𑁨. 𑀧𑀼𑀭𑀺𑀲𑀲𑀼𑀢𑁆𑀢𑀁

𑁨𑁮𑁧. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀏𑀓𑀦𑁆𑀢𑀅𑀫𑀦𑀸𑀧𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀘 𑀭𑀽𑀧𑀯𑀸 𑀳𑁄𑀢𑀺, 𑀦 𑀘 𑀪𑁄𑀕𑀯𑀸 𑀳𑁄𑀢𑀺, 𑀦 𑀘 𑀲𑀻𑀮𑀯𑀸 𑀳𑁄𑀢𑀺, 𑀅𑀮𑀲𑁄 𑀘 𑀳𑁄𑀢𑀺, 𑀧𑀚𑀜𑁆𑀘𑀲𑁆𑀲 𑀦 𑀮𑀪𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀏𑀓𑀦𑁆𑀢𑀅𑀫𑀦𑀸𑀧𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲. 𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀏𑀓𑀦𑁆𑀢𑀫𑀦𑀸𑀧𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀭𑀽𑀧𑀯𑀸 𑀘 𑀳𑁄𑀢𑀺, 𑀪𑁄𑀕𑀯𑀸 𑀘 𑀳𑁄𑀢𑀺, 𑀲𑀻𑀮𑀯𑀸 𑀘 𑀳𑁄𑀢𑀺, 𑀤𑀓𑁆𑀔𑁄 𑀘 𑀳𑁄𑀢𑀺 𑀅𑀦𑀮𑀲𑁄, 𑀧𑀚𑀜𑁆𑀘𑀲𑁆𑀲 𑀮𑀪𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀏𑀓𑀦𑁆𑀢𑀫𑀦𑀸𑀧𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲𑀸’’𑀢𑀺. 𑀤𑀼𑀢𑀺𑀬𑀁.