𑁬. 𑀭𑀽𑀧𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧. 𑀏𑀯𑀁 𑀢𑀸𑀯 𑀘𑀺𑀢𑁆𑀢𑀘𑁂𑀢𑀲𑀺𑀓𑀯𑀲𑁂𑀦 𑀤𑀼𑀯𑀺𑀥𑀁 𑀅𑀪𑀺𑀥𑀫𑁆𑀫𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀭𑀽𑀧𑀁, 𑀢𑀤𑀦𑀦𑁆𑀢𑀭𑀜𑁆𑀘 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀼𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀏𑀢𑁆𑀢𑀸𑀯𑀢𑀸’’𑀢𑁆𑀬𑀸𑀤𑀺. 𑀲𑀧𑁆𑀧𑀪𑁂𑀤𑀧𑁆𑀧𑀯𑀢𑁆𑀢𑀺𑀓𑀸 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀢𑀻𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑀯𑀦𑁆𑀢𑁄, 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀤𑁆𑀯𑀻𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀼𑀢𑁆𑀢𑀧𑁆𑀧𑀯𑀢𑁆𑀢𑀺𑀯𑀦𑁆𑀢𑁄 𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀏𑀢𑁆𑀢𑀸𑀯𑀢𑀸 𑀧𑀜𑁆𑀘𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀺𑀪𑀢𑁆𑀢𑀸 𑀳𑀺 𑀬𑀲𑁆𑀫𑀸, 𑀇𑀤𑀸𑀦𑀺 𑀬𑀣𑀸𑀦𑀼𑀧𑁆𑀧𑀢𑁆𑀢𑀁 𑀭𑀽𑀧𑀁 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑁨. 𑀇𑀤𑀸𑀦𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀭𑀽𑀧𑀯𑀺𑀪𑀸𑀕𑀢𑁆𑀣𑀁 𑀫𑀸𑀢𑀺𑀓𑀁 𑀞𑀧𑁂𑀢𑀼𑀁 ‘‘𑀲𑀫𑀼𑀤𑁆𑀤𑁂𑀲𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀲𑀗𑁆𑀔𑁂𑀧𑀢𑁄 𑀉𑀤𑁆𑀤𑀺𑀲𑀦𑀁 𑀲𑀫𑀼𑀤𑁆𑀤𑁂𑀲𑁄. 𑀏𑀓𑀯𑀺𑀥𑀸𑀤𑀺𑀯𑀲𑁂𑀦 𑀯𑀺𑀪𑀚𑀦𑀁 𑀯𑀺𑀪𑀸𑀕𑁄, 𑀲𑀫𑀼𑀝𑁆𑀞𑀸𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀓𑀫𑁆𑀫𑀸𑀤𑀬𑁄 𑀭𑀽𑀧𑀚𑀦𑀓𑀧𑀘𑁆𑀘𑀬𑀸. 𑀘𑀓𑁆𑀔𑀼𑀤𑀲𑀓𑀸𑀤𑀬𑁄 𑀓𑀮𑀸𑀧𑀸. 𑀧𑀯𑀢𑁆𑀢𑀺𑀓𑁆𑀓𑀫𑀢𑁄 𑀘𑁂𑀢𑀺 𑀪𑀯𑀓𑀸𑀮𑀲𑀢𑁆𑀢𑀪𑁂𑀤𑁂𑀦 𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀢𑁄.

𑀭𑀽𑀧𑀲𑀫𑀼𑀤𑁆𑀤𑁂𑀲𑀯𑀡𑁆𑀡𑀦𑀸

𑁩. 𑀉𑀧𑀸𑀤𑀺𑀦𑁆𑀦𑀸𑀦𑀼𑀧𑀸𑀤𑀺𑀦𑁆𑀦𑀲𑀦𑁆𑀢𑀸𑀦𑁂𑀲𑀼 𑀲𑀲𑀫𑁆𑀪𑀸𑀭𑀥𑀸𑀢𑀼𑀯𑀲𑁂𑀦 𑀫𑀳𑀦𑁆𑀢𑀸 𑀳𑀼𑀢𑁆𑀯𑀸 𑀪𑀽𑀢𑀸 𑀧𑀸𑀢𑀼𑀪𑀽𑀢𑀸𑀢𑀺 𑀫𑀳𑀸𑀪𑀽𑀢𑀸 (𑀥. 𑀲. 𑀅𑀝𑁆𑀞. 𑁫𑁮𑁪). 𑀅𑀣𑀯𑀸 𑀅𑀦𑁂𑀓𑀯𑀺𑀥𑀅𑀩𑁆𑀪𑀼𑀢𑀯𑀺𑀲𑁂𑀲𑀤𑀲𑁆𑀲𑀦𑁂𑀦, 𑀅𑀦𑁂𑀓𑀸𑀪𑀽𑀢𑀤𑀲𑁆𑀲𑀦𑁂𑀦 𑀯𑀸 𑀫𑀳𑀦𑁆𑀢𑀸𑀦𑀺 𑀅𑀩𑁆𑀪𑀼𑀢𑀸𑀦𑀺, 𑀅𑀪𑀽𑀢𑀸𑀦𑀺 𑀯𑀸 𑀏𑀢𑁂𑀲𑀽𑀢𑀺 𑀫𑀳𑀸𑀪𑀽𑀢𑀸, 𑀫𑀸𑀬𑀸𑀓𑀸𑀭𑀸𑀤𑀬𑁄. 𑀢𑁂𑀳𑀺 𑀲𑀫𑀸𑀦𑀸 𑀲𑀬𑀁 𑀅𑀦𑀻𑀮𑀸𑀤𑀺𑀲𑀪𑀸𑀯𑀸𑀦𑁂𑀯 𑀦𑀻𑀮𑀸𑀤𑀺𑀉𑀧𑀸𑀤𑀸𑀬𑀭𑀽𑀧𑀤𑀲𑁆𑀲𑀦𑀸𑀤𑀺𑀢𑁄𑀢𑀺 𑀫𑀳𑀸𑀪𑀽𑀢𑀸. 𑀫𑀦𑀸𑀧𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀳𑀺 𑀯𑀸 𑀲𑀢𑁆𑀢𑀸𑀦𑀁 𑀯𑀜𑁆𑀘𑀺𑀓𑀸 𑀬𑀓𑁆𑀔𑀺𑀦𑀺𑀆𑀤𑀬𑁄 𑀯𑀺𑀬 𑀫𑀦𑀸𑀧𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀲𑀢𑁆𑀢𑀸𑀦𑀁 𑀯𑀜𑁆𑀘𑀓𑀢𑁆𑀢𑀸 𑀫𑀳𑀦𑁆𑀢𑀸𑀦𑀺 𑀅𑀪𑀽𑀢𑀸𑀦𑀺 𑀏𑀢𑁂𑀲𑀽𑀢𑀺 𑀫𑀳𑀸𑀪𑀽𑀢𑀸. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀫𑀳𑀦𑁆𑀢𑀸 𑀧𑀸𑀢𑀼𑀪𑀽𑀢𑀸𑀢𑀺, 𑀫𑀳𑀸𑀪𑀽𑀢𑀲𑀫𑀸𑀢𑀺 𑀯𑀸;

𑀯𑀜𑁆𑀘𑀓𑀢𑁆𑀢𑀸 𑀅𑀪𑀽𑀢𑁂𑀦, ‘𑀫𑀳𑀸𑀪𑀽𑀢𑀸’𑀢𑀺 𑀲𑀫𑁆𑀫𑀢𑀸’’𑀢𑀺. (𑀅𑀪𑀺𑀥. 𑁬𑁨𑁬);

𑀅𑀣 𑀯𑀸 𑀫𑀳𑀦𑁆𑀢𑀧𑀸𑀢𑀼𑀪𑀸𑀯𑀢𑁄 𑀫𑀳𑀦𑁆𑀢𑀸𑀦𑀺 𑀪𑀯𑀦𑁆𑀢𑀺 𑀏𑀢𑁂𑀲𑀼 𑀉𑀧𑀸𑀤𑀸𑀭𑀽𑀧𑀸𑀦𑀺, 𑀪𑀽𑀢𑀸𑀦𑀺 𑀘𑀸𑀢𑀺 𑀫𑀳𑀸𑀪𑀽𑀢𑀸𑀦𑀺. 𑀫𑀳𑀸𑀪𑀽𑀢𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑀁 𑀭𑀽𑀧𑀁 𑀉𑀧𑀸𑀤𑀸𑀬𑀭𑀽𑀧𑀁. 𑀬𑀤𑀺 𑀏𑀯𑀁 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀢𑁄 𑀫𑀳𑀸𑀪𑀽𑀢𑀸’’𑀢𑁆𑀬𑀸𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁧.𑁫𑁩) 𑀏𑀓𑁂𑀓𑀫𑀳𑀸𑀪𑀽𑀢𑀸 𑀲𑁂𑀲𑀫𑀳𑀸𑀪𑀽𑀢𑀸𑀦𑀁 𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺 𑀢𑁂𑀲𑀫𑁆𑀧𑀺 𑀉𑀧𑀸𑀤𑀸𑀬𑀭𑀽𑀧𑀢𑀸𑀧𑀲𑀗𑁆𑀕𑁄𑀢𑀺? 𑀦𑀬𑀺𑀤𑀫𑁂𑀯𑀁 𑀉𑀧𑀸𑀤𑀸𑀬𑁂𑀯 𑀧𑀯𑀢𑁆𑀢𑀭𑀽𑀧𑀸𑀦𑀁 𑀢𑀁𑀲𑀫𑀜𑁆𑀜𑀸𑀲𑀺𑀤𑁆𑀥𑀺𑀢𑁄. 𑀬𑀜𑁆𑀳𑀺 𑀫𑀳𑀸𑀪𑀽𑀢𑁂 𑀉𑀧𑀸𑀤𑀺𑀬𑀢𑀺, 𑀲𑀬𑀜𑁆𑀘 𑀅𑀜𑁆𑀜𑁂𑀳𑀺 𑀉𑀧𑀸𑀤𑀻𑀬𑀢𑀺. 𑀦 𑀢𑀁 𑀉𑀧𑀸𑀤𑀸𑀬𑀭𑀽𑀧𑀁. 𑀬𑀁 𑀧𑀦 𑀉𑀧𑀸𑀤𑀻𑀬𑀢𑁂𑀯, 𑀦 𑀓𑁂𑀦𑀘𑀺 𑀉𑀧𑀸𑀤𑀻𑀬𑀢𑀺, 𑀢𑀤𑁂𑀯 𑀉𑀧𑀸𑀤𑀸𑀬𑀭𑀽𑀧𑀦𑁆𑀢𑀺 𑀦𑀢𑁆𑀣𑀺 𑀪𑀽𑀢𑀸𑀦𑀁 𑀢𑀩𑁆𑀩𑁄𑀳𑀸𑀭𑀧𑁆𑀧𑀲𑀗𑁆𑀕𑁄. 𑀅𑀧𑀺𑀘 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀦𑁆𑀢𑀺 𑀉𑀧𑀸𑀤𑀸𑀬𑀭𑀽𑀧𑀮𑀓𑁆𑀔𑀡𑀦𑁆𑀢𑀺 𑀦𑀢𑁆𑀣𑀺 𑀢𑀬𑁄 𑀉𑀧𑀸𑀤𑀸𑀬 𑀧𑀯𑀢𑁆𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀢𑀸𑀢𑀺.

𑁪. 𑀧𑀣𑀦𑀝𑁆𑀞𑁂𑀦 𑀧𑀣𑀯𑀻, 𑀢𑀭𑀼𑀧𑀩𑁆𑀩𑀢𑀸𑀤𑀻𑀦𑀁 𑀧𑀓𑀢𑀺𑀧𑀣𑀯𑀻 𑀯𑀺𑀬 𑀲𑀳𑀚𑀸𑀢𑀭𑀽𑀧𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀧𑀓𑁆𑀔𑀸𑀬𑀢𑀺, 𑀉𑀧𑀝𑁆𑀞𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀧𑀣𑀯𑀻 𑀏𑀯 𑀥𑀸𑀢𑀼 𑀲𑀮𑀓𑁆𑀔𑀡𑀥𑀸𑀭𑀡𑀸𑀤𑀺𑀢𑁄 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀲𑀭𑀻𑀭𑀲𑁂𑀮𑀸𑀯𑀬𑀯𑀥𑀸𑀢𑀼𑀲𑀤𑀺𑀲𑀢𑁆𑀢𑀸 𑀘𑀸𑀢𑀺 𑀧𑀣𑀯𑀻𑀥𑀸𑀢𑀼. 𑀆𑀧𑁂𑀢𑀺 𑀲𑀳𑀚𑀸𑀢𑀭𑀽𑀧𑀸𑀦𑀺 𑀧𑀢𑁆𑀣𑀭𑀢𑀺, 𑀆𑀧𑀸𑀬𑀢𑀺 𑀯𑀸 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀆𑀧𑁄. 𑀢𑁂𑀚𑁂𑀢𑀺 𑀧𑀭𑀺𑀧𑀸𑀘𑁂𑀢𑀺, 𑀦𑀺𑀲𑁂𑀢𑀺 𑀯𑀸 𑀢𑀺𑀓𑁆𑀔𑀪𑀸𑀯𑁂𑀦 𑀲𑁂𑀲𑀪𑀽𑀢𑀢𑁆𑀢𑀬𑀁 𑀉𑀲𑁆𑀫𑀸𑀧𑁂𑀢𑀻𑀢𑀺 𑀢𑁂𑀚𑁄. 𑀯𑀸𑀬𑀢𑀺 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀪𑀽𑀢𑀲𑀗𑁆𑀖𑀸𑀢𑀁 𑀧𑀸𑀧𑁂𑀢𑀻𑀢𑀺 𑀯𑀸𑀬𑁄. 𑀘𑀢𑀲𑁆𑀲𑁄𑀧𑀺 𑀧𑀦𑁂𑀢𑀸 𑀬𑀣𑀸𑀓𑁆𑀓𑀫𑀁 𑀓𑀣𑀺𑀦𑀢𑁆𑀢𑀤𑀯𑀢𑁆𑀢𑀉𑀡𑁆𑀳𑀢𑁆𑀢𑀯𑀺𑀢𑁆𑀣𑀫𑁆𑀪𑀦𑀢𑁆𑀢𑀮𑀓𑁆𑀔𑀡𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁫. 𑀘𑀓𑁆𑀔𑀸𑀤𑀻𑀦𑀁 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀓𑀣𑀺𑀢𑁄𑀯. 𑀧𑀲𑀸𑀤𑀭𑀽𑀧𑀁 𑀦𑀸𑀫 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀧𑀲𑀦𑁆𑀦𑀪𑀸𑀯𑀳𑁂𑀢𑀼𑀓𑀢𑁆𑀢𑀸. 𑀢𑀁 𑀧𑀦 𑀬𑀣𑀸𑀓𑁆𑀓𑀫𑀁 𑀤𑀝𑁆𑀞𑀼𑀓𑀸𑀫𑀢𑀸𑀲𑁄𑀢𑀼𑀓𑀸𑀫𑀢𑀸𑀖𑀸𑀬𑀺𑀢𑀼𑀓𑀸𑀫𑀢𑀸𑀲𑀸𑀬𑀺𑀢𑀼𑀓𑀸𑀫𑀢𑀸𑀨𑀼𑀲𑀺𑀢𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁. 𑀢𑀢𑁆𑀣 𑀘𑀓𑁆𑀔𑀼 𑀢𑀸𑀯 𑀫𑀚𑁆𑀛𑁂 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀊𑀓𑀸𑀲𑀺𑀭𑀧𑁆𑀧𑀫𑀸𑀡𑁂 𑀅𑀪𑀺𑀫𑀼𑀔𑁂 𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀧𑀤𑁂𑀲𑁂 𑀢𑁂𑀮𑀫𑀺𑀯 𑀧𑀺𑀘𑀼𑀧𑀝𑀮𑀸𑀦𑀺 𑀲𑀢𑁆𑀢𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀥𑀸𑀭𑀡𑀦𑀳𑀸𑀧𑀦𑀫𑀡𑁆𑀟𑀦𑀩𑀻𑀚𑀦𑀓𑀺𑀘𑁆𑀘𑀸𑀳𑀺 𑀘𑀢𑀽𑀳𑀺 𑀥𑀸𑀢𑀻𑀳𑀺 𑀯𑀺𑀬 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀲𑀦𑁆𑀥𑀸𑀭𑀡𑀩𑀦𑁆𑀥𑀦𑀧𑀭𑀺𑀧𑀸𑀘𑀦𑀲𑀫𑀼𑀤𑀻𑀭𑀡𑀓𑀺𑀘𑁆𑀘𑀸𑀳𑀺 𑀘𑀢𑀽𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀆𑀬𑀼𑀦𑀸 𑀧𑀭𑀺𑀧𑀸𑀮𑀺𑀬𑀫𑀸𑀦𑀁 𑀯𑀡𑁆𑀡𑀸𑀤𑀻𑀳𑀺 𑀧𑀭𑀺𑀯𑀸𑀭𑀺𑀢𑀁 𑀬𑀣𑀸𑀬𑁄𑀕𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀥𑁂𑀦𑁆𑀢𑀁 𑀧𑀯𑀢𑁆𑀢𑀢𑀺, 𑀇𑀢𑀭𑀁 ‘‘𑀲𑀲𑀫𑁆𑀪𑀸𑀭𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀲𑁄𑀢𑀸𑀤𑀬𑁄𑀧𑀺 𑀬𑀣𑀸𑀓𑁆𑀓𑀫𑀁 𑀲𑁄𑀢𑀩𑀺𑀮𑀩𑁆𑀪𑀦𑁆𑀢𑀭𑁂 𑀅𑀗𑁆𑀕𑀼𑀮𑀺𑀯𑁂𑀥𑀦𑀸𑀓𑀸𑀭𑀁 𑀉𑀧𑀘𑀺𑀢𑀢𑀦𑀼𑀢𑀫𑁆𑀩𑀮𑁄𑀫𑀁, 𑀦𑀸𑀲𑀺𑀓𑀩𑁆𑀪𑀦𑁆𑀢𑀭𑁂 𑀅𑀚𑀧𑀤𑀲𑀡𑁆𑀞𑀸𑀦𑀁, 𑀚𑀺𑀯𑁆𑀳𑀸𑀫𑀚𑁆𑀛𑁂 𑀉𑀧𑁆𑀧𑀮𑀤𑀮𑀕𑁆𑀕𑀲𑀡𑁆𑀞𑀸𑀦𑀁 𑀧𑀤𑁂𑀲𑀁 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀇𑀢𑀭𑀁 𑀧𑀦 𑀞𑀧𑁂𑀢𑁆𑀯𑀸 𑀓𑀫𑁆𑀫𑀚𑀢𑁂𑀚𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀓𑁂𑀲𑀕𑁆𑀕𑀮𑁄𑀫𑀕𑁆𑀕𑀦𑀔𑀕𑁆𑀕𑀲𑀼𑀓𑁆𑀔𑀘𑀫𑁆𑀫𑀸𑀦𑀺 𑀘 𑀅𑀯𑀲𑁂𑀲𑀁 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀢𑀭𑁂𑀳𑀺 𑀢𑀲𑁆𑀲 𑀲𑀗𑁆𑀓𑀭𑁄 𑀦 𑀳𑁄𑀢𑀺 𑀪𑀺𑀦𑁆𑀦𑀦𑀺𑀲𑁆𑀲𑀬𑀮𑀓𑁆𑀔𑀡𑀢𑁆𑀢𑀸. 𑀏𑀓𑀦𑀺𑀲𑁆𑀲𑀬𑀸𑀦𑀺𑀧𑀺 𑀳𑀺 𑀭𑀽𑀧𑀭𑀲𑀸𑀤𑀻𑀦𑀺 𑀮𑀓𑁆𑀔𑀡𑀪𑁂𑀤𑀢𑁄 𑀅𑀲𑀁𑀓𑀺𑀡𑁆𑀡𑀸𑀢𑀺 𑀓𑀺𑀁 𑀧𑀦 𑀪𑀺𑀦𑁆𑀦𑀦𑀺𑀲𑁆𑀲𑀬𑀸 𑀧𑀲𑀸𑀤𑀸.

𑁬. 𑀆𑀧𑁄𑀥𑀸𑀢𑀼𑀬𑀸 𑀲𑀼𑀔𑀼𑀫𑀪𑀸𑀯𑁂𑀦 𑀨𑀼𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀆𑀧𑁄𑀥𑀸𑀢𑀼 𑀯𑀺𑀯𑀚𑁆𑀚𑀺𑀢𑀁 𑀪𑀽𑀢𑀢𑁆𑀢𑀬𑀲𑀗𑁆𑀔𑀸𑀢’’𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀻𑀢𑀢𑀸 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀺, 𑀲𑀸 𑀧𑀦 𑀢𑁂𑀚𑁄𑀬𑁂𑀯. 𑀫𑀦𑁆𑀤𑁂 𑀳𑀺 𑀉𑀡𑁆𑀳𑀢𑁆𑀢𑁂 𑀲𑀻𑀢𑀩𑀼𑀤𑁆𑀥𑀺 𑀲𑀻𑀢𑀢𑀸𑀲𑀗𑁆𑀔𑀸𑀢𑀲𑁆𑀲 𑀓𑀲𑁆𑀲𑀘𑀺 𑀕𑀼𑀡𑀲𑁆𑀲 𑀅𑀪𑀸𑀯𑀢𑁄. 𑀢𑀬𑀺𑀤𑀁 𑀲𑀻𑀢𑀩𑀼𑀤𑁆𑀥𑀺𑀬𑀸 𑀅𑀦𑀯𑀝𑁆𑀞𑀺𑀢𑀪𑀸𑀯𑀢𑁄 𑀯𑀺𑀜𑁆𑀜𑀸𑀬𑀢𑀺 𑀧𑀸𑀭𑀸𑀧𑀸𑀭𑁂 𑀯𑀺𑀬. 𑀢𑀣𑀸 𑀳𑀺 𑀖𑀫𑁆𑀫𑀓𑀸𑀮𑁂 𑀆𑀢𑀧𑁂 𑀞𑀢𑁆𑀯𑀸 𑀙𑀸𑀬𑀁 𑀧𑀯𑀺𑀝𑁆𑀞𑀸𑀦𑀁 𑀲𑀻𑀢𑀩𑀼𑀤𑁆𑀥𑀺 𑀳𑁄𑀢𑀺, 𑀢𑀢𑁆𑀣𑁂𑀯 𑀘𑀺𑀭𑀓𑀸𑀮𑀁 𑀞𑀺𑀢𑀸𑀦𑀁 𑀉𑀡𑁆𑀳𑀩𑀼𑀤𑁆𑀥𑀺. 𑀬𑀤𑀺 𑀘 𑀆𑀧𑁄𑀥𑀸𑀢𑀼 𑀲𑀻𑀢𑀢𑀸 𑀲𑀺𑀬𑀸, 𑀉𑀡𑁆𑀳𑀪𑀸𑀯𑁂𑀦 𑀲𑀳 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀉𑀧𑀮𑀩𑁆𑀪𑁂𑀬𑁆𑀬, 𑀦 𑀘𑁂𑀯𑀁 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 ‘‘𑀦 𑀆𑀧𑁄𑀥𑀸𑀢𑀼 𑀲𑀻𑀢𑀢𑀸’’𑀢𑀺. 𑀬𑁂 𑀧𑀦 ‘‘𑀤𑀯𑀢𑀸 𑀆𑀧𑁄𑀥𑀸𑀢𑀼, 𑀲𑀸 𑀘 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀤𑀯𑀢𑀸 𑀦𑀸𑀫 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀇𑀤𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀪𑀺𑀫𑀸𑀦𑀫𑀢𑁆𑀢𑀁 𑀲𑀡𑁆𑀞𑀸𑀦𑁂 𑀯𑀺𑀬𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀤𑀯𑀢𑀸𑀲𑀳𑀯𑀼𑀢𑁆𑀢𑀻𑀦𑀺, 𑀢𑀻𑀡𑀺 𑀪𑀽𑀢𑀸𑀦𑀺 𑀲𑀫𑁆𑀨𑀼𑀲𑀁;

𑀤𑀯𑀢𑀁 𑀲𑀫𑁆𑀨𑀼𑀲𑀸𑀫𑀻𑀢𑀺, 𑀮𑁄𑀓𑁄𑀬𑀫𑀪𑀺𑀫𑀜𑁆𑀜𑀢𑀺.

‘‘𑀪𑀽𑀢𑁂 𑀨𑀼𑀲𑀺𑀢𑁆𑀯𑀸 𑀲𑀡𑁆𑀞𑀸𑀦𑀁, 𑀫𑀦𑀲𑀸 𑀕𑀡𑁆𑀳𑀢𑁄 𑀬𑀣𑀸;

𑀧𑀘𑁆𑀘𑀓𑁆𑀔𑀢𑁄 𑀨𑀼𑀲𑀸𑀫𑀻𑀢𑀺, 𑀯𑀺𑀜𑁆𑀜𑁂𑀬𑁆𑀬𑀸 𑀤𑀯𑀢𑀸 𑀢𑀣𑀸’’𑀢𑀺.

𑀕𑁄𑀘𑀭𑀭𑀽𑀧𑀁 𑀦𑀸𑀫 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀺𑀲𑀬𑀪𑀸𑀯𑀢𑁄. 𑀕𑀸𑀯𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑀦𑁆𑀢𑀺 𑀳𑀺 𑀆𑀭𑀫𑁆𑀫𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀁 𑀧𑀦𑁂𑀢𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀕𑁄𑀘𑀭𑀪𑀸𑀯𑀮𑀓𑁆𑀔𑀡𑀁, 𑀘𑀓𑁆𑀔𑀸𑀤𑀺𑀧𑀝𑀺𑀳𑀦𑀦𑀮𑀓𑁆𑀔𑀡𑀁 𑀯𑀸.

𑁭. 𑀇𑀢𑁆𑀣𑀺𑀬𑀸 𑀪𑀸𑀯𑁄 𑀇𑀢𑁆𑀣𑀢𑁆𑀢𑀁 (𑀥. 𑀲. 𑀅𑀝𑁆𑀞. 𑁬𑁩𑁨). 𑀧𑀼𑀭𑀺𑀲𑀲𑁆𑀲 𑀪𑀸𑀯𑁄 𑀧𑀼𑀭𑀺𑀲𑀢𑁆𑀢𑀁. 𑀢𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀳𑁂𑀢𑀼𑀪𑀸𑀯𑀮𑀓𑁆𑀔𑀡𑀁 𑀇𑀢𑁆𑀣𑀢𑁆𑀢𑀁, 𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺𑀳𑁂𑀢𑀼𑀪𑀸𑀯𑀮𑀓𑁆𑀔𑀡𑀁 𑀧𑀼𑀭𑀺𑀲𑀢𑁆𑀢𑀁. 𑀢𑀢𑁆𑀣 𑀇𑀢𑁆𑀣𑀻𑀦𑀁 𑀅𑀗𑁆𑀕𑀚𑀸𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀲𑀭𑀸𑀥𑀺𑀧𑁆𑀧𑀸𑀬𑀸 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 ‘‘𑀇𑀢𑁆𑀣𑀻’’𑀢𑀺 𑀲𑀜𑁆𑀚𑀸𑀦𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄. 𑀅𑀯𑀺𑀲𑀤𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀤𑀺 𑀇𑀢𑁆𑀣𑀺𑀓𑀼𑀢𑁆𑀢𑀁. 𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀇𑀢𑁆𑀣𑀸𑀓𑀧𑁆𑀧𑁄. 𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀻𑀦𑀺𑀧𑀺 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀜𑁆𑀜𑀣𑀸 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀯𑀡𑁆𑀡𑀺𑀢𑀸𑀦𑀺. 𑀢𑀁 𑀧𑀦 𑀏𑀯𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺 𑁋

‘‘𑀮𑀺𑀗𑁆𑀕𑀁 𑀳𑀢𑁆𑀣𑀸𑀤𑀺𑀲𑀡𑁆𑀞𑀸𑀦𑀁, 𑀦𑀺𑀫𑀺𑀢𑁆𑀢𑀁 𑀫𑀺𑀳𑀺𑀢𑀸𑀤𑀺𑀓𑀁;

𑀓𑀼𑀢𑁆𑀢𑀁 𑀲𑀼𑀧𑁆𑀧𑀸𑀤𑀺𑀦𑀸 𑀓𑀻𑀴𑀸, 𑀆𑀓𑀧𑁆𑀧𑁄 𑀕𑀫𑀦𑀸𑀤𑀺𑀓’’𑀦𑁆𑀢𑀺.

𑀪𑀸𑀯𑀭𑀽𑀧𑀁 𑀦𑀸𑀫 𑀪𑀯𑀢𑀺 𑀏𑀢𑁂𑀦 𑀇𑀢𑁆𑀣𑀸𑀤𑀺𑀅𑀪𑀺𑀥𑀸𑀦𑀁, 𑀩𑀼𑀤𑁆𑀥𑀺 𑀘𑀸𑀢𑀺 𑀓𑀢𑁆𑀯𑀸. 𑀢𑀁 𑀧𑀦𑁂𑀢𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺.

𑁮. 𑀳𑀤𑀬𑀫𑁂𑀯 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀲𑁆𑀲𑀬𑀢𑁆𑀢𑀸 𑀯𑀢𑁆𑀣𑀼 𑀘𑀸𑀢𑀺 𑀳𑀤𑀬𑀯𑀢𑁆𑀣𑀼. 𑀢𑀣𑀸 𑀳𑀺 𑀢𑀁 𑀥𑀸𑀢𑀼𑀤𑁆𑀯𑀬𑀦𑀺𑀲𑁆𑀲𑀬𑀪𑀸𑀯𑀮𑀓𑁆𑀔𑀡𑀁, 𑀢𑀜𑁆𑀘 𑀳𑀤𑀬𑀓𑁄𑀲𑀩𑁆𑀪𑀦𑁆𑀢𑀭𑁂 𑀅𑀟𑁆𑀠𑀧𑀲𑀢𑀫𑀢𑁆𑀢𑀁 𑀮𑁄𑀳𑀺𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺. 𑀭𑀽𑀧𑀓𑀡𑁆𑀟𑁂 𑀅𑀯𑀼𑀢𑁆𑀢𑀲𑁆𑀲𑀧𑀺 𑀧𑀦𑁂𑀢𑀲𑁆𑀲 𑀆𑀕𑀫𑀢𑁄, 𑀬𑀼𑀢𑁆𑀢𑀺𑀢𑁄 𑀘 𑀅𑀢𑁆𑀣𑀺𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣, 𑀢𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺 ‘‘𑀬𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁮) 𑀏𑀯𑀫𑀸𑀕𑀢𑀁 𑀧𑀝𑁆𑀞𑀸𑀦𑀯𑀘𑀦𑀁 𑀆𑀕𑀫𑁄. 𑀬𑀼𑀢𑁆𑀢𑀺 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀸 𑁋

‘‘𑀦𑀺𑀧𑁆𑀨𑀦𑁆𑀦𑀪𑀽𑀢𑀺𑀓𑀸𑀥𑀸𑀭𑀸, 𑀤𑁆𑀯𑁂 𑀥𑀸𑀢𑀽 𑀓𑀸𑀫𑀭𑀽𑀧𑀺𑀦𑀁;

𑀭𑀽𑀧𑀸𑀦𑀼𑀩𑀦𑁆𑀥𑀯𑀼𑀢𑁆𑀢𑀺𑀢𑁆𑀢𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀯𑀺𑀬.

‘‘𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑁂𑀢𑀸, 𑀢𑀲𑁆𑀲𑀜𑁆𑀜𑀸𑀥𑀸𑀭𑀪𑀸𑀯𑀢𑁄;

𑀦𑀸𑀧𑀺 𑀭𑀽𑀧𑀸𑀤𑀺𑀓𑁂 𑀢𑁂𑀲𑀁, 𑀩𑀳𑀺𑀤𑁆𑀥𑀸𑀧𑀺 𑀧𑀯𑀢𑁆𑀢𑀺𑀢𑁄.

‘‘𑀦 𑀘𑀸𑀧𑀺 𑀚𑀻𑀯𑀺𑀢𑀁 𑀢𑀲𑁆𑀲, 𑀓𑀺𑀘𑁆𑀘𑀦𑁆𑀢𑀭𑀦𑀺𑀬𑀼𑀢𑁆𑀢𑀺𑀢𑁄;

𑀦 𑀘 𑀪𑀸𑀯𑀤𑁆𑀯𑀬𑀁 𑀢𑀲𑁆𑀫𑀺𑀁, 𑀅𑀲𑀦𑁆𑀢𑁂𑀧𑀺 𑀧𑀯𑀢𑁆𑀢𑀺𑀢𑁄.

‘‘𑀢𑀲𑁆𑀫𑀸 𑀢𑀤𑀜𑁆𑀜𑀁 𑀯𑀢𑁆𑀣𑀼 𑀢𑀁, 𑀪𑀽𑀢𑀺𑀓𑀦𑁆𑀢𑀺 𑀯𑀺𑀚𑀸𑀦𑀺𑀬𑀁;

𑀯𑀢𑁆𑀣𑀸𑀮𑀫𑁆𑀩𑀤𑀼𑀓𑀸𑀦𑀦𑁆𑀢𑀼, 𑀤𑁂𑀲𑀦𑀸𑀪𑁂𑀤𑀢𑁄 𑀇𑀤𑀁;

𑀥𑀫𑁆𑀫𑀲𑀗𑁆𑀕𑀡𑀺𑀧𑀸𑀞𑀲𑁆𑀫𑀺𑀁, 𑀦 𑀅𑀓𑁆𑀔𑀸𑀢𑀁 𑀫𑀳𑁂𑀲𑀺𑀦𑀸’’𑀢𑀺.

𑁯. 𑀚𑀻𑀯𑀦𑁆𑀢𑀺 𑀢𑁂𑀦𑀸𑀢𑀺 𑀚𑀻𑀯𑀺𑀢𑀁, 𑀢𑀤𑁂𑀯 𑀓𑀫𑁆𑀫𑀚𑀭𑀽𑀧𑀧𑀭𑀺𑀧𑀸𑀮𑀦𑁂 𑀆𑀥𑀺𑀧𑀘𑁆𑀘𑀬𑁄𑀕𑀢𑁄 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀣𑀸 𑀳𑁂𑀢𑀁 𑀓𑀫𑁆𑀫𑀚𑀭𑀽𑀧𑀧𑀭𑀺𑀧𑀸𑀮𑀦𑀮𑀓𑁆𑀔𑀡𑀁. 𑀬𑀣𑀸𑀲𑀓𑀁 𑀔𑀡𑀫𑀢𑁆𑀢𑀝𑁆𑀞𑀸𑀬𑀻𑀦𑀫𑁆𑀧𑀺 𑀳𑀺 𑀲𑀳𑀚𑀸𑀢𑀸𑀦𑀁 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦𑁂𑀯 𑀅𑀦𑀼𑀧𑀸𑀮𑀓𑀁. 𑀦 𑀳𑀺 𑀢𑁂𑀲𑀁 𑀓𑀫𑁆𑀫𑀁𑀬𑁂𑀯 𑀞𑀺𑀢𑀺𑀓𑀸𑀭𑀡𑀁 𑀳𑁄𑀢𑀺 𑀆𑀳𑀸𑀭𑀚𑀸𑀤𑀻𑀦𑀁 𑀆𑀳𑀸𑀭𑀸𑀤𑀺 𑀯𑀺𑀬 𑀓𑀫𑁆𑀫𑀲𑁆𑀲 𑀢𑀗𑁆𑀔𑀡𑀸𑀪𑀸𑀯𑀢𑁄. 𑀇𑀤𑀁 𑀧𑀦 𑀲𑀳 𑀧𑀸𑀘𑀦𑀕𑁆𑀕𑀺𑀦𑀸 𑀅𑀦𑀯𑀲𑁂𑀲𑀉𑀧𑀸𑀤𑀺𑀦𑁆𑀦𑀓𑀸𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺.

𑁧𑁦. 𑀓𑀩𑀴𑀁 𑀓𑀢𑁆𑀯𑀸 𑀅𑀚𑁆𑀛𑁄𑀳𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀇𑀤𑀜𑁆𑀘 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀆𑀳𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑁂𑀦𑁆𑀤𑁆𑀭𑀺𑀬𑀓𑀸𑀬𑁄𑀧𑀢𑁆𑀣𑀫𑁆𑀪𑀦𑀳𑁂𑀢𑀼𑀪𑀽𑀢𑀸 𑀧𑀦 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀻 𑀭𑀲𑀳𑀭𑀲𑀗𑁆𑀔𑀸𑀢𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀸𑀳𑀸𑀭𑀲𑀺𑀦𑁂𑀳𑀪𑀽𑀢𑀸 𑀑𑀚𑀸 𑀇𑀥 𑀆𑀳𑀸𑀭𑀭𑀽𑀧𑀁 𑀦𑀸𑀫. 𑀢𑀣𑀸 𑀳𑁂𑀢𑀁 𑀲𑁂𑀦𑁆𑀤𑁆𑀭𑀺𑀬𑀓𑀸𑀬𑁄𑀧𑀢𑁆𑀣𑀫𑁆𑀪𑀦𑀳𑁂𑀢𑀼𑀪𑀸𑀯𑀮𑀓𑁆𑀔𑀡𑀁, 𑀑𑀚𑀝𑁆𑀞𑀫𑀓𑀭𑀽𑀧𑀸𑀳𑀭𑀡𑀮𑀓𑁆𑀔𑀡𑀁 𑀯𑀸.

𑁧𑁧. 𑀓𑀓𑁆𑀔𑀴𑀢𑁆𑀢𑀸𑀤𑀺𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀦𑀢𑁄 𑀲𑀪𑀸𑀯𑀭𑀽𑀧𑀁 𑀦𑀸𑀫. 𑀉𑀧𑁆𑀧𑀸𑀤𑀸𑀤𑀻𑀳𑀺, 𑀅𑀦𑀺𑀘𑁆𑀘𑀢𑀸𑀤𑀻𑀳𑀺 𑀯𑀸 𑀮𑀓𑁆𑀔𑀡𑁂𑀳𑀺 𑀲𑀳𑀺𑀢𑀦𑁆𑀢𑀺 𑀲𑀮𑀓𑁆𑀔𑀡𑀁. 𑀧𑀭𑀺𑀘𑁆𑀙𑁂𑀤𑀸𑀤𑀺𑀪𑀸𑀯𑀁 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀓𑀫𑁆𑀫𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀦𑀺𑀧𑁆𑀨𑀭𑀽𑀧𑀁 𑀦𑀸𑀫. 𑀭𑀼𑀧𑁆𑀧𑀦𑀲𑀪𑀸𑀯𑁄 𑀭𑀽𑀧𑀁, 𑀢𑁂𑀦 𑀬𑀼𑀢𑁆𑀢𑀫𑁆𑀧𑀺 𑀭𑀽𑀧𑀁, 𑀬𑀣𑀸 ‘‘𑀅𑀭𑀺𑀲𑀲𑁄, 𑀦𑀻𑀮𑀼𑀧𑁆𑀧𑀮’’𑀦𑁆𑀢𑀺, 𑀲𑁆𑀯𑀸𑀬𑀁 𑀭𑀽𑀧-𑀲𑀤𑁆𑀤𑁄 𑀭𑀼𑀴𑁆𑀳𑀺𑀬𑀸 𑀅𑀢𑀁𑀲𑀪𑀸𑀯𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀅𑀧𑀭𑁂𑀦 𑀭𑀽𑀧-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀭𑀽𑀧𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀸𑀤𑀺𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀯𑁂𑀦𑁂𑀯 𑀉𑀧𑀮𑀩𑁆𑀪𑀦𑀢𑁄 𑀮𑀓𑁆𑀔𑀡𑀢𑁆𑀢𑀬𑀸𑀭𑁄𑀧𑀦𑁂𑀦 𑀲𑀫𑁆𑀫𑀲𑀺𑀢𑀼𑀁 𑀅𑀭𑀳𑀢𑁆𑀢𑀸 𑀲𑀫𑁆𑀫𑀲𑀦𑀭𑀽𑀧𑀁.

𑁧𑁨. 𑀦 𑀓𑀲𑁆𑀲𑀢𑀻𑀢𑀺 𑀅𑀓𑀸𑀲𑁄. 𑀅𑀓𑀸𑀲𑁄𑀬𑁂𑀯 𑀆𑀓𑀸𑀲𑁄, 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀼 𑀘𑀸𑀢𑀺 𑀆𑀓𑀸𑀲𑀥𑀸𑀢𑀼. 𑀘𑀓𑁆𑀔𑀼𑀤𑀲𑀓𑀸𑀤𑀺𑀏𑀓𑁂𑀓𑀓𑀮𑀸𑀧𑀕𑀢𑀭𑀽𑀧𑀸𑀦𑀁 𑀓𑀮𑀸𑀧𑀦𑁆𑀢𑀭𑁂𑀳𑀺 𑀅𑀲𑀁𑀓𑀺𑀡𑁆𑀡𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀓𑀁, 𑀢𑁂𑀳𑀺 𑀯𑀸 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑀁, 𑀢𑁂𑀲𑀁 𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀁 𑀯𑀸 𑀭𑀽𑀧𑀁 𑀧𑀭𑀺𑀘𑁆𑀙𑁂𑀤𑀭𑀽𑀧𑀁. 𑀢𑀜𑁆𑀳𑀺 𑀢𑀁 𑀢𑀁 𑀭𑀽𑀧𑀓𑀮𑀸𑀧𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀁 𑀯𑀺𑀬 𑀳𑁄𑀢𑀺. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀘 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀲𑀫𑁆𑀨𑀼𑀝𑁆𑀞𑀪𑀸𑀯𑁂 𑀢𑀁𑀢𑀁𑀭𑀽𑀧𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀧𑀭𑀺𑀬𑀦𑁆𑀢𑁄 𑀆𑀓𑀸𑀲𑁄. 𑀬𑁂𑀲𑀜𑁆𑀘 𑀲𑁄 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀲𑀬𑀁 𑀅𑀲𑀫𑁆𑀨𑀼𑀝𑁆𑀞𑁄𑀬𑁂𑀯. 𑀅𑀜𑁆𑀜𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀦 𑀲𑀺𑀬𑀸 𑀢𑁂𑀲𑀁 𑀭𑀽𑀧𑀸𑀦𑀁 𑀩𑁆𑀬𑀸𑀧𑀻𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀩𑁆𑀬𑀸𑀧𑀺𑀢𑀸 𑀳𑀺 𑀅𑀲𑀫𑁆𑀨𑀼𑀝𑁆𑀞𑀢𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻’’𑀢𑀺 (𑀥. 𑀲. 𑁬𑁩𑁭).

𑁧𑁩. 𑀘𑀮𑀫𑀸𑀦𑀓𑀸𑀬𑁂𑀦 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀲𑀬𑀜𑁆𑀘 𑀢𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀲𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑀲𑀗𑁆𑀔𑀸𑀢𑀯𑀸𑀘𑀸𑀬 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀲𑀬𑀜𑁆𑀘 𑀢𑀸𑀬 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀢𑀢𑁆𑀣 𑀅𑀪𑀺𑀓𑁆𑀓𑀫𑀸𑀤𑀺𑀚𑀦𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀬𑀸 𑀲𑀳𑀚𑀸𑀢𑀭𑀽𑀧𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀺𑀢𑁂𑀲𑀼 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑁄 𑀨𑀦𑁆𑀤𑀫𑀸𑀦𑀓𑀸𑀬𑀨𑀦𑁆𑀤𑀦𑀢𑀁𑀳𑁂𑀢𑀼𑀓𑀯𑀸𑀬𑁄𑀥𑀸𑀢𑀼𑀯𑀺𑀦𑀺𑀫𑀼𑀢𑁆𑀢𑁄 𑀫𑀳𑀦𑁆𑀢𑀁 𑀧𑀸𑀲𑀸𑀡𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀲𑀩𑁆𑀩𑀣𑀸𑀫𑁂𑀦 𑀕𑀳𑀡𑀓𑀸𑀮𑁂 𑀉𑀲𑁆𑀲𑀸𑀳𑀦𑀯𑀺𑀓𑀸𑀭𑁄 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲 𑀧𑀭𑀺𑀨𑀦𑁆𑀤𑀦𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑁄 𑀯𑀺𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀲𑀸 𑀳𑀺 𑀨𑀦𑁆𑀤𑀫𑀸𑀦𑀓𑀸𑀬𑁂𑀦 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺. 𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀭𑀳𑀺𑀢𑁂𑀲𑀼 𑀭𑀼𑀓𑁆𑀔𑀘𑀮𑀦𑀸𑀤𑀻𑀲𑀼 ‘‘𑀇𑀤𑀫𑁂𑀲 𑀓𑀸𑀭𑁂𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀁 𑀤𑀺𑀝𑁆𑀞𑀦𑁆𑀢𑀺. 𑀳𑀢𑁆𑀣𑀘𑀮𑀦𑀸𑀤𑀻𑀲𑀼 𑀘 𑀨𑀦𑁆𑀤𑀫𑀸𑀦𑀓𑀸𑀬𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑁂𑀳𑀺 𑀫𑀦𑁄𑀤𑁆𑀯𑀸𑀭𑀚𑀯𑀦𑁂𑀳𑀺 𑀕𑀬𑁆𑀳𑀫𑀸𑀦𑀢𑁆𑀢𑀸 𑀲𑀬𑀜𑁆𑀘 𑀓𑀸𑀬𑁂𑀦 𑀯𑀺𑀜𑁆𑀜𑀸𑀬𑀢𑀺.

𑀓𑀣𑀁 𑀧𑀦 𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀳𑀢𑁆𑀣𑀘𑀮𑀦𑀸𑀤𑀬𑁄 𑀳𑁄𑀦𑁆𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀚𑀯𑀦𑁂𑀲𑀼 𑀲𑀢𑁆𑀢𑀫𑀚𑀯𑀦𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀯 𑀧𑀞𑀫𑀚𑀯𑀦𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀳𑀺 𑀯𑀸𑀬𑁄𑀥𑀸𑀢𑀽𑀳𑀺 𑀮𑀤𑁆𑀥𑁄𑀧𑀢𑁆𑀣𑀫𑁆𑀪𑀸 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀘𑀮𑀬𑀢𑀺 𑀘𑀺𑀢𑁆𑀢𑀚𑀁, 𑀧𑀼𑀭𑀺𑀫𑀚𑀯𑀦𑀸𑀤𑀺𑀲𑀫𑁆𑀪𑀽𑀢𑀸 𑀧𑀦 𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀫𑀢𑁆𑀢𑀓𑀭𑀸 𑀢𑀲𑁆𑀲 𑀉𑀧𑀓𑀸𑀭𑀸𑀬 𑀳𑁄𑀦𑁆𑀢𑀻𑀢𑀺. 𑀬𑀣𑀸 𑀳𑀺 𑀲𑀢𑁆𑀢𑀳𑀺 𑀬𑀼𑀕𑁂𑀳𑀺 𑀆𑀓𑀟𑁆𑀠𑀺𑀢𑀩𑁆𑀩𑀲𑀓𑀝𑁂 𑀲𑀢𑁆𑀢𑀫𑀬𑀼𑀕𑀬𑀼𑀢𑁆𑀢𑀸𑀬𑁂𑀯 𑀕𑁄𑀡𑀸 𑀳𑁂𑀝𑁆𑀞𑀸 𑀙𑀲𑀼 𑀬𑀼𑀕𑁂𑀲𑀼 𑀬𑀼𑀢𑁆𑀢𑀕𑁄𑀡𑁂𑀳𑀺 𑀮𑀤𑁆𑀥𑀽𑀧𑀢𑁆𑀣𑀫𑁆𑀪𑀸 𑀲𑀓𑀝𑀁 𑀘𑀸𑀮𑁂𑀦𑁆𑀢𑀺, 𑀧𑀞𑀫𑀬𑀼𑀕𑀸𑀤𑀺𑀬𑀼𑀢𑁆𑀢𑀸 𑀧𑀦 𑀉𑀧𑀢𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀫𑀢𑁆𑀢𑀫𑁂𑀯 𑀲𑀸𑀥𑁂𑀦𑁆𑀢𑀸 𑀢𑁂𑀲𑀁 𑀉𑀧𑀓𑀸𑀭𑀸𑀬 𑀳𑁄𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑁂𑀯 𑀘𑁂𑀢𑁆𑀣 𑀘𑀮𑀦𑀁 𑀉𑀧𑁆𑀧𑀦𑁆𑀦𑀤𑁂𑀲𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀥𑀫𑁆𑀫𑀸𑀦𑀁 𑀲𑀗𑁆𑀓𑀫𑀦𑀸𑀪𑀸𑀯𑀢𑁄. 𑀇𑀢𑀭𑀣𑀸 𑀦𑁂𑀲𑀁 𑀅𑀩𑁆𑀬𑀸𑀧𑀸𑀭𑀓𑀢𑀸, 𑀔𑀡𑀺𑀓𑀢𑀸 𑀘 𑀦 𑀲𑀺𑀬𑀸. 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄𑀢𑀺 𑀘 𑀬𑀣𑀸 𑀅𑀢𑁆𑀢𑀦𑀸 𑀲𑀳𑀚𑀭𑀽𑀧𑀸𑀦𑀺 𑀳𑁂𑀝𑁆𑀞𑀺𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀭𑀽𑀧𑁂𑀳𑀺 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀢𑁂𑀳𑀺 𑀲𑀳 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀏𑀢𑁆𑀣 𑀧𑀦 𑀘𑀺𑀢𑁆𑀢𑀚𑁂 𑀘𑀮𑀺𑀢𑁂 𑀢𑀁𑀲𑀫𑁆𑀩𑀦𑁆𑀥𑁂𑀦 𑀇𑀢𑀭𑀫𑁆𑀧𑀺 𑀘𑀮𑀢𑀺 𑀦𑀤𑀻𑀲𑁄𑀢𑁂 𑀧𑀓𑁆𑀔𑀺𑀢𑁆𑀢𑀲𑀼𑀓𑁆𑀔𑀕𑁄𑀫𑀬𑀧𑀺𑀡𑁆𑀟𑀁 𑀯𑀺𑀬. 𑀢𑀣𑀸 𑀘𑀮𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺 𑀬𑁄𑀧𑀺 𑀧𑀞𑀫𑀚𑀯𑀦𑀸𑀤𑀺𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀬𑁄 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀬𑁂𑀯 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀅𑀬𑀁 𑀅𑀪𑀺𑀓𑁆𑀓𑀫𑀸𑀤𑀻𑀦𑀺 𑀧𑀯𑀢𑁆𑀢𑁂𑀢𑀼𑀓𑀸𑀫𑁄, 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸𑀭𑀲𑀫𑁆𑀪𑀯𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀁 𑀯𑀓𑁆𑀔𑀢𑀺. 𑀯𑀘𑀻𑀪𑁂𑀤𑀓𑀭𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼𑀬𑀸 𑀅𑀓𑁆𑀔𑀭𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀕𑀢𑀉𑀧𑀸𑀤𑀺𑀦𑁆𑀦𑀭𑀽𑀧𑁂𑀳𑀺 𑀲𑀳 𑀖𑀝𑁆𑀝𑀦𑀧𑀘𑁆𑀘𑀬𑀪𑀽𑀢𑁄 𑀏𑀓𑁄 𑀯𑀺𑀓𑀸𑀭𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑀁.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 ‘‘𑀨𑀦𑁆𑀤𑀫𑀸𑀦𑀓𑀸𑀬𑀕𑁆𑀕𑀳𑀡𑀸𑀦𑀦𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 ‘‘𑀲𑀼𑀬𑁆𑀬𑀫𑀸𑀦𑀲𑀤𑁆𑀤𑀲𑀯𑀦𑀸𑀦𑀦𑁆𑀢𑀭’’𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀥 𑀘 𑀲𑀦𑁆𑀣𑀫𑁆𑀪𑀦𑀸𑀤𑀻𑀦𑀁 𑀅𑀪𑀸𑀯𑀢𑁄 𑀲𑀢𑁆𑀢𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸𑀢𑁆𑀬𑀸𑀤𑀺𑀦𑀬𑁄 𑀦 𑀮𑀩𑁆𑀪𑀢𑀺. 𑀖𑀝𑁆𑀝𑀦𑁂𑀦 𑀳𑀺 𑀲𑀤𑁆𑀥𑀺𑀁𑀬𑁂𑀯 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀖𑀝𑁆𑀝𑀦𑀜𑁆𑀘 𑀧𑀞𑀫𑀚𑀯𑀦𑀸𑀤𑀻𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀏𑀢𑁆𑀣 𑀘 𑀬𑀣𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀩𑀤𑁆𑀥𑀕𑁄𑀲𑀻𑀲𑀢𑀸𑀮𑀧𑀡𑁆𑀡𑀸𑀤𑀺𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 𑀢𑀤𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀬 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀸𑀬 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀕𑁄𑀲𑀻𑀲𑀸𑀤𑀻𑀦𑀁 𑀉𑀤𑀓𑀲𑀳𑀘𑀸𑀭𑀺𑀢𑀧𑁆𑀧𑀓𑀸𑀭𑀁 𑀲𑀜𑁆𑀜𑀸𑀡𑀁 𑀕𑀳𑁂𑀢𑁆𑀯𑀸 𑀉𑀤𑀓𑀕𑁆𑀕𑀳𑀡𑀁 𑀳𑁄𑀢𑀺, 𑀏𑀯𑀁 𑀯𑀺𑀧𑁆𑀨𑀦𑁆𑀤𑀫𑀸𑀦𑀲𑀫𑀼𑀘𑁆𑀘𑀸𑀭𑀺𑀬𑀫𑀸𑀦𑀓𑀸𑀬𑀲𑀤𑁆𑀤𑁂 𑀕𑀳𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀬 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀸𑀬 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀽𑀧𑀦𑀺𑀲𑁆𑀲𑀬𑀸𑀬 𑀲𑀸𑀥𑀺𑀧𑁆𑀧𑀸𑀬𑀯𑀺𑀓𑀸𑀭𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀅𑀬𑀁 𑀤𑁆𑀯𑀺𑀦𑁆𑀦𑀁 𑀲𑀸𑀥𑀸𑀭𑀡𑀸 𑀉𑀧𑀫𑀸.

𑁧𑁪. 𑀮𑀳𑀼𑀪𑀸𑀯𑁄 𑀮𑀳𑀼𑀢𑀸. 𑀫𑀼𑀤𑀼𑀪𑀸𑀯𑁄 𑀫𑀼𑀤𑀼𑀢𑀸. 𑀓𑀫𑁆𑀫𑀜𑁆𑀜𑀪𑀸𑀯𑁄 𑀓𑀫𑁆𑀫𑀜𑁆𑀜𑀢𑀸. 𑀬𑀣𑀸𑀓𑁆𑀓𑀫𑀜𑁆𑀘𑁂𑀢𑀸 𑀅𑀭𑁄𑀕𑀺𑀦𑁄 𑀯𑀺𑀬 𑀭𑀽𑀧𑀸𑀦𑀁 𑀅𑀕𑀭𑀼𑀢𑀸 𑀲𑀼𑀧𑀭𑀺𑀫𑀤𑁆𑀤𑀺𑀢𑀘𑀫𑁆𑀫𑀲𑁆𑀲 𑀯𑀺𑀬 𑀅𑀓𑀣𑀺𑀦𑀢𑀸 𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀲𑀭𑀻𑀭𑀓𑀺𑀭𑀺𑀬𑀸𑀦𑀁 𑀅𑀦𑀼𑀓𑀽𑀮𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀚𑀳𑀦𑁆𑀢𑀲𑁆𑀲𑀧𑀺 𑀳𑀺 𑀮𑀳𑀼𑀢𑀸𑀤𑀺𑀢𑁆𑀢𑀬𑀲𑁆𑀲 𑀢𑀁𑀢𑀁𑀯𑀺𑀓𑀸𑀭𑀸𑀥𑀺𑀓𑀭𑀽𑀧𑁂𑀳𑀺 𑀦𑀸𑀦𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀤𑀦𑁆𑀥𑀢𑁆𑀢𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑁆𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄 𑀳𑀺 𑀭𑀽𑀧𑀯𑀺𑀓𑀸𑀭𑁄 𑀮𑀳𑀼𑀢𑀸. 𑀣𑀤𑁆𑀥𑀢𑁆𑀢𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑁆𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄 𑀫𑀼𑀤𑀼𑀢𑀸. 𑀲𑀭𑀻𑀭𑀓𑀺𑀭𑀺𑀬𑀸𑀦𑀁 𑀅𑀦𑀦𑀼𑀓𑀽𑀮𑀪𑀸𑀯𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑁆𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄 𑀓𑀫𑁆𑀫𑀜𑁆𑀜𑀢𑀸𑀢𑀺.

𑁧𑁫. 𑀉𑀧𑀘𑀬𑀦𑀁 𑀉𑀧𑀘𑀬𑁄, 𑀧𑀞𑀫𑀘𑀬𑁄𑀢𑁆𑀬𑀢𑁆𑀣𑁄 ‘‘𑀉𑀧𑀜𑁆𑀜𑀢𑁆𑀢’’𑀦𑁆𑀢𑁆𑀬𑀸𑀤𑀻𑀲𑀼 𑀯𑀺𑀬 𑀉𑀧-𑀲𑀤𑁆𑀤𑀲𑁆𑀲 𑀧𑀞𑀫𑀢𑁆𑀣𑀚𑁄𑀢𑀦𑀢𑁄. 𑀲𑀦𑁆𑀢𑀸𑀦𑁄 𑀲𑀦𑁆𑀢𑀢𑀺, 𑀧𑀩𑀦𑁆𑀥𑁄𑀢𑁆𑀬𑀢𑁆𑀣𑁄. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀓𑁆𑀔𑀸𑀤𑀺𑀤𑀲𑀓𑀸𑀦𑀁 𑀉𑀧𑁆𑀧𑀢𑁆𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀭𑀽𑀧𑀼𑀧𑁆𑀧𑀸𑀤𑁄 𑀉𑀧𑀘𑀬𑁄 𑀦𑀸𑀫. 𑀢𑀢𑁄 𑀧𑀭𑀁 𑀲𑀦𑁆𑀢𑀢𑀺 𑀦𑀸𑀫. 𑀬𑀣𑀸𑀲𑀓𑀁 𑀔𑀡𑀫𑀢𑁆𑀢𑀝𑁆𑀞𑀸𑀬𑀻𑀦𑀁 𑀭𑀽𑀧𑀸𑀦𑀁 𑀦𑀺𑀭𑁄𑀥𑀸𑀪𑀺𑀫𑀼𑀔𑀪𑀸𑀯𑀯𑀲𑁂𑀦 𑀚𑀻𑀭𑀡𑀁 𑀚𑀭𑀸, 𑀲𑀸𑀬𑁂𑀯 𑀚𑀭𑀢𑀸, 𑀦𑀺𑀘𑁆𑀘𑀥𑀼𑀯𑀪𑀸𑀯𑁂𑀦 𑀦 𑀇𑀘𑁆𑀘𑀁 𑀅𑀦𑀼𑀧𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀦𑀺𑀘𑁆𑀘𑀁, 𑀢𑀲𑁆𑀲 𑀪𑀸𑀯𑁄 𑀅𑀦𑀺𑀘𑁆𑀘𑀢𑀸, 𑀭𑀽𑀧𑀧𑀭𑀺𑀪𑁂𑀤𑁄. 𑀮𑀓𑁆𑀔𑀡𑀭𑀽𑀧𑀁 𑀦𑀸𑀫 𑀥𑀫𑁆𑀫𑀸𑀦𑀁 𑀢𑀁𑀢𑀁𑀅𑀯𑀢𑁆𑀣𑀸𑀯𑀲𑁂𑀦 𑀮𑀓𑁆𑀔𑀡𑀳𑁂𑀢𑀼𑀢𑁆𑀢𑀸.

𑁧𑁬. 𑀚𑀸𑀢𑀺𑀭𑀽𑀧𑀫𑁂𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀭𑀽𑀧𑀸𑀦𑀁 𑀔𑀡𑁂 𑀔𑀡𑁂 𑀉𑀧𑁆𑀧𑀢𑁆𑀢𑀺𑀪𑀸𑀯𑀢𑁄 𑀚𑀸𑀢𑀺𑀲𑀗𑁆𑀔𑀸𑀢𑀁 𑀭𑀽𑀧𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁆𑀢𑀸 𑀭𑀽𑀧𑀲𑀫𑁆𑀫𑀢𑀜𑁆𑀘 𑀚𑀸𑀢𑀺𑀭𑀽𑀧𑀫𑁂𑀯 𑀉𑀧𑀘𑀬𑀲𑀦𑁆𑀢𑀢𑀺𑀪𑀸𑀯𑁂𑀦 𑀧𑀯𑀼𑀘𑁆𑀘𑀢𑀺 𑀧𑀞𑀫𑀼𑀧𑀭𑀺𑀦𑀺𑀘𑁆𑀘𑀢𑁆𑀢𑀲𑀗𑁆𑀔𑀸𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀢𑁄 𑀯𑁂𑀦𑁂𑀬𑁆𑀬𑀯𑀲𑁂𑀦 ‘‘𑀉𑀧𑀘𑀬𑁄 𑀲𑀦𑁆𑀢𑀢𑀻’’𑀢𑀺 (𑀥. 𑀲. 𑁬𑁪𑁨) 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀸𑀲𑀁 𑀦𑀺𑀤𑁆𑀤𑁂𑀲𑁂 𑀅𑀢𑁆𑀣𑀢𑁄 𑀅𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄, 𑀲𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄. 𑀬𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀻’’𑀢𑀺 (𑀥. 𑀲. 𑁬𑁪𑁧-𑁬𑁪𑁨) 𑀯𑀼𑀢𑁆𑀢𑀁. 𑀏𑀓𑀸𑀤𑀲𑀯𑀺𑀥𑀫𑁆𑀧𑀻𑀢𑀺 𑀲𑀪𑀸𑀕𑀲𑀗𑁆𑀕𑀳𑀯𑀲𑁂𑀦 𑀏𑀓𑀸𑀤𑀲𑀧𑁆𑀧𑀓𑀸𑀭𑀫𑁆𑀧𑀺.

𑁧𑁭. 𑀘𑀢𑁆𑀢𑀸𑀭𑁄 𑀪𑀽𑀢𑀸, 𑀧𑀜𑁆𑀘 𑀧𑀲𑀸𑀤𑀸, 𑀘𑀢𑁆𑀢𑀸𑀭𑁄 𑀯𑀺𑀲𑀬𑀸, 𑀤𑀼𑀯𑀺𑀥𑁄 𑀪𑀸𑀯𑁄, 𑀳𑀤𑀬𑀭𑀽𑀧𑀫𑀺𑀘𑁆𑀘𑀧𑀺 𑀇𑀤𑀁 𑀚𑀻𑀯𑀺𑀢𑀸𑀳𑀸𑀭𑀭𑀽𑀧𑁂𑀳𑀺 𑀤𑁆𑀯𑀻𑀳𑀺 𑀲𑀳 𑀅𑀝𑁆𑀞𑀸𑀭𑀲𑀯𑀺𑀥𑀁, 𑀢𑀣𑀸 𑀧𑀭𑀺𑀘𑁆𑀙𑁂𑀤𑁄 𑀘 𑀤𑀼𑀯𑀺𑀥𑀸 𑀯𑀺𑀜𑁆𑀜𑀢𑁆𑀢𑀺, 𑀢𑀺𑀯𑀺𑀥𑁄 𑀯𑀺𑀓𑀸𑀭𑁄, 𑀘𑀢𑀼𑀩𑁆𑀩𑀺𑀥𑀁 𑀮𑀓𑁆𑀔𑀡𑀦𑁆𑀢𑀺 𑀭𑀽𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑀯𑀺𑀓𑀸𑀭𑀸𑀤𑀺𑀪𑀸𑀯𑀁 𑀯𑀺𑀦𑀸 𑀯𑀺𑀲𑀼𑀁 𑀧𑀘𑁆𑀘𑀬𑁂𑀳𑀺 𑀅𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀇𑀫𑁂 𑀅𑀦𑀺𑀧𑁆𑀨𑀦𑁆𑀦𑀸 𑀤𑀲 𑀘𑁂𑀢𑀺 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀪𑀯𑁂.

𑀭𑀽𑀧𑀲𑀫𑀼𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀯𑀺𑀪𑀸𑀕𑀯𑀡𑁆𑀡𑀦𑀸

𑁧𑁮. 𑀇𑀤𑀸𑀦𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀭𑀽𑀧𑀸𑀦𑀁 𑀏𑀓𑀯𑀺𑀥𑀸𑀤𑀺𑀦𑀬𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑀜𑁆𑀘 𑀧𑀦𑁂𑀢’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀮𑁄𑀪𑀸𑀤𑀺𑀳𑁂𑀢𑀼𑀦𑁄 𑀅𑀪𑀸𑀯𑀸 𑀅𑀳𑁂𑀢𑀼𑀓𑀁. 𑀬𑀣𑀸𑀲𑀓𑀁 𑀧𑀘𑁆𑀘𑀬𑀯𑀦𑁆𑀢𑀢𑀸𑀬 𑀲𑀧𑁆𑀧𑀘𑁆𑀘𑀬𑀁. 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑁂𑀳𑀺 𑀓𑀸𑀫𑀸𑀲𑀯𑀸𑀤𑀻𑀳𑀺 𑀲𑀳𑀺𑀢𑀢𑁆𑀢𑀸 𑀲𑀸𑀲𑀯𑀁. 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀲𑀗𑁆𑀔𑀢𑀁. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂 𑀮𑁄𑀓𑁂 𑀦𑀺𑀬𑀼𑀢𑁆𑀢𑀢𑀸𑀬 𑀮𑁄𑀓𑀺𑀬𑀁. 𑀓𑀸𑀫𑀢𑀡𑁆𑀳𑀸𑀬 𑀅𑀯𑀘𑀭𑀺𑀢𑀢𑁆𑀢𑀸 𑀓𑀸𑀫𑀸𑀯𑀘𑀭𑀁. 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀓𑀲𑁆𑀲𑀘𑀺 𑀆𑀭𑀫𑁆𑀫𑀡𑀲𑁆𑀲 𑀅𑀕𑁆𑀕𑀳𑀡𑀢𑁄 𑀦𑀸𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺 𑀅𑀦𑀸𑀭𑀫𑁆𑀫𑀡𑀁. 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀳𑀸𑀢𑀩𑁆𑀩𑀢𑀸𑀪𑀸𑀯𑀢𑁄 𑀅𑀧𑁆𑀧𑀳𑀸𑀢𑀩𑁆𑀩𑀁. 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀢𑁂𑀦 ‘‘𑀅𑀩𑁆𑀬𑀸𑀓𑀢’’𑀦𑁆𑀢𑁆𑀬𑀸𑀤𑀺𑀓𑀁 𑀲𑀩𑁆𑀩𑀁 𑀏𑀓𑀯𑀺𑀥𑀦𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁯. 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀓𑀸𑀫𑀁 𑀅𑀜𑁆𑀜𑁂𑀧𑀺 𑀳𑀺 𑀅𑀚𑁆𑀛𑀢𑁆𑀢𑀲𑀫𑁆𑀪𑀽𑀢𑀸 𑀅𑀢𑁆𑀣𑀺, 𑀭𑀼𑀴𑁆𑀳𑀻𑀯𑀲𑁂𑀦 𑀧𑀦 𑀘𑀓𑁆𑀔𑀸𑀤𑀺𑀓𑀁𑀬𑁂𑀯 𑀅𑀚𑁆𑀛𑀢𑁆𑀢𑀺𑀓𑀁. 𑀅𑀣 𑀯𑀸 ‘‘𑀬𑀤𑀺 𑀫𑀬𑀁 𑀦 𑀳𑁄𑀫, 𑀢𑁆𑀯𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀯𑀤𑀦𑁆𑀢𑀸 𑀯𑀺𑀬 𑀅𑀢𑁆𑀢𑀪𑀸𑀯𑀲𑁆𑀲 𑀲𑀸𑀢𑀺𑀲𑀬𑀁 𑀉𑀧𑀓𑀸𑀭𑀢𑁆𑀢𑀸 𑀘𑀓𑁆𑀔𑀸𑀤𑀻𑀦𑁂𑀯 𑀯𑀺𑀲𑁂𑀲𑀢𑁄 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀦𑀸𑀫. 𑀅𑀢𑁆𑀢𑀲𑀗𑁆𑀔𑀸𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀥𑀺𑀓𑀺𑀘𑁆𑀘 𑀢𑀲𑁆𑀲 𑀤𑁆𑀯𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀚𑁆𑀛𑀢𑁆𑀢𑀁, 𑀢𑀤𑁂𑀯 𑀅𑀚𑁆𑀛𑀢𑁆𑀢𑀺𑀓𑀁. 𑀢𑀢𑁄 𑀩𑀳𑀺𑀪𑀽𑀢𑀢𑁆𑀢𑀸 𑀇𑀢𑀭𑀁 𑀢𑁂𑀯𑀻𑀲𑀢𑀺𑀯𑀺𑀥𑀁 𑀩𑀸𑀳𑀺𑀭𑀭𑀽𑀧𑀁.

𑁨𑁦. 𑀇𑀢𑀭𑀁 𑀩𑀸𑀯𑀻𑀲𑀢𑀺𑀯𑀺𑀥𑀁 𑀅𑀯𑀢𑁆𑀣𑀼𑀭𑀽𑀧𑀁.

𑁨𑁨. 𑀅𑀝𑁆𑀞𑀯𑀺𑀥𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀭𑀽𑀧𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀮𑀺𑀗𑁆𑀕𑀸𑀤𑀻𑀲𑀼 𑀲𑀳𑀚𑀭𑀽𑀧𑀧𑀭𑀺𑀧𑀸𑀮𑀦𑁂 𑀘 𑀆𑀥𑀺𑀧𑀘𑁆𑀘𑀬𑁄𑀕𑀢𑁄. 𑀧𑀲𑀸𑀤𑀭𑀽𑀧𑀲𑁆𑀲 𑀳𑀺 𑀧𑀜𑁆𑀘𑀯𑀺𑀥𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀆𑀥𑀺𑀧𑀘𑁆𑀘𑀁 𑀅𑀢𑁆𑀢𑀦𑁄 𑀧𑀝𑀼𑀫𑀦𑁆𑀤𑀸𑀤𑀺𑀪𑀸𑀯𑁂𑀦 𑀢𑁂𑀲𑀫𑁆𑀧𑀺 𑀧𑀝𑀼𑀫𑀦𑁆𑀤𑀸𑀤𑀺𑀪𑀸𑀯𑀸𑀧𑀸𑀤𑀦𑀢𑁄. 𑀪𑀸𑀯𑀤𑁆𑀯𑀬𑀲𑁆𑀲𑀸𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀲𑀼 𑀆𑀥𑀺𑀧𑀘𑁆𑀘𑀁 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀢𑁂𑀲𑀁 𑀬𑁂𑀪𑀼𑀬𑁆𑀬𑁂𑀦 𑀲𑀪𑀸𑀯𑀓𑀲𑀦𑁆𑀢𑀸𑀦𑁂𑀬𑁂𑀯 𑀢𑀁𑀢𑀤𑀸𑀓𑀸𑀭𑁂𑀦 𑀉𑀧𑁆𑀧𑀚𑁆𑀚𑀦𑀢𑁄, 𑀦 𑀧𑀦 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑀢𑁄. 𑀚𑀻𑀯𑀺𑀢𑀲𑁆𑀲 𑀘 𑀓𑀫𑁆𑀫𑀚𑀧𑀭𑀺𑀧𑀸𑀮𑀦𑁂 𑀆𑀥𑀺𑀧𑀘𑁆𑀘𑀁 𑀢𑁂𑀲𑀁 𑀬𑀣𑀸𑀲𑀓𑀁 𑀔𑀡𑀝𑁆𑀞𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸. 𑀲𑀬𑀜𑁆𑀘 𑀅𑀢𑁆𑀢𑀦𑀸 𑀞𑀧𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀧𑀯𑀢𑁆𑀢𑀢𑀺 𑀦𑀸𑀯𑀺𑀓𑁄 𑀯𑀺𑀬.

𑁨𑁩. 𑀯𑀺𑀲𑀬𑀯𑀺𑀲𑀬𑀺𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀣𑀽𑀮𑀢𑁆𑀢𑀸 𑀑𑀴𑀸𑀭𑀺𑀓𑀭𑀽𑀧𑀁. 𑀢𑀢𑁄𑀬𑁂𑀯 𑀕𑀳𑀡𑀲𑁆𑀲 𑀲𑀼𑀓𑀭𑀢𑁆𑀢𑀸 𑀲𑀦𑁆𑀢𑀺𑀓𑁂𑀭𑀽𑀧𑀁 𑀆𑀲𑀦𑁆𑀦𑀭𑀽𑀧𑀁 𑀦𑀸𑀫. 𑀬𑁄 𑀲𑀬𑀁, 𑀦𑀺𑀲𑁆𑀲𑀬𑀯𑀲𑁂𑀦 𑀘 𑀲𑀫𑁆𑀧𑀢𑁆𑀢𑀸𑀦𑀁, 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀘 𑀧𑀝𑀺𑀫𑀼𑀔𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀧𑀢𑀦𑀁, 𑀲𑁄 𑀧𑀝𑀺𑀖𑁄 𑀯𑀺𑀬𑀸𑀢𑀺 𑀧𑀝𑀺𑀖𑁄. 𑀬𑀣𑀸 𑀳𑀺 𑀧𑀝𑀺𑀖𑀸𑀢𑁂 𑀲𑀢𑀺 𑀤𑀼𑀩𑁆𑀩𑀮𑀲𑁆𑀲 𑀘𑀮𑀦𑀁 𑀳𑁄𑀢𑀺, 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀫𑀼𑀔𑀪𑀸𑀯𑁂 𑀲𑀢𑀺 𑀅𑀭𑀽𑀧𑀲𑀪𑀸𑀯𑀢𑁆𑀢𑀸 𑀤𑀼𑀩𑁆𑀩𑀮𑀲𑁆𑀲 𑀪𑀯𑀗𑁆𑀕𑀲𑁆𑀲 𑀘𑀮𑀦𑀁 𑀳𑁄𑀢𑀺. 𑀧𑀝𑀺𑀖𑁄 𑀬𑀲𑁆𑀲 𑀅𑀢𑁆𑀣𑀺 𑀢𑀁 𑀲𑀧𑁆𑀧𑀝𑀺𑀖𑀁. 𑀢𑀢𑁆𑀣 𑀲𑀬𑀁 𑀲𑀫𑁆𑀧𑀢𑁆𑀢𑀺 𑀨𑁄𑀝𑁆𑀞𑀩𑁆𑀩𑀲𑁆𑀲, 𑀦𑀺𑀲𑁆𑀲𑀬𑀯𑀲𑁂𑀦 𑀲𑀫𑁆𑀧𑀢𑁆𑀢𑀺 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀕𑀦𑁆𑀥𑀭𑀲𑀸𑀦𑀁, 𑀉𑀪𑀬𑀣𑀸𑀧𑀺 𑀅𑀲𑀫𑁆𑀧𑀢𑁆𑀢𑀺 𑀘𑀓𑁆𑀔𑀼𑀲𑁄𑀢𑀭𑀽𑀧𑀲𑀤𑁆𑀤𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀁 𑀲𑁄𑀴𑀲𑀯𑀺𑀥𑀁 𑀑𑀴𑀸𑀭𑀺𑀓𑀢𑀸𑀤𑀺𑀲𑀪𑀸𑀯𑀸𑀪𑀸𑀯𑀢𑁄 𑀲𑀼𑀔𑀼𑀫𑀭𑀽𑀧𑀸𑀤𑀺𑀓𑀁.

𑁨𑁪. 𑀓𑀫𑁆𑀫𑀢𑁄 𑀚𑀸𑀢𑀁 𑀅𑀝𑁆𑀞𑀸𑀭𑀲𑀯𑀺𑀥𑀁 𑀉𑀧𑀸𑀤𑀺𑀦𑁆𑀦𑀭𑀽𑀧𑀁 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀅𑀢𑁆𑀢𑀦𑁄 𑀨𑀮𑀪𑀸𑀯𑁂𑀦 𑀆𑀤𑀺𑀦𑁆𑀦𑀢𑁆𑀢𑀸 𑀕𑀳𑀺𑀢𑀢𑁆𑀢𑀸. 𑀇𑀢𑀭𑀁 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦𑀤𑀲𑀯𑀺𑀥𑀁 𑀅𑀦𑀼𑀧𑀸𑀤𑀺𑀦𑁆𑀦𑀭𑀽𑀧𑀁.

𑁨𑁫. 𑀤𑀝𑁆𑀞𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁂𑀦 𑀦𑀺𑀤𑀲𑁆𑀲𑀦𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀦𑀺𑀤𑀲𑁆𑀲𑀦𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀕𑁄𑀘𑀭𑀪𑀸𑀯𑁄 𑀳𑀺 𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀘 𑀭𑀽𑀧𑀸𑀬𑀢𑀦𑀢𑁄 𑀅𑀦𑀜𑁆𑀜𑀢𑁆𑀢𑁂𑀧𑀺 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀢𑀁 𑀯𑀺𑀲𑁂𑀲𑁂𑀢𑀼𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀳 𑀦𑀺𑀤𑀲𑁆𑀲𑀦𑁂𑀦 𑀲𑀦𑀺𑀤𑀲𑁆𑀲𑀦𑀦𑁆𑀢𑀺. 𑀥𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑁂𑀦 𑀳𑀺 𑀏𑀓𑀻𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀦𑀸𑀦𑀢𑁆𑀢𑀓𑀭𑁄 𑀯𑀺𑀲𑁂𑀲𑁄, 𑀲𑁄 𑀅𑀜𑁆𑀜𑁄 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀺𑀢𑀼𑀁 𑀬𑀼𑀢𑁆𑀢𑁄. 𑀏𑀯𑀜𑁆𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀺.

𑁨𑁬. 𑀅𑀲𑀫𑁆𑀧𑀢𑁆𑀢𑀯𑀲𑁂𑀦𑀸𑀢𑀺 𑀅𑀢𑁆𑀢𑀸𑀦𑀁 𑀅𑀲𑀫𑁆𑀧𑀢𑁆𑀢𑀲𑁆𑀲 𑀕𑁄𑀘𑀭𑀲𑁆𑀲 𑀯𑀲𑁂𑀦, 𑀅𑀢𑁆𑀢𑀦𑀸 𑀯𑀺𑀲𑀬𑀧𑁆𑀧𑀤𑁂𑀲𑀁 𑀯𑀸 𑀅𑀲𑀫𑁆𑀧𑀢𑁆𑀢𑀯𑀲𑁂𑀦. 𑀘𑀓𑁆𑀔𑀼𑀲𑁄𑀢𑀸𑀦𑀺 𑀳𑀺 𑀭𑀽𑀧𑀲𑀤𑁆𑀤𑁂𑀳𑀺 𑀅𑀲𑀫𑁆𑀧𑀢𑁆𑀢𑀸𑀦𑀺, 𑀲𑀬𑀁 𑀯𑀸 𑀢𑀸𑀦𑀺 𑀅𑀲𑀫𑁆𑀧𑀢𑁆𑀢𑀸𑀦𑁂𑀯 𑀆𑀭𑀫𑁆𑀫𑀡𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀘𑀓𑁆𑀔𑀼𑀲𑁄𑀢𑀁 𑀧𑀦𑁂𑀢𑁂𑀲𑀼, 𑀳𑁄𑀢𑀸𑀲𑀫𑁆𑀧𑀢𑁆𑀢𑀕𑀸𑀳𑀓𑀁;

𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁆𑀢𑀸, 𑀲𑀦𑁆𑀢𑀭𑀸𑀥𑀺𑀓𑀕𑁄𑀘𑀭𑁂.

‘‘𑀢𑀣𑀸 𑀳𑀺 𑀤𑀽𑀭𑀤𑁂𑀲𑀝𑁆𑀞𑀁, 𑀨𑀮𑀺𑀓𑀸𑀤𑀺𑀢𑀺𑀭𑁄𑀳𑀺𑀢𑀁;

𑀫𑀳𑀦𑁆𑀢𑀜𑁆𑀘 𑀦𑀕𑀸𑀤𑀻𑀦𑀁, 𑀯𑀡𑁆𑀡𑀁 𑀘𑀓𑁆𑀔𑀼 𑀉𑀤𑀺𑀓𑁆𑀔𑀢𑀺.

‘‘𑀆𑀓𑀸𑀲𑀸𑀤𑀺𑀕𑀢𑁄 𑀓𑀼𑀘𑁆𑀙𑀺-𑀘𑀫𑁆𑀫𑀸𑀦𑀦𑁆𑀢𑀭𑀺𑀓𑁄𑀧𑀺 𑀘;

𑀫𑀳𑀦𑁆𑀢𑁄 𑀘 𑀖𑀡𑁆𑀝𑀸𑀤𑀻𑀦𑀁, 𑀲𑀤𑁆𑀤𑁄 𑀲𑁄𑀢𑀲𑁆𑀲 𑀕𑁄𑀘𑀭𑁄.

‘‘𑀕𑀦𑁆𑀢𑁆𑀯𑀸 𑀯𑀺𑀲𑀬𑀤𑁂𑀲𑀁 𑀢𑀁, 𑀨𑀭𑀺𑀢𑁆𑀯𑀸 𑀕𑀡𑁆𑀳𑀢𑀻𑀢𑀺 𑀘𑁂;

𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑁂𑀧𑀺, 𑀢𑀲𑁆𑀲 𑀲𑁄 𑀕𑁄𑀘𑀭𑁄 𑀲𑀺𑀬𑀸.

‘‘𑀪𑀽𑀢𑀧𑁆𑀧𑀩𑀦𑁆𑀥𑀢𑁄 𑀲𑁄 𑀘𑁂, 𑀬𑀸𑀢𑀺 𑀇𑀦𑁆𑀤𑁆𑀭𑀺𑀬𑀲𑀦𑁆𑀦𑀺𑀥𑀺𑀁;

𑀓𑀫𑁆𑀫𑀘𑀺𑀢𑁆𑀢𑁄𑀚𑀲𑀫𑁆𑀪𑀽𑀢𑁄, 𑀯𑀡𑁆𑀡𑁄 𑀲𑀤𑁆𑀤𑁄 𑀘 𑀘𑀺𑀢𑁆𑀢𑀚𑁄.

‘‘𑀦 𑀢𑁂𑀲𑀁 𑀕𑁄𑀘𑀭𑀸 𑀳𑁄𑀦𑁆𑀢𑀺, 𑀦 𑀳𑀺 𑀲𑀫𑁆𑀪𑁄𑀦𑁆𑀢𑀺 𑀢𑁂 𑀩𑀳𑀺;

𑀯𑀼𑀢𑁆𑀢𑀸 𑀘 𑀅𑀯𑀺𑀲𑁂𑀲𑁂𑀦, 𑀧𑀸𑀞𑁂 𑀢𑀁𑀯𑀺𑀲𑀬𑀸𑀯 𑀢𑁂.

‘‘𑀬𑀤𑀺 𑀘𑁂𑀢𑀁 𑀤𑁆𑀯𑀬𑀁 𑀅𑀢𑁆𑀢𑀲𑀫𑀻𑀧𑀁𑀬𑁂𑀯 𑀕𑀡𑁆𑀳𑀢𑀺;

𑀅𑀓𑁆𑀔𑀺𑀯𑀡𑁆𑀡𑀁 𑀢𑀣𑀸 𑀫𑀽𑀮𑀁, 𑀧𑀲𑁆𑀲𑁂𑀬𑁆𑀬 𑀪𑀫𑀼𑀓𑀲𑁆𑀲 𑀘.

‘‘𑀤𑀺𑀲𑀸𑀤𑁂𑀲𑀯𑀯𑀢𑁆𑀣𑀸𑀦𑀁, 𑀲𑀤𑁆𑀤𑀲𑁆𑀲 𑀦 𑀪𑀯𑁂𑀬𑁆𑀬 𑀘;

𑀲𑀺𑀬𑀸 𑀘 𑀲𑀭𑀯𑁂𑀥𑀺𑀲𑁆𑀲, 𑀲𑀓𑀡𑁆𑀡𑁂 𑀲𑀭𑀧𑀸𑀢𑀦’’𑀦𑁆𑀢𑀺.

𑀕𑁄𑀘𑀭𑀕𑁆𑀕𑀸𑀳𑀺𑀓𑀭𑀽𑀧𑀁 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀳𑀼𑀢𑁆𑀯𑀸 𑀢𑀁𑀢𑀁𑀕𑁄𑀘𑀭𑀕𑁆𑀕𑀳𑀡𑀲𑀪𑀸𑀯𑀢𑁆𑀢𑀸. 𑀇𑀢𑀭𑀁 𑀢𑁂𑀯𑀻𑀲𑀢𑀺𑀯𑀺𑀥𑀁 𑀅𑀕𑁄𑀘𑀭𑀕𑁆𑀕𑀸𑀳𑀺𑀓𑀭𑀽𑀧𑀁 𑀕𑁄𑀘𑀭𑀕𑁆𑀕𑀳𑀡𑀸𑀪𑀸𑀯𑀢𑁄.

𑁨𑁭. 𑀯𑀡𑁆𑀡𑀺𑀢𑀩𑁆𑀩𑁄 𑀤𑀝𑁆𑀞𑀩𑁆𑀩𑁄𑀢𑀺 𑀯𑀡𑁆𑀡𑁄. 𑀅𑀢𑁆𑀢𑀦𑁄 𑀉𑀤𑀬𑀸𑀦𑀦𑁆𑀢𑀭𑀁 𑀭𑀽𑀧𑀁 𑀚𑀦𑁂𑀢𑀻𑀢𑀺 𑀑𑀚𑀸. 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀁 𑀓𑀢𑁆𑀣𑀘𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀺𑀪𑀼𑀜𑁆𑀚𑀦𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀭𑀽𑀧𑀮𑁄𑀓𑁂 𑀕𑀦𑁆𑀥𑀸𑀤𑀻𑀦𑀁 𑀅𑀪𑀸𑀯𑀯𑀸𑀤𑀺𑀫𑀢𑀫𑁆𑀧𑀺 𑀳𑀺 𑀢𑀢𑁆𑀣 𑀢𑀢𑁆𑀣 (𑀯𑀺𑀪. 𑀫𑀽𑀮𑀝𑀻. 𑁨𑁨𑁭; 𑀯𑀺𑀪. 𑀅𑀦𑀼𑀝𑀻. 𑁨𑁨𑁭) 𑀆𑀘𑀭𑀺𑀬𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯.

𑁨𑁮. 𑀇𑀘𑁆𑀘𑁂𑀯𑀦𑁆𑀢𑀺 𑀏𑀢𑁆𑀣𑀧𑀺 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀢𑁂𑀦 𑀇𑀥 𑀅𑀦𑀸𑀕𑀢𑀫𑁆𑀧𑀺 𑀲𑀩𑁆𑀩𑀁 𑀤𑀼𑀓𑀢𑀺𑀓𑀸𑀤𑀺𑀪𑁂𑀤𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀭𑀽𑀧𑀯𑀺𑀪𑀸𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀲𑀫𑀼𑀝𑁆𑀞𑀸𑀦𑀦𑀬𑀯𑀡𑁆𑀡𑀦𑀸

𑁨𑁯. 𑀓𑀸𑀦𑀺 𑀧𑀦 𑀢𑀸𑀦𑀺 𑀓𑀫𑁆𑀫𑀸𑀤𑀻𑀦𑀺, 𑀓𑀣𑀁, 𑀓𑀢𑁆𑀣, 𑀓𑀤𑀸 𑀘 𑀭𑀽𑀧𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑁆𑀬𑀸𑀤𑀺. 𑀧𑀝𑀺𑀲𑀦𑁆𑀥𑀺𑀫𑀼𑀧𑀸𑀤𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑀁 𑀉𑀧𑀸𑀤𑀸𑀬. 𑀔𑀡𑁂 𑀔𑀡𑁂𑀢𑀺 𑀏𑀓𑁂𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀻𑀲𑀼 𑀢𑀻𑀲𑀼 𑀔𑀡𑁂𑀲𑀼, 𑀦𑀺𑀭𑀦𑁆𑀢𑀭𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀭𑁂 𑀧𑀦 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑀁 (𑀯𑀺𑀪. 𑀫𑀽𑀮𑀝𑀻. 𑁨𑁦 𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸), 𑀪𑀗𑁆𑀕𑀓𑁆𑀔𑀡𑁂 𑀘 𑀭𑀽𑀧𑀼𑀧𑁆𑀧𑀸𑀤𑀁 (𑀯𑀺𑀪. 𑀫𑀽𑀮𑀝𑀻. 𑁨𑁦 𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸) 𑀧𑀝𑀺𑀲𑁂𑀥𑁂𑀦𑁆𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀞𑀺𑀢𑀺𑀓𑁆𑀔𑀡𑀸𑀪𑀸𑀯𑁂 𑀢𑁂𑀲𑀁 𑀉𑀧𑀧𑀢𑁆𑀢𑀺 𑀘𑁂𑀯 𑀢𑀢𑁆𑀣 𑀯𑀢𑁆𑀢𑀩𑁆𑀩𑀜𑁆𑀘 𑀳𑁂𑀝𑁆𑀞𑀸 𑀓𑀣𑀺𑀢𑀫𑁂𑀯, 𑀇𑀥𑀸𑀧𑀺 𑀧𑀦 𑀪𑀗𑁆𑀕𑀓𑁆𑀔𑀡𑁂 𑀭𑀽𑀧𑀼𑀧𑁆𑀧𑀸𑀤𑀸𑀪𑀸𑀯𑁂 𑀉𑀧𑀧𑀢𑁆𑀢𑀺𑀬𑀸 𑀢𑀢𑁆𑀣 𑀯𑀢𑁆𑀢𑀩𑁆𑀩𑁂𑀦 𑀘 𑀲𑀳 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀘𑁆𑀘𑀢𑀺 𑁋

‘‘𑀉𑀧𑁆𑀧𑀦𑁆𑀦𑀼𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺, 𑀯𑀺𑀪𑀗𑁆𑀕𑁂 𑀏𑀯𑀫𑀸𑀤𑀺𑀦𑀁;

𑀪𑀗𑁆𑀕𑀓𑁆𑀔𑀡𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀉𑀧𑁆𑀧𑀚𑁆𑀚𑀫𑀸𑀦𑀓𑀁.

‘‘𑀉𑀧𑁆𑀧𑀚𑁆𑀚𑀫𑀸𑀦𑀫𑀼𑀧𑁆𑀧𑀸𑀤𑁂, 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺𑀆𑀤𑀺𑀦𑀸;

𑀪𑀗𑁆𑀕𑀼𑀧𑁆𑀧𑀸𑀤𑀸𑀯 𑀅𑀓𑁆𑀔𑀸𑀢𑀸, 𑀦 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁄.

‘‘‘𑀉𑀧𑁆𑀧𑀸𑀤𑁄 𑀘 𑀯𑀬𑁄 𑀘𑁂𑀯, 𑀅𑀜𑁆𑀜𑀣𑀢𑁆𑀢𑀁 𑀞𑀺𑀢𑀲𑁆𑀲 𑀘;

𑀧𑀜𑁆𑀜𑀸𑀬𑀢𑀻’𑀢𑀺 (𑀅. 𑀦𑀺. 𑁩.𑁪𑁭) 𑀯𑀼𑀢𑁆𑀢𑀢𑁆𑀢𑀸, 𑀞𑀺𑀢𑀺 𑀅𑀢𑁆𑀣𑀻𑀢𑀺 𑀘𑁂 𑀫𑀢𑀁.

‘‘𑀅𑀜𑁆𑀜𑀣𑀢𑁆𑀢𑀲𑁆𑀲 𑀏𑀓𑀲𑁆𑀫𑀺𑀁, 𑀥𑀫𑁆𑀫𑁂 𑀅𑀦𑀼𑀧𑀮𑀤𑁆𑀥𑀺𑀢𑁄;

𑀧𑀜𑁆𑀜𑀸𑀡𑀯𑀘𑀦𑀸 𑀘𑁂𑀯, 𑀧𑀩𑀦𑁆𑀥𑀝𑁆𑀞𑀺𑀢𑀺 𑀢𑀢𑁆𑀣𑀧𑀺.

‘‘𑀯𑀼𑀢𑁆𑀢𑀸 𑀢𑀲𑁆𑀫𑀸 𑀦 𑀘𑀺𑀢𑁆𑀢𑀲𑁆𑀲, 𑀞𑀺𑀢𑀺 𑀤𑀺𑀲𑁆𑀲𑀢𑀺 𑀧𑀸𑀴𑀺𑀬𑀁;

𑀅𑀪𑀺𑀥𑀫𑁆𑀫𑁂 𑀅𑀪𑀸𑀯𑁄𑀧𑀺, 𑀦𑀺𑀲𑁂𑀥𑁄𑀬𑁂𑀯 𑀲𑀩𑁆𑀩𑀣𑀸.

‘‘𑀬𑀤𑀸 𑀲𑀫𑀼𑀤𑀬𑁄 𑀬𑀲𑁆𑀲, 𑀦𑀺𑀭𑀼𑀚𑁆𑀛𑀢𑀺 𑀢𑀤𑀸𑀲𑁆𑀲 𑀓𑀺𑀁;

𑀤𑀼𑀓𑁆𑀔𑀫𑀼𑀧𑁆𑀧𑀚𑁆𑀚𑀢𑀻𑀢𑁆𑀬𑁂𑀢𑁆𑀣, 𑀧𑀜𑁆𑀳𑁂 𑀦𑁄𑀢𑀺 𑀦𑀺𑀲𑁂𑀥𑀢𑁄.

‘‘𑀭𑀽𑀧𑀼𑀧𑁆𑀧𑀸𑀤𑁄 𑀦 𑀪𑀗𑁆𑀕𑀲𑁆𑀫𑀺𑀁, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀧𑀘𑁆𑀘𑀬𑀸;

𑀉𑀧𑁆𑀧𑀸𑀤𑁂𑀬𑁂𑀯 𑀘𑀺𑀢𑁆𑀢𑀲𑁆𑀲, 𑀭𑀽𑀧𑀳𑁂𑀢𑀽𑀢𑀺 𑀓𑁂𑀘𑀦.

‘‘𑀯𑀼𑀘𑁆𑀘𑀢𑁂 𑀢𑀢𑁆𑀣 𑀏𑀓𑀲𑁆𑀫𑀺𑀁, 𑀥𑀫𑁆𑀫𑁂𑀬𑁂𑀯 𑀬𑀣𑀸 𑀫𑀢𑀸;

𑀉𑀧𑁆𑀧𑀸𑀤𑀸𑀯𑀢𑁆𑀣𑀢𑁄 𑀪𑀺𑀦𑁆𑀦𑀸, 𑀪𑀗𑁆𑀕𑀸𑀯𑀢𑁆𑀣𑀸 𑀢𑀣𑁂𑀯 𑀢𑀼.

‘‘𑀪𑀗𑁆𑀕𑀲𑁆𑀲𑀸𑀪𑀺𑀫𑀼𑀔𑀸𑀯𑀢𑁆𑀣𑀸, 𑀇𑀘𑁆𑀙𑀺𑀢𑀩𑁆𑀩𑀸 𑀅𑀬𑀁 𑀞𑀺𑀢𑀺;

𑀦𑀬𑀤𑀲𑁆𑀲𑀦𑀢𑁄 𑀏𑀲𑀸, 𑀯𑀺𑀪𑀗𑁆𑀕𑁂 𑀦 𑀢𑀼 𑀤𑁂𑀲𑀺𑀢𑀸.

‘‘𑀮𑀓𑁆𑀔𑀡𑀁 𑀲𑀗𑁆𑀔𑀢𑀲𑁆𑀲𑁂𑀯, 𑀯𑀢𑁆𑀢𑀼𑀫𑀼𑀧𑁆𑀧𑀸𑀤𑀆𑀤𑀺𑀦𑀁;

𑀤𑁂𑀲𑀺𑀢𑀢𑁆𑀢𑀸 𑀦 𑀢𑀢𑁆𑀣𑀸𑀧𑀺, 𑀧𑀩𑀦𑁆𑀥𑀲𑁆𑀲 𑀞𑀺𑀢𑀻𑀭𑀺𑀢𑀸.

‘‘𑀉𑀧𑀲𑀕𑁆𑀕𑀲𑁆𑀲 𑀥𑀸𑀢𑀽𑀦𑀫𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀺𑀢𑁄;

𑀧𑀜𑁆𑀜𑀸𑀬𑀢𑀻𑀢𑀺 𑀘𑁂𑀢𑀲𑁆𑀲, 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂 𑀇𑀢𑀺.

‘‘𑀪𑀗𑁆𑀕𑁂 𑀭𑀽𑀧𑀲𑁆𑀲 𑀦𑀼𑀧𑁆𑀧𑀸𑀤𑁄, 𑀘𑀺𑀢𑁆𑀢𑀚𑀸𑀦𑀁 𑀯𑀲𑁂𑀦 𑀯𑀸;

𑀆𑀭𑀼𑀧𑁆𑀧𑀁𑀯𑀸𑀪𑀺𑀲𑀦𑁆𑀥𑀸𑀬, 𑀪𑀸𑀲𑀺𑀢𑁄 𑀬𑀫𑀓𑀲𑁆𑀲 𑀳𑀺.

‘‘𑀲𑀪𑀸𑀯𑁄𑀬𑀁 𑀬𑀣𑀸𑀮𑀸𑀪-𑀬𑁄𑀚𑀦𑀸𑀢𑀺 𑀢𑀢𑁄 𑀦𑀳𑀺;

𑀦 𑀘𑀺𑀢𑁆𑀢𑀝𑁆𑀞𑀺𑀢𑀺 𑀪𑀗𑁆𑀕𑁂 𑀘, 𑀦 𑀭𑀽𑀧𑀲𑁆𑀲 𑀅𑀲𑀫𑁆𑀪𑀯𑁄’’𑀢𑀺.

𑁩𑁧. 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀳𑁂𑀢𑀼𑀦𑁄 𑀢𑀩𑁆𑀩𑀺𑀥𑀼𑀭𑀢𑀸𑀬, 𑀅𑀦𑁄𑀓𑀸𑀲𑀢𑀸𑀬 𑀘 𑀅𑀭𑀽𑀧𑀯𑀺𑀧𑀸𑀓𑀸, 𑀭𑀽𑀧𑀚𑀦𑀦𑁂 𑀯𑀺𑀲𑁂𑀲𑀧𑀘𑁆𑀘𑀬𑁂𑀳𑀺 𑀛𑀸𑀦𑀗𑁆𑀕𑁂𑀳𑀺 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀘𑀸𑀢𑀺 𑀘𑀼𑀤𑁆𑀤𑀲 𑀘𑀺𑀢𑁆𑀢𑀸𑀦𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀭𑀼𑀧𑁆𑀧𑀯𑀺𑀧𑀸𑀓𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢’’𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁, 𑀧𑀦 𑀘𑀼𑀢𑀺𑀘𑀺𑀢𑁆𑀢𑀜𑁆𑀘 𑀏𑀓𑀽𑀦𑀯𑀻𑀲𑀢𑀺 𑀪𑀯𑀗𑁆𑀕𑀲𑁆𑀲𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 𑀘𑀺𑀢𑁆𑀢𑀦𑁆𑀢𑀭𑀁 𑀦 𑀳𑁄𑀢𑀻𑀢𑀺 𑀦 𑀢𑀲𑁆𑀲 𑀯𑀚𑁆𑀚𑀦𑀁 𑀓𑀢𑀁. 𑀓𑀺𑀜𑁆𑀘𑀸𑀧𑀺 𑀦 𑀓𑀢𑀁, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀭𑀳𑀺𑀢𑀁, 𑀧𑀦 𑀆𑀳𑀸𑀭𑀸𑀤𑀻𑀳𑀺 𑀘 𑀅𑀦𑀼𑀧𑀢𑁆𑀣𑀤𑁆𑀥𑀁 𑀤𑀼𑀩𑁆𑀩𑀮𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑁆𑀢𑀸, 𑀅𑀢𑁆𑀢𑀦𑁄 𑀘 𑀆𑀕𑀦𑁆𑀢𑀼𑀓𑀢𑀸𑀬 𑀓𑀫𑁆𑀫𑀚𑀭𑀽𑀧𑁂𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀞𑀸𑀦𑀁 𑀕𑀳𑁂𑀢𑁆𑀯𑀸 𑀞𑀺𑀢𑀢𑁆𑀢𑀸 𑀘 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀁 𑀦 𑀳𑁄𑀢𑀺. 𑀘𑀼𑀢𑀺𑀘𑀺𑀢𑁆𑀢𑁂 𑀧𑀦 𑀅𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁬𑁩𑁬; 𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸) 𑀢𑀸𑀯 ‘‘𑀯𑀽𑀧𑀲𑀦𑁆𑀢𑀯𑀝𑁆𑀝𑀫𑀽𑀮𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀸𑀢𑀺𑀲𑀬𑀁 𑀲𑀦𑁆𑀢𑀯𑀼𑀢𑁆𑀢𑀺𑀢𑀸𑀬 𑀔𑀻𑀡𑀸𑀲𑀯𑀲𑁆𑀲𑁂𑀯 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 (𑀥. 𑀲. 𑀫𑀽𑀮𑀝𑀻. 𑁬𑁩𑁬) 𑀯𑀼𑀢𑁆𑀢𑀁. 𑀆𑀦𑀦𑁆𑀤𑀸𑀘𑀭𑀺𑀬𑀸𑀤𑀬𑁄 𑀧𑀦 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀯𑀺𑀦𑀺𑀘𑁆𑀙𑀬𑁄 𑀧𑀦 𑀦𑁂𑀲𑀁 𑀲𑀗𑁆𑀔𑁂𑀧𑀢𑁄 𑀫𑀽𑀮𑀝𑀻𑀓𑀸𑀤𑀻𑀲𑀼, 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑁄. 𑀧𑀞𑀫𑀪𑀯𑀗𑁆𑀕𑀫𑀼𑀧𑀸𑀤𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭𑀦𑀺𑀩𑁆𑀩𑀢𑁆𑀢𑀧𑀞𑀫𑀪𑀯𑀗𑁆𑀕𑀢𑁄 𑀧𑀝𑁆𑀞𑀸𑀬. 𑀚𑀸𑀬𑀦𑁆𑀢𑀫𑁂𑀯 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀦 𑀧𑀦 𑀞𑀺𑀢𑀁, 𑀪𑀺𑀚𑁆𑀚𑀫𑀸𑀦𑀁 𑀯𑀸 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀚𑀦𑀓𑀲𑀸𑀫𑀢𑁆𑀣𑀺𑀬𑀬𑁄𑀕𑀢𑁄.

𑁩𑁨. 𑀇𑀭𑀺𑀬𑀸𑀬 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀺𑀧𑀣𑀪𑀸𑀯𑀢𑁄 𑀇𑀭𑀺𑀬𑀸𑀧𑀣𑁄, 𑀕𑀫𑀦𑀸𑀤𑀺, 𑀅𑀢𑁆𑀣𑀢𑁄 𑀢𑀤𑀯𑀢𑁆𑀣𑀸 𑀭𑀽𑀧𑀧𑁆𑀧𑀯𑀢𑁆𑀢𑀺. 𑀢𑀫𑁆𑀧𑀺 𑀲𑀦𑁆𑀥𑀸𑀭𑁂𑀢𑀺 𑀬𑀣𑀸𑀧𑀯𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀬𑀣𑀸 𑀳𑀺 𑀯𑀻𑀣𑀺𑀘𑀺𑀢𑁆𑀢𑁂𑀳𑀺 𑀅𑀩𑁆𑀩𑁄𑀓𑀺𑀡𑁆𑀡𑁂 𑀪𑀯𑀗𑁆𑀕𑁂 𑀧𑀯𑀢𑁆𑀢𑀫𑀸𑀦𑁂 𑀅𑀗𑁆𑀕𑀸𑀦𑀺 𑀑𑀲𑀻𑀤𑀦𑁆𑀢𑀺, 𑀦 𑀏𑀯𑀫𑁂𑀢𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑁂𑀲𑀼, 𑀯𑀓𑁆𑀔𑀫𑀸𑀦𑁂𑀲𑀼 𑀘 𑀙𑀩𑁆𑀩𑀻𑀲𑀢𑀺𑀬𑀸 𑀚𑀸𑀕𑀭𑀡𑀘𑀺𑀢𑁆𑀢𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼. 𑀢𑀤𑀸 𑀧𑀦 𑀅𑀗𑁆𑀕𑀸𑀦𑀺 𑀉𑀧𑀢𑁆𑀣𑀤𑁆𑀥𑀸𑀦𑀺 𑀬𑀣𑀸𑀧𑀯𑀢𑁆𑀢𑀇𑀭𑀺𑀬𑀸𑀧𑀣𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺.

𑁩𑁩. 𑀯𑀺𑀜𑁆𑀜𑀢𑁆𑀢𑀺𑀫𑁆𑀧𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀦 𑀓𑁂𑀯𑀮𑀁 𑀭𑀽𑀧𑀺𑀭𑀺𑀬𑀸𑀧𑀣𑀸𑀦𑁂𑀯. 𑀅𑀯𑀺𑀲𑁂𑀲𑀯𑀘𑀦𑁂𑀧𑀺 𑀧𑀦𑁂𑀢𑁆𑀣 𑀫𑀦𑁄𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀦𑁂𑀯 𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀸𑀦𑀺, 𑀢𑀣𑀸 𑀳𑀸𑀲𑀚𑀦𑀓𑀸𑀦𑀺 𑀘 𑀧𑀜𑁆𑀘𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀦𑀁 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑁄 𑀇𑀭𑀺𑀬𑀸𑀧𑀣𑁄, 𑀯𑀺𑀜𑁆𑀜𑀢𑁆𑀢𑀺 𑀯𑀸 𑀦𑀢𑁆𑀣𑀺, 𑀢𑀣𑀸𑀧𑀺 𑀦 𑀲𑀩𑁆𑀩𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀁 𑀘𑀺𑀢𑁆𑀢𑀁 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀓𑀁, 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀚𑀦𑀓𑀜𑁆𑀘 𑀳𑁄𑀢𑀺. 𑀬𑀁 𑀧𑀦 𑀘𑀺𑀢𑁆𑀢𑀁 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀁, 𑀢𑀁 𑀏𑀓𑀁𑀲𑀢𑁄 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀓𑀁 𑀇𑀭𑀺𑀬𑀸𑀧𑀣𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀳 𑀅𑀯𑀺𑀦𑀸𑀪𑀸𑀯𑀢𑁄. 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀓𑀜𑁆𑀘 𑀭𑀽𑀧𑀚𑀦𑀓𑀦𑁆𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀭𑀽𑀧𑀢𑁄 𑀇𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀻𑀦𑀁 𑀯𑀺𑀲𑀼𑀁 𑀕𑀳𑀡𑀁.

𑁩𑁪. 𑀢𑁂𑀭𑀲𑀸𑀢𑀺 𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀺, 𑀅𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀺, 𑀓𑀺𑀭𑀺𑀬𑀢𑁄 𑀧𑀜𑁆𑀘𑀸𑀢𑀺 𑀢𑁂𑀭𑀲. 𑀢𑁂𑀲𑀼 𑀳𑀺 𑀧𑀼𑀣𑀼𑀚𑁆𑀚𑀦𑀸 𑀅𑀝𑁆𑀞𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀳𑀲𑀦𑁆𑀢𑀺, 𑀲𑁂𑀓𑁆𑀔𑀸 𑀤𑀺𑀝𑁆𑀞𑀺𑀲𑀳𑀕𑀢𑀯𑀚𑁆𑀚𑀺𑀢𑁂𑀳𑀺, 𑀅𑀲𑁂𑀓𑁆𑀔𑀸 𑀧𑀦 𑀧𑀜𑁆𑀘𑀳𑀺 𑀓𑀺𑀭𑀺𑀬𑀘𑀺𑀢𑁆𑀢𑁂𑀳𑀺, 𑀢𑀢𑁆𑀣𑀸𑀧𑀺 𑀩𑀼𑀤𑁆𑀥𑀸 𑀘𑀢𑀽𑀳𑀺 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑁂𑀳𑁂𑀯 𑀳𑀲𑀦𑁆𑀢𑀺, 𑀦 𑀅𑀳𑁂𑀢𑀼𑀓𑁂𑀦 ‘‘𑀅𑀢𑀻𑀢𑀁𑀲𑀸𑀤𑀻𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁 𑀧𑀢𑁆𑀯𑀸 𑀇𑀫𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻’’𑀢𑀺 𑀯𑀘𑀦𑀢𑁄 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫). 𑀦 𑀳𑀺 𑀯𑀺𑀘𑀸𑀭𑀡𑀧𑀜𑁆𑀜𑀸𑀭𑀳𑀺𑀢𑀲𑁆𑀲 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲 𑀩𑀼𑀤𑁆𑀥𑀸𑀦𑀁 𑀧𑀯𑀢𑁆𑀢𑀺 𑀬𑀼𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀦 𑀧𑀦 𑀧𑀯𑀢𑁆𑀢𑀺𑀬𑀫𑀸𑀦𑀫𑁆𑀧𑀺 𑀢𑁂𑀲𑀁 𑀲𑀺𑀢𑀓𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀅𑀦𑀼𑀯𑀢𑁆𑀢𑀓𑀢𑁆𑀢𑀸 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀬𑁂𑀯𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁫𑁬𑁮) ‘‘𑀢𑁂𑀲𑀁 𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀇𑀤𑀁 𑀘𑀺𑀢𑁆𑀢𑀁 𑀳𑀸𑀲𑀬𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀢𑀲𑁆𑀲 𑀩𑀼𑀤𑁆𑀥𑀸𑀦𑀁 𑀧𑀯𑀢𑁆𑀢𑀺 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁.

𑁩𑁫. 𑀧𑀘𑁆𑀙𑀸𑀚𑀸𑀢𑀸𑀤𑀺𑀧𑀘𑁆𑀘𑀬𑀽𑀧𑀢𑁆𑀣𑀫𑁆𑀪𑀮𑀸𑀪𑁂𑀦 𑀞𑀺𑀢𑀺𑀓𑁆𑀔𑀡𑁂𑀬𑁂𑀯 𑀉𑀢𑀼𑀑𑀚𑀸𑀦𑀁 𑀩𑀮𑀯𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀢𑁂𑀚𑁄𑀥𑀸𑀢𑀼 𑀞𑀺𑀢𑀺𑀧𑁆𑀧𑀢𑁆𑀢𑀸’’𑀢𑁆𑀬𑀸𑀤𑀺.

𑁩𑁭. 𑀢𑀢𑁆𑀣 𑀳𑀤𑀬𑀇𑀦𑁆𑀤𑁆𑀭𑀺𑀬𑀭𑀽𑀧𑀸𑀦𑀺 𑀦𑀯 𑀓𑀫𑁆𑀫𑀢𑁄𑀬𑁂𑀯 𑀚𑀸𑀢𑀢𑁆𑀢𑀸 𑀓𑀫𑁆𑀫𑀚𑀸𑀦𑁂𑀯. 𑀬𑀜𑁆𑀳𑀺 𑀚𑀸𑀢𑀁, 𑀚𑀸𑀬𑀢𑀺, 𑀚𑀸𑀬𑀺𑀲𑁆𑀲𑀢𑀺 𑀘, 𑀢𑀁 ‘‘𑀓𑀫𑁆𑀫𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 𑀤𑀼𑀤𑁆𑀥𑀦𑁆𑀢𑀺.

𑁪𑁦. 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀸𑀧𑁂𑀓𑁆𑀔𑀢𑁆𑀢𑀸 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀓𑀫𑁆𑀫𑀚𑀁 𑀦 𑀳𑁄𑀢𑀺, 𑀇𑀢𑀭𑀣𑀸 𑀲𑀩𑁆𑀩𑀤𑀸𑀪𑀸𑀯𑀻𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀲𑀫𑁆𑀪𑁄𑀢𑀻’’𑀢𑀺.

𑁪𑁩. 𑀏𑀓𑀦𑁆𑀢𑀓𑀫𑁆𑀫𑀚𑀸𑀦𑀺 𑀦𑀯, 𑀘𑀢𑀼𑀚𑁂𑀲𑀼 𑀓𑀫𑁆𑀫𑀚𑀸𑀦𑀺 𑀦𑀯𑀸𑀢𑀺 𑀅𑀝𑁆𑀞𑀸𑀭𑀲 𑀓𑀫𑁆𑀫𑀚𑀸𑀦𑀺, 𑀧𑀜𑁆𑀘𑀯𑀺𑀓𑀸𑀭𑀭𑀽𑀧𑀲𑀤𑁆𑀤𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀆𑀓𑀸𑀲𑀯𑀲𑁂𑀦 𑀧𑀦𑁆𑀦𑀭𑀲 𑀘𑀺𑀢𑁆𑀢𑀚𑀸𑀦𑀺, 𑀲𑀤𑁆𑀤𑁄, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁, 𑀅𑀯𑀺𑀦𑀺𑀩𑁆𑀪𑁄𑀕𑀸𑀓𑀸𑀲𑀭𑀽𑀧𑀸𑀦𑀺 𑀦𑀯𑀸𑀢𑀺 𑀢𑁂𑀭𑀲 𑀉𑀢𑀼𑀚𑀸𑀦𑀺, 𑀮𑀳𑀼𑀢𑀸𑀤𑀺𑀢𑁆𑀢𑀬𑀅𑀯𑀺𑀦𑀺𑀩𑁆𑀪𑁄𑀕𑀸𑀓𑀸𑀲𑀯𑀲𑁂𑀦 𑀤𑁆𑀯𑀸𑀤𑀲 𑀆𑀳𑀸𑀭𑀚𑀸𑀦𑀺.

𑁪𑁪. 𑀓𑁂𑀯𑀮𑀁 𑀚𑀸𑀬𑀫𑀸𑀦𑀸𑀤𑀺𑀭𑀽𑀧𑀸𑀦𑀁 𑀚𑀸𑀬𑀫𑀸𑀦𑀧𑀭𑀺𑀧𑀘𑁆𑀘𑀫𑀸𑀦𑀪𑀺𑀚𑁆𑀚𑀫𑀸𑀦𑀭𑀽𑀧𑀸𑀦𑀁 𑀲𑀪𑀸𑀯𑀢𑁆𑀢𑀸 𑀲𑀪𑀸𑀯𑀫𑀢𑁆𑀢𑀁 𑀯𑀺𑀦𑀸 𑀅𑀢𑁆𑀢𑀦𑁄 𑀚𑀸𑀢𑀺𑀆𑀤𑀺𑀮𑀓𑁆𑀔𑀡𑀸𑀪𑀸𑀯𑀢𑁄 𑀮𑀓𑁆𑀔𑀡𑀸𑀦𑀺 𑀓𑁂𑀳𑀺𑀘𑀺 𑀧𑀘𑁆𑀘𑀬𑁂𑀳𑀺 𑀦 𑀚𑀸𑀬𑀦𑁆𑀢𑀻𑀢𑀺 𑀧𑀓𑀸𑀲𑀺𑀢𑀁. 𑀉𑀧𑁆𑀧𑀸𑀤𑀸𑀤𑀺𑀬𑀼𑀢𑁆𑀢𑀸𑀦𑀜𑁆𑀳𑀺 𑀘𑀓𑁆𑀔𑀸𑀤𑀻𑀦𑀁 𑀚𑀸𑀢𑀺𑀆𑀤𑀻𑀦𑀺 𑀮𑀓𑁆𑀔𑀡𑀸𑀦𑀺 𑀯𑀺𑀚𑁆𑀚𑀦𑁆𑀢𑀺, 𑀦 𑀏𑀯𑀁 𑀚𑀸𑀢𑀺𑀆𑀤𑀻𑀦𑀁. 𑀬𑀤𑀺 𑀢𑁂𑀲𑀫𑁆𑀧𑀺 𑀚𑀸𑀢𑀺𑀆𑀤𑀻𑀦𑀺 𑀲𑀺𑀬𑀼𑀁, 𑀏𑀯𑀁 𑀅𑀦𑀯𑀢𑁆𑀣𑀸𑀦𑀫𑁂𑀯 𑀆𑀧𑀚𑁆𑀚𑁂𑀬𑁆𑀬. 𑀬𑀁 𑀧𑀦 ‘‘𑀭𑀽𑀧𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄. 𑀇𑀫𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸’’𑀢𑁆𑀬𑀸𑀤𑀻𑀲𑀼 (𑀥. 𑀲. 𑁧𑁨𑁦𑁧) 𑀚𑀸𑀢𑀺𑀬𑀸 𑀓𑀼𑀢𑁄𑀘𑀺𑀚𑀸𑀢𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀫𑁆𑀧𑀺 𑀭𑀽𑀧𑀚𑀦𑀓𑀧𑀘𑁆𑀘𑀬𑀸𑀦𑀁 𑀭𑀽𑀧𑀼𑀧𑁆𑀧𑀸𑀤𑀦𑀁 𑀧𑀢𑀺 𑀅𑀦𑀼𑀧𑀭𑀢𑀩𑁆𑀬𑀸𑀧𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑀽𑀧𑀕𑀫𑀦𑀓𑁆𑀔𑀡𑁂 𑀚𑀸𑀬𑀫𑀸𑀦𑀥𑀫𑁆𑀫𑀯𑀺𑀓𑀸𑀭𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀫𑁆𑀧𑀺 ‘‘𑀚𑀸𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀘𑀦𑀁 (𑀲𑀁. 𑀦𑀺. 𑁨.𑁨𑁦), 𑀢𑀢𑁆𑀣𑀸𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀮𑀓𑁆𑀔𑀡𑀪𑀸𑀯𑀢𑁄𑀢𑀺 𑀅𑀬𑀫𑁂𑀢𑁆𑀣𑀸𑀪𑀺𑀲𑀦𑁆𑀥𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀧𑀸𑀞𑁂 𑀓𑀼𑀢𑁄𑀘𑀺 𑀚𑀸𑀢𑀢𑁆𑀢𑀁, 𑀚𑀸𑀢𑀺𑀬𑀸 𑀧𑀭𑀺𑀬𑀸𑀬𑀢𑁄;

𑀲𑀗𑁆𑀔𑀢𑀸𑀦𑀁 𑀲𑀪𑀸𑀯𑀢𑁆𑀢𑀸, 𑀢𑀻𑀲𑀼 𑀲𑀗𑁆𑀔𑀢𑀢𑁄𑀤𑀺𑀢𑀸’’𑀢𑀺.

𑀭𑀽𑀧𑀲𑀫𑀼𑀝𑁆𑀞𑀸𑀦𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀮𑀸𑀧𑀬𑁄𑀚𑀦𑀸𑀯𑀡𑁆𑀡𑀦𑀸

𑁪𑁫. 𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀭𑀽𑀧𑀸𑀦𑀺 𑀓𑀫𑁆𑀫𑀸𑀤𑀺𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺𑀧𑀺 𑀦 𑀏𑀓𑁂𑀓𑀁 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀅𑀣 𑀔𑁄 𑀧𑀺𑀡𑁆𑀟𑀢𑁄𑀯. 𑀢𑀲𑁆𑀫𑀸 𑀧𑀺𑀡𑁆𑀟𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀁, 𑀲𑀭𑀽𑀧𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀼𑀧𑁆𑀧𑀸𑀤𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀲𑀳𑀯𑀼𑀢𑁆𑀢𑀺𑀦𑁄𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀮𑀸𑀧𑀕𑀢𑀭𑀽𑀧𑀯𑀲𑁂𑀦 𑀲𑀳𑀯𑀼𑀢𑁆𑀢𑀺𑀦𑁄, 𑀦 𑀲𑀩𑁆𑀩𑀓𑀮𑀸𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀳𑀼𑀧𑁆𑀧𑀢𑁆𑀢𑀺𑀯𑀲𑁂𑀦.

𑁪𑁬. 𑀤𑀲 𑀧𑀭𑀺𑀫𑀸𑀡𑀸 𑀅𑀲𑁆𑀲𑀸𑀢𑀺 𑀤𑀲𑀓𑀁, 𑀲𑀫𑀼𑀤𑀸𑀬𑀲𑁆𑀲𑁂𑀢𑀁 𑀦𑀸𑀫𑀁, 𑀘𑀓𑁆𑀔𑀼𑀦𑀸 𑀉𑀧𑀮𑀓𑁆𑀔𑀺𑀢𑀁, 𑀢𑀧𑁆𑀧𑀥𑀸𑀦𑀁 𑀯𑀸 𑀤𑀲𑀓𑀁 𑀘𑀓𑁆𑀔𑀼𑀤𑀲𑀓𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑁪𑁭. 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑁂𑀦 𑀲𑀤𑁆𑀤𑁄𑀧𑀺 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀢𑀤𑀯𑀺𑀦𑀸𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀤𑀲𑀓’’𑀦𑁆𑀢𑀺.

𑁫𑁦. 𑀓𑀺𑀁 𑀧𑀦𑁂𑀢𑁂 𑀏𑀓𑀯𑀻𑀲𑀢𑀺 𑀓𑀮𑀸𑀧𑀸 𑀲𑀩𑁆𑀩𑁂𑀧𑀺 𑀲𑀩𑁆𑀩𑀢𑁆𑀣 𑀳𑁄𑀦𑁆𑀢𑀺, 𑀉𑀤𑀸𑀳𑀼 𑀓𑁂𑀘𑀺 𑀓𑀢𑁆𑀣𑀘𑀻𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑁆𑀬𑀸𑀤𑀺.

𑀓𑀮𑀸𑀧𑀬𑁄𑀚𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀧𑀯𑀢𑁆𑀢𑀺𑀓𑁆𑀓𑀫𑀯𑀡𑁆𑀡𑀦𑀸

𑁫𑁨. 𑀇𑀤𑀸𑀦𑀺 𑀦𑁂𑀲𑀁 𑀲𑀫𑁆𑀪𑀯𑀯𑀲𑁂𑀦, 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦, 𑀬𑁄𑀦𑀺𑀯𑀲𑁂𑀦 𑀘 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀦𑀺𑀧𑀺 𑀧𑀦𑁂𑀢𑀸𑀦𑀻’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀬𑀣𑀸𑀭𑀳𑀦𑁆𑀢𑀺 𑀲𑀪𑀸𑀯𑀓𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀅𑀦𑀼𑀭𑀽𑀧𑀢𑁄.

𑁫𑁩. 𑀓𑀫𑀮𑀓𑀼𑀳𑀭𑀕𑀩𑁆𑀪𑀫𑀮𑀸𑀤𑀺𑀲𑀁𑀲𑁂𑀤𑀝𑁆𑀞𑀸𑀦𑁂𑀲𑀼 𑀚𑀸𑀢𑀸 𑀲𑀁𑀲𑁂𑀤𑀚𑀸. 𑀉𑀧𑀧𑀸𑀢𑁄 𑀦𑁂𑀲𑀁 𑀅𑀢𑁆𑀣𑀻𑀢𑀺 𑀑𑀧𑀧𑀸𑀢𑀺𑀓𑀸, 𑀉𑀓𑁆𑀓𑀁𑀲𑀕𑀢𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘𑁂𑀢𑁆𑀣 𑀯𑀺𑀲𑀺𑀝𑁆𑀞𑀉𑀧𑀧𑀸𑀢𑁄 𑀕𑀳𑀺𑀢𑁄 𑀬𑀣𑀸 ‘‘𑀅𑀪𑀺𑀭𑀽𑀧𑀲𑁆𑀲 𑀓𑀜𑁆𑀜𑀸 𑀤𑀸𑀢𑀩𑁆𑀩𑀸’’𑀢𑀺. 𑀲𑀢𑁆𑀢 𑀤𑀲𑀓𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀪𑀸𑀯𑁂𑀦 𑀉𑀧𑀮𑀩𑁆𑀪𑀦𑀢𑁄. 𑀓𑀤𑀸𑀘𑀺 𑀦 𑀮𑀩𑁆𑀪𑀦𑁆𑀢𑀺 𑀚𑀘𑁆𑀘𑀦𑁆𑀥𑀚𑀘𑁆𑀘𑀩𑀥𑀺𑀭𑀚𑀘𑁆𑀘𑀸𑀖𑀸𑀦𑀦𑀧𑀼𑀁𑀲𑀓𑀆𑀤𑀺𑀓𑀧𑁆𑀧𑀺𑀓𑀸𑀦𑀁 𑀯𑀲𑁂𑀦. 𑀢𑀢𑁆𑀣 𑀲𑀼𑀕𑀢𑀺𑀬𑀁 𑀫𑀳𑀸𑀦𑀼𑀪𑀸𑀯𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁 𑀑𑀧𑀧𑀸𑀢𑀺𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀸𑀬𑁄𑀕𑀢𑁄 𑀘𑀓𑁆𑀔𑀼𑀲𑁄𑀢𑀖𑀸𑀦𑀸𑀮𑀸𑀪𑁄 𑀲𑀁𑀲𑁂𑀤𑀚𑀸𑀦𑀁, 𑀪𑀸𑀯𑀸𑀮𑀸𑀪𑁄 𑀧𑀞𑀫𑀓𑀧𑁆𑀧𑀺𑀓𑀑𑀧𑀧𑀸𑀢𑀺𑀓𑀸𑀦𑀁 𑀯𑀲𑁂𑀦𑀧𑀺. 𑀤𑀼𑀕𑁆𑀕𑀢𑀺𑀬𑀁 𑀧𑀦 𑀘𑀓𑁆𑀔𑀼𑀲𑁄𑀢𑀪𑀸𑀯𑀸𑀮𑀸𑀪𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀲𑁂𑀦, 𑀖𑀸𑀦𑀸𑀮𑀸𑀪𑁄 𑀲𑀁𑀲𑁂𑀤𑀚𑀸𑀦𑀫𑁂𑀯 𑀯𑀲𑁂𑀦, 𑀦 𑀑𑀧𑀧𑀸𑀢𑀺𑀓𑀸𑀦𑀁 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀤𑀲, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺𑀧𑀺 𑀤𑀲, 𑀓𑀲𑁆𑀲𑀘𑀺 𑀦𑀯, 𑀓𑀲𑁆𑀲𑀘𑀺 𑀲𑀢𑁆𑀢𑀸’’𑀢𑀺 (𑀯𑀺𑀪. 𑁧𑁦𑁦𑁭) 𑀯𑀘𑀦𑀢𑁄 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑀲𑁆𑀲 𑀑𑀧𑀧𑀸𑀢𑀺𑀓𑀲𑁆𑀲 𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀅𑀦𑁆𑀥𑀲𑁆𑀲 𑀘𑀓𑁆𑀔𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀺 𑀤𑀲, 𑀢𑀣𑀸 𑀩𑀥𑀺𑀭𑀲𑁆𑀲 𑀲𑁄𑀢𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀺, 𑀅𑀦𑁆𑀥𑀩𑀥𑀺𑀭𑀲𑁆𑀲 𑀢𑀤𑀼𑀪𑀬𑀯𑀚𑁆𑀚𑀺𑀢𑀸𑀦𑀺 𑀦𑀯, 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀺𑀲𑀢𑁆𑀢𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀬𑀤𑀺 𑀧𑀦 𑀅𑀖𑀸𑀦𑀓𑁄𑀧𑀺 𑀑𑀧𑀧𑀸𑀢𑀺𑀓𑁄 𑀲𑀺𑀬𑀸, 𑀅𑀦𑁆𑀥𑀩𑀥𑀺𑀭𑀸𑀖𑀸𑀦𑀓𑀸𑀦𑀁 𑀯𑀲𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀤𑀲, 𑀅𑀦𑁆𑀥𑀩𑀥𑀺𑀭𑀅𑀦𑁆𑀥𑀸𑀖𑀸𑀦𑀓𑀩𑀥𑀺𑀭𑀸𑀖𑀸𑀦𑀓𑀸𑀦𑀁 𑀯𑀲𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀦𑀯, 𑀅𑀦𑁆𑀥𑀩𑀥𑀺𑀭𑀸𑀖𑀸𑀦𑀓𑀲𑁆𑀲 𑀯𑀲𑁂𑀦 𑀘 𑀅𑀝𑁆𑀞 𑀆𑀬𑀢𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀦 𑀧𑀦𑁂𑀯𑀁 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀦𑀢𑁆𑀣𑀺 𑀑𑀧𑀧𑀸𑀢𑀺𑀓𑀲𑁆𑀲 𑀖𑀸𑀦𑀯𑁂𑀓𑀮𑁆𑀮𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑀬𑀫𑀓𑀝𑁆𑀞𑀓𑀣𑀸𑀬𑀁 ‘‘𑀅𑀖𑀸𑀦𑀓𑁄 𑀑𑀧𑀧𑀸𑀢𑀺𑀓𑁄 𑀦𑀢𑁆𑀣𑀺. 𑀬𑀤𑀺 𑀪𑀯𑁂𑀬𑁆𑀬, 𑀓𑀲𑁆𑀲𑀘𑀺 𑀅𑀝𑁆𑀞𑀸𑀬𑀢𑀦𑀸𑀦𑀻𑀢𑀺 𑀯𑀤𑁂𑀬𑁆𑀬𑀸’’𑀢𑀺 (𑀬𑀫. 𑀅𑀝𑁆𑀞. 𑀆𑀬𑀢𑀦𑀬𑀫𑀓. 𑁧𑁮-𑁨𑁧).

𑀲𑀁𑀲𑁂𑀤𑀚𑀸𑀦𑀁 𑀧𑀦 𑀖𑀸𑀦𑀸𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁 ‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂’’𑀢𑁆𑀬𑀸𑀤𑀺𑀧𑀸𑀴𑀺𑀬𑀸 (𑀯𑀺𑀪. 𑁧𑁦𑁦𑁭) 𑀑𑀧𑀧𑀸𑀢𑀺𑀓𑀬𑁄𑀦𑀺𑀫𑁂𑀯 𑀲𑀦𑁆𑀥𑀸𑀬, 𑀲𑀢𑁆𑀢𑀸𑀬𑀢𑀦𑀕𑁆𑀕𑀳𑀡𑀲𑁆𑀲 𑀘 𑀅𑀜𑁆𑀜𑁂𑀲𑀁 𑀅𑀲𑀫𑁆𑀪𑀯𑀢𑁄 𑀕𑀩𑁆𑀪𑀲𑁂𑀬𑁆𑀬𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀧𑀦 ‘‘𑀲𑀁𑀲𑁂𑀤𑀚𑀬𑁄𑀦𑀺𑀓𑀸 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀪𑀸𑀯𑁂𑀦 𑀑𑀧𑀧𑀸𑀢𑀺𑀓𑀲𑀗𑁆𑀕𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁, 𑀢𑀫𑁆𑀧𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀁𑀬𑁂𑀯 𑀲𑀁𑀲𑁂𑀤𑀚𑀸𑀦𑀁 𑀑𑀧𑀧𑀸𑀢𑀺𑀓𑁂𑀲𑀼 𑀲𑀗𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 𑀬𑀫𑀓𑁂 𑀖𑀸𑀦𑀚𑀺𑀯𑁆𑀳𑀸𑀦𑀁 𑀲𑀳𑀘𑀸𑀭𑀺𑀢𑀸 𑀯𑀼𑀢𑁆𑀢𑀸𑀢𑀺 𑀅𑀚𑀺𑀯𑁆𑀳𑀲𑁆𑀲 𑀅𑀲𑀫𑁆𑀪𑀯𑀢𑁄 𑀅𑀖𑀸𑀦𑀓𑀲𑁆𑀲𑀧𑀺 𑀅𑀪𑀸𑀯𑀫𑁂𑀯 𑀯𑀡𑁆𑀡𑁂𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀬𑀣𑀸 𑀘𑀓𑁆𑀔𑀼𑀲𑁄𑀢𑀸𑀦𑀺 𑀭𑀽𑀧𑀪𑀯𑁂 𑀖𑀸𑀦𑀚𑀺𑀯𑁆𑀳𑀸𑀳𑀺 𑀯𑀺𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀦 𑀏𑀯𑀁 𑀖𑀸𑀦𑀚𑀺𑀯𑁆𑀳𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀸 𑀧𑀯𑀢𑁆𑀢𑀦𑁆𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀭𑀽𑀧𑀪𑀯𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀸𑀫𑀪𑀯𑁂 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀢𑁂𑀲𑀁 𑀲𑀳𑀘𑀸𑀭𑀺𑀢𑀸 𑀯𑀼𑀢𑁆𑀢𑀸𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑁫𑁪. 𑀕𑀩𑁆𑀪𑁂 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀲𑁂𑀦𑁆𑀢𑀻𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀸, 𑀢𑁂𑀬𑁂𑀯 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀢𑀸𑀬 𑀲𑀢𑁆𑀢𑀸𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀸. 𑀏𑀢𑁂 𑀅𑀡𑁆𑀟𑀚𑀚𑀮𑀸𑀩𑀼𑀚𑀸. 𑀢𑀻𑀡𑀺 𑀤𑀲𑀓𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀬𑀸𑀦𑀺 ‘‘𑀓𑀮𑀮𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀧𑀭𑀺𑀧𑀺𑀡𑁆𑀟𑀺𑀢𑀸𑀦𑀺 𑀘 𑀢𑀸𑀦𑀺 𑀚𑀸𑀢𑀺𑀉𑀡𑁆𑀡𑀸𑀬 𑀏𑀓𑀲𑁆𑀲 𑀅𑀁𑀲𑀼𑀦𑁄 𑀧𑀲𑀦𑁆𑀦𑀢𑀺𑀮𑀢𑁂𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀝𑀲𑁆𑀲 𑀧𑀕𑁆𑀖𑀭𑀺𑀢𑁆𑀯𑀸 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢𑀸𑀦𑀺 𑀅𑀘𑁆𑀙𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀺. 𑀓𑀤𑀸𑀘𑀺 𑀦 𑀮𑀩𑁆𑀪𑀢𑀺 𑀅𑀪𑀸𑀯𑀓𑀲𑀢𑁆𑀢𑀸𑀦𑀁 𑀯𑀲𑁂𑀦. 𑀢𑀢𑁄 𑀧𑀭𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀢𑁄 𑀧𑀭𑀁. 𑀧𑀯𑀢𑁆𑀢𑀺𑀓𑀸𑀮𑁂𑀢𑀺 𑀲𑀢𑁆𑀢𑀫𑁂 𑀲𑀢𑁆𑀢𑀸𑀳𑁂, 𑀝𑀻𑀓𑀸𑀓𑀸𑀭𑀫𑀢𑁂𑀦 𑀏𑀓𑀸𑀤𑀲𑀫𑁂 𑀲𑀢𑁆𑀢𑀸𑀳𑁂 𑀯𑀸. 𑀓𑀫𑁂𑀦𑀸𑀢𑀺 𑀘𑀓𑁆𑀔𑀼𑀤𑀲𑀓𑀧𑀸𑀢𑀼𑀪𑀸𑀯𑀢𑁄 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀦 𑀲𑁄𑀢𑀤𑀲𑀓𑀁, 𑀢𑀢𑁄 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀦 𑀖𑀸𑀦𑀤𑀲𑀓𑀁, 𑀢𑀢𑁄 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀦 𑀚𑀺𑀯𑁆𑀳𑀸𑀤𑀲𑀓𑀦𑁆𑀢𑀺 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀳𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀯.

𑁫𑁫. 𑀞𑀺𑀢𑀺𑀓𑀸𑀮𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑀸𑀮𑀁. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑀳𑀚𑀸𑀢𑀸 𑀳𑀺 𑀉𑀢𑀼 𑀞𑀸𑀦𑀧𑁆𑀧𑀢𑁆𑀢𑀸 𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀲𑀼𑀤𑁆𑀥𑀝𑁆𑀞𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀤𑀸 𑀉𑀧𑁆𑀧𑀦𑁆𑀦𑀸 𑀪𑀗𑁆𑀕𑀓𑁆𑀔𑀡𑁂𑀢𑁆𑀬𑀸𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀉𑀢𑀼 𑀭𑀽𑀧𑀁 𑀚𑀦𑁂𑀢𑀺. 𑀑𑀚𑀸𑀨𑀭𑀡𑀫𑀼𑀧𑀸𑀤𑀸𑀬𑀸𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀫𑀸𑀢𑀼 𑀅𑀚𑁆𑀛𑁄𑀳𑀝𑀸𑀳𑀸𑀭𑀢𑁄 𑀲𑀁𑀲𑁂𑀤𑀚𑁄𑀧𑀧𑀸𑀢𑀺𑀓𑀸𑀦𑀜𑁆𑀘 𑀫𑀼𑀔𑀕𑀢𑀲𑁂𑀫𑁆𑀳𑀸𑀤𑀺𑀢𑁄 𑀑𑀚𑀸𑀬 𑀭𑀲𑀳𑀭𑀡𑀻𑀅𑀦𑀼𑀲𑀸𑀭𑁂𑀦 𑀲𑀭𑀻𑀭𑁂 𑀨𑀭𑀡𑀓𑀸𑀮𑀢𑁄 𑀧𑀝𑁆𑀞𑀸𑀬.

𑁫𑁬. 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑀭𑀺𑀫𑀁 𑀏𑀢𑀲𑁆𑀲𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑁄𑀧𑀭𑀺. 𑀓𑀫𑁆𑀫𑀚𑀭𑀽𑀧𑀸𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀤𑀼𑀧𑁆𑀧𑀢𑁆𑀢𑀺𑀬𑀁 𑀫𑀭𑀡𑀸𑀪𑀸𑀯𑀢𑁄. 𑀓𑀫𑁆𑀫𑀚𑀭𑀽𑀧𑀯𑀺𑀘𑁆𑀙𑁂𑀤𑁂 𑀳𑀺 ‘‘𑀫𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀆𑀬𑀼 𑀉𑀲𑁆𑀫𑀸 𑀘 𑀯𑀺𑀜𑁆𑀜𑀸𑀡𑀁, 𑀬𑀤𑀸 𑀓𑀸𑀬𑀁 𑀚𑀳𑀦𑁆𑀢𑀺𑀫𑀁;

𑀅𑀧𑀯𑀺𑀤𑁆𑀥𑁄 𑀢𑀤𑀸 𑀲𑁂𑀢𑀺, 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭’’𑀦𑁆𑀢𑀺. (𑀲𑀁. 𑀦𑀺. 𑁩.𑁯𑁫 𑀣𑁄𑀓𑀁 𑀯𑀺𑀲𑀤𑀺𑀲𑀁);

𑀧𑀼𑀭𑁂𑀢𑀭𑀦𑁆𑀢𑀺 𑀲𑀢𑁆𑀢𑀭𑀲𑀫𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂. 𑀢𑀢𑁄𑀧𑀭𑀁 𑀘𑀺𑀢𑁆𑀢𑀚𑀸𑀳𑀸𑀭𑀚𑀭𑀽𑀧𑀜𑁆𑀘 𑀯𑁄𑀘𑁆𑀙𑀺𑀚𑁆𑀚𑀢𑀻𑀢𑀺 𑀅𑀚𑀻𑀯𑀓𑀲𑀦𑁆𑀢𑀸𑀦𑁂 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀬𑀣𑀸𑀦𑀺𑀩𑁆𑀩𑀢𑁆𑀢𑀁 𑀘𑀺𑀢𑁆𑀢𑀚𑀁, 𑀆𑀳𑀸𑀭𑀚𑀜𑁆𑀘 𑀢𑀢𑁄 𑀧𑀭𑀁 𑀓𑀺𑀜𑁆𑀘𑀺 𑀓𑀸𑀮𑀁 𑀧𑀯𑀢𑁆𑀢𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 ‘‘𑀘𑀺𑀢𑁆𑀢𑀚𑀭𑀽𑀧𑀁 𑀘𑀼𑀢𑀺𑀘𑀺𑀢𑁆𑀢𑀢𑁄 𑀧𑀼𑀭𑁂𑀢𑀭𑀫𑁂𑀯 𑀯𑁄𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀯𑀡𑁆𑀡𑁂𑀦𑁆𑀢𑀺.

𑁫𑁮. 𑀭𑀽𑀧𑀮𑁄𑀓𑁂 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀦𑀁 𑀅𑀪𑀸𑀯𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀪𑀸𑀯𑀤𑁆𑀯𑀬𑀁 𑀧𑀦 𑀩𑀳𑀮𑀓𑀸𑀫𑀭𑀸𑀕𑀽𑀧𑀦𑀺𑀲𑁆𑀲𑀬𑀢𑁆𑀢𑀸 𑀩𑁆𑀭𑀳𑁆𑀫𑀸𑀦𑀜𑁆𑀘 𑀢𑀤𑀪𑀸𑀯𑀢𑁄 𑀢𑀢𑁆𑀣 𑀦 𑀧𑀯𑀢𑁆𑀢𑀢𑀺. 𑀆𑀳𑀸𑀭𑀚𑀓𑀮𑀸𑀧𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀺 𑀅𑀚𑁆𑀛𑁄𑀳𑀝𑀸𑀳𑀸𑀭𑀸𑀪𑀸𑀯𑁂𑀦 𑀲𑀭𑀻𑀭𑀕𑀢𑀲𑁆𑀲𑀧𑀺 𑀆𑀳𑀸𑀭𑀲𑁆𑀲 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀸𑀪𑀸𑀯𑀢𑁄. 𑀩𑀸𑀳𑀺𑀭𑀜𑁆𑀳𑀺 𑀉𑀢𑀼𑀁, 𑀆𑀳𑀸𑀭𑀜𑁆𑀘 𑀉𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀉𑀢𑀼𑀆𑀳𑀸𑀭𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀚𑀻𑀯𑀺𑀢𑀦𑀯𑀓𑀦𑁆𑀢𑀺 𑀓𑀸𑀬𑀸𑀪𑀸𑀯𑀢𑁄 𑀓𑀸𑀬𑀤𑀲𑀓𑀝𑁆𑀞𑀸𑀦𑀺𑀬𑀁 𑀚𑀻𑀯𑀺𑀢𑀦𑀯𑀓𑀁.

𑁫𑁯. 𑀅𑀢𑀺𑀭𑀺𑀘𑁆𑀙𑀢𑀺 𑀲𑁂𑀲𑀩𑁆𑀭𑀳𑁆𑀫𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑁂 𑀘 𑀉𑀧𑀮𑀪𑀺𑀢𑀩𑁆𑀩𑀭𑀽𑀧𑀢𑁄 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀫𑀭𑀡𑀓𑀸𑀮𑁂 𑀧𑀦 𑀩𑁆𑀭𑀳𑁆𑀫𑀸𑀦𑀁 𑀲𑀭𑀻𑀭𑀦𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺, 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸𑀦𑀺 𑀘 𑀲𑀳𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺.

𑁬𑁧. 𑀭𑀽𑀧𑁂𑀲𑀼 𑀢𑁂𑀯𑀻𑀲𑀢𑀺 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀪𑀸𑀯𑀤𑁆𑀯𑀬𑀯𑀲𑁂𑀦 𑀧𑀜𑁆𑀘𑀦𑁆𑀦𑀁 𑀅𑀪𑀸𑀯𑀢𑁄. 𑀓𑁂𑀘𑀺 𑀧𑀦 ‘‘𑀮𑀳𑀼𑀢𑀸𑀤𑀺𑀢𑁆𑀢𑀬𑀫𑁆𑀧𑀺 𑀢𑁂𑀲𑀼 𑀦𑀢𑁆𑀣𑀺 𑀤𑀦𑁆𑀥𑀢𑁆𑀢𑀓𑀭𑀸𑀤𑀺𑀥𑀸𑀢𑀼𑀓𑁆𑀔𑁄𑀪𑀸𑀪𑀸𑀯𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀓𑀸𑀭𑀡𑀁. 𑀦 𑀳𑀺 𑀯𑀽𑀧𑀲𑀫𑁂𑀢𑀩𑁆𑀩𑀸𑀧𑁂𑀓𑁆𑀔𑀸 𑀢𑀩𑁆𑀩𑀺𑀭𑁄𑀥𑀺𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀢𑀣𑀸 𑀲𑀢𑀺 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀮𑀳𑀼𑀢𑀸𑀤𑀻𑀦𑀁 𑀅𑀪𑀸𑀯𑀧𑁆𑀧𑀲𑀗𑁆𑀕𑀢𑁄. ‘‘𑀲𑀤𑁆𑀤𑁄 𑀯𑀺𑀓𑀸𑀭𑁄’’𑀢𑁆𑀬𑀸𑀤𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀁.

𑀭𑀽𑀧𑀧𑀯𑀢𑁆𑀢𑀺𑀓𑁆𑀓𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀩𑁆𑀩𑀸𑀦𑀪𑁂𑀤𑀯𑀡𑁆𑀡𑀦𑀸

𑁬𑁨. 𑀏𑀢𑁆𑀢𑀸𑀯𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀽𑀧𑀸𑀦𑀺 𑀯𑀺𑀪𑀸𑀕𑀢𑁄 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑀺𑀩𑁆𑀩𑀸𑀦𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀦𑀺𑀩𑁆𑀩𑀸𑀦𑀁 𑀧𑀦𑀸’’𑀢𑁆𑀬𑀸𑀤𑀺. ‘‘𑀘𑀢𑀼𑀫𑀕𑁆𑀕𑀜𑀸𑀡𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀩𑁆𑀩𑀸𑀦𑀲𑁆𑀲 𑀢𑀁𑀢𑀁𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. ‘‘𑀫𑀕𑁆𑀕𑀨𑀮𑀸𑀦𑀫𑀸𑀭𑀫𑁆𑀫𑀡𑀪𑀽𑀢’’𑀦𑁆𑀢𑀺 𑀇𑀫𑀺𑀦𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀦𑀼𑀫𑀸𑀦𑀲𑀺𑀤𑁆𑀥𑀢𑀁. 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀜𑁆𑀳𑀺, 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀁 𑀯𑀸 𑀜𑀸𑀡𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁂 𑀅𑀲𑀫𑀢𑁆𑀣𑀁, 𑀅𑀢𑁆𑀣𑀺 𑀘 𑀮𑁄𑀓𑁂 𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑀸𑀤𑀺. 𑀢𑀲𑁆𑀫𑀸 𑀅𑀢𑁆𑀣𑀺 𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀯𑀺𑀧𑀭𑀻𑀢𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀭𑀸𑀦𑀁 𑀫𑀕𑁆𑀕𑀨𑀮𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀏𑀓𑁄 𑀥𑀫𑁆𑀫𑁄𑀢𑀺 𑀲𑀺𑀤𑁆𑀥𑀁. 𑀧𑀘𑁆𑀘𑀓𑁆𑀔𑀸𑀦𑀼𑀫𑀸𑀦𑀲𑀺𑀤𑁆𑀥𑀢𑀸𑀲𑀦𑁆𑀤𑀲𑁆𑀲𑀦𑁂𑀦 𑀘 𑀅𑀪𑀸𑀯𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀺𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀯𑀸𑀤𑀁 𑀦𑀺𑀲𑁂𑀥𑁂𑀢𑀻𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦. 𑀔𑀦𑁆𑀥𑀸𑀤𑀺𑀪𑁂𑀤𑁂 𑀢𑁂𑀪𑀽𑀫𑀓𑀥𑀫𑁆𑀫𑁂 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀯𑀺𑀦𑀦𑀢𑁄 𑀲𑀁𑀲𑀺𑀩𑁆𑀩𑀦𑀢𑁄 𑀯𑀸𑀦𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀯𑀺𑀲𑀬𑀸𑀢𑀺𑀓𑁆𑀓𑀫𑀯𑀲𑁂𑀦 𑀅𑀢𑀻𑀢𑀢𑁆𑀢𑀸.

𑁬𑁩. 𑀲𑀪𑀸𑀯𑀢𑁄𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀮𑀓𑁆𑀔𑀡𑁂𑀦. 𑀉𑀧𑀸𑀤𑀻𑀬𑀢𑀺 𑀓𑀸𑀫𑀼𑀧𑀸𑀤𑀸𑀤𑀻𑀳𑀻𑀢𑀺 𑀉𑀧𑀸𑀤𑀺, 𑀧𑀜𑁆𑀘𑀓𑁆𑀔𑀦𑁆𑀥𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀉𑀧𑀸𑀤𑀺𑀬𑁂𑀯 𑀲𑁂𑀲𑁄 𑀓𑀺𑀮𑁂𑀲𑁂𑀳𑀻𑀢𑀺 𑀉𑀧𑀸𑀤𑀺𑀲𑁂𑀲𑁄, 𑀢𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀉𑀧𑀸𑀤𑀺𑀲𑁂𑀲𑀸, 𑀲𑀸 𑀏𑀯 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼. 𑀓𑀸𑀭𑀡𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀉𑀧𑀸𑀤𑀺𑀲𑁂𑀲𑀸𑀤𑀺𑀯𑀲𑁂𑀦 𑀧𑀜𑁆𑀜𑀸𑀧𑀦𑁂 𑀓𑀸𑀭𑀡𑀪𑀽𑀢𑀲𑁆𑀲 𑀉𑀧𑀸𑀤𑀺𑀲𑁂𑀲 𑀪𑀸𑀯𑀸𑀪𑀸𑀯𑀲𑁆𑀲 𑀮𑁂𑀲𑁂𑀦.

𑁬𑁪. 𑀆𑀭𑀫𑁆𑀫𑀡𑀢𑁄, 𑀲𑀫𑁆𑀧𑀬𑁄𑀕𑀢𑁄 𑀘 𑀭𑀸𑀕𑀤𑁄𑀲𑀫𑁄𑀳𑁂𑀳𑀺 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀁, 𑀲𑀼𑀜𑁆𑀜𑀫𑁂𑀯 𑀲𑀼𑀜𑁆𑀜𑀢𑀁, 𑀢𑀣𑀸 𑀭𑀸𑀕𑀸𑀤𑀺𑀦𑀺𑀫𑀺𑀢𑁆𑀢𑀭𑀳𑀺𑀢𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑀁. 𑀭𑀸𑀕𑀸𑀤𑀺𑀧𑀡𑀺𑀥𑀺𑀭𑀳𑀺𑀢𑀢𑁆𑀢𑀸 𑀅𑀧𑁆𑀧𑀡𑀺𑀳𑀺𑀢𑀁. 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀯𑀸 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀢𑀁. 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀁. 𑀢𑀡𑁆𑀳𑀸𑀧𑀡𑀺𑀥𑀺𑀬𑀸 𑀅𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑀁.

𑁬𑁫. 𑀘𑀯𑀦𑀸𑀪𑀸𑀯𑀢𑁄 𑀅𑀘𑁆𑀘𑀼𑀢𑀁. 𑀅𑀦𑁆𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀁. 𑀧𑀘𑁆𑀘𑀬𑁂𑀳𑀺 𑀅𑀲𑀗𑁆𑀔𑀢𑀢𑁆𑀢𑀸 𑀅𑀲𑀗𑁆𑀔𑀢𑀁. 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀲𑁆𑀲 𑀅𑀪𑀸𑀯𑀢𑁄, 𑀲𑀳𑀥𑀫𑁆𑀫𑁂𑀦 𑀯𑀢𑁆𑀢𑀩𑁆𑀩𑀲𑁆𑀲 𑀉𑀢𑁆𑀢𑀭𑀲𑁆𑀲 𑀯𑀸 𑀅𑀪𑀸𑀯𑀢𑁄 𑀅𑀦𑀼𑀢𑁆𑀢𑀭𑀁. 𑀯𑀸𑀦𑀢𑁄 𑀢𑀡𑁆𑀳𑀸𑀢𑁄 𑀫𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀲𑁄 𑀅𑀧𑀕𑀢𑀢𑁆𑀢𑀸 𑀯𑀸𑀦𑀫𑀼𑀢𑁆𑀢𑀸. 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀻𑀢𑀺 𑀫𑀳𑁂𑀲𑀬𑁄. ‘‘𑀇𑀢𑀺 𑀘𑀺𑀢𑁆𑀢’’𑀦𑁆𑀢𑁆𑀬𑀸𑀤𑀺 𑀙𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀺𑀪𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀤𑀻𑀦𑀁 𑀦𑀺𑀕𑀫𑀦𑀁.

𑀦𑀺𑀩𑁆𑀩𑀸𑀦𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀭𑀽𑀧𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.