𑁧. 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑀪𑀽𑀫𑀺𑀪𑁂𑀤𑀘𑀺𑀢𑁆𑀢𑀯𑀡𑁆𑀡𑀦𑀸

𑁩. 𑀇𑀤𑀸𑀦𑀺 𑀬𑀲𑁆𑀫𑀸 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑁂𑀦 𑀯𑀺𑀦𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸𑀉𑀤𑁆𑀤𑀺𑀝𑁆𑀞𑀸𑀦𑀁 𑀅𑀪𑀺𑀥𑀫𑁆𑀫𑀢𑁆𑀣𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 𑀘𑀺𑀢𑁆𑀢𑀁 𑀢𑀸𑀯 𑀪𑀽𑀫𑀺𑀚𑀸𑀢𑀺𑀲𑀫𑁆𑀧𑀬𑁄𑀕𑀸𑀤𑀺𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀢𑀼𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀢𑀢𑁆𑀣 𑀘𑀺𑀢𑁆𑀢𑀁 𑀢𑀸𑀯𑀸’’𑀢𑁆𑀬𑀸𑀤𑀺. 𑀢𑀸𑀯-𑀲𑀤𑁆𑀤𑁄 𑀧𑀞𑀫𑀦𑁆𑀢𑀺 𑀏𑀢𑀲𑁆𑀲𑀢𑁆𑀣𑁂. 𑀬𑀣𑀸𑀉𑀤𑁆𑀤𑀺𑀝𑁆𑀞𑁂𑀲𑀼 𑀘𑀢𑀽𑀲𑀼 𑀅𑀪𑀺𑀥𑀫𑁆𑀫𑀢𑁆𑀣𑁂𑀲𑀼 𑀧𑀞𑀫𑀁 𑀘𑀺𑀢𑁆𑀢𑀁 𑀦𑀺𑀤𑁆𑀤𑀺𑀲𑀻𑀬𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄. 𑀘𑀢𑁆𑀢𑀸𑀭𑁄 𑀯𑀺𑀥𑀸 𑀧𑀓𑀸𑀭𑀸 𑀅𑀲𑁆𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀬𑀲𑁆𑀫𑀸 𑀧𑀦𑁂𑀢𑁂 𑀘𑀢𑀼𑀪𑀼𑀫𑁆𑀫𑀓𑀸 𑀥𑀫𑁆𑀫𑀸 𑀅𑀦𑀼𑀧𑀼𑀩𑁆𑀩𑀧𑀡𑀻𑀢𑀸, 𑀢𑀲𑁆𑀫𑀸 𑀳𑀻𑀦𑀼𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀢𑀭𑀢𑀫𑀸𑀦𑀼𑀓𑁆𑀓𑀫𑁂𑀦 𑀢𑁂𑀲𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀢𑁆𑀣 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄, 𑀓𑀸𑀫𑀢𑀡𑁆𑀳𑀸, 𑀲𑀸 𑀏𑀢𑁆𑀣 𑀅𑀯𑀘𑀭𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀢𑀺 𑀓𑀸𑀫𑀸𑀯𑀘𑀭𑀁. 𑀓𑀸𑀫𑀻𑀬𑀢𑀻𑀢𑀺 𑀯𑀸 𑀓𑀸𑀫𑁄, 𑀏𑀓𑀸𑀤𑀲𑀯𑀺𑀥𑁄 𑀓𑀸𑀫𑀪𑀯𑁄, 𑀢𑀲𑁆𑀫𑀺𑀁 𑀬𑁂𑀪𑀼𑀬𑁆𑀬𑁂𑀦 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑀁. 𑀬𑁂𑀪𑀼𑀬𑁆𑀬𑁂𑀦 𑀘𑀭𑀡𑀲𑁆𑀲 𑀳𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀧𑀯𑀢𑁆𑀢𑀲𑁆𑀲𑀸𑀧𑀺 𑀇𑀫𑀲𑁆𑀲 𑀓𑀸𑀫𑀸𑀯𑀘𑀭𑀪𑀸𑀯𑁄 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀓𑀸𑀫𑀪𑀯𑁄𑀬𑁂𑀯 𑀯𑀸 𑀓𑀸𑀫𑁄 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑁄, 𑀢𑀢𑁆𑀣 𑀧𑀯𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀦𑀺𑀲𑁆𑀲𑀺𑀢𑁂 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀓𑀸𑀫𑀸𑀯𑀘𑀭𑀁 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑁆𑀬𑀸𑀤𑀻𑀲𑀼 𑀯𑀺𑀬𑀸𑀢𑀺 𑀅𑀮𑀫𑀢𑀺𑀯𑀺𑀲𑀸𑀭𑀡𑀺𑀬𑀸 𑀓𑀣𑀸𑀬. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀓𑀸𑀫𑁄𑀯𑀘𑀭𑀢𑀻𑀢𑁆𑀬𑁂𑀢𑁆𑀣, 𑀓𑀸𑀫𑁂𑀯𑀘𑀭𑀢𑀻𑀢𑀺 𑀯𑀸;

𑀞𑀸𑀦𑀽𑀧𑀘𑀸𑀭𑀢𑁄 𑀯𑀸𑀧𑀺, 𑀢𑀁 𑀓𑀸𑀫𑀸𑀯𑀘𑀭𑀁 𑀪𑀯𑁂’’𑀢𑀺.

𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄 𑀬𑀣𑀸𑀭𑀳𑀁 𑀤𑀝𑁆𑀞𑀩𑁆𑀩𑁄. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀮𑁄𑀓𑀢𑁄 𑀉𑀢𑁆𑀢𑀭𑀢𑀺 𑀅𑀦𑀸𑀲𑀯𑀪𑀸𑀯𑁂𑀦𑀸𑀢𑀺 𑀮𑁄𑀓𑀼𑀢𑁆𑀢𑀭𑀁, 𑀫𑀕𑁆𑀕𑀘𑀺𑀢𑁆𑀢𑀁. 𑀨𑀮𑀘𑀺𑀢𑁆𑀢𑀁 𑀧𑀦 𑀢𑀢𑁄 𑀉𑀢𑁆𑀢𑀺𑀡𑁆𑀡𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁. 𑀉𑀪𑀬𑀫𑁆𑀧𑀺 𑀯𑀸 𑀲𑀳 𑀦𑀺𑀩𑁆𑀩𑀸𑀦𑁂𑀦 𑀮𑁄𑀓𑀢𑁄 𑀉𑀢𑁆𑀢𑀭𑀁 𑀅𑀥𑀺𑀓𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑀯𑀲𑁂𑀦𑁂𑀯𑀸𑀢𑀺 𑀮𑁄𑀓𑀼𑀢𑁆𑀢𑀭𑀁.

𑀪𑀽𑀫𑀺𑀪𑁂𑀤𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀘𑀺𑀢𑁆𑀢𑀯𑀡𑁆𑀡𑀦𑀸

𑁪. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀘𑀺𑀢𑁆𑀢𑁂𑀲𑀼 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑁂𑀧𑀺 𑀧𑀸𑀧𑀸𑀳𑁂𑀢𑀼𑀓𑀯𑀚𑁆𑀚𑀸𑀦𑀁 𑀏𑀓𑀽𑀦𑀲𑀝𑁆𑀞𑀺𑀬𑀸, 𑀏𑀓𑀦𑀯𑀼𑀢𑀺𑀬𑀸 𑀯𑀸 𑀘𑀺𑀢𑁆𑀢𑀸𑀦𑀁 𑀲𑁄𑀪𑀦𑀦𑀸𑀫𑁂𑀦 𑀯𑁄𑀳𑀸𑀭𑀓𑀭𑀡𑀢𑁆𑀣𑀁 ‘‘𑀧𑀸𑀧𑀸𑀳𑁂𑀢𑀼𑀓𑀫𑀼𑀢𑁆𑀢𑀸𑀦𑀺 ‘𑀲𑁄𑀪𑀦𑀸𑀦𑀻’𑀢𑀺 𑀯𑀼𑀘𑁆𑀘𑀭𑁂’’𑀢𑀺 𑀏𑀯𑀁 𑀯𑀓𑁆𑀔𑀫𑀸𑀦𑀦𑀬𑀲𑁆𑀲 𑀅𑀦𑀼𑀭𑀽𑀧𑀢𑁄 𑀧𑀸𑀧𑀸𑀳𑁂𑀢𑀼𑀓𑁂𑀬𑁂𑀯 𑀧𑀞𑀫𑀁 𑀤𑀲𑁆𑀲𑁂𑀦𑁆𑀢𑁄, 𑀢𑁂𑀲𑀼 𑀘 𑀪𑀯𑁂𑀲𑀼 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀆𑀤𑀺𑀢𑁄 𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀫𑁂𑀯 𑀲𑀫𑁆𑀪𑀯𑀢𑁄 𑀢𑁂𑀬𑁂𑀯 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀤𑁆𑀯𑀺𑀳𑁂𑀢𑀼𑀓𑀪𑀸𑀯𑀲𑀸𑀫𑀜𑁆𑀜𑁂𑀦 𑀤𑁄𑀫𑀦𑀲𑁆𑀲𑀲𑀳𑀕𑀢𑁂, 𑀢𑀤𑀦𑀦𑁆𑀢𑀭𑀁 𑀏𑀓𑀳𑁂𑀢𑀼𑀓𑁂 𑀘 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑁆𑀬𑀸𑀤𑀺𑀦𑀸 𑀮𑁄𑀪𑀫𑀽𑀮𑀁 𑀢𑀸𑀯 𑀯𑁂𑀤𑀦𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀭𑀪𑁂𑀤𑁂𑀦 𑀅𑀝𑁆𑀞𑀥𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀲𑀼𑀦𑁆𑀤𑀭𑀁 𑀫𑀦𑁄, 𑀢𑀁 𑀯𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀫𑀦𑁄, 𑀘𑀺𑀢𑁆𑀢𑀁, 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 𑀯𑀸, 𑀢𑀲𑁆𑀲 𑀪𑀸𑀯𑁄 𑀢𑀲𑁆𑀫𑀺𑀁 𑀅𑀪𑀺𑀥𑀸𑀦𑀩𑀼𑀤𑁆𑀥𑀻𑀦𑀁 𑀧𑀯𑀢𑁆𑀢𑀺𑀳𑁂𑀢𑀼𑀢𑀸𑀬𑀸𑀢𑀺 𑀲𑁄𑀫𑀦𑀲𑁆𑀲𑀁, 𑀫𑀸𑀦𑀲𑀺𑀓𑀲𑀼𑀔𑀯𑁂𑀤𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀦 𑀲𑀳𑀕𑀢𑀁 𑀏𑀓𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀲𑀁𑀲𑀝𑁆𑀞𑀁, 𑀢𑁂𑀦 𑀲𑀳 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀁 𑀕𑀢𑀦𑁆𑀢𑀺 𑀯𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀁. 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀤𑀺𑀝𑁆𑀞𑀺. 𑀲𑀸𑀫𑀜𑁆𑀜𑀯𑀘𑀦𑀲𑁆𑀲𑀧𑀺 𑀳𑀺 𑀅𑀢𑁆𑀣𑀧𑁆𑀧𑀓𑀭𑀡𑀸𑀤𑀺𑀦𑀸 𑀯𑀺𑀲𑁂𑀲𑀯𑀺𑀲𑀬𑀢𑀸 𑀳𑁄𑀢𑀻𑀢𑀺 𑀇𑀥 𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑁂𑀯 ‘‘𑀤𑀺𑀝𑁆𑀞𑀻’’𑀢𑀺 𑀯𑀼𑀘𑁆𑀘𑀢𑀺. 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀁 ‘‘𑀲𑀗𑁆𑀔𑀸𑀭𑀕𑀢𑀁 𑀣𑀸𑀫𑀕𑀢’’𑀦𑁆𑀢𑁆𑀬𑀸𑀤𑀻𑀲𑀼 𑀯𑀺𑀬 𑀕𑀢-𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁆𑀢𑀸. 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀸 𑀤𑀺𑀝𑁆𑀞𑀻𑀲𑀼 𑀕𑀢𑀁 𑀅𑀦𑁆𑀢𑁄𑀕𑀢𑀁, 𑀤𑀺𑀝𑁆𑀞𑀺𑀬𑀸 𑀯𑀸 𑀕𑀫𑀦𑀫𑀢𑁆𑀢𑀁 𑀦 𑀏𑀢𑁆𑀣 𑀕𑀦𑁆𑀢𑀩𑁆𑀩𑁄 𑀅𑀢𑁆𑀢𑀸𑀤𑀺𑀓𑁄 𑀓𑁄𑀘𑀺 𑀅𑀢𑁆𑀣𑀻𑀢𑀺 𑀤𑀺𑀝𑁆𑀞𑀺𑀕𑀢𑀁, ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀧𑀯𑀢𑁆𑀢𑁄 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀅𑀪𑀺𑀦𑀺𑀯𑁂𑀲𑁄, 𑀢𑁂𑀦 𑀲𑀫𑀁 𑀏𑀓𑀼𑀧𑁆𑀧𑀸𑀤𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁. 𑀲𑀗𑁆𑀔𑀭𑁄𑀢𑀺 𑀘𑀺𑀢𑁆𑀢𑀁 𑀢𑀺𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑀫𑀡𑁆𑀟𑀦𑀯𑀺𑀲𑁂𑀲𑁂𑀦 𑀲𑀚𑁆𑀚𑁂𑀢𑀺, 𑀲𑀗𑁆𑀔𑀭𑀻𑀬𑀢𑀺 𑀯𑀸 𑀢𑀁 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀚𑁆𑀚𑀻𑀬𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀢𑀢𑁆𑀣 𑀢𑀢𑁆𑀣 𑀓𑀺𑀘𑁆𑀘𑁂 𑀲𑀁𑀲𑀻𑀤𑀫𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀦𑀯𑀲𑁂𑀦 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀧𑀯𑀢𑁆𑀢𑀧𑀼𑀩𑁆𑀩𑀧𑁆𑀧𑀬𑁄𑀕𑁄, 𑀲𑁄 𑀧𑀦 𑀅𑀢𑁆𑀢𑀦𑁄 𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀘𑁂𑀯 𑀧𑀭𑀲𑀦𑁆𑀢𑀸𑀦𑁂 𑀘 𑀧𑀯𑀢𑁆𑀢𑀢𑀻𑀢𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑁄 𑀘𑀺𑀢𑁆𑀢𑀲𑁆𑀲 𑀢𑀺𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑁄 𑀯𑀺𑀲𑁂𑀲𑁄𑀯𑀺𑀥 𑀲𑀗𑁆𑀔𑀸𑀭𑁄, 𑀲𑁄 𑀬𑀲𑁆𑀲 𑀦𑀢𑁆𑀣𑀺 𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀤𑁂𑀯 𑀅𑀲𑀗𑁆𑀔𑀸𑀭𑀺𑀓𑀁. 𑀲𑀗𑁆𑀔𑀸𑀭𑁂𑀦 𑀲𑀳𑀺𑀢𑀁 𑀲𑀲𑀗𑁆𑀔𑀸𑀭𑀺𑀓𑀁. 𑀢𑀣𑀸 𑀘 𑀯𑀤𑀦𑁆𑀢𑀺 𑁋

‘‘𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑀫𑁆𑀪𑀽𑀢𑁄, 𑀯𑀺𑀲𑁂𑀲𑁄 𑀘𑀺𑀢𑁆𑀢𑀲𑀫𑁆𑀪𑀯𑀻;

𑀲𑀗𑁆𑀔𑀸𑀭𑁄 𑀢𑀁𑀯𑀲𑁂𑀦𑁂𑀢𑁆𑀣, 𑀳𑁄𑀢𑁆𑀬𑀸𑀲𑀗𑁆𑀔𑀸𑀭𑀺𑀓𑀸𑀤𑀺𑀢𑀸’’𑀢𑀺.

𑀅𑀣 𑀯𑀸 ‘‘𑀲𑀲𑀗𑁆𑀔𑀸𑀭𑀺𑀓𑀁 𑀅𑀲𑀗𑁆𑀔𑀸𑀭𑀺𑀓’’𑀦𑁆𑀢𑀺 𑀘𑁂𑀢𑀁 𑀓𑁂𑀯𑀮𑀁 𑀲𑀗𑁆𑀔𑀸𑀭𑀲𑁆𑀲 𑀪𑀸𑀯𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀲𑀳𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸𑀪𑀸𑀯𑀢𑁄𑀢𑀺 𑀪𑀺𑀦𑁆𑀦𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀺𑀦𑁄𑀧𑀺 𑀲𑀗𑁆𑀔𑀸𑀭𑀲𑁆𑀲 𑀇𑀤𑀫𑀢𑁆𑀣𑀺𑀢𑀸𑀬 𑀢𑀁𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀁 𑀘𑀺𑀢𑁆𑀢𑀁 𑀲𑀗𑁆𑀔𑀸𑀭𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀲𑀗𑁆𑀔𑀸𑀭𑀺𑀓𑀁 ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀲𑀳-𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀣𑀧𑀭𑀺𑀤𑀻𑀧𑀦𑀢𑁄. 𑀢𑀩𑁆𑀩𑀺𑀧𑀭𑀻𑀢𑀁 𑀧𑀦 𑀢𑀤𑀪𑀸𑀯𑀢𑁄 𑀯𑀼𑀢𑁆𑀢𑀦𑀬𑁂𑀦 𑀅𑀲𑀗𑁆𑀔𑀸𑀭𑀺𑀓𑀁. 𑀤𑀺𑀝𑁆𑀞𑀺𑀕𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀁 𑀯𑀺𑀲𑀁𑀲𑀝𑁆𑀞𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁. 𑀉𑀧𑀧𑀢𑁆𑀢𑀺𑀢𑁄 𑀬𑀼𑀢𑁆𑀢𑀺𑀢𑁄 𑀇𑀓𑁆𑀔𑀢𑀺 𑀅𑀦𑀼𑀪𑀯𑀢𑀺 𑀯𑁂𑀤𑀬𑀫𑀸𑀦𑀸𑀧𑀺 𑀫𑀚𑁆𑀛𑀢𑁆𑀢𑀸𑀓𑀸𑀭𑀲𑀡𑁆𑀞𑀺𑀢𑀺𑀬𑀸𑀢𑀺 𑀉𑀧𑁂𑀓𑁆𑀔𑀸. 𑀲𑀼𑀔𑀤𑀼𑀓𑁆𑀔𑀸𑀦𑀁 𑀯𑀸 𑀉𑀧𑁂𑀢𑀸 𑀬𑀼𑀢𑁆𑀢𑀸 𑀅𑀯𑀺𑀭𑀼𑀤𑁆𑀥𑀸 𑀇𑀓𑁆𑀔𑀸 𑀅𑀦𑀼𑀪𑀯𑀦𑀦𑁆𑀢𑀺 𑀉𑀧𑁂𑀓𑁆𑀔𑀸. 𑀲𑀼𑀔𑀤𑀼𑀓𑁆𑀔𑀸𑀯𑀺𑀭𑁄𑀥𑀺𑀢𑀸𑀬 𑀳𑁂𑀲𑀸 𑀢𑁂𑀲𑀁 𑀅𑀦𑀦𑁆𑀢𑀭𑀫𑁆𑀧𑀺 𑀧𑀯𑀢𑁆𑀢𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀜𑁆𑀜𑁂𑀲𑀼𑀧𑀺 𑀨𑀲𑁆𑀲𑀸𑀤𑀻𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀪𑀸𑀯𑁄𑀯 𑀯𑀼𑀢𑁆𑀢𑁄𑀢𑀺? 𑀲𑁄𑀫𑀦𑀲𑁆𑀲𑀸𑀤𑀻𑀦𑀫𑁂𑀯 𑀅𑀲𑀸𑀥𑀸𑀭𑀡𑀪𑀸𑀯𑀢𑁄. 𑀨𑀲𑁆𑀲𑀸𑀤𑀬𑁄 𑀳𑀺 𑀓𑁂𑀘𑀺 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀸, 𑀓𑁂𑀘𑀺 𑀓𑀼𑀲𑀮𑀸𑀤𑀺𑀲𑀸𑀥𑀸𑀭𑀡𑀸, 𑀫𑁄𑀳𑀸𑀤𑀬𑁄 𑀘 𑀲𑀩𑁆𑀩𑀸𑀓𑀼𑀲𑀮𑀲𑀸𑀥𑀸𑀭𑀡𑀸𑀢𑀺 𑀦 𑀢𑁂𑀳𑀺 𑀲𑀓𑁆𑀓𑀸 𑀘𑀺𑀢𑁆𑀢𑀁 𑀯𑀺𑀲𑁂𑀲𑁂𑀢𑀼𑀁, 𑀲𑁄𑀫𑀦𑀲𑁆𑀲𑀸𑀤𑀬𑁄 𑀧𑀦 𑀓𑀢𑁆𑀣𑀘𑀺 𑀘𑀺𑀢𑁆𑀢𑁂 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀦 𑀳𑁄𑀦𑁆𑀢𑀻𑀢𑀺 𑀧𑀸𑀓𑀝𑁄𑀯 𑀢𑀁𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀲𑁂𑀲𑁄. 𑀓𑀲𑁆𑀫𑀸 𑀧𑀦𑁂𑀢𑁂 𑀓𑀢𑁆𑀣𑀘𑀺 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀦 𑀳𑁄𑀦𑁆𑀢𑀻𑀢𑀺? 𑀓𑀸𑀭𑀡𑀲𑁆𑀲 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄. 𑀓𑀺𑀁 𑀧𑀦 𑀦𑁂𑀲𑀁 𑀓𑀸𑀭𑀡𑀦𑁆𑀢𑀺? 𑀯𑀼𑀘𑁆𑀘𑀢𑁂𑀲𑀪𑀸𑀯𑀢𑁄, 𑀧𑀭𑀺𑀓𑀧𑁆𑀧𑀢𑁄 𑀯𑀸 𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑀁, 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀢𑀸, 𑀅𑀕𑀫𑁆𑀪𑀻𑀭𑀲𑀪𑀸𑀯𑀢𑀸 𑀘 𑀇𑀥 𑀲𑁄𑀫𑀦𑀲𑁆𑀲𑀲𑁆𑀲 𑀓𑀸𑀭𑀡𑀁, 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀉𑀧𑁂𑀓𑁆𑀔𑀸𑀧𑀝𑀺𑀲𑀦𑁆𑀥𑀺𑀓𑀢𑀸, 𑀕𑀫𑁆𑀪𑀻𑀭𑀲𑀪𑀸𑀯𑀢𑀸 𑀘 𑀉𑀧𑁂𑀓𑁆𑀔𑀸𑀬, 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑀧𑀼𑀕𑁆𑀕𑀮𑀲𑁂𑀯𑀦𑀸, 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀲𑀬𑀢𑀸 𑀘 𑀤𑀺𑀝𑁆𑀞𑀺𑀬𑀸, 𑀩𑀮𑀯𑀉𑀢𑀼𑀪𑁄𑀚𑀦𑀸𑀤𑀬𑁄 𑀧𑀦 𑀧𑀘𑁆𑀘𑀬𑀸 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀲𑁆𑀲𑀸𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀓𑀸𑀭𑀡𑀯𑀲𑁂𑀦 𑀦𑁂𑀲𑀁 𑀉𑀧𑁆𑀧𑀚𑁆𑀚𑀦𑀢𑁄 𑀓𑀢𑁆𑀣𑀘𑀺 𑀘𑀺𑀢𑁆𑀢𑁂𑀬𑁂𑀯 𑀲𑀫𑁆𑀪𑀯𑁄𑀢𑀺 𑀲𑀓𑁆𑀓𑀸 𑀏𑀢𑁂𑀳𑀺 𑀘𑀺𑀢𑁆𑀢𑀲𑁆𑀲 𑀯𑀺𑀲𑁂𑀲𑁄 𑀧𑀜𑁆𑀜𑀸𑀧𑁂𑀢𑀼𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀦𑁂𑀲𑀁 𑀲𑀢𑀺𑀧𑀺 𑀫𑁄𑀳𑀳𑁂𑀢𑀼𑀓𑀪𑀸𑀯𑁂 𑀮𑁄𑀪𑀲𑀳𑀕𑀢𑀪𑀸𑀯𑁄𑀯 𑀦𑀺𑀕𑀫𑀦𑁂 𑀯𑀼𑀢𑁆𑀢𑁄.

𑀇𑀫𑁂𑀲𑀁 𑀧𑀦 𑀅𑀝𑁆𑀞𑀦𑁆𑀦𑀫𑁆𑀧𑀺 𑀅𑀬𑀫𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀸 𑀳𑀺 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄’’𑀢𑁆𑀬𑀸𑀤𑀺𑀦𑀸 𑀦𑀬𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀓𑀸𑀫𑁂 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀺 𑀯𑀸 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀧𑀞𑀫𑀁 𑀅𑀓𑀼𑀲𑀮𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀤𑀼𑀢𑀺𑀬𑀁. 𑀬𑀤𑀸 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀯𑀮𑀁 𑀳𑀝𑁆𑀞𑀢𑀼𑀝𑁆𑀞𑁄 𑀫𑁂𑀣𑀼𑀦𑀁 𑀯𑀸 𑀲𑁂𑀯𑀢𑀺, 𑀧𑀭𑀲𑀫𑁆𑀧𑀢𑁆𑀢𑀺𑀁 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀧𑀭𑀪𑀡𑁆𑀟𑀁 𑀯𑀸 𑀳𑀭𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀢𑀢𑀺𑀬𑀁. 𑀬𑀤𑀸 𑀧𑀦 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀘𑀢𑀼𑀢𑁆𑀣𑀁. 𑀬𑀤𑀸 𑀧𑀦 𑀓𑀸𑀫𑀸𑀦𑀁 𑀯𑀸 𑀅𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫, 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑁂𑀦 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀅𑀝𑁆𑀞𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀯𑀓𑁆𑀔𑀫𑀸𑀦𑀦𑀬𑁂𑀦 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀦𑁂𑀲𑀁 𑀮𑀩𑁆𑀪𑀫𑀸𑀦𑀓𑀫𑁆𑀫𑀧𑀣𑀸𑀦𑀼𑀭𑀽𑀧𑀢𑁄 𑀧𑀯𑀢𑁆𑀢𑀺𑀪𑁂𑀤𑀁 𑀓𑀸𑀮𑀤𑁂𑀲𑀲𑀦𑁆𑀢𑀸𑀦𑀸𑀭𑀫𑁆𑀫𑀡𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺.

𑁫. 𑀤𑀼𑀝𑁆𑀞𑀼 𑀫𑀦𑁄, 𑀢𑀁 𑀯𑀸 𑀏𑀢𑀲𑁆𑀲𑀸𑀢𑀺 𑀤𑀼𑀫𑁆𑀫𑀦𑁄, 𑀢𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁, 𑀫𑀸𑀦𑀲𑀺𑀓𑀤𑀼𑀓𑁆𑀔𑀯𑁂𑀤𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀦 𑀲𑀳𑀕𑀢𑀦𑁆𑀢𑀺 𑀤𑁄𑀫𑀦𑀲𑁆𑀲𑀲𑀳𑀕𑀢𑀁. 𑀆𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀖𑁄, 𑀤𑁄𑀲𑁄. 𑀘𑀡𑁆𑀟𑀺𑀓𑁆𑀓𑀲𑀪𑀸𑀯𑀢𑀸𑀬 𑀳𑁂𑀲 𑀆𑀭𑀫𑁆𑀫𑀡𑀁 𑀧𑀝𑀺𑀳𑀦𑀦𑁆𑀢𑁄 𑀯𑀺𑀬 𑀧𑀯𑀢𑁆𑀢𑀢𑀺. 𑀤𑁄𑀫𑀦𑀲𑁆𑀲𑀲𑀳𑀕𑀢𑀲𑁆𑀲 𑀯𑁂𑀤𑀦𑀸𑀯𑀲𑁂𑀦 𑀅𑀪𑁂𑀤𑁂𑀧𑀺 𑀅𑀲𑀸𑀥𑀸𑀭𑀡𑀥𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀉𑀧𑀮𑀓𑁆𑀔𑀡𑀢𑁆𑀣𑀁 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑀁, 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁄 𑀧𑀦 𑀉𑀪𑀺𑀦𑁆𑀦𑀁 𑀏𑀓𑀦𑁆𑀢𑀲𑀳𑀘𑀸𑀭𑀺𑀢𑀸 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀤𑁄𑀫𑀦𑀲𑁆𑀲𑀜𑁆𑀘𑁂𑀢𑁆𑀣 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄 𑀏𑀓𑁄 𑀥𑀫𑁆𑀫𑁄, 𑀧𑀝𑀺𑀖𑁄 𑀘𑀡𑁆𑀟𑀺𑀓𑁆𑀓𑀲𑀪𑀸𑀯𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄 𑀏𑀓𑁄 𑀥𑀫𑁆𑀫𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀏𑀢𑁆𑀣 𑀘 𑀬𑀁 𑀓𑀺𑀜𑁆𑀘𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁, 𑀦𑀯𑀯𑀺𑀥𑀆𑀖𑀸𑀢𑀯𑀢𑁆𑀣𑀽𑀦𑀺 𑀘 𑀤𑁄𑀫𑀦𑀲𑁆𑀲𑀲𑁆𑀲 𑀓𑀸𑀭𑀡𑀁, 𑀧𑀝𑀺𑀖𑀲𑁆𑀲 𑀓𑀸𑀭𑀡𑀜𑁆𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀧𑀦 𑀦𑁂𑀲𑀁 𑀘𑀺𑀢𑁆𑀢𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀢𑀺𑀓𑁆𑀔𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀦𑀺𑀕𑀫𑀦𑁂 𑀧𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀤𑀝𑁆𑀞𑀩𑁆𑀩𑁄.

𑁬. 𑀲𑀪𑀸𑀯𑀁 𑀯𑀺𑀘𑀺𑀦𑀦𑁆𑀢𑁄 𑀢𑀸𑀬 𑀓𑀺𑀘𑁆𑀙𑀢𑀺 𑀓𑀺𑀮𑀫𑀢𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀅𑀣 𑀯𑀸 𑀘𑀺𑀓𑀺𑀘𑁆𑀙𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸 𑀜𑀸𑀡𑀧𑁆𑀧𑀝𑀺𑀓𑀸𑀭𑁄 𑀇𑀫𑀺𑀲𑁆𑀲𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸, 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁. 𑀉𑀤𑁆𑀥𑀢𑀲𑁆𑀲 𑀪𑀸𑀯𑁄 𑀉𑀤𑁆𑀥𑀘𑁆𑀘𑀁. 𑀉𑀤𑁆𑀥𑀘𑁆𑀘𑀲𑁆𑀲 𑀲𑀩𑁆𑀩𑀸𑀓𑀼𑀲𑀮𑀲𑀸𑀥𑀸𑀭𑀡𑀪𑀸𑀯𑁂𑀧𑀺 𑀇𑀥 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀧𑀥𑀸𑀦𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀇𑀤𑀫𑁂𑀯 𑀢𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀥𑀫𑁆𑀫𑀼𑀤𑁆𑀤𑁂𑀲𑀧𑀸𑀴𑀺𑀬𑀁 𑀲𑁂𑀲𑀸𑀓𑀼𑀲𑀮𑁂𑀲𑀼 𑀉𑀤𑁆𑀥𑀘𑁆𑀘𑀁 𑀬𑁂𑀯𑀸𑀧𑀦𑀓𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀥 𑀧𑀦 ‘‘𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀭𑀽𑀧𑁂𑀦𑁂𑀯 𑀤𑁂𑀲𑀺𑀢𑀁. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀲𑀩𑁆𑀩𑀸𑀓𑀼𑀲𑀮𑀬𑀼𑀢𑁆𑀢𑀫𑁆𑀧𑀺, 𑀉𑀤𑁆𑀥𑀘𑁆𑀘𑀁 𑀅𑀦𑁆𑀢𑀫𑀸𑀦𑀲𑁂;

𑀩𑀮𑀯𑀁 𑀇𑀢𑀺 𑀢𑀁𑀬𑁂𑀯, 𑀯𑀼𑀢𑁆𑀢𑀫𑀼𑀤𑁆𑀥𑀘𑁆𑀘𑀬𑁄𑀕𑀢𑁄.

‘‘𑀢𑁂𑀦𑁂𑀯 𑀳𑀺 𑀫𑀼𑀦𑀺𑀦𑁆𑀤𑁂𑀦, 𑀬𑁂𑀯𑀸𑀧𑀦𑀓𑀦𑀸𑀫𑀢𑁄;

𑀯𑀢𑁆𑀯𑀸 𑀲𑁂𑀲𑁂𑀲𑀼 𑀏𑀢𑁆𑀣𑁂𑀯, 𑀢𑀁 𑀲𑀭𑀽𑀧𑁂𑀦 𑀤𑁂𑀲𑀺𑀢’’𑀦𑁆𑀢𑀺.

𑀇𑀫𑀸𑀦𑀺 𑀧𑀦 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺 𑀫𑀽𑀮𑀦𑁆𑀢𑀭𑀯𑀺𑀭𑀳𑀢𑁄 𑀅𑀢𑀺𑀲𑀫𑁆𑀫𑀽𑀴𑁆𑀳𑀢𑀸𑀬, 𑀲𑀁𑀲𑀧𑁆𑀧𑀦𑀯𑀺𑀓𑁆𑀔𑀺𑀧𑀦𑀯𑀲𑁂𑀦 𑀧𑀯𑀢𑁆𑀢𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑀸𑀬𑁄𑀕𑁂𑀦 𑀘𑀜𑁆𑀘𑀮𑀢𑀸𑀬 𑀘 𑀲𑀩𑁆𑀩𑀢𑁆𑀣𑀸𑀧𑀺 𑀭𑀚𑁆𑀚𑀦𑀤𑀼𑀲𑁆𑀲𑀦𑀭𑀳𑀺𑀢𑀸𑀦𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀢𑀢𑁄𑀬𑁂𑀯 𑀘 𑀲𑀪𑀸𑀯𑀢𑀺𑀓𑁆𑀔𑀢𑀸𑀬 𑀉𑀲𑁆𑀲𑀸𑀳𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄 𑀲𑀗𑁆𑀔𑀸𑀭𑀪𑁂𑀤𑁄𑀧𑀺 𑀦𑁂𑀲𑀁 𑀦𑀢𑁆𑀣𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀫𑀽𑀴𑁆𑀳𑀢𑁆𑀢𑀸 𑀘𑁂𑀯 𑀲𑀁𑀲𑀧𑁆𑀧-𑀯𑀺𑀓𑁆𑀔𑁂𑀧𑀸 𑀘𑁂𑀓𑀳𑁂𑀢𑀼𑀓𑀁;

𑀲𑁄𑀧𑁂𑀓𑁆𑀔𑀁 𑀲𑀩𑁆𑀩𑀤𑀸 𑀦𑁄 𑀘, 𑀪𑀺𑀦𑁆𑀦𑀁 𑀲𑀗𑁆𑀔𑀸𑀭𑀪𑁂𑀤𑀢𑁄.

‘‘𑀦 𑀳𑀺 𑀢𑀲𑁆𑀲 𑀲𑀪𑀸𑀯𑁂𑀦, 𑀢𑀺𑀓𑁆𑀔𑀢𑀼𑀲𑁆𑀲𑀸𑀳𑀦𑀻𑀬𑀢𑀸;

𑀅𑀢𑁆𑀣𑀺 𑀲𑀁𑀲𑀧𑁆𑀧𑀫𑀸𑀦𑀲𑁆𑀲, 𑀯𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀲𑀩𑁆𑀩𑀤𑀸’’𑀢𑀺.

𑀫𑁄𑀳𑁂𑀦 𑀫𑀼𑀬𑁆𑀳𑀦𑁆𑀢𑀺 𑀅𑀢𑀺𑀲𑀬𑁂𑀦 𑀫𑀼𑀬𑁆𑀳𑀦𑁆𑀢𑀺 𑀫𑀽𑀮𑀦𑁆𑀢𑀭𑀯𑀺𑀭𑀳𑀢𑁄𑀢𑀺 𑀫𑁄𑀫𑀽𑀳𑀸𑀦𑀺.

𑁭. 𑀇𑀘𑁆𑀘𑁂𑀯𑀦𑁆𑀢𑁆𑀬𑀸𑀤𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀦𑀺𑀕𑀫𑀦𑀁. 𑀢𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀯𑀘𑀦𑀯𑀘𑀦𑀻𑀬𑀲𑀫𑀼𑀤𑀸𑀬𑀦𑀺𑀤𑀲𑁆𑀲𑀦𑀢𑁆𑀣𑁄. 𑀏𑀯𑀁-𑀲𑀤𑁆𑀤𑁄 𑀯𑀘𑀦𑀯𑀘𑀦𑀻𑀬𑀧𑀝𑀺𑀧𑀸𑀝𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑁄. 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀯𑀸 𑀏𑀲 𑀯𑀘𑀦𑀯𑀘𑀦𑀻𑀬𑀦𑀺𑀕𑀫𑀦𑀸𑀭𑀫𑁆𑀪𑁂. 𑀇𑀘𑁆𑀘𑁂𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀣𑀸𑀧𑀺 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀲𑀫𑁆𑀧𑀬𑁄𑀕𑀸𑀤𑀺𑀦𑀸 𑀧𑀝𑀺𑀖𑀲𑀫𑁆𑀧𑀬𑁄𑀕𑀸𑀤𑀺𑀦𑀸 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀬𑁄𑀕𑁂𑀦𑀸𑀢𑀺 𑀲𑀩𑁆𑀩𑁂𑀦𑀸𑀧𑀺 𑀲𑀫𑁆𑀧𑀬𑁄𑀕𑀸𑀤𑀺𑀆𑀓𑀸𑀭𑁂𑀦 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀫𑀢𑁆𑀢𑀸𑀦𑀺 𑀧𑀭𑀺𑀦𑀺𑀝𑁆𑀞𑀺𑀢𑀸𑀦𑀺, 𑀲𑀗𑁆𑀕𑀳𑁂𑀢𑁆𑀯𑀸 𑀯𑀸 𑀅𑀢𑁆𑀢𑀸𑀦𑀺 𑀕𑀳𑀺𑀢𑀸𑀦𑀺, 𑀯𑀼𑀢𑁆𑀢𑀸𑀦𑀻𑀢𑁆𑀬𑀢𑁆𑀣𑁄. 𑀢𑀢𑁆𑀣 𑀓𑀼𑀲𑀮𑀧𑀝𑀺𑀧𑀓𑁆𑀔𑀸𑀦𑀺 𑀅𑀓𑀼𑀲𑀮𑀸𑀦𑀺 𑀫𑀺𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀫𑀺𑀢𑁆𑀢𑁄 𑀯𑀺𑀬, 𑀧𑀝𑀺𑀧𑀓𑁆𑀔𑀪𑀸𑀯𑁄 𑀘 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀬𑀣𑀸𑀓𑁆𑀓𑀫𑀁 𑀧𑀳𑀸𑀬𑀓𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁮. 𑀅𑀝𑁆𑀞𑀥𑀸𑀢𑁆𑀬𑀸𑀤𑀺 𑀲𑀗𑁆𑀕𑀳𑀕𑀸𑀣𑀸. 𑀮𑁄𑀪𑁄 𑀘 𑀲𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀫𑀽𑀮𑀲𑀤𑀺𑀲𑀢𑁆𑀢𑀸 𑀫𑀽𑀮𑀜𑁆𑀘, 𑀓𑀁 𑀏𑀢𑁂𑀲𑀦𑁆𑀢𑀺 𑀮𑁄𑀪𑀫𑀽𑀮𑀸𑀦𑀺 𑀘𑀺𑀢𑁆𑀢𑀸𑀦𑀺 𑀯𑁂𑀤𑀦𑀸𑀤𑀺𑀪𑁂𑀤𑀢𑁄 𑀅𑀝𑁆𑀞𑀥𑀸 𑀲𑀺𑀬𑀼𑀁. 𑀢𑀣𑀸 𑀤𑁄𑀲𑀫𑀽𑀮𑀸𑀦𑀺 𑀲𑀗𑁆𑀔𑀸𑀭𑀪𑁂𑀤𑀢𑁄 𑀤𑁆𑀯𑀺𑀥𑀸. 𑀫𑁄𑀳𑀫𑀽𑀮𑀸𑀦𑀺 𑀲𑀼𑀤𑁆𑀥𑁄 𑀫𑁄𑀳𑁄𑀬𑁂𑀯 𑀫𑀽𑀮𑀫𑁂𑀢𑁂𑀲𑀦𑁆𑀢𑀺 𑀫𑁄𑀳𑀫𑀽𑀮𑀲𑀗𑁆𑀔𑀸𑀢𑀸𑀦𑀺 𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀤𑁆𑀯𑁂 𑀘𑀸𑀢𑀺 𑀅𑀓𑀼𑀲𑀮𑀸 𑀤𑁆𑀯𑀸𑀤𑀲 𑀲𑀺𑀬𑀼𑀦𑁆𑀢𑁆𑀬𑀢𑁆𑀣𑁄.

𑀅𑀓𑀼𑀲𑀮𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀳𑁂𑀢𑀼𑀓𑀘𑀺𑀢𑁆𑀢𑀯𑀡𑁆𑀡𑀦𑀸

𑁯. 𑀏𑀯𑀁 𑀫𑀽𑀮𑀪𑁂𑀤𑀢𑁄 𑀢𑀺𑀯𑀺𑀥𑀫𑁆𑀧𑀺 𑀅𑀓𑀼𑀲𑀮𑀁 𑀲𑀫𑁆𑀧𑀬𑁄𑀕𑀸𑀤𑀺𑀪𑁂𑀤𑀢𑁄 𑀤𑁆𑀯𑀸𑀤𑀲𑀥𑀸 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀦𑀺𑀤𑁆𑀤𑀺𑀲𑀦𑁆𑀢𑁄 𑀢𑁂𑀲𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀪𑀸𑀯𑁂𑀧𑀺 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀅𑀓𑀼𑀲𑀮𑀯𑀺𑀧𑀸𑀓𑁂𑀬𑁂𑀯 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀓𑀺𑀘𑁆𑀘𑀪𑁂𑀤𑁂𑀦 𑀲𑀢𑁆𑀢𑀥𑀸 𑀯𑀺𑀪𑀚𑀺𑀢𑀼𑀁 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀢𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀳𑀼𑀢𑁆𑀯𑀸 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀘𑀓𑁆𑀔𑀼. 𑀅𑀣 𑀯𑀸 𑀘𑀓𑁆𑀔𑀢𑀺 𑀭𑀽𑀧𑀁 𑀅𑀲𑁆𑀲𑀸𑀤𑁂𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀘𑀓𑁆𑀔𑀼. 𑀘𑀓𑁆𑀔𑀢𑀻𑀢𑀺 𑀳𑀺 𑀅𑀬𑀁 𑀲𑀤𑁆𑀤𑁄 ‘‘𑀫𑀥𑀼𑀁 𑀘𑀓𑁆𑀔𑀢𑀺, 𑀩𑁆𑀬𑀜𑁆𑀚𑀦𑀁 𑀘𑀓𑁆𑀔𑀢𑀻’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀅𑀲𑁆𑀲𑀸𑀤𑀦𑀢𑁆𑀣𑁄 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀘𑀓𑁆𑀔𑀼𑀁 𑀔𑁄 𑀧𑀦, 𑀫𑀸𑀕𑀡𑁆𑀟𑀺𑀬, 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑁆𑀫𑀼𑀤𑀺𑀢’’𑀦𑁆𑀢𑁆𑀬𑀸𑀤𑀺. 𑀬𑀤𑀺 𑀏𑀯𑀁 ‘‘𑀲𑁄𑀢𑀁 𑀔𑁄, 𑀫𑀸𑀕𑀡𑁆𑀟𑀺𑀬, 𑀲𑀤𑁆𑀤𑀸𑀭𑀸𑀫𑀁 𑀲𑀤𑁆𑀤𑀭𑀢𑀁 𑀲𑀤𑁆𑀤𑀲𑀫𑁆𑀫𑀼𑀤𑀺𑀢’’𑀦𑁆𑀢𑁆𑀬𑀸𑀤𑀺𑀯𑀘𑀦𑀢𑁄 (𑀫. 𑀦𑀺. 𑁨.𑁨𑁦𑁯) 𑀲𑁄𑀢𑀸𑀤𑀻𑀦𑀫𑁆𑀧𑀺 𑀲𑀤𑁆𑀤𑀸𑀤𑀺𑀅𑀲𑁆𑀲𑀸𑀤𑀦𑀁 𑀅𑀢𑁆𑀣𑀻𑀢𑀺 𑀢𑁂𑀲𑀫𑁆𑀧𑀺 𑀘𑀓𑁆𑀔𑀼𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦𑀸𑀧𑀚𑁆𑀚𑀢𑀺 𑀦𑀺𑀭𑀼𑀴𑁆𑀳𑀢𑁆𑀢𑀸, 𑀦𑀺𑀭𑀼𑀴𑁆𑀳𑁄 𑀳𑁂𑀲 𑀘𑀓𑁆𑀔𑀼-𑀲𑀤𑁆𑀤𑁄 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀚𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑁂 𑀘𑀓𑁆𑀔𑀼𑀧𑁆𑀧𑀲𑀸𑀤𑁂𑀬𑁂𑀯 𑀫𑀬𑀽𑀭𑀸𑀤𑀺𑀲𑀤𑁆𑀤𑀸 𑀯𑀺𑀬 𑀲𑀓𑀼𑀡𑀯𑀺𑀲𑁂𑀲𑀸𑀤𑀻𑀲𑀼, 𑀘𑀓𑁆𑀔𑀼𑀦𑀸 𑀲𑀳𑀯𑀼𑀢𑁆𑀢𑀺𑀬𑀸 𑀧𑀦 𑀪𑀫𑀼𑀓𑀝𑁆𑀞𑀺𑀧𑀭𑀺𑀘𑁆𑀙𑀺𑀦𑁆𑀦𑁄 𑀫𑀁𑀲𑀧𑀺𑀡𑁆𑀟𑁄𑀧𑀺 ‘‘𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀘𑀓𑁆𑀔𑀢𑀺-𑀲𑀤𑁆𑀤𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀢𑀸𑀧𑀺 𑀲𑀫𑁆𑀪𑀯𑀢𑀻𑀢𑀺 ‘‘𑀘𑀓𑁆𑀔𑀢𑀺 𑀭𑀽𑀧𑀁 𑀯𑀺𑀪𑀸𑀯𑁂𑀢𑀻𑀢𑀺 𑀘𑀓𑁆𑀔𑀽’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁫𑁧𑁦) 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑀁 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀣𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀣𑀸 𑀳𑁂𑀢𑀁 ‘‘𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀭𑀽𑀧𑀯𑀺𑀚𑀸𑀦𑀦𑀮𑀓𑁆𑀔𑀡’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁪𑁩𑁧; 𑀯𑀺𑀲𑀼𑀤𑁆𑀥𑀺. 𑁨.𑁪𑁫𑁪) 𑀯𑀼𑀢𑁆𑀢𑀁.

𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀤𑀝𑁆𑀞𑀩𑁆𑀩𑀁. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀪𑀸𑀯𑀁 𑀅𑀢𑀺𑀤𑀺𑀲𑀢𑀺. 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀳𑀼𑀢𑁆𑀯𑀸 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀖𑀸𑀬𑀢𑀺 𑀕𑀦𑁆𑀥𑁄𑀧𑀸𑀤𑀸𑀦𑀁 𑀓𑀭𑁄𑀢𑀻𑀢𑀺 𑀖𑀸𑀦𑀁. 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀭𑀲𑁄 𑀚𑀻𑀯𑀺𑀢𑀁, 𑀢𑀁 𑀅𑀯𑁆𑀳𑀸𑀬𑀢𑀺 𑀢𑀲𑁆𑀫𑀺𑀁 𑀦𑀺𑀦𑁆𑀦𑀢𑀸𑀬𑀸𑀢𑀺 𑀚𑀺𑀯𑁆𑀳𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀓𑀼𑀘𑁆𑀙𑀺𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀆𑀬𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑁄. 𑀓𑀸𑀬𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀨𑁄𑀝𑁆𑀞𑀩𑁆𑀩𑀕𑁆𑀕𑀳𑀡𑀲𑀪𑀸𑀯𑀢𑁆𑀢𑀸 𑀢𑀤𑀲𑁆𑀲𑀸𑀤𑀯𑀲𑀧𑁆𑀧𑀯𑀢𑁆𑀢𑀸𑀦𑀁, 𑀢𑀫𑁆𑀫𑀽𑀮𑀓𑀸𑀦𑀜𑁆𑀘 𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀢𑁂𑀲𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀯𑀺𑀬 𑀕𑀬𑁆𑀳𑀢𑀺. 𑀲𑀲𑀫𑁆𑀪𑀸𑀭𑀓𑀸𑀬𑁄 𑀯𑀸 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀢𑀁𑀲𑀳𑀘𑀭𑀺𑀢𑀢𑁆𑀢𑀸 𑀧𑀦 𑀧𑀲𑀸𑀤𑀓𑀸𑀬𑁄𑀧𑀺 𑀢𑀣𑀸 𑀯𑀼𑀘𑁆𑀘𑀢𑀺. 𑀤𑀼 𑀓𑀼𑀘𑁆𑀙𑀺𑀢𑀁 𑀳𑀼𑀢𑁆𑀯𑀸 𑀔𑀦𑀢𑀺 𑀓𑀸𑀬𑀺𑀓𑀲𑀼𑀔𑀁, 𑀤𑀼𑀓𑁆𑀔𑀫𑀦𑁆𑀢𑀺 𑀯𑀸 𑀤𑀼𑀓𑁆𑀔𑀁. 𑀤𑀼𑀓𑁆𑀓𑀭𑀫𑁄𑀓𑀸𑀲𑀤𑀸𑀦𑀁 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔’’𑀦𑁆𑀢𑀺𑀧𑀺 𑀅𑀧𑀭𑁂. 𑀧𑀜𑁆𑀘𑀯𑀺𑀜𑁆𑀜𑀸𑀡𑀕𑁆𑀕𑀳𑀺𑀢𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀢𑀺 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁. 𑀲𑀫𑁆𑀫𑀸 𑀢𑀻𑀭𑁂𑀢𑀺 𑀬𑀣𑀸𑀲𑀫𑁆𑀧𑀝𑀺𑀘𑁆𑀙𑀺𑀢𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀯𑀻𑀫𑀁𑀲𑀢𑀻𑀢𑀺 𑀲𑀦𑁆𑀢𑀻𑀭𑀡𑀁. 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀸𑀓𑀸𑀢𑀺 𑀯𑀺𑀧𑀸𑀓𑀸, 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀦𑀢𑁆𑀣𑀺 𑀯𑀺𑀧𑀸𑀓𑀯𑁄𑀳𑀸𑀭𑁄. 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀅𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺.

𑁧𑁦. 𑀲𑀼𑀔𑀬𑀢𑀺 𑀓𑀸𑀬𑀘𑀺𑀢𑁆𑀢𑀁, 𑀲𑀼𑀝𑁆𑀞𑀼 𑀯𑀸 𑀔𑀦𑀢𑀺 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀁, 𑀲𑀼𑀔𑁂𑀦 𑀔𑀫𑀺𑀢𑀩𑁆𑀩𑀦𑁆𑀢𑀺 𑀯𑀸 𑀲𑀼𑀔𑀁. ‘‘𑀲𑀼𑀓𑀭𑀫𑁄𑀓𑀸𑀲𑀤𑀸𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀔’’𑀦𑁆𑀢𑀺 𑀅𑀧𑀭𑁂. 𑀓𑀲𑁆𑀫𑀸 𑀧𑀦 𑀬𑀣𑀸 𑀅𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀻𑀭𑀡𑀁 𑀏𑀓𑀫𑁂𑀯 𑀯𑀼𑀢𑁆𑀢𑀁, 𑀏𑀯𑀫𑀯𑀢𑁆𑀯𑀸 𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀻𑀭𑀡𑀁 𑀤𑁆𑀯𑀺𑀥𑀸 𑀯𑀼𑀢𑁆𑀢𑀦𑁆𑀢𑀺? 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀦𑀸𑀪𑁂𑀤𑀲𑀫𑁆𑀪𑀯𑀢𑁄. 𑀬𑀤𑀺 𑀏𑀯𑀁 𑀢𑀢𑁆𑀣𑀸𑀧𑀺 𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀦𑀸𑀪𑁂𑀤𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀲𑁆𑀲𑀧𑀺 𑀤𑁄𑀫𑀦𑀲𑁆𑀲𑀲𑁆𑀲 𑀧𑀝𑀺𑀖𑁂𑀦 𑀯𑀺𑀦𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀧𑀝𑀺𑀖𑀲𑁆𑀲 𑀘 𑀏𑀓𑀦𑁆𑀢𑀸𑀓𑀼𑀲𑀮𑀲𑀪𑀸𑀯𑀲𑁆𑀲 𑀅𑀩𑁆𑀬𑀸𑀓𑀢𑁂𑀲𑀼 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀪𑀺𑀦𑁆𑀦𑀚𑀸𑀢𑀺𑀓𑁄 𑀥𑀫𑁆𑀫𑁄 𑀪𑀺𑀦𑁆𑀦𑀚𑀸𑀢𑀺𑀓𑁂𑀲𑀼 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀲𑀫𑀸𑀦𑀬𑁄𑀕𑀓𑁆𑀔𑀫𑀲𑁆𑀲 𑀅𑀲𑀫𑁆𑀪𑀯𑀢𑁄 𑀅𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀤𑁄𑀫𑀦𑀲𑁆𑀲𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀢𑀲𑁆𑀲 𑀢𑀁𑀲𑀳𑀕𑀢𑀢𑀸 𑀦 𑀯𑀼𑀢𑁆𑀢𑀸. 𑀅𑀣 𑀯𑀸 𑀬𑀣𑀸 𑀓𑁄𑀘𑀺 𑀩𑀮𑀯𑀢𑀸 𑀧𑁄𑀣𑀺𑀬𑀫𑀸𑀦𑁄 𑀤𑀼𑀩𑁆𑀩𑀮𑀧𑀼𑀭𑀺𑀲𑁄 𑀢𑀲𑁆𑀲 𑀧𑀝𑀺𑀧𑁆𑀧𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀫𑀺𑀁 𑀉𑀧𑁂𑀓𑁆𑀔𑀓𑁄𑀯 𑀳𑁄𑀢𑀺, 𑀏𑀯𑀫𑁂𑀯 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑀢𑁄 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀧𑀺 𑀤𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑁄 𑀦𑀢𑁆𑀣𑀻𑀢𑀺 𑀲𑀦𑁆𑀢𑀻𑀭𑀡𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀉𑀪𑀬𑀯𑀺𑀧𑀸𑀓𑀸𑀦𑀺𑀧𑀺 𑀯𑀢𑁆𑀣𑀸𑀭𑀫𑁆𑀫𑀡𑀖𑀝𑁆𑀝𑀦𑀸𑀬 𑀤𑀼𑀩𑁆𑀩𑀮𑀪𑀸𑀯𑀢𑁄 𑀅𑀦𑀺𑀝𑁆𑀞𑁂 𑀇𑀝𑁆𑀞𑁂𑀧𑀺 𑀘 𑀆𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯. 𑀢𑁂𑀲𑀜𑁆𑀳𑀺 𑀘𑀢𑀼𑀦𑁆𑀦𑀫𑁆𑀧𑀺 𑀯𑀢𑁆𑀣𑀼𑀪𑀽𑀢𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀉𑀧𑀸𑀤𑀸𑀭𑀽𑀧𑀸𑀦𑁂𑀯, 𑀢𑀣𑀸 𑀆𑀭𑀫𑁆𑀫𑀡𑀪𑀽𑀢𑀸𑀦𑀺𑀧𑀺 𑀭𑀽𑀧𑀸𑀤𑀻𑀦𑀺, 𑀉𑀧𑀸𑀤𑀸𑀭𑀽𑀧𑀓𑁂𑀦 𑀘 𑀉𑀧𑀸𑀤𑀸𑀭𑀽𑀧𑀓𑀲𑁆𑀲 𑀲𑀗𑁆𑀖𑀝𑁆𑀝𑀦𑀁 𑀅𑀢𑀺𑀤𑀼𑀩𑁆𑀩𑀮𑀁 𑀧𑀺𑀘𑀼𑀧𑀺𑀡𑁆𑀟𑀓𑁂𑀦 𑀧𑀺𑀘𑀼𑀧𑀺𑀡𑁆𑀟𑀓𑀲𑁆𑀲 𑀨𑀼𑀲𑀦𑀁 𑀯𑀺𑀬, 𑀢𑀲𑁆𑀫𑀸 𑀢𑀸𑀦𑀺 𑀲𑀩𑁆𑀩𑀣𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯. 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀧𑀦 𑀨𑁄𑀝𑁆𑀞𑀩𑁆𑀩𑀲𑀗𑁆𑀔𑀸𑀢𑀪𑀽𑀢𑀢𑁆𑀢𑀬𑀫𑁂𑀯 𑀆𑀭𑀫𑁆𑀫𑀡𑀦𑁆𑀢𑀺 𑀢𑀁 𑀓𑀸𑀬𑀧𑁆𑀧𑀲𑀸𑀤𑁂 𑀲𑀗𑁆𑀖𑀝𑁆𑀝𑀺𑀢𑀫𑁆𑀧𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀦𑁆𑀦𑀺𑀲𑁆𑀲𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀧𑀝𑀺𑀳𑀜𑁆𑀜𑀢𑀺. 𑀪𑀽𑀢𑀭𑀽𑀧𑁂𑀳𑀺 𑀘 𑀪𑀽𑀢𑀭𑀽𑀧𑀸𑀦𑀁 𑀲𑀗𑁆𑀖𑀝𑁆𑀝𑀦𑀁 𑀩𑀮𑀯𑀢𑀭𑀁 𑀅𑀥𑀺𑀓𑀭𑀡𑀺𑀫𑀢𑁆𑀣𑀓𑁂 𑀧𑀺𑀘𑀼𑀧𑀺𑀡𑁆𑀟𑀓𑀁 𑀞𑀧𑁂𑀢𑁆𑀯𑀸 𑀓𑀽𑀝𑁂𑀦 𑀧𑀳𑀝𑀓𑀸𑀮𑁂 𑀓𑀽𑀝𑀲𑁆𑀲 𑀧𑀺𑀘𑀼𑀧𑀺𑀡𑁆𑀟𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀥𑀺𑀓𑀭𑀡𑀺𑀕𑁆𑀕𑀳𑀡𑀁 𑀯𑀺𑀬, 𑀢𑀲𑁆𑀫𑀸 𑀯𑀢𑁆𑀣𑀸𑀭𑀫𑁆𑀫𑀡𑀖𑀝𑁆𑀝𑀦𑀸𑀬 𑀩𑀮𑀯𑀪𑀸𑀯𑀢𑁄 𑀓𑀸𑀬𑀯𑀺𑀜𑁆𑀜𑀸𑀡𑀁 𑀅𑀦𑀺𑀝𑁆𑀞𑁂 𑀤𑀼𑀓𑁆𑀔𑀲𑀳𑀕𑀢𑀁, 𑀇𑀝𑁆𑀞𑁂 𑀲𑀼𑀔𑀲𑀳𑀕𑀢𑀦𑁆𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑀬𑀼𑀕𑀴𑁆𑀳𑀁 𑀧𑀦 𑀅𑀢𑁆𑀢𑀦𑀸 𑀅𑀲𑀫𑀸𑀦𑀦𑀺𑀲𑁆𑀲𑀬𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀫𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑀸𑀦𑀦𑀺𑀲𑁆𑀲𑀬𑀢𑁄 𑀅𑀮𑀤𑁆𑀥𑀸𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀬 𑀲𑀪𑀸𑀕𑀽𑀧𑀢𑁆𑀣𑀫𑁆𑀪𑀭𑀳𑀺𑀢𑁄 𑀯𑀺𑀬 𑀧𑀼𑀭𑀺𑀲𑁄 𑀦𑀸𑀢𑀺𑀩𑀮𑀯𑀁 𑀲𑀩𑁆𑀩𑀣𑀸𑀧𑀺 𑀯𑀺𑀲𑀬𑀭𑀲𑀫𑀦𑀼𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀩𑁆𑀩𑀣𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀻𑀭𑀡𑀁 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂𑀲𑀼 𑀲𑀼𑀔𑁄𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺. 𑀬𑀤𑀺 𑀏𑀯𑀁 𑀆𑀯𑀚𑁆𑀚𑀦𑀤𑁆𑀯𑀬𑀲𑁆𑀲 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑁄𑀕𑀁 𑀓𑀲𑁆𑀫𑀸 𑀯𑀓𑁆𑀔𑀢𑀺, 𑀦𑀦𑀼 𑀢𑀫𑁆𑀧𑀺 𑀲𑀫𑀸𑀦𑀦𑀺𑀲𑁆𑀲𑀬𑀸𑀦𑀦𑁆𑀢𑀭𑀁 𑀧𑀯𑀢𑁆𑀢𑀢𑀻𑀢𑀺? 𑀲𑀘𑁆𑀘𑀁, 𑀢𑀢𑁆𑀣 𑀧𑀦 𑀧𑀼𑀭𑀺𑀫𑀁 𑀧𑀼𑀩𑁆𑀩𑁂 𑀓𑁂𑀦𑀘𑀺 𑀅𑀕𑁆𑀕𑀳𑀺𑀢𑁂𑀬𑁂𑀯 𑀆𑀭𑀫𑁆𑀫𑀡𑁂 𑀏𑀓𑀯𑀸𑀭𑀫𑁂𑀯 𑀧𑀯𑀢𑁆𑀢𑀢𑀺, 𑀧𑀘𑁆𑀙𑀺𑀫𑀫𑁆𑀧𑀺 𑀯𑀺𑀲𑀤𑀺𑀲𑀘𑀺𑀢𑁆𑀢𑀲𑀦𑁆𑀢𑀸𑀦𑀧𑀭𑀸𑀯𑀢𑁆𑀢𑀦𑀯𑀲𑁂𑀦 𑀩𑁆𑀬𑀸𑀧𑀸𑀭𑀦𑁆𑀢𑀭𑀲𑀸𑀧𑁂𑀓𑁆𑀔𑀦𑁆𑀢𑀺 𑀦 𑀲𑀩𑁆𑀩𑀣𑀸𑀧𑀺 𑀯𑀺𑀲𑀬𑀭𑀲𑀫𑀦𑀼𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀫𑀚𑁆𑀛𑀢𑁆𑀢𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀫𑁂𑀯𑀸𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀯𑀢𑁆𑀣𑀸𑀮𑀫𑁆𑀩𑀲𑀪𑀸𑀯𑀸𑀦𑀁, 𑀪𑀽𑀢𑀺𑀓𑀸𑀦𑀜𑁆𑀳𑀺 𑀖𑀝𑁆𑀝𑀦𑀁;

𑀤𑀼𑀩𑁆𑀩𑀮𑀁 𑀇𑀢𑀺 𑀘𑀓𑁆𑀔𑀸𑀤𑀺-𑀘𑀢𑀼𑀘𑀺𑀢𑁆𑀢𑀫𑀼𑀧𑁂𑀓𑁆𑀔𑀓𑀁.

‘‘𑀓𑀸𑀬𑀦𑀺𑀲𑁆𑀲𑀬𑀨𑁄𑀝𑁆𑀞𑀩𑁆𑀩-𑀪𑀽𑀢𑀸𑀦𑀁 𑀖𑀝𑁆𑀝𑀦𑀸𑀬 𑀢𑀼;

𑀩𑀮𑀯𑀢𑁆𑀢𑀸 𑀦 𑀯𑀺𑀜𑁆𑀜𑀸𑀡𑀁, 𑀓𑀸𑀬𑀺𑀓 𑀫𑀚𑁆𑀛𑀯𑁂𑀤𑀦𑀁.

‘‘𑀲𑀫𑀸𑀦𑀦𑀺𑀲𑁆𑀲𑀬𑁄 𑀬𑀲𑁆𑀫𑀸, 𑀦𑀢𑁆𑀣𑀸𑀦𑀦𑁆𑀢𑀭𑀧𑀘𑁆𑀘𑀬𑁄;

𑀢𑀲𑁆𑀫𑀸 𑀤𑀼𑀩𑁆𑀩𑀮𑀫𑀸𑀮𑀫𑁆𑀩𑁂, 𑀲𑁄𑀧𑁂𑀓𑁆𑀔𑀁 𑀲𑀫𑁆𑀧𑀝𑀺𑀘𑁆𑀙𑀦’’𑀦𑁆𑀢𑀺.

𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀸𑀦𑀺, 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀯𑀺𑀭𑀳𑀢𑁄 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺. 𑀦𑀺𑀩𑁆𑀩𑀢𑁆𑀢𑀓𑀳𑁂𑀢𑀼𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀸𑀦𑀺𑀧𑀺 𑀳𑁂𑀢𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀯𑀲𑁂𑀦𑁂𑀯 𑀅𑀳𑁂𑀢𑀼𑀓𑀯𑁄𑀳𑀸𑀭𑀁 𑀮𑀪𑀦𑁆𑀢𑀺, 𑀇𑀢𑀭𑀣𑀸 𑀫𑀳𑀸𑀯𑀺𑀧𑀸𑀓𑁂𑀳𑀺 𑀇𑀫𑁂𑀲𑀁 𑀦𑀸𑀦𑀢𑁆𑀢𑀸𑀲𑀫𑁆𑀪𑀯𑀢𑁄. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀬𑀣𑀸 𑀇𑀥𑁂𑀯𑀁 𑀅𑀓𑀼𑀲𑀮𑀯𑀺𑀧𑀸𑀓𑀦𑀺𑀕𑀫𑀦𑁂 𑀅𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺? 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄. 𑀲𑀢𑀺 𑀳𑀺 𑀲𑀫𑁆𑀪𑀯𑁂, 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀲𑀺𑀬𑀸. 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀦 𑀮𑁄𑀪𑀸𑀤𑀺𑀲𑀸𑀯𑀚𑁆𑀚𑀥𑀫𑁆𑀫𑀯𑀺𑀧𑀸𑀓𑀪𑀸𑀯𑁂𑀦 𑀢𑀩𑁆𑀩𑀺𑀥𑀼𑀭𑁂𑀳𑀺, 𑀅𑀮𑁄𑀪𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀸𑀬𑁄𑀕𑀢𑁄, 𑀲𑀬𑀁 𑀅𑀩𑁆𑀬𑀸𑀓𑀢𑀦𑀺𑀭𑀯𑀚𑁆𑀚𑀲𑀪𑀸𑀯𑀸𑀦𑀁 𑀮𑁄𑀪𑀸𑀤𑀺𑀅𑀓𑀼𑀲𑀮𑀥𑀫𑁆𑀫𑀲𑀫𑁆𑀧𑀬𑁄𑀕𑀯𑀺𑀭𑁄𑀥𑀢𑁄 𑀘 𑀦𑀢𑁆𑀣𑀺 𑀓𑀤𑀸𑀘𑀺𑀧𑀺 𑀲𑀳𑁂𑀢𑀼𑀓𑀢𑀸𑀬 𑀲𑀫𑁆𑀪𑀯𑁄𑀢𑀺 𑀅𑀳𑁂𑀢𑀼𑀓𑀪𑀸𑀯𑀸𑀩𑁆𑀬𑀪𑀺𑀘𑀸𑀭𑀢𑁄 𑀦 𑀢𑀸𑀦𑀺 𑀅𑀳𑁂𑀢𑀼𑀓𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀺.

𑁧𑁧. 𑀇𑀤𑀸𑀦𑀺 𑀅𑀳𑁂𑀢𑀼𑀓𑀸𑀥𑀺𑀓𑀸𑀭𑁂 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺𑀧𑀺 𑀓𑀺𑀘𑁆𑀘𑀪𑁂𑀤𑁂𑀦 𑀢𑀺𑀥𑀸 𑀤𑀲𑁆𑀲𑁂𑀢𑀼𑀁 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀸𑀤𑀺𑀧𑀜𑁆𑀘𑀤𑁆𑀯𑀸𑀭𑁂 𑀖𑀝𑁆𑀝𑀺𑀢𑀫𑀸𑀭𑀫𑁆𑀫𑀡𑀁 𑀆𑀯𑀚𑁆𑀚𑁂𑀢𑀺 𑀢𑀢𑁆𑀣 𑀆𑀪𑁄𑀕𑀁 𑀓𑀭𑁄𑀢𑀺, 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀯𑀸 𑀪𑀯𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀤𑀢𑁆𑀯𑀸 𑀯𑀻𑀣𑀺𑀘𑀺𑀢𑁆𑀢𑀪𑀸𑀯𑀸𑀬 𑀧𑀭𑀺𑀡𑀸𑀫𑁂𑀢𑀻𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀁, 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀁. 𑀆𑀯𑀚𑁆𑀚𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀁 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀪𑀸𑀯𑀢𑁄. 𑀢𑀲𑁆𑀫𑀺𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑀸𑀤𑀺𑀯𑀲𑁂𑀦 𑀆𑀧𑀸𑀣𑀫𑀸𑀕𑀢𑀫𑀸𑀭𑀫𑁆𑀫𑀡𑀁 𑀆𑀯𑀚𑁆𑀚𑁂𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀧𑀭𑀺𑀡𑀸𑀫𑁂𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁, 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀁. 𑀇𑀤𑀫𑁂𑀯 𑀘 𑀧𑀜𑁆𑀘𑀤𑁆𑀯𑀸𑀭𑁂 𑀬𑀣𑀸𑀲𑀦𑁆𑀢𑀻𑀭𑀺𑀢𑀁 𑀆𑀭𑀫𑁆𑀫𑀡𑀁 𑀯𑀯𑀢𑁆𑀣𑀧𑁂𑀢𑀻𑀢𑀺 𑀯𑁄𑀝𑁆𑀞𑀩𑁆𑀩𑀦𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀳𑀲𑀺𑀢𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀳𑀲𑀺𑀢𑀼𑀧𑁆𑀧𑀸𑀤𑀁, 𑀔𑀻𑀡𑀸𑀲𑀯𑀸𑀦𑀁 𑀅𑀦𑁄𑀴𑀸𑀭𑀺𑀓𑀸𑀭𑀫𑁆𑀫𑀡𑁂𑀲𑀼 𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀳𑁂𑀢𑀼𑀓𑀁 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀁.

𑁧𑁨. 𑀲𑀩𑁆𑀩𑀣𑀸𑀧𑀻𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑁂𑀦. 𑀅𑀝𑁆𑀞𑀸𑀭𑀲𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁.

𑀅𑀳𑁂𑀢𑀼𑀓𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀪𑀦𑀘𑀺𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀏𑀯𑀁 𑀤𑁆𑀯𑀸𑀤𑀲𑀸𑀓𑀼𑀲𑀮𑀅𑀳𑁂𑀢𑀼𑀓𑀸𑀝𑁆𑀞𑀸𑀭𑀲𑀯𑀲𑁂𑀦 𑀲𑀫𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀸𑀦𑀁 𑀲𑁄𑀪𑀦𑀯𑁄𑀳𑀸𑀭𑀁 𑀞𑀧𑁂𑀢𑀼𑀁 ‘‘𑀧𑀸𑀧𑀸𑀳𑁂𑀢𑀼𑀓𑀫𑀼𑀢𑁆𑀢𑀸𑀦𑀻’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑀸 𑀅𑀥𑀺𑀲𑀬𑀺𑀢𑀲𑁆𑀲 𑀅𑀧𑀸𑀬𑀸𑀤𑀺𑀤𑀼𑀓𑁆𑀔𑀲𑁆𑀲 𑀧𑀸𑀧𑀦𑀢𑁄 𑀧𑀸𑀧𑁂𑀳𑀺, 𑀳𑁂𑀢𑀼𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀅𑀳𑁂𑀢𑀼𑀓𑁂𑀳𑀺 𑀘 𑀫𑀼𑀢𑁆𑀢𑀸𑀦𑀺 𑀘𑀢𑀼𑀯𑀻𑀲𑀢𑀺𑀓𑀸𑀫𑀸𑀯𑀘𑀭𑀧𑀜𑁆𑀘𑀢𑀺𑀁𑀲𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀏𑀓𑀽𑀦𑀲𑀝𑁆𑀞𑀺𑀧𑀭𑀺𑀫𑀸𑀡𑀸𑀦𑀺, 𑀅𑀣 𑀯𑀸 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀸𑀦𑀺 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑁂𑀦 𑀧𑀘𑁆𑀘𑁂𑀓𑀁 𑀧𑀜𑁆𑀘𑀥𑀸 𑀓𑀢𑁆𑀯𑀸 𑀏𑀓𑀦𑀯𑀼𑀢𑀺𑀧𑀺 𑀘𑀺𑀢𑁆𑀢𑀸𑀦𑀺 𑀲𑁄𑀪𑀦𑀕𑀼𑀡𑀸𑀯𑀳𑀦𑀢𑁄, 𑀅𑀮𑁄𑀪𑀸𑀤𑀺𑀅𑀦𑀯𑀚𑁆𑀚𑀳𑁂𑀢𑀼𑀲𑀫𑁆𑀧𑀬𑁄𑀕𑀢𑁄 𑀘 𑀲𑁄𑀪𑀦𑀸𑀦𑀻𑀢𑀺 𑀯𑀼𑀘𑁆𑀘𑀭𑁂 𑀓𑀣𑀻𑀬𑀦𑁆𑀢𑀺.

𑀓𑀸𑀫𑀸𑀯𑀘𑀭𑀲𑁄𑀪𑀦𑀘𑀺𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀇𑀤𑀸𑀦𑀺 𑀲𑁄𑀪𑀦𑁂𑀲𑀼 𑀓𑀸𑀫𑀸𑀯𑀘𑀭𑀸𑀦𑀫𑁂𑀯 𑀧𑀞𑀫𑀁 𑀉𑀤𑁆𑀤𑀺𑀝𑁆𑀞𑀢𑁆𑀢𑀸 𑀢𑁂𑀲𑀼𑀧𑀺 𑀅𑀩𑁆𑀬𑀸𑀓𑀢𑀸𑀦𑀁 𑀓𑀼𑀲𑀮𑀧𑀼𑀩𑁆𑀩𑀓𑀢𑁆𑀢𑀸 𑀧𑀞𑀫𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁, 𑀢𑀢𑁄 𑀢𑀩𑁆𑀩𑀺𑀧𑀸𑀓𑀁, 𑀢𑀤𑀦𑀦𑁆𑀢𑀭𑀁 𑀢𑀤𑁂𑀓𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀁 𑀓𑀺𑀭𑀺𑀬𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑁂𑀓𑀁 𑀯𑁂𑀤𑀦𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑁂𑀦 𑀅𑀝𑁆𑀞𑀥𑀸 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀦𑀸𑀢𑀺 𑀬𑀣𑀸𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀜𑀸𑀡𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣 𑀘 𑀩𑀮𑀯𑀲𑀤𑁆𑀥𑀸𑀬 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀏𑀯𑀫𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸, 𑀧𑀜𑁆𑀜𑀸𑀲𑀁𑀯𑀢𑁆𑀢𑀦𑀺𑀓𑀓𑀫𑁆𑀫𑀢𑁄, 𑀅𑀩𑁆𑀬𑀸𑀧𑀚𑁆𑀚𑀮𑁄𑀓𑀽𑀧𑀧𑀢𑁆𑀢𑀺𑀢𑁄, 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀢𑁄, 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀢𑁄 𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀸 𑀘𑁂𑀯 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀘, 𑀆𑀯𑀸𑀲𑀲𑀧𑁆𑀧𑀸𑀬𑀸𑀤𑀺𑀯𑀲𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀮𑁆𑀮𑀪𑀸𑀯𑀢𑁄, 𑀧𑀼𑀩𑁆𑀩𑁂 𑀤𑀸𑀦𑀸𑀤𑀻𑀲𑀼 𑀓𑀢𑀧𑀭𑀺𑀘𑀬𑀢𑀸𑀤𑀻𑀳𑀺 𑀘 𑀅𑀲𑀗𑁆𑀔𑀸𑀭𑀺𑀓𑀢𑀸, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀲𑀲𑀗𑁆𑀔𑀸𑀭𑀺𑀓𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀬𑀤𑀸 𑀧𑀦 𑀬𑁄 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀁, 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀼𑀁 𑀆𑀕𑀫𑁆𑀫 𑀳𑀝𑁆𑀞𑀧𑀳𑀝𑁆𑀞𑁄 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑁆𑀬𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀫𑀼𑀢𑁆𑀢𑀘𑀸𑀕𑀢𑀸𑀤𑀺𑀯𑀲𑁂𑀦 𑀅𑀲𑀁𑀲𑀻𑀤𑀦𑁆𑀢𑁄 𑀅𑀦𑀼𑀲𑁆𑀲𑀸𑀳𑀺𑀢𑁄 𑀧𑀭𑁂𑀳𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀘𑀺𑀢𑁆𑀢𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀁 𑀳𑁄𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀝𑁆𑀞𑀢𑀼𑀝𑁆𑀞𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸𑀧𑀺 𑀅𑀫𑀼𑀢𑁆𑀢𑀘𑀸𑀕𑀢𑀸𑀤𑀺𑀯𑀲𑁂𑀦 𑀲𑀁𑀲𑀻𑀤𑀫𑀸𑀦𑁄 𑀧𑀭𑁂𑀳𑀺 𑀯𑀸 𑀉𑀲𑁆𑀲𑀸𑀳𑀺𑀢𑁄 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀢𑀤𑁂𑀯 𑀘𑀺𑀢𑁆𑀢𑀁 𑀲𑀲𑀗𑁆𑀔𑀸𑀭𑀺𑀓𑀁 𑀳𑁄𑀢𑀺. 𑀬𑀤𑀸 𑀧𑀦 𑀜𑀸𑀢𑀺𑀚𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀚𑀸𑀢𑀧𑀭𑀺𑀘𑀬𑀸 𑀩𑀸𑀮𑀤𑀸𑀭𑀓𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀳𑀲𑀸 𑀓𑀺𑀜𑁆𑀘𑀺𑀤𑁂𑀯 𑀳𑀢𑁆𑀣𑀕𑀢𑀁 𑀤𑀤𑀦𑁆𑀢𑀺 𑀯𑀸 𑀯𑀦𑁆𑀤𑀦𑁆𑀢𑀺 𑀯𑀸, 𑀢𑀤𑀸 𑀢𑁂𑀲𑀁 𑀢𑀢𑀺𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 ‘‘𑀤𑁂𑀣, 𑀯𑀦𑁆𑀤𑀣𑀸’’𑀢𑀺 𑀜𑀸𑀢𑀻𑀳𑀺 𑀉𑀲𑁆𑀲𑀸𑀳𑀺𑀢𑀸 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀘𑀢𑀼𑀢𑁆𑀣𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀤𑀻𑀦𑀁 𑀅𑀲𑀫𑁆𑀧𑀢𑁆𑀢𑀺𑀁, 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑀁 𑀆𑀕𑀫𑁆𑀫 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀅𑀝𑁆𑀞𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀓𑀫𑁂𑀦 𑀧𑀼𑀜𑁆𑀜𑀯𑀢𑁆𑀣𑀽𑀳𑀺, 𑀕𑁄𑀘𑀭𑀸𑀥𑀺𑀧𑀢𑀻𑀳𑀺 𑀘;

𑀓𑀫𑁆𑀫𑀳𑀻𑀦𑀸𑀤𑀺𑀢𑁄 𑀘𑁂𑀯, 𑀕𑀡𑁂𑀬𑁆𑀬 𑀦𑀬𑀓𑁄𑀯𑀺𑀤𑁄’’𑀢𑀺.

𑀇𑀫𑀸𑀦𑀺 𑀳𑀺 𑀅𑀝𑁆𑀞 𑀘𑀺𑀢𑁆𑀢𑀸𑀦𑀺 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀧𑀘𑁆𑀘𑁂𑀓𑀁 𑀤𑀲 𑀤𑀲𑀸𑀢𑀺 𑀓𑀢𑁆𑀯𑀸 𑀅𑀲𑀻𑀢𑀺 𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀦𑀢𑁄 𑀧𑀘𑁆𑀘𑁂𑀓𑀁 𑀙𑀕𑁆𑀕𑀼𑀡𑀺𑀢𑀸𑀦𑀺 𑀲𑀸𑀲𑀻𑀢𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀥𑀺𑀧𑀢𑀺𑀪𑁂𑀤𑁂𑀦 𑀧𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀤𑁆𑀯𑀺𑀲𑀢𑀧𑀭𑀺𑀫𑀸𑀡𑀸𑀦𑀁 𑀯𑀻𑀫𑀁𑀲𑀸𑀥𑀺𑀧𑀢𑀺𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀢𑀸𑀦𑀺 𑀢𑀺𑀡𑁆𑀡𑀁 𑀅𑀥𑀺𑀧𑀢𑀻𑀦𑀁 𑀯𑀲𑁂𑀦 𑀢𑀺𑀕𑀼𑀡𑀺𑀢𑀸𑀦𑀺 𑀯𑀻𑀲𑀸𑀥𑀺𑀓𑀸𑀦𑀺 𑀲𑀢𑁆𑀢𑀲𑀢𑀸𑀦𑀺, 𑀢𑀣𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀻𑀦𑀁 𑀯𑀲𑁂𑀦 𑀘𑀢𑀼𑀕𑁆𑀕𑀼𑀡𑀺𑀢𑀸𑀦𑀺 𑀲𑀲𑀝𑁆𑀞𑀺𑀓𑀸𑀦𑀺 𑀦𑀯 𑀲𑀢𑀸𑀦𑀻𑀢𑀺 𑀏𑀯𑀁 𑀅𑀥𑀺𑀧𑀢𑀺𑀯𑀲𑁂𑀦 𑀲𑀳𑀲𑁆𑀲𑀁 𑀲𑀸𑀲𑀻𑀢𑀺𑀓𑀸𑀦𑀺 𑀘 𑀙 𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀲𑀗𑁆𑀔𑀸𑀢𑀓𑀫𑁆𑀫𑀢𑁆𑀢𑀺𑀓𑀯𑀲𑁂𑀦 𑀢𑀺𑀕𑀼𑀡𑀺𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀸𑀦𑀺 𑀧𑀜𑁆𑀘 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄 𑀢𑀺𑀕𑀼𑀡𑀺𑀢𑀸𑀦𑀺 𑀯𑀻𑀲𑀲𑀢𑀸𑀥𑀺𑀓𑀧𑀦𑁆𑀦𑀭𑀲𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦 𑁋

‘‘𑀲𑀢𑁆𑀢𑀭𑀲 𑀲𑀳𑀲𑁆𑀲𑀸𑀦𑀺, 𑀤𑁆𑀯𑁂 𑀲𑀢𑀸𑀦𑀺 𑀅𑀲𑀻𑀢𑀺 𑀘;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂’’𑀢𑀺.

𑀢𑀁 𑀅𑀥𑀺𑀧𑀢𑀺𑀯𑀲𑁂𑀦 𑀕𑀡𑀦𑀧𑀭𑀺𑀳𑀸𑀦𑀺𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀲𑁄𑀢𑀧𑀢𑀺𑀢𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀓𑀸𑀮𑀤𑁂𑀲𑀸𑀤𑀺𑀪𑁂𑀤𑁂𑀦 𑀧𑀦 𑀦𑁂𑀲𑀁 𑀪𑁂𑀤𑁄 𑀅𑀧𑁆𑀧𑀫𑁂𑀬𑁆𑀬𑁄𑀯.

𑀓𑀼𑀘𑁆𑀙𑀺𑀢𑁂 (𑀥. 𑀲. 𑀅𑀝𑁆𑀞. 𑁧) 𑀧𑀸𑀧𑀥𑀫𑁆𑀫𑁂 𑀲𑀮𑀬𑀦𑁆𑀢𑀺 𑀓𑀫𑁆𑀧𑁂𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀺 𑀅𑀧𑀕𑀫𑁂𑀦𑁆𑀢𑀻𑀢𑀺 𑀯𑀸 𑀓𑀼𑀲𑀮𑀸𑀦𑀺. 𑀅𑀣 𑀯𑀸 𑀓𑀼𑀘𑁆𑀙𑀺𑀢𑀸𑀓𑀸𑀭𑁂𑀦 𑀲𑀦𑁆𑀢𑀸𑀦𑁂 𑀲𑀬𑀦𑀢𑁄 𑀧𑀯𑀢𑁆𑀢𑀦𑀢𑁄 𑀓𑀼𑀲𑀲𑀗𑁆𑀔𑀸𑀢𑁂 𑀧𑀸𑀧𑀥𑀫𑁆𑀫𑁂 𑀮𑀼𑀦𑀦𑁆𑀢𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀓𑀼𑀲𑀮𑀸𑀦𑀺. 𑀅𑀣 𑀯𑀸 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄 𑀑𑀲𑀸𑀦𑀓𑀭𑀡𑀢𑁄 𑀯𑀸 𑀓𑀼𑀲𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦, 𑀲𑀤𑁆𑀥𑀸𑀤𑀺𑀥𑀫𑁆𑀫𑀚𑀸𑀢𑁂𑀦 𑀯𑀸 𑀮𑀸𑀢𑀩𑁆𑀩𑀸𑀦𑀺 𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀬𑀣𑀸𑀭𑀳𑀁 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀓𑀼𑀲𑀮𑀸𑀦𑀺, 𑀢𑀸𑀦𑁂𑀯 𑀬𑀣𑀸𑀯𑀼𑀢𑁆𑀢𑀢𑁆𑀣𑁂𑀦 𑀓𑀸𑀫𑀸𑀯𑀘𑀭𑀸𑀦𑀺 𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺.

𑁧𑁬. 𑀬𑀣𑀸 𑀧𑀦𑁂𑀢𑀸𑀦𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀲𑁂𑀦, 𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦, 𑀓𑀫𑁆𑀫𑀯𑀲𑁂𑀦, 𑀅𑀥𑀺𑀧𑀢𑀺𑀯𑀲𑁂𑀦 𑀘 𑀧𑀯𑀢𑁆𑀢𑀦𑁆𑀢𑀺, 𑀦𑁂𑀯𑀁 𑀯𑀺𑀧𑀸𑀓𑀸𑀦𑀺 𑀤𑀸𑀦𑀸𑀤𑀺𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀦𑀸𑀪𑀸𑀯𑀢𑁄, 𑀅𑀯𑀺𑀧𑀸𑀓𑀲𑀪𑀸𑀯𑀢𑁄, 𑀙𑀦𑁆𑀤𑀸𑀤𑀻𑀦𑀺 𑀧𑀼𑀭𑀓𑁆𑀔𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘, 𑀢𑀲𑁆𑀫𑀸 𑀢𑀁𑀯𑀲𑁂𑀦 𑀧𑀭𑀺𑀳𑀸𑀧𑁂𑀢𑁆𑀯𑀸 𑀬𑀣𑀸𑀭𑀳𑀁 𑀕𑀡𑀦𑀪𑁂𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀇𑀫𑀸𑀦𑀺𑀧𑀺 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀺𑀢𑀸𑀦𑀺. 𑀧𑀝𑀺𑀲𑀦𑁆𑀥𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀲𑁆𑀲 𑀩𑀮𑀯𑀸𑀩𑀮𑀯𑀪𑀸𑀯𑀢𑁄, 𑀢𑀤𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀁 𑀬𑁂𑀪𑀼𑀬𑁆𑀬𑁂𑀦 𑀚𑀯𑀦𑀸𑀦𑀼𑀭𑀽𑀧𑀢𑁄, 𑀓𑀤𑀸𑀘𑀺 𑀢𑀢𑁆𑀣𑀸𑀧𑀺 𑀓𑀫𑁆𑀫𑀸𑀦𑀼𑀭𑀽𑀧𑀢𑁄 𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀘 𑀳𑁄𑀦𑁆𑀢𑀺. 𑀬𑀣𑀸𑀧𑀬𑁄𑀕𑀁 𑀯𑀺𑀦𑀸 𑀲𑀧𑁆𑀧𑀬𑁄𑀕𑀜𑁆𑀘 𑀬𑀣𑀸𑀉𑀧𑀝𑁆𑀞𑀺𑀢𑁂𑀳𑀺 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀳𑀺 𑀉𑀢𑀼𑀪𑁄𑀚𑀦𑀸𑀤𑀺𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀯𑀲𑁂𑀦 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀸𑀦𑀺.

𑁧𑁭. 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀫𑁆𑀧𑀺 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀭𑀳𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁮. 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀲𑀳𑁂𑀢𑀼𑀓𑀕𑁆𑀕𑀳𑀡𑀁 𑀯𑀺𑀧𑀸𑀓𑀓𑀺𑀭𑀺𑀬𑀸𑀧𑁂𑀓𑁆𑀔𑀁 𑀯𑀺𑀲𑁂𑀲𑀦𑀁 𑀓𑀼𑀲𑀮𑀲𑁆𑀲 𑀏𑀓𑀦𑁆𑀢𑀲𑀳𑁂𑀢𑀼𑀓𑀢𑁆𑀢𑀸. 𑀳𑁄𑀢𑀺 𑀳𑀺 𑀬𑀣𑀸𑀮𑀸𑀪𑀬𑁄𑀚𑀦𑀸, ‘‘𑀲𑀓𑁆𑀔𑀭𑀓𑀣𑀮𑀫𑁆𑀧𑀺 𑀫𑀘𑁆𑀙𑀕𑀼𑀫𑁆𑀩𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀻’’𑀢𑁆𑀬𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁪𑁯) 𑀯𑀺𑀬 𑀲𑀓𑁆𑀔𑀭𑀓𑀣𑀮𑀲𑁆𑀲 𑀘𑀭𑀡𑀸𑀬𑁄𑀕𑀢𑁄 𑀫𑀘𑁆𑀙𑀕𑀼𑀫𑁆𑀩𑀸𑀧𑁂𑀓𑁆𑀔𑀸𑀬 𑀘𑀭𑀡𑀓𑀺𑀭𑀺𑀬𑀸 𑀬𑁄𑀚𑀻𑀬𑀢𑀻𑀢𑀺.

𑁧𑁯. 𑀲𑀳𑁂𑀢𑀼𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀧𑀸𑀓𑀓𑀺𑀭𑀺𑀬𑀸 𑀯𑁂𑀤𑀦𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑁂𑀦 𑀧𑀘𑁆𑀘𑁂𑀓𑀁 𑀯𑁂𑀤𑀦𑀸𑀪𑁂𑀤𑀢𑁄 𑀤𑀼𑀯𑀺𑀥𑀢𑁆𑀢𑀸, 𑀜𑀸𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀢𑁆𑀢𑀸, 𑀲𑀗𑁆𑀔𑀸𑀭𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀢𑁆𑀢𑀸 𑀘 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀘𑀢𑀼𑀯𑀻𑀲𑀢𑀺 𑀫𑀢𑀸𑀢𑀺 𑀬𑁄𑀚𑀦𑀸. 𑀦𑀦𑀼 𑀘 𑀯𑁂𑀤𑀦𑀸𑀪𑁂𑀤𑁄 𑀢𑀸𑀯 𑀬𑀼𑀢𑁆𑀢𑁄 𑀢𑀸𑀲𑀁 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸. 𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑁄 𑀧𑀦 𑀓𑀣𑀦𑁆𑀢𑀺? 𑀜𑀸𑀡𑀲𑀗𑁆𑀔𑀸𑀭𑀸𑀦𑀁 𑀪𑀸𑀯𑀸𑀪𑀸𑀯𑀓𑀢𑁄𑀧𑀺 𑀪𑁂𑀤𑁄 𑀜𑀸𑀡𑀲𑀗𑁆𑀔𑀸𑀭𑀓𑀢𑁄𑀯 𑀬𑀣𑀸 𑀯𑀲𑁆𑀲𑀓𑀢𑁄 𑀲𑀼𑀪𑀺𑀓𑁆𑀔𑁄 𑀤𑀼𑀩𑁆𑀪𑀺𑀓𑁆𑀔𑁄𑀢𑀺, 𑀢𑀲𑁆𑀫𑀸 𑀜𑀸𑀡𑀲𑀗𑁆𑀔𑀸𑀭𑀓𑀢𑁄 𑀪𑁂𑀤𑁄 𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑁄𑀢𑀺 𑀦 𑀏𑀢𑁆𑀣 𑀓𑁄𑀘𑀺 𑀯𑀺𑀭𑁄𑀥𑁄𑀢𑀺.

𑁨𑁦. 𑀇𑀤𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑁂 𑀢𑁂𑀯𑀻𑀲𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀓𑀸𑀫𑁂 𑀪𑀯𑁂 𑀲𑀢𑁆𑀢 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺, 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀦𑀺 𑀲𑁄𑀴𑀲 𑀓𑀼𑀲𑀮𑀯𑀺𑀧𑀸𑀓𑀸𑀦𑀻𑀢𑀺 𑀏𑀯𑀁 𑀢𑁂𑀯𑀻𑀲𑀢𑀺 𑀯𑀺𑀧𑀸𑀓𑀸𑀦𑀺 𑀤𑁆𑀯𑀸𑀤𑀲 𑀅𑀓𑀼𑀲𑀮𑀸𑀦𑀺, 𑀅𑀝𑁆𑀞 𑀓𑀼𑀲𑀮𑀸𑀦𑀻𑀢𑀺 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀯𑀻𑀲𑀢𑀺 𑀅𑀳𑁂𑀢𑀼𑀓𑀸 𑀢𑀺𑀲𑁆𑀲𑁄 𑀲𑀳𑁂𑀢𑀼𑀓𑀸 𑀅𑀝𑁆𑀞𑀸𑀢𑀺 𑀏𑀓𑀸𑀤𑀲 𑀓𑀺𑀭𑀺𑀬𑀸 𑀘𑀸𑀢𑀺 𑀲𑀩𑁆𑀩𑀣𑀸𑀧𑀺 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀅𑀦𑁆𑀢𑁄𑀕𑀥𑀪𑁂𑀤𑁂𑀦 𑀘𑀢𑀼𑀧𑀜𑁆𑀜𑀸𑀲𑁂𑀯 𑀓𑀸𑀮𑀤𑁂𑀲𑀲𑀦𑁆𑀢𑀸𑀦𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑀪𑀸𑀯𑁂𑀧𑀻𑀢𑁆𑀬𑀢𑁆𑀣𑁄.

𑀓𑀸𑀫𑀸𑀯𑀘𑀭𑀲𑁄𑀪𑀦𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀼𑀤𑁆𑀤𑀺𑀝𑁆𑀞𑀲𑁆𑀲 𑀭𑀽𑀧𑀸𑀯𑀘𑀭𑀲𑁆𑀲 𑀦𑀺𑀤𑁆𑀤𑁂𑀲𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀢𑀲𑁆𑀲 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑁂𑀦 𑀧𑀜𑁆𑀘𑀥𑀸 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀢𑀓𑁆𑀓…𑀧𑁂… 𑀲𑀳𑀺𑀢’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀏𑀓𑀕𑁆𑀕𑀢𑀸 𑀘𑀸𑀢𑀺 𑀇𑀫𑁂𑀳𑀺 𑀲𑀳𑀺𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁. 𑀢𑀢𑁆𑀣 𑀆𑀭𑀫𑁆𑀫𑀡𑀁 𑀯𑀺𑀢𑀓𑁆𑀓𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀅𑀪𑀺𑀦𑀺𑀭𑁄𑀧𑁂𑀢𑀻𑀢𑀺 𑀯𑀺𑀢𑀓𑁆𑀓𑁄, 𑀲𑁄 𑀲𑀳𑀚𑀸𑀢𑀸𑀦𑀁 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄, 𑀬𑀣𑀸 𑀳𑀺 𑀓𑁄𑀘𑀺 𑀕𑀸𑀫𑀯𑀸𑀲𑀻 𑀧𑀼𑀭𑀺𑀲𑁄 𑀭𑀸𑀚𑀯𑀮𑁆𑀮𑀪𑀁 𑀲𑀫𑁆𑀩𑀦𑁆𑀥𑀺𑀦𑀁 𑀫𑀺𑀢𑁆𑀢𑀁 𑀯𑀸 𑀦𑀺𑀲𑁆𑀲𑀸𑀬 𑀭𑀸𑀚𑀕𑁂𑀳𑀁 𑀅𑀦𑀼𑀧𑀯𑀺𑀲𑀢𑀺, 𑀏𑀯𑀁 𑀯𑀺𑀢𑀓𑁆𑀓𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀅𑀯𑀺𑀢𑀓𑁆𑀓𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀻𑀢𑀺? 𑀢𑀫𑁆𑀧𑀺 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀅𑀪𑀺𑀦𑀺𑀭𑁄𑀳𑀢𑀺. 𑀬𑀣𑀸 𑀳𑀺 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀘𑀬𑁂𑀦 𑀢𑁂𑀦 𑀯𑀺𑀦𑀸𑀧𑀺 𑀦𑀺𑀭𑀸𑀲𑀗𑁆𑀓𑁄 𑀭𑀸𑀚𑀕𑁂𑀳𑀁 𑀧𑀯𑀺𑀲𑀢𑀺, 𑀏𑀯𑀁 𑀧𑀭𑀺𑀘𑀬𑁂𑀦 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀅𑀯𑀺𑀢𑀓𑁆𑀓𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀪𑀺𑀦𑀺𑀭𑁄𑀳𑀢𑀺. 𑀧𑀭𑀺𑀘𑀬𑁄𑀢𑀺 𑀘𑁂𑀢𑁆𑀣 𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑀲𑁆𑀲 𑀲𑀦𑁆𑀢𑀸𑀦𑁂 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀸 𑀘𑀺𑀢𑁆𑀢𑀪𑀸𑀯𑀦𑀸. 𑀅𑀧𑀺 𑀘𑁂𑀢𑁆𑀣 𑀧𑀜𑁆𑀘𑀯𑀺𑀜𑁆𑀜𑀸𑀡𑀁 𑀅𑀯𑀺𑀢𑀓𑁆𑀓𑀫𑁆𑀧𑀺 𑀯𑀢𑁆𑀣𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑀩𑀮𑁂𑀦, 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀘 𑀳𑁂𑀝𑁆𑀞𑀺𑀫𑀪𑀸𑀯𑀦𑀸𑀩𑀮𑁂𑀦 𑀅𑀪𑀺𑀭𑁄𑀳𑀦𑁆𑀢𑀺.

𑀆𑀭𑀫𑁆𑀫𑀡𑁂 𑀢𑁂𑀦 𑀘𑀺𑀢𑁆𑀢𑀁 𑀯𑀺𑀘𑀭𑀢𑀻𑀢𑀺 𑀯𑀺𑀘𑀸𑀭𑁄. 𑀲𑁄 𑀆𑀭𑀡𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄. 𑀢𑀣𑀸 𑀳𑁂𑀲 ‘‘𑀅𑀦𑀼𑀲𑀦𑁆𑀥𑀸𑀦𑀢𑀸’’𑀢𑀺 (𑀥. 𑀲. 𑁮) 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀢𑁆𑀣 𑀘 𑀯𑀺𑀘𑀸𑀭𑀢𑁄 𑀑𑀴𑀸𑀭𑀺𑀓𑀝𑁆𑀞𑁂𑀦, 𑀢𑀲𑁆𑀲𑁂𑀯 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀘 𑀧𑀞𑀫𑀖𑀡𑁆𑀝𑀸𑀪𑀺𑀖𑀸𑀢𑁄 𑀯𑀺𑀬 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄, 𑀅𑀦𑀼𑀭𑀯𑁄 𑀯𑀺𑀬 𑀅𑀦𑀼𑀲𑀜𑁆𑀘𑀭𑀡𑀁 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸𑀘𑁂𑀢𑁆𑀣 𑀯𑀺𑀢𑀓𑁆𑀓𑁄 𑀘𑀺𑀢𑁆𑀢𑀲𑁆𑀲 𑀧𑀭𑀺𑀧𑁆𑀨𑀦𑁆𑀤𑀦𑀪𑀽𑀢𑁄, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀲𑁆𑀲 𑀲𑀓𑀼𑀡𑀲𑁆𑀲 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬, 𑀧𑀤𑀼𑀫𑀸𑀪𑀺𑀫𑀼𑀔𑀧𑀸𑀢𑁄 𑀯𑀺𑀬 𑀘 𑀕𑀦𑁆𑀥𑀸𑀦𑀼𑀩𑀦𑁆𑀥𑀘𑁂𑀢𑀲𑀸 𑀪𑀫𑀭𑀲𑁆𑀲, 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲 𑀦𑀸𑀢𑀺𑀧𑀭𑀺𑀧𑁆𑀨𑀦𑁆𑀤𑀦𑀪𑀽𑀢𑁄, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲 𑀲𑀓𑀼𑀡𑀲𑁆𑀲 𑀧𑀓𑁆𑀔𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀧𑀤𑀼𑀫𑀲𑁆𑀲 𑀉𑀧𑀭𑀺𑀪𑀸𑀕𑁂 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀘 𑀧𑀤𑀼𑀫𑀸𑀪𑀺𑀫𑀼𑀔𑀧𑀢𑀺𑀢𑀲𑁆𑀲 𑀪𑀫𑀭𑀲𑁆𑀲.

𑀧𑀺𑀦𑀬𑀢𑀺 𑀓𑀸𑀬𑀘𑀺𑀢𑁆𑀢𑀁 𑀢𑀧𑁆𑀧𑁂𑀢𑀺, 𑀯𑀟𑁆𑀠𑁂𑀢𑀻𑀢𑀺 𑀯𑀸 𑀧𑀻𑀢𑀺, 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸, 𑀆𑀭𑀫𑁆𑀫𑀡𑀁 𑀓𑀮𑁆𑀮𑀢𑁄 𑀕𑀳𑀡𑀮𑀓𑁆𑀔𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁, 𑀢𑀁 𑀇𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑀼𑀪𑁄𑀚𑀦𑀭𑀲𑀲𑁆𑀲𑀸𑀤𑀓𑁄 𑀭𑀸𑀚𑀸 𑀯𑀺𑀬. 𑀢𑀢𑁆𑀣 𑀆𑀭𑀫𑁆𑀫𑀡𑀧𑁆𑀧𑀝𑀺𑀮𑀸𑀪𑁂 𑀧𑀻𑀢𑀺𑀬𑀸 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀓𑀦𑁆𑀢𑀸𑀭𑀔𑀺𑀦𑁆𑀦𑀲𑁆𑀲 𑀯𑀦𑀦𑁆𑀢𑁄𑀤𑀓𑀤𑀲𑁆𑀲𑀦𑁂 𑀯𑀺𑀬, 𑀬𑀣𑀸𑀮𑀤𑁆𑀥𑀲𑁆𑀲 𑀅𑀦𑀼𑀪𑀯𑀦𑁂 𑀲𑀼𑀔𑀲𑁆𑀲 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀬𑀣𑀸𑀤𑀺𑀝𑁆𑀞𑀉𑀤𑀓𑀲𑁆𑀲 𑀧𑀸𑀦𑀸𑀤𑀻𑀲𑀼 𑀯𑀺𑀬𑀸𑀢𑀺. 𑀦𑀸𑀦𑀸𑀭𑀫𑁆𑀫𑀡𑀯𑀺𑀓𑁆𑀔𑁂𑀧𑀸𑀪𑀸𑀯𑁂𑀦 𑀏𑀓𑀁 𑀆𑀭𑀫𑁆𑀫𑀡𑀁 𑀅𑀕𑁆𑀕𑀁 𑀇𑀫𑀲𑁆𑀲𑀸𑀢𑀺 𑀏𑀓𑀕𑁆𑀕𑀁, 𑀘𑀺𑀢𑁆𑀢𑀁, 𑀢𑀲𑁆𑀲 𑀪𑀸𑀯𑁄 𑀏𑀓𑀕𑁆𑀕𑀢𑀸, 𑀲𑀫𑀸𑀥𑀺. 𑀲𑁄 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄. 𑀢𑀲𑁆𑀲 𑀳𑀺 𑀯𑀲𑁂𑀦 𑀲𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺.

𑀧𑀞𑀫𑀜𑁆𑀘 𑀤𑁂𑀲𑀦𑀸𑀓𑁆𑀓𑀫𑀢𑁄 𑀘𑁂𑀯 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀢𑁄 𑀘 𑀆𑀤𑀺𑀪𑀽𑀢𑀢𑁆𑀢𑀸 𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄, 𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀘𑀸𑀢𑀺 𑀧𑀞𑀫𑀚𑁆𑀛𑀸𑀦𑀁, 𑀯𑀺𑀢𑀓𑁆𑀓𑀸𑀤𑀺𑀧𑀜𑁆𑀘𑀓𑀁. 𑀛𑀸𑀦𑀗𑁆𑀕𑀲𑀫𑀼𑀤𑀸𑀬𑁂 𑀬𑁂𑀯 𑀳𑀺 𑀛𑀸𑀦𑀯𑁄𑀳𑀸𑀭𑁄 𑀦𑁂𑀫𑀺𑀆𑀤𑀺𑀅𑀗𑁆𑀕𑀲𑀫𑀼𑀤𑀸𑀬𑁂 𑀭𑀣𑀯𑁄𑀳𑀸𑀭𑁄 𑀯𑀺𑀬, 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀪𑀗𑁆𑀕𑁂 ‘‘𑀛𑀸𑀦𑀦𑁆𑀢𑀺 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁬𑁯). 𑀧𑀞𑀫𑀚𑁆𑀛𑀸𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀓𑀼𑀲𑀮𑀘𑀺𑀢𑁆𑀢𑀁 𑀧𑀞𑀫𑀚𑁆𑀛𑀸𑀦𑀓𑀼𑀲𑀮𑀘𑀺𑀢𑁆𑀢𑀁.

𑀓𑀲𑁆𑀫𑀸 𑀧𑀦 𑀅𑀜𑁆𑀜𑁂𑀲𑀼 𑀨𑀲𑁆𑀲𑀸𑀤𑀻𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀇𑀫𑁂𑀬𑁂𑀯 𑀧𑀜𑁆𑀘 𑀛𑀸𑀦𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀯𑀦𑁆𑀢𑀢𑀸𑀬, 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀘. 𑀯𑀺𑀢𑀓𑁆𑀓𑁄 𑀳𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺. 𑀯𑀺𑀘𑀸𑀭𑁄 𑀅𑀦𑀼𑀧𑁆𑀧𑀩𑀦𑁆𑀥𑁂𑀢𑀺, 𑀧𑀻𑀢𑀺 𑀘𑀲𑁆𑀲 𑀧𑀻𑀦𑀦𑀁, 𑀲𑀼𑀔𑀜𑁆𑀘 𑀉𑀧𑀩𑁆𑀭𑀽𑀳𑀦𑀁 𑀓𑀭𑁄𑀢𑀺, 𑀅𑀣 𑀦𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀏𑀢𑁂𑀳𑀺 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀧𑁆𑀧𑀩𑀦𑁆𑀥𑀦𑀧𑀻𑀦𑀦𑀉𑀧𑀩𑁆𑀭𑀽𑀳𑀦𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀏𑀓𑀕𑁆𑀕𑀢𑀸 𑀲𑀫𑀸𑀥𑀸𑀦𑀓𑀺𑀘𑁆𑀘𑁂𑀦 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀸𑀧𑁂𑀦𑁆𑀢𑀻 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀁, 𑀲𑀫𑁆𑀫𑀸 𑀘 𑀆𑀥𑀺𑀬𑀢𑀺. 𑀇𑀦𑁆𑀤𑁆𑀭𑀺𑀬𑀲𑀫𑀢𑀸𑀯𑀲𑁂𑀦 𑀲𑀫𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀮𑀻𑀦𑀼𑀤𑁆𑀥𑀘𑁆𑀘𑀸𑀪𑀸𑀯𑁂𑀦 𑀲𑀫𑁆𑀫𑀸 𑀘 𑀞𑀧𑁂𑀢𑀻𑀢𑀺 𑀏𑀯𑀫𑁂𑀢𑁂 𑀲𑀫𑁂𑀯 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀁 𑀆𑀯𑁂𑀡𑀺𑀓𑀁. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑀝𑀺𑀧𑀓𑁆𑀔𑀪𑀸𑀯𑁂 𑀧𑀦 𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄 𑀭𑀸𑀕𑀧𑁆𑀧𑀡𑀺𑀥𑀺𑀬𑀸 𑀉𑀚𑀼𑀧𑀘𑁆𑀘𑀦𑀻𑀓𑀪𑀸𑀯𑀢𑁄. 𑀓𑀸𑀫𑀘𑁆𑀙𑀦𑁆𑀤𑀯𑀲𑁂𑀦 𑀳𑀺 𑀦𑀸𑀦𑀸𑀭𑀫𑁆𑀫𑀡𑁂𑀳𑀺 𑀧𑀮𑁄𑀪𑀺𑀢𑀲𑁆𑀲 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀁 𑀏𑀓𑀕𑁆𑀕𑀢𑀸𑀬 𑀳𑁄𑀢𑀺. 𑀧𑀻𑀢𑀺 𑀩𑁆𑀬𑀸𑀧𑀸𑀤𑀲𑁆𑀲 𑀧𑀸𑀫𑁄𑀚𑁆𑀚𑀲𑀪𑀸𑀯𑀢𑁆𑀢𑀸. 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲 𑀬𑁄𑀦𑀺𑀲𑁄 𑀲𑀗𑁆𑀓𑀧𑁆𑀧𑀦𑀯𑀲𑁂𑀦 𑀲𑀯𑀺𑀧𑁆𑀨𑀸𑀭𑀧𑁆𑀧𑀯𑀢𑁆𑀢𑀺𑀢𑁄 𑀲𑀼𑀔𑀁 𑀅𑀯𑀽𑀧𑀲𑀫𑀸𑀦𑀼𑀢𑀸𑀧𑀲𑀪𑀸𑀯𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀯𑀽𑀧𑀲𑀦𑁆𑀢𑀲𑀻𑀢𑀮𑀲𑀪𑀸𑀯𑀢𑁆𑀢𑀸. 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀭𑀫𑁆𑀫𑀡𑁂 𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀧𑀜𑁆𑀜𑀸𑀧𑀢𑀺𑀭𑀽𑀧𑀲𑀪𑀸𑀯𑀢𑁆𑀢𑀸. 𑀏𑀯𑀁 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀯𑀦𑁆𑀢𑀢𑀸𑀬, 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀘 𑀇𑀫𑁂𑀬𑁂𑀯 𑀧𑀜𑁆𑀘 𑀛𑀸𑀦𑀗𑁆𑀕𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸𑀢𑀺. 𑀬𑀣𑀸𑀳𑀼 𑁋

‘‘𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀢𑁆𑀢𑀸, 𑀓𑀸𑀫𑀸𑀤𑀺𑀧𑀝𑀺𑀧𑀓𑁆𑀔𑀢𑁄;

𑀲𑀦𑁆𑀢𑁂𑀲𑀼𑀧𑀺 𑀘 𑀅𑀜𑁆𑀜𑁂𑀲𑀼, 𑀧𑀜𑁆𑀘𑁂𑀯 𑀛𑀸𑀦𑀲𑀜𑁆𑀜𑀺𑀢𑀸’’𑀢𑀺.

𑀉𑀧𑁂𑀓𑁆𑀔𑀸 𑀧𑀦𑁂𑀢𑁆𑀢 𑀲𑀦𑁆𑀢𑀯𑀼𑀢𑁆𑀢𑀺𑀲𑀪𑀸𑀯𑀢𑁆𑀢𑀸 𑀲𑀼𑀔𑁂𑀯 𑀅𑀦𑁆𑀢𑁄𑀕𑀥𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳𑀼 𑁋

‘‘𑀉𑀧𑁂𑀓𑁆𑀔𑀸 𑀲𑀦𑁆𑀢𑀯𑀼𑀢𑁆𑀢𑀺𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸’’𑀢𑀺. (𑀯𑀺𑀪. 𑀅𑀝𑁆𑀞. 𑁨𑁩𑁨; 𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁪);

𑀧𑀳𑀸𑀦𑀗𑁆𑀕𑀸𑀤𑀺𑀯𑀲𑁂𑀦 𑀧𑀦𑀲𑁆𑀲 𑀯𑀺𑀲𑁂𑀲𑁄 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺, 𑀢𑀣𑀸 𑀅𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑁂𑀲𑀼𑀧𑀺 𑀮𑀩𑁆𑀪𑀫𑀸𑀦𑀓𑀯𑀺𑀲𑁂𑀲𑁄. 𑀅𑀣𑁂𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑀼 𑀯𑀺𑀬 𑀲𑀗𑁆𑀔𑀸𑀭𑀪𑁂𑀤𑁄 𑀓𑀲𑁆𑀫𑀸 𑀦 𑀕𑀳𑀺𑀢𑁄. 𑀇𑀤𑀫𑁆𑀧𑀺 𑀳𑀺 𑀓𑁂𑀯𑀮𑀁 𑀲𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀧𑀝𑀺𑀮𑀤𑁆𑀥𑀁 𑀲𑀲𑀗𑁆𑀔𑀸𑀭𑀺𑀓𑀁, 𑀫𑀕𑁆𑀕𑀸𑀥𑀺𑀕𑀫𑀯𑀲𑁂𑀦 𑀧𑀝𑀺𑀮𑀤𑁆𑀥𑀁 𑀅𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 𑀫𑀕𑁆𑀕𑀸𑀥𑀺𑀕𑀫𑀯𑀲𑁂𑀦𑀲𑀢𑁆𑀢𑀺𑀢𑁄 𑀧𑀝𑀺𑀮𑀤𑁆𑀥𑀲𑁆𑀲𑀸𑀧𑀺 𑀅𑀧𑀭𑀪𑀸𑀕𑁂 𑀧𑀭𑀺𑀓𑀫𑁆𑀫𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀲𑁆𑀲𑀧𑀺 𑀛𑀸𑀦𑀲𑁆𑀲 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀅𑀥𑀺𑀓𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 ‘‘𑀅𑀲𑀗𑁆𑀔𑀸𑀭𑀺𑀓’’𑀦𑁆𑀢𑀺𑀧𑀺, 𑀅𑀥𑀺𑀓𑀸𑀭𑁂𑀦 𑀘 𑀯𑀺𑀦𑀸 𑀓𑁂𑀯𑀮𑀁 𑀧𑀭𑀺𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁂𑀦𑁂𑀯 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 ‘‘𑀲𑀲𑀗𑁆𑀔𑀸𑀭𑀺𑀓’’𑀦𑁆𑀢𑀺𑀧𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀅𑀣 𑀯𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀦 𑀓𑀤𑀸𑀘𑀺 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀲𑀫𑁆𑀪𑀯𑀢𑀻𑀢𑀺 ‘‘𑀅𑀲𑀗𑁆𑀔𑀸𑀭𑀺𑀓’’𑀦𑁆𑀢𑀺 𑀘 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄 ‘‘𑀲𑀲𑀗𑁆𑀔𑀸𑀭𑀺𑀓’’𑀦𑁆𑀢𑀺 𑀘 𑀦 𑀯𑀼𑀢𑁆𑀢𑀦𑁆𑀢𑀺.

𑀧𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀘𑀢𑀼𑀓𑁆𑀓𑀧𑀜𑁆𑀘𑀓𑀦𑀬𑀯𑀲𑁂𑀦 𑀲𑀼𑀤𑁆𑀥𑀺𑀓𑀦𑀯𑀓𑁄, 𑀢𑀜𑁆𑀘 𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀲𑀼𑀔𑀧𑁆𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀲𑀼𑀔𑀧𑁆𑀧𑀝𑀺𑀧𑀤𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀯𑀲𑁂𑀦 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑁂𑀦 𑀬𑁄𑀚𑁂𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀘𑀢𑁆𑀢𑀸𑀭𑁄 𑀦𑀯𑀓𑀸, 𑀧𑀭𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀦𑁆𑀢𑀺 𑀆𑀭𑀫𑁆𑀫𑀡𑀘𑀢𑀼𑀓𑁆𑀓𑁂𑀦 𑀬𑁄𑀚𑀺𑀢𑀢𑁆𑀢𑀸 𑀘𑀢𑁆𑀢𑀸𑀭𑁄 𑀦𑀯𑀓𑀸, ‘‘𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁 𑀧𑀭𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁 𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑁆𑀬𑀸𑀤𑀺𑀦𑀸 𑀆𑀭𑀫𑁆𑀫𑀡𑀧𑁆𑀧𑀝𑀺𑀧𑀤𑀸𑀫𑀺𑀲𑁆𑀲𑀓𑀦𑀬𑀯𑀲𑁂𑀦 𑀲𑁄𑀴𑀲 𑀦𑀯𑀓𑀸𑀢𑀺 𑀧𑀜𑁆𑀘𑀯𑀻𑀲𑀢𑀺 𑀦𑀯𑀓𑀸𑀢𑀺 𑀏𑀯𑀫𑀸𑀤𑀺𑀪𑁂𑀤𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁨. 𑀛𑀸𑀦𑀯𑀺𑀲𑁂𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀧𑀸𑀓𑁄 𑀏𑀓𑀦𑁆𑀢𑀢𑁄 𑀢𑀁𑀢𑀁𑀛𑀸𑀦𑀲𑀤𑀺𑀲𑁄𑀯𑀸𑀢𑀺 𑀯𑀺𑀧𑀸𑀓𑀁 𑀛𑀸𑀦𑀲𑀤𑀺𑀲𑀫𑁂𑀯 𑀯𑀺𑀪𑀢𑁆𑀢𑀁. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀻𑀧𑁂𑀢𑀼𑀁 𑀪𑀕𑀯𑀢𑀸 𑀯𑀺𑀧𑀸𑀓𑀦𑀺𑀤𑁆𑀤𑁂𑀲𑁂𑀧𑀺 𑀓𑀼𑀲𑀮𑀁 𑀉𑀤𑁆𑀤𑀺𑀲𑀺𑀢𑁆𑀯𑀸𑀯 𑀢𑀤𑀦𑀦𑁆𑀢𑀭𑀁 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸 𑀯𑀺𑀪𑀢𑁆𑀢𑀸.

𑁨𑁫. 𑀭𑀽𑀧𑀸𑀯𑀘𑀭𑀫𑀸𑀦𑀲𑀁 𑀛𑀸𑀦𑀪𑁂𑀤𑁂𑀦 𑀧𑀜𑁆𑀘𑀳𑀺 𑀘𑀢𑀽𑀳𑀺 𑀢𑀻𑀳𑀺 𑀤𑁆𑀯𑀻𑀳𑀺 𑀧𑀼𑀦 𑀤𑁆𑀯𑀻𑀳𑀺 𑀛𑀸𑀦𑀗𑁆𑀕𑁂𑀳𑀺 𑀲𑀫𑁆𑀧𑀬𑁄𑀕𑀪𑁂𑀤𑁂𑀦 𑀧𑀜𑁆𑀘𑀥𑀸 𑀧𑀜𑁆𑀘𑀗𑁆𑀕𑀺𑀓𑀁 𑀘𑀢𑀼𑀭𑀗𑁆𑀕𑀺𑀓𑀁 𑀢𑀺𑀯𑀗𑁆𑀕𑀺𑀓𑀁 𑀤𑀼𑀯𑀗𑁆𑀕𑀺𑀓𑀁 𑀧𑀼𑀦 𑀤𑀼𑀯𑀗𑁆𑀕𑀺𑀓𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺 𑀅𑀯𑀺𑀲𑁂𑀲𑁂𑀦, 𑀧𑀼𑀦 𑀢𑀁 𑀧𑀼𑀜𑁆𑀜𑀧𑀸𑀓𑀓𑀺𑀭𑀺𑀬𑀸𑀦𑀁 𑀧𑀘𑁆𑀘𑁂𑀓𑀁 𑀧𑀜𑁆𑀘𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀪𑁂𑀤𑀸 𑀧𑀜𑁆𑀘𑀤𑀲𑀥𑀸 𑀪𑀯𑁂𑀢𑁆𑀬𑀢𑁆𑀣𑁄.

𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀇𑀤𑀸𑀦𑀺 𑀅𑀭𑀽𑀧𑀸𑀯𑀘𑀭𑀁 𑀆𑀭𑀫𑁆𑀫𑀡𑀪𑁂𑀤𑁂𑀦 𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑁆𑀧𑀸𑀤𑀸𑀤𑀺𑀅𑀦𑁆𑀢𑀭𑀳𑀺𑀢𑀢𑀸𑀬 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁, 𑀆𑀓𑀸𑀲𑀜𑁆𑀘 𑀢𑀁 𑀅𑀦𑀦𑁆𑀢𑀜𑁆𑀘𑀸𑀢𑀺 𑀆𑀓𑀸𑀲𑀸𑀦𑀦𑁆𑀢𑀁, 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁄. ‘‘𑀅𑀦𑀦𑁆𑀢𑀸𑀓𑀸𑀲’’𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑁂 ‘‘𑀅𑀕𑁆𑀬𑀸𑀳𑀺𑀢𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑀯𑀲𑁂𑀦 ‘‘𑀆𑀓𑀸𑀲𑀸𑀦𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀓𑀸𑀲𑀸𑀦𑀦𑁆𑀢𑀫𑁂𑀯 𑀆𑀓𑀸𑀲𑀸𑀦𑀜𑁆𑀘𑀁 𑀲𑀓𑀢𑁆𑀣𑁂 𑀪𑀸𑀯𑀧𑀘𑁆𑀘𑀬𑀯𑀲𑁂𑀦. 𑀆𑀓𑀸𑀲𑀸𑀦𑀜𑁆𑀘𑀫𑁂𑀯 𑀆𑀬𑀢𑀦𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀁 𑀯𑀺𑀬𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀢𑀲𑁆𑀫𑀺𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀧𑀞𑀫𑀸𑀭𑀼𑀧𑁆𑀧𑀚𑁆𑀛𑀸𑀦𑀫𑁆𑀧𑀺 𑀇𑀥 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀧𑀣𑀯𑀻𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 ‘‘𑀧𑀣𑀯𑀻𑀓𑀲𑀺𑀡’’𑀦𑁆𑀢𑀺. 𑀅𑀣 𑀯𑀸 𑀆𑀓𑀸𑀲𑀸𑀦𑀜𑁆𑀘𑀁 𑀆𑀬𑀢𑀦𑀁 𑀅𑀲𑁆𑀲𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀛𑀸𑀦𑀁, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀓𑀼𑀲𑀮𑀘𑀺𑀢𑁆𑀢𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀘𑀺𑀢𑁆𑀢𑀁.

𑀯𑀺𑀜𑁆𑀜𑀸𑀡𑀫𑁂𑀯 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀁, 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀉𑀧𑁆𑀧𑀸𑀤𑀸𑀤𑀺𑀅𑀦𑁆𑀢𑀯𑀦𑁆𑀢𑀫𑁆𑀧𑀺 𑀅𑀦𑀦𑁆𑀢𑀸𑀓𑀸𑀲𑁂 𑀧𑀯𑀢𑁆𑀢𑀦𑀢𑁄 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸𑀬 𑀪𑀸𑀯𑀦𑀸𑀬 𑀉𑀧𑁆𑀧𑀸𑀤𑀸𑀤𑀺𑀅𑀦𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀦𑀦𑁆𑀢𑀢𑁄 𑀨𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀘 ‘‘𑀅𑀦𑀦𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀫𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀁 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀦-𑀓𑀸𑀭𑀲𑁆𑀲 𑀮𑁄𑀧𑀜𑁆𑀘 𑀓𑀢𑁆𑀯𑀸. 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂𑀦 𑀯𑀸 𑀅𑀜𑁆𑀘𑀺𑀢𑀩𑁆𑀩𑀁 𑀧𑀸𑀧𑀼𑀡𑀺𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀁, 𑀢𑀤𑁂𑀯 𑀆𑀬𑀢𑀦𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀅𑀥𑀺𑀝𑁆𑀞𑀸𑀦𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀫𑀁.

𑀦𑀸𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀲𑁆𑀲 𑀓𑀺𑀜𑁆𑀘𑀦𑀁 𑀅𑀧𑁆𑀧𑀫𑀢𑁆𑀢𑀓𑀁 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀯𑀲𑀺𑀝𑁆𑀞𑀁 𑀅𑀢𑁆𑀣𑀻𑀢𑀺 𑀅𑀓𑀺𑀜𑁆𑀘𑀦𑀁, 𑀢𑀲𑁆𑀲 𑀪𑀸𑀯𑁄 𑀆𑀓𑀺𑀜𑁆𑀘𑀜𑁆𑀜𑀁, 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑁄. 𑀢𑀤𑁂𑀯 𑀆𑀬𑀢𑀦𑀦𑁆𑀢𑁆𑀬𑀸𑀤𑀺 𑀧𑀼𑀭𑀺𑀫𑀲𑀤𑀺𑀲𑀁.

𑀑𑀴𑀸𑀭𑀺𑀓𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄, 𑀲𑀼𑀔𑀼𑀫𑀸𑀬 𑀘 𑀲𑀜𑁆𑀜𑀸𑀬 𑀅𑀢𑁆𑀣𑀺𑀢𑀸𑀬 𑀦𑁂𑀯𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀲𑀜𑁆𑀜𑀸 𑀅𑀢𑁆𑀣𑀺, 𑀦𑀸𑀧𑀺 𑀅𑀲𑀜𑁆𑀜𑀁 𑀅𑀯𑀺𑀚𑁆𑀚𑀫𑀸𑀦𑀲𑀜𑁆𑀜𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀁, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑁆𑀛𑀸𑀦𑀁. 𑀤𑀻𑀖𑀁 𑀓𑀢𑁆𑀯𑀸 𑀧𑀦 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀫𑁂𑀯 𑀆𑀬𑀢𑀦𑀁 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀅𑀣 𑀯𑀸 𑀲𑀜𑁆𑀜𑀸𑀯 𑀯𑀺𑀧𑀲𑁆𑀲𑀦𑀸𑀬 𑀕𑁄𑀘𑀭𑀪𑀸𑀯𑀁 𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑁂𑀤𑀚𑀦𑀦𑀲𑀗𑁆𑀔𑀸𑀢𑀲𑁆𑀲 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄 𑀦𑁂𑀯𑀲𑀜𑁆𑀜𑀸 𑀘 𑀉𑀡𑁆𑀳𑁄𑀤𑀓𑁂 𑀢𑁂𑀚𑁄𑀥𑀸𑀢𑀼 𑀯𑀺𑀬 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦 𑀅𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸, 𑀲𑀸 𑀏𑀯 𑀆𑀬𑀢𑀦𑀁 𑀇𑀫𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑀢𑁄𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀲𑀜𑁆𑀜𑀸𑀯𑀲𑁂𑀦 𑀘𑁂𑀢𑁆𑀣 𑀛𑀸𑀦𑀽𑀧𑀮𑀓𑁆𑀔𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀯𑁂𑀤𑀦𑀸𑀤𑀬𑁄𑀧𑀺 𑀳𑀺 𑀢𑀲𑁆𑀫𑀺𑀁 𑀛𑀸𑀦𑁂 𑀦𑁂𑀯𑀯𑁂𑀤𑀦𑀸𑀦𑀸𑀯𑁂𑀤𑀦𑀸𑀤𑀺𑀓𑀸𑀬𑁂𑀯𑀸𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀓𑀼𑀲𑀮𑀘𑀺𑀢𑁆𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀘𑀺𑀢𑁆𑀢𑀁. 𑀧𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀆𑀭𑀫𑁆𑀫𑀡𑀧𑁆𑀧𑀝𑀺𑀧𑀤𑀸𑀫𑀺𑀲𑁆𑀲𑀓𑀦𑀬𑀯𑀲𑁂𑀦 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀤𑁂𑀲𑀦𑀁 (𑀥. 𑀲. 𑁨𑁬𑁫-𑁨𑁬𑁮), 𑀅𑀜𑁆𑀜𑀫𑁆𑀧𑀺 𑀘 𑀧𑀸𑀴𑀺𑀬𑀁 𑀆𑀕𑀢𑀦𑀬𑀪𑁂𑀤𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁩𑁦. 𑀆𑀭𑀫𑁆𑀫𑀡𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀦𑀁, 𑀓𑀲𑀺𑀡𑀸𑀓𑀸𑀲𑀯𑀺𑀜𑁆𑀜𑀸𑀡𑀢𑀤𑀪𑀸𑀯𑀲𑀗𑁆𑀔𑀸𑀢𑀸𑀦𑀁 𑀆𑀮𑀫𑁆𑀩𑀺𑀢𑀩𑁆𑀩𑀸𑀦𑀜𑁆𑀘 𑀆𑀓𑀸𑀲𑀸𑀤𑀺𑀘𑀢𑀼𑀦𑁆𑀦𑀁 𑀕𑁄𑀘𑀭𑀸𑀦𑀁 𑀧𑀪𑁂𑀤𑁂𑀦 𑀆𑀭𑀼𑀧𑁆𑀧𑀫𑀸𑀦𑀲𑀁 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀜𑁆𑀳𑀺 𑀬𑀣𑀸𑀓𑁆𑀓𑀫𑀁 𑀧𑀜𑁆𑀘𑀫𑀚𑁆𑀛𑀸𑀦𑀸𑀭𑀫𑁆𑀫𑀡𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀅𑀢𑀺𑀓𑁆𑀓𑀫𑁆𑀫 𑀢𑀤𑀼𑀕𑁆𑀖𑀸𑀝𑁂𑀦 𑀮𑀤𑁆𑀥𑀁 𑀆𑀓𑀸𑀲𑀫𑀸𑀮𑀫𑁆𑀩𑀺𑀢𑁆𑀯𑀸 𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀢𑀢𑁆𑀣 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀫𑀸𑀮𑀫𑁆𑀩𑀺𑀢𑁆𑀯𑀸 𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀢𑀤𑀪𑀸𑀯𑀪𑀽𑀢𑀁 𑀅𑀓𑀺𑀜𑁆𑀘𑀦𑀪𑀸𑀯𑀫𑀸𑀮𑀫𑁆𑀩𑀺𑀢𑁆𑀯𑀸 𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀢𑀢𑁆𑀣 𑀧𑀯𑀢𑁆𑀢𑀁 𑀢𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀫𑀸𑀮𑀫𑁆𑀩𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀦 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀯𑀺𑀬 𑀧𑀼𑀭𑀺𑀫𑀧𑀼𑀭𑀺𑀫𑀅𑀗𑁆𑀕𑀸𑀢𑀺𑀓𑁆𑀓𑀫𑀯𑀲𑁂𑀦 𑀧𑀼𑀭𑀺𑀫𑀧𑀼𑀭𑀺𑀫𑀲𑁆𑀲𑀸𑀧𑀺 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸. 𑀢𑁂𑀦𑀸𑀳𑀼 𑀆𑀘𑀭𑀺𑀬𑀸 𑁋

‘‘𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄, 𑀘𑀢𑀲𑁆𑀲𑁄𑀧𑀺 𑀪𑀯𑀦𑁆𑀢𑀺𑀫𑀸;

𑀅𑀗𑁆𑀕𑀸𑀢𑀺𑀓𑁆𑀓𑀫𑀫𑁂𑀢𑀸𑀲𑀁, 𑀦 𑀇𑀘𑁆𑀙𑀦𑁆𑀢𑀺 𑀯𑀺𑀪𑀸𑀯𑀺𑀦𑁄’’𑀢𑀺; (𑀥. 𑀲. 𑀅𑀝𑁆𑀞. 𑁨𑁬𑁮);

𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀪𑀦𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀘𑀢𑀼𑀫𑀕𑁆𑀕𑀬𑁄𑀕𑀢𑁄, 𑀨𑀮𑀜𑁆𑀘 𑀢𑀤𑀦𑀼𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸 𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀁 𑀧𑀢𑀺𑀲𑀯𑀦𑀢𑁄 𑀉𑀧𑀕𑀫𑀦𑀢𑁄, 𑀦𑀺𑀩𑁆𑀩𑀸𑀦𑀫𑀳𑀸𑀲𑀫𑀼𑀤𑁆𑀤𑀦𑀺𑀦𑁆𑀦𑀢𑀸𑀬 𑀲𑁄𑀢𑀲𑀤𑀺𑀲𑀢𑁆𑀢𑀸 𑀯𑀸 ‘‘𑀲𑁄𑀢𑁄’’𑀢𑀺 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀢𑀲𑁆𑀲 𑀆𑀧𑀢𑁆𑀢𑀺 𑀆𑀤𑀺𑀢𑁄 𑀧𑀚𑁆𑀚𑀦𑀁 𑀧𑀸𑀧𑀼𑀡𑀦𑀁 𑀧𑀞𑀫𑀲𑀫𑀦𑁆𑀦𑀸𑀕𑀫𑁄 𑀲𑁄𑀢𑀸𑀧𑀢𑁆𑀢𑀺 𑀆-𑀉𑀧𑀲𑀕𑁆𑀕𑀲𑁆𑀲 𑀆𑀤𑀺𑀓𑀫𑁆𑀫𑀦𑀺 𑀧𑀯𑀢𑁆𑀢𑀦𑀢𑁄. 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑁂𑀢𑀺, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀯𑀸 𑀫𑀕𑁆𑀕𑀻𑀬𑀢𑀺, 𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀯𑀸 𑀫𑀕𑁆𑀕𑁄, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀲𑁄𑀢𑀸𑀧𑀢𑁆𑀢𑀺𑀬𑀸 𑀮𑀤𑁆𑀥𑀁 𑀫𑀕𑁆𑀕𑀘𑀺𑀢𑁆𑀢𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁. 𑀅𑀣 𑀯𑀸 𑀅𑀭𑀺𑀬𑀫𑀕𑁆𑀕𑀲𑁄𑀢𑀲𑁆𑀲 𑀆𑀤𑀺𑀢𑁄 𑀧𑀚𑁆𑀚𑀦𑀁 𑀏𑀢𑀲𑁆𑀲𑀸𑀢𑀺 𑀲𑁄𑀢𑀸𑀧𑀢𑁆𑀢𑀺, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁.

𑀲𑀓𑀺𑀁 𑀏𑀓𑀯𑀸𑀭𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀇𑀫𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻, 𑀇𑀥 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀢𑀢𑁆𑀣 𑀧𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀇𑀥 𑀧𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀢𑀢𑁆𑀣 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀇𑀥 𑀧𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀧𑀜𑁆𑀘𑀫𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀇𑀢𑁄 𑀕𑀦𑁆𑀢𑁆𑀯𑀸 𑀧𑀼𑀦 𑀲𑀓𑀺𑀁 𑀇𑀥 𑀆𑀕𑀘𑁆𑀙𑀢𑀻𑀢𑀺. 𑀢𑀲𑁆𑀲 𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄. 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀢𑀣𑀸𑀕𑀫𑀦𑀸𑀲𑀫𑁆𑀪𑀯𑀢𑁄 𑀨𑀮𑀝𑁆𑀞𑁄𑀬𑁂𑀯 𑀲𑀓𑀤𑀸𑀕𑀸𑀫𑀻 𑀦𑀸𑀫, 𑀢𑀲𑁆𑀲 𑀧𑀦 𑀓𑀸𑀭𑀡𑀪𑀽𑀢𑁄 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑁄 𑀫𑀕𑁆𑀕𑁄 𑀫𑀕𑁆𑀕𑀦𑁆𑀢𑀭𑀸𑀯𑀘𑁆𑀙𑁂𑀤𑀦𑀢𑁆𑀣𑀁 𑀨𑀮𑀝𑁆𑀞𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀘𑁆𑀘𑀢𑀺 ‘‘𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄’’𑀢𑀺. 𑀏𑀯𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁄𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁.

𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀇𑀫𑀁 𑀓𑀸𑀫𑀥𑀸𑀢𑀼𑀁 𑀦 𑀆𑀕𑀘𑁆𑀙𑀢𑀻𑀢𑀺 𑀅𑀦𑀸𑀕𑀸𑀫𑀻, 𑀢𑀲𑁆𑀲 𑀫𑀕𑁆𑀕𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁄, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁. 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁂𑀦 𑀧𑀽𑀚𑀸𑀯𑀺𑀲𑁂𑀲𑀁 𑀅𑀭𑀳𑀢𑀻𑀢𑀺 𑀅𑀭𑀳𑀸, 𑀅𑀣 𑀯𑀸 𑀓𑀺𑀮𑁂𑀲𑀲𑀗𑁆𑀔𑀸𑀢𑀸 𑀅𑀭𑀬𑁄, 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀯𑀸 𑀅𑀭𑀸 𑀓𑀺𑀮𑁂𑀲𑀸 𑀳𑀢𑀸 𑀅𑀦𑁂𑀦𑀸𑀢𑀺 𑀅𑀭𑀳𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀢𑁄 𑀯𑀸 𑀅𑀭𑀳𑀸, 𑀅𑀝𑁆𑀞𑀫𑀓𑁄 𑀅𑀭𑀺𑀬𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀅𑀭𑀳𑀢𑁆𑀢𑀁, 𑀘𑀢𑀼𑀢𑁆𑀣𑀨𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀲 𑀆𑀕𑀫𑀦𑀪𑀽𑀢𑁄 𑀫𑀕𑁆𑀕𑁄 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀁.

𑀧𑀺-𑀲𑀤𑁆𑀤𑁂𑀦 𑀏𑀓𑁂𑀓𑀲𑁆𑀲 𑀫𑀕𑁆𑀕𑀲𑁆𑀲 𑀦𑀬𑀲𑀳𑀲𑁆𑀲𑀯𑀲𑁂𑀦 𑀘𑀢𑀼𑀦𑁆𑀦𑀁 𑀘𑀢𑀼𑀲𑀳𑀲𑁆𑀲𑀪𑁂𑀤𑀁 𑀲𑀘𑁆𑀘𑀯𑀺𑀪𑀗𑁆𑀕𑁂 (𑀯𑀺𑀪. 𑁨𑁦𑁬; 𑀯𑀺𑀪. 𑀅𑀝𑁆𑀞. 𑁨𑁦𑁬-𑁨𑁧𑁪) 𑀆𑀕𑀢𑀁 𑀲𑀝𑁆𑀞𑀺𑀲𑀳𑀲𑁆𑀲𑀪𑁂𑀤𑀁 𑀦𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀦𑁂𑀓𑀯𑀺𑀥𑀢𑁆𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣𑀸𑀬𑀁 𑀦𑀬𑀲𑀳𑀲𑁆𑀲𑀫𑀢𑁆𑀢𑀧𑀭𑀺𑀤𑀻𑀧𑀦𑀸, 𑀓𑀣𑀁? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀢𑀸𑀯 𑀛𑀸𑀦𑀦𑀸𑀫𑁂𑀦 𑀧𑀝𑀺𑀧𑀤𑀸𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑁂𑀯𑀮𑀁 𑀲𑀼𑀜𑁆𑀜𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀤𑁆𑀯𑀺𑀥𑀸 𑀯𑀺𑀪𑀢𑁆𑀢𑁄, 𑀧𑀼𑀦 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑁂𑀦 𑀬𑁄𑀚𑁂𑀢𑁆𑀯𑀸 𑀧𑀘𑁆𑀘𑁂𑀓𑀁 𑀘𑀢𑀼𑀥𑀸 𑀯𑀺𑀪𑀢𑁆𑀢𑁄𑀢𑀺 𑀏𑀯𑀁 𑀛𑀸𑀦𑀦𑀸𑀫𑁂𑀦 𑀤𑀲𑀥𑀸 𑀯𑀺𑀪𑀢𑁆𑀢𑁄. 𑀢𑀣𑀸 𑀫𑀕𑁆𑀕𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀲𑀘𑁆𑀘𑀲𑀫𑀣𑀥𑀫𑁆𑀫𑀔𑀦𑁆𑀥𑀆𑀬𑀢𑀦𑀥𑀸𑀢𑀼𑀆𑀳𑀸𑀭𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸𑀘𑁂𑀢𑀦𑀸𑀘𑀺𑀢𑁆𑀢𑀦𑀸𑀫𑁂𑀳𑀺𑀧𑀺 𑀧𑀘𑁆𑀘𑁂𑀓𑀁 𑀤𑀲𑀤𑀲𑀸𑀓𑀸𑀭𑁂𑀳𑀺 𑀯𑀺𑀪𑀢𑁆𑀢𑁄 𑀢𑀣𑀸 𑀢𑀣𑀸 𑀩𑀼𑀚𑁆𑀛𑀦𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦. 𑀢𑀲𑁆𑀫𑀸 𑀛𑀸𑀦𑀯𑀲𑁂𑀦 𑀤𑀲𑀫𑀕𑁆𑀕𑀸𑀤𑀻𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁂𑀦 𑀤𑀲 𑀤𑀲𑀸𑀢𑀺 𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀤𑁆𑀯𑁂 𑀦𑀬𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀼𑀦 𑀢𑀸𑀦𑀺 𑀘𑀢𑀽𑀳𑀺 𑀅𑀥𑀺𑀧𑀢𑀻𑀳𑀺 𑀬𑁄𑀚𑁂𑀢𑁆𑀯𑀸 𑀧𑀘𑁆𑀘𑁂𑀓𑀁 𑀘𑀢𑀼𑀥𑀸 𑀯𑀺𑀪𑀢𑁆𑀢𑀸𑀦𑀻𑀢𑀺 𑀏𑀯𑀁 𑀅𑀥𑀺𑀧𑀢𑀻𑀳𑀺 𑀅𑀫𑀺𑀲𑁆𑀲𑁂𑀢𑁆𑀯𑀸 𑀤𑁆𑀯𑁂 𑀲𑀢𑀸𑀦𑀺, 𑀫𑀺𑀲𑁆𑀲𑁂𑀢𑁆𑀯𑀸 𑀅𑀝𑁆𑀞 𑀲𑀢𑀸𑀦𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀦𑀬𑀲𑀳𑀲𑁆𑀲𑀁 𑀳𑁄𑀢𑀺, 𑀢𑀣𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀻𑀲𑀼𑀧𑀺.

𑁩𑁨. 𑀲𑁄𑀢𑀸𑀧𑀢𑁆𑀢𑀺𑀬𑀸 𑀮𑀤𑁆𑀥𑀁, 𑀲𑁄𑀢𑀸𑀧𑀢𑁆𑀢𑀺𑀲𑁆𑀲 𑀯𑀸 𑀨𑀮𑀘𑀺𑀢𑁆𑀢𑀁 𑀯𑀺𑀧𑀸𑀓𑀪𑀽𑀢𑀁 𑀘𑀺𑀢𑁆𑀢𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀘𑀺𑀢𑁆𑀢𑀁. 𑀅𑀭𑀳𑀢𑁆𑀢𑀜𑁆𑀘 𑀢𑀁 𑀨𑀮𑀘𑀺𑀢𑁆𑀢𑀜𑁆𑀘𑀸𑀢𑀺 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑀁.

𑁩𑁪. 𑀘𑀢𑀼𑀫𑀕𑁆𑀕𑀧𑁆𑀧𑀪𑁂𑀤𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀸𑀝𑀯𑀧𑀸𑀝𑀯𑀢𑀭𑀢𑀫𑀪𑁂𑀤𑁂𑀦 𑀪𑀺𑀦𑁆𑀦𑀲𑀸𑀫𑀢𑁆𑀣𑀺𑀬𑀢𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸𑀦𑀁 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀁 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀸𑀧𑀸𑀤𑀦𑀁 𑀢𑁂𑀲𑀫𑁂𑀯 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀁 𑀭𑀽𑀧𑀸𑀭𑀽𑀧𑀭𑀸𑀕𑀫𑀸𑀦𑀼𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀦𑁆𑀢𑀺 𑀏𑀯𑀁 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀁 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀸𑀦𑀁 𑀲𑀫𑁆𑀧𑀬𑁄𑀕𑀪𑁂𑀤𑁂𑀦 𑀘𑀢𑀼𑀫𑀕𑁆𑀕𑀲𑀗𑁆𑀔𑀸𑀢𑀁 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀘𑀢𑀼𑀥𑀸 𑀳𑁄𑀢𑀺, 𑀯𑀺𑀧𑀸𑀓𑀁 𑀧𑀦 𑀢𑀲𑁆𑀲𑁂𑀯 𑀓𑀼𑀲𑀮𑀲𑁆𑀲 𑀨𑀮𑀢𑁆𑀢𑀸 𑀢𑀤𑀦𑀼𑀭𑀽𑀧𑀢𑁄 𑀢𑀣𑀸 𑀘𑀢𑀼𑀥𑀸𑀢𑀺 𑀏𑀯𑀁 𑀅𑀦𑀼𑀢𑁆𑀢𑀭𑀁 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀲𑀗𑁆𑀔𑀸𑀢𑀁 𑀮𑁄𑀓𑀼𑀢𑁆𑀢𑀭𑀁 𑀘𑀺𑀢𑁆𑀢𑀁 𑀅𑀝𑁆𑀞𑀥𑀸 𑀫𑀢𑀦𑁆𑀢𑀺 𑀬𑁄𑀚𑀦𑀸.

𑀓𑀺𑀭𑀺𑀬𑀸𑀦𑀼𑀢𑁆𑀢𑀭𑀲𑁆𑀲 𑀧𑀦 𑀅𑀲𑀫𑁆𑀪𑀯𑀢𑁄 𑀤𑁆𑀯𑀸𑀤𑀲𑀯𑀺𑀥𑀢𑀸 𑀦 𑀯𑀼𑀢𑁆𑀢𑀸. 𑀓𑀲𑁆𑀫𑀸 𑀧𑀦 𑀢𑀲𑁆𑀲 𑀅𑀲𑀫𑁆𑀪𑀯𑁄𑀢𑀺? 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸. 𑀬𑀤𑀺 𑀳𑀺 𑀫𑀕𑁆𑀕𑀘𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀤𑀼𑀧𑁆𑀧𑀢𑁆𑀢𑀺𑀬𑀸 𑀓𑀺𑀭𑀺𑀬𑀪𑀸𑀯𑁄 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀁 𑀧𑀦 𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑀓𑀯𑀲𑁂𑀦𑁂𑀯 𑀉𑀧𑀮𑀪𑀺𑀢𑀩𑁆𑀩𑀢𑁄 𑀏𑀓𑀯𑀸𑀭𑀧𑁆𑀧𑀯𑀢𑁆𑀢𑁂𑀦𑁂𑀯 𑀘 𑀢𑁂𑀦 𑀅𑀲𑀦𑀺𑀲𑀫𑁆𑀧𑀸𑀢𑁂𑀦 𑀯𑀺𑀬 𑀢𑀭𑀼𑀆𑀤𑀻𑀦𑀁 𑀲𑀫𑀽𑀮𑀯𑀺𑀤𑁆𑀥𑀁𑀲𑀦𑀲𑁆𑀲 𑀢𑀁𑀢𑀁𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀬𑀸 𑀲𑀸𑀥𑀺𑀢𑀢𑁆𑀢𑀸 𑀧𑀼𑀦 𑀉𑀧𑁆𑀧𑀚𑁆𑀚𑀫𑀸𑀦𑁂𑀧𑀺 𑀓𑀸𑀢𑀩𑁆𑀩𑀸𑀪𑀸𑀯𑀢𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀜𑁆𑀘 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀏𑀯 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀦 𑀓𑀤𑀸𑀘𑀺 𑀲𑁂𑀓𑁆𑀔𑀸𑀦𑀁 𑀅𑀲𑁂𑀓𑁆𑀔𑀸𑀦𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀦𑀢𑁆𑀣𑀺 𑀲𑀩𑁆𑀩𑀣𑀸𑀧𑀺 𑀮𑁄𑀓𑀼𑀢𑁆𑀢𑀭𑀓𑀺𑀭𑀺𑀬𑀘𑀺𑀢𑁆𑀢𑀦𑁆𑀢𑀺.

𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀕𑀡𑀦𑀲𑀗𑁆𑀕𑀳𑀯𑀡𑁆𑀡𑀦𑀸

𑁩𑁫. ‘‘𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑁂𑀯’’𑀦𑁆𑀢𑁆𑀬𑀸𑀤𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀘𑀢𑀼𑀪𑀽𑀫𑀺𑀓𑀘𑀺𑀢𑁆𑀢𑀸𑀦𑀁 𑀕𑀡𑀦𑀲𑀗𑁆𑀕𑀳𑁄.

𑁩𑁬. 𑀏𑀯𑀁 𑀚𑀸𑀢𑀺𑀯𑀲𑁂𑀦 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀪𑀽𑀫𑀺𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀧𑀜𑁆𑀜𑀸𑀲𑀥𑀸 𑀓𑀸𑀫𑁂’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀓𑀸𑀫𑁂 𑀪𑀯𑁂 𑀘𑀺𑀢𑁆𑀢𑀸𑀦𑀺 𑀘𑀢𑀼𑀧𑀜𑁆𑀜𑀸𑀲𑀥𑀸 𑀈𑀭𑀬𑁂, 𑀭𑀽𑀧𑁂 𑀪𑀯𑁂 𑀧𑀦𑁆𑀦𑀭𑀲 𑀈𑀭𑀬𑁂, 𑀆𑀭𑀼𑀧𑁆𑀧𑁂 𑀪𑀯𑁂 𑀤𑁆𑀯𑀸𑀤𑀲 𑀈𑀭𑀬𑁂, 𑀅𑀦𑀼𑀢𑁆𑀢𑀭𑁂 𑀧𑀦 𑀦𑀯𑀯𑀺𑀥𑁂 𑀥𑀫𑁆𑀫𑀲𑀫𑀼𑀤𑀸𑀬𑁂 𑀘𑀺𑀢𑁆𑀢𑀸𑀦𑀺 𑀅𑀝𑁆𑀞𑀥𑀸 𑀈𑀭𑀬𑁂, 𑀓𑀣𑁂𑀬𑁆𑀬𑀸𑀢𑁆𑀬𑀢𑁆𑀣𑁄. 𑀏𑀢𑁆𑀣 𑀘 𑀓𑀸𑀫𑀢𑀡𑁆𑀳𑀸𑀤𑀺𑀯𑀺𑀲𑀬𑀪𑀸𑀯𑁂𑀦 𑀓𑀸𑀫𑀪𑀯𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀘𑀺𑀢𑁆𑀢𑀸𑀦𑀺 𑀲𑀓𑀲𑀓𑀪𑀽𑀫𑀺𑀢𑁄 𑀅𑀜𑁆𑀜𑀢𑁆𑀣 𑀧𑀯𑀢𑁆𑀢𑀫𑀸𑀦𑀸𑀦𑀺𑀧𑀺 𑀓𑀸𑀫𑀪𑀯𑀸𑀤𑀻𑀲𑀼 𑀘𑀺𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀬𑀣𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑁂𑀲𑁆𑀯𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀓𑀢𑁆𑀣𑀘𑀺 𑀅𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀫𑀽𑀳𑁂𑀓𑀤𑁂𑀲𑀪𑀽𑀢𑀸𑀦𑀺 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀅𑀦𑀼𑀢𑁆𑀢𑀭𑁂 𑀘𑀺𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀅𑀣 𑀯𑀸 ‘‘𑀓𑀸𑀫𑁂, 𑀭𑀽𑀧𑁂’’𑀢𑀺 𑀘 𑀉𑀢𑁆𑀢𑀭𑀧𑀤𑀮𑁄𑀧𑀦𑀺𑀤𑁆𑀤𑁂𑀲𑁄. 𑀅𑀭𑀽𑀧𑁂 𑀪𑀯𑀸𑀦𑀺 𑀆𑀭𑀼𑀧𑁆𑀧𑀸𑀦𑀺. 𑀦𑀢𑁆𑀣𑀺 𑀏𑀢𑁂𑀲𑀁 𑀉𑀢𑁆𑀢𑀭𑀁 𑀘𑀺𑀢𑁆𑀢𑀦𑁆𑀢𑀺 𑀅𑀦𑀼𑀢𑁆𑀢𑀭𑀸𑀦𑀻𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀯𑀲𑁂𑀦 𑀓𑀸𑀫𑁂 𑀓𑀸𑀫𑀸𑀯𑀘𑀭𑀸𑀦𑀺 𑀘𑀺𑀢𑁆𑀢𑀸𑀦𑀺 𑀘𑀢𑀼𑀧𑀜𑁆𑀜𑀸𑀲𑀥𑀸 𑀈𑀭𑀬𑁂, 𑀭𑀽𑀧𑁂 𑀭𑀽𑀧𑀸𑀯𑀘𑀭𑀸𑀦𑀺 𑀘𑀺𑀢𑁆𑀢𑀸𑀦𑀺 𑀧𑀦𑁆𑀦𑀭𑀲 𑀈𑀭𑀬𑁂, 𑀆𑀭𑀼𑀧𑁆𑀧𑁂 𑀆𑀭𑀼𑀧𑁆𑀧𑀸𑀦𑀺 𑀘𑀺𑀢𑁆𑀢𑀸𑀦𑀺 𑀤𑁆𑀯𑀸𑀤𑀲 𑀈𑀭𑀬𑁂. 𑀅𑀦𑀼𑀢𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀸𑀦𑀺 𑀘𑀺𑀢𑁆𑀢𑀸𑀦𑀺 𑀅𑀝𑁆𑀞𑀥𑀸 𑀈𑀭𑀬𑁂𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄.

𑁩𑁭. 𑀇𑀢𑁆𑀣𑀁 𑀬𑀣𑀸𑀯𑀼𑀢𑁆𑀢𑁂𑀦 𑀚𑀸𑀢𑀺𑀪𑁂𑀤𑀪𑀺𑀦𑁆𑀦𑀘𑀢𑀼𑀪𑀽𑀫𑀺𑀓𑀘𑀺𑀢𑁆𑀢𑀪𑁂𑀤𑀯𑀲𑁂𑀦 𑀏𑀓𑀽𑀦𑀦𑀯𑀼𑀢𑀺𑀧𑁆𑀧𑀪𑁂𑀤𑀁 𑀓𑀢𑁆𑀯𑀸 𑀫𑀸𑀦𑀲𑀁 𑀘𑀺𑀢𑁆𑀢𑀁 𑀯𑀺𑀘𑀓𑁆𑀔𑀡𑀸 𑀯𑀺𑀲𑁂𑀲𑁂𑀦 𑀅𑀢𑁆𑀣𑀘𑀓𑁆𑀔𑀡𑀲𑀪𑀸𑀯𑀸 𑀧𑀡𑁆𑀟𑀺𑀢𑀸 𑀯𑀺𑀪𑀚𑀦𑁆𑀢𑀺. 𑀅𑀣 𑀯𑀸 𑀏𑀓𑀯𑀻𑀲𑀲𑀢𑀁 𑀏𑀓𑀼𑀢𑁆𑀢𑀭𑀯𑀻𑀲𑀸𑀥𑀺𑀓𑀁 𑀲𑀢𑀁 𑀯𑀺𑀪𑀚𑀦𑁆𑀢𑀺.

𑀘𑀺𑀢𑁆𑀢𑀕𑀡𑀦𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀢𑁆𑀣𑀸𑀭𑀕𑀡𑀦𑀯𑀡𑁆𑀡𑀦𑀸

𑁩𑁮. 𑀛𑀸𑀦𑀗𑁆𑀕𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀲𑀤𑀺𑀲𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀜𑁆𑀘 𑀢𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀜𑁆𑀘𑁂𑀢𑀺 𑀧𑀞𑀫𑀚𑁆𑀛𑀸𑀦𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁. 𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀲𑀼𑀧𑀺, 𑀳𑀺 𑀅𑀜𑁆𑀜𑀢𑀭𑀯𑀲𑁂𑀦 𑀢𑀁𑀢𑀁𑀛𑀸𑀦𑀲𑀤𑀺𑀲𑀢𑁆𑀢𑀸 𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑁄𑀳𑀸𑀭𑀁 𑀮𑀪𑀦𑁆𑀢𑀸 𑀧𑀘𑁆𑀘𑁂𑀓𑀁 𑀧𑀜𑁆𑀘𑀥𑀸 𑀯𑀺𑀪𑀚𑀦𑁆𑀢𑀺. 𑀢𑁂𑀦𑀸𑀳 ‘‘𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑁂𑀦𑀸’’𑀢𑁆𑀬𑀸𑀤𑀺, 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀬𑀁 𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀧𑀯𑀢𑁆𑀢𑀸, 𑀢𑀁 𑀧𑀸𑀤𑀓𑀚𑁆𑀛𑀸𑀦𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑀢𑁄. 𑀬𑀁 𑀬𑀁 𑀛𑀸𑀦𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀲𑀸 𑀧𑀯𑀢𑁆𑀢𑀸, 𑀢𑀁 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁. ‘‘𑀅𑀳𑁄 𑀯𑀢 𑀫𑁂 𑀧𑀞𑀫𑀚𑁆𑀛𑀸𑀦𑀲𑀤𑀺𑀲𑁄 𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄, 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀲𑀤𑀺𑀲𑁄 𑀘𑀢𑀼𑀭𑀗𑁆𑀕𑀸𑀤𑀺𑀪𑁂𑀤𑁄 𑀫𑀕𑁆𑀕𑁄 𑀪𑀯𑁂𑀬𑁆𑀬𑀸’’𑀢𑀺 𑀏𑀯𑀁 𑀬𑁄𑀕𑀸𑀯𑀘𑀭𑀲𑁆𑀲 𑀉𑀧𑁆𑀧𑀦𑁆𑀦𑀚𑁆𑀛𑀸𑀲𑀬𑁄 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀸𑀫.

𑀢𑀢𑁆𑀣 𑀬𑁂𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑁄 𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀢𑀁𑀢𑀁𑀧𑀸𑀤𑀓𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀲𑀘𑁂 𑀧𑀦 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀓𑀺𑀜𑁆𑀘𑀺 𑀛𑀸𑀦𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀛𑀸𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑁄 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀬𑀤𑀸 𑀧𑀦 𑀬𑀁 𑀓𑀺𑀜𑁆𑀘𑀺 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀅𑀜𑁆𑀜𑀢𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀤𑀸 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀤𑁆𑀯𑀻𑀲𑀼 𑀅𑀜𑁆𑀜𑀢𑀭𑀲𑀤𑀺𑀲𑁄 𑀳𑁄𑀢𑀺. 𑀲𑀘𑁂 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀯𑀺𑀥𑁄 𑀅𑀚𑁆𑀛𑀸𑀲𑀬𑁄 𑀦𑀢𑁆𑀣𑀺, 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀉𑀧𑀭𑀽𑀧𑀭𑀺𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄 𑀧𑀸𑀤𑀓𑀚𑁆𑀛𑀸𑀦𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀉𑀧𑀭𑀽𑀧𑀭𑀺𑀛𑀸𑀦𑀢𑁄 𑀧𑀦 𑀯𑀼𑀝𑁆𑀞𑀸𑀬 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀢𑁄 𑀳𑀺 𑀉𑀧𑀭𑀽𑀧𑀭𑀺𑀛𑀸𑀦𑀁 𑀩𑀮𑀯𑀢𑀭𑀦𑁆𑀢𑀺. 𑀯𑁂𑀤𑀦𑀸𑀦𑀺𑀬𑀫𑁄 𑀧𑀦 𑀲𑀩𑁆𑀩𑀢𑁆𑀣𑀸𑀧𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦 𑀳𑁄𑀢𑀺. 𑀢𑀣𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀲𑀓𑀮𑀚𑁆𑀛𑀸𑀦𑀗𑁆𑀕𑀦𑀺𑀬𑀫𑁄. 𑀢𑀲𑁆𑀲 𑀳𑀺 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀁 𑀅𑀪𑀸𑀯𑁂𑀦 𑀢𑁂𑀲𑀁 𑀯𑀲𑁂𑀦 𑀦𑀺𑀬𑀫𑀸𑀪𑀸𑀯𑀢𑁄 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦 𑀧𑀜𑁆𑀘𑀗𑁆𑀕𑀺𑀓𑁄𑀯 𑀫𑀕𑁆𑀕𑁄 𑀳𑁄𑀢𑀻𑀢𑀺. 𑀅𑀧𑀺𑀘 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀧𑀺 𑀛𑀸𑀦𑀁 𑀧𑀸𑀤𑀓𑀁 𑀅𑀓𑀢𑁆𑀯𑀸 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄𑀧𑀺 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦𑁂𑀯 𑀧𑀜𑁆𑀘𑀗𑁆𑀕𑀺𑀓𑁄𑀯 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀤𑀺𑀢𑁄 𑀉𑀤𑁆𑀥𑀝𑁄 𑀯𑀺𑀦𑀺𑀘𑁆𑀙𑀬𑀲𑀸𑀭𑁄. 𑀣𑁂𑀭𑀯𑀸𑀤𑀤𑀲𑁆𑀲𑀦𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁄 𑀧𑀦 𑀧𑀧𑀜𑁆𑀘𑁄 𑀅𑀝𑁆𑀞𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺 𑀯𑀺𑀢𑁆𑀣𑀸𑀭𑀦𑀬𑁄 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑁄. 𑀕𑀦𑁆𑀣𑀪𑀻𑀭𑀼𑀓𑀚𑀦𑀸𑀦𑀼𑀕𑁆𑀕𑀳𑀢𑁆𑀣𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀓𑀣𑀸 𑀅𑀥𑀺𑀧𑁆𑀧𑁂𑀢𑀸.

𑁪𑁨. 𑀬𑀣𑀸 𑀭𑀽𑀧𑀸𑀯𑀘𑀭𑀁 𑀘𑀺𑀢𑁆𑀢𑀁 𑀧𑀞𑀫𑀸𑀤𑀺𑀧𑀜𑁆𑀘𑀯𑀺𑀥𑀛𑀸𑀦𑀪𑁂𑀤𑁂𑀦 𑀕𑀬𑁆𑀳𑀢𑀺 ‘‘𑀧𑀞𑀫𑀚𑁆𑀛𑀸𑀦’’𑀦𑁆𑀢𑁆𑀬𑀸𑀤𑀺𑀦𑀸 𑀯𑀼𑀘𑁆𑀘𑀢𑀺, 𑀢𑀣𑀸 𑀅𑀦𑀼𑀢𑁆𑀢𑀭𑀫𑁆𑀧𑀺 𑀘𑀺𑀢𑁆𑀢𑀁 ‘‘𑀧𑀞𑀫𑀚𑁆𑀛𑀸𑀦𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢’’𑀦𑁆𑀢𑁆𑀬𑀸𑀤𑀺𑀦𑀸 𑀕𑀬𑁆𑀳𑀢𑀺. 𑀆𑀭𑀼𑀧𑁆𑀧𑀜𑁆𑀘𑀸𑀧𑀺 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑁄𑀕𑁂𑀦 𑀅𑀗𑁆𑀕𑀲𑀫𑀢𑀸𑀬 𑀧𑀜𑁆𑀘𑀫𑀚𑁆𑀛𑀸𑀦𑁂 𑀕𑀬𑁆𑀳𑀢𑀺, 𑀧𑀜𑁆𑀘𑀫𑀚𑁆𑀛𑀸𑀦𑀯𑁄𑀳𑀸𑀭𑀁 𑀮𑀪𑀢𑀻𑀢𑁆𑀬𑀢𑁆𑀣𑁄. 𑀅𑀣 𑀯𑀸 𑀭𑀽𑀧𑀸𑀯𑀘𑀭𑀁 𑀘𑀺𑀢𑁆𑀢𑀁 𑀅𑀦𑀼𑀢𑁆𑀢𑀭𑀜𑁆𑀘 𑀧𑀞𑀫𑀸𑀤𑀺𑀛𑀸𑀦𑀪𑁂𑀤𑁂 ‘‘𑀧𑀞𑀫𑀚𑁆𑀛𑀸𑀦𑀓𑀼𑀲𑀮𑀘𑀺𑀢𑁆𑀢𑀁, 𑀧𑀞𑀫𑀚𑁆𑀛𑀸𑀦𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀦𑁆𑀢𑁆𑀬𑀸𑀤𑀺𑀦𑀸 𑀬𑀣𑀸 𑀕𑀬𑁆𑀳𑀢𑀺, 𑀢𑀣𑀸 𑀆𑀭𑀼𑀧𑁆𑀧𑀜𑁆𑀘𑀸𑀧𑀺 𑀧𑀜𑁆𑀘𑀫𑁂 𑀛𑀸𑀦𑁂 𑀕𑀬𑁆𑀳𑀢𑀻𑀢𑀺 𑀬𑁄𑀚𑀦𑀸. 𑀆𑀘𑀭𑀺𑀬𑀲𑁆𑀲𑀸𑀧𑀺 𑀳𑀺 𑀅𑀬𑀫𑁂𑀯 𑀬𑁄𑀚𑀦𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀺𑀲𑁆𑀲𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀉𑀚𑀼𑀓𑀫𑁂𑀯 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀕𑀬𑁆𑀳𑀦𑁆𑀢𑀸𑀦𑀼𑀢𑁆𑀢𑀭𑀸𑀦𑀺 𑀘;

𑀧𑀞𑀫𑀸𑀤𑀺𑀛𑀸𑀦𑀪𑁂𑀤𑁂, 𑀆𑀭𑀼𑀧𑁆𑀧𑀜𑁆𑀘𑀸𑀧𑀺 𑀧𑀜𑁆𑀘𑀫𑁂’’𑀢𑀺. (𑀦𑀸𑀫. 𑀧𑀭𑀺. 𑁨𑁪);

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀭𑀽𑀧𑀸𑀯𑀘𑀭𑀁 𑀯𑀺𑀬 𑀅𑀦𑀼𑀢𑁆𑀢𑀭𑀫𑁆𑀧𑀺 𑀧𑀞𑀫𑀸𑀤𑀺𑀛𑀸𑀦𑀪𑁂𑀤𑁂 𑀕𑀬𑁆𑀳𑀢𑀺, 𑀆𑀭𑀼𑀧𑁆𑀧𑀜𑁆𑀘𑀸𑀧𑀺 𑀧𑀜𑁆𑀘𑀫𑁂 𑀕𑀬𑁆𑀳𑀢𑀺, 𑀬𑀲𑁆𑀫𑀸 𑀯𑀸 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑁂𑀦 𑀏𑀓𑁂𑀓𑀁 𑀧𑀜𑁆𑀘𑀥𑀸 𑀓𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀁 𑀘𑀢𑁆𑀢𑀸𑀮𑀻𑀲𑀯𑀺𑀥𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀸𑀦𑀺 𑀯𑀺𑀬 𑀘 𑀧𑀞𑀫𑀸𑀤𑀺𑀛𑀸𑀦𑀪𑁂𑀤𑁂, 𑀢𑀣𑀸 𑀆𑀭𑀼𑀧𑁆𑀧𑀜𑁆𑀘𑀸𑀧𑀺 𑀧𑀜𑁆𑀘𑀫𑁂 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀧𑀞𑀫𑀸𑀤𑀺𑀓𑀫𑁂𑀓𑁂𑀓𑀁 𑀛𑀸𑀦𑀁 𑀮𑁄𑀓𑀺𑀬𑀁 𑀢𑀺𑀯𑀺𑀥𑀁, 𑀮𑁄𑀓𑀼𑀢𑁆𑀢𑀭𑀁 𑀅𑀝𑁆𑀞𑀯𑀺𑀥𑀦𑁆𑀢𑀺 𑀏𑀓𑀸𑀤𑀲𑀯𑀺𑀥𑀁. 𑀅𑀦𑁆𑀢𑁂 𑀢𑀼 𑀛𑀸𑀦𑀁 𑀢𑁂𑀯𑀻𑀲𑀢𑀺𑀯𑀺𑀥𑀁 𑀢𑀺𑀯𑀺𑀥𑀭𑀽𑀧𑀸𑀯𑀘𑀭𑀤𑁆𑀯𑀸𑀤𑀲𑀯𑀺𑀥𑀅𑀭𑀽𑀧𑀸𑀯𑀘𑀭𑀅𑀝𑁆𑀞𑀮𑁄𑀓𑀼𑀢𑁆𑀢𑀭𑀯𑀲𑁂𑀦𑀸𑀢𑁆𑀬𑀢𑁆𑀣𑁄.

𑁪𑁩. 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀕𑀡𑀦𑀯𑀼𑀟𑁆𑀠𑀺 𑀓𑀼𑀲𑀮𑀯𑀺𑀧𑀸𑀓𑁂𑀲𑁆𑀯𑁂𑀯 𑀲𑀫𑁆𑀪𑀯𑀢𑀻𑀢𑀺 𑀢𑁂𑀲𑀫𑁂𑀯 𑀕𑀡𑀦𑀁 𑀏𑀓𑀯𑀻𑀲𑀲𑀢𑀕𑀡𑀦𑀸𑀬 𑀅𑀗𑁆𑀕𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀢𑁆𑀢𑀢𑀺𑀁𑀲𑀸’’𑀢𑁆𑀬𑀸𑀤𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀺𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀯𑀡𑁆𑀡𑀦𑀸𑀬

𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.