𑁩. 𑀉𑀤𑀸𑀬𑀺𑀯𑀕𑁆𑀕𑁄

𑁧. 𑀩𑁄𑀥𑀸𑀬𑀲𑀼𑀢𑁆𑀢𑀁

𑁨𑁦𑁨. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘‘𑀩𑁄𑀚𑁆𑀛𑀗𑁆𑀕𑀸, 𑀩𑁄𑀚𑁆𑀛𑀗𑁆𑀕𑀸’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀦𑁆𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, ‘𑀩𑁄𑀚𑁆𑀛𑀗𑁆𑀕𑀸’𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺? ‘‘‘𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀩𑁄𑀚𑁆𑀛𑀗𑁆𑀕𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀥, 𑀪𑀺𑀓𑁆𑀔𑀼, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. ‘𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀲𑁆𑀫𑀸 ‘𑀩𑁄𑀚𑁆𑀛𑀗𑁆𑀕𑀸’𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀧𑀞𑀫𑀁.

𑁨. 𑀩𑁄𑀚𑁆𑀛𑀗𑁆𑀕𑀤𑁂𑀲𑀦𑀸𑀲𑀼𑀢𑁆𑀢𑀁

𑁨𑁦𑁩. ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑁂 𑀤𑁂𑀲𑁂𑀲𑁆𑀲𑀸𑀫𑀺; 𑀢𑀁 𑀲𑀼𑀡𑀸𑀣. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀞𑀸𑀦𑀺𑀬𑀲𑀼𑀢𑁆𑀢𑀁

𑁨𑁦𑁪. ‘‘𑀓𑀸𑀫𑀭𑀸𑀕𑀝𑁆𑀞𑀸𑀦𑀺𑀬𑀸𑀦𑀁, [𑀓𑀸𑀫𑀭𑀸𑀕𑀝𑁆𑀞𑀸𑀦𑀻𑀬𑀸𑀦𑀁 (𑀲𑀻.)] 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺. 𑀩𑁆𑀬𑀸𑀧𑀸𑀤𑀝𑁆𑀞𑀸𑀦𑀺𑀬𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀩𑁆𑀬𑀸𑀧𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀩𑁆𑀬𑀸𑀧𑀸𑀤𑁄 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺. 𑀣𑀺𑀦𑀫𑀺𑀤𑁆𑀥𑀝𑁆𑀞𑀸𑀦𑀺𑀬𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀣𑀺𑀦𑀫𑀺𑀤𑁆𑀥𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀁 𑀲𑀁𑀯𑀢𑁆𑀢𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀝𑁆𑀞𑀸𑀦𑀺𑀬𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀺𑀬𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀼𑀢𑁆𑀢𑀁

𑁨𑁦𑁫. ‘‘𑀅𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀩𑁆𑀬𑀸𑀧𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀩𑁆𑀬𑀸𑀧𑀸𑀤𑁄 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀣𑀺𑀦𑀫𑀺𑀤𑁆𑀥𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀺𑀭𑀼𑀚𑁆𑀛𑀢𑀺…𑀧𑁂… 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀺𑀭𑀼𑀚𑁆𑀛𑀢𑀺.

𑀬𑁄𑀦𑀺𑀲𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀓𑀸𑀫𑀘𑁆𑀙𑀦𑁆𑀤𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀩𑁆𑀬𑀸𑀧𑀸𑀤𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺; 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀣𑀺𑀦𑀫𑀺𑀤𑁆𑀥𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺; 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺; 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀯𑀺𑀘𑀺𑀓𑀺𑀘𑁆𑀙𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺.

‘‘𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺…𑀧𑁂… 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀧𑀭𑀺𑀳𑀸𑀦𑀺𑀬𑀲𑀼𑀢𑁆𑀢𑀁

𑁨𑁦𑁬. ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺; 𑀢𑀁 𑀲𑀼𑀡𑀸𑀣. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀬𑀤𑀺𑀤𑀁 𑁋 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀢𑀡𑁆𑀳𑀓𑁆𑀔𑀬𑀲𑀼𑀢𑁆𑀢𑀁

𑁨𑁦𑁭. ‘‘𑀬𑁄, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀬𑀸 𑀧𑀝𑀺𑀧𑀤𑀸 𑀢𑀡𑁆𑀳𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀫𑀕𑁆𑀕𑀁 𑀢𑀁 𑀧𑀝𑀺𑀧𑀤𑀁 𑀪𑀸𑀯𑁂𑀣. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀓𑀢𑀫𑀸 𑀘 𑀧𑀝𑀺𑀧𑀤𑀸 𑀢𑀡𑁆𑀳𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺? 𑀬𑀤𑀺𑀤𑀁 𑁋 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀁 𑀪𑀸𑀯𑀺𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀢𑀡𑁆𑀳𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺?

‘‘𑀇𑀥, 𑀉𑀤𑀸𑀬𑀺, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁 𑀯𑀺𑀧𑀼𑀮𑀁 𑀫𑀳𑀕𑁆𑀕𑀢𑀁 𑀅𑀧𑁆𑀧𑀫𑀸𑀡𑀁 𑀅𑀩𑁆𑀬𑀸𑀧𑀚𑁆𑀚𑀁 [𑀅𑀩𑁆𑀬𑀸𑀧𑀚𑁆𑀛𑀁 (𑀲𑀻. 𑀲𑁆𑀬𑀸. 𑀧𑀻.)]. 𑀢𑀲𑁆𑀲 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑀬𑀢𑁄 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁 𑀯𑀺𑀧𑀼𑀮𑀁 𑀫𑀳𑀕𑁆𑀕𑀢𑀁 𑀅𑀧𑁆𑀧𑀫𑀸𑀡𑀁 𑀅𑀩𑁆𑀬𑀸𑀧𑀚𑁆𑀚𑀁 𑀢𑀡𑁆𑀳𑀸 𑀧𑀳𑀻𑀬𑀢𑀺. 𑀢𑀡𑁆𑀳𑀸𑀬 𑀧𑀳𑀸𑀦𑀸 𑀓𑀫𑁆𑀫𑀁 𑀧𑀳𑀻𑀬𑀢𑀺. 𑀓𑀫𑁆𑀫𑀲𑁆𑀲 𑀧𑀳𑀸𑀦𑀸 𑀤𑀼𑀓𑁆𑀔𑀁 𑀧𑀳𑀻𑀬𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁 𑀯𑀺𑀧𑀼𑀮𑀁 𑀫𑀳𑀕𑁆𑀕𑀢𑀁 𑀅𑀧𑁆𑀧𑀫𑀸𑀡𑀁 𑀅𑀩𑁆𑀬𑀸𑀧𑀚𑁆𑀚𑀁. 𑀢𑀲𑁆𑀲 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑀬𑀢𑁄 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁 𑀯𑀺𑀧𑀼𑀮𑀁 𑀫𑀳𑀕𑁆𑀕𑀢𑀁 𑀅𑀧𑁆𑀧𑀫𑀸𑀡𑀁 𑀅𑀩𑁆𑀬𑀸𑀧𑀚𑁆𑀚𑀁 𑀢𑀡𑁆𑀳𑀸 𑀧𑀳𑀻𑀬𑀢𑀺 𑀢𑀡𑁆𑀳𑀸𑀬 𑀧𑀳𑀸𑀦𑀸 𑀓𑀫𑁆𑀫𑀁 𑀧𑀳𑀻𑀬𑀢𑀺. 𑀓𑀫𑁆𑀫𑀲𑁆𑀲 𑀧𑀳𑀸𑀦𑀸 𑀤𑀼𑀓𑁆𑀔𑀁 𑀧𑀳𑀻𑀬𑀢𑀺. 𑀇𑀢𑀺 𑀔𑁄, 𑀉𑀤𑀸𑀬𑀺, 𑀢𑀡𑁆𑀳𑀓𑁆𑀔𑀬𑀸 𑀓𑀫𑁆𑀫𑀓𑁆𑀔𑀬𑁄, 𑀓𑀫𑁆𑀫𑀓𑁆𑀔𑀬𑀸 𑀤𑀼𑀓𑁆𑀔𑀓𑁆𑀔𑀬𑁄’’𑀢𑀺. 𑀙𑀝𑁆𑀞𑀁.

𑁭. 𑀢𑀡𑁆𑀳𑀸𑀦𑀺𑀭𑁄𑀥𑀲𑀼𑀢𑁆𑀢𑀁

𑁨𑁦𑁮. ‘‘𑀬𑁄, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀬𑀸 𑀧𑀝𑀺𑀧𑀤𑀸 𑀢𑀡𑁆𑀳𑀸𑀦𑀺𑀭𑁄𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀫𑀕𑁆𑀕𑀁 𑀢𑀁 𑀧𑀝𑀺𑀧𑀤𑀁 𑀪𑀸𑀯𑁂𑀣. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀓𑀢𑀫𑀸 𑀘 𑀧𑀝𑀺𑀧𑀤𑀸 𑀢𑀡𑁆𑀳𑀸𑀦𑀺𑀭𑁄𑀥𑀸𑀬 𑀲𑀁𑀯𑀢𑁆𑀢𑀢𑀺? 𑀬𑀤𑀺𑀤𑀁 𑁋 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀓𑀣𑀁 𑀪𑀸𑀯𑀺𑀢𑀸, 𑀘 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀢𑀡𑁆𑀳𑀸𑀦𑀺𑀭𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺?

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀏𑀯𑀁 𑀩𑀳𑀼𑀮𑀻𑀓𑀢𑀸 𑀢𑀡𑁆𑀳𑀸𑀦𑀺𑀭𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀁

𑁨𑁦𑁯. ‘‘𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑀁 𑀤𑁂𑀲𑁂𑀲𑁆𑀲𑀸𑀫𑀺; 𑀢𑀁 𑀲𑀼𑀡𑀸𑀣. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀫𑀕𑁆𑀕𑁄? 𑀬𑀤𑀺𑀤𑀁 𑁋 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀁 𑀪𑀸𑀯𑀺𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀦𑀺𑀩𑁆𑀩𑁂𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺?

‘‘𑀇𑀥, 𑀉𑀤𑀸𑀬𑀺, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁 𑀯𑀺𑀧𑀼𑀮𑀁 𑀫𑀳𑀕𑁆𑀕𑀢𑀁 𑀅𑀧𑁆𑀧𑀫𑀸𑀡𑀁 𑀅𑀩𑁆𑀬𑀸𑀧𑀚𑁆𑀚𑀁. 𑀲𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑀺𑀢𑁂𑀦 𑀘𑀺𑀢𑁆𑀢𑁂𑀦 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀺; 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀤𑁄𑀲𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀺; 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀫𑁄𑀳𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁 𑀯𑀺𑀧𑀼𑀮𑀁 𑀫𑀳𑀕𑁆𑀕𑀢𑀁 𑀅𑀧𑁆𑀧𑀫𑀸𑀡𑀁 𑀅𑀩𑁆𑀬𑀸𑀧𑀚𑁆𑀚𑀁. 𑀲𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑀺𑀢𑁂𑀦 𑀘𑀺𑀢𑁆𑀢𑁂𑀦 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀺; 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀤𑁄𑀲𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀺; 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀫𑁄𑀳𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀺. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀉𑀤𑀸𑀬𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀏𑀯𑀁 𑀩𑀳𑀼𑀮𑀻𑀓𑀢𑀸 𑀦𑀺𑀩𑁆𑀩𑁂𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀏𑀓𑀥𑀫𑁆𑀫𑀲𑀼𑀢𑁆𑀢𑀁

𑁨𑁧𑁦. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁄 𑀏𑀯𑀁 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀲𑀁𑀬𑁄𑀚𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀲𑀁𑀬𑁄𑀚𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺?

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀏𑀯𑀁 𑀩𑀳𑀼𑀮𑀻𑀓𑀢𑀸 𑀲𑀁𑀬𑁄𑀚𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀻𑀬𑀸 𑀥𑀫𑁆𑀫𑀸? 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀻𑀬𑁄 𑀥𑀫𑁆𑀫𑁄. 𑀏𑀢𑁆𑀣𑁂𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀁𑀬𑁄𑀚𑀦𑀯𑀺𑀦𑀺𑀩𑀦𑁆𑀥𑀸 𑀅𑀚𑁆𑀛𑁄𑀲𑀸𑀦𑀸…𑀧𑁂… 𑀚𑀺𑀯𑁆𑀳𑀸 𑀲𑀁𑀬𑁄𑀚𑀦𑀻𑀬𑀸 𑀥𑀫𑁆𑀫𑀸. 𑀏𑀢𑁆𑀣𑁂𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀁𑀬𑁄𑀚𑀦𑀯𑀺𑀦𑀺𑀩𑀦𑁆𑀥𑀸 𑀅𑀚𑁆𑀛𑁄𑀲𑀸𑀦𑀸…𑀧𑁂… 𑀫𑀦𑁄 𑀲𑀁𑀬𑁄𑀚𑀦𑀻𑀬𑁄 𑀥𑀫𑁆𑀫𑁄. 𑀏𑀢𑁆𑀣𑁂𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀁𑀬𑁄𑀚𑀦𑀯𑀺𑀦𑀺𑀩𑀦𑁆𑀥𑀸 𑀅𑀚𑁆𑀛𑁄𑀲𑀸𑀦𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀻𑀬𑀸 𑀥𑀫𑁆𑀫𑀸’’𑀢𑀺. 𑀦𑀯𑀫𑀁.

𑁧𑁦. 𑀉𑀤𑀸𑀬𑀺𑀲𑀼𑀢𑁆𑀢𑀁

𑁨𑁧𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀼𑀫𑁆𑀪𑁂𑀲𑀼 𑀯𑀺𑀳𑀭𑀢𑀺 𑀲𑁂𑀢𑀓𑀁 𑀦𑀸𑀫 𑀲𑀼𑀫𑁆𑀪𑀸𑀦𑀁 𑀦𑀺𑀕𑀫𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯 𑀩𑀳𑀼𑀓𑀢𑀜𑁆𑀘 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑀺 𑀧𑁂𑀫𑀜𑁆𑀘 𑀕𑀸𑀭𑀯𑁄 𑀘 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘. 𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄 𑀲𑀫𑀸𑀦𑁄 𑀅𑀩𑀳𑀼𑀓𑀢𑁄 𑀅𑀳𑁄𑀲𑀺𑀁 𑀥𑀫𑁆𑀫𑁂𑀦 [𑀥𑀫𑁆𑀫𑁂 (?)] 𑀅𑀩𑀳𑀼𑀓𑀢𑁄 𑀲𑀗𑁆𑀖𑁂𑀦. 𑀲𑁄 𑀔𑁆𑀯𑀸𑀳𑀁 𑀪𑀕𑀯𑀢𑀺 𑀧𑁂𑀫𑀜𑁆𑀘 𑀕𑀸𑀭𑀯𑀜𑁆𑀘 𑀳𑀺𑀭𑀺𑀜𑁆𑀘 𑀑𑀢𑁆𑀢𑀧𑁆𑀧𑀜𑁆𑀘 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀢𑀲𑁆𑀲 𑀫𑁂 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸…𑀧𑁂… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺.

‘‘𑀲𑁄 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀇𑀫𑁂𑀲𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀓𑁆𑀓𑀼𑀚𑁆𑀚𑀸𑀯𑀓𑀼𑀚𑁆𑀚𑀁 𑀲𑀫𑁆𑀧𑀭𑀺𑀯𑀢𑁆𑀢𑁂𑀦𑁆𑀢𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀥𑀫𑁆𑀫𑁄 𑀘 𑀫𑁂, 𑀪𑀦𑁆𑀢𑁂, 𑀅𑀪𑀺𑀲𑀫𑀺𑀢𑁄, 𑀫𑀕𑁆𑀕𑁄 𑀘 𑀫𑁂 𑀧𑀝𑀺𑀮𑀤𑁆𑀥𑁄; 𑀬𑁄 𑀫𑁂 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀢𑀣𑀸 𑀢𑀣𑀸 𑀯𑀺𑀳𑀭𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀲𑁆𑀲𑀢𑀺 𑀬𑀣𑀸𑀳𑀁 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀺𑀲𑁆𑀲𑀸𑀫𑀺.

‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑁂, 𑀪𑀦𑁆𑀢𑁂, 𑀧𑀝𑀺𑀮𑀤𑁆𑀥𑁄, 𑀬𑁄 𑀫𑁂 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀢𑀣𑀸 𑀢𑀣𑀸 𑀯𑀺𑀳𑀭𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀲𑁆𑀲𑀢𑀺 𑀬𑀣𑀸𑀳𑀁 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀺𑀲𑁆𑀲𑀸𑀫𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑁂, 𑀪𑀦𑁆𑀢𑁂, 𑀧𑀝𑀺𑀮𑀤𑁆𑀥𑁄, 𑀬𑁄 𑀫𑁂 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀢𑀣𑀸 𑀢𑀣𑀸 𑀯𑀺𑀳𑀭𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀲𑁆𑀲𑀢𑀺 𑀬𑀣𑀸𑀳𑀁 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀺𑀲𑁆𑀲𑀸𑀫𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀫𑀕𑁆𑀕𑁄 𑀧𑀝𑀺𑀮𑀤𑁆𑀥𑁄, 𑀬𑁄 𑀫𑁂 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀢𑀣𑀸 𑀢𑀣𑀸 𑀯𑀺𑀳𑀭𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀲𑁆𑀲𑀢𑀺 𑀬𑀣𑀸𑀳𑀁 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀉𑀤𑀸𑀬𑀺! 𑀏𑀲𑁄 𑀳𑀺 𑀢𑁂, 𑀉𑀤𑀸𑀬𑀺, 𑀫𑀕𑁆𑀕𑁄 𑀧𑀝𑀺𑀮𑀤𑁆𑀥𑁄, 𑀬𑁄 𑀢𑁂 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀢𑀣𑀸 𑀢𑀣𑀸 𑀯𑀺𑀳𑀭𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀲𑁆𑀲𑀢𑀺 𑀬𑀣𑀸 𑀢𑁆𑀯𑀁 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀺𑀲𑁆𑀲𑀲𑀻’’𑀢𑀺. 𑀤𑀲𑀫𑀁.

𑀉𑀤𑀸𑀬𑀺𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀩𑁄𑀥𑀸𑀬 𑀤𑁂𑀲𑀦𑀸 𑀞𑀸𑀦𑀸, 𑀅𑀬𑁄𑀦𑀺𑀲𑁄 𑀘𑀸𑀧𑀭𑀺𑀳𑀸𑀦𑀻;

𑀔𑀬𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑁂𑀥𑁄, 𑀏𑀓𑀥𑀫𑁆𑀫𑁄 𑀉𑀤𑀸𑀬𑀺𑀦𑀸𑀢𑀺.