𑁭. 𑀲𑀫𑀼𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧. 𑀲𑀮𑀓𑁆𑀔𑀡𑀸 𑀘𑀺𑀦𑁆𑀢𑀦𑀸𑀤𑀺𑀲𑀮𑀓𑁆𑀔𑀡𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀧𑁆𑀨𑀦𑁆𑀦𑀭𑀽𑀧𑀦𑀺𑀩𑁆𑀩𑀸𑀦𑀯𑀲𑁂𑀦 𑀤𑁆𑀯𑀸𑀲𑀢𑁆𑀢𑀢𑀺𑀧𑀪𑁂𑀤𑀸 𑀯𑀢𑁆𑀣𑀼𑀥𑀫𑁆𑀫𑀸 𑀲𑀪𑀸𑀯𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀇𑀤𑀸𑀦𑀺 𑀢𑁂𑀲𑀁 𑀬𑀣𑀸𑀬𑁄𑀕𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀏𑀓𑁂𑀓𑀲𑀫𑀼𑀘𑁆𑀘𑀬𑀯𑀲𑁂𑀦 𑀬𑁄𑀕𑀸𑀦𑀼𑀭𑀽𑀧𑀢𑁄 𑀅𑀓𑀼𑀲𑀮𑀲𑀗𑁆𑀕𑀳𑀸𑀤𑀺𑀪𑁂𑀤𑀁 𑀲𑀫𑀼𑀘𑁆𑀘𑀬𑀁 𑀭𑀸𑀲𑀺𑀁 𑀧𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸.

𑁨. 𑀅𑀓𑀼𑀲𑀮𑀸𑀦𑀫𑁂𑀯 𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀲𑀗𑁆𑀕𑀳𑁄 𑀅𑀓𑀼𑀲𑀮𑀲𑀗𑁆𑀕𑀳𑁄. 𑀓𑀼𑀲𑀮𑀸𑀤𑀺𑀯𑀲𑁂𑀦 𑀫𑀺𑀲𑁆𑀲𑀓𑀸𑀦𑀁 𑀲𑀗𑁆𑀕𑀳𑁄 𑀫𑀺𑀲𑁆𑀲𑀓𑀲𑀗𑁆𑀕𑀳𑁄, 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀓𑁆𑀔𑁂 𑀪𑀯𑀸𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀸𑀦𑀁 𑀲𑀪𑀸𑀕𑀯𑀢𑁆𑀣𑀼𑀯𑀲𑁂𑀦 𑀲𑀗𑁆𑀕𑀳𑁄 𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑁄. 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑁄 𑀲𑀩𑁆𑀩𑀲𑀗𑁆𑀕𑀳𑁄.

𑀅𑀓𑀼𑀲𑀮𑀲𑀗𑁆𑀕𑀳𑀯𑀡𑁆𑀡𑀦𑀸

𑁩. 𑀧𑀼𑀩𑁆𑀩𑀓𑁄𑀝𑀺𑀬𑀸 𑀅𑀧𑀜𑁆𑀜𑀸𑀬𑀦𑀢𑁄 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦, 𑀯𑀡𑀢𑁄 𑀯𑀸 𑀯𑀺𑀲𑁆𑀲𑀦𑁆𑀤𑀫𑀸𑀦𑀬𑀽𑀲𑀸 𑀯𑀺𑀬 𑀘𑀓𑁆𑀔𑀸𑀤𑀺𑀢𑁄 𑀯𑀺𑀲𑀬𑁂𑀲𑀼 𑀯𑀺𑀲𑁆𑀲𑀦𑁆𑀤𑀦𑀢𑁄 𑀆𑀲𑀯𑀸. 𑀅𑀣 𑀯𑀸 𑀪𑀯𑀢𑁄 𑀆𑀪𑀯𑀕𑁆𑀕𑀁 𑀥𑀫𑁆𑀫𑀢𑁄 𑀆𑀕𑁄𑀢𑁆𑀭𑀪𑀼𑀁 𑀲𑀯𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀲𑀯𑀸. 𑀅𑀯𑀥𑀺𑀅𑀢𑁆𑀣𑁄 𑀘𑁂𑀢𑁆𑀣 𑀆-𑀓𑀸𑀭𑁄, 𑀅𑀯𑀥𑀺 𑀘 𑀫𑀭𑀺𑀬𑀸𑀤𑀸𑀪𑀺𑀯𑀺𑀥𑀺𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 ‘‘𑀆𑀧𑀸𑀝𑀮𑀺𑀧𑀼𑀢𑁆𑀢𑀁 𑀯𑀼𑀝𑁆𑀞𑁄 𑀤𑁂𑀯𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀓𑀺𑀭𑀺𑀬𑀁 𑀩𑀳𑀺 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀫𑀭𑀺𑀬𑀸𑀤𑁄. ‘‘𑀆𑀪𑀯𑀕𑁆𑀕𑀁 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀓𑀺𑀭𑀺𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑁄 𑀅𑀪𑀺𑀯𑀺𑀥𑀺. 𑀇𑀥 𑀧𑀦 𑀅𑀪𑀺𑀯𑀺𑀥𑀺𑀫𑁆𑀳𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑁂𑀢𑁂 𑀦𑀺𑀩𑁆𑀩𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂 𑀘 𑀪𑀯𑀕𑁆𑀕𑁂, 𑀕𑁄𑀢𑁆𑀭𑀪𑀼𑀫𑁆𑀳𑀺 𑀘 𑀆𑀭𑀫𑁆𑀫𑀡𑀪𑀽𑀢𑁂 𑀧𑀯𑀢𑁆𑀢𑀦𑁆𑀢𑀺. 𑀯𑀺𑀚𑁆𑀚𑀫𑀸𑀦𑁂𑀲𑀼 𑀘 𑀅𑀜𑁆𑀜𑁂𑀲𑀼 𑀆𑀪𑀯𑀕𑁆𑀕𑀁, 𑀆𑀕𑁄𑀢𑁆𑀭𑀪𑀼𑀜𑁆𑀘 𑀲𑀯𑀦𑁆𑀢𑁂𑀲𑀼 𑀫𑀸𑀦𑀸𑀤𑀻𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀳𑀡𑀯𑀲𑁂𑀦 𑀅𑀪𑀺𑀩𑁆𑀬𑀸𑀧𑀦𑀢𑁄 𑀫𑀤𑀓𑀭𑀡𑀝𑁆𑀞𑁂𑀦 𑀆𑀲𑀯𑀲𑀤𑀺𑀲𑀢𑀸𑀬 𑀘 𑀏𑀢𑁂𑀬𑁂𑀯 𑀆𑀲𑀯𑀪𑀸𑀯𑁂𑀦 𑀦𑀺𑀭𑀼𑀴𑁆𑀳𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑁄𑀬𑁂𑀯 𑀆𑀲𑀯𑁄 𑀓𑀸𑀫𑀸𑀲𑀯𑁄, 𑀓𑀸𑀫𑀭𑀸𑀕𑁄. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀪𑀯𑀸𑀲𑀯𑁄. 𑀛𑀸𑀦𑀦𑀺𑀓𑀦𑁆𑀢𑀺𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀘 𑀭𑀸𑀕𑁄 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀢𑀢𑁆𑀣 𑀧𑀞𑀫𑁄 𑀉𑀧𑀧𑀢𑁆𑀢𑀺𑀪𑀯𑁂𑀲𑀼 𑀭𑀸𑀕𑁄, 𑀤𑀼𑀢𑀺𑀬𑁄 𑀓𑀫𑁆𑀫𑀪𑀯𑁂, 𑀢𑀢𑀺𑀬𑁄 𑀪𑀯𑀤𑀺𑀝𑁆𑀞𑀺𑀲𑀳𑀕𑀢𑁄. 𑀤𑁆𑀯𑀸𑀲𑀝𑁆𑀞𑀺𑀯𑀺𑀥𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀸𑀲𑀯𑁄. 𑀤𑀼𑀓𑁆𑀔𑀸𑀤𑀻𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼, 𑀧𑀼𑀩𑁆𑀩𑀦𑁆𑀢𑁂, 𑀅𑀧𑀭𑀦𑁆𑀢𑁂, 𑀧𑀼𑀩𑁆𑀩𑀸𑀧𑀭𑀦𑁆𑀢𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀘𑀸𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀲𑀯𑁄.

𑁪. 𑀑𑀢𑁆𑀣𑀭𑀺𑀢𑁆𑀯𑀸 𑀳𑀭𑀡𑀢𑁄, 𑀑𑀳𑀦𑀦𑀢𑁄 𑀯𑀸 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀳𑀦𑀦𑀢𑁄 𑀑𑀲𑀻𑀤𑀸𑀧𑀦𑀢𑁄 ‘‘𑀑𑀖𑁄’’𑀢𑀺 𑀯𑀼𑀘𑁆𑀘𑀢𑀺 𑀚𑀮𑀧𑁆𑀧𑀯𑀸𑀳𑁄, 𑀏𑀢𑁂 𑀘 𑀲𑀢𑁆𑀢𑁂 𑀑𑀢𑁆𑀣𑀭𑀺𑀢𑁆𑀯𑀸 𑀳𑀦𑀦𑁆𑀢𑀸 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑁂 𑀑𑀲𑀻𑀤𑀸𑀧𑁂𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀑𑀖𑀲𑀤𑀺𑀲𑀢𑀸𑀬 𑀑𑀖𑀸, 𑀆𑀲𑀯𑀸𑀬𑁂𑀯 𑀧𑀦𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀝𑁆𑀞𑁂𑀦 ‘‘𑀑𑀖𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺.

𑁫. 𑀯𑀝𑁆𑀝𑀲𑁆𑀫𑀺𑀁, 𑀪𑀯𑀬𑀦𑁆𑀢𑀓𑁂 𑀯𑀸 𑀲𑀢𑁆𑀢𑁂 𑀓𑀫𑁆𑀫𑀯𑀺𑀧𑀸𑀓𑁂𑀦 𑀪𑀯𑀦𑁆𑀢𑀭𑀸𑀤𑀻𑀳𑀺, 𑀤𑀼𑀓𑁆𑀔𑁂𑀦 𑀯𑀸 𑀲𑀢𑁆𑀢𑁂 𑀬𑁄𑀚𑁂𑀦𑁆𑀢𑀻𑀢𑀺 𑀬𑁄𑀕𑀸, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀥𑀫𑁆𑀫𑀸𑀯.

𑁬. 𑀦𑀸𑀫𑀓𑀸𑀬𑁂𑀦 𑀭𑀽𑀧𑀓𑀸𑀬𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀬𑁂𑀦 𑀯𑀸 𑀅𑀦𑀸𑀕𑀢𑀓𑀸𑀬𑀁 𑀕𑀦𑁆𑀣𑁂𑀦𑁆𑀢𑀺 𑀤𑀼𑀧𑁆𑀧𑀫𑀼𑀜𑁆𑀘𑀁 𑀯𑁂𑀞𑁂𑀦𑁆𑀢𑀻𑀢𑀺 𑀓𑀸𑀬𑀕𑀦𑁆𑀣𑀸. 𑀕𑁄𑀲𑀻𑀮𑀸𑀤𑀺𑀦𑀸 𑀲𑀻𑀮𑁂𑀦, 𑀯𑀢𑁂𑀦, 𑀢𑀤𑀼𑀪𑀬𑁂𑀦 𑀘 𑀲𑀼𑀤𑁆𑀥𑀻𑀢𑀺 𑀏𑀯𑀁 𑀧𑀭𑀢𑁄 𑀅𑀲𑀪𑀸𑀯𑀢𑁄 𑀆𑀫𑀲𑀦𑀁 𑀧𑀭𑀸𑀫𑀸𑀲𑁄. ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑀁 𑀤𑀴𑁆𑀳𑀕𑁆𑀕𑀸𑀳𑁄 𑀇𑀤𑀁 𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄.

𑁭. 𑀫𑀡𑁆𑀟𑀽𑀓𑀁 𑀧𑀦𑁆𑀦𑀕𑁄 𑀯𑀺𑀬 𑀪𑀼𑀲𑀁 𑀤𑀴𑁆𑀳𑀁 𑀆𑀭𑀫𑁆𑀫𑀡𑀁 𑀆𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸𑀦𑀺. 𑀓𑀸𑀫𑁄𑀬𑁂𑀯 𑀉𑀧𑀸𑀤𑀸𑀦𑀁, 𑀓𑀸𑀫𑁂 𑀉𑀧𑀸𑀤𑀺𑀬𑀢𑀻𑀢𑀺 𑀯𑀸 𑀓𑀸𑀫𑀼𑀧𑀸𑀤𑀸𑀦𑀁. ‘‘𑀇𑀫𑀺𑀦𑀸 𑀫𑁂 𑀲𑀻𑀮𑀯𑀢𑀸𑀤𑀺𑀦𑀸 𑀲𑀁𑀲𑀸𑀭𑀲𑀼𑀤𑁆𑀥𑀻’’𑀢𑀺 𑀏𑀯𑀁 𑀲𑀻𑀮𑀯𑀢𑀸𑀤𑀻𑀦𑀁 𑀕𑀳𑀡𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀔𑀦𑁆𑀥𑁂𑀳𑀺 𑀩𑁆𑀬𑀢𑀺𑀭𑀺𑀢𑁆𑀢𑀸𑀩𑁆𑀬𑀢𑀺𑀭𑀺𑀢𑁆𑀢𑀯𑀲𑁂𑀦 𑀯𑀻𑀲𑀢𑀺 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀯𑀸𑀤𑁄 𑀅𑀢𑁆𑀢𑀯𑀸𑀤𑁄. 𑀲𑁄𑀬𑁂𑀯 𑀉𑀧𑀸𑀤𑀸𑀦𑀦𑁆𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁.

𑁮. 𑀛𑀸𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀓𑀼𑀲𑀮𑀘𑀺𑀢𑁆𑀢𑀁 𑀦𑀺𑀲𑁂𑀥𑁂𑀦𑁆𑀢𑀺 𑀢𑀣𑀸 𑀢𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀻𑀢𑀺 𑀦𑀻𑀯𑀭𑀡𑀸𑀦𑀺, 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀯𑀸 𑀆𑀯𑀭𑀡𑀝𑁆𑀞𑁂𑀦 𑀦𑀻𑀯𑀭𑀡𑀸. 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀥𑀺𑀫𑀢𑁆𑀢𑀭𑀸𑀕𑀲𑀗𑁆𑀔𑀸𑀢𑁄 𑀓𑀸𑀫𑁄𑀬𑁂𑀯 𑀙𑀦𑁆𑀤𑀦𑀝𑁆𑀞𑁂𑀦 𑀙𑀦𑁆𑀤𑁄 𑀘𑀸𑀢𑀺 𑀓𑀸𑀫𑀘𑁆𑀙𑀦𑁆𑀤𑁄. 𑀲𑁄𑀬𑁂𑀯 𑀦𑀻𑀯𑀭𑀡𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀩𑁆𑀬𑀸𑀧𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀏𑀢𑁂𑀦 𑀘𑀺𑀢𑁆𑀢𑀦𑁆𑀢𑀺 𑀩𑁆𑀬𑀸𑀧𑀸𑀤𑁄, ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑁆𑀬𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀦𑀯𑀯𑀺𑀥𑀆𑀖𑀸𑀢𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀢𑀸𑀬 𑀦𑀯𑀯𑀺𑀥𑁄, 𑀅𑀝𑁆𑀞𑀸𑀦𑀓𑁄𑀧𑁂𑀦 𑀲𑀳 𑀤𑀲𑀯𑀺𑀥𑁄 𑀯𑀸 𑀤𑁄𑀲𑁄, 𑀲𑁄𑀬𑁂𑀯 𑀦𑀻𑀯𑀭𑀡𑀦𑁆𑀢𑀺 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁. 𑀣𑀺𑀦𑀫𑀺𑀤𑁆𑀥𑀫𑁂𑀯 𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁. 𑀢𑀣𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁. 𑀓𑀲𑁆𑀫𑀸 𑀧𑀦𑁂𑀢𑁂 𑀪𑀺𑀦𑁆𑀦𑀥𑀫𑁆𑀫𑀸 𑀤𑁆𑀯𑁂 𑀤𑁆𑀯𑁂 𑀏𑀓𑀦𑀻𑀯𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺? 𑀓𑀺𑀘𑁆𑀘𑀸𑀳𑀸𑀭𑀧𑀝𑀺𑀧𑀓𑁆𑀔𑀸𑀦𑀁 𑀲𑀫𑀸𑀦𑀪𑀸𑀯𑀢𑁄. 𑀣𑀺𑀦𑀫𑀺𑀤𑁆𑀥𑀸𑀦𑀜𑁆𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀮𑀬𑀸𑀧𑀸𑀤𑀦𑀓𑀺𑀘𑁆𑀘𑀁 𑀲𑀫𑀸𑀦𑀁, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀅𑀯𑀽𑀧𑀲𑀦𑁆𑀢𑀪𑀸𑀯𑀓𑀸𑀭𑀡𑀁. 𑀢𑀣𑀸 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀢𑀦𑁆𑀤𑀻𑀯𑀺𑀚𑀫𑁆𑀪𑀺𑀢𑀸 𑀆𑀳𑀸𑀭𑁄, 𑀳𑁂𑀢𑀽𑀢𑁆𑀬𑀢𑁆𑀣𑁄, 𑀧𑀘𑁆𑀙𑀺𑀫𑀸𑀦𑀁 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀯𑀺𑀢𑀓𑁆𑀓𑀦𑀁. 𑀧𑀼𑀭𑀺𑀫𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀯𑀻𑀭𑀺𑀬𑀁 𑀧𑀝𑀺𑀧𑀓𑁆𑀔𑀪𑀽𑀢𑀁, 𑀧𑀘𑁆𑀙𑀺𑀫𑀸𑀦𑀁 𑀲𑀫𑀣𑁄𑀢𑀺, 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀓𑀺𑀘𑁆𑀘𑀸𑀳𑀸𑀭𑀯𑀺𑀧𑀓𑁆𑀔𑀸𑀦𑀁, 𑀏𑀓𑀢𑁆𑀢𑀸 𑀏𑀓𑀫𑁂𑀢𑁆𑀣 𑀳𑀺;

𑀓𑀢𑀫𑀼𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀣𑀺𑀦𑀫𑀺𑀤𑁆𑀥𑀜𑁆𑀘 𑀢𑀸𑀤𑀺𑀦𑀸.

‘‘𑀮𑀻𑀦𑀢𑀸𑀲𑀦𑁆𑀢𑀢𑀸 𑀓𑀺𑀘𑁆𑀘𑀁, 𑀢𑀦𑁆𑀤𑀻 𑀜𑀸𑀢𑀺𑀯𑀺𑀢𑀓𑁆𑀓𑀦𑀁;

𑀳𑁂𑀢𑀼 𑀯𑀻𑀭𑀺𑀬𑀲𑀫𑀣𑀸, 𑀇𑀫𑁂 𑀢𑁂𑀲𑀁 𑀯𑀺𑀭𑁄𑀥𑀺𑀦𑁄’’𑀢𑀺.

𑁯. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼 𑀅𑀦𑀼 𑀲𑀦𑁆𑀢𑀸𑀦𑁂 𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑁆𑀬𑀢𑁆𑀣𑁄. 𑀅𑀧𑁆𑀧𑀳𑀻𑀦𑀸 𑀳𑀺 𑀓𑀺𑀮𑁂𑀲𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑀚𑁆𑀚𑀦𑀸𑀭𑀳𑀸 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑀬𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀢𑀤𑀯𑀢𑁆𑀣𑀸 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀦𑀸𑀕𑀢𑀸 𑀓𑀺𑀮𑁂𑀲𑀸, 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀢𑀁𑀲𑀪𑀸𑀯𑀢𑁆𑀢𑀸 𑀢𑀣𑀸 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀓𑀸𑀮𑀪𑁂𑀤𑁂𑀦 𑀥𑀫𑁆𑀫𑀸𑀦𑀁 𑀲𑀪𑀸𑀯𑀪𑁂𑀤𑁄 𑀅𑀢𑁆𑀣𑀺, 𑀬𑀤𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑀸, 𑀦𑀦𑀼 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀅𑀧𑁆𑀧𑀳𑀻𑀦𑀸 𑀅𑀦𑀼𑀲𑀬𑀸 𑀪𑀯𑁂𑀬𑁆𑀬𑀼𑀦𑁆𑀢𑀺? 𑀦 𑀫𑀬𑀁 𑀅𑀧𑁆𑀧𑀳𑀻𑀦𑀢𑀸𑀫𑀢𑁆𑀢𑁂𑀦 ‘‘𑀅𑀦𑀼𑀲𑀬𑀸’’𑀢𑀺 𑀯𑀤𑀸𑀫, 𑀅𑀣 𑀔𑁄 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀸 𑀓𑀺𑀮𑁂𑀲𑀸 𑀅𑀦𑀼𑀲𑀬𑀸𑀢𑀺. 𑀣𑀸𑀫𑀕𑀫𑀦𑀜𑁆𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀓𑀸𑀫𑀭𑀸𑀕𑀸𑀤𑀻𑀦𑀫𑁂𑀯 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄𑀢𑀺 𑀅𑀮𑀁 𑀯𑀺𑀯𑀸𑀤𑁂𑀦. 𑀓𑀸𑀫𑀭𑀸𑀕𑁄𑀬𑁂𑀯 𑀅𑀦𑀼𑀲𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄.

𑁧𑁦. 𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺.

𑁧𑁨. 𑀘𑀺𑀢𑁆𑀢𑀁 𑀓𑀺𑀮𑀺𑀲𑁆𑀲𑀢𑀺 𑀉𑀧𑀢𑀧𑁆𑀧𑀢𑀺, 𑀩𑀸𑀥𑀻𑀬𑀢𑀺 𑀯𑀸 𑀏𑀢𑁂𑀳𑀻𑀢𑀺 𑀓𑀺𑀮𑁂𑀲𑀸.

𑁧𑁩. 𑀓𑀸𑀫𑀪𑀯𑀦𑀸𑀫𑁂𑀦𑀸𑀢𑀺 𑀓𑀸𑀫𑀪𑀯𑀲𑀗𑁆𑀔𑀸𑀢𑀸𑀦𑀁 𑀆𑀭𑀫𑁆𑀫𑀡𑀸𑀦𑀁 𑀦𑀸𑀫𑁂𑀦. 𑀢𑀣𑀸𑀧𑀯𑀢𑁆𑀢𑀦𑁆𑀢𑀺 𑀲𑀻𑀮𑀩𑁆𑀩𑀢𑀸𑀤𑀻𑀦𑀁 𑀧𑀭𑀢𑁄 𑀆𑀫𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁.

𑁧𑁪. 𑀆𑀲𑀯𑀸 𑀘 𑀑𑀖𑀸 𑀘 𑀬𑁄𑀕𑀸 𑀘 𑀕𑀦𑁆𑀣𑀸 𑀘 𑀯𑀢𑁆𑀣𑀼𑀢𑁄 𑀥𑀫𑁆𑀫𑀢𑁄 𑀯𑀼𑀢𑁆𑀢𑀦𑀬𑁂𑀦 𑀢𑀬𑁄. 𑀢𑀣𑀸 𑀉𑀧𑀸𑀤𑀸𑀦𑀸 𑀤𑀼𑀯𑁂 𑀯𑀼𑀢𑁆𑀢𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦. 𑀦𑀻𑀯𑀭𑀡𑀸 𑀅𑀝𑁆𑀞 𑀲𑀺𑀬𑀼𑀁 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀯𑀺𑀲𑀼𑀁 𑀕𑀳𑀡𑀢𑁄. 𑀅𑀦𑀼𑀲𑀬𑀸 𑀙𑀴𑁂𑀯 𑀳𑁄𑀦𑁆𑀢𑀺 𑀓𑀸𑀫𑀭𑀸𑀕𑀪𑀯𑀭𑀸𑀕𑀸𑀦𑀼𑀲𑀬𑀸𑀦𑀁 𑀢𑀡𑁆𑀳𑀸𑀲𑀪𑀸𑀯𑁂𑀦 𑀏𑀓𑀢𑁄 𑀕𑀳𑀺𑀢𑀢𑁆𑀢𑀸. 𑀦𑀯 𑀲𑀁𑀬𑁄𑀚𑀦𑀸 𑀫𑀢𑀸 𑀉𑀪𑀬𑀢𑁆𑀣 𑀯𑀼𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀪𑀸𑀯𑀸𑀦𑀁, 𑀤𑀺𑀝𑁆𑀞𑀺𑀲𑀪𑀸𑀯𑀸𑀦𑀜𑁆𑀘 𑀏𑀓𑁂𑀓𑀁 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀓𑀺𑀮𑁂𑀲𑀸 𑀧𑀦 𑀲𑀼𑀢𑁆𑀢𑀦𑁆𑀢𑀯𑀲𑁂𑀦, 𑀅𑀪𑀺𑀥𑀫𑁆𑀫𑀯𑀲𑁂𑀦𑀧𑀺 𑀤𑀲. 𑀇𑀢𑀺 𑀏𑀯𑀁 𑀧𑀸𑀧𑀸𑀦𑀁 𑀅𑀓𑀼𑀲𑀮𑀸𑀦𑀁 𑀲𑀗𑁆𑀕𑀳𑁄 𑀦𑀯𑀥𑀸 𑀯𑀼𑀢𑁆𑀢𑁄. 𑀏𑀢𑁆𑀣 𑀘 𑁋

𑀦𑀯𑀸𑀝𑁆𑀞𑀲𑀗𑁆𑀕𑀳𑀸 𑀮𑁄𑀪-𑀤𑀺𑀝𑁆𑀞𑀺𑀬𑁄 𑀲𑀢𑁆𑀢𑀲𑀗𑁆𑀕𑀳𑀸;

𑀅𑀯𑀺𑀚𑁆𑀚𑀸 𑀧𑀝𑀺𑀖𑁄 𑀧𑀜𑁆𑀘-𑀲𑀗𑁆𑀕𑀳𑁄 𑀘𑀢𑀼𑀲𑀗𑁆𑀕𑀳𑀸;

𑀓𑀗𑁆𑀔𑀸 𑀢𑀺𑀲𑀗𑁆𑀕𑀳𑀸 𑀫𑀸𑀦𑀼𑀤𑁆𑀥𑀘𑁆𑀘𑀸 𑀣𑀺𑀦𑀁 𑀤𑁆𑀯𑀺𑀲𑀗𑁆𑀕𑀳𑀁.

𑀓𑀼𑀓𑁆𑀓𑀼𑀘𑁆𑀘𑀫𑀺𑀤𑁆𑀥𑀸𑀳𑀺𑀭𑀺𑀓𑀸-𑀦𑁄𑀢𑁆𑀢𑀧𑁆𑀧𑀺𑀲𑁆𑀲𑀸 𑀦𑀺𑀕𑀽𑀳𑀦𑀸;

𑀏𑀓𑀲𑀗𑁆𑀕𑀳𑀺𑀢𑀸 𑀧𑀸𑀧𑀸, 𑀇𑀘𑁆𑀘𑁂𑀯𑀁 𑀦𑀯𑀲𑀗𑁆𑀕𑀳𑀸.

𑀅𑀓𑀼𑀲𑀮𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀺𑀲𑁆𑀲𑀓𑀲𑀗𑁆𑀕𑀳𑀯𑀡𑁆𑀡𑀦𑀸

𑁧𑁫. 𑀳𑁂𑀢𑀽𑀲𑀼 𑀯𑀢𑁆𑀢𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁧𑁬. 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑀦𑀲𑀗𑁆𑀔𑀸𑀢𑁂𑀦 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀬𑀣𑀸𑀭𑀳𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀛𑀸𑀧𑀦𑀝𑁆𑀞𑁂𑀦 𑀘 𑀛𑀸𑀦𑀸𑀦𑀺 𑀘 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀘 𑀲𑀫𑀼𑀤𑀺𑀢𑀸𑀦𑀁 𑀅𑀯𑀬𑀯𑀪𑀸𑀯𑁂𑀦 𑀅𑀗𑁆𑀕𑀻𑀬𑀦𑁆𑀢𑀺 𑀜𑀸𑀬𑀦𑁆𑀢𑀻𑀢𑀺 𑀛𑀸𑀦𑀗𑁆𑀕𑀸𑀦𑀺. 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑁂𑀧𑀺 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀗𑁆𑀕𑀪𑀸𑀯𑁂𑀦 𑀯𑀼𑀘𑁆𑀘𑀦𑁆𑀢𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀛𑀸𑀦𑀪𑀸𑀯𑁂𑀦. 𑀤𑁄𑀫𑀦𑀲𑁆𑀲𑀜𑁆𑀘𑁂𑀢𑁆𑀣 𑀅𑀓𑀼𑀲𑀮𑀛𑀸𑀦𑀗𑁆𑀕𑀁, 𑀲𑁂𑀲𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀛𑀸𑀦𑀗𑁆𑀕𑀸𑀦𑀺.

𑁧𑁭. 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀦𑀁, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀅𑀪𑀺𑀫𑀼𑀔𑀁 𑀧𑀸𑀧𑀦𑀢𑁄 𑀫𑀕𑁆𑀕𑀸, 𑀢𑁂𑀲𑀁 𑀧𑀣𑀪𑀽𑀢𑀸𑀦𑀺 𑀅𑀗𑁆𑀕𑀸𑀦𑀺, 𑀫𑀕𑁆𑀕𑀲𑁆𑀲 𑀯𑀸 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀅𑀗𑁆𑀕𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺. 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀢𑁄 𑀧𑀲𑁆𑀲𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀸 𑀧𑀦 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑁆𑀬𑀸𑀤𑀺𑀯𑀲𑁂𑀦 𑀤𑀲𑀯𑀺𑀥𑀸, 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸 𑀯𑀸. 𑀲𑀫𑁆𑀫𑀸 𑀲𑀗𑁆𑀓𑀧𑁆𑀧𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑁄 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑀯𑀲𑁂𑀦 𑀢𑀺𑀯𑀺𑀥𑁄. 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑀸𑀯. 𑀲𑀫𑁆𑀫𑀸 𑀯𑀸𑀬𑀫𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀸 𑀲𑀭𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀫𑁆𑀫𑀸𑀲𑀢𑀺. 𑀇𑀫𑁂𑀲𑀁 𑀧𑀦 𑀪𑁂𑀤𑀁 𑀉𑀧𑀭𑀺 𑀯𑀓𑁆𑀔𑀢𑀺. 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀆𑀥𑀻𑀬𑀢𑀺 𑀏𑀢𑁂𑀦 𑀘𑀺𑀢𑁆𑀢𑀦𑁆𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀏𑀓𑀕𑁆𑀕𑀢𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀤𑀼𑀕𑁆𑀕𑀢𑀺𑀫𑀕𑁆𑀕𑀢𑁆𑀢𑀸 𑀫𑀕𑁆𑀕𑀗𑁆𑀕𑀸𑀦𑀺.

𑁧𑁮. 𑀤𑀲𑁆𑀲𑀦𑀸𑀤𑀻𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺, 𑀬𑁂𑀪𑀼𑀬𑁆𑀬𑁂𑀦 𑀢𑀁𑀲𑀳𑀺𑀢𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀺𑀬𑀁 𑀮𑀺𑀗𑁆𑀕𑀸𑀤𑀻𑀳𑀺, 𑀚𑀻𑀯𑀦𑁂 𑀚𑀻𑀯𑀦𑁆𑀢𑁂𑀳𑀺 𑀓𑀫𑁆𑀫𑀚𑀭𑀽𑀧𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺, 𑀫𑀦𑀦𑁂 𑀚𑀸𑀦𑀦𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺, 𑀲𑀼𑀔𑀺𑀢𑀸𑀤𑀺𑀪𑀸𑀯𑁂 𑀲𑀼𑀔𑀺𑀢𑀸𑀤𑀻𑀳𑀺 𑀲𑀳𑀚𑀸𑀢𑁂𑀳𑀺, 𑀲𑀤𑁆𑀤𑀳𑀦𑀸𑀤𑀻𑀲𑀼 𑀲𑀤𑁆𑀤𑀳𑀦𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀳𑀺 𑀢𑁂𑀳𑁂𑀯, ‘‘𑀅𑀦𑀜𑁆𑀜𑀸𑀢𑀁 𑀜𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀁 𑀢𑀣𑀸𑀧𑀯𑀢𑁆𑀢𑁂𑀳𑀺 𑀲𑀳𑀚𑀸𑀢𑁂𑀳𑀺, 𑀆𑀚𑀸𑀦𑀦𑁂 𑀅𑀜𑁆𑀜𑀪𑀸𑀯𑀺𑀪𑀸𑀯𑁂 𑀘 𑀆𑀚𑀸𑀦𑀦𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀳𑀺 𑀲𑀳𑀚𑀸𑀢𑁂𑀳𑀺 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀸𑀧𑁂𑀦𑁆𑀢𑀸 𑀥𑀫𑁆𑀫𑀸 𑀇𑀲𑁆𑀲𑀭𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫𑀸𑀢𑀺 𑀆𑀳 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬’’𑀦𑁆𑀢𑁆𑀬𑀸𑀤𑀺. 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁧𑁯; 𑀯𑀺𑀲𑀼𑀤𑁆𑀥𑀺. 𑁨.𑁫𑁨𑁫) 𑀧𑀦 𑀅𑀧𑀭𑁂𑀧𑀺 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑀸𑀤𑀬𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑀸 𑀯𑀼𑀢𑁆𑀢𑀸. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀭𑀽𑀧𑀸𑀭𑀽𑀧𑀯𑀲𑁂𑀦 𑀤𑀼𑀯𑀺𑀥𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. ‘‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀜𑁆𑀜𑀸𑀢𑀁 𑀅𑀫𑀢𑀁 𑀧𑀤𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑀫𑁂𑀯 𑀯𑀸 𑀜𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀚𑁆𑀛𑀸𑀲𑀬𑁂𑀦 𑀧𑀝𑀺𑀧𑀦𑁆𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀆𑀚𑀸𑀦𑀸𑀢𑀺 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀸𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀲𑁆𑀲 𑀅𑀭𑀳𑀢𑁄 𑀇𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀥𑀫𑁆𑀫𑀲𑀭𑀽𑀧𑀯𑀺𑀪𑀸𑀯𑀦𑀢𑁆𑀣𑀜𑁆𑀘𑁂𑀢𑁆𑀣 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑀁, 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀓𑀺𑀘𑁆𑀘𑀯𑀺𑀲𑁂𑀲𑀯𑀺𑀪𑀸𑀯𑀦𑀢𑁆𑀣𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀕𑀳𑀡𑀁.

𑀏𑀢𑁆𑀣 𑀘 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀯𑀺𑀲𑁂𑀲𑀦𑀺𑀲𑁆𑀲𑀬𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀆𑀤𑀺𑀢𑁄 𑀯𑀼𑀢𑁆𑀢𑀸𑀦𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀧𑀦 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀢𑁆𑀣𑁂𑀯 𑀯𑀢𑁆𑀢𑀩𑁆𑀩𑀫𑁆𑀧𑀺 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀳 𑀏𑀓𑀢𑁄 𑀤𑀲𑁆𑀲𑀦𑀢𑁆𑀣𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀁, 𑀲𑀸𑀬𑀁 𑀧𑀜𑁆𑀜𑀢𑁆𑀢𑀺 𑀇𑀫𑁂𑀲𑀁 𑀯𑀲𑁂𑀦 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀯𑀺𑀪𑀸𑀕𑀁 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀪𑀸𑀯𑀤𑁆𑀯𑀬𑀁, 𑀢𑀬𑀺𑀫𑁂 𑀉𑀧𑀸𑀤𑀺𑀦𑁆𑀦𑀥𑀫𑁆𑀫𑀸 𑀇𑀫𑀲𑁆𑀲 𑀯𑀲𑁂𑀦 𑀢𑀺𑀝𑁆𑀞𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀧𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀲𑀢𑁆𑀢𑀲𑀜𑁆𑀜𑀺𑀢𑁄 𑀥𑀫𑁆𑀫𑀧𑀼𑀜𑁆𑀚𑁄 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀇𑀫𑀸𑀳𑀺 𑀯𑁂𑀤𑀦𑀸𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀯𑁂𑀤𑀦𑀸𑀧𑀜𑁆𑀘𑀓𑀁, 𑀢𑀸𑀳𑀺 𑀧𑀦 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀯𑁄𑀤𑀸𑀦𑀲𑀫𑁆𑀪𑀸𑀭𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀲𑀤𑁆𑀥𑀸𑀤𑀺𑀧𑀜𑁆𑀘𑀓𑀁, 𑀲𑀫𑁆𑀪𑀽𑀢𑀯𑁄𑀤𑀸𑀦𑀲𑀫𑁆𑀪𑀸𑀭𑀸 𑀘 𑀇𑀫𑁂𑀳𑀺 𑀯𑀺𑀲𑀼𑀚𑁆𑀛𑀦𑁆𑀢𑀻𑀢𑀺 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀸, 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀸 𑀘 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 𑀢𑀻𑀡𑀺 𑀯𑀼𑀢𑁆𑀢𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀜𑁆𑀜𑁂𑀲𑀁 𑀅𑀕𑁆𑀕𑀳𑀡𑀦𑁆𑀢𑀺 𑀇𑀤𑀫𑁂𑀢𑁂𑀲𑀁 𑀅𑀦𑀼𑀓𑁆𑀓𑀫𑁂𑀦 𑀤𑁂𑀲𑀦𑀸𑀬 𑀓𑀸𑀭𑀡𑀦𑁆𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦.

𑁧𑁯. 𑀅𑀲𑀤𑁆𑀥𑀺𑀬𑀓𑁄𑀲𑀚𑁆𑀚𑀧𑀫𑀸𑀤𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀅𑀳𑀺𑀭𑀺𑀓𑀅𑀦𑁄𑀢𑁆𑀢𑀧𑁆𑀧𑀲𑀗𑁆𑀔𑀸𑀢𑁂𑀳𑀺 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦 𑀘 𑀲𑀤𑁆𑀥𑀸𑀤𑀻𑀦𑀺 𑀲𑀢𑁆𑀢 𑀩𑀮𑀸𑀦𑀺, 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀤𑁆𑀯𑀬𑀁 𑀧𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦𑁂𑀯.

𑁨𑁦. 𑀅𑀢𑁆𑀢𑀸𑀥𑀻𑀦𑀧𑁆𑀧𑀯𑀢𑁆𑀢𑀻𑀦𑀁 𑀧𑀢𑀺𑀪𑀽𑀢𑀸 𑀥𑀫𑁆𑀫𑀸 𑀅𑀥𑀺𑀧𑀢𑀻. ‘‘𑀙𑀦𑁆𑀤𑀯𑀢𑁄 𑀓𑀺𑀁𑀦𑀸𑀫 𑀦 𑀲𑀺𑀚𑁆𑀛𑀢𑀻’’𑀢𑁆𑀬𑀸𑀤𑀺𑀓𑀁 𑀳𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀽𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂 𑀘𑀺𑀢𑁆𑀢𑁂 𑀙𑀦𑁆𑀤𑀸𑀤𑀬𑁄 𑀥𑀼𑀭𑀪𑀽𑀢𑀸 𑀲𑀬𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀸𑀥𑀬𑀫𑀸𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀘 𑀢𑁂𑀲𑀁 𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀢𑁂𑀦 𑀢𑁂 𑀅𑀢𑁆𑀢𑀸𑀥𑀻𑀦𑀸𑀦𑀁 𑀧𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀅𑀥𑀺𑀧𑀢𑀺𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑀦𑀺𑀯𑀸𑀭𑀡𑀯𑀲𑁂𑀦 𑀇𑀲𑁆𑀲𑀭𑀺𑀬𑀁 𑀅𑀥𑀺𑀧𑀢𑀺𑀢𑀸. 𑀲𑀦𑁆𑀢𑁂𑀲𑀼𑀧𑀺 𑀇𑀦𑁆𑀤𑁆𑀭𑀺𑀬𑀦𑁆𑀢𑀭𑁂𑀲𑀼 𑀓𑁂𑀯𑀮𑀁 𑀤𑀲𑁆𑀲𑀦𑀸𑀤𑀻𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀸𑀧𑀦𑀫𑀢𑁆𑀢𑀁 𑀇𑀦𑁆𑀤𑁆𑀭𑀺𑀬𑀢𑀸𑀢𑀺 𑀅𑀬𑀁 𑀅𑀥𑀺𑀧𑀢𑀺𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑁂𑀲𑁄.

𑁨𑁧. 𑀑𑀚𑀝𑁆𑀞𑀫𑀓𑀭𑀽𑀧𑀸𑀤𑀬𑁄 𑀆𑀳𑀭𑀦𑁆𑀢𑀻𑀢𑀺 𑀆𑀳𑀸𑀭𑀸. 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀳𑀺 𑀑𑀚𑀝𑁆𑀞𑀫𑀓𑀭𑀽𑀧𑀁 𑀆𑀳𑀭𑀢𑀺, 𑀨𑀲𑁆𑀲𑀸𑀳𑀸𑀭𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀲𑀗𑁆𑀔𑀸𑀢𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀁. 𑀯𑀺𑀜𑁆𑀜𑀸𑀡𑀸𑀳𑀸𑀭𑀲𑀗𑁆𑀔𑀸𑀢𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀲𑀳𑀚𑀸𑀢𑀦𑀸𑀫𑀭𑀽𑀧𑁂𑀆𑀳𑀭𑀢𑀺, 𑀓𑀺𑀜𑁆𑀘𑀸𑀧𑀺 𑀲𑀓𑀲𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂 𑀆𑀳𑀭𑀦𑁆𑀢𑀸 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺. 𑀅𑀚𑁆𑀛𑀢𑁆𑀢𑀺𑀓𑀲𑀦𑁆𑀢𑀢𑀺𑀬𑀸 𑀧𑀦 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀇𑀫𑁂𑀬𑁂𑀯 𑀘𑀢𑁆𑀢𑀸𑀭𑁄 ‘‘𑀆𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀸.

𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀜𑁆𑀳𑀺 𑀲𑀢𑁆𑀢𑀸𑀦𑀁 𑀭𑀽𑀧𑀓𑀸𑀬𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀯𑀺𑀲𑁂𑀲𑀧𑀘𑁆𑀘𑀬𑁄 𑀓𑀫𑁆𑀫𑀸𑀤𑀺𑀚𑀦𑀺𑀢𑀲𑁆𑀲𑀧𑀺 𑀢𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀢𑁆𑀣𑀫𑁆𑀪𑀩𑀮𑁂𑀦𑁂𑀯 𑀤𑀲𑀯𑀲𑁆𑀲𑀸𑀤𑀺𑀧𑁆𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄. 𑀢𑀣𑀸 𑀳𑁂𑀲 ‘‘𑀥𑀸𑀢𑀺 𑀯𑀺𑀬 𑀓𑀼𑀫𑀸𑀭𑀲𑁆𑀲, 𑀉𑀧𑀢𑁆𑀣𑀫𑁆𑀪𑀦𑀓𑀬𑀦𑁆𑀢𑀁 𑀯𑀺𑀬 𑀕𑁂𑀳𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁄. 𑀨𑀲𑁆𑀲𑁄𑀧𑀺 𑀲𑀼𑀔𑀸𑀤𑀺𑀯𑀢𑁆𑀣𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑁄𑀬𑁂𑀯 𑀲𑀼𑀔𑀸𑀤𑀺𑀯𑁂𑀤𑀦𑀸𑀧𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀯𑀲𑁂𑀦 𑀆𑀬𑀽𑀳𑀫𑀸𑀦𑀸𑀬𑁂𑀯 𑀪𑀯𑀫𑀽𑀮𑀦𑀺𑀧𑁆𑀨𑀸𑀤𑀦𑀢𑁄 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑁆𑀢𑀫𑁂𑀯 𑀦𑀸𑀫𑀭𑀽𑀧𑀧𑁆𑀧𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁂𑀬𑁂𑀯 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 ‘‘𑀆𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀸, 𑀨𑀲𑁆𑀲𑀸𑀤𑀻𑀦𑀁 𑀤𑀼𑀢𑀺𑀬𑀸𑀤𑀺𑀪𑀸𑀯𑁄 𑀤𑁂𑀲𑀦𑀸𑀓𑁆𑀓𑀫𑀢𑁄, 𑀦 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀢𑁄.

𑁨𑁬. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀯𑀺𑀢𑀓𑁆𑀓𑀯𑀺𑀭𑀳𑁂𑀦 𑀆𑀭𑀫𑁆𑀫𑀡𑁂𑀲𑀼 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀢𑁆𑀢𑀸 𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀉𑀧𑁂𑀓𑁆𑀔𑀸𑀲𑀼𑀔𑀤𑀼𑀓𑁆𑀔𑀸𑀦𑀺 𑀉𑀧𑀦𑀺𑀚𑁆𑀛𑀸𑀦𑀸𑀓𑀸𑀭𑀲𑁆𑀲 𑀅𑀪𑀸𑀯𑀢𑁄 𑀛𑀸𑀦𑀗𑁆𑀕𑀪𑀸𑀯𑁂𑀦 𑀦 𑀉𑀤𑁆𑀥𑀝𑀸𑀦𑀺. ‘‘𑀯𑀺𑀢𑀓𑁆𑀓𑀧𑀘𑁆𑀙𑀺𑀫𑀓𑀁 𑀳𑀺 𑀛𑀸𑀦𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀲𑀦𑁆𑀢𑀻𑀭𑀡𑀢𑁆𑀢𑀺𑀓𑀯𑀲𑁂𑀦 𑀲𑁄𑀴𑀲𑀘𑀺𑀢𑁆𑀢𑁂𑀲𑀼 𑀯𑀻𑀭𑀺𑀬𑀸𑀪𑀸𑀯𑀢𑁄 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑁄𑀧𑀺 𑀲𑀫𑀸𑀥𑀺 𑀩𑀮𑀪𑀸𑀯𑀁 𑀦 𑀕𑀘𑁆𑀙𑀢𑀺. ‘‘𑀯𑀻𑀭𑀺𑀬𑀧𑀘𑁆𑀙𑀺𑀫𑀓𑀁 𑀩𑀮’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀣𑀸 𑀅𑀝𑁆𑀞𑀸𑀭𑀲𑀸𑀳𑁂𑀢𑀼𑀓𑁂𑀲𑀼 𑀳𑁂𑀢𑀼𑀯𑀺𑀭𑀳𑀢𑁄 𑀫𑀕𑁆𑀕𑀗𑁆𑀕𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺. ‘‘𑀳𑁂𑀢𑀼𑀧𑀘𑁆𑀙𑀺𑀫𑀓𑀁 𑀫𑀕𑁆𑀕𑀗𑁆𑀕’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁪𑁩𑁮) 𑀳𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀫𑀦𑀲𑀺 𑀦𑀺𑀥𑀸𑀬𑀸𑀳 ‘‘𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀽’’𑀢𑁆𑀬𑀸𑀤𑀺. 𑀛𑀸𑀦𑀗𑁆𑀕𑀸𑀦𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁭. 𑀅𑀥𑀺𑀫𑁄𑀓𑁆𑀔𑀯𑀺𑀭𑀳𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑁂 𑀏𑀓𑀕𑁆𑀕𑀢𑀸 𑀘𑀺𑀢𑁆𑀢𑀝𑁆𑀞𑀺𑀢𑀺𑀫𑀢𑁆𑀢𑀁, 𑀦 𑀧𑀦 𑀫𑀺𑀘𑁆𑀙𑀸𑀲𑀫𑀸𑀥𑀺𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀩𑀮𑀯𑁄𑀳𑀸𑀭𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑁂’’𑀢𑁆𑀬𑀸𑀤𑀺.

𑁨𑁮. 𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀕𑁆𑀕𑀳𑀡𑁂𑀦 𑀏𑀓𑀳𑁂𑀢𑀼𑀓𑁂𑀲𑀼 𑀅𑀥𑀺𑀧𑀢𑀻𑀦𑀁 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀚𑀯𑀦𑁂𑀲𑁆𑀯𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀮𑁄𑀓𑀺𑀬𑀯𑀺𑀧𑀸𑀓𑁂𑀲𑀼 𑀅𑀥𑀺𑀧𑀢𑀻𑀦𑀁 𑀅𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀢𑁂 𑀙𑀦𑁆𑀤𑀸𑀤𑀻𑀦𑀺 𑀧𑀼𑀭𑀓𑁆𑀔𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀯𑀻𑀫𑀁𑀲𑀸𑀥𑀺𑀧𑀢𑀺𑀦𑁄 𑀤𑁆𑀯𑀺𑀳𑁂𑀢𑀼𑀓𑀚𑀯𑀦𑁂𑀲𑀼 𑀅𑀲𑀫𑁆𑀪𑀯𑀢𑁄 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀽𑀧𑀦𑀺𑀲𑁆𑀲𑀬𑀲𑁆𑀲 𑀘 𑀲𑀫𑁆𑀪𑀯𑀸𑀦𑀼𑀭𑀽𑀧𑀢𑁄 𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸𑀲𑀫𑁆𑀪𑀯’’𑀦𑁆𑀢𑀺. 𑀏𑀓𑁄𑀯 𑀮𑀩𑁆𑀪𑀢𑀺, 𑀇𑀢𑀭𑀣𑀸 𑀅𑀥𑀺𑀧𑀢𑀺𑀪𑀸𑀯𑀸𑀬𑁄𑀕𑀢𑁄, 𑀢𑁂𑀦𑁂𑀯 𑀳𑀺 𑀪𑀕𑀯𑀢𑀸 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑁆𑀬𑀸𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁧) 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀯𑀺𑀬 ‘‘𑀅𑀥𑀺𑀧𑀢𑀻 𑀅𑀥𑀺𑀧𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑁆𑀬𑀸𑀤𑀺𑀦𑀸 𑀅𑀯𑀢𑁆𑀯𑀸 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑁆𑀬𑀸𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁩) 𑀏𑀓𑁂𑀓𑀸𑀥𑀺𑀧𑀢𑀺𑀯𑀲𑁂𑀦𑁂𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀉𑀤𑁆𑀥𑀝𑁄.

𑁨𑁯. 𑀯𑀢𑁆𑀣𑀼𑀢𑁄 𑀥𑀫𑁆𑀫𑀯𑀲𑁂𑀦 𑀳𑁂𑀢𑀼𑀥𑀫𑁆𑀫𑀸 𑀙, 𑀛𑀸𑀦𑀗𑁆𑀕𑀸𑀦𑀺 𑀧𑀜𑁆𑀘 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀏𑀓𑀢𑁄 𑀕𑀳𑀺𑀢𑀢𑁆𑀢𑀸, 𑀫𑀕𑁆𑀕𑀗𑁆𑀕𑀸 𑀦𑀯 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀫𑀸𑀥𑀻𑀦𑀁 𑀯𑀺𑀢𑀓𑁆𑀓𑀯𑀻𑀭𑀺𑀬𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀪𑀸𑀯𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀳𑀺 𑀏𑀓𑀢𑁄 𑀕𑀳𑀺𑀢𑀢𑁆𑀢𑀸. 𑀇𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀲𑁄𑀴𑀲 𑀧𑀜𑁆𑀘𑀦𑁆𑀦𑀁 𑀯𑁂𑀤𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑁂𑀤𑀦𑀸𑀲𑀸𑀫𑀜𑁆𑀜𑁂𑀦, 𑀢𑀺𑀡𑁆𑀡𑀁 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀜𑀸𑀡𑀲𑀸𑀫𑀜𑁆𑀜𑁂𑀦 𑀏𑀓𑀢𑁄 𑀕𑀳𑀺𑀢𑀢𑁆𑀢𑀸, 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸, 𑀩𑀮𑀥𑀫𑁆𑀫𑀸 𑀧𑀦 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀯 𑀈𑀭𑀺𑀢𑀸, 𑀅𑀥𑀺𑀧𑀢𑀺𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸, 𑀆𑀳𑀸𑀭𑀸 𑀢𑀣𑀸 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸𑀢𑀺 𑀓𑀼𑀲𑀮𑀸𑀤𑀻𑀳𑀺 𑀢𑀻𑀳𑀺 𑀲𑀫𑀸𑀓𑀺𑀡𑁆𑀡𑁄 𑀢𑀢𑁄𑀬𑁂𑀯 𑀫𑀺𑀲𑁆𑀲𑀓𑀲𑀗𑁆𑀕𑀳𑁄 𑀏𑀯𑀁𑀦𑀸𑀫𑀓𑁄 𑀲𑀗𑁆𑀕𑀳𑁄 𑀲𑀢𑁆𑀢𑀥𑀸 𑀯𑀼𑀢𑁆𑀢𑁄. 𑀏𑀢𑁆𑀣 𑀘 𑁋

𑀧𑀜𑁆𑀘𑀲𑀗𑁆𑀕𑀳𑀺𑀢𑀸 𑀧𑀜𑁆𑀜𑀸, 𑀯𑀸𑀬𑀸𑀫𑁂𑀓𑀕𑁆𑀕𑀢𑀸 𑀧𑀦;

𑀘𑀢𑀼𑀲𑀗𑁆𑀕𑀳𑀺𑀢𑀸 𑀘𑀺𑀢𑁆𑀢𑀁, 𑀲𑀢𑀺 𑀘𑁂𑀯 𑀢𑀺𑀲𑀗𑁆𑀕𑀳𑀸.

𑀲𑀗𑁆𑀓𑀧𑁆𑀧𑁄 𑀯𑁂𑀤𑀦𑀸 𑀲𑀤𑁆𑀥𑀸, 𑀤𑀼𑀓𑀲𑀗𑁆𑀕𑀳𑀺𑀢𑀸 𑀫𑀢𑀸;

𑀏𑀓𑁂𑀓𑀲𑀗𑁆𑀕𑀳𑀸 𑀲𑁂𑀲𑀸, 𑀅𑀝𑁆𑀞𑀯𑀻𑀲𑀢𑀺 𑀪𑀸𑀲𑀺𑀢𑀸.

𑀫𑀺𑀲𑁆𑀲𑀓𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑀯𑀡𑁆𑀡𑀦𑀸

𑁩𑁦. 𑀧𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦𑀁, 𑀅𑀲𑀼𑀪𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀓𑀸𑀬𑀸𑀤𑀺𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑀻𑀢𑁆𑀬𑀢𑁆𑀣𑁄, 𑀲𑀢𑀺𑀬𑁂𑀯 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀢𑀁 𑀧𑀦 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀅𑀲𑀼𑀪𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦, 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀯𑀲𑁂𑀦 𑀘 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺. 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀆𑀬𑁄𑀢𑀺 𑀓𑀸𑀬𑁄, 𑀲𑀭𑀻𑀭𑀁, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀸 𑀲𑀫𑀽𑀳𑁄 𑀓𑀸𑀬𑁄, 𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀧𑀭𑀺𑀓𑀫𑁆𑀫𑀯𑀲𑁂𑀦, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘 𑀲𑀭𑀡𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸. 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀽𑀢𑀸𑀦𑀁 𑀯𑁂𑀤𑀦𑀸𑀦𑀁 𑀯𑀲𑁂𑀦 𑀅𑀦𑀼𑀧𑀲𑁆𑀲𑀦𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸. 𑀢𑀣𑀸 𑀲𑀭𑀸𑀕𑀫𑀳𑀕𑁆𑀕𑀢𑀸𑀤𑀺𑀯𑀲𑁂𑀦 𑀲𑀫𑁆𑀧𑀬𑁄𑀕𑀪𑀽𑀫𑀺𑀪𑁂𑀤𑁂𑀦 𑀪𑀺𑀦𑁆𑀦𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀲𑀜𑁆𑀜𑀸𑀲𑀗𑁆𑀔𑀸𑀭𑀸𑀦𑀁 𑀥𑀫𑁆𑀫𑀸𑀦𑀁 𑀪𑀺𑀦𑁆𑀦𑀮𑀓𑁆𑀔𑀡𑀸𑀦𑀫𑁂𑀯 𑀅𑀦𑀼𑀧𑀲𑁆𑀲𑀦𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸.

𑁩𑁧. 𑀲𑀫𑁆𑀫𑀸 𑀧𑀤𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀯𑀸𑀬𑀸𑀫𑁄. 𑀲𑁄 𑀘 𑀓𑀺𑀘𑁆𑀘𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑁄𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑁆𑀬𑀸𑀤𑀺. 𑀅𑀲𑀼𑀪𑀫𑀦𑀲𑀺𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑀼𑀜𑁆𑀚𑀦𑀸𑀤𑀺𑀯𑀲𑁂𑀦 𑀯𑀸𑀬𑀫𑀦𑀁 𑀯𑀸𑀬𑀸𑀫𑁄. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀅𑀪𑀺𑀯𑀼𑀤𑁆𑀥𑀺𑀬𑀸.

𑁩𑁨. 𑀇𑀚𑁆𑀛𑀢𑀺 𑀅𑀥𑀺𑀝𑁆𑀞𑀸𑀦𑀸𑀤𑀺𑀓𑀁 𑀏𑀢𑀸𑀬𑀸𑀳𑀺 𑀇𑀤𑁆𑀥𑀺, 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄, 𑀙𑀦𑁆𑀤𑁄𑀬𑁂𑀯 𑀇𑀤𑁆𑀥𑀺𑀧𑀸𑀤𑁄 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄.

𑁩𑁫. 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀢𑁄 𑀧𑀝𑁆𑀞𑀸𑀬 𑀬𑁄𑀕𑀸𑀯𑀘𑀭𑁄. 𑀬𑀸𑀬 𑀯𑀸 𑀲𑁄 𑀲𑀢𑀺𑀆𑀤𑀺𑀓𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀓𑀺𑀮𑁂𑀲𑀦𑀺𑀤𑁆𑀤𑀸𑀢𑁄 𑀯𑀸 𑀯𑀼𑀝𑁆𑀞𑀸𑀢𑀺, 𑀓𑀺𑀮𑁂𑀲𑀲𑀗𑁆𑀓𑁄𑀘𑀸𑀪𑀸𑀯𑀢𑁄 𑀯𑀸 𑀫𑀕𑁆𑀕𑀨𑀮𑀧𑁆𑀧𑀢𑁆𑀢𑀺𑀬𑀸 𑀯𑀺𑀓𑀲𑀢𑀺, 𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀻 𑀩𑁄𑀥𑀺, 𑀢𑀲𑁆𑀲 𑀩𑁄𑀥𑀺𑀲𑁆𑀲, 𑀢𑀲𑁆𑀲𑀸 𑀯𑀸 𑀩𑁄𑀥𑀺𑀬𑀸 𑀅𑀗𑁆𑀕𑀪𑀽𑀢𑀸 𑀓𑀸𑀭𑀡𑀪𑀽𑀢𑀸𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀢𑁂 𑀧𑀦 𑀥𑀫𑁆𑀫𑀯𑀲𑁂𑀦 𑀲𑀢𑁆𑀢𑀯𑀺𑀥𑀸𑀢𑀺 𑀆𑀳 ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑁆𑀬𑀸𑀤𑀺. 𑀲𑀢𑀺𑀬𑁂𑀯 𑀲𑀼𑀦𑁆𑀤𑀭𑁄 𑀩𑁄𑀚𑁆𑀛𑀗𑁆𑀕𑁄, 𑀲𑀼𑀦𑁆𑀤𑀭𑀲𑁆𑀲 𑀯𑀸 𑀩𑁄𑀥𑀺𑀲𑁆𑀲, 𑀲𑀼𑀦𑁆𑀤𑀭𑀸𑀬 𑀯𑀸 𑀩𑁄𑀥𑀺𑀬𑀸 𑀅𑀗𑁆𑀕𑁄𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀥𑀫𑁆𑀫𑁂 𑀯𑀺𑀘𑀺𑀦𑀸𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑁄, 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸. 𑀉𑀧𑁂𑀓𑁆𑀔𑀸𑀢𑀺 𑀇𑀥 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸.

𑁪𑁦. ‘‘𑀲𑀢𑁆𑀢𑀥𑀸 𑀢𑀢𑁆𑀣 𑀲𑀗𑁆𑀕𑀳𑁄’’𑀢𑀺 𑀯𑀢𑁆𑀯𑀸𑀦 𑀧𑀼𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀓𑀧𑁆𑀧𑀧𑀲𑁆𑀲𑀤𑁆𑀥𑀺 𑀘𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀻𑀭𑀺𑀬𑀁 𑀦𑀯𑀝𑁆𑀞𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀘𑀢𑀼𑀓𑁆𑀓𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀯𑀻𑀭𑀺𑀬𑀩𑀮𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑁆𑀫𑀸𑀯𑀸𑀬𑀸𑀫𑀯𑀲𑁂𑀦 𑀦𑀯𑀓𑀺𑀘𑁆𑀘𑀢𑁆𑀢𑀸, 𑀲𑀢𑀺 𑀅𑀝𑁆𑀞𑀝𑁆𑀞𑀸𑀦𑀸 𑀲𑀢𑀺𑀧𑀝𑁆𑀞𑀸𑀦𑀘𑀢𑀼𑀓𑁆𑀓𑀲𑀢𑀺𑀦𑁆𑀤𑁆𑀭𑀺𑀬𑀲𑀢𑀺𑀩𑀮𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑁆𑀫𑀸𑀲𑀢𑀺𑀯𑀲𑁂𑀦 𑀅𑀝𑁆𑀞𑀓𑀺𑀘𑁆𑀘𑀢𑁆𑀢𑀸. 𑀲𑀫𑀸𑀥𑀺 𑀘𑀢𑀼𑀝𑁆𑀞𑀸𑀦𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀩𑀮𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑁆𑀫𑀸𑀲𑀫𑀸𑀥𑀺𑀯𑀲𑁂𑀦 𑀘𑀢𑀼𑀓𑀺𑀘𑁆𑀘𑀢𑁆𑀢𑀸, 𑀧𑀜𑁆𑀜𑀸 𑀧𑀜𑁆𑀘𑀝𑁆𑀞𑀸𑀦𑀸 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀜𑁆𑀜𑀸𑀩𑀮𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀜𑁆𑀘𑀓𑀺𑀘𑁆𑀘𑀢𑁆𑀢𑀸, 𑀲𑀤𑁆𑀥𑀸 𑀤𑁆𑀯𑀺𑀝𑁆𑀞𑀸𑀦𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀤𑁆𑀥𑀸𑀩𑀮𑀯𑀲𑁂𑀦 𑀤𑁆𑀯𑀺𑀓𑀺𑀘𑁆𑀘𑀢𑁆𑀢𑀸. 𑀏𑀲𑁄 𑀉𑀢𑁆𑀢𑀫𑀸𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑁂𑀦 𑀯𑀺𑀲𑀺𑀝𑁆𑀞𑀸𑀦𑀁 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸𑀦𑀁 𑀧𑀯𑀭𑁄 𑀉𑀢𑁆𑀢𑀫𑁄 𑀯𑀺𑀪𑀸𑀕𑁄.

𑁪𑁧. 𑀮𑁄𑀓𑀼𑀢𑁆𑀢𑀭𑁂 𑀅𑀝𑁆𑀞𑀯𑀺𑀥𑁂𑀧𑀺 𑀲𑀩𑁆𑀩𑁂 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀲𑀗𑁆𑀓𑀧𑁆𑀧𑀧𑀻𑀢𑀺𑀬𑁄 𑀦 𑀯𑀸 𑀳𑁄𑀦𑁆𑀢𑀺, 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁂 𑀲𑀗𑁆𑀓𑀧𑁆𑀧𑀲𑁆𑀲, 𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁂 𑀧𑀻𑀢𑀺𑀬𑀸 𑀘 𑀅𑀲𑀫𑁆𑀪𑀯𑀢𑁄 𑀦 𑀳𑁄𑀦𑁆𑀢𑀺 𑀯𑀸, 𑀮𑁄𑀓𑀺𑀬𑁂𑀧𑀺 𑀘𑀺𑀢𑁆𑀢𑁂 𑀲𑀻𑀮𑀯𑀺𑀲𑀼𑀤𑁆𑀥𑀸𑀤𑀺 𑀙𑀩𑁆𑀩𑀺𑀲𑀼𑀤𑁆𑀥𑀺𑀧𑀯𑀢𑁆𑀢𑀺𑀬𑀁 𑀬𑀣𑀸𑀬𑁄𑀕𑀁 𑀢𑀁𑀢𑀁𑀓𑀺𑀘𑁆𑀘𑀲𑁆𑀲 𑀅𑀦𑀼𑀭𑀽𑀧𑀯𑀲𑁂𑀦 𑀓𑁂𑀘𑀺 𑀓𑀢𑁆𑀣𑀘𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀦 𑀯𑀸 𑀳𑁄𑀦𑁆𑀢𑀺.

𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀩𑁆𑀩𑀲𑀗𑁆𑀕𑀳𑀯𑀡𑁆𑀡𑀦𑀸

𑁪𑁨. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀢𑁂 𑀢𑁂 𑀲𑀪𑀸𑀕𑀥𑀫𑁆𑀫𑀸 𑀏𑀓𑀚𑁆𑀛𑀁 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀁𑀬𑀽𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑁆𑀬𑀸𑀤𑀺 (𑀯𑀺𑀪. 𑁨), 𑀢𑁂 𑀧𑀦𑁂𑀢𑁂 𑀔𑀦𑁆𑀥𑀸 𑀪𑀸𑀚𑀦𑀪𑁄𑀚𑀦𑀩𑁆𑀬𑀜𑁆𑀚𑀦𑀪𑀢𑁆𑀢𑀓𑀸𑀭𑀓𑀪𑀼𑀜𑁆𑀚𑀓𑀯𑀺𑀓𑀧𑁆𑀧𑀯𑀲𑁂𑀦 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑁆𑀬𑀸𑀤𑀺. 𑀭𑀽𑀧𑀜𑁆𑀳𑀺 𑀯𑁂𑀤𑀦𑀸𑀦𑀺𑀲𑁆𑀲𑀬𑀢𑁆𑀢𑀸 𑀪𑀸𑀚𑀦𑀝𑁆𑀞𑀸𑀦𑀺𑀬𑀁, 𑀯𑁂𑀤𑀦𑀸 𑀪𑀼𑀜𑁆𑀚𑀺𑀢𑀩𑁆𑀩𑀢𑁆𑀢𑀸 𑀪𑁄𑀚𑀦𑀝𑁆𑀞𑀸𑀦𑀺𑀬𑀸, 𑀲𑀜𑁆𑀜𑀸 𑀯𑁂𑀤𑀦𑀸𑀲𑁆𑀲𑀸𑀤𑀮𑀸𑀪𑀳𑁂𑀢𑀼𑀢𑁆𑀢𑀸 𑀩𑁆𑀬𑀜𑁆𑀚𑀦𑀝𑁆𑀞𑀸𑀦𑀺𑀬𑀸, 𑀲𑀗𑁆𑀔𑀸𑀭𑀸 𑀅𑀪𑀺𑀲𑀗𑁆𑀔𑀭𑀡𑀢𑁄 𑀪𑀢𑁆𑀢𑀓𑀸𑀭𑀓𑀝𑁆𑀞𑀸𑀦𑀺𑀬𑀸, 𑀯𑀺𑀜𑁆𑀜𑀸𑀡𑀁 𑀉𑀧𑀪𑀼𑀜𑁆𑀚𑀓𑀢𑁆𑀢𑀸 𑀪𑀼𑀜𑁆𑀚𑀓𑀝𑁆𑀞𑀸𑀦𑀺𑀬𑀁. 𑀏𑀢𑁆𑀢𑀸𑀯𑀢𑀸 𑀘 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀻𑀢𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀤𑁂𑀲𑀦𑀸𑀓𑁆𑀓𑀫𑁂𑀧𑀺 𑀇𑀤𑀫𑁂𑀯 𑀓𑀸𑀭𑀡𑀁 𑀬𑀢𑁆𑀣 𑀪𑀼𑀜𑁆𑀚𑀢𑀺, 𑀬𑀜𑁆𑀘 𑀪𑀼𑀜𑁆𑀚𑀢𑀺, 𑀬𑁂𑀦 𑀘 𑀪𑀼𑀜𑁆𑀚𑀢𑀺, 𑀬𑁄 𑀘 𑀪𑁄𑀚𑀓𑁄, 𑀬𑁄 𑀘 𑀪𑀼𑀜𑁆𑀚𑀺𑀢𑀸, 𑀢𑁂𑀲𑀁 𑀅𑀦𑀼𑀓𑁆𑀓𑀫𑁂𑀦 𑀤𑀲𑁆𑀲𑁂𑀢𑀼𑀓𑀸𑀫𑀢𑁆𑀢𑀸.

𑁪𑁩. 𑀉𑀧𑀸𑀤𑀸𑀦𑀸𑀦𑀁 𑀕𑁄𑀘𑀭𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀢𑁂 𑀧𑀦 𑀉𑀧𑀸𑀤𑀸𑀦𑀯𑀺𑀲𑀬𑀪𑀸𑀯𑁂𑀦 𑀕𑀳𑀺𑀢𑀸 𑀭𑀽𑀧𑀸𑀤𑀬𑁄 𑀧𑀜𑁆𑀘𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄’’𑀢𑁆𑀬𑀸𑀤𑀺. 𑀲𑀩𑁆𑀩𑀲𑀪𑀸𑀕𑀥𑀫𑁆𑀫𑀲𑀗𑁆𑀕𑀳𑀢𑁆𑀣𑀁 𑀳𑀺 𑀲𑀸𑀲𑀯𑀸, 𑀅𑀦𑀸𑀲𑀯𑀸𑀧𑀺 𑀥𑀫𑁆𑀫𑀸 𑀅𑀯𑀺𑀲𑁂𑀲𑀢𑁄 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀤𑁂𑀲𑀺𑀢𑀸. 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀧𑀦 𑀲𑀸𑀲𑀯𑀸𑀯 ‘‘𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺. 𑀬𑀣𑀸 𑀧𑀦𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀲𑀸𑀲𑀯𑀸, 𑀅𑀦𑀸𑀲𑀯𑀸 𑀘, 𑀦 𑀏𑀯𑀁 𑀭𑀽𑀧𑀁, 𑀏𑀓𑀦𑁆𑀢𑀓𑀸𑀫𑀸𑀯𑀘𑀭𑀢𑁆𑀢𑀸. 𑀲𑀪𑀸𑀕𑀭𑀸𑀲𑀺𑀯𑀲𑁂𑀦 𑀧𑀦 𑀢𑀁 𑀔𑀦𑁆𑀥𑁂𑀲𑀼 𑀤𑁂𑀲𑀺𑀢𑀁, 𑀉𑀧𑀸𑀤𑀸𑀦𑀺𑀬𑀪𑀸𑀯𑁂𑀦, 𑀧𑀦 𑀭𑀸𑀲𑀺𑀯𑀲𑁂𑀦 𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀽𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁪. 𑀆𑀬𑀢𑀦𑁆𑀢𑀺 𑀏𑀢𑁆𑀣 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀢𑁂𑀦 𑀢𑁂𑀦 𑀓𑀺𑀘𑁆𑀘𑁂𑀦 𑀖𑀝𑁆𑀝𑁂𑀦𑁆𑀢𑀺 𑀯𑀸𑀬𑀫𑀦𑁆𑀢𑀺, 𑀆𑀬𑀪𑀽𑀢𑁂 𑀯𑀸 𑀢𑁂 𑀥𑀫𑁆𑀫𑁂 𑀏𑀢𑀸𑀦𑀺 𑀢𑀦𑁄𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀺, 𑀆𑀬𑀢𑀁 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀦𑀬𑀦𑁆𑀢𑀺 𑀧𑀯𑀢𑁆𑀢𑁂𑀦𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀓𑀸𑀭𑀡𑀪𑀽𑀢𑀸𑀦𑀻𑀢𑀺 𑀯𑀸 𑀆𑀬𑀢𑀦𑀸𑀦𑀺. 𑀅𑀧𑀺𑀘 𑀮𑁄𑀓𑁂 𑀦𑀺𑀯𑀸𑀲𑀆𑀓𑀭𑀲𑀫𑁄𑀲𑀭𑀡𑀲𑀜𑁆𑀚𑀸𑀢𑀺𑀝𑁆𑀞𑀸𑀦𑀁 ‘‘𑀆𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀢𑁂𑀧𑀺 𑀢𑀁𑀢𑀁𑀤𑁆𑀯𑀸𑀭𑀺𑀓𑀸𑀦𑀁, 𑀢𑀁𑀢𑀤𑀸𑀭𑀫𑁆𑀫𑀡𑀸𑀦𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬, 𑀢𑁂𑀲𑀫𑁂𑀯 𑀆𑀓𑀺𑀡𑁆𑀡𑀪𑀸𑀯𑁂𑀦 𑀧𑀯𑀢𑁆𑀢𑀸𑀦𑀁 𑀆𑀓𑀭𑀝𑁆𑀞𑀸𑀦𑀢𑀸𑀬, 𑀤𑁆𑀯𑀸𑀭𑀸𑀭𑀫𑁆𑀫𑀡𑀢𑁄 𑀲𑀫𑁄𑀲𑀭𑀦𑁆𑀢𑀸𑀦𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀢𑀸𑀬, 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀁 𑀲𑀜𑁆𑀚𑀸𑀢𑀺𑀝𑁆𑀞𑀸𑀦𑀢𑀸𑀬 𑀘 𑀆𑀬𑀢𑀦𑀸𑀦𑀺. 𑀢𑀸𑀦𑀺 𑀧𑀦 𑀤𑁆𑀯𑀸𑀭𑀪𑀽𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀙, 𑀆𑀭𑀫𑁆𑀫𑀡𑀪𑀽𑀢𑀸𑀦𑀺 𑀘 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀙𑀸𑀢𑀺 𑀤𑁆𑀯𑀸𑀤𑀲𑀯𑀺𑀥𑀸𑀦𑀻𑀢𑀺 𑀆𑀳 ‘‘𑀘𑀓𑁆𑀔𑀸𑀬𑀢𑀦’’𑀦𑁆𑀢𑁆𑀬𑀸𑀤𑀺. 𑀘𑀓𑁆𑀔𑀼 𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀏𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀭𑀫𑁆𑀫𑀡𑀢𑁆𑀢𑀸 𑀘𑀓𑁆𑀔𑀸𑀬𑀢𑀦𑀁 𑀯𑀺𑀪𑀽𑀢𑀦𑁆𑀢𑀺 𑀢𑀁 𑀧𑀞𑀫𑀁 𑀯𑀼𑀢𑁆𑀢𑀁, 𑀢𑀤𑀦𑀦𑁆𑀢𑀭𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀭𑀫𑁆𑀫𑀡𑀸𑀦𑀺 𑀇𑀢𑀭𑀸𑀦𑀺, 𑀢𑀢𑁆𑀣𑀸𑀧𑀺 𑀅𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀲𑀸𑀫𑀜𑁆𑀜𑁂𑀦 𑀘𑀓𑁆𑀔𑀸𑀬𑀢𑀦𑀸𑀦𑀦𑁆𑀢𑀭𑀁 𑀲𑁄𑀢𑀸𑀬𑀢𑀦𑀁 𑀯𑀼𑀢𑁆𑀢𑀁, 𑀇𑀢𑀭𑁂𑀲𑀼 𑀲𑀻𑀖𑀢𑀭𑀁 𑀆𑀭𑀫𑁆𑀫𑀡𑀕𑁆𑀕𑀳𑀡𑀲𑀫𑀢𑁆𑀣𑀢𑁆𑀢𑀸 𑀖𑀸𑀦𑀸𑀬𑀢𑀦𑀁 𑀧𑀞𑀫𑀁 𑀯𑀼𑀢𑁆𑀢𑀁. 𑀧𑀼𑀭𑀢𑁄 𑀞𑀧𑀺𑀢𑀫𑀢𑁆𑀢𑀲𑁆𑀲 𑀳𑀺 𑀪𑁄𑀚𑀦𑀸𑀤𑀺𑀓𑀲𑁆𑀲 𑀕𑀦𑁆𑀥𑁄 𑀯𑀸𑀢𑀸𑀦𑀼𑀲𑀸𑀭𑁂𑀦 𑀖𑀸𑀦𑁂 𑀧𑀝𑀺𑀳𑀜𑁆𑀜𑀢𑀺, 𑀢𑀤𑀦𑀦𑁆𑀢𑀭𑀁 𑀧𑀦 𑀧𑀤𑁂𑀲𑀯𑀼𑀢𑁆𑀢𑀺𑀲𑀸𑀫𑀜𑁆𑀜𑁂𑀦 𑀚𑀺𑀯𑁆𑀳𑀸𑀬𑀢𑀦𑀁 𑀯𑀼𑀢𑁆𑀢𑀁, 𑀢𑀢𑁄 𑀲𑀩𑁆𑀩𑀝𑁆𑀞𑀸𑀦𑀺𑀓𑀁 𑀓𑀸𑀬𑀸𑀬𑀢𑀦𑀁, 𑀢𑀢𑁄 𑀧𑀜𑁆𑀘𑀦𑁆𑀦𑀫𑁆𑀧𑀺 𑀕𑁄𑀘𑀭𑀕𑁆𑀕𑀳𑀡𑀲𑀫𑀢𑁆𑀣𑀁 𑀫𑀦𑀸𑀬𑀢𑀦𑀁, 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀦 𑀅𑀦𑀼𑀓𑁆𑀓𑀫𑁂𑀦 𑀢𑁂𑀲𑀁 𑀢𑁂𑀲𑀁 𑀆𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀺.

𑁪𑁫. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀅𑀣 𑀯𑀸 𑀬𑀣𑀸𑀲𑀫𑁆𑀪𑀯𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀤𑀳𑀦𑁆𑀢𑀺, 𑀪𑀸𑀭𑀳𑀸𑀭𑁂𑀳𑀺 𑀯𑀺𑀬 𑀘 𑀪𑀸𑀭𑁄 𑀲𑀢𑁆𑀢𑁂𑀳𑀺 𑀥𑀻𑀬𑀦𑁆𑀢𑀺 𑀥𑀸𑀭𑀺𑀬𑀦𑁆𑀢𑀺, 𑀅𑀯𑀲𑀯𑀢𑁆𑀢𑀦𑀢𑁄 𑀤𑀼𑀓𑁆𑀔𑀯𑀺𑀥𑀸𑀦𑀫𑀢𑁆𑀢𑀫𑁂𑀯 𑀘𑁂𑀢𑀸, 𑀲𑀢𑁆𑀢𑁂𑀳𑀺 𑀘 𑀲𑀁𑀲𑀸𑀭𑀤𑀼𑀓𑁆𑀔𑀁 𑀅𑀦𑀼𑀯𑀺𑀥𑀻𑀬𑀢𑀺 𑀏𑀢𑀸𑀳𑀺, 𑀢𑀣𑀸𑀯𑀺𑀳𑀺𑀢𑀜𑁆𑀘 𑀏𑀢𑀸𑀲𑁆𑀯𑁂𑀯 𑀫𑀻𑀬𑀢𑀺 𑀞𑀧𑀺𑀬𑀢𑀺, 𑀭𑀲𑀲𑁄𑀡𑀺𑀢𑀸𑀤𑀺𑀲𑀭𑀻𑀭𑀸𑀯𑀬𑀯𑀥𑀸𑀢𑀼𑀬𑁄 𑀯𑀺𑀬, 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀤𑀺𑀲𑁂𑀮𑀸𑀯𑀬𑀯𑀥𑀸𑀢𑀼𑀬𑁄 𑀯𑀺𑀬 𑀘 𑀜𑁂𑀬𑁆𑀬𑀸𑀯𑀬𑀯𑀪𑀽𑀢𑀸 𑀘𑀸𑀢𑀺 𑀥𑀸𑀢𑀼𑀬𑁄. 𑀬𑀣𑀸𑀳𑀼 𑁋

‘‘𑀯𑀺𑀤𑀳𑀢𑀺 𑀯𑀺𑀥𑀸𑀦𑀜𑁆𑀘, 𑀥𑀻𑀬𑀢𑁂 𑀘 𑀯𑀺𑀥𑀻𑀬𑀢𑁂;

𑀏𑀢𑀸𑀬 𑀥𑀻𑀬𑀢𑁂 𑀏𑀢𑁆𑀣, 𑀇𑀢𑀺 𑀯𑀸 𑀥𑀸𑀢𑀼𑀲𑀫𑁆𑀫𑀢𑀸;

𑀲𑀭𑀻𑀭𑀲𑁂𑀮𑀸𑀯𑀬𑀯-𑀥𑀸𑀢𑀼𑀬𑁄 𑀯𑀺𑀬 𑀥𑀸𑀢𑀼𑀬𑁄’’𑀢𑀺.

𑀢𑀸 𑀧𑀦 𑀫𑀦𑀸𑀬𑀢𑀦𑀁 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀲𑀢𑁆𑀢𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀅𑀯𑀲𑁂𑀲𑁂𑀳𑀺 𑀏𑀓𑀸𑀤𑀲𑀸𑀬𑀢𑀦𑁂𑀳𑀺 𑀲𑀳 𑀅𑀝𑁆𑀞𑀸𑀭𑀲𑀥𑀸𑀢𑀽 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀘𑀓𑁆𑀔𑀼𑀥𑀸𑀢𑀽’’𑀢𑁆𑀬𑀸𑀤𑀺. 𑀓𑀫𑀓𑀸𑀭𑀡𑀁 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑀁.

𑁪𑁬. 𑀅𑀭𑀺𑀬𑀓𑀭𑀢𑁆𑀢𑀸 𑀅𑀭𑀺𑀬𑀸𑀦𑀺, 𑀢𑀘𑁆𑀙𑀪𑀸𑀯𑀢𑁄 𑀲𑀘𑁆𑀘𑀸𑀦𑀻𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀇𑀫𑀸𑀦𑀺 𑀳𑀺 𑀘𑀢𑁆𑀢𑀸𑀭𑁄 𑀧𑀝𑀺𑀧𑀦𑁆𑀦𑀓𑁂, 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑁂𑀢𑀺 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑁂 𑀲𑀸𑀥𑁂𑀦𑁆𑀢𑀺 𑀅𑀲𑀢𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁂 𑀢𑁂𑀲𑀁 𑀅𑀭𑀺𑀬𑀪𑀸𑀯𑀸𑀦𑀼𑀧𑀕𑀫𑀦𑀢𑁄, 𑀲𑀢𑀺 𑀘 𑀢𑀲𑁆𑀫𑀺𑀁 𑀏𑀓𑀦𑁆𑀢𑁂𑀦 𑀢𑀩𑁆𑀪𑀸𑀯𑀽𑀧𑀕𑀫𑀦𑀢𑁄 𑀘. 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀸𑀦𑀫𑁂𑀯 𑀧𑀦 𑀬𑀣𑀸𑀓𑁆𑀓𑀫𑀁 𑀩𑀸𑀥𑀓𑀢𑁆𑀢𑀁 𑀧𑀪𑀯𑀢𑁆𑀢𑀁 𑀦𑀺𑀲𑁆𑀲𑀭𑀡𑀢𑁆𑀢𑀁 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀁, 𑀦𑀸𑀜𑁆𑀜𑁂𑀲𑀁, 𑀩𑀸𑀥𑀓𑀸𑀤𑀺𑀪𑀸𑀯𑁄𑀬𑁂𑀯 𑀘 𑀤𑀼𑀓𑁆𑀔𑀸𑀤𑀻𑀦𑀁, 𑀦 𑀅𑀩𑀸𑀥𑀓𑀸𑀤𑀺𑀪𑀸𑀯𑁄, 𑀢𑀲𑁆𑀫𑀸 𑀅𑀜𑁆𑀜𑀢𑁆𑀣𑀸𑀪𑀸𑀯𑀢𑀢𑁆𑀣𑀩𑁆𑀬𑀸𑀧𑀺𑀢𑀸𑀲𑀗𑁆𑀔𑀸𑀢𑁂𑀦 𑀮𑀓𑁆𑀔𑀡𑁂𑀦 𑀏𑀢𑀸𑀦𑀺 𑀢𑀘𑁆𑀙𑀸𑀦𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀩𑁄𑀥𑀸𑀦𑀼𑀭𑀽𑀧𑀁 𑀘𑀢𑁆𑀢𑀸𑀭𑁄, 𑀙𑀺𑀦𑁆𑀤𑀦𑁆𑀢𑁂 𑀘𑀢𑀼𑀭𑁄 𑀫𑀮𑁂;

𑀔𑀻𑀡𑀤𑁄𑀲𑁂 𑀘 𑀘𑀢𑁆𑀢𑀸𑀭𑁄, 𑀲𑀸𑀥𑁂𑀦𑁆𑀢𑀸𑀭𑀺𑀬𑀧𑀼𑀕𑁆𑀕𑀮𑁂.

‘‘𑀅𑀜𑁆𑀜𑀢𑁆𑀣 𑀩𑀸𑀥𑀓𑀢𑁆𑀢𑀸𑀤𑀺, 𑀦 𑀳𑀺 𑀏𑀢𑁂𑀳𑀺 𑀮𑀩𑁆𑀪𑀢𑀺;

𑀦𑀸𑀩𑀸𑀥𑀓𑀢𑁆𑀢𑀫𑁂𑀢𑁂𑀲𑀁, 𑀢𑀘𑁆𑀙𑀸𑀦𑁂𑀢𑀸𑀦𑀺𑀯𑁂𑀢𑀢𑁄’’𑀢𑀺.

𑀅𑀭𑀺𑀬𑀸𑀦𑀁 𑀯𑀸 𑀲𑀘𑁆𑀘𑀸𑀦𑀺 𑀢𑁂𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁆𑀢𑀸, 𑀅𑀭𑀺𑀬𑀲𑁆𑀲 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀘𑁆𑀘𑀸𑀦𑀺 𑀢𑁂𑀦 𑀤𑁂𑀲𑀺𑀢𑀢𑁆𑀢𑀸𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀢𑀸𑀦𑀺 𑀧𑀦 𑀲𑀁𑀓𑀺𑀮𑀺𑀝𑁆𑀞𑀸𑀲𑀁𑀓𑀺𑀮𑀺𑀝𑁆𑀞𑀨𑀮𑀳𑁂𑀢𑀼𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀦𑀻𑀢𑀺 𑀆𑀳 ‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑁆𑀬𑀸𑀤𑀺. 𑀢𑀢𑁆𑀣 𑀓𑀼𑀘𑁆𑀙𑀺𑀢𑀢𑁆𑀢𑀸, 𑀢𑀼𑀘𑁆𑀙𑀢𑁆𑀢𑀸 𑀘 𑀤𑀼𑀓𑁆𑀔𑀁. 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀲𑀦𑁆𑀦𑀺𑀝𑁆𑀞𑀸𑀦𑁂 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀲𑀫𑀼𑀤𑀬𑁄 𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸 𑀤𑀼𑀓𑁆𑀔𑀦𑁆𑀢𑀺 𑀓𑀢𑁆𑀯𑀸, 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺, 𑀧𑀝𑀺𑀧𑀚𑁆𑀚𑀦𑁆𑀢𑀺 𑀘 𑀢𑀁 𑀏𑀢𑀸𑀬𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸.

𑁪𑁭. 𑀘𑁂𑀢𑀲𑀺𑀓𑀸𑀦𑀁, 𑀲𑁄𑀴𑀲𑀲𑀼𑀔𑀼𑀫𑀭𑀽𑀧𑀸𑀦𑀁, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀯𑀲𑁂𑀦 𑀏𑀓𑀽𑀦𑀲𑀢𑁆𑀢𑀢𑀺 𑀥𑀫𑁆𑀫𑀸 𑀆𑀬𑀢𑀦𑁂𑀲𑀼 𑀥𑀫𑁆𑀫𑀸𑀬𑀢𑀦𑀁, 𑀥𑀸𑀢𑀽𑀲𑀼 𑀥𑀫𑁆𑀫𑀥𑀸𑀢𑀽𑀢𑀺 𑀘 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺.

𑁪𑁯. 𑀲𑁂𑀲𑀸 𑀘𑁂𑀢𑀲𑀺𑀓𑀸𑀢𑀺 𑀯𑁂𑀤𑀦𑀸𑀲𑀜𑁆𑀜𑀸𑀳𑀺 𑀲𑁂𑀲𑀸 𑀧𑀜𑁆𑀜𑀸𑀲 𑀘𑁂𑀢𑀲𑀺𑀓𑀸. 𑀓𑀲𑁆𑀫𑀸 𑀧𑀦 𑀯𑁂𑀤𑀦𑀸𑀲𑀜𑁆𑀜𑀸 𑀯𑀺𑀲𑀼𑀁 𑀓𑀢𑀸𑀢𑀺? 𑀯𑀝𑁆𑀝𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀢𑀤𑀼𑀧𑀓𑀭𑀡𑀪𑀸𑀯𑀢𑁄. 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀳𑀺 𑀅𑀲𑁆𑀲𑀸𑀤𑀯𑀲𑀧𑁆𑀧𑀯𑀢𑁆𑀢𑀸 𑀯𑁂𑀤𑀦𑀸, 𑀅𑀲𑀼𑀪𑁂 𑀲𑀼𑀪𑀸𑀤𑀺𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀘 𑀢𑀲𑁆𑀲𑀸 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀻𑀢𑀺 𑀢𑀤𑀼𑀧𑀓𑀭𑀡𑀪𑀽𑀢𑀸 𑀲𑀜𑁆𑀜𑀸, 𑀢𑀲𑁆𑀫𑀸 𑀲𑀁𑀲𑀸𑀭𑀲𑁆𑀲 𑀧𑀥𑀸𑀦𑀳𑁂𑀢𑀼𑀢𑀸𑀬 𑀏𑀢𑀸 𑀯𑀺𑀦𑀺𑀪𑀼𑀚𑁆𑀚𑀺𑀢𑁆𑀯𑀸 𑀤𑁂𑀲𑀺𑀢𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀯𑀝𑁆𑀝𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀁, 𑀢𑀤𑀲𑁆𑀲𑀸𑀤𑀼𑀧𑀲𑁂𑀯𑀦𑀁;

𑀯𑀺𑀦𑀺𑀪𑀼𑀚𑁆𑀚 𑀦𑀺𑀤𑀲𑁆𑀲𑁂𑀢𑀼𑀁, 𑀔𑀦𑁆𑀥𑀤𑁆𑀯𑀬𑀫𑀼𑀤𑀸𑀳𑀝’’𑀦𑁆𑀢𑀺. (𑀦𑀸𑀫. 𑀧𑀭𑀺. 𑁬𑁪𑁯);

𑁫𑁦. 𑀦𑀦𑀼 𑀘 𑀆𑀬𑀢𑀦𑀥𑀸𑀢𑀽𑀲𑀼 𑀦𑀺𑀩𑁆𑀩𑀸𑀦𑀁 𑀲𑀗𑁆𑀕𑀳𑀺𑀢𑀁, 𑀔𑀦𑁆𑀥𑁂𑀲𑀼 𑀓𑀲𑁆𑀫𑀸 𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀪𑁂𑀤𑀸𑀪𑀸𑀯𑁂𑀦𑀸’’𑀢𑁆𑀬𑀸𑀤𑀺. 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀜𑁆𑀳𑀺 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀯𑁄𑀳𑀸𑀭𑁄𑀢𑀺 𑀦𑀺𑀩𑁆𑀩𑀸𑀦𑀁 𑀪𑁂𑀤𑀸𑀪𑀸𑀯𑀢𑁄 𑀔𑀦𑁆𑀥𑀲𑀗𑁆𑀕𑀳𑀢𑁄 𑀦𑀺𑀲𑁆𑀲𑀝𑀁, 𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑁆𑀬𑀢𑁆𑀣𑁄.

𑁫𑁧. 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁, 𑀙𑀦𑁆𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀪𑁂𑀤𑁂𑀦 𑀆𑀬𑀢𑀦𑀸𑀦𑀺 𑀤𑁆𑀯𑀸𑀤𑀲 𑀪𑀯𑀦𑁆𑀢𑀺, 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀙𑀦𑁆𑀦𑀁 𑀆𑀭𑀫𑁆𑀫𑀡𑀸𑀦𑀁 𑀢𑀤𑀼𑀪𑀬𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀸𑀦𑀁 𑀢𑀢𑁆𑀢𑀓𑀸𑀦𑀫𑁂𑀯 𑀯𑀺𑀜𑁆𑀜𑀸𑀡𑀸𑀦𑀁 𑀧𑀭𑀺𑀬𑀸𑀬𑁂𑀦 𑀓𑀫𑁂𑀦 𑀥𑀸𑀢𑀼𑀬𑁄 𑀅𑀝𑁆𑀞𑀸𑀭𑀲 𑀪𑀯𑀦𑁆𑀢𑀺.

𑁫𑁨. 𑀢𑀺𑀲𑁆𑀲𑁄 𑀪𑀽𑀫𑀺𑀬𑁄 𑀇𑀫𑀲𑁆𑀲𑀸𑀢𑀺 𑀢𑀺𑀪𑀽𑀫𑀁, 𑀢𑀺𑀪𑀽𑀫𑀁𑀬𑁂𑀯 𑀢𑁂𑀪𑀽𑀫𑀓𑀁. 𑀯𑀢𑁆𑀢𑀢𑀺 𑀏𑀢𑁆𑀣 𑀓𑀫𑁆𑀫𑀁, 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀯𑀝𑁆𑀝𑀁. 𑀢𑀡𑁆𑀳𑀸𑀢𑀺 𑀓𑀸𑀫𑀢𑀡𑁆𑀳𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀸, 𑀧𑀼𑀦 𑀙𑀴𑀸𑀭𑀫𑁆𑀫𑀡𑀯𑀲𑁂𑀦 𑀅𑀝𑁆𑀞𑀸𑀭𑀲𑀯𑀺𑀥𑀸, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀘𑀢𑀼𑀧𑀜𑁆𑀜𑀸𑀲𑀯𑀺𑀥𑀸, 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸 𑀢𑀡𑁆𑀳𑀸. 𑀓𑀲𑁆𑀫𑀸 𑀧𑀦 𑀅𑀜𑁆𑀜𑁂𑀲𑀼𑀧𑀺 𑀤𑀼𑀓𑁆𑀔𑀳𑁂𑀢𑀽𑀲𑀼 𑀲𑀦𑁆𑀢𑁂𑀲𑀼 𑀢𑀡𑁆𑀳𑀸𑀬𑁂𑀯 𑀲𑀫𑀼𑀤𑀬𑁄𑀢𑀺 𑀯𑀼𑀢𑁆𑀢𑀸𑀢𑀺? 𑀧𑀥𑀸𑀦𑀓𑀸𑀭𑀡𑀢𑁆𑀢𑀸. 𑀓𑀫𑁆𑀫𑀯𑀺𑀘𑀺𑀢𑁆𑀢𑀢𑀸𑀳𑁂𑀢𑀼𑀪𑀸𑀯𑁂𑀦, 𑀳𑀺 𑀓𑀫𑁆𑀫𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑁂𑀦 𑀘 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀓𑀸𑀭𑀡𑀢𑁆𑀢𑀸 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺. 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀦𑀸𑀫𑁂𑀦 𑀯𑀼𑀢𑁆𑀢𑁄 𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑁄 𑀫𑀢𑁄𑀢𑀺 𑀫𑀕𑁆𑀕𑁄𑀢𑀺 𑀧𑀼𑀦 𑀫𑀕𑁆𑀕𑀕𑁆𑀕𑀳𑀡𑀁 𑀬𑁄𑀚𑁂𑀢𑀩𑁆𑀩𑀁.

𑁫𑁩. 𑀫𑀕𑁆𑀕𑀬𑀼𑀢𑁆𑀢𑀸 𑀅𑀝𑁆𑀞𑀗𑁆𑀕𑀺𑀓𑀯𑀺𑀦𑀺𑀫𑀼𑀢𑁆𑀢𑀸 𑀲𑁂𑀲𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀨𑀮𑀜𑁆𑀘𑁂𑀯 𑀲𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀏𑀢𑁂 𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀯𑀺𑀦𑀺𑀲𑁆𑀲𑀝𑀸 𑀯𑀺𑀦𑀺𑀕𑁆𑀕𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄, 𑀧𑀭𑀺𑀬𑀸𑀬𑀢𑁄 𑀧𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁂𑀧𑀺 ‘‘𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 (𑀥. 𑀲. 𑁫𑁫𑁫) 𑀯𑀼𑀢𑁆𑀢𑀢𑁆𑀢𑀸 𑀨𑀮𑀥𑀫𑁆𑀫𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀻𑀦𑀁 𑀫𑀕𑁆𑀕𑀲𑀘𑁆𑀘𑁂, 𑀇𑀢𑀭𑁂𑀲𑀜𑁆𑀘 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑀸𑀫𑀜𑁆𑀜𑁂𑀦 𑀤𑀼𑀓𑁆𑀔𑀲𑀘𑁆𑀘𑁂 𑀲𑀗𑁆𑀕𑀳𑁄 𑀲𑀓𑁆𑀓𑀸 𑀓𑀸𑀢𑀼𑀁. 𑀏𑀯𑀜𑁆𑀳𑀺 𑀲𑀢𑀺 𑀲𑀘𑁆𑀘𑀤𑁂𑀲𑀦𑀸𑀬𑀧𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀢𑀸 𑀉𑀧𑀧𑀦𑁆𑀦𑀸 𑀳𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁂 𑀔𑀦𑁆𑀥𑀸𑀤𑀬𑁄 𑀩𑀳𑀽 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺? 𑀪𑀕𑀯𑀢𑀸𑀧𑀺 𑀢𑀣𑁂𑀯 𑀤𑁂𑀲𑀺𑀢𑀢𑁆𑀢𑀸. 𑀪𑀕𑀯𑀢𑀸𑀧𑀺 𑀓𑀲𑁆𑀫𑀸 𑀢𑀣𑀸 𑀤𑁂𑀲𑀺𑀢𑀸𑀢𑀺? 𑀢𑀺𑀯𑀺𑀥𑀲𑀢𑁆𑀢𑀸𑀦𑀼𑀕𑁆𑀕𑀳𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦𑀸𑀫𑀭𑀽𑀧𑀢𑀤𑀼𑀪𑀬𑀲𑀫𑁆𑀫𑀼𑀴𑁆𑀳𑀯𑀲𑁂𑀦 𑀳𑀺 𑀢𑀺𑀓𑁆𑀔𑀦𑀸𑀪𑀺𑀢𑀺𑀓𑁆𑀔𑀫𑀼𑀤𑀺𑀦𑁆𑀤𑁆𑀭𑀺𑀬𑀯𑀲𑁂𑀦, 𑀲𑀗𑁆𑀔𑀺𑀢𑁆𑀢𑀫𑀚𑁆𑀛𑀺𑀫𑀯𑀺𑀢𑁆𑀣𑀸𑀭𑀭𑀼𑀘𑀺𑀯𑀲𑁂𑀦 𑀘 𑀢𑀺𑀯𑀺𑀥𑀸 𑀲𑀢𑁆𑀢𑀸. 𑀢𑁂𑀲𑀼 𑀦𑀸𑀫𑀲𑀫𑁆𑀫𑀼𑀴𑁆𑀳𑀸𑀦𑀁 𑀔𑀦𑁆𑀥𑀕𑁆𑀕𑀳𑀡𑀁 𑀦𑀸𑀫𑀲𑁆𑀲 𑀢𑀢𑁆𑀣 𑀘𑀢𑀼𑀥𑀸 𑀯𑀺𑀪𑀢𑁆𑀢𑀢𑁆𑀢𑀸, 𑀭𑀽𑀧𑀲𑀫𑁆𑀫𑀼𑀴𑁆𑀳𑀸𑀦𑀁 𑀆𑀬𑀢𑀦𑀕𑁆𑀕𑀳𑀡𑀁 𑀭𑀽𑀧𑀲𑁆𑀲 𑀢𑀢𑁆𑀣 𑀅𑀟𑁆𑀠𑁂𑀓𑀸𑀤𑀲𑀥𑀸 𑀯𑀺𑀪𑀢𑁆𑀢𑀢𑁆𑀢𑀸, 𑀉𑀪𑀬𑀫𑀼𑀴𑁆𑀳𑀸𑀦𑀁 𑀥𑀸𑀢𑀼𑀕𑁆𑀕𑀳𑀡𑀁 𑀉𑀪𑀬𑁂𑀲𑀫𑁆𑀧𑀺 𑀢𑀢𑁆𑀣 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀢𑁆𑀢𑀸, 𑀢𑀣𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀁, 𑀲𑀗𑁆𑀔𑀺𑀢𑁆𑀢𑀭𑀼𑀘𑀺𑀓𑀸𑀦𑀜𑁆𑀘 𑀔𑀦𑁆𑀥𑀸𑀕𑁆𑀕𑀳𑀡𑀦𑁆𑀢𑁆𑀬𑀸𑀤𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀁 𑀧𑀦𑁂𑀢𑀁 𑀢𑀺𑀯𑀺𑀥𑀫𑁆𑀧𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀼𑀯𑀲𑁂𑀦 𑀤𑀺𑀝𑁆𑀞𑀫𑁂𑀯 𑀉𑀧𑀓𑀸𑀭𑀸𑀯𑀳𑀁. 𑀦𑁄 𑀅𑀜𑁆𑀜𑀣𑀸𑀢𑀺 𑀲𑀘𑁆𑀘𑀕𑁆𑀕𑀳𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀲𑀫𑀼𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.