𑁮. 𑀧𑀘𑁆𑀘𑀬𑀧𑀭𑀺𑀘𑁆𑀙𑁂𑀤𑁄

𑁧. 𑀬𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁, 𑀬𑁂 𑀥𑀫𑁆𑀫𑀸 𑀧𑀘𑁆𑀘𑀬𑀸 𑀬𑀣𑀸.

𑀢𑀁 𑀯𑀺𑀪𑀸𑀕𑀫𑀺𑀳𑁂𑀤𑀸𑀦𑀺, 𑀧𑀯𑀓𑁆𑀔𑀸𑀫𑀺 𑀬𑀣𑀸𑀭𑀳𑀁.

𑁨. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄 𑀧𑀝𑁆𑀞𑀸𑀦𑀦𑀬𑁄 𑀘𑁂𑀢𑀺 𑀧𑀘𑁆𑀘𑀬𑀲𑀗𑁆𑀕𑀳𑁄 𑀤𑀼𑀯𑀺𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁩. 𑀢𑀢𑁆𑀣 𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑀸𑀓𑀸𑀭𑀫𑀢𑁆𑀢𑁄𑀧𑀮𑀓𑁆𑀔𑀺𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄, 𑀧𑀝𑁆𑀞𑀸𑀦𑀦𑀬𑁄 𑀧𑀦 𑀆𑀳𑀘𑁆𑀘𑀧𑀘𑁆𑀘𑀬𑀝𑁆𑀞𑀺𑀢𑀺𑀫𑀸𑀭𑀩𑁆𑀪 𑀧𑀯𑀼𑀘𑁆𑀘𑀢𑀺, 𑀉𑀪𑀬𑀁 𑀧𑀦 𑀯𑁄𑀫𑀺𑀲𑁆𑀲𑁂𑀢𑁆𑀯𑀸 𑀧𑀧𑀜𑁆𑀘𑁂𑀦𑁆𑀢𑀺 𑀆𑀘𑀭𑀺𑀬𑀸.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄

𑁪. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄.

𑁫. 𑀢𑀢𑁆𑀣 𑀢𑀬𑁄 𑀅𑀤𑁆𑀥𑀸 𑀤𑁆𑀯𑀸𑀤𑀲𑀗𑁆𑀕𑀸𑀦𑀺 𑀯𑀻𑀲𑀢𑀸𑀓𑀸𑀭𑀸 𑀢𑀺𑀲𑀦𑁆𑀥𑀺 𑀘𑀢𑀼𑀲𑀗𑁆𑀔𑁂𑀧𑀸 𑀢𑀻𑀡𑀺 𑀯𑀝𑁆𑀝𑀸𑀦𑀺 𑀤𑁆𑀯𑁂 𑀫𑀽𑀮𑀸𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬. 𑀓𑀣𑀁? 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀅𑀢𑀻𑀢𑁄 𑀅𑀤𑁆𑀥𑀸, 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀦𑀸𑀕𑀢𑁄 𑀅𑀤𑁆𑀥𑀸, 𑀫𑀚𑁆𑀛𑁂 𑀅𑀝𑁆𑀞 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸𑀢𑀺 𑀢𑀬𑁄 𑀅𑀤𑁆𑀥𑀸.

𑁭. 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀁 𑀨𑀲𑁆𑀲𑁄 𑀯𑁂𑀤𑀦𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀁 𑀪𑀯𑁄 𑀚𑀸𑀢𑀺 𑀚𑀭𑀸𑀫𑀭𑀡𑀦𑁆𑀢𑀺 𑀤𑁆𑀯𑀸𑀤𑀲𑀗𑁆𑀕𑀸𑀦𑀺.

𑁮. 𑀲𑁄𑀓𑀸𑀤𑀺𑀯𑀘𑀦𑀁 𑀧𑀦𑁂𑀢𑁆𑀣 𑀦𑀺𑀲𑁆𑀲𑀦𑁆𑀤𑀨𑀮𑀦𑀺𑀤𑀲𑁆𑀲𑀦𑀁.

𑁯. 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀧𑀦𑁂𑀢𑁆𑀣 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀧𑀺 𑀕𑀳𑀺𑀢𑀸 𑀪𑀯𑀦𑁆𑀢𑀺, 𑀢𑀣𑀸 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀕𑁆𑀕𑀳𑀡𑁂𑀦 𑀘 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸, 𑀚𑀸𑀢𑀺𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦 𑀘 𑀯𑀺𑀜𑁆𑀜𑀸𑀡𑀸𑀤𑀺𑀨𑀮𑀧𑀜𑁆𑀘𑀓𑀫𑁂𑀯 𑀕𑀳𑀺𑀢𑀦𑁆𑀢𑀺 𑀓𑀢𑁆𑀯𑀸 𑁋

𑁧𑁦. 𑀅𑀢𑀻𑀢𑁂 𑀳𑁂𑀢𑀯𑁄 𑀧𑀜𑁆𑀘, 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀁.

𑀇𑀤𑀸𑀦𑀺 𑀳𑁂𑀢𑀯𑁄 𑀧𑀜𑁆𑀘, 𑀆𑀬𑀢𑀺𑀁 𑀨𑀮𑀧𑀜𑁆𑀘𑀓𑀦𑁆𑀢𑀺;

𑀯𑀻𑀲𑀢𑀸𑀓𑀸𑀭𑀸 𑀢𑀺𑀲𑀦𑁆𑀥𑀺, 𑀘𑀢𑀼𑀲𑀗𑁆𑀔𑁂𑀧𑀸 𑀘 𑀪𑀯𑀦𑁆𑀢𑀺.

𑁧𑁧. 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀸 𑀘 𑀓𑀺𑀮𑁂𑀲𑀯𑀝𑁆𑀝𑀁, 𑀓𑀫𑁆𑀫𑀪𑀯𑀲𑀗𑁆𑀔𑀸𑀢𑁄 𑀪𑀯𑁂𑀓𑀤𑁂𑀲𑁄 𑀲𑀗𑁆𑀔𑀸𑀭𑀸 𑀘 𑀓𑀫𑁆𑀫𑀯𑀝𑁆𑀝𑀁, 𑀉𑀧𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑁄 𑀪𑀯𑁂𑀓𑀤𑁂𑀲𑁄 𑀅𑀯𑀲𑁂𑀲𑀸 𑀘 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀢𑀻𑀡𑀺 𑀯𑀝𑁆𑀝𑀸𑀦𑀺.

𑁧𑁨. 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀯𑀲𑁂𑀦 𑀤𑁆𑀯𑁂 𑀫𑀽𑀮𑀸𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧𑁩. 𑀢𑁂𑀲𑀫𑁂𑀯 𑀘 𑀫𑀽𑀮𑀸𑀦𑀁, 𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀺.

𑀚𑀭𑀸𑀫𑀭𑀡𑀫𑀼𑀘𑁆𑀙𑀸𑀬, 𑀧𑀻𑀴𑀺𑀢𑀸𑀦𑀫𑀪𑀺𑀡𑁆𑀳𑀲𑁄;

𑀆𑀲𑀯𑀸𑀦𑀁 𑀲𑀫𑀼𑀧𑁆𑀧𑀸𑀤𑀸, 𑀅𑀯𑀺𑀚𑁆𑀚𑀸 𑀘 𑀧𑀯𑀢𑁆𑀢𑀢𑀺.

𑀯𑀝𑁆𑀝𑀫𑀸𑀩𑀦𑁆𑀥𑀫𑀺𑀘𑁆𑀘𑁂𑀯𑀁, 𑀢𑁂𑀪𑀽𑀫𑀓𑀫𑀦𑀸𑀤𑀺𑀓𑀁;

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺, 𑀧𑀝𑁆𑀞𑀧𑁂𑀲𑀺 𑀫𑀳𑀸𑀫𑀼𑀦𑀺.

𑀧𑀝𑁆𑀞𑀸𑀦𑀦𑀬𑁄

𑁧𑁪. 𑀳𑁂𑀢𑀼𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀓𑀫𑁆𑀫𑀧𑀘𑁆𑀘𑀬𑁄 𑀯𑀺𑀧𑀸𑀓𑀧𑀘𑁆𑀘𑀬𑁄 𑀆𑀳𑀸𑀭𑀧𑀘𑁆𑀘𑀬𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀛𑀸𑀦𑀧𑀘𑁆𑀘𑀬𑁄 𑀫𑀕𑁆𑀕𑀧𑀘𑁆𑀘𑀬𑁄 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀢𑁆𑀣𑀺𑀧𑀘𑁆𑀘𑀬𑁄 𑀯𑀺𑀕𑀢𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀅𑀬𑀫𑁂𑀢𑁆𑀣 𑀧𑀝𑁆𑀞𑀸𑀦𑀦𑀬𑁄.

𑁧𑁫. 𑀙𑀥𑀸 𑀦𑀸𑀫𑀁 𑀢𑀼 𑀦𑀸𑀫𑀲𑁆𑀲, 𑀧𑀜𑁆𑀘𑀥𑀸 𑀦𑀸𑀫𑀭𑀽𑀧𑀺𑀦𑀁.

𑀏𑀓𑀥𑀸 𑀧𑀼𑀦 𑀭𑀽𑀧𑀲𑁆𑀲, 𑀭𑀽𑀧𑀁 𑀦𑀸𑀫𑀲𑁆𑀲 𑀘𑁂𑀓𑀥𑀸.

𑀧𑀜𑁆𑀜𑀢𑁆𑀢𑀺𑀦𑀸𑀫𑀭𑀽𑀧𑀸𑀦𑀺, 𑀦𑀸𑀫𑀲𑁆𑀲 𑀤𑀼𑀯𑀺𑀥𑀸 𑀤𑁆𑀯𑀬𑀁;

𑀤𑁆𑀯𑀬𑀲𑁆𑀲 𑀦𑀯𑀥𑀸 𑀘𑁂𑀢𑀺, 𑀙𑀩𑁆𑀩𑀺𑀥𑀸 𑀧𑀘𑁆𑀘𑀬𑀸 𑀓𑀣𑀁.

𑁧𑁬. 𑀅𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀝𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀦𑀢𑁆𑀣𑀺𑀯𑀺𑀕𑀢𑀯𑀲𑁂𑀦, 𑀧𑀼𑀭𑀺𑀫𑀸𑀦𑀺 𑀚𑀯𑀦𑀸𑀦𑀺 𑀧𑀘𑁆𑀙𑀺𑀫𑀸𑀦𑀁 𑀚𑀯𑀦𑀸𑀦𑀁 𑀆𑀲𑁂𑀯𑀦𑀯𑀲𑁂𑀦, 𑀲𑀳𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦𑁂𑀢𑀺 𑀘 𑀙𑀥𑀸 𑀦𑀸𑀫𑀁 𑀦𑀸𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑁧𑁭. 𑀳𑁂𑀢𑀼𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀺 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀸𑀦𑀁 𑀳𑁂𑀢𑀸𑀤𑀺𑀯𑀲𑁂𑀦, 𑀲𑀳𑀚𑀸𑀢𑀸 𑀘𑁂𑀢𑀦𑀸 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀸𑀦𑀁, 𑀦𑀸𑀦𑀸𑀓𑁆𑀔𑀡𑀺𑀓𑀸 𑀘𑁂𑀢𑀦𑀸 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀁 𑀦𑀸𑀫𑀭𑀽𑀧𑀸𑀦𑀁 𑀓𑀫𑁆𑀫𑀯𑀲𑁂𑀦, 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀸𑀦𑀁 𑀭𑀽𑀧𑀸𑀦𑀁 𑀯𑀺𑀧𑀸𑀓𑀯𑀲𑁂𑀦𑁂𑀢𑀺 𑀘 𑀧𑀜𑁆𑀘𑀥𑀸 𑀦𑀸𑀫𑀁 𑀦𑀸𑀫𑀭𑀽𑀧𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺.

𑁧𑁮. 𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀯𑀲𑁂𑀦𑁂𑀢𑀺 𑀏𑀓𑀥𑀸𑀯 𑀦𑀸𑀫𑀁 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑁧𑁯. 𑀙 𑀯𑀢𑁆𑀣𑀽𑀦𑀺 𑀧𑀯𑀢𑁆𑀢𑀺𑀬𑀁 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀼𑀭𑁂𑀚𑀸𑀢𑀯𑀲𑁂𑀦𑁂𑀢𑀺 𑀏𑀓𑀥𑀸𑀯 𑀭𑀽𑀧𑀁 𑀦𑀸𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑁨𑁦. 𑀆𑀭𑀫𑁆𑀫𑀡𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀢𑀺 𑀘 𑀤𑀼𑀯𑀺𑀥𑀸 𑀧𑀜𑁆𑀜𑀢𑁆𑀢𑀺𑀦𑀸𑀫𑀭𑀽𑀧𑀸𑀦𑀺 𑀦𑀸𑀫𑀲𑁆𑀲𑁂𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑁨𑁧. 𑀢𑀢𑁆𑀣 𑀭𑀽𑀧𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀁 𑀳𑁄𑀢𑀺 𑀆𑀭𑀫𑁆𑀫𑀡𑀁.

𑁨𑁨. 𑀉𑀧𑀦𑀺𑀲𑁆𑀲𑀬𑁄 𑀧𑀦 𑀢𑀺𑀯𑀺𑀥𑁄 𑀳𑁄𑀢𑀺 𑁋 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀘𑁂𑀢𑀺.

𑁨𑁩. 𑀢𑀢𑁆𑀣 𑀆𑀭𑀫𑁆𑀫𑀡𑀫𑁂𑀯 𑀕𑀭𑀼𑀓𑀢𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄.

𑁨𑁪. 𑀅𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄.

𑁨𑁫. 𑀭𑀸𑀕𑀸𑀤𑀬𑁄 𑀧𑀦 𑀥𑀫𑁆𑀫𑀸 𑀲𑀤𑁆𑀥𑀸𑀤𑀬𑁄 𑀘 𑀲𑀼𑀔𑀁 𑀤𑀼𑀓𑁆𑀔𑀁 𑀧𑀼𑀕𑁆𑀕𑀮𑁄 𑀪𑁄𑀚𑀦𑀁 𑀉𑀢𑀼𑀲𑁂𑀦𑀸𑀲𑀦𑀜𑁆𑀘 𑀬𑀣𑀸𑀭𑀳𑀁 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁, 𑀓𑀫𑁆𑀫𑀁 𑀯𑀺𑀧𑀸𑀓𑀸𑀦𑀦𑁆𑀢𑀺 𑀘 𑀩𑀳𑀼𑀥𑀸 𑀳𑁄𑀢𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄.

𑁨𑁬. 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦𑁂𑀢𑀺 𑀬𑀣𑀸𑀭𑀳𑀁 𑀦𑀯𑀥𑀸 𑀦𑀸𑀫𑀭𑀽𑀧𑀸𑀦𑀺 𑀦𑀸𑀫𑀭𑀽𑀧𑀸𑀦𑀁 𑀧𑀘𑁆𑀘𑀬𑀸 𑀪𑀯𑀦𑁆𑀢𑀺.

𑁨𑁭. 𑀢𑀢𑁆𑀣 𑀕𑀭𑀼𑀓𑀢𑀫𑀸𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀯𑀲𑁂𑀦 𑀦𑀸𑀫𑀸𑀦𑀁, 𑀲𑀳𑀚𑀸𑀢𑀸𑀥𑀺𑀧𑀢𑀺 𑀘𑀢𑀼𑀩𑁆𑀩𑀺𑀥𑁄𑀧𑀺 𑀲𑀳𑀚𑀸𑀢𑀯𑀲𑁂𑀦 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀘 𑀤𑀼𑀯𑀺𑀥𑁄 𑀳𑁄𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑁄.

𑁨𑁮. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀭𑀽𑀧𑀸𑀦𑀜𑁆𑀘, 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀯𑀺𑀧𑀸𑀓𑀸 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀘 𑀢𑀺𑀯𑀺𑀥𑁄 𑀳𑁄𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑁄.

𑁨𑁯. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁, 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀯𑀺𑀧𑀸𑀓𑀸 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀘 𑀢𑀺𑀯𑀺𑀥𑁄 𑀳𑁄𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄.

𑁩𑁦. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀭𑀽𑀧𑀸𑀦𑀜𑁆𑀘, 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘, 𑀙 𑀯𑀢𑁆𑀣𑀽𑀦𑀺 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀦𑁆𑀢𑀺 𑀘 𑀢𑀺𑀯𑀺𑀥𑁄 𑀳𑁄𑀢𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑁄.

𑁩𑁧. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀘 𑀤𑀼𑀯𑀺𑀥𑁄 𑀳𑁄𑀢𑀺 𑀆𑀳𑀸𑀭𑀧𑀘𑁆𑀘𑀬𑁄.

𑁩𑁨. 𑀧𑀜𑁆𑀘 𑀧𑀲𑀸𑀤𑀸 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀸𑀤𑀺𑀦𑁆𑀦𑀭𑀽𑀧𑀸𑀦𑀁, 𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀘 𑀢𑀺𑀯𑀺𑀥𑁄 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄.

𑁩𑁩. 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀯𑀢𑁆𑀣𑀼 𑀯𑀺𑀧𑀸𑀓𑀸𑀦𑀁, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀳𑀚𑀸𑀢𑀭𑀽𑀧𑀸𑀦𑀁 𑀲𑀳𑀚𑀸𑀢𑀯𑀲𑁂𑀦, 𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀙 𑀯𑀢𑁆𑀣𑀽𑀦𑀺 𑀧𑀯𑀢𑁆𑀢𑀺𑀬𑀁 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀧𑀼𑀭𑁂𑀚𑀸𑀢𑀯𑀲𑁂𑀦𑁂𑀢𑀺 𑀘 𑀢𑀺𑀯𑀺𑀥𑁄 𑀳𑁄𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄.

𑁩𑁪. 𑀲𑀳𑀚𑀸𑀢𑀁 𑀧𑀼𑀭𑁂𑀚𑀸𑀢𑀁, 𑀧𑀘𑁆𑀙𑀸𑀚𑀸𑀢𑀜𑁆𑀘 𑀲𑀩𑁆𑀩𑀣𑀸.

𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀭𑀽𑀧𑀚𑀻𑀯𑀺𑀢𑀫𑀺𑀘𑁆𑀘𑀬𑀦𑁆𑀢𑀺. 𑁋

𑀧𑀜𑁆𑀘𑀯𑀺𑀥𑁄 𑀳𑁄𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁄 𑀘.

𑁩𑁫. 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀓𑀫𑁆𑀫𑀢𑁆𑀣𑀺𑀧𑀘𑁆𑀘𑀬𑁂𑀲𑀼 𑀘 𑀲𑀩𑁆𑀩𑁂𑀧𑀺 𑀧𑀘𑁆𑀘𑀬𑀸 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺.

𑁩𑁬. 𑀲𑀳𑀚𑀸𑀢𑀭𑀽𑀧𑀦𑁆𑀢𑀺 𑀧𑀦𑁂𑀢𑁆𑀣 𑀲𑀩𑁆𑀩𑀢𑁆𑀣𑀸𑀧𑀺 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘 𑀯𑀲𑁂𑀦 𑀤𑀼𑀯𑀺𑀥𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁭. 𑀇𑀢𑀺 𑀢𑁂𑀓𑀸𑀮𑀺𑀓𑀸 𑀥𑀫𑁆𑀫𑀸, 𑀓𑀸𑀮𑀫𑀼𑀢𑁆𑀢𑀸 𑀘 𑀲𑀫𑁆𑀪𑀯𑀸.

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀲𑀗𑁆𑀔𑀢𑀸𑀲𑀗𑁆𑀔𑀢𑀸 𑀢𑀣𑀸;

𑀧𑀜𑁆𑀜𑀢𑁆𑀢𑀺𑀦𑀸𑀫𑀭𑀽𑀧𑀸𑀦𑀁, 𑀯𑀲𑁂𑀦 𑀢𑀺𑀯𑀺𑀥𑀸 𑀞𑀺𑀢𑀸;

𑀧𑀘𑁆𑀘𑀬𑀸 𑀦𑀸𑀫 𑀧𑀝𑁆𑀞𑀸𑀦𑁂, 𑀘𑀢𑀼𑀯𑀻𑀲𑀢𑀺 𑀲𑀩𑁆𑀩𑀣𑀸.

𑁩𑁮. 𑀢𑀢𑁆𑀣 𑀭𑀽𑀧𑀥𑀫𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑁄𑀯, 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀦𑀺𑀩𑁆𑀩𑀸𑀦𑀜𑁆𑀘𑁂𑀢𑀺 𑀧𑀜𑁆𑀘𑀯𑀺𑀥𑀫𑁆𑀧𑀺 𑀅𑀭𑀽𑀧𑀦𑁆𑀢𑀺 𑀘 𑀦𑀸𑀫𑀦𑁆𑀢𑀺 𑀘 𑀧𑀯𑀼𑀘𑁆𑀘𑀢𑀺.

𑀧𑀜𑁆𑀜𑀢𑁆𑀢𑀺𑀪𑁂𑀤𑁄

𑁩𑁯. 𑀢𑀢𑁄 𑀅𑀯𑀲𑁂𑀲𑀸 𑀧𑀜𑁆𑀜𑀢𑁆𑀢𑀺 𑀧𑀦 𑀧𑀜𑁆𑀜𑀸𑀧𑀺𑀬𑀢𑁆𑀢𑀸 𑀧𑀜𑁆𑀜𑀢𑁆𑀢𑀺, 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀻𑀢𑀺 𑀘 𑀤𑀼𑀯𑀺𑀥𑀸 𑀳𑁄𑀢𑀺.

𑁪𑁦. 𑀓𑀣𑀁? 𑀢𑀁𑀢𑀁𑀪𑀽𑀢𑀯𑀺𑀧𑀭𑀺𑀡𑀸𑀫𑀸𑀓𑀸𑀭𑀫𑀼𑀧𑀸𑀤𑀸𑀬 𑀢𑀣𑀸 𑀢𑀣𑀸 𑀧𑀜𑁆𑀜𑀢𑁆𑀢𑀸 𑀪𑀽𑀫𑀺𑀧𑀩𑁆𑀩𑀢𑀸𑀤𑀺𑀓𑀸, 𑀲𑀫𑁆𑀪𑀸𑀭𑀲𑀦𑁆𑀦𑀺𑀯𑁂𑀲𑀸𑀓𑀸𑀭𑀫𑀼𑀧𑀸𑀤𑀸𑀬 𑀕𑁂𑀳𑀭𑀣𑀲𑀓𑀝𑀸𑀤𑀺𑀓𑀸, 𑀔𑀦𑁆𑀥𑀧𑀜𑁆𑀘𑀓𑀫𑀼𑀧𑀸𑀤𑀸𑀬 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀤𑀺𑀓𑀸, 𑀘𑀦𑁆𑀤𑀸𑀯𑀝𑁆𑀝𑀦𑀸𑀤𑀺𑀓𑀫𑀼𑀧𑀸𑀤𑀸𑀬 𑀤𑀺𑀲𑀸𑀓𑀸𑀮𑀸𑀤𑀺𑀓𑀸, 𑀅𑀲𑀫𑁆𑀨𑀼𑀝𑁆𑀞𑀸𑀓𑀸𑀭𑀫𑀼𑀧𑀸𑀤𑀸𑀬 𑀓𑀽𑀧𑀕𑀼𑀳𑀸𑀤𑀺𑀓𑀸, 𑀢𑀁𑀢𑀁𑀪𑀽𑀢𑀦𑀺𑀫𑀺𑀢𑁆𑀢𑀁 𑀪𑀸𑀯𑀦𑀸𑀯𑀺𑀲𑁂𑀲𑀜𑁆𑀘 𑀉𑀧𑀸𑀤𑀸𑀬 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀓𑀸 𑀘𑁂𑀢𑀺 𑀏𑀯𑀫𑀸𑀤𑀺𑀧𑁆𑀧𑀪𑁂𑀤𑀸 𑀧𑀦 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀧𑀺 𑀅𑀢𑁆𑀣𑀘𑁆𑀙𑀸𑀬𑀸𑀓𑀸𑀭𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀫𑀸𑀭𑀫𑁆𑀫𑀡𑀪𑀽𑀢𑀸 𑀢𑀁 𑀢𑀁 𑀉𑀧𑀸𑀤𑀸𑀬 𑀉𑀧𑀦𑀺𑀥𑀸𑀬 𑀓𑀸𑀭𑀡𑀁 𑀓𑀢𑁆𑀯𑀸 𑀢𑀣𑀸 𑀢𑀣𑀸 𑀧𑀭𑀺𑀓𑀧𑁆𑀧𑀺𑀬𑀫𑀸𑀦𑀸 𑀲𑀗𑁆𑀔𑀸𑀬𑀢𑀺 𑀲𑀫𑀜𑁆𑀜𑀸𑀬𑀢𑀺 𑀯𑁄𑀳𑀭𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀧𑀜𑁆𑀜𑀢𑁆𑀢𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀧𑀜𑁆𑀜𑀸𑀧𑀺𑀬𑀢𑁆𑀢𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫.

𑁪𑁧. 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀧𑀦 𑀦𑀸𑀫𑀦𑀸𑀫𑀓𑀫𑁆𑀫𑀸𑀤𑀺𑀦𑀸𑀫𑁂𑀦 𑀧𑀭𑀺𑀤𑀻𑀧𑀺𑀢𑀸, 𑀲𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀘𑁂𑀢𑀺 𑀙𑀩𑁆𑀩𑀺𑀥𑀸 𑀳𑁄𑀢𑀺.

𑁪𑁨. 𑀢𑀢𑁆𑀣 𑀬𑀤𑀸 𑀧𑀦 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀁 𑀭𑀽𑀧𑀯𑁂𑀤𑀦𑀸𑀤𑀺𑀁 𑀏𑀢𑀸𑀬 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀢𑀤𑀸𑀬𑀁 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀬𑀤𑀸 𑀧𑀦 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀁 𑀪𑀽𑀫𑀺𑀧𑀩𑁆𑀩𑀢𑀸𑀤𑀺𑀁 𑀏𑀢𑀸𑀬 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀢𑀤𑀸𑀬𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀉𑀪𑀺𑀦𑁆𑀦𑀁 𑀧𑀦 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀲𑁂𑀲𑀸 𑀬𑀣𑀸𑀓𑁆𑀓𑀫𑀁 𑀙𑀴𑀪𑀺𑀜𑁆𑀜𑁄, 𑀇𑀢𑁆𑀣𑀺𑀲𑀤𑁆𑀤𑁄, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀭𑀸𑀚𑀧𑀼𑀢𑁆𑀢𑁄𑀢𑀺 𑀘 𑀯𑁂𑀤𑀺𑀢𑀩𑁆𑀩𑀸.

𑁪𑁩. 𑀯𑀘𑀻𑀖𑁄𑀲𑀸𑀦𑀼𑀲𑀸𑀭𑁂𑀦, 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸.

𑀧𑀯𑀢𑁆𑀣𑀸𑀦𑀦𑁆𑀢𑀭𑀼𑀧𑁆𑀧𑀦𑁆𑀦-𑀫𑀦𑁄𑀤𑁆𑀯𑀸𑀭𑀲𑁆𑀲 𑀕𑁄𑀘𑀭𑀸.

𑀅𑀢𑁆𑀣𑀸 𑀬𑀲𑁆𑀲𑀸𑀦𑀼𑀲𑀸𑀭𑁂𑀦, 𑀯𑀺𑀜𑁆𑀜𑀸𑀬𑀦𑁆𑀢𑀺 𑀢𑀢𑁄 𑀧𑀭𑀁;

𑀲𑀸𑀬𑀁 𑀧𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀮𑁄𑀓𑀲𑀗𑁆𑀓𑁂𑀢𑀦𑀺𑀫𑁆𑀫𑀺𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑀧𑀘𑁆𑀘𑀬𑀲𑀗𑁆𑀕𑀳𑀯𑀺𑀪𑀸𑀕𑁄 𑀦𑀸𑀫

𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.