𑁩. 𑀧𑀓𑀺𑀡𑁆𑀡𑀓𑀧𑀭𑀺𑀘𑁆𑀙𑁂𑀤𑁄

𑁧. 𑀲𑀫𑁆𑀧𑀬𑀼𑀢𑁆𑀢𑀸 𑀬𑀣𑀸𑀬𑁄𑀕𑀁, 𑀢𑁂𑀧𑀜𑁆𑀜𑀸𑀲 𑀲𑀪𑀸𑀯𑀢𑁄.

𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂𑀲𑀁 𑀤𑀸𑀦𑀺 𑀬𑀣𑀸𑀭𑀳𑀁.

𑁨. 𑀯𑁂𑀤𑀦𑀸𑀳𑁂𑀢𑀼𑀢𑁄 𑀓𑀺𑀘𑁆𑀘𑀤𑁆𑀯𑀸𑀭𑀸𑀮𑀫𑁆𑀩𑀡𑀯𑀢𑁆𑀣𑀼𑀢𑁄.

𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯, 𑀲𑀗𑁆𑀕𑀳𑁄 𑀦𑀸𑀫 𑀦𑀻𑀬𑀢𑁂.

𑀯𑁂𑀤𑀦𑀸𑀲𑀗𑁆𑀕𑀳𑁄

𑁩. 𑀢𑀢𑁆𑀣 𑀯𑁂𑀤𑀦𑀸𑀲𑀗𑁆𑀕𑀳𑁂 𑀢𑀸𑀯 𑀢𑀺𑀯𑀺𑀥𑀸 𑀯𑁂𑀤𑀦𑀸 𑀲𑀼𑀔𑀁 𑀤𑀼𑀓𑁆𑀔𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀘𑁂𑀢𑀺, 𑀲𑀼𑀔𑀁 𑀤𑀼𑀓𑁆𑀔𑀁 𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁 𑀉𑀧𑁂𑀓𑁆𑀔𑀸𑀢𑀺 𑀘 𑀪𑁂𑀤𑁂𑀦 𑀧𑀦 𑀧𑀜𑁆𑀘𑀥𑀸 𑀳𑁄𑀢𑀺.

𑁪. 𑀢𑀢𑁆𑀣 𑀲𑀼𑀔𑀲𑀳𑀕𑀢𑀁 𑀓𑀼𑀲𑀮𑀯𑀺𑀧𑀸𑀓𑀁 𑀓𑀸𑀬𑀯𑀺𑀜𑁆𑀜𑀸𑀡𑀫𑁂𑀓𑀫𑁂𑀯, 𑀢𑀣𑀸 𑀤𑀼𑀓𑁆𑀔𑀲𑀳𑀕𑀢𑀁 𑀅𑀓𑀼𑀲𑀮𑀯𑀺𑀧𑀸𑀓𑀁.

𑁫. 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀸𑀦𑀺 𑀧𑀦 𑀮𑁄𑀪𑀫𑀽𑀮𑀸𑀦𑀺 𑀘𑀢𑁆𑀢𑀸𑀭𑀺, 𑀤𑁆𑀯𑀸𑀤𑀲 𑀓𑀸𑀫𑀸𑀯𑀘𑀭𑀲𑁄𑀪𑀦𑀸𑀦𑀺, 𑀲𑀼𑀔𑀲𑀦𑁆𑀢𑀻𑀭𑀡𑀳𑀲𑀦𑀸𑀦𑀺 𑀘 𑀤𑁆𑀯𑁂𑀢𑀺 𑀅𑀝𑁆𑀞𑀸𑀭𑀲 𑀓𑀸𑀫𑀸𑀯𑀘𑀭𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀸𑀦𑀺 𑀘𑁂𑀯 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀗𑁆𑀔𑀸𑀢𑀸𑀦𑀺 𑀘𑀢𑀼𑀘𑀢𑁆𑀢𑀸𑀮𑀻𑀲 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀘𑁂𑀢𑀺 𑀤𑁆𑀯𑀸𑀲𑀝𑁆𑀞𑀺𑀯𑀺𑀥𑀸𑀦𑀺 𑀪𑀯𑀦𑁆𑀢𑀺.

𑁬. 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀸𑀦𑀺 𑀧𑀦 𑀤𑁆𑀯𑁂 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑁂𑀯.

𑁭. 𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀧𑀜𑁆𑀘𑀧𑀜𑁆𑀜𑀸𑀲 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀸𑀦𑁂𑀯𑀸𑀢𑀺.

𑁮. 𑀲𑀼𑀔𑀁 𑀤𑀼𑀓𑁆𑀔𑀫𑀼𑀧𑁂𑀓𑁆𑀔𑀸𑀢𑀺, 𑀢𑀺𑀯𑀺𑀥𑀸 𑀢𑀢𑁆𑀣 𑀯𑁂𑀤𑀦𑀸.

𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀫𑀺𑀢𑀺𑀪𑁂𑀤𑁂𑀦 𑀧𑀜𑁆𑀘𑀥𑀸.

𑁯. 𑀲𑀼𑀔𑀫𑁂𑀓𑀢𑁆𑀣 𑀤𑀼𑀓𑁆𑀔𑀜𑁆𑀘, 𑀤𑁄𑀫𑀦𑀲𑁆𑀲𑀁 𑀤𑁆𑀯𑀬𑁂 𑀞𑀺𑀢𑀁.

𑀤𑁆𑀯𑀸𑀲𑀝𑁆𑀞𑀻𑀲𑀼 𑀲𑁄𑀫𑀦𑀲𑁆𑀲𑀁, 𑀧𑀜𑁆𑀘𑀧𑀜𑁆𑀜𑀸𑀲𑀓𑁂𑀢𑀭𑀸.

𑀳𑁂𑀢𑀼𑀲𑀗𑁆𑀕𑀳𑁄

𑁧𑁦. 𑀳𑁂𑀢𑀼𑀲𑀗𑁆𑀕𑀳𑁂 𑀳𑁂𑀢𑀽 𑀦𑀸𑀫 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀘𑀸𑀢𑀺 𑀙𑀩𑁆𑀩𑀺𑀥𑀸 𑀪𑀯𑀦𑁆𑀢𑀺.

𑁧𑁧. 𑀢𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀳𑀲𑀦𑀯𑀲𑁂𑀦 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁧𑁨. 𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀏𑀓𑀲𑀢𑁆𑀢𑀢𑀺 𑀘𑀺𑀢𑁆𑀢𑀸𑀦𑀺 𑀲𑀳𑁂𑀢𑀼𑀓𑀸𑀦𑁂𑀯.

𑁧𑁩. 𑀢𑀢𑁆𑀣𑀸𑀧𑀺 𑀤𑁆𑀯𑁂 𑀫𑁄𑀫𑀽𑀳𑀘𑀺𑀢𑁆𑀢𑀸𑀦𑀺 𑀏𑀓𑀳𑁂𑀢𑀼𑀓𑀸𑀦𑀺.

𑁧𑁪. 𑀲𑁂𑀲𑀸𑀦𑀺 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑁂𑀯 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑀸𑀤𑀲 𑀓𑀸𑀫𑀸𑀯𑀘𑀭𑀲𑁄𑀪𑀦𑀸𑀦𑀺 𑀘𑁂𑀢𑀺 𑀤𑁆𑀯𑀸𑀯𑀻𑀲𑀢𑀺 𑀤𑁆𑀯𑀺𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺.

𑁧𑁫. 𑀤𑁆𑀯𑀸𑀤𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀲𑁄𑀪𑀦𑀸𑀦𑀺 𑀘𑁂𑀯 𑀧𑀜𑁆𑀘𑀢𑀺𑀁𑀲 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀘𑁂𑀢𑀺 𑀲𑀢𑁆𑀢𑀘𑀢𑁆𑀢𑀸𑀮𑀻𑀲 𑀢𑀺𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀻𑀢𑀺.

𑁧𑁬. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀳𑁂𑀢𑀽 𑀅𑀓𑀼𑀲𑀮𑀸 𑀢𑀬𑁄;

𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑁄 𑀘,

𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀢𑀣𑀸.

𑁧𑁭. 𑀅𑀳𑁂𑀢𑀼𑀓𑀸𑀝𑁆𑀞𑀸𑀭𑀲𑁂𑀓𑀳𑁂𑀢𑀼𑀓𑀸 𑀤𑁆𑀯𑁂 𑀤𑁆𑀯𑀸𑀯𑀻𑀲𑀢𑀺.

𑀤𑁆𑀯𑀺𑀳𑁂𑀢𑀼𑀓𑀸 𑀫𑀢𑀸 𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀢𑀺𑀳𑁂𑀢𑀼𑀓𑀸.

𑀓𑀺𑀘𑁆𑀘𑀲𑀗𑁆𑀕𑀳𑁄

𑁧𑁮. 𑀓𑀺𑀘𑁆𑀘𑀲𑀗𑁆𑀕𑀳𑁂 𑀓𑀺𑀘𑁆𑀘𑀸𑀦𑀺 𑀦𑀸𑀫 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀯𑀚𑁆𑀚𑀦𑀤𑀲𑁆𑀲𑀦𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀢𑀤𑀸𑀭𑀫𑁆𑀫𑀡𑀘𑀼𑀢𑀺𑀯𑀲𑁂𑀦 𑀘𑀼𑀤𑁆𑀤𑀲𑀯𑀺𑀥𑀸𑀦𑀺 𑀪𑀯𑀦𑁆𑀢𑀺.

𑁧𑁯. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀯𑀚𑁆𑀚𑀦𑀧𑀜𑁆𑀘𑀯𑀺𑀜𑁆𑀜𑀸𑀡𑀞𑀸𑀦𑀸𑀤𑀺𑀯𑀲𑁂𑀦 𑀧𑀦 𑀢𑁂𑀲𑀁 𑀤𑀲𑀥𑀸 𑀞𑀸𑀦𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁦. 𑀢𑀢𑁆𑀣 𑀤𑁆𑀯𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀸𑀦𑀺 𑀘𑁂𑀯 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀸𑀦𑀺 𑀘 𑀦𑀯 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀸𑀦𑀺 𑀘𑁂𑀢𑀺 𑀏𑀓𑀽𑀦𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀓𑀺𑀘𑁆𑀘𑀸𑀦𑀺 𑀦𑀸𑀫.

𑁨𑁧. 𑀆𑀯𑀚𑁆𑀚𑀦𑀓𑀺𑀘𑁆𑀘𑀸𑀦𑀺 𑀧𑀦 𑀤𑁆𑀯𑁂.

𑁨𑁨. 𑀢𑀣𑀸 𑀤𑀲𑁆𑀲𑀦𑀲𑀯𑀦𑀖𑀸𑀬𑀦𑀲𑀸𑀬𑀦𑀨𑀼𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀸𑀦𑀺 𑀘.

𑁨𑁩. 𑀢𑀻𑀡𑀺 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀸𑀦𑀺.

𑁨𑁪. 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀫𑁂𑀯 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺.

𑁨𑁫. 𑀆𑀯𑀚𑁆𑀚𑀦𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀨𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀧𑀜𑁆𑀘𑀧𑀜𑁆𑀜𑀸𑀲 𑀚𑀯𑀦𑀓𑀺𑀘𑁆𑀘𑀸𑀦𑀺.

𑁨𑁬. 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀸𑀦𑀺 𑀘𑁂𑀯 𑀲𑀦𑁆𑀢𑀻𑀭𑀡𑀢𑁆𑀢𑀬𑀜𑁆𑀘𑁂𑀢𑀺 𑀏𑀓𑀸𑀤𑀲 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀺.

𑁨𑁭. 𑀢𑁂𑀲𑀼 𑀧𑀦 𑀤𑁆𑀯𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀘𑀺𑀢𑁆𑀢𑀸𑀦𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀲𑀦𑁆𑀢𑀻𑀭𑀡𑀯𑀲𑁂𑀦 𑀧𑀜𑁆𑀘𑀓𑀺𑀘𑁆𑀘𑀸𑀦𑀺 𑀦𑀸𑀫.

𑁨𑁮. 𑀫𑀳𑀸𑀯𑀺𑀧𑀸𑀓𑀸𑀦𑀺 𑀅𑀝𑁆𑀞 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀘𑀢𑀼𑀓𑀺𑀘𑁆𑀘𑀸𑀦𑀺 𑀦𑀸𑀫.

𑁨𑁯. 𑀫𑀳𑀕𑁆𑀕𑀢𑀯𑀺𑀧𑀸𑀓𑀸𑀦𑀺 𑀦𑀯 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀢𑀺𑀓𑀺𑀘𑁆𑀘𑀸𑀦𑀺 𑀦𑀸𑀫.

𑁩𑁦. 𑀲𑁄𑀫𑀦𑀲𑁆𑀲𑀲𑀦𑁆𑀢𑀻𑀭𑀡𑀁 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀤𑀼𑀓𑀺𑀘𑁆𑀘𑀁.

𑁩𑁧. 𑀢𑀣𑀸 𑀯𑁄𑀝𑁆𑀞𑀩𑁆𑀩𑀦𑀁 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀯𑀲𑁂𑀦.

𑁩𑁨. 𑀲𑁂𑀲𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀚𑀯𑀦𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀬𑀣𑀸𑀲𑀫𑁆𑀪𑀯𑀫𑁂𑀓𑀓𑀺𑀘𑁆𑀘𑀸𑀦𑀻𑀢𑀺.

𑁩𑁩. 𑀧𑀝𑀺𑀲𑀦𑁆𑀥𑀸𑀤𑀬𑁄 𑀦𑀸𑀫, 𑀓𑀺𑀘𑁆𑀘𑀪𑁂𑀤𑁂𑀦 𑀘𑀼𑀤𑁆𑀤𑀲.

𑀤𑀲𑀥𑀸 𑀞𑀸𑀦𑀪𑁂𑀤𑁂𑀦, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀓𑀸𑀲𑀺𑀢𑀸.

𑁩𑁪. 𑀅𑀝𑁆𑀞𑀲𑀝𑁆𑀞𑀺 𑀢𑀣𑀸 𑀤𑁆𑀯𑁂 𑀘, 𑀦𑀯𑀸𑀝𑁆𑀞 𑀤𑁆𑀯𑁂 𑀬𑀣𑀸𑀓𑁆𑀓𑀫𑀁.

𑀏𑀓𑀤𑁆𑀯𑀺𑀢𑀺𑀘𑀢𑀼𑀧𑀜𑁆𑀘𑀓𑀺𑀘𑁆𑀘𑀞𑀸𑀦𑀸𑀦𑀺 𑀦𑀺𑀤𑁆𑀤𑀺𑀲𑁂.

𑀤𑁆𑀯𑀸𑀭𑀲𑀗𑁆𑀕𑀳𑁄

𑁩𑁫. 𑀤𑁆𑀯𑀸𑀭𑀲𑀗𑁆𑀕𑀳𑁂 𑀤𑁆𑀯𑀸𑀭𑀸𑀦𑀺 𑀦𑀸𑀫 𑀘𑀓𑁆𑀔𑀼𑀤𑁆𑀯𑀸𑀭𑀁 𑀲𑁄𑀢𑀤𑁆𑀯𑀸𑀭𑀁 𑀖𑀸𑀦𑀤𑁆𑀯𑀸𑀭𑀁 𑀚𑀺𑀯𑁆𑀳𑀸𑀤𑁆𑀯𑀸𑀭𑀁 𑀓𑀸𑀬𑀤𑁆𑀯𑀸𑀭𑀁 𑀫𑀦𑁄𑀤𑁆𑀯𑀸𑀭𑀜𑁆𑀘𑁂𑀢𑀺 𑀙𑀩𑁆𑀩𑀺𑀥𑀸𑀦𑀺 𑀪𑀯𑀦𑁆𑀢𑀺.

𑁩𑁬. 𑀢𑀢𑁆𑀣 𑀘𑀓𑁆𑀔𑀼𑀫𑁂𑀯 𑀘𑀓𑁆𑀔𑀼𑀤𑁆𑀯𑀸𑀭𑀁.

𑁩𑁭. 𑀢𑀣𑀸 𑀲𑁄𑀢𑀸𑀤𑀬𑁄 𑀲𑁄𑀢𑀤𑁆𑀯𑀸𑀭𑀸𑀤𑀻𑀦𑀺.

𑁩𑁮. 𑀫𑀦𑁄𑀤𑁆𑀯𑀸𑀭𑀁 𑀧𑀦 𑀪𑀯𑀗𑁆𑀕𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁩𑁯. 𑀢𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀓𑀸𑀫𑀸𑀯𑀘𑀭𑀚𑀯𑀦𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀙𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀬𑀣𑀸𑀭𑀳𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀲𑁂𑀦 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀙𑀘𑀢𑁆𑀢𑀸𑀮𑀻𑀲𑁂𑀯 𑀪𑀯𑀦𑁆𑀢𑀻𑀢𑀺 𑀲𑀩𑁆𑀩𑀣𑀸𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀘𑀢𑀼𑀧𑀜𑁆𑀜𑀸𑀲 𑀘𑀺𑀢𑁆𑀢𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑁂𑀯.

𑁪𑁦. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀧𑀜𑁆𑀘𑀧𑀜𑁆𑀜𑀸𑀲𑀚𑀯𑀦𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀲𑀢𑁆𑀢𑀲𑀝𑁆𑀞𑀺 𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀺.

𑁪𑁧. 𑀏𑀓𑀽𑀦𑀯𑀻𑀲𑀢𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀺.

𑁪𑁨. 𑀢𑁂𑀲𑀼 𑀧𑀦 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀘𑁂𑀯 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑀯𑀦𑀸𑀦𑀺 𑀘𑁂𑀢𑀺 𑀙𑀢𑁆𑀢𑀺𑀁𑀲 𑀬𑀣𑀸𑀭𑀳𑀫𑁂𑀓𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁪𑁩. 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀁 𑀧𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀁.

𑁪𑁪. 𑀲𑀼𑀔𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀺.

𑁪𑁫. 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀫𑀳𑀸𑀯𑀺𑀧𑀸𑀓𑀸𑀦𑀺 𑀙𑀤𑁆𑀯𑀸𑀭𑀺𑀓𑀸𑀦𑀺 𑀘𑁂𑀯 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀺 𑀘.

𑁪𑁬. 𑀫𑀳𑀕𑁆𑀕𑀢𑀯𑀺𑀧𑀸𑀓𑀸𑀦𑀺 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑁂𑀯𑀸𑀢𑀺.

𑁪𑁭. 𑀏𑀓𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘𑀙𑀤𑁆𑀯𑀸𑀭𑀺𑀓𑀸𑀦𑀺 𑀘.

𑀙𑀤𑁆𑀯𑀸𑀭𑀺𑀓𑀯𑀺𑀫𑀼𑀢𑁆𑀢𑀸𑀦𑀺, 𑀯𑀺𑀫𑀼𑀢𑁆𑀢𑀸𑀦𑀺 𑀘 𑀲𑀩𑁆𑀩𑀣𑀸.

𑀙𑀢𑁆𑀢𑀺𑀁𑀲𑀢𑀺 𑀢𑀣𑀸 𑀢𑀻𑀡𑀺, 𑀏𑀓𑀢𑀺𑀁𑀲 𑀬𑀣𑀸𑀓𑁆𑀓𑀫𑀁;

𑀤𑀲𑀥𑀸 𑀦𑀯𑀥𑀸 𑀘𑁂𑀢𑀺, 𑀧𑀜𑁆𑀘𑀥𑀸 𑀧𑀭𑀺𑀤𑀻𑀧𑀬𑁂.

𑀆𑀮𑀫𑁆𑀩𑀡𑀲𑀗𑁆𑀕𑀳𑁄

𑁪𑁮. 𑀆𑀮𑀫𑁆𑀩𑀡𑀲𑀗𑁆𑀕𑀳𑁂 𑀆𑀭𑀫𑁆𑀫𑀡𑀸𑀦𑀺 𑀦𑀸𑀫 𑀭𑀽𑀧𑀸𑀭𑀫𑁆𑀫𑀡𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀕𑀦𑁆𑀥𑀸𑀭𑀫𑁆𑀫𑀡𑀁 𑀭𑀲𑀸𑀭𑀫𑁆𑀫𑀡𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀥𑀫𑁆𑀫𑀸𑀭𑀫𑁆𑀫𑀡𑀜𑁆𑀘𑁂𑀢𑀺 𑀙𑀩𑁆𑀩𑀺𑀥𑀸𑀦𑀺 𑀪𑀯𑀦𑁆𑀢𑀺.

𑁪𑁯. 𑀢𑀢𑁆𑀣 𑀭𑀽𑀧𑀫𑁂𑀯 𑀭𑀽𑀧𑀸𑀭𑀫𑁆𑀫𑀡𑀁, 𑀢𑀣𑀸 𑀲𑀤𑁆𑀤𑀸𑀤𑀬𑁄 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀦𑀺.

𑁫𑁦. 𑀥𑀫𑁆𑀫𑀸𑀭𑀫𑁆𑀫𑀡𑀁 𑀧𑀦 𑀧𑀲𑀸𑀤𑀲𑀼𑀔𑀼𑀫𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀥𑀸 𑀲𑀗𑁆𑀕𑀬𑁆𑀳𑀢𑀺.

𑁫𑁧. 𑀢𑀢𑁆𑀣 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀭𑀽𑀧𑀫𑁂𑀯 𑀆𑀭𑀫𑁆𑀫𑀡𑀁, 𑀢𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀣𑀸 𑀲𑁄𑀢𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀤𑀻𑀦𑀫𑁆𑀧𑀺 𑀲𑀤𑁆𑀤𑀸𑀤𑀻𑀦𑀺, 𑀢𑀸𑀦𑀺 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺𑀬𑁂𑀯.

𑁫𑁨. 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀧𑀦 𑀙𑀩𑁆𑀩𑀺𑀥𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀅𑀦𑀸𑀕𑀢𑀁 𑀓𑀸𑀮𑀯𑀺𑀫𑀼𑀢𑁆𑀢𑀜𑁆𑀘 𑀬𑀣𑀸𑀭𑀳𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑁫𑁩. 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀲𑀗𑁆𑀔𑀸𑀢𑀸𑀦𑀁 𑀙𑀩𑁆𑀩𑀺𑀥𑀫𑁆𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑁆𑀢𑀭𑁂 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀧𑀜𑁆𑀜𑀢𑁆𑀢𑀺𑀪𑀽𑀢𑀁 𑀯𑀸 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺.

𑁫𑁪. 𑀢𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀬𑀣𑀸𑀓𑁆𑀓𑀫𑀁 𑀭𑀽𑀧𑀸𑀤𑀺𑀏𑀓𑁂𑀓𑀸𑀭𑀫𑁆𑀫𑀡𑀸𑀦𑁂𑀯.

𑁫𑁫. 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀁 𑀧𑀦 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀁.

𑁫𑁬. 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀺 𑀳𑀲𑀦𑀘𑀺𑀢𑁆𑀢𑀜𑁆𑀘𑁂𑀢𑀺 𑀲𑀩𑁆𑀩𑀣𑀸𑀧𑀺 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀸𑀦𑁂𑀯.

𑁫𑁭. 𑀅𑀓𑀼𑀲𑀮𑀸𑀦𑀺 𑀘𑁂𑀯 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀘𑁂𑀢𑀺 𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺.

𑁫𑁮. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺 𑀘𑁂𑀯 𑀧𑀜𑁆𑀘𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀅𑀪𑀺𑀜𑁆𑀜𑀸𑀓𑀼𑀲𑀮𑀜𑁆𑀘𑁂𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀯𑀚𑁆𑀚𑀺𑀢𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺.

𑁫𑁯. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀦𑀺 𑀘𑁂𑀯 𑀓𑀺𑀭𑀺𑀬𑀸𑀪𑀺𑀜𑁆𑀜𑀸𑀯𑁄𑀝𑁆𑀞𑀩𑁆𑀩𑀦𑀜𑁆𑀘𑁂𑀢𑀺 𑀲𑀩𑁆𑀩𑀣𑀸𑀧𑀺 𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺.

𑁬𑁦. 𑀆𑀭𑀼𑀧𑁆𑀧𑁂𑀲𑀼 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸𑀦𑀺.

𑁬𑁧. 𑀲𑁂𑀲𑀸𑀦𑀺 𑀫𑀳𑀕𑁆𑀕𑀢𑀘𑀺𑀢𑁆𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀦𑀺.

𑁬𑁨. 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀻𑀢𑀺.

𑁬𑁩. 𑀧𑀜𑁆𑀘𑀯𑀻𑀲 𑀧𑀭𑀺𑀢𑁆𑀢𑀫𑁆𑀳𑀺, 𑀙 𑀘𑀺𑀢𑁆𑀢𑀸𑀦𑀺 𑀫𑀳𑀕𑁆𑀕𑀢𑁂.

𑀏𑀓𑀯𑀻𑀲𑀢𑀺 𑀯𑁄𑀳𑀸𑀭𑁂, 𑀅𑀝𑁆𑀞 𑀦𑀺𑀩𑁆𑀩𑀸𑀦𑀕𑁄𑀘𑀭𑁂.

𑀯𑀻𑀲𑀸𑀦𑀼𑀢𑁆𑀢𑀭𑀫𑀼𑀢𑁆𑀢𑀫𑁆𑀳𑀺, 𑀅𑀕𑁆𑀕𑀫𑀕𑁆𑀕𑀨𑀮𑀼𑀚𑁆𑀛𑀺𑀢𑁂;

𑀧𑀜𑁆𑀘 𑀲𑀩𑁆𑀩𑀢𑁆𑀣 𑀙𑀘𑁆𑀘𑁂𑀢𑀺, 𑀲𑀢𑁆𑀢𑀥𑀸 𑀢𑀢𑁆𑀣 𑀲𑀗𑁆𑀕𑀳𑁄.

𑀯𑀢𑁆𑀣𑀼𑀲𑀗𑁆𑀕𑀳𑁄

𑁬𑁪. 𑀯𑀢𑁆𑀣𑀼𑀲𑀗𑁆𑀕𑀳𑁂 𑀯𑀢𑁆𑀣𑀽𑀦𑀺 𑀦𑀸𑀫 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀳𑀤𑀬𑀯𑀢𑁆𑀣𑀼 𑀘𑁂𑀢𑀺 𑀙𑀩𑁆𑀩𑀺𑀥𑀸𑀦𑀺 𑀪𑀯𑀦𑁆𑀢𑀺.

𑁬𑁫. 𑀢𑀸𑀦𑀺 𑀓𑀸𑀫𑀮𑁄𑀓𑁂 𑀲𑀩𑁆𑀩𑀸𑀦𑀺𑀧𑀺 𑀮𑀩𑁆𑀪𑀦𑁆𑀢𑀺.

𑁬𑁬. 𑀭𑀽𑀧𑀮𑁄𑀓𑁂 𑀧𑀦 𑀖𑀸𑀦𑀸𑀤𑀺𑀢𑁆𑀢𑀬𑀁 𑀦𑀢𑁆𑀣𑀺.

𑁬𑁭. 𑀅𑀭𑀽𑀧𑀮𑁄𑀓𑁂 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺.

𑁬𑁮. 𑀢𑀢𑁆𑀣 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀬𑀣𑀸𑀓𑁆𑀓𑀫𑀁 𑀏𑀓𑀦𑁆𑀢𑁂𑀦 𑀧𑀜𑁆𑀘 𑀧𑀲𑀸𑀤𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀦𑁆𑀢𑀺.

𑁬𑁯. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀗𑁆𑀔𑀸𑀢𑀸 𑀧𑀦 𑀫𑀦𑁄𑀥𑀸𑀢𑀼 𑀘 𑀳𑀤𑀬𑀁 𑀦𑀺𑀲𑁆𑀲𑀺𑀢𑀸𑀬𑁂𑀯 𑀧𑀯𑀢𑁆𑀢𑀦𑁆𑀢𑀺.

𑁭𑁦. 𑀅𑀯𑀲𑁂𑀲𑀸 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑀸𑀢𑀸 𑀘 𑀲𑀦𑁆𑀢𑀻𑀭𑀡𑀫𑀳𑀸𑀯𑀺𑀧𑀸𑀓𑀧𑀝𑀺𑀖𑀤𑁆𑀯𑀬𑀧𑀞𑀫𑀫𑀕𑁆𑀕𑀳𑀲𑀦𑀭𑀽𑀧𑀸𑀯𑀘𑀭𑀯𑀲𑁂𑀦 𑀳𑀤𑀬𑀁 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀦𑁆𑀢𑀺.

𑁭𑁧. 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀦𑀼𑀢𑁆𑀢𑀭𑀯𑀲𑁂𑀦 𑀧𑀦 𑀦𑀺𑀲𑁆𑀲𑀸𑀬 𑀯𑀸 𑀅𑀦𑀺𑀲𑁆𑀲𑀸𑀬 𑀯𑀸.

𑁭𑁨. 𑀆𑀭𑀼𑀧𑁆𑀧𑀯𑀺𑀧𑀸𑀓𑀯𑀲𑁂𑀦 𑀳𑀤𑀬𑀁 𑀅𑀦𑀺𑀲𑁆𑀲𑀸𑀬𑁂𑀯𑀸𑀢𑀺.

𑁭𑁩. 𑀙𑀯𑀢𑁆𑀣𑀼𑀁 𑀦𑀺𑀲𑁆𑀲𑀺𑀢𑀸 𑀓𑀸𑀫𑁂, 𑀲𑀢𑁆𑀢 𑀭𑀽𑀧𑁂 𑀘𑀢𑀼𑀩𑁆𑀩𑀺𑀥𑀸.

𑀢𑀺𑀯𑀢𑁆𑀣𑀼𑀁 𑀦𑀺𑀲𑁆𑀲𑀺𑀢𑀸𑀭𑀼𑀧𑁆𑀧𑁂, 𑀥𑀸𑀢𑁆𑀯𑁂𑀓𑀸 𑀦𑀺𑀲𑁆𑀲𑀺𑀢𑀸 𑀫𑀢𑀸.

𑁭𑁪. 𑀢𑁂𑀘𑀢𑁆𑀢𑀸𑀮𑀻𑀲 𑀦𑀺𑀲𑁆𑀲𑀸𑀬, 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀚𑀸𑀬𑀭𑁂.

𑀦𑀺𑀲𑁆𑀲𑀸𑀬 𑀘 𑀅𑀦𑀺𑀲𑁆𑀲𑀸𑀬, 𑀧𑀸𑀓𑀸𑀭𑀼𑀧𑁆𑀧𑀸 𑀅𑀦𑀺𑀲𑁆𑀲𑀺𑀢𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑀯𑀺𑀪𑀸𑀕𑁄 𑀦𑀸𑀫

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.