𑁫. 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀸

𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀢𑀸𑀯 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀅𑀬𑀁 𑀧𑀼𑀘𑁆𑀙𑀸, ‘‘𑀆𑀫𑀦𑁆𑀢𑀸’’𑀢𑀺 𑀅𑀬𑀁 𑀧𑀝𑀺𑀚𑀸𑀦𑀦𑀸. 𑀓𑀲𑁆𑀲 𑀧𑀦𑀸𑀬𑀁 𑀧𑀼𑀘𑁆𑀙𑀸, 𑀓𑀲𑁆𑀲 𑀧𑀝𑀺𑀚𑀸𑀦𑀦𑀸𑀢𑀺? ‘‘𑀅𑀲𑀼𑀓𑀲𑁆𑀲𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀦 𑀳𑀺 𑀪𑀕𑀯𑀸 𑀧𑀭𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀫𑀸𑀢𑀺𑀓𑀁 𑀞𑀧𑁂𑀲𑀺, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀤𑁂𑀲𑀦𑀸𑀤𑀺𑀁 𑀧𑀦 𑀦𑀺𑀲𑁆𑀲𑀸𑀬 ‘‘𑀧𑀭𑀫𑀢𑁆𑀣𑀢𑁄 𑀅𑀢𑁆𑀢𑀸 𑀦𑀸𑀫 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀅𑀦𑀸𑀕𑀢𑁂 𑀯𑀺𑀧𑀮𑁆𑀮𑀸𑀲𑀕𑀸𑀳𑀺𑀪𑀺𑀓𑁆𑀔𑀽𑀦𑀁, 𑀧𑀭𑀯𑀸𑀤𑀻𑀦𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑀤𑀺𑀝𑁆𑀞𑀺𑀝𑁆𑀞𑀸𑀦𑀯𑀺𑀲𑁄𑀥𑀦𑀢𑁆𑀣𑀁 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀸𑀤𑀦𑀬𑀤𑀲𑁆𑀲𑀦𑀯𑀲𑁂𑀦 𑀧𑀼𑀕𑁆𑀕𑀮𑀯𑀸𑀤𑀫𑁂𑀢𑀁 𑀆𑀭𑀩𑁆𑀪 𑀢𑀦𑁆𑀢𑀺𑀯𑀲𑁂𑀦 𑀫𑀸𑀢𑀺𑀓𑀁 𑀞𑀧𑁂𑀦𑁆𑀢𑁄 𑀲𑀓𑀯𑀸𑀤𑀺𑀧𑀭𑀯𑀸𑀤𑀻𑀦𑀁 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀤𑁄𑀲𑀸𑀭𑁄𑀧𑀦𑀦𑀺𑀕𑁆𑀕𑀳𑀧𑀸𑀧𑀦𑀸𑀤𑀺𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦𑁂𑀯 𑀞𑀧𑁂𑀲𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀲𑁆𑀲 𑀲𑀼𑀔𑀸𑀯𑀥𑀸𑀭𑀡𑀢𑁆𑀣𑀁 𑀲𑀓𑀯𑀸𑀤𑀻𑀧𑀼𑀘𑁆𑀙𑀸 𑀧𑀭𑀯𑀸𑀤𑀻𑀧𑀼𑀘𑁆𑀙𑀸 𑀲𑀓𑀯𑀸𑀤𑀻𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀻𑀧𑀝𑀺𑀜𑁆𑀜𑀸𑀢𑀺 𑀏𑀯𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀅𑀬𑀁 𑀲𑀓𑀯𑀸𑀤𑀻𑀧𑀼𑀘𑁆𑀙𑀸, 𑀢𑀸𑀬 𑀘 ‘‘𑀬𑁂 ‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’𑀢𑀺 𑀏𑀯𑀁𑀮𑀤𑁆𑀥𑀺𑀓𑀸 𑀧𑀼𑀕𑁆𑀕𑀮𑀯𑀸𑀤𑀺𑀦𑁄, 𑀢𑁂 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀤𑀻𑀧𑁂𑀢𑀺. 𑀓𑁂 𑀧𑀦 𑀢𑁂 𑀧𑀼𑀕𑁆𑀕𑀮𑀯𑀸𑀤𑀺𑀦𑁄𑀢𑀺? 𑀲𑀸𑀲𑀦𑁂 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀘𑁂𑀯 𑀲𑀫𑁆𑀫𑀺𑀢𑀺𑀬𑀸 𑀘 𑀩𑀳𑀺𑀤𑁆𑀥𑀸 𑀩𑀳𑀽 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀘. 𑀓𑀤𑀸 𑀧𑀦𑁂𑀢𑁂 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀸𑀢𑀺? 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂. 𑀪𑀕𑀯𑀢𑀺 𑀓𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀳𑀺 𑀢𑀧𑁆𑀧𑀫𑀼𑀔𑁂𑀳𑀺 𑀯𑀲𑀺𑀕𑀡𑁂𑀳𑀺 𑀲𑀼𑀪𑀤𑁆𑀤𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀧𑀸𑀧𑀪𑀺𑀓𑁆𑀔𑀽𑀦𑀁 𑀧𑀯𑁂𑀲𑁄𑀓𑀸𑀲𑀦𑀺𑀲𑁂𑀥𑀦𑀢𑁆𑀣𑀁 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸𑀦𑀁 𑀲𑀳𑀸𑀬𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀭𑀻𑀭𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀲𑀦𑁂 𑀅𑀘𑀮𑁂 𑀧𑀯𑀢𑁆𑀢𑀸𑀧𑀺𑀢𑁂 𑀢𑀢𑁄 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀯𑁂𑀲𑀸𑀮𑀺𑀬𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑁂𑀳𑀺 𑀤𑀻𑀧𑀺𑀢𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀫𑀤𑁆𑀤𑀺𑀢𑁆𑀯𑀸 𑀢𑁂 𑀘 𑀪𑀺𑀓𑁆𑀔𑀽 𑀦𑀺𑀕𑁆𑀕𑀳𑁂𑀢𑁆𑀯𑀸 𑀬𑀲𑀢𑁆𑀣𑁂𑀭𑀲𑀫𑀼𑀲𑁆𑀲𑀸𑀳𑀺𑀢𑁂𑀳𑀺 𑀯𑀲𑀺𑀕𑀡𑁂𑀳𑀺 𑀧𑀼𑀦 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀢𑁂 𑀢𑁂𑀳𑀺 𑀦𑀺𑀕𑁆𑀕𑀳𑀺𑀢𑀸 𑀤𑀲𑀲𑀳𑀲𑁆𑀲𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀓𑀜𑁆𑀘𑀺 𑀤𑀼𑀩𑁆𑀩𑀮𑀭𑀸𑀚𑀸𑀦𑀁 𑀩𑀮𑀁 𑀮𑀪𑀺𑀢𑁆𑀯𑀸 𑀫𑀽𑀮𑀲𑀗𑁆𑀕𑀳𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀦𑀸𑀘𑀸𑀭𑀸𑀦𑀼𑀓𑀽𑀮𑀯𑀘𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀜𑁆𑀘 𑀙𑀟𑁆𑀟𑁂𑀢𑁆𑀯𑀸 𑀫𑀳𑀸𑀲𑀗𑁆𑀕𑀻𑀢𑀻𑀳𑀺 𑀯𑀺𑀲𑀼𑀁 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀢𑁆𑀯𑀸 𑀫𑀳𑀸𑀲𑀗𑁆𑀖𑀺𑀓𑀸𑀘𑀭𑀺𑀬𑀓𑀼𑀮𑀁 𑀦𑀸𑀫 𑀅𑀓𑀁𑀲𑀼. 𑀧𑀭𑀺𑀲𑀼𑀤𑁆𑀥𑀲𑀸𑀲𑀦𑀁 𑀧𑀦 𑀣𑁂𑀭𑁂𑀳𑀺 𑀧𑀭𑀺𑀧𑀸𑀮𑀺𑀢𑀢𑁆𑀢𑀸 ‘‘𑀣𑁂𑀭𑀯𑀸𑀤𑁄’’𑀢𑀺 𑀧𑀜𑁆𑀜𑀸𑀬𑀺, 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀯𑀸𑀤𑁂𑀲𑀼 𑀫𑀳𑀸𑀲𑀗𑁆𑀖𑀺𑀓𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀏𑀓𑀩𑁆𑀬𑁄𑀳𑀸𑀭𑀺𑀓𑀸, 𑀕𑁄𑀓𑀼𑀮𑀺𑀓𑀸 𑀘, 𑀢𑀢𑁄 𑀧𑀡𑁆𑀡𑀢𑁆𑀢𑀺𑀯𑀸𑀤𑀸, 𑀩𑀳𑀼𑀮𑀺𑀬𑀸, 𑀘𑁂𑀢𑀺𑀬𑀯𑀸𑀤𑀸 𑀘𑀸𑀢𑀺 𑀧𑀜𑁆𑀘 𑀯𑀸𑀤𑀸, 𑀫𑀳𑀸𑀲𑀗𑁆𑀖𑀺𑀓𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀙 𑀆𑀘𑀭𑀺𑀬𑀓𑀼𑀮𑀸𑀦𑀺 𑀦𑀸𑀫 𑀚𑀸𑀢𑀸𑀦𑀺. 𑀢𑀣𑀸 𑀣𑁂𑀭𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀫𑀳𑀺𑀲𑀸𑀲𑀓𑀸, 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀘, 𑀢𑀢𑁄 𑀥𑀫𑁆𑀫𑀼𑀢𑁆𑀢𑀭𑀺𑀬𑀸, 𑀪𑀤𑁆𑀭𑀬𑀸𑀦𑀺𑀓𑀸, 𑀙𑀦𑁆𑀦𑀸𑀕𑀸𑀭𑀺𑀓𑀸, 𑀲𑀫𑁆𑀫𑀺𑀢𑀺𑀬𑀸 𑀘, 𑀫𑀳𑀺𑀲𑀸𑀲𑀓𑀢𑁄 𑀥𑀫𑁆𑀫𑀕𑀼𑀢𑁆𑀢𑀺𑀓𑀸, 𑀲𑀩𑁆𑀩𑀢𑁆𑀣𑀺𑀓𑀸 𑀘, 𑀢𑀢𑁄 𑀓𑀲𑁆𑀲𑀧𑀺𑀓𑀸, 𑀢𑀢𑁄 𑀲𑀗𑁆𑀓𑀦𑁆𑀢𑀺𑀓𑀸, 𑀢𑀢𑁄 𑀲𑀼𑀢𑁆𑀢𑀯𑀸𑀤𑀸 𑀘𑀸𑀢𑀺 𑀇𑀫𑁂 𑀏𑀓𑀸𑀤𑀲 𑀯𑀸𑀤𑀸 𑀚𑀸𑀢𑀸. 𑀢𑁂 𑀧𑀼𑀭𑀺𑀫𑁂𑀳𑀺 𑀙𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀭𑀲 𑀪𑀺𑀦𑁆𑀦𑀯𑀸𑀤𑀸 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀉𑀧𑁆𑀧𑀦𑁆𑀦𑀸, 𑀣𑁂𑀭𑀯𑀸𑀤𑁄 𑀧𑀦 𑀏𑀓𑁄𑀯 𑀅𑀲𑀫𑁆𑀪𑀺𑀦𑁆𑀦𑀓𑁄, 𑀢𑁂𑀦 𑀲𑀤𑁆𑀥𑀺𑀁 𑀲𑀸𑀲𑀦𑁂 𑀅𑀝𑁆𑀞𑀸𑀭𑀲 𑀦𑀺𑀓𑀸𑀬𑀸 𑀚𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑁂 ‘‘𑀅𑀝𑁆𑀞𑀸𑀭𑀲𑀸𑀘𑀭𑀺𑀬𑀓𑀼𑀮𑀸𑀦𑀻’’𑀢𑀺 𑀧𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂𑀲𑀁 𑀧𑀦 𑀅𑀝𑁆𑀞𑀸𑀭𑀲𑀦𑁆𑀦𑀁 𑀆𑀘𑀭𑀺𑀬𑀯𑀸𑀤𑀸𑀦𑀁 𑀯𑀲𑁂𑀦 𑀆𑀬𑀢𑀺𑀁 𑀲𑀸𑀲𑀦𑀲𑁆𑀲 𑀆𑀮𑀼𑀴𑀦𑀁 𑀜𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀅𑀘𑁆𑀘𑀬𑁂𑀦 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁂𑀦 𑀅𑀲𑁄𑀓𑁂𑀦 𑀥𑀫𑁆𑀫𑀭𑀜𑁆𑀜𑀸 𑀩𑀸𑀳𑀺𑀭𑀓𑁂 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀸𑀲𑀦𑁂 𑀏𑀯 𑀮𑀸𑀪𑀲𑀓𑁆𑀓𑀸𑀭𑁂 𑀧𑀯𑀢𑁆𑀢𑀦𑁆𑀢𑁂 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀸𑀬 𑀲𑀸𑀲𑀦𑀯𑁂𑀲𑀁 𑀕𑀳𑁂𑀢𑁆𑀯𑀸 𑀲𑀓𑀸𑀦𑀺 𑀲𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀢𑀣𑀢𑁄 𑀤𑀻𑀧𑁂𑀦𑁆𑀢𑁂𑀲𑀼 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀺𑀓𑁂𑀲𑀼 𑀬𑀣𑀸𑀯𑀼𑀢𑁆𑀢𑀲𑀢𑁆𑀢𑀭𑀲𑀸𑀘𑀭𑀺𑀬𑀓𑀼𑀮𑁂𑀲𑀼 𑀘 𑀲𑀫𑀬𑀓𑀼𑀲𑀮𑀢𑀸𑀬 𑀯𑀺𑀘𑀺𑀦𑀺𑀢𑁆𑀯𑀸 𑀲𑁂𑀢𑀓𑀸𑀦𑀺 𑀤𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑀺𑀢𑁂𑀲𑀼 𑀧𑀭𑀺𑀲𑀼𑀤𑁆𑀥𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀬𑀸𑀦𑀺 𑀢𑀤𑀸 𑀉𑀧𑁆𑀧𑀦𑁆𑀦𑀸𑀦𑀺 𑀯𑀢𑁆𑀣𑀽𑀦𑀺, 𑀬𑀸𑀦𑀺 𑀘 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀫𑀸𑀢𑀺𑀓𑀸𑀫𑀼𑀔𑀫𑀢𑁆𑀢𑁂𑀦 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀢𑁆𑀢𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀁 𑀧𑀭𑀧𑁆𑀧𑀯𑀸𑀤𑀫𑀣𑀦𑀁 𑀆𑀬𑀢𑀺𑀮𑀓𑁆𑀔𑀡𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀫𑀸𑀢𑀺𑀓𑀸𑀯𑀺𑀪𑀚𑀦𑀯𑀲𑁂𑀦 𑀪𑀸𑀲𑀺𑀢𑁆𑀯𑀸 𑀢𑀁 𑀢𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀆𑀮𑀼𑀴𑀺𑀢𑀁 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀓𑀸𑀲𑀦𑀢𑁆𑀣𑀁 𑀆𑀬𑀢𑀺𑀯𑀸𑀤𑀧𑁆𑀧𑀝𑀺𑀩𑀸𑀳𑀦𑀦𑀬𑀤𑀲𑁆𑀲𑀦𑀯𑀲𑁂𑀦 𑀇𑀫𑀁 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀁 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀑𑀓𑀸𑀲𑀁 𑀞𑀧𑁂𑀦𑁆𑀢𑁄 𑀢𑀲𑁆𑀲𑀸 𑀯𑀺𑀪𑀗𑁆𑀕𑀁 𑀦 𑀅𑀯𑁄𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀧𑀼𑀕𑁆𑀕𑀮𑁄𑀢𑀺 𑀅𑀢𑁆𑀢𑀸 𑀚𑀻𑀯𑁄 𑀲𑀢𑁆𑀢𑁄. 𑀉𑀧𑀮𑀩𑁆𑀪𑀢𑀻𑀢𑀺 𑀧𑀜𑁆𑀜𑀸𑀬 𑀉𑀧𑀕𑀦𑁆𑀢𑁆𑀯𑀸 𑀮𑀩𑁆𑀪𑀢𑀺, 𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀸𑀓𑀸𑀭𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑁄 𑀪𑀽𑀢𑀝𑁆𑀞𑁄. 𑀧𑀭𑀫𑀢𑁆𑀣𑁄𑀢𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑁄 𑀉𑀢𑁆𑀢𑀫𑀢𑁆𑀣𑁄. 𑀉𑀪𑀬𑁂𑀦𑀸𑀧𑀺 𑀬𑀣𑀸 𑀭𑀽𑀧𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑀸 𑀪𑀽𑀢𑁂𑀦 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀢𑀸𑀯 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀧𑀭𑀯𑀸𑀤𑀻 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀝𑀺𑀚𑀸𑀦𑀦𑀜𑁆𑀳𑀺 𑀓𑀢𑁆𑀣𑀘𑀺 ‘‘𑀆𑀫 𑀪𑀦𑁆𑀢𑁂’’𑀢𑀺 𑀆𑀕𑀘𑁆𑀙𑀢𑀺, 𑀓𑀢𑁆𑀣𑀘𑀺 ‘‘𑀆𑀫𑁄’’𑀢𑀺 𑀆𑀕𑀘𑁆𑀙𑀢𑀺, 𑀇𑀥 𑀧𑀦 ‘‘𑀆𑀫𑀦𑁆𑀢𑀸’’𑀢𑀺 𑀆𑀕𑀢𑀁. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀧𑀭𑀯𑀸𑀤𑀻 𑀳𑀺 𑀬𑀲𑁆𑀫𑀸 𑀪𑀕𑀯𑀢𑀸 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁯𑁫-𑁯𑁬) 𑀧𑀼𑀕𑁆𑀕𑀮𑁄 𑀧𑀓𑀸𑀲𑀺𑀢𑁄, 𑀪𑀕𑀯𑀸 𑀘 𑀅𑀯𑀺𑀢𑀣𑀯𑀸𑀤𑀻, 𑀢𑀲𑁆𑀫𑀸 𑀲𑁄 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑁂𑀯 𑀅𑀢𑁆𑀣𑀻’’𑀢𑀺 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺.

𑀅𑀣𑀲𑁆𑀲 𑀢𑀸𑀤𑀺𑀲𑀲𑁆𑀲 𑀮𑁂𑀲𑀯𑀘𑀦𑀲𑁆𑀲 𑀙𑀮𑀯𑀸𑀤𑀲𑁆𑀲 𑀑𑀓𑀸𑀲𑀁 𑀅𑀤𑀤𑀫𑀸𑀦𑁄 𑀲𑀓𑀯𑀸𑀤𑀻 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁆𑀯𑀸𑀬𑀁 𑀳𑁂𑀝𑁆𑀞𑀸 𑀭𑀽𑀧𑀯𑁂𑀤𑀦𑀸𑀤𑀺𑀓𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀆𑀕𑀢𑁄, 𑀦 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦, 𑀦𑀸𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑁄, 𑀅𑀢𑁆𑀢𑀦𑁄 𑀧𑀦 𑀪𑀽𑀢𑀢𑀸𑀬 𑀏𑀯 𑀲𑀘𑁆𑀘𑀺𑀓𑀝𑁆𑀞𑁄, 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬 𑀘 𑀧𑀭𑀫𑀢𑁆𑀣𑁄, 𑀲𑁄 𑀢𑀣𑀸𑀧𑀝𑀺𑀜𑁆𑀜𑀸𑀢𑁄 𑀧𑀼𑀕𑁆𑀕𑀮𑁄 𑀢𑀢𑁄 𑀢𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀆𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀺, 𑀬𑀣𑀸 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀦𑀸 𑀲𑀓𑀺𑀬𑁂𑀦𑀸𑀓𑀸𑀭𑁂𑀦 𑀧𑀼𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁄 𑀉𑀧𑀮𑀩𑁆𑀪𑀢𑀺, 𑀓𑀺𑀁 𑀢𑀯 𑀧𑀼𑀕𑁆𑀕𑀮𑁄𑀧𑀺 𑀏𑀯𑀁 𑀉𑀧𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂𑀢𑀺 𑀅𑀯𑀚𑀸𑀦𑀦𑀸 𑀧𑀭𑀯𑀸𑀤𑀺𑀲𑁆𑀲. 𑀲𑁄 𑀳𑀺 𑀢𑀣𑀸𑀭𑀽𑀧𑀁 𑀧𑀼𑀕𑁆𑀕𑀮𑀁 𑀅𑀦𑀺𑀘𑁆𑀙𑀦𑁆𑀢𑁄 𑀅𑀯𑀚𑀸𑀦𑀸𑀢𑀺. 𑀦 𑀳𑀺 𑀅𑀢𑁆𑀢𑀸 𑀦𑀸𑀫 𑀔𑀦𑁆𑀥𑀸𑀤𑀺𑀯𑀺𑀫𑀼𑀢𑁆𑀢𑁄 𑀓𑁄𑀘𑀺 𑀤𑀺𑀲𑁆𑀲𑀢𑀺 𑀅𑀜𑁆𑀜𑀢𑁆𑀭 𑀩𑁆𑀬𑀸𑀫𑁄𑀳𑀫𑀢𑁆𑀢𑀸. 𑀢𑀢𑁆𑀭𑀸𑀬𑀁 𑀧𑀤𑀘𑁆𑀙𑁂𑀤𑁄 𑁋 𑀦 𑀳𑀺 𑀏𑀯𑀁 𑀯𑀢𑁆𑀢𑀩𑁆𑀩𑁂𑀢𑀺. ‘‘𑀦 𑀳 𑀏𑀯’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀯𑀁 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺 𑀲𑀓𑀯𑀸𑀤𑀺𑀯𑀘𑀦𑀁. 𑀬𑀲𑁆𑀫𑀸 𑀢𑁂 𑀧𑀼𑀭𑀺𑀫𑀸𑀬 𑀯𑀢𑁆𑀢𑀩𑁆𑀩𑀧𑀝𑀺𑀜𑁆𑀜𑀸𑀬 𑀧𑀘𑁆𑀙𑀺𑀫𑀸 𑀦𑀯𑀢𑁆𑀢𑀩𑁆𑀩𑀧𑀝𑀺𑀜𑁆𑀜𑀸, 𑀧𑀘𑁆𑀙𑀺𑀫𑀸𑀬 𑀘 𑀧𑀼𑀭𑀺𑀫𑀸 𑀦 𑀲𑀦𑁆𑀥𑀻𑀬𑀢𑀺, 𑀢𑀲𑁆𑀫𑀸 𑀦𑀺𑀕𑁆𑀕𑀳𑀁 𑀧𑀢𑁆𑀢𑁄, 𑀢𑀁 𑀦𑀺𑀕𑁆𑀕𑀳𑀁 𑀤𑁄𑀲𑀁 𑀅𑀧𑀭𑀸𑀥𑀁 𑀆𑀚𑀸𑀦𑀸𑀳𑀺, 𑀲𑀫𑁆𑀧𑀝𑀺𑀘𑁆𑀙𑀸𑀳𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀦𑀺𑀕𑁆𑀕𑀳𑀁 𑀆𑀚𑀸𑀦𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀞𑀧𑀦𑀸𑀬 𑀘𑁂𑀯 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀦𑀜𑁆𑀘 𑀯𑀲𑁂𑀦 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀳𑀜𑁆𑀘𑀺 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀜𑁆𑀘𑀻𑀢𑀺 𑀬𑀤𑀺, 𑀲𑀘𑁂 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀸𑀯 𑀧𑀭𑀯𑀸𑀤𑀻𑀧𑀓𑁆𑀔𑀲𑁆𑀲 𑀅𑀦𑀼𑀯𑀤𑀦𑁂𑀦 𑀞𑀧𑀦𑀢𑁄 𑀦𑀺𑀕𑁆𑀕𑀳𑀧𑀢𑀺𑀝𑁆𑀞𑀸𑀧𑀦𑀢𑁄 𑀦𑀺𑀕𑁆𑀕𑀳𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀮𑀓𑁆𑀔𑀡𑀪𑀽𑀢𑀸 𑀅𑀦𑀼𑀮𑁄𑀫𑀝𑁆𑀞𑀧𑀦𑀸 𑀦𑀸𑀫. 𑀢𑁂𑀦 𑀯𑀢 𑀭𑁂𑀢𑀺𑀆𑀤𑀺 𑀅𑀦𑀼𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀧𑀸𑀧𑀺𑀓𑀢𑁆𑀢𑀸 𑀅𑀦𑀼𑀮𑁄𑀫𑀧𑀸𑀧𑀦𑀸 𑀦𑀸𑀫. 𑀢𑀢𑁆𑀣 𑀢𑁂𑀦𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀯𑀢𑀸𑀢𑀺 𑀑𑀓𑀧𑁆𑀧𑀦𑀯𑀘𑀦𑀁 𑀦𑀺𑀬𑀫𑀯𑀘𑀦𑀁. 𑀭𑁂𑀢𑀺 𑀆𑀫𑀦𑁆𑀢𑀦𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑀯𑀢 𑀭𑁂 𑀳𑀫𑁆𑀪𑁄 𑀪𑀤𑁆𑀭𑀫𑀼𑀔 𑀢𑁂𑀦 𑀓𑀸𑀭𑀡𑁂𑀦 𑀯𑀢𑁆𑀢𑀩𑁆𑀩𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀬𑀁 𑀢𑀢𑁆𑀣 𑀯𑀤𑁂𑀲𑀻𑀢𑀺𑀆𑀤𑀺 𑀅𑀦𑀼𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀆𑀭𑁄𑀧𑀺𑀢𑀢𑁆𑀢𑀸 𑀅𑀦𑀼𑀮𑁄𑀫𑀭𑁄𑀧𑀦𑀸 𑀦𑀸𑀫. 𑀬𑀜𑁆𑀘𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 ‘‘𑀫𑀺𑀘𑁆𑀙𑀸’’𑀢𑀺 𑀧𑀤𑀁, 𑀢𑀲𑁆𑀲 𑀧𑀼𑀭𑀢𑁄 ‘‘𑀇𑀤𑀁 𑀢𑁂’’𑀢𑀺 𑀆𑀳𑀭𑀺𑀢𑀩𑁆𑀩𑀁. 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀏𑀯𑀁 𑀉𑀧𑀭𑀺𑀧𑀺. 𑀧𑀭𑀢𑁄 𑀧𑀸𑀴𑀺𑀬𑀫𑁆𑀧𑀺 𑀏𑀢𑀁 𑀆𑀕𑀢𑀫𑁂𑀯. 𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂𑀢𑀺𑀆𑀤𑀺 ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀧𑀓𑁆𑀔𑀲𑁆𑀲 𑀅𑀦𑀼𑀯𑀤𑀦𑁂𑀦 𑀞𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀢𑁄 𑀦𑀺𑀕𑁆𑀕𑀳𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀮𑀓𑁆𑀔𑀡𑀪𑀽𑀢𑀸 𑀧𑀝𑀺𑀮𑁄𑀫𑀝𑁆𑀞𑀧𑀦𑀸 𑀦𑀸𑀫. 𑀦𑁄 𑀘 𑀯𑀢 𑀭𑁂𑀢𑀺𑀆𑀤𑀺 𑀧𑀝𑀺𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀧𑀸𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀧𑀸𑀧𑀦𑀸 𑀦𑀸𑀫. 𑀧𑀼𑀦 𑀬𑀁 𑀢𑀢𑁆𑀣 𑀯𑀤𑁂𑀲𑀻𑀢𑀺𑀆𑀤𑀺 𑀧𑀝𑀺𑀮𑁄𑀫𑀧𑀓𑁆𑀔𑁂 𑀦𑀺𑀕𑁆𑀕𑀳𑀲𑁆𑀲 𑀆𑀭𑁄𑀧𑀺𑀢𑀢𑁆𑀢𑀸 𑀧𑀝𑀺𑀮𑁄𑀫𑀭𑁄𑀧𑀦𑀸 𑀦𑀸𑀫.

𑀢𑀢𑁆𑀭𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀤𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀢𑁂𑀦 𑀯𑀢 𑀪𑁄 𑀲𑁄 𑀉𑀧𑀮𑀩𑁆𑀪𑀢𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀬𑀁 𑀧𑀦 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁄 𑀔𑁄 𑀧𑀼𑀭𑀺𑀫𑀧𑀜𑁆𑀳𑁂 ‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀻’𑀢𑀺 𑀦𑁄 𑀘 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀏𑀯𑀁 𑀢𑀸𑀯 𑀅𑀦𑀼𑀮𑁄𑀫𑀢𑁄 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁄𑀦𑁆𑀢𑀺.

𑀅𑀣 𑀦 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺, 𑀧𑀼𑀭𑀺𑀫𑀧𑀜𑁆𑀳𑁂𑀧𑀺 𑀦 𑀯𑀢𑁆𑀢𑀩𑁆𑀩𑁄𑀯. 𑀬𑀁 𑀧𑀦 𑀢𑀢𑁆𑀣 𑀯𑀤𑁂𑀲𑀺 ‘‘𑀯𑀢𑁆𑀢𑀩𑁆𑀩𑁄 𑀔𑁄 𑀧𑀼𑀭𑀺𑀫𑀧𑀜𑁆𑀳𑁂 ‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀻’𑀢𑀺, 𑀦𑁄 𑀘 𑀯𑀢𑁆𑀢𑀩𑁆𑀩𑁄 𑀤𑀼𑀢𑀺𑀬𑀧𑀜𑁆𑀳𑁂 ‘𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’’𑀢𑀺, 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀏𑀯𑀁 𑀧𑀝𑀺𑀮𑁄𑀫𑀢𑁄 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀢𑀁 𑀦𑀺𑀕𑁆𑀕𑀳𑀲𑁆𑀲 𑀘 𑀅𑀦𑀼𑀮𑁄𑀫𑀢𑁄 𑀤𑁆𑀯𑀺𑀦𑁆𑀦𑀁, 𑀧𑀝𑀺𑀮𑁄𑀫𑀢𑁄 𑀤𑁆𑀯𑀺𑀦𑁆𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀧𑀸𑀧𑀦𑀸𑀭𑁄𑀧𑀦𑀸𑀦𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀁 𑀅𑀦𑀼𑀮𑁄𑀫𑀧𑀜𑁆𑀘𑀓𑀁 𑀦𑀸𑀫. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀅𑀦𑀼𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀏𑀓𑁄, 𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀏𑀓𑁄𑀢𑀺 𑀤𑁆𑀯𑁂 𑀦𑀺𑀕𑁆𑀕𑀳𑀸 𑀓𑀢𑀸, 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺 𑀏𑀢𑀲𑁆𑀲𑁂𑀯 𑀧𑀦 𑀧𑀞𑀫𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀆𑀭𑁄𑀧𑀺𑀢𑀢𑁆𑀢𑀸 𑀏𑀓𑁄𑀯𑀸𑀬𑀁 𑀦𑀺𑀕𑁆𑀕𑀳𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀧𑀞𑀫𑁄 𑀦𑀺𑀕𑁆𑀕𑀳𑁄.

𑀇𑀤𑀸𑀦𑀺 𑀧𑀘𑁆𑀘𑀦𑀻𑀓𑀦𑀬𑁄 𑀳𑁄𑀢𑀺. 𑀢𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀓𑀯𑀸𑀤𑀻 𑀬𑀣𑀸 𑀭𑀽𑀧𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀦 𑀇𑀢𑀭𑁄 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀲𑀘𑁆𑀘𑀺𑀓𑀝𑁆𑀞𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀯𑀸 𑀏𑀓𑀢𑁄 𑀓𑀢𑁆𑀯𑀸𑀧𑀺 𑀧𑀭𑀯𑀸𑀤𑀻 𑀏𑀯𑀫𑀸𑀳. 𑀲𑀓𑀯𑀸𑀤𑀻 𑀧𑀼𑀕𑁆𑀕𑀮𑁄 𑀳𑀺 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺𑀲𑀩𑁆𑀪𑀸𑀯𑀢𑁄𑀧𑀺 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀢𑁆𑀢𑀸𑀧𑀺 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀤𑀸𑀦𑀺 𑀓𑀺𑀜𑁆𑀘𑀸𑀧𑀺 𑀢𑁂𑀦 𑀧𑀞𑀫𑀁 𑀧𑀭𑀫𑀢𑁆𑀣𑀲𑀘𑁆𑀘𑀯𑀲𑁂𑀦 𑀦𑀼𑀧𑀮𑀩𑁆𑀪𑀦𑀻𑀬𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀸, 𑀧𑀘𑁆𑀙𑀸 𑀧𑀦 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀯𑀸 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀧𑀭𑀯𑀸𑀤𑀻 𑀧𑀦 ‘‘𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬 ‘‘𑀬𑀁 𑀢𑀬𑀸 𑀧𑀞𑀫𑀁 𑀧𑀝𑀺𑀜𑁆𑀜𑀸𑀢𑀁, 𑀢𑀁 𑀧𑀘𑁆𑀙𑀸 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀪𑀡𑁆𑀟𑀦𑀲𑁆𑀲 𑀧𑀝𑀺𑀪𑀡𑁆𑀟𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀓𑀢𑀲𑁆𑀲 𑀦𑀺𑀕𑁆𑀕𑀳𑀓𑀫𑁆𑀫𑀲𑁆𑀲 𑀧𑀝𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 ‘‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’’𑀦𑁆𑀢𑀺 𑀆𑀳. 𑀇𑀤𑀸𑀦𑀺 𑀬𑀣𑀸𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀲𑀓𑀯𑀸𑀤𑀺𑀦𑀸 𑀯𑀸𑀤𑀝𑁆𑀞𑀧𑀦𑀁 𑀓𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀧𑀭𑀯𑀸𑀤𑀺𑀦𑀺𑀕𑁆𑀕𑀳𑁄 𑀧𑀸𑀓𑀝𑁄 𑀓𑀢𑁄, 𑀏𑀯𑀁 𑀧𑀝𑀺𑀓𑀫𑁆𑀫𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀳𑀜𑁆𑀘𑀺 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀞𑀧𑀦𑀸 𑀦𑀸𑀫 𑀧𑀭𑀯𑀸𑀤𑀺𑀧𑀓𑁆𑀔𑀲𑁆𑀲 𑀞𑀧𑀦𑀢𑁄 ‘‘𑀅𑀬𑀁 𑀢𑀯 𑀤𑁄𑀲𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀦𑀺𑀕𑁆𑀕𑀳𑀲𑁆𑀲 𑀯𑀸 𑀧𑀝𑀺𑀓𑀫𑁆𑀫𑀲𑁆𑀲 𑀯𑀸 𑀧𑀸𑀓𑀝𑀻𑀪𑀸𑀯𑀓𑀭𑀡𑀁, 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀧𑀦𑀲𑁆𑀲 𑀧𑀸𑀓𑀝𑀻𑀓𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀸𑀧𑀦𑀸𑀭𑁄𑀧𑀦𑀸𑀦𑀁 𑀯𑀲𑁂𑀦 𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀝𑀺𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀁 𑀦𑀸𑀫𑀸𑀢𑀺 𑀏𑀓𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀧𑀝𑀺𑀓𑀫𑁆𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀬𑁆𑀯𑀸𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀲𑀓𑀯𑀸𑀤𑀺𑀦𑀸 𑀦𑀺𑀕𑁆𑀕𑀳𑁄 𑀓𑀢𑁄, 𑀢𑀲𑁆𑀲 𑀢𑀫𑁂𑀯 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀓𑀝𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁆𑀯𑀁 𑀘𑁂 𑀧𑀦 𑀫𑀜𑁆𑀜𑀲𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁆𑀯𑀁 𑀘𑁂 𑀧𑀦 𑀫𑀜𑁆𑀜𑀲𑀻𑀢𑀺 𑀬𑀤𑀺 𑀢𑁆𑀯𑀁 𑀫𑀜𑁆𑀜𑀲𑀺. ‘‘𑀯𑀢𑁆𑀢𑀩𑁆𑀩𑁂 𑀔𑁄’’𑀢𑀺 𑀇𑀤𑀁 𑀧𑀘𑁆𑀘𑀦𑀻𑀓𑁂 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀦𑁄 𑀘 𑀯𑀢𑁆𑀢𑀩𑁆𑀩𑁂’’𑀢𑀺 𑀇𑀤𑀁 𑀧𑀦 ‘‘𑀦 𑀳𑁂𑀯𑀸’’𑀢𑀺 𑀅𑀯𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦 𑀢𑀯 𑀢𑀢𑁆𑀣𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁𑀬𑁂𑀯 𑀢𑀲𑁆𑀫𑀺𑀁 ‘‘𑀬𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀧𑀓𑁆𑀔𑁂 𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑁄. 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂𑀢𑀺 𑀧𑀼𑀦 ‘‘𑀦 𑀳𑁂𑀯𑀸’’𑀢𑀺 𑀅𑀯𑀚𑀸𑀦𑀦𑁆𑀢𑁄 𑀏𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀅𑀣 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀅𑀣𑁂𑀯𑀁 𑀦𑀺𑀕𑁆𑀕𑀡𑁆𑀳𑀦𑀸𑀭𑀳𑀁 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫, 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀳𑁄𑀲𑀻𑀢𑀺 𑀲𑀓𑁂𑀦 𑀫𑀢𑁂𑀦 𑀦𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀪𑀯𑀲𑀺. 𑀏𑀯𑀫𑀲𑁆𑀲 𑀦𑀺𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 ‘‘𑀳𑀜𑁆𑀘𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀧𑀦𑀸𑀧𑀸𑀧𑀦𑀸𑀭𑁄𑀧𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀇𑀤𑀁 𑀢𑀯 𑀯𑀘𑀦𑀁 𑀫𑀺𑀘𑁆𑀙𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀙𑀮𑀯𑀸𑀤𑁂𑀦 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀦𑀺𑀕𑁆𑀕𑀳𑀲𑁆𑀲 𑀓𑀢𑀢𑁆𑀢𑀸 𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀁 𑀦𑀸𑀫.

𑀏𑀯𑀁 𑀦𑀺𑀕𑁆𑀕𑀳𑀁 𑀓𑀢𑁆𑀯𑀸𑀧𑀺 𑀇𑀤𑀸𑀦𑀺 ‘‘𑀬𑀤𑀺 𑀅𑀬𑀁 𑀫𑀬𑀸 𑀢𑀯 𑀫𑀢𑁂𑀦 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀬𑁄𑀧𑀺 𑀫𑀫 𑀢𑀬𑀸 𑀳𑁂𑀝𑁆𑀞𑀸 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀓𑀢𑁄 𑀦𑀺𑀕𑁆𑀕𑀳𑁄, 𑀲𑁄𑀧𑀺 𑀤𑀼𑀦𑁆𑀦𑀺𑀕𑁆𑀕𑀳𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀲𑁂 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑁂 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂𑀢𑀺 𑀏𑀲𑁄 𑀘𑁂 𑀢𑀯 𑀯𑀸𑀤𑁄 𑀫𑀬𑀸 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁄, 𑀅𑀣 𑀯𑀸 𑀏𑀲𑁄 𑀘𑁂 𑀢𑀯 𑀫𑀬𑀸 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄. 𑀳𑁂𑀯𑀫𑁂𑀯𑀁 𑀢𑀢𑁆𑀣 𑀤𑀓𑁆𑀔𑀸𑀢𑀺 𑀢𑀢𑁆𑀣𑀸𑀧𑀺 𑀢𑀬𑀸 𑀫𑀫 𑀳𑁂𑀝𑁆𑀞𑀸 𑀓𑀢𑁂 𑀦𑀺𑀕𑁆𑀕𑀳𑁂 𑀏𑀯𑀫𑁂𑀯𑀁 𑀧𑀲𑁆𑀲. 𑀇𑀤𑀸𑀦𑀺 𑀬𑁆𑀯𑀸𑀲𑁆𑀲 𑀳𑁂𑀝𑁆𑀞𑀸 𑀲𑀓𑀯𑀸𑀤𑀺𑀦𑀸 𑀦𑀺𑀕𑁆𑀕𑀳𑁄 𑀓𑀢𑁄, 𑀢𑀁 ‘‘𑀯𑀢𑁆𑀢𑀩𑁆𑀩𑁂 𑀔𑁄’’𑀢𑀺𑀆𑀤𑀺𑀯𑀘𑀦𑁂𑀦 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁 𑀦𑀺𑀕𑁆𑀕𑀳𑀁 𑀅𑀦𑀺𑀕𑁆𑀕𑀳𑀪𑀸𑀯𑀁 𑀉𑀧𑀦𑁂𑀦𑁆𑀢𑁄 ‘‘𑀦𑁄 𑀘 𑀫𑀬𑀁 𑀢𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁄 𑀘 𑀫𑀬𑀁 𑀢𑀬𑀸 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬𑀸𑀢𑀺𑀆𑀤𑀻𑀲𑀼 𑀅𑀬𑀫𑀢𑁆𑀣𑁄 𑁋 𑀬𑀲𑁆𑀫𑀸 𑀲𑁄 𑀢𑀬𑀸 𑀫𑀫 𑀓𑀢𑁄 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀢𑀲𑁆𑀫𑀸 𑀫𑀬𑀁 𑀢𑀬𑀸 𑀢𑀢𑁆𑀣 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 ‘‘𑀆𑀫𑀦𑁆𑀢𑀸’’𑀢𑀺 𑀏𑀢𑀸𑀬 𑀧𑀝𑀺𑀜𑁆𑀜𑀸𑀬 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑀸 𑀧𑀼𑀦 ‘‘𑀦 𑀳𑁂𑀯𑀸’’𑀢𑀺 𑀧𑀝𑀺𑀓𑁆𑀔𑁂𑀧𑁂 𑀓𑀢𑁂𑀧𑀺 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀏𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀸𑀬𑁂𑀯, 𑀏𑀯𑀁 𑀅𑀦𑀺𑀕𑁆𑀕𑀳𑁂𑀢𑀩𑁆𑀩𑀫𑁆𑀧𑀺 𑀫𑀁 𑀦𑀺𑀕𑁆𑀕𑀡𑁆𑀳𑀸𑀲𑀺, 𑀈𑀤𑀺𑀲𑁂𑀦 𑀧𑀦 𑀦𑀺𑀕𑁆𑀕𑀳𑁂𑀦 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀫𑀬𑀁 𑀳𑁄𑀫. 𑀇𑀤𑀸𑀦𑀺 𑀬𑀁 𑀦𑀺𑀕𑁆𑀕𑀳𑀁 𑀲𑀦𑁆𑀥𑀸𑀬 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀘 𑀳𑁄𑀫𑀸𑀢𑀺 𑀅𑀯𑁄𑀘, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀜𑁆𑀘𑀺 𑀧𑀼𑀕𑁆𑀕𑀮𑁄…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸’’𑀢𑀺 𑀆𑀳. 𑀏𑀯𑀫𑀺𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀦𑀺𑀕𑁆𑀕𑀳𑀲𑁆𑀲 𑀉𑀧𑀦𑀻𑀢𑀢𑁆𑀢𑀸 𑀉𑀧𑀦𑀬𑀦𑀘𑀢𑀼𑀓𑁆𑀓𑀁 𑀦𑀸𑀫 𑀳𑁄𑀢𑀺.

𑀇𑀤𑀸𑀦𑀺 𑀦 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂𑀢𑀺𑀆𑀤𑀺𑀓𑀁 𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀁 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀦 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂𑀢𑀺 𑀬𑀣𑀸𑀳𑀁 𑀢𑀬𑀸 𑀦𑀺𑀕𑁆𑀕𑀳𑀺𑀢𑁄, 𑀦 𑀳𑀺 𑀏𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄, 𑀏𑀢𑀲𑁆𑀲 𑀳𑀺 𑀦𑀺𑀕𑁆𑀕𑀳𑀲𑁆𑀲 𑀤𑀼𑀦𑁆𑀦𑀺𑀕𑁆𑀕𑀳𑀪𑀸𑀯𑁄 𑀫𑀬𑀸 𑀲𑀸𑀥𑀺𑀢𑁄. 𑀢𑁂𑀦 𑀳𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀬𑀲𑁆𑀫𑀸 𑀏𑀲 𑀦𑀺𑀕𑁆𑀕𑀳𑁄 𑀤𑀼𑀦𑁆𑀦𑀺𑀕𑁆𑀕𑀳𑁄, 𑀢𑀲𑁆𑀫𑀸 𑀬𑀁 𑀫𑀁 𑀦𑀺𑀕𑁆𑀕𑀡𑁆𑀳𑀸𑀲𑀺. 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀇𑀤𑀁 𑀦𑀺𑀕𑁆𑀕𑀡𑁆𑀳𑀦𑀁 𑀢𑀯 𑀫𑀺𑀘𑁆𑀙𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀬𑁂 𑀓𑀢𑁂 𑀦𑀺𑀕𑁆𑀕𑀳𑁂𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀇𑀤𑀁 𑀫𑀺𑀘𑁆𑀙𑀸, 𑀢𑁂𑀦 𑀓𑀸𑀭𑀡𑁂𑀦 𑀬𑁄 𑀢𑀬𑀸 𑀦𑀺𑀕𑁆𑀕𑀳𑁄 𑀓𑀢𑁄, 𑀲𑁄 𑀤𑀼𑀓𑁆𑀓𑀝𑁄. 𑀬𑀁 𑀫𑀬𑀸 𑀧𑀝𑀺𑀓𑀫𑁆𑀫𑀁 𑀓𑀢𑀁, 𑀢𑀤𑁂𑀯 𑀲𑀼𑀓𑀢𑀁. 𑀬𑀸𑀧𑀺 𑀘𑁂𑀲𑀸 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀺𑀯𑀲𑁂𑀦 𑀓𑀣𑀸𑀫𑀕𑁆𑀕𑀲𑀫𑁆𑀧𑀝𑀺𑀧𑀸𑀤𑀦𑀸 𑀓𑀢𑀸, 𑀲𑀸𑀧𑀺 𑀲𑀼𑀓𑀢𑀸𑀢𑀺. 𑀢𑀤𑁂𑀯 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀲𑁆𑀲 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 𑀦𑀼𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀸𑀦𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀲𑀓𑀯𑀸𑀤𑀺𑀦𑁄 𑀧𑀼𑀩𑁆𑀩𑀧𑀓𑁆𑀔𑁂 𑀲𑀢𑀺 𑀧𑀭𑀯𑀸𑀤𑀺𑀦𑁄 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑁂𑀦 𑀙𑀮𑀯𑀸𑀤𑁂𑀦 𑀚𑀬𑁄 𑀳𑁄𑀢𑀺.

𑀇𑀤𑀸𑀦𑀺 𑀬𑀣𑀸 𑀧𑀭𑀯𑀸𑀤𑀺𑀦𑁄 𑀧𑀼𑀩𑁆𑀩𑀧𑀓𑁆𑀔𑁂 𑀲𑀢𑀺 𑀲𑀓𑀯𑀸𑀤𑀺𑀦𑁄 𑀥𑀫𑁆𑀫𑁂𑀦𑁂𑀯 𑀢𑀣𑁂𑀦 𑀚𑀬𑁄 𑀳𑁄𑀢𑀺, 𑀢𑀣𑀸 𑀯𑀸𑀤𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀘𑁆𑀘𑀦𑀻𑀓𑁂 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀭𑀽𑀧𑀸𑀤𑀺𑀪𑁂𑀤𑀁 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲, 𑀲𑀼𑀤𑁆𑀥𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀯𑀸 𑀧𑀭𑀫𑀢𑁆𑀣𑀫𑀺𑀲𑁆𑀲𑀓𑀁 𑀯𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺 𑀧𑀼𑀦 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲, 𑀲𑀫𑁆𑀫𑀼𑀢𑀺𑀯𑀲𑁂𑀦 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀦𑀯𑀢𑁆𑀢𑀩𑁆𑀩𑀢𑁆𑀢𑀸 𑀫𑀺𑀲𑁆𑀲𑀓𑀯𑀲𑁂𑀦 𑀯𑀸 𑀅𑀦𑀼𑀬𑁄𑀕𑀲𑁆𑀲 𑀲𑀁𑀓𑀺𑀡𑁆𑀡𑀢𑁆𑀢𑀸 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑁂𑀦 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀧𑀭𑀯𑀸𑀤𑀺𑀲𑁆𑀲. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻𑀢𑀺 𑀤𑀼𑀢𑀺𑀬𑀯𑀸𑀤𑀁 𑀦𑀺𑀲𑁆𑀲𑀸𑀬 𑀤𑀼𑀢𑀺𑀬𑁄 𑀦𑀺𑀕𑁆𑀕𑀳𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀢𑁂𑀦 𑀙𑀮𑁂𑀦 𑀦𑀺𑀕𑁆𑀕𑀳𑁄 𑀆𑀭𑁄𑀧𑀺𑀢𑁄.

𑀇𑀤𑀸𑀦𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑀯𑀸𑀤𑀺𑀧𑀝𑀺𑀜𑁆𑀜𑀸𑀬 𑀅𑀢𑁆𑀢𑀦𑁄 𑀯𑀸𑀤𑁂 𑀚𑀬𑀁 𑀤𑀲𑁆𑀲𑁂𑀢𑀼𑀁 𑀅𑀦𑀼𑀮𑁄𑀫𑀦𑀬𑁂 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀬𑀸 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀧𑀭𑀫𑀢𑁆𑀣𑀯𑀲𑁂𑀦 𑀧𑀼𑀦 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀭𑀫𑀢𑁆𑀣𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲, 𑀢𑀢𑁄 𑀧𑀭𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀢𑁆𑀢𑀦𑁄 𑀚𑀬𑀤𑀲𑁆𑀲𑀦𑀢𑁆𑀣𑀁 ‘‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀲𑀓𑀯𑀸𑀤𑀺𑀯𑀘𑀦𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀺𑀤𑀁 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑀲𑁆𑀲 ‘‘𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀻𑀦𑀁 𑀧𑀝𑀺𑀓𑀫𑁆𑀫𑀦𑀺𑀕𑁆𑀕𑀳𑁄𑀧𑀦𑀬𑀦𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺. 𑀏𑀯𑀫𑁂𑀢𑀸𑀦𑀺 𑀧𑀞𑀫𑀲𑀘𑁆𑀘𑀺𑀓𑀝𑁆𑀞𑁂 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀦𑀺𑀕𑁆𑀕𑀳𑁄 𑀧𑀭𑀯𑀸𑀤𑀺𑀲𑁆𑀲, 𑀲𑀼𑀤𑁆𑀥𑁄 𑀧𑀞𑀫𑀧𑀜𑁆𑀘𑀓𑁂;

𑀅𑀲𑀼𑀤𑁆𑀥𑁄 𑀧𑀦 𑀢𑀲𑁆𑀲𑁂𑀯, 𑀧𑀝𑀺𑀓𑀫𑁆𑀫𑀚𑀬𑁄 𑀢𑀳𑀺𑀁.

‘‘𑀦𑀺𑀕𑁆𑀕𑀳𑁄 𑀲𑀓𑀯𑀸𑀤𑀺𑀲𑁆𑀲, 𑀅𑀲𑀼𑀤𑁆𑀥𑁄 𑀤𑀼𑀢𑀺𑀬𑀧𑀜𑁆𑀘𑀓𑁂;

𑀯𑀺𑀲𑀼𑀤𑁆𑀥𑁄 𑀧𑀦 𑀢𑀲𑁆𑀲𑁂𑀯, 𑀧𑀝𑀺𑀓𑀫𑁆𑀫𑀚𑀬𑁄 𑀢𑀳𑀺𑀁.

‘‘𑀢𑀲𑁆𑀫𑀸 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼, 𑀚𑀬𑁄𑀯 𑀲𑀓𑀯𑀸𑀤𑀺𑀦𑁄;

𑀥𑀫𑁆𑀫𑁂𑀦 𑀳𑀺 𑀚𑀬𑁄 𑀦𑀸𑀫, 𑀅𑀥𑀫𑁆𑀫𑁂𑀦 𑀓𑀼𑀢𑁄 𑀚𑀬𑁄.

‘‘𑀲𑀘𑁆𑀘𑀺𑀓𑀝𑁆𑀞𑁂 𑀬𑀣𑀸 𑀘𑁂𑀢𑁆𑀣, 𑀧𑀜𑁆𑀘𑀓𑀤𑁆𑀯𑀬𑀫𑀡𑁆𑀟𑀺𑀢𑁂;

𑀥𑀫𑁆𑀫𑀸𑀥𑀫𑁆𑀫𑀯𑀲𑁂𑀦𑁂𑀯, 𑀯𑀼𑀢𑁆𑀢𑁄 𑀚𑀬𑀧𑀭𑀸𑀚𑀬𑁄.

‘‘𑀇𑀢𑁄 𑀧𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀲𑀘𑁆𑀘𑀺𑀓𑀝𑁆𑀞𑁂𑀲𑀼 𑀧𑀡𑁆𑀟𑀺𑀢𑁄;

𑀏𑀯𑀫𑁂𑀯 𑀯𑀺𑀪𑀸𑀯𑁂𑀬𑁆𑀬, 𑀉𑀪𑁄 𑀚𑀬𑀧𑀭𑀸𑀚𑀬𑁂’’𑀢𑀺. (𑀓𑀣𑀸. 𑀅𑀝𑁆𑀞. 𑁭-𑁧𑁦);

𑀧𑀞𑀫𑁄 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑁄 𑀦𑀺𑀝𑁆𑀞𑀺𑀢𑁄.

𑀏𑀯𑀁 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀅𑀧𑀭𑁂𑀳𑀺𑀧𑀺 𑀑𑀓𑀸𑀲𑀸𑀤𑀻𑀳𑀺 𑀦𑀬𑁂𑀳𑀺 𑀯𑀺𑀢𑁆𑀣𑀸𑀭𑁂𑀢𑀼𑀁 𑀧𑀼𑀦 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀲𑀩𑁆𑀩𑀢𑁆𑀣𑀸𑀢𑀺 𑀲𑀭𑀻𑀭𑀁 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀤𑁄𑀲𑀜𑁆𑀘 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀆𑀧𑀚𑁆𑀚𑀦𑀤𑁄𑀲𑀜𑁆𑀘 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀞𑁄 𑀧𑀦 𑀲𑀁𑀔𑀺𑀢𑁆𑀢𑁄. 𑀢𑀢𑁆𑀣 𑀬𑀲𑁆𑀫𑀸 𑀲𑀭𑀻𑀭𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀢𑁆𑀣 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀭𑀻𑀭𑀢𑁄 𑀩𑀳𑀺 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲, 𑀧𑀞𑀫𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀅𑀯𑀚𑀸𑀦𑀸𑀢𑀻𑀢𑀺 𑀙𑀮𑀯𑀸𑀤𑀲𑁆𑀲 𑀯𑀲𑁂𑀦 𑀧𑀝𑀺𑀓𑀫𑁆𑀫𑀁 𑀧𑀭𑀯𑀸𑀤𑀺𑀲𑁆𑀲, 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀤𑀼𑀢𑀺𑀬𑀦𑀬𑁂 𑀲𑀩𑁆𑀩𑀤𑀸𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑀜𑁆𑀘 𑀥𑀭𑀫𑀸𑀦𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑀜𑁆𑀘 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲, 𑀲𑁆𑀯𑁂𑀯 𑀔𑀢𑁆𑀢𑀺𑀬𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄𑀢𑀺𑀆𑀤𑀻𑀦𑀁 𑀆𑀧𑀢𑁆𑀢𑀺𑀤𑁄𑀲𑀜𑁆𑀘 𑀥𑀭𑀫𑀸𑀦𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀯𑀺𑀲𑁂𑀲𑀸𑀪𑀸𑀯𑀤𑁄𑀲𑀜𑁆𑀘 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀧𑀞𑀫𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀢𑀢𑀺𑀬𑀦𑀬𑁂 𑀲𑀩𑁆𑀩𑁂𑀲𑀽𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸, 𑀘𑀓𑁆𑀔𑀼𑀲𑁆𑀫𑀺𑀁 𑀅𑀢𑁆𑀢𑀸𑀢𑀺𑀆𑀤𑀺𑀤𑁄𑀲𑀪𑀬𑁂𑀦 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀏𑀯𑀫𑀺𑀫𑀸𑀦𑀺 𑀢𑀻𑀡𑀺 𑀫𑀼𑀔𑀸𑀦𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁂 𑀅𑀦𑀼𑀮𑁄𑀫𑀫𑀢𑁆𑀢𑀯𑀲𑁂𑀦𑁂𑀯 𑀢𑀸𑀯 𑀧𑀝𑀺𑀧𑀸𑀝𑀺𑀬𑀸 𑀪𑀸𑀚𑁂𑀢𑁆𑀯𑀸 𑀧𑀼𑀦 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑁂 𑀧𑀘𑁆𑀘𑀦𑀻𑀓𑀫𑀢𑁆𑀢𑀯𑀲𑁂𑀦𑁂𑀯 𑀪𑀸𑀚𑁂𑀢𑀼𑀁 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀲𑀼𑀤𑁆𑀥𑀺𑀓𑀲𑁆𑀲 𑀘𑁂𑀯 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀺𑀓𑀝𑁆𑀞𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀲𑀘𑁆𑀘𑀺𑀓𑀝𑁆𑀞𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀲𑁆𑀲, 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀦𑀻𑀓𑀸𑀦𑀁 𑀯𑀲𑁂𑀦 𑀅𑀬𑀁 𑀅𑀝𑁆𑀞𑀫𑀼𑀔𑀸 𑀦𑀸𑀫 𑀯𑀸𑀤𑀬𑀼𑀢𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀏𑀓𑁂𑀓𑀲𑁆𑀫𑀺𑀁 𑀫𑀼𑀔𑁂 𑀏𑀓𑁂𑀓𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀯𑀲𑁂𑀦 𑀯𑀼𑀘𑁆𑀘𑀢𑀺. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀯𑀁 𑀘𑀢𑀼𑀩𑁆𑀩𑀺𑀥𑁂 𑀧𑀜𑁆𑀳𑁂, 𑀧𑀜𑁆𑀘𑀓𑀤𑁆𑀯𑀬𑀪𑁂𑀤𑀢𑁄;

𑀏𑀲𑀸 𑀅𑀝𑁆𑀞𑀫𑀼𑀔𑀸 𑀦𑀸𑀫, 𑀯𑀸𑀤𑀬𑀼𑀢𑁆𑀢𑀺 𑀧𑀓𑀸𑀲𑀺𑀢𑀸.

‘‘𑀅𑀝𑁆𑀞𑁂𑀯 𑀦𑀺𑀕𑁆𑀕𑀳𑀸 𑀢𑀢𑁆𑀣, 𑀘𑀢𑁆𑀢𑀸𑀭𑁄 𑀢𑁂𑀲𑀼 𑀥𑀫𑁆𑀫𑀺𑀓𑀸;

𑀅𑀥𑀫𑁆𑀫𑀺𑀓𑀸 𑀘 𑀘𑀢𑁆𑀢𑀸𑀭𑁄, 𑀲𑀩𑁆𑀩𑀢𑁆𑀣 𑀲𑀓𑀯𑀸𑀤𑀺𑀦𑁄;

𑀚𑀬𑁄 𑀧𑀭𑀸𑀚𑀬𑁄 𑀘𑁂𑀯, 𑀲𑀩𑁆𑀩𑀢𑁆𑀣 𑀧𑀭𑀯𑀸𑀤𑀺𑀦𑁄’’𑀢𑀺. (𑀓𑀣𑀸. 𑀅𑀝𑁆𑀞. 𑁧𑁪);

𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀲𑀁𑀯𑀡𑁆𑀡𑀦𑀸.

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣𑀸𑀧𑀺 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀓𑀢𑀦𑀺𑀤𑁆𑀤𑁂𑀲𑀲𑁆𑀲 𑀦𑀬𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀯𑀲𑁂𑀦𑁂𑀯 𑀳𑁄𑀢𑀺. 𑀣𑁂𑀭𑁂𑀦 𑀳𑀺 𑀪𑀕𑀯𑀢𑀸 𑀞𑀧𑀺𑀢𑀸𑀬 𑀏𑀢𑀺𑀲𑁆𑀲𑀸 𑀫𑀸𑀢𑀺𑀓𑀸𑀬 𑀧𑀤𑀼𑀤𑁆𑀥𑀸𑀭𑀯𑀲𑁂𑀦 𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 𑀪𑀕𑀯𑀢𑀸 𑀤𑀺𑀦𑁆𑀦𑀅𑀝𑁆𑀞𑀫𑀼𑀔𑀯𑀸𑀤𑀬𑀼𑀢𑁆𑀢𑀺𑀦𑀬𑁂 𑀞𑀢𑁆𑀯𑀸 𑀅𑀧𑀭𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀼𑀕𑁆𑀕𑀮𑀯𑀸𑀤𑀁, 𑀢𑀤𑀜𑁆𑀜𑀁 𑀦𑀸𑀦𑀧𑁆𑀧𑀓𑀸𑀭𑀁 𑀫𑀺𑀘𑁆𑀙𑀸𑀕𑀸𑀳𑀜𑁆𑀘 𑀦𑀺𑀭𑀸𑀓𑀭𑁄𑀦𑁆𑀢𑁂𑀦𑁂𑀯 𑀧𑀼𑀕𑁆𑀕𑀮𑀓𑀣𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀸𑀥𑀺𑀓𑀤𑁆𑀯𑀺𑀲𑀢𑀓𑀣𑀸𑀳𑀺 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀢𑀢𑁆𑀣 𑀧𑀼𑀕𑁆𑀕𑀮𑀯𑀸𑀤𑀦𑀺𑀭𑀸𑀓𑀭𑀡𑀢𑁆𑀣𑀁 𑀢𑀸𑀯 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀥𑀫𑁆𑀫𑁂𑀲𑀼 𑀏𑀓𑁂𑀓𑁂𑀦 𑀲𑀤𑁆𑀥𑀺𑀁 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀭𑀽𑀧𑀜𑁆𑀘 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦…𑀧𑁂… 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦, 𑀯𑁂𑀤𑀦𑀸𑀧𑀺 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀯𑀲𑀧𑁆𑀧𑀯𑀢𑁆𑀢𑀁 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀁, 𑀬𑀣𑀸 𑀭𑀽𑀧𑀯𑁂𑀤𑀦𑀸𑀤𑀬𑁄 𑀲𑀢𑁆𑀢𑀧𑀜𑁆𑀜𑀸𑀲 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀸 𑀯𑀺𑀲𑀤𑀺𑀲𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀭𑀽𑀧𑀸𑀤𑀻𑀳𑀺 𑀯𑀺𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀼𑀘𑁆𑀙𑀦𑀯𑀲𑀧𑁆𑀧𑀯𑀢𑁆𑀢𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁, ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄, 𑀭𑀽𑀧𑀲𑁆𑀫𑀺𑀁 𑀧𑀼𑀕𑁆𑀕𑀮𑁄, 𑀅𑀜𑁆𑀜𑀢𑁆𑀭 𑀭𑀽𑀧𑀸 𑀧𑀼𑀕𑁆𑀕𑀮𑁄, 𑀧𑀼𑀕𑁆𑀕𑀮𑀲𑁆𑀫𑀺𑀁 𑀭𑀽𑀧’’𑀦𑁆𑀢𑀺 𑀏𑀯𑀁 𑀘𑀢𑀼𑀓𑁆𑀓𑀦𑀬𑁂𑀦 𑀲𑀢𑁆𑀢𑀧𑀜𑁆𑀜𑀸𑀲𑀸𑀬 𑀥𑀫𑁆𑀫𑁂𑀳𑀺 𑀧𑀼𑀘𑁆𑀙𑀦𑀯𑀲𑀧𑁆𑀧𑀯𑀢𑁆𑀢𑀁 𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀦𑁆𑀢𑀺 𑀢𑀺𑀯𑀺𑀥𑀸 𑀲𑀁𑀲𑀦𑁆𑀤𑀦𑀦𑀬𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀺𑀲𑀪𑀸𑀯𑀢𑁆𑀢𑁂 𑀦𑀺𑀘𑁆𑀘𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀤𑀺𑀧𑁆𑀧𑀲𑀗𑁆𑀕𑀢𑁄 𑀬𑀣𑀸𑀦𑀼𑀭𑀽𑀧𑀁 𑀦𑀺𑀭𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦𑁂𑀢𑁆𑀣 𑀉𑀧𑀭𑀺 𑀘𑁂𑀢𑀁 𑀦 𑀯𑀺𑀢𑁆𑀣𑀸𑀭𑀻𑀬𑀢𑀺.

𑀢𑀢𑁄 ‘‘𑀬𑀣𑀸 𑀭𑀽𑀧𑀸𑀤𑀬𑁄 𑀲𑀧𑁆𑀧𑀘𑁆𑀘𑀬𑀸, 𑀅𑀧𑁆𑀧𑀘𑁆𑀘𑀬𑀸𑀤𑀬𑁄 𑀯𑀸 𑀳𑁄𑀦𑁆𑀢𑀺, 𑀏𑀯𑀁 𑀢𑀯 𑀧𑀼𑀕𑁆𑀕𑀮𑁄𑀧𑀺 𑀲𑀧𑁆𑀧𑀘𑁆𑀘𑀬𑀢𑀸𑀤𑀺𑀮𑀓𑁆𑀔𑀡𑀬𑀼𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀦𑀯𑀲𑀧𑁆𑀧𑀯𑀢𑁆𑀢𑀸 𑀮𑀓𑁆𑀔𑀡𑀬𑀼𑀢𑁆𑀢𑀺𑀓𑀣𑀸, ‘‘𑀧𑀼𑀕𑁆𑀕𑀮𑁄’’𑀢𑀺, ‘‘𑀉𑀧𑀮𑀩𑁆𑀪𑀢𑀻’’𑀢𑀺 𑀘 𑀧𑀤𑀤𑁆𑀯𑀬𑀸𑀤𑀺𑀲𑁄𑀥𑀦𑀢𑁆𑀣𑀁 ‘‘𑀬𑁄 𑀧𑀼𑀕𑁆𑀕𑀮𑁄, 𑀲𑁄 𑀉𑀧𑀮𑀩𑁆𑀪𑀢𑀺. 𑀬𑁄 𑀯𑀸 𑀉𑀧𑀮𑀩𑁆𑀪𑀢𑀺, 𑀲𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀧𑀼𑀘𑁆𑀙𑀦𑀯𑀲𑀧𑁆𑀧𑀯𑀢𑁆𑀢𑀁 𑀯𑀘𑀦𑀲𑁄𑀥𑀦𑀁, ‘‘𑀭𑀽𑀧𑀥𑀸𑀢𑀼𑀬𑀸 𑀭𑀽𑀧𑀻’’𑀢𑀺𑀆𑀤𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀲𑁄𑀥𑀦𑀯𑀲𑀧𑁆𑀧𑀯𑀢𑁆𑀢𑁄 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄 𑀘, ‘‘𑀲𑁄𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀅𑀜𑁆𑀜𑁄 𑀯𑀸, 𑀦 𑀅𑀜𑁆𑀜𑁄 𑀯𑀸, 𑀦𑁂𑀯 𑀅𑀜𑁆𑀜𑁄 𑀦𑀸𑀦𑀜𑁆𑀜𑁄 𑀯𑀸’’𑀢𑀺𑀆𑀤𑀺𑀦𑀸 𑀕𑀢𑀺𑀧𑀭𑀺𑀯𑀢𑁆𑀢𑀦𑀫𑀼𑀔𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀸𑀦𑀼𑀬𑁄𑀕𑁄, ‘‘𑀭𑀼𑀓𑁆𑀔𑀁 𑀉𑀧𑀸𑀤𑀸𑀬 𑀙𑀸𑀬𑀸𑀤𑀻𑀦𑀁 𑀯𑀺𑀬 𑀔𑀦𑁆𑀥𑀸𑀤𑀺𑀁 𑀉𑀧𑀸𑀤𑀸𑀬 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀸𑀤𑁂 𑀢𑀲𑁆𑀲 𑀅𑀦𑀺𑀘𑁆𑀘𑀲𑀗𑁆𑀔𑀢𑀢𑀸𑀤𑀺𑀧𑁆𑀧𑀲𑀗𑁆𑀕𑀤𑀻𑀧𑀓𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄, ‘‘𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀸𑀭𑀓𑁄 𑀧𑀼𑀕𑁆𑀕𑀮𑁄’’𑀢𑀺 𑀯𑀸𑀤𑁂 𑀢𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀸𑀦𑀼𑀧𑀘𑁆𑀙𑁂𑀤𑀸𑀤𑀺𑀧𑁆𑀧𑀲𑀗𑁆𑀕𑀤𑀻𑀧𑀓𑁄 𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑁄 𑀘, ‘‘𑀬𑁄 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀓𑁄, 𑀲𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀯𑀸𑀤𑀪𑁂𑀤𑀓𑁄 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑁄, ‘‘𑀫𑀸𑀢𑀸𑀧𑀺𑀢𑀸𑀤𑀬𑁄 𑀦𑀸𑀫 𑀅𑀢𑁆𑀣𑀺, 𑀢𑁂𑀦 𑀧𑀼𑀕𑁆𑀕𑀮𑁄 𑀅𑀢𑁆𑀣𑀻’’𑀢𑀺 𑀯𑀸𑀤𑀪𑁂𑀤𑀓𑁄 𑀜𑀸𑀢𑀓𑀸𑀦𑀼𑀬𑁄𑀕𑁄, ‘‘𑀏𑀯𑀁 𑀔𑀢𑁆𑀢𑀺𑀬𑁄’’𑀢𑀺𑀆𑀤𑀺 𑀚𑀸𑀢𑁆𑀬𑀸𑀦𑀼𑀬𑁄𑀕𑁄, ‘‘𑀕𑀳𑀝𑁆𑀞𑁄 𑀧𑀩𑁆𑀩𑀚𑀺𑀢𑁄’’𑀢𑀺𑀆𑀤𑀺 𑀧𑀝𑀺𑀧𑀢𑁆𑀢𑀸𑀦𑀼𑀬𑁄𑀕𑁄, ‘‘𑀤𑁂𑀯𑁄 𑀫𑀦𑀼𑀲𑁆𑀲𑁄’’𑀢𑀺𑀆𑀤𑀺 𑀉𑀧𑀧𑀢𑁆𑀢𑀸𑀦𑀼𑀬𑁄𑀕𑁄, ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺𑀆𑀤𑀺 𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑁄, ‘‘𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸’’𑀢𑀺𑀆𑀤𑀺 𑀲𑀗𑁆𑀖𑀸𑀦𑀼𑀬𑁄𑀕𑁄, ‘‘𑀧𑀼𑀕𑁆𑀕𑀮𑁄 𑀲𑀗𑁆𑀔𑀢𑁄’’𑀢𑀺𑀆𑀤𑀺𑀯𑀲𑀧𑁆𑀧𑀯𑀢𑁆𑀢𑁄 𑀲𑀘𑁆𑀘𑀺𑀓𑀝𑁆𑀞𑀲𑀪𑀸𑀕𑀸𑀦𑀼𑀬𑁄𑀕𑁄, ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄’’𑀢𑀺𑀆𑀤𑀺 𑀯𑁂𑀤𑀓𑀸𑀦𑀼𑀬𑁄𑀕𑁄, ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀺 𑀓𑀺𑀘𑁆𑀘𑀸𑀦𑀼𑀬𑁄𑀕𑁄, ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀲𑀪𑀸𑀯𑀲𑀸𑀥𑀓𑀲𑀼𑀢𑁆𑀢𑁂𑀲𑀼 𑀲𑀦𑁆𑀦𑀺𑀲𑁆𑀲𑀺𑀢𑁂𑀲𑀼 𑁋

𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸 (𑀫. 𑀦𑀺. 𑁧.𑁩𑁫𑁩, 𑁩𑁫𑁬; 𑀥. 𑀧. 𑁨𑁭𑁯), 𑀤𑀼𑀓𑁆𑀔𑀫𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺 (𑀲𑀁. 𑀦𑀺. 𑁨.𑁧𑁫).

𑀓𑀺𑀦𑁆𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀽𑀧𑀮𑀩𑁆𑀪𑀢𑀺.

𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘;

𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀺. (𑀲𑀁. 𑀦𑀺. 𑁧.𑁧𑁭𑁧);

𑀬𑀲𑁆𑀫𑀸 𑀘 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸…𑀧𑁂… 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺 (𑀲𑀁. 𑀦𑀺. 𑁪.𑁮𑁫).

‘‘𑀅𑀢𑁆𑀢𑀦𑀺 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀢𑁆𑀢𑀦𑀺𑀬𑀁 𑀫𑁂𑀢𑀺 𑀅𑀲𑁆𑀲𑀸𑀢𑀺…𑀧𑁂… 𑀅𑀢𑁆𑀢𑀦𑀺 𑀘 𑀪𑀺𑀓𑁆𑀔𑀯𑁂 𑀅𑀢𑁆𑀢𑀦𑀺𑀬𑁂 𑀘 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀅𑀦𑀼𑀧𑀮𑀩𑁆𑀪𑀦𑀺𑀬𑀫𑀸𑀦𑁂 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀲𑁄 𑀮𑁄𑀓𑁄, 𑀲𑁄 𑀅𑀢𑁆𑀢𑀸, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺, 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻𑀢𑀺, 𑀦𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑁂𑀯𑀮𑁄 𑀧𑀭𑀺𑀧𑀽𑀭𑁄 𑀩𑀸𑀮𑀥𑀫𑁆𑀫𑁄’’𑀢𑀺 (𑀫. 𑀦𑀺. 𑁧.𑁨𑁪𑁪), ‘‘𑀢𑀢𑁆𑀭, 𑀲𑁂𑀦𑀺𑀬, 𑀬𑁆𑀯𑀸𑀬𑀁 𑀲𑀢𑁆𑀣𑀸 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀦 𑀧𑀜𑁆𑀜𑀸𑀧𑁂𑀢𑀺, 𑀅𑀪𑀺𑀲𑀫𑁆𑀧𑀭𑀸𑀬𑁂 𑀘…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺, 𑀲𑁂𑀦𑀺𑀬, 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀪𑀸𑀯𑀤𑀻𑀧𑀓𑀲𑀼𑀢𑁆𑀢𑀲𑀦𑁆𑀤𑀲𑁆𑀲𑀦𑀯𑀲𑀧𑁆𑀧𑀯𑀢𑁆𑀢𑁄 𑀲𑀼𑀢𑁆𑀢𑀲𑀦𑁆𑀤𑀲𑁆𑀲𑀦𑀸𑀦𑀼𑀬𑁄𑀕𑁄 𑀘𑀸𑀢𑀺 𑀏𑀢𑁆𑀢𑀓𑁂𑀦 𑀓𑀣𑀸𑀫𑀕𑁆𑀕𑁂𑀦 𑀯𑀺𑀢𑁆𑀣𑀸𑀭𑀢𑁄 𑀧𑀞𑀫𑀸 𑀧𑀼𑀕𑁆𑀕𑀮𑀓𑀣𑀸 𑀯𑀺𑀪𑀢𑁆𑀢𑀸. 𑀢𑀢𑁆𑀣 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀬𑀣𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀮𑀩𑁆𑀪𑀦𑁆𑀢𑀺, 𑀦 𑀏𑀯𑀁 𑀧𑀼𑀕𑁆𑀕𑀮𑁄, 𑀭𑀽𑀧𑀸𑀤𑀻𑀲𑀼 𑀧𑀦 𑀲𑀢𑀺 𑀮𑁄𑀓𑀯𑁄𑀳𑀸𑀭𑀫𑀢𑁆𑀢𑁂𑀦 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋 ‘‘𑀇𑀫𑀸 𑀔𑁄, 𑀘𑀺𑀢𑁆𑀢…𑀧𑁂… 𑀮𑁄𑀓𑀯𑁄𑀳𑀸𑀭𑀸 𑀮𑁄𑀓𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 (𑀤𑀻. 𑀦𑀺. 𑁧.𑁪𑁪𑁦). 𑀤𑁆𑀯𑀺𑀥𑀸𑀧𑀺 𑀩𑀼𑀤𑁆𑀥𑀸𑀦𑀁 𑀓𑀣𑀸 𑀲𑀫𑁆𑀫𑀼𑀢𑀺𑀓𑀣𑀸, 𑀧𑀭𑀫𑀢𑁆𑀣𑀓𑀣𑀸 𑀘. 𑀢𑀢𑁆𑀣 ‘‘𑀲𑀢𑁆𑀢𑁄 𑀧𑀼𑀕𑁆𑀕𑀮𑁄 𑀕𑀸𑀫𑁄 𑀧𑀩𑁆𑀩𑀢𑁄’’𑀢𑀺𑀆𑀤𑀺𑀓𑀸 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫, ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀔𑀦𑁆𑀥𑀸 𑀆𑀬𑀢𑀦𑀸𑀦𑀻’’𑀢𑀺𑀆𑀤𑀺𑀓𑀸 𑀧𑀭𑀫𑀢𑁆𑀣𑀓𑀣𑀸 𑀦𑀸𑀫. 𑀩𑀼𑀤𑁆𑀥𑀸 𑀳𑀺 𑀬𑁂 𑀬𑁂 𑀲𑀢𑁆𑀢𑀸 𑀬𑀣𑀸 𑀬𑀣𑀸 𑀩𑀼𑀚𑁆𑀛𑀺𑀢𑁆𑀯𑀸 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀲𑀁 𑀢𑁂𑀲𑀁 𑀢𑀣𑀸 𑀢𑀣𑀸 𑀲𑀫𑁆𑀫𑀼𑀢𑀺𑀯𑀲𑁂𑀦 𑀯𑀸 𑀧𑀭𑀫𑀢𑁆𑀣𑀯𑀲𑁂𑀦 𑀯𑀸 𑀯𑁄𑀫𑀺𑀲𑁆𑀲𑀓𑀯𑀲𑁂𑀦 𑀯𑀸 𑀤𑁂𑀲𑁂𑀢𑁆𑀯𑀸 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦𑁂𑀯 𑀅𑀫𑀢𑀁 𑀫𑀕𑁆𑀕𑀁 𑀧𑀓𑀸𑀲𑁂𑀦𑁆𑀢𑀺. 𑀅𑀬𑀜𑁆𑀳𑀺 𑁋

𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀼𑀧𑀮𑀩𑁆𑀪𑀢𑀺.

𑀢𑀢𑁆𑀣 𑁋

𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀁;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀢𑀣𑀮𑀓𑁆𑀔𑀡𑀁.

𑀢𑀲𑁆𑀫𑀸 𑀯𑀺𑀜𑁆𑀜𑀽 𑀅𑀓𑀢𑁆𑀯𑀸𑀦, 𑀩𑁆𑀬𑀜𑁆𑀚𑀦𑁂𑀪𑀺𑀦𑀺𑀯𑁂𑀲𑀦𑀁;

𑀧𑀭𑀫𑀢𑁆𑀣𑁂 𑀧𑀢𑀺𑀝𑁆𑀞𑀸𑀬, 𑀧𑀼𑀕𑁆𑀕𑀮𑀸𑀤𑀺𑀁 𑀯𑀺𑀯𑀚𑁆𑀚𑀬𑁂.

𑀧𑀜𑁆𑀜𑀢𑁆𑀢𑀺𑀁 𑀅𑀦𑀢𑀺𑀓𑁆𑀓𑀫𑁆𑀫, 𑀧𑀭𑀫𑀢𑁆𑀣𑁄 𑀧𑀓𑀸𑀲𑀺𑀢𑁄;

𑀯𑀺𑀦𑀸𑀬𑀓𑁂𑀦 𑀲𑁄 𑀬𑀲𑁆𑀫𑀸, 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀧𑀡𑁆𑀟𑀺𑀢𑁄;

𑀧𑀭𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑀬𑁂𑀢𑀺. (𑀓𑀣𑀸. 𑀅𑀝𑁆𑀞. 𑁨𑁩𑁭);

𑀅𑀬𑀁 𑀧𑀼𑀕𑁆𑀕𑀮𑀓𑀣𑀸𑀦𑀬𑁄.

𑀧𑀭𑀺𑀳𑀸𑀦𑀺𑀓𑀣𑀸𑀤𑀺𑀯𑀡𑁆𑀡𑀦𑀸

𑀧𑀼𑀕𑁆𑀕𑀮𑀓𑀣𑀸𑀢𑁄 𑀧𑀭𑀁 ‘‘𑀧𑀭𑀺𑀳𑀸𑀬𑀢𑀺 𑀅𑀭𑀳𑀸 𑀅𑀭𑀳𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀅𑀲𑁂𑀔𑀸, 𑀲𑁄𑀢𑀸𑀧𑀦𑁆𑀦𑀯𑀚𑁆𑀚𑀺𑀢𑀲𑁂𑀔𑀸 𑀘 𑀅𑀕𑁆𑀕𑀫𑀕𑁆𑀕𑀨𑀮𑀢𑁄 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀧𑀭𑀺𑀳𑀸𑀦𑀺𑀓𑀣𑀸. 𑀧𑀩𑁆𑀩𑀚𑁆𑀚𑀸 𑀯𑀺𑀬 𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀯 𑀪𑀯𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀧𑀯𑀢𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸. 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀏𑀓𑀤𑁂𑀲𑀢𑁄 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀢𑀣𑀸 𑀲𑀫𑀼𑀤𑀬𑀤𑀲𑁆𑀲𑀦𑀸𑀤𑀻𑀳𑀻𑀢𑀺 𑀏𑀯𑀁 𑀦𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀑𑀥𑀺𑀲𑁄 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀑𑀥𑀺𑀲𑁄𑀓𑀣𑀸. 𑀛𑀸𑀦𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀚𑀳𑀢𑀺, 𑀲𑁄 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀸 𑀧𑀞𑀫𑀫𑁂𑀯 𑀅𑀦𑀸𑀕𑀸𑀫𑀻 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀚𑀳𑀢𑀺𑀓𑀣𑀸. 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀔𑀦𑁆𑀥𑀸𑀤𑀺𑀓𑀁 𑀓𑀸𑀮𑀢𑁆𑀢𑀬𑁂𑀧𑀺 𑀔𑀦𑁆𑀥𑀸𑀤𑀺𑀲𑀪𑀸𑀯𑁂𑀦 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸. 𑀅𑀢𑀻𑀢𑀁, 𑀅𑀦𑀸𑀕𑀢𑀜𑁆𑀘 𑀔𑀦𑁆𑀥𑀸𑀤𑀺𑀓𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀢𑀻𑀢𑀓𑁆𑀔𑀦𑁆𑀥𑀸𑀤𑀺𑀓𑀣𑀸. 𑀅𑀢𑀻𑀢𑁂𑀲𑀼 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀲𑀼 𑀏𑀓𑀘𑁆𑀘𑀁 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀫𑁂𑀯 𑀅𑀢𑁆𑀣𑀺, 𑀦 𑀇𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀏𑀓𑀘𑁆𑀘𑀫𑀢𑁆𑀣𑀻𑀢𑀺𑀓𑀣𑀸. 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀧𑀯𑀢𑁆𑀢𑀸 𑀲𑀢𑀺𑀧𑀝𑁆𑀞𑀸𑀦𑀓𑀣𑀸. 𑀅𑀢𑀻𑀢𑀸𑀦𑀸𑀕𑀢𑀸𑀤𑀺𑀯𑀲𑁂𑀦 𑀦𑀢𑁆𑀣𑀺, 𑀲𑀓𑀪𑀸𑀯𑁂𑀦 𑀯𑀸 𑀅𑀢𑁆𑀣𑀺, 𑀧𑀭𑀪𑀸𑀯𑁂𑀦 𑀦𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀳𑁂𑀯𑀢𑁆𑀣𑀺𑀓𑀣𑀸. 𑀢𑀢𑁆𑀣 𑀳𑁂𑀯𑀢𑁆𑀣𑀻𑀢𑀺 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀅𑀥𑀺𑀫𑀸𑀦𑀺𑀓𑀸𑀦𑀁, 𑀓𑀼𑀳𑀓𑀸𑀦𑀁 𑀯𑀸 𑀅𑀭𑀳𑀢𑁆𑀢𑀧𑀝𑀺𑀜𑁆𑀜𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀤𑀺𑀲𑁆𑀯𑀸 𑀫𑀸𑀭𑀓𑀸𑀬𑀺𑀓𑀸 𑀤𑁂𑀯𑀢𑀸 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀧𑀭𑀽𑀧𑀳𑀸𑀭𑀓𑀣𑀸. 𑀅𑀭𑀳𑀢𑁄 𑀧𑀭𑁂𑀲𑀁 𑀦𑀸𑀫𑀕𑁄𑀢𑁆𑀢𑀸𑀤𑀻𑀲𑀼 𑀅𑀢𑁆𑀣𑀺 𑀅𑀜𑁆𑀜𑀸𑀡𑀁, 𑀅𑀢𑁆𑀣𑀺 𑀓𑀗𑁆𑀔𑀸, 𑀧𑀭𑁂𑀳𑀺 𑀜𑀸𑀧𑀦𑀻𑀬𑀢𑁄 𑀅𑀢𑁆𑀣𑀺 𑀧𑀭𑀯𑀺𑀢𑀭𑀡𑀸𑀢𑀺 𑀢𑀺𑀲𑁆𑀲𑁄 𑀓𑀣𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀼𑀓𑁆𑀔𑀦𑁆𑀢𑀺 𑀯𑀸𑀘𑀸 𑀪𑀺𑀚𑁆𑀚𑀢𑀻𑀢𑀺 𑀧𑀯𑀢𑁆𑀢𑀸 𑀯𑀘𑀻𑀪𑁂𑀤𑀓𑀣𑀸. 𑀤𑀼𑀓𑁆𑀔𑀦𑁆𑀢𑀺 𑀯𑀸𑀘𑀁 𑀪𑀸𑀲𑀦𑁆𑀢𑁄 𑀤𑀼𑀓𑁆𑀔𑁂 𑀜𑀸𑀡𑀁 𑀆𑀳𑀭𑀢𑀺, 𑀢𑀜𑁆𑀘 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀤𑀼𑀓𑁆𑀔𑀸𑀳𑀸𑀭𑀓𑀣𑀸. 𑀲𑀫𑀸𑀧𑀢𑁆𑀢𑀺𑀬𑀁, 𑀪𑀯𑀗𑁆𑀕𑁂 𑀘 𑀘𑀺𑀢𑁆𑀢𑀁 𑀘𑀺𑀭𑀁 𑀢𑀺𑀝𑁆𑀞𑀢𑀻𑀢𑀺 𑀧𑀯𑀢𑁆𑀢𑀸 𑀘𑀺𑀢𑁆𑀢𑀝𑁆𑀞𑀺𑀢𑀺𑀓𑀣𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀤𑀺𑀢𑁆𑀢𑀸 𑀓𑀼𑀓𑁆𑀓𑀼𑀴𑀦𑀺𑀭𑀬𑀲𑀤𑀺𑀲𑀸𑀢𑀺 𑀧𑀯𑀢𑁆𑀢𑀸 𑀓𑀼𑀓𑁆𑀓𑀼𑀴𑀓𑀣𑀸. 𑀧𑀘𑁆𑀘𑁂𑀓𑀁 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀏𑀓𑁂𑀓𑀲𑁆𑀲 𑀫𑀕𑁆𑀕𑀲𑁆𑀲 𑀘𑀢𑀼𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑁄𑀴𑀲𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻𑀢𑀺 𑀧𑀯𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑀓𑀣𑀸. 𑀩𑀼𑀤𑁆𑀥𑀸𑀦𑀁 𑀯𑁄𑀳𑀸𑀭𑀯𑀘𑀦𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀯𑁄𑀳𑀸𑀭𑀓𑀣𑀸. 𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀫𑀕𑁆𑀕𑁂𑀦 𑀯𑀺𑀦𑀸 𑀓𑀺𑀮𑁂𑀲𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄, 𑀧𑀝𑀺𑀲𑀗𑁆𑀔𑀸𑀬 𑀢𑁂𑀦 𑀫𑀕𑁆𑀕𑁂𑀦 𑀓𑀺𑀮𑁂𑀲𑀦𑀺𑀭𑁄𑀥𑁄𑀢𑀺 𑀤𑁆𑀯𑁂 𑀦𑀺𑀭𑁄𑀥𑀸𑀢𑀺 𑀧𑀯𑀢𑁆𑀢𑀸 𑀦𑀺𑀭𑁄𑀥𑀓𑀣𑀸.

𑀢𑀣𑀸𑀕𑀢𑀩𑀮𑀁 𑀲𑀸𑀯𑀓𑀲𑀸𑀥𑀸𑀭𑀡𑀦𑁆𑀢𑀺 𑀧𑀯𑀢𑁆𑀢𑀸 𑀩𑀮𑀓𑀣𑀸. 𑀆𑀲𑀯𑀓𑁆𑀔𑀬𑀜𑀸𑀡𑀯𑀺𑀭𑀳𑀺𑀢𑀁 𑀦𑀯𑀩𑀮𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀅𑀭𑀺𑀬𑀦𑁆𑀢𑀺𑀓𑀣𑀸. 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀭𑀸𑀕𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑀧𑀯𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀓𑀣𑀸. 𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑀸 𑀧𑀞𑀫𑀁 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀫𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸. 𑀅𑀝𑁆𑀞𑀫𑀓𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀲𑁆𑀲 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀦𑁆𑀢𑀺 𑀦𑀸𑀫, 𑀫𑀕𑁆𑀕𑀓𑁆𑀔𑀡𑁂 𑀧𑀳𑀻𑀦𑀸 𑀦𑀸𑀫𑀸𑀢𑀺 𑀧𑀯𑀢𑁆𑀢𑀸 𑀅𑀝𑁆𑀞𑀫𑀓𑀓𑀣𑀸. 𑀅𑀝𑁆𑀞𑀫𑀓𑀲𑁆𑀲 𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀝𑀺𑀮𑀪𑀦𑁆𑀢𑀺, 𑀦 𑀧𑀝𑀺𑀮𑀤𑁆𑀥𑀸𑀦𑀻𑀢𑀺 𑀧𑀯𑀢𑁆𑀢𑀸 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸. 𑀘𑀢𑀼𑀢𑁆𑀣𑀚𑁆𑀛𑀸𑀦𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀁 𑀫𑀁𑀲𑀘𑀓𑁆𑀔𑀼𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫𑀸𑀢𑀺 𑀧𑀯𑀢𑁆𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸. 𑀢𑀣𑀸 𑀫𑀁𑀲𑀲𑁄𑀢𑁂 𑀤𑀺𑀩𑁆𑀩𑀲𑁄𑀢𑀓𑀣𑀸. 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀧𑀯𑀢𑁆𑀢𑀸 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸. 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀲𑀁𑀯𑀭𑀸𑀪𑀸𑀯𑀫𑀢𑁆𑀢𑁂𑀦 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀬𑀸 𑀅𑀪𑀸𑀯𑁂𑀧𑀺 𑀲𑀁𑀯𑀭𑁄 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀲𑀁𑀯𑀭𑀓𑀣𑀸. 𑀅𑀲𑀜𑁆𑀜𑀻𑀦𑀫𑁆𑀧𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀲𑀜𑁆𑀜𑀓𑀣𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀽𑀫𑀺𑀬𑀁 𑀲𑀜𑁆𑀜𑀸 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸.

𑀅𑀭𑀳𑀸 𑀕𑀺𑀳𑀻 𑀅𑀲𑁆𑀲𑀸𑀢𑀺 𑀧𑀯𑀢𑁆𑀢𑀸 𑀕𑀺𑀳𑀺𑀲𑁆𑀲 𑀅𑀭𑀳𑀸𑀢𑀺𑀓𑀣𑀸. 𑀅𑀦𑀸𑀕𑀸𑀫𑀺𑀦𑁄 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀅𑀭𑀳𑀦𑁆𑀢𑁄 𑀳𑁄𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀉𑀧𑀧𑀢𑁆𑀢𑀺𑀓𑀣𑀸. 𑀅𑀭𑀳𑀢𑁄 𑀮𑁄𑀓𑀺𑀬𑀥𑀫𑁆𑀫𑀸𑀧𑀺 𑀅𑀦𑀸𑀲𑀯𑀸𑀢𑀺 𑀧𑀯𑀢𑁆𑀢𑀸 𑀅𑀦𑀸𑀲𑀯𑀓𑀣𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀡𑁂 𑀲𑀫𑀗𑁆𑀕𑀺𑀪𑀸𑀯𑀲𑀫𑀦𑁆𑀦𑀸𑀕𑀫𑁄 𑀘 𑀭𑀽𑀧𑀸𑀯𑀘𑀭𑀸𑀤𑀺𑀪𑀽𑀫𑀦𑁆𑀢𑀭𑀧𑀝𑀺𑀮𑀸𑀪𑀲𑀫𑀦𑁆𑀦𑀸𑀕𑀫𑁄 𑀘𑀸𑀢𑀺 𑀤𑁆𑀯𑁂 𑀲𑀫𑀦𑁆𑀦𑀸𑀕𑀫𑀸, 𑀬𑁂𑀲𑀁 𑀧𑀦 𑀇𑀫𑁂 𑀤𑁆𑀯𑁂 𑀲𑀫𑀦𑁆𑀦𑀸𑀕𑀫𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄𑀧𑀺 𑀳𑁂𑀢𑁆𑀣 𑀉𑀧𑀧𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀏𑀓𑁄 𑀲𑀫𑀦𑁆𑀦𑀸𑀕𑀫𑁄 𑀦𑀸𑀫 𑀅𑀢𑁆𑀣𑀺, 𑀢𑁂𑀦 𑀅𑀭𑀳𑀸 𑀘𑀢𑀽𑀳𑀺 𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀯𑀢𑁆𑀢𑀸 𑀲𑀫𑀦𑁆𑀦𑀸𑀕𑀢𑀓𑀣𑀸. 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀭𑀳𑀸 𑀙𑀳𑀺 𑀉𑀧𑁂𑀓𑁆𑀔𑀸𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀯𑀢𑁆𑀢𑀸 𑀉𑀧𑁂𑀓𑁆𑀔𑀸𑀲𑀫𑀦𑁆𑀦𑀸𑀕𑀢𑀓𑀣𑀸. 𑀫𑀕𑁆𑀕𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀩𑁄𑀥𑀺𑀬𑀸 𑀲𑀤𑀸 𑀲𑀦𑁆𑀦𑀺𑀳𑀺𑀢𑀪𑀸𑀯𑁂𑀦 𑀩𑀼𑀤𑁆𑀥𑁄𑀢𑀺 𑀧𑀯𑀢𑁆𑀢𑀸 𑀩𑁄𑀥𑀺𑀬𑀸 𑀩𑀼𑀤𑁆𑀥𑁄𑀢𑀺𑀓𑀣𑀸. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀬𑀼𑀢𑁆𑀢𑀸𑀯 𑀩𑁄𑀥𑀺𑀲𑀢𑁆𑀢𑀸𑀢𑀺 𑀧𑀯𑀢𑁆𑀢𑀸 𑀮𑀓𑁆𑀔𑀡𑀓𑀣𑀸. 𑀩𑁄𑀥𑀺𑀲𑀢𑁆𑀢𑀸𑀦𑀫𑁆𑀧𑀺 𑀫𑀕𑁆𑀕𑀦𑀺𑀬𑀸𑀫𑁄 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀓𑀣𑀸. 𑀘𑀢𑀼𑀢𑁆𑀣𑀫𑀕𑁆𑀕𑀝𑁆𑀞𑁄 𑀢𑀻𑀳𑀺 𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀸 𑀅𑀧𑀭𑀸𑀧𑀺 𑀲𑀫𑀦𑁆𑀦𑀸𑀕𑀢𑀓𑀣𑀸. 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀧𑀳𑀻𑀦𑁂𑀳𑀺 𑀲𑀤𑁆𑀥𑀺𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀭𑀳𑀢𑁆𑀢𑀁 𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀦𑁆𑀢𑀺 𑀧𑀯𑀢𑁆𑀢𑀸 𑀲𑀩𑁆𑀩𑀲𑀁𑀬𑁄𑀚𑀦𑀧𑀳𑀸𑀦𑀓𑀣𑀸.

𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀨𑀮𑀁 𑀯𑀺𑀫𑀼𑀢𑁆𑀢𑀺 𑀦𑀸𑀫, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀧𑀦 𑀧𑀭𑀺𑀬𑀸𑀬𑀢𑁄. 𑀏𑀯𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀯𑀺𑀫𑀼𑀢𑁆𑀢𑀻𑀢𑀺 𑀧𑀯𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀓𑀣𑀸. 𑀩𑀼𑀤𑁆𑀥𑀸𑀤𑀺𑀅𑀲𑁂𑀔𑀸𑀭𑀫𑁆𑀫𑀡𑀁 𑀅𑀲𑁂𑀔𑀜𑀸𑀡𑀦𑁆𑀢𑀺 𑀧𑀯𑀢𑁆𑀢𑀸 𑀅𑀲𑁂𑀔𑀜𑀸𑀡𑀓𑀣𑀸. 𑀧𑀣𑀯𑀻𑀓𑀲𑀺𑀡𑀸𑀤𑀺𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑁆𑀢𑀸 𑀯𑀺𑀧𑀭𑀻𑀢𑀜𑀸𑀡𑀦𑁆𑀢𑀺 𑀧𑀯𑀢𑁆𑀢𑀸 𑀯𑀺𑀧𑀭𑀻𑀢𑀓𑀣𑀸. 𑀢𑀢𑁆𑀣 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑁄 𑀯𑀺𑀧𑀮𑁆𑀮𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀬𑀸𑀫𑀕𑀫𑀦𑀸𑀬 𑀜𑀸𑀡𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀦𑀺𑀬𑀸𑀫𑀓𑀣𑀸. 𑀲𑀩𑁆𑀩𑀁 𑀜𑀸𑀡𑀁 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀧𑀯𑀢𑁆𑀢𑀸 𑀧𑀝𑀺𑀲𑀫𑁆𑀪𑀺𑀤𑀸𑀓𑀣𑀸. 𑀲𑀫𑁆𑀫𑀼𑀢𑀺𑀯𑀺𑀲𑀬𑀫𑁆𑀧𑀺 𑀜𑀸𑀡𑀁 𑀪𑀽𑀢𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀧𑀯𑀢𑁆𑀢𑀸 𑀲𑀫𑁆𑀫𑀼𑀢𑀺𑀜𑀸𑀡𑀓𑀣𑀸. 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯, 𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑀸𑀤𑀺𑀘𑁂𑀢𑀲𑀺𑀓𑀸𑀭𑀫𑁆𑀫𑀡𑀦𑁆𑀢𑀺 𑀧𑀯𑀢𑁆𑀢𑀸 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸. 𑀲𑀩𑁆𑀩𑀲𑁆𑀫𑀺𑀁 𑀅𑀦𑀸𑀕𑀢𑀥𑀫𑁆𑀫𑁂 𑀲𑀩𑁆𑀩𑁂𑀲𑀁 𑀜𑀸𑀡𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀦𑀸𑀕𑀢𑀜𑀸𑀡𑀓𑀣𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑁄 𑀜𑀸𑀡𑁂𑀧𑀺 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸. 𑀩𑀼𑀤𑁆𑀥𑀸 𑀯𑀺𑀬 𑀲𑀸𑀯𑀓𑀸𑀧𑀺 𑀢𑁂𑀦 𑀢𑁂𑀦 𑀯𑁂𑀦𑁂𑀬𑁆𑀬𑀚𑀦𑁂𑀦 𑀧𑀢𑁆𑀢𑀩𑁆𑀩𑀨𑀮𑀁 𑀜𑀢𑁆𑀯𑀸𑀯 𑀢𑀤𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀨𑀮𑀜𑀸𑀡𑀓𑀣𑀸.

𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀦𑀺𑀬𑀫𑀢𑁄 𑀦𑀺𑀘𑁆𑀘𑀝𑁆𑀞𑁂𑀦 𑀅𑀲𑀗𑁆𑀔𑀢𑁄𑀢𑀺 𑀧𑀯𑀢𑁆𑀢𑀸 𑀦𑀺𑀬𑀸𑀫𑀓𑀣𑀸. ‘‘𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺 𑀧𑀯𑀢𑁆𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸. ‘‘𑀲𑀘𑁆𑀘𑀸𑀦𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀘𑀢𑀼𑀲𑀘𑁆𑀘𑀸𑀦𑀺 𑀅𑀲𑀗𑁆𑀔𑀢𑀸𑀦𑀻𑀢𑀺 𑀧𑀯𑀢𑁆𑀢𑀸 𑀲𑀘𑁆𑀘𑀓𑀣𑀸. ‘‘𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀆𑀦𑁂𑀜𑁆𑀚𑀸’’𑀢𑀺 𑀯𑀘𑀦𑀢𑁄 𑀅𑀲𑀗𑁆𑀔𑀢𑀸𑀢𑀺 𑀧𑀯𑀢𑁆𑀢𑀸 𑀆𑀭𑀼𑀧𑁆𑀧𑀓𑀣𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺 𑀧𑀯𑀢𑁆𑀢𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸. 𑀅𑀲𑀗𑁆𑀔𑀢𑁄 𑀆𑀓𑀸𑀲𑁄𑀢𑀺 𑀆𑀓𑀸𑀲𑀓𑀣𑀸. 𑀆𑀓𑀸𑀲𑁄 𑀲𑀦𑀺𑀤𑀲𑁆𑀲𑀦𑁄𑀢𑀺𑀓𑀣𑀸. 𑀧𑀣𑀯𑀻𑀥𑀸𑀢𑀼 𑀲𑀦𑀺𑀤𑀲𑁆𑀲𑀦𑀸𑀢𑀺𑀆𑀤𑀺𑀁 𑀓𑀢𑁆𑀯𑀸 𑀓𑀸𑀬𑀓𑀫𑁆𑀫𑀁 𑀲𑀦𑀺𑀤𑀲𑁆𑀲𑀦𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀓𑀣𑀸.

𑀦𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀢𑁂𑀦 𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄𑀢𑀺𑀆𑀤𑀺 𑀦𑀺𑀭𑀢𑁆𑀣𑀓𑀦𑁆𑀢𑀺 𑀧𑀯𑀢𑁆𑀢𑀸 𑀲𑀗𑁆𑀕𑀳𑀺𑀢𑀓𑀣𑀸. 𑀯𑁂𑀤𑀦𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀧𑀯𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀓𑀣𑀸. 𑀘𑁂𑀢𑀲𑀺𑀓𑀁 𑀦𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀘𑁂𑀢𑀲𑀺𑀓𑀓𑀣𑀸. 𑀘𑁂𑀢𑀦𑀸𑀥𑀫𑁆𑀫𑁄𑀯 𑀤𑀸𑀦𑀁, 𑀦 𑀤𑁂𑀬𑁆𑀬𑀥𑀫𑁆𑀫𑁄𑀢𑀺 𑀧𑀯𑀢𑁆𑀢𑀸 𑀤𑀸𑀦𑀓𑀣𑀸. 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀧𑀭𑀺𑀪𑁄𑀕𑀓𑀣𑀸. 𑀧𑁂𑀢𑀸 𑀇𑀢𑁄 𑀤𑀺𑀦𑁆𑀦𑀘𑀻𑀯𑀭𑀸𑀤𑀻𑀳𑁂𑀯 𑀬𑀸𑀧𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀇𑀢𑁄𑀤𑀺𑀦𑁆𑀦𑀓𑀣𑀸. 𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸. 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺𑀓𑀣𑀸. 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑀢𑁆𑀢𑀫𑁂𑀯 𑀲𑀸𑀫𑀜𑁆𑀜𑀨𑀮𑀁, 𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀢𑀺 𑀧𑀯𑀢𑁆𑀢𑀸 𑀅𑀭𑀺𑀬𑀥𑀫𑁆𑀫𑀯𑀺𑀧𑀸𑀓𑀓𑀣𑀸. 𑀅𑀜𑁆𑀜𑀫𑀜𑁆𑀜𑀸𑀤𑀺𑀧𑀘𑁆𑀘𑀬𑀢𑀸𑀬 𑀯𑀺𑀧𑀸𑀓𑁄 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀢𑀺𑀓𑀣𑀸.

𑀅𑀲𑀼𑀭𑀓𑀸𑀬𑁂𑀦 𑀲𑀤𑁆𑀥𑀺𑀁 𑀙 𑀕𑀢𑀺𑀬𑁄𑀢𑀺 𑀧𑀯𑀢𑁆𑀢𑀸 𑀕𑀢𑀺𑀓𑀣𑀸. 𑀫𑀢𑀲𑀢𑁆𑀢𑁄 𑀫𑀸𑀢𑀼𑀉𑀢𑀼𑀲𑀫𑀬𑀜𑁆𑀘 𑀫𑀸𑀢𑀸𑀧𑀺𑀢𑀼𑀲𑀁𑀬𑁄𑀕𑀜𑁆𑀘 𑀑𑀮𑁄𑀓𑀬𑀫𑀸𑀦𑁄 𑀲𑀢𑁆𑀢𑀸𑀳𑀁, 𑀅𑀢𑀺𑀭𑁂𑀓𑀲𑀢𑁆𑀢𑀸𑀳𑀁 𑀯𑀸 𑀬𑀲𑁆𑀫𑀺𑀁 𑀪𑀯𑁂 𑀢𑀺𑀝𑁆𑀞𑀢𑀺, 𑀲𑁄 𑀅𑀦𑁆𑀢𑀭𑀸𑀪𑀯𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀦𑁆𑀢𑀭𑀸𑀪𑀯𑀓𑀣𑀸. 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀸𑀯 𑀓𑀸𑀫𑀥𑀸𑀢𑀼 𑀦𑀸𑀫, 𑀦 𑀢𑀼 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸𑀢𑀺 𑀧𑀯𑀢𑁆𑀢𑀸 𑀓𑀸𑀫𑀕𑀼𑀡𑀓𑀣𑀸. 𑀧𑀜𑁆𑀘𑁂𑀯𑀸𑀬𑀢𑀦𑀸𑀦𑀺 𑀓𑀸𑀫𑀸𑀢𑀺𑀓𑀣𑀸. 𑀭𑀽𑀧𑀥𑀫𑁆𑀫𑀸𑀯 𑀭𑀽𑀧𑀥𑀸𑀢𑀽𑀢𑀺𑀓𑀣𑀸. 𑀅𑀭𑀽𑀧𑀥𑀫𑁆𑀫𑀸𑀯 𑀅𑀭𑀽𑀧𑀥𑀸𑀢𑀽𑀢𑀺𑀓𑀣𑀸. 𑀭𑀽𑀧𑀥𑀸𑀢𑀼𑀬𑀸 𑀲𑀢𑁆𑀢𑀸 𑀖𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀴𑀸𑀬𑀢𑀦𑀺𑀓𑀸𑀢𑀺 𑀧𑀯𑀢𑁆𑀢𑀸 𑀭𑀽𑀧𑀥𑀸𑀢𑀼𑀬𑀸𑀆𑀬𑀢𑀦𑀓𑀣𑀸. 𑀆𑀭𑀼𑀧𑁆𑀧𑁂𑀧𑀺 𑀅𑀢𑁆𑀣𑀺 𑀲𑀼𑀔𑀼𑀫𑀭𑀽𑀧𑀦𑁆𑀢𑀺𑀓𑀣𑀸. 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀭𑀽𑀧𑀁 𑀓𑀫𑁆𑀫𑀦𑁆𑀢𑀺𑀓𑀣𑀸. 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀭𑀽𑀧𑀥𑀫𑁆𑀫𑁄𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀣𑀸. 𑀅𑀭𑀺𑀬𑀼𑀧𑀯𑀸𑀤𑀓𑀫𑁆𑀫𑁂𑀦 𑀅𑀭𑀳𑀢𑁆𑀢𑀸 𑀧𑀭𑀺𑀳𑀸𑀬𑀢𑀻𑀢𑀺 𑀧𑀯𑀢𑁆𑀢𑀸 𑀓𑀫𑁆𑀫𑀳𑁂𑀢𑀼𑀓𑀣𑀸.

𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀆𑀤𑀻𑀦𑀯𑀢𑁄 𑀅𑀧𑀲𑁆𑀲𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀆𑀦𑀺𑀲𑀁𑀲𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀓𑀣𑀸. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀫𑁆𑀧𑀺 𑀲𑀁𑀬𑁄𑀚𑀦𑀁 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀅𑀫𑀢𑀸𑀭𑀫𑁆𑀫𑀡𑀓𑀣𑀸. 𑀭𑀽𑀧𑀁 𑀲𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸. 𑀅𑀦𑀼𑀲𑀬𑀸 𑀅𑀦𑀸𑀭𑀫𑁆𑀫𑀡𑀸𑀢𑀺𑀓𑀣𑀸. 𑀜𑀸𑀡𑀁 𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸. 𑀅𑀢𑀻𑀢𑀸𑀭𑀫𑁆𑀫𑀡𑀜𑁆𑀘 𑀅𑀦𑀸𑀕𑀢𑀸𑀭𑀫𑁆𑀫𑀡𑀜𑁆𑀘 𑀘𑀺𑀢𑁆𑀢𑀁 𑀅𑀦𑀸𑀭𑀫𑁆𑀫𑀡𑀦𑁆𑀢𑀺𑀓𑀣𑀸𑀤𑁆𑀯𑀬𑀁. 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑀸𑀦𑀼𑀧𑀢𑀺𑀢𑀦𑁆𑀢𑀺𑀓𑀣𑀸. 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑁄𑀯 𑀲𑀤𑁆𑀤𑁄, 𑀲𑁄 𑀘 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀧𑀯𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀓𑀣𑀸. 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦 𑀯𑀸𑀘𑀸 𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀦𑀬𑀣𑀸𑀘𑀺𑀢𑁆𑀢𑀲𑁆𑀲𑀯𑀸𑀘𑀸𑀢𑀺𑀓𑀣𑀸. 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦 𑀓𑀸𑀬𑀓𑀫𑁆𑀫𑀁 𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀦𑀬𑀣𑀸𑀘𑀺𑀢𑁆𑀢𑀲𑁆𑀲𑀓𑀸𑀬𑀓𑀫𑁆𑀫𑀦𑁆𑀢𑀺𑀓𑀣𑀸. 𑀅𑀢𑀻𑀢𑁂𑀳𑀺𑀧𑀺 𑀛𑀸𑀦𑁂𑀳𑀺, 𑀅𑀦𑀸𑀕𑀢𑁂𑀳𑀺𑀧𑀺 𑀬𑁄𑀕𑀺𑀦𑁄 𑀲𑀫𑀦𑁆𑀦𑀸𑀕𑀢𑀸𑀢𑀺 𑀧𑀯𑀢𑁆𑀢𑀸 𑀅𑀢𑀻𑀢𑀸𑀦𑀸𑀕𑀢𑀲𑀫𑀦𑁆𑀦𑀸𑀕𑀢𑀓𑀣𑀸.

𑀪𑀯𑀗𑁆𑀕𑀘𑀺𑀢𑁆𑀢𑁂 𑀅𑀦𑀺𑀭𑀼𑀤𑁆𑀥𑁂 𑀏𑀯 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀪𑀸𑀯𑁂 𑀘 𑀲𑀦𑁆𑀢𑀢𑀺𑀦𑀺𑀭𑁄𑀥𑁄 𑀲𑀺𑀬𑀸𑀢𑀺 𑀧𑀯𑀢𑁆𑀢𑀸 𑀦𑀺𑀭𑁄𑀥𑀓𑀣𑀸. 𑀲𑀳 𑀯𑀸𑀘𑀸𑀳𑀺 𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀁 𑀫𑀕𑁆𑀕𑁄𑀢𑀺𑀓𑀣𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀸𑀧𑀺 𑀫𑀕𑁆𑀕𑀪𑀸𑀯𑀦𑀸 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀫𑀕𑁆𑀕𑀓𑀣𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀓𑀼𑀲𑀮𑀸𑀧𑀺 𑀅𑀓𑀼𑀲𑀮𑀸𑀧𑀻𑀢𑀺𑀓𑀣𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸 𑀲𑀸𑀪𑁄𑀕𑀸𑀢𑀺𑀓𑀣𑀸. 𑀫𑀕𑁆𑀕𑀓𑁆𑀔𑀡𑁂 𑀮𑁄𑀓𑀺𑀬𑁂𑀦, 𑀮𑁄𑀓𑀼𑀢𑁆𑀢𑀭𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀻𑀮𑁂𑀳𑀺 𑀬𑀼𑀢𑁆𑀢𑀸𑀢𑀺𑀓𑀣𑀸. 𑀲𑀻𑀮𑀁 𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸. 𑀲𑀻𑀮𑀁 𑀦 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺𑀓𑀣𑀸. 𑀲𑀫𑀸𑀤𑀸𑀦𑀳𑁂𑀢𑀼𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀧𑀼𑀜𑁆𑀜𑁄𑀧𑀘𑀬𑁄 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀲𑀫𑀸𑀤𑀸𑀦𑀳𑁂𑀢𑀼𑀓𑀓𑀣𑀸. 𑀯𑀺𑀜𑁆𑀜𑀢𑁆𑀢𑀺 𑀲𑀻𑀮𑀦𑁆𑀢𑀺𑀓𑀣𑀸. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀯𑀺𑀦𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀁 𑀳𑁄𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀅𑀯𑀺𑀜𑁆𑀜𑀢𑁆𑀢𑀺𑀤𑀼𑀲𑁆𑀲𑀻𑀮𑁆𑀬𑀓𑀣𑀸.

𑀅𑀦𑀼𑀲𑀬𑀸 𑀅𑀩𑁆𑀬𑀸𑀓𑀢𑀸, 𑀅𑀳𑁂𑀢𑀼𑀓𑀸, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀢𑀺𑀲𑁆𑀲𑁄𑀧𑀺 𑀅𑀦𑀼𑀲𑀬𑀓𑀣𑀸. 𑀅𑀲𑁂𑀔𑀲𑁆𑀲 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑁄 𑀜𑀸𑀡𑀻𑀢𑀺 𑀦𑀯𑀢𑁆𑀢𑀩𑁆𑀩𑁄𑀢𑀺 𑀧𑀯𑀢𑁆𑀢𑀸 𑀜𑀸𑀡𑀓𑀣𑀸. 𑀜𑀸𑀡𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸. 𑀫𑀕𑁆𑀕𑀓𑁆𑀔𑀡𑁂 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀜𑀸𑀡𑀁 𑀧𑀯𑀢𑁆𑀢𑀦𑁆𑀢𑀺 𑀧𑀯𑀢𑁆𑀢𑀸 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀓𑀣𑀸. 𑀩𑀼𑀤𑁆𑀥𑀸 𑀇𑀤𑁆𑀥𑀺𑀩𑀮𑁂𑀦 𑀆𑀬𑀼𑀓𑀧𑁆𑀧𑀁 𑀯𑀺𑀦𑀸𑀧𑀺 𑀫𑀳𑀸𑀓𑀧𑁆𑀧𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀇𑀤𑁆𑀥𑀺𑀩𑀮𑀓𑀣𑀸. 𑀘𑀺𑀢𑁆𑀢𑀲𑀦𑁆𑀢𑀢𑀺 𑀲𑀫𑀸𑀥𑀺, 𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄𑀢𑀺 𑀧𑀯𑀢𑁆𑀢𑀸 𑀲𑀫𑀸𑀥𑀺𑀓𑀣𑀸. 𑀅𑀯𑀺𑀚𑁆𑀚𑀸𑀤𑀺𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀳𑀺 𑀅𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀢𑀸𑀢𑀺 𑀧𑀯𑀢𑁆𑀢𑀸 𑀥𑀫𑁆𑀫𑀝𑁆𑀞𑀺𑀢𑀢𑀸𑀓𑀣𑀸. 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑀸 𑀅𑀦𑀺𑀘𑁆𑀘𑀢𑀸𑀢𑀺 𑀧𑀯𑀢𑁆𑀢𑀸 𑀅𑀦𑀺𑀘𑁆𑀘𑀢𑀸𑀓𑀣𑀸.

𑀯𑀺𑀜𑁆𑀜𑀢𑁆𑀢𑀺𑀬𑁄 𑀯𑀺𑀦𑀸𑀧𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀓𑀸𑀬𑀯𑀘𑀻𑀓𑀫𑁆𑀫𑀦𑁆𑀢𑀺 𑀧𑀯𑀢𑁆𑀢𑀸 𑀓𑀣𑀸. 𑀲𑀩𑁆𑀩𑀁 𑀓𑀫𑁆𑀫𑀁 𑀯𑀺𑀧𑀸𑀓𑀚𑀦𑀓𑀦𑁆𑀢𑀺 𑀧𑀯𑀢𑁆𑀢𑀸 𑀓𑀫𑁆𑀫𑀓𑀣𑀸. 𑀲𑀤𑁆𑀤𑁄 𑀯𑀺𑀧𑀸𑀓𑁄𑀢𑀺 𑀧𑀯𑀢𑁆𑀢𑀸 𑀓𑀣𑀸. 𑀲𑀴𑀸𑀬𑀢𑀦𑀁 𑀯𑀺𑀧𑀸𑀓𑁄𑀢𑀺 𑀧𑀯𑀢𑁆𑀢𑀸 𑀓𑀣𑀸. 𑀫𑀕𑁆𑀕𑀁 𑀯𑀺𑀦𑀸𑀧𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺𑀓𑀣𑀸. 𑀢𑀣𑀸 𑀓𑁄𑀮𑀁𑀓𑁄𑀮𑀏𑀓𑀩𑀻𑀚𑀺𑀓𑀣𑀸𑀲𑀼𑀧𑀺. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻𑀢𑀺𑀓𑀣𑀸. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀲𑁆𑀲 𑀅𑀧𑀸𑀬𑀤𑀼𑀕𑁆𑀕𑀢𑀺𑀬𑀸 𑀲𑀤𑁆𑀥𑀺𑀁 𑀭𑀽𑀧𑀸𑀤𑀺𑀢𑀡𑁆𑀳𑀸𑀲𑀗𑁆𑀔𑀸𑀢𑀤𑀼𑀕𑁆𑀕𑀢𑀺𑀧𑀳𑀻𑀦𑀸𑀢𑀺 𑀧𑀯𑀢𑁆𑀢𑀸 𑀤𑀼𑀕𑁆𑀕𑀢𑀺𑀓𑀣𑀸. 𑀲𑀢𑁆𑀢𑀫𑀪𑀯𑀺𑀓𑀲𑁆𑀲 𑀢𑀡𑁆𑀳𑀸𑀲𑀫𑁆𑀪𑀯𑀢𑁄 𑀤𑀼𑀕𑁆𑀕𑀢𑀺 𑀅𑀧𑁆𑀧𑀳𑀻𑀦𑀸𑀢𑀺 𑀧𑀯𑀢𑁆𑀢𑀸 𑀲𑀢𑁆𑀢𑀫𑀪𑀯𑀺𑀓𑀓𑀣𑀸.

𑀲𑀗𑁆𑀖𑀪𑁂𑀤𑀸𑀤𑀺𑀓𑀧𑁆𑀧𑀝𑁆𑀞𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑁂𑀦 𑀫𑀳𑀸𑀓𑀧𑁆𑀧𑀁 𑀅𑀲𑀻𑀢𑀺𑀪𑀸𑀕𑀁 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀫𑀢𑁆𑀢𑀁 𑀓𑀸𑀮𑀁 𑀆𑀬𑀼𑀓𑀧𑁆𑀧𑀁 𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀻𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀲𑀓𑀮𑀁 𑀫𑀳𑀸𑀓𑀧𑁆𑀧𑀁 𑀧𑀘𑁆𑀘𑀦𑁆𑀢𑀺, 𑀯𑀺𑀦𑀲𑁆𑀲𑀫𑀸𑀦𑁂𑀧𑀺 𑀓𑀧𑁆𑀧𑁂 𑀘𑀓𑁆𑀓𑀯𑀸𑀴𑀦𑁆𑀢𑀭𑁂𑀲𑀼 𑀧𑀘𑁆𑀘𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀓𑀧𑁆𑀧𑀝𑁆𑀞𑀓𑀣𑀸. 𑀲𑀗𑁆𑀖𑀪𑁂𑀤𑀓𑁄 𑀅𑀧𑁆𑀧𑀦𑀸𑀓𑀼𑀲𑀮𑀸𑀦𑀺 𑀯𑀺𑀬 𑀓𑀸𑀫𑀸𑀯𑀘𑀭𑀓𑀼𑀲𑀮𑀫𑁆𑀧𑀺 𑀦 𑀧𑀝𑀺𑀮𑀪𑀢𑀻𑀢𑀺 𑀧𑀯𑀢𑁆𑀢𑀸 𑀓𑀼𑀲𑀮𑀧𑀝𑀺𑀮𑀸𑀪𑀓𑀣𑀸. 𑀅𑀗𑁆𑀕𑀲𑀫𑁆𑀧𑀦𑁆𑀦𑀸𑀬 𑀆𑀡𑀢𑁆𑀢𑀺𑀬𑀸 𑀅𑀪𑀸𑀯𑁂𑀧𑀺 𑀫𑀸𑀢𑀼𑀖𑀸𑀢𑀸𑀤𑀺𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀧𑀬𑁄𑀚𑀓𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀏𑀯𑀸𑀢𑀺 𑀧𑀯𑀢𑁆𑀢𑀸 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑀓𑀣𑀸. 𑀅𑀦𑀺𑀬𑀢𑀥𑀫𑁆𑀫𑁂𑀲𑀼𑀧𑀺 𑀓𑁂𑀘𑀺 𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀸𑀦𑀺𑀬𑀢𑀸 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀦𑀺𑀬𑀢𑀲𑁆𑀲 𑀦𑀺𑀬𑀸𑀫𑀓𑀣𑀸. 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁂𑀦 𑀧𑀝𑀺𑀘𑁆𑀙𑀦𑁆𑀦𑁂𑀦𑁂𑀯 𑀘𑀺𑀢𑁆𑀢𑁂𑀦 𑀦𑀻𑀯𑀭𑀡𑀁 𑀧𑀚𑀳𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀦𑀺𑀯𑀼𑀢𑀓𑀣𑀸. 𑀲𑀫𑁆𑀫𑀼𑀔𑀻𑀪𑀽𑀢𑀁 𑀲𑀁𑀬𑁄𑀚𑀦𑀫𑁂𑀯 𑀚𑀳𑀢𑀻𑀢𑀺 𑀧𑀯𑀢𑁆𑀢𑀸 𑀲𑀫𑁆𑀫𑀼𑀔𑀻𑀪𑀽𑀢𑀓𑀣𑀸. 𑀲𑀫𑀸𑀧𑀦𑁆𑀦𑁄 𑀘 𑀛𑀸𑀦𑀸𑀭𑀫𑁆𑀫𑀡𑀦𑀺𑀓𑀦𑁆𑀢𑀺𑀬𑀸 𑀛𑀸𑀦𑀁 𑀅𑀲𑁆𑀲𑀸𑀤𑁂𑀢𑀻𑀢𑀺 𑀧𑀯𑀢𑁆𑀢𑀸 𑀲𑀫𑀸𑀧𑀦𑁆𑀦𑁄 𑀅𑀲𑁆𑀲𑀸𑀤𑁂𑀢𑀻𑀢𑀺𑀓𑀣𑀸. 𑀤𑀼𑀓𑁆𑀔𑀯𑁂𑀤𑀦𑀸𑀬𑀧𑀺 𑀭𑀸𑀕𑀲𑁆𑀲𑀸𑀤𑀯𑁂𑀤𑀦𑀸 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀅𑀲𑁆𑀲𑀸𑀢𑀭𑀸𑀕𑀓𑀣𑀸. 𑀥𑀫𑁆𑀫𑀢𑀡𑁆𑀳𑀸 𑀅𑀩𑁆𑀬𑀸𑀓𑀢𑀸𑀢𑀺𑀓𑀣𑀸. 𑀥𑀫𑁆𑀫𑀢𑀡𑁆𑀳𑀸 𑀦 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺𑀓𑀣𑀸.

𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀁 𑀯𑀸 𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸. 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀫𑁆𑀧𑀺 𑀩𑀻𑀚𑀫𑀢𑁆𑀢𑀁 𑀲𑀴𑀸𑀬𑀢𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀯𑀢𑁆𑀢𑀸 𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸. 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀯𑀺𑀜𑁆𑀜𑀢𑁆𑀢𑀺𑀬𑁄 𑀅𑀭𑀺𑀬𑀭𑀽𑀧𑀦𑁆𑀢𑀺𑀓𑀣𑀸. 𑀓𑀸𑀫𑀭𑀸𑀕𑀸𑀤𑀺𑀢𑁄 𑀅𑀜𑁆𑀜𑁄 𑀅𑀦𑀼𑀲𑀬𑁄𑀢𑀺𑀓𑀣𑀸. 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸. 𑀬𑀣𑀸 𑀓𑀸𑀫𑀭𑀸𑀕𑁄 𑀓𑀸𑀫𑀥𑀸𑀢𑀼𑀬𑀁 𑀧𑀭𑀺𑀬𑀸𑀧𑀦𑁆𑀦𑁄, 𑀏𑀯𑀁 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀸 𑀭𑀽𑀧𑀸𑀭𑀽𑀧𑀪𑀽𑀫𑀺𑀬𑀁 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀯𑀢𑁆𑀢𑀸 𑀧𑀭𑀺𑀬𑀸𑀧𑀦𑁆𑀦𑀓𑀣𑀸. 𑀤𑁆𑀯𑀬𑀁 𑀤𑀺𑀝𑁆𑀞𑀺𑀕𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺𑀓𑀣𑀸. 𑀤𑀺𑀝𑁆𑀞𑀺𑀕𑀢𑀁 𑀅𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺𑀓𑀣𑀸. 𑀬𑁄 𑀬𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑁄, 𑀲𑁄 𑀧𑀼𑀦 𑀢𑁂𑀲𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀏𑀓𑀥𑀸𑀯 𑀏𑀓𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀧𑀘𑁆𑀘𑀬𑀢𑀸𑀓𑀣𑀸. 𑀅𑀯𑀺𑀚𑁆𑀚𑀸𑀯 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄, 𑀦 𑀧𑀦 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀬𑀸𑀢𑀺 𑀧𑀯𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸. 𑀓𑀸𑀮𑀤𑁆𑀥𑀸𑀦𑀸 𑀇𑀫𑁂 𑀧𑀭𑀺𑀦𑀺𑀧𑁆𑀨𑀦𑁆𑀦𑁂𑀦 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀸𑀢𑀺 𑀧𑀯𑀢𑁆𑀢𑀸 𑀅𑀤𑁆𑀥𑀸𑀓𑀣𑀸. 𑀏𑀯𑀁 𑀔𑀡𑀮𑀬𑀫𑀼𑀳𑀼𑀢𑁆𑀢𑀓𑀣𑀸. 𑀅𑀜𑁆𑀜𑀲𑁆𑀲 𑀆𑀲𑀯𑀲𑁆𑀲 𑀅𑀪𑀸𑀯𑀸 𑀆𑀲𑀯𑀸 𑀅𑀦𑀸𑀲𑀯𑀸𑀢𑀺 𑀧𑀯𑀢𑁆𑀢𑀸 𑀆𑀲𑀯𑀓𑀣𑀸. 𑀮𑁄𑀓𑀼𑀢𑁆𑀢𑀭𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀚𑀭𑀸𑀫𑀭𑀡𑀓𑀣𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸. 𑀲𑀸 𑀮𑁄𑀓𑀺𑀬𑀸𑀢𑀺 𑀧𑀯𑀢𑁆𑀢𑀸 𑀤𑀼𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸. 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄𑀧𑀺 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺 𑀧𑀯𑀢𑁆𑀢𑀸 𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀢𑀺𑀓𑀣𑀸. 𑀓𑀫𑁆𑀫𑀢𑁄 𑀅𑀜𑁆𑀜𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀓𑀫𑁆𑀫𑀽𑀧𑀘𑀬𑁄𑀢𑀺𑀓𑀣𑀸.

𑀩𑀮𑀧𑁆𑀧𑀢𑁆𑀢𑀸 𑀩𑀼𑀤𑁆𑀥𑀸𑀤𑀬𑁄 𑀇𑀤𑁆𑀥𑀺𑀩𑀮𑁂𑀦 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀭𑀸𑀕𑀸𑀤𑀺𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀦𑀺𑀕𑁆𑀕𑀳𑀓𑀣𑀸. 𑀏𑀯𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀧𑀭𑀘𑀺𑀢𑁆𑀢𑀧𑀕𑁆𑀕𑀳𑀦𑀓𑀣𑀸. 𑀩𑀼𑀤𑁆𑀥𑀸 𑀇𑀤𑁆𑀥𑀺𑀬𑀸 𑀧𑀭𑁂𑀲𑀁 𑀲𑀼𑀔𑀁 𑀤𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸. ‘‘𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀫𑀦𑀲𑀺𑀓𑀭𑁄𑀢𑁄 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀲𑀩𑁆𑀩𑁂 𑀲𑀗𑁆𑀔𑀸𑀭𑁂 𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀢𑁄 𑀅𑀥𑀺𑀕𑀡𑁆𑀳𑀸𑀢𑀻𑀢𑀺 𑀧𑀯𑀢𑁆𑀢𑀸 𑀅𑀥𑀺𑀕𑀬𑁆𑀳𑀫𑀦𑀲𑀺𑀓𑀸𑀭𑀓𑀣𑀸. 𑀭𑀽𑀧𑀁 𑀳𑁂𑀢𑀼𑀓𑀦𑁆𑀢𑀺𑀓𑀣𑀸. 𑀏𑀯𑀁 𑀭𑀽𑀧𑀁 𑀲𑀳𑁂𑀢𑀼𑀓𑀦𑁆𑀢𑀺𑀓𑀣𑀸. 𑀭𑀽𑀧𑀁 𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀺𑀓𑀣𑀸. 𑀭𑀽𑀧𑀁 𑀯𑀺𑀧𑀸𑀓𑁄𑀢𑀺𑀓𑀣𑀸, 𑀬𑀣𑀸 𑀓𑀸𑀫𑀸𑀯𑀘𑀭𑀓𑀫𑁆𑀫𑁂𑀦 𑀚𑀸𑀢𑀁 𑀭𑀽𑀧𑀁 𑀓𑀸𑀫𑀸𑀯𑀘𑀭𑀁, 𑀏𑀯𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑁂𑀳𑀺 𑀚𑀸𑀢𑀁 𑀭𑀽𑀧𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺𑀓𑀣𑀸. 𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀬𑀸, 𑀅𑀭𑀽𑀧𑀭𑀸𑀕𑁄 𑀘 𑀅𑀭𑀽𑀧𑀥𑀸𑀢𑀼𑀬𑀸 𑀧𑀭𑀺𑀬𑀸𑀧𑀦𑁆𑀦𑁄𑀢𑀺𑀓𑀣𑀸.

𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑁄𑀢𑀺𑀓𑀣𑀸. 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸. 𑀬𑀁 𑀓𑀺𑀜𑁆𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀢𑁄𑀢𑀺𑀓𑀣𑀸. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑁂𑀯 𑀤𑀼𑀓𑁆𑀔𑀁, 𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀧𑀯𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀦𑁆𑀢𑀺𑀓𑀣𑀸. 𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄 𑀦𑀸𑀫, 𑀦 𑀘 𑀢𑀸𑀦𑀺 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺𑀓𑀣𑀸. 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀪𑀼𑀜𑁆𑀚𑀢𑀻𑀢𑀺𑀓𑀣𑀸. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸. 𑀩𑀼𑀤𑁆𑀥𑀸 𑀦 𑀓𑀺𑀜𑁆𑀘𑀺 𑀪𑀼𑀜𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸. 𑀤𑀸𑀬𑀓𑀢𑁄 𑀤𑀸𑀦𑀁 𑀯𑀺𑀲𑀼𑀚𑁆𑀛𑀢𑀺, 𑀦 𑀧𑀝𑀺𑀕𑁆𑀕𑀸𑀳𑀓𑀢𑁄𑀢𑀺 𑀧𑀯𑀢𑁆𑀢𑀸 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸.

𑀩𑀼𑀤𑁆𑀥𑀸 𑀢𑀼𑀲𑀺𑀢𑀮𑁄𑀓𑁂 𑀏𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦 𑀫𑀦𑀼𑀲𑁆𑀲𑀮𑁄𑀓𑁂. 𑀏𑀢𑁆𑀣 𑀳𑀺 𑀦𑀺𑀫𑁆𑀫𑀺𑀢𑀭𑀽𑀧𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀫𑀦𑀼𑀲𑁆𑀲𑀮𑁄𑀓𑀓𑀣𑀸. 𑀦𑀺𑀫𑁆𑀫𑀺𑀢𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦 𑀩𑀼𑀤𑁆𑀥𑁄𑀢𑀺 𑀧𑀯𑀢𑁆𑀢𑀸 𑀥𑀫𑁆𑀫𑀤𑁂𑀲𑀦𑀸𑀓𑀣𑀸. 𑀭𑀸𑀕𑁄𑀯 𑀓𑀭𑀼𑀡𑀸 𑀦𑀸𑀫, 𑀢𑀢𑁄 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀓𑀭𑀼𑀡𑀸𑀢𑀺𑀓𑀣𑀸. 𑀩𑀼𑀤𑁆𑀥𑀸𑀦𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀅𑀜𑁆𑀜𑁂 𑀕𑀦𑁆𑀥𑀚𑀸𑀢𑁂 𑀅𑀢𑀺𑀯𑀺𑀬 𑀅𑀥𑀺𑀕𑀡𑁆𑀳𑀸𑀢𑀻𑀢𑀺 𑀧𑀯𑀢𑁆𑀢𑀸 𑀕𑀦𑁆𑀥𑀚𑀸𑀢𑀓𑀣𑀸. 𑀩𑀼𑀤𑁆𑀥𑀸 𑀏𑀓𑁂𑀦 𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀏𑀓𑀫𑀕𑁆𑀕𑀓𑀣𑀸. 𑀧𑀭𑀺𑀓𑀫𑁆𑀫𑀸𑀤𑀺𑀁 𑀯𑀺𑀦𑀸𑀯 𑀧𑀞𑀫𑀸𑀤𑀺𑀚𑁆𑀛𑀸𑀦𑀸 𑀤𑀼𑀢𑀺𑀬𑀸𑀤𑀺𑀚𑁆𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺 𑀧𑀯𑀢𑁆𑀢𑀸 𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸. 𑀧𑀜𑁆𑀘𑀓𑀦𑀬𑁂 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀛𑀸𑀦𑀁 𑀯𑀺𑀲𑀼𑀁 𑀛𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀛𑀸𑀦𑀦𑁆𑀢𑀭𑀺𑀓𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀛𑀸𑀦𑀦𑁆𑀢𑀭𑀺𑀓𑀓𑀣𑀸. 𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺𑀓𑀣𑀸. 𑀯𑀺𑀜𑁆𑀜𑀸𑀡𑀁 𑀯𑀺𑀦𑀸 𑀧𑀲𑀸𑀤𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺𑀓𑀣𑀸.

𑀢𑁂𑀓𑀸𑀮𑀺𑀓𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺 𑀧𑀯𑀢𑁆𑀢𑀸 𑀓𑀺𑀮𑁂𑀲𑀧𑁆𑀧𑀚𑀳𑀦𑀓𑀣𑀸. 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸𑀧𑀺 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀯𑀢𑁆𑀢𑀸 𑀲𑀼𑀜𑁆𑀜𑀢𑀓𑀣𑀸. 𑀅𑀲𑀗𑁆𑀔𑀢𑀫𑁂𑀯 𑀲𑀸𑀫𑀜𑁆𑀜𑀨𑀮𑀦𑁆𑀢𑀺𑀓𑀣𑀸. 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀥𑀫𑁆𑀫𑀸𑀦𑀁 𑀧𑀝𑀺𑀮𑀸𑀪𑀸 𑀅𑀲𑀗𑁆𑀔𑀢𑀸𑀢𑀺 𑀧𑀯𑀢𑁆𑀢𑀸 𑀧𑀢𑁆𑀢𑀺𑀓𑀣𑀸. 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀪𑀸𑀯𑀲𑀗𑁆𑀔𑀸𑀢𑀸 𑀢𑀣𑀢𑀸 𑀅𑀲𑀗𑁆𑀔𑀢𑀸𑀢𑀺 𑀧𑀯𑀢𑁆𑀢𑀸 𑀢𑀣𑀢𑀸𑀓𑀣𑀸. 𑀅𑀦𑀯𑀚𑁆𑀚𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀫𑁆𑀧𑀺 𑀓𑀼𑀲𑀮𑀦𑁆𑀢𑀺𑀓𑀣𑀸. 𑀆𑀦𑀦𑁆𑀢𑀭𑀺𑀬𑀸𑀤𑀺𑀁 𑀯𑀺𑀦𑀸𑀧𑀺 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸𑀢𑀺𑀓𑀣𑀸. 𑀮𑁄𑀓𑀺𑀬𑀲𑀤𑁆𑀥𑀸𑀤𑀬𑁄 𑀦 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀧𑀯𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀓𑀣𑀸.

𑀅𑀲𑀜𑁆𑀘𑀺𑀘𑁆𑀘𑀸𑀧𑀺 𑀆𑀦𑀦𑁆𑀢𑀭𑀺𑀓𑁄 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀅𑀲𑀜𑁆𑀘𑀺𑀘𑁆𑀘𑀓𑀣𑀸. 𑀦𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀜𑀸𑀡𑀦𑁆𑀢𑀺 𑀧𑀯𑀢𑁆𑀢𑀸 𑀜𑀸𑀡𑀓𑀣𑀸. 𑀦𑁂𑀭𑀬𑀺𑀓𑀸𑀦𑀁 𑀓𑀫𑁆𑀫𑀸𑀦𑁂𑀯 𑀦𑀺𑀭𑀬𑀧𑀸𑀮𑀭𑀽𑀧𑁂𑀦 𑀯𑀥𑁂𑀦𑁆𑀢𑀺, 𑀦 𑀦𑀺𑀭𑀬𑀧𑀸𑀮𑀸𑀢𑀺 𑀧𑀯𑀢𑁆𑀢𑀸 𑀦𑀺𑀭𑀬𑀧𑀸𑀮𑀓𑀣𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀢𑀺𑀭𑀘𑁆𑀙𑀸𑀦𑀸𑀢𑀺𑀓𑀣𑀸. 𑀯𑀺𑀭𑀢𑀺𑀢𑁆𑀢𑀬𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁, 𑀧𑀜𑁆𑀘𑀗𑁆𑀕𑀺𑀓𑁄𑀯 𑀫𑀕𑁆𑀕𑁄𑀢𑀺 𑀧𑀯𑀢𑁆𑀢𑀸 𑀫𑀕𑁆𑀕𑀓𑀣𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀧𑀯𑀢𑁆𑀢𑀸 𑀜𑀸𑀡𑀓𑀣𑀸.

𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀩𑁆𑀪 𑀲𑀸𑀲𑀦𑀁 𑀦𑀯𑀁 𑀓𑀢𑀦𑁆𑀢𑀺 𑀧𑀯𑀢𑁆𑀢𑀸 𑀲𑀸𑀲𑀦𑀓𑀣𑀸. 𑀧𑀼𑀣𑀼𑀚𑁆𑀚𑀦𑁄 𑀏𑀓𑀓𑁆𑀔𑀡𑁂 𑀢𑁂𑀥𑀸𑀢𑀼𑀓𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀢𑁆𑀢𑁄𑀢𑀺 𑀧𑀯𑀢𑁆𑀢𑀸 𑀅𑀯𑀺𑀯𑀺𑀢𑁆𑀢𑀓𑀣𑀸. 𑀜𑁂𑀬𑁆𑀬𑀸𑀯𑀭𑀡𑀳𑁂𑀢𑀼𑀓𑀁 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬𑀧𑀺 𑀅𑀭𑀳𑀸 𑀳𑁄𑀢𑀻𑀢𑀺 𑀧𑀯𑀢𑁆𑀢𑀸 𑀲𑀁𑀬𑁄𑀚𑀦𑀓𑀣𑀸. ‘‘𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸 𑀳𑁄𑀦𑁆𑀢𑀼, 𑀭𑀼𑀓𑁆𑀔𑀸 𑀦𑀺𑀘𑁆𑀘𑀧𑀼𑀧𑁆𑀨𑀨𑀮𑀸𑀤𑀺𑀬𑀼𑀢𑁆𑀢𑀸 𑀔𑁂𑀫𑀺𑀦𑁄 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 𑀇𑀤𑁆𑀥𑀺 𑀧𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀸 𑀇𑀤𑁆𑀥𑀺𑀓𑀣𑀸. 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀆𑀬𑀼𑀧𑀪𑀸𑀯𑁂𑀫𑀢𑁆𑀢𑀢𑁄 𑀅𑀜𑁆𑀜𑀸𑀧𑀺 𑀯𑁂𑀫𑀢𑁆𑀢𑀢𑀸 𑀅𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀩𑀼𑀤𑁆𑀥𑀓𑀣𑀸. 𑀏𑀓𑀲𑁆𑀫𑀺𑀁 𑀔𑀡𑁂 𑀲𑀩𑁆𑀩𑀮𑁄𑀓𑀥𑀸𑀢𑀽𑀲𑀼 𑀅𑀦𑁂𑀓𑁂 𑀩𑀼𑀤𑁆𑀥𑀸 𑀲𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀲𑀩𑁆𑀩𑀤𑀺𑀲𑀸𑀓𑀣𑀸. 𑀲𑀩𑁆𑀩𑁂 𑀥𑀫𑁆𑀫𑀸 𑀦𑀺𑀬𑀢𑀸𑀢𑀺 𑀧𑀯𑀢𑁆𑀢𑀸 𑀥𑀫𑁆𑀫𑀓𑀣𑀸. 𑀲𑀩𑁆𑀩𑀓𑀫𑁆𑀫𑀸𑀦𑀺 𑀨𑀮𑀤𑀸𑀦𑁂 𑀦𑀺𑀬𑀢𑀸𑀦𑀻𑀢𑀺 𑀧𑀯𑀢𑁆𑀢𑀸 𑀓𑀫𑁆𑀫𑀓𑀣𑀸.

𑀅𑀭𑀳𑀸 𑀅𑀲𑀩𑁆𑀩𑀜𑁆𑀜𑀼𑀪𑀸𑀯𑁂𑀦 𑀲𑀩𑁆𑀩𑀜𑁆𑀜𑀼𑀯𑀺𑀲𑀬𑁂 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀧𑀭𑀺𑀦𑀺𑀩𑁆𑀩𑀸𑀢𑀻𑀢𑀺 𑀧𑀯𑀢𑁆𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑀓𑀣𑀸. 𑀅𑀭𑀳𑀸 𑀓𑀼𑀲𑀮𑀘𑀺𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀧𑀯𑀢𑁆𑀢𑀸 𑀓𑀼𑀲𑀮𑀘𑀺𑀢𑁆𑀢𑀓𑀣𑀸. 𑀅𑀭𑀳𑀸 𑀆𑀦𑁂𑀜𑁆𑀚𑁂 𑀲𑀡𑁆𑀞𑀺𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀧𑀯𑀢𑁆𑀢𑀸 𑀆𑀦𑁂𑀜𑁆𑀚𑀓𑀣𑀸. 𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄, 𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺, 𑀲𑀼𑀧𑀺𑀦𑀦𑁆𑀢𑁂 𑀥𑀫𑁆𑀫𑀸𑀪𑀺𑀲𑀫𑀬𑁄, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘𑀸𑀢𑀺 𑀧𑀯𑀢𑁆𑀢𑀸 𑀢𑀺𑀲𑁆𑀲𑁄𑀧𑀺 𑀓𑀣𑀸. 𑀲𑀩𑁆𑀩𑀁 𑀲𑀼𑀧𑀺𑀦𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺𑀓𑀣𑀸. 𑀔𑀡𑀺𑀓𑀢𑀸𑀬 𑀘𑀺𑀢𑁆𑀢𑀸𑀦𑀁 𑀦𑀢𑁆𑀣𑀺 𑀆𑀲𑁂𑀯𑀦𑀧𑀘𑁆𑀘𑀬𑀢𑀸𑀢𑀺𑀓𑀣𑀸. 𑀲𑀩𑁆𑀩𑁂 𑀲𑀗𑁆𑀔𑀢𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀢𑀺 𑀧𑀯𑀢𑁆𑀢𑀸 𑀔𑀡𑀺𑀓𑀓𑀣𑀸.

𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸𑀢𑀺 𑀧𑀽𑀚𑀸𑀤𑀺𑀁 𑀓𑀢𑁆𑀯𑀸 𑀏𑀓𑀸𑀥𑀺𑀧𑁆𑀧𑀸𑀬𑀧𑁆𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑀩𑁆𑀩𑁄𑀢𑀺 𑀧𑀯𑀢𑁆𑀢𑀸 𑀏𑀓𑀸𑀥𑀺𑀧𑁆𑀧𑀸𑀬𑀓𑀣𑀸. 𑀧𑀸𑀧𑀪𑀺𑀓𑁆𑀔𑀽𑀲𑀼 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁂𑀲𑀼 𑀅𑀭𑀳𑀦𑁆𑀢𑀸𑀦𑀁 𑀯𑀡𑁆𑀡𑁂𑀦 𑀅𑀫𑀦𑀼𑀲𑁆𑀲𑀸 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀅𑀭𑀳𑀦𑁆𑀢𑀯𑀡𑁆𑀡𑀓𑀣𑀸. 𑀓𑁂𑀘𑀺 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂𑀦 𑀓𑀸𑀫𑀓𑀸𑀭𑀺𑀓𑀸𑀯𑀲𑁂𑀦 𑀯𑀺𑀦𑀺𑀧𑀸𑀢𑀁 𑀕𑀘𑁆𑀙𑀦𑁆𑀢𑀺, 𑀦 𑀓𑀫𑁆𑀫𑀯𑀲𑁂𑀦𑀸𑀢𑀺 𑀧𑀯𑀢𑁆𑀢𑀸 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀓𑀣𑀸. 𑀦 𑀭𑀸𑀕𑁄 𑀭𑀸𑀕𑀧𑀢𑀺𑀭𑀽𑀧𑀓𑁄𑀢𑀺𑀆𑀤𑀺 𑀧𑀢𑀺𑀭𑀽𑀧𑀓𑀣𑀸. 𑀔𑀦𑁆𑀥𑀸𑀬𑀢𑀦𑀸𑀤𑀬𑁄 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀢𑀺 𑀧𑀯𑀢𑁆𑀢𑀸 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸𑀢𑀺 𑀲𑀸𑀥𑀺𑀓𑀤𑁆𑀯𑀺𑀲𑀢𑀓𑀣𑀸. 𑀧𑀸𑀴𑀺𑀬𑀁 𑀅𑀝𑁆𑀞𑀫𑀼𑀔𑀯𑀸𑀤𑀬𑀼𑀢𑁆𑀢𑀺𑀯𑀲𑁂𑀦𑁂𑀯 𑀲𑀫𑁆𑀫𑀺𑀢𑀺𑀬𑀸𑀤𑀻𑀦𑀁 𑀪𑀺𑀦𑁆𑀦𑀮𑀤𑁆𑀥𑀺𑀓𑀸𑀦𑀁 𑀮𑀤𑁆𑀥𑀺𑀪𑁂𑀤𑀯𑀲𑁂𑀦 𑀦𑀸𑀦𑀸𑀧𑀓𑀸𑀭𑀢𑁄 𑀯𑀺𑀪𑀢𑁆𑀢𑀸, 𑀢𑀸 𑀧𑀦 𑀲𑀩𑁆𑀩𑀓𑀣𑀸 𑀧𑀼𑀕𑁆𑀕𑀮𑀓𑀣𑀸𑀯. 𑀢𑀸 𑀢𑀁𑀢𑀁𑀮𑀤𑁆𑀥𑀺𑀪𑁂𑀤𑀯𑀲𑁂𑀦 𑀲𑀗𑁆𑀔𑁂𑀧𑀢𑁄𑀧𑀺 𑀯𑀼𑀘𑁆𑀘𑀫𑀸𑀦𑀸 𑀅𑀢𑀺𑀪𑀸𑀭𑀺𑀬𑀁 𑀕𑀦𑁆𑀣𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑀺𑀢𑀸. 𑀢𑀁 𑀧𑀦 𑀦𑀬𑀁 𑀇𑀘𑁆𑀙𑀦𑁆𑀢𑁂𑀳𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀓𑀣𑀸. 𑁧 𑀆𑀤𑀬𑁄; 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀏𑀯 𑀯𑀺𑀢𑁆𑀣𑀸𑀭𑀢𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀦𑀬𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.