𑁩. 𑀫𑀸𑀢𑀼𑀕𑀸𑀫𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀫𑀸𑀢𑀼𑀕𑀸𑀫𑀲𑀼𑀢𑁆𑀢𑀁

𑁨𑁮𑁦. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀏𑀓𑀦𑁆𑀢𑀅𑀫𑀦𑀸𑀧𑁄 𑀳𑁄𑀢𑀺 𑀧𑀼𑀭𑀺𑀲𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀘 𑀭𑀽𑀧𑀯𑀸 𑀳𑁄𑀢𑀺, 𑀦 𑀘 𑀪𑁄𑀕𑀯𑀸 𑀳𑁄𑀢𑀺, 𑀦 𑀘 𑀲𑀻𑀮𑀯𑀸 𑀳𑁄𑀢𑀺, 𑀅𑀮𑀲𑁄 𑀘 𑀳𑁄𑀢𑀺, 𑀧𑀚𑀜𑁆𑀘𑀲𑁆𑀲 𑀦 𑀮𑀪𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀏𑀓𑀦𑁆𑀢𑀅𑀫𑀦𑀸𑀧𑁄 𑀳𑁄𑀢𑀺 𑀧𑀼𑀭𑀺𑀲𑀲𑁆𑀲. 𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀏𑀓𑀦𑁆𑀢𑀫𑀦𑀸𑀧𑁄 𑀳𑁄𑀢𑀺 𑀧𑀼𑀭𑀺𑀲𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀭𑀽𑀧𑀯𑀸 𑀘 𑀳𑁄𑀢𑀺, 𑀪𑁄𑀕𑀯𑀸 𑀘 𑀳𑁄𑀢𑀺, 𑀲𑀻𑀮𑀯𑀸 𑀘 𑀳𑁄𑀢𑀺, 𑀤𑀓𑁆𑀔𑁄 𑀘 𑀳𑁄𑀢𑀺 𑀅𑀦𑀮𑀲𑁄, 𑀧𑀚𑀜𑁆𑀘𑀲𑁆𑀲 𑀮𑀪𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀏𑀓𑀦𑁆𑀢𑀫𑀦𑀸𑀧𑁄 𑀳𑁄𑀢𑀺 𑀧𑀼𑀭𑀺𑀲𑀲𑁆𑀲𑀸’’𑀢𑀺. 𑀧𑀞𑀫𑀁.

𑁨. 𑀧𑀼𑀭𑀺𑀲𑀲𑀼𑀢𑁆𑀢𑀁

𑁨𑁮𑁧. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀏𑀓𑀦𑁆𑀢𑀅𑀫𑀦𑀸𑀧𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀘 𑀭𑀽𑀧𑀯𑀸 𑀳𑁄𑀢𑀺, 𑀦 𑀘 𑀪𑁄𑀕𑀯𑀸 𑀳𑁄𑀢𑀺, 𑀦 𑀘 𑀲𑀻𑀮𑀯𑀸 𑀳𑁄𑀢𑀺, 𑀅𑀮𑀲𑁄 𑀘 𑀳𑁄𑀢𑀺, 𑀧𑀚𑀜𑁆𑀘𑀲𑁆𑀲 𑀦 𑀮𑀪𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀏𑀓𑀦𑁆𑀢𑀅𑀫𑀦𑀸𑀧𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲. 𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀏𑀓𑀦𑁆𑀢𑀫𑀦𑀸𑀧𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀭𑀽𑀧𑀯𑀸 𑀘 𑀳𑁄𑀢𑀺, 𑀪𑁄𑀕𑀯𑀸 𑀘 𑀳𑁄𑀢𑀺, 𑀲𑀻𑀮𑀯𑀸 𑀘 𑀳𑁄𑀢𑀺, 𑀤𑀓𑁆𑀔𑁄 𑀘 𑀳𑁄𑀢𑀺 𑀅𑀦𑀮𑀲𑁄, 𑀧𑀚𑀜𑁆𑀘𑀲𑁆𑀲 𑀮𑀪𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀏𑀓𑀦𑁆𑀢𑀫𑀦𑀸𑀧𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀆𑀯𑁂𑀡𑀺𑀓𑀤𑀼𑀓𑁆𑀔𑀲𑀼𑀢𑁆𑀢𑀁

𑁨𑁮𑁨. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀆𑀯𑁂𑀡𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺, 𑀬𑀸𑀦𑀺 𑀫𑀸𑀢𑀼𑀕𑀸𑀫𑁄 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀜𑁆𑀜𑀢𑁆𑀭𑁂𑀯 𑀧𑀼𑀭𑀺𑀲𑁂𑀳𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀤𑀳𑀭𑁄𑀯 𑀲𑀫𑀸𑀦𑁄 𑀧𑀢𑀺𑀓𑀼𑀮𑀁 𑀕𑀘𑁆𑀙𑀢𑀺, 𑀜𑀸𑀢𑀓𑁂𑀳𑀺 𑀯𑀺𑀦𑀸 𑀳𑁄𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀧𑀞𑀫𑀁 𑀆𑀯𑁂𑀡𑀺𑀓𑀁 𑀤𑀼𑀓𑁆𑀔𑀁, 𑀬𑀁 𑀫𑀸𑀢𑀼𑀕𑀸𑀫𑁄 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀜𑁆𑀜𑀢𑁆𑀭𑁂𑀯 𑀧𑀼𑀭𑀺𑀲𑁂𑀳𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀉𑀢𑀼𑀦𑀻 𑀳𑁄𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀤𑀼𑀢𑀺𑀬𑀁 𑀆𑀯𑁂𑀡𑀺𑀓𑀁 𑀤𑀼𑀓𑁆𑀔𑀁, 𑀬𑀁 𑀫𑀸𑀢𑀼𑀕𑀸𑀫𑁄 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀜𑁆𑀜𑀢𑁆𑀭𑁂𑀯 𑀧𑀼𑀭𑀺𑀲𑁂𑀳𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀕𑀩𑁆𑀪𑀺𑀦𑀻 𑀳𑁄𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀢𑀢𑀺𑀬𑀁 𑀆𑀯𑁂𑀡𑀺𑀓𑀁 𑀤𑀼𑀓𑁆𑀔𑀁, 𑀬𑀁 𑀫𑀸𑀢𑀼𑀕𑀸𑀫𑁄 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀜𑁆𑀜𑀢𑁆𑀭𑁂𑀯 𑀧𑀼𑀭𑀺𑀲𑁂𑀳𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀯𑀺𑀚𑀸𑀬𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀘𑀢𑀼𑀢𑁆𑀣𑀁 𑀆𑀯𑁂𑀡𑀺𑀓𑀁 𑀤𑀼𑀓𑁆𑀔𑀁, 𑀬𑀁 𑀫𑀸𑀢𑀼𑀕𑀸𑀫𑁄 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀜𑁆𑀜𑀢𑁆𑀭𑁂𑀯 𑀧𑀼𑀭𑀺𑀲𑁂𑀳𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀧𑀼𑀭𑀺𑀲𑀲𑁆𑀲 𑀧𑀸𑀭𑀺𑀘𑀭𑀺𑀬𑀁 𑀉𑀧𑁂𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀧𑀜𑁆𑀘𑀫𑀁 𑀆𑀯𑁂𑀡𑀺𑀓𑀁 𑀤𑀼𑀓𑁆𑀔𑀁, 𑀬𑀁 𑀫𑀸𑀢𑀼𑀕𑀸𑀫𑁄 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀜𑁆𑀜𑀢𑁆𑀭𑁂𑀯 𑀧𑀼𑀭𑀺𑀲𑁂𑀳𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀆𑀯𑁂𑀡𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺, 𑀬𑀸𑀦𑀺 𑀫𑀸𑀢𑀼𑀕𑀸𑀫𑁄 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀜𑁆𑀜𑀢𑁆𑀭𑁂𑀯 𑀧𑀼𑀭𑀺𑀲𑁂𑀳𑀻’’𑀢𑀺. 𑀢𑀢𑀺𑀬𑀁.

𑁪. 𑀢𑀻𑀳𑀺𑀥𑀫𑁆𑀫𑁂𑀳𑀺𑀲𑀼𑀢𑁆𑀢𑀁

𑁨𑁮𑁩. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀬𑁂𑀪𑀼𑀬𑁆𑀬𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀇𑀲𑁆𑀲𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀲𑀸𑀬𑀦𑁆𑀳𑀲𑀫𑀬𑀁 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀬𑁂𑀪𑀼𑀬𑁆𑀬𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀓𑁄𑀥𑀦𑀲𑀼𑀢𑁆𑀢𑀁

𑁨𑁮𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑀁 𑀧𑀲𑁆𑀲𑀸𑀫𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀁. 𑀓𑀢𑀻𑀳𑀺 𑀦𑀼 𑀔𑁄, 𑀪𑀦𑁆𑀢𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺?

‘‘𑀧𑀜𑁆𑀘𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀓𑁄𑀥𑀦𑁄 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀉𑀧𑀦𑀸𑀳𑀻𑀲𑀼𑀢𑁆𑀢𑀁

𑁨𑁮𑁫. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀉𑀧𑀦𑀸𑀳𑀻 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀇𑀲𑁆𑀲𑀼𑀓𑀻𑀲𑀼𑀢𑁆𑀢𑀁

𑁨𑁮𑁬. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀇𑀲𑁆𑀲𑀼𑀓𑀻 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀫𑀘𑁆𑀙𑀭𑀻𑀲𑀼𑀢𑁆𑀢𑀁

𑁨𑁮𑁭. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀫𑀘𑁆𑀙𑀭𑀻 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀅𑀢𑀺𑀘𑀸𑀭𑀻𑀲𑀼𑀢𑁆𑀢𑀁

𑁨𑁮𑁮. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀅𑀢𑀺𑀘𑀸𑀭𑀻 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀉𑀧𑀧𑀚𑁆𑀚𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀤𑀼𑀲𑁆𑀲𑀻𑀮𑀲𑀼𑀢𑁆𑀢𑀁

𑁨𑁮𑁯. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑀲𑀫𑀁.

𑁧𑁧. 𑀅𑀧𑁆𑀧𑀲𑁆𑀲𑀼𑀢𑀲𑀼𑀢𑁆𑀢𑀁

𑁨𑁯𑁦. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀓𑀼𑀲𑀻𑀢𑀲𑀼𑀢𑁆𑀢𑀁

𑁨𑁯𑁧. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀓𑀼𑀲𑀻𑀢𑁄 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑁆𑀯𑀸𑀤𑀲𑀫𑀁.

𑁧𑁩. 𑀫𑀼𑀝𑁆𑀞𑀲𑁆𑀲𑀢𑀺𑀲𑀼𑀢𑁆𑀢𑀁

𑁨𑁯𑁨. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀘 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀢𑁂𑀭𑀲𑀫𑀁.

𑁧𑁪. 𑀧𑀜𑁆𑀘𑀯𑁂𑀭𑀲𑀼𑀢𑁆𑀢𑀁

𑁨𑁯𑁩. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀘 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀘 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀘 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀘 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀬𑀻 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀘𑀼𑀤𑁆𑀤𑀲𑀫𑀁.

𑀧𑀞𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀸𑀢𑀼𑀕𑀸𑀫𑁄 𑀧𑀼𑀭𑀺𑀲𑁄 𑀘, 𑀆𑀯𑁂𑀡𑀺𑀓𑀸 𑀢𑀺𑀥𑀫𑁆𑀫𑁄 𑀘 [𑀤𑁆𑀯𑁂 𑀫𑀦𑀸𑀧𑀸𑀫𑀦𑀸𑀧𑀸𑀘, 𑀆𑀯𑁂𑀡𑀺𑀓𑀸 𑀢𑀻𑀳𑀺 𑀅𑀦𑀼𑀭𑀼𑀤𑁆𑀥𑁄 (𑀲𑀩𑁆𑀩𑀢𑁆𑀣)];

𑀓𑁄𑀥𑀦𑁄 𑀉𑀧𑀦𑀸𑀳𑀻 𑀘, 𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑁂𑀦 𑀘;

𑀅𑀢𑀺𑀘𑀸𑀭𑀻 𑀘 𑀤𑀼𑀲𑁆𑀲𑀻𑀮𑁄, 𑀅𑀧𑁆𑀧𑀲𑁆𑀲𑀼𑀢𑁄 𑀘 𑀓𑀼𑀲𑀻𑀢𑁄;

𑀫𑀼𑀝𑁆𑀞𑀲𑁆𑀲𑀢𑀺 𑀧𑀜𑁆𑀘𑀯𑁂𑀭𑀁, 𑀓𑀡𑁆𑀳𑀧𑀓𑁆𑀔𑁂 𑀧𑀓𑀸𑀲𑀺𑀢𑁄.

𑁨. 𑀤𑀼𑀢𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀅𑀓𑁆𑀓𑁄𑀥𑀦𑀲𑀼𑀢𑁆𑀢𑀁

𑁨𑁯𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑀁 𑀧𑀲𑁆𑀲𑀸𑀫𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀁. 𑀓𑀢𑀻𑀳𑀺 𑀦𑀼 𑀔𑁄, 𑀪𑀦𑁆𑀢𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺?

‘‘𑀧𑀜𑁆𑀘𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑁄 𑀘 𑀳𑁄𑀢𑀺, 𑀳𑀺𑀭𑀺𑀫𑀸 𑀘 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀅𑀓𑁆𑀓𑁄𑀥𑀦𑁄 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀧𑀞𑀫𑀁.

𑁨. 𑀅𑀦𑀼𑀧𑀦𑀸𑀳𑀻𑀲𑀼𑀢𑁆𑀢𑀁

𑁨𑁯𑁫. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑁄 𑀘 𑀳𑁄𑀢𑀺, 𑀳𑀺𑀭𑀺𑀫𑀸 𑀘 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀅𑀦𑀼𑀧𑀦𑀸𑀳𑀻 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀦𑀺𑀲𑁆𑀲𑀼𑀓𑀻𑀲𑀼𑀢𑁆𑀢𑀁

𑁨𑁯𑁬. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑁄 𑀘 𑀳𑁄𑀢𑀺, 𑀳𑀺𑀭𑀺𑀫𑀸 𑀘 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀘 𑀳𑁄𑀢𑀺, 𑀅𑀦𑀺𑀲𑁆𑀲𑀼𑀓𑀻 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀅𑀫𑀘𑁆𑀙𑀭𑀻𑀲𑀼𑀢𑁆𑀢𑀁

𑁨𑁯𑁭. 𑀅𑀫𑀘𑁆𑀙𑀭𑀻 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺…𑀧𑁂…. 𑀘𑀢𑀼𑀢𑁆𑀣𑀁.

𑁫. 𑀅𑀦𑀢𑀺𑀘𑀸𑀭𑀻𑀲𑀼𑀢𑁆𑀢𑀁

𑁨𑁯𑁮. 𑀅𑀦𑀢𑀺𑀘𑀸𑀭𑀻 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺…𑀧𑁂…. 𑀧𑀜𑁆𑀘𑀫𑀁.

𑁬. 𑀲𑀼𑀲𑀻𑀮𑀲𑀼𑀢𑁆𑀢𑀁

𑁨𑁯𑁯. 𑀲𑀻𑀮𑀯𑀸 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺…𑀧𑁂…. 𑀙𑀝𑁆𑀞𑀁.

𑁭. 𑀩𑀳𑀼𑀲𑁆𑀲𑀼𑀢𑀲𑀼𑀢𑁆𑀢𑀁

𑁩𑁦𑁦. 𑀩𑀳𑀼𑀲𑁆𑀲𑀼𑀢𑁄 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺…𑀧𑁂…. 𑀲𑀢𑁆𑀢𑀫𑀁.

𑁮. 𑀆𑀭𑀤𑁆𑀥𑀯𑀻𑀭𑀺𑀬𑀲𑀼𑀢𑁆𑀢𑀁

𑁩𑁦𑁧. 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺…𑀧𑁂…. 𑀅𑀝𑁆𑀞𑀫𑀁.

𑁯. 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑀼𑀢𑁆𑀢𑀁

𑁩𑁦𑁨. ‘‘𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀘 𑀳𑁄𑀢𑀺, 𑀧𑀜𑁆𑀜𑀯𑀸 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀦𑀯𑀫𑀁.

𑀇𑀫𑁂 𑀅𑀝𑁆𑀞 𑀲𑀼𑀢𑁆𑀢𑀦𑁆𑀢𑀲𑀗𑁆𑀔𑁂𑀧𑀸.

𑁧𑁦. 𑀧𑀜𑁆𑀘𑀲𑀻𑀮𑀲𑀼𑀢𑁆𑀢𑀁

𑁩𑁦𑁩. ‘‘𑀧𑀜𑁆𑀘𑀳𑀺, 𑀅𑀦𑀼𑀭𑀼𑀤𑁆𑀥, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀅𑀦𑀼𑀭𑀼𑀤𑁆𑀥, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑀲𑀫𑀁.

𑀤𑀼𑀢𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀼𑀢𑀺𑀬𑁂 𑀘 [𑀅𑀦𑀼𑀭𑀼𑀤𑁆𑀥𑁄 (𑀲𑀩𑁆𑀩𑀢𑁆𑀣)] 𑀅𑀓𑁆𑀓𑁄𑀥𑀦𑁄, 𑀅𑀦𑀼𑀧𑀦𑀸𑀳𑀻 𑀅𑀦𑀺𑀲𑁆𑀲𑀼𑀓𑀻;

𑀅𑀫𑀘𑁆𑀙𑀭𑀻 𑀅𑀦𑀢𑀺𑀘𑀸𑀭𑀻, 𑀲𑀻𑀮𑀯𑀸 𑀘 𑀩𑀳𑀼𑀲𑁆𑀲𑀼𑀢𑁄;

𑀯𑀻𑀭𑀺𑀬𑀁 𑀲𑀢𑀺 𑀲𑀻𑀮𑀜𑁆𑀘, 𑀲𑀼𑀓𑁆𑀓𑀧𑀓𑁆𑀔𑁂 𑀧𑀓𑀸𑀲𑀺𑀢𑁄.

𑁩. 𑀩𑀮𑀯𑀕𑁆𑀕𑁄

𑁧. 𑀯𑀺𑀲𑀸𑀭𑀤𑀲𑀼𑀢𑁆𑀢𑀁

𑁩𑁦𑁪. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀭𑀽𑀧𑀩𑀮𑀁, 𑀪𑁄𑀕𑀩𑀮𑀁, 𑀜𑀸𑀢𑀺𑀩𑀮𑀁, 𑀧𑀼𑀢𑁆𑀢𑀩𑀮𑀁, 𑀲𑀻𑀮𑀩𑀮𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀯𑀺𑀲𑀸𑀭𑀤𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀧𑀞𑀫𑀁.

𑁨. 𑀧𑀲𑀬𑁆𑀳𑀲𑀼𑀢𑁆𑀢𑀁

𑁩𑁦𑁫. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀭𑀽𑀧𑀩𑀮𑀁, 𑀪𑁄𑀕𑀩𑀮𑀁, 𑀜𑀸𑀢𑀺𑀩𑀮𑀁, 𑀧𑀼𑀢𑁆𑀢𑀩𑀮𑀁, 𑀲𑀻𑀮𑀩𑀮𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀲𑀸𑀫𑀺𑀓𑀁 𑀧𑀲𑀬𑁆𑀳 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀪𑀺𑀪𑀼𑀬𑁆𑀬𑀲𑀼𑀢𑁆𑀢𑀁

𑁩𑁦𑁬. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀭𑀽𑀧𑀩𑀮𑀁, 𑀪𑁄𑀕𑀩𑀮𑀁, 𑀜𑀸𑀢𑀺𑀩𑀮𑀁, 𑀧𑀼𑀢𑁆𑀢𑀩𑀮𑀁, 𑀲𑀻𑀮𑀩𑀮𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀲𑀸𑀫𑀺𑀓𑀁 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀏𑀓𑀲𑀼𑀢𑁆𑀢𑀁

𑁩𑁦𑁭. ‘‘𑀏𑀓𑁂𑀦 𑀘 𑀔𑁄, 𑀪𑀺𑀓𑁆𑀔𑀯𑁂, 𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀫𑀸𑀢𑀼𑀕𑀸𑀫𑀁 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀺. 𑀓𑀢𑀫𑁂𑀦 𑀏𑀓𑁂𑀦 𑀩𑀮𑁂𑀦? 𑀇𑀲𑁆𑀲𑀭𑀺𑀬𑀩𑀮𑁂𑀦 𑀅𑀪𑀺𑀪𑀽𑀢𑀁 𑀫𑀸𑀢𑀼𑀕𑀸𑀫𑀁 𑀦𑁂𑀯 𑀭𑀽𑀧𑀩𑀮𑀁 𑀢𑀸𑀬𑀢𑀺, 𑀦 𑀪𑁄𑀕𑀩𑀮𑀁 𑀢𑀸𑀬𑀢𑀺, 𑀦 𑀜𑀸𑀢𑀺𑀩𑀮𑀁 𑀢𑀸𑀬𑀢𑀺, 𑀦 𑀧𑀼𑀢𑁆𑀢𑀩𑀮𑀁 𑀢𑀸𑀬𑀢𑀺, 𑀦 𑀲𑀻𑀮𑀩𑀮𑀁 𑀢𑀸𑀬𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀗𑁆𑀕𑀲𑀼𑀢𑁆𑀢𑀁

𑁩𑁦𑁮. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀭𑀽𑀧𑀩𑀮𑀁, 𑀪𑁄𑀕𑀩𑀮𑀁, 𑀜𑀸𑀢𑀺𑀩𑀮𑀁, 𑀧𑀼𑀢𑁆𑀢𑀩𑀮𑀁, 𑀲𑀻𑀮𑀩𑀮𑀁. 𑀭𑀽𑀧𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀘 𑀪𑁄𑀕𑀩𑀮𑁂𑀦 𑁋 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀭𑀽𑀧𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘 𑁋 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀭𑀽𑀧𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀦 𑀘 𑀜𑀸𑀢𑀺𑀩𑀮𑁂𑀦 𑁋 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀭𑀽𑀧𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀜𑀸𑀢𑀺𑀩𑀮𑁂𑀦 𑀘 𑁋 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀭𑀽𑀧𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀜𑀸𑀢𑀺𑀩𑀮𑁂𑀦 𑀘, 𑀦 𑀘 𑀧𑀼𑀢𑁆𑀢𑀩𑀮𑁂𑀦 𑁋 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀭𑀽𑀧𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀜𑀸𑀢𑀺𑀩𑀮𑁂𑀦 𑀘, 𑀧𑀼𑀢𑁆𑀢𑀩𑀮𑁂𑀦 𑀘 𑁋 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀭𑀽𑀧𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀜𑀸𑀢𑀺𑀩𑀮𑁂𑀦 𑀘, 𑀧𑀼𑀢𑁆𑀢𑀩𑀮𑁂𑀦 𑀘, 𑀦 𑀘 𑀲𑀻𑀮𑀩𑀮𑁂𑀦 𑁋 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀭𑀽𑀧𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀜𑀸𑀢𑀺𑀩𑀮𑁂𑀦 𑀘, 𑀧𑀼𑀢𑁆𑀢𑀩𑀮𑁂𑀦 𑀘, 𑀲𑀻𑀮𑀩𑀮𑁂𑀦 𑀘 𑁋 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀦𑀸𑀲𑁂𑀦𑁆𑀢𑀺𑀲𑀼𑀢𑁆𑀢𑀁

𑁩𑁦𑁯. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀭𑀽𑀧𑀩𑀮𑀁, 𑀪𑁄𑀕𑀩𑀮𑀁, 𑀜𑀸𑀢𑀺𑀩𑀮𑀁, 𑀧𑀼𑀢𑁆𑀢𑀩𑀮𑀁, 𑀲𑀻𑀮𑀩𑀮𑀁. 𑀭𑀽𑀧𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀘 𑀲𑀻𑀮𑀩𑀮𑁂𑀦, 𑀦𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀯𑀸𑀲𑁂𑀦𑁆𑀢𑀺. 𑀭𑀽𑀧𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀦 𑀘 𑀲𑀻𑀮𑀩𑀮𑁂𑀦, 𑀦𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀯𑀸𑀲𑁂𑀦𑁆𑀢𑀺. 𑀭𑀽𑀧𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀜𑀸𑀢𑀺𑀩𑀮𑁂𑀦 𑀘, 𑀦 𑀘 𑀲𑀻𑀮𑀩𑀮𑁂𑀦, 𑀦𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀯𑀸𑀲𑁂𑀦𑁆𑀢𑀺. 𑀭𑀽𑀧𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀪𑁄𑀕𑀩𑀮𑁂𑀦 𑀘, 𑀜𑀸𑀢𑀺𑀩𑀮𑁂𑀦 𑀘, 𑀧𑀼𑀢𑁆𑀢𑀩𑀮𑁂𑀦 𑀘, 𑀦 𑀘 𑀲𑀻𑀮𑀩𑀮𑁂𑀦, 𑀦𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀯𑀸𑀲𑁂𑀦𑁆𑀢𑀺. 𑀲𑀻𑀮𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀘 𑀭𑀽𑀧𑀩𑀮𑁂𑀦, 𑀯𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀦𑀸𑀲𑁂𑀦𑁆𑀢𑀺. 𑀲𑀻𑀮𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀘 𑀪𑁄𑀕𑀩𑀮𑁂𑀦, 𑀯𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀦𑀸𑀲𑁂𑀦𑁆𑀢𑀺. 𑀲𑀻𑀮𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀘 𑀜𑀸𑀢𑀺𑀩𑀮𑁂𑀦, 𑀯𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀦𑀸𑀲𑁂𑀦𑁆𑀢𑀺. 𑀲𑀻𑀮𑀩𑀮𑁂𑀦 𑀘, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀘 𑀧𑀼𑀢𑁆𑀢𑀩𑀮𑁂𑀦, 𑀯𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀦𑀸𑀲𑁂𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀻’’𑀢𑀺. 𑀙𑀝𑁆𑀞𑀁.

𑁭. 𑀳𑁂𑀢𑀼𑀲𑀼𑀢𑁆𑀢𑀁

𑁩𑁧𑁦. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀭𑀽𑀧𑀩𑀮𑀁, 𑀪𑁄𑀕𑀩𑀮𑀁, 𑀜𑀸𑀢𑀺𑀩𑀮𑀁, 𑀧𑀼𑀢𑁆𑀢𑀩𑀮𑀁, 𑀲𑀻𑀮𑀩𑀮𑀁. 𑀦, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀭𑀽𑀧𑀩𑀮𑀳𑁂𑀢𑀼 𑀯𑀸 𑀪𑁄𑀕𑀩𑀮𑀳𑁂𑀢𑀼 𑀯𑀸 𑀜𑀸𑀢𑀺𑀩𑀮𑀳𑁂𑀢𑀼 𑀯𑀸 𑀧𑀼𑀢𑁆𑀢𑀩𑀮𑀳𑁂𑀢𑀼 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀲𑀻𑀮𑀩𑀮𑀳𑁂𑀢𑀼 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀩𑀮𑀸𑀦𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀞𑀸𑀦𑀲𑀼𑀢𑁆𑀢𑀁

𑁩𑁧𑁧. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑀸𑀦𑀺 𑀤𑀼𑀮𑁆𑀮𑀪𑀸𑀦𑀺 𑀅𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀓𑀢𑀫𑀸𑀦𑀺 𑀧𑀜𑁆𑀘? 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑁂𑀬𑁆𑀬𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀞𑀸𑀦𑀁 𑀤𑀼𑀮𑁆𑀮𑀪𑀁 𑀅𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑀺𑀢𑁆𑀯𑀸 𑀧𑀢𑀺𑀭𑀽𑀧𑀁 𑀓𑀼𑀮𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀞𑀸𑀦𑀁 𑀤𑀼𑀮𑁆𑀮𑀪𑀁 𑀅𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑀺𑀢𑁆𑀯𑀸, 𑀧𑀢𑀺𑀭𑀽𑀧𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸, 𑀅𑀲𑀧𑀢𑁆𑀢𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑁂𑀬𑁆𑀬𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀞𑀸𑀦𑀁 𑀤𑀼𑀮𑁆𑀮𑀪𑀁 𑀅𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑀺𑀢𑁆𑀯𑀸, 𑀧𑀢𑀺𑀭𑀽𑀧𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸, 𑀅𑀲𑀧𑀢𑁆𑀢𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀻 𑀧𑀼𑀢𑁆𑀢𑀯𑀢𑀻 𑀅𑀲𑁆𑀲𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀞𑀸𑀦𑀁 𑀤𑀼𑀮𑁆𑀮𑀪𑀁 𑀅𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑀺𑀢𑁆𑀯𑀸, 𑀧𑀢𑀺𑀭𑀽𑀧𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸, 𑀅𑀲𑀧𑀢𑁆𑀢𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀻 𑀧𑀼𑀢𑁆𑀢𑀯𑀢𑀻 𑀲𑀫𑀸𑀦𑀸 𑀲𑀸𑀫𑀺𑀓𑀁 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑀁 𑀞𑀸𑀦𑀁 𑀤𑀼𑀮𑁆𑀮𑀪𑀁 𑀅𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀞𑀸𑀦𑀸𑀦𑀺 𑀤𑀼𑀮𑁆𑀮𑀪𑀸𑀦𑀺 𑀅𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦𑀸𑀢𑀺.

‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑀸𑀦𑀺 𑀲𑀼𑀮𑀪𑀸𑀦𑀺 𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀓𑀢𑀫𑀸𑀦𑀺 𑀧𑀜𑁆𑀘? 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑁂𑀬𑁆𑀬𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀞𑀸𑀦𑀁 𑀲𑀼𑀮𑀪𑀁 𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑀺𑀢𑁆𑀯𑀸 𑀧𑀢𑀺𑀭𑀽𑀧𑀁 𑀓𑀼𑀮𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀞𑀸𑀦𑀁 𑀲𑀼𑀮𑀪𑀁 𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑀺𑀢𑁆𑀯𑀸 𑀧𑀢𑀺𑀭𑀽𑀧𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀅𑀲𑀧𑀢𑁆𑀢𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑁂𑀬𑁆𑀬𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀞𑀸𑀦𑀁 𑀲𑀼𑀮𑀪𑀁 𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑀺𑀢𑁆𑀯𑀸 𑀧𑀢𑀺𑀭𑀽𑀧𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀅𑀲𑀧𑀢𑁆𑀢𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀻 𑀧𑀼𑀢𑁆𑀢𑀯𑀢𑀻 𑀅𑀲𑁆𑀲𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀞𑀸𑀦𑀁 𑀲𑀼𑀮𑀪𑀁 𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀚𑀸𑀬𑀺𑀢𑁆𑀯𑀸 𑀧𑀢𑀺𑀭𑀽𑀧𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀅𑀲𑀧𑀢𑁆𑀢𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀻 𑀧𑀼𑀢𑁆𑀢𑀯𑀢𑀻 𑀲𑀫𑀸𑀦𑀸 𑀲𑀸𑀫𑀺𑀓𑀁 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑁋 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑀁 𑀞𑀸𑀦𑀁 𑀲𑀼𑀮𑀪𑀁 𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀞𑀸𑀦𑀸𑀦𑀺 𑀲𑀼𑀮𑀪𑀸𑀦𑀺 𑀓𑀢𑀧𑀼𑀜𑁆𑀜𑁂𑀦 𑀫𑀸𑀢𑀼𑀕𑀸𑀫𑁂𑀦𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀜𑁆𑀘𑀲𑀻𑀮𑀯𑀺𑀲𑀸𑀭𑀤𑀲𑀼𑀢𑁆𑀢𑀁

𑁩𑁧𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀯𑀺𑀲𑀸𑀭𑀤𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀘 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀯𑀺𑀲𑀸𑀭𑀤𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀯𑀟𑁆𑀠𑀻𑀲𑀼𑀢𑁆𑀢𑀁

𑁩𑁧𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀯𑀟𑁆𑀠𑀻𑀳𑀺 𑀯𑀟𑁆𑀠𑀫𑀸𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀅𑀭𑀺𑀬𑀸𑀬 𑀯𑀟𑁆𑀠𑀺𑀬𑀸 𑀯𑀟𑁆𑀠𑀢𑀺 𑀲𑀸𑀭𑀸𑀤𑀸𑀬𑀺𑀦𑀻 𑀘 𑀳𑁄𑀢𑀺 𑀯𑀭𑀸𑀤𑀸𑀬𑀺𑀦𑀻 𑀘 𑀓𑀸𑀬𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀲𑀻𑀮𑁂𑀦 𑀯𑀟𑁆𑀠𑀢𑀺, 𑀲𑀼𑀢𑁂𑀦 𑀯𑀟𑁆𑀠𑀢𑀺, 𑀘𑀸𑀕𑁂𑀦 𑀯𑀟𑁆𑀠𑀢𑀺, 𑀧𑀜𑁆𑀜𑀸𑀬 𑀯𑀟𑁆𑀠𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀯𑀟𑁆𑀠𑀻𑀳𑀺 𑀯𑀟𑁆𑀠𑀫𑀸𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀅𑀭𑀺𑀬𑀸𑀬 𑀯𑀟𑁆𑀠𑀺𑀬𑀸 𑀯𑀟𑁆𑀠𑀢𑀺, 𑀲𑀸𑀭𑀸𑀤𑀸𑀬𑀺𑀦𑀻 𑀘 𑀳𑁄𑀢𑀺, 𑀯𑀭𑀸𑀤𑀸𑀬𑀺𑀦𑀻 𑀘 𑀓𑀸𑀬𑀲𑁆𑀲𑀸’’𑀢𑀺.

‘‘𑀲𑀤𑁆𑀥𑀸𑀬 𑀲𑀻𑀮𑁂𑀦 𑀘 𑀬𑀸𑀥 𑀯𑀟𑁆𑀠𑀢𑀺,

𑀧𑀜𑁆𑀜𑀸𑀬 𑀘𑀸𑀕𑁂𑀦 𑀲𑀼𑀢𑁂𑀦 𑀘𑀽𑀪𑀬𑀁;

𑀲𑀸 𑀢𑀸𑀤𑀺𑀲𑀻 𑀲𑀻𑀮𑀯𑀢𑀻 𑀉𑀧𑀸𑀲𑀺𑀓𑀸,

𑀆𑀤𑀻𑀬𑀢𑀺 𑀲𑀸𑀭𑀫𑀺𑀥𑁂𑀯 𑀅𑀢𑁆𑀢𑀦𑁄’’𑀢𑀺. 𑀤𑀲𑀫𑀁;

𑀩𑀮𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀺𑀲𑀸𑀭𑀤𑀸 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬, 𑀏𑀓𑀁 𑀅𑀗𑁆𑀕𑁂𑀦 𑀧𑀜𑁆𑀘𑀫𑀁;

𑀦𑀸𑀲𑁂𑀦𑁆𑀢𑀺 𑀳𑁂𑀢𑀼 𑀞𑀸𑀦𑀜𑁆𑀘, 𑀯𑀺𑀲𑀸𑀭𑀤𑁄 𑀯𑀟𑁆𑀠𑀺𑀦𑀸 𑀤𑀲𑀸𑀢𑀺.

𑀫𑀸𑀢𑀼𑀕𑀸𑀫𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.