𑁮. 𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑁆𑀞𑀸𑀦𑀦𑀬𑀯𑀲𑁂𑀦 𑀧𑀘𑁆𑀘𑀬𑁂 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲’’𑀦𑁆𑀢𑁆𑀬𑀸𑀤𑀺 𑀆𑀭𑀤𑁆𑀥𑀁. 𑀬𑁂𑀲𑀁 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀢𑀢𑁆𑀢𑀸 𑀲𑀗𑁆𑀔𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀬𑁂 𑀧𑀘𑁆𑀘𑀬𑀥𑀫𑁆𑀫𑀸 𑀬𑀣𑀸 𑀬𑁂𑀦𑀸𑀓𑀸𑀭𑁂𑀦 𑀧𑀘𑁆𑀘𑀬𑀸 𑀞𑀺𑀢𑀺𑀬𑀸, 𑀉𑀧𑁆𑀧𑀢𑁆𑀢𑀺𑀬𑀸 𑀘 𑀉𑀧𑀓𑀸𑀭𑀓𑀸, 𑀢𑀁 𑀯𑀺𑀪𑀸𑀕𑀁 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁, 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁, 𑀢𑀲𑁆𑀲 𑀘 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀧𑀪𑁂𑀤𑀁 𑀇𑀳 𑀇𑀫𑀲𑁆𑀫𑀺𑀁 𑀲𑀫𑀼𑀘𑁆𑀘𑀬𑀲𑀗𑁆𑀕𑀳𑀸𑀦𑀦𑁆𑀢𑀭𑁂 𑀞𑀸𑀦𑁂 𑀬𑀣𑀸𑀭𑀳𑀁 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀲𑀢𑀺 𑀢𑀁𑀢𑀁𑀧𑀘𑁆𑀘𑀬𑀸𑀦𑀁 𑀢𑀁𑀢𑀁𑀧𑀘𑁆𑀘𑀬𑀪𑀸𑀯𑀸𑀓𑀸𑀭𑀸𑀦𑀼𑀭𑀽𑀧𑀁 𑀇𑀤𑀸𑀦𑀺 𑀧𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸.

𑁨. 𑀢𑀢𑁆𑀣 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀧𑀝𑀺𑀘𑁆𑀘 𑀲𑀫𑀁 𑀕𑀦𑁆𑀢𑁆𑀯𑀸 𑀨𑀮𑀸𑀦𑀁 𑀉𑀧𑁆𑀧𑀸𑀤𑁄 𑀏𑀢𑀲𑁆𑀫𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀧𑀘𑁆𑀘𑀬𑀸𑀓𑀸𑀭𑁄. 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀞𑀸𑀦𑀸𑀦𑀺 𑀧𑀘𑁆𑀘𑀬𑀸 𑀏𑀢𑁆𑀣𑀸𑀢𑁆𑀬𑀸𑀤𑀺𑀦𑀸 𑀧𑀝𑁆𑀞𑀸𑀦𑀁, 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑀁, 𑀢𑀢𑁆𑀣 𑀤𑁂𑀲𑀺𑀢𑀦𑀬𑁄 𑀧𑀝𑁆𑀞𑀸𑀦𑀦𑀬𑁄.

𑁩. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀦𑀬𑁂𑀲𑀼. 𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀪𑀸𑀯𑁂𑀦 𑀪𑀯𑀦𑀲𑀻𑀮𑀲𑁆𑀲 𑀪𑀸𑀯𑁄 𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑁄, 𑀲𑁄𑀬𑁂𑀯 𑀆𑀓𑀸𑀭𑀫𑀢𑁆𑀢𑀁, 𑀢𑁂𑀦 𑀉𑀧𑀮𑀓𑁆𑀔𑀺𑀢𑁄 𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑀸𑀓𑀸𑀭𑀫𑀢𑁆𑀢𑁄𑀧𑀮𑀓𑁆𑀔𑀺𑀢𑁄. 𑀏𑀢𑁂𑀦𑁂𑀯 𑀢𑀤𑀪𑀸𑀯𑀸𑀪𑀸𑀯𑀸𑀓𑀸𑀭𑀫𑀢𑁆𑀢𑁄𑀧𑀮𑀓𑁆𑀔𑀺𑀢𑀢𑀸𑀧𑀺 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀳𑀺 𑀧𑀘𑁆𑀘𑀬𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀩𑁆𑀩𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀫𑀼𑀧𑁆𑀧𑀚𑁆𑀚𑀢𑀺. 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁪, 𑁪𑁦𑁬; 𑀲𑀁. 𑀦𑀺. 𑁨.𑁨𑁧; 𑀉𑀤𑀸. 𑁧, 𑁨). 𑀧𑀝𑀺𑀘𑁆𑀘 𑀨𑀮𑀁 𑀏𑀢𑀺 𑀏𑀢𑀲𑁆𑀫𑀸𑀢𑀺 𑀧𑀘𑁆𑀘𑀬𑁄. 𑀢𑀺𑀝𑁆𑀞𑀢𑀺 𑀨𑀮𑀁 𑀏𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀺𑀢𑀺, 𑀆𑀳𑀘𑁆𑀘 𑀯𑀺𑀲𑁂𑀲𑁂𑀢𑁆𑀯𑀸 𑀧𑀯𑀢𑁆𑀢𑀸 𑀧𑀘𑁆𑀘𑀬𑀲𑀗𑁆𑀔𑀸𑀢𑀸 𑀞𑀺𑀢𑀺 𑀆𑀳𑀘𑁆𑀘𑀧𑀘𑁆𑀘𑀬𑀝𑁆𑀞𑀺𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄 𑀳𑀺 𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑀸𑀓𑀸𑀭𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀢𑁆𑀢𑀸 𑀳𑁂𑀢𑀸𑀤𑀺𑀧𑀘𑁆𑀘𑀬𑀦𑀺𑀬𑀫𑀯𑀺𑀲𑁂𑀲𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀅𑀯𑀺𑀲𑁂𑀲𑀢𑁄𑀯 𑀧𑀯𑀢𑁆𑀢𑀢𑀺, 𑀅𑀬𑀁 𑀧𑀦 𑀳𑁂𑀢𑀸𑀤𑀺𑀢𑀁𑀢𑀁𑀧𑀘𑁆𑀘𑀬𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀢𑀁𑀢𑀁𑀧𑀘𑁆𑀘𑀬𑀪𑀸𑀯𑀲𑀸𑀫𑀢𑁆𑀣𑀺𑀬𑀸𑀓𑀸𑀭𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀯𑀺𑀲𑁂𑀲𑁂𑀢𑁆𑀯𑀸 𑀧𑀯𑀢𑁆𑀢𑁄𑀢𑀺 𑀆𑀳𑀘𑁆𑀘𑀧𑀘𑁆𑀘𑀬𑀝𑁆𑀞𑀺𑀢𑀺𑀫𑀸𑀭𑀩𑁆𑀪 𑀧𑀯𑀼𑀘𑁆𑀘𑀢𑀻𑀢𑀺. 𑀓𑁂𑀘𑀺 𑀧𑀦 ‘‘𑀆𑀳𑀘𑁆𑀘 𑀓𑀡𑁆𑀞𑀢𑀸𑀮𑀼𑀆𑀤𑀻𑀲𑀼 𑀧𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀸 𑀞𑀺𑀢𑀺 𑀆𑀳𑀘𑁆𑀘𑀧𑀘𑁆𑀘𑀬𑀝𑁆𑀞𑀺𑀢𑀻’’𑀢𑀺 𑀯𑀡𑁆𑀡𑁂𑀦𑁆𑀢𑀺. 𑀢𑀁 𑀧𑀦 𑀲𑀯𑀦𑀫𑀢𑁆𑀢𑁂𑀦𑁂𑀯 𑀢𑁂𑀲𑀁 𑀅𑀯𑀳𑀲𑀺𑀢𑀩𑁆𑀩𑀯𑀘𑀦𑀢𑀁 𑀧𑀓𑀸𑀲𑁂𑀢𑀺. 𑀦 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀦𑀬𑁄 𑀓𑀡𑁆𑀞𑀢𑀸𑀮𑀼𑀆𑀤𑀻𑀲𑀼 𑀅𑀦𑀸𑀳𑀘𑁆𑀘 𑀤𑁂𑀲𑁂𑀢𑀼𑀁 𑀲𑀓𑁆𑀓𑀸𑀢𑀺. 𑀯𑁄𑀫𑀺𑀲𑁆𑀲𑁂𑀢𑁆𑀯𑀸𑀢𑀺 𑀧𑀝𑁆𑀞𑀸𑀦𑀦𑀬𑀫𑁆𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑁂𑀦 𑀳𑁂𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀘 𑀫𑀺𑀲𑁆𑀲𑁂𑀢𑁆𑀯𑀸 𑀆𑀘𑀭𑀺𑀬𑀸 𑀲𑀗𑁆𑀕𑀳𑀓𑀸𑀭𑀸𑀤𑀬𑁄 𑀧𑀧𑀜𑁆𑀘𑁂𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀺, 𑀫𑀬𑀁 𑀧𑀦 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫𑀸𑀢𑁆𑀬𑀥𑀺𑀧𑁆𑀧𑀸𑀬𑁄.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀯𑀡𑁆𑀡𑀦𑀸

𑁪. 𑀦 𑀯𑀺𑀚𑀸𑀦𑀸𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀅𑀯𑀺𑀦𑁆𑀤𑀺𑀬𑀁 𑀯𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺, 𑀯𑀺𑀦𑁆𑀤𑀺𑀬𑀁 𑀯𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀁 𑀦 𑀯𑀺𑀦𑁆𑀤𑀢𑀺, 𑀯𑁂𑀤𑀺𑀢𑀩𑁆𑀩𑀁 𑀯𑀸 𑀘𑀢𑀼𑀲𑀘𑁆𑀘𑀸𑀤𑀺𑀓𑀁 𑀦 𑀯𑀺𑀤𑀺𑀢𑀁 𑀓𑀭𑁄𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂 𑀯𑀸 𑀚𑀯𑀸𑀧𑁂𑀢𑀺, 𑀯𑀺𑀚𑁆𑀚𑀫𑀸𑀦𑁂 𑀯𑀸 𑀦 𑀚𑀯𑀸𑀧𑁂𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘𑀢𑀽𑀲𑀼 𑀅𑀜𑁆𑀜𑀸𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀯𑀺𑀚𑁆𑀚𑀸 𑀏𑀯 𑀧𑀘𑁆𑀘𑀬𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄. 𑀢𑀢𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸, 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀺. 𑀢𑁂 𑀢𑀺𑀯𑀺𑀥𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺. 𑀢𑀢𑁆𑀣𑀓𑀸𑀫𑀭𑀽𑀧𑀸𑀯𑀘𑀭𑀸 𑀢𑁂𑀭𑀲 𑀓𑀼𑀲𑀮𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀘𑁂𑀢𑀦𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀏𑀯𑀫𑁂𑀢𑀸 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸 𑀲𑀗𑁆𑀔𑀸𑀭𑀸 𑀦𑀸𑀫. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁, 𑀧𑀯𑀢𑁆𑀢𑀺𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀁. 𑀢𑀢𑁆𑀣 𑀦𑀸𑀫𑀁 𑀇𑀥 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁, 𑀭𑀽𑀧𑀁 𑀧𑀦 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀢𑁄 𑀤𑀼𑀯𑀺𑀥𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀁, 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑀳𑀕𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺 𑀲𑀭𑀽𑀧𑁂𑀓𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀔𑀸𑀤𑀻𑀦𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺, 𑀓𑁂𑀲𑀜𑁆𑀘𑀺 𑀫𑀢𑁂𑀦 𑀭𑀽𑀧𑀸𑀤𑀻𑀦𑀺 𑀙 𑀩𑀸𑀳𑀺𑀭𑀸𑀬𑀢𑀦𑀸𑀦𑀺𑀧𑀺 𑀯𑀸 𑀆𑀬𑀢𑀦𑀁 𑀦𑀸𑀫. 𑀙 𑀆𑀬𑀢𑀦𑀸𑀦𑀺 𑀘 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀁. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀯𑀲𑁂𑀦 𑀙𑀤𑁆𑀯𑀸𑀭𑀺𑀓𑁄 𑀨𑀲𑁆𑀲𑁄 𑀨𑀲𑁆𑀲𑁄 𑀦𑀸𑀫. 𑀲𑀼𑀔𑀤𑀼𑀓𑁆𑀔𑀼𑀧𑁂𑀓𑁆𑀔𑀸𑀯𑀲𑁂𑀦 𑀢𑀺𑀯𑀺𑀥𑀸 𑀯𑁂𑀤𑀦𑀸.

𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸𑀢𑀺 𑀢𑀺𑀯𑀺𑀥𑀸 𑀢𑀡𑁆𑀳𑀸. 𑀙𑀴𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀧𑀦 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸 𑀳𑁄𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺. 𑀏𑀢𑁆𑀣 𑀘 𑀤𑀼𑀩𑁆𑀩𑀮𑀸 𑀢𑀡𑁆𑀳𑀸 𑀢𑀡𑁆𑀳𑀸 𑀦𑀸𑀫, 𑀩𑀮𑀯𑀢𑀻 𑀉𑀧𑀸𑀤𑀸𑀦𑀁. 𑀅𑀲𑀫𑁆𑀧𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸 𑀯𑀸 𑀢𑀡𑁆𑀳𑀸 𑀢𑀫𑀲𑀺 𑀘𑁄𑀭𑀸𑀦𑀁 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀳𑀡𑀁 𑀉𑀧𑀸𑀤𑀸𑀦𑀁 𑀘𑁄𑀭𑀸𑀦𑀁 𑀳𑀢𑁆𑀣𑀧𑁆𑀧𑀢𑁆𑀢𑀲𑁆𑀲 𑀕𑀳𑀡𑀁 𑀯𑀺𑀬. 𑀅𑀧𑁆𑀧𑀺𑀘𑁆𑀙𑀢𑀸𑀧𑀝𑀺𑀧𑀓𑁆𑀔𑀸 𑀢𑀡𑁆𑀳𑀸, 𑀲𑀦𑁆𑀢𑁄𑀲𑀧𑁆𑀧𑀝𑀺𑀧𑀓𑁆𑀔𑀁 𑀉𑀧𑀸𑀤𑀸𑀦𑀁. 𑀧𑀭𑀺𑀬𑁂𑀲𑀦𑀤𑀼𑀓𑁆𑀔𑀫𑀽𑀮𑀁 𑀢𑀡𑁆𑀳𑀸, 𑀆𑀭𑀓𑁆𑀔𑀤𑀼𑀓𑁆𑀔𑀫𑀽𑀮𑀁 𑀉𑀧𑀸𑀤𑀸𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀓𑀫𑁆𑀫𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄𑀢𑀺 𑀤𑀼𑀯𑀺𑀥𑁄 𑀪𑀯𑁄. 𑀢𑀢𑁆𑀣 𑀧𑀞𑀫𑁄 𑀪𑀯𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀪𑀯𑁄, 𑀲𑁄 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀯𑀲𑁂𑀦 𑀏𑀓𑀽𑀦𑀢𑀺𑀁𑀲𑀯𑀺𑀥𑁄. 𑀤𑀼𑀢𑀺𑀬𑁄 𑀧𑀦 𑀪𑀯𑀢𑀻𑀢𑀺 𑀪𑀯𑁄, 𑀲𑁄 𑀓𑀸𑀫𑀪𑀯𑀸𑀤𑀺𑀯𑀲𑁂𑀦 𑀦𑀯𑀯𑀺𑀥𑁄. 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀪𑀯𑁄𑀧𑀺 𑀅𑀥𑀺𑀧𑁆𑀧𑁂𑀢𑁄. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺 𑀓𑀫𑁆𑀫𑀪𑀯𑁄𑀯. 𑀲𑁄 𑀳𑀺 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀇𑀢𑀭𑁄. 𑀲𑁄 𑀳𑀺 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀲𑀪𑀸𑀯𑁄 𑀚𑀸𑀢𑀺𑀬𑁂𑀯, 𑀦 𑀘 𑀢𑀤𑁂𑀯 𑀢𑀲𑁆𑀲 𑀓𑀸𑀭𑀡𑀁 𑀬𑀼𑀢𑁆𑀢𑀁. 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀁𑀢𑀁𑀕𑀢𑀺𑀆𑀤𑀻𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀚𑀸𑀢𑀺. 𑀢𑀣𑀸𑀦𑀺𑀩𑁆𑀩𑀢𑁆𑀢𑀲𑁆𑀲 𑀘 𑀅𑀢𑁆𑀢𑀪𑀸𑀯𑀲𑁆𑀲 𑀧𑀼𑀭𑀸𑀡𑀪𑀸𑀯𑁄 𑀚𑀭𑀸. 𑀏𑀢𑀲𑁆𑀲𑁂𑀯 𑀏𑀓𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀫𑀭𑀡𑀁. 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀧𑁄 𑀲𑁄𑀓𑁄. 𑀢𑀲𑁆𑀲𑁂𑀯 𑀯𑀘𑀻𑀧𑀮𑀸𑀧𑁄 𑀧𑀭𑀺𑀤𑁂𑀯𑁄. 𑀓𑀸𑀬𑀺𑀓𑀤𑀼𑀓𑁆𑀔𑀯𑁂𑀤𑀦𑀸 𑀤𑀼𑀓𑁆𑀔𑀁. 𑀫𑀸𑀦𑀲𑀺𑀓𑀤𑀼𑀓𑁆𑀔𑀯𑁂𑀤𑀦𑀸 𑀤𑁄𑀫𑀦𑀲𑁆𑀲𑀁. 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀅𑀥𑀺𑀫𑀢𑁆𑀢𑀘𑁂𑀢𑁄𑀤𑀼𑀓𑁆𑀔𑀧𑁆𑀧𑀪𑀸𑀯𑀺𑀢𑁄 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄.

𑀏𑀢𑁆𑀣 𑀘 𑀲𑀢𑀺𑀧𑀺 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀓𑁂 𑀧𑀘𑁆𑀘𑀬𑀦𑁆𑀢𑀭𑁂 𑀅𑀯𑀺𑀚𑁆𑀚𑀸𑀤𑀺𑀏𑀓𑁂𑀓𑀧𑀘𑁆𑀘𑀬𑀕𑁆𑀕𑀳𑀡𑀁 𑀧𑀥𑀸𑀦𑀪𑀸𑀯𑀢𑁄, 𑀧𑀸𑀓𑀝𑀪𑀸𑀯𑀢𑁄 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀅𑀯𑀺𑀚𑁆𑀚𑀸𑀦𑀼𑀲𑀬𑀺𑀢𑁂𑀬𑁂𑀯 𑀲𑀦𑁆𑀢𑀸𑀦𑁂 𑀲𑀗𑁆𑀔𑀸𑀭𑀸𑀦𑀁 𑀯𑀺𑀧𑀸𑀓𑀥𑀫𑁆𑀫𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀲𑀗𑁆𑀔𑀸𑀭𑀸𑀲𑀫𑁆𑀪𑀯𑀦𑁆𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘 𑀲𑀗𑁆𑀔𑀸𑀭𑀚𑀦𑀺𑀢𑀁 𑀳𑀼𑀢𑁆𑀯𑀸 𑀪𑀯𑀦𑁆𑀢𑀭𑁂 𑀧𑀢𑀺𑀝𑁆𑀞𑀸𑀢𑀺. 𑀦 𑀳𑀺 𑀚𑀦𑀓𑀸𑀪𑀸𑀯𑁂 𑀢𑀲𑁆𑀲𑀼𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁. 𑀦𑀸𑀫𑀭𑀽𑀧𑀜𑁆𑀘 𑀧𑀼𑀩𑁆𑀩𑀗𑁆𑀕𑀫𑀸𑀥𑀺𑀝𑁆𑀞𑀸𑀦𑀪𑀽𑀢𑀯𑀺𑀜𑁆𑀜𑀸𑀡𑀼𑀧𑀢𑁆𑀣𑀤𑁆𑀥𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀧𑀢𑀺𑀝𑁆𑀞𑀳𑀢𑀻𑀢𑀺 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀦𑀸𑀫𑀭𑀽𑀧𑀁, 𑀲𑀴𑀸𑀬𑀢𑀦𑀜𑁆𑀘 𑀦𑀸𑀫𑀭𑀽𑀧𑀦𑀺𑀲𑁆𑀲𑀬𑀫𑁂𑀯 𑀙𑀩𑁆𑀩𑀺𑀥𑀨𑀲𑁆𑀲𑀲𑁆𑀲 𑀤𑁆𑀯𑀸𑀭𑀪𑀸𑀯𑁂𑀦 𑀬𑀣𑀸𑀭𑀳𑀁 𑀧𑀯𑀢𑁆𑀢𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁. 𑀨𑀲𑁆𑀲𑁄 𑀘 𑀲𑀴𑀸𑀬𑀢𑀦𑀲𑀫𑁆𑀪𑀯𑁂𑀬𑁂𑀯 𑀆𑀭𑀫𑁆𑀫𑀡𑀁 𑀨𑀼𑀲𑀢𑀺. 𑀦 𑀳𑀺 𑀤𑁆𑀯𑀸𑀭𑀸𑀪𑀸𑀯𑁂 𑀢𑀲𑁆𑀲𑀼𑀧𑁆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄. 𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀜𑁆𑀘 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑁄𑀬𑁂𑀯 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸. 𑀯𑁂𑀤𑀦𑀻𑀬𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑁂𑀤𑀦𑀸𑀳𑁂𑀢𑀼𑀓𑀸 𑀢𑀡𑁆𑀳𑀸 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸. 𑀢𑀡𑁆𑀳𑀸𑀲𑀺𑀦𑁂𑀳𑀧𑀺𑀧𑀸𑀲𑀺𑀢𑀸𑀬𑁂𑀯 𑀘 𑀉𑀧𑀸𑀤𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀉𑀧𑀸𑀤𑀸𑀬 𑀤𑀴𑁆𑀳𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀡𑁆𑀳𑀸𑀬 𑀳𑀺 𑀭𑀽𑀧𑀸𑀤𑀻𑀦𑀺 𑀅𑀲𑁆𑀲𑀸𑀤𑁂𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑁆𑀯𑀸 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑁄. 𑀢𑀣𑀸 𑀭𑀽𑀧𑀸𑀤𑀺𑀪𑁂𑀤𑁂𑀕𑀥𑀺𑀢𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑁆𑀬𑀸𑀤𑀺𑀦𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀲𑀁𑀲𑀸𑀭𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀅𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀸𑀲𑀁 𑀔𑀦𑁆𑀥𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑀪𑀽𑀢𑀁 𑀅𑀢𑁆𑀢𑀯𑀸𑀤𑀤𑀲𑁆𑀲𑀦𑀤𑁆𑀯𑀬𑀜𑁆𑀘 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀼𑀧𑀸𑀤𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀬𑁄𑀢𑀺 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁. 𑀬𑀣𑀸𑀭𑀳𑀁 𑀲𑀫𑁆𑀧𑀬𑁄𑀕𑀸𑀦𑀼𑀲𑀬𑀯𑀲𑁂𑀦 𑀉𑀧𑀸𑀤𑀸𑀦𑀧𑀢𑀺𑀝𑁆𑀞𑀺𑀢𑀸𑀬𑁂𑀯 𑀲𑀢𑁆𑀢𑀸 𑀓𑀫𑁆𑀫𑀸𑀬𑀽𑀳𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀁 𑀪𑀯𑀲𑁆𑀲 𑀧𑀘𑁆𑀘𑀬𑁄. 𑀉𑀧𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑀸 𑀘 𑀚𑀸𑀢𑀺 𑀓𑀫𑁆𑀫𑀪𑀯𑀳𑁂𑀢𑀼𑀓𑀸𑀬𑁂𑀯. 𑀩𑀻𑀚𑀢𑁄 𑀅𑀗𑁆𑀓𑀼𑀭𑁄 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀲𑀫𑀼𑀧𑀮𑀩𑁆𑀪𑀢𑀻𑀢𑀺 𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄 𑀦𑀸𑀫. 𑀲𑀢𑀺 𑀘 𑀚𑀸𑀢𑀺𑀬𑀸 𑀏𑀯 𑀚𑀭𑀸𑀫𑀭𑀡𑀲𑀫𑁆𑀪𑀯𑁄. 𑀦 𑀳𑀺 𑀅𑀚𑀸𑀢𑀸𑀦𑀁 𑀚𑀭𑀸𑀫𑀭𑀡𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀚𑀸𑀢𑀺 𑀚𑀭𑀸𑀫𑀭𑀡𑀸𑀦𑀁 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑁄 𑀤𑀝𑁆𑀞𑀩𑁆𑀩𑁄.

𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀧𑀘𑁆𑀘𑀬𑀧𑀭𑀫𑁆𑀧𑀭𑀯𑀺𑀥𑀺𑀦𑀸, 𑀦 𑀧𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀻𑀳𑀺 𑀏𑀢𑀲𑁆𑀲 𑀯𑀝𑁆𑀝𑀲𑀗𑁆𑀔𑀸𑀢𑀲𑁆𑀲 𑀓𑁂𑀯𑀮𑀲𑁆𑀲 𑀲𑀼𑀔𑀸𑀤𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀲𑁆𑀲, 𑀲𑀓𑀮𑀲𑁆𑀲 𑀯𑀸 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀤𑀼𑀓𑁆𑀔𑀭𑀸𑀲𑀺𑀲𑁆𑀲 𑀦 𑀲𑀼𑀔𑀲𑀼𑀪𑀸𑀤𑀻𑀦𑀁 𑀲𑀫𑀼𑀤𑀬𑁄 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀲𑀗𑁆𑀕𑀳𑀸𑀥𑀺𑀓𑀸𑀭𑁂.

𑁫. 𑀅𑀢𑀢𑀺 𑀲𑀢𑀢𑀁 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀤𑁆𑀥𑀸, 𑀓𑀸𑀮𑁄.

𑁬. 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀅𑀢𑀻𑀢𑁄 𑀅𑀤𑁆𑀥𑀸 𑀅𑀢𑀻𑀢𑀪𑀯𑀧𑀭𑀺𑀬𑀸𑀧𑀦𑁆𑀦𑀳𑁂𑀢𑀽𑀦𑀫𑁂𑀯𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀅𑀤𑁆𑀥𑀸𑀕𑁆𑀕𑀳𑀡𑁂𑀦 𑀘 𑀅𑀯𑀺𑀚𑁆𑀚𑀸𑀤𑀻𑀦𑀁 𑀥𑀫𑁆𑀫𑀸𑀦𑀫𑁂𑀯 𑀕𑀳𑀡𑀁 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀓𑀸𑀮𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄. 𑀦𑀺𑀭𑀼𑀤𑁆𑀥𑀸𑀦𑀼𑀧𑁆𑀧𑀸𑀤𑀸 𑀏𑀯 𑀳𑀺 𑀥𑀫𑁆𑀫𑀸 𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑀯𑀲𑁂𑀦 𑀉𑀧𑁆𑀧𑀸𑀤𑀸𑀤𑀺𑀓𑁆𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀲𑁂𑀦 𑀯𑁄𑀳𑀭𑀻𑀬𑀦𑁆𑀢𑀺. 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀦𑀸𑀕𑀢𑁄 𑀅𑀤𑁆𑀥𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀼𑀢𑁄 𑀅𑀦𑀸𑀕𑀢𑁂 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀫𑀚𑁆𑀛𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸 𑀅𑀢𑀻𑀢𑀳𑁂𑀢𑀼𑀢𑁄 𑀇𑀥 𑀦𑀺𑀩𑁆𑀩𑀢𑁆𑀢𑀦𑀓𑀨𑀮𑀲𑀪𑀸𑀯𑀢𑁆𑀢𑀸, 𑀅𑀦𑀸𑀕𑀢𑀨𑀮𑀲𑁆𑀲 𑀇𑀥 𑀳𑁂𑀢𑀼𑀲𑀪𑀸𑀯𑀢𑁆𑀢𑀸 𑀘 𑀫𑀚𑁆𑀛𑁂 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸.

𑁮. 𑀦𑀦𑀼 𑀲𑁄𑀓𑀧𑀭𑀺𑀤𑁂𑀯𑀸𑀤𑀬𑁄𑀧𑀺 𑀅𑀗𑁆𑀕𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸𑀢𑀺 𑀆𑀳 ‘‘𑀲𑁄𑀓𑀸𑀤𑀺𑀯𑀘𑀦’’𑀦𑁆𑀢𑁆𑀬𑀸𑀤𑀺. 𑀲𑁄𑀓𑀸𑀤𑀺𑀯𑀘𑀦𑀁 𑀚𑀸𑀢𑀺𑀬𑀸 𑀦𑀺𑀲𑁆𑀲𑀦𑁆𑀤𑀲𑁆𑀲 𑀅𑀫𑀼𑀔𑁆𑀬𑀨𑀮𑀫𑀢𑁆𑀢𑀲𑁆𑀲 𑀦𑀺𑀤𑀲𑁆𑀲𑀦𑀁, 𑀦 𑀧𑀦 𑀯𑀺𑀲𑀼𑀁 𑀅𑀗𑁆𑀕𑀤𑀲𑁆𑀲𑀦𑀦𑁆𑀢𑁆𑀬𑀢𑁆𑀣𑁄.

𑁯. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀓𑀺𑀮𑁂𑀲𑀪𑀸𑀯𑀲𑀸𑀫𑀜𑁆𑀜𑀢𑁄 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺, 𑀓𑀫𑁆𑀫𑀪𑀯𑀲𑀸𑀫𑀜𑁆𑀜𑀢𑁄 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀓𑀫𑁆𑀫𑀪𑀯𑁄 𑀕𑀳𑀺𑀢𑁄. 𑀢𑀣𑀸 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀕𑁆𑀕𑀳𑀡𑁂𑀦 𑀘 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀢𑁂𑀲𑀁 𑀕𑀳𑀡𑁂𑀦 𑀢𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀦𑀁 𑀚𑀸𑀢𑀺𑀚𑀭𑀸𑀪𑀗𑁆𑀕𑀸𑀯 𑀚𑀸𑀢𑀺𑀚𑀭𑀸𑀫𑀭𑀡𑀦𑁆𑀢𑀺 𑀘 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀚𑀸𑀢𑀺𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦𑀸’’𑀢𑁆𑀬𑀸𑀤𑀺.

𑁧𑁦. 𑀅𑀢𑀻𑀢𑁂 𑀳𑁂𑀢𑀯𑁄 𑀧𑀜𑁆𑀘𑀸𑀢𑀺 𑀲𑀭𑀽𑀧𑀢𑁄 𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁, 𑀲𑀗𑁆𑀕𑀳𑀯𑀲𑁂𑀦 𑀕𑀳𑀺𑀢𑀸𑀦𑀁 𑀢𑀺𑀡𑁆𑀡𑀁 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀦𑀜𑁆𑀘 𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀨𑀮𑀲𑁆𑀲 𑀧𑀘𑁆𑀘𑀬𑀸 𑀅𑀢𑀻𑀢𑀪𑀯𑁂 𑀦𑀺𑀩𑁆𑀩𑀢𑁆𑀢𑀸 𑀳𑁂𑀢𑀯𑁄 𑀧𑀜𑁆𑀘, 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀦𑁆𑀢𑀺 𑀅𑀢𑀻𑀢𑀳𑁂𑀢𑀼𑀧𑀘𑁆𑀘𑀬𑀸 𑀇𑀥 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀦𑀺𑀩𑁆𑀩𑀢𑁆𑀢𑀁 𑀯𑀺𑀜𑁆𑀜𑀸𑀡𑀸𑀤𑀺𑀨𑀮𑀧𑀜𑁆𑀘𑀓𑀁. 𑀇𑀤𑀸𑀦𑀺 𑀳𑁂𑀢𑀯𑁄 𑀧𑀜𑁆𑀘𑀸𑀢𑀺 𑀲𑀭𑀽𑀧𑀢𑁄 𑀯𑀼𑀢𑁆𑀢𑀸𑀦𑀁 𑀢𑀡𑁆𑀳𑀸𑀤𑀻𑀦𑀁 𑀢𑀺𑀡𑁆𑀡𑀁, 𑀲𑀗𑁆𑀕𑀳𑀢𑁄 𑀮𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀯𑀲𑁂𑀦 𑀆𑀬𑀢𑀺𑀁 𑀨𑀮𑀲𑁆𑀲 𑀧𑀘𑁆𑀘𑀬𑀸 𑀇𑀤𑀸𑀦𑀺 𑀳𑁂𑀢𑀯𑁄 𑀧𑀜𑁆𑀘. 𑀆𑀬𑀢𑀺𑀁 𑀨𑀮𑀧𑀜𑁆𑀘𑀓𑀦𑁆𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦 𑀯𑀼𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀼𑀧𑀘𑁆𑀘𑀬𑀸 𑀅𑀦𑀸𑀕𑀢𑁂 𑀦𑀺𑀩𑁆𑀩𑀢𑁆𑀢𑀦𑀓𑀯𑀺𑀜𑁆𑀜𑀸𑀡𑀸𑀤𑀺𑀨𑀮𑀧𑀜𑁆𑀘𑀓𑀦𑁆𑀢𑀺 𑀏𑀯𑀁 𑀯𑀻𑀲𑀢𑀺 𑀅𑀢𑀻𑀢𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀓𑀺𑀭𑀺𑀬𑀦𑁆𑀢𑀻𑀢𑀺 𑀆𑀓𑀸𑀭𑀸.

𑀅𑀢𑀻𑀢𑀳𑁂𑀢𑀽𑀦𑀁, 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀲𑁆𑀲 𑀘 𑀅𑀦𑁆𑀢𑀭𑀸 𑀏𑀓𑁄 𑀲𑀦𑁆𑀥𑀺, 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀲𑁆𑀲, 𑀇𑀤𑀸𑀦𑀺 𑀳𑁂𑀢𑀽𑀦𑀜𑁆𑀘 𑀅𑀦𑁆𑀢𑀭𑀸 𑀏𑀓𑁄, 𑀇𑀤𑀸𑀦𑀺 𑀳𑁂𑀢𑀽𑀦𑀁, 𑀆𑀬𑀢𑀺𑀁 𑀨𑀮𑀲𑁆𑀲 𑀘 𑀅𑀦𑁆𑀢𑀭𑀸 𑀏𑀓𑁄𑀢𑀺 𑀏𑀯𑀁 𑀢𑀺𑀲𑀦𑁆𑀥𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀫𑀦𑁆𑀢𑀭𑀸 𑀏𑀓𑁄, 𑀯𑁂𑀤𑀦𑀸𑀢𑀡𑁆𑀳𑀸𑀦𑀫𑀦𑁆𑀢𑀭𑀸 𑀏𑀓𑁄, 𑀪𑀯𑀚𑀸𑀢𑀻𑀦𑀫𑀦𑁆𑀢𑀭𑀸 𑀏𑀓𑁄 𑀲𑀦𑁆𑀥𑀻’’𑀢𑀺. 𑀏𑀢𑁆𑀣 𑀳𑀺 𑀳𑁂𑀢𑀼𑀢𑁄𑀨𑀮𑀲𑁆𑀲 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀪𑀽𑀢𑁄 𑀧𑀞𑀫𑁄 𑀲𑀦𑁆𑀥𑀺, 𑀢𑀣𑀸 𑀢𑀢𑀺𑀬𑁄, 𑀤𑀼𑀢𑀺𑀬𑁄 𑀧𑀦 𑀨𑀮𑀢𑁄 𑀳𑁂𑀢𑀼𑀦𑁄 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀨𑀮𑀳𑁂𑀢𑀼𑀲𑀫𑁆𑀩𑀦𑁆𑀥𑀪𑀽𑀢𑁄. 𑀨𑀮𑀪𑀽𑀢𑁄𑀧𑀺 𑀳𑀺 𑀥𑀫𑁆𑀫𑁄 𑀅𑀜𑁆𑀜𑀲𑁆𑀲 𑀳𑁂𑀢𑀼𑀲𑀪𑀸𑀯𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄𑀢𑀺. 𑀲𑀗𑁆𑀔𑀺𑀧𑀻𑀬𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄, 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀗𑁆𑀔𑁂𑀧𑁄, 𑀅𑀢𑀻𑀢𑀳𑁂𑀢𑀼, 𑀏𑀢𑀭𑀳𑀺 𑀯𑀺𑀧𑀸𑀓𑁄, 𑀏𑀢𑀭𑀳𑀺 𑀳𑁂𑀢𑀼 𑀆𑀬𑀢𑀺𑀁 𑀯𑀺𑀧𑀸𑀓𑁄𑀢𑀺 𑀘𑀢𑁆𑀢𑀸𑀭𑁄 𑀲𑀗𑁆𑀔𑁂𑀧𑀸𑀢𑀺 𑀘𑀢𑀼𑀲𑀗𑁆𑀔𑁂𑀧𑀸.

𑁧𑁧. 𑀓𑀫𑁆𑀫𑀪𑀯𑀲𑀗𑁆𑀔𑀸𑀢𑁄 𑀪𑀯𑁂𑀓𑀤𑁂𑀲𑁄𑀢𑀺 𑀏𑀢𑁆𑀣 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀘𑁂𑀢𑀦𑀸 𑀪𑀯𑁄 𑀦𑀸𑀫, 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀘𑁂𑀢𑀦𑀸 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁂𑀲𑀸 𑀘𑀸𑀢𑀺 𑀯𑀺𑀜𑁆𑀜𑀸𑀡𑀸𑀤𑀺𑀧𑀜𑁆𑀘𑀓𑀚𑀸𑀢𑀺𑀚𑀭𑀸𑀫𑀭𑀡𑀯𑀲𑁂𑀦 𑀲𑀢𑁆𑀢𑀯𑀺𑀥𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀨𑀮𑀯𑀲𑁂𑀦 𑀯𑀼𑀢𑁆𑀢𑀥𑀫𑁆𑀫𑀸. 𑀉𑀧𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑁄 𑀪𑀯𑁂𑀓𑀤𑁂𑀲𑁄𑀢𑀺 𑀧𑀦 𑀅𑀦𑀸𑀕𑀢𑀧𑀭𑀺𑀬𑀸𑀧𑀦𑁆𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀯-𑀲𑀤𑁆𑀤𑁂𑀦 𑀓𑀫𑁆𑀫𑀪𑀯𑀲𑁆𑀲𑀧𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀪𑀯𑁂𑀓𑀤𑁂𑀲-𑀲𑀤𑁆𑀤𑁄 𑀯𑀼𑀢𑁆𑀢𑁄.

𑁧𑁨. 𑀧𑀼𑀩𑁆𑀩𑀦𑁆𑀢𑀲𑁆𑀲 𑀅𑀯𑀺𑀚𑁆𑀚𑀸 𑀫𑀽𑀮𑀁. 𑀅𑀧𑀭𑀦𑁆𑀢𑀲𑁆𑀲 𑀢𑀡𑁆𑀳𑀸 𑀫𑀽𑀮𑀦𑁆𑀢𑀺 𑀆𑀳 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀯𑀲𑁂𑀦 𑀤𑁆𑀯𑁂 𑀫𑀽𑀮𑀸𑀦𑀻’’𑀢𑀺.

𑁧𑁩. 𑀢𑁂𑀲𑀫𑁂𑀯 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀦𑀁 𑀯𑀝𑁆𑀝𑀫𑀽𑀮𑀸𑀦𑀁 𑀦𑀺𑀭𑁄𑀥𑁂𑀦 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀸𑀧𑀢𑁆𑀢𑀺𑀬𑀸 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀢𑁄 𑀲𑀺𑀤𑁆𑀥𑀸𑀬 𑀅𑀧𑁆𑀧𑀯𑀢𑁆𑀢𑀺𑀬𑀸 𑀯𑀝𑁆𑀝𑀁 𑀦𑀺𑀭𑀼𑀚𑁆𑀛𑀢𑀺. 𑀅𑀪𑀺𑀡𑁆𑀳𑀲𑁄 𑀅𑀪𑀺𑀓𑁆𑀔𑀡𑀁 𑀚𑀭𑀸𑀫𑀭𑀡𑀲𑀗𑁆𑀔𑀸𑀢𑀸𑀬 𑀫𑀼𑀘𑁆𑀙𑀸𑀬 𑀧𑀻𑀴𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀲𑁄𑀓𑀸𑀤𑀺𑀲𑀫𑀧𑁆𑀧𑀺𑀢𑀸𑀦𑀁 𑀓𑀸𑀫𑀸𑀲𑀯𑀸𑀤𑀺𑀆𑀲𑀯𑀸𑀦𑀁 𑀲𑀫𑀼𑀧𑁆𑀧𑀸𑀤𑀢𑁄 𑀧𑀼𑀦 𑀅𑀯𑀺𑀚𑁆𑀚𑀸 𑀘 𑀧𑀯𑀢𑁆𑀢𑀢𑀺. ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀳𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀅𑀯𑀺𑀚𑁆𑀚𑀸𑀬𑀧𑀺 𑀧𑀘𑁆𑀘𑀬𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀇𑀢𑀭𑀣𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀘𑀓𑁆𑀓𑀁 𑀅𑀩𑀤𑁆𑀥𑀁 𑀲𑀺𑀬𑀸𑀢𑀺. 𑀇𑀘𑁆𑀘𑁂𑀯𑀁 𑀯𑀼𑀢𑁆𑀢𑀦𑀬𑁂𑀦 𑀆𑀩𑀤𑁆𑀥𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀅𑀦𑀸𑀤𑀺𑀓𑀁 𑀆𑀤𑀺𑀭𑀳𑀺𑀢𑀁 𑀢𑀺𑀪𑀽𑀫𑀓𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑁂𑀪𑀽𑀫𑀓𑀁 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀢𑀺𑀯𑀝𑁆𑀝𑀪𑀽𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀧𑀝𑁆𑀞𑀧𑁂𑀲𑀺 𑀧𑀜𑁆𑀜𑀧𑁂𑀲𑀺 𑀫𑀳𑀸𑀫𑀼𑀦𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑁆𑀞𑀸𑀦𑀦𑀬𑀯𑀡𑁆𑀡𑀦𑀸

𑁧𑁪. 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀁 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑁆𑀞𑀸𑀦𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀢𑀼𑀧𑀘𑁆𑀘𑀬𑁄’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺𑀦𑁄𑀢𑀺 𑀧𑀢𑀺𑀝𑁆𑀞𑀸𑀢𑀺 𑀏𑀢𑁂𑀦𑀸𑀢𑀺 𑀳𑁂𑀢𑀼. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀳𑀺-𑀲𑀤𑁆𑀤𑁄 𑀇𑀥 𑀧𑀢𑀺𑀝𑁆𑀞𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀳𑀺𑀦𑁄𑀢𑀺 𑀯𑀸 𑀏𑀢𑁂𑀦 𑀓𑀫𑁆𑀫𑀦𑀺𑀤𑀸𑀦𑀪𑀽𑀢𑁂𑀦 𑀉𑀤𑁆𑀥𑀁 𑀑𑀚𑀁 𑀅𑀪𑀺𑀳𑀭𑀦𑁆𑀢𑁂𑀦 𑀫𑀽𑀮𑁂𑀦 𑀯𑀺𑀬 𑀧𑀸𑀤𑀧𑁄 𑀢𑀧𑁆𑀧𑀘𑁆𑀘𑀬𑀁 𑀨𑀮𑀁 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀆𑀧𑀚𑁆𑀚𑀢𑀻𑀢𑀺 𑀳𑁂𑀢𑀼. 𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁄. 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄, 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼, 𑀉𑀧𑀓𑀸𑀭𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺 𑀲𑀗𑁆𑀔𑁂𑀧𑀢𑁄 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄. 𑀲𑁄 𑀧𑀦 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀉𑀪𑀬𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀸𑀫𑀥𑀫𑁆𑀫𑀸𑀦𑀜𑁆𑀘 𑀭𑀼𑀓𑁆𑀔𑀲𑁆𑀲 𑀫𑀽𑀮𑀸𑀦𑀺 𑀯𑀺𑀬 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀲𑀗𑁆𑀔𑀸𑀢𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑀸 𑀙 𑀥𑀫𑁆𑀫𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀆𑀮𑀫𑁆𑀩𑀻𑀬𑀢𑀺 𑀤𑀼𑀩𑁆𑀩𑀮𑁂𑀦 𑀯𑀺𑀬 𑀤𑀡𑁆𑀟𑀸𑀤𑀺𑀓𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀕𑀬𑁆𑀳𑀢𑀻𑀢𑀺 𑀆𑀭𑀫𑁆𑀫𑀡𑀁. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀳𑀺 𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀦𑀸𑀫. 𑀦 𑀳𑀺 𑀲𑁄 𑀥𑀫𑁆𑀫𑁄 𑀅𑀢𑁆𑀣𑀺, 𑀬𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀁 𑀦 𑀕𑀘𑁆𑀙𑁂𑀬𑁆𑀬. 𑀅𑀢𑁆𑀢𑀸𑀥𑀻𑀦𑀧𑁆𑀧𑀯𑀢𑁆𑀢𑀻𑀦𑀁 𑀧𑀢𑀺𑀪𑀽𑀢𑁄 𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄.

𑀦 𑀯𑀺𑀚𑁆𑀚𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀦 𑀲𑀳 𑀅𑀦𑁆𑀢𑀭𑀁 𑀏𑀢𑀲𑁆𑀲 𑀧𑀘𑁆𑀘𑀬𑀲𑁆𑀲𑀸𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀲𑀡𑁆𑀞𑀸𑀦𑀸𑀪𑀸𑀯𑁂𑀦 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀚𑀦𑀦𑀲𑀫𑀢𑁆𑀣𑁄 𑀧𑀼𑀭𑀺𑀫𑀧𑀼𑀭𑀺𑀫𑀦𑀺𑀭𑀼𑀤𑁆𑀥𑁄 𑀥𑀫𑁆𑀫𑁄 ‘‘𑀅𑀦𑀦𑁆𑀢𑀭𑀧𑀘𑁆𑀘𑀬𑁄’’, ‘‘𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀦𑁂𑀯 𑀳𑀺 𑀦𑁂𑀲𑀁 𑀯𑀺𑀲𑁂𑀲𑁄. 𑀅𑀢𑁆𑀣𑀢𑁄 𑀧𑀦 𑀉𑀪𑀬𑀫𑁆𑀧𑀺 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀦 𑀳𑀺 𑀢𑁂𑀲𑀁 𑀅𑀢𑁆𑀣𑀢𑁄 𑀪𑁂𑀤𑁄 𑀉𑀧𑀮𑀩𑁆𑀪𑀢𑀺. 𑀬𑀁 𑀧𑀦 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀅𑀢𑁆𑀣𑀸𑀦𑀦𑁆𑀢𑀭𑀢𑀸𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄’’𑀢𑀺, 𑀢𑀁 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑁆𑀬𑀸𑀤𑀻𑀳𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀯𑀺𑀭𑀼𑀚𑁆𑀛𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀳𑀺 𑀲𑀢𑁆𑀢𑀸𑀳𑀸𑀤𑀺𑀓𑀸𑀮𑀁 𑀦𑀺𑀭𑀼𑀤𑁆𑀥𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸 𑀩𑁆𑀬𑀜𑁆𑀚𑀦𑀫𑀢𑁆𑀢𑀢𑁄𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀧𑀘𑁆𑀘𑁂𑀢𑀩𑁆𑀩𑀁, 𑀦 𑀅𑀢𑁆𑀣𑀢𑁄. 𑀧𑀼𑀩𑁆𑀩𑀥𑀫𑁆𑀫𑀦𑀺𑀭𑁄𑀥𑀲𑁆𑀲 𑀳𑀺 𑀧𑀘𑁆𑀙𑀸𑀚𑀸𑀢𑀥𑀫𑁆𑀫𑀼𑀧𑁆𑀧𑀸𑀤𑀦𑀲𑁆𑀲 𑀘 𑀅𑀦𑁆𑀢𑀭𑀸𑀪𑀸𑀯𑁂𑀦 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬 𑀦𑀺𑀭𑁄𑀥𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸, ‘‘𑀇𑀤𑀫𑀺𑀢𑁄 𑀉𑀤𑁆𑀥𑀁, 𑀇𑀤𑀁 𑀳𑁂𑀝𑁆𑀞𑀸, 𑀇𑀤𑀁 𑀲𑀫𑀦𑁆𑀢𑀢𑁄’’𑀢𑀺 𑀅𑀢𑁆𑀢𑀦𑀸 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀯𑀺𑀬 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑀁 𑀳𑀼𑀢𑁆𑀯𑀸 𑀦𑀺𑀭𑁄𑀥𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀢𑀺 𑀏𑀯𑀁 𑀩𑁆𑀬𑀜𑁆𑀚𑀦𑀫𑀢𑁆𑀢𑀢𑁄𑀯 𑀪𑁂𑀤𑁄. 𑀦𑀺𑀭𑁄𑀥𑀧𑀘𑁆𑀘𑀬𑀲𑁆𑀲𑀧𑀺 𑀳𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀅𑀲𑀜𑁆𑀜𑀼𑀧𑁆𑀧𑀢𑁆𑀢𑀺𑀬𑀸 𑀧𑀼𑀭𑀺𑀫𑀲𑁆𑀲 𑀘 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀓𑀸𑀮𑀦𑁆𑀢𑀭𑁂𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀁 𑀨𑀮𑀧𑀝𑀺𑀲𑀦𑁆𑀥𑀻𑀦𑀁 𑀅𑀦𑁆𑀢𑀭𑀸 𑀲𑀫𑀸𑀦𑀚𑀸𑀢𑀺𑀬𑁂𑀦 𑀅𑀭𑀽𑀧𑀥𑀫𑁆𑀫𑁂𑀦 𑀩𑁆𑀬𑀯𑀥𑀸𑀦𑀸𑀪𑀸𑀯𑀢𑁄 𑀪𑀺𑀦𑁆𑀦𑀚𑀸𑀢𑀺𑀓𑀸𑀦𑀜𑁆𑀘 𑀭𑀽𑀧𑀥𑀫𑁆𑀫𑀸𑀦𑀁 𑀩𑁆𑀬𑀯𑀥𑀸𑀦𑀓𑀭𑀡𑁂 𑀅𑀲𑀫𑀢𑁆𑀣𑀢𑀸𑀬 𑀦𑀺𑀭𑀦𑁆𑀢𑀭𑀼𑀧𑁆𑀧𑀸𑀤𑀦𑁂 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀯𑀺𑀬 𑀉𑀧𑁆𑀧𑀸𑀤𑀦𑁂 𑀘 𑀲𑀫𑀢𑁆𑀣𑀢𑀸 𑀅𑀢𑁆𑀣𑀻𑀢𑀺 𑀢𑁂𑀲𑀫𑁆𑀧𑀺 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀢𑁄 𑀅𑀯𑀺𑀲𑁂𑀲𑁂𑀧𑀺 𑀢𑀣𑀸 𑀢𑀣𑀸 𑀩𑀼𑀚𑁆𑀛𑀦𑀓𑀸𑀦𑀁 𑀯𑁂𑀦𑁂𑀬𑁆𑀬𑀸𑀦𑀁 𑀯𑀲𑁂𑀦 𑀉𑀧𑀲𑀕𑁆𑀕𑀢𑁆𑀣𑀯𑀺𑀲𑁂𑀲𑀫𑀢𑁆𑀢𑀢𑁄𑀯 𑀪𑁂𑀤𑁄 𑀧𑀘𑁆𑀘𑁂𑀢𑀩𑁆𑀩𑁄𑀢𑀺.

𑀅𑀢𑁆𑀢𑀦𑁄 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀲𑀳𑀼𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀓𑀸𑀲𑀲𑁆𑀲 𑀧𑀤𑀻𑀧𑁄 𑀯𑀺𑀬 𑀲𑀳𑀼𑀧𑁆𑀧𑀦𑁆𑀦𑀸𑀦𑀁 𑀲𑀳𑀼𑀧𑁆𑀧𑀸𑀤𑀪𑀸𑀯𑁂𑀦 𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑁄, 𑀅𑀭𑀽𑀧𑀺𑀦𑁄 𑀘𑀢𑀼𑀓𑁆𑀔𑀦𑁆𑀥𑀸, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀯𑀺𑀧𑀸𑀓𑀸 𑀘 𑀥𑀫𑁆𑀫𑀸.

𑀅𑀜𑁆𑀜𑀫𑀜𑁆𑀜𑀁 𑀉𑀧𑀢𑁆𑀣𑀫𑁆𑀪𑀬𑀫𑀸𑀦𑀁 𑀢𑀺𑀤𑀡𑁆𑀟𑀁 𑀯𑀺𑀬 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀥𑀫𑁆𑀫𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑁂𑀦 𑀧𑀘𑁆𑀘𑀬𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄. 𑀅𑀜𑁆𑀜𑀫𑀜𑁆𑀜𑀢𑀸𑀯𑀲𑁂𑀦𑁂𑀯 𑀘 𑀉𑀧𑀓𑀸𑀭𑀓𑀢𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸, 𑀦 𑀲𑀳𑀚𑀸𑀢𑀫𑀢𑁆𑀢𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄. 𑀢𑀣𑀸 𑀳𑀺 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀻𑀬𑁂𑀯 𑀓𑁄𑀘𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦 𑀳𑁄𑀢𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀺𑀦𑁄 𑀦𑀸𑀫𑀲𑁆𑀲 𑀉𑀧𑀸𑀤𑀸𑀭𑀽𑀧𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀻𑀦𑀁 𑀫𑀳𑀸𑀪𑀽𑀢𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀬𑀤𑀺 𑀳𑀺 𑀲𑀳𑀚𑀸𑀢𑀪𑀸𑀯𑁂𑀦𑁂𑀯 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀸𑀦𑀁 𑀉𑀧𑀓𑀸𑀭𑀓𑀢𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸 𑀲𑀺𑀬𑀸, 𑀢𑀤𑀸 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀳𑀺 𑀲𑀫𑀸𑀦𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀘𑀺𑀢𑁆𑀢𑀓𑀫𑁆𑀫𑀲𑁆𑀲 𑀧𑀝𑁄 𑀯𑀺𑀬 𑀲𑀳𑀚𑀸𑀢𑀦𑀸𑀫𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀪𑀽𑀢𑀸 𑀘𑀢𑀼𑀓𑁆𑀔𑀦𑁆𑀥𑀸, 𑀢𑀭𑀼𑀧𑀩𑁆𑀩𑀢𑀸𑀤𑀻𑀦𑀁 𑀧𑀣𑀯𑀻 𑀯𑀺𑀬 𑀆𑀥𑀸𑀭𑀡𑀢𑁄𑀬𑁂𑀯 𑀲𑀳𑀚𑀸𑀢𑀭𑀽𑀧𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀬𑀣𑀸𑀓𑁆𑀓𑀫𑀁 𑀦𑀺𑀲𑁆𑀲𑀬𑀸 𑀪𑀽𑀢𑀭𑀽𑀧𑀁, 𑀯𑀢𑁆𑀣𑀼 𑀘𑀸𑀢𑀺 𑀇𑀫𑁂 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦𑀸𑀫 𑀦𑀺𑀲𑁆𑀲𑀻𑀬𑀢𑀺 𑀦𑀺𑀲𑁆𑀲𑀺𑀢𑀓𑁂𑀳𑀻𑀢𑀺 𑀓𑀢𑁆𑀯𑀸, 𑀩𑀮𑀯𑀪𑀸𑀯𑁂𑀦 𑀦𑀺𑀲𑁆𑀲𑀬𑁄 𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀉𑀧-𑀲𑀤𑁆𑀤𑀲𑁆𑀲 𑀅𑀢𑀺𑀲𑀬𑀚𑁄𑀢𑀓𑀢𑁆𑀢𑀸, 𑀢𑀲𑁆𑀲 𑀧𑀦 𑀪𑁂𑀤𑀁 𑀯𑀓𑁆𑀔𑀢𑀺.

𑀙 𑀯𑀢𑁆𑀣𑀽𑀦𑀺, 𑀙 𑀆𑀭𑀫𑁆𑀫𑀡𑀸𑀦𑀺 𑀘𑀸𑀢𑀺 𑀇𑀫𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀧𑀞𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂 𑀅𑀲𑀢𑀺 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀳𑁂𑀢𑀼𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑀸 𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄. 𑀲𑁄 𑀕𑀺𑀚𑁆𑀛𑀧𑁄𑀢𑀓𑀲𑀭𑀻𑀭𑀸𑀦𑀁 𑀆𑀳𑀸𑀭𑀸𑀲𑀸 𑀘𑁂𑀢𑀦𑀸 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑀧𑀼𑀭𑀺𑀫𑀧𑀼𑀭𑀺𑀫𑀧𑀭𑀺𑀘𑀺𑀢𑀕𑀦𑁆𑀣𑁄 𑀯𑀺𑀬 𑀉𑀢𑁆𑀢𑀭𑀉𑀢𑁆𑀢𑀭𑀕𑀦𑁆𑀣𑀲𑁆𑀲 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀅𑀢𑁆𑀢𑀲𑀤𑀺𑀲𑀲𑁆𑀲 𑀧𑀕𑀼𑀡𑀩𑀮𑀯𑀪𑀸𑀯𑀯𑀺𑀲𑀺𑀝𑁆𑀞𑀅𑀢𑁆𑀢𑀲𑀫𑀸𑀦𑀚𑀸𑀢𑀺𑀬𑀢𑀸𑀕𑀸𑀳𑀡𑀁 𑀆𑀲𑁂𑀯𑀦𑀁, 𑀢𑁂𑀦 𑀧𑀘𑁆𑀘𑀬𑀸 𑀲𑀚𑀸𑀢𑀺𑀬𑀥𑀫𑁆𑀫𑀸𑀦𑀁 𑀲𑀚𑀸𑀢𑀺𑀬𑀥𑀫𑁆𑀫𑀸𑀯 𑀆𑀲𑁂𑀯𑀦𑀧𑀘𑁆𑀘𑀬𑁄. 𑀪𑀺𑀦𑁆𑀦𑀚𑀸𑀢𑀺𑀓𑀸 𑀳𑀺 𑀪𑀺𑀦𑁆𑀦𑀚𑀸𑀢𑀺𑀓𑁂𑀳𑀺 𑀆𑀲𑁂𑀯𑀦𑀧𑀕𑀼𑀡𑁂𑀦 𑀧𑀕𑀼𑀡𑀩𑀮𑀯𑀪𑀸𑀯𑀯𑀺𑀲𑀺𑀝𑁆𑀞𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀢𑀦𑁄 𑀕𑀢𑀺𑀁 𑀕𑀸𑀳𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀦 𑀘 𑀲𑀬𑀁 𑀢𑀢𑁄 𑀕𑀡𑁆𑀳𑀦𑁆𑀢𑀺, 𑀢𑁂 𑀧𑀦 𑀅𑀦𑀦𑁆𑀢𑀭𑀸𑀢𑀻𑀢𑀸𑀦𑀺 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀘𑁂𑀯 𑀅𑀦𑀸𑀯𑀚𑁆𑀚𑀦𑀓𑀺𑀭𑀺𑀬𑀚𑀯𑀦𑀸𑀦𑀺 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀺𑀢𑁆𑀢𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑀓𑀺𑀭𑀺𑀬𑀸𑀪𑀸𑀯𑁂𑀦 𑀲𑀳𑀚𑀸𑀢𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀸𑀦𑀁 𑀯𑀺𑀧𑀸𑀓𑀸𑀦𑀁, 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘 𑀉𑀧𑀓𑀸𑀭𑀺𑀓𑀸 𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁄.

𑀅𑀢𑁆𑀢𑀦𑁄 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦 𑀲𑀳𑀚𑀸𑀢𑀦𑀸𑀫𑀭𑀽𑀧𑀸𑀦𑀁 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸𑀬 𑀉𑀧𑀓𑀸𑀭𑀓𑀸 𑀯𑀺𑀧𑀸𑀓𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀯𑀺𑀧𑀸𑀓𑀧𑀘𑁆𑀘𑀬𑁄. 𑀢𑁂 𑀳𑀺 𑀧𑀬𑁄𑀕𑁂𑀦 𑀅𑀲𑀸𑀥𑁂𑀢𑀩𑁆𑀩𑀢𑀸𑀬 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀦𑀺𑀧𑁆𑀨𑀚𑁆𑀚𑀫𑀸𑀦𑀫𑀢𑁆𑀢𑀢𑁄 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸 𑀳𑁄𑀦𑁆𑀢𑀺, 𑀦 𑀓𑀺𑀮𑁂𑀲𑀯𑀽𑀧𑀲𑀫𑀲𑀦𑁆𑀢𑀪𑀸𑀯𑀸. 𑀢𑀣𑀸 𑀲𑀦𑁆𑀢𑀪𑀸𑀯𑀢𑁄𑀬𑁂𑀯 𑀳𑀺 𑀪𑀯𑀗𑁆𑀕𑀸𑀤𑀬𑁄 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸. 𑀅𑀪𑀺𑀦𑀺𑀧𑀸𑀢𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀫𑀢𑁆𑀢𑀸 𑀧𑀦 𑀯𑀺𑀧𑀸𑀓𑀸 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸𑀯. 𑀚𑀯𑀦𑀧𑁆𑀧𑀯𑀢𑁆𑀢𑀺𑀬𑀸𑀯 𑀦𑁂𑀲𑀁 𑀭𑀽𑀧𑀸𑀤𑀺𑀕𑁆𑀕𑀳𑀺𑀢𑀢𑀸 𑀯𑀺𑀜𑁆𑀜𑀸𑀬𑀢𑀺.

𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀉𑀧𑀓𑀸𑀭𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀆𑀳𑀸𑀭𑀧𑀘𑁆𑀘𑀬𑁄. 𑀲𑀢𑀺𑀧𑀺 𑀳𑀺 𑀚𑀦𑀓𑀪𑀸𑀯𑁂 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀫𑁂𑀯 𑀆𑀳𑀸𑀭𑀲𑁆𑀲 𑀧𑀥𑀸𑀦𑀓𑀺𑀘𑁆𑀘𑀁. 𑀚𑀦𑀬𑀦𑁆𑀢𑁄𑀧𑀺 𑀆𑀳𑀸𑀭𑁄 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀯 𑀚𑀦𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑁄 𑀯 𑀆𑀳𑀸𑀭𑀪𑀸𑀯𑁄. 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀳𑀺 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀸𑀧𑀦𑀲𑀗𑁆𑀔𑀸𑀢𑀸𑀥𑀺𑀧𑀢𑀺𑀬𑀝𑁆𑀞𑁂𑀦 𑀧𑀘𑁆𑀘𑀬𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄.

𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸 𑀆𑀭𑀫𑁆𑀫𑀡𑀦𑀺𑀚𑁆𑀛𑀸𑀦𑀓𑀸 𑀯𑀺𑀢𑀓𑁆𑀓𑀸𑀤𑀬𑁄 𑀛𑀸𑀦𑀧𑀘𑁆𑀘𑀬𑁄. 𑀲𑀼𑀕𑀢𑀺𑀢𑁄 𑀧𑀼𑀜𑁆𑀜𑀢𑁄, 𑀤𑀼𑀕𑁆𑀕𑀳𑀺𑀢𑁄 𑀧𑀸𑀧𑀢𑁄 𑀯𑀸 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀉𑀧𑀓𑀸𑀭𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀬𑁄 𑀫𑀕𑁆𑀕𑀧𑀘𑁆𑀘𑀬𑁄.

𑀧𑀭𑀫𑀢𑁆𑀣𑀢𑁄 𑀪𑀺𑀦𑁆𑀦𑀸𑀧𑀺 𑀏𑀓𑀻𑀪𑀸𑀯𑀕𑀢𑀸 𑀯𑀺𑀬 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑁂𑀦 𑀉𑀧𑀓𑀸𑀭𑀓𑀸 𑀦𑀸𑀫𑀥𑀫𑁆𑀫𑀸 𑀯 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀢𑀸𑀬 𑀬𑀼𑀢𑁆𑀢𑀸𑀧𑀺 𑀲𑀫𑀸𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀯𑀺𑀲𑀁𑀲𑀝𑁆𑀞𑀢𑀸𑀬 𑀦𑀸𑀦𑀢𑁆𑀢𑀼𑀧𑀕𑀫𑀦𑁂𑀦 𑀉𑀧𑀓𑀸𑀭𑀓𑀸 𑀯𑀢𑁆𑀣𑀼𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄.

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑀲𑀗𑁆𑀔𑀸𑀢𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀉𑀧𑀓𑀸𑀭𑀓𑀸 ‘‘𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢’’𑀦𑁆𑀢𑁆𑀬𑀸𑀤𑀺𑀦𑀸 𑀯𑀓𑁆𑀔𑀫𑀸𑀦𑀥𑀫𑁆𑀫𑀸 𑀅𑀢𑁆𑀣𑀺𑀧𑀘𑁆𑀘𑀬𑁄. 𑀲𑀢𑀺𑀧𑀺 𑀳𑀺 𑀚𑀦𑀓𑀢𑁆𑀢𑁂 𑀞𑀺𑀢𑀺𑀬𑀁𑀬𑁂𑀯 𑀲𑀸𑀢𑀺𑀲𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑀸𑀦𑀁 𑀩𑁆𑀬𑀸𑀧𑀸𑀭𑁄𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑀸𑀯 𑀢𑁂𑀲𑀁 𑀕𑀳𑀺𑀢𑀸. 𑀏𑀓𑀲𑁆𑀫𑀺𑀁 𑀨𑀲𑁆𑀲𑀸𑀤𑀺𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀫𑀸𑀦𑁂 𑀤𑀼𑀢𑀺𑀬𑀲𑁆𑀲 𑀅𑀪𑀸𑀯𑀢𑁄 𑀅𑀢𑁆𑀢𑀦𑁄 𑀞𑀺𑀢𑀺𑀬𑀸 𑀑𑀓𑀸𑀲𑀁 𑀅𑀮𑀪𑀦𑁆𑀢𑀸𑀦𑀁 𑀅𑀦𑀦𑁆𑀢𑀭𑀫𑀼𑀧𑁆𑀧𑀚𑁆𑀚𑀫𑀸𑀦𑀓𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀑𑀓𑀸𑀲𑀤𑀸𑀦𑀯𑀲𑁂𑀦 𑀉𑀧𑀓𑀸𑀭𑀓𑀸 𑀅𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀦𑀢𑁆𑀣𑀺𑀧𑀘𑁆𑀘𑀬𑁄.

𑀅𑀢𑁆𑀢𑀦𑁄 𑀲𑀪𑀸𑀯𑀸𑀯𑀺𑀕𑀫𑀦𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀸𑀬𑁂𑀯 𑀥𑀫𑁆𑀫𑀸 𑀯𑀺𑀕𑀢𑀧𑀘𑁆𑀘𑀬𑁄. 𑀦𑀺𑀭𑁄𑀥𑀸𑀦𑀼𑀧𑀕𑀫𑀦𑀯𑀲𑁂𑀦 𑀉𑀧𑀓𑀸𑀭𑀓𑀸 𑀅𑀢𑁆𑀣𑀺𑀧𑀘𑁆𑀘𑀬𑀸 𑀯 𑀅𑀯𑀺𑀕𑀢𑀧𑀘𑁆𑀘𑀬𑁄. 𑀲𑀲𑀪𑀸𑀯𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑀢𑀸 𑀅𑀢𑁆𑀣𑀺𑀧𑀘𑁆𑀘𑀬𑀢𑀸, 𑀦𑀺𑀭𑁄𑀥𑀸𑀦𑀼𑀧𑀕𑀫𑀦𑀯𑀲𑁂𑀦 𑀉𑀧𑀓𑀸𑀭𑀓𑀢𑀸 𑀅𑀯𑀺𑀕𑀢𑀧𑀘𑁆𑀘𑀬𑀢𑀸𑀢𑀺 𑀧𑀘𑁆𑀘𑀬𑀢𑀸𑀯𑀺𑀲𑁂𑀲𑁄 𑀦𑁂𑀲𑀁 𑀥𑀫𑁆𑀫𑀸𑀯𑀺𑀲𑁂𑀲𑁂𑀧𑀺 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀫𑀢𑁆𑀣𑀢𑀸𑀯𑀺𑀲𑁂𑀲𑀁 𑀲𑀩𑁆𑀩𑀸𑀓𑀸𑀭𑁂𑀦 𑀜𑀢𑁆𑀯𑀸 𑀪𑀕𑀯𑀢𑀸 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀸 𑀤𑁂𑀲𑀺𑀢𑀸𑀢𑀺 𑀪𑀕𑀯𑀢𑀺 𑀲𑀤𑁆𑀥𑀸𑀬 ‘‘𑀏𑀯𑀁 𑀯𑀺𑀲𑁂𑀲𑀸 𑀏𑀢𑁂 𑀥𑀫𑁆𑀫𑀸’’𑀢𑀺 𑀲𑀼𑀢𑀫𑀬𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀦𑁆𑀢𑀸𑀪𑀸𑀯𑀦𑀸𑀫𑀬𑀜𑀸𑀡𑁂𑀳𑀺 𑀢𑀤𑀪𑀺𑀲𑀫𑀬𑀸𑀬 𑀬𑁄𑀕𑁄 𑀓𑀭𑀡𑀻𑀬𑁄. 𑀅𑀯𑀺𑀲𑁂𑀲𑁂𑀧𑀺 𑀳𑀺 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀲𑁆𑀲 𑀢𑀣𑀸 𑀢𑀣𑀸 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀧𑀺 𑀧𑀘𑁆𑀘𑀬𑁄 𑀧𑀼𑀦 𑀧𑀓𑀸𑀭𑀦𑁆𑀢𑁂𑀦 𑀯𑀼𑀘𑁆𑀘𑀢𑀺 𑀅𑀳𑁂𑀢𑀼𑀓𑀤𑀼𑀓𑀁 𑀯𑀢𑁆𑀯𑀸𑀧𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀤𑀼𑀓𑀁 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁫. 𑀦𑀸𑀫𑀁 𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀦𑀸𑀫𑀁 𑀢𑀸𑀤𑀺𑀲𑀲𑁆𑀲𑁂𑀯 𑀦𑀸𑀫𑀲𑁆𑀲 𑀙𑀥𑀸 𑀙𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑁂𑀯 𑀦𑀸𑀫𑀭𑀽𑀧𑀻𑀦𑀁 𑀲𑀫𑀼𑀤𑀺𑀢𑀸𑀦𑀁 𑀧𑀜𑁆𑀘𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀲𑁆𑀲 𑀧𑀼𑀦 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀲𑁆𑀲 𑀏𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀜𑁆𑀘 𑀦𑀸𑀫𑀲𑁆𑀲 𑀏𑀓𑀥𑀸 𑀧𑀘𑁆𑀘𑀬𑁄, 𑀧𑀜𑁆𑀜𑀢𑁆𑀢𑀺𑀦𑀸𑀫𑀭𑀽𑀧𑀸𑀦𑀺 𑀦𑀸𑀫𑀲𑁆𑀲 𑀤𑁆𑀯𑀺𑀥𑀸 𑀤𑁆𑀯𑀺𑀧𑁆𑀧𑀓𑀸𑀭𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀤𑁆𑀯𑀬𑀁 𑀧𑀦 𑀦𑀸𑀫𑀭𑀽𑀧𑀤𑁆𑀯𑀬𑀁 𑀲𑀫𑀼𑀤𑀺𑀢𑀁 𑀤𑁆𑀯𑀬𑀲𑁆𑀲 𑀢𑀸𑀤𑀺𑀲𑀲𑁆𑀲𑁂𑀯 𑀦𑀸𑀫𑀭𑀽𑀧𑀤𑁆𑀯𑀬𑀲𑁆𑀲 𑀦𑀯𑀥𑀸 𑀧𑀘𑁆𑀘𑀬𑁄 𑀘𑁂𑀢𑀺 𑀏𑀯𑀁 𑀧𑀘𑁆𑀘𑀬𑀸 𑀙𑀩𑁆𑀩𑀺𑀥𑀸 𑀞𑀺𑀢𑀸.

𑁧𑁬. 𑀯𑀺𑀧𑀸𑀓𑀩𑁆𑀬𑀸𑀓𑀢𑀁 𑀓𑀫𑁆𑀫𑀯𑀲𑁂𑀦 𑀯𑀺𑀧𑀸𑀓𑀪𑀸𑀯𑀧𑁆𑀧𑀢𑁆𑀢𑀁 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀧𑀢𑀺𑀢𑀁 𑀯𑀺𑀬 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀕𑀸𑀳𑁂𑀢𑁆𑀯𑀸 𑀧𑀭𑀺𑀪𑀸𑀯𑁂𑀢𑁆𑀯𑀸 𑀦𑁂𑀯 𑀅𑀜𑁆𑀜𑀁 𑀧𑀯𑀢𑁆𑀢𑁂𑀢𑀺, 𑀦 𑀘 𑀧𑀼𑀭𑀺𑀫𑀯𑀺𑀧𑀸𑀓𑀸𑀦𑀼𑀪𑀸𑀯𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. ‘‘𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀏𑀓’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁨𑁨𑁧) 𑀯𑀘𑀦𑀢𑁄 𑀘 𑀅𑀳𑁂𑀢𑀼𑀓𑀓𑀺𑀭𑀺𑀬𑁂𑀲𑀼 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲𑁂𑀯 𑀆𑀲𑁂𑀯𑀦𑀢𑀸𑀉𑀤𑁆𑀥𑀭𑀡𑁂𑀦 𑀆𑀯𑀚𑁆𑀚𑀦𑀤𑁆𑀯𑀬𑀁 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀚𑀯𑀦𑀸𑀦𑁂𑀯 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀧𑀼𑀭𑀺𑀫𑀸𑀦𑀺 𑀚𑀯𑀦𑀸𑀦𑀻’’𑀢𑁆𑀬𑀸𑀤𑀺. 𑀅𑀯𑀺𑀲𑁂𑀲𑀯𑀘𑀦𑁂𑀧𑁂𑀢𑁆𑀣 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀚𑀯𑀦𑀸𑀦𑁂𑀯 𑀤𑀝𑁆𑀞𑀩𑁆𑀩𑀸𑀦𑀺 𑀮𑁄𑀓𑀼𑀢𑁆𑀢𑀭𑀚𑀯𑀦𑀸𑀦𑀁 𑀆𑀲𑁂𑀯𑀦𑀪𑀸𑀯𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸.

𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀧𑀝𑁆𑀞𑀸𑀦𑀝𑁆𑀞𑀓𑀣𑀸𑀬𑀁 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁧𑁨) ‘‘𑀮𑁄𑀓𑀼𑀢𑁆𑀢𑀭𑁄 𑀧𑀦 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀢𑀢𑁆𑀣 𑀳𑀺 𑀓𑀼𑀲𑀮𑀁 𑀪𑀺𑀦𑁆𑀦𑀚𑀸𑀢𑀺𑀓𑀲𑁆𑀲 𑀧𑀼𑀭𑁂𑀘𑀭𑀢𑁆𑀢𑀸 𑀦 𑀢𑁂𑀦 𑀆𑀲𑁂𑀯𑀦𑀕𑀼𑀡𑀁 𑀕𑀡𑁆𑀳𑀸𑀧𑁂𑀢𑀺, 𑀨𑀮𑀘𑀺𑀢𑁆𑀢𑀸𑀦𑀺 𑀘 𑀚𑀯𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺𑀧𑀺 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁂 𑀯𑀼𑀢𑁆𑀢𑀦𑀬𑁂𑀦 𑀆𑀲𑁂𑀯𑀦𑀁 𑀦 𑀕𑀡𑁆𑀳𑀦𑁆𑀢𑀺, 𑀦 𑀘 𑀅𑀜𑁆𑀜𑀁 𑀕𑀸𑀳𑀸𑀧𑁂𑀦𑁆𑀢𑀺. 𑀬𑀫𑁆𑀧𑀺 ‘‘𑀆𑀲𑁂𑀯𑀦𑀯𑀺𑀦𑀺𑀫𑀼𑀢𑁆𑀢𑀁 𑀚𑀯𑀦𑀁 𑀦𑀢𑁆𑀣𑀻’’𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀇𑀢𑀭𑀣𑀸 𑀆𑀘𑀭𑀺𑀬𑀲𑁆𑀲 𑀅𑀲𑀫𑀧𑁂𑀓𑁆𑀔𑀺𑀢𑀸𑀪𑀺𑀥𑀸𑀬𑀓𑀢𑁆𑀢𑀧𑁆𑀧𑀲𑀗𑁆𑀕𑁄 𑀲𑀺𑀬𑀸. 𑀫𑀕𑁆𑀕𑁄 𑀧𑀦 𑀕𑁄𑀢𑁆𑀭𑀪𑀼𑀢𑁄 𑀆𑀲𑁂𑀯𑀦𑀁 𑀦 𑀕𑀡𑁆𑀳𑀸𑀢𑀻𑀢𑀺 𑀦𑀢𑁆𑀣𑀺 𑀪𑀽𑀫𑀺𑀆𑀤𑀺𑀯𑀲𑁂𑀦 𑀦𑀸𑀦𑀸𑀚𑀸𑀢𑀺𑀢𑀸𑀬 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀝𑁆𑀞𑀸𑀦𑁂 ‘‘𑀕𑁄𑀢𑁆𑀭𑀪𑀼 𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀯𑁄𑀤𑀸𑀦𑀁 𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁬). 𑀏𑀓𑀼𑀧𑁆𑀧𑀸𑀤𑀸𑀤𑀺𑀘𑀢𑀼𑀩𑁆𑀩𑀺𑀥𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀸𑀪𑀸𑀯𑀢𑁄 𑀲𑀳𑀼𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺.

𑁧𑁭. 𑀳𑁂𑀢𑀼𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀺 𑀲𑀳𑀚𑀸𑀢𑀸𑀦𑀁 𑀦𑀸𑀫 𑀭𑀽𑀧𑀸𑀦𑀦𑁆𑀢𑀺 𑀢𑀬𑁄𑀧𑁂𑀢𑁂 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁, 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁, 𑀉𑀪𑀬𑀢𑁆𑀣 𑀲𑀳𑀚𑀸𑀢𑀸𑀦𑀁 𑀦𑀸𑀫𑀸𑀦𑀜𑁆𑀘 𑀳𑁂𑀢𑀸𑀤𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. ‘‘𑀲𑀳𑀚𑀸𑀢𑀭𑀽𑀧𑀦𑁆𑀢𑀺 𑀳𑀺 𑀲𑀩𑁆𑀩𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁, 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀓𑁆𑀔𑀢𑀺. 𑀲𑀳𑀚𑀸𑀢𑀸 𑀘𑁂𑀢𑀦𑀸𑀢𑀺 𑀅𑀦𑁆𑀢𑀫𑀲𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺𑀧𑀺 𑀲𑀳𑀚𑀸𑀢𑀘𑁂𑀢𑀦𑀸. 𑀲𑀳𑀚𑀸𑀢𑀸𑀦𑀁 𑀦𑀸𑀫 𑀭𑀽𑀧𑀸𑀦𑀦𑁆𑀢𑀺 𑀲𑀩𑁆𑀩𑀸𑀧𑀺 𑀘𑁂𑀢𑀦𑀸 𑀦𑀸𑀫𑀸𑀦𑀁, 𑀧𑀝𑀺𑀲𑀦𑁆𑀥𑀺𑀲𑀳𑀕𑀢𑀸 𑀘𑁂𑀢𑀦𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁, 𑀧𑀯𑀢𑁆𑀢𑀺𑀬𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑀳𑀕𑀢𑀸 𑀘𑁂𑀢𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘. 𑀦𑀸𑀦𑀸𑀓𑁆𑀔𑀡𑀺𑀓𑀸 𑀘𑁂𑀢𑀦𑀸𑀢𑀺 𑀯𑀺𑀧𑀸𑀓𑀓𑁆𑀔𑀡𑀢𑁄 𑀦𑀸𑀦𑀸𑀓𑁆𑀔𑀡𑁂 𑀅𑀢𑀻𑀢𑀪𑀯𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸. 𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀉𑀪𑀬𑀢𑁆𑀣𑀸𑀧𑀺 𑀦𑀸𑀫𑀭𑀽𑀧𑀸𑀦𑀁. 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀸𑀤𑀺𑀓𑀸 𑀯𑀺𑀧𑀸𑀓𑀸 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀳𑀺 𑀭𑀽𑀧𑀁 𑀯𑀺𑀧𑀸𑀓𑀯𑁄𑀳𑀸𑀭𑀁 𑀦 𑀮𑀪𑀢𑀺 𑀅𑀭𑀽𑀧𑀥𑀫𑁆𑀫𑀪𑀸𑀯𑁂𑀦, 𑀲𑀸𑀭𑀫𑁆𑀫𑀡𑀪𑀸𑀯𑁂𑀦 𑀘 𑀓𑀫𑁆𑀫𑀲𑀤𑀺𑀲𑁂𑀲𑀼 𑀅𑀭𑀽𑀧𑀥𑀫𑁆𑀫𑁂𑀲𑁆𑀯𑁂𑀯 𑀯𑀺𑀧𑀸𑀓-𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸.

𑁧𑁮. 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀧𑀘𑁆𑀘𑀬𑀥𑀫𑁆𑀫𑀢𑁄 𑀧𑀼𑀭𑁂 𑀉𑀧𑁆𑀧𑀦𑁆𑀦𑀲𑁆𑀲 𑀇𑀫𑀲𑁆𑀲 𑀭𑀽𑀧𑀓𑀸𑀬𑀲𑁆𑀲. 𑀓𑀣𑀁 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀬𑀁 𑀧𑀘𑁆𑀙𑀸𑀚𑀸𑀢𑀲𑁆𑀲 𑀧𑀘𑁆𑀘𑀬𑀢𑀸𑀢𑀺? 𑀦𑀦𑀼 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂 𑀅𑀲𑀢𑀺 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀳𑁂𑀢𑀼𑀓𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀲𑁆𑀲𑀸’’𑀢𑀺, 𑀢𑀲𑁆𑀫𑀸 𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀲𑁆𑀲 𑀳𑁂𑀢𑀼𑀪𑀸𑀯𑀼𑀧𑀢𑁆𑀣𑀫𑁆𑀪𑀦𑁂 𑀇𑀫𑀲𑁆𑀲 𑀩𑁆𑀬𑀸𑀧𑀸𑀭𑁄𑀢𑀺 𑀦 𑀓𑁄𑀘𑀺 𑀯𑀺𑀭𑁄𑀥𑁄.

𑁧𑁯. 𑀧𑀝𑀺𑀲𑀦𑁆𑀥𑀺𑀬𑀁 𑀘𑀓𑁆𑀔𑀸𑀤𑀺𑀯𑀢𑁆𑀣𑀽𑀦𑀁 𑀅𑀲𑀫𑁆𑀪𑀯𑀢𑁄, 𑀲𑀢𑀺 𑀘 𑀲𑀫𑁆𑀪𑀯𑁂 𑀢𑀁𑀢𑀁𑀯𑀺𑀜𑁆𑀜𑀸𑀡𑀸𑀦𑀁 𑀧𑀘𑁆𑀘𑀬𑀪𑀸𑀯𑀸𑀦𑀼𑀧𑀕𑀫𑀦𑀢𑁄, 𑀳𑀤𑀬𑀯𑀢𑁆𑀣𑀼𑀦𑁄 𑀘 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀳𑀼𑀧𑁆𑀧𑀦𑁆𑀦𑀲𑁆𑀲 𑀧𑀼𑀭𑁂𑀚𑀸𑀢𑀓𑀢𑀸𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀙𑀯𑀢𑁆𑀣𑀽𑀦𑀺 𑀧𑀯𑀢𑁆𑀢𑀺𑀬’’𑀦𑁆𑀢𑀺. ‘‘𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸’’𑀢𑀺 𑀘 𑀇𑀤𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀤𑁆𑀤𑁂𑀲𑁂 𑀆𑀕𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀲𑁂𑀓𑁆𑀔𑀸 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀻’’𑀢𑁆𑀬𑀸𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁨𑁪) 𑀅𑀯𑀺𑀲𑁂𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀓𑁆𑀔𑀸𑀤𑀻𑀦𑀫𑁆𑀧𑀺 𑀕𑀳𑀺𑀢𑀢𑁆𑀢𑀸 𑀥𑀫𑁆𑀫𑀸𑀭𑀫𑁆𑀫𑀡𑀫𑁆𑀧𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀮𑀩𑁆𑀪𑀢𑀺. 𑀅𑀢𑁆𑀣𑀢𑁄 𑀳𑁂𑀢𑀁 𑀲𑀺𑀤𑁆𑀥𑀁, 𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀺𑀓𑀯𑀻𑀣𑀺 𑀧𑀯𑀢𑁆𑀢𑀢𑀺, 𑀢𑀁 𑀢𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀳𑁄𑀢𑀻𑀢𑀺.

𑁨𑁨. 𑀧𑀓𑀢𑀺𑀬𑀸 𑀏𑀯 𑀧𑀘𑁆𑀘𑀬𑀦𑁆𑀢𑀭𑀭𑀳𑀺𑀢𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑁂𑀳𑀺 𑀅𑀲𑀁𑀫𑀺𑀲𑁆𑀲𑁄 𑀧𑀼𑀣𑀕𑁂𑀯 𑀓𑁄𑀘𑀺 𑀉𑀧𑀦𑀺𑀲𑁆𑀲𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀧𑀓𑀢𑁄 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀧𑀓𑀢𑁄𑀢𑀺 𑀘𑁂𑀢𑁆𑀣 𑀧-𑀓𑀸𑀭𑁄 𑀉𑀧𑀲𑀕𑁆𑀕𑁄, 𑀲𑁄 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀸𑀤𑀺𑀢𑀪𑀸𑀯𑀁, 𑀆𑀲𑁂𑀯𑀺𑀢𑀪𑀸𑀯𑀜𑁆𑀘 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀦𑁆𑀦𑁄 𑀭𑀸𑀕𑀸𑀤𑀺, 𑀲𑀤𑁆𑀥𑀸𑀤𑀺, 𑀉𑀧𑀲𑁂𑀯𑀺𑀢𑁄 𑀯𑀸 𑀉𑀢𑀼𑀪𑁄𑀚𑀦𑀸𑀤𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀢𑀣𑀸 𑀘𑁂𑀯 𑀦𑀺𑀤𑁆𑀤𑀺𑀲𑀢𑀺.

𑁨𑁩. 𑀕𑀭𑀼𑀓𑀢𑀦𑁆𑀢𑀺 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀁. 𑀢𑀣𑀸 𑀳𑀺 ‘‘𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑁆𑀬𑀸𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁧𑁩) 𑀤𑀸𑀦𑀲𑀻𑀮𑀉𑀧𑁄𑀲𑀣𑀓𑀫𑁆𑀫𑀧𑀼𑀩𑁆𑀩𑁂𑀓𑀢𑀲𑀼𑀘𑀺𑀡𑁆𑀡𑀛𑀸𑀦𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀫𑀕𑁆𑀕𑀸𑀤𑀻𑀦𑀺 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀅𑀲𑁆𑀲 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄.

𑁨𑁪. ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑁆𑀬𑀸𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀦𑀬𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀲𑁆𑀲 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸’’𑀢𑁆𑀬𑀸𑀤𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀩𑀮𑀯𑀓𑀸𑀭𑀡𑀯𑀲𑁂𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑁨𑁫. 𑀬𑀣𑀸𑀭𑀳𑀁 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀭𑀸𑀕𑀸𑀤𑀬𑁄…𑀧𑁂… 𑀲𑁂𑀦𑀸𑀲𑀦𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀭𑀸𑀕𑀸𑀤𑀬𑁄 𑀳𑀺 𑀅𑀚𑁆𑀛𑀢𑁆𑀢𑀁 𑀦𑀺𑀧𑁆𑀨𑀸𑀤𑀺𑀢𑀸, 𑀧𑀼𑀕𑁆𑀕𑀮𑀸𑀤𑀬𑁄 𑀩𑀳𑀺𑀤𑁆𑀥𑀸 𑀲𑁂𑀯𑀺𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀭𑀸𑀕𑀲𑀤𑁆𑀥𑀸𑀤𑀬𑁄 𑀥𑀫𑁆𑀫𑀸, 𑀅𑀚𑁆𑀛𑀢𑁆𑀢𑀫𑀦𑀼𑀯𑀸𑀲𑀺𑀢𑀸;

𑀲𑀢𑁆𑀢𑀲𑀗𑁆𑀔𑀸𑀭𑀥𑀫𑁆𑀫𑀸 𑀘, 𑀩𑀳𑀺𑀤𑁆𑀥𑁄𑀧𑀦𑀺𑀲𑁂𑀯𑀺𑀢𑀸’’𑀢𑀺. (𑀦𑀸𑀫. 𑀧𑀭𑀺. 𑁮𑁨𑁭);

𑀅𑀣 𑀯𑀸 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀦𑁆𑀢𑀺 𑀬𑀣𑀸𑀞𑀺𑀢𑀯𑀲𑁂𑀦𑁂𑀯 𑀬𑁄𑀚𑀦𑀸 𑀅𑀢𑁆𑀢𑀦𑁄 𑀳𑀺 𑀭𑀸𑀕𑀸𑀤𑀬𑁄 𑀘 𑀅𑀢𑁆𑀢𑀦𑁄 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀲𑀤𑁆𑀥𑀸𑀤𑀺𑀓𑁂 𑀦𑀺𑀲𑁆𑀲𑀸𑀬 𑀓𑀼𑀲𑀮𑀁 𑀓𑀭𑁄𑀦𑁆𑀢𑀸𑀦𑀁 𑀧𑀭𑁂𑀲𑀜𑁆𑀘 𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺.

𑀢𑀢𑁆𑀣 𑀓𑀸𑀫𑀭𑀸𑀕𑀸𑀤𑀬𑁄 𑀦𑀺𑀲𑁆𑀲𑀸𑀬 𑀓𑀸𑀫𑀪𑀯𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁, 𑀭𑀸𑀕𑀸𑀤𑀺𑀯𑀽𑀧𑀲𑀫𑀢𑁆𑀣𑀜𑁆𑀘 𑀤𑀸𑀦𑀲𑀻𑀮𑀉𑀧𑁄𑀲𑀣𑀚𑁆𑀛𑀸𑀦𑀸𑀪𑀺𑀜𑁆𑀜𑀸𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀪𑀸𑀯𑀦𑀸, 𑀭𑀸𑀕𑀸𑀤𑀺𑀳𑁂𑀢𑀼𑀓𑀸 𑀘 𑀉𑀧𑀭𑀽𑀧𑀭𑀺𑀭𑀸𑀕𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀬𑀣𑀸𑀭𑀳𑀁 𑀤𑀝𑁆𑀞𑀩𑁆𑀩𑀁. 𑀬𑀁 𑀬𑀜𑁆𑀳𑀺 𑀦𑀺𑀲𑁆𑀲𑀸𑀬 𑀬𑀲𑁆𑀲 𑀬𑀲𑁆𑀲 𑀲𑀫𑁆𑀪𑀯𑁄, 𑀢𑀁 𑀢𑀁 𑀢𑀲𑁆𑀲 𑀢𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀧𑀘𑁆𑀘𑀬𑀫𑀳𑀸𑀧𑀤𑁂𑀲𑁄 𑀳𑁂𑀲, 𑀬𑀤𑀺𑀤𑀁 ‘‘𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀘𑀸𑀳 ‘‘𑀩𑀳𑀼𑀥𑀸 𑀳𑁄𑀢𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄’’𑀢𑀺. 𑀲𑀤𑁆𑀥𑀸𑀤𑀬𑁄𑀢𑀺 𑀲𑀻𑀮𑀲𑀼𑀢𑀘𑀸𑀕𑀧𑀜𑁆𑀜𑀸. 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀺𑀓𑀜𑁆𑀳𑀺 𑀉𑀧𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀤𑀸𑀦𑀲𑀻𑀮𑀸𑀤𑀬𑁄, 𑀢𑀣𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀲𑀤𑁆𑀥𑀸𑀤𑀬𑁄 𑀉𑀧𑀦𑀺𑀲𑁆𑀲𑀸𑀬 𑀧𑀭𑁂𑀲𑀜𑁆𑀘 𑀤𑀸𑀦𑀲𑀻𑀮𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀧𑀸𑀓𑀝𑀫𑁂𑀢𑀁. 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀺𑀓𑀁 𑀲𑀼𑀔𑀁 𑀤𑀼𑀓𑁆𑀔𑀁. 𑀧𑀼𑀕𑁆𑀕𑀮𑁄𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀧𑀼𑀕𑁆𑀕𑀮𑁄. 𑀪𑁄𑀚𑀦𑀦𑁆𑀢𑀺 𑀲𑀧𑁆𑀧𑀸𑀬𑀸𑀤𑀺𑀪𑁄𑀚𑀦𑀁, 𑀉𑀢𑀼𑀧𑀺 𑀢𑀸𑀤𑀺𑀲𑁄𑀯.

𑁨𑁭. ‘‘𑀅𑀥𑀺𑀧𑀢𑀺…𑀧𑁂… 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑀼𑀁 ‘‘𑀢𑀢𑁆𑀣 𑀕𑀭𑀼𑀓𑀢𑀫𑀸𑀭𑀫𑁆𑀫𑀡’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀕𑀭𑀼𑀓𑀢𑀫𑀸𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀅𑀲𑁆𑀲𑀸𑀤𑀸𑀤𑀺𑀦𑀸 𑀕𑀭𑀼𑀓𑀢𑀁 𑀆𑀭𑀫𑁆𑀫𑀡𑀁. 𑀢𑀜𑁆𑀳𑀺 𑀛𑀸𑀦𑀫𑀕𑁆𑀕𑀨𑀮𑀯𑀺𑀧𑀲𑁆𑀲𑀦𑀸𑀦𑀺𑀩𑁆𑀩𑀸𑀦𑀸𑀤𑀺𑀪𑁂𑀤𑀁 𑀧𑀘𑁆𑀘𑀯𑁂𑀓𑁆𑀔𑀡𑀅𑀲𑁆𑀲𑀸𑀤𑀸𑀤𑀺𑀫𑀕𑁆𑀕𑀨𑀮𑀸𑀤𑀺𑀥𑀫𑁆𑀫𑁂 𑀅𑀢𑁆𑀢𑀸𑀥𑀻𑀦𑁂 𑀓𑀭𑁄𑀢𑀻𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀦𑀸𑀫. 𑀕𑀭𑀼𑀓𑀸𑀢𑀩𑁆𑀩𑀢𑀸𑀫𑀢𑁆𑀢𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺. 𑀕𑀭𑀼𑀓𑀢𑁄𑀧𑀺 𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀲𑀳𑀚𑀸𑀢𑀸…𑀧𑁂… 𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀙𑀦𑁆𑀤𑀘𑀺𑀢𑁆𑀢𑀯𑀻𑀭𑀺𑀬𑀯𑀻𑀫𑀁𑀲𑀸𑀦𑀁, 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀧𑀺 𑀲𑀳𑀚𑀸𑀢𑀸𑀥𑀺𑀧𑀢𑀺 𑀬𑀣𑀸𑀭𑀳𑀁 𑀲𑀳𑀚𑀸𑀢𑀦𑀸𑀫𑀭𑀽𑀧𑀸𑀦𑀁 𑀧𑀯𑀢𑁆𑀢𑀺𑀬𑀁𑀬𑁂𑀯 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀧𑀘𑁆𑀘𑀬𑁄.

𑁨𑁮. 𑀭𑀽𑀧𑀥𑀫𑁆𑀫𑀲𑁆𑀲 𑀅𑀭𑀽𑀧𑀥𑀫𑁆𑀫𑀁 𑀧𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀢𑀸 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀯𑀢𑁆𑀣𑀼𑀯𑀺𑀧𑀸𑀓𑀸 𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑁋

𑁩𑁦. 𑀬𑀲𑁆𑀫𑀸 𑀧𑀦 𑀅𑀜𑁆𑀜𑀫𑀜𑁆𑀜𑀼𑀧𑀢𑁆𑀣𑀫𑁆𑀪𑀦𑀯𑀲𑁂𑀦𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸, 𑀦 𑀲𑀳𑀚𑀸𑀢𑀫𑀢𑁆𑀢𑀢𑁄𑀢𑀺 𑀧𑀯𑀢𑁆𑀢𑀺𑀬𑀁 𑀭𑀽𑀧𑀁 𑀦𑀸𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺. 𑀢𑀣𑀸 𑀉𑀧𑀸𑀤𑀸𑀭𑀽𑀧𑀸𑀦𑀺 𑀘 𑀪𑀽𑀢𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺.

𑁩𑁧. 𑀦𑀦𑀼 𑀘 ‘‘𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀲𑀢𑀺 𑀅𑀲𑀜𑁆𑀜𑀻𑀦𑀁 𑀲𑀳𑀚𑀸𑀢𑀸𑀳𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀓𑀣𑀫𑀺𑀤𑀁 𑀦𑀻𑀬𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀯𑀲𑀧𑁆𑀧𑀯𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲, 𑀢𑀁𑀲𑀳𑀕𑀢𑀸𑀦𑀫𑁆𑀧𑀺 𑀯𑀸 𑀲𑁂𑀲𑀸𑀳𑀸𑀭𑀸𑀦𑀁 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀢𑁆𑀢𑀧𑀭𑀺𑀬𑀸𑀬𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀸 𑀯𑀼𑀢𑁆𑀢𑀸, 𑀦 𑀆𑀳𑀸𑀭𑀧𑀘𑁆𑀘𑀬𑀪𑀸𑀯𑀢𑁄𑀢𑀺.

𑁩𑁨. ‘‘𑀧𑀜𑁆𑀘 𑀧𑀲𑀸𑀤𑀸’’𑀢𑁆𑀬𑀸𑀤𑀻𑀲𑀼 𑀦𑀦𑀼 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸 𑀦 𑀕𑀳𑀺𑀢𑀸𑀢𑀺? 𑀲𑀘𑁆𑀘𑀁 𑀦 𑀕𑀳𑀺𑀢𑀸. 𑀬𑀤𑀺𑀧𑀺 𑀢𑁂𑀲𑀁 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀢𑀸 𑀅𑀢𑁆𑀣𑀺, 𑀲𑀸 𑀧𑀦 𑀦 𑀧𑀘𑁆𑀘𑀬𑀪𑀸𑀯𑀢𑁄. 𑀬𑀣𑀸 𑀳𑀺 𑀚𑀻𑀯𑀺𑀢𑀸𑀳𑀸𑀭𑀸 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀦𑀼𑀧𑀸𑀮𑀓𑀸 𑀉𑀧𑀢𑁆𑀣𑀫𑁆𑀪𑀓𑀸 𑀅𑀢𑁆𑀣𑀺, 𑀅𑀯𑀺𑀕𑀢𑀧𑀘𑁆𑀘𑀬𑀪𑀽𑀢𑀸 𑀘 𑀳𑁄𑀦𑁆𑀢𑀺, 𑀦 𑀏𑀯𑀁 𑀇𑀢𑁆𑀣𑀺𑀧𑀼𑀭𑀺𑀲𑀪𑀸𑀯𑀸 𑀮𑀺𑀗𑁆𑀕𑀸𑀤𑀻𑀦𑀁 𑀓𑁂𑀦𑀘𑀺 𑀉𑀧𑀓𑀸𑀭𑁂𑀦 𑀉𑀧𑀓𑀸𑀭𑀸 𑀳𑁄𑀦𑁆𑀢𑀺. 𑀓𑁂𑀯𑀮𑀁 𑀧𑀦 𑀬𑀣𑀸𑀲𑀓𑁂𑀳𑁂𑀯 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑀁 𑀮𑀺𑀗𑁆𑀕𑀸𑀤𑀻𑀦𑀁 𑀬𑀣𑀸 𑀇𑀢𑁆𑀣𑀸𑀤𑀺𑀕𑁆𑀕𑀳𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀺, 𑀢𑀢𑁄 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀢𑀁-𑀲𑀳𑀺𑀢𑀲𑀦𑁆𑀢𑀸𑀦𑁂 𑀅𑀧𑁆𑀧𑀯𑀢𑁆𑀢𑀺𑀢𑁄 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀢𑀸, 𑀇𑀦𑁆𑀤𑁆𑀭𑀺𑀬𑀢𑀸 𑀘 𑀦𑁂𑀲𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄.

𑁩𑁩. 𑀬𑁂𑀲𑀁 𑀦𑀸𑀫𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀅𑀩𑁆𑀪𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀸𑀦𑀁 𑀯𑀺𑀬 𑀧𑀯𑀢𑁆𑀢𑀸𑀦𑀁, 𑀬𑁂𑀲𑀜𑁆𑀘 𑀭𑀽𑀧𑀸𑀦𑀁 𑀦𑀸𑀫𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸 𑀳𑁄𑀢𑀺, 𑀢𑁂𑀲𑀫𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸. 𑀭𑀽𑀧𑀸𑀦𑀁 𑀧𑀦 𑀭𑀽𑀧𑁂𑀳𑀺 𑀲𑀸𑀲𑀗𑁆𑀓𑀸 𑀦𑀢𑁆𑀣𑀺. 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀚𑀸𑀬𑀦𑁆𑀢𑀸𑀦𑀁 𑀯𑀺𑀲𑀬𑀪𑀸𑀯𑀫𑀢𑁆𑀢𑀁 𑀆𑀭𑀫𑁆𑀫𑀡𑀦𑁆𑀢𑀺 𑀢𑁂𑀦𑀸𑀧𑀺 𑀢𑁂𑀲𑀁 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸 𑀦𑀢𑁆𑀣𑀻𑀢𑀺 𑀬𑁂𑀲𑀁 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸 𑀅𑀢𑁆𑀣𑀺, 𑀢𑁂𑀲𑀫𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸𑀧𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀯𑀢𑁆𑀣𑀽’’𑀢𑁆𑀬𑀸𑀤𑀺.

𑁩𑁪. 𑀲𑀩𑁆𑀩𑀣𑀸 𑀲𑀩𑁆𑀩𑀸𑀓𑀸𑀭𑁂𑀦 𑀬𑀣𑀸𑀭𑀳𑀁 𑀦𑀸𑀫𑀯𑀲𑁂𑀦 𑀯𑀼𑀢𑁆𑀢𑀁 𑀢𑀺𑀯𑀺𑀥𑀁 𑀲𑀳𑀚𑀸𑀢𑀁, 𑀤𑀼𑀯𑀺𑀥𑀁 𑀧𑀼𑀭𑁂𑀚𑀸𑀢𑀁, 𑀏𑀓𑀯𑀺𑀥𑀁 𑀧𑀘𑁆𑀙𑀸𑀚𑀸𑀢𑀜𑁆𑀘 𑀧𑀘𑁆𑀘𑀬𑀚𑀸𑀢𑀁, 𑀆𑀳𑀸𑀭𑁂𑀲𑀼 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀬𑀁 𑀧𑀜𑁆𑀘𑀯𑀺𑀥𑁄𑀧𑀺 𑀅𑀢𑁆𑀣𑀺𑀧𑀘𑁆𑀘𑀬𑁄, 𑀅𑀯𑀺𑀕𑀢𑀧𑀘𑁆𑀘𑀬𑁄 𑀘 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀸 𑀅𑀢𑁆𑀣𑀺𑀪𑀸𑀯𑀸𑀪𑀸𑀯𑁂𑀦 𑀅𑀦𑀼𑀧𑀓𑀸𑀭𑀓𑀸𑀦𑀫𑁂𑀯 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀅𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑁄𑀢𑀺 𑀦𑀢𑁆𑀣𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀩𑁆𑀩𑀤𑀸 𑀪𑀸𑀯𑀺𑀦𑁄 𑀅𑀢𑁆𑀣𑀺𑀧𑀘𑁆𑀘𑀬𑀢𑀸, 𑀅𑀯𑀺𑀕𑀢𑀧𑀘𑁆𑀘𑀬𑀢𑀸 𑀘. 𑀉𑀧𑁆𑀧𑀸𑀤𑀸𑀤𑀺𑀬𑀼𑀢𑁆𑀢𑀸𑀦𑀁 𑀯𑀸 𑀦𑀢𑁆𑀣𑀺𑀪𑀸𑀯𑁄𑀧𑀓𑀸𑀭𑀓𑀢𑀸𑀯𑀺𑀭𑀼𑀤𑁆𑀥𑁄, 𑀯𑀺𑀕𑀢𑀪𑀸𑀯𑁄𑀧𑀓𑀸𑀭𑀓𑀢𑀸𑀯𑀺𑀭𑀼𑀤𑁆𑀥𑁄 𑀘 𑀉𑀧𑀓𑀸𑀭𑀓𑀪𑀸𑀯𑁄 𑀅𑀢𑁆𑀣𑀺𑀧𑀘𑁆𑀘𑀬𑀢𑀸𑀤𑀺𑀓𑀸𑀢𑀺 𑀦 𑀢𑀲𑁆𑀲 𑀢𑀧𑁆𑀧𑀘𑁆𑀘𑀬𑀢𑁆𑀢𑀧𑁆𑀧𑀲𑀗𑁆𑀕𑁄. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘𑁂𑀢𑁆𑀣 𑀑𑀚𑀸 𑀯𑀺𑀬 𑀞𑀺𑀢𑀺𑀓𑁆𑀔𑀡𑁂𑀯 𑀉𑀧𑀓𑀸𑀭𑀓𑀢𑁆𑀢𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀲𑀼 𑀦 𑀕𑀬𑁆𑀳𑀢𑀻𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀁.

𑁩𑁫. 𑀇𑀤𑀸𑀦𑀺 𑀲𑀩𑁆𑀩𑁂𑀧𑀺 𑀧𑀘𑁆𑀘𑀬𑀸 𑀲𑀗𑁆𑀔𑁂𑀧𑀢𑁄𑀧𑀺 𑀘𑀢𑀼𑀥𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑀽…𑀧𑁂… 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀲𑁄 𑀓𑁄𑀘𑀺 𑀧𑀘𑁆𑀘𑀬𑁄 𑀅𑀢𑁆𑀣𑀺, 𑀬𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀁 𑀦 𑀕𑀘𑁆𑀙𑁂𑀬𑁆𑀬, 𑀲𑀓𑀲𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀦 𑀕𑀘𑁆𑀙𑀢𑀺, 𑀓𑀫𑁆𑀫𑀳𑁂𑀢𑀼𑀓𑀢𑁆𑀢𑀸 𑀘 𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑀸 𑀨𑀮𑀳𑁂𑀢𑀽𑀧𑀘𑀸𑀭𑀯𑀲𑁂𑀦 𑀲𑀩𑁆𑀩𑁂𑀧𑀺 𑀓𑀫𑁆𑀫𑀲𑀪𑀸𑀯𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀢𑁂 𑀘 𑀧𑀭𑀫𑀢𑁆𑀣𑀢𑁄 𑀮𑁄𑀓𑀲𑀫𑁆𑀫𑀼𑀢𑀺𑀯𑀲𑁂𑀦 𑀘 𑀯𑀺𑀚𑁆𑀚𑀫𑀸𑀦𑀸𑀬𑁂𑀯𑀸𑀢𑀺 𑀲𑀩𑁆𑀩𑁂𑀧𑀺 𑀘𑀢𑀽𑀲𑀼 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺.

𑁩𑁬. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 𑀢𑀢𑁆𑀣 𑀢𑀢𑁆𑀣 ‘‘𑀲𑀳𑀚𑀸𑀢𑀭𑀽𑀧’’𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀦 𑀅𑀯𑀺𑀲𑁂𑀲𑀢𑁄 𑀤𑀝𑁆𑀞𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀚𑀸𑀢𑀭𑀽𑀧’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀬𑀜𑁆𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀪𑀸𑀯𑀢𑁄 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀲𑀳𑀼𑀧𑁆𑀧𑀢𑁆𑀢𑀺𑀦𑀺𑀬𑀫𑀸𑀪𑀸𑀯𑀢𑁄 𑀲𑀳𑀚𑀸𑀢𑀭𑀽𑀧𑀦𑁆𑀢𑀺 𑀲𑀩𑁆𑀩𑀢𑁆𑀣𑀸𑀧𑀺 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀔𑀸𑀢𑀓𑀫𑁆𑀫𑀚𑀭𑀽𑀧𑀸𑀦𑀜𑁆𑀘 𑀯𑀲𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺. 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀺 𑀭𑀽𑀧𑀸𑀦𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑀺.

𑁩𑁭. 𑀇𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀪𑀯𑀸 𑀬𑀣𑀸𑀲𑀫𑁆𑀪𑀯𑀁 𑀢𑁂𑀓𑀸𑀮𑀺𑀓𑀸 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀯𑀲𑁂𑀦 𑀧𑀜𑁆𑀘𑀦𑁆𑀦𑀁 𑀅𑀢𑀻𑀢𑀓𑀸𑀮𑀺𑀓𑀸𑀦𑀁, 𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀅𑀢𑀻𑀢𑀯𑀢𑁆𑀢𑀫𑀸𑀦𑀯𑀲𑁂𑀦 𑀤𑁆𑀯𑀺𑀓𑀸𑀮𑀺𑀓𑀲𑁆𑀲, 𑀆𑀭𑀫𑁆𑀫𑀡𑀅𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀦𑀁 𑀢𑀺𑀓𑀸𑀮𑀺𑀓𑀸𑀦𑀁, 𑀇𑀢𑀭𑁂𑀲𑀁 𑀧𑀦𑁆𑀦𑀭𑀲𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸𑀦𑀜𑁆𑀘 𑀯𑀲𑁂𑀦 𑀓𑀸𑀮𑀢𑁆𑀢𑀬𑀯𑀦𑁆𑀢𑁄, 𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀓𑀸𑀮𑀯𑀺𑀫𑀼𑀢𑁆𑀢𑀸 𑀘, 𑀘𑀓𑁆𑀔𑀸𑀤𑀺𑀭𑀸𑀕𑀸𑀤𑀺𑀲𑀤𑁆𑀥𑀸𑀤𑀺𑀯𑀲𑁂𑀦 𑀅𑀚𑁆𑀛𑀢𑁆𑀢𑀺𑀓𑀸 𑀘, 𑀧𑀼𑀕𑁆𑀕𑀮𑀉𑀢𑀼𑀪𑁄𑀚𑀦𑀸𑀤𑀺𑀯𑀲𑁂𑀦 𑀢𑀢𑁄 𑀩𑀳𑀺𑀤𑁆𑀥𑀸 𑀘, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀲𑀗𑁆𑀔𑀢𑀸 𑀘, 𑀓𑀣𑀸 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀲𑀗𑁆𑀔𑀢𑀸 𑀘 𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀺𑀦𑀸𑀫𑀭𑀽𑀧𑀸𑀦𑀁 𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀸 𑀞𑀺𑀢𑀸 𑀲𑀩𑁆𑀩𑀣𑀸 𑀧𑀝𑁆𑀞𑀸𑀦𑁂 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑁂 𑀧𑀓𑀭𑀡𑁂 𑀘𑀢𑀼𑀯𑀻𑀲𑀢𑀺𑀲𑀗𑁆𑀔𑀸𑀢𑀸 𑀧𑀘𑁆𑀘𑀬𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑁩𑁮. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀜𑁆𑀜𑀢𑁆𑀢𑀺𑀦𑀸𑀫𑀭𑀽𑀧𑁂𑀲𑀼.

𑀧𑀝𑁆𑀞𑀸𑀦𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀜𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸

𑁩𑁯. 𑀯𑀘𑀦𑀻𑀬𑀯𑀸𑀘𑀓𑀪𑁂𑀤𑀸 𑀤𑀼𑀯𑀺𑀥𑀸 𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀺𑀬𑀢𑁆𑀢𑀸’’𑀢𑁆𑀬𑀸𑀤𑀺. 𑀧𑀜𑁆𑀜𑀸𑀧𑀺𑀬𑀢𑁆𑀢𑀸𑀢𑀺 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀜𑀸𑀧𑁂𑀢𑀩𑁆𑀩𑀢𑁆𑀢𑀸, 𑀇𑀫𑀺𑀦𑀸 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀲𑀫𑀽𑀳𑀲𑀦𑁆𑀢𑀸𑀦𑀸𑀤𑀺𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀤𑀺𑀪𑁂𑀤𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀪𑀽𑀢𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸 𑀅𑀢𑁆𑀣𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸. 𑀲𑀸 𑀳𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀻𑀬𑀢𑀺. 𑀧𑀜𑁆𑀜𑀸𑀧𑀦𑀢𑁄𑀢𑀺 𑀧𑀓𑀸𑀭𑁂𑀳𑀺 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀬𑀸 𑀜𑀸𑀧𑀦𑀢𑁄. 𑀇𑀫𑀺𑀦𑀸 𑀳𑀺 𑀧𑀜𑁆𑀜𑀸𑀧𑁂𑀢𑀻𑀢𑀺 ‘‘𑀧𑀜𑁆𑀜𑀢𑁆𑀢𑀻’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀅𑀢𑁆𑀣𑀸𑀦𑀁 𑀅𑀪𑀺𑀥𑀸𑀦𑀲𑀗𑁆𑀔𑀸𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸.

𑁪𑁦. 𑀪𑀽𑀢𑀧𑀭𑀺𑀡𑀸𑀫𑀸𑀓𑀸𑀭𑀫𑀼𑀧𑀸𑀤𑀸𑀬𑀸𑀢𑀺 𑀧𑀣𑀯𑀸𑀤𑀺𑀓𑀸𑀦𑀁 𑀫𑀳𑀸𑀪𑀽𑀢𑀸𑀦𑀁 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀧𑀢𑁆𑀣𑀝𑀲𑀗𑁆𑀕𑀳𑀢𑀸𑀤𑀺𑀆𑀓𑀸𑀭𑁂𑀦 𑀧𑀭𑀺𑀡𑀸𑀫𑀸𑀓𑀸𑀭𑀁 𑀧𑀭𑀺𑀡𑀢𑀪𑀸𑀯𑀲𑀗𑁆𑀔𑀸𑀢𑀁 𑀆𑀓𑀸𑀭𑀁 𑀉𑀧𑀸𑀤𑀸𑀬 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀢𑀣𑀸 𑀢𑀣𑀸𑀢𑀺 𑀪𑀽𑀫𑀸𑀤𑀺𑀯𑀲𑁂𑀦. 𑀪𑀽𑀫𑀺𑀧𑀩𑁆𑀩𑀢𑀸𑀤𑀺𑀓𑀸𑀢𑀺 𑀪𑀽𑀫𑀺𑀧𑀩𑁆𑀩𑀢𑀭𑀼𑀓𑁆𑀔𑀸𑀤𑀺𑀓𑀸 𑀲𑀦𑁆𑀢𑀸𑀦𑀧𑀜𑁆𑀜𑀢𑁆𑀢𑀺. 𑀲𑀫𑁆𑀪𑀸𑀭𑀲𑀦𑁆𑀦𑀺𑀯𑁂𑀲𑀸𑀓𑀸𑀭𑀦𑁆𑀢𑀺 𑀤𑀸𑀭𑀼𑀫𑀢𑁆𑀢𑀺𑀓𑀸𑀢𑀦𑁆𑀢𑀸𑀤𑀻𑀦𑀁 𑀲𑀫𑁆𑀪𑀸𑀭𑀸𑀦𑀁 𑀉𑀧𑀓𑀭𑀡𑀸𑀦𑀁 𑀲𑀦𑁆𑀦𑀺𑀯𑁂𑀲𑀸𑀓𑀸𑀭𑀁 𑀭𑀘𑀦𑀸𑀤𑀺𑀯𑀺𑀲𑀺𑀝𑁆𑀞𑀢𑀁𑀢𑀁𑀲𑀡𑁆𑀞𑀸𑀦𑀸𑀤𑀺𑀆𑀓𑀸𑀭𑀁. 𑀭𑀣𑀲𑀓𑀝𑀸𑀤𑀺𑀓𑀸𑀢𑀺 𑀭𑀣𑀲𑀓𑀝𑀕𑀸𑀫𑀖𑀝𑀧𑀝𑀸𑀤𑀺𑀓𑀸 𑀲𑀫𑀽𑀳𑀧𑀜𑁆𑀜𑀢𑁆𑀢𑀺. 𑀘𑀦𑁆𑀤𑀸𑀯𑀝𑁆𑀝𑀦𑀸𑀤𑀺𑀓𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀸𑀦𑀁 𑀲𑀺𑀦𑁂𑀭𑀼𑀁 𑀧𑀤𑀓𑁆𑀔𑀺𑀡𑀯𑀲𑁂𑀦 𑀉𑀤𑀬𑀸𑀤𑀺𑀆𑀯𑀝𑁆𑀝𑀦𑀸𑀓𑀸𑀭𑀁. 𑀤𑀺𑀲𑀸𑀓𑀸𑀮𑀸𑀤𑀺𑀓𑀸𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀤𑀺𑀓𑀸 𑀤𑀺𑀲𑀸𑀧𑀜𑁆𑀜𑀢𑁆𑀢𑀺, 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸 𑀓𑀸𑀮𑀧𑀜𑁆𑀜𑀢𑁆𑀢𑀺, 𑀫𑀸𑀲𑁄𑀢𑀼𑀯𑁂𑀲𑀸𑀔𑀫𑀸𑀲𑀸𑀤𑀺𑀓𑀸 𑀢𑀁𑀢𑀁𑀦𑀸𑀫𑀯𑀺𑀲𑀺𑀝𑁆𑀞𑀸 𑀫𑀸𑀲𑀸𑀤𑀺𑀧𑀜𑁆𑀜𑀢𑁆𑀢𑀺 𑀘. 𑀅𑀲𑀫𑁆𑀨𑀼𑀝𑁆𑀞𑀸𑀓𑀸𑀭𑀦𑁆𑀢𑀺 𑀢𑀁𑀢𑀁𑀭𑀽𑀧𑀓𑀮𑀸𑀧𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀁 𑀲𑀼𑀲𑀺𑀭𑀸𑀤𑀺𑀆𑀓𑀸𑀭𑀁. 𑀓𑀽𑀧𑀕𑀼𑀳𑀸𑀤𑀺𑀓𑀸 𑀢𑀺 𑀓𑀽𑀧𑀕𑀼𑀳𑀙𑀺𑀤𑁆𑀤𑀸𑀤𑀺𑀓𑀸 𑀆𑀓𑀸𑀲𑀧𑀜𑁆𑀜𑀢𑁆𑀢𑀺. 𑀢𑀁𑀢𑀁𑀪𑀽𑀢𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀢𑀁𑀢𑀁𑀪𑀽𑀢𑀦𑀺𑀫𑀺𑀢𑁆𑀢𑀁. 𑀪𑀸𑀯𑀦𑀸𑀯𑀺𑀲𑁂𑀲𑀦𑁆𑀢𑀺 𑀧𑀭𑀺𑀓𑀫𑁆𑀫𑀸𑀤𑀺𑀪𑁂𑀤𑀁 𑀪𑀸𑀯𑀦𑀸𑀬 𑀧𑀩𑀦𑁆𑀥𑀯𑀺𑀲𑁂𑀲𑀁. 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀓𑀸𑀢𑀺 𑀓𑀲𑀺𑀡𑀸𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀪𑁂𑀤𑀸 𑀬𑁄𑀕𑀻𑀦𑀁 𑀉𑀧𑀝𑁆𑀞𑀺𑀢𑀸 𑀉𑀕𑁆𑀕𑀳𑀧𑀝𑀺𑀪𑀸𑀕𑀸𑀤𑀺𑀪𑁂𑀤𑀸 𑀦𑀺𑀫𑀺𑀢𑁆𑀢𑀧𑀜𑁆𑀜𑀢𑁆𑀢𑀺. 𑀏𑀯𑀫𑀸𑀤𑀺𑀧𑁆𑀧𑀪𑁂𑀤𑀸𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀦𑀺𑀭𑁄𑀥𑀓𑀲𑀺𑀡𑀸𑀤𑀺𑀪𑁂𑀤𑀸 𑀘. 𑀅𑀢𑁆𑀣𑀘𑁆𑀙𑀸𑀬𑀸𑀓𑀸𑀭𑁂𑀦𑀸𑀢𑀺 𑀧𑀭𑀫𑀢𑁆𑀣𑀥𑀫𑁆𑀫𑀲𑁆𑀲 𑀙𑀸𑀬𑀸𑀓𑀸𑀭𑁂𑀦 𑀧𑀝𑀺𑀪𑀸𑀕𑀸𑀓𑀸𑀭𑁂𑀦.

𑁪𑁧. 𑀦𑀸𑀫𑀦𑀸𑀫𑀓𑀫𑁆𑀫𑀸𑀤𑀺𑀦𑀸𑀫𑁂𑀦𑀸𑀢𑀺 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑀇𑀫𑁂𑀳𑀺 𑀙𑀳𑀺 𑀦𑀸𑀫𑁂𑀳𑀺. 𑀢𑀢𑁆𑀣 𑀅𑀢𑁆𑀣𑁂𑀲𑀼 𑀦𑀫𑀢𑀻𑀢𑀺 𑀦𑀸𑀫𑀁. 𑀢𑀁 𑀅𑀦𑁆𑀯𑀢𑁆𑀣𑀭𑀼𑀴𑁆𑀳𑀻𑀯𑀲𑁂𑀦 𑀤𑀼𑀯𑀺𑀥𑀁, 𑀲𑀸𑀫𑀜𑁆𑀜𑀕𑀼𑀡𑀓𑀺𑀭𑀺𑀬𑀸𑀬𑀤𑀺𑀘𑁆𑀙𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀦𑀸𑀫𑀫𑁂𑀯 𑀦𑀸𑀫𑀓𑀫𑁆𑀫𑀁. 𑀢𑀣𑀸 𑀦𑀸𑀫𑀥𑁂𑀬𑁆𑀬𑀁. 𑀅𑀓𑁆𑀔𑀭𑀤𑁆𑀯𑀸𑀭𑁂𑀦 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀉𑀢𑁆𑀢𑀺 𑀓𑀣𑀦𑀁 𑀦𑀺𑀭𑀼𑀢𑁆𑀢𑀺, 𑀅𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁. 𑀅𑀪𑀺𑀮𑀧𑀢𑀻𑀢𑀺 𑀅𑀪𑀺𑀮𑀸𑀧𑁄, 𑀲𑀤𑁆𑀤𑀕𑀢𑀅𑀓𑁆𑀔𑀭𑀲𑀦𑁆𑀦𑀺𑀯𑁂𑀲𑀓𑁆𑀓𑀫𑁄. 𑀲𑀸 𑀧𑀦𑀸𑀬𑀁 𑀦𑀸𑀫𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑀅𑀯𑀺𑀚𑁆𑀚𑀫𑀸𑀦𑀢𑀤𑀼𑀪𑀬𑀲𑀁𑀬𑁄𑀕𑀯𑀲𑁂𑀦 𑀙𑀩𑁆𑀩𑀺𑀥𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁, 𑀏𑀢𑀸𑀬 𑀧𑀜𑁆𑀜𑀸𑀧𑁂𑀦𑁆𑀢𑀻𑀢𑀺 ‘‘𑀭𑀽𑀧𑀯𑁂𑀤𑀦𑀸’’𑀢𑁆𑀬𑀸𑀤𑀺𑀦𑀸 𑀧𑀓𑀸𑀲𑁂𑀦𑁆𑀢𑀺.

𑁪𑁨. 𑀉𑀪𑀺𑀦𑁆𑀦𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀸𑀦𑀁 𑀤𑁆𑀯𑀺𑀦𑁆𑀦𑀁. 𑀧𑀜𑁆𑀘𑀸𑀪𑀺𑀜𑁆𑀜𑀸, 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀙 𑀅𑀪𑀺𑀜𑁆𑀜𑀸 𑀅𑀲𑁆𑀲𑀸𑀢𑀺 𑀙𑀴𑀪𑀺𑀜𑁆𑀜𑁄. 𑀏𑀢𑁆𑀣 𑀘 𑀅𑀪𑀺𑀜𑁆𑀜𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀢𑀧𑁆𑀧𑀝𑀺𑀮𑀸𑀪𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀘 𑀅𑀬𑀁 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀣𑀸 𑀇𑀢𑁆𑀣𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀲𑀤𑁆𑀤𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀇𑀢𑁆𑀣𑀺𑀲𑀤𑁆𑀤𑁄𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀧𑀲𑀸𑀤𑀘𑀓𑁆𑀔𑀼𑀦𑁄, 𑀢𑀦𑁆𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀭𑀜𑁆𑀜𑁄 𑀘 𑀧𑀼𑀢𑁆𑀢𑀲𑁆𑀲 𑀘 𑀲𑀫𑁆𑀫𑀼𑀢𑀺𑀲𑀘𑁆𑀘𑀪𑀽𑀢𑀢𑁆𑀢𑀸 𑀭𑀸𑀚𑀧𑀼𑀢𑁆𑀢𑁄𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺.

𑁪𑁩. 𑀯𑀘𑀻𑀖𑁄𑀲𑀸𑀦𑀼𑀲𑀸𑀭𑁂𑀦𑀸𑀢𑀺 𑀪𑀽𑀫𑀺𑀧𑀩𑁆𑀩𑀢𑀭𑀽𑀧𑀯𑁂𑀤𑀦𑀸𑀤𑀺𑀯𑀘𑀻𑀫𑀬𑀲𑀤𑁆𑀤𑀲𑁆𑀲 𑀅𑀦𑀼𑀲𑀸𑀭𑁂𑀦 𑀅𑀦𑀼𑀕𑀫𑀦𑁂𑀦 𑀅𑀦𑀼𑀲𑁆𑀲𑀭𑀡𑁂𑀦 𑀆𑀭𑀫𑁆𑀫𑀡𑀓𑀭𑀡𑁂𑀦 𑀧𑀯𑀢𑁆𑀢𑀸𑀬 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀯𑀢𑁆𑀢𑀺𑀢𑁄 𑀅𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑀲𑁆𑀲 𑀦𑀸𑀫𑀘𑀺𑀦𑁆𑀢𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀲𑁆𑀲 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑀲𑁆𑀲 ‘‘𑀇𑀤𑀫𑀻𑀤𑀺𑀲𑀲𑁆𑀲 𑀅𑀢𑁆𑀣𑀲𑁆𑀲 𑀦𑀸𑀫’’𑀦𑁆𑀢𑀺 𑀧𑀼𑀩𑁆𑀩𑁂𑀬𑁂𑀯 𑀕𑀳𑀺𑀢𑀲𑀗𑁆𑀓𑁂𑀢𑁄𑀧𑀦𑀺𑀲𑁆𑀲𑀬𑀲𑁆𑀲 𑀕𑁄𑀘𑀭𑀸 𑀆𑀭𑀫𑁆𑀫𑀡𑀪𑀽𑀢𑀸 𑀢𑀢𑁄 𑀦𑀸𑀫𑀕𑁆𑀕𑀳𑀡𑀢𑁄 𑀧𑀭𑀁 𑀬𑀲𑁆𑀲𑀸 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀯𑀺𑀲𑀬𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀲𑀸𑀭𑁂𑀦 𑀅𑀦𑀼𑀕𑀫𑀦𑁂𑀦 𑀅𑀢𑁆𑀣𑀸 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀪𑁂𑀤𑀸 𑀯𑀺𑀜𑁆𑀜𑀸𑀬𑀦𑁆𑀢𑀺, 𑀲𑀸𑀬𑀁 𑀪𑀽𑀫𑀺𑀧𑀩𑁆𑀩𑀢𑀭𑀽𑀧𑀯𑁂𑀤𑀦𑀸𑀤𑀺𑀓𑀸 𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑁆𑀣𑀧𑀜𑁆𑀜𑀸𑀧𑀺𑀓𑀸 𑀮𑁄𑀓𑀲𑀗𑁆𑀓𑁂𑀢𑁂𑀦 𑀦𑀺𑀫𑁆𑀫𑀺𑀢𑀸 𑀮𑁄𑀓𑀯𑁄𑀳𑀸𑀭𑁂𑀦 𑀲𑀺𑀤𑁆𑀥𑀸, 𑀫𑀦𑁄𑀤𑁆𑀯𑀸𑀭𑀕𑁆𑀕𑀳𑀺𑀢𑀸 𑀅𑀓𑁆𑀔𑀭𑀸𑀯𑀮𑀺𑀪𑀽𑀢𑀸 𑀧𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀸 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑀸.

𑀏𑀢𑁆𑀣 𑀘 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀪𑀸𑀯𑀺𑀦𑀺𑀁 𑀫𑀦𑁄𑀤𑁆𑀯𑀸𑀭𑀺𑀓𑀯𑀻𑀣𑀺𑀫𑁆𑀧𑀺 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀖𑀝𑀸𑀤𑀺𑀲𑀤𑁆𑀤𑀜𑁆𑀳𑀺 𑀲𑀼𑀡𑀦𑁆𑀢𑀲𑁆𑀲 𑀏𑀓𑀫𑁂𑀓𑀁 𑀲𑀤𑁆𑀤𑀁 𑀆𑀭𑀩𑁆𑀪 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀚𑀯𑀦𑀯𑀸𑀭𑀸, 𑀩𑀼𑀤𑁆𑀥𑀺𑀬𑀸 𑀕𑀳𑀺𑀢𑀦𑀸𑀫𑀧𑀡𑁆𑀡𑀢𑁆𑀢𑀺𑀪𑀽𑀢𑀁 𑀅𑀓𑁆𑀔𑀭𑀸𑀯𑀮𑀺𑀫𑀸𑀭𑀩𑁆𑀪 𑀏𑀓𑁄𑀢𑀺 𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀸𑀬 𑀅𑀢𑀻𑀢𑀲𑀤𑁆𑀤𑀸𑀭𑀫𑁆𑀫𑀡𑀸𑀬 𑀚𑀯𑀦𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀕𑀳𑀡𑀁, 𑀢𑀢𑁄 𑀧𑀭𑀁 𑀅𑀢𑁆𑀣𑀸𑀯𑀩𑁄𑀥𑁄𑀢𑀺 𑀆𑀘𑀭𑀺𑀬𑀸.

𑀧𑀜𑁆𑀜𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.