𑁧. 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸

𑀢𑀺𑀓𑀧𑀤𑀢𑁆𑀣𑀯𑀡𑁆𑀡𑀦𑀸

𑀢𑀢𑁆𑀣 𑀅𑀪𑀺𑀥𑀫𑁆𑀫𑀲𑁆𑀲 𑀫𑀸𑀢𑀺𑀓𑀸𑀢𑀺 𑀏𑀢𑁆𑀣 𑀓𑁂𑀦𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄? 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦. 𑀅𑀢𑀺𑀭𑁂𑀓𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑁄 𑀳𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 ‘‘𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺 (𑀲𑀁. 𑀦𑀺. 𑁪.𑁮𑁭; 𑁫.𑁧𑁯𑁫, 𑁧𑁦𑁨𑁨; 𑀫. 𑀦𑀺. 𑁩.𑁩𑁮𑁪, 𑁩𑁮𑁯), 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧; 𑀔𑀼. 𑀧𑀸. 𑁫.𑁧; 𑀲𑀼. 𑀦𑀺. 𑀫𑀗𑁆𑀕𑀮𑀲𑀼𑀢𑁆𑀢; 𑀯𑀺. 𑀯. 𑁮𑁫𑁭) 𑀯𑀺𑀬, 𑀢𑀲𑁆𑀫𑀸 𑀬𑀣𑀸 𑀲𑀫𑀼𑀲𑁆𑀲𑀺𑀢𑁂𑀲𑀼 𑀩𑀳𑀽𑀲𑀼 𑀙𑀢𑁆𑀢𑁂𑀲𑀼 𑀘𑁂𑀯 𑀥𑀚𑁂𑀲𑀼 𑀘 𑀬𑀁 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀁, 𑀯𑀺𑀲𑁂𑀲𑀯𑀡𑁆𑀡𑀲𑀡𑁆𑀞𑀸𑀦𑀜𑁆𑀘 𑀙𑀢𑁆𑀢𑀁, 𑀢𑀁 𑀅𑀢𑀺𑀘𑁆𑀙𑀢𑁆𑀢𑀁, 𑀬𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁄, 𑀯𑀺𑀲𑁂𑀲𑀯𑀡𑁆𑀡𑀲𑀡𑁆𑀞𑀸𑀦𑁄 𑀘 𑀥𑀚𑁄, 𑀲𑁄 𑀅𑀢𑀺𑀤𑁆𑀥𑀚𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 ‘‘𑀅𑀪𑀺𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀢𑀸 𑀳𑀺 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀓𑀸𑀭𑀸𑀤𑀬𑁄 𑀥𑀫𑁆𑀫𑀸 𑀏𑀓𑀤𑁂𑀲𑁂𑀦 𑀯𑀺𑀪𑀢𑁆𑀢𑀸, 𑀦 𑀦𑀺𑀧𑁆𑀧𑀤𑁂𑀲𑁂𑀦, 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀧𑀦 𑀅𑀦𑁂𑀓𑁂𑀳𑀺 𑀦𑀬𑀯𑀺𑀲𑁂𑀲𑁂𑀳𑀺 𑀦𑀺𑀧𑁆𑀧𑀤𑁂𑀲𑀢𑁄𑀯 𑀯𑀺𑀪𑀢𑁆𑀢𑀸. 𑀏𑀯𑀁 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 ‘‘𑀅𑀪𑀺𑀥𑀫𑁆𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑁂𑀦𑀝𑁆𑀞𑁂𑀦 𑀫𑀸𑀢𑀺𑀓𑀸? 𑀫𑀸𑀢𑀼𑀲𑀫𑀝𑁆𑀞𑁂𑀦. 𑀫𑀸𑀢𑀸 𑀯𑀺𑀬𑀸𑀢𑀺 𑀳𑀺 𑀫𑀸𑀢𑀺𑀓𑀸 𑀬𑀣𑀸 𑀧𑀤𑀼𑀫𑀺𑀓𑀁 𑀫𑀼𑀔𑀦𑁆𑀢𑀺. 𑀬𑀣𑀸 𑀳𑀺 𑀫𑀸𑀢𑀸 𑀦𑀸𑀦𑀸𑀯𑀺𑀥𑁂 𑀧𑀼𑀢𑁆𑀢𑁂 𑀧𑀲𑀯𑀢𑀺, 𑀢𑁂 𑀧𑀸𑀮𑁂𑀢𑀺, 𑀧𑁄𑀲𑁂𑀢𑀺 𑀘, 𑀏𑀯𑀫𑀬𑀫𑁆𑀧𑀺 𑀦𑀸𑀦𑀸𑀯𑀺𑀥𑁂 𑀥𑀫𑁆𑀫𑁂, 𑀅𑀢𑁆𑀣𑁂 𑀘 𑀧𑀲𑀯𑀢𑀺, 𑀢𑁂 𑀘 𑀅𑀯𑀺𑀦𑀲𑁆𑀲𑀫𑀸𑀦𑁂 𑀧𑀸𑀮𑁂𑀢𑀺, 𑀧𑁄𑀲𑁂𑀢𑀺 𑀘, 𑀢𑀲𑁆𑀫𑀸 ‘‘𑀫𑀸𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀫𑀸𑀢𑀺𑀓𑀁 𑀳𑀺 𑀦𑀺𑀲𑁆𑀲𑀸𑀬 𑀥𑀫𑁆𑀫𑀲𑀗𑁆𑀕𑀡𑀻𑀆𑀤𑀺𑀲𑀢𑁆𑀢𑀧𑁆𑀧𑀓𑀭𑀡𑀯𑀲𑁂𑀦 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸 𑀥𑀫𑁆𑀫𑀸, 𑀅𑀢𑁆𑀣𑀸 𑀘 𑀢𑀸𑀬 𑀧𑀲𑀼𑀢𑀸, 𑀧𑀸𑀮𑀺𑀢𑀸, 𑀧𑁄𑀲𑀺𑀢𑀸 𑀯𑀺𑀬 𑀘 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀥𑀫𑁆𑀫𑀲𑀗𑁆𑀕𑀡𑀺𑀧𑁆𑀧𑀓𑀭𑀡𑁂 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀘𑀺𑀢𑁆𑀢𑀯𑀺𑀪𑀢𑁆𑀢𑀺 𑀭𑀽𑀧𑀯𑀺𑀪𑀢𑁆𑀢𑀺 𑀦𑀺𑀓𑁆𑀔𑁂𑀧𑀭𑀸𑀲𑀺 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺. 𑀢𑀢𑁆𑀣 𑀦𑀸𑀦𑀸𑀦𑀬𑁂𑀳𑀺 𑀏𑀓𑀽𑀦𑀦𑀯𑀼𑀢𑀺𑀘𑀺𑀢𑁆𑀢𑀯𑀺𑀪𑀸𑀯𑀺𑀦𑀻 𑀘𑀺𑀢𑁆𑀢𑀯𑀺𑀪𑀢𑁆𑀢𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀸 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀁 𑀏𑀓𑀯𑀺𑀥𑀸𑀤𑀺𑀦𑀸 𑀭𑀽𑀧𑀯𑀺𑀪𑀸𑀯𑀺𑀦𑀻 𑀭𑀽𑀧𑀯𑀺𑀪𑀢𑁆𑀢𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀸 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀁 𑀫𑀽𑀮𑀔𑀦𑁆𑀥𑀤𑁆𑀯𑀸𑀭𑀸𑀤𑀻𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀲𑀺𑀢𑁄 𑀦𑀺𑀓𑁆𑀔𑁂𑀧𑀭𑀸𑀲𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑁄 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀁 𑀢𑁂𑀧𑀺𑀝𑀓𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀝𑁆𑀞𑀓𑀣𑀸𑀪𑀽𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑁄 𑀳𑁄𑀢𑀺. 𑀏𑀯𑀫𑀺𑀤𑀁 𑀥𑀫𑁆𑀫𑀲𑀗𑁆𑀕𑀡𑀺𑀧𑁆𑀧𑀓𑀭𑀡𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀢𑁂𑀭𑀲𑀫𑀢𑁆𑀢𑀪𑀸𑀡𑀯𑀸𑀭𑀫𑁆𑀧𑀺 𑀲𑀫𑀸𑀦𑀁 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 𑀔𑀦𑁆𑀥𑀯𑀺𑀪𑀗𑁆𑀕𑁄 𑀆𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀅𑀧𑁆𑀧𑀫𑀜𑁆𑀜𑀸𑀲𑀺𑀓𑁆𑀔𑀸𑀧𑀤𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀔𑀼𑀤𑁆𑀤𑀓𑀯𑀢𑁆𑀣𑀼𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀸𑀢𑀺 𑀅𑀝𑁆𑀞𑀸𑀭𑀲 𑀯𑀺𑀪𑀗𑁆𑀕𑀸 𑀯𑀺𑀪𑀢𑁆𑀢𑀸, 𑀢𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀸𑀤𑀺𑀦𑀸𑀦𑀸𑀦𑀬𑁂𑀳𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀧𑀘𑁆𑀘𑁂𑀓𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀸 𑀳𑁄𑀦𑁆𑀢𑀺. 𑀏𑀯𑀫𑀺𑀤𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀧𑀜𑁆𑀘𑀢𑀺𑀁𑀲𑀫𑀢𑁆𑀢𑀪𑀸𑀡𑀯𑀸𑀭𑀫𑁆𑀧𑀺 𑀲𑀫𑀸𑀦𑀁 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀥𑀸𑀢𑀼𑀓𑀣𑀸𑀧𑀓𑀭𑀡𑀁 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺𑀆𑀤𑀺𑀦𑀸 𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀙𑀪𑀸𑀡𑀯𑀸𑀭𑀫𑀢𑁆𑀢𑀫𑁆𑀧𑀺 𑀲𑀫𑀸𑀦𑀁 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑁆𑀧𑀓𑀭𑀡𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀆𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻𑀢𑀺 𑀙𑀩𑁆𑀩𑀺𑀥𑁂𑀦 𑀯𑀺𑀪𑀢𑁆𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀅𑀢𑀺𑀭𑁂𑀓𑀧𑀜𑁆𑀘𑀪𑀸𑀡𑀯𑀸𑀭𑀫𑀢𑁆𑀢𑀫𑁆𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺, 𑀧𑀭𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀯𑀺𑀪𑀢𑁆𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀲𑀗𑁆𑀕𑀻𑀢𑀺𑀆𑀭𑁄𑀧𑀺𑀢𑀦𑀬𑁂𑀦 𑀤𑀻𑀖𑀦𑀺𑀓𑀸𑀬𑀧𑁆𑀧𑀫𑀸𑀡𑀫𑁆𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀢𑀣𑀸 𑀬𑀫𑀓𑀧𑁆𑀧𑀓𑀭𑀡𑀁 𑀫𑀽𑀮𑀬𑀫𑀓𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀲𑀗𑁆𑀔𑀸𑀭𑀅𑀦𑀼𑀲𑀬𑀘𑀺𑀢𑁆𑀢𑀥𑀫𑁆𑀫𑀇𑀦𑁆𑀤𑁆𑀭𑀺𑀬𑀬𑀫𑀓𑀦𑁆𑀢𑀺 𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀯𑀸𑀘𑀦𑀸𑀫𑀕𑁆𑀕𑀢𑁄 𑀯𑀻𑀲𑀪𑀸𑀡𑀯𑀸𑀭𑀲𑀢𑀫𑁆𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺.

𑀧𑀝𑁆𑀞𑀸𑀦𑀧𑁆𑀧𑀓𑀭𑀡𑀁 𑀳𑁂𑀢𑀼𑀧𑀘𑁆𑀘𑀬𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀺𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑁂 𑀕𑀳𑁂𑀢𑁆𑀯𑀸 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀘𑀢𑀼𑀯𑀻𑀲𑀢𑀺𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀧𑀘𑁆𑀘𑁂𑀓𑀁 𑀓𑀢𑀺𑀧𑀬𑀪𑀸𑀡𑀯𑀸𑀭𑀫𑁆𑀧𑀺 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑀸𑀡𑀯𑀸𑀭𑀁 𑀳𑁄𑀢𑀺. 𑀏𑀯𑀁 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸𑀦𑀁 𑀥𑀫𑁆𑀫𑀸𑀦𑀁, 𑀅𑀢𑁆𑀣𑀸𑀦𑀜𑁆𑀘 𑀧𑀲𑀯𑀦𑀢𑁄, 𑀧𑀸𑀮𑀦𑀢𑁄, 𑀧𑁄𑀲𑀦𑀢𑁄 𑀘 ‘‘𑀫𑀸𑀢𑀸 𑀯𑀺𑀬𑀸𑀢𑀺 𑀫𑀸𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀮𑀦𑀧𑁄𑀲𑀦𑀜𑁆𑀘𑁂𑀢𑁆𑀣 𑀲𑀫𑁆𑀫𑀼𑀝𑁆𑀞𑀸𑀦𑀁, 𑀯𑀺𑀭𑀤𑁆𑀥𑀸𑀦𑀜𑁆𑀘 𑀧𑀸𑀴𑀺𑀅𑀢𑁆𑀣𑀸𑀦𑀁 𑀫𑀸𑀢𑀺𑀓𑀸𑀦𑀼𑀲𑀸𑀭𑁂𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀫𑀸𑀦𑀬𑀦𑀢𑁄, 𑀭𑀓𑁆𑀔𑀡𑀢𑁄 𑀘 𑀯𑁂𑀤𑀺𑀢𑀩𑁆𑀩𑀁. 𑀲𑀸 𑀧𑀦𑀸𑀬𑀁 𑀧𑀭𑀺𑀘𑁆𑀙𑁂𑀤𑀢𑁄 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸 𑀯𑀺𑀪𑀗𑁆𑀕𑀫𑀸𑀢𑀺𑀓𑀸 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀫𑀸𑀢𑀺𑀓𑀸 𑀓𑀣𑀸𑀯𑀢𑁆𑀣𑀼𑀫𑀸𑀢𑀺𑀓𑀸 𑀬𑀫𑀓𑀫𑀸𑀢𑀺𑀓𑀸 𑀧𑀝𑁆𑀞𑀸𑀦𑀫𑀸𑀢𑀺𑀓𑀸𑀢𑀺 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀆𑀤𑀺𑀫𑁆𑀳𑀺 𑀞𑀧𑀺𑀢𑀸 𑀲𑀢𑁆𑀢𑀯𑀺𑀥𑀸 𑀳𑁄𑀢𑀺.

𑀢𑀢𑁆𑀣 𑀥𑀫𑁆𑀫𑀲𑀗𑁆𑀕𑀡𑀻𑀫𑀸𑀢𑀺𑀓𑀸 𑀆𑀤𑀺, 𑀲𑀸𑀧𑀺 𑀢𑀺𑀓𑀫𑀸𑀢𑀺𑀓𑀸 𑀤𑀼𑀓𑀫𑀸𑀢𑀺𑀓𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑀸 𑀢𑀺𑀓𑀫𑀸𑀢𑀺𑀓𑀸 𑀦𑀸𑀫. 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀲𑀢𑀤𑀼𑀓𑀸 𑀤𑀼𑀓𑀫𑀸𑀢𑀺𑀓𑀸 𑀦𑀸𑀫, 𑀲𑀸 𑀧𑀼𑀦 𑀆𑀳𑀘𑁆𑀘𑀪𑀸𑀲𑀺𑀢𑀸 𑀲𑀸𑀯𑀓𑀪𑀸𑀲𑀺𑀢𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑀸 𑀘𑁂𑀯, ‘‘𑀳𑁂𑀢𑀽 𑀥𑀫𑁆𑀫𑀸 𑀦 𑀳𑁂𑀢𑀽 𑀥𑀫𑁆𑀫𑀸…𑀧𑁂… 𑀲𑀭𑀡𑀸 𑀥𑀫𑁆𑀫𑀸 𑀅𑀭𑀡𑀸 𑀥𑀫𑁆𑀫𑀸’’𑀢𑀺 𑀇𑀫𑁂 𑀘 𑀲𑀢𑀁 𑀤𑀼𑀓𑀸𑀢𑀺 𑀅𑀬𑀁 𑀆𑀳𑀘𑁆𑀘𑀪𑀸𑀲𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀸 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀫𑀸𑀢𑀺𑀓𑀸 𑀦𑀸𑀫, 𑀢𑀤𑀦𑀦𑁆𑀢𑀭𑀸 ‘‘𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸…𑀧𑁂… 𑀔𑀬𑁂𑀜𑀸𑀡𑀁 𑀅𑀦𑀼𑀧𑁆𑀧𑀸𑀤𑁂𑀜𑀸𑀡’’𑀦𑁆𑀢𑀺 𑀇𑀫𑁂 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀞𑀧𑀺𑀢𑀢𑁆𑀢𑀸 𑀲𑀸𑀯𑀓𑀪𑀸𑀲𑀺𑀢𑀸 𑀦𑀸𑀫. 𑀇𑀫𑁂 𑀞𑀧𑁂𑀦𑁆𑀢𑁄 𑀧𑀦 𑀣𑁂𑀭𑁄 𑀦 𑀲𑀸𑀫𑀼𑀓𑁆𑀓𑀁𑀲𑀺𑀓𑁂𑀦 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀞𑀧𑁂𑀲𑀺, 𑀏𑀓𑀼𑀢𑁆𑀢𑀭𑀺𑀬𑀁 𑀧𑀦 𑀏𑀓𑀓𑀦𑀺𑀧𑀸𑀢𑀤𑀼𑀓𑀦𑀺𑀧𑀸𑀢𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑁂𑀳𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀆𑀪𑀺𑀥𑀫𑁆𑀫𑀺𑀓𑀢𑁆𑀣𑁂𑀭𑀸𑀦𑀁 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀅𑀓𑀺𑀮𑀫𑀦𑀢𑁆𑀣𑀁 𑀞𑀧𑁂𑀲𑀺.

𑀲𑀸 𑀧𑀼𑀦 𑀲𑀧𑁆𑀧𑀤𑁂𑀲𑀦𑀺𑀧𑁆𑀧𑀤𑁂𑀲𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀳𑀺 𑀦𑀯 𑀢𑀺𑀓𑀸, 𑀏𑀓𑀲𑀢𑁆𑀢𑀢𑀺 𑀘 𑀤𑀼𑀓𑀸 𑀲𑀧𑁆𑀧𑀤𑁂𑀲𑀸𑀦𑀁 𑀲𑀸𑀯𑀲𑁂𑀲𑀸𑀦𑀁 𑀦𑀸𑀫𑀭𑀽𑀧𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀧𑁆𑀧𑀤𑁂𑀲𑀸 𑀦𑀸𑀫, 𑀅𑀯𑀲𑁂𑀲𑀸 𑀢𑁂𑀭𑀲 𑀢𑀺𑀓𑀸, 𑀏𑀓𑀲𑀢𑁆𑀢𑀢𑀺 𑀘 𑀤𑀼𑀓𑀸 𑀦𑀺𑀧𑁆𑀧𑀤𑁂𑀲𑀸𑀦𑀁 𑀦𑀺𑀭𑀯𑀲𑁂𑀲𑀸𑀦𑀁 𑀦𑀸𑀫𑀭𑀽𑀧𑀸𑀦𑀁 𑀕𑀳𑀺𑀢𑀢𑁆𑀢𑀸 𑀦𑀺𑀧𑁆𑀧𑀤𑁂𑀲𑀸 𑀦𑀸𑀫. 𑀢𑁂𑀲𑀁 𑀯𑀺𑀪𑀸𑀕𑁄 𑀢𑀢𑁆𑀣 𑀢𑀢𑁆𑀣𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀣𑀸 𑀦𑀸𑀫𑀮𑀸𑀪𑀯𑀲𑁂𑀦 𑀤𑁆𑀯𑀺𑀥𑀸. 𑀲𑀩𑁆𑀩𑁂𑀯 𑀳𑀺 𑀏𑀢𑁂 𑀢𑀺𑀓𑀤𑀼𑀓𑀸 𑀆𑀤𑀺𑀧𑀤𑀯𑀲𑁂𑀦, 𑀲𑀩𑁆𑀩𑀧𑀤𑀯𑀲𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀦𑀸𑀫𑀁 𑀮𑀪𑀦𑁆𑀢𑀺. 𑀢𑀢𑁆𑀣 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺 𑀅𑀬𑀁 𑀢𑀸𑀯 𑀆𑀤𑀺𑀧𑀤𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀓𑀼𑀲𑀮𑀢𑁆𑀢𑀺𑀓𑁄 𑀦𑀸𑀫. ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸…𑀧𑁂… 𑀥𑀫𑁆𑀫𑀸’’𑀢𑀺 𑀅𑀬𑀁 𑀲𑀩𑁆𑀩𑀧𑀤𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀯𑁂𑀤𑀦𑀸𑀢𑁆𑀢𑀺𑀓𑁄 𑀦𑀸𑀫. 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀓𑀤𑀼𑀓𑀸𑀦𑀁 𑀦𑀸𑀫𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸 𑀧𑀦𑁂𑀲𑀸 𑀧𑀜𑁆𑀘𑀤𑀲𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀯𑀢𑁆𑀣𑀺𑀢𑀸. 𑀢𑀺𑀓𑀸𑀦𑀁 𑀳𑀺 𑀏𑀓𑁄 𑀧𑀭𑀺𑀘𑁆𑀙𑁂𑀤𑁄, 𑀤𑀼𑀓𑀸𑀦𑀁 𑀘𑀼𑀤𑁆𑀤𑀲. ‘‘𑀳𑁂𑀢𑀽 𑀥𑀫𑁆𑀫𑀸 𑀦𑀳𑁂𑀢𑀽 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀳𑀺 𑀙 𑀤𑀼𑀓𑀸 𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑁂𑀦 𑀓𑀡𑁆𑀡𑀺𑀓𑀸 𑀯𑀺𑀬, 𑀖𑀝𑀸 𑀯𑀺𑀬 𑀘 𑀳𑀼𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀳𑁂𑀢𑀼𑀕𑁄𑀘𑁆𑀙𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀅𑀧𑀭𑁂 ‘‘𑀲𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀲𑀢𑁆𑀢 𑀤𑀼𑀓𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀩𑀦𑁆𑀥𑀸 𑀓𑁂𑀯𑀮𑀁 𑀤𑀼𑀓𑀲𑀸𑀫𑀜𑁆𑀜𑁂𑀦 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑁄𑀘𑁆𑀙𑀓𑀦𑁆𑀢𑀭𑁂 𑀞𑀧𑀺𑀢𑀢𑁆𑀢𑀸, 𑀅𑀜𑁆𑀜𑁂𑀳𑀺 𑀘 𑀅𑀦𑁆𑀢𑀭𑀤𑀼𑀓𑁂𑀳𑀺 𑀘𑀽𑀴𑀓𑀢𑁆𑀢𑀸 ‘‘𑀘𑀽𑀴𑀦𑁆𑀢𑀭𑀤𑀼𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀧𑀭𑀁 𑀆𑀲𑀯𑀤𑀼𑀓𑀸𑀤𑀻𑀦𑀁 𑀙𑀦𑁆𑀦𑀁 𑀤𑀼𑀓𑀸𑀦𑀁 𑀯𑀲𑁂𑀦 𑀆𑀲𑀯𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀢𑁄 𑀲𑀁𑀬𑁄𑀚𑀦𑀤𑀼𑀓𑀸𑀤𑀻𑀦𑀁 𑀙𑀦𑁆𑀦𑀁 𑀯𑀲𑁂𑀦 𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀣𑀸 𑀕𑀦𑁆𑀣𑀑𑀖𑀬𑁄𑀕𑀦𑀻𑀯𑀭𑀡𑀤𑀼𑀓𑀸𑀤𑀻𑀦𑀁 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁂𑀦 𑀕𑀦𑁆𑀣𑀑𑀖𑀬𑁄𑀕𑀦𑀻𑀯𑀭𑀡𑀕𑁄𑀘𑁆𑀙𑀓𑀸 𑀦𑀸𑀫. 𑀧𑀭𑀸𑀫𑀸𑀲𑀤𑀼𑀓𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀲𑁂𑀦 𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀢𑁄 𑀧𑀭𑀁 𑀲𑀸𑀭𑀫𑁆𑀫𑀡𑀤𑀼𑀓𑀸𑀤𑀬𑁄 𑀘𑀢𑀼𑀤𑁆𑀤𑀲 𑀤𑀼𑀓𑀸 𑀫𑀳𑀦𑁆𑀢𑀭𑀤𑀼𑀓𑀸 𑀦𑀸𑀫. 𑀢𑀢𑁄 𑀧𑀭𑀁 𑀉𑀧𑀸𑀤𑀸𑀦𑀤𑀼𑀓𑀸𑀤𑀬𑁄 𑀙 𑀤𑀼𑀓𑀸 𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀢𑁄 𑀓𑀺𑀮𑁂𑀲𑀤𑀼𑀓𑀸𑀤𑀬𑁄 𑀅𑀝𑁆𑀞𑀤𑀼𑀓𑀸 𑀓𑀺𑀮𑁂𑀲𑀕𑁄𑀘𑁆𑀙𑀓𑁄 𑀦𑀸𑀫. 𑀢𑀢𑁄 𑀧𑀭𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀤𑀼𑀓𑀸𑀤𑀬𑁄 𑀅𑀝𑁆𑀞𑀸𑀭𑀲 𑀤𑀼𑀓𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀬 𑀧𑀭𑀺𑀬𑁄𑀲𑀸𑀦𑁂 𑀞𑀧𑀺𑀢𑀢𑁆𑀢𑀸 𑀧𑀺𑀝𑁆𑀞𑀺𑀤𑀼𑀓𑀸 𑀦𑀸𑀫. 𑀯𑀺𑀚𑁆𑀚𑀸𑀪𑀸𑀕𑀺𑀬𑀤𑀼𑀓𑀸𑀤𑀬𑁄 𑀧𑀦 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀤𑀼𑀓𑀸 𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀸 𑀦𑀸𑀫. 𑀏𑀯𑀫𑁂𑀢𑀺𑀲𑁆𑀲𑀸 𑀧𑀜𑁆𑀘𑀤𑀲𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀯𑀯𑀢𑁆𑀣𑀺𑀢𑀸𑀬 𑀢𑀸𑀯 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀪𑀯𑀺𑀲𑁆𑀲𑀢𑀺.

𑀓𑀼𑀲𑀮𑀢𑁆𑀢𑀺𑀓𑀯𑀡𑁆𑀡𑀦𑀸

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀢𑀺𑀓𑀫𑀸𑀢𑀺𑀓𑀸 𑀆𑀤𑀺, 𑀢𑀢𑁆𑀣𑀸𑀧𑀺 𑀓𑀼𑀲𑀮𑀢𑁆𑀢𑀺𑀓𑁄 𑀆𑀤𑀺, 𑀢𑀲𑁆𑀫𑀸 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀢𑀸𑀯 𑁋

𑀅𑀢𑁆𑀣𑀢𑁄 𑀪𑀽𑀫𑀺𑀪𑁂𑀤𑀸 𑀘, 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑀢𑁄;

𑀉𑀤𑁆𑀤𑁂𑀲𑀢𑁄 𑀘 𑀥𑀫𑁆𑀫𑀸𑀦𑀁, 𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑀢𑁄.

𑀲𑀗𑁆𑀕𑀳𑀸 𑀲𑀼𑀜𑁆𑀜𑀢𑁄 𑀘𑁂𑀯, 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄;

𑀬𑀣𑀸𑀦𑀼𑀭𑀽𑀧𑀁 𑀲𑀩𑁆𑀩𑀢𑁆𑀣, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀅𑀢𑁆𑀣𑀢𑁄 𑀢𑀸𑀯 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀓𑀼𑀲𑀮𑀲𑀤𑁆𑀤𑁄 𑀆𑀭𑁄𑀕𑁆𑀬𑀸𑀦𑀯𑀚𑁆𑀚𑀙𑁂𑀓𑀲𑀼𑀔𑀯𑀺𑀧𑀸𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀁 𑀳𑀺 ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁨𑁪𑁬; 𑁨.𑁨𑁦.𑁧𑁨𑁯) 𑀆𑀭𑁄𑀕𑁆𑀬𑁂 𑀤𑀺𑀲𑁆𑀲𑀢𑀺. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀓𑀸𑀬𑀲𑀫𑀸𑀘𑀸𑀭𑁄 𑀓𑀼𑀲𑀮𑁄? 𑀬𑁄 𑀔𑁄, 𑀫𑀳𑀸𑀭𑀸𑀚, 𑀓𑀸𑀬𑀲𑀫𑀸𑀘𑀸𑀭𑁄 𑀅𑀦𑀯𑀚𑁆𑀚𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁬𑁧) 𑀅𑀦𑀯𑀚𑁆𑀚𑁂. ‘‘𑀓𑀼𑀲𑀮𑁄 𑀢𑁆𑀯𑀁 𑀭𑀣𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁮𑁭) 𑀙𑁂𑀓𑁂. ‘‘𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁪𑁩𑁧) 𑀲𑀼𑀔𑀯𑀺𑀧𑀸𑀓𑁂. 𑀲𑁆𑀯𑀸𑀬𑀫𑀺𑀥 𑀆𑀭𑁄𑀕𑁆𑀬𑁂𑀧𑀺 𑀅𑀦𑀯𑀚𑁆𑀚𑁂𑀧𑀺 𑀲𑀼𑀔𑀯𑀺𑀧𑀸𑀓𑁂𑀧𑀺 𑀯𑀢𑁆𑀢𑀢𑀺. 𑀬𑀣𑁂𑀯 𑀳𑀺 𑀭𑀽𑀧𑀓𑀸𑀬𑁂 𑀦𑀺𑀩𑁆𑀬𑀸𑀥𑀺𑀢𑀸𑀬 𑀆𑀭𑁄𑀕𑁆𑀬𑀝𑁆𑀞𑁂𑀦 𑀓𑀼𑀲𑀮𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀭𑀽𑀧𑀥𑀫𑁆𑀫𑁂𑀧𑀺 𑀓𑀺𑀮𑁂𑀲𑀩𑁆𑀬𑀸𑀥𑀺𑀦𑁄 𑀅𑀪𑀸𑀯𑁂𑀦 𑀆𑀭𑁄𑀕𑁆𑀬𑀝𑁆𑀞𑁂𑀦 𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀮𑁂𑀲𑀯𑀚𑁆𑀚𑀲𑁆𑀲 𑀧𑀦 𑀅𑀪𑀸𑀯𑀸 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁.

𑀥𑀫𑁆𑀫-𑀲𑀤𑁆𑀤𑁄 𑀧𑀦𑀸𑀬𑀁 𑀧𑀭𑀺𑀬𑀢𑁆𑀢𑀺𑀳𑁂𑀢𑀼𑀕𑀼𑀡𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀁 𑀳𑀺 ‘‘𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁨) 𑀧𑀭𑀺𑀬𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀳𑁂𑀢𑀼𑀫𑁆𑀳𑀺. ‘‘𑀦 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄’’𑀢𑀺𑀆𑀤𑀻𑀲𑀼 (𑀣𑁂𑀭𑀕𑀸. 𑁩𑁦𑁪) 𑀕𑀼𑀡𑁂. ‘‘𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁩) 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬𑀁, 𑀲𑁆𑀯𑀸𑀬𑀫𑀺𑀥𑀸𑀧𑀺 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬𑀫𑁂𑀯 𑀯𑀝𑁆𑀝𑀢𑀺.

𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀦𑁆𑀢𑀺 𑀘𑀮𑀬𑀦𑁆𑀢𑀺 𑀓𑀫𑁆𑀧𑁂𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀓𑀼𑀘𑁆𑀙𑀺𑀢𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀬𑀦𑁆𑀢𑀻𑀢𑀺 𑀓𑀼𑀲𑀸, 𑀢𑁂 𑀓𑀼𑀲𑁂 𑀮𑀼𑀦𑀦𑁆𑀢𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄 𑀜𑀸𑀡𑀁 𑀓𑀼𑀲𑀁 𑀦𑀸𑀫, 𑀢𑁂𑀦 𑀓𑀼𑀲𑁂𑀦 𑀮𑀸𑀢𑀩𑁆𑀩𑀸 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀓𑀼𑀲𑀮𑀸. 𑀅𑀣 𑀯𑀸 𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀢𑁄 𑀓𑁄𑀲𑀮𑁆𑀮𑀢𑁄 𑀲𑀫𑁆𑀪𑀽𑀢𑀢𑁆𑀢𑀸 𑀓𑀼𑀲𑀮𑀸. 𑀇𑀤𑀁 𑀧𑀦 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀜𑁆𑀘𑀸𑀢𑀺 𑀦𑀺𑀩𑁆𑀩𑀘𑀦𑀤𑁆𑀯𑀬𑀁 𑀓𑀺𑀜𑁆𑀘𑀸𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁂𑀯 𑀬𑀼𑀚𑁆𑀚𑀢𑀺, 𑀭𑀼𑀴𑁆𑀳𑀻𑀯𑀲𑁂𑀦 𑀧𑀦 𑀢𑀁𑀲𑀤𑀺𑀲𑀢𑀸𑀬 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀯𑀸 𑀓𑀼𑀲𑀸 𑀉𑀪𑀬𑀪𑀸𑀕𑀕𑀢𑀁 𑀳𑀢𑁆𑀣𑀧𑁆𑀧𑀤𑁂𑀲𑀁 𑀮𑀼𑀦𑀦𑁆𑀢𑀺, 𑀏𑀯𑀫𑀺𑀫𑁂𑀧𑀺 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀉𑀪𑀬𑀪𑀸𑀕𑀕𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀮𑀼𑀦𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀸 𑀯𑀺𑀬 𑀮𑀼𑀦𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀅𑀢𑁆𑀢𑀦𑁄 𑀧𑀦 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸, 𑀥𑀸𑀭𑀻𑀬𑀦𑁆𑀢𑀺 𑀯𑀸 𑀧𑀘𑁆𑀘𑀬𑁂𑀳𑀺, 𑀥𑀸𑀭𑀻𑀬𑀦𑁆𑀢𑀺 𑀯𑀸 𑀬𑀣𑀸𑀲𑀪𑀸𑀯𑀢𑁄 𑀆𑀥𑀸𑀭𑀻𑀬𑀦𑁆𑀢𑀻𑀢𑀺𑀧𑀺 𑀥𑀫𑁆𑀫𑀸. 𑀦 𑀓𑀼𑀲𑀮𑀸 𑀅𑀓𑀼𑀲𑀮𑀸, 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀸 𑀅𑀫𑀺𑀢𑁆𑀢𑀸 𑀯𑀺𑀬 𑀓𑀼𑀲𑀮𑀧𑀝𑀺𑀧𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀦 𑀩𑁆𑀬𑀸𑀓𑀢𑀸𑀢𑀺 𑀅𑀩𑁆𑀬𑀸𑀓𑀢𑀸, 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀼 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸 𑀓𑀼𑀲𑀮𑀸, 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀸 𑀅𑀓𑀼𑀲𑀮𑀸, 𑀅𑀯𑀺𑀧𑀸𑀓𑀮𑀓𑁆𑀔𑀡𑀸 𑀅𑀩𑁆𑀬𑀸𑀓𑀢𑀸.

𑀓𑀺𑀁 𑀧𑀦𑁂𑀢𑀸𑀦𑀺 𑀓𑀼𑀲𑀮𑀸𑀢𑀺 𑀯𑀸 𑀥𑀫𑁆𑀫𑀸𑀢𑀺 𑀯𑀸𑀢𑀺𑀆𑀤𑀻𑀦𑀺 𑀏𑀓𑀢𑁆𑀣𑀸𑀦𑀺, 𑀉𑀤𑀸𑀳𑀼 𑀦𑀸𑀦𑀢𑁆𑀣𑀸𑀦𑀻𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀏𑀓𑀢𑁆𑀣𑀸𑀦𑀺, ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀇𑀤𑀁 ‘‘𑀓𑀼𑀲𑀮𑀸 𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺. 𑀅𑀣 𑀦𑀸𑀦𑀢𑁆𑀣𑀸𑀦𑀺, 𑀢𑀺𑀓𑀤𑀼𑀓𑀸𑀦𑀁 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀧𑀤𑀸𑀦𑀜𑁆𑀘 𑀅𑀲𑀫𑁆𑀩𑀦𑁆𑀥𑁄 ‘‘𑀓𑀼𑀲𑀮𑀸 𑀭𑀽𑀧𑀁 𑀘𑀓𑁆𑀔𑀼𑀫𑀸’’𑀢𑀺𑀆𑀤𑀻𑀦𑀁 𑀯𑀺𑀬. 𑀅𑀣𑀸𑀧𑀺 𑀬𑀤𑀺 𑀏𑀢𑀸𑀦𑀺 𑀏𑀓𑀢𑁆𑀣𑀸𑀦𑀺, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑀤𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀥𑀫𑁆𑀫𑀸𑀦𑀁 𑀥𑀫𑁆𑀫𑀲𑀪𑀸𑀯𑁂𑀦 𑀏𑀓𑀢𑁆𑀢𑀸 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀺. 𑀅𑀣 ‘‘𑀓𑀼𑀲𑀮𑀧𑀤𑀢𑁄 𑀅𑀓𑀼𑀲𑀮𑀸𑀤𑀺𑀧𑀤𑀲𑁆𑀲 𑀅𑀜𑁆𑀜𑀢𑁆𑀢𑀁 𑀲𑀺𑀬𑀸’’𑀢𑀺 𑀯𑀤𑀣, 𑀦 𑀏𑀢𑀸𑀦𑀺 𑀏𑀓𑀢𑁆𑀣𑀸𑀦𑀺. 𑀢𑀤𑀸 𑀥𑀫𑁆𑀫𑁄 𑀦𑀸𑀫 𑀪𑀸𑀯𑁄. 𑀪𑀸𑀯𑀢𑁄 𑀘 𑀅𑀜𑁆𑀜𑁄 𑀅𑀪𑀸𑀯𑁄𑀢𑀺. 𑀏𑀯𑀁 𑀅𑀜𑁆𑀜𑁄𑀜𑁆𑀜𑀸𑀧𑁂𑀓𑁆𑀔𑀸𑀬 𑀅𑀪𑀸𑀯𑀢𑁆𑀢𑀫𑀸𑀧𑀦𑁆𑀦𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀜𑁆𑀜𑁂 𑀓𑀼𑀲𑀮𑀸𑀤𑀬𑁄𑀧𑀺 𑀅𑀪𑀸𑀯𑀸 𑀏𑀯 𑀲𑀺𑀬𑀼𑀦𑁆𑀢𑀺? 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁, 𑀓𑀲𑁆𑀫𑀸? 𑀬𑀣𑀸𑀦𑀼𑀫𑀢𑀺𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄, 𑀦 𑀳𑀺 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀬𑀣𑀸 𑀓𑀼𑀲𑀮𑀸 𑀓𑀼𑀲𑀮𑀸𑀢𑀺, 𑀏𑀯𑀁 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁂𑀦 𑀧𑀡𑁆𑀟𑀺𑀢𑁂𑀳𑀺 𑀅𑀦𑀼𑀫𑀢𑀸𑀦𑀺, 𑀦𑀸𑀧𑀺 𑀓𑀼𑀲𑀮𑀸 𑀭𑀽𑀧𑀁 𑀘𑀓𑁆𑀔𑀼𑀫𑀸-𑀲𑀤𑁆𑀤𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀅𑀦𑁄𑀮𑁄𑀓𑀺𑀢𑀢𑁆𑀣𑀪𑀸𑀯𑁂𑀦, 𑀅𑀣 𑀔𑁄 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀢𑁆𑀢𑀸𑀤𑀺𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀲𑁆𑀲, 𑀲𑀪𑀸𑀯𑀲𑀸𑀥𑀸𑀭𑀡𑀸𑀤𑀺𑀅𑀢𑁆𑀣𑀲𑀸𑀫𑀜𑁆𑀜𑀲𑁆𑀲 𑀘 𑀚𑁄𑀢𑀓𑀢𑁆𑀢𑁂𑀦 𑀬𑀣𑀸𑀓𑁆𑀓𑀫𑀁 𑀅𑀦𑀼𑀫𑀢𑀸𑀦𑀺. 𑀓𑀼𑀲𑀮-𑀲𑀤𑁆𑀤𑁄 𑀳𑀺 𑀥𑀫𑁆𑀫-𑀲𑀤𑁆𑀤𑀲𑁆𑀲 𑀧𑀼𑀭𑀢𑁄 𑀯𑀼𑀘𑁆𑀘𑀫𑀸𑀦𑁄 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀲𑀩𑁆𑀩𑀲𑀸𑀥𑀸𑀭𑀡𑀲𑀸𑀫𑀜𑁆𑀜𑀢𑁆𑀣𑀤𑀻𑀧𑀓𑀁 𑀥𑀫𑁆𑀫-𑀲𑀤𑁆𑀤𑀁 𑀅𑀓𑀼𑀲𑀮𑀸𑀤𑀺𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀢𑁆𑀣𑀤𑀻𑀧𑀓𑀁 𑀓𑀭𑁄𑀢𑀺. 𑀏𑀯𑀁 𑀧𑀘𑁆𑀘𑁂𑀓𑀁 𑀪𑀺𑀦𑁆𑀦𑀯𑀺𑀲𑀬𑀸𑀦𑀫𑁆𑀧𑀺 𑀦𑁂𑀲𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀁 𑀏𑀓𑀢𑁆𑀣𑀢𑀸𑀬 𑀧𑀡𑁆𑀟𑀺𑀢𑀸𑀦𑀼𑀫𑀢𑀢𑀸𑀬 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀭𑁄𑀧𑀦𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁. 𑀏𑀯𑀁 𑀢𑀢𑁄 𑀧𑀭𑁂𑀲𑀼𑀧𑀺 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀢𑁄 𑀜𑀸𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀼𑀲𑀮𑀧𑀤𑀢𑁆𑀣𑁄

𑀪𑀽𑀫𑀺𑀪𑁂𑀤𑀸𑀢𑀺 𑀢𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀼𑀲𑀮𑀸 𑀢𑀸𑀯 𑀥𑀫𑁆𑀫𑀸 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑁋 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸 𑀮𑁄𑀓𑀼𑀢𑁆𑀢𑀭𑀸𑀢𑀺. 𑀅𑀬𑀁 𑀪𑀽𑀫𑀺𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀫𑁆𑀧𑀬𑁄𑀕𑀢𑁄𑀢𑀺 𑀏𑀯𑀁 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸𑀦𑀫𑁆𑀧𑀺 𑀦𑁂𑀲𑀁 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀸 𑀢𑀸𑀯 𑀲𑀫𑁆𑀧𑀬𑁄𑀕𑀢𑁄 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁? 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀁, 𑀢𑀣𑀸 𑀲𑀲𑀗𑁆𑀔𑀸𑀭𑀦𑁆𑀢𑀺. 𑀢𑀢𑁆𑀣 𑀇𑀝𑁆𑀞𑀸𑀭𑀫𑁆𑀫𑀡𑀢𑀸, 𑀲𑀤𑁆𑀥𑀸𑀩𑀸𑀳𑀼𑀮𑁆𑀮𑀢𑀸, 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑀸, 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸 𑀘 𑀏𑀓𑀸𑀤𑀲 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀓𑀸𑀭𑀡𑀸𑀦𑀺 𑀘𑀸𑀢𑀺 𑀇𑀫𑁂𑀳𑀺 𑀢𑀸𑀯 𑀓𑀸𑀭𑀡𑁂𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀜𑀸𑀡𑀲𑀫𑁆𑀧𑀢𑁆𑀢𑀺𑀁 𑀧𑀦 𑀧𑀢𑁆𑀣𑁂𑀢𑁆𑀯𑀸 𑀓𑀢𑀓𑀫𑁆𑀫𑀢𑁄, 𑀩𑁆𑀭𑀳𑁆𑀫𑀸𑀤𑀺𑀉𑀧𑀧𑀢𑁆𑀢𑀺𑀢𑁄, 𑀧𑀜𑁆𑀜𑀸𑀤𑀲𑀓𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀢𑁄, 𑀯𑀺𑀓𑁆𑀔𑀫𑁆𑀪𑀦𑁂𑀦 𑀓𑀺𑀮𑁂𑀲𑀤𑀽𑀭𑀺𑀪𑀸𑀯𑀢𑁄 𑀘 𑀲𑀢𑁆𑀢𑀯𑀺𑀥𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀓𑀸𑀭𑀡𑀢𑁄 𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀯𑀲𑁂𑀦 𑀧𑀯𑀢𑁆𑀢𑁄 𑀧𑀼𑀩𑁆𑀩𑀧𑀬𑁄𑀕𑁄 𑀲𑀗𑁆𑀔𑀸𑀭𑁄 𑀦𑀸𑀫.

𑀢𑁂𑀦 𑀉𑀧𑁆𑀧𑀦𑁆𑀦𑀁 𑀲𑀲𑀗𑁆𑀔𑀸𑀭𑀁, 𑀢𑀤𑀪𑀸𑀯𑀸 𑀅𑀲𑀗𑁆𑀔𑀸𑀭𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀳𑀺 𑀬𑀣𑀸𑀯𑀼𑀢𑁆𑀢𑀲𑁄𑀫𑀦𑀲𑁆𑀲𑀜𑀸𑀡𑀳𑁂𑀢𑀼𑀁 𑀆𑀕𑀫𑁆𑀫 𑀧𑀳𑀝𑁆𑀞𑁄 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀅𑀲𑀁𑀲𑀻𑀤𑀦𑁆𑀢𑁄, 𑀧𑀭𑁂𑀳𑀺 𑀘 𑀅𑀦𑀼𑀲𑁆𑀲𑀸𑀳𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀳𑀝𑁆𑀞𑀢𑀼𑀝𑁆𑀞𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀅𑀫𑀼𑀢𑁆𑀢𑀘𑀸𑀕𑀺𑀢𑀸𑀤𑀺𑀯𑀲𑁂𑀦 𑀲𑀁𑀲𑀻𑀤𑀫𑀸𑀦𑁄, 𑀅𑀢𑁆𑀢𑀦𑁄 𑀧𑀝𑀺𑀲𑀗𑁆𑀔𑀸𑀭𑁂𑀦 𑀯𑀸 𑀧𑀭𑁂𑀳𑀺 𑀯𑀸 𑀉𑀲𑁆𑀲𑀸𑀳𑀺𑀢𑁄 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀢𑀤𑁂𑀯 𑀲𑀲𑀗𑁆𑀔𑀸𑀭𑀁 𑀤𑀼𑀢𑀺𑀬𑀁 𑀓𑀼𑀲𑀮𑀁 𑀳𑁄𑀢𑀺. 𑀬𑀤𑀸 𑀧𑀦 𑀜𑀸𑀢𑀺𑀚𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀚𑀸𑀢𑀧𑀭𑀺𑀘𑀬𑀸 𑀩𑀸𑀮𑀤𑀸𑀭𑀓𑀸𑀤𑀬𑁄 𑀪𑀺𑀓𑁆𑀔𑀼𑀆𑀤𑀺𑀤𑀲𑁆𑀲𑀦𑁂𑀦 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀳𑀲𑀸 𑀤𑀸𑀦𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀢𑀤𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀜𑀸𑀢𑀺𑀆𑀤𑀻𑀳𑀺 𑀉𑀲𑁆𑀲𑀸𑀳𑀺𑀢𑀸 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀢𑀤𑁂𑀯 𑀘𑀢𑀼𑀢𑁆𑀣𑀁 𑀲𑀲𑀗𑁆𑀔𑀸𑀭𑀘𑀺𑀢𑁆𑀢𑀁 𑀳𑁄𑀢𑀺. 𑀬𑀤𑀸 𑀧𑀦 𑀲𑁄𑀫𑀦𑀲𑁆𑀲𑀳𑁂𑀢𑀼𑀦𑁄 𑀅𑀪𑀸𑀯𑁂𑀦 𑀯𑀺𑀲𑀼𑀁 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀓𑀼𑀲𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀤𑁆𑀤𑁂𑀲𑀢𑁄 𑀘 𑀥𑀫𑁆𑀫𑀸𑀦𑀦𑁆𑀢𑀺 𑀏𑀯𑀁 𑀲𑀫𑁆𑀧𑀬𑁄𑀕𑀢𑁄 𑀅𑀝𑁆𑀞𑀯𑀺𑀥𑁂𑀲𑀼 𑀓𑀼𑀲𑀮𑁂𑀲𑀼 𑀧𑀘𑁆𑀘𑁂𑀓𑀁 𑀥𑀫𑁆𑀫𑀸𑀦𑀁 𑀉𑀤𑁆𑀤𑁂𑀲𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀞𑀫𑀓𑀼𑀲𑀮𑁂 𑀢𑀸𑀯 𑀧𑀸𑀴𑀺𑀬𑀸 𑀲𑀭𑀽𑀧𑁂𑀦 𑀆𑀕𑀢𑀸 𑀢𑀺𑀁𑀲 𑀥𑀫𑁆𑀫𑀸, 𑀬𑁂𑀯𑀸𑀧𑀦𑀓𑀸 𑀦𑀯𑀸𑀢𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀯𑀻𑀭𑀺𑀬𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀚𑀻𑀯𑀺𑀢𑀁 𑀲𑀤𑁆𑀥𑀸 𑀲𑀢𑀺 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀓𑀸𑀬𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢𑀮𑀳𑀼𑀢𑀸 𑀓𑀸𑀬𑀫𑀼𑀤𑀼𑀢𑀸 𑀘𑀺𑀢𑁆𑀢𑀫𑀼𑀤𑀼𑀢𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀓𑀸𑀬𑀼𑀚𑀼𑀓𑀢𑀸 𑀘𑀺𑀢𑁆𑀢𑀼𑀚𑀼𑀓𑀢𑀸𑀢𑀺 𑀇𑀫𑁂 𑀲𑀭𑀽𑀧𑁂𑀦 𑀆𑀕𑀢𑀸 𑀢𑀺𑀁𑀲𑀥𑀫𑁆𑀫𑀸. 𑀙𑀦𑁆𑀤𑁄 𑀅𑀥𑀺𑀫𑁄𑀓𑁆𑀔𑁄 𑀫𑀦𑀲𑀺𑀓𑀸𑀭𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀻𑀢𑀺 𑀇𑀫𑁂 𑀬𑁂𑀯𑀸𑀧𑀦𑀓𑀸 𑀦𑀯𑀸𑀢𑀺.

𑀧𑀤𑀪𑀸𑀚𑀦𑀻𑀬𑁂 𑀧𑀦 𑁋

‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺 𑀲𑀤𑁆𑀥𑀸𑀩𑀮𑀁 𑀯𑀻𑀭𑀺𑀬𑀩𑀮𑀁 𑀲𑀢𑀺𑀩𑀮𑀁 𑀲𑀫𑀸𑀥𑀺𑀩𑀮𑀁 𑀧𑀜𑁆𑀜𑀸𑀩𑀮𑀁 𑀳𑀺𑀭𑀺𑀩𑀮𑀁 𑀑𑀢𑁆𑀢𑀧𑁆𑀧𑀩𑀮𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀓𑀸𑀬𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢𑀮𑀳𑀼𑀢𑀸 𑀓𑀸𑀬𑀫𑀼𑀤𑀼𑀢𑀸 𑀘𑀺𑀢𑁆𑀢𑀫𑀼𑀤𑀼𑀢𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀓𑀸𑀬𑀼𑀚𑀼𑀓𑀢𑀸 𑀘𑀺𑀢𑁆𑀢𑀼𑀚𑀼𑀓𑀢𑀸 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀧𑀕𑁆𑀕𑀸𑀳𑁄 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 (𑀥. 𑀲. 𑁧) 𑁋

𑀏𑀯𑀁 𑀲𑀭𑀽𑀧𑀢𑁄 𑀉𑀤𑁆𑀤𑀺𑀝𑁆𑀞𑀸 𑀙𑀧𑀜𑁆𑀜𑀸𑀲 𑀥𑀫𑁆𑀫𑀸 ‘‘𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺 (𑀥. 𑀲. 𑁧) 𑀏𑀯𑀁 𑀬𑁂𑀯𑀸𑀧𑀦𑀓𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀉𑀤𑁆𑀤𑀺𑀝𑁆𑀞𑀸, 𑀅𑀝𑁆𑀞𑀓𑀣𑀸𑀬𑀁 𑀘𑀲𑁆𑀲𑀸 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼 𑀆𑀕𑀢𑁂 𑀕𑀳𑁂𑀢𑁆𑀯𑀸 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀝𑁆𑀞𑀸 𑀙𑀦𑁆𑀤𑀸𑀤𑀬𑁄 𑀦𑀯𑀸𑀢𑀺 𑀧𑀜𑁆𑀘𑀲𑀝𑁆𑀞𑀺 𑀥𑀫𑁆𑀫𑀸 𑀆𑀕𑀢𑀸. 𑀬𑀲𑁆𑀫𑀸 𑀧𑀦 𑀢𑁂𑀲𑀼 𑀲𑀭𑀽𑀧𑁂𑀦 𑀆𑀕𑀢𑀸 𑀛𑀸𑀦𑀗𑁆𑀕𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀗𑁆𑀕𑀩𑀮𑀫𑀽𑀮𑀸𑀤𑀻𑀦𑀁 𑀯𑀲𑁂𑀦 𑀏𑀓𑀲𑁆𑀲𑁂𑀯 𑀩𑀳𑀼𑀓𑀺𑀘𑁆𑀘𑀢𑀸𑀤𑀲𑁆𑀲𑀦𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑀸𑀬𑁂𑀦 𑀙𑀧𑀜𑁆𑀜𑀸𑀲𑀯𑀺𑀥𑁂𑀦 𑀤𑁂𑀲𑀺𑀢𑀸𑀧𑀺 𑀅𑀕𑀳𑀺𑀢𑀕𑁆𑀕𑀳𑀡𑁂𑀦 𑀬𑀣𑀸𑀯𑀼𑀢𑁆𑀢𑀸 𑀲𑀫𑀢𑀺𑀁𑀲𑁂𑀯 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑁂 𑀧𑀦 𑀲𑀯𑀺𑀪𑀢𑁆𑀢𑀺𑀓𑀸 𑀅𑀯𑀺𑀪𑀢𑁆𑀢𑀺𑀓𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀨𑀲𑁆𑀲𑀸𑀤𑀬𑁄 𑀅𑀝𑁆𑀞𑀸𑀭𑀲 𑀏𑀓𑀓𑀢𑁆𑀢𑀸 𑀅𑀯𑀺𑀪𑀢𑁆𑀢𑀺𑀓𑀸. 𑀯𑁂𑀤𑀦𑀸𑀤𑀬𑁄 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀅𑀝𑁆𑀞𑀢𑀺𑀁𑀲𑀧𑁆𑀧𑀪𑁂𑀤𑁂𑀦 𑀬𑀣𑀸𑀬𑁄𑀕𑀁 𑀯𑀺𑀪𑀢𑁆𑀢𑀢𑁆𑀢𑀸 𑀲𑀯𑀺𑀪𑀢𑁆𑀢𑀺𑀓𑀸, 𑀬𑁂𑀯𑀸𑀧𑀦𑀓𑀸 𑀧𑀦 𑀅𑀯𑀺𑀪𑀢𑁆𑀢𑀺𑀓𑀸 𑀏𑀯. 𑀢𑀲𑁆𑀫𑀸 𑀢𑁂 𑀲𑀩𑁆𑀩𑁂𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸𑀯 𑀳𑁄𑀦𑁆𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

𑀨𑀲𑁆𑀲𑀸𑀤𑀺𑀧𑀜𑁆𑀘𑀓𑀁 𑀧𑀜𑁆𑀘𑀛𑀸𑀦𑀗𑁆𑀕𑀸𑀦𑀺𑀦𑁆𑀤𑁆𑀭𑀺𑀬𑀝𑁆𑀞𑀓𑀁;

𑀫𑀕𑁆𑀕𑀗𑁆𑀕𑀧𑀜𑁆𑀘𑀓𑀁 𑀲𑀢𑁆𑀢𑀩𑀮𑀁 𑀫𑀽𑀮𑀢𑁆𑀢𑀺𑀓𑀫𑁆𑀧𑀺 𑀘.

𑀓𑀫𑁆𑀫𑀧𑀣𑀢𑁆𑀢𑀺𑀓𑀜𑁆𑀘𑁂𑀯, 𑀮𑁄𑀓𑀧𑀸𑀮𑀤𑀼𑀓𑀁 𑀢𑀣𑀸;

𑀧𑀲𑁆𑀲𑀤𑁆𑀥𑀺𑀆𑀤𑀻 𑀙 𑀤𑀼𑀓𑀸, 𑀢𑀻𑀡𑀺 𑀧𑀺𑀝𑁆𑀞𑀺𑀤𑀼𑀓𑀸𑀦𑀺𑀢𑀺.

𑀲𑀢𑁆𑀢𑀭𑀲𑀳𑀺 𑀭𑀸𑀲𑀻𑀳𑀺, 𑀙𑀧𑀜𑁆𑀜𑀸𑀲𑁂𑀯 𑀧𑀸𑀴𑀺𑀬𑀁;

𑀯𑀼𑀢𑁆𑀢𑀸 𑀲𑀪𑀸𑀯𑀢𑁄 𑀢𑀺𑀁𑀲, 𑀥𑀫𑁆𑀫𑀸 𑀅𑀕𑀳𑀺𑀢𑀕𑁆𑀕𑀳𑁂.

𑀨𑀲𑁆𑀲𑁄 𑀚𑀻𑀯𑀺𑀢𑀲𑀜𑁆𑀜𑀸 𑀘, 𑀘𑁂𑀢𑀦𑀸 𑀘𑀸𑀭𑀧𑀻𑀢𑀺𑀬𑁄;

𑀙 𑀤𑀼𑀓𑀸 𑀓𑀸𑀬𑀧𑀲𑁆𑀲𑀤𑁆𑀥𑀺-𑀧𑀫𑀼𑀔𑀸𑀝𑁆𑀞𑀸𑀭𑀲𑁂𑀓𑀓𑀸.

𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀲𑀤𑁆𑀥𑀸 𑀘, 𑀳𑀺𑀭𑀺𑀑𑀢𑁆𑀢𑀧𑁆𑀧𑀺𑀬𑀫𑁆𑀧𑀺 𑀘;

𑀅𑀮𑁄𑀪𑁄 𑀘 𑀅𑀤𑁄𑀲𑁄 𑀘, 𑀲𑀢𑁆𑀢 𑀤𑁆𑀯𑀺𑀥𑀸 𑀯𑀺𑀪𑀸𑀯𑀺𑀢𑀸.

𑀯𑁂𑀤𑀦𑀸 𑀢𑀺𑀯𑀺𑀥𑀸 𑀯𑀻𑀭𑀺𑀬𑀁, 𑀲𑀢𑀺 𑀘 𑀘𑀢𑀼𑀥𑀸 𑀫𑀢𑀸;

𑀙𑀤𑁆𑀥𑀸 𑀏𑀓𑀕𑁆𑀕𑀢𑀸 𑀧𑀜𑁆𑀜𑀸, 𑀲𑀢𑁆𑀢𑀥𑀸𑀯 𑀯𑀺𑀪𑀸𑀯𑀺𑀢𑀸.

𑀯𑀺𑀭𑀢𑀻 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀫𑀦𑀓𑁆𑀓𑀸𑀭𑁄 𑀙𑀦𑁆𑀤𑀫𑀚𑁆𑀛𑀢𑁆𑀢𑀸;

𑀥𑀺𑀫𑁄𑀓𑁆𑀔𑁄 𑀬𑁂𑀯𑀸𑀧𑀦𑀓𑀸, 𑀦𑀯𑁂𑀢𑁂 𑀧𑀞𑀫𑁂 𑀫𑀦𑁂.

𑀧𑀜𑁆𑀘𑀲𑀝𑁆𑀞𑀺𑀯𑀺𑀥𑁂𑀦𑁂𑀯, 𑀧𑀭𑀺𑀬𑀸𑀬𑁂𑀦 𑀤𑁂𑀲𑀺𑀢𑀸;

𑀦𑀯𑀸𑀥𑀺𑀓𑀸 𑀘 𑀢𑁂𑀢𑁆𑀢𑀺𑀁𑀲, 𑀥𑀫𑁆𑀫𑀸𑀯 𑀧𑀭𑀫𑀢𑁆𑀣𑀢𑁄𑀢𑀺.

𑀏𑀢𑁆𑀣 𑀘 𑀲𑀭𑀽𑀧𑁂𑀦 𑀆𑀕𑀢𑀸 𑀢𑀺𑀁𑀲 𑀥𑀫𑁆𑀫𑀸, 𑀬𑁂𑀯𑀸𑀧𑀦𑀓𑁂𑀲𑀼 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀘𑀢𑀼𑀢𑁆𑀢𑀺𑀁𑀲 𑀥𑀫𑁆𑀫𑀸 𑀏𑀓𑀓𑁆𑀔𑀡𑁂 𑀦𑀺𑀬𑀢𑀸 𑀮𑀩𑁆𑀪𑀦𑁆𑀢𑀺, 𑀲𑁂𑀲𑀸 𑀧𑀦 𑀓𑀭𑀼𑀡𑀸𑀤𑀬𑁄 𑀧𑀜𑁆𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑀯𑀲𑁂𑀦, 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀘𑀻𑀤𑀼𑀘𑁆𑀘𑀭𑀺𑀢𑀫𑀺𑀘𑁆𑀙𑀸𑀚𑀻𑀯𑁂𑀳𑀺 𑀯𑀺𑀭𑀫𑀡𑀯𑀲𑁂𑀦 𑀘 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀓𑀸𑀮𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀜𑁆𑀜𑀣𑀸𑀦𑀼𑀧𑁆𑀧𑀚𑁆𑀚𑀦𑀢𑁄 𑀅𑀦𑀺𑀬𑀢𑀸. 𑀢𑁂 𑀘 𑀬𑀲𑁆𑀫𑀸 𑀤𑀼𑀓𑁆𑀔𑀺𑀢𑀲𑀼𑀔𑀺𑀢𑀲𑀢𑁆𑀢𑀯𑀲𑁂𑀦, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀢𑁆𑀢𑀬𑀯𑀲𑁂𑀦 𑀘 𑀧𑀘𑁆𑀘𑁂𑀓𑀁 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀘𑀺𑀢𑁆𑀢𑀓𑁆𑀔𑀡𑁂𑀲𑀼 𑀦𑀺𑀬𑀢𑀸 𑀘𑀢𑀼𑀢𑁆𑀢𑀺𑀁𑀲, 𑀓𑀭𑀼𑀡𑀸𑀤𑀻𑀲𑀼 𑀏𑀓𑀦𑁆𑀢𑀺 𑀧𑀜𑁆𑀘𑀢𑀺𑀁𑀲 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑁂𑀯𑀮𑀁 𑀧𑀦 𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀦𑀺𑀬𑀢𑀸 𑀘𑀢𑀼𑀢𑁆𑀢𑀺𑀁𑀲𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀥𑀫𑁆𑀫𑀼𑀤𑁆𑀤𑁂𑀲𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑀢𑁄𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑀸𑀦𑀁 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀭𑀲𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄. 𑀅𑀬𑀁 𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀸 𑀘𑀲𑁆𑀲 𑀨𑀼𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺 𑀅𑀫𑁆𑀩𑀺𑀮𑀸𑀤𑀺𑀤𑀲𑁆𑀲𑀦𑁂 𑀔𑁂𑀴𑀼𑀧𑁆𑀧𑀸𑀤𑀸𑀤𑀺𑀦𑀸 𑀜𑀸𑀢𑀩𑁆𑀩𑀸. 𑀏𑀓𑀤𑁂𑀲𑁂𑀦 𑀧𑀦 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀁, 𑀲𑀤𑁆𑀤𑁄 𑀯𑀺𑀬 𑀘 𑀲𑁄𑀢𑀁 𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀜𑁆𑀘 𑀲𑀗𑁆𑀖𑀝𑁆𑀝𑁂𑀢𑀻𑀢𑀺 𑀲𑀗𑁆𑀖𑀝𑁆𑀝𑀦𑀭𑀲𑁄. 𑀢𑀺𑀓𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀧𑀯𑁂𑀤𑀺𑀢𑀢𑁆𑀢𑀸 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀨𑀮𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀧𑀦𑁂𑀲 𑀯𑁂𑀤𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀦𑀸𑀫 𑀳𑁄𑀢𑀺. 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑁂𑀦 𑀘𑁂𑀯 𑀇𑀦𑁆𑀤𑁆𑀭𑀺𑀬𑁂𑀦 𑀘 𑀧𑀭𑀺𑀓𑁆𑀔𑀢𑁂 𑀯𑀺𑀲𑀬𑁂 𑀅𑀦𑀦𑁆𑀢𑀭𑀸𑀬𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀦𑁂𑀲 𑀦𑀺𑀘𑁆𑀘𑀫𑁆𑀫𑀸 𑀕𑀸𑀯𑀻 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀮𑀓𑁆𑀔𑀡𑀸𑀤𑀻𑀲𑀼 𑀘 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄 𑀯𑀸 𑀲𑀸𑀫𑀜𑁆𑀜𑀁 𑀯𑀸 𑀮𑀓𑁆𑀔𑀡𑀁 𑀦𑀸𑀫, 𑀓𑀺𑀘𑁆𑀘𑀁 𑀯𑀸 𑀲𑀫𑁆𑀧𑀢𑁆𑀢𑀺 𑀯𑀸 𑀭𑀲𑁄 𑀦𑀸𑀫, 𑀉𑀧𑀝𑁆𑀞𑀸𑀦𑀸𑀓𑀸𑀭𑁄 𑀯𑀸 𑀨𑀮𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀦𑀸𑀫, 𑀆𑀲𑀦𑁆𑀦𑀓𑀸𑀭𑀡𑀁 𑀧𑀤𑀝𑁆𑀞𑀸𑀦𑀁 𑀦𑀸𑀫. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀢𑁆𑀣 𑀮𑀓𑁆𑀔𑀡𑀸𑀤𑀻𑀦𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸, 𑀲𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀲𑀪𑀸𑀯𑀪𑁂𑀤𑀢𑁄 𑀧𑀦𑁂𑀲𑀸 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺 𑁋 𑀲𑀼𑀔𑀁 𑀤𑀼𑀓𑁆𑀔𑀁 𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁 𑀉𑀧𑁂𑀓𑁆𑀔𑀸𑀢𑀺. 𑀢𑀢𑁆𑀣 𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑀼𑀔𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁, 𑀓𑀸𑀬𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀁. 𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀫𑀺𑀮𑀸𑀧𑀦𑀭𑀲𑀁, 𑀓𑀸𑀬𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀁. 𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑁄𑀫𑀦𑀲𑁆𑀲𑀁, 𑀬𑀣𑀸 𑀢𑀣𑀸 𑀯𑀸 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁 𑀯𑀸, 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀇𑀝𑁆𑀞𑀸𑀓𑀸𑀭𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀁. 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁, 𑀬𑀣𑀸 𑀢𑀣𑀸 𑀯𑀸 𑀅𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀫𑀺𑀮𑀸𑀧𑀦𑀭𑀲𑀁 𑀯𑀸, 𑀘𑁂𑀢𑀲𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀏𑀓𑀦𑁆𑀢𑁂𑀦 𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁. 𑀫𑀚𑁆𑀛𑀢𑁆𑀢𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀸𑀢𑀺𑀉𑀧𑀩𑁆𑀭𑀽𑀳𑀦𑀫𑀺𑀮𑀸𑀧𑀦𑀭𑀲𑀸, 𑀲𑀦𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀦𑀺𑀧𑁆𑀧𑀻𑀢𑀺𑀓𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀏𑀢𑁆𑀣 𑀘 𑀲𑀼𑀔𑀁, 𑀤𑀼𑀓𑁆𑀔𑀜𑁆𑀘 𑀏𑀓𑀦𑁆𑀢𑀫𑀩𑁆𑀬𑀸𑀓𑀢𑀁, 𑀤𑁄𑀫𑀦𑀲𑁆𑀲𑀫𑁂𑀓𑀦𑁆𑀢𑀫𑀓𑀼𑀲𑀮𑀁, 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸 𑀧𑀦 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸. 𑀇𑀥 𑀧𑀦 𑀓𑀼𑀲𑀮𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀅𑀥𑀺𑀧𑁆𑀧𑁂𑀢𑀸.

𑀦𑀻𑀮𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸. 𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸, 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀭𑀲𑀸 𑀯𑀸 𑀤𑀸𑀭𑀼𑀆𑀤𑀻𑀲𑀼 𑀢𑀘𑁆𑀙𑀓𑀸𑀤𑀬𑁄 𑀯𑀺𑀬, 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀓𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸 𑀯𑀺𑀬, 𑀆𑀭𑀫𑁆𑀫𑀡𑁂 𑀅𑀦𑁄𑀕𑀸𑀴𑁆𑀳𑀯𑀼𑀢𑁆𑀢𑀺𑀢𑀸𑀬 𑀅𑀘𑀺𑀭𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸 𑀯𑀺𑀚𑁆𑀚𑀼 𑀯𑀺𑀬, 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸 𑀢𑀺𑀡𑀧𑀼𑀭𑀺𑀲𑁂𑀲𑀼 𑀫𑀺𑀕𑀧𑁄𑀢𑀓𑀸𑀦𑀁 𑀧𑀼𑀭𑀺𑀲𑀸𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀯𑀺𑀬.

𑀘𑁂𑀢𑁂𑀢𑀻𑀢𑀺 𑀘𑁂𑀢𑀦𑀸, 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀘𑁂𑀢𑀦𑀸𑀪𑀸𑀯𑀮𑀓𑁆𑀔𑀡𑀸, 𑀆𑀬𑀽𑀳𑀦𑀭𑀲𑀸, 𑀲𑀸 𑀘 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀏𑀯 𑀳𑁄𑀢𑀺. 𑀇𑀢𑀭𑁂𑀲𑀼 𑀧𑀦 𑀢𑀁𑀲𑀤𑀺𑀲𑀢𑀸𑀬 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀓𑀸 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀺𑀆𑀤𑀬𑁄 𑀯𑀺𑀬. 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼 𑀧𑀦𑀸𑀬𑀁 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀉𑀲𑁆𑀲𑀸𑀳𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀺.

𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁. 𑀯𑀺𑀢𑁆𑀣𑀸𑀭𑀢𑁄 𑀧𑀦𑀲𑁆𑀲 𑀯𑀘𑀦𑀢𑁆𑀣𑁄 𑀘𑀺𑀢𑁆𑀢𑀤𑀼𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑁂𑀢𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀺𑀢𑁆𑀢𑀁, 𑀧𑀼𑀩𑁆𑀩𑀗𑁆𑀕𑀫𑀭𑀲𑀁, 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀢𑁄 𑀲𑀦𑁆𑀥𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁.

𑀯𑀺𑀢𑀓𑁆𑀓𑁂𑀢𑀺 𑀊𑀳𑁂𑀢𑀺, 𑀯𑀺𑀢𑀓𑁆𑀓𑀦𑀫𑀢𑁆𑀢𑀫𑁂𑀯 𑀯𑀸 𑀲𑁄𑀢𑀺 𑀯𑀺𑀢𑀓𑁆𑀓𑁄. 𑀲𑁆𑀯𑀸𑀬𑀫𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀭𑁄𑀧𑀦𑀮𑀓𑁆𑀔𑀡𑁄, 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄, 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀆𑀭𑀫𑁆𑀫𑀡𑁂 𑀢𑁂𑀦 𑀘𑀺𑀢𑁆𑀢𑀁 𑀯𑀺𑀘𑀭𑀢𑀺, 𑀯𑀺𑀘𑀭𑀡𑀫𑀢𑁆𑀢𑀫𑁂𑀯 𑀯𑀸 𑀲𑁄𑀢𑀺 𑀯𑀺𑀘𑀸𑀭𑁄. 𑀲𑁆𑀯𑀸𑀬𑀫𑀸𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄, 𑀢𑀢𑁆𑀣 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀫𑀚𑁆𑀚𑀦𑀯𑀲𑁂𑀦 𑀧𑀦𑁂𑀲𑀁 𑀬𑀣𑀸𑀓𑁆𑀓𑀫𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀬 𑀖𑀡𑁆𑀝𑀸𑀪𑀺𑀖𑀸𑀢𑁄 𑀯𑀺𑀬 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄, 𑀖𑀡𑁆𑀝𑀸𑀦𑀼𑀭𑀯𑁄 𑀯𑀺𑀬 𑀅𑀦𑀼𑀧𑁆𑀧𑀩𑀦𑁆𑀥𑁄 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸 𑀘𑁂𑀢𑁆𑀣 𑀯𑀺𑀢𑀓𑁆𑀓𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀧𑀓𑁆𑀔𑀺𑀦𑁄 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬, 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀧𑀲𑀸𑀭𑀡𑀁 𑀯𑀺𑀬. 𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀸𑀓𑀝𑁄 𑀳𑁄𑀢𑀺. 𑀉𑀪𑁄𑀧𑀺 𑀧𑀦𑁂𑀢𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀧𑀤𑀝𑁆𑀞𑀸𑀦𑀸.

𑀧𑀺𑀡𑀬𑀢𑀻𑀢𑀺 𑀧𑀻𑀢𑀺. 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀧𑀻𑀡𑀦𑀭𑀲𑀸, 𑀨𑀭𑀡𑀭𑀲𑀸 𑀯𑀸, 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸.

𑀯𑀻𑀭𑀸𑀦𑀁 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀯𑀻𑀭𑀺𑀬𑀁, 𑀯𑀺𑀯𑀺𑀥𑁂𑀦 𑀯𑀸 𑀉𑀧𑀸𑀬𑁂𑀦 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑀬𑀺𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁. 𑀢𑀜𑁆𑀘 𑀉𑀲𑁆𑀲𑀸𑀳𑀮𑀓𑁆𑀔𑀡𑀁, 𑀲𑀳𑀚𑀸𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, ‘‘𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻’’𑀢𑀺 (𑀅. 𑀦𑀺. 𑁪.𑁧𑁧𑁩) 𑀯𑀘𑀦𑀢𑁄 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁, 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁 𑀯𑀸. 𑀇𑀤𑀁 𑀧𑀦 𑀓𑀼𑀲𑀮𑀧𑀓𑁆𑀔𑁂 𑀧𑀤𑀝𑁆𑀞𑀸𑀦𑀁, 𑀅𑀓𑀼𑀲𑀮𑀸𑀤𑀺𑀧𑀓𑁆𑀔𑁂 𑀧𑀦 𑀲𑀸𑀥𑀸𑀭𑀡𑀯𑀲𑁂𑀦 𑀬𑀣𑀸 𑀢𑀣𑀸 𑀯𑀸 𑀤𑀼𑀓𑁆𑀔𑀯𑀺𑀦𑁄𑀤𑀦𑀓𑀸𑀫𑀢𑀸𑀧𑀤𑀝𑁆𑀞𑀸𑀦𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀧𑀤𑀝𑁆𑀞𑀸𑀦𑀁 𑀯𑀸. 𑀢𑀁 𑀲𑀫𑀸𑀭𑀤𑁆𑀥𑀁 𑀲𑀩𑁆𑀩𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓𑁄 𑀅𑀕𑁆𑀕𑁄 𑀯𑀺𑀲𑀬𑁄 𑀅𑀲𑁆𑀲𑀸𑀢𑀺 𑀏𑀓𑀕𑁆𑀕𑀁, 𑀘𑀺𑀢𑁆𑀢𑀁, 𑀢𑀲𑁆𑀲 𑀪𑀸𑀯𑁄 𑀏𑀓𑀕𑁆𑀕𑀢𑀸, 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀲𑀫𑀸𑀥𑀺𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀸 𑀅𑀯𑀺𑀲𑀸𑀭𑀡𑀮𑀓𑁆𑀔𑀡𑀸, 𑀲𑀳𑀚𑀸𑀢𑀸𑀦𑀁 𑀲𑀫𑁆𑀧𑀺𑀡𑁆𑀟𑀦𑀭𑀲𑀸 𑀦𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀁 𑀉𑀤𑀓𑀁 𑀯𑀺𑀬, 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀜𑀸𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀲𑀼𑀔𑀧𑀤𑀝𑁆𑀞𑀸𑀦𑀸, 𑀅𑀓𑀼𑀲𑀮𑀸𑀤𑀺𑀲𑀸𑀥𑀸𑀭𑀡𑀯𑀲𑁂𑀦 𑀧𑀦𑁂𑀢𑁆𑀣𑀸𑀧𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑀸𑀦𑀺. 𑀦𑀺𑀯𑀸𑀢𑁂 𑀤𑀻𑀧𑀘𑁆𑀘𑀻𑀦𑀁 𑀞𑀺𑀢𑀺 𑀯𑀺𑀬 𑀘𑁂𑀢𑀲𑁄 𑀞𑀺𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀆𑀭𑀫𑁆𑀫𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀦𑁆𑀢𑀸 𑀯𑀺𑀬 𑀓𑀼𑀲𑀮𑀧𑀓𑁆𑀔𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀆𑀭𑀫𑁆𑀫𑀡𑀁 𑀑𑀕𑀸𑀳𑀦𑁆𑀢𑀺 𑀲𑀤𑁆𑀥𑀸 𑀲𑀢𑀺 𑀏𑀓𑀕𑁆𑀕𑀢𑀸 𑀧𑀜𑁆𑀜𑀸𑀢𑀺, 𑀢𑁂𑀦𑁂𑀯 𑀲𑀤𑁆𑀥𑀸 ‘‘𑀑𑀓𑀧𑁆𑀧𑀦𑀸’’𑀢𑀺 𑀯𑀼𑀢𑁆𑀢𑀸, 𑀲𑀢𑀺 𑀘 ‘‘𑀅𑀧𑀺𑀮𑀸𑀧𑀦𑀸’’𑀢𑀺, 𑀏𑀓𑀕𑁆𑀕𑀢𑀸 ‘‘𑀅𑀯𑀝𑁆𑀞𑀺𑀢𑀻’’𑀢𑀺, 𑀧𑀜𑁆𑀜𑀸 ‘‘𑀧𑀭𑀺𑀬𑁄𑀕𑀸𑀳𑀦𑀸’’𑀢𑀺 𑀘 𑀯𑀼𑀢𑁆𑀢𑀸. 𑀅𑀓𑀼𑀲𑀮𑀧𑀓𑁆𑀔𑁂 𑀘 𑀢𑀬𑁄 𑀢𑀡𑁆𑀳𑀸 𑀤𑀺𑀝𑁆𑀞𑀺 𑀅𑀯𑀺𑀚𑁆𑀚𑀸𑀢𑀺. 𑀢𑁂𑀦 𑀢𑁂 𑀏𑀯 ‘‘𑀑𑀖𑀸’’𑀢𑀺 𑀯𑀼𑀢𑁆𑀢𑀸. 𑀢𑀣𑀸𑀧𑀺 𑀦𑁂𑀲𑀁 𑀮𑀓𑁆𑀔𑀡𑀸𑀤𑀺𑀢𑁄 𑀦𑀸𑀦𑀢𑁆𑀢𑀫𑁆𑀧𑀺 𑀲𑀺𑀤𑁆𑀥𑀫𑁂𑀯. 𑀅𑀓𑀼𑀲𑀮𑀧𑀓𑁆𑀔𑁂 𑀧𑀦 𑀏𑀓𑀕𑁆𑀕𑀢𑀸 𑀉𑀤𑁆𑀥𑀘𑁆𑀘𑀲𑀫𑀸𑀕𑀢𑀢𑁆𑀢𑀸 ‘‘𑀑𑀕𑀸𑀳𑀦𑀸’’𑀢𑀺 𑀦 𑀯𑀼𑀢𑁆𑀢𑀸. 𑀅𑀓𑀼𑀲𑀮𑀥𑀫𑁆𑀫𑀸 𑀳𑀺 𑀏𑀓𑀯𑀺𑀲𑀬𑁂 𑀲𑀫𑁆𑀧𑀺𑀡𑁆𑀟𑀦𑀓𑀺𑀘𑁆𑀘𑁂𑀦 𑀲𑀫𑀸𑀥𑀺𑀦𑀸 𑀬𑀼𑀢𑁆𑀢𑀸𑀧𑀺 𑀉𑀤𑀓𑀲𑀺𑀢𑁆𑀢𑀭𑀚𑀼𑀝𑁆𑀞𑀸𑀦𑀁 𑀯𑀺𑀬 𑀢𑀗𑁆𑀔𑀡𑀜𑁆𑀜𑁂𑀯 𑀯𑀺𑀓𑀺𑀭𑀡𑀲𑀪𑀸𑀯𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀳𑁂𑀢𑁆𑀣 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀺 𑀦 𑀳𑁄𑀢𑀺, 𑀓𑀼𑀲𑀮𑀥𑀫𑁆𑀫𑀸 𑀧𑀦 𑀬𑀲𑁆𑀫𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀆𑀲𑀺𑀜𑁆𑀘𑀺𑀢𑁆𑀯𑀸 𑀆𑀓𑁄𑀝𑀦𑀫𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀉𑀧𑀮𑀺𑀢𑁆𑀢𑀝𑁆𑀞𑀸𑀦𑀁 𑀯𑀺𑀬 𑀲𑀓𑀮𑀫𑁆𑀧𑀺 𑀤𑀺𑀯𑀲𑀁 𑀦𑀺𑀘𑁆𑀘𑀮𑀧𑀯𑀢𑁆𑀢𑀦𑀲𑀫𑀢𑁆𑀣𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀑𑀕𑀸𑀳𑀦𑀸𑀢𑀺 𑀯𑀼𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀚𑀻𑀯𑀦𑁆𑀢𑀺 𑀢𑁂𑀦, 𑀚𑀻𑀯𑀦𑀫𑀢𑁆𑀢𑀁 𑀯𑀸 𑀢𑀦𑁆𑀢𑀺 𑀚𑀻𑀯𑀺𑀢𑀁, 𑀢𑀁 𑀲𑀳𑀚𑀸𑀢𑀸𑀦𑀼𑀧𑀸𑀮𑀦𑀮𑀓𑁆𑀔𑀡𑀁, 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁, 𑀢𑁂𑀲𑀜𑁆𑀜𑁂𑀯 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀸𑀧𑀬𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀦𑁄 𑀞𑀺𑀢𑀺𑀓𑁆𑀔𑀡𑁂 𑀏𑀯 𑀘𑁂𑀢𑀁 𑀢𑁂 𑀥𑀫𑁆𑀫𑁂 𑀅𑀦𑀼𑀧𑀸𑀮𑁂𑀢𑀺 𑀉𑀤𑀓𑀁 𑀯𑀺𑀬 𑀉𑀧𑁆𑀧𑀮𑀸𑀤𑀻𑀦𑀺, 𑀦 𑀪𑀗𑁆𑀕𑀓𑁆𑀔𑀡𑁂. 𑀲𑀬𑀁 𑀪𑀺𑀚𑁆𑀚𑀫𑀸𑀦𑀢𑁆𑀢𑀸 𑀲𑀬𑀁 𑀧𑀯𑀢𑁆𑀢𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀧𑀯𑀢𑁆𑀢𑀢𑀺 𑀦𑀺𑀬𑀸𑀫𑀓𑁄 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀤𑁆𑀤𑀳𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀲𑀤𑁆𑀤𑀳𑀢𑀺, 𑀲𑀤𑁆𑀤𑀳𑀦𑀫𑀢𑁆𑀢𑀁 𑀯𑀸 𑀏𑀲𑀸𑀢𑀺 𑀲𑀤𑁆𑀥𑀸. 𑀲𑀸 𑀲𑀤𑁆𑀤𑀳𑀦𑀮𑀓𑁆𑀔𑀡𑀸, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸, 𑀧𑀲𑀸𑀤𑀦𑀭𑀲𑀸 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬, 𑀧𑀓𑁆𑀔𑀦𑁆𑀤𑀦𑀭𑀲𑀸 𑀯𑀸 𑀑𑀖𑀼𑀢𑁆𑀢𑀸𑀭𑀓𑀯𑀻𑀭𑀧𑀼𑀭𑀺𑀲𑁄 𑀯𑀺𑀬, 𑀅𑀓𑀸𑀮𑀼𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸, 𑀲𑀤𑁆𑀥𑀫𑁆𑀫𑀲𑀯𑀦𑀸𑀤𑀺𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀸 𑀯𑀸, 𑀳𑀢𑁆𑀣𑀯𑀺𑀢𑁆𑀢𑀩𑀻𑀚𑀸𑀦𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀲𑀭𑀦𑁆𑀢𑀺 𑀢𑀸𑀬, 𑀲𑀬𑀁 𑀯𑀸 𑀲𑀭𑀢𑀺, 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀢𑀺. 𑀲𑀸 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸, 𑀅𑀲𑀫𑁆𑀫𑁄𑀲𑀦𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸, 𑀓𑀸𑀬𑀸𑀤𑀺𑀲𑀢𑀺𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀯𑀸. 𑀆𑀭𑀫𑁆𑀫𑀡𑁂 𑀤𑀴𑁆𑀳𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀧𑀦 𑀏𑀲𑀺𑀓𑀸 𑀯𑀺𑀬, 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀭𑀓𑁆𑀔𑀡𑀢𑁄 𑀤𑁄𑀯𑀸𑀭𑀺𑀓𑁄 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀻𑀬𑀢𑀻𑀢𑀺 𑀳𑀺𑀭𑀻, 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀺𑀬𑁂𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁, 𑀧𑀸𑀧𑀢𑁄 𑀉𑀩𑁆𑀩𑁂𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻, 𑀉𑀢𑁆𑀢𑀸𑀲𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁. 𑀮𑀚𑁆𑀚𑀦𑀸𑀓𑀸𑀭𑁂𑀦 𑀧𑀸𑀧𑀓𑀸𑀦𑀁 𑀅𑀓𑀭𑀡𑀭𑀲𑀸 𑀳𑀺𑀭𑀻, 𑀉𑀢𑁆𑀢𑀸𑀲𑀸𑀓𑀸𑀭𑁂𑀦 𑀑𑀢𑁆𑀢𑀧𑁆𑀧𑀁. 𑀅𑀲𑀼𑀘𑀺𑀫𑀓𑁆𑀔𑀺𑀢𑀲𑁆𑀲, 𑀅𑀕𑁆𑀕𑀺𑀲𑀦𑁆𑀢𑀢𑁆𑀢𑀲𑁆𑀲 𑀘 𑀅𑀬𑁄𑀕𑀼𑀴𑀲𑁆𑀲 𑀕𑀳𑁂𑀢𑀼𑀁 𑀅𑀯𑀺𑀲𑀳𑀦𑀁 𑀯𑀺𑀬 𑀏𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀚𑀺𑀕𑀼𑀘𑁆𑀙𑀦𑀲𑀦𑁆𑀢𑀸𑀲𑀸𑀓𑀸𑀭𑁂𑀳𑀺 𑀧𑀸𑀧𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀸𑀓𑀸𑀭𑁂𑀦𑁂𑀯 𑀘 𑀧𑀸𑀧𑀢𑁄 𑀲𑀁𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺 𑀏𑀢𑀸𑀦𑀺, 𑀅𑀢𑁆𑀢𑀧𑀭𑀕𑀸𑀭𑀯𑀧𑀤𑀝𑁆𑀞𑀸𑀦𑀸𑀦𑀺 𑀓𑀼𑀮𑀯𑀥𑀽𑀯𑁂𑀲𑀺𑀬𑀸 𑀪𑀸𑀯𑁄 𑀯𑀺𑀬, 𑀮𑁄𑀓𑀧𑀸𑀮𑀓𑀸𑀦𑀺 𑀘𑀸𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦𑁂𑀲𑀁 𑀲𑀫𑀼𑀝𑁆𑀞𑀸𑀦𑀁 𑀅𑀥𑀺𑀧𑀢𑀺 𑀲𑀪𑀸𑀯𑁄 𑀮𑀓𑁆𑀔𑀡𑁂𑀦 𑀘𑀸𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀢𑀸, 𑀅𑀢𑁆𑀢𑀮𑁄𑀓𑀸𑀥𑀺𑀧𑀢𑀺𑀢𑀸, 𑀮𑀚𑁆𑀚𑀸𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀢𑀸, 𑀲𑀧𑁆𑀧𑀢𑀺𑀲𑁆𑀲𑀯𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀢𑀸𑀮𑀓𑁆𑀔𑀡𑀢𑀸 𑀘 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁧 𑀩𑀮𑀭𑀸𑀲𑀺𑀯𑀡𑁆𑀡𑀦𑀸) 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸, 𑀅𑀢𑁆𑀣𑀺𑀓𑁂𑀳𑀺 𑀢𑀁 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑀁.

𑀦 𑀮𑀼𑀩𑁆𑀪𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀦 𑀮𑀼𑀩𑁆𑀪𑀢𑀺, 𑀅𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀮𑁄𑀪𑁄. 𑀅𑀤𑁄𑀲𑀸𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀼 𑀅𑀮𑁄𑀪𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀕𑁂𑀥𑀮𑀓𑁆𑀔𑀡𑁄, 𑀅𑀮𑀕𑁆𑀕𑀪𑀸𑀯𑀮𑀓𑁆𑀔𑀡𑁄 𑀯𑀸 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬, 𑀅𑀧𑀭𑀺𑀕𑁆𑀕𑀳𑀭𑀲𑁄 𑀫𑀼𑀢𑁆𑀢𑀪𑀺𑀓𑁆𑀔𑀼 𑀯𑀺𑀬, 𑀅𑀦𑀮𑁆𑀮𑀻𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀲𑀼𑀘𑀺𑀫𑁆𑀳𑀺 𑀧𑀢𑀺𑀢𑀧𑀼𑀭𑀺𑀲𑁄 𑀯𑀺𑀬.

𑀅𑀤𑁄𑀲𑁄 𑀅𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄, 𑀅𑀯𑀺𑀭𑁄𑀥𑀮𑀓𑁆𑀔𑀡𑁄 𑀯𑀸 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀯𑀺𑀬, 𑀆𑀖𑀸𑀢𑀯𑀺𑀦𑀬𑀦𑀭𑀲𑁄, 𑀧𑀭𑀺𑀴𑀸𑀳𑀯𑀺𑀦𑀬𑀦𑀭𑀲𑁄 𑀯𑀸 𑀘𑀦𑁆𑀤𑀦𑀁 𑀯𑀺𑀬, 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬.

𑀅𑀫𑁄𑀳𑁄 𑀬𑀣𑀸𑀲𑀪𑀸𑀯𑀧𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑁄, 𑀅𑀓𑁆𑀔𑀮𑀺𑀢𑀧𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑁄 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀓𑁆𑀔𑀺𑀢𑁆𑀢𑀉𑀲𑀼𑀧𑁆𑀧𑀝𑀺𑀯𑁂𑀥𑁄 𑀯𑀺𑀬, 𑀯𑀺𑀲𑀬𑁄𑀪𑀸𑀲𑀦𑀭𑀲𑁄 𑀅𑀦𑀼𑀤𑁆𑀥𑀝𑁄 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬. 𑀢𑀬𑁄𑀧𑀺 𑀘𑁂𑀢𑁂 𑀲𑀩𑁆𑀩𑀓𑀼𑀲𑀮𑀸𑀦𑀁 𑀫𑀽𑀮𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀅𑀧𑀺𑀘 𑀅𑀮𑁄𑀪𑁄 𑀘𑁂𑀢𑁆𑀣 𑀤𑀸𑀦𑀳𑁂𑀢𑀼, 𑀅𑀤𑁄𑀲𑁄 𑀲𑀻𑀮𑀳𑁂𑀢𑀼, 𑀅𑀫𑁄𑀳𑁄 𑀪𑀸𑀯𑀦𑀸𑀳𑁂𑀢𑀼. 𑀢𑀻𑀳𑀺𑀧𑀺 𑀘𑁂𑀢𑁂𑀳𑀺 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀳𑁄𑀦𑁆𑀢𑀺, 𑀢𑀣𑀸 𑀅𑀥𑀺𑀓𑀊𑀦𑀯𑀺𑀧𑀭𑀻𑀢𑀕𑁆𑀕𑀳𑀡𑀸𑀦𑀁 𑀅𑀪𑀸𑀯𑁄, 𑀢𑀣𑀸 𑀧𑀺𑀬𑀯𑀺𑀧𑁆𑀧𑀬𑁄𑀕𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀇𑀘𑁆𑀙𑀺𑀢𑀸𑀮𑀸𑀪𑀤𑀼𑀓𑁆𑀔𑀸𑀦𑀁, 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀸𑀦𑀁, 𑀧𑁂𑀢𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀕𑀢𑀺𑀤𑀼𑀓𑁆𑀔𑀸𑀦𑀜𑁆𑀘 𑀅𑀪𑀸𑀯𑁄, 𑀢𑀣𑀸 𑀪𑁄𑀕𑀫𑀺𑀢𑁆𑀢𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑁄, 𑀢𑀣𑀸 𑀓𑀸𑀫𑀲𑀼𑀔𑀧𑀭𑀺𑀘𑁆𑀘𑀸𑀕𑀅𑀢𑁆𑀢𑀓𑀺𑀮𑀫𑀣𑀧𑀭𑀺𑀘𑁆𑀘𑀸𑀕𑀫𑀚𑁆𑀛𑀺𑀫𑀧𑀝𑀺𑀧𑀢𑁆𑀢𑀻𑀦𑀁 𑀲𑀫𑁆𑀪𑀯𑁄, 𑀢𑀣𑀸 𑀅𑀲𑀼𑀪𑀅𑀧𑁆𑀧𑀫𑀸𑀡𑀥𑀸𑀢𑀼𑀲𑀜𑁆𑀜𑀸𑀦𑀁, 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀲𑀜𑁆𑀜𑀸𑀦𑀁, 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑀸𑀦𑀜𑁆𑀘 𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀅𑀫𑁄𑀳𑁄 𑀦𑀸𑀫 𑀧𑀜𑁆𑀜𑀸, 𑀲𑀸 𑀧𑀚𑀸𑀦𑀦𑀮𑀓𑁆𑀔𑀡𑀸. 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀁. 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸. 𑀓𑀺𑀁 𑀧𑀦𑁂𑀢𑀸𑀲𑀁 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀦𑁆𑀢𑀺? 𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀧𑀚𑀸𑀦𑀦𑀫𑁂𑀯. 𑀏𑀢𑀸𑀲𑀁 𑀳𑀺 𑀲𑀫𑀸𑀦𑁂𑀧𑀺 𑀚𑀸𑀦𑀦𑀪𑀸𑀯𑁂 𑀲𑀜𑁆𑀜𑀸𑀬 ‘‘𑀦𑀻𑀮𑀁 𑀧𑀻𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀦 𑀲𑀜𑁆𑀜𑀼𑀧𑁆𑀧𑀸𑀤𑀓𑀫𑀢𑁆𑀢𑁂𑀦 𑀆𑀓𑀸𑀭𑁂𑀦 𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑀲𑁆𑀲 𑀯𑀺𑀬 𑀘𑀺𑀢𑁆𑀢𑀯𑀝𑁆𑀝𑀸𑀤𑀺𑀪𑀸𑀯𑀫𑀢𑁆𑀢𑀸𑀓𑀸𑀭𑁂𑀦 𑀓𑀳𑀸𑀧𑀡𑀸𑀤𑀺𑀤𑀲𑁆𑀲𑀦𑀁, 𑀦 𑀢𑀢𑁄 𑀉𑀤𑁆𑀥𑀁. 𑀯𑀺𑀜𑁆𑀜𑀸𑀡𑀲𑁆𑀲 𑀧𑀦 𑀬𑀣𑀸𑀯𑀼𑀢𑁆𑀢𑁂𑀦 𑀘 𑀢𑀢𑁄 𑀯𑀺𑀲𑀺𑀝𑁆𑀞𑁂𑀦 𑀘 𑀅𑀦𑀺𑀘𑁆𑀘𑀸𑀤𑀺𑀦𑀸 𑀆𑀓𑀸𑀭𑁂𑀦 𑀚𑀸𑀦𑀦𑀁 𑀳𑁄𑀢𑀺, 𑀕𑀸𑀫𑀺𑀓𑀧𑀼𑀭𑀺𑀲𑀲𑁆𑀲 𑀯𑀺𑀬 𑀬𑀣𑀸𑀯𑀼𑀢𑁆𑀢𑁂𑀦 𑀘𑁂𑀯 𑀉𑀧𑀪𑁄𑀕𑀸𑀭𑀳𑀢𑀸𑀤𑀺𑀦𑀸 𑀘 𑀆𑀓𑀸𑀭𑁂𑀦 𑀓𑀳𑀸𑀧𑀡𑀸𑀤𑀺𑀤𑀲𑁆𑀲𑀦𑀁, 𑀦 𑀢𑀢𑁄 𑀉𑀤𑁆𑀥𑀁. 𑀧𑀜𑁆𑀜𑀸𑀬 𑀧𑀦 𑀢𑁂𑀳𑀺 𑀘 𑀬𑀣𑀸𑀯𑀼𑀢𑁆𑀢𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀘 𑀫𑀕𑁆𑀕𑀧𑀸𑀢𑀼𑀪𑀸𑀯𑀸𑀤𑀺𑀳𑁂𑀢𑀽𑀳𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀧𑀚𑀸𑀦𑀦𑀁 𑀳𑁄𑀢𑀺, 𑀳𑁂𑀭𑀜𑁆𑀜𑀺𑀓𑀲𑁆𑀲 𑀯𑀺𑀬 𑀬𑀣𑀸𑀯𑀼𑀢𑁆𑀢𑁂𑀳𑀺 𑀘𑁂𑀯 𑀙𑁂𑀓𑀓𑀽𑀝𑀅𑀤𑁆𑀥𑀲𑀸𑀭𑀸𑀤𑀺𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀘 𑀓𑀳𑀸𑀧𑀡𑀸𑀤𑀺𑀤𑀲𑁆𑀲𑀦𑀁. 𑀧𑀜𑁆𑀜𑀸𑀬 𑀳𑀺 𑀅𑀚𑀸𑀦𑀺𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀧𑀚𑀸𑀦𑀦𑀸𑀓𑀸𑀭𑁂𑀳𑀺 𑀏𑀢𑀸𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀯𑀺𑀢𑀓𑁆𑀓𑀯𑀻𑀭𑀺𑀬𑀸𑀤𑀺𑀲𑀳𑀚𑀸𑀢𑀧𑀘𑁆𑀘𑀬𑀯𑀺𑀭𑀳𑀢𑁄 𑀭𑀽𑀧𑀸𑀤𑀻𑀲𑀼 𑀲𑀜𑁆𑀜𑀸𑀓𑀺𑀘𑁆𑀘𑀢𑁄 𑀅𑀥𑀺𑀓𑀯𑀺𑀚𑀸𑀦𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀩𑀮𑀧𑀭𑀺𑀡𑀸𑀬𑀓𑀸𑀦𑀺 𑀯𑀺𑀬 𑀲𑁂𑀦𑀗𑁆𑀕𑀸𑀦𑀺 𑀧𑀜𑁆𑀜𑀸𑀦𑀼𑀯𑀢𑁆𑀢𑀓𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀅𑀜𑁆𑀜𑀢𑁆𑀭 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸’’𑀢𑀺𑀆𑀤𑀺 (𑀯𑀺𑀪. 𑁭𑁬𑁬).

𑀓𑀸𑀬𑀧𑀲𑁆𑀲𑀫𑁆𑀪𑀦𑀁 𑀓𑀸𑀬𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀧𑀲𑁆𑀲𑀫𑁆𑀪𑀦𑀁 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺. 𑀓𑀸𑀬𑁄𑀢𑀺 𑀧𑀦𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀉𑀪𑁄𑀧𑀺 𑀧𑀦𑁂𑀢𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀤𑀭𑀣𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀧𑀭𑀺𑀧𑁆𑀨𑀦𑁆𑀤𑀲𑀻𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀸𑀦𑀜𑁆𑀘 𑀅𑀯𑀽𑀧𑀲𑀫𑀓𑀭𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀮𑀳𑀼𑀪𑀸𑀯𑁄 𑀓𑀸𑀬𑀮𑀳𑀼𑀢𑀸. 𑀘𑀺𑀢𑁆𑀢𑀮𑀳𑀼𑀪𑀸𑀯𑁄 𑀘𑀺𑀢𑁆𑀢𑀮𑀳𑀼𑀢𑀸. 𑀏𑀯𑀁 𑀉𑀧𑀭𑀺𑀧𑀺 𑀧𑀤𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀕𑀭𑀼𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀮𑀳𑀼𑀢𑀸, 𑀘𑀺𑀢𑁆𑀢𑀮𑀳𑀼𑀢𑀸 𑀘, 𑀢𑁂𑀲𑀁 𑀕𑀭𑀼𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀢𑁂𑀲𑀁 𑀅𑀤𑀦𑁆𑀥𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑁂𑀲𑀁 𑀕𑀭𑀼𑀪𑀸𑀯𑀓𑀭𑀣𑀺𑀦𑀫𑀺𑀤𑁆𑀥𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀘𑀺𑀢𑁆𑀢𑀸𑀦𑀁 𑀣𑀤𑁆𑀥𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀫𑀼𑀤𑀼𑀢𑀸, 𑀘𑀺𑀢𑁆𑀢𑀫𑀼𑀤𑀼𑀢𑀸 𑀘, 𑀢𑁂𑀲𑀁 𑀣𑀤𑁆𑀥𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀅𑀧𑁆𑀧𑀝𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸, 𑀢𑁂𑀲𑀁 𑀣𑀤𑁆𑀥𑀪𑀸𑀯𑀓𑀭𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸 𑀓𑀸𑀬𑀓𑀫𑁆𑀫𑀜𑁆𑀜𑀢𑀸, 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀘, 𑀢𑁂𑀲𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑁂𑀲𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀓𑀭𑀸𑀯𑀲𑁂𑀲𑀦𑀻𑀯𑀭𑀡𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀲𑀸𑀤𑀦𑀻𑀬𑀯𑀢𑁆𑀣𑀽𑀲𑀼 𑀧𑀲𑀸𑀤𑀸𑀯𑀳𑀸, 𑀳𑀺𑀢𑀓𑀺𑀭𑀺𑀬𑀸𑀲𑀼 𑀯𑀺𑀦𑀺𑀬𑁄𑀕𑀓𑁆𑀔𑀫𑀪𑀸𑀯𑀸𑀯𑀳𑀸 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀕𑁂𑀮𑀜𑁆𑀜𑀪𑀸𑀯𑀮𑀓𑁆𑀔𑀡𑀸 𑀓𑀸𑀬𑀧𑀸𑀕𑀼𑀜𑁆𑀜𑀢𑀸, 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀘, 𑀢𑁂𑀲𑀁 𑀕𑁂𑀮𑀜𑁆𑀜𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀦𑀺𑀭𑀸𑀤𑀻𑀦𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑁂𑀲𑀁 𑀕𑁂𑀮𑀜𑁆𑀜𑀓𑀭𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀚𑁆𑀚𑀯𑀮𑀓𑁆𑀔𑀡𑀸 𑀓𑀸𑀬𑀼𑀚𑀼𑀓𑀢𑀸, 𑀘𑀺𑀢𑁆𑀢𑀼𑀚𑀼𑀓𑀢𑀸 𑀘, 𑀢𑁂𑀲𑀁 𑀓𑀼𑀝𑀺𑀮𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀅𑀚𑀺𑀫𑁆𑀳𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑁂𑀲𑀁 𑀓𑀼𑀝𑀺𑀮𑀪𑀸𑀯𑀓𑀭𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀩𑁆𑀩𑁂𑀧𑁂𑀢𑁂 𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀥𑀫𑁆𑀫𑀸 𑀓𑀸𑀬𑀘𑀺𑀢𑁆𑀢𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀁 𑀧𑀦𑁂𑀢𑁆𑀣 𑀧𑀲𑁆𑀲𑀤𑁆𑀥𑀸𑀤𑀬𑁄 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀸𑀤𑀺𑀁 𑀯𑀺𑀦𑁄𑀤𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀬𑁂𑀦 𑀇𑀫𑁂 𑀧𑀲𑁆𑀲𑀤𑁆𑀥𑀸𑀤𑀬𑁄 𑀥𑀫𑁆𑀫𑀸 𑀦 𑀯𑀺𑀲𑀼𑀁 𑀯𑀺𑀪𑀢𑁆𑀢𑀸𑀢𑀺? 𑀦𑁄 𑀦 𑀲𑀓𑁆𑀓𑁄𑀦𑁆𑀢𑀺, 𑀇𑀫𑁂 𑀧𑀦 𑀲𑀳𑀺𑀢𑀸 𑀏𑀯 𑀲𑀓𑁆𑀓𑁄𑀦𑁆𑀢𑀺, 𑀇𑀢𑀭𑀣𑀸 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯 𑀅𑀲𑀫𑁆𑀪𑀯𑀢𑁄. 𑀬𑀣𑀸 𑀯𑀸 𑀧𑀲𑁆𑀲𑀤𑁆𑀥𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀫𑁄𑀳𑀸𑀳𑀺𑀭𑀺𑀓𑀸𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀫𑁄𑀳𑀳𑀺𑀭𑀺𑀆𑀤𑀬𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀉𑀤𑁆𑀥𑀘𑁆𑀘𑀸𑀤𑀺𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀬𑀲𑁆𑀫𑀸 𑀘𑁂𑀢𑁆𑀣 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀏𑀯 𑀬𑀣𑀸𑀲𑀓𑀁 𑀧𑀝𑀺𑀧𑀓𑁆𑀔𑀸 𑀳𑀭𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀢𑁂 𑀏𑀢𑁂 𑀏𑀯 𑀤𑁆𑀯𑀺𑀥𑀸 𑀯𑀺𑀪𑀢𑁆𑀢𑀸, 𑀦 𑀅𑀫𑁄𑀳𑀸𑀤𑀬𑁄𑀢𑀺 𑀜𑀸𑀢𑀩𑁆𑀩𑀸.

𑀬𑁂𑀯𑀸𑀧𑀦𑀓𑁂𑀲𑀼 𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀲𑁄 𑀓𑀢𑁆𑀢𑀼𑀓𑀸𑀫𑀢𑀸𑀮𑀓𑁆𑀔𑀡𑁄, 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀢𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀘𑀸𑀬𑀁 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀅𑀬𑀜𑁆𑀘 𑀬𑀲𑁆𑀫𑀸 𑀯𑀺𑀭𑀚𑁆𑀚𑀺𑀢𑀩𑁆𑀩𑀸𑀤𑀻𑀲𑀼𑀧𑀺 𑀦𑁂𑀓𑁆𑀔𑀫𑁆𑀫𑀸𑀤𑀺𑀦𑀸 𑀲𑀳 𑀮𑁄𑀪𑀯𑀺𑀲𑀤𑀺𑀲𑁂𑀦 𑀓𑀢𑁆𑀢𑀼𑀓𑀸𑀫𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀲𑁂𑀔𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀮𑁄𑀪𑁄 𑀧𑀦 𑀲𑀼𑀪𑀲𑀼𑀔𑀸𑀤𑀺𑀯𑀺𑀧𑀮𑁆𑀮𑀸𑀲𑀧𑀼𑀩𑁆𑀩𑀓𑁂𑀦 𑀅𑀪𑀺𑀲𑀗𑁆𑀕𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀏𑀯𑀁 𑀫𑁂𑀢𑁆𑀢𑀸𑀓𑀭𑀼𑀡𑀸𑀤𑀻𑀦𑀫𑁆𑀧𑀺 𑀮𑁄𑀪𑀸𑀤𑀻𑀳𑀺 𑀯𑀺𑀲𑁂𑀲𑁄 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄.

𑀅𑀥𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑁄𑀓𑁆𑀔𑁄. 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄, 𑀅𑀲𑀁𑀲𑀧𑁆𑀧𑀦𑀭𑀲𑁄, 𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀦𑁆𑀦𑀺𑀝𑁆𑀞𑀸𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘 𑀲𑀤𑁆𑀥𑀸𑀧𑀺 𑀅𑀥𑀺𑀫𑁄𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀲𑀘𑁆𑀘𑀁, 𑀲𑀸 𑀘 𑀔𑁄 𑀲𑀫𑁆𑀧𑀲𑀸𑀤𑀦𑀪𑀸𑀯𑁂𑀦 𑀅𑀥𑀺𑀫𑁄𑀓𑁆𑀔𑁄, 𑀅𑀬𑀁 𑀧𑀦 𑀬𑀣𑀸 𑀢𑀣𑀸 𑀯𑀸 𑀦𑀺𑀘𑁆𑀙𑀬𑀪𑀸𑀯𑁂𑀦𑀸𑀢𑀺 𑀦 𑀓𑁄𑀘𑀺 𑀯𑀺𑀭𑁄𑀥𑁄.

𑀓𑀺𑀭𑀺𑀬𑀸 𑀓𑀸𑀭𑁄, 𑀫𑀦𑀲𑁆𑀫𑀺𑀁 𑀓𑀸𑀭𑁄 𑀫𑀦𑀲𑀺𑀓𑀸𑀭𑁄, 𑀧𑀼𑀭𑀺𑀫𑀫𑀦𑀢𑁄 𑀯𑀺𑀲𑀤𑀺𑀲𑀁 𑀫𑀦𑀁 𑀓𑀭𑁄𑀢𑀻𑀢𑀺𑀧𑀺 𑀫𑀦𑀲𑀺𑀓𑀸𑀭𑁄, 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀯𑀻𑀣𑀺𑀧𑀝𑀺𑀧𑀸𑀤𑀓𑁄 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀢𑀺𑀧𑁆𑀧𑀓𑀸𑀭𑁄, 𑀢𑀢𑁆𑀣 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄 𑀇𑀥 𑀫𑀦𑀲𑀺𑀓𑀸𑀭𑁄. 𑀲𑁄 𑀲𑀸𑀭𑀡𑀮𑀓𑁆𑀔𑀡𑁄, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂𑀲𑀼 𑀧𑀬𑁄𑀚𑀦𑀭𑀲𑁄, 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀭𑀫𑁆𑀫𑀡𑀧𑀤𑀝𑁆𑀞𑀸𑀦𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄. 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀻𑀣𑀺𑀧𑀝𑀺𑀧𑀸𑀤𑀓𑁄𑀢𑀺 𑀧𑀦 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀚𑀯𑀦𑀧𑀝𑀺𑀧𑀸𑀤𑀓𑁄𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲, 𑀦 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀏𑀢𑁆𑀣 𑀘𑀸𑀬𑀁 𑀫𑀦𑀲𑀺𑀓𑀸𑀭𑁄 𑀲𑀫𑀦𑁆𑀦𑀸𑀳𑀸𑀭𑀫𑀢𑁆𑀢𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀬𑁄𑀚𑀓𑁄, 𑀘𑁂𑀢𑀦𑀸 𑀘𑁂𑀢𑁄𑀓𑀺𑀭𑀺𑀬𑀸𑀪𑀸𑀯𑁂𑀦, 𑀯𑀺𑀢𑀓𑁆𑀓𑁄 𑀧𑀦 𑀲𑀗𑁆𑀓𑀧𑁆𑀧𑀸𑀓𑀸𑀭𑁂𑀦, 𑀉𑀧𑀦𑀺𑀚𑁆𑀛𑀸𑀬𑀦𑀸𑀓𑀸𑀭𑁂𑀦 𑀘 𑀅𑀪𑀺𑀦𑀺𑀭𑁄𑀧𑀓𑁄. 𑀢𑁂𑀦𑁂𑀯 𑀳𑁂𑀢𑁆𑀣 𑀧𑀤𑀪𑀸𑀚𑀦𑀻𑀬𑁂 ‘‘𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄𑀢𑀺 𑀘, 𑀛𑀸𑀦𑀗𑁆𑀕’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸, 𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀭𑀲𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸 𑀯𑀸, 𑀫𑀚𑁆𑀛𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀫𑀧𑁆𑀧𑀯𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀧𑀤𑀝𑁆𑀞𑀸𑀦𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀡𑁂𑀦 𑀲𑀫𑀧𑁆𑀧𑀯𑀢𑁆𑀢𑀸𑀦𑀁 𑀆𑀚𑀸𑀦𑀻𑀬𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀓𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦𑀁 𑀓𑀭𑁄𑀢𑀻𑀢𑀺 𑀓𑀭𑀼𑀡𑀸, 𑀓𑀺𑀭𑀢𑀺 𑀯𑀸 𑀧𑀭𑀤𑀼𑀓𑁆𑀔𑀁 𑀳𑀺𑀁𑀲𑀢𑀺 𑀘, 𑀓𑀺𑀭𑀻𑀬𑀢𑀺 𑀯𑀸 𑀤𑀼𑀓𑁆𑀔𑀺𑀢𑁂𑀲𑀼 𑀧𑀲𑀸𑀭𑀻𑀬𑀢𑀻𑀢𑀺 𑀓𑀭𑀼𑀡𑀸. 𑀲𑀸 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸, 𑀧𑀭𑀤𑀼𑀓𑁆𑀔𑀸𑀲𑀳𑀦𑀭𑀲𑀸, 𑀅𑀯𑀺𑀳𑀺𑀁𑀲𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀦𑀁 𑀅𑀦𑀸𑀣𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀫𑁄𑀤𑀦𑁆𑀢𑀺 𑀢𑀸𑀬 𑀢𑀁𑀲𑀫𑀗𑁆𑀕𑀺𑀦𑁄, 𑀲𑀬𑀁 𑀯𑀸 𑀫𑁄𑀤𑀢𑀺, 𑀫𑁄𑀤𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑀼𑀤𑀺𑀢𑀸. 𑀲𑀸 𑀧𑀫𑁄𑀤𑀮𑀓𑁆𑀔𑀡𑀸, 𑀅𑀦𑀺𑀲𑁆𑀲𑀸𑀬𑀦𑀭𑀲𑀸, 𑀅𑀭𑀢𑀺𑀯𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑁂𑀢𑁆𑀢𑀼𑀧𑁂𑀓𑁆𑀔𑀸 𑀦 𑀯𑀼𑀢𑁆𑀢𑀸𑀢𑀺? 𑀧𑀼𑀩𑁆𑀩𑁂 𑀕𑀳𑀺𑀢𑀢𑁆𑀢𑀸. 𑀅𑀤𑁄𑀲𑁄 𑀏𑀯 𑀳𑀺 𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀫𑁂𑀢𑁆𑀢𑀸. 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀏𑀯 𑀘 𑀇𑀝𑁆𑀞𑀸𑀦𑀺𑀝𑁆𑀞𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀁 𑀉𑀧𑁂𑀓𑁆𑀔𑀸. 𑀢𑁂 𑀘 𑀥𑀫𑁆𑀫𑀸 𑀦𑀺𑀬𑀢𑀸, 𑀓𑁂𑀯𑀮𑀁 𑀧𑀦 𑀦𑁂𑀲𑀁 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀪𑀸𑀯𑁂𑀦 𑀧𑀯𑀢𑁆𑀢𑀺 𑀅𑀦𑀺𑀬𑀢𑀸𑀢𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀢𑀸 𑀢𑀺𑀲𑁆𑀲𑁄𑀧𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀸, 𑀢𑀢𑁄 𑀲𑀁𑀓𑁄𑀘𑀦𑀭𑀲𑀸, 𑀢𑁂𑀲𑀁 𑀅𑀓𑀺𑀭𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀤𑁆𑀥𑀸𑀳𑀺𑀭𑁄𑀢𑁆𑀢𑀧𑁆𑀧𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀧𑀤𑀝𑁆𑀞𑀸𑀦𑀸, 𑀧𑀸𑀧𑀓𑀺𑀭𑀺𑀬𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀔𑀪𑀸𑀯𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀯𑀁 𑀮𑀓𑁆𑀔𑀡𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀗𑁆𑀕𑀳𑀸𑀢𑀺 𑀏𑀯𑀁 𑀬𑁂 𑀇𑀫𑁂 𑀇𑀫𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀺𑀪𑀢𑁆𑀢𑀸 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀥𑀫𑁆𑀫𑀸, 𑀲𑀩𑁆𑀩𑁂𑀢𑁂 𑀔𑀦𑁆𑀥𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑁋 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺. 𑀢𑀢𑁆𑀣 𑀭𑀸𑀲𑀝𑁆𑀞𑁂𑀦 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀢𑀣𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀅𑀯𑀲𑁂𑀲𑀸 𑀨𑀲𑁆𑀲𑀸𑀤𑀬𑁄 𑀙𑀢𑁆𑀢𑀺𑀁𑀲 𑀥𑀫𑁆𑀫𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀦𑀼 𑀘 𑀬𑀤𑀺 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑁄, 𑀨𑀲𑁆𑀲𑀸𑀤𑀻𑀦𑀁 𑀢𑀸𑀯 𑀅𑀦𑁂𑀓𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀢𑀸 𑀬𑀼𑀢𑁆𑀢𑀸, 𑀓𑀣𑀁 𑀧𑀦 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀢𑀸𑀢𑀺? 𑀉𑀧𑀘𑀸𑀭𑀢𑁄. 𑀧𑀘𑁆𑀘𑁂𑀓𑀁 𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑁂𑀲𑀼 𑀦𑀺𑀭𑀼𑀴𑁆𑀳𑁄𑀧𑀺 𑀔𑀦𑁆𑀥-𑀲𑀤𑁆𑀤𑁄 𑀢𑀤𑁂𑀓𑀤𑁂𑀲𑁂𑀲𑀼 𑀏𑀓𑁂𑀓𑀯𑁂𑀤𑀦𑀸𑀤𑀻𑀲𑀼𑀧𑀺 𑀲𑀫𑀼𑀤𑀸𑀬𑁄𑀧𑀘𑀸𑀭𑁂𑀦 𑀯𑁄𑀳𑀭𑀻𑀬𑀢𑀻𑀢𑀺 𑀢𑀤𑁂𑀓𑀤𑁂𑀲𑁂𑀧𑀺 𑀢𑀩𑁆𑀩𑁄𑀳𑀸𑀭𑁄, 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀬 𑀙𑀺𑀚𑁆𑀚𑀫𑀸𑀦𑀸𑀬 ‘‘𑀭𑀼𑀓𑁆𑀔𑁄 𑀙𑀺𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺. 𑀏𑀯𑀁 𑀔𑀦𑁆𑀥𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺.

𑀢𑁂 𑀧𑀼𑀦 𑀆𑀬𑀢𑀦𑀢𑁄 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑁋 𑀫𑀦𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀦𑁆𑀢𑀺. 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 𑀳𑁂𑀢𑁆𑀣 𑀘𑀺𑀢𑁆𑀢𑀁 𑀫𑀦𑀸𑀬𑀢𑀦𑀁, 𑀲𑁂𑀲𑀸 𑀧𑀦 𑀅𑀝𑁆𑀞𑀢𑀺𑀁𑀲 𑀥𑀫𑁆𑀫𑀸 𑀥𑀫𑁆𑀫𑀸𑀬𑀢𑀦𑀦𑁆𑀢𑀺. 𑀏𑀯𑀁 𑀆𑀬𑀢𑀦𑀢𑁄 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀢𑁂 𑀧𑀼𑀦 𑀥𑀸𑀢𑀼𑀯𑀲𑁂𑀦 𑀤𑀼𑀯𑀺𑀥𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀥𑀫𑁆𑀫𑀥𑀸𑀢𑀽𑀢𑀺. 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀳𑁂𑀢𑁆𑀣 𑀘𑀺𑀢𑁆𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁂𑀲𑀸 𑀥𑀫𑁆𑀫𑀥𑀸𑀢𑀽𑀢𑀺. 𑀏𑀯𑀁 𑀥𑀸𑀢𑀼𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀆𑀳𑀸𑀭𑀸𑀦𑀸𑀳𑀸𑀭𑀯𑀲𑁂𑀦. 𑀢𑀢𑁆𑀣 𑀨𑀲𑁆𑀲𑁄 𑀘𑁂𑀢𑀦𑀸 𑀘𑀺𑀢𑁆𑀢𑀦𑁆𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀨𑀲𑁆𑀲𑀸𑀳𑀸𑀭𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀯𑀲𑁂𑀲𑀸 𑀦 𑀆𑀳𑀸𑀭𑀸𑀢𑀺. 𑀓𑀺𑀁 𑀧𑀦𑁂𑀢𑁂 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀬𑁂 𑀦 𑀆𑀳𑀸𑀭𑀸𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀦𑁆𑀢𑀺? 𑀦𑁄 𑀦 𑀳𑁄𑀦𑁆𑀢𑀺, 𑀯𑀺𑀲𑁂𑀲𑀧𑀘𑁆𑀘𑀬𑀸 𑀧𑀦 𑀦 𑀳𑁄𑀦𑁆𑀢𑀺, 𑀨𑀲𑁆𑀲𑀸𑀤𑀬𑁄 𑀧𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀯𑀺𑀲𑁂𑀲𑀢𑁄 𑀯𑁂𑀤𑀦𑀸𑀤𑀬𑁄 𑀘 𑀆𑀳𑀭𑀦𑁆𑀢𑀺. 𑀨𑀲𑁆𑀲𑀸𑀳𑀸𑀭𑁄 𑀳𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸𑀬𑁄 𑀆𑀳𑀭𑀢𑀺, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄 𑀪𑀯𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁. 𑀦𑀦𑀼 𑀘 𑀲𑁄 𑀯𑀺𑀧𑀸𑀓𑁄, 𑀇𑀤𑀁 𑀧𑀦 𑀓𑀼𑀲𑀮𑀯𑀺𑀜𑁆𑀜𑀸𑀡𑀦𑁆𑀢𑀺? 𑀓𑀺𑀜𑁆𑀘𑀸𑀧𑀺 𑀏𑀯𑀁, 𑀢𑀁𑀲𑀭𑀺𑀓𑁆𑀔𑀢𑀸𑀬 𑀧𑀦 𑀯𑀺𑀜𑁆𑀜𑀸𑀡𑀸𑀳𑀸𑀭𑁄𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀇𑀫𑁂 ‘‘𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫) 𑀯𑀘𑀦𑀢𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀦𑀸𑀫𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀇𑀫𑁂𑀯 ‘‘𑀆𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀆𑀳𑀸𑀭𑀸𑀦𑀸𑀳𑀸𑀭𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀢𑁄. 𑀢𑀢𑁆𑀣 𑀲𑀤𑁆𑀥𑀸 𑀯𑀻𑀭𑀺𑀬𑀁 𑀲𑀢𑀺 𑀏𑀓𑀕𑁆𑀕𑀢𑀸 𑀅𑀫𑁄𑀳𑁄 𑀘𑀺𑀢𑁆𑀢𑀁 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀚𑀻𑀯𑀺𑀢𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀥𑀫𑁆𑀫𑀸 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀯𑀲𑁂𑀲𑀸 𑀦 ‘‘𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺. 𑀏𑀯𑀁 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀢𑁄 𑀤𑀼𑀯𑀺𑀥𑀸.

𑀢𑀣𑀸 𑀛𑀸𑀦𑀗𑁆𑀕𑀸𑀛𑀸𑀦𑀗𑁆𑀕𑀯𑀲𑁂𑀦. 𑀢𑀢𑁆𑀣 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑁄𑀫𑀦𑀲𑁆𑀲𑀁 𑀏𑀓𑀕𑁆𑀕𑀢𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 ‘‘𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 ‘‘𑀅𑀛𑀸𑀦𑀗𑁆𑀕𑀸𑀦𑀻’’𑀢𑀺. 𑀏𑀯𑀁 𑀛𑀸𑀦𑀗𑁆𑀕𑀸𑀛𑀸𑀦𑀗𑁆𑀕𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀫𑀕𑁆𑀕𑀗𑁆𑀕𑀸𑀫𑀕𑁆𑀕𑀗𑁆𑀕𑀯𑀲𑁂𑀦. 𑀢𑀢𑁆𑀣 𑀅𑀫𑁄𑀳𑁄 𑀯𑀺𑀢𑀓𑁆𑀓𑁄 𑀯𑀺𑀭𑀢𑀺𑀢𑁆𑀢𑀬𑀁 𑀯𑀻𑀭𑀺𑀬𑀁 𑀲𑀢𑀺 𑀏𑀓𑀕𑁆𑀕𑀢𑀸𑀢𑀺 𑀇𑀫𑁂 𑀅𑀝𑁆𑀞 𑀥𑀫𑁆𑀫𑀸 𑀦𑀺𑀬𑁆𑀬𑀸𑀦𑀝𑁆𑀞𑁂𑀦, 𑀯𑀺𑀫𑁄𑀓𑁆𑀔𑀝𑁆𑀞𑁂𑀦 𑀘 𑀬𑀣𑀸𑀓𑁆𑀓𑀫𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀦𑀸𑀫𑁂𑀦 ‘‘𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 ‘‘𑀅𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺. 𑀧𑀸𑀴𑀺𑀬𑀁 𑀧𑀦 𑀮𑁄𑀓𑀺𑀬𑀘𑀺𑀢𑁆𑀢𑁂 𑀯𑀺𑀭𑀢𑀻𑀦𑀁 𑀅𑀦𑀺𑀬𑀢𑀢𑁆𑀢𑀸, 𑀬𑁂𑀯𑀸𑀧𑀦𑀓𑀢𑁆𑀢𑀸 𑀘 𑀢𑀸 𑀯𑀚𑁆𑀚𑁂𑀢𑁆𑀯𑀸 ‘‘𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 (𑀥. 𑀲. 𑁫𑁮, 𑁧𑁨𑁧) 𑀯𑀼𑀘𑁆𑀘𑀢𑀺. 𑀏𑀯𑀁 𑀫𑀕𑁆𑀕𑀗𑁆𑀕𑀸𑀫𑀕𑁆𑀕𑀗𑁆𑀕𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀩𑀮𑀸𑀩𑀮𑀯𑀲𑁂𑀦. 𑀢𑀢𑁆𑀣 𑀲𑀤𑁆𑀥𑀸𑀯𑀻𑀭𑀺𑀬𑀁 𑀲𑀢𑀺 𑀲𑀫𑀸𑀥𑀺 𑀧𑀜𑁆𑀜𑀸 𑀳𑀺𑀭𑀻 𑀑𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑁂 𑀲𑀢𑁆𑀢 𑀥𑀫𑁆𑀫𑀸 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 𑀅𑀩𑀮𑀸𑀦𑀻𑀢𑀺. 𑀏𑀯𑀁 𑀩𑀮𑀸𑀩𑀮𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀣𑀸 𑀳𑁂𑀢𑀼𑀦𑀳𑁂𑀢𑀼𑀯𑀲𑁂𑀦. 𑀢𑀢𑁆𑀣 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀫𑀽𑀮𑀝𑁆𑀞𑁂𑀦 𑀳𑁂𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 𑀦𑀳𑁂𑀢𑀽𑀢𑀺. 𑀏𑀯𑀁 𑀳𑁂𑀢𑀼𑀦𑀳𑁂𑀢𑀼𑀯𑀲𑁂𑀦 𑀤𑀼𑀯𑀺𑀥𑀸. 𑀏𑀯𑀁 𑀨𑀲𑁆𑀲𑀸𑀨𑀲𑁆𑀲𑀯𑁂𑀤𑀦𑀸𑀯𑁂𑀤𑀦𑀸 𑀲𑀜𑁆𑀜𑀸𑀲𑀜𑁆𑀜𑀸𑀘𑀺𑀢𑁆𑀢𑀸𑀘𑀺𑀢𑁆𑀢𑀸𑀤𑀺𑀯𑀲𑁂𑀦𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑀣𑀸𑀬𑁄𑀕𑀁 𑀲𑀗𑁆𑀕𑀳𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀤𑀪𑀸𑀚𑀦𑀻𑀬𑀲𑀗𑁆𑀕𑀳𑀯𑀸𑀭𑁂 (𑀥. 𑀲. 𑁧𑁦𑁩 𑀆𑀤𑀬𑁄), 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 (𑀥. 𑀲. 𑀅𑀝𑁆𑀞. 𑁫𑁮-𑁧𑁨𑁦) 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀲𑀗𑁆𑀕𑀳𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀜𑁆𑀜𑀢𑁄 𑀘𑁂𑀯𑀸𑀢𑀺 𑀏𑀯𑀁 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀳𑀺𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀓𑀸𑀭𑀓𑀯𑁂𑀤𑀓𑀸𑀤𑀺𑀲𑀪𑀸𑀯𑁄 𑀅𑀢𑁆𑀢𑀸 𑀯𑀸 𑀲𑀲𑁆𑀲𑀢𑁄 𑀯𑀸 𑀪𑀸𑀯𑁄 𑀦 𑀉𑀧𑀮𑀩𑁆𑀪𑀢𑀺. 𑀲𑀼𑀜𑁆𑀜𑀸 𑀢𑁂 𑀥𑀫𑁆𑀫𑀸 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀓𑁂𑀯𑀮𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸, 𑀲𑀮𑀓𑁆𑀔𑀡𑀥𑀸𑀭𑀡𑀢𑁄 𑀥𑀫𑁆𑀫𑀫𑀢𑁆𑀢𑀸, 𑀦𑀺𑀘𑁆𑀘𑀲𑀼𑀔𑀸𑀤𑀺𑀲𑀸𑀭𑀯𑀺𑀭𑀳𑀢𑁄 𑀅𑀲𑀸𑀭𑀸, 𑀧𑀯𑀢𑁆𑀢𑀓𑀦𑀺𑀬𑀸𑀫𑀓𑀸𑀪𑀸𑀯𑀢𑁄 𑀅𑀧𑀭𑀺𑀡𑀸𑀬𑀓𑀸 𑀅𑀦𑀺𑀘𑁆𑀘𑀸, 𑀤𑀼𑀓𑁆𑀔𑀸, 𑀅𑀦𑀢𑁆𑀢𑀸, 𑀅𑀦𑀢𑁆𑀢𑀦𑀺𑀬𑀸 𑀘 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀤𑀪𑀸𑀚𑀦𑀻𑀬𑀲𑀼𑀜𑁆𑀜𑀢𑀯𑀸𑀭𑁂, 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀕𑀳𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀲𑀼𑀜𑁆𑀜𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀝𑁆𑀞𑀺𑀢𑀸 𑀧𑀞𑀫𑀓𑀼𑀲𑀮𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸.

𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀦𑀸 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀣𑁂𑀯, 𑀇𑀢𑁄 𑀧𑀭𑁂𑀲𑀼𑀧𑀺 𑀲𑀩𑁆𑀩𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀸𑀦𑀁 𑀧𑀤𑀸𑀦𑀁, 𑀥𑀫𑁆𑀫𑀸𑀦𑀜𑁆𑀘 𑀅𑀢𑁆𑀣𑁄, 𑀲𑀩𑁆𑀩𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀧𑀦 𑀅𑀧𑀼𑀩𑁆𑀩𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀤𑀼𑀢𑀺𑀬𑀘𑀺𑀢𑁆𑀢𑁂 𑀢𑀸𑀯 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀧𑀞𑀫𑀘𑀺𑀢𑁆𑀢𑀢𑁄 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀤𑀼𑀢𑀺𑀬𑀓𑀼𑀲𑀮𑀁.

𑀢𑀢𑀺𑀬𑁂𑀧𑀺 𑀥𑀫𑁆𑀫𑀼𑀤𑁆𑀤𑁂𑀲𑁂 𑀅𑀫𑁄𑀳𑀸𑀪𑀸𑀯𑀸 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀗𑁆𑀕𑀩𑀮𑀫𑀽𑀮𑀲𑀗𑁆𑀕𑀳𑁂𑀲𑀼 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀕𑁆𑀕𑀗𑁆𑀕𑀧𑀜𑁆𑀜𑀸𑀩𑀮𑀅𑀫𑁄𑀳𑀫𑀽𑀮𑀸𑀦𑀁 𑀧𑀭𑀺𑀳𑀸𑀦𑀺𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀪𑀸𑀯𑁄𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀢𑀣𑀸 𑀘𑀢𑀼𑀢𑁆𑀣𑁂 𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑁂𑀲𑀼 𑀧𑀦 𑀲𑀼𑀔𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂𑀲𑀼 𑀉𑀧𑁂𑀓𑁆𑀔𑀸𑀪𑀸𑀯𑁄, 𑀧𑀻𑀢𑀺𑀬𑀸 𑀘 𑀅𑀪𑀸𑀯𑁄. 𑀢𑁂𑀦𑁂𑀯 𑀛𑀸𑀦𑀗𑁆𑀕𑀲𑀗𑁆𑀕𑀳𑀯𑀸𑀭𑁂 𑀘𑀢𑀼𑀭𑀗𑁆𑀕𑀚𑁆𑀛𑀸𑀦𑀢𑀸𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀘𑀺𑀢𑁆𑀢𑀲𑀤𑀺𑀲𑀫𑁂𑀯. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀲𑀼 𑀘𑁂𑀢𑁆𑀣 𑀘𑀢𑀽𑀲𑀼 𑀓𑀭𑀼𑀡𑀸𑀫𑀼𑀤𑀺𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀧𑀭𑀺𑀓𑀫𑁆𑀫𑀪𑀽𑀢𑀸𑀦𑀁 𑀧𑀦𑁂𑀢𑁆𑀣 𑀢𑀸𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀉𑀧𑀘𑀸𑀭𑀧𑁆𑀧𑀢𑁆𑀢𑀸 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀇𑀢𑀭𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀸𑀦𑀺.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄𑀢𑀺 𑀏𑀯𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀦𑀸 𑀯𑀺𑀪𑀢𑁆𑀢𑀸𑀦𑀺 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺 𑀆𑀭𑀫𑁆𑀫𑀡𑀯𑀺𑀪𑀸𑀕𑀢𑁄 𑀧𑀘𑁆𑀘𑁂𑀓𑀁 𑀙𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀁…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺. 𑀢𑀢𑁆𑀣 𑀦𑀻𑀮𑀸𑀤𑀺𑀪𑁂𑀤𑀪𑀺𑀦𑁆𑀦𑀸, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀘 𑀯𑀡𑁆𑀡𑀥𑀸𑀢𑀼 𑀭𑀽𑀧𑀸𑀭𑀫𑁆𑀫𑀡𑀁 𑀦𑀸𑀫. 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀨𑁄𑀝𑁆𑀞𑀩𑁆𑀩𑀦𑁆𑀢𑀺 𑀆𑀧𑁄𑀥𑀸𑀢𑀼𑀯𑀚𑁆𑀚𑀺𑀢𑀪𑀽𑀢𑀢𑁆𑀢𑀬𑀁, 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸 𑀭𑀽𑀧𑀸𑀭𑀽𑀧𑀧𑀜𑁆𑀜𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀫𑀸𑀧𑀸𑀣𑀕𑀢𑀸𑀦𑀺 𑀏𑀢𑀸𑀦𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀯𑁄𑀳𑀸𑀭𑀁 𑀮𑀪𑀦𑁆𑀢𑀺, 𑀅𑀦𑀸𑀧𑀸𑀣𑀕𑀢𑀸𑀦𑀺 𑀧𑀦 𑀅𑀢𑀻𑀢𑀸𑀦𑀸𑀕𑀢𑀤𑀽𑀭𑀲𑀼𑀔𑀼𑀫𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀤𑀺𑀩𑁆𑀩𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀸𑀭𑀫𑁆𑀫𑀡𑀢𑀸𑀤𑀺𑀯𑀘𑀦𑀢𑁄.

𑀅𑀦𑀸𑀧𑀸𑀣𑀕𑀢𑀸 𑀏𑀯 𑀳𑀺 𑀢𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀆𑀤𑀻𑀦𑀁 𑀆𑀭𑀫𑁆𑀫𑀡𑀁, 𑀦 𑀘 𑀢𑀸𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀺. 𑀭𑀽𑀧𑀸𑀤𑀬𑁄 𑀳𑀺 𑀧𑀜𑁆𑀘 𑀧𑀘𑁆𑀘𑁂𑀓𑀁 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀏𑀓𑀲𑁆𑀫𑀺𑀁 𑀔𑀡𑁂 𑀆𑀧𑀸𑀣𑀫𑀸𑀕𑀦𑁆𑀢𑁆𑀯𑀸 𑀢𑀁𑀢𑀁𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁, 𑀢𑀤𑀦𑀦𑁆𑀢𑀭𑁂 𑀫𑀦𑁄𑀤𑁆𑀯𑀸𑀭𑀺𑀓𑀸𑀦𑀜𑁆𑀘 𑀅𑀧𑀭𑀪𑀸𑀕𑁂 𑀘 𑀤𑀺𑀝𑁆𑀞𑀲𑀼𑀢𑀸𑀤𑀺𑀯𑀲𑁂𑀦𑀸𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑀺𑀓𑀸𑀦𑀜𑁆𑀘 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀦𑀸𑀦𑀸𑀯𑀡𑁆𑀡𑀯𑀺𑀘𑀺𑀢𑁆𑀢𑀘𑁂𑀢𑀺𑀬𑀸𑀤𑀺𑀤𑀲𑁆𑀲𑀦𑀁 𑀓𑀭𑁄𑀦𑁆𑀢𑀲𑁆𑀲, 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲, 𑀪𑁂𑀭𑀺𑀲𑀤𑁆𑀤𑀸𑀤𑀻𑀳𑀺 𑀯𑀸 𑀧𑀽𑀚𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀘 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀖𑀸𑀬𑀺𑀢𑁆𑀯𑀸, 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀺𑀜𑁆𑀘 𑀲𑀸𑀬𑀺𑀢𑁆𑀯𑀸, 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺 𑀘 𑀨𑀼𑀲𑀺𑀢𑁆𑀯𑀸 𑀫𑀦𑀸𑀧𑀪𑀸𑀯𑀁 𑀜𑀢𑁆𑀯𑀸 𑀢𑁂𑀳𑀺 𑀘𑁂𑀢𑀺𑀬𑀧𑀽𑀚𑀁 𑀓𑀭𑁄𑀦𑁆𑀢𑀲𑁆𑀲, 𑀢𑀢𑁆𑀣 𑀢𑀢𑁆𑀣 𑀅𑀓𑀼𑀲𑀮𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀡𑁂 𑀕𑀬𑁆𑀳𑀫𑀸𑀦𑀸𑀦𑀺 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀲𑀸𑀔𑀸𑀬 𑀅𑀓𑁆𑀓𑀫𑀦𑀁, 𑀧𑀣𑀯𑀺𑀬𑀁 𑀙𑀸𑀬𑀸𑀨𑀭𑀡𑀜𑁆𑀘 𑀏𑀓𑀓𑁆𑀔𑀡𑁂 𑀓𑀼𑀭𑀼𑀫𑀸𑀦𑀁 𑀭𑀼𑀓𑁆𑀔𑀕𑁆𑀕𑁂 𑀦𑀺𑀮𑀻𑀬𑀫𑀸𑀦𑀁 𑀧𑀓𑁆𑀔𑀺𑀦𑁄 𑀲𑀭𑀻𑀭𑀁 𑀯𑀺𑀬 𑀬𑀣𑀸𑀲𑀓𑀁 𑀧𑀲𑀸𑀤𑀜𑁆𑀘 𑀖𑀝𑁆𑀝𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀪𑀯𑀗𑁆𑀕𑀘𑀮𑀦𑀧𑀘𑁆𑀘𑀬𑀪𑀸𑀯𑁂𑀦 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀧𑀸𑀣𑀫𑀸𑀕𑀦𑁆𑀢𑁆𑀯𑀸 𑀢𑀢𑁄 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀦𑀁 𑀆𑀯𑀚𑁆𑀚𑀦𑀸𑀤𑀺𑀯𑁄𑀝𑁆𑀞𑀩𑁆𑀩𑀦𑀧𑀭𑀺𑀬𑁄𑀲𑀸𑀦𑀸𑀦𑀁, 𑀯𑀻𑀣𑀺𑀘𑀺𑀢𑁆𑀢𑀸𑀦𑀁, 𑀢𑀤𑀦𑀦𑁆𑀢𑀭𑀸𑀦𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀢𑀤𑀦𑀦𑁆𑀢𑀭𑀸𑀲𑀼 𑀫𑀦𑁄𑀤𑁆𑀯𑀸𑀭𑀯𑀻𑀣𑀻𑀲𑀼 𑀘 𑀅𑀧𑀭𑀪𑀸𑀕𑁂 𑀢𑀣𑀸𑀭𑀽𑀧𑀁 𑀧𑀘𑁆𑀘𑀬𑀁 𑀆𑀕𑀫𑁆𑀫 𑀅𑀢𑁆𑀢𑀦𑀸 𑀧𑀽𑀚𑀸𑀤𑀺𑀓𑀭𑀡𑀓𑀸𑀮𑁂𑀲𑀼, 𑀤𑀺𑀝𑁆𑀞𑀲𑀼𑀢𑀖𑀸𑀬𑀺𑀢𑀲𑀸𑀬𑀺𑀢𑀨𑀼𑀝𑁆𑀞𑀯𑀲𑁂𑀦𑀸𑀦𑀼𑀲𑁆𑀲𑀭𑀦𑁆𑀢𑀲𑁆𑀲, 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀪𑀼𑀬𑁆𑀬𑀫𑀸𑀦𑀸𑀦𑀺 𑀯𑀺𑀬 𑀫𑀦𑁄𑀤𑁆𑀯𑀸𑀭𑁂 𑀘 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺.

𑀅𑀣𑀸𑀧𑀺 𑀧𑀜𑁆𑀘𑀳𑀺 𑀤𑁆𑀯𑀸𑀭𑁂𑀳𑀺 𑀅𑀕𑀳𑀺𑀢𑀧𑀼𑀩𑁆𑀩𑀸𑀦𑀺 𑀩𑀼𑀤𑁆𑀥𑀭𑀽𑀧𑀸𑀤𑀻𑀦𑀺, 𑀤𑀺𑀩𑁆𑀩𑀭𑀽𑀧𑀸𑀤𑀻𑀦𑀺 𑀘 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀲𑀯𑀦𑀯𑀲𑁂𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀯𑀦𑀓𑁆𑀔𑀡𑁂 𑀯𑀸 𑀅𑀧𑀭𑀪𑀸𑀕𑁂 𑀲𑀼𑀢𑀯𑀲𑁂𑀦𑁂𑀯 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀯𑀸 𑀧𑀲𑀸𑀤𑀁, 𑀓𑀫𑁆𑀫𑀨𑀮𑀲𑀤𑁆𑀥𑀸𑀤𑀺𑀁, 𑀮𑁄𑀪𑀸𑀤𑀺𑀜𑁆𑀘 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀧𑀺 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺. 𑀅𑀪𑀺𑀜𑁆𑀜𑀸𑀦𑀁 𑀧𑀦 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂 𑀏𑀯, 𑀢𑀲𑁆𑀫𑀸 𑀏𑀯𑀁 𑀧𑀜𑁆𑀘𑀤𑁆𑀯𑀸𑀭𑁂, 𑀫𑀦𑁄𑀤𑁆𑀯𑀸𑀭𑁂, 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂 𑀘 𑀆𑀧𑀸𑀣𑀕𑀢𑀸𑀦𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀓𑀤𑀸𑀘𑀺𑀧𑀺 𑀥𑀫𑁆𑀫𑀸𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺, 𑀢𑀤𑀺𑀢𑀭𑀸 𑀦𑀸𑀫𑀭𑀽𑀧𑀧𑀜𑁆𑀜𑀢𑁆𑀢𑀺𑀬𑁄 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀦𑀼 𑀘𑁂𑀢𑀸𑀦𑀺 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀮𑁄𑀪𑀲𑁆𑀲 𑀯𑀢𑁆𑀣𑀼, 𑀓𑀣𑀫𑁂𑀢𑁆𑀣 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑀺𑀬𑀫𑀸𑀤𑀺𑀓𑀸𑀭𑀡𑀢𑁄. 𑀘𑀺𑀢𑁆𑀢𑀁 𑀳𑀺 ‘‘𑀓𑀼𑀲𑀮𑀫𑁂𑀯 𑀫𑀬𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀬𑀫𑀺𑀢𑀯𑀲𑁂𑀦 𑀲𑀩𑁆𑀩𑀢𑁆𑀣 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀼𑀲𑀮𑁂 𑀧𑀭𑀺𑀡𑀸𑀫𑀦𑀯𑀲𑁂𑀦 𑀘 𑀅𑀪𑀺𑀡𑁆𑀳𑀁 𑀆𑀲𑁂𑀯𑀺𑀢𑀓𑀼𑀲𑀮𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀘 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀬𑁄𑀦𑀺𑀲𑁄𑀆𑀪𑀼𑀚𑀺𑀢𑀯𑀲𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀓𑀼𑀲𑀮𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑀺𑀫𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀧𑀘𑁆𑀘𑁂𑀓𑀁 𑀙𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀓𑀣𑀸.

𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀪𑀺𑀦𑁆𑀦𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀁 𑀢𑀸𑀯 𑀓𑀼𑀲𑀮𑀁 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀤𑀲𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀏𑀓𑁂𑀓𑀁 𑀧𑀦 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀢𑀺𑀯𑀺𑀥𑀁. 𑀢𑀢𑁆𑀣 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀫𑀦𑁄𑀓𑀫𑁆𑀫𑀁. 𑀢𑀢𑁆𑀣 𑀓𑀸𑀬𑀤𑁆𑀯𑀸𑀭𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀯𑀘𑀻𑀤𑁆𑀯𑀸𑀭𑀦𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀢𑀸𑀲𑀁 𑀯𑀺𑀪𑀸𑀕𑁄 𑀭𑀽𑀧𑀯𑀺𑀪𑀢𑁆𑀢𑀺𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀲𑀩𑁆𑀩𑀁 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀯𑀺𑀲𑁂𑀲𑀢𑁄 𑀓𑀼𑀲𑀮𑀸𑀓𑀼𑀲𑀮𑀁. 𑀢𑀁 𑀳𑀺 𑀲𑀳𑀚𑀸𑀢𑀸𑀦𑀁 𑀘𑁂𑀢𑀦𑀸𑀦𑀁, 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀘𑁄𑀧𑀦𑀁 𑀅𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀧𑀯𑀢𑁆𑀢𑀸𑀦𑀁 𑀲𑀼𑀤𑁆𑀥𑀫𑀦𑁄𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀦𑀢𑁄 𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀓𑀸𑀬𑀓𑀫𑁆𑀫𑀸𑀤𑀬𑁄 𑀦𑀸𑀫. 𑀅𑀧𑀺𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄, 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀬𑁄 𑀘 𑀓𑀸𑀬𑀓𑀫𑁆𑀫𑀁 𑀦𑀸𑀫, 𑀫𑀼𑀲𑀸𑀯𑀸𑀤𑀸𑀤𑀬𑁄, 𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀺𑀆𑀤𑀬𑁄 𑀘 𑀯𑀘𑀻𑀓𑀫𑁆𑀫𑀁 𑀦𑀸𑀫, 𑀅𑀪𑀺𑀚𑁆𑀛𑀸𑀤𑀬𑁄, 𑀅𑀦𑀪𑀺𑀚𑁆𑀛𑀸𑀤𑀬𑁄 𑀘 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀓𑀼𑀲𑀮𑀧𑀓𑁆𑀔𑁂 𑀧𑀦 𑀤𑀸𑀦𑀸𑀤𑀺𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀘 𑀬𑀣𑀸𑀭𑀳𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀢𑁄 𑀘𑁂𑀲 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀫𑁆𑀧𑀺 𑀯𑀘𑀻𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑁄 𑀓𑁂𑀲𑀜𑁆𑀘𑀺 𑀧𑀼𑀭𑀺𑀲𑀸𑀦𑀁 𑀯𑀦𑀘𑀭𑀓𑀸𑀤𑀺𑀪𑀸𑀯𑁄 𑀯𑀺𑀬, 𑀤𑁆𑀯𑀸𑀭𑀸𑀦𑀜𑁆𑀘 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀸𑀤𑀺𑀪𑀸𑀯𑁄 𑀓𑁂𑀲𑀜𑁆𑀘𑀺 𑀕𑀸𑀫𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀸𑀤𑀺𑀪𑀸𑀯𑁄 𑀯𑀺𑀬. 𑀅𑀓𑀼𑀲𑀮𑁂 𑀢𑀸𑀯 𑀏𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀸𑀬𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂, 𑀯𑀘𑀻𑀤𑁆𑀯𑀸𑀭𑁂 𑀘 𑀬𑀣𑀸𑀭𑀳𑀁 𑀲𑀫𑀼𑀝𑁆𑀞𑀸𑀢𑀺, 𑀦𑁄 𑀫𑀦𑁄𑀤𑁆𑀯𑀸𑀭𑁂. 𑀢𑀣𑀸 𑀫𑀼𑀲𑀸𑀯𑀸𑀤𑀸𑀤𑀺𑀯𑀘𑀻𑀓𑀫𑁆𑀫𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀳𑀺 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀩𑁆𑀬𑀸𑀧𑀸𑀤𑀸𑀤𑀻𑀲𑀼 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑁂𑀲𑀼 𑀯𑀸 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑁂𑀲𑀼 𑀯𑀸 𑀫𑀦𑁄𑀓𑀫𑁆𑀫𑁂𑀲𑀼 𑀏𑀯 𑀧𑀯𑀺𑀲𑀦𑀢𑁄 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀁 𑀦 𑀧𑀸𑀧𑀼𑀡𑀸𑀢𑀺. 𑀦𑀦𑀼 𑀯𑀺𑀚𑁆𑀚𑀸𑀫𑀬𑁂𑀦𑀸𑀧𑀺 𑀓𑁂𑀯𑀮𑀁 𑀫𑀦𑁄𑀓𑀫𑁆𑀫𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀓𑀭𑁄𑀦𑁆𑀢𑀻𑀢𑀺? 𑀦 𑀅𑀮𑁄𑀡𑀪𑁄𑀚𑀦𑀤𑀩𑁆𑀪𑀲𑀬𑀦𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀸𑀤𑀺𑀓𑀸𑀬𑀯𑀘𑀻𑀧𑀬𑁄𑀕𑀁 𑀯𑀺𑀦𑀸 𑀢𑀲𑁆𑀲𑀸𑀲𑀺𑀚𑁆𑀛𑀦𑀢𑁄. 𑀅𑀪𑀺𑀚𑁆𑀛𑀸𑀤𑀺𑀫𑀦𑁄𑀓𑀫𑁆𑀫𑀁 𑀧𑀦 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀲𑀫𑀼𑀝𑁆𑀞𑀸𑀢𑀺. 𑀅𑀪𑀺𑀚𑁆𑀛𑀸𑀬 𑀳𑀺 𑀓𑀸𑀬𑁂𑀦 𑀧𑀭𑀪𑀡𑁆𑀟𑀕𑁆𑀕𑀸𑀳𑀸𑀤𑀻𑀦𑀁, 𑀩𑁆𑀬𑀸𑀧𑀸𑀤𑁂𑀦 𑀤𑀡𑁆𑀟𑀧𑀭𑀸𑀫𑀲𑀦𑀸𑀤𑀻𑀦𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀢𑀺𑀢𑁆𑀣𑀺𑀬𑀯𑀦𑁆𑀤𑀦𑀸𑀤𑀻𑀦𑀁 𑀓𑀭𑀡𑀓𑀸𑀮𑁂, 𑀯𑀸𑀘𑀸𑀬 𑀧𑀭𑀲𑀫𑁆𑀧𑀢𑁆𑀢𑀺𑀧𑀢𑁆𑀣𑀦𑀸𑀬 ‘‘𑀳𑀜𑁆𑀜𑀦𑁆𑀢𑀼 𑀩𑀚𑁆𑀛𑀦𑁆𑀢𑀽’’𑀢𑀺 𑀅𑀦𑀢𑁆𑀣𑀧𑀢𑁆𑀣𑀦𑀸𑀬 𑀘 𑀢𑀺𑀢𑁆𑀣𑀺𑀬𑀢𑁆𑀣𑀼𑀢𑀺𑀢𑀤𑀢𑁆𑀣𑀤𑀻𑀧𑀦𑀸𑀤𑀻𑀦𑀜𑁆𑀘 𑀬𑀣𑀸𑀓𑁆𑀓𑀫𑀁 𑀧𑀯𑀢𑁆𑀢𑀺𑀓𑀸𑀮𑁂 𑀘 𑀢𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀓𑀸𑀬𑀯𑀸𑀘𑀸𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀺𑀓𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀢𑁆𑀢𑀬𑁂𑀧𑀺 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀲𑀫𑁆𑀨𑀧𑁆𑀧𑀮𑀸𑀧𑀧𑀭𑀺𑀬𑁄𑀲𑀸𑀦𑁂𑀳𑀺 𑀲𑀢𑁆𑀢𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀢𑀸𑀯 𑀳𑀢𑁆𑀣𑀫𑀼𑀤𑁆𑀤𑀸𑀬, 𑀯𑀘𑀻𑀪𑁂𑀤𑁂𑀦 𑀘 𑀲𑀫𑀸𑀤𑀺𑀬𑀦𑀓𑀸𑀮𑁂, 𑀫𑀦𑀲𑀸 𑀯𑀺𑀭𑀫𑀡𑀓𑀸𑀮𑁂 𑀘 𑀢𑁂𑀲𑀁 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀪𑀺𑀚𑁆𑀛𑀸𑀤𑀻𑀳𑀺 𑀲𑀳𑀕𑀢𑁂𑀦 𑀘𑁂𑀢𑀲𑀸 𑀢𑀚𑁆𑀚𑀲𑁆𑀲 𑀓𑀸𑀬𑀧𑀬𑁄𑀕𑀲𑁆𑀲, ‘‘𑀧𑀭𑀯𑀺𑀢𑁆𑀢𑀼𑀧𑀓𑀭𑀡𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀼, 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀘𑀻𑀧𑀬𑁄𑀕𑀲𑁆𑀲, 𑀓𑁂𑀯𑀮𑀁 𑀫𑀦𑁄𑀧𑀬𑁄𑀕𑀲𑁆𑀲 𑀘 𑀓𑀭𑀡𑀓𑀸𑀮𑁂 𑀫𑀦𑁄𑀓𑀫𑁆𑀫𑀲𑁆𑀲 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸𑀦𑀺 𑀚𑀯𑀦𑀸𑀦𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀦 𑀳𑁄𑀦𑁆𑀢𑀺, 𑀫𑀦𑁄𑀓𑀫𑁆𑀫𑀸𑀦𑀺 𑀏𑀯. 𑀢𑀸𑀦𑀺 𑀘 𑀦 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀺, 𑀓𑁂𑀯𑀮𑀁 𑀓𑀼𑀲𑀮𑀸𑀤𑀻𑀦𑀺 𑀳𑁄𑀦𑁆𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀧𑀝𑀼𑀢𑀭𑀧𑁆𑀧𑀯𑀢𑁆𑀢𑀸𑀦𑀺 𑀏𑀯 𑀳𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀺 𑀫𑀦𑁄𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺, 𑀭𑀽𑀧𑀸𑀭𑀽𑀧𑀚𑀯𑀦𑀸𑀦𑀺 𑀧𑀦 𑀏𑀓𑀦𑁆𑀢𑀁 𑀪𑀸𑀯𑀦𑀸𑀫𑀬𑀁 𑀫𑀦𑁄𑀓𑀫𑁆𑀫𑀫𑁂𑀯 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀘 𑀧𑀯𑀢𑁆𑀢𑀦𑁆𑀢𑀺.

𑀓𑀺𑀜𑁆𑀘𑀸𑀧𑀺 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀚𑀦𑀓𑀸𑀦𑀺, 𑀢𑀣𑀸𑀧𑀺 𑀓𑀸𑀬𑀯𑀘𑀻𑀓𑀫𑁆𑀫𑀯𑁄𑀳𑀸𑀭𑀁 𑀦 𑀮𑀪𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀧𑀦 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀓𑀸𑀭𑀻𑀦𑀁 𑀯𑀺𑀭𑀢𑀻𑀦𑀁 𑀯𑀲𑁂𑀦 𑀓𑀸𑀬𑀯𑀘𑀻𑀓𑀫𑁆𑀫𑀫𑁆𑀧𑀺 𑀳𑁄𑀢𑀺, 𑀢𑀤𑀺𑀢𑀭𑀫𑀕𑁆𑀕𑀗𑁆𑀕𑀯𑀲𑁂𑀦 𑀫𑀦𑁄𑀓𑀫𑁆𑀫𑀫𑁆𑀧𑀻𑀢𑀺 𑀏𑀓𑀓𑁆𑀔𑀡𑁂 𑀢𑀻𑀡𑀺𑀧𑀺 𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺, 𑀢𑀜𑁆𑀘 𑀪𑀸𑀯𑀦𑀸𑀫𑀬𑀁, 𑀤𑁆𑀯𑀸𑀭𑀁 𑀧𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑀫𑁂𑀯. 𑀬𑀣𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀬𑀸𑀤𑀻𑀦𑀁 𑀯𑀲𑁂𑀦 𑀓𑀼𑀲𑀮𑀲𑁆𑀲 𑀤𑁆𑀯𑀸𑀭𑀢𑁆𑀢𑀬𑁂 𑀧𑀯𑀢𑁆𑀢𑀺 𑀯𑀼𑀢𑁆𑀢𑀸, 𑀏𑀯𑀁 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀫𑁆𑀧𑀺 𑀯𑀲𑁂𑀦 𑀯𑀢𑁆𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀦 𑀯𑀺𑀘𑀸𑀭𑀺𑀢𑀸, 𑀢𑀣𑀸𑀧𑀺 𑀦𑀬𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀲𑀼 𑀤𑀸𑀦𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀯𑀸. 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁, 𑀅𑀩𑁆𑀪𑀦𑀼𑀫𑁄𑀤𑀦𑀁, 𑀤𑁂𑀲𑀦𑀸 𑀯𑀘𑀻𑀓𑀫𑁆𑀫𑀫𑁂𑀯. 𑀲𑀻𑀮𑀁 𑀅𑀧𑀘𑀺𑀢𑀺𑀲𑀳𑀕𑀢𑀁, 𑀯𑁂𑀬𑁆𑀬𑀸𑀯𑀘𑁆𑀘𑀲𑀳𑀕𑀢𑀜𑁆𑀘 𑀓𑀸𑀬𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀺, 𑀯𑀘𑀻𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀺. 𑀢𑀢𑁆𑀣 𑀲𑀻𑀮𑀲𑁆𑀲 𑀓𑀸𑀬𑀯𑀘𑀻𑀓𑀫𑁆𑀫𑀪𑀸𑀯𑁄 𑀲𑀺𑀤𑁆𑀥𑁄 𑀏𑀯. 𑀅𑀧𑀘𑀺𑀢𑀺𑀬𑀸 𑀧𑀦 𑀧𑀼𑀧𑁆𑀨𑀧𑀽𑀚𑀸𑀤𑀺𑀦𑀸, 𑀯𑀦𑁆𑀤𑀦𑀸𑀤𑀺𑀦𑀸 𑀯𑀸 𑀧𑀯𑀢𑁆𑀢𑀺𑀓𑀸𑀮𑁂 𑀓𑀸𑀬𑀓𑀫𑁆𑀫𑀪𑀸𑀯𑁄, 𑀣𑀼𑀢𑀺𑀫𑀬𑀧𑀽𑀚𑀸𑀤𑀺𑀦𑀸 𑀧𑀯𑀢𑁆𑀢𑀺𑀓𑀸𑀮𑁂 𑀯𑀘𑀻𑀓𑀫𑁆𑀫𑀪𑀸𑀯𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀬𑁆𑀬𑀸𑀯𑀘𑁆𑀘𑀲𑁆𑀲𑀸𑀧𑀺 𑀲𑀳𑀢𑁆𑀣𑀸 𑀓𑀭𑀡𑀓𑀸𑀮𑁂 𑀓𑀸𑀬𑀓𑀫𑁆𑀫𑀪𑀸𑀯𑁄, 𑀕𑀺𑀮𑀸𑀦𑀸𑀤𑀻𑀦𑀁 𑀘𑀢𑀼𑀧𑀘𑁆𑀘𑀬𑀲𑀫𑀸𑀤𑀸𑀧𑀦𑀸𑀤𑀺𑀯𑀲𑁂𑀦, 𑀕𑀭𑀽𑀳𑀺 𑀆𑀡𑀢𑁆𑀢𑀲𑀤𑁆𑀤𑁂𑀦 𑀆𑀭𑁄𑀘𑀦𑀧𑀓𑁆𑀓𑁄𑀲𑀦𑀸𑀤𑀺𑀯𑀲𑁂𑀦 𑀯𑀘𑀻𑀓𑀫𑁆𑀫𑀪𑀸𑀯𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀯𑀦𑀸, 𑀲𑀯𑀦𑀁, 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀜𑁆𑀘 𑀫𑀦𑁄𑀓𑀫𑁆𑀫𑀫𑁂𑀯, 𑀅𑀩𑁆𑀪𑀦𑀼𑀫𑁄𑀤𑀦𑀫𑁆𑀧𑀻𑀢𑀺 𑀓𑁂𑀘𑀺. 𑀲𑀯𑀦𑀫𑁆𑀧𑀺 𑀳𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀥𑀫𑁆𑀫𑀢𑁆𑀣𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀺𑀓𑀸𑀮𑁂 𑀫𑀦𑁄𑀓𑀫𑁆𑀫𑀫𑁂𑀯.

𑀢𑀢𑁆𑀣 𑀤𑀸𑀦𑀁 𑀅𑀧𑀘𑀺𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀁 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁 𑀤𑁂𑀲𑀦𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀏𑀯 𑀧𑀯𑀢𑁆𑀢𑀦𑁆𑀢𑀺, 𑀦 𑀫𑀦𑁄𑀤𑁆𑀯𑀸𑀭𑁂. 𑀏𑀢𑁆𑀣 𑀘 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀤𑁂𑀲𑀦𑀸𑀦𑀁 𑀓𑀸𑀬𑀯𑀺𑀓𑀸𑀭𑁂𑀦 𑀧𑀢𑁆𑀢𑀺𑀁 𑀤𑁂𑀦𑁆𑀢𑀲𑁆𑀲, 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘 𑀓𑀸𑀬𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀮𑀁 𑀪𑀸𑀯𑀦𑀸 𑀅𑀩𑁆𑀪𑀦𑀼𑀫𑁄𑀤𑀦𑀁 𑀲𑀯𑀦𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀇𑀫𑀸𑀦𑀺 𑀧𑀦 𑀧𑀜𑁆𑀘 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀦𑁆𑀢𑀺, ‘‘𑀦 𑀧𑀼𑀦𑁂𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑁂𑀢𑁆𑀣 𑀫𑀦𑀲𑀸𑀯 𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀫𑀦𑁆𑀢𑀲𑁆𑀲, 𑀅𑀩𑁆𑀪𑀦𑀼𑀫𑁄𑀤𑀦𑁆𑀢𑀲𑁆𑀲 𑀘 𑀯𑀲𑁂𑀦 𑀲𑀻𑀮𑀩𑁆𑀪𑀦𑀼𑀫𑁄𑀤𑀦𑀸𑀦𑀁 𑀫𑀦𑁄𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀤𑀸𑀦𑀫𑀬𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀧𑀼𑀩𑁆𑀩𑀘𑁂𑀢𑀦𑀸𑀯𑀲𑁂𑀦 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸𑀯. 𑀢𑁂𑀦𑁂𑀯 𑀳𑀺 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁 ‘‘𑀯𑀺𑀦𑀬𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀳𑀺 ‘𑀤𑀲𑁆𑀲𑀸𑀫𑀺 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸𑀘𑀸 𑀪𑀺𑀦𑁆𑀦𑀸 𑀳𑁄𑀢𑀻𑀢𑀺. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀤𑀸𑀦𑀁 𑀦𑀸𑀫 𑀳𑁄𑀢𑀺, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀧𑀦 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀆𑀭𑀩𑁆𑀪 𑀫𑀦𑀲𑀸 𑀘𑀺𑀦𑁆𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀼𑀲𑀮𑀁 𑀳𑁄𑀢𑀺. 𑀅𑀧𑀭𑀪𑀸𑀕𑁂 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧). 𑀇𑀢𑀭𑀣𑀸 ‘‘𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀺𑀢𑀫𑀢𑁆𑀢𑁂𑀦𑀸𑀧𑀺 𑀤𑀸𑀦𑀁 𑀦𑀸𑀫 𑀪𑀯𑁂𑀬𑁆𑀬, 𑀢𑀣𑀸 𑀘 𑀢𑀸𑀤𑀺𑀲𑀁 𑀯𑀢𑁆𑀣𑀼𑀁 𑀬𑀣𑀸𑀘𑀺𑀦𑁆𑀢𑀺𑀢𑀦𑀺𑀬𑀸𑀫𑁂𑀦 𑀅𑀤𑁂𑀦𑁆𑀢𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂 𑀅𑀤𑀺𑀦𑁆𑀦𑀸𑀤𑀸𑀦𑀫𑁆𑀧𑀺 𑀲𑀺𑀬𑀸. 𑀏𑀯𑀁 𑀫𑀦𑀲𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄𑀧𑀺 𑀲𑀺𑀬𑀼𑀁, 𑀢𑀜𑁆𑀘 𑀦 𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀅𑀣 𑀯𑀸 ‘‘𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀤𑀺𑀦𑁆𑀦𑀜𑁆𑀜𑁂𑀯 𑀳𑀭𑀢𑀽’’𑀢𑀺 𑀧𑀭𑀺𑀘𑁆𑀘𑀚𑀦𑀲𑀫𑁆𑀪𑀯𑀢𑁄 𑀤𑀸𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀘 𑀤𑀸𑀦𑀲𑀻𑀮𑀸𑀤𑀺𑀓𑀸𑀬𑀓𑀫𑁆𑀫𑀸𑀦𑀁 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑀫𑁂𑀯. 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀁 𑀧𑀦 𑀯𑀘𑀻𑀤𑁆𑀯𑀸𑀭𑀁. 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁, 𑀤𑁆𑀯𑀸𑀭𑀁 𑀧𑀦 𑀫𑀦𑁄𑀤𑁆𑀯𑀸𑀭𑀁. 𑀤𑁂𑀲𑀦𑀸𑀩𑁆𑀪𑀦𑀼𑀫𑁄𑀤𑀦𑀸𑀤𑀻𑀦𑀁 𑀯𑀘𑀻𑀓𑀫𑁆𑀫𑀸𑀦𑀁 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀫𑁆𑀧𑀺 𑀯𑀘𑀻𑀓𑀫𑁆𑀫𑀁, 𑀤𑁆𑀯𑀸𑀭𑀫𑁆𑀧𑀺 𑀯𑀘𑀻𑀤𑁆𑀯𑀸𑀭𑀫𑁂𑀯. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀁 𑀧𑀦 𑀓𑀸𑀬𑀤𑁆𑀯𑀸𑀭𑀁. 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀤𑁆𑀯𑀸𑀭𑀁 𑀧𑀦 𑀫𑀦𑁄𑀤𑁆𑀯𑀸𑀭𑀁. 𑀪𑀸𑀯𑀦𑀸𑀤𑀺𑀫𑀦𑁄𑀓𑀫𑁆𑀫𑀸𑀦𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀫𑁆𑀧𑀺 𑀫𑀦𑁄𑀓𑀫𑁆𑀫𑀁, 𑀤𑁆𑀯𑀸𑀭𑀫𑁆𑀧𑀺 𑀫𑀦𑁄𑀤𑁆𑀯𑀸𑀭𑀫𑁂𑀯. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀁 𑀧𑀦 𑀓𑀸𑀬𑀤𑁆𑀯𑀸𑀭𑀁. 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀫𑁂𑀯, 𑀤𑁆𑀯𑀸𑀭𑀁 𑀧𑀦 𑀯𑀘𑀻𑀤𑁆𑀯𑀸𑀭𑀁. 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁, 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀻𑀦𑀜𑁆𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀓𑀫𑁆𑀫𑀯𑀯𑀢𑁆𑀣𑀸𑀦𑀁, 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀜𑁆𑀘 𑀬𑀣𑀸𑀦𑀼𑀭𑀽𑀧𑀁 𑀬𑁄𑀚𑁂𑀢𑁆𑀯𑀸 𑀅𑀲𑀗𑁆𑀓𑀭𑀢𑁄 𑀜𑀸𑀢𑀩𑁆𑀩𑀁.

𑀤𑁆𑀯𑀸𑀭𑀓𑀫𑁆𑀫𑀯𑀯𑀢𑁆𑀣𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀇𑀤𑀸𑀦𑀺 𑀬𑀲𑁆𑀫𑀸 𑀤𑀲𑀯𑀺𑀥𑀸𑀦𑀺 𑀘𑁂𑀢𑀸𑀦𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀢𑀻𑀲𑀼 𑀏𑀯𑀁 𑀲𑀗𑁆𑀕𑀬𑁆𑀳𑀦𑁆𑀢𑀺 𑀤𑀸𑀦𑀫𑀬𑁂 𑀲𑀻𑀮𑀫𑀬𑁂 𑀪𑀸𑀯𑀦𑀸𑀫𑀬𑁂𑀢𑀺. 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁 𑀳𑀺 𑀤𑀸𑀦𑀫𑀬𑁂 𑀲𑀗𑁆𑀕𑀬𑁆𑀳𑀢𑀺, ‘‘𑀅𑀩𑁆𑀪𑀦𑀼𑀫𑁄𑀤𑀦𑀫𑁆𑀧𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧𑁫𑁬-𑁧𑁫𑁯 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀸𑀤𑀺𑀓𑀣𑀸) 𑀅𑀝𑁆𑀞𑀓𑀣𑀸𑀬𑀁. 𑀅𑀧𑀘𑀺𑀢𑀺𑀯𑁂𑀬𑁆𑀬𑀸𑀯𑀘𑁆𑀘𑀸𑀦𑀺 𑀲𑀻𑀮𑀫𑀬𑁂. 𑀤𑁂𑀲𑀦𑀸𑀲𑀯𑀦𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀸𑀦𑀺 𑀪𑀸𑀯𑀦𑀸𑀫𑀬𑁂, 𑀢𑀲𑁆𑀫𑀸 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀓𑀼𑀲𑀮𑀲𑁆𑀲 𑀤𑀸𑀦𑀲𑀻𑀮𑀪𑀸𑀯𑀦𑀸𑀯𑀲𑁂𑀦 𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀯𑀢𑁆𑀢𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀸𑀫. 𑀢𑀤𑀦𑀼𑀲𑀸𑀭𑁂𑀦𑁂𑀯 𑀇𑀢𑀭𑁂𑀲𑀁 𑀯𑀲𑁂𑀦𑀸𑀧𑀺 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺. 𑀓𑀼𑀲𑀮𑀁 𑀳𑀺 𑀯𑀡𑁆𑀡𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀤𑀸𑀦𑀲𑀻𑀮𑀪𑀸𑀯𑀦𑀸𑀯𑀲𑁂𑀦𑁂𑀯 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀣𑀁? 𑀬𑀤𑀸 𑀳𑀺 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀯𑀺𑀘𑀺𑀢𑁆𑀢𑀁 𑀧𑀼𑀧𑁆𑀨𑀯𑀢𑁆𑀣𑀸𑀤𑀺𑀤𑁂𑀬𑁆𑀬𑀥𑀫𑁆𑀫𑀁 𑀮𑀪𑀺𑀢𑁆𑀯𑀸 ‘‘𑀯𑀡𑁆𑀡𑀤𑀸𑀦𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀡𑁆𑀡𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 𑀘𑁂𑀢𑀺𑀬𑀸𑀤𑀻𑀲𑀼 𑀲𑀳𑀢𑁆𑀣𑁂𑀦 𑀧𑀽𑀚𑁂𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀤𑀸𑀦𑀫𑀬𑀁 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺, 𑀢𑀜𑁆𑀘 𑀧𑀼𑀩𑁆𑀩𑀘𑁂𑀢𑀦𑀸 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸 𑀅𑀧𑀭𑀘𑁂𑀢𑀦𑀸𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀯𑀸𑀭𑁂𑀲𑀼 𑀢𑀺𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀸 𑀧𑀦 𑀢𑀤𑁂𑀯 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀁 𑀯𑀸𑀘𑀸𑀬 𑀆𑀡𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀸𑀤𑀻𑀳𑀺 𑀤𑀸𑀧𑁂𑀢𑀺, 𑀢𑀤𑀸𑀭𑀽𑀧𑀸𑀭𑀫𑁆𑀫𑀡𑀁 𑀤𑀸𑀦𑀫𑀬𑀁 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀬𑀤𑀸 𑀧𑀦 𑀢𑀤𑁂𑀯 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 ‘‘𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑀺, 𑀧𑀘𑁆𑀘𑀸𑀲𑀻𑀲𑀢𑀺, 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀺, 𑀢𑀤𑀸 𑀧𑀼𑀩𑁆𑀩𑀘𑁂𑀢𑀦𑀸𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀤𑀸𑀦𑀫𑀬𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺 𑀦𑀸𑀫. 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀤𑀸𑀦𑀫𑀬𑀁 𑀤𑁆𑀯𑀸𑀭𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺.

𑀬𑀤𑀸 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀡𑁆𑀡𑀁 𑀤𑁂𑀬𑁆𑀬𑀥𑀫𑁆𑀫𑀁 𑀮𑀪𑀺𑀢𑁆𑀯𑀸 ‘‘𑀏𑀯𑀁 𑀫𑀦𑀸𑀧𑀯𑀡𑁆𑀡𑀸𑀦𑀁 𑀧𑀭𑀺𑀘𑁆𑀘𑀚𑀦𑀁 𑀦𑀸𑀫 𑀫𑀬𑁆𑀳𑀁 𑀓𑀼𑀮𑀯𑀁𑀲𑀸𑀕𑀢𑀯𑀢𑁆𑀢𑀫𑁂𑀢’’𑀦𑁆𑀢𑀺 𑀲𑀳𑀢𑁆𑀣𑀸 𑀧𑀽𑀚𑁂𑀢𑀺, 𑀢𑀸𑀤𑀺𑀲𑀯𑀡𑁆𑀡𑀯𑀦𑁆𑀢𑀁 𑀯𑀸 𑀧𑀭𑀧𑀭𑀺𑀕𑁆𑀕𑀳𑀺𑀢𑀸𑀤𑀺𑀪𑁄𑀕𑀲𑀫𑁆𑀧𑀢𑁆𑀢𑀺𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀲𑀻𑀮𑀁 𑀓𑀸𑀬𑀤𑁆𑀯𑀸𑀭𑁂 𑀘 𑀧𑀯𑀢𑁆𑀢𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀡𑁆𑀡𑀁 𑀤𑁂𑀬𑁆𑀬𑀥𑀫𑁆𑀫𑀁 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦 𑀯𑀸𑀘𑀸𑀬 𑀆𑀡𑀸𑀧𑁂𑀢𑁆𑀯𑀸 𑀧𑀭𑁂𑀳𑀺 𑀤𑀸𑀧𑁂𑀢𑀺, 𑀢𑀸𑀤𑀺𑀲𑀁 𑀯𑀸 𑀧𑀭𑀧𑀭𑀺𑀕𑁆𑀕𑀳𑀺𑀢𑀸𑀤𑀺𑀁 𑀯𑀸𑀘𑀸𑀬 𑀅𑀧𑀦𑁂𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀲𑀻𑀮𑀁 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀬𑀤𑀸 𑀧𑀦 𑀢𑀸𑀤𑀺𑀲𑀁 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀁 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦 ‘‘𑀤𑀲𑁆𑀲𑀸𑀫𑀻’’𑀢𑀺, 𑀢𑀸𑀤𑀺𑀲𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀸𑀤𑀺𑀓𑀁 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀲𑀻𑀮𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀘𑀺𑀦𑁆𑀢𑁂𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀲𑀻𑀮𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀻𑀮𑀫𑀬𑀁 𑀤𑁆𑀯𑀸𑀭𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺.

𑀬𑀤𑀸 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀡𑁆𑀡𑀯𑀦𑁆𑀢𑀁 𑀤𑀢𑁆𑀯𑀸 𑀢𑀤𑁂𑀯 𑀯𑀡𑁆𑀡𑀁, 𑀲𑀩𑁆𑀩𑀁 𑀯𑀸 𑀭𑀽𑀧𑀸𑀬𑀢𑀦𑀁 𑀘𑀗𑁆𑀓𑀫𑀦𑁆𑀢𑁄 𑀅𑀦𑀺𑀘𑁆𑀘𑀸𑀤𑀺𑀢𑁄 𑀯𑀺𑀧𑀲𑁆𑀲𑀢𑀺, 𑀢𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀪𑀸𑀯𑀦𑀸𑀫𑀬𑀁 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀢𑀤𑁂𑀯 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑀁 𑀪𑀸𑀯𑀦𑀸𑀫𑀬𑀁 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀢𑀤𑁂𑀯 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀁 𑀅𑀘𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑀁 𑀪𑀸𑀯𑀦𑀸𑀫𑀬𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀪𑀸𑀯𑀦𑀸𑀫𑀬𑀁 𑀤𑁆𑀯𑀸𑀭𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀇𑀢𑀺 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀓𑀼𑀲𑀮𑀲𑁆𑀲 𑀢𑀺𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀦𑀯𑀲𑀼 𑀓𑀫𑁆𑀫𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸𑀯 𑀦𑀬𑁂𑀦 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀓𑀼𑀲𑀮𑀲𑁆𑀲 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦𑀸𑀧𑀺 𑀢𑀺𑀁𑀲𑀸𑀬 𑀓𑀫𑁆𑀫𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺𑀯𑀺𑀪𑀸𑀕𑁄 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑁄. 𑀬𑀣𑀸 𑀘 𑀭𑀽𑀧𑀸𑀭𑀫𑁆𑀫𑀡𑀲𑁆𑀲, 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀦𑀫𑁆𑀧𑀺 𑀧𑀜𑁆𑀘𑀦𑁆𑀦𑀁 𑀓𑀼𑀲𑀮𑀸𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀤𑁆𑀯𑀸𑀭𑁂𑀳𑀺 𑀯𑀺𑀪𑀸𑀕𑁄, 𑀬𑁄𑀚𑀦𑀸𑀦𑀬𑁄 𑀘 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄.

𑀅𑀧𑀺𑀘 𑀲𑀤𑁆𑀤𑀁 𑀦𑀸𑀫 𑀓𑀦𑁆𑀤𑀫𑀽𑀮𑀁 𑀯𑀺𑀬 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀤𑀸𑀢𑀼𑀁 𑀦 𑀲𑀓𑁆𑀓𑀸. 𑀬𑀤𑀸 𑀧𑀦 ‘‘𑀲𑀤𑁆𑀤𑀤𑀸𑀦𑀁 𑀫𑁂’’𑀢𑀺 𑀆𑀪𑀼𑀚𑀺𑀢𑁆𑀯𑀸 𑀪𑁂𑀭𑀺𑀆𑀤𑀺𑀢𑀽𑀭𑀺𑀬𑁂 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀤𑁂𑀢𑀺, 𑀢𑁂𑀳𑀺 𑀉𑀧𑀳𑀸𑀭𑀁 𑀯𑀸 𑀓𑀭𑁄𑀢𑀺, 𑀥𑀫𑁆𑀫𑀓𑀣𑀺𑀓𑀸𑀤𑀻𑀦𑀁 𑀲𑀭𑀪𑁂𑀲𑀚𑁆𑀚𑀸𑀤𑀺𑀁 𑀤𑁂𑀢𑀺, 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑁂𑀢𑀺, 𑀲𑀭𑀪𑀜𑁆𑀜𑀥𑀫𑁆𑀫𑀓𑀣𑀸𑀤𑀺𑀁 𑀯𑀸 𑀓𑀭𑁄𑀢𑀺, 𑀢𑀤𑀸 𑀓𑀼𑀲𑀮𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀁 𑀕𑀦𑁆𑀥𑀸𑀤𑀺𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁂𑀧𑀺 𑀕𑀦𑁆𑀥𑀸𑀤𑀺𑀆𑀭𑀫𑁆𑀫𑀡𑀁. 𑀥𑀫𑁆𑀫𑀸𑀭𑀫𑁆𑀫𑀡𑀁 𑀧𑀦 𑀑𑀚𑀸𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑀤𑀸𑀬𑀢𑁆𑀢𑀸𑀦𑀁 𑀯𑀲𑁂𑀦 𑀜𑀸𑀢𑀩𑁆𑀩𑀁. 𑀬𑀤𑀸 𑀳𑀺 𑀑𑀚𑀯𑀦𑁆𑀢𑀸𑀦𑀺 𑀅𑀦𑁆𑀦𑀧𑀸𑀦𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 ‘‘𑀑𑀚𑀤𑀸𑀦𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁂𑀢𑀺, 𑀕𑀺𑀮𑀸𑀦𑀸𑀦𑀁 𑀪𑁂𑀲𑀚𑁆𑀚𑀁 𑀯𑀸 𑀯𑁂𑀚𑁆𑀚𑀁 𑀯𑀸 𑀉𑀧𑀦𑁂𑀢𑁆𑀯𑀸, 𑀧𑀸𑀡𑁄𑀧𑀭𑁄𑀥𑀓𑀁 𑀆𑀯𑀼𑀥𑀚𑀸𑀮𑀓𑀼𑀫𑀺𑀦𑀸𑀤𑀺𑀁 𑀯𑀺𑀦𑀸𑀲𑁂𑀢𑁆𑀯𑀸 𑀯𑀸, 𑀯𑀚𑁆𑀛𑀧𑁆𑀧𑀢𑁆𑀢𑁂 𑀧𑀸𑀡𑀺𑀦𑁄 𑀫𑁄𑀘𑁂𑀢𑁆𑀯𑀸 𑀯𑀸 ‘‘𑀚𑀻𑀯𑀺𑀢𑀤𑀸𑀦𑀁 𑀫𑁂 𑀪𑀯𑀺𑀲𑁆𑀲𑀢𑀺 𑀚𑀻𑀯𑀺𑀢𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬, 𑀧𑀜𑁆𑀘𑀧𑀲𑀸𑀤𑀲𑁄𑀴𑀲𑀲𑀼𑀔𑀼𑀫𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀯𑀲𑁂𑀦 𑀧𑀲𑀸𑀤𑀸𑀤𑀺𑀤𑀸𑀦𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀘 𑀫𑀦𑀲𑀺 𑀓𑀭𑁄𑀢𑀺, 𑀢𑀤𑀸 𑀓𑀼𑀲𑀮𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀅𑀬𑀁 𑀦𑀸𑀦𑀸𑀯𑀢𑁆𑀣𑀽𑀲𑀼 𑀞𑀺𑀢𑀸𑀭𑀫𑁆𑀫𑀡𑀸𑀦𑀁 𑀬𑁄𑀚𑀦𑀸. 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀙𑀸𑀭𑀫𑁆𑀫𑀡𑀁 𑀮𑀩𑁆𑀪𑀢𑁂𑀯. 𑀧𑀺𑀡𑁆𑀟𑀧𑀸𑀢𑀲𑁆𑀫𑀺𑀁 𑀳𑀺 𑀫𑀦𑀸𑀧𑁄 𑀯𑀡𑁆𑀡𑁄, 𑀔𑀸𑀤𑀦𑀓𑀸𑀮𑁂 𑀫𑀼𑀭𑀼𑀫𑀼𑀭𑀸𑀬𑀦𑀲𑀤𑁆𑀤𑁄, 𑀕𑀦𑁆𑀥𑁄, 𑀭𑀲𑁄, 𑀨𑁄𑀝𑁆𑀞𑀩𑁆𑀩𑀁, 𑀑𑀚𑀸, 𑀢𑀤𑀸𑀬𑀢𑁆𑀢𑀸 𑀯𑀸 𑀚𑀻𑀯𑀺𑀢𑀧𑀲𑀸𑀤𑀸𑀤𑀬𑁄, 𑀢𑀩𑁆𑀩𑀺𑀲𑀬𑀸𑀦𑀺 𑀘 𑀯𑀺𑀜𑁆𑀜𑀸𑀡𑀸𑀤𑀻𑀦𑀻𑀢𑀺 𑀙𑀸𑀭𑀫𑁆𑀫𑀡𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀘𑀻𑀯𑀭𑀸𑀤𑀻𑀲𑀼 𑀘𑁂𑀯 𑀯𑀢𑁆𑀣𑀸𑀤𑀻𑀲𑀼 𑀘 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀏𑀢𑁆𑀣𑀧𑀺 𑀤𑀸𑀦𑀲𑀻𑀮𑀪𑀸𑀯𑀦𑀸𑀫𑀬𑀢𑀸, 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀪𑀸𑀯𑁄 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀓𑀼𑀲𑀮𑀸𑀦𑀁, 𑀏𑀯𑀁 𑀅𑀓𑀼𑀲𑀮𑀸𑀦𑀫𑁆𑀧𑀺 𑀆𑀭𑀫𑁆𑀫𑀡𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁, 𑀅𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀬𑁄𑀚𑀦𑀸𑀦𑀬𑁄 𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀬𑀣𑀸𑀬𑁄𑀕𑀁 𑀜𑀸𑀢𑀩𑁆𑀩𑁄.

𑀏𑀯𑀁 𑀆𑀭𑀫𑁆𑀫𑀡𑀢𑁄, 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀢𑁄, 𑀓𑀫𑁆𑀫𑀢𑁄, 𑀤𑁆𑀯𑀸𑀭𑀢𑁄 𑀘 𑀅𑀦𑁂𑀓𑀲𑀳𑀲𑁆𑀲𑀧𑁆𑀧𑀪𑁂𑀤𑁂𑀲𑀼 𑀘𑁂𑀢𑁂𑀲𑀼 𑀓𑀼𑀲𑀮𑁂𑀲𑀼 𑀉𑀧𑀟𑁆𑀠𑀸𑀦𑀺 𑀧𑀦 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀻𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸𑀦𑀺, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀧𑀦 𑀉𑀧𑀟𑁆𑀠𑀸𑀦𑀺 𑀯𑀻𑀫𑀁𑀲𑀸𑀥𑀺𑀧𑀢𑀺𑀯𑀚𑁆𑀚𑀺𑀢𑀸𑀥𑀺𑀧𑀢𑀺𑀢𑁆𑀢𑀬𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸𑀦𑀺, 𑀢𑀤𑀼𑀪𑀬𑀸𑀦𑀺 𑀧𑀼𑀦 𑀳𑀻𑀦𑀢𑁆𑀢𑀺𑀓𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸𑀦𑀺, 𑀢𑀸𑀦𑀺 𑀧𑀼𑀦 𑀅𑀧𑀭𑀺𑀫𑀸𑀡𑁂𑀲𑀼 𑀧𑀦 𑀘𑀓𑁆𑀓𑀯𑀸𑀴𑁂𑀲𑀼 𑀧𑀘𑁆𑀘𑁂𑀓𑀁 𑀅𑀧𑀭𑀺𑀫𑀸𑀡𑁂𑀲𑀼 𑀲𑀢𑁆𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀤𑀻𑀳𑀺 𑀅𑀦𑀦𑁆𑀢𑁂𑀳𑀺 𑀧𑀓𑀸𑀭𑁂𑀳𑀺 𑀉𑀧𑁆𑀧𑀚𑁆𑀚𑀦𑀢𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀲𑀫𑁆𑀩𑀼𑀤𑁆𑀥𑁄 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀫𑀳𑀸𑀢𑀼𑀮𑀸𑀬 𑀢𑀼𑀮𑀬𑀫𑀸𑀦𑁄 𑀯𑀺𑀬, 𑀫𑀳𑀸𑀢𑀼𑀫𑁆𑀩𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀺𑀦𑀬𑀫𑀸𑀦𑁄 𑀯𑀺𑀬 𑀲𑀩𑁆𑀩𑀸𑀓𑀸𑀭𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀓𑀸𑀫𑀸𑀯𑀘𑀭𑀝𑁆𑀞𑁂𑀦 𑀲𑀭𑀺𑀓𑁆𑀔𑀢𑀸𑀬 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸, 𑀧𑀼𑀦 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀝𑁆𑀞𑁂𑀦, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀝𑁆𑀞𑁂𑀦, 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀝𑁆𑀞𑁂𑀦 𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑁂𑀲𑁂𑀲𑀺, 𑀬𑀣𑀸 𑀢𑀁 𑀮𑁄𑀓𑀯𑀺𑀤𑀽 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀲𑀗𑁆𑀕𑀡𑀺𑀬𑀸 (𑀥. 𑀲. 𑁧), 𑀢𑀤𑀝𑁆𑀞𑀓𑀣𑀸𑀬 𑀘 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 (𑀥. 𑀲. 𑀅𑀝𑁆𑀞. 𑁧) 𑀲𑀩𑁆𑀩𑀸𑀓𑀸𑀭𑀢𑁄 𑀜𑀸𑀢𑀩𑁆𑀩𑁄𑀢𑀺. 𑀏𑀯𑀁 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀫𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀥𑀫𑁆𑀫𑀸 𑀧𑀦 𑀓𑀼𑀲𑀮𑀸 𑀛𑀸𑀦𑀗𑁆𑀕𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀚𑁆𑀛𑀸𑀦𑀺𑀓𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀯𑀺𑀘𑀸𑀭𑀁 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀚𑁆𑀛𑀸𑀦𑀺𑀓𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀁 𑀯𑀺𑀭𑀢𑁆𑀢𑀧𑀻𑀢𑀺𑀓𑀁 𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀁 𑀅𑀢𑁆𑀣𑀗𑁆𑀕𑀢𑀲𑀼𑀔𑀁 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀦𑁆𑀢𑀺. 𑀏𑀯𑀁 𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀧𑀦 𑀧𑀞𑀫𑀚𑁆𑀛𑀸𑀦𑁂 𑀢𑀸𑀯 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁 𑀲𑁂𑀲𑀸 𑀙𑀢𑁆𑀢𑀺𑀁𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄, 𑀓𑀭𑀼𑀡𑀸, 𑀫𑀼𑀤𑀺𑀢𑀸 𑀘𑀸𑀢𑀺 𑀙 𑀬𑁂𑀯𑀸𑀧𑀦𑀓𑀸. 𑀲𑁂𑀲𑀁 𑀲𑀼𑀜𑁆𑀜𑀢𑀯𑀸𑀭𑀧𑀭𑀺𑀬𑁄𑀲𑀸𑀦𑀁 𑀲𑀩𑁆𑀩𑀁 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀓𑁂𑀯𑀮𑀁 𑀳𑀺 𑀯𑀺𑀭𑀢𑀻𑀦𑀁 𑀅𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀧𑀜𑁆𑀘𑀫𑀕𑁆𑀕𑀗𑁆𑀕𑀪𑀸𑀯𑁄, 𑀪𑀽𑀫𑀦𑁆𑀢𑀭𑀯𑀲𑁂𑀦 𑀭𑀽𑀧𑀸𑀯𑀘𑀭𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀧𑀞𑀫𑀚𑁆𑀛𑀸𑀦𑀁.

𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀯𑀺𑀢𑀓𑁆𑀓𑀸𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀘𑀢𑀼𑀓𑁆𑀓𑀚𑁆𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀁.

𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑁂𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀯𑀺𑀘𑀸𑀭𑀸𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀢𑀺𑀯𑀗𑁆𑀕𑀺𑀓𑀚𑁆𑀛𑀸𑀦𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀤𑀼𑀢𑀺𑀬𑀲𑀤𑀺𑀲𑀫𑁂𑀯. 𑀢𑀢𑀺𑀬𑀁.

𑀢𑀣𑀸 𑀘𑀢𑀼𑀢𑁆𑀣𑁂 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀧𑀻𑀢𑀺𑀬𑀸 𑀅𑀪𑀸𑀯𑁄, 𑀓𑁄𑀝𑁆𑀞𑀸𑀲𑀯𑀸𑀭𑁂 𑀤𑀼𑀯𑀗𑁆𑀕𑀺𑀓𑀚𑁆𑀛𑀸𑀦𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀢𑀺𑀬𑀲𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀁.

𑀢𑀣𑀸 𑀧𑀜𑁆𑀘𑀫𑁂 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀓𑀭𑀼𑀡𑀸𑀫𑀼𑀤𑀺𑀢𑀸𑀤𑀻𑀦𑀁 𑀅𑀪𑀸𑀯𑁄, 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀉𑀧𑁂𑀓𑁆𑀔𑀸𑀪𑀸𑀯𑁄, 𑀓𑁄𑀝𑁆𑀞𑀸𑀲𑀯𑀸𑀭𑁂 𑀛𑀸𑀦𑀺𑀦𑁆𑀤𑁆𑀭𑀺𑀬𑁂𑀲𑀼 𑀉𑀧𑁂𑀓𑁆𑀔𑀸𑀛𑀸𑀦𑀗𑁆𑀕𑀪𑀸𑀯𑁄, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀘𑀢𑀼𑀢𑁆𑀣𑀲𑀫𑀫𑁂𑀯. 𑀧𑀜𑁆𑀘𑀫𑀁.

𑀧𑀤𑀪𑀸𑀚𑀦𑀻𑀬𑁂 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀤𑀼𑀢𑀺𑀬𑀁, 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀢𑀢𑀺𑀬𑀁, 𑀲𑁄𑀫𑀦𑀲𑁆𑀲𑀲𑁆𑀲 𑀘 𑀅𑀢𑁆𑀣𑀗𑁆𑀕𑀫𑀸 𑀘𑀢𑀼𑀢𑁆𑀣𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑁄𑀧𑀺 𑀆𑀕𑀢𑁄, 𑀲𑁄 𑀢𑀺𑀓𑁆𑀔𑀧𑀜𑁆𑀜𑀸𑀦𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀤𑀼𑀢𑀺𑀬𑀸𑀤𑀻𑀦𑀁 𑀲𑀩𑁆𑀩𑀲𑁄 𑀧𑀜𑁆𑀘𑀓𑀦𑀬𑁂 𑀢𑀢𑀺𑀬𑀸𑀤𑀺𑀲𑀫𑀢𑁆𑀢𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑀢𑀢𑁆𑀣𑁂𑀯 𑀅𑀦𑁆𑀢𑁄𑀕𑀥𑀪𑀸𑀯𑁄 𑀘𑀸𑀢𑀺. 𑀘𑀢𑀼𑀓𑁆𑀓𑀦𑀬𑁄.

𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀧𑀦 𑀯𑀺𑀦𑀺𑀘𑁆𑀙𑀬𑀁 𑀧𑀜𑁆𑀘𑀓𑀦𑀬𑁂𑀦𑁂𑀯 𑀯𑀓𑁆𑀔𑀸𑀫, 𑀢𑀤𑀦𑀼𑀲𑀸𑀭𑀢𑁄 𑀏𑀯 𑀘𑀢𑀼𑀓𑁆𑀓𑀦𑀬𑀯𑀲𑁂𑀦𑀸𑀧𑀺 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺. 𑀏𑀯𑀁 𑀉𑀧𑀭𑀺 𑀮𑁄𑀓𑀼𑀢𑁆𑀢𑀭𑁂𑀧𑀺. 𑀧𑀜𑁆𑀘𑀯𑀺𑀥𑀸𑀧𑀺 𑀘𑁂𑀢𑁂 𑀭𑀽𑀧𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀓𑀲𑀺𑀡𑀸𑀭𑀫𑁆𑀫𑀡𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀁 𑀆𑀧𑁄𑀢𑁂𑀚𑁄𑀯𑀸𑀬𑁄𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀓𑀲𑀺𑀡𑀜𑁆𑀘𑀸𑀢𑀺, 𑀆𑀮𑁄𑀓𑀸𑀓𑀸𑀲𑀓𑀲𑀺𑀡𑁂𑀳𑀺 𑀲𑀤𑁆𑀥𑀺𑀁 𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀧𑀤𑀪𑀸𑀚𑀦𑀻𑀬𑁂 (𑀥. 𑀲. 𑁨𑁦𑁨) 𑀧𑀦 𑀆𑀮𑁄𑀓𑀓𑀲𑀺𑀡𑀲𑁆𑀲 𑀑𑀤𑀸𑀢𑀓𑀲𑀺𑀡𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁, 𑀆𑀓𑀸𑀲𑀓𑀲𑀺𑀡𑀲𑁆𑀲 𑀧𑀦 𑀉𑀕𑁆𑀖𑀸𑀝𑀦𑀸𑀲𑀫𑁆𑀪𑀯𑀢𑁄 𑀅𑀦𑀸𑀭𑀼𑀧𑁆𑀧𑀚𑁆𑀛𑀸𑀦𑀺𑀓𑀢𑁆𑀢𑀸. 𑀢𑀁 𑀳𑀺 𑀧𑀼𑀦𑀧𑁆𑀧𑀼𑀦𑀁 𑀉𑀕𑁆𑀖𑀸𑀝𑀺𑀬𑀫𑀸𑀦𑀫𑁆𑀧𑀺 𑀆𑀓𑀸𑀲𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣𑀼𑀧𑁆𑀧𑀦𑁆𑀦𑀁 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀁 𑀪𑀯𑀯𑀺𑀲𑁂𑀲𑀸𑀬, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬 𑀘 𑀲𑀁𑀯𑀢𑁆𑀢𑀢𑀺, 𑀅𑀪𑀺𑀜𑁆𑀜𑀸𑀬, 𑀯𑀺𑀧𑀲𑁆𑀲𑀦𑀸𑀬 𑀘 𑀧𑀸𑀤𑀓𑀫𑁆𑀧𑀺 𑀳𑁄𑀢𑀺, 𑀅𑀦𑀸𑀭𑀼𑀧𑁆𑀧𑀢𑁆𑀢𑀸 𑀧𑀦 𑀦𑀺𑀭𑁄𑀥𑀧𑀸𑀤𑀓𑀁 𑀦 𑀳𑁄𑀢𑀺. 𑀲𑁂𑀲𑀸𑀦𑀺 𑀧𑀦 𑀦𑀯 𑀓𑀲𑀺𑀡𑀸𑀦𑀺 𑀦𑀺𑀭𑁄𑀥𑀧𑀸𑀤𑀓𑀸𑀦𑀺𑀧𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀆𑀦𑀸𑀧𑀸𑀦𑀚𑁆𑀛𑀸𑀦𑀲𑁆𑀲𑀸𑀧𑀺 𑀧𑀦𑁂𑀢𑁆𑀣 𑀯𑀸𑀬𑁄𑀓𑀲𑀺𑀡𑁂 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄𑀢𑀺. 𑀓𑀲𑀺𑀡𑀓𑀣𑀸.

𑀏𑀯𑀁 𑀓𑀲𑀺𑀡𑀯𑀲𑁂𑀦 𑀅𑀝𑁆𑀞𑀯𑀺𑀥𑀸 𑀘𑁂𑀢𑁂 𑀅𑀪𑀺𑀪𑀸𑀬𑀢𑀦𑀯𑀲𑁂𑀦 𑀧𑀦 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀺. 𑀪𑀕𑀯𑀢𑀸 𑀳𑀺 𑁋

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬…𑀧𑁂… 𑀅𑀧𑁆𑀧𑀫𑀸𑀡𑀸𑀦𑀺. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 …𑀧𑁂… 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺…𑀧𑁂… 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺 𑀲𑀼𑀯𑀺𑀲𑀼𑀤𑁆𑀥𑀁 𑀦𑀻𑀮𑀁 𑀧𑀻𑀢𑀁 𑀮𑁄𑀳𑀺𑀢𑀁 𑀑𑀤𑀸𑀢’’𑀦𑁆𑀢𑀺 (𑀥. 𑀲. 𑁨𑁧𑁧 𑀆𑀤𑀬𑁄) 𑁋

𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀢𑀸𑀦𑀺 𑀘 𑀓𑀲𑀺𑀡𑁂𑀲𑁆𑀯𑁂𑀯 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀛𑀸𑀦𑀼𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀢𑁄, 𑀅𑀦𑀸𑀭𑀫𑁆𑀫𑀡𑀯𑀺𑀲𑁂𑀲𑀢𑁄. 𑀢𑀢𑁆𑀣 𑀳𑀺 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀮𑀸𑀪𑀺𑀢𑀸𑀬 𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀓𑀲𑀺𑀡𑀯𑀲𑁂𑀦 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀯𑀺𑀭𑀳𑀺𑀢𑁄𑀯. 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸 𑀅𑀝𑁆𑀞 𑀓𑀲𑀺𑀡𑀭𑀽𑀧𑀸𑀦𑀺 𑀧𑀭𑀺𑀓𑀫𑁆𑀫𑀯𑀲𑁂𑀦 𑀘𑁂𑀯 𑀅𑀧𑁆𑀧𑀦𑀸𑀯𑀲𑁂𑀦 𑀘 𑀧𑀲𑁆𑀲𑀢𑀺. 𑀧𑀭𑀺𑀢𑁆𑀢𑀸𑀦𑀻𑀢𑀺 𑀔𑀼𑀤𑁆𑀤𑀓𑀧𑀭𑀺𑀫𑀸𑀡𑀸𑀦𑀺, 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀧𑀲𑁆𑀲𑀦𑁆𑀢𑁄 𑀘 𑀲𑀫𑁆𑀧𑀦𑁆𑀦𑀕𑀳𑀡𑀺𑀓𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 ‘‘𑀓𑀺𑀁 𑀏𑀢𑁆𑀣 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀲𑀩𑁆𑀩𑀁 𑀏𑀓𑀓𑀩𑀴𑀫𑁂𑀯 𑀓𑀭𑁄𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑀺𑀓𑁄 ‘‘𑀓𑀺𑀫𑁂𑀢𑁆𑀣 𑀧𑀭𑀺𑀢𑁆𑀢𑀓𑁂 𑀆𑀭𑀫𑁆𑀫𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀦𑀸𑀬𑀁 𑀫𑀫 𑀪𑀸𑀭𑁄’’𑀢𑀺 𑀢𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀢𑀁 𑀛𑀸𑀦𑀁 ‘‘𑀅𑀪𑀺𑀪𑀸𑀬𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀫𑀳𑀦𑁆𑀢𑀸𑀦𑀺. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺 𑀫𑀳𑀕𑁆𑀖𑀲𑁄 𑀏𑀓𑀁 𑀪𑀢𑁆𑀢𑀧𑀸𑀢𑀺𑀁 𑀮𑀪𑀺𑀢𑁆𑀯𑀸 𑀯𑀺𑀬 𑀜𑀸𑀡𑀼𑀢𑁆𑀢𑀭𑁄 𑀅𑀧𑁆𑀧𑀫𑀸𑀡𑀁 𑀮𑀪𑀺𑀢𑁆𑀯𑀸 ‘‘𑀏𑀢𑀁 𑀯𑀸 𑀳𑁄𑀢𑀼 𑀅𑀜𑁆𑀜𑀁 𑀯𑀸, 𑀓𑀺𑀫𑁂𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀸𑀦𑀺. 𑀧𑀭𑀺𑀲𑀼𑀤𑁆𑀥𑀸𑀦𑀺 𑀳𑀺 𑀦𑀻𑀮𑀸𑀤𑀻𑀦𑀺, 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀘 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀏𑀢𑀸𑀦𑀺𑀧𑀺 ‘‘𑀲𑀼𑀯𑀡𑁆𑀡𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀤𑀼𑀩𑁆𑀩𑀡𑁆𑀡𑀸𑀦𑀺 𑀯𑀸, 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀯𑀲𑁂𑀦𑁂𑀯 𑀅𑀪𑀺𑀪𑀸𑀬𑀢𑀦𑀸𑀦𑀻’’𑀢𑀺 𑀆𑀕𑀫𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀝. 𑁨.𑁧𑁭𑁩; 𑀫. 𑀦𑀺. 𑀅𑀝𑁆𑀞. 𑁨.𑁨𑁪𑁯; 𑀅. 𑀦𑀺. 𑀅𑀝𑁆𑀞. 𑁩.𑁮.𑁬𑁫) 𑀯𑀡𑁆𑀡𑀺𑀢𑀸𑀦𑀺. 𑀯𑀡𑁆𑀡𑀸𑀪𑁄𑀕𑀲𑁆𑀲 𑀳𑀺 𑀅𑀢𑁆𑀣𑀺𑀢𑀸𑀬 𑀧𑀼𑀭𑀺𑀫𑀸𑀦𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀲𑀳𑀺𑀢𑀢𑀸𑀬 𑀏𑀢𑁆𑀣 𑀓𑁂𑀯𑀮𑀢𑁄 𑀯𑀺𑀲𑁂𑀲𑀲𑀩𑁆𑀪𑀸𑀯𑀸 𑀘𑀢𑀼𑀥𑀸 𑀯𑀼𑀢𑁆𑀢𑀸𑀦𑀺, 𑀦𑀻𑀮𑀸𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀲𑀼𑀯𑀺𑀲𑀼𑀤𑁆𑀥𑀯𑀡𑁆𑀡𑀯𑀲𑁂𑀦 𑀲𑀼𑀔𑀸𑀭𑁄𑀳𑀢𑀸𑀬 𑀜𑀸𑀡𑀼𑀢𑁆𑀢𑀭𑀺𑀓𑁄 𑀅𑀪𑀺𑀪𑀯𑀺𑀢𑁆𑀯𑀸 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀛𑀸𑀦𑀼𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀢𑁄 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀪𑀸𑀬𑀢𑀦𑀓𑀣𑀸.

𑀢𑀸𑀦𑀺 𑀧𑀼𑀦 𑀬𑀣𑀸 𑀘 𑀅𑀪𑀺𑀪𑀸𑀬𑀢𑀦𑀯𑀲𑁂𑀦, 𑀏𑀯𑀁 𑀯𑀺𑀫𑁄𑀓𑁆𑀔𑀯𑀲𑁂𑀦𑀸𑀧𑀺 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀪𑀕𑀯𑀢𑀸 𑀳𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 (𑀥. 𑀲. 𑁨𑁪𑁦 𑀆𑀤𑀬𑁄; 𑀤𑀻. 𑀦𑀺. 𑁩.𑁩𑁩𑁯, 𑁩𑁫𑁮; 𑀅. 𑀦𑀺. 𑁮.𑁬𑁬) 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀤𑁂𑀲𑀺𑀢𑀸. 𑀢𑁂 𑀘 𑀓𑀲𑀺𑀡𑁂𑀲𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀛𑀸𑀦𑀼𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀢𑁄, 𑀪𑀸𑀯𑀦𑀸𑀭𑀫𑁆𑀫𑀡𑀯𑀺𑀲𑁂𑀲𑀢𑁄 𑀓𑀺𑀫𑀺𑀤𑀁 𑀅𑀥𑀺𑀫𑀼𑀘𑁆𑀘𑀦𑀁 𑀦𑀸𑀫? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀘𑁆𑀘𑀦𑀁, 𑀆𑀭𑀫𑁆𑀫𑀡𑁂𑀲𑀼 𑀘 𑀲𑀼𑀝𑁆𑀞𑀼 𑀅𑀪𑀺𑀭𑀢𑀺, 𑀧𑀺𑀢𑀼 𑀫𑀸𑀢𑀼 𑀅𑀗𑁆𑀓𑁂 𑀯𑀺𑀲𑁆𑀲𑀝𑁆𑀞𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀤𑀸𑀭𑀓𑀲𑁆𑀲 𑀲𑀬𑀦𑀁 𑀯𑀺𑀬 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀻𑀢𑀺 𑀅𑀚𑁆𑀛𑀢𑁆𑀢𑀁 𑀓𑁂𑀲𑀸𑀤𑀻𑀲𑀼 𑀉𑀧𑁆𑀧𑀸𑀤𑀺𑀢𑀁 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁 𑀦𑀸𑀫, 𑀢𑀤𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻. 𑀅𑀚𑁆𑀛𑀢𑁆𑀢𑀫𑁆𑀧𑀺 𑀳𑀺 𑀓𑁂𑀲𑀸𑀤𑀻𑀲𑀼 𑀦𑀻𑀮𑀁, 𑀫𑁂𑀤𑀸𑀤𑀻𑀲𑀼 𑀧𑀻𑀢𑀁, 𑀫𑀁𑀲𑀸𑀤𑀻𑀲𑀼 𑀮𑁄𑀳𑀺𑀢𑀁, 𑀤𑀦𑁆𑀢𑀸𑀤𑀻𑀲𑀼 𑀑𑀤𑀸𑀢𑀜𑁆𑀘 𑀯𑀡𑁆𑀡𑀓𑀲𑀺𑀡𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀭𑀽𑀧𑀚𑁆𑀛𑀸𑀦𑀸𑀦𑀺, 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀘 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑁂𑀯. 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸𑀧𑀺 𑀦𑀻𑀮𑀓𑀲𑀺𑀡𑀸𑀤𑀺𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺, 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀯𑀢𑁆𑀣𑀼𑀓𑁂𑀲𑀼 𑀓𑀲𑀺𑀡𑁂𑀲𑀼 𑀛𑀸𑀦𑀧𑁆𑀧𑀝𑀺𑀮𑀸𑀪𑁄 𑀤𑀲𑁆𑀲𑀺𑀢𑁄. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀲𑀼 𑀅𑀦𑀼𑀧𑁆𑀧𑀸𑀤𑀺𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄, 𑀇𑀫𑀺𑀦𑀸 𑀩𑀳𑀺𑀤𑁆𑀥𑀸 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀢𑀸 𑀤𑀲𑁆𑀲𑀺𑀢𑀸. 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀺𑀯𑀡𑁆𑀡𑀓𑀲𑀺𑀡𑁂𑀲𑀼 ‘‘𑀲𑀼𑀪’’𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀢𑀸 𑀤𑀲𑁆𑀲𑀺𑀢𑀸. 𑀏𑀯𑀁 𑀆𑀭𑀫𑁆𑀫𑀡𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀛𑀸𑀦𑀼𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀢𑁄 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀯𑀺𑀫𑁄𑀓𑁆𑀔𑀸𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀫𑁄𑀓𑁆𑀔𑀓𑀣𑀸.

𑀬𑀣𑀸 𑀘 𑀯𑀺𑀫𑁄𑀓𑁆𑀔𑀢𑁄, 𑀏𑀯𑀁 𑀧𑀝𑀺𑀧𑀤𑀸𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀤𑀼𑀓𑁆𑀔𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀁, 𑀲𑀼𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀲𑀼𑀔𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀧𑀘𑀸𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀛𑀸𑀦𑀪𑀸𑀯𑀦𑀸 ‘‘𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀏𑀓𑀘𑁆𑀘𑀲𑁆𑀲 𑀤𑀼𑀓𑁆𑀔𑀸 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑀫𑀼𑀤𑀸𑀘𑀸𑀭𑀕𑀳𑀦𑀢𑀸𑀬 𑀅𑀲𑀼𑀔𑀲𑁂𑀯𑀦𑀸 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀢𑀤𑀪𑀸𑀯𑀢𑁄 𑀲𑀼𑀔𑀸. 𑀉𑀧𑀘𑀸𑀭𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀅𑀧𑁆𑀧𑀦𑀸, 𑀢𑀸𑀯 𑀧𑀯𑀢𑁆𑀢𑀸 𑀧𑀜𑁆𑀜𑀸 ‘‘𑀅𑀪𑀺𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀏𑀓𑀘𑁆𑀘𑀲𑁆𑀲 𑀤𑀦𑁆𑀥𑀸 𑀅𑀲𑀻𑀖𑀧𑁆𑀧𑀯𑀢𑁆𑀢𑀺𑀦𑀻, 𑀏𑀓𑀘𑁆𑀘𑀲𑁆𑀲 𑀔𑀺𑀧𑁆𑀧𑀸. 𑀅𑀲𑀧𑁆𑀧𑀸𑀬𑀲𑁂𑀯𑀺𑀦𑁄 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸, 𑀲𑀧𑁆𑀧𑀸𑀬𑀲𑁂𑀯𑀺𑀦𑁄 𑀲𑀼𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀔𑀺𑀧𑁆𑀧𑀸 𑀘 𑀅𑀪𑀺𑀜𑁆𑀜𑀸. 𑀧𑀼𑀩𑁆𑀩𑀸𑀧𑀭𑀓𑀸𑀮𑁂𑀲𑀼 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀲𑁂𑀯𑀦𑀯𑀲𑁂𑀦 𑀯𑁄𑀫𑀺𑀲𑁆𑀲𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀺𑀓𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀝𑀺𑀧𑀤𑀸 𑀤𑀼𑀓𑁆𑀔𑀸, 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸. 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀔𑀺𑀧𑁆𑀧𑀸. 𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀸 𑀢𑀺𑀓𑁆𑀔𑀫𑀼𑀤𑀼𑀢𑀸𑀬 𑀧𑀞𑀫𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀘𑀢𑀼𑀢𑁆𑀣𑀸, 𑀯𑁄𑀫𑀺𑀲𑁆𑀲𑀢𑀸𑀬 𑀫𑀚𑁆𑀛𑀺𑀫𑀸 𑀤𑁆𑀯𑁂𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀡𑁆𑀳𑀸𑀯𑀺𑀚𑁆𑀚𑀸𑀪𑀺𑀪𑀯𑀦𑀸𑀦𑀪𑀺𑀪𑀯𑀦𑀯𑀲𑁂𑀦 𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀓𑀢𑀸𑀥𑀺𑀓𑀸𑀭𑀸𑀓𑀢𑀸𑀥𑀺𑀓𑀸𑀭𑀢𑀸𑀯𑀲𑁂𑀦 𑀯𑀸𑀧𑀺 𑀏𑀢𑀸𑀲𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀚𑁆𑀛𑀸𑀦𑀸𑀤𑀺𑀆𑀕𑀫𑀦𑀯𑀲𑁂𑀦𑀸𑀧𑀺 𑀤𑀼𑀢𑀺𑀬𑀸𑀤𑀻𑀦𑀁 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀪𑁂𑀤𑁄 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀧𑀝𑀺𑀧𑀤𑀸𑀯𑀲𑁂𑀦 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑀤𑀸𑀓𑀣𑀸.

𑀬𑀣𑀸 𑀘 𑀧𑀝𑀺𑀧𑀤𑀸𑀳𑀺, 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀢𑁄𑀧𑀺 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺 𑀧𑀭𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀦𑁆𑀢𑀺. 𑀢𑀢𑁆𑀣 𑀬𑀁 𑀅𑀧𑁆𑀧𑀕𑀼𑀡𑀁, 𑀉𑀧𑀭𑀺𑀚𑁆𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑀁 𑀧𑀭𑀺𑀢𑁆𑀢𑀁. 𑀬𑀁 𑀧𑀦 𑀅𑀯𑀟𑁆𑀠𑀺𑀢𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀁, 𑀢𑀁 𑀧𑀭𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲𑀸𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁. 𑀯𑀺𑀧𑀭𑀺𑀬𑀸𑀬𑀢𑁄 𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀢𑀸𑀬 𑀫𑀚𑁆𑀛𑁂 𑀇𑀢𑀭𑀤𑁆𑀯𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀭𑀫𑁆𑀫𑀡𑀓𑀣𑀸.

𑀬𑀣𑀸 𑀘 𑀧𑀝𑀺𑀧𑀤𑀸𑀭𑀫𑁆𑀫𑀡𑁂𑀳𑀺, 𑀏𑀯𑀁 𑀅𑀥𑀺𑀧𑀢𑀻𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀢𑀸, 𑀳𑀻𑀦𑀢𑁆𑀢𑀺𑀓𑀯𑀲𑁂𑀦 𑀧𑀼𑀦 𑀢𑀺𑀯𑀺𑀥𑀢𑀸 𑀘 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸.

𑀤𑀲𑀓𑀲𑀺𑀡𑀫𑀽𑀮𑀯𑀺𑀪𑀸𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀬𑀣𑀸 𑀓𑀲𑀺𑀡𑀫𑀽𑀮𑁂𑀲𑀼, 𑀏𑀯𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀽𑀮𑁂𑀲𑀼𑀧𑀺 𑀬𑀣𑀸𑀬𑁄𑀕𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀲𑁂𑀦 𑀳𑀺 𑀆𑀤𑀺𑀢𑁄 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀓𑀭𑀼𑀡𑀸𑀲𑀳𑀕𑀢𑀁, 𑀫𑀼𑀤𑀺𑀢𑀸𑀲𑀳𑀕𑀢𑀦𑁆𑀢𑀺. 𑀧𑀜𑁆𑀘𑀫𑀚𑁆𑀛𑀸𑀦𑀁 𑀧𑀦 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀏𑀓𑀯𑀺𑀥𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺. 𑀧𑀼𑀭𑀺𑀫𑁂𑀲𑀼 𑀳𑀺 𑀢𑀻𑀲𑀼 𑀧𑀜𑁆𑀘𑀫𑀚𑁆𑀛𑀸𑀦𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀲𑁄𑀫𑀦𑀲𑁆𑀲𑀸𑀯𑀺𑀧𑁆𑀧𑀬𑁄𑀕𑀢𑁄, 𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀺𑀢𑀸𑀦𑀁 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀭𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀦𑀺𑀲𑁆𑀲𑀭𑀡𑀢𑁆𑀢𑀸, 𑀧𑀘𑁆𑀙𑀺𑀫𑁂 𑀘 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑀢𑁄, 𑀢𑀲𑁆𑀲𑀸 𑀘 𑀧𑀝𑀺𑀖𑀸𑀦𑀼𑀦𑀬𑀦𑀺𑀲𑁆𑀲𑀭𑀡𑀢𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁄, 𑀢𑀸𑀦𑀺 𑀧𑀼𑀦 𑀧𑀝𑀺𑀧𑀤𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀳𑀻𑀦𑀢𑁆𑀢𑀺𑀓𑀪𑁂𑀤𑁂𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀅𑀧𑁆𑀧𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸, 𑀩𑀳𑀼𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀘 𑀏𑀓𑀲𑁆𑀫𑀺𑀁 𑀲𑀢𑁆𑀢𑁂 𑀅𑀧𑁆𑀧𑀦𑀁 𑀧𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀏𑀓𑀸𑀯𑀸𑀲𑀏𑀓𑀯𑀻𑀣𑀺𑀕𑀸𑀫𑀸𑀤𑀺𑀕𑀢𑀲𑀢𑁆𑀢𑁂𑀲𑀼 𑀧𑀸𑀧𑀦𑀯𑀲𑁂𑀦 𑀯𑀟𑁆𑀠𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀥𑀫𑁆𑀫𑀼𑀤𑁆𑀤𑁂𑀲𑁂 𑀧𑀦𑁂𑀢𑁆𑀣 𑀓𑀭𑀼𑀡𑀸𑀲𑀳𑀕𑀢𑁂 𑀫𑀼𑀤𑀺𑀢𑀸𑀯𑀺𑀭𑀳𑀺𑀢𑀸 𑀧𑀜𑁆𑀘𑀢𑀺𑀁𑀲 𑀥𑀫𑁆𑀫𑀸, 𑀢𑁂𑀲𑀼 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄, 𑀓𑀭𑀼𑀡𑀸 𑀘𑀸𑀢𑀺 𑀧𑀜𑁆𑀘𑁂𑀯 𑀬𑁂𑀯𑀸𑀧𑀦𑀓𑀸, 𑀓𑀭𑀼𑀡𑀸 𑀘 𑀦𑀺𑀬𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀫𑀼𑀤𑀺𑀢𑀸𑀲𑀳𑀕𑀢𑁂𑀧𑀺. 𑀓𑁂𑀯𑀮𑀁 𑀓𑀭𑀼𑀡𑀸𑀯𑀺𑀭𑀳𑀺𑀢𑀸 𑀫𑀼𑀤𑀺𑀢𑀸 𑀦𑀺𑀬𑀢𑀸 𑀧𑀯𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀅𑀯𑀲𑁂𑀲𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑁆𑀯𑀬𑁂, 𑀧𑀦 𑀓𑀲𑀺𑀡𑀸𑀲𑀼𑀪𑀸𑀤𑀻𑀲𑀼 𑀘 𑀲𑀩𑁆𑀩𑀢𑁆𑀣 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀺𑀭𑀳𑀺𑀢𑀸 𑀘 𑀘𑀢𑀼𑀢𑁆𑀢𑀺𑀁𑀲 𑀥𑀫𑁆𑀫𑀸, 𑀢𑀢𑁆𑀣 𑀘 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄𑀯 𑀬𑁂𑀯𑀸𑀧𑀦𑀓𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀽𑀮𑀯𑀺𑀪𑀸𑀕𑀓𑀣𑀸.

𑀅𑀲𑀼𑀪𑀪𑁂𑀤𑀢𑁄 𑀧𑀦 𑀧𑀞𑀫𑀚𑁆𑀛𑀸𑀦𑀫𑁂𑀯𑁂𑀓𑀁 𑀤𑀲𑀯𑀺𑀥𑀁 𑀳𑁄𑀢𑀺 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀲𑀳𑀕𑀢𑀁 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀯𑀺𑀘𑁆𑀙𑀺𑀤𑁆𑀤𑀓𑀯𑀺𑀓𑁆𑀔𑀸𑀬𑀺𑀢𑀓𑀯𑀺𑀓𑁆𑀔𑀺𑀢𑁆𑀢𑀓𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀮𑁄𑀳𑀺𑀢𑀓𑀧𑀼𑀴𑀯𑀓𑀅𑀝𑁆𑀞𑀺𑀓𑀲𑀜𑁆𑀜𑀸𑀲𑀳𑀕𑀢𑀦𑁆𑀢𑀺, 𑀤𑀲𑀯𑀺𑀥𑁂𑀧𑀺 𑀘𑁂𑀢𑀲𑁆𑀫𑀺𑀁 𑀅𑀲𑀼𑀪𑁂 𑀧𑀝𑀺𑀓𑀽𑀮𑀢𑁆𑀢𑀸, 𑀤𑀼𑀩𑁆𑀩𑀮𑀢𑁆𑀢𑀸 𑀘 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀛𑀸𑀦𑀁 𑀢𑀺𑀝𑁆𑀞𑀢𑀺, 𑀦 𑀯𑀺𑀦𑀸 𑀯𑀺𑀢𑀓𑁆𑀓𑁂𑀦 𑀲𑀻𑀖𑀲𑁄𑀢𑀸𑀬 𑀦𑀤𑀺𑀬𑀸 𑀅𑀭𑀺𑀢𑁆𑀢𑀩𑀮𑁂𑀦𑁂𑀯 𑀦𑀸𑀯𑀸 𑀯𑀺𑀬, 𑀢𑀲𑁆𑀫𑀸 𑀧𑀞𑀫𑀚𑁆𑀛𑀸𑀦𑀫𑁂𑀯𑁂𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀺𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬, 𑀧𑀦𑁂𑀢𑁆𑀣 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀘 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀯𑁂𑀢𑀦𑀮𑀸𑀪𑀤𑀲𑁆𑀲𑀦𑁂𑀦 𑀧𑀼𑀧𑁆𑀨𑀙𑀟𑁆𑀟𑀓𑀲𑁆𑀲 𑀕𑀽𑀣𑀭𑀸𑀲𑀺𑀫𑁆𑀳𑀺 𑀯𑀺𑀬, 𑀉𑀧𑀲𑀦𑁆𑀢𑀩𑁆𑀬𑀸𑀥𑀺𑀤𑀼𑀓𑁆𑀔𑀲𑁆𑀲 𑀘 𑀭𑁄𑀕𑀺𑀦𑁄 𑀯𑀫𑀦𑀯𑀺𑀭𑁂𑀘𑀦𑀧𑁆𑀧𑀯𑀢𑁆𑀢𑀺𑀬𑀁 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀧𑀦 𑀤𑀲𑀯𑀺𑀥𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑀁 𑀧𑀝𑀺𑀧𑀤𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀳𑀻𑀦𑀢𑁆𑀢𑀺𑀓𑀯𑀲𑁂𑀦 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀅𑀲𑀼𑀪𑀸𑀭𑀫𑁆𑀫𑀡𑀲𑁆𑀲 𑀅𑀯𑀟𑁆𑀠𑀦𑀻𑀬𑀢𑀸𑀬 𑀔𑀼𑀤𑁆𑀤𑀓𑁂 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀁 𑀦𑀺𑀫𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀫𑀳𑀦𑁆𑀢𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀧𑀦 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀲𑀸𑀫𑀜𑁆𑀜𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀲𑁂𑀦, 𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀸𑀬𑀕𑀢𑀸𑀲𑀢𑀺 𑀲𑀗𑁆𑀕𑀳𑀺𑀢𑀸, 𑀯𑀡𑁆𑀡𑀓𑀲𑀺𑀡𑁂𑀲𑀼 𑀘 𑀓𑁂𑀲𑀸𑀤𑀻𑀦𑀁 𑀓𑁄𑀝𑁆𑀞𑀸𑀲𑀸𑀦𑀁 𑀦𑀻𑀮𑀸𑀤𑀺𑀯𑀡𑁆𑀡𑀸𑀭𑀫𑁆𑀫𑀡𑀸, 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀓𑀸𑀬𑀕𑀢𑀸𑀲𑀢𑀺 𑀘 𑀲𑀗𑁆𑀕𑀳𑀺𑀢𑀸. 𑀧𑀤𑀪𑀸𑀚𑀦𑀻𑀬𑁂 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦𑀸𑀧𑀺 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀼𑀪𑀫𑀽𑀮𑀯𑀺𑀪𑀸𑀕𑀓𑀣𑀸.

𑀏𑀯𑀁 𑀆𑀭𑀫𑁆𑀫𑀡𑀸𑀤𑀺𑀪𑁂𑀤𑀢𑁄 𑀘 𑀪𑀺𑀦𑁆𑀦𑀸𑀦𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸𑀦𑀁 𑀓𑀸𑀮𑀤𑁂𑀲𑀸𑀤𑀺𑀪𑁂𑀤𑁂𑀦 𑀅𑀦𑀦𑁆𑀢𑀢𑀸, 𑀪𑀕𑀯𑀢𑀸 𑀘 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀤𑁂𑀲𑀺𑀢𑀪𑀸𑀯𑁄, 𑀯𑀺𑀢𑁆𑀣𑀸𑀭𑀦𑀬𑀸𑀢𑀺𑀤𑁂𑀲𑁄 𑀘 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀅𑀭𑀽𑀧𑀸𑀯𑀘𑀭𑀸𑀤𑀻𑀲𑀼𑀧𑀺 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫. 𑀏𑀯𑀁 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀭𑀽𑀧𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀽𑀧𑀸𑀯𑀘𑀭𑀸 𑀧𑀦 𑀓𑀼𑀲𑀮𑀥𑀫𑁆𑀫𑀸 𑀲𑀫𑁆𑀧𑀬𑁄𑀕𑀢𑁄 𑀦 𑀪𑀺𑀦𑁆𑀦𑀸, 𑀲𑀩𑁆𑀩𑁂𑀧𑀺 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀸𑀯, 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄𑀧𑀺 𑀲𑀩𑁆𑀩𑀲𑁄 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀲𑀤𑀺𑀲𑀸. 𑀅𑀭𑀽𑀧𑀸𑀯𑀘𑀭𑀪𑀸𑀯𑁄 𑀏𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄. 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄𑀢𑀺 𑀏𑀢𑁆𑀣 𑀧𑀦 𑀆𑀭𑀫𑁆𑀫𑀡𑀢𑁄 𑀢𑁂 𑀘𑀢𑀼𑀩𑁆𑀩𑀺𑀥𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺. 𑀢𑀢𑁆𑀣 𑀳𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀧𑀯𑀢𑁆𑀢𑀁 𑀧𑀞𑀫𑀁, 𑀢𑀲𑁆𑀫𑀺𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀯𑀢𑁆𑀢𑀁 𑀤𑀼𑀢𑀺𑀬𑀁, 𑀢𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑁂 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀧𑀯𑀢𑁆𑀢𑀁 𑀢𑀢𑀺𑀬𑀁, 𑀢𑀲𑁆𑀫𑀺𑀁 𑀢𑀢𑀺𑀬𑁂 ‘‘𑀲𑀦𑁆𑀢𑀫𑁂𑀢𑀁 𑀧𑀡𑀻𑀢𑀫𑁂𑀢’’𑀦𑁆𑀢𑀺 𑀧𑀯𑀢𑁆𑀢𑀁 𑀘𑀢𑀼𑀢𑁆𑀣𑀁. 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀁 𑀲𑀦𑁆𑀢𑀲𑀦𑁆𑀢𑀢𑀭𑀲𑀦𑁆𑀢𑀢𑀫𑀦𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀁.

𑀦𑀦𑀼 𑀭𑀽𑀧𑀸𑀯𑀘𑀭𑁂𑀲𑀼 𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀲𑀫𑀢𑀺𑀓𑁆𑀓𑀫𑀢𑁄 𑀉𑀧𑀭𑀽𑀧𑀭𑀺𑀛𑀸𑀦𑀸𑀦𑀁 𑀲𑀦𑁆𑀢𑀢𑀭𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀅𑀗𑁆𑀕𑀸𑀢𑀺𑀓𑁆𑀓𑀫𑀭𑀳𑀺𑀢𑁂𑀲𑀼 𑀧𑀦 𑀆𑀭𑀼𑀧𑁆𑀧𑁂𑀲𑀼 𑀓𑀣𑀦𑁆𑀢𑀺? 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀢𑁄. 𑀏𑀢𑁂𑀲𑀼 𑀳𑀺 𑀓𑀲𑀺𑀡𑀭𑀽𑀧𑀲𑀫𑀢𑀺𑀓𑁆𑀓𑀫𑀢𑁄 𑀧𑀞𑀫𑀁 𑀛𑀸𑀦𑀁 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀢𑁄 𑀲𑀦𑁆𑀢𑀁, 𑀢𑀢𑁄𑀧𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀸𑀢𑀺𑀓𑁆𑀓𑀫𑀢𑁄 𑀤𑀼𑀢𑀺𑀬𑀁, 𑀢𑀢𑁄𑀧𑀺 𑀆𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀸𑀢𑀺𑀓𑁆𑀓𑀫𑀢𑁄 𑀢𑀢𑀺𑀬𑀁, 𑀢𑀢𑁄𑀧𑀺 𑀆𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀢𑀺𑀓𑁆𑀓𑀫𑀢𑁄 𑀘𑀢𑀼𑀢𑁆𑀣𑀦𑁆𑀢𑀺. 𑀏𑀯𑀁 𑀅𑀗𑁆𑀕𑀲𑀫𑀢𑁆𑀢𑁂𑀧𑀺 𑀣𑀽𑀮𑀣𑀽𑀮𑀸𑀢𑀺𑀓𑁆𑀓𑀫𑁂𑀦 𑀲𑀼𑀔𑀼𑀫𑀲𑀼𑀔𑀼𑀫𑀸𑀭𑀫𑁆𑀫𑀡𑀢𑀸𑀬 𑀉𑀧𑀭𑀽𑀧𑀭𑀺𑀚𑁆𑀛𑀸𑀦𑀸𑀦𑀁 𑀲𑀦𑁆𑀢𑀢𑀭𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑀲𑀫𑀸𑀬𑀸𑀫𑀯𑀺𑀢𑁆𑀣𑀸𑀭𑀸𑀦𑀫𑁆𑀧𑀺 𑀯𑀢𑁆𑀣𑀸𑀦𑀁 𑀲𑀼𑀢𑁆𑀢𑀲𑀼𑀔𑀼𑀫𑀢𑀭𑀸𑀤𑀺𑀪𑀸𑀯𑁄 𑀯𑀺𑀬. 𑀦𑀦𑀼 𑀅𑀪𑀸𑀯𑀸𑀭𑀫𑁆𑀫𑀡𑀢𑀸𑀬 𑀢𑀢𑀺𑀬𑀸𑀭𑀼𑀧𑁆𑀧𑀁 𑀲𑀦𑁆𑀢𑀧𑀡𑀻𑀢𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑁆𑀲 𑀓𑀣𑀁 𑀢𑀢𑁆𑀣 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁, 𑀓𑀣𑀁 𑀘 𑀲𑀫𑀢𑀺𑀓𑁆𑀓𑀫𑁄 𑀯𑀸 𑀳𑁄𑀢𑀻𑀢𑀺? 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀬, 𑀲𑀸 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀧𑀡𑀻𑀢𑀢𑀸𑀬. 𑀬𑀣𑀸 𑀳𑀺 𑀭𑀸𑀚𑀸 𑀤𑀦𑁆𑀢𑀓𑀸𑀭𑀸𑀤𑀺𑀲𑀺𑀧𑁆𑀧𑀺𑀓𑀸𑀦𑀁 𑀅𑀢𑀺𑀲𑀼𑀔𑀼𑀫𑀫𑀦𑀸𑀧𑀲𑀺𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀙𑁂𑀓𑀸 𑀯𑀢𑀺𑀫𑁂 𑀆𑀘𑀭𑀺𑀬𑀸’’𑀢𑀺 𑀢𑁂𑀲𑀁 𑀙𑁂𑀓𑀢𑀸𑀬 𑀢𑀼𑀲𑁆𑀲𑀦𑁆𑀢𑁄𑀧𑀺 𑀦 𑀢𑀁 𑀲𑀺𑀧𑁆𑀧𑀺𑀓𑀪𑀸𑀯𑀁 𑀧𑀢𑁆𑀣𑁂𑀢𑀺, 𑀢𑀁 𑀲𑀫𑀢𑀺𑀓𑁆𑀓𑀫𑁆𑀫 𑀭𑀸𑀚𑀪𑀸𑀯𑁂 𑀏𑀯 𑀢𑀺𑀝𑁆𑀞𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸𑀦𑀫𑁆𑀧𑁂𑀢𑁂𑀲𑀁 𑀧𑀼𑀦 𑀧𑀝𑀺𑀧𑀤𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀳𑀻𑀦𑀢𑁆𑀢𑀺𑀓𑀪𑁂𑀤𑁂𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑁂𑀓𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀓𑀦𑁆𑀢𑀺 𑀧𑀭𑀺𑀬𑀸𑀤𑀸𑀦𑀤𑀼𑀓𑁆𑀔𑀢𑀸𑀬 𑀧𑀞𑀫𑀸𑀭𑀼𑀧𑁆𑀧𑀲𑁆𑀲, 𑀧𑀞𑀫𑀸𑀭𑀼𑀧𑁆𑀧𑀸𑀤𑀺𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀤𑀼𑀓𑁆𑀔𑀢𑀸𑀬 𑀤𑀼𑀢𑀺𑀬𑀸𑀭𑀼𑀧𑁆𑀧𑀸𑀤𑀻𑀦𑀜𑁆𑀘 𑀤𑀼𑀓𑁆𑀔𑀧𑀝𑀺𑀧𑀤𑀢𑀸, 𑀧𑀭𑀺𑀬𑀸𑀤𑀺𑀡𑁆𑀡𑀦𑀺𑀓𑀦𑁆𑀢𑀺𑀓𑀲𑁆𑀲 𑀢𑀤𑀧𑁆𑀧𑀦𑀸𑀧𑀭𑀺𑀯𑀸𑀲𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀢𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀇𑀢𑀭𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀫𑀽𑀮𑀓𑀸𑀦𑀁 𑀧𑀦 𑀘𑀢𑀼𑀦𑁆𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑀸, 𑀯𑀺𑀧𑀭𑀺𑀬𑀸𑀬𑀸𑀦𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀭𑀽𑀧𑀸𑀭𑀽𑀧𑀸𑀯𑀘𑀭𑀸 𑀧𑀦𑁂𑀢𑁆𑀣 𑀅𑀥𑀺𑀧𑀢𑀺𑀲𑀳𑀺𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀯𑀺𑀦𑀸 𑀅𑀥𑀺𑀧𑀢𑀻𑀳𑀺. 𑀓𑀸𑀫𑀸𑀯𑀘𑀭𑀸 𑀢𑀼 𑀅𑀥𑀺𑀧𑀢𑀺𑀭𑀳𑀺𑀢𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀻𑀢𑀺 𑀤𑁆𑀯𑁂𑀧𑀺 𑀮𑀩𑁆𑀪𑀦𑁆𑀢𑀺. 𑀭𑀽𑀧𑀸𑀭𑀽𑀧𑀸𑀯𑀘𑀭𑀸 𑀧𑀦 𑀲𑀳𑀚𑀸𑀢𑀸𑀥𑀺𑀧𑀢𑀺𑀫𑁂𑀯, 𑀦𑁂𑀢𑀭𑀁. 𑀢𑀢𑁆𑀣 𑀘 𑀙𑀦𑁆𑀤𑀸𑀥𑀺𑀧𑀢𑀺𑀦𑀸 𑀲𑀳𑀚𑀸𑀢𑀸 𑀥𑀫𑁆𑀫𑀸 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀸, 𑀙𑀦𑁆𑀤𑁄 𑀧𑀦 𑀅𑀥𑀺𑀧𑀢𑀺 𑀏𑀯, 𑀦 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑁄. 𑀇𑀢𑀭𑁂 𑀧𑀦 𑀅𑀥𑀺𑀧𑀢𑁂𑀬𑁆𑀬𑀸𑀯, 𑀦𑀸𑀥𑀺𑀧𑀢𑀬𑁄 𑀅𑀜𑁆𑀜𑀲𑁆𑀲 𑀅𑀢𑁆𑀢𑀦𑀸 𑀲𑀳𑀚𑀸𑀢𑀲𑁆𑀲 𑀙𑀦𑁆𑀤𑀲𑁆𑀲, 𑀇𑀢𑀭𑁂𑀲𑀜𑁆𑀘 𑀅𑀥𑀺𑀧𑀢𑀺𑀬𑀢𑁆𑀣𑀲𑁆𑀲 𑀅𑀪𑀸𑀯𑀸. 𑀏𑀓𑀲𑁆𑀫𑀺𑀁 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀙𑀦𑁆𑀤𑀸𑀤𑀻𑀲𑀼 𑀘𑀢𑀽𑀲𑀼𑀧𑀺 𑀯𑀺𑀚𑁆𑀚𑀫𑀸𑀦𑁂𑀲𑀼 𑀬𑀣𑀸𑀧𑀘𑁆𑀘𑀬𑀁 𑀲𑀳𑀚𑀸𑀢𑀸𑀥𑀺𑀧𑀢𑀺 𑀏𑀓𑁄𑀯 𑀮𑀩𑁆𑀪𑀢𑀺. 𑀏𑀯𑀁 𑀯𑀻𑀭𑀺𑀬𑀸𑀥𑀺𑀧𑀢𑀺𑀬𑀸𑀤𑀻𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁. 𑀏𑀯𑀁 𑀯𑀺𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀯𑀺𑀦𑀺𑀘𑁆𑀙𑀬𑁄 𑀜𑀸𑀢𑀩𑁆𑀩𑁄.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀸 𑀧𑀦 𑀓𑀼𑀲𑀮𑀸 𑀫𑀕𑁆𑀕𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺. 𑀦𑀦𑀼 𑀘𑀢𑀽𑀲𑀼𑀧𑀺 𑀘𑁂𑀢𑁂𑀲𑀼 𑀫𑀕𑁆𑀕𑀲𑀫𑁆𑀧𑀬𑁄𑀕𑁄 𑀲𑀫𑀸𑀦𑁄 𑀅𑀝𑁆𑀞𑀦𑁆𑀦𑀫𑁆𑀧𑀺 𑀫𑀕𑁆𑀕𑀗𑁆𑀕𑀸𑀦𑀁 𑀲𑀩𑁆𑀩𑀢𑁆𑀣 𑀉𑀧𑁆𑀧𑀢𑁆𑀢𑀺𑀢𑁄 𑀓𑀣𑀁 𑀢𑀢𑁆𑀣 𑀪𑁂𑀤𑁄𑀢𑀺? 𑀅𑀦𑀼𑀲𑀬𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑀲𑁆𑀲 𑀫𑀕𑁆𑀕𑀓𑀺𑀘𑁆𑀘𑀲𑁆𑀲 𑀪𑁂𑀤𑀢𑁄. 𑀅𑀦𑀼𑀲𑀬𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀳𑀺 𑀫𑀕𑁆𑀕𑁄. 𑀫𑀕𑁆𑀕𑀸 𑀳𑀺 𑀬𑀣𑀸𑀲𑀓𑀁 𑀅𑀦𑀼𑀲𑀬𑁂 𑀧𑀚𑀳𑀦𑁆𑀢𑀺 𑀏𑀯, 𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀧𑀯𑀢𑁆𑀢𑀜𑁆𑀘 𑀙𑀺𑀦𑁆𑀤𑀦𑁆𑀢𑀺 𑀦𑀸𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀧𑀯𑀢𑁆𑀢𑀦𑁆𑀢𑀺𑀧𑀺 𑀢𑁂 𑀏𑀯. 𑀢𑀁 𑀤𑀼𑀯𑀺𑀥𑀁 𑀉𑀧𑀸𑀤𑀺𑀦𑁆𑀦𑀓𑀁, 𑀅𑀦𑀼𑀧𑀸𑀤𑀺𑀦𑁆𑀦𑀓𑀜𑁆𑀘.

𑀢𑀢𑁆𑀣𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀤𑀺𑀝𑁆𑀞𑀸𑀦𑀼𑀲𑀬𑀁, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀁, 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂, 𑀢𑀁𑀲𑀳𑀚𑀸𑀢𑀸𑀦𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺, 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸𑀢𑀺 𑀧𑀜𑁆𑀘𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑁄 𑀘 𑀅𑀧𑀸𑀬𑀪𑀯𑀢𑁄 𑀘𑁂𑀯 𑀲𑀼𑀕𑀢𑀺𑀪𑀯𑀢𑁄 𑀘 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀪𑀯𑁂 𑀢𑀤𑀯𑀲𑁂𑀲𑀢𑁄 𑀯𑀼𑀝𑁆𑀞𑀸𑀢𑀺. 𑀢𑀢𑁆𑀣 𑀬𑀤𑁂𑀢𑀁 𑀧𑀞𑀫𑀫𑀕𑁆𑀕𑀸𑀦𑀼𑀧𑁆𑀧𑀢𑁆𑀢𑀺𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀭𑀳𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁, 𑀢𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀢𑀸𑀦𑀺 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄 𑀇𑀢𑀭𑁂 𑀢𑀬𑁄 𑀔𑀦𑁆𑀥𑀸. 𑀇𑀫𑁂 𑀅𑀦𑀼𑀧𑀸𑀤𑀺𑀦𑁆𑀦𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀦𑀺𑀫𑀺𑀢𑁆𑀢𑀁, 𑀅𑀦𑀼𑀧𑀸𑀤𑀺𑀦𑁆𑀦𑀧𑁆𑀧𑀯𑀢𑁆𑀢𑀁 𑀦𑀸𑀫. 𑀢𑀢𑁄 𑀧𑀞𑀫𑀫𑀕𑁆𑀕𑁄 𑀯𑀼𑀝𑁆𑀞𑀸𑀢𑀺, 𑀢𑀁 𑀙𑀺𑀦𑁆𑀤𑀢𑀺 𑀦𑀸𑀫. 𑀬𑀤𑁂𑀢𑀁 𑀅𑀧𑀸𑀬𑀪𑀯𑁂, 𑀲𑀼𑀕𑀢𑀺𑀬𑀜𑁆𑀘 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀪𑀯𑁂 𑀢𑀤𑀯𑀲𑁂𑀲𑁂 𑀘 𑀧𑀞𑀫𑀫𑀕𑁆𑀕𑀸𑀦𑀼𑀧𑁆𑀧𑀢𑁆𑀢𑀺𑀬𑀁 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀭𑀳𑀁 𑀓𑀫𑁆𑀫𑀚𑀓𑁆𑀔𑀦𑁆𑀥𑀧𑀜𑁆𑀘𑀓𑀁, 𑀢𑀁 𑀉𑀧𑀸𑀤𑀺𑀦𑁆𑀦𑀦𑀺𑀫𑀺𑀢𑁆𑀢𑀁, 𑀉𑀧𑀸𑀤𑀺𑀦𑁆𑀦𑀧𑁆𑀧𑀯𑀢𑁆𑀢𑀁 𑀦𑀸𑀫. 𑀢𑀢𑁄 𑀧𑀞𑀫𑀫𑀕𑁆𑀕𑁄 𑀯𑀼𑀝𑁆𑀞𑀸𑀢𑀺, 𑀢𑀜𑁆𑀘 𑀙𑀺𑀦𑁆𑀤𑀢𑀺 𑀦𑀸𑀫. 𑀢𑀢𑁄𑀯 𑀧𑀞𑀫𑀫𑀕𑁆𑀕𑁄 𑀅𑀦𑀼𑀲𑀬𑀁 𑀧𑀚𑀳𑀦𑁆𑀢𑁄𑀯 𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀳𑀢𑀺, 𑀧𑀯𑀢𑁆𑀢𑀜𑁆𑀘 𑀙𑀺𑀦𑁆𑀤𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀇𑀢𑀭𑀫𑀕𑁆𑀕𑁂𑀲𑀼𑀧𑀺 𑀉𑀧𑀸𑀤𑀺𑀦𑁆𑀦𑀸𑀦𑀼𑀧𑀸𑀤𑀺𑀦𑁆𑀦𑀦𑀺𑀫𑀺𑀢𑁆𑀢𑀧𑁆𑀧𑀯𑀢𑁆𑀢𑀁 𑀯𑀼𑀝𑁆𑀞𑀸𑀦𑀁 𑀙𑀺𑀦𑁆𑀤𑀦𑀁 𑀬𑀣𑀸𑀦𑀼𑀭𑀽𑀧𑀁 𑀜𑀸𑀢𑀩𑁆𑀩𑀁.

𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀧𑀦 𑀑𑀴𑀸𑀭𑀺𑀓𑀓𑀸𑀫𑀭𑀸𑀕𑀸𑀦𑀼𑀲𑀬𑀁, 𑀧𑀝𑀺𑀖𑀸𑀦𑀼𑀲𑀬𑀁, 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂, 𑀢𑀁𑀲𑀳𑀚𑀸𑀢𑀸𑀦𑀺 𑀘 𑀢𑀣𑀸 𑀧𑀯𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀤𑁆𑀯𑁂 𑀘 𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀻𑀢𑀺 𑀙 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑁄 𑀘 𑀓𑀸𑀫𑀲𑀼𑀕𑀢𑀺𑀢𑁄 𑀞𑀧𑁂𑀢𑁆𑀯𑀸 𑀏𑀓𑀪𑀯𑀁 𑀢𑀤𑀯𑀲𑁂𑀲𑀢𑁄 𑀯𑀼𑀝𑁆𑀞𑀸𑀢𑀺, 𑀧𑀢𑀦𑀼𑀪𑀽𑀢𑀸𑀯 𑀢𑀁𑀲𑀫𑀗𑁆𑀕𑀺𑀦𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀅𑀥𑀺𑀫𑀢𑁆𑀢𑀸, 𑀢𑁂 𑀘 𑀓𑀤𑀸𑀘𑀺 𑀯𑀺𑀭𑀴𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀸𑀕𑀸𑀫𑀺𑀫𑀕𑁆𑀕𑁄𑀧𑀺 𑀢𑀸𑀦𑁂𑀯 𑀢𑀦𑀼𑀲𑀳𑀕𑀢𑀓𑀸𑀫𑀭𑀸𑀕𑀧𑁆𑀧𑀝𑀺𑀖𑀸𑀦𑀼𑀲𑀬𑀯𑀲𑁂𑀦 𑀉𑀧𑁆𑀧𑀦𑁆𑀦𑀸𑀦𑀺 𑀙 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑁄 𑀘 𑀓𑀸𑀫𑀪𑀯𑀢𑁄 𑀯𑀼𑀝𑁆𑀞𑀸𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀦 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀸𑀯𑀺𑀚𑁆𑀚𑀸𑀦𑀼𑀲𑀬𑁂, 𑀉𑀤𑁆𑀥𑀘𑁆𑀘𑀁, 𑀢𑀤𑁂𑀓𑀝𑁆𑀞𑁂 𑀲𑀩𑁆𑀩𑁂 𑀓𑀺𑀮𑁂𑀲𑁂 𑀘 𑀢𑀁𑀲𑀳𑀚𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘𑀸𑀢𑀺 𑀧𑀜𑁆𑀘𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑁄 𑀘 𑀭𑀽𑀧𑀸𑀭𑀽𑀧𑀢𑁄, 𑀲𑀩𑁆𑀩𑀪𑀯𑀢𑁄𑀧𑀺 𑀯𑀼𑀝𑁆𑀞𑀸𑀢𑀺. 𑀲𑁂𑀲𑀁 𑀧𑀞𑀫𑀫𑀕𑁆𑀕𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀅𑀦𑀼𑀲𑀬𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑀓𑀺𑀘𑁆𑀘𑀪𑁂𑀤𑀢𑁄 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀤𑁂𑀯𑀁 𑀫𑀕𑁆𑀕𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁, 𑀧𑀼𑀦 𑀛𑀸𑀦𑀗𑁆𑀕𑀲𑀫𑁆𑀧𑀬𑁄𑀕𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀧𑀜𑁆𑀘𑀯𑀺𑀥𑀸 𑀳𑁄𑀦𑁆𑀢𑀺. 𑀓𑀣𑀁? 𑀧𑀞𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀢𑀸𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀚𑁆𑀛𑀸𑀦𑀺𑀓𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀁, 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀢𑀢𑀺𑀬𑀚𑁆𑀛𑀸𑀦𑀺𑀓𑀁, 𑀲𑀼𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀜𑁆𑀘𑀸𑀢𑀺 𑀧𑀜𑁆𑀘𑀯𑀺𑀥𑀁 𑀳𑁄𑀢𑀺. 𑀏𑀯𑀁 𑀤𑀼𑀢𑀺𑀬𑀫𑀕𑁆𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀯𑀻𑀲𑀢𑀺𑀯𑀺𑀥𑀸 𑀳𑁄𑀦𑁆𑀢𑀺, 𑀏𑀢𑁆𑀣 𑀘 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀲𑁄𑀴𑀲𑀯𑀺𑀥𑀢𑀸𑀧𑀺 𑀬𑁄𑀚𑁂𑀢𑀩𑁆𑀩𑀸. 𑀓𑀺𑀁 𑀧𑀦𑁂𑀢𑁆𑀣 𑀏𑀯𑀁 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀲𑁆𑀲 𑀦𑀺𑀬𑀸𑀫𑀓𑀁 𑀓𑀸𑀭𑀡𑀦𑁆𑀢𑀺? 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁. 𑀢𑀲𑁆𑀫𑀺𑀁 𑀳𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀪𑀽𑀢𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑁂 𑀅𑀭𑀺𑀬𑀫𑀕𑁆𑀕𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑁂 𑀘 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀦𑀦𑀼 𑀘𑁂𑀢𑁆𑀣 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀢𑁆𑀢𑀸 𑀘𑀢𑀼𑀓𑁆𑀓𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀁 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀪𑀸𑀯𑀲𑁆𑀲 𑀦𑀺𑀬𑀸𑀫𑀓𑀳𑁂𑀢𑀼, 𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀲𑀫𑀢𑀺𑀓𑁆𑀓𑀫𑀢𑁄 𑀧𑀦 𑀦𑁂𑀲𑀁 𑀤𑀼𑀢𑀺𑀬𑀸𑀤𑀺𑀚𑁆𑀛𑀸𑀦𑀪𑀸𑀯𑀲𑁆𑀲 𑀦𑀺𑀬𑀸𑀫𑀓𑁂𑀦 𑀅𑀜𑁆𑀜𑁂𑀦 𑀪𑀯𑀺𑀢𑀩𑁆𑀩𑀁. 𑀦 𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀯𑀺𑀢𑀓𑁆𑀓𑀸𑀤𑀺𑀯𑀺𑀓𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀬𑁂𑀦 𑀢𑀁 𑀦𑀺𑀬𑀸𑀫𑀓𑀁 𑀪𑀯𑁂𑀬𑁆𑀬, 𑀓𑀺𑀁 𑀢𑀁 𑀦𑀺𑀬𑀸𑀫𑀓𑀓𑀸𑀭𑀡𑀦𑁆𑀢𑀺? 𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁 𑀯𑀸. 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼 𑀳𑀺 𑀬𑀁 𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑀼𑀝𑁆𑀞𑀸𑀬 𑀬𑁂 𑀓𑁂𑀘𑀺 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀬𑁂 𑀫𑀕𑁆𑀕𑁂 𑀉𑀧𑁆𑀧𑀸𑀤𑁂𑀢𑀺, 𑀢𑁂 𑀲𑀩𑁆𑀩𑁂 𑀢𑀁𑀢𑀁𑀛𑀸𑀦𑀲𑀤𑀺𑀲𑀸𑀯 𑀳𑁄𑀦𑁆𑀢𑀺. 𑀬𑀁 𑀬𑀁 𑀯𑀸 𑀧𑀦 𑀛𑀸𑀦𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀘 𑀅𑀦𑀺𑀘𑁆𑀘𑀸𑀤𑀺𑀢𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀬𑁂 𑀬𑁂 𑀫𑀕𑁆𑀕𑁂 𑀉𑀧𑁆𑀧𑀸𑀤𑁂𑀢𑀺, 𑀢𑁂 𑀘 𑀢𑀁𑀢𑀁𑀛𑀸𑀦𑀲𑀤𑀺𑀲𑀸𑀯 𑀳𑁄𑀦𑁆𑀢𑀺 𑀪𑀽𑀫𑀺𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑀸 𑀕𑁄𑀥𑀸 𑀯𑀺𑀬. 𑀢𑀢𑁆𑀣 𑀘 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀦𑁆𑀦𑀫𑀕𑁆𑀕𑀸𑀧𑀺, 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀸 𑀛𑀸𑀦𑀁 𑀧𑀸𑀤𑀓𑀁 𑀅𑀓𑀢𑁆𑀯𑀸 𑀅𑀲𑀫𑁆𑀫𑀲𑀺𑀢𑁆𑀯𑀸𑀯 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀸𑀧𑀺 𑀧𑀞𑀫𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀢𑀁 𑀢𑀁 𑀯𑀸 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀸𑀧𑀺 𑀲𑀩𑁆𑀩𑁂 𑀏𑀓𑀲𑀤𑀺𑀲𑀸 𑀧𑀞𑀫𑀚𑁆𑀛𑀸𑀦𑀺𑀓𑀸𑀯 𑀳𑁄𑀦𑁆𑀢𑀺. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑁄 𑀦𑀸𑀫 𑀅𑀢𑁆𑀣𑀺. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀯𑀸 𑀢𑀢𑁆𑀣 𑀕𑀢𑁂 𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀸 𑀬𑀣𑀸𑀓𑁆𑀓𑀫𑀁 𑀘𑀢𑀼𑀭𑀗𑁆𑀕𑀺𑀓𑀸, 𑀢𑀺𑀯𑀗𑁆𑀕𑀺𑀓𑀸, 𑀤𑀼𑀯𑀗𑁆𑀕𑀺𑀓𑀸 𑀘 𑀳𑁄𑀦𑁆𑀢𑀺. 𑀧𑀜𑁆𑀘𑀫𑀚𑁆𑀛𑀸𑀦𑀁, 𑀧𑀦 𑀆𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀺 𑀘 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀸 𑀢𑀢𑁆𑀣 𑀕𑀢𑁂 𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀸 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀤𑀼𑀯𑀗𑁆𑀕𑀺𑀓𑀸𑀯 𑀳𑁄𑀦𑁆𑀢𑀺. 𑀏𑀢𑁂𑀲𑀜𑁆𑀘 𑀧𑀜𑁆𑀘𑀦𑁆𑀦𑀁 𑀛𑀸𑀦𑀺𑀓𑀸𑀦𑀫𑁆𑀧𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀧𑀺 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀧𑀺, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀯𑀺𑀧𑀲𑁆𑀲𑀦𑀸 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀳𑁄𑀢𑀺. 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀁 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯𑀸𑀢𑀺 𑀢𑀤𑁂𑀯 𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁 𑀯𑀸 𑀦𑀺𑀬𑀸𑀫𑀓𑀓𑀸𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀧𑀦 𑀧𑀞𑀫𑀚𑁆𑀛𑀸𑀦𑀺𑀓𑁂𑀲𑀼 𑀢𑀸𑀯 𑀘𑀢𑀽𑀲𑀼 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀥𑀫𑁆𑀫𑁂𑀲𑀼 𑀞𑀧𑁂𑀢𑁆𑀯𑀸 𑀓𑀭𑀼𑀡𑀸𑀫𑀼𑀤𑀺𑀢𑀸 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀯𑀺𑀭𑀢𑀺𑀬𑁄 𑀧𑀦𑁂𑀢𑁆𑀣 𑀦𑀺𑀬𑀢𑀸, 𑀧𑀸𑀴𑀺𑀬𑀜𑁆𑀘 (𑀥. 𑀲. 𑁨𑁭𑁭) 𑀭𑀽𑀧𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀙𑀦𑁆𑀤𑀸𑀤𑀬𑁄 𑀘 𑀘𑀢𑁆𑀢𑀸𑀭𑁄 𑀬𑁂𑀯𑀸𑀧𑀦𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀗𑁆𑀕𑀳𑀯𑀸𑀭𑁂 𑀧𑀦 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀧𑀼𑀩𑁆𑀩𑁂 𑀲𑀗𑁆𑀕𑀳𑀺𑀢𑀸𑀯𑀲𑁂𑀲𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀩𑁄𑀚𑁆𑀛𑀗𑁆𑀕𑀸𑀦𑀁 𑀯𑀲𑁂𑀦 𑀅𑀢𑀺𑀭𑁂𑀓𑀸 𑀘𑀢𑁆𑀢𑀸𑀭𑁄 𑀲𑀗𑁆𑀕𑀳𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀚𑁆𑀛𑀸𑀦𑀺𑀓𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀳𑀺 𑀥𑀫𑁆𑀫𑁂𑀲𑀼 𑀲𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀁, 𑀲𑀸 𑀯𑀺𑀲𑀬𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀸, 𑀇𑀢𑀭𑁂 𑀅𑀲𑁆𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀲𑀩𑁆𑀩𑁂𑀯 𑀢𑁂 𑀤𑁆𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀣𑀸 𑀯𑀻𑀭𑀺𑀬𑀁 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀢𑀁 𑀓𑀺𑀘𑁆𑀘𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀁, 𑀇𑀢𑀭𑁂 𑀅𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺. 𑀢𑀣𑀸 𑀙𑀦𑁆𑀤𑁄 𑀯𑀻𑀭𑀺𑀬𑀁 𑀘𑀺𑀢𑁆𑀢𑀁 𑀅𑀫𑁄𑀳𑁄𑀢𑀺 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀇𑀚𑁆𑀛𑀦𑀓𑀝𑁆𑀞𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄’’𑀢𑀺 𑀦𑀸𑀫𑁂𑀦 ‘‘𑀇𑀤𑁆𑀥𑀺𑀧𑀸𑀤𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 ‘‘𑀅𑀦𑀺𑀤𑁆𑀥𑀺𑀧𑀸𑀤𑀸’’𑀢𑀺. 𑀢𑀣𑀸 𑀲𑀢𑀺 𑀅𑀫𑁄𑀳𑁄 𑀯𑀻𑀭𑀺𑀬𑀁 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺 𑀲𑀫𑀸𑀥𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀇𑀫𑁂 𑀲𑀢𑁆𑀢 𑀥𑀫𑁆𑀫𑀸 𑀩𑀼𑀚𑁆𑀛𑀦𑀝𑁆𑀞𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 𑀅𑀩𑁄𑀚𑁆𑀛𑀗𑁆𑀕𑀸𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀲𑀗𑁆𑀕𑀳𑀸.

𑀲𑁂𑀲𑀁 𑀲𑀩𑁆𑀩𑀁 𑀮𑀓𑁆𑀔𑀡𑀸𑀤𑀺𑀢𑁄 𑀧𑀝𑁆𑀞𑀸𑀬 𑀲𑀼𑀜𑁆𑀜𑀢𑀯𑀸𑀭𑀧𑀭𑀺𑀬𑁄𑀲𑀸𑀦𑀁 𑀓𑀸𑀫𑀸𑀯𑀘𑀭𑀧𑀞𑀫𑀓𑀼𑀲𑀮𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯, 𑀓𑁂𑀯𑀮𑀁 𑀧𑀦 𑀫𑀕𑁆𑀕𑀗𑁆𑀕𑀲𑀗𑁆𑀕𑀳𑁂 ‘‘𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 (𑀥. 𑀲. 𑁩𑁩𑁭) 𑀧𑀤𑀪𑀸𑀚𑀦𑀻𑀬𑁂 𑀲𑀭𑀽𑀧𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀲𑀗𑁆𑀕𑀳𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀝𑁆𑀞𑀸𑀦𑁂 𑀧𑀞𑀫𑀫𑀕𑁆𑀕𑀲𑁆𑀲 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀕𑀳𑁂𑀢𑁆𑀯𑀸 𑀇𑀢𑀭𑀫𑀕𑁆𑀕𑀸𑀦𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀕𑀳𑁂𑀢𑁆𑀯𑀸𑀯 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀢𑀸, 𑀲𑀩𑁆𑀩𑀢𑁆𑀣 𑀮𑁄𑀓𑀼𑀢𑁆𑀢𑀭𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀧𑀞𑀫𑀚𑁆𑀛𑀸𑀦𑀺𑀓𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸.

𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁂𑀲𑀼𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀯𑀺𑀢𑀓𑁆𑀓𑀸𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀘𑀢𑀼𑀭𑀗𑁆𑀕𑀚𑁆𑀛𑀸𑀦𑀢𑀸, 𑀲𑀢𑁆𑀢𑀗𑁆𑀕𑀫𑀕𑁆𑀕𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀧𑀞𑀫𑀚𑁆𑀛𑀸𑀦𑀺𑀓𑀲𑀤𑀺𑀲𑀫𑁂𑀯. 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀫𑀕𑁆𑀕𑀸.

𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑀺𑀓𑁂𑀲𑀼𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀯𑀺𑀘𑀸𑀭𑀸𑀪𑀸𑀯𑁄, 𑀲𑀗𑁆𑀕𑀳𑀯𑀸𑀭𑁂 𑀢𑀺𑀯𑀗𑁆𑀕𑀺𑀓𑀚𑁆𑀛𑀸𑀦𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀲𑀤𑀺𑀲𑀫𑁂𑀯. 𑀢𑀢𑀺𑀬𑀚𑁆𑀛𑀸𑀦𑀺𑀓𑀫𑀕𑁆𑀕𑀸.

𑀢𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑁂𑀲𑀼𑀧𑀺 𑀓𑁂𑀯𑀮𑀁 𑀥𑀫𑁆𑀫𑀼𑀤𑁆𑀤𑁂𑀲𑁂 𑀧𑀻𑀢𑀺𑀬𑀸 𑀅𑀪𑀸𑀯𑁄, 𑀓𑁄𑀝𑁆𑀞𑀸𑀲𑀯𑀸𑀭𑁂 𑀤𑀼𑀯𑀗𑁆𑀕𑀺𑀓𑀚𑁆𑀛𑀸𑀦𑀢𑀸, 𑀙𑀴𑀗𑁆𑀕𑀺𑀓𑀩𑁄𑀚𑁆𑀛𑀗𑁆𑀕𑀢𑀸 𑀘 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀢𑀺𑀬𑀚𑁆𑀛𑀸𑀦𑀺𑀓𑀲𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀫𑀕𑁆𑀕𑀸.

𑀢𑀣𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁂𑀲𑀼𑀧𑀺 𑀓𑁂𑀯𑀮𑀁 𑀲𑀩𑁆𑀩𑀢𑁆𑀣 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀫𑁂𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀲𑀤𑀺𑀲𑀫𑁂𑀯. 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀫𑀕𑁆𑀕𑀸. 𑀏𑀯𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀤𑀺𑀢𑁄 𑀯𑀺𑀦𑀺𑀘𑁆𑀙𑀬𑁄.