𑁨. 𑀘𑁂𑀢𑀲𑀺𑀓𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀯𑀡𑁆𑀡𑀦𑀸

𑁧. 𑀏𑀯𑀁 𑀢𑀸𑀯 𑀘𑀺𑀢𑁆𑀢𑀁 𑀪𑀽𑀫𑀺𑀚𑀸𑀢𑀺𑀲𑀫𑁆𑀧𑀬𑁄𑀕𑀲𑀗𑁆𑀔𑀸𑀭𑀛𑀸𑀦𑀸𑀭𑀫𑁆𑀫𑀡𑀫𑀕𑁆𑀕𑀪𑁂𑀤𑁂𑀦 𑀬𑀣𑀸𑀭𑀳𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀢𑁆𑀢𑀸 𑀧𑀞𑀫𑀁 𑀢𑀸𑀯 𑀘𑀢𑀼𑀩𑁆𑀩𑀺𑀥𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀲𑀦𑁆𑀤𑀲𑁆𑀲𑀦𑀯𑀲𑁂𑀦 𑀘𑁂𑀢𑀲𑀺𑀓𑀮𑀓𑁆𑀔𑀡𑀁 𑀞𑀧𑁂𑀢𑁆𑀯𑀸, 𑀢𑀤𑀦𑀦𑁆𑀢𑀭𑀁 𑀅𑀜𑁆𑀜𑀲𑀫𑀸𑀦𑀅𑀓𑀼𑀲𑀮𑀲𑁄𑀪𑀦𑀯𑀲𑁂𑀦 𑀢𑀻𑀳𑀺 𑀭𑀸𑀲𑀻𑀳𑀺 𑀘𑁂𑀢𑀲𑀺𑀓𑀥𑀫𑁆𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸, 𑀢𑁂𑀲𑀁 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀫𑁆𑀧𑀬𑁄𑀕𑀁, 𑀢𑁂𑀢𑁆𑀢𑀺𑀁𑀲𑀯𑀺𑀥𑁂𑀦 𑀲𑀗𑁆𑀕𑀳𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸 𑀘𑀸’’𑀢𑁆𑀬𑀸𑀤𑀺 𑀆𑀭𑀤𑁆𑀥𑀁. 𑀘𑀺𑀢𑁆𑀢𑁂𑀦 𑀲𑀳 𑀏𑀓𑀢𑁄 𑀉𑀧𑁆𑀧𑀸𑀤𑁄 𑀘 𑀦𑀺𑀭𑁄𑀥𑁄 𑀘 𑀬𑁂𑀲𑀁 𑀢𑁂 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸. 𑀏𑀓𑀁 𑀆𑀮𑀫𑁆𑀩𑀡𑀜𑁆𑀘 𑀯𑀢𑁆𑀣𑀼 𑀘 𑀬𑁂𑀲𑀁 𑀢𑁂 𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀸. 𑀏𑀯𑀁 𑀘𑀢𑀽𑀳𑀺 𑀮𑀓𑁆𑀔𑀡𑁂𑀳𑀺 𑀘𑁂𑀢𑁄𑀬𑀼𑀢𑁆𑀢𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀤𑁆𑀯𑀺𑀧𑀜𑁆𑀜𑀸𑀲 𑀮𑀓𑁆𑀔𑀡𑀸 𑀥𑀸𑀭𑀡𑀢𑁄 𑀥𑀫𑁆𑀫𑀸 𑀦𑀺𑀬𑀢𑀬𑁄𑀕𑀺𑀦𑁄, 𑀅𑀦𑀺𑀬𑀢𑀬𑁄𑀕𑀺𑀦𑁄 𑀘 𑀘𑁂𑀢𑀲𑀺𑀓𑀸 𑀫𑀢𑀸.

𑀢𑀢𑁆𑀣 𑀬𑀤𑀺 𑀏𑀓𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀘𑁂𑀢𑁄𑀬𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀢𑀤𑀸 𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀘𑁂𑀢𑁄𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓𑀦𑀺𑀭𑁄𑀥𑀕𑁆𑀕𑀳𑀡𑀁. 𑀏𑀯𑀫𑁆𑀧𑀺 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀲𑁆𑀲 𑀧𑀲𑀗𑁆𑀕𑁄 𑀦𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁, 𑀢𑀣𑀸 ‘‘𑀏𑀓𑀢𑁄 𑀉𑀧𑁆𑀧𑀸𑀤𑁄 𑀯𑀸 𑀦𑀺𑀭𑁄𑀥𑁄 𑀯𑀸 𑀏𑀢𑁂𑀲𑀦𑁆𑀢𑀺 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸’’𑀢𑀺 𑀧𑀭𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀧𑀼𑀭𑁂𑀢𑀭𑀫𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀫𑀸𑀦𑀸𑀦𑀫𑁆𑀧𑀺 𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀏𑀓𑀸𑀮𑀫𑁆𑀩𑀡𑀕𑁆𑀕𑀳𑀡𑀁. 𑀬𑁂 𑀏𑀯𑀁 𑀢𑀺𑀯𑀺𑀥𑀮𑀓𑁆𑀔𑀡𑀸, 𑀢𑁂 𑀦𑀺𑀬𑀫𑀢𑁄 𑀏𑀓𑀯𑀢𑁆𑀣𑀼𑀬𑁂𑀯𑀸𑀢𑀺𑀤𑀲𑁆𑀲𑀦𑀢𑁆𑀣𑀁 𑀏𑀓𑀯𑀢𑁆𑀣𑀼𑀓𑀕𑁆𑀕𑀳𑀡𑀦𑁆𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦.

𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀜𑁆𑀜𑀲𑀫𑀸𑀦𑀘𑁂𑀢𑀲𑀺𑀓𑀯𑀡𑁆𑀡𑀦𑀸

𑁨. 𑀓𑀣𑀦𑁆𑀢𑀺 𑀲𑀭𑀽𑀧𑀲𑀫𑁆𑀧𑀬𑁄𑀕𑀸𑀓𑀸𑀭𑀸𑀦𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄 (𑀥. 𑀲. 𑀅𑀝𑁆𑀞. 𑁧 𑀥𑀫𑁆𑀫𑀼𑀤𑁂𑀲𑀯𑀸𑀭𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺𑀯𑀡𑁆𑀡𑀦𑀸), 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄. 𑀅𑀬𑀜𑁆𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀲𑀸 𑀘𑀲𑁆𑀲 𑀨𑀼𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺 𑀅𑀫𑁆𑀩𑀺𑀮𑀔𑀸𑀤𑀓𑀸𑀤𑀻𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀧𑀭𑀲𑁆𑀲 𑀔𑁂𑀴𑀼𑀧𑁆𑀧𑀸𑀤𑀸𑀤𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀯𑁂𑀤𑀬𑀢𑀺 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀻𑀢𑀺 𑀯𑁂𑀤𑀦𑀸, 𑀲𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸. 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀜𑁆𑀳𑀺 𑀧𑀢𑁆𑀯𑀸 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀏𑀓𑀤𑁂𑀲𑀫𑀢𑁆𑀢𑁂𑀦𑁂𑀯 𑀭𑀲𑀁 𑀅𑀦𑀼𑀪𑀯𑀦𑁆𑀢𑀺, 𑀏𑀓𑀁𑀲𑀢𑁄 𑀧𑀦 𑀇𑀲𑁆𑀲𑀭𑀯𑀢𑀸𑀬 𑀯𑁂𑀤𑀦𑀸𑀯 𑀅𑀦𑀼𑀪𑀯𑀢𑀺. 𑀢𑀣𑀸 𑀳𑁂𑀲𑀸 ‘‘𑀲𑀼𑀪𑁄𑀚𑀦𑀭𑀲𑀸𑀦𑀼𑀪𑀯𑀦𑀓𑀭𑀸𑀚𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀸. 𑀲𑀼𑀔𑀸𑀤𑀺𑀯𑀲𑁂𑀦 𑀧𑀦𑀲𑁆𑀲𑀸 𑀪𑁂𑀤𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀦𑀻𑀮𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀲𑀜𑁆𑀚𑀸𑀦𑀸𑀢𑀺 𑀲𑀜𑁆𑀜𑀁 𑀓𑀢𑁆𑀯𑀸 𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸, 𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸. 𑀲𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀤𑀸𑀭𑀼𑀆𑀤𑀻𑀲𑀼 𑀯𑀟𑁆𑀠𑀓𑀺𑀆𑀤𑀻𑀦𑀁 𑀲𑀜𑁆𑀜𑀸𑀡𑀓𑀭𑀡𑀁 𑀯𑀺𑀬 𑀧𑀘𑁆𑀙𑀸 𑀲𑀜𑁆𑀚𑀸𑀦𑀦𑀲𑁆𑀲 𑀓𑀸𑀭𑀡𑀪𑀽𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀦𑀺𑀫𑀺𑀢𑁆𑀢𑀓𑀸𑀭𑀺𑀓𑀸𑀬 𑀢𑀸𑀯𑁂𑀢𑀁 𑀬𑀼𑀚𑁆𑀚𑀢𑀺, 𑀦𑀺𑀫𑀺𑀢𑁆𑀢𑁂𑀦 𑀲𑀜𑁆𑀚𑀸𑀦𑀦𑁆𑀢𑀺𑀬𑀸 𑀧𑀦 𑀓𑀣𑀦𑁆𑀢𑀺? 𑀲𑀸𑀧𑀺 𑀧𑀼𑀦 𑀅𑀧𑀭𑀸𑀬 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦 𑀏𑀢𑁆𑀣 𑀓𑁄𑀘𑀺 𑀅𑀲𑀫𑁆𑀪𑀯𑁄.

𑀘𑁂𑀢𑁂𑀢𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀺, 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑁂 𑀯𑀸 𑀩𑁆𑀬𑀸𑀧𑀸𑀭𑀫𑀸𑀧𑀚𑁆𑀚𑀢𑀻𑀢𑀺 𑀘𑁂𑀢𑀦𑀸. 𑀢𑀣𑀸 𑀳𑀺 𑀅𑀬𑀫𑁂𑀯 𑀅𑀪𑀺𑀲𑀗𑁆𑀔𑀭𑀡𑁂 𑀧𑀥𑀸𑀦𑀢𑁆𑀢𑀸 𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀺𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀯𑀺𑀪𑀚𑀦𑁆𑀢𑁂𑀦 ‘‘𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸’’𑀢𑀺 (𑀲𑀁. 𑀦𑀺. 𑁩.𑁭𑁯) 𑀯𑀢𑁆𑀯𑀸 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑁆𑀬𑀸𑀤𑀺𑀦𑀸 (𑀯𑀺𑀪. 𑁨𑁧) 𑀦𑀺𑀤𑁆𑀤𑀺𑀝𑁆𑀞𑀸. 𑀲𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀺𑀆𑀤𑀬𑁄 𑀯𑀺𑀬 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀺𑀓𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀕𑁆𑀕𑀢𑀸𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀻𑀦𑀁 𑀲𑀭𑀽𑀧𑀯𑀺𑀪𑀸𑀯𑀦𑀁 𑀳𑁂𑀝𑁆𑀞𑀸 𑀆𑀕𑀢𑀫𑁂𑀯.

𑀚𑀻𑀯𑀦𑁆𑀢𑀺 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀢𑀺 𑀚𑀻𑀯𑀺𑀢𑀁, 𑀢𑀤𑁂𑀯 𑀲𑀳𑀚𑀸𑀢𑀸𑀦𑀼𑀧𑀸𑀮𑀦𑁂 𑀆𑀥𑀺𑀧𑀘𑁆𑀘𑀬𑁄𑀕𑁂𑀦 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁 𑀉𑀧𑁆𑀧𑀮𑀸𑀤𑀺𑀅𑀦𑀼𑀧𑀸𑀮𑀓𑀁 𑀉𑀤𑀓𑀁 𑀯𑀺𑀬. 𑀓𑀭𑀡𑀁 𑀓𑀸𑀭𑁄, 𑀫𑀦𑀲𑁆𑀫𑀺𑀁 𑀓𑀸𑀭𑁄 𑀫𑀦𑀲𑀺𑀓𑀸𑀭𑁄, 𑀲𑁄 𑀘𑁂𑀢𑀲𑁄 𑀆𑀭𑀫𑁆𑀫𑀡𑁂 𑀲𑀫𑀦𑁆𑀦𑀸𑀳𑀸𑀭𑀮𑀓𑁆𑀔𑀡𑁄. 𑀯𑀺𑀢𑀓𑁆𑀓𑁄 𑀳𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑁂 𑀅𑀪𑀺𑀦𑀺𑀭𑁄𑀧𑀦𑀲𑀪𑀸𑀯𑀢𑁆𑀢𑀸 𑀢𑁂 𑀢𑀢𑁆𑀣 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀘𑁂𑀢𑀦𑀸 𑀅𑀢𑁆𑀢𑀦𑀸 𑀆𑀭𑀫𑁆𑀫𑀡𑀕𑁆𑀕𑀳𑀡𑁂𑀦 𑀬𑀣𑀸𑀭𑀼𑀴𑁆𑀳𑁂 𑀥𑀫𑁆𑀫𑁂𑀧𑀺 𑀢𑀢𑁆𑀣 𑀢𑀢𑁆𑀣 𑀦𑀺𑀬𑁄𑀚𑁂𑀦𑁆𑀢𑀻 𑀩𑀮𑀦𑀸𑀬𑀓𑁄 𑀯𑀺𑀬 𑀳𑁄𑀢𑀺, 𑀫𑀦𑀲𑀺𑀓𑀸𑀭𑁄 𑀢𑁂 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀧𑀬𑁄𑀚𑀦𑀢𑁄 𑀆𑀚𑀸𑀦𑀻𑀬𑀸𑀦𑀁 𑀧𑀬𑁄𑀚𑀦𑀓𑀲𑀸𑀭𑀣𑀺 𑀯𑀺𑀬𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀥𑀫𑁆𑀫𑀸𑀦𑀜𑁆𑀳𑀺 𑀢𑀁 𑀢𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀲𑀪𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀪𑀕𑀯𑀢𑀸 𑀢𑁂 𑀢𑁂 𑀥𑀫𑁆𑀫𑀸 𑀯𑀺𑀪𑀢𑁆𑀢𑀸𑀢𑀺 𑀪𑀕𑀯𑀢𑀺 𑀲𑀤𑁆𑀥𑀸𑀬 ‘‘𑀏𑀯𑀁 𑀯𑀺𑀲𑁂𑀲𑀸 𑀇𑀫𑁂 𑀥𑀫𑁆𑀫𑀸’’𑀢𑀺 𑀑𑀓𑀧𑁆𑀧𑁂𑀢𑁆𑀯𑀸 𑀉𑀕𑁆𑀕𑀳𑀡𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀢𑁂𑀲𑀁 𑀲𑀪𑀸𑀯𑀲𑀫𑀥𑀺𑀕𑀫𑀸𑀬 𑀬𑁄𑀕𑁄 𑀓𑀭𑀡𑀻𑀬𑁄, 𑀦 𑀧𑀦 𑀢𑀢𑁆𑀣 𑀢𑀢𑁆𑀣 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 𑀲𑀫𑁆𑀫𑁄𑀳𑁄 𑀆𑀧𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀅𑀦𑀼𑀲𑀸𑀲𑀦𑀻. 𑀲𑀩𑁆𑀩𑁂𑀲𑀫𑁆𑀧𑀺 𑀏𑀓𑀽𑀦𑀦𑀯𑀼𑀢𑀺𑀘𑀺𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸 𑀦𑀺𑀬𑀫𑀢𑁄 𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀸 𑀦𑀸𑀫.

𑁩. 𑀅𑀥𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑁄𑀓𑁆𑀔𑁄, 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄, 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀻𑀭𑀸𑀦𑀁 𑀪𑀸𑀯𑁄, 𑀓𑀫𑁆𑀫𑀁, 𑀯𑀺𑀥𑀺𑀦𑀸 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀸 𑀯𑀻𑀭𑀺𑀬𑀁, 𑀉𑀲𑁆𑀲𑀸𑀳𑁄, 𑀲𑁄 𑀲𑀳𑀚𑀸𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑁄. 𑀯𑀻𑀭𑀺𑀬𑀯𑀲𑁂𑀦 𑀳𑀺 𑀢𑁂𑀲𑀁 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀫𑀲𑁆𑀲 𑀯𑀺𑀢𑀓𑁆𑀓𑀸𑀤𑀻𑀳𑀺 𑀯𑀺𑀲𑁂𑀲𑁄 𑀲𑀼𑀧𑀸𑀓𑀝𑁄 𑀳𑁄𑀢𑀺. 𑀙𑀦𑁆𑀤𑀦𑀁 𑀙𑀦𑁆𑀤𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸, 𑀲𑁄 𑀓𑀢𑁆𑀢𑀼𑀓𑀸𑀫𑀢𑀸𑀮𑀓𑁆𑀔𑀡𑁄. 𑀢𑀣𑀸 𑀳𑁂𑀲 ‘‘𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬𑀸’’𑀢𑀺 (𑀥. 𑀲. 𑀅𑀝𑁆𑀞. 𑁧 𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸) 𑀯𑀼𑀘𑁆𑀘𑀢𑀺. 𑀤𑀸𑀦𑀯𑀢𑁆𑀣𑀼𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀓𑀸𑀮𑁂𑀧𑀺 𑀘𑁂𑀲 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁂𑀦 𑀢𑁂𑀦 𑀅𑀢𑁆𑀣𑀺𑀓𑁄𑀯 𑀔𑀺𑀧𑀺𑀢𑀩𑁆𑀩𑀉𑀲𑀽𑀦𑀁 𑀕𑀳𑀡𑁂 𑀅𑀢𑁆𑀣𑀺𑀓𑁄 𑀇𑀲𑁆𑀲𑀸𑀲𑁄 𑀯𑀺𑀬. 𑀲𑁄𑀪𑀦𑁂𑀲𑀼 𑀢𑀤𑀺𑀢𑀭𑁂𑀲𑀼 𑀘 𑀧𑀓𑀸𑀭𑁂𑀦 𑀓𑀺𑀡𑁆𑀡𑀸 𑀯𑀺𑀧𑁆𑀧𑀓𑀺𑀡𑁆𑀡𑀸𑀢𑀺 𑀧𑀓𑀺𑀡𑁆𑀡𑀓𑀸.

𑁪. 𑀲𑁄𑀪𑀦𑀸𑀧𑁂𑀓𑁆𑀔𑀸𑀬 𑀇𑀢𑀭𑁂, 𑀇𑀢𑀭𑀸𑀧𑁂𑀓𑁆𑀔𑀸𑀬 𑀲𑁄𑀪𑀦𑀸 𑀘 𑀅𑀜𑁆𑀜𑁂 𑀦𑀸𑀫, 𑀢𑁂𑀲𑀁 𑀲𑀫𑀸𑀦𑀸 𑀦 𑀉𑀤𑁆𑀥𑀘𑁆𑀘𑀲𑀤𑁆𑀥𑀸𑀤𑀬𑁄 𑀯𑀺𑀬 𑀅𑀓𑀼𑀲𑀮𑀸𑀤𑀺𑀲𑀪𑀸𑀯𑀸𑀬𑁂𑀯𑀸𑀢𑀺 𑀅𑀜𑁆𑀜𑀲𑀫𑀸𑀦𑀸.

𑀅𑀜𑁆𑀜𑀲𑀫𑀸𑀦𑀘𑁂𑀢𑀲𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀘𑁂𑀢𑀲𑀺𑀓𑀯𑀡𑁆𑀡𑀦𑀸

𑁫. 𑀏𑀯𑀁 𑀢𑀸𑀯 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀯𑀲𑁂𑀦, 𑀧𑀓𑀺𑀡𑁆𑀡𑀓𑀯𑀲𑁂𑀦 𑀘 𑀲𑁄𑀪𑀦𑁂𑀢𑀭𑀲𑀪𑀸𑀯𑁂 𑀢𑁂𑀭𑀲 𑀥𑀫𑁆𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀳𑁂𑀝𑁆𑀞𑀸 𑀘𑀺𑀢𑁆𑀢𑀯𑀺𑀪𑀸𑀕𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀼𑀓𑁆𑀓𑀫𑁂𑀦 𑀅𑀓𑀼𑀲𑀮𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑁂 𑀧𑀞𑀫𑀁, 𑀢𑀢𑁄 𑀲𑁄𑀪𑀦𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑁂 𑀘 𑀤𑀲𑁆𑀲𑁂𑀢𑀼𑀁 ‘‘𑀫𑁄𑀳𑁄’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀅𑀳𑁂𑀢𑀼𑀓𑀸 𑀧𑀦 𑀆𑀯𑁂𑀡𑀺𑀓𑀥𑀫𑁆𑀫𑀸 𑀦𑀢𑁆𑀣𑀻𑀢𑀺 𑀦 𑀢𑁂 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀆𑀭𑀫𑁆𑀫𑀡𑁂 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑁄, 𑀅𑀜𑁆𑀜𑀸𑀡𑀁, 𑀲𑁄 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀮𑀓𑁆𑀔𑀡𑁄. 𑀆𑀭𑀫𑁆𑀫𑀡𑀕𑁆𑀕𑀳𑀡𑀯𑀲𑀧𑁆𑀧𑀯𑀢𑁆𑀢𑁄𑀧𑀺 𑀳𑁂𑀲 𑀢𑀲𑁆𑀲 𑀬𑀣𑀸𑀲𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀸𑀓𑀆𑀭𑁂𑀦𑁂𑀯 𑀧𑀯𑀢𑁆𑀢𑀢𑀺. 𑀦 𑀳𑀺𑀭𑀻𑀬𑀢𑀺 𑀦 𑀮𑀚𑁆𑀚𑀢𑀻𑀢𑀺 𑀅𑀳𑀺𑀭𑀺𑀓𑁄, 𑀧𑀼𑀕𑁆𑀕𑀮𑁄, 𑀥𑀫𑁆𑀫𑀲𑀫𑀽𑀳𑁄 𑀯𑀸. 𑀅𑀳𑀺𑀭𑀺𑀓𑀲𑁆𑀲 𑀪𑀸𑀯𑁄 𑀅𑀳𑀺𑀭𑀺𑀓𑁆𑀓𑀁, 𑀢𑀤𑁂𑀯 𑀅𑀳𑀺𑀭𑀺𑀓𑀁. 𑀦 𑀑𑀢𑁆𑀢𑀧𑁆𑀧𑀢𑀻𑀢𑀺 𑀅𑀦𑁄𑀢𑁆𑀢𑀧𑁆𑀧𑀁. 𑀢𑀢𑁆𑀣 𑀕𑀽𑀣𑀢𑁄 𑀕𑀸𑀫𑀲𑀽𑀓𑀭𑁄 𑀯𑀺𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀢𑁄 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀁 𑀅𑀳𑀺𑀭𑀺𑀓𑀁, 𑀅𑀕𑁆𑀕𑀺𑀢𑁄 𑀲𑀮𑀪𑁄 𑀯𑀺𑀬 𑀢𑀢𑁄 𑀅𑀦𑀼𑀢𑁆𑀢𑀸𑀲𑀮𑀓𑁆𑀔𑀡𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀚𑀺𑀕𑀼𑀘𑁆𑀙𑀢𑀺 𑀦𑀸𑀳𑀺𑀭𑀺𑀓𑁄, 𑀧𑀸𑀧𑀸 𑀕𑀽𑀣𑀸𑀯 𑀲𑀽𑀓𑀭𑁄;

𑀦 𑀪𑀸𑀬𑀢𑀺 𑀅𑀦𑁄𑀢𑁆𑀢𑀧𑁆𑀧𑀻, 𑀲𑀮𑀪𑁄 𑀯𑀺𑀬 𑀧𑀸𑀯𑀓𑀸’’𑀢𑀺.

𑀉𑀤𑁆𑀥𑀢𑀲𑁆𑀲 𑀪𑀸𑀯𑁄 𑀉𑀤𑁆𑀥𑀘𑁆𑀘𑀁, 𑀢𑀁 𑀘𑀺𑀢𑁆𑀢𑀲𑁆𑀲 𑀅𑀯𑀽𑀧𑀲𑀫𑀮𑀓𑁆𑀔𑀡𑀁 𑀧𑀸𑀲𑀸𑀡𑀸𑀪𑀺𑀖𑀸𑀢𑀲𑀫𑀼𑀤𑁆𑀥𑀢𑀪𑀲𑁆𑀫𑀁 𑀯𑀺𑀬. 𑀮𑀼𑀩𑁆𑀪𑀢𑀻𑀢𑀺 𑀮𑁄𑀪𑁄, 𑀲𑁄 𑀆𑀭𑀫𑁆𑀫𑀡𑁂 𑀅𑀪𑀺𑀲𑀗𑁆𑀕𑀮𑀓𑁆𑀔𑀡𑁄 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬. 𑀘𑀺𑀢𑁆𑀢𑀲𑁆𑀲 𑀆𑀮𑀫𑁆𑀩𑀺𑀢𑀼𑀓𑀸𑀫𑀢𑀸𑀫𑀢𑁆𑀢𑀁 𑀙𑀦𑁆𑀤𑁄, 𑀮𑁄𑀪𑁄 𑀢𑀢𑁆𑀣 𑀅𑀪𑀺𑀕𑀺𑀚𑁆𑀛𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀸 𑀤𑀺𑀝𑁆𑀞𑀺. 𑀜𑀸𑀡𑀜𑁆𑀳𑀺 𑀆𑀭𑀫𑁆𑀫𑀡𑀁 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀸𑀢𑀺, 𑀤𑀺𑀝𑁆𑀞𑀺 𑀬𑀣𑀸𑀲𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀅𑀬𑀸𑀣𑀸𑀯𑀢𑁄 𑀕𑀡𑁆𑀳𑀸𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑁆𑀬𑀸𑀤𑀺𑀦𑀸 𑀫𑀜𑁆𑀜𑀢𑀻𑀢𑀺 𑀫𑀸𑀦𑁄, 𑀲𑁄 𑀉𑀡𑁆𑀡𑀢𑀺𑀮𑀓𑁆𑀔𑀡𑁄. 𑀢𑀣𑀸 𑀳𑁂𑀲 ‘‘𑀓𑁂𑀢𑀼𑀓𑀫𑁆𑀬𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺 (𑀥. 𑀲. 𑀅𑀝𑁆𑀞. 𑁪𑁦𑁦) 𑀯𑀼𑀢𑁆𑀢𑁄. 𑀤𑀼𑀲𑁆𑀲𑀢𑀻𑀢𑀺 𑀤𑁄𑀲𑁄, 𑀲𑁄 𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄 𑀧𑀳𑀝𑀸𑀲𑀻𑀯𑀺𑀲𑁄 𑀯𑀺𑀬, 𑀇𑀲𑁆𑀲𑀢𑀻𑀢𑀺 𑀇𑀲𑁆𑀲𑀸, 𑀲𑀸 𑀧𑀭𑀲𑀫𑁆𑀧𑀢𑁆𑀢𑀺𑀉𑀲𑀽𑀬𑀦𑀮𑀓𑁆𑀔𑀡𑀸. 𑀫𑀘𑁆𑀙𑀭𑀲𑁆𑀲 𑀪𑀸𑀯𑁄 𑀫𑀘𑁆𑀙𑀭𑀺𑀬𑀁, ‘‘𑀫𑀸 𑀇𑀤𑀁 𑀅𑀘𑁆𑀙𑀭𑀺𑀬𑀁 𑀅𑀜𑁆𑀜𑁂𑀲𑀁 𑀳𑁄𑀢𑀼, 𑀫𑀬𑁆𑀳𑀫𑁂𑀯 𑀳𑁄𑀢𑀽’’𑀢𑀺 𑀧𑀯𑀢𑁆𑀢𑀁 𑀯𑀸 𑀫𑀘𑁆𑀙𑀭𑀺𑀬𑀁, 𑀢𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀁. 𑀓𑀼𑀘𑁆𑀙𑀺𑀢𑀁 𑀓𑀢𑀦𑁆𑀢𑀺 𑀓𑀼𑀓𑀢𑀁. 𑀓𑀢𑀸𑀓𑀢𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀁. 𑀅𑀓𑀢𑀫𑁆𑀧𑀺 𑀳𑀺 𑀓𑀼𑀓𑀢’’𑀦𑁆𑀢𑀺 𑀯𑁄𑀳𑀭𑀦𑁆𑀢𑀺 ‘‘𑀬𑀁 𑀫𑀬𑀸 𑀅𑀓𑀢𑀁. 𑀢𑀁 𑀓𑀼𑀓𑀢’’𑀦𑁆𑀢𑀺. 𑀇𑀥 𑀧𑀦 𑀓𑀢𑀸𑀓𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁, 𑀢𑀁 𑀓𑀢𑀸𑀓𑀢𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀸𑀦𑀼𑀲𑁄𑀘𑀦𑀮𑀓𑁆𑀔𑀡𑀁. 𑀣𑀺𑀦𑀦𑀁 𑀣𑀺𑀦𑀁, 𑀅𑀦𑀼𑀲𑁆𑀲𑀸𑀳𑀦𑀸𑀯𑀲𑀁𑀲𑀻𑀤𑀦𑀯𑀲𑁂𑀦 𑀲𑀁𑀳𑀢𑀪𑀸𑀯𑁄. 𑀫𑀺𑀤𑁆𑀥𑀦𑀁 𑀫𑀺𑀤𑁆𑀥𑀁, 𑀯𑀺𑀕𑀢𑀲𑀸𑀫𑀢𑁆𑀣𑀺𑀬𑀢𑀸, 𑀅𑀲𑀢𑁆𑀢𑀺𑀯𑀺𑀖𑀸𑀢𑁄 𑀯𑀸, 𑀢𑀢𑁆𑀣 𑀣𑀺𑀦𑀁 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀁, 𑀫𑀺𑀤𑁆𑀥𑀁 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 (𑀥. 𑀲. 𑁧𑁧𑁬𑁨-𑁧𑁧𑁬𑁩) ‘‘𑀢𑀢𑁆𑀣 𑀓𑀢𑀫𑀁 𑀣𑀺𑀦𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸. 𑀢𑀢𑁆𑀣 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸’’𑀢𑁆𑀬𑀸𑀤𑀺𑀦𑀸 𑀇𑀫𑁂𑀲𑀁 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄. 𑀦𑀦𑀼 𑀘 ‘‘𑀓𑀸𑀬𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀭𑀽𑀧𑀓𑀸𑀬𑀲𑁆𑀲𑀧𑀺 𑀅𑀓𑀫𑁆𑀫𑀜𑁆𑀜𑀢𑀸 𑀫𑀺𑀤𑁆𑀥𑀦𑁆𑀢𑀺 𑀢𑀲𑁆𑀲 𑀭𑀽𑀧𑀪𑀸𑀯𑁄𑀧𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀢𑀢𑁆𑀣 𑀢𑀢𑁆𑀣 𑀆𑀘𑀭𑀺𑀬𑁂𑀳𑀺 𑀆𑀦𑀻𑀢𑀓𑀸𑀭𑀡𑀯𑀲𑁂𑀦𑁂𑀯𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 𑀫𑀺𑀤𑁆𑀥𑀯𑀸𑀤𑀺𑀫𑀢𑀧𑁆𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀁 𑀢𑁂𑀲𑀁 𑀯𑀸𑀤𑀦𑀺𑀓𑁆𑀔𑁂𑀧𑀧𑀼𑀩𑁆𑀩𑀓𑀁 𑀅𑀝𑁆𑀞𑀓𑀣𑀸𑀤𑀻𑀲𑀼 𑀩𑀳𑀼𑀥𑀸 𑀯𑀺𑀢𑁆𑀣𑀸𑀭𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀕𑀳𑁄 𑁋

‘‘𑀓𑁂𑀘𑀺 𑀫𑀺𑀤𑁆𑀥𑀫𑁆𑀧𑀺 𑀭𑀽𑀧𑀦𑁆𑀢𑀺, 𑀯𑀤𑀦𑁆𑀢𑁂𑀢𑀁 𑀦 𑀬𑀼𑀚𑁆𑀚𑀢𑀺;

𑀧𑀳𑀸𑀢𑀩𑁆𑀩𑁂𑀲𑀼 𑀯𑀼𑀢𑁆𑀢𑀢𑁆𑀢𑀸, 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀯𑀺𑀬.

‘‘𑀧𑀳𑀸𑀢𑀩𑁆𑀩𑁂𑀲𑀼 𑀅𑀓𑁆𑀔𑀸𑀢-𑀫𑁂𑀢𑀁 𑀦𑀻𑀯𑀭𑀡𑁂𑀲𑀼 𑀳𑀺;

𑀭𑀽𑀧𑀦𑁆𑀢𑀼 𑀦 𑀧𑀳𑀸𑀢𑀩𑁆𑀩-𑀫𑀓𑁆𑀔𑀸𑀢𑀁 𑀤𑀲𑁆𑀲𑀦𑀸𑀤𑀺𑀦𑀸.

‘‘‘𑀦 𑀢𑀼𑀫𑁆𑀳𑀁 𑀪𑀺𑀓𑁆𑀔𑀯𑁂 𑀭𑀽𑀧𑀁, 𑀧𑀚𑀳𑁂𑀣𑀸’𑀢𑀺 𑀧𑀸𑀞𑀢𑁄;

𑀧𑀳𑁂𑀬𑁆𑀬𑀪𑀸𑀯𑀮𑁂𑀲𑁄𑀧𑀺, 𑀬𑀢𑁆𑀣 𑀭𑀽𑀧𑀲𑁆𑀲 𑀤𑀺𑀲𑁆𑀲𑀢𑀺.

‘‘𑀢𑀢𑁆𑀣 𑀢𑀩𑁆𑀩𑀺𑀲𑀬𑀘𑁆𑀙𑀦𑁆𑀤-𑀭𑀸𑀕𑀳𑀸𑀦𑀺 𑀧𑀓𑀸𑀲𑀺𑀢𑀸;

𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀬𑁄 𑀙𑀦𑁆𑀤-𑀭𑀸𑀕𑀓𑁆𑀔𑁂𑀧𑁄𑀢𑀺𑀆𑀤𑀺𑀓𑀁.

‘‘𑀭𑀽𑀧𑀸𑀭𑀽𑀧𑁂𑀲𑀼 𑀫𑀺𑀤𑁆𑀥𑁂𑀲𑀼, 𑀅𑀭𑀽𑀧𑀁 𑀢𑀢𑁆𑀣 𑀤𑁂𑀲𑀺𑀢𑀁;

𑀇𑀢𑀺 𑀘𑁂 𑀦𑀢𑁆𑀣𑀺 𑀢𑀁 𑀢𑀢𑁆𑀣, 𑀅𑀯𑀺𑀲𑁂𑀲𑁂𑀦 𑀧𑀸𑀞𑀢𑁄.

‘‘𑀲𑀓𑁆𑀓𑀸 𑀳𑀺 𑀅𑀦𑀼𑀫𑀸𑀢𑀼𑀁 𑀬𑀁, 𑀫𑀺𑀤𑁆𑀥𑀁 𑀭𑀽𑀧𑀦𑁆𑀢𑀺 𑀘𑀺𑀦𑁆𑀢𑀺𑀢𑀁;

𑀢𑀫𑁆𑀧𑀺 𑀦𑀻𑀯𑀭𑀡𑀁 𑀫𑀺𑀤𑁆𑀥-𑀪𑀸𑀯𑀢𑁄 𑀇𑀢𑀭𑀁 𑀯𑀺𑀬.

‘‘𑀲𑀫𑁆𑀧𑀬𑁄𑀕𑀸𑀪𑀺𑀥𑀸𑀦𑀸 𑀘, 𑀦 𑀢𑀁 𑀭𑀽𑀧𑀦𑁆𑀢𑀺 𑀦𑀺𑀘𑁆𑀙𑀬𑁄;

𑀅𑀭𑀽𑀧𑀻𑀦𑀜𑁆𑀳𑀺 𑀔𑀦𑁆𑀥𑀸𑀦𑀁, 𑀲𑀫𑁆𑀧𑀬𑁄𑀕𑁄 𑀧𑀯𑀼𑀘𑁆𑀘𑀢𑀺.

‘‘𑀢𑀣𑀸𑀭𑀼𑀧𑁆𑀧𑁂 𑀲𑀫𑀼𑀧𑁆𑀧𑀢𑁆𑀢𑀺, 𑀧𑀸𑀞𑀢𑁄 𑀦𑀢𑁆𑀣𑀺 𑀭𑀽𑀧𑀢𑀸;

𑀦𑀺𑀤𑁆𑀤𑀸 𑀔𑀻𑀡𑀸𑀲𑀯𑀸𑀦𑀦𑁆𑀢𑀼, 𑀓𑀸𑀬𑀕𑁂𑀮𑀜𑁆𑀜𑀢𑁄 𑀲𑀺𑀬𑀸’’𑀢𑀺.

𑀅𑀓𑀼𑀲𑀮𑀘𑁂𑀢𑀲𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀪𑀦𑀘𑁂𑀢𑀲𑀺𑀓𑀯𑀡𑁆𑀡𑀦𑀸

𑁬. 𑀲𑀤𑁆𑀤𑀳𑀢𑀻𑀢𑀺 𑀲𑀤𑁆𑀥𑀸, 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑁄, 𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀲𑀸𑀤𑀦𑀮𑀓𑁆𑀔𑀡𑀸 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬. 𑀲𑀭𑀡𑀁 𑀲𑀢𑀺, 𑀅𑀲𑀫𑁆𑀫𑁄𑀲𑁄, 𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀸𑀭𑀡𑀮𑀓𑁆𑀔𑀡𑀸. 𑀳𑀺𑀭𑀻𑀬𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀚𑀺𑀕𑀼𑀘𑁆𑀙𑀢𑀻𑀢𑀺 𑀳𑀺𑀭𑀻, 𑀲𑀸 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸. 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁, 𑀢𑀁 𑀧𑀸𑀧𑀢𑁄 𑀉𑀢𑁆𑀢𑀸𑀲𑀮𑀓𑁆𑀔𑀡𑀁. 𑀅𑀢𑁆𑀢𑀕𑀸𑀭𑀯𑀯𑀲𑁂𑀦 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀢𑁄 𑀓𑀼𑀮𑀯𑀥𑀽 𑀯𑀺𑀬 𑀳𑀺𑀭𑀻, 𑀧𑀭𑀕𑀸𑀭𑀯𑀯𑀲𑁂𑀦 𑀧𑀸𑀧𑀢𑁄 𑀉𑀢𑁆𑀢𑀸𑀲𑀦𑀢𑁄 𑀯𑁂𑀲𑀺𑀬𑀸 𑀯𑀺𑀬 𑀑𑀢𑁆𑀢𑀧𑁆𑀧𑀁. 𑀮𑁄𑀪𑀧𑁆𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄, 𑀲𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀮𑀕𑁆𑀕𑀢𑀸𑀮𑀓𑁆𑀔𑀡𑁄 𑀫𑀼𑀢𑁆𑀢𑀪𑀺𑀓𑁆𑀔𑀼 𑀯𑀺𑀬. 𑀤𑁄𑀲𑀧𑁆𑀧𑀝𑀺𑀧𑀓𑁆𑀔𑁄 𑀅𑀤𑁄𑀲𑁄, 𑀲𑁄 𑀅𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀯𑀺𑀬. 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸, 𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀮𑀓𑁆𑀔𑀡𑀸 𑀲𑀫𑀧𑁆𑀧𑀯𑀢𑁆𑀢𑀸𑀦𑀁 𑀅𑀲𑁆𑀲𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀓𑁄 𑀲𑀸𑀭𑀣𑀺 𑀯𑀺𑀬.

𑀓𑀸𑀬𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺. 𑀉𑀪𑁄𑀧𑀺 𑀘𑁂𑀢𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸. 𑀓𑀸𑀬𑀲𑁆𑀲 𑀮𑀳𑀼𑀪𑀸𑀯𑁄 𑀓𑀸𑀬𑀮𑀳𑀼𑀢𑀸. 𑀢𑀣𑀸 𑀘𑀺𑀢𑁆𑀢𑀮𑀳𑀼𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀕𑀭𑀼𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸. 𑀓𑀸𑀬𑀲𑁆𑀲 𑀫𑀼𑀤𑀼𑀪𑀸𑀯𑁄 𑀓𑀸𑀬𑀫𑀼𑀤𑀼𑀢𑀸. 𑀢𑀣𑀸 𑀘𑀺𑀢𑁆𑀢𑀫𑀼𑀤𑀼𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀣𑀤𑁆𑀥𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸. 𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁, 𑀢𑀲𑁆𑀲 𑀪𑀸𑀯𑁄 𑀓𑀫𑁆𑀫𑀜𑁆𑀜𑀢𑀸, 𑀓𑀸𑀬𑀲𑁆𑀲 𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸. 𑀢𑀣𑀸 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀅𑀓𑀫𑁆𑀫𑀜𑁆𑀜𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸. 𑀧𑀕𑀼𑀡𑀲𑁆𑀲 𑀪𑀸𑀯𑁄 𑀧𑀸𑀕𑀼𑀜𑁆𑀜𑀁, 𑀢𑀤𑁂𑀯 𑀧𑀸𑀕𑀼𑀜𑁆𑀜𑀢𑀸, 𑀓𑀸𑀬𑀲𑁆𑀲 𑀧𑀸𑀕𑀼𑀜𑁆𑀜𑀢𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸. 𑀢𑀣𑀸 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑁂𑀮𑀜𑁆𑀜𑀯𑀽𑀧𑀲𑀫𑀮𑀓𑁆𑀔𑀡𑀸. 𑀓𑀸𑀬𑀲𑁆𑀲 𑀉𑀚𑀼𑀓𑀪𑀸𑀯𑁄 𑀓𑀸𑀬𑀼𑀚𑀼𑀓𑀢𑀸. 𑀢𑀣𑀸 𑀘𑀺𑀢𑁆𑀢𑀼𑀚𑀼𑀓𑀢𑀸. 𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀚𑁆𑀚𑀯𑀮𑀓𑁆𑀔𑀡𑀸. 𑀬𑀣𑀸𑀓𑁆𑀓𑀫𑀁 𑀧𑀦𑁂𑀢𑀸 𑀓𑀸𑀬𑀘𑀺𑀢𑁆𑀢𑀸𑀦𑀁 𑀲𑀸𑀭𑀫𑁆𑀪𑀸𑀤𑀺𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸, 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲 𑀕𑀳𑀡𑀁. 𑀬𑀲𑁆𑀫𑀸 𑀘𑁂𑀢𑁂 𑀤𑁆𑀯𑁂 𑀤𑁆𑀯𑁂 𑀥𑀫𑁆𑀫𑀸𑀯 𑀏𑀓𑀢𑁄 𑀳𑀼𑀢𑁆𑀯𑀸 𑀬𑀣𑀸𑀲𑀓𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀳𑀦𑀦𑁆𑀢𑀺, 𑀢𑀲𑁆𑀫𑀸 𑀇𑀥𑁂𑀯 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸, 𑀦 𑀲𑀫𑀸𑀥𑀺𑀆𑀤𑀻𑀲𑀼. 𑀅𑀧𑀺𑀘 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺𑀆𑀤𑀻𑀳𑀺 𑀘𑀺𑀢𑁆𑀢𑀲𑁆𑀲𑁂𑀯 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑁄 𑀳𑁄𑀢𑀺, 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺𑀆𑀤𑀻𑀳𑀺 𑀧𑀦 𑀭𑀽𑀧𑀓𑀸𑀬𑀲𑁆𑀲𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀭𑀡𑀯𑀲𑁂𑀦𑀸𑀢𑀺 𑀢𑀤𑀢𑁆𑀣𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀢𑁆𑀣 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀲𑁄𑀪𑀦𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑀸 𑀦𑀺𑀬𑀫𑁂𑀦 𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀲𑁄𑀪𑀦𑀲𑀸𑀥𑀸𑀭𑀡𑀸.

𑁭. 𑀲𑀫𑁆𑀫𑀸 𑀯𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀫𑁆𑀫𑀸𑀯𑀸𑀘𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀲𑀸 𑀘𑀢𑀼𑀩𑁆𑀩𑀺𑀥𑀸 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺, 𑀧𑀺𑀲𑀼𑀡𑀯𑀸𑀘𑀸 𑀯𑁂𑀭𑀫𑀡𑀺, 𑀨𑀭𑀼𑀲𑀯𑀸𑀘𑀸 𑀯𑁂𑀭𑀫𑀡𑀺, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻𑀢𑀺. 𑀓𑀫𑁆𑀫𑀫𑁂𑀯 𑀓𑀫𑁆𑀫𑀦𑁆𑀢𑁄 𑀲𑀼𑀢𑁆𑀢𑀦𑁆𑀢𑀯𑀦𑀦𑁆𑀢𑀸𑀤𑀬𑁄 𑀯𑀺𑀬. 𑀲𑀫𑁆𑀫𑀸 𑀧𑀯𑀢𑁆𑀢𑁄 𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀲𑀸 𑀢𑀺𑀯𑀺𑀥𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻𑀢𑀺. 𑀲𑀫𑁆𑀫𑀸 𑀆𑀚𑀻𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀆𑀚𑀻𑀯𑁄, 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀺. 𑀲𑁄 𑀧𑀦 𑀆𑀚𑀻𑀯𑀳𑁂𑀢𑀼𑀓𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀫𑀡𑀯𑀲𑁂𑀦 𑀲𑀢𑁆𑀢𑀯𑀺𑀥𑁄, 𑀓𑀼𑀳𑀦𑀮𑀧𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀫𑀡𑀯𑀲𑁂𑀦 𑀩𑀳𑀼𑀯𑀺𑀥𑁄 𑀯𑀸. 𑀢𑀺𑀯𑀺𑀥𑀸𑀧𑀺 𑀧𑀦𑁂𑀢𑀸 𑀧𑀘𑁆𑀘𑁂𑀓𑀁 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀯𑀲𑁂𑀦 𑀢𑀺𑀯𑀺𑀥𑀸 𑀯𑀺𑀭𑀢𑀺𑀬𑁄 𑀦𑀸𑀫 𑀬𑀣𑀸𑀯𑀼𑀢𑁆𑀢𑀤𑀼𑀘𑁆𑀘𑀭𑀺𑀢𑁂𑀳𑀺 𑀯𑀺𑀭𑀫𑀡𑀢𑁄.

𑁮. 𑀓𑀭𑁄𑀢𑀺 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀔𑁂𑀤𑀁 𑀚𑀦𑁂𑀢𑀺, 𑀓𑀺𑀭𑀢𑀺 𑀯𑀸 𑀯𑀺𑀓𑁆𑀔𑀺𑀧𑀢𑀺 𑀧𑀭𑀤𑀼𑀓𑁆𑀔𑀁, 𑀓𑀺𑀡𑀸𑀢𑀺 𑀯𑀸 𑀢𑀁 𑀳𑀺𑀁𑀲𑀢𑀺, 𑀓𑀺𑀭𑀺𑀬𑀢𑀺 𑀯𑀸 𑀤𑀼𑀓𑁆𑀔𑀺𑀢𑁂𑀲𑀼 𑀧𑀲𑀸𑀭𑀺𑀬𑀢𑀻𑀢𑀺 𑀓𑀭𑀼𑀡𑀸, 𑀲𑀸 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸. 𑀢𑀸𑀬 𑀳𑀺 𑀧𑀭𑀤𑀼𑀓𑁆𑀔𑀁 𑀅𑀧𑀦𑀻𑀬𑀢𑀼 𑀯𑀸, 𑀫𑀸 𑀯𑀸, 𑀢𑀤𑀸𑀓𑀸𑀭𑁂𑀦𑁂𑀯 𑀲𑀸 𑀧𑀯𑀢𑁆𑀢𑀢𑀺. 𑀫𑁄𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀫𑀼𑀤𑀺𑀢𑀸, 𑀲𑀸 𑀧𑀭𑀲𑀫𑁆𑀧𑀢𑁆𑀢𑀺𑀅𑀦𑀼𑀫𑁄𑀤𑀦𑀮𑀓𑁆𑀔𑀡𑀸, 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑀸, 𑀢𑀸 𑀏𑀯 𑀅𑀧𑁆𑀧𑀫𑀜𑁆𑀜𑀸. 𑀦𑀦𑀼 𑀘 ‘‘𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸’’𑀢𑀺 𑀯𑀓𑁆𑀔𑀢𑀺, 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀤𑁆𑀯𑁂𑀬𑁂𑀯 𑀯𑀼𑀢𑁆𑀢𑀸𑀢𑀺? 𑀅𑀤𑁄𑀲𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀳𑀺 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀅𑀤𑁄𑀲𑁄𑀬𑁂𑀯 𑀳𑀺 𑀲𑀢𑁆𑀢𑁂𑀲𑀼 𑀳𑀺𑀢𑀚𑁆𑀛𑀸𑀲𑀬𑀯𑀲𑀧𑁆𑀧𑀯𑀢𑁆𑀢𑁄 𑀫𑁂𑀢𑁆𑀢𑀸 𑀦𑀸𑀫. 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬𑁂𑀯 𑀢𑁂𑀲𑀼 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑀧𑁆𑀧𑀯𑀢𑁆𑀢𑀸 𑀉𑀧𑁂𑀓𑁆𑀔𑀸 𑀦𑀸𑀫. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀅𑀩𑁆𑀬𑀸𑀧𑀸𑀤𑁂𑀦 𑀫𑁂𑀢𑁆𑀢𑀸 𑀳𑀺, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀘;

𑀉𑀧𑁂𑀓𑁆𑀔𑀸 𑀕𑀳𑀺𑀢𑀸 𑀬𑀲𑁆𑀫𑀸, 𑀢𑀲𑁆𑀫𑀸 𑀦 𑀕𑀳𑀺𑀢𑀸 𑀉𑀪𑁄’’𑀢𑀺. (𑀅𑀪𑀺𑀥. 𑁭𑁦);

𑀧𑀓𑀸𑀭𑁂𑀦 𑀚𑀸𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀯𑀩𑀼𑀚𑁆𑀛𑀢𑀻𑀢𑀺 𑀧𑀜𑁆𑀜𑀸, 𑀲𑀸 𑀏𑀯 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑀦𑁂 𑀆𑀥𑀺𑀧𑀘𑁆𑀘𑀬𑁄𑀕𑀢𑁄 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀣 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀲𑀜𑁆𑀜𑀸 𑀢𑀸𑀯 𑀦𑀻𑀮𑀸𑀤𑀺𑀯𑀲𑁂𑀦 𑀲𑀜𑁆𑀚𑀸𑀦𑀦𑀫𑀢𑁆𑀢𑀁 𑀓𑀭𑁄𑀢𑀺, 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀺𑀜𑁆𑀜𑀸𑀡𑀁 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀫𑁆𑀧𑀺 𑀲𑀸𑀥𑁂𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀧𑀦 𑀫𑀕𑁆𑀕𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀜𑁆𑀜𑀸 𑀧𑀦 𑀢𑀺𑀯𑀺𑀥𑀫𑁆𑀧𑀺 𑀓𑀭𑁄𑀢𑀺, 𑀩𑀸𑀮𑀕𑀸𑀫𑀺𑀓𑀳𑁂𑀭𑀜𑁆𑀜𑀺𑀓𑀸𑀦𑀁 𑀓𑀳𑀸𑀧𑀡𑀸𑀯𑀩𑁄𑀥𑀦𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀦𑁆𑀢𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀲𑀜𑁆𑀜𑀸𑀬 𑀘𑁂𑀢𑁆𑀣 𑀆𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀯𑀺𑀜𑁆𑀜𑀸𑀡𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀲𑁂𑀲𑀓𑀸𑀮𑁂 𑀩𑀮𑀯𑀁. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀉𑀪𑁄𑀧𑀺 𑀢𑀤𑀦𑀼𑀕𑀢𑀺𑀓𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀣𑀸𑀧𑀺 𑀧𑀜𑁆𑀘𑀯𑀻𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁯. ‘‘𑀢𑁂𑀭𑀲𑀜𑁆𑀜𑀲𑀫𑀸𑀦𑀸’’𑀢𑁆𑀬𑀸𑀤𑀺 𑀢𑀻𑀳𑀺 𑀭𑀸𑀲𑀻𑀳𑀺 𑀯𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑁄.

𑀲𑁄𑀪𑀦𑀘𑁂𑀢𑀲𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀧𑀬𑁄𑀕𑀦𑀬𑀯𑀡𑁆𑀡𑀦𑀸

𑁧𑁦. 𑀘𑀺𑀢𑁆𑀢𑁂𑀦 𑀲𑀳 𑀅𑀯𑀺𑀬𑀼𑀢𑁆𑀢𑀸 𑀘𑀺𑀢𑁆𑀢𑀸𑀯𑀺𑀬𑀼𑀢𑁆𑀢𑀸, 𑀘𑁂𑀢𑀲𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑁄, 𑀘𑀺𑀢𑁆𑀢𑀫𑁂𑀯 𑀉𑀧𑁆𑀧𑀸𑀤𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀅𑀜𑁆𑀜𑀢𑁆𑀣 𑀧𑀦 𑀲𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀉𑀧𑁆𑀧𑀸𑀤𑁄, 𑀥𑀫𑁆𑀫𑀲𑀫𑀽𑀳𑁄, 𑀘𑀺𑀢𑁆𑀢𑀜𑁆𑀘 𑀢𑀁 𑀉𑀧𑁆𑀧𑀸𑀤𑁄 𑀘𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 𑀓𑀢𑁆𑀯𑀸. 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂𑀧𑀺 𑀳𑀺 𑀧𑀼𑀮𑁆𑀮𑀺𑀗𑁆𑀕𑀁 𑀓𑀢𑁆𑀣𑀘𑀺 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀸𑀯𑀺𑀬𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑁄 𑀇𑀢𑁄 𑀧𑀭𑀁 𑀬𑀣𑀸𑀬𑁄𑀕𑀁 𑀧𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀜𑁆𑀜𑀲𑀫𑀸𑀦𑀘𑁂𑀢𑀲𑀺𑀓𑀲𑀫𑁆𑀧𑀬𑁄𑀕𑀦𑀬𑀯𑀡𑁆𑀡𑀦𑀸

𑁧𑁩. 𑀲𑀪𑀸𑀯𑁂𑀦 𑀅𑀯𑀺𑀢𑀓𑁆𑀓𑀢𑁆𑀢𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀯𑀚𑁆𑀚𑀺𑀢𑀸𑀦𑀺 𑀏𑀢𑁂𑀳𑀺, 𑀢𑁂𑀳𑀺 𑀯𑀸 𑀏𑀢𑀸𑀦𑀺 𑀯𑀚𑁆𑀚𑀺𑀢𑀸𑀦𑀻𑀢𑀺 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀸𑀦𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺. 𑀢𑁂𑀲𑀼 𑀘𑁂𑀯 𑀏𑀓𑀸𑀤𑀲𑀲𑀼 𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼 𑀘 𑀯𑀺𑀢𑀓𑁆𑀓𑁄 𑀚𑀸𑀬𑀢𑀺 𑀲𑁂𑀲𑀸𑀦𑀁 𑀪𑀸𑀯𑀦𑀸𑀩𑀮𑁂𑀦 𑀅𑀯𑀺𑀢𑀓𑁆𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁪. 𑀢𑁂𑀲𑀼 𑀘𑁂𑀯 𑀧𑀜𑁆𑀘𑀧𑀜𑁆𑀜𑀸𑀲𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀼, 𑀏𑀓𑀸𑀤𑀲𑀲𑀼 𑀤𑀼𑀢𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀙𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼 𑀯𑀺𑀘𑀸𑀭𑁄 𑀚𑀸𑀬𑀢𑀺.

𑁧𑁫. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺, 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂𑀦 𑀘𑀸𑀢𑀺 𑀏𑀓𑀸𑀤𑀲𑀳𑀺 𑀯𑀚𑁆𑀚𑀺𑀢𑁂𑀲𑀼 𑀅𑀝𑁆𑀞𑀲𑀢𑁆𑀢𑀢𑀺𑀘𑀺𑀢𑁆𑀢𑁂𑀲𑀼 𑀅𑀥𑀺𑀫𑁄𑀓𑁆𑀔𑁄 𑀚𑀸𑀬𑀢𑀺.

𑁧𑁬. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑁂𑀦, 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺, 𑀲𑀫𑁆𑀧𑀝𑀺𑀘𑁆𑀙𑀦𑀤𑁆𑀯𑀬𑁂𑀦, 𑀲𑀦𑁆𑀢𑀻𑀭𑀡𑀢𑁆𑀢𑀬𑁂𑀦 𑀘𑀸𑀢𑀺 𑀲𑁄𑀴𑀲𑀳𑀺 𑀯𑀚𑁆𑀚𑀺𑀢𑁂𑀲𑀼 𑀢𑁂𑀲𑀢𑁆𑀢𑀢𑀺𑀬𑀸 𑀘𑀺𑀢𑁆𑀢𑁂𑀲𑀼 𑀯𑀻𑀭𑀺𑀬𑀁 𑀚𑀸𑀬𑀢𑀺.

𑁧𑁭. 𑀤𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺𑀤𑁆𑀯𑀻𑀳𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀳𑀺 𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀳𑀺, 𑀓𑀸𑀬𑀯𑀺𑀜𑁆𑀜𑀸𑀡𑀤𑁆𑀯𑀬𑁂𑀦, 𑀏𑀓𑀸𑀤𑀲𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀳𑀺 𑀘𑀸𑀢𑀺 𑀲𑀢𑁆𑀢𑀢𑀺𑀘𑀺𑀢𑁆𑀢𑁂𑀳𑀺 𑀯𑀚𑁆𑀚𑀺𑀢𑁂𑀲𑀼 𑀏𑀓𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀧𑀻𑀢𑀺 𑀚𑀸𑀬𑀢𑀺.

𑁧𑁮. 𑀅𑀳𑁂𑀢𑀼𑀓𑁂𑀳𑀺 𑀅𑀝𑁆𑀞𑀸𑀭𑀲𑀳𑀺, 𑀫𑁄𑀫𑀽𑀳𑁂𑀳𑀺 𑀤𑁆𑀯𑀻𑀳𑀺 𑀘𑀸𑀢𑀺 𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑁂𑀳𑀺 𑀯𑀚𑁆𑀚𑀺𑀢𑁂𑀲𑀼 𑀏𑀓𑀽𑀦𑀲𑀢𑁆𑀢𑀢𑀺𑀘𑀺𑀢𑁆𑀢𑁂𑀲𑀼 𑀙𑀦𑁆𑀤𑁄 𑀚𑀸𑀬𑀢𑀺.

𑁧𑁯. 𑀢𑁂 𑀧𑀦𑀸𑀢𑀺 𑀧𑀓𑀺𑀡𑁆𑀡𑀓𑀯𑀺𑀯𑀚𑁆𑀚𑀺𑀢𑀸 𑀢𑀁𑀲𑀳𑀕𑀢𑀸 𑀘. 𑀬𑀣𑀸𑀓𑁆𑀓𑀫𑀦𑁆𑀢𑀺 𑀯𑀺𑀢𑀓𑁆𑀓𑀸𑀤𑀺𑀙𑀧𑀓𑀺𑀡𑁆𑀡𑀓𑀯𑀚𑁆𑀚𑀺𑀢𑀢𑀁𑀲𑀳𑀺𑀢𑀓𑀫𑀸𑀦𑀼𑀭𑀽𑀧𑀢𑁄. ‘‘𑀙𑀲𑀝𑁆𑀞𑀺 𑀧𑀜𑁆𑀘𑀧𑀜𑁆𑀜𑀸𑀲𑀸’’𑀢𑁆𑀬𑀸𑀤𑀺 𑀏𑀓𑀯𑀻𑀲𑀲𑀢𑀕𑀡𑀦𑀯𑀲𑁂𑀦, 𑀏𑀓𑀽𑀦𑀦𑀯𑀼𑀢𑀺𑀕𑀡𑀦𑀯𑀲𑁂𑀦 𑀘 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁.

𑀅𑀜𑁆𑀜𑀲𑀫𑀸𑀦𑀘𑁂𑀢𑀲𑀺𑀓𑀲𑀫𑁆𑀧𑀬𑁄𑀕𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀘𑁂𑀢𑀲𑀺𑀓𑀲𑀫𑁆𑀧𑀬𑁄𑀕𑀦𑀬𑀯𑀡𑁆𑀡𑀦𑀸

𑁨𑁦. ‘‘𑀲𑀩𑁆𑀩𑀸𑀓𑀼𑀲𑀮𑀲𑀸𑀥𑀸𑀭𑀡𑀸’’𑀢𑀺 𑀯𑀢𑁆𑀯𑀸 𑀢𑀤𑁂𑀯 𑀲𑀫𑀢𑁆𑀣𑁂𑀢𑀼𑀁 ‘‘𑀲𑀩𑁆𑀩𑁂𑀲𑀼𑀧𑀻’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀬𑁄 𑀳𑀺 𑀓𑁄𑀘𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀲𑀩𑁆𑀩𑁄𑀧𑀺 𑀫𑁄𑀳𑁂𑀦 𑀢𑀢𑁆𑀣 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻 𑀅𑀳𑀺𑀭𑀺𑀓𑁂𑀦 𑀢𑀢𑁄 𑀅𑀚𑀺𑀕𑀼𑀘𑁆𑀙𑀦𑁆𑀢𑁄, 𑀅𑀦𑁄𑀢𑁆𑀢𑀧𑁆𑀧𑁂𑀦 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑁄, 𑀉𑀤𑁆𑀥𑀘𑁆𑀘𑁂𑀦 𑀅𑀯𑀽𑀧𑀲𑀦𑁆𑀢𑁄 𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑁂 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀧𑀮𑀩𑁆𑀪𑀦𑁆𑀢𑀺.

𑁨𑁧. 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑁆𑀯𑁂𑀯𑀸𑀢𑀺 𑀏𑀯-𑀓𑀸𑀭𑁄 𑀅𑀥𑀺𑀓𑀸𑀭𑀢𑁆𑀣𑀸𑀬𑀧𑀺 𑀳𑁄𑀢𑀻𑀢𑀺 ‘‘𑀤𑀺𑀝𑁆𑀞𑀺𑀲𑀳𑀕𑀢𑀘𑀺𑀢𑁆𑀢𑁂𑀲𑀽’’𑀢𑀺𑀆𑀤𑀻𑀲𑀼𑀧𑀺 𑀅𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀲𑀓𑁆𑀓𑀸𑀬𑀸𑀤𑀻𑀲𑀼 𑀳𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀢𑀢𑁆𑀣 𑀫𑀫𑀸𑀬𑀦𑀲𑀫𑁆𑀪𑀯𑀢𑁄 𑀤𑀺𑀝𑁆𑀞𑀺 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑁆𑀯𑁂𑀯 𑀮𑀩𑁆𑀪𑀢𑀺. 𑀫𑀸𑀦𑁄𑀧𑀺 𑀅𑀳𑀁𑀫𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀤𑀺𑀝𑁆𑀞𑀺𑀲𑀤𑀺𑀲𑁄𑀯 𑀧𑀯𑀢𑁆𑀢𑀢𑀻𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀧𑀯𑀢𑁆𑀢𑀢𑀺 𑀓𑁂𑀲𑀭𑀲𑀻𑀳𑁄 𑀯𑀺𑀬 𑀅𑀧𑀭𑁂𑀦 𑀢𑀣𑀸𑀯𑀺𑀥𑁂𑀦 𑀲𑀳 𑀏𑀓𑀕𑀼𑀳𑀸𑀬𑀁, 𑀦 𑀘𑀸𑀧𑀺 𑀤𑁄𑀲𑀫𑀽𑀮𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀢𑀺 𑀅𑀢𑁆𑀢𑀲𑀺𑀦𑁂𑀳𑀲𑀦𑁆𑀦𑀺𑀲𑁆𑀲𑀬𑀪𑀸𑀯𑁂𑀦 𑀏𑀓𑀦𑁆𑀢𑀮𑁄𑀪𑀧𑀤𑀝𑁆𑀞𑀸𑀦𑀢𑁆𑀢𑀸𑀢𑀺 𑀲𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑁆𑀯𑁂𑀯 𑀮𑀩𑁆𑀪𑀢𑀺.

𑁨𑁪. 𑀢𑀣𑀸 𑀧𑀭𑀲𑀫𑁆𑀧𑀢𑁆𑀢𑀺𑀁 𑀉𑀲𑀽𑀬𑀦𑁆𑀢𑀲𑁆𑀲, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲, 𑀓𑀢𑀸𑀓𑀢𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑁂 𑀅𑀦𑀼𑀲𑁄𑀘𑀦𑁆𑀢𑀲𑁆𑀲 𑀘 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀳𑀦𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀧𑀝𑀺𑀖𑀘𑀺𑀢𑁆𑀢𑁂𑀲𑁆𑀯𑁂𑀯.

𑁨𑁫. 𑀅𑀓𑀫𑁆𑀫𑀜𑁆𑀜𑀢𑀸𑀧𑀓𑀢𑀺𑀓𑀲𑁆𑀲 𑀢𑀣𑀸 𑀲𑀪𑀸𑀯𑀢𑀺𑀓𑁆𑀔𑁂𑀲𑀼 𑀅𑀲𑀗𑁆𑀔𑀸𑀭𑀺𑀓𑁂𑀲𑀼 𑀧𑀯𑀢𑁆𑀢𑀦𑀸𑀬𑁄𑀕𑀢𑁄 𑀣𑀺𑀦𑀫𑀺𑀤𑁆𑀥𑀁 𑀲𑀲𑀗𑁆𑀔𑀸𑀭𑀺𑀓𑁂𑀲𑁆𑀯𑁂𑀯 𑀮𑀩𑁆𑀪𑀢𑀺.

𑁨𑁭. 𑀲𑀩𑁆𑀩𑀸𑀧𑀼𑀜𑁆𑀜𑁂𑀲𑁆𑀯𑁂𑀯 𑀘𑀢𑁆𑀢𑀸𑀭𑁄 𑀘𑁂𑀢𑀲𑀺𑀓𑀸 𑀕𑀢𑀸, 𑀮𑁄𑀪𑀫𑀽𑀮𑁂𑀬𑁂𑀯 𑀬𑀣𑀸𑀲𑀫𑁆𑀪𑀯𑀁 𑀢𑀬𑁄 𑀕𑀢𑀸, 𑀤𑁄𑀲𑀫𑀽𑀮𑁂𑀲𑁆𑀯𑁂𑀯 𑀤𑁆𑀯𑀻𑀲𑀼 𑀘𑀢𑁆𑀢𑀸𑀭𑁄 𑀕𑀢𑀸, 𑀢𑀣𑀸 𑀲𑀲𑀗𑁆𑀔𑀸𑀭𑁂𑀬𑁂𑀯 𑀤𑁆𑀯𑀬𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑁂 𑀘𑀸𑀢𑀺 𑀘-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑁂𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀓𑀼𑀲𑀮𑀘𑁂𑀢𑀲𑀺𑀓𑀲𑀫𑁆𑀧𑀬𑁄𑀕𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀪𑀦𑀘𑁂𑀢𑀲𑀺𑀓𑀲𑀫𑁆𑀧𑀬𑁄𑀕𑀦𑀬𑀯𑀡𑁆𑀡𑀦𑀸

𑁨𑁯. 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀓𑀤𑀸𑀘𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀯𑀺𑀭𑀳𑁄 𑀲𑀺𑀬𑀸, 𑀦 𑀧𑀦 𑀯𑀺𑀭𑀢𑀻𑀦𑀁 𑀅𑀪𑀸𑀯𑁄 𑀫𑀕𑁆𑀕𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦, 𑀨𑀮𑀲𑁆𑀲 𑀘 𑀢𑀤𑀦𑀼𑀓𑀽𑀮𑀯𑀲𑁂𑀦 𑀧𑀯𑀢𑁆𑀢𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀭𑀢𑀺𑀬𑁄 𑀧𑀦𑀸’’𑀢𑁆𑀬𑀸𑀤𑀺. 𑀲𑀩𑁆𑀩𑀣𑀸𑀧𑀻𑀢𑀺 𑀲𑀩𑁆𑀩𑁂𑀳𑀺𑀧𑀺 𑀢𑀁𑀢𑀁𑀤𑀼𑀘𑁆𑀘𑀭𑀺𑀢𑀤𑀼𑀭𑀸𑀚𑀻𑀯𑀸𑀦𑀁 𑀯𑀺𑀥𑀫𑀦𑀯𑀲𑀧𑁆𑀧𑀯𑀢𑁆𑀢𑁂𑀳𑀺 𑀆𑀓𑀸𑀭𑁂𑀳𑀺. 𑀦 𑀳𑀺 𑀏𑀢𑀸𑀲𑀁 𑀮𑁄𑀓𑀺𑀬𑁂𑀲𑀼 𑀯𑀺𑀬 𑀮𑁄𑀓𑀼𑀢𑁆𑀢𑀭𑁂𑀲𑀼𑀧𑀺 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀳𑀸𑀦𑀯𑀲𑁂𑀦 𑀧𑀯𑀢𑁆𑀢𑀺 𑀳𑁄𑀢𑀺 𑀲𑀩𑁆𑀩𑁂𑀲𑀫𑁂𑀯 𑀤𑀼𑀘𑁆𑀘𑀭𑀺𑀢𑀤𑀼𑀭𑀸𑀚𑀻𑀯𑀸𑀦𑀁 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀓𑁂𑀲𑀜𑁆𑀘𑀺 𑀲𑀩𑁆𑀩𑀲𑁄, 𑀓𑁂𑀲𑀜𑁆𑀘𑀺 𑀅𑀧𑀸𑀬𑀕𑀫𑀦𑀻𑀬𑀸𑀤𑀺𑀅𑀯𑀢𑁆𑀣𑀸𑀬 𑀧𑀳𑀸𑀦𑀯𑀲𑁂𑀦 𑀏𑀓𑀓𑁆𑀔𑀡𑁂 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄. 𑀦𑀦𑀼 𑀘𑀸𑀬𑀫𑀢𑁆𑀣𑁄 ‘‘𑀏𑀓𑀢𑁄𑀯𑀸’’𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑁄𑀢𑀺? 𑀢𑀁 𑀦, 𑀢𑀺𑀲𑁆𑀲𑀦𑁆𑀦𑀁 𑀏𑀓𑀢𑁄𑀯𑀼𑀢𑁆𑀢𑀺𑀧𑀭𑀺𑀤𑀻𑀧𑀦𑀫𑀢𑁆𑀢𑁂𑀦 𑀘𑀢𑀼𑀩𑁆𑀩𑀺𑀥𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀤𑀻𑀧𑀺𑀢𑀢𑁆𑀢𑀸. 𑀓𑁂𑀘𑀺 𑀧𑀦 𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 ‘‘‘𑀲𑀩𑁆𑀩𑀣𑀸𑀧𑀻’𑀢𑀺 𑀇𑀤𑀁 𑀅𑀢𑀺𑀭𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀢𑁆𑀣 𑀢𑁂𑀲𑀁 𑀅𑀜𑁆𑀜𑀸𑀡𑀫𑁂𑀯 𑀓𑀸𑀭𑀡𑀁. ‘‘𑀦𑀺𑀬𑀢𑀸’’𑀢𑀺 𑀇𑀫𑀺𑀦𑀸𑀧𑀺 𑀮𑁄𑀓𑀺𑀬𑁂𑀲𑀼 𑀯𑀺𑀬 𑀓𑀤𑀸𑀘𑀺 𑀲𑀫𑁆𑀪𑀯𑀁 𑀦𑀺𑀯𑀸𑀭𑁂𑀢𑀺. 𑀢𑀣𑀸 𑀳𑁂𑀢𑀸 𑀮𑁄𑀓𑀺𑀬𑁂𑀲𑀼 𑀬𑁂𑀯𑀸𑀧𑀦𑀓𑀯𑀲𑁂𑀦 𑀤𑁂𑀲𑀺𑀢𑀸, 𑀇𑀥 𑀧𑀦 𑀲𑀭𑀽𑀧𑁂𑀦𑁂𑀯. 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑁆𑀯𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀓𑀺𑀭𑀺𑀬𑁂𑀲𑀼 𑀫𑀳𑀕𑁆𑀕𑀢𑁂𑀲𑀼 𑀘 𑀲𑀫𑁆𑀪𑀯𑀁 𑀦𑀺𑀯𑀸𑀭𑁂𑀢𑀺. 𑀢𑀣𑀸 𑀘𑁂𑀯 𑀉𑀧𑀭𑀺 𑀯𑀓𑁆𑀔𑀢𑀺. 𑀓𑀤𑀸𑀘𑀻𑀢𑀺 𑀫𑀼𑀲𑀸𑀯𑀸𑀤𑀸𑀤𑀺𑀏𑀓𑁂𑀓𑀤𑀼𑀘𑁆𑀘𑀭𑀺𑀢𑁂𑀳𑀺 𑀧𑀝𑀺𑀯𑀺𑀭𑀫𑀡𑀓𑀸𑀮𑁂. 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀦 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀸𑀦𑀁 𑀲𑀫𑁆𑀪𑀯𑀸𑀧𑁂𑀓𑁆𑀔𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀲𑀼𑀁 𑀯𑀺𑀲𑀼’’𑀦𑁆𑀢𑀺.

𑁩𑁦. 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀦 𑀓𑀤𑀸𑀘𑀺 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺 ‘‘𑀧𑀜𑁆𑀘𑀫…𑀧𑁂… 𑀘𑀺𑀢𑁆𑀢𑁂𑀲𑀼 𑀘𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀻𑀯𑀭𑀡𑀸𑀤𑀺𑀢𑀸𑀬 𑀫𑀳𑀢𑁆𑀢𑀁 𑀕𑀢𑀸𑀦𑀺, 𑀫𑀳𑀦𑁆𑀢𑁂𑀳𑀺 𑀯𑀸 𑀛𑀸𑀬𑀻𑀳𑀺 𑀕𑀢𑀸𑀦𑀺 𑀧𑀢𑁆𑀢𑀸𑀦𑀻𑀢𑀺 𑀫𑀳𑀕𑁆𑀕𑀢𑀸𑀦𑀺. 𑀦𑀸𑀦𑀸 𑀳𑀼𑀢𑁆𑀯𑀸𑀢𑀺 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀪𑀽𑀢𑀸𑀦𑀁 𑀤𑀼𑀓𑁆𑀔𑀺𑀢𑀲𑀼𑀔𑀺𑀢𑀲𑀢𑁆𑀢𑀸𑀦𑀁 𑀆𑀧𑀸𑀣𑀕𑀫𑀦𑀸𑀧𑁂𑀓𑁆𑀔𑀢𑀸𑀬 𑀯𑀺𑀲𑀼𑀁 𑀯𑀺𑀲𑀼𑀁 𑀳𑀼𑀢𑁆𑀯𑀸. 𑀏𑀢𑁆𑀣𑀸𑀢𑀺 𑀇𑀫𑁂𑀲𑀼 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑁂𑀲𑀼, 𑀓𑀭𑀼𑀡𑀸𑀫𑀼𑀤𑀺𑀢𑀸𑀪𑀸𑀯𑀦𑀸𑀓𑀸𑀮𑁂 𑀅𑀧𑁆𑀧𑀦𑀸𑀯𑀻𑀣𑀺𑀢𑁄 𑀧𑀼𑀩𑁆𑀩𑁂 𑀧𑀭𑀺𑀘𑀬𑀯𑀲𑁂𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑁂𑀳𑀺𑀧𑀺 𑀧𑀭𑀺𑀓𑀫𑁆𑀫𑀁 𑀳𑁄𑀢𑀺, 𑀬𑀣𑀸 𑀢𑀁 𑀧𑀕𑀼𑀡𑀕𑀦𑁆𑀣𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀓𑀤𑀸𑀘𑀺 𑀅𑀜𑁆𑀜𑀯𑀺𑀳𑀺𑀢𑀲𑁆𑀲𑀧𑀺 𑀲𑀚𑁆𑀛𑀸𑀬𑀦𑀁, 𑀬𑀣𑀸 𑀘 𑀧𑀕𑀼𑀡𑀯𑀺𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀓𑀤𑀸𑀘𑀺 𑀧𑀭𑀺𑀘𑀬𑀩𑀮𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀳𑀺𑀧𑀺 𑀲𑀫𑁆𑀫𑀲𑀦𑀦𑁆𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀸𑀫𑀸𑀯𑀘𑀭𑁂𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀁 𑀅𑀲𑀫𑁆𑀪𑀯𑀯𑀸𑀤𑁄 𑀓𑁂𑀘𑀺𑀯𑀸𑀤𑁄 𑀓𑀢𑁄. 𑀅𑀧𑁆𑀧𑀦𑀸𑀯𑀻𑀣𑀺𑀬𑀁 𑀧𑀦 𑀢𑀸𑀲𑀁 𑀏𑀓𑀦𑁆𑀢𑀢𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑁆𑀯𑁂𑀯 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄 𑀪𑀺𑀦𑁆𑀦𑀚𑀸𑀢𑀺𑀓𑀲𑁆𑀲 𑀯𑀺𑀬 𑀪𑀺𑀦𑁆𑀦𑀯𑁂𑀤𑀦𑀲𑁆𑀲𑀧𑀺 𑀆𑀲𑁂𑀯𑀦𑀧𑀘𑁆𑀘𑀬𑀸𑀪𑀸𑀯𑀢𑁄.

𑁩𑁨. 𑀢𑀬𑁄 𑀲𑁄𑀴𑀲𑀘𑀺𑀢𑁆𑀢𑁂𑀲𑀽𑀢𑀺 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀥𑀫𑁆𑀫𑀸 𑀅𑀝𑁆𑀞𑀮𑁄𑀓𑀼𑀢𑁆𑀢𑀭𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀲𑁂𑀦 𑀲𑁄𑀴𑀲𑀘𑀺𑀢𑁆𑀢𑁂𑀲𑀼 𑀚𑀸𑀬𑀦𑁆𑀢𑀺.

𑁩𑁩. 𑀏𑀯𑀁 𑀦𑀺𑀬𑀢𑀸𑀦𑀺𑀬𑀢𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀅𑀦𑀺𑀬𑀢𑀥𑀫𑁆𑀫𑁂 𑀏𑀓𑀢𑁄 𑀤𑀲𑁆𑀲𑁂𑀢𑁆𑀯𑀸 𑀲𑁂𑀲𑀸𑀦𑀁 𑀦𑀺𑀬𑀢𑀪𑀸𑀯𑀁 𑀤𑀻𑀧𑁂𑀢𑀼𑀁 ‘‘𑀇𑀲𑁆𑀲𑀸𑀫𑀘𑁆𑀙𑁂𑀭𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀯𑀺𑀭𑀢𑀺𑀓𑀭𑀼𑀡𑀸𑀤𑀬𑁄 𑀦𑀸𑀦𑀸 𑀓𑀤𑀸𑀘𑀺 𑀚𑀸𑀬𑀦𑁆𑀢𑀺, 𑀫𑀸𑀦𑁄 𑀘 𑀓𑀤𑀸𑀘𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑁆𑀬𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀺𑀬𑀁 𑀚𑀸𑀬𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀢𑀣𑀸 𑀓𑀤𑀸𑀘𑀺 𑀅𑀓𑀫𑁆𑀫𑀜𑁆𑀜𑀢𑀸𑀯𑀲𑀧𑁆𑀧𑀯𑀢𑁆𑀢𑀺𑀬𑀁 𑀲𑀳 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀧𑁆𑀧𑀬𑁄𑀕𑀺𑀯𑀲𑁂𑀦 𑀚𑀸𑀬𑀢𑀻𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀫𑀸𑀦𑁄 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑀁 ‘‘𑀲𑀳𑀸’’𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀁 𑀢𑀣𑀸 𑀓𑀤𑀸𑀘𑀺 𑀲𑀳 𑀘 𑀲𑀲𑀗𑁆𑀔𑀸𑀭𑀺𑀓𑀧𑀝𑀺𑀖𑁂, 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀲𑀲𑀗𑁆𑀔𑀸𑀭𑀺𑀓𑁂𑀲𑀼 𑀘 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑁂𑀳𑀺, 𑀫𑀸𑀦𑁂𑀦 𑀘 𑀲𑀤𑁆𑀥𑀺𑀁, 𑀓𑀤𑀸𑀘𑀺 𑀢𑀤𑀺𑀢𑀭𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀓𑀸𑀮𑁂, 𑀢𑀁𑀲𑀫𑁆𑀧𑀬𑁄𑀕𑀓𑀸𑀮𑁂𑀧𑀺 𑀯𑀸 𑀦𑀸𑀦𑀸 𑀘 𑀚𑀸𑀬𑀢𑀻𑀢𑀺 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 ‘‘𑀫𑀸𑀦𑁄 𑀘 𑀣𑀺𑀦𑀫𑀺𑀤𑁆𑀥𑀜𑁆𑀘 𑀢𑀣𑀸 𑀓𑀤𑀸𑀘𑀺 𑀦𑀸𑀦𑀸 𑀓𑀤𑀸𑀘𑀺 𑀲𑀳 𑀘 𑀚𑀸𑀬𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀬𑁄𑀚𑁂𑀲𑀼𑀁.

𑁩𑁪. 𑀲𑁂𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀏𑀓𑀸𑀤𑀲𑀳𑀺 𑀅𑀦𑀺𑀬𑀢𑁂𑀳𑀺 𑀇𑀢𑀭𑁂 𑀏𑀓𑀘𑀢𑁆𑀢𑀸𑀮𑀻𑀲. 𑀓𑁂𑀘𑀺 𑀧𑀦 ‘‘𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑁂𑀳𑀺 𑀲𑁂𑀲𑀸 𑀦𑀺𑀬𑀢𑀬𑁂𑀯𑀸𑀧𑀦𑀓𑀸’’𑀢𑀺 𑀯𑀡𑁆𑀡𑁂𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀇𑀥 𑀬𑁂𑀯𑀸𑀧𑀦𑀓𑀦𑀸𑀫𑁂𑀦 𑀓𑁂𑀲𑀜𑁆𑀘𑀺 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀦𑀺𑀬𑀢𑀸𑀦𑀺𑀬𑀢𑀯𑀲𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀬𑀣𑀸𑀭𑀳𑀁 𑀮𑀩𑁆𑀪𑀫𑀸𑀦𑀘𑁂𑀢𑀲𑀺𑀓𑀫𑀢𑁆𑀢𑀲𑀦𑁆𑀤𑀲𑁆𑀲𑀦𑀁 𑀆𑀘𑀭𑀺𑀬𑁂𑀦 𑀓𑀢𑀁, 𑀦 𑀬𑁂𑀯𑀸𑀧𑀦𑀓𑀦𑀸𑀫𑁂𑀦 𑀓𑁂𑀘𑀺 𑀉𑀤𑁆𑀥𑀝𑀸𑀢𑀺.

𑀏𑀯𑀁 𑀢𑀸𑀯 ‘‘𑀨𑀲𑁆𑀲𑀸𑀤𑀻𑀲𑀼 𑀅𑀬𑀁 𑀥𑀫𑁆𑀫𑁄 𑀏𑀢𑁆𑀢𑀓𑁂𑀲𑀼 𑀘𑀺𑀢𑁆𑀢𑁂𑀲𑀼 𑀉𑀧𑀮𑀩𑁆𑀪𑀢𑀻’’𑀢𑀺 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀫𑁆𑀧𑀬𑁄𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀏𑀢𑁆𑀢𑀓𑀸 𑀘𑁂𑀢𑀲𑀺𑀓𑀸’’𑀢𑀺 𑀘𑁂𑀢𑀲𑀺𑀓𑀭𑀸𑀲𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀕𑀳𑀜𑁆𑀘𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁.

𑀲𑁄𑀪𑀦𑀘𑁂𑀢𑀲𑀺𑀓𑀲𑀫𑁆𑀧𑀬𑁄𑀕𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀧𑀬𑁄𑀕𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸

𑁩𑁫. ‘‘𑀙𑀢𑁆𑀢𑀺𑀁𑀲𑀸’’𑀢𑁆𑀬𑀸𑀤𑀺 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁 𑀮𑀩𑁆𑀪𑀫𑀸𑀦𑀓𑀥𑀫𑁆𑀫𑀯𑀲𑁂𑀦 𑀕𑀡𑀦𑀲𑀗𑁆𑀕𑀳𑁄.

𑁩𑁬. 𑀧𑀞𑀫𑀚𑁆𑀛𑀸𑀦𑁂 𑀦𑀺𑀬𑀼𑀢𑁆𑀢𑀸𑀦𑀺 𑀘𑀺𑀢𑁆𑀢𑀸𑀦𑀺, 𑀢𑀁 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑀸𑀦𑀺. 𑀅𑀧𑁆𑀧𑀫𑀜𑁆𑀜𑀸𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸, 𑀮𑁄𑀓𑀼𑀢𑁆𑀢𑀭𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀫𑀜𑁆𑀜𑀸𑀯𑀚𑁆𑀚𑀺𑀢𑀸’’𑀢𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀲𑀫𑀸𑀦𑀸, 𑀅𑀧𑁆𑀧𑀫𑀜𑁆𑀜𑀸𑀯𑀚𑁆𑀚𑀺𑀢𑀸 𑀲𑁄𑀪𑀦𑀘𑁂𑀢𑀲𑀺𑀓𑀸 𑀘 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀆𑀓𑀟𑁆𑀠𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀯𑀚𑁆𑀚𑀸 𑀲𑀼𑀔𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀉𑀧𑁂𑀓𑁆𑀔𑀸𑀬 𑀲𑀳𑀕𑀢𑀸. 𑀧𑀜𑁆𑀘𑀓𑀚𑁆𑀛𑀸𑀦𑀯𑀲𑁂𑀦𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀸𑀯𑁂𑀦𑁆𑀢𑀲𑁆𑀲 𑀦𑀸𑀢𑀺𑀢𑀺𑀓𑁆𑀔𑀜𑀸𑀡𑀲𑁆𑀲 𑀯𑀲𑁂𑀦 𑀤𑁂𑀲𑀺𑀢𑀲𑁆𑀲 𑀛𑀸𑀦𑀧𑀜𑁆𑀘𑀓𑀲𑁆𑀲 𑀯𑀲𑁂𑀦. 𑀢𑁂 𑀧𑀦 𑀏𑀓𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀸𑀯𑁂𑀦𑁆𑀢𑀲𑁆𑀲 𑀢𑀺𑀓𑁆𑀔𑀜𑀸𑀡𑀲𑁆𑀲 𑀯𑀲𑁂𑀦 𑀤𑁂𑀲𑀺𑀢𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁂𑀲𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀚𑁆𑀚𑀺𑀢𑀸𑀦𑀁 𑀲𑀫𑁆𑀪𑀯𑀢𑁄 𑀘𑀢𑀼𑀥𑀸 𑀏𑀯 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁭. 𑀢𑁂𑀢𑁆𑀢𑀺𑀁𑀲𑀤𑁆𑀯𑀬𑀁 𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼.

𑀫𑀳𑀕𑁆𑀕𑀢𑀘𑀺𑀢𑁆𑀢𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸

𑁩𑁮. 𑀢𑀻𑀲𑀽𑀢𑀺 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀢𑀺𑀯𑀺𑀥𑁂𑀲𑀼 𑀲𑀻𑀮𑀯𑀺𑀲𑀼𑀤𑁆𑀥𑀺𑀯𑀲𑁂𑀦 𑀲𑀼𑀯𑀺𑀲𑁄𑀥𑀺𑀢𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀓𑁂𑀯𑀮𑀁 𑀘𑀺𑀢𑁆𑀢𑀲𑀫𑀸𑀥𑀸𑀦𑀫𑀢𑁆𑀢𑁂𑀦 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀦 𑀧𑀦 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀯𑀺𑀲𑁄𑀥𑀦𑀯𑀲𑁂𑀦, 𑀦𑀸𑀧𑀺 𑀤𑀼𑀘𑁆𑀘𑀭𑀺𑀢𑀤𑀼𑀭𑀸𑀚𑀻𑀯𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀭𑀢𑀺𑀯𑀚𑁆𑀚𑀺𑀢𑀸’’𑀢𑀺. 𑀧𑀘𑁆𑀘𑁂𑀓𑀫𑁂𑀯𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯. 𑀧𑀦𑁆𑀦𑀭𑀲𑀲𑀽𑀢𑀺 𑀭𑀽𑀧𑀸𑀯𑀘𑀭𑀯𑀲𑁂𑀦 𑀢𑀻𑀲𑀼, 𑀆𑀭𑀼𑀧𑁆𑀧𑀯𑀲𑁂𑀦 𑀤𑁆𑀯𑀸𑀤𑀲𑀲𑀽𑀢𑀺 𑀧𑀦𑁆𑀦𑀭𑀲𑀲𑀼. 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯.

𑀫𑀳𑀕𑁆𑀕𑀢𑀘𑀺𑀢𑁆𑀢𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀫𑀸𑀯𑀘𑀭𑀲𑁄𑀪𑀦𑀘𑀺𑀢𑁆𑀢𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸

𑁪𑁦. 𑀧𑀘𑁆𑀘𑁂𑀓𑀫𑁂𑀯𑀸𑀢𑀺 𑀏𑀓𑁂𑀓𑀸𑀬𑁂𑀯. 𑀅𑀧𑁆𑀧𑀫𑀜𑁆𑀜𑀸𑀦𑀁 𑀳𑀺 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸, 𑀯𑀺𑀭𑀢𑀻𑀦𑀜𑁆𑀘 𑀯𑀻𑀢𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀯𑀺𑀲𑀬𑀢𑁆𑀢𑀸 𑀦𑀢𑁆𑀣𑀺 𑀢𑀸𑀲𑀁 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀫𑁆𑀪𑀯𑁄𑀢𑀺 𑀮𑁄𑀓𑀺𑀬𑀯𑀺𑀭𑀢𑀻𑀦𑀁 𑀏𑀓𑀦𑁆𑀢𑀓𑀼𑀲𑀮𑀲𑀪𑀸𑀯𑀢𑁆𑀢𑀸 𑀦𑀢𑁆𑀣𑀺 𑀅𑀩𑁆𑀬𑀸𑀓𑀢𑁂𑀲𑀼 𑀲𑀫𑁆𑀪𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀭𑀢𑀺𑀯𑀚𑁆𑀚𑀺𑀢𑀸’’𑀢𑀺. 𑀢𑁂𑀦𑀸𑀳 ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸𑀬𑁂𑀯𑀸’’𑀢𑀺 (𑀯𑀺𑀪. 𑁭𑁧𑁫). 𑀇𑀢𑀭𑀣𑀸 𑀲𑀤𑁆𑀥𑀸𑀲𑀢𑀺𑀆𑀤𑀬𑁄 𑀯𑀺𑀬 ‘‘𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸’’𑀢𑀺 𑀯𑀤𑁂𑀬𑁆𑀬. 𑀨𑀮𑀲𑁆𑀲 𑀧𑀦 𑀫𑀕𑁆𑀕𑀧𑀝𑀺𑀩𑀺𑀫𑁆𑀩𑀪𑀽𑀢𑀢𑁆𑀢𑀸, 𑀤𑀼𑀘𑁆𑀘𑀭𑀺𑀢𑀤𑀼𑀭𑀸𑀚𑀻𑀯𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁄 𑀘 𑀦 𑀮𑁄𑀓𑀼𑀢𑁆𑀢𑀭𑀯𑀺𑀭𑀢𑀻𑀦𑀁 𑀏𑀓𑀦𑁆𑀢𑀓𑀼𑀲𑀮𑀢𑀸 𑀬𑀼𑀢𑁆𑀢𑀸𑀢𑀺 𑀢𑀸𑀲𑀁 𑀢𑀢𑁆𑀣 𑀅𑀕𑁆𑀕𑀳𑀡𑀁. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀫𑁆𑀧𑀺 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸, 𑀅𑀧𑁆𑀧𑀫𑀜𑁆𑀜𑀸𑀦𑀜𑁆𑀘 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸, 𑀯𑀺𑀭𑀢𑀻𑀦𑀫𑁆𑀧𑀺 𑀏𑀓𑀦𑁆𑀢𑀓𑀼𑀲𑀮𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀫𑀜𑁆𑀜𑀸𑀯𑀺𑀭𑀢𑀺𑀯𑀚𑁆𑀚𑀺𑀢𑀸’’𑀢𑀺.

𑀦𑀦𑀼 𑀘 𑀧𑀜𑁆𑀜𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀳𑁄𑀢𑀻𑀢𑀺 𑀢𑀲𑁆𑀲 𑀯𑀺𑀧𑀸𑀓𑁂𑀦𑀧𑀺 𑀓𑀼𑀲𑀮𑀲𑀤𑀺𑀲𑀸𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁 𑀬𑀣𑀸 𑀢𑀁 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁂𑀳𑀻𑀢𑀺? 𑀦𑀬𑀺𑀤𑀫𑁂𑀯𑀁, 𑀓𑀸𑀫𑀢𑀡𑁆𑀳𑀸𑀥𑀻𑀦𑀲𑁆𑀲 𑀨𑀮𑀪𑀽𑀢𑀢𑁆𑀢𑀸. 𑀬𑀣𑀸 𑀳𑀺 𑀤𑀸𑀲𑀺𑀬𑀸 𑀧𑀼𑀢𑁆𑀢𑁄 𑀫𑀸𑀢𑀭𑀸 𑀇𑀘𑁆𑀙𑀺𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀸𑀫𑀺𑀓𑁂𑀦𑁂𑀯 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀓𑀭𑁄𑀢𑀺, 𑀏𑀯𑀁 𑀓𑀸𑀫𑀢𑀡𑁆𑀳𑀸𑀬𑀢𑁆𑀢𑀢𑀸𑀬 𑀤𑀸𑀲𑀺𑀲𑀤𑀺𑀲𑀲𑁆𑀲 𑀓𑀸𑀫𑀸𑀯𑀘𑀭𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀪𑀽𑀢𑀁 𑀘𑀺𑀢𑁆𑀢𑀁 𑀢𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀓𑀸𑀫𑀢𑀡𑁆𑀳𑀸𑀭𑀫𑁆𑀫𑀡𑀫𑁂𑀯 𑀕𑀡𑁆𑀳𑀸𑀢𑀻𑀢𑀺. 𑀤𑁆𑀯𑀸𑀤𑀲𑀥𑀸𑀢𑀺 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑁂𑀲𑀼 𑀧𑀘𑁆𑀘𑁂𑀓𑀁 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀤𑀼𑀓𑀸𑀢𑀺 𑀓𑀢𑁆𑀯𑀸 𑀢𑀻𑀲𑀼 𑀤𑁆𑀯𑀸𑀤𑀲𑀥𑀸.

𑁪𑁨. 𑀇𑀤𑀸𑀦𑀺 𑀇𑀫𑁂𑀲𑀼 𑀧𑀞𑀫𑀚𑁆𑀛𑀸𑀦𑀺𑀓𑀸𑀤𑀻𑀳𑀺 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀻𑀦𑀁 𑀪𑁂𑀤𑀓𑀭𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀢𑁆𑀢𑀭𑁂 𑀛𑀸𑀦𑀥𑀫𑁆𑀫𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀅𑀦𑀼𑀢𑁆𑀢𑀭𑁂 𑀘𑀺𑀢𑁆𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀯𑀲𑁂𑀦 𑀛𑀸𑀦𑀥𑀫𑁆𑀫𑀸 𑀯𑀺𑀲𑁂𑀲𑀓𑀸 𑀪𑁂𑀤𑀓𑀸. 𑀫𑀚𑁆𑀛𑀺𑀫𑁂 𑀫𑀳𑀕𑁆𑀕𑀢𑁂 𑀅𑀧𑁆𑀧𑀫𑀜𑁆𑀜𑀸, 𑀛𑀸𑀦𑀥𑀫𑁆𑀫𑀸 𑀘. 𑀧𑀭𑀺𑀢𑁆𑀢𑁂𑀲𑀼 𑀓𑀸𑀫𑀸𑀯𑀘𑀭𑁂𑀲𑀼 𑀯𑀺𑀭𑀢𑀻, 𑀜𑀸𑀡𑀧𑀻𑀢𑀻 𑀘 𑀅𑀧𑁆𑀧𑀫𑀜𑁆𑀜𑀸 𑀘 𑀯𑀺𑀲𑁂𑀲𑀓𑀸, 𑀢𑀢𑁆𑀣 𑀯𑀺𑀭𑀢𑀻 𑀓𑀼𑀲𑀮𑁂𑀳𑀺 𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀯𑀺𑀲𑁂𑀲𑀓𑀸, 𑀅𑀧𑁆𑀧𑀫𑀜𑁆𑀜𑀸 𑀓𑀼𑀲𑀮𑀓𑀺𑀭𑀺𑀬𑁂𑀳𑀺 𑀯𑀺𑀧𑀸𑀓𑀸𑀦𑀁, 𑀜𑀸𑀡𑀧𑀻𑀢𑀻 𑀧𑀦 𑀢𑀻𑀲𑀼 𑀧𑀞𑀫𑀬𑀼𑀕𑀴𑀸𑀤𑀻𑀳𑀺 𑀤𑀼𑀢𑀺𑀬𑀬𑀼𑀕𑀴𑀸𑀤𑀻𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀸𑀫𑀸𑀯𑀘𑀭𑀲𑁄𑀪𑀦𑀘𑀺𑀢𑁆𑀢𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀘𑀺𑀢𑁆𑀢𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸

𑁪𑁪. 𑀤𑀼𑀢𑀺𑀬𑁂 𑀅𑀲𑀗𑁆𑀔𑀸𑀭𑀺𑀓𑁂𑀢𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀲𑀗𑁆𑀔𑀸𑀭𑀺𑀓𑁂 𑀮𑁄𑀪𑀫𑀸𑀦𑁂𑀦 𑀢𑀣𑁂𑀯 𑀅𑀜𑁆𑀜𑀲𑀫𑀸𑀦𑀸, 𑀅𑀓𑀼𑀲𑀮𑀲𑀸𑀥𑀸𑀭𑀡𑀸 𑀘 𑀏𑀓𑀽𑀦𑀯𑀻𑀲𑀢𑀺 𑀥𑀫𑁆𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁫. 𑀢𑀢𑀺𑀬𑁂𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂 𑀅𑀲𑀗𑁆𑀔𑀸𑀭𑀺𑀓𑁂.

𑁪𑁬. 𑀘𑀢𑀼𑀢𑁆𑀣𑁂𑀢𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀲𑀗𑁆𑀔𑀸𑀭𑀺𑀓𑁂.

𑁪𑁭. 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀧𑀦𑁂𑀢𑁆𑀣 𑀧𑀘𑁆𑀘𑁂𑀓𑀫𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀺 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁦. 𑀅𑀥𑀺𑀫𑁄𑀓𑁆𑀔𑀲𑁆𑀲 𑀦𑀺𑀘𑁆𑀙𑀬𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀢𑁄 𑀤𑁆𑀯𑁂𑀴𑁆𑀳𑀓𑀲𑀪𑀸𑀯𑁂 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑁂 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 ‘‘𑀅𑀥𑀺𑀫𑁄𑀓𑁆𑀔𑀯𑀺𑀭𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑁫𑁧. 𑀏𑀓𑀽𑀦𑀯𑀻𑀲𑀢𑀺 𑀧𑀞𑀫𑀤𑀼𑀢𑀺𑀬𑀅𑀲𑀗𑁆𑀔𑀸𑀭𑀺𑀓𑁂𑀲𑀼, 𑀅𑀝𑁆𑀞𑀸𑀭𑀲 𑀢𑀢𑀺𑀬𑀘𑀢𑀼𑀢𑁆𑀣𑀅𑀲𑀗𑁆𑀔𑀸𑀭𑀺𑀓𑁂𑀲𑀼, 𑀯𑀻𑀲 𑀧𑀜𑁆𑀘𑀫𑁂 𑀅𑀲𑀗𑁆𑀔𑀸𑀭𑀺𑀓𑁂, 𑀏𑀓𑀯𑀻𑀲 𑀧𑀞𑀫𑀤𑀼𑀢𑀺𑀬𑀲𑀲𑀗𑁆𑀔𑀸𑀭𑀺𑀓𑁂𑀲𑀼, 𑀯𑀻𑀲𑀢𑀺 𑀢𑀢𑀺𑀬𑀘𑀢𑀼𑀢𑁆𑀣𑀲𑀲𑀗𑁆𑀔𑀸𑀭𑀺𑀓𑁂𑀲𑀼, 𑀤𑁆𑀯𑀸𑀯𑀻𑀲 𑀧𑀜𑁆𑀘𑀫𑁂 𑀲𑀲𑀗𑁆𑀔𑀸𑀭𑀺𑀓𑁂, 𑀧𑀦𑁆𑀦𑀭𑀲 𑀫𑁄𑀫𑀽𑀳𑀤𑁆𑀯𑀬𑁂𑀢𑀺 𑀏𑀯𑀁 𑀅𑀓𑀼𑀲𑀮𑁂 𑀲𑀢𑁆𑀢𑀥𑀸 𑀞𑀺𑀢𑀸𑀢𑀺 𑀬𑁄𑀚𑀦𑀸.

𑁫𑁨. 𑀲𑀸𑀥𑀸𑀭𑀡𑀸𑀢𑀺 𑀅𑀓𑀼𑀲𑀮𑀸𑀦𑀁 𑀲𑀩𑁆𑀩𑁂𑀲𑀫𑁂𑀯 𑀲𑀸𑀥𑀸𑀭𑀡𑀪𑀽𑀢𑀸 𑀘𑀢𑁆𑀢𑀸𑀭𑁄 𑀲𑀫𑀸𑀦𑀸 𑀘 𑀙𑀦𑁆𑀤𑀧𑀻𑀢𑀺𑀅𑀥𑀺𑀫𑁄𑀓𑁆𑀔𑀯𑀚𑁆𑀚𑀺𑀢𑀸 𑀅𑀜𑁆𑀜𑀲𑀫𑀸𑀦𑀸 𑀅𑀧𑀭𑁂 𑀤𑀲𑀸𑀢𑀺 𑀏𑀢𑁂 𑀘𑀼𑀤𑁆𑀤𑀲 𑀥𑀫𑁆𑀫𑀸 𑀲𑀩𑁆𑀩𑀸𑀓𑀼𑀲𑀮𑀬𑁄𑀕𑀺𑀦𑁄𑀢𑀺 𑀧𑀯𑀼𑀘𑁆𑀘𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀅𑀓𑀼𑀲𑀮𑀘𑀺𑀢𑁆𑀢𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀳𑁂𑀢𑀼𑀓𑀘𑀺𑀢𑁆𑀢𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸

𑁫𑁪. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀲𑀫𑀸𑀦𑁂 𑀧𑀘𑁆𑀘𑀸𑀫𑀲𑀢𑀺.

𑁫𑁬. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀯𑀺𑀬 𑀯𑀺𑀲𑀺𑀝𑁆𑀞𑀫𑀦𑀦𑀓𑀺𑀘𑁆𑀘𑀸𑀬𑁄𑀕𑀢𑁄 𑀫𑀦𑀦𑀫𑀢𑁆𑀢𑀸 𑀥𑀸𑀢𑀽𑀢𑀺 𑀫𑀦𑁄𑀥𑀸𑀢𑀼. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀼𑀕𑀴𑁂𑀢𑀺 𑀉𑀧𑁂𑀓𑁆𑀔𑀸𑀲𑀦𑁆𑀢𑀻𑀭𑀡𑀤𑁆𑀯𑀬𑁂.

𑁫𑁮. 𑀤𑁆𑀯𑀸𑀤𑀲 𑀳𑀲𑀦𑀘𑀺𑀢𑁆𑀢𑁂, 𑀏𑀓𑀸𑀤𑀲 𑀯𑁄𑀝𑁆𑀞𑀩𑁆𑀩𑀦𑀲𑀼𑀔𑀲𑀦𑁆𑀢𑀻𑀭𑀡𑁂𑀲𑀼, 𑀤𑀲 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀸𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀼𑀕𑀴𑀯𑀲𑁂𑀦 𑀧𑀜𑁆𑀘𑀲𑀼, 𑀲𑀢𑁆𑀢 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀽𑀢𑀺 𑀅𑀝𑁆𑀞𑀸𑀭𑀲𑀸𑀳𑁂𑀢𑀼𑀓𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀗𑁆𑀕𑀳𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁫𑁯. 𑀢𑁂𑀢𑁆𑀢𑀺𑀁𑀲𑀯𑀺𑀥𑀲𑀗𑁆𑀕𑀳𑁄𑀢𑀺 𑀅𑀦𑀼𑀢𑁆𑀢𑀭𑁂 𑀧𑀜𑁆𑀘, 𑀢𑀣𑀸 𑀫𑀳𑀕𑁆𑀕𑀢𑁂, 𑀓𑀸𑀫𑀸𑀯𑀘𑀭𑀲𑁄𑀪𑀦𑁂 𑀤𑁆𑀯𑀸𑀤𑀲, 𑀅𑀓𑀼𑀲𑀮𑁂 𑀲𑀢𑁆𑀢, 𑀅𑀳𑁂𑀢𑀼𑀓𑁂 𑀘𑀢𑁆𑀢𑀸𑀭𑁄𑀢𑀺 𑀢𑁂𑀢𑁆𑀢𑀺𑀁𑀲𑀯𑀺𑀥𑀲𑀗𑁆𑀕𑀳𑁄.

𑁬𑁦. 𑀇𑀢𑁆𑀣𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀘𑀺𑀢𑁆𑀢𑀸𑀯𑀺𑀬𑀼𑀢𑁆𑀢𑀸𑀦𑀁 𑀘𑁂𑀢𑀲𑀺𑀓𑀸𑀦𑀁 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁 𑀲𑀫𑁆𑀧𑀬𑁄𑀕𑀜𑁆𑀘 𑀘𑁂𑀢𑀲𑀺𑀓𑀭𑀸𑀲𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁 𑀲𑀗𑁆𑀕𑀳𑀜𑁆𑀘 𑀜𑀢𑁆𑀯𑀸 𑀬𑀣𑀸𑀬𑁄𑀕𑀁 𑀘𑀺𑀢𑁆𑀢𑁂𑀦 𑀲𑀫𑀁 𑀪𑁂𑀤𑀁 𑀉𑀤𑁆𑀤𑀺𑀲𑁂 ‘‘𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀸 𑀢𑀸𑀯 𑀲𑀢𑁆𑀢 𑀏𑀓𑀽𑀦𑀦𑀯𑀼𑀢𑀺𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀧𑀘𑁆𑀘𑁂𑀓𑀁 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑀸, 𑀧𑀓𑀺𑀡𑁆𑀡𑀓𑁂𑀲𑀼 𑀯𑀺𑀢𑀓𑁆𑀓𑁄 𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀧𑀜𑁆𑀘𑀧𑀜𑁆𑀜𑀸𑀲𑀯𑀺𑀥𑁄’’𑀢𑁆𑀬𑀸𑀤𑀺𑀦𑀸 𑀓𑀣𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀳𑁂𑀢𑀼𑀓𑀘𑀺𑀢𑁆𑀢𑀲𑀗𑁆𑀕𑀳𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀘𑁂𑀢𑀲𑀺𑀓𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.