𑁫. 𑀯𑀻𑀣𑀺𑀫𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄

𑁧. 𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦𑁂𑀯𑀁, 𑀧𑀯𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑁄.

𑀧𑀯𑀢𑁆𑀢𑀺𑀲𑀗𑁆𑀕𑀳𑁄 𑀦𑀸𑀫, 𑀲𑀦𑁆𑀥𑀺𑀬𑀁 𑀤𑀸𑀦𑀺 𑀯𑀼𑀘𑁆𑀘𑀢𑀺.

𑁨. 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄, 𑀘𑀢𑀼𑀩𑁆𑀩𑀺𑀥𑀸 𑀧𑀝𑀺𑀲𑀦𑁆𑀥𑀺, 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺, 𑀘𑀢𑀼𑀥𑀸 𑀫𑀭𑀡𑀼𑀧𑁆𑀧𑀢𑁆𑀢𑀺 𑀘𑁂𑀢𑀺 𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑁂 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀪𑀽𑀫𑀺𑀘𑀢𑀼𑀓𑁆𑀓𑀁

𑁩. 𑀢𑀢𑁆𑀣 𑀅𑀧𑀸𑀬𑀪𑀽𑀫𑀺 𑀓𑀸𑀫𑀲𑀼𑀕𑀢𑀺𑀪𑀽𑀫𑀺 𑀭𑀽𑀧𑀸𑀯𑀘𑀭𑀪𑀽𑀫𑀺 𑀅𑀭𑀽𑀧𑀸𑀯𑀘𑀭𑀪𑀽𑀫𑀺 𑀘𑁂𑀢𑀺 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄 𑀦𑀸𑀫.

𑁪. 𑀢𑀸𑀲𑀼 𑀦𑀺𑀭𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀅𑀲𑀼𑀭𑀓𑀸𑀬𑁄 𑀘𑁂𑀢𑀺 𑀅𑀧𑀸𑀬𑀪𑀽𑀫𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺.

𑁫. 𑀫𑀦𑀼𑀲𑁆𑀲𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀢𑀸𑀯𑀢𑀺𑀁𑀲𑀸 𑀬𑀸𑀫𑀸 𑀢𑀼𑀲𑀺𑀢𑀸 𑀦𑀺𑀫𑁆𑀫𑀸𑀦𑀭𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀘𑁂𑀢𑀺 𑀓𑀸𑀫𑀲𑀼𑀕𑀢𑀺𑀪𑀽𑀫𑀺 𑀲𑀢𑁆𑀢𑀯𑀺𑀥𑀸 𑀳𑁄𑀢𑀺.

𑁬. 𑀲𑀸 𑀧𑀦𑀸𑀬𑀫𑁂𑀓𑀸𑀤𑀲𑀯𑀺𑀥𑀸𑀧𑀺 𑀓𑀸𑀫𑀸𑀯𑀘𑀭𑀪𑀽𑀫𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑁭. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸 𑀫𑀳𑀸𑀩𑁆𑀭𑀳𑁆𑀫𑀸 𑀘𑁂𑀢𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺.

𑁮. 𑀧𑀭𑀺𑀢𑁆𑀢𑀸𑀪𑀸 𑀅𑀧𑁆𑀧𑀫𑀸𑀡𑀸𑀪𑀸 𑀆𑀪𑀲𑁆𑀲𑀭𑀸 𑀘𑁂𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺.

𑁯. 𑀧𑀭𑀺𑀢𑁆𑀢𑀲𑀼𑀪𑀸 𑀅𑀧𑁆𑀧𑀫𑀸𑀡𑀲𑀼𑀪𑀸 𑀲𑀼𑀪𑀓𑀺𑀡𑁆𑀳𑀸 𑀘𑁂𑀢𑀺 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺.

𑁧𑁦. 𑀯𑁂𑀳𑀧𑁆𑀨𑀮𑀸 𑀅𑀲𑀜𑁆𑀜𑀲𑀢𑁆𑀢𑀸 𑀲𑀼𑀤𑁆𑀥𑀸𑀯𑀸𑀲𑀸 𑀘𑁂𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀻𑀢𑀺 𑀭𑀽𑀧𑀸𑀯𑀘𑀭𑀪𑀽𑀫𑀺 𑀲𑁄𑀴𑀲𑀯𑀺𑀥𑀸 𑀳𑁄𑀢𑀺.

𑁧𑁧. 𑀅𑀯𑀺𑀳𑀸 𑀅𑀢𑀧𑁆𑀧𑀸 𑀲𑀼𑀤𑀲𑁆𑀲𑀸 𑀲𑀼𑀤𑀲𑁆𑀲𑀻 𑀅𑀓𑀦𑀺𑀝𑁆𑀞𑀸 𑀘𑁂𑀢𑀺 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺.

𑁧𑁨. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀽𑀫𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀪𑀽𑀫𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀪𑀽𑀫𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀽𑀫𑀺 𑀘𑁂𑀢𑀺 𑀅𑀭𑀽𑀧𑀪𑀽𑀫𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺.

𑁧𑁩. 𑀧𑀼𑀣𑀼𑀚𑁆𑀚𑀦𑀸 𑀦 𑀮𑀩𑁆𑀪𑀦𑁆𑀢𑀺, 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀲𑀩𑁆𑀩𑀣𑀸.

𑀲𑁄𑀢𑀸𑀧𑀦𑁆𑀦𑀸 𑀘 𑀲𑀓𑀤𑀸𑀕𑀸𑀫𑀺𑀦𑁄 𑀘𑀸𑀧𑀺 𑀧𑀼𑀕𑁆𑀕𑀮𑀸.

𑁧𑁪. 𑀅𑀭𑀺𑀬𑀸 𑀦𑁄𑀧𑀮𑀩𑁆𑀪𑀦𑁆𑀢𑀺, 𑀅𑀲𑀜𑁆𑀜𑀸𑀧𑀸𑀬𑀪𑀽𑀫𑀺𑀲𑀼.

𑀲𑁂𑀲𑀝𑁆𑀞𑀸𑀦𑁂𑀲𑀼 𑀮𑀩𑁆𑀪𑀦𑁆𑀢𑀺, 𑀅𑀭𑀺𑀬𑀸𑀦𑀭𑀺𑀬𑀸𑀧𑀺 𑀘.

𑀇𑀤𑀫𑁂𑀢𑁆𑀣 𑀪𑀽𑀫𑀺𑀘𑀢𑀼𑀓𑁆𑀓𑀁.

𑀧𑀝𑀺𑀲𑀦𑁆𑀥𑀺𑀘𑀢𑀼𑀓𑁆𑀓𑀁

𑁧𑁫. 𑀅𑀧𑀸𑀬𑀧𑀝𑀺𑀲𑀦𑁆𑀥𑀺 𑀓𑀸𑀫𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺 𑀅𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺 𑀘𑁂𑀢𑀺 𑀘𑀢𑀼𑀩𑁆𑀩𑀺𑀥𑀸 𑀧𑀝𑀺𑀲𑀦𑁆𑀥𑀺 𑀦𑀸𑀫.

𑁧𑁬. 𑀢𑀢𑁆𑀣 𑀅𑀓𑀼𑀲𑀮𑀯𑀺𑀧𑀸𑀓𑁄𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀅𑀧𑀸𑀬𑀪𑀽𑀫𑀺𑀬𑀁 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀁 𑀧𑀭𑀺𑀬𑁄𑀲𑀸𑀦𑁂 𑀘𑀯𑀦𑀁 𑀳𑀼𑀢𑁆𑀯𑀸 𑀯𑁄𑀘𑁆𑀙𑀺𑀚𑁆𑀚𑀢𑀺, 𑀅𑀬𑀫𑁂𑀓𑀸𑀧𑀸𑀬𑀧𑀝𑀺𑀲𑀦𑁆𑀥𑀺 𑀦𑀸𑀫.

𑁧𑁭. 𑀓𑀼𑀲𑀮𑀯𑀺𑀧𑀸𑀓𑁄𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀧𑀦 𑀓𑀸𑀫𑀲𑀼𑀕𑀢𑀺𑀬𑀁 𑀫𑀦𑀼𑀲𑁆𑀲𑀸𑀦𑀜𑁆𑀘𑁂𑀯 𑀚𑀘𑁆𑀘𑀦𑁆𑀥𑀸𑀤𑀻𑀦𑀁 𑀪𑀼𑀫𑁆𑀫𑀲𑁆𑀲𑀺𑀢𑀸𑀦𑀜𑁆𑀘 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸𑀦𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑀺.

𑁧𑁮. 𑀫𑀳𑀸𑀯𑀺𑀧𑀸𑀓𑀸𑀦𑀺 𑀧𑀦 𑀅𑀝𑁆𑀞 𑀲𑀩𑁆𑀩𑀢𑁆𑀣𑀸𑀧𑀺 𑀓𑀸𑀫𑀲𑀼𑀕𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺.

𑁧𑁯. 𑀇𑀫𑀸 𑀦𑀯 𑀓𑀸𑀫𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀦𑀸𑀫.

𑁨𑁦. 𑀲𑀸 𑀧𑀦𑀸𑀬𑀁 𑀤𑀲𑀯𑀺𑀥𑀸𑀧𑀺 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑁨𑁧. 𑀢𑁂𑀲𑀼 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸𑀦𑀜𑁆𑀘 𑀆𑀬𑀼𑀧𑁆𑀧𑀫𑀸𑀡𑀕𑀡𑀦𑀸𑀬 𑀦𑀺𑀬𑀫𑁄 𑀦𑀢𑁆𑀣𑀺.

𑁨𑁨. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀧𑀦 𑀤𑁂𑀯𑀸𑀦𑀁 𑀤𑀺𑀩𑁆𑀩𑀸𑀦𑀺 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀢𑀸𑀯𑀢𑀺𑀁𑀲𑀸𑀦𑀁, 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀬𑀸𑀫𑀸𑀦𑀁, 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀢𑀼𑀲𑀺𑀢𑀸𑀦𑀁, 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀦𑀺𑀫𑁆𑀫𑀸𑀦𑀭𑀢𑀻𑀦𑀁, 𑀢𑀢𑁄 𑀘𑀢𑀼𑀕𑁆𑀕𑀼𑀡𑀁 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁.

𑁨𑁩. 𑀦𑀯𑀲𑀢𑀜𑁆𑀘𑁂𑀓𑀯𑀻𑀲-𑀯𑀲𑁆𑀲𑀸𑀦𑀁 𑀓𑁄𑀝𑀺𑀬𑁄 𑀢𑀣𑀸.

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀲𑀝𑁆𑀞𑀺 𑀘 𑀯𑀲𑀯𑀢𑁆𑀢𑀺𑀲𑀼.

𑁨𑁪. 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑀁 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑀺.

𑁨𑁫. 𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀁 𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀜𑁆𑀘 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁.

𑁨𑁬. 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑀁 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁.

𑁨𑁭. 𑀧𑀜𑁆𑀘𑀫𑀚𑁆𑀛𑀸𑀦𑀯𑀺𑀧𑀸𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀬𑀁.

𑁨𑁮. 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀧𑀦 𑀭𑀽𑀧𑀫𑁂𑀯 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀢𑀣𑀸 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀬𑀁 𑀘𑀯𑀦𑀓𑀸𑀮𑁂 𑀘 𑀭𑀽𑀧𑀫𑁂𑀯 𑀧𑀯𑀢𑁆𑀢𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀇𑀫𑀸 𑀙 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑁄 𑀦𑀸𑀫.

𑁨𑁯. 𑀢𑁂𑀲𑀼 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀁 𑀤𑁂𑀯𑀸𑀦𑀁 𑀓𑀧𑁆𑀧𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄 𑀆𑀬𑀼𑀧𑁆𑀧𑀫𑀸𑀡𑀁.

𑁩𑁦. 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀦𑀁 𑀉𑀧𑀟𑁆𑀠𑀓𑀧𑁆𑀧𑁄.

𑁩𑁧. 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀏𑀓𑁄 𑀓𑀧𑁆𑀧𑁄.

𑁩𑁨. 𑀧𑀭𑀺𑀢𑁆𑀢𑀸𑀪𑀸𑀦𑀁 𑀤𑁆𑀯𑁂 𑀓𑀧𑁆𑀧𑀸𑀦𑀺.

𑁩𑁩. 𑀅𑀧𑁆𑀧𑀫𑀸𑀡𑀸𑀪𑀸𑀦𑀁 𑀘𑀢𑁆𑀢𑀸𑀭𑀺𑀓𑀧𑁆𑀧𑀸𑀦𑀺.

𑁩𑁪. 𑀆𑀪𑀲𑁆𑀲𑀭𑀸𑀦𑀁 𑀅𑀝𑁆𑀞 𑀓𑀧𑁆𑀧𑀸𑀦𑀺.

𑁩𑁫. 𑀧𑀭𑀺𑀢𑁆𑀢𑀲𑀼𑀪𑀸𑀦𑀁 𑀲𑁄𑀴𑀲 𑀓𑀧𑁆𑀧𑀸𑀦𑀺.

𑁩𑁬. 𑀅𑀧𑁆𑀧𑀫𑀸𑀡𑀲𑀼𑀪𑀸𑀦𑀁 𑀤𑁆𑀯𑀢𑁆𑀢𑀺𑀁𑀲 𑀓𑀧𑁆𑀧𑀸𑀦𑀺.

𑁩𑁭. 𑀲𑀼𑀪𑀓𑀺𑀡𑁆𑀳𑀸𑀦𑀁 𑀘𑀢𑀼𑀲𑀝𑁆𑀞𑀺 𑀓𑀧𑁆𑀧𑀸𑀦𑀺.

𑁩𑁮. 𑀯𑁂𑀳𑀧𑁆𑀨𑀮𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀜𑁆𑀘 𑀧𑀜𑁆𑀘𑀓𑀧𑁆𑀧𑀲𑀢𑀸𑀦𑀺.

𑁩𑁯. 𑀅𑀯𑀺𑀳𑀸𑀦𑀁 𑀓𑀧𑁆𑀧𑀲𑀳𑀲𑁆𑀲𑀸𑀦𑀺.

𑁪𑁦. 𑀅𑀢𑀧𑁆𑀧𑀸𑀦𑀁 𑀤𑁆𑀯𑁂 𑀓𑀧𑁆𑀧𑀲𑀳𑀲𑁆𑀲𑀸𑀦𑀺.

𑁪𑁧. 𑀲𑀼𑀤𑀲𑁆𑀲𑀸𑀦𑀁 𑀘𑀢𑁆𑀢𑀸𑀭𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺.

𑁪𑁨. 𑀲𑀼𑀤𑀲𑁆𑀲𑀻𑀦𑀁 𑀅𑀝𑁆𑀞 𑀓𑀧𑁆𑀧𑀲𑀳𑀲𑁆𑀲𑀸𑀦𑀺.

𑁪𑁩. 𑀅𑀓𑀦𑀺𑀝𑁆𑀞𑀸𑀦𑀁 𑀲𑁄𑀴𑀲 𑀓𑀧𑁆𑀧𑀲𑀳𑀲𑁆𑀲𑀸𑀦𑀺.

𑁪𑁪. 𑀧𑀞𑀫𑀸𑀭𑀼𑀧𑁆𑀧𑀸𑀤𑀺𑀯𑀺𑀧𑀸𑀓𑀸𑀦𑀺 𑀧𑀞𑀫𑀸𑀭𑀼𑀧𑁆𑀧𑀸𑀤𑀺𑀪𑀽𑀫𑀻𑀲𑀼 𑀬𑀣𑀸𑀓𑁆𑀓𑀫𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀇𑀫𑀸 𑀘𑀢𑀲𑁆𑀲𑁄 𑀅𑀭𑀽𑀧𑀧𑀝𑀺𑀲𑀦𑁆𑀥𑀺𑀬𑁄 𑀦𑀸𑀫.

𑁪𑁫. 𑀢𑁂𑀲𑀼 𑀧𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀯𑀻𑀲𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁.

𑁪𑁬. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀘𑀢𑁆𑀢𑀸𑀮𑀻𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺.

𑁪𑁭. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺.

𑁪𑁮. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺.

𑁪𑁯. 𑀧𑀝𑀺𑀲𑀦𑁆𑀥𑀺 𑀪𑀯𑀗𑁆𑀕𑀜𑁆𑀘, 𑀢𑀣𑀸 𑀘𑀯𑀦𑀫𑀸𑀦𑀲𑀁.

𑀏𑀓𑀫𑁂𑀯 𑀢𑀣𑁂𑀯𑁂𑀓𑀯𑀺𑀲𑀬𑀜𑁆𑀘𑁂𑀓𑀚𑀸𑀢𑀺𑀬𑀁.

𑀇𑀤𑀫𑁂𑀢𑁆𑀣 𑀧𑀝𑀺𑀲𑀦𑁆𑀥𑀺𑀘𑀢𑀼𑀓𑁆𑀓𑀁.

𑀓𑀫𑁆𑀫𑀘𑀢𑀼𑀓𑁆𑀓𑀁

𑁫𑁦. 𑀚𑀦𑀓𑀁 𑀉𑀧𑀢𑁆𑀣𑀫𑁆𑀪𑀓𑀁 𑀉𑀧𑀧𑀻𑀴𑀓𑀁 𑀉𑀧𑀖𑀸𑀢𑀓𑀜𑁆𑀘𑁂𑀢𑀺 𑀓𑀺𑀘𑁆𑀘𑀯𑀲𑁂𑀦.

𑁫𑁧. 𑀕𑀭𑀼𑀓𑀁 𑀆𑀲𑀦𑁆𑀦𑀁 𑀆𑀘𑀺𑀡𑁆𑀡𑀁 𑀓𑀝𑀢𑁆𑀢𑀸𑀓𑀫𑁆𑀫𑀜𑁆𑀘𑁂𑀢𑀺 𑀧𑀸𑀓𑀤𑀸𑀦𑀧𑀭𑀺𑀬𑀸𑀬𑁂𑀦.

𑁫𑁨. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀅𑀳𑁄𑀲𑀺𑀓𑀫𑁆𑀫𑀜𑁆𑀘𑁂𑀢𑀺 𑀧𑀸𑀓𑀓𑀸𑀮𑀯𑀲𑁂𑀦 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀦𑀸𑀫.

𑁫𑁩. 𑀢𑀣𑀸 𑀅𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀜𑁆𑀘𑁂𑀢𑀺 𑀧𑀸𑀓𑀞𑀸𑀦𑀯𑀲𑁂𑀦.

𑁫𑁪. 𑀢𑀢𑁆𑀣 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀜𑁆𑀘𑁂𑀢𑀺 𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺.

𑁫𑁫. 𑀓𑀣𑀁? 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀘𑁂𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀓𑀸𑀬𑀤𑁆𑀯𑀸𑀭𑁂 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄 𑀓𑀸𑀬𑀓𑀫𑁆𑀫𑀁 𑀦𑀸𑀫.

𑁫𑁬. 𑀫𑀼𑀲𑀸𑀯𑀸𑀤𑁄 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀘𑁂𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀯𑀘𑀻𑀤𑁆𑀯𑀸𑀭𑁂 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄 𑀯𑀘𑀻𑀓𑀫𑁆𑀫𑀁 𑀦𑀸𑀫.

𑁫𑁭. 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑁂𑀢𑀺 𑀅𑀜𑁆𑀜𑀢𑁆𑀭𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀫𑀦𑀲𑁆𑀫𑀺𑀁𑀬𑁂𑀯 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑁫𑁮. 𑀢𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑁄 𑀨𑀭𑀼𑀲𑀯𑀸𑀘𑀸 𑀩𑁆𑀬𑀸𑀧𑀸𑀤𑁄 𑀘 𑀤𑁄𑀲𑀫𑀽𑀮𑁂𑀦 𑀚𑀸𑀬𑀦𑁆𑀢𑀺.

𑁫𑁯. 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀅𑀪𑀺𑀚𑁆𑀛𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀮𑁄𑀪𑀫𑀽𑀮𑁂𑀦.

𑁬𑁦. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀤𑁆𑀯𑀻𑀳𑀺 𑀫𑀽𑀮𑁂𑀳𑀺 𑀲𑀫𑁆𑀪𑀯𑀦𑁆𑀢𑀺.

𑁬𑁧. 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀧𑀦𑁂𑀢𑀁 𑀅𑀓𑀼𑀲𑀮𑀁 𑀲𑀩𑁆𑀩𑀣𑀸𑀧𑀺 𑀤𑁆𑀯𑀸𑀤𑀲𑀯𑀺𑀥𑀁 𑀳𑁄𑀢𑀺.

𑁬𑁨. 𑀓𑀸𑀫𑀸𑀯𑀘𑀭𑀓𑀼𑀲𑀮𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀫𑀦𑁄𑀓𑀫𑁆𑀫𑀜𑁆𑀘𑁂𑀢𑀺 𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺.

𑁬𑁩. 𑀢𑀣𑀸 𑀤𑀸𑀦𑀲𑀻𑀮𑀪𑀸𑀯𑀦𑀸𑀯𑀲𑁂𑀦.

𑁬𑁪. 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀧𑀦𑁂𑀢𑀁 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺.

𑁬𑁫. 𑀤𑀸𑀦𑀲𑀻𑀮𑀪𑀸𑀯𑀦𑀸𑀧𑀘𑀸𑀬𑀦𑀯𑁂𑀬𑁆𑀬𑀸𑀯𑀘𑁆𑀘𑀧𑀢𑁆𑀢𑀺𑀤𑀸𑀦𑀧𑀢𑁆𑀢𑀸𑀦𑀼𑀫𑁄𑀤𑀦𑀥𑀫𑁆𑀫𑀲𑁆𑀲𑀯𑀦𑀥𑀫𑁆𑀫𑀤𑁂𑀲𑀦𑀸 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀯𑀲𑁂𑀦 𑀤𑀲𑀯𑀺𑀥𑀁 𑀳𑁄𑀢𑀺.

𑁬𑁬. 𑀢𑀁 𑀧𑀦𑁂𑀢𑀁 𑀯𑀻𑀲𑀢𑀺𑀯𑀺𑀥𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀫𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑁬𑁭. 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀧𑀦 𑀫𑀦𑁄𑀓𑀫𑁆𑀫𑀫𑁂𑀯, 𑀢𑀜𑁆𑀘 𑀪𑀸𑀯𑀦𑀸𑀫𑀬𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁, 𑀛𑀸𑀦𑀗𑁆𑀕𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺.

𑁬𑁮. 𑀢𑀣𑀸 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀜𑁆𑀘 𑀫𑀦𑁄𑀓𑀫𑁆𑀫𑀁, 𑀢𑀫𑁆𑀧𑀺 𑀪𑀸𑀯𑀦𑀸𑀫𑀬𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁. 𑀆𑀭𑀫𑁆𑀫𑀡𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺.

𑁬𑁯. 𑀏𑀢𑁆𑀣𑀸𑀓𑀼𑀲𑀮𑀓𑀫𑁆𑀫𑀫𑀼𑀤𑁆𑀥𑀘𑁆𑀘𑀭𑀳𑀺𑀢𑀁 𑀅𑀧𑀸𑀬𑀪𑀽𑀫𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀺, 𑀧𑀯𑀢𑁆𑀢𑀺𑀬𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀤𑁆𑀯𑀸𑀤𑀲𑀯𑀺𑀥𑀁 𑀲𑀢𑁆𑀢𑀸𑀓𑀼𑀲𑀮𑀧𑀸𑀓𑀸𑀦𑀺 𑀲𑀩𑁆𑀩𑀢𑁆𑀣𑀸𑀧𑀺 𑀓𑀸𑀫𑀮𑁄𑀓𑁂 𑀭𑀽𑀧𑀮𑁄𑀓𑁂 𑀘 𑀬𑀣𑀸𑀭𑀳𑀁 𑀯𑀺𑀧𑀘𑁆𑀘𑀢𑀺.

𑁭𑁦. 𑀓𑀸𑀫𑀸𑀯𑀘𑀭𑀓𑀼𑀲𑀮𑀫𑁆𑀧𑀺 𑀓𑀸𑀫𑀲𑀼𑀕𑀢𑀺𑀬𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀬𑀜𑁆𑀘 𑀫𑀳𑀸𑀯𑀺𑀧𑀸𑀓𑀸𑀦𑀺, 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀺 𑀧𑀦 𑀅𑀝𑁆𑀞𑀧𑀺 𑀲𑀩𑁆𑀩𑀢𑁆𑀣𑀸𑀧𑀺 𑀓𑀸𑀫𑀮𑁄𑀓𑁂 𑀭𑀽𑀧𑀮𑁄𑀓𑁂 𑀘 𑀬𑀣𑀸𑀭𑀳𑀁 𑀯𑀺𑀧𑀘𑁆𑀘𑀢𑀺.

𑁭𑁧. 𑀢𑀢𑁆𑀣𑀸𑀧𑀺 𑀢𑀺𑀳𑁂𑀢𑀼𑀓𑀫𑀼𑀓𑁆𑀓𑀝𑁆𑀞𑀁 𑀓𑀼𑀲𑀮𑀁 𑀢𑀺𑀳𑁂𑀢𑀼𑀓𑀁 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀲𑁄𑀴𑀲 𑀯𑀺𑀧𑀸𑀓𑀸𑀦𑀺 𑀯𑀺𑀧𑀘𑁆𑀘𑀢𑀺.

𑁭𑁨. 𑀢𑀺𑀳𑁂𑀢𑀼𑀓𑀫𑁄𑀫𑀓𑀁 𑀤𑁆𑀯𑀺𑀳𑁂𑀢𑀼𑀓𑀫𑀼𑀓𑁆𑀓𑀝𑁆𑀞𑀜𑁆𑀘 𑀓𑀼𑀲𑀮𑀁 𑀤𑁆𑀯𑀺𑀳𑁂𑀢𑀼𑀓𑀁 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀢𑀺𑀳𑁂𑀢𑀼𑀓𑀭𑀳𑀺𑀢𑀸𑀦𑀺 𑀤𑁆𑀯𑀸𑀤𑀲 𑀯𑀺𑀧𑀸𑀓𑀸𑀦𑀺 𑀯𑀺𑀧𑀘𑁆𑀘𑀢𑀺.

𑁭𑁩. 𑀤𑁆𑀯𑀺𑀳𑁂𑀢𑀼𑀓𑀫𑁄𑀫𑀓𑀁 𑀧𑀦 𑀓𑀼𑀲𑀮𑀁 𑀅𑀳𑁂𑀢𑀼𑀓𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀧𑀯𑀢𑁆𑀢𑁂 𑀘 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑁂𑀯 𑀯𑀺𑀧𑀘𑁆𑀘𑀢𑀺.

𑁭𑁪. 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭-𑀯𑀺𑀧𑀸𑀓𑀸𑀦𑀺 𑀦 𑀧𑀘𑁆𑀘𑀢𑀺.

𑀲𑀲𑀗𑁆𑀔𑀸𑀭𑀫𑀲𑀗𑁆𑀔𑀸𑀭-𑀯𑀺𑀧𑀸𑀓𑀸𑀦𑀻𑀢𑀺 𑀓𑁂𑀘𑀦.

𑀢𑁂𑀲𑀁 𑀤𑁆𑀯𑀸𑀤𑀲 𑀧𑀸𑀓𑀸𑀦𑀺, 𑀤𑀲𑀸𑀝𑁆𑀞 𑀘 𑀬𑀣𑀸𑀓𑁆𑀓𑀫𑀁;

𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀬𑀣𑀸𑀲𑀫𑁆𑀪𑀯𑀫𑀼𑀤𑁆𑀤𑀺𑀲𑁂.

𑁭𑁫. 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀧𑀦 𑀧𑀞𑀫𑀚𑁆𑀛𑀸𑀦𑀁 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂𑀲𑀼 𑀉𑀧𑁆𑀧𑀚𑁆𑀚𑀢𑀺.

𑁭𑁬. 𑀢𑀤𑁂𑀯 𑀫𑀚𑁆𑀛𑀺𑀫𑀁 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑁂𑀲𑀼.

𑁭𑁭. 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑁂𑀲𑀼.

𑁭𑁮. 𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑀁 𑀢𑀢𑀺𑀬𑀚𑁆𑀛𑀸𑀦𑀜𑁆𑀘 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀧𑀭𑀺𑀢𑁆𑀢𑀸𑀪𑁂𑀲𑀼.

𑁭𑁯. 𑀫𑀚𑁆𑀛𑀺𑀫𑀁 𑀪𑀸𑀯𑁂𑀢𑁆𑀯𑀸 𑀅𑀧𑁆𑀧𑀫𑀸𑀡𑀸𑀪𑁂𑀲𑀼.

𑁮𑁦. 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀆𑀪𑀲𑁆𑀲𑀭𑁂𑀲𑀼.

𑁮𑁧. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀧𑀭𑀺𑀢𑁆𑀢𑀲𑀼𑀪𑁂𑀲𑀼.

𑁮𑁨. 𑀫𑀚𑁆𑀛𑀺𑀫𑀁 𑀪𑀸𑀯𑁂𑀢𑁆𑀯𑀸 𑀅𑀧𑁆𑀧𑀫𑀸𑀡𑀲𑀼𑀪𑁂𑀲𑀼.

𑁮𑁩. 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑁂𑀲𑀼.

𑁮𑁪. 𑀧𑀜𑁆𑀘𑀫𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀯𑁂𑀳𑀧𑁆𑀨𑀮𑁂𑀲𑀼.

𑁮𑁫. 𑀢𑀤𑁂𑀯 𑀲𑀜𑁆𑀜𑀸𑀯𑀺𑀭𑀸𑀕𑀁 𑀪𑀸𑀯𑁂𑀢𑁆𑀯𑀸 𑀅𑀲𑀜𑁆𑀜𑀲𑀢𑁆𑀢𑁂𑀲𑀼.

𑁮𑁬. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁮𑁭. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀜𑁆𑀘 𑀬𑀣𑀸𑀓𑁆𑀓𑀫𑀁 𑀪𑀸𑀯𑁂𑀢𑁆𑀯𑀸 𑀆𑀭𑀼𑀧𑁆𑀧𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑁮𑁮. 𑀇𑀢𑁆𑀣𑀁 𑀫𑀳𑀕𑁆𑀕𑀢𑀁 𑀧𑀼𑀜𑁆𑀜𑀁, 𑀬𑀣𑀸𑀪𑀽𑀫𑀺𑀯𑀯𑀢𑁆𑀣𑀺𑀢𑀁.

𑀚𑀦𑁂𑀢𑀺 𑀲𑀤𑀺𑀲𑀁 𑀧𑀸𑀓𑀁, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀬𑀁.

𑀇𑀤𑀫𑁂𑀢𑁆𑀣 𑀓𑀫𑁆𑀫𑀘𑀢𑀼𑀓𑁆𑀓𑀁.

𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑁄

𑁮𑁯. 𑀆𑀬𑀼𑀓𑁆𑀔𑀬𑁂𑀦 𑀓𑀫𑁆𑀫𑀓𑁆𑀔𑀬𑁂𑀦 𑀉𑀪𑀬𑀓𑁆𑀔𑀬𑁂𑀦 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀼𑀦𑀸 𑀘𑁂𑀢𑀺 𑀘𑀢𑀼𑀥𑀸 𑀫𑀭𑀡𑀼𑀧𑁆𑀧𑀢𑁆𑀢𑀺 𑀦𑀸𑀫.

𑁯𑁦. 𑀢𑀣𑀸 𑀘 𑀫𑀭𑀦𑁆𑀢𑀸𑀦𑀁 𑀧𑀦 𑀫𑀭𑀡𑀓𑀸𑀮𑁂 𑀬𑀣𑀸𑀭𑀳𑀁 𑀅𑀪𑀺𑀫𑀼𑀔𑀻𑀪𑀽𑀢𑀁 𑀪𑀯𑀦𑁆𑀢𑀭𑁂 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀓𑀫𑁆𑀫𑀁 𑀯𑀸, 𑀢𑀁𑀓𑀫𑁆𑀫𑀓𑀭𑀡𑀓𑀸𑀮𑁂 𑀭𑀽𑀧𑀸𑀤𑀺𑀓𑀫𑀼𑀧𑀮𑀤𑁆𑀥𑀧𑀼𑀩𑁆𑀩𑀫𑀼𑀧𑀓𑀭𑀡𑀪𑀽𑀢𑀜𑁆𑀘 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸, 𑀅𑀦𑀦𑁆𑀢𑀭𑀫𑀼𑀧𑁆𑀧𑀚𑁆𑀚𑀫𑀸𑀦𑀪𑀯𑁂 𑀉𑀧𑀮𑀪𑀺𑀢𑀩𑁆𑀩𑀫𑀼𑀧𑀪𑁄𑀕𑀪𑀽𑀢𑀜𑁆𑀘 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀓𑀫𑁆𑀫𑀩𑀮𑁂𑀦 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀢𑀢𑁄 𑀧𑀭𑀁 𑀢𑀫𑁂𑀯 𑀢𑀣𑁄𑀧𑀝𑁆𑀞𑀺𑀢𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀯𑀺𑀧𑀘𑁆𑀘𑀫𑀸𑀦𑀓𑀓𑀫𑁆𑀫𑀸𑀦𑀼𑀭𑀽𑀧𑀁 𑀧𑀭𑀺𑀲𑀼𑀤𑁆𑀥𑀁 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀯𑀸 𑀉𑀧𑀮𑀪𑀺𑀢𑀩𑁆𑀩𑀪𑀯𑀸𑀦𑀼𑀭𑀽𑀧𑀁 𑀢𑀢𑁆𑀣𑁄𑀡𑀢𑀁𑀯 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀢𑀺 𑀩𑀸𑀳𑀼𑀮𑁆𑀮𑁂𑀦, 𑀢𑀫𑁂𑀯 𑀯𑀸 𑀧𑀦 𑀚𑀦𑀓𑀪𑀽𑀢𑀁 𑀓𑀫𑁆𑀫𑀁 𑀅𑀪𑀺𑀦𑀯𑀓𑀭𑀡𑀯𑀲𑁂𑀦 𑀤𑁆𑀯𑀸𑀭𑀧𑁆𑀧𑀢𑁆𑀢𑀁 𑀳𑁄𑀢𑀺.

𑁯𑁧. 𑀧𑀘𑁆𑀘𑀸𑀲𑀦𑁆𑀦𑀫𑀭𑀡𑀲𑁆𑀲 𑀢𑀲𑁆𑀲 𑀯𑀻𑀣𑀺𑀘𑀺𑀢𑁆𑀢𑀸𑀯𑀲𑀸𑀦𑁂 𑀪𑀯𑀗𑁆𑀕𑀓𑁆𑀔𑀬𑁂 𑀯𑀸 𑀘𑀯𑀦𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑀸𑀯𑀲𑀸𑀦𑁂 𑀢𑀲𑁆𑀲𑀸𑀦𑀦𑁆𑀢𑀭𑀫𑁂𑀯 𑀢𑀣𑀸𑀕𑀳𑀺𑀢𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀲𑀯𑀢𑁆𑀣𑀼𑀓𑀁 𑀅𑀯𑀢𑁆𑀣𑀼𑀓𑀫𑁂𑀯 𑀯𑀸 𑀬𑀣𑀸𑀭𑀳𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀧𑀭𑀺𑀓𑁆𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀦𑀼𑀲𑀬𑀫𑀽𑀮𑀓𑁂𑀦 𑀲𑀗𑁆𑀔𑀸𑀭𑁂𑀦 𑀚𑀦𑀺𑀬𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀁 𑀲𑀳𑀚𑀸𑀢𑀸𑀦𑀫𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀧𑀼𑀩𑁆𑀩𑀗𑁆𑀕𑀫𑀪𑀽𑀢𑀁 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀦𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑀁 𑀫𑀸𑀦𑀲𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀧𑀢𑀺𑀝𑁆𑀞𑀸𑀢𑀺 𑀪𑀯𑀦𑁆𑀢𑀭𑁂.

𑁯𑁨. 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀬𑀁 𑀧𑀦𑁂𑀢𑁆𑀣 𑀫𑀦𑁆𑀤𑀧𑁆𑀧𑀯𑀢𑁆𑀢𑀸𑀦𑀺 𑀧𑀜𑁆𑀘𑁂𑀯 𑀚𑀯𑀦𑀸𑀦𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀬𑀤𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂𑀲𑀼 𑀆𑀧𑀸𑀣𑀕𑀢𑁂𑀲𑀼 𑀥𑀭𑀦𑁆𑀢𑁂𑀲𑁆𑀯𑁂𑀯 𑀫𑀭𑀡𑀁 𑀳𑁄𑀢𑀺, 𑀢𑀤𑀸 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀮𑀩𑁆𑀪𑀢𑀻𑀢𑀺 𑀓𑀢𑁆𑀯𑀸 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑀸 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀸𑀭𑀫𑁆𑀫𑀡𑀁 𑀉𑀧𑀮𑀩𑁆𑀪𑀢𑀺, 𑀓𑀫𑁆𑀫𑀁 𑀧𑀦 𑀅𑀢𑀻𑀢𑀫𑁂𑀯, 𑀢𑀜𑁆𑀘 𑀫𑀦𑁄𑀤𑁆𑀯𑀸𑀭𑀕𑁆𑀕𑀳𑀺𑀢𑀁, 𑀢𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀧𑀭𑀺𑀢𑁆𑀢𑀥𑀫𑁆𑀫𑀪𑀽𑀢𑀸𑀦𑁂𑀯𑀸𑀭𑀫𑁆𑀫𑀡𑀸𑀦𑀺.

𑁯𑁩. 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑀸 𑀧𑀦 𑀧𑀜𑁆𑀜𑀢𑁆𑀢𑀺𑀪𑀽𑀢𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯𑀸𑀭𑀫𑁆𑀫𑀡𑀁 𑀳𑁄𑀢𑀺.

𑁯𑁪. 𑀢𑀣𑀸 𑀅𑀭𑀽𑀧𑀧𑀝𑀺𑀲𑀦𑁆𑀥𑀺𑀬𑀸 𑀘 𑀫𑀳𑀕𑁆𑀕𑀢𑀪𑀽𑀢𑀁 𑀧𑀜𑁆𑀜𑀢𑁆𑀢𑀺𑀪𑀽𑀢𑀜𑁆𑀘 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯 𑀬𑀣𑀸𑀭𑀳𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑁯𑁫. 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀧𑀦 𑀚𑀻𑀯𑀺𑀢𑀦𑀯𑀓𑀫𑁂𑀯 𑀧𑀝𑀺𑀲𑀦𑁆𑀥𑀺𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀢𑁂 𑀭𑀽𑀧𑀧𑀝𑀺𑀲𑀦𑁆𑀥𑀺𑀓𑀸 𑀦𑀸𑀫.

𑁯𑁬. 𑀅𑀭𑀽𑀧𑀸 𑀅𑀭𑀽𑀧𑀧𑀝𑀺𑀲𑀦𑁆𑀥𑀺𑀓𑀸.

𑁯𑁭. 𑀲𑁂𑀲𑀸 𑀭𑀽𑀧𑀸𑀭𑀽𑀧𑀧𑀝𑀺𑀲𑀦𑁆𑀥𑀺𑀓𑀸.

𑁯𑁮. 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀳𑁄𑀦𑁆𑀢𑀺, 𑀳𑁂𑀝𑁆𑀞𑀺𑀫𑀸𑀭𑀼𑀧𑁆𑀧𑀯𑀚𑁆𑀚𑀺𑀢𑀸.

𑀧𑀭𑀫𑀸𑀭𑀼𑀧𑁆𑀧𑀲𑀦𑁆𑀥𑀻 𑀘, 𑀢𑀣𑀸 𑀓𑀸𑀫𑀢𑀺𑀳𑁂𑀢𑀼𑀓𑀸.

𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸, 𑀅𑀳𑁂𑀢𑀼𑀭𑀳𑀺𑀢𑀸 𑀲𑀺𑀬𑀼𑀁;

𑀲𑀩𑁆𑀩𑀸 𑀓𑀸𑀫𑀢𑀺𑀳𑁂𑀢𑀼𑀫𑁆𑀳𑀸, 𑀓𑀸𑀫𑁂𑀲𑁆𑀯𑁂𑀯 𑀧𑀦𑁂𑀢𑀭𑀸.

𑀅𑀬𑀫𑁂𑀢𑁆𑀣 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑁄.

𑁯𑁯. 𑀇𑀘𑁆𑀘𑁂𑀯𑀁 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀧𑀦 𑀧𑀝𑀺𑀲𑀦𑁆𑀥𑀺𑀦𑀺𑀭𑁄𑀥𑀸𑀦𑀦𑁆𑀢𑀭𑀢𑁄 𑀧𑀪𑀼𑀢𑀺 𑀢𑀫𑁂𑀯𑀸𑀭𑀫𑁆𑀫𑀡𑀫𑀸𑀭𑀩𑁆𑀪 𑀢𑀤𑁂𑀯 𑀘𑀺𑀢𑁆𑀢𑀁 𑀬𑀸𑀯 𑀘𑀼𑀢𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀲𑀢𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀯𑀲𑁆𑀲 𑀅𑀗𑁆𑀕𑀪𑀸𑀯𑁂𑀦 𑀪𑀯𑀗𑁆𑀕𑀲𑀦𑁆𑀢𑀢𑀺𑀲𑀗𑁆𑀔𑀸𑀢𑀁 𑀫𑀸𑀦𑀲𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀦𑀤𑀻𑀲𑁄𑀢𑁄 𑀯𑀺𑀬 𑀧𑀯𑀢𑁆𑀢𑀢𑀺.

𑁧𑁦𑁦. 𑀧𑀭𑀺𑀬𑁄𑀲𑀸𑀦𑁂 𑀘 𑀘𑀯𑀦𑀯𑀲𑁂𑀦 𑀘𑀼𑀢𑀺𑀘𑀺𑀢𑁆𑀢𑀁 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺.

𑁧𑁦𑁧. 𑀢𑀢𑁄 𑀧𑀭𑀜𑁆𑀘 𑀧𑀝𑀺𑀲𑀦𑁆𑀥𑀸𑀤𑀬𑁄 𑀭𑀣𑀘𑀓𑁆𑀓𑀫𑀺𑀯 𑀬𑀣𑀸𑀓𑁆𑀓𑀫𑀁 𑀏𑀯 𑀧𑀭𑀺𑀯𑀢𑁆𑀢𑀦𑁆𑀢𑀸 𑀧𑀯𑀢𑁆𑀢𑀦𑁆𑀢𑀺.

𑁧𑁦𑁨. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀯𑀻𑀣𑀺𑀬𑁄, 𑀘𑀼𑀢𑀺𑀘𑁂𑀳 𑀢𑀣𑀸 𑀪𑀯𑀦𑁆𑀢𑀭𑁂.

𑀧𑀼𑀦 𑀲𑀦𑁆𑀥𑀺 𑀪𑀯𑀗𑁆𑀕𑀫𑀺𑀘𑁆𑀘𑀬𑀁, 𑀧𑀭𑀺𑀯𑀢𑁆𑀢𑀢𑀺 𑀘𑀺𑀢𑁆𑀢𑀲𑀦𑁆𑀢𑀢𑀺.

𑀧𑀝𑀺𑀲𑀗𑁆𑀔𑀸𑀬𑀧𑀦𑁂𑀢𑀫𑀤𑁆𑀥𑀼𑀯𑀁, 𑀅𑀥𑀺𑀕𑀦𑁆𑀢𑁆𑀯𑀸 𑀧𑀤𑀫𑀘𑁆𑀘𑀼𑀢𑀁 𑀩𑀼𑀥𑀸;

𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀲𑀺𑀦𑁂𑀳𑀩𑀦𑁆𑀥𑀦𑀸, 𑀲𑀫𑀫𑁂𑀲𑁆𑀲𑀦𑁆𑀢𑀺 𑀘𑀺𑀭𑀸𑀬 𑀲𑀼𑀩𑁆𑀩𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑀯𑀺𑀪𑀸𑀕𑁄 𑀦𑀸𑀫

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.