𑁨. 𑀯𑀺𑀪𑀗𑁆𑀕𑀫𑀸𑀢𑀺𑀓𑀸

𑀇𑀤𑀸𑀦𑀺 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸𑀦𑀦𑁆𑀢𑀭𑀁 𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀅𑀢𑁆𑀣𑀯𑀡𑁆𑀡𑀦𑀸 𑀅𑀦𑀼𑀧𑁆𑀧𑀢𑁆𑀢𑀸. 𑀢𑀲𑁆𑀲𑀸 𑀧𑀦 𑁋

𑀅𑀢𑁆𑀣𑀢𑁄 𑀥𑀫𑁆𑀫𑀪𑁂𑀤𑁂𑀦, 𑀯𑀺𑀪𑀗𑁆𑀕𑀦𑀬𑀤𑀲𑁆𑀲𑀦𑀸;

𑀧𑀸𑀴𑀺𑀫𑀼𑀢𑁆𑀢𑀦𑀬𑀸 𑀘𑀸𑀧𑀺, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀲𑀸 𑀧𑀦𑁂𑀲𑀸 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀺𑀪𑀗𑁆𑀕𑀸𑀦𑀁 𑀆𑀤𑀺𑀫𑁆𑀳𑀺 𑀞𑀧𑀺𑀢𑀸 𑀅𑀝𑁆𑀞𑀸𑀭𑀲𑀯𑀺𑀥𑀸 𑀳𑁄𑀢𑀺 𑁋 𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀢𑀺𑀓𑀸-𑀆𑀬𑀢𑀦-𑀥𑀸𑀢𑀼-𑀲𑀘𑁆𑀘-𑀇𑀦𑁆𑀤𑁆𑀭𑀺𑀬-𑀧𑀘𑁆𑀘𑀬𑀸𑀓𑀸𑀭-𑀲𑀢𑀺𑀧𑀝𑁆𑀞𑀸𑀦-𑀲𑀫𑁆𑀫𑀧𑁆𑀧𑀥𑀸𑀦-𑀇𑀤𑁆𑀥𑀺𑀧𑀸𑀤𑀩𑁄𑀚𑁆𑀛𑀗𑁆𑀕-𑀫𑀕𑁆𑀕𑀗𑁆𑀕𑀛𑀸𑀦-𑀅𑀧𑁆𑀧𑀫𑀜𑁆𑀜𑀸-𑀲𑀺𑀓𑁆𑀔𑀸𑀧𑀤-𑀧𑀝𑀺𑀲𑀫𑁆𑀪𑀺𑀤𑀸-𑀜𑀸𑀡-𑀔𑀼𑀤𑁆𑀤𑀓𑀯𑀢𑁆𑀣𑀼-𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀫𑀸𑀢𑀺

𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀢𑀢𑁆𑀣 𑀆𑀤𑀺𑀪𑀽𑀢𑀸𑀬 𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀅𑀢𑁆𑀣𑀢𑁄 𑀢𑀸𑀯 𑁋 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀏𑀢𑁆𑀣 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑁂𑀦 𑀦 𑀢𑀢𑁄 𑀳𑁂𑀝𑁆𑀞𑀸, 𑀦 𑀉𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀔𑀦𑁆𑀥𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀢𑁆𑀭𑀸𑀬𑀁 𑀔𑀦𑁆𑀥-𑀲𑀤𑁆𑀤𑁄 𑀲𑀫𑁆𑀩𑀳𑀼𑀮𑁂𑀲𑀼 𑀞𑀸𑀦𑁂𑀲𑀼 𑀦𑀺𑀧𑀢𑀢𑀺 𑀭𑀸𑀲𑀺𑀫𑁆𑀳𑀺 𑀕𑀼𑀡𑁂 𑀧𑀡𑁆𑀡𑀢𑁆𑀢𑀺𑀬𑀁 𑀭𑀼𑀴𑁆𑀳𑀺𑀬𑀦𑁆𑀢𑀺. 𑀢𑀢𑁆𑀣 ‘‘𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁧𑁦𑁩𑁭; 𑀅. 𑀦𑀺. 𑁪.𑁫𑁧; 𑁫.𑁪𑁫; 𑁬.𑁩𑁭) 𑀳𑀺 𑀭𑀸𑀲𑀺𑀢𑁄 𑀔𑀦𑁆𑀥𑁄 𑀦𑀸𑀫. ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁫𑁫) 𑀕𑀼𑀡𑀢𑁄. ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁧) 𑀧𑀡𑁆𑀡𑀢𑁆𑀢𑀺𑀢𑁄. ‘‘𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁬𑁩) 𑀏𑀓𑀫𑁆𑀧𑀺 𑀘𑀺𑀢𑁆𑀢𑀁 𑀭𑀼𑀴𑁆𑀳𑀺𑀢𑁄 𑀔𑀦𑁆𑀥𑁄 𑀦𑀸𑀫, 𑀲𑁆𑀯𑀸𑀬𑀫𑀺𑀥 𑀭𑀸𑀲𑀺𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀭𑀸𑀲𑀝𑁆𑀞𑁄 𑀳𑀺 𑀔𑀦𑁆𑀥-𑀲𑀤𑁆𑀤𑁄, 𑀓𑁄𑀝𑁆𑀞𑀸𑀲𑀝𑁆𑀞𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀮𑁄𑀓𑀲𑁆𑀫𑀺𑀁 𑀳𑀺 𑀇𑀡𑀁 𑀕𑀳𑁂𑀢𑁆𑀯𑀸 𑀘𑁄𑀤𑀺𑀬𑀫𑀸𑀦𑀸 ‘‘𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑁆𑀲𑀸𑀫, 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀔𑀦𑁆𑀥𑁄𑀢𑀺 𑀓𑁄𑀝𑁆𑀞𑀸𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀏𑀢𑁆𑀣 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁, 𑀲𑀻𑀢𑀼𑀡𑁆𑀳𑀸𑀤𑀻𑀳𑀺 𑀧𑀲𑀺𑀤𑁆𑀥𑀸𑀓𑀸𑀭𑁂𑀦 𑀭𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺, 𑀧𑀻𑀴𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀁 𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀚𑀺𑀖𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀧𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁭𑁯).

𑀭𑀽𑀧𑀜𑁆𑀘 𑀢𑀁 𑀔𑀦𑁆𑀥𑁄 𑀘𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀭𑀸𑀲𑀺 𑀭𑀽𑀧𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀓𑀼𑀲𑀮𑀢𑁆𑀢𑀺𑀓𑁂 𑀯𑀺𑀪𑀢𑁆𑀢𑀸 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀲𑀩𑁆𑀩𑁂 𑀭𑀽𑀧𑀥𑀫𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫. 𑀢𑀣𑀸 𑀘𑀢𑀼𑀪𑀽𑀫𑀓𑀸 𑀯𑁂𑀤𑀦𑀸𑀲𑀜𑁆𑀜𑀸𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀸𑀫, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀦𑀸𑀫. 𑀯𑁂𑀤𑀦𑀸𑀲𑀜𑁆𑀜𑀸 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀨𑀲𑁆𑀲𑀸𑀤𑀬𑁄 𑀧𑀜𑁆𑀜𑀸𑀲 𑀘𑁂𑀢𑀲𑀺𑀓𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀦𑀸𑀫. 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀦𑀺𑀩𑁆𑀩𑀸𑀦𑀫𑁂𑀯 𑀅𑀲𑀗𑁆𑀕𑀳𑀺𑀢𑀁, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀧𑀦 𑀲𑀩𑁆𑀩𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸. 𑀅𑀬𑀫𑁂𑀯 𑀳𑀺 𑀔𑀦𑁆𑀥𑁂𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀯𑀺𑀲𑁂𑀲𑁄. 𑀔𑀦𑁆𑀥𑀸 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀸, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀸𑀲𑀯𑁄𑀧𑀸𑀤𑀸𑀦𑀺𑀬𑀪𑀸𑀯𑁂𑀦 𑀯𑀺𑀲𑁂𑀲𑁂𑀢𑁆𑀯𑀸. 𑀇𑀥 𑀧𑀦 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀬𑀁 𑀥𑀫𑁆𑀫𑀪𑁂𑀤𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀯𑀺𑀪𑀗𑁆𑀕𑀦𑀬𑀤𑀲𑁆𑀲𑀦𑀸𑀢𑀺 𑀯𑀺𑀪𑀗𑁆𑀕𑀧𑀸𑀴𑀺𑀬𑀸 𑀆𑀕𑀢𑀅𑀢𑁆𑀣𑀦𑀬𑀤𑀲𑁆𑀲𑀦𑀢𑁄. 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑁆𑀢𑀺 𑀢𑀻𑀳𑀺 𑀦𑀬𑁂𑀳𑀺 𑀔𑀦𑁆𑀥𑀯𑀺𑀪𑀗𑁆𑀕𑁄 𑀯𑀺𑀪𑀢𑁆𑀢𑁄. 𑀢𑀣𑀸 𑀆𑀬𑀢𑀦𑀯𑀺𑀪𑀗𑁆𑀕𑀸𑀤𑀬𑁄. 𑀓𑁂𑀯𑀮𑀁 𑀳𑀺 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂, 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀘 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺. 𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑁂 𑀧𑀜𑁆𑀳𑀸𑀧𑀼𑀘𑁆𑀙𑀓𑀁 𑀦𑀢𑁆𑀣𑀺. 𑀜𑀸𑀡𑀯𑀺𑀪𑀗𑁆𑀕𑀸𑀤𑀻𑀲𑀼 𑀧𑀦 𑀢𑀻𑀲𑀼 𑀢𑀬𑁄𑀧𑀺 𑀦𑀬𑀸 𑀦 𑀲𑀦𑁆𑀢𑀺. 𑀢𑁂𑀲𑀼 𑀳𑀺 𑀜𑀸𑀡𑀯𑀺𑀪𑀗𑁆𑀕𑁄 𑀏𑀓𑀯𑀺𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀯𑀺𑀥𑀸 𑀯𑀺𑀪𑀢𑁆𑀢𑁄, 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄 𑀏𑀓𑀯𑀺𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁆𑀯𑀸𑀲𑀝𑁆𑀞𑀺𑀧𑀪𑁂𑀤𑀸 𑀯𑀺𑀪𑀢𑁆𑀢𑁄, 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁄 𑀧𑀦 𑀲𑀩𑁆𑀩𑀲𑀗𑁆𑀕𑀳𑀸𑀤𑀻𑀳𑀺 𑀤𑀲𑀳𑀺 𑀯𑀸𑀭𑁂𑀳𑀺 𑀯𑀺𑀪𑀢𑁆𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀦𑀬𑀸𑀦𑀁 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀲𑀁𑀯𑀡𑁆𑀡𑀦𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁆𑀭𑀺𑀤𑀁 𑀔𑀦𑁆𑀥𑀯𑀺𑀪𑀗𑁆𑀕𑁂 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 𑀭𑀽𑀧𑀓𑁆𑀔𑀦𑁆𑀥𑁄 𑁋

‘‘𑀢𑀢𑁆𑀣 𑀓𑀢𑀫𑁄 𑀭𑀽𑀧𑀓𑁆𑀔𑀦𑁆𑀥𑁄? 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀽𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 (𑀯𑀺𑀪. 𑁨) 𑁋

𑀏𑀯𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑁄, 𑀢𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄𑀧𑀺. 𑀢𑀢𑁆𑀣 𑀦𑀺𑀬𑀓𑀚𑁆𑀛𑀢𑁆𑀢𑀁 𑀦𑀸𑀫 𑀅𑀚𑁆𑀛𑀢𑁆𑀢𑀭𑀽𑀧𑀁 𑀅𑀚𑁆𑀛𑀢𑁆𑀢𑀁 𑀦𑀸𑀫, 𑀢𑀢𑁄 𑀅𑀜𑁆𑀜𑀁 𑀧𑀭𑀧𑀼𑀕𑁆𑀕𑀮𑀕𑀢𑀁, 𑀅𑀯𑀺𑀜𑁆𑀜𑀸𑀡𑀜𑁆𑀘 𑀩𑀳𑀺𑀤𑁆𑀥𑀸 𑀦𑀸𑀫, 𑀢𑀣𑀸 𑀯𑁂𑀤𑀦𑀸𑀤𑀬𑁄𑀧𑀺. 𑀧𑀲𑀸𑀤𑀯𑀺𑀲𑀬𑀭𑀽𑀧𑀁 𑀧𑀦 𑀑𑀴𑀸𑀭𑀺𑀓𑀁 𑀦𑀸𑀫, 𑀲𑁂𑀲𑀁 𑀲𑀼𑀔𑀼𑀫𑀁 𑀦𑀸𑀫. 𑀅𑀦𑀺𑀝𑁆𑀞𑀭𑀽𑀧𑀁 𑀳𑀻𑀦𑀁 𑀦𑀸𑀫, 𑀇𑀝𑁆𑀞𑀭𑀽𑀧𑀁 𑀧𑀡𑀻𑀢𑀁 𑀦𑀸𑀫.

𑀦𑀦𑀼 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀸𑀫 𑀧𑀸𑀝𑁂𑀓𑁆𑀓𑀁 𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀏𑀓𑀁 𑀏𑀓𑀘𑁆𑀘𑀲𑁆𑀲 𑀇𑀝𑁆𑀞𑀁 𑀳𑁄𑀢𑀺 𑀫𑀦𑀸𑀧𑀁, 𑀢𑀤𑁂𑀯 𑀅𑀜𑁆𑀜𑀲𑁆𑀲 𑀘 𑀅𑀦𑀺𑀝𑁆𑀞𑀁 𑀳𑁄𑀢𑀺. 𑀯𑀢𑁆𑀣𑀸𑀤𑀻𑀦𑀺 𑀳𑀺 𑀲𑀽𑀓𑀭𑀸𑀤𑀻𑀦𑀁 𑀦𑀧𑁆𑀧𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦 𑀫𑀦𑀼𑀲𑁆𑀲𑀸𑀤𑀻𑀦𑀁, 𑀢𑁂𑀲𑀜𑁆𑀘 𑀯𑀢𑁆𑀣𑀸𑀪𑀭𑀡𑀸𑀤𑀻𑀦𑀺 𑀧𑀺𑀬𑀸𑀦𑀺, 𑀦 𑀲𑀽𑀓𑀭𑀸𑀤𑀻𑀦𑀦𑁆𑀢𑀺, 𑀢𑀲𑁆𑀫𑀸 𑀭𑀼𑀘𑀺𑀯𑀲𑁂𑀦𑁂𑀯 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀕𑀳𑁂𑀢𑀩𑁆𑀩𑀸? 𑀦, 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀁 𑀧𑀸𑀝𑁂𑀓𑁆𑀓𑀁 𑀯𑀺𑀪𑀢𑁆𑀢𑀢𑁆𑀢𑀸. 𑀓𑀼𑀲𑀮𑀓𑀫𑁆𑀫𑀚𑀁 𑀳𑀺 𑀓𑀼𑀲𑀮𑀯𑀺𑀧𑀸𑀓𑀯𑀺𑀲𑀬𑁄𑀯 𑀇𑀝𑁆𑀞𑀁 𑀦𑀸𑀫, 𑀅𑀓𑀼𑀲𑀮𑀓𑀫𑁆𑀫𑀚𑀁 𑀅𑀓𑀼𑀲𑀮𑀯𑀺𑀧𑀸𑀓𑀯𑀺𑀲𑀬𑁄𑀯 𑀅𑀦𑀺𑀝𑁆𑀞𑀁 𑀦𑀸𑀫, 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀧𑀦 𑀓𑁄𑀘𑀺 𑀇𑀝𑁆𑀞𑀫𑁂𑀯 𑀩𑀼𑀤𑁆𑀥𑀭𑀽𑀧𑀸𑀤𑀺𑀁 𑀚𑀯𑀦𑀓𑁆𑀔𑀡𑁂 𑀅𑀦𑀺𑀝𑁆𑀞𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀅𑀦𑀺𑀝𑁆𑀞𑀜𑁆𑀘 𑀦𑀺𑀭𑀬𑀕𑁆𑀕𑀺𑀲𑀢𑁆𑀣𑀯𑀺𑀲𑀸𑀤𑀺𑀁 𑀇𑀝𑁆𑀞𑀢𑁄 𑀫𑀦𑀲𑀺 𑀓𑀭𑁄𑀢𑀺. 𑀚𑀯𑀦𑁂𑀳𑀺 𑀏𑀯 𑀯𑀺𑀧𑀮𑁆𑀮𑀸𑀲𑀪𑀸𑀯𑁄, 𑀦 𑀯𑀺𑀧𑀸𑀓𑁂𑀳𑀻𑀢𑀺 𑀯𑀺𑀧𑀸𑀓𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀺𑀬𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀧𑀦 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬 𑁋

‘‘𑀲𑀼𑀔𑀲𑀫𑁆𑀨𑀲𑁆𑀲𑀁 𑀳𑀺 𑀕𑀽𑀣𑀓𑀮𑀮𑀁 𑀘𑀓𑁆𑀔𑀼𑀤𑁆𑀯𑀸𑀭𑀖𑀸𑀦𑀤𑁆𑀯𑀸𑀭𑁂𑀲𑀼 𑀅𑀦𑀺𑀝𑁆𑀞𑀁, 𑀓𑀸𑀬𑀤𑁆𑀯𑀸𑀭𑁂 𑀇𑀝𑁆𑀞𑀁 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀫𑀡𑀺𑀭𑀢𑀦𑁂𑀦 𑀧𑁄𑀣𑀺𑀬𑀫𑀸𑀦𑀲𑁆𑀲, 𑀲𑀼𑀯𑀡𑁆𑀡𑀲𑀽𑀮𑁂 𑀉𑀢𑁆𑀢𑀸𑀲𑀺𑀬𑀫𑀸𑀦𑀲𑁆𑀲 𑀘 𑀫𑀡𑀺𑀭𑀢𑀦𑀲𑀼𑀯𑀡𑁆𑀡𑀲𑀽𑀮𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀓𑀸𑀬𑀤𑁆𑀯𑀸𑀭𑁂 𑀅𑀦𑀺𑀝𑁆𑀞𑀸𑀦𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁬) 𑁋

𑀏𑀯𑀁 𑀤𑁆𑀯𑀸𑀭𑀯𑀲𑁂𑀦 𑀏𑀓𑀲𑁆𑀲𑁂𑀯 𑀯𑀢𑁆𑀣𑀼𑀦𑁄 𑀇𑀝𑁆𑀞𑀢𑀸, 𑀅𑀦𑀺𑀝𑁆𑀞𑀢𑀸 𑀘 𑀯𑀼𑀢𑁆𑀢𑀸. 𑀲𑀸 𑀘 𑀏𑀓𑀓𑁆𑀔𑀡𑁂 𑀦 𑀬𑀼𑀢𑁆𑀢𑀸 𑀏𑀓𑀓𑀮𑀸𑀧𑀕𑀢𑀪𑀽𑀢𑁄𑀧𑀸𑀤𑀸𑀬𑀭𑀽𑀧𑀸𑀦𑀁 𑀏𑀓𑀲𑀸𑀫𑀕𑁆𑀕𑀺𑀬𑀫𑀼𑀧𑁆𑀧𑀢𑁆𑀢𑀺𑀢𑁄. 𑀦 𑀳𑀺 𑀪𑀽𑀢𑁂𑀲𑀼 𑀅𑀓𑀼𑀲𑀮𑀯𑀲𑁂𑀦 𑀅𑀦𑀺𑀝𑁆𑀞𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼 𑀢𑀤𑀼𑀧𑀸𑀤𑀸𑀬𑀭𑀽𑀧𑀸𑀤𑀺𑀓𑀼𑀲𑀮𑁂𑀦 𑀇𑀝𑁆𑀞𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀪𑀺𑀦𑁆𑀦𑀓𑁆𑀔𑀡𑁂 𑀧𑀦 𑀇𑀝𑁆𑀞𑀸𑀦𑀺 𑀫𑀡𑀺𑀭𑀢𑀦𑀸𑀤𑀻𑀦𑀺 𑀢𑁂𑀳𑀺 𑀧𑁄𑀣𑀺𑀬𑀫𑀸𑀦𑀲𑁆𑀲 𑀅𑀓𑀼𑀲𑀮𑀧𑀘𑁆𑀘𑀬𑁂𑀦 𑀉𑀢𑀼𑀦𑀸 𑀅𑀦𑀺𑀝𑁆𑀞𑀸𑀦𑀺 𑀯𑀺𑀧𑀭𑀺𑀡𑀫𑀦𑁆𑀢𑀺, 𑀓𑀼𑀲𑀮𑀧𑀘𑁆𑀘𑀬𑁂𑀦 𑀅𑀦𑀺𑀝𑁆𑀞𑀸𑀦𑀺 𑀕𑀽𑀣𑀓𑀮𑀮𑀸𑀤𑀻𑀦𑀺 𑀇𑀝𑁆𑀞𑀸𑀦𑀻𑀢𑀺, 𑀅𑀬𑀁 𑀦𑁄 𑀅𑀢𑁆𑀢𑀦𑁄𑀫𑀢𑀺. 𑀏𑀯𑀁 𑀯𑀺𑀪𑀢𑁆𑀢𑁂𑀲𑀼 𑀘 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀢𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀳𑀻𑀦𑀁, 𑀧𑀡𑀻𑀢𑀜𑁆𑀘 𑀤𑀝𑁆𑀞𑀩𑁆𑀩𑀁. 𑀲𑀼𑀔𑀼𑀫𑀁 𑀧𑀦 𑀭𑀽𑀧𑀁 𑀤𑀽𑀭𑁂𑀭𑀽𑀧𑀁 𑀦𑀸𑀫, 𑀑𑀴𑀸𑀭𑀺𑀓𑀁 𑀲𑀦𑁆𑀢𑀺𑀓𑁂𑀭𑀽𑀧𑀁 𑀦𑀸𑀫. 𑀢𑀁 𑀢𑀁 𑀯𑀸 𑀧𑀦 𑀭𑀽𑀧𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀭𑀽𑀧𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀯𑁂𑀤𑀦𑀸𑀤𑀻𑀲𑀼 𑀧𑀦 𑀅𑀓𑀼𑀲𑀮𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀓𑀼𑀲𑀮𑀸𑀓𑀼𑀲𑀮𑀸 𑀑𑀴𑀸𑀭𑀺𑀓𑀸, 𑀅𑀩𑁆𑀬𑀸𑀓𑀢𑀸 𑀲𑀼𑀔𑀼𑀫𑀸. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀲𑀼𑀔𑀤𑀼𑀓𑁆𑀔𑀸 𑀯𑀸 𑀑𑀴𑀸𑀭𑀺𑀓𑀸, 𑀇𑀢𑀭𑀸 𑀲𑀼𑀔𑀼𑀫𑀸. 𑀅𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀲𑀫𑀸𑀧𑀦𑁆𑀦𑀲𑁆𑀲 𑀲𑀼𑀔𑀼𑀫𑀸. 𑀲𑀸𑀲𑀯𑀸 𑀑𑀴𑀸𑀭𑀺𑀓𑀸, 𑀅𑀦𑀸𑀲𑀯𑀸 𑀲𑀼𑀔𑀼𑀫𑀸. 𑀢𑀁 𑀢𑀁 𑀯𑀸 𑀧𑀦 𑀯𑁂𑀤𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀓𑀼𑀲𑀮𑀸 𑀯𑁂𑀤𑀦𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀳𑀺 𑀤𑀽𑀭𑁂, 𑀢𑀸 𑀘 𑀢𑀸𑀬 𑀤𑀽𑀭𑁂𑀢𑀺 𑀏𑀯𑀁 𑀚𑀸𑀢𑀺𑀲𑀪𑀸𑀯𑀧𑀼𑀕𑁆𑀕𑀮𑀪𑀽𑀫𑀺𑀪𑁂𑀤𑀢𑁄 𑀯𑀼𑀢𑁆𑀢𑀦𑀬𑁂𑀦 𑀤𑀽𑀭𑁂𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸, 𑀓𑀼𑀲𑀮𑀸 𑀯𑁂𑀤𑀦𑀸 𑀓𑀼𑀲𑀮𑀸𑀬 𑀲𑀦𑁆𑀢𑀺𑀓𑁂𑀢𑀺 𑀏𑀯𑀁 𑀚𑀸𑀢𑀺𑀆𑀤𑀺𑀲𑀸𑀫𑀜𑁆𑀜𑀢𑁄 𑀲𑀦𑁆𑀢𑀺𑀓𑁂𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸. 𑀢𑀁 𑀢𑀁 𑀯𑀸 𑀧𑀦 𑀯𑁂𑀤𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑁂𑀤𑀦𑀸 𑀤𑀽𑀭𑁂𑀲𑀦𑁆𑀢𑀺𑀓𑁂 𑀤𑀝𑁆𑀞𑀩𑁆𑀩𑀸. 𑀏𑀯𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀪𑀗𑁆𑀕𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 (𑀯𑀺𑀪. 𑁮 𑀆𑀤𑀬𑁄; 𑀯𑀺𑀪. 𑀅𑀝𑁆𑀞. 𑁮 𑀆𑀤𑀬𑁄) 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁂 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀢𑀸𑀯 𑀏𑀓𑀯𑀺𑀥𑀸𑀤𑀺𑀢𑁄 𑀬𑀸𑀯 𑀏𑀓𑀸𑀤𑀲𑀯𑀺𑀥𑀸 𑀭𑀽𑀧𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀧𑀦 𑀏𑀓𑀯𑀺𑀥𑁄 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑁄, 𑀤𑀼𑀯𑀺𑀥𑁄 𑀲𑀳𑁂𑀢𑀼𑀓𑀤𑀼𑀓𑀯𑀲𑁂𑀦, 𑀢𑀺𑀯𑀺𑀥𑁄 𑀓𑀼𑀲𑀮𑀢𑁆𑀢𑀺𑀓𑀯𑀲𑁂𑀦, 𑀘𑀢𑀼𑀩𑁆𑀩𑀺𑀥𑁄 𑀘𑀢𑀼𑀪𑀽𑀫𑀓𑀯𑀲𑁂𑀦, 𑀧𑀜𑁆𑀘𑀯𑀺𑀥𑁄 𑀲𑀪𑀸𑀯𑀪𑁂𑀤𑁂𑀦, 𑀙𑀩𑁆𑀩𑀺𑀥𑁄 𑀙𑀤𑁆𑀯𑀸𑀭𑀺𑀓𑀯𑀲𑁂𑀦, 𑀲𑀢𑁆𑀢𑀯𑀺𑀥𑁄 𑀲𑀢𑁆𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑁄𑀕𑀯𑀲𑁂𑀦, 𑀅𑀝𑁆𑀞𑀯𑀺𑀥𑁄 𑀢𑁂𑀲𑀼 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸, 𑀦𑀯𑀯𑀺𑀥𑁄 𑀢𑁂𑀲𑀼 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀓𑀼𑀲𑀮𑀢𑁆𑀢𑀺𑀓𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸, 𑀤𑀲𑀯𑀺𑀥𑁄 𑀢𑁂𑀲𑀼 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀯𑀺𑀥𑀸, 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀏𑀯𑀁 𑀲𑀳𑁂𑀢𑀼𑀓𑀤𑀼𑀓𑀫𑀽𑀮𑀁 𑀧𑀞𑀫𑀯𑀸𑀭𑀁 𑀯𑀢𑁆𑀯𑀸 𑀧𑀼𑀦 𑀓𑀼𑀲𑀮𑀢𑁆𑀢𑀺𑀓𑀝𑁆𑀞𑀸𑀦𑁂 𑀯𑁂𑀤𑀦𑀸𑀢𑁆𑀢𑀺𑀓𑀧𑀻𑀢𑀺𑀢𑁆𑀢𑀺𑀓𑀲𑀦𑀺𑀤𑀲𑁆𑀲𑀦𑀢𑁆𑀢𑀺𑀓𑀯𑀚𑁆𑀚𑀺𑀢𑁂 𑀲𑀩𑁆𑀩𑀢𑁆𑀢𑀺𑀓𑁂 𑀬𑁄𑀚𑁂𑀢𑁆𑀯𑀸 𑀬𑀸𑀯 𑀤𑀲𑀯𑀺𑀥𑀸, 𑀅𑀧𑀭𑁂𑀧𑀺 𑀅𑀝𑁆𑀞𑀸𑀭𑀲 𑀯𑀸𑀭𑀸 𑀯𑀼𑀢𑁆𑀢𑀸. 𑀬𑀣𑀸 𑀘𑁂𑀢𑁆𑀣 𑀲𑀳𑁂𑀢𑀼𑀓𑀤𑀼𑀓𑀫𑀽𑀮𑀺𑀓𑀸 𑀲𑀩𑁆𑀩𑀢𑁆𑀢𑀺𑀓𑀬𑁄𑀚𑀦𑀸, 𑀏𑀯𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀤𑀻𑀲𑀼 𑀅𑀦𑀼𑀭𑀽𑀧𑀤𑀼𑀓𑀫𑀽𑀮𑀺𑀓𑀸𑀧𑀺 𑀲𑀭𑀡𑀤𑀼𑀓𑀧𑀭𑀺𑀬𑁄𑀲𑀸𑀦𑀸 𑀧𑀘𑁆𑀘𑁂𑀓𑀁 𑀲𑀩𑁆𑀩𑀢𑁆𑀢𑀺𑀓𑀬𑁄𑀚𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀤𑀼𑀓𑀫𑀽𑀮𑀓𑁄 𑀬𑁄𑀚𑀦𑀸𑀦𑀬𑁄. 𑀬𑀣𑀸 𑀘 𑀏𑀓𑁂𑀓𑀤𑀼𑀓𑁂𑀦 𑀲𑀩𑁆𑀩𑀢𑁆𑀢𑀺𑀓𑀬𑁄𑀚𑀦𑀸𑀯𑀲𑁂𑀦 𑀤𑀼𑀓𑀫𑀽𑀮𑀓𑁄 𑀦𑀬𑁄 𑀯𑀼𑀢𑁆𑀢𑁄, 𑀏𑀯𑀁 𑀏𑀓𑁂𑀓𑀢𑁆𑀢𑀺𑀓𑁂𑀦 𑀬𑀣𑀸𑀦𑀼𑀭𑀽𑀧𑀁 𑀲𑀩𑁆𑀩𑀤𑀼𑀓𑀬𑁄𑀚𑀦𑀸𑀯𑀲𑁂𑀦 𑀢𑀺𑀓𑀫𑀽𑀮𑀓𑁄, 𑀢𑀤𑀼𑀪𑀬𑀫𑀺𑀲𑁆𑀲𑀓𑀯𑀲𑁂𑀦 𑀉𑀪𑀢𑁄𑀯𑀟𑁆𑀠𑀦𑀓𑁄 𑀘 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁂, 𑀏𑀯𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀤𑀼𑀓𑀫𑀽𑀮𑀓𑀸𑀤𑀺𑀦𑀬𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂 𑀧𑀦 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀢𑀺 𑀓𑀼𑀲𑀮𑀸, 𑀓𑀢𑀺 𑀅𑀓𑀼𑀲𑀮𑀸, 𑀓𑀢𑀺 𑀅𑀩𑁆𑀬𑀸𑀓𑀢𑀸, 𑀓𑀢𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸…𑀧𑁂… 𑀓𑀢𑀺 𑀲𑀭𑀡𑀸, 𑀓𑀢𑀺 𑀅𑀭𑀡𑀸𑀢𑀺? 𑀭𑀽𑀧𑀓𑁆𑀔𑀦𑁆𑀥𑁄 𑀅𑀩𑁆𑀬𑀸𑀓𑀢𑁄, 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀭𑀽𑀧𑀁, 𑀯𑁂𑀤𑀦𑀸 𑀘 𑀯𑁂𑀤𑀦𑀸𑀢𑁆𑀢𑀺𑀓𑁂 𑀦 𑀯𑀢𑁆𑀢𑀩𑁆𑀩𑀸, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀭𑀽𑀧𑀁 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁, 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁, 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀁, 𑀲𑁂𑀲𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀢𑀻𑀳𑀺 𑀢𑀺𑀓𑁂𑀳𑀺 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀭𑀽𑀧𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀢𑀬𑁄 𑀔𑀦𑁆𑀥𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘. 𑀭𑀽𑀧𑀁 𑀦 𑀯𑀢𑁆𑀢𑀩𑁆𑀩𑀁, 𑀯𑁂𑀤𑀦𑀸 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀦 𑀯𑀢𑁆𑀢𑀩𑁆𑀩𑀸, 𑀢𑀬𑁄 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀭𑀽𑀧𑀁 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀁, 𑀦𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀁, 𑀦𑁂𑀯𑀸𑀘𑀬𑀕𑀸𑀫𑀺𑀦𑀅𑀧𑀘𑀬𑀕𑀸𑀫𑀺, 𑀦𑁂𑀯𑀲𑁂𑀔𑀁𑀦𑀸𑀲𑁂𑀔𑀁, 𑀧𑀭𑀺𑀢𑁆𑀢𑀁, 𑀲𑁂𑀲𑀸 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀭𑀽𑀧𑀁 𑀫𑀚𑁆𑀛𑀺𑀫𑀁, 𑀅𑀦𑀺𑀬𑀢𑀁, 𑀲𑁂𑀲𑀸 𑀢𑀺𑀥𑀸𑀧𑀺. 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀘 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀢𑀺𑀥𑀸𑀧𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸. 𑀉𑀧𑁆𑀧𑀦𑁆𑀦𑀸𑀢𑀻𑀢𑀢𑁆𑀢𑀺𑀓𑁂𑀲𑀼 𑀧𑀜𑁆𑀘𑀧𑀺 𑀢𑀺𑀥𑀸 𑀳𑁄𑀦𑁆𑀢𑀺. 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀧𑀜𑁆𑀘𑀧𑀺 𑀢𑀺𑀥𑀸 𑀳𑁄𑀦𑁆𑀢𑀺. 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀢𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀘. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸, 𑀭𑀽𑀧𑀓𑁆𑀔𑀦𑁆𑀥𑁄 𑀢𑀺𑀥𑀸𑀧𑀺 𑀳𑁄𑀢𑀺.

𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦𑀳𑁂𑀢𑀽, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀲𑀺𑀬𑀸 𑀳𑁂𑀢𑀼, 𑀲𑀺𑀬𑀸 𑀦 𑀳𑁂𑀢𑀼. 𑀭𑀽𑀧𑀁 𑀅𑀳𑁂𑀢𑀼𑀓𑀁, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀁, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀢𑀬𑁄 𑀔𑀦𑁆𑀥𑀸 𑀲𑀺𑀬𑀸 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀘, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘, 𑀭𑀽𑀧𑀁 𑀦 𑀯𑀢𑁆𑀢𑀩𑁆𑀩𑀫𑁂𑀯. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑁂𑀧𑀺. 𑀭𑀽𑀧𑀁 𑀦𑀳𑁂𑀢𑀼𑀅𑀳𑁂𑀢𑀼𑀓𑀁, 𑀢𑀬𑁄 𑀤𑁆𑀯𑀺𑀥𑀸𑀧𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘. 𑀧𑀜𑁆𑀘𑀧𑀺 𑀲𑀧𑁆𑀧𑀘𑁆𑀘𑀬𑀸, 𑀲𑀗𑁆𑀔𑀢𑀸, 𑀘𑀢𑁆𑀢𑀸𑀭𑁄 𑀅𑀦𑀺𑀤𑀲𑁆𑀲𑀦𑀸, 𑀅𑀧𑁆𑀧𑀝𑀺𑀖𑀸, 𑀭𑀽𑀧𑀁 𑀤𑁆𑀯𑀺𑀥𑀸𑀧𑀺. 𑀭𑀽𑀧𑀁 𑀭𑀽𑀧𑀻, 𑀲𑁂𑀲𑀸 𑀅𑀭𑀽𑀧𑀺𑀦𑁄. 𑀭𑀽𑀧𑀁 𑀮𑁄𑀓𑀺𑀬𑀁, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀧𑀜𑁆𑀘𑀧𑀺 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀘 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀘. 𑀘𑀢𑁆𑀢𑀸𑀭𑁄 𑀦𑁄 𑀆𑀲𑀯𑀸, 𑀲𑀗𑁆𑀔𑀸𑀭𑀸 𑀤𑁆𑀯𑀺𑀥𑀸𑀧𑀺, 𑀦 𑀯𑀢𑁆𑀢𑀩𑁆𑀩𑀸 𑀘. 𑀭𑀽𑀧𑀁 𑀲𑀸𑀲𑀯𑁄, 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀭𑀽𑀧𑀁 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸, 𑀢𑀬𑁄 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀲𑀗𑁆𑀔𑀸𑀭𑁄 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘. 𑀭𑀽𑀧𑀁 𑀦 𑀯𑀢𑁆𑀢𑀩𑁆𑀩𑀫𑁂𑀯, 𑀢𑀬𑁄 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸, 𑀲𑀗𑁆𑀔𑀸𑀭𑁄 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘. 𑀭𑀽𑀧𑀁 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀸𑀲𑀯𑀜𑁆𑀘, 𑀲𑁂𑀲𑀸 𑀤𑁆𑀯𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀇𑀫𑀺𑀦𑀸 𑀦𑀬𑁂𑀦 𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑀸𑀤𑀻𑀲𑀼𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀁 𑀳𑀺 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂 𑀭𑀽𑀧𑀁 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀁, 𑀢𑀬𑁄 𑀤𑁆𑀯𑀺𑀥𑀸𑀧𑀺, 𑀲𑀗𑁆𑀔𑀸𑀭𑁄 𑀤𑁆𑀯𑀺𑀥𑀸𑀧𑀺, 𑀤𑀺𑀝𑁆𑀞𑀺𑀯𑀲𑁂𑀦 𑀦 𑀯𑀢𑁆𑀢𑀩𑁆𑀩𑁄 𑀘. 𑀢𑀢𑀺𑀬𑁂 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀭𑀽𑀧𑀁 𑀅𑀦𑀸𑀭𑀫𑁆𑀫𑀡𑀁, 𑀲𑁂𑀲𑀸 𑀲𑀸𑀭𑀫𑁆𑀫𑀡𑀸. 𑀯𑀺𑀜𑁆𑀜𑀸𑀡𑀁 𑀘𑀺𑀢𑁆𑀢𑀁, 𑀲𑁂𑀲𑀸 𑀦𑁄 𑀘𑀺𑀢𑁆𑀢𑀸. 𑀢𑀬𑁄 𑀘𑁂𑀢𑀲𑀺𑀓𑀸, 𑀤𑁆𑀯𑁂 𑀅𑀘𑁂𑀢𑀲𑀺𑀓𑀸. 𑀢𑀬𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸, 𑀭𑀽𑀧𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀁 𑀦 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀤𑀼𑀓𑁂𑀧𑀺. 𑀢𑀬𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀯𑀺𑀜𑁆𑀜𑀸𑀡𑀁 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀭𑀽𑀧𑀁 𑀤𑁆𑀯𑀺𑀥𑀸𑀧𑀺. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑀤𑁆𑀯𑀬𑁂𑀧𑀺. 𑀢𑀬𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸, 𑀤𑁆𑀯𑁂 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑀤𑁆𑀯𑀬𑁂𑀧𑀺. 𑀯𑀺𑀜𑁆𑀜𑀸𑀡𑀁 𑀅𑀚𑁆𑀛𑀢𑁆𑀢𑀺𑀓𑀁, 𑀢𑀬𑁄 𑀩𑀸𑀳𑀺𑀭𑀸, 𑀭𑀽𑀧𑀁 𑀤𑁆𑀯𑀺𑀥𑀸𑀧𑀺. 𑀘𑀢𑁆𑀢𑀸𑀭𑁄 𑀦𑁄 𑀉𑀧𑀸𑀤𑀸. 𑀭𑀽𑀧𑀁 𑀤𑁆𑀯𑀺𑀥𑀸𑀧𑀺. 𑀧𑀜𑁆𑀘𑀧𑀺 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀸, 𑀦𑁄 𑀉𑀧𑀸𑀤𑀸𑀦𑀸.

𑀓𑀺𑀮𑁂𑀲𑀕𑁄𑀘𑁆𑀙𑀓𑁄 𑀯𑀼𑀢𑁆𑀢𑀦𑀬𑁄𑀯. 𑀭𑀽𑀧𑀁 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀏𑀯𑀁 𑀬𑀸𑀯𑀧𑀻𑀢𑀺𑀤𑀼𑀓𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀭𑀽𑀧𑀁 𑀦 𑀯𑁂𑀤𑀦𑀸, 𑀦 𑀲𑀼𑀔𑀸, 𑀦 𑀲𑀼𑀔𑀲𑀳𑀕𑀢𑀸, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀢𑀣𑀸 𑀅𑀦𑀦𑁆𑀢𑀭𑀤𑀼𑀓𑁂𑀧𑀺. 𑀭𑀽𑀧𑀁 𑀓𑀸𑀫𑀸𑀯𑀘𑀭𑀁, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀏𑀯𑀁 𑀬𑀸𑀯 𑀲𑀭𑀡𑀤𑀼𑀓𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄.

𑀇𑀫𑁂 𑀧𑀦 𑀦𑀬𑀸 𑀯𑀺𑀢𑁆𑀣𑀸𑀭𑀢𑁄 𑀧𑀸𑀴𑀺𑀅𑀝𑁆𑀞𑀓𑀣𑀸𑀳𑀺 𑀜𑀸𑀢𑀩𑁆𑀩𑀸. 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀘 𑀦𑁂𑀲𑀁 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀅𑀢𑀺𑀭𑁂𑀓𑀁 𑀅𑀯𑀢𑁆𑀯𑀸 𑀅𑀧𑀼𑀩𑁆𑀩𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀅𑀬𑀁 𑀯𑀺𑀪𑀗𑁆𑀕𑀦𑀬𑀤𑀲𑁆𑀲𑀦𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄.

𑀇𑀤𑀸𑀦𑀺 𑀧𑀦𑁂𑀢𑁆𑀣 𑁋

𑀓𑀫𑀢𑁄𑀦𑀽𑀦𑀸𑀥𑀺𑀓𑀢𑁄, 𑀤𑀝𑁆𑀞𑀩𑁆𑀩𑀲𑀫𑀪𑁂𑀤𑀢𑁄;

𑀧𑀸𑀴𑀺𑀫𑀼𑀢𑁆𑀢𑀦𑀬𑁄 𑀜𑁂𑀬𑁆𑀬𑁄, 𑀔𑀦𑁆𑀥𑀓𑁄𑀲𑀮𑁆𑀮𑀫𑀺𑀘𑁆𑀙𑀢𑀸.

𑀢𑀢𑁆𑀣 𑀓𑀫𑀢𑁄𑀢𑀺 𑀏𑀢𑁆𑀣 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀧𑀳𑀸𑀦𑀓𑁆𑀓𑀫𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀪𑀽𑀫𑀺𑀓𑁆𑀓𑀫𑁄 𑀤𑁂𑀲𑀦𑀸𑀓𑁆𑀓𑀫𑁄𑀢𑀺 𑀩𑀳𑀼𑀯𑀺𑀥𑁂𑀲𑀼 𑀓𑀫𑁂𑀲𑀼 𑀔𑀦𑁆𑀥𑀸𑀦𑀁 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺, 𑀦 𑀇𑀢𑀭𑁂, 𑀅𑀲𑀫𑁆𑀪𑀯𑀸. 𑀅𑀪𑁂𑀤𑁂𑀦 𑀳𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀢𑁆𑀢𑀕𑁆𑀕𑀸𑀳𑀧𑀢𑀺𑀢𑀁 𑀯𑁂𑀦𑁂𑀬𑁆𑀬𑀚𑀦𑀁 𑀲𑀫𑀽𑀳𑀖𑀦𑀯𑀺𑀦𑀺𑀩𑁆𑀪𑁄𑀕𑀤𑀲𑁆𑀲𑀦𑁂𑀦 𑀅𑀢𑁆𑀢𑀕𑁆𑀕𑀸𑀳𑀢𑁄 𑀫𑁄𑀘𑁂𑀢𑀼𑀓𑀸𑀫𑁄 𑀪𑀕𑀯𑀸 𑀳𑀺𑀢𑀓𑀸𑀫𑁄 𑀢𑀲𑁆𑀲 𑀢𑀲𑁆𑀲 𑀚𑀦𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀘𑀓𑁆𑀔𑀼𑀆𑀤𑀻𑀦𑀁 𑀯𑀺𑀲𑀬𑀪𑀽𑀢𑀁 𑀑𑀴𑀸𑀭𑀺𑀓𑀁 𑀧𑀞𑀫𑀁 𑀭𑀽𑀧𑀓𑁆𑀔𑀦𑁆𑀥𑀁 𑀤𑁂𑀲𑁂𑀲𑀺, 𑀢𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀲𑀁𑀯𑁂𑀤𑀓𑀁 𑀑𑀴𑀸𑀭𑀺𑀓𑀁 𑀯𑁂𑀤𑀦𑀁, 𑀬𑀁 𑀯𑁂𑀤𑁂𑀢𑀺, 𑀢𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀏𑀯𑀁 𑀯𑁂𑀤𑀦𑀸𑀯𑀺𑀲𑀬𑀲𑁆𑀲 𑀆𑀓𑀸𑀭𑀕𑁆𑀕𑀸𑀳𑀺𑀓𑀁 𑀲𑀜𑁆𑀜𑀁, 𑀲𑀜𑁆𑀜𑀸𑀯𑀲𑁂𑀦𑀸𑀪𑀺𑀲𑀗𑁆𑀔𑀸𑀭𑀓𑁂 𑀲𑀗𑁆𑀔𑀸𑀭𑁂, 𑀢𑁂𑀲𑀁 𑀯𑁂𑀤𑀦𑀸𑀤𑀻𑀦𑀁 𑀦𑀺𑀲𑁆𑀲𑀬𑀸𑀥𑀺𑀧𑀢𑀺𑀪𑀽𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀅𑀦𑀽𑀦𑀸𑀥𑀺𑀓𑀢𑁄𑀢𑀺 𑀓𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀯𑀼𑀢𑁆𑀢𑀸 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺? 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑀢𑁄, 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑁆𑀧𑀭𑀫𑀢𑁄, 𑀅𑀜𑁆𑀜𑁂𑀲𑀜𑁆𑀘 𑀢𑀤𑀯𑀭𑁄𑀥𑀢𑁄. 𑀅𑀦𑁂𑀓𑀧𑁆𑀧𑀪𑁂𑀤𑁂𑀲𑀼 𑀳𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀲𑀪𑀸𑀕𑀯𑀲𑁂𑀦 𑀲𑀗𑁆𑀕𑀬𑁆𑀳𑀫𑀸𑀦𑁂𑀲𑀼 𑀭𑀽𑀧𑀁 𑀭𑀽𑀧𑀲𑀪𑀸𑀕𑁂𑀓𑀲𑀗𑁆𑀕𑀳𑀯𑀲𑁂𑀦 𑀏𑀓𑁄 𑀔𑀦𑁆𑀥𑁄 𑀳𑁄𑀢𑀺, 𑀯𑁂𑀤𑀦𑀸 𑀯𑁂𑀤𑀦𑀸𑀲𑀪𑀸𑀕𑁂𑀓𑀲𑀗𑁆𑀕𑀳𑀯𑀲𑁂𑀦 𑀏𑀓𑁄 𑀔𑀦𑁆𑀥𑁄 𑀳𑁄𑀢𑀺. 𑀏𑀲 𑀦𑀬𑁄 𑀲𑀜𑁆𑀜𑀸𑀤𑀻𑀲𑀼𑀧𑀺, 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑀢𑁄 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀏𑀢𑀧𑀭𑀫𑀜𑁆𑀘𑁂𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼, 𑀬𑀤𑀺𑀤𑀁 𑀭𑀽𑀧𑀸𑀤𑀬𑁄 𑀧𑀜𑁆𑀘, 𑀢𑀲𑁆𑀫𑀸 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑀭𑀫𑀢𑁄𑀧𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸. 𑀬𑁂𑀧𑀺 𑀘𑀜𑁆𑀜𑁂 𑀲𑀻𑀮𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸, 𑀢𑁂𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀢𑁆𑀣𑁂𑀯 𑀅𑀯𑀭𑁄𑀥𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀁 𑀢𑀤𑀯𑀭𑁄𑀥𑀢𑁄𑀧𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀅𑀦𑀽𑀦𑀸𑀥𑀺𑀓𑀢𑁄.

𑀤𑀝𑁆𑀞𑀩𑁆𑀩𑀲𑀫𑀪𑁂𑀤𑀢𑁄𑀢𑀺 𑀤𑀝𑁆𑀞𑀩𑁆𑀩𑀪𑁂𑀤𑀢𑁄, 𑀉𑀧𑀫𑀸𑀪𑁂𑀤𑀢𑁄 𑀘. 𑀢𑀢𑁆𑀣 𑀤𑀝𑁆𑀞𑀩𑁆𑀩𑀪𑁂𑀤𑀢𑁄 𑀢𑀸𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀸𑀫𑀜𑁆𑀜𑀢𑁄 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀘𑁆𑀘𑀢𑁆𑀣𑀺𑀓𑀢𑁄, 𑀪𑀸𑀭𑀢𑁄, 𑀔𑀸𑀤𑀓𑀢𑁄, 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀲𑀗𑁆𑀔𑀸𑀢𑀯𑀥𑀓𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦 𑀨𑁂𑀡𑀧𑀺𑀡𑁆𑀟𑀁 𑀯𑀺𑀬 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁, 𑀉𑀤𑀓𑀩𑀼𑀩𑁆𑀩𑀼𑀴𑀫𑀭𑀻𑀘𑀺𑀓𑀓𑀤𑀮𑀺𑀓𑁆𑀔𑀦𑁆𑀥𑀫𑀸𑀬𑀸 𑀯𑀺𑀬 𑀬𑀣𑀸𑀓𑁆𑀓𑀫𑀁 𑀯𑁂𑀤𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀳𑀺 𑀨𑁂𑀡𑀧𑀺𑀡𑁆𑀟𑁄 𑀯𑀺𑀫𑀤𑁆𑀤𑀸𑀲𑀳𑁄, 𑀲𑁄 𑀘 𑀧𑀢𑁆𑀢𑀣𑀸𑀮𑀓𑀸𑀤𑀺𑀅𑀢𑁆𑀣𑀁 𑀕𑀳𑀺𑀢𑁄𑀧𑀺 𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺, 𑀪𑀺𑀚𑁆𑀚𑀢𑀺, 𑀏𑀯𑀁 𑀭𑀽𑀧𑀫𑁆𑀧𑀺 𑀯𑀺𑀫𑀤𑁆𑀤𑀸𑀲𑀳𑀁, 𑀢𑀜𑁆𑀘 𑀲𑀼𑀪𑀸𑀤𑀺𑀯𑀲𑁂𑀦 𑀕𑀳𑀺𑀢𑀫𑁆𑀧𑀺 𑀦 𑀢𑀣𑀸 𑀢𑀺𑀝𑁆𑀞𑀢𑀺, 𑀅𑀲𑀼𑀪𑀸𑀤𑀺𑀬𑁂𑀯 𑀳𑁄𑀢𑀺.

𑀬𑀣𑀸 𑀯𑀸 𑀨𑁂𑀡𑀧𑀺𑀡𑁆𑀟𑁄 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑁄 𑀩𑀳𑀼𑀦𑁆𑀦𑀁 𑀉𑀤𑀓𑀲𑀧𑁆𑀧𑀸𑀤𑀺𑀧𑀸𑀡𑀓𑀸𑀦𑀁 𑀆𑀯𑀸𑀲𑁄, 𑀆𑀤𑀺𑀢𑁄 𑀘𑁂𑀲 𑀩𑀤𑀭𑀧𑀓𑁆𑀓𑀫𑀢𑁆𑀢𑁄 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀯𑀟𑁆𑀠𑀦𑀓𑁄 𑀉𑀝𑁆𑀞𑀺𑀢𑀫𑀢𑁆𑀢𑁄𑀧𑀺 𑀘𑁂𑀲 𑀪𑀺𑀚𑁆𑀚𑀢𑀺, 𑀣𑁄𑀓𑀁 𑀕𑀦𑁆𑀢𑁆𑀯𑀸𑀧𑀺, 𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀧𑀦 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺, 𑀏𑀯𑀁 𑀭𑀽𑀧𑀫𑁆𑀧𑀺 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑀁 𑀅𑀲𑀻𑀢𑀺𑀓𑀺𑀫𑀺𑀓𑀼𑀮𑀯𑁄𑀓𑀺𑀡𑁆𑀡𑀁, 𑀆𑀤𑀺𑀢𑁄 𑀘𑁂𑀢𑀁 𑀓𑀮𑀮𑀫𑀢𑁆𑀢𑀁 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀯𑀟𑁆𑀠𑀦𑀓𑀁, 𑀓𑀮𑀮𑀫𑀢𑁆𑀢𑁂𑀧𑀺 𑀘𑁂𑀢𑀁 𑀪𑀺𑀚𑁆𑀚𑀢𑀺, 𑀅𑀩𑁆𑀩𑀼𑀤𑀸𑀤𑀺𑀪𑀸𑀯𑁂𑀧𑀺 𑀆𑀬𑀼𑀓𑁆𑀔𑀬𑀁 𑀧𑀢𑁆𑀯𑀸 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺. 𑀏𑀯𑀁 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁 𑀤𑀝𑁆𑀞𑀩𑁆𑀩𑀁.

𑀬𑀣𑀸 𑀧𑀦 𑀩𑀼𑀩𑁆𑀩𑀼𑀴𑁄 𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑁄 𑀅𑀕𑀬𑁆𑀳𑀼𑀧𑀕𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄𑀯, 𑀏𑀯𑀁 𑀯𑁂𑀤𑀦𑀸𑀧𑀺. 𑀬𑀣𑀸 𑀘 𑀩𑀼𑀩𑁆𑀩𑀼𑀴𑁄 𑀉𑀤𑀓𑀢𑀮𑀁, 𑀉𑀤𑀓𑀩𑀺𑀦𑁆𑀤𑀼𑀁, 𑀉𑀤𑀓𑀚𑀮𑁆𑀮𑀓𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀼𑀝𑀁 𑀓𑀢𑁆𑀯𑀸 𑀕𑀳𑀡𑀯𑀸𑀢𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀯𑁂𑀤𑀦𑀸𑀧𑀺 𑀯𑀢𑁆𑀣𑀼𑀁, 𑀆𑀭𑀫𑁆𑀫𑀡𑀁, 𑀓𑀺𑀮𑁂𑀲𑀚𑀮𑁆𑀮𑀁, 𑀨𑀲𑁆𑀲𑀲𑀗𑁆𑀖𑀝𑁆𑀝𑀦𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀸 𑀩𑀼𑀩𑁆𑀩𑀼𑀴𑀲𑀤𑀺𑀲𑀸 𑀤𑀝𑁆𑀞𑀩𑁆𑀩𑀸.

𑀬𑀣𑀸 𑀧𑀦 𑀫𑀭𑀻𑀘𑀺𑀓𑀸 𑀚𑀮𑀸𑀲𑀬𑀸𑀤𑀺𑀪𑀸𑀯𑁂𑀦 𑀯𑀺𑀧𑁆𑀧𑀮𑀫𑁆𑀪𑀺𑀓𑀸, 𑀏𑀯𑀁 𑀲𑀜𑁆𑀜𑀸𑀧𑀺 𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦𑀸𑀢𑀺 𑀫𑀭𑀻𑀘𑀺𑀲𑀤𑀺𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀧𑀦 𑀓𑀤𑀮𑀺𑀓𑁆𑀔𑀦𑁆𑀥𑁄 𑀅𑀕𑀬𑁆𑀳𑀼𑀧𑀕𑁄 𑀩𑀳𑀼𑀯𑀝𑁆𑀝𑀺𑀲𑀫𑁄𑀥𑀸𑀦𑁄, 𑀏𑀯𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀧𑀺 𑀅𑀕𑀬𑁆𑀳𑀼𑀧𑀕𑁄𑀦𑀺𑀘𑁆𑀘𑀸𑀤𑀺𑀲𑀸𑀭𑀯𑀺𑀭𑀳𑀺𑀢𑁄, 𑀨𑀲𑁆𑀲𑀸𑀤𑀺𑀩𑀳𑀼𑀥𑀫𑁆𑀫𑀲𑀫𑁄𑀥𑀸𑀦𑁄 𑀘 𑀳𑁄𑀢𑀻𑀢𑀺 𑀲𑁄 𑀓𑀤𑀮𑀺𑀓𑁆𑀔𑀦𑁆𑀥𑀲𑀤𑀺𑀲𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀦 𑀫𑀸𑀬𑀸 𑀅𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀭𑀽𑀧𑀸𑀦𑀺𑀧𑀺 𑀢𑀣𑀸 𑀕𑀸𑀳𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑀺, 𑀏𑀯𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀦𑀺𑀘𑁆𑀘𑀸𑀤𑀺𑀭𑀽𑀧𑀁 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀆𑀕𑀘𑁆𑀙𑀦𑁆𑀢𑀁 𑀯𑀺𑀬 𑀦𑀺𑀘𑁆𑀘𑀸𑀤𑀺𑀢𑁄 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀯𑀜𑁆𑀘𑁂𑀢𑀻𑀢𑀺 𑀢𑀁 𑀫𑀸𑀬𑀸𑀲𑀤𑀺𑀲𑀁 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀨𑁂𑀡𑀧𑀺𑀡𑁆𑀟𑀽𑀧𑀫𑀁 𑀭𑀽𑀧𑀁, 𑀯𑁂𑀤𑀦𑀸 𑀩𑀼𑀩𑁆𑀩𑀼𑀴𑀽𑀧𑀫𑀸;

𑀫𑀭𑀻𑀘𑀺𑀓𑀽𑀧𑀫𑀸 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸 𑀓𑀤𑀮𑀽𑀧𑀫𑀸;

𑀫𑀸𑀬𑀽𑀧𑀫𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸’’𑀢𑀺. (𑀲𑀁. 𑀦𑀺. 𑁩.𑁯𑁫);

𑀅𑀬𑀫𑁂𑀢𑁆𑀣 𑀤𑀝𑁆𑀞𑀩𑁆𑀩𑀪𑁂𑀤𑁄.

𑀉𑀧𑀫𑀸𑀪𑁂𑀤𑀢𑁄 𑀘 𑀧𑀦 𑀕𑀺𑀮𑀸𑀦𑀲𑀸𑀮𑀽𑀧𑀫𑁄 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀕𑁂𑀮𑀜𑁆𑀜𑀽𑀧𑀫𑁄 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀕𑁂𑀮𑀜𑁆𑀜𑀲𑀫𑀼𑀝𑁆𑀞𑀸𑀦𑀽𑀧𑀫𑁄 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀅𑀲𑀧𑁆𑀧𑀸𑀬𑀲𑁂𑀯𑀦𑀽𑀧𑀫𑁄 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀕𑀺𑀮𑀸𑀦𑀽𑀧𑀫𑁄 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀅𑀧𑀺𑀘 𑀘𑀸𑀭𑀓𑀓𑀸𑀭𑀡𑀅𑀧𑀭𑀸𑀥𑀓𑀸𑀭𑀡𑀓𑀸𑀭𑀓𑀅𑀧𑀭𑀸𑀥𑀺𑀓𑀽𑀧𑀫𑀸 𑀏𑀢𑁂 𑀪𑀸𑀚𑀦𑀪𑁄𑀚𑀦𑀩𑁆𑀬𑀜𑁆𑀚𑀦𑀧𑀭𑀺𑀯𑁂𑀲𑀓𑀪𑀼𑀜𑁆𑀚𑀓𑀽𑀧𑀫𑀸 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀉𑀧𑀫𑀸𑀪𑁂𑀤𑁄. 𑀏𑀯𑀁 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀦𑀬𑁄 𑀜𑁂𑀬𑁆𑀬𑁄.

𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀢𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀆𑀬𑀢𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺 𑀏𑀢𑁆𑀣 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀸𑀦𑀺. 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀳𑀺 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑁂𑀦 𑀲𑁂𑀦 𑀅𑀦𑀼𑀪𑀯𑀦𑀸𑀤𑀺𑀦𑀸 𑀓𑀺𑀘𑁆𑀘𑁂𑀦 𑀆𑀬𑀢𑀦𑁆𑀢𑀺 𑀉𑀧𑀝𑁆𑀞𑀳𑀦𑁆𑀢𑀺 𑀖𑀝𑁂𑀦𑁆𑀢𑀺 𑀯𑀸𑀬𑀫𑀦𑁆𑀢𑀺, 𑀢𑁂 𑀘 𑀧𑀦 𑀆𑀬𑀪𑀽𑀢𑁂 𑀥𑀫𑁆𑀫𑁂 𑀏𑀢𑀸𑀦𑀺 𑀢𑀦𑁄𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀺, 𑀇𑀤𑀜𑁆𑀘 𑀅𑀢𑀻𑀯 𑀆𑀬𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀦𑀬𑀦𑁆𑀢𑁂𑀯, 𑀧𑀯𑀢𑁆𑀢𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀧𑀺𑀘 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦, 𑀆𑀓𑀭𑀝𑁆𑀞𑁂𑀦, 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦, 𑀲𑀜𑁆𑀚𑀸𑀪𑀺𑀤𑁂𑀲𑀝𑁆𑀞𑁂𑀦, 𑀓𑀸𑀭𑀡𑀝𑁆𑀞𑁂𑀦 𑀘 𑀲𑀸𑀲𑀦𑁂, 𑀮𑁄𑀓𑁂 𑀘 ‘‘𑀆𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀘𑀓𑁆𑀔𑀼𑀆𑀤𑀻𑀲𑀼 𑀳𑀺 𑀢𑁂 𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀦𑀺𑀯𑀲𑀦𑁆𑀢𑀺, 𑀢𑁂𑀲𑀼 𑀘 𑀆𑀓𑀭𑀪𑀽𑀢𑁂𑀲𑀼 𑀆𑀓𑀺𑀡𑁆𑀡𑀸 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀘 𑀲𑀫𑁄𑀲𑀭𑀦𑁆𑀢𑀺, 𑀘𑀓𑁆𑀔𑀸𑀤𑀬𑁄𑀯 𑀦𑁂𑀲𑀁 𑀲𑀜𑁆𑀚𑀸𑀢𑀺𑀤𑁂𑀲𑁄, 𑀓𑀸𑀭𑀡𑀜𑁆𑀘, 𑀢𑀲𑁆𑀫𑀸 𑀦𑀺𑀯𑀸𑀲𑀝𑁆𑀞𑀸𑀦𑀸𑀤𑀺𑀦𑀸 𑀅𑀢𑁆𑀣𑁂𑀦 𑀘𑀓𑁆𑀔𑀸𑀤𑀻𑀦𑀺 𑀆𑀬𑀢𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀻𑀲𑀼 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼, 𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺, 𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁. 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀲𑀧𑁆𑀧𑀢𑀻𑀢𑀺 𑀲𑀤𑁆𑀤𑁄, 𑀉𑀤𑀸𑀳𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀕𑀦𑁆𑀥𑀬𑀢𑀻𑀢𑀺 𑀕𑀦𑁆𑀥𑁄, 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑀬𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸𑀢𑀺 𑀭𑀲𑁄, 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄, 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀨𑀼𑀲𑀻𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁. 𑀫𑀦𑀢𑀻𑀢𑀺 𑀫𑀦𑁄. 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀘𑀓𑁆𑀔𑀼 𑀘 𑀢𑀁 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸 𑀘 𑀢𑁂 𑀆𑀬𑀢𑀦𑀜𑁆𑀘𑀸𑀢𑀺 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀦𑀸𑀬𑀢𑀦𑀁 𑀦𑀸𑀫. 𑀘𑁂𑀢𑀲𑀺𑀓𑀲𑀼𑀔𑀼𑀫𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫. 𑀲𑁂𑀲𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺. 𑀇𑀫𑁂𑀲𑀼 𑀘 𑀆𑀬𑀢𑀦𑁂𑀲𑀼 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸, 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀸 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀩𑁆𑀩𑁂 𑀦𑀸𑀫𑀭𑀽𑀧𑀥𑀫𑁆𑀫𑀸, 𑀧𑀜𑁆𑀜𑀢𑁆𑀢𑀺𑀬𑁄 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀥𑀸𑀢𑀼. 𑁭𑁧) 𑀳𑀺 𑀭𑀽𑀧𑀸𑀭𑀽𑀧𑀮𑀓𑁆𑀔𑀡𑀸𑀦𑀁 𑀚𑀸𑀢𑀺𑀚𑀭𑀸𑀪𑀗𑁆𑀕𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸 𑀇𑀢𑀭𑀸𑀲𑀫𑁆𑀧𑀺 𑀧𑀜𑁆𑀜𑀢𑁆𑀢𑀻𑀦𑀁 𑀬𑀣𑀸𑀭𑀳𑀁 𑀢𑀢𑁆𑀣 𑀲𑀗𑁆𑀕𑀳𑀺𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀪𑁂𑀤𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 ‘‘𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸…𑀧𑁂… 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺 (𑀯𑀺𑀪. 𑁧𑁫𑁪) 𑀏𑀯𑀁 𑀯𑀺𑀲𑀬𑀺𑀯𑀺𑀲𑀬𑀸𑀬𑀢𑀦𑀯𑀲𑁂𑀦 𑀆𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑀧𑀲𑀸𑀤𑀯𑀺𑀲𑀬𑀸𑀬𑀢𑀦𑀸𑀦𑀺 𑀢𑀸𑀯 ‘‘𑀢𑀢𑁆𑀣 𑀓𑀢𑀫𑀁 𑀘𑀓𑁆𑀔𑀸𑀬𑀢𑀦𑀁? 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁫𑁬) 𑀭𑀽𑀧𑀓𑀡𑁆𑀟𑁂 (𑀥. 𑀲. 𑁫𑁯𑁭) 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀢𑁆𑀢𑀸𑀦𑀺. 𑀫𑀦𑀸𑀬𑀢𑀦𑀁 𑀧𑀦 𑀏𑀓𑀯𑀺𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯𑀤𑀲𑀯𑀺𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀢𑁆𑀢𑀁. 𑀥𑀫𑁆𑀫𑀸𑀬𑀢𑀦𑀁 𑀧𑀦 ‘‘𑀢𑀢𑁆𑀣 𑀓𑀢𑀫𑀁 𑀥𑀫𑁆𑀫𑀸𑀬𑀢𑀦𑀁? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀬𑀜𑁆𑀘 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀽’’𑀢𑀺 (𑀯𑀺𑀪. 𑁧𑁬𑁭) 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁬𑁭) 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀢𑁆𑀢𑀁. 𑀲𑀼𑀔𑀼𑀫𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀭𑀽𑀧𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑀁 𑀧𑀦 𑀇𑀢𑁄 𑀧𑀭𑀁 𑀯𑀺𑀢𑁆𑀣𑀸𑀭𑀢𑁄 𑀅𑀤𑀲𑁆𑀲𑁂𑀢𑁆𑀯𑀸 𑀢𑀺𑀓𑀤𑀼𑀓𑀸𑀦𑀁 𑀆𑀤𑀺𑀅𑀦𑁆𑀢𑁂𑀳𑀺 𑀘𑁂𑀯 𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑁂𑀳𑀺 𑀘 𑀢𑀺𑀓𑀤𑀼𑀓𑁂𑀳𑀺 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀲𑁂𑀲𑁂𑀳𑀺𑀧𑀺 𑀢𑀺𑀓𑀤𑀼𑀓𑁂𑀳𑀺 𑀬𑁄𑀚𑀦𑀸𑀦𑀬𑁄 𑀔𑀦𑁆𑀥𑁂 𑀯𑀼𑀢𑁆𑀢𑀦𑀬𑁂𑀦 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺. 𑀓𑀣𑀁 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸𑀢𑀺? 𑀤𑀲𑀸𑀬𑀢𑀦𑀸 𑀅𑀩𑁆𑀬𑀸𑀓𑀢𑀸, 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸. 𑀯𑁂𑀤𑀦𑀸𑀢𑁆𑀢𑀺𑀓𑁂 𑀤𑀲𑀸𑀬𑀢𑀦𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺, 𑀫𑀦𑀸𑀬𑀢𑀦𑀁 𑀢𑀺𑀥𑀸𑀧𑀺, 𑀥𑀫𑁆𑀫𑀸𑀬𑀢𑀦𑀁 𑀢𑀺𑀥𑀸 𑀦 𑀯𑀢𑁆𑀢𑀩𑁆𑀩𑀜𑁆𑀘…𑀧𑁂… 𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀦𑀯𑀸𑀬𑀢𑀦𑀸𑀦𑀺 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀦𑀺, 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀸𑀦𑀺 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀦𑀺, 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀦 𑀳𑁂𑀢𑀽, 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀳𑁂𑀢𑀼, 𑀲𑀺𑀬𑀸 𑀦 𑀳𑁂𑀢𑀼…𑀧𑁂… 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀲𑀧𑁆𑀧𑀘𑁆𑀘𑀬𑀸𑀦𑀺, 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀧𑁆𑀧𑀘𑁆𑀘𑀬𑀁, 𑀲𑀺𑀬𑀸 𑀅𑀧𑁆𑀧𑀘𑁆𑀘𑀬𑀁…𑀧𑁂… 𑀤𑀲𑀸𑀬𑀢𑀦𑀸𑀦𑀺 𑀭𑀽𑀧𑀁, 𑀫𑀦𑀸𑀬𑀢𑀦𑀁 𑀅𑀭𑀽𑀧𑀁, 𑀥𑀫𑁆𑀫𑀸𑀬𑀢𑀦𑀁 𑀤𑁆𑀯𑀺𑀥𑀸𑀧𑀺…𑀧𑁂… 𑀤𑀲𑀸𑀬𑀢𑀦𑀸𑀦𑀺 𑀅𑀭𑀡𑀸𑀦𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀲𑀺𑀬𑀸 𑀲𑀭𑀡𑀸𑀦𑀺, 𑀲𑀺𑀬𑀸 𑀅𑀭𑀡𑀸𑀦𑀻𑀢𑀺 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄.

𑀇𑀤𑀸𑀦𑀺 𑀧𑀦 𑁋

𑀓𑀫𑀢𑁄 𑀢𑀸𑀯𑀢𑁆𑀢𑀢𑁄 𑀘, 𑀢𑁂𑀲𑀁 𑀤𑀝𑁆𑀞𑀩𑁆𑀩𑀪𑁂𑀤𑀢𑁄;

𑀧𑀸𑀴𑀺𑀫𑀼𑀢𑁆𑀢𑀦𑀬𑁂𑀦𑁂𑀢𑁆𑀣, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀫𑀢𑁄𑀢𑀺 𑀇𑀥𑀸𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀳𑀺 𑀆𑀬𑀢𑀦𑁂𑀲𑀼 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀯𑀺𑀲𑀬𑀢𑁆𑀢𑀸 𑀘𑀓𑁆𑀔𑀸𑀬𑀢𑀦𑀁 𑀧𑀸𑀓𑀝𑀦𑁆𑀢𑀺 𑀧𑀞𑀫𑀁 𑀤𑁂𑀲𑀺𑀢𑀁, 𑀢𑀢𑁄 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀯𑀺𑀲𑀬𑀸𑀦𑀺 𑀲𑁄𑀢𑀸𑀬𑀢𑀦𑀸𑀤𑀻𑀦𑀺. 𑀅𑀣 𑀯𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀳𑁂𑀢𑀼𑀪𑀸𑀯𑀢𑁄 𑀩𑀳𑀽𑀧𑀓𑀸𑀭𑀢𑁆𑀢𑀸 𑀘𑀓𑁆𑀔𑀼𑀲𑁄𑀢𑀸𑀬𑀢𑀦𑀸𑀦𑀺 𑀧𑀞𑀫𑀁 𑀤𑁂𑀲𑀺𑀢𑀸𑀦𑀺, 𑀢𑀢𑁄 𑀖𑀸𑀦𑀸𑀬𑀢𑀦𑀸𑀤𑀻𑀦𑀺 𑀢𑀻𑀡𑀺, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀧𑀦 𑀕𑁄𑀘𑀭𑀯𑀺𑀲𑀬𑀢𑁆𑀢𑀸 𑀅𑀦𑁆𑀢𑁂 𑀫𑀦𑀸𑀬𑀢𑀦𑀁, 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀕𑁄𑀘𑀭𑀢𑁆𑀢𑀸 𑀢𑁂𑀲𑀁 𑀅𑀦𑀦𑁆𑀢𑀭𑀁 𑀭𑀽𑀧𑀸𑀬𑀢𑀦𑀸𑀤𑀻𑀦𑀺. 𑀅𑀧𑀺𑀘 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀯𑀯𑀢𑁆𑀣𑀸𑀦𑀢𑁄𑀧𑀺 𑀅𑀬𑀫𑁂𑀢𑁂𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁩.𑁪𑁨𑁧; 𑀲𑀁. 𑀦𑀺. 𑁪.𑁬𑁦, 𑁧𑁧𑁩; 𑀫𑀳𑀸𑀦𑀺. 𑁧𑁦𑁭) 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀢𑀸𑀯𑀢𑁆𑀢𑀢𑁄𑀢𑀺 𑀢𑀸𑀯𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑀓𑁆𑀔𑀸𑀤𑀬𑁄𑀧𑀺 𑀳𑀺 𑀥𑀫𑁆𑀫𑀸 𑀏𑀯, 𑀏𑀯𑀁 𑀲𑀢𑀺 𑀥𑀫𑁆𑀫𑀸𑀬𑀢𑀦𑀫𑀺𑀘𑁆𑀘𑁂𑀯 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀘𑁂? 𑀙𑀯𑀺𑀜𑁆𑀜𑀸𑀡𑀓𑀸𑀬𑀼𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄 𑀅𑀬𑀫𑁂𑀢𑁂𑀲𑀁 𑀪𑁂𑀤𑁄 𑀳𑁄𑀢𑀻𑀢𑀺 𑀤𑁆𑀯𑀸𑀤𑀲 𑀯𑀼𑀢𑁆𑀢𑀸𑀦𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀳𑀺 𑀯𑀺𑀜𑁆𑀜𑀸𑀡𑀓𑀸𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀫𑁂𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀭𑀽𑀧𑀸𑀬𑀢𑀦𑀫𑁂𑀯𑀸𑀭𑀫𑁆𑀫𑀡𑀁. 𑀢𑀣𑀸 𑀇𑀢𑀭𑀸𑀦𑀺 𑀇𑀢𑀭𑁂𑀲𑀁. 𑀙𑀝𑁆𑀞𑀲𑁆𑀲 𑀧𑀦 𑀪𑀯𑀗𑁆𑀕𑀫𑀦𑀲𑀗𑁆𑀔𑀸𑀢𑁄 𑀫𑀦𑀸𑀬𑀢𑀦𑁂𑀓𑀤𑁂𑀲𑁄𑀯 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀁, 𑀅𑀲𑀸𑀥𑀸𑀭𑀡𑀜𑁆𑀘 𑀥𑀫𑁆𑀫𑀸𑀬𑀢𑀦𑀁 𑀆𑀭𑀫𑁆𑀫𑀡𑀦𑁆𑀢𑀺. 𑀇𑀢𑀺 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀓𑀸𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄 𑀤𑁆𑀯𑀸𑀤𑀲 𑀯𑀼𑀢𑁆𑀢𑀸𑀦𑀻𑀢𑀺 𑀅𑀬𑀫𑁂𑀢𑁆𑀣 𑀢𑀸𑀯𑀢𑁆𑀢𑀢𑀸.

𑀤𑀝𑁆𑀞𑀩𑁆𑀩𑀪𑁂𑀤𑀢𑁄𑀢𑀺 𑀏𑀢𑁆𑀣 𑀧𑀦 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀆𑀬𑀢𑀦𑀸𑀦𑀺 𑀅𑀦𑀸𑀕𑀫𑀦𑀢𑁄, 𑀅𑀦𑀺𑀕𑁆𑀕𑀫𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀦 𑀳𑀺 𑀢𑀸𑀦𑀺 𑀧𑀼𑀩𑁆𑀩𑁂 𑀉𑀤𑀬𑀸 𑀓𑀼𑀢𑁄𑀘𑀺 𑀆𑀕𑀘𑁆𑀙𑀦𑁆𑀢𑀺, 𑀦𑀧𑀺 𑀉𑀤𑁆𑀥𑀁 𑀯𑀬𑀸 𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀦𑁆𑀢𑀺, 𑀅𑀣 𑀔𑁄 𑀧𑀼𑀩𑁆𑀩𑁂 𑀉𑀤𑀬𑀸 𑀅𑀧𑁆𑀧𑀝𑀺𑀮𑀤𑁆𑀥𑀲𑀪𑀸𑀯𑀸𑀦𑀺 𑀉𑀤𑁆𑀥𑀁 𑀯𑀬𑀸 𑀧𑀭𑀺𑀪𑀺𑀦𑁆𑀦𑀲𑀪𑀸𑀯𑀸𑀦𑀺, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑁂𑀫𑀚𑁆𑀛𑁂 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀯𑀲𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀸𑀕𑀫𑀦𑀢𑁄, 𑀅𑀦𑀺𑀕𑁆𑀕𑀫𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀣𑀸 𑀦𑀺𑀭𑀻𑀳𑀢𑁄, 𑀅𑀩𑁆𑀬𑀸𑀧𑀸𑀭𑀢𑁄 𑀘. 𑀦 𑀳𑀺 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀏𑀯𑀁 𑀳𑁄𑀢𑀺 ‘‘𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀲𑀸𑀫𑀕𑁆𑀕𑀺𑀬𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺, 𑀦 𑀘 𑀢𑀸𑀦𑀺 𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦𑀢𑁆𑀣𑀁 𑀤𑁆𑀯𑀸𑀭𑀪𑀸𑀯𑁂𑀦, 𑀯𑀢𑁆𑀣𑀼𑀪𑀸𑀯𑁂𑀦, 𑀆𑀭𑀫𑁆𑀫𑀡𑀪𑀸𑀯𑁂𑀦 𑀯𑀸 𑀩𑁆𑀬𑀸𑀧𑀸𑀭𑀫𑀸𑀧𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀥𑀫𑁆𑀫𑀢𑀸𑀯𑁂𑀲𑀸 𑀬𑀁 𑀘𑀓𑁆𑀔𑀼𑀭𑀽𑀧𑀸𑀤𑀺𑀲𑀸𑀫𑀕𑁆𑀕𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀭𑀻𑀳𑀢𑁄, 𑀅𑀩𑁆𑀬𑀸𑀧𑀸𑀭𑀢𑁄 𑀘 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀧𑀺𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀲𑀼𑀜𑁆𑀜𑁄 𑀕𑀸𑀫𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁆𑀢𑀸, 𑀩𑀸𑀳𑀺𑀭𑀸𑀦𑀺 𑀕𑀸𑀫𑀖𑀸𑀢𑀓𑀘𑁄𑀭𑀸 𑀯𑀺𑀬. 𑀢𑀣𑀸 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙𑀧𑀸𑀡𑀓𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺, 𑀩𑀸𑀳𑀺𑀭𑀸𑀦𑀺 𑀢𑁂𑀲𑀁 𑀕𑁄𑀘𑀭𑀸 𑀯𑀺𑀬𑀸𑀢𑀺 𑀅𑀬𑀫𑁂𑀢𑁆𑀣 𑀤𑀝𑁆𑀞𑀩𑁆𑀩𑀪𑁂𑀤𑁄. 𑀏𑀯𑀁 𑀧𑀸𑀴𑀺𑀫𑀼𑀢𑁆𑀢𑀦𑀬𑁂𑀦𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀆𑀬𑀢𑀦𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀥𑀸𑀢𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄𑀢𑀺 𑀏𑀢𑁆𑀣 𑀯𑀺𑀤𑀳𑀢𑀺, 𑀥𑀻𑀬𑀢𑁂, 𑀯𑀺𑀥𑀸𑀦𑀁, 𑀯𑀺𑀥𑀻𑀬𑀢𑁂 𑀏𑀢𑀸𑀬, 𑀏𑀢𑁆𑀣 𑀯𑀸 𑀥𑀻𑀬𑀢𑀻𑀢𑀺 𑀥𑀸𑀢𑀼. 𑀮𑁄𑀓𑀺𑀬𑀸 𑀳𑀺 𑀥𑀸𑀢𑀼𑀬𑁄 𑀓𑀸𑀭𑀡𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸. 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀤𑀳𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀲𑀢𑁆𑀢𑁂𑀳𑀺 𑀘 𑀥𑀻𑀬𑀦𑁆𑀢𑁂 𑀥𑀸𑀭𑀻𑀬𑀦𑁆𑀢𑀺, 𑀤𑀼𑀓𑁆𑀔𑀯𑀺𑀥𑀸𑀦𑀫𑀢𑁆𑀢𑀫𑁂𑀯 𑀘𑁂𑀢𑀸, 𑀏𑀢𑀸𑀳𑀺 𑀘 𑀓𑀸𑀭𑀡𑀪𑀽𑀢𑀸𑀳𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀢𑁆𑀢𑁂𑀳𑀺 𑀅𑀦𑀼𑀯𑀺𑀥𑀻𑀬𑀢𑀺, 𑀬𑀣𑀸𑀯𑀺𑀳𑀺𑀢𑀜𑁆𑀘 𑀤𑀼𑀓𑁆𑀔𑀁 𑀏𑀢𑀸𑀲𑁆𑀯𑁂𑀯 𑀥𑀻𑀬𑀢𑀺 𑀞𑀧𑀻𑀬𑀢𑀻𑀢𑀺 𑀏𑀢𑁂𑀳𑀺 𑀅𑀢𑁆𑀣𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 ‘‘𑀥𑀸𑀢𑀼𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀬𑀣𑀸 𑀯𑀸 𑀲𑀭𑀻𑀭𑀲𑀗𑁆𑀔𑀸𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀪𑀽𑀢𑁂𑀲𑀼 𑀭𑀲𑀲𑁄𑀡𑀺𑀢𑀸𑀤𑀻𑀲𑀼 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀥𑀸𑀢𑀼𑀲𑀫𑀜𑁆𑀜𑀸, 𑀏𑀯𑀫𑁂𑀢𑁂𑀲𑀼𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀘𑀓𑁆𑀔𑀸𑀤𑀻𑀲𑀼 𑀥𑀸𑀢𑀼𑀲𑀫𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀸𑀥𑀸𑀭𑀡𑀢𑁆𑀣𑀯𑀲𑁂𑀦 𑀧𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀦𑀺𑀚𑁆𑀚𑀻𑀯𑀫𑀢𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀘𑀓𑁆𑀔𑀼 𑀘 𑀢𑀁 𑀥𑀸𑀢𑀼 𑀘𑀸𑀢𑀺 𑀘𑀓𑁆𑀔𑀼𑀥𑀸𑀢𑀼. 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀆𑀬𑀢𑀦𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀤𑁆𑀯𑀬𑀯𑀺𑀜𑁆𑀜𑀸𑀡𑀁 𑀫𑀦𑁄𑀥𑀸𑀢𑀼 𑀦𑀸𑀫. 𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀯𑀚𑁆𑀚𑀺𑀢𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀸𑀯 𑁋 ‘‘𑀧𑀣𑀯𑀻𑀥𑀸𑀢𑀼 𑀆𑀧𑁄 𑀢𑁂𑀚𑁄 𑀯𑀸𑀬𑁄 𑀆𑀓𑀸𑀲𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀙 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀆𑀤𑀺𑀢𑁄 𑀧𑀜𑁆𑀘 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦, 𑀧𑀘𑁆𑀙𑀺𑀫𑀸 𑀘 𑀙 𑀯𑀺𑀜𑁆𑀜𑀸𑀡𑀯𑀲𑁂𑀦 𑀯𑀺𑀪𑀢𑁆𑀢𑀸, 𑀅𑀧𑀭𑀸𑀧𑀺 ‘‘𑀲𑀼𑀔𑀥𑀸𑀢𑀼 𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀅𑀯𑀺𑀚𑁆𑀚𑀸𑀥𑀸𑀢𑀽’’𑀢𑀺 𑀙 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀣𑀸 𑀢𑀣𑀸 𑀯𑀺𑀪𑀢𑁆𑀢𑀸, 𑀧𑀼𑀦 𑀅𑀧𑀭𑀸𑀧𑀺 ‘‘𑀓𑀸𑀫𑀥𑀸𑀢𑀼 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀦𑁂𑀓𑁆𑀔𑀫𑁆𑀫𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀥𑀸𑀢𑀽’’𑀢𑀺 𑀙 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸, 𑀏𑀯𑀁 𑀢𑀻𑀳𑀺 𑀙𑀓𑁆𑀓𑁂𑀳𑀺 𑀧𑀘𑁆𑀘𑁂𑀓𑀁 𑀢𑁂𑀪𑀽𑀫𑀓𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀲𑀭𑀽𑀧𑀢𑁄, 𑀮𑀓𑁆𑀔𑀡𑀸𑀳𑀸𑀭𑀢𑁄, 𑀦𑀺𑀲𑁆𑀲𑀬𑀯𑀺𑀲𑀬𑀧𑀬𑁄𑀕𑀯𑀺𑀦𑀸𑀪𑀸𑀯𑀸𑀤𑀺𑀢𑁄 𑀘 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑀲𑀭𑀽𑀧𑁂𑀦𑁂𑀯 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀲𑀸𑀤𑀯𑀺𑀲𑀬𑀥𑀸𑀢𑀼𑀬𑁄 𑀆𑀬𑀢𑀦𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀪𑀢𑁆𑀢𑀸, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀧𑀦 𑁋

‘‘𑀢𑀢𑁆𑀣 𑀓𑀢𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼? 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀅𑀬𑀁 𑀯𑀼𑀘𑁆𑀘𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼.

‘‘𑀢𑀢𑁆𑀣 𑀓𑀢𑀫𑀸 𑀫𑀦𑁄𑀥𑀸𑀢𑀼? 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀸 𑀧𑀦 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀦𑁄𑀥𑀸𑀢𑀼.

‘‘𑀢𑀢𑁆𑀣 𑀓𑀢𑀫𑀸 𑀥𑀫𑁆𑀫𑀥𑀸𑀢𑀼? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀬𑀜𑁆𑀘 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀁 𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀥𑀫𑁆𑀫𑀥𑀸𑀢𑀼.

‘‘𑀢𑀢𑁆𑀣 𑀓𑀢𑀫𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼𑀬𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁪) 𑁋

𑀏𑀯𑀁 𑀯𑀺𑀪𑀢𑁆𑀢𑀸. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀸 𑀧𑀦 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀏𑀢𑁆𑀣 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀺𑀲𑀬𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀏𑀯𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀫𑀦𑁄𑀥𑀸𑀢𑀼𑀬𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸𑀢𑀺 𑀏𑀢𑁆𑀣 𑀧𑀦 𑀧𑀺-𑀓𑀸𑀭𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑀲𑁆𑀫𑀸 𑀫𑀦𑁄𑀥𑀸𑀢𑀼𑀬𑀸𑀧𑀺 𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀸𑀤𑀺𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀧𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀫𑀦𑀜𑁆𑀘 𑀧𑀝𑀺𑀘𑁆𑀘𑀸𑀢𑀺𑀆𑀤𑀻𑀲𑀼 𑀫𑀦𑁄𑀤𑁆𑀯𑀸𑀭𑁂 𑀪𑀯𑀗𑁆𑀕𑀫𑀦𑀜𑁆𑀘𑁂𑀯 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀜𑁆𑀘 𑀧𑀝𑀺𑀘𑁆𑀘 𑀲𑀳𑀸𑀯𑀚𑁆𑀚𑀦𑀓𑀚𑀯𑀦𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂 𑀧𑀦 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸𑀢𑀺? 𑀲𑁄𑀴𑀲 𑀥𑀸𑀢𑀼𑀬𑁄 𑀅𑀩𑁆𑀬𑀸𑀓𑀢𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺…𑀧𑁂… 𑀤𑀲 𑀥𑀸𑀢𑀼𑀬𑁄 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀧𑀜𑁆𑀘 𑀥𑀸𑀢𑀼𑀬𑁄 𑀯𑀺𑀧𑀸𑀓𑀸, 𑀫𑀦𑁄𑀥𑀸𑀢𑀼 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀢𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀤𑀲 𑀥𑀸𑀢𑀼𑀬𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀤𑁆𑀤𑀥𑀸𑀢𑀼𑀬𑁄 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀧𑀜𑁆𑀘 𑀥𑀸𑀢𑀼𑀬𑁄 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀢𑀺𑀥𑀸𑀧𑀺…𑀧𑁂… 𑀤𑀲 𑀥𑀸𑀢𑀼𑀬𑁄 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀉𑀧𑁆𑀧𑀸𑀤𑀺𑀦𑁄, 𑀲𑀤𑁆𑀤𑀥𑀸𑀢𑀼 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀉𑀧𑁆𑀧𑀸𑀤𑀺𑀦𑁄𑀢𑀺, 𑀙 𑀥𑀸𑀢𑀼𑀬𑁄 𑀢𑀺𑀥𑀸𑀧𑀺. 𑀥𑀫𑁆𑀫𑀥𑀸𑀢𑀼 𑀢𑀺𑀥𑀸𑀯…𑀧𑁂… 𑀭𑀽𑀧𑀥𑀸𑀢𑀼 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸, 𑀦𑀯 𑀥𑀸𑀢𑀼𑀬𑁄 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸, 𑀅𑀝𑁆𑀞 𑀥𑀸𑀢𑀼𑀬𑁄 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸. 𑀲𑀢𑁆𑀢𑀭𑀲 𑀥𑀸𑀢𑀼𑀬𑁄 𑀦 𑀳𑁂𑀢𑀽, 𑀥𑀫𑁆𑀫𑀥𑀸𑀢𑀼 𑀤𑁆𑀯𑀺𑀥𑀸𑀯…𑀧𑁂… 𑀲𑁄𑀴𑀲 𑀥𑀸𑀢𑀼𑀬𑁄 𑀅𑀭𑀡𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀤𑁆𑀯𑀺𑀥𑀸𑀧𑀻𑀢𑀺 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄.

𑀇𑀤𑀸𑀦𑀺 𑀧𑀦𑁂𑀢𑀸𑀲𑀁 𑁋

𑀓𑀫𑀢𑀸𑀯𑀢𑁆𑀢𑀢𑁄 𑀤𑀝𑁆𑀞𑀩𑁆𑀩𑀸, 𑀧𑀘𑁆𑀘𑀬𑀸𑀦𑀁 𑀯𑀺𑀪𑀸𑀕𑀢𑁄;

𑀥𑀸𑀢𑀽𑀦𑀫𑀺𑀥 𑀯𑀺𑀜𑁆𑀜𑁂𑀬𑁆𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀫𑀢𑁄 𑀢𑀸𑀯 𑀇𑀥𑀸𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀲𑁄 𑀘 𑀧𑀦𑀸𑀬𑀁 𑀳𑁂𑀢𑀼𑀨𑀮𑀸𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀽𑀢𑀺 𑀇𑀤𑀁 𑀳𑀺 𑀤𑁆𑀯𑀬𑀁 𑀳𑁂𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀇𑀤𑀁 𑀨𑀮𑀁. 𑀏𑀯𑀁 𑀲𑀩𑁆𑀩𑀢𑁆𑀣. 𑀅𑀬𑀁 𑀢𑀸𑀯𑁂𑀢𑁆𑀣 𑀓𑀫𑁄.

𑀢𑀸𑀯𑀢𑁆𑀢𑀢𑁄 𑀧𑀦 𑀬𑀸 𑀇𑀥 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀢𑀻𑀳𑀺 𑀙𑀓𑁆𑀓𑁂𑀳𑀺 𑀯𑀼𑀢𑁆𑀢𑀸 𑀥𑀸𑀢𑀼𑀬𑁄 𑀘𑁂𑀯, 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀤𑁂𑀲𑁂𑀲𑀼 ‘‘𑀆𑀪𑀸𑀥𑀸𑀢𑀼…𑀧𑁂… 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀆𑀕𑀢𑀸 𑀘𑀸𑀢𑀺 𑀅𑀜𑁆𑀜𑀸𑀧𑀺 𑀩𑀳𑀼𑀥𑀸𑀢𑀼𑀬𑁄 𑀤𑀺𑀲𑁆𑀲𑀦𑁆𑀢𑀺, 𑀢𑀸𑀲𑀫𑁆𑀧𑀺 𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸𑀢𑀺? 𑀢𑀸𑀲𑀫𑁆𑀧𑀺 𑀢𑀤𑀦𑁆𑀢𑁄𑀕𑀥𑀢𑁆𑀢𑀸.

𑀅𑀧𑀺𑀘 𑀯𑀺𑀚𑀸𑀦𑀦𑀲𑀪𑀸𑀯𑁂 𑀯𑀺𑀜𑁆𑀜𑀸𑀡𑁂 𑀚𑀻𑀯𑀲𑀜𑁆𑀜𑀻𑀦𑀁 𑀢𑀲𑁆𑀲𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀢𑀁, 𑀘𑀓𑁆𑀔𑀼𑀭𑀽𑀧𑀸𑀤𑀺𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀦𑀺𑀘𑁆𑀘𑀢𑀜𑁆𑀘 𑀧𑀓𑀸𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀚𑀻𑀯𑀲𑀜𑁆𑀜𑀸𑀲𑀫𑀽𑀳𑀦𑀦𑀢𑁆𑀣𑀜𑁆𑀘 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀘. 𑀯𑁂𑀦𑁂𑀬𑁆𑀬𑀸 𑀳𑀺 𑀅𑀭𑀽𑀧𑀫𑀽𑀴𑁆𑀳𑁄 𑀭𑀽𑀧𑀫𑀽𑀴𑁆𑀳𑁄 𑀉𑀪𑀬𑀫𑀽𑀴𑁆𑀳𑁄𑀢𑀺 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀢𑁄 𑀅𑀭𑀽𑀧𑀪𑁂𑀤𑀯𑀺𑀪𑀸𑀯𑀺𑀦𑀻 𑀔𑀦𑁆𑀥𑀤𑁂𑀲𑀦𑀸, 𑀭𑀽𑀧𑀪𑁂𑀤𑀯𑀺𑀪𑀸𑀯𑀺𑀦𑀻 𑀆𑀬𑀢𑀦𑀤𑁂𑀲𑀦𑀸, 𑀢𑀤𑀼𑀪𑀬𑀪𑁂𑀤𑀯𑀺𑀪𑀸𑀯𑀺𑀦𑀻 𑀥𑀸𑀢𑀼𑀤𑁂𑀲𑀦𑀸 𑀲𑀧𑁆𑀧𑀸𑀬𑀸𑀢𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀅𑀝𑁆𑀞𑀸𑀭𑀲𑁂𑀯 𑀯𑀼𑀢𑁆𑀢𑀸𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀢𑀣𑀸 𑀢𑀣𑀸 𑀳𑀺,

𑀥𑀫𑁆𑀫𑀁 𑀧𑀓𑀸𑀲𑀬𑀢𑀺 𑀏𑀲 𑀬𑀣𑀸 𑀬𑀣𑀸𑀲𑁆𑀲;

𑀲𑀤𑁆𑀥𑀫𑁆𑀫𑀢𑁂𑀚𑀯𑀺𑀳𑀢𑀁 𑀯𑀺𑀮𑀬𑀁 𑀔𑀡𑁂𑀦,

𑀯𑁂𑀦𑁂𑀬𑁆𑀬𑀲𑀢𑁆𑀢𑀳𑀤𑀬𑁂𑀲𑀼 𑀢𑀫𑁄 𑀧𑀬𑀸𑀢𑀻’’𑀢𑀺. (𑀯𑀺𑀪. 𑀅𑀝𑁆𑀞. 𑁧𑁮𑁩);

𑀅𑀬𑀫𑁂𑀢𑁆𑀣 𑀢𑀸𑀯𑀢𑁆𑀢𑀢𑀸.

𑀤𑀝𑁆𑀞𑀩𑁆𑀩𑀢𑁄 𑀧𑀦𑁂𑀢𑀸 𑀲𑀩𑁆𑀩𑀸𑀧𑀺 𑀲𑀗𑁆𑀔𑀢𑀸 𑀥𑀸𑀢𑀼𑀬𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀺𑀯𑀺𑀢𑁆𑀢𑀢𑁄, 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀲𑀼𑀜𑁆𑀜𑀢𑁄, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀪𑁂𑀭𑀺𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼 𑀤𑀝𑁆𑀞𑀩𑁆𑀩𑀸, 𑀤𑀡𑁆𑀟𑁄 𑀯𑀺𑀬 𑀭𑀽𑀧𑀥𑀸𑀢𑀼, 𑀲𑀤𑁆𑀤𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀣𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀸 𑀬𑀣𑀸𑀓𑁆𑀓𑀫𑀁 𑀆𑀤𑀸𑀲𑀢𑀮𑀫𑀼𑀔𑀫𑀼𑀔𑀦𑀺𑀫𑀺𑀢𑁆𑀢𑀸𑀦𑀺 𑀯𑀺𑀬. 𑀢𑀣𑀸 𑀢𑀺𑀮𑀬𑀦𑁆𑀢𑀘𑀓𑁆𑀓𑀢𑁂𑀮𑀸𑀦𑀺 𑀯𑀺𑀬, 𑀅𑀥𑀭𑀸𑀭𑀡𑀻𑀉𑀢𑁆𑀢𑀭𑀸𑀭𑀡𑀻𑀅𑀕𑁆𑀕𑀻 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸. 𑀏𑀲 𑀦𑀬𑁄 𑀲𑁄𑀢𑀥𑀸𑀢𑀼𑀆𑀤𑀻𑀲𑀼𑀧𑀺. 𑀫𑀦𑁄𑀥𑀸𑀢𑀼 𑀧𑀦 𑀬𑀣𑀸𑀲𑀫𑁆𑀪𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀥𑀫𑁆𑀫𑀥𑀸𑀢𑀼𑀬𑀁 𑀧𑀦 𑀯𑁂𑀤𑀦𑀸 𑀲𑀮𑁆𑀮𑀲𑀽𑀮𑀫𑀺𑀯, 𑀲𑀜𑁆𑀜𑀸 𑀭𑀺𑀢𑁆𑀢𑀫𑀼𑀝𑁆𑀞𑀺 𑀯𑀺𑀬, 𑀲𑀗𑁆𑀔𑀸𑀭𑀸 𑀯𑀺𑀲𑀭𑀼𑀓𑁆𑀔𑀫𑀺𑀯, 𑀲𑀼𑀔𑀼𑀫𑀭𑀽𑀧𑀁 𑀔𑀼𑀭𑀘𑀓𑁆𑀓𑀁 𑀯𑀺𑀬, 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀔𑁂𑀫𑀦𑁆𑀢𑀪𑀽𑀫𑀺 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀫𑀓𑁆𑀓𑀝𑁄 𑀯𑀺𑀬, 𑀅𑀲𑁆𑀲𑀔𑀴𑀼𑀗𑁆𑀓𑁄 𑀯𑀺𑀬, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀢𑁄 𑀯𑁂𑀳𑀸𑀲𑀓𑁆𑀔𑀺𑀢𑁆𑀢𑀤𑀡𑁆𑀟𑁄 𑀯𑀺𑀬, 𑀭𑀗𑁆𑀕𑀦𑀝𑁄 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀤𑀝𑁆𑀞𑀩𑁆𑀩𑀢𑀸.

𑀧𑀘𑁆𑀘𑀬𑀸𑀦𑀁 𑀯𑀺𑀪𑀸𑀕𑀢𑁄 𑀧𑀦𑁂𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘𑀓𑁆𑀔𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀭𑀽𑀧𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀲𑀳𑀚𑀸𑀢𑀧𑀘𑁆𑀘𑀬𑁄. 𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀧𑀦 𑀫𑀦𑁄𑀥𑀸𑀢𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀥𑀫𑁆𑀫𑀥𑀸𑀢𑀼 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀲𑀫𑁆𑀧𑀬𑀼𑀢𑁆𑀢𑀦𑀺𑀲𑁆𑀲𑀬𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄𑀢𑀺 𑀅𑀬𑀁 𑀧𑀘𑁆𑀘𑀬𑀯𑀺𑀪𑀸𑀕𑁄. 𑀏𑀯𑀁 𑀯𑀺𑀜𑁆𑀜𑁂𑀬𑁆𑀬𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀥𑀸𑀢𑀼𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀲𑀘𑁆𑀘𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀏𑀢𑁆𑀣𑀸𑀬𑀁 𑀲𑀘𑁆𑀘-𑀲𑀤𑁆𑀤𑁄 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁨𑁪) 𑀯𑀸𑀘𑀸𑀲𑀘𑁆𑀘𑁂. ‘‘𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁧.𑁪𑁩𑁩) 𑀯𑀺𑀭𑀢𑀺𑀲𑀘𑁆𑀘𑁂. ‘‘𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸, 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁧) 𑀤𑀺𑀝𑁆𑀞𑀺𑀲𑀘𑁆𑀘𑁂. ‘‘𑀏𑀓𑀁 𑀳𑀺 𑀲𑀘𑁆𑀘𑀁, 𑀦 𑀤𑀼𑀢𑀺𑀬𑀫𑀢𑁆𑀣𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁦) 𑀧𑀭𑀫𑀢𑁆𑀣𑀲𑀘𑁆𑀘𑁂, 𑀦𑀺𑀩𑁆𑀩𑀸𑀦𑁂 𑀘𑁂𑀯 𑀫𑀕𑁆𑀕𑁂 𑀘. ‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨𑁧𑁬) 𑀅𑀭𑀺𑀬𑀲𑀘𑁆𑀘𑁂. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀅𑀭𑀺𑀬𑀲𑀘𑁆𑀘𑁂 𑀯𑀢𑁆𑀢𑀢𑀺. 𑀓𑁂𑀦𑀝𑁆𑀞𑁂𑀦 𑀲𑀘𑁆𑀘𑀸𑀦𑀺? 𑀢𑀣𑀝𑁆𑀞𑁂𑀦. 𑀓𑁄𑀬𑀁 𑀢𑀣𑀝𑁆𑀞𑁄 𑀦𑀸𑀫? 𑀬𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀫𑀸𑀦𑀸𑀦𑀁 𑀫𑀸𑀬𑀸𑀯 𑀯𑀺𑀧𑀭𑀻𑀢𑁄, 𑀫𑀭𑀻𑀘𑀻𑀯 𑀯𑀺𑀲𑀁𑀯𑀸𑀤𑀓𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀣𑀸 𑀯𑀺𑀬 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑀪𑀸𑀯𑁄 𑀘 𑀦 𑀳𑁄𑀢𑀺, 𑀅𑀣 𑀔𑁄 𑀩𑀸𑀥𑀦𑀧𑁆𑀧𑀪𑀯𑀲𑀦𑁆𑀢𑀺𑀦𑀺𑀬𑁆𑀬𑀸𑀦𑀪𑀽𑀢𑁂𑀦 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁂𑀦 𑀅𑀭𑀺𑀬𑀜𑀸𑀡𑀲𑁆𑀲 𑀕𑁄𑀘𑀭𑁄 𑀳𑁄𑀢𑀺. 𑀅𑀬𑀁 𑀢𑀣𑀝𑁆𑀞𑁄 𑀲𑀘𑁆𑀘𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀇𑀢𑀺 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲𑀪𑀽𑀢𑀪𑀸𑀯𑀁 𑀘𑀢𑀽𑀲𑀼𑀧𑀺;

𑀤𑀼𑀓𑁆𑀔𑀸𑀤𑀻𑀲𑁆𑀯𑀯𑀺𑀲𑁂𑀲𑁂𑀦, 𑀲𑀘𑁆𑀘𑀝𑁆𑀞𑀁 𑀆𑀳𑀼 𑀧𑀡𑁆𑀟𑀺𑀢𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁧𑁮𑁯; 𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪).

𑀅𑀭𑀺𑀬𑀸𑀦𑀺 𑀘 𑀢𑀸𑀦𑀺 𑀲𑀘𑁆𑀘𑀸𑀦𑀺 𑀘𑀸𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀅𑀭𑀺𑀬𑀸𑀦𑀻𑀢𑀺 𑀉𑀢𑁆𑀢𑀫𑀸𑀦𑀺, 𑀅𑀯𑀺𑀲𑀁𑀯𑀸𑀤𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀭𑀺𑀬𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺, 𑀅𑀭𑀺𑀬𑀲𑁆𑀲 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀓𑀸𑀦𑀺 𑀲𑀘𑁆𑀘𑀸𑀦𑀺 𑀢𑁂𑀦 𑀉𑀧𑁆𑀧𑀸𑀤𑀺𑀢𑀢𑁆𑀢𑀸, 𑀧𑀓𑀸𑀲𑀺𑀢𑀢𑁆𑀢𑀸 𑀘, 𑀅𑀭𑀺𑀬𑀪𑀸𑀯𑀓𑀭𑀸𑀦𑀺 𑀯𑀸 𑀲𑀘𑁆𑀘𑀸𑀦𑀺 𑀢𑁂𑀲𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀤𑀼-𑀇𑀢𑀺 𑀅𑀬𑀁 𑀲𑀤𑁆𑀤𑁄 𑀓𑀼𑀘𑁆𑀙𑀺𑀢𑁂 𑀤𑀺𑀲𑁆𑀲𑀢𑀺. 𑀓𑀼𑀘𑁆𑀙𑀺𑀢𑀁 𑀳𑀺 𑀧𑀼𑀢𑁆𑀢𑀁 ‘‘𑀤𑀼𑀧𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺. 𑀔𑀁-𑀲𑀤𑁆𑀤𑁄 𑀧𑀦 𑀢𑀼𑀘𑁆𑀙𑁂. 𑀢𑀼𑀘𑁆𑀙𑀁 𑀳𑀺 𑀆𑀓𑀸𑀲𑀁 ‘‘𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀧𑀞𑀫𑀲𑀘𑁆𑀘𑀁 𑀓𑀼𑀘𑁆𑀙𑀺𑀢𑀁 𑀅𑀦𑁂𑀓𑁄𑀧𑀤𑁆𑀤𑀯𑀸𑀥𑀺𑀝𑁆𑀞𑀸𑀦𑀢𑁄, 𑀢𑀼𑀘𑁆𑀙𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑀺𑀢𑀢𑁄, 𑀢𑀲𑁆𑀫𑀸 𑀓𑀼𑀘𑁆𑀙𑀺𑀢𑀢𑁆𑀢𑀸, 𑀢𑀼𑀘𑁆𑀙𑀢𑁆𑀢𑀸 𑀘 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀁-𑀇𑀢𑀺 𑀘 𑀅𑀬𑀁 𑀲𑀤𑁆𑀤𑁄 ‘‘𑀲𑀫𑀸𑀕𑀫𑁄, 𑀲𑀫𑁂𑀢’’𑀦𑁆𑀢𑀺𑀆𑀤𑀻𑀲𑀼 𑀲𑀁𑀬𑁄𑀕𑀁 𑀤𑀻𑀧𑁂𑀢𑀺. 𑀉-𑀇𑀢𑀺 𑀅𑀬𑀁 𑀲𑀤𑁆𑀤𑁄 ‘‘𑀉𑀧𑁆𑀧𑀦𑁆𑀦𑀁 𑀉𑀤𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀉𑀧𑁆𑀧𑀢𑁆𑀢𑀺𑀁. 𑀅𑀬-𑀲𑀤𑁆𑀤𑁄 𑀧𑀦 𑀓𑀸𑀭𑀡𑀁 𑀤𑀻𑀧𑁂𑀢𑀺. 𑀇𑀤𑀜𑁆𑀘 𑀤𑀼𑀢𑀺𑀬𑀲𑀘𑁆𑀘𑀁 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀲𑀢𑀺 𑀤𑀼𑀓𑁆𑀔𑀲𑁆𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀦𑁆𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀯𑀼𑀘𑁆𑀘𑀢𑀺.

𑀢𑀢𑀺𑀬𑀲𑀘𑁆𑀘𑀁 𑀧𑀦 𑀬𑀲𑁆𑀫𑀸 𑀦𑀺-𑀲𑀤𑁆𑀤𑁄 𑀅𑀪𑀸𑀯𑀁, 𑀭𑁄𑀥-𑀲𑀤𑁆𑀤𑁄 𑀘𑀸𑀭𑀓𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀪𑀸𑀯𑁄 𑀏𑀢𑁆𑀣, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲 𑀲𑀩𑁆𑀩𑀕𑀢𑀺𑀲𑀼𑀜𑁆𑀜𑀢𑁆𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀘𑀸𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀤𑀼𑀓𑁆𑀔𑀲𑁆𑀲 𑀯𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸. 𑀘𑀢𑀼𑀢𑁆𑀣𑀁 𑀧𑀦 𑀬𑀲𑁆𑀫𑀸 𑀏𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺, 𑀲𑀢𑁆𑀢𑀁 𑀯𑀸 𑀢𑀁 𑀕𑀫𑀬𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀢𑀤𑀪𑀺𑀫𑀼𑀔𑀢𑁆𑀢𑀸, 𑀧𑀝𑀺𑀧𑀤𑀸 𑀘 𑀳𑁄𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸, 𑀢𑀲𑁆𑀫𑀸 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀺𑀘 𑀤𑀼𑀓𑁆𑀔𑀸𑀤𑀻𑀦𑀁 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀺𑀪𑀢𑁆𑀢𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀬𑁂 𑀤𑀼𑀓𑁆𑀔𑀸𑀤𑀻𑀦𑀺 𑀅𑀪𑀺𑀲𑀫𑁂𑀦𑁆𑀢𑁂𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀸. 𑀬𑀣𑀸𑀳 𑁋

‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄 𑀦𑀺𑀤𑀸𑀦𑀝𑁆𑀞𑁄 𑀲𑀁𑀬𑁄𑀕𑀝𑁆𑀞𑁄 𑀧𑀮𑀺𑀩𑁄𑀥𑀝𑁆𑀞𑁄 …𑀧𑁂… 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄 𑀅𑀲𑀗𑁆𑀔𑀢𑀝𑁆𑀞𑁄 𑀅𑀫𑀢𑀝𑁆𑀞𑁄…𑀧𑁂… 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄 𑀳𑁂𑀢𑁆𑀯𑀝𑁆𑀞𑁄 𑀤𑀲𑁆𑀲𑀦𑀝𑁆𑀞𑁄 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄…𑀧𑁂… 𑀅𑀦𑀜𑁆𑀜𑀣𑀸’’𑀢𑀺 (𑀧𑀝𑀺. 𑀫. 𑁨.𑁮).

𑀏𑀯𑀁 𑀯𑀺𑀪𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀤𑀼𑀓𑁆𑀔𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦 𑀢𑀡𑁆𑀳𑀸𑀯𑀚𑁆𑀚𑀺𑀢𑀸 𑀲𑀩𑁆𑀩𑀮𑁄𑀓𑀺𑀬𑀥𑀫𑁆𑀫𑀸, 𑀲𑀁𑀓𑀺𑀮𑁂𑀲𑀺𑀓𑀯𑀚𑁆𑀚𑀺𑀢𑀸 𑀯𑀸 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫, 𑀢𑀡𑁆𑀳𑀸 𑀧𑀦 𑀲𑀩𑁆𑀩𑀸 𑀅𑀓𑀼𑀲𑀮𑀸 𑀯𑀸 𑀮𑁄𑀓𑀺𑀬𑀓𑀼𑀲𑀮𑀸 𑀯𑀸 𑀥𑀫𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁 𑀦𑀸𑀫, 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥𑀲𑀘𑁆𑀘𑀁 𑀦𑀸𑀫, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀅𑀝𑁆𑀞𑀫𑀕𑁆𑀕𑀗𑁆𑀕𑀸𑀦𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀦𑀸𑀫. 𑀇𑀫𑁂𑀳𑀺 𑀧𑀦 𑀫𑀕𑁆𑀕𑀗𑁆𑀕𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑁂𑀯 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑁂𑀢𑁆𑀣 𑀅𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀳𑀺 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀘𑀦𑀢𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑀗𑁆𑀕𑀳𑀺𑀢𑀸𑀦𑀺𑀧𑀺. 𑀬𑀸𑀬 𑀧𑀭𑀺𑀜𑁆𑀜𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀢𑀣𑀢𑁆𑀢𑁂𑀦 𑀦 𑀳𑁄𑀦𑁆𑀢𑀺, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺, 𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀬𑀁 𑀥𑀫𑁆𑀫𑀪𑁂𑀤𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀤𑀼𑀓𑁆𑀔𑀲𑀘𑁆𑀘𑀁 𑀢𑀸𑀯 𑁋

‘‘𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀧𑀺 𑀤𑀼𑀓𑁆𑀔𑀸, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺, 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀯𑀺𑀪. 𑁧𑁯𑁦) 𑁋

𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀪𑀢𑁆𑀢𑀁. 𑀢𑀢𑁆𑀣 𑀤𑀼𑀓𑁆𑀔𑀁 𑀢𑀺𑀯𑀺𑀥𑀁 𑀳𑁄𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀦𑁆𑀢𑀺. 𑀢𑀢𑁆𑀣 𑀤𑀼𑀓𑁆𑀔𑀤𑀼𑀓𑁆𑀔𑀁 𑀤𑀼𑀯𑀺𑀥𑀁 𑀧𑀭𑀺𑀬𑀸𑀬𑀤𑀼𑀓𑁆𑀔𑀁 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀦𑁆𑀢𑀺. 𑀢𑀢𑁆𑀣 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀯𑁂𑀤𑀦𑀸 𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑀁 𑀦𑀸𑀫, 𑀢𑀤𑀯𑀲𑁂𑀲𑀸 𑀧𑀦 𑀤𑀼𑀓𑁆𑀔𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀧𑀭𑀺𑀬𑀸𑀬𑀤𑀼𑀓𑁆𑀔𑀁 𑀦𑀸𑀫. 𑀲𑀼𑀔𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 𑀦𑀸𑀫. 𑀲𑀩𑁆𑀩𑁂 𑀧𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀲𑀩𑁆𑀩𑀲𑀗𑁆𑀔𑀢𑀸 𑀯𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀦𑀸𑀫. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀤𑀼𑀓𑁆𑀔𑀸𑀦𑀁 𑀯𑀲𑁂𑀦 𑀬𑀣𑀸𑀬𑁄𑀕𑀁 𑀢𑀻𑀲𑀼 𑀪𑀯𑁂𑀲𑀼 𑀚𑀸𑀢𑀺𑀆𑀤𑀻𑀦𑀁 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀪𑀯𑀲𑁆𑀫𑀺𑀁 𑀳𑀺 𑀚𑀸𑀢𑀺 𑀢𑀸𑀯 𑀲𑀬𑀁 𑀦 𑀤𑀼𑀓𑁆𑀔𑀸, 𑀅𑀧𑀸𑀬𑀕𑀢𑀺𑀫𑀦𑀼𑀲𑁆𑀲𑀕𑀢𑀺𑀆𑀤𑀻𑀲𑀼 𑀧𑀦 𑀦𑀺𑀭𑀬𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀫𑀽𑀮𑀓𑀁, 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀓𑀸𑀤𑀺𑀫𑀽𑀮𑀓𑀁, 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀤𑀺𑀫𑀽𑀮𑀓𑀜𑁆𑀘 𑀤𑀼𑀓𑁆𑀔𑀁 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑁂𑀦 𑀧𑀭𑀺𑀬𑀸𑀬𑀢𑁄 𑀤𑀼𑀓𑁆𑀔𑀦𑁆𑀢𑀺. 𑀢𑀣𑀸 𑀚𑀭𑀸𑀫𑀭𑀡𑀸𑀤𑀬𑁄𑀧𑀺. 𑀓𑁂𑀯𑀮𑀁 𑀚𑀭𑀸 𑀓𑀸𑀬𑀤𑀼𑀩𑁆𑀩𑀮𑀢𑀸𑀫𑀽𑀮𑀲𑁆𑀲, 𑀧𑀼𑀢𑁆𑀢𑀤𑀸𑀭𑀸𑀤𑀺𑀧𑀭𑀺𑀪𑀯𑀫𑀽𑀮𑀲𑁆𑀲 𑀘, 𑀫𑀭𑀡𑀁 𑀧𑀦 𑀫𑀸𑀭𑀡𑀦𑁆𑀢𑀺𑀓𑀯𑁂𑀤𑀦𑀸𑀪𑀽𑀢𑀲𑁆𑀲, 𑀦𑀺𑀭𑀬𑀸𑀤𑀺𑀕𑀢𑀺𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑀫𑀽𑀮𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄, 𑀲𑁄𑀓𑀸𑀤𑀬𑁄 𑀲𑁄𑀓𑀸𑀤𑀺𑀫𑀽𑀮𑀲𑁆𑀲 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁆𑀢𑀸 𑀘𑁂𑀯 𑀲𑀬𑀁 𑀤𑀼𑀓𑁆𑀔𑀢𑁆𑀢𑀸 𑀘 𑀤𑀼𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀘𑁂𑀲𑀁 𑀧𑀲𑀺𑀤𑁆𑀥𑀸𑀬𑁂𑀯. 𑀏𑀯𑀁 𑀓𑀸𑀫𑀪𑀯𑁂 𑀚𑀸𑀢𑀺𑀆𑀤𑀻𑀦𑀁 𑀢𑀻𑀳𑀺𑀧𑀺 𑀤𑀼𑀓𑁆𑀔𑁂𑀳𑀺 𑀤𑀼𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀧𑀦 𑀬𑀲𑁆𑀫𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦 𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀚𑀸𑀢𑀺𑀆𑀤𑀻𑀦𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀲𑁂𑀦 𑀘 𑀤𑀼𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀤𑀼𑀓𑁆𑀔𑀤𑀼𑀓𑁆𑀔𑀯𑀲𑁂𑀦𑀸𑀢𑀺 𑀅𑀬𑀁 𑀤𑀼𑀓𑁆𑀔𑀲𑀘𑁆𑀘𑁂 𑀦𑀬𑁄.

𑀲𑀫𑀼𑀤𑀬𑀲𑀘𑁆𑀘𑀁 𑀧𑀦 ‘‘𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸’’𑀢𑀺 (𑀯𑀺𑀪. 𑁨𑁦𑁩) 𑀢𑀢𑁆𑀢𑀓𑀫𑁂𑀯 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀲𑀸 𑀔𑁄 𑀧𑀦𑁂𑀲𑀸 𑀢𑀡𑁆𑀳𑀸 𑀓𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀯𑀺𑀪. 𑁨𑁦𑁩) 𑀧𑀼𑀘𑁆𑀙𑀺𑀢𑁆𑀯𑀸 𑀙𑀦𑁆𑀦𑀁 𑀙𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸𑀘𑁂𑀢𑀦𑀸𑀢𑀡𑁆𑀳𑀸𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀺𑀲𑀬𑀪𑀽𑀢𑀸𑀦𑀁 𑀯𑀲𑁂𑀦 𑀢𑀡𑁆𑀳𑀸𑀬 ‘‘𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀢𑁆𑀢𑀺𑀁 𑀧𑀓𑀸𑀲𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀁.

𑀦𑀺𑀭𑁄𑀥𑀲𑀘𑁆𑀘𑀁 𑀧𑀦 ‘‘𑀢𑀲𑁆𑀲𑀸 𑀏𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 (𑀯𑀺𑀪. 𑁨𑁦𑁪) 𑀯𑀢𑁆𑀯𑀸 𑀧𑀼𑀦 ‘‘𑀲𑀸 𑀔𑁄 𑀧𑀦𑁂𑀲𑀸 𑀢𑀡𑁆𑀳𑀸 𑀓𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀯𑀺𑀪. 𑁨𑁦𑁪) 𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑀼𑀤𑀬𑀲𑀘𑁆𑀘𑁂 𑀯𑀼𑀢𑁆𑀢𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀲𑁂𑀦 𑀧𑀝𑀺𑀮𑁄𑀫𑀢𑁄 𑀢𑀡𑁆𑀳𑀸𑀬 𑀦𑀺𑀭𑁄𑀥𑀁 𑀧𑀓𑀸𑀲𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀁. 𑀢𑀢𑁆𑀣 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑀺. 𑀦𑀺𑀩𑁆𑀩𑀸𑀦𑀁 𑀳𑀺 𑀆𑀕𑀫𑁆𑀫 𑀢𑀡𑁆𑀳𑀸 𑀅𑀲𑁂𑀲𑀸 𑀯𑀺𑀭𑀚𑁆𑀚𑀢𑀺, 𑀦𑀺𑀭𑀼𑀚𑁆𑀛𑀢𑀺, 𑀘𑀚𑀻𑀬𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀢𑀺, 𑀫𑀼𑀘𑁆𑀘𑀢𑀺, 𑀦 𑀅𑀮𑁆𑀮𑀻𑀬𑀢𑀺, 𑀢𑀲𑁆𑀫𑀸 ‘‘𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀫𑁂𑀯 𑀳𑀺 𑀦𑀺𑀩𑁆𑀩𑀸𑀦𑀁, 𑀦𑀸𑀫𑀸𑀦𑀺 𑀧𑀦𑀲𑁆𑀲 𑀲𑀩𑁆𑀩𑀲𑀗𑁆𑀔𑀢𑀸𑀦𑀁 𑀦𑀸𑀫𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀦𑁂𑀓𑀸𑀦𑀺 𑀳𑁄𑀦𑁆𑀢𑀺.

𑀦𑀦𑀼 𑀧𑀸𑀝𑁂𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀦𑀁, 𑀢𑁂𑀦𑁂𑀯 𑀘 𑀢𑀸𑀲𑀼 𑀢𑀸𑀲𑀼 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀤𑁂𑀲𑀦𑀸𑀲𑀼 ‘‘𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁩𑁧𑁪) 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀅𑀭𑀳𑀢𑁆𑀢𑀦𑀺𑀩𑁆𑀩𑀸𑀦𑀸𑀦𑀁 𑀏𑀓𑀢𑀸𑀧𑀚𑁆𑀚𑀦𑀢𑁄. 𑀅𑀭𑀳𑀢𑁆𑀢𑀫𑁆𑀧𑀺 𑀳𑀺 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁧𑁪) 𑀭𑀸𑀕𑀸𑀤𑀻𑀦𑀁 𑀧𑀭𑀺𑀓𑁆𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀉𑀧𑀘𑀸𑀭𑁂𑀦 𑀅𑀭𑀳𑀢𑁆𑀢𑀁 𑀭𑀸𑀕𑀓𑁆𑀔𑀬𑀸𑀤𑀺𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀢𑀣𑀸 𑀭𑀸𑀕𑀸𑀤𑀻𑀦𑀁 𑀔𑀬𑀳𑁂𑀢𑀼𑀢𑁆𑀢𑀸 𑀦𑀺𑀩𑁆𑀩𑀸𑀦𑀫𑁆𑀧𑀺 𑀭𑀸𑀕𑀓𑁆𑀔𑀬𑀸𑀤𑀺𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀣𑀸 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀢𑁆𑀢𑀁 𑀆𑀧𑀚𑁆𑀚𑀢𑀺 𑀭𑀸𑀕𑀸𑀤𑀻𑀦𑀁 𑀩𑀳𑀼𑀦𑁆𑀦𑀁 𑀔𑀬𑀲𑁆𑀲𑀸𑀧𑀺 𑀩𑀳𑀼𑀢𑁆𑀢𑀸. 𑀲𑀩𑁆𑀩𑀓𑀺𑀮𑁂𑀲𑀸𑀦𑀫𑁆𑀧𑀺 𑀔𑀬𑀲𑁆𑀲 𑀏𑀓𑀢𑁆𑀢𑁂𑀦 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀆𑀤𑀻𑀦𑀁 𑀔𑀬𑁂 𑀲𑀩𑁆𑀩𑀓𑀺𑀮𑁂𑀲𑀓𑁆𑀔𑀬𑁄 𑀆𑀧𑀚𑁆𑀚𑀢𑀺, 𑀑𑀴𑀸𑀭𑀺𑀓𑀢𑁆𑀢𑀜𑁆𑀘𑀲𑁆𑀲 𑀲𑀺𑀬𑀸 𑀢𑀺𑀭𑀘𑁆𑀙𑀸𑀦𑀸𑀦𑀫𑁆𑀧𑀺 𑀉𑀧𑁆𑀧𑀦𑁆𑀦𑀭𑀸𑀕𑀓𑁆𑀔𑀬𑀲𑁆𑀲 𑀧𑀸𑀓𑀝𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀢𑁄, 𑀕𑁄𑀢𑁆𑀭𑀪𑀽𑀓𑁆𑀔𑀡𑁂𑀧𑀺 𑀘 𑀭𑀸𑀕𑀸𑀤𑀺𑀓𑁆𑀔𑀬𑁄 𑀳𑁄𑀢𑀺 𑀕𑁄𑀢𑁆𑀭𑀪𑀼𑀦𑁄 𑀦𑀺𑀩𑁆𑀩𑀸𑀦𑀯𑀺𑀲𑀬𑀢𑁆𑀢𑀸, 𑀫𑀕𑁆𑀕𑀲𑁆𑀲 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀅𑀧𑁆𑀧𑀲𑀗𑁆𑀕𑁄. 𑀦 𑀳𑀺 𑀅𑀢𑁆𑀢𑀦𑀸 𑀔𑁂𑀧𑀺𑀬𑀫𑀸𑀦𑀓𑀺𑀮𑁂𑀲𑀓𑁆𑀔𑀬𑀫𑀸𑀭𑀩𑁆𑀪 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀪𑀸𑀯𑁄 𑀘𑀲𑁆𑀲 𑀆𑀧𑀚𑁆𑀚𑀢𑀺 𑀭𑀸𑀕𑀸𑀤𑀺𑀓𑁆𑀔𑀬𑀪𑀽𑀢𑀲𑁆𑀲 𑀧𑀦 𑀅𑀪𑀸𑀯𑀲𑁆𑀲 𑀧𑀓𑁆𑀔𑀯𑀲𑁂𑀦 𑀢𑀼𑀘𑁆𑀙𑀭𑀽𑀧𑀢𑁆𑀢𑀸, 𑀢𑀲𑁆𑀲𑀸𑀧𑀺 𑀪𑀸𑀯𑀢𑁆𑀢𑀸𑀪𑀸𑀯𑀸𑀯 𑀯𑀺𑀯𑁂𑀓𑀮𑀓𑁆𑀔𑀡𑀁 𑀦 𑀲𑀺𑀬𑀸, 𑀲𑀗𑁆𑀔𑀢𑀢𑀸 𑀘𑀲𑁆𑀲 𑀲𑀺𑀬𑀸. 𑀦 𑀳𑀺 𑀓𑀤𑀸𑀘𑀺 𑀉𑀧𑀮𑀩𑁆𑀪𑀫𑀸𑀦𑀁 𑀅𑀲𑀗𑁆𑀔𑀢𑀁 𑀪𑀯𑀺𑀢𑀼𑀫𑀭𑀳𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀅𑀳𑁂𑀢𑀼𑀓𑀢𑁆𑀢𑀸𑀧𑀢𑁆𑀢𑀺𑀢𑁄, 𑀲𑀗𑁆𑀔𑀢𑀢𑁆𑀢𑁂𑀧𑀺 𑀘𑀲𑁆𑀲 𑀦 𑀦𑀺𑀩𑁆𑀩𑀸𑀦𑀢𑁆𑀢𑀁 𑀉𑀧𑁆𑀧𑀢𑁆𑀢𑀺𑀚𑀭𑀸𑀪𑀗𑁆𑀕𑀲𑀫𑀗𑁆𑀕𑀺𑀢𑀸𑀬 𑀤𑀼𑀓𑁆𑀔𑀢𑁆𑀢𑀸, 𑀢𑀣𑀸 𑀘 𑀅𑀪𑀸𑀯𑀲𑁆𑀲𑀸𑀧𑀺 𑀅𑀪𑀸𑀯𑁄, 𑀅𑀦𑀯𑀝𑁆𑀞𑀸𑀦𑀜𑁆𑀘 𑀔𑀻𑀡𑀸𑀦𑀫𑁆𑀧𑀺 𑀭𑀸𑀕𑀸𑀤𑀻𑀦𑀁 𑀧𑀼𑀦 𑀉𑀧𑁆𑀧𑀚𑁆𑀚𑀦𑀁 𑀬𑁂𑀲𑀁 𑀢𑁂𑀲𑀫𑁂𑀯 𑀅𑀪𑀸𑀯𑁄 𑀅𑀪𑀸𑀯𑀲𑁆𑀲 𑀯𑀺𑀦𑀝𑁆𑀞𑀢𑁆𑀢𑀸.

𑀅𑀧𑀺𑀘 𑀓𑀸𑀭𑀡𑀦𑁆𑀢𑀭𑁂𑀦 𑀯𑀸 𑀪𑀸𑀯𑁂 𑀉𑀧𑁆𑀧𑀦𑁆𑀦𑁂 𑀭𑀸𑀕𑀸𑀤𑀻𑀦𑀁 𑀦 𑀓𑀸𑀘𑀺 𑀳𑀸𑀦𑀺 𑀳𑁄𑀢𑀺. 𑀦 𑀳𑀺 𑀅𑀜𑁆𑀜𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀁 𑀅𑀜𑁆𑀜𑀁 𑀯𑀺𑀕𑀘𑁆𑀙𑀢𑀺. 𑀅𑀪𑀸𑀯𑁄 𑀪𑀸𑀯𑀲𑁆𑀲 𑀯𑀺𑀭𑁄𑀥𑀺, 𑀯𑀺𑀭𑁄𑀥𑀺𑀲𑀦𑁆𑀦𑀺𑀥𑀸𑀦𑁂 𑀘 𑀇𑀢𑀭𑀁 𑀯𑀺𑀕𑀘𑁆𑀙𑀢𑀻𑀢𑀺 𑀘𑁂? 𑀓𑀺𑀫𑀺𑀤𑀁 𑀯𑀺𑀕𑀫𑀦𑀁 𑀦𑀸𑀫. 𑀬𑀤𑀺 𑀢𑀫𑁆𑀧𑀺 𑀪𑀸𑀯𑀭𑀽𑀧𑀁, 𑀲𑀫𑀸𑀦𑀤𑁄𑀲𑀢𑀸 𑀘𑀲𑁆𑀲 𑀲𑀺𑀬𑀸 𑀅𑀦𑀯𑀝𑁆𑀞𑀸𑀦𑀜𑁆𑀘, 𑀦 𑀘 𑀅𑀢𑁆𑀣𑀲𑀺𑀤𑁆𑀥𑀺. 𑀬𑀤𑀺 𑀢𑀼𑀘𑁆𑀙𑀭𑀽𑀧𑀁, 𑀓𑀺𑀁 𑀧𑀞𑀫𑀫𑁂𑀯𑀲𑁆𑀲 𑀢𑀼𑀘𑁆𑀙𑀭𑀽𑀧𑀢𑀸𑀬 𑀉𑀧𑀕𑀢𑀸𑀬 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀲𑀺𑀤𑁆𑀥𑀸, 𑀭𑀸𑀕𑀸𑀤𑀺𑀓𑁆𑀔𑀬𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀢𑀼𑀘𑁆𑀙𑀭𑀽𑀧𑀢𑀸𑀬 𑀅𑀪𑀸𑀯𑁄, 𑀦 𑀘 𑀅𑀪𑀸𑀯𑁄 𑀏𑀯 𑀦𑀺𑀩𑁆𑀩𑀸𑀦𑀁. 𑀅𑀢𑀻𑀢𑀸𑀦𑀸𑀕𑀢𑀤𑁄𑀲𑀸𑀦𑀫𑀪𑀸𑀯𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀯𑀢𑁆𑀢𑀫𑀸𑀦𑀸𑀦𑀜𑁆𑀘 𑀅𑀪𑀸𑀯𑁄 𑀦𑀸𑀫. 𑀅𑀪𑀸𑀯𑁄 𑀦𑀸𑀫 𑀦 𑀓𑀺𑀮𑁂𑀲𑀯𑀺𑀕𑀫𑀫𑀢𑁆𑀢𑁄, 𑀅𑀧𑀺 𑀢𑀼 𑀅𑀦𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦. 𑀅𑀘𑁆𑀘𑀦𑁆𑀢𑀯𑀺𑀕𑀫𑁄 𑀦𑀺𑀩𑁆𑀩𑀸𑀦𑁂𑀦𑀸𑀧𑀺 𑀲𑀫𑁆𑀧𑀸𑀤𑀻𑀬𑀢𑀻𑀢𑀺 𑀘𑁂? 𑀦, 𑀢𑀲𑁆𑀲 𑀓𑀸𑀭𑀡𑀪𑀸𑀯𑀸. 𑀯𑀺𑀧𑀲𑁆𑀲𑀦𑀸 𑀓𑀸𑀭𑀡𑀫𑀺𑀢𑀺 𑀘𑁂? 𑀦, 𑀅𑀢𑁆𑀢𑀸𑀤𑀺𑀯𑀺𑀓𑀧𑁆𑀧𑀚𑀦𑀓𑀲𑀗𑁆𑀔𑀢𑀥𑀫𑁆𑀫𑀤𑀲𑁆𑀲𑀦𑁂𑀦 𑀯𑀺𑀦𑀸 𑀅𑀦𑀢𑁆𑀢𑀸𑀤𑀺𑀯𑀺𑀓𑀧𑁆𑀧𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀬𑀤𑀺 𑀳𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀸𑀬 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀯𑀺𑀫𑀼𑀢𑁆𑀢𑀸 𑀏𑀯 𑀲𑀺𑀬𑀼𑀁, 𑀦𑁄 𑀘 𑀓𑀤𑀸𑀘𑀺 𑀦 𑀧𑀼𑀘𑁆𑀙𑁂𑀬𑁆𑀬 𑀯𑀺𑀭𑀼𑀤𑁆𑀥𑀥𑀫𑁆𑀫𑀤𑀲𑁆𑀲𑀦𑀸𑀪𑀸𑀯𑀸. 𑀦 𑀳𑀺 𑀤𑀲𑁆𑀲𑀦𑀁 𑀯𑀺𑀦𑀸 𑀯𑀺𑀓𑀧𑁆𑀧𑁄 𑀲𑀫𑁆𑀪𑀯𑀢𑀺, 𑀦 𑀘 𑀅𑀢𑁆𑀢𑀸𑀢𑀺 𑀯𑀺𑀓𑀧𑁆𑀧𑀚𑀦𑀓𑀭𑀽𑀧𑀸𑀤𑀺𑀤𑀲𑁆𑀲𑀦𑀫𑁂𑀯 𑀢𑀩𑁆𑀩𑀺𑀭𑀼𑀤𑁆𑀥𑀯𑀺𑀓𑀧𑁆𑀧𑀚𑀦𑀓𑀁 𑀳𑁄𑀢𑀺. 𑀩𑀼𑀤𑁆𑀥𑀸𑀦𑀜𑁆𑀘 𑀧𑀭𑀫𑁆𑀧𑀭𑁄𑀧𑀤𑁂𑀲𑁂𑀦 𑀭𑀽𑀧𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀯𑀺𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀢𑁂𑀲𑀫𑁆𑀧𑀺 𑀯𑀺𑀭𑀼𑀤𑁆𑀥𑀤𑀲𑁆𑀲𑀦𑀸𑀪𑀸𑀯𑁂𑀦 𑀯𑀺𑀧𑀲𑁆𑀲𑀦𑀸𑀯𑀺𑀓𑀧𑁆𑀧𑀸𑀦𑀼𑀧𑁆𑀧𑀢𑁆𑀢𑀺𑀢𑁄. 𑀦 𑀳𑀺 𑀬𑀸𑀤𑀺𑀲𑀸𑀬 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸 𑀬𑀸𑀤𑀺𑀲𑀁 𑀓𑀸𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑀸𑀬 𑀏𑀯 𑀢𑀩𑁆𑀩𑀺𑀭𑀼𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺 𑀅𑀳𑁂𑀢𑀼𑀓𑀢𑁆𑀢𑀧𑁆𑀧𑀲𑀗𑁆𑀕𑀢𑁄. 𑀦 𑀘 𑀯𑀺𑀭𑀼𑀤𑁆𑀥𑀤𑀲𑁆𑀲𑀦𑀸𑀪𑀸𑀯𑁂𑀦 𑀏𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀯𑀺𑀓𑀧𑁆𑀧𑀚𑀦𑀓𑀲𑀸𑀫𑀢𑁆𑀣𑀺𑀬𑀸𑀪𑀸𑀯𑀢𑁄 𑀢𑀸𑀤𑀺𑀲𑀸𑀦𑀁 𑀧𑀭𑀫𑁆𑀧𑀭𑀸𑀬𑀧𑀺 𑀢𑀩𑁆𑀪𑀸𑀯𑁄, 𑀢𑀤𑀼𑀧𑀤𑁂𑀲𑁄 𑀘 𑀲𑀫𑁆𑀪𑀯𑀢𑀺. 𑀢𑀺𑀮𑀓𑁆𑀔𑀡𑀽𑀧𑀤𑁂𑀲𑀦𑀸𑀦𑀦𑁆𑀢𑀭𑀺𑀓𑀢𑀸𑀬 𑀧𑀦 𑀩𑀼𑀤𑁆𑀥𑀸𑀦𑀁 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸 𑀲𑀺𑀤𑁆𑀥𑀺, 𑀢𑁂𑀦𑁂𑀯𑀲𑁆𑀲 𑀓𑀺𑀮𑁂𑀲𑀸𑀦𑀫𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀲𑁆𑀲, 𑀯𑀺𑀧𑀲𑁆𑀲𑀦𑁄𑀧𑀤𑁂𑀲𑀲𑀸𑀫𑀢𑁆𑀣𑀺𑀬𑀲𑁆𑀲 𑀘 𑀲𑀺𑀤𑁆𑀥𑀻𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀢𑀤𑀼𑀪𑀬𑀓𑀸𑀭𑀡𑀁, 𑀦𑀸𑀜𑁆𑀜𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑁂𑀦 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁, 𑀢𑀺𑀮𑀓𑁆𑀔𑀡𑀜𑁆𑀘 𑀳𑁄𑀢𑀺. 𑀦 𑀳𑀺 𑀅𑀜𑁆𑀜𑀲𑁆𑀲 𑀤𑀲𑁆𑀲𑀦𑁂𑀦 𑀇𑀢𑀭𑀭𑀸𑀕𑀧𑁆𑀧𑀳𑀸𑀦𑀁, 𑀢𑀺𑀮𑀓𑁆𑀔𑀡𑀜𑀸𑀡𑀜𑁆𑀘 𑀬𑀼𑀢𑁆𑀢𑀦𑁆𑀢𑀺? 𑀦, 𑀅𑀲𑀗𑁆𑀔𑀢𑀤𑀲𑁆𑀲𑀦𑁂𑀦 𑀲𑀗𑁆𑀔𑀢𑀲𑁆𑀲 𑀯𑀸 𑀤𑁄𑀲𑀲𑁆𑀲 𑀯𑀸 𑀧𑀸𑀓𑀝𑀢𑁆𑀢𑀸. 𑀤𑀺𑀝𑁆𑀞𑀅𑀘𑁆𑀘𑀦𑁆𑀢𑀲𑀼𑀔𑀸𑀦𑀁 𑀳𑀺 𑀯𑀝𑁆𑀝𑀲𑀼𑀔𑁂, 𑀢𑀦𑁆𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀤𑀻𑀲𑀼 𑀘 𑀲𑀼𑀔𑀸𑀪𑀺𑀫𑀸𑀦𑁄, 𑀯𑀝𑁆𑀝𑀸𑀪𑀺𑀭𑀢𑀺 𑀘 𑀧𑀳𑀻𑀬𑀢𑀺 𑀤𑀺𑀝𑁆𑀞𑀧𑀭𑀢𑀻𑀭𑀲𑁆𑀲 𑀦𑀸𑀯𑀺𑀓𑀲𑁆𑀲 𑀦𑀸𑀯𑀸𑀬𑁂𑀓𑀤𑁂𑀲𑁂 𑀲𑀼𑀔𑀸𑀪𑀺𑀫𑀸𑀦𑀸𑀪𑀺𑀭𑀢𑀺𑀬𑁄 𑀯𑀺𑀬. 𑀅𑀧𑀺𑀘 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀅𑀮𑁆𑀮𑀺𑀦𑀸 𑀭𑀸𑀕𑀸𑀤𑀬𑁄 𑀅𑀲𑀗𑁆𑀔𑀢𑀥𑀫𑁆𑀫𑁂 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀯𑀺𑀬 𑀫𑀓𑁆𑀔𑀺𑀓𑀸, 𑀣𑀮𑁂 𑀯𑀺𑀬 𑀘 𑀚𑀮𑀘𑀭𑀸, 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑁂𑀦 𑀧𑀳𑀻𑀦𑀤𑁄𑀲𑀲𑁆𑀲 𑀘𑀺𑀢𑁆𑀢𑀲𑁆𑀲 𑀬𑀸𑀣𑀸𑀯𑀢𑁄 𑀢𑁂𑀲𑀼 𑀲𑀗𑁆𑀔𑀢𑁂𑀲𑀼 𑀢𑀺𑀮𑀓𑁆𑀔𑀡𑀤𑀲𑁆𑀲𑀦𑀁 𑀲𑀫𑁆𑀪𑀯𑀢𑀺 𑀪𑁂𑀲𑀚𑁆𑀚𑀸𑀮𑁂𑀧𑁂𑀦 𑀯𑀺𑀳𑀢𑀓𑀸𑀘𑀢𑀺𑀫𑀺𑀭𑀸𑀤𑀺𑀤𑁄𑀲𑀲𑁆𑀲 𑀘𑀓𑁆𑀔𑀼𑀦𑁄 𑀖𑀝𑀸𑀤𑀺𑀭𑀽𑀧𑀤𑀲𑁆𑀲𑀦𑀁 𑀯𑀺𑀬, 𑀤𑀺𑀝𑁆𑀞𑀤𑁄𑀲𑁂𑀲𑀼 𑀘𑀲𑁆𑀲 𑀲𑀗𑁆𑀔𑀸𑀭𑁂𑀲𑀼 𑀦 𑀧𑀼𑀦 𑀭𑀸𑀕𑀸𑀤𑀻𑀦𑀫𑀼𑀧𑁆𑀧𑀢𑁆𑀢𑀺 𑀜𑀸𑀢𑀸 𑀲𑀼𑀘𑀺𑀪𑀸𑀯𑁂 𑀯𑀺𑀬 𑀯𑀘𑁆𑀘𑀓𑀽𑀧𑁂𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦 𑀓𑁂𑀲𑀜𑁆𑀘𑀺 𑀲𑀢𑁆𑀢𑀸𑀦𑀁 𑀏𑀯 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑁆𑀪𑀯𑁄, 𑀦 𑀲𑀩𑁆𑀩𑁂𑀲𑀦𑁆𑀢𑀺? 𑀅𑀦𑀸𑀤𑀺𑀩𑀼𑀤𑁆𑀥𑀧𑀭𑀫𑁆𑀧𑀭𑁄𑀧𑀤𑁂𑀲𑀲𑀸𑀧𑁂𑀓𑁆𑀔𑀢𑁆𑀢𑀸, 𑀢𑁂𑀲𑀜𑁆𑀘 𑀉𑀧𑀤𑁂𑀲𑀓𑀸𑀦𑀁 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀅𑀪𑀸𑀯𑀢𑁄, 𑀲𑁄𑀢𑀽𑀦𑀜𑁆𑀘 𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀘𑁆𑀘𑀦𑁆𑀢𑀤𑀼𑀮𑁆𑀮𑀪𑀢𑁆𑀢𑀸, 𑀘𑀓𑁆𑀓𑀯𑀸𑀴𑀸𑀦𑀜𑁆𑀘 𑀅𑀦𑀦𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀓𑁂𑀘𑀺 𑀏𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂 𑀢𑀺𑀮𑀓𑁆𑀔𑀡𑁄𑀧𑀤𑁂𑀲𑀮𑀸𑀪𑁂𑀦 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀦 𑀲𑀩𑁆𑀩𑁂𑀢𑀺 𑀕𑀳𑁂𑀢𑀩𑁆𑀩𑀁.

𑀓𑀣𑀁 𑀧𑀦𑁂𑀢𑁆𑀣 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀯𑀺𑀕𑀫𑁄 𑀦𑀺𑀩𑁆𑀩𑀸𑀦𑁂𑀦 𑀲𑀸𑀥𑀻𑀬𑀢𑀻𑀢𑀺? 𑀦 𑀢𑀸𑀯 𑀲𑁄, 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀢𑁂𑀲𑀫𑀺𑀤𑀸𑀦𑀺 𑀅𑀪𑀸𑀯𑀸, 𑀧𑀼𑀩𑁆𑀩𑁂 𑀘 𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀯𑀢𑁆𑀢𑀫𑀸𑀦𑀸𑀦𑀁 𑀲𑀭𑀲𑀦𑀺𑀭𑁄𑀥𑀢𑁄. 𑀓𑀣𑀜𑁆𑀘𑀲𑁆𑀲 𑀢𑀼𑀘𑁆𑀙𑀭𑀽𑀧𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀳𑁂𑀢𑀼𑀢𑁆𑀢𑁂 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀦𑀫𑀯𑀲𑀭𑁄𑀢𑀺 𑀘𑁂? 𑀦, 𑀢𑀲𑁆𑀲 𑀪𑀸𑀯𑀭𑀽𑀧𑀢𑁆𑀢𑀸. 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀬𑀸 𑀳𑀺 𑀦𑀺𑀩𑁆𑀩𑀸𑀦𑀫𑀸𑀭𑀩𑁆𑀪 𑀅𑀦𑀼𑀲𑀬𑀸𑀚𑀦𑀦𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀫𑀕𑁆𑀕𑀸 𑀏𑀯 𑀓𑀺𑀮𑁂𑀲𑀸𑀦𑀫𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀢𑀤𑀼𑀧𑁆𑀧𑀢𑁆𑀢𑀺𑀬𑀸 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀅𑀕𑁆𑀕𑀺𑀲𑀦𑁆𑀦𑀺𑀥𑀸𑀦𑁂 𑀅𑀗𑁆𑀓𑀼𑀭𑀸𑀚𑀦𑀓𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀲𑀸𑀮𑀺𑀓𑁆𑀔𑀦𑁆𑀥𑀲𑁆𑀲 𑀩𑀻𑀚𑀢𑀸𑀪𑀸𑀯𑀭𑀽𑀧𑀢𑀸 𑀯𑀺𑀬. 𑀦 𑀳𑀺 𑀅𑀪𑀸𑀯𑁄 𑀦𑀸𑀫 𑀓𑁄𑀘𑀺 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺, 𑀬𑁄 𑀓𑀸𑀭𑀡𑁂𑀦 𑀚𑀦𑀻𑀬𑀢𑀺 𑀢𑀩𑁆𑀩𑀺𑀭𑀼𑀤𑁆𑀥𑀓𑁆𑀔𑀡𑀼𑀧𑁆𑀧𑀸𑀤𑀦𑀪𑀸𑀯𑁄𑀯𑀼𑀧𑁆𑀧𑀸𑀤𑀦𑀁 𑀅𑀦𑁂𑀓𑀓𑁆𑀔𑀡𑀼𑀧𑁆𑀧𑀸𑀤𑀦𑁂𑀦 𑀔𑀦𑁆𑀥𑀓𑀸𑀭𑀸𑀪𑀸𑀯𑀼𑀧𑁆𑀧𑀸𑀤𑀦𑀁 𑀯𑀺𑀬, 𑀢𑀲𑁆𑀫𑀸 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸 𑀉𑀧𑀦𑀺𑀲𑁆𑀲𑀬𑁄𑀧𑀘𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 ‘‘𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁. 𑀲𑀭𑀽𑀧𑁂𑀦𑁂𑀯 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀪𑀺𑀲𑀼𑀔𑀼𑀫𑀢𑁆𑀢𑀸, 𑀅𑀦𑀼𑀧𑀮𑀤𑁆𑀥𑀧𑀼𑀩𑁆𑀩𑀢𑁆𑀢𑀸 𑀘, 𑀲𑀼𑀔𑀼𑀫𑀢𑀸 𑀘𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀯𑀘𑀦𑀢𑁄, 𑀅𑀭𑀺𑀬𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑀩𑁆𑀩𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀧𑀦 𑀧𑀭𑀯𑀸𑀤𑀻 𑀆𑀳 𑁋 ‘‘𑀦𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄’’𑀢𑀺. 𑀦 𑀅𑀦𑀼𑀧𑀮𑀩𑁆𑀪𑀦𑀻𑀬𑀁 𑀢𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀉𑀧𑀮𑀩𑁆𑀪𑀢𑀺 𑀳𑀺 𑀢𑀁 𑀢𑀤𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀬𑀸 𑀅𑀭𑀺𑀬𑁂𑀳𑀺. 𑀅𑀧𑀺𑀘 𑀦𑀺𑀩𑁆𑀩𑀸𑀦𑀁 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀺𑀭𑀼𑀤𑁆𑀥𑀥𑀫𑁆𑀫𑀸𑀦𑀁 𑀪𑀸𑀯𑁂𑀦 𑀅𑀧𑀯𑀕𑁆𑀕𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀦 𑀘 𑀢𑀁 𑀬𑀼𑀢𑁆𑀢𑀁 𑀉𑀡𑁆𑀳𑀸𑀤𑀺𑀧𑀝𑀺𑀧𑀓𑁆𑀔𑀲𑁆𑀲 𑀲𑀻𑀢𑀸𑀤𑀺𑀦𑁄 𑀯𑀺𑀬 𑀪𑀯𑀧𑀝𑀺𑀧𑀓𑁆𑀔𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀅𑀯𑀲𑁆𑀲𑀁𑀪𑀸𑀯𑀸. 𑀯𑀼𑀢𑁆𑀢𑀜𑁆𑀘 𑁋

‘‘𑀬𑀣𑀸𑀧𑀺 𑀉𑀡𑁆𑀳𑁂 𑀯𑀺𑀚𑁆𑀚𑀦𑁆𑀢𑁂, 𑀅𑀧𑀭𑀁 𑀯𑀺𑀚𑁆𑀚𑀢𑀺 𑀲𑀻𑀢𑀮𑀁;

𑀏𑀯𑀁 𑀢𑀺𑀯𑀺𑀥𑀕𑁆𑀕𑀺 𑀯𑀺𑀚𑁆𑀚𑀦𑁆𑀢𑁂, 𑀦𑀺𑀩𑁆𑀩𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀓’’𑀦𑁆𑀢𑀺. (𑀩𑀼. 𑀯𑀁. 𑁨.𑁧𑁧) 𑁋

𑀆𑀤𑀺. 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑀳𑁂𑀢𑀼𑀦𑁄 𑀯𑀺𑀧𑀲𑁆𑀲𑀦𑁄𑀧𑀤𑁂𑀲𑀲𑁆𑀲 𑀤𑀲𑁆𑀲𑀦𑀢𑁄 𑀘 𑀅𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑀁 𑀢𑀁 𑀯𑀺𑀦𑀸 𑀢𑀲𑁆𑀲𑀸𑀲𑀫𑁆𑀪𑀯𑀢𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀤𑁂𑀢𑀁 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄 𑀅𑀧𑁆𑀧𑀪𑀯𑀁, 𑀢𑀢𑁄𑀯 𑀅𑀚𑀭𑀸𑀫𑀭𑀡𑀁, 𑀦𑀺𑀘𑁆𑀘𑀜𑁆𑀘 𑀳𑁄𑀢𑀻𑀢𑀺 𑀅𑀡𑀼𑀆𑀤𑀻𑀦𑀫𑁆𑀧𑀺 𑀦𑀺𑀘𑁆𑀘𑀪𑀸𑀯𑀧𑀢𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀺𑀘𑁆𑀘𑀢𑁆𑀢𑀸𑀢𑀺 𑀘𑁂? 𑀦, 𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑁆𑀢𑁂𑀦 𑀳𑁂𑀢𑀼𑀮𑀓𑁆𑀔𑀡𑀲𑁆𑀲𑀸𑀦𑀼𑀧𑀧𑀢𑁆𑀢𑀺𑀢𑁄. 𑀅𑀡𑀼𑀆𑀤𑀻𑀦𑀫𑁆𑀧𑀺 𑀅𑀲𑀗𑁆𑀔𑀢𑀢𑀸 𑀇𑀢𑀺 𑀘𑁂? 𑀦, 𑀅𑀲𑀗𑁆𑀔𑀢𑀢𑀸𑀲𑀺𑀤𑁆𑀥𑀺𑀢𑁄 𑀅𑀲𑀗𑁆𑀔𑀢𑀸𑀦𑀜𑁆𑀘𑀸𑀦𑁂𑀓𑀢𑁆𑀢𑀸𑀦𑀼𑀧𑀧𑀢𑁆𑀢𑀺𑀢𑁄. 𑀬𑀤𑀺 𑀳𑀺 𑀅𑀲𑀗𑁆𑀔𑀢𑀁 𑀦𑀸𑀫 𑀪𑀯𑁂𑀬𑁆𑀬, 𑀏𑀓𑁂𑀦𑁂𑀯 𑀪𑀯𑀺𑀢𑀩𑁆𑀩𑀁 𑀤𑁂𑀲𑀓𑀸𑀮𑀲𑀪𑀸𑀯𑀪𑁂𑀤𑀲𑁆𑀲 𑀓𑀸𑀭𑀡𑀪𑁂𑀤𑀓𑀢𑁆𑀢𑀸, 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀅𑀳𑁂𑀢𑀼𑀓𑀢𑁆𑀢𑁂 𑀅𑀢𑀺𑀧𑁆𑀧𑀲𑀗𑁆𑀕𑀢𑁄.

𑀲𑀗𑁆𑀔𑀢𑁂𑀳𑀺 𑀲𑀪𑀸𑀯𑀪𑀺𑀦𑁆𑀦𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀓𑀣𑀁 𑀅𑀳𑁂𑀢𑀼𑀓𑀢𑀸𑀢𑀺 𑀘𑁂? 𑀅𑀲𑀗𑁆𑀔𑀢𑀲𑀪𑀸𑀯𑁂𑀦 𑀲𑀗𑁆𑀔𑀢𑀲𑀪𑀸𑀯𑁂𑀳𑀺 𑀪𑀺𑀦𑁆𑀦𑀲𑁆𑀲 𑀓𑀸𑀭𑀡𑀸𑀦𑀧𑁂𑀓𑁆𑀔𑀢𑁆𑀢𑀸. 𑀅𑀲𑀗𑁆𑀔𑀢𑀢𑁆𑀢𑁂 𑀳𑀺 𑀲𑀫𑀸𑀦𑁂 𑀪𑀯𑀲𑀪𑀸𑀯𑀪𑁂𑀤𑁄 𑀓𑀸𑀭𑀡𑀪𑁂𑀤𑀁 𑀲𑀽𑀘𑀬𑀢𑀺, 𑀢𑀲𑁆𑀫𑀸 𑀏𑀓𑀫𑁂𑀯 𑀦𑀺𑀘𑁆𑀘𑀁 𑀪𑀯𑀺𑀢𑀼𑀫𑀭𑀳𑀢𑀺, 𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀢𑁄, 𑀲𑀩𑁆𑀩𑀜𑁆𑀜𑀼𑀯𑀘𑀦𑀢𑁄 𑀘 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀁 𑀦𑀺𑀩𑁆𑀩𑀸𑀦𑀫𑁂𑀯. 𑀯𑀼𑀢𑁆𑀢𑀁 𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 (𑀇𑀢𑀺𑀯𑀼. 𑁪𑁩). 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀲𑀘𑁆𑀘𑁂 𑀦𑀬𑁄.

𑀇𑀢𑀭𑀁 𑀧𑀦 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀁. 𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣 𑀫𑀕𑁆𑀕𑀗𑁆𑀕𑀯𑀺𑀪𑀗𑁆𑀕𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀬𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑁋

‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀤𑀼𑀓𑁆𑀔𑀦𑀺𑀭𑁄𑀥𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀢𑀢𑁆𑀣 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀅𑀯𑀲𑁂𑀲𑀸 𑀲𑀸𑀲𑀯𑀥𑀫𑁆𑀫𑀸…𑀧𑁂… 𑀤𑀼𑀓𑁆𑀔𑀁. 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 (𑀯𑀺𑀪. 𑁨𑁦𑁬) 𑁋

𑀯𑀢𑁆𑀯𑀸 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 ‘‘𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 (𑀯𑀺𑀪. 𑁨𑁦𑁬 𑀆𑀤𑀬𑁄) 𑀏𑀯𑀁 𑀧𑀞𑀫𑀯𑀸𑀭𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀼𑀦 𑀅𑀧𑀭𑁂𑀳𑀺𑀧𑀺 ‘‘𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸 𑀲𑀫𑀼𑀤𑀬𑁄, 𑀢𑀣𑀸 𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀲𑀫𑀼𑀤𑀬𑁄, 𑀢𑀣𑀸 𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺, 𑀲𑀸𑀲𑀯𑀸𑀦𑀺 𑀲𑀫𑀼𑀤𑀬𑁄, 𑀢𑀣𑀸 𑀢𑀡𑁆𑀳𑀸, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺, 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀓𑀼𑀲𑀮𑀥𑀫𑁆𑀫𑀸 𑀲𑀫𑀼𑀤𑀬𑁄. 𑀅𑀯𑀲𑁂𑀲𑀸 𑀲𑀸𑀲𑀯𑀥𑀫𑁆𑀫𑀸 𑀤𑀼𑀓𑁆𑀔𑀁, 𑀢𑀲𑁆𑀲 𑀢𑀲𑁆𑀲 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀁 𑀦𑀺𑀭𑁄𑀥𑁄, 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀧𑀝𑀺𑀧𑀤𑀸’’𑀢𑀺 𑀇𑀫𑁂𑀳𑀺 𑀯𑀸𑀭𑁂𑀳𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀢𑁆𑀣 ‘‘𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀦𑀺𑀧𑁆𑀧𑀤𑁂𑀲𑀢𑁄 𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀲𑀫𑀼𑀤𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁆𑀘𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀲𑀘𑁆𑀘𑁂𑀲𑀼 𑀳𑀺 𑀢𑀡𑁆𑀳𑀸𑀯 𑀲𑀫𑀼𑀤𑀬𑁄, 𑀦 𑀇𑀢𑀭𑁂. 𑀦 𑀘 𑀓𑁂𑀯𑀮𑀁 𑀢𑀡𑁆𑀳𑀸𑀯 𑀤𑀼𑀓𑁆𑀔𑀁 𑀲𑀫𑀼𑀤𑀸𑀦𑁂𑀢𑀺, 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀧𑀺 𑀧𑀘𑁆𑀘𑀬𑀁 𑀲𑀫𑀼𑀤𑀸𑀦𑁂𑀦𑁆𑀢𑀺𑀬𑁂𑀯𑀸𑀢𑀺 𑀢𑁂𑀧𑀺 𑀲𑀫𑀼𑀤𑀬𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁆𑀘𑀸𑀦𑀺’’𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀬𑀲𑁆𑀫𑀸 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀯 𑀧𑀝𑀺𑀧𑀤𑀸𑀢𑀺. 𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀨𑀲𑁆𑀲𑀸𑀤𑀬𑁄 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀧𑀝𑀺𑀧𑀤𑀸 𑀏𑀯, 𑀢𑀲𑁆𑀫𑀸 𑀢𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁂𑀧𑀺 𑀲𑀩𑁆𑀩𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀏𑀢𑁆𑀣 𑀳𑀺 𑀅𑀭𑀺𑀬𑀥𑀦𑀸𑀦𑁂𑀯 𑀲𑀗𑁆𑀕𑀳𑀺𑀢𑀸𑀦𑀺. 𑀲𑁂𑀲𑀁 𑀲𑀤𑀺𑀲𑀫𑁂𑀯𑀸𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁄.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂 𑀧𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸? 𑀲𑀫𑀼𑀤𑀬𑀲𑀘𑁆𑀘𑀁 𑀅𑀓𑀼𑀲𑀮𑀁, 𑀦𑀺𑀭𑁄𑀥𑀲𑀘𑁆𑀘𑀁 𑀅𑀩𑁆𑀬𑀸𑀓𑀢𑀁, 𑀤𑀼𑀓𑁆𑀔𑀲𑀘𑁆𑀘𑀁 𑀢𑀺𑀥𑀸𑀧𑀺. 𑀲𑀫𑀼𑀤𑀬𑁄 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄, 𑀦𑀺𑀭𑁄𑀥𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄, 𑀫𑀕𑁆𑀕𑁄 𑀢𑀺𑀥𑀸𑀧𑀺, 𑀤𑀼𑀓𑁆𑀔𑀁 𑀢𑀺𑀥𑀸𑀧𑀺, 𑀦 𑀯𑀢𑁆𑀢𑀩𑁆𑀩𑀁 𑀘. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀦𑀺, 𑀤𑀼𑀓𑁆𑀔𑀁 𑀢𑀺𑀥𑀸𑀧𑀺. 𑀲𑀫𑀼𑀤𑀬𑁄 𑀳𑁂𑀢𑀼, 𑀦𑀺𑀭𑁄𑀥𑁄 𑀦 𑀳𑁂𑀢𑀼, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺. 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀮𑁄𑀓𑀺𑀬𑀸𑀦𑀺, 𑀫𑀕𑁆𑀕𑀦𑀺𑀭𑁄𑀥𑀸 𑀮𑁄𑀓𑀼𑀢𑁆𑀢𑀭𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀭𑀡𑀁, 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀅𑀭𑀡𑀸𑀦𑀺, 𑀤𑀼𑀓𑁆𑀔𑀁 𑀤𑀼𑀯𑀺𑀥𑀸𑀧𑀺. 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄. 𑀇𑀤𑀸𑀦𑀺 𑀧𑀦𑁂𑀢𑁆𑀣 𑁋

𑀓𑀫𑀢𑁄𑀦𑀽𑀦𑀸𑀥𑀺𑀓𑀢𑁄, 𑀮𑀓𑁆𑀔𑀡𑀸𑀤𑀻𑀳𑀺 𑀲𑀼𑀜𑁆𑀜𑀢𑁄;

𑀜𑀸𑀡𑀓𑀺𑀘𑁆𑀘𑁄𑀧𑀫𑀸 𑀜𑁂𑀬𑁆𑀬𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀫𑀢𑁄 𑀢𑀸𑀯 𑀇𑀥𑀸𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀚𑁆𑀚𑀢𑀺. 𑀏𑀢𑁆𑀣 𑀑𑀴𑀸𑀭𑀺𑀓𑀢𑁆𑀢𑀸, 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀧𑀞𑀫𑀁 𑀯𑀼𑀢𑁆𑀢𑀁, 𑀢𑀢𑁄 𑀢𑀲𑁆𑀲𑁂𑀯 𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀢𑁄 ‘‘𑀳𑁂𑀢𑀼𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’’𑀢𑀺 𑀜𑀸𑀧𑀦𑀢𑁆𑀣𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀢𑀤𑀥𑀺𑀕𑀫𑀼𑀧𑀸𑀬𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 𑀫𑀕𑁆𑀕𑀲𑀘𑁆𑀘𑀁. 𑀪𑀯𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀸𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀧𑀞𑀫𑀁 𑀤𑀼𑀓𑁆𑀔𑀫𑀸𑀳, 𑀢𑀢𑁄 ‘‘𑀪𑀯𑀁 𑀦𑁂𑀯 𑀅𑀳𑁂𑀢𑀼𑀓𑀁 𑀆𑀕𑀘𑁆𑀙𑀢𑀺, 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀦𑀸 𑀳𑁄𑀢𑀺, 𑀇𑀢𑁄 𑀧𑀦 𑀳𑁄𑀢𑀻’’𑀢𑀺 𑀜𑀸𑀧𑀦𑀢𑁆𑀣𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀢𑁄 𑀲𑀳𑁂𑀢𑀼𑀓𑁂𑀦 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸𑀦𑀁 𑀢𑀦𑁆𑀦𑀺𑀲𑁆𑀲𑀭𑀡𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀦𑀺𑀭𑁄𑀥𑀁, 𑀢𑀢𑁄 𑀦𑀺𑀭𑁄𑀥𑀲𑀫𑁆𑀧𑀸𑀧𑀓𑀁 𑀫𑀕𑁆𑀕𑀦𑁆𑀢𑀺 𑀅𑀬𑀫𑁂𑀢𑁆𑀣 𑀓𑀫𑁄.

𑀅𑀦𑀽𑀦𑀸𑀥𑀺𑀓𑀢𑁄 𑀧𑀦 𑀓𑀲𑁆𑀫𑀸 𑀘𑀢𑁆𑀢𑀸𑀭𑀺 𑀏𑀯 𑀲𑀘𑁆𑀘𑀸𑀦𑀻𑀢𑀺 𑀘𑁂? 𑀢𑀢𑁄 𑀅𑀜𑁆𑀜𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀅𑀜𑁆𑀜𑀢𑀭𑀲𑁆𑀲 𑀘 𑀅𑀦𑀧𑀦𑁂𑀬𑁆𑀬𑀢𑁄. 𑀅𑀧𑀺𑀘 𑀧𑀯𑀢𑁆𑀢𑀺𑀫𑀸𑀘𑀺𑀓𑁆𑀔𑀦𑁆𑀢𑁄 𑀪𑀕𑀯𑀸 𑀲𑀳𑁂𑀢𑀼𑀓𑀁 𑀆𑀘𑀺𑀓𑁆𑀔𑀢𑀺, 𑀦𑀺𑀯𑀢𑁆𑀢𑀺𑀜𑁆𑀘 𑀲𑀉𑀧𑀸𑀬𑀁. 𑀇𑀢𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀽𑀦𑀁 𑀏𑀢𑀧𑀭𑀫𑀢𑁄 𑀘𑀢𑁆𑀢𑀸𑀭𑀺 𑀏𑀯 𑀯𑀼𑀢𑁆𑀢𑀸𑀦𑀻𑀢𑀺 𑀅𑀬𑀫𑁂𑀢𑁆𑀣𑀸𑀦𑀽𑀦𑀸𑀥𑀺𑀓𑀢𑁄.

𑀮𑀓𑁆𑀔𑀡𑀸𑀤𑀻𑀳𑀺 𑀧𑀦𑁂𑀢𑁆𑀣 𑀮𑀓𑁆𑀔𑀡𑀢𑁄 𑀩𑀸𑀥𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀦𑁆𑀢𑀸𑀧𑀦𑀭𑀲𑀁, 𑀧𑀯𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀪𑀯𑀮𑀓𑁆𑀔𑀡𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀦𑀼𑀧𑀘𑁆𑀙𑁂𑀤𑀓𑀭𑀡𑀭𑀲𑀁, 𑀧𑀮𑀺𑀩𑁄𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀦𑁆𑀢𑀺𑀮𑀓𑁆𑀔𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀅𑀘𑁆𑀘𑀼𑀢𑀺𑀭𑀲𑀁, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀁 𑀫𑀕𑁆𑀕𑀲𑀘𑁆𑀘𑀁, 𑀓𑀺𑀮𑁂𑀲𑀧𑀳𑀸𑀦𑀓𑀭𑀡𑀭𑀲𑀁, 𑀯𑀼𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀧𑀺𑀘 𑀧𑀯𑀢𑁆𑀢𑀺𑀧𑀯𑀢𑁆𑀢𑀓𑀦𑀺𑀯𑀢𑁆𑀢𑀺𑀦𑀺𑀯𑀢𑁆𑀢𑀓𑀮𑀓𑁆𑀔𑀡𑀸𑀦𑀺 𑀧𑀝𑀺𑀧𑀸𑀝𑀺𑀬𑀸, 𑀢𑀣𑀸 𑀲𑀗𑁆𑀔𑀢𑀢𑀡𑁆𑀳𑀸𑀅𑀲𑀗𑁆𑀔𑀢𑀤𑀲𑁆𑀲𑀦𑀮𑀓𑁆𑀔𑀡𑀸𑀦𑀺 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀮𑀓𑁆𑀔𑀡𑀸𑀦𑀺.

𑀲𑀼𑀜𑁆𑀜𑀢𑁄 𑀧𑀦𑁂𑀢𑀸𑀦𑀺 𑀬𑀣𑀸𑀓𑁆𑀓𑀫𑀁 𑀯𑁂𑀤𑀓𑀓𑀸𑀭𑀓𑀦𑀺𑀩𑁆𑀩𑀼𑀢𑀕𑀫𑀓𑀸𑀪𑀸𑀯𑀢𑁄 𑀲𑀼𑀜𑁆𑀜𑀸𑀦𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀤𑀼𑀓𑁆𑀔𑀫𑁂𑀯 𑀳𑀺, 𑀦 𑀓𑁄𑀘𑀺 𑀤𑀼𑀓𑁆𑀔𑀺𑀢𑁄,

𑀓𑀸𑀭𑀓𑁄 𑀦, 𑀓𑀺𑀭𑀺𑀬𑀸𑀯 𑀯𑀺𑀚𑁆𑀚𑀢𑀺;

𑀅𑀢𑁆𑀣𑀺 𑀦𑀺𑀩𑁆𑀩𑀼𑀢𑀺, 𑀦 𑀦𑀺𑀩𑁆𑀩𑀼𑀢𑁄 𑀧𑀼𑀫𑀸,

𑀫𑀕𑁆𑀕𑀫𑀢𑁆𑀣𑀺, 𑀕𑀫𑀓𑁄 𑀦 𑀯𑀺𑀚𑁆𑀚𑀢𑀻’’𑀢𑀺. (𑀯𑀺𑀪. 𑀅𑀝𑁆𑀞. 𑁧𑁮𑁯);

𑀅𑀣 𑀯𑀸 𑁋

𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀲𑀼𑀜𑁆𑀜𑀁,

𑀧𑀼𑀭𑀺𑀫𑀤𑁆𑀯𑀬𑀫𑀢𑁆𑀢𑀲𑀼𑀜𑁆𑀜𑀫𑀫𑀢𑀧𑀤𑀁;

𑀥𑀼𑀯𑀲𑀼𑀪𑀲𑀼𑀔𑀅𑀢𑁆𑀢𑀯𑀺𑀭𑀳𑀺𑀢𑁄,

𑀫𑀕𑁆𑀕𑁄 𑀇𑀢𑀺 𑀲𑀼𑀜𑁆𑀜𑀢𑁄 𑀢𑁂𑀲𑀼. (𑀯𑀺𑀪. 𑀅𑀝𑁆𑀞. 𑁧𑁮𑁯);

𑀦𑀺𑀭𑁄𑀥𑀲𑀼𑀜𑁆𑀜𑀸𑀦𑀺 𑀯𑀸 𑀢𑀻𑀡𑀺. 𑀦𑀺𑀭𑁄𑀥𑁄 𑀘 𑀲𑁂𑀲𑀢𑁆𑀢𑀬𑀲𑀼𑀜𑁆𑀜𑁄. 𑀨𑀮𑀲𑀼𑀜𑁆𑀜𑁄 𑀯𑀸 𑀳𑁂𑀢𑁆𑀣 𑀳𑁂𑀢𑀼 𑀲𑀫𑀼𑀤𑀬𑀫𑀕𑁆𑀕𑁂𑀲𑀼 𑀤𑀼𑀓𑁆𑀔𑀦𑀺𑀭𑁄𑀥𑀸𑀦𑀁 𑀅𑀪𑀸𑀯𑀸 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬. 𑀳𑁂𑀢𑀼𑀲𑀼𑀜𑁆𑀜𑀜𑁆𑀘 𑀨𑀮𑀁 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁, 𑀦𑀺𑀭𑁄𑀥𑀫𑀕𑁆𑀕𑀸𑀦𑀜𑁆𑀘 𑀅𑀲𑀫𑀯𑀸𑀬𑀸, 𑀦 𑀳𑁂𑀢𑀼𑀲𑀫𑀯𑁂𑀢𑀁 𑀳𑁂𑀢𑀼𑀨𑀮𑀁. 𑀳𑁂𑀢𑀼𑀨𑀮𑀲𑀫𑀯𑀸𑀬𑀯𑀸𑀤𑀻𑀦𑀁 𑀤𑁆𑀯𑀺𑀅𑀡𑀼𑀓𑀸𑀤𑀻𑀦𑀺 𑀯𑀺𑀬𑀸𑀢𑀺 𑀅𑀬𑀫𑁂𑀢𑁆𑀣 𑀲𑀼𑀜𑁆𑀜𑀢𑀸.

𑀜𑀸𑀡𑀓𑀺𑀘𑁆𑀘𑀢𑁄𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀲𑀘𑁆𑀘𑀜𑀸𑀡𑀁 𑀅𑀦𑀼𑀩𑁄𑀥𑀜𑀸𑀡𑀁, 𑀧𑀝𑀺𑀯𑁂𑀥𑀜𑀸𑀡𑀜𑁆𑀘. 𑀢𑀢𑁆𑀣 𑀅𑀦𑀼𑀩𑁄𑀥𑀜𑀸𑀡𑀁 𑀮𑁄𑀓𑀺𑀬𑀁, 𑀢𑀁 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀦𑀺𑀭𑁄𑀥𑁂, 𑀫𑀕𑁆𑀕𑁂 𑀘 𑀧𑀯𑀢𑁆𑀢𑀢𑀺. 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀢𑀁 𑀲𑀘𑁆𑀘𑀸𑀯𑀩𑁄𑀥𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑁂 𑀔𑁂𑀧𑁂𑀦𑁆𑀢𑀁 𑀦𑀺𑀭𑁄𑀥𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀢𑁄 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀬𑀁 𑀧𑀦𑁂𑀢𑀁 𑀮𑁄𑀓𑀺𑀬𑀁, 𑀢𑀢𑁆𑀣 𑀤𑀼𑀓𑁆𑀔𑀜𑀸𑀡𑀁 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀪𑀯𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀦𑀺𑀯𑀢𑁆𑀢𑁂𑀢𑀺, 𑀲𑀫𑀼𑀤𑀬𑀜𑀸𑀡𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁, 𑀦𑀺𑀭𑁄𑀥𑀜𑀸𑀡𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀁, 𑀫𑀕𑁆𑀕𑀜𑀸𑀡𑀁 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁. 𑀤𑀼𑀓𑁆𑀔𑀜𑀸𑀡𑀁 𑀯𑀸 𑀢𑁂𑀲𑀼 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀭𑀳𑀺𑀢𑁂𑀲𑀼 𑀔𑀦𑁆𑀥𑁂𑀲𑀼 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀲𑀜𑁆𑀜𑀸𑀲𑀗𑁆𑀔𑀸𑀢𑀁 𑀨𑀮𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀲𑀫𑀼𑀤𑀬𑀜𑀸𑀡𑀁 ‘‘𑀇𑀲𑁆𑀲𑀭𑀧𑀥𑀸𑀦𑀓𑀸𑀮𑀲𑀪𑀸𑀯𑀸𑀤𑀻𑀳𑀺 𑀮𑁄𑀓𑁄 𑀧𑀯𑀢𑁆𑀢𑀢𑀻’’𑀢𑀺 𑀅𑀓𑀸𑀭𑀡𑁂 𑀓𑀸𑀭𑀡𑀸𑀪𑀺𑀫𑀸𑀦𑀧𑁆𑀧𑀯𑀢𑁆𑀢𑀁 𑀳𑁂𑀢𑀼𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀦𑀺𑀭𑁄𑀥𑀜𑀸𑀡𑀁 𑀅𑀭𑀽𑀧𑀮𑁄𑀓𑀸𑀤𑀻𑀲𑀼 𑀅𑀧𑀯𑀕𑁆𑀕𑀕𑁆𑀕𑀸𑀳𑀪𑀽𑀢𑀁 𑀦𑀺𑀭𑁄𑀥𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁, 𑀫𑀕𑁆𑀕𑀜𑀸𑀡𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀧𑁆𑀧𑀪𑁂𑀤𑁂 𑀅𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀕𑁆𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀁 𑀉𑀧𑀸𑀬𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀇𑀤𑀫𑁂𑀢𑁆𑀣 𑀜𑀸𑀡𑀓𑀺𑀘𑁆𑀘𑀁.

𑀉𑀧𑀫𑀸𑀢𑁄 𑀧𑀦𑁂𑀢𑁆𑀣 𑀪𑀸𑀭𑁄 𑀯𑀺𑀬 𑀳𑀺 𑀤𑀼𑀓𑁆𑀔𑀲𑀘𑁆𑀘𑀁 𑀤𑀝𑁆𑀞𑀩𑁆𑀩𑀁, 𑀪𑀸𑀭𑀸𑀤𑀸𑀦𑀫𑀺𑀯 𑀲𑀫𑀼𑀤𑀬𑀲𑀘𑁆𑀘𑀁, 𑀪𑀸𑀭𑀦𑀺𑀓𑁆𑀔𑁂𑀧𑀦𑀫𑀺𑀯 𑀦𑀺𑀭𑁄𑀥𑀲𑀘𑁆𑀘𑀁, 𑀪𑀸𑀭𑀦𑀺𑀓𑁆𑀔𑁂𑀧𑀦𑀼𑀧𑀸𑀬𑁄 𑀯𑀺𑀬 𑀫𑀕𑁆𑀕𑀲𑀘𑁆𑀘𑀁. 𑀅𑀧𑀺𑀘 𑀭𑁄𑀕𑀢𑀦𑁆𑀦𑀺𑀤𑀸𑀦𑀢𑀤𑀼𑀧𑀲𑀫𑀪𑁂𑀲𑀚𑁆𑀚𑁂𑀳𑀺, 𑀑𑀭𑀺𑀫𑀢𑀻𑀭𑀫𑀳𑁄𑀖𑀧𑀸𑀭𑀺𑀫𑀢𑀻𑀭𑀢𑀁𑀲𑀫𑁆𑀧𑀸𑀧𑀓𑁄𑀧𑀸𑀬𑁂𑀳𑀺 𑀘𑀸𑀢𑀺 𑀏𑀯𑀫𑀸𑀤𑀻𑀳𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑁆𑀯𑀸𑀧𑀺 𑀏𑀢𑀸𑀦𑀺 𑀉𑀧𑀫𑀸𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀫𑁂𑀢𑁆𑀣 𑀉𑀧𑀫𑀸. 𑀏𑀯𑀁 𑀜𑁂𑀬𑁆𑀬𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀲𑀘𑁆𑀘𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀤𑁆𑀯𑀸𑀯𑀻𑀲𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀏𑀢𑁆𑀣 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑁄 𑀧𑀦𑁂𑀲 𑀇𑀦𑁆𑀤𑁆𑀭𑀺𑀬𑀝𑁆𑀞𑁄 𑀦𑀸𑀫𑀸𑀢𑀺? 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁄, 𑀇𑀦𑁆𑀤𑀤𑁂𑀲𑀺𑀢𑀝𑁆𑀞𑁄, 𑀇𑀦𑁆𑀤𑀤𑀺𑀝𑁆𑀞𑀝𑁆𑀞𑁄, 𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑁄, 𑀇𑀦𑁆𑀤𑀚𑀼𑀝𑁆𑀞𑀝𑁆𑀞𑁄 𑀘, 𑀲𑁄 𑀲𑀩𑁆𑀩𑁄𑀧𑀺 𑀇𑀥 𑀬𑀣𑀸𑀬𑁄𑀕𑀁 𑀬𑀼𑀚𑁆𑀚𑀢𑀺. 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀇𑀦𑁆𑀤𑁄 𑀦𑀸𑀫 𑀓𑀫𑁆𑀫𑁂𑀲𑀼 𑀓𑀲𑁆𑀲𑀘𑀺 𑀇𑀲𑁆𑀲𑀭𑀺𑀬𑀸𑀪𑀸𑀯𑀢𑁄, 𑀢𑁂𑀦𑁂𑀯𑁂𑀢𑁆𑀣 𑀓𑀫𑁆𑀫𑀲𑀜𑁆𑀚𑀦𑀺𑀢𑀸𑀦𑀺 𑀢𑀸𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀢𑁆𑀢𑀦𑁄 𑀚𑀦𑀓𑀓𑀫𑁆𑀫𑀁 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑀺, 𑀢𑁂𑀦 𑀘 𑀲𑀺𑀝𑁆𑀞𑀸𑀦𑀻𑀢𑀺 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁂𑀦, 𑀇𑀦𑁆𑀤𑀲𑀺𑀝𑁆𑀞𑀝𑁆𑀞𑁂𑀦 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀧𑀭𑀫𑀺𑀲𑁆𑀲𑀭𑀺𑀬𑀪𑀸𑀯𑀢𑁄 𑀇𑀦𑁆𑀤𑁄, 𑀢𑀢𑁄 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀕𑀯𑀢𑀸 𑀬𑀣𑀸𑀪𑀽𑀢𑀢𑁄 𑀧𑀓𑀸𑀲𑀺𑀢𑀸𑀦𑀺, 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀦𑀺 𑀘𑀸𑀢𑀺 𑀇𑀦𑁆𑀤𑀤𑁂𑀲𑀺𑀢𑀝𑁆𑀞𑁂𑀦, 𑀇𑀦𑁆𑀤𑀤𑀺𑀝𑁆𑀞𑀝𑁆𑀞𑁂𑀦 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑁂𑀦𑁂𑀯 𑀪𑀕𑀯𑀢𑀸 𑀓𑀸𑀦𑀺𑀘𑀺 𑀕𑁄𑀘𑀭𑀸𑀲𑁂𑀯𑀦𑀸𑀬, 𑀓𑀸𑀦𑀺𑀘𑀺 𑀪𑀸𑀯𑀦𑀸𑀲𑁂𑀯𑀦𑀸𑀬 𑀲𑁂𑀯𑀺𑀢𑀸𑀦𑀻𑀢𑀺 𑀇𑀦𑁆𑀤𑀚𑀼𑀝𑁆𑀞𑀝𑁆𑀞𑁂𑀦𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀅𑀧𑀺𑀘 𑀆𑀥𑀺𑀧𑀘𑁆𑀘𑀲𑀗𑁆𑀔𑀸𑀢𑁂𑀦 𑀇𑀲𑁆𑀲𑀭𑀺𑀬𑀝𑁆𑀞𑁂𑀦𑀸𑀧𑀺 𑀏𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺.

𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀻𑀲𑀼 𑀘𑀓𑁆𑀔𑀸𑀤𑀻𑀦𑀁 𑀧𑀤𑀢𑁆𑀣𑁄 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑁄. 𑀧𑀘𑁆𑀙𑀺𑀫𑁂𑀲𑀼 𑀧𑀦 𑀢𑀻𑀲𑀼 𑀧𑀼𑀩𑁆𑀩𑀪𑀸𑀕𑁂 𑀅𑀦𑀜𑁆𑀜𑀸𑀢𑀁 𑀅𑀫𑀢𑀁 𑀧𑀤𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄, 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀆𑀚𑀸𑀦𑀦𑀢𑁄 𑀅𑀜𑁆𑀜𑀸 𑀏𑀯 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀺𑀝𑁆𑀞𑀺𑀢𑀜𑀸𑀡𑀓𑀺𑀘𑁆𑀘𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀘 𑀧𑀲𑀸𑀤𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀁 𑀭𑀽𑀧𑀸𑀤𑀻𑀦𑀁 𑀦𑀺𑀬𑀢𑀪𑀸𑀯𑀲𑁆𑀲, 𑀅𑀢𑁆𑀢𑀦𑁄 𑀢𑀺𑀓𑁆𑀔𑀫𑀦𑁆𑀤𑀢𑀸𑀦𑀼𑀯𑀺𑀥𑀸𑀦𑀲𑁆𑀲 𑀘 𑀆𑀧𑀸𑀤𑀦𑀢𑁄 𑀆𑀥𑀺𑀧𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀦𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀚𑀸𑀦𑀦𑀸𑀤𑀺𑀮𑀓𑁆𑀔𑀡𑁂 𑀆𑀥𑀺𑀧𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀸𑀭𑀽𑀧𑀯𑀲𑁂𑀦 𑀤𑁆𑀯𑀺𑀥𑀸. 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀜𑁆𑀘 𑀯𑁂𑀤𑀦𑀸𑀪𑀸𑀯𑀢𑁄 𑀏𑀓𑀥𑀫𑁆𑀫𑁄, 𑀢𑀣𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀫𑁄𑀳𑀪𑀸𑀯𑀢𑁄. 𑀲𑁂𑀲𑀸𑀦𑀺 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀏𑀓𑁂𑀓𑀥𑀫𑁆𑀫𑀸 𑀏𑀯𑀸𑀢𑀺 𑀏𑀯𑀁 𑀧𑀭𑀫𑀢𑁆𑀣𑀢𑁄 𑀲𑁄𑀴𑀲 𑀥𑀫𑁆𑀫𑀸𑀯 𑀤𑁆𑀯𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀪𑀸𑀯𑁂𑀦 𑀤𑁂𑀲𑀺𑀢𑀸𑀦𑀺. 𑀲𑁂𑀲𑀸𑀦𑀺 𑀧𑀦𑁂𑀢𑁆𑀣 𑀘𑁂𑀢𑀲𑀺𑀓𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀅𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀅𑀬𑀁 𑀥𑀫𑁆𑀫𑀪𑁂𑀤𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀸𑀫 𑀦 𑀕𑀳𑀺𑀢𑀁. 𑀓𑀲𑁆𑀫𑀸? 𑀲𑀼𑀢𑁆𑀢𑀦𑁆𑀢𑁂 𑀇𑀫𑀸𑀬 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀸𑀕𑀢𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑀲𑁆𑀫𑀺𑀁 𑀳𑀺 𑀓𑀢𑁆𑀣𑀘𑀺 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺, 𑀓𑀢𑁆𑀣𑀘𑀺 𑀢𑀻𑀡𑀺, 𑀓𑀢𑁆𑀣𑀘𑀺 𑀧𑀜𑁆𑀘, 𑀏𑀯𑀁 𑀧𑀦 𑀦𑀺𑀭𑀦𑁆𑀢𑀭𑀁 𑀤𑁆𑀯𑀸𑀯𑀻𑀲𑀢𑀺 𑀆𑀕𑀢𑀸𑀦𑀺 𑀦𑀸𑀫 𑀦𑀢𑁆𑀣𑀺. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀧𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺.

𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁂 𑀧𑀦 𑀤𑁆𑀯𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸𑀢𑀺? 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀓𑀼𑀲𑀮𑀁, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀓𑀼𑀲𑀮𑀁, 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀸𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀢𑁆𑀢𑀸𑀭𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺, 𑀫𑀦𑀚𑀻𑀯𑀺𑀢𑀲𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀯𑀻𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀦𑀺 𑀙 𑀢𑀺𑀥𑀸𑀧𑀺, 𑀲𑁂𑀲𑀸𑀦𑀺 𑀤𑀲 𑀅𑀩𑁆𑀬𑀸𑀓𑀢𑀸𑀦𑀺. 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀢𑀺, 𑀢𑀻𑀡𑀺 𑀢𑀺𑀥𑀸𑀧𑀺, 𑀚𑀻𑀯𑀺𑀢𑀁 𑀢𑀺𑀥𑀸 𑀘 𑀦 𑀯𑀢𑁆𑀢𑀩𑁆𑀩𑀜𑁆𑀘, 𑀤𑁆𑀯𑀸𑀤𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺 𑀏𑀯. 𑀢𑀻𑀡𑀺 𑀯𑀺𑀧𑀸𑀓𑀸𑀦𑀺, 𑀤𑁆𑀯𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀺, 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑁆𑀢 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀺, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀲𑀺𑀬𑀸 𑀯𑀺𑀧𑀸𑀓𑀁, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁, 𑀦𑀯𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀥𑀸𑀧𑀺. 𑀦𑀯𑀺𑀦𑁆𑀤𑁆𑀭𑀺𑀬𑀸𑀦𑀺 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸𑀦𑀺, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁, 𑀢𑀻𑀡𑀺 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸𑀦𑀺, 𑀦𑀯 𑀢𑀺𑀥𑀸𑀧𑀺. 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀢𑀣𑀸 𑀘 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀜𑁆𑀘, 𑀦𑀯 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀦𑀺, 𑀏𑀓𑀸𑀤𑀲 𑀢𑀺𑀥𑀸𑀧𑀺. 𑀲𑀢𑁆𑀢 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑁂𑀯 𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀢𑀺 𑀤𑀲 𑀧𑀭𑀺𑀢𑁆𑀢𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀺 𑀅𑀧𑁆𑀧𑀫𑀸𑀡𑀸𑀦𑀺, 𑀲𑁂𑀲𑀸𑀦𑀺 𑀦𑀯 𑀢𑀺𑀥𑀸𑀯. 𑀢𑀢𑁆𑀣 𑀘 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀸𑀯𑀘𑀭𑀯𑀲𑁂𑀦𑁂𑀯 𑀫𑀳𑀕𑁆𑀕𑀢𑀁, 𑀢𑀤𑀯𑀲𑁂𑀲𑀸𑀦𑀺 𑀅𑀭𑀽𑀧𑀸𑀯𑀘𑀭𑀯𑀲𑁂𑀦𑀸𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸𑀦𑀺, 𑀲𑀢𑁆𑀢𑀭𑀲 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀦𑁂𑀯.

𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀳𑁂𑀢𑀽, 𑀲𑁂𑀲𑀸 𑀦 𑀳𑁂𑀢𑀽…𑀧𑁂… 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀭𑀡𑀁, 𑀫𑀦𑀚𑀻𑀯𑀺𑀢𑀲𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀯𑀻𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁆𑀯𑀺𑀥𑀸𑀧𑀺, 𑀲𑁂𑀲𑀸𑀦𑀺 𑀧𑀦𑁆𑀦𑀭𑀲 𑀅𑀭𑀡𑀸𑀦𑁂𑀯𑀸𑀢𑀺 𑀅𑀬𑀁 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄.

𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀦𑁂𑀢𑁂𑀲𑀼, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄;

𑀓𑀫𑀢𑁄 𑀤𑀸𑀦𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀢𑀢𑁆𑀣 𑀓𑁄𑀲𑀮𑁆𑀮𑀫𑀺𑀘𑁆𑀙𑀢𑀸.

𑀓𑀫𑀢𑁄𑀢𑀺 𑀅𑀬𑀫𑁆𑀧𑀺 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀥𑀫𑁆𑀫𑁂 𑀧𑀭𑀺𑀜𑁆𑀜𑀸𑀬 𑀅𑀭𑀺𑀬𑀪𑀽𑀫𑀺𑀧𑀝𑀺𑀮𑀸𑀪𑁄 𑀳𑁄𑀢𑀻𑀢𑀺 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀞𑀫𑀁 𑀤𑁂𑀲𑀺𑀢𑀸𑀦𑀺. 𑀲𑁄 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄 𑀬𑀁 𑀥𑀫𑁆𑀫𑀁 𑀉𑀧𑀸𑀤𑀸𑀬 ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸 𑀲𑀗𑁆𑀔𑀁 𑀕𑀘𑁆𑀙𑀢𑀺, ‘‘𑀅𑀬𑀁 𑀲𑁄’’𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑁆𑀘. 𑀲𑁄 𑀤𑀼𑀯𑀺𑀥𑁄𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀬𑀸𑀯 𑀢𑀲𑁆𑀲 𑀧𑀯𑀢𑁆𑀢𑀺, 𑀢𑀸𑀯 𑀏𑀢𑁂𑀲𑀁 𑀯𑁂𑀤𑀬𑀺𑀢𑀸𑀦𑀁 𑀅𑀦𑀺𑀯𑀢𑁆𑀢𑀺. 𑀬𑀜𑁆𑀘 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 𑀢𑀢𑁄 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀢𑀦𑁆𑀦𑀺𑀭𑁄𑀥𑀢𑁆𑀣𑀁 𑀧𑀦 𑀏𑀢𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀲𑀤𑁆𑀥𑀸𑀤𑀻𑀦𑀺. ‘‘𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀏𑀲 𑀥𑀫𑁆𑀫𑁄 𑀧𑀞𑀫𑀁 𑀅𑀢𑁆𑀢𑀦𑀺 𑀧𑀸𑀢𑀼𑀪𑀯𑀢𑀻’’𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀅𑀫𑁄𑀖𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀲𑁂𑀯 𑀨𑀮𑀢𑁆𑀢𑀸, 𑀢𑀢𑁄 𑀅𑀦𑀦𑁆𑀢𑀭𑀁 𑀪𑀸𑀯𑁂𑀢𑀩𑁆𑀩𑀢𑁆𑀢𑀸 𑀘 𑀢𑀢𑁄 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀇𑀢𑁄 𑀧𑀭𑀁 𑀪𑀸𑀯𑀦𑀸𑀬 𑀇𑀫𑀲𑁆𑀲 𑀅𑀥𑀺𑀕𑀫𑁄, 𑀅𑀥𑀺𑀕𑀢𑁂 𑀘 𑀧𑀦 𑀇𑀫𑀲𑁆𑀫𑀺𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 𑀅𑀦𑁆𑀢𑁂 𑀧𑀭𑀫𑀲𑁆𑀲𑀸𑀲𑀪𑀽𑀢𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀤𑁂𑀲𑀺𑀢𑀦𑁆𑀢𑀺 𑀏𑀯𑀁 𑀓𑀫𑀢𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀺𑀜𑁆𑀜𑁂𑀬𑁆𑀬𑁄.

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀗𑁆𑀕𑀫𑀸𑀢𑀺𑀓𑀸𑀬 𑀧𑀦 𑀅𑀢𑁆𑀣𑀢𑁄 𑀢𑀸𑀯 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺𑀆𑀤𑀻𑀲𑀼 𑀅𑀯𑀺𑀦𑁆𑀤𑀺𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺, 𑀯𑀺𑀦𑁆𑀤𑀺𑀬𑀁 𑀯𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀁 𑀦 𑀯𑀺𑀦𑁆𑀤𑀢𑀺, 𑀥𑀫𑁆𑀫𑀸𑀦𑀁 𑀯𑀸 𑀬𑀣𑀸𑀲𑀪𑀸𑀯𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀺, 𑀅𑀦𑁆𑀢𑀯𑀺𑀭𑀳𑀺𑀢𑁂 𑀯𑀸 𑀲𑀁𑀲𑀸𑀭𑁂 𑀲𑀢𑁆𑀢𑁂 𑀚𑀯𑀸𑀧𑁂𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀸 𑀚𑀯𑀢𑀺, 𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀸 𑀦 𑀚𑀯𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀧𑀝𑀺𑀘𑁆𑀘 𑀨𑀮𑀫𑁂𑀢𑀺 𑀏𑀢𑀲𑁆𑀫𑀸𑀢𑀺 𑀧𑀘𑁆𑀘𑀬𑁄, 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸, 𑀞𑀺𑀢𑀺𑀬𑀸 𑀘 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄. 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸. 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸.

𑀇𑀢𑁄 𑀧𑀭𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀼𑀢𑁆𑀢𑁂𑀲𑀼 𑀧𑀦 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀦𑀫𑀢𑀻𑀢𑀺 𑀦𑀸𑀫𑀁, 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀆𑀬𑁂 𑀢𑀦𑁄𑀢𑀺, 𑀆𑀬𑀢𑀜𑁆𑀘 𑀦𑀬𑀢𑀻𑀢𑀺 𑀆𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀓𑀲𑁂𑀲𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸. 𑀉𑀧𑀸𑀤𑀺𑀬𑀢𑀻𑀢𑀺 𑀉𑀧𑀸𑀤𑀸𑀦𑀁. 𑀪𑀯𑀢𑀺, 𑀪𑀸𑀯𑀬𑀢𑀺 𑀘𑀸𑀢𑀺 𑀪𑀯𑁄. 𑀚𑀦𑀦𑀁 𑀚𑀸𑀢𑀺. 𑀚𑀻𑀭𑀡𑀁 𑀚𑀭𑀸. 𑀫𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀫𑀭𑀡𑀁. 𑀲𑁄𑀘𑀦𑀁 𑀲𑁄𑀓𑁄. 𑀧𑀭𑀺𑀤𑁂𑀯𑀦𑀁 𑀧𑀭𑀺𑀤𑁂𑀯𑁄. 𑀤𑀼𑀓𑁆𑀔𑀬𑀢𑀺, 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀯𑀲𑁂𑀦 𑀤𑁆𑀯𑀺𑀥𑀸 𑀔𑀡𑀢𑀻𑀢𑀺𑀧𑀺 𑀤𑀼𑀓𑁆𑀔𑀁. 𑀤𑀼𑀫𑁆𑀫𑀦𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄. 𑀲𑀫𑁆𑀪𑀯𑀦𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀲𑁄𑀓𑀸𑀤𑀻𑀳𑁂𑀯, 𑀅𑀣 𑀔𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑀤𑁂𑀳𑀺𑀧𑀺 𑀲𑀫𑁆𑀪𑀯𑀦𑁆𑀢𑀺-𑀲𑀤𑁆𑀤𑀲𑁆𑀲 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀳𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺.

𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀦𑀬𑀦𑀺𑀤𑀲𑁆𑀲𑀦𑀁, 𑀢𑁂𑀦 𑀅𑀯𑀺𑀚𑁆𑀚𑀸𑀤𑀻𑀳𑁂𑀯 𑀓𑀸𑀭𑀡𑁂𑀳𑀺, 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀻𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲. 𑀓𑁂𑀯𑀮𑀲𑁆𑀲𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀲𑁆𑀲, 𑀲𑀓𑀮𑀲𑁆𑀲 𑀯𑀸, 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀫𑀽𑀳𑀲𑁆𑀲, 𑀦 𑀲𑀢𑁆𑀢𑀲𑁆𑀲, 𑀦 𑀲𑀼𑀔𑀲𑀼𑀪𑀸𑀤𑀻𑀦𑀁. 𑀲𑀫𑀼𑀤𑀬𑁄𑀢𑀺 𑀦𑀺𑀩𑁆𑀩𑀢𑁆𑀢𑀺, 𑀳𑁄𑀢𑀻𑀢𑀺 𑀲𑀫𑁆𑀪𑀯𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁆𑀣𑁄.

𑀥𑀫𑁆𑀫𑀪𑁂𑀤𑀢𑁄 𑀧𑀦𑁂𑀢𑁆𑀣 𑀅𑀯𑀺𑀚𑁆𑀚𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀤𑀼𑀓𑁆𑀔𑀸𑀤𑀻𑀲𑀼 𑀘𑀢𑀽𑀲𑀼, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀧𑀼𑀩𑁆𑀩𑀦𑁆𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞𑀲𑀼 𑀯𑀸 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀁. 𑀲𑀗𑁆𑀔𑀸𑀭𑀸 𑀧𑀦 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀢𑀬𑁄, 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀢𑀬𑁄 𑀘𑀸𑀢𑀺 𑀙𑀩𑁆𑀩𑀺𑀥𑀸. 𑀢𑀢𑁆𑀣 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀘𑁂𑀢𑀺 𑀢𑁂𑀭𑀲 𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀘𑀢𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀁 𑀲𑀗𑁆𑀔𑀸𑀭𑀸𑀦𑀁 𑀏𑀯 𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀲𑀗𑁆𑀔𑀸𑀭𑀸𑀤𑀺𑀢𑁆𑀢𑀺𑀓𑁄 𑀯𑀼𑀢𑁆𑀢𑁄.

𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀘𑁂𑀯 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸 𑀘 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀯𑀘𑀻𑀲𑀗𑁆𑀔𑀸𑀭𑁄, 𑀏𑀢𑀸 𑀘𑁂𑀯 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁, 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀧𑀯𑀢𑁆𑀢𑀦𑀓𑀸 𑀭𑀽𑀧𑀸𑀭𑀽𑀧𑀓𑀼𑀲𑀮𑀘𑁂𑀢𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀧𑀦𑁂𑀢𑁆𑀣 𑀉𑀤𑁆𑀥𑀘𑁆𑀘𑀘𑁂𑀢𑀦𑀸 𑀘 𑀧𑀭𑀢𑁄 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑁂 𑀅𑀧𑀦𑁂𑀢𑀩𑁆𑀩𑀸𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀫𑁆𑀪𑀯𑀢𑁄 𑀇𑀥 𑀕𑀳𑁂𑀢𑀩𑁆𑀩𑀸𑀯𑀸𑀢𑀺 𑀅𑀬𑀁 𑀢𑀺𑀓𑁄 𑀧𑀼𑀭𑀺𑀫𑀢𑁆𑀢𑀺𑀓𑀫𑁂𑀯 𑀧𑀯𑀺𑀲𑀢𑀻𑀢𑀺 𑀅𑀢𑁆𑀣𑀢𑁄 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀯 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀜𑁆𑀘 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁂𑀦, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁂𑀦 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀏𑀓𑁂𑀓𑀘𑀺𑀢𑁆𑀢𑀓𑁆𑀔𑀡𑁂 𑀤𑁆𑀯𑀸𑀤𑀲𑀗𑁆𑀕𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀕𑀳𑀡𑀢𑁄 𑀲𑀩𑁆𑀩𑀸𑀧𑀺 𑀘𑁂𑀢𑀦𑀸 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀤𑀻𑀲𑀼𑀧𑀺 𑀲𑀩𑁆𑀩𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀘 𑀥𑀫𑁆𑀫𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁂𑀦𑁂𑀯 𑀧𑀦 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀙𑀩𑁆𑀩𑀺𑀥𑀁 𑀩𑀸𑀢𑁆𑀢𑀺𑀁𑀲𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀫𑁂𑀯 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀸𑀦𑀺 𑀧𑀦 𑀯𑀝𑁆𑀝𑀓𑀣𑀸𑀬 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑀺𑀢𑀸𑀦𑀺. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁 𑀧𑀦 𑀲𑀩𑁆𑀩𑀮𑁄𑀓𑀺𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀁 𑀲𑀩𑁆𑀩𑀸𑀦𑀺 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀸𑀦𑀺. 𑀲𑀴𑀸𑀬𑀢𑀦𑀁 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀙𑀯𑀺𑀧𑀸𑀓𑀨𑀲𑁆𑀲𑁄, 𑀢𑀣𑀸 𑀯𑁂𑀤𑀦𑀸𑀧𑀺. 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑀢𑁄 𑀙𑀩𑁆𑀩𑀺𑀥𑁄 𑀮𑁄𑀪𑁄. 𑀉𑀧𑀸𑀤𑀸𑀦𑀁 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀢𑁄 𑀘𑀢𑀼𑀩𑁆𑀩𑀺𑀥𑀸 𑀮𑁄𑀪𑀤𑀺𑀝𑁆𑀞𑀺𑀬𑁄𑀯. 𑀪𑀯𑁄 𑀧𑀦 𑀤𑀼𑀯𑀺𑀥𑁄 𑀓𑀫𑁆𑀫𑀪𑀯𑁄, 𑀉𑀧𑀧𑀢𑁆𑀢𑀺𑀪𑀯𑁄𑀢𑀺. 𑀢𑀢𑁆𑀣 𑀓𑀫𑁆𑀫𑀪𑀯𑁄 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀘. 𑀉𑀧𑀧𑀢𑁆𑀢𑀺𑀪𑀯𑁄 𑀧𑀦 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀜𑁆𑀘𑀧𑀺 𑀔𑀦𑁆𑀥𑀸. 𑀲𑁄 𑀧𑀪𑁂𑀤𑀢𑁄 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀸 𑀢𑀬𑁄, 𑀲𑀜𑁆𑀜𑀸 𑀅𑀲𑀜𑁆𑀜𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀪𑀯𑀸 𑀢𑀬𑁄, 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑀸 𑀢𑀬𑁄𑀢𑀺 𑀦𑀯𑀯𑀺𑀥𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀚𑀸𑀢𑀺𑀆𑀤𑀻𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀚𑀸𑀢𑀺𑀕𑁆𑀕𑀳𑀡𑁂𑀦 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀯 𑀕𑀳𑀺𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀢𑀣𑀸 𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦𑀸𑀧𑀺 𑀢𑁂𑀲𑀜𑁆𑀜𑁂𑀯 𑀧𑀸𑀓𑀪𑁂𑀤𑀢𑁆𑀢𑀸. 𑀲𑁄𑀓𑀸𑀤𑀬𑁄 𑀧𑀦 𑀚𑀭𑀸𑀫𑀭𑀡𑁂𑀦 𑀤𑁆𑀯𑀸𑀤𑀲𑀫𑁂𑀦 𑀅𑀗𑁆𑀕𑁂𑀦 𑀏𑀓𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀯𑀺𑀲𑀼𑀁 𑀅𑀗𑁆𑀕𑀪𑀸𑀯𑁂𑀦. 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁. 𑀲𑁄𑀓𑀸𑀤𑀺𑀢𑁄 𑀳𑀺 𑀅𑀯𑀺𑀚𑁆𑀚𑀸 𑀲𑀺𑀤𑁆𑀥𑀸 𑀳𑁄𑀢𑀺 𑀅𑀯𑀺𑀚𑁆𑀚𑀸𑀯𑀺𑀧𑁆𑀧𑀬𑁄𑀕𑀢𑁄, 𑀅𑀯𑀺𑀚𑁆𑀚𑀸𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀘. 𑀚𑀭𑀸𑀫𑀭𑀡𑀩𑁆𑀪𑀸𑀳𑀢𑀲𑁆𑀲 𑀳𑀺 𑀩𑀸𑀮𑀲𑁆𑀲𑁂𑀯 𑀢𑁂 𑀲𑀫𑁆𑀪𑀯𑀦𑁆𑀢𑀺, 𑀢𑁂𑀳𑀺 𑀘 𑀅𑀯𑀺𑀚𑁆𑀚𑀸𑀬 𑀲𑀺𑀤𑁆𑀥𑀸𑀬 𑀧𑀼𑀦 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀏𑀯𑀁 𑀳𑁂𑀢𑀼𑀨𑀮𑀧𑀭𑀫𑁆𑀧𑀭𑀸𑀬 𑀪𑀯𑀘𑀓𑁆𑀓𑀁 𑀅𑀯𑀺𑀘𑁆𑀙𑀺𑀦𑁆𑀦𑀁, 𑀅𑀦𑀸𑀤𑀺𑀓𑀁, 𑀅𑀧𑀭𑀺𑀬𑀦𑁆𑀢𑀁, 𑀅𑀧𑀭𑀺𑀬𑁄𑀲𑀸𑀦𑀜𑁆𑀘 𑀳𑁄𑀢𑀺.

𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀅𑀯𑀺𑀚𑁆𑀚𑀸 𑀆𑀤𑀺𑀢𑁄 𑀯𑀼𑀢𑁆𑀢𑀸𑀢𑀺? 𑀧𑀥𑀸𑀦𑀤𑀲𑁆𑀲𑀦𑀢𑁆𑀣𑀁 𑀧𑀦 𑀆𑀤𑀺𑀢𑁄 𑀯𑀼𑀢𑁆𑀢𑀸. 𑀢𑀺𑀡𑁆𑀡𑀁 𑀳𑀺 𑀯𑀝𑁆𑀝𑀸𑀦𑀁 𑀅𑀯𑀺𑀚𑁆𑀚𑀸 𑀧𑀥𑀸𑀦𑁄 𑀳𑁂𑀢𑀼 𑀢𑀲𑁆𑀲𑀸 𑀪𑀸𑀯𑁂 𑀪𑀸𑀯𑀢𑁄, 𑀦𑀺𑀭𑁄𑀥𑁂𑀦 𑀘 𑀦𑀺𑀭𑀼𑀚𑁆𑀛𑀦𑀢𑁄. 𑀏𑀯𑀁 𑀅𑀯𑀺𑀚𑁆𑀚𑀸𑀤𑀻𑀳𑀺 𑀤𑁆𑀯𑀸𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑁂𑀦 𑀲𑀩𑁆𑀩𑁂 𑀮𑁄𑀓𑀺𑀬𑀥𑀫𑁆𑀫𑀸𑀯 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀧𑀦 𑀮𑁄𑀓𑀼𑀢𑁆𑀢𑀭𑀸𑀧𑀻𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀪𑁂𑀤𑁄.

𑀯𑀺𑀪𑀗𑁆𑀕𑀦𑀬𑀢𑁄 𑀧𑀦𑁂𑀢𑁆𑀣 𑀧𑀜𑁆𑀳𑀸𑀧𑀼𑀘𑁆𑀙𑀓𑀦𑀬𑁄 𑀦𑀢𑁆𑀣𑀺, 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑀬𑀸𑀧𑀺 𑀥𑀫𑁆𑀫𑀪𑁂𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑁋

‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.