𑁪. 𑀯𑀻𑀣𑀺𑀧𑀭𑀺𑀘𑁆𑀙𑁂𑀤𑁄

𑁧. 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀫𑀺𑀘𑁆𑀘𑁂𑀯𑀁, 𑀓𑀢𑁆𑀯𑀸𑀲𑀗𑁆𑀕𑀳𑀫𑀼𑀢𑁆𑀢𑀭𑀁.

𑀪𑀽𑀫𑀺𑀧𑀼𑀕𑁆𑀕𑀮𑀪𑁂𑀤𑁂𑀦, 𑀧𑀼𑀩𑁆𑀩𑀸𑀧𑀭𑀦𑀺𑀬𑀸𑀫𑀺𑀢𑀁.

𑀧𑀯𑀢𑁆𑀢𑀺𑀲𑀗𑁆𑀕𑀳𑀁 𑀦𑀸𑀫, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀬𑀁;

𑀧𑀯𑀓𑁆𑀔𑀸𑀫𑀺 𑀲𑀫𑀸𑀲𑁂𑀦, 𑀬𑀣𑀸𑀲𑀫𑁆𑀪𑀯𑀢𑁄 𑀓𑀣𑀁.

𑁨. . 𑀯𑀻𑀣𑀺𑀫𑀼𑀢𑁆𑀢𑀸𑀦𑀁 𑀧𑀦 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀢𑀺 𑀯𑀺𑀲𑀬𑀧𑁆𑀧𑀯𑀢𑁆𑀢𑀺.

𑁪. 𑀢𑀢𑁆𑀣 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀦𑁂𑀯.

𑀯𑀺𑀜𑁆𑀜𑀸𑀡𑀙𑀓𑁆𑀓𑀁

𑁫. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀖𑀸𑀦𑀯𑀺𑀜𑁆𑀜𑀸𑀡𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀜𑁆𑀘𑁂𑀢𑀺 𑀙 𑀯𑀺𑀜𑁆𑀜𑀸𑀡𑀸𑀦𑀺.

𑀯𑀻𑀣𑀺𑀙𑀓𑁆𑀓𑀁

𑁬. 𑀙 𑀯𑀻𑀣𑀺𑀬𑁄 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑀯𑀻𑀣𑀺 𑀲𑁄𑀢𑀤𑁆𑀯𑀸𑀭𑀯𑀻𑀣𑀺 𑀖𑀸𑀦𑀤𑁆𑀯𑀸𑀭𑀯𑀻𑀣𑀺 𑀚𑀺𑀯𑁆𑀳𑀸𑀤𑁆𑀯𑀸𑀭𑀯𑀻𑀣𑀺 𑀓𑀸𑀬𑀤𑁆𑀯𑀸𑀭𑀯𑀻𑀣𑀺 𑀫𑀦𑁄𑀤𑁆𑀯𑀸𑀭𑀯𑀻𑀣𑀺 𑀘𑁂𑀢𑀺 𑀤𑁆𑀯𑀸𑀭𑀯𑀲𑁂𑀦 𑀯𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺 𑀖𑀸𑀦𑀯𑀺𑀜𑁆𑀜𑀸𑀡𑀯𑀻𑀣𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀯𑀻𑀣𑀺 𑀓𑀸𑀬𑀯𑀺𑀜𑁆𑀜𑀸𑀡𑀯𑀻𑀣𑀺 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺 𑀘𑁂𑀢𑀺 𑀯𑀺𑀜𑁆𑀜𑀸𑀡𑀯𑀲𑁂𑀦 𑀯𑀸 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑁄 𑀬𑁄𑀚𑁂𑀢𑀩𑁆𑀩𑀸.

𑀯𑀻𑀣𑀺𑀪𑁂𑀤𑁄

𑁭. 𑀅𑀢𑀺𑀫𑀳𑀦𑁆𑀢𑀁 𑀫𑀳𑀦𑁆𑀢𑀁 𑀧𑀭𑀺𑀢𑁆𑀢𑀁 𑀅𑀢𑀺𑀧𑀭𑀺𑀢𑁆𑀢𑀜𑁆𑀘𑁂𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀯𑀺𑀪𑀽𑀢𑀫𑀯𑀺𑀪𑀽𑀢𑀜𑁆𑀘𑁂𑀢𑀺 𑀙𑀥𑀸 𑀯𑀺𑀲𑀬𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀜𑁆𑀘𑀤𑁆𑀯𑀸𑀭𑀯𑀻𑀣𑀺

𑁮. 𑀓𑀣𑀁? 𑀉𑀧𑁆𑀧𑀸𑀤𑀞𑀺𑀢𑀺𑀪𑀗𑁆𑀕𑀯𑀲𑁂𑀦 𑀔𑀡𑀢𑁆𑀢𑀬𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀁 𑀦𑀸𑀫.

𑁯. 𑀢𑀸𑀦𑀺 𑀧𑀦 𑀲𑀢𑁆𑀢𑀭𑀲 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀭𑀽𑀧𑀥𑀫𑁆𑀫𑀸𑀦𑀫𑀸𑀬𑀽.

𑁧𑁦. 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺 𑀯𑀸 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺 𑀯𑀸 𑀞𑀺𑀢𑀺𑀧𑁆𑀧𑀢𑁆𑀢𑀸𑀦𑁂𑀯 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀧𑀜𑁆𑀘𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀬𑀤𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀓𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀢𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑁂 𑀘𑀮𑀺𑀢𑁂 𑀪𑀯𑀗𑁆𑀕𑀲𑁄𑀢𑀁 𑀯𑁄𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀫𑁂𑀯 𑀭𑀽𑀧𑀸𑀭𑀫𑁆𑀫𑀡𑀁 𑀆𑀯𑀚𑁆𑀚𑀦𑁆𑀢𑀁 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀢𑀲𑁆𑀲𑀸𑀦𑀦𑁆𑀢𑀭𑀁 𑀢𑀫𑁂𑀯 𑀭𑀽𑀧𑀁 𑀧𑀲𑁆𑀲𑀦𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀁, 𑀲𑀦𑁆𑀢𑀻𑀭𑀬𑀫𑀸𑀦𑀁 𑀲𑀦𑁆𑀢𑀻𑀭𑀡𑀘𑀺𑀢𑁆𑀢𑀁, 𑀯𑀯𑀢𑁆𑀣𑀧𑁂𑀦𑁆𑀢𑀁 𑀯𑁄𑀝𑁆𑀞𑀩𑁆𑀩𑀦𑀘𑀺𑀢𑁆𑀢𑀜𑁆𑀘𑁂𑀢𑀺 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀢𑁄 𑀧𑀭𑀁 𑀏𑀓𑀽𑀦𑀢𑀺𑀁𑀲 𑀓𑀸𑀫𑀸𑀯𑀘𑀭𑀚𑀯𑀦𑁂𑀲𑀼 𑀬𑀁𑀓𑀺𑀜𑁆𑀘𑀺 𑀮𑀤𑁆𑀥𑀧𑀘𑁆𑀘𑀬𑀁 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀢𑀺, 𑀚𑀯𑀦𑀸𑀦𑀼𑀩𑀦𑁆𑀥𑀸𑀦𑀺 𑀘 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀧𑀸𑀓𑀸𑀦𑀺 𑀬𑀣𑀸𑀭𑀳𑀁 𑀧𑀯𑀢𑁆𑀢𑀦𑁆𑀢𑀺, 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀧𑀸𑀢𑁄.

𑁧𑁧. 𑀏𑀢𑁆𑀢𑀸𑀯𑀢𑀸 𑀘𑀼𑀤𑁆𑀤𑀲 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀤𑁆𑀯𑁂 𑀪𑀯𑀗𑁆𑀕𑀘𑀮𑀦𑀸𑀦𑀺, 𑀧𑀼𑀩𑁆𑀩𑁂𑀯𑀸𑀢𑀻𑀢𑀓𑀫𑁂𑀓𑀘𑀺𑀢𑁆𑀢𑀓𑁆𑀔𑀡𑀦𑁆𑀢𑀺 𑀓𑀢𑁆𑀯𑀸 𑀲𑀢𑁆𑀢𑀭𑀲 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑀢𑁄 𑀧𑀭𑀁 𑀦𑀺𑀭𑀼𑀚𑁆𑀛𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀅𑀢𑀺𑀫𑀳𑀦𑁆𑀢𑀁 𑀦𑀸𑀫 𑀕𑁄𑀘𑀭𑀁.

𑁧𑁨. 𑀬𑀸𑀯 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑀸 𑀧𑀦 𑀅𑀧𑁆𑀧𑀳𑁄𑀦𑁆𑀢𑀸𑀢𑀻𑀢𑀓𑀫𑀸𑀧𑀸𑀣𑀫𑀸𑀕𑀢𑀁 𑀆𑀭𑀫𑁆𑀫𑀡𑀁 𑀫𑀳𑀦𑁆𑀢𑀁 𑀦𑀸𑀫, 𑀢𑀢𑁆𑀣 𑀚𑀯𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺, 𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄.

𑁧𑁩. 𑀬𑀸𑀯 𑀚𑀯𑀦𑀼𑀧𑁆𑀧𑀸𑀤𑀸𑀧𑀺 𑀅𑀧𑁆𑀧𑀳𑁄𑀦𑁆𑀢𑀸𑀢𑀻𑀢𑀓𑀫𑀸𑀧𑀸𑀣𑀫𑀸𑀕𑀢𑀁 𑀆𑀭𑀫𑁆𑀫𑀡𑀁 𑀧𑀭𑀺𑀢𑁆𑀢𑀁 𑀦𑀸𑀫, 𑀢𑀢𑁆𑀣 𑀚𑀯𑀦𑀫𑁆𑀧𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑁄𑀝𑁆𑀞𑀩𑁆𑀩𑀦𑀫𑁂𑀯 𑀧𑀯𑀢𑁆𑀢𑀢𑀺, 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺.

𑁧𑁪. 𑀬𑀸𑀯 𑀯𑁄𑀝𑁆𑀞𑀩𑁆𑀩𑀦𑀼𑀧𑁆𑀧𑀸𑀤𑀸 𑀘 𑀧𑀦 𑀅𑀧𑁆𑀧𑀳𑁄𑀦𑁆𑀢𑀸𑀢𑀻𑀢𑀓𑀫𑀸𑀧𑀸𑀣𑀫𑀸𑀕𑀢𑀁 𑀦𑀺𑀭𑁄𑀥𑀸𑀲𑀦𑁆𑀦𑀫𑀸𑀭𑀫𑁆𑀫𑀡𑀁 𑀅𑀢𑀺𑀧𑀭𑀺𑀢𑁆𑀢𑀁 𑀦𑀸𑀫, 𑀢𑀢𑁆𑀣 𑀪𑀯𑀗𑁆𑀕𑀘𑀮𑀦𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁄.

𑁧𑁫. 𑀇𑀘𑁆𑀘𑁂𑀯𑀁 𑀘𑀓𑁆𑀔𑀼𑀤𑁆𑀯𑀸𑀭𑁂, 𑀢𑀣𑀸 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀘𑁂𑀢𑀺 𑀲𑀩𑁆𑀩𑀣𑀸𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀚𑀯𑀦𑀯𑁄𑀝𑁆𑀞𑀩𑁆𑀩𑀦𑀫𑁄𑀖𑀯𑀸𑀭𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀯𑀸𑀭𑀸𑀦𑀁 𑀬𑀣𑀸𑀓𑁆𑀓𑀫𑀁 𑀆𑀭𑀫𑁆𑀫𑀡𑀪𑀽𑀢𑀸 𑀯𑀺𑀲𑀬𑀧𑁆𑀧𑀯𑀢𑁆𑀢𑀺 𑀘𑀢𑀼𑀥𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁬. 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀲𑀢𑁆𑀢𑁂𑀯, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀢𑀼𑀤𑁆𑀤𑀲.

𑀘𑀢𑀼𑀧𑀜𑁆𑀜𑀸𑀲 𑀯𑀺𑀢𑁆𑀣𑀸𑀭𑀸, 𑀧𑀜𑁆𑀘𑀤𑁆𑀯𑀸𑀭𑁂 𑀬𑀣𑀸𑀭𑀳𑀁.

𑀅𑀬𑀫𑁂𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑁂 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀬𑁄.

𑀫𑀦𑁄𑀤𑁆𑀯𑀸𑀭𑀯𑀻𑀣𑀺 𑀧𑀭𑀺𑀢𑁆𑀢𑀚𑀯𑀦𑀯𑀸𑀭𑁄

𑁧𑁭. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀬𑀤𑀺 𑀯𑀺𑀪𑀽𑀢𑀫𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀘𑀮𑀦𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀚𑀯𑀦𑀸𑀯𑀲𑀸𑀦𑁂 𑀢𑀤𑀸𑀭𑀫𑁆𑀫𑀡𑀧𑀸𑀓𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀧𑀸𑀢𑁄.

𑁧𑁮. 𑀅𑀯𑀺𑀪𑀽𑀢𑁂 𑀧𑀦𑀸𑀭𑀫𑁆𑀫𑀡𑁂 𑀚𑀯𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺, 𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄𑀢𑀺.

𑁧𑁯. 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀢𑀻𑀡𑁂𑀯, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀲𑁂𑀭𑀺𑀢𑀸.

𑀯𑀺𑀢𑁆𑀣𑀸𑀭𑁂𑀦 𑀧𑀦𑁂𑀢𑁆𑀣𑁂𑀓-𑀘𑀢𑁆𑀢𑀸𑀮𑀻𑀲 𑀯𑀺𑀪𑀸𑀯𑀬𑁂;

𑀅𑀬𑀫𑁂𑀢𑁆𑀣 𑀧𑀭𑀺𑀢𑁆𑀢𑀚𑀯𑀦𑀯𑀸𑀭𑁄.

𑀅𑀧𑁆𑀧𑀦𑀸𑀚𑀯𑀦𑀯𑀸𑀭𑁄

𑁨𑁦. 𑀅𑀧𑁆𑀧𑀦𑀸𑀚𑀯𑀦𑀯𑀸𑀭𑁂 𑀧𑀦 𑀯𑀺𑀪𑀽𑀢𑀸𑀯𑀺𑀪𑀽𑀢𑀪𑁂𑀤𑁄 𑀦𑀢𑁆𑀣𑀺, 𑀢𑀣𑀸 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄 𑀘.

𑁨𑁧. 𑀢𑀢𑁆𑀣 𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀫𑀝𑁆𑀞𑀦𑁆𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀦𑀸𑀫𑁂𑀦 𑀘𑀢𑀼𑀓𑁆𑀔𑀢𑁆𑀢𑀼𑀁 𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀯𑀸 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀦𑀦𑁆𑀢𑀭𑀫𑁂𑀯 𑀬𑀣𑀸𑀭𑀳𑀁 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁 𑀯𑀸 𑀙𑀩𑁆𑀩𑀻𑀲𑀢𑀺𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑁂𑀲𑀼 𑀬𑀣𑀸𑀪𑀺𑀦𑀻𑀳𑀸𑀭𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀚𑀯𑀦𑀁 𑀅𑀧𑁆𑀧𑀦𑀸𑀯𑀻𑀣𑀺𑀫𑁄𑀢𑀭𑀢𑀺, 𑀢𑀢𑁄 𑀧𑀭𑀁 𑀅𑀧𑁆𑀧𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺.

𑁨𑁨. 𑀢𑀢𑁆𑀣 𑀲𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀦𑀦𑁆𑀢𑀭𑀁 𑀅𑀧𑁆𑀧𑀦𑀸𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑀚𑀯𑀦𑀸𑀦𑀦𑁆𑀢𑀭𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯, 𑀢𑀢𑁆𑀣𑀸𑀧𑀺 𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀁 𑀓𑀼𑀲𑀮𑀚𑀯𑀦𑀜𑁆𑀘𑁂𑀯 𑀳𑁂𑀝𑁆𑀞𑀺𑀫𑀜𑁆𑀘 𑀨𑀮𑀢𑁆𑀢𑀬𑀫𑀧𑁆𑀧𑁂𑀢𑀺, 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀓𑀺𑀭𑀺𑀬𑀚𑀯𑀦𑀁 𑀅𑀭𑀳𑀢𑁆𑀢𑀨𑀮𑀜𑁆𑀘𑀸𑀢𑀺.

𑁨𑁩. 𑀤𑁆𑀯𑀢𑁆𑀢𑀺𑀁𑀲 𑀲𑀼𑀔𑀧𑀼𑀜𑁆𑀜𑀫𑁆𑀳𑀸, 𑀤𑁆𑀯𑀸𑀤𑀲𑁄𑀧𑁂𑀓𑁆𑀔𑀓𑀸 𑀧𑀭𑀁,

𑀲𑀼𑀔𑀺𑀢𑀓𑁆𑀭𑀺𑀬𑀢𑁄 𑀅𑀝𑁆𑀞, 𑀙 𑀲𑀫𑁆𑀪𑁄𑀦𑁆𑀢𑀺 𑀉𑀧𑁂𑀓𑁆𑀔𑀓𑀸.

𑁨𑁪. 𑀧𑀼𑀣𑀼𑀚𑁆𑀚𑀦𑀸𑀦 𑀲𑁂𑀓𑁆𑀔𑀸𑀦𑀁, 𑀓𑀸𑀫𑀧𑀼𑀜𑁆𑀜𑀢𑀺𑀳𑁂𑀢𑀼𑀢𑁄.

𑀢𑀺𑀳𑁂𑀢𑀼𑀓𑀸𑀫𑀓𑁆𑀭𑀺𑀬𑀢𑁄, 𑀯𑀻𑀢𑀭𑀸𑀕𑀸𑀦𑀫𑀧𑁆𑀧𑀦𑀸.

𑀅𑀬𑀫𑁂𑀢𑁆𑀣 𑀫𑀦𑁄𑀤𑁆𑀯𑀸𑀭𑁂 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀬𑁄.

𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁄

𑁨𑁫. 𑀲𑀩𑁆𑀩𑀢𑁆𑀣𑀸𑀧𑀺 𑀧𑀦𑁂𑀢𑁆𑀣 𑀅𑀦𑀺𑀝𑁆𑀞𑁂 𑀆𑀭𑀫𑁆𑀫𑀡𑁂 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑁂𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀸𑀦𑀺.

𑁨𑁬. 𑀇𑀝𑁆𑀞𑁂 𑀓𑀼𑀲𑀮𑀯𑀺𑀧𑀸𑀓𑀸𑀦𑀺.

𑁨𑁭. 𑀅𑀢𑀺𑀇𑀝𑁆𑀞𑁂 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑁂𑀯 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀸𑀦𑀺, 𑀢𑀢𑁆𑀣𑀸𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀚𑀯𑀦𑀸𑀯𑀲𑀸𑀦𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑁂𑀯 𑀢𑀤𑀸𑀭𑀫𑁆𑀫𑀡𑀸𑀦𑀺 𑀪𑀯𑀦𑁆𑀢𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀺𑀭𑀺𑀬𑀚𑀯𑀦𑀸𑀯𑀲𑀸𑀦𑁂 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯 𑀳𑁄𑀦𑁆𑀢𑀺.

𑁨𑁮. 𑀤𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀯𑀲𑀸𑀦𑁂 𑀘 𑀧𑀦 𑀢𑀤𑀸𑀭𑀫𑁆𑀫𑀡𑀸𑀦𑀺𑀘𑁂𑀯 𑀪𑀯𑀗𑁆𑀕𑀸𑀦𑀺 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀬𑀤𑀺 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀤𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀯𑀲𑀸𑀦𑁂 𑀢𑀤𑀸𑀭𑀫𑁆𑀫𑀡𑀲𑀫𑁆𑀪𑀯𑁄 𑀦𑀢𑁆𑀣𑀺, 𑀢𑀤𑀸 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀘𑀺𑀢𑀧𑀼𑀩𑁆𑀩𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀫𑀸𑀭𑀩𑁆𑀪 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀫𑀦𑀦𑁆𑀢𑀭𑀺𑀢𑁆𑀯𑀸 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺 𑀆𑀘𑀭𑀺𑀬𑀸.

𑁨𑁯. 𑀢𑀣𑀸 𑀓𑀸𑀫𑀸𑀯𑀘𑀭𑀚𑀯𑀦𑀸𑀯𑀲𑀸𑀦𑁂 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑁆𑀯𑁂𑀯 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀇𑀘𑁆𑀙𑀦𑁆𑀢𑀻𑀢𑀺.

𑁩𑁦. 𑀓𑀸𑀫𑁂 𑀚𑀯𑀦𑀲𑀢𑁆𑀢𑀸𑀮𑀫𑁆𑀩𑀡𑀸𑀦𑀁 𑀦𑀺𑀬𑀫𑁂 𑀲𑀢𑀺.

𑀯𑀺𑀪𑀽𑀢𑁂𑀢𑀺𑀫𑀳𑀦𑁆𑀢𑁂 𑀘, 𑀢𑀤𑀸𑀭𑀫𑁆𑀫𑀡𑀫𑀻𑀭𑀺𑀢𑀁.

𑀅𑀬𑀫𑁂𑀢𑁆𑀣 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁄.

𑀚𑀯𑀦𑀦𑀺𑀬𑀫𑁄

𑁩𑁧. 𑀚𑀯𑀦𑁂𑀲𑀼 𑀘 𑀧𑀭𑀺𑀢𑁆𑀢𑀚𑀯𑀦𑀯𑀻𑀣𑀺𑀬𑀁 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀙𑀓𑁆𑀔𑀢𑁆𑀢𑀼𑀫𑁂𑀯 𑀯𑀸 𑀚𑀯𑀦𑁆𑀢𑀺.

𑁩𑁨. 𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀁 𑀧𑀦 𑀫𑀭𑀡𑀓𑀸𑀮𑀸𑀤𑀻𑀲𑀼 𑀧𑀜𑁆𑀘𑀯𑀸𑀭𑀫𑁂𑀯.

𑁩𑁩. 𑀪𑀕𑀯𑀢𑁄 𑀧𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑀸𑀤𑀻𑀲𑀼 𑀮𑀳𑀼𑀓𑀧𑁆𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀭𑀺𑀧𑀜𑁆𑀘 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀻𑀢𑀺𑀧𑀺 𑀯𑀤𑀦𑁆𑀢𑀺.

𑁩𑁪. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀧𑀦 𑀧𑀞𑀫𑀓𑀧𑁆𑀧𑀦𑀸𑀬𑀁 𑀫𑀳𑀕𑁆𑀕𑀢𑀚𑀯𑀦𑀸𑀦𑀺𑀅𑀪𑀺𑀜𑁆𑀜𑀸𑀚𑀯𑀦𑀸𑀦𑀺 𑀘 𑀲𑀩𑁆𑀩𑀤𑀸𑀧𑀺 𑀏𑀓𑀯𑀸𑀭𑀫𑁂𑀯 𑀚𑀯𑀦𑁆𑀢𑀺, 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀧𑀸𑀢𑁄.

𑁩𑁫. 𑀘𑀢𑁆𑀢𑀸𑀭𑁄 𑀧𑀦 𑀫𑀕𑁆𑀕𑀼𑀧𑁆𑀧𑀸𑀤𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸, 𑀢𑀢𑁄 𑀧𑀭𑀁 𑀤𑁆𑀯𑁂 𑀢𑀻𑀡𑀺 𑀨𑀮𑀘𑀺𑀢𑁆𑀢𑀸𑀦𑀺 𑀬𑀣𑀸𑀭𑀳𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀧𑀸𑀢𑁄.

𑁩𑁬. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑀯𑀦𑀁 𑀚𑀯𑀢𑀺, 𑀢𑀢𑁄 𑀧𑀭𑀁 𑀦𑀺𑀭𑁄𑀥𑀁 𑀨𑀼𑀲𑀢𑀺.

𑁩𑁭. 𑀯𑀼𑀝𑁆𑀞𑀸𑀦𑀓𑀸𑀮𑁂 𑀘 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀨𑀮𑀁 𑀯𑀸 𑀬𑀣𑀸𑀭𑀳𑀫𑁂𑀓𑀯𑀸𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺.

𑁩𑁮. 𑀲𑀩𑁆𑀩𑀢𑁆𑀣𑀸𑀧𑀺 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀪𑀯𑀗𑁆𑀕𑀲𑁄𑀢𑁄 𑀯𑀺𑀬 𑀯𑀻𑀣𑀺𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀩𑀳𑀽𑀦𑀺𑀧𑀺 𑀮𑀩𑁆𑀪𑀦𑁆𑀢𑀻𑀢𑀺.

𑁩𑁯. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀢𑁆𑀢𑀸𑀦𑀺, 𑀫𑀕𑁆𑀕𑀸𑀪𑀺𑀜𑁆𑀜𑀸 𑀲𑀓𑀺𑀁 𑀫𑀢𑀸.

𑀅𑀯𑀲𑁂𑀲𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀚𑀯𑀦𑀸𑀦𑀺 𑀩𑀳𑀽𑀦𑀺𑀧𑀺.

𑀅𑀬𑀫𑁂𑀢𑁆𑀣 𑀚𑀯𑀦𑀦𑀺𑀬𑀫𑁄.

𑀧𑀼𑀕𑁆𑀕𑀮𑀪𑁂𑀤𑁄

𑁪𑁦. 𑀤𑀼𑀳𑁂𑀢𑀼𑀓𑀸𑀦𑀫𑀳𑁂𑀢𑀼𑀓𑀸𑀦𑀜𑁆𑀘 𑀧𑀦𑁂𑀢𑁆𑀣 𑀓𑀺𑀭𑀺𑀬𑀚𑀯𑀦𑀸𑀦𑀺 𑀘𑁂𑀯 𑀅𑀧𑁆𑀧𑀦𑀸𑀚𑀯𑀦𑀸𑀦𑀺 𑀘 𑀮𑀩𑁆𑀪𑀦𑁆𑀢𑀺.

𑁪𑁧. 𑀢𑀣𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀦𑀺 𑀘 𑀲𑀼𑀕𑀢𑀺𑀬𑀁.

𑁪𑁨. 𑀤𑀼𑀕𑁆𑀕𑀢𑀺𑀬𑀁 𑀧𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀘 𑀫𑀳𑀸𑀯𑀺𑀧𑀸𑀓𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺.

𑁪𑁩. 𑀢𑀺𑀳𑁂𑀢𑀼𑀓𑁂𑀲𑀼 𑀘 𑀔𑀻𑀡𑀸𑀲𑀯𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺.

𑁪𑁪. 𑀢𑀣𑀸 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀓𑀺𑀭𑀺𑀬𑀚𑀯𑀦𑀸𑀦𑀺.

𑁪𑁫. 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀯𑀺𑀘𑀺𑀓𑀺𑀘𑁆𑀙𑀸𑀚𑀯𑀦𑀸𑀦𑀺 𑀘 𑀲𑁂𑀓𑁆𑀔𑀸𑀦𑀁.

𑁪𑁬. 𑀅𑀦𑀸𑀕𑀸𑀫𑀺𑀧𑀼𑀕𑁆𑀕𑀮𑀸𑀦𑀁 𑀧𑀦 𑀧𑀝𑀺𑀖𑀚𑀯𑀦𑀸𑀦𑀺 𑀘 𑀦 𑀮𑀩𑁆𑀪𑀦𑁆𑀢𑀺.

𑁪𑁭. 𑀮𑁄𑀓𑀼𑀢𑁆𑀢𑀭𑀚𑀯𑀦𑀸𑀦𑀺 𑀘 𑀬𑀣𑀸𑀭𑀳𑀁 𑀅𑀭𑀺𑀬𑀸𑀦𑀫𑁂𑀯 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑁪𑁮. 𑀅𑀲𑁂𑀓𑁆𑀔𑀸𑀦𑀁 𑀘𑀢𑀼𑀘𑀢𑁆𑀢𑀸𑀮𑀻𑀲 𑀲𑁂𑀓𑁆𑀔𑀸𑀦𑀫𑀼𑀤𑁆𑀤𑀺𑀲𑁂.

𑀙𑀧𑁆𑀧𑀜𑁆𑀜𑀸𑀲𑀸𑀯𑀲𑁂𑀲𑀸𑀦𑀁, 𑀘𑀢𑀼𑀧𑀜𑁆𑀜𑀸𑀲 𑀲𑀫𑁆𑀪𑀯𑀸.

𑀅𑀬𑀫𑁂𑀢𑁆𑀣 𑀧𑀼𑀕𑁆𑀕𑀮𑀪𑁂𑀤𑁄.

𑀪𑀽𑀫𑀺𑀯𑀺𑀪𑀸𑀕𑁄

𑁪𑁯. 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀧𑀦𑁂𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀬𑀣𑀸𑀭𑀳𑀫𑀼𑀧𑀮𑀩𑁆𑀪𑀦𑁆𑀢𑀺.

𑁫𑁦. 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀧𑀝𑀺𑀖𑀚𑀯𑀦𑀢𑀤𑀸𑀭𑀫𑁆𑀫𑀡𑀯𑀚𑁆𑀚𑀺𑀢𑀸𑀦𑀺.

𑁫𑁧. 𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀧𑀞𑀫𑀫𑀕𑁆𑀕𑀭𑀽𑀧𑀸𑀯𑀘𑀭𑀳𑀲𑀦𑀳𑁂𑀝𑁆𑀞𑀺𑀫𑀸𑀭𑀼𑀧𑁆𑀧𑀯𑀚𑁆𑀚𑀺𑀢𑀸𑀦𑀺 𑀘 𑀮𑀩𑁆𑀪𑀦𑁆𑀢𑀺.

𑁫𑁨. 𑀲𑀩𑁆𑀩𑀢𑁆𑀣𑀸𑀧𑀺 𑀘 𑀢𑀁𑀢𑀁𑀧𑀲𑀸𑀤𑀭𑀳𑀺𑀢𑀸𑀦𑀁 𑀢𑀁𑀢𑀁𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀦 𑀮𑀩𑁆𑀪𑀦𑁆𑀢𑁂𑀯.

𑁫𑁩. 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀧𑀦 𑀲𑀩𑁆𑀩𑀣𑀸𑀧𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀦𑀢𑁆𑀣𑁂𑀯𑀸𑀢𑀺.

𑁫𑁪. 𑀅𑀲𑀻𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺, 𑀓𑀸𑀫𑁂 𑀭𑀽𑀧𑁂 𑀬𑀣𑀸𑀭𑀳𑀁.

𑀘𑀢𑀼𑀲𑀝𑁆𑀞𑀺 𑀢𑀣𑀸𑀭𑀽𑀧𑁂, 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀮𑀩𑁆𑀪𑀭𑁂.

𑀅𑀬𑀫𑁂𑀢𑁆𑀣 𑀪𑀽𑀫𑀺𑀯𑀺𑀪𑀸𑀕𑁄.

𑁫𑁫. 𑀇𑀘𑁆𑀘𑁂𑀯𑀁 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀬𑀣𑀸𑀲𑀫𑁆𑀪𑀯𑀁 𑀪𑀯𑀗𑁆𑀕𑀦𑁆𑀢𑀭𑀺𑀢𑀸 𑀬𑀸𑀯𑀢𑀸𑀬𑀼𑀓𑀫𑀩𑁆𑀩𑁄𑀘𑁆𑀙𑀺𑀦𑁆𑀦𑀸 𑀧𑀯𑀢𑁆𑀢𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑀯𑀻𑀣𑀺𑀲𑀗𑁆𑀕𑀳𑀯𑀺𑀪𑀸𑀕𑁄 𑀦𑀸𑀫

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.