𑁬. 𑀭𑀽𑀧𑀧𑀭𑀺𑀘𑁆𑀙𑁂𑀤𑁄

𑁧. 𑀏𑀢𑁆𑀢𑀸𑀯𑀢𑀸 𑀯𑀺𑀪𑀢𑁆𑀢𑀸 𑀳𑀺, 𑀲𑀧𑁆𑀧𑀪𑁂𑀤𑀧𑁆𑀧𑀯𑀢𑁆𑀢𑀺𑀓𑀸.

𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀭𑀽𑀧𑀁 𑀤𑀸𑀦𑀺 𑀧𑀯𑀼𑀘𑁆𑀘𑀢𑀺.

𑁨. 𑀲𑀫𑀼𑀤𑁆𑀤𑁂𑀲𑀸 𑀯𑀺𑀪𑀸𑀕𑀸 𑀘, 𑀲𑀫𑀼𑀝𑁆𑀞𑀸𑀦𑀸 𑀓𑀮𑀸𑀧𑀢𑁄.

𑀧𑀯𑀢𑁆𑀢𑀺𑀓𑁆𑀓𑀫𑀢𑁄 𑀘𑁂𑀢𑀺, 𑀧𑀜𑁆𑀘𑀥𑀸 𑀢𑀢𑁆𑀣 𑀲𑀗𑁆𑀕𑀳𑁄.

𑀭𑀽𑀧𑀲𑀫𑀼𑀤𑁆𑀤𑁂𑀲𑁄

𑁩. 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀦𑁆𑀢𑀺 𑀤𑀼𑀯𑀺𑀥𑀫𑁆𑀧𑁂𑀢𑀁 𑀭𑀽𑀧𑀁 𑀏𑀓𑀸𑀤𑀲𑀯𑀺𑀥𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺.

𑁪. 𑀓𑀣𑀁? 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀪𑀽𑀢𑀭𑀽𑀧𑀁 𑀦𑀸𑀫.

𑁫. 𑀘𑀓𑁆𑀔𑀼 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄 𑀧𑀲𑀸𑀤𑀭𑀽𑀧𑀁 𑀦𑀸𑀫.

𑁬. 𑀭𑀽𑀧𑀁 𑀲𑀤𑁆𑀤𑁄 𑀕𑀦𑁆𑀥𑁄 𑀭𑀲𑁄 𑀆𑀧𑁄𑀥𑀸𑀢𑀼𑀯𑀺𑀯𑀚𑁆𑀚𑀺𑀢𑀁 𑀪𑀽𑀢𑀢𑁆𑀢𑀬𑀲𑀗𑁆𑀔𑀸𑀢𑀁 𑀨𑁄𑀝𑁆𑀞𑀩𑁆𑀩𑀁 𑀕𑁄𑀘𑀭𑀭𑀽𑀧𑀁 𑀦𑀸𑀫.

𑁭. 𑀇𑀢𑁆𑀣𑀢𑁆𑀢𑀁 𑀧𑀼𑀭𑀺𑀲𑀢𑁆𑀢𑀁 𑀪𑀸𑀯𑀭𑀽𑀧𑀁 𑀦𑀸𑀫.

𑁮. 𑀳𑀤𑀬𑀯𑀢𑁆𑀣𑀼 𑀳𑀤𑀬𑀭𑀽𑀧𑀁 𑀦𑀸𑀫.

𑁯. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀭𑀽𑀧𑀁 𑀦𑀸𑀫.

𑁧𑁦. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀆𑀳𑀸𑀭𑀭𑀽𑀧𑀁 𑀦𑀸𑀫.

𑁧𑁧. 𑀇𑀢𑀺 𑀘 𑀅𑀝𑁆𑀞𑀸𑀭𑀲𑀯𑀺𑀥𑀫𑁆𑀧𑁂𑀢𑀁 𑀭𑀽𑀧𑀁 𑀲𑀪𑀸𑀯𑀭𑀽𑀧𑀁 𑀲𑀮𑀓𑁆𑀔𑀡𑀭𑀽𑀧𑀁 𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀭𑀽𑀧𑀭𑀽𑀧𑀁 𑀲𑀫𑁆𑀫𑀲𑀦𑀭𑀽𑀧𑀦𑁆𑀢𑀺 𑀘 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺.

𑁧𑁨. 𑀆𑀓𑀸𑀲𑀥𑀸𑀢𑀼 𑀧𑀭𑀺𑀘𑁆𑀙𑁂𑀤𑀭𑀽𑀧𑀁 𑀦𑀸𑀫.

𑁧𑁩. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀁 𑀦𑀸𑀫.

𑁧𑁪. 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀓𑀫𑁆𑀫𑀜𑁆𑀜𑀢𑀸 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀯𑀺𑀓𑀸𑀭𑀭𑀽𑀧𑀁 𑀦𑀸𑀫.

𑁧𑁫. 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀲𑀦𑁆𑀢𑀢𑀺 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸 𑀮𑀓𑁆𑀔𑀡𑀭𑀽𑀧𑀁 𑀦𑀸𑀫.

𑁧𑁬. 𑀚𑀸𑀢𑀺𑀭𑀽𑀧𑀫𑁂𑀯 𑀧𑀦𑁂𑀢𑁆𑀣 𑀉𑀧𑀘𑀬𑀲𑀦𑁆𑀢𑀢𑀺𑀦𑀸𑀫𑁂𑀦 𑀧𑀯𑀼𑀘𑁆𑀘𑀢𑀻𑀢𑀺 𑀏𑀓𑀸𑀤𑀲𑀯𑀺𑀥𑀫𑁆𑀧𑁂𑀢𑀁 𑀭𑀽𑀧𑀁 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺 𑀲𑀭𑀽𑀧𑀯𑀲𑁂𑀦.

𑁧𑁭. 𑀓𑀣𑀁 𑁋

𑀪𑀽𑀢𑀧𑁆𑀧𑀲𑀸𑀤𑀯𑀺𑀲𑀬𑀸, 𑀪𑀸𑀯𑁄 𑀳𑀤𑀬𑀫𑀺𑀘𑁆𑀘𑀧𑀺;

𑀚𑀻𑀯𑀺𑀢𑀸𑀳𑀸𑀭𑀭𑀽𑀧𑁂𑀳𑀺, 𑀅𑀝𑁆𑀞𑀸𑀭𑀲𑀯𑀺𑀥𑀁 𑀢𑀣𑀸.

𑀧𑀭𑀺𑀘𑁆𑀙𑁂𑀤𑁄 𑀘 𑀯𑀺𑀜𑁆𑀜𑀢𑁆𑀢𑀺, 𑀯𑀺𑀓𑀸𑀭𑁄 𑀮𑀓𑁆𑀔𑀡𑀦𑁆𑀢𑀺 𑀘;

𑀅𑀦𑀺𑀧𑁆𑀨𑀦𑁆𑀦𑀸 𑀤𑀲 𑀘𑁂𑀢𑀺, 𑀅𑀝𑁆𑀞𑀯𑀻𑀲𑀯𑀺𑀥𑀁 𑀪𑀯𑁂.

𑀅𑀬𑀫𑁂𑀢𑁆𑀣 𑀭𑀽𑀧𑀲𑀫𑀼𑀤𑁆𑀤𑁂𑀲𑁄.

𑀭𑀽𑀧𑀯𑀺𑀪𑀸𑀕𑁄

𑁧𑁮. 𑀲𑀩𑁆𑀩𑀜𑁆𑀘 𑀧𑀦𑁂𑀢𑀁 𑀭𑀽𑀧𑀁 𑀅𑀳𑁂𑀢𑀼𑀓𑀁 𑀲𑀧𑁆𑀧𑀘𑁆𑀘𑀬𑀁 𑀲𑀸𑀲𑀯𑀁 𑀲𑀗𑁆𑀔𑀢𑀁 𑀮𑁄𑀓𑀺𑀬𑀁 𑀓𑀸𑀫𑀸𑀯𑀘𑀭𑀁 𑀅𑀦𑀸𑀭𑀫𑁆𑀫𑀡𑀁 𑀅𑀧𑁆𑀧𑀳𑀸𑀢𑀩𑁆𑀩𑀫𑁂𑀯𑀸𑀢𑀺 𑀏𑀓𑀯𑀺𑀥𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀤𑀺𑀯𑀲𑁂𑀦 𑀩𑀳𑀼𑀥𑀸 𑀪𑁂𑀤𑀁 𑀕𑀘𑁆𑀙𑀢𑀺.

𑁧𑁯. 𑀓𑀣𑀁? 𑀧𑀲𑀸𑀤𑀲𑀗𑁆𑀔𑀸𑀢𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁 𑀦𑀸𑀫, 𑀇𑀢𑀭𑀁 𑀩𑀸𑀳𑀺𑀭𑀭𑀽𑀧𑀁.

𑁨𑁦. 𑀧𑀲𑀸𑀤𑀳𑀤𑀬𑀲𑀗𑁆𑀔𑀸𑀢𑀁 𑀙𑀩𑁆𑀩𑀺𑀥𑀫𑁆𑀧𑀺 𑀯𑀢𑁆𑀣𑀼𑀭𑀽𑀧𑀁 𑀦𑀸𑀫, 𑀇𑀢𑀭𑀁 𑀅𑀯𑀢𑁆𑀣𑀼𑀭𑀽𑀧𑀁.

𑁨𑁧. 𑀧𑀲𑀸𑀤𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀢𑁆𑀢𑀯𑀺𑀥𑀫𑁆𑀧𑀺 𑀤𑁆𑀯𑀸𑀭𑀭𑀽𑀧𑀁 𑀦𑀸𑀫, 𑀇𑀢𑀭𑀁 𑀅𑀤𑁆𑀯𑀸𑀭𑀭𑀽𑀧𑀁.

𑁨𑁨. 𑀧𑀲𑀸𑀤𑀪𑀸𑀯𑀚𑀻𑀯𑀺𑀢𑀲𑀗𑁆𑀔𑀸𑀢𑀁 𑀅𑀝𑁆𑀞𑀯𑀺𑀥𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀭𑀽𑀧𑀁 𑀦𑀸𑀫, 𑀇𑀢𑀭𑀁 𑀅𑀦𑀺𑀦𑁆𑀤𑁆𑀭𑀺𑀬𑀭𑀽𑀧𑀁.

𑁨𑁩. 𑀧𑀲𑀸𑀤𑀯𑀺𑀲𑀬𑀲𑀗𑁆𑀔𑀸𑀢𑀁 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀑𑀴𑀸𑀭𑀺𑀓𑀭𑀽𑀧𑀁 𑀲𑀦𑁆𑀢𑀺𑀓𑁂𑀭𑀽𑀧𑀁, 𑀲𑀧𑁆𑀧𑀝𑀺𑀖𑀭𑀽𑀧𑀜𑁆𑀘, 𑀇𑀢𑀭𑀁 𑀲𑀼𑀔𑀼𑀫𑀭𑀽𑀧𑀁 𑀤𑀽𑀭𑁂𑀭𑀽𑀧𑀁 𑀅𑀧𑁆𑀧𑀝𑀺𑀖𑀭𑀽𑀧𑀜𑁆𑀘.

𑁨𑁪. 𑀓𑀫𑁆𑀫𑀚𑀁 𑀉𑀧𑀸𑀤𑀺𑀦𑁆𑀦𑀭𑀽𑀧𑀁, 𑀇𑀢𑀭𑀁 𑀅𑀦𑀼𑀧𑀸𑀤𑀺𑀦𑁆𑀦𑀭𑀽𑀧𑀁.

𑁨𑁫. 𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀭𑀽𑀧𑀁, 𑀇𑀢𑀭𑀁 𑀅𑀦𑀺𑀤𑀲𑁆𑀲𑀦𑀭𑀽𑀧𑀁.

𑁨𑁬. 𑀘𑀓𑁆𑀔𑀸𑀤𑀺𑀤𑁆𑀯𑀬𑀁 𑀅𑀲𑀫𑁆𑀧𑀢𑁆𑀢𑀯𑀲𑁂𑀦, 𑀖𑀸𑀦𑀸𑀤𑀺𑀢𑁆𑀢𑀬𑀁 𑀲𑀫𑁆𑀧𑀢𑁆𑀢𑀯𑀲𑁂𑀦𑀸𑀢𑀺 𑀧𑀜𑁆𑀘𑀯𑀺𑀥𑀫𑁆𑀧𑀺 𑀕𑁄𑀘𑀭𑀕𑁆𑀕𑀸𑀳𑀺𑀓𑀭𑀽𑀧𑀁, 𑀇𑀢𑀭𑀁 𑀅𑀕𑁄𑀘𑀭𑀕𑁆𑀕𑀸𑀳𑀺𑀓𑀭𑀽𑀧𑀁.

𑁨𑁭. 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸 𑀪𑀽𑀢𑀘𑀢𑀼𑀓𑁆𑀓𑀜𑁆𑀘𑁂𑀢𑀺 𑀅𑀝𑁆𑀞𑀯𑀺𑀥𑀫𑁆𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀁, 𑀇𑀢𑀭𑀁 𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀁.

𑁨𑁮. 𑀇𑀘𑁆𑀘𑁂𑀯𑀫𑀝𑁆𑀞𑀯𑀻𑀲𑀢𑀺-𑀯𑀺𑀥𑀫𑁆𑀧𑀺 𑀘 𑀯𑀺𑀘𑀓𑁆𑀔𑀡𑀸.

𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀪𑁂𑀤𑁂𑀦, 𑀯𑀺𑀪𑀚𑀦𑁆𑀢𑀺 𑀬𑀣𑀸𑀭𑀳𑀁.

𑀅𑀬𑀫𑁂𑀢𑁆𑀣 𑀭𑀽𑀧𑀯𑀺𑀪𑀸𑀕𑁄.

𑀭𑀽𑀧𑀲𑀫𑀼𑀝𑁆𑀞𑀸𑀦𑀦𑀬𑁄

𑁨𑁯. 𑀓𑀫𑁆𑀫𑀁 𑀘𑀺𑀢𑁆𑀢𑀁 𑀉𑀢𑀼 𑀆𑀳𑀸𑀭𑁄 𑀘𑁂𑀢𑀺 𑀘𑀢𑁆𑀢𑀸𑀭𑀺 𑀭𑀽𑀧𑀲𑀫𑀼𑀝𑁆𑀞𑀸𑀦𑀸𑀦𑀺 𑀦𑀸𑀫.

𑁩𑁦. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀜𑁆𑀘𑁂𑀢𑀺 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀫𑀪𑀺𑀲𑀗𑁆𑀔𑀢𑀁 𑀅𑀚𑁆𑀛𑀢𑁆𑀢𑀺𑀓𑀲𑀦𑁆𑀢𑀸𑀦𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀫𑀼𑀧𑀸𑀤𑀸𑀬 𑀔𑀡𑁂 𑀔𑀡𑁂 𑀲𑀫𑀼𑀝𑁆𑀞𑀸𑀧𑁂𑀢𑀺.

𑁩𑁧. 𑀅𑀭𑀽𑀧𑀯𑀺𑀧𑀸𑀓𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀁 𑀧𑀜𑁆𑀘𑀲𑀢𑁆𑀢𑀢𑀺𑀯𑀺𑀥𑀫𑁆𑀧𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀧𑀞𑀫𑀪𑀯𑀗𑁆𑀕𑀫𑀼𑀧𑀸𑀤𑀸𑀬 𑀚𑀸𑀬𑀦𑁆𑀢𑀫𑁂𑀯 𑀲𑀫𑀼𑀝𑁆𑀞𑀸𑀧𑁂𑀢𑀺.

𑁩𑁨. 𑀢𑀢𑁆𑀣 𑀅𑀧𑁆𑀧𑀦𑀸𑀚𑀯𑀦𑀁 𑀇𑀭𑀺𑀬𑀸𑀧𑀣𑀫𑁆𑀧𑀺 𑀲𑀦𑁆𑀦𑀸𑀫𑁂𑀢𑀺.

𑁩𑁩. 𑀯𑁄𑀝𑁆𑀞𑀩𑁆𑀩𑀦𑀓𑀸𑀫𑀸𑀯𑀘𑀭𑀚𑀯𑀦𑀸𑀪𑀺𑀜𑁆𑀜𑀸 𑀧𑀦 𑀯𑀺𑀜𑁆𑀜𑀢𑁆𑀢𑀺𑀫𑁆𑀧𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺.

𑁩𑁪. 𑀲𑁄𑀫𑀦𑀲𑁆𑀲𑀚𑀯𑀦𑀸𑀦𑀺 𑀧𑀦𑁂𑀢𑁆𑀣 𑀢𑁂𑀭𑀲 𑀳𑀲𑀦𑀫𑁆𑀧𑀺 𑀚𑀦𑁂𑀦𑁆𑀢𑀺.

𑁩𑁫. 𑀲𑀻𑀢𑀼𑀡𑁆𑀳𑁄𑀢𑀼𑀲𑀫𑀜𑁆𑀜𑀸𑀢𑀸 𑀢𑁂𑀚𑁄𑀥𑀸𑀢𑀼 𑀞𑀺𑀢𑀺𑀧𑁆𑀧𑀢𑁆𑀢𑀸𑀯 𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀬𑀣𑀸𑀭𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑀺.

𑁩𑁬. 𑀑𑀚𑀸𑀲𑀗𑁆𑀔𑀸𑀢𑁄 𑀆𑀳𑀸𑀭𑁄 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀞𑀸𑀦𑀧𑁆𑀧𑀢𑁆𑀢𑁄𑀯 𑀲𑀫𑀼𑀝𑁆𑀞𑀸𑀧𑁂𑀢𑀺.

𑁩𑁭. 𑀢𑀢𑁆𑀣 𑀳𑀤𑀬𑀇𑀦𑁆𑀤𑁆𑀭𑀺𑀬𑀭𑀽𑀧𑀸𑀦𑀺 𑀓𑀫𑁆𑀫𑀚𑀸𑀦𑁂𑀯.

𑁩𑁮. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀘𑀺𑀢𑁆𑀢𑀚𑀫𑁂𑀯.

𑁩𑁯. 𑀲𑀤𑁆𑀤𑁄 𑀘𑀺𑀢𑁆𑀢𑁄𑀢𑀼𑀚𑁄.

𑁪𑁦. 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀲𑀫𑁆𑀪𑁄𑀢𑀺.

𑁪𑁧. 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀺 𑀘𑁂𑀯 𑀆𑀓𑀸𑀲𑀥𑀸𑀢𑀼 𑀘. 𑀘𑀢𑀽𑀳𑀺 𑀲𑀫𑁆𑀪𑀽𑀢𑀸𑀦𑀺.

𑁪𑁨. 𑀮𑀓𑁆𑀔𑀡𑀭𑀽𑀧𑀸𑀦𑀺 𑀦 𑀓𑀼𑀢𑁄𑀘𑀺 𑀚𑀸𑀬𑀦𑁆𑀢𑀺.

𑁪𑁩. 𑀅𑀝𑁆𑀞𑀸𑀭𑀲 𑀧𑀦𑁆𑀦𑀭𑀲, 𑀢𑁂𑀭𑀲 𑀤𑁆𑀯𑀸𑀤𑀲𑀸𑀢𑀺 𑀘.

𑀓𑀫𑁆𑀫𑀘𑀺𑀢𑁆𑀢𑁄𑀢𑀼𑀓𑀸𑀳𑀸𑀭-𑀚𑀸𑀦𑀺 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁.

𑁪𑁪. 𑀚𑀸𑀬𑀫𑀸𑀦𑀸𑀤𑀺𑀭𑀽𑀧𑀸𑀦𑀁, 𑀲𑀪𑀸𑀯𑀢𑁆𑀢𑀸 𑀳𑀺 𑀓𑁂𑀯𑀮𑀁.

𑀮𑀓𑁆𑀔𑀡𑀸𑀦𑀺 𑀦 𑀚𑀸𑀬𑀦𑁆𑀢𑀺, 𑀓𑁂𑀳𑀺𑀘𑀻𑀢𑀺 𑀧𑀓𑀸𑀲𑀺𑀢𑀁.

𑀅𑀬𑀫𑁂𑀢𑁆𑀣 𑀭𑀽𑀧𑀲𑀫𑀼𑀝𑁆𑀞𑀸𑀦𑀦𑀬𑁄.

𑀓𑀮𑀸𑀧𑀬𑁄𑀚𑀦𑀸

𑁪𑁫. 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀦𑀺𑀲𑁆𑀲𑀬𑀸 𑀲𑀳𑀯𑀼𑀢𑁆𑀢𑀺𑀦𑁄 𑀏𑀓𑀯𑀻𑀲𑀢𑀺 𑀭𑀽𑀧𑀓𑀮𑀸𑀧𑀸 𑀦𑀸𑀫.

𑁪𑁬. 𑀢𑀢𑁆𑀣 𑀚𑀻𑀯𑀺𑀢𑀁 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀜𑁆𑀘 𑀘𑀓𑁆𑀔𑀼𑀦𑀸 𑀲𑀳 𑀘𑀓𑁆𑀔𑀼𑀤𑀲𑀓𑀦𑁆𑀢𑀺 𑀧𑀯𑀼𑀘𑁆𑀘𑀢𑀺. 𑀢𑀣𑀸 𑀲𑁄𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀤𑀲𑀓𑀁 𑀖𑀸𑀦𑀤𑀲𑀓𑀁 𑀚𑀺𑀯𑁆𑀳𑀸𑀤𑀲𑀓𑀁 𑀓𑀸𑀬𑀤𑀲𑀓𑀁 𑀇𑀢𑁆𑀣𑀺𑀪𑀸𑀯𑀤𑀲𑀓𑀁 𑀧𑀼𑀫𑁆𑀪𑀸𑀯𑀤𑀲𑀓𑀁 𑀯𑀢𑁆𑀣𑀼𑀤𑀲𑀓𑀜𑁆𑀘𑁂𑀢𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀫𑁂𑀯 𑀚𑀻𑀯𑀺𑀢𑁂𑀦 𑀲𑀳 𑀚𑀻𑀯𑀺𑀢𑀦𑀯𑀓𑀦𑁆𑀢𑀺 𑀧𑀯𑀼𑀘𑁆𑀘𑀢𑀺. 𑀇𑀫𑁂 𑀦𑀯 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀸.

𑁪𑁭. 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀁 𑀧𑀦 𑀲𑀼𑀤𑁆𑀥𑀝𑁆𑀞𑀓𑀁, 𑀢𑀤𑁂𑀯 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀳 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀦𑀯𑀓𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑁂𑀳𑀺 𑀲𑀳 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀤𑀲𑀓𑀁, 𑀮𑀳𑀼𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸𑀤𑀺𑀤𑁆𑀯𑀸𑀤𑀲𑀓𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑀮𑀳𑀼𑀢𑀸𑀤𑀺𑀢𑁂𑀭𑀲𑀓𑀜𑁆𑀘𑁂𑀢𑀺 𑀙 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀸.

𑁪𑁮. 𑀲𑀼𑀤𑁆𑀥𑀝𑁆𑀞𑀓𑀁 𑀲𑀤𑁆𑀤𑀦𑀯𑀓𑀁 𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁 𑀲𑀤𑁆𑀤𑀮𑀳𑀼𑀢𑀸𑀤𑀺𑀤𑁆𑀯𑀸𑀤𑀲𑀓𑀜𑁆𑀘𑁂𑀢𑀺 𑀘𑀢𑁆𑀢𑀸𑀭𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀸.

𑁪𑁯. 𑀲𑀼𑀤𑁆𑀥𑀝𑁆𑀞𑀓𑀁 𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀜𑁆𑀘𑁂𑀢𑀺 𑀤𑁆𑀯𑁂𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀸.

𑁫𑁦. 𑀢𑀢𑁆𑀣 𑀲𑀼𑀤𑁆𑀥𑀝𑁆𑀞𑀓𑀁 𑀲𑀤𑁆𑀤𑀦𑀯𑀓𑀜𑁆𑀘𑁂𑀢𑀺 𑀤𑁆𑀯𑁂 𑀉𑀢𑀼𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀸 𑀩𑀳𑀺𑀤𑁆𑀥𑀸𑀧𑀺 𑀮𑀩𑁆𑀪𑀦𑁆𑀢𑀺, 𑀅𑀯𑀲𑁂𑀲𑀸 𑀧𑀦 𑀲𑀩𑁆𑀩𑁂𑀧𑀺 𑀅𑀚𑁆𑀛𑀢𑁆𑀢𑀺𑀓𑀫𑁂𑀯𑀸𑀢𑀺.

𑁫𑁧. 𑀓𑀫𑁆𑀫𑀘𑀺𑀢𑁆𑀢𑁄𑀢𑀼𑀓𑀸𑀳𑀸𑀭-𑀲𑀫𑀼𑀝𑁆𑀞𑀸𑀦𑀸 𑀬𑀣𑀸𑀓𑁆𑀓𑀫𑀁.

𑀦𑀯 𑀙 𑀘𑀢𑀼𑀭𑁄 𑀤𑁆𑀯𑁂𑀢𑀺, 𑀓𑀮𑀸𑀧𑀸 𑀏𑀓𑀯𑀻𑀲𑀢𑀺.

𑀓𑀮𑀸𑀧𑀸𑀦𑀁 𑀧𑀭𑀺𑀘𑁆𑀙𑁂𑀤-𑀮𑀓𑁆𑀔𑀡𑀢𑁆𑀢𑀸 𑀯𑀺𑀘𑀓𑁆𑀔𑀡𑀸;

𑀦 𑀓𑀮𑀸𑀧𑀗𑁆𑀕𑀫𑀺𑀘𑁆𑀘𑀸𑀳𑀼, 𑀆𑀓𑀸𑀲𑀁 𑀮𑀓𑁆𑀔𑀡𑀸𑀦𑀺 𑀘.

𑀅𑀬𑀫𑁂𑀢𑁆𑀣 𑀓𑀮𑀸𑀧𑀬𑁄𑀚𑀦𑀸.

𑀭𑀽𑀧𑀧𑀯𑀢𑁆𑀢𑀺𑀓𑁆𑀓𑀫𑁄

𑁫𑁨. 𑀲𑀩𑁆𑀩𑀸𑀦𑀺𑀧𑀺 𑀧𑀦𑁂𑀢𑀸𑀦𑀺 𑀭𑀽𑀧𑀸𑀦𑀺 𑀓𑀸𑀫𑀮𑁄𑀓𑁂 𑀬𑀣𑀸𑀭𑀳𑀁 𑀅𑀦𑀽𑀦𑀸𑀦𑀺 𑀧𑀯𑀢𑁆𑀢𑀺𑀬𑀁 𑀉𑀧𑀮𑀩𑁆𑀪𑀦𑁆𑀢𑀺.

𑁫𑁩. 𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 𑀲𑀁𑀲𑁂𑀤𑀚𑀸𑀦𑀜𑁆𑀘𑁂𑀯 𑀑𑀧𑀧𑀸𑀢𑀺𑀓𑀸𑀦𑀜𑁆𑀘 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀪𑀸𑀯𑀯𑀢𑁆𑀣𑀼𑀤𑀲𑀓𑀲𑀗𑁆𑀔𑀸𑀢𑀸𑀦𑀺 𑀲𑀢𑁆𑀢 𑀤𑀲𑀓𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺 𑀉𑀓𑁆𑀓𑀝𑁆𑀞𑀯𑀲𑁂𑀦, 𑀑𑀫𑀓𑀯𑀲𑁂𑀦 𑀧𑀦 𑀘𑀓𑁆𑀔𑀼𑀲𑁄𑀢𑀖𑀸𑀦𑀪𑀸𑀯𑀤𑀲𑀓𑀸𑀦𑀺 𑀓𑀤𑀸𑀘𑀺𑀧𑀺 𑀦 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀓𑀮𑀸𑀧𑀳𑀸𑀦𑀺 𑀯𑁂𑀤𑀺𑀢𑀩𑁆𑀩𑀸.

𑁫𑁪. 𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀸𑀦𑀁 𑀧𑀦 𑀓𑀸𑀬𑀪𑀸𑀯𑀯𑀢𑁆𑀣𑀼𑀤𑀲𑀓𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀤𑀲𑀓𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀪𑀸𑀯𑀤𑀲𑀓𑀁 𑀓𑀤𑀸𑀘𑀺 𑀦 𑀮𑀩𑁆𑀪𑀢𑀺, 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀓𑀸𑀮𑁂 𑀓𑀫𑁂𑀦 𑀘𑀓𑁆𑀔𑀼𑀤𑀲𑀓𑀸𑀤𑀻𑀦𑀺 𑀘 𑀧𑀸𑀢𑀼𑀪𑀯𑀦𑁆𑀢𑀺.

𑁫𑁫. 𑀇𑀘𑁆𑀘𑁂𑀯𑀁 𑀧𑀝𑀺𑀲𑀦𑁆𑀥𑀺𑀫𑀼𑀧𑀸𑀤𑀸𑀬 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸, 𑀤𑀼𑀢𑀺𑀬𑀘𑀺𑀢𑁆𑀢𑀫𑀼𑀧𑀸𑀤𑀸𑀬 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀞𑀺𑀢𑀺𑀓𑀸𑀮𑀫𑀼𑀧𑀸𑀤𑀸𑀬 𑀉𑀢𑀼𑀲𑀫𑀼𑀝𑁆𑀞𑀸𑀦𑀸, 𑀑𑀚𑀸𑀨𑀭𑀡𑀫𑀼𑀧𑀸𑀤𑀸𑀬 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸 𑀘𑁂𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀓𑀮𑀸𑀧𑀲𑀦𑁆𑀢𑀢𑀺 𑀓𑀸𑀫𑀮𑁄𑀓𑁂 𑀤𑀻𑀧𑀚𑀸𑀮𑀸 𑀯𑀺𑀬, 𑀦𑀤𑀻𑀲𑁄𑀢𑁄 𑀯𑀺𑀬 𑀘 𑀬𑀸𑀯𑀢𑀸𑀬𑀼𑀓𑀫𑀩𑁆𑀩𑁄𑀘𑁆𑀙𑀺𑀦𑁆𑀦𑀸 𑀧𑀯𑀢𑁆𑀢𑀢𑀺.

𑁫𑁬. 𑀫𑀭𑀡𑀓𑀸𑀮𑁂 𑀧𑀦 𑀘𑀼𑀢𑀺𑀘𑀺𑀢𑁆𑀢𑁄𑀧𑀭𑀺𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑀸𑀮𑀫𑀼𑀧𑀸𑀤𑀸𑀬 𑀓𑀫𑁆𑀫𑀚𑀭𑀽𑀧𑀸𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀼𑀭𑁂𑀢𑀭𑀫𑀼𑀧𑁆𑀧𑀦𑁆𑀦𑀸𑀦𑀺 𑀘 𑀓𑀫𑁆𑀫𑀚𑀭𑀽𑀧𑀸𑀦𑀺 𑀘𑀼𑀢𑀺𑀘𑀺𑀢𑁆𑀢𑀲𑀫𑀓𑀸𑀮𑀫𑁂𑀯 𑀧𑀯𑀢𑁆𑀢𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀢𑁄 𑀧𑀭𑀁 𑀘𑀺𑀢𑁆𑀢𑀚𑀸𑀳𑀸𑀭𑀚𑀭𑀽𑀧𑀜𑁆𑀘 𑀯𑁄𑀘𑁆𑀙𑀺𑀚𑁆𑀚𑀢𑀺, 𑀢𑀢𑁄 𑀧𑀭𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀧𑀭𑀫𑁆𑀧𑀭𑀸 𑀬𑀸𑀯 𑀫𑀢𑀓𑀴𑁂𑀯𑀭𑀲𑀗𑁆𑀔𑀸𑀢𑀸 𑀧𑀯𑀢𑁆𑀢𑀦𑁆𑀢𑀺.

𑁫𑁭. 𑀇𑀘𑁆𑀘𑁂𑀯𑀁 𑀫𑀢𑀲𑀢𑁆𑀢𑀸𑀦𑀁, 𑀧𑀼𑀦𑀤𑁂𑀯 𑀪𑀯𑀦𑁆𑀢𑀭𑁂.

𑀧𑀝𑀺𑀲𑀦𑁆𑀥𑀺𑀫𑀼𑀧𑀸𑀤𑀸𑀬, 𑀢𑀣𑀸 𑀭𑀽𑀧𑀁 𑀧𑀯𑀢𑁆𑀢𑀢𑀺.

𑁫𑁮. 𑀭𑀽𑀧𑀮𑁄𑀓𑁂 𑀧𑀦 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀪𑀸𑀯𑀤𑀲𑀓𑀸𑀦𑀺 𑀘 𑀆𑀳𑀸𑀭𑀚𑀓𑀮𑀸𑀧𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀯𑀲𑁂𑀦 𑀢𑀻𑀡𑀺 𑀤𑀲𑀓𑀸𑀦𑀺 𑀚𑀻𑀯𑀺𑀢𑀦𑀯𑀓𑀜𑁆𑀘𑁂𑀢𑀺 𑀘𑀢𑁆𑀢𑀸𑀭𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀸, 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑁄𑀢𑀼𑀲𑀫𑀼𑀝𑁆𑀞𑀸𑀦𑀸 𑀘 𑀮𑀩𑁆𑀪𑀦𑁆𑀢𑀺.

𑁫𑁯. 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀧𑀦 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀲𑀤𑁆𑀤𑀸𑀧𑀺 𑀦 𑀮𑀩𑁆𑀪𑀦𑁆𑀢𑀺, 𑀢𑀣𑀸 𑀲𑀩𑁆𑀩𑀸𑀦𑀺𑀧𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀺, 𑀢𑀲𑁆𑀫𑀸 𑀢𑁂𑀲𑀁 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀚𑀻𑀯𑀺𑀢𑀦𑀯𑀓𑀫𑁂𑀯, 𑀧𑀯𑀢𑁆𑀢𑀺𑀬𑀜𑁆𑀘 𑀲𑀤𑁆𑀤𑀯𑀚𑁆𑀚𑀺𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀅𑀢𑀺𑀭𑀺𑀘𑁆𑀙𑀢𑀺.

𑁬𑁦. 𑀇𑀘𑁆𑀘𑁂𑀯𑀁 𑀓𑀸𑀫𑀭𑀽𑀧𑀸𑀲𑀜𑁆𑀜𑀻𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦 𑀤𑀼𑀯𑀺𑀥𑀸 𑀭𑀽𑀧𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁧. 𑀅𑀝𑁆𑀞𑀯𑀻𑀲𑀢𑀺 𑀓𑀸𑀫𑁂𑀲𑀼, 𑀳𑁄𑀦𑁆𑀢𑀺 𑀢𑁂𑀯𑀻𑀲 𑀭𑀽𑀧𑀺𑀲𑀼.

𑀲𑀢𑁆𑀢𑀭𑀲𑁂𑀯 𑀲𑀜𑁆𑀜𑀻𑀦𑀁, 𑀅𑀭𑀽𑀧𑁂 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺.

𑀲𑀤𑁆𑀤𑁄 𑀯𑀺𑀓𑀸𑀭𑁄 𑀚𑀭𑀢𑀸, 𑀫𑀭𑀡𑀜𑁆𑀘𑁄𑀧𑀧𑀢𑁆𑀢𑀺𑀬𑀁;

𑀦 𑀮𑀩𑁆𑀪𑀦𑁆𑀢𑀺 𑀧𑀯𑀢𑁆𑀢𑁂 𑀢𑀼, 𑀦 𑀓𑀺𑀜𑁆𑀘𑀺𑀧𑀺 𑀦 𑀮𑀩𑁆𑀪𑀢𑀺.

𑀅𑀬𑀫𑁂𑀢𑁆𑀣 𑀭𑀽𑀧𑀧𑀯𑀢𑁆𑀢𑀺𑀓𑁆𑀓𑀫𑁄.

𑀦𑀺𑀩𑁆𑀩𑀸𑀦𑀪𑁂𑀤𑁄

𑁬𑁨. 𑀦𑀺𑀩𑁆𑀩𑀸𑀦𑀁 𑀧𑀦 𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀢𑀁 𑀘𑀢𑀼𑀫𑀕𑁆𑀕𑀜𑀸𑀡𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀫𑀕𑁆𑀕𑀨𑀮𑀸𑀦𑀫𑀸𑀭𑀫𑁆𑀫𑀡𑀪𑀽𑀢𑀁 𑀯𑀸𑀦𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁬𑁩. 𑀢𑀤𑁂𑀢𑀁 𑀲𑀪𑀸𑀯𑀢𑁄 𑀏𑀓𑀯𑀺𑀥𑀫𑁆𑀧𑀺 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀘𑁂𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺 𑀓𑀸𑀭𑀡𑀧𑀭𑀺𑀬𑀸𑀬𑁂𑀦.

𑁬𑁪. 𑀢𑀣𑀸 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘𑁂𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺 𑀆𑀓𑀸𑀭𑀪𑁂𑀤𑁂𑀦.

𑁬𑁫. 𑀧𑀤𑀫𑀘𑁆𑀘𑀼𑀢𑀫𑀘𑁆𑀘𑀦𑁆𑀢𑀁, 𑀅𑀲𑀗𑁆𑀔𑀢𑀫𑀦𑀼𑀢𑁆𑀢𑀭𑀁.

𑀦𑀺𑀩𑁆𑀩𑀸𑀦𑀫𑀺𑀢𑀺 𑀪𑀸𑀲𑀦𑁆𑀢𑀺, 𑀯𑀸𑀦𑀫𑀼𑀢𑁆𑀢𑀸 𑀫𑀳𑁂𑀲𑀬𑁄.

𑀇𑀢𑀺 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁, 𑀭𑀽𑀧𑀁 𑀦𑀺𑀩𑁆𑀩𑀸𑀦𑀫𑀺𑀘𑁆𑀘𑀧𑀺;

𑀧𑀭𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀺, 𑀘𑀢𑀼𑀥𑀸𑀯 𑀢𑀣𑀸𑀕𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑀭𑀽𑀧𑀲𑀗𑁆𑀕𑀳𑀯𑀺𑀪𑀸𑀕𑁄 𑀦𑀸𑀫

𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄.