𑁪. 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄

𑀏𑀓𑀯𑀺𑀥𑀸𑀤𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨𑁭. 𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀦𑀬𑀫𑁂𑀓𑀯𑀺𑀥𑀸𑀤𑀺𑀓𑀁;

𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀁, 𑀩𑀼𑀤𑁆𑀥𑀺𑀬𑀸 𑀧𑀦 𑀯𑀼𑀤𑁆𑀥𑀺𑀬𑀸.

𑀅𑀳𑀁 𑀇𑀢𑁄 𑀧𑀭𑀁 𑀇𑀢𑁄 𑀧𑀭𑀺𑀘𑁆𑀙𑁂𑀤𑀢𑁄 𑀧𑀭𑀁 𑀏𑀓𑀯𑀺𑀥𑀸𑀤𑀺𑀓𑀁 𑀦𑀬𑀁 𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀁 𑀩𑀼𑀤𑁆𑀥𑀺𑀬𑀸 𑀯𑀼𑀤𑁆𑀥𑀺𑀢𑁆𑀣𑀸𑀬 𑀧𑀯𑀓𑁆𑀔𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺.

𑁧𑁨𑁮. 𑀲𑀩𑁆𑀩𑀫𑁂𑀓𑀯𑀺𑀥𑀁 𑀘𑀺𑀢𑁆𑀢𑀁, 𑀯𑀺𑀚𑀸𑀦𑀦𑀲𑀪𑀸𑀯𑀢𑁄 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀯𑀺𑀚𑀸𑀦𑀦𑀲𑀪𑀸𑀯𑀢𑁄 𑀏𑀓𑀯𑀺𑀥𑀁, 𑀤𑀼𑀯𑀺𑀥𑀜𑁆𑀘 𑀪𑀯𑁂 𑀘𑀺𑀢𑁆𑀢𑀁 𑀅𑀳𑁂𑀢𑀼𑀓𑀲𑀳𑁂𑀢𑀼𑀓𑀢𑁄 𑀇𑀤𑀁 𑀘𑀺𑀢𑁆𑀢𑀁 𑀤𑀼𑀯𑀺𑀥𑀁 𑀪𑀯𑁂𑀬𑁆𑀬.

𑁧𑁨𑁯. 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀺𑀧𑀸𑀓𑀸 𑀳𑀺, 𑀓𑀸𑀫𑁂 𑀤𑀲 𑀘 𑀧𑀜𑁆𑀘 𑀘 𑀳𑀺 𑀲𑀘𑁆𑀘𑀁 𑀓𑀸𑀫𑁂 𑀓𑀸𑀫𑀸𑀯𑀘𑀭𑁂 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸 𑀤𑀲 𑀧𑀜𑁆𑀘 𑀘 𑀓𑀺𑀭𑀺𑀬𑀸 𑀢𑀺𑀲𑁆𑀲𑁄 𑀇𑀢𑀺 𑀲𑀩𑁆𑀩𑁂 𑀅𑀝𑁆𑀞𑀸𑀭𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀳𑁂𑀢𑀼𑀓𑀸.

𑁧𑁩𑁦. 𑀅𑀳𑁂𑀢𑀼𑀓𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀲𑁂𑀲𑀸 𑀏𑀓𑀲𑀢𑁆𑀢𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀳𑁂𑀢𑀼𑀓𑀸𑀢𑀺 𑀲𑀳𑁂𑀢𑀼𑀓𑀸 𑀦𑀸𑀫𑀸𑀢𑀺 𑀫𑀳𑁂𑀲𑀺𑀦𑀸 𑀢𑀸𑀤𑀺𑀦𑀸 𑀅𑀯𑀺𑀧𑀭𑀻𑀢𑀲𑀪𑀸𑀯𑁂𑀦 𑀳𑁂𑀢𑀼𑀯𑀸𑀤𑀺𑀦𑀸 𑀧𑀘𑁆𑀘𑀬𑀯𑀸𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀸.

𑁧𑁩𑁧. 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀢𑁄 𑀲𑀯𑀢𑁆𑀣𑀼𑀓𑀅𑀯𑀢𑁆𑀣𑀼𑀓𑀯𑀲𑁂𑀦 𑀢𑀣𑀸 𑀉𑀪𑀬𑀯𑀲𑁂𑀦 𑀲𑀯𑀢𑁆𑀣𑀼𑀓𑀯𑀲𑁂𑀦, 𑀅𑀯𑀢𑁆𑀣𑀼𑀓𑀯𑀲𑁂𑀦 𑀘 𑀲𑀩𑁆𑀩𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘 𑀫𑀸𑀦𑀲𑀁 𑀢𑀺𑀯𑀺𑀥𑀁 𑀳𑁄𑀢𑀺.

𑁧𑁩𑁨-𑁪. 𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄 𑀘, 𑀭𑀽𑀧𑁂 𑀧𑀜𑁆𑀘𑀤𑀲𑀸𑀧𑀺 𑀘 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀆𑀤𑀺𑀫𑀕𑁆𑀕𑁄 𑀧𑀞𑀫𑀫𑀕𑁆𑀕𑁄 𑀳𑀲𑀺𑀢𑀼𑀧𑁆𑀧𑀸𑀤𑁄 𑀫𑀦𑁄𑀥𑀸𑀢𑀼𑀓𑀺𑀭𑀺𑀬𑀸𑀧𑀺 𑀘 𑀤𑁄𑀫𑀦𑀲𑁆𑀲𑀤𑁆𑀯𑀬𑀜𑁆𑀘𑀸𑀧𑀺 𑀢𑁂𑀘𑀢𑁆𑀢𑀸𑀮𑀻𑀲 𑀫𑀸𑀦𑀲𑀸 𑀯𑀺𑀦𑀸 𑀯𑀢𑁆𑀣𑀼𑀁 𑀯𑀢𑁆𑀣𑀼𑀁 𑀯𑀚𑁆𑀚𑁂𑀢𑁆𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑀦𑁆𑀢𑁂𑀦 𑀲𑀯𑀢𑁆𑀣𑀼𑀓𑀸 𑀦𑀸𑀫. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸 𑀘 𑀏𑀓𑀦𑁆𑀢𑁂𑀦 𑀅𑀯𑀢𑁆𑀣𑀼𑀓𑀸, 𑀫𑀬𑀸 𑀯𑀼𑀢𑁆𑀢𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀲𑁂𑀲𑀸𑀦𑀺 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀉𑀪𑀬𑀣𑀸 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀯𑀲𑁂𑀦 𑀲𑀺𑀬𑀼𑀁.

𑁧𑁩𑁫. 𑀏𑀓𑁂𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀧𑀜𑁆𑀘𑀸𑀭𑀫𑁆𑀫𑀡𑀫𑁂𑀯 𑀘 𑀘𑀺𑀢𑁆𑀢𑀁 𑀙𑀴𑀸𑀭𑀫𑁆𑀫𑀡𑀓𑀜𑁆𑀘𑁂𑀢𑀺 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸𑀧𑀺 𑀢𑀺𑀯𑀺𑀥𑀁 𑀘𑀺𑀢𑁆𑀢𑀁 𑀲𑀺𑀬𑀸.

𑁧𑁩𑁬-𑁮. 𑀯𑀺𑀜𑁆𑀜𑀸𑀡𑀸𑀦𑀺 𑀘 𑀤𑁆𑀯𑁂 𑀧𑀜𑁆𑀘, 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀸𑀦𑀺 𑀘 𑀅𑀪𑀺𑀜𑁆𑀜𑀸𑀫𑀸𑀦𑀲𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀫𑀳𑀕𑁆𑀕𑀢𑀜𑁆𑀘𑁂𑀯𑀸𑀢𑀺 𑀢𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀦 𑀏𑀓𑁂𑀓𑀸𑀭𑀫𑁆𑀫𑀡𑀸 𑀯𑀺𑀜𑁆𑀜𑁂𑀬𑁆𑀬𑀸 𑀥𑀻𑀭𑁂𑀦. 𑀢𑀢𑁆𑀣 𑀘𑀺𑀢𑁆𑀢𑁂 𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀧𑀜𑁆𑀘𑀸𑀭𑀫𑁆𑀫𑀡𑀁 𑀈𑀭𑀺𑀢𑀁 𑀪𑀕𑀯𑀢𑀸. 𑀫𑀬𑀸 𑀯𑀼𑀢𑁆𑀢𑀘𑀺𑀢𑁆𑀢𑀢𑁄 𑀲𑁂𑀲𑀸𑀦𑀺 𑀢𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀙𑀴𑀸𑀭𑀫𑁆𑀫𑀡𑀺𑀓𑀸𑀦𑀺 𑀫𑀢𑀸𑀦𑀺 𑀲𑀢𑁆𑀣𑀼𑀦𑀸, 𑀢𑀣𑀸 𑀏𑀯𑀁 𑀘𑀺𑀢𑁆𑀢𑀁 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄 𑀢𑀺𑀯𑀺𑀥𑀁. 𑀆𑀤𑀺-𑀲𑀤𑁆𑀤𑁂𑀦 𑀅𑀩𑁆𑀬𑀸𑀓𑀢𑀁 𑀕𑀳𑁂𑀢𑀩𑁆𑀩𑀁.

𑁧𑁩𑁯. 𑀅𑀳𑁂𑀢𑀼𑀓𑀁 𑀘𑀺𑀢𑁆𑀢𑀁 𑀏𑀓𑀳𑁂𑀢𑀼𑀓𑀜𑁆𑀘 𑀘𑀺𑀢𑁆𑀢𑀁 𑀤𑁆𑀯𑀺𑀳𑁂𑀢𑀼𑀓𑀜𑁆𑀘 𑀘𑀺𑀢𑁆𑀢𑀁 𑀢𑀺𑀳𑁂𑀢𑀼𑀓𑀜𑁆𑀘 𑀘𑀺𑀢𑁆𑀢𑀦𑁆𑀢𑀺 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀘𑀺𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀯𑀺𑀪𑀸𑀯𑀺𑀦𑀸 𑀯𑀺𑀜𑁆𑀜𑀸𑀢𑀩𑁆𑀩𑀁.

𑁧𑁪𑁦-𑁨. 𑀳𑁂𑀝𑁆𑀞𑀸 𑀫𑀬𑀸𑀧𑀺 𑀦𑀺𑀤𑁆𑀤𑀺𑀝𑁆𑀞𑀸 𑀅𑀝𑁆𑀞𑀸𑀭𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀳𑁂𑀢𑀼𑀓𑀸, 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀁𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀏𑀓𑀳𑁂𑀢𑀼𑀓𑀁 𑀏𑀯𑀁 𑀉𑀤𑀻𑀭𑀺𑀢𑀁 𑀪𑀕𑀯𑀢𑀸. 𑀓𑀸𑀫𑁂 𑀓𑀸𑀫𑀸𑀯𑀘𑀭𑁂 𑀧𑀼𑀜𑁆𑀜𑀯𑀺𑀧𑀸𑀓𑀓𑁆𑀭𑀺𑀬𑀢𑁄 𑀓𑀼𑀲𑀮𑀯𑀲𑁂𑀦 𑀘 𑀯𑀺𑀧𑀸𑀓𑀯𑀲𑁂𑀦 𑀘 𑀓𑀺𑀭𑀺𑀬𑀸𑀯𑀲𑁂𑀦 𑀘 𑀤𑁆𑀯𑀸𑀤𑀲𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀓𑀼𑀲𑀮𑀸 𑀘 𑀤𑀲𑀥𑀸 𑀘𑀸𑀢𑀺 𑀩𑀸𑀯𑀻𑀲𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀼𑀳𑁂𑀢𑀼𑀓𑀸. 𑀓𑀸𑀫𑁂 𑀓𑀸𑀫𑀸𑀯𑀘𑀭𑁂 𑀧𑀼𑀜𑁆𑀜𑀯𑀺𑀧𑀸𑀓𑀓𑁆𑀭𑀺𑀬𑀢𑁄 𑀧𑀼𑀜𑁆𑀜𑀯𑀲𑁂𑀦 𑀘 𑀯𑀺𑀧𑀸𑀓𑀯𑀲𑁂𑀦 𑀘 𑀓𑀺𑀭𑀺𑀬𑀸𑀯𑀲𑁂𑀦 𑀘 𑀤𑁆𑀯𑀸𑀤𑀲𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀲𑀩𑁆𑀩𑀁 𑀫𑀳𑀕𑁆𑀕𑀢𑀜𑁆𑀘𑁂𑀯 𑀅𑀧𑁆𑀧𑀫𑀸𑀡𑀁 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀜𑁆𑀘 𑀢𑀺𑀳𑁂𑀢𑀼𑀓𑀁.

𑁧𑁪𑁩-𑁫𑁦. 𑀭𑀽𑀧𑀻𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺-𑀚𑀦𑀓𑀸𑀚𑀦𑀓𑀸𑀤𑀺𑀢𑁄𑀢𑀺 𑀭𑀽𑀧𑀇𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀯𑀲𑁂𑀦 𑀭𑀽𑀧𑀇𑀭𑀺𑀬𑀸𑀧𑀣𑀚𑀦𑀓𑀯𑀲𑁂𑀦 𑀘 𑀭𑀽𑀧𑀚𑀦𑀓𑀯𑀲𑁂𑀦 𑀘 𑀢𑀺𑀓𑀺𑀘𑁆𑀘𑀸𑀚𑀦𑀓𑀯𑀲𑁂𑀦 𑀘𑀸𑀢𑀺𑀆𑀤𑀻𑀳𑀺 𑀧𑀓𑀸𑀭𑁂𑀳𑀺 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀤𑁆𑀯𑀸𑀤𑀲𑀸𑀓𑀼𑀲𑀮𑀸, 𑀓𑀸𑀫𑀥𑀸𑀢𑀼𑀬𑀸 𑀓𑀼𑀲𑀮𑀸, 𑀢𑀣𑀸 𑀓𑀸𑀫𑁂 𑀤𑀲 𑀓𑀺𑀭𑀺𑀬𑀸, 𑀅𑀪𑀺𑀜𑁆𑀜𑀸𑀫𑀸𑀦𑀲𑀁 𑀤𑁆𑀯𑀬𑀁, 𑀇𑀫𑁂 𑀩𑀸𑀢𑁆𑀢𑀺𑀁𑀲 𑀫𑀸𑀦𑀲𑀸 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀦𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀦𑁆𑀢𑀺. 𑀓𑀼𑀲𑀮𑀸 𑀫𑀳𑀕𑁆𑀕𑀢𑀫𑀸𑀦𑀲𑀸 𑀓𑀺𑀭𑀺𑀬𑀸 𑀘 𑀫𑀳𑀕𑁆𑀕𑀢𑀫𑀸𑀦𑀲𑀸, 𑀅𑀝𑁆𑀞 𑀅𑀦𑀸𑀲𑀯𑀘𑀺𑀢𑁆𑀢𑀸𑀦𑀺, 𑀙𑀩𑁆𑀩𑀻𑀲𑀢𑀺 𑀘 𑀫𑀸𑀦𑀲𑀸 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀦𑁆𑀢𑀺. 𑀘𑁄𑀧𑀦𑀁 𑀦 𑀧𑀸𑀧𑁂𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀁 𑀦 𑀚𑀦𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀼𑀓𑀺𑀘𑁆𑀘𑀦𑀺𑀬𑀢𑀸, 𑀤𑀲 𑀯𑀺𑀜𑁆𑀜𑀸𑀡𑁂 𑀞𑀧𑁂𑀢𑁆𑀯𑀸 𑀤𑁆𑀯𑀻𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼𑀤𑁆𑀯𑀬𑀲𑀦𑁆𑀢𑀻𑀭𑀡𑀢𑁆𑀢𑀬𑀫𑀳𑀸𑀯𑀺𑀧𑀸𑀓𑀭𑀽𑀧𑀯𑀺𑀧𑀸𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞𑀸𑀭𑀲 𑀧𑀸𑀓𑀸 𑀫𑀦𑁄𑀥𑀸𑀢𑀼 𑀓𑀺𑀭𑀺𑀬𑀸 𑀘𑁂𑀯𑀸𑀢𑀺 𑀇𑀫𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀇𑀢𑀭𑀤𑁆𑀯𑀬𑀁 𑀦 𑀓𑀭𑁄𑀦𑁆𑀢𑀺, 𑀧𑀼𑀦 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀧𑀞𑀫𑀁 ‘‘𑀤𑀲 𑀯𑀺𑀜𑁆𑀜𑀸𑀡𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀦𑀸’’𑀢𑀺 𑀯𑀼𑀢𑁆𑀢𑀸. 𑀅𑀭𑀽𑀧𑀻𑀲𑀼 𑀯𑀺𑀧𑀸𑀓𑀸 𑀘 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀜𑁆𑀘 𑀇𑀫𑁂 𑀲𑁄𑀴𑀲 𑀫𑀸𑀦𑀲𑀸 𑀢𑀺𑀓𑀺𑀘𑁆𑀘𑀸𑀦𑀺 𑀦 𑀓𑀭𑁄𑀦𑁆𑀢𑀺.

𑁧𑁫𑁧. 𑀏𑀓𑀤𑁆𑀯𑀺𑀢𑀺𑀘𑀢𑀼𑀝𑁆𑀞𑀸𑀦-𑀧𑀜𑁆𑀘𑀝𑁆𑀞𑀸𑀦𑀧𑁆𑀧𑀪𑁂𑀤𑀢𑁄 𑀏𑀓𑀓𑀺𑀘𑁆𑀘𑀤𑁆𑀯𑀺𑀓𑀺𑀘𑁆𑀘𑀢𑀺𑀓𑀺𑀘𑁆𑀘𑀘𑀢𑀼𑀓𑀺𑀘𑁆𑀘𑀧𑀜𑁆𑀘𑀓𑀺𑀘𑁆𑀘𑀪𑁂𑀤𑁂𑀦 𑀧𑀜𑁆𑀘𑀥𑀸 𑀘𑀺𑀢𑁆𑀢𑀁 𑀧𑀜𑁆𑀘𑀧𑀓𑀸𑀭𑀁 𑀘𑀺𑀢𑁆𑀢𑀁 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄 𑀩𑀼𑀤𑁆𑀥𑁄 𑀅𑀓𑁆𑀔𑀸𑀲𑀺 𑀓𑀣𑁂𑀲𑀺.

𑁧𑁫𑁨. 𑀓𑀼𑀲𑀮𑀸𑀓𑀼𑀲𑀮𑀸 𑀲𑀩𑁆𑀩𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀫𑀳𑀸𑀓𑁆𑀭𑀺𑀬𑀸;

𑀫𑀳𑀕𑁆𑀕𑀢𑀸 𑀓𑁆𑀭𑀺𑀬𑀸 𑀘𑁂𑀯, 𑀘𑀢𑁆𑀢𑀸𑀭𑁄 𑀨𑀮𑀫𑀸𑀦𑀲𑀸.

𑁧𑁫𑁩. 𑀲𑀩𑁆𑀩𑁂𑀯 𑀧𑀜𑁆𑀘𑀧𑀜𑁆𑀜𑀸𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀚𑀯𑀦𑀝𑁆𑀞𑀸𑀦𑀢𑁄𑀬𑁂𑀯 𑀚𑀯𑀦𑀓𑀺𑀘𑁆𑀘𑀯𑀲𑁂𑀦𑁂𑀯 𑀏𑀓𑀝𑁆𑀞𑀸𑀦𑁂 𑀏𑀓𑀓𑀺𑀘𑁆𑀘𑁂 𑀦𑀺𑀧𑁆𑀧𑀧𑀜𑁆𑀘𑁂𑀦 𑀲𑀢𑁆𑀣𑀼𑀦𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀺𑀭𑀳𑀺𑀢𑁂𑀦 𑀲𑀢𑁆𑀣𑀼𑀦𑀸 𑀦𑀺𑀬𑀸𑀫𑀺𑀢𑀸 𑀓𑀣𑀺𑀢𑀸.

𑁧𑁫𑁪. 𑀧𑀼𑀦 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀲𑁆𑀲𑀦𑁂 𑀲𑀯𑀦𑁂 𑀢𑀣𑀸 𑀖𑀸𑀬𑀦𑁂 𑀲𑀸𑀬𑀦𑀝𑁆𑀞𑀸𑀦𑁂 𑀨𑀼𑀲𑀦𑁂 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀣𑀼𑀦𑀸 𑀦𑀺𑀬𑀸𑀫𑀺𑀢𑀸.

𑁧𑁫𑁫. 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀁 𑀆𑀯𑀚𑁆𑀚𑀦𑁂 𑀧𑀝𑀺𑀘𑁆𑀙𑀦𑁂, 𑀏𑀢𑁂 𑀅𑀝𑁆𑀞𑀲𑀝𑁆𑀞𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀏𑀓𑀝𑁆𑀞𑀸𑀦𑀺𑀓𑀢𑀁 𑀏𑀓𑀓𑀺𑀘𑁆𑀘𑀪𑀸𑀯𑀁 𑀕𑀢𑀸 𑀧𑀢𑁆𑀢𑀸 𑀪𑀯𑀦𑁆𑀢𑀺.

𑁧𑁫𑁬-𑁮. 𑀘𑀺𑀢𑁆𑀢𑀤𑁆𑀯𑀬𑀁 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀦𑀸𑀫 𑀉𑀤𑀻𑀭𑀺𑀢𑀁 𑀪𑀕𑀯𑀢𑀸, 𑀲𑁄𑀫𑀦𑀲𑁆𑀲𑀬𑀼𑀢𑀁 𑀘𑀺𑀢𑁆𑀢𑀁 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀁 𑀲𑀺𑀬𑀸. 𑀙𑀤𑁆𑀯𑀸𑀭𑁂 𑀢𑀤𑀸𑀮𑀫𑁆𑀩𑀡𑀜𑁆𑀘 𑀩𑀮𑀯𑀸𑀭𑀫𑁆𑀫𑀡𑁂 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑁂 𑀲𑀢𑀺 𑀲𑀺𑀬𑀸, 𑀢𑀣𑀸 𑀯𑁄𑀝𑁆𑀞𑀩𑁆𑀩𑀦𑀁 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀯𑁄𑀝𑁆𑀞𑀩𑁆𑀩𑀦𑀁 𑀳𑁄𑀢𑀺. 𑀫𑀦𑁄𑀤𑁆𑀯𑀸𑀭𑁂𑀲𑀼 𑀧𑀦 𑀲𑀩𑁆𑀩𑁂𑀲𑀁 𑀆𑀭𑀫𑁆𑀫𑀡𑀸𑀦𑀁 𑀆𑀯𑀚𑁆𑀚𑀦𑀁 𑀳𑁄𑀢𑀺, 𑀇𑀤𑀁 𑀘𑀺𑀢𑁆𑀢𑀤𑁆𑀯𑀬𑀁 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀦𑀸𑀫 𑀳𑁄𑀢𑀺.

𑁧𑁫𑁯. 𑀧𑀝𑀺𑀲𑀦𑁆𑀥𑀺𑀬𑀸 𑀞𑀸𑀦𑀢𑁄 𑀧𑀝𑀺𑀲𑀦𑁆𑀥𑀺𑀬𑀸 𑀓𑀺𑀘𑁆𑀘𑀯𑀲𑁂𑀦 𑀪𑀯𑀗𑁆𑀕𑀲𑁆𑀲 𑀞𑀸𑀦𑀢𑁄 𑀪𑀯𑀗𑁆𑀕𑀲𑁆𑀲 𑀓𑀺𑀘𑁆𑀘𑀯𑀲𑁂𑀦 𑀘𑀼𑀢𑀺𑀬𑀸 𑀞𑀸𑀦𑀢𑁄 𑀘𑀼𑀢𑀺𑀬𑀸 𑀓𑀺𑀘𑁆𑀘𑀯𑀲𑁂𑀦 𑀢𑁂 𑀫𑀳𑀕𑁆𑀕𑀢𑀯𑀺𑀧𑀸𑀓𑀸 𑀦𑀯 𑀢𑀺𑀝𑁆𑀞𑀸𑀦𑀺𑀓𑀸 𑀢𑀺𑀓𑀺𑀘𑁆𑀘𑀸𑀢𑀺 𑀫𑀼𑀦𑀺𑀦𑀸 𑀫𑀢𑀸.

𑁧𑁬𑁦-𑁩. 𑀅𑀝𑁆𑀞 𑀓𑀸𑀫𑀸 𑀫𑀳𑀸𑀧𑀸𑀓𑀸, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀢𑁄 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀢𑁄 𑀘𑁂𑀯 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀘 𑀏𑀯 𑀘𑀼𑀢𑀺𑀝𑁆𑀞𑀸𑀦𑀯𑀲𑁂𑀦 𑀘 𑀅𑀝𑁆𑀞 𑀘𑀺𑀢𑁆𑀢𑀸𑀦𑀺 𑀘𑀢𑀼𑀝𑁆𑀞𑀸𑀦𑀺𑀓𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀇𑀢𑀺 𑀯𑀘𑀦𑀁 𑀥𑀻𑀭𑁄 𑀦𑀺𑀤𑁆𑀤𑀺𑀲𑁂, 𑀓𑀼𑀲𑀮𑀸𑀓𑀼𑀲𑀮𑀧𑀸𑀓𑁄𑀧𑁂𑀓𑁆𑀔𑀸𑀲𑀳𑀕𑀢𑀤𑁆𑀯𑀬𑀁 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀁 𑀪𑀯𑁂, 𑀙𑀤𑁆𑀯𑀸𑀭𑀺𑀓𑁂𑀲𑀼𑀧𑀺 𑀩𑀮𑀯𑀸𑀭𑀫𑁆𑀫𑀡𑁂 𑀲𑀢𑀺 𑀢𑀤𑀸𑀭𑀫𑁆𑀫𑀡𑀢𑀸 𑀲𑀺𑀬𑀸. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁 𑀞𑀸𑀦𑀯𑀲𑁂𑀦 𑀘 𑀘𑀼𑀢𑀺𑀝𑁆𑀞𑀸𑀦𑀯𑀲𑁂𑀦 𑀘 𑀇𑀤𑀁 𑀘𑀺𑀢𑁆𑀢𑀤𑁆𑀯𑀬𑀁 𑀧𑀜𑁆𑀘𑀝𑁆𑀞𑀸𑀦𑀺𑀓𑀘𑀺𑀢𑁆𑀢𑀁 𑀦𑀸𑀫𑀸𑀢𑀺 𑀉𑀤𑀻𑀭𑀺𑀢𑀁 𑀫𑀼𑀦𑀺𑀦𑀸.

𑁧𑁬𑁪. 𑀧𑀜𑁆𑀘𑀓𑀺𑀘𑁆𑀘𑀁 𑀤𑁆𑀯𑀬𑀁 𑀘𑀺𑀢𑁆𑀢𑀁, 𑀅𑀝𑁆𑀞𑀓𑀁 𑀧𑀦 𑀘𑀢𑀼𑀓𑀺𑀘𑁆𑀘𑀁, 𑀦𑀯𑀓𑀁 𑀢𑀺𑀓𑀺𑀘𑁆𑀘𑀁, 𑀤𑁆𑀯𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑁆𑀯𑀺𑀓𑀺𑀘𑁆𑀘𑀸, 𑀇𑀫𑁂𑀲𑀁 𑀇𑀫𑁂𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀳𑀺 𑀲𑁂𑀲𑀁 𑀏𑀓𑀓𑀁 𑀓𑀺𑀘𑁆𑀘𑀁.

𑁧𑁬𑁫. 𑀪𑀯𑀗𑁆𑀕𑀸𑀯𑀚𑁆𑀚𑀦𑀜𑁆𑀘𑁂𑀯, 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀲𑀦𑁆𑀢𑀻𑀭𑀡𑀁 𑀯𑁄𑀝𑁆𑀞𑀩𑁆𑀩𑀦𑀁, 𑀚𑀯𑀦𑀁 𑀪𑀯𑀢𑀺 𑀲𑀢𑁆𑀢𑀫𑀁.

𑁧𑁬𑁬. 𑀙𑀩𑁆𑀩𑀺𑀥𑀁 𑀳𑁄𑀢𑀺 𑀢𑀁 𑀙𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀙𑀦𑁆𑀦𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀯𑀺𑀜𑁆𑀜𑀸𑀡𑀸𑀦𑀁 𑀧𑀪𑁂𑀤𑀢𑁄 𑀙𑀩𑁆𑀩𑀺𑀥𑀁 𑀳𑁄𑀢𑀺, 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀲𑀢𑁆𑀢𑀦𑁆𑀦𑀁 𑀯𑀲𑁂𑀦 𑀘𑀺𑀢𑁆𑀢𑀁 𑀲𑀢𑁆𑀢𑀥𑀸 𑀳𑁄𑀢𑀺.

𑁧𑁬𑁭. 𑀏𑀓𑁂𑀓𑀸𑀭𑀫𑁆𑀫𑀡𑀁 𑀙𑀓𑁆𑀓𑀁, 𑀧𑀜𑁆𑀘𑀸𑀭𑀫𑁆𑀫𑀡𑀪𑁂𑀤𑀢𑁄 𑀙𑀴𑀸𑀭𑀫𑁆𑀫𑀡𑀢𑁄 𑀘𑁂𑀯 𑀙𑀴𑀸𑀭𑀫𑁆𑀫𑀡𑀘𑀺𑀢𑁆𑀢𑀯𑀲𑁂𑀦 𑀫𑀦𑁄 𑀘𑀺𑀢𑁆𑀢𑀁 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺.

𑁧𑁬𑁮. 𑀢𑀢𑁆𑀣 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀏𑀓𑁂𑀓𑀕𑁄𑀘𑀭𑀸 𑀳𑁄𑀦𑁆𑀢𑀺, 𑀤𑁆𑀯𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀭𑀽𑀧𑀸𑀭𑀫𑁆𑀫𑀡𑀺𑀓𑀸, 𑀤𑁆𑀯𑁂 𑀤𑁆𑀯𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀤𑁆𑀤𑀸𑀤𑀺𑀕𑁄𑀘𑀭𑀸.

𑁧𑁬𑁯. 𑀧𑀜𑁆𑀘𑀸𑀪𑀺𑀜𑁆𑀜𑀸𑀯𑀺𑀯𑀚𑁆𑀚𑀺𑀢𑀁 𑀲𑀩𑁆𑀩𑀁 𑀫𑀳𑀕𑁆𑀕𑀢𑀁, 𑀲𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀜𑁆𑀘 𑀇𑀢𑀺 𑀇𑀤𑀁 𑀘𑀺𑀢𑁆𑀢𑀁 𑀏𑀓𑁂𑀓𑀸𑀭𑀫𑁆𑀫𑀡𑀁 𑀪𑀯𑁂.

𑁧𑁭𑁦. 𑀇𑀤𑀁 𑀙𑀓𑁆𑀓𑀁 𑀏𑀓𑁂𑀓𑀸𑀭𑀫𑁆𑀫𑀡𑀁 𑀯𑀺𑀪𑀸𑀯𑀺𑀦𑀸 𑀜𑁂𑀬𑁆𑀬𑀁, 𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀧𑀜𑁆𑀘𑀸𑀭𑀫𑁆𑀫𑀡𑀺𑀓𑀁 𑀦𑀸𑀫 𑀪𑀯𑁂.

𑁧𑁭𑁧. 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀁 𑀢𑀣𑀸 𑀏𑀓𑁂𑀓𑀁 𑀲𑀩𑁆𑀩𑀸𑀦𑀺 𑀅𑀪𑀺𑀜𑁆𑀜𑀸𑀦𑀺 𑀘 𑀙𑀴𑀸𑀭𑀫𑁆𑀫𑀡𑀺𑀓𑀸𑀦𑀻𑀢𑀺 𑀙𑀴𑀸𑀭𑀫𑁆𑀫𑀡𑀺𑀓𑀸𑀦𑀺 𑀦𑀸𑀫 𑀧𑀡𑁆𑀟𑀺𑀢𑁂𑀦 𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑁧𑁭𑁨. 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼 𑀧𑀘𑁆𑀙𑀺𑀫𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀲𑁂𑀦 𑀢𑀺𑀥𑀸 𑀓𑀢𑁆𑀯𑀸 𑀦𑀯𑀯𑀺𑀥𑀁 𑀘𑀺𑀢𑁆𑀢𑀁 𑀳𑁄𑀢𑀺.

𑁧𑁭𑁩. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀪𑁂𑀤𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦𑁂𑀯 𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀢𑁄 𑀙𑀲𑀢𑁆𑀢𑀢𑀺𑀯𑀺𑀥𑁄 𑀳𑁄𑀢𑀺.

𑁧𑁭𑁪. 𑀫𑀦𑁄𑀥𑀸𑀢𑀼𑀁 𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀢𑁄 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀳𑀺 𑀦𑀯𑀥𑀸 𑀘𑀺𑀢𑁆𑀢𑁂𑀳𑀺 𑀫𑀸𑀦𑀲𑀁 𑀤𑀲𑀥𑀸 𑀳𑁄𑀢𑀺.

𑁧𑁭𑁫. 𑀧𑀘𑁆𑀙𑀺𑀫𑀁 𑀥𑀸𑀢𑀼𑀤𑁆𑀯𑀬𑀁 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀁, 𑀫𑀦𑁄𑀥𑀸𑀢𑀼𑀁 𑀓𑀼𑀲𑀮𑀯𑀺𑀧𑀸𑀓𑀅𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀢𑀺𑀥𑀸 𑀓𑀢𑁆𑀯𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀲𑁂𑀦 𑀢𑀺𑀯𑀺𑀥𑀸 𑀓𑀢𑁆𑀯𑀸 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑁂𑀳𑀺 𑀲𑀳 𑀘𑀺𑀢𑁆𑀢𑀁 𑀏𑀓𑀸𑀤𑀲𑀯𑀺𑀥𑀁 𑀳𑁄𑀢𑀺, 𑀇𑀢𑀺 𑀇𑀤𑀁 𑀯𑀘𑀦𑀁 𑀧𑀡𑁆𑀟𑀺𑀢𑁄 𑀧𑀭𑀺𑀤𑀻𑀧𑀬𑁂.

𑁧𑁭𑁬. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸𑀦 𑀢𑀁 𑀘𑀺𑀢𑁆𑀢𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑁂𑀳𑀺 𑀲𑀳 𑀢𑀺𑀧𑁆𑀧𑀓𑀸𑀭𑀸𑀬 𑀫𑀦𑁄𑀥𑀸𑀢𑀼𑀬𑀸 𑀘 𑀲𑀳 𑀤𑁆𑀯𑀸𑀤𑀲𑀥𑀸𑀧𑀺 𑀥𑀻𑀭𑁄 𑀯𑀤𑁂.

𑁧𑁭𑁭-𑁯. 𑀘𑀺𑀢𑁆𑀢𑀁 𑀘𑀼𑀤𑁆𑀤𑀲𑀝𑁆𑀞𑀸𑀦𑀪𑁂𑀤𑁂𑀦 𑀘𑀼𑀤𑁆𑀤𑀲𑀥𑀸 𑀪𑀯𑁂, 𑀧𑀝𑀺𑀲𑀦𑁆𑀥𑀺𑀬𑀸 𑀯𑀲𑁂𑀦 𑀘 𑀪𑀯𑀗𑁆𑀕𑀯𑀲𑁂𑀦 𑀘 𑀘𑀼𑀢𑀺𑀬𑀸 𑀯𑀲𑁂𑀦 𑀘 𑀆𑀯𑀚𑁆𑀚𑀦𑀲𑁆𑀲 𑀯𑀲𑁂𑀦 𑀘 𑀧𑀜𑁆𑀘𑀦𑁆𑀦𑀁 𑀤𑀲𑁆𑀲𑀦𑀸𑀤𑀻𑀦𑀁 𑀓𑀺𑀘𑁆𑀘𑀸𑀦𑀁 𑀯𑀲𑁂𑀦 𑀘 𑀲𑀫𑁆𑀧𑀝𑀺𑀘𑁆𑀙𑀦𑀘𑁂𑀢𑀲𑁄 𑀯𑀲𑁂𑀦 𑀘 𑀲𑀦𑁆𑀢𑀻𑀭𑀡𑀲𑁆𑀲 𑀯𑀲𑁂𑀦 𑀘 𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀸𑀦𑀁 𑀯𑀲𑁂𑀦 𑀘, 𑀬𑀣𑀸 𑀏𑀯𑀁 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀘𑀸𑀢𑀺 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀞𑀸𑀦𑀪𑁂𑀤𑀢𑁄 𑀓𑀺𑀘𑁆𑀘𑀪𑁂𑀤𑁂𑀦 𑀘𑀼𑀤𑁆𑀤𑀲𑀥𑀸 𑀘𑀺𑀢𑁆𑀢𑀁 𑀳𑁄𑀢𑀺, 𑀇𑀢𑀺 𑀇𑀤𑀁 𑀯𑀘𑀦𑀁 𑀥𑀻𑀭𑁄 𑀧𑀭𑀺𑀤𑀻𑀧𑀬𑁂 𑀧𑀭𑀺𑀤𑀻𑀧𑁂𑀬𑁆𑀬.

𑁧𑁮𑁦. 𑀪𑀽𑀫𑀺𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀯𑀲𑁂𑀦 𑀪𑀽𑀫𑀺𑀦𑀸𑀦𑀢𑁆𑀢𑀯𑀲𑁂𑀦, 𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀯𑀲𑁂𑀦 𑀘 𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀢𑁄 𑀇𑀤𑀁 𑀘𑀺𑀢𑁆𑀢𑀁 𑀩𑀳𑀼𑀥𑀸 𑀳𑁄𑀢𑀺, 𑀇𑀢𑀺 𑀯𑀘𑀦𑀜𑁆𑀘 𑀥𑀻𑀭𑁄 𑀯𑀺𑀪𑀸𑀯𑀬𑁂 𑀧𑀓𑀸𑀲𑁂𑀬𑁆𑀬.

𑁧𑁮𑁧. 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑁄 𑀪𑀺𑀓𑁆𑀔𑀼 𑀫𑀢𑀺𑀫𑀸 𑀇𑀫𑀲𑁆𑀫𑀺𑀁 𑀏𑀓𑀯𑀺𑀥𑀸𑀤𑀺𑀦𑀬𑁂 𑀓𑀼𑀲𑀮𑁄 𑀙𑁂𑀓𑁄 𑀳𑁄𑀢𑀺, 𑀅𑀪𑀺𑀥𑀫𑁆𑀫𑁂 𑀧𑀯𑀢𑁆𑀢𑀸 𑀅𑀢𑁆𑀣𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑀢𑁆𑀣𑀕𑀢𑀸 𑀳𑀢𑁆𑀣𑀧𑀯𑀺𑀝𑁆𑀞𑀸 𑀆𑀫𑀮𑀓𑀸 𑀯𑀺𑀬 𑀲𑀼𑀤𑁆𑀥𑀫𑀡𑀺𑀓𑀸 𑀯𑀺𑀬 𑀳𑁄𑀦𑁆𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀏𑀓𑀯𑀺𑀥𑀸𑀤𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.