𑁧𑁭. 𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀪𑀺𑀜𑁆𑀜𑀸𑀭𑀫𑁆𑀫𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧𑁦𑁪. 𑀅𑀦𑀸𑀕𑀢𑀁𑀲𑀜𑀸𑀡𑀜𑁆𑀘𑀸𑀢𑀺 𑀦 𑀆𑀕𑀢𑁄 𑀅𑀦𑀸𑀕𑀢𑁄, 𑀦 𑀢𑀸𑀯 𑀲𑀫𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄, 𑀅𑀦𑀸𑀕𑀢𑁂 𑀅𑀁𑀲𑀸 𑀓𑁄𑀝𑁆𑀞𑀸𑀲𑀸 𑀢𑁂𑀲𑀁 𑀜𑀸𑀡𑀁 𑀅𑀦𑀸𑀕𑀢𑀁𑀲𑀜𑀸𑀡𑀁. 𑀬𑀁 𑀬𑀁 𑀓𑀫𑁆𑀫𑀁 𑀬𑀣𑀸𑀓𑀫𑁆𑀫𑀁, 𑀢𑀁 𑀉𑀧𑀕𑀘𑁆𑀙𑀢𑀺 𑀚𑀸𑀦𑀸𑀢𑀻𑀢𑀺 𑀬𑀣𑀸𑀓𑀫𑁆𑀫𑀼𑀧𑀕𑀁, 𑀯𑀺𑀧𑀸𑀓𑀘𑁂𑀢𑀦𑀸𑀚𑀸𑀦𑀦𑀓𑀜𑀸𑀡𑀁.

𑁧𑁧𑁦𑁭-𑁯. 𑀢𑀢𑁆𑀣 𑀢𑁂𑀲𑀼 𑀆𑀭𑀫𑁆𑀫𑀡𑀢𑁆𑀢𑀺𑀓𑁂𑀲𑀼. 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸𑀢𑀺 𑀢𑀁 𑀓𑀸𑀬𑀁 𑀘𑀺𑀢𑁆𑀢𑀁 𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀭𑀺𑀢𑁆𑀯𑀸 𑀢𑀫𑁂𑀯 𑀓𑀸𑀬𑀘𑀺𑀢𑁆𑀢𑀘𑁂𑀢𑀲𑀺𑀓𑀯𑀲𑁂𑀦 𑀫𑀳𑀕𑁆𑀕𑀢𑁂 𑀘𑀺𑀢𑁆𑀢𑀲𑁆𑀫𑀺𑀁 𑀲𑀫𑀸𑀭𑁄𑀧𑁂𑀢𑀺 𑀜𑀸𑀡𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀁, 𑀢𑀢𑁄 𑀓𑀸𑀬𑀸𑀭𑀫𑁆𑀫𑀡𑀢𑁄 𑀓𑀸𑀬𑀲𑁆𑀲 𑀧𑀭𑀺𑀢𑁆𑀢𑀢𑁆𑀢𑀸 𑀓𑀸𑀫𑀸𑀯𑀘𑀭𑀢𑁆𑀢𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀜𑀸𑀡𑀁 𑀲𑀺𑀬𑀸.

𑁧𑁧𑁧𑁦-𑁩. 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦, 𑀕𑀦𑁆𑀢𑀼𑀓𑀸𑀫𑁄 𑀬𑀤𑀸 𑀪𑀯𑁂 𑀬𑁄 𑀬𑁄𑀕𑀻 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀦𑁆𑀢𑀼𑀓𑀸𑀫𑁄 𑀬𑀤𑀸 𑀪𑀯𑁂𑀬𑁆𑀬, 𑀲𑁄 𑀬𑁄𑀕𑀻 𑀢𑀤𑀸 𑀘𑀺𑀢𑁆𑀢𑀁 𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀭𑀽𑀧𑀓𑀸𑀬𑁂 𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀢𑀁 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀓𑀸𑀬𑀯𑀲𑁂𑀦 𑀓𑀸𑀬𑁂 𑀆𑀭𑁄𑀧𑁂𑀢𑀺, 𑀢𑀤𑀸 𑀛𑀸𑀦𑀸𑀭𑀫𑁆𑀫𑀡𑀢𑁄 𑀢𑀁 𑀜𑀸𑀡𑀁 𑀫𑀳𑀕𑁆𑀕𑀢𑀕𑁄𑀘𑀭𑀁 𑀳𑁄𑀢𑀺, 𑀬𑀁 𑀜𑀸𑀡𑀁 𑀬𑀤𑀸 𑀅𑀦𑀸𑀕𑀢𑀜𑁆𑀘 𑀥𑀫𑁆𑀫𑀚𑀸𑀢𑀁, 𑀅𑀢𑀻𑀢𑀜𑁆𑀘 𑀥𑀫𑁆𑀫𑀚𑀸𑀢𑀁 𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀤𑀸 𑀢𑀁 𑀜𑀸𑀡𑀁 𑀅𑀢𑀻𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀤𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀓𑀭𑀡𑀓𑀸𑀮𑁂 𑀅𑀦𑀸𑀕𑀢𑀕𑁄𑀘𑀭𑀁 𑀳𑁄𑀢𑀺. 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀫𑀦𑁂 𑀧𑀦 𑀲𑀢𑀺 𑀢𑀲𑁆𑀲 𑀬𑁄𑀕𑀺𑀦𑁄 𑀜𑀸𑀡𑀲𑁆𑀲 𑀕𑁄𑀘𑀭𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀇𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁧𑁧𑁧𑁪. 𑀓𑀸𑀬𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑁂 𑀆𑀭𑁄𑀧𑁂𑀢𑀺, 𑀘𑀺𑀢𑁆𑀢𑀁 𑀓𑀸𑀬𑀲𑁆𑀲 𑀯𑀲𑁂𑀦 𑀓𑀸𑀬𑁂 𑀆𑀭𑁄𑀧𑁂𑀢𑀺, 𑀇𑀢𑀺 𑀧𑀭𑀺𑀡𑀸𑀫𑀦𑀓𑀸𑀮𑀲𑁆𑀫𑀺𑀁 𑀢𑀲𑁆𑀲 𑀬𑁄𑀕𑀺𑀦𑁄 𑀜𑀸𑀡𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀲𑀺𑀬𑀸. 𑀲𑀫𑁆𑀧𑀯𑀢𑁆𑀢𑀢𑀺 𑀲𑀢𑁆𑀢𑀲𑀽𑀢𑀺 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀢𑀻𑀢𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑁂𑀲𑀼 𑀲𑀢𑁆𑀢𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀫𑁆𑀧𑀯𑀢𑁆𑀢𑀢𑀺.

𑁧𑁧𑁨𑁦. 𑀚𑀸𑀦𑀦𑁂 𑀫𑀚𑁆𑀛𑀺𑀫𑀸𑀦𑀦𑁆𑀢𑀺 𑀫𑀳𑀕𑁆𑀕𑀢𑀸𑀦𑀁 𑀚𑀸𑀦𑀦𑁂.

𑁧𑁧𑁨𑁨. 𑀏𑀢𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀫𑀕𑁆𑀕𑀸𑀭𑀫𑁆𑀫𑀡𑀢𑀸 𑀧𑀭𑀺𑀬𑀸𑀬𑁂𑀦 𑀏𑀯 𑀫𑀢𑀸 𑀜𑀸𑀢𑀸.

𑁧𑁧𑁨𑁬-𑁭. 𑀢𑀢𑁆𑀣 𑀢𑀺𑀓𑁆𑀔𑀡𑀲𑀫𑁆𑀧𑀢𑁆𑀢𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀔𑀡𑀸𑀤𑀺𑀓𑀁.

𑀢𑀢𑁆𑀣 𑀢𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀔𑀡𑀸𑀤𑀺𑀓𑀁 𑀢𑀺𑀓𑁆𑀔𑀡𑀲𑀫𑁆𑀧𑀢𑁆𑀢𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑀲𑀫𑁆𑀧𑀢𑁆𑀢𑀁 𑀔𑀡𑀸𑀤𑀺𑀓𑀁 𑀔𑀡𑀸𑀬𑁂𑀯 𑀢𑀁 𑀔𑀡𑀸𑀯𑀬𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀏𑀓𑀘𑀺𑀢𑁆𑀢𑀤𑁆𑀯𑀺𑀘𑀺𑀢𑁆𑀢𑀯𑀻𑀣𑀺𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀘𑁆𑀙𑀺𑀫𑀦𑁆𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁧𑁩𑁧-𑁨. 𑀬𑁂𑀦 𑀆𑀯𑀚𑁆𑀚𑀦𑀘𑀺𑀢𑁆𑀢𑁂𑀦 𑀥𑀫𑁆𑀫𑁂 𑀆𑀯𑀚𑁆𑀚𑀢𑀺, 𑀬𑁂𑀦 𑀘𑁂𑀢𑀲𑀸 𑀚𑀸𑀦𑀸𑀢𑀺, 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀆𑀯𑀚𑁆𑀚𑀦𑀚𑀯𑀦𑀘𑀺𑀢𑁆𑀢𑀸𑀦𑀁 𑀲𑀳𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀸 𑀢𑀁 ‘‘𑀔𑀡𑀸𑀤𑀺𑀓𑀢𑁆𑀢𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀓𑀁 ‘‘𑀏𑀓𑀲𑁆𑀲 𑀘𑀺𑀢𑁆𑀢𑀫𑁂𑀓𑁂𑀦, 𑀅𑀯𑀲𑁆𑀲𑀁 𑀧𑀦 𑀯𑀺𑀚𑁆𑀛𑀢𑀺’’𑀇𑀢𑀺 𑀧𑀭𑀺𑀬𑁄𑀲𑀸𑀦𑀁 𑀯𑀘𑀦𑀁 𑀦 𑀬𑀼𑀚𑁆𑀚𑀢𑀺. 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀦𑀸𑀦𑀸𑀭𑀫𑁆𑀫𑀡𑀪𑀸𑀯𑀁 𑀧𑀢𑁆𑀢𑀺𑀢𑁄 𑀆𑀧𑀚𑁆𑀚𑀦𑀢𑁄 𑀘 𑀦 𑀬𑀼𑀚𑁆𑀚𑀢𑀺. 𑀅𑀦𑀺𑀝𑁆𑀞𑁂 𑀧𑀦 𑀞𑀸𑀦𑁂 𑀢𑁂𑀲𑀁 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀏𑀓𑀸𑀭𑀫𑁆𑀫𑀡𑀪𑀸𑀯𑁂 𑀅𑀦𑀺𑀘𑁆𑀙𑀺𑀢𑁂 𑀢𑀲𑁆𑀫𑀺𑀁 𑀞𑀸𑀦𑁂 𑀦 𑀬𑀼𑀚𑁆𑀚𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀫𑀕𑁆𑀕𑀯𑀻𑀣𑀺𑀬𑀁 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀚𑀯𑀦𑀸𑀦𑀁 𑀓𑀲𑀺𑀡𑀸𑀤𑀺𑀓𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀕𑁄𑀢𑁆𑀭𑀪𑀼𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀢𑁆𑀣 𑀆𑀭𑀫𑁆𑀫𑀡𑀚𑀯𑀦𑀸𑀦𑀁 𑀏𑀓𑀸𑀭𑀫𑁆𑀫𑀡𑀢𑀸 𑀅𑀦𑀺𑀘𑁆𑀙𑀢𑀸.

𑁧𑁧𑁩𑁪-𑁪𑁧. ‘‘𑀏𑀓𑀩𑁆𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀘𑁆𑀙𑀺𑀫’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀅𑀤𑁆𑀥𑀸𑀔𑁆𑀬𑀁 𑀅𑀤𑁆𑀥𑀸𑀦𑀸𑀫 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀚𑀯𑀦𑀯𑀸𑀭𑀢𑁄 𑀤𑀻𑀧𑁂𑀢𑀩𑁆𑀩𑀁. 𑀇𑀢𑀺 𑀯𑀘𑀦𑀁 𑀦𑀺𑀤𑁆𑀤𑀺𑀝𑁆𑀞𑀁. 𑀬𑀤𑀸 𑀇𑀤𑁆𑀥𑀺𑀫𑀸 𑀬𑁄𑀕𑀻 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀜𑀸𑀢𑀼𑀁 𑀆𑀯𑀚𑁆𑀚𑀢𑀺, 𑀢𑀲𑁆𑀲 𑀆𑀯𑀚𑁆𑀚𑀦𑀫𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀔𑀡𑀯𑁆𑀳𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺, 𑀢𑁂𑀲𑀼 𑀦𑀺𑀭𑀼𑀤𑁆𑀥𑁂𑀲𑀼 𑀢𑀲𑁆𑀲 𑀬𑁄𑀕𑀺𑀦𑁄 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀸𑀬𑀦𑁆𑀢𑀺. 𑀏𑀢𑁂𑀲𑀁 𑀘𑀢𑀼𑀦𑁆𑀦𑀁, 𑀧𑀜𑁆𑀘𑀦𑁆𑀦𑀁 𑀚𑀯𑀦𑀸𑀦𑀁 𑀬𑀁 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁 𑀇𑀤𑁆𑀥𑀺𑀘𑀺𑀢𑁆𑀢𑀫𑀼𑀤𑀻𑀭𑀺𑀢𑀁. 𑀇𑀤𑁆𑀥𑀺𑀘𑀺𑀢𑁆𑀢𑀢𑁄 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺. 𑀏𑀢𑁂𑀲𑀁 𑀓𑀸𑀫𑀸𑀯𑀘𑀭𑁂 𑀇𑀤𑁆𑀥𑀺𑀚𑀯𑀦𑀸𑀦𑀁 𑀢𑀤𑁂𑀯 𑀘 𑀧𑀭𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺 𑀬𑀲𑁆𑀫𑀸, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀚𑀯𑀦𑀸𑀦𑀺 𑀏𑀓𑀸𑀭𑀫𑁆𑀫𑀡𑀢𑀁 𑀬𑀦𑁆𑀢𑀺, 𑀢𑁂𑀲𑀁 𑀚𑀯𑀦𑀸𑀦𑀁 𑀦𑀸𑀦𑀸𑀭𑀫𑁆𑀫𑀡𑀢𑀸 𑀅𑀤𑁆𑀥𑀸𑀯𑀲𑀸 𑀦 𑀪𑀯𑁂𑀬𑁆𑀬, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁄 𑀢𑁂𑀲𑀁 𑀚𑀯𑀦𑀸𑀦𑀁 𑀏𑀓𑀸𑀭𑀫𑁆𑀫𑀡𑀪𑀸𑀯𑁂𑀧𑀺 𑀇𑀤𑁆𑀥𑀺𑀫𑀸𑀦𑀲𑀫𑁂𑀯 𑀘 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺. 𑀇𑀢𑀭𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺 𑀧𑀦 𑀘𑀺𑀢𑁆𑀢𑀸𑀦𑀺 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀦𑁆𑀢𑀺. 𑀬𑀣𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀼 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀁 𑀧𑀲𑁆𑀲𑀢𑀺, 𑀢𑀣𑀸 𑀇𑀢𑀭𑀁 𑀘𑀺𑀢𑁆𑀢𑀁 𑀦 𑀧𑀲𑁆𑀲𑀢𑀺.

𑁧𑁧𑁬𑁧. 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀸𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀅𑀦𑀸𑀕𑀢𑀁 𑀥𑀫𑁆𑀫𑀁 𑀅𑀕𑁄𑀘𑀭𑀁, 𑀕𑁄𑀘𑀭𑀁 𑀦 𑀳𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑁧𑁧𑁬𑁯. 𑀯𑀺𑀯𑀺𑀥𑀢𑁆𑀣𑀸𑀦𑀺 𑀯𑀡𑁆𑀡𑀧𑀤𑀸𑀦𑀺 𑀬𑀲𑁆𑀫𑀺𑀁 𑀲𑁄 𑀯𑀺𑀯𑀺𑀥𑀢𑁆𑀣𑀯𑀡𑁆𑀡𑀧𑀤𑁄, 𑀢𑀁 𑀫𑀥𑀼𑀭𑀢𑁆𑀣𑀫𑀢𑀺𑀦𑀻𑀳𑀭𑀁 𑀉𑀢𑁆𑀢𑀫𑀁 𑀲𑁄𑀢𑀼𑀚𑀦𑀲𑁆𑀲 𑀳𑀤𑀬𑀁 𑀧𑀻𑀢𑀺𑀓𑀭𑀁 𑀲𑀘𑁂𑀢𑀦𑁄 𑀓𑁄 𑀦𑀸𑀫 𑀫𑀦𑀼𑀚𑁄 𑀦 𑀲𑀼𑀡𑁂𑀬𑁆𑀬.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀅𑀪𑀺𑀜𑁆𑀜𑀸𑀭𑀫𑁆𑀫𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.