀧𑀺 𑀪𑀯𑀦𑁆𑀢𑀺𑀫𑀸;

𑀅𑀗𑁆𑀕𑀸𑀢𑀺𑀓𑁆𑀓𑀫𑀫𑁂𑀢𑀸𑀲𑀁, 𑀦 𑀇𑀘𑁆𑀙𑀦𑁆𑀢𑀺 𑀯𑀺𑀪𑀸𑀯𑀺𑀦𑁄.

𑁧𑁦𑁪𑁦. 𑀲𑀼𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺,

𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀇𑀥;

𑀉𑀧𑀫𑀸 𑀢𑀢𑁆𑀣 𑀯𑀺𑀜𑁆𑀜𑁂𑀬𑁆𑀬𑀸,

𑀧𑀸𑀲𑀸𑀤𑀢𑀮𑀲𑀸𑀝𑀺𑀓𑀸’’𑀢𑀺.

𑁧𑁦𑁪𑁧. 𑀲𑀗𑁆𑀔𑁂𑀧𑁂𑀦 𑀫𑀬𑀸𑀭𑀼𑀧𑁆𑀧-𑀲𑀫𑀸𑀧𑀢𑁆𑀢𑀺𑀦𑀬𑁄 𑀅𑀬𑀁;

𑀤𑀲𑁆𑀲𑀺𑀢𑁄 𑀤𑀲𑁆𑀲𑀺𑀢𑁄 𑀲𑀼𑀤𑁆𑀥-𑀤𑀲𑁆𑀲𑀺𑀦𑀸 𑀧𑀺𑀬𑀤𑀲𑁆𑀲𑀺𑀦𑀸.

𑁧𑁦𑁪𑁨. 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀥𑀸𑀦𑀁,

𑀚𑀸𑀦𑀸𑀢𑀺𑀫𑀁 𑀲𑀸𑀭𑀢𑀭𑀁 𑀬𑁄 𑀧𑀦 𑀪𑀺𑀓𑁆𑀔𑀼;

𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀤𑀓𑁆𑀔𑁄,

𑀭𑀽𑀧𑀸𑀭𑀽𑀧𑀁 𑀬𑀸𑀢𑀺 𑀪𑀯𑀁 𑀲𑁄 𑀅𑀪𑀺𑀪𑀼𑀬𑁆𑀬.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀦𑀸𑀫

𑀧𑀦𑁆𑀦𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.