𑁨. 𑀧𑀞𑀫𑀆𑀓𑀸𑀲𑀲𑀼𑀢𑁆𑀢𑀁

𑁨𑁬𑁦. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀓𑀸𑀲𑁂 𑀯𑀺𑀯𑀺𑀥𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀧𑀼𑀭𑀢𑁆𑀣𑀺𑀫𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀲𑀭𑀚𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀅𑀭𑀚𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀲𑀻𑀢𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀡𑁆𑀳𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀭𑀺𑀢𑁆𑀢𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀅𑀥𑀺𑀫𑀢𑁆𑀢𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀓𑀸𑀬𑀲𑁆𑀫𑀺𑀁 𑀯𑀺𑀯𑀺𑀥𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀼𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀬𑀣𑀸𑀧𑀺 𑀯𑀸𑀢𑀸 𑀆𑀓𑀸𑀲𑁂, 𑀯𑀸𑀬𑀦𑁆𑀢𑀺 𑀯𑀺𑀯𑀺𑀥𑀸 𑀧𑀼𑀣𑀽;

𑀧𑀼𑀭𑀢𑁆𑀣𑀺𑀫𑀸 𑀧𑀘𑁆𑀙𑀺𑀫𑀸 𑀘𑀸𑀧𑀺, 𑀉𑀢𑁆𑀢𑀭𑀸 𑀅𑀣 𑀤𑀓𑁆𑀔𑀺𑀡𑀸.

‘‘𑀲𑀭𑀚𑀸 𑀅𑀭𑀚𑀸 𑀘𑀧𑀺, 𑀲𑀻𑀢𑀸 𑀉𑀡𑁆𑀳𑀸 𑀘 𑀏𑀓𑀤𑀸;

𑀅𑀥𑀺𑀫𑀢𑁆𑀢𑀸 𑀧𑀭𑀺𑀢𑁆𑀢𑀸 𑀘, 𑀧𑀼𑀣𑀽 𑀯𑀸𑀬𑀦𑁆𑀢𑀺 𑀫𑀸𑀮𑀼𑀢𑀸.

‘‘𑀢𑀣𑁂𑀯𑀺𑀫𑀲𑁆𑀫𑀺𑀁 𑀓𑀸𑀬𑀲𑁆𑀫𑀺𑀁, 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀺 𑀯𑁂𑀤𑀦𑀸;

𑀲𑀼𑀔𑀤𑀼𑀓𑁆𑀔𑀲𑀫𑀼𑀧𑁆𑀧𑀢𑁆𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀘 𑀬𑀸.

‘‘𑀬𑀢𑁄 𑀘 𑀪𑀺𑀓𑁆𑀔𑀼 𑀆𑀢𑀸𑀧𑀻, 𑀲𑀫𑁆𑀧𑀚𑀜𑁆𑀜𑀁 𑀦 𑀭𑀺𑀜𑁆𑀘𑀢𑀺 [𑀲𑀫𑁆𑀧𑀚𑀸𑀦𑁄 𑀦𑀺𑀭𑀽𑀧𑀥𑀺 (𑀓.)];

𑀢𑀢𑁄 𑀲𑁄 𑀯𑁂𑀤𑀦𑀸 𑀲𑀩𑁆𑀩𑀸, 𑀧𑀭𑀺𑀚𑀸𑀦𑀸𑀢𑀺 𑀧𑀡𑁆𑀟𑀺𑀢𑁄.

‘‘𑀲𑁄 𑀯𑁂𑀤𑀦𑀸 𑀧𑀭𑀺𑀜𑁆𑀜𑀸𑀬, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀸𑀲𑀯𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀥𑀫𑁆𑀫𑀝𑁆𑀞𑁄, 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀺 𑀯𑁂𑀤𑀕𑀽’’𑀢𑀺. 𑀤𑀼𑀢𑀺𑀬𑀁;