𑁪. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀸

𑀏𑀓𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀇𑀤𑀸𑀦𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀸𑀲𑀁𑀯𑀡𑁆𑀡𑀦𑀸𑀦𑀬𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀢𑀸𑀯 𑀙 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀏𑀢𑁆𑀣 ‘‘𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀻’’𑀢𑀺 (𑀲𑀁. 𑀦𑀺. 𑁨.𑁨𑁦) 𑀆𑀕𑀢𑀝𑁆𑀞𑀸𑀦𑁂 𑀲𑀦𑁆𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫. ‘‘𑀲𑀼𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞’’𑀦𑁆𑀢𑀺 (𑀧𑀸𑀭𑀸. 𑁨𑁬𑁯) 𑀆𑀕𑀢𑀝𑁆𑀞𑀸𑀦𑁂 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀇𑀥 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀙 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀳𑀺 𑀙 𑀧𑀜𑁆𑀜𑀸𑀧𑀦𑀸 𑀙 𑀲𑀦𑁆𑀤𑀲𑁆𑀲𑀦𑀸 𑀧𑀓𑀸𑀲𑀦𑀸𑀢𑀺𑀧𑀺, 𑀙 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑁂𑀯 𑀳𑀺 𑀢𑁂 𑀢𑁂 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑁂 𑀥𑀫𑁆𑀫𑁂 𑀲𑀦𑁆𑀤𑀲𑁆𑀲𑁂𑀢𑀻𑀢𑀺𑀧𑀺. 𑀢𑁂𑀦 𑀢𑁂𑀦 𑀓𑁄𑀝𑁆𑀞𑀸𑀲𑁂𑀦 𑀞𑀧𑁂𑀢𑀻𑀢𑀺𑀧𑀺. 𑀔𑀦𑁆𑀥𑀧𑀜𑁆𑀜𑀢𑁆𑀢𑀻𑀢𑀺𑀆𑀤𑀺 𑀧𑀦 𑀲𑀗𑁆𑀔𑁂𑀧𑀢𑁄 𑀢𑀸𑀲𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀤𑀲𑁆𑀲𑀦𑀁. 𑀢𑀢𑁆𑀣 𑀔𑀦𑁆𑀥𑀸𑀦𑀁 ‘‘𑀔𑀦𑁆𑀥𑀸’’𑀢𑀺 𑀧𑀜𑁆𑀜𑀸𑀧𑀦𑀸 𑀲𑀦𑁆𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀘 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀘 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀦𑀸𑀫…𑀧𑁂… 𑀧𑀼𑀕𑁆𑀕𑀮𑀸𑀦𑀁 ‘‘𑀧𑀼𑀕𑁆𑀕𑀮𑀸’’𑀢𑀺 𑀧𑀜𑁆𑀜𑀸𑀧𑀦𑀸 𑀲𑀦𑁆𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀘 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀘 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀇𑀫𑀸 𑀏𑀯 𑀙 𑀧𑀜𑁆𑀜𑀢𑁆𑀢𑀺𑀬𑁄 𑀯𑀺𑀚𑁆𑀚𑀦𑁆𑀢𑀺. 𑀅𑀜𑁆𑀜𑀸𑀲𑀫𑁆𑀧𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀓𑀣𑀸𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀅𑀦𑀦𑁆𑀢𑀢𑁆𑀢𑀸, 𑀉𑀧𑀮𑀓𑁆𑀔𑀡𑀯𑀲𑁂𑀦 𑀧𑀦 𑀧𑀥𑀸𑀦𑀪𑀸𑀯𑀢𑁄 𑀘 𑀏𑀢𑀸𑀯 𑀯𑀼𑀢𑁆𑀢𑀸. 𑀧𑀸𑀴𑀺𑀫𑀼𑀢𑁆𑀢𑀓𑀦𑀬𑁂𑀦 𑀧𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀙 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑁄 𑀅𑀝𑁆𑀞𑀓𑀣𑀸𑀲𑀼 (𑀧𑀼. 𑀧. 𑀅𑀝𑁆𑀞. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑁧) 𑀆𑀕𑀢𑀸, 𑀢𑀸 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀢𑀺 𑀇𑀥 𑀦 𑀯𑀼𑀢𑁆𑀢𑀸. 𑀢𑀸𑀲𑀼 𑀇𑀥 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀤𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀲𑁂𑀲𑁂𑀳𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀘𑀸𑀢𑀺 𑀤𑁆𑀯𑁂 𑀏𑀯 𑀮𑀩𑁆𑀪𑀦𑁆𑀢𑀺.

𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁂𑀦 𑀧𑀦 𑀆𑀘𑀭𑀺𑀬𑀦𑀬𑁂𑀦 𑀅𑀧𑀭𑀸𑀧𑀺 𑀙 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀲𑀫𑁄𑀥𑀸𑀦𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀻𑀢𑀺, 𑀬𑀸 ‘‘𑀅𑀢𑁆𑀣𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀬𑀸 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀲𑀫𑁆𑀫𑀢𑀸 𑀲𑀢𑁆𑀢𑀸𑀤𑀺𑀓𑀸, 𑀅𑀗𑁆𑀕𑀸𑀦𑀺 𑀉𑀧𑀸𑀤𑀸𑀬 𑀭𑀣𑀸𑀤𑀺𑀓𑀸, 𑀘𑀦𑁆𑀤𑀸𑀤𑀺𑀧𑀭𑀺𑀯𑀢𑁆𑀢𑀸𑀤𑀬𑁄 𑀉𑀧𑀸𑀤𑀸𑀬 𑀓𑀸𑀮𑀤𑀺𑀲𑀸𑀤𑀺𑀓𑀸, 𑀢𑀁𑀢𑀁𑀪𑀽𑀢𑀦𑀺𑀫𑀺𑀢𑁆𑀢𑀁, 𑀪𑀸𑀯𑀦𑀸𑀯𑀺𑀲𑁂𑀲𑀜𑁆𑀘 𑀉𑀧𑀸𑀤𑀸𑀬 𑀓𑀲𑀺𑀡𑀸𑀤𑀺𑀉𑀕𑁆𑀕𑀳𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀤𑀺𑀓𑀸𑀢𑀺 𑀅𑀬𑀁 𑀏𑀯𑀭𑀽𑀧𑀸 𑀲𑀪𑀸𑀯𑀥𑀫𑁆𑀫𑁂𑀳𑀺 𑀏𑀓𑀢𑁆𑀢𑁂𑀦 𑀯𑀸 𑀲𑀘𑁆𑀙𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀧𑀜𑁆𑀜𑀸𑀧𑁂𑀢𑀩𑁆𑀩𑀝𑁆𑀞𑁂𑀦 𑀘𑁂𑀲𑀸 𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸, 𑀦 𑀧𑀦 𑀧𑀜𑁆𑀜𑀸𑀧𑀦𑀝𑁆𑀞𑁂𑀦. 𑀬𑀸 𑀢𑀲𑁆𑀲 𑀢𑀲𑁆𑀲𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀸, 𑀲𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯.

𑀬𑀸 𑀧𑀦 𑀅𑀜𑁆𑀜𑀁 𑀧𑀞𑀫𑀸𑀤𑀺𑀁 𑀉𑀧𑀦𑀺𑀥𑀸𑀬 𑀅𑀧𑁂𑀓𑁆𑀔𑀺𑀢𑁆𑀯𑀸 𑀤𑀼𑀢𑀺𑀬𑀁 𑀭𑀲𑁆𑀲𑀁 𑀤𑀻𑀖𑀁 𑀤𑀽𑀭𑀁 𑀲𑀦𑁆𑀢𑀺𑀓𑀦𑁆𑀢𑀺𑀆𑀤𑀺𑀓𑀸 𑀢𑀤𑀜𑁆𑀜𑀸𑀧𑁂𑀓𑁆𑀔𑀽𑀧𑀦𑀺𑀥𑀸, 𑀙𑀢𑁆𑀢𑀧𑀸𑀡𑀻𑀢𑀺𑀆𑀤𑀺𑀓𑀸 𑀳𑀢𑁆𑀣𑀕𑀢𑀽𑀧𑀦𑀺𑀥𑀸, 𑀓𑀼𑀡𑁆𑀟𑀮𑀻𑀢𑀺𑀆𑀤𑀺𑀓𑀸 𑀲𑀫𑁆𑀧𑀬𑀼𑀢𑁆𑀢𑀽𑀧𑀦𑀺𑀥𑀸, 𑀥𑀜𑁆𑀜𑀲𑀓𑀝𑀦𑁆𑀢𑀺 𑀆𑀤𑀺𑀓𑀸 𑀲𑀫𑀸𑀭𑁄𑀧𑀺𑀢𑀽𑀧𑀦𑀺𑀥𑀸, 𑀇𑀦𑁆𑀤𑀲𑀸𑀮𑀕𑀼𑀳𑀸𑀢𑀺𑀆𑀤𑀺𑀓𑀸 𑀅𑀯𑀺𑀤𑀽𑀭𑀕𑀢𑀽𑀧𑀦𑀺𑀥𑀸, 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺𑀆𑀤𑀺𑀓𑀸 𑀧𑀝𑀺𑀪𑀸𑀕𑀽𑀧𑀦𑀺𑀥𑀸, 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺𑀆𑀤𑀺𑀓𑀸 𑀢𑀩𑁆𑀩𑀳𑀼𑀮𑀽𑀧𑀦𑀺𑀥𑀸, 𑀫𑀡𑀺𑀓𑀝𑀓𑀦𑁆𑀢𑀺𑀆𑀤𑀺𑀓𑀸 𑀢𑀩𑁆𑀩𑀺𑀲𑀺𑀝𑁆𑀞𑀽𑀧𑀦𑀺𑀥𑀸𑀢𑀺 𑀏𑀯𑀫𑀸𑀤𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀥𑀜𑁆𑀜𑀭𑀸𑀲𑀻𑀢𑀺𑀆𑀤𑀺𑀓𑀸 𑀧𑀦 𑀲𑀫𑁄𑀥𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀺𑀓𑀸 𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀁𑀢𑀁𑀲𑀪𑀸𑀯𑀦𑀺𑀲𑁆𑀲𑀺𑀢𑀸 𑀧𑀣𑀯𑀻𑀆𑀤𑀺𑀓𑀸 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀆𑀲𑀻𑀢𑀺𑀓𑁄𑀢𑀺𑀆𑀤𑀺𑀓𑀸 𑀧𑀦 𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁂𑀦𑁂𑀯 𑀆𑀘𑀭𑀺𑀬𑀦𑀬𑁂𑀦 𑀅𑀧𑀭𑀸𑀧𑀺 𑀥𑀫𑁆𑀫𑀓𑀣𑀺𑀓𑀸𑀤𑀺𑀓𑀸 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺, 𑀓𑀺𑀲𑀣𑀽𑀮𑀸𑀤𑀺𑀓𑀸 𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺, 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀓𑀸 𑀮𑀺𑀗𑁆𑀕𑀧𑀜𑁆𑀜𑀢𑁆𑀢𑀺, 𑀓𑀸𑀫𑀸𑀯𑀘𑀭𑀸𑀤𑀺𑀓𑀸, 𑀓𑁄𑀲𑀮𑀓𑀸𑀤𑀺𑀓𑀸 𑀘 𑀪𑀽𑀫𑀺𑀧𑀜𑁆𑀜𑀢𑁆𑀢𑀺, 𑀢𑀺𑀲𑁆𑀲𑁄 𑀦𑀸𑀕𑁄𑀢𑀺𑀆𑀤𑀺𑀓𑀸 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺, 𑀦𑀺𑀭𑁄𑀥𑀸𑀤𑀺𑀓𑀸 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺 𑀘𑀸𑀢𑀺 𑀙 𑀧𑀜𑁆𑀜𑀢𑁆𑀢𑀺𑀬𑁄.

𑀏𑀢𑀸𑀲𑀼 𑀧𑀦 𑀤𑁆𑀯𑀸𑀤𑀲𑀲𑀼 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺, 𑀏𑀓𑀘𑁆𑀘𑀸 𑀪𑀽𑀫𑀺𑀧𑀜𑁆𑀜𑀢𑁆𑀢𑀺, 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺 𑀘 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀢𑀤𑀜𑁆𑀜𑀸 𑀧𑀭𑀫𑀢𑁆𑀣𑀸𑀯𑀲𑁂𑀲𑀸, 𑀧𑀦 𑀅𑀢𑁆𑀣𑀧𑀜𑁆𑀜𑀢𑁆𑀢𑀻𑀢𑀺 𑀤𑀻𑀧𑀺𑀢𑀸 𑀅𑀯𑀺𑀚𑁆𑀚𑀫𑀸𑀦𑀸𑀤𑀺𑀧𑀜𑁆𑀜𑀢𑁆𑀢𑀺𑀬𑁄 𑀘𑀸𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀲𑀁𑀯𑀡𑁆𑀡𑀦𑀸.

𑀅𑀢𑁆𑀣𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣𑀸𑀧𑀺 𑀧𑀸𑀴𑀺𑀦𑀬𑁂𑀦𑁂𑀯 𑀲𑀤𑁆𑀥𑀺𑀁 𑀳𑁄𑀢𑀺, 𑀦 𑀯𑀺𑀦𑀸 𑀧𑀸𑀴𑀺𑀁 𑀢𑀲𑁆𑀲 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀧𑀸𑀴𑀺𑀬𑀜𑁆𑀘 𑀬𑀲𑁆𑀫𑀸 𑀆𑀤𑀺𑀢𑁄 𑀧𑀜𑁆𑀘 𑀧𑀜𑁆𑀜𑀢𑁆𑀢𑀺𑀬𑁄, 𑀢𑀤𑀢𑁆𑀣𑀪𑀽𑀢𑀸 𑀔𑀦𑁆𑀥𑀸𑀤𑀬𑁄 𑀘 𑀳𑁂𑀝𑁆𑀞𑀸 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 𑀦𑀺𑀧𑁆𑀧𑀤𑁂𑀲𑀢𑁄 𑀓𑀣𑀺𑀢𑀸𑀢𑀺 𑀢𑀸 𑀇𑀥 ‘‘𑀓𑀺𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺, 𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀸 𑀘𑁂𑀢𑁆𑀣𑀸𑀧𑀺 𑀯𑀼𑀢𑁆𑀢𑀢𑁆𑀣𑀸. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀦 𑀳𑁂𑀝𑁆𑀞𑀸 𑀦 𑀯𑀼𑀢𑁆𑀢𑀸𑀢𑀺 ‘‘𑀓𑀺𑀢𑁆𑀢𑀸𑀯𑀢𑀸 𑀧𑀼𑀕𑁆𑀕𑀮𑀸𑀦𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺? 𑀲𑀫𑀬𑀯𑀺𑀫𑀼𑀢𑁆𑀢𑁄, 𑀅𑀲𑀫𑀬𑀯𑀺𑀫𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀏𑀓𑀓𑀸𑀤𑀺𑀪𑁂𑀤𑁂𑀦 𑀬𑀸𑀯 𑀤𑀲𑀓𑀸 𑀤𑀲𑀥𑀸 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦𑁂𑀯 𑀯𑀺𑀪𑀢𑁆𑀢𑀸, 𑀲𑀸 𑀘 𑀜𑀸𑀢𑀩𑁆𑀩𑀧𑀪𑁂𑀤𑀢𑁄 𑀅𑀯𑀼𑀘𑁆𑀘𑀫𑀸𑀦𑀸 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸, 𑀢𑀲𑁆𑀫𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀏𑀯 𑀘𑁂𑀢𑁆𑀣 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀦𑀺𑀘𑁆𑀙𑀬𑁄 𑀳𑁄𑀢𑀺, 𑀲𑁄 𑀘𑁂𑀢𑁆𑀣 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑁂 𑀲𑀩𑁆𑀩𑀧𑀼𑀕𑁆𑀕𑀮𑁂 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀜𑀸𑀢𑀩𑁆𑀩𑀸𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀏𑀓𑀓𑀸𑀤𑀺𑀪𑁂𑀤𑀢𑁄𑀯 𑀫𑀸𑀢𑀺𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀪𑀚𑀦𑀯𑀲𑁂𑀦 𑀲𑀗𑁆𑀔𑁂𑀧𑀢𑁄𑀯 𑀳𑁄𑀢𑀺. 𑀓𑀣𑀁? ‘‘𑀲𑀫𑀬𑀯𑀺𑀫𑀼𑀢𑁆𑀢𑁄 𑀅𑀲𑀫𑀬𑀯𑀺𑀫𑀼𑀢𑁆𑀢𑁄, 𑀓𑀼𑀧𑁆𑀧𑀥𑀫𑁆𑀫𑁄 𑀅𑀓𑀼𑀧𑁆𑀧𑀥𑀫𑁆𑀫𑁄, 𑀘𑁂𑀢𑀦𑀸𑀪𑀩𑁆𑀩𑁄 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄, 𑀪𑀬𑀽𑀧𑀭𑀢𑁄 𑀅𑀪𑀬𑀽𑀧𑀭𑀢𑁄, 𑀪𑀩𑁆𑀩𑀸𑀕𑀫𑀦𑁄 𑀅𑀪𑀩𑁆𑀩𑀸𑀕𑀫𑀦𑁄, 𑀦𑀺𑀬𑀢𑁄 𑀅𑀦𑀺𑀬𑀢𑁄, 𑀧𑀝𑀺𑀧𑀦𑁆𑀦𑀓𑁄 𑀨𑀮𑁂 𑀞𑀺𑀢𑁄, 𑀲𑀫𑀲𑀻𑀲𑀻 𑀞𑀺𑀢𑀓𑀧𑁆𑀧𑀻, 𑀲𑁄𑀢𑀸𑀧𑀦𑁆𑀦𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀓𑁄𑀮𑀁𑀓𑁄𑀮𑁄 𑀏𑀓𑀩𑀻𑀚𑀻, 𑀲𑀓𑀤𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀅𑀭𑀳𑀸’’𑀢𑀺 𑀏𑀓𑀓𑀫𑀸𑀢𑀺𑀓𑀸.

𑀢𑀢𑁆𑀣 𑀬𑁄 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀅𑀝𑁆𑀞𑀳𑀺 𑀯𑀺𑀫𑁄𑀓𑁆𑀔𑁂𑀳𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑀢𑁄 𑀯𑀺𑀫𑀼𑀘𑁆𑀘𑀺𑀢𑁆𑀯𑀸 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀬𑀣𑀸𑀲𑀓𑀁 𑀆𑀲𑀯𑁂 𑀔𑁂𑀧𑁂𑀢𑁆𑀯𑀸 𑀯𑀼𑀝𑁆𑀞𑀺𑀢𑁄, 𑀅𑀬𑀁 𑀲𑀫𑀬𑀯𑀺𑀫𑀼𑀢𑁆𑀢𑁄 𑀦𑀸𑀫. ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀼. 𑀧. 𑁧) 𑀳𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄 𑀯𑀸 𑀔𑀻𑀡𑀸𑀲𑀯𑁄 𑀯𑀸 𑀇𑀥 𑀦 𑀕𑀳𑀺𑀢𑁄, 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀦 𑀨𑀮𑀝𑁆𑀞𑀲𑁂𑀔𑀸𑀯 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑁄, 𑀲𑀩𑁆𑀩𑁂𑀧𑀺 𑀘 𑀅𑀭𑀺𑀬𑀸 𑀫𑀕𑁆𑀕𑀯𑀺𑀫𑁄𑀓𑁆𑀔𑀁 𑀲𑀦𑁆𑀥𑀸𑀬 𑀅𑀲𑀫𑀬𑀯𑀺𑀫𑀼𑀢𑁆𑀢𑀸 𑀦𑀸𑀫. 𑀩𑀸𑀳𑀺𑀭𑀸𑀦𑀜𑁆𑀳𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀧𑀯𑀺𑀯𑁂𑀓𑀝𑁆𑀞𑀸𑀦𑀮𑀸𑀪𑀸𑀤𑀺𑀲𑀫𑀬𑁄𑀧𑀺 𑀅𑀢𑁆𑀣𑀺, 𑀯𑀢𑁆𑀢𑀓𑀭𑀡𑀓𑀸𑀮𑀸𑀤𑀺𑀅𑀲𑀫𑀬𑁄𑀧𑀺 𑀅𑀢𑁆𑀣𑀺. 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑀲𑁆𑀲 𑀧𑀦 𑀢𑀸𑀤𑀺𑀲𑁄 𑀲𑀫𑀬𑁄 𑀯𑀸 𑀅𑀲𑀫𑀬𑁄 𑀯𑀸 𑀦𑀢𑁆𑀣𑀺, 𑀬𑀲𑁆𑀲 𑀲𑀤𑁆𑀥𑀸 𑀩𑀮𑀯𑀢𑀻, 𑀯𑀺𑀧𑀲𑁆𑀲𑀦𑀸 𑀘 𑀆𑀭𑀤𑁆𑀥𑀸, 𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀸 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀅𑀭𑀺𑀬𑀸 𑀅𑀭𑀺𑀬𑀯𑀺𑀫𑁄𑀓𑁆𑀔𑁂 𑀅𑀲𑀫𑀬𑀯𑀺𑀫𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀭𑀺𑀫𑀧𑀤𑁂𑀧𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀜𑁆𑀜𑁂𑀯 𑀲𑀦𑁆𑀥𑀸𑀬 𑀲𑁂𑀔𑀸 𑀲𑀫𑀬𑀯𑀺𑀫𑀼𑀢𑁆𑀢𑀸 𑀦𑀸𑀫 𑀚𑀸𑀢𑀸.

𑀅𑀯𑀲𑀺𑀪𑀸𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀦 𑀧𑀼𑀣𑀼𑀚𑁆𑀚𑀦𑁄, 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀤𑁆𑀯𑁂 𑀲𑁂𑀔𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀓𑀼𑀧𑁆𑀧𑀥𑀫𑁆𑀫𑁄 𑀦𑀸𑀫. 𑀧𑀭𑀺𑀳𑀸𑀦𑀥𑀫𑁆𑀫𑁄𑀢𑀺𑀧𑀺 𑀤𑀼𑀯𑀺𑀥𑀸 𑀏𑀯. 𑀅𑀦𑀸𑀕𑀸𑀫𑀺𑀆𑀤𑀬𑁄 𑀲𑀼𑀧𑁆𑀧𑀳𑀻𑀦𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀢𑁆𑀢𑀸 𑀯𑀲𑀺𑀪𑀸𑀯𑀸 𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄, 𑀅𑀭𑀺𑀬𑀸 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀧𑀺 𑀲𑀦𑁆𑀥𑀸𑀬 𑀅𑀓𑀼𑀧𑁆𑀧𑀥𑀫𑁆𑀫𑁄 𑀦𑀸𑀫. 𑀅𑀧𑀭𑀺𑀳𑀸𑀦𑀥𑀫𑁆𑀫𑁄𑀢𑀺 𑀢𑁂 𑀏𑀯. 𑀘𑁂𑀢𑀦𑀸𑀪𑀩𑁆𑀩𑁄𑀢𑀺 𑀘𑁂𑀢𑀦𑀸𑀲𑀗𑁆𑀔𑀸𑀢𑁂𑀦 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑁂𑀦 𑀅𑀧𑀭𑀺𑀳𑀸𑀦𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑁄. 𑀬𑁄 𑀳𑀺 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑁂𑀲𑀼 𑀆𑀘𑀺𑀡𑁆𑀡𑀯𑀲𑀺𑀢𑀸𑀬 𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀬 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀯𑀴𑀜𑁆𑀚𑀫𑀸𑀦𑁄 𑀢𑁂𑀳𑀺 𑀦 𑀧𑀭𑀺𑀳𑀸𑀬𑀢𑀺, 𑀅𑀯𑀴𑀜𑁆𑀚𑀫𑀸𑀦𑁄 𑀘 𑀧𑀭𑀺𑀳𑀸𑀬𑀢𑀺, 𑀅𑀬𑀁 𑀯𑀴𑀜𑁆𑀚𑀫𑀸𑀦𑁄 𑀘𑁂𑀢𑀦𑀸𑀪𑀩𑁆𑀩𑁄 𑀦𑀸𑀫. 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑁄𑀢𑀺 𑀛𑀸𑀦𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀅𑀦𑀼𑀭𑀓𑁆𑀔𑀡𑀸𑀬 𑀅𑀯𑀴𑀜𑁆𑀚𑀫𑀸𑀦𑁄𑀧𑀺 𑀅𑀧𑀭𑀺𑀳𑀸𑀦𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑁄, 𑀏𑀲𑁄 𑀘 𑀧𑀼𑀭𑀺𑀫𑀢𑁄 𑀩𑀮𑀯𑀢𑀭𑁄, 𑀆𑀘𑀺𑀡𑁆𑀡𑀯𑀲𑀺𑀦𑁄 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀧𑀝𑀺𑀧𑀚𑁆𑀚𑀦𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀬𑀽𑀧𑀭𑀢𑁄𑀢𑀺 𑀪𑀬𑁂𑀦 𑀧𑀸𑀧𑀢𑁄 𑀉𑀧𑀭𑀢𑁄 𑀯𑀺𑀭𑀢𑁄 𑀲𑁂𑀔𑁄, 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀘. 𑀢𑁂𑀲𑀼 𑀧𑀘𑁆𑀙𑀺𑀫𑁄 𑀤𑀼𑀕𑁆𑀕𑀢𑀺𑀯𑀝𑁆𑀝𑀓𑀺𑀮𑁂𑀲𑀉𑀧𑀯𑀸𑀤𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀪𑀬𑁂𑀳𑀺 𑀧𑀸𑀧𑀢𑁄 𑀑𑀭𑀫𑀢𑀺, 𑀲𑁂𑀔𑁄 𑀤𑀼𑀕𑁆𑀕𑀢𑀺𑀯𑀚𑁆𑀚𑁂𑀳𑀺, 𑀅𑀧𑀸𑀬𑁂𑀳𑀺 𑀫𑀼𑀢𑁆𑀢𑀢𑁆𑀢𑀸. 𑀔𑀻𑀡𑀸𑀲𑀯𑁄 𑀧𑀦 𑀅𑀪𑀬𑀽𑀧𑀭𑀢𑁄 𑀦𑀸𑀫 𑀲𑀫𑀼𑀘𑁆𑀙𑀺𑀦𑁆𑀦𑀪𑀬𑀢𑁆𑀢𑀸, 𑀉𑀧𑀯𑀸𑀤𑀢𑁄 𑀧𑀦 𑀑𑀭𑀫𑀺𑀢𑀩𑁆𑀩𑁄.

𑀅𑀪𑀩𑁆𑀩𑀸𑀕𑀫𑀦𑁄𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀸𑀕𑀫𑀦𑀲𑁆𑀲 𑀅𑀪𑀩𑁆𑀩𑁄, 𑀬𑁂 𑀆𑀦𑀦𑁆𑀢𑀭𑀺𑀬𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀸𑀯𑀭𑀡𑁂𑀦, 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀓𑀺𑀮𑁂𑀲𑀸𑀯𑀭𑀡𑁂𑀦, 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑁂𑀦 𑀯𑀺𑀧𑀸𑀓𑀸𑀯𑀭𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸, 𑀩𑀼𑀤𑁆𑀥𑀸𑀤𑀻𑀲𑀼 𑀘 𑀲𑀤𑁆𑀥𑀸𑀭𑀳𑀺𑀢𑀸, 𑀫𑀕𑁆𑀕𑀪𑀸𑀯𑀦𑀸𑀬 𑀘 𑀉𑀢𑁆𑀢𑀭𑀓𑀼𑀭𑀼𑀓𑀸𑀤𑀬𑁄 𑀯𑀺𑀬 𑀅𑀘𑁆𑀙𑀦𑁆𑀤𑀺𑀓𑀸, 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀸 𑀘, 𑀲𑀩𑁆𑀩𑁂𑀢𑁂 𑀅𑀪𑀩𑁆𑀩𑀸𑀕𑀫𑀦𑀸 𑀦𑀸𑀫. 𑀯𑀺𑀧𑀭𑀻𑀢𑀸 𑀪𑀩𑁆𑀩𑀸𑀕𑀫𑀦𑀸 𑀦𑀸𑀫. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀦𑀺𑀭𑀬𑀕𑀫𑀦𑁂, 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀸𑀤𑀻𑀲𑀼 𑀦𑀺𑀬𑀢𑀸 𑀦𑀸𑀫. 𑀅𑀯𑀲𑁂𑀲𑀧𑀼𑀕𑁆𑀕𑀮𑀸 𑀅𑀦𑀺𑀩𑀤𑁆𑀥𑀕𑀢𑀺𑀓𑀢𑀸𑀬 𑀅𑀦𑀺𑀬𑀢𑀸 𑀦𑀸𑀫, 𑀉𑀢𑁆𑀢𑀭𑀓𑀼𑀭𑀼𑀓𑀸 𑀧𑀦 𑀲𑀼𑀕𑀢𑀺𑀦𑀺𑀬𑀢𑀸𑀧𑀺 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑁆𑀲𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀦𑀺𑀬𑀢𑀸’’𑀢𑀺 𑀦 𑀯𑀼𑀢𑁆𑀢𑀸. 𑀫𑀕𑁆𑀕𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀫𑀕𑁆𑀕𑀓𑁆𑀔𑀡𑁂 𑀨𑀮𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀓𑁄 𑀦𑀸𑀫, 𑀨𑀮𑀲𑀫𑀗𑁆𑀕𑀻 𑀨𑀮𑀸𑀦𑀼𑀧𑁆𑀧𑀢𑁆𑀢𑀺𑀬𑀫𑁆𑀧𑀺 𑀨𑀮𑁂 𑀞𑀺𑀢𑁄 𑀦𑀸𑀫.

𑀬𑀲𑁆𑀲 𑀧𑀦 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘, 𑀅𑀬𑀁 𑀲𑀫𑀲𑀻𑀲𑀻 𑀦𑀸𑀫. 𑀲𑁄 𑀘 𑀢𑀺𑀯𑀺𑀥𑁄 𑀳𑁄𑀢𑀺 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀭𑁄𑀕𑀲𑀫𑀲𑀻𑀲𑀻 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺. 𑀢𑀢𑁆𑀣 𑀬𑁄 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀲𑁆𑀫𑀺𑀜𑁆𑀜𑁂𑀯 𑀇𑀭𑀺𑀬𑀸𑀧𑀣𑁂 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀬𑁄 𑀧𑀦 𑀏𑀓𑀁 𑀭𑁄𑀕𑀁 𑀧𑀢𑁆𑀯𑀸 𑀅𑀦𑁆𑀢𑁄𑀭𑁄𑀕𑁂 𑀏𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀭𑁄𑀕𑀲𑀫𑀲𑀻𑀲𑀻 𑀦𑀸𑀫. 𑀬𑀲𑁆𑀲 𑀧𑀦 𑀓𑀺𑀮𑁂𑀲𑀲𑀻𑀲𑀲𑀗𑁆𑀔𑀸𑀢𑀸 𑀅𑀯𑀺𑀚𑁆𑀚𑀸, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀯𑀢𑁆𑀢𑀲𑀻𑀲𑀲𑀗𑁆𑀔𑀸𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀫𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀅𑀬𑀁 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫. 𑀓𑀣𑀫𑀺𑀤𑀁 𑀲𑀫𑀁 𑀳𑁄𑀢𑀻𑀢𑀺? 𑀯𑀸𑀭𑀲𑀫𑀢𑀸𑀬. 𑀬𑀲𑁆𑀫𑀺𑀁 𑀳𑀺 𑀯𑀸𑀭𑁂 𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑀺𑀢𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀲𑀸𑀦𑀦𑁆𑀢𑀭𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑁄 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀇𑀤𑀁 𑀉𑀪𑀬𑀲𑀻𑀲𑀧𑀭𑀺𑀬𑀸𑀤𑀸𑀦𑀫𑁆𑀧𑀺 𑀲𑀫𑀁 𑀳𑁄𑀢𑀺 𑀦𑀸𑀫, 𑀅𑀬𑀫𑁂𑀯 𑀚𑀻𑀯𑀺𑀢𑀲𑀫𑀲𑀻𑀲𑀻 𑀇𑀥𑀸𑀥𑀺𑀧𑁆𑀧𑁂𑀢𑁄.

𑀞𑀺𑀢𑀓𑀧𑁆𑀧𑀻𑀢𑀺 𑀞𑀺𑀢𑁄 𑀓𑀧𑁆𑀧𑁄 𑀞𑀺𑀢𑀓𑀧𑁆𑀧𑁄, 𑀲𑁆𑀯𑀸𑀲𑁆𑀲 𑀅𑀢𑁆𑀣𑀻𑀢𑀺 𑀞𑀺𑀢𑀓𑀧𑁆𑀧𑀻, 𑀓𑀧𑁆𑀧𑀫𑁆𑀳𑀺 𑀯𑀺𑀦𑀲𑁆𑀲𑀫𑀸𑀦𑀫𑁆𑀳𑀺 𑀓𑀧𑁆𑀧𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄.

𑀲𑀘𑁂 𑀳𑀺 𑀬𑁂𑀲𑀁 𑀫𑀕𑁆𑀕𑀲𑀫𑀗𑁆𑀕𑀺𑀓𑁆𑀔𑀡𑁂 𑀓𑀧𑁆𑀧𑀯𑀺𑀦𑀸𑀲𑁄 𑀪𑀯𑁂𑀬𑁆𑀬, 𑀦𑁂𑀯 𑀢𑀸𑀯 𑀓𑀧𑁆𑀧𑁄 𑀯𑀺𑀦𑀲𑁆𑀲𑁂𑀬𑁆𑀬, 𑀬𑀸𑀯𑀸𑀬𑀁 𑀬𑀣𑀸𑀲𑀓𑀁 𑀨𑀮𑀁 𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀢𑁂 𑀯𑀺𑀦𑀲𑁆𑀲𑀫𑀸𑀦𑀫𑁆𑀧𑀺 𑀓𑀧𑁆𑀧𑀁 𑀞𑀧𑁂𑀦𑁆𑀢𑀻𑀢𑀺 𑀞𑀺𑀢𑀓𑀧𑁆𑀧𑀺𑀦𑁄 𑀦𑀸𑀫 𑀚𑀸𑀢𑀸𑀢𑀺. 𑀓𑀺𑀜𑁆𑀘𑀸𑀧𑀺 𑀓𑀧𑁆𑀧𑀯𑀺𑀦𑀸𑀲𑀦𑀓𑀸𑀮𑁂 𑀲𑀸𑀲𑀦𑀁 𑀦𑀢𑁆𑀣𑀺, 𑀕𑀢𑀓𑁄𑀝𑀺𑀓𑁂 𑀳𑀺 𑀓𑀸𑀮𑁂 𑀓𑀧𑁆𑀧𑀯𑀺𑀦𑀸𑀲𑁄 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑁆𑀲 𑀅𑀦𑀦𑁆𑀢𑀭𑀸𑀬𑀁 𑀤𑀻𑀧𑁂𑀢𑀼𑀁 𑀇𑀤𑀁 𑀅𑀪𑀽𑀢𑀫𑁆𑀧𑀺 𑀓𑀸𑀭𑀡𑀁 𑀆𑀳𑀝𑀁.

𑀲𑁄𑀢𑀸𑀧𑀦𑁆𑀦𑁄𑀢𑀺 𑀦𑀺𑀩𑁆𑀩𑀸𑀦𑀲𑀫𑀼𑀤𑁆𑀤𑀦𑀺𑀦𑁆𑀦𑀢𑀸𑀬 𑀲𑁄𑀢𑀲𑀗𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀧𑀞𑀫𑀲𑀫𑀗𑁆𑀕𑀻 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀨𑀮𑀝𑁆𑀞𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲𑁂𑀯 𑀘 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀯𑀸𑀭𑀸 𑀧𑀭𑀫𑀸 𑀅𑀲𑁆𑀲 𑀪𑀯𑀽𑀧𑀧𑀢𑁆𑀢𑀻𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀢𑀢𑁄 𑀧𑀭𑀁 𑀅𑀝𑁆𑀞𑀫𑀁 𑀪𑀯𑀁 𑀦𑀸𑀤𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀸𑀧𑀦𑁆𑀦𑁄 𑀳𑀺 𑀬𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼, 𑀫𑀦𑀼𑀲𑁆𑀲𑁂𑀲𑀼 𑀘 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀫𑁂 𑀪𑀯𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫. 𑀓𑀼𑀮𑀢𑁄 𑀓𑀼𑀮𑀁 𑀪𑀯𑀢𑁄 𑀪𑀯𑀁 𑀕𑀘𑁆𑀙𑀢𑀻𑀢𑀺 𑀓𑁄𑀮𑀁𑀓𑁄𑀮𑁄. 𑀲𑁄 𑀳𑀺 𑀤𑁂𑀯𑀫𑀦𑀼𑀲𑁆𑀲𑀯𑀲𑁂𑀦 𑀤𑁆𑀯𑁂 𑀕𑀢𑀺𑀬𑁄 𑀪𑀯𑁂 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀓𑁄𑀮𑀁𑀓𑁄𑀮𑁄 𑀦𑀸𑀫. 𑀓𑀫𑁆𑀫𑀧𑀝𑀺𑀲𑀦𑁆𑀥𑀺𑀬𑀸 𑀏𑀓𑀁 𑀓𑀫𑁆𑀫𑀁 𑀓𑀺𑀮𑁂𑀲𑀩𑀻𑀚𑀁 𑀅𑀲𑁆𑀲𑀸𑀢𑀺 𑀏𑀓𑀩𑀻𑀚𑀻. 𑀲𑁄 𑀳𑀺 𑀏𑀓𑀲𑁆𑀫𑀺𑀜𑁆𑀜𑁂𑀯 𑀪𑀯𑁂 𑀔𑀻𑀡𑀸𑀲𑀯𑁄 𑀳𑁄𑀢𑀺. 𑀓𑀺𑀁 𑀧𑀦𑀲𑁆𑀲 𑀪𑁂𑀤𑀲𑁆𑀲 𑀦𑀺𑀬𑀸𑀫𑀓𑀦𑁆𑀢𑀺? 𑀯𑀺𑀧𑀲𑁆𑀲𑀦𑀸𑀪𑀺𑀜𑁆𑀜𑀸𑀪𑁂𑀤𑀸. 𑀲𑁄𑀢𑀸𑀧𑀦𑁆𑀦𑁂𑀲𑀼 𑀳𑀺 𑀬𑁄 𑀯𑀺𑀧𑀲𑁆𑀲𑀦𑀸𑀬 𑀧𑀫𑀢𑁆𑀢𑁄, 𑀲𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀳𑁄𑀢𑀺. 𑀬𑁄 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑁄, 𑀲𑁄 𑀓𑁄𑀮𑀁𑀓𑁄𑀮𑁄. 𑀬𑁄 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀅𑀢𑀺𑀯𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀲𑁄 𑀏𑀓𑀩𑀻𑀚𑀻 𑀳𑁄𑀢𑀺. 𑀬𑁂 𑀧𑀦 𑀅𑀪𑀺𑀯𑀺𑀬 𑀧𑀫𑀢𑁆𑀢𑀸 𑀯𑀝𑁆𑀝𑀚𑁆𑀛𑀸𑀲𑀬𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀺𑀲𑀸𑀔𑀸𑀲𑀓𑁆𑀓𑀸𑀤𑀬𑁄, 𑀢𑁂 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀯𑀺𑀘𑀭𑀦𑁆𑀢𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀙 𑀤𑁂𑀯𑀮𑁄𑀓𑁂 𑀑𑀲𑀸𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂𑀲𑀼𑀧𑀺 𑀬𑀣𑀸𑀓𑁆𑀓𑀫𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑁂 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀦𑁆𑀢𑀺, 𑀦 𑀢𑁂 𑀇𑀥 𑀕𑀳𑀺𑀢𑀸. 𑀢𑁂 𑀳𑀺 𑀫𑀦𑀼𑀲𑁆𑀲𑀕𑀢𑀺𑀁 𑀧𑀼𑀦𑀧𑁆𑀧𑀼𑀦𑀁 𑀆𑀤𑀺𑀬𑀦𑁆𑀢𑀺. 𑀬𑁂 𑀧𑀦 𑀫𑀦𑀼𑀲𑁆𑀲𑀕𑀢𑀺𑀬𑀫𑁆𑀧𑀺 𑀪𑀯𑀁 𑀆𑀤𑀺𑀬𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀓𑁄𑀮𑀁𑀓𑁄𑀮𑁄 𑀫𑀸𑀦𑀼𑀲𑀺𑀓𑀪𑀯𑀦𑀺𑀩𑁆𑀩𑀢𑁆𑀢𑀓𑁄 𑀏𑀯 𑀏𑀓𑀩𑀻𑀚𑀻 𑀕𑀳𑀺𑀢𑁄. 𑀢𑁂 𑀧𑀦 𑀲𑀤𑁆𑀥𑀸𑀥𑀼𑀭𑁂𑀦 𑀆𑀕𑀢𑀸 𑀢𑀬𑁄, 𑀧𑀜𑁆𑀜𑀸𑀥𑀼𑀭𑁂𑀦 𑀆𑀕𑀢𑀸 𑀢𑀬𑁄𑀢𑀺 𑀲𑁄𑀢𑀸𑀧𑀦𑁆𑀦𑁄 𑀙𑀩𑁆𑀩𑀺𑀥𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀦 𑀲𑀓𑀺𑀁 𑀇𑀫𑀁 𑀫𑀦𑀼𑀲𑁆𑀲𑀕𑀢𑀺𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻, 𑀤𑀼𑀢𑀺𑀬𑀫𑀕𑁆𑀕𑀨𑀮𑀲𑀫𑀗𑁆𑀕𑀻. 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀕𑀳𑀺𑀢𑁄. 𑀏𑀓𑀘𑁆𑀘𑁄 𑀳𑀺 𑀲𑀓𑀤𑀸𑀕𑀸𑀫𑀺𑀨𑀮𑁂 𑀞𑀢𑁆𑀯𑀸 𑀧𑀼𑀦 𑀤𑀼𑀢𑀺𑀬𑀪𑀯𑁂 𑀇𑀥𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀤𑀼𑀢𑀺𑀬𑀪𑀯𑁂 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀇𑀥 𑀦 𑀕𑀳𑀺𑀢𑀸. 𑀬𑁄 𑀧𑀦 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀼𑀦 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀫𑁂𑀓𑁄𑀯 𑀇𑀥 𑀕𑀳𑀺𑀢𑁄. 𑀇𑀫𑀲𑁆𑀲 𑀘 𑀤𑁆𑀯𑁂 𑀧𑀝𑀺𑀲𑀦𑁆𑀥𑀺𑀬𑁄, 𑀏𑀓𑀩𑀻𑀚𑀺𑀲𑁆𑀲 𑀧𑀦 𑀏𑀓𑀸𑀯𑀸𑀢𑀺 𑀇𑀤𑀁 𑀢𑁂𑀲𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀓𑀸𑀫𑀪𑀯𑀁 𑀦𑀸𑀕𑀘𑁆𑀙𑀢𑀻𑀢𑀺 𑀅𑀦𑀸𑀕𑀸𑀫𑀻, 𑀢𑀢𑀺𑀬𑀫𑀕𑁆𑀕𑀨𑀮𑀲𑀫𑀗𑁆𑀕𑀻. 𑀢𑀲𑁆𑀲𑁂𑀯 𑀧𑀦 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀬𑀼𑀯𑁂𑀫𑀚𑁆𑀛𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀅𑀭𑀳𑀢𑁆𑀢𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀲𑀻𑀮𑁄 𑀏𑀓𑁄 𑀅𑀦𑀸𑀕𑀸𑀫𑀻. 𑀲𑁄 𑀘 𑀉𑀧𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀁 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀆𑀬𑀼𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀆𑀬𑀼𑀯𑁂𑀫𑀚𑁆𑀛𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀬𑀼𑀯𑁂𑀫𑀚𑁆𑀛𑀁 𑀉𑀧𑀳𑀘𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸, 𑀫𑀭𑀡𑀲𑀫𑀬𑀁 𑀯𑀸 𑀉𑀧𑀳𑀘𑁆𑀘 𑀉𑀧𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀆𑀬𑀼𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀸𑀯 𑀫𑀭𑀡𑀲𑀫𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀢𑁆𑀣𑁄. 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀤𑀼𑀓𑁆𑀔𑁂𑀦 𑀅𑀥𑀺𑀫𑀢𑁆𑀢𑀧𑁆𑀧𑀬𑁄𑀕𑀁 𑀅𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀲𑀻𑀮𑁄. 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀲𑀗𑁆𑀔𑀸𑀭𑁂𑀦 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀅𑀥𑀺𑀫𑀢𑁆𑀢𑀧𑁆𑀧𑀬𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑀲𑀻𑀮𑁄. 𑀉𑀤𑁆𑀥𑀁𑀲𑁄𑀢𑁄𑀢𑀺 𑀉𑀤𑁆𑀥𑀁𑀯𑀸𑀳𑀺𑀪𑀸𑀯𑁂𑀦 𑀉𑀤𑁆𑀥𑀫𑀲𑁆𑀲 𑀢𑀡𑁆𑀳𑀸𑀲𑁄𑀢𑀁 𑀯𑀝𑁆𑀝𑀲𑁄𑀢𑀜𑁆𑀘, 𑀉𑀤𑁆𑀥𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁄 𑀉𑀤𑁆𑀥𑀁 𑀫𑀕𑁆𑀕𑀲𑁄𑀢𑀫𑀲𑁆𑀲𑀸𑀢𑀺𑀧𑀺 𑀉𑀤𑁆𑀥𑀁𑀲𑁄𑀢𑁄. 𑀅𑀓𑀦𑀺𑀝𑁆𑀞𑀁 𑀕𑀘𑁆𑀙𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀇𑀫𑁂𑀲𑀁 𑀧𑀦 𑀅𑀦𑀸𑀕𑀸𑀫𑀻𑀦𑀁 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀫𑁆𑀧𑁂𑀢𑁆𑀣 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺𑀆𑀤𑀺 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑁄 𑀅𑀯𑀺𑀳𑀢𑁄 𑀧𑀝𑁆𑀞𑀸𑀬 𑀘𑀢𑀽𑀲𑀼 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀘𑀼𑀢𑁄 𑀅𑀓𑀦𑀺𑀝𑁆𑀞𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀅𑀓𑀦𑀺𑀝𑁆𑀞𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀫𑀦𑀼𑀲𑁆𑀲𑀮𑁄𑀓𑁄 𑀅𑀓𑀦𑀺𑀝𑁆𑀞𑀫𑁂𑀯 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀳𑁂𑀝𑁆𑀞𑀸 𑀘𑀢𑀽𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀏𑀯𑀫𑁂𑀢𑁂 𑀅𑀦𑀸𑀕𑀸𑀫𑀺𑀦𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀓𑀣𑀁? 𑀅𑀯𑀺𑀳𑁂𑀲𑀼 𑀢𑀸𑀯 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀤𑁆𑀥𑀁𑀲𑁄𑀢𑁄𑀢𑀺 𑀧𑀜𑁆𑀘, 𑀢𑁂 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀯𑀲𑁂𑀦 𑀤𑀲 𑀳𑁄𑀦𑁆𑀢𑀺, 𑀏𑀯𑀁 𑀅𑀢𑀧𑁆𑀧𑀲𑀼𑀤𑀲𑁆𑀲𑀲𑀼𑀤𑀲𑁆𑀲𑀻𑀲𑀽𑀢𑀺 𑀘𑀢𑁆𑀢𑀸𑀮𑀻𑀲𑀁, 𑀅𑀓𑀦𑀺𑀝𑁆𑀞𑁂 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀢𑀁 𑀲𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀯𑀲𑁂𑀦 𑀤𑀼𑀯𑀺𑀥𑀁 𑀉𑀤𑁆𑀥𑀁𑀲𑁄𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀝𑁆𑀞 𑀘𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺.

𑀅𑀭𑀳𑀸𑀢𑀺 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸𑀤𑀺𑀦𑀸 𑀔𑀻𑀡𑀸𑀲𑀯𑁄 𑀅𑀭𑀳𑀸 𑀦𑀸𑀫. 𑀲𑁄 𑀲𑀼𑀜𑁆𑀜𑀢𑀸𑀤𑀺𑀯𑀺𑀫𑁄𑀓𑁆𑀔𑀢𑁆𑀢𑀬𑀯𑀲𑁂𑀦 𑀢𑀺𑀯𑀺𑀥𑁄 𑀳𑀼𑀢𑁆𑀯𑀸 𑀧𑀼𑀦 𑀧𑀘𑁆𑀘𑁂𑀓𑀁 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀅𑀭𑀳𑀸 𑀤𑁆𑀯𑀸𑀤𑀲𑀯𑀺𑀥𑁄, 𑀏𑀯𑀁 𑀤𑁆𑀯𑀸𑀤𑀲𑁂𑀯 𑀲𑀓𑀤𑀸𑀕𑀸𑀫𑀺𑀦𑁄, 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑀸 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀺𑀦𑁄𑀯 𑀧𑀘𑁆𑀘𑁂𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂 𑀘 𑀲𑀩𑁆𑀩𑁂 𑀅𑀭𑀺𑀬𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀩𑀳𑀺𑀤𑁆𑀥𑀸𑀢𑀺. 𑀏𑀓𑀓𑀦𑀬𑁄.

𑀤𑀼𑀓𑀸𑀤𑀺𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀤𑀼𑀓𑀸𑀤𑀻𑀲𑀼 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑁋 𑀓𑁄𑀥𑀦𑁄 𑀘 𑀉𑀧𑀦𑀸𑀳𑀻 𑀘 𑀫𑀓𑁆𑀔𑀻 𑀘 𑀧𑀴𑀸𑀲𑀻 𑀘𑀸’’𑀢𑀺𑀆𑀤𑀺𑀦𑀸 𑀤𑀼𑀓𑀜𑁆𑀘, ‘‘𑀢𑀬𑁄 𑀧𑀼𑀕𑁆𑀕𑀮𑀸 𑁋 𑀦𑀺𑀭𑀸𑀲𑁄 𑀆𑀲𑀁𑀲𑁄 𑀯𑀺𑀕𑀢𑀸𑀲𑁄’’𑀢𑀺𑀆𑀤𑀺𑀦𑀸 𑀢𑀺𑀓𑀜𑁆𑀘, ‘‘𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑁋 𑀅𑀲𑀧𑁆𑀧𑀼𑀭𑀺𑀲𑁄, 𑀅𑀲𑀧𑁆𑀧𑀼𑀭𑀺𑀲𑁂𑀦𑀅𑀲𑀧𑁆𑀧𑀼𑀭𑀺𑀲𑀢𑀭𑁄, 𑀲𑀧𑁆𑀧𑀼𑀭𑀺𑀲𑁄, 𑀲𑀧𑁆𑀧𑀼𑀭𑀺𑀲𑁂𑀦𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺𑀆𑀤𑀺𑀦𑀸 𑀘𑀢𑀼𑀓𑁆𑀓𑀜𑁆𑀘, ‘‘𑀧𑀜𑁆𑀘 𑀧𑀼𑀕𑁆𑀕𑀮𑀸 𑁋 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀺, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀺…𑀧𑁂… 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀸𑀭𑀪𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀺…𑀧𑁂… 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀸𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺…𑀧𑁂… 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀓𑀜𑁆𑀘 𑀯𑀺𑀢𑁆𑀣𑀸𑀭𑀢𑁄 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀧𑀼𑀕𑁆𑀕𑀮𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀇𑀥 𑀧𑀦 𑀢𑁂 𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀬𑁂𑀦 𑀲𑀩𑁆𑀩𑁂 𑀦 𑀉𑀤𑁆𑀤𑀺𑀝𑁆𑀞𑀸, 𑀧𑀸𑀴𑀺𑀬𑀸 𑀏𑀯 𑀜𑀸𑀢𑀩𑁆𑀩𑀸𑀢𑀺.

𑀢𑀢𑁆𑀣 𑀢𑀺𑀓𑁂 𑀦𑀺𑀭𑀸𑀲𑁄𑀢𑀺 𑀅𑀭𑀳𑀢𑁆𑀢𑀸𑀲𑀸𑀬 𑀯𑀺𑀭𑀳𑀺𑀢𑁄 𑀤𑀼𑀲𑁆𑀲𑀻𑀮𑁄. 𑀢𑀲𑁆𑀲 𑀳𑀺 𑀅𑀢𑁆𑀢𑀦𑁄 𑀅𑀪𑀩𑁆𑀩𑀢𑀸𑀬 𑀪𑀩𑁆𑀩𑀲𑀳𑀸𑀬𑀓𑀲𑁆𑀲 𑀲𑀻𑀮𑀯𑀢𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀲𑀼𑀢𑁆𑀯𑀸, 𑀘𑀡𑁆𑀟𑀸𑀮𑀧𑀼𑀢𑁆𑀢𑀲𑁆𑀲 𑀯𑀺𑀬 𑀓𑀲𑁆𑀲𑀘𑀺 𑀭𑀸𑀚𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀸𑀪𑀺𑀲𑁂𑀓𑀁 𑀲𑀼𑀢𑁆𑀯𑀸 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀺𑀬𑀁, ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀁 𑀧𑀢𑁆𑀣𑀦𑀸𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺. 𑀆𑀲𑀁𑀲𑁄𑀢𑀺 𑀅𑀭𑀳𑀢𑁆𑀢𑀁 𑀆𑀲𑀻𑀲𑀫𑀸𑀦𑁄 𑀧𑀢𑁆𑀣𑀬𑀫𑀸𑀦𑁄 𑀲𑀻𑀮𑀯𑀸. 𑀢𑀲𑁆𑀲 𑀳𑀺 𑀅𑀭𑀳𑀢𑁆𑀢𑀧𑀢𑁆𑀣𑀦𑀸𑀬 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑀢𑁆𑀢𑀸 𑀓𑀲𑁆𑀲𑀘𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀲𑀼𑀢𑁆𑀯𑀸, 𑀉𑀪𑀢𑁄𑀲𑀼𑀚𑀸𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀯𑀺𑀬 𑀢𑀸𑀤𑀺𑀲𑀲𑁆𑀲 𑀓𑀲𑁆𑀲𑀘𑀺 𑀭𑀚𑁆𑀚𑀸𑀪𑀺𑀲𑁂𑀓𑀁 𑀲𑀼𑀢𑁆𑀯𑀸 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀺𑀬𑀁, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀁 𑀧𑀢𑁆𑀣𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀕𑀢𑀸𑀲𑁄𑀢𑀺 𑀅𑀭𑀳𑀸. 𑀲𑁄 𑀳𑀺 𑀧𑀢𑁆𑀢𑀅𑀭𑀳𑀢𑁆𑀢𑀢𑀸𑀬 𑀢𑀢𑁆𑀣 𑀯𑀺𑀕𑀢𑀸𑀲𑁄 𑀳𑁄𑀢𑀺 𑀧𑀢𑁆𑀢𑀸𑀪𑀺𑀲𑁂𑀓𑁄 𑀯𑀺𑀬 𑀔𑀢𑁆𑀢𑀺𑀬𑁄 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀓𑁆𑀓𑁂 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀓𑀫𑁆𑀫𑀧𑀣𑀲𑀫𑀦𑁆𑀦𑀸𑀕𑀢𑁄 𑀅𑀲𑀧𑁆𑀧𑀼𑀭𑀺𑀲𑁄 𑀦𑀸𑀫. 𑀬𑁄 𑀧𑀦 𑀲𑀬𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀢𑁆𑀯𑀸 𑀧𑀭𑀜𑁆𑀘 𑀢𑀢𑁆𑀣 𑀲𑀫𑀸𑀤𑀧𑁂𑀢𑀺, 𑀅𑀬𑀁 𑀅𑀲𑀧𑁆𑀧𑀼𑀭𑀺𑀲𑁂𑀦𑀅𑀲𑀧𑁆𑀧𑀼𑀭𑀺𑀲𑀢𑀭𑁄, 𑀅𑀲𑀧𑁆𑀧𑀼𑀭𑀺𑀲𑀢𑁄𑀧𑀺 𑀅𑀲𑀧𑁆𑀧𑀼𑀭𑀺𑀲𑀢𑀭𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀓𑀼𑀲𑀮𑀯𑀲𑁂𑀦 𑀲𑀧𑁆𑀧𑀼𑀭𑀺𑀲𑁄, 𑀲𑀧𑁆𑀧𑀼𑀭𑀺𑀲𑁂𑀦𑀲𑀧𑁆𑀧𑀼𑀭𑀺𑀲𑀢𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀘𑀓𑁂 𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻𑀢𑀺 𑀏𑀢𑁆𑀣 𑀆𑀭𑀫𑁆𑀪-𑀲𑀤𑁆𑀤𑁄 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀆𑀭𑀪𑀢𑀺 𑀘𑁂𑀯 𑀢𑀧𑁆𑀧𑀘𑁆𑀘𑀬𑀸 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁. 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀅𑀦𑀥𑀺𑀕𑀢𑀢𑁆𑀢𑀸 𑀬𑀣𑀸𑀲𑀪𑀸𑀯𑀢𑁄 𑀦𑀧𑁆𑀧𑀚𑀸𑀦𑀸𑀢𑀺. 𑀬𑀢𑁆𑀣𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁂 𑀛𑀸𑀦𑁂 𑀅𑀥𑀺𑀕𑀢𑁂 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀯𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀜𑁆𑀘𑀸𑀧𑀺 𑀢𑁂 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀦𑀺𑀭𑀼𑀚𑁆𑀛𑀦𑁆𑀢𑀺 𑀦𑀸𑀫, 𑀨𑀮𑀓𑁆𑀔𑀡𑁂 𑀧𑀦 𑀦𑀺𑀭𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀇𑀥 𑀧𑀦 𑀫𑀕𑁆𑀕𑀓𑀺𑀘𑁆𑀘𑀯𑀲𑁂𑀦 ‘‘𑀨𑀮𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑀁 𑀧𑀦 𑀤𑁂𑀲𑁂𑀢𑀼𑀁 𑀲𑀪𑀸𑀕𑀧𑀼𑀕𑁆𑀕𑀮𑀁 𑀧𑀭𑀺𑀬𑁂𑀲𑀢𑀺, 𑀯𑀼𑀝𑁆𑀞𑀸𑀧𑁂𑀢𑀺 𑀯𑀸, 𑀢𑀲𑁆𑀫𑀸 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀦𑀸𑀭𑀪𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀺𑀢𑀸𑀬 𑀯𑀼𑀝𑁆𑀞𑀺𑀢𑀸𑀬𑀧𑀺 𑀢𑀁 𑀆𑀧𑀢𑁆𑀢𑀺𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀦𑀸𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀦𑀸𑀭𑀪𑀢𑀺 𑀦𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀅𑀭𑀳𑀢𑁆𑀢𑀜𑁆𑀘 𑀦 𑀧𑀸𑀧𑀼𑀡𑀸𑀢𑀺. 𑀓𑀢𑀭𑁄 𑀧𑀦𑁂𑀲 𑀧𑀼𑀕𑁆𑀕𑀮𑁄𑀢𑀺? 𑀲𑀻𑀮𑀯𑀸 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀧𑀼𑀕𑁆𑀕𑀮𑁄. 𑀲𑁄 𑀳𑀺 ‘‘𑀓𑀺𑀁 𑀫𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀦𑁂𑀦, 𑀅𑀦𑀸𑀕𑀢𑁂 𑀫𑁂𑀢𑁆𑀢𑁂𑀬𑁆𑀬𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑀼𑀤𑁆𑀥𑀲𑀻𑀮𑁄𑀧𑀺 𑀧𑀝𑀺𑀧𑀢𑁆𑀢𑀺𑀁 𑀦 𑀧𑀽𑀭𑁂𑀢𑀺. 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀧𑀼𑀕𑁆𑀕𑀮𑀸 𑀢𑀣𑀸 𑀢𑀣𑀸 𑀑𑀯𑀤𑀺𑀢𑁆𑀯𑀸 𑀆𑀲𑀯𑀓𑁆𑀔𑀬𑁂 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸. 𑀏𑀯𑀁 𑀳𑀺 𑀢𑁂𑀧𑀺 𑀬𑁆𑀯𑀸𑀬𑀁 𑀧𑀜𑁆𑀘𑀫𑁄 𑀧𑀼𑀕𑁆𑀕𑀮𑁄 𑀦𑀸𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀆𑀭𑀤𑁆𑀥𑀯𑀻𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑁂𑀦 𑀲𑀫𑀲𑀫𑀸𑀯 𑀪𑀯𑀺𑀲𑁆𑀲𑀦𑁆𑀢𑀻𑀢𑀺.

𑀙𑀓𑁆𑀓𑀸𑀤𑀻𑀲𑀼 𑁋

‘‘𑀙 𑀧𑀼𑀕𑁆𑀕𑀮𑀸 𑁋 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀺 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀦 𑀘 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀺, 𑀦 𑀘 𑀩𑀮𑁂𑀲𑀼 𑀯𑀲𑀺𑀪𑀸𑀯𑀁. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀅𑀦𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀲𑀸𑀯𑀓𑀧𑀸𑀭𑀫𑀺𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀦 𑀘 𑀲𑀸𑀯𑀓𑀧𑀸𑀭𑀫𑀺𑀁 𑀧𑀸𑀧𑀼𑀡𑀸𑀢𑀺. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀅𑀦𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀦 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀅𑀦𑀸𑀕𑀸𑀫𑀻 𑀳𑁄𑀢𑀺 𑀅𑀦𑀸𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀁. 𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀅𑀦𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀦 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀆𑀕𑀸𑀫𑀻 𑀳𑁄𑀢𑀺 𑀆𑀕𑀦𑁆𑀢𑀸 𑀇𑀢𑁆𑀣𑀢𑁆𑀢’’𑀦𑁆𑀢𑀺 𑁋

𑀙𑀓𑁆𑀓𑀁, ‘‘𑀲𑀢𑁆𑀢 𑀧𑀼𑀕𑁆𑀕𑀮𑀸 𑁋 𑀲𑀢𑁆𑀢 𑀉𑀤𑀓𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀭𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀝𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑀺𑀡𑁆𑀡𑁄 𑀳𑁄𑀢𑀺 𑀧𑀸𑀭𑀗𑁆𑀕𑀢𑁄, 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀓𑀁, ‘‘𑀅𑀝𑁆𑀞 𑀧𑀼𑀕𑁆𑀕𑀮𑀸 𑁋 𑀘𑀢𑁆𑀢𑀸𑀭𑁄 𑀫𑀕𑁆𑀕𑀲𑀫𑀗𑁆𑀕𑀺𑀦𑁄, 𑀘𑀢𑁆𑀢𑀸𑀭𑁄 𑀨𑀮𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀸’’𑀢𑀺 𑀅𑀝𑁆𑀞𑀓𑀁, ‘‘𑀦𑀯 𑀧𑀼𑀕𑁆𑀕𑀮𑀸 𑁋 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀓𑀸𑀬𑀲𑀓𑁆𑀔𑀻 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀲𑀤𑁆𑀥𑀸𑀦𑀼𑀲𑀸𑀭𑀻’’𑀢𑀺 𑀦𑀯𑀓𑀁, ‘‘𑀤𑀲 𑀧𑀼𑀕𑁆𑀕𑀮𑀸 𑁋 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺 𑀤𑀲𑀓𑀜𑁆𑀘 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀴𑀺𑀬𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀢𑁆𑀣 𑀙𑀓𑁆𑀓𑁂 𑀧𑀞𑀫𑁂𑀦 𑀧𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀲𑁄 𑀳𑀺 𑀅𑀦𑀸𑀘𑀭𑀺𑀬𑀓𑁄 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀩𑁆𑀩𑀸𑀓𑀸𑀭𑀢𑁄 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺, 𑀤𑀲𑀜𑀸𑀡𑀩𑀮𑁂𑀲𑀼 𑀘 𑀯𑀲𑀺𑀪𑀸𑀯𑀦𑁆𑀢𑀺. 𑀤𑀼𑀢𑀺𑀬𑁂𑀦 𑀧𑀦 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀢𑀢𑀺𑀬𑁂𑀦 𑀅𑀕𑁆𑀕𑀲𑀸𑀯𑀓𑁄, 𑀘𑀢𑀼𑀢𑁆𑀣𑁂𑀦 𑀅𑀯𑀲𑁂𑀲𑀸 𑀅𑀭𑀳𑀦𑁆𑀢𑁄, 𑀧𑀜𑁆𑀘𑀫𑁂𑀦 𑀅𑀦𑀸𑀕𑀸𑀫𑀻, 𑀙𑀝𑁆𑀞𑁂𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀤𑀝𑁆𑀞𑀩𑁆𑀩𑀸. 𑀢𑁂 𑀳𑀺 ‘‘𑀆𑀕𑀦𑁆𑀢𑀸 𑀇𑀢𑁆𑀣𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺.

𑀲𑀢𑁆𑀢𑀓𑁂 𑀧𑀞𑀫𑁂𑀦 𑀧𑀤𑁂𑀦 𑀲𑀸𑀲𑀦𑁂 𑀅𑀦𑀺𑀯𑀺𑀝𑁆𑀞𑀲𑀤𑁆𑀥𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑁂𑀳𑀺 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀳𑀺𑀢𑁄. 𑀲𑁄 𑀳𑀺 𑀲𑀫𑀼𑀤𑁆𑀤𑁂 𑀉𑀤𑀓𑀪𑀻𑀭𑀼𑀓𑀧𑀼𑀭𑀺𑀲𑁄 𑀯𑀺𑀬 𑀲𑀁𑀲𑀸𑀭𑁂 𑀅𑀧𑀸𑀬𑁂 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺, 𑀦 𑀧𑀼𑀦 𑀪𑀯𑀢𑁄 𑀯𑀼𑀝𑁆𑀞𑀸𑀢𑀺, 𑀅𑀦𑀦𑁆𑀢𑀫𑁆𑀧𑀺 𑀓𑀸𑀮𑀁 𑀪𑀯𑁂 𑀏𑀯 𑀯𑀺𑀘𑀭𑀢𑀺 𑀲𑀸𑀲𑀦𑀲𑀫𑀸𑀬𑁄𑀕𑀸𑀪𑀸𑀯𑀸. 𑀤𑀼𑀢𑀺𑀬𑁂𑀦 𑀧𑀤𑁂𑀦 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄𑀧𑀺 𑀤𑁂𑀯𑀤𑀢𑁆𑀢𑀸𑀤𑀬𑁄 𑀯𑀺𑀬 𑀲𑀤𑁆𑀥𑀸𑀤𑀺𑀧𑀭𑀺𑀳𑀸𑀦𑀺𑀬𑀁 𑀞𑀺𑀢𑁄 𑀤𑀼𑀲𑁆𑀲𑀻𑀮𑁄 𑀕𑀳𑀺𑀢𑁄. 𑀲𑁄 𑀳𑀺 𑀲𑀫𑀼𑀤𑁆𑀤𑁂 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀼𑀦 𑀦𑀺𑀫𑀼𑀕𑁆𑀕𑁄 𑀯𑀺𑀬 𑀲𑀸𑀲𑀦𑀲𑀤𑁆𑀥𑀸𑀬 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸𑀧𑀺 𑀅𑀧𑀸𑀬𑁂 𑀦𑀺𑀫𑀼𑀚𑁆𑀚𑀢𑀺 𑀏𑀯, 𑀅𑀬𑀁 𑀧𑀦 𑀘𑀺𑀭𑀓𑀸𑀮𑀸𑀢𑀺𑀓𑁆𑀓𑀫𑁂𑀦 𑀩𑀼𑀤𑁆𑀥𑀸𑀤𑀻𑀳𑀺, 𑀅𑀢𑁆𑀢𑀦𑀸 𑀏𑀯 𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀦 𑀪𑀯𑀢𑁄 𑀉𑀤𑁆𑀥𑀭𑀡𑀻𑀬𑁄 𑀳𑁄𑀢𑀺 𑀲𑀸𑀲𑀦𑁂 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸𑀬𑀧𑀺 𑀲𑀤𑁆𑀥𑀸𑀬 𑀫𑁄𑀓𑁆𑀔𑀪𑀸𑀯𑁂𑀦 𑀦𑀺𑀬𑀫𑁂𑀦 𑀦𑀺𑀩𑁆𑀩𑀸𑀦𑀸𑀯𑀳𑀢𑁆𑀢𑀸. 𑀅𑀬𑀫𑁂𑀯 𑀳𑀺𑀲𑁆𑀲 𑀧𑀼𑀭𑀺𑀫𑀧𑀼𑀕𑁆𑀕𑀮𑀢𑁄 𑀯𑀺𑀲𑁂𑀲𑁄, 𑀇𑀢𑀭𑀣𑀸 𑀢𑀲𑁆𑀲 𑀯𑀺𑀲𑀼𑀁 𑀕𑀳𑀡𑁂 𑀧𑀬𑁄𑀚𑀦𑀫𑁂𑀯 𑀦 𑀲𑀺𑀬𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑀺𑀬𑁂𑀦 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀲𑀤𑁆𑀥𑁄 𑀞𑀺𑀢𑀺𑀪𑀸𑀕𑀺𑀬𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀳𑀺𑀢𑁄. 𑀲𑁄 𑀳𑀺 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑀻𑀭𑀁 𑀅𑀤𑀺𑀲𑁆𑀯𑀸𑀯 𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑀸𑀯𑀸𑀤𑀺𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀧𑀼𑀦 𑀅𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀉𑀡𑁆𑀡𑀢𑀧𑁆𑀧𑀤𑁂𑀲𑁂 𑀞𑀺𑀢𑁄 𑀯𑀺𑀬 𑀲𑀸𑀲𑀦𑀲𑀤𑁆𑀥𑀸𑀬 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀅𑀤𑀺𑀲𑁆𑀯𑀸𑀯 𑀩𑀼𑀤𑁆𑀥𑀸𑀤𑀺𑀁 𑀑𑀮𑁄𑀓𑀬𑀫𑀸𑀦𑁄 𑀲𑀕𑁆𑀕𑁂, 𑀲𑀻𑀮𑀸𑀤𑀺𑀫𑁆𑀳𑀺 𑀞𑀺𑀢𑁄 𑀳𑁄𑀢𑀺. 𑀘𑀢𑀼𑀢𑁆𑀣𑁂𑀦 𑀧𑀦 𑀲𑁄𑀢𑀸𑀧𑀦𑁆𑀦𑁄 𑀕𑀳𑀺𑀢𑁄. 𑀲𑁄 𑀳𑀺 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀢𑀻𑀭𑀁 𑀤𑀺𑀲𑁆𑀯𑀸 𑀉𑀢𑁆𑀢𑀭𑀡𑀽𑀧𑀸𑀬𑀁 𑀯𑀺𑀮𑁄𑀓𑀬𑀫𑀸𑀦𑁄 𑀯𑀺𑀬 𑀮𑁄𑀓𑀼𑀢𑁆𑀢𑀭𑀲𑀤𑁆𑀥𑀸𑀬 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀢𑀻𑀭𑀁 𑀤𑀺𑀲𑁆𑀯𑀸 𑀉𑀢𑁆𑀢𑀭𑀡𑁄𑀧𑀸𑀬𑀁 𑀯𑀺𑀮𑁄𑀓𑁂𑀢𑀺. 𑀧𑀜𑁆𑀘𑀫𑁂𑀦 𑀲𑀓𑀤𑀸𑀕𑀸𑀫𑀻 𑀕𑀳𑀺𑀢𑁄. 𑀲𑁄 𑀳𑀺 𑀲𑀫𑀼𑀤𑁆𑀤𑁂 𑀢𑀻𑀭𑀁 𑀤𑀺𑀲𑁆𑀯𑀸 𑀢𑀤𑀪𑀺𑀫𑀼𑀔𑀁 𑀧𑀢𑀭𑀫𑀸𑀦𑁄 𑀯𑀺𑀬 𑀧𑀞𑀫𑀫𑀕𑁆𑀕𑁂𑀦 𑀦𑀺𑀩𑁆𑀩𑀸𑀦𑀢𑀻𑀭𑀁 𑀤𑀺𑀲𑁆𑀯𑀸 𑀢𑀤𑀪𑀺𑀫𑀼𑀔𑀁 𑀤𑀼𑀢𑀺𑀬𑀫𑀕𑁆𑀕𑁂𑀦 𑀧𑀢𑀭𑀢𑀺 𑀦𑀸𑀫. 𑀙𑀝𑁆𑀞𑁂𑀦 𑀅𑀦𑀸𑀕𑀸𑀫𑀻 𑀕𑀳𑀺𑀢𑁄. 𑀲𑁄 𑀳𑀺 𑀧𑀢𑀭𑀺𑀢𑁆𑀯𑀸 𑀢𑀻𑀭𑀁 𑀉𑀧𑀕𑁆𑀕𑀫𑁆𑀫 𑀓𑀝𑀺𑀧𑁆𑀧𑀫𑀸𑀡𑁂 𑀉𑀤𑀓𑁂 𑀞𑀺𑀢𑁄 𑀯𑀺𑀬 𑀅𑀭𑀳𑀢𑁆𑀢𑀲𑀫𑀻𑀧𑁂 𑀲𑀢𑀺𑀓𑀯𑀸𑀝𑀧𑀢𑀺𑀢𑁆𑀣𑁂 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀢𑀸𑀬 𑀢𑀢𑀺𑀬𑀫𑀕𑁆𑀕𑁂𑀦 𑀢𑀺𑀝𑁆𑀞𑀢𑀺. 𑀲𑀢𑁆𑀢𑀫𑁂𑀦 𑀧𑀦 𑀅𑀭𑀳𑀸 𑀕𑀳𑀺𑀢𑁄, 𑀲𑁄 𑀳𑀺 𑀢𑀭𑀺𑀢𑁆𑀯𑀸 𑀧𑀸𑀭𑀁 𑀧𑀢𑁆𑀯𑀸 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀢𑁆𑀣𑀮𑁂 𑀞𑀺𑀢𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀳𑁄𑀢𑀻𑀢𑀺.

𑀦𑀯𑀓𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦, 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀓𑀺𑀮𑁂𑀲𑀢𑁄 𑀯𑀺𑀫𑀼𑀢𑁆𑀢𑁄, 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀯𑀸 𑀭𑀽𑀧𑀓𑀸𑀬𑀢𑁄, 𑀫𑀕𑁆𑀕𑁂𑀦 𑀘 𑀦𑀸𑀫𑀓𑀸𑀬𑀢𑁄𑀢𑀺 𑀇𑀫𑁂𑀳𑀺 𑀉𑀪𑀢𑁄𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺𑀧𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀲𑁄 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀘 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄, 𑀢𑁂𑀲𑀼 𑀧𑀘𑁆𑀙𑀺𑀫𑁄𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫, 𑀲𑁂𑀲𑀸 𑀧𑀭𑀺𑀬𑀸𑀬𑁂𑀦. 𑀏𑀢𑁆𑀣 𑀘 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀓𑀺𑀮𑁂𑀲𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀫𑁆𑀧𑀺 𑀭𑀽𑀧𑀓𑀸𑀬𑀢𑁄 𑀅𑀯𑀺𑀫𑀼𑀢𑁆𑀢𑀁, 𑀅𑀭𑀽𑀧𑀸𑀯𑀘𑀭𑀁 𑀧𑀦 𑀢𑀤𑀪𑀬𑀢𑁄𑀧𑀺 𑀯𑀺𑀫𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄𑀯 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀦 𑀭𑀽𑀧𑀸𑀯𑀘𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸𑀬 𑀆𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄. 𑀲𑁄 𑀳𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀘𑀢𑀽𑀳𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄. 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀳𑀺 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀯 𑀦𑀸𑀫 𑀳𑁄𑀢𑀺.

𑀓𑀸𑀬𑀲𑀓𑁆𑀔𑀻𑀢𑀺 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀮𑀸𑀪𑀻 𑀅𑀭𑀺𑀬𑁄. 𑀲𑁄 𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀯𑀚𑁆𑀚𑀺𑀢𑀸𑀦𑀁 𑀙𑀦𑁆𑀦𑀁 𑀲𑁂𑀔𑀸𑀦𑀁 𑀯𑀲𑁂𑀦 𑀙𑀩𑁆𑀩𑀺𑀥𑁄. 𑀢𑁂𑀦𑁂𑀯 𑀳𑀺𑀲𑁆𑀲 ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸’’𑀢𑀺 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲 𑀘 𑀦 𑀓𑁂𑀘𑀺𑀧𑀺 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸𑀢𑀺 𑀯𑀢𑁆𑀢𑀩𑁆𑀩𑀸, 𑀧𑀭𑀺𑀓𑁆𑀔𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀧𑀦 𑀯𑀢𑁆𑀢𑀩𑁆𑀩𑀸, 𑀅𑀭𑀳𑀢𑁄 𑀧𑀦 𑀲𑀩𑁆𑀩𑁂𑀧𑀺 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦 𑀏𑀓𑀘𑁆𑀘𑁂𑀢𑀺. 𑀲𑁄 𑀳𑀺 𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻, 𑀨𑀼𑀝𑁆𑀞𑀸𑀦𑀁 𑀧𑀝𑀺𑀮𑀤𑁆𑀥𑀸𑀦𑀁 𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑀁 𑀦𑀸𑀫𑀓𑀸𑀬𑁂𑀦 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺𑀧𑀺 𑀓𑀸𑀬𑀲𑀓𑁆𑀔𑀻, 𑀓𑀸𑀬𑁂𑀦𑀸𑀢𑀺 𑀘𑁂𑀢𑁆𑀣 ‘‘𑀦𑀸𑀫𑀓𑀸𑀬𑁂𑀦 𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀻’’𑀢𑀺 𑀯𑀘𑀦𑀢𑁄 𑀅𑀭𑀳𑀢𑁆𑀢𑀨𑀮𑀁 𑀞𑀧𑁂𑀢𑁆𑀯𑀸 𑀲𑁂𑀲𑀫𑀕𑁆𑀕𑀨𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀦 𑀓𑀸𑀬𑁂𑀦 𑀧𑀞𑀫𑀚𑁆𑀛𑀸𑀦𑀸𑀦𑀦𑁆𑀢𑀭𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁄𑀧𑀺 𑀓𑀸𑀬𑀲𑀓𑁆𑀔𑀻𑀢𑀺 𑀓𑁂𑀘𑀺. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀭𑀽𑀧𑀚𑁆𑀛𑀸𑀦𑀮𑀸𑀪𑀻 𑀘 𑀬𑀣𑀸𑀯𑀼𑀢𑁆𑀢𑁄 𑀙𑀩𑁆𑀩𑀺𑀥𑁄 𑀲𑁂𑀔𑁄 𑀘, 𑀅𑀬𑀁 𑀤𑀺𑀝𑁆𑀞𑀦𑁆𑀢𑀧𑁆𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺, 𑀧𑀞𑀫𑀫𑀕𑁆𑀕𑁄, 𑀢𑀲𑁆𑀲 𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀧𑁆𑀧𑀢𑁆𑀢𑁄𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀧𑀼𑀦 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀭𑀽𑀧𑀚𑁆𑀛𑀸𑀦𑀮𑀸𑀪𑀻 𑀘 𑀬𑀣𑀸𑀯𑀼𑀢𑁆𑀢𑁄 𑀙𑀩𑁆𑀩𑀺𑀥𑁄 𑀲𑁂𑀔𑁄 𑀘. 𑀅𑀬𑀁 𑀳𑀺 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀓𑀣𑀁 𑀧𑀦𑁂𑀢𑀲𑁆𑀲 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀢𑁄 𑀦𑀸𑀦𑀢𑁆𑀢𑀦𑁆𑀢𑀺? 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀬. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑀺 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀬 𑀓𑀺𑀮𑁂𑀲𑁂 𑀅𑀧𑁆𑀧𑀤𑀼𑀓𑁆𑀔𑁂𑀦 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀆𑀕𑀢𑁄, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀧𑀦 𑀲𑀤𑁆𑀥𑀸𑀩𑀳𑀼𑀮𑀢𑀸𑀬 𑀓𑀺𑀮𑁂𑀲𑁂 𑀤𑀼𑀓𑁆𑀔𑁂𑀦 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀆𑀕𑀢𑁄. 𑀏𑀢𑀫𑁂𑀯 𑀳𑀺 𑀪𑁂𑀤𑀁 𑀲𑀦𑁆𑀥𑀸𑀬 𑀦𑀺𑀤𑁆𑀤𑁂𑀲𑁂 ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁄 𑀬𑀣𑀸𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀸𑀦𑀼𑀲𑀸𑀭𑀻𑀢𑀺 𑀬𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀅𑀬𑀁 𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀦 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲𑁂𑀢𑀁 𑀦𑀸𑀫𑀁. 𑀨𑀮𑁂 𑀧𑀦 𑀧𑀢𑁆𑀢𑁂 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀲𑀤𑁆𑀥𑀸𑀦𑀼𑀲𑀸𑀭𑀻𑀢𑀺 𑀬𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀅𑀬𑀁 𑀲𑀤𑁆𑀥𑀸𑀬 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲𑁂𑀢𑀁 𑀦𑀸𑀫𑀁. 𑀨𑀮𑁂 𑀧𑀦 𑀧𑀢𑁆𑀢𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺.

𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀳𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀸𑀦𑀁 𑀤𑁆𑀯𑁂 𑀥𑀼𑀭𑀸𑀦𑀺 𑀦𑀸𑀫, 𑀤𑁆𑀯𑁂 𑀅𑀪𑀺𑀦𑀺𑀯𑁂𑀲𑀸 𑀦𑀸𑀫, 𑀤𑁆𑀯𑁂 𑀲𑀻𑀲𑀸𑀦𑀺 𑀦𑀸𑀫. 𑀢𑀢𑁆𑀣 𑀲𑀤𑁆𑀥𑀸𑀥𑀼𑀭𑀁 𑀧𑀜𑁆𑀜𑀸𑀥𑀼𑀭𑀦𑁆𑀢𑀺 𑀤𑁆𑀯𑁂 𑀥𑀼𑀭𑀸𑀦𑀺 𑀦𑀸𑀫. 𑀏𑀓𑁄 𑀧𑀦 𑀲𑀫𑀣𑀸𑀪𑀺𑀦𑀺𑀯𑁂𑀲𑁄, 𑀏𑀓𑁄 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄𑀢𑀺 𑀤𑁆𑀯𑁂 𑀅𑀪𑀺𑀦𑀺𑀯𑁂𑀲𑀸. 𑀏𑀓𑁄 𑀘 𑀅𑀭𑀳𑀢𑁆𑀢𑀁 𑀫𑀢𑁆𑀣𑀓𑀁 𑀧𑀸𑀧𑀼𑀡𑀦𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀏𑀓𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀲𑀻𑀲𑀸𑀦𑀺 𑀦𑀸𑀫. 𑀬𑁂 𑀳𑀺 𑀓𑁂𑀘𑀺 𑀮𑁄𑀓𑀼𑀢𑁆𑀢𑀭𑀁 𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀤𑁆𑀯𑁂 𑀇𑀫𑁂 𑀥𑀫𑁆𑀫𑁂 𑀥𑀼𑀭𑀁 𑀓𑀢𑁆𑀯𑀸 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀯𑀺𑀫𑀼𑀘𑁆𑀘𑀦𑁆𑀢𑀺. 𑀢𑁂𑀲𑀼 𑀬𑁄 𑀪𑀺𑀓𑁆𑀔𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀧𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀲𑀫𑀣𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀅𑀜𑁆𑀜𑀢𑀭𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫. 𑀧𑀭𑀢𑁄 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀻 𑀦𑀸𑀫. 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀢𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫.

𑀅𑀧𑀭𑁄 𑀧𑀜𑁆𑀜𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫. 𑀧𑀭𑀢𑁄 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫.

𑀅𑀧𑀭𑁄 𑀧𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀲𑀤𑁆𑀥𑀁 𑀥𑀼𑀭𑀁 𑀓𑀢𑁆𑀯𑀸 𑀲𑀫𑀸𑀥𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀅𑀜𑁆𑀜𑀢𑀭𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫, 𑀧𑀭𑀢𑁄 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀻𑀬𑁂𑀯 𑀦𑀸𑀫. 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀬𑁂𑀯 𑀦𑀸𑀫. 𑀅𑀧𑀭𑁄 𑀲𑀤𑁆𑀥𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫, 𑀧𑀭𑀢𑁄 𑀙𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀇𑀫𑁂 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀦𑀯 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀸 𑀦𑀸𑀫𑀸𑀢𑀺.

𑀤𑀲𑀓𑁂 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀓𑁄𑀮𑀁𑀓𑁄𑀮𑁄, 𑀏𑀓𑀩𑀻𑀚𑀻, 𑀲𑀓𑀤𑀸𑀕𑀸𑀫𑀻 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀓𑁄, 𑀅𑀭𑀳𑀸 𑀘𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀜𑁆𑀜𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸 𑀦𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀸𑀯𑀘𑀭𑀢𑁆𑀢𑀪𑀸𑀯𑁂 𑀏𑀯 𑀳𑀺 𑀏𑀢𑁂 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀦𑀸𑀜𑁆𑀜𑀲𑁆𑀫𑀺𑀁. 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸𑀢𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀘𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀓𑀸𑀫𑀸𑀯𑀘𑀭𑁂 𑀅𑀢𑁆𑀢𑀪𑀸𑀯𑀁 𑀯𑀺𑀳𑀸𑀬 𑀯𑀺𑀚𑀳𑀺𑀢𑁆𑀯𑀸 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀜𑁆𑀜𑁂𑀯 𑀦𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀧𑀸𑀴𑀺𑀦𑀬𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀦𑀺𑀘𑁆𑀙𑀬𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀧𑀼. 𑀧. 𑀫𑀸𑀢𑀺𑀓𑀸 𑁧 𑀆𑀤𑀬𑁄; 𑀧𑀼. 𑀧. 𑀅𑀝𑁆𑀞. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑁧) 𑀕𑀳𑁂𑀢𑀩𑁆𑀩𑁄𑀢𑀺.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.