𑁪. 𑀤𑀼𑀢𑀺𑀬𑀲𑀁𑀪𑁂𑀚𑁆𑀚𑀲𑀼𑀢𑁆𑀢𑀁

𑁧𑁧𑁨𑁪. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀣𑀺𑀫𑀸 𑀫𑀳𑀸𑀦𑀤𑀺𑀬𑁄 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸, 𑀬𑀫𑀼𑀦𑀸, 𑀅𑀘𑀺𑀭𑀯𑀢𑀻, 𑀲𑀭𑀪𑀽, 𑀫𑀳𑀻, 𑀢𑀁 𑀉𑀤𑀓𑀁 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁 𑁋 𑀬𑀁 𑀯𑀸 𑀲𑀁𑀪𑁂𑀚𑁆𑀚𑀉𑀤𑀓𑀁 𑀧𑀭𑀺𑀓𑁆𑀔𑀻𑀡𑀁 𑀧𑀭𑀺𑀬𑀸𑀤𑀺𑀦𑁆𑀦𑀁, 𑀬𑀸𑀦𑀺 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀅𑀯𑀲𑀺𑀝𑁆𑀞𑀸𑀦𑀻’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀩𑀳𑀼𑀢𑀭𑀁 𑀲𑀁𑀪𑁂𑀚𑁆𑀚𑀉𑀤𑀓𑀁 𑀬𑀤𑀺𑀤𑀁 𑀧𑀭𑀺𑀓𑁆𑀔𑀻𑀡𑀁 𑀧𑀭𑀺𑀬𑀸𑀤𑀺𑀦𑁆𑀦𑀁; 𑀅𑀧𑁆𑀧𑀫𑀢𑁆𑀢𑀓𑀸𑀦𑀺 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀅𑀯𑀲𑀺𑀝𑁆𑀞𑀸𑀦𑀺. 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀦𑁆𑀢𑀺, 𑀉𑀧𑀦𑀺𑀥𑀫𑁆𑀧𑀺 𑀦 𑀉𑀧𑁂𑀦𑁆𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀦𑁆𑀢𑀺 𑀲𑀁𑀪𑁂𑀚𑁆𑀚𑀉𑀤𑀓𑀁 𑀧𑀭𑀺𑀓𑁆𑀔𑀻𑀡𑀁 𑀧𑀭𑀺𑀬𑀸𑀤𑀺𑀦𑁆𑀦𑀁 𑀉𑀧𑀦𑀺𑀥𑀸𑀬 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀅𑀯𑀲𑀺𑀝𑁆𑀞𑀸𑀦𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲…𑀧𑁂… 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺. 𑀘𑀢𑀼𑀢𑁆𑀣𑀁.