𑀅𑀪𑀺𑀥𑀫𑁆𑀫𑀤𑀼𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸

𑀤𑀼𑀓𑀫𑀸𑀢𑀺𑀓𑀸𑀬 𑀧𑀦 𑀳𑁂𑀝𑁆𑀞𑀸 𑀅𑀦𑀸𑀕𑀢𑀧𑀤𑀢𑁆𑀣𑀯𑀡𑁆𑀡𑀦𑀁𑀬𑁂𑀯 𑀓𑀭𑀺𑀲𑁆𑀲𑀸𑀫. 𑀳𑁂𑀢𑀼𑀕𑁄𑀘𑁆𑀙𑀓𑁂 𑀢𑀸𑀯 𑀳𑁂𑀢𑀽 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀳𑁂𑀢𑀼𑀳𑁂𑀢𑀼 𑀧𑀘𑁆𑀘𑀬𑀳𑁂𑀢𑀼 𑀉𑀢𑁆𑀢𑀫𑀳𑁂𑀢𑀼 𑀲𑀸𑀥𑀸𑀭𑀡𑀳𑁂𑀢𑀽𑀢𑀺 𑀘𑀢𑀼𑀩𑁆𑀩𑀺𑀥𑀸 𑀳𑁂𑀢𑀽. 𑀢𑀢𑁆𑀣 𑀅𑀮𑁄𑀪𑀸𑀤𑀬𑁄 𑀙 𑀥𑀫𑁆𑀫𑀸 𑀳𑁂𑀢𑀼𑀳𑁂𑀢𑀽 𑀦𑀸𑀫, 𑀉𑀧𑀸𑀤𑀸𑀭𑀽𑀧𑀸𑀤𑀻𑀦𑀁 𑀫𑀳𑀸𑀪𑀽𑀢𑀸𑀤𑀬𑁄 𑀧𑀘𑁆𑀘𑀬𑀳𑁂𑀢𑀽 𑀦𑀸𑀫, 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀜𑁆𑀘 𑀉𑀢𑁆𑀢𑀫𑀳𑁂𑀢𑀽 𑀦𑀸𑀫, 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀯𑀺𑀚𑁆𑀚𑀸𑀤𑀬𑁄 𑀲𑀸𑀥𑀸𑀭𑀡𑀳𑁂𑀢𑀽 𑀦𑀸𑀫. 𑀇𑀥 𑀧𑀦 𑀳𑁂𑀢𑀼𑀳𑁂𑀢𑀼 𑀅𑀥𑀺𑀧𑁆𑀧𑁂𑀢𑁄. 𑀳𑁂𑀢𑀽 𑀥𑀫𑁆𑀫𑀸𑀢𑀺 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼𑀲𑀗𑁆𑀔𑀸𑀢𑀸 𑀥𑀫𑁆𑀫𑀸, ‘‘𑀳𑁂𑀢𑀼𑀥𑀫𑁆𑀫𑀸’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀦 𑀳𑁂𑀢𑀽𑀢𑀺 𑀢𑁂𑀲𑀜𑁆𑀜𑁂𑀯 𑀧𑀝𑀺𑀓𑁆𑀔𑁂𑀧𑀯𑀘𑀦𑀁.

𑀢𑀢𑁆𑀣 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀢𑀬𑁄, 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄𑀢𑀺 𑀅𑀓𑀼𑀲𑀮𑀸 𑀢𑀬𑁄 𑀘𑀸𑀢𑀺 𑀇𑀫𑁂 𑀙 𑀥𑀫𑁆𑀫𑀸 𑀳𑁂𑀢𑀽 𑀦𑀸𑀫. 𑀇𑀫𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀘𑁂𑀢𑀲𑀺𑀓𑀸, 𑀲𑀩𑁆𑀩𑀸𑀦𑀺 𑀘 𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀦 𑀳𑁂𑀢𑀽 𑀦𑀸𑀫, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀤𑀼𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑁂𑀢𑀼𑀤𑀼𑀓𑀁 𑀧𑀞𑀫𑀁.

𑀲𑀫𑁆𑀧𑀬𑁄𑀕𑀢𑁄 𑀧𑀯𑀢𑁆𑀢𑁂𑀦 𑀲𑀳 𑀳𑁂𑀢𑀼𑀦𑀸𑀢𑀺 𑀲𑀳𑁂𑀢𑀼𑀓𑀸. 𑀢𑀣𑁂𑀯 𑀧𑀯𑀢𑁆𑀢𑁄 𑀦𑀢𑁆𑀣𑀺 𑀏𑀢𑁂𑀲𑀁 𑀳𑁂𑀢𑀽𑀢𑀺 𑀅𑀳𑁂𑀢𑀼𑀓𑀸.

𑀢𑀢𑁆𑀣 𑀅𑀳𑁂𑀢𑀼𑀓𑀘𑀺𑀢𑁆𑀢𑀯𑀚𑁆𑀚𑀺𑀢𑀸𑀦𑀺 𑀏𑀓𑀲𑀢𑁆𑀢𑀢𑀺 𑀘𑀺𑀢𑁆𑀢𑀸𑀦𑀺 𑀲𑀳𑁂𑀢𑀼𑀓𑀸 𑀦𑀸𑀫. 𑀢𑁂𑀲𑀼 𑀤𑁆𑀯𑁂 𑀫𑁄𑀳𑀫𑀽𑀮𑀸𑀦𑀺 𑀫𑁄𑀳𑁂𑀦𑁂𑀯 𑀲𑀳𑁂𑀢𑀼𑀓𑀸𑀦𑀺, 𑀅𑀝𑁆𑀞 𑀮𑁄𑀪𑀫𑀽𑀮𑀸𑀦𑀺 𑀮𑁄𑀪𑀫𑁄𑀳𑁂𑀳𑀺 𑀤𑁆𑀯𑀻𑀳𑀺, 𑀤𑁆𑀯𑁂 𑀤𑁄𑀲𑀫𑀽𑀮𑀸𑀦𑀺 𑀤𑁄𑀲𑀫𑁄𑀳𑁂𑀳𑀺, 𑀤𑁆𑀯𑀸𑀤𑀲 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺 𑀅𑀮𑁄𑀪𑀸𑀤𑁄𑀲𑁂𑀳𑀺, 𑀲𑁂𑀲𑀸𑀦𑀺 𑀲𑀢𑁆𑀢𑀘𑀢𑁆𑀢𑀸𑀮𑀻𑀲 𑀅𑀮𑁄𑀪𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀳𑁂𑀢𑀼𑀓𑀸𑀦𑀻𑀢𑀺, 𑀫𑁄𑀳𑀫𑀽𑀮𑁂𑀲𑀼 𑀧𑀦 𑀫𑁄𑀳𑁄, 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼, 𑀲𑀦𑁆𑀢𑀻𑀭𑀡𑀢𑁆𑀢𑀬𑀁, 𑀯𑁄𑀝𑁆𑀞𑀩𑁆𑀩𑀦𑀁, 𑀳𑀲𑀺𑀢𑀼𑀧𑁆𑀧𑀸𑀤𑀓𑀸𑀦𑀺 𑀅𑀝𑁆𑀞𑀸𑀭𑀲 𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀮𑁄𑀪𑀤𑁄𑀲𑀸, 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀫𑁄𑀳𑁂𑀦𑁂𑀯 𑀲𑀳𑁂𑀢𑀼𑀓𑀸, 𑀤𑀺𑀝𑁆𑀞𑀺𑀫𑀸𑀦𑁄 𑀮𑁄𑀪𑀫𑁄𑀳𑁂𑀳𑀺 𑀤𑁆𑀯𑀻𑀳𑀺, 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀤𑁄𑀲𑀫𑁄𑀳𑁂𑀳𑀺, 𑀫𑁄𑀳𑁄 𑀧𑀦 𑀲𑀺𑀬𑀸 𑀮𑁄𑀪𑁂𑀦, 𑀲𑀺𑀬𑀸 𑀤𑁄𑀲𑁂𑀦𑀸𑀢𑀺 𑀤𑁆𑀯𑀻𑀳𑀺 𑀲𑀳𑁂𑀢𑀼𑀓𑁄𑀧𑀺 𑀫𑁄𑀳𑀫𑀽𑀮𑁂𑀲𑀼 𑀅𑀳𑁂𑀢𑀼𑀓𑁄𑀧𑀺, 𑀣𑀺𑀦𑀫𑀺𑀤𑁆𑀥𑀸𑀦𑀺 𑀲𑀺𑀬𑀸 𑀮𑁄𑀪𑀫𑁄𑀳𑁂𑀳𑀺, 𑀲𑀺𑀬𑀸 𑀤𑁄𑀲𑀫𑁄𑀳𑁂𑀳𑀻𑀢𑀺 𑀢𑀻𑀳𑀺𑀧𑀺 𑀲𑀳𑁂𑀢𑀼𑀓𑀸𑀦𑀺, 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀸𑀦𑀺 𑀢𑀣𑀸 𑀘 𑀓𑁂𑀯𑀮𑀫𑁄𑀳𑁂𑀦 𑀘, 𑀅𑀫𑁄𑀳𑁄 𑀧𑀦 𑀅𑀮𑁄𑀪𑀸𑀤𑁄𑀲𑁂𑀳𑁂𑀯 𑀤𑁆𑀯𑀻𑀳𑀺, 𑀅𑀮𑁄𑀪𑁄 𑀲𑀺𑀬𑀸 𑀅𑀤𑁄𑀲𑀸𑀫𑁄𑀳𑁂𑀳𑀺, 𑀲𑀺𑀬𑀸 𑀅𑀤𑁄𑀲𑁂𑀦𑀸𑀢𑀺 𑀤𑁆𑀯𑀻𑀳𑀺, 𑀅𑀤𑁄𑀲𑁄 𑀲𑀺𑀬𑀸 𑀅𑀮𑁄𑀪𑀸𑀫𑁄𑀳𑁂𑀳𑀺, 𑀲𑀺𑀬𑀸 𑀅𑀮𑁄𑀪𑁂𑀦𑀸𑀢𑀺 𑀤𑁆𑀯𑀻𑀳𑀺, 𑀲𑁂𑀲𑀸 𑀧𑀦 𑀤𑁆𑀯𑀸𑀯𑀻𑀲𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀲𑀺𑀬𑀸 𑀢𑀻𑀳𑀺, 𑀲𑀺𑀬𑀸 𑀤𑁆𑀯𑀻𑀳𑀺𑀧𑀺 𑀳𑁂𑀢𑀽𑀳𑀺 𑀲𑀳𑁂𑀢𑀼𑀓𑀸, 𑀙𑀦𑁆𑀤𑁄 𑀧𑀦 𑀬𑀣𑀸𑀬𑁄𑀕𑀁 𑀢𑀻𑀳𑀺, 𑀧𑀻𑀢𑀺𑀤𑁄𑀲𑀯𑀚𑁆𑀚𑀺𑀢𑁂𑀳𑀺 𑀧𑀜𑁆𑀘𑀳𑀺 𑀲𑀺𑀬𑀸 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺, 𑀲𑁂𑀲𑀸 𑀏𑀓𑀸𑀤𑀲 𑀢𑀺𑀚𑀸𑀢𑀺𑀓𑀸 𑀙𑀳𑀺 𑀳𑁂𑀢𑀽𑀳𑀺 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺, 𑀯𑁂𑀤𑀦𑀸 𑀘𑁂𑀢𑁆𑀣 𑀤𑁄𑀫𑀦𑀲𑁆𑀲𑀪𑀽𑀢𑀸 𑀤𑁆𑀯𑀺𑀳𑁂𑀢𑀼𑀓𑀸𑀯, 𑀲𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸 𑀬𑀣𑀸𑀬𑁄𑀕𑀁 𑀤𑁄𑀲𑀯𑀚𑁆𑀚𑀺𑀢𑁂𑀳𑀺 𑀧𑀜𑁆𑀘𑀳𑀺 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺, 𑀲𑀼𑀔𑀤𑀼𑀓𑁆𑀔𑀪𑀽𑀢𑀸 𑀅𑀳𑁂𑀢𑀼𑀓𑀸𑀯, 𑀇𑀤𑀜𑁆𑀘 𑀦𑀺𑀧𑁆𑀧𑀤𑁂𑀲𑀤𑀼𑀓𑀦𑁆𑀢𑀺. 𑀤𑀼𑀢𑀺𑀬𑀁.

𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀬 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸. 𑀳𑁂𑀢𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸. 𑀅𑀬𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀲𑀳𑁂𑀢𑀼𑀓𑀤𑀼𑀓𑁂𑀦 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑁄. 𑀲𑀳𑁂𑀢𑀼𑀓𑀤𑀼𑀓𑁄 𑀏𑀯 𑀳𑀺 𑀪𑀕𑀯𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦, 𑀢𑀣𑀸 𑀩𑀼𑀚𑁆𑀛𑀦𑀓𑀧𑀼𑀕𑁆𑀕𑀮𑀸𑀦𑀁 𑀯𑀸 𑀅𑀚𑁆𑀛𑀸𑀲𑀬𑀯𑀲𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀪𑀸𑀯𑁂𑀦𑀸𑀧𑀺 𑀯𑀼𑀢𑁆𑀢𑁄. 𑀏𑀯𑀁 𑀉𑀧𑀭𑀺𑀧𑀺 𑀲𑀫𑀸𑀦𑀢𑁆𑀣𑀤𑀼𑀓𑀸𑀦𑀁 𑀯𑀘𑀦𑁂 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑀺𑀬𑀁.

𑀘𑀢𑀼𑀢𑁆𑀣𑀸𑀤𑀬𑁄 𑀧𑀦 𑀬𑀲𑁆𑀫𑀸 𑀧𑀞𑀫𑀤𑀼𑀓𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑁂𑀲𑀼 𑀧𑀞𑀫𑀧𑀤𑁂𑀦 𑀬𑁄𑀚𑁂𑀢𑁆𑀯𑀸 𑀤𑁆𑀯𑁂 𑀤𑀼𑀓𑀸, 𑀧𑀞𑀫𑀤𑀼𑀓𑁂 𑀘 𑀧𑀘𑁆𑀙𑀺𑀫𑀧𑀤𑀁 𑀤𑀼𑀢𑀺𑀬𑀤𑀼𑀓𑁂𑀦 𑀬𑁄𑀚𑁂𑀢𑁆𑀯𑀸 𑀏𑀓𑀁 𑀤𑀼𑀓𑀦𑁆𑀢𑀺 𑀢𑀬𑁄 𑀤𑀼𑀓𑀸 𑀤𑁂𑀲𑀺𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀧𑀤𑀢𑁆𑀣𑁄 𑀯𑀼𑀢𑁆𑀢𑀦𑀬𑁄𑀯.

𑀢𑀢𑁆𑀣 𑀘 𑀬𑀣𑁂𑀯 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀘, 𑀲𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺 𑀅𑀬𑀁 𑀤𑀼𑀓𑁄 𑀲𑀫𑁆𑀪𑀯𑀢𑀺, 𑀢𑀣𑀸 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘, 𑀅𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺 𑀅𑀬𑀫𑁆𑀧𑀺 𑀲𑀫𑁆𑀪𑀯𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂𑀦 𑀬𑁄𑀚𑀦𑀸𑀬𑀧𑀺 𑀏𑀓𑁄 𑀮𑀩𑁆𑀪𑀢𑀺. 𑀬𑀣𑀸 𑀘 ‘‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺, 𑀅𑀳𑁂𑀢𑀼𑀓𑀸𑀧𑀻’’𑀢𑀺 𑀅𑀬𑀁 𑀮𑀩𑁆𑀪𑀢𑀺, 𑀢𑀣𑀸 ‘‘𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺, 𑀅𑀳𑁂𑀢𑀼𑀓𑀸𑀧𑀻’’𑀢𑀺 𑀅𑀬𑀫𑁆𑀧𑀺. 𑀬𑀣𑀸 𑀘𑁂𑀢𑁆𑀣 𑀲𑀳𑁂𑀢𑀼𑀓𑀤𑀼𑀓𑁂 𑀤𑁆𑀯𑁂 𑀤𑀼𑀓𑀸, 𑀏𑀯𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂𑀧𑀺 ‘‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀘 ‘‘𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀘 𑀤𑁆𑀯𑁂 𑀤𑀼𑀓𑀸 𑀮𑀩𑁆𑀪𑀦𑁆𑀢𑀻𑀢𑀺 𑀅𑀧𑀭𑁂𑀧𑀺 𑀧𑀜𑁆𑀘 𑀤𑀼𑀓𑀸 𑀳𑁂𑀢𑀼𑀕𑁄𑀘𑁆𑀙𑀓𑁂 𑀬𑁄𑀚𑁂𑀢𑀼𑀁 𑀲𑀓𑁆𑀓𑀸. 𑀢𑁂 𑀧𑀦 𑀪𑀕𑀯𑀢𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀙𑀲𑀼 𑀏𑀯 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑁂 𑀢𑀸𑀯 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀤𑁆𑀯𑁂 𑀢𑀬𑁄 𑀳𑁂𑀢𑀽 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀳𑁂𑀢𑀽 𑀘𑁂𑀯 𑀅𑀜𑁆𑀜𑁄𑀜𑁆𑀜𑀸𑀧𑁂𑀓𑁆𑀔𑀸𑀬 𑀲𑀳𑁂𑀢𑀼𑀓𑀸 𑀘 𑀦𑀸𑀫. 𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀧𑀦 𑀳𑁂𑀢𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽 𑀦𑀸𑀫. 𑀇𑀫𑀲𑁆𑀫𑀺𑀁 𑀤𑀼𑀓𑁂 𑀲𑀩𑁆𑀩𑁂 𑀅𑀳𑁂𑀢𑀼𑀓𑀥𑀫𑁆𑀫𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀳𑁂𑀢𑀼𑀯𑀚𑁆𑀚𑀺𑀢𑀸 𑀅𑀓𑀼𑀲𑀮𑀸 𑀘𑁂𑀯 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘, 𑀙𑀦𑁆𑀤𑁄 𑀘 𑀲𑀳𑁂𑀢𑀼𑀓𑁄 𑀘𑁂𑀯 𑀦 𑀳𑁂𑀢𑀼 𑀏𑀯, 𑀲𑁂𑀲𑀸 𑀢𑀺𑀚𑀸𑀢𑀺𑀓𑀸, 𑀢𑀣𑀸 𑀦𑀯𑀢𑁆𑀢𑀩𑁆𑀩𑀸 𑀘, 𑀫𑁄𑀳𑁄 𑀧𑀦 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑁄 𑀘 𑀦𑀯𑀢𑁆𑀢𑀩𑁆𑀩𑁄 𑀘. 𑀘𑀢𑀼𑀢𑁆𑀣𑀁.

𑀅𑀦𑀦𑁆𑀢𑀭𑀤𑀼𑀓𑁄𑀧𑀺 𑀇𑀫𑀺𑀦𑀸 𑀤𑀼𑀓𑁂𑀦 𑀲𑀩𑁆𑀩𑀣𑀸𑀧𑀺 𑀲𑀤𑀺𑀲𑁄𑀯𑀸𑀢𑀺. 𑀧𑀜𑁆𑀘𑀫𑀁.

𑀲𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀳𑁂𑀢𑀼𑀯𑀚𑁆𑀚𑀺𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀦𑀳𑁂𑀢𑀽 𑀲𑀳𑁂𑀢𑀽 𑀦𑀸𑀫, 𑀅𑀳𑁂𑀢𑀼𑀓𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦𑀳𑁂𑀢𑀽 𑀅𑀳𑁂𑀢𑀼𑀓𑀸 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀤𑀼𑀓𑁂 𑀙 𑀳𑁂𑀢𑀽 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺. 𑀙𑀝𑁆𑀞𑀁.

𑀳𑁂𑀢𑀼𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀲𑀢𑁆𑀢𑀲𑀼 𑀘𑀽𑀴𑀦𑁆𑀢𑀭𑀤𑀼𑀓𑁂𑀲𑀼 𑀅𑀢𑁆𑀢𑀦𑁄 𑀦𑀺𑀧𑁆𑀨𑀸𑀤𑀓𑁂𑀦 𑀲𑀳 𑀧𑀘𑁆𑀘𑀬𑁂𑀦𑀸𑀢𑀺 𑀲𑀧𑁆𑀧𑀘𑁆𑀘𑀬𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀽𑀧𑀸𑀦𑀺. 𑀦𑀢𑁆𑀣𑀺 𑀏𑀢𑁂𑀲𑀁 𑀉𑀧𑁆𑀧𑀸𑀤𑁂 𑀯𑀸 𑀞𑀺𑀢𑀺𑀬𑀁 𑀯𑀸 𑀧𑀘𑁆𑀘𑀬𑁄 𑀅𑀳𑀼𑀢𑁆𑀯𑀸 𑀪𑀯𑀦𑀲𑁆𑀲𑁂𑀯𑀸𑀪𑀸𑀯𑀸𑀢𑀺 𑀅𑀧𑁆𑀧𑀘𑁆𑀘𑀬𑀸, 𑀦𑀺𑀩𑁆𑀩𑀸𑀦𑀫𑁂𑀯. 𑀤𑁂𑀲𑀦𑀸𑀬 𑀧𑀦𑁂𑀢𑁆𑀣 𑀧𑀭𑀫𑀢𑀸𑀬 𑀲𑁄𑀢𑀧𑀢𑀺𑀢𑀯𑀲𑁂𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀏𑀯𑀁 𑀲𑀦𑀺𑀤𑀲𑁆𑀲𑀦𑀸𑀤𑀻𑀲𑀼𑀧𑀺. 𑀇𑀤𑀜𑁆𑀘 𑀇𑀢𑁄 𑀧𑀭𑀸𑀦𑀺 𑀙 𑀘 𑀦𑀺𑀧𑁆𑀧𑀤𑁂𑀲𑀤𑀼𑀓𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁄 𑀧𑀭𑀜𑁆𑀘 𑀬𑀢𑁆𑀣 ‘‘𑀇𑀫𑁂 𑀦 𑀯𑀢𑁆𑀢𑀩𑁆𑀩𑀸’’𑀢𑀺 𑀦 𑀯𑀓𑁆𑀔𑀸𑀫, 𑀢𑀁 𑀦𑀺𑀧𑁆𑀧𑀤𑁂𑀲𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀧𑁆𑀧𑀘𑁆𑀘𑀬𑀤𑀼𑀓𑀁.

𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀸𑀢𑀺 𑀲𑀗𑁆𑀔𑀢𑀸. 𑀦 𑀲𑀗𑁆𑀔𑀢𑀸𑀢𑀺 𑀅𑀲𑀗𑁆𑀔𑀢𑀸. 𑀇𑀤𑀜𑁆𑀘 𑀲𑀩𑁆𑀩𑀣𑀸 𑀲𑀧𑁆𑀧𑀘𑁆𑀘𑀬𑀤𑀼𑀓𑀲𑀤𑀺𑀲𑀫𑁂𑀯. 𑀲𑀧𑁆𑀧𑀘𑁆𑀘𑀬𑀲𑀗𑁆𑀔𑀢𑀉𑀪𑀬𑀤𑀼𑀓𑀁 𑀲𑀩𑁆𑀩𑀣𑀸 𑀲𑀤𑀺𑀲𑀫𑁂𑀯. 𑀲𑀗𑁆𑀔𑀢𑀤𑀼𑀓𑀁.

𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀁 𑀦𑀸𑀫. 𑀲𑁂𑀲𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺 𑀅𑀦𑀺𑀤𑀲𑁆𑀲𑀦𑀸 𑀦𑀸𑀫. 𑀲𑀦𑀺𑀤𑀲𑁆𑀲𑀦𑀤𑀼𑀓𑀁.

𑀧𑀲𑀸𑀤𑀯𑀺𑀲𑀬𑀭𑀽𑀧𑀸𑀦𑀺 𑀤𑁆𑀯𑀸𑀤𑀲 𑀲𑀧𑁆𑀧𑀝𑀺𑀖𑀸 𑀦𑀸𑀫. 𑀲𑁂𑀲𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺 𑀅𑀧𑁆𑀧𑀝𑀺𑀖𑀸 𑀦𑀸𑀫. 𑀲𑀧𑁆𑀧𑀝𑀺𑀖𑀤𑀼𑀓𑀁.

𑀅𑀯𑀺𑀦𑀺𑀩𑁆𑀪𑁄𑀕𑀯𑀲𑁂𑀦 𑀭𑀽𑀧𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀭𑀽𑀧𑀺𑀦𑁄, 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀯𑀸 𑀭𑀽𑀧𑀁, 𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀭𑀽𑀧𑀺𑀦𑁄, 𑀪𑀽𑀢𑁄𑀧𑀸𑀤𑀸𑀬𑀭𑀽𑀧𑀫𑁂𑀯. 𑀦 𑀭𑀽𑀧𑀺𑀦𑁄 𑀅𑀭𑀽𑀧𑀺𑀦𑁄, 𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺. 𑀭𑀽𑀧𑀺𑀤𑀼𑀓𑀁.

𑀮𑁄𑀓𑁄 𑀯𑀼𑀘𑁆𑀘𑀢𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀯𑀝𑁆𑀝𑀁, 𑀢𑀲𑁆𑀫𑀺𑀁 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀮𑁄𑀓𑁂 𑀦𑀺𑀬𑀼𑀢𑁆𑀢𑀸𑀢𑀺 𑀮𑁄𑀓𑀺𑀬𑀸, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀢𑀢𑁄 𑀮𑁄𑀓𑀢𑁄 𑀢𑀢𑁆𑀣 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀉𑀢𑁆𑀢𑀺𑀡𑁆𑀡𑀸𑀢𑀺 𑀮𑁄𑀓𑀼𑀢𑁆𑀢𑀭𑀸, 𑀅𑀭𑀺𑀬𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺. 𑀘𑁂𑀢𑀲𑀺𑀓𑁂𑀲𑀼 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀲𑁂𑀔𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑀺𑀬𑀤𑀼𑀓𑀁.

𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀓𑁂𑀦𑀘𑀺 𑀏𑀓𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀦𑀸 𑀯𑀸 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀢𑁂𑀦𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀦𑀸 𑀯𑀸 𑀦 𑀓𑁂𑀦𑀘𑀺 𑀯𑀺𑀚𑀸𑀦𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀳𑀺 𑀲𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑀦𑀸𑀦𑀢𑁆𑀢𑀢𑁄 𑀤𑀼𑀓𑁄 𑀳𑁄𑀢𑀺. 𑀧𑀤𑀪𑀸𑀚𑀦𑀻𑀬𑀲𑁆𑀫𑀺𑀫𑁆𑀧𑀺 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 (𑀥. 𑀲. 𑁧𑁧𑁦𑁧) 𑀏𑀢𑁆𑀢𑀓𑀁 𑀏𑀓𑀤𑀼𑀓𑀦𑁆𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 (𑀥. 𑀲. 𑁧𑁧𑁦𑁧) 𑀅𑀬𑀫𑁂𑀓𑁄 𑀤𑀼𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀧𑀦 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁, 𑀲𑀤𑁆𑀤𑁄 𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀅𑀬𑀫𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀤𑀼𑀓𑀧𑀭𑀺𑀘𑁆𑀙𑁂𑀤𑁄 𑀜𑀸𑀢𑀩𑁆𑀩𑁄. 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀦𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀯𑀺𑀜𑁆𑀜𑁂𑀬𑁆𑀬𑀁 𑀦𑀸𑀫. 𑀲𑁂𑀲𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀢𑁂𑀦𑁂𑀯 𑀘𑀓𑁆𑀔𑀼𑀦𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀸 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸. 𑀏𑀯𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀢𑀩𑁆𑀩𑀺𑀜𑁆𑀜𑀸𑀡𑀫𑀽𑀮𑀺𑀓𑀸𑀲𑀼𑀧𑀺 𑀘𑀢𑀽𑀲𑀼 𑀬𑁄𑀚𑀦𑀸𑀲𑀼 𑀯𑀺𑀪𑀸𑀕𑁄 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄. 𑀭𑀽𑀧𑀸𑀤𑀬𑁄 𑀧𑀦 𑀧𑀜𑁆𑀘𑀯𑀺𑀲𑀬𑀸 𑀫𑀦𑁄𑀥𑀸𑀢𑀼𑀢𑁆𑀢𑀬𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸. 𑀲𑁂𑀲𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀢𑁂𑀦𑁂𑀯 𑀫𑀦𑁄𑀥𑀸𑀢𑀼𑀢𑁆𑀢𑀬𑁂𑀦 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸. 𑀓𑀺𑀜𑁆𑀘𑀸𑀧𑀺 𑀲𑀸𑀫𑀜𑁆𑀜𑀢𑁄 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀅𑀯𑀺𑀜𑁆𑀜𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄 𑀧𑀸𑀴𑀺𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀯𑀲𑁂𑀦 𑀤𑀼𑀓𑁄 𑀦 𑀯𑀼𑀢𑁆𑀢𑁄, 𑀢𑀣𑀸𑀧𑀺 𑀯𑀺𑀲𑁂𑀲𑀢𑁄 𑀯𑀢𑁆𑀢𑀩𑁆𑀩𑁄𑀯. 𑀢𑀣𑀸 𑀳𑀺 𑀙𑀩𑁆𑀩𑀺𑀥𑀸𑀧𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀤𑀺𑀦𑀸 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀭𑀽𑀧𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀢𑁆𑀢𑀺𑀬𑁄 𑀢𑁂𑀦𑁂𑀯 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸. 𑀢𑀣𑀸 𑀓𑀸𑀫𑀭𑀽𑀧𑀸𑀭𑀽𑀧𑀸𑀯𑀘𑀭𑀧𑀜𑁆𑀜𑀢𑁆𑀢𑀺𑀬𑁄 𑀅𑀓𑀼𑀲𑀮𑀸𑀤𑀺𑀦𑀸 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀮𑁄𑀓𑀼𑀢𑁆𑀢𑀭𑀸 𑀢𑁂𑀦𑁂𑀯 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸. 𑀢𑀣𑀸 𑀦𑀺𑀩𑁆𑀩𑀸𑀦𑀁 𑀮𑁄𑀓𑀼𑀢𑁆𑀢𑀭𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀲𑁂𑀲𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀢𑁂𑀦𑁂𑀯 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀤𑀺𑀪𑁂𑀤𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸𑀯𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀸 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸. 𑀏𑀯𑀁 𑀲𑀩𑁆𑀩𑁂 𑀥𑀫𑁆𑀫𑀸 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸 𑀦𑀸𑀫. 𑀇𑀫𑀲𑁆𑀫𑀺𑀜𑁆𑀘 𑀤𑀼𑀓𑁂 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀓𑁂𑀦𑀘𑀺𑀯𑀺𑀜𑁆𑀜𑁂𑀬𑁆𑀬𑀤𑀼𑀓𑀁.

𑀘𑀽𑀴𑀦𑁆𑀢𑀭𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀕𑁄𑀘𑁆𑀙𑀓𑁂 𑀆𑀲𑀫𑀦𑁆𑀢𑀢𑁄 𑀲𑀯𑀦𑁆𑀢𑀻𑀢𑀺 𑀆𑀲𑀯𑀸, 𑀘𑀓𑁆𑀔𑀼𑀢𑁄𑀧𑀺…𑀧𑁂… 𑀫𑀦𑀢𑁄𑀧𑀺 𑀲𑀯𑀦𑁆𑀢𑀺, 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀢𑁄 𑀬𑀸𑀯𑀕𑁄𑀢𑁆𑀭𑀪𑀼𑀁, 𑀑𑀓𑀸𑀲𑀢𑁄 𑀬𑀸𑀯𑀪𑀯𑀕𑁆𑀕𑀸 𑀲𑀯𑀦𑁆𑀢𑀻𑀢𑀺 𑀯𑀸 𑀆𑀲𑀯𑀸, 𑀏𑀢𑁂 𑀥𑀫𑁆𑀫𑁂, 𑀏𑀢𑀜𑁆𑀘 𑀑𑀓𑀸𑀲𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀓𑀭𑀡𑀢𑁆𑀣𑁄 𑀳𑀺 𑀅𑀬𑀁 𑀆-𑀓𑀸𑀭𑁄. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀫𑀤𑀺𑀭𑀸𑀤𑀺𑀆𑀲𑀯𑀸 𑀯𑀺𑀬𑀸𑀢𑀺𑀧𑀺 𑀆𑀲𑀯𑀸. 𑀬𑀤𑀺 𑀘 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀆𑀲𑀯𑀸, 𑀏𑀢𑁂 𑀏𑀯 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀺. 𑀅𑀦𑀸𑀤𑀺𑀢𑁆𑀢𑀸 𑀆𑀬𑀢𑀁 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀺 𑀧𑀲𑀯𑀦𑁆𑀢𑀻𑀢𑀺𑀧𑀺 𑀆𑀲𑀯𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀆𑀲𑀯𑀸 𑀦𑀸𑀫.

𑀢𑀢𑁆𑀣 𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀦𑀸𑀫. 𑀢𑀢𑁆𑀣 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀸𑀲𑀯𑁄 𑀦𑀸𑀫. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀓𑀸𑀫𑀸𑀲𑀯𑁄’’𑀢𑀺 (𑀥. 𑀲. 𑀅𑀝𑁆𑀞. 𑁧𑁧𑁦𑁨) 𑀘, ‘‘𑀤𑀺𑀝𑁆𑀞𑀺𑀲𑀳𑀚𑀸𑀢𑁄 𑀭𑀸𑀕𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀺, 𑀤𑀺𑀝𑁆𑀞𑀺𑀭𑀸𑀕𑁄 𑀦𑀸𑀫 𑀳𑁄𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧𑁧𑁦𑁫) 𑀘, ‘‘𑀬𑁄 𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀪𑀭𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀲𑁆𑀲 𑀭𑀸𑀕𑀲𑁆𑀲 𑀇𑀥𑁂𑀯 𑀧𑀳𑀻𑀦𑀢𑁆𑀢𑀸’’𑀢𑀺 𑀘 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 ‘‘𑀓𑀸𑀫𑀸𑀲𑀯𑁄 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀥. 𑀲. 𑁧𑁪𑁬𑁫) 𑀘, ‘‘𑀓𑀸𑀫𑀸𑀲𑀯𑀁 𑀧𑀝𑀺𑀘𑁆𑀘 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 (𑀧𑀝𑁆𑀞𑀸. 𑁩.𑁩.𑁧) 𑀘 𑀯𑀼𑀢𑁆𑀢𑀢𑁆𑀢𑀸 𑀪𑀯𑀸𑀲𑀯𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀸𑀲𑀯𑁄𑀢𑀺 𑀧𑀜𑁆𑀜𑀸𑀬𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑀲𑁆𑀲, 𑀩𑁆𑀭𑀳𑁆𑀫𑀸𑀦𑀁 𑀯𑀢𑁆𑀣𑀸𑀪𑀭𑀡𑀸𑀤𑀻𑀲𑀼 𑀭𑀸𑀕𑀲𑁆𑀲 𑀘 𑀪𑀯𑀸𑀲𑀯𑀢𑁆𑀢𑀸𑀪𑀸𑀯𑀸. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀭𑀸𑀕𑁄 𑀏𑀯 𑀳𑀺 𑀭𑀽𑀧𑀸𑀭𑀽𑀧𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀪𑀯𑀸𑀲𑀯𑁄 𑀳𑁄𑀢𑀺 ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁨), 𑀦 𑀘 𑀓𑀸𑀫𑀸𑀲𑀯𑀪𑀯𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑁄 𑀮𑁄𑀪𑁄 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, ‘‘𑀮𑁄𑀪𑁄 𑀲𑀺𑀬𑀸 𑀆𑀲𑀯𑁄, 𑀲𑀺𑀬𑀸 𑀦𑁄 𑀆𑀲𑀯𑁄’’𑀢𑀺 𑀧𑀸𑀴𑀺𑀬𑀁 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬, ‘‘𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀅𑀯𑀺𑀚𑁆𑀚𑀸𑀲𑀯𑁄 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄, 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀧𑀤𑀪𑀸𑀚𑀦𑀻𑀬𑁂 𑀘 𑀓𑀸𑀫𑀸𑀲𑀯𑀦𑀺𑀤𑁆𑀤𑁂𑀲𑁂 𑀆𑀕𑀢𑀲𑁆𑀲 ‘‘𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑁧𑁧𑁦𑁩) 𑀇𑀫𑀲𑁆𑀲 𑀧𑀤𑀲𑁆𑀲 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑀅. 𑁧𑁧𑁦𑁩) 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁄𑀢𑀺𑀧𑀺 𑀅𑀢𑁆𑀣𑀬𑁄𑀚𑀦𑀸 𑀲𑀓𑁆𑀓𑀸 𑀓𑀸𑀢𑀼𑀁 𑀢𑁂𑀪𑀼𑀫𑀓𑀲𑁆𑀲 𑀥𑀫𑁆𑀫𑀲𑁆𑀲 𑀯𑀢𑁆𑀣𑀼𑀓𑀸𑀫𑀢𑁆𑀢𑀸, 𑀢𑀢𑁆𑀣 𑀲𑀩𑁆𑀩𑀢𑁆𑀣 𑀭𑀸𑀕𑀲𑁆𑀲 𑀘 𑀓𑀺𑀮𑁂𑀲𑀓𑀸𑀫𑀢𑁆𑀢𑀸. 𑀯𑀼𑀢𑁆𑀢𑀁 𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀫𑀳𑀸𑀦𑀺𑀤𑁆𑀤𑁂𑀲𑁂 𑁋

‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸…𑀧𑁂… 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸.

‘‘𑀓𑀢𑀫𑁂 𑀓𑀺𑀮𑁂𑀲𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄…𑀧𑁂… 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸’’𑀢𑀺 (𑀫𑀳𑀸𑀦𑀺. 𑁧).

𑀅𑀧𑀺𑀘𑁂𑀢𑁆𑀣 ‘‘𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄’’𑀢𑀺𑀆𑀤𑀺𑀦𑀸 𑀓𑀺𑀮𑁂𑀲𑀓𑀸𑀫𑀲𑁆𑀲 𑀓𑀸𑀫𑁄𑀖𑀸𑀤𑀺𑀪𑀸𑀯𑀁 𑀯𑀤𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀯𑀢𑁆𑀣𑀼𑀓𑀸𑀫𑀢𑁆𑀢𑀯𑀺𑀲𑀬𑀲𑁆𑀲 𑀭𑀸𑀕𑀲𑁆𑀲 𑀆𑀲𑀯𑀸𑀤𑀺𑀪𑀸𑀯𑁄 𑀅𑀦𑀼𑀜𑁆𑀜𑀸𑀢𑁄, 𑀦 𑀧𑀜𑁆𑀘𑀓𑀆𑀫𑀕𑀼𑀡𑀺𑀓𑀲𑁆𑀲𑁂𑀯 𑀭𑀸𑀕𑀲𑁆𑀲. 𑀦 𑀘 𑀑𑀖𑀸𑀲𑀯𑁂𑀲𑀼 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀫𑁆𑀧𑀺 𑀳𑀺 𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑀲𑁆𑀲 𑀧𑀤𑀪𑀸𑀚𑀦𑀻𑀬𑁂 ‘‘𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑁧𑁨𑁨𑁦) 𑀇𑀫𑀲𑁆𑀲 ‘‘𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑀅. 𑁧𑁨𑁨𑁦) 𑀅𑀬𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀢𑁄 𑀅𑀜𑁆𑀜𑁂𑀲𑀼 𑀳𑁂𑀢𑀼𑀕𑀦𑁆𑀣𑀓𑀺𑀮𑁂𑀲𑀕𑁄𑀘𑁆𑀙𑀓𑁂𑀲𑀼 𑀮𑁄𑀪𑀲𑁆𑀲𑁂𑀯 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀯𑀼𑀢𑁆𑀢𑀁, 𑀦 𑀇𑀢𑀭𑀕𑁄𑀘𑁆𑀙𑀓𑁂𑀲𑀼. 𑀢𑁂𑀲𑀼 𑀘 𑀮𑁄𑀪𑀲𑁆𑀲 𑀧𑀸𑀴𑀺𑀅𑀦𑀼𑀲𑀸𑀭𑀢𑁄 𑀑𑀮𑁄𑀓𑀺𑀬𑀫𑀸𑀦𑁂 𑀓𑀺𑀮𑁂𑀲𑀓𑀸𑀫𑀫𑀢𑁆𑀢𑀓𑁄. 𑀅𑀦𑀯𑀲𑁂𑀲𑀮𑁄𑀪𑀧𑀭𑀺𑀬𑀸𑀤𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀘𑀢𑀽𑀲𑀼 𑀧𑀦 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑀪𑀸𑀯𑁂𑀦, 𑀓𑀸𑀫𑀚𑁆𑀛𑁄𑀲𑀸𑀦𑀦𑀺𑀓𑀦𑁆𑀢𑀺𑀪𑀸𑀯𑁂𑀦 𑀘 𑀧𑀯𑀢𑁆𑀢𑁄 𑀮𑁄𑀪𑁄 𑀪𑀯𑀸𑀲𑀯𑁄 𑀦𑀸𑀫. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 ‘‘𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀚𑀸𑀢𑁄 𑀭𑀸𑀕𑁄 𑀪𑀯𑀸𑀲𑀯𑁄’’𑀢𑀺 (𑀥. 𑀲. 𑀅𑀝𑁆𑀞. 𑁧𑁧𑁦𑁨) 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 ‘‘𑀪𑀯𑀸𑀲𑀯𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑁂𑀲𑀽’’𑀢𑀺 (𑀥. 𑀲. 𑁧𑁪𑁬𑁫) 𑀦𑀺𑀬𑀫𑀺𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀕𑀳𑁂𑀢𑀼𑀁, 𑀅𑀥𑀺𑀧𑁆𑀧𑀸𑀬𑁄 𑀧𑀦 𑀕𑀯𑁂𑀲𑀺𑀢𑀩𑁆𑀩𑁄. 𑀤𑁆𑀯𑀸𑀲𑀝𑁆𑀞𑀺𑀧𑀪𑁂𑀤𑀸 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀸𑀲𑀯𑁄 𑀦𑀸𑀫. 𑀅𑀝𑁆𑀞𑀯𑀢𑁆𑀣𑀼𑀓𑁄 𑀲𑀩𑁆𑀩𑁄𑀧𑀺 𑀫𑁄𑀳𑁄 𑀅𑀯𑀺𑀚𑁆𑀚𑀸𑀲𑀯𑁄 𑀦𑀸𑀫. 𑀢𑁂𑀲𑀼 𑀤𑀺𑀝𑁆𑀞𑀸𑀲𑀯𑁄 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀢𑀺, 𑀓𑀸𑀫𑀸𑀲𑀯𑁄 𑀘𑀢𑀽𑀳𑀺𑀧𑀻𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, ‘‘𑀢𑀢𑀺𑀬𑁂𑀦𑀸’’𑀢𑀺 𑀧𑀦 𑀯𑀼𑀢𑁆𑀢𑀁. 𑀪𑀯𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄 𑀘 𑀘𑀢𑀼𑀢𑁆𑀣𑁂𑀦 𑀧𑀳𑀻𑀬𑀢𑀺. 𑀇𑀫𑁂𑀲𑀜𑁆𑀘 𑀓𑀸𑀫𑀸𑀲𑀯𑀪𑀯𑀸𑀲𑀯𑀸𑀦𑀁 𑀮𑁄𑀪𑀲𑀪𑀸𑀯𑀢𑁆𑀢𑀸 𑀲𑀪𑀸𑀯𑀢𑁄 𑀢𑀬𑁄 𑀥𑀫𑁆𑀫𑀸 𑀯𑀺𑀪𑀸𑀕𑀢𑁄 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀦𑀸𑀫 𑀚𑀸𑀢𑀸. 𑀇𑀫𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀦𑁄 𑀆𑀲𑀯𑀸 𑀦𑀸𑀫. 𑀆𑀲𑀯𑀤𑀼𑀓𑀁 𑀧𑀞𑀫𑀁.

𑀅𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑀸, 𑀲𑀩𑁆𑀩𑁂 𑀮𑁄𑀓𑀺𑀬𑀥𑀫𑁆𑀫𑀸. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀸 𑀦𑀢𑁆𑀣𑀺 𑀏𑀢𑁂𑀲𑀁 𑀆𑀲𑀯𑀸𑀢𑀺 𑀅𑀦𑀸𑀲𑀯𑀸, 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀯. 𑀘𑁂𑀢𑀲𑀺𑀓𑀸 𑀧𑀦𑁂𑀢𑁆𑀣 𑀮𑁄𑀓𑀺𑀬𑀤𑀼𑀓𑁂 𑀯𑀼𑀢𑁆𑀢𑀲𑀤𑀺𑀲𑀸𑀯. 𑀲𑀸𑀲𑀯𑀤𑀼𑀓𑀁 𑀤𑀼𑀢𑀺𑀬𑀁.

𑀢𑀢𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀤𑀼𑀓𑀸𑀦𑀁 𑀧𑀤𑀢𑁆𑀣𑁄 𑀯𑀼𑀢𑁆𑀢𑀦𑀬𑁄𑀯. 𑀲𑁂𑀲𑀫𑁂𑀢𑁆𑀣 𑀳𑁂𑀢𑀼𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 ‘‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺, 𑀅𑀳𑁂𑀢𑀼𑀓𑀸𑀧𑀻’’𑀢𑀺 𑀅𑀬𑀁 𑀑𑀲𑀸𑀦𑀤𑀼𑀓𑁄 𑀧𑀞𑀫𑀤𑀼𑀓𑁂 𑀤𑀼𑀢𑀺𑀬𑀧𑀤𑀁 𑀤𑀼𑀢𑀺𑀬𑀤𑀼𑀓𑁂𑀦 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀏𑀯𑀫𑀺𑀥 ‘‘𑀦𑁄 𑀆𑀲𑀯𑀸 𑀔𑁄 𑀧𑀦 𑀥𑀫𑁆𑀫𑀸 𑀲𑀸𑀲𑀯𑀸𑀧𑀺, 𑀅𑀦𑀸𑀲𑀯𑀸𑀧𑀻’’𑀢𑀺 𑀦 𑀯𑀼𑀢𑁆𑀢𑁄. 𑀅𑀬𑀜𑁆𑀘 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀇𑀳 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀜𑁆𑀜𑁄𑀚𑀦𑀕𑁄𑀘𑁆𑀙𑀓𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁.

𑀢𑀢𑁆𑀣 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀤𑁄𑀲𑀫𑁄𑀳𑀫𑀽𑀮𑀘𑀺𑀢𑁆𑀢𑁂𑀲𑀼 𑀫𑁄𑀳𑁄, 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀫𑁄𑀳𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀅𑀓𑀼𑀲𑀮𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸𑀯, 𑀫𑁄𑀳𑁄 𑀧𑀦 𑀢𑀺𑀚𑀸𑀢𑀺𑀓𑁄 𑀘 𑀤𑁆𑀯𑀺𑀥𑀸𑀧𑀺 𑀳𑁄𑀢𑀺, 𑀲𑁂𑀲𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀏𑀯𑀸𑀢𑀺. 𑀢𑀢𑀺𑀬𑀁.

𑀘𑀢𑁆𑀢𑀸𑀭𑁄 𑀆𑀲𑀯𑀸 𑀆𑀲𑀯𑀸 𑀘𑁂𑀯 𑀲𑀸𑀲𑀯𑀸 𑀘 𑀦𑀸𑀫. 𑀢𑀤𑀯𑀲𑁂𑀲𑀸 𑀮𑁄𑀓𑀺𑀬𑀥𑀫𑁆𑀫𑀸 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀦𑀸𑀫. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀆𑀲𑀯𑀸𑀢𑀺 𑀯𑀼𑀢𑁆𑀢𑁂𑀳𑀺 𑀲𑁂𑀲𑀸 𑀅𑀓𑀼𑀲𑀮𑀸, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀘 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀏𑀯, 𑀲𑁂𑀲𑀸 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘. 𑀘𑀢𑀼𑀢𑁆𑀣𑀁.

𑀬𑁂 𑀧𑀦 𑀮𑁄𑀪𑀫𑀽𑀮𑁂𑀲𑀼 𑀮𑁄𑀪𑀫𑁄𑀳𑀸, 𑀮𑁄𑀪𑀤𑀺𑀝𑁆𑀞𑀺𑀫𑁄𑀳𑁄 𑀘𑀸𑀢𑀺 𑀤𑁆𑀯𑁂 𑀢𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦𑀸𑀫. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑁂𑀯 𑀆𑀲𑀯𑀯𑀚𑁆𑀚𑀺𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀦𑀸𑀫. 𑀇𑀥 𑀧𑀦 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀆𑀲𑀯𑀯𑀚𑁆𑀚𑀺𑀢𑀸 𑀅𑀓𑀼𑀲𑀮𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀏𑀯, 𑀫𑁄𑀳𑁄 𑀲𑀺𑀬𑀸 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄, 𑀢𑀺𑀚𑀸𑀢𑀺𑀓𑀸 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀦 𑀯𑀢𑁆𑀢𑀩𑁆𑀩𑀸𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀜𑁆𑀘𑀫𑀁.

𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀸𑀲𑀯𑀸 𑀦𑀸𑀫. 𑀇𑀥 𑀧𑀦 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸𑀯. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸 𑀏𑀯, 𑀫𑁄𑀳𑁄 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘, 𑀲𑁂𑀲𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀢𑀺𑀚𑀸𑀢𑀺𑀓𑀸 𑀤𑁆𑀯𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸𑀯, 𑀫𑁄𑀳𑀯𑀚𑁆𑀚𑀺𑀢𑀸 𑀧𑀦 𑀅𑀓𑀼𑀲𑀮𑀸 𑀦 𑀯𑀢𑁆𑀢𑀩𑁆𑀩𑀸𑀯. 𑀙𑀝𑁆𑀞𑀁.

𑀆𑀲𑀯𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑁂 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀲𑀁𑀬𑁄𑀚𑀦𑀸.

𑀢𑀢𑁆𑀣 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀪𑀯𑀭𑀸𑀕𑀧𑀝𑀺𑀖𑀫𑀸𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀦𑁆𑀢𑀺 𑀇𑀫𑁂 𑀤𑀲 𑀥𑀫𑁆𑀫𑀸 𑀲𑀁𑀬𑁄𑀚𑀦𑀸 𑀦𑀸𑀫. 𑀢𑁂𑀲𑀼 𑀓𑀸𑀫𑀪𑀯𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀸𑀦𑀺 𑀆𑀲𑀯𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑀦𑀬𑀸𑀦𑁂𑀯. ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀺, 𑀧𑀺𑀬𑀲𑁆𑀲 𑀫𑁂 𑀅𑀦𑀢𑁆𑀣𑀁 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀢𑁆𑀣𑀁 𑀅𑀘𑀭𑀺, 𑀘𑀭𑀢𑀺, 𑀘𑀭𑀺𑀲𑁆𑀲𑀢𑀻’’𑀢𑀺 (𑀥. 𑀲. 𑁧𑁦𑁬𑁬) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺 𑀲𑀢𑁆𑀢𑁂𑀲𑀼, 𑀅𑀝𑁆𑀞𑀸𑀦𑀓𑁄𑀧𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀩𑁆𑀩𑁄𑀧𑀺 𑀤𑁄𑀲𑁄 𑀧𑀝𑀺𑀖𑀲𑀁𑀬𑁄𑀚𑀦𑀁 𑀦𑀸𑀫.

‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀺, 𑀲𑀤𑀺𑀲𑁄𑀳𑀫𑀲𑁆𑀫𑀺, 𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀏𑀯𑀁 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑁄 𑀲𑀩𑁆𑀩𑁄 𑀫𑀸𑀦𑁄 𑀫𑀸𑀦𑀲𑀁𑀬𑁄𑀚𑀦𑀁 𑀦𑀸𑀫. 𑀢𑀢𑁆𑀣 𑀲𑁂𑀬𑁆𑀬𑀲𑁆𑀲𑁂𑀯 𑀲𑀢𑁄 𑀧𑀼𑀕𑁆𑀕𑀮𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀺, 𑀲𑀤𑀺𑀲𑁄, 𑀳𑀻𑀦𑁄’’𑀢𑀺 𑀘 𑀢𑀺𑀥𑀸 𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀲𑀤𑀺𑀲𑀳𑀻𑀦𑀸𑀦𑀫𑁆𑀧𑀺. 𑀢𑀢𑁆𑀣 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄. 𑀢𑀣𑀸 𑀲𑀤𑀺𑀲𑀲𑁆𑀲 𑀲𑀤𑀺𑀲𑀫𑀸𑀦𑁄, 𑀳𑀻𑀦𑀲𑁆𑀲 𑀳𑀻𑀦𑀫𑀸𑀦𑁄 𑀘. 𑀢𑀺𑀡𑁆𑀡𑀫𑁆𑀧𑀺 𑀇𑀢𑀭𑁂 𑀤𑁆𑀯𑁂 𑀤𑁆𑀯𑁂 𑀫𑀸𑀦𑀸 𑀅𑀬𑀸𑀣𑀸𑀯𑀫𑀸𑀦𑀸𑀢𑀺 𑀜𑀸𑀢𑀩𑁆𑀩𑀸.

𑀲𑀢𑁆𑀣𑀼𑀥𑀫𑁆𑀫𑀲𑀗𑁆𑀖𑀲𑀺𑀓𑁆𑀔𑀸𑀲𑀼, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀢𑀤𑀼𑀪𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀘 𑀓𑀗𑁆𑀔𑀢𑀸𑀯𑀲𑁂𑀦 𑀧𑀯𑀢𑁆𑀢𑀸 𑀲𑀩𑁆𑀩𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁 𑀦𑀸𑀫.

𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀳𑀺 𑀲𑀼𑀤𑁆𑀥𑀻𑀢𑀺 𑀕𑀳𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀏𑀯 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀁 𑀦𑀸𑀫.

𑀢𑀤𑀯𑀲𑁂𑀲𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀤𑀻𑀲𑀼 𑀅𑀲𑀳𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀇𑀲𑁆𑀲𑀸 𑀇𑀲𑁆𑀲𑀸𑀲𑀁𑀬𑁄𑀚𑀦𑀁 𑀦𑀸𑀫. 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀓𑀼𑀮𑀮𑀸𑀪𑀯𑀡𑁆𑀡𑀥𑀫𑁆𑀫𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀫𑀘𑁆𑀙𑀭𑀺𑀬𑀁 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁 𑀦𑀸𑀫. 𑀲𑀓𑀮𑀸𑀭𑀸𑀫𑁂𑀧𑀺 𑀳𑀺 𑀧𑀭𑀺𑀯𑁂𑀡𑁄𑀯𑀭𑀓𑀸𑀤𑀻𑀲𑀼 𑀯𑀸 𑀯𑀲𑀦𑁆𑀢𑁄 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀯𑀢𑁆𑀢𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀁 𑀦 𑀇𑀘𑁆𑀙𑀢𑀺, 𑀆𑀕𑀢𑀲𑁆𑀲𑀸𑀧𑀺 𑀔𑀺𑀧𑁆𑀧𑀁 𑀕𑀫𑀦𑀜𑁆𑀜𑁂𑀯 𑀇𑀘𑁆𑀙𑀢𑀺, 𑀇𑀤𑀁 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀦𑀸𑀫. 𑀪𑀡𑁆𑀟𑀦𑀓𑀸𑀭𑀓𑀸𑀤𑀻𑀦𑀁 𑀧𑀦 𑀢𑀢𑁆𑀣 𑀯𑀸𑀲𑀁 𑀅𑀦𑀺𑀘𑁆𑀙𑀢𑁄 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦 𑀳𑁄𑀢𑀺.

𑀅𑀢𑁆𑀢𑀦𑁄 𑀧𑀦 𑀉𑀧𑀝𑁆𑀞𑀸𑀓𑀓𑀼𑀮𑁂 𑀯𑀸 𑀜𑀸𑀢𑀺𑀓𑀼𑀮𑁂 𑀯𑀸 𑀅𑀜𑁆𑀜𑀲𑁆𑀲 𑀧𑁂𑀲𑀮𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀅𑀦𑀺𑀘𑁆𑀙𑀢𑁄 𑀓𑀼𑀮𑀫𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀧𑀸𑀧𑀧𑀼𑀕𑁆𑀕𑀮𑀲𑁆𑀲 𑀅𑀦𑀺𑀘𑁆𑀙𑀢𑁄 𑀧𑀦 𑀦 𑀳𑁄𑀢𑀺. 𑀲𑁄 𑀳𑀺 𑀢𑁂𑀲𑀁 𑀧𑀲𑀸𑀤𑀪𑁂𑀤𑀸𑀬 𑀧𑀝𑀺𑀧𑀚𑁆𑀚𑀢𑀻𑀢𑀺.

𑀅𑀢𑁆𑀢𑀦𑀸 𑀮𑀪𑀦𑀝𑁆𑀞𑀸𑀦𑁂 𑀘𑀢𑀼𑀧𑀘𑁆𑀘𑀬𑀁 𑀮𑀪𑀦𑁆𑀢𑁂 𑀲𑀻𑀮𑀯𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀫𑀸 𑀮𑀪𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀮𑀸𑀪𑀫𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀬𑁄 𑀧𑀦 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺, 𑀧𑀽𑀢𑀺𑀪𑀸𑀯𑀫𑁆𑀧𑀺 𑀕𑀘𑁆𑀙𑀦𑁆𑀢𑀁 𑀅𑀜𑁆𑀜𑀲𑁆𑀲 𑀦 𑀤𑁂𑀢𑀺, 𑀢𑀁 𑀮𑀪𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀇𑀫𑀁 𑀅𑀜𑁆𑀜𑁄 𑀲𑀻𑀮𑀯𑀸 𑀮𑀪𑁂𑀬𑁆𑀬, 𑀧𑀭𑀺𑀪𑁄𑀕𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀫𑀘𑁆𑀙𑀭𑀺𑀬𑀁 𑀦𑀸𑀫 𑀦𑀢𑁆𑀣𑀺.

𑀯𑀡𑁆𑀡𑁄 𑀦𑀸𑀫 𑀅𑀢𑁆𑀢𑀦𑀸 𑀲𑀤𑀺𑀲𑁄 𑀲𑀭𑀻𑀭𑀯𑀡𑁆𑀡𑁄𑀧𑀺 𑀕𑀼𑀡𑀯𑀡𑁆𑀡𑁄𑀧𑀺. 𑀢𑀢𑁆𑀣 ‘‘𑀭𑀽𑀧𑀯𑀸 𑀧𑀸𑀲𑀸𑀤𑀺𑀓𑁄’’𑀢𑀺 𑀧𑀭𑀲𑁆𑀲 𑀲𑀭𑀻𑀭𑀯𑀡𑁆𑀡𑀁, ‘‘𑀲𑀻𑀮𑀯𑀸, 𑀥𑀼𑀢𑀯𑀸’’𑀢𑀺𑀆𑀤𑀺𑀦𑀸 𑀕𑀼𑀡𑀯𑀡𑁆𑀡𑀜𑁆𑀘 𑀅𑀢𑁆𑀢𑀦𑁄 𑀯𑀡𑁆𑀡𑀪𑀡𑀦𑀝𑁆𑀞𑀸𑀦𑁂 𑀯𑀼𑀘𑁆𑀘𑀫𑀸𑀦𑀁 𑀅𑀲𑀳𑀦𑁆𑀢𑀲𑁆𑀲 𑀤𑀼𑀯𑀺𑀥𑀁 𑀯𑀡𑁆𑀡𑀫𑀘𑁆𑀙𑀭𑀺𑀬𑀁 𑀦𑀸𑀫 𑀳𑁄𑀢𑀺, 𑀅𑀧𑁂𑀲𑀮𑀁 𑀧𑀦 𑀯𑀺𑀧𑀦𑁆𑀦𑀁 𑀧𑀲𑀁𑀲𑀺𑀢𑁆𑀯𑀸 𑀧𑀭𑀺𑀲𑀸𑀲𑀼 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀁 𑀤𑀺𑀲𑁆𑀯𑀸 𑀧𑀸𑀧𑀕𑀭𑀳𑀺𑀢𑀸𑀬 𑀅𑀲𑀳𑀦𑁆𑀢𑀲𑁆𑀲 𑀦 𑀳𑁄𑀢𑀺.

𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀬𑁂𑀯, 𑀦 𑀧𑀝𑀺𑀯𑁂𑀥𑁄 𑀅𑀭𑀺𑀬𑀸𑀦𑀁 𑀢𑀢𑁆𑀣 𑀫𑀘𑁆𑀙𑀭𑀺𑀬𑀸𑀪𑀸𑀯𑀸. 𑀧𑀭𑀺𑀬𑀢𑁆𑀢𑀺𑀁 𑀧𑀦 𑀕𑀼𑀴𑁆𑀳𑀕𑀦𑁆𑀣𑀁 𑀅𑀜𑁆𑀜𑁂𑀲𑀁 𑀅𑀓𑀣𑁂𑀢𑀼𑀓𑀸𑀫𑀲𑁆𑀲 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀦𑀸𑀫 𑀳𑁄𑀢𑀺, 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀧𑀦 𑀮𑁄𑀮𑀲𑁆𑀲, 𑀓𑀸𑀮𑁂𑀦 𑀲𑀫𑀡𑁄, 𑀓𑀸𑀮𑁂𑀦 𑀦𑀺𑀕𑀡𑁆𑀞𑀸𑀤𑀺 𑀘 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀲𑁆𑀲 𑀧𑀯𑁂𑀡𑀺𑀆𑀕𑀢𑀁 𑀢𑀦𑁆𑀢𑀺𑀁 ‘‘𑀲𑀡𑁆𑀳𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀆𑀮𑀼𑀴𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀲𑀫𑀬𑀁 𑀪𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀘 𑀦 𑀤𑁂𑀦𑁆𑀢𑀲𑁆𑀲, 𑀧𑀼𑀕𑁆𑀕𑀮𑀸𑀦𑀼𑀕𑁆𑀕𑀳𑁂𑀦 𑀯𑀸 𑀧𑀓𑀢𑀺𑀬𑀸 𑀲𑀞𑀲𑁆𑀲 𑀫𑀸𑀬𑀸𑀯𑀺𑀦𑁄 ‘‘𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀦 𑀤𑁂𑀦𑁆𑀢𑀲𑁆𑀲 𑀘 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀦 𑀳𑁄𑀢𑀺. 𑀬𑀣𑀸 𑀘 𑀪𑀺𑀓𑁆𑀔𑀽𑀦𑀁, 𑀏𑀯𑀁 𑀕𑀳𑀝𑁆𑀞𑀸𑀦𑀫𑁆𑀧𑀺 𑀧𑀜𑁆𑀘𑀯𑀺𑀥𑀁 𑀫𑀘𑁆𑀙𑀭𑀺𑀬𑀁 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀲𑀗𑁆𑀔𑁂𑀧𑀢𑁄 𑀧𑀦 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀁 𑀫𑀘𑁆𑀙𑀭𑀺𑀬𑀁 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀇𑀫𑁂𑀲𑀼 𑀘 𑀲𑀁𑀬𑁄𑀚𑀦𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀧𑀝𑀺𑀖𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀓𑀸𑀫𑀭𑀸𑀕𑁄 𑀘𑀢𑀽𑀳𑀺𑀧𑀻𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀢𑀢𑀺𑀬𑁂𑀦𑀸’’𑀢𑀺 𑀧𑀦 𑀯𑀼𑀢𑁆𑀢𑀁. 𑀫𑀸𑀦𑀪𑀯𑀭𑀸𑀕𑀅𑀯𑀺𑀚𑁆𑀚𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀢𑀢𑁆𑀣 𑀘 𑀅𑀬𑀸𑀣𑀸𑀯𑀫𑀸𑀦𑁄 𑀧𑀞𑀫𑀫𑀕𑁆𑀕𑁂𑀦 𑀧𑀳𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑁄, 𑀇𑀫𑁂𑀲𑀁 𑀓𑀸𑀫𑀭𑀸𑀕𑀪𑀯𑀭𑀸𑀕𑀸𑀦𑀁 𑀮𑁄𑀪𑀲𑀪𑀸𑀯𑀢𑁆𑀢𑀸 𑀤𑀺𑀝𑁆𑀞𑀺𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀪𑀸𑀯𑀢𑁆𑀢𑀸 𑀲𑀪𑀸𑀯𑀢𑁄 𑀅𑀝𑁆𑀞𑁂𑀯 𑀥𑀫𑁆𑀫𑀸 𑀤𑀲 𑀲𑀁𑀬𑁄𑀚𑀦𑀸 𑀦𑀸𑀫 𑀚𑀸𑀢𑀸. 𑀇𑀫𑁂 𑀤𑀲 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀦𑁄 𑀲𑀁𑀬𑁄𑀚𑀦𑀸 𑀦𑀸𑀫. 𑀲𑁂𑀲𑀁 𑀆𑀲𑀯𑀤𑀼𑀓𑀲𑀤𑀺𑀲𑀁. 𑀲𑀁𑀬𑁄𑀚𑀦𑀤𑀼𑀓𑀁 𑀧𑀞𑀫𑀁.

𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀲𑀁𑀬𑁄𑀚𑀦𑀲𑀁𑀯𑀟𑁆𑀠𑀦𑁂𑀦 𑀲𑀁𑀬𑁄𑀚𑀦𑀸𑀦𑀁 𑀳𑀺𑀢𑀸𑀢𑀺 𑀲𑀁𑀬𑁄𑀚𑀦𑀺𑀬𑀸, 𑀲𑀸𑀲𑀯𑀥𑀫𑁆𑀫𑀸 𑀏𑀯. 𑀢𑀣𑀸 𑀦𑀻𑀯𑀭𑀡𑀺𑀬𑀸𑀢𑀺 𑀏𑀢𑁆𑀣𑀸𑀧𑀺. 𑀦 𑀲𑀁𑀬𑁄𑀚𑀦𑀺𑀬𑀸 𑀅𑀲𑀁𑀬𑁄𑀚𑀦𑀺𑀬𑀸, 𑀅𑀦𑀸𑀲𑀯𑀸. 𑀲𑁂𑀲𑀁 𑀲𑀸𑀲𑀯𑀤𑀼𑀓𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀁.

𑀢𑀢𑀺𑀬𑀸𑀤𑀬𑁄𑀧𑀺 𑀆𑀲𑀯𑀕𑁄𑀘𑁆𑀙𑀓𑁂 𑀢𑀢𑀺𑀬𑀸𑀤𑀺𑀲𑀤𑀺𑀲𑀸 𑀏𑀯, 𑀯𑀺𑀲𑁂𑀲𑀫𑀢𑁆𑀢𑀫𑁂𑀯𑁂𑀢𑁆𑀣 𑀯𑀓𑁆𑀔𑀸𑀫. 𑀢𑀢𑁆𑀣 𑀳𑀺 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫, 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀫𑁄𑀳𑁄, 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀲𑁂𑀲𑀁 𑀲𑀫𑀫𑁂𑀯. 𑀢𑀢𑀺𑀬𑀁.

𑀤𑀲 𑀲𑀁𑀬𑁄𑀚𑀦𑀸𑀦𑀺 𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀺𑀬𑀸 𑀘 𑀦𑀸𑀫. 𑀢𑀤𑀯𑀲𑁂𑀲𑀮𑁄𑀓𑀺𑀬𑀥𑀫𑁆𑀫𑀸 𑀲𑀁𑀬𑁄𑀚𑀦𑀺𑀬𑀸 𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀸 𑀦𑀸𑀫. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀘𑀢𑀼𑀢𑁆𑀣𑀁.

𑀬𑁂 𑀧𑀦 𑀉𑀤𑁆𑀥𑀘𑁆𑀘𑀯𑀺𑀭𑀳𑀺𑀢𑁂𑀲𑀼 𑀏𑀓𑀸𑀤𑀲𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀫𑁄𑀳𑀸 𑀤𑁄𑀲𑀫𑁄𑀳𑀸 𑀤𑁄𑀲𑀇𑀲𑁆𑀲𑀸𑀫𑁄𑀳𑀸 𑀤𑁄𑀲𑀫𑀘𑁆𑀙𑀭𑀺𑀬𑀫𑁄𑀳𑀸 𑀮𑁄𑀪𑀫𑀸𑀦𑀫𑁄𑀳𑀸 𑀮𑁄𑀪𑀤𑀺𑀝𑁆𑀞𑀺𑀫𑁄𑀳𑀸 𑀘𑀸𑀢𑀺 𑀤𑁆𑀯𑁂 𑀢𑀬𑁄 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦𑀸𑀫. 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑁂𑀯 𑀲𑀁𑀬𑁄𑀚𑀦𑀯𑀚𑁆𑀚𑀺𑀢𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀸 𑀦𑀸𑀫. 𑀲𑁂𑀲𑀫𑀺𑀥 𑀅𑀦𑀦𑁆𑀢𑀭𑀤𑀼𑀓𑀜𑁆𑀘 𑀆𑀲𑀯𑀕𑁄𑀘𑁆𑀙𑀓𑁂 𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀲𑀤𑀺𑀲𑀫𑁂𑀯. 𑀓𑁂𑀯𑀮𑀁 𑀆𑀲𑀯𑀧𑀤𑀝𑁆𑀞𑀸𑀦𑁂 𑀲𑀁𑀬𑁄𑀚𑀦𑀧𑀤𑀫𑁂𑀯 𑀯𑀺𑀲𑁂𑀲𑁄. 𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀸𑀦𑀺.

𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀕𑀦𑁆𑀣𑀕𑁄𑀘𑁆𑀙𑀓𑁂 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀕𑀦𑁆𑀣𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀕𑀦𑁆𑀣𑀸. 𑀢𑀢𑁄 𑀅𑀜𑁆𑀜𑁂 𑀦𑁄 𑀕𑀦𑁆𑀣𑀸.

𑀢𑀢𑁆𑀣 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀕𑀦𑁆𑀣𑀸 𑀦𑀸𑀫. 𑀢𑀢𑁆𑀣 𑀅𑀪𑀺𑀚𑁆𑀛𑀸 𑀏𑀯 𑀦𑀸𑀫𑀓𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀕𑀦𑁆𑀣𑁂𑀢𑀻𑀢𑀺 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑀺𑀲𑀦𑀢𑁄 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀯𑀺𑀭𑀳𑀺𑀢𑀸 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀦𑀸𑀫. 𑀲𑁂𑀲𑀸 𑀯𑀼𑀢𑁆𑀢𑀢𑁆𑀣𑀸𑀯. 𑀇𑀫𑁂𑀲𑀼 𑀘 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀕𑀦𑁆𑀣𑀸 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀩𑁆𑀬𑀸𑀧𑀸𑀤𑁄 𑀢𑀢𑀺𑀬𑁂𑀦, 𑀅𑀪𑀺𑀚𑁆𑀛𑀸 𑀘𑀢𑀽𑀳𑀺𑀧𑀺. 𑀇𑀫𑁂 𑀘 𑀲𑀪𑀸𑀯𑀢𑁄 𑀢𑀬𑁄 𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑀦𑀸𑀫 𑀚𑀸𑀢𑀸. 𑀇𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀦𑁄 𑀕𑀦𑁆𑀣𑀸 𑀦𑀸𑀫. 𑀕𑀦𑁆𑀣𑀤𑀼𑀓𑀁 𑀧𑀞𑀫𑀁.

𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀦𑁆𑀣𑁂𑀳𑀺 𑀕𑀦𑁆𑀣𑀺𑀢𑀩𑁆𑀩𑀸𑀢𑀺 𑀕𑀦𑁆𑀣𑀦𑀺𑀬𑀸. 𑀦 𑀕𑀦𑁆𑀣𑀦𑀺𑀬𑀸 𑀅𑀕𑀦𑁆𑀣𑀦𑀺𑀬𑀸. 𑀲𑁂𑀲𑀁 𑀲𑀸𑀲𑀯𑀤𑀼𑀓𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀁.

𑀫𑁄𑀳𑀫𑀽𑀮𑀯𑀚𑁆𑀚𑀺𑀢𑀸𑀦𑀺 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀮𑁄𑀪𑀁, 𑀤𑁄𑀲𑀫𑀽𑀮𑁂𑀲𑀼 𑀘 𑀤𑁄𑀲𑀁 𑀞𑀧𑁂𑀢𑁆𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀬𑀣𑀸𑀯𑀼𑀢𑁆𑀢𑁄 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑀫𑀽𑀮𑀸𑀦𑀺, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺 𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀤𑀺𑀝𑁆𑀞𑀺𑀫𑀸𑀦𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀣𑀺𑀦𑀫𑀺𑀤𑁆𑀥𑀸𑀦𑀺 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀏𑀯. 𑀤𑁄𑀲𑀯𑀺𑀘𑀺𑀓𑀺𑀘𑁆𑀙𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀏𑀯, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑀕𑀦𑁆𑀣𑀸 𑀘𑁂𑀯 𑀕𑀦𑁆𑀣𑀦𑀺𑀬𑀸 𑀘 𑀦𑀸𑀫. 𑀢𑀤𑀯𑀲𑁂𑀲𑀸 𑀮𑁄𑀓𑀺𑀬𑀸 𑀕𑀦𑁆𑀣𑀦𑀺𑀬𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸 𑀦𑀸𑀫. 𑀢𑀣𑀸 𑀘𑁂𑀢𑀲𑀺𑀓𑁂𑀲𑀼 𑀕𑀦𑁆𑀣𑀯𑀚𑁆𑀚𑀺𑀢𑀸 𑀅𑀓𑀼𑀲𑀮𑀸, 𑀅𑀧𑁆𑀧𑀫𑀜𑁆𑀜𑀸 𑀘, 𑀲𑁂𑀲𑀸 𑀘𑁂𑀢𑀲𑀺𑀓𑀸 𑀧𑀦 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘, 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑀢𑀼𑀢𑁆𑀣𑀁.

𑀤𑀺𑀝𑁆𑀞𑀺 𑀕𑀦𑁆𑀣𑀸𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦𑀸𑀫. 𑀮𑁄𑀪𑁄 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑁄 𑀘, 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀕𑀦𑁆𑀣𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸 𑀦𑀸𑀫. 𑀇𑀥 𑀧𑀦 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀫𑀸𑀦𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀣𑀺𑀦𑀫𑀺𑀤𑁆𑀥𑀸𑀦𑀺 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸 𑀏𑀯, 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀸𑀦𑀺 𑀢𑀺𑀚𑀸𑀢𑀺𑀓𑀸 𑀘 𑀲𑀺𑀬𑀸, 𑀢𑀣𑀸 𑀦𑀯𑀢𑁆𑀢𑀩𑁆𑀩𑀸 𑀘, 𑀲𑁂𑀲𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀜𑁆𑀘𑀫𑀁.

𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀕𑀦𑁆𑀣𑀦𑀺𑀬𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀕𑀦𑁆𑀣𑀦𑀺𑀬𑀸 𑀦𑀸𑀫. 𑀇𑀥 𑀧𑀦 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀤𑁄𑀲𑁄 𑀯𑀺𑀘𑀺𑀓𑀺𑀘𑁆𑀙𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸 𑀕𑀦𑁆𑀣𑀦𑀺𑀬𑀸 𑀏𑀯, 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀮𑁄𑀪𑀸 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀸 𑀘, 𑀲𑁂𑀲𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀢𑀺𑀚𑀸𑀢𑀺𑀓𑀸 𑀧𑀦 𑀤𑁆𑀯𑀺𑀥𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀘, 𑀲𑁂𑀲𑀸 𑀅𑀓𑀼𑀲𑀮𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸 𑀘. 𑀙𑀝𑁆𑀞𑀁.

𑀕𑀦𑁆𑀣𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀑𑀖𑀬𑁄𑀕𑀕𑁄𑀘𑁆𑀙𑀓𑀸𑀦𑀺 𑀲𑀩𑁆𑀩𑀣𑀸 𑀆𑀲𑀯𑀕𑁄𑀘𑁆𑀙𑀓𑀲𑀤𑀺𑀲𑀸𑀦𑀺. 𑀧𑀤𑀢𑁆𑀣𑀫𑀢𑁆𑀢𑀫𑁂𑀯, 𑀳𑁂𑀢𑁆𑀣 𑀦𑀸𑀫𑀫𑀢𑁆𑀢𑀜𑁆𑀘 𑀯𑀺𑀲𑁂𑀲𑁄. 𑀢𑀢𑁆𑀣 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀦𑁆𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀑𑀖𑀸. 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀢𑀺𑀓𑁆𑀓𑀫𑀦𑀻𑀬𑀢𑁄 𑀑𑀖𑁂𑀳𑀺 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀢𑀺 𑀑𑀖𑀦𑀺𑀬𑀸. 𑀢𑀣𑀸 𑀬𑁄𑀕𑀦𑀺𑀬𑀸𑀢𑀺 𑀏𑀢𑁆𑀣𑀸𑀧𑀺. 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀦𑁆𑀢𑀻𑀢𑀺 𑀬𑁄𑀕𑀸. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀑𑀖𑀬𑁄𑀕𑀕𑁄𑀘𑁆𑀙𑀓𑀸𑀦𑀺 𑀦𑀺𑀝𑁆𑀞𑀺𑀢𑀸𑀦𑀺.

𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀘𑀺𑀢𑁆𑀢𑀁 𑀦𑀻𑀯𑀭𑀦𑁆𑀢𑀺 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻𑀢𑀺 𑀦𑀻𑀯𑀭𑀡𑀸. 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺 𑀇𑀫𑁂 𑀙 𑀦𑀻𑀯𑀭𑀡𑀸 𑀦𑀸𑀫. 𑀢𑀢𑁆𑀣 𑀣𑀺𑀦𑀦𑁆𑀢𑀺 𑀲𑀧𑁆𑀧𑀺𑀧𑀺𑀡𑁆𑀟𑁄 𑀯𑀺𑀬 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀘𑀺𑀢𑁆𑀢𑀲𑁆𑀲 𑀖𑀦𑀪𑀸𑀯𑁄, 𑀣𑀤𑁆𑀥𑀢𑀸𑀢𑀺 𑀅𑀢𑁆𑀣𑁄. 𑀫𑁂𑀥𑀢𑀻𑀢𑀺 𑀫𑀺𑀤𑁆𑀥𑀁, 𑀅𑀓𑀫𑁆𑀫𑀜𑁆𑀜𑀪𑀸𑀯𑁄, 𑀧𑀘𑀮𑀸𑀬𑀺𑀓𑀪𑀸𑀯𑀓𑀭𑁄𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀤𑁆𑀤𑀸𑀬 𑀧𑀼𑀩𑁆𑀩𑀪𑀸𑀕𑁂, 𑀅𑀧𑀭𑀪𑀸𑀕𑁂 𑀘 𑀧𑀘𑀮𑀸𑀬𑀦𑀳𑁂𑀢𑀼𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀤𑁆𑀤𑁄𑀓𑁆𑀓𑀫𑀦𑀓𑀸𑀮𑁂. 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀳𑀺 𑀓𑀭𑀚𑀓𑀸𑀬𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁂𑀦 𑀅𑀲𑀫𑁆𑀫𑀺𑀲𑁆𑀲𑀪𑀯𑀗𑁆𑀕𑀲𑀦𑁆𑀢𑀢𑀺𑀯𑀲𑁂𑀦 𑀦𑀺𑀤𑁆𑀤𑁄𑀓𑁆𑀓𑀫𑀦𑀁 𑀳𑁄𑀢𑀺, 𑀢𑀁 𑀧𑀦 𑀢𑁂𑀲𑀁 𑀣𑀺𑀦𑀫𑀺𑀤𑁆𑀥𑀳𑁂𑀢𑀼𑀓𑀁 𑀦 𑀳𑁄𑀢𑀺, 𑀇𑀢𑀭𑁂𑀲𑀫𑁂𑀯 𑀳𑁄𑀢𑀺.

𑀓𑁂𑀘𑀺 𑀧𑀦 𑀭𑀽𑀧𑀫𑁂𑀯 ‘‘𑀫𑀺𑀤𑁆𑀥’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑁄𑀕𑀯𑀘𑀦𑀢𑁄 𑀅𑀭𑀽𑀧𑀫𑁂𑀯. 𑀅𑀓𑀼𑀲𑀮𑀜𑁆𑀘 ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲 𑀧𑀳𑀻𑀦𑀢𑁆𑀢𑀸’’𑀢𑀺𑀆𑀤𑀺𑀧𑀳𑀸𑀦𑀯𑀘𑀦𑀢𑁄. 𑀅𑀓𑀼𑀲𑀮𑀸 𑀏𑀯 𑀳𑀺 𑀧𑀳𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀆𑀭𑀼𑀧𑁆𑀧𑁂𑀧𑀺 𑀘𑁂𑀢𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀻𑀯𑀭𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀦𑀻𑀯𑀭𑀡’’𑀦𑁆𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. ‘‘𑀲𑁄𑀧𑁆𑀧𑀁 𑀧𑀘𑀮𑀸𑀬𑀺𑀓𑀸’’𑀢𑀺 (𑀥. 𑀲. 𑁧𑁧𑁬𑁩) 𑀧𑀤𑀪𑀸𑀚𑀦𑀻𑀬𑁂 𑀧𑀦𑀲𑁆𑀲 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀣𑀺𑀦𑀁 𑀫𑀺𑀤𑁆𑀥𑀜𑁆𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀦𑀻𑀯𑀭𑀡𑀝𑁆𑀞𑀸𑀦𑁂 𑀏𑀓𑀦𑀻𑀯𑀭𑀡𑀁 𑀯𑀼𑀢𑁆𑀢𑀁, 𑀢𑀣𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀜𑁆𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁. 𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀓𑀢𑀁 𑀧𑀸𑀧’’𑀦𑁆𑀢𑀺𑀆𑀤𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑀻𑀬𑁂 ‘‘𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄’’𑀢𑀺 𑀘 𑀯𑀼𑀢𑁆𑀢𑀁. ‘‘𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸’’𑀢𑀺𑀆𑀤𑀺 𑀧𑀦 𑀓𑀼𑀓𑁆𑀓𑀼𑀘𑁆𑀘𑀫𑀽𑀮𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁𑀲𑀜𑁆𑀜𑀺𑀢𑀸𑀬 𑀳𑀺 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀧𑀘𑁆𑀙𑀸 ‘‘𑀤𑀼𑀝𑁆𑀞𑀼 𑀫𑀬𑀸 𑀓𑀢’’𑀦𑁆𑀢𑀺 𑀲𑀼𑀤𑀺𑀦𑁆𑀦𑀸𑀤𑀻𑀦𑀁 𑀯𑀺𑀬 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀁 𑀧𑀦 𑀯𑀺𑀦𑀬𑁂 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄…𑀧𑁂… 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀦 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺 (𑀧𑀸𑀘𑀺. 𑁨𑁦𑁪) 𑀓𑀼𑀓𑁆𑀓𑀼𑀘𑁆𑀘𑀁 𑀆𑀕𑀢𑀁, 𑀢𑀁 𑀦𑀻𑀯𑀭𑀡𑀓𑀼𑀓𑁆𑀓𑀼𑀘𑁆𑀘𑀁. 𑀦 𑀳𑀺 𑀅𑀭𑀳𑀢𑁄 𑀦𑀻𑀯𑀭𑀡𑀁 𑀅𑀢𑁆𑀣𑀺, 𑀦𑀻𑀯𑀭𑀡𑀯𑀢𑀺𑀭𑀽𑀧𑀓𑀁 𑀧𑀦 ‘‘𑀓𑀧𑁆𑀧𑀢𑀺, 𑀦 𑀓𑀧𑁆𑀧𑀢𑀻’’𑀢𑀺 𑀯𑀻𑀫𑀁𑀲𑀦𑀲𑀗𑁆𑀔𑀸𑀢𑀁 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀦𑀻𑀯𑀭𑀡𑀸𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑀺 𑀏𑀯. 𑀇𑀫𑁂𑀲𑀼 𑀘 𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀩𑁆𑀬𑀸𑀧𑀸𑀤𑁄 𑀢𑀢𑀺𑀬𑁂𑀦, 𑀣𑀺𑀦𑀫𑀺𑀤𑁆𑀥𑀼𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸 𑀘𑀢𑀼𑀢𑁆𑀣𑁂𑀦, 𑀓𑀸𑀫𑀘𑁆𑀙𑀦𑁆𑀤𑁄 𑀘𑀢𑀽𑀳𑀺𑀧𑀻𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀢𑀢𑀺𑀬𑁂𑀦𑀸’’𑀢𑀺 𑀧𑀦 𑀯𑀼𑀢𑁆𑀢𑀁. 𑀇𑀫𑁂 𑀘 𑀲𑀪𑀸𑀯𑀢𑁄 𑀅𑀝𑁆𑀞 𑀥𑀫𑁆𑀫𑀸 𑀙 𑀦𑀻𑀯𑀭𑀡𑀸 𑀦𑀸𑀫 𑀚𑀸𑀢𑀸, 𑀇𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀦𑁄 𑀦𑀻𑀯𑀭𑀡𑀸 𑀦𑀸𑀫. 𑀦𑀻𑀯𑀭𑀡𑀤𑀼𑀓𑀁 𑀧𑀞𑀫𑀁.

𑀤𑀼𑀢𑀺𑀬𑀁 𑀲𑀸𑀲𑀯𑀤𑀼𑀓𑀲𑀤𑀺𑀲𑀫𑁂𑀯. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀅𑀓𑀼𑀲𑀮𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸𑀯, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀯, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑀙 𑀦𑀻𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀺𑀬𑀸 𑀘 𑀦𑀸𑀫. 𑀲𑁂𑀲𑀸 𑀮𑁄𑀓𑀺𑀬𑀸 𑀦𑀻𑀯𑀭𑀡𑀺𑀬𑀸 𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀆𑀲𑀯𑀕𑁄𑀘𑁆𑀙𑀓𑁂 𑀘𑀢𑀼𑀢𑁆𑀣𑀲𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀁.

𑀙 𑀦𑀻𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦𑀸𑀫. 𑀢𑀤𑀜𑁆𑀜𑁂 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀸 𑀦𑀸𑀫. 𑀢𑀣𑀸 𑀘𑁂𑀢𑀲𑀺𑀓𑁂𑀲𑀼 𑀦𑀻𑀯𑀭𑀡𑀯𑀺𑀭𑀳𑀺𑀢𑀸 𑀅𑀓𑀼𑀲𑀮𑀸, 𑀢𑀺𑀚𑀸𑀢𑀺𑀓𑀸 𑀧𑀦 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀦 𑀯𑀢𑁆𑀢𑀩𑁆𑀩𑀸𑀯. 𑀇𑀥 𑀧𑀦 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀩𑁆𑀩𑁂 𑀦 𑀯𑀢𑁆𑀢𑀩𑁆𑀩𑀸. 𑀧𑀜𑁆𑀘𑀫𑀁.

𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀻𑀯𑀭𑀡𑀺𑀬𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀻𑀯𑀭𑀡𑀺𑀬𑀸 𑀦𑀸𑀫. 𑀇𑀥 𑀧𑀦 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀻𑀯𑀭𑀡𑀺𑀬𑀸𑀯, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺, 𑀢𑀺𑀚𑀸𑀢𑀺𑀓𑀸 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘, 𑀅𑀓𑀼𑀲𑀮𑀸 𑀧𑀦 𑀦 𑀯𑀢𑁆𑀢𑀩𑁆𑀩𑀸𑀯. 𑀙𑀝𑁆𑀞𑀁.

𑀦𑀻𑀯𑀭𑀡𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑁂 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀁 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀭𑀢𑁄 𑀆𑀫𑀲𑀦𑁆𑀢𑀻𑀢𑀺 𑀧𑀭𑀸𑀫𑀸𑀲𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀢𑀤𑀜𑁆𑀜𑁂 𑀲𑀩𑁆𑀩𑁂 𑀥𑀫𑁆𑀫𑀸 𑀦𑁄 𑀧𑀭𑀸𑀫𑀸𑀲𑀸 𑀦𑀸𑀫. 𑀧𑀭𑀸𑀫𑀸𑀲𑀤𑀼𑀓𑀁 𑀧𑀞𑀫𑀁.

𑀧𑀭𑀸𑀫𑀸𑀲𑁂𑀳𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀭𑀸𑀫𑀝𑁆𑀞𑀢𑁆𑀢𑀸 𑀧𑀭𑀸𑀫𑀝𑁆𑀞𑀸. 𑀲𑁂𑀲𑀁 𑀆𑀲𑀯𑀤𑀼𑀓𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀁.

𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀯𑀺𑀭𑀳𑀺𑀢𑀸 𑀥𑀫𑁆𑀫𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀇𑀥 𑀧𑀦 𑀤𑀺𑀝𑁆𑀞𑀺 𑀦 𑀯𑀢𑁆𑀢𑀩𑁆𑀩𑀸, 𑀲𑁂𑀲𑀘𑁂𑀢𑀲𑀺𑀓𑁂𑀲𑀼 𑀧𑀦 𑀫𑀸𑀦𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀏𑀯, 𑀲𑁂𑀲𑀸 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑀤𑀺𑀝𑁆𑀞𑀺 𑀏𑀯 𑀧𑀭𑀸𑀫𑀸𑀲𑀸 𑀘𑁂𑀯 𑀧𑀭𑀸𑀫𑀝𑁆𑀞𑀸 𑀘 𑀦𑀸𑀫. 𑀲𑁂𑀲𑀮𑁄𑀓𑀺𑀬𑀸 𑀧𑀭𑀸𑀫𑀝𑁆𑀞𑀸 𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑀸 𑀦𑀸𑀫. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀘𑀢𑀼𑀢𑁆𑀣𑀁.

𑀇𑀫𑀲𑁆𑀫𑀺𑀁 𑀧𑀦 𑀕𑁄𑀘𑁆𑀙𑀓𑁂 ‘‘𑀧𑀭𑀸𑀫𑀸𑀲𑀸 𑀘𑁂𑀯 𑀥𑀫𑁆𑀫𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺 𑀅𑀬𑀁 𑀤𑀼𑀓𑁄 𑀦 𑀮𑀩𑁆𑀪𑀢𑀺. 𑀦 𑀳𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀬𑀼𑀚𑁆𑀚𑀢𑀺. 𑀧𑀘𑁆𑀙𑀺𑀫𑀤𑀼𑀓𑁂 𑀮𑁄𑀓𑀼𑀢𑁆𑀢𑀭𑀯𑀚𑁆𑀚𑀺𑀢𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀧𑀭𑀸𑀫𑀝𑁆𑀞𑀸 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀧𑀭𑀸𑀫𑀝𑁆𑀞𑀸 𑀦𑀸𑀫. 𑀇𑀥 𑀧𑀦 𑀧𑀭𑀸𑀫𑀸𑀲𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀫𑀳𑀦𑁆𑀢𑀭𑀤𑀼𑀓𑁂𑀲𑀼 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀲𑀳 𑀆𑀭𑀫𑁆𑀫𑀡𑁂𑀦𑀸𑀢𑀺 𑀲𑀸𑀭𑀫𑁆𑀫𑀡𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸. 𑀦𑀢𑁆𑀣𑀺 𑀆𑀭𑀫𑁆𑀫𑀡𑀫𑁂𑀢𑁂𑀲𑀦𑁆𑀢𑀺 𑀅𑀦𑀸𑀭𑀫𑁆𑀫𑀡𑀸, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺. 𑀲𑀸𑀭𑀫𑁆𑀫𑀡𑀤𑀼𑀓𑀁.

𑀘𑀺𑀦𑁆𑀢𑀦𑀝𑁆𑀞𑁂𑀦 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀢𑀸𑀬 𑀯𑀸 𑀘𑀺𑀢𑁆𑀢𑀁. 𑀢𑀁 𑀳𑀺 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀤𑀺𑀪𑁂𑀤𑀢𑁄, 𑀅𑀢𑀻𑀢𑀸𑀤𑀺𑀪𑁂𑀤𑀢𑁄 𑀘 𑀅𑀢𑁆𑀢𑀦𑁄 𑀯𑀺𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀓𑀭𑀡𑀢𑀸𑀬 𑀯𑀸. 𑀮𑁄𑀓𑀲𑁆𑀫𑀺𑀁 𑀳𑀺 𑀘𑀺𑀢𑁆𑀢𑀓𑀫𑁆𑀫𑀢𑁄 𑀉𑀢𑁆𑀢𑀭𑀺𑀢𑀭𑀁 𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀺𑀫𑁆𑀧𑀺 𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢𑀁 𑀅𑀢𑀺𑀘𑀺𑀢𑁆𑀢𑀁 𑀳𑁄𑀢𑀺. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀮𑁄𑀓𑁂 𑀲𑀺𑀧𑁆𑀧𑀚𑀸𑀢𑀁, 𑀲𑀩𑁆𑀩𑀁 𑀢𑀁 𑀘𑀺𑀢𑁆𑀢𑁂𑀦𑁂𑀯 𑀓𑀭𑀻𑀬𑀢𑀺. 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀧𑁆𑀨𑀸𑀤𑀓𑀁 𑀘𑀺𑀢𑁆𑀢𑀫𑁆𑀧𑀺 𑀢𑀣𑁂𑀯 𑀘𑀺𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀘𑀺𑀦𑁆𑀢𑀺𑀢𑀲𑁆𑀲 𑀯𑀸 𑀅𑀦𑀯𑀲𑁂𑀲𑀲𑁆𑀲 𑀅𑀦𑀺𑀧𑁆𑀨𑀚𑁆𑀚𑀦𑀢𑁄 𑀢𑀢𑁄𑀧𑀺 𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀢𑀭𑀁, 𑀢𑀣𑀸 𑀬𑀤𑁂𑀢𑀁 𑀤𑁂𑀯𑀫𑀦𑀼𑀲𑁆𑀲𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀪𑁂𑀤𑀸𑀲𑀼 𑀕𑀢𑀻𑀲𑀼 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀦𑀸𑀦𑀢𑁆𑀢𑀁, 𑀢𑁂𑀦 𑀢𑀸𑀲𑀼 𑀕𑀢𑀻𑀲𑀼 𑀅𑀧𑀤𑀤𑁆𑀯𑀺𑀧𑀤𑀸𑀤𑀺𑀉𑀘𑁆𑀘𑀢𑁆𑀢𑀦𑀻𑀘𑀢𑁆𑀢𑀸𑀤𑀺𑀦𑀸𑀦𑀢𑁆𑀢𑀁, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀤𑀻𑀖𑀭𑀲𑁆𑀲𑀣𑀽𑀮𑀸𑀣𑀽𑀮𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀤𑀺𑀮𑀸𑀪𑀸𑀮𑀸𑀪𑀸𑀤𑀺 𑀘𑀸𑀢𑀺 𑀏𑀯𑀫𑀸𑀤𑀺 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁, 𑀩𑀳𑀺𑀤𑁆𑀥𑀸 𑀘 𑀧𑀣𑀯𑀻𑀧𑀩𑁆𑀩𑀢𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀤𑁂𑀯𑀩𑁆𑀭𑀳𑁆𑀫𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀪𑀽𑀢𑀁 𑀓𑀫𑁆𑀫𑀧𑀘𑁆𑀘𑀬𑀁 𑀘𑀺𑀢𑁆𑀢𑀁, 𑀢𑀫𑁆𑀧𑀺 𑀘𑀺𑀢𑁆𑀢𑁂𑀦𑁂𑀯 𑀓𑀢𑀁, 𑀢𑀢𑁄 𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀢𑀭𑀁 𑀘𑀺𑀦𑁆𑀢𑀺𑀢𑀦𑀺𑀬𑀸𑀫𑁂𑀦 𑀲𑀩𑁆𑀩𑀸𑀓𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀏𑀯𑀁 𑀘𑀺𑀦𑁆𑀢𑀦𑀝𑁆𑀞𑁂𑀦, 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀝𑁆𑀞𑁂𑀦, 𑀘𑀺𑀢𑁆𑀢𑀓𑀭𑀡𑀝𑁆𑀞𑁂𑀦 𑀘 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀺𑀜𑁆𑀜𑀸𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀤𑁂𑀯 𑀯𑀺𑀜𑁆𑀜𑀸𑀡𑀁 𑀘𑀺𑀢𑁆𑀢𑀁 𑀦𑀸𑀫. 𑀘𑁂𑀢𑀲𑀺𑀓𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦𑁄 𑀘𑀺𑀢𑁆𑀢𑀸 𑀦𑀸𑀫. 𑀘𑀺𑀢𑁆𑀢𑀤𑀼𑀓𑀁.

𑀅𑀯𑀺𑀧𑁆𑀧𑀬𑁄𑀕𑀯𑀲𑁂𑀦 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸 𑀘𑁂𑀢𑀲𑀺𑀓𑀸, 𑀨𑀲𑁆𑀲𑀸𑀤𑀬𑁄 𑀤𑁆𑀯𑀺𑀧𑀜𑁆𑀜𑀸𑀲 𑀥𑀫𑁆𑀫𑀸. 𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀅𑀘𑁂𑀢𑀲𑀺𑀓𑀸 𑀦𑀸𑀫. 𑀘𑁂𑀢𑀲𑀺𑀓𑀤𑀼𑀓𑀁.

𑀘𑁂𑀢𑀲𑀺𑀓𑀸 𑀏𑀯 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫, 𑀇𑀥 𑀧𑀦 𑀘𑀺𑀢𑁆𑀢𑀁 𑀦 𑀯𑀢𑁆𑀢𑀩𑁆𑀩𑀁. 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀁.

𑀦𑀺𑀭𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀢𑀸𑀬 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸𑀘𑀺𑀢𑁆𑀢𑁂𑀦 𑀲𑀁𑀲𑀝𑁆𑀞𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀸. 𑀏𑀓𑀢𑁄 𑀯𑀢𑁆𑀢𑀫𑀸𑀦𑀸𑀧𑀺 𑀦𑀺𑀭𑀦𑁆𑀢𑀭𑀪𑀸𑀯𑀁 𑀅𑀦𑀼𑀧𑀕𑀫𑀦𑀢𑀸𑀬 𑀘𑀺𑀢𑁆𑀢𑁂𑀦 𑀯𑀺𑀲𑀁𑀲𑀝𑁆𑀞𑀸𑀢𑀺 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀸. 𑀲𑁂𑀲𑀁 𑀅𑀦𑀦𑁆𑀢𑀭𑀤𑀼𑀓𑀲𑀤𑀺𑀲𑀫𑁂𑀯. 𑀘𑀺𑀢𑁆𑀢𑀲𑀁𑀲𑀝𑁆𑀞𑀤𑀼𑀓𑀁.

𑀲𑀫𑀼𑀝𑁆𑀞𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀘𑁂𑀢𑀲𑀺𑀓𑀸𑀦𑀺 𑀘𑁂𑀯 𑀘𑀺𑀢𑁆𑀢𑀚𑀭𑀽𑀧𑀓𑀮𑀸𑀧𑀸 𑀘. 𑀘𑀺𑀢𑁆𑀢𑀁, 𑀧𑀦 𑀅𑀘𑀺𑀢𑁆𑀢𑀚𑀭𑀽𑀧𑀓𑀮𑀸𑀧𑀸, 𑀦𑀺𑀩𑁆𑀩𑀸𑀦𑀜𑁆𑀘 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀤𑀼𑀓𑀁.

𑀲𑀳 𑀪𑀯𑀦𑁆𑀢𑀻𑀢𑀺 𑀲𑀳𑀪𑀼𑀦𑁄, 𑀘𑀺𑀢𑁆𑀢𑁂𑀦 𑀲𑀳𑀪𑀼𑀦𑁄 𑀘𑀺𑀢𑁆𑀢𑀲𑀳𑀪𑀼𑀦𑁄, 𑀘𑁂𑀢𑀲𑀺𑀓𑀸𑀦𑀺 𑀘𑁂𑀯 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀘. 𑀘𑀺𑀢𑁆𑀢𑀁, 𑀧𑀦 𑀯𑀺𑀜𑁆𑀜𑀢𑁆𑀢𑀺𑀯𑀚𑁆𑀚𑀺𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀦𑁄 𑀘𑀺𑀢𑁆𑀢𑀲𑀳𑀪𑀼𑀦𑁄 𑀦𑀸𑀫. 𑀘𑀺𑀢𑁆𑀢𑀲𑀳𑀪𑀼𑀤𑀼𑀓𑀁.

𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀺𑀦𑁄, 𑀓𑀺𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺? 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀲𑁂𑀲𑀁 𑀅𑀦𑀦𑁆𑀢𑀭𑀤𑀼𑀓𑀲𑀤𑀺𑀲𑀫𑁂𑀯. 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀤𑀼𑀓𑀁.

𑀇𑀢𑁄 𑀧𑀭𑁂 𑀧𑀦 𑀢𑀬𑁄 𑀤𑀼𑀓𑀸 𑀘𑁂𑀢𑀲𑀺𑀓𑀤𑀼𑀓𑀲𑀤𑀺𑀲𑀸𑀯, 𑀓𑁂𑀯𑀮𑀁 𑀧𑀤𑀢𑁆𑀣𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀢𑀢𑁆𑀣 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀏𑀯 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸. 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘 𑀘𑀺𑀢𑁆𑀢𑀲𑀳𑀪𑀼𑀦𑁄 𑀏𑀯 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄, 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀏𑀯 𑀘𑀸𑀢𑀺 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀢𑀤𑀦𑀦𑁆𑀢𑀭𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑀤𑀼𑀓𑁂 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀁 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀯𑀼𑀢𑁆𑀢𑀯𑀲𑁂𑀦 𑀅𑀚𑁆𑀛𑀢𑁆𑀢𑀸𑀯 𑀅𑀚𑁆𑀛𑀢𑁆𑀢𑀺𑀓𑀸. 𑀧𑀲𑀸𑀤𑀭𑀽𑀧𑀘𑀺𑀢𑁆𑀢𑀲𑀗𑁆𑀔𑀸𑀢𑀸𑀦𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀢𑀢𑁄 𑀩𑀳𑀺𑀪𑀽𑀢𑀸 𑀩𑀸𑀳𑀺𑀭𑀸. 𑀲𑁂𑀲𑀭𑀽𑀧𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸𑀦𑀺 𑀙 𑀩𑀸𑀳𑀺𑀭𑀸𑀬𑀢𑀦𑀸𑀦𑀺, 𑀇𑀥 𑀧𑀦 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀮𑀩𑁆𑀪𑀦𑁆𑀢𑀺. 𑀅𑀚𑁆𑀛𑀢𑁆𑀢𑀺𑀓𑀤𑀼𑀓𑀁.

𑀉𑀧𑀸𑀤𑀺𑀬𑀦𑁆𑀢𑁂𑀯 𑀪𑀽𑀢𑀸𑀦𑀺, 𑀦 𑀪𑀽𑀢𑀸 𑀯𑀺𑀬 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸, 𑀘𑀢𑀼𑀯𑀻𑀲𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀏𑀯. 𑀦 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀦𑁄 𑀉𑀧𑀸𑀤𑀸, 𑀘𑀢𑀼𑀫𑀳𑀸𑀪𑀽𑀢𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀺. 𑀉𑀧𑀸𑀤𑀸𑀤𑀼𑀓𑀁.

𑀤𑁆𑀯𑀢𑁆𑀢𑀺𑀁𑀲 𑀮𑁄𑀓𑀺𑀬𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀓𑀫𑁆𑀫𑀚𑀭𑀽𑀧𑀜𑁆𑀘 𑀉𑀧𑀸𑀤𑀺𑀦𑁆𑀦𑀸 𑀦𑀸𑀫. 𑀲𑁂𑀲𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀅𑀦𑀼𑀧𑀸𑀤𑀺𑀦𑁆𑀦𑀸 𑀦𑀸𑀫. 𑀲𑁂𑀲𑀁 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀢𑁆𑀢𑀺𑀓𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀁. 𑀉𑀧𑀸𑀤𑀺𑀦𑁆𑀦𑀤𑀼𑀓𑀁.

𑀫𑀳𑀦𑁆𑀢𑀭𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁂𑀪𑀼𑀲𑀁 𑀆𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸, 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀴𑁆𑀳𑀢𑁆𑀣𑁄 𑀳𑀺 𑀏𑀢𑁆𑀣 𑀉𑀧-𑀲𑀤𑁆𑀤𑁄 ‘‘𑀉𑀧𑀸𑀬𑀸𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀢𑁄 𑀅𑀜𑁆𑀜𑁂 𑀦𑁄 𑀉𑀧𑀸𑀤𑀸𑀦𑀸. 𑀢𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀇𑀫𑁂 𑀉𑀧𑀸𑀤𑀸𑀦𑀸 𑀦𑀸𑀫. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑁂𑀲𑀼 𑀉𑀧𑁆𑀧𑀦𑁆𑀦𑁄 𑀓𑀺𑀮𑁂𑀲𑀓𑀸𑀫𑁄𑀯 𑀯𑀼𑀢𑁆𑀢𑀦𑀬𑁂𑀦 𑀉𑀧𑀸𑀤𑀸𑀦𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀦𑀸𑀫. 𑀲𑁂𑀲𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑁂𑀯. 𑀧𑀘𑁆𑀙𑀺𑀫𑀸𑀦𑀺 𑀧𑀦𑁂𑀢𑁆𑀣 𑀢𑀻𑀡𑀺 𑀉𑀧𑀸𑀤𑀸𑀦𑀸𑀦𑀺 𑀢𑀣𑀸𑀧𑀯𑀢𑁆𑀢𑀤𑀺𑀝𑁆𑀞𑀺 𑀏𑀯. 𑀢𑀸𑀦𑀺 𑀘 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀓𑀸𑀫𑀼𑀧𑀸𑀤𑀸𑀦𑀁 𑀘𑀢𑀽𑀳𑀺𑀧𑀺. 𑀇𑀫𑁂 𑀘 𑀲𑀪𑀸𑀯𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀯𑀺𑀪𑀸𑀕𑀢𑁄 𑀘𑀢𑀼𑀭𑀼𑀧𑀸𑀤𑀸𑀦𑀸 𑀦𑀸𑀫 𑀚𑀸𑀢𑀸. 𑀇𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀦𑁄 𑀉𑀧𑀸𑀤𑀸𑀦𑀸 𑀦𑀸𑀫. 𑀉𑀧𑀸𑀤𑀸𑀦𑀤𑀼𑀓𑀁 𑀧𑀞𑀫𑀁.

𑀉𑀧𑀸𑀤𑀸𑀦𑀺𑀬𑀤𑀼𑀓𑁄 𑀲𑀁𑀬𑁄𑀚𑀦𑀺𑀬𑀤𑀼𑀓𑀲𑀤𑀺𑀲𑁄𑀯. 𑀤𑀼𑀢𑀺𑀬𑀁.

𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀸𑀦𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀘 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀤𑁄𑀲𑀫𑁄𑀳𑀫𑀽𑀮𑀸𑀦𑀺, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺 𑀘 𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀤𑀺𑀝𑁆𑀞𑀺𑀫𑀸𑀦𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸𑀯, 𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀏𑀯. 𑀲𑁂𑀲𑀸 𑀤𑀼𑀯𑀺𑀥𑀸𑀧𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀉𑀧𑀸𑀤𑀸𑀦𑀸 𑀘𑁂𑀯 𑀉𑀧𑀸𑀤𑀸𑀦𑀺𑀬𑀸 𑀘 𑀦𑀸𑀫. 𑀢𑀤𑀯𑀲𑁂𑀲𑀸 𑀮𑁄𑀓𑀺𑀬𑀸 𑀉𑀧𑀸𑀤𑀸𑀦𑀺𑀬𑀸 𑀘𑁂𑀯 𑀦𑁄𑀘 𑀉𑀧𑀸𑀤𑀸𑀦𑀸 𑀦𑀸𑀫. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀘𑀢𑀼𑀢𑁆𑀣𑀁.

𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀸 𑀧𑀸𑀞𑀢𑁄 𑀕𑀦𑁆𑀣𑀕𑁄𑀘𑁆𑀙𑀓𑁂 𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀲𑀤𑀺𑀲𑀸𑀯, 𑀓𑁂𑀯𑀮𑀁 𑀧𑀜𑁆𑀘𑀫𑀤𑀼𑀓𑁂 ‘‘𑀘𑁂𑀢𑀲𑀺𑀓𑁂𑀲𑀼 𑀫𑀸𑀦𑁄 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑁄 𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑁄 𑀏𑀯, 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀣𑀺𑀦𑀫𑀺𑀤𑁆𑀥𑀸𑀦𑀺 𑀢𑀺𑀚𑀸𑀢𑀺𑀓𑀸𑀦𑀺 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀘𑀸’’𑀢𑀺 𑀇𑀤𑀜𑁆𑀘, 𑀙𑀝𑁆𑀞𑀤𑀼𑀓𑁂 ‘‘𑀘𑁂𑀢𑀲𑀺𑀓𑁂𑀲𑀼 𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸 𑀅𑀧𑁆𑀧𑀫𑀜𑁆𑀜𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀉𑀧𑀸𑀤𑀸𑀦𑀺𑀬𑀸 𑀏𑀯, 𑀫𑁄𑀳𑀸𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀉𑀤𑁆𑀥𑀘𑁆𑀘𑀮𑁄𑀪𑀣𑀺𑀦𑀫𑀺𑀤𑁆𑀥𑀸𑀦𑀺 𑀢𑀣𑀸 𑀘 𑀦 𑀯𑀢𑁆𑀢𑀩𑁆𑀩𑀸𑀦𑀺 𑀘𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀧𑀸𑀞𑀢𑁄 𑀯𑀺𑀲𑁂𑀲𑁄, 𑀅𑀢𑁆𑀣𑀢𑁄 𑀧𑀦 𑀦𑀸𑀫𑀫𑀢𑁆𑀢𑀓𑁄𑀯 𑀯𑀺𑀲𑁂𑀲𑁄. 𑀲𑁂𑀲𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀧𑀜𑁆𑀘𑀫𑀙𑀝𑁆𑀞𑀸𑀦𑀺.

𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦 𑀧𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀤𑀲 𑀥𑀫𑁆𑀫𑀸 𑀓𑀺𑀮𑁂𑀲𑀸 𑀦𑀸𑀫. 𑀇𑀫𑁂 𑀘 𑀯𑀼𑀢𑁆𑀢𑀢𑁆𑀣𑀸 𑀏𑀯, 𑀇𑀥 𑀧𑀦 𑀮𑁄𑀪𑁄, 𑀳𑁂𑀢𑀼𑀕𑀦𑁆𑀣𑀦𑀻𑀯𑀭𑀡𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁂𑀲𑀼 𑀮𑁄𑀪𑁄 𑀘 𑀦𑀺𑀧𑁆𑀧𑀤𑁂𑀲𑀢𑁄 𑀘𑀢𑀼𑀫𑀕𑁆𑀕𑀯𑀚𑁆𑀛𑁄𑀧𑀺 𑀏𑀓𑁂𑀦𑁂𑀯 𑀓𑁄𑀝𑁆𑀞𑀸𑀲𑁂𑀦 𑀞𑀺𑀢𑁄, 𑀲𑁂𑀲𑀕𑁄𑀘𑁆𑀙𑀓𑁂𑀲𑀼 𑀲𑁄 𑀲𑀩𑁆𑀩𑁄𑀧𑀺 𑀮𑁄𑀪𑁄 ‘‘𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄’’𑀢𑀺𑀆𑀤𑀺𑀦𑀸 𑀤𑁆𑀯𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑀼𑀢𑁆𑀯𑀸 𑀞𑀺𑀢𑁄, 𑀇𑀫𑀺𑀦𑀸 𑀧𑀦 𑀅𑀝𑁆𑀞𑀓𑀣𑀸𑀯𑀘𑀦𑁂𑀦𑀸𑀧𑀺 𑀪𑀯𑀸𑀲𑀯𑀸𑀤𑀺𑀩𑁆𑀬𑀢𑀺𑀭𑀺𑀢𑁆𑀢𑁄 𑀲𑀩𑁆𑀩𑁄 𑀘𑀢𑀼𑀫𑀕𑁆𑀕𑀯𑀚𑁆𑀛𑁄𑀧𑀺 𑀭𑀸𑀕𑁄 𑀓𑀸𑀫𑀸𑀲𑀯𑀸𑀤𑀻𑀲𑀼 𑀲𑀗𑁆𑀕𑀳𑀺𑀢𑁄. 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀦 𑀪𑀯𑀭𑀸𑀕𑁄𑀧𑀺 𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀫𑀢𑁆𑀢𑁄𑀯𑀸𑀢𑀺 𑀧𑀜𑁆𑀜𑀸𑀬𑀢𑀺, ‘‘𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡’’𑀦𑁆𑀢𑀺𑀆𑀤𑀺𑀧𑀸𑀴𑀺𑀢𑁄 (𑀧𑀝𑁆𑀞𑀸. 𑁩.𑁮.𑁮) 𑀘𑁂𑀢𑀁 𑀤𑀝𑁆𑀞𑀩𑁆𑀩𑀁 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀭𑀽𑀧𑀸𑀭𑀽𑀧𑀪𑀽𑀫𑀻𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀇𑀫𑁂𑀲𑀼 𑀘 𑀓𑀺𑀮𑁂𑀲𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀧𑀞𑀫𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀤𑁄𑀲𑁄 𑀢𑀢𑀺𑀬𑁂𑀦, 𑀮𑁄𑀪𑀸𑀤𑀬𑁄 𑀘𑀢𑀽𑀳𑀺𑀧𑀺. 𑀇𑀫𑁂 𑀧𑀦 𑀤𑀲 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀦𑁄 𑀓𑀺𑀮𑁂𑀲𑀸 𑀦𑀸𑀫. 𑀓𑀺𑀮𑁂𑀲𑀤𑀼𑀓𑀁 𑀧𑀞𑀫𑀁.

𑀲𑀁𑀓𑀺𑀮𑁂𑀲𑀺𑀓𑀤𑀼𑀓𑁄 𑀲𑀸𑀲𑀯𑀤𑀼𑀓𑀲𑀤𑀺𑀲𑁄𑀯. 𑀤𑀼𑀢𑀺𑀬𑀁.

𑀲𑀁𑀓𑀺𑀮𑀺𑀝𑁆𑀞𑀤𑀼𑀓𑁄, 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀘𑀸𑀢𑀺 𑀤𑁆𑀯𑁂𑀧𑀺 𑀲𑀫𑀸𑀦𑀢𑁆𑀣𑀸𑀯. 𑀢𑁂 𑀘 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀢𑀢𑀺𑀬𑀤𑀼𑀓𑀲𑀤𑀺𑀲𑀸𑀯. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑀤𑀲 𑀓𑀺𑀮𑁂𑀲𑀸 𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀸 𑀘 𑀦𑀸𑀫. 𑀲𑁂𑀲𑀸 𑀮𑁄𑀓𑀺𑀬𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸 𑀦𑀸𑀫. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀦 𑀯𑀢𑁆𑀢𑀩𑁆𑀩𑀸. 𑀲𑁂𑀲𑀁 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀘𑀢𑀼𑀢𑁆𑀣𑀤𑀼𑀓𑀲𑀤𑀺𑀲𑀫𑁂𑀯. 𑀧𑀜𑁆𑀘𑀫𑀁.

𑀙𑀝𑁆𑀞𑀲𑀢𑁆𑀢𑀫𑀤𑀼𑀓𑀸𑀦𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀢𑁆𑀣𑀸𑀦𑁂𑀯. 𑀢𑀸𑀦𑀺 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀬𑀣𑀸𑀓𑁆𑀓𑀫𑀁 𑀧𑀸𑀞𑀢𑁄 𑀧𑀜𑁆𑀘𑀫𑀙𑀝𑁆𑀞𑀤𑀼𑀓𑀲𑀤𑀺𑀲𑀸𑀦𑀺, 𑀅𑀢𑁆𑀣𑀢𑁄 𑀧𑀦 𑀦𑀸𑀫𑀫𑀢𑁆𑀢𑀓𑁄𑀯 𑀯𑀺𑀲𑁂𑀲𑁄. 𑀲𑁂𑀲𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄. 𑀙𑀝𑁆𑀞𑀲𑀢𑁆𑀢𑀫𑀅𑀝𑁆𑀞𑀫𑀸𑀦𑀺.

𑀓𑀺𑀮𑁂𑀲𑀕𑁄𑀘𑁆𑀙𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀺𑀝𑁆𑀞𑀺𑀤𑀼𑀓𑁂𑀲𑀼 𑀆𑀤𑀺𑀢𑁄 𑀘𑀢𑁆𑀢𑀸𑀭𑁄 𑀤𑀼𑀓𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀢𑁆𑀢𑀺𑀓𑁂, 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂 𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀁 𑀧𑀦 𑀢𑀢𑁆𑀣 𑀧𑀞𑀫𑀢𑁆𑀢𑀺𑀓𑁂 𑀯𑀼𑀢𑁆𑀢𑁂𑀲𑀼 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀇𑀥 𑀧𑀞𑀫𑀤𑀼𑀓𑀲𑁆𑀲 𑀤𑀼𑀢𑀺𑀬𑀧𑀤𑁂 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼 𑀧𑀯𑀺𑀲𑀦𑁆𑀢𑀺, 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀇𑀥 𑀤𑀼𑀢𑀺𑀬𑀤𑀼𑀓𑁂 𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁂𑀲𑀼 𑀧𑀯𑀺𑀲𑀦𑁆𑀢𑀺. 𑀢𑀢𑁆𑀣 𑀘 𑀤𑀼𑀢𑀺𑀬𑀢𑁆𑀢𑀺𑀓𑁂 𑀯𑀼𑀢𑁆𑀢𑁂𑀲𑀼 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀇𑀥 𑀢𑀢𑀺𑀬𑀤𑀼𑀓𑁂 𑀦𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂, 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂 𑀘 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀇𑀥 𑀘𑀢𑀼𑀢𑁆𑀣𑀤𑀼𑀓𑁂 𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂𑀲𑀼 𑀧𑀯𑀺𑀲𑀦𑁆𑀢𑀺.

𑀧𑀤𑀢𑁆𑀣𑁄 𑀘 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀏𑀯𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀳𑀺 𑀲𑀢𑀺 𑀅𑀳𑁂𑀢𑀼𑀓𑀸𑀦𑀁 𑀅𑀕𑁆𑀕𑀳𑀡𑀁 𑀲𑀺𑀬𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄. 𑀢𑀺𑀓𑀤𑁆𑀯𑀬𑀫𑁂𑀯 𑀳𑀺 𑀪𑀕𑀯𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘𑀢𑁆𑀢𑀸𑀭𑁄 𑀤𑀼𑀓𑁂 𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀘𑀢𑁆𑀢𑀸𑀭𑁄 𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀧𑀜𑁆𑀜𑀸𑀲𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀼 𑀯𑀺𑀢𑀓𑁆𑀓𑀯𑀺𑀭𑀳𑀺𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀯𑀺𑀢𑀓𑁆𑀓𑀸 𑀦𑀸𑀫. 𑀯𑀺𑀢𑀓𑁆𑀓𑁄, 𑀧𑀦 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀅𑀯𑀺𑀢𑀓𑁆𑀓𑀸 𑀦𑀸𑀫. 𑀧𑀜𑁆𑀘𑀫𑀁.

𑀙𑀲𑀝𑁆𑀞𑀺𑀬𑀸 𑀲𑀯𑀺𑀘𑀸𑀭𑀘𑀺𑀢𑁆𑀢𑁂𑀲𑀼 𑀯𑀺𑀘𑀸𑀭𑀯𑀺𑀭𑀳𑀺𑀢𑀸 𑀥𑀫𑁆𑀫𑀸 𑀲𑀯𑀺𑀘𑀸𑀭𑀸 𑀦𑀸𑀫. 𑀯𑀺𑀘𑀸𑀭𑁄, 𑀧𑀦 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀅𑀯𑀺𑀘𑀸𑀭𑀸 𑀦𑀸𑀫. 𑀲𑁂𑀲𑀁 𑀇𑀥, 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀤𑀼𑀓𑁂 𑀘 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀁. 𑀙𑀝𑁆𑀞𑀁.

𑀇𑀢𑁄 𑀧𑀭𑁂𑀲𑀼 𑀲𑀧𑁆𑀧𑀻𑀢𑀺𑀓𑀤𑀼𑀓𑁄, 𑀧𑀻𑀢𑀺𑀲𑀳𑀕𑀢𑀤𑀼𑀓𑁄 𑀘 𑀲𑀫𑀸𑀦𑀢𑁆𑀣𑀸𑀯, 𑀢𑁂 𑀘 𑀲𑀼𑀔𑀲𑀳𑀕𑀢𑀉𑀧𑁂𑀓𑁆𑀔𑀸𑀲𑀳𑀕𑀢𑀤𑀼𑀓𑀸 𑀘𑀸𑀢𑀺 𑀘𑀢𑁆𑀢𑀸𑀭𑁄𑀧𑀺 𑀤𑀼𑀓𑀸 𑀧𑀻𑀢𑀺𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑀸𑀯. 𑀓𑁂𑀯𑀮𑀁 𑀧𑀦𑁂𑀢𑁂𑀲𑀁 𑀤𑀼𑀓𑀸𑀦𑀁 𑀧𑀞𑀫𑀁 𑀧𑀤𑀁 𑀢𑀢𑁆𑀣 𑀧𑀯𑀺𑀲𑀢𑀺, 𑀧𑀻𑀢𑀺𑀢𑁆𑀢𑀺𑀓𑁂 𑀇𑀢𑀭𑀻𑀢𑀭𑀧𑀤𑀤𑁆𑀯𑀬𑀲𑀗𑁆𑀕𑀳𑀺𑀢𑀸, 𑀅𑀲𑀗𑁆𑀕𑀳𑀺𑀢𑀸 𑀘 𑀲𑀩𑁆𑀩𑁂 𑀅𑀢𑁆𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀢𑁆𑀣 𑀤𑀼𑀓𑀸𑀦𑀁 𑀤𑀼𑀢𑀺𑀬𑀧𑀤𑁂𑀲𑀼 𑀅𑀢𑁆𑀣𑀢𑁄 𑀲𑀗𑁆𑀕𑀳𑀺𑀢𑀸, 𑀇𑀫𑁂 𑀘 𑀦𑀺𑀧𑁆𑀧𑀤𑁂𑀲𑀤𑀼𑀓𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑀢𑁆𑀢𑀫𑀅𑀝𑁆𑀞𑀫𑀦𑀯𑀫𑀤𑀲𑀫𑀸.

𑀢𑀤𑀦𑀦𑁆𑀢𑀭𑁂𑀲𑀼 𑀓𑀸𑀫𑀸𑀯𑀘𑀭𑀸𑀢𑀺 𑀏𑀢𑁆𑀣 ‘‘𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀬𑀁 𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 𑀏𑀯𑀁 (𑀥. 𑀲. 𑁧𑁨𑁮𑁭) 𑀧𑀸𑀴𑀺𑀬𑀁 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀁, 𑀫𑀦𑀼𑀲𑁆𑀲𑀸𑀦𑀁, 𑀙𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀜𑁆𑀘 𑀯𑀲𑁂𑀦 𑀑𑀓𑀸𑀲𑀢𑁄 𑀏𑀓𑀸𑀤𑀲𑀯𑀺𑀥𑁄 𑀓𑀸𑀫𑀪𑀯𑁄 ‘‘𑀓𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸’’𑀢𑀺𑀆𑀤𑀻𑀲𑀼 𑀭𑀽𑀧𑀪𑀯𑁄 ‘‘𑀭𑀽𑀧’’𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀸𑀫𑁂 𑀅𑀯𑀘𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑀸. 𑀬𑁂𑀪𑀼𑀬𑁆𑀬𑀢𑁄 𑀘𑁂𑀢𑀁 𑀯𑀼𑀢𑁆𑀢𑀁 𑀭𑀽𑀧𑀸𑀭𑀽𑀧𑁂𑀲𑀼 𑀘𑁂𑀢𑁂𑀲𑀜𑁆𑀘 𑀇𑀥 𑀧𑀯𑀢𑁆𑀢𑀺𑀢𑁄 ‘‘𑀣𑀮𑀘𑀭𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀸𑀫𑀪𑀯𑀲𑀗𑁆𑀔𑀸𑀢𑁂 𑀯𑀸 𑀓𑀸𑀫𑁂 𑀧𑀝𑀺𑀲𑀦𑁆𑀥𑀺𑀁 𑀅𑀯𑀘𑀸𑀭𑁂𑀦𑁆𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀸, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺. 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀁 𑀧𑀦 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀤𑀺𑀲𑀁. 𑀢𑀤𑀸𑀬𑀢𑁆𑀢𑀢𑀸𑀬, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀯𑀸 𑀓𑀺𑀮𑁂𑀲𑀓𑀸𑀫𑁄 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀁. 𑀓𑀸𑀫𑀜𑁆𑀘𑁂𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼𑀧𑀺 𑀅𑀯𑀘𑀭𑀢𑀺, 𑀭𑀼𑀴𑁆𑀳𑀺𑀢𑁄 𑀧𑀦 ‘‘𑀯𑀤𑀢𑀻𑀢𑀺 𑀯𑀘𑁆𑀙𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀇𑀫𑁂 𑀏𑀯 ‘‘𑀓𑀸𑀫𑀸𑀯𑀘𑀭𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘 𑀓𑀸𑀫𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀢𑁄 𑀓𑀸𑀫𑁄 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀸. 𑀏𑀯𑀁 𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀸𑀪𑀭𑀡𑀸𑀤𑀻𑀲𑀼 𑀙𑀦𑁆𑀤𑀭𑀸𑀕𑀲𑁆𑀲𑀸𑀧𑀺 𑀓𑀸𑀫𑀢𑀡𑁆𑀳𑀸𑀪𑀸𑀯𑁄 𑀲𑀺𑀤𑁆𑀥𑁄, 𑀭𑀽𑀧𑀢𑀡𑁆𑀳𑀸𑀯𑀺𑀲𑀬𑀸𑀦𑀫𑁆𑀧𑀺 𑀘 𑀩𑁆𑀭𑀳𑁆𑀫𑀸𑀦𑀁 𑀓𑀫𑁆𑀫𑀚𑀭𑀽𑀧𑀸𑀤𑀻𑀦𑀁 𑀓𑀸𑀫𑀢𑀡𑁆𑀳𑀸𑀬𑀧𑀺 𑀯𑀺𑀲𑀬𑀢𑀸𑀬 𑀓𑀸𑀫𑀸𑀯𑀘𑀭𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀦𑀁 𑀢𑀤𑀪𑀸𑀯𑀢𑁄 𑀢𑀤𑀜𑁆𑀜𑁂 𑀦 𑀓𑀸𑀫𑀸𑀯𑀘𑀭𑀸. 𑀇𑀫𑀺𑀦𑀸 𑀦𑀬𑁂𑀦 𑀭𑀽𑀧𑀸𑀯𑀘𑀭𑀸𑀤𑀺𑀤𑀼𑀓𑀸𑀦𑀫𑁆𑀧𑀺 𑀧𑀤𑀢𑁆𑀣𑁄 𑀬𑀣𑀸𑀭𑀳𑀁 𑀜𑀸𑀢𑀩𑁆𑀩𑁄. 𑀢𑀢𑁆𑀣 𑀘𑀢𑀼𑀧𑀜𑁆𑀜𑀸𑀲 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀲𑀩𑁆𑀩𑀜𑁆𑀘 𑀭𑀽𑀧𑀁 𑀓𑀸𑀫𑀸𑀯𑀘𑀭𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀦𑀺𑀩𑁆𑀩𑀸𑀦𑀸𑀦𑀺 𑀦 𑀓𑀸𑀫𑀸𑀯𑀘𑀭𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀯𑀢𑁆𑀢𑀩𑁆𑀩𑀁 𑀧𑀭𑀺𑀬𑀸𑀧𑀦𑁆𑀦𑀤𑀼𑀓𑁂 𑀏𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀓𑀸𑀤𑀲𑀫𑀁.

𑀧𑀦𑁆𑀦𑀭𑀲 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀭𑀽𑀧𑀸𑀯𑀘𑀭𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦 𑀭𑀽𑀧𑀸𑀯𑀘𑀭𑀸 𑀦𑀸𑀫. 𑀤𑁆𑀯𑀸𑀤𑀲𑀫𑀁.

𑀤𑁆𑀯𑀸𑀤𑀲 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀅𑀭𑀽𑀧𑀸𑀯𑀘𑀭𑀸 𑀦𑀸𑀫. 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀦 𑀅𑀭𑀽𑀧𑀸𑀯𑀘𑀭𑀸 𑀦𑀸𑀫. 𑀢𑁂𑀭𑀲𑀫𑀁.

𑀢𑁂𑀪𑀽𑀫𑀓𑀯𑀝𑁆𑀝𑁂 𑀧𑀭𑀺𑀬𑀸𑀧𑀦𑁆𑀦𑀸 𑀅𑀦𑁆𑀢𑁄𑀕𑀥𑀸𑀢𑀺 𑀧𑀭𑀺𑀬𑀸𑀧𑀦𑁆𑀦𑀸, 𑀮𑁄𑀓𑀺𑀬𑀥𑀫𑁆𑀫𑀸𑀯. 𑀢𑀢𑁆𑀣 𑀦 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀮𑁄𑀓𑀼𑀢𑁆𑀢𑀭𑀸. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀓𑀸𑀫𑀸𑀯𑀘𑀭𑀸𑀤𑀺𑀤𑀼𑀓𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑁄 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀓𑀼𑀲𑀮𑀘𑁂𑀢𑀲𑀺𑀓𑀸 𑀓𑀸𑀫𑀸𑀯𑀘𑀭𑀸𑀯, 𑀅𑀧𑁆𑀧𑀫𑀜𑁆𑀜𑀸 𑀓𑀸𑀫𑀭𑀽𑀧𑀸𑀯𑀘𑀭𑀸, 𑀯𑀺𑀭𑀢𑀺𑀬𑁄 𑀧𑀦 𑀓𑀸𑀫𑀸𑀯𑀘𑀭𑀧𑀭𑀺𑀬𑀸𑀧𑀦𑁆𑀦𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀬𑁄 𑀧𑀦 𑀓𑀸𑀫𑀭𑀽𑀧𑀸𑀯𑀘𑀭𑀧𑀭𑀺𑀬𑀸𑀧𑀦𑁆𑀦𑀸, 𑀲𑁂𑀲𑀸 𑀘𑀢𑀼𑀪𑀽𑀫𑀓𑀸𑀢𑀺. 𑀘𑀼𑀤𑁆𑀤𑀲𑀫𑀁.

𑀯𑀝𑁆𑀝𑀫𑀽𑀮𑀁 𑀙𑀺𑀦𑁆𑀤𑀦𑁆𑀢𑀸 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀝𑁆𑀝𑀢𑁄 𑀦𑀻𑀬𑀦𑁆𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸, 𑀘𑀢𑁆𑀢𑀸𑀭𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀘𑀺𑀢𑁆𑀢𑀸𑀦𑀺. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀦 𑀦𑀺𑀬𑁆𑀬𑀦𑁆𑀢𑀻𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀜𑁆𑀘𑀤𑀲𑀫𑀁.

𑀘𑀼𑀢𑀺𑀬𑀸 𑀯𑀸 𑀅𑀢𑁆𑀢𑀦𑁄 𑀯𑀸 𑀧𑀯𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀁 𑀨𑀮𑀤𑀸𑀦𑁂 𑀦𑀺𑀬𑀢𑀢𑁆𑀢𑀸 𑀦𑀺𑀬𑀢𑀸, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸, 𑀲𑀫𑁆𑀫𑀢𑁆𑀢𑀦𑀺𑀬𑀢𑀸 𑀘. 𑀢𑀣𑀸 𑀅𑀦𑀺𑀬𑀢𑀢𑁆𑀢𑀸 𑀅𑀦𑀺𑀬𑀢𑀸, 𑀲𑁂𑀲𑀥𑀫𑁆𑀫𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑁄𑀴𑀲𑀫𑀁.

𑀅𑀜𑁆𑀜𑁂 𑀥𑀫𑁆𑀫𑁂 𑀉𑀢𑁆𑀢𑀭𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀉𑀢𑁆𑀢𑀭𑀸, 𑀅𑀢𑁆𑀢𑀸𑀦𑀁 𑀉𑀢𑁆𑀢𑀭𑀺𑀢𑀼𑀁 𑀲𑀫𑀢𑁆𑀣𑁂𑀳𑀺 𑀲𑀳 𑀉𑀢𑁆𑀢𑀭𑁂𑀳𑀻𑀢𑀺 𑀲𑀉𑀢𑁆𑀢𑀭𑀸, 𑀮𑁄𑀓𑀺𑀬𑀸𑀯. 𑀦𑀢𑁆𑀣𑀺 𑀏𑀢𑁂𑀲𑀁 𑀉𑀢𑁆𑀢𑀭𑀸𑀢𑀺 𑀅𑀦𑀼𑀢𑁆𑀢𑀭𑀸, 𑀮𑁄𑀓𑀼𑀢𑁆𑀢𑀭𑀸. 𑀲𑀢𑁆𑀢𑀭𑀲𑀫𑀁.

𑀭𑀡𑀦𑁆𑀢𑀺 𑀓𑀦𑁆𑀤𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀡𑀸, 𑀬𑁂𑀳𑀺 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀭𑀺𑀤𑁂𑀯𑀦𑁆𑀢𑀺, 𑀢𑁂𑀲𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀳𑀺 𑀲𑀫𑁆𑀧𑀬𑁄𑀕𑀯𑀲𑁂𑀦, 𑀧𑀳𑀸𑀦𑁂𑀓𑀝𑁆𑀞𑀢𑀸𑀯𑀲𑁂𑀦 𑀘 𑀲𑀳 𑀭𑀡𑁂𑀳𑀻𑀢𑀺 𑀲𑀭𑀡𑀸. 𑀏𑀢𑁂𑀦𑀸𑀓𑀸𑀭𑁂𑀦 𑀦𑀢𑁆𑀣𑀺 𑀏𑀢𑁂𑀲𑀁 𑀭𑀡𑀸𑀢𑀺 𑀅𑀭𑀡𑀸.

𑀢𑀢𑁆𑀣 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀭𑀡𑀸 𑀦𑀸𑀫. 𑀲𑀭𑀡𑀥𑀫𑁆𑀫𑁂𑀲𑀼 𑀘𑁂𑀢𑁆𑀣 𑀮𑁄𑀪𑀤𑁄𑀲𑀫𑁄𑀳𑀸 𑀭𑀡𑀸 𑀘𑁂𑀯 𑀲𑀭𑀡𑀸 𑀘, 𑀢𑁂𑀲𑀼 𑀮𑁄𑀪𑀤𑁄𑀲𑀸 𑀫𑁄𑀳𑁂𑀦𑁂𑀯 𑀲𑀫𑁆𑀧𑀬𑁄𑀕𑀢𑁄 𑀲𑀭𑀡𑀸, 𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘. 𑀫𑁄𑀳𑁄 𑀧𑀦 𑀢𑁂𑀲𑀼 𑀲𑀫𑁆𑀧𑀬𑁄𑀕𑀢𑁄 𑀲𑀭𑀡𑁄, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑁂𑀦, 𑀧𑀦 𑀪𑀯𑀭𑀸𑀕𑁂𑀦 𑀘 𑀭𑀡𑀪𑀽𑀢𑁂𑀦 𑀧𑀳𑀸𑀦𑁂𑀓𑀝𑁆𑀞𑀢𑀸𑀯𑀲𑁂𑀦𑁂𑀯 𑀲𑀭𑀡𑁄. 𑀮𑁄𑀪𑀤𑁄𑀲𑀫𑁄𑀳𑀫𑀽𑀮𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀧𑀦 𑀫𑁄𑀳𑁄 𑀮𑁄𑀪𑁂𑀦 𑀘𑁂𑀯 𑀤𑁄𑀲𑁂𑀦 𑀘, 𑀲𑁂𑀲𑀸 𑀮𑁄𑀪𑀫𑁄𑀳𑁂𑀦 𑀘𑁂𑀯 𑀤𑁄𑀲𑀫𑁄𑀳𑁂𑀦 𑀘 𑀲𑀫𑁆𑀧𑀬𑁄𑀕𑀢𑁄 𑀲𑀭𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀸𑀦𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀸𑀦𑀺, 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀺 𑀘 𑀅𑀭𑀡𑀸 𑀦𑀸𑀫. 𑀘𑁂𑀢𑀲𑀺𑀓𑁂𑀲𑀼 𑀧𑀦 𑀅𑀓𑀼𑀲𑀮𑀸 𑀲𑀭𑀡𑀸𑀯, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀅𑀭𑀡𑀸𑀯, 𑀢𑀺𑀚𑀸𑀢𑀺𑀓𑀸 𑀧𑀦 𑀤𑁆𑀯𑀺𑀥𑀸𑀧𑀺 𑀳𑁄𑀦𑁆𑀢𑀻𑀢𑀺. 𑀅𑀝𑁆𑀞𑀸𑀭𑀲𑀫𑀁.

𑀧𑀺𑀝𑁆𑀞𑀺𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.

𑀅𑀪𑀺𑀥𑀫𑁆𑀫𑀤𑀼𑀓𑀫𑀸𑀢𑀺𑀓𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.