𑁯. 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑁄

𑁧. 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁, 𑀪𑀸𑀯𑀦𑀸𑀦𑀫𑀺𑀢𑁄 𑀧𑀭𑀁.

𑀓𑀫𑁆𑀫𑀝𑁆𑀞𑀸𑀦𑀁 𑀧𑀯𑀓𑁆𑀔𑀸𑀫𑀺, 𑀤𑀼𑀯𑀺𑀥𑀫𑁆𑀧𑀺 𑀬𑀣𑀸𑀓𑁆𑀓𑀫𑀁.

𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁

𑁨. 𑀢𑀢𑁆𑀣 𑀲𑀫𑀣𑀲𑀗𑁆𑀕𑀳𑁂 𑀢𑀸𑀯 𑀤𑀲 𑀓𑀲𑀺𑀡𑀸𑀦𑀺, 𑀤𑀲 𑀅𑀲𑀼𑀪𑀸, 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀏𑀓𑀸 𑀲𑀜𑁆𑀜𑀸, 𑀏𑀓𑀁 𑀯𑀯𑀢𑁆𑀣𑀸𑀦𑀁, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀘𑁂𑀢𑀺 𑀲𑀢𑁆𑀢𑀯𑀺𑀥𑁂𑀦 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀕𑀳𑁄.

𑀘𑀭𑀺𑀢𑀪𑁂𑀤𑁄

𑁩. 𑀭𑀸𑀕𑀘𑀭𑀺𑀢𑀸 𑀤𑁄𑀲𑀘𑀭𑀺𑀢𑀸 𑀫𑁄𑀳𑀘𑀭𑀺𑀢𑀸 𑀲𑀤𑁆𑀥𑀸𑀘𑀭𑀺𑀢𑀸 𑀩𑀼𑀤𑁆𑀥𑀺𑀘𑀭𑀺𑀢𑀸 𑀯𑀺𑀢𑀓𑁆𑀓𑀘𑀭𑀺𑀢𑀸 𑀘𑁂𑀢𑀺 𑀙𑀩𑁆𑀩𑀺𑀥𑁂𑀦 𑀘𑀭𑀺𑀢𑀲𑀗𑁆𑀕𑀳𑁄.

𑀪𑀸𑀯𑀦𑀸𑀪𑁂𑀤𑁄

𑁪. 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 𑀉𑀧𑀘𑀸𑀭𑀪𑀸𑀯𑀦𑀸 𑀅𑀧𑁆𑀧𑀦𑀸𑀪𑀸𑀯𑀦𑀸 𑀘𑁂𑀢𑀺 𑀢𑀺𑀲𑁆𑀲𑁄 𑀪𑀸𑀯𑀦𑀸.

𑀦𑀺𑀫𑀺𑀢𑁆𑀢𑀪𑁂𑀤𑁄

𑁫. 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀜𑁆𑀘𑁂𑀢𑀺 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬. 𑀓𑀣𑀁? 𑀧𑀣𑀯𑀻𑀓𑀲𑀺𑀡𑀁 𑀆𑀧𑁄𑀓𑀲𑀺𑀡𑀁 𑀢𑁂𑀚𑁄𑀓𑀲𑀺𑀡𑀁 𑀯𑀸𑀬𑁄𑀓𑀲𑀺𑀡𑀁 𑀦𑀻𑀮𑀓𑀲𑀺𑀡𑀁 𑀧𑀻𑀢𑀓𑀲𑀺𑀡𑀁 𑀮𑁄𑀳𑀺𑀢𑀓𑀲𑀺𑀡𑀁 𑀑𑀤𑀸𑀢𑀓𑀲𑀺𑀡𑀁 𑀆𑀓𑀸𑀲𑀓𑀲𑀺𑀡𑀁 𑀆𑀮𑁄𑀓𑀓𑀲𑀺𑀡𑀜𑁆𑀘𑁂𑀢𑀺 𑀇𑀫𑀸𑀦𑀺 𑀤𑀲 𑀓𑀲𑀺𑀡𑀸𑀦𑀺 𑀦𑀸𑀫.

𑁭. 𑀉𑀤𑁆𑀥𑀼𑀫𑀸𑀢𑀓𑀁 𑀯𑀺𑀦𑀻𑀮𑀓𑀁 𑀯𑀺𑀧𑀼𑀩𑁆𑀩𑀓𑀁 𑀯𑀺𑀘𑁆𑀙𑀺𑀤𑁆𑀤𑀓𑀁 𑀯𑀺𑀓𑁆𑀔𑀸𑀬𑀺𑀢𑀓𑀁 𑀯𑀺𑀓𑁆𑀔𑀺𑀢𑁆𑀢𑀓𑀁 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁 𑀮𑁄𑀳𑀺𑀢𑀓𑀁 𑀧𑀼𑀴𑀯𑀓𑀁 𑀅𑀝𑁆𑀞𑀺𑀓𑀜𑁆𑀘𑁂𑀢𑀺 𑀇𑀫𑁂 𑀤𑀲 𑀅𑀲𑀼𑀪𑀸 𑀦𑀸𑀫.

𑁮. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺 𑀲𑀁𑀖𑀸𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀫𑀭𑀡𑀸𑀦𑀼𑀲𑁆𑀲𑀢𑀺 𑀓𑀸𑀬𑀕𑀢𑀸𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺 𑀘𑁂𑀢𑀺 𑀇𑀫𑀸 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄 𑀦𑀸𑀫.

𑁯. 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸 𑀘𑁂𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦𑀸𑀫, 𑀩𑁆𑀭𑀳𑁆𑀫𑀯𑀺𑀳𑀸𑀭𑁄𑀢𑀺 𑀘 𑀧𑀯𑀼𑀘𑁆𑀘𑀢𑀺.

𑁧𑁦. 𑀆𑀳𑀸𑀭𑁂𑀧𑀝𑀺𑀓𑀽𑀮𑀲𑀜𑁆𑀜𑀸 𑀏𑀓𑀸 𑀲𑀜𑁆𑀜𑀸 𑀦𑀸𑀫.

𑁧𑁧. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀏𑀓𑀁 𑀯𑀯𑀢𑁆𑀣𑀸𑀦𑀁 𑀦𑀸𑀫.

𑁧𑁨. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀬𑁄 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀦𑀸𑀫𑀸𑀢𑀺 𑀲𑀩𑁆𑀩𑀣𑀸𑀧𑀺 𑀲𑀫𑀣𑀦𑀺𑀤𑁆𑀤𑁂𑀲𑁂 𑀘𑀢𑁆𑀢𑀸𑀮𑀻𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀪𑀯𑀦𑁆𑀢𑀺.

𑀲𑀧𑁆𑀧𑀸𑀬𑀪𑁂𑀤𑁄

𑁧𑁩. 𑀘𑀭𑀺𑀢𑀸𑀲𑀼 𑀧𑀦 𑀤𑀲 𑀅𑀲𑀼𑀪𑀸 𑀓𑀸𑀬𑀕𑀢𑀸𑀲𑀢𑀺𑀲𑀗𑁆𑀔𑀸𑀢𑀸 𑀓𑁄𑀝𑁆𑀞𑀸𑀲𑀪𑀸𑀯𑀦𑀸 𑀘 𑀭𑀸𑀕𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀸.

𑁧𑁪. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦𑀻𑀮𑀸𑀤𑀻𑀦𑀺 𑀘 𑀘𑀢𑁆𑀢𑀸𑀭𑀺 𑀓𑀲𑀺𑀡𑀸𑀦𑀺 𑀤𑁄𑀲𑀘𑀭𑀺𑀢𑀲𑁆𑀲.

𑁧𑁫. 𑀆𑀦𑀸𑀧𑀸𑀦𑀁 𑀫𑁄𑀳𑀘𑀭𑀺𑀢𑀲𑁆𑀲 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀘,

𑁧𑁬. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀬𑁄 𑀙 𑀲𑀤𑁆𑀥𑀸𑀘𑀭𑀺𑀢𑀲𑁆𑀲.

𑁧𑁭. 𑀫𑀭𑀡𑀉𑀧𑀲𑀫𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑀸𑀦𑀺 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲.

𑁧𑁮. 𑀲𑁂𑀲𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀧𑁆𑀧𑀸𑀬𑀸𑀦𑀺, 𑀢𑀢𑁆𑀣𑀸𑀧𑀺 𑀓𑀲𑀺𑀡𑁂𑀲𑀼 𑀧𑀼𑀣𑀼𑀮𑀁 𑀫𑁄𑀳𑀘𑀭𑀺𑀢𑀲𑁆𑀲, 𑀔𑀼𑀤𑁆𑀤𑀓𑀁 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲𑁂𑀯𑀸𑀢𑀺.

𑀅𑀬𑀫𑁂𑀢𑁆𑀣 𑀲𑀧𑁆𑀧𑀸𑀬𑀪𑁂𑀤𑁄.

𑀪𑀸𑀯𑀦𑀸𑀪𑁂𑀤𑁄

𑁧𑁯. 𑀪𑀸𑀯𑀦𑀸𑀲𑀼 𑀲𑀩𑁆𑀩𑀢𑁆𑀣𑀸𑀧𑀺 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 𑀮𑀩𑁆𑀪𑀢𑁂𑀯, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼 𑀅𑀝𑁆𑀞𑀲𑀼 𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑁂𑀲𑀼 𑀘𑀸𑀢𑀺 𑀤𑀲𑀲𑀼𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀉𑀧𑀘𑀸𑀭𑀪𑀸𑀯𑀦𑀸𑀯 𑀲𑀫𑁆𑀧𑀚𑁆𑀚𑀢𑀺, 𑀦𑀢𑁆𑀣𑀺 𑀅𑀧𑁆𑀧𑀦𑀸.

𑁨𑁦. 𑀲𑁂𑀲𑁂𑀲𑀼 𑀧𑀦 𑀲𑀫𑀢𑀺𑀁𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀧𑁆𑀧𑀦𑀸𑀪𑀸𑀯𑀦𑀸𑀧𑀺 𑀲𑀫𑁆𑀧𑀚𑁆𑀚𑀢𑀺.

𑁨𑁧. 𑀢𑀢𑁆𑀣𑀸𑀧𑀺 𑀤𑀲 𑀓𑀲𑀺𑀡𑀸𑀦𑀺 𑀆𑀦𑀸𑀧𑀸𑀦𑀜𑁆𑀘 𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀸𑀦𑀺.

𑁨𑁨. 𑀤𑀲 𑀅𑀲𑀼𑀪𑀸 𑀓𑀸𑀬𑀕𑀢𑀸𑀲𑀢𑀺 𑀘 𑀧𑀞𑀫𑀚𑁆𑀛𑀸𑀦𑀺𑀓𑀸.

𑁨𑁩. 𑀫𑁂𑀢𑁆𑀢𑀸𑀤𑀬𑁄 𑀢𑀬𑁄 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸.

𑁨𑁪. 𑀉𑀧𑁂𑀓𑁆𑀔𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀢𑀺 𑀙𑀩𑁆𑀩𑀻𑀲𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀺𑀓𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺.

𑁨𑁫. 𑀘𑀢𑁆𑀢𑀸𑀭𑁄 𑀧𑀦 𑀆𑀭𑀼𑀧𑁆𑀧𑀸 𑀆𑀭𑀼𑀧𑁆𑀧𑀚𑁆𑀛𑀸𑀦𑀺𑀓𑀸𑀢𑀺.

𑀅𑀬𑀫𑁂𑀢𑁆𑀣 𑀪𑀸𑀯𑀦𑀸𑀪𑁂𑀤𑁄.

𑀕𑁄𑀘𑀭𑀪𑁂𑀤𑁄

𑁨𑁬. 𑀦𑀺𑀫𑀺𑀢𑁆𑀢𑁂𑀲𑀼 𑀧𑀦 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀜𑁆𑀘 𑀲𑀩𑁆𑀩𑀢𑁆𑀣𑀸𑀧𑀺 𑀬𑀣𑀸𑀭𑀳𑀁 𑀧𑀭𑀺𑀬𑀸𑀬𑁂𑀦 𑀮𑀩𑁆𑀪𑀦𑁆𑀢𑁂𑀯.

𑁨𑁭. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀦 𑀓𑀲𑀺𑀡𑀸𑀲𑀼𑀪𑀓𑁄𑀝𑁆𑀞𑀸𑀲𑀆𑀦𑀸𑀧𑀸𑀦𑁂𑀲𑁆𑀯𑁂𑀯 𑀮𑀩𑁆𑀪𑀢𑀺, 𑀢𑀢𑁆𑀣 𑀳𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑀸𑀭𑀩𑁆𑀪 𑀉𑀧𑀘𑀸𑀭𑀲𑀫𑀸𑀥𑀺 𑀅𑀧𑁆𑀧𑀦𑀸𑀲𑀫𑀸𑀥𑀺 𑀘 𑀧𑀯𑀢𑁆𑀢𑀦𑁆𑀢𑀺.

𑁨𑁮. 𑀓𑀣𑀁? 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀳𑀺 𑀧𑀣𑀯𑀻𑀫𑀡𑁆𑀟𑀮𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀢𑀫𑀸𑀭𑀫𑁆𑀫𑀡𑀁 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀯𑀼𑀘𑁆𑀘𑀢𑀺, 𑀲𑀸 𑀘 𑀪𑀸𑀯𑀦𑀸 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 𑀦𑀸𑀫.

𑁨𑁯. 𑀬𑀤𑀸 𑀧𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑁂𑀦 𑀲𑀫𑀼𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀦𑁄𑀤𑁆𑀯𑀸𑀭𑀲𑁆𑀲 𑀆𑀧𑀸𑀣𑀫𑀸𑀕𑀢𑀁, 𑀢𑀤𑀸 𑀢𑀫𑁂𑀯𑀸𑀭𑀫𑁆𑀫𑀡𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀦𑀸𑀫, 𑀲𑀸 𑀘 𑀪𑀸𑀯𑀦𑀸 𑀲𑀫𑀸𑀥𑀺𑀬𑀢𑀺.

𑁩𑁦. 𑀢𑀣𑀸 𑀲𑀫𑀸𑀳𑀺𑀢𑀲𑁆𑀲 𑀧𑀦𑁂𑀢𑀲𑁆𑀲 𑀢𑀢𑁄 𑀧𑀭𑀁 𑀢𑀲𑁆𑀫𑀺𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀦𑀸 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀬𑀤𑀸 𑀢𑀧𑁆𑀧𑀝𑀺𑀪𑀸𑀕𑀁 𑀯𑀢𑁆𑀣𑀼𑀥𑀫𑁆𑀫𑀯𑀺𑀫𑀼𑀘𑁆𑀘𑀺𑀢𑀁 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀪𑀸𑀯𑀦𑀸𑀫𑀬𑀫𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑁂 𑀲𑀦𑁆𑀦𑀺𑀲𑀦𑁆𑀦𑀁 𑀲𑀫𑀧𑁆𑀧𑀺𑀢𑀁 𑀳𑁄𑀢𑀺, 𑀢𑀤𑀸 𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁩𑁧. 𑀢𑀢𑁄 𑀧𑀝𑁆𑀞𑀸𑀬 𑀧𑀭𑀺𑀧𑀦𑁆𑀣𑀯𑀺𑀧𑁆𑀧𑀳𑀻𑀦𑀸 𑀓𑀸𑀫𑀸𑀯𑀘𑀭𑀲𑀫𑀸𑀥𑀺𑀲𑀗𑁆𑀔𑀸𑀢𑀸 𑀉𑀧𑀘𑀸𑀭𑀪𑀸𑀯𑀦𑀸 𑀦𑀺𑀧𑁆𑀨𑀦𑁆𑀦𑀸 𑀦𑀸𑀫 𑀳𑁄𑀢𑀺.

𑁩𑁨. 𑀢𑀢𑁄 𑀧𑀭𑀁 𑀢𑀫𑁂𑀯 𑀧𑀭𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀲𑀫𑀸𑀲𑁂𑀯𑀦𑁆𑀢𑀲𑁆𑀲 𑀭𑀽𑀧𑀸𑀯𑀘𑀭𑀧𑀞𑀫𑀚𑁆𑀛𑀸𑀦𑀫𑀧𑁆𑀧𑁂𑀢𑀺.

𑁩𑁩. 𑀢𑀢𑁄 𑀧𑀭𑀁 𑀢𑀫𑁂𑀯 𑀧𑀞𑀫𑀚𑁆𑀛𑀸𑀦𑀁 𑀆𑀯𑀚𑁆𑀚𑀦𑀁 𑀲𑀫𑀸𑀧𑀚𑁆𑀚𑀦𑀁 𑀅𑀥𑀺𑀝𑁆𑀞𑀸𑀦𑀁 𑀯𑀼𑀝𑁆𑀞𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀘𑁂𑀢𑀺 𑀇𑀫𑀸𑀳𑀺 𑀧𑀜𑁆𑀘𑀳𑀺 𑀯𑀲𑀺𑀢𑀸𑀳𑀺 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀯𑀺𑀢𑀓𑁆𑀓𑀸𑀤𑀺𑀓𑀫𑁄𑀴𑀸𑀭𑀺𑀓𑀗𑁆𑀕𑀁 𑀧𑀳𑀸𑀦𑀸𑀬 𑀯𑀺𑀘𑀸𑀭𑀸𑀤𑀺𑀲𑀼𑀔𑀼𑀫𑀗𑁆𑀕𑀼𑀧𑀢𑁆𑀢𑀺𑀬𑀸 𑀧𑀤𑀳𑀢𑁄 𑀬𑀣𑀸𑀓𑁆𑀓𑀫𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀬𑁄 𑀬𑀣𑀸𑀭𑀳𑀫𑀧𑁆𑀧𑁂𑀦𑁆𑀢𑀺.

𑁩𑁪. 𑀇𑀘𑁆𑀘𑁂𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀤𑁆𑀯𑀸𑀯𑀻𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑀼𑀧𑀮𑀩𑁆𑀪𑀢𑀺.

𑁩𑁫. 𑀅𑀯𑀲𑁂𑀲𑁂𑀲𑀼 𑀧𑀦 𑀅𑀧𑁆𑀧𑀫𑀜𑁆𑀜𑀸 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀁 𑀧𑀯𑀢𑁆𑀢𑀦𑁆𑀢𑀺.

𑁩𑁬. 𑀆𑀓𑀸𑀲𑀯𑀚𑁆𑀚𑀺𑀢𑀓𑀲𑀺𑀡𑁂𑀲𑀼 𑀧𑀦 𑀬𑀁 𑀓𑀺𑀜𑁆𑀘𑀺 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀮𑀤𑁆𑀥𑀫𑀸𑀓𑀸𑀲𑀁 𑀅𑀦𑀦𑁆𑀢𑀯𑀲𑁂𑀦 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀫𑀧𑁆𑀧𑁂𑀢𑀺.

𑁩𑁭. 𑀢𑀫𑁂𑀯 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀅𑀦𑀦𑁆𑀢𑀯𑀲𑁂𑀦 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀧𑁆𑀧𑁂𑀢𑀺.

𑁩𑁮. 𑀢𑀫𑁂𑀯 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑀁 𑀧𑀦 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀢𑀢𑀺𑀬𑀸𑀭𑀼𑀧𑁆𑀧𑀫𑀧𑁆𑀧𑁂𑀢𑀺.

𑁩𑁯. 𑀢𑀢𑀺𑀬𑀸𑀭𑀼𑀧𑁆𑀧𑀁 ‘‘𑀲𑀦𑁆𑀢𑀫𑁂𑀢𑀁, 𑀧𑀡𑀻𑀢𑀫𑁂𑀢’’𑀦𑁆𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀧𑁆𑀧𑁂𑀢𑀺.

𑁪𑁦. 𑀅𑀯𑀲𑁂𑀲𑁂𑀲𑀼 𑀘 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀩𑀼𑀤𑁆𑀥𑀕𑀼𑀡𑀸𑀤𑀺𑀓𑀫𑀸𑀭𑀫𑁆𑀫𑀡𑀫𑀸𑀭𑀩𑁆𑀪 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀲𑀸𑀥𑀼𑀓𑀫𑀼𑀕𑁆𑀕𑀳𑀺𑀢𑁂 𑀢𑀢𑁆𑀣𑁂𑀯 𑀧𑀭𑀺𑀓𑀫𑁆𑀫𑀜𑁆𑀘 𑀲𑀫𑀸𑀥𑀺𑀬𑀢𑀺, 𑀉𑀧𑀘𑀸𑀭𑁄 𑀘 𑀲𑀫𑁆𑀧𑀚𑁆𑀚𑀢𑀺.

𑁪𑁧. 𑀅𑀪𑀺𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀧𑀦 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀧𑀜𑁆𑀘𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀥𑀺𑀝𑁆𑀞𑁂𑀬𑁆𑀬𑀸𑀤𑀺𑀓𑀫𑀸𑀯𑀚𑁆𑀚𑁂𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀣𑀸𑀭𑀳𑀫𑀧𑁆𑀧𑁂𑀢𑀺.

𑁪𑁨. 𑀅𑀪𑀺𑀜𑁆𑀜𑀸 𑀘 𑀦𑀸𑀫 𑁋

𑀇𑀤𑁆𑀥𑀺𑀯𑀺𑀥𑀁 𑀤𑀺𑀩𑁆𑀩𑀲𑁄𑀢𑀁, 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀸;

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺, 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀧𑀜𑁆𑀘𑀥𑀸.

𑀅𑀬𑀫𑁂𑀢𑁆𑀣 𑀕𑁄𑀘𑀭𑀪𑁂𑀤𑁄.

𑀦𑀺𑀝𑁆𑀞𑀺𑀢𑁄 𑀘 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀦𑀬𑁄.

𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁

𑀯𑀺𑀲𑀼𑀤𑁆𑀥𑀺𑀪𑁂𑀤𑁄

𑁪𑁩. 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂 𑀧𑀦 𑀲𑀻𑀮𑀯𑀺𑀲𑀼𑀤𑁆𑀥𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀘𑁂𑀢𑀺 𑀲𑀢𑁆𑀢𑀯𑀺𑀥𑁂𑀦 𑀯𑀺𑀲𑀼𑀤𑁆𑀥𑀺𑀲𑀗𑁆𑀕𑀳𑁄.

𑁪𑁪. 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀤𑀼𑀓𑁆𑀔𑀮𑀓𑁆𑀔𑀡𑀁 𑀅𑀦𑀢𑁆𑀢𑀮𑀓𑁆𑀔𑀡𑀜𑁆𑀘𑁂𑀢𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺.

𑁪𑁫. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀘𑁂𑀢𑀺 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸.

𑁪𑁬. 𑀲𑀫𑁆𑀫𑀲𑀦𑀜𑀸𑀡𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀪𑀗𑁆𑀕𑀜𑀸𑀡𑀁 𑀪𑀬𑀜𑀸𑀡𑀁 𑀆𑀤𑀻𑀦𑀯𑀜𑀸𑀡𑀁 𑀦𑀺𑀩𑁆𑀩𑀺𑀤𑀸𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀅𑀦𑀼𑀮𑁄𑀫𑀜𑀸𑀡𑀜𑁆𑀘𑁂𑀢𑀺 𑀤𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺.

𑁪𑁭. 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄 𑀘𑁂𑀢𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸.

𑁪𑁮. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀸𑀦𑀸 𑀘𑁂𑀢𑀺 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪𑁯. 𑀓𑀣𑀁? 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀜𑁆𑀘𑁂𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀲𑀻𑀮𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁫𑁦. 𑀉𑀧𑀘𑀸𑀭𑀲𑀫𑀸𑀥𑀺 𑀅𑀧𑁆𑀧𑀦𑀸𑀲𑀫𑀸𑀥𑀺 𑀘𑁂𑀢𑀺 𑀤𑀼𑀯𑀺𑀥𑁄𑀧𑀺 𑀲𑀫𑀸𑀥𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁫𑁧. 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀯𑀲𑁂𑀦 𑀦𑀸𑀫𑀭𑀽𑀧 𑀧𑀭𑀺𑀕𑁆𑀕𑀳𑁄 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁫𑁨. 𑀢𑁂𑀲𑀫𑁂𑀯 𑀘 𑀦𑀸𑀫𑀭𑀽𑀧𑀸𑀦𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁫𑁩. 𑀢𑀢𑁄 𑀧𑀭𑀁 𑀧𑀦 𑀢𑀣𑀸𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀲𑀧𑁆𑀧𑀘𑁆𑀘𑀬𑁂𑀲𑀼 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂𑀲𑀼 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀔𑀦𑁆𑀥𑀸𑀤𑀺𑀦𑀬𑀫𑀸𑀭𑀩𑁆𑀪 𑀓𑀮𑀸𑀧𑀯𑀲𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 ‘‘𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸’’𑀢𑀺 𑀅𑀤𑁆𑀥𑀸𑀦𑀯𑀲𑁂𑀦 𑀲𑀦𑁆𑀢𑀢𑀺𑀯𑀲𑁂𑀦 𑀔𑀡𑀯𑀲𑁂𑀦 𑀯𑀸 𑀲𑀫𑁆𑀫𑀲𑀦𑀜𑀸𑀡𑁂𑀦 𑀮𑀓𑁆𑀔𑀡𑀢𑁆𑀢𑀬𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀢𑁂𑀲𑁆𑀯𑁂𑀯 𑀧𑀘𑁆𑀘𑀬𑀯𑀲𑁂𑀦 𑀔𑀡𑀯𑀲𑁂𑀦 𑀘 𑀉𑀤𑀬𑀩𑁆𑀩𑀬𑀜𑀸𑀡𑁂𑀦 𑀉𑀤𑀬𑀩𑁆𑀩𑀬𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀘 𑁋

‘‘𑀑𑀪𑀸𑀲𑁄 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺, 𑀅𑀥𑀺𑀫𑁄𑀓𑁆𑀔𑁄 𑀘 𑀧𑀕𑁆𑀕𑀳𑁄;

𑀲𑀼𑀔𑀁 𑀜𑀸𑀡𑀫𑀼𑀧𑀝𑁆𑀞𑀸𑀦𑀫𑀼𑀧𑁂𑀓𑁆𑀔𑀸 𑀘 𑀦𑀺𑀓𑀦𑁆𑀢𑀺 𑀘𑁂’’𑀢𑀺. 𑁋

𑀑𑀪𑀸𑀲𑀸𑀤𑀺𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀧𑀭𑀺𑀧𑀦𑁆𑀣𑀧𑀭𑀺𑀕𑁆𑀕𑀳𑀯𑀲𑁂𑀦 𑀫𑀕𑁆𑀕𑀸𑀫𑀕𑁆𑀕𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀁 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁫𑁪. 𑀢𑀣𑀸 𑀧𑀭𑀺𑀧𑀦𑁆𑀣𑀯𑀺𑀫𑀼𑀢𑁆𑀢𑀲𑁆𑀲 𑀧𑀦 𑀢𑀲𑁆𑀲 𑀉𑀤𑀬𑀩𑁆𑀩𑀬𑀜𑀸𑀡𑀢𑁄 𑀧𑀝𑁆𑀞𑀸𑀬 𑀬𑀸 𑀯𑀸𑀦𑀼𑀮𑁄𑀫𑀸 𑀢𑀺𑀮𑀓𑁆𑀔𑀡𑀁 𑀯𑀺𑀧𑀲𑁆𑀲𑀦𑀸𑀧𑀭𑀫𑁆𑀧𑀭𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀦𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑁫𑁫. 𑀢𑀲𑁆𑀲𑁂𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀧𑀦 𑀯𑀺𑀧𑀲𑁆𑀲𑀦𑀸𑀧𑀭𑀺𑀧𑀸𑀓𑀫𑀸𑀕𑀫𑁆𑀫 ‘‘𑀇𑀤𑀸𑀦𑀺 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀪𑀯𑀗𑁆𑀕𑀁 𑀯𑁄𑀘𑁆𑀙𑀺𑀚𑁆𑀚𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀤𑁆𑀯𑁂 𑀢𑀻𑀡𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀸𑀦𑀺 𑀬𑀁 𑀓𑀺𑀜𑁆𑀘𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀫𑀸𑀭𑀩𑁆𑀪 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀦𑀸𑀫𑁂𑀦 𑀧𑀯𑀢𑁆𑀢𑀦𑁆𑀢𑀺.

𑁫𑁬. 𑀬𑀸 𑀲𑀺𑀔𑀸𑀧𑁆𑀧𑀢𑁆𑀢𑀸, 𑀲𑀸 𑀲𑀸𑀦𑀼𑀮𑁄𑀫𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀢𑀺 𑀘 𑀧𑀯𑀼𑀘𑁆𑀘𑀢𑀺.

𑁫𑁭. 𑀢𑀢𑁄 𑀧𑀭𑀁 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀫𑀸𑀮𑀫𑁆𑀩𑀺𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀫𑀪𑀺𑀪𑀯𑀦𑁆𑀢𑀁, 𑀅𑀭𑀺𑀬𑀕𑁄𑀢𑁆𑀢𑀫𑀪𑀺𑀲𑀫𑁆𑀪𑁄𑀦𑁆𑀢𑀜𑁆𑀘 𑀧𑀯𑀢𑁆𑀢𑀢𑀺.

𑁫𑁮. 𑀢𑀲𑁆𑀲𑀸𑀦𑀦𑁆𑀢𑀭𑀫𑁂𑀯 𑀫𑀕𑁆𑀕𑁄 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀫𑀼𑀤𑀬𑀲𑀘𑁆𑀘𑀁 𑀧𑀚𑀳𑀦𑁆𑀢𑁄, 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄, 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀯𑀲𑁂𑀦 𑀅𑀧𑁆𑀧𑀦𑀸𑀯𑀻𑀣𑀺𑀫𑁄𑀢𑀭𑀢𑀺.

𑁫𑁯. 𑀢𑀢𑁄 𑀧𑀭𑀁 𑀤𑁆𑀯𑁂 𑀢𑀻𑀡𑀺 𑀨𑀮𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀺𑀢𑁆𑀯𑀸 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺, 𑀧𑀼𑀦 𑀪𑀯𑀗𑁆𑀕𑀁 𑀯𑁄𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺.

𑁬𑁦. 𑀫𑀕𑁆𑀕𑀁 𑀨𑀮𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀧𑀘𑁆𑀘𑀯𑁂𑀓𑁆𑀔𑀢𑀺 𑀧𑀡𑁆𑀟𑀺𑀢𑁄.

𑀳𑀻𑀦𑁂 𑀓𑀺𑀮𑁂𑀲𑁂 𑀲𑁂𑀲𑁂 𑀘, 𑀧𑀘𑁆𑀘𑀯𑁂𑀓𑁆𑀔𑀢𑀺 𑀯𑀸𑀦 𑀯𑀸.

𑀙𑀩𑁆𑀩𑀺𑀲𑀼𑀤𑁆𑀥𑀺𑀓𑀫𑁂𑀦𑁂𑀯𑀁, 𑀪𑀸𑀯𑁂𑀢𑀩𑁆𑀩𑁄 𑀘𑀢𑀼𑀩𑁆𑀩𑀺𑀥𑁄;

𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀦𑀸𑀫 𑀫𑀕𑁆𑀕𑁄 𑀧𑀯𑀼𑀘𑁆𑀘𑀢𑀺.

𑀅𑀬𑀫𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀪𑁂𑀤𑁄.

𑀯𑀺𑀫𑁄𑀓𑁆𑀔𑀪𑁂𑀤𑁄

𑁬𑁧. 𑀢𑀢𑁆𑀣 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀁 𑀫𑀼𑀜𑁆𑀘𑀦𑁆𑀢𑀻 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀫 𑀯𑀺𑀫𑁄𑀓𑁆𑀔𑀫𑀼𑀔𑀁 𑀳𑁄𑀢𑀺.

𑁬𑁨. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀮𑁆𑀮𑀸𑀲𑀦𑀺𑀫𑀺𑀢𑁆𑀢𑀁 𑀫𑀼𑀜𑁆𑀘𑀦𑁆𑀢𑀻 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀫.

𑁬𑁩. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀢𑀡𑁆𑀳𑀸𑀧𑀡𑀺𑀥𑀺𑀁 𑀫𑀼𑀜𑁆𑀘𑀦𑁆𑀢𑀻 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸 𑀦𑀸𑀫.

𑁬𑁪. 𑀢𑀲𑁆𑀫𑀸 𑀬𑀤𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺, 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫 𑀳𑁄𑀢𑀺 𑀫𑀕𑁆𑀕𑁄.

𑁬𑁫. 𑀬𑀤𑀺 𑀅𑀦𑀺𑀘𑁆𑀘𑀢𑁄 𑀯𑀺𑀧𑀲𑁆𑀲𑀢𑀺, 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫.

𑁬𑁬. 𑀬𑀤𑀺 𑀤𑀼𑀓𑁆𑀔𑀢𑁄 𑀯𑀺𑀧𑀲𑁆𑀲𑀢𑀺, 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫𑀸𑀢𑀺 𑀘 𑀫𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀕𑀫𑀦𑀯𑀲𑁂𑀦 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺, 𑀢𑀣𑀸 𑀨𑀮𑀜𑁆𑀘 𑀫𑀕𑁆𑀕𑀸𑀕𑀫𑀦𑀯𑀲𑁂𑀦 𑀫𑀕𑁆𑀕𑀯𑀻𑀣𑀺𑀬𑀁.

𑁬𑁭. 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀧𑀦 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀬𑀣𑀸𑀲𑀓𑀨𑀮𑀫𑀼𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀯𑀺𑀧𑀲𑁆𑀲𑀦𑀸𑀕𑀫𑀦𑀯𑀲𑁂𑀦𑁂𑀯 𑀲𑀼𑀜𑁆𑀜𑀢𑀸𑀤𑀺𑀯𑀺𑀫𑁄𑀓𑁆𑀔𑁄𑀢𑀺 𑀘 𑀧𑀯𑀼𑀘𑁆𑀘𑀢𑀺, 𑀆𑀭𑀫𑁆𑀫𑀡𑀯𑀲𑁂𑀦 𑀧𑀦 𑀲𑀭𑀲𑀯𑀲𑁂𑀦 𑀘 𑀦𑀸𑀫𑀢𑁆𑀢𑀬𑀁 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 𑀲𑀫𑀫𑁂𑀯 𑀘.

𑀅𑀬𑀫𑁂𑀢𑁆𑀣 𑀯𑀺𑀫𑁄𑀓𑁆𑀔𑀪𑁂𑀤𑁄.

𑀧𑀼𑀕𑁆𑀕𑀮𑀪𑁂𑀤𑁄

𑁬𑁮. 𑀏𑀢𑁆𑀣 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀧𑀳𑀸𑀦𑁂𑀦 𑀧𑀳𑀻𑀦𑀸𑀧𑀸𑀬𑀕𑀫𑀦𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺.

𑁬𑁯. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀓𑀭𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸.

𑁭𑁦. 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀫𑀦𑀯𑀲𑁂𑀲𑀧𑁆𑀧𑀳𑀸𑀦𑁂𑀦 𑀅𑀦𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺 𑀅𑀦𑀸𑀕𑀦𑁆𑀢𑁆𑀯𑀸 𑀇𑀢𑁆𑀣𑀢𑁆𑀢𑀁.

𑁭𑁧. 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀅𑀦𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀅𑀭𑀳𑀸 𑀦𑀸𑀫 𑀳𑁄𑀢𑀺 𑀔𑀻𑀡𑀸𑀲𑀯𑁄 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄𑀢𑀺.

𑀅𑀬𑀫𑁂𑀢𑁆𑀣 𑀧𑀼𑀕𑁆𑀕𑀮𑀪𑁂𑀤𑁄.

𑀲𑀫𑀸𑀧𑀢𑁆𑀢𑀺𑀪𑁂𑀤𑁄

𑁭𑁨. 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀧𑀦𑁂𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 𑀬𑀣𑀸𑀲𑀓𑀨𑀮𑀯𑀲𑁂𑀦 𑀲𑀸𑀥𑀸𑀭𑀡𑀸𑀯.

𑁭𑁩. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀧𑀦 𑀅𑀦𑀸𑀕𑀸𑀫𑀻𑀦𑀜𑁆𑀘𑁂𑀯 𑀅𑀭𑀳𑀦𑁆𑀢𑀸𑀦𑀜𑁆𑀘 𑀮𑀩𑁆𑀪𑀢𑀺, 𑀢𑀢𑁆𑀣 𑀬𑀣𑀸𑀓𑁆𑀓𑀫𑀁 𑀧𑀞𑀫𑀚𑁆𑀛𑀸𑀦𑀸𑀤𑀺𑀫𑀳𑀕𑁆𑀕𑀢𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀕𑀢𑁂 𑀲𑀗𑁆𑀔𑀸𑀭𑀥𑀫𑁆𑀫𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀺𑀧𑀲𑁆𑀲𑀦𑁆𑀢𑁄 𑀬𑀸𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀥𑀺𑀝𑁆𑀞𑁂𑀬𑁆𑀬𑀸𑀤𑀺𑀓𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀅𑀧𑁆𑀧𑀦𑀸𑀚𑀯𑀦𑀸𑀦𑀁 𑀧𑀭𑀢𑁄 𑀯𑁄𑀘𑁆𑀙𑀺𑀚𑁆𑀚𑀢𑀺 𑀘𑀺𑀢𑁆𑀢𑀲𑀦𑁆𑀢𑀢𑀺, 𑀢𑀢𑁄 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺.

𑁭𑁪. 𑀯𑀼𑀝𑁆𑀞𑀸𑀦𑀓𑀸𑀮𑁂 𑀧𑀦 𑀅𑀦𑀸𑀕𑀸𑀫𑀺𑀦𑁄 𑀅𑀦𑀸𑀕𑀸𑀫𑀺𑀨𑀮𑀘𑀺𑀢𑁆𑀢𑀁, 𑀅𑀭𑀳𑀢𑁄 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑀁 𑀏𑀓𑀯𑀸𑀭𑀫𑁂𑀯 𑀧𑀯𑀢𑁆𑀢𑀺𑀢𑁆𑀯𑀸 𑀪𑀯𑀗𑁆𑀕𑀧𑀸𑀢𑁄 𑀳𑁄𑀢𑀺, 𑀢𑀢𑁄 𑀧𑀭𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀅𑀬𑀫𑁂𑀢𑁆𑀣 𑀲𑀫𑀸𑀧𑀢𑁆𑀢𑀺𑀪𑁂𑀤𑁄.

𑀦𑀺𑀝𑁆𑀞𑀺𑀢𑁄 𑀘 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀦𑀬𑁄.

𑀉𑀬𑁆𑀬𑁄𑀚𑀦𑀁

𑁭𑁫. 𑀪𑀸𑀯𑁂𑀢𑀩𑁆𑀩𑀁 𑀧𑀦𑀺𑀘𑁆𑀘𑁂𑀯𑀁, 𑀪𑀸𑀯𑀦𑀸𑀤𑁆𑀯𑀬𑀫𑀼𑀢𑁆𑀢𑀫𑀁.

𑀧𑀝𑀺𑀧𑀢𑁆𑀢𑀺𑀭𑀲𑀲𑁆𑀲𑀸𑀤𑀁, 𑀧𑀢𑁆𑀣𑀬𑀦𑁆𑀢𑁂𑀦 𑀲𑀸𑀲𑀦𑁂𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀕𑀳𑀯𑀺𑀪𑀸𑀕𑁄 𑀦𑀸𑀫

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀕𑀫𑀦𑀁

(𑀓) 𑀘𑀸𑀭𑀺𑀢𑁆𑀢𑀲𑁄𑀪𑀺𑀢𑀯𑀺𑀲𑀸𑀮𑀓𑀼𑀮𑁄𑀤𑀬𑁂𑀦,

𑀲𑀤𑁆𑀥𑀸𑀪𑀺𑀯𑀼𑀟𑁆𑀠𑀧𑀭𑀺𑀲𑀼𑀤𑁆𑀥𑀕𑀼𑀡𑁄𑀤𑀬𑁂𑀦;

𑀦𑀫𑁆𑀧𑀯𑁆𑀳𑀬𑁂𑀦 𑀧𑀡𑀺𑀥𑀸𑀬 𑀧𑀭𑀸𑀦𑀼𑀓𑀫𑁆𑀧𑀁,

𑀬𑀁 𑀧𑀢𑁆𑀣𑀺𑀢𑀁 𑀧𑀓𑀭𑀡𑀁 𑀧𑀭𑀺𑀦𑀺𑀝𑁆𑀞𑀺𑀢𑀁 𑀢𑀁.

(𑀔) 𑀧𑀼𑀜𑁆𑀜𑁂𑀦 𑀢𑁂𑀦 𑀯𑀺𑀧𑀼𑀮𑁂𑀦 𑀢𑀼 𑀫𑀽𑀮𑀲𑁄𑀫𑀁;

𑀥𑀜𑁆𑀜𑀸𑀥𑀺𑀯𑀸𑀲𑀫𑀼𑀤𑀺𑀢𑁄𑀤𑀺𑀢𑀫𑀸𑀬𑀼𑀓𑀦𑁆𑀢𑀁;

𑀧𑀜𑁆𑀜𑀸𑀯𑀤𑀸𑀢𑀕𑀼𑀡𑀲𑁄𑀪𑀺𑀢𑀮𑀚𑁆𑀚𑀺𑀪𑀺𑀓𑁆𑀔𑀽,

𑀫𑀜𑁆𑀜𑀦𑁆𑀢𑀼 𑀧𑀼𑀜𑁆𑀜𑀯𑀺𑀪𑀯𑁄𑀤𑀬𑀫𑀗𑁆𑀕𑀮𑀸𑀬.

𑀇𑀢𑀺 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑁂𑀦 𑀭𑀘𑀺𑀢𑀁

𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀁 𑀦𑀸𑀫 𑀧𑀓𑀭𑀡𑀁.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.