𑁯. 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧. 𑀇𑀢𑁄 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀢𑁄 𑀧𑀭𑀁 𑀦𑀻𑀯𑀭𑀡𑀸𑀦𑀁 𑀲𑀫𑀦𑀝𑁆𑀞𑁂𑀦 𑀲𑀫𑀣𑀲𑀗𑁆𑀔𑀸𑀢𑀸𑀦𑀁, 𑀅𑀦𑀺𑀘𑁆𑀘𑀸𑀤𑀺𑀯𑀺𑀯𑀺𑀥𑀸𑀓𑀸𑀭𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀪𑀸𑀯𑀦𑀸𑀦𑀁 𑀤𑀼𑀯𑀺𑀥𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀤𑀼𑀯𑀺𑀥𑀪𑀸𑀯𑀦𑀸𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀓𑀫𑁆𑀫𑀝𑁆𑀞𑀸𑀦𑀪𑀽𑀢𑀫𑀸𑀭𑀫𑁆𑀫𑀡𑀁 𑀉𑀢𑁆𑀢𑀭𑀼𑀢𑁆𑀢𑀭𑀬𑁄𑀕𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑀸𑀬 𑀓𑀫𑁆𑀫𑀝𑁆𑀞𑀸𑀦𑀪𑀽𑀢𑀁 𑀪𑀸𑀯𑀦𑀸𑀯𑀻𑀣𑀺𑀜𑁆𑀘 𑀬𑀣𑀸𑀓𑁆𑀓𑀫𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀓𑁆𑀓𑀫𑁂𑀦 𑀧𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸.

𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁

𑀘𑀭𑀺𑀢𑀪𑁂𑀤𑀯𑀡𑁆𑀡𑀦𑀸

𑁩. 𑀭𑀸𑀕𑁄 𑀯 𑀘𑀭𑀺𑀢𑀸 𑀧𑀓𑀢𑀻𑀢𑀺 𑀭𑀸𑀕𑀘𑀭𑀺𑀢𑀸. 𑀏𑀯𑀁 𑀤𑁄𑀲𑀘𑀭𑀺𑀢𑀸𑀤𑀬𑁄𑀧𑀺. 𑀘𑀭𑀺𑀢𑀲𑀗𑁆𑀕𑀳𑁄𑀢𑀺 𑀫𑀽𑀮𑀘𑀭𑀺𑀢𑀯𑀲𑁂𑀦 𑀧𑀼𑀕𑁆𑀕𑀮𑀲𑀗𑁆𑀕𑀳𑁄, 𑀲𑀁𑀲𑀕𑁆𑀕𑀯𑀲𑁂𑀦 𑀧𑀦 𑀢𑁂𑀲𑀝𑁆𑀞𑀺 𑀘𑀭𑀺𑀢𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀭𑀸𑀕𑀸𑀤𑀺𑀓𑁂 𑀢𑀺𑀓𑁂 𑀲𑀢𑁆𑀢, 𑀲𑀢𑁆𑀢 𑀲𑀤𑁆𑀥𑀸𑀤𑀺𑀓𑁂 𑀢𑀺𑀓𑁂;

𑀏𑀓𑀤𑁆𑀯𑀺𑀢𑀺𑀓𑀫𑀽𑀮𑀫𑁆𑀳𑀺, 𑀫𑀺𑀲𑁆𑀲𑀢𑁄 𑀲𑀢𑁆𑀢𑀲𑀢𑁆𑀢𑀓’’𑀦𑁆𑀢𑀺.

𑀏𑀢𑁆𑀣 𑀳𑀺 𑀭𑀸𑀕𑀘𑀭𑀺𑀢𑀸 𑀤𑁄𑀲𑀘𑀭𑀺𑀢𑀸 𑀫𑁄𑀳𑀘𑀭𑀺𑀢𑀸 𑀭𑀸𑀕𑀤𑁄𑀲𑀘𑀭𑀺𑀢𑀸 𑀭𑀸𑀕𑀫𑁄𑀳𑀘𑀭𑀺𑀢𑀸 𑀤𑁄𑀲𑀫𑁄𑀳𑀘𑀭𑀺𑀢𑀸 𑀭𑀸𑀕𑀤𑁄𑀲𑀫𑁄𑀳𑀘𑀭𑀺𑀢𑀸𑀢𑀺 𑀏𑀯𑀁 𑀭𑀸𑀕𑀸𑀤𑀺𑀓𑁂 𑀢𑀺𑀓𑁂 𑀲𑀢𑁆𑀢𑀓𑀫𑁂𑀓𑀁. 𑀢𑀣𑀸 𑀲𑀤𑁆𑀥𑀸𑀘𑀭𑀺𑀢𑀸 𑀩𑀼𑀤𑁆𑀥𑀺𑀘𑀭𑀺𑀢𑀸 𑀯𑀺𑀢𑀓𑁆𑀓𑀘𑀭𑀺𑀢𑀸 𑀲𑀤𑁆𑀥𑀸𑀩𑀼𑀤𑁆𑀥𑀺𑀘𑀭𑀺𑀢𑀸 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀘𑀭𑀺𑀢𑀸 𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀘𑀭𑀺𑀢𑀸 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀘𑀭𑀺𑀢𑀸𑀢𑀺 𑀲𑀤𑁆𑀥𑀸𑀤𑀺𑀓𑁂𑀧𑀺 𑀢𑀺𑀓𑁂 𑀏𑀓𑀦𑁆𑀢𑀺 𑀏𑀯𑀁 𑀤𑁆𑀯𑁂 𑀢𑀺𑀓𑁂 𑀅𑀫𑀺𑀲𑁆𑀲𑁂𑀢𑁆𑀯𑀸 𑀘𑀼𑀤𑁆𑀤𑀲 𑀘𑀭𑀺𑀢𑀸 𑀳𑁄𑀦𑁆𑀢𑀺. 𑀭𑀸𑀕𑀸𑀤𑀺𑀢𑀺𑀓𑁂 𑀧𑀦 𑀏𑀓𑀤𑁆𑀯𑀺𑀢𑀺𑀓𑀫𑀽𑀮𑀯𑀲𑁂𑀦 𑀲𑀤𑁆𑀥𑀸𑀤𑀺𑀢𑀺𑀓𑁂𑀦 𑀲𑀳 𑀬𑁄𑀚𑀺𑀢𑁂 𑀭𑀸𑀕𑀲𑀤𑁆𑀥𑀸𑀘𑀭𑀺𑀢𑀸 𑀭𑀸𑀕𑀩𑀼𑀤𑁆𑀥𑀺𑀘𑀭𑀺𑀢𑀸 𑀭𑀸𑀕𑀯𑀺𑀢𑀓𑁆𑀓𑀘𑀭𑀺𑀢𑀸 𑀭𑀸𑀕𑀲𑀤𑁆𑀥𑀸𑀩𑀼𑀤𑁆𑀥𑀺𑀘𑀭𑀺𑀢𑀸 𑀭𑀸𑀕𑀲𑀤𑁆𑀥𑀸𑀯𑀺𑀢𑀓𑁆𑀓𑀘𑀭𑀺𑀢𑀸 𑀭𑀸𑀕𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀘𑀭𑀺𑀢𑀸 𑀭𑀸𑀕𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀘𑀭𑀺𑀢𑀸𑀢𑀺 𑀭𑀸𑀕𑀫𑀽𑀮𑀦𑀬𑁂 𑀏𑀓𑀁 𑀲𑀢𑁆𑀢𑀓𑀁, 𑀢𑀣𑀸 ‘‘𑀤𑁄𑀲𑀲𑀤𑁆𑀥𑀸𑀘𑀭𑀺𑀢𑀸 𑀤𑁄𑀲𑀩𑀼𑀤𑁆𑀥𑀺𑀘𑀭𑀺𑀢𑀸 𑀤𑁄𑀲𑀯𑀺𑀢𑀓𑁆𑀓𑀘𑀭𑀺𑀢𑀸’’𑀢𑁆𑀬𑀸𑀤𑀺𑀦𑀸 𑀤𑁄𑀲𑀫𑀽𑀮𑀦𑀬𑁂𑀧𑀺 𑀏𑀓𑀁, ‘‘𑀫𑁄𑀳𑀲𑀤𑁆𑀥𑀸𑀘𑀭𑀺𑀢𑀸’’𑀢𑁆𑀬𑀸𑀤𑀺𑀦𑀸 𑀫𑁄𑀳𑀫𑀽𑀮𑀦𑀬𑁂𑀧𑀺 𑀏𑀓𑀦𑁆𑀢𑀺 𑀏𑀯𑀁 𑀏𑀓𑀫𑀽𑀮𑀦𑀬𑁂 𑀲𑀢𑁆𑀢𑀓𑀢𑁆𑀢𑀬𑀁 𑀳𑁄𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀤𑁆𑀯𑀺𑀫𑀽𑀮𑀓𑀦𑀬𑁂𑀧𑀺 ‘‘𑀭𑀸𑀕𑀤𑁄𑀲𑀲𑀤𑁆𑀥𑀸𑀘𑀭𑀺𑀢𑀸 𑀭𑀸𑀕𑀤𑁄𑀲𑀩𑀼𑀤𑁆𑀥𑀺𑀘𑀭𑀺𑀢𑀸 𑀭𑀸𑀕𑀤𑁄𑀲𑀯𑀺𑀢𑀓𑁆𑀓𑀘𑀭𑀺𑀢𑀸’’𑀢𑁆𑀬𑀸𑀤𑀺𑀦𑀸 𑀲𑀢𑁆𑀢𑀓𑀢𑁆𑀢𑀬𑀁. 𑀢𑀺𑀫𑀽𑀮𑀓𑀦𑀬𑁂 𑀧𑀦 ‘‘𑀭𑀸𑀕𑀤𑁄𑀲𑀫𑁄𑀳𑀲𑀤𑁆𑀥𑀸𑀘𑀭𑀺𑀢𑀸’’𑀢𑁆𑀬𑀸𑀤𑀺𑀦𑀸 𑀏𑀓𑀁 𑀲𑀢𑁆𑀢𑀓𑀦𑁆𑀢𑀺 𑀏𑀯𑀁 𑀫𑀺𑀲𑁆𑀲𑀢𑁄 𑀲𑀢𑁆𑀢𑀲𑀢𑁆𑀢𑀓𑀯𑀲𑁂𑀦 𑀏𑀓𑀽𑀦𑀧𑀜𑁆𑀜𑀸𑀲 𑀘𑀭𑀺𑀢𑀸 𑀳𑁄𑀦𑁆𑀢𑀺. 𑀇𑀢𑀺 𑀇𑀫𑀸 𑀏𑀓𑀽𑀦𑀧𑀜𑁆𑀜𑀸𑀲, 𑀧𑀼𑀭𑀺𑀫𑀸 𑀘 𑀘𑀼𑀤𑁆𑀤𑀲𑀸𑀢𑀺 𑀢𑁂𑀲𑀝𑁆𑀞𑀺 𑀘𑀭𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀓𑁂𑀘𑀺 𑀧𑀦 𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 ‘‘𑀘𑀢𑀼𑀲𑀝𑁆𑀞𑀻’’𑀢𑀺 𑀯𑀡𑁆𑀡𑁂𑀦𑁆𑀢𑀺.

𑀘𑀭𑀺𑀢𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀸𑀯𑀦𑀸𑀪𑁂𑀤𑀯𑀡𑁆𑀡𑀦𑀸

𑁪. 𑀪𑀸𑀯𑀦𑀸𑀬 𑀧𑀝𑀺𑀲𑀗𑁆𑀔𑀸𑀭𑀓𑀫𑁆𑀫𑀪𑀽𑀢𑀸, 𑀆𑀤𑀺𑀓𑀫𑁆𑀫𑀪𑀽𑀢𑀸 𑀯𑀸 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 𑀦𑀸𑀫. 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀢𑁄 𑀧𑀝𑁆𑀞𑀸𑀬 𑀕𑁄𑀢𑁆𑀭𑀪𑀽𑀧𑀭𑀺𑀬𑁄𑀲𑀸𑀦𑀸 𑀓𑀸𑀫𑀸𑀯𑀘𑀭𑀪𑀸𑀯𑀦𑀸 𑀉𑀧𑀘𑀸𑀭𑀪𑀸𑀯𑀦𑀸 𑀦𑀸𑀫. 𑀅𑀧𑁆𑀧𑀦𑀸𑀬 𑀲𑀫𑀻𑀧𑀘𑀸𑀭𑀺𑀢𑁆𑀢𑀸 𑀕𑀸𑀫𑀽𑀧𑀘𑀸𑀭𑀸𑀤𑀬𑁄 𑀯𑀺𑀬. 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸 𑀅𑀧𑁆𑀧𑀦𑀸𑀪𑀸𑀯𑀦𑀸 𑀦𑀸𑀫 𑀅𑀧𑁆𑀧𑀦𑀸𑀲𑀗𑁆𑀔𑀸𑀢𑀯𑀺𑀢𑀓𑁆𑀓𑀧𑀫𑀼𑀔𑀢𑁆𑀢𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀆𑀭𑀫𑁆𑀫𑀡𑁂 𑀅𑀧𑁆𑀧𑁂𑀦𑁆𑀢𑁄 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀯𑀺𑀢𑀓𑁆𑀓𑁄 𑀅𑀧𑁆𑀧𑀦𑀸. 𑀢𑀣𑀸 𑀳𑀺 𑀲𑁄 ‘‘𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸’’𑀢𑀺 (𑀥. 𑀲. 𑁭) 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀧𑁆𑀧𑀫𑀼𑀔𑀢𑀸𑀯𑀲𑁂𑀦 𑀧𑀦 𑀲𑀩𑁆𑀩𑁂𑀧𑀺 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀛𑀸𑀦𑀥𑀫𑁆𑀫𑀸 ‘‘𑀅𑀧𑁆𑀧𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀪𑀸𑀯𑀦𑀸𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀫𑀺𑀢𑁆𑀢𑀪𑁂𑀤𑀯𑀡𑁆𑀡𑀦𑀸

𑁫. 𑀧𑀭𑀺𑀓𑀫𑁆𑀫𑀲𑁆𑀲 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀢𑁆𑀢𑀸𑀢𑀺 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀁, 𑀓𑀲𑀺𑀡𑀫𑀡𑁆𑀟𑀮𑀸𑀤𑀺. 𑀢𑀤𑁂𑀯 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁 𑀯𑀺𑀬 𑀫𑀦𑀲𑀸 𑀉𑀕𑁆𑀕𑀳𑁂𑀢𑀩𑁆𑀩𑀁 𑀦𑀺𑀫𑀺𑀢𑁆𑀢𑀁, 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀯𑀸 𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁. 𑀢𑀧𑁆𑀧𑀝𑀺𑀪𑀸𑀕𑀁 𑀯𑀡𑁆𑀡𑀸𑀤𑀺𑀓𑀲𑀺𑀡𑀤𑁄𑀲𑀭𑀳𑀺𑀢𑀁 𑀦𑀺𑀫𑀺𑀢𑁆𑀢𑀁 𑀉𑀧𑀘𑀸𑀭𑀧𑁆𑀧𑀦𑀸𑀦𑀁 𑀆𑀭𑀫𑁆𑀫𑀡𑀢𑁆𑀢𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁.

𑁬. 𑀧𑀣𑀯𑀻𑀬𑁂𑀯 𑀓𑀲𑀺𑀡𑀁 𑀏𑀓𑀤𑁂𑀲𑁂 𑀅𑀝𑁆𑀞𑀢𑁆𑀯𑀸 𑀅𑀦𑀦𑁆𑀢𑀲𑁆𑀲 𑀨𑀭𑀺𑀢𑀩𑁆𑀩𑀢𑀸𑀬 𑀲𑀓𑀮𑀝𑁆𑀞𑁂𑀦𑀸𑀢𑀺 𑀧𑀣𑀯𑀻𑀓𑀲𑀺𑀡𑀁, 𑀓𑀲𑀺𑀡𑀫𑀡𑁆𑀟𑀮𑀁. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀜𑁆𑀘 𑀛𑀸𑀦𑀁 ‘𑀧𑀣𑀯𑀻𑀓𑀲𑀺𑀡’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀆𑀧𑁄𑀓𑀲𑀺𑀡𑀸𑀤𑀻𑀲𑀼𑀧𑀺. 𑀢𑀢𑁆𑀣 𑀧𑀣𑀯𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀪𑀽𑀢𑀓𑀲𑀺𑀡𑀸𑀦𑀺. 𑀦𑀻𑀮𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀡𑁆𑀡𑀓𑀲𑀺𑀡𑀸𑀦𑀺, 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑁄 𑀆𑀓𑀸𑀲𑀓𑀲𑀺𑀡𑀁, 𑀘𑀦𑁆𑀤𑀸𑀤𑀺𑀆𑀮𑁄𑀓𑁄 𑀆𑀮𑁄𑀓𑀓𑀲𑀺𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁭. 𑀉𑀤𑁆𑀥𑀁 𑀥𑀼𑀫𑀸𑀢𑀁 𑀲𑀽𑀦𑀁 𑀙𑀯𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀢𑀁, 𑀢𑀤𑁂𑀯 𑀓𑀼𑀘𑁆𑀙𑀺𑀢𑀝𑁆𑀞𑁂𑀦𑀉𑀤𑁆𑀥𑀼𑀫𑀸𑀢𑀓𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑁂𑀢𑀭𑀢𑁆𑀢𑀸𑀤𑀺𑀦𑀸 𑀯𑀺𑀫𑀺𑀲𑁆𑀲𑀺𑀢𑀁 𑀬𑁂𑀪𑀼𑀬𑁆𑀬𑁂𑀦 𑀦𑀻𑀮𑀯𑀡𑁆𑀡𑀁 𑀙𑀯𑀲𑀭𑀻𑀭𑀁 𑀯𑀺𑀦𑀻𑀮𑀓𑀁 𑀯𑀺𑀲𑁂𑀲𑀢𑁄 𑀦𑀻𑀮𑀓𑀦𑁆𑀢𑀺 𑀓𑀢𑁆𑀯𑀸. 𑀯𑀺𑀲𑁆𑀲𑀯𑀦𑁆𑀢𑀧𑀼𑀩𑁆𑀩𑀓𑀁 𑀯𑀺𑀧𑀼𑀩𑁆𑀩𑀓𑀁. 𑀫𑀚𑁆𑀛𑁂 𑀤𑁆𑀯𑀺𑀥𑀸 𑀙𑀺𑀦𑁆𑀦𑀁 𑀯𑀺𑀘𑁆𑀙𑀺𑀤𑁆𑀤𑀓𑀁. 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀯𑀺𑀯𑀺𑀥𑀸𑀓𑀸𑀭𑁂𑀦 𑀔𑀸𑀬𑀺𑀢𑀁 𑀯𑀺𑀓𑁆𑀔𑀸𑀬𑀺𑀢𑀓𑀁. 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀔𑀡𑁆𑀟𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀔𑀺𑀢𑁆𑀢𑀁 𑀯𑀺𑀓𑁆𑀔𑀺𑀢𑁆𑀢𑀓𑀁. 𑀓𑀸𑀓𑀧𑀤𑀸𑀤𑀺𑀆𑀓𑀸𑀭𑁂𑀦 𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸 𑀯𑀺𑀯𑀺𑀥𑀁 𑀔𑀺𑀢𑁆𑀢𑀁 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁. 𑀮𑁄𑀳𑀺𑀢𑀧𑀕𑁆𑀖𑀭𑀡𑀓𑀁 𑀮𑁄𑀳𑀺𑀢𑀓𑀁. 𑀓𑀺𑀫𑀺𑀓𑀼𑀮𑀧𑀕𑁆𑀖𑀭𑀡𑀓𑀁 𑀧𑀼𑀴𑀯𑀓𑀁. 𑀅𑀦𑁆𑀢𑀫𑀲𑁄 𑀏𑀓𑀫𑁆𑀧𑀺 𑀅𑀝𑁆𑀞𑀺 𑀅𑀝𑁆𑀞𑀺𑀓𑀁.

𑁮. 𑀅𑀦𑀼 𑀅𑀦𑀼 𑀲𑀭𑀡𑀁 𑀅𑀦𑀼𑀲𑁆𑀲𑀢𑀺, 𑀅𑀭𑀳𑀢𑀸𑀤𑀺𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀸 𑀅𑀦𑀼𑀲𑁆𑀲𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺. 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀥𑀫𑁆𑀫𑀕𑀼𑀡𑀸𑀭𑀫𑁆𑀫𑀡𑀸 𑀅𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺. 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀲𑀁𑀖𑀕𑀼𑀡𑀸𑀭𑀫𑁆𑀫𑀡𑀸 𑀅𑀦𑀼𑀲𑁆𑀲𑀢𑀺 𑀲𑀁𑀖𑀸𑀦𑀼𑀲𑁆𑀲𑀢𑀺. 𑀅𑀔𑀡𑁆𑀟𑀢𑀸𑀤𑀺𑀦𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑁆𑀲 𑀅𑀢𑁆𑀢𑀦𑁄 𑀲𑀻𑀮𑀕𑀼𑀡𑀲𑁆𑀲 𑀅𑀦𑀼𑀲𑁆𑀲𑀭𑀡𑀁 𑀲𑀻𑀮𑀸𑀦𑀼𑀲𑁆𑀲𑀢𑀺. 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀘𑀸𑀕𑀸𑀦𑀼𑀲𑁆𑀲𑀭𑀡𑀁 𑀘𑀸𑀕𑀸𑀦𑀼𑀲𑁆𑀲𑀢𑀺. ‘‘𑀬𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀸 𑀤𑁂𑀯𑀸 𑀤𑁂𑀯𑀢𑁆𑀢𑀁 𑀕𑀢𑀸, 𑀢𑀸𑀤𑀺𑀲𑀸 𑀕𑀼𑀡𑀸 𑀫𑀬𑀺 𑀲𑀦𑁆𑀢𑀻’’𑀢𑀺 𑀏𑀯𑀁 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀺𑀕𑀼𑀡𑀸𑀦𑀼𑀲𑁆𑀲𑀭𑀡𑀁 𑀤𑁂𑀯𑀢𑀸𑀦𑀼𑀲𑁆𑀲𑀢𑀺. 𑀲𑀩𑁆𑀩𑀤𑀼𑀓𑁆𑀔𑀽𑀧𑀲𑀫𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀕𑀼𑀡𑀸𑀦𑀼𑀲𑁆𑀲𑀭𑀡𑀁 𑀉𑀧𑀲𑀫𑀸𑀦𑀼𑀲𑁆𑀲𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀪𑀽𑀢𑀲𑁆𑀲 𑀫𑀭𑀡𑀲𑁆𑀲 𑀅𑀦𑀼𑀲𑁆𑀲𑀭𑀡𑀁 𑀫𑀭𑀡𑀸𑀦𑀼𑀲𑁆𑀲𑀢𑀺. 𑀓𑁂𑀲𑀸𑀤𑀺𑀓𑀸𑀬𑀓𑁄𑀝𑁆𑀞𑀸𑀲𑁂 𑀕𑀢𑀸 𑀧𑀯𑀢𑁆𑀢𑀸 𑀲𑀢𑀺 𑀓𑀸𑀬𑀕𑀢𑀸𑀲𑀢𑀺. 𑀆𑀦𑀜𑁆𑀘 𑀅𑀧𑀸𑀦𑀜𑁆𑀘 𑀆𑀦𑀸𑀧𑀸𑀦𑀁, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀢𑀤𑀸𑀭𑀫𑁆𑀫𑀡𑀸 𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺.

𑁯. 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑁂𑀢𑁆𑀢𑀸, 𑀫𑀺𑀢𑁆𑀢𑁂𑀲𑀼 𑀪𑀯𑀸𑀢𑀺 𑀯𑀸 𑀫𑁂𑀢𑁆𑀢𑀸, 𑀲𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀽𑀧𑀲𑀁𑀳𑀭𑀡𑀮𑀓𑁆𑀔𑀡𑀸. 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸 𑀓𑀭𑀼𑀡𑀸. 𑀧𑀭𑀲𑀫𑁆𑀧𑀢𑁆𑀢𑀺𑀧𑀫𑁄𑀤𑀮𑀓𑁆𑀔𑀡𑀸 𑀫𑀼𑀤𑀺𑀢𑀸. 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸. 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀫𑀜𑁆𑀜𑀸. 𑀉𑀢𑁆𑀢𑀫𑀯𑀺𑀳𑀸𑀭𑀪𑀸𑀯𑀢𑁄, 𑀉𑀢𑁆𑀢𑀫𑀸𑀦𑀁 𑀯𑀸 𑀯𑀺𑀳𑀸𑀭𑀪𑀸𑀯𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄.

𑁧𑁦. 𑀕𑀫𑀦𑀧𑀭𑀺𑀬𑁂𑀲𑀦𑀧𑀭𑀺𑀪𑁄𑀕𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀧𑀝𑀺𑀓𑀽𑀮𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸.

𑁧𑁧. 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀲𑀮𑀓𑁆𑀔𑀡𑀢𑁄 𑀓𑁂𑀲𑀸𑀤𑀺𑀲𑀲𑀫𑁆𑀪𑀸𑀭𑀸𑀤𑀺𑀢𑁄 𑀘 𑀯𑀯𑀢𑁆𑀣𑀸𑀦𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁.

𑁧𑁨. 𑀅𑀭𑀽𑀧𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸 𑀆𑀭𑀼𑀧𑁆𑀧𑀸.

𑀦𑀺𑀫𑀺𑀢𑁆𑀢𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀧𑁆𑀧𑀸𑀬𑀪𑁂𑀤𑀯𑀡𑁆𑀡𑀦𑀸

𑁧𑁩. 𑀇𑀤𑀸𑀦𑀺 𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀭𑀺𑀢𑀸𑀦𑀼𑀓𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀭𑀺𑀢𑀸𑀲𑀼 𑀧𑀦𑀸’’𑀢𑁆𑀬𑀸𑀤𑀺𑀫𑀸𑀳. 𑀭𑀸𑀕𑁄 𑀯 𑀘𑀭𑀺𑀢𑀁 𑀧𑀓𑀢𑀺 𑀏𑀢𑀲𑁆𑀲𑀸𑀢𑀺 𑀭𑀸𑀕𑀘𑀭𑀺𑀢𑁄, 𑀭𑀸𑀕𑀩𑀳𑀼𑀮𑁄 𑀧𑀼𑀕𑁆𑀕𑀮𑁄, 𑀭𑀸𑀕𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀢𑀲𑁆𑀲 𑀲𑀧𑁆𑀧𑀸𑀬𑀁. 𑀆𑀦𑀸𑀧𑀸𑀦𑀁 𑀫𑁄𑀳𑀘𑀭𑀺𑀢𑀲𑁆𑀲, 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀘 𑀲𑀧𑁆𑀧𑀸𑀬𑀁 𑀩𑀼𑀤𑁆𑀥𑀺𑀯𑀺𑀲𑀬𑀪𑀸𑀯𑁂𑀦 𑀫𑁄𑀳𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸, 𑀯𑀺𑀢𑀓𑁆𑀓𑀲𑀦𑁆𑀥𑀸𑀯𑀦𑀲𑁆𑀲 𑀦𑀺𑀯𑀸𑀭𑀓𑀢𑁆𑀢𑀸 𑀘. 𑀙 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀬𑁄 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀸 𑀲𑀤𑁆𑀥𑀸𑀯𑀼𑀤𑁆𑀥𑀺𑀳𑁂𑀢𑀼𑀪𑀸𑀯𑀢𑁄.

𑁧𑁭. 𑀫𑀭𑀡𑀉𑀧𑀲𑀫𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑀸𑀦𑀺 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀸𑀦𑀺 𑀕𑀫𑁆𑀪𑀻𑀭𑀪𑀸𑀯𑀢𑁄 𑀩𑀼𑀤𑁆𑀥𑀺𑀬𑀸 𑀏𑀯 𑀯𑀺𑀲𑀬𑀢𑁆𑀢𑀸.

𑁧𑁮. 𑀲𑁂𑀲𑀸𑀦𑀻𑀢𑀺 𑀘𑀢𑀼𑀩𑁆𑀩𑀺𑀥𑀪𑀽𑀢𑀓𑀲𑀺𑀡𑀆𑀓𑀸𑀲𑀆𑀮𑁄𑀓𑀓𑀲𑀺𑀡𑀆𑀭𑀼𑀧𑁆𑀧𑀘𑀢𑀼𑀓𑁆𑀓𑀯𑀲𑁂𑀦 𑀤𑀲𑀯𑀺𑀥𑀸𑀦𑀺. 𑀢𑀢𑁆𑀣𑀸𑀧𑀻𑀢𑀺 𑀢𑁂𑀲𑀼 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀧𑀼𑀣𑀼𑀮𑀁 𑀫𑁄𑀳𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁 𑀲𑀫𑁆𑀩𑀸𑀥𑁂 𑀑𑀓𑀸𑀲𑁂 𑀘𑀺𑀢𑁆𑀢𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀫𑁆𑀫𑀼𑀬𑁆𑀳𑀦𑀢𑁄. 𑀔𑀼𑀤𑁆𑀤𑀓𑀁 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁 𑀫𑀳𑀦𑁆𑀢𑀸𑀭𑀫𑁆𑀫𑀡𑀲𑁆𑀲 𑀯𑀺𑀢𑀓𑁆𑀓𑀲𑀦𑁆𑀥𑀸𑀯𑀦𑀧𑀘𑁆𑀘𑀬𑀢𑁆𑀢𑀸. 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑁄 𑀘𑁂𑀯 𑀅𑀢𑀺𑀲𑀧𑁆𑀧𑀸𑀬𑀢𑀸𑀬 𑀘𑁂𑀢𑀁 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀻𑀦𑀁 𑀧𑀦 𑀅𑀯𑀺𑀓𑁆𑀔𑀫𑁆𑀪𑀺𑀓𑀸, 𑀲𑀤𑁆𑀥𑀸𑀤𑀻𑀦𑀁 𑀯𑀸 𑀅𑀦𑀼𑀧𑀓𑀸𑀭𑀺𑀓𑀸 𑀓𑀲𑀺𑀡𑀸𑀤𑀺𑀪𑀸𑀯𑀦𑀸 𑀦𑀸𑀫 𑀦𑀢𑁆𑀣𑀺.

𑀲𑀧𑁆𑀧𑀸𑀬𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀸𑀯𑀦𑀸𑀪𑁂𑀤𑀯𑀡𑁆𑀡𑀦𑀸

𑁧𑁯. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼𑀧𑀺 𑀦𑀢𑁆𑀣𑀺 𑀅𑀧𑁆𑀧𑀦𑀸, 𑀩𑀼𑀤𑁆𑀥𑀕𑀼𑀡𑀸𑀤𑀻𑀦𑀁 𑀧𑀭𑀫𑀢𑁆𑀣𑀪𑀸𑀯𑀢𑁄, 𑀅𑀦𑁂𑀓𑀯𑀺𑀥𑀢𑁆𑀢𑀸, 𑀏𑀓𑀲𑁆𑀲𑀧𑀺 𑀕𑀫𑁆𑀪𑀻𑀭𑀪𑀸𑀯𑀢𑁄 𑀘. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀧𑁆𑀧𑀦𑀸𑀯𑀲𑁂𑀦 𑀲𑀫𑀸𑀥𑀺𑀲𑁆𑀲 𑀧𑀢𑀺𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀧𑁆𑀧𑀦𑀸𑀪𑀸𑀯𑀁 𑀅𑀧𑁆𑀧𑀢𑁆𑀯𑀸 𑀲𑀫𑀸𑀥𑀺 𑀉𑀧𑀘𑀸𑀭𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺, 𑀧𑀦 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀫𑀸𑀥𑀺 𑀘 𑀲𑀪𑀸𑀯𑀥𑀫𑁆𑀫𑁂𑀧𑀺 𑀪𑀸𑀯𑀦𑀸𑀯𑀺𑀲𑁂𑀲𑀯𑀲𑁂𑀦 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀦𑀼𑀓𑁆𑀓𑀫𑀯𑀲𑁂𑀦 𑀳𑀺 𑀮𑁄𑀓𑀼𑀢𑁆𑀢𑀭𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀪𑀸𑀯𑀦𑀸𑀯𑀲𑁂𑀦 𑀆𑀭𑀼𑀧𑁆𑀧𑀲𑀫𑀸𑀥𑀺. 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑁆𑀲𑁂𑀯 𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑁄 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀦𑀫𑀢𑁆𑀢𑀁 𑀳𑁄𑀢𑀺.

𑁨𑁧. 𑀧𑀜𑁆𑀘𑀧𑀺 𑀛𑀸𑀦𑀸𑀦𑀺 𑀏𑀢𑁂𑀲𑀫𑀢𑁆𑀣𑀺, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸𑀦𑀻𑀢𑀺 𑀯𑀸 𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀸𑀦𑀺.

𑁨𑁨. 𑀅𑀲𑀼𑀪𑀪𑀸𑀯𑀦𑀸𑀬 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀢𑁆𑀢𑀸 𑀘𑀡𑁆𑀟𑀲𑁄𑀢𑀸𑀬 𑀦𑀤𑀺𑀬𑀸 𑀅𑀭𑀺𑀢𑁆𑀢𑀩𑀮𑁂𑀦 𑀦𑀸𑀯𑀸 𑀯𑀺𑀬 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻𑀢𑀺 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑁂 𑀅𑀯𑀺𑀢𑀓𑁆𑀓𑀚𑁆𑀛𑀸𑀦𑀸𑀲𑀫𑁆𑀪𑀯𑀢𑁄 ‘‘𑀧𑀞𑀫𑀚𑁆𑀛𑀸𑀦𑀺𑀓𑀸’’𑀢𑀺 𑀯𑀼𑀢𑁆𑀢𑀁.

𑁨𑁩. 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀦𑀪𑀺𑀭𑀢𑀻𑀦𑀁 𑀧𑀳𑀸𑀬𑀓𑀢𑁆𑀢𑀸 𑀤𑁄𑀫𑀦𑀲𑁆𑀲𑀧𑁆𑀧𑀝𑀺𑀧𑀓𑁆𑀔𑁂𑀦 𑀲𑁄𑀫𑀦𑀲𑁆𑀲𑁂𑀦𑁂𑀯 𑀲𑀳𑀕𑀢𑀢𑀸 𑀬𑀼𑀢𑁆𑀢𑀸𑀢𑀺 ‘‘𑀫𑁂𑀢𑁆𑀢𑀸𑀤𑀬𑁄 𑀢𑀬𑁄 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸’’𑀢𑀺 𑀯𑀼𑀢𑁆𑀢𑀸.

𑁨𑁪. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀦𑁆𑀢𑀼, 𑀮𑀤𑁆𑀥𑀲𑀼𑀔𑀲𑀫𑁆𑀧𑀢𑁆𑀢𑀺𑀢𑁄 𑀫𑀸 𑀯𑀺𑀕𑀘𑁆𑀙𑀦𑁆𑀢𑀽’’𑀢𑀺 𑀫𑁂𑀢𑁆𑀢𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀩𑁆𑀬𑀸𑀧𑀸𑀭𑀢𑁆𑀢𑀬𑀁 𑀧𑀳𑀸𑀬 𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑁂𑀦 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀪𑀸𑀯𑀦𑀸𑀦𑀺𑀩𑁆𑀩𑀢𑁆𑀢𑀸𑀬 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀩𑀮𑀯𑀢𑀭𑀢𑁆𑀢𑀸 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀲𑀼𑀔𑀲𑀳𑀕𑀢𑀸𑀲𑀫𑁆𑀪𑀯𑀢𑁄 ‘‘𑀉𑀧𑁂𑀓𑁆𑀔𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸’’𑀢𑀺 𑀯𑀼𑀢𑁆𑀢𑀸.

𑀪𑀸𑀯𑀦𑀸𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑁄𑀘𑀭𑀪𑁂𑀤𑀯𑀡𑁆𑀡𑀦𑀸

𑁨𑁬. 𑀬𑀣𑀸𑀭𑀳𑀦𑁆𑀢𑀺 𑀢𑀁𑀢𑀁𑀆𑀭𑀫𑁆𑀫𑀡𑀸𑀦𑀼𑀭𑀽𑀧𑀢𑁄. 𑀓𑀲𑁆𑀲𑀘𑀺 𑀆𑀭𑀫𑁆𑀫𑀡𑀲𑁆𑀲 𑀅𑀧𑀭𑀺𑀩𑁆𑀬𑀢𑁆𑀢𑀢𑀸𑀬 ‘‘𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁨𑁭. 𑀓𑀲𑀺𑀡𑀸𑀲𑀼𑀪𑀓𑁄𑀝𑁆𑀞𑀸𑀲𑀸𑀦𑀸𑀧𑀸𑀦𑀲𑁆𑀲𑀢𑀻𑀲𑁆𑀯𑁂𑀯 𑀳𑀺 𑀧𑀭𑀺𑀩𑁆𑀬𑀢𑁆𑀢𑀦𑀺𑀫𑀺𑀢𑁆𑀢𑀲𑀫𑁆𑀪𑀯𑁄𑀢𑀺.

𑁨𑁮. 𑀧𑀣𑀯𑀻𑀫𑀡𑁆𑀟𑀮𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀆𑀤𑀺𑀫𑁆𑀳𑀺 𑀢𑀸𑀯 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀤𑀲𑀯𑀺𑀥𑀁 𑀧𑀮𑀺𑀩𑁄𑀥𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀺𑀬𑀕𑀭𑀼𑀪𑀸𑀯𑀦𑀻𑀬𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑀭𑀺𑀬𑀸𑀦𑀼𑀓𑀽𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀯𑀺𑀥𑀁 𑀅𑀦𑀦𑀼𑀭𑀽𑀧𑀯𑀺𑀳𑀸𑀭𑀁 𑀧𑀳𑀸𑀬 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑀼𑀭𑀽𑀧𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑀲𑁆𑀲 𑀓𑁂𑀲𑀦𑀔𑀳𑀭𑀡𑀸𑀤𑀺𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀓𑀲𑀺𑀡𑀫𑀡𑁆𑀟𑀮𑀸𑀤𑀻𑀦𑀺 𑀧𑀼𑀭𑀢𑁄 𑀓𑀢𑁆𑀯𑀸 𑀆𑀦𑀸𑀧𑀸𑀦𑀓𑁄𑀝𑁆𑀞𑀸𑀲𑀸𑀤𑀻𑀲𑀼 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀧𑀣𑀯𑀻 𑀧𑀣𑀯𑀻’’𑀢𑁆𑀬𑀸𑀤𑀺𑀦𑀸 𑀢𑀁𑀢𑀁𑀪𑀸𑀯𑀦𑀸𑀦𑀼𑀓𑁆𑀓𑀫𑁂𑀦 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀢𑀁𑀢𑀤𑀸𑀭𑀫𑁆𑀫𑀡𑁂𑀲𑀼 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀪𑀸𑀯𑀦𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁧.𑁫𑁪 𑀆𑀤𑀬𑁄) 𑀕𑀳𑁂𑀢𑀩𑁆𑀩𑀸. 𑀤𑀼𑀯𑀺𑀥𑀫𑁆𑀧𑀺 𑀳𑀺 𑀪𑀸𑀯𑀦𑀸𑀯𑀺𑀥𑀸𑀦𑀁 𑀇𑀥 𑀆𑀘𑀭𑀺𑀬𑁂𑀦 𑀅𑀢𑀺𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁, 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑀺𑀢𑁆𑀣𑀸𑀭𑀦𑀬𑁂 𑀆𑀳𑀭𑀺𑀬𑀫𑀸𑀦𑁂 𑀅𑀢𑀺𑀧𑁆𑀧𑀧𑀜𑁆𑀘𑁄 𑀲𑀺𑀬𑀸𑀢𑀺 𑀫𑀬𑀫𑁆𑀧𑀺 𑀢𑀁 𑀦 𑀯𑀺𑀢𑁆𑀣𑀸𑀭𑁂𑀲𑁆𑀲𑀸𑀫. 𑀬𑀤𑀸 𑀧𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑁂𑀦 𑀲𑀫𑀼𑀕𑁆𑀕𑀳𑀺𑀢𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸𑀦𑀼𑀧𑀼𑀩𑁆𑀩𑀪𑀸𑀯𑀦𑀸𑀯𑀲𑁂𑀦 𑀬𑀤𑀸 𑀢𑀁 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑁂𑀦 𑀲𑀫𑁆𑀫𑀸 𑀉𑀕𑁆𑀕𑀳𑀺𑀢𑀁 𑀳𑁄𑀢𑀺. 𑀫𑀦𑁄𑀤𑁆𑀯𑀸𑀭𑀲𑁆𑀲 𑀆𑀧𑀸𑀣𑀫𑀸𑀕𑀢𑀦𑁆𑀢𑀺 𑀘𑀓𑁆𑀔𑀼𑀁 𑀦𑀺𑀫𑁆𑀫𑀻𑀮𑁂𑀢𑁆𑀯𑀸, 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀯𑀸 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀓𑀲𑀺𑀡𑀫𑀡𑁆𑀟𑀮𑀲𑀤𑀺𑀲𑀫𑁂𑀯 𑀳𑀼𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀆𑀧𑀸𑀣𑀁 𑀆𑀕𑀢𑀁 𑀳𑁄𑀢𑀺.

𑁨𑁯. 𑀲𑀫𑀸𑀥𑀺𑀬𑀢𑀻𑀢𑀺 𑀯𑀺𑀲𑁂𑀲𑀢𑁄 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀧𑀢𑁆𑀢𑀺𑀬𑀸 𑀲𑀫𑀸𑀳𑀺𑀢𑀸 𑀳𑁄𑀢𑀺.

𑁩𑁦. 𑀘𑀺𑀢𑁆𑀢𑀲𑀫𑀸𑀥𑀸𑀦𑀯𑀲𑁂𑀦 𑀧𑀼𑀕𑁆𑀕𑀮𑁄𑀧𑀺 𑀲𑀫𑀸𑀳𑀺𑀢𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀣𑀸 𑀲𑀫𑀸𑀳𑀺𑀢𑀲𑁆𑀲𑀸’’𑀢𑀺. 𑀢𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀲𑀤𑀺𑀲𑀁, 𑀢𑀢𑁄𑀬𑁂𑀯 𑀳𑀺 𑀢𑀁 ‘‘𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀢𑁄 𑀅𑀢𑀺𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀺. 𑀯𑀢𑁆𑀣𑀼𑀥𑀫𑁆𑀫𑀯𑀺𑀫𑀼𑀘𑁆𑀘𑀺𑀢𑀦𑁆𑀢𑀺 𑀧𑀭𑀫𑀢𑁆𑀣𑀥𑀫𑁆𑀫𑀢𑁄 𑀯𑀺𑀫𑀼𑀢𑁆𑀢𑀁, 𑀯𑀢𑁆𑀣𑀼𑀥𑀫𑁆𑀫𑀢𑁄 𑀯𑀸 𑀓𑀲𑀺𑀡𑀫𑀡𑁆𑀟𑀮𑀕𑀢𑀓𑀲𑀺𑀡𑀤𑁄𑀲𑀢𑁄 𑀯𑀺𑀦𑀺𑀫𑀼𑀢𑁆𑀢𑀁. 𑀪𑀸𑀯𑀦𑀸𑀬 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀪𑀸𑀯𑀦𑀸𑀫𑀬𑀁. 𑀲𑀫𑀧𑁆𑀧𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀁.

𑁩𑁧. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬.

𑁩𑁩. 𑀧𑀜𑁆𑀘𑀲𑀼 𑀛𑀸𑀦𑀗𑁆𑀕𑁂𑀲𑀼 𑀏𑀓𑁂𑀓𑀸𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀘𑀢𑀼𑀧𑀜𑁆𑀘𑀚𑀯𑀦𑀓𑀢𑀺𑀧𑀬𑀪𑀯𑀗𑁆𑀕𑀢𑁄 𑀧𑀭𑀁 𑀅𑀕𑀦𑁆𑀢𑁆𑀯𑀸 𑀅𑀧𑀭𑀸𑀧𑀭𑀁 𑀛𑀸𑀦𑀗𑁆𑀕𑀸𑀯𑀚𑁆𑀚𑀦𑀲𑀫𑀢𑁆𑀣𑀢𑀸 𑀆𑀯𑀚𑁆𑀚𑀦𑀯𑀲𑀺𑀢𑀸 𑀦𑀸𑀫. 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀦𑀦𑁆𑀢𑀭𑀁 𑀓𑀢𑀺𑀧𑀬𑀪𑀯𑀗𑁆𑀕𑀢𑁄 𑀧𑀭𑀁 𑀅𑀕𑀦𑁆𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀺𑀢𑀸 𑀦𑀸𑀫. 𑀲𑁂𑀢𑀼 𑀯𑀺𑀬 𑀲𑀻𑀖𑀲𑁄𑀢𑀸𑀬 𑀦𑀤𑀺𑀬𑀸 𑀑𑀖𑀁 𑀪𑀯𑀗𑁆𑀕𑀯𑁂𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑀢𑀸 𑀪𑀯𑀗𑁆𑀕𑀧𑀸𑀢𑀢𑁄 𑀭𑀓𑁆𑀔𑀡𑀬𑁄𑀕𑁆𑀬𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫. 𑀬𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀛𑀸𑀦𑀢𑁄 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫. 𑀅𑀣 𑀯𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀉𑀤𑁆𑀥𑀁 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀞𑀧𑀦𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀅𑀦𑁆𑀢𑁄 𑀅𑀯𑀼𑀝𑁆𑀞𑀳𑀺𑀢𑁆𑀯𑀸 𑀬𑀣𑀸𑀓𑀸𑀮𑀯𑀲𑁂𑀦𑁂𑀯 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫𑀸𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦. 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀢𑀸 𑀧𑀦 𑀆𑀯𑀚𑁆𑀚𑀦𑀯𑀲𑀺𑀢𑀸𑀬 𑀏𑀯 𑀲𑀺𑀤𑁆𑀥𑀸. 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀚𑀯𑀦𑀸𑀦𑁂𑀯 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀸𑀦𑀺 𑀦𑀸𑀫. 𑀯𑀺𑀢𑀓𑁆𑀓𑀸𑀤𑀺𑀑𑀴𑀸𑀭𑀺𑀓𑀗𑁆𑀕𑀁 𑀧𑀳𑀸𑀦𑀸𑀬𑀸𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀳𑀺 𑀯𑀺𑀢𑀓𑁆𑀓𑀸𑀤𑀺𑀑𑀴𑀸𑀭𑀺𑀓𑀗𑁆𑀕𑀸𑀦𑀁 𑀛𑀸𑀦𑀓𑁆𑀔𑀡𑁂 𑀅𑀦𑀼𑀧𑁆𑀧𑀸𑀤𑀸𑀬. 𑀧𑀤𑀳𑀢𑁄𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲. 𑀢𑀲𑁆𑀲 𑀧𑀦 𑀉𑀧𑀘𑀸𑀭𑀪𑀸𑀯𑀦𑀸 𑀦𑀺𑀧𑁆𑀨𑀦𑁆𑀦𑀸 𑀦𑀸𑀫 𑀳𑁄𑀢𑀺 𑀯𑀺𑀢𑀓𑁆𑀓𑀸𑀤𑀻𑀲𑀼 𑀦𑀺𑀓𑀦𑁆𑀢𑀺𑀯𑀺𑀓𑁆𑀔𑀫𑁆𑀪𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀭𑀳𑀦𑁆𑀢𑀺 𑀢𑀁𑀢𑀁𑀛𑀸𑀦𑀺𑀓𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀸𑀦𑀼𑀭𑀽𑀧𑀁.

𑁩𑁬. 𑀆𑀓𑀸𑀲𑀓𑀲𑀺𑀡𑀲𑁆𑀲 𑀉𑀕𑁆𑀖𑀸𑀝𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀆𑀓𑀸𑀲𑀯𑀚𑁆𑀚𑀺𑀢𑁂𑀲𑀽’’𑀢𑀺. 𑀓𑀲𑀺𑀡𑀦𑁆𑀢𑀺 𑀓𑀲𑀺𑀡𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀉𑀕𑁆𑀖𑀸𑀝𑁂𑀢𑁆𑀯𑀸𑀢𑀺 𑀅𑀫𑀦𑀲𑀺𑀓𑀸𑀭𑀯𑀲𑁂𑀦 𑀉𑀤𑁆𑀥𑀭𑀺𑀢𑁆𑀯𑀸. 𑀅𑀦𑀦𑁆𑀢𑀯𑀲𑁂𑀦 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 ‘‘𑀅𑀦𑀦𑁆𑀢𑀁 𑀆𑀓𑀸𑀲𑀁, 𑀅𑀦𑀦𑁆𑀢𑀁 𑀆𑀓𑀸𑀲’’𑀦𑁆𑀢𑀺 𑀆𑀓𑀸𑀲𑀁 𑀆𑀭𑀩𑁆𑀪 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲, 𑀦 𑀧𑀦 𑀓𑁂𑀯𑀮𑀁 ‘‘𑀅𑀦𑀦𑁆𑀢𑀁 𑀅𑀦𑀦𑁆𑀢’’𑀦𑁆𑀢𑀺. 𑀏𑀯𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑁂𑀧𑀺. ‘‘𑀅𑀦𑀦𑁆𑀢’’𑀦𑁆𑀢𑀺 𑀅𑀯𑀢𑁆𑀯𑀸𑀧𑀺 ‘‘𑀆𑀓𑀸𑀲𑁄 𑀆𑀓𑀸𑀲𑁄 (𑀯𑀺𑀲𑀼𑀤𑁆𑀥𑀺. 𑁧.𑁨𑁭𑁬), 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁮𑁧) 𑀫𑀦𑀲𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀘𑀭𑀺𑀬𑀸.

𑁩𑁯. ‘‘𑀲𑀦𑁆𑀢𑀫𑁂𑀢𑀁, 𑀧𑀡𑀻𑀢𑀫𑁂𑀢’’𑀦𑁆𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀪𑀸𑀯𑀫𑀢𑁆𑀢𑀸𑀭𑀫𑁆𑀫𑀡𑀢𑀸𑀬 ‘‘𑀏𑀢𑀁 𑀲𑀦𑁆𑀢𑀁, 𑀏𑀢𑀁 𑀧𑀡𑀻𑀢’’𑀦𑁆𑀢𑀺 𑀪𑀸𑀯𑁂𑀦𑁆𑀢𑀲𑁆𑀲.

𑁪𑁦. 𑀅𑀯𑀲𑁂𑀲𑁂𑀲𑀼 𑀘𑀸𑀢𑀺 𑀓𑀲𑀺𑀡𑀸𑀤𑀻𑀳𑀺 𑀲𑀳 𑀅𑀧𑁆𑀧𑀦𑀸𑀯𑀳𑀓𑀫𑁆𑀫𑀝𑁆𑀞𑀸𑀦𑀢𑁄 𑀅𑀯𑀲𑁂𑀲𑁂𑀲𑀼 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼 𑀅𑀝𑁆𑀞𑀲𑀼, 𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑁂𑀲𑀼 𑀘𑀸𑀢𑀺 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 ‘‘𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑁆𑀬𑀸𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁪) 𑀯𑀼𑀢𑁆𑀢𑀯𑀺𑀥𑀸𑀦𑁂𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀲𑀸𑀥𑀼𑀓𑀫𑀼𑀕𑁆𑀕𑀳𑀺𑀢𑁂𑀢𑀺 𑀩𑀼𑀤𑁆𑀥𑀸𑀤𑀺𑀕𑀼𑀡𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸𑀯𑀲𑁂𑀦 𑀲𑀼𑀝𑁆𑀞𑀼 𑀉𑀕𑁆𑀕𑀳𑀺𑀢𑁂. 𑀧𑀭𑀺𑀓𑀫𑁆𑀫𑀜𑁆𑀘 𑀲𑀫𑀸𑀥𑀺𑀬𑀢𑀻𑀢𑀺 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 𑀲𑀫𑀸𑀳𑀺𑀢𑀸 𑀦𑀺𑀧𑁆𑀨𑀚𑁆𑀚𑀢𑀺. 𑀉𑀧𑀘𑀸𑀭𑁄 𑀘 𑀲𑀫𑁆𑀧𑀚𑁆𑀚𑀢𑀻𑀢𑀺 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀉𑀧𑀘𑀸𑀭𑀲𑀫𑀸𑀥𑀺 𑀘 𑀉𑀧𑁆𑀧𑀚𑁆𑀚𑀢𑀺.

𑁪𑁧. 𑀅𑀪𑀺𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀦𑁆𑀢𑀺 𑀅𑀪𑀺𑀯𑀺𑀲𑁂𑀲𑀢𑁄 𑀚𑀸𑀦𑀦𑀝𑁆𑀞𑁂𑀦 𑀅𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀯𑀺𑀥𑀸𑀤𑀺𑀧𑀜𑁆𑀘𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁, 𑀅𑀪𑀺𑀜𑁆𑀜𑀸𑀧𑀸𑀤𑀓𑀧𑀜𑁆𑀘𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀓𑀲𑀺𑀡𑀸𑀦𑀼𑀮𑁄𑀫𑀸𑀤𑀻𑀳𑀺 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 (𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁫) 𑀘𑀺𑀢𑁆𑀢𑀁 𑀧𑀭𑀺𑀤𑀫𑁂𑀢𑁆𑀯𑀸 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑁄𑀕𑀢𑁄 𑀅𑀦𑀼𑀭𑀽𑀧𑀢𑁆𑀢𑀸 𑀘 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀫𑁂𑀯 𑀅𑀪𑀺𑀜𑁆𑀜𑀸𑀦𑀁 𑀧𑀸𑀤𑀓𑀁 𑀧𑀢𑀺𑀝𑁆𑀞𑀸𑀪𑀽𑀢𑀁 𑀧𑀣𑀯𑀸𑀤𑀺𑀓𑀲𑀺𑀡𑀸𑀭𑀫𑁆𑀫𑀡𑀁 𑀧𑀜𑁆𑀘𑀫𑀚𑁆𑀛𑀸𑀦𑀁, 𑀢𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬. 𑀅𑀥𑀺𑀝𑁆𑀞𑁂𑀬𑁆𑀬𑀸𑀤𑀺𑀓𑀫𑀸𑀯𑀚𑁆𑀚𑁂𑀢𑁆𑀯𑀸𑀢𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀓𑀸𑀮𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀁 𑀯𑀺𑀓𑀼𑀩𑁆𑀩𑀦𑀻𑀬𑀁 𑀲𑀢𑀸𑀤𑀺𑀓𑀁 𑀓𑁄𑀫𑀸𑀭𑀭𑀽𑀧𑀸𑀤𑀺𑀓𑀁, 𑀤𑀺𑀩𑁆𑀩𑀲𑁄𑀢𑀲𑁆𑀲 𑀧𑀭𑀺𑀓𑀫𑁆𑀫𑀓𑀸𑀮𑁂 𑀣𑀽𑀮𑀲𑀼𑀔𑀼𑀫𑀪𑁂𑀤𑀁 𑀲𑀤𑁆𑀤𑀁, 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀓𑀸𑀮𑁂 𑀧𑀭𑀲𑁆𑀲 𑀳𑀤𑀬𑀗𑁆𑀕𑀢𑀯𑀡𑁆𑀡𑀤𑀲𑁆𑀲𑀦𑁂𑀦 𑀲𑀭𑀸𑀕𑀸𑀤𑀺𑀪𑁂𑀤𑀁 𑀘𑀺𑀢𑁆𑀢𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀲𑀫𑀬𑁂 𑀧𑀼𑀭𑀺𑀫𑀪𑀯𑁂𑀲𑀼 𑀘𑀼𑀢𑀺𑀘𑀺𑀢𑁆𑀢𑀸𑀤𑀺𑀪𑁂𑀤𑀁 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀁, 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀧𑀭𑀺𑀓𑀫𑁆𑀫𑀲𑀫𑀬𑁂 𑀑𑀪𑀸𑀲𑀨𑀭𑀺𑀢𑀝𑁆𑀞𑀸𑀦𑀕𑀢𑀁 𑀭𑀽𑀧𑀁 𑀯𑀸 𑀆𑀯𑀚𑁆𑀚𑁂𑀢𑁆𑀯𑀸.

𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 ‘‘𑀲𑀢𑀁 𑀳𑁄𑀫𑀺, 𑀲𑀳𑀲𑁆𑀲𑀁 𑀳𑁄𑀫𑀻’’𑀢𑁆𑀬𑀸𑀤𑀺𑀦𑀸 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲. 𑀭𑀽𑀧𑀸𑀤𑀻𑀲𑀽𑀢𑀺 𑀧𑀭𑀺𑀓𑀫𑁆𑀫𑀯𑀺𑀲𑀬𑀪𑀽𑀢𑁂𑀲𑀼 𑀭𑀽𑀧𑀧𑀸𑀤𑀓𑀚𑁆𑀛𑀸𑀦𑀲𑀤𑁆𑀤𑀧𑀭𑀘𑀺𑀢𑁆𑀢𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀤𑀺𑀪𑁂𑀤𑁂𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀏𑀢𑁆𑀣 𑀳𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀢𑀸𑀯 𑀧𑀸𑀤𑀓𑀚𑁆𑀛𑀸𑀦𑀁, 𑀓𑀸𑀬𑁄, 𑀭𑀽𑀧𑀸𑀤𑀺𑀅𑀥𑀺𑀝𑁆𑀞𑀸𑀦𑁂 𑀭𑀽𑀧𑀸𑀤𑀻𑀦𑀺 𑀘𑀸𑀢𑀺 𑀙 𑀆𑀭𑀫𑁆𑀫𑀡𑀸𑀦𑀺. 𑀢𑀢𑁆𑀣 𑀧𑀸𑀤𑀓𑀚𑁆𑀛𑀸𑀦𑀁 𑀅𑀢𑀻𑀢𑀫𑁂𑀯, 𑀓𑀸𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀇𑀢𑀭𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀦𑀸𑀕𑀢𑀁 𑀯𑀸. 𑀤𑀺𑀩𑁆𑀩𑀲𑁄𑀢𑀲𑁆𑀲 𑀧𑀦 𑀲𑀤𑁆𑀤𑁄𑀬𑁂𑀯, 𑀲𑁄 𑀘 𑀔𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀸𑀬 𑀧𑀦 𑀅𑀢𑀻𑀢𑁂 𑀲𑀢𑁆𑀢𑀤𑀺𑀯𑀲𑁂𑀲𑀼, 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑁂𑀲𑀼 𑀘 𑀧𑀯𑀢𑁆𑀢𑀁 𑀧𑀭𑀺𑀢𑁆𑀢𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀢𑀺𑀓𑀸𑀮𑀺𑀓𑀁 𑀘𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀘𑀭𑀺𑀬𑀸 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁬; 𑀥. 𑀲. 𑀅𑀝𑁆𑀞. 𑁧𑁪𑁩𑁪).

𑀲𑀗𑁆𑀕𑀳𑀓𑀸𑀭𑀸 𑀧𑀦 ‘‘𑀘𑀢𑁆𑀢𑀸𑀭𑁄𑀧𑀺 𑀔𑀦𑁆𑀥𑀸’’𑀢𑀺 (𑀥. 𑀲. 𑀅𑀝𑁆𑀞. 𑁧𑁪𑁩𑁪) 𑀯𑀤𑀦𑁆𑀢𑀺, 𑀓𑀣𑀁 𑀧𑀦𑀲𑁆𑀲𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑀸, 𑀦𑀦𑀼 𑀘 𑀆𑀯𑀚𑁆𑀚𑀦𑀸𑀬 𑀕𑀳𑀺𑀢𑀫𑁂𑀯 𑀇𑀤𑁆𑀥𑀺𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀆𑀯𑀚𑁆𑀚𑀦𑀸𑀬 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀫𑀸𑀦𑀸𑀬 𑀢𑀁𑀲𑀫𑀓𑀸𑀮𑀫𑁂𑀯 𑀧𑀭𑀲𑁆𑀲 𑀘𑀺𑀢𑁆𑀢𑀫𑁆𑀧𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀓𑀸𑀮𑀯𑀲𑁂𑀦 𑀏𑀓𑀸𑀭𑀫𑁆𑀫𑀡𑀢𑀸 𑀦 𑀲𑀺𑀬𑀸, 𑀫𑀕𑁆𑀕𑀨𑀮𑀯𑀻𑀣𑀺𑀢𑁄 𑀅𑀜𑁆𑀜𑀢𑁆𑀣 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀓𑀣𑀜𑁆𑀘 𑀦𑀸𑀦𑀸𑀭𑀫𑁆𑀫𑀡𑀢𑀸 𑀦 𑀅𑀥𑀺𑀧𑁆𑀧𑁂𑀢𑀸𑀢𑀺? 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁬; 𑀥. 𑀲. 𑀅𑀝𑁆𑀞. 𑁧𑁪𑁩𑁪) 𑀢𑀸𑀯 𑀲𑀦𑁆𑀢𑀢𑀺𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀬𑁄𑀚𑀺𑀢𑀸. 𑀆𑀦𑀦𑁆𑀤𑀸𑀘𑀭𑀺𑀬𑁄 (𑀥. 𑀲. 𑀫𑀽𑀮𑀝𑀻. 𑁧𑁪𑁩𑁪 𑀣𑁄𑀓 𑀯𑀺𑀲𑀤𑀺𑀲𑀁) 𑀧𑀦 𑀪𑀡𑀢𑀺 ‘‘𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀓𑁂𑀯𑀮𑀁 ‘𑀇𑀫𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀫𑀺’𑀘𑁆𑀘𑁂𑀯 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦𑀧𑀺 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀯𑀺𑀲𑁂𑀲𑁂𑀦𑁂𑀯 𑀘𑀺𑀢𑁆𑀢𑀁 𑀆𑀯𑀚𑁆𑀚𑁂𑀢𑁆𑀯𑀸 𑀢𑀺𑀡𑁆𑀡𑀁, 𑀘𑀢𑀼𑀦𑁆𑀦𑀁 𑀯𑀸 𑀧𑀭𑀺𑀓𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀢𑀺 𑀭𑀽𑀧𑀁 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀦𑀸. 𑀧𑀘𑁆𑀙𑀸 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦 𑀲𑀭𑀸𑀕𑀸𑀤𑀺𑀯𑀯𑀢𑁆𑀣𑀸𑀦𑀫𑁆𑀧𑀺 𑀓𑀭𑁄𑀢𑀺 𑀦𑀻𑀮𑀸𑀤𑀺𑀯𑀯𑀢𑁆𑀣𑀸𑀦𑀁 𑀯𑀺𑀬. 𑀢𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀅𑀪𑀺𑀫𑀼𑀔𑀻𑀪𑀽𑀢𑀘𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑁂𑀯, 𑀅𑀦𑀺𑀝𑁆𑀞𑁂 𑀘 𑀞𑀸𑀦𑁂 𑀦𑀸𑀦𑀸𑀭𑀫𑁆𑀫𑀡𑀢𑀸𑀤𑁄𑀲𑁄 𑀦𑀢𑁆𑀣𑀺 𑀅𑀪𑀺𑀦𑁆𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀢𑁄’’𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸, 𑀔𑀦𑁆𑀥𑀧𑁆𑀧𑀝𑀺𑀩𑀤𑁆𑀥𑀸𑀦𑀺 𑀘 𑀦𑀸𑀫𑀕𑁄𑀢𑁆𑀢𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀧𑀦 𑀭𑀽𑀧𑀫𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀆𑀭𑀫𑁆𑀫𑀡𑀯𑀺𑀪𑀸𑀕𑁄. 𑀬𑀣𑀸𑀭𑀳𑀫𑀧𑁆𑀧𑁂𑀢𑀻𑀢𑀺 𑀢𑀁𑀢𑀁𑀧𑀭𑀺𑀓𑀫𑁆𑀫𑀸𑀦𑀼𑀭𑀽𑀧𑀢𑁄 𑀅𑀧𑁆𑀧𑁂𑀢𑀺.

𑁪𑁨. 𑀇𑀤𑀸𑀦𑀺 𑀆𑀭𑀫𑁆𑀫𑀡𑀸𑀦𑀁 𑀪𑁂𑀤𑁂𑀦 𑀅𑀪𑀺𑀜𑁆𑀜𑀸𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑁆𑀥𑀺𑀯𑀺𑀥𑀸’’𑀢𑁆𑀬𑀸𑀤𑀺𑀫𑀸𑀳. 𑀅𑀥𑀺𑀝𑁆𑀞𑀸𑀦𑀸𑀤𑀺 𑀇𑀤𑁆𑀥𑀺𑀧𑁆𑀧𑀪𑁂𑀤𑁄 𑀏𑀢𑀺𑀲𑁆𑀲𑀸𑀢𑀺 𑀇𑀤𑁆𑀥𑀺𑀯𑀺𑀥𑀸. 𑀤𑀺𑀩𑁆𑀩𑀸𑀦𑀁 𑀲𑁄𑀢𑀲𑀤𑀺𑀲𑀢𑀸𑀬, 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑀸𑀬 𑀘 𑀤𑀺𑀩𑁆𑀩𑀜𑁆𑀘 𑀢𑀁 𑀲𑁄𑀢𑀜𑁆𑀘𑀸𑀢𑀺 𑀤𑀺𑀩𑁆𑀩𑀲𑁄𑀢𑀁. 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀬𑀢𑀺 𑀏𑀢𑀸𑀬𑀸𑀢𑀺 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀸. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀯𑀼𑀢𑁆𑀣𑀯𑀲𑁂𑀦 𑀘𑁂𑀯 𑀕𑁄𑀘𑀭𑀦𑀺𑀯𑀸𑀲𑀯𑀲𑁂𑀦 𑀘 𑀧𑀼𑀩𑁆𑀩𑁂 𑀅𑀢𑀻𑀢𑀪𑀯𑁂𑀲𑀼 𑀔𑀦𑁆𑀥𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀤𑀺𑀩𑁆𑀩𑀜𑁆𑀘 𑀢𑀁 𑀘𑀓𑁆𑀔𑀼 𑀘𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼. ‘𑀘𑀼𑀢𑀽𑀧𑀧𑀸𑀢𑀜𑀸𑀡’𑀦𑁆𑀢𑀺 𑀧𑀦 𑀤𑀺𑀩𑁆𑀩𑀘𑀓𑁆𑀔𑀼𑀫𑁂𑀯 𑀯𑀼𑀘𑁆𑀘𑀢𑀺. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀺𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀯𑀲𑁂𑀦𑁂𑀯 𑀇𑀚𑁆𑀛𑀦𑁆𑀢𑀺. 𑀦 𑀳𑀺 𑀢𑁂𑀲𑀁 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀅𑀢𑁆𑀣𑀺. 𑀢𑀢𑁆𑀣 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀢𑀸𑀯 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀢𑁄 𑀧𑀭𑀁 𑀧𑀯𑀢𑁆𑀢𑀦𑀓𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀁 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑀦𑀓𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀢𑀜𑁆𑀳𑀺 𑀲𑀯𑀺𑀲𑀬𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀦𑁆𑀢𑀺. 𑀬𑀣𑀸 𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀧𑀦 𑀓𑀼𑀲𑀮𑀸𑀓𑀼𑀲𑀮𑀲𑀗𑁆𑀔𑀸𑀢𑀸 𑀘𑁂𑀢𑀦𑀸, 𑀘𑀢𑁆𑀢𑀸𑀭𑁄𑀧𑀺 𑀯𑀸 𑀔𑀦𑁆𑀥𑀸 𑀆𑀭𑀫𑁆𑀫𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀕𑁄𑀘𑀭𑀯𑀲𑁂𑀦 𑀪𑁂𑀤𑁄 𑀕𑁄𑀘𑀭𑀪𑁂𑀤𑁄.

𑀕𑁄𑀘𑀭𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁

𑀯𑀺𑀲𑀼𑀤𑁆𑀥𑀺𑀪𑁂𑀤𑀯𑀡𑁆𑀡𑀦𑀸

𑁪𑁩. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑀸𑀓𑀸𑀭𑁂𑀦 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀸 𑀪𑀸𑀯𑀦𑀸𑀧𑀜𑁆𑀜𑀸. 𑀢𑀲𑁆𑀲𑀸 𑀓𑀫𑁆𑀫𑀝𑁆𑀞𑀸𑀦𑀁, 𑀲𑀸𑀬𑁂𑀯 𑀯𑀸 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁. 𑀢𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑁆𑀢𑀯𑀺𑀥𑁂𑀦 𑀯𑀺𑀲𑀼𑀤𑁆𑀥𑀺𑀲𑀗𑁆𑀕𑀳𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁪. 𑀅𑀦𑀺𑀘𑁆𑀘𑀢𑀸𑀬𑁂𑀯 𑀮𑀓𑁆𑀔𑀡𑀁 𑀮𑀓𑁆𑀔𑀺𑀢𑀩𑁆𑀩𑀁, 𑀮𑀓𑁆𑀔𑀻𑀬𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁. 𑀉𑀤𑀬𑀯𑀬𑀧𑀝𑀺𑀧𑀻𑀴𑀦𑀲𑀗𑁆𑀔𑀸𑀢𑀤𑀼𑀓𑁆𑀔𑀪𑀸𑀯𑁄 𑀯 𑀮𑀓𑁆𑀔𑀡𑀦𑁆𑀢𑀺 𑀤𑀼𑀓𑁆𑀔𑀮𑀓𑁆𑀔𑀡𑀁. 𑀧𑀭𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀅𑀪𑀸𑀯𑁄 𑀅𑀦𑀢𑁆𑀢𑀢𑀸, 𑀢𑀤𑁂𑀯 𑀮𑀓𑁆𑀔𑀡𑀦𑁆𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀁.

𑁪𑁫. 𑀢𑀺𑀡𑁆𑀡𑀁 𑀮𑀓𑁆𑀔𑀡𑀸𑀦𑀁 𑀅𑀦𑀼 𑀅𑀦𑀼 𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀸.

𑁪𑁬. 𑀔𑀦𑁆𑀥𑀸𑀤𑀻𑀦𑀁 𑀓𑀮𑀸𑀧𑀢𑁄 𑀲𑀫𑁆𑀫𑀲𑀦𑀯𑀲𑀧𑁆𑀧𑀯𑀢𑁆𑀢𑀁 𑀜𑀸𑀡𑀁 𑀲𑀫𑁆𑀫𑀲𑀦𑀜𑀸𑀡𑀁. 𑀉𑀧𑁆𑀧𑀸𑀤𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑀧𑁆𑀧𑀯𑀢𑁆𑀢𑀜𑀸𑀡𑀁 𑀉𑀤𑀬𑀩𑁆𑀩𑀬𑀜𑀸𑀡𑀁. 𑀉𑀤𑀬𑀁 𑀫𑀼𑀘𑁆𑀘𑀺𑀢𑁆𑀯𑀸 𑀯𑀬𑁂 𑀧𑀯𑀢𑁆𑀢𑀁 𑀜𑀸𑀡𑀁 𑀪𑀗𑁆𑀕𑀜𑀸𑀡𑀁. 𑀲𑀗𑁆𑀔𑀸𑀭𑀸𑀦𑀁 𑀪𑀬𑀢𑁄 𑀅𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁 𑀪𑀬𑀜𑀸𑀡𑀁, 𑀤𑀺𑀝𑁆𑀞𑀪𑀬𑀸𑀦𑀁 𑀆𑀤𑀻𑀦𑀯𑀢𑁄 𑀧𑁂𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁 𑀆𑀤𑀻𑀦𑀯𑀜𑀸𑀡𑀁, 𑀤𑀺𑀝𑁆𑀞𑀸𑀤𑀻𑀦𑀯𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑀯𑀲𑀧𑁆𑀧𑀯𑀢𑁆𑀢𑀁 𑀜𑀸𑀡𑀁 𑀦𑀺𑀩𑁆𑀩𑀺𑀤𑀸𑀜𑀸𑀡𑀁. 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀔𑀸𑀭𑁂𑀳𑀺 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀯𑀲𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁. 𑀫𑀼𑀘𑁆𑀘𑀦𑀲𑁆𑀲 𑀉𑀧𑀸𑀬𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀁 𑀧𑀼𑀦 𑀲𑀗𑁆𑀔𑀸𑀭𑀸𑀦𑀁 𑀧𑀭𑀺𑀕𑁆𑀕𑀳𑀯𑀲𑀧𑁆𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀜𑀸𑀡𑀁. 𑀧𑀝𑀺𑀲𑀗𑁆𑀔𑀸𑀢𑀥𑀫𑁆𑀫𑁂𑀲𑀼 𑀪𑀬𑀦𑀦𑁆𑀤𑀻𑀯𑀺𑀯𑀚𑁆𑀚𑀦𑀯𑀲𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀁 𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁. 𑀧𑀼𑀭𑀺𑀫𑀸𑀦𑀁 𑀦𑀯𑀦𑁆𑀦𑀁 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸, 𑀉𑀧𑀭𑀺 𑀘 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀅𑀦𑀼𑀓𑀽𑀮𑀁 𑀜𑀸𑀡𑀁 𑀅𑀦𑀼𑀮𑁄𑀫𑀜𑀸𑀡𑀁.

𑁪𑁭. 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀲𑀼𑀜𑁆𑀜𑀢𑁄. 𑀲𑀁𑀬𑁄𑀚𑀦𑀸𑀤𑀻𑀳𑀺 𑀯𑀺𑀫𑀼𑀘𑁆𑀘𑀦𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄. 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀺𑀦𑁄 𑀅𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑁄. 𑀧𑀡𑀺𑀳𑀺𑀢𑀲𑁆𑀲 𑀢𑀡𑁆𑀳𑀸𑀧𑀡𑀺𑀥𑀺𑀲𑁆𑀲 𑀅𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑁄.

𑁪𑁯. 𑀬𑁄 𑀦𑀁 𑀧𑀸𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀅𑀧𑀸𑀬𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀢𑀤𑁂𑀯 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄, 𑀲𑀫𑀸𑀥𑀸𑀦𑁄𑀧𑀥𑀸𑀭𑀡𑀝𑁆𑀞𑁂𑀦 𑀲𑀻𑀮𑀜𑁆𑀘𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁. 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀭𑀽𑀧𑀸𑀤𑀻𑀲𑀼 𑀲𑀁𑀯𑀭𑀡𑀯𑀲𑁂𑀦 𑀧𑀯𑀢𑁆𑀢𑀁 𑀲𑀻𑀮𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁. 𑀫𑀺𑀘𑁆𑀙𑀸𑀚𑀻𑀯 𑀯𑀺𑀯𑀚𑁆𑀚𑀦𑁂𑀦 𑀆𑀚𑀻𑀯𑀲𑁆𑀲 𑀧𑀭𑀺𑀲𑀼𑀤𑁆𑀥𑀺𑀯𑀲𑀧𑁆𑀧𑀯𑀢𑁆𑀢𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀧𑀘𑁆𑀘𑀬𑁂 𑀲𑀦𑁆𑀦𑀺𑀲𑁆𑀲𑀺𑀢𑀁 𑀢𑁂𑀲𑀁 𑀇𑀤𑀫𑀢𑁆𑀣𑀺𑀓𑀢𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀲𑀻𑀮𑀁 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁. 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀤𑁂𑀲𑀦𑀸𑀲𑀁𑀯𑀭𑀧𑀭𑀺𑀬𑁂𑀝𑁆𑀞𑀺𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦, 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀘 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀦𑀸𑀫.

𑁫𑁦. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀯𑀺𑀦𑀻𑀯𑀭𑀡𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀯𑀺𑀲𑁄𑀥𑀦𑀢𑁄, 𑀘𑀺𑀢𑁆𑀢𑀲𑀻𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀸𑀢𑀺 𑀯𑀸 𑀓𑀢𑁆𑀯𑀸.

𑁫𑁧. ‘‘𑀥𑀫𑁆𑀫𑀸𑀦𑀁 𑀲𑀸𑀫𑀜𑁆𑀜𑀲𑀪𑀸𑀯𑁄 𑀮𑀓𑁆𑀔𑀡𑀁, 𑀓𑀺𑀘𑁆𑀘𑀲𑀫𑁆𑀧𑀢𑁆𑀢𑀺𑀬𑁄 𑀭𑀲𑁄, 𑀉𑀧𑀝𑁆𑀞𑀸𑀦𑀸𑀓𑀸𑀭𑁄, 𑀨𑀮𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀮𑀓𑁆𑀔𑀡𑀸𑀤𑀻𑀦𑀁 ‘‘𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀓𑀓𑁆𑀔𑀴𑀮𑀓𑁆𑀔𑀡𑀸 𑀧𑀣𑀯𑀻’’𑀢𑁆𑀬𑀸𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄, ‘‘𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧’’𑀦𑁆𑀢𑁆𑀬𑀸𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀘 𑀧𑀭𑀺𑀕𑁆𑀕𑀳𑁄 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀡𑀁 𑀤𑀼𑀓𑁆𑀔𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀦𑀸𑀫 ‘‘𑀦𑀸𑀫𑀭𑀽𑀧𑀢𑁄 𑀅𑀢𑁆𑀢𑀸 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑀦𑀢𑁄 𑀤𑀺𑀝𑁆𑀞𑀺 𑀘 𑀅𑀢𑁆𑀢𑀤𑀺𑀝𑁆𑀞𑀺𑀫𑀮𑀯𑀺𑀲𑁄𑀥𑀦𑀢𑁄 𑀯𑀺𑀲𑀼𑀤𑁆𑀥𑀺 𑀘𑀸𑀢𑀺 𑀓𑀢𑁆𑀯𑀸.

𑁫𑁨. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄𑀢𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀲𑀦𑁆𑀥𑀺𑀬𑀁 𑀢𑀸𑀯 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀉𑀧𑀸𑀤𑀸𑀦𑀓𑀫𑁆𑀫𑀳𑁂𑀢𑀼𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀯𑀢𑁆𑀢𑀺𑀬𑀜𑁆𑀘 𑀭𑀽𑀧𑀁 𑀓𑀫𑁆𑀫𑀘𑀺𑀢𑁆𑀢𑀉𑀢𑀼𑀆𑀳𑀸𑀭𑀧𑀘𑁆𑀘𑀬𑀯𑀲𑁂𑀦, 𑀦𑀸𑀫𑀜𑁆𑀘 𑀘𑀓𑁆𑀔𑀼𑀭𑀽𑀧𑀸𑀤𑀺𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑀯𑀲𑁂𑀦, 𑀯𑀺𑀲𑁂𑀲𑀢𑁄 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀘𑀢𑀼𑀘𑀓𑁆𑀓𑀲𑀫𑁆𑀧𑀢𑁆𑀢𑀺𑀬𑀸 𑀓𑀼𑀲𑀮𑀁, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀅𑀓𑀼𑀲𑀮𑀁, 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀯𑀺𑀧𑀸𑀓𑁄 𑀪𑀯𑀗𑁆𑀕𑀸𑀤𑀺𑀯𑀲𑁂𑀦 𑀆𑀯𑀚𑁆𑀚𑀦𑀁, 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑀯𑀲𑁂𑀦 𑀓𑀺𑀭𑀺𑀬𑀚𑀯𑀦𑀁, 𑀆𑀯𑀚𑁆𑀚𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀲𑁂𑀦 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀦𑀸𑀫𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀓𑁆𑀔𑀸𑀤𑀺𑀲𑀺𑀤𑁆𑀥𑀲𑁆𑀲 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀯𑀯𑀢𑁆𑀣𑀸𑀦𑀁 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀦𑀸𑀫 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑁆𑀬𑀸𑀤𑀺𑀓𑀸𑀬 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀲𑁄𑀴𑀲𑀯𑀺𑀥𑀸𑀬, ‘‘𑀲𑀢𑁆𑀣𑀭𑀺𑀓𑀗𑁆𑀔𑀢𑀻’’𑀢𑁆𑀬𑀸𑀤𑀺𑀓𑀸𑀬 (𑀥. 𑀲. 𑁧𑁧𑁨𑁩; 𑀯𑀺𑀪. 𑁯𑁧𑁫) 𑀅𑀝𑁆𑀞𑀯𑀺𑀥𑀸𑀬 𑀘 𑀓𑀗𑁆𑀔𑀸𑀬 𑀯𑀺𑀢𑀭𑀡𑀢𑁄 𑀅𑀢𑀺𑀓𑁆𑀓𑀫𑀦𑀢𑁄 𑀓𑀗𑁆𑀔𑀸𑀯𑀺𑀢𑀭𑀡𑀸, 𑀅𑀳𑁂𑀢𑀼𑀓𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀺𑀫𑀮𑀯𑀺𑀲𑁄𑀥𑀦𑀢𑁄 𑀯𑀺𑀲𑀼𑀤𑁆𑀥𑀺 𑀘𑀸𑀢𑀺 𑀓𑀢𑁆𑀯𑀸.

𑁫𑁩. 𑀢𑀢𑁄 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀢𑁄 𑀧𑀭𑀁 𑀢𑀣𑀸𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀸𑀤𑀺𑀯𑀯𑀢𑁆𑀣𑀸𑀦𑀯𑀲𑁂𑀦, 𑀧𑀘𑁆𑀘𑀬𑀯𑀯𑀢𑁆𑀣𑀸𑀦𑀯𑀲𑁂𑀦 𑀘 𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑁂𑀲𑀼 𑀢𑀺𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀦𑀸𑀫𑀭𑀽𑀧𑁂𑀲𑀼 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀔𑀦𑁆𑀥𑀸𑀤𑀺𑀦𑀬𑀫𑀸𑀭𑀩𑁆𑀪 𑀧𑀜𑁆𑀘𑀓𑁆𑀔𑀦𑁆𑀥𑀙𑀤𑁆𑀯𑀸𑀭𑀙𑀴𑀸𑀭𑀫𑁆𑀫𑀡𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑀸𑀤𑀺𑀯𑀲𑁂𑀦 𑀆𑀕𑀢𑀁 𑀔𑀦𑁆𑀥𑀸𑀤𑀺𑀦𑀬𑀁 𑀆𑀭𑀩𑁆𑀪 𑀓𑀮𑀸𑀧𑀯𑀲𑁂𑀦 𑀧𑀺𑀡𑁆𑀟𑀯𑀲𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀬𑀁 𑀅𑀢𑀻𑀢𑁂 𑀚𑀸𑀢𑀁 𑀭𑀽𑀧𑀁, 𑀢𑀁 𑀅𑀢𑀻𑀢𑁂𑀯 𑀦𑀺𑀭𑀼𑀤𑁆𑀥𑀁. 𑀬𑀁 𑀅𑀦𑀸𑀕𑀢𑁂 𑀪𑀸𑀯𑀺 𑀭𑀽𑀧𑀁, 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀁 𑀅𑀦𑀸𑀕𑀢𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀲𑀼𑀔𑀼𑀫𑀑𑀴𑀸𑀭𑀺𑀓𑀳𑀻𑀦𑀧𑀡𑀻𑀢𑀭𑀽𑀧𑀸𑀤𑀬𑁄. 𑀢𑀲𑁆𑀫𑀸 ‘‘𑀅𑀦𑀺𑀘𑁆𑀘𑀁 𑀅𑀢𑁆𑀢𑀸𑀤𑀺𑀯𑀲𑁂𑀦 𑀦 𑀇𑀘𑁆𑀘𑀁 𑀅𑀦𑀼𑀧𑀕𑀦𑁆𑀢𑀩𑁆𑀩𑀁 𑀔𑀬𑀝𑁆𑀞𑁂𑀦 𑀔𑀬𑀕𑀫𑀦𑀢𑁄, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦 𑀪𑀬𑀓𑀭𑀢𑁆𑀢𑀸, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦 𑀅𑀢𑁆𑀢𑀲𑀸𑀭𑀸𑀤𑀺𑀅𑀪𑀸𑀯𑁂𑀦𑀸’’𑀢𑀺 𑀘 ‘‘𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀁…𑀧𑁂… 𑀫𑀦𑁄. 𑀭𑀽𑀧𑀁…𑀧𑁂… 𑀥𑀫𑁆𑀫𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑁆𑀬𑀸𑀤𑀺𑀦𑀸 (𑀧𑀝𑀺. 𑀫. 𑁧.𑁪𑁮) 𑀅𑀢𑀻𑀢𑀸𑀤𑀺𑀅𑀤𑁆𑀥𑀸𑀯𑀲𑁂𑀦, 𑀅𑀢𑀻𑀢𑀸𑀤𑀺𑀲𑀦𑁆𑀢𑀸𑀦𑀯𑀲𑁂𑀦, 𑀅𑀢𑀻𑀢𑀸𑀤𑀺𑀔𑀡𑀯𑀲𑁂𑀦 𑀘 𑀲𑀫𑁆𑀫𑀲𑀦𑀜𑀸𑀡𑁂𑀦 𑀳𑀼𑀢𑁆𑀯𑀸𑀅𑀪𑀸𑀯𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑀲𑀗𑁆𑀔𑀸𑀢𑀮𑀓𑁆𑀔𑀡𑀢𑁆𑀢𑀬𑀲𑀫𑁆𑀫𑀲𑀦𑀯𑀲𑀧𑁆𑀧𑀯𑀢𑁆𑀢𑁂𑀦 𑀓𑀮𑀸𑀧𑀲𑀫𑁆𑀫𑀲𑀦𑀜𑀸𑀡𑁂𑀦 𑀮𑀓𑁆𑀔𑀡𑀢𑁆𑀢𑀬𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲.

𑀲𑀫𑁆𑀫𑀲𑀦𑀜𑀸𑀡𑁂 𑀧𑀦 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀢𑁂𑀲𑁆𑀯𑁂𑀯 𑀲𑀗𑁆𑀔𑀸𑀭𑁂𑀲𑀼 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀢𑀡𑁆𑀳𑀸𑀓𑀫𑁆𑀫𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀢𑀣𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄, 𑀢𑀡𑁆𑀳𑀸𑀓𑀫𑁆𑀫𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑁂 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀲𑀼𑀧𑀺 𑀆𑀳𑀸𑀭𑀁 𑀅𑀧𑀦𑁂𑀢𑁆𑀯𑀸 ‘‘𑀨𑀲𑁆𑀲𑀲𑀫𑀼𑀤𑀬𑀸 𑀨𑀲𑁆𑀲𑀦𑀺𑀭𑁄𑀥𑀸’’𑀢𑀺 𑀘 𑀏𑀯𑀁 𑀨𑀲𑁆𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 ‘‘𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑀸’’𑀢𑀺 𑀦𑀸𑀫𑀭𑀽𑀧𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀬𑀲𑀫𑀼𑀤𑀬𑀯𑀲𑁂𑀦, 𑀧𑀘𑁆𑀘𑀬𑀦𑀺𑀭𑁄𑀥𑀯𑀲𑁂𑀦 𑀘, 𑀧𑀘𑁆𑀘𑀬𑁂 𑀅𑀦𑀸𑀫𑀲𑀺𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀦𑁆𑀥𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀫𑀢𑁆𑀢𑀲𑁆𑀲, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀫𑀢𑁆𑀢𑀲𑁆𑀲 𑀘 𑀤𑀲𑁆𑀲𑀦𑁂𑀦 𑀔𑀡𑀯𑀲𑁂𑀦 𑀘𑀸𑀢𑀺 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀧𑀘𑁆𑀘𑀬𑀯𑀲𑁂𑀦 𑀘𑀢𑀼𑀥𑀸, 𑀔𑀡𑀯𑀲𑁂𑀦 𑀏𑀓𑀥𑀸 𑀘𑀸𑀢𑀺 𑀧𑀜𑁆𑀘𑀥𑀸 𑀉𑀤𑀬𑀁, 𑀧𑀜𑁆𑀘𑀥𑀸 𑀯𑀬𑀦𑁆𑀢𑀺 𑀤𑀲𑀤𑀲𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀯𑀲𑁂𑀦 𑀲𑀫𑀧𑀜𑁆𑀜𑀸𑀲𑀸𑀓𑀸𑀭𑁂𑀳𑀺 𑀉𑀤𑀬𑀩𑁆𑀩𑀬𑀜𑀸𑀡𑁂𑀦 𑀉𑀤𑀬𑀩𑁆𑀩𑀬𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀬𑁄𑀕𑀺𑀦𑁄 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀲𑀭𑀻𑀭𑀢𑁄 𑀦𑀺𑀘𑁆𑀙𑀭𑀡𑀓𑀆𑀮𑁄𑀓𑀲𑀗𑁆𑀔𑀸𑀢𑁄 𑀑𑀪𑀸𑀲𑁄, 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀳𑀚𑀸𑀢𑀸 𑀔𑀼𑀤𑁆𑀤𑀺𑀓𑀸𑀤𑀺𑀧𑀜𑁆𑀘𑀯𑀺𑀥𑀸 (𑀥. 𑀲. 𑀅𑀝𑁆𑀞. 𑁧 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭 𑀛𑀸𑀦𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸) 𑀧𑀻𑀢𑀺, 𑀢𑀣𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀘𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀸 𑀧𑀲𑁆𑀲𑀤𑁆𑀥𑀺, 𑀩𑀮𑀯𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀗𑁆𑀔𑀸𑀢𑁄 𑀅𑀥𑀺𑀫𑁄𑀓𑁆𑀔𑁄, 𑀲𑀫𑁆𑀫𑀧𑁆𑀧𑀥𑀸𑀦𑀓𑀺𑀘𑁆𑀘𑀲𑀸𑀥𑀓𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀗𑁆𑀔𑀸𑀢𑁄 𑀧𑀕𑁆𑀕𑀳𑁄, 𑀅𑀢𑀺𑀧𑀡𑀻𑀢𑀁 𑀲𑀼𑀔𑀁, 𑀇𑀦𑁆𑀤𑀯𑀺𑀲𑁆𑀲𑀝𑁆𑀞𑀯𑀚𑀺𑀭𑀲𑀤𑀺𑀲𑀁 𑀢𑀺𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸𑀪𑀽𑀢𑀁 𑀜𑀸𑀡𑀁, 𑀲𑀢𑀺𑀧𑀝𑁆𑀞𑀸𑀦𑀪𑀽𑀢𑀸 𑀘𑀺𑀭𑀓𑀢𑀸𑀤𑀺𑀅𑀦𑀼𑀲𑁆𑀲𑀭𑀡𑀲𑀫𑀢𑁆𑀣𑀸 𑀉𑀧𑀝𑁆𑀞𑀸𑀦𑀲𑀗𑁆𑀔𑀸𑀢𑀸 𑀲𑀢𑀺, 𑀲𑀫𑀧𑁆𑀧𑀯𑀢𑁆𑀢𑀯𑀺𑀧𑀲𑁆𑀲𑀦𑀸𑀲𑀳𑀚𑀸𑀢𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀪𑀽𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸, 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀛𑀦𑀼𑀧𑁂𑀓𑁆𑀔𑀸 𑀘𑀸𑀢𑀺 𑀤𑀼𑀯𑀺𑀥𑀸𑀧𑀺 𑀉𑀧𑁂𑀓𑁆𑀔𑀸, 𑀑𑀪𑀸𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘‘𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑁄 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄’’𑀢𑁆𑀬𑀸𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁭𑁩𑁩) 𑀦𑀬𑁂𑀦 𑀢𑀢𑁆𑀣 𑀆𑀮𑀬𑀁 𑀓𑀼𑀭𑀼𑀫𑀸𑀦𑀸 𑀲𑀼𑀔𑀼𑀫𑀢𑀡𑁆𑀳𑀸 𑀭𑀽𑀧𑀦𑀺𑀓𑀦𑁆𑀢𑀺𑀘𑀸𑀢𑀺 𑀑𑀪𑀸𑀲𑀸𑀤𑀻𑀲𑀼 𑀤𑀲𑀲𑀼 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘‘𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀸 𑀑𑀪𑀸𑀲𑀸𑀤𑀬𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸 𑀅𑀤𑁆𑀥𑀸 𑀫𑀕𑁆𑀕𑀧𑁆𑀧𑀢𑁆𑀢𑁄𑀲𑁆𑀫𑀺, 𑀨𑀮𑀧𑁆𑀧𑀢𑁆𑀢𑁄𑀲𑁆𑀫𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁩𑁩) 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀇𑀫𑁂 𑀑𑀪𑀸𑀲𑀸𑀤𑀬𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀯𑀢𑁆𑀣𑀼𑀢𑀸𑀬 𑀦 𑀫𑀕𑁆𑀕𑁄, 𑀅𑀣 𑀔𑁄 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀏𑀯, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀧𑀦 𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑁄’’𑀢𑀺 𑀏𑀯𑀁 𑀫𑀕𑁆𑀕𑀸𑀫𑀕𑁆𑀕𑀮𑀓𑁆𑀔𑀡𑀲𑁆𑀲 𑀯𑀯𑀢𑁆𑀣𑀸𑀦𑀁 𑀦𑀺𑀘𑁆𑀙𑀬𑀦𑀁 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀚𑀸𑀦𑀦𑀢𑁄, 𑀤𑀲𑁆𑀲𑀦𑀢𑁄, 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬 𑀯𑀺𑀲𑁄𑀥𑀦𑀢𑁄 𑀘 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁫𑁪. 𑀬𑀸𑀯𑀸𑀦𑀼𑀮𑁄𑀫𑀸𑀢𑀺 𑀬𑀸𑀯 𑀲𑀘𑁆𑀘𑀸𑀦𑀼𑀮𑁄𑀫𑀜𑀸𑀡𑀸. 𑀦𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀻𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁩𑁭 𑀆𑀤𑀬𑁄) 𑀔𑀦𑁆𑀥𑀸𑀦𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀚𑀸𑀦𑀦𑀓𑀁 𑀉𑀤𑀬𑀩𑁆𑀩𑀬𑀜𑀸𑀡𑀁, 𑀉𑀤𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀪𑀗𑁆𑀕𑀫𑀢𑁆𑀢𑀸𑀦𑀼𑀧𑁂𑀓𑁆𑀔𑀓𑀁 𑀪𑀗𑁆𑀕𑀜𑀸𑀡𑀁, 𑀪𑀗𑁆𑀕𑀯𑀲𑁂𑀦 𑀉𑀧𑀝𑁆𑀞𑀺𑀢𑀸𑀦𑀁 𑀲𑀻𑀳𑀸𑀤𑀻𑀦𑀁 𑀯𑀺𑀬 𑀪𑀸𑀬𑀺𑀢𑀩𑁆𑀩𑀸𑀓𑀸𑀭𑀸𑀦𑀼𑀧𑁂𑀓𑁆𑀔𑀓𑀁 𑀪𑀬𑀜𑀸𑀡𑀁, 𑀢𑀣𑀸𑀦𑀼𑀧𑁂𑀓𑁆𑀔𑀺𑀢𑀸𑀦𑀁 𑀆𑀤𑀺𑀢𑁆𑀢𑀖𑀭𑀲𑁆𑀲 𑀯𑀺𑀬 𑀆𑀤𑀻𑀦𑀯𑀸𑀓𑀸𑀭𑀸𑀦𑀼𑀧𑁂𑀓𑁆𑀔𑀓𑀁 𑀆𑀤𑀻𑀦𑀯𑀜𑀸𑀡𑀁, 𑀤𑀺𑀝𑁆𑀞𑀸𑀤𑀻𑀦𑀯𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀁 𑀦𑀺𑀩𑁆𑀩𑀺𑀤𑀸𑀜𑀸𑀡𑀁, 𑀚𑀸𑀮𑀸𑀤𑀺𑀢𑁄 𑀫𑀘𑁆𑀙𑀸𑀤𑀺𑀓𑀸 𑀯𑀺𑀬 𑀢𑁂𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑁂𑀳𑀺 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁, 𑀫𑀼𑀘𑁆𑀘𑀦𑀼𑀧𑀸𑀬𑀲𑀫𑁆𑀧𑀸𑀤𑀦𑀢𑁆𑀣𑀁 𑀤𑀺𑀝𑁆𑀞𑀸𑀤𑀻𑀦𑀯𑁂𑀲𑀼𑀧𑀺 𑀲𑀫𑀼𑀤𑁆𑀤𑀲𑀓𑀼𑀡𑀻 𑀯𑀺𑀬 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀦𑀯𑀲𑀧𑁆𑀧𑀢𑁆𑀢𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀘𑀢𑁆𑀢𑀪𑀭𑀺𑀬𑁄 𑀧𑀼𑀭𑀺𑀲𑁄 𑀯𑀺𑀬 𑀤𑀺𑀝𑁆𑀞𑀸𑀤𑀻𑀦𑀯𑁂𑀲𑀼 𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀉𑀧𑁂𑀓𑁆𑀔𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁, 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀢𑀸𑀬 𑀳𑁂𑀝𑁆𑀞𑀸 𑀧𑀯𑀢𑁆𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀁, 𑀉𑀤𑁆𑀥𑀁 𑀫𑀕𑁆𑀕𑀓𑁆𑀔𑀡𑁂 𑀅𑀥𑀺𑀕𑀦𑁆𑀢𑀩𑁆𑀩𑀸𑀦𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀜𑁆𑀘 𑀅𑀦𑀼𑀮𑁄𑀫𑀢𑁄 𑀫𑀕𑁆𑀕𑀯𑀻𑀣𑀺𑀬𑀁 𑀕𑁄𑀢𑁆𑀭𑀪𑀼𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀲𑀗𑁆𑀔𑀸𑀢𑀁 𑀦𑀯𑀫𑀁 𑀅𑀦𑀼𑀮𑁄𑀫𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀦𑀯 𑀜𑀸𑀡𑀸𑀦𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀧𑀝𑀺𑀧𑀤𑀸𑀪𑀸𑀯𑀢𑁄 𑀢𑀺𑀮𑀓𑁆𑀔𑀡𑀚𑀸𑀦𑀦𑀝𑁆𑀞𑁂𑀦, 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦, 𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁫𑁫. 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀧𑀸𑀓𑁄 𑀯𑀺𑀧𑀲𑁆𑀲𑀦𑀸𑀧𑀭𑀺𑀧𑀸𑀓𑁄, 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁. 𑀢𑀁 𑀆𑀕𑀫𑁆𑀫 𑀧𑀝𑀺𑀘𑁆𑀘. 𑀇𑀤𑀸𑀦𑀺 𑀅𑀧𑁆𑀧𑀦𑀸𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 ‘‘𑀇𑀤𑀸𑀦𑀺 𑀅𑀧𑁆𑀧𑀦𑀸𑀲𑀗𑁆𑀔𑀸𑀢𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀓𑁆𑀔𑀡𑁂. 𑀬𑀁 𑀓𑀺𑀜𑁆𑀘𑀻𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀕𑀳𑀺𑀢𑁂𑀲𑀼 𑀢𑀻𑀲𑀼 𑀏𑀓𑀁 𑀬𑀁 𑀓𑀺𑀜𑁆𑀘𑀺.

𑁫𑁬. 𑀯𑀺𑀧𑀲𑁆𑀲𑀦𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀲𑀺𑀔𑀸𑀧𑁆𑀧𑀢𑁆𑀢𑀸. 𑀅𑀦𑀼𑀮𑁄𑀫𑀜𑀸𑀡𑀲𑀳𑀺𑀢𑀢𑀸𑀬 𑀲𑀸𑀦𑀼𑀮𑁄𑀫𑀸. 𑀲𑀸 𑀏𑀯 𑀲𑀗𑁆𑀔𑀸𑀭𑁂𑀲𑀼 𑀉𑀤𑀸𑀲𑀻𑀦𑀢𑁆𑀢𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸. 𑀬𑀣𑀸𑀦𑀼𑀭𑀽𑀧𑀁 𑀅𑀧𑀸𑀬𑀸𑀤𑀺𑀢𑁄, 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀢𑁄 𑀘 𑀯𑀼𑀝𑁆𑀞𑀳𑀦𑀢𑁄 𑀯𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀕𑀘𑁆𑀙𑀢𑀻𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻.

𑁫𑁭. 𑀅𑀪𑀺𑀲𑀫𑁆𑀪𑁄𑀦𑁆𑀢𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀁.

𑁫𑁮. 𑀧𑀭𑀺𑀚𑀸𑀦𑀦𑁆𑀢𑁄𑀢𑀺 ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀊𑀦𑀸𑀥𑀺𑀓’’𑀦𑁆𑀢𑀺 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑁆𑀢𑁄. 𑀲𑀘𑁆𑀙𑀺𑀓𑀭𑁄𑀦𑁆𑀢𑁄𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁄. 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀯𑀲𑁂𑀦𑀸𑀢𑀺 𑀫𑀕𑁆𑀕𑀲𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀘𑀢𑀼𑀢𑁆𑀣𑀲𑀘𑁆𑀘𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀯𑀟𑁆𑀠𑀦𑀯𑀲𑁂𑀦. 𑀏𑀓𑀲𑁆𑀲𑁂𑀯 𑀜𑀸𑀡𑀲𑁆𑀲 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀁 𑀧𑀤𑀻𑀧𑀸𑀤𑀻𑀦𑀁 𑀯𑀝𑁆𑀝𑀺𑀤𑀸𑀳𑀸𑀤𑀺𑀘𑀢𑀼𑀓𑀺𑀘𑁆𑀘𑀤𑀲𑁆𑀲𑀦𑀢𑁄, ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀻’’𑀢𑁆𑀬𑀸𑀤𑀺 (𑀲𑀁. 𑀦𑀺. 𑁫.𑁧𑁧𑁦𑁦; 𑀯𑀺𑀲𑀼𑀤𑁆𑀥𑀺. 𑁨.𑁮𑁩𑁯) 𑀆𑀕𑀫𑀢𑁄 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁.

𑁫𑁯. 𑀤𑁆𑀯𑁂 𑀢𑀻𑀡𑀺 𑀨𑀮𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀺𑀢𑁆𑀯𑀸𑀢𑀺 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀢𑁄 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀨𑀮𑀘𑀺𑀢𑁆𑀢𑀸𑀦𑀺 𑀅𑀧𑀦𑀻𑀢𑀕𑁆𑀕𑀺𑀫𑁆𑀳𑀺 𑀞𑀸𑀦𑁂 𑀉𑀡𑁆𑀳𑀢𑁆𑀢𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬 𑀖𑀝𑁂𑀳𑀺 𑀅𑀪𑀺𑀲𑀺𑀜𑁆𑀘𑀫𑀸𑀦𑀫𑀼𑀤𑀓𑀁 𑀯𑀺𑀬 𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑁂𑀧𑀺 𑀲𑀦𑁆𑀢𑀸𑀦𑁂 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀓𑀸𑀦𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀺𑀢𑁆𑀯𑀸, 𑀢𑁂𑀲𑀁 𑀧𑀯𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀻𑀢𑀺 𑀫𑀕𑁆𑀕𑀨𑀮𑀸𑀤𑀺𑀯𑀺𑀲𑀬𑀸𑀦𑀺 𑀓𑀸𑀫𑀸𑀯𑀘𑀭𑀜𑀸𑀡𑀸𑀦𑀺, 𑀬𑀸𑀦𑀺 𑀲𑀦𑁆𑀥𑀸𑀬 ‘‘𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁨𑁩) 𑀯𑀼𑀢𑁆𑀢𑀁.

𑁬𑁦. 𑀇𑀤𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀪𑀽𑀫𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀁 𑀨𑀮𑀜𑁆𑀘𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀇𑀫𑀺𑀦𑀸𑀯 𑀯𑀢𑀸𑀳𑀁 𑀫𑀕𑁆𑀕𑁂𑀦 𑀆𑀕𑀢𑁄’’𑀢𑀺 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑀢𑁄 ‘‘𑀅𑀬𑀁 𑀦𑀸𑀫 𑀫𑁂 𑀆𑀦𑀺𑀲𑀁𑀲𑁄 𑀮𑀤𑁆𑀥𑁄’’𑀢𑀺 𑀢𑀲𑁆𑀲 𑀨𑀮𑀁, 𑀢𑀢𑁄 ‘‘𑀅𑀬𑀁 𑀦𑀸𑀫 𑀫𑁂 𑀥𑀫𑁆𑀫𑁄 𑀆𑀭𑀫𑁆𑀫𑀡𑀢𑁄 𑀲𑀘𑁆𑀙𑀺𑀓𑀢𑁄’’𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀡𑁆𑀟𑀺𑀢𑁄 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑀢𑁄 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀧𑀳𑀻𑀦𑁂 𑀓𑀺𑀮𑁂𑀲𑁂, ‘‘𑀇𑀫𑁂 𑀦𑀸𑀫 𑀅𑀯𑀲𑀺𑀝𑁆𑀞𑀸’’𑀢𑀺 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺 𑀯𑀸, 𑀦 𑀯𑀸. 𑀓𑁄𑀘𑀺 𑀲𑁂𑀓𑁆𑀔𑁄 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀓𑁄𑀘𑀺 𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑀢𑁆𑀣 𑀓𑀸𑀫𑀘𑀸𑀭𑁄𑀢𑁆𑀬𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀳𑀺 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 ‘‘𑀓𑁄 𑀲𑀼 𑀦𑀸𑀫 𑀫𑁂 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀅𑀧𑁆𑀧𑀳𑀻𑀦𑁄’’𑀢𑀺 (𑀫. 𑀦𑀺. 𑁧.𑁧𑁭𑁫; 𑀯𑀺𑀲𑀼𑀤𑁆𑀥𑀺. 𑁨.𑁮𑁧𑁨) 𑀅𑀧𑁆𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀘𑁆𑀙𑀺. 𑀅𑀭𑀳𑀢𑁄 𑀧𑀦 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀁 𑀦𑀢𑁆𑀣𑀺 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸, 𑀢𑀲𑁆𑀫𑀸 𑀢𑀺𑀡𑁆𑀡𑀁 𑀲𑁂𑀓𑁆𑀔𑀸𑀦𑀁 𑀧𑀦𑁆𑀦𑀭𑀲 𑀅𑀭𑀳𑀢𑁄 𑀘𑀢𑁆𑀢𑀸𑀭𑀻𑀢𑀺 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀙𑀩𑁆𑀩𑀺𑀲𑀼𑀤𑁆𑀥𑀺𑀓𑀫𑁂𑀦𑀸𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁬𑁬𑁨 𑀆𑀤𑀬𑁄) 𑀲𑀻𑀮𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀦𑀁 𑀯𑀲𑁂𑀦 𑀫𑀽𑀮𑀪𑀽𑀢𑀸𑀦𑀁 𑀤𑁆𑀯𑀺𑀦𑁆𑀦𑀁, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀆𑀤𑀻𑀦𑀁 𑀯𑀲𑁂𑀦 𑀲𑀭𑀻𑀭𑀪𑀽𑀢𑀸𑀦𑀁 𑀘𑀢𑀼𑀦𑁆𑀦𑀦𑁆𑀢𑀺 𑀏𑀢𑀸𑀲𑀁 𑀙𑀦𑁆𑀦𑀁 𑀯𑀺𑀲𑀼𑀤𑁆𑀥𑀻𑀦𑀁 𑀓𑀫𑁂𑀦. 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀚𑀸𑀦𑀦𑀢𑀸, 𑀧𑀘𑁆𑀘𑀓𑁆𑀔𑀓𑀭𑀡𑀢𑁄, 𑀓𑀺𑀮𑁂𑀲𑀫𑀮𑁂𑀳𑀺 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑀏𑀢𑁆𑀣𑀸𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂.

𑀯𑀺𑀲𑀼𑀤𑁆𑀥𑀺𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀫𑁄𑀓𑁆𑀔𑀪𑁂𑀤𑀯𑀡𑁆𑀡𑀦𑀸

𑁬𑁧. 𑀢𑀢𑁆𑀣 𑀢𑀲𑁆𑀫𑀺𑀁 𑀉𑀤𑁆𑀤𑁂𑀲𑁂. 𑀲𑀗𑁆𑀔𑀸𑀭𑁂𑀲𑀼 ‘‘𑀬𑁄 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀨𑀮𑀲𑁆𑀲 𑀘 𑀯𑁂𑀤𑀓𑁄 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀏𑀯𑀁 𑀅𑀪𑀺𑀦𑀺𑀯𑁂𑀲𑁄 𑀤𑀴𑁆𑀳𑀕𑁆𑀕𑀸𑀳𑁄, 𑀢𑀁 𑀫𑀼𑀜𑁆𑀘𑀦𑁆𑀢𑀻 ‘‘𑀅𑀦𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸𑀯 𑀅𑀢𑁆𑀢𑀲𑀼𑀜𑁆𑀜𑀢𑀸𑀓𑀸𑀭𑀸𑀦𑀼𑀧𑀲𑁆𑀲𑀦𑀢𑁄 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀫 𑀯𑀺𑀫𑁄𑀓𑁆𑀔𑀫𑀼𑀔𑀁 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀁 𑀫𑀕𑁆𑀕𑀨𑀮𑀲𑁆𑀲 𑀤𑁆𑀯𑀸𑀭𑀁 𑀳𑁄𑀢𑀺.

𑁬𑁨. 𑀲𑀗𑁆𑀔𑀸𑀭𑁂𑀲𑀼 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 (𑀅. 𑀦𑀺. 𑁪.𑁪𑁯; 𑀧𑀝𑀺. 𑀫. 𑁧.𑁨𑁩𑁬; 𑀯𑀺𑀪. 𑁯𑁩𑁯) 𑀧𑀯𑀢𑁆𑀢𑀁 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀲𑀗𑁆𑀔𑀸𑀢𑀁 𑀯𑀺𑀧𑀮𑁆𑀮𑀸𑀲𑀦𑀺𑀫𑀺𑀢𑁆𑀢𑀁 𑀫𑀼𑀜𑁆𑀘𑀦𑁆𑀢𑀻 𑀧𑀚𑀳𑀦𑁆𑀢𑀻 𑀯𑀺𑀧𑀮𑁆𑀮𑀸𑀲𑀦𑀺𑀫𑀺𑀢𑁆𑀢𑀭𑀳𑀺𑀢𑀸𑀓𑀸𑀭𑀸𑀦𑀼𑀧𑀲𑁆𑀲𑀦𑀢𑁄 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀫 𑀯𑀺𑀫𑁄𑀓𑁆𑀔𑀫𑀼𑀔𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁩. ‘‘𑀤𑀼𑀓𑁆𑀔’’𑀦𑁆𑀢𑀺 𑀧𑀯𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁂𑀲𑀼 ‘‘𑀏𑀢𑀁 𑀫𑀫, 𑀏𑀢𑀁 𑀲𑀼𑀔’’𑀦𑁆𑀢𑁆𑀬𑀸𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 𑀓𑀸𑀫𑀪𑀯𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀢𑀡𑁆𑀳𑀸𑀧𑀡𑀺𑀥𑀺𑀁 𑀢𑀡𑁆𑀳𑀸𑀧𑀢𑁆𑀣𑀦𑀁 𑀫𑀼𑀜𑁆𑀘𑀦𑁆𑀢𑀻 𑀤𑀼𑀓𑁆𑀔𑀸𑀓𑀸𑀭𑀤𑀲𑁆𑀲𑀦𑁂𑀦 𑀧𑀭𑀺𑀘𑁆𑀘𑀚𑀦𑁆𑀢𑀻 𑀧𑀡𑀺𑀥𑀺𑀭𑀳𑀺𑀢𑀸𑀓𑀸𑀭𑀸𑀦𑀼𑀧𑀲𑁆𑀲𑀦𑀢𑁄 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀫.

𑁬𑁪. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀢𑀸𑀲𑀁 𑀢𑀺𑀲𑁆𑀲𑀦𑁆𑀦𑀁 𑀏𑀢𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺, 𑀢𑀲𑁆𑀫𑀸 𑀬𑀤𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺. 𑀫𑀕𑁆𑀕𑁄 𑀲𑀼𑀜𑁆𑀜𑀢𑁄 𑀦𑀸𑀫 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀆𑀕𑀫𑀦𑀯𑀲𑁂𑀦 𑀮𑀤𑁆𑀥𑀦𑀸𑀫𑀢𑁆𑀢𑀸.

𑁬𑁬. 𑀯𑀺𑀧𑀲𑁆𑀲𑀦𑀸𑀕𑀫𑀦𑀯𑀲𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀕𑀫𑀦𑀯𑀲𑁂𑀦. 𑀆𑀕𑀘𑁆𑀙𑀢𑀺 𑀏𑀢𑁂𑀦 𑀫𑀕𑁆𑀕𑁄, 𑀨𑀮𑀜𑁆𑀘𑀸𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁄 𑀇𑀥 𑀆𑀕𑀫𑀦𑀁 𑀦𑀸𑀫.

𑁬𑁭. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦. 𑀬𑀣𑀸𑀲𑀓𑀁 𑀨𑀮𑀫𑀼𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀻𑀢𑀺 𑀬𑀣𑀸𑀮𑀤𑁆𑀥𑀫𑀕𑁆𑀕𑀲𑁆𑀲 𑀨𑀮𑀪𑀽𑀢𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀨𑀮𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀫𑀕𑁆𑀕𑀸𑀕𑀫𑀦𑀯𑀲𑁂𑀦 𑀅𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀕𑀫𑀦𑀯𑀲𑁂𑀦𑁂𑀯 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀢𑀤𑀸 𑀫𑀕𑁆𑀕𑀧𑁆𑀧𑀯𑀢𑁆𑀢𑀸𑀪𑀸𑀯𑁂𑀦 𑀢𑀲𑁆𑀲 𑀤𑁆𑀯𑀸𑀭𑀪𑀸𑀯𑀸𑀬𑁄𑀕𑀢𑁄. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀼𑀜𑁆𑀜𑀢𑀢𑁆𑀢𑀸, 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀭𑀳𑀺𑀢𑀢𑁆𑀢𑀸, 𑀢𑀡𑁆𑀳𑀸𑀧𑀡𑀺𑀥𑀺𑀭𑀳𑀺𑀢𑀢𑁆𑀢𑀸 𑀘 𑀲𑀼𑀜𑁆𑀜𑀢𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀦𑀸𑀫𑀯𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀢𑀲𑁆𑀲 𑀯𑀲𑁂𑀦. 𑀲𑀭𑀲𑀯𑀲𑁂𑀦𑀸𑀢𑀺 𑀭𑀸𑀕𑀸𑀤𑀺𑀲𑀼𑀜𑁆𑀜𑀢𑀢𑁆𑀢𑀸, 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀭𑀳𑀺𑀢𑀢𑁆𑀢𑀸, 𑀓𑀺𑀮𑁂𑀲𑀧𑀡𑀺𑀥𑀺𑀭𑀳𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀕𑀼𑀡𑀯𑀲𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀫𑀕𑁆𑀕𑀯𑀻𑀣𑀺𑀬𑀁, 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀜𑁆𑀘. 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲𑀧𑀺.

𑀯𑀺𑀫𑁄𑀓𑁆𑀔𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀪𑁂𑀤𑀯𑀡𑁆𑀡𑀦𑀸

𑁬𑁮. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼 𑀓𑀸𑀫𑀲𑀼𑀕𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀧𑀭𑀫𑀁 𑀏𑀢𑀲𑁆𑀲𑀸𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦 𑀧𑀦 𑀅𑀝𑁆𑀞𑀫𑀸𑀤𑀺𑀓𑀸𑀫𑀪𑀯𑀕𑀸𑀫𑀻𑀢𑁆𑀬𑀥𑀺𑀧𑁆𑀧𑀸𑀬𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦 𑀢𑁂 𑀪𑀯𑀁 𑀅𑀝𑁆𑀞𑀫𑀫𑀸𑀤𑀺𑀬𑀦𑁆𑀢𑀻’’𑀢𑀺 (𑀔𑀼. 𑀧𑀸. 𑁬.𑁯; 𑀲𑀼. 𑀦𑀺. 𑁨𑁩𑁨; 𑀦𑁂𑀢𑁆𑀢𑀺. 𑁧𑁧𑁫). 𑀭𑀽𑀧𑀸𑀭𑀽𑀧𑀲𑀼𑀕𑀢𑀺𑀪𑀯𑀁 𑀧𑀦 𑀲𑀢𑁆𑀢𑀯𑀸𑀭𑀢𑁄 𑀧𑀭𑀫𑁆𑀧𑀺 𑀕𑀘𑁆𑀙𑀢𑀻𑀢𑀺 𑀆𑀘𑀭𑀺𑀬𑀸.

𑁬𑁯. 𑀭𑀸𑀕𑀤𑁄𑀲𑀫𑁄𑀳𑀸𑀦𑀦𑁆𑀢𑀺 𑀫𑁄𑀳𑀕𑁆𑀕𑀳𑀡𑀁 𑀭𑀸𑀕𑀤𑁄𑀲𑁂𑀓𑀝𑁆𑀞𑀫𑁄𑀳𑀁 𑀲𑀦𑁆𑀥𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁭𑁦. 𑀔𑀻𑀡𑀸 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀏𑀢𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑁄. 𑀤𑀓𑁆𑀔𑀺𑀡𑀸𑀭𑀳𑁂𑀲𑀼 𑀅𑀕𑁆𑀕𑀢𑁆𑀢𑀸 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄.

𑀧𑀼𑀕𑁆𑀕𑀮𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀸𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸

𑁭𑁨. 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁.

𑁭𑁩. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀦𑀺𑀭𑁄𑀥𑀲𑁆𑀲 𑀲𑀫𑀸𑀧𑀢𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀘𑀺𑀢𑁆𑀢𑀦𑀺𑀭𑁄𑀥𑀁 𑀧𑀢𑁆𑀯𑀸 𑀯𑀺𑀳𑀭𑀡𑀁. 𑀅𑀦𑀸𑀕𑀸𑀫𑀻𑀦𑀜𑁆𑀘𑀸𑀢𑀺 𑀓𑀸𑀫𑀭𑀽𑀧𑀪𑀯𑀝𑁆𑀞𑀸𑀦𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀦𑀫𑁂𑀯 𑀅𑀦𑀸𑀕𑀸𑀫𑀻𑀦𑀁, 𑀢𑀣𑀸 𑀔𑀻𑀡𑀸𑀲𑀯𑀸𑀦𑀜𑁆𑀘. 𑀢𑀢𑁆𑀣𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀁. 𑀬𑀸𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀕𑀦𑁆𑀢𑁆𑀯𑀸𑀢𑀺 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀬𑀼𑀕𑀦𑀤𑁆𑀥𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀬𑀸𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀢𑀸𑀯 𑀕𑀦𑁆𑀢𑁆𑀯𑀸. 𑀅𑀥𑀺𑀝𑁆𑀞𑁂𑀬𑁆𑀬𑀸𑀤𑀺𑀓𑀦𑁆𑀢𑀺 𑀓𑀸𑀬𑀧𑀝𑀺𑀩𑀤𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀧𑀺𑀢𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑀕𑁂𑀳𑀸𑀤𑀻𑀦𑀁 𑀅𑀕𑁆𑀕𑀺𑀆𑀤𑀺𑀦𑀸 𑀅𑀯𑀺𑀦𑀸𑀲𑀦𑀸𑀥𑀺𑀝𑁆𑀞𑀸𑀦𑀁, 𑀲𑀁𑀖𑀧𑀝𑀺𑀫𑀸𑀦𑀦𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀸𑀦𑀁 𑀧𑀼𑀭𑁂𑀢𑀭𑀁 𑀯𑀼𑀝𑁆𑀞𑀸𑀦𑀁, 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀆𑀬𑀼𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺𑀑𑀮𑁄𑀓𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀅𑀥𑀺𑀝𑁆𑀞𑀸𑀦𑀸𑀤𑀺𑀓𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸.

𑀲𑀫𑀸𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀬𑁆𑀬𑁄𑀚𑀦𑀯𑀡𑁆𑀡𑀦𑀸

𑁭𑁫. 𑀧𑀝𑀺𑀧𑀢𑁆𑀢𑀺𑀭𑀲𑀲𑁆𑀲𑀸𑀤𑀦𑁆𑀢𑀺 𑀛𑀸𑀦𑀲𑀼𑀔𑀨𑀮𑀲𑀼𑀔𑀸𑀤𑀺𑀪𑁂𑀤𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺𑀭𑀲𑀲𑁆𑀲𑀸𑀤𑀁.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

(𑀓) 𑀘𑀸𑀭𑀺𑀢𑁆𑀢𑁂𑀦 𑀓𑀼𑀮𑀸𑀘𑀸𑀭𑁂𑀦 𑀲𑁄𑀪𑀺𑀢𑁂 𑀯𑀺𑀲𑀸𑀮𑀓𑀼𑀮𑁂 𑀉𑀤𑀬𑁄 𑀦𑀺𑀩𑁆𑀩𑀢𑁆𑀢𑀺 𑀬𑀲𑁆𑀲, 𑀢𑁂𑀦, 𑀓𑀫𑁆𑀫𑀸𑀤𑀺𑀯𑀺𑀲𑀬𑀸𑀬 𑀲𑀤𑁆𑀥𑀸𑀬 𑀅𑀪𑀺𑀯𑀼𑀤𑁆𑀥𑁄 𑀧𑀭𑀺𑀲𑀼𑀤𑁆𑀥𑁄 𑀘 𑀤𑀸𑀦𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀉𑀤𑀬𑁄 𑀬𑀲𑁆𑀲, 𑀢𑁂𑀦, 𑀦𑀫𑁆𑀧𑀯𑁆𑀳𑀬𑁂𑀦 𑀦𑀫𑁆𑀧𑀦𑀸𑀫𑀓𑁂𑀦, 𑀧𑀭𑀸𑀦𑀼𑀓𑀫𑁆𑀧𑀁 𑀲𑀸𑀲𑀦𑁂 𑀲𑀼𑀔𑁄𑀢𑀭𑀡𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁 𑀧𑀭𑀸𑀦𑀼𑀕𑁆𑀕𑀳𑀁, 𑀧𑀡𑀺𑀥𑀸𑀬 𑀧𑀢𑁆𑀣𑁂𑀢𑁆𑀯𑀸 𑀬𑀁 𑀧𑀓𑀭𑀡𑀁 𑀧𑀢𑁆𑀣𑀺𑀢𑀁 𑀅𑀪𑀺𑀬𑀸𑀘𑀺𑀢𑀁, 𑀢𑀁 𑀏𑀢𑁆𑀢𑀸𑀯𑀢𑀸 𑀧𑀭𑀺𑀦𑀺𑀝𑁆𑀞𑀺𑀢𑀦𑁆𑀢𑀺 𑀬𑁄𑀚𑀦𑀸.

(𑀔) 𑀢𑁂𑀦 𑀧𑀓𑀭𑀡𑀧𑁆𑀧𑀲𑀼𑀢𑁂𑀦 𑀯𑀺𑀧𑀼𑀮𑁂𑀦 𑀧𑀼𑀜𑁆𑀜𑁂𑀦 𑀧𑀜𑁆𑀜𑀸𑀯𑀤𑀸𑀢𑁂𑀦 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀧𑀭𑀺𑀲𑀼𑀤𑁆𑀥𑁂𑀦 𑀲𑀻𑀮𑀸𑀤𑀺𑀕𑀼𑀡𑁂𑀦 𑀲𑁄𑀪𑀺𑀢𑀸. 𑀢𑀢𑁄𑀬𑁂𑀯 𑀮𑀚𑁆𑀚𑀺𑀦𑁄 𑀪𑀺𑀓𑁆𑀔𑀽, 𑀥𑀜𑁆𑀜𑀸𑀦𑀁 𑀅𑀥𑀺𑀯𑀸𑀲𑀪𑀽𑀢𑀁, 𑀉𑀤𑀺𑀢𑁄𑀤𑀺𑀢𑀁 𑀅𑀘𑁆𑀘𑀦𑁆𑀢𑀧𑁆𑀧𑀲𑀺𑀤𑁆𑀥𑀁, 𑀫𑀽𑀮𑀲𑁄𑀫𑀁 𑀦𑀸𑀫 𑀯𑀺𑀳𑀸𑀭𑀁, 𑀧𑀼𑀜𑁆𑀜𑀯𑀺𑀪𑀯𑀲𑁆𑀲 𑀉𑀤𑀬𑀲𑀗𑁆𑀔𑀸𑀢𑀸𑀬 𑀫𑀗𑁆𑀕𑀮𑀢𑁆𑀣𑀸𑀬 𑀆𑀬𑀼𑀓𑀦𑁆𑀢𑀁 𑀫𑀜𑁆𑀜𑀦𑁆𑀢𑀼, 𑀢𑀢𑁆𑀣 𑀦𑀺𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀈𑀤𑀺𑀲𑀸 𑀳𑁄𑀦𑁆𑀢𑀽𑀢𑁆𑀬𑀥𑀺𑀧𑁆𑀧𑀸𑀬𑁄.

𑀦𑀺𑀕𑀫𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘𑀸𑀬𑀁 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀻 𑀦𑀸𑀫.

𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀝𑀻𑀓𑀸.

𑀦𑀺𑀕𑀫𑀦𑀓𑀣𑀸

𑁧. 𑀭𑀫𑁆𑀫𑁂 𑀧𑀼𑀮𑀢𑁆𑀣𑀺𑀦𑀕𑀭𑁂 𑀦𑀕𑀭𑀸𑀥𑀺𑀭𑀸𑀚𑁂,

𑀭𑀜𑁆𑀜𑀸 𑀧𑀭𑀓𑁆𑀓𑀫𑀪𑀼𑀚𑁂𑀦 𑀫𑀳𑀸𑀪𑀼𑀚𑁂𑀦;

𑀓𑀸𑀭𑀸𑀧𑀺𑀢𑁂 𑀯𑀲𑀢𑀺 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂;

𑀬𑁄 𑀭𑀫𑁆𑀫𑀳𑀫𑁆𑀫𑀺𑀬𑀯𑀭𑀽𑀧𑀯𑀦𑀸𑀪𑀺𑀭𑀸𑀫𑁂.

𑁨. 𑀲𑀫𑁆𑀧𑀦𑁆𑀦𑀲𑀻𑀮𑀤𑀫𑀲𑀁𑀬𑀫𑀢𑁄𑀲𑀺𑀢𑁂𑀳𑀺,

𑀲𑀫𑁆𑀫𑀸𑀦𑀺𑀢𑁄 𑀯𑀲𑀺𑀕𑀡𑁂𑀳𑀺 𑀕𑀼𑀡𑀸𑀓𑀭𑁂𑀳𑀺;

𑀧𑀢𑁆𑀢𑁄 𑀫𑀼𑀦𑀺𑀦𑁆𑀤𑀯𑀘𑀦𑀸𑀤𑀺𑀲𑀼 𑀦𑁂𑀓𑀕𑀦𑁆𑀣-

𑀚𑀸𑀢𑁂𑀲𑀼 𑀘𑀸𑀘𑀭𑀺𑀬𑀢𑀁 𑀫𑀳𑀺𑀢𑀁 𑀯𑀺𑀤𑀽𑀳𑀺.

𑁩. 𑀜𑀸𑀡𑀸𑀦𑀼𑀪𑀸𑀯𑀫𑀺𑀳 𑀬𑀲𑁆𑀲 𑀘 𑀲𑀽𑀘𑀬𑀦𑁆𑀢𑀻,

𑀲𑀁𑀯𑀡𑁆𑀡𑀦𑀸 𑀘 𑀯𑀺𑀦𑀬𑀝𑁆𑀞𑀓𑀣𑀸𑀤𑀺𑀓𑀸𑀦𑀁;

𑀲𑀸𑀭𑀢𑁆𑀣𑀤𑀻𑀧𑀦𑀺𑀫𑀼𑀔𑀸 𑀫𑀥𑀼𑀭𑀢𑁆𑀣𑀲𑀸𑀭-

𑀲𑀦𑁆𑀤𑀻𑀧𑀦𑁂𑀦 𑀲𑀼𑀚𑀦𑀁 𑀧𑀭𑀺𑀢𑁄𑀲𑀬𑀦𑁆𑀢𑀻.

𑁪. 𑀢𑀲𑁆𑀲𑀸𑀦𑀼𑀓𑀫𑁆𑀧𑀫𑀯𑀮𑀫𑁆𑀩𑀺𑀬 𑀲𑀸𑀭𑀺𑀧𑀼𑀢𑁆𑀢-

𑀢𑁆𑀣𑁂𑀭𑀲𑁆𑀲 𑀣𑀸𑀫𑀕𑀢𑀲𑀸𑀭𑀕𑀼𑀡𑀸𑀓𑀭𑀲𑁆𑀲;

𑀬𑁄 𑀦𑁂𑀓𑀕𑀦𑁆𑀣𑀯𑀺𑀲𑀬𑀁 𑀧𑀝𑀼𑀢𑀁 𑀅𑀮𑀢𑁆𑀣𑀁,

𑀢𑀲𑁆𑀲𑁂𑀲 𑀜𑀸𑀡𑀯𑀺𑀪𑀯𑁄 𑀯𑀺𑀪𑀯𑁂𑀓𑀳𑁂𑀢𑀼.

𑁫. 𑀲𑁄𑀳𑀫𑁂𑀢𑀲𑁆𑀲 𑀲𑀁𑀲𑀼𑀤𑁆𑀥-𑀯𑀸𑀬𑀸𑀫𑀲𑁆𑀲𑀸𑀦𑀼𑀪𑀸𑀯𑀢𑁄.

𑀅𑀤𑁆𑀥𑀸𑀲𑀸𑀲𑀦𑀤𑀸𑀬𑀸𑀤𑁄, 𑀳𑁂𑀲𑁆𑀲𑀁 𑀫𑁂𑀢𑁆𑀢𑁂𑀬𑁆𑀬𑀲𑀢𑁆𑀣𑀼𑀦𑁄.

𑁬. 𑀚𑁄𑀢𑀬𑀦𑁆𑀢𑀁 𑀢𑀤𑀸 𑀢𑀲𑁆𑀲, 𑀲𑀸𑀲𑀦𑀁 𑀲𑀼𑀤𑁆𑀥𑀫𑀸𑀦𑀲𑀁.

𑀧𑀲𑁆𑀲𑁂𑀬𑁆𑀬𑀁 𑀲𑀓𑁆𑀓𑀭𑁂𑀬𑁆𑀬𑀜𑁆𑀘, 𑀕𑀭𑀼𑀁 𑀫𑁂 𑀲𑀸𑀭𑀺𑀲𑀫𑁆𑀪𑀯𑀁.

𑁭. 𑀤𑀺𑀦𑁂𑀳𑀺 𑀘𑀢𑀼𑀯𑀻𑀲𑁂𑀳𑀺, 𑀝𑀻𑀓𑀸𑀬𑀁 𑀦𑀺𑀝𑁆𑀞𑀺𑀢𑀸 𑀬𑀣𑀸.

𑀢𑀣𑀸 𑀓𑀮𑁆𑀬𑀸𑀡𑀲𑀗𑁆𑀓𑀧𑁆𑀧𑀸, 𑀲𑀻𑀖𑀁 𑀲𑀺𑀚𑁆𑀛𑀦𑁆𑀢𑀼 𑀧𑀸𑀡𑀺𑀦𑀦𑁆𑀢𑀺.

𑀇𑀢𑀺 𑀪𑀤𑀦𑁆𑀢𑀲𑀸𑀭𑀺𑀧𑀼𑀢𑁆𑀢𑀫𑀳𑀸𑀣𑁂𑀭𑀲𑁆𑀲 𑀲𑀺𑀲𑁆𑀲𑁂𑀦 𑀭𑀘𑀺𑀢𑀸

𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀻 𑀦𑀸𑀫

𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.