𑁪. 𑀦𑀻𑀯𑀭𑀡𑀯𑀕𑁆𑀕𑁄

𑁧. 𑀧𑀞𑀫𑀓𑀼𑀲𑀮𑀲𑀼𑀢𑁆𑀢𑀁

𑁨𑁧𑁨. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀪𑀸𑀕𑀺𑀬𑀸 𑀓𑀼𑀲𑀮𑀧𑀓𑁆𑀔𑀺𑀓𑀸, 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸 𑀅𑀧𑁆𑀧𑀫𑀸𑀤𑀲𑀫𑁄𑀲𑀭𑀡𑀸; 𑀅𑀧𑁆𑀧𑀫𑀸𑀤𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀅𑀧𑁆𑀧𑀫𑀢𑁆𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀲𑁆𑀲𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀧𑁆𑀧𑀫𑀢𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀳𑀼𑀮𑀻𑀓𑀭𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀧𑁆𑀧𑀫𑀢𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀓𑀼𑀲𑀮𑀲𑀼𑀢𑁆𑀢𑀁

𑁨𑁧𑁩. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀪𑀸𑀕𑀺𑀬𑀸 𑀓𑀼𑀲𑀮𑀧𑀓𑁆𑀔𑀺𑀓𑀸, 𑀲𑀩𑁆𑀩𑁂 𑀢𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁄𑀲𑀭𑀡𑀸; 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀲𑁆𑀲𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀳𑀼𑀮𑀻𑀓𑀭𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀁

𑁨𑁧𑁪. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀚𑀸𑀢𑀭𑀽𑀧𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬. 𑀓𑀢𑀫𑁂 𑀧𑀜𑁆𑀘? 𑀅𑀬𑁄, 𑀪𑀺𑀓𑁆𑀔𑀯𑁂, 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀚𑀸𑀢𑀭𑀽𑀧𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬. 𑀮𑁄𑀳𑀁, 𑀪𑀺𑀓𑁆𑀔𑀯𑁂, 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀚𑀸𑀢𑀭𑀽𑀧𑀁…𑀧𑁂… 𑀢𑀺𑀧𑀼, 𑀪𑀺𑀓𑁆𑀔𑀯𑁂, 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄…𑀧𑁂… 𑀲𑀻𑀲𑀁, 𑀪𑀺𑀓𑁆𑀔𑀯𑁂, 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄…𑀧𑁂… 𑀲𑀚𑁆𑀛𑀼, 𑀪𑀺𑀓𑁆𑀔𑀯𑁂, 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀚𑀸𑀢𑀭𑀽𑀧𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀚𑀸𑀢𑀭𑀽𑀧𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂 𑀧𑀜𑁆𑀘? 𑀓𑀸𑀫𑀘𑁆𑀙𑀦𑁆𑀤𑁄, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬…𑀧𑁂… 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀘𑀺𑀢𑁆𑀢𑀲𑁆𑀲 𑀉𑀧𑁂𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀫𑀼𑀤𑀼 𑀳𑁄𑀢𑀺 𑀦 𑀘 𑀓𑀫𑁆𑀫𑀦𑀺𑀬𑀁, 𑀦 𑀘 𑀧𑀪𑀲𑁆𑀲𑀭𑀁 𑀧𑀪𑀗𑁆𑀕𑀼 𑀘, 𑀦 𑀘 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺. 𑀢𑀢𑀺𑀬𑀁.

𑁪. 𑀅𑀦𑀼𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀁

𑁨𑁧𑁫. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀯𑀭𑀡𑁄 𑀅𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀯𑀭𑀡𑁄 𑀅𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀼𑀢𑁆𑀢𑀁

𑁨𑁧𑁬. ‘‘𑀅𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀩𑁆𑀬𑀸𑀧𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀩𑁆𑀬𑀸𑀧𑀸𑀤𑁄 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀣𑀺𑀦𑀫𑀺𑀤𑁆𑀥𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺; 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀼𑀢𑁆𑀢𑀁

𑁨𑁧𑁭. ‘‘𑀬𑁄𑀦𑀺𑀲𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺…𑀧𑁂… 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀩𑀼𑀤𑁆𑀥𑀺𑀲𑀼𑀢𑁆𑀢𑀁

𑁨𑁧𑁮. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀆𑀯𑀭𑀡𑀦𑀻𑀯𑀭𑀡𑀲𑀼𑀢𑁆𑀢𑀁

𑁨𑁧𑁯. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀓𑀢𑀫𑁂 𑀧𑀜𑁆𑀘? 𑀓𑀸𑀫𑀘𑁆𑀙𑀦𑁆𑀤𑁄, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑁄 𑀦𑀻𑀯𑀭𑀡𑁄 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁄 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁄. 𑀩𑁆𑀬𑀸𑀧𑀸𑀤𑁄, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑁄 𑀦𑀻𑀯𑀭𑀡𑁄 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁄 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁄. 𑀣𑀺𑀦𑀫𑀺𑀤𑁆𑀥𑀁, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑀁 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀁. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑀁 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀁. 𑀯𑀺𑀘𑀺𑀓𑀺𑀘𑁆𑀙𑀸, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸.

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀯𑀭𑀡𑁄 𑀅𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀯𑀭𑀡𑁄 𑀅𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀇𑀫𑀲𑁆𑀲 𑀧𑀜𑁆𑀘 𑀦𑀻𑀯𑀭𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀺. 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀓𑀢𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀺? 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀇𑀫𑀲𑁆𑀲 𑀧𑀜𑁆𑀘 𑀦𑀻𑀯𑀭𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀺.

‘‘𑀓𑀢𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀇𑀫𑀲𑁆𑀲 𑀧𑀜𑁆𑀘 𑀦𑀻𑀯𑀭𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀺. 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀭𑀼𑀓𑁆𑀔𑀲𑀼𑀢𑁆𑀢𑀁

𑁨𑁨𑁦. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀭𑀼𑀓𑁆𑀔𑀸 𑀅𑀡𑀼𑀩𑀻𑀚𑀸 𑀫𑀳𑀸𑀓𑀸𑀬𑀸 𑀭𑀼𑀓𑁆𑀔𑀸𑀦𑀁 𑀅𑀚𑁆𑀛𑀸𑀭𑀼𑀳𑀸, 𑀬𑁂𑀳𑀺 𑀭𑀼𑀓𑁆𑀔𑀸 𑀅𑀚𑁆𑀛𑀸𑀭𑀽𑀴𑁆𑀳𑀸 𑀑𑀪𑀕𑁆𑀕𑀯𑀺𑀪𑀕𑁆𑀕𑀸 𑀯𑀺𑀧𑀢𑀺𑀢𑀸 𑀲𑁂𑀦𑁆𑀢𑀺. 𑀓𑀢𑀫𑁂 𑀘 𑀢𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀭𑀼𑀓𑁆𑀔𑀸 𑀅𑀡𑀼𑀩𑀻𑀚𑀸 𑀫𑀳𑀸𑀓𑀸𑀬𑀸 𑀭𑀼𑀓𑁆𑀔𑀸𑀦𑀁 𑀅𑀚𑁆𑀛𑀸𑀭𑀼𑀳𑀸, 𑀬𑁂𑀳𑀺 𑀭𑀼𑀓𑁆𑀔𑀸 𑀅𑀚𑁆𑀛𑀸𑀭𑀽𑀴𑁆𑀳𑀸 𑀑𑀪𑀕𑁆𑀕𑀯𑀺𑀪𑀕𑁆𑀕𑀸 𑀯𑀺𑀧𑀢𑀺𑀢𑀸 𑀲𑁂𑀦𑁆𑀢𑀺 [𑀲𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 (𑀓𑀢𑁆𑀣𑀘𑀺)]? 𑀅𑀲𑁆𑀲𑀢𑁆𑀣𑁄, 𑀦𑀺𑀕𑁆𑀭𑁄𑀥𑁄, 𑀧𑀺𑀮𑀓𑁆𑀔𑁄, 𑀉𑀤𑀼𑀫𑁆𑀩𑀭𑁄, 𑀓𑀘𑁆𑀙𑀓𑁄, 𑀓𑀧𑀺𑀢𑁆𑀣𑀦𑁄 𑁋 𑀇𑀫𑁂 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀭𑀼𑀓𑁆𑀔𑀸 𑀅𑀡𑀼𑀩𑀻𑀚𑀸 𑀫𑀳𑀸𑀓𑀸𑀬𑀸 𑀭𑀼𑀓𑁆𑀔𑀸𑀦𑀁 𑀅𑀚𑁆𑀛𑀸𑀭𑀼𑀳𑀸, 𑀬𑁂𑀳𑀺 𑀭𑀼𑀓𑁆𑀔𑀸 𑀅𑀚𑁆𑀛𑀸𑀭𑀽𑀴𑁆𑀳𑀸 𑀑𑀪𑀕𑁆𑀕𑀯𑀺𑀪𑀕𑁆𑀕𑀸 𑀯𑀺𑀧𑀢𑀺𑀢𑀸 𑀲𑁂𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄 𑀬𑀸𑀤𑀺𑀲𑀓𑁂 𑀓𑀸𑀫𑁂 𑀑𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀲𑁄 𑀢𑀸𑀤𑀺𑀲𑀓𑁂𑀳𑀺 𑀓𑀸𑀫𑁂𑀳𑀺 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑁂𑀳𑀺 𑀑𑀪𑀕𑁆𑀕𑀯𑀺𑀪𑀕𑁆𑀕𑁄 𑀯𑀺𑀧𑀢𑀺𑀢𑁄 𑀲𑁂𑀢𑀺.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀓𑀢𑀫𑁂 𑀧𑀜𑁆𑀘? 𑀓𑀸𑀫𑀘𑁆𑀙𑀦𑁆𑀤𑁄, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑁄 𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑁄 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁄. 𑀩𑁆𑀬𑀸𑀧𑀸𑀤𑁄, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑁄 𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑁄 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁄. 𑀣𑀺𑀦𑀫𑀺𑀤𑁆𑀥𑀁, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀁 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀁. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀁 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀁. 𑀯𑀺𑀘𑀺𑀓𑀺𑀘𑁆𑀙𑀸, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸.

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀦𑀚𑁆𑀛𑀸𑀭𑀼𑀳𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀯𑀭𑀡𑁄 𑀅𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀦𑀚𑁆𑀛𑀸𑀭𑀼𑀳𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀯𑀭𑀡𑁄 𑀅𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀦𑀚𑁆𑀛𑀸𑀭𑀼𑀳𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀦𑀚𑁆𑀛𑀸𑀭𑀼𑀳𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀦𑀻𑀯𑀭𑀡𑀲𑀼𑀢𑁆𑀢𑀁

𑁨𑁨𑁧. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀦𑀻𑀯𑀭𑀡𑀸 𑀅𑀦𑁆𑀥𑀓𑀭𑀡𑀸 𑀅𑀘𑀓𑁆𑀔𑀼𑀓𑀭𑀡𑀸 𑀅𑀜𑁆𑀜𑀸𑀡𑀓𑀭𑀡𑀸 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀸 𑀯𑀺𑀖𑀸𑀢𑀧𑀓𑁆𑀔𑀺𑀬𑀸 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀸. 𑀓𑀢𑀫𑁂 𑀧𑀜𑁆𑀘? 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑁆𑀥𑀓𑀭𑀡𑀁 𑀅𑀘𑀓𑁆𑀔𑀼𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀬𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀁. 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁, 𑀪𑀺𑀓𑁆𑀔𑀯𑁂…𑀧𑁂… 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁, 𑀪𑀺𑀓𑁆𑀔𑀯𑁂… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁, 𑀪𑀺𑀓𑁆𑀔𑀯𑁂… 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑁆𑀥𑀓𑀭𑀡𑀁 𑀅𑀘𑀓𑁆𑀔𑀼𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀬𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀦𑀻𑀯𑀭𑀡𑀸 𑀅𑀦𑁆𑀥𑀓𑀭𑀡𑀸 𑀅𑀘𑀓𑁆𑀔𑀼𑀓𑀭𑀡𑀸 𑀅𑀜𑁆𑀜𑀸𑀡𑀓𑀭𑀡𑀸 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀸 𑀯𑀺𑀖𑀸𑀢𑀧𑀓𑁆𑀔𑀺𑀬𑀸 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀸.

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸 𑀘𑀓𑁆𑀔𑀼𑀓𑀭𑀡𑀸 𑀜𑀸𑀡𑀓𑀭𑀡𑀸 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑀸 𑀅𑀯𑀺𑀖𑀸𑀢𑀧𑀓𑁆𑀔𑀺𑀬𑀸 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀓𑀭𑀡𑁄 𑀜𑀸𑀡𑀓𑀭𑀡𑁄 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑁄 𑀅𑀯𑀺𑀖𑀸𑀢𑀧𑀓𑁆𑀔𑀺𑀬𑁄 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀓𑀭𑀡𑁄 𑀜𑀸𑀡𑀓𑀭𑀡𑁄 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑁄 𑀅𑀯𑀺𑀖𑀸𑀢𑀧𑀓𑁆𑀔𑀺𑀬𑁄 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀘𑀓𑁆𑀔𑀼𑀓𑀭𑀡𑀸 𑀜𑀸𑀡𑀓𑀭𑀡𑀸 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑀸 𑀅𑀯𑀺𑀖𑀸𑀢𑀧𑀓𑁆𑀔𑀺𑀬𑀸 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀸’’𑀢𑀺. 𑀤𑀲𑀫𑀁.

𑀦𑀻𑀯𑀭𑀡𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀓𑀼𑀲𑀮𑀸 𑀓𑀺𑀮𑁂𑀲𑀸 𑀘, 𑀤𑁆𑀯𑁂 𑀬𑁄𑀦𑀺𑀲𑁄 𑀘 𑀩𑀼𑀤𑁆𑀥𑀺 𑀘;

𑀆𑀯𑀭𑀡𑀸 𑀦𑀻𑀯𑀭𑀡𑀸 𑀭𑀼𑀓𑁆𑀔𑀁, 𑀦𑀻𑀯𑀭𑀡𑀜𑁆𑀘 𑀢𑁂 𑀤𑀲𑀸𑀢𑀺.