𑁪. 𑀯𑀻𑀣𑀺𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧. 𑀇𑀘𑁆𑀘𑁂𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀢𑁆𑀢𑀭𑀁 𑀯𑁂𑀤𑀦𑀸𑀲𑀗𑁆𑀕𑀳𑀸𑀤𑀺𑀯𑀺𑀪𑀸𑀕𑀢𑁄 𑀉𑀢𑁆𑀢𑀫𑀁 𑀧𑀪𑁂𑀤𑀲𑀗𑁆𑀕𑀳𑀁 𑀓𑀢𑁆𑀯𑀸 𑀧𑀼𑀦 𑀓𑀸𑀫𑀸𑀯𑀘𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀪𑀽𑀫𑀻𑀦𑀁, 𑀤𑁆𑀯𑀺𑀳𑁂𑀢𑀼𑀓𑀸𑀤𑀺𑀧𑀼𑀕𑁆𑀕𑀮𑀸𑀦𑀜𑁆𑀘 𑀪𑁂𑀤𑁂𑀦 𑀮𑀓𑁆𑀔𑀺𑀢𑀁 ‘‘𑀇𑀤𑀁 𑀏𑀢𑁆𑀢𑀓𑁂𑀳𑀺 𑀧𑀭𑀁, 𑀇𑀫𑀲𑁆𑀲 𑀅𑀦𑀦𑁆𑀢𑀭𑀁 𑀏𑀢𑁆𑀢𑀓𑀸𑀦𑀺 𑀘𑀺𑀢𑁆𑀢𑀸𑀦𑀻’’𑀢𑀺 𑀏𑀯𑀁 𑀧𑀼𑀩𑁆𑀩𑀸𑀧𑀭𑀘𑀺𑀢𑁆𑀢𑁂𑀳𑀺 𑀦𑀺𑀬𑀸𑀫𑀺𑀢𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀧𑀯𑀢𑁆𑀢𑀺𑀲𑀗𑁆𑀕𑀳𑀁 𑀦𑀸𑀫 𑀢𑀦𑁆𑀦𑀸𑀫𑀓𑀁 𑀲𑀗𑁆𑀕𑀳𑀁 𑀬𑀣𑀸𑀲𑀫𑁆𑀪𑀯𑀢𑁄 𑀲𑀫𑀸𑀲𑁂𑀦 𑀧𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸.

𑁨. 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀗𑁆𑀕𑀳𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸𑀧𑀺 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀦𑀺𑀓𑁆𑀔𑀺𑀢𑁆𑀢𑀸.

𑁩. 𑀯𑀺𑀲𑀬𑀸𑀦𑀁 𑀤𑁆𑀯𑀸𑀭𑁂𑀲𑀼, 𑀯𑀺𑀲𑀬𑁂𑀲𑀼 𑀘 𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺 𑀯𑀺𑀲𑀬𑀧𑁆𑀧𑀯𑀢𑁆𑀢𑀺.

𑁪. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀙𑀓𑁆𑀓𑁂𑀲𑀼.

𑀯𑀻𑀣𑀺𑀙𑀓𑁆𑀓𑀯𑀡𑁆𑀡𑀦𑀸

𑁬. ‘‘𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀯𑀻𑀣𑀺 𑀘𑀺𑀢𑁆𑀢𑀧𑀭𑀫𑁆𑀧𑀭𑀸 𑀘𑀓𑁆𑀔𑀼𑀤𑁆𑀯𑀸𑀭𑀯𑀻𑀣𑀻’’𑀢𑁆𑀬𑀸𑀤𑀺𑀦𑀸 𑀤𑁆𑀯𑀸𑀭𑀯𑀲𑁂𑀦, ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀩𑀦𑁆𑀥𑀺𑀦𑀻 𑀯𑀻𑀣𑀺 𑀢𑁂𑀦 𑀲𑀳 𑀏𑀓𑀸𑀭𑀫𑁆𑀫𑀡𑀏𑀓𑀤𑁆𑀯𑀸𑀭𑀺𑀓𑀢𑀸𑀬 𑀲𑀳𑀘𑀭𑀡𑀪𑀸𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀻’’𑀢𑁆𑀬𑀸𑀤𑀺𑀦𑀸 𑀯𑀺𑀜𑁆𑀜𑀸𑀡𑀯𑀲𑁂𑀦 𑀯𑀸 𑀯𑀻𑀣𑀻𑀦𑀁 𑀦𑀸𑀫 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀤𑁆𑀯𑀸𑀭𑀯𑀻𑀣𑀻’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁.

𑀯𑀻𑀣𑀺𑀙𑀓𑁆𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀻𑀣𑀺𑀪𑁂𑀤𑀯𑀡𑁆𑀡𑀦𑀸

𑁭. ‘‘𑀅𑀢𑀺𑀫𑀳𑀦𑁆𑀢’’𑀦𑁆𑀢𑁆𑀬𑀸𑀤𑀻𑀲𑀼 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀁 𑀳𑀼𑀢𑁆𑀯𑀸 𑀆𑀧𑀸𑀣𑀸𑀕𑀢𑀁 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀅𑀢𑀺𑀫𑀳𑀦𑁆𑀢𑀁 𑀦𑀸𑀫. 𑀤𑁆𑀯𑀺𑀢𑀺𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀁 𑀳𑀼𑀢𑁆𑀯𑀸 𑀧𑀦𑁆𑀦𑀭𑀲𑀘𑀼𑀤𑁆𑀤𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀫𑀳𑀦𑁆𑀢𑀁 𑀦𑀸𑀫. 𑀘𑀢𑀼𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀯𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀁 𑀳𑀼𑀢𑁆𑀯𑀸 𑀢𑁂𑀭𑀲𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀝𑁆𑀞𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀢𑀁 𑀧𑀭𑀺𑀢𑁆𑀢𑀁 𑀦𑀸𑀫. 𑀤𑀲𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀦𑁆𑀦𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀁 𑀳𑀼𑀢𑁆𑀯𑀸 𑀲𑀢𑁆𑀢𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁆𑀯𑀺𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀅𑀢𑀺𑀧𑀭𑀺𑀢𑁆𑀢𑀁 𑀦𑀸𑀫. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀓𑁆𑀔𑀢𑀺 ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀻’’𑀢𑁆𑀬𑀸𑀤𑀺. 𑀯𑀺𑀪𑀽𑀢𑀁 𑀧𑀸𑀓𑀝𑀁. 𑀅𑀯𑀺𑀪𑀽𑀢𑀁 𑀅𑀧𑀸𑀓𑀝𑀁.

𑀯𑀻𑀣𑀺𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀤𑁆𑀯𑀸𑀭𑀯𑀻𑀣𑀺𑀯𑀡𑁆𑀡𑀦𑀸

𑁮. 𑀓𑀣𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀅𑀢𑀺𑀫𑀳𑀦𑁆𑀢𑀸𑀤𑀺𑀯𑀲𑁂𑀦 𑀯𑀺𑀲𑀬𑀯𑀯𑀢𑁆𑀣𑀸𑀦𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦 𑀢𑀁 𑀧𑀓𑀸𑀲𑁂𑀢𑀼𑀁 ‘‘𑀉𑀧𑁆𑀧𑀸𑀤𑀞𑀺𑀢𑀻’’𑀢𑁆𑀬𑀸𑀤𑀺 𑀆𑀭𑀤𑁆𑀥𑀁. 𑀉𑀧𑁆𑀧𑀚𑁆𑀚𑀦𑀁 𑀉𑀧𑁆𑀧𑀸𑀤𑁄, 𑀅𑀢𑁆𑀢𑀧𑀝𑀺𑀮𑀸𑀪𑁄. 𑀪𑀜𑁆𑀚𑀦𑀁 𑀪𑀗𑁆𑀕𑁄, 𑀲𑀭𑀽𑀧𑀯𑀺𑀦𑀸𑀲𑁄. 𑀉𑀪𑀺𑀦𑁆𑀦𑀁 𑀯𑁂𑀫𑀚𑁆𑀛𑁂 𑀪𑀗𑁆𑀕𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀺 𑀞𑀺𑀢𑀺 𑀦𑀸𑀫. 𑀓𑁂𑀘𑀺 𑀧𑀦 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑀁 𑀧𑀝𑀺𑀲𑁂𑀥𑁂𑀦𑁆𑀢𑀺. 𑀅𑀬𑀜𑁆𑀳𑀺 𑀦𑁂𑀲𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀘𑀺𑀢𑁆𑀢𑀬𑀫𑀓𑁂 (𑀯𑀺𑀪. 𑀫𑀽𑀮𑀝𑀻. 𑁨𑁦 𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸; 𑀬𑀫. 𑁨.𑀘𑀺𑀢𑁆𑀢𑀬𑀫𑀓.𑁮𑁧, 𑁧𑁦𑁨) ‘‘𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀧𑀤𑀸𑀦𑀁 𑀯𑀺𑀪𑀗𑁆𑀕𑁂 ‘‘𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀜𑁆𑀘𑀸’’𑀢𑁆𑀬𑀸𑀤𑀺𑀦𑀸 (𑀬𑀫. 𑁨.𑀘𑀺𑀢𑁆𑀢𑀬𑀫𑀓.𑁮𑁧, 𑁧𑁦𑁨) 𑀪𑀗𑁆𑀕𑀼𑀧𑁆𑀧𑀸𑀤𑀸𑀯 𑀓𑀣𑀺𑀢𑀸, 𑀦 𑀞𑀺𑀢𑀺𑀓𑁆𑀔𑀡𑁄. 𑀬𑀤𑀺 𑀘 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁄𑀧𑀺 𑀅𑀢𑁆𑀣𑀺, ‘‘𑀞𑀺𑀢𑀺𑀓𑁆𑀔𑀡𑁂 𑀪𑀗𑁆𑀕𑀓𑁆𑀔𑀡𑁂 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀅𑀣 𑀫𑀢𑀁 ‘‘𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 (𑀅. 𑀦𑀺. 𑁩.𑁪𑁭) 𑀲𑀼𑀢𑁆𑀢𑀦𑁆𑀢𑀧𑀸𑀞𑀢𑁄 𑀞𑀺𑀢𑀺𑀓𑁆𑀔𑀡𑁄 𑀅𑀢𑁆𑀣𑀻’’𑀢𑀺, 𑀢𑀢𑁆𑀣𑀧𑀺 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀅𑀜𑁆𑀜𑀣𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀧𑀜𑁆𑀜𑀸𑀡𑀯𑀘𑀦𑀢𑁄 𑀘 𑀧𑀩𑀦𑁆𑀥𑀞𑀺𑀢𑀺𑀬𑁂𑀯 𑀅𑀥𑀺𑀧𑁆𑀧𑁂𑀢𑀸, 𑀦 𑀘 𑀔𑀡𑀞𑀺𑀢𑀺, 𑀦 𑀘 𑀅𑀪𑀺𑀥𑀫𑁆𑀫𑁂 𑀮𑀩𑁆𑀪𑀫𑀸𑀦𑀲𑁆𑀲 𑀅𑀯𑀘𑀦𑁂 𑀓𑀸𑀭𑀡𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀯𑀘𑀦𑀫𑁆𑀧𑀺 𑀅𑀪𑀸𑀯𑀫𑁂𑀯 𑀤𑀻𑀧𑁂𑀢𑀻𑀢𑀺. 𑀢𑀢𑁆𑀣 𑀯𑀼𑀘𑁆𑀘𑀢𑁂 𑀬𑀣𑁂𑀯 𑀳𑀺 𑀏𑀓𑀥𑀫𑁆𑀫𑀸𑀥𑀸𑀭𑀪𑀸𑀯𑁂𑀧𑀺 𑀉𑀧𑁆𑀧𑀸𑀤𑀪𑀗𑁆𑀕𑀸𑀦𑀁 𑀅𑀜𑁆𑀜𑁄 𑀉𑀧𑁆𑀧𑀸𑀤𑀓𑁆𑀔𑀡𑁄, 𑀅𑀜𑁆𑀜𑁄 𑀪𑀗𑁆𑀕𑀓𑁆𑀔𑀡𑁄𑀢𑀺 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀪𑀺𑀦𑁆𑀦𑀸 𑀪𑀗𑁆𑀕𑀸𑀯𑀢𑁆𑀣𑀸 𑀇𑀘𑁆𑀙𑀺𑀢𑀸. 𑀇𑀢𑀭𑀣𑀸 𑀳𑀺 ‘‘𑀅𑀜𑁆𑀜𑁄𑀬𑁂𑀯 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑁄 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀉𑀧𑁆𑀧𑀸𑀤𑀪𑀗𑁆𑀕𑀸𑀯𑀢𑁆𑀣𑀸𑀳𑀺 𑀪𑀺𑀦𑁆𑀦𑀸 𑀪𑀗𑁆𑀕𑀸𑀪𑀺𑀫𑀼𑀔𑀸𑀯𑀢𑁆𑀣𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀸 𑀞𑀺𑀢𑀺 𑀦𑀸𑀫. 𑀧𑀸𑀴𑀺𑀬𑀁 𑀧𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑀢𑁄 𑀦𑀬𑀤𑀲𑁆𑀲𑀦𑀯𑀲𑁂𑀦 𑀲𑀸 𑀦 𑀯𑀼𑀢𑁆𑀢𑀸. 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀧𑀺 𑀳𑀺 𑀓𑀤𑀸𑀘𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀢𑀺, 𑀬𑀣𑀸 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 𑀉𑀧𑀘𑀬𑁄 𑀲𑀦𑁆𑀢𑀢𑀻𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑁂𑀲𑀺𑀢𑁄, 𑀲𑀼𑀢𑁆𑀢𑁂 𑀘 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀯𑀁 𑀲𑀗𑁆𑀔𑀢𑀥𑀫𑁆𑀫𑀲𑁆𑀲𑁂𑀯 𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀉𑀧𑁆𑀧𑀸𑀤𑀸𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀩𑀦𑁆𑀥𑀲𑁆𑀲 𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀲𑁆𑀲 𑀅𑀲𑀗𑁆𑀔𑀢𑀲𑁆𑀲 𑀞𑀺𑀢𑀺 𑀢𑀢𑁆𑀣 𑀯𑀼𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀢𑀼𑀁. 𑀉𑀧𑀲𑀕𑁆𑀕𑀲𑁆𑀲 𑀘 𑀥𑀸𑀢𑁆𑀯𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀦𑀢𑁄 ‘‘𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀢𑀲𑁆𑀲 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀦 𑀏𑀢𑁆𑀢𑀸𑀯𑀢𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁄 𑀧𑀝𑀺𑀩𑀸𑀳𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀲𑀼𑀯𑀼𑀢𑁆𑀢𑀫𑁂𑀢𑀁 ‘‘𑀉𑀧𑁆𑀧𑀸𑀤𑀞𑀺𑀢𑀺𑀪𑀗𑁆𑀕𑀯𑀲𑁂𑀦𑀸’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀏𑀓𑁂𑀓𑀲𑁆𑀲 𑀉𑀧𑁆𑀧𑀸𑀤𑀞𑀺𑀢𑀺𑀪𑀗𑁆𑀕𑀯𑀲𑁂𑀦 𑀢𑀬𑁄 𑀢𑀬𑁄 𑀔𑀡𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸).

𑁯. 𑀅𑀭𑀽𑀧𑀁 𑀮𑀳𑀼𑀧𑀭𑀺𑀡𑀸𑀫𑀁, 𑀭𑀽𑀧𑀁 𑀕𑀭𑀼𑀧𑀭𑀺𑀡𑀸𑀫𑀁 𑀕𑀸𑀳𑀓𑀕𑀸𑀳𑁂𑀢𑀩𑁆𑀩𑀪𑀸𑀯𑀲𑁆𑀲 𑀢𑀁𑀢𑀁𑀔𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀆𑀳 ‘‘𑀢𑀸𑀦𑀻’’𑀢𑁆𑀬𑀸𑀤𑀺. 𑀢𑀸𑀦𑀻𑀢𑀺 𑀢𑀸𑀤𑀺𑀲𑀸𑀦𑀺. 𑀲𑀢𑁆𑀢𑀭𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀔𑀡𑀸𑀦𑀺 𑀯𑀺𑀬 𑀔𑀡𑀸𑀦𑀺 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀦𑀺, 𑀢𑀸𑀦𑀺 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀲𑀢𑁆𑀢𑀭𑀲𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀦 𑀏𑀓𑀧𑀜𑁆𑀜𑀸𑀲 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺. 𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀮𑀓𑁆𑀔𑀡𑀭𑀽𑀧𑀯𑀚𑁆𑀚𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀜𑁆𑀳𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁. 𑀢𑀣𑀸 𑀳𑀺 𑀢𑀁 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀥𑀫𑁆𑀫𑁂𑀲𑀼 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀭𑀽𑀧𑁂𑀲𑀼 𑀘 𑀚𑀸𑀢𑀺 𑀘𑁂𑀯 𑀅𑀦𑀺𑀘𑁆𑀘𑀢𑀸 𑀘 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀪𑀗𑁆𑀕𑀓𑁆𑀔𑀡𑁂𑀳𑀺 𑀲𑀫𑀸𑀦𑀸𑀬𑀼𑀓𑀸, 𑀚𑀭𑀢𑀸 𑀧𑀦 𑀏𑀓𑀽𑀦𑀧𑀜𑁆𑀜𑀸𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀤𑀦𑁆𑀢𑀺 𑁋

‘‘𑀢𑀁 𑀲𑀢𑁆𑀢𑀭𑀲𑀘𑀺𑀢𑁆𑀢𑀸𑀬𑀼, 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀮𑀓𑁆𑀔𑀡’’𑀦𑁆𑀢𑀺 (𑀲. 𑀲. 𑁬𑁦);

𑀓𑁂𑀘𑀺 (𑀯𑀺𑀪. 𑀫𑀽𑀮𑀝𑀻. 𑁨𑁦) 𑀧𑀦 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀝𑁆𑀞𑀓𑀣𑀸𑀬𑀁 ‘𑀏𑀢𑁆𑀢𑀸𑀯𑀢𑀸 𑀏𑀓𑀸𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺, 𑀅𑀣𑀸𑀯𑀲𑁂𑀲𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁬𑁨𑁩; 𑀯𑀺𑀪. 𑀅𑀝𑁆𑀞. 𑁨𑁨𑁭) 𑀯𑀘𑀦𑀢𑁄 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀭𑀽𑀧𑀥𑀫𑁆𑀫𑀸𑀦𑀫𑀸𑀬𑀽. 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀳𑀺 𑀭𑀽𑀧𑀁 𑀪𑀯𑀗𑁆𑀕𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀬𑀺𑀤𑀫𑀲𑀸𑀭𑀁 ‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀓𑀫𑁆𑀫𑀚𑀭𑀽𑀧𑀁 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀭𑀲𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀅𑀝𑁆𑀞𑀸𑀭𑀲𑀫𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻’’𑀢𑁆𑀬𑀸𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸) 𑀅𑀝𑁆𑀞𑀓𑀣𑀸𑀬𑀫𑁂𑀯 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀲𑁆𑀲 𑀆𑀕𑀢𑀢𑁆𑀢𑀸. 𑀬𑀢𑁆𑀣 𑀧𑀦 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀦𑁂𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀢𑁆𑀣 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀬𑁄𑀕𑁆𑀬𑀓𑁆𑀔𑀡𑀯𑀲𑁂𑀦 𑀦𑀬𑁄 𑀦𑀻𑀢𑁄. 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀳𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀫𑁆𑀧𑀺 𑀅𑀢𑀺𑀓𑁆𑀓𑀦𑁆𑀢𑀲𑁆𑀲𑁂𑀯 𑀭𑀽𑀧𑀲𑁆𑀲 𑀆𑀧𑀸𑀣𑀸𑀕𑀫𑀦𑀲𑀸𑀫𑀢𑁆𑀣𑀺𑀬𑀦𑁆𑀢𑀺 𑀅𑀮𑀫𑀢𑀺𑀯𑀺𑀢𑁆𑀣𑀸𑀭𑁂𑀦.

𑁧𑁦. 𑀏𑀓𑀘𑀺𑀢𑁆𑀢𑀲𑁆𑀲 𑀔𑀡𑀁 𑀯𑀺𑀬 𑀔𑀡𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀁, 𑀢𑀁 𑀅𑀢𑀻𑀢𑀁 𑀏𑀢𑁂𑀲𑀁, 𑀏𑀢𑀸𑀦𑀺 𑀯𑀸 𑀢𑀁 𑀅𑀢𑀻𑀢𑀸𑀦𑀻𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺. 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀭𑀽𑀧𑀲𑀤𑁆𑀤𑀸𑀭𑀫𑁆𑀫𑀡𑀸𑀦𑀺 𑀲𑀓𑀲𑀓𑀝𑁆𑀞𑀸𑀦𑁂 𑀞𑀢𑁆𑀯𑀸𑀯 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀆𑀪𑁄𑀕𑀸𑀦𑀼𑀭𑀽𑀧𑀁 𑀅𑀦𑁂𑀓𑀓𑀮𑀸𑀧𑀕𑀢𑀸𑀦𑀺 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀲𑁂𑀲𑀸𑀦𑀺 𑀧𑀦 𑀖𑀸𑀦𑀸𑀤𑀺𑀦𑀺𑀲𑁆𑀲𑀬𑁂𑀲𑀼 𑀅𑀮𑁆𑀮𑀻𑀦𑀸𑀦𑁂𑀯 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀸𑀦𑀻𑀢𑀺 𑀏𑀓𑁂𑀓𑀓𑀮𑀸𑀧𑀕𑀢𑀸𑀦𑀺𑀧𑀺. 𑀏𑀓𑁂𑀓𑀓𑀮𑀸𑀧𑀕𑀢𑀸𑀧𑀺 𑀳𑀺 𑀧𑀲𑀸𑀤𑀸 𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀢𑁂 𑀧𑀦 𑀪𑀯𑀗𑁆𑀕𑀘𑀮𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁂𑀦 𑀪𑀯𑀗𑁆𑀕𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸. ‘‘𑀆𑀯𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸’’𑀢𑀺 𑀅𑀧𑀭𑁂.

𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑁂 𑀘𑀮𑀺𑀢𑁂𑀢𑀺 𑀯𑀺𑀲𑀤𑀺𑀲𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀲𑀗𑁆𑀔𑀸𑀢𑀪𑀯𑀗𑁆𑀕𑀘𑀮𑀦𑀯𑀲𑁂𑀦 𑀧𑀼𑀭𑀺𑀫𑀕𑁆𑀕𑀳𑀺𑀢𑀸𑀭𑀫𑁆𑀫𑀡𑀲𑁆𑀫𑀺𑀁𑀬𑁂𑀯 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑁂 𑀧𑀯𑀢𑁆𑀢𑁂. 𑀧𑀜𑁆𑀘𑀲𑀼 𑀳𑀺 𑀧𑀲𑀸𑀤𑁂𑀲𑀼 𑀬𑁄𑀕𑁆𑀬𑀤𑁂𑀲𑀸𑀯𑀢𑁆𑀣𑀸𑀦𑀯𑀲𑁂𑀦 𑀆𑀭𑀫𑁆𑀫𑀡𑁂 𑀖𑀝𑁆𑀝𑀺𑀢𑁂 𑀧𑀲𑀸𑀤𑀖𑀝𑁆𑀝𑀦𑀸𑀦𑀼𑀪𑀸𑀯𑁂𑀦 𑀪𑀯𑀗𑁆𑀕𑀲𑀦𑁆𑀢𑀢𑀺 𑀯𑁄𑀘𑁆𑀙𑀺𑀚𑁆𑀚𑀫𑀸𑀦𑀸 𑀲𑀳𑀲𑀸 𑀅𑀦𑁄𑀘𑁆𑀙𑀺𑀚𑁆𑀚𑀺𑀢𑁆𑀯𑀸 𑀬𑀣𑀸 𑀯𑁂𑀕𑁂𑀦 𑀥𑀸𑀯𑀦𑁆𑀢𑁄 𑀞𑀸𑀢𑀼𑀓𑀸𑀫𑁄𑀧𑀺 𑀧𑀼𑀭𑀺𑀲𑁄 𑀏𑀓𑀤𑁆𑀯𑀺𑀧𑀤𑀯𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀢𑀺𑀝𑁆𑀞𑀢𑀺, 𑀏𑀯𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀑𑀘𑁆𑀙𑀺𑀚𑁆𑀚𑀢𑀺. 𑀢𑀢𑁆𑀣 𑀧𑀞𑀫𑀘𑀺𑀢𑁆𑀢𑀁 𑀪𑀯𑀗𑁆𑀕𑀲𑀦𑁆𑀢𑀢𑀺𑀁 𑀘𑀸𑀮𑁂𑀦𑁆𑀢𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 𑀪𑀯𑀗𑁆𑀕𑀘𑀮𑀦𑀁, 𑀤𑀼𑀢𑀺𑀬𑀁 𑀢𑀲𑁆𑀲 𑀑𑀘𑁆𑀙𑀺𑀚𑁆𑀚𑀦𑀸𑀓𑀸𑀭𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑁄𑀢𑀺 𑀯𑁄𑀳𑀭𑀦𑁆𑀢𑀺. 𑀇𑀥 𑀧𑀦 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑁂 𑀘𑀮𑀺𑀢𑁂’’𑀢𑀺.

𑀦𑀦𑀼 𑀘 𑀭𑀽𑀧𑀸𑀤𑀺𑀦𑀸 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲𑁂𑀯 𑀘𑀮𑀦𑀁 𑀬𑀼𑀢𑁆𑀢𑀁, 𑀓𑀣𑀁 𑀧𑀦 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀲𑁆𑀲 𑀪𑀯𑀗𑁆𑀕𑀲𑁆𑀲𑀸𑀢𑀺? 𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀸𑀩𑀤𑁆𑀥𑀢𑁆𑀢𑀸. 𑀬𑀣𑀸 𑀳𑀺 𑀪𑁂𑀭𑀺𑀬𑀸 𑀏𑀓𑀲𑁆𑀫𑀺𑀁 𑀢𑀮𑁂 𑀞𑀺𑀢𑀲𑀓𑁆𑀔𑀭𑀸𑀬 𑀫𑀓𑁆𑀔𑀺𑀓𑀸𑀬 𑀦𑀺𑀲𑀺𑀦𑁆𑀦𑀸𑀬 𑀅𑀧𑀭𑀲𑁆𑀫𑀺𑀁 𑀢𑀮𑁂 𑀤𑀡𑁆𑀟𑀸𑀤𑀺𑀦𑀸 𑀧𑀳𑀝𑁂 𑀅𑀦𑀼𑀓𑁆𑀓𑀫𑁂𑀦 𑀪𑁂𑀭𑀺𑀘𑀫𑁆𑀫𑀯𑀭𑀢𑁆𑀢𑀸𑀤𑀻𑀦𑀁 𑀘𑀮𑀦𑁂𑀦 𑀲𑀓𑁆𑀔𑀭𑀸𑀬 𑀘𑀮𑀺𑀢𑀸𑀬 𑀫𑀓𑁆𑀔𑀺𑀓𑀸𑀬 𑀉𑀧𑁆𑀧𑀢𑀺𑀢𑁆𑀯𑀸 𑀕𑀫𑀦𑀁 𑀳𑁄𑀢𑀺, 𑀏𑀯𑀫𑁂𑀯 𑀭𑀽𑀧𑀸𑀤𑀺𑀦𑀸 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀢𑀦𑁆𑀦𑀺𑀲𑁆𑀲𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀘𑀮𑀺𑀢𑁂𑀲𑀼 𑀅𑀦𑀼𑀓𑁆𑀓𑀫𑁂𑀦 𑀢𑀁𑀲𑀫𑁆𑀩𑀦𑁆𑀥𑀸𑀦𑀁 𑀲𑁂𑀲𑀭𑀽𑀧𑀸𑀦𑀫𑁆𑀧𑀺 𑀘𑀮𑀦𑁂𑀦 𑀳𑀤𑀬𑀯𑀢𑁆𑀣𑀼𑀫𑁆𑀳𑀺 𑀘𑀮𑀺𑀢𑁂 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀪𑀯𑀗𑁆𑀕𑀲𑁆𑀲 𑀘𑀮𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀖𑀝𑁆𑀝𑀺𑀢𑁂 𑀅𑀜𑁆𑀜𑀯𑀢𑁆𑀣𑀼𑀫𑁆𑀳𑀺, 𑀅𑀜𑁆𑀜𑀦𑀺𑀲𑁆𑀲𑀺𑀢𑀓𑀫𑁆𑀧𑀦𑀁;

𑀏𑀓𑀸𑀩𑀤𑁆𑀥𑁂𑀦 𑀳𑁄𑀢𑀻𑀢𑀺, 𑀲𑀓𑁆𑀔𑀭𑁄𑀧𑀫𑀬𑀸 𑀯𑀤𑁂’’𑀢𑀺. (𑀲. 𑀲. 𑁧𑁭𑁬);

𑀪𑀯𑀗𑁆𑀕𑀲𑁄𑀢𑀦𑁆𑀢𑀺 𑀪𑀯𑀗𑁆𑀕𑀧𑁆𑀧𑀯𑀸𑀳𑀁. 𑀆𑀯𑀚𑁆𑀚𑀦𑁆𑀢𑀦𑁆𑀢𑀺 ‘‘𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀯𑀤𑀦𑁆𑀢𑀁 𑀯𑀺𑀬 𑀆𑀪𑁄𑀕𑀁 𑀓𑀼𑀭𑀼𑀫𑀸𑀦𑀁. 𑀧𑀲𑁆𑀲𑀦𑁆𑀢𑀦𑁆𑀢𑀺 𑀧𑀘𑁆𑀘𑀓𑁆𑀔𑀢𑁄 𑀧𑁂𑀓𑁆𑀔𑀦𑁆𑀢𑀁. 𑀦𑀦𑀼 𑀘 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺 (𑀤𑀻. 𑀦𑀺. 𑁧.𑁨𑁧𑁩; 𑀅. 𑀦𑀺. 𑁩.𑁬𑁨; 𑀯𑀺𑀪. 𑁫𑁧𑁭) 𑀯𑀘𑀦𑀢𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑁂𑀯 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀤𑁂𑀢𑀺, 𑀦 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁, 𑀭𑀽𑀧𑀲𑁆𑀲 𑀅𑀦𑁆𑀥𑀪𑀸𑀯𑁂𑀦 𑀭𑀽𑀧𑀤𑀲𑁆𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑀢𑁄. 𑀬𑀤𑀺 𑀘 𑀢𑀁 𑀭𑀽𑀧𑀁 𑀧𑀲𑁆𑀲𑀢𑀺, 𑀢𑀣𑀸 𑀲𑀢𑀺 𑀅𑀜𑁆𑀜𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑁄𑀧𑀺 𑀭𑀽𑀧𑀤𑀲𑁆𑀲𑀦𑀧𑁆𑀧𑀲𑀗𑁆𑀕𑁄 𑀲𑀺𑀬𑀸. 𑀬𑀤𑀺 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀢𑀁 𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀅𑀧𑁆𑀧𑀝𑀺𑀩𑀦𑁆𑀥𑀢𑁆𑀢𑀸 𑀅𑀦𑁆𑀢𑀭𑀺𑀢𑀭𑀽𑀧𑀲𑁆𑀲𑀧𑀺 𑀤𑀲𑁆𑀲𑀦𑀁 𑀲𑀺𑀬𑀸. 𑀳𑁄𑀢𑀼 𑀅𑀦𑁆𑀢𑀭𑀺𑀢𑀲𑁆𑀲𑀧𑀺 𑀤𑀲𑁆𑀲𑀦𑀁, 𑀬𑀲𑁆𑀲 𑀨𑀮𑀺𑀓𑀸𑀤𑀺𑀢𑀺𑀭𑁄𑀳𑀺𑀢𑀲𑁆𑀲 𑀆𑀮𑁄𑀓𑀧𑀝𑀺𑀩𑀦𑁆𑀥𑁄 𑀦𑀢𑁆𑀣𑀺, 𑀬𑀲𑁆𑀲 𑀧𑀦 𑀓𑀼𑀝𑁆𑀝𑀸𑀤𑀺𑀅𑀦𑁆𑀢𑀭𑀺𑀢𑀲𑁆𑀲 𑀅𑀮𑁄𑀓𑀧𑀝𑀺𑀩𑀦𑁆𑀥𑁄 𑀅𑀢𑁆𑀣𑀺. 𑀢𑀢𑁆𑀣 𑀧𑀘𑁆𑀘𑀬𑀸𑀪𑀸𑀯𑀢𑁄 𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀦 𑀢𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀕𑀳𑀡𑀁 𑀳𑁄𑀢𑀺. ‘‘𑀘𑀓𑁆𑀔𑀼𑀦𑀸’’𑀢𑀺 𑀧𑀦𑁂𑀢𑁆𑀣 𑀢𑁂𑀦 𑀤𑁆𑀯𑀸𑀭𑁂𑀦 𑀓𑀭𑀡𑀪𑀽𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀦𑀺𑀲𑁆𑀲𑀺𑀢𑀓𑀺𑀭𑀺𑀬𑀸 𑀦𑀺𑀲𑁆𑀲𑀬𑀧𑁆𑀧𑀝𑀺𑀩𑀤𑁆𑀥𑀸 𑀯𑀼𑀢𑁆𑀢𑀸 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺.

𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀦𑁆𑀢𑀺 𑀢𑀫𑁂𑀯 𑀭𑀽𑀧𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀁 𑀯𑀺𑀬. 𑀲𑀦𑁆𑀢𑀻𑀭𑀬𑀫𑀸𑀦𑀦𑁆𑀢𑀺 𑀢𑀫𑁂𑀯 𑀭𑀽𑀧𑀁 𑀯𑀻𑀫𑀁𑀲𑀦𑁆𑀢𑀁 𑀯𑀺𑀬. 𑀯𑀯𑀢𑁆𑀣𑀧𑁂𑀦𑁆𑀢𑀦𑁆𑀢𑀺 𑀢𑀫𑁂𑀯 𑀭𑀽𑀧𑀁 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀦𑁆𑀢𑀁 𑀯𑀺𑀬. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀮𑀤𑁆𑀥𑁄 𑀧𑀘𑁆𑀘𑀬𑁄 𑀏𑀢𑁂𑀦𑀸𑀢𑀺 𑀮𑀤𑁆𑀥𑀧𑀘𑁆𑀘𑀬𑀁. 𑀬𑀁 𑀓𑀺𑀜𑁆𑀘𑀺 𑀚𑀯𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀼𑀘𑁆𑀙𑀸𑀫𑀭𑀡𑀸𑀲𑀦𑁆𑀦𑀓𑀸𑀮𑁂𑀲𑀼 𑀘 𑀙𑀧𑁆𑀧𑀜𑁆𑀘𑀧𑀺 𑀚𑀯𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺. 𑀚𑀯𑀦𑀸𑀦𑀼𑀩𑀦𑁆𑀥𑀸𑀦𑀻𑀢𑀺 𑀧𑀝𑀺𑀲𑁄𑀢𑀕𑀸𑀫𑀺𑀦𑀸𑀯𑀁 𑀦𑀤𑀻𑀲𑁄𑀢𑁄 𑀯𑀺𑀬 𑀓𑀺𑀜𑁆𑀘𑀺 𑀓𑀸𑀮𑀁 𑀚𑀯𑀦𑀁 𑀅𑀦𑀼𑀕𑀢𑀸𑀦𑀺. 𑀢𑀲𑁆𑀲 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀫𑁂𑀢𑁂𑀲𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀸𑀦𑀺 ‘‘𑀩𑁆𑀭𑀳𑁆𑀫𑀲𑁆𑀲𑀭𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀫𑀚𑁆𑀛𑁂𑀧𑀤𑀮𑁄𑀧𑀯𑀲𑁂𑀦, 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀢𑀸𑀦𑀺 𑀧𑀸𑀓𑀸𑀦𑀺 𑀘𑀸𑀢𑀺 𑀢𑀤𑀸𑀭𑀫𑁆𑀫𑀡𑀧𑀸𑀓𑀸𑀦𑀺. 𑀬𑀣𑀸𑀭𑀳𑀦𑁆𑀢𑀺 𑀆𑀭𑀫𑁆𑀫𑀡𑀚𑀯𑀦𑀲𑀢𑁆𑀢𑀸𑀦𑀼𑀭𑀽𑀧𑀁. 𑀢𑀣𑀸 𑀧𑀯𑀢𑁆𑀢𑀺𑀁 𑀧𑀦 𑀲𑀬𑀫𑁂𑀯 𑀧𑀓𑀸𑀲𑀬𑀺𑀲𑁆𑀲𑀢𑀺, 𑀪𑀯𑀗𑁆𑀕𑀧𑀸𑀢𑁄𑀢𑀺 𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀪𑀯𑀗𑁆𑀕𑀧𑀸𑀢𑁄 𑀯𑀺𑀬, 𑀪𑀯𑀗𑁆𑀕𑀯𑀲𑁂𑀦 𑀉𑀧𑁆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀅𑀫𑁆𑀩𑁄𑀧𑀫𑀸𑀤𑀺𑀓𑀁 𑀆𑀳𑀭𑀦𑁆𑀢𑀺, 𑀢𑀢𑁆𑀭𑀺𑀤𑀁 𑀅𑀫𑁆𑀩𑁄𑀧𑀫𑀸𑀫𑀢𑁆𑀢𑀁 (𑀥. 𑀲. 𑀅𑀝𑁆𑀞. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸) 𑁋 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀨𑀮𑀺𑀢𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀆𑀲𑀦𑁆𑀦𑁂 𑀧𑀢𑀺𑀢𑀲𑁆𑀲 𑀏𑀓𑀲𑁆𑀲 𑀅𑀫𑁆𑀩𑀨𑀮𑀲𑁆𑀲 𑀲𑀤𑁆𑀤𑁂𑀦 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀻𑀲𑀢𑁄 𑀯𑀢𑁆𑀣𑀁 𑀅𑀧𑀦𑁂𑀢𑁆𑀯𑀸 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀤𑀺𑀲𑁆𑀯𑀸 𑀘 𑀢𑀁 𑀕𑀳𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀉𑀧𑀲𑀺𑀗𑁆𑀖𑀺𑀢𑁆𑀯𑀸 𑀧𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀕𑀢𑀁 𑀲𑀳 𑀲𑁂𑀫𑁆𑀳𑁂𑀦 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀧𑀼𑀦 𑀢𑀢𑁆𑀣𑁂𑀯 𑀦𑀺𑀤𑁆𑀤𑀸𑀬𑀢𑀺. 𑀢𑀢𑁆𑀣 𑀧𑀼𑀭𑀺𑀲𑀲𑁆𑀲 𑀦𑀺𑀤𑁆𑀤𑀸𑀬𑀦𑀓𑀸𑀮𑁄 𑀯𑀺𑀬 𑀪𑀯𑀗𑁆𑀕𑀓𑀸𑀮𑁄, 𑀨𑀮𑀲𑁆𑀲 𑀧𑀢𑀺𑀢𑀓𑀸𑀮𑁄 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀦𑀓𑀸𑀮𑁄, 𑀢𑀲𑁆𑀲 𑀲𑀤𑁆𑀤𑁂𑀦 𑀧𑀩𑀼𑀤𑁆𑀥𑀓𑀸𑀮𑁄 𑀯𑀺𑀬 𑀆𑀯𑀚𑁆𑀚𑀦𑀓𑀸𑀮𑁄, 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑀺𑀢𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀓𑀸𑀮𑁄, 𑀕𑀳𑀺𑀢𑀓𑀸𑀮𑁄 𑀯𑀺𑀬 𑀲𑀫𑁆𑀧𑀝𑀺𑀘𑁆𑀙𑀦𑀓𑀸𑀮𑁄, 𑀫𑀤𑁆𑀤𑀦𑀓𑀸𑀮𑁄 𑀯𑀺𑀬 𑀲𑀦𑁆𑀢𑀻𑀭𑀡𑀓𑀸𑀮𑁄, 𑀉𑀧𑀲𑀺𑀗𑁆𑀖𑀦𑀓𑀸𑀮𑁄 𑀯𑀺𑀬 𑀯𑁄𑀝𑁆𑀞𑀩𑁆𑀩𑀦𑀓𑀸𑀮𑁄, 𑀧𑀭𑀺𑀪𑁄𑀕𑀓𑀸𑀮𑁄 𑀯𑀺𑀬 𑀚𑀯𑀦𑀓𑀸𑀮𑁄, 𑀫𑀼𑀔𑀕𑀢𑀁 𑀲𑀳 𑀲𑁂𑀫𑁆𑀳𑁂𑀦 𑀅𑀚𑁆𑀛𑁄𑀳𑀭𑀡𑀓𑀸𑀮𑁄 𑀯𑀺𑀬 𑀢𑀤𑀸𑀭𑀫𑁆𑀫𑀡𑀓𑀸𑀮𑁄, 𑀧𑀼𑀦 𑀦𑀺𑀤𑁆𑀤𑀸𑀬𑀦𑀓𑀸𑀮𑁄 𑀯𑀺𑀬 𑀧𑀼𑀦 𑀪𑀯𑀗𑁆𑀕𑀓𑀸𑀮𑁄.

𑀇𑀫𑀸𑀬 𑀘 𑀉𑀧𑀫𑀸𑀬 𑀓𑀺𑀁 𑀤𑀻𑀧𑀺𑀢𑀁 𑀳𑁄𑀢𑀺? 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀦𑀫𑁂𑀯 𑀓𑀺𑀘𑁆𑀘𑀁, 𑀆𑀯𑀚𑁆𑀚𑀦𑀲𑁆𑀲 𑀯𑀺𑀲𑀬𑀸𑀪𑀼𑀚𑀦𑀫𑁂𑀯, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑀲𑁆𑀲𑀦𑀫𑀢𑁆𑀢𑀫𑁂𑀯, 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀜𑁆𑀘 𑀧𑀝𑀺𑀕𑁆𑀕𑀡𑁆𑀳𑀦𑀸𑀤𑀺𑀫𑀢𑁆𑀢𑀫𑁂𑀯, 𑀚𑀯𑀦𑀲𑁆𑀲𑁂𑀯 𑀧𑀦 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁, 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘 𑀢𑁂𑀦 𑀅𑀦𑀼𑀪𑀽𑀢𑀲𑁆𑀲𑁂𑀯 𑀅𑀦𑀼𑀪𑀯𑀦𑀦𑁆𑀢𑀺 𑀏𑀯𑀁 𑀓𑀺𑀘𑁆𑀘𑀯𑀲𑁂𑀦 𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀢𑀸 𑀤𑀻𑀧𑀺𑀢𑀸 𑀳𑁄𑀢𑀺. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀁 𑀧𑀦 𑀘𑀺𑀢𑁆𑀢𑀁 ‘‘𑀆𑀯𑀚𑁆𑀚𑀦𑀁 𑀦𑀸𑀫 𑀳𑀼𑀢𑁆𑀯𑀸 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀳𑁄𑀢𑀺, 𑀢𑁆𑀯𑀁 𑀤𑀲𑁆𑀲𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀳𑀼𑀢𑁆𑀯𑀸 𑀆𑀯𑀚𑁆𑀚𑀦𑀸𑀦𑀦𑁆𑀢𑀭’’𑀦𑁆𑀢𑁆𑀬𑀸𑀤𑀺𑀦𑀸 𑀦𑀺𑀬𑀼𑀜𑁆𑀚𑀓𑁂 𑀓𑀸𑀭𑀓𑁂 𑀅𑀲𑀢𑀺𑀧𑀺 𑀉𑀢𑀼𑀩𑀻𑀚𑀦𑀺𑀬𑀸𑀫𑀸𑀤𑀺 (𑀥. 𑀲. 𑀅𑀝𑁆𑀞. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸) 𑀯𑀺𑀬 𑀘𑀺𑀢𑁆𑀢𑀦𑀺𑀬𑀸𑀫𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧. 𑀏𑀢𑁆𑀢𑀸𑀯𑀢𑀸 𑀲𑀢𑁆𑀢𑀭𑀲 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁨. 𑀅𑀧𑁆𑀧𑀳𑁄𑀦𑁆𑀢𑀸𑀢𑀻𑀢𑀓𑀦𑁆𑀢𑀺 𑀅𑀧𑁆𑀧𑀳𑁄𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀻𑀢𑀁. 𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄𑀢𑀺 𑀘𑀼𑀤𑁆𑀤𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀢𑀸𑀯 𑀆𑀭𑀫𑁆𑀫𑀡𑀲𑁆𑀲 𑀦𑀺𑀭𑀼𑀤𑁆𑀥𑀢𑁆𑀢𑀸𑀯 𑀢𑀤𑀸𑀭𑀫𑁆𑀫𑀡𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀦 𑀳𑀺 𑀏𑀓𑀯𑀻𑀣𑀺𑀬𑀁 𑀓𑁂𑀲𑀼𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂𑀲𑀼 𑀓𑀸𑀦𑀺𑀘𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀧𑀦𑁆𑀦𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂𑀲𑀼𑀧𑀺 𑀚𑀯𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀭𑀁 𑀏𑀓𑀫𑁂𑀯 𑀘𑀺𑀢𑁆𑀢𑀓𑁆𑀔𑀡𑀁 𑀅𑀯𑀲𑀺𑀝𑁆𑀞𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀳𑁄𑀦𑀓𑀪𑀸𑀯𑀢𑁄 𑀦𑀢𑁆𑀣𑀺 𑀤𑀼𑀢𑀺𑀬𑀢𑀤𑀸𑀭𑀫𑁆𑀫𑀡𑀲𑁆𑀲 𑀉𑀧𑁆𑀧𑀢𑁆𑀢𑀻𑀢𑀺 𑀧𑀞𑀫𑀫𑁆𑀧𑀺 𑀦𑀼𑀧𑁆𑀧𑀚𑁆𑀚𑀢𑀺. 𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁂𑀯 𑀳𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀧𑀸𑀴𑀺𑀬𑀁 𑀦𑀺𑀬𑀫𑀺𑀢𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀁 𑀲𑀩𑁆𑀩𑀯𑀸𑀭𑁂𑀲𑀼 ‘‘𑀢𑀤𑀸𑀭𑀫𑁆𑀫𑀡𑀸𑀦𑀺 𑀤𑁆𑀯𑁂’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀤𑁆𑀯𑀺𑀦𑁆𑀦𑀫𑁂𑀯 𑀘𑀺𑀢𑁆𑀢𑀯𑀸𑀭𑀸𑀦𑀁 𑀆𑀕𑀢𑀢𑁆𑀢𑀸. 𑀬𑀁 𑀧𑀦 𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑀁 𑁋

‘‘𑀲𑀓𑀺𑀁 𑀤𑁆𑀯𑁂 𑀯𑀸 𑀢𑀤𑀸𑀮𑀫𑁆𑀩𑀁, 𑀲𑀓𑀺𑀫𑀸𑀯𑀚𑁆𑀚𑀦𑀸𑀤𑀬𑁄’’𑀢𑀺 (𑀧𑀭𑀫. 𑀯𑀺. 𑁧𑁧𑁬), 𑀢𑀁 𑀫𑀚𑁆𑀛𑀺𑀫𑀪𑀸𑀡𑀓𑀫𑀢𑀸𑀦𑀼𑀲𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀫𑀚𑁆𑀛𑀺𑀫𑀪𑀸𑀡𑀓𑀸𑀦𑀁 𑀯𑀸𑀤𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀸𑀴𑀺𑀬𑀸 𑀅𑀲𑀁𑀲𑀦𑁆𑀤𑀦𑀢𑁄 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻𑀬𑀁 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀧𑀝𑀺𑀓𑁆𑀔𑀺𑀢𑁆𑀢𑁄𑀯, 𑀢𑀲𑁆𑀫𑀸 𑀆𑀘𑀭𑀺𑀬𑁂𑀦𑀧𑀺 𑀅𑀢𑁆𑀢𑀦𑀸 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸𑀬𑁂𑀯 𑀇𑀥 𑀘𑁂𑀯 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀘 𑀲𑀓𑀺𑀁 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸.

𑁧𑁩. 𑀯𑁄𑀝𑁆𑀞𑀩𑁆𑀩𑀦𑀼𑀧𑁆𑀧𑀸𑀤𑀢𑁄 𑀧𑀭𑀁 𑀙𑀘𑀺𑀢𑁆𑀢𑀓𑁆𑀔𑀡𑀸𑀯𑀲𑀺𑀝𑁆𑀞𑀸𑀬𑀼𑀓𑀫𑁆𑀧𑀺 𑀆𑀭𑀫𑁆𑀫𑀡𑀁 𑀅𑀧𑁆𑀧𑀸𑀬𑀼𑀓𑀪𑀸𑀯𑁂𑀦 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸 𑀚𑀯𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀚𑀯𑀦𑀜𑁆𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦𑀺𑀬𑀫𑁂𑀦 𑀲𑀢𑁆𑀢𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀚𑀯𑀦𑀫𑁆𑀧𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸’’𑀢𑀺. 𑀳𑁂𑀢𑀼𑀫𑁆𑀳𑀺 𑀘𑀸𑀬𑀁 𑀢𑁆𑀯𑀸𑀧𑀘𑁆𑀘𑀬𑁄, 𑀚𑀯𑀦𑀲𑁆𑀲𑀧𑀺 𑀅𑀦𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀢𑀭𑀣𑀸 𑀳𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀬 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀦 𑀮𑀩𑁆𑀪𑀢𑀻𑀢𑀺. 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸. 𑀓𑁂𑀘𑀺 𑀧𑀦 ‘‘𑀢𑀺𑀓𑁆𑀔𑀢𑁆𑀢𑀼’𑀦𑁆𑀢𑀺 𑀇𑀤𑀁 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀧𑁆𑀧𑀬𑁄𑀚𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀢𑁂𑀲𑀁 𑀅𑀪𑀺𑀦𑀺𑀯𑁂𑀲𑀫𑀢𑁆𑀢𑀁. 𑀦 𑀳𑀺 ‘‘𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑁄𑀝𑁆𑀞𑀩𑁆𑀩𑀦𑀫𑁂𑀯 𑀧𑀭𑀺𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀯𑀘𑀦𑀲𑁆𑀲 𑀅𑀲𑀺𑀮𑀺𑀝𑁆𑀞𑀪𑀸𑀯𑁄 𑀅𑀢𑁆𑀣𑀺, 𑀦 𑀘 𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸 𑀩𑀸𑀥𑀓𑀁 𑀓𑀺𑀜𑁆𑀘𑀺 𑀯𑀘𑀦𑀁 𑀅𑀝𑁆𑀞𑀓𑀣𑀸𑀤𑀻𑀲𑀼 𑀅𑀢𑁆𑀣𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀻𑀳𑀴𑀲𑀁𑀯𑀡𑁆𑀡𑀦𑀸𑀓𑀸𑀭𑀸𑀧𑀺 ‘‘𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸’’𑀇𑀘𑁆𑀘𑁂𑀯 𑀯𑀡𑁆𑀡𑁂𑀦𑁆𑀢𑀺. 𑀯𑁄𑀝𑁆𑀞𑀩𑁆𑀩𑀦𑀫𑁂𑀯 𑀧𑀭𑀺𑀯𑀢𑁆𑀢𑀢𑀻𑀢𑀺 𑀯𑁄𑀝𑁆𑀞𑀩𑁆𑀩𑀦𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀧𑀦 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀞𑀢𑁆𑀯𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀦𑀺𑀯𑀢𑁆𑀢𑀦𑀁 𑀦𑀢𑁆𑀣𑀺.

𑀆𑀦𑀦𑁆𑀤𑀸𑀘𑀭𑀺𑀬𑁄 𑀧𑀦𑁂𑀢𑁆𑀣 (𑀥. 𑀲. 𑀫𑀽𑀮𑀝𑀻. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀯𑀡𑁆𑀡𑀦𑀸) ‘‘𑀆𑀯𑀚𑁆𑀚𑀦𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀆𑀯𑀚𑁆𑀚𑀦𑀸𑀬 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀸𑀦𑀜𑁆𑀘 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑀢𑁄 𑀲𑀢𑀺 𑀉𑀧𑁆𑀧𑀢𑁆𑀢𑀺𑀬𑀁 𑀯𑁄𑀝𑁆𑀞𑀩𑁆𑀩𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀸𑀦𑀁 𑀏𑀓𑀦𑁆𑀢𑀢𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑁂𑀬𑁆𑀬, 𑀦𑁄 𑀅𑀜𑁆𑀜𑀣𑀸𑀢𑀺 𑀫𑀼𑀘𑁆𑀙𑀸𑀓𑀸𑀮𑀸𑀤𑀻𑀲𑀼 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑀸𑀬 𑀚𑀯𑀦𑀧𑀸𑀭𑀺𑀧𑀽𑀭𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀦𑀺𑀬𑀫𑀺𑀢𑀩𑁆𑀩𑀁, 𑀦 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸𑀢𑀺 𑀤𑀻𑀧𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀤𑀻𑀧𑁂𑀢𑀺, 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀺 𑀧𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑁂𑀯. 𑀔𑀻𑀡𑀸𑀲𑀯𑀸𑀦𑀁 𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀦 𑀓𑀲𑁆𑀲𑀘𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀢𑀸𑀦𑀺 𑀯𑀺𑀬 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑁄 𑀓𑀼𑀲𑀮𑀸𑀓𑀼𑀲𑀮𑀸𑀤𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀦𑀬𑁂𑀦𑁂𑀯𑁂𑀢𑁆𑀣 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀦𑀺𑀬𑀫𑀺𑀢𑀦𑁆𑀢𑀺.

𑁧𑁪. 𑀦𑀢𑁆𑀣𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀉𑀧𑀭𑀺𑀫𑀓𑁄𑀝𑀺𑀬𑀸 𑀲𑀢𑁆𑀢𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀲𑁆𑀲𑀧𑀺 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑁄𑀝𑁆𑀞𑀩𑁆𑀩𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀳𑁄𑀦𑀓𑀪𑀸𑀯𑀢𑁄 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑁄 𑀦𑀢𑁆𑀣𑀺, 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀯𑀗𑁆𑀕𑀘𑀮𑀦𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀢𑁆𑀣𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀦𑀢𑁆𑀣𑀺 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑁄’’𑀢𑀺 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀦𑁆𑀢𑀺, 𑀢𑀁 𑀧𑀦 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀪𑀸𑀯𑀯𑀘𑀦𑁂𑀦𑁂𑀯 𑀲𑀺𑀤𑁆𑀥𑀁. 𑀲𑀢𑀺 𑀳𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀦𑀸𑀫𑁂𑀦 𑀧𑀦 𑀳𑁂𑀝𑁆𑀞𑀸𑀧𑀺 𑀯𑀺𑀲𑀼𑀁 𑀅𑀯𑀼𑀢𑁆𑀢𑀢𑁆𑀢𑀸 𑀇𑀥 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁.

𑁧𑁫. 𑀲𑀩𑁆𑀩𑀲𑁄 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀧𑀘𑁆𑀙𑀺𑀫𑀯𑀸𑀭𑁄𑀯𑀺𑀥𑀫𑁄𑀖𑀯𑀸𑀭𑀯𑀲𑁂𑀦 𑀯𑀼𑀢𑁆𑀢𑁄, 𑀅𑀜𑁆𑀜𑀢𑁆𑀣 (𑀥. 𑀲. 𑀅𑀝𑁆𑀞. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸) 𑀧𑀦 𑀤𑀼𑀢𑀺𑀬𑀢𑀢𑀺𑀬𑀯𑀸𑀭𑀸𑀧𑀺 𑀢𑀤𑀸𑀭𑀫𑁆𑀫𑀡𑀚𑀯𑀦𑁂𑀳𑀺 𑀲𑀼𑀜𑁆𑀜𑀢𑁆𑀢𑀸 ‘‘𑀫𑁄𑀖𑀯𑀸𑀭𑀸’’𑀢𑀺 𑀯𑀼𑀢𑁆𑀢𑀸. 𑀆𑀭𑀫𑁆𑀫𑀡𑀪𑀽𑀢𑀸𑀢𑀺 𑀯𑀺𑀲𑀬𑀪𑀽𑀢𑀸, 𑀧𑀘𑁆𑀘𑀬𑀪𑀽𑀢𑀸 𑀘. 𑀧𑀘𑁆𑀘𑀬𑁄𑀧𑀺 𑀳𑀺 ‘‘𑀆𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀦 𑀮𑀘𑁆𑀙𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀘𑁆𑀙𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡’’𑀦𑁆𑀢𑁆𑀬𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁦) 𑀯𑀺𑀬. 𑀢𑁂𑀦𑁂𑀯𑁂𑀢𑁆𑀣 𑀫𑁄𑀖𑀯𑀸𑀭𑀲𑁆𑀲𑀧𑀺 𑀆𑀭𑀫𑁆𑀫𑀡𑀪𑀽𑀢𑀸 𑀯𑀺𑀲𑀬𑀧𑁆𑀧𑀯𑀢𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀅𑀢𑀺𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀳𑀺 𑀫𑁄𑀖𑀯𑀸𑀭𑀧𑀜𑁆𑀜𑀸𑀧𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀢𑀭𑀣𑀸 𑀳𑀺 𑀪𑀯𑀗𑁆𑀕𑀘𑀮𑀦𑀲𑁆𑀲 𑀲𑀓𑀲𑀓𑀕𑁄𑀘𑀭𑁂𑀬𑁂𑀯 𑀧𑀯𑀢𑁆𑀢𑀦𑀢𑁄 𑀧𑀘𑁆𑀙𑀺𑀫𑀯𑀸𑀭𑀲𑁆𑀲 𑀅𑀢𑀺𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 ‘‘𑀘𑀢𑀼𑀦𑁆𑀦𑀁 𑀯𑀸𑀭𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸’’𑀢𑀺 𑀯𑀘𑀦𑀁 𑀤𑀼𑀭𑀼𑀧𑀧𑀸𑀤𑀦𑀁 𑀲𑀺𑀬𑀸𑀢𑀺.

𑁧𑁬. 𑀧𑀜𑁆𑀘𑀤𑁆𑀯𑀸𑀭𑁂 𑀬𑀣𑀸𑀭𑀳𑀁 𑀢𑀁𑀢𑀁𑀤𑁆𑀯𑀸𑀭𑀸𑀦𑀼𑀭𑀽𑀧𑀁, 𑀢𑀁𑀢𑀁𑀧𑀘𑁆𑀘𑀬𑀸𑀦𑀼𑀭𑀽𑀧𑀁, 𑀢𑀁𑀢𑀁𑀆𑀭𑀫𑁆𑀫𑀡𑀸𑀤𑀺𑀅𑀦𑀼𑀭𑀽𑀧𑀜𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀆𑀯𑀚𑁆𑀚𑀦𑀤𑀲𑁆𑀲𑀦𑀸𑀤𑀺𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀅𑀯𑀺𑀲𑁂𑀲𑀢𑁄 𑀲𑀢𑁆𑀢𑁂𑀯 𑀳𑁄𑀦𑁆𑀢𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀘𑀺𑀢𑁆𑀢𑀸𑀦𑀺𑀬𑁂𑀯 𑀯𑀸 𑀘𑀢𑀼𑀤𑁆𑀤𑀲 𑀆𑀯𑀚𑁆𑀚𑀦𑀸𑀤𑀺𑀧𑀜𑁆𑀘𑀓𑀲𑀢𑁆𑀢𑀚𑀯𑀦𑀢𑀤𑀸𑀭𑀫𑁆𑀫𑀡𑀤𑁆𑀯𑀬𑀯𑀲𑁂𑀦. 𑀯𑀺𑀢𑁆𑀣𑀸𑀭𑀸 𑀧𑀦 𑀘𑀢𑀼𑀧𑀜𑁆𑀜𑀸𑀲 𑀲𑀩𑁆𑀩𑁂𑀲𑀫𑁂𑀯 𑀓𑀸𑀫𑀸𑀯𑀘𑀭𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀢𑁄,

𑀏𑀢𑁆𑀣𑀸𑀢𑀺 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀲𑀗𑁆𑀕𑀳𑁂.

𑀧𑀜𑁆𑀘𑀤𑁆𑀯𑀸𑀭𑀯𑀻𑀣𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀦𑁄𑀤𑁆𑀯𑀸𑀭𑀯𑀻𑀣𑀺

𑀧𑀭𑀺𑀢𑁆𑀢𑀚𑀯𑀦𑀯𑀸𑀭𑀯𑀡𑁆𑀡𑀦𑀸

𑁧𑁭. 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀅𑀢𑀻𑀢𑀸𑀦𑀸𑀕𑀢𑀫𑁆𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀅𑀢𑀺𑀫𑀳𑀦𑁆𑀢𑀸𑀤𑀺𑀯𑀲𑁂𑀦 𑀯𑀺𑀲𑀬𑀯𑀯𑀢𑁆𑀣𑀸𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀯𑀺𑀪𑀽𑀢𑀸𑀯𑀺𑀪𑀽𑀢𑀯𑀲𑁂𑀦𑁂𑀯𑁂𑀢𑀁 𑀦𑀺𑀬𑀫𑁂𑀢𑀼𑀁 ‘‘𑀬𑀤𑀺 𑀯𑀺𑀪𑀽𑀢𑀫𑀸𑀭𑀫𑁆𑀫𑀡’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁.

𑁧𑁯. 𑀏𑀢𑁆𑀣𑀸𑀢𑀺 𑀫𑀦𑁄𑀤𑁆𑀯𑀸𑀭𑁂. 𑀏𑀓𑀘𑀢𑁆𑀢𑀸𑀮𑀻𑀲 𑀧𑀜𑁆𑀘𑀤𑁆𑀯𑀸𑀭𑀸𑀯𑁂𑀡𑀺𑀓𑀸𑀦𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀢𑁆𑀢𑀬𑀯𑀲𑁂𑀦 𑀢𑁂𑀭𑀲𑀘𑀺𑀢𑁆𑀢𑀸𑀦𑀁 𑀢𑀢𑁆𑀣 𑀅𑀧𑁆𑀧𑀯𑀢𑁆𑀢𑀦𑀢𑁄.

𑀧𑀭𑀺𑀢𑁆𑀢𑀚𑀯𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑁆𑀧𑀦𑀸𑀚𑀯𑀦𑀯𑀸𑀭𑀯𑀡𑁆𑀡𑀦𑀸

𑁨𑁦. 𑀯𑀺𑀪𑀽𑀢𑀸𑀯𑀺𑀪𑀽𑀢𑀪𑁂𑀤𑁄 𑀦𑀢𑁆𑀣𑀺 𑀆𑀭𑀫𑁆𑀫𑀡𑀲𑁆𑀲 𑀯𑀺𑀪𑀽𑀢𑀓𑀸𑀮𑁂𑀬𑁂𑀯 𑀅𑀧𑁆𑀧𑀦𑀸𑀲𑀫𑁆𑀪𑀯𑀢𑁄.

𑁨𑁧. 𑀢𑀢𑁆𑀣 𑀳𑀺 𑀙𑀩𑁆𑀩𑀻𑀲𑀢𑀺𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀚𑀯𑀦𑀁 𑀅𑀧𑁆𑀧𑀦𑀸𑀯𑀻𑀣𑀺𑀫𑁄𑀢𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀦𑀸𑀫𑁂𑀦 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀤𑁂𑀢𑀺 𑀬𑁄𑀚𑀦𑀸. 𑀧𑀞𑀫𑀘𑀺𑀢𑁆𑀢𑀜𑁆𑀳𑀺 𑀅𑀧𑁆𑀧𑀦𑀸𑀬 𑀧𑀭𑀺𑀓𑀫𑁆𑀫𑀢𑁆𑀢𑀸 𑀧𑀝𑀺𑀲𑀗𑁆𑀔𑀸𑀭𑀓𑀪𑀽𑀢𑀢𑁆𑀢𑀸 𑀧𑀭𑀺𑀓𑀫𑁆𑀫𑀁. 𑀤𑀼𑀢𑀺𑀬𑀁 𑀲𑀫𑀻𑀧𑀘𑀸𑀭𑀺𑀢𑁆𑀢𑀸 𑀉𑀧𑀘𑀸𑀭𑀁. 𑀦𑀸𑀘𑁆𑀘𑀸𑀲𑀦𑁆𑀦𑁄𑀧𑀺 𑀳𑀺 𑀦𑀸𑀢𑀺𑀤𑀽𑀭𑀧𑁆𑀧𑀯𑀢𑁆𑀢𑀺 𑀲𑀫𑀻𑀧𑀘𑀸𑀭𑀻 𑀦𑀸𑀫 𑀳𑁄𑀢𑀺, 𑀅𑀧𑁆𑀧𑀦𑀁 𑀉𑀧𑁂𑀘𑁆𑀘 𑀘𑀭𑀢𑀻𑀢𑀺 𑀯𑀸 𑀉𑀧𑀘𑀸𑀭𑀁. 𑀢𑀢𑀺𑀬𑀁 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀓𑀫𑁆𑀫𑀸𑀦𑀁, 𑀉𑀧𑀭𑀺𑀅𑀧𑁆𑀧𑀦𑀸𑀬 𑀘 𑀅𑀦𑀼𑀓𑀽𑀮𑀢𑁆𑀢𑀸 𑀅𑀦𑀼𑀮𑁄𑀫𑀁. 𑀘𑀢𑀼𑀢𑁆𑀣𑀁 𑀧𑀭𑀺𑀢𑁆𑀢𑀕𑁄𑀢𑁆𑀢𑀲𑁆𑀲, 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀲𑁆𑀲 𑀘 𑀅𑀪𑀺𑀪𑀯𑀦𑀢𑁄, 𑀫𑀳𑀕𑁆𑀕𑀢𑀕𑁄𑀢𑁆𑀢𑀲𑁆𑀲, 𑀮𑁄𑀓𑀼𑀢𑁆𑀢𑀭𑀕𑁄𑀢𑁆𑀢𑀲𑁆𑀲 𑀘 𑀪𑀸𑀯𑀦𑀢𑁄 𑀯𑀟𑁆𑀠𑀦𑀢𑁄 𑀕𑁄𑀢𑁆𑀭𑀪𑀼, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀁 𑀅𑀦𑀯𑀲𑁂𑀲𑀢𑁄 𑀮𑀩𑁆𑀪𑀦𑁆𑀢𑀺, 𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀁 𑀧𑀦 𑀉𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀦𑀸𑀫𑁂𑀦𑁂𑀯 𑀮𑀩𑁆𑀪𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁮𑁦𑁪) 𑀧𑀦 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁, 𑀤𑁆𑀯𑀺𑀦𑁆𑀦𑀁 𑀯𑀸 𑀅𑀯𑀺𑀲𑁂𑀲𑁂𑀦𑀧𑀺 𑀧𑀭𑀺𑀓𑀫𑁆𑀫𑀸𑀤𑀺𑀦𑀸𑀫𑀁 𑀯𑀼𑀢𑁆𑀢𑀁, 𑀘𑀢𑀼𑀓𑁆𑀔𑀢𑁆𑀢𑀼𑀁, 𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀯𑀸 𑀧𑀜𑁆𑀘𑀫𑀁, 𑀘𑀢𑀼𑀢𑁆𑀣𑀁 𑀯𑀸 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀅𑀧𑁆𑀧𑀦𑀸𑀦𑀼𑀭𑀽𑀧𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀓𑀫𑁆𑀫𑀸𑀤𑀺𑀦𑀸𑀫𑀸𑀦𑀁 𑀅𑀦𑀯𑀲𑁂𑀲𑀢𑁄 𑀮𑀩𑁆𑀪𑀫𑀸𑀦𑀯𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀘𑀢𑀼𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀆𑀤𑀺𑀢𑁄 𑀯𑀼𑀢𑁆𑀢𑀁, 𑀕𑀡𑀦𑀧𑀝𑀺𑀧𑀸𑀝𑀺𑀯𑀲𑁂𑀦 𑀧𑀦 ‘‘𑀧𑀜𑁆𑀘𑀫𑀁 𑀯𑀸’’𑀢𑀺 𑀑𑀲𑀸𑀦𑁂 𑀯𑀼𑀢𑁆𑀢𑀁.

𑀬𑀣𑀸𑀭𑀳𑀦𑁆𑀢𑀺 𑀔𑀺𑀧𑁆𑀧𑀸𑀪𑀺𑀜𑁆𑀜𑀤𑀦𑁆𑀥𑀸𑀪𑀺𑀜𑁆𑀜𑀸𑀦𑀼𑀭𑀽𑀧𑀁. 𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑁆𑀲 𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀦𑁆𑀢𑀭𑀁 𑀘𑀢𑀼𑀢𑁆𑀣𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀤𑀦𑁆𑀥𑀸𑀪𑀺𑀜𑁆𑀜𑀲𑁆𑀲 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀚𑀯𑀦𑀸𑀦𑀦𑁆𑀢𑀭𑀁 𑀧𑀜𑁆𑀘𑀫𑀁 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀬𑀲𑁆𑀫𑀸 𑀧𑀦 𑀅𑀮𑀤𑁆𑀥𑀸𑀲𑁂𑀯𑀦𑀁 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀮𑀤𑁆𑀥𑀸𑀲𑁂𑀯𑀦𑀫𑁆𑀧𑀺 𑀘 𑀙𑀝𑁆𑀞𑀁 𑀲𑀢𑁆𑀢𑀫𑀁 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀧𑀧𑀸𑀢𑀸𑀲𑀦𑁆𑀦𑀧𑀼𑀭𑀺𑀲𑁄 𑀯𑀺𑀬 𑀅𑀧𑁆𑀧𑀦𑀸𑀯𑀲𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀘𑀢𑀼𑀢𑁆𑀣𑀢𑁄 𑀑𑀭𑀁, 𑀧𑀜𑁆𑀘𑀫𑀢𑁄 𑀧𑀭𑀁 𑀯𑀸 𑀅𑀧𑁆𑀧𑀦𑀸 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀪𑀺𑀦𑀻𑀳𑀸𑀭𑀯𑀲𑁂𑀦𑀸𑀢𑀺 𑀭𑀽𑀧𑀸𑀭𑀽𑀧𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀨𑀮𑀸𑀦𑀼𑀭𑀽𑀧𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀘𑀺𑀢𑁆𑀢𑀸𑀪𑀺𑀦𑀻𑀳𑀭𑀡𑀸𑀦𑀼𑀭𑀽𑀧𑀢𑁄, 𑀅𑀧𑁆𑀧𑀦𑀸𑀬 𑀯𑀻𑀣𑀺 𑀅𑀧𑁆𑀧𑀦𑀸𑀯𑀻𑀣𑀺. ‘‘𑀢𑀢𑁄 𑀧𑀭𑀁 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁 𑀯𑀸 𑀑𑀢𑀺𑀡𑁆𑀡𑀅𑀧𑁆𑀧𑀦𑀸𑀢𑁄 𑀧𑀭𑀁 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺, 𑀦 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀘𑀺𑀢𑁆𑀢𑀁, 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀜𑁆𑀘 𑀛𑀸𑀦𑀨𑀮𑀘𑀺𑀢𑁆𑀢𑀸𑀦𑀺 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀕𑀡𑁆𑀳𑁂𑀬𑁆𑀬𑀼𑀦𑁆𑀢𑀺 𑀧𑀼𑀦 ‘‘𑀅𑀧𑁆𑀧𑀦𑀸𑀯𑀲𑀸𑀦𑁂’’𑀢𑀺 𑀯𑀼𑀢𑁆𑀢𑀁. 𑀦𑀺𑀓𑀸𑀬𑀦𑁆𑀢𑀭𑀺𑀬𑀸 𑀓𑀺𑀭 𑀮𑁄𑀓𑀺𑀬𑀧𑁆𑀧𑀦𑀸𑀲𑀼 𑀧𑀞𑀫𑀓𑀧𑁆𑀧𑀦𑀸𑀢𑁄 𑀧𑀭𑀁 𑀲𑀢𑁆𑀢𑀫𑀚𑀯𑀦𑀧𑀽𑀭𑀡𑀢𑁆𑀣𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀫𑁆𑀧𑀺 𑀧𑀯𑀢𑁆𑀢𑀺𑀁 𑀯𑀡𑁆𑀡𑁂𑀦𑁆𑀢𑀻𑀢𑀺 𑀢𑁂𑀲𑀁 𑀫𑀢𑀺𑀦𑀺𑀲𑁂𑀥𑀦𑀢𑁆𑀣𑀁 ‘‘𑀪𑀯𑀗𑁆𑀕𑀧𑀸𑀢𑁄𑀯𑀸’’𑀢𑀺 𑀲𑀸𑀯𑀥𑀸𑀭𑀡𑀁 𑀯𑀼𑀢𑁆𑀢𑀁.

𑁨𑁨. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀝𑁆𑀞𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑁂𑀲𑀼, 𑀢𑁂𑀲𑀼 𑀘 𑀙𑀩𑁆𑀩𑀻𑀲𑀢𑀺𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑁂𑀲𑀼. 𑀢𑀢𑁆𑀣𑀸𑀢𑀺 𑀯𑀸 𑀢𑀲𑁆𑀫𑀺𑀁 𑀅𑀧𑁆𑀧𑀦𑀸𑀯𑀸𑀭𑁂. 𑀲𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀦𑀦𑁆𑀢𑀭𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀸𑀦𑀁 𑀅𑀦𑀦𑁆𑀢𑀭𑀁. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯𑀸𑀢𑀺 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑁆𑀲, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸𑀤𑀻𑀦𑀁 𑀫𑀕𑁆𑀕𑀨𑀮𑀲𑁆𑀲 𑀘 𑀯𑀲𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯, 𑀦 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀪𑀺𑀦𑁆𑀦𑀯𑁂𑀤𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸𑀢𑀺 𑀧𑀲𑀁𑀲𑀺𑀢𑀩𑁆𑀩𑀸, 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀧𑀻𑀢𑀺 𑀢𑀲𑁆𑀫𑀺𑀁 𑀏𑀓𑀯𑁂𑀤𑀦𑀚𑀯𑀦𑀯𑀸𑀭𑁂𑀧𑀺. 𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀁 𑀓𑀼𑀲𑀮𑀚𑀯𑀦𑀫𑀧𑁆𑀧𑁂𑀢𑀺, 𑀦 𑀓𑀺𑀭𑀺𑀬𑀚𑀯𑀦𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀳𑁂𑀝𑁆𑀞𑀺𑀫𑀜𑁆𑀘 𑀨𑀮𑀢𑁆𑀢𑀬𑀫𑀧𑁆𑀧𑁂𑀢𑀺 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀦𑁆𑀢𑁆𑀬𑀥𑀺𑀧𑁆𑀧𑀸𑀬𑁄.

𑁨𑁩. 𑀲𑀼𑀔𑀧𑀼𑀜𑁆𑀜𑀫𑁆𑀳𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀺𑀳𑁂𑀢𑀼𑀓𑀓𑀼𑀲𑀮𑀤𑁆𑀯𑀬𑀢𑁄 𑀧𑀭𑀁 𑀅𑀕𑁆𑀕𑀨𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀚𑁆𑀚𑀺𑀢𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀘𑀢𑀼𑀓𑁆𑀓𑀚𑁆𑀛𑀸𑀦𑀚𑀯𑀦𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲, 𑀉𑀧𑁂𑀓𑁆𑀔𑀓𑀸 𑀢𑀺𑀳𑁂𑀢𑀼𑀓𑀓𑀼𑀲𑀮𑀤𑁆𑀯𑀬𑀢𑁄 𑀧𑀭𑀁 𑀢𑀣𑁂𑀯 𑀧𑀜𑁆𑀘𑀫𑀚𑁆𑀛𑀸𑀦𑀸𑀦𑀺 𑀤𑁆𑀯𑀸𑀤𑀲, 𑀲𑀼𑀔𑀺𑀢𑀓𑁆𑀭𑀺𑀬𑀢𑁄 𑀢𑀺𑀳𑁂𑀢𑀼𑀓𑀤𑁆𑀯𑀬𑀢𑁄 𑀧𑀭𑀁 𑀓𑀺𑀭𑀺𑀬𑀚𑁆𑀛𑀸𑀦𑀘𑀢𑀼𑀓𑁆𑀓𑀲𑁆𑀲, 𑀅𑀕𑁆𑀕𑀨𑀮𑀘𑀢𑀼𑀓𑁆𑀓𑀲𑁆𑀲 𑀘 𑀯𑀲𑁂𑀦 𑀅𑀝𑁆𑀞, 𑀉𑀧𑁂𑀓𑁆𑀔𑀓𑀸 𑀢𑀺𑀳𑁂𑀢𑀼𑀓𑀤𑁆𑀯𑀬𑀢𑁄 𑀧𑀭𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀭𑀽𑀧𑀸𑀭𑀽𑀧𑀓𑀺𑀭𑀺𑀬𑀧𑀜𑁆𑀘𑀓𑀲𑁆𑀲, 𑀅𑀕𑁆𑀕𑀨𑀮𑀲𑁆𑀲 𑀘 𑀯𑀲𑁂𑀦 𑀙 𑀅𑀧𑁆𑀧𑀦𑀸 𑀲𑀫𑁆𑀪𑁄𑀦𑁆𑀢𑀺.

𑁨𑁪. 𑀏𑀢𑁆𑀣𑀸𑀢𑀺 𑀯𑀻𑀣𑀺𑀲𑀗𑁆𑀕𑀳𑀸𑀥𑀺𑀓𑀸𑀭𑁂.

𑀅𑀧𑁆𑀧𑀦𑀸𑀚𑀯𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑁆𑀧𑀦𑀸𑀚𑀯𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑀯𑀡𑁆𑀡𑀦𑀸

𑁨𑁫. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀧𑀺.

𑁨𑁬. 𑀇𑀝𑁆𑀞𑁂𑀢𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑁂. 𑀅𑀢𑀺𑀇𑀝𑁆𑀞𑀸𑀭𑀫𑁆𑀫𑀡𑀜𑁆𑀳𑀺 𑀯𑀺𑀲𑀼𑀁 𑀯𑀓𑁆𑀔𑀢𑀺. 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀸𑀦𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯𑀸𑀢𑀺 𑀆𑀳 ‘‘𑀅𑀢𑀺𑀇𑀝𑁆𑀞𑁂 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑁂𑀯𑀸’’𑀢𑀺. 𑀯𑀺𑀧𑀸𑀓𑀲𑁆𑀲 𑀳𑀺 𑀓𑀫𑁆𑀫𑀸𑀦𑀼𑀪𑀸𑀯𑀢𑁄 𑀧𑀯𑀢𑁆𑀢𑀫𑀸𑀦𑀲𑁆𑀲 𑀆𑀤𑀸𑀲𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀦𑀺𑀩𑁆𑀩𑀺𑀓𑀧𑁆𑀧𑀢𑀸𑀬 𑀧𑀓𑀧𑁆𑀧𑁂𑀢𑁆𑀯𑀸 𑀕𑀳𑀡𑀸𑀪𑀸𑀯𑀢𑁄 𑀬𑀣𑀸𑀭𑀫𑁆𑀫𑀡𑀫𑁂𑀯 𑀯𑁂𑀤𑀦𑀸𑀬𑁄𑀕𑁄 𑀳𑁄𑀢𑀺, 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀦 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑁂𑀲𑀼 𑀲𑀦𑁆𑀢𑀸𑀦𑁂𑀲𑀼 𑀧𑀯𑀢𑁆𑀢𑀺𑀬𑀸 𑀅𑀢𑀺𑀇𑀝𑁆𑀞𑁂𑀧𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑀸𑀓𑀸𑀭𑀢𑁄, 𑀅𑀦𑀺𑀝𑁆𑀞𑁂𑀧𑀺 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀓𑀸𑀭𑀢𑁄 𑀕𑀳𑀡𑀁 𑀳𑁄𑀢𑀺. 𑀢𑀣𑀸 𑀳𑀺 𑀅𑀲𑁆𑀲𑀤𑁆𑀥𑀸𑀤𑀻𑀦𑀁 𑀩𑀼𑀤𑁆𑀥𑀸𑀤𑀻𑀲𑀼 𑀅𑀢𑀺𑀇𑀝𑁆𑀞𑀸𑀭𑀫𑁆𑀫𑀡𑁂𑀲𑀼𑀧𑀺 𑀉𑀧𑁂𑀓𑁆𑀔𑀸𑀚𑀯𑀦𑀁 𑀳𑁄𑀢𑀺, 𑀢𑀺𑀢𑁆𑀣𑀺𑀬𑀸𑀤𑀻𑀦𑀜𑁆𑀘 𑀤𑁄𑀫𑀦𑀲𑁆𑀲𑀚𑀯𑀦𑀁, 𑀕𑀫𑁆𑀪𑀻𑀭𑀧𑀓𑀢𑀺𑀓𑀸𑀤𑀻𑀦𑀜𑁆𑀘 𑀧𑀝𑀺𑀓𑁆𑀓𑀽𑀮𑀸𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸𑀚𑀯𑀦𑀁, 𑀲𑀼𑀦𑀔𑀸𑀤𑀻𑀦𑀜𑁆𑀘 𑀢𑀢𑁆𑀣 𑀲𑁄𑀫𑀦𑀲𑁆𑀲𑀚𑀯𑀦𑀁, 𑀧𑀼𑀭𑀺𑀫𑀧𑀘𑁆𑀙𑀸𑀪𑀸𑀕𑀧𑁆𑀧𑀯𑀢𑁆𑀢𑀸𑀦𑀺 𑀧𑀦 𑀯𑀺𑀧𑀸𑀓𑀸𑀦𑀺 𑀬𑀣𑀸𑀯𑀢𑁆𑀣𑀼𑀓𑀸𑀦𑁂𑀯. 𑀅𑀧𑀺𑀘 𑀅𑀲𑀼𑀘𑀺𑀤𑀲𑁆𑀲𑀦𑁂 𑀲𑀼𑀫𑀦𑀸𑀬𑀫𑀸𑀦𑀸𑀦𑀁 𑀲𑀼𑀦𑀔𑀸𑀤𑀻𑀦𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀦 𑀅𑀢𑀺𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀧𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀪𑀸𑀯𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀓𑀣𑀺𑀢𑀫𑁂𑀯.

𑁨𑁭. 𑀢𑀢𑁆𑀣𑀸𑀧𑀻𑀢𑀺 𑀢𑀤𑀸𑀭𑀫𑁆𑀫𑀡𑁂𑀲𑀼𑀧𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀚𑀯𑀦𑀸𑀯𑀲𑀸𑀦𑁂𑀢𑀺 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀲𑀼𑀔𑀲𑀳𑀕𑀢𑀓𑀺𑀭𑀺𑀬𑀧𑀜𑁆𑀘𑀓𑀸𑀯𑀲𑀸𑀦𑁂. 𑀔𑀻𑀡𑀸𑀲𑀯𑀸𑀦𑀁 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸𑀪𑀸𑀯𑁂𑀦 𑀓𑀺𑀭𑀺𑀬𑀚𑀯𑀦𑀸𑀦𑀺𑀧𑀺 𑀬𑀣𑀸𑀭𑀫𑁆𑀫𑀡𑀫𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀚𑀯𑀦𑀸𑀯𑀲𑀸𑀦𑁂’’𑀢𑁆𑀬𑀸𑀤𑀺. 𑀓𑁂𑀘𑀺 𑀧𑀦 𑀆𑀘𑀭𑀺𑀬𑀸 ‘‘𑀧𑀝𑁆𑀞𑀸𑀦𑁂 (𑀥. 𑀲. 𑀫𑀽𑀮𑀝𑀻. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀯𑀡𑁆𑀡𑀦𑀸) ‘𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’𑀢𑀺 (𑀧𑀝𑁆𑀞𑀸. 𑁩.𑁧.𑁯𑁮) 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁂𑀯𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀦𑁆𑀢𑀺 𑀦𑀢𑁆𑀣𑀺 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀬𑀤𑀺 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀭𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀁 𑀯𑀼𑀘𑁆𑀘𑁂𑀬𑁆𑀬. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀯𑁄𑀝𑁆𑀞𑀩𑁆𑀩𑀦𑀸𑀦𑀦𑁆𑀢𑀭𑀫𑁆𑀧𑀺 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀦 𑀯𑀼𑀢𑁆𑀢𑀁, 𑀦 𑀧𑀦 𑀅𑀮𑀩𑁆𑀪𑀦𑀢𑁄. 𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀳𑀺 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀓𑀢𑁆𑀣𑀘𑀺 𑀅𑀯𑀘𑀦𑀁 𑀤𑀺𑀲𑁆𑀲𑀢𑀺, 𑀬𑀣𑀸 𑀢𑀁 𑀥𑀫𑁆𑀫𑀲𑀗𑁆𑀕𑀳𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀳𑀤𑀬𑀯𑀢𑁆𑀣𑀼 𑀤𑁂𑀲𑀦𑀸𑀪𑁂𑀤𑀧𑀭𑀺𑀳𑀸𑀭𑀢𑁆𑀣𑀁 𑀦 𑀯𑀼𑀢𑁆𑀢𑀦𑁆𑀢𑀺.

𑁨𑁮. 𑀤𑁄𑀫𑀦𑀲𑁆𑀲…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯 𑀪𑀯𑀦𑁆𑀢𑀺, 𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸. 𑀢𑁂𑀦𑁂𑀯 𑀳𑀺 𑀧𑀝𑁆𑀞𑀸𑀦𑁂 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀁, 𑀢𑀤𑀦𑀦𑁆𑀢𑀭𑀜𑁆𑀘 𑀤𑁄𑀫𑀦𑀲𑁆𑀲𑀁 𑀅𑀦𑀼𑀤𑁆𑀥𑀝𑀁. 𑀢𑀣𑀸 𑀳𑀺 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑁆𑀬𑀸𑀤𑀺𑀦𑀸 (𑀧𑀝𑁆𑀞𑀸. 𑁧.𑁨.𑁪𑁫) 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀸𑀦𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀯𑀸𑀭𑁂𑀲𑀼 𑀯𑀼𑀢𑁆𑀢𑀸, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀓𑀸 𑀧𑀦 𑀲𑀫𑀸𑀦𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀇𑀢𑀭𑀯𑁂𑀤𑀦𑀸𑀤𑁆𑀯𑀬𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀢𑀻𑀲𑀼 𑀯𑀸𑀭𑁂𑀲𑀽𑀢𑀺 𑀏𑀯𑀁 𑀯𑁂𑀤𑀦𑀸𑀢𑁆𑀢𑀺𑀓𑁂 𑀲𑀢𑁆𑀢𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑀯𑀸𑀭𑀸 𑀯𑀼𑀢𑁆𑀢𑀸. 𑀬𑀤𑀺 𑀘 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀁, 𑀲𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀯𑀸 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀯𑀲𑁂𑀦 𑀤𑁆𑀯𑁂 𑀯𑀸𑀭𑁂 𑀯𑀟𑁆𑀠𑁂𑀢𑁆𑀯𑀸 𑀦𑀯 𑀯𑀸𑀭𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀦 𑀧𑀦𑁂𑀯𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀦 𑀢𑁂𑀲𑀁 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀏𑀢𑁆𑀣 𑀘 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀚𑀯𑀦𑀸𑀯𑀲𑀸𑀦𑁂’’𑀢𑁆𑀬𑀸𑀤𑀺𑀦𑀸 𑀅𑀬𑀫𑁆𑀧𑀺 𑀦𑀺𑀬𑀫𑁄 𑀅𑀦𑀼𑀜𑁆𑀜𑀸𑀢𑁄 𑁋

‘‘𑀧𑀭𑀺𑀢𑁆𑀢𑀓𑀼𑀲𑀮𑀸𑀤𑁄𑀲-𑀧𑀸𑀧𑀲𑀸𑀢𑀓𑁆𑀭𑀺𑀬𑀸𑀚𑀯𑀸;

𑀧𑀜𑁆𑀘𑀲𑁆𑀯𑁂𑀓𑀁 𑀢𑀤𑀸𑀮𑀫𑁆𑀩𑀁, 𑀲𑀼𑀔𑀺𑀢𑁂𑀲𑀼 𑀬𑀣𑀸𑀭𑀳𑀁.

‘‘𑀧𑀸𑀧𑀸𑀓𑀸𑀫𑀲𑀼𑀪𑀸 𑀘𑁂𑀯, 𑀲𑁄𑀧𑁂𑀓𑁆𑀔𑀸 𑀘 𑀓𑁆𑀭𑀺𑀬𑀸𑀚𑀯𑀸;

𑀲𑁄𑀧𑁂𑀓𑁆𑀔𑁂𑀲𑀼 𑀢𑀤𑀸𑀮𑀫𑁆𑀩𑀁, 𑀙𑀲𑁆𑀯𑁂𑀓𑀫𑀦𑀼𑀭𑀽𑀧𑀢𑁄’’𑀢𑀺.

𑀅𑀬𑀜𑁆𑀳𑀺 𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁄 𑀅𑀩𑁆𑀬𑀪𑀺𑀘𑀸𑀭𑀻. ‘‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀤𑀸𑀭𑀫𑁆𑀫𑀡’’𑀦𑁆𑀢𑁆𑀬𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀧𑀦 𑀅𑀦𑁂𑀓𑀦𑁆𑀢𑀺𑀓𑁄. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀅𑀓𑀼𑀲𑀮𑀚𑀯𑀦𑁂𑀲𑀼 𑀧𑀭𑀺𑀘𑀺𑀢𑀲𑁆𑀲 𑀓𑀤𑀸𑀘𑀺 𑀓𑀼𑀲𑀮𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀼, 𑀓𑀼𑀲𑀮𑀚𑀯𑀦𑁂𑀲𑀼 𑀯𑀸 𑀧𑀭𑀺𑀘𑀺𑀢𑀲𑁆𑀲 𑀓𑀤𑀸𑀘𑀺 𑀅𑀓𑀼𑀲𑀮𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀼 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀧𑀯𑀢𑁆𑀢𑀧𑀭𑀺𑀘𑀬𑁂𑀦 𑀢𑀺𑀳𑁂𑀢𑀼𑀓𑀚𑀯𑀦𑀢𑁄𑀧𑀺 𑀧𑀭𑀁 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀣𑀸 𑀓𑀼𑀲𑀮𑀸𑀦𑀦𑁆𑀢𑀭𑀁 𑀧𑀯𑀢𑁆𑀢𑀧𑀭𑀺𑀘𑀬𑁂𑀦 𑀅𑀓𑀼𑀲𑀮𑀚𑀯𑀦𑀢𑁄 𑀧𑀭𑀁 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁆𑀧𑀺, 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀢𑁄 𑀧𑀦 𑀅𑀜𑁆𑀜𑀓𑀫𑁆𑀫𑁂𑀦 𑀢𑀤𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑀧𑀝𑁆𑀞𑀸𑀦𑁂 ‘‘𑀅𑀳𑁂𑀢𑀼𑀓𑁂 𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀺, 𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀅𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀲𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁩.𑁧.𑁯𑁮).

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑁄𑀫𑀦𑀲𑁆𑀲𑀚𑀯𑀦𑀸𑀯𑀲𑀸𑀦𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀤𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀯𑀲𑀸𑀦𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑀸’𑀢𑀺 𑀇𑀫𑀺𑀦𑀸𑀯 𑀪𑀯𑀗𑁆𑀕𑀧𑀸𑀢𑀸𑀪𑀸𑀯𑁄 𑀤𑀻𑀧𑀺𑀢𑁄𑀯 𑀳𑁄𑀢𑀺 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀸𑀪𑀸𑀯𑀢𑁄𑀢𑀺 𑀢𑀁 𑀅𑀯𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑀫𑁂𑀯 𑀧𑀭𑀺𑀓𑀧𑁆𑀧𑁂𑀦𑁆𑀢𑁄 𑀆𑀳 ‘‘𑀬𑀤𑀺 𑀢𑀤𑀸𑀭𑀫𑁆𑀫𑀡𑀲𑀫𑁆𑀪𑀯𑁄 𑀦𑀢𑁆𑀣𑀻’’𑀢𑀺. 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀢𑀺𑀢𑁆𑀣𑀺𑀬𑀸𑀤𑀺𑀦𑁄 𑀩𑀼𑀤𑁆𑀥𑀸𑀤𑀺𑀅𑀢𑀺𑀇𑀝𑁆𑀞𑀸𑀭𑀫𑁆𑀫𑀡𑁂 𑀧𑀺 𑀧𑀝𑀺𑀳𑀢𑀘𑀺𑀢𑁆𑀢𑀲𑁆𑀲 𑀤𑁄𑀫𑀦𑀲𑁆𑀲𑀚𑀯𑀦𑁂 𑀚𑀯𑀺𑀢𑁂 𑀯𑀼𑀢𑁆𑀢𑀦𑀬𑁂𑀦 𑀲𑁄𑀫𑀦𑀲𑁆𑀲𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀢𑀺𑀇𑀝𑁆𑀞𑀸𑀭𑀫𑁆𑀫𑀡𑁂 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀓𑁂𑀦𑀘𑀺 𑀯𑀸 𑀅𑀲𑀧𑁆𑀧𑀸𑀬𑁂𑀦 𑀧𑀭𑀺𑀳𑀻𑀦𑀮𑁄𑀓𑀺𑀬𑀚𑁆𑀛𑀸𑀦𑀁 𑀆𑀭𑀩𑁆𑀪 ‘‘𑀧𑀡𑀻𑀢𑀥𑀫𑁆𑀫𑁄 𑀫𑁂 𑀦𑀝𑁆𑀞𑁄’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀚𑀦𑁂𑀦𑁆𑀢𑀲𑁆𑀲 𑀤𑁄𑀫𑀦𑀲𑁆𑀲𑀚𑀯𑀦𑁂 𑀲𑀢𑀺 𑀅𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑀢𑁄 𑀬𑀤𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀭𑀺𑀘𑀺𑀢𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀧𑀭𑀺𑀘𑀺𑀢𑀁, 𑀢𑀲𑁆𑀫𑀺𑀁 𑀪𑀯𑁂 𑀬𑁂𑀪𑀼𑀬𑁆𑀬𑁂𑀦 𑀕𑀳𑀺𑀢𑀧𑀼𑀩𑁆𑀩𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀸𑀯𑀚𑁆𑀚𑀦𑀫𑁆𑀧𑀺. 𑀬𑀣𑀸 𑀢𑀁 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀨𑀮𑀘𑀺𑀢𑁆𑀢𑀦𑁆𑀢𑁆𑀬𑀥𑀺𑀧𑁆𑀧𑀸𑀬𑁄. 𑀬𑀣𑀸𑀳𑀼 𑁋

‘‘𑀦𑀺𑀭𑀸𑀯𑀚𑁆𑀚𑀁 𑀓𑀣𑀁 𑀘𑀺𑀢𑁆𑀢𑀁, 𑀳𑁄𑀢𑀺 𑀦𑁂𑀢𑀜𑁆𑀳𑀺 𑀲𑀫𑁆𑀫𑀢𑀁;

𑀦𑀺𑀬𑀫𑁄 𑀦 𑀯𑀺𑀦𑀸𑀯𑀚𑁆𑀚𑀁, 𑀦𑀺𑀭𑁄𑀥𑀸 𑀨𑀮𑀤𑀲𑁆𑀲𑀦𑀸’’𑀢𑀺.

𑀓𑁂𑀦 𑀧𑀦 𑀓𑀺𑀘𑁆𑀘𑁂𑀦 𑀇𑀤𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻𑀢𑀺? 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑁂𑀦 𑀢𑀸𑀯 𑀦 𑀧𑀯𑀢𑁆𑀢𑀢𑀺 𑀚𑀯𑀦𑀸𑀭𑀫𑁆𑀫𑀡𑀲𑁆𑀲 𑀅𑀕𑁆𑀕𑀳𑀡𑀢𑁄, 𑀦𑀸𑀧𑀺 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑁂𑀦 𑀬𑀣𑀸𑀲𑀫𑁆𑀧𑀝𑀺𑀘𑁆𑀙𑀺𑀢𑀲𑁆𑀲 𑀲𑀦𑁆𑀢𑀻𑀭𑀡𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀧𑀝𑀺𑀲𑀦𑁆𑀥𑀺𑀘𑀼𑀢𑀻𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀧𑀸𑀭𑀺𑀲𑁂𑀲𑀢𑁄 𑀧𑀦 𑀪𑀯𑀲𑁆𑀲 𑀅𑀗𑁆𑀕𑀪𑀸𑀯𑀢𑁄 𑀪𑀯𑀗𑁆𑀕𑀓𑀺𑀘𑁆𑀘𑁂𑀦𑀸𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑀧𑀺 (𑀥. 𑀲. 𑀅𑀦𑀼𑀝𑀻. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀯𑀡𑁆𑀡𑀦𑀸) 𑀳𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀯. 𑀬𑀁 𑀧𑀦 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁 𑀥𑀫𑁆𑀫𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀲𑀫𑀸𑀦𑀢𑀁 𑀯𑀓𑁆𑀔𑀢𑀺, 𑀢𑀁 𑀬𑁂𑀪𑀼𑀬𑁆𑀬𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀇𑀤𑀫𑁂𑀓𑀁 𑀞𑀸𑀦𑀁 𑀯𑀚𑁆𑀚𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁 𑀯𑀺𑀲𑀤𑀺𑀲𑀢𑀸 𑀅𑀢𑁆𑀣𑀺. 𑀢𑀫𑀦𑀦𑁆𑀢𑀭𑀺𑀢𑁆𑀯𑀸𑀢𑀺 𑀢𑀁 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀅𑀩𑁆𑀬𑀯𑀳𑀺𑀢𑀁 𑀓𑀢𑁆𑀯𑀸, 𑀢𑀤𑀦𑀦𑁆𑀢𑀭𑀦𑁆𑀢𑁆𑀬𑀢𑁆𑀣𑁄.

𑁨𑁯. 𑀓𑀸𑀫𑀸𑀯𑀘𑀭…𑀧𑁂… 𑀇𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀓𑀸𑀫𑀸𑀯𑀘𑀭𑀚𑀯𑀦𑀸𑀯𑀲𑀸𑀦𑁂𑀬𑁂𑀯 𑀢𑀤𑀸𑀭𑀫𑁆𑀫𑀡𑀁 𑀇𑀘𑁆𑀙𑀦𑁆𑀢𑀺 𑀓𑀸𑀫𑀢𑀡𑁆𑀳𑀸𑀦𑀺𑀤𑀸𑀦𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀦 𑀳𑀺 𑀢𑀁 𑀓𑀸𑀫𑀢𑀡𑁆𑀳𑀸𑀳𑁂𑀢𑀼𑀓𑁂𑀦 𑀓𑀫𑁆𑀫𑀼𑀦𑀸 𑀚𑀦𑀺𑀢𑀁 𑀅𑀢𑀁𑀲𑀪𑀸𑀯𑀲𑁆𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀚𑀯𑀦𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀁𑀓𑀸𑀭𑀡𑀸? 𑀅𑀚𑀦𑀓𑀢𑁆𑀢𑀸, 𑀚𑀦𑀓𑀲𑀫𑀸𑀦𑀢𑁆𑀢𑀸𑀪𑀸𑀯𑀢𑁄 𑀘. 𑀬𑀣𑀸 𑀳𑀺 𑀕𑁂𑀳𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄 𑀩𑀸𑀮𑀓𑁄 𑀚𑀦𑀓𑀁, 𑀢𑀁𑀲𑀤𑀺𑀲𑀁 𑀯𑀸 𑀅𑀗𑁆𑀕𑀼𑀮𑀺𑀬𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀢𑀺, 𑀦𑀸𑀜𑁆𑀜𑀁 𑀭𑀸𑀚𑀧𑀼𑀭𑀺𑀲𑀸𑀤𑀺𑀁, 𑀏𑀯𑀁 𑀪𑀯𑀗𑁆𑀕𑀯𑀺𑀲𑀬𑀢𑁄 𑀅𑀜𑁆𑀜𑀢𑁆𑀣 𑀧𑀯𑀢𑁆𑀢𑀫𑀸𑀦𑀁 𑀢𑀤𑀸𑀭𑀫𑁆𑀫𑀡𑀁 𑀚𑀦𑀓𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀁, 𑀢𑀁𑀲𑀤𑀺𑀲𑀁 𑀯𑀸 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀚𑀯𑀦𑀁 𑀅𑀦𑀼𑀩𑀦𑁆𑀥𑀢𑀺, 𑀦 𑀧𑀦 𑀢𑀲𑁆𑀲 𑀯𑀺𑀲𑀤𑀺𑀲𑀸𑀦𑀺 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑀸𑀦𑀺. 𑀢𑀣𑀸 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀇𑀘𑁆𑀙𑀦𑁆𑀢𑀺, 𑀦 𑀩𑁆𑀭𑀳𑁆𑀫𑀸𑀦𑀁 𑀢𑀤𑀸𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀲𑁆𑀲 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀩𑀻𑀚𑀲𑁆𑀲𑀸𑀪𑀸𑀯𑀢𑁄. 𑀢𑀣𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑁆𑀯𑁂𑀯 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀇𑀘𑁆𑀙𑀦𑁆𑀢𑀺. 𑀦 𑀇𑀢𑀭𑁂𑀲𑀼 𑀅𑀧𑀭𑀺𑀘𑀺𑀢𑀢𑁆𑀢𑀸. 𑀬𑀣𑀸 𑀳𑀺 𑀲𑁄 𑀩𑀸𑀮𑀓𑁄 𑀚𑀦𑀓𑀁, 𑀢𑀁𑀲𑀤𑀺𑀲𑀁 𑀯𑀸 𑀅𑀦𑀼𑀕𑀘𑁆𑀙𑀦𑁆𑀢𑁄𑀧𑀺 𑀅𑀭𑀜𑁆𑀜𑀸𑀤𑀺𑀅𑀧𑀭𑀺𑀘𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀁 𑀅𑀦𑀦𑀼𑀩𑀦𑁆𑀥𑀺𑀢𑁆𑀯𑀸 𑀧𑀫𑀼𑀔𑀗𑁆𑀕𑀡𑀸𑀤𑀺𑀫𑁆𑀳𑀺 𑀧𑀭𑀺𑀘𑀺𑀢𑀝𑁆𑀞𑀸𑀦𑁂𑀬𑁂𑀯 𑀅𑀦𑀼𑀩𑀦𑁆𑀥𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀭𑀽𑀧𑀸𑀯𑀘𑀭𑀸𑀤𑀺𑀅𑀧𑀭𑀺𑀘𑀺𑀢𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀁 𑀦𑀸𑀦𑀼𑀩𑀦𑁆𑀥𑀢𑀺. 𑀅𑀧𑀺𑀘 𑀓𑀸𑀫𑀢𑀡𑁆𑀳𑀸𑀬𑀢𑁆𑀢𑀓𑀫𑁆𑀫𑀚𑀦𑀺𑀢𑀢𑁆𑀢𑀸𑀧𑀺 𑀏𑀢𑀁 𑀓𑀸𑀫𑀢𑀡𑁆𑀳𑀸𑀭𑀫𑁆𑀫𑀡𑁂𑀲𑀼 𑀧𑀭𑀺𑀢𑁆𑀢𑀥𑀫𑁆𑀫𑁂𑀲𑁆𑀯𑁂𑀯 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀚𑀦𑀓𑀁 𑀢𑀁𑀲𑀫𑀸𑀦𑀁 𑀯𑀸, 𑀚𑀯𑀦𑀁 𑀅𑀦𑀼𑀩𑀦𑁆𑀥𑀢𑀺;

𑀦 𑀢𑀼 𑀅𑀜𑁆𑀜𑀁 𑀢𑀤𑀸𑀮𑀫𑁆𑀩𑀁, 𑀩𑀸𑀮𑀤𑀸𑀭𑀓𑀮𑀻𑀮𑀬𑀸.

‘‘𑀩𑀻𑀚𑀲𑁆𑀲𑀸𑀪𑀸𑀯𑀢𑁄 𑀦𑀢𑁆𑀣𑀺, 𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀇𑀫𑀲𑁆𑀲 𑀳𑀺;

𑀧𑀝𑀺𑀲𑀦𑁆𑀥𑀺𑀫𑀦𑁄 𑀩𑀻𑀚𑀁, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁.

‘‘𑀞𑀸𑀦𑁂 𑀧𑀭𑀺𑀘𑀺𑀢𑁂𑀬𑁂𑀯, 𑀢𑀁 𑀇𑀤𑀁 𑀩𑀸𑀮𑀓𑁄 𑀯𑀺𑀬;

𑀅𑀦𑀼𑀬𑀸𑀢𑀻𑀢𑀺 𑀦𑀸𑀜𑁆𑀜𑀢𑁆𑀣, 𑀳𑁄𑀢𑀺 𑀢𑀡𑁆𑀳𑀸𑀯𑀲𑁂𑀦 𑀯𑀸’’𑀢𑀺.

𑀦𑀦𑀼 𑀘 ‘‘𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀩𑀻𑀚𑀸𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀫𑁆𑀧𑀺 𑀅𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀇𑀦𑁆𑀤𑁆𑀭𑀺𑀬𑀧𑁆𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀢𑁄, 𑀤𑁆𑀯𑀸𑀭𑀯𑀻𑀣𑀺𑀪𑁂𑀤𑁂 𑀘𑀺𑀢𑁆𑀢𑀦𑀺𑀬𑀫𑀢𑁄 𑀘.

𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀯𑀦𑀦𑀺𑀬𑀫𑀯𑀡𑁆𑀡𑀦𑀸

𑁩𑁨. 𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀦𑁆𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑀸𑀬 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀫𑀦𑁆𑀤𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀺𑀬𑀁. 𑀫𑀭𑀡𑀓𑀸𑀮𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀼𑀘𑁆𑀙𑀸𑀓𑀸𑀮𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁩𑁩. 𑀪𑀕𑀯𑀢𑁄…𑀧𑁂… 𑀯𑀤𑀦𑁆𑀢𑀻𑀢𑀺 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑀸𑀤𑀻𑀲𑀼 𑀉𑀤𑀓𑀓𑁆𑀔𑀦𑁆𑀥𑀅𑀕𑁆𑀕𑀺𑀓𑁆𑀔𑀦𑁆𑀥𑀧𑁆𑀧𑀯𑀢𑁆𑀢𑀦𑀸𑀤𑀺𑀅𑀢𑁆𑀣𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀛𑀸𑀦𑀥𑀫𑁆𑀫𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀆𑀯𑀚𑁆𑀚𑀦𑀯𑀲𑀺𑀢𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀆𑀯𑀚𑁆𑀚𑀦𑀢𑀧𑁆𑀧𑀭𑁄𑀯 𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑁄 𑀳𑁄𑀢𑀻𑀢𑀺 𑀬𑀣𑀸𑀯𑀚𑁆𑀚𑀺𑀢𑀛𑀸𑀦𑀗𑁆𑀕𑀸𑀭𑀫𑁆𑀫𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀧𑀜𑁆𑀘𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀤𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁭𑁮) 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. ‘‘𑀪𑀕𑀯𑀢𑁄’’𑀢𑀺 𑀘 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀅𑀜𑁆𑀜𑁂𑀲𑀫𑁆𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀦𑀁 𑀏𑀯𑀭𑀽𑀧𑁂 𑀅𑀘𑁆𑀘𑀸𑀬𑀺𑀓𑀓𑀸𑀮𑁂 𑀅𑀧𑀭𑀺𑀧𑀼𑀡𑁆𑀡𑀚𑀯𑀦𑀸𑀦𑀁 𑀧𑀯𑀢𑁆𑀢𑀦𑀢𑁄. 𑀢𑀣𑀸 𑀘 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀬𑀜𑁆𑀘 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀯𑀲𑀺𑀢𑀸 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑁂 𑀅𑀜𑁆𑀜𑁂𑀲𑀁 𑀯𑀸 𑀏𑀯𑀭𑀽𑀧𑁂 𑀓𑀸𑀮𑁂’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁭𑁮). ‘‘𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸’’𑀢𑀺 𑀘 𑀧𑀦𑁂𑀢𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀯𑀺𑀲𑀼𑀤𑁆𑀥𑀺. 𑀫𑀳𑀸. 𑁧.𑁭𑁮) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀪𑀕𑀯𑀢𑁄 𑀘𑀢𑁆𑀢𑀸𑀭𑀺, 𑀅𑀜𑁆𑀜𑁂𑀲𑀁 𑀧𑀜𑁆𑀘𑀧𑀻𑀢𑀺 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺.

𑁩𑁪. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀆𑀤𑀺𑀢𑁄 𑀓𑀢𑀬𑁄𑀕𑀓𑀫𑁆𑀫𑀲𑁆𑀲. 𑀧𑀞𑀫𑀁 𑀦𑀺𑀩𑁆𑀩𑀢𑁆𑀢𑀸 𑀅𑀧𑁆𑀧𑀦𑀸 𑀧𑀞𑀫𑀓𑀧𑁆𑀧𑀦𑀸. 𑀅𑀪𑀺𑀜𑁆𑀜𑀸𑀚𑀯𑀦𑀸𑀦𑀫𑁆𑀧𑀺 ‘‘𑀧𑀞𑀫𑀓𑀧𑁆𑀧𑀦𑀸𑀬𑀸’’𑀢𑀺 𑀅𑀥𑀺𑀓𑀸𑀭𑁄 𑀲𑀺𑀬𑀸𑀢𑀺 𑀆𑀳 ‘‘𑀲𑀩𑁆𑀩𑀤𑀸𑀧𑀻’’𑀢𑀺, 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑀸𑀮𑁂, 𑀘𑀺𑀡𑁆𑀡𑀯𑀲𑀻𑀓𑀸𑀮𑁂 𑀘 𑀧𑀜𑁆𑀘𑀸𑀪𑀺𑀜𑁆𑀜𑀸𑀚𑀯𑀦𑀸𑀦𑀺 𑀏𑀓𑀯𑀸𑀭𑀫𑁂𑀯 𑀚𑀯𑀦𑁆𑀢𑀻𑀢𑁆𑀬𑀢𑁆𑀣𑁄.

𑁩𑁫. 𑀫𑀕𑁆𑀕𑀸𑀬𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀫𑀕𑁆𑀕𑀼𑀧𑁆𑀧𑀸𑀤𑀸. 𑀬𑀣𑀸𑀭𑀳𑀦𑁆𑀢𑀺 𑀧𑀜𑁆𑀘𑀫𑀁 𑀯𑀸 𑀘𑀢𑀼𑀢𑁆𑀣𑀁 𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀸𑀦𑀼𑀭𑀽𑀧𑀁. 𑀲𑀢𑁆𑀢𑀚𑀯𑀦𑀧𑀭𑀫𑀢𑁆𑀢𑀸 𑀳𑀺 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀸 𑀘𑀢𑀼𑀢𑁆𑀣𑀁 𑀉𑀧𑁆𑀧𑀦𑁆𑀦𑀫𑀕𑁆𑀕𑀢𑁄 𑀧𑀭𑀁 𑀢𑀻𑀢𑀺 𑀨𑀮𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘𑀫𑀁 𑀉𑀧𑁆𑀧𑀦𑁆𑀦𑀫𑀕𑁆𑀕𑀢𑁄 𑀧𑀭𑀁 𑀤𑁆𑀯𑁂 𑀯𑀸 𑀳𑁄𑀦𑁆𑀢𑀺.

𑁩𑁬. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀸𑀮𑁂𑀢𑀺 𑀦𑀺𑀭𑁄𑀥𑀲𑁆𑀲 𑀧𑀼𑀩𑁆𑀩𑀪𑀸𑀕𑁂. 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑀯𑀦𑀦𑁆𑀢𑀺 𑀓𑀼𑀲𑀮𑀓𑀺𑀭𑀺𑀬𑀸𑀦𑀁 𑀅𑀜𑁆𑀜𑀢𑀭𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀚𑀯𑀦𑀁. 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸𑀬𑁂𑀯 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀫𑀺𑀦𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀨𑀮𑀁 𑀯𑀸’’𑀢𑀺. 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀘𑁂𑀢𑁆𑀣 𑀤𑀝𑁆𑀞𑀩𑁆𑀩𑁄 ‘‘𑀅𑀦𑀸𑀕𑀸𑀫𑀺𑀨𑀮𑁂 𑀯𑀸 𑀅𑀭𑀳𑀢𑁆𑀢𑀨𑀮𑁂 𑀯𑀸’’𑀢𑀺. 𑀢𑁂𑀦𑀸𑀳 ‘‘𑀦𑀺𑀭𑀼𑀤𑁆𑀥𑁂’’𑀢𑀺. 𑀬𑀣𑀸𑀭𑀳𑀦𑁆𑀢𑀺 𑀢𑀁𑀢𑀁𑀧𑀼𑀕𑁆𑀕𑀮𑀸𑀦𑀼𑀭𑀽𑀧𑀁.

𑁩𑁮. 𑀲𑀩𑁆𑀩𑀢𑁆𑀣𑀸𑀧𑀺 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀦𑁆𑀢𑀺 𑀲𑀓𑀮𑀸𑀬𑀧𑀺 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁, 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀜𑁆𑀘.

𑁩𑁯. 𑀧𑀭𑀺𑀢𑁆𑀢𑀸𑀦𑀺 𑀚𑀯𑀦𑀸𑀦𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀢𑀸𑀦𑀺 𑀉𑀓𑁆𑀓𑀁𑀲𑀓𑁄𑀝𑀺𑀬𑀸. 𑀫𑀕𑁆𑀕𑀸𑀪𑀺𑀜𑁆𑀜𑀸 𑀧𑀦 𑀲𑀓𑀺𑀁 𑀏𑀓𑀯𑀸𑀭𑀫𑁂𑀯 𑀫𑀢𑀸. 𑀅𑀯𑀲𑁂𑀲𑀸𑀦𑀺 𑀅𑀪𑀺𑀜𑁆𑀜𑀸𑀫𑀕𑁆𑀕𑀯𑀚𑁆𑀚𑀺𑀢𑀸𑀦𑀺 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑀸𑀦𑀺 𑀩𑀳𑀽𑀦𑀺𑀧𑀺 𑀮𑀩𑁆𑀪𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀅𑀳𑁄𑀭𑀢𑁆𑀢𑀫𑁆𑀧𑀺 𑀧𑀯𑀢𑁆𑀢𑀦𑀢𑁄. 𑀅𑀧𑀺-𑀲𑀤𑁆𑀤𑁂𑀦 𑀮𑁄𑀓𑀺𑀬𑀚𑁆𑀛𑀸𑀦𑀸𑀦𑀺 𑀧𑀞𑀫𑀓𑀧𑁆𑀧𑀦𑀸𑀬𑀁, 𑀅𑀦𑁆𑀢𑀺𑀫𑀨𑀮𑀤𑁆𑀯𑀬𑀜𑁆𑀘 𑀦𑀺𑀭𑁄𑀥𑀸𑀦𑀦𑁆𑀢𑀭𑀁 𑀏𑀓𑀯𑀸𑀭𑀁, 𑀨𑀮𑀘𑀺𑀢𑁆𑀢𑀸𑀦𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺.

𑀚𑀯𑀦𑀦𑀺𑀬𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀪𑁂𑀤𑀯𑀡𑁆𑀡𑀦𑀸

𑁪𑁦. 𑀇𑀤𑀸𑀦𑀺 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀧𑀸𑀬𑀺𑀓𑀸𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀯𑀲𑁂𑀦 𑀅𑀝𑁆𑀞𑀯𑀺𑀥𑀸𑀦𑀁 𑀅𑀭𑀺𑀬𑀸𑀦𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀉𑀧𑁆𑀧𑀚𑁆𑀚𑀦𑀓𑀯𑀻𑀣𑀺𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀧𑀞𑀫𑀁 𑀢𑀸𑀯 𑀢𑁂𑀲𑀁 𑀯𑀚𑁆𑀚𑀺𑀢𑀩𑁆𑀩𑀘𑀺𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀼𑀳𑁂𑀢𑀼𑀓𑀸𑀦𑀫𑀳𑁂𑀢𑀼𑀓𑀸𑀦𑀜𑁆𑀘𑀸’’𑀢𑁆𑀬𑀸𑀤𑀺. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑀳𑀕𑀢𑀸𑀮𑁄𑀪𑀸𑀤𑁄𑀲𑀯𑀲𑁂𑀦 𑀤𑁆𑀯𑁂 𑀳𑁂𑀢𑀽 𑀇𑀫𑁂𑀲𑀦𑁆𑀢𑀺 𑀤𑁆𑀯𑀺𑀳𑁂𑀢𑀼𑀓𑀸. 𑀢𑀸𑀤𑀺𑀲𑀸𑀦𑀁 𑀳𑁂𑀢𑀽𑀦𑀁 𑀅𑀪𑀸𑀯𑀢𑁄 𑀅𑀳𑁂𑀢𑀼𑀓𑀸. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀧𑁆𑀧𑀦𑀸𑀚𑀯𑀦𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺 𑀯𑀺𑀧𑀸𑀓𑀸𑀯𑀭𑀡𑀲𑀩𑁆𑀪𑀸𑀯𑀢𑁄. 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑀺 ‘‘𑀯𑀺𑀧𑀸𑀓𑀸𑀯𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀦𑀸𑀚𑀯𑀦𑀸𑀪𑀸𑀯𑀢𑁄𑀬𑁂𑀯 𑀅𑀭𑀳𑀢𑁆𑀢𑀁 𑀦𑀢𑁆𑀣𑀻𑀢𑀺 𑀓𑀺𑀭𑀺𑀬𑀚𑀯𑀦𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺.

𑁪𑁧. ‘‘𑀲𑀳𑁂𑀢𑀼𑀓𑀁 (𑀧𑀝𑁆𑀞𑀸. 𑁩.𑁧.𑁧𑁦𑁨) 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀧𑀸𑀞𑀢𑁄 𑀅𑀳𑁂𑀢𑀼𑀓𑀸𑀦𑀫𑁆𑀧𑀺 𑀦𑀸𑀦𑀸𑀓𑀫𑁆𑀫𑁂𑀦 𑀤𑁆𑀯𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀲𑀫𑁆𑀪𑀯𑀢𑀺, 𑀤𑁆𑀯𑀺𑀳𑁂𑀢𑀼𑀓𑀸𑀦𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀫𑀽𑀮𑀲𑀦𑁆𑀥𑀺𑀬𑀸 𑀧𑀦 𑀚𑀴𑀪𑀸𑀯𑀢𑁄 𑀉𑀪𑀺𑀦𑁆𑀦𑀫𑁆𑀧𑀺 𑀦𑀢𑁆𑀣𑀺 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀆𑀳 ‘‘𑀢𑀣𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀦𑀺 𑀘𑀸’’𑀢𑀺. 𑀆𑀘𑀭𑀺𑀬𑀚𑁄𑀢𑀺𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀳𑁂𑀢𑀼𑀓𑀸𑀦𑀫𑁆𑀧𑀺 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀯𑀢𑁆𑀯𑀸 𑀇𑀥 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀪𑀸𑀯𑀯𑀘𑀦𑀲𑁆𑀲 𑀧𑀭𑀺𑀳𑀸𑀲𑀯𑀲𑁂𑀦 ‘‘𑀲𑁄 𑀏𑀯 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀬𑁄 𑀢𑀲𑁆𑀲 𑀓𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀧𑀭𑀺𑀳𑀸𑀲𑀯𑀲𑁂𑀦 𑀯𑀼𑀢𑁆𑀢𑀫𑁆𑀧𑀺 𑀆𑀘𑀭𑀺𑀬𑀁 𑀧𑀼𑀘𑁆𑀙𑀺𑀢𑁆𑀯𑀸𑀯 𑀯𑀺𑀚𑀸𑀦𑀦𑀢𑁆𑀣𑀁 𑀯𑀼𑀢𑁆𑀢𑀯𑀘𑀦𑀁 𑀯𑀺𑀬 𑀞𑀺𑀢𑀁. 𑀢𑀣𑀸 𑀳𑀺 𑀆𑀘𑀭𑀺𑀬𑁂𑀦𑁂𑀯𑁂𑀢𑁆𑀣 𑀓𑀸𑀭𑀡𑀁 𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑀁 𑁋

‘‘𑀜𑀸𑀡𑀧𑀸𑀓𑀸 𑀦 𑀯𑀢𑁆𑀢𑀦𑁆𑀢𑀺, 𑀚𑀴𑀢𑁆𑀢𑀸 𑀫𑀽𑀮𑀲𑀦𑁆𑀥𑀺𑀬𑀸’’𑀢𑀺; (𑀧𑀭𑀫. 𑀯𑀺. 𑁨𑁭𑁧);

𑀅𑀧𑀭𑁂 𑀧𑀦 ‘‘𑀬𑀣𑀸 𑀅𑀳𑁂𑀢𑀼𑀓𑀸𑀦𑀁 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀯𑀁 𑀤𑁆𑀯𑀺𑀳𑁂𑀢𑀼𑀓𑀸𑀦𑀁 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁆𑀧𑀻’’𑀢𑀺 𑀯𑀡𑁆𑀡𑁂𑀦𑁆𑀢𑀺, 𑀢𑁂𑀲𑀁 𑀫𑀢𑀸𑀦𑀼𑀭𑁄𑀥𑁂𑀦 𑀘 𑀇𑀥𑀸𑀧𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀧𑀝𑀺𑀓𑁆𑀔𑁂𑀧𑁄 𑀅𑀳𑁂𑀢𑀼𑀓𑁂𑀬𑁂𑀯 𑀲𑀦𑁆𑀥𑀸𑀬𑀸𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀧𑀦 𑀧𑀫𑀸𑀡𑀧𑀸𑀞𑀸𑀪𑀸𑀯𑀢𑁄 𑀆𑀘𑀭𑀺𑀬𑁂𑀦 𑀉𑀪𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀲𑁂𑀦 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀪𑀸𑀯𑁂 𑀓𑀸𑀭𑀡𑀁 𑀯𑀢𑁆𑀯𑀸 𑀲𑀫𑀓𑀫𑁂𑀯 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀢𑁂𑀲𑀁 𑀯𑀘𑀦𑀁 𑀯𑀻𑀫𑀁𑀲𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀳𑁂𑀢𑀼𑀓𑀸𑀧𑁂𑀓𑁆𑀔𑀸𑀬 𑀘𑁂𑀢𑁆𑀣 ‘‘𑀲𑀼𑀕𑀢𑀺𑀬’’𑀦𑁆𑀢𑀺 𑀯𑀘𑀦𑀁, 𑀢𑀁 𑀧𑀦 𑀅𑀢𑁆𑀣𑀢𑁄 𑀅𑀦𑀼𑀜𑁆𑀜𑀸𑀢𑀤𑁆𑀯𑀺𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀁 𑀢𑀢𑁆𑀣𑁂𑀯 𑀲𑀫𑁆𑀪𑀯𑀤𑀲𑁆𑀲𑀦𑀧𑀭𑀁. 𑀢𑁂𑀦𑀸𑀳 ‘‘𑀤𑀼𑀕𑁆𑀕𑀢𑀺𑀬𑀁 𑀧𑀦𑀸’’𑀢𑁆𑀬𑀸𑀤𑀺.

𑁪𑁩. 𑀢𑀺𑀳𑁂𑀢𑀼𑀓𑁂𑀲𑀽𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑀳𑀕𑀢𑀸𑀮𑁄𑀪𑀸𑀤𑁄𑀲𑀸𑀫𑁄𑀳𑀯𑀲𑁂𑀦 𑀢𑀺𑀳𑁂𑀢𑀼𑀓𑁂𑀲𑀼 𑀧𑀼𑀣𑀼𑀚𑁆𑀚𑀸𑀤𑀻𑀲𑀽 𑀦𑀯𑀯𑀺𑀥𑀧𑀼𑀕𑁆𑀕𑀮𑁂𑀲𑀼.

𑁪𑁫. 𑀤𑀺𑀝𑁆𑀞𑀻…𑀧𑁂… 𑀲𑁂𑀓𑁆𑀔𑀸𑀦𑀦𑁆𑀢𑀺 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀲𑀺𑀓𑁆𑀔𑀦𑀲𑀻𑀮𑀢𑀸𑀬 ‘‘𑀲𑁂𑀓𑁆𑀔𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀧𑀞𑀫𑀫𑀕𑁆𑀕𑁂𑀦𑁂𑀯 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀧𑀳𑀻𑀦𑀢𑁆𑀢𑀸 𑀢𑀁𑀲𑀳𑀕𑀢𑀚𑀯𑀦𑀸𑀦𑀺 𑀘𑁂𑀯 𑀘-𑀲𑀤𑁆𑀤𑁂𑀦 𑀆𑀓𑀟𑁆𑀠𑀺𑀢𑀸𑀦𑀺 𑀔𑀻𑀡𑀸𑀲𑀯𑀸𑀯𑁂𑀡𑀺𑀓𑀸𑀦𑀺 𑀓𑀺𑀭𑀺𑀬𑀚𑀯𑀦𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀺.

𑁪𑁬. 𑀧𑀝𑀺𑀖𑀚𑀯𑀦𑀸𑀦𑀺 𑀘𑀸𑀢𑀺 𑀤𑁄𑀫𑀦𑀲𑁆𑀲𑀚𑀯𑀦𑀸𑀦𑀺 𑀘𑁂𑀯 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀓𑀺𑀭𑀺𑀬𑀚𑀯𑀦𑀸𑀦𑀺 𑀘.

𑁪𑁭. 𑀮𑁄𑀓𑀼𑀢𑁆𑀢𑀭…𑀧𑁂… 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀪𑀸𑀯𑁂𑀦 𑀧𑀼𑀕𑁆𑀕𑀮𑀦𑁆𑀢𑀭𑁂𑀲𑀼 𑀅𑀲𑀫𑁆𑀪𑀯𑀢𑁄, 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀸𑀦𑀜𑁆𑀘 𑀉𑀧𑀭𑀽𑀧𑀭𑀺𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀢𑁆𑀢𑀸, 𑀉𑀧𑀭𑀽𑀧𑀭𑀺𑀧𑀼𑀕𑁆𑀕𑀮𑀸𑀦𑀜𑁆𑀘 𑀅𑀲𑀫𑀼𑀕𑁆𑀖𑀸𑀝𑀺𑀢𑀓𑀫𑁆𑀫𑀓𑀺𑀮𑁂𑀲𑀦𑀺𑀭𑁄𑀥𑁂𑀦 𑀧𑀼𑀣𑀼𑀚𑁆𑀚𑀦𑁂𑀳𑀺 𑀯𑀺𑀬 𑀲𑁄𑀢𑀸𑀧𑀦𑁆𑀦𑀸𑀦𑀁 𑀲𑁄𑀢𑀸𑀧𑀦𑁆𑀦𑀸𑀤𑀻𑀳𑀺 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀘 𑀅𑀝𑁆𑀞𑀧𑀺 𑀮𑁄𑀓𑀼𑀢𑁆𑀢𑀭𑀚𑀯𑀦𑀸𑀦𑀺 𑀬𑀣𑀸𑀲𑀓𑀁 𑀫𑀕𑁆𑀕𑀨𑀮𑀝𑁆𑀞𑀸𑀦𑀁 𑀅𑀭𑀺𑀬𑀸𑀦𑀫𑁂𑀯 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀺.

𑁪𑁮. 𑀇𑀤𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀬𑀣𑀸𑀧𑀝𑀺𑀓𑁆𑀔𑀺𑀢𑁆𑀢𑀚𑀯𑀦𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀧𑀸𑀭𑀺𑀲𑁂𑀲𑀢𑁄 𑀮𑀩𑁆𑀪𑀫𑀸𑀦𑀚𑀯𑀦𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀲𑁂𑀓𑁆𑀔𑀸𑀦’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀺𑀯𑀺𑀥𑀲𑀺𑀓𑁆𑀔𑀸𑀬 𑀧𑀭𑀺𑀧𑀽𑀭𑀓𑀸𑀭𑀺𑀪𑀸𑀯𑀢𑁄 𑀅𑀲𑁂𑀓𑁆𑀔𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀢𑁂𑀢𑁆𑀢𑀺𑀁𑀲𑀯𑀺𑀥𑀓𑀼𑀲𑀮𑀸𑀓𑀼𑀲𑀮𑀲𑁆𑀲, 𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀲𑁆𑀲, 𑀯𑀻𑀣𑀺𑀫𑀼𑀢𑁆𑀢𑀸𑀦𑀜𑁆𑀘 𑀦𑀯𑀫𑀳𑀕𑁆𑀕𑀢𑀯𑀺𑀧𑀸𑀓𑀸𑀦𑀁 𑀯𑀲𑁂𑀦 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀚𑁆𑀚𑀺𑀢𑀸𑀦𑀺 𑀲𑁂𑀲𑀸𑀦𑀺 𑀢𑁂𑀯𑀻𑀲𑀢𑀺𑀓𑀆𑀫𑀸𑀯𑀘𑀭𑀯𑀺𑀧𑀸𑀓𑀯𑀻𑀲𑀢𑀺𑀓𑀺𑀭𑀺𑀬𑀅𑀭𑀳𑀢𑁆𑀢𑀨𑀮𑀯𑀲𑁂𑀦 𑀘𑀢𑀼𑀘𑀢𑁆𑀢𑀸𑀮𑀻𑀲 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀲𑀫𑁆𑀪𑀯𑀸 𑀬𑀣𑀸𑀮𑀸𑀪𑀁 𑀓𑀸𑀫𑀪𑀯𑁂 𑀞𑀺𑀢𑀸𑀦𑀁 𑀯𑀲𑁂𑀦 𑀉𑀤𑁆𑀤𑀺𑀲𑁂.

𑀲𑁂𑀓𑁆𑀔𑀸𑀦𑀁 𑀅𑀝𑁆𑀞𑀸𑀭𑀲𑀓𑀺𑀭𑀺𑀬𑀚𑀯𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀧𑀜𑁆𑀘𑀓𑀅𑀕𑁆𑀕𑀨𑀮𑀫𑀳𑀕𑁆𑀕𑀢𑀯𑀺𑀧𑀸𑀓𑀯𑀲𑁂𑀦 𑀢𑁂𑀢𑁆𑀢𑀺𑀁𑀲 𑀯𑀚𑁆𑀚𑁂𑀢𑁆𑀯𑀸 𑀢𑁂𑀯𑀻𑀲𑀢𑀺𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀆𑀯𑀚𑁆𑀚𑀦𑀤𑁆𑀯𑀬𑀏𑀓𑀯𑀻𑀲𑀢𑀺𑀓𑀼𑀲𑀮𑀲𑀢𑁆𑀢𑀸𑀓𑀼𑀲𑀮𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀯𑀲𑁂𑀦 𑀙𑀧𑁆𑀧𑀜𑁆𑀜𑀸𑀲 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀬𑀣𑀸𑀲𑀫𑁆𑀪𑀯𑀁 𑀉𑀤𑁆𑀤𑀺𑀲𑁂 𑀅𑀯𑀺𑀲𑁂𑀲𑀢𑁄. 𑀯𑀺𑀲𑁂𑀲𑀢𑁄 𑀧𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁 𑀏𑀓𑀧𑀜𑁆𑀜𑀸𑀲, 𑀅𑀦𑀸𑀕𑀸𑀫𑀻𑀦𑀁 𑀏𑀓𑀽𑀦𑀧𑀜𑁆𑀜𑀸𑀲, 𑀅𑀯𑀲𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀝𑁆𑀞𑀸𑀭𑀲𑀓𑀺𑀭𑀺𑀬𑀚𑀯𑀦𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀯𑀺𑀧𑀸𑀓𑀯𑀲𑁂𑀦 𑀧𑀜𑁆𑀘𑀢𑀺𑀁𑀲 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀆𑀯𑀚𑁆𑀚𑀦𑀤𑁆𑀯𑀬𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀘𑀢𑀼𑀧𑀜𑁆𑀜𑀸𑀲 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀬𑀣𑀸𑀲𑀫𑁆𑀪𑀯𑀢𑁄 𑀉𑀤𑁆𑀤𑀺𑀲𑁂 𑀅𑀯𑀺𑀲𑁂𑀲𑀢𑁄. 𑀯𑀺𑀲𑁂𑀲𑀢𑁄 𑀧𑀦 𑀢𑀺𑀳𑁂𑀢𑀼𑀓𑀸𑀦𑀁 𑀘𑀢𑀼𑀧𑀜𑁆𑀜𑀸𑀲𑁂𑀯 𑀮𑀩𑁆𑀪𑀦𑁆𑀢𑀺, 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀅𑀧𑁆𑀧𑀦𑀸𑀚𑀯𑀦𑀯𑀚𑁆𑀚𑀺𑀢𑀸𑀦𑀺 𑀏𑀓𑀘𑀢𑁆𑀢𑀸𑀮𑀻𑀲, 𑀆𑀧𑀸𑀬𑀺𑀓𑀸𑀦𑀁 𑀢𑀸𑀦𑁂𑀯 𑀤𑁆𑀯𑀺𑀳𑁂𑀢𑀼𑀓𑀯𑀺𑀧𑀸𑀓𑀯𑀚𑁆𑀚𑀺𑀢𑀸𑀦𑀺 𑀲𑀢𑁆𑀢𑀢𑀺𑀁𑀲 𑀯𑀻𑀣𑀺𑀘𑀺𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀪𑁂𑀤𑁄 𑀧𑀼𑀕𑁆𑀕𑀮𑀪𑁂𑀤𑁄.

𑀧𑀼𑀕𑁆𑀕𑀮𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀽𑀫𑀺𑀯𑀺𑀪𑀸𑀕𑀯𑀡𑁆𑀡𑀦𑀸

𑁪𑁯. 𑀲𑀩𑁆𑀩𑀸𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀉𑀧𑀮𑀩𑁆𑀪𑀦𑁆𑀢𑀺 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁, 𑀲𑀩𑁆𑀩𑁂𑀲𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀢𑀢𑁆𑀣 𑀲𑀫𑁆𑀪𑀯𑀢𑁄. 𑀬𑀣𑀸𑀭𑀳𑀦𑁆𑀢𑀺 𑀢𑀁𑀢𑀁𑀪𑀯𑀸𑀦𑀼𑀭𑀽𑀧𑀁, 𑀢𑀁𑀢𑀁𑀧𑀼𑀕𑁆𑀕𑀮𑀸𑀦𑀼𑀭𑀽𑀧𑀜𑁆𑀘.

𑁫𑁨. 𑀢𑁆𑀬𑀸𑀤𑀺𑀦𑀸 𑀖𑀸𑀦𑀯𑀺𑀜𑁆𑀜𑀸𑀡𑀸𑀤𑀻𑀦𑀫𑁆𑀧𑀺 𑀧𑀝𑀺𑀓𑁆𑀔𑁂𑀧𑁄 𑀳𑁂𑀲𑁆𑀲𑀢𑀻𑀢𑀺 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀧𑀝𑀺𑀖𑀚𑀯𑀦𑀢𑀤𑀸𑀭𑀫𑁆𑀫𑀡𑀸𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀓𑀸𑀫𑀪𑀯𑁂, 𑀭𑀽𑀧𑀪𑀯𑁂, 𑀅𑀭𑀽𑀧𑀪𑀯𑁂 𑀘.

𑁫𑁪. 𑀓𑀸𑀫𑀪𑀯𑁂 𑀬𑀣𑀸𑀭𑀳𑀁 𑀯𑀻𑀣𑀺𑀫𑀼𑀢𑁆𑀢𑀯𑀚𑁆𑀚𑀸𑀦𑀺 𑀅𑀲𑀻𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺, 𑀭𑀽𑀧𑀪𑀯𑁂 𑀧𑀝𑀺𑀖𑀤𑁆𑀯𑀬𑀅𑀝𑁆𑀞𑀢𑀤𑀸𑀭𑀫𑁆𑀫𑀡𑀖𑀸𑀦𑀸𑀤𑀺𑀯𑀺𑀜𑁆𑀜𑀸𑀡𑀙𑀓𑁆𑀓𑀯𑀻𑀣𑀺𑀫𑀼𑀢𑁆𑀢𑀓𑀯𑀲𑁂𑀦 𑀧𑀜𑁆𑀘𑀯𑀻𑀲𑀢𑀺 𑀯𑀚𑁆𑀚𑁂𑀢𑁆𑀯𑀸 𑀲𑁂𑀲𑀸𑀦𑀺 𑀆𑀯𑀚𑁆𑀚𑀦𑀤𑁆𑀯𑀬𑀦𑀯𑀅𑀳𑁂𑀢𑀼𑀓𑀯𑀺𑀧𑀸𑀓𑀢𑁂𑀧𑀜𑁆𑀜𑀸𑀲𑀚𑀯𑀦𑀯𑀲𑁂𑀦 𑀘𑀢𑀼𑀲𑀝𑁆𑀞𑀺, 𑀅𑀭𑀽𑀧𑁂 𑀪𑀯𑁂 𑀢𑁂𑀯𑀻𑀲𑀢𑀺𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀧𑀞𑀫𑀫𑀕𑁆𑀕𑀧𑀜𑁆𑀘𑀤𑀲𑀭𑀽𑀧𑀸𑀯𑀘𑀭𑀧𑀝𑀺𑀖𑀤𑁆𑀯𑀬𑀆𑀭𑀼𑀧𑁆𑀧𑀯𑀺𑀧𑀸𑀓𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀳𑀲𑀦𑀯𑀲𑁂𑀦 𑀲𑀢𑁆𑀢𑀘𑀢𑁆𑀢𑀸𑀮𑀻𑀲 𑀯𑀚𑁆𑀚𑁂𑀢𑁆𑀯𑀸 𑀲𑁂𑀲𑀸𑀦𑀺 𑀙𑀩𑁆𑀩𑀻𑀲𑀢𑀺 𑀧𑀭𑀺𑀢𑁆𑀢𑀚𑀯𑀦𑀅𑀝𑁆𑀞𑀆𑀭𑀼𑀧𑁆𑀧𑀚𑀯𑀦𑀲𑀢𑁆𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀯𑀲𑁂𑀦 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀭𑁂 𑀉𑀧𑀮𑀩𑁆𑀪𑀦𑁆𑀢𑀺.

𑀓𑁂𑀘𑀺 𑀧𑀦 ‘‘𑀭𑀽𑀧𑀪𑀯𑁂 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀪𑀸𑀯𑀢𑁄 𑀇𑀥𑀸𑀕𑀢𑀸𑀦𑀁𑀬𑁂𑀯 𑀩𑁆𑀭𑀳𑁆𑀫𑀸𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑀫𑁆𑀪𑀯𑁄𑀢𑀺 𑀢𑀸𑀦𑀺 𑀧𑀭𑀺𑀳𑀸𑀧𑁂𑀢𑁆𑀯𑀸 𑀧𑀜𑁆𑀘𑀧𑀭𑀺𑀢𑁆𑀢𑀯𑀺𑀧𑀸𑀓𑁂𑀳𑀺 𑀲𑀤𑁆𑀥𑀺𑀁 𑀭𑀽𑀧𑀪𑀯𑁂 𑀲𑀝𑁆𑀞𑀺𑀬𑁂𑀯 𑀯𑀻𑀣𑀺𑀘𑀺𑀢𑁆𑀢𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀇𑀥 𑀧𑀦 𑀢𑀢𑁆𑀣 𑀞𑀢𑁆𑀯𑀸𑀧𑀺 𑀇𑀫𑀁 𑀮𑁄𑀓𑀁 𑀧𑀲𑁆𑀲𑀦𑁆𑀢𑀸𑀦𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀅𑀲𑀫𑁆𑀪𑀯𑁄 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀢𑀢𑁆𑀣 𑀘𑀢𑀼𑀲𑀝𑁆𑀞𑀺 𑀯𑀼𑀢𑁆𑀢𑀸𑀦𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀥𑀫𑁆𑀫𑀸𑀦𑀼𑀲𑀸𑀭𑀡𑀺𑀬𑀁 ‘‘𑀬𑀤𑀸 𑀩𑁆𑀭𑀳𑁆𑀫𑀸𑀦𑁄 𑀓𑀸𑀫𑀸𑀯𑀘𑀭𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀆𑀮𑀫𑁆𑀩𑀦𑁆𑀢𑀺, 𑀢𑀤𑀸 𑀢𑀁 𑀲𑀼𑀕𑀢𑀺𑀬𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀲𑀦𑁆𑀢𑀻𑀭𑀡𑀸𑀦𑀁 𑀉𑀧𑁆𑀧𑀢𑁆𑀢𑀺 𑀲𑀫𑁆𑀪𑀯𑀢𑀻’’𑀢𑀺.

𑀪𑀽𑀫𑀺𑀯𑀲𑁂𑀦 𑀯𑀺𑀪𑀸𑀕𑁄 𑀪𑀽𑀫𑀺𑀯𑀺𑀪𑀸𑀕𑁄.

𑀪𑀽𑀫𑀺𑀯𑀺𑀪𑀸𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁫. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀢𑀁𑀢𑀁𑀤𑁆𑀯𑀸𑀭𑁂𑀲𑀼, 𑀢𑀁𑀢𑀁𑀪𑀯𑁂𑀲𑀼 𑀯𑀸 𑀲𑀫𑁆𑀪𑀯𑀸𑀦𑀼𑀭𑀽𑀧𑀢𑁄. 𑀬𑀸𑀯𑀢𑀸𑀬𑀼𑀓𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀢𑁄 𑀧𑀭𑀁 𑀪𑀯𑀦𑀺𑀓𑀦𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀯𑀻𑀣𑀺𑀢𑁄 𑀧𑀝𑁆𑀞𑀸𑀬 𑀘𑀼𑀢𑀺𑀘𑀺𑀢𑁆𑀢𑀸𑀯𑀲𑀸𑀦𑀁, 𑀢𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀪𑀯𑀗𑁆𑀕𑀸𑀯𑀲𑀸𑀦𑀁 𑀯𑀸 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀸 𑀅𑀲𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀯𑀻𑀣𑀺𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.