𑁫. 𑀯𑀻𑀣𑀺𑀫𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧. 𑀏𑀢𑁆𑀢𑀸𑀯𑀢𑀸 𑀯𑀻𑀣𑀺𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦𑁂𑀯’’𑀦𑁆𑀢𑁆𑀬𑀸𑀤𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀢𑁄 𑀅𑀧𑀭𑀪𑀸𑀕𑁂 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀧𑀯𑀢𑁆𑀢𑀺𑀲𑀗𑁆𑀕𑀳𑁄 𑀦𑀸𑀫 𑀲𑀗𑁆𑀕𑀳𑁄 𑀉𑀤𑀻𑀭𑀺𑀢𑁄, 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀁 𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑀸𑀮𑁂, 𑀢𑀤𑀸𑀲𑀦𑁆𑀦𑀢𑀸𑀬 𑀢𑀁𑀕𑀳𑀡𑁂𑀦𑁂𑀯 𑀕𑀳𑀺𑀢𑀘𑀼𑀢𑀺𑀓𑀸𑀮𑁂 𑀘 𑀧𑀯𑀢𑁆𑀢𑀺𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑀪𑀽𑀫𑀺𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑁩. 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸 𑀬𑁂𑀪𑀼𑀬𑁆𑀬𑁂𑀦 𑀅𑀧𑀕𑀢𑁄𑀢𑀺 𑀅𑀧𑀸𑀬𑁄, 𑀲𑁄𑀬𑁂𑀯 𑀪𑀽𑀫𑀺 𑀪𑀯𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸𑀢𑀺 𑀅𑀧𑀸𑀬𑀪𑀽𑀫𑀺. 𑀅𑀦𑁂𑀓𑀯𑀺𑀥𑀲𑀫𑁆𑀧𑀢𑁆𑀢𑀺𑀅𑀥𑀺𑀝𑁆𑀞𑀸𑀦𑀢𑀸𑀬 𑀲𑁄𑀪𑀦𑀸 𑀕𑀦𑁆𑀢𑀩𑁆𑀩𑀢𑁄 𑀉𑀧𑀧𑀚𑁆𑀚𑀺𑀢𑀩𑁆𑀩𑀢𑁄 𑀕𑀢𑀻𑀢𑀺 𑀲𑀼𑀕𑀢𑀺, 𑀓𑀸𑀫𑀢𑀡𑁆𑀳𑀸𑀲𑀳𑀘𑀭𑀺𑀢𑀸 𑀲𑀼𑀕𑀢𑀺 𑀓𑀸𑀫𑀲𑀼𑀕𑀢𑀺, 𑀲𑀸𑀬𑁂𑀯 𑀪𑀽𑀫𑀻𑀢𑀺 𑀓𑀸𑀫𑀲𑀼𑀕𑀢𑀺𑀪𑀽𑀫𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑁪. 𑀅𑀬𑀢𑁄 𑀲𑀼𑀔𑀢𑁄 𑀦𑀺𑀕𑁆𑀕𑀢𑁄𑀢𑀺 𑀦𑀺𑀭𑀬𑁄. 𑀢𑀺𑀭𑁄 𑀅𑀜𑁆𑀘𑀺𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀸, 𑀢𑁂𑀲𑀁 𑀬𑁄𑀦𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀬𑀯𑀦𑁆𑀢𑀺 𑀢𑀸𑀬 𑀲𑀢𑁆𑀢𑀸 𑀅𑀫𑀺𑀲𑁆𑀲𑀺𑀢𑀸𑀧𑀺 𑀲𑀫𑀸𑀦𑀚𑀸𑀢𑀺𑀢𑀸𑀬 𑀫𑀺𑀲𑁆𑀲𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀬𑁄𑀦𑀺. 𑀲𑀸 𑀧𑀦 𑀅𑀢𑁆𑀣𑀢𑁄 𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑁄. 𑀧𑀓𑀝𑁆𑀞𑁂𑀦 𑀲𑀼𑀔𑀢𑁄 𑀇𑀢𑀸 𑀕𑀢𑀸𑀢𑀺 𑀧𑁂𑀢𑀸, 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸𑀤𑀺𑀪𑁂𑀤𑀸𑀦𑀁 𑀧𑁂𑀢𑀸𑀦𑀁 𑀯𑀺𑀲𑀬𑁄 𑀧𑁂𑀢𑁆𑀢𑀺𑀯𑀺𑀲𑀬𑁄. 𑀏𑀢𑁆𑀣 𑀧𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀕𑁆𑀕𑀳𑀡𑁂𑀦 𑀔𑀦𑁆𑀥𑀸𑀦𑀁𑀬𑁂𑀯 𑀕𑀳𑀡𑀁 𑀢𑁂𑀲𑀁 𑀢𑀸𑀤𑀺𑀲𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀲𑁆𑀲 𑀅𑀪𑀸𑀯𑀢𑁄. 𑀬𑀢𑁆𑀣 𑀯𑀸 𑀢𑁂 𑀅𑀭𑀜𑁆𑀜𑀧𑀩𑁆𑀩𑀢𑀧𑀸𑀤𑀸𑀤𑀺𑀓𑁂 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑀺, 𑀢𑀸𑀤𑀺𑀲𑀲𑁆𑀲 𑀞𑀸𑀦𑀲𑁆𑀲 𑀯𑀲𑁂𑀦 𑀑𑀓𑀸𑀲𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀦 𑀲𑀼𑀭𑀦𑁆𑀢𑀺 𑀇𑀲𑁆𑀲𑀭𑀺𑀬𑀓𑀻𑀴𑀸𑀤𑀻𑀳𑀺 𑀦 𑀤𑀺𑀩𑁆𑀩𑀦𑁆𑀢𑀻𑀢𑀺 𑀅𑀲𑀼𑀭𑀸, 𑀧𑁂𑀢𑀸𑀲𑀼𑀭𑀸. 𑀇𑀢𑀭𑁂 𑀧𑀦 𑀦 𑀲𑀼𑀭𑀸 𑀲𑀼𑀭𑀧𑁆𑀧𑀝𑀺𑀧𑀓𑁆𑀔𑀸𑀢𑀺 𑀅𑀲𑀼𑀭𑀸, 𑀇𑀥 𑀘 𑀧𑁂𑀢𑀸𑀲𑀼𑀭𑀸𑀦𑀫𑁂𑀯 𑀕𑀳𑀡𑀁 𑀇𑀢𑀭𑁂𑀲𑀁 𑀢𑀸𑀯𑀢𑀺𑀁𑀲𑁂𑀲𑀼 𑀕𑀳𑀡𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀯𑁂𑀧𑀘𑀺𑀢𑁆𑀢𑀸𑀲𑀼𑀭𑀸 𑀕𑀢𑀸’’𑀢𑀺; (𑀦𑀸𑀫. 𑀧𑀭𑀺. 𑁪𑁩𑁮);

𑁫. 𑀲𑀢𑀺𑀲𑀽𑀭𑀪𑀸𑀯𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑁂𑀳𑀺 𑀉𑀓𑁆𑀓𑀝𑁆𑀞𑀫𑀦𑀢𑀸𑀬 𑀫𑀦𑁄 𑀉𑀲𑁆𑀲𑀦𑁆𑀦𑀁 𑀏𑀢𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸. 𑀢𑀣𑀸 𑀳𑀺 𑀧𑀭𑀫𑀲𑀢𑀺𑀦𑁂𑀧𑀓𑁆𑀓𑀸𑀤𑀺𑀧𑁆𑀧𑀢𑁆𑀢𑀸 𑀩𑀼𑀤𑁆𑀥𑀸𑀤𑀬𑁄𑀧𑀺 𑀫𑀦𑀼𑀲𑁆𑀲𑀪𑀽𑀢𑀸𑀬𑁂𑀯. 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀘𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀫𑀦𑀼𑀲𑁆𑀲𑀸. 𑀢𑁂𑀳𑀺 𑀧𑀦 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 ‘‘𑀫𑀦𑀼𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀮𑁄𑀓𑀺𑀬𑀸 𑀧𑀦 ‘‘𑀫𑀦𑀼𑀦𑁄 𑀆𑀤𑀺𑀔𑀢𑁆𑀢𑀺𑀬𑀲𑁆𑀲 𑀅𑀧𑀘𑁆𑀘𑀁 𑀧𑀼𑀢𑁆𑀢𑀸𑀢𑀺 𑀫𑀦𑀼𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀦𑀺𑀯𑀸𑀲𑀪𑀽𑀢𑀸 𑀪𑀽𑀫𑀺 𑀇𑀥 𑀫𑀦𑀼𑀲𑁆𑀲𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀘𑀢𑀽𑀲𑀼 𑀫𑀳𑀸𑀭𑀸𑀚𑁂𑀲𑀼 𑀪𑀢𑁆𑀢𑀺 𑀏𑀢𑁂𑀲𑀁, 𑀘𑀢𑀼𑀦𑁆𑀦𑀁 𑀯𑀸 𑀫𑀳𑀸𑀭𑀸𑀚𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑁂 𑀘𑀸𑀢𑀼𑀫𑀳𑀸𑀭𑀸𑀚𑁂 𑀪𑀯𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸. 𑀫𑀸𑀖𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀁 𑀢𑁂𑀢𑁆𑀢𑀺𑀁𑀲 𑀲𑀳𑀧𑀼𑀜𑁆𑀜𑀓𑀸𑀭𑀺𑀦𑁄 𑀏𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑀁𑀲𑀳𑀘𑀭𑀺𑀢𑀝𑁆𑀞𑀸𑀦𑀁 𑀢𑁂𑀢𑁆𑀢𑀺𑀁𑀲𑀁, 𑀢𑀤𑁂𑀯 𑀢𑀸𑀯𑀢𑀺𑀁𑀲𑀁, 𑀢𑀁𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀢𑀺𑀁𑀲𑀸𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 ‘‘𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀸𑀦’’𑀦𑁆𑀢𑀺 (𑀅. 𑀦𑀺. 𑁩.𑁮𑁧) 𑀯𑀘𑀦𑀢𑁄 𑀲𑁂𑀲𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀦𑀸𑀫𑀫𑀢𑁆𑀢𑀫𑁂𑀯 𑀏𑀢𑀁 𑀢𑀲𑁆𑀲 𑀤𑁂𑀯𑀮𑁄𑀓𑀲𑁆𑀲𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀤𑀼𑀓𑁆𑀔𑀢𑁄 𑀬𑀸𑀢𑀸 𑀅𑀧𑀬𑀸𑀢𑀸𑀢𑀺 𑀬𑀸𑀫𑀸. 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀢𑀼𑀲𑀁 𑀧𑀻𑀢𑀺𑀁 𑀇𑀢𑀸 𑀕𑀢𑀸𑀢𑀺 𑀢𑀼𑀲𑀺𑀢𑀸. 𑀦𑀺𑀫𑁆𑀫𑀸𑀦𑁂 𑀭𑀢𑀺 𑀏𑀢𑁂𑀲𑀦𑁆𑀢𑀺 𑀦𑀺𑀫𑁆𑀫𑀸𑀦𑀭𑀢𑀺𑀦𑁄. 𑀧𑀭𑀦𑀺𑀫𑁆𑀫𑀺𑀢𑁂𑀲𑀼 𑀪𑁄𑀕𑁂𑀲𑀼 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑁂𑀦𑁆𑀢𑀻𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄.

𑁭. 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀧𑀭𑀺𑀘𑀸𑀭𑀺𑀓𑀢𑁆𑀢𑀸 𑀢𑁂𑀲𑀁 𑀧𑀭𑀺𑀲𑀢𑀺 𑀪𑀯𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸. 𑀢𑁂𑀲𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸. 𑀢𑁂𑀳𑀺 𑀢𑁂𑀳𑀺 𑀛𑀸𑀦𑀸𑀤𑀻𑀳𑀺 𑀕𑀼𑀡𑀯𑀺𑀲𑁂𑀲𑁂𑀳𑀺 𑀩𑁆𑀭𑀽𑀳𑀺𑀢𑀸 𑀧𑀭𑀺𑀯𑀼𑀤𑁆𑀥𑀸𑀢𑀺 𑀩𑁆𑀭𑀳𑁆𑀫𑀸𑀦𑁄, 𑀯𑀡𑁆𑀡𑀯𑀦𑁆𑀢𑀢𑀸𑀬 𑀘𑁂𑀯 𑀤𑀻𑀖𑀸𑀬𑀼𑀓𑀢𑀸𑀤𑀻𑀳𑀺 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀳𑀺 𑀫𑀳𑀦𑁆𑀢𑀸 𑀩𑁆𑀭𑀳𑁆𑀫𑀸𑀦𑁄𑀢𑀺 𑀫𑀳𑀸𑀩𑁆𑀭𑀳𑁆𑀫𑀸𑀦𑁄. 𑀢𑀬𑁄𑀧𑁂𑀢𑁂 𑀧𑀡𑀻𑀢𑀭𑀢𑀦𑀧𑀪𑀸𑀯𑀪𑀸𑀲𑀺𑀢𑀲𑀫𑀸𑀦𑀢𑀮𑀯𑀸𑀲𑀺𑀦𑁄.

𑁮. 𑀉𑀧𑀭𑀺𑀫𑁂𑀳𑀺 𑀧𑀭𑀺𑀢𑁆𑀢𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀸𑀪𑀸. 𑀅𑀧𑁆𑀧𑀫𑀸𑀡𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀸𑀪𑀸. 𑀯𑀮𑀸𑀳𑀓𑀢𑁄 𑀯𑀺𑀚𑁆𑀚𑀼 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀆𑀪𑀸 𑀲𑀭𑀢𑀺 𑀦𑀺𑀲𑁆𑀲𑀭𑀢𑀺 𑀏𑀢𑁂𑀲𑀁 𑀲𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀢𑁆𑀢𑀸𑀢𑀺 𑀆𑀪𑀲𑁆𑀲𑀭𑀸. 𑀤𑀡𑁆𑀟𑀤𑀻𑀧𑀺𑀓𑀸𑀬 𑀯𑀸 𑀅𑀘𑁆𑀘𑀺 𑀯𑀺𑀬 𑀏𑀢𑁂𑀲𑀁 𑀲𑀭𑀻𑀭𑀢𑁄 𑀆𑀪𑀸 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑁆𑀢𑀻 𑀯𑀺𑀬 𑀲𑀭𑀢𑀺 𑀦𑀺𑀲𑁆𑀲𑀭𑀢𑀻𑀢𑀺 𑀆𑀪𑀲𑁆𑀲𑀭𑀸. 𑀬𑀣𑀸𑀯𑀼𑀢𑁆𑀢𑀸𑀬 𑀯𑀸 𑀧𑀪𑀸𑀬 𑀆𑀪𑀸𑀲𑀦𑀲𑀻𑀮𑀸𑀢𑀺 𑀆𑀪𑀲𑁆𑀲𑀭𑀸. 𑀏𑀢𑁂𑀧𑀺 𑀢𑀬𑁄 𑀧𑀡𑀻𑀢𑀭𑀢𑀦𑀧𑀪𑀸𑀯𑀪𑀸𑀲𑀺𑀢𑁂𑀓𑀢𑀮𑀯𑀸𑀲𑀺𑀦𑁄.

𑁯. 𑀲𑀼𑀪𑀸𑀢𑀺 𑀏𑀓𑀕𑁆𑀖𑀦𑀸 𑀅𑀘𑀮𑀸 𑀲𑀭𑀻𑀭𑀸𑀪𑀸 𑀯𑀼𑀘𑁆𑀘𑀢𑀺, 𑀲𑀸 𑀉𑀧𑀭𑀺𑀩𑁆𑀭𑀳𑁆𑀫𑁂𑀳𑀺 𑀧𑀭𑀺𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀲𑀼𑀪𑀸. 𑀅𑀧𑁆𑀧𑀫𑀸𑀡𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀲𑀼𑀪𑀸. 𑀧𑀪𑀸𑀲𑀫𑀼𑀤𑀬𑀲𑀗𑁆𑀔𑀸𑀢𑁂𑀳𑀺 𑀲𑀼𑀪𑁂𑀳𑀺 𑀓𑀺𑀡𑁆𑀡𑀸 𑀆𑀓𑀺𑀡𑁆𑀡𑀸𑀢𑀺 𑀲𑀼𑀪𑀓𑀺𑀡𑁆𑀳𑀸. ‘‘𑀲𑀼𑀪𑀸𑀓𑀺𑀡𑁆𑀡𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑁂 𑀆-𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀅𑀦𑁆𑀢𑀺𑀫𑀡-𑀓𑀸𑀭𑀲𑁆𑀲 𑀘 𑀳-𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀪𑀓𑀺𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀧𑀺 𑀧𑀡𑀻𑀢𑀭𑀢𑀦𑀧𑀪𑀸𑀯𑀪𑀸𑀲𑀺𑀢𑁂𑀓𑀢𑀮𑀯𑀸𑀲𑀺𑀦𑁄.

𑁧𑁦. 𑀛𑀸𑀦𑀧𑁆𑀧𑀪𑀸𑀯𑀦𑀺𑀩𑁆𑀩𑀢𑁆𑀢𑀁 𑀯𑀺𑀧𑀼𑀮𑀁 𑀨𑀮𑀫𑁂𑀢𑁂𑀲𑀦𑁆𑀢𑀺 𑀯𑁂𑀳𑀧𑁆𑀨𑀮𑀸. 𑀲𑀜𑁆𑀜𑀸𑀯𑀺𑀭𑀸𑀕𑀪𑀸𑀯𑀦𑀸𑀦𑀺𑀩𑁆𑀩𑀢𑁆𑀢𑀭𑀽𑀧𑀲𑀦𑁆𑀢𑀢𑀺𑀫𑀢𑁆𑀢𑀢𑁆𑀢𑀸 𑀦𑀢𑁆𑀣𑀺 𑀲𑀜𑁆𑀜𑀸, 𑀢𑀁𑀫𑀼𑀔𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀸 𑀅𑀭𑀽𑀧𑀓𑁆𑀔𑀦𑁆𑀥𑀸 𑀘 𑀏𑀢𑁂𑀲𑀦𑁆𑀢𑀺 𑀅𑀲𑀜𑁆𑀜𑀸. 𑀢𑁂𑀬𑁂𑀯 𑀲𑀢𑁆𑀢𑀸𑀢𑀺 𑀅𑀲𑀜𑁆𑀜𑀲𑀢𑁆𑀢𑀸. 𑀏𑀢𑁂𑀧𑀺 𑀧𑀡𑀻𑀢𑀭𑀢𑀦𑀧𑀪𑀸𑀯𑀪𑀸𑀲𑀺𑀢𑁂𑀓𑀢𑀮𑀯𑀸𑀲𑀺𑀦𑁄. 𑀲𑀼𑀤𑁆𑀥𑀸𑀦𑀁 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀸𑀦𑀫𑁂𑀯 𑀆𑀯𑀸𑀲𑀸𑀢𑀺 𑀲𑀼𑀤𑁆𑀥𑀸𑀯𑀸𑀲𑀸. 𑀅𑀦𑀼𑀦𑀬𑀧𑀝𑀺𑀖𑀸𑀪𑀸𑀯𑀢𑁄 𑀯𑀸 𑀲𑀼𑀤𑁆𑀥𑁄 𑀆𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑀸, 𑀢𑁂𑀲𑀁 𑀦𑀺𑀯𑀸𑀲𑀪𑀽𑀫𑀺𑀧𑀺 𑀲𑀼𑀤𑁆𑀥𑀸𑀯𑀸𑀲𑀸.

𑁧𑁧. 𑀇𑀫𑁂𑀲𑀼 𑀧𑀦 𑀧𑀞𑀫𑀢𑀮𑀯𑀸𑀲𑀺𑀦𑁄 𑀅𑀧𑁆𑀧𑀓𑁂𑀦 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀞𑀸𑀦𑀁 𑀦 𑀯𑀺𑀚𑀳𑀦𑁆𑀢𑀻𑀢𑀺 𑀅𑀯𑀺𑀳𑀸. 𑀤𑀼𑀢𑀺𑀬𑀢𑀮𑀯𑀸𑀲𑀺𑀦𑁄 𑀦 𑀓𑁂𑀦𑀘𑀺 𑀢𑀧𑁆𑀧𑀦𑁆𑀢𑀻𑀢𑀺 𑀅𑀢𑀧𑁆𑀧𑀸. 𑀢𑀢𑀺𑀬𑀢𑀮𑀯𑀸𑀲𑀺𑀦𑁄 𑀧𑀭𑀫𑀲𑀼𑀦𑁆𑀤𑀭𑀭𑀽𑀧𑀢𑁆𑀢𑀸 𑀲𑀼𑀔𑁂𑀦 𑀤𑀺𑀲𑁆𑀲𑀦𑁆𑀢𑀻𑀢𑀺 𑀲𑀼𑀤𑀲𑁆𑀲𑀸. 𑀘𑀢𑀼𑀢𑁆𑀣𑀢𑀮𑀯𑀸𑀲𑀺𑀦𑁄 𑀲𑀼𑀧𑀭𑀺𑀲𑀼𑀤𑁆𑀥𑀤𑀲𑁆𑀲𑀦𑀢𑁆𑀢𑀸 𑀲𑀼𑀔𑁂𑀦 𑀧𑀲𑁆𑀲𑀦𑁆𑀢𑀻𑀢𑀺 𑀲𑀼𑀤𑀲𑁆𑀲𑀺𑀦𑁄. 𑀧𑀜𑁆𑀘𑀫𑀢𑀮𑀯𑀸𑀲𑀺𑀦𑁄 𑀧𑀦 𑀉𑀓𑁆𑀓𑀝𑁆𑀞𑀲𑀫𑁆𑀧𑀢𑁆𑀢𑀺𑀓𑀢𑁆𑀢𑀸 𑀦𑀢𑁆𑀣𑀺 𑀏𑀢𑁂𑀲𑀁 𑀓𑀦𑀺𑀝𑁆𑀞𑀪𑀸𑀯𑁄𑀢𑀺 𑀅𑀓𑀦𑀺𑀝𑁆𑀞𑀸.

𑁧𑁨. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀧𑀯𑀢𑁆𑀢𑀸 𑀧𑀞𑀫𑀸𑀭𑀼𑀧𑁆𑀧𑀯𑀺𑀧𑀸𑀓𑀪𑀽𑀢𑀘𑀢𑀼𑀓𑁆𑀔𑀦𑁆𑀥𑀸 𑀏𑀯, 𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀑𑀓𑀸𑀲𑁄 𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀽𑀫𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑁧𑁩. 𑀧𑀼𑀣𑀼𑀚𑁆𑀚𑀦𑀸, 𑀲𑁄𑀢𑀸𑀧𑀦𑁆𑀦𑀸 𑀘 𑀲𑀓𑀤𑀸𑀕𑀸𑀫𑀺𑀦𑁄 𑀘𑀸𑀧𑀺 𑀧𑀼𑀕𑁆𑀕𑀮𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀲𑀩𑁆𑀩𑀣𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀜𑁆𑀘 𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀸𑀦𑀫𑁂𑀯 𑀢𑀢𑁆𑀣 𑀮𑀸𑀪𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑁧𑁪. 𑀲𑁂𑀲𑀝𑁆𑀞𑀸𑀦𑁂𑀲𑀽𑀢𑀺 𑀲𑀼𑀤𑁆𑀥𑀸𑀯𑀸𑀲𑀅𑀧𑀸𑀬𑀅𑀲𑀜𑁆𑀜𑀺𑀯𑀚𑁆𑀚𑀺𑀢𑁂𑀲𑀼 𑀲𑁂𑀲𑀝𑁆𑀞𑀸𑀦𑁂𑀲𑀼 𑀅𑀭𑀺𑀬𑀸, 𑀅𑀦𑀭𑀺𑀬𑀸𑀧𑀺 𑀘 𑀮𑀩𑁆𑀪𑀦𑁆𑀢𑀺.

𑀪𑀽𑀫𑀺𑀘𑀢𑀼𑀓𑁆𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀲𑀦𑁆𑀥𑀺𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑁧𑁬. 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂.

𑁧𑁭. 𑀚𑀸𑀢𑀺𑀬𑀸 𑀅𑀦𑁆𑀥𑁄 𑀚𑀘𑁆𑀘𑀦𑁆𑀥𑁄. 𑀓𑀺𑀜𑁆𑀘𑀸𑀧𑀺 𑀚𑀸𑀢𑀺𑀓𑁆𑀔𑀡𑁂 𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀩𑁆𑀩𑁂𑀧𑀺 𑀅𑀘𑀓𑁆𑀔𑀼𑀓𑀸𑀯. 𑀢𑀣𑀸𑀧𑀺 𑀘𑀓𑁆𑀔𑀸𑀤𑀺𑀉𑀧𑁆𑀧𑀚𑁆𑀚𑀦𑀸𑀭𑀳𑀓𑀸𑀮𑁂𑀧𑀺 𑀘𑀓𑁆𑀔𑀼𑀧𑁆𑀧𑀢𑁆𑀢𑀺𑀯𑀺𑀩𑀦𑁆𑀥𑀓𑀓𑀫𑁆𑀫𑀧𑁆𑀧𑀝𑀺𑀩𑀸𑀳𑀺𑀢𑀲𑀸𑀫𑀢𑁆𑀣𑀺𑀬𑁂𑀦 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀦𑀸, 𑀇𑀢𑀭𑁂𑀦𑀧𑀺 𑀯𑀸 𑀓𑀫𑁆𑀫𑁂𑀦 𑀅𑀦𑀼𑀧𑁆𑀧𑀸𑀤𑁂𑀢𑀩𑁆𑀩𑀘𑀓𑁆𑀔𑀼𑀓𑁄 𑀲𑀢𑁆𑀢𑁄 𑀚𑀘𑁆𑀘𑀦𑁆𑀥𑁄 𑀦𑀸𑀫. 𑀅𑀧𑀭𑁂 𑀧𑀦 ‘‘𑀚𑀘𑁆𑀘𑀦𑁆𑀥𑁄𑀢𑀺 𑀧𑀲𑀽𑀢𑀺𑀬𑀁𑀬𑁂𑀯 𑀅𑀦𑁆𑀥𑁄, 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀅𑀦𑁆𑀥𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀢𑁂𑀦 𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀘𑀓𑁆𑀔𑀼𑀲𑁆𑀲 𑀅𑀯𑀺𑀧𑀚𑁆𑀚𑀦𑀁 𑀲𑀺𑀤𑁆𑀥’’𑀦𑁆𑀢𑀺 𑀯𑀤𑀦𑁆𑀢𑀺. 𑀚𑀘𑁆𑀘𑀦𑁆𑀥𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺𑀕𑁆𑀕𑀳𑀡𑁂𑀦 𑀚𑀘𑁆𑀘𑀩𑀥𑀺𑀭𑀚𑀘𑁆𑀘𑀫𑀽𑀕𑀚𑀘𑁆𑀘𑀚𑀴𑀚𑀘𑁆𑀘𑀼𑀫𑁆𑀫𑀢𑁆𑀢𑀓𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀦𑀧𑀼𑀁𑀲𑀓𑀫𑀫𑁆𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀧𑀭𑁂 𑀧𑀦 ‘‘𑀏𑀓𑀘𑁆𑀘𑁂 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 𑀅𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸 𑀳𑀼𑀢𑁆𑀯𑀸 𑀣𑁄𑀓𑀁 𑀯𑀺𑀘𑀸𑀭𑀡𑀧𑀓𑀢𑀺𑀓𑀸 𑀳𑁄𑀦𑁆𑀢𑀺, 𑀢𑀸𑀤𑀺𑀲𑀸𑀦𑀫𑁆𑀧𑀺 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑁄’’𑀢𑀺 𑀯𑀤𑀦𑁆𑀢𑀺. 𑀪𑀼𑀫𑁆𑀫𑀤𑁂𑀯𑁂 𑀲𑀺𑀢𑀸 𑀦𑀺𑀲𑁆𑀲𑀺𑀢𑀸 𑀢𑀕𑁆𑀕𑀢𑀺𑀓𑀢𑁆𑀢𑀸𑀢𑀺 𑀪𑀼𑀫𑁆𑀫𑀲𑁆𑀲𑀺𑀢𑀸. 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀸𑀢𑀸𑀢𑀺 𑀯𑀺𑀦𑀺𑀧𑀸𑀢𑀺𑀓𑀸.

𑁧𑁮. 𑀲𑀩𑁆𑀩𑀢𑁆𑀣𑀸𑀧𑀺 𑀓𑀸𑀫𑀲𑀼𑀕𑀢𑀺𑀬𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀯𑀲𑁂𑀦 𑀲𑀢𑁆𑀢𑀯𑀺𑀥𑀸𑀬𑀧𑀺 𑀓𑀸𑀫𑀲𑀼𑀕𑀢𑀺𑀬𑀁.

𑁨𑁧. 𑀢𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑀧𑀝𑀺𑀲𑀦𑁆𑀥𑀺𑀬𑀼𑀢𑁆𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼, 𑀅𑀧𑀸𑀬𑀸𑀤𑀻𑀲𑀼 𑀯𑀸. 𑀆𑀬𑀼𑀧𑁆𑀧𑀫𑀸𑀡𑀕𑀡𑀦𑀸𑀬 𑀦𑀺𑀬𑀫𑁄 𑀦𑀢𑁆𑀣𑀺 𑀓𑁂𑀲𑀜𑁆𑀘𑀺 𑀘𑀺𑀭𑀸𑀬𑀼𑀓𑀢𑁆𑀢𑀸, 𑀓𑁂𑀲𑀜𑁆𑀘𑀺 𑀘𑀺𑀭𑀢𑀭𑀸𑀬𑀼𑀓𑀢𑁆𑀢𑀸 𑀘. 𑀢𑀣𑀸𑀘𑀸𑀳𑀼 𑁋

‘‘𑀆𑀧𑀸𑀬𑀺𑀓𑀫𑀦𑀼𑀲𑁆𑀲𑀸𑀬𑀼-

𑀧𑀭𑀺𑀘𑁆𑀙𑁂𑀤𑁄 𑀦 𑀯𑀺𑀚𑁆𑀚𑀢𑀺;

𑀢𑀣𑀸 𑀳𑀺 𑀓𑀸𑀮𑁄 𑀫𑀦𑁆𑀥𑀸𑀢𑀸,

𑀬𑀓𑁆𑀔𑀸 𑀓𑁂𑀘𑀺 𑀘𑀺𑀭𑀸𑀬𑀼𑀦𑁄’’𑀢𑀺. 𑁋

𑀅𑀧𑀸𑀬𑁂𑀲𑀼 𑀳𑀺 𑀓𑀫𑁆𑀫𑀫𑁂𑀯 𑀧𑀫𑀸𑀡𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀦𑀁 𑀬𑀸𑀯 𑀓𑀫𑁆𑀫𑀁 𑀦𑀔𑀻𑀬𑀢𑀺. 𑀢𑀸𑀯 𑀘𑀯𑀦𑀸𑀪𑀸𑀯𑀢𑁄, 𑀢𑀣𑀸 𑀪𑀼𑀫𑁆𑀫𑀤𑁂𑀯𑀸𑀦𑀁. 𑀢𑁂𑀲𑀼𑀧𑀺 𑀳𑀺 𑀦𑀺𑀩𑁆𑀩𑀢𑁆𑀢𑀸 𑀓𑁂𑀘𑀺 𑀲𑀢𑁆𑀢𑀸𑀳𑀸𑀤𑀺𑀓𑀸𑀮𑀁 𑀢𑀺𑀝𑁆𑀞𑀦𑁆𑀢𑀺, 𑀓𑁂𑀘𑀺 𑀓𑀧𑁆𑀧𑀫𑀢𑁆𑀢𑀫𑁆𑀧𑀺, 𑀢𑀣𑀸 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀓𑀤𑀸𑀘𑀺 𑀢𑁂𑀲𑀫𑁆𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀢𑁆𑀢𑀸 𑀓𑀤𑀸𑀘𑀺 𑀤𑀲𑀯𑀲𑁆𑀲𑀸𑀬𑀼𑀓𑀢𑁆𑀢𑀸. ‘‘𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀚𑀻𑀯𑀢𑀺, 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄 (𑀤𑀻. 𑀦𑀺. 𑁨.𑁭; 𑀲𑀁. 𑀦𑀺. 𑁧.𑁧𑁪𑁫; 𑀅. 𑀦𑀺. 𑁭.𑁭𑁪), 𑀤𑀼𑀢𑀺𑀬𑀁 𑀯𑀲𑁆𑀲𑀲𑀢𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀇𑀤𑀁 𑀧𑀦 𑀅𑀚𑁆𑀚𑀢𑀦𑀓𑀸𑀮𑀺𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁨. 𑀤𑀺𑀩𑁆𑀩𑀸𑀦𑀺 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀏𑀓𑀤𑀺𑀦𑀁, 𑀢𑀤𑀦𑀼𑀭𑀽𑀧𑀢𑁄 𑀫𑀸𑀲𑀲𑀁𑀯𑀘𑁆𑀙𑀭𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀩𑁆𑀩𑀧𑁆𑀧𑀫𑀸𑀡𑀸𑀦𑀺 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀸𑀦𑀺 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀸𑀦𑀁 𑀤𑀺𑀦𑁄 𑀢𑀳𑀺𑀁;

𑀢𑀺𑀁𑀲𑀭𑀢𑁆𑀢𑀺𑀤𑀺𑀯𑁄 𑀫𑀸𑀲𑁄, 𑀫𑀸𑀲𑀸 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀁;

𑀢𑁂𑀦 𑀲𑀁𑀯𑀘𑁆𑀙𑀭𑁂𑀦𑀸𑀬𑀼, 𑀤𑀺𑀩𑁆𑀩𑀁 𑀧𑀜𑁆𑀘𑀲𑀢𑀁 𑀫𑀢’’𑀦𑁆𑀢𑀺.

𑀫𑀦𑀼𑀲𑁆𑀲𑀕𑀡𑀦𑀸𑀬𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀲𑀁𑀯𑀘𑁆𑀙𑀭𑀕𑀡𑀦𑀸𑀬. 𑀢𑀢𑁄 𑀘𑀢𑀼𑀕𑁆𑀕𑀼𑀡𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀧𑀜𑁆𑀜𑀸𑀲𑀫𑀸𑀦𑀼𑀲𑁆𑀲𑀓𑀯𑀲𑁆𑀲𑀧𑀭𑀺𑀫𑀺𑀢𑀁 𑀤𑀺𑀯𑀲𑀁, 𑀤𑀺𑀩𑁆𑀩𑀸𑀦𑀺 𑀘 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀤𑀺𑀩𑁆𑀩𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀪𑀯𑀢𑀻𑀢𑀺 𑀏𑀯𑀁 𑀤𑀺𑀯𑀲𑀲𑀁𑀯𑀘𑁆𑀙𑀭𑀤𑀺𑀕𑀼𑀡𑀯𑀲𑁂𑀦 𑀘𑀢𑀼𑀕𑁆𑀕𑀼𑀡𑀁, 𑀢𑀁 𑀧𑀦 𑀤𑀺𑀩𑁆𑀩𑀕𑀡𑀦𑀸𑀬 𑀯𑀲𑁆𑀲𑀲𑀳𑀲𑁆𑀲𑀁, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀢𑀺𑀓𑁄𑀝𑀺𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀬𑀸𑀫𑀸𑀦𑀦𑁆𑀢𑀺 𑀢𑀸𑀯𑀢𑀺𑀁𑀲𑀸𑀦𑀫𑀸𑀬𑀼𑀧𑁆𑀧𑀫𑀸𑀡𑀢𑁄 𑀯𑀼𑀢𑁆𑀢𑀦𑀬𑁂𑀦 𑀘𑀢𑀼𑀕𑁆𑀕𑀼𑀡𑀁, 𑀤𑀺𑀩𑁆𑀩𑀕𑀡𑀦𑀸𑀬 𑀤𑁆𑀯𑀺𑀲𑀳𑀲𑁆𑀲𑀁, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀘𑀼𑀤𑁆𑀤𑀲 𑀯𑀲𑁆𑀲𑀓𑁄𑀝𑀺𑀬𑁄 𑀳𑁄𑀦𑁆𑀢𑀺. 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀢𑀼𑀲𑀺𑀢𑀸𑀦𑀦𑁆𑀢𑀺 𑀤𑀺𑀩𑁆𑀩𑀸𑀦𑀺 𑀘𑀢𑁆𑀢𑀸𑀭𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀲𑀢𑁆𑀢𑀧𑀜𑁆𑀜𑀸𑀲 𑀯𑀲𑁆𑀲𑀓𑁄𑀝𑀺𑀬𑁄. 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀦𑀺𑀫𑁆𑀫𑀸𑀦𑀭𑀢𑀻𑀦𑀦𑁆𑀢𑀺 𑀤𑀺𑀩𑁆𑀩𑀸𑀦𑀺 𑀅𑀝𑁆𑀞𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀤𑁆𑀯𑁂 𑀯𑀲𑁆𑀲𑀓𑁄𑀝𑀺𑀲𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀢𑀺𑀁𑀲 𑀯𑀲𑁆𑀲𑀓𑁄𑀝𑀺𑀬𑁄 𑀘. 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀦𑁆𑀢𑀺 𑀤𑀺𑀩𑁆𑀩𑀸𑀦𑀺 𑀲𑁄𑀴𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺.

𑁨𑁩. 𑀫𑀦𑀼𑀲𑁆𑀲𑀕𑀡𑀦𑀁 𑀧𑀦 𑀲𑀬𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀯𑀲𑀢𑀜𑁆𑀘𑀸’’𑀢𑁆𑀬𑀸𑀤𑀺. 𑀯𑀲𑁆𑀲𑀸𑀦𑀁 𑀲𑀫𑁆𑀩𑀦𑁆𑀥𑀺 𑀦𑀯𑀲𑀢𑀁 𑀏𑀓𑀯𑀻𑀲 𑀓𑁄𑀝𑀺𑀬𑁄, 𑀢𑀣𑀸 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀯𑀲𑀯𑀢𑁆𑀢𑀻𑀲𑀼 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁫. 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀬𑀁, 𑀘𑀯𑀦𑀓𑀸𑀮𑁂 𑀘 𑀢𑀣𑀸𑀭𑀽𑀧𑀫𑁂𑀯 𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑁄𑀚𑀦𑀸.

𑁨𑁯. 𑀢𑁂𑀲𑀽𑀢𑀺 𑀢𑀸𑀳𑀺 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑁂𑀲𑀼 𑀩𑁆𑀭𑀳𑁆𑀫𑁂𑀲𑀼. 𑀓𑀧𑁆𑀧𑀲𑁆𑀲𑀸𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑁆𑀲. 𑀦 𑀳𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀦𑀁 𑀢𑀺𑀡𑁆𑀡𑀁 𑀫𑀳𑀸𑀓𑀧𑁆𑀧𑀯𑀲𑁂𑀦 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀲𑀫𑁆𑀪𑀯𑀢𑀺 𑀏𑀓𑀓𑀧𑁆𑀧𑁂𑀧𑀺 𑀢𑁂𑀲𑀁 𑀅𑀯𑀺𑀦𑀸𑀲𑀸𑀪𑀸𑀯𑁂𑀦 𑀧𑀭𑀺𑀧𑀼𑀡𑁆𑀡𑀓𑀧𑁆𑀧𑁂 𑀅𑀲𑀫𑁆𑀪𑀯𑀢𑁄. 𑀢𑀣𑀸 𑀳𑁂𑀲 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁯) 𑀮𑁄𑀓𑁄 𑀲𑀢𑁆𑀢𑀯𑀸𑀭𑁂𑀲𑀼 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀺, 𑀅𑀝𑁆𑀞𑀫𑁂 𑀯𑀸𑀭𑁂 𑀉𑀤𑀓𑁂𑀦, 𑀧𑀼𑀦 𑀲𑀢𑁆𑀢𑀯𑀸𑀭𑁂𑀲𑀼 𑀅𑀕𑁆𑀕𑀺𑀦𑀸, 𑀅𑀝𑁆𑀞𑀫𑁂 𑀯𑀸𑀭𑁂 𑀉𑀤𑀓𑁂𑀦𑀸𑀢𑀺 𑀏𑀯𑀁 𑀅𑀝𑁆𑀞𑀲𑀼 𑀅𑀝𑁆𑀞𑀓𑁂𑀲𑀼 𑀧𑀭𑀺𑀧𑀼𑀡𑁆𑀡𑁂𑀲𑀼 𑀧𑀘𑁆𑀙𑀺𑀫𑁂 𑀯𑀸𑀭𑁂 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀅𑀕𑁆𑀕𑀺𑀦𑀸, 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀉𑀤𑀓𑁂𑀦, 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀢𑁆𑀢 𑀲𑀢𑁆𑀢𑀕𑁆𑀕𑀺𑀦𑀸 𑀯𑀸𑀭𑀸, 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀤𑀓𑀸;

𑀘𑀢𑀼𑀲𑀝𑁆𑀞𑀺 𑀬𑀤𑀸 𑀧𑀼𑀡𑁆𑀡𑀸, 𑀏𑀓𑁄 𑀯𑀸𑀬𑀼𑀯𑀭𑁄 𑀲𑀺𑀬𑀸.

‘‘𑀅𑀕𑁆𑀕𑀺𑀦𑀸𑀪𑀲𑁆𑀲𑀭𑀸 𑀳𑁂𑀝𑁆𑀞𑀸, 𑀆𑀧𑁂𑀦 𑀲𑀼𑀪𑀓𑀺𑀡𑁆𑀳𑀢𑁄;

𑀯𑁂𑀳𑀧𑁆𑀨𑀮𑀢𑁄 𑀯𑀸𑀢𑁂𑀦, 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀻’’𑀢𑀺. 𑁋

𑀢𑀲𑁆𑀫𑀸 𑀢𑀺𑀡𑁆𑀡𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑀢𑀮𑀸𑀦𑀁 𑀏𑀓𑀓𑀧𑁆𑀧𑁂𑀧𑀺 𑀅𑀯𑀺𑀦𑀸𑀲𑀸𑀪𑀸𑀯𑀢𑁄 𑀲𑀓𑀮𑀓𑀧𑁆𑀧𑁂 𑀢𑁂𑀲𑀁 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦 𑀢𑁂𑀲𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀢𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀧𑀭𑀺𑀧𑀼𑀡𑁆𑀡𑀲𑁆𑀲 𑀫𑀳𑀸𑀓𑀧𑁆𑀧𑀲𑁆𑀲 𑀯𑀲𑁂𑀦, 𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦. 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄𑀢𑀺 𑀘 𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀲𑁂𑀢𑀲𑀸𑀲𑀧𑀭𑀸𑀲𑀺𑀢𑁄 𑀯𑀲𑁆𑀲𑀲𑀢𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀏𑀓𑁂𑀓𑀩𑀻𑀚𑀲𑁆𑀲 𑀳𑀭𑀡𑁂𑀦 𑀲𑀸𑀲𑀧𑀭𑀸𑀲𑀺𑀦𑁄 𑀧𑀭𑀺𑀓𑁆𑀔𑀬𑁂𑀧𑀺 𑀅𑀓𑁆𑀔𑀬𑀲𑀪𑀸𑀯𑀲𑁆𑀲 𑀫𑀳𑀸𑀓𑀧𑁆𑀧𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑁄. 𑀲𑁄 𑀧𑀦 𑀲𑀢𑁆𑀣𑀭𑁄𑀕𑀤𑀼𑀩𑁆𑀪𑀺𑀓𑁆𑀔𑀸𑀦𑀁 𑀅𑀜𑁆𑀜𑀢𑀭𑀲𑀁𑀯𑀝𑁆𑀝𑁂𑀦 𑀩𑀳𑀽𑀲𑀼 𑀯𑀺𑀦𑀸𑀲𑀫𑀼𑀧𑀕𑀢𑁂𑀲𑀼 𑀅𑀯𑀲𑀺𑀝𑁆𑀞𑀲𑀢𑁆𑀢𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀓𑀼𑀲𑀮𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀧𑁆𑀧𑀫𑀸𑀡𑁂𑀲𑀼 𑀲𑀢𑁆𑀢𑁂𑀲𑀼 𑀧𑀼𑀦 𑀅𑀲𑀤𑁆𑀥𑀫𑁆𑀫𑀲𑀫𑀸𑀤𑀸𑀦𑀯𑀲𑁂𑀦 𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀤𑀲𑀯𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀭𑁄𑀕𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀁𑀯𑀝𑁆𑀝𑁂𑀦 𑀲𑀢𑁆𑀢𑀸𑀦𑀁 𑀯𑀺𑀦𑀸𑀲𑀧𑁆𑀧𑀢𑁆𑀢𑀺𑀬𑀸𑀯 ‘‘𑀅𑀬𑀫𑁂𑀓𑁄 𑀅𑀦𑁆𑀢𑀭𑀓𑀧𑁆𑀧𑁄’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀅𑀦𑁆𑀢𑀭𑀓𑀧𑁆𑀧𑀲𑁆𑀲 𑀯𑀲𑁂𑀦 𑀘𑀢𑀼𑀲𑀝𑁆𑀞𑀺𑀅𑀦𑁆𑀢𑀭𑀓𑀧𑁆𑀧𑀧𑁆𑀧𑀫𑀸𑀡𑁄 𑀳𑁄𑀢𑀺, ‘‘𑀯𑀻𑀲𑀢𑀺𑀅𑀦𑁆𑀢𑀭𑀓𑀧𑁆𑀧𑀧𑁆𑀧𑀫𑀸𑀡𑁄’’𑀢𑀺 𑀘 𑀯𑀤𑀦𑁆𑀢𑀺.

𑁪𑁫. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸.

𑁪𑁯. 𑀏𑀓𑀫𑁂𑀯𑀸𑀢𑀺 𑀪𑀽𑀫𑀺𑀢𑁄, 𑀚𑀸𑀢𑀺𑀢𑁄, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀢𑁄, 𑀲𑀗𑁆𑀔𑀸𑀭𑀢𑁄 𑀘 𑀲𑀫𑀸𑀦𑀫𑁂𑀯. 𑀏𑀓𑀚𑀸𑀢𑀺𑀬𑀦𑁆𑀢𑀺 𑀏𑀓𑀲𑁆𑀫𑀺𑀁 𑀪𑀯𑁂.

𑀧𑀝𑀺𑀲𑀦𑁆𑀥𑀺𑀘𑀢𑀼𑀓𑁆𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑁫𑁦. 𑀇𑀤𑀸𑀦𑀺 𑀓𑀫𑁆𑀫𑀘𑀢𑀼𑀓𑁆𑀓𑀁 𑀘𑀢𑀽𑀳𑀸𑀓𑀸𑀭𑁂𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀚𑀦𑀓’’𑀦𑁆𑀢𑁆𑀬𑀸𑀤𑀺 𑀆𑀭𑀤𑁆𑀥𑀁, 𑀚𑀦𑀬𑀢𑀻𑀢𑀺 𑀚𑀦𑀓𑀁. 𑀉𑀧𑀢𑁆𑀣𑀫𑁆𑀪𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀓𑀁. 𑀉𑀧𑀕𑀦𑁆𑀢𑁆𑀯𑀸 𑀧𑀻𑀴𑁂𑀢𑀻𑀢𑀺 𑀉𑀧𑀧𑀻𑀴𑀓𑀁. 𑀉𑀧𑀕𑀦𑁆𑀢𑁆𑀯𑀸 𑀖𑀸𑀢𑁂𑀢𑀻𑀢𑀺 𑀉𑀧𑀖𑀸𑀢𑀓𑀁.

𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀦𑀺𑀩𑁆𑀩𑀢𑁆𑀢𑀓𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀚𑀦𑀓𑀁 𑀦𑀸𑀫. 𑀲𑀬𑀁 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀫𑁆𑀧𑀺 𑀓𑀫𑁆𑀫𑀦𑁆𑀢𑀭𑀲𑁆𑀲 𑀘𑀺𑀭𑀢𑀭𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑁂 𑀧𑀘𑁆𑀘𑀬𑀪𑀽𑀢𑀁, 𑀯𑀺𑀧𑀸𑀓𑀲𑁆𑀲𑁂𑀯 𑀯𑀸 𑀲𑀼𑀔𑀤𑀼𑀓𑁆𑀔𑀪𑀽𑀢𑀲𑁆𑀲 𑀯𑀺𑀘𑁆𑀙𑁂𑀤𑀧𑀘𑁆𑀘𑀬𑀸𑀦𑀼𑀧𑁆𑀧𑀢𑁆𑀢𑀺𑀬𑀸, 𑀉𑀧𑀩𑁆𑀭𑀽𑀳𑀦𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀘 𑀚𑀦𑀓𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀁 𑀘𑀺𑀭𑀢𑀭𑀧𑁆𑀧𑀯𑀢𑁆𑀢𑀺𑀧𑀘𑁆𑀘𑀬𑀪𑀽𑀢𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀉𑀧𑀢𑁆𑀣𑀫𑁆𑀪𑀓𑀁 𑀦𑀸𑀫. 𑀓𑀫𑁆𑀫𑀦𑁆𑀢𑀭𑀚𑀦𑀺𑀢𑀯𑀺𑀧𑀸𑀓𑀲𑁆𑀲 𑀩𑁆𑀬𑀸𑀥𑀺𑀥𑀸𑀢𑀼𑀲𑀫𑀢𑀸𑀤𑀺𑀦𑀺𑀫𑀺𑀢𑁆𑀢𑀯𑀺𑀩𑀸𑀥𑀦𑁂𑀦 𑀘𑀺𑀭𑀢𑀭𑀧𑁆𑀧𑀯𑀢𑁆𑀢𑀺𑀯𑀺𑀦𑀺𑀩𑀦𑁆𑀥𑀓𑀁 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀉𑀧𑀧𑀻𑀴𑀓𑀁 𑀦𑀸𑀫. 𑀤𑀼𑀩𑁆𑀩𑀮𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀚𑀦𑀓𑀲𑀸𑀫𑀢𑁆𑀣𑀺𑀬𑀁 𑀉𑀧𑀳𑀘𑁆𑀘 𑀯𑀺𑀘𑁆𑀙𑁂𑀤𑀓𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑁂𑀦 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀬𑀁 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀁 𑀉𑀧𑀖𑀸𑀢𑀓𑀁 𑀦𑀸𑀫.

𑀚𑀦𑀓𑁄𑀧𑀖𑀸𑀢𑀓𑀸𑀦𑀜𑁆𑀳𑀺 𑀅𑀬𑀁 𑀯𑀺𑀲𑁂𑀲𑁄 𑁋 𑀚𑀦𑀓𑀁 𑀓𑀫𑁆𑀫𑀦𑁆𑀢𑀭𑀲𑁆𑀲 𑀯𑀺𑀧𑀸𑀓𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀯 𑀯𑀺𑀧𑀸𑀓𑀁 𑀚𑀦𑁂𑀢𑀺, 𑀉𑀧𑀖𑀸𑀢𑀓𑀁 𑀉𑀧𑀘𑁆𑀙𑁂𑀤𑀦𑀧𑀼𑀩𑁆𑀩𑀓𑀦𑁆𑀢𑀺 𑀇𑀤𑀁 𑀢𑀸𑀯 𑀅𑀝𑁆𑀞𑀓𑀣𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑁨.𑁬𑁮𑁭; 𑀅. 𑀦𑀺. 𑀅𑀝𑁆𑀞. 𑁨.𑁩.𑁩𑁪) 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 ‘‘𑀉𑀧𑀧𑀻𑀴𑀓𑀓𑀫𑁆𑀫𑀁 𑀩𑀳𑁆𑀯𑀸𑀩𑀸𑀥𑀢𑀸𑀤𑀺𑀧𑀘𑁆𑀘𑀬𑁄𑀧𑀲𑀁𑀳𑀸𑀭𑁂𑀦 𑀓𑀫𑁆𑀫𑀦𑁆𑀢𑀭𑀲𑁆𑀲 𑀯𑀺𑀧𑀸𑀓𑀁 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀩𑀸𑀥𑀢𑀺. 𑀉𑀧𑀖𑀸𑀢𑀓𑀁 𑀧𑀦 𑀢𑀁 𑀲𑀩𑁆𑀩𑀲𑁄 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀑𑀓𑀸𑀲𑀁 𑀤𑁂𑀢𑀺, 𑀦 𑀧𑀦 𑀲𑀬𑀁 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀓𑀁. 𑀏𑀯𑀜𑁆𑀳𑀺 𑀚𑀦𑀓𑀢𑁄 𑀇𑀫𑀲𑁆𑀲 𑀯𑀺𑀲𑁂𑀲𑁄 𑀲𑀼𑀧𑀸𑀓𑀝𑁄’’𑀢𑀺 𑀯𑀤𑀦𑁆𑀢𑀺. 𑀓𑀺𑀘𑁆𑀘𑀯𑀲𑁂𑀦𑀸𑀢𑀺 𑀚𑀦𑀦𑀉𑀧𑀢𑁆𑀣𑀫𑁆𑀪𑀦𑀉𑀧𑀧𑀻𑀴𑀦𑀉𑀧𑀘𑁆𑀙𑁂𑀤𑀦𑀓𑀺𑀘𑁆𑀘𑀯𑀲𑁂𑀦.

𑁫𑁧. 𑀕𑀭𑀼𑀓𑀦𑁆𑀢𑀺 𑀫𑀳𑀸𑀲𑀸𑀯𑀚𑁆𑀚𑀁, 𑀫𑀳𑀸𑀦𑀼𑀪𑀸𑀯𑀜𑁆𑀘 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀓𑀫𑁆𑀫𑀁. 𑀆𑀲𑀦𑁆𑀦𑀦𑁆𑀢𑀺 𑀫𑀭𑀡𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀁, 𑀢𑀤𑀸 𑀓𑀢𑀜𑁆𑀘. 𑀆𑀘𑀺𑀡𑁆𑀡𑀦𑁆𑀢𑀺 𑀅𑀪𑀺𑀡𑁆𑀳𑀲𑁄 𑀓𑀢𑀁, 𑀏𑀓𑀯𑀸𑀭𑀁 𑀓𑀢𑁆𑀯𑀸𑀧𑀺 𑀯𑀸 𑀅𑀪𑀺𑀡𑁆𑀳𑀲𑁄 𑀲𑀫𑀸𑀲𑁂𑀯𑀺𑀢𑀁. 𑀓𑀝𑀢𑁆𑀢𑀸𑀓𑀫𑁆𑀫𑀦𑁆𑀢𑀺 𑀕𑀭𑀼𑀓𑀸𑀤𑀺𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀁 𑀓𑀢𑀫𑀢𑁆𑀢𑀢𑁄𑀬𑁂𑀯 𑀓𑀫𑁆𑀫𑀦𑁆𑀢𑀺 𑀯𑀢𑁆𑀢𑀩𑁆𑀩𑀓𑀫𑁆𑀫𑀁.

𑀢𑀢𑁆𑀣 𑀓𑀼𑀲𑀮𑀁 𑀯𑀸 𑀳𑁄𑀢𑀼 𑀅𑀓𑀼𑀲𑀮𑀁 𑀯𑀸, 𑀕𑀭𑀼𑀓𑀸𑀕𑀭𑀼𑀓𑁂𑀲𑀼 𑀬𑀁 𑀕𑀭𑀼𑀓𑀁 𑀅𑀓𑀼𑀲𑀮𑀧𑀓𑁆𑀔𑁂 𑀫𑀸𑀢𑀼𑀖𑀸𑀢𑀓𑀸𑀤𑀺𑀓𑀫𑁆𑀫𑀁, 𑀓𑀼𑀲𑀮𑀧𑀓𑁆𑀔𑁂 𑀫𑀳𑀕𑁆𑀕𑀢𑀓𑀫𑁆𑀫𑀁 𑀯𑀸, 𑀢𑀤𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺 𑀲𑀢𑀺𑀧𑀺 𑀆𑀲𑀦𑁆𑀦𑀸𑀤𑀺𑀓𑀫𑁆𑀫𑁂 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀑𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀫𑀳𑁄𑀖𑁄 𑀯𑀺𑀬. 𑀢𑀣𑀸 𑀳𑀺 𑀢𑀁 ‘‘𑀕𑀭𑀼𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀅𑀲𑀢𑀺 𑀤𑀽𑀭𑀸𑀲𑀦𑁆𑀦𑁂𑀲𑀼 𑀬𑀁 𑀆𑀲𑀦𑁆𑀦𑀁 𑀫𑀭𑀡𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀁, 𑀢𑀤𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺, 𑀆𑀲𑀦𑁆𑀦𑀓𑀸𑀮𑁂 𑀓𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀆𑀘𑀺𑀡𑁆𑀡𑀸𑀦𑀸𑀘𑀺𑀡𑁆𑀡𑁂𑀲𑀼 𑀘 𑀬𑀁 𑀆𑀘𑀺𑀡𑁆𑀡𑀁 𑀲𑀼𑀲𑀻𑀮𑁆𑀬𑀁 𑀯𑀸, 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸, 𑀢𑀤𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀓𑀝𑀢𑁆𑀢𑀸𑀓𑀫𑁆𑀫𑀁 𑀧𑀦 𑀮𑀤𑁆𑀥𑀸𑀲𑁂𑀯𑀦𑀁 𑀧𑀼𑀭𑀺𑀫𑀸𑀦𑀁 𑀅𑀪𑀸𑀯𑁂𑀦 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀻𑀢𑀺 𑀕𑀭𑀼𑀓𑀁 𑀲𑀩𑁆𑀩𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀕𑀭𑀼𑀓𑁂 𑀅𑀲𑀢𑀺 𑀆𑀲𑀦𑁆𑀦𑀁, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀆𑀘𑀺𑀡𑁆𑀡𑀁, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀓𑀝𑀢𑁆𑀢𑀸𑀓𑀫𑁆𑀫𑀁. 𑀢𑁂𑀦𑀸𑀳 ‘‘𑀧𑀸𑀓𑀤𑀸𑀦𑀧𑀭𑀺𑀬𑀸𑀬𑁂𑀦𑀸’’𑀢𑀺, 𑀯𑀺𑀧𑀸𑀓𑀤𑀸𑀦𑀸𑀦𑀼𑀓𑁆𑀓𑀫𑁂𑀦𑀸𑀢𑁆𑀬𑀢𑁆𑀣𑁄. 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀸𑀤𑀻𑀲𑀼 𑀧𑀦 𑀆𑀲𑀦𑁆𑀦𑀢𑁄 𑀆𑀘𑀺𑀡𑁆𑀡𑀁 𑀧𑀞𑀫𑀁 𑀯𑀺𑀧𑀘𑁆𑀘𑀦𑁆𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀣𑀸 𑀧𑀦 𑀕𑁄𑀕𑀡𑀧𑀭𑀺𑀧𑀼𑀡𑁆𑀡𑀲𑁆𑀲 𑀯𑀚𑀲𑁆𑀲 𑀤𑁆𑀯𑀸𑀭𑁂 𑀯𑀺𑀯𑀝𑁂 𑀅𑀧𑀭𑀪𑀸𑀕𑁂 𑀤𑀫𑁆𑀫𑀕𑀯𑀩𑀮𑀯𑀕𑀯𑁂𑀲𑀼 𑀲𑀦𑁆𑀢𑁂𑀲𑀼𑀧𑀺 𑀬𑁄 𑀯𑀚𑀤𑁆𑀯𑀸𑀭𑀲𑁆𑀲 𑀆𑀲𑀦𑁆𑀦𑁄 𑀳𑁄𑀢𑀺, 𑀅𑀦𑁆𑀢𑀫𑀲𑁄 𑀤𑀼𑀩𑁆𑀩𑀮𑀚𑀭𑀕𑁆𑀕𑀯𑁄𑀧𑀺, 𑀲𑁄𑀬𑁂𑀯 𑀧𑀞𑀫𑀢𑀭𑀁 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀕𑀭𑀼𑀓𑀢𑁄 𑀅𑀜𑁆𑀜𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀲𑀦𑁆𑀢𑁂𑀲𑀼𑀧𑀺 𑀫𑀭𑀡𑀓𑀸𑀮𑀲𑁆𑀲 𑀆𑀲𑀦𑁆𑀦𑀢𑁆𑀢𑀸 𑀆𑀲𑀦𑁆𑀦𑀫𑁂𑀯 𑀧𑀞𑀫𑀁 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀇𑀥 𑀢𑀁 𑀧𑀞𑀫𑀁 𑀯𑀼𑀢𑁆𑀢𑀁.

𑁫𑁨. 𑀤𑀺𑀝𑁆𑀞𑀥𑀫𑁆𑀫𑁄 𑀧𑀘𑁆𑀘𑀓𑁆𑀔𑀪𑀽𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀁 𑀯𑀺𑀧𑀸𑀓𑀸𑀦𑀼𑀪𑀯𑀦𑀯𑀲𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀤𑀺𑀝𑁆𑀞𑀥𑀫𑁆𑀫𑀢𑁄 𑀅𑀦𑀦𑁆𑀢𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁. 𑀅𑀧𑀭𑁂 𑀅𑀧𑀭𑁂 𑀤𑀺𑀝𑁆𑀞𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀫𑀺𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀢𑁆𑀢𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑀁 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁. 𑀅𑀳𑁄𑀲𑀺 𑀏𑀯 𑀓𑀫𑁆𑀫𑀁, 𑀦 𑀢𑀲𑁆𑀲 𑀯𑀺𑀧𑀸𑀓𑁄 𑀅𑀳𑁄𑀲𑀺, 𑀅𑀢𑁆𑀣𑀺, 𑀪𑀯𑀺𑀲𑁆𑀲𑀢𑀺 𑀘𑀸𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀓𑀫𑁆𑀫𑀁 𑀅𑀳𑁄𑀲𑀺𑀓𑀫𑁆𑀫𑀁.

𑀢𑀢𑁆𑀣 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬, 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀢𑀸𑀬 𑀘 𑀩𑀮𑀯𑀪𑀸𑀯𑀧𑁆𑀧𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀮𑀤𑀸𑀬𑀺𑀦𑀻 𑀧𑀞𑀫𑀚𑀯𑀦𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀦𑀸𑀫. 𑀲𑀸 𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀩𑀮𑀯𑀚𑀦𑀲𑀦𑁆𑀢𑀸𑀦𑁂 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁂𑀲𑀼 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑀺𑀬𑀸, 𑀆𑀲𑁂𑀯𑀦𑀸𑀮𑀸𑀪𑁂𑀦 𑀅𑀧𑁆𑀧𑀯𑀺𑀧𑀸𑀓𑀢𑀸𑀬 𑀘 𑀇𑀢𑀭𑀤𑁆𑀯𑀬𑀁 𑀯𑀺𑀬 𑀧𑀯𑀢𑁆𑀢𑀲𑀦𑁆𑀢𑀸𑀦𑀼𑀧𑀭𑀫𑀸𑀧𑁂𑀓𑁆𑀔𑀁, 𑀑𑀓𑀸𑀲𑀮𑀸𑀪𑀸𑀧𑁂𑀓𑁆𑀔𑀜𑁆𑀘 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀇𑀥𑁂𑀯 𑀧𑀼𑀧𑁆𑀨𑀫𑀢𑁆𑀢𑀁 𑀯𑀺𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀁 𑀅𑀳𑁂𑀢𑀼𑀓𑀨𑀮𑀁 𑀤𑁂𑀢𑀺. 𑀅𑀢𑁆𑀣𑀲𑀸𑀥𑀺𑀓𑀸 𑀧𑀦 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀪𑀽𑀢𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀸 𑀅𑀦𑀦𑁆𑀢𑀭𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀬𑀺𑀦𑀻 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀦𑀸𑀫. 𑀲𑀸 𑀘 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸𑀯 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀺. 𑀧𑀝𑀺𑀲𑀦𑁆𑀥𑀺𑀬𑀸 𑀧𑀦 𑀅𑀤𑀺𑀦𑁆𑀦𑀸𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀦𑀢𑁆𑀣𑀺. 𑀘𑀼𑀢𑀺 𑀅𑀦𑀦𑁆𑀢𑀭𑀜𑁆𑀳𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑁆𑀲 𑀑𑀓𑀸𑀲𑁄. 𑀧𑀝𑀺𑀲𑀦𑁆𑀥𑀺𑀬𑀸 𑀧𑀦 𑀤𑀺𑀦𑁆𑀦𑀸𑀬 𑀚𑀸𑀢𑀺𑀲𑀢𑁂𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀆𑀘𑀭𑀺𑀬𑀸. 𑀬𑀣𑀸𑀯𑀼𑀢𑁆𑀢𑀓𑀆𑀭𑀡𑀯𑀺𑀭𑀳𑀢𑁄 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀺𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀸 𑀆𑀤𑀺𑀧𑀭𑀺𑀬𑁄𑀲𑀸𑀦𑀘𑁂𑀢𑀦𑀸𑀦𑀁 𑀫𑀚𑁆𑀛𑁂 𑀧𑀯𑀢𑁆𑀢𑀸 𑀧𑀜𑁆𑀘 𑀘𑁂𑀢𑀦𑀸 𑀯𑀺𑀧𑀸𑀓𑀤𑀸𑀦𑀲𑀪𑀸𑀯𑀲𑁆𑀲 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀬𑀤𑀸 𑀓𑀤𑀸𑀘𑀺 𑀑𑀓𑀸𑀲𑀮𑀸𑀪𑁂 𑀲𑀢𑀺 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀯𑀺𑀧𑀸𑀓𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀻 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀺𑀬𑀁 𑀦𑀸𑀫. 𑀲𑀓𑀲𑀓𑀓𑀸𑀮𑀸𑀢𑀻𑀢𑀁 𑀧𑀦 𑀧𑀼𑀭𑀺𑀫𑀓𑀫𑁆𑀫𑀤𑁆𑀯𑀬𑀁, 𑀢𑀢𑀺𑀬𑀫𑁆𑀧𑀺 𑀘 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀯𑁄𑀘𑁆𑀙𑀺𑀦𑁆𑀦𑀸𑀬 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫.

𑀧𑀸𑀓𑀓𑀸𑀮𑀯𑀲𑁂𑀦𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀢𑀤𑀦𑀦𑁆𑀢𑀭𑁂, 𑀬𑀤𑀸 𑀓𑀤𑀸𑀘𑀻𑀢𑀺 𑀏𑀯𑀁 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦, 𑀇𑀢𑀭𑀲𑁆𑀲 𑀢𑀁𑀓𑀸𑀮𑀸𑀪𑀸𑀯𑀯𑀲𑁂𑀦 𑀘. 𑀅𑀳𑁄𑀲𑀺𑀓𑀫𑁆𑀫𑀲𑁆𑀲 𑀳𑀺 𑀓𑀸𑀮𑀸𑀢𑀺𑀓𑁆𑀓𑀫𑀢𑁄𑀯 𑀢𑀁 𑀯𑁄𑀳𑀸𑀭𑁄.

𑁫𑁩. 𑀧𑀸𑀓𑀞𑀸𑀦𑀯𑀲𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀧𑀘𑁆𑀘𑀦𑀪𑀽𑀫𑀺𑀯𑀲𑁂𑀦.

𑁫𑁪. 𑀇𑀤𑀸𑀦𑀺 𑀅𑀓𑀼𑀲𑀮𑀸𑀤𑀺𑀓𑀫𑁆𑀫𑀸𑀦𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀁, 𑀢𑀁𑀦𑀺𑀤𑁆𑀤𑁂𑀲𑀫𑀼𑀔𑁂𑀦 𑀘 𑀢𑁂𑀲𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀤𑀲𑀯𑀺𑀥𑀸𑀤𑀺𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀅𑀓𑀼𑀲𑀮’’𑀦𑁆𑀢𑁆𑀬𑀸𑀤𑀺 𑀆𑀭𑀤𑁆𑀥𑀁. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁. 𑀏𑀯𑀁 𑀯𑀘𑀻𑀓𑀫𑁆𑀫𑀸𑀤𑀻𑀦𑀺.

𑁫𑁫. 𑀧𑀸𑀡𑀲𑁆𑀲 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀅𑀢𑀻𑀯 𑀧𑀸𑀢𑀦𑀁 𑀧𑀸𑀡𑀸𑀢𑀺𑀧𑀸𑀢𑁄. 𑀓𑀸𑀬𑀯𑀸𑀘𑀸𑀳𑀺 𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂𑀲𑀼 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀘𑀭𑀡𑀁 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑁄.

𑀢𑀢𑁆𑀣 𑀧𑀸𑀡𑁄𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀫𑀺𑀁 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀧𑀭𑀪𑀡𑁆𑀟𑁂 𑀢𑀣𑀸𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀅𑀲𑀤𑁆𑀥𑀫𑁆𑀫𑀲𑁂𑀯𑀦𑀯𑀲𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀦𑀸𑀫. 𑀲𑀼𑀭𑀸𑀧𑀸𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀻𑀢𑀺 𑀯𑀤𑀦𑁆𑀢𑀺 𑀭𑀲𑀲𑀗𑁆𑀔𑀸𑀢𑁂𑀲𑀼 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑀪𑀸𑀯𑀢𑁄. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀓𑀸𑀬𑀤𑁆𑀯𑀸𑀭𑁂𑀢𑀺 𑀓𑀸𑀬𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀢𑁄, 𑀲𑀬𑀜𑁆𑀘 𑀓𑀸𑀬𑁂𑀦 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀅𑀪𑀺𑀓𑁆𑀓𑀫𑀸𑀤𑀺𑀚𑀦𑀓𑀘𑀺𑀢𑁆𑀢𑀚𑀯𑀸𑀬𑁄𑀥𑀸𑀢𑁆𑀯𑀸𑀥𑀺𑀓𑀓𑀮𑀸𑀧𑀲𑁆𑀲 𑀯𑀺𑀓𑀸𑀭𑀪𑀽𑀢𑁂 𑀲𑀦𑁆𑀣𑀫𑁆𑀪𑀦𑀸𑀤𑀻𑀦𑀁 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑁂 𑀘𑁄𑀧𑀦𑀓𑀸𑀬𑀪𑀸𑀯𑀢𑁄, 𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀪𑀸𑀯𑀢𑁄 𑀘 𑀓𑀸𑀬𑀤𑁆𑀯𑀸𑀭𑀲𑀗𑁆𑀔𑀸𑀢𑁂 𑀓𑀫𑁆𑀫𑀤𑁆𑀯𑀸𑀭𑁂.

𑀓𑀺𑀜𑁆𑀘𑀸𑀧𑀺 𑀳𑀺 𑀢𑀁𑀢𑀁𑀓𑀫𑁆𑀫𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀲𑀸 𑀯𑀺𑀜𑁆𑀜𑀢𑁆𑀢𑀺 𑀚𑀦𑀻𑀬𑀢𑀺. 𑀢𑀣𑀸𑀧𑀺 𑀢𑀲𑁆𑀲𑀸 𑀢𑀣𑀸 𑀧𑀯𑀢𑁆𑀢𑀫𑀸𑀦𑀸𑀬 𑀢𑀁𑀲𑀫𑀼𑀝𑁆𑀞𑀸𑀧𑀓𑀓𑀫𑁆𑀫𑀲𑁆𑀲 𑀓𑀸𑀬𑀓𑀫𑁆𑀫𑀸𑀤𑀺𑀯𑁄𑀳𑀸𑀭𑁄 𑀳𑁄𑀢𑀻𑀢𑀺 𑀲𑀸 𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀫𑀼𑀔𑀪𑀸𑀯𑁂𑀦 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺. ‘‘𑀓𑀸𑀬𑀤𑁆𑀯𑀸𑀭𑁂 𑀯𑀼𑀢𑁆𑀢𑀺𑀢𑁄’’𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 ‘‘𑀬𑀤𑀺 𑀏𑀯𑀁 𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀓𑀸𑀬𑀤𑁆𑀯𑀸𑀭𑁂 𑀳𑀺 𑀧𑀯𑀢𑁆𑀢𑀁 ‘𑀓𑀸𑀬𑀓𑀫𑁆𑀫’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀓𑀸𑀬𑀓𑀫𑁆𑀫𑀲𑁆𑀲 𑀘 𑀧𑀯𑀢𑁆𑀢𑀺𑀫𑀼𑀔𑀪𑀽𑀢𑀁 ‘𑀓𑀸𑀬𑀤𑁆𑀯𑀸𑀭’𑀦𑁆𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀁 𑀧𑀦 𑀯𑀸𑀘𑀸𑀬 𑀆𑀡𑀸𑀧𑁂𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀤𑁆𑀯𑀸𑀭𑁂𑀦 𑀓𑀫𑁆𑀫𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸, 𑀢𑀣𑀸 𑀫𑀼𑀲𑀸𑀯𑀸𑀤𑀸𑀤𑀺𑀁 𑀓𑀸𑀬𑀯𑀺𑀓𑀸𑀭𑁂𑀦 𑀓𑀭𑁄𑀦𑁆𑀢𑀲𑁆𑀲 𑀯𑀘𑀻𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀓𑀫𑁆𑀫𑁂𑀦 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀫𑁆𑀧𑀺 𑀦 𑀲𑀺𑀬𑀸’’𑀢𑀺 𑀅𑀬𑀁 𑀘𑁄𑀤𑀦𑀸 𑀧𑀘𑁆𑀘𑀼𑀧𑀝𑁆𑀞𑁂𑀬𑁆𑀬𑀸𑀢𑀺 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀬𑀸 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀓𑀫𑁆𑀫𑀜𑁆𑀳𑀺 𑀓𑀸𑀬𑀤𑁆𑀯𑀸𑀭𑁂𑀬𑁂𑀯 𑀩𑀳𑀼𑀮𑀁 𑀧𑀯𑀢𑁆𑀢𑀢𑀺, 𑀅𑀧𑁆𑀧𑀁 𑀯𑀘𑀻𑀤𑁆𑀯𑀸𑀭𑁂, 𑀢𑀲𑁆𑀫𑀸 𑀓𑀸𑀬𑀤𑁆𑀯𑀸𑀭𑁂𑀬𑁂𑀯 𑀩𑀳𑀼𑀮𑀁 𑀧𑀯𑀢𑁆𑀢𑀦𑀢𑁄 𑀓𑀸𑀬𑀓𑀫𑁆𑀫𑀪𑀸𑀯𑁄 𑀲𑀺𑀤𑁆𑀥𑁄 𑀯𑀦𑀘𑀭𑀓𑀸𑀤𑀻𑀦𑀁 𑀯𑀦𑀘𑀭𑀓𑀸𑀤𑀺𑀪𑀸𑀯𑁄 𑀯𑀺𑀬. 𑀢𑀣𑀸 𑀓𑀸𑀬𑀓𑀫𑁆𑀫𑀫𑁂𑀯 𑀬𑁂𑀪𑀼𑀬𑁆𑀬𑁂𑀦 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺, 𑀦 𑀇𑀢𑀭𑀸𑀦𑀺, 𑀢𑀲𑁆𑀫𑀸 𑀓𑀸𑀬𑀓𑀫𑁆𑀫𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀏𑀢𑁆𑀣𑁂𑀯 𑀧𑀯𑀢𑁆𑀢𑀦𑀢𑁄 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀪𑀸𑀯𑁄 𑀲𑀺𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑀕𑀸𑀫𑀸𑀤𑀻𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀸𑀤𑀺𑀪𑀸𑀯𑁄 𑀯𑀺𑀬𑀸𑀢𑀺 𑀦𑀢𑁆𑀣𑀺 𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑁂 𑀓𑁄𑀘𑀺 𑀯𑀺𑀩𑀦𑁆𑀥𑁄𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄.

𑁫𑁬. 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀯𑀢𑁆𑀣𑀼, 𑀢𑀁 𑀢𑀘𑁆𑀙𑀢𑁄 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀫𑀼𑀲𑀸𑀯𑀸𑀤𑁄. 𑀧𑀺𑀲𑀢𑀺 𑀲𑀸𑀫𑀕𑁆𑀕𑀺𑀁 𑀲𑀜𑁆𑀘𑀼𑀡𑁆𑀡𑁂𑀢𑀺 𑀯𑀺𑀓𑁆𑀔𑀺𑀧𑀢𑀺, 𑀧𑀺𑀬𑀪𑀸𑀯𑀁 𑀲𑀼𑀜𑁆𑀜𑀁 𑀓𑀭𑁄𑀢𑀻𑀢𑀺 𑀯𑀸 𑀧𑀺𑀲𑀼𑀡𑀸. 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀨𑀭𑀼𑀲𑀁 𑀓𑀭𑁄𑀢𑀺, 𑀓𑀓𑀘𑁄 𑀯𑀺𑀬 𑀔𑀭𑀲𑀫𑁆𑀨𑀲𑁆𑀲𑀸𑀢𑀺 𑀯𑀸 𑀨𑀭𑀼𑀲𑀸. 𑀲𑀁 𑀲𑀼𑀔𑀁, 𑀳𑀺𑀢𑀜𑁆𑀘 𑀨𑀮𑀢𑀺 𑀯𑀺𑀲𑀭𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀲𑀫𑁆𑀨𑀁, 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀅𑀦𑀼𑀧𑀓𑀸𑀭𑀁 𑀬𑀁 𑀓𑀺𑀜𑁆𑀘𑀺, 𑀢𑀁 𑀧𑀮𑀧𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑁄.

𑀢𑀢𑁆𑀣 𑀅𑀪𑀽𑀢𑀁 𑀯𑀢𑁆𑀣𑀼𑀁 𑀪𑀽𑀢𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸 𑀯𑀺𑀜𑁆𑀜𑀸𑀧𑀦𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑁄 𑀧𑀭𑀲𑁆𑀲 𑀅𑀢𑁆𑀣𑀪𑁂𑀤𑀓𑀭𑁄𑀯 𑀓𑀫𑁆𑀫𑀧𑀣𑁄 𑀳𑁄𑀢𑀺, 𑀇𑀢𑀭𑁄 𑀓𑀫𑁆𑀫𑀫𑁂𑀯. 𑀧𑀭𑁂𑀲𑀁 𑀪𑁂𑀤𑀓𑀸𑀫𑀢𑀸𑀬, 𑀅𑀢𑁆𑀢𑀧𑁆𑀧𑀺𑀬𑀓𑀸𑀫𑀢𑀸𑀬 𑀯𑀸 𑀧𑀭𑀪𑁂𑀤𑀓𑀭𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀲𑀁𑀓𑀺𑀮𑀺𑀝𑁆𑀞𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸, 𑀲𑀸𑀧𑀺 𑀤𑁆𑀯𑀻𑀲𑀼 𑀪𑀺𑀦𑁆𑀦𑁂𑀲𑀼𑀬𑁂𑀯 𑀓𑀫𑁆𑀫𑀧𑀣𑁄. 𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀭𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸. 𑀦 𑀳𑀺 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀲𑀢𑀺 𑀨𑀭𑀼𑀲𑀯𑀸𑀘𑀸 𑀦𑀸𑀫 𑀳𑁄𑀢𑀺. 𑀲𑀻𑀢𑀸𑀳𑀭𑀡𑀸𑀤𑀺𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀦𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀲𑀁𑀓𑀺𑀮𑀺𑀝𑁆𑀞𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀲𑁄 𑀧𑀦 𑀧𑀭𑁂𑀳𑀺 𑀢𑀲𑁆𑀫𑀺𑀁 𑀅𑀦𑀢𑁆𑀣𑁂 𑀕𑀳𑀺𑀢𑁂𑀬𑁂𑀯 𑀓𑀫𑁆𑀫𑀧𑀣𑁄. 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀯𑀘𑀻𑀤𑁆𑀯𑀸𑀭𑁂𑀢𑀺 𑀯𑀸𑀘𑀸𑀬 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀲𑀬𑀜𑁆𑀘 𑀯𑀸𑀘𑀸𑀬 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀯𑀘𑀻𑀪𑁂𑀤𑀓𑀭𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑁆𑀯𑀸𑀥𑀺𑀓𑀓𑀮𑀸𑀧𑀲𑁆𑀲 𑀯𑀺𑀓𑀸𑀭𑀪𑀽𑀢𑁂 𑀘𑁄𑀧𑀦𑀯𑀸𑀘𑀸𑀪𑀸𑀯𑀢𑁄, 𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀪𑀸𑀯𑀢𑁄 𑀘 𑀯𑀘𑀻𑀤𑁆𑀯𑀸𑀭𑀲𑀗𑁆𑀔𑀸𑀢𑁂 𑀓𑀫𑁆𑀫𑀤𑁆𑀯𑀸𑀭𑁂. 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁫𑁭. 𑀧𑀭𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀫𑀼𑀔𑀁 𑀛𑀸𑀬𑀢𑀺 𑀮𑁄𑀪𑀯𑀲𑁂𑀦 𑀘𑀺𑀦𑁆𑀢𑁂𑀢𑀻𑀢𑀺 𑀅𑀪𑀺𑀚𑁆𑀛𑀸. 𑀩𑁆𑀬𑀸𑀧𑀚𑁆𑀚𑀢𑀺 𑀳𑀺𑀢𑀲𑀼𑀔𑀁 𑀏𑀢𑁂𑀦𑀸𑀢𑀺 𑀩𑁆𑀬𑀸𑀧𑀸𑀤𑁄. 𑀫𑀺𑀘𑁆𑀙𑀸 𑀯𑀺𑀧𑀭𑀻𑀢𑀢𑁄 𑀧𑀲𑁆𑀲𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑀢𑀢𑁆𑀣 ‘‘𑀅𑀳𑁄 𑀯𑀢 𑀇𑀤𑀁 𑀫𑀫 𑀲𑀺𑀬𑀸’’𑀢𑀺 𑀏𑀯𑀁 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀁 𑀅𑀪𑀺𑀚𑁆𑀛𑀸, 𑀲𑀸 𑀧𑀭𑀪𑀡𑁆𑀟𑀲𑁆𑀲 𑀅𑀢𑁆𑀢𑀦𑁄 𑀦𑀸𑀫𑀦𑁂𑀦𑁂𑀯 𑀓𑀫𑁆𑀫𑀧𑀣𑁄 𑀳𑁄𑀢𑀺. ‘‘𑀅𑀳𑁄 𑀯𑀢𑀸𑀬𑀁 𑀲𑀢𑁆𑀢𑁄 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀏𑀯𑀁 𑀫𑀦𑁄𑀧𑀤𑁄𑀲𑁄 𑀩𑁆𑀬𑀸𑀧𑀸𑀤𑁄. ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑁆𑀬𑀸𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀤𑀲𑁆𑀲𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀏𑀢𑁆𑀣 𑀧𑀦 𑀦𑀢𑁆𑀣𑀺𑀓𑀅𑀳𑁂𑀢𑀼𑀓𑀅𑀓𑀺𑀭𑀺𑀬𑀤𑀺𑀝𑁆𑀞𑀻𑀳𑀺𑀬𑁂𑀯 𑀓𑀫𑁆𑀫𑀧𑀣𑀪𑁂𑀤𑁄. 𑀇𑀫𑁂𑀲𑀁 𑀧𑀦 𑀅𑀗𑁆𑀕𑀸𑀤𑀺𑀯𑀯𑀢𑁆𑀣𑀸𑀦𑀯𑀲𑁂𑀦 𑀧𑀧𑀜𑁆𑀘𑁄 𑀢𑀢𑁆𑀣 𑀢𑀢𑁆𑀣 (𑀤𑀻. 𑀦𑀺. 𑀅𑀝𑁆𑀞. 𑁧.𑁮; 𑀥. 𑀲. 𑀅𑀝𑁆𑀞. 𑁧 𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨) 𑀆𑀕𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀢𑁆𑀭𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀁 𑀯𑀺𑀦𑀸𑀧𑀺, 𑀢𑀁 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸𑀧𑀻𑀢𑁆𑀬𑀢𑁆𑀣𑁄. 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑁆𑀣 𑀅𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸𑀯 𑀳𑁄𑀦𑁆𑀢𑀺.

𑁫𑁮. 𑀤𑁄𑀲𑀫𑀽𑀮𑁂𑀦 𑀚𑀸𑀬𑀦𑁆𑀢𑀻𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀦 𑀤𑁄𑀲𑀲𑀗𑁆𑀔𑀸𑀢𑀫𑀽𑀮𑁂𑀦, 𑀤𑁄𑀲𑀫𑀽𑀮𑀓𑀘𑀺𑀢𑁆𑀢𑁂𑀦 𑀯𑀸 𑀚𑀸𑀬𑀦𑁆𑀢𑀺, 𑀦 𑀮𑁄𑀪𑀫𑀽𑀮𑀸𑀤𑀻𑀳𑀺. 𑀳𑀲𑀫𑀸𑀦𑀸𑀧𑀺 𑀳𑀺 𑀭𑀸𑀚𑀸𑀦𑁄 𑀤𑁄𑀲𑀘𑀺𑀢𑁆𑀢𑁂𑀦𑁂𑀯 𑀧𑀸𑀡𑀯𑀥𑀁 𑀆𑀡𑀸𑀧𑁂𑀦𑁆𑀢𑀺, 𑀢𑀣𑀸 𑀨𑀭𑀼𑀲𑀯𑀸𑀘𑀸𑀩𑁆𑀬𑀸𑀧𑀸𑀤𑁂𑀲𑀼𑀧𑀺 𑀬𑀣𑀸𑀭𑀳𑀁 𑀤𑀝𑁆𑀞𑀩𑁆𑀩𑀁. 𑀫𑀺𑀘𑁆𑀙𑀸𑀤𑀲𑁆𑀲𑀦𑀲𑁆𑀲 𑀅𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀯𑀢𑁆𑀣𑀽𑀲𑀼 𑀮𑁄𑀪𑀧𑀼𑀩𑁆𑀩𑀗𑁆𑀕𑀫𑀫𑁂𑀯 𑀅𑀪𑀺𑀦𑀺𑀯𑀺𑀲𑀦𑀢𑁄 𑀆𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀮𑁄𑀪𑀫𑀽𑀮𑁂𑀦𑀸’’𑀢𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀤𑁆𑀯𑀻𑀳𑀺 𑀫𑀽𑀮𑁂𑀳𑀺 𑀲𑀫𑁆𑀪𑀯𑀦𑁆𑀢𑀻𑀢𑀺 𑀬𑁄 𑀢𑀸𑀯 𑀅𑀪𑀺𑀫𑀢𑀁 𑀯𑀢𑁆𑀣𑀼𑀁, 𑀅𑀦𑀪𑀺𑀫𑀢𑀁 𑀯𑀸 𑀅𑀢𑁆𑀢𑀩𑀦𑁆𑀥𑀼𑀧𑀭𑀺𑀢𑁆𑀢𑀸𑀡𑀸𑀤𑀺𑀧𑁆𑀧𑀬𑁄𑀚𑀦𑀁 𑀲𑀦𑁆𑀥𑀸𑀬 𑀳𑀭𑀢𑀺, 𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀁 𑀮𑁄𑀪𑀫𑀽𑀮𑁂𑀦 𑀳𑁄𑀢𑀺. 𑀯𑁂𑀭𑀦𑀺𑀬𑁆𑀬𑀸𑀢𑀦𑀢𑁆𑀣𑀁 𑀳𑀭𑀦𑁆𑀢𑀲𑁆𑀲 𑀤𑁄𑀲𑀫𑀽𑀮𑁂𑀦. 𑀦𑀻𑀢𑀺𑀧𑀸𑀞𑀓𑀧𑁆𑀧𑀫𑀸𑀡𑀢𑁄 𑀤𑀼𑀝𑁆𑀞𑀦𑀺𑀕𑁆𑀕𑀳𑀡𑀢𑁆𑀣𑀁 𑀧𑀭𑀲𑀦𑁆𑀢𑀓𑀁 𑀳𑀭𑀦𑁆𑀢𑀸𑀦𑀁 𑀭𑀸𑀚𑀽𑀦𑀁, 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 ‘‘𑀲𑀩𑁆𑀩𑀫𑀺𑀤𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀭𑀸𑀚𑀽𑀳𑀺 𑀤𑀺𑀦𑁆𑀦𑀁, 𑀢𑁂𑀲𑀁 𑀧𑀦 𑀲𑀩𑁆𑀩𑀤𑀼𑀩𑁆𑀩𑀮𑀪𑀸𑀯𑁂𑀦 𑀅𑀜𑁆𑀜𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀅𑀢𑁆𑀢𑀲𑀦𑁆𑀢𑀓𑀫𑁂𑀯 𑀩𑁆𑀭𑀸𑀳𑁆𑀫𑀡𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑁆𑀬𑀸𑀤𑀻𑀦𑀺 𑀯𑀢𑁆𑀯𑀸 𑀲𑀓𑀲𑀜𑁆𑀜𑀸𑀬 𑀏𑀯𑀁 𑀬𑀁 𑀓𑀺𑀜𑁆𑀘𑀺 𑀳𑀭𑀦𑁆𑀢𑀸𑀦𑀁, 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀸𑀧𑀯𑀸𑀤𑀻𑀦𑀜𑁆𑀘 𑀫𑁄𑀳𑀫𑀽𑀮𑁂𑀦. 𑀏𑀯𑀁 𑀫𑀼𑀲𑀸𑀯𑀸𑀤𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁.

𑁬𑁩. 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀺𑀯𑀺𑀥𑀓𑀫𑁆𑀫𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑁂𑀢𑀁 𑀢𑀺𑀯𑀺𑀥𑀦𑀺𑀬𑀫𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀢𑀣𑀸 𑀤𑀸𑀦𑀲𑀻𑀮𑀪𑀸𑀯𑀦𑀸𑀯𑀲𑁂𑀦𑀸’’𑀢𑀺. 𑀤𑀲𑀥𑀸 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀸𑀦𑀁 𑀳𑀺 𑀤𑁆𑀯𑀺𑀦𑁆𑀦𑀁, 𑀧𑀼𑀦 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀜𑁆𑀘 𑀬𑀣𑀸𑀓𑁆𑀓𑀫𑀁 𑀤𑀸𑀦𑀸𑀤𑀻𑀲𑀼 𑀢𑀻𑀲𑁆𑀯𑁂𑀯 𑀲𑀗𑁆𑀕𑀳𑁄. 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀧𑀭𑀢𑁄 𑀯𑀓𑁆𑀔𑀸𑀫. 𑀙𑀴𑀸𑀭𑀫𑁆𑀫𑀡𑁂𑀲𑀼 𑀧𑀦 𑀢𑀺𑀯𑀺𑀥𑀓𑀫𑁆𑀫𑀤𑁆𑀯𑀸𑀭𑁂𑀲𑀼 𑀘 𑀦𑁂𑀲𑀁 𑀧𑀯𑀢𑁆𑀢𑀺𑀬𑁄𑀚𑀦𑀸 𑀅𑀝𑁆𑀞𑀓𑀣𑀸𑀤𑀻𑀲𑀼 (𑀥. 𑀲. 𑀅𑀝𑁆𑀞. 𑁧𑁫𑁬-𑁧𑁫𑁯) 𑀆𑀕𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀸.

𑁬𑁫. 𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀤𑀸𑀦𑀁, 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑀻𑀮𑀢𑀻𑀢𑀺 𑀲𑀻𑀮𑀁, 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀲𑀫𑀸𑀤𑀳𑀢𑀺, 𑀲𑀫𑁆𑀫𑀸 𑀞𑀧𑁂𑀢𑀻𑀢𑁆𑀬𑀢𑁆𑀣𑁄, 𑀲𑀻𑀮𑀬𑀢𑀺 𑀯𑀸 𑀉𑀧𑀥𑀸𑀭𑁂𑀢𑀻𑀢𑀺 𑀲𑀻𑀮𑀁, 𑀉𑀧𑀥𑀸𑀭𑀡𑀁 𑀧𑀦𑁂𑀢𑁆𑀣 𑀓𑀼𑀲𑀮𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑁆𑀬𑀸𑀤𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨). 𑀪𑀸𑀯𑁂𑀢𑀺 𑀓𑀼𑀲𑀮𑁂 𑀥𑀫𑁆𑀫𑁂 𑀆𑀲𑁂𑀯𑀢𑀺 𑀯𑀟𑁆𑀠𑁂𑀢𑀺 𑀏𑀢𑀸𑀬𑀸𑀢𑀺 𑀪𑀸𑀯𑀦𑀸. 𑀅𑀧𑀘𑀸𑀬𑀢𑀺 𑀧𑀽𑀚𑀸𑀯𑀲𑁂𑀦 𑀲𑀸𑀫𑀻𑀘𑀺𑀁 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀅𑀧𑀘𑀸𑀬𑀦𑀁. 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑁂 𑀩𑁆𑀬𑀸𑀯𑀝𑀲𑁆𑀲 𑀪𑀸𑀯𑁄 𑀯𑁂𑀬𑁆𑀬𑀸𑀯𑀘𑁆𑀘𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀸 𑀧𑀢𑁆𑀢𑀺 𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀧𑀢𑁆𑀢𑀺𑀤𑀸𑀦𑀁. 𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑀢𑀺 𑀏𑀢𑀸𑀬𑀸𑀢𑀺 𑀧𑀢𑁆𑀢𑀸𑀦𑀼𑀫𑁄𑀤𑀦𑀸. 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺 𑀏𑀢𑁂𑀦𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀁. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀏𑀢𑀸𑀬𑀸𑀢𑀺 𑀥𑀫𑁆𑀫𑀤𑁂𑀲𑀦𑀸. 𑀤𑀺𑀝𑁆𑀞𑀺𑀬𑀸 𑀉𑀚𑀼𑀓𑀭𑀡𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁.

𑀢𑀢𑁆𑀣 𑀲𑀸𑀦𑀼𑀲𑀬𑀲𑀦𑁆𑀢𑀸𑀦𑀯𑀢𑁄 𑀧𑀭𑁂𑀲𑀁 𑀧𑀽𑀚𑀸𑀦𑀼𑀕𑁆𑀕𑀳𑀓𑀸𑀫𑀢𑀸𑀬 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀧𑀭𑀺𑀘𑁆𑀘𑀚𑀦𑀯𑀲𑀧𑁆𑀧𑀯𑀢𑁆𑀢𑀘𑁂𑀢𑀦𑀸 𑀤𑀸𑀦𑀁 𑀦𑀸𑀫, 𑀤𑀸𑀦𑀯𑀢𑁆𑀣𑀼𑀧𑀭𑀺𑀬𑁂𑀲𑀦𑀯𑀲𑁂𑀦, 𑀤𑀺𑀦𑁆𑀦𑀲𑁆𑀲 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀧𑀼𑀩𑁆𑀩𑀧𑀘𑁆𑀙𑀸𑀪𑀸𑀕𑀘𑁂𑀢𑀦𑀸 𑀏𑀢𑁆𑀣𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀤𑀝𑁆𑀞𑀩𑁆𑀩𑀁. 𑀦𑀺𑀘𑁆𑀘𑀲𑀻𑀮𑀸𑀤𑀺𑀯𑀲𑁂𑀦 𑀧𑀜𑁆𑀘, 𑀅𑀝𑁆𑀞, 𑀤𑀲 𑀯𑀸 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲, 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲, 𑀅𑀲𑀫𑀸𑀤𑀺𑀬𑀺𑀢𑁆𑀯𑀸𑀧𑀺 𑀲𑀫𑁆𑀧𑀢𑁆𑀢𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀫𑀦𑁆𑀢𑀲𑁆𑀲, 𑀧𑀩𑁆𑀩𑀚𑀦𑁆𑀢𑀲𑁆𑀲, 𑀉𑀧𑀲𑀫𑁆𑀧𑀤𑀫𑀸𑀴𑀓𑁂 𑀲𑀁𑀯𑀭𑀁 𑀲𑀫𑀸𑀤𑀺𑀬𑀦𑁆𑀢𑀲𑁆𑀲, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲 𑀘 𑀧𑀯𑀢𑁆𑀢𑀘𑁂𑀢𑀦𑀸 𑀲𑀻𑀮𑀁 𑀦𑀸𑀫. 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼, 𑀔𑀦𑁆𑀥𑀸𑀤𑀻𑀲𑀼 𑀘 𑀪𑀽𑀫𑀻𑀲𑀼 𑀧𑀭𑀺𑀓𑀫𑁆𑀫𑀲𑀫𑁆𑀫𑀲𑀦𑀯𑀲𑀧𑁆𑀧𑀯𑀢𑁆𑀢𑀸 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀸 𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑀘𑁂𑀢𑀦𑀸 𑀪𑀸𑀯𑀦𑀸 𑀦𑀸𑀫, 𑀦𑀺𑀭𑀯𑀚𑁆𑀚𑀯𑀺𑀚𑁆𑀚𑀸𑀤𑀺𑀧𑀭𑀺𑀬𑀸𑀧𑀼𑀡𑀦𑀘𑁂𑀢𑀦𑀸𑀧𑀺 𑀏𑀢𑁆𑀣𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺.

𑀯𑀬𑀲𑀸, 𑀕𑀼𑀡𑁂𑀳𑀺 𑀘 𑀚𑁂𑀝𑁆𑀞𑀸𑀦𑀁 𑀘𑀻𑀯𑀭𑀸𑀤𑀻𑀲𑀼 𑀧𑀘𑁆𑀘𑀸𑀲𑀸𑀭𑀳𑀺𑀢𑁂𑀦 𑀅𑀲𑀁𑀓𑀺𑀮𑀺𑀝𑁆𑀞𑀚𑁆𑀛𑀸𑀲𑀬𑁂𑀦 𑀧𑀘𑁆𑀘𑀼𑀝𑁆𑀞𑀸𑀦𑀆𑀲𑀦𑀸𑀪𑀺𑀦𑀻𑀳𑀸𑀭𑀸𑀤𑀺𑀯𑀺𑀥𑀺𑀦𑀸 𑀩𑀳𑀼𑀫𑀸𑀦𑀓𑀭𑀡𑀘𑁂𑀢𑀦𑀸 𑀅𑀧𑀘𑀸𑀬𑀦𑀁 𑀦𑀸𑀫. 𑀢𑁂𑀲𑀫𑁂𑀯, 𑀕𑀺𑀮𑀸𑀦𑀸𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑀚𑁆𑀛𑀸𑀲𑀬𑁂𑀦 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑀘𑁂𑀢𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀦𑀸𑀫. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀧𑀘𑁆𑀘𑀸𑀲𑀻𑀲𑀦𑀘𑁂𑀢𑀦𑀸 𑀧𑀢𑁆𑀢𑀺𑀤𑀸𑀦𑀁 𑀦𑀸𑀫. 𑀧𑀭𑁂𑀳𑀺 𑀤𑀺𑀦𑁆𑀦𑀲𑁆𑀲, 𑀅𑀤𑀺𑀦𑁆𑀦𑀲𑁆𑀲𑀧𑀺 𑀯𑀸 𑀧𑀼𑀜𑁆𑀜𑀲𑁆𑀲 𑀫𑀘𑁆𑀙𑁂𑀭𑀫𑀮𑀯𑀺𑀦𑀺𑀲𑁆𑀲𑀝𑁂𑀦 𑀘𑀺𑀢𑁆𑀢𑁂𑀦 𑀅𑀩𑁆𑀪𑀸𑀦𑀼𑀫𑁄𑀤𑀦𑀘𑁂𑀢𑀦𑀸 𑀧𑀢𑁆𑀢𑀸𑀦𑀼𑀫𑁄𑀤𑀦𑀸 𑀦𑀸𑀫. 𑀏𑀯𑀫𑀺𑀫𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑁄 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀯𑀺𑀲𑁂𑀲𑀲𑁆𑀲 𑀪𑀸𑀕𑀻 𑀪𑀯𑀺𑀲𑁆𑀲𑀸𑀫𑀺, 𑀩𑀳𑀼𑀲𑁆𑀲𑀼𑀢𑁄 𑀯𑀸 𑀳𑀼𑀢𑁆𑀯𑀸 𑀧𑀭𑁂𑀲𑀁 𑀥𑀫𑁆𑀫𑀤𑁂𑀲𑀦𑀸𑀤𑀻𑀳𑀺 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄, 𑀧𑀭𑁂𑀲𑀁 𑀯𑀸 𑀳𑀺𑀢𑀨𑀭𑀡𑀯𑀲𑀧𑁆𑀧𑀯𑀢𑁆𑀢𑁂𑀦 𑀅𑀲𑀁𑀓𑀺𑀮𑀺𑀝𑁆𑀞𑀚𑁆𑀛𑀸𑀲𑀬𑁂𑀦 𑀳𑀺𑀢𑀽𑀧𑀤𑁂𑀲𑀲𑀯𑀦𑀘𑁂𑀢𑀦𑀸 𑀥𑀫𑁆𑀫𑀲𑁆𑀲𑀯𑀦𑀁 𑀦𑀸𑀫, 𑀦𑀺𑀭𑀯𑀚𑁆𑀚𑀯𑀺𑀚𑁆𑀚𑀸𑀤𑀺𑀲𑀯𑀦𑀘𑁂𑀢𑀦𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀢𑀸𑀬 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑁄 𑀳𑀺𑀢𑀽𑀧𑀤𑁂𑀲𑀘𑁂𑀢𑀦𑀸 𑀥𑀫𑁆𑀫𑀤𑁂𑀲𑀦𑀸 𑀦𑀸𑀫, 𑀦𑀺𑀭𑀯𑀚𑁆𑀚𑀯𑀺𑀚𑁆𑀚𑀸𑀤𑀺𑀉𑀧𑀤𑀺𑀲𑀦𑀘𑁂𑀢𑀦𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑁆𑀬𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑀫𑁆𑀫𑀸𑀤𑀲𑁆𑀲𑀦𑀯𑀲𑁂𑀦 𑀤𑀺𑀝𑁆𑀞𑀺𑀬𑀸 𑀉𑀚𑀼𑀓𑀭𑀡𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀦𑀸𑀫.

𑀬𑀤𑀺 𑀏𑀯𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀧𑀼𑀜𑁆𑀜𑀓𑀺𑀭𑀺𑀬𑀪𑀸𑀯𑁄 𑀦 𑀮𑀩𑁆𑀪𑀢𑀻𑀢𑀺? 𑀦𑁄 𑀦 𑀮𑀩𑁆𑀪𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀘𑁂𑀢𑀦𑀸𑀦𑀫𑁆𑀧𑀺 𑀢𑀁𑀢𑀁𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑁆𑀯𑁂𑀯 𑀲𑀗𑁆𑀕𑀡𑁆𑀳𑀦𑀢𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀉𑀚𑀼𑀓𑀭𑀡𑀯𑁂𑀮𑀸𑀬𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀳𑁄𑀢𑀺, 𑀧𑀼𑀭𑀺𑀫𑀧𑀘𑁆𑀙𑀸𑀪𑀸𑀕𑁂 𑀧𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀢𑀲𑁆𑀲𑀧𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀪𑀸𑀯𑁄 𑀉𑀧𑀧𑀚𑁆𑀚𑀢𑀻𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦.

𑀇𑀫𑁂𑀲𑀼 𑀧𑀦 𑀤𑀲𑀲𑀼 𑀧𑀢𑁆𑀢𑀺𑀤𑀸𑀦𑀸𑀦𑀼𑀫𑁄𑀤𑀦𑀸 𑀤𑀸𑀦𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀢𑀁𑀲𑀪𑀸𑀯𑀢𑁆𑀢𑀸. 𑀤𑀸𑀦𑀫𑁆𑀧𑀺 𑀳𑀺 𑀇𑀲𑁆𑀲𑀸𑀫𑀘𑁆𑀙𑁂𑀭𑀸𑀦𑀁 𑀧𑀝𑀺𑀧𑀓𑁆𑀔𑀁, 𑀏𑀢𑁂𑀧𑀺. 𑀢𑀲𑁆𑀫𑀸 𑀲𑀫𑀸𑀦𑀧𑁆𑀧𑀝𑀺𑀧𑀓𑁆𑀔𑀢𑀸𑀬 𑀏𑀓𑀮𑀓𑁆𑀔𑀡𑀢𑁆𑀢𑀸 𑀢𑁂 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀫𑁆𑀳𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀅𑀧𑀘𑀸𑀬𑀦𑀯𑁂𑀬𑁆𑀬𑀸𑀯𑀘𑁆𑀘𑀸𑀲𑀻𑀮𑀫𑀬𑀧𑀼𑀜𑁆𑀜𑁂𑀯 𑀲𑀗𑁆𑀕𑀬𑁆𑀳𑀦𑁆𑀢𑀺 𑀘𑀸𑀭𑀺𑀢𑁆𑀢𑀲𑀻𑀮𑀪𑀸𑀯𑀢𑁄. 𑀤𑁂𑀲𑀦𑀸𑀲𑀯𑀦𑀤𑀺𑀝𑁆𑀞𑀺𑀚𑀼𑀓𑀸 𑀧𑀦 𑀓𑀼𑀲𑀮𑀥𑀫𑁆𑀫𑀸𑀲𑁂𑀯𑀦𑀪𑀸𑀯𑀢𑁄 𑀪𑀸𑀯𑀦𑀸𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 (𑀤𑀻. 𑀦𑀺. 𑀝𑀻. 𑁩.𑁩𑁦𑁫) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀤𑁂𑀲𑁂𑀦𑁆𑀢𑁄, 𑀲𑀼𑀡𑀦𑁆𑀢𑁄 𑀘 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛 𑀧𑀝𑀺𑀯𑀺𑀚𑁆𑀛 𑀤𑁂𑀲𑁂𑀢𑀺, 𑀲𑀼𑀡𑀸𑀢𑀺 𑀘, 𑀢𑀸𑀦𑀺 𑀘 𑀤𑁂𑀲𑀦𑀸𑀲𑀯𑀦𑀸𑀦𑀺 𑀧𑀝𑀺𑀯𑁂𑀥𑀫𑁂𑀯𑀸𑀳𑀭𑀦𑁆𑀢𑀻𑀢𑀺 𑀤𑁂𑀲𑀦𑀸𑀲𑀯𑀦𑀸𑀪𑀸𑀯𑀦𑀸𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀥𑀫𑁆𑀫𑀤𑀸𑀦𑀲𑀪𑀸𑀯𑀢𑁄 𑀤𑁂𑀲𑀦𑀸 𑀤𑀸𑀦𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺𑀧𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀁 𑀚𑀺𑀦𑀸𑀢𑀻’’𑀢𑀺 (𑀥. 𑀧. 𑁩𑁫𑁪). 𑀢𑀣𑀸 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀲𑀩𑁆𑀩𑀢𑁆𑀣𑀸𑀧𑀺 𑀲𑀩𑁆𑀩𑁂𑀲𑀁 𑀦𑀺𑀬𑀫𑀦𑀮𑀓𑁆𑀔𑀡𑀢𑁆𑀢𑀸. 𑀤𑀸𑀦𑀸𑀤𑀻𑀲𑀼 𑀳𑀺 𑀬𑀁 𑀓𑀺𑀜𑁆𑀘𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑁆𑀬𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀲𑁄𑀥𑀺𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁, 𑀏𑀯𑀜𑁆𑀘 𑀓𑀢𑁆𑀯𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫; 𑀥. 𑀲. 𑀅𑀝𑁆𑀞. 𑁧𑁫𑁬-𑁧𑁫𑁯 𑀧𑀼𑀜𑁆𑀜𑀸𑀓𑀺𑀭𑀺𑀬𑀯𑀢𑁆𑀣𑀸𑀤𑀺𑀓𑀣𑀸) ‘‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀲𑀩𑁆𑀩𑁂𑀲𑀁 𑀦𑀺𑀬𑀫𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀤𑀸𑀦𑀲𑀻𑀮𑀪𑀸𑀯𑀦𑀸𑀯𑀲𑁂𑀦 𑀢𑀻𑀲𑀼 𑀇𑀢𑀭𑁂𑀲𑀁 𑀲𑀗𑁆𑀕𑀡𑁆𑀳𑀦𑀢𑁄 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀫𑁂𑀯 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀢𑀣𑀸 𑀘𑁂𑀯 𑀆𑀘𑀭𑀺𑀬𑁂𑀦 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀁.

𑁬𑁭. 𑀫𑀦𑁄𑀓𑀫𑁆𑀫𑀫𑁂𑀯 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀸𑀪𑀸𑀯𑁂𑀦 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀢𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀪𑀸𑀯𑀦𑀸𑀫𑀬𑀁 𑀤𑀸𑀦𑀸𑀤𑀺𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀪𑀸𑀯𑀢𑁄. 𑀛𑀸𑀦𑀗𑁆𑀕𑀪𑁂𑀤𑁂𑀦𑀸𑀢𑀺 𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄 𑀅𑀦𑁂𑀓𑀯𑀺𑀥𑀢𑁆𑀢𑁂𑀧𑀺 𑀅𑀗𑁆𑀕𑀸𑀢𑀺𑀓𑁆𑀓𑀫𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀚𑁆𑀛𑀸𑀦𑀗𑁆𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺.

𑁬𑁮. 𑀆𑀭𑀫𑁆𑀫𑀡𑀪𑁂𑀤𑁂𑀦𑀸𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁, 𑀆𑀓𑀸𑀲𑀯𑀺𑀲𑀬𑀁 𑀫𑀦𑁄, 𑀢𑀤𑀪𑀸𑀯𑁄, 𑀢𑀤𑀸𑀮𑀫𑁆𑀩𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀆𑀭𑀫𑁆𑀫𑀡𑀸𑀦𑀁 𑀪𑁂𑀤𑁂𑀦.

𑁬𑁯. 𑀏𑀢𑁆𑀣𑀸𑀢𑀺 𑀇𑀫𑁂𑀲𑀼 𑀧𑀸𑀓𑀝𑁆𑀞𑀸𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁂𑀲𑀼 𑀓𑀫𑁆𑀫𑁂𑀲𑀼. 𑀉𑀤𑁆𑀥𑀘𑁆𑀘𑀭𑀳𑀺𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑁂𑀢𑀦𑀸𑀭𑀳𑀺𑀢𑀁 𑀏𑀓𑀸𑀤𑀲𑀯𑀺𑀥𑀁 𑀅𑀓𑀼𑀲𑀮𑀓𑀫𑁆𑀫𑀁. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀅𑀥𑀺𑀫𑁄𑀓𑁆𑀔𑀯𑀺𑀭𑀳𑁂𑀦 𑀲𑀩𑁆𑀩𑀤𑀼𑀩𑁆𑀩𑀮𑀫𑁆𑀧𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺, 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀬𑁄𑀕𑁂𑀦 𑀢𑀢𑁄 𑀩𑀮𑀯𑀦𑁆𑀢𑀫𑁆𑀧𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀦𑀸𑀓𑀟𑁆𑀠𑀢𑀻𑀢𑀺? 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑀸𑀪𑀸𑀯𑀢𑁄. 𑀩𑀮𑀯𑀁 𑀆𑀓𑀟𑁆𑀠𑀢𑀺, 𑀤𑀼𑀩𑁆𑀩𑀮𑀁 𑀦𑀸𑀓𑀟𑁆𑀠𑀢𑀻𑀢𑀺 𑀳𑀺 𑀅𑀬𑀁 𑀯𑀺𑀘𑀸𑀭𑀡𑀸 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑁂𑀲𑀼𑀬𑁂𑀯. 𑀬𑀲𑁆𑀲 𑀧𑀦 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑁄𑀬𑁂𑀯 𑀦𑀢𑁆𑀣𑀺, 𑀦 𑀢𑀲𑁆𑀲 𑀩𑀮𑀯𑀪𑀸𑀯𑁄 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑁂 𑀓𑀸𑀭𑀡𑀁.

𑀓𑀣𑀁 𑀧𑀦𑁂𑀢𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑁄 𑀦𑀢𑁆𑀣𑀻𑀢𑀺? 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼 𑀅𑀦𑀸𑀕𑀢𑀢𑁆𑀢𑀸. 𑀢𑀺𑀯𑀺𑀥𑀸 𑀳𑀺 𑀅𑀓𑀼𑀲𑀮𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀺𑀲𑀳𑀕𑀢𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀦𑀸𑀫 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀯𑀲𑁂𑀦 ‘‘𑀤𑀲𑁆𑀲𑀦’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀦𑀸𑀫 𑀅𑀕𑁆𑀕𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀜𑁆𑀳𑀺 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀦𑀺𑀩𑁆𑀩𑀸𑀦𑁂 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 ‘‘𑀪𑀸𑀯𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀦 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀢𑁂𑀲𑀁 𑀅𑀧𑀸𑀬𑀦𑀺𑀩𑁆𑀩𑀢𑁆𑀢𑀓𑀸𑀯𑀢𑁆𑀣𑀸𑀬 𑀧𑀞𑀫𑀫𑀕𑁆𑀕𑁂𑀦, 𑀲𑁂𑀲𑀩𑀳𑀮𑀸𑀩𑀳𑀮𑀸𑀯𑀢𑁆𑀣𑀸𑀬 𑀉𑀧𑀭𑀺𑀫𑀕𑁆𑀕𑁂𑀳𑀺 𑀧𑀳𑀻𑀬𑀫𑀸𑀦𑀢𑁆𑀢𑀸. 𑀢𑀢𑁆𑀣 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀫𑁆𑀧𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀲𑀸𑀫𑀜𑁆𑀜𑁂𑀦 𑀇𑀥 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩’’𑀦𑁆𑀢𑀺 𑀯𑁄𑀳𑀭𑀦𑁆𑀢𑀺.

𑀬𑀤𑀺 𑀘 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀧𑀝𑀺𑀲𑀦𑁆𑀥𑀺𑀁 𑀤𑀤𑁂𑀬𑁆𑀬, 𑀢𑀤𑀸 𑀅𑀓𑀼𑀲𑀮𑀧𑀝𑀺𑀲𑀦𑁆𑀥𑀺𑀬𑀸 𑀲𑀼𑀕𑀢𑀺𑀬𑀁 𑀅𑀲𑀫𑁆𑀪𑀯𑀢𑁄 𑀅𑀧𑀸𑀬𑁂𑀲𑁆𑀯𑁂𑀯 𑀤𑀤𑁂𑀬𑁆𑀬. 𑀅𑀧𑀸𑀬𑀕𑀫𑀦𑀻𑀬𑀜𑁆𑀘 𑀅𑀯𑀲𑁆𑀲𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁 𑀲𑀺𑀬𑀸. 𑀇𑀢𑀭𑀣𑀸 𑀅𑀧𑀸𑀬𑀕𑀫𑀦𑀻𑀬𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀲𑁂𑀓𑁆𑀔𑀸𑀦𑀁 𑀅𑀧𑀸𑀬𑀼𑀧𑁆𑀧𑀢𑁆𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀧𑀦𑁂𑀢𑀁 𑀬𑀼𑀢𑁆𑀢𑀁 ‘‘𑀘𑀢𑀽𑀳𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄 (𑀔𑀼. 𑀧𑀸. 𑁬.𑁧𑁧; 𑀲𑀼. 𑀦𑀺. 𑁨𑁩𑁪), 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄’’𑀢𑀺 (𑀧𑀸𑀭𑀸. 𑁨𑁧; 𑀲𑀁. 𑀦𑀺. 𑁫.𑁯𑁯𑁮) 𑀆𑀤𑀺𑀯𑀘𑀦𑁂𑀳𑀺 𑀲𑀳 𑀯𑀺𑀭𑀼𑀚𑁆𑀛𑀦𑀢𑁄. 𑀲𑀢𑀺 𑀘 𑀧𑀦𑁂𑀢𑀲𑁆𑀲 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀪𑀸𑀯𑁂 ‘‘𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸’’𑀢𑀺 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺. 𑀅𑀣 𑀲𑀺𑀬𑀸 ‘‘𑀅𑀧𑀸𑀬𑀕𑀸𑀫𑀺𑀦𑀺𑀬𑁄 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’’𑀢𑀺 𑀏𑀯𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀯𑀼𑀢𑁆𑀢𑀢𑁆𑀢𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑁂𑀢𑀦𑀸𑀬 𑀢𑀢𑁆𑀣 𑀲𑀗𑁆𑀕𑀳𑁄 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀢𑀁 𑀦, 𑀢𑀲𑁆𑀲 𑀏𑀓𑀦𑁆𑀢𑀢𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸? 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 (𑀥. 𑀲. 𑁧𑁪𑁦𑁬), 𑀢𑀲𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀅𑀯𑀘𑀦𑀁 𑀇𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀪𑀸𑀯𑀁 𑀲𑀸𑀥𑁂𑀢𑀺. 𑀦𑀦𑀼 𑀘 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑁋

‘‘𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸, 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁩𑁦-𑁭𑁩𑁧) 𑁋

𑀏𑀯𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀯𑀺𑀧𑀸𑀓𑁄𑀧𑀺 𑀉𑀤𑁆𑀥𑀝𑁄𑀢𑀺 𑀓𑀣𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀪𑀸𑀯𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄𑀢𑀺? 𑀦𑀸𑀬𑀁 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀲𑀦𑁆𑀥𑀸𑀬 𑀉𑀤𑁆𑀥𑀝𑁄. 𑀅𑀣 𑀔𑁄 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀲𑀦𑁆𑀥𑀸𑀬. 𑀧𑀝𑁆𑀞𑀸𑀦𑁂 𑀧𑀦 𑁋

‘‘𑀲𑀳𑀚𑀸𑀢𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀸𑀦𑀸𑀓𑁆𑀔𑀡𑀺𑀓𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁, 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁮𑁯) 𑁋

𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀬 𑀏𑀯 𑀲𑀳𑀚𑀸𑀢𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀲𑀳𑀚𑀸𑀢𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁮𑁯) 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀬 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄𑀯 𑀉𑀤𑁆𑀥𑀝𑁄, 𑀦 𑀧𑀦 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄, 𑀦 𑀘 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀁 𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀢𑀲𑁆𑀲 𑀲𑀩𑁆𑀩𑀣𑀸𑀧𑀺 𑀧𑀝𑀺𑀲𑀦𑁆𑀥𑀺𑀤𑀸𑀦𑀦𑁆𑀢𑀺. 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀉𑀤𑁆𑀥𑀘𑁆𑀘𑀘𑁂𑀢𑀦𑀸 𑀉𑀪𑀬𑀯𑀺𑀧𑀸𑀓𑀫𑁆𑀧𑀺 𑀦 𑀤𑁂𑀢𑀺 𑀧𑀝𑁆𑀞𑀸𑀦𑁂 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸’’𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑀉𑀤𑁆𑀥𑀘𑁆𑀘𑀲𑀳𑀕𑀢𑀸𑀦𑀫𑁆𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲 𑀉𑀤𑁆𑀥𑀝𑀢𑁆𑀢𑀸, 𑀧𑀝𑁆𑀞𑀸𑀦𑁂 𑀘 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀬𑀤𑀺 𑀳𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀲𑀦𑁆𑀥𑀸𑀬 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀯𑀼𑀘𑁆𑀘𑁂𑀬𑁆𑀬, 𑀢𑀤𑀸 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀫𑁆𑀧𑀺𑀲𑁆𑀲 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲 𑀯𑀲𑁂𑀦 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀢𑀲𑁆𑀲 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀦𑀺𑀯𑀸𑀭𑁂𑀢𑀼𑀁. 𑀢𑁂𑀦𑀸𑀳 ‘‘𑀧𑀯𑀢𑁆𑀢𑀺𑀬𑀁 𑀧𑀦𑀸’’𑀢𑁆𑀬𑀸𑀤𑀺. 𑀆𑀘𑀭𑀺𑀬𑀩𑀼𑀤𑁆𑀥𑀫𑀺𑀢𑁆𑀢𑀸𑀤𑀬𑁄 𑀧𑀦 𑀅𑀢𑁆𑀣𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀫𑁆𑀧𑀺. 𑀅𑀢𑁆𑀣𑀺 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀫𑁆𑀧𑀺, 𑀢𑁂𑀲𑀼 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁 𑀲𑁂𑀓𑁆𑀔𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀁, 𑀇𑀢𑀭𑀁 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀁, 𑀨𑀮𑀤𑀸𑀦𑀜𑁆𑀘 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀲𑁆𑀲𑁂𑀯 𑀦 𑀇𑀢𑀭𑀲𑁆𑀲𑀸𑀢𑀺 𑀏𑀯𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀏𑀓𑀲𑁆𑀲 𑀉𑀪𑀬𑀯𑀺𑀧𑀸𑀓𑀤𑀸𑀦𑀁, 𑀏𑀓𑀲𑁆𑀲 𑀲𑀩𑁆𑀩𑀣𑀸𑀧𑀺 𑀯𑀺𑀧𑀸𑀓𑀸𑀪𑀸𑀯𑀁 𑀯𑀡𑁆𑀡𑁂𑀦𑁆𑀢𑀺. 𑀬𑁄 𑀧𑀦𑁂𑀢𑁆𑀣 𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑁄, 𑀬𑀜𑁆𑀘 𑀢𑀲𑁆𑀲 𑀦𑀺𑀭𑀸𑀓𑀭𑀡𑀁, 𑀬𑀜𑁆𑀘 𑀲𑀩𑁆𑀩𑀣𑀸𑀧𑀺 𑀯𑀺𑀧𑀸𑀓𑀸𑀪𑀸𑀯𑀯𑀸𑀤𑀻𑀦𑀁 𑀫𑀢𑀧𑀝𑀺𑀓𑁆𑀔𑁂𑀧𑀦𑀁 𑀇𑀥 𑀅𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀤𑀻𑀲𑀼, 𑀯𑀺𑀲𑁂𑀲𑀢𑁄 𑀘 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀲𑀩𑁆𑀩𑀢𑁆𑀣𑀸𑀧𑀺 𑀓𑀸𑀫𑀮𑁄𑀓𑁂𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀓𑀸𑀫𑀮𑁄𑀓𑁂. 𑀬𑀣𑀸𑀭𑀳𑀦𑁆𑀢𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀼𑀭𑀽𑀧𑀁. 𑀅𑀧𑀸𑀬𑁂𑀲𑀼𑀧𑀺 𑀬𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀫𑀳𑀸𑀲𑀫𑁆𑀧𑀢𑁆𑀢𑀺𑀯𑀺𑀲𑀬𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁, 𑀬𑀜𑁆𑀘 𑀦𑀺𑀭𑀬𑀯𑀸𑀲𑀻𑀦𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀤𑀲𑁆𑀲𑀦𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀢𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁, 𑀢𑀁 𑀓𑀼𑀲𑀮𑀓𑀫𑁆𑀫𑀲𑁆𑀲𑁂𑀯 𑀨𑀮𑀁. 𑀦 𑀳𑀺 𑀅𑀓𑀼𑀲𑀮𑀲𑁆𑀲 𑀇𑀝𑁆𑀞𑀯𑀺𑀧𑀸𑀓𑁄 𑀲𑀫𑁆𑀪𑀯𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀇𑀝𑁆𑀞𑁄 𑀓𑀦𑁆𑀢𑁄 𑀯𑀺𑀧𑀸𑀓𑁄 𑀲𑀁𑀯𑀺𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁩.𑁧𑁩𑁧; 𑀅. 𑀦𑀺. 𑁧.𑁨𑁮𑁪-𑁨𑁮𑁬; 𑀯𑀺𑀪. 𑁮𑁦𑁯), 𑀢𑀲𑁆𑀫𑀸 𑀓𑀼𑀲𑀮𑀓𑀫𑁆𑀫𑀁 𑀅𑀧𑀸𑀬𑁂𑀲𑀼𑀧𑀺 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀺 𑀚𑀦𑁂𑀢𑀺. 𑀅𑀜𑁆𑀜𑀪𑀽𑀫𑀺𑀓𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀅𑀜𑁆𑀜𑀪𑀽𑀫𑀺𑀓𑀯𑀺𑀧𑀸𑀓𑀸𑀪𑀸𑀯𑀢𑁄 𑀓𑀸𑀫𑀯𑀺𑀭𑀸𑀕𑀪𑀸𑀯𑀦𑀸𑀬 𑀓𑀸𑀫𑀢𑀡𑁆𑀳𑀸𑀯𑀺𑀲𑀬𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦𑀸𑀬𑁄𑀕𑀢𑁄 𑀏𑀓𑀦𑁆𑀢𑀲𑀤𑀺𑀲𑀯𑀺𑀧𑀸𑀓𑀢𑁆𑀢𑀸 𑀘 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀓𑀼𑀲𑀮𑀸𑀦𑀁 𑀭𑀽𑀧𑀸𑀯𑀘𑀭𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀭𑀽𑀧𑀮𑁄𑀓𑁂𑀧𑀺 𑀬𑀣𑀸𑀭𑀳𑀁 𑀭𑀽𑀧𑀸𑀤𑀺𑀯𑀺𑀲𑀬𑀸𑀦𑀺 𑀢𑀸𑀦𑀺 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀢𑁆𑀣𑀸𑀧𑀺 𑀓𑀸𑀫𑀮𑁄𑀓𑁂’’𑀢𑁆𑀬𑀸𑀤𑀺.

𑁭𑁧. 𑀏𑀯𑀁 𑀧𑀦 𑀯𑀺𑀧𑀘𑁆𑀘𑀦𑁆𑀢𑀁 𑀓𑀫𑁆𑀫𑀁 𑀲𑁄𑀴𑀲𑀓𑀤𑁆𑀯𑀸𑀤𑀲𑀓𑀅𑀝𑁆𑀞𑀓𑀯𑀲𑁂𑀦 𑀢𑀺𑀥𑀸 𑀯𑀺𑀧𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸𑀧𑀺’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀻𑀢𑀺 𑀏𑀯𑀁 𑀯𑀺𑀧𑀘𑁆𑀘𑀫𑀸𑀦𑁂𑀧𑀺 𑀓𑀼𑀲𑀮𑀓𑀫𑁆𑀫𑁂. 𑀉𑀓𑁆𑀓𑀝𑁆𑀞𑀦𑁆𑀢𑀺 𑀓𑀼𑀲𑀮𑀧𑀭𑀺𑀯𑀸𑀭𑀮𑀸𑀪𑀢𑁄, 𑀧𑀘𑁆𑀙𑀸 𑀆𑀲𑁂𑀯𑀦𑀧𑁆𑀧𑀯𑀢𑁆𑀢𑀺𑀬𑀸 𑀯𑀸 𑀯𑀺𑀲𑀺𑀝𑁆𑀞𑀁. 𑀬𑀜𑁆𑀳𑀺 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑀸𑀮𑁂 𑀧𑀼𑀭𑀺𑀫𑀧𑀘𑁆𑀙𑀸𑀪𑀸𑀕𑀧𑁆𑀧𑀯𑀢𑁆𑀢𑁂𑀳𑀺 𑀓𑀼𑀲𑀮𑀓𑀫𑁆𑀫𑁂𑀳𑀺 𑀧𑀭𑀺𑀯𑀸𑀭𑀺𑀢𑀁, 𑀧𑀘𑁆𑀙𑀸 𑀯𑀸 𑀆𑀲𑁂𑀯𑀦𑀮𑀸𑀪𑁂𑀦 𑀲𑀫𑀼𑀤𑀸𑀘𑀺𑀡𑁆𑀡𑀁. 𑀢𑀁 𑀉𑀓𑁆𑀓𑀝𑁆𑀞𑀁. 𑀬𑀁 𑀧𑀦 𑀓𑀭𑀡𑀓𑀸𑀮𑁂 𑀅𑀓𑀼𑀲𑀮𑀓𑀫𑁆𑀫𑁂𑀳𑀺 𑀧𑀭𑀺𑀯𑀸𑀭𑀺𑀢𑀁, 𑀧𑀘𑁆𑀙𑀸 𑀯𑀸 ‘‘𑀤𑀼𑀓𑁆𑀓𑀝𑀫𑁂𑀢𑀁 𑀫𑀬𑀸’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀼𑀧𑁆𑀧𑀸𑀤𑀦𑁂𑀦 𑀧𑀭𑀺𑀪𑀸𑀯𑀺𑀢𑀁, 𑀢𑀁 𑀑𑀫𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀏𑀓𑀫𑁂𑀯 𑀧𑀝𑀺𑀲𑀦𑁆𑀥𑀺𑀁. 𑀦 𑀳𑀺 𑀏𑀓𑁂𑀦 𑀓𑀫𑁆𑀫𑁂𑀦 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀧𑀯𑀢𑁆𑀢𑀺𑀯𑀺𑀧𑀸𑀓𑁄 𑀧𑀦 𑀚𑀸𑀢𑀺𑀲𑀢𑁂𑀧𑀺 𑀚𑀸𑀢𑀺𑀲𑀳𑀲𑁆𑀲𑁂𑀧𑀺 𑀳𑁄𑀢𑀺. 𑀬𑀣𑀸𑀳 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯). 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀜𑀸𑀡𑀁 𑀚𑀘𑁆𑀘𑀦𑁆𑀥𑀸𑀤𑀺𑀯𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀫𑁄𑀳𑀲𑁆𑀲, 𑀲𑀩𑁆𑀩𑀸𑀓𑀼𑀲𑀮𑀲𑁆𑀲𑁂𑀯 𑀯𑀸 𑀧𑀝𑀺𑀧𑀓𑁆𑀔𑀁, 𑀢𑀲𑁆𑀫𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀓𑀫𑁆𑀫𑀁 𑀚𑀘𑁆𑀘𑀦𑁆𑀥𑀸𑀤𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀁 𑀦 𑀳𑁄𑀢𑀻𑀢𑀺 𑀢𑀺𑀳𑁂𑀢𑀼𑀓𑀁 𑀅𑀢𑀺𑀤𑀼𑀩𑁆𑀩𑀮𑀫𑁆𑀧𑀺 𑀲𑀫𑀸𑀦𑀁 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀫𑁂𑀯 𑀆𑀓𑀟𑁆𑀠𑀢𑀺, 𑀦𑀸𑀳𑁂𑀢𑀼𑀓𑀁. 𑀤𑀼𑀳𑁂𑀢𑀼𑀓𑀜𑁆𑀘 𑀓𑀫𑁆𑀫𑀁 𑀜𑀸𑀡𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀜𑀸𑀡𑀨𑀮𑀼𑀧𑁆𑀧𑀸𑀤𑀦𑁂 𑀅𑀲𑀫𑀢𑁆𑀣𑀁, 𑀬𑀣𑀸 𑀢𑀁 𑀅𑀮𑁄𑀪𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀅𑀮𑁄𑀪𑀨𑀮𑀼𑀧𑁆𑀧𑀸𑀤𑀦𑁂 𑀅𑀲𑀫𑀢𑁆𑀣𑀁 𑀅𑀓𑀼𑀲𑀮𑀓𑀫𑁆𑀫𑀦𑁆𑀢𑀺 𑀢𑀁 𑀅𑀢𑀺𑀉𑀓𑁆𑀓𑀝𑁆𑀞𑀫𑁆𑀧𑀺 𑀲𑀫𑀸𑀦𑀁 𑀤𑀼𑀳𑁂𑀢𑀼𑀓𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺, 𑀦 𑀢𑀺𑀳𑁂𑀢𑀼𑀓𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀢𑀺𑀳𑁂𑀢𑀼𑀓𑀫𑁄𑀫𑀓𑀁 𑀤𑀼𑀳𑁂𑀢𑀼𑀓𑀫𑀼𑀓𑁆𑀓𑀝𑁆𑀞𑀜𑁆𑀘𑀸’’𑀢𑁆𑀬𑀸𑀤𑀺.

𑀏𑀢𑁆𑀣 𑀲𑀺𑀬𑀸 𑁋 𑀬𑀣𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁩𑁧) 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀢𑀺𑀡𑁆𑀡𑀁, 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑀺𑀦𑁆𑀦𑀁, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀺𑀡𑁆𑀡𑀜𑁆𑀘 𑀳𑁂𑀢𑀽𑀦𑀁 𑀯𑀲𑁂𑀦 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀽𑀧𑀧𑀢𑁆𑀢𑀺, 𑀢𑀣𑀸 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀙𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁩𑁩) 𑀚𑀯𑀦𑀓𑁆𑀔𑀡𑁂 𑀤𑁆𑀯𑀺𑀦𑁆𑀦𑀁, 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑀺𑀦𑁆𑀦𑀁, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑁆𑀯𑀺𑀦𑁆𑀦𑀜𑁆𑀘 𑀳𑁂𑀢𑀽𑀦𑀁 𑀯𑀲𑁂𑀦 𑀙𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀽𑀧𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀏𑀯𑀁 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀻’’𑀢𑀺 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀅𑀯𑀼𑀢𑁆𑀢𑀢𑁆𑀢𑀸 𑀦𑀢𑁆𑀣𑀺 𑀢𑀺𑀳𑁂𑀢𑀼𑀓𑀲𑁆𑀲 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 𑀤𑀼𑀳𑁂𑀢𑀼𑀓𑁄𑀫𑀓𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀬 𑀢𑀺𑀳𑁂𑀢𑀼𑀓𑁄𑀫𑀓𑀓𑀫𑁆𑀫𑁂𑀦 𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀢𑁄 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸𑀯 𑀤𑀸𑀢𑀩𑁆𑀩𑀢𑁆𑀢𑀸, 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀤𑀲𑁆𑀲𑀢𑁆𑀣𑀁 𑀧𑀦 𑀫𑀳𑀸𑀣𑁂𑀭𑁂𑀦 𑀲𑀸𑀯𑀲𑁂𑀲𑁄 𑀧𑀸𑀞𑁄 𑀓𑀢𑁄. 𑀇𑀢𑀭𑀣𑀸 ‘‘𑀘𑀢𑀼𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸’’𑀢𑀺 𑀯𑀘𑀦𑀸𑀪𑀸𑀯𑀢𑁄 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀽𑀧𑀧𑀢𑁆𑀢𑀺𑀬𑀸𑀧𑀺𑀅𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀬𑀣𑀸 𑀲𑀼𑀕𑀢𑀺𑀬𑀁 𑀚𑀘𑁆𑀘𑀦𑁆𑀥𑀩𑀥𑀺𑀭𑀸𑀤𑀺𑀯𑀺𑀧𑀢𑁆𑀢𑀺𑀬𑀸 𑀅𑀳𑁂𑀢𑀼𑀓𑀽𑀧𑀧𑀢𑁆𑀢𑀺𑀁 𑀯𑀚𑁆𑀚𑁂𑀢𑁆𑀯𑀸 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀳𑁂𑀢𑀼𑀓𑀽𑀧𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀤𑀼𑀳𑁂𑀢𑀼𑀓𑀽𑀧𑀧𑀢𑁆𑀢𑀺 𑀏𑀯 𑀉𑀤𑁆𑀥𑀝𑀸, 𑀦 𑀅𑀳𑁂𑀢𑀼𑀓𑀽𑀧𑀧𑀢𑁆𑀢𑀺, 𑀏𑀯𑀁 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀤𑀲𑁆𑀲𑀦𑀢𑁆𑀣𑀁 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀢𑀺𑀳𑁂𑀢𑀼𑀓𑀽𑀧𑀧𑀢𑁆𑀢𑀺 𑀏𑀯 𑀉𑀤𑁆𑀥𑀝𑀸, 𑀦 𑀤𑀼𑀳𑁂𑀢𑀼𑀓𑀽𑀧𑀧𑀢𑁆𑀢𑀺, 𑀦 𑀧𑀦 𑀅𑀮𑀩𑁆𑀪𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁭𑁪. 𑀏𑀯𑀁 𑀏𑀓𑀸𑀬 𑀘𑁂𑀢𑀦𑀸𑀬 𑀲𑁄𑀴𑀲 𑀯𑀺𑀧𑀸𑀓𑀸𑀦𑀺 𑀏𑀢𑁆𑀣𑁂𑀯 𑀤𑁆𑀯𑀸𑀤𑀲𑀓𑀫𑀕𑁆𑀕𑁄 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀻𑀢𑀺 𑀧𑀯𑀢𑁆𑀢𑀲𑁆𑀲 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀯𑀸𑀤𑀲𑁆𑀲 𑀯𑀲𑁂𑀦 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀏𑀓𑀸𑀬 𑀘𑁂𑀢𑀦𑀸𑀬 𑀤𑁆𑀯𑀸𑀤𑀲 𑀯𑀺𑀧𑀸𑀓𑀸𑀦𑀺 𑀏𑀢𑁆𑀣𑁂𑀯 𑀤𑀲𑀓𑀫𑀕𑁆𑀕𑁄 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀻𑀢𑀺 𑀆𑀕𑀢𑀲𑁆𑀲 𑀫𑁄𑀭𑀯𑀸𑀧𑀻𑀯𑀸𑀲𑀻𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑀲𑁆𑀲𑀧𑀺 𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀯𑀺𑀧𑀸𑀓𑀸𑀦𑀻’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀫𑀼𑀔𑁂 𑀘𑀮𑀺𑀢𑁂 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀘𑀮𑀢𑀺, 𑀏𑀯𑀁 𑀅𑀲𑀗𑁆𑀔𑀸𑀭𑀓𑀼𑀲𑀮𑀲𑁆𑀲 𑀅𑀲𑀗𑁆𑀔𑀸𑀭𑀯𑀺𑀧𑀸𑀓𑁄𑀯 𑀳𑁄𑀢𑀺, 𑀦 𑀲𑀲𑀗𑁆𑀔𑀸𑀭𑁄𑀢𑀺 𑀏𑀯𑀁 𑀆𑀕𑀫𑀦𑀢𑁄𑀯 𑀲𑀗𑁆𑀔𑀸𑀭𑀪𑁂𑀤𑁄𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦 𑀯𑀺𑀧𑀸𑀓𑀲𑁆𑀲 𑀲𑀗𑁆𑀔𑀸𑀭𑀪𑁂𑀤𑁄 𑀧𑀘𑁆𑀘𑀬𑀯𑀲𑁂𑀦 𑀇𑀘𑁆𑀙𑀺𑀢𑁄, 𑀦 𑀓𑀫𑁆𑀫𑀯𑀲𑁂𑀦, 𑀢𑀲𑁆𑀫𑀸 𑀏𑀲 𑀓𑁂𑀘𑀺𑀯𑀸𑀤𑁄 𑀓𑀢𑁄.

𑀢𑁂𑀲𑀦𑁆𑀢𑀺 𑀢𑁂𑀲𑀁 𑀏𑀯𑀁𑀯𑀸𑀤𑀻𑀦𑀁. 𑀬𑀣𑀸𑀓𑁆𑀓𑀫𑀦𑁆𑀢𑀺 𑀢𑀺𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑀸𑀤𑀻𑀦𑀁 𑀅𑀦𑀼𑀓𑁆𑀓𑀫𑁂𑀦. 𑀤𑁆𑀯𑀸𑀤𑀲 𑀯𑀺𑀧𑀸𑀓𑀸𑀦𑀻𑀢𑀺 𑀢𑀺𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀲𑁆𑀲 𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀲𑀲𑀗𑁆𑀔𑀸𑀭𑀺𑀓𑀘𑀢𑀼𑀓𑁆𑀓𑀯𑀚𑁆𑀚𑀺𑀢𑀸𑀦𑀺, 𑀅𑀲𑀗𑁆𑀔𑀸𑀭𑀺𑀓𑀘𑀢𑀼𑀓𑁆𑀓𑀯𑀚𑁆𑀚𑀺𑀢𑀸𑀦𑀺 𑀘 𑀤𑁆𑀯𑀸𑀤𑀲 𑀯𑀺𑀧𑀸𑀓𑀸𑀦𑀺, 𑀢𑀣𑀸 𑀢𑀺𑀳𑁂𑀢𑀼𑀓𑁄𑀫𑀓𑀲𑁆𑀲, 𑀤𑀼𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀯𑀲𑁂𑀦 𑀤𑀼𑀳𑁂𑀢𑀼𑀓𑀲𑀲𑀗𑁆𑀔𑀸𑀭𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺, 𑀤𑀼𑀳𑁂𑀢𑀼𑀓𑀸𑀲𑀗𑁆𑀔𑀸𑀭𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀘 𑀤𑀲 𑀯𑀺𑀧𑀸𑀓𑀸𑀦𑀺, 𑀤𑀼𑀳𑁂𑀢𑀼𑀓𑁄𑀫𑀓𑀲𑁆𑀲 𑀯𑀲𑁂𑀦 𑀤𑀼𑀳𑁂𑀢𑀼𑀓𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀘 𑀅𑀝𑁆𑀞 𑀯𑀺𑀧𑀸𑀓𑀸𑀦𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 ‘‘𑀢𑀺𑀳𑁂𑀢𑀼𑀓𑀫𑀼𑀓𑁆𑀓𑀝𑁆𑀞’’𑀦𑁆𑀢𑁆𑀬𑀸𑀤𑀺𑀦𑀸 𑀯𑀼𑀢𑁆𑀢𑀦𑀬𑀲𑁆𑀲 𑀅𑀦𑀼𑀲𑀸𑀭𑁂𑀦 𑀅𑀦𑀼𑀲𑁆𑀲𑀭𑀡𑁂𑀦 𑀬𑀣𑀸𑀲𑀫𑁆𑀪𑀯𑀁 𑀢𑀲𑁆𑀲 𑀢𑀲𑁆𑀲 𑀲𑀫𑁆𑀪𑀯𑀸𑀦𑀼𑀭𑀽𑀧𑀢𑁄 𑀉𑀤𑁆𑀤𑀺𑀲𑁂.

𑁭𑁫. 𑀧𑀭𑀺𑀢𑁄 𑀅𑀢𑁆𑀢𑀁 𑀔𑀡𑁆𑀟𑀺𑀢𑀁 𑀯𑀺𑀬 𑀅𑀧𑁆𑀧𑀸𑀦𑀼𑀪𑀸𑀯𑀦𑁆𑀢𑀺 𑀧𑀭𑀺𑀢𑁆𑀢𑀁. 𑀧𑀓𑀝𑁆𑀞𑀪𑀸𑀯𑀁 𑀦𑀻𑀢𑀦𑁆𑀢𑀺 𑀧𑀡𑀻𑀢𑀁, 𑀉𑀪𑀺𑀦𑁆𑀦𑀁 𑀫𑀚𑁆𑀛𑁂 𑀪𑀯𑀁 𑀫𑀚𑁆𑀛𑀺𑀫𑀁. 𑀢𑀢𑁆𑀣 ‘‘𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀅𑀦𑀸𑀲𑁂𑀯𑀺𑀢𑀁 𑀧𑀭𑀺𑀢𑁆𑀢’’𑀦𑁆𑀢𑀺 𑀅𑀯𑀺𑀲𑁂𑀲𑀢𑁄𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀣𑀸 ‘‘𑀦𑀸𑀢𑀺𑀲𑀼𑀪𑀸𑀯𑀺𑀢𑀁 𑀅𑀧𑀭𑀺𑀧𑀼𑀡𑁆𑀡𑀯𑀲𑀻𑀪𑀸𑀯𑀁 𑀫𑀚𑁆𑀛𑀺𑀫𑀁. 𑀅𑀢𑀺𑀯𑀺𑀬 𑀲𑀼𑀪𑀸𑀯𑀺𑀢𑀁 𑀧𑀦 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀯𑀲𑀻𑀪𑀸𑀯𑀁 𑀧𑀡𑀻𑀢’’𑀦𑁆𑀢𑀺. 𑀆𑀘𑀭𑀺𑀬𑁂𑀦 𑀧𑀦𑁂𑀢𑁆𑀣 𑀧𑀭𑀺𑀢𑁆𑀢𑀫𑁆𑀧𑀺 𑀈𑀲𑀓𑀁 𑀮𑀤𑁆𑀥𑀸𑀲𑁂𑀯𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀸𑀦𑁂𑀦 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑁋

‘‘𑀲𑀫𑀸𑀦𑀸𑀲𑁂𑀯𑀦𑁂 𑀮𑀤𑁆𑀥𑁂, 𑀯𑀺𑀚𑁆𑀚𑀫𑀸𑀦𑁂 𑀫𑀳𑀩𑁆𑀩𑀮𑁂;

𑀅𑀮𑀤𑁆𑀥𑀸 𑀢𑀸𑀤𑀺𑀲𑀁 𑀳𑁂𑀢𑀼𑀁, 𑀅𑀪𑀺𑀜𑁆𑀜𑀸 𑀦 𑀯𑀺𑀧𑀘𑁆𑀘𑀢𑀻’’𑀢𑀺. (𑀦𑀸𑀫. 𑀧𑀭𑀺. 𑁪𑁭𑁪);

𑀲𑀫𑀸𑀦𑀪𑀽𑀫𑀺𑀓𑀢𑁄𑀯 𑀆𑀲𑁂𑀯𑀦𑀮𑀸𑀪𑁂𑀦 𑀩𑀮𑀯𑀪𑀸𑀯𑀢𑁄 𑀫𑀳𑀕𑁆𑀕𑀢𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀤𑀸𑀦𑀁 𑀯𑀢𑁆𑀯𑀸 𑀢𑀤𑀪𑀸𑀯𑀢𑁄 𑀅𑀪𑀺𑀜𑁆𑀜𑀸𑀬 𑀅𑀯𑀺𑀧𑀘𑁆𑀘𑀦𑀁 𑀯𑀼𑀢𑁆𑀢𑀁. 𑀳𑀻𑀦𑁂𑀳𑀺 𑀙𑀦𑁆𑀤𑀘𑀺𑀢𑁆𑀢𑀯𑀻𑀭𑀺𑀬𑀯𑀻𑀫𑀁𑀲𑀸𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀁 𑀯𑀸 𑀧𑀭𑀺𑀢𑁆𑀢𑀁. 𑀫𑀚𑁆𑀛𑀺𑀫𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀫𑀚𑁆𑀛𑀺𑀫𑀁. 𑀧𑀡𑀻𑀢𑁂𑀳𑀺 𑀧𑀡𑀻𑀢𑀦𑁆𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦.

𑁮𑁪. 𑀧𑀜𑁆𑀘𑀫𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸𑀢𑀺 𑀅𑀪𑀺𑀜𑁆𑀜𑀸𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀁 𑀢𑀺𑀯𑀺𑀥𑀫𑁆𑀧𑀺 𑀪𑀸𑀯𑁂𑀢𑁆𑀯𑀸. 𑀅𑀪𑀺𑀜𑁆𑀜𑀸𑀪𑀸𑀯𑀧𑁆𑀧𑀢𑁆𑀢𑀲𑁆𑀲 𑀧𑀦 𑀅𑀯𑀺𑀧𑀸𑀓𑀪𑀸𑀯𑁄 ‘‘𑀅𑀮𑀤𑁆𑀥𑀸 𑀢𑀸𑀤𑀺𑀲’’𑀦𑁆𑀢𑁆𑀬𑀸𑀤𑀺𑀦𑀸 (𑀦𑀸𑀫. 𑀧𑀭𑀺. 𑁪𑁭𑁪) 𑀆𑀘𑀭𑀺𑀬𑁂𑀦 𑀲𑀸𑀥𑀺𑀢𑁄. 𑀫𑀽𑀮𑀝𑀻𑀓𑀸𑀓𑀸𑀭𑀸𑀤𑀬𑁄 𑀧𑀦 𑀅𑀜𑁆𑀜𑀣𑀸𑀧𑀺 𑀢𑀁 𑀲𑀸𑀥𑁂𑀦𑁆𑀢𑀺. 𑀢𑀁 𑀧𑀦 𑀲𑀗𑁆𑀔𑁂𑀧𑀢𑁄, 𑀢𑀢𑁆𑀣 𑀢𑀢𑁆𑀣 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑀁. 𑀲𑀜𑁆𑀜𑀸𑀯𑀺𑀭𑀸𑀕𑀁 𑀪𑀸𑀯𑁂𑀢𑁆𑀯𑀸𑀢𑀺 ‘‘𑀲𑀜𑁆𑀜𑀸 𑀭𑁄𑀕𑁄, 𑀲𑀜𑁆𑀜𑀸 𑀕𑀡𑁆𑀟𑁄’’𑀢𑁆𑀬𑀸𑀤𑀺𑀦𑀸, ‘‘𑀥𑀻 𑀘𑀺𑀢𑁆𑀢𑀁 𑀥𑀺𑀩𑁆𑀩𑀢𑀁 𑀘𑀺𑀢𑁆𑀢’’𑀦𑁆𑀢𑁆𑀬𑀸𑀤𑀺𑀦𑀸 𑀯𑀸 𑀦𑀬𑁂𑀦 𑀅𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀢𑀤𑀪𑀸𑀯𑁂 𑀘 𑀧𑀡𑀻𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀯𑀸𑀬𑁄𑀓𑀲𑀺𑀡𑁂 𑀓𑁂𑀲𑀜𑁆𑀘𑀺 𑀫𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑁂 𑀯𑀸 𑀪𑀸𑀯𑀦𑀸𑀩𑀮𑁂𑀦 𑀢𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀪𑀸𑀯𑁂 𑀅𑀭𑀽𑀧𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀺𑀲𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀁 𑀪𑀸𑀯𑁂𑀢𑁆𑀯𑀸 𑀅𑀜𑁆𑀜𑀲𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀺𑀦𑁄 𑀢𑀺𑀢𑁆𑀣𑀺𑀬𑀸 𑀏𑀯𑀸𑀢𑁆𑀬𑀥𑀺𑀧𑁆𑀧𑀸𑀬𑁄. 𑀢𑁂 𑀧𑀦 𑀬𑁂𑀦 𑀇𑀭𑀺𑀬𑀸𑀧𑀣𑁂𑀦 𑀇𑀥 𑀫𑀭𑀦𑁆𑀢𑀺. 𑀢𑁂𑀦𑁂𑀯 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁮𑁬. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀦𑀸𑀕𑀸𑀫𑀺𑀦𑁄𑀬𑁂𑀯 𑀅𑀭𑀺𑀬𑀸 𑀧𑀼𑀣𑀼𑀚𑁆𑀚𑀦𑀸𑀤𑀺𑀓𑀸𑀮𑁂, 𑀧𑀘𑁆𑀙𑀸𑀧𑀺 𑀯𑀸 𑀧𑀜𑁆𑀘𑀫𑀚𑁆𑀛𑀸𑀦𑀁 𑀢𑀺𑀯𑀺𑀥𑀫𑁆𑀧𑀺 𑀪𑀸𑀯𑁂𑀢𑁆𑀯𑀸 𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸𑀦𑀼𑀓𑁆𑀓𑀫𑁂𑀦 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁮𑁭. 𑀬𑀣𑀸𑀓𑁆𑀓𑀫𑀁 𑀪𑀸𑀯𑁂𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀆𑀭𑀼𑀧𑁆𑀧𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸 𑀬𑀣𑀸𑀓𑁆𑀓𑀫𑀦𑁆𑀢𑀺 𑀘 𑀧𑀞𑀫𑀸𑀭𑀼𑀧𑁆𑀧𑀸𑀤𑀺𑀅𑀦𑀼𑀓𑁆𑀓𑀫𑁂𑀦. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀢𑀲𑁆𑀲 𑀢𑀲𑁆𑀲𑁂𑀯 𑀛𑀸𑀦𑀲𑁆𑀲 𑀆𑀯𑁂𑀡𑀺𑀓𑀪𑀽𑀫𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀺𑀓𑀦𑁆𑀢𑀺𑀬𑀸 𑀧𑀦 𑀲𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀬𑀣𑀸𑀮𑀤𑁆𑀥𑀚𑁆𑀛𑀸𑀦𑀲𑁆𑀲 𑀪𑀽𑀫𑀺𑀪𑀽𑀢𑁂𑀲𑀼 𑀲𑀼𑀤𑁆𑀥𑀸𑀯𑀸𑀲𑀯𑀚𑁆𑀚𑀺𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀣𑀸 𑀓𑀸𑀫𑀪𑀯𑁂𑀧𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀩𑀮𑁂𑀦. ‘𑀇𑀚𑁆𑀛𑀢𑀺, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’𑀢𑀺 (𑀅. 𑀦𑀺. 𑁮.𑁩𑁫) 𑀳𑀺 𑀯𑀼𑀢𑁆𑀢𑀁. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀓𑀸𑀫𑀭𑀸𑀕𑀲𑁆𑀲 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸 𑀓𑀸𑀫𑀪𑀯𑁂𑀲𑀼 𑀦𑀺𑀓𑀦𑁆𑀢𑀺𑀁 𑀦 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀓𑀸𑀫𑀮𑁄𑀓𑀯𑀚𑁆𑀚𑀺𑀢𑁂 𑀬𑀣𑀸𑀮𑀤𑁆𑀥𑀚𑁆𑀛𑀸𑀦𑀪𑀽𑀫𑀺𑀪𑀽𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀳𑀺 𑀅𑀦𑀸𑀕𑀸𑀫𑀺𑀦𑁄𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺. 𑀢𑁂 𑀧𑀦 𑀅𑀜𑁆𑀜𑀢𑁆𑀣 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀲𑀼𑀤𑁆𑀥𑀸𑀯𑀸𑀲𑁂𑀲𑁆𑀯𑀦𑀸𑀕𑀸𑀫𑀺-𑀧𑀼𑀕𑁆𑀕𑀮𑀸𑀯𑁄𑀧𑀧𑀚𑁆𑀚𑀭𑁂;

𑀓𑀸𑀫𑀥𑀸𑀢𑀼𑀫𑁆𑀳𑀺 𑀚𑀸𑀬𑀦𑁆𑀢𑀺, 𑀅𑀦𑀸𑀕𑀸𑀫𑀺𑀯𑀺𑀯𑀚𑁆𑀚𑀺𑀢𑀸’’𑀢𑀺. (𑀧𑀭𑀫. 𑀯𑀺. 𑁨𑁦𑁫);

𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸𑀧𑀺 𑀧𑀦𑁂𑀢𑁂 𑀫𑀭𑀡𑀓𑀸𑀮𑁂 𑀏𑀓𑀦𑁆𑀢𑁂𑀦𑁂𑀯 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀲𑀫𑀸𑀥𑀺𑀫𑁆𑀳𑀺 𑀧𑀭𑀺𑀧𑀽𑀭𑀓𑀸𑀭𑀻𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀇𑀢𑁆𑀣𑀺𑀬𑁄𑀧𑀺 𑀧𑀦 𑀅𑀭𑀺𑀬𑀸 𑀯𑀸 𑀅𑀦𑀭𑀺𑀬𑀸 𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀺𑀬𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁮𑁦𑁯; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁭𑁯 𑀆𑀤𑀬𑁄; 𑀫. 𑀦𑀺. 𑀅𑀝𑁆𑀞. 𑁩.𑁧𑁩𑁦) 𑀯𑀼𑀢𑁆𑀢𑀁. 𑀅𑀧𑀺𑀘𑁂𑀢𑁆𑀣 𑀯𑁂𑀳𑀧𑁆𑀨𑀮𑀅𑀓𑀦𑀺𑀝𑁆𑀞𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀯𑀸𑀦𑀁 𑀲𑁂𑀝𑁆𑀞𑀪𑀯𑀪𑀸𑀯𑀢𑁄 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀅𑀭𑀺𑀬𑀸 𑀅𑀜𑁆𑀜𑀢𑁆𑀣 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀅𑀯𑀲𑁂𑀲𑁂𑀲𑀼 𑀉𑀧𑀭𑀽𑀧𑀭𑀺 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑁂𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀯𑁂𑀳𑀧𑁆𑀨𑀮𑁂 𑀅𑀓𑀦𑀺𑀝𑁆𑀞𑁂, 𑀪𑀯𑀕𑁆𑀕𑁂 𑀘 𑀧𑀢𑀺𑀝𑁆𑀞𑀺𑀢𑀸;

𑀦 𑀧𑀼𑀦𑀸𑀜𑁆𑀜𑀢𑁆𑀣 𑀚𑀸𑀬𑀦𑁆𑀢𑀺, 𑀲𑀩𑁆𑀩𑁂 𑀅𑀭𑀺𑀬𑀧𑀼𑀕𑁆𑀕𑀮𑀸;

𑀩𑁆𑀭𑀳𑁆𑀫𑀮𑁄𑀓𑀕𑀢𑀸 𑀳𑁂𑀝𑁆𑀞𑀸, 𑀅𑀭𑀺𑀬𑀸 𑀦𑁄𑀧𑀧𑀚𑁆𑀚𑀭𑁂’’𑀢𑀺. (𑀦𑀸𑀫. 𑀧𑀭𑀺. 𑁪𑁫𑁨-𑁪𑁫𑁩);

𑀓𑀫𑁆𑀫𑀘𑀢𑀼𑀓𑁆𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀯𑀡𑁆𑀡𑀦𑀸

𑁮𑁯. ‘‘𑀆𑀬𑀼𑀓𑁆𑀔𑀬𑁂𑀦𑀸’’𑀢𑁆𑀬𑀸𑀤𑀻𑀲𑀼 𑀲𑀢𑀺𑀧𑀺 𑀓𑀫𑁆𑀫𑀸𑀦𑀼𑀪𑀸𑀯𑁂 𑀢𑀁𑀢𑀁𑀕𑀢𑀻𑀲𑀼 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀆𑀬𑀼𑀦𑁄 𑀧𑀭𑀺𑀓𑁆𑀔𑀬𑁂𑀦 𑀫𑀭𑀡𑀁 𑀆𑀬𑀼𑀓𑁆𑀔𑀬𑀫𑀭𑀡𑀁. 𑀲𑀢𑀺𑀧𑀺 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀘𑁆𑀙𑀺𑀦𑁆𑀦𑀸𑀬𑀼𑀲𑁂𑀲𑁂 𑀕𑀢𑀺𑀓𑀸𑀮𑀸𑀤𑀺𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀜𑁆𑀘 𑀢𑀁𑀢𑀁𑀪𑀯𑀲𑀸𑀥𑀓𑀲𑁆𑀲 𑀓𑀫𑁆𑀫𑀼𑀦𑁄 𑀧𑀭𑀺𑀦𑀺𑀝𑁆𑀞𑀺𑀢𑀯𑀺𑀧𑀸𑀓𑀢𑁆𑀢𑀸 𑀫𑀭𑀡𑀁 𑀓𑀫𑁆𑀫𑀓𑁆𑀔𑀬𑀫𑀭𑀡𑀁. 𑀆𑀬𑀼𑀓𑀫𑁆𑀫𑀸𑀦𑀁 𑀲𑀫𑀓𑀫𑁂𑀯 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀫𑀭𑀡𑀁 𑀉𑀪𑀬𑀓𑁆𑀔𑀬𑀫𑀭𑀡𑀁. 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀤𑀼𑀯𑀺𑀫𑁂 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀲𑁆𑀲 𑀓𑀲𑁆𑀲𑀘𑀺 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀼𑀦𑁄 𑀩𑀮𑁂𑀦 𑀲𑀢𑁆𑀣𑀳𑀭𑀡𑀸𑀤𑀻𑀳𑀺 𑀉𑀧𑀓𑁆𑀓𑀫𑁂𑀳𑀺 𑀉𑀧𑀘𑁆𑀙𑀺𑀚𑁆𑀚𑀫𑀸𑀦𑀲𑀦𑁆𑀢𑀸𑀦𑀸𑀦𑀁, 𑀕𑀼𑀡𑀫𑀳𑀦𑁆𑀢𑁂𑀲𑀼 𑀯𑀸 𑀓𑀢𑁂𑀦 𑀓𑁂𑀦𑀘𑀺 𑀉𑀧𑀓𑁆𑀓𑀫𑁂𑀦 𑀆𑀬𑀽𑀳𑀺𑀢𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀼𑀦𑀸 𑀧𑀝𑀺𑀩𑀸𑀳𑀺𑀢𑀲𑀸𑀫𑀢𑁆𑀣𑀺𑀬𑀲𑁆𑀲 𑀓𑀫𑁆𑀫𑀲𑁆𑀲 𑀢𑀁𑀢𑀁𑀅𑀢𑁆𑀢𑀪𑀸𑀯𑀧𑁆𑀧𑀯𑀢𑁆𑀢𑀦𑁂 𑀅𑀲𑀫𑀢𑁆𑀣𑀪𑀸𑀯𑀢𑁄 𑀤𑀼𑀲𑀺𑀫𑀸𑀭𑀓𑀮𑀸𑀩𑀼𑀭𑀸𑀚𑀸𑀤𑀻𑀦𑀁 𑀯𑀺𑀬 𑀢𑀗𑁆𑀔𑀡𑁂𑀬𑁂𑀯 𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀫𑀭𑀡𑀁 𑀉𑀧𑀘𑁆𑀙𑁂𑀤𑀓𑀫𑀭𑀡𑀁 𑀦𑀸𑀫. 𑀇𑀤𑀁 𑀧𑀦 𑀦𑁂𑀭𑀬𑀺𑀓𑀸𑀦𑀁 𑀉𑀢𑁆𑀢𑀭𑀓𑀼𑀭𑀼𑀯𑀸𑀲𑀻𑀦𑀁 𑀓𑁂𑀲𑀜𑁆𑀘𑀺 𑀤𑁂𑀯𑀸𑀦𑀜𑁆𑀘 𑀦 𑀳𑁄𑀢𑀺. 𑀢𑁂𑀦𑀸𑀳𑀼 𑁋

‘‘𑀉𑀧𑀓𑁆𑀓𑀫𑁂𑀦 𑀯𑀸 𑀓𑁂𑀲𑀜𑁆𑀘𑀼𑀧𑀘𑁆𑀙𑁂𑀤𑀓𑀓𑀫𑁆𑀫𑀼𑀦𑀸’’𑀢𑀺. (𑀲. 𑀲. 𑁬𑁨);

𑀫𑀭𑀡𑀲𑁆𑀲 𑀉𑀧𑁆𑀧𑀢𑁆𑀢𑀺 𑀧𑀯𑀢𑁆𑀢𑀺 𑀫𑀭𑀡𑀼𑀧𑁆𑀧𑀢𑁆𑀢𑀺.

𑁯𑁦. 𑀫𑀭𑀡𑀓𑀸𑀮𑁂𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂. 𑀬𑀣𑀸𑀭𑀳𑀦𑁆𑀢𑀺 𑀢𑀁𑀢𑀁𑀕𑀢𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀸𑀦𑀼𑀭𑀽𑀧𑀁, 𑀓𑀢𑁆𑀣𑀘𑀺 𑀧𑀦 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀬𑀣𑁄𑀧𑀝𑁆𑀞𑀺𑀢𑀁 𑀦𑀸𑀫𑀭𑀽𑀧𑀥𑀫𑁆𑀫𑀸𑀤𑀺𑀓𑀫𑁂𑀯 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀁 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀺, 𑀦 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀬𑁄. 𑀉𑀧𑀮𑀤𑁆𑀥𑀧𑀼𑀩𑁆𑀩𑀦𑁆𑀢𑀺 𑀘𑁂𑀢𑀺𑀬𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑁂 𑀉𑀧𑀮𑀤𑁆𑀥𑀁. 𑀉𑀧𑀓𑀭𑀡𑀪𑀽𑀢𑀦𑁆𑀢𑀺 𑀧𑀼𑀧𑁆𑀨𑀸𑀤𑀺𑀯𑀲𑁂𑀦 𑀉𑀧𑀓𑀭𑀡𑀪𑀽𑀢𑀁. 𑀉𑀧𑀮𑀪𑀺𑀢𑀩𑁆𑀩𑀦𑁆𑀢𑀺 𑀅𑀦𑀼𑀪𑀯𑀺𑀢𑀩𑁆𑀩𑀁. 𑀉𑀧𑀪𑁄𑀕𑀪𑀽𑀢𑀦𑁆𑀢𑀺 𑀅𑀘𑁆𑀙𑀭𑀸𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀦𑀺𑀭𑀬𑀕𑁆𑀕𑀺𑀆𑀤𑀺𑀓𑀁 𑀉𑀧𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀘𑁆𑀙𑀭𑀸𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀫𑀸𑀢𑀼𑀓𑀼𑀘𑁆𑀙𑀺𑀆𑀤𑀺𑀕𑀢𑀁 𑀳𑀺 𑀭𑀽𑀧𑀸𑀬𑀢𑀦𑀁 𑀲𑀼𑀕𑀢𑀺𑀦𑀺𑀫𑀺𑀢𑁆𑀢𑀁. 𑀦𑀺𑀭𑀬𑀕𑁆𑀕𑀺𑀦𑀺𑀭𑀬𑀧𑀸𑀮𑀸𑀤𑀺𑀕𑀢𑀁 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑀁. 𑀕𑀢𑀺𑀬𑀸 𑀦𑀺𑀫𑀺𑀢𑁆𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁.

𑀓𑀫𑁆𑀫𑀩𑀮𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦. 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀦𑁆𑀢𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀬𑀣𑀸𑀲𑀫𑁆𑀪𑀯𑀁 𑀙𑀦𑁆𑀦𑀁 𑀉𑀧𑀧𑀢𑁆𑀢𑀺𑀤𑁆𑀯𑀸𑀭𑀸𑀦𑀁, 𑀬𑀤𑀺 𑀓𑀼𑀲𑀮𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺, 𑀢𑀤𑀸 𑀧𑀭𑀺𑀲𑀼𑀤𑁆𑀥𑀁 𑀓𑀼𑀲𑀮𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀅𑀣 𑀅𑀓𑀼𑀲𑀮𑀓𑀫𑁆𑀫𑀁, 𑀢𑀤𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀅𑀓𑀼𑀲𑀮𑀘𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀧𑀘𑁆𑀘𑀫𑀸𑀦𑀓…𑀧𑁂… 𑀓𑀺𑀮𑀺𑀝𑁆𑀞𑀁 𑀯𑀸’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀺, 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀥𑀺𑀢𑀁 𑀯𑀸, 𑀢𑀲𑁆𑀫𑀺𑀁 𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁄𑀢𑀺, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀉𑀧𑀧𑀚𑁆𑀚𑁂𑀬𑁆𑀬 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’𑀢𑀺 (𑀲𑀁. 𑀦𑀺. 𑁪.𑁨𑁩𑁫). 𑀢𑀢𑁆𑀣𑁄𑀡𑀢𑀁 𑀯𑀸𑀢𑀺 𑀢𑀲𑁆𑀫𑀺𑀁 𑀉𑀧𑀧𑀚𑁆𑀚𑀺𑀢𑀩𑁆𑀩𑀪𑀯𑁂 𑀑𑀡𑀢𑀁 𑀯𑀺𑀬, 𑀢𑀢𑁆𑀣𑁄𑀡𑀢𑀁 𑀏𑀯𑀸𑀢𑀺 𑀯𑀸 𑀧𑀤𑀘𑁆𑀙𑁂𑀤𑁄. ‘‘𑀩𑀸𑀳𑀼𑀮𑁆𑀮𑁂𑀦𑀸’’𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 ‘‘𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑁆𑀢𑀭𑁂’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 ‘‘𑀬𑀣𑀸𑀭𑀳’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑁄 𑀲𑀓𑁆𑀓𑀸 𑀲𑀗𑁆𑀕𑀳𑁂𑀢𑀼𑀦𑁆𑀢𑀺 ‘‘𑀩𑀸𑀳𑀼𑀮𑁆𑀮𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀳𑀲𑀸 𑀑𑀘𑁆𑀙𑀺𑀚𑁆𑀚𑀫𑀸𑀦𑀚𑀻𑀯𑀺𑀢𑀸𑀦𑀁 𑀲𑀡𑀺𑀓𑀁 𑀫𑀭𑀦𑁆𑀢𑀸𑀦𑀁 𑀯𑀺𑀬 𑀦 𑀅𑀪𑀺𑀓𑁆𑀔𑀡𑀫𑁂𑀯𑀸𑀢𑀺 𑀤𑀻𑀧𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀪𑀺𑀦𑀯𑀓𑀭𑀡𑀯𑀲𑁂𑀦𑀸𑀢𑀺 𑀢𑀗𑁆𑀔𑀡𑁂 𑀓𑀭𑀺𑀬𑀫𑀸𑀦𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀅𑀪𑀺𑀦𑀯𑀓𑀭𑀡𑀯𑀲𑁂𑀦.

𑁯𑁧. 𑀧𑀘𑁆𑀘𑀸𑀲𑀦𑁆𑀦𑀫𑀭𑀡𑀲𑁆𑀲𑀸𑀢𑀺 𑀏𑀓𑀯𑀻𑀣𑀺𑀧𑁆𑀧𑀫𑀸𑀡𑀸𑀬𑀼𑀓𑀯𑀲𑁂𑀦, 𑀢𑀢𑁄 𑀯𑀸 𑀓𑀺𑀜𑁆𑀘𑀺 𑀅𑀥𑀺𑀓𑀸𑀬𑀼𑀓𑀯𑀲𑁂𑀦 𑀲𑀫𑀸𑀲𑀦𑁆𑀦𑀫𑀭𑀡𑀲𑁆𑀲. 𑀯𑀻𑀣𑀺𑀘𑀺𑀢𑁆𑀢𑀸𑀯𑀲𑀸𑀦𑁂𑀢𑀺 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀦𑀁, 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀁 𑀯𑀸 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀅𑀯𑀲𑀸𑀦𑁂. 𑀢𑀢𑁆𑀣 ‘‘𑀓𑀸𑀫𑀪𑀯𑀢𑁄 𑀘𑀯𑀺𑀢𑁆𑀯𑀸 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀦𑀺, 𑀲𑁂𑀲𑀸𑀦𑀁 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀻’’𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀡𑀺𑀬𑀁 𑀯𑀼𑀢𑁆𑀢𑀁. 𑀪𑀯𑀗𑁆𑀕𑀓𑁆𑀔𑀬𑁂𑀯𑀸𑀢𑀺 𑀬𑀤𑀺 𑀏𑀓𑀚𑀯𑀦𑀯𑀻𑀣𑀺𑀢𑁄 𑀅𑀥𑀺𑀓𑀢𑀭𑀸𑀬𑀼𑀲𑁂𑀲𑁄 𑀲𑀺𑀬𑀸, 𑀢𑀤𑀸 𑀪𑀯𑀗𑁆𑀕𑀸𑀯𑀲𑀸𑀦𑁂 𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀣 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀲𑁂𑀲𑁄 𑀲𑀺𑀬𑀸, 𑀢𑀤𑀸 𑀯𑀻𑀣𑀺𑀘𑀺𑀢𑁆𑀢𑀸𑀯𑀲𑀸𑀦𑁂, 𑀢𑀜𑁆𑀘 𑀅𑀢𑀻𑀢𑀓𑀫𑁆𑀫𑀸𑀤𑀺𑀯𑀺𑀲𑀬𑀫𑁂𑀯. ‘‘𑀢𑀲𑁆𑀲𑀸𑀦𑀦𑁆𑀢𑀭𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑀭𑀸𑀪𑀯𑀯𑀸𑀤𑀺𑀫𑀢𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀬𑀣𑀸𑀭𑀳𑀦𑁆𑀢𑀺 𑀓𑀫𑁆𑀫𑀓𑀭𑀡𑀓𑀸𑀮𑀲𑁆𑀲, 𑀯𑀺𑀧𑀸𑀓𑀤𑀸𑀦𑀓𑀸𑀮𑀲𑁆𑀲 𑀘 𑀅𑀦𑀼𑀭𑀽𑀧𑀯𑀲𑁂𑀦. 𑀅𑀣 𑀯𑀸 𑀯𑀺𑀧𑀘𑁆𑀘𑀫𑀸𑀦𑀓𑀓𑀫𑁆𑀫𑀸𑀦𑀼𑀭𑀽𑀧𑀁 𑀅𑀦𑀼𑀲𑀬𑀯𑀲𑁂𑀦, 𑀚𑀯𑀦𑀲𑀳𑀚𑀸𑀢𑀯𑀲𑁂𑀦 𑀯𑀸 𑀧𑀯𑀢𑁆𑀢𑀺𑀅𑀦𑀼𑀭𑀽𑀧𑀢𑁄𑀢𑁆𑀬𑀢𑁆𑀣𑁄. 𑀦𑀦𑀼 𑀘 ‘‘𑀅𑀯𑀺𑀚𑁆𑀚𑀸𑀦𑀼𑀲𑀬𑀧𑀭𑀺𑀓𑁆𑀔𑀺𑀢𑁆𑀢𑁂𑀦𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀚𑀯𑀦𑀲𑀳𑀚𑀸𑀢𑀸𑀦𑀜𑁆𑀘 𑀓𑀣𑀁 𑀅𑀦𑀼𑀲𑀬𑀪𑀸𑀯𑁄𑀢𑀺? 𑀦𑀸𑀬𑀁 𑀤𑁄𑀲𑁄 𑀅𑀦𑀼𑀲𑀬𑀲𑀤𑀺𑀲𑀢𑀸𑀬 𑀢𑀸𑀲𑀫𑁆𑀧𑀺 𑀅𑀦𑀼𑀲𑀬𑀯𑁄𑀳𑀸𑀭𑀪𑀸𑀯𑀢𑁄. 𑀇𑀢𑀭𑀣𑀸 𑀅𑀓𑀼𑀲𑀮𑀓𑀫𑁆𑀫𑀲𑀳𑀚𑀸𑀢𑀸𑀦𑀁 𑀪𑀯𑀢𑀡𑁆𑀳𑀸𑀲𑀳𑀚𑀸𑀢𑀸𑀦𑀁 𑀯𑀸 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀲𑀳𑀚𑀸𑀢𑀸𑀦𑀜𑁆𑀘 𑀲𑀗𑁆𑀕𑀳𑁄 𑀦 𑀲𑀺𑀬𑀸. 𑀅𑀯𑀺𑀚𑁆𑀚𑀸𑀯 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑀦𑀢𑁄 𑀧𑀯𑀢𑁆𑀢𑀦𑀢𑁄 𑀅𑀦𑀼𑀲𑀬𑁄, 𑀢𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁂𑀦 𑀧𑀭𑀺𑀯𑀸𑀭𑀺𑀢𑁂𑀦. 𑀢𑀡𑁆𑀳𑀸𑀦𑀼𑀲𑀬𑁄𑀯 𑀫𑀽𑀮𑀁 𑀧𑀥𑀸𑀦𑀁 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀁 𑀇𑀫𑀲𑁆𑀲𑀸𑀢𑀺 𑀢𑀡𑁆𑀳𑀸𑀦𑀼𑀲𑀬𑀫𑀽𑀮𑀓𑁄. 𑀲𑀗𑁆𑀔𑀸𑀭𑁂𑀦𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑁂𑀦 𑀓𑀫𑁆𑀫𑀲𑀳𑀚𑀸𑀢𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀫𑀼𑀤𑀸𑀬𑁂𑀦 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀲𑀳𑀚𑀸𑀢𑁂𑀦 𑀯𑀸, 𑀢𑁂𑀦 𑀚𑀦𑀺𑀬𑀫𑀸𑀦𑀁. 𑀅𑀯𑀺𑀚𑁆𑀚𑀸𑀬 𑀳𑀺 𑀧𑀝𑀺𑀘𑁆𑀙𑀦𑁆𑀦𑀸𑀤𑀻𑀦𑀯𑀯𑀺𑀲𑀬𑁂 𑀢𑀡𑁆𑀳𑀸 𑀦𑀸𑀫𑁂𑀢𑀺, 𑀔𑀺𑀧𑀦𑀓𑀲𑀗𑁆𑀔𑀸𑀭𑀲𑀫𑁆𑀫𑀢𑀸 𑀬𑀣𑀸𑀯𑀼𑀢𑁆𑀢𑀲𑀗𑁆𑀔𑀸𑀭𑀸 𑀔𑀺𑀧𑀦𑁆𑀢𑀺, 𑀬𑀣𑀸𑀳𑀼 𑁋

‘‘𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀗𑁆𑀔𑀸𑀭-𑀲𑀳𑀚𑁂𑀳𑀺 𑀅𑀧𑀸𑀬𑀺𑀦𑀁;

𑀯𑀺𑀲𑀬𑀸𑀤𑀻𑀦𑀯𑀘𑁆𑀙𑀸𑀤𑀺𑀦𑀫𑀦𑀓𑁆𑀔𑀺𑀧𑀓𑁂𑀳𑀺 𑀢𑀼.

‘‘𑀅𑀧𑁆𑀧𑀳𑀻𑀦𑁂𑀳𑀺 𑀲𑁂𑀲𑀸𑀦𑀁, 𑀙𑀸𑀤𑀦𑀁 𑀦𑀫𑀦𑀫𑁆𑀧𑀺 𑀘;

𑀔𑀺𑀧𑀓𑀸 𑀧𑀦 𑀲𑀗𑁆𑀔𑀸𑀭𑀸, 𑀓𑀼𑀲𑀮𑀸𑀯 𑀪𑀯𑀦𑁆𑀢𑀺𑀳𑀸’’𑀢𑀺. (𑀲. 𑀲. 𑁧𑁬𑁪-𑁧𑁬𑁫);

𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀦𑁆𑀢𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀨𑀲𑁆𑀲𑀸𑀤𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀤𑀺𑀦𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀬𑁆𑀳𑀫𑀸𑀦𑀁, 𑀲𑀳𑀚𑀸𑀢𑀸𑀦𑀫𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀧𑀼𑀩𑁆𑀩𑀗𑁆𑀕𑀫𑀪𑀽𑀢𑀦𑁆𑀢𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀧𑀥𑀸𑀦𑀪𑀽𑀢𑀁. ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧-𑁨) 𑀳𑀺 𑀯𑀼𑀢𑁆𑀢𑀁. 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀦𑀯𑀲𑁂𑀦𑀸𑀢𑀺 𑀧𑀼𑀭𑀺𑀫𑀪𑀯𑀦𑁆𑀢𑀭𑀲𑁆𑀲, 𑀧𑀘𑁆𑀙𑀺𑀫𑀪𑀯𑀦𑁆𑀢𑀭𑀲𑁆𑀲 𑀘 𑀅𑀜𑁆𑀜𑀫𑀜𑁆𑀜𑀁 𑀏𑀓𑀸𑀩𑀤𑁆𑀥𑀁 𑀯𑀺𑀬 𑀧𑀝𑀺𑀲𑀦𑁆𑀤𑀳𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀦 𑀇𑀢𑁄 𑀕𑀦𑁆𑀢𑁆𑀯𑀸𑀢𑁆𑀬𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀧𑀼𑀭𑀺𑀫𑀪𑀯𑀧𑀭𑀺𑀬𑀸𑀧𑀦𑁆𑀦𑁄 𑀓𑁄𑀘𑀺 𑀥𑀫𑁆𑀫𑁄 𑀪𑀯𑀦𑁆𑀢𑀭𑀁 𑀲𑀗𑁆𑀓𑀫𑀢𑀺, 𑀦𑀸𑀧𑀺 𑀧𑀼𑀭𑀺𑀫𑀪𑀯𑀧𑀭𑀺𑀬𑀸𑀧𑀦𑁆𑀦𑀳𑁂𑀢𑀽𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀢𑀺 𑀧𑀝𑀺𑀖𑁄𑀲𑀧𑀤𑀻𑀧𑀫𑀼𑀤𑁆𑀤𑀸 𑀯𑀺𑀬𑀸𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦.

𑁯𑁨. 𑀫𑀦𑁆𑀤𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸𑀦𑀺 𑀫𑀦𑁆𑀤𑀧𑁆𑀧𑀯𑀢𑁆𑀢𑀸𑀦𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂𑀲𑀼 𑀆𑀧𑀸𑀣𑀕𑀢𑁂𑀲𑀼 𑀫𑀦𑁄𑀤𑁆𑀯𑀸𑀭𑁂 𑀕𑀢𑀺𑀦𑀺𑀫𑀺𑀢𑁆𑀢𑀯𑀲𑁂𑀦, 𑀧𑀜𑁆𑀘𑀤𑁆𑀯𑀸𑀭𑁂 𑀓𑀫𑁆𑀫𑀦𑀺𑀫𑀺𑀢𑁆𑀢𑀯𑀲𑁂𑀦𑀸𑀢𑁆𑀬𑀥𑀺𑀧𑁆𑀧𑀸𑀬𑁄. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀮𑀩𑁆𑀪𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑁂 𑀢𑀸𑀯 𑀧𑀝𑀺𑀲𑀦𑁆𑀥𑀺𑀬𑀸 𑀘𑀢𑀼𑀦𑁆𑀦𑀁 𑀪𑀯𑀗𑁆𑀕𑀸𑀦𑀜𑁆𑀘, 𑀧𑀜𑁆𑀘𑀤𑁆𑀯𑀸𑀭𑁂 𑀧𑀦 𑀧𑀝𑀺𑀲𑀦𑁆𑀥𑀺𑀬𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀪𑀸𑀯𑁄 𑀮𑀩𑁆𑀪𑀢𑀺. 𑀢𑀣𑀸 𑀳𑀺 𑀓𑀲𑁆𑀲𑀘𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸𑀬 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀬 𑀘𑀺𑀢𑁆𑀢𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀘𑀼𑀢𑀺𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀢𑀤𑀦𑀦𑁆𑀢𑀭𑀁 𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀘𑀢𑀼𑀦𑁆𑀦𑀁 𑀪𑀯𑀗𑁆𑀕𑀸𑀦𑀁, 𑀧𑀜𑁆𑀘𑀤𑁆𑀯𑀸𑀭𑁂 𑀘 𑀜𑀸𑀢𑀓𑀸𑀤𑀻𑀳𑀺 𑀉𑀧𑀝𑁆𑀞𑀸𑀧𑀺𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼 𑀯𑀡𑁆𑀡𑀸𑀤𑀺𑀓𑁂 𑀆𑀭𑀩𑁆𑀪 𑀬𑀣𑀸𑀭𑀳𑀁 𑀧𑀯𑀢𑁆𑀢𑀸𑀬 𑀘𑀺𑀢𑁆𑀢𑀯𑀻𑀣𑀺𑀬𑀸 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀘 𑀅𑀦𑀦𑁆𑀢𑀭𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂(𑀯𑀺𑀲𑀼𑀤𑁆𑀥𑀺. 𑁨.𑁬𑁨𑁦 𑀆𑀤𑀬𑁄) 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀯𑀸 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀯𑀺𑀜𑁆𑀜𑀸𑀡𑀧𑀤𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑁄. 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑀦𑁆𑀢𑀺 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑀁, 𑀕𑀢𑀺𑀦𑀺𑀫𑀺𑀢𑁆𑀢𑀁 𑀙𑀝𑁆𑀞𑀤𑁆𑀯𑀸𑀭𑀕𑁆𑀕𑀳𑀺𑀢𑀦𑁆𑀢𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀭𑁂 𑀧𑀦 𑀅𑀯𑀺𑀲𑁂𑀲𑀢𑁄 𑀯𑀡𑁆𑀡𑁂𑀦𑁆𑀢𑀺. 𑀲𑀘𑁆𑀘𑀲𑀗𑁆𑀔𑁂𑀧𑁂𑀧𑀺 𑀢𑁂𑀦𑁂𑀯𑀸𑀥𑀺𑀧𑁆𑀧𑀸𑀬𑁂𑀦 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀧𑀜𑁆𑀘𑀤𑁆𑀯𑀸𑀭𑁂 𑀲𑀺𑀬𑀸 𑀲𑀦𑁆𑀥𑀺, 𑀯𑀺𑀦𑀸 𑀓𑀫𑁆𑀫𑀁 𑀤𑁆𑀯𑀺𑀕𑁄𑀘𑀭𑁂’’𑀢𑀺; (𑀲. 𑀲. 𑁧𑁭𑁩);

𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁬𑁨𑁪-𑁬𑁨𑁫; 𑀯𑀺𑀪. 𑀅𑀝𑁆𑀞. 𑁨𑁨𑁭) 𑀧𑀦 ‘‘𑀕𑀢𑀺𑀦𑀺𑀫𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑀤𑀸𑀭𑀫𑁆𑀫𑀡𑀸𑀬 𑀘 𑀧𑀜𑁆𑀘𑀤𑁆𑀯𑀸𑀭𑀺𑀓𑀧𑀝𑀺𑀲𑀦𑁆𑀥𑀺𑀬𑀸 𑀅𑀤𑀲𑁆𑀲𑀺𑀢𑀢𑁆𑀢𑀸, 𑀫𑀽𑀮𑀝𑀻𑀓𑀸𑀤𑀻𑀲𑀼 𑀘 ‘‘𑀓𑀫𑁆𑀫𑀩𑀮𑁂𑀦 𑀉𑀧𑀝𑁆𑀞𑀸𑀧𑀺𑀢𑀁 𑀯𑀡𑁆𑀡𑀸𑀬𑀢𑀦𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀯𑀺𑀬 𑀘 𑀫𑀦𑁄𑀤𑁆𑀯𑀸𑀭𑁂𑀬𑁂𑀯 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑀫𑀳𑀸. 𑁨.𑁬𑁨𑁩) 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀁 𑀯𑀘𑀦𑀁 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺 𑀆𑀘𑀭𑀺𑀬𑀸. ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘𑀸’’𑀢𑀺 𑀏𑀢𑁆𑀣 𑀕𑀢𑀺𑀦𑀺𑀫𑀺𑀢𑁆𑀢𑀁 𑀢𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀬𑀼𑀚𑁆𑀚𑀢𑀺, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀧𑀦 𑀧𑀝𑀺𑀲𑀦𑁆𑀥𑀺𑀚𑀦𑀓𑀓𑀫𑁆𑀫𑀲𑁆𑀲𑁂𑀯 𑀦𑀺𑀫𑀺𑀢𑁆𑀢𑀪𑀽𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑀣𑀁 𑀢𑀲𑁆𑀲 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑁂𑀳𑀺 𑀕𑀳𑀺𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁄 𑀲𑀫𑁆𑀪𑀯𑀢𑀺. 𑀦 𑀳𑀺 𑀢𑀤𑁂𑀯 𑀆𑀭𑀫𑁆𑀫𑀡𑀼𑀧𑀝𑁆𑀞𑀸𑀧𑀓𑀁, 𑀢𑀤𑁂𑀯 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀪𑀯𑁂𑀬𑁆𑀬 𑀉𑀧𑀘𑀺𑀢𑀪𑀸𑀯𑀸𑀪𑀸𑀯𑀢𑁄 𑀅𑀦𑀲𑁆𑀲𑀸𑀤𑀺𑀢𑀢𑁆𑀢𑀸 𑀘. ‘‘𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺 (𑀥. 𑀲. 𑁪𑁩𑁧) 𑀳𑀺 𑀯𑀘𑀦𑀢𑁄 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸𑀲𑁂𑀯𑀦𑀫𑁂𑀯 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁨𑁩𑁨) 𑀘 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑀺𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸𑀧𑀺 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀯𑀼𑀢𑁆𑀢𑀢𑁆𑀢𑀸𑀓𑀢𑀽𑀧𑀘𑀺𑀢𑀫𑁆𑀧𑀺 𑀓𑀫𑁆𑀫𑀁 𑀢𑀡𑁆𑀳𑀸𑀬 𑀅𑀲𑁆𑀲𑀸𑀤𑀺𑀢𑀫𑁂𑀯 𑀯𑀺𑀧𑀸𑀓𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀢𑀤𑀸 𑀘 𑀧𑀝𑀺𑀲𑀦𑁆𑀥𑀺𑀬𑀸 𑀲𑀫𑀸𑀦𑀯𑀻𑀣𑀺𑀬𑀁 𑀯𑀺𑀬 𑀧𑀯𑀢𑁆𑀢𑀫𑀸𑀦𑀸𑀦𑀺 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀸𑀦𑀺 𑀓𑀣𑀁 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸𑀲𑁂𑀯𑀦𑀸𑀦𑀺 𑀲𑀺𑀬𑀼𑀁, 𑀓𑀣𑀜𑁆𑀘 𑀢𑀸𑀦𑀺 𑀢𑀤𑀸 𑀓𑀡𑁆𑀳𑀸𑀬 𑀧𑀭𑀸𑀫𑀝𑁆𑀞𑀸𑀦𑀺. 𑀅𑀧𑀺𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀘𑀼𑀢𑀺𑀆𑀲𑀦𑁆𑀦𑀧𑁆𑀧𑀯𑀢𑁆𑀢𑀸𑀦𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. ‘‘𑀧𑀜𑁆𑀘𑀤𑁆𑀯𑀸𑀭𑀺𑀓𑀓𑀫𑁆𑀫𑀜𑁆𑀘 𑀧𑀝𑀺𑀲𑀦𑁆𑀥𑀺𑀦𑀺𑀫𑀺𑀢𑁆𑀢𑀓𑀁 𑀦 𑀳𑁄𑀢𑀺 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁬𑁨𑁦; 𑀯𑀺𑀪. 𑀅𑀝𑁆𑀞. 𑁨𑁨𑁭) 𑀯𑀼𑀢𑁆𑀢𑀦𑁆𑀢𑀺 𑀲𑀘𑁆𑀘𑀫𑁂𑀢𑀁. 𑀜𑀸𑀢𑀓𑀸𑀤𑀻𑀳𑀺 𑀉𑀧𑀝𑁆𑀞𑀸𑀧𑀺𑀢𑁂𑀲𑀼 𑀧𑀦 𑀧𑀼𑀧𑁆𑀨𑀸𑀤𑀻𑀲𑀼 𑀲𑀦𑁆𑀦𑀺𑀳𑀺𑀢𑁂𑀲𑁆𑀯𑁂𑀯 𑀫𑀭𑀡𑀲𑀫𑁆𑀪𑀯𑀢𑁄 𑀢𑀢𑁆𑀣 𑀯𑀡𑁆𑀡𑀸𑀤𑀺𑀓𑀁 𑀆𑀭𑀩𑁆𑀪 𑀘𑀼𑀢𑀺𑀆𑀲𑀦𑁆𑀦𑀯𑀻𑀣𑀺𑀢𑁄 𑀧𑀼𑀭𑀺𑀫𑀪𑀸𑀕𑀧𑁆𑀧𑀯𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀚𑀦𑀦𑀲𑀫𑀢𑁆𑀣𑀸𑀦𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑁂𑀦 𑀲𑀳 𑀲𑀫𑀸𑀦𑀢𑁆𑀢𑀸 𑀢𑀤𑁂𑀓𑀲𑀦𑁆𑀢𑀢𑀺𑀧𑀢𑀺𑀢𑀁 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀕𑁆𑀕𑀳𑀺𑀢𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀡𑁆𑀡𑀸𑀤𑀺𑀓𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀆𑀦𑀦𑁆𑀤𑀸𑀘𑀭𑀺𑀬𑁂𑀦 ‘‘𑀧𑀜𑁆𑀘𑀤𑁆𑀯𑀸𑀭𑁂 𑀘 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀆𑀲𑀦𑁆𑀦𑀓𑀢𑀓𑀫𑁆𑀫𑀸𑀭𑀫𑁆𑀫𑀡𑀲𑀦𑁆𑀢𑀢𑀺𑀬𑀁 𑀉𑀧𑁆𑀧𑀦𑁆𑀦𑀁, 𑀢𑀁𑀲𑀤𑀺𑀲𑀜𑁆𑀘 𑀤𑀝𑁆𑀞𑀩𑁆𑀩’’𑀦𑁆𑀢𑀺 (𑀯𑀺𑀪. 𑀫𑀽𑀮𑀝𑀻. 𑁨𑁨𑁭; 𑀯𑀺𑀲𑀼𑀤𑁆𑀥𑀺. 𑀫𑀳𑀸. 𑁨.𑁬𑁨𑁩).

𑁯𑁪. 𑀬𑀣𑀸𑀭𑀳𑀦𑁆𑀢𑀺 𑀤𑀼𑀢𑀺𑀬𑀘𑀢𑀼𑀢𑁆𑀣𑀧𑀞𑀫𑀢𑀢𑀺𑀬𑀸𑀦𑀁 𑀧𑀝𑀺𑀲𑀦𑁆𑀥𑀻𑀦𑀁 𑀅𑀦𑀼𑀭𑀽𑀧𑀢𑁄.

𑁯𑁮. 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀧𑀭𑀁 𑀳𑁂𑀝𑁆𑀞𑀺𑀫𑀸𑀭𑀼𑀧𑁆𑀧𑀯𑀚𑁆𑀚𑀺𑀢𑀸 𑀆𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀺𑀬𑁄 𑀳𑁄𑀦𑁆𑀢𑀺 𑀉𑀧𑀭𑀽𑀧𑀭𑀺𑀅𑀭𑀽𑀧𑀻𑀦𑀁 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀓𑀫𑁆𑀫𑀲𑁆𑀲 𑀅𑀦𑀸𑀬𑀽𑀳𑀦𑀢𑁄, 𑀉𑀧𑀘𑀸𑀭𑀚𑁆𑀛𑀸𑀦𑀲𑁆𑀲 𑀧𑀦 𑀩𑀮𑀯𑀪𑀸𑀯𑀢𑁄 𑀢𑀲𑁆𑀲 𑀯𑀺𑀧𑀸𑀓𑀪𑀽𑀢𑀸 𑀓𑀸𑀫𑀢𑀺𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺𑀬𑁄 𑀳𑁄𑀦𑁆𑀢𑀺. 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸 𑀧𑀭𑀁 𑀅𑀳𑁂𑀢𑀼𑀓𑀭𑀳𑀺𑀢𑀸 𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀼𑀪𑀸𑀯𑁂𑀦𑁂𑀯 𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑁄 𑀲𑀺𑀬𑀼𑀁, 𑀓𑀸𑀫𑀢𑀺𑀳𑁂𑀢𑀼𑀫𑁆𑀳𑀸 𑀘𑀼𑀢𑀺𑀢𑁄 𑀧𑀭𑀁 𑀲𑀩𑁆𑀩𑀸 𑀏𑀯 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀧𑀭𑀺𑀬𑀸𑀧𑀦𑁆𑀦𑀸 𑀬𑀣𑀸𑀭𑀳𑀁 𑀅𑀳𑁂𑀢𑀼𑀓𑀸𑀤𑀺𑀧𑀝𑀺𑀲𑀦𑁆𑀥𑀺𑀬𑁄 𑀲𑀺𑀬𑀼𑀁. 𑀇𑀢𑀭𑁄 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀘𑀼𑀢𑀺𑀢𑁄 𑀧𑀭𑀁 𑀓𑀸𑀫𑁂𑀲𑁆𑀯𑁂𑀯 𑀪𑀯𑁂𑀲𑀼 𑀢𑀺𑀳𑁂𑀢𑀼𑀓𑀸𑀤𑀺𑀧𑀝𑀺𑀲𑀦𑁆𑀥𑀺𑀬𑁄 𑀲𑀺𑀬𑀼𑀁.

𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁯. 𑀧𑀝𑀺𑀲𑀦𑁆𑀥𑀺𑀬𑀸 𑀦𑀺𑀭𑁄𑀥𑀲𑁆𑀲 𑀅𑀦𑀦𑁆𑀢𑀭𑀢𑁄 𑀧𑀝𑀺𑀲𑀦𑁆𑀥𑀺𑀦𑀺𑀭𑁄𑀥𑀸𑀦𑀦𑁆𑀢𑀭𑀢𑁄. 𑀢𑀤𑁂𑀯 𑀘𑀺𑀢𑁆𑀢𑀦𑁆𑀢𑀺 𑀢𑀁𑀲𑀤𑀺𑀲𑀢𑀸𑀬 𑀢𑀩𑁆𑀩𑁄𑀳𑀸𑀭𑀧𑁆𑀧𑀯𑀢𑁆𑀢𑀢𑁆𑀢𑀸 𑀢𑀤𑁂𑀯 𑀘𑀺𑀢𑁆𑀢𑀁 𑀬𑀣𑀸 ‘‘𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀻’’𑀢𑀺. 𑀅𑀲𑀢𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑁂 𑀅𑀲𑀢𑀺, 𑀘𑀼𑀢𑀺𑀘𑀺𑀢𑁆𑀢𑀁 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺 𑀢𑀤𑁂𑀯 𑀘𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦𑁧. 𑀧𑀭𑀺𑀯𑀢𑁆𑀢𑀦𑁆𑀢𑀸 𑀧𑀯𑀢𑁆𑀢𑀦𑁆𑀢𑀺 𑀬𑀸𑀯 𑀯𑀝𑁆𑀝𑀫𑀽𑀮𑀲𑀫𑀼𑀘𑁆𑀙𑁂𑀤𑀸𑀢𑁆𑀬𑀥𑀺𑀧𑁆𑀧𑀸𑀬𑁄.

𑁧𑁦𑁨. 𑀬𑀣𑀸 𑀇𑀳 𑀪𑀯𑁂𑀧𑀝𑀺𑀲𑀦𑁆𑀥𑀺 𑀘𑁂𑀯 𑀪𑀯𑀗𑁆𑀕𑀜𑁆𑀘 𑀯𑀻𑀣𑀺𑀬𑁄 𑀘 𑀘𑀼𑀢𑀺 𑀘, 𑀢𑀣𑀸 𑀧𑀼𑀦 𑀪𑀯𑀦𑁆𑀢𑀭𑁂 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀦𑁆𑀢𑀺 𑀏𑀯𑀫𑀸𑀤𑀺𑀓𑀸 𑀅𑀬𑀁 𑀘𑀺𑀢𑁆𑀢𑀲𑀦𑁆𑀢𑀢𑀺 𑀧𑀭𑀺𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸. 𑀓𑁂𑀘𑀺 𑀧𑀦 𑀇𑀫𑀲𑁆𑀫𑀺𑀁 𑀧𑀭𑀺𑀘𑁆𑀙𑁂𑀤𑁂 𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑀲𑁆𑀲𑁂𑀯 𑀤𑀲𑁆𑀲𑀺𑀢𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀻𑀦𑀫𑁂𑀯 𑀇𑀥 𑀕𑀳𑀡𑀁 𑀬𑀼𑀢𑁆𑀢𑀦𑁆𑀢𑁆𑀬𑀸𑀥𑀺𑀧𑁆𑀧𑀸𑀬𑁂𑀦 ‘‘𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀯𑀻𑀣𑀺𑀬𑁄’’𑀢𑀺 𑀇𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀧𑁆𑀧𑀯𑀸𑀳𑀸𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀧𑀯𑀢𑁆𑀢𑀺𑀲𑀗𑁆𑀕𑀳𑀤𑀲𑁆𑀲𑀦𑀸𑀯𑀲𑀸𑀦𑁂 𑀢𑀢𑁆𑀣 𑀲𑀗𑁆𑀕𑀳𑀺𑀢𑀸𑀦𑀁 𑀲𑀩𑁆𑀩𑁂𑀲𑀫𑁂𑀯 𑀦𑀺𑀕𑀫𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀯𑀜𑁆𑀳𑀺 𑀲𑀢𑀺 ‘‘𑀧𑀝𑀺𑀲𑀗𑁆𑀔𑀸𑀬 𑀧𑀦𑁂𑀢𑀫𑀤𑁆𑀥𑀼𑀯’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑁂𑀲𑀫𑁂𑀯 𑀏𑀢-𑀲𑀤𑁆𑀤𑁂𑀦 𑀧𑀭𑀸𑀫𑀲𑀦𑀁 𑀲𑀼𑀝𑁆𑀞𑀼 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀏𑀢𑀁 𑀬𑀣𑀸𑀯𑀼𑀢𑁆𑀢𑀁 𑀯𑀝𑁆𑀝𑀧𑀯𑀢𑁆𑀢𑀁 𑀅𑀤𑁆𑀥𑀼𑀯𑀁 𑀅𑀦𑀺𑀘𑁆𑀘𑀁 𑀧𑀮𑁄𑀓𑀥𑀫𑁆𑀫𑀁 𑀧𑀝𑀺𑀲𑀗𑁆𑀔𑀸𑀬 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀩𑀼𑀥𑀸 𑀧𑀡𑁆𑀟𑀺𑀢𑀸 𑀘𑀺𑀭𑀸𑀬 𑀘𑀺𑀭𑀓𑀸𑀮𑀁 𑀲𑀼𑀩𑁆𑀩𑀢𑀸 𑀳𑀼𑀢𑁆𑀯𑀸 𑀅𑀘𑁆𑀘𑀼𑀢𑀁 𑀥𑀼𑀯𑀁 𑀅𑀘𑀯𑀦𑀥𑀫𑁆𑀫𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀦𑁆𑀢𑁆𑀯𑀸 𑀫𑀕𑁆𑀕𑀨𑀮𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑁆𑀯𑀸 𑀢𑀢𑁄𑀬𑁂𑀯 𑀲𑀼𑀝𑁆𑀞𑀼 𑀲𑀫𑀼𑀘𑁆𑀙𑀺𑀦𑁆𑀦𑀲𑀺𑀦𑁂𑀳𑀩𑀦𑁆𑀥𑀦𑀸 𑀲𑀫𑀁 𑀦𑀺𑀭𑀼𑀧𑀥𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀏𑀲𑁆𑀲𑀦𑁆𑀢𑀺 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀯𑀻𑀣𑀺𑀫𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.