𑁩. 𑀧𑀓𑀺𑀡𑁆𑀡𑀓𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀯𑁂𑀤𑀦𑀸𑀤𑀺𑀯𑀺𑀪𑀸𑀕𑀢𑁄, 𑀢𑀁𑀢𑀁𑀯𑁂𑀤𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀺𑀪𑀸𑀕𑀢𑁄 𑀘 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀬𑀼𑀢𑁆𑀢𑀸 𑀬𑀣𑀸𑀬𑁄𑀕’’𑀦𑁆𑀢𑁆𑀬𑀸𑀤𑀺 𑀆𑀭𑀤𑁆𑀥𑀁. 𑀬𑀣𑀸𑀬𑁄𑀕𑀁 𑀲𑀫𑁆𑀧𑀬𑀼𑀢𑁆𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀪𑀸𑀯𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀪𑀸𑀯𑀯𑀲𑁂𑀦 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑀫𑁆𑀧𑀺 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀲𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀯𑀺𑀥𑀁, 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑁄 𑀨𑀲𑁆𑀲𑁄 𑀨𑀼𑀲𑀦𑀲𑀪𑀸𑀯𑁂𑀦 𑀏𑀓𑀯𑀺𑀥𑁄𑀢𑁆𑀬𑀸𑀤𑀺𑀦𑀸 𑀢𑁂𑀧𑀜𑁆𑀜𑀸𑀲 𑀳𑁄𑀦𑁆𑀢𑀺.

𑁨. 𑀇𑀤𑀸𑀦𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀬𑀣𑀸𑀭𑀳𑀁 𑀯𑁂𑀤𑀦𑀸…𑀧𑁂… 𑀯𑀢𑁆𑀣𑀼𑀢𑁄 𑀲𑀗𑁆𑀕𑀳𑁄 𑀦𑀸𑀫 𑀯𑁂𑀤𑀦𑀸𑀲𑀗𑁆𑀕𑀳𑀸𑀤𑀺𑀦𑀸𑀫𑀓𑁄 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯 𑀢𑀁𑀢𑀁𑀯𑁂𑀤𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦𑁂𑀯 𑀦 𑀓𑀢𑁆𑀣𑀘𑀺 𑀢𑀁𑀯𑀺𑀭𑀳𑁂𑀦 𑀦𑀻𑀬𑀢𑁂 𑀉𑀧𑀦𑀻𑀬𑀢𑁂, 𑀆𑀳𑀭𑀻𑀬𑀢𑀻𑀢𑁆𑀬𑀢𑁆𑀣𑁄.

𑀯𑁂𑀤𑀦𑀸𑀲𑀗𑁆𑀕𑀳𑀯𑀡𑁆𑀡𑀦𑀸

𑁩. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀲𑀗𑁆𑀕𑀳𑁂𑀲𑀼. 𑀲𑀼𑀔𑀸𑀤𑀺𑀯𑁂𑀤𑀦𑀸𑀦𑀁, 𑀢𑀁𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀜𑁆𑀘 𑀯𑀺𑀪𑀸𑀕𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀦𑀸𑀲𑀗𑁆𑀕𑀳𑁄. 𑀤𑀼𑀓𑁆𑀔𑀢𑁄, 𑀲𑀼𑀔𑀢𑁄 𑀘 𑀅𑀜𑁆𑀜𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀫-𑀓𑀸𑀭𑀸𑀕𑀫𑀯𑀲𑁂𑀦. 𑀦𑀦𑀼 𑀘 ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀲𑀼𑀔𑀸 𑀤𑀼𑀓𑁆𑀔𑀸’’𑀢𑀺 (𑀲𑀁. 𑀦𑀺. 𑁪.𑁨𑁬𑁭) 𑀯𑀘𑀦𑀢𑁄 𑀤𑁆𑀯𑁂 𑀏𑀯 𑀯𑁂𑀤𑀦𑀸𑀢𑀺? 𑀲𑀘𑁆𑀘𑀁, 𑀢𑀁 𑀧𑀦 𑀅𑀦𑀯𑀚𑁆𑀚𑀧𑀓𑁆𑀔𑀺𑀓𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀼𑀔𑀯𑁂𑀤𑀦𑀸𑀬𑀁, 𑀲𑀸𑀯𑀚𑁆𑀚𑀧𑀓𑁆𑀔𑀺𑀓𑀜𑁆𑀘 𑀤𑀼𑀓𑁆𑀔𑀯𑁂𑀤𑀦𑀸𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀫𑁆𑀧𑀺 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀫𑀺𑀤𑀫𑁂𑀢𑁆𑀣 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀲𑀁. 𑀦𑀺. 𑁪.𑁨𑁫𑁯) 𑀯𑀘𑀦𑀁, 𑀢𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀲𑀩𑁆𑀩𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀣𑀸𑀳 𑁋 ‘‘𑀲𑀗𑁆𑀔𑀸𑀭𑀸𑀦𑀺𑀘𑁆𑀘𑀢𑀁, 𑀆𑀦𑀦𑁆𑀤, 𑀫𑀬𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀢𑀜𑁆𑀘 𑀬𑀁 𑀓𑀺𑀜𑁆𑀘𑀺𑀯𑁂𑀤𑀬𑀺𑀢𑀫𑀺𑀤𑀫𑁂𑀢𑁆𑀣 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀲𑀁. 𑀦𑀺. 𑁪.𑁨𑁫𑁯; 𑀇𑀢𑀺𑀯𑀼. 𑀅𑀝𑁆𑀞. 𑁫𑁨). 𑀢𑀲𑁆𑀫𑀸 𑀢𑀺𑀲𑁆𑀲𑁄𑀬𑁂𑀯 𑀯𑁂𑀤𑀦𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀲𑀼𑀔𑀸 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀘𑀸’’𑀢𑀺 (𑀇𑀢𑀺𑀯𑀼. 𑁫𑁨-𑁫𑁩; 𑀲𑀁. 𑀦𑀺. 𑁪.𑁨𑁪𑁯-𑁨𑁫𑁧). 𑀏𑀯𑀁 𑀢𑀺𑀯𑀺𑀥𑀸𑀧𑀺 𑀧𑀦𑁂𑀢𑀸 𑀇𑀦𑁆𑀤𑁆𑀭𑀺𑀬𑀤𑁂𑀲𑀦𑀸𑀬𑀁 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀯𑀺𑀪. 𑁨𑁧𑁯) 𑀧𑀜𑁆𑀘𑀥𑀸 𑀤𑁂𑀲𑀺𑀢𑀸𑀢𑀺 𑀢𑀁𑀯𑀲𑁂𑀦𑀧𑁂𑀢𑁆𑀣 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀓𑀸𑀬𑀺𑀓𑀫𑀸𑀦𑀲𑀺𑀓𑀲𑀸𑀢𑀸𑀲𑀸𑀢𑀪𑁂𑀤𑀢𑁄 𑀳𑀺 𑀲𑀼𑀔𑀁 𑀤𑀼𑀓𑁆𑀔𑀜𑁆𑀘 𑀧𑀘𑁆𑀘𑁂𑀓𑀁 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀯𑀺𑀪. 𑁨𑁧𑁯) 𑀤𑁂𑀲𑀺𑀢𑀸, 𑀉𑀧𑁂𑀓𑁆𑀔𑀸 𑀧𑀦 𑀪𑁂𑀤𑀸𑀪𑀸𑀯𑀢𑁄 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀓𑀥𑀸𑀯. 𑀬𑀣𑀸 𑀳𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀅𑀜𑁆𑀜𑀣𑀸 𑀓𑀸𑀬𑀲𑁆𑀲 𑀅𑀦𑀼𑀕𑁆𑀕𑀳𑀫𑀼𑀧𑀖𑀸𑀢𑀜𑁆𑀘 𑀓𑀭𑁄𑀦𑁆𑀢𑀺, 𑀅𑀜𑁆𑀜𑀣𑀸 𑀫𑀦𑀲𑁄, 𑀦𑁂𑀯𑀁 𑀉𑀧𑁂𑀓𑁆𑀔𑀸, 𑀢𑀲𑁆𑀫𑀸 𑀲𑀸 𑀏𑀓𑀥𑀸𑀯 𑀤𑁂𑀲𑀺𑀢𑀸, 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀓𑀸𑀬𑀺𑀓𑀁 𑀫𑀸𑀦𑀲𑀁 𑀤𑀼𑀓𑁆𑀔𑀁, 𑀲𑀼𑀔𑀜𑁆𑀘𑁄𑀧𑁂𑀓𑁆𑀔𑀯𑁂𑀤𑀦𑀸;

𑀏𑀓𑀁 𑀫𑀸𑀦𑀲𑀫𑁂𑀯𑁂𑀢𑀺, 𑀧𑀜𑁆𑀘𑀥𑀺𑀦𑁆𑀤𑁆𑀭𑀺𑀬𑀪𑁂𑀤𑀢𑁄’’𑀢𑀺. (𑀲. 𑀲. 𑁭𑁪);

𑀢𑀢𑁆𑀣 𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑀼𑀔𑀁. 𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁. 𑀲𑀪𑀸𑀯𑀢𑁄, 𑀧𑀭𑀺𑀓𑀧𑁆𑀧𑀢𑁄 𑀯𑀸 𑀇𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑁄𑀫𑀦𑀲𑁆𑀲𑀁. 𑀢𑀣𑀸 𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁. 𑀫𑀚𑁆𑀛𑀢𑁆𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸.

𑁫. 𑀘𑀢𑀼𑀘𑀢𑁆𑀢𑀸𑀮𑀻𑀲 𑀧𑀘𑁆𑀘𑁂𑀓𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑁂𑀦 𑀏𑀓𑀸𑀤𑀲𑀯𑀺𑀥𑀢𑁆𑀢𑀸.

𑁭. 𑀲𑁂𑀲𑀸𑀦𑀻𑀢𑀺 𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺 𑀅𑀯𑀲𑁂𑀲𑀸𑀦𑀺 𑀅𑀓𑀼𑀲𑀮𑀢𑁄 𑀙, 𑀅𑀳𑁂𑀢𑀼𑀓𑀢𑁄 𑀘𑀼𑀤𑁆𑀤𑀲, 𑀓𑀸𑀫𑀸𑀯𑀘𑀭𑀲𑁄𑀪𑀦𑀢𑁄 𑀤𑁆𑀯𑀸𑀤𑀲, 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀺 𑀢𑁂𑀯𑀻𑀲𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀧𑀜𑁆𑀘𑀧𑀜𑁆𑀜𑀸𑀲.

𑀯𑁂𑀤𑀦𑀸𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀳𑁂𑀢𑀼𑀲𑀗𑁆𑀕𑀳𑀯𑀡𑁆𑀡𑀦𑀸

𑁧𑁦. 𑀮𑁄𑀪𑀸𑀤𑀺𑀳𑁂𑀢𑀽𑀦𑀁 𑀯𑀺𑀪𑀸𑀕𑀯𑀲𑁂𑀦, 𑀢𑀁𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀘 𑀲𑀗𑁆𑀕𑀳𑁄 𑀳𑁂𑀢𑀼𑀲𑀗𑁆𑀕𑀳𑁄. 𑀳𑁂𑀢𑀯𑁄 𑀦𑀸𑀫 𑀙𑀩𑁆𑀩𑀺𑀥𑀸 𑀪𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑁂𑀢𑀼𑀪𑀸𑀯𑁄 𑀧𑀦 𑀦𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀲𑀗𑁆𑀔𑀸𑀢𑁄 𑀫𑀽𑀮𑀪𑀸𑀯𑁄. 𑀮𑀤𑁆𑀥𑀳𑁂𑀢𑀼𑀧𑀘𑁆𑀘𑀬𑀸 𑀳𑀺 𑀥𑀫𑁆𑀫𑀸 𑀯𑀺𑀭𑀼𑀴𑁆𑀳𑀫𑀽𑀮𑀸 𑀯𑀺𑀬 𑀧𑀸𑀤𑀧𑀸 𑀣𑀺𑀭𑀸 𑀳𑁄𑀦𑁆𑀢𑀺, 𑀦 𑀅𑀳𑁂𑀢𑀼𑀓𑀸 𑀯𑀺𑀬 𑀚𑀮𑀢𑀮𑁂 𑀲𑁂𑀯𑀸𑀮𑀲𑀤𑀺𑀲𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀏𑀢𑁂 𑀫𑀽𑀮𑀲𑀤𑀺𑀲𑀢𑀸𑀬 ‘‘𑀫𑀽𑀮𑀸𑀦𑀻’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀦𑀁 𑀳𑁂𑀢𑀼𑀪𑀸𑀯𑁄’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀳𑁂𑀢𑀽𑀦𑀁 𑀅𑀢𑁆𑀢𑀦𑁄 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀦𑁄 𑀅𑀜𑁆𑀜𑁄 𑀳𑁂𑀢𑀼 𑀫𑀕𑁆𑀕𑀺𑀢𑀩𑁆𑀩𑁄 𑀲𑀺𑀬𑀸. 𑀅𑀣 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀢𑁂𑀲𑀁 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀏𑀯𑀫𑁆𑀧𑀺 𑀫𑁄𑀫𑀽𑀳𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀳𑁂𑀢𑀼𑀦𑁄 𑀅𑀓𑀼𑀲𑀮𑀪𑀸𑀯𑁄 𑀅𑀧𑁆𑀧𑀝𑀺𑀩𑀤𑁆𑀥𑁄 𑀲𑀺𑀬𑀸. 𑀅𑀣 𑀢𑀲𑁆𑀲 𑀲𑀪𑀸𑀯𑀢𑁄 𑀅𑀓𑀼𑀲𑀮𑀪𑀸𑀯𑁄𑀧𑀺 𑀲𑀺𑀬𑀸, 𑀏𑀯𑀁 𑀲𑀢𑀺 𑀲𑁂𑀲𑀳𑁂𑀢𑀽𑀦𑀫𑁆𑀧𑀺 𑀲𑀪𑀸𑀯𑀢𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑁄𑀢𑀺 𑀢𑁂𑀲𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀲𑁄 𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀦 𑀲𑀺𑀬𑀸. 𑀬𑀤𑀺 𑀘 𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀢𑀤𑀸 𑀅𑀳𑁂𑀢𑀼𑀓𑀸𑀦𑀁 𑀅𑀩𑁆𑀬𑀸𑀓𑀢𑀪𑀸𑀯𑁄 𑀦 𑀲𑀺𑀬𑀸𑀢𑀺 𑀅𑀮𑀫𑀢𑀺𑀦𑀺𑀧𑁆𑀧𑀻𑀴𑀦𑁂𑀦. 𑀓𑀼𑀲𑀮𑀸𑀤𑀺𑀪𑀸𑀯𑁄 𑀧𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀬𑁄𑀦𑀺𑀲𑁄𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀩𑀤𑁆𑀥𑁄. 𑀬𑀣𑀸𑀳 𑁋 ‘‘𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’’𑀢𑁆𑀬𑀸𑀤𑀺 (𑀅. 𑀦𑀺. 𑁧.𑁬𑁭), 𑀅𑀩𑁆𑀬𑀸𑀓𑀢𑀸𑀦𑀁 𑀧𑀦 𑀅𑀩𑁆𑀬𑀸𑀓𑀢𑀪𑀸𑀯𑁄 𑀦𑀺𑀭𑀦𑀼𑀲𑀬𑀲𑀦𑁆𑀢𑀸𑀦𑀧𑁆𑀧𑀝𑀺𑀩𑀤𑁆𑀥𑁄 𑀓𑀫𑁆𑀫𑀧𑁆𑀧𑀝𑀺𑀩𑀤𑁆𑀥𑁄 𑀅𑀯𑀺𑀧𑀸𑀓𑀪𑀸𑀯𑀧𑁆𑀧𑀝𑀺𑀩𑀤𑁆𑀥𑁄 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁬. 𑀇𑀤𑀸𑀦𑀺 𑀳𑁂𑀢𑀽𑀦𑀁 𑀚𑀸𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀪𑁄 𑀤𑁄𑀲𑁄 𑀘𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁.

𑀳𑁂𑀢𑀼𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀺𑀘𑁆𑀘𑀲𑀗𑁆𑀕𑀳𑀯𑀡𑁆𑀡𑀦𑀸

𑁧𑁮. 𑀧𑀝𑀺𑀲𑀦𑁆𑀥𑀸𑀤𑀻𑀦𑀁 𑀓𑀺𑀘𑁆𑀘𑀸𑀦𑀁 𑀯𑀺𑀪𑀸𑀕𑀯𑀲𑁂𑀦, 𑀢𑀁𑀓𑀺𑀘𑁆𑀘𑀯𑀦𑁆𑀢𑀸𑀦𑀜𑁆𑀘 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀗𑁆𑀕𑀳𑁄 𑀓𑀺𑀘𑁆𑀘𑀲𑀗𑁆𑀕𑀳𑁄. 𑀪𑀯𑀢𑁄 𑀪𑀯𑀲𑁆𑀲 𑀧𑀝𑀺𑀲𑀦𑁆𑀥𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑀺𑀘𑁆𑀘𑀁. 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀪𑀯𑀲𑁆𑀲 𑀅𑀗𑁆𑀕𑀪𑀸𑀯𑁄 𑀪𑀯𑀗𑁆𑀕𑀓𑀺𑀘𑁆𑀘𑀁. 𑀆𑀯𑀚𑁆𑀚𑀦𑀓𑀺𑀘𑁆𑀘𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀘𑀦𑀢𑁆𑀣𑀸𑀦𑀼𑀲𑀸𑀭𑁂𑀦 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀆𑀭𑀫𑁆𑀫𑀡𑁂 𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀅𑀦𑁂𑀓𑀓𑁆𑀔𑀢𑁆𑀢𑀼𑀁, 𑀏𑀓𑀓𑁆𑀔𑀢𑁆𑀢𑀼𑀁 𑀯𑀸 𑀚𑀯𑀫𑀸𑀦𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺 𑀚𑀯𑀦𑀓𑀺𑀘𑁆𑀘𑀁. 𑀢𑀁𑀢𑀁𑀚𑀯𑀦𑀕𑁆𑀕𑀳𑀺𑀢𑀸𑀭𑀫𑁆𑀫𑀡𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀁 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁. 𑀦𑀺𑀩𑁆𑀩𑀢𑁆𑀢𑀪𑀯𑀢𑁄 𑀧𑀭𑀺𑀕𑀴𑁆𑀳𑀦𑀁 𑀘𑀼𑀢𑀺𑀓𑀺𑀘𑁆𑀘𑀁.

𑁧𑁯. 𑀇𑀫𑀸𑀦𑀺 𑀧𑀦 𑀓𑀺𑀘𑁆𑀘𑀸𑀦𑀺 𑀞𑀸𑀦𑀯𑀲𑁂𑀦 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀁 𑀤𑀸𑀦𑀺 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀲𑀦𑁆𑀥𑀻’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀸 𑀞𑀸𑀦𑀁 𑀧𑀝𑀺𑀲𑀦𑁆𑀥𑀺𑀞𑀸𑀦𑀁. 𑀓𑀸𑀫𑀁 𑀧𑀝𑀺𑀲𑀦𑁆𑀥𑀺𑀯𑀺𑀦𑀺𑀫𑀼𑀢𑁆𑀢𑀁 𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀧𑀦 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑁆𑀬𑀸𑀤𑀻𑀲𑀼 𑀯𑀺𑀬 𑀅𑀪𑁂𑀤𑁂𑀧𑀺 𑀪𑁂𑀤𑀧𑀭𑀺𑀓𑀧𑁆𑀧𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀤𑀲𑁆𑀲𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀞𑀸𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀞𑀸𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀞𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀢𑀢𑁆𑀣 𑀘𑀼𑀢𑀺𑀪𑀯𑀗𑁆𑀕𑀸𑀦𑀁 𑀅𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀺𑀞𑀸𑀦𑀁. 𑀧𑀝𑀺𑀲𑀦𑁆𑀥𑀺𑀆𑀯𑀚𑁆𑀚𑀦𑀸𑀦𑀁, 𑀚𑀯𑀦𑀸𑀯𑀚𑁆𑀚𑀦𑀸𑀦𑀁, 𑀢𑀤𑀸𑀭𑀫𑁆𑀫𑀡𑀸𑀯𑀚𑁆𑀚𑀦𑀸𑀦𑀁, 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀸𑀦𑀁, 𑀓𑀤𑀸𑀘𑀺 𑀚𑀯𑀦𑀘𑀼𑀢𑀻𑀦𑀁, 𑀢𑀤𑀸𑀭𑀫𑁆𑀫𑀡𑀘𑀼𑀢𑀻𑀦𑀜𑁆𑀘 𑀅𑀦𑁆𑀢𑀭𑀸 𑀪𑀯𑀗𑁆𑀕𑀞𑀸𑀦𑀁. 𑀪𑀯𑀗𑁆𑀕𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁, 𑀪𑀯𑀗𑁆𑀕𑀚𑀯𑀦𑀸𑀦𑀜𑁆𑀘 𑀅𑀦𑁆𑀢𑀭𑀸 𑀆𑀯𑀚𑁆𑀚𑀦𑀞𑀸𑀦𑀁. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀫𑀦𑁆𑀢𑀭𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀞𑀸𑀦𑀁. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀦𑁆𑀢𑀻𑀭𑀡𑀸𑀦𑀫𑀦𑁆𑀢𑀭𑀸 𑀲𑀫𑁆𑀧𑀝𑀺𑀘𑁆𑀙𑀦𑀞𑀸𑀦𑀁. 𑀲𑀫𑁆𑀧𑀝𑀺𑀘𑁆𑀙𑀦𑀯𑁄𑀝𑁆𑀞𑀩𑁆𑀩𑀦𑀸𑀦𑀫𑀦𑁆𑀢𑀭𑀸 𑀲𑀦𑁆𑀢𑀻𑀭𑀡𑀞𑀸𑀦𑀁. 𑀲𑀦𑁆𑀢𑀻𑀭𑀡𑀚𑀯𑀦𑀸𑀦𑀁, 𑀲𑀦𑁆𑀢𑀻𑀭𑀡𑀪𑀯𑀗𑁆𑀕𑀸𑀦𑀜𑁆𑀘 𑀅𑀦𑁆𑀢𑀭𑀸 𑀯𑁄𑀝𑁆𑀞𑀩𑁆𑀩𑀦𑀞𑀸𑀦𑀁. 𑀯𑁄𑀝𑁆𑀞𑀩𑁆𑀩𑀦𑀢𑀤𑀸𑀭𑀫𑁆𑀫𑀡𑀸𑀦𑀁, 𑀯𑁄𑀝𑁆𑀞𑀩𑁆𑀩𑀦𑀪𑀯𑀗𑁆𑀕𑀸𑀦𑀁, 𑀯𑁄𑀝𑁆𑀞𑀩𑁆𑀩𑀦𑀘𑀼𑀢𑀻𑀦𑀁, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀸𑀦𑀁, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀪𑀯𑀗𑁆𑀕𑀸𑀦𑀁, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀼𑀢𑀻𑀦𑀜𑁆𑀘 𑀅𑀦𑁆𑀢𑀭𑀸 𑀚𑀯𑀦𑀞𑀸𑀦𑀁. 𑀚𑀯𑀦𑀪𑀯𑀗𑁆𑀕𑀸𑀦𑀁, 𑀚𑀯𑀦𑀘𑀼𑀢𑀻𑀦𑀜𑁆𑀘 𑀅𑀦𑁆𑀢𑀭𑀸 𑀢𑀤𑀸𑀭𑀫𑁆𑀫𑀡𑀞𑀸𑀦𑀁. 𑀚𑀯𑀦𑀧𑀝𑀺𑀲𑀦𑁆𑀥𑀻𑀦𑀁, 𑀢𑀤𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀻𑀦𑀁, 𑀪𑀯𑀗𑁆𑀕𑀧𑀝𑀺𑀲𑀦𑁆𑀥𑀻𑀦𑀁 𑀯𑀸 𑀅𑀦𑁆𑀢𑀭𑀸 𑀘𑀼𑀢𑀺𑀞𑀸𑀦𑀁 𑀦𑀸𑀫.

𑁨𑁦. 𑀤𑁆𑀯𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀸𑀦𑀺 𑀲𑀼𑀔𑀲𑀦𑁆𑀢𑀻𑀭𑀡𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀲𑀧𑁆𑀧𑀯𑀢𑁆𑀢𑀺𑀪𑀸𑀯𑀸𑀪𑀸𑀯𑀢𑁄𑀢𑀺𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁪.𑁧𑁩.𑁧𑁭𑁯) 𑀏𑀯𑀫𑀸𑀕𑀢𑀲𑁆𑀲 𑀉𑀧𑁂𑀓𑁆𑀔𑀸𑀲𑀳𑀕𑀢𑀧𑀤𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀅𑀳𑁂𑀢𑀼𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸, 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄, 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸, 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄’’𑀢𑀺 (𑀧𑀝𑁆𑀞𑀸. 𑁪.𑁧𑁩.𑁧𑁭𑁯) 𑀏𑀯𑀁 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀝𑀺𑀘𑁆𑀘𑀦𑀬𑁄 𑀉𑀤𑁆𑀥𑀝𑁄, 𑀧𑀻𑀢𑀺𑀲𑀳𑀕𑀢𑀲𑀼𑀔𑀲𑀳𑀕𑀢𑀧𑀤𑀯𑀺𑀪𑀗𑁆𑀕𑁂 𑀧𑀦 ‘‘𑀅𑀳𑁂𑀢𑀼𑀓𑀁 𑀧𑀻𑀢𑀺𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘𑀢𑀬𑁄 𑀔𑀦𑁆𑀥𑀸…𑀧𑁂… 𑀤𑁆𑀯𑁂 𑀔𑀦𑁆𑀥𑀸. 𑀅𑀳𑁂𑀢𑀼𑀓𑀁 𑀲𑀼𑀔𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸 …𑀧𑁂… 𑀏𑀓𑁄 𑀔𑀦𑁆𑀥𑁄’’𑀢𑀺 (𑀧𑀝𑁆𑀞𑀸. 𑁪.𑁧𑁩.𑁧𑁪𑁪, 𑁧𑁬𑁭) 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀉𑀤𑁆𑀥𑀝𑁄, 𑀦 𑀧𑀦 ‘‘𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂’’𑀢𑁆𑀬𑀸𑀤𑀺𑀦𑀸 𑀧𑀝𑀺𑀲𑀦𑁆𑀥𑀺𑀯𑀲𑁂𑀦, 𑀢𑀲𑁆𑀫𑀸 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀯𑀘𑀦𑀫𑁆𑀧𑀺 𑀅𑀪𑀸𑀯𑀫𑁂𑀯 𑀤𑀻𑀧𑁂𑀢𑀻𑀢𑀺 𑀦 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀺 𑀅𑀢𑁆𑀣𑀺. 𑀬𑀢𑁆𑀣 𑀧𑀦 𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀓𑀲𑁆𑀲𑀘𑀺 𑀅𑀯𑀘𑀦𑀁, 𑀢𑀢𑁆𑀣 𑀓𑀸𑀭𑀡𑀁 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁨𑁫. 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀫𑀸𑀦𑀲𑁆𑀲𑀧𑀺 𑀦𑀢𑁆𑀣𑀺 𑀚𑀯𑀦𑀓𑀺𑀘𑁆𑀘𑀁 𑀢𑀲𑁆𑀲 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀸𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀆𑀯𑀚𑁆𑀚𑀦𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸’’𑀢𑀺 (𑀥. 𑀲. 𑀅𑀝𑁆𑀞. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸). 𑀇𑀢𑀭𑀣𑀸 ‘‘𑀚𑀯𑀦𑀁 𑀳𑀼𑀢𑁆𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀓𑀼𑀲𑀮𑀸𑀓𑀼𑀲𑀮𑀨𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀻𑀢𑀺 𑀏𑀓𑀯𑀻𑀲𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀺, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀸𑀦𑀺, 𑀘𑀢𑁆𑀢𑀸𑀭𑀺 𑀮𑁄𑀓𑀼𑀢𑁆𑀢𑀭𑀨𑀮𑀘𑀺𑀢𑁆𑀢𑀸𑀦𑀺, 𑀅𑀝𑁆𑀞𑀸𑀭𑀲 𑀢𑁂𑀪𑀽𑀫𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀫𑁆𑀧𑀺 𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀸𑀤𑀺𑀓𑀁 𑀢𑀁𑀲𑀪𑀸𑀯𑀯𑀦𑁆𑀢𑀢𑀸𑀬 𑀚𑀯𑀦𑀓𑀺𑀘𑁆𑀘𑀁 𑀦𑀸𑀫, 𑀬𑀣𑀸 𑀏𑀓𑁂𑀓𑀕𑁄𑀘𑀭𑀯𑀺𑀲𑀬𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀓𑀮𑀯𑀺𑀲𑀬𑀸𑀯𑀩𑁄𑀥𑀦𑀲𑀸𑀫𑀢𑁆𑀣𑀺𑀬𑀬𑁄𑀕𑀢𑁄 𑀦 𑀓𑀤𑀸𑀘𑀺 𑀢𑀁𑀦𑀸𑀫𑀁 𑀯𑀺𑀚𑀳𑀢𑀻𑀢𑀺.

𑁨𑁭. 𑀏𑀯𑀁 𑀓𑀺𑀘𑁆𑀘𑀪𑁂𑀤𑁂𑀦 𑀯𑀼𑀢𑁆𑀢𑀸𑀦𑁂𑀯 𑀬𑀣𑀸𑀲𑀓𑀁 𑀮𑀩𑁆𑀪𑀫𑀸𑀦𑀓𑀺𑀘𑁆𑀘𑀕𑀡𑀦𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀼 𑀧𑀦𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁.

𑁩𑁩. 𑀧𑀝𑀺𑀲𑀦𑁆𑀥𑀸𑀤𑀬𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀦𑀸𑀫𑀓𑀺𑀘𑁆𑀘𑀪𑁂𑀤𑁂𑀦 𑀧𑀝𑀺𑀲𑀦𑁆𑀥𑀸𑀤𑀻𑀦𑀁 𑀦𑀸𑀫𑀸𑀦𑀁, 𑀓𑀺𑀘𑁆𑀘𑀸𑀦𑀜𑁆𑀘 𑀪𑁂𑀤𑁂𑀦, 𑀅𑀣 𑀯𑀸 𑀧𑀝𑀺𑀲𑀦𑁆𑀥𑀸𑀤𑀬𑁄 𑀦𑀸𑀫 𑀢𑀦𑁆𑀦𑀸𑀫𑀓𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀝𑀺𑀲𑀦𑁆𑀥𑀸𑀤𑀻𑀦𑀁 𑀓𑀺𑀘𑁆𑀘𑀸𑀦𑀁 𑀪𑁂𑀤𑁂𑀦 𑀘𑀼𑀤𑁆𑀤𑀲, 𑀞𑀸𑀦𑀪𑁂𑀤𑁂𑀦 𑀧𑀝𑀺𑀲𑀦𑁆𑀥𑀸𑀤𑀻𑀦𑀁𑀬𑁂𑀯 𑀞𑀸𑀦𑀸𑀦𑀁 𑀪𑁂𑀤𑁂𑀦 𑀤𑀲𑀥𑀸 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀏𑀓𑀓𑀺𑀘𑁆𑀘𑀞𑀸𑀦𑀤𑁆𑀯𑀺𑀓𑀺𑀘𑁆𑀘𑀞𑀸𑀦𑀢𑀺𑀓𑀺𑀘𑁆𑀘𑀞𑀸𑀦𑀘𑀢𑀼𑀓𑀺𑀘𑁆𑀘𑀞𑀸𑀦𑀧𑀜𑁆𑀘𑀓𑀺𑀘𑁆𑀘𑀞𑀸𑀦𑀸𑀦𑀺 𑀘𑀺𑀢𑁆𑀢𑀸𑀦𑀺 𑀬𑀣𑀸𑀓𑁆𑀓𑀫𑀁 𑀅𑀝𑁆𑀞𑀲𑀝𑁆𑀞𑀺, 𑀢𑀣𑀸 𑀤𑁆𑀯𑁂 𑀘 𑀦𑀯 𑀘 𑀅𑀝𑁆𑀞 𑀘 𑀤𑁆𑀯𑁂 𑀘𑀸𑀢𑀺 𑀦𑀺𑀤𑁆𑀤𑀺𑀲𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀺𑀘𑁆𑀘𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀭𑀲𑀗𑁆𑀕𑀳𑀯𑀡𑁆𑀡𑀦𑀸

𑁩𑁫. 𑀤𑁆𑀯𑀸𑀭𑀸𑀦𑀁, 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀘𑀺𑀢𑁆𑀢𑀸𑀦𑀜𑁆𑀘 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀗𑁆𑀕𑀳𑁄 𑀤𑁆𑀯𑀸𑀭𑀲𑀗𑁆𑀕𑀳𑁄. 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀪𑀸𑀯𑀢𑁄 𑀤𑁆𑀯𑀸𑀭𑀸𑀦𑀺 𑀯𑀺𑀬𑀸𑀢𑀺 𑀤𑁆𑀯𑀸𑀭𑀸𑀦𑀺.

𑁩𑁬. 𑀘𑀓𑁆𑀔𑀼𑀫𑁂𑀯𑀸𑀢𑀺 𑀧𑀲𑀸𑀤𑀘𑀓𑁆𑀔𑀼𑀫𑁂𑀯.

𑁩𑁭. 𑀆𑀯𑀚𑁆𑀚𑀦𑀸𑀤𑀻𑀦𑀁 𑀫𑀦𑀸𑀦𑀁, 𑀫𑀦𑁄𑀬𑁂𑀯 𑀯𑀸 𑀤𑁆𑀯𑀸𑀭𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀁. 𑀪𑀯𑀗𑁆𑀕𑀦𑁆𑀢𑀺 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀸𑀯𑀚𑁆𑀚𑀦𑀁 𑀪𑀯𑀗𑁆𑀕𑀦𑁆𑀢𑀼, 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺;

𑁩𑁯. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁂𑀲𑀼 𑀘𑀓𑁆𑀔𑀼𑀤𑁆𑀯𑀸𑀭𑁂 𑀙𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀬𑀣𑀸𑀭𑀳𑀫𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀫𑁂𑀓𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀉𑀪𑀬𑀯𑀺𑀧𑀸𑀓𑀯𑀲𑁂𑀦 𑀲𑀢𑁆𑀢, 𑀯𑁄𑀝𑁆𑀞𑀩𑁆𑀩𑀦𑀫𑁂𑀓𑀁, 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀘 𑀓𑀼𑀲𑀮𑀸𑀓𑀼𑀲𑀮𑀦𑀺𑀭𑀸𑀯𑀚𑁆𑀚𑀦𑀓𑀺𑀭𑀺𑀬𑀯𑀲𑁂𑀦 𑀏𑀓𑀽𑀦𑀢𑀺𑀁𑀲, 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀅𑀝𑁆𑀞𑁂𑀯𑀸𑀢𑀺 𑀙𑀘𑀢𑁆𑀢𑀸𑀮𑀻𑀲. 𑀬𑀣𑀸𑀭𑀳𑀦𑁆𑀢𑀺 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑁂 𑀬𑁄𑀦𑀺𑀲𑁄𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀦𑀺𑀭𑀦𑀼𑀲𑀬𑀲𑀦𑁆𑀢𑀸𑀦𑀸𑀤𑀻𑀦𑀁 𑀅𑀦𑀼𑀭𑀽𑀧𑀯𑀲𑁂𑀦. 𑀲𑀩𑁆𑀩𑀣𑀸𑀧𑀻𑀢𑀺 𑀆𑀯𑀚𑁆𑀚𑀦𑀸𑀤𑀺𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑁂𑀦 𑀲𑀩𑁆𑀩𑁂𑀦𑀧𑀺 𑀧𑀓𑀸𑀭𑁂𑀦 𑀓𑀸𑀫𑀸𑀯𑀘𑀭𑀸𑀦𑁂𑀯𑀸𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀣𑀸𑀧𑀺 𑀘𑀢𑀼𑀧𑀜𑁆𑀜𑀸𑀲 𑀘𑀺𑀢𑁆𑀢𑀸𑀦𑀻𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀣𑀸𑀧𑀺 𑀢𑀁𑀢𑀁𑀤𑁆𑀯𑀸𑀭𑀺𑀓𑀯𑀲𑁂𑀦 𑀞𑀺𑀢𑀸𑀦𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑁂𑀲𑀼 𑀙𑀘𑀢𑁆𑀢𑀸𑀮𑀻𑀲𑀘𑀺𑀢𑁆𑀢𑁂𑀲𑀼 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀬𑀼𑀕𑀴𑀸𑀦𑀁 𑀧𑀓𑁆𑀔𑁂𑀧𑁂𑀦 𑀘𑀢𑀼𑀧𑀜𑁆𑀜𑀸𑀲𑀧𑀻𑀢𑁆𑀬𑀢𑁆𑀣𑁄.

𑁪𑁧. 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁂𑀲𑀼 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀫𑀦𑁄𑀤𑁆𑀯𑀸𑀭𑀲𑀗𑁆𑀔𑀸𑀢𑀪𑀯𑀗𑁆𑀕𑀢𑁄 𑀆𑀭𑀫𑁆𑀫𑀡𑀦𑁆𑀢𑀭𑀕𑁆𑀕𑀳𑀡𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘 𑀧𑀝𑀺𑀲𑀦𑁆𑀥𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀺.

𑁪𑁨. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀲𑀓𑀲𑀓𑀤𑁆𑀯𑀸𑀭𑁂, 𑀙𑀩𑁆𑀩𑀻𑀲𑀢𑀺 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑀸𑀦𑀺 𑀫𑀦𑁄𑀤𑁆𑀯𑀸𑀭𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀙𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀬𑀣𑀸𑀭𑀳𑀁 𑀲𑀓𑀲𑀓𑀤𑁆𑀯𑀸𑀭𑀸𑀦𑀼𑀭𑀽𑀧𑀁 𑀏𑀓𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀺.

𑁪𑁫. 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦, 𑀫𑀦𑁄𑀤𑁆𑀯𑀸𑀭𑁂 𑀘 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀙𑀤𑁆𑀯𑀸𑀭𑀺𑀓𑀸𑀦𑀺 𑀘𑁂𑀯 𑀧𑀝𑀺𑀲𑀦𑁆𑀥𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀺𑀬𑀸 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀺 𑀘.

𑁪𑁭. 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀦𑀺 𑀘 𑀙𑀤𑁆𑀯𑀸𑀭𑀺𑀓𑀸𑀦𑀺 𑀘 𑀧𑀜𑁆𑀘𑀙𑀤𑁆𑀯𑀸𑀭𑀺𑀓𑀸𑀦𑀺. 𑀙𑀤𑁆𑀯𑀸𑀭𑀺𑀓𑀸𑀦𑀺 𑀘 𑀢𑀸𑀦𑀺 𑀓𑀤𑀸𑀘𑀺 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀺 𑀘𑀸𑀢𑀺 𑀙𑀤𑁆𑀯𑀸𑀭𑀺𑀓𑀯𑀺𑀫𑀼𑀢𑁆𑀢𑀸𑀦𑀺. 𑀅𑀣 𑀯𑀸 𑀙𑀤𑁆𑀯𑀸𑀭𑀺𑀓𑀸𑀦𑀺 𑀘 𑀙𑀤𑁆𑀯𑀸𑀭𑀺𑀓𑀯𑀺𑀫𑀼𑀢𑁆𑀢𑀸𑀦𑀺 𑀘𑀸𑀢𑀺 𑀙𑀤𑁆𑀯𑀸𑀭𑀺𑀓𑀯𑀺𑀫𑀼𑀢𑁆𑀢𑀸𑀦𑀻𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

𑀤𑁆𑀯𑀸𑀭𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀮𑀫𑁆𑀩𑀡𑀲𑀗𑁆𑀕𑀳𑀯𑀡𑁆𑀡𑀦𑀸

𑁪𑁮. 𑀆𑀭𑀫𑁆𑀫𑀡𑀸𑀦𑀁 𑀲𑀭𑀽𑀧𑀢𑁄, 𑀯𑀺𑀪𑀸𑀕𑀢𑁄, 𑀢𑀁𑀯𑀺𑀲𑀬𑀘𑀺𑀢𑁆𑀢𑀢𑁄 𑀘 𑀲𑀗𑁆𑀕𑀳𑁄 𑀆𑀮𑀫𑁆𑀩𑀡𑀲𑀗𑁆𑀕𑀳𑁄. 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀭𑀽𑀧𑀬𑀢𑀺 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀭𑀽𑀧𑀁, 𑀢𑀤𑁂𑀯 𑀤𑀼𑀩𑁆𑀩𑀮𑀧𑀼𑀭𑀺𑀲𑁂𑀦 𑀤𑀡𑁆𑀟𑀸𑀤𑀺 𑀯𑀺𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀆𑀮𑀫𑁆𑀩𑀻𑀬𑀢𑀺, 𑀢𑀸𑀦𑀺 𑀯𑀸 𑀆𑀕𑀦𑁆𑀢𑁆𑀯𑀸 𑀏𑀢𑁆𑀣 𑀭𑀫𑀦𑁆𑀢𑀻𑀢𑀺 𑀆𑀭𑀫𑁆𑀫𑀡𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀁. 𑀲𑀤𑁆𑀤𑀻𑀬𑀢𑀻𑀢𑀺 𑀲𑀤𑁆𑀤𑁄, 𑀲𑁄𑀬𑁂𑀯 𑀆𑀭𑀫𑁆𑀫𑀡𑀦𑁆𑀢𑀺 𑀲𑀤𑁆𑀤𑀸𑀭𑀫𑁆𑀫𑀡𑀁. 𑀕𑀦𑁆𑀥𑀬𑀢𑀺 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑁂𑀢𑀺 ‘‘𑀇𑀤𑀫𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀓𑀭𑁄𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀕𑀦𑁆𑀥𑁄, 𑀲𑁄𑀬𑁂𑀯 𑀆𑀭𑀫𑁆𑀫𑀡𑀁 𑀕𑀦𑁆𑀥𑀸𑀭𑀫𑁆𑀫𑀡𑀁. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀭𑀲𑁄, 𑀲𑁄𑀬𑁂𑀯 𑀆𑀭𑀫𑁆𑀫𑀡𑀁 𑀭𑀲𑀸𑀭𑀫𑁆𑀫𑀡𑀁. 𑀨𑀼𑀲𑀻𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁, 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁. 𑀥𑀫𑁆𑀫𑁄𑀬𑁂𑀯 𑀆𑀭𑀫𑁆𑀫𑀡𑀁 𑀥𑀫𑁆𑀫𑀸𑀭𑀫𑁆𑀫𑀡𑀁.

𑁪𑁯. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂𑀲𑀼, 𑀭𑀽𑀧𑀫𑁂𑀯𑀸𑀢𑀺 𑀯𑀡𑁆𑀡𑀸𑀬𑀢𑀦𑀲𑀗𑁆𑀔𑀸𑀢𑀁 𑀭𑀽𑀧𑀫𑁂𑀯. 𑀲𑀤𑁆𑀤𑀸𑀤𑀬𑁄𑀢𑀺 𑀲𑀤𑁆𑀤𑀸𑀬𑀢𑀦𑀸𑀤𑀺𑀲𑀗𑁆𑀔𑀸𑀢𑀸 𑀲𑀤𑁆𑀤𑀸𑀤𑀬𑁄, 𑀆𑀧𑁄𑀥𑀸𑀢𑀼𑀯𑀚𑁆𑀚𑀺𑀢𑀪𑀽𑀢𑀢𑁆𑀢𑀬𑀲𑀗𑁆𑀔𑀸𑀢𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀜𑁆𑀘.

𑁫𑁦. 𑀧𑀜𑁆𑀘𑀸𑀭𑀫𑁆𑀫𑀡𑀧𑀲𑀸𑀤𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑁄𑀴𑀲 𑀲𑀼𑀔𑀼𑀫𑀭𑀽𑀧𑀸𑀦𑀺.

𑁫𑁧. 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀢𑁆𑀢𑀫𑀸𑀦𑀁.

𑁫𑁨. 𑀙𑀩𑁆𑀩𑀺𑀥𑀫𑁆𑀧𑀻𑀢𑀺 𑀭𑀽𑀧𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀫𑁆𑀧𑀺. 𑀯𑀺𑀦𑀸𑀲𑀸𑀪𑀸𑀯𑀢𑁄 𑀅𑀢𑀻𑀢𑀸𑀤𑀺𑀓𑀸𑀮𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀢𑁆𑀢𑀸 𑀦𑀺𑀩𑁆𑀩𑀸𑀦𑀁, 𑀧𑀜𑁆𑀜𑀢𑁆𑀢𑀺 𑀘 𑀓𑀸𑀮𑀯𑀺𑀫𑀼𑀢𑁆𑀢𑀁 𑀦𑀸𑀫. 𑀬𑀣𑀸𑀭𑀳𑀦𑁆𑀢𑀺 𑀓𑀸𑀫𑀸𑀯𑀘𑀭𑀚𑀯𑀦𑀅𑀪𑀺𑀜𑁆𑀜𑀸𑀲𑁂𑀲𑀫𑀳𑀕𑁆𑀕𑀢𑀸𑀤𑀺𑀚𑀯𑀦𑀸𑀦𑀁 𑀅𑀦𑀼𑀭𑀽𑀧𑀢𑁄. 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀜𑁆𑀳𑀺 𑀳𑀲𑀺𑀢𑀼𑀧𑁆𑀧𑀸𑀤𑀯𑀚𑁆𑀚𑀸𑀦𑀁 𑀙𑀩𑁆𑀩𑀺𑀥𑀫𑁆𑀧𑀺 𑀢𑀺𑀓𑀸𑀮𑀺𑀓𑀁, 𑀓𑀸𑀮𑀯𑀺𑀫𑀼𑀢𑁆𑀢𑀜𑁆𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲 𑀢𑀺𑀓𑀸𑀮𑀺𑀓𑀫𑁂𑀯. 𑀢𑀣𑀸 𑀳𑀺𑀲𑁆𑀲 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀁 𑀯𑀓𑁆𑀔𑀢𑀺. 𑀤𑀺𑀩𑁆𑀩𑀘𑀓𑁆𑀔𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀲𑁆𑀲 𑀧𑀦 𑀅𑀪𑀺𑀜𑁆𑀜𑀸𑀚𑀯𑀦𑀲𑁆𑀲 𑀬𑀣𑀸𑀭𑀳𑀁 𑀙𑀩𑁆𑀩𑀺𑀥𑀫𑁆𑀧𑀺 𑀢𑀺𑀓𑀸𑀮𑀺𑀓𑀁, 𑀓𑀸𑀮𑀯𑀺𑀫𑀼𑀢𑁆𑀢𑀜𑁆𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀯𑀺𑀪𑀸𑀕𑁄 𑀧𑀦𑁂𑀢𑁆𑀣 𑀦𑀯𑀫𑀧𑀭𑀺𑀘𑁆𑀙𑁂𑀤𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑁂𑀲𑀸𑀦𑀁 𑀧𑀦 𑀓𑀸𑀮𑀯𑀺𑀫𑀼𑀢𑁆𑀢𑀁, 𑀅𑀢𑀻𑀢𑀜𑁆𑀘 𑀬𑀣𑀸𑀭𑀳𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑁫𑁩. 𑀤𑁆𑀯𑀸𑀭…𑀧𑁂… 𑀲𑀗𑁆𑀔𑀸𑀢𑀸𑀦𑀁 𑀙𑀩𑁆𑀩𑀺𑀥𑀫𑁆𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀁 𑀧𑀦 𑀦𑁂𑀲𑀁 𑀆𑀭𑀫𑁆𑀫𑀡𑀁 𑀦 𑀆𑀯𑀚𑁆𑀚𑀦𑀲𑁆𑀲 𑀯𑀺𑀬 𑀓𑁂𑀦𑀘𑀺 𑀅𑀕𑁆𑀕𑀳𑀺𑀢𑀫𑁂𑀯 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀺, 𑀦 𑀘 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀯𑀺𑀬 𑀏𑀓𑀦𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀦𑀸𑀧𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀯𑀺𑀬 𑀢𑀺𑀓𑀸𑀮𑀺𑀓𑀫𑁂𑀯, 𑀅𑀯𑀺𑀲𑁂𑀲𑁂𑀦 𑀓𑀸𑀮𑀯𑀺𑀫𑀼𑀢𑁆𑀢𑀁 𑀯𑀸, 𑀦𑀸𑀧𑀺 𑀫𑀭𑀡𑀸𑀲𑀦𑁆𑀦𑀢𑁄 𑀧𑀼𑀭𑀺𑀫𑀪𑀸𑀕𑀚𑀯𑀦𑀸𑀦𑀁 𑀯𑀺𑀬 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀯𑀲𑁂𑀦 𑀆𑀕𑀫𑀲𑀺𑀤𑁆𑀥𑀺𑀯𑁄𑀳𑀸𑀭𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀣𑀸𑀲𑀫𑁆𑀪𑀯𑀁…𑀧𑁂… 𑀲𑀫𑁆𑀫𑀢’’𑀦𑁆𑀢𑀺. 𑀢𑀢𑁆𑀣 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀢𑀁𑀢𑀁𑀪𑀽𑀫𑀺𑀓𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀻𑀦𑀁 𑀢𑀁𑀢𑀁𑀤𑁆𑀯𑀸𑀭𑀕𑁆𑀕𑀳𑀺𑀢𑀸𑀤𑀺𑀯𑀲𑁂𑀦 𑀲𑀫𑁆𑀪𑀯𑀸𑀦𑀼𑀭𑀽𑀧𑀢𑁄. 𑀓𑀸𑀫𑀸𑀯𑀘𑀭𑀸𑀦𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁 𑀢𑀸𑀯 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀁 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀬𑀣𑀸𑀭𑀳𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀜𑁆𑀘 𑀓𑀫𑁆𑀫𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀫𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀣𑀸 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀅𑀢𑀻𑀢𑀫𑁂𑀯. 𑀥𑀫𑁆𑀫𑀸𑀭𑀫𑁆𑀫𑀡𑀁 𑀧𑀦 𑀢𑁂𑀲𑀁 𑀢𑀺𑀡𑁆𑀡𑀦𑁆𑀦𑀫𑁆𑀧𑀺 𑀫𑀦𑁄𑀤𑁆𑀯𑀸𑀭𑀕𑁆𑀕𑀳𑀺𑀢𑀫𑁂𑀯 𑀅𑀢𑀻𑀢𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀁, 𑀢𑀣𑀸 𑀭𑀽𑀧𑀸𑀭𑀫𑁆𑀫𑀡𑀁 𑀏𑀓𑀫𑁂𑀯 𑀫𑀦𑁄𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀏𑀓𑀦𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀕𑀢𑀺𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀦𑁆𑀢𑀺 𑀏𑀯𑀁 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀸𑀤𑀻𑀦𑀁 𑀬𑀣𑀸𑀲𑀫𑁆𑀪𑀯𑀁 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀜𑁆𑀘 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀫𑀳𑀕𑁆𑀕𑀢𑀧𑀝𑀺𑀲𑀦𑁆𑀥𑀸𑀤𑀻𑀲𑀼 𑀧𑀦 𑀭𑀽𑀧𑀸𑀯𑀘𑀭𑀸𑀦𑀁, 𑀧𑀞𑀫𑀢𑀢𑀺𑀬𑀸𑀭𑀼𑀧𑁆𑀧𑀸𑀦𑀜𑁆𑀘 𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀯 𑀫𑀦𑁄𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀧𑀜𑁆𑀜𑀢𑁆𑀢𑀺𑀪𑀽𑀢𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀁, 𑀢𑀣𑀸 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀸𑀦𑀁 𑀅𑀢𑀻𑀢𑀫𑁂𑀯𑀸𑀢𑀺 𑀏𑀯𑀁 𑀫𑀳𑀕𑁆𑀕𑀢𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀻𑀦𑀁 𑀫𑀦𑁄𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀧𑀜𑁆𑀜𑀢𑁆𑀢𑀺𑀪𑀽𑀢𑀁, 𑀅𑀢𑀻𑀢𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀫𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀺.

𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑁆𑀢𑀭𑁂 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑀦𑁆𑀢𑀺 𑀩𑀸𑀳𑀼𑀮𑁆𑀮𑁂𑀦 𑀅𑀢𑀻𑀢𑀸𑀦𑀦𑁆𑀢𑀭𑀪𑀯𑁂 𑀫𑀭𑀡𑀸𑀲𑀦𑁆𑀦𑀧𑁆𑀧𑀯𑀢𑁆𑀢𑀙𑀤𑁆𑀯𑀸𑀭𑀺𑀓𑀚𑀯𑀦𑁂𑀳𑀺 𑀕𑀳𑀺𑀢𑀁. 𑀅𑀲𑀜𑁆𑀜𑀻𑀪𑀯𑀢𑁄 𑀘𑀼𑀢𑀸𑀦𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀯𑀺𑀲𑀬𑀲𑁆𑀲 𑀅𑀦𑀦𑁆𑀢𑀭𑀸𑀢𑀻𑀢𑀪𑀯𑁂 𑀦 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀕𑀳𑀡𑀁 𑀅𑀢𑁆𑀣𑀻𑀢𑀺 𑀢𑀤𑁂𑀯𑁂𑀢𑁆𑀣 𑀬𑁂𑀪𑀼𑀬𑁆𑀬𑀕𑁆𑀕𑀳𑀡𑁂𑀦 𑀩𑁆𑀬𑀪𑀺𑀘𑀸𑀭𑀺𑀢𑀁. 𑀓𑁂𑀯𑀮𑀜𑁆𑀳𑀺 𑀓𑀫𑁆𑀫𑀩𑀮𑁂𑀦𑁂𑀯 𑀢𑁂𑀲𑀁 𑀧𑀝𑀺𑀲𑀦𑁆𑀥𑀺𑀬𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀓𑀫𑀸𑀭𑀫𑁆𑀫𑀡𑀁 𑀉𑀧𑀝𑁆𑀞𑀸𑀢𑀺. 𑀢𑀣𑀸 𑀳𑀺 𑀲𑀘𑁆𑀘𑀲𑀗𑁆𑀔𑁂𑀧𑁂 𑀅𑀲𑀜𑁆𑀜𑀻𑀪𑀯𑀢𑁄 𑀘𑀼𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀦𑀺𑀫𑀺𑀢𑁆𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀪𑀯𑀦𑁆𑀢𑀭𑀓𑀢𑀁 𑀓𑀫𑁆𑀫𑀁, 𑀬𑀫𑁄𑀓𑀸𑀲𑀁 𑀮𑀪𑁂 𑀢𑀢𑁄;

𑀳𑁄𑀢𑀺 𑀲𑀸 𑀲𑀦𑁆𑀥𑀺 𑀢𑁂𑀦𑁂𑀯, 𑀉𑀧𑀝𑁆𑀞𑀸𑀧𑀺𑀢𑀕𑁄𑀘𑀭𑁂’’𑀢𑀺. (𑀲. 𑀲. 𑁧𑁭𑁧) 𑁋

𑀓𑁂𑀯𑀮𑀁 𑀓𑀫𑁆𑀫𑀩𑀮𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀕𑁄𑀘𑀭𑀲𑁆𑀲 𑀉𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀳𑀺 𑀚𑀯𑀦𑀕𑁆𑀕𑀳𑀺𑀢𑀲𑁆𑀲𑀧𑀺 𑀆𑀭𑀫𑁆𑀫𑀡𑀲𑁆𑀲 𑀓𑀫𑁆𑀫𑀩𑀮𑁂𑀦𑁂𑀯 𑀉𑀧𑀝𑁆𑀞𑀸𑀧𑀺𑀬𑀫𑀸𑀦𑀢𑁆𑀢𑀸 ‘‘𑀢𑁂𑀦𑁂𑀯𑀸’’𑀢𑀺 𑀲𑀸𑀯𑀥𑀸𑀭𑀡𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑀼𑀜𑁆𑀜𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀦𑀦𑀼 𑀘 𑀢𑁂𑀲𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀕𑁄𑀘𑀭𑁄 𑀓𑀫𑁆𑀫𑀪𑀯𑁂 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀚𑀯𑀦𑀕𑁆𑀕𑀳𑀺𑀢𑁄 𑀲𑀫𑁆𑀪𑀯𑀢𑀻𑀢𑀺? 𑀲𑀘𑁆𑀘𑀁 𑀲𑀫𑁆𑀪𑀯𑀢𑀺 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑁄, 𑀕𑀢𑀺𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑁄 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀫𑀭𑀡𑀓𑀸𑀮𑁂𑀬𑁂𑀯 𑀉𑀧𑀝𑁆𑀞𑀸𑀢𑀻𑀢𑀺 𑀓𑀼𑀢𑁄 𑀢𑀲𑁆𑀲 𑀓𑀫𑁆𑀫𑀪𑀯𑁂 𑀕𑀳𑀡𑀲𑀫𑁆𑀪𑀯𑁄. 𑀅𑀧𑀺𑀘𑁂𑀢𑁆𑀣 𑀫𑀭𑀡𑀸𑀲𑀦𑁆𑀦𑀧𑀯𑀢𑁆𑀢𑀚𑀯𑀦𑁂𑀳𑀺 𑀕𑀳𑀺𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀙𑀤𑁆𑀯𑀸𑀭𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀓𑀢𑁆𑀯𑀸 𑀆𑀘𑀭𑀺𑀬𑁂𑀦 𑀇𑀫𑀲𑁆𑀫𑀺𑀁𑀬𑁂𑀯 𑀅𑀥𑀺𑀓𑀸𑀭𑁂 𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑀁 𑁋

‘‘𑀫𑀭𑀡𑀸𑀲𑀦𑁆𑀦𑀲𑀢𑁆𑀢𑀲𑁆𑀲, 𑀬𑀣𑁄𑀧𑀝𑁆𑀞𑀺𑀢𑀕𑁄𑀘𑀭𑀁;

𑀙𑀤𑁆𑀯𑀸𑀭𑁂𑀲𑀼 𑀢𑀫𑀸𑀭𑀩𑁆𑀪, 𑀧𑀝𑀺𑀲𑀦𑁆𑀥𑀺 𑀪𑀯𑀦𑁆𑀢𑀭𑁂’’𑀢𑀺. (𑀧𑀭𑀫. 𑀯𑀺. 𑁮𑁯);

‘‘𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑁆𑀬𑀸𑀤𑀺𑀦𑀸 𑀅𑀦𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁄𑀘𑀭𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀦 𑀳𑀺 𑀢𑀁 𑀅𑀢𑀻𑀢𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀺 𑀯𑀺𑀬 𑀅𑀦𑀼𑀪𑀽𑀢𑀁, 𑀦𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀯𑀺𑀬 𑀆𑀧𑀸𑀣𑀕𑀢𑀜𑁆𑀘 𑀳𑁄𑀢𑀻𑀢𑀺, 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀻𑀦𑀜𑁆𑀘 𑀲𑀭𑀽𑀧𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑁫𑁪. 𑀢𑁂𑀲𑀽𑀢𑀺 𑀭𑀽𑀧𑀸𑀤𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀓𑀫𑁆𑀫𑀸𑀤𑀺𑀆𑀭𑀫𑁆𑀫𑀡𑁂𑀲𑀼 𑀯𑀺𑀜𑁆𑀜𑀸𑀡𑁂𑀲𑀼. 𑀭𑀽𑀧𑀸𑀤𑀻𑀲𑀼 𑀏𑀓𑁂𑀓𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀭𑀽𑀧𑀸𑀤𑀺𑀏𑀓𑁂𑀓𑀸𑀭𑀫𑁆𑀫𑀡𑀸𑀦𑀺.

𑁫𑁫. 𑀭𑀽𑀧𑀸𑀤𑀺𑀓𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀆𑀭𑀫𑁆𑀫𑀡𑀫𑁂𑀢𑀲𑁆𑀲𑀸𑀢𑀺 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀁.

𑁫𑁬. 𑀲𑁂𑀲𑀸𑀦𑀻𑀢𑀺 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑁂𑀳𑀺 𑀅𑀯𑀲𑁂𑀲𑀸𑀦𑀺 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀺. 𑀲𑀩𑁆𑀩𑀣𑀸𑀧𑀺 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀸𑀦𑀻𑀢𑀺 𑀲𑀩𑁆𑀩𑁂𑀦𑀧𑀺 𑀙𑀤𑁆𑀯𑀸𑀭𑀺𑀓𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀙𑀴𑀸𑀭𑀫𑁆𑀫𑀡𑀯𑀲𑀧𑁆𑀧𑀯𑀢𑁆𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺𑀧𑀺 𑀏𑀓𑀦𑁆𑀢𑀓𑀸𑀫𑀸𑀯𑀘𑀭𑀲𑀪𑀸𑀯𑀙𑀴𑀸𑀭𑀫𑁆𑀫𑀡𑀕𑁄𑀘𑀭𑀸𑀦𑀺. 𑀏𑀢𑁆𑀣 𑀳𑀺 𑀯𑀺𑀧𑀸𑀓𑀸𑀦𑀺 𑀢𑀸𑀯 𑀲𑀦𑁆𑀢𑀻𑀭𑀡𑀸𑀤𑀺𑀯𑀲𑁂𑀦 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑁂, 𑀧𑀝𑀺𑀲𑀦𑁆𑀥𑀸𑀤𑀺𑀯𑀲𑁂𑀦 𑀙𑀴𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑁂 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑁂𑀬𑁂𑀯 𑀧𑀯𑀢𑁆𑀢𑀦𑁆𑀢𑀺.

𑀳𑀲𑀦𑀘𑀺𑀢𑁆𑀢𑀫𑁆𑀧𑀺 𑀧𑀥𑀸𑀦𑀲𑀸𑀭𑀼𑀧𑁆𑀧𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀢𑀼𑀲𑁆𑀲𑀦𑁆𑀢𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑁂, 𑀪𑀡𑁆𑀟𑀪𑀸𑀚𑀦𑀝𑁆𑀞𑀸𑀦𑁂 𑀫𑀳𑀸𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀏𑀯𑀭𑀽𑀧𑀸 𑀮𑁄𑀮𑀼𑀧𑁆𑀧𑀢𑀡𑁆𑀳𑀸 𑀫𑁂 𑀧𑀳𑀻𑀦𑀸’’𑀢𑀺 𑀢𑀼𑀲𑁆𑀲𑀦𑁆𑀢𑀲𑁆𑀲 𑀲𑀤𑁆𑀤𑀸𑀭𑀫𑁆𑀫𑀡𑁂, 𑀕𑀦𑁆𑀥𑀸𑀤𑀻𑀳𑀺 𑀘𑁂𑀢𑀺𑀬𑀧𑀽𑀚𑀦𑀓𑀸𑀮𑁂 𑀢𑀼𑀲𑁆𑀲𑀦𑁆𑀢𑀲𑁆𑀲 𑀕𑀦𑁆𑀥𑀸𑀭𑀫𑁆𑀫𑀡𑁂, 𑀭𑀲𑀲𑀫𑁆𑀧𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀓𑀸𑀮𑁂 𑀢𑀼𑀲𑁆𑀲𑀦𑁆𑀢𑀲𑁆𑀲 𑀭𑀲𑀸𑀭𑀫𑁆𑀫𑀡𑁂, 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀧𑀭𑀺𑀧𑀽𑀭𑀡𑀓𑀸𑀮𑁂 𑀢𑀼𑀲𑁆𑀲𑀦𑁆𑀢𑀲𑁆𑀲 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁂, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀸𑀤𑀻𑀳𑀺 𑀕𑀳𑀺𑀢𑀓𑀸𑀫𑀸𑀯𑀘𑀭𑀥𑀫𑁆𑀫𑀁 𑀆𑀭𑀩𑁆𑀪 𑀢𑀼𑀲𑁆𑀲𑀦𑁆𑀢𑀲𑁆𑀲 𑀥𑀫𑁆𑀫𑀸𑀭𑀫𑁆𑀫𑀡𑁂𑀢𑀺 𑀏𑀯𑀁 𑀧𑀭𑀺𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑁂𑀲𑁆𑀯𑁂𑀯 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺.

𑁫𑁭. 𑀤𑁆𑀯𑀸𑀤𑀲𑀸𑀓𑀼𑀲𑀮𑀅𑀝𑁆𑀞𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀚𑀯𑀦𑀯𑀲𑁂𑀦 𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀅𑀢𑁆𑀢𑀦𑁄 𑀚𑀴𑀪𑀸𑀯𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀯𑀚𑁆𑀚𑁂𑀢𑁆𑀯𑀸 𑀢𑁂𑀪𑀽𑀫𑀓𑀸𑀦𑀺, 𑀧𑀜𑁆𑀜𑀢𑁆𑀢𑀺𑀜𑁆𑀘 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀅𑀓𑀼𑀲𑀮𑀸𑀦𑀺 𑀘𑁂𑀯𑀸’’𑀢𑁆𑀬𑀸𑀤𑀺. 𑀇𑀫𑁂𑀲𑀼 𑀳𑀺 𑀅𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀭𑀺𑀢𑁆𑀢𑀥𑀫𑁆𑀫𑁂 𑀆𑀭𑀩𑁆𑀪 𑀧𑀭𑀸𑀫𑀲𑀦𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀓𑀸𑀮𑁂 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀸, 𑀢𑁂𑀦𑁂𑀯𑀸𑀓𑀸𑀭𑁂𑀦 𑀲𑀢𑁆𑀢𑀯𑀻𑀲𑀢𑀺 𑀫𑀳𑀕𑁆𑀕𑀢𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀲𑀫𑁆𑀫𑀼𑀢𑀺𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀧𑀺 𑀢𑁂𑀬𑁂𑀯 𑀥𑀫𑁆𑀫𑁂 𑀆𑀭𑀩𑁆𑀪 𑀓𑁂𑀯𑀮𑀁 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀁, 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸 𑀘 𑀤𑀼𑀲𑁆𑀲𑀦𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦, 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀅𑀦𑀺𑀝𑁆𑀞𑀗𑁆𑀕𑀫𑀦𑀯𑀲𑁂𑀦, 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀯𑀺𑀓𑁆𑀔𑀺𑀧𑀦𑀯𑀲𑁂𑀦, 𑀅𑀯𑀽𑀧𑀲𑀫𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑁄, 𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄, 𑀓𑀺𑀭𑀺𑀬𑀢𑁄 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀸𑀦𑀁 𑀅𑀲𑀓𑁆𑀓𑀘𑁆𑀘𑀤𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀲𑀼 𑀧𑀭𑀺𑀢𑁆𑀢𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀸, 𑀅𑀢𑀺𑀧𑀕𑀼𑀡𑀚𑁆𑀛𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀻𑀲𑀼 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁫𑁮. 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀯𑀚𑁆𑀚𑀺𑀢𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂𑀲𑁆𑀯𑁂𑀯 𑀧𑀯𑀢𑁆𑀢𑀦𑀢𑁄. 𑀲𑁂𑀓𑁆𑀔𑀸𑀧𑀺 𑀳𑀺 𑀞𑀧𑁂𑀢𑁆𑀯𑀸 𑀮𑁄𑀓𑀺𑀬𑀘𑀺𑀢𑁆𑀢𑀁 𑀅𑀭𑀳𑀢𑁄 𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀁 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀦𑀥𑀺𑀕𑀢𑀢𑁆𑀢𑀸, 𑀢𑀣𑀸 𑀧𑀼𑀣𑀼𑀚𑁆𑀚𑀦𑀸𑀤𑀬𑁄𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁, 𑀲𑁂𑀓𑁆𑀔𑀸𑀦𑀁 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑁂𑀲𑀼 𑀧𑀭𑀲𑀦𑁆𑀢𑀸𑀦𑀕𑀢𑀫𑀕𑁆𑀕𑀨𑀮𑀸𑀭𑀫𑁆𑀫𑀡𑀸𑀬 𑀅𑀪𑀺𑀜𑁆𑀜𑀸𑀬 𑀧𑀭𑀺𑀓𑀫𑁆𑀫𑀓𑀸𑀮𑁂, 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦𑁂𑀯 𑀫𑀕𑁆𑀕𑀨𑀮𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑀓𑀸𑀮𑁂 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀸𑀦𑀸𑀦𑀁, 𑀳𑁂𑀝𑁆𑀞𑀺𑀫𑀸𑀦𑀜𑁆𑀘 𑀫𑀕𑁆𑀕𑀨𑀮𑀥𑀫𑁆𑀫𑁂 𑀆𑀭𑀩𑁆𑀪 𑀓𑀼𑀲𑀮𑀚𑀯𑀦𑀸𑀦𑀁 𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀲𑁆𑀲𑁂𑀯 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄. 𑀓𑀸𑀫𑀸𑀯𑀘𑀭𑀫𑀳𑀕𑁆𑀕𑀢𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀸𑀦𑀺 𑀧𑀦 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀓𑁆𑀓𑀘𑁆𑀘𑀤𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀥𑀫𑁆𑀫𑀲𑁆𑀲𑀯𑀦𑀲𑀗𑁆𑀔𑀸𑀭𑀲𑀫𑁆𑀫𑀲𑀦𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀲𑀼 𑀢𑀁𑀢𑀤𑀸𑀭𑀫𑁆𑀫𑀡𑀺𑀓𑀸𑀪𑀺𑀜𑁆𑀜𑀸𑀦𑀁 𑀧𑀭𑀺𑀓𑀫𑁆𑀫𑀓𑀸𑀮𑁂, 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀓𑀸𑀮𑁂, 𑀤𑀺𑀩𑁆𑀩𑀘𑀓𑁆𑀔𑀸𑀤𑀻𑀳𑀺 𑀭𑀽𑀧𑀯𑀺𑀚𑀸𑀦𑀦𑀸𑀤𑀺𑀓𑀸𑀮𑁂 𑀘 𑀓𑀼𑀲𑀮𑀚𑀯𑀦𑀸𑀦𑀁 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀦𑁆𑀢𑀺.

𑁫𑁯. 𑀲𑀩𑁆𑀩𑀣𑀸𑀧𑀺 𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀻𑀢𑀺 𑀓𑀸𑀫𑀸𑀯𑀘𑀭𑀫𑀳𑀕𑁆𑀕𑀢𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀲𑀩𑁆𑀩𑀣𑀸𑀧𑀺 𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺, 𑀦 𑀧𑀦 𑀅𑀓𑀼𑀲𑀮𑀸𑀤𑀬𑁄 𑀯𑀺𑀬 𑀲𑀧𑁆𑀧𑀤𑁂𑀲𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀻𑀢𑁆𑀬𑀢𑁆𑀣𑁄. 𑀓𑀺𑀭𑀺𑀬𑀚𑀯𑀦𑀸𑀦𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀺𑀬𑀁, 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀘 𑀢𑀁𑀢𑀁𑀧𑀼𑀭𑁂𑀘𑀸𑀭𑀺𑀓𑀯𑀲𑀧𑁆𑀧𑀯𑀢𑁆𑀢𑀺𑀬𑀁 𑀦 𑀘 𑀓𑀺𑀜𑁆𑀘𑀺 𑀅𑀕𑁄𑀘𑀭𑀁 𑀦𑀸𑀫 𑀅𑀢𑁆𑀣𑀺.

𑁬𑁦. 𑀧𑀞𑀫𑀢𑀢𑀺𑀬𑀸𑀭𑀼𑀧𑁆𑀧𑀸𑀭𑀫𑁆𑀫𑀡𑀢𑁆𑀢𑀸 𑀆𑀭𑀼𑀧𑁆𑀧𑁂𑀲𑀼 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸𑀦𑀺.

𑁬𑁧. 𑀲𑁂𑀲𑀸𑀦𑀺…𑀧𑁂… 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀦𑀻𑀢𑀺 𑀧𑀦𑁆𑀦𑀭𑀲 𑀭𑀽𑀧𑀸𑀯𑀘𑀭𑀸𑀦𑀺, 𑀧𑀞𑀫𑀢𑀢𑀺𑀬𑀸𑀭𑀼𑀧𑁆𑀧𑀸𑀦𑀺 𑀘𑀸𑀢𑀺 𑀏𑀓𑀯𑀻𑀲𑀢𑀺 𑀓𑀲𑀺𑀡𑀸𑀤𑀺𑀧𑀜𑁆𑀜𑀢𑁆𑀢𑀻𑀲𑀼 𑀧𑀯𑀢𑁆𑀢𑀦𑀢𑁄 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀦𑀺.

𑁬𑁩. 𑀢𑁂𑀯𑀻𑀲𑀢𑀺𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀳𑀲𑀦𑀯𑀲𑁂𑀦 𑀧𑀜𑁆𑀘𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀧𑀭𑀺𑀢𑁆𑀣𑀫𑁆𑀳𑀺 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑁂 𑀬𑁂𑀯 𑀪𑀯𑀦𑁆𑀢𑀺. 𑀓𑀸𑀫𑀸𑀯𑀘𑀭𑀜𑁆𑀳𑀺 𑀫𑀳𑀕𑁆𑀕𑀢𑀸𑀤𑀬𑁄 𑀉𑀧𑀸𑀤𑀸𑀬 𑀫𑀦𑁆𑀤𑀸𑀦𑀼𑀪𑀸𑀯𑀢𑀸𑀬 𑀧𑀭𑀺𑀲𑀫𑀦𑁆𑀢𑀢𑁄 𑀅𑀢𑁆𑀢𑀁 𑀔𑀡𑁆𑀟𑀺𑀢𑀁 𑀯𑀺𑀬𑀸𑀢𑀺 𑀧𑀭𑀺𑀢𑁆𑀢𑀁. ‘‘𑀙 𑀘𑀺𑀢𑁆𑀢𑀸𑀦𑀺 𑀫𑀳𑀕𑁆𑀕𑀢𑁂𑀬𑁂𑀯𑀸’’𑀢𑁆𑀬𑀸𑀤𑀺𑀦𑀸 𑀲𑀩𑁆𑀩𑀢𑁆𑀣 𑀲𑀸𑀯𑀥𑀸𑀭𑀡𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑀆𑀮𑀫𑁆𑀩𑀡𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀣𑀼𑀲𑀗𑁆𑀕𑀳𑀯𑀡𑁆𑀡𑀦𑀸

𑁬𑁪. 𑀯𑀢𑁆𑀣𑀼𑀯𑀺𑀪𑀸𑀕𑀢𑁄, 𑀢𑀩𑁆𑀩𑀢𑁆𑀣𑀼𑀓𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘 𑀲𑀗𑁆𑀕𑀳𑁄 𑀯𑀢𑁆𑀣𑀼𑀲𑀗𑁆𑀕𑀳𑁄. 𑀯𑀲𑀦𑁆𑀢𑀺 𑀏𑀢𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀢𑀦𑁆𑀦𑀺𑀲𑁆𑀲𑀬𑀢𑁆𑀢𑀸𑀢𑀺 𑀯𑀢𑁆𑀣𑀽𑀦𑀺.

𑁬𑁫. 𑀢𑀸𑀦𑀺 𑀓𑀸𑀫𑀮𑁄𑀓𑁂 𑀲𑀩𑁆𑀩𑀸𑀦𑀺𑀧𑀺 𑀮𑀩𑁆𑀪𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀢𑁆𑀣𑁂𑀯 𑀉𑀧𑀮𑀩𑁆𑀪𑀦𑀢𑁄. 𑀧𑀺-𑀲𑀤𑁆𑀤𑁂𑀦 𑀧𑀦 𑀅𑀦𑁆𑀥𑀩𑀥𑀺𑀭𑀸𑀤𑀺𑀯𑀲𑁂𑀦 𑀓𑁂𑀲𑀜𑁆𑀘𑀺 𑀅𑀲𑀫𑁆𑀪𑀯𑀁 𑀤𑀻𑀧𑁂𑀢𑀺.

𑁬𑁬. 𑀖𑀸𑀦𑀸𑀤𑀺𑀢𑁆𑀢𑀬𑀁 𑀦𑀢𑁆𑀣𑀺 𑀩𑁆𑀭𑀳𑁆𑀫𑀸𑀦𑀁 𑀓𑀸𑀫𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂𑀲𑀼 𑀯𑀺𑀭𑀢𑁆𑀢𑀢𑀸𑀬 𑀢𑀩𑁆𑀩𑀺𑀲𑀬𑀧𑁆𑀧𑀲𑀸𑀤𑁂𑀲𑀼𑀧𑀺 𑀯𑀺𑀭𑀸𑀕𑀲𑀪𑀸𑀯𑀢𑁄. 𑀩𑀼𑀤𑁆𑀥𑀤𑀲𑁆𑀲𑀦𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀅𑀢𑁆𑀣𑀁 𑀧𑀦 𑀘𑀓𑁆𑀔𑀼𑀲𑁄𑀢𑁂𑀲𑀼 𑀅𑀯𑀺𑀭𑀢𑁆𑀢𑀪𑀸𑀯𑀢𑁄 𑀘𑀓𑁆𑀔𑀸𑀤𑀺𑀤𑁆𑀯𑀬𑀁 𑀢𑀢𑁆𑀣 𑀉𑀧𑀮𑀩𑁆𑀪𑀢𑀺.

𑁬𑁭. 𑀅𑀭𑀽𑀧𑀮𑁄𑀓𑁂 𑀲𑀩𑁆𑀩𑀸𑀦𑀺𑀧𑀺 𑀙 𑀯𑀢𑁆𑀣𑀽𑀦𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀅𑀭𑀽𑀧𑀻𑀦𑀁 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀩𑀮𑁂𑀦 𑀢𑀢𑁆𑀣 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄.

𑁬𑁮. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑁂𑀯 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀼𑀬𑁄𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄.

𑁬𑁯. 𑀫𑀦𑀦𑀫𑀢𑁆𑀢𑀸 𑀥𑀸𑀢𑀼 𑀫𑀦𑁄𑀥𑀸𑀢𑀼.

𑁭𑁦. 𑀫𑀦𑁄𑀬𑁂𑀯 𑀯𑀺𑀲𑀺𑀝𑁆𑀞𑀯𑀺𑀚𑀸𑀦𑀦𑀓𑀺𑀘𑁆𑀘𑀬𑁄𑀕𑀢𑁄 𑀯𑀺𑀜𑁆𑀜𑀸𑀡𑀁 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀼 𑀘𑀸𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀫𑀦𑀲𑁄 𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀲𑀸 𑀳𑀺 𑀫𑀦𑀢𑁄𑀬𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑁄 𑀲𑀫𑁆𑀪𑀽𑀬𑀫𑀦𑀲𑁄𑀬𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀸𑀢𑀺 𑀫𑀦𑀲𑁄 𑀲𑀫𑁆𑀩𑀦𑁆𑀥𑀺𑀦𑀻 𑀳𑁄𑀢𑀺. 𑀲𑀦𑁆𑀢𑀻𑀭𑀡𑀢𑁆𑀢𑀬𑀲𑁆𑀲, 𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀸𑀦𑀁, 𑀧𑀝𑀺𑀖𑀤𑁆𑀯𑀬𑀲𑁆𑀲, 𑀧𑀞𑀫𑀫𑀕𑁆𑀕𑀲𑁆𑀲, 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲, 𑀧𑀦𑁆𑀦𑀭𑀲𑀭𑀽𑀧𑀸𑀯𑀘𑀭𑀸𑀦𑀜𑁆𑀘 𑀯𑀲𑁂𑀦 𑀧𑀯𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀫𑀦𑁄𑀥𑀸𑀢𑀼𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀅𑀯𑀲𑁂𑀲𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀗𑁆𑀔𑀸𑀢𑀸 𑀘 𑀢𑀺𑀁𑀲 𑀥𑀫𑁆𑀫𑀸 𑀦 𑀓𑁂𑀯𑀮𑀁 𑀫𑀦𑁄𑀥𑀸𑀢𑀼𑀬𑁂𑀯, 𑀢𑀣𑀸 𑀳𑀤𑀬𑀁 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀦𑁆𑀢𑀻𑀭𑀡𑀫𑀳𑀸𑀯𑀺𑀧𑀸𑀓𑀸𑀦𑀺 𑀳𑀺 𑀏𑀓𑀸𑀤𑀲 𑀤𑁆𑀯𑀸𑀭𑀸𑀪𑀸𑀯𑀢𑁄, 𑀓𑀺𑀘𑁆𑀘𑀸𑀪𑀸𑀯𑀢𑁄 𑀘 𑀆𑀭𑀼𑀧𑁆𑀧𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀝𑀺𑀖𑀲𑁆𑀲 𑀅𑀦𑀻𑀯𑀭𑀡𑀸𑀯𑀢𑁆𑀣𑀲𑁆𑀲 𑀅𑀪𑀸𑀯𑀢𑁄 𑀢𑀁𑀲𑀳𑀕𑀢𑀁 𑀘𑀺𑀢𑁆𑀢𑀤𑁆𑀯𑀬𑀁 𑀭𑀽𑀧𑀮𑁄𑀓𑁂𑀧𑀺 𑀦𑀢𑁆𑀣𑀺, 𑀧𑀕𑁂𑀯 𑀆𑀭𑀼𑀧𑁆𑀧𑁂. 𑀧𑀞𑀫𑀫𑀕𑁆𑀕𑁄𑀧𑀺 𑀧𑀭𑀢𑁄𑀖𑁄𑀲𑀧𑀘𑁆𑀘𑀬𑀸𑀪𑀸𑀯𑁂 𑀲𑀸𑀯𑀓𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀫𑀦𑀼𑀲𑁆𑀲𑀮𑁄𑀓𑀢𑁄 𑀅𑀜𑁆𑀜𑀢𑁆𑀣 𑀅𑀦𑀺𑀩𑁆𑀩𑀢𑁆𑀢𑀦𑀢𑁄, 𑀳𑀲𑀦𑀘𑀺𑀢𑁆𑀢𑀜𑁆𑀘 𑀓𑀸𑀬𑀸𑀪𑀸𑀯𑀢𑁄, 𑀭𑀽𑀧𑀸𑀯𑀘𑀭𑀸𑀦𑀺 𑀅𑀭𑀽𑀧𑀻𑀦𑀁 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑁂𑀲𑀼 𑀛𑀸𑀦𑁂𑀲𑀼𑀧𑀺 𑀯𑀺𑀭𑀢𑁆𑀢𑀪𑀸𑀯𑀢𑁄 𑀅𑀭𑀽𑀧𑀪𑀯𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀢𑁂𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀳𑀤𑀬𑀁 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀦𑁆𑀢𑀺.

𑁭𑁧. 𑀧𑀜𑁆𑀘𑀭𑀽𑀧𑀸𑀯𑀘𑀭𑀓𑀼𑀲𑀮𑀢𑁄 𑀅𑀯𑀲𑁂𑀲𑀸𑀦𑀺 𑀤𑁆𑀯𑀸𑀤𑀲 𑀮𑁄𑀓𑀺𑀬𑀓𑀼𑀲𑀮𑀸𑀦𑀺, 𑀧𑀝𑀺𑀖𑀤𑁆𑀯𑀬𑀢𑁄 𑀅𑀯𑀲𑁂𑀲𑀸𑀦𑀺 𑀤𑀲 𑀅𑀓𑀼𑀲𑀮𑀸𑀦𑀺, 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀳𑀲𑀦𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑁂𑀳𑀺 𑀅𑀯𑀲𑁂𑀲𑀸𑀦𑀺 𑀢𑁂𑀭𑀲 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀧𑀞𑀫𑀫𑀕𑁆𑀕𑀢𑁄 𑀅𑀯𑀲𑁂𑀲𑀸𑀦𑀺 𑀲𑀢𑁆𑀢 𑀅𑀦𑀼𑀢𑁆𑀢𑀭𑀸𑀦𑀺 𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀯𑀺𑀥𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑀸𑀢𑀸 𑀥𑀫𑁆𑀫𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀳𑀤𑀬𑀁 𑀦𑀺𑀲𑁆𑀲𑀸𑀬 𑀯𑀸, 𑀘𑀢𑀼𑀯𑁄𑀓𑀸𑀭𑀪𑀯𑀯𑀲𑁂𑀦 𑀅𑀦𑀺𑀲𑁆𑀲𑀸𑀬𑀯𑀸 𑀧𑀯𑀢𑁆𑀢𑀦𑁆𑀢𑀺.

𑁭𑁩. 𑀓𑀸𑀫𑁂 𑀪𑀯𑁂 𑀙𑀯𑀢𑁆𑀣𑀼𑀁 𑀦𑀺𑀲𑁆𑀲𑀺𑀢𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀭𑀽𑀧𑁂 𑀪𑀯𑁂 𑀢𑀺𑀯𑀢𑁆𑀣𑀼𑀁 𑀦𑀺𑀲𑁆𑀲𑀺𑀢𑀸 𑀖𑀸𑀦𑀯𑀺𑀜𑁆𑀜𑀸𑀡𑀸𑀤𑀺𑀢𑁆𑀢𑀬𑀯𑀚𑁆𑀚𑀺𑀢𑀸 𑀘𑀢𑀼𑀩𑁆𑀩𑀺𑀥𑀸 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀆𑀭𑀼𑀧𑁆𑀧𑁂 𑀪𑀯𑁂 𑀅𑀦𑀺𑀲𑁆𑀲𑀺𑀢𑀸 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀢𑀸𑀢𑀺 𑀬𑁄𑀚𑀦𑀸.

𑁭𑁪. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀧𑀝𑀺𑀖𑀤𑁆𑀯𑀬𑀳𑀲𑀦𑀯𑀲𑁂𑀦 𑀲𑀢𑁆𑀢𑀯𑀻𑀲𑀢𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀧𑀦𑁆𑀦𑀭𑀲 𑀭𑀽𑀧𑀸𑀯𑀘𑀭𑀸𑀦𑀺, 𑀧𑀞𑀫𑀫𑀕𑁆𑀕𑁄𑀢𑀺 𑀢𑁂𑀘𑀢𑁆𑀢𑀸𑀮𑀻𑀲 𑀦𑀺𑀲𑁆𑀲𑀸𑀬𑁂𑀯 𑀚𑀸𑀬𑀭𑁂, 𑀢𑀢𑁄𑀬𑁂𑀯 𑀅𑀯𑀲𑁂𑀲𑀸 𑀆𑀭𑀼𑀧𑁆𑀧𑀯𑀺𑀧𑀸𑀓𑀯𑀚𑁆𑀚𑀺𑀢𑀸 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀦𑀺𑀲𑁆𑀲𑀸𑀬 𑀘 𑀅𑀦𑀺𑀲𑁆𑀲𑀸𑀬 𑀘 𑀚𑀸𑀬𑀭𑁂, 𑀧𑀸𑀓𑀸𑀭𑀼𑀧𑁆𑀧𑀸 𑀘𑀢𑁆𑀢𑀸𑀭𑁄 𑀅𑀦𑀺𑀲𑁆𑀲𑀺𑀢𑀸𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀢𑁆𑀣𑀼𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀧𑀓𑀺𑀡𑁆𑀡𑀓𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.