𑁩. 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸

𑀇𑀤𑀸𑀦𑀺 𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀦𑀦𑁆𑀢𑀭𑀁 𑁋

𑀅𑀬𑀁 𑀥𑀸𑀢𑀼𑀓𑀣𑀸𑀤𑀻𑀦𑀁, 𑀲𑀫𑁆𑀧𑀢𑁆𑀢𑀸 𑀅𑀢𑁆𑀣𑀯𑀡𑁆𑀡𑀦𑀸;

𑀫𑀸𑀢𑀺𑀓𑀸𑀦𑀁 𑀬𑀢𑁄 𑀢𑀲𑁆𑀫𑀸, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀬𑀣𑀸𑀭𑀳𑀁.

𑀅𑀦𑀼𑀢𑁆𑀢𑀸𑀦𑀢𑁆𑀣𑀢𑁄 𑀘𑁂𑀯, 𑀲𑀗𑁆𑀔𑁂𑀧𑁂𑀦𑀢𑁆𑀣𑀦𑀺𑀘𑁆𑀙𑀬𑀸;

𑀯𑀺𑀪𑀗𑁆𑀕𑀦𑀬𑀢𑁄 𑀘𑁂𑀯, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀢𑀢𑁆𑀣 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸𑀬 𑀢𑀸𑀯 𑀲𑀁𑀯𑀡𑁆𑀡𑀦𑀸 𑀳𑁄𑀢𑀺. 𑀲𑀸 𑀧𑀦𑁂𑀲𑀸 𑀦𑀺𑀓𑁆𑀔𑁂𑀧𑀢𑁄 𑀧𑀜𑁆𑀘𑀥𑀸 𑀞𑀺𑀢𑀸 𑁋 𑀦𑀬𑀫𑀸𑀢𑀺𑀓𑀸 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸 𑀦𑀬𑀫𑀼𑀔𑀫𑀸𑀢𑀺𑀓𑀸 𑀮𑀓𑁆𑀔𑀡𑀫𑀸𑀢𑀺𑀓𑀸 𑀩𑀸𑀳𑀺𑀭𑀫𑀸𑀢𑀺𑀓𑀸𑀢𑀺. 𑀢𑀢𑁆𑀣 ‘‘𑀲𑀗𑁆𑀕𑀳𑁄, 𑀅𑀲𑀗𑁆𑀕𑀳𑁄…𑀧𑁂… 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀅𑀬𑀁 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀲𑀗𑁆𑀕𑀳𑀸𑀤𑀺𑀓𑁂𑀦 𑀦𑀬𑁂𑀦 𑀥𑀸𑀢𑀼𑀓𑀣𑀸𑀬 𑀥𑀫𑁆𑀫𑀸 𑀯𑀺𑀪𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀦𑀬𑀫𑀸𑀢𑀺𑀓𑀸 𑀦𑀸𑀫, 𑀬𑀸 ‘‘𑀫𑀽𑀮𑀫𑀸𑀢𑀺𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺.

‘‘𑀧𑀜𑁆𑀘𑀓𑁆𑀔𑀦𑁆𑀥𑀸…𑀧𑁂… 𑀫𑀦𑀲𑀺𑀓𑀸𑀭𑁄’’𑀢𑀺 𑀅𑀬𑀁 𑀧𑀜𑁆𑀘𑀯𑀻𑀲𑀸𑀥𑀺𑀓𑁂𑀦 𑀧𑀤𑀲𑀢𑁂𑀦 𑀦𑀺𑀓𑁆𑀔𑀺𑀢𑁆𑀢𑀸 𑀲𑀗𑁆𑀕𑀳𑀸𑀤𑀺𑀦𑀬𑁂𑀦 𑀯𑀺𑀪𑀚𑀺𑀢𑀩𑁆𑀩𑀪𑀸𑀯𑁂𑀦 𑀥𑀸𑀢𑀼𑀓𑀣𑀸𑀬 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀞𑀧𑀺𑀢𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸 𑀦𑀸𑀫, 𑀬𑀸 ‘‘𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺.

‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄, 𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀅𑀬𑀁 𑀘𑀢𑀽𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀔𑀦𑁆𑀥𑀸𑀤𑀻𑀲𑀼 𑀘 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀲𑀼 𑀘 𑀫𑀸𑀢𑀺𑀓𑀸𑀥𑀫𑁆𑀫𑁂𑀲𑀼 𑀢𑀻𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀤𑁂𑀳𑁂𑀯 𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄 𑀘, 𑀢𑀣𑀸 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑁄, 𑀯𑀺𑀧𑁆𑀧𑀬𑁄𑀕𑁄 𑀘𑀸𑀢𑀺 𑀇𑀫𑁂𑀲𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀻𑀦𑀁 𑀦𑀬𑀸𑀦𑀁 𑀫𑀼𑀔𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀦𑀬𑀫𑀼𑀔𑀫𑀸𑀢𑀺𑀓𑀸 𑀦𑀸𑀫.

‘‘𑀲𑀪𑀸𑀕𑁄 𑀯𑀺𑀲𑀪𑀸𑀕𑁄’’𑀢𑀺 𑀅𑀬𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀸 𑀲𑀪𑀸𑀕𑀯𑀺𑀲𑀪𑀸𑀕𑀮𑀓𑁆𑀔𑀡𑀯𑀲𑁂𑀦𑁂𑀯 𑀲𑀗𑁆𑀕𑀳𑀸𑀲𑀗𑁆𑀕𑀳𑀦𑀬𑀸 𑀘𑁂𑀯 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀦𑀬𑀸 𑀘 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀺𑀢𑀢𑁆𑀢𑀸 𑀮𑀓𑁆𑀔𑀡𑀫𑀸𑀢𑀺𑀓𑀸 𑀦𑀸𑀫. 𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸𑀢𑀺 𑀅𑀬𑀁 𑀙𑀲𑀝𑁆𑀞𑀺 𑀢𑀺𑀓𑀧𑀤𑀸𑀦𑀺, 𑀤𑁆𑀯𑁂 𑀘 𑀤𑀼𑀓𑀧𑀤𑀲𑀢𑀸𑀦𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸 𑀥𑀸𑀢𑀼𑀓𑀣𑀸 𑀫𑀸𑀢𑀺𑀓𑀸𑀢𑁄 𑀩𑀳𑀺 𑀞𑀧𑀺𑀢𑀢𑁆𑀢𑀸 𑀩𑀸𑀳𑀺𑀭𑀫𑀸𑀢𑀺𑀓𑀸 𑀦𑀸𑀫. 𑀏𑀯𑀫𑁂𑀢𑀺𑀲𑁆𑀲𑀸 𑀧𑀜𑁆𑀘𑀯𑀺𑀥𑀸𑀬 𑀫𑀸𑀢𑀺𑀓𑀸𑀬 𑀅𑀬𑀫𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀸.

𑀲𑀗𑁆𑀕𑀳𑁄𑀢𑀺𑀆𑀤𑀻𑀲𑀼 𑀳𑀺 𑀲𑀗𑁆𑀕𑀳𑁄 𑀢𑀸𑀯 𑀚𑀸𑀢𑀺𑀲𑀜𑁆𑀚𑀸𑀢𑀺𑀓𑀺𑀭𑀺𑀬𑀸𑀕𑀡𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 ‘‘𑀲𑀩𑁆𑀩𑁂 𑀔𑀢𑁆𑀢𑀺𑀬𑀸 𑀆𑀕𑀘𑁆𑀙𑀦𑁆𑀢𑀼, 𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀘𑀸, 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄, 𑀇𑀫𑁂 𑀥𑀫𑁆𑀫𑀸 𑀲𑀻𑀮𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀚𑀸𑀢𑀺𑀲𑀗𑁆𑀕𑀳𑁄 𑀦𑀸𑀫. ‘‘𑀲𑀩𑁆𑀩𑁂 𑀓𑁄𑀲𑀮𑀓𑀸 𑀆𑀕𑀘𑁆𑀙𑀦𑁆𑀢𑀼, 𑀬𑁄 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀬𑀸 𑀘 𑀲𑀫𑁆𑀫𑀸𑀲𑀢𑀺, 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀇𑀫𑁂 𑀥𑀫𑁆𑀫𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄 𑀦𑀸𑀫, 𑀏𑀓𑀝𑁆𑀞𑀸𑀦𑁂 𑀚𑀸𑀢𑀺𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑁂 𑀳𑀢𑁆𑀣𑀸𑀭𑁄𑀳𑀸 𑀆𑀕𑀘𑁆𑀙𑀦𑁆𑀢𑀼, 𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀓𑀺𑀭𑀺𑀬𑀸𑀲𑀗𑁆𑀕𑀳𑁄 𑀦𑀸𑀫. ‘‘𑀳𑀜𑁆𑀘𑀺 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 ‘𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’’𑀦𑁆𑀢𑀺 (𑀓𑀣𑀸. 𑁪𑁭𑁧) 𑀅𑀬𑀁 𑀕𑀡𑀦𑀲𑀗𑁆𑀕𑀳𑁄 𑀦𑀸𑀫, 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀁 𑀯𑀺𑀓𑀧𑁆𑀧𑀢𑁄 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀤𑀻𑀦𑀺, 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀢𑀸𑀯𑀲𑁂𑀦 𑀲𑀫𑁆𑀧𑀬𑁄𑀕𑁄, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀯𑀺𑀧𑁆𑀧𑀬𑁄𑀕𑁄, 𑀢𑁂𑀲𑀁 𑀯𑀺𑀓𑀧𑁆𑀧𑀢𑁄 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀻𑀦𑀺, 𑀢𑀤𑀼𑀪𑀬𑀲𑀁𑀲𑀕𑁆𑀕𑀯𑀺𑀓𑀧𑁆𑀧𑀢𑁄 𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀆𑀤𑀻𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑁄.

𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀢𑁆𑀣𑀯𑀡𑁆𑀡𑀦𑀸

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀢𑁄 𑀧𑀦 𑀬𑀲𑁆𑀫𑀸 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀬 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀺, 𑀩𑀸𑀳𑀺𑀭𑀫𑀸𑀢𑀺𑀓𑀸𑀬 𑀓𑀼𑀲𑀮𑀸𑀤𑀻𑀦𑀺 𑀘 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺𑀆𑀤𑀺𑀓𑁂𑀳𑀺 𑀦𑀬𑀫𑀸𑀢𑀺𑀓𑀸𑀧𑀤𑁂𑀳𑀺 ‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺𑀆𑀤𑀺𑀦𑀬𑀫𑀼𑀔𑀫𑀸𑀢𑀺𑀓𑀸𑀯𑀲𑁂𑀦 𑀬𑀣𑀸𑀭𑀳𑀁 𑀦𑀺𑀤𑁆𑀤𑁂𑀲𑀢𑁆𑀣𑀸𑀬 𑀪𑀕𑀯𑀢𑀸 𑀞𑀧𑀺𑀢𑀸𑀦𑀺, 𑀢𑀲𑁆𑀫𑀸 𑀔𑀦𑁆𑀥𑀸𑀤𑀻𑀦𑀁 𑀲𑀗𑁆𑀕𑀳𑀸𑀤𑀻𑀦𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑀦𑀬𑁄 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀢𑀁 𑀯𑀺𑀲𑀼𑀁 𑀦 𑀯𑀓𑁆𑀔𑀸𑀫.

𑀢𑀢𑁆𑀣 𑀲𑀗𑁆𑀕𑀳𑀸𑀲𑀗𑁆𑀕𑀳𑀯𑀸𑀭𑁂 𑀔𑀦𑁆𑀥𑀸𑀦𑀁 𑀢𑀸𑀯 𑀅𑀬𑀁 𑀦𑀺𑀤𑁆𑀤𑁂𑀲𑁂 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁄 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄. 𑀢𑀢𑁆𑀣 𑀏𑀓𑀸𑀤𑀲𑀳𑀻𑀢𑀺 𑀫𑀦𑀸𑀬𑀢𑀦𑀯𑀚𑁆𑀚𑁂𑀳𑀺. 𑀥𑀫𑁆𑀫𑀸𑀬𑀢𑀦𑁂𑀦𑀸𑀧𑀺 𑀳𑀺 𑀓𑁂𑀘𑀺 𑀭𑀽𑀧𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸. 𑀏𑀓𑀸𑀤𑀲𑀳𑀻𑀢𑀺 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀚𑁆𑀚𑀸𑀳𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸 𑀬𑀣𑀸𑀲𑀓𑀁 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑀣𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀧𑀺. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄, 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀢𑀢𑁆𑀣 𑀳𑀺 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀏𑀓𑁂𑀦 𑀥𑀫𑁆𑀫𑀸𑀬𑀢𑀦𑁂𑀦 𑀘 𑀏𑀓𑀸𑀬 𑀥𑀫𑁆𑀫𑀥𑀸𑀢𑀼𑀬𑀸 𑀘 𑀲𑀗𑁆𑀕𑀳𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀔𑀦𑁆𑀥𑀧𑀤𑀦𑀺𑀤𑁆𑀤𑁂𑀲𑁂, 𑀉𑀧𑀭𑀺 𑀆𑀬𑀢𑀦𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀼 𑀘 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 (𑀥𑀸𑀢𑀼. 𑁧𑁫) 𑀤𑁆𑀯𑀺𑀫𑀽𑀮𑀓𑀸𑀤𑀺𑀦𑀬𑁂𑀦𑀸𑀧𑀺 𑀯𑀺𑀢𑁆𑀣𑀸𑀭𑀦𑀬𑁄 𑀯𑀺𑀪𑀢𑁆𑀢𑁄, 𑀲𑁄𑀧𑀺 𑀇𑀫𑀺𑀦𑀸 𑀏𑀓𑀫𑀽𑀮𑀦𑀬𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳𑀸. 𑀅𑀬𑀁 𑀔𑀦𑁆𑀥𑀧𑀤𑀦𑀺𑀤𑁆𑀤𑁂𑀲𑀦𑀬𑁄.

𑀆𑀬𑀢𑀦𑀥𑀸𑀢𑀼𑀧𑀤𑀸𑀦𑀫𑁆𑀧𑀺 𑀔𑀦𑁆𑀥𑀧𑀤𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄 𑀘 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀅𑀲𑀗𑁆𑀔𑀢𑀲𑁆𑀲 𑀔𑀦𑁆𑀥𑀲𑀗𑁆𑀕𑀳𑀸𑀪𑀸𑀯𑀸 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀔𑀦𑁆𑀥𑁂𑀲𑀼 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀘𑁆𑀘𑁂𑀲𑀼 𑀤𑀼𑀓𑁆𑀔𑀲𑀘𑁆𑀘𑀁 𑀲𑀩𑁆𑀩𑁂𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺. 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀘 𑀲𑀗𑁆𑀕𑀳𑀺𑀢𑀸𑀦𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀔𑀦𑁆𑀥𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀏𑀯 𑀲𑀗𑁆𑀕𑀳𑀺𑀢𑀁.

𑀇𑀦𑁆𑀤𑁆𑀭𑀺𑀬𑁂𑀲𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀤𑁆𑀯𑀻𑀳𑀺 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺. 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀜𑁆𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦, 𑀲𑀤𑁆𑀥𑀸𑀤𑀻𑀦𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦, 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺𑀧𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑁂𑀳𑀺 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺, 𑀏𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀘 𑀲𑀗𑁆𑀕𑀳𑀺𑀢𑀁. 𑀏𑀢𑁆𑀣 𑀳𑀺 𑀧𑀯𑀢𑁆𑀢𑀺𑀬𑀁 𑀦𑀸𑀫𑀭𑀽𑀧𑀲𑁆𑀲𑀸𑀧𑀺 𑀕𑀳𑀺𑀢𑀢𑁆𑀢𑀸 𑀲𑀤𑁆𑀤𑀸𑀬𑀢𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀴𑀸𑀬𑀢𑀦𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺, 𑀧𑀲𑀸𑀤𑀯𑀺𑀜𑁆𑀜𑀸𑀡𑀪𑀽𑀢𑁂𑀳𑀺 𑀙𑀳𑀺 𑀆𑀬𑀢𑀦𑁂𑀳𑀺, 𑀤𑁆𑀯𑀸𑀤𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀁. 𑀉𑀧𑀧𑀢𑁆𑀢𑀺𑀪𑀯𑁄 𑀧𑀦 𑀓𑀸𑀫𑀪𑀯𑀪𑀽𑀢𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺, 𑀲𑀤𑁆𑀤𑀸𑀬𑀢𑀦𑀯𑀚𑁆𑀚𑀺𑀢𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺, 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺. 𑀭𑀽𑀧𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺, 𑀲𑀤𑁆𑀤𑀸𑀤𑀺𑀘𑀢𑀼𑀓𑁆𑀓𑀖𑀸𑀦𑀸𑀤𑀺𑀢𑁆𑀢𑀬𑀢𑀩𑁆𑀩𑀺𑀜𑁆𑀜𑀸𑀡𑀯𑀚𑁆𑀚𑁂𑀳𑀺 𑀧𑀜𑁆𑀘𑀳𑀸𑀬𑀢𑀦𑁂𑀳𑀺, 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀅𑀲𑀜𑁆𑀜𑀻𑀪𑀯𑁄 𑀏𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦, 𑀭𑀽𑀧𑀥𑀫𑁆𑀫𑀯𑀲𑁂𑀦 𑀤𑁆𑀯𑀻𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀖𑀸𑀦𑀸𑀤𑀺𑀢𑁆𑀢𑀬𑀁 𑀧𑀦𑁂𑀢𑁆𑀣 𑀆𑀬𑀢𑀦𑀸𑀤𑀺𑀓𑀺𑀘𑁆𑀘𑀸𑀓𑀭𑀡𑀢𑁄 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀫𑁆𑀧𑀺 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀯𑀲𑁆𑀲 𑀘 𑀏𑀓𑀦𑁆𑀢𑀫𑀼𑀧𑀸𑀤𑀺𑀦𑁆𑀦𑀢𑁆𑀢𑀸 𑀧𑀯𑀢𑁆𑀢𑀺𑀯𑀺𑀧𑀸𑀓𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀕𑀳𑀡𑁂𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀲𑀤𑁆𑀤𑀸𑀬𑀢𑀦𑀲𑁆𑀲 𑀇𑀥 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀅𑀭𑀽𑀧𑀪𑀯𑁄 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀺 𑀆𑀬𑀢𑀦𑀥𑀸𑀢𑀽𑀳𑀺. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀢𑁆𑀢𑀸 𑀤𑁆𑀯𑀻𑀳𑀺 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺. 𑀲𑁄𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦. 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦, 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀘 𑀲𑀗𑁆𑀕𑀳𑀺𑀢𑁄. 𑀧𑀭𑀺𑀤𑁂𑀯𑁄 𑀭𑀽𑀧𑀓𑁆𑀔𑀦𑁆𑀥𑀲𑀤𑁆𑀤𑀸𑀬𑀢𑀦𑀲𑀤𑁆𑀤𑀥𑀸𑀢𑀽𑀳𑀺. 𑀲𑁂𑀲𑀸𑀦𑀺 𑀧𑀦𑁂𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺, 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑀇𑀤𑁆𑀥𑀺𑀧𑀸𑀤𑀸 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺, 𑀆𑀬𑀢𑀦𑁂𑀳𑀺, 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀏𑀢𑁆𑀣 𑀘 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀲𑁆𑀲 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀬𑀫𑀢𑁄 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀛𑀸𑀦𑀸𑀦𑀺 𑀤𑁆𑀯𑀻𑀳𑀺 𑀯𑁂𑀤𑀦𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺, 𑀏𑀓𑁂𑀦𑀸𑀬𑀢𑀦𑁂𑀦, 𑀏𑀓𑀸𑀬 𑀥𑀸𑀢𑀼𑀬𑀸 𑀘 𑀲𑀗𑁆𑀕𑀳𑀺𑀢𑀸𑀦𑀺. 𑀅𑀧𑁆𑀧𑀫𑀜𑁆𑀜𑀸 𑀏𑀓𑁂𑀦 𑀔𑀦𑁆𑀥𑁂𑀦, 𑀏𑀓𑁂𑀦 𑀆𑀬𑀢𑀦𑁂𑀦, 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸. 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺𑀧𑀺. 𑀓𑁂𑀯𑀮𑀁 𑀧𑀦 𑀘𑀺𑀢𑁆𑀢𑀁 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀘𑁂𑀲 𑀯𑀼𑀢𑁆𑀢𑀸𑀯𑀲𑁂𑀲𑁂𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀫𑀺𑀦𑀸 𑀦𑀬𑁂𑀦 𑀩𑀸𑀳𑀺𑀭𑀫𑀸𑀢𑀺𑀓𑀸𑀬𑀧𑀺 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺, 𑀤𑁆𑀯𑀻𑀳𑀺 𑀆𑀬𑀢𑀦𑁂𑀳𑀺, 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀅𑀩𑁆𑀬𑀸𑀓𑀢𑀸 𑀧𑀦 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑁆𑀯𑀸 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀜𑀸𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀥𑀸𑀢𑀼𑀓𑀣𑀸𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀥𑀸𑀢𑀼. 𑁭𑁭 𑀆𑀤𑀬𑁄; 𑀥𑀸𑀢𑀼. 𑀅𑀝𑁆𑀞. 𑁭𑁭) 𑀕𑀳𑁂𑀢𑀩𑁆𑀩𑁄𑀢𑀺.

𑀦𑀺𑀝𑁆𑀞𑀺𑀢𑁄 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀧𑀤𑀲𑁆𑀲

𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄.

𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑁂 𑀲𑀩𑁆𑀩𑁂𑀲𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀁 𑀦𑀺𑀤𑁆𑀤𑁂𑀲𑁄 𑀦 𑀲𑀫𑁆𑀪𑀯𑀢𑀺. 𑀬𑀸𑀦𑀺 𑀧𑀦𑁂𑀢𑁆𑀣 𑀧𑀤𑀸𑀦𑀺 𑀭𑀽𑀧𑁂𑀓𑀤𑁂𑀲𑀁, 𑀅𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀯𑀺𑀜𑁆𑀜𑀸𑀡𑁂𑀓𑀤𑁂𑀲𑀜𑁆𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺, 𑀢𑁂𑀲𑀫𑀺𑀥 𑀦𑀺𑀤𑁆𑀤𑁂𑀲𑁄. 𑀢𑀸𑀦𑀺 𑀧𑀦 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀁 𑀤𑀲𑀸𑀬𑀢𑀦𑀸𑀦𑀁, 𑀥𑀫𑁆𑀫𑀥𑀸𑀢𑀼𑀯𑀚𑁆𑀚𑀺𑀢𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀥𑀸𑀢𑀽𑀦𑀁, 𑀲𑀢𑁆𑀢𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁. 𑀢𑁂𑀦𑁂𑀯 𑀧𑀸𑀴𑀺𑀬𑀁 𑁋

‘‘𑀤𑀲𑀸𑀬𑀢𑀦𑀸 𑀲𑀢𑁆𑀢𑀭𑀲 𑀥𑀸𑀢𑀼𑀬𑁄,

𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸 𑀅𑀲𑀜𑁆𑀜𑀸𑀪𑀯𑁄 𑀏𑀓𑀯𑁄𑀓𑀸𑀭𑀪𑀯𑁄;

𑀧𑀭𑀺𑀤𑁂𑀯𑁄 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁,

𑀅𑀦𑀺𑀤𑀲𑁆𑀲𑀦𑀁 𑀧𑀼𑀦𑀤𑁂𑀯 𑀲𑀧𑁆𑀧𑀝𑀺𑀖𑀁 𑀉𑀧𑀸𑀤𑀸’’𑀢𑀺. (𑀥𑀸𑀢𑀼. 𑁧𑁭𑁮) 𑁋

𑀏𑀯𑀁 𑀉𑀤𑁆𑀤𑀸𑀦𑀕𑀸𑀣𑀸 𑀯𑀼𑀢𑁆𑀢𑀸. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄, 𑀏𑀯𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄𑀯. 𑀢𑁂𑀧𑀺 𑀘 𑀬𑁂𑀳𑀺 𑀓𑁂𑀳𑀺𑀘𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀢𑁂𑀲𑀁 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀸 𑀬𑀣𑀸𑀯𑀼𑀢𑁆𑀢𑀸𑀬𑀢𑀦𑀸𑀦𑀁 𑀯𑀲𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑀁 𑀔𑀦𑁆𑀥𑀧𑀤𑁂𑀦 𑀲𑀗𑁆𑀕𑀳𑀺𑀢𑀁 𑀳𑀼𑀢𑁆𑀯𑀸 𑀆𑀬𑀢𑀦𑀥𑀸𑀢𑀼𑀧𑀤𑁂𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀔𑀦𑁆𑀥𑀸𑀬𑀢𑀦𑀧𑀤𑁂𑀳𑀺 𑀯𑀸 𑀲𑀗𑁆𑀕𑀳𑀺𑀢𑀁 𑀳𑀼𑀢𑁆𑀯𑀸 𑀥𑀸𑀢𑀼𑀧𑀤𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺. 𑀓𑀣𑀁? 𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀲𑀗𑁆𑀕𑀳𑁂𑀦, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀘 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺, 𑀆𑀬𑀢𑀦𑁂𑀳𑀺, 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸? 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀺 𑀆𑀬𑀢𑀦𑁂𑀳𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀏𑀯𑀁 𑀭𑀽𑀧𑀸𑀬𑀢𑀦𑀸𑀤𑀻𑀲𑀼𑀧𑀺 𑀧𑀲𑀸𑀤𑀯𑀺𑀲𑀬𑀪𑀽𑀢𑁂𑀲𑀼 𑀥𑀸𑀢𑀽𑀲𑀼, 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀘 𑀬𑁄𑀚𑀦𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀭𑀽𑀧𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀘𑀓𑁆𑀔𑀸𑀬𑀢𑀦𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀘𑀓𑁆𑀔𑀼𑀥𑀸𑀢𑀼𑀬𑀸 𑀅𑀲𑀗𑁆𑀕𑀳𑀺𑀢𑀸, 𑀘𑀓𑁆𑀔𑀸𑀬𑀢𑀦𑀘𑀓𑁆𑀔𑀼𑀥𑀸𑀢𑀽𑀳𑀺 𑀏𑀓𑀲𑁆𑀲𑁂𑀯𑁂𑀢𑀲𑁆𑀲 𑀘𑀓𑁆𑀔𑀼𑀲𑁆𑀲 𑀯𑀺𑀲𑀼𑀁 𑀆𑀬𑀢𑀦𑀥𑀸𑀢𑀽𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑁂 𑀘𑀓𑁆𑀔𑀸𑀬𑀢𑀦𑀯𑀺𑀭𑀳𑀺𑀢𑀸 𑀲𑀩𑁆𑀩𑁂 𑀭𑀽𑀧𑀥𑀫𑁆𑀫𑀸 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀘𑀓𑁆𑀔𑀸𑀬𑀢𑀦𑀁 𑀫𑀦𑀸𑀬𑀢𑀦𑀦𑁆𑀢𑀺 𑀤𑁆𑀯𑀻𑀳𑀺 𑀆𑀬𑀢𑀦𑁂𑀳𑀺 𑀘𑀓𑁆𑀔𑀼𑀥𑀸𑀢𑀼 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀉𑀧𑀭𑀺 𑀭𑀽𑀧𑀸𑀬𑀢𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀲𑁆𑀫𑀺𑀁 𑀳𑀺 𑀯𑀸𑀭𑁂 𑀘𑀓𑁆𑀔𑀸𑀬𑀢𑀦𑀲𑁆𑀲 𑀅𑀢𑁆𑀢𑀦𑁄 𑀢𑀻𑀳𑀺𑀧𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀢𑀸𑀬 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀁, 𑀆𑀬𑀢𑀦𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀏𑀯𑀁 𑀢𑀻𑀳𑀺𑀧𑀺 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀯𑀺𑀲𑁂𑀲𑀦𑁂𑀳𑀺 𑀯𑀺𑀲𑀺𑀝𑁆𑀞𑀲𑁆𑀲𑁂𑀯 ‘‘𑀓𑀢𑀺𑀳𑀺 𑀔𑀦𑁆𑀥𑁂𑀳𑀻’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀘 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀲𑀳 𑀩𑀳𑀺𑀪𑀽𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘𑁂𑀢𑁆𑀣 𑀘𑀓𑁆𑀔𑀸𑀬𑀢𑀦𑁂𑀦 𑀉𑀧𑀮𑀓𑁆𑀔𑀺𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑀸, 𑀦 𑀘𑀓𑁆𑀔𑀸𑀬𑀢𑀦𑀲𑁆𑀲, 𑀏𑀯𑀁 𑀉𑀧𑀭𑀺 𑀭𑀽𑀧𑀸𑀬𑀢𑀦𑀸𑀤𑀻𑀳𑀺 𑀉𑀧𑀮𑀓𑁆𑀔𑀺𑀢𑀯𑀸𑀭𑁂𑀧𑀺 𑀬𑀣𑀸𑀭𑀳𑀁 𑀜𑀸𑀢𑀩𑁆𑀩𑀸.

𑀲𑁂𑀲𑁂𑀲𑀼 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀤𑁆𑀯𑀸𑀤𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀏𑀯𑀁 𑀲𑁂𑀲𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼𑀧𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀅𑀲𑀜𑁆𑀜𑀻𑀪𑀯𑁂𑀦 𑀬𑁂 𑀥𑀫𑁆𑀫𑀸…𑀧𑁂… 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀉𑀧𑀸𑀤𑀸𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸…𑀧𑁂… 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀸𑀭𑀸 𑀅𑀧𑀼𑀩𑁆𑀩𑀯𑀺𑀲𑁂𑀲𑀸 𑀲𑀫𑀸𑀬𑁂𑀯. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀸𑀭𑁂 𑀤𑁆𑀯𑀸𑀤𑀲𑀳𑀻𑀢𑀺 𑀙 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸𑀳𑀺 𑀥𑀸𑀢𑀽𑀳𑀺 𑀲𑁂𑀲𑀸 𑀙 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀯 𑀔𑀦𑁆𑀥𑀸𑀬𑀢𑀦𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀥𑀸𑀢𑀼𑀲𑀗𑁆𑀕𑀳𑁂𑀦𑁂𑀯 𑀅𑀲𑀗𑁆𑀕𑀳𑀺𑀢𑀸. 𑀅𑀯𑀲𑁂𑀲𑀸𑀳𑀺 𑀤𑁆𑀯𑀸𑀤𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺. 𑀏𑀲 𑀦𑀬𑁄 𑀲𑁂𑀲𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼𑀧𑀺.

𑀤𑀼𑀢𑀺𑀬𑁂 𑀢𑀻𑀳𑀸𑀬𑀢𑀦𑁂𑀳𑀻𑀢𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺. 𑀅𑀲𑀜𑁆𑀜𑀺𑀩𑁆𑀭𑀳𑁆𑀫𑀮𑁄𑀓𑁂 𑀳𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀲𑁂𑀦 𑀤𑁆𑀯𑁂 𑀆𑀬𑀢𑀦𑀸𑀦𑀺 𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺, 𑀢𑁂 𑀧𑀦 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺, 𑀆𑀬𑀢𑀦𑀥𑀸𑀢𑀽𑀲𑀼 𑀅𑀲𑀗𑁆𑀕𑀳𑀺𑀢𑀸𑀦𑀺. 𑀢𑀤𑀯𑀲𑁂𑀲𑀸𑀦𑀺 𑀦𑀯 𑀭𑀽𑀧𑀸𑀬𑀢𑀦𑀸𑀦𑀺, 𑀢𑀸𑀦𑀺 𑀢𑁂𑀳𑁂𑀯 𑀘 𑀤𑁆𑀯𑀻𑀳𑀺 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺 𑀘 𑀅𑀲𑀗𑁆𑀕𑀳𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀦𑀯𑀳𑀺 𑀥𑀸𑀢𑀽𑀳𑀻𑀢𑀺 𑀭𑀽𑀧𑀥𑀸𑀢𑀼𑀥𑀫𑁆𑀫𑀥𑀸𑀢𑀽𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺.

𑀢𑀢𑀺𑀬𑁂 𑀤𑀲𑀳𑀻𑀢𑀺 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀯𑀚𑁆𑀚𑁂𑀳𑀺. 𑀲𑁄𑀴𑀲𑀳𑀻𑀢𑀺 𑀭𑀽𑀧𑀥𑀸𑀢𑀼𑀥𑀫𑁆𑀫𑀥𑀸𑀢𑀼𑀯𑀚𑁆𑀚𑀸𑀳𑀺. 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀦𑀺 𑀦𑀸𑀫 𑀦𑀯 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑀺, 𑀢𑀸𑀦𑀺 𑀢𑁂𑀳𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀦𑀺, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀘 𑀅𑀲𑀗𑁆𑀕𑀳𑀺𑀢𑀸𑀦𑀺, 𑀭𑀽𑀧𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀦𑀺 𑀤𑁆𑀯𑁂𑀧𑀺 𑀲𑁂𑀲𑁂𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀘𑀢𑀼𑀢𑁆𑀣𑁂 𑀏𑀓𑀸𑀤𑀲𑀳𑀻𑀢𑀺 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀯𑀚𑁆𑀚𑁂𑀳𑀺 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀲𑁆𑀲 𑀉𑀧𑀸𑀤𑀸𑀥𑀫𑁆𑀫𑁂𑀳𑀺 𑀆𑀬𑀢𑀦𑀸𑀤𑀻𑀲𑀼 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀯𑀺𑀜𑁆𑀜𑀸𑀡𑁂𑀦 𑀯𑀸 𑀑𑀴𑀸𑀭𑀺𑀓𑀭𑀽𑀧𑁂𑀦 𑀯𑀸 𑀅𑀲𑀫𑁆𑀫𑀺𑀲𑁆𑀲𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁 𑀤𑀻𑀧𑁂𑀦𑁆𑀢𑀺, 𑀢𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺, 𑀢𑀸𑀦𑀺 𑀧𑀦 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀤𑀼𑀓𑁆𑀔𑀲𑀘𑁆𑀘𑀯𑀚𑁆𑀚𑀺𑀢𑀸𑀦𑀁 𑀢𑀺𑀡𑁆𑀡𑀁 𑀲𑀘𑁆𑀘𑀸𑀦𑀁, 𑀧𑀲𑀸𑀤𑀫𑀦𑁄𑀯𑀚𑁆𑀚𑀺𑀢𑀸𑀦𑀁 𑀲𑁄𑀴𑀲𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀨𑀲𑁆𑀲𑀯𑁂𑀤𑀦𑀸𑀢𑀡𑁆𑀳𑀼𑀧𑀸𑀤𑀸𑀦𑀓𑀫𑁆𑀫𑀪𑀯𑀚𑀸𑀢𑀺𑀚𑀭𑀸𑀫𑀭𑀡𑀲𑁄𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀯𑀲𑁂𑀦 𑀘𑀼𑀤𑁆𑀤𑀲𑀧𑀘𑁆𑀘𑀬𑀸𑀓𑀸𑀭𑀧𑀤𑀸𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀬𑁄 𑀔𑀦𑁆𑀥𑀸 𑀢𑀣𑀸 𑀲𑀘𑁆𑀘𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀲𑁄𑀴𑀲;

𑀧𑀤𑀸𑀦𑀺 𑀧𑀘𑁆𑀘𑀬𑀸𑀓𑀸𑀭𑁂, 𑀘𑀼𑀤𑁆𑀤𑀲𑀽𑀧𑀭𑀺 𑀘𑀼𑀤𑁆𑀤𑀲.

‘‘𑀲𑀫𑀢𑀺𑀁𑀲 𑀧𑀤𑀸 𑀳𑁄𑀦𑁆𑀢𑀺, 𑀕𑁄𑀘𑁆𑀙𑀓𑁂𑀲𑀼 𑀤𑀲𑀲𑁆𑀯𑀣;

𑀤𑀼𑀯𑁂 𑀘𑀽𑀴𑀦𑁆𑀢𑀭𑀤𑀼𑀓𑀸, 𑀅𑀝𑁆𑀞 𑀳𑁄𑀦𑁆𑀢𑀺 𑀫𑀳𑀦𑁆𑀢𑀭𑀸’’𑀢𑀺. (𑀥𑀸𑀢𑀼. 𑀅𑀝𑁆𑀞. 𑁧𑁭𑁯) 𑁋

𑀏𑀯𑀁 𑀉𑀤𑁆𑀤𑀸𑀦𑀕𑀸𑀣𑀸 𑀯𑀼𑀢𑁆𑀢𑀸. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑀁 𑀔𑀦𑁆𑀥𑀧𑀤𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀆𑀬𑀢𑀦𑀥𑀸𑀢𑀼𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀢𑀻𑀳𑀺 𑀯𑀺𑀲𑁂𑀲𑀦𑁂𑀳𑀺 𑀯𑀺𑀲𑀺𑀝𑁆𑀞𑀲𑁆𑀲 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺. 𑀓𑀣𑀁? 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺, 𑀆𑀬𑀢𑀦𑁂𑀳𑀺, 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸? 𑀢𑁂 𑀥𑀫𑁆𑀫𑀸 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 𑀦𑀺𑀩𑁆𑀩𑀸𑀦𑀁, 𑀲𑀼𑀔𑀼𑀫𑀭𑀽𑀧𑀁, 𑀲𑀜𑁆𑀜𑀸𑀲𑀗𑁆𑀔𑀸𑀭𑀸 𑀘 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸 𑀳𑀼𑀢𑁆𑀯𑀸 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸. 𑀢𑁂𑀲𑀼 𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺, 𑀲𑁂𑀲𑀸 𑀢𑀻𑀳𑀺 𑀭𑀽𑀧𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀆𑀬𑀢𑀦𑀥𑀸𑀢𑀼𑀬𑁄 𑀧𑀦𑁂𑀢𑁆𑀣 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀦𑀁 𑀯𑀲𑁂𑀦𑁂𑀯 𑀲𑀩𑁆𑀩𑀢𑁆𑀣 𑀯𑁂𑀤𑀺𑀢𑀩𑁆𑀩𑀸 𑀇𑀢𑀭𑀸𑀲𑀁 𑀅𑀲𑀫𑁆𑀪𑀯𑀸, 𑀇𑀫𑁂𑀲𑀼 𑀘 𑀦𑀺𑀩𑁆𑀩𑀸𑀦𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑁂𑀦𑁂𑀯 𑀳𑀺 ‘‘𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀔𑀦𑁆𑀥𑀲𑀗𑁆𑀕𑀳𑁂 𑀏𑀯 𑀅𑀲𑀗𑁆𑀔𑀢𑀁 𑀞𑀧𑁂𑀢𑁆𑀯𑀸, 𑀦 𑀇𑀢𑀭𑀲𑀗𑁆𑀕𑀳𑁂𑀲𑀽𑀢𑀺 𑀏𑀯𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀬𑁂 𑀥𑀫𑁆𑀫𑀸…𑀧𑁂… 𑀢𑁂 𑀥𑀫𑁆𑀫𑀸 𑀤𑁆𑀯𑀻𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀦𑀺𑀩𑁆𑀩𑀸𑀦𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀲𑀼 𑀘 𑀦𑀺𑀩𑁆𑀩𑀸𑀦𑀯𑁂𑀤𑀦𑀸𑀲𑀜𑁆𑀜𑀸𑀯 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀲𑀗𑁆𑀔𑀸𑀭𑁂𑀓𑀤𑁂𑀲𑀁 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺 𑀯𑁂𑀤𑀦𑁂𑀓𑀤𑁂𑀲𑀁 𑀯𑀸 𑀲𑀼𑀔𑀼𑀫𑀭𑀽𑀧𑀁 𑀯𑀸 𑀲𑀤𑁆𑀤𑁂𑀓𑀤𑁂𑀲𑀁 𑀯𑀸, 𑀢𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼 𑀏𑀓𑀫𑁆𑀧𑀺 𑀓𑁄𑀝𑁆𑀞𑀸𑀲𑀁 𑀲𑀓𑀮𑁂𑀦 𑀕𑀳𑁂𑀢𑁆𑀯𑀸 𑀞𑀺𑀢𑀧𑀤𑀸𑀦𑀺 𑀦 𑀬𑀼𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀁, 𑀧𑀦𑁆𑀦𑀭𑀲𑀺𑀦𑁆𑀤𑁆𑀭𑀺𑀬𑀸𑀦𑀁, 𑀏𑀓𑀸𑀤𑀲𑀧𑀝𑀺𑀘𑁆𑀘𑀧𑀤𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑀁 𑀅𑀢𑁆𑀢𑀦𑀸 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑁂𑀳𑀺 𑀔𑀦𑁆𑀥𑀸𑀤𑀺𑀢𑁄 𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀧𑀞𑀫𑀁 𑀉𑀤𑁆𑀥𑀝𑀧𑀤𑀲𑁆𑀲 𑀧𑀼𑀦 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀆𑀤𑀺𑀧𑀤𑁂 𑀦𑀬𑁄 𑁋 𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸𑀢𑀺. 𑀲𑀫𑀼𑀤𑀬𑀲𑀘𑁆𑀘𑁂𑀦 𑀳𑀺 𑀢𑀡𑁆𑀳𑀸𑀯𑀚𑁆𑀚𑀸 𑀲𑁂𑀲𑀸 𑀲𑀗𑁆𑀔𑀸𑀭𑀸 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀧𑀼𑀦 𑀢𑁂𑀳𑀺 𑀘 𑀢𑀡𑁆𑀳𑀸𑀯 𑀲𑀗𑁆𑀕𑀳𑀺𑀢𑀸, 𑀲𑀸 𑀘 𑀧𑀼𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀧𑀜𑁆𑀘𑀓𑁆𑀔𑀦𑁆𑀥𑀕𑀸𑀳𑀓𑁂𑀳𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀳𑀺, 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀼𑀔𑀼𑀫𑀭𑀽𑀧𑀕𑀸𑀳𑀓𑁂𑀳𑀺 𑀅𑀘𑁂𑀢𑀲𑀺𑀓𑀸𑀤𑀻𑀳𑀺 𑀘 𑀧𑀤𑁂𑀳𑀺 𑀯𑀺𑀯𑀚𑁆𑀚𑀺𑀢𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀺, 𑀢𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑀁 𑀧𑀞𑀫𑀁 𑀉𑀤𑁆𑀥𑀝𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑁂𑀦 𑀔𑀦𑁆𑀥𑀸𑀤𑀺𑀢𑁄 𑀅𑀲𑀗𑁆𑀕𑀳𑀺𑀢𑀁, 𑀬𑀁 𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀧𑀼𑀦 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀏𑀓𑀧𑀤𑀬𑁄𑀚𑀦𑀸 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀅𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀦𑀺𑀩𑁆𑀩𑀸𑀦𑀜𑁆𑀘 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀸𑀤𑀻𑀳𑀺 𑀧𑀦 𑀯𑀺𑀜𑁆𑀜𑀸𑀡𑀫𑁂𑀯 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑀸𑀬𑀢𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑀺𑀜𑁆𑀜𑀸𑀡𑀫𑁂𑀯 𑀢𑀻𑀳𑀺𑀧𑀺 𑀔𑀦𑁆𑀥𑀲𑀗𑁆𑀕𑀳𑀸𑀤𑀻𑀳𑀺 𑀭𑀽𑀧𑀓𑁆𑀔𑀦𑁆𑀥𑁂𑀦 𑀅𑀲𑀗𑁆𑀕𑀳𑀺𑀢𑀁 𑀦𑀸𑀫. 𑀢𑁂𑀦 𑀧𑀼𑀦 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀦𑀺𑀩𑁆𑀩𑀸𑀦𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀧𑀼𑀦 𑀯𑀺𑀜𑁆𑀜𑀸𑀡𑀪𑀽𑀢𑁂𑀦 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺. 𑀅𑀬𑀁 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀦𑀺𑀩𑁆𑀩𑀸𑀦𑁂𑀦, 𑀭𑀽𑀧𑁂𑀦 𑀯𑀸 𑀫𑀺𑀲𑁆𑀲𑁂𑀲𑀼 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼 𑀏𑀓𑀸𑀬𑀧𑀺 𑀅𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀭𑀽𑀧𑀥𑀫𑁆𑀫𑁂 𑀧𑀓𑀸𑀲𑁂𑀦𑁆𑀢𑀺, 𑀢𑁂𑀲𑀁 𑀥𑀫𑁆𑀫𑀸𑀬𑀢𑀦𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑁄 𑀦 𑀲𑀫𑁆𑀪𑀯𑀢𑀺. 𑀓𑀸𑀳𑀺𑀘𑀺 𑀧𑀦 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀭𑀽𑀧𑀫𑀺𑀲𑁆𑀲𑀸𑀭𑀽𑀧𑀥𑀫𑁆𑀫𑀸𑀦𑀁, 𑀓𑁂𑀯𑀮𑀸𑀦𑀸𑀭𑀫𑁆𑀫𑀡𑀸𑀦𑀁 𑀯𑀸 𑀲𑀓𑀮𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀯𑀸 𑀧𑀓𑀸𑀲𑀓𑀸𑀦𑀁 𑀭𑀽𑀧𑀪𑀯𑀭𑀽𑀧𑀓𑁆𑀔𑀦𑁆𑀥𑀓𑀼𑀲𑀮𑀸𑀤𑀺𑀧𑀤𑀸𑀦𑀁 𑀲𑀫𑁆𑀧𑀬𑁄𑀕𑀧𑀤𑁂 𑀏𑀯 𑀦𑀺𑀤𑁆𑀤𑁂𑀲𑁄 𑀦 𑀲𑀫𑁆𑀪𑀯𑀢𑀺, 𑀯𑀺𑀧𑁆𑀧𑀬𑁄𑀕𑀧𑀤𑁂 𑀧𑀦 𑀲𑀫𑁆𑀪𑀯𑀢𑀺. 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀧𑀦 𑀧𑀘𑁆𑀘𑁂𑀓𑀁, 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀁, 𑀢𑀤𑁂𑀓𑀤𑁂𑀲𑀸𑀦𑀁 𑀯𑀸 𑀢𑀤𑀼𑀪𑀬𑁂𑀧𑀺 𑀲𑀫𑁆𑀪𑀯𑀢𑀺. ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄, 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄’’𑀢𑀺 𑀳𑀺 𑀯𑀘𑀦𑀢𑁄 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑁂𑀯 𑀲𑀪𑀸𑀕𑀸𑀦𑀁 𑀏𑀓𑀲𑀦𑁆𑀢𑀸𑀦𑁂 𑀏𑀓𑀓𑁆𑀔𑀡𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀏𑀯 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑁄𑀕𑁄 𑀮𑀩𑁆𑀪𑀢𑀺. 𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀭𑀽𑀧𑁂𑀦, 𑀦𑀺𑀩𑁆𑀩𑀸𑀦𑁂𑀦 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀺, 𑀢𑀣𑀸 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺. 𑀯𑀺𑀲𑀪𑀸𑀕𑀸 𑀳𑀺 𑀢𑁂 𑀢𑁂𑀲𑀁 𑀬𑀣𑀸 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺, 𑀏𑀯𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑀺𑀓𑁂𑀳𑀺 𑀦𑀸𑀦𑀓𑁆𑀔𑀡𑀺𑀓𑁂𑀳𑀺 𑀅𑀭𑀽𑀧𑀥𑀫𑁆𑀫𑁂𑀳𑀺𑀧𑀺 𑀲𑀤𑁆𑀥𑀺𑀁 𑀦𑀢𑁆𑀣𑀺𑀬𑁂𑀯. 𑀢𑁂𑀧𑀺 𑀳𑀺 𑀢𑁂𑀲𑀁 𑀲𑀦𑁆𑀢𑀸𑀦𑀓𑁆𑀔𑀡𑀯𑀺𑀲𑀪𑀸𑀕𑀢𑀸𑀬 𑀯𑀺𑀲𑀪𑀸𑀕𑀸 𑀏𑀯. 𑀅𑀬𑀁 𑀧𑀦 𑀯𑀺𑀲𑀪𑀸𑀕𑀢𑀸 𑀇𑀥 𑀲𑀸𑀫𑀜𑁆𑀜𑀢𑁄 𑀦 𑀕𑀳𑀺𑀢𑀸 𑀢𑁂𑀲𑀁 𑀅𑀯𑀺𑀲𑁂𑀲𑁂𑀦 𑀲𑀫𑁆𑀧𑀬𑁄𑀕𑀲𑁆𑀲𑀸𑀧𑀺 𑀲𑀫𑁆𑀪𑀯𑀸. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁂𑀢𑁆𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀤𑀬𑁄 𑀦𑀺𑀓𑁆𑀔𑀺𑀢𑁆𑀢𑀸, 𑀢𑀢𑁆𑀣𑀸𑀬𑀫𑁆𑀧𑀺 𑀯𑀺𑀲𑀪𑀸𑀕𑀢𑀸 𑀕𑀳𑀺𑀢𑀸. 𑀬𑀢𑁆𑀣 𑀧𑀦 𑀬𑁂 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑀦𑀸, 𑀢𑀢𑁆𑀣𑀸𑀧𑀺 𑀲𑀩𑁆𑀩𑀣𑀸 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀁 𑀦 𑀲𑀫𑁆𑀪𑀯𑀢𑀺. 𑀲𑁄 𑀘 𑀢𑀲𑁆𑀲 𑀏𑀓𑀦𑁆𑀢𑁂𑀦 𑀯𑀺𑀲𑀪𑀸𑀕𑁄𑀢𑀺 𑀇𑀥 𑀕𑀬𑁆𑀳𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁄 𑀓𑁂𑀦𑀘𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄. 𑀏𑀲 𑀦𑀬𑁄 𑀘𑀓𑁆𑀔𑀸𑀬𑀢𑀦𑀸𑀤𑀺𑀅𑀦𑀸𑀭𑀫𑁆𑀫𑀡𑁂𑀲𑀼𑀧𑀺. 𑀲𑀸𑀭𑀫𑁆𑀫𑀡𑁂𑀲𑀼 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀺 𑀆𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺.

𑀢𑀢𑁆𑀣 𑀏𑀓𑁂𑀦𑀸𑀢𑀺 𑀫𑀦𑀸𑀬𑀢𑀦𑁂𑀦. 𑀲𑀢𑁆𑀢𑀳𑀻𑀢𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀓𑁂𑀳𑀺𑀘𑀻𑀢𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑀺. 𑀤𑀼𑀢𑀺𑀬𑀦𑀬𑁂 𑀢𑀻𑀳𑀻𑀢𑀺 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺. 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀳𑀺. 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 ‘‘𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀤𑀬𑁄 𑀏𑀓𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀅𑀥𑀺𑀫𑁄𑀓𑁆𑀔𑁄 𑀧𑀦 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀤𑁆𑀯𑀻𑀳𑁂𑀯𑀸’’𑀢𑀺. 𑀅𑀬𑀁 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑁂 𑀦𑀬𑁄.

𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀲𑀫𑁆𑀧𑀬𑁄𑀕𑀸𑀭𑀳𑀧𑀤𑁂𑀲𑀼 𑀬𑀸𑀦𑀺 𑀧𑀤𑀸𑀦𑀺 𑀥𑀫𑁆𑀫𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁂 𑀥𑀫𑁆𑀫𑁂, 𑀯𑀺𑀜𑁆𑀜𑀸𑀡𑀜𑁆𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀺, 𑀢𑁂𑀲𑀫𑁂𑀯 𑀦𑀺𑀤𑁆𑀤𑁂𑀲𑁄. 𑀢𑀸𑀦𑀺 𑀧𑀦 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀧𑀤𑀸𑀦𑀁, 𑀫𑀦𑀸𑀬𑀢𑀦𑀲𑁆𑀲, 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁, 𑀫𑀦𑁄𑀧𑁂𑀓𑁆𑀔𑀸𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀦𑀁 𑀢𑀺𑀡𑁆𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀤𑀸𑀦𑀁, 𑀨𑀲𑁆𑀲𑀲𑀢𑁆𑀢𑀓𑀲𑁆𑀲, 𑀅𑀤𑀼𑀓𑁆𑀔𑀫𑀲𑀼𑀔𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀯𑀲𑁂𑀦 𑀢𑀺𑀡𑁆𑀡𑀁 𑀢𑀺𑀓𑀧𑀤𑀸𑀦𑀁, 𑀲𑀢𑁆𑀢𑀫𑀳𑀦𑁆𑀢𑀭𑀤𑀼𑀓𑀧𑀤𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀦 𑀇𑀢𑀭𑁂𑀲𑀁 𑀅𑀲𑀫𑁆𑀪𑀯𑀸. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀬𑀢𑀦𑀜𑁆𑀘 𑀏𑀓𑀁,

𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸 𑀥𑀸𑀢𑀼𑀧𑀤𑀸𑀦𑀺 𑀲𑀢𑁆𑀢;

𑀢𑀬𑁄 𑀧𑀝𑀺𑀘𑁆𑀘𑀸 𑀅𑀣 𑀨𑀲𑁆𑀲𑀲𑀢𑁆𑀢𑀓𑀁,

𑀢𑀺𑀓𑁂 𑀢𑀬𑁄 𑀲𑀢𑁆𑀢 𑀫𑀳𑀦𑁆𑀢𑀭𑁂 𑀘;

𑀏𑀓𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀫𑁂𑀓𑀁,

𑀬𑀼𑀢𑁆𑀢𑀁 𑀉𑀧𑁂𑀓𑁆𑀔𑀸𑀬 𑀘 𑀏𑀓𑀫𑁂𑀯𑀸’’𑀢𑀺. (𑀥𑀸𑀢𑀼. 𑀅𑀝𑁆𑀞. 𑁩𑁦𑁬) 𑁋

𑀉𑀤𑁆𑀤𑀸𑀦𑀕𑀸𑀣𑀸 𑀯𑀼𑀢𑁆𑀢𑀸. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀦 𑀓𑁂𑀳𑀺𑀘𑀺 𑀔𑀦𑁆𑀥𑀸𑀬𑀢𑀦𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑀸𑀬 𑀧𑀦 𑀥𑀸𑀢𑀼𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀢𑁂 𑀥𑀫𑁆𑀫𑀸𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑀥𑀫𑁆𑀫𑀸, 𑀢𑁂 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀏𑀓𑁂𑀦𑀸𑀢𑀺 𑀫𑀦𑀸𑀬𑀢𑀦𑁂𑀦. 𑀤𑀼𑀢𑀺𑀬𑀦𑀬𑁂 𑀢𑁂 𑀥𑀫𑁆𑀫𑀸𑀢𑀺 𑀲𑀧𑁆𑀧𑀻𑀢𑀺𑀓𑀸 𑀢𑁂 𑀥𑀫𑁆𑀫𑀸. 𑀦 𑀓𑁂𑀳𑀺𑀘𑀻𑀢𑀺 𑀧𑀞𑀫𑀁 𑀉𑀤𑁆𑀥𑀝𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀙𑀯𑀺𑀜𑁆𑀜𑀸𑀡𑀥𑀸𑀢𑀽, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸, 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀜𑁆𑀘. 𑀢𑁂𑀳𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀬𑀢𑀦𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺, 𑀆𑀬𑀢𑀦𑁂𑀳𑀺 𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀦 𑀳𑀺 𑀲𑀬𑀁 𑀅𑀢𑁆𑀢𑀦𑀸 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀲𑀫𑁆𑀧𑀬𑀼𑀚𑁆𑀚𑀢𑀺 𑀯𑀸𑀢𑀺. 𑀏𑀓𑀸𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫 𑀥𑀫𑁆𑀫𑁄 𑀦𑀢𑁆𑀣𑀺, 𑀤𑁂𑀲𑀦𑀸𑀲𑀫𑁆𑀧𑀤𑀫𑀢𑁆𑀢𑀸𑀬 𑀧𑀦 𑀫𑁄𑀖𑀫𑁆𑀧𑁂𑀢𑀁 𑀧𑀤𑀁 𑀉𑀤𑁆𑀥𑀝𑀁, 𑀢𑁂𑀦𑁂𑀯 𑀧𑀸𑀴𑀺𑀬𑀁 𑀲𑀩𑁆𑀩𑀯𑀸𑀭𑁂𑀲𑀼𑀧𑀺 ‘‘𑀦𑀢𑁆𑀣𑀺 𑀦𑀢𑁆𑀣𑀺’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀅𑀦𑀸𑀭𑀫𑁆𑀫𑀡𑀥𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀢𑁂𑀲𑀜𑁆𑀘 𑀅𑀜𑁆𑀜𑁂𑀳𑀺 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺. 𑀯𑁂𑀤𑀦𑀸𑀤𑀻𑀳𑀺𑀧𑀺 𑀭𑀽𑀧𑀦𑀺𑀩𑁆𑀩𑀸𑀦𑀸𑀤𑀻𑀦𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀢𑁂𑀲𑀜𑁆𑀘 𑀓𑁂𑀦𑀘𑀺 𑀲𑀫𑁆𑀧𑀬𑁄𑀕𑁄𑀯 𑀦𑀢𑁆𑀣𑀻𑀢𑀺. 𑀅𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀅𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑀫𑁂𑀯 𑀤𑀻𑀧𑁂𑀦𑁆𑀢𑀺, 𑀢𑁂𑀲𑀫𑁂𑀯 𑀦𑀺𑀤𑁆𑀤𑁂𑀲𑁄, 𑀦 𑀭𑀽𑀧𑀸𑀭𑀽𑀧𑀲𑀫𑁆𑀫𑀺𑀲𑁆𑀲𑀸𑀦𑀁, 𑀲𑀩𑁆𑀩𑀭𑀽𑀧𑀓𑁆𑀔𑀦𑁆𑀥𑀤𑀻𑀧𑀓𑀸𑀦𑀁 𑀢𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀢𑀸𑀬𑁄𑀕𑀸𑀪𑀸𑀯𑀸. 𑀲𑀩𑁆𑀩𑀸𑀭𑀽𑀧𑀓𑁆𑀔𑀦𑁆𑀥𑁂𑀦𑀸𑀧𑀺 𑀳𑀺 𑀓𑀼𑀲𑀮𑀸𑀤𑀺𑀦𑀸 𑀅𑀜𑁆𑀜𑁄 𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀸, 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀦 𑀧𑀼𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀲𑀜𑁆𑀜𑁂𑀯 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦…𑀧𑁂… 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀲𑀫𑁆𑀧𑀬𑁄𑀕𑀧𑀤𑁂 𑀯𑀼𑀢𑁆𑀢𑀧𑀤𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀧𑀼𑀦 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦…𑀧𑁂… 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦…𑀧𑁂… 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀧𑀤𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄, 𑀯𑀺𑀧𑁆𑀧𑀬𑁄𑀕𑁄 𑀘 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀦 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦…𑀧𑁂… 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺.

𑀢𑀢𑁆𑀣 𑀏𑀓𑁂𑀦𑀸𑀢𑀺 𑀫𑀦𑀸𑀬𑀢𑀦𑁂𑀦. 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦. 𑀓𑁂𑀳𑀺𑀘𑀻𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀢𑀡𑁆𑀳𑀸𑀬 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀢𑀡𑁆𑀳𑀸𑀯𑁂𑀤𑀦𑀸𑀲𑀜𑁆𑀜𑀸𑀳𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑁂𑀯 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁄, 𑀅𑀲𑀗𑁆𑀕𑀳𑁄 𑀘 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀺 𑀆𑀬𑀢𑀦𑁂𑀳𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀲𑁂𑀲𑁂𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸, 𑀲𑁂𑀲𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺.

𑀢𑀢𑁆𑀣 𑀢𑀻𑀳𑀻𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺. 𑀢𑁂𑀳𑀺 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸. 𑀤𑁆𑀯𑀻𑀳𑀻𑀢𑀺 𑀥𑀫𑁆𑀫𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄.

𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀲𑀼𑀔𑀼𑀫𑀭𑀽𑀧𑀁 𑀅𑀯𑀺𑀜𑁆𑀜𑀸𑀡𑀁, 𑀅𑀭𑀽𑀧𑀁 𑀲𑀯𑀺𑀜𑁆𑀜𑀸𑀡𑀁 𑀯𑀸, 𑀓𑁂𑀯𑀮𑀁 𑀅𑀭𑀽𑀧𑀁 𑀯𑀸 𑀣𑀽𑀮𑀭𑀽𑀧𑀲𑁆𑀲𑀧𑀺 𑀓𑁂𑀯𑀮𑀁 𑀯𑀸, 𑀲𑀼𑀔𑀼𑀫𑀭𑀽𑀧𑀁 𑀤𑀻𑀧𑁂𑀦𑁆𑀢𑀺, 𑀢𑁂𑀲𑀫𑁂𑀯 𑀦𑀺𑀤𑁆𑀤𑁂𑀲𑁄. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀥𑀫𑁆𑀫𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺𑀧𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄, 𑀯𑀺𑀧𑁆𑀧𑀬𑁄𑀕𑁄 𑀘 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀏𑀯𑀁 𑀥𑀫𑁆𑀫𑀸𑀬𑀢𑀦𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀬𑁄𑀚𑀦𑀸.

𑀅𑀭𑀽𑀧𑀪𑀯𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦𑀢𑁆𑀣𑀺. 𑀢𑁂 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀏𑀯𑀁 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸𑀤𑀺𑀧𑀤𑁂𑀲𑀼𑀧𑀺 𑀬𑁄𑀚𑀦𑀸.

𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀢𑀻𑀳𑀺𑀧𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀲𑁆𑀲 𑀢𑀻𑀳𑀺 𑀯𑁂𑀤𑀦𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑁄, 𑀇𑀢𑀭𑁂𑀳𑀺 𑀘 𑀯𑀺𑀧𑁆𑀧𑀬𑁄𑀕𑁄 𑀜𑀸𑀢𑀩𑁆𑀩𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑁂 𑀦𑀬𑁄.

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀢𑁆𑀣𑀯𑀡𑁆𑀡𑀦𑀸

𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑁂 𑀧𑀦 𑀬𑀸𑀦𑀺 𑀧𑀤𑀸𑀦𑀺 𑀓𑁂𑀯𑀮𑀸𑀦𑀁 𑀲𑀸𑀭𑀫𑁆𑀫𑀡𑀸𑀦𑀁, 𑀅𑀦𑀸𑀭𑀫𑁆𑀫𑀡𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀧𑀓𑀸𑀲𑀓𑀸𑀦𑀺 𑀘 𑀲𑀪𑀸𑀯𑀚𑀸𑀢𑀺𑀪𑀽𑀫𑀺𑀓𑀸𑀮𑀲𑀦𑁆𑀢𑀸𑀦𑀯𑀲𑁂𑀦 𑀪𑀺𑀦𑁆𑀦𑀢𑀸𑀬 𑀓𑁂𑀳𑀺𑀘𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀅𑀦𑀸𑀭𑀫𑁆𑀫𑀡𑀥𑀫𑁆𑀫𑀫𑀺𑀲𑁆𑀲𑀸𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀧𑀓𑀸𑀲𑀓𑀸𑀦𑀺 𑀤𑀼𑀓𑁆𑀔𑀲𑀘𑁆𑀘𑀅𑀩𑁆𑀬𑀸𑀓𑀢𑀧𑀭𑀺𑀢𑁆𑀢𑀅𑀢𑀻𑀢𑀅𑀚𑁆𑀛𑀢𑁆𑀢𑀸𑀤𑀺𑀧𑀤𑀸𑀦𑀺, 𑀢𑁂𑀲𑀫𑁂𑀯 𑀦𑀺𑀤𑁆𑀤𑁂𑀲𑁄 𑀇𑀢𑀭𑁂𑀲𑀁 𑀥𑀫𑁆𑀫𑀸𑀬𑀢𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀚𑀸𑀢𑀺𑀚𑀭𑀸𑀫𑀭𑀡𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀦𑀳𑁂𑀢𑀼𑀆𑀤𑀻𑀦𑀁 𑀢𑁂𑀲𑀁 𑀓𑁂𑀦𑀘𑀺 𑀯𑀺𑀧𑁆𑀧𑀬𑁄𑀕𑀸𑀲𑀫𑁆𑀪𑀯𑀸. 𑀇𑀤𑀁 𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀤𑁆𑀥𑀝𑀧𑀤𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑁄, 𑀅𑀲𑀗𑁆𑀕𑀳𑁄 𑀘 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸. 𑀤𑀼𑀓𑁆𑀔𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀺, 𑀢𑁂 𑀘 𑀥𑀫𑁆𑀫𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀘𑀢𑀼𑀓𑁆𑀔𑀦𑁆𑀥𑁂𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀫𑁆𑀫𑀥𑀸𑀢𑀼𑀯𑀲𑁂𑀦 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑁂 𑀦𑀬𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀯𑀺𑀪𑀗𑁆𑀕𑀦𑀬𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀦𑀺𑀘𑁆𑀙𑀬𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀥𑀸𑀢𑀼𑀓𑀣𑀸𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀥𑀸𑀢𑀼. 𑁧𑁨; 𑀥𑀸𑀢𑀼. 𑀅𑀝𑁆𑀞. 𑁧-𑁨) 𑀕𑀳𑁂𑀢𑀩𑁆𑀩𑁄𑀢𑀺.

𑀫𑁄𑀳𑀯𑀺𑀘𑁆𑀙𑁂𑀤𑀦𑀺𑀬𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬

𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.