𑁧𑁩. 𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀸𑀭𑀓𑀧𑀝𑀺𑀯𑁂𑀥𑀯𑀡𑁆𑀡𑀦𑀸

𑀯𑁂𑀤𑀓𑀲𑁆𑀲𑀸𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀓𑀲𑁆𑀲. 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀻𑀦𑀦𑁆𑀢𑀺 𑀢𑁂𑀲𑀁 𑀆𑀬𑀢𑁆𑀢𑀸 𑀧𑀝𑀺𑀩𑀤𑁆𑀥𑀸 𑀬𑁂𑀲𑀁 𑀯𑀺𑀧𑀸𑀓𑀸𑀦𑀁 𑀢𑁂 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄, 𑀢𑁂𑀲𑀁. 𑀅𑀢𑁆𑀭 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀘𑀭𑀺𑀬𑁂𑀦 𑀧𑀭𑀺𑀳𑀸𑀭𑁄 𑀯𑀼𑀘𑁆𑀘𑀢𑁂. 𑀓𑀼𑀢𑁄𑀬𑀁 𑀢𑀯 𑀢𑀢𑁆𑀣𑀸𑀦𑀼𑀭𑁄𑀥𑁄𑀢𑀺 𑀢𑀢𑁆𑀣 𑀢𑀲𑁆𑀫𑀺𑀁 𑀅𑀜𑁆𑀜𑀲𑁆𑀲 𑀅𑀢𑁆𑀢𑀓𑀸𑀭𑀓𑀲𑁆𑀲 𑀅𑀪𑀸𑀯𑁂𑀧𑀺 𑀲𑀢𑁆𑀢𑀼𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀪𑀸𑀯𑁂𑀧𑀺 𑀅𑀬𑀁 𑀢𑀯 𑀅𑀦𑀼𑀭𑁄𑀥𑁄 𑀅𑀦𑀼𑀦𑀬𑁄 𑀓𑀼𑀢𑁄 𑀓𑁂𑀦 𑀓𑀸𑀭𑀡𑁂𑀦 𑀇𑀥 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀓𑀢𑁆𑀢𑀭𑀺 𑀓𑀼𑀲𑀮𑀸𑀤𑀻𑀦𑀁 𑀅𑀢𑁆𑀣𑀺𑀪𑀸𑀯𑁂 𑀓𑀫𑁆𑀫𑀯𑀺𑀭𑁄𑀥𑁄 𑀓𑀼𑀢𑁄 𑀓𑁂𑀦 𑀓𑀸𑀭𑀡𑁂𑀦. 𑀅𑀣𑀸𑀧𑀻𑀢𑀺 𑀅𑀧𑀭𑁄 𑀦𑀬𑁄𑀧𑀺. 𑀓𑀺𑀜𑁆𑀘𑁂𑀢𑁆𑀣𑀸𑀢𑀺 𑀏𑀢𑁆𑀣 𑀏𑀢𑀺𑀲𑁆𑀲𑀁 𑀘𑁄𑀤𑀦𑀸𑀬𑀁 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀅𑀯𑀲𑀺𑀝𑁆𑀞𑀁 𑀢𑀸𑀯 𑀩𑁆𑀭𑀽𑀳𑀺, 𑀅𑀧𑀭𑀺𑀲𑀫𑀢𑁆𑀢𑀸 𑀢𑁂 𑀘𑁄𑀤𑀦𑀸. 𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄. 𑀓𑀸𑀭𑀓𑀯𑁂𑀤𑀓𑀢𑁆𑀢𑀸𑀪𑀸𑀯𑁄𑀢𑀺 𑀓𑀸𑀭𑀓𑀯𑁂𑀤𑀓𑀢𑁆𑀢𑀲𑁆𑀲 𑀅𑀪𑀸𑀯𑁄 𑀲𑀺𑀬𑀸.

𑀅𑀣 𑀦 𑀪𑀯𑀢𑀻𑀢𑀺 𑀅𑀢𑁆𑀢𑀦𑁄 𑀅𑀦𑀸𑀲𑁂 𑀘𑁂𑀢𑀦𑀸𑀧𑀺 𑀅𑀦𑀸𑀲𑁄 𑀬𑀤𑀺 𑀦 𑀪𑀯𑀢𑀺. 𑀧𑀝𑀺𑀜𑁆𑀜𑀸 𑀳𑀻𑀦𑀸𑀢𑀺 ‘‘𑀘𑁂𑀢𑀦𑀸𑀬 𑀅𑀦𑀜𑁆𑀜𑁄 𑀅𑀢𑁆𑀢𑀸’’𑀢𑀺 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄𑀢𑀺 ‘‘𑀅𑀢𑁆𑀢𑀦𑁄 𑀅𑀦𑀸𑀲𑁂 𑀘𑁂𑀢𑀦𑀸𑀬 𑀦𑀸𑀲𑁄 𑀦 𑀪𑀯𑀢𑀺’’𑀇𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄. 𑀯𑀺𑀧𑀭𑀻𑀢𑀦𑁆𑀢𑀺 ‘‘𑀅𑀢𑁆𑀢𑀦𑁄 𑀅𑀦𑀸𑀲𑁂 𑀘𑁂𑀢𑀦𑀸𑀬 𑀅𑀦𑀸𑀲𑁄’’𑀇𑀢𑀺 𑀯𑀺𑀧𑀭𑀻𑀢𑀕𑁆𑀕𑀳𑀡𑀁 𑀲𑀺𑀬𑀸. 𑀅𑀢𑁆𑀢𑀸 𑀦𑀲𑁆𑀲𑀢𑀼, 𑀘𑁂𑀢𑀦𑀸 𑀢𑀺𑀝𑁆𑀞𑀢𑀼, 𑀅𑀣 𑀧𑀦 𑀏𑀯𑀁 𑀦 𑀪𑀯𑀢𑀻𑀢𑀺 𑀅𑀢𑁆𑀢𑀸 𑀦𑀲𑁆𑀲𑀢𑀼, 𑀘𑁂𑀢𑀦𑀸 𑀢𑀺𑀝𑁆𑀞𑀢𑀼, 𑀏𑀯𑀁 𑀕𑀳𑀡𑀁 𑀧𑀦 𑀦 𑀪𑀯𑀢𑀺. 𑀅𑀦𑀜𑁆𑀜𑀢𑁆𑀢𑀧𑀓𑁆𑀔𑀁 𑀧𑀭𑀺𑀘𑁆𑀘𑀚 𑀧𑀭𑀺𑀘𑁆𑀘𑀚𑀸𑀳𑀺 ‘‘𑀘𑁂𑀢𑀦𑀸𑀬 𑀅𑀦𑀜𑁆𑀜𑁄 𑀅𑀢𑁆𑀢𑀸’’𑀢𑀺. 𑀧𑀝𑀺𑀜𑁆𑀜𑀸 𑀳𑀻𑀦𑀸 𑀬𑀲𑁆𑀲 𑀲𑁄 𑀧𑀝𑀺𑀜𑁆𑀜𑀸𑀳𑀻𑀦𑁄.

𑀉𑀪𑀺𑀦𑁆𑀦𑀁 𑀘𑁂𑀢𑀦𑀢𑁆𑀢𑀸𑀦𑀁 𑀏𑀓𑀤𑁂𑀲𑀢𑀸 𑀏𑀓𑀤𑁂𑀲𑀪𑀸𑀯𑁄 𑀦𑀢𑁆𑀣𑀺. 𑀏𑀯𑀜𑁆𑀘 𑀲𑀢𑀻𑀢𑀺 𑀏𑀯𑀁 𑀉𑀪𑀺𑀦𑁆𑀦𑀁 𑀏𑀓𑀤𑁂𑀲𑀲𑁆𑀲 𑀅𑀪𑀸𑀯𑁂 𑀲𑀢𑀺 𑀓𑁄 𑀤𑁄𑀲𑁄 𑀇𑀢𑀺 𑀢𑁆𑀯𑀁 𑀘𑁂 𑀯𑀤𑁂𑀬𑁆𑀬𑀸𑀲𑀺. 𑀬𑀁 𑀧𑀦 𑀢𑀬𑀸 𑀯𑀼𑀢𑁆𑀢𑀁 𑀬𑀣𑀸 𑀭𑀽𑀧𑀭𑀲𑀕𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀦𑁆𑀢𑀺 𑀬𑀁 𑀯𑀘𑀦𑀁 𑀧𑀦 𑀢𑀬𑀸 𑀯𑀼𑀢𑁆𑀢𑀁, 𑀢𑀁 𑀯𑀘𑀦𑀁 𑀅𑀬𑀼𑀢𑁆𑀢𑀁, 𑀦𑀸𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀢𑀯 𑀧𑀝𑀺𑀜𑁆𑀜𑀸 𑀳𑀻𑀦𑀸𑀢𑀺 ‘‘𑀏𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀁 𑀘𑁂𑀢𑀦𑀢𑁆𑀢𑀸𑀦𑀁 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢’’𑀦𑁆𑀢𑀺 𑀧𑀝𑀺𑀜𑁆𑀜𑀸 𑀳𑀻𑀦𑀸.

𑀏𑀯𑀜𑁆𑀘 𑀲𑀢𑀻𑀢𑀺 𑀏𑀢𑀁 𑀘𑁂𑀢𑀦𑀸𑀬 𑀅𑀜𑁆𑀜𑀪𑀸𑀯𑁂 𑀲𑀢𑀺 𑀓𑁄 𑀤𑁄𑀲𑁄 𑀇𑀢𑀺 𑀘𑁂 𑀪𑀯𑀁 𑀯𑀤𑁂𑀬𑁆𑀬. ‘‘𑀅𑀘𑁂𑀢𑀦𑁄 𑀅𑀢𑁆𑀢𑀸’’𑀢𑀺 𑀯𑀘𑀦𑀁, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀢𑁄𑀢𑀺 ‘‘𑀧𑀸𑀓𑀸𑀭𑀢𑀭𑀼𑀧𑀸𑀲𑀸𑀡𑀢𑀺𑀡𑀲𑀤𑀺𑀲𑁄 𑀲𑀺𑀬𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀢𑁄.

𑁭𑁮𑁦. 𑀅𑀢𑁆𑀣𑀺 𑀲𑀢𑁆𑀢𑁄𑀧𑀧𑀸𑀢𑀺𑀓𑁄𑀢𑀺 𑀑𑀧𑀧𑀸𑀢𑀺𑀓𑀸 𑀲𑀢𑁆𑀢𑀸 𑀅𑀢𑁆𑀣𑀺.

𑁭𑁮𑁧. 𑀪𑀸𑀭𑀸𑀤𑀸𑀦𑀦𑁆𑀢𑀺 𑀪𑀸𑀭𑀕𑁆𑀕𑀳𑀡𑀁. 𑀪𑀸𑀭𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀪𑀸𑀭𑁄𑀭𑁄𑀧𑀦𑀁.

𑁭𑁮𑁩. 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀝𑁆𑀞𑀺𑀲𑀜𑁆𑀘𑀬𑁄 𑀅𑀝𑁆𑀞𑀺𑀲𑀫𑀽𑀳𑁄 𑀏𑀓𑁂𑀦 𑀓𑀧𑁆𑀧𑁂𑀦 𑀧𑀩𑁆𑀩𑀢𑀲𑀫𑁄 𑀭𑀸𑀲𑀺 𑀲𑀺𑀬𑀸.

𑁭𑁮𑁫. 𑀪𑁄 𑀫𑀸𑀭, 𑀢𑁆𑀯𑀁 𑀲𑀢𑁆𑀢𑁄 𑀇𑀢𑀺 𑀧𑀘𑁆𑀘𑁂𑀲𑀺, 𑀓𑀁 𑀲𑀤𑁆𑀤𑀳𑀲𑀺, ‘‘𑀲𑀢𑁆𑀢𑁄’’𑀢𑀺 𑀕𑀳𑀡𑀁 𑀢𑁂 𑀢𑀯 𑀤𑀺𑀝𑁆𑀞𑀺𑀕𑀢𑀁, 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄 𑀅𑀬𑀁, 𑀇𑀥 𑀮𑁄𑀓𑁂 𑀲𑀢𑁆𑀢𑁄 𑀦 𑀉𑀧𑀮𑀩𑁆𑀪𑀢𑀺.

𑁭𑁮𑁭. 𑀬𑁄 𑀪𑀺𑀓𑁆𑀔𑀼 𑀇𑀫𑀁 𑀕𑀦𑁆𑀣𑀁 𑀅𑀘𑁆𑀘𑀦𑁆𑀢𑀁 𑀲𑀢𑀢𑀫𑁆𑀧𑀺 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀫𑀸 𑀧𑀜𑁆𑀜𑀸 𑀯𑁂𑀧𑀼𑀮𑀁 𑀯𑀺𑀧𑀼𑀮𑀪𑀸𑀯𑀁 𑀕𑀘𑁆𑀙𑀢𑀺.

𑁭𑁮𑁮. 𑀬𑁄 𑀪𑀺𑀓𑁆𑀔𑀼 𑀇𑀫𑀁 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀁 𑀅𑀢𑀺𑀫𑀢𑀺𑀓𑀭𑀁 𑀉𑀢𑁆𑀢𑀫𑀁 𑀅𑀪𑀺𑀜𑁆𑀜𑀸𑀡𑀓𑀭𑀁 𑀯𑀺𑀫𑀢𑀺𑀯𑀺𑀦𑀸𑀲𑀓𑀭𑀁 𑀓𑀗𑁆𑀔𑀘𑁆𑀙𑁂𑀤𑀓𑀭𑀁 𑀧𑀺𑀬𑀓𑁆𑀓𑀭𑀁 𑀧𑁂𑀫𑀓𑀭𑀁 𑀲𑀤𑀸 𑀧𑀞𑀢𑀺, 𑀲𑀼𑀡𑀸𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑀺 𑀇𑀥 𑀲𑀸𑀲𑀦𑁂 𑀞𑀺𑀢𑁂 𑀯𑀺𑀓𑀲𑀢𑀺 𑀧𑀝𑀺𑀨𑀼𑀮𑁆𑀮𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀓𑀸𑀭𑀓𑀧𑀝𑀺𑀯𑁂𑀥𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.