𑁨. 𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑀁

𑁧. 𑀲𑀕𑀸𑀣𑀸𑀯𑀕𑁆𑀕𑁄

𑁧. 𑀲𑀫𑀸𑀥𑀺𑀲𑀼𑀢𑁆𑀢𑀁

𑁨𑁪𑁯. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺.

‘‘𑀲𑀫𑀸𑀳𑀺𑀢𑁄 𑀲𑀫𑁆𑀧𑀚𑀸𑀦𑁄, 𑀲𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀯𑁂𑀤𑀦𑀸 𑀘 𑀧𑀚𑀸𑀦𑀸𑀢𑀺, 𑀯𑁂𑀤𑀦𑀸𑀦𑀜𑁆𑀘 𑀲𑀫𑁆𑀪𑀯𑀁.

‘‘𑀬𑀢𑁆𑀣 𑀘𑁂𑀢𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀫𑀕𑁆𑀕𑀜𑁆𑀘 𑀔𑀬𑀕𑀸𑀫𑀺𑀦𑀁;

𑀯𑁂𑀤𑀦𑀸𑀦𑀁 𑀔𑀬𑀸 𑀪𑀺𑀓𑁆𑀔𑀼, 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀧𑀞𑀫𑀁;

𑁨. 𑀲𑀼𑀔𑀲𑀼𑀢𑁆𑀢𑀁

𑁨𑁫𑁦. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺.

‘‘𑀲𑀼𑀔𑀁 𑀯𑀸 𑀬𑀤𑀺 𑀯𑀸 𑀤𑀼𑀓𑁆𑀔𑀁, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀳;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀣𑀺 𑀯𑁂𑀤𑀺𑀢𑀁.

‘‘𑀏𑀢𑀁 𑀤𑀼𑀓𑁆𑀔𑀦𑁆𑀢𑀺 𑀜𑀢𑁆𑀯𑀸𑀦, 𑀫𑁄𑀲𑀥𑀫𑁆𑀫𑀁 𑀧𑀮𑁄𑀓𑀺𑀦𑀁;

𑀨𑀼𑀲𑁆𑀲 𑀨𑀼𑀲𑁆𑀲 𑀯𑀬𑀁 𑀧𑀲𑁆𑀲𑀁, 𑀏𑀯𑀁 𑀢𑀢𑁆𑀣 𑀯𑀺𑀭𑀚𑁆𑀚𑀢𑀻’’𑀢𑀺. 𑀤𑀼𑀢𑀺𑀬𑀁;

𑁩. 𑀧𑀳𑀸𑀦𑀲𑀼𑀢𑁆𑀢𑀁

𑁨𑁫𑁧. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀲𑀼𑀔𑀸𑀬, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀧𑀳𑀸𑀢𑀩𑁆𑀩𑁄, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀧𑀳𑀸𑀢𑀩𑁆𑀩𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀸𑀢𑀩𑁆𑀩𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀦𑀺𑀭𑀦𑀼𑀲𑀬𑁄 𑀲𑀫𑁆𑀫𑀤𑁆𑀤𑀲𑁄 𑀅𑀘𑁆𑀙𑁂𑀘𑁆𑀙𑀺 [𑀅𑀘𑁆𑀙𑁂𑀚𑁆𑀚𑀺 (𑀩𑀳𑀽𑀲𑀼)] 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 [𑀯𑀸𑀯𑀢𑁆𑀢𑀬𑀺 (𑀲𑀻.)] 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’’𑀢𑀺.

‘‘𑀲𑀼𑀔𑀁 𑀯𑁂𑀤𑀬𑀫𑀸𑀦𑀲𑁆𑀲 [𑀯𑁂𑀤𑀺𑀬𑀫𑀸𑀦𑀲𑁆𑀲 (𑀲𑀻. 𑀧𑀻.)], 𑀯𑁂𑀤𑀦𑀁 𑀅𑀧𑁆𑀧𑀚𑀸𑀦𑀢𑁄;

𑀲𑁄 𑀭𑀸𑀕𑀸𑀦𑀼𑀲𑀬𑁄 𑀳𑁄𑀢𑀺, 𑀅𑀦𑀺𑀲𑁆𑀲𑀭𑀡𑀤𑀲𑁆𑀲𑀺𑀦𑁄.

‘‘𑀤𑀼𑀓𑁆𑀔𑀁 𑀯𑁂𑀤𑀬𑀫𑀸𑀦𑀲𑁆𑀲, 𑀯𑁂𑀤𑀦𑀁 𑀅𑀧𑁆𑀧𑀚𑀸𑀦𑀢𑁄;

𑀧𑀝𑀺𑀖𑀸𑀦𑀼𑀲𑀬𑁄 𑀳𑁄𑀢𑀺, 𑀅𑀦𑀺𑀲𑁆𑀲𑀭𑀡𑀤𑀲𑁆𑀲𑀺𑀦𑁄.

‘‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀪𑀽𑀭𑀺𑀧𑀜𑁆𑀜𑁂𑀦 𑀤𑁂𑀲𑀺𑀢𑀁;

𑀢𑀜𑁆𑀘𑀸𑀧𑀺 𑀅𑀪𑀺𑀦𑀦𑁆𑀤𑀢𑀺, 𑀦𑁂𑀯 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺.

‘‘𑀬𑀢𑁄 𑀘 𑀪𑀺𑀓𑁆𑀔𑀼 𑀆𑀢𑀸𑀧𑀻, 𑀲𑀫𑁆𑀧𑀚𑀜𑁆𑀜𑀁 𑀦 𑀭𑀺𑀜𑁆𑀘𑀢𑀺;

𑀢𑀢𑁄 𑀲𑁄 𑀯𑁂𑀤𑀦𑀸 𑀲𑀩𑁆𑀩𑀸, 𑀧𑀭𑀺𑀚𑀸𑀦𑀸𑀢𑀺 𑀧𑀡𑁆𑀟𑀺𑀢𑁄.

‘‘𑀲𑁄 𑀯𑁂𑀤𑀦𑀸 𑀧𑀭𑀺𑀜𑁆𑀜𑀸𑀬, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀸𑀲𑀯𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀥𑀫𑁆𑀫𑀝𑁆𑀞𑁄, 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀺 𑀯𑁂𑀤𑀕𑀽’’𑀢𑀺. 𑀢𑀢𑀺𑀬𑀁;

𑁪. 𑀧𑀸𑀢𑀸𑀮𑀲𑀼𑀢𑁆𑀢𑀁

𑁨𑁫𑁨. ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀬𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀅𑀢𑁆𑀣𑀺 𑀫𑀳𑀸𑀲𑀫𑀼𑀤𑁆𑀤𑁂 𑀧𑀸𑀢𑀸𑀮𑁄’𑀢𑀺. 𑀢𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀲𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀁 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀅𑀢𑁆𑀣𑀺 𑀫𑀳𑀸𑀲𑀫𑀼𑀤𑁆𑀤𑁂 𑀧𑀸𑀢𑀸𑀮𑁄’𑀢𑀺. 𑀲𑀸𑀭𑀻𑀭𑀺𑀓𑀸𑀦𑀁 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀸𑀦𑀁 𑀯𑁂𑀤𑀦𑀸𑀦𑀁 𑀅𑀥𑀺𑀯𑀘𑀦𑀁 𑀬𑀤𑀺𑀤𑀁 ‘𑀧𑀸𑀢𑀸𑀮𑁄’𑀢𑀺. 𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀲𑀸𑀭𑀻𑀭𑀺𑀓𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀧𑀸𑀢𑀸𑀮𑁂 𑀦 𑀧𑀘𑁆𑀘𑀼𑀝𑁆𑀞𑀸𑀲𑀺, 𑀕𑀸𑀥𑀜𑁆𑀘 𑀦𑀸𑀚𑁆𑀛𑀕𑀸’. 𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀸𑀭𑀻𑀭𑀺𑀓𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀦𑁂𑀯 𑀲𑁄𑀘𑀢𑀺, 𑀦 𑀓𑀺𑀮𑀫𑀢𑀺, 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀧𑀸𑀢𑀸𑀮𑁂 𑀧𑀘𑁆𑀘𑀼𑀝𑁆𑀞𑀸𑀲𑀺, 𑀕𑀸𑀥𑀜𑁆𑀘 𑀅𑀚𑁆𑀛𑀕𑀸’’’𑀢𑀺.

‘‘𑀬𑁄 𑀏𑀢𑀸 𑀦𑀸𑀥𑀺𑀯𑀸𑀲𑁂𑀢𑀺, 𑀉𑀧𑁆𑀧𑀦𑁆𑀦𑀸 𑀯𑁂𑀤𑀦𑀸 𑀤𑀼𑀔𑀸;

𑀲𑀸𑀭𑀻𑀭𑀺𑀓𑀸 𑀧𑀸𑀡𑀳𑀭𑀸, 𑀬𑀸𑀳𑀺 𑀨𑀼𑀝𑁆𑀞𑁄 𑀧𑀯𑁂𑀥𑀢𑀺.

‘‘𑀅𑀓𑁆𑀓𑀦𑁆𑀤𑀢𑀺 𑀧𑀭𑁄𑀤𑀢𑀺, 𑀤𑀼𑀩𑁆𑀩𑀮𑁄 𑀅𑀧𑁆𑀧𑀣𑀸𑀫𑀓𑁄;

𑀦 𑀲𑁄 𑀧𑀸𑀢𑀸𑀮𑁂 𑀧𑀘𑁆𑀘𑀼𑀝𑁆𑀞𑀸𑀲𑀺, 𑀅𑀣𑁄 𑀕𑀸𑀥𑀫𑁆𑀧𑀺 𑀦𑀸𑀚𑁆𑀛𑀕𑀸.

‘‘𑀬𑁄 𑀘𑁂𑀢𑀸 𑀅𑀥𑀺𑀯𑀸𑀲𑁂𑀢𑀺, 𑀉𑀧𑁆𑀧𑀦𑁆𑀦𑀸 𑀯𑁂𑀤𑀦𑀸 𑀤𑀼𑀔𑀸;

𑀲𑀸𑀭𑀻𑀭𑀺𑀓𑀸 𑀧𑀸𑀡𑀳𑀭𑀸, 𑀬𑀸𑀳𑀺 𑀨𑀼𑀝𑁆𑀞𑁄 𑀦 𑀯𑁂𑀥𑀢𑀺;

𑀲 𑀯𑁂 𑀧𑀸𑀢𑀸𑀮𑁂 𑀧𑀘𑁆𑀘𑀼𑀝𑁆𑀞𑀸𑀲𑀺, 𑀅𑀣𑁄 𑀕𑀸𑀥𑀫𑁆𑀧𑀺 𑀅𑀚𑁆𑀛𑀕𑀸’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀁

𑁨𑁫𑁩. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀲𑀼𑀔𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀮𑁆𑀮𑀢𑁄 𑀤𑀝𑁆𑀞𑀩𑁆𑀩𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀢𑁄 𑀤𑀝𑁆𑀞𑀩𑁆𑀩𑀸. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄 𑀤𑀺𑀝𑁆𑀞𑀸 𑀳𑁄𑀢𑀺, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀮𑁆𑀮𑀢𑁄 𑀤𑀺𑀝𑁆𑀞𑀸 𑀳𑁄𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑀸 𑀳𑁄𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀲𑀫𑁆𑀫𑀤𑁆𑀤𑀲𑁄 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’’𑀢𑀺.

‘‘𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄.

‘‘𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀧𑀭𑀺𑀚𑀸𑀦𑀸𑀢𑀺 𑀯𑁂𑀤𑀦𑀸;

𑀲𑁄 𑀯𑁂𑀤𑀦𑀸 𑀧𑀭𑀺𑀜𑁆𑀜𑀸𑀬, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀸𑀲𑀯𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀥𑀫𑁆𑀫𑀝𑁆𑀞𑁄, 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀺 𑀯𑁂𑀤𑀕𑀽’’𑀢𑀺. 𑀧𑀜𑁆𑀘𑀫𑀁;

𑁬. 𑀲𑀮𑁆𑀮𑀲𑀼𑀢𑁆𑀢𑀁

𑁨𑁫𑁪. ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺 [𑀯𑁂𑀤𑀺𑀬𑀢𑀺 (𑀲𑀻. 𑀧𑀻.)], 𑀤𑀼𑀓𑁆𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀤𑀼𑀓𑁆𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀓𑁄 𑀯𑀺𑀲𑁂𑀲𑁄 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄 [𑀅𑀥𑀺𑀧𑁆𑀧𑀸𑀬𑁄 (𑀲𑀻. 𑀓.), 𑀅𑀥𑀺𑀧𑁆𑀧𑀸𑀬𑀲𑁄 (𑀲𑁆𑀬𑀸. 𑀓𑀁.), 𑀅𑀥𑀺𑀧𑁆𑀧𑀸𑀬𑁄𑀲𑁄 (𑀧𑀻.)] 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀲𑁆𑀲𑀼𑀢𑀯𑀢𑀸 𑀧𑀼𑀣𑀼𑀚𑁆𑀚𑀦𑁂𑀦𑀸’’𑀢𑀺? 𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸…𑀧𑁂… 𑀅𑀲𑁆𑀲𑀼𑀢𑀯𑀸. 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀲𑁄 𑀤𑁆𑀯𑁂 𑀯𑁂𑀤𑀦𑀸 𑀯𑁂𑀤𑀬𑀢𑀺 𑁋 𑀓𑀸𑀬𑀺𑀓𑀜𑁆𑀘, 𑀘𑁂𑀢𑀲𑀺𑀓𑀜𑁆𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀁 𑀲𑀮𑁆𑀮𑁂𑀦 𑀯𑀺𑀚𑁆𑀛𑁂𑀬𑁆𑀬 [𑀲𑀮𑁆𑀮𑁂𑀦 𑀅𑀦𑀼𑀯𑀺𑀚𑁆𑀛𑁂𑀬𑁆𑀬𑀼𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀢𑀫𑁂𑀦𑀁 𑀤𑀼𑀢𑀺𑀬𑁂𑀦 𑀲𑀮𑁆𑀮𑁂𑀦 𑀅𑀦𑀼𑀯𑁂𑀥𑀁 𑀯𑀺𑀚𑁆𑀛𑁂𑀬𑁆𑀬 [𑀲𑀮𑁆𑀮𑁂𑀦 𑀅𑀦𑀼𑀯𑀺𑀚𑁆𑀛𑁂𑀬𑁆𑀬𑀼𑀁 (𑀲𑀻.), 𑀲𑀮𑁆𑀮𑁂𑀦 𑀅𑀦𑀼𑀯𑁂𑀥𑀁 𑀯𑀺𑀚𑁆𑀛𑁂𑀬𑁆𑀬𑀼𑀁 (𑀲𑁆𑀬𑀸. 𑀓𑀁.), 𑀲𑀮𑁆𑀮𑁂𑀦 𑀯𑀺𑀚𑁆𑀛𑁂𑀬𑁆𑀬𑀼𑀁 (𑀧𑀻.)]. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀤𑁆𑀯𑀺𑀲𑀮𑁆𑀮𑁂𑀦 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀲𑁄 𑀤𑁆𑀯𑁂 𑀯𑁂𑀤𑀦𑀸 𑀯𑁂𑀤𑀬𑀢𑀺 𑁋 𑀓𑀸𑀬𑀺𑀓𑀜𑁆𑀘, 𑀘𑁂𑀢𑀲𑀺𑀓𑀜𑁆𑀘. 𑀢𑀲𑁆𑀲𑀸𑀬𑁂𑀯 𑀔𑁄 𑀧𑀦 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀧𑀝𑀺𑀖𑀯𑀸 𑀳𑁄𑀢𑀺. 𑀢𑀫𑁂𑀦𑀁 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀯𑀦𑁆𑀢𑀁, 𑀬𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄, 𑀲𑁄 𑀅𑀦𑀼𑀲𑁂𑀢𑀺. 𑀲𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀓𑀸𑀫𑀲𑀼𑀔𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑀚𑀸𑀦𑀸𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀜𑁆𑀜𑀢𑁆𑀭 𑀓𑀸𑀫𑀲𑀼𑀔𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁, 𑀢𑀲𑁆𑀲 𑀓𑀸𑀫𑀲𑀼𑀔𑀜𑁆𑀘 𑀅𑀪𑀺𑀦𑀦𑁆𑀤𑀢𑁄, 𑀬𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄, 𑀲𑁄 𑀅𑀦𑀼𑀲𑁂𑀢𑀺. 𑀲𑁄 𑀢𑀸𑀲𑀁 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀢𑀸𑀲𑀁 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀢𑁄, 𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄, 𑀲𑁄 𑀅𑀦𑀼𑀲𑁂𑀢𑀺. 𑀲𑁄 𑀲𑀼𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺. 𑀤𑀼𑀓𑁆𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀲𑀜𑁆𑀜𑀼𑀢𑁆𑀢𑁄 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀲𑀜𑁆𑀜𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸’𑀢𑀺 𑀯𑀤𑀸𑀫𑀺.

‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀦 𑀲𑁄𑀘𑀢𑀺, 𑀦 𑀓𑀺𑀮𑀫𑀢𑀺, 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀲𑁄 𑀏𑀓𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺 𑁋 𑀓𑀸𑀬𑀺𑀓𑀁, 𑀦 𑀘𑁂𑀢𑀲𑀺𑀓𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀁 𑀲𑀮𑁆𑀮𑁂𑀦 𑀯𑀺𑀚𑁆𑀛𑁂𑀬𑁆𑀬. 𑀢𑀫𑁂𑀦𑀁 𑀤𑀼𑀢𑀺𑀬𑁂𑀦 𑀲𑀮𑁆𑀮𑁂𑀦 𑀅𑀦𑀼𑀯𑁂𑀥𑀁 𑀦 𑀯𑀺𑀚𑁆𑀛𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀏𑀓𑀲𑀮𑁆𑀮𑁂𑀦 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀦 𑀲𑁄𑀘𑀢𑀺, 𑀦 𑀓𑀺𑀮𑀫𑀢𑀺, 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀲𑁄 𑀏𑀓𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺 𑁋 𑀓𑀸𑀬𑀺𑀓𑀁, 𑀦 𑀘𑁂𑀢𑀲𑀺𑀓𑀁. 𑀢𑀲𑁆𑀲𑀸𑀬𑁂𑀯 𑀔𑁄 𑀧𑀦 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀧𑀝𑀺𑀖𑀯𑀸 𑀦 𑀳𑁄𑀢𑀺. 𑀢𑀫𑁂𑀦𑀁 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀅𑀧𑁆𑀧𑀝𑀺𑀖𑀯𑀦𑁆𑀢𑀁, 𑀬𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄, 𑀲𑁄 𑀦𑀸𑀦𑀼𑀲𑁂𑀢𑀺. 𑀲𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀓𑀸𑀫𑀲𑀼𑀔𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀧𑀚𑀸𑀦𑀸𑀢𑀺 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀢𑁆𑀭 𑀓𑀸𑀫𑀲𑀼𑀔𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁. 𑀢𑀲𑁆𑀲 𑀓𑀸𑀫𑀲𑀼𑀔𑀁 𑀦𑀸𑀪𑀺𑀦𑀦𑁆𑀤𑀢𑁄 𑀬𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄, 𑀲𑁄 𑀦𑀸𑀦𑀼𑀲𑁂𑀢𑀺. 𑀲𑁄 𑀢𑀸𑀲𑀁 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀁 𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀢𑀸𑀲𑀁 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀢𑁄, 𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄, 𑀲𑁄 𑀦𑀸𑀦𑀼𑀲𑁂𑀢𑀺. 𑀲𑁄 𑀲𑀼𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺. 𑀤𑀼𑀓𑁆𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀯𑀺𑀲𑀜𑁆𑀜𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸’𑀢𑀺 𑀯𑀤𑀸𑀫𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀲𑁂𑀲𑁄, 𑀅𑀬𑀁 𑀅𑀥𑀺𑀧𑁆𑀧𑀬𑀸𑀲𑁄, 𑀇𑀤𑀁 𑀦𑀸𑀦𑀸𑀓𑀭𑀡𑀁 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀲𑁆𑀲𑀼𑀢𑀯𑀢𑀸 𑀧𑀼𑀣𑀼𑀚𑁆𑀚𑀦𑁂𑀦𑀸’’𑀢𑀺.

‘‘𑀦 𑀯𑁂𑀤𑀦𑀁 𑀯𑁂𑀤𑀬𑀢𑀺 𑀲𑀧𑀜𑁆𑀜𑁄,

𑀲𑀼𑀔𑀫𑁆𑀧𑀺 𑀤𑀼𑀓𑁆𑀔𑀫𑁆𑀧𑀺 𑀩𑀳𑀼𑀲𑁆𑀲𑀼𑀢𑁄𑀧𑀺;

𑀅𑀬𑀜𑁆𑀘 𑀥𑀻𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑁂𑀦,

𑀫𑀳𑀸 [𑀅𑀬𑀁 (𑀲𑁆𑀬𑀸. 𑀓𑀁. 𑀓.)] 𑀯𑀺𑀲𑁂𑀲𑁄 𑀓𑀼𑀲𑀮𑀲𑁆𑀲 𑀳𑁄𑀢𑀺.

‘‘𑀲𑀗𑁆𑀔𑀸𑀢𑀥𑀫𑁆𑀫𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲,

𑀯𑀺𑀧𑀲𑁆𑀲𑀢𑁄 [𑀲𑀫𑁆𑀧𑀲𑁆𑀲𑀢𑁄 (𑀲𑀻. 𑀧𑀻.)] 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘;

𑀇𑀝𑁆𑀞𑀲𑁆𑀲 𑀥𑀫𑁆𑀫𑀸 𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁,

𑀅𑀦𑀺𑀝𑁆𑀞𑀢𑁄 𑀦𑁄 𑀧𑀝𑀺𑀖𑀸𑀢𑀫𑁂𑀢𑀺.

‘‘𑀢𑀲𑁆𑀲𑀸𑀦𑀼𑀭𑁄𑀥𑀸 𑀅𑀣𑀯𑀸 𑀯𑀺𑀭𑁄𑀥𑀸,

𑀯𑀺𑀥𑀽𑀧𑀺𑀢𑀸 𑀅𑀢𑁆𑀣𑀕𑀢𑀸 𑀦 𑀲𑀦𑁆𑀢𑀺;

𑀧𑀤𑀜𑁆𑀘 𑀜𑀢𑁆𑀯𑀸 𑀯𑀺𑀭𑀚𑀁 𑀅𑀲𑁄𑀓𑀁,

𑀲𑀫𑁆𑀫𑀸 𑀧𑀚𑀸𑀦𑀸𑀢𑀺 𑀪𑀯𑀲𑁆𑀲 𑀧𑀸𑀭𑀕𑀽’’𑀢𑀺. 𑀙𑀝𑁆𑀞𑀁;

𑁭. 𑀧𑀞𑀫𑀕𑁂𑀮𑀜𑁆𑀜𑀲𑀼𑀢𑁆𑀢𑀁

𑁨𑁫𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀕𑀺𑀮𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀓𑀸𑀮𑀁 𑀆𑀕𑀫𑁂𑀬𑁆𑀬. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀓𑀸𑀮𑀁 𑀆𑀕𑀫𑁂𑀬𑁆𑀬. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻.

‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸, 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀸 𑀔𑁄 𑀫𑁆𑀬𑀸𑀬𑀁 𑀲𑀼𑀔𑀸 𑀯𑁂𑀤𑀦𑀸. 𑀲𑀸 𑀘 𑀔𑁄 𑀧𑀝𑀺𑀘𑁆𑀘, 𑀦𑁄 𑀅𑀧𑁆𑀧𑀝𑀺𑀘𑁆𑀘. 𑀓𑀺𑀁 𑀧𑀝𑀺𑀘𑁆𑀘? 𑀇𑀫𑀫𑁂𑀯 𑀓𑀸𑀬𑀁 𑀧𑀝𑀺𑀘𑁆𑀘. 𑀅𑀬𑀁 𑀔𑁄 𑀧𑀦 𑀓𑀸𑀬𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀅𑀦𑀺𑀘𑁆𑀘𑀁 𑀔𑁄 𑀧𑀦 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀓𑀸𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀓𑀼𑀢𑁄 𑀦𑀺𑀘𑁆𑀘𑀸 𑀪𑀯𑀺𑀲𑁆𑀲𑀢𑀻’𑀢𑀺! 𑀲𑁄 𑀓𑀸𑀬𑁂 𑀘 𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀢𑀲𑁆𑀲 𑀓𑀸𑀬𑁂 𑀘 𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀯𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀬𑁄 𑀓𑀸𑀬𑁂 𑀘 𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄, 𑀲𑁄 𑀧𑀳𑀻𑀬𑀢𑀺.

‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀸 𑀔𑁄 𑀫𑁆𑀬𑀸𑀬𑀁 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀲𑀸 𑀘 𑀔𑁄 𑀧𑀝𑀺𑀘𑁆𑀘, 𑀦𑁄 𑀅𑀧𑁆𑀧𑀝𑀺𑀘𑁆𑀘. 𑀓𑀺𑀁 𑀧𑀝𑀺𑀘𑁆𑀘? 𑀇𑀫𑀫𑁂𑀯 𑀓𑀸𑀬𑀁 𑀧𑀝𑀺𑀘𑁆𑀘. 𑀅𑀬𑀁 𑀔𑁄 𑀧𑀦 𑀓𑀸𑀬𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀅𑀦𑀺𑀘𑁆𑀘𑀁 𑀔𑁄 𑀧𑀦 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀓𑀸𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀓𑀼𑀢𑁄 𑀦𑀺𑀘𑁆𑀘𑀸 𑀪𑀯𑀺𑀲𑁆𑀲𑀢𑀻’𑀢𑀺! 𑀲𑁄 𑀓𑀸𑀬𑁂 𑀘 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀢𑀲𑁆𑀲 𑀓𑀸𑀬𑁂 𑀘 𑀤𑀼𑀓𑁆𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀬𑁄 𑀓𑀸𑀬𑁂 𑀘 𑀤𑀼𑀓𑁆𑀔𑀸𑀬 𑀘 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄, 𑀲𑁄 𑀧𑀳𑀻𑀬𑀢𑀺.

‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀸 𑀔𑁄 𑀫𑁆𑀬𑀸𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀲𑀸 𑀘 𑀔𑁄 𑀧𑀝𑀺𑀘𑁆𑀘, 𑀦𑁄 𑀅𑀧𑁆𑀧𑀝𑀺𑀘𑁆𑀘. 𑀓𑀺𑀁 𑀧𑀝𑀺𑀘𑁆𑀘? 𑀇𑀫𑀫𑁂𑀯 𑀓𑀸𑀬𑀁 𑀧𑀝𑀺𑀘𑁆𑀘. 𑀅𑀬𑀁 𑀔𑁄 𑀧𑀦 𑀓𑀸𑀬𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀅𑀦𑀺𑀘𑁆𑀘𑀁 𑀔𑁄 𑀧𑀦 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀓𑀸𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀓𑀼𑀢𑁄 𑀦𑀺𑀘𑁆𑀘𑀸 𑀪𑀯𑀺𑀲𑁆𑀲𑀢𑀻’𑀢𑀺! 𑀲𑁄 𑀓𑀸𑀬𑁂 𑀘 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀢𑀲𑁆𑀲 𑀓𑀸𑀬𑁂 𑀘 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀬𑁄 𑀓𑀸𑀬𑁂 𑀘 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄, 𑀲𑁄 𑀧𑀳𑀻𑀬𑀢𑀺.

‘‘𑀲𑁄 𑀲𑀼𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀲𑀸 𑀅𑀦𑀺𑀘𑁆𑀘𑀸𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀚𑁆𑀛𑁄𑀲𑀺𑀢𑀸𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀪𑀺𑀦𑀦𑁆𑀤𑀺𑀢𑀸𑀢𑀺 𑀧𑀚𑀸𑀦𑀸𑀢𑀺; 𑀤𑀼𑀓𑁆𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀲𑀸 𑀅𑀦𑀺𑀘𑁆𑀘𑀸𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀚𑁆𑀛𑁄𑀲𑀺𑀢𑀸𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀪𑀺𑀦𑀦𑁆𑀤𑀺𑀢𑀸𑀢𑀺 𑀧𑀚𑀸𑀦𑀸𑀢𑀺; 𑀅𑀤𑀼𑀓𑁆𑀔𑀫𑀲𑀼𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀲𑀸 𑀅𑀦𑀺𑀘𑁆𑀘𑀸𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀚𑁆𑀛𑁄𑀲𑀺𑀢𑀸𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀪𑀺𑀦𑀦𑁆𑀤𑀺𑀢𑀸𑀢𑀺 𑀧𑀚𑀸𑀦𑀸𑀢𑀺. 𑀲𑁄 𑀲𑀼𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺; 𑀤𑀼𑀓𑁆𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺; 𑀅𑀤𑀼𑀓𑁆𑀔𑀫𑀲𑀼𑀔𑀜𑁆𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺. 𑀲𑁄 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 [𑀲𑀻𑀢𑀺𑀪𑀯𑀺𑀲𑁆𑀲𑀦𑁆𑀢𑀻𑀢𑀺 (𑀲𑀻. 𑀧𑀻. 𑀓.)] 𑀧𑀚𑀸𑀦𑀸𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀢𑁂𑀮𑀜𑁆𑀘 𑀧𑀝𑀺𑀘𑁆𑀘 𑀯𑀝𑁆𑀝𑀺𑀜𑁆𑀘 𑀧𑀝𑀺𑀘𑁆𑀘 𑀢𑁂𑀮𑀧𑁆𑀧𑀤𑀻𑀧𑁄 𑀛𑀸𑀬𑁂𑀬𑁆𑀬, 𑀢𑀲𑁆𑀲𑁂𑀯 𑀢𑁂𑀮𑀲𑁆𑀲 𑀘 𑀯𑀝𑁆𑀝𑀺𑀬𑀸 𑀘 𑀧𑀭𑀺𑀬𑀸𑀤𑀸𑀦𑀸 𑀅𑀦𑀸𑀳𑀸𑀭𑁄 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀕𑁂𑀮𑀜𑁆𑀜𑀲𑀼𑀢𑁆𑀢𑀁

𑁨𑁫𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀕𑀺𑀮𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀓𑀸𑀮𑀁 𑀆𑀕𑀫𑁂𑀬𑁆𑀬. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺… 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺…𑀧𑁂… 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀓𑀸𑀮𑀁 𑀆𑀕𑀫𑁂𑀬𑁆𑀬. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻.

‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀸 𑀔𑁄 𑀫𑁆𑀬𑀸𑀬𑀁 𑀲𑀼𑀔𑀸 𑀯𑁂𑀤𑀦𑀸; 𑀲𑀸 𑀘 𑀔𑁄 𑀧𑀝𑀺𑀘𑁆𑀘, 𑀦𑁄 𑀅𑀧𑁆𑀧𑀝𑀺𑀘𑁆𑀘. 𑀓𑀺𑀁 𑀧𑀝𑀺𑀘𑁆𑀘? 𑀇𑀫𑀫𑁂𑀯 𑀨𑀲𑁆𑀲𑀁 𑀧𑀝𑀺𑀘𑁆𑀘. 𑀅𑀬𑀁 𑀔𑁄 𑀧𑀦 𑀨𑀲𑁆𑀲𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀅𑀦𑀺𑀘𑁆𑀘𑀁 𑀔𑁄 𑀧𑀦 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀓𑀼𑀢𑁄 𑀦𑀺𑀘𑁆𑀘𑀸 𑀪𑀯𑀺𑀲𑁆𑀲𑀢𑀻’𑀢𑀺! 𑀲𑁄 𑀨𑀲𑁆𑀲𑁂 𑀘 𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀢𑀲𑁆𑀲 𑀨𑀲𑁆𑀲𑁂 𑀘 𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀯𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀬𑁄 𑀨𑀲𑁆𑀲𑁂 𑀘 𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄, 𑀲𑁄 𑀧𑀳𑀻𑀬𑀢𑀺.

‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀲𑀢𑀲𑁆𑀲…𑀧𑁂… 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸…𑀧𑁂… 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀸 𑀔𑁄 𑀫𑁆𑀬𑀸𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸; 𑀲𑀸 𑀘 𑀔𑁄 𑀧𑀝𑀺𑀘𑁆𑀘, 𑀦𑁄 𑀅𑀧𑁆𑀧𑀝𑀺𑀘𑁆𑀘. 𑀓𑀺𑀁 𑀧𑀝𑀺𑀘𑁆𑀘? 𑀇𑀫𑀫𑁂𑀯 𑀨𑀲𑁆𑀲𑀁 𑀧𑀝𑀺𑀘𑁆𑀘…𑀧𑁂… 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀧𑀚𑀸𑀦𑀸𑀢𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀢𑁂𑀮𑀜𑁆𑀘 𑀧𑀝𑀺𑀘𑁆𑀘 𑀯𑀝𑁆𑀝𑀺𑀜𑁆𑀘 𑀧𑀝𑀺𑀘𑁆𑀘 𑀢𑁂𑀮𑀧𑁆𑀧𑀤𑀻𑀧𑁄 𑀛𑀸𑀬𑁂𑀬𑁆𑀬, 𑀢𑀲𑁆𑀲𑁂𑀯 𑀢𑁂𑀮𑀲𑁆𑀲 𑀘 𑀯𑀝𑁆𑀝𑀺𑀬𑀸 𑀘 𑀧𑀭𑀺𑀬𑀸𑀤𑀸𑀦𑀸 𑀅𑀦𑀸𑀳𑀸𑀭𑁄 𑀦𑀺𑀩𑁆𑀩𑀸𑀬𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀅𑀦𑀺𑀘𑁆𑀘𑀲𑀼𑀢𑁆𑀢𑀁

𑁨𑁫𑁭. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸’’𑀢𑀺. 𑀦𑀯𑀫𑀁.

𑁧𑁦. 𑀨𑀲𑁆𑀲𑀫𑀽𑀮𑀓𑀲𑀼𑀢𑁆𑀢𑀁

𑁨𑁫𑁮. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀨𑀲𑁆𑀲𑀚𑀸 𑀨𑀲𑁆𑀲𑀫𑀽𑀮𑀓𑀸 𑀨𑀲𑁆𑀲𑀦𑀺𑀤𑀸𑀦𑀸 𑀨𑀲𑁆𑀲𑀧𑀘𑁆𑀘𑀬𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀲𑀼𑀔𑀯𑁂𑀤𑀦𑀺𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸. 𑀢𑀲𑁆𑀲𑁂𑀯 𑀲𑀼𑀔𑀯𑁂𑀤𑀦𑀺𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸, 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺, 𑀲𑀸 𑀯𑀽𑀧𑀲𑀫𑁆𑀫𑀢𑀺. 𑀤𑀼𑀓𑁆𑀔𑀯𑁂𑀤𑀦𑀺𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀢𑀲𑁆𑀲𑁂𑀯 𑀤𑀼𑀓𑁆𑀔𑀯𑁂𑀤𑀦𑀺𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸, 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺, 𑀲𑀸 𑀯𑀽𑀧𑀲𑀫𑁆𑀫𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀢𑀲𑁆𑀲𑁂𑀯 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸, 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺, 𑀲𑀸 𑀯𑀽𑀧𑀲𑀫𑁆𑀫𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀓𑀝𑁆𑀞𑀸𑀦𑀁 𑀲𑀗𑁆𑀖𑀝𑁆𑀝𑀦𑀲𑀫𑁄𑀥𑀸𑀦𑀸 [𑀲𑀗𑁆𑀔𑀢𑁆𑀢𑀸 𑀢𑀲𑁆𑀲 𑀲𑀫𑁄𑀥𑀸𑀦𑀸 (𑀲𑁆𑀬𑀸. 𑀓𑀁.) 𑀲𑀗𑁆𑀖𑀢𑁆𑀢𑀸 𑀢𑀲𑁆𑀲 𑀲𑀫𑁄𑀥𑀸𑀦𑀸 (𑀓.) 𑀲𑀁. 𑀦𑀺. 𑁨.𑁬𑁨 𑀧𑀲𑁆𑀲𑀺𑀢𑀩𑁆𑀩𑀁] 𑀉𑀲𑁆𑀫𑀸 𑀚𑀸𑀬𑀢𑀺, 𑀢𑁂𑀚𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑀺. 𑀢𑁂𑀲𑀁𑀬𑁂𑀯 𑀓𑀝𑁆𑀞𑀸𑀦𑀁 𑀦𑀸𑀦𑀸𑀪𑀸𑀯𑀸 𑀯𑀺𑀦𑀺𑀓𑁆𑀔𑁂𑀧𑀸, 𑀬𑀸 𑀢𑀚𑁆𑀚𑀸 𑀉𑀲𑁆𑀫𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺, 𑀲𑀸 𑀯𑀽𑀧𑀲𑀫𑁆𑀫𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀨𑀲𑁆𑀲𑀚𑀸 𑀨𑀲𑁆𑀲𑀫𑀽𑀮𑀓𑀸 𑀨𑀲𑁆𑀲𑀦𑀺𑀤𑀸𑀦𑀸 𑀨𑀲𑁆𑀲𑀧𑀘𑁆𑀘𑀬𑀸. 𑀢𑀚𑁆𑀚𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀢𑀚𑁆𑀚𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀚𑁆𑀚𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸 𑀢𑀚𑁆𑀚𑀸 𑀯𑁂𑀤𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺. 𑀤𑀲𑀫𑀁.

𑀲𑀕𑀸𑀣𑀸𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀫𑀸𑀥𑀺 𑀲𑀼𑀔𑀁 𑀧𑀳𑀸𑀦𑁂𑀦, 𑀧𑀸𑀢𑀸𑀮𑀁 𑀤𑀝𑁆𑀞𑀩𑁆𑀩𑁂𑀦 𑀘;

𑀲𑀮𑁆𑀮𑁂𑀦 𑀘𑁂𑀯 𑀕𑁂𑀮𑀜𑁆𑀜𑀸, 𑀅𑀦𑀺𑀘𑁆𑀘 𑀨𑀲𑁆𑀲𑀫𑀽𑀮𑀓𑀸𑀢𑀺.

𑁨. 𑀭𑀳𑁄𑀕𑀢𑀯𑀕𑁆𑀕𑁄

𑁧. 𑀭𑀳𑁄𑀕𑀢𑀲𑀼𑀢𑁆𑀢𑀁

𑁨𑁫𑁯. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀁 𑀪𑀕𑀯𑀢𑀸 𑁋 ‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺’𑀦𑁆𑀢𑀺. 𑀓𑀺𑀁 𑀦𑀼 𑀔𑁄 𑀏𑀢𑀁 𑀪𑀕𑀯𑀢𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺’’’𑀦𑁆𑀢𑀺?

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼! 𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀼, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀫𑀬𑀸. 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀫𑀬𑀸. 𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀼, 𑀫𑀬𑀸 𑁋 ‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀲𑁆𑀫𑀺’𑀦𑁆𑀢𑀺. 𑀢𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀼, 𑀫𑀬𑀸 𑀲𑀗𑁆𑀔𑀸𑀭𑀸𑀦𑀁𑀬𑁂𑀯 𑀅𑀦𑀺𑀘𑁆𑀘𑀢𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺’𑀦𑁆𑀢𑀺. 𑀢𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀼, 𑀫𑀬𑀸 𑀲𑀗𑁆𑀔𑀸𑀭𑀸𑀦𑀁𑀬𑁂𑀯 𑀔𑀬𑀥𑀫𑁆𑀫𑀢𑀁…𑀧𑁂… 𑀯𑀬𑀥𑀫𑁆𑀫𑀢𑀁…𑀧𑁂… 𑀯𑀺𑀭𑀸𑀕𑀥𑀫𑁆𑀫𑀢𑀁 …𑀧𑁂… 𑀦𑀺𑀭𑁄𑀥𑀥𑀫𑁆𑀫𑀢𑀁…𑀧𑁂… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺’𑀦𑁆𑀢𑀺. 𑀅𑀣 𑀔𑁄 𑀧𑀦, 𑀪𑀺𑀓𑁆𑀔𑀼, 𑀫𑀬𑀸 𑀅𑀦𑀼𑀧𑀼𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁄 𑀅𑀓𑁆𑀔𑀸𑀢𑁄. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀦𑀺𑀭𑀼𑀤𑁆𑀥𑀸 𑀳𑁄𑀢𑀺. 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀦𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀺. 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺 𑀦𑀺𑀭𑀼𑀤𑁆𑀥𑀸 𑀳𑁄𑀢𑀺. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸 𑀦𑀺𑀭𑀼𑀤𑁆𑀥𑀸 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀦𑀺𑀭𑀼𑀤𑁆𑀥𑀸 𑀳𑁄𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀦𑀺𑀭𑀼𑀤𑁆𑀥𑀸 𑀳𑁄𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀦𑀺𑀭𑀼𑀤𑁆𑀥𑀸 𑀳𑁄𑀢𑀺. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀦𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀤𑁄𑀲𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀫𑁄𑀳𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀼, 𑀫𑀬𑀸 𑀅𑀦𑀼𑀧𑀼𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀯𑀽𑀧𑀲𑀦𑁆𑀢𑀸 𑀳𑁄𑀢𑀺. 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺…𑀧𑁂… 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺, 𑀤𑁄𑀲𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺, 𑀫𑁄𑀳𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺. 𑀙𑀬𑀺𑀫𑀸, 𑀪𑀺𑀓𑁆𑀔𑀼, 𑀧𑀲𑁆𑀲𑀤𑁆𑀥𑀺𑀬𑁄. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺. 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑁄𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀫𑁄𑀳𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀻’’𑀢𑀺. 𑀧𑀞𑀫𑀁.

𑁨. 𑀧𑀞𑀫𑀆𑀓𑀸𑀲𑀲𑀼𑀢𑁆𑀢𑀁

𑁨𑁬𑁦. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀓𑀸𑀲𑁂 𑀯𑀺𑀯𑀺𑀥𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀧𑀼𑀭𑀢𑁆𑀣𑀺𑀫𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀲𑀭𑀚𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀅𑀭𑀚𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀲𑀻𑀢𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀡𑁆𑀳𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀭𑀺𑀢𑁆𑀢𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀅𑀥𑀺𑀫𑀢𑁆𑀢𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀓𑀸𑀬𑀲𑁆𑀫𑀺𑀁 𑀯𑀺𑀯𑀺𑀥𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀼𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀬𑀣𑀸𑀧𑀺 𑀯𑀸𑀢𑀸 𑀆𑀓𑀸𑀲𑁂, 𑀯𑀸𑀬𑀦𑁆𑀢𑀺 𑀯𑀺𑀯𑀺𑀥𑀸 𑀧𑀼𑀣𑀽;

𑀧𑀼𑀭𑀢𑁆𑀣𑀺𑀫𑀸 𑀧𑀘𑁆𑀙𑀺𑀫𑀸 𑀘𑀸𑀧𑀺, 𑀉𑀢𑁆𑀢𑀭𑀸 𑀅𑀣 𑀤𑀓𑁆𑀔𑀺𑀡𑀸.

‘‘𑀲𑀭𑀚𑀸 𑀅𑀭𑀚𑀸 𑀘𑀧𑀺, 𑀲𑀻𑀢𑀸 𑀉𑀡𑁆𑀳𑀸 𑀘 𑀏𑀓𑀤𑀸;

𑀅𑀥𑀺𑀫𑀢𑁆𑀢𑀸 𑀧𑀭𑀺𑀢𑁆𑀢𑀸 𑀘, 𑀧𑀼𑀣𑀽 𑀯𑀸𑀬𑀦𑁆𑀢𑀺 𑀫𑀸𑀮𑀼𑀢𑀸.

‘‘𑀢𑀣𑁂𑀯𑀺𑀫𑀲𑁆𑀫𑀺𑀁 𑀓𑀸𑀬𑀲𑁆𑀫𑀺𑀁, 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀺 𑀯𑁂𑀤𑀦𑀸;

𑀲𑀼𑀔𑀤𑀼𑀓𑁆𑀔𑀲𑀫𑀼𑀧𑁆𑀧𑀢𑁆𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀘 𑀬𑀸.

‘‘𑀬𑀢𑁄 𑀘 𑀪𑀺𑀓𑁆𑀔𑀼 𑀆𑀢𑀸𑀧𑀻, 𑀲𑀫𑁆𑀧𑀚𑀜𑁆𑀜𑀁 𑀦 𑀭𑀺𑀜𑁆𑀘𑀢𑀺 [𑀲𑀫𑁆𑀧𑀚𑀸𑀦𑁄 𑀦𑀺𑀭𑀽𑀧𑀥𑀺 (𑀓.)];

𑀢𑀢𑁄 𑀲𑁄 𑀯𑁂𑀤𑀦𑀸 𑀲𑀩𑁆𑀩𑀸, 𑀧𑀭𑀺𑀚𑀸𑀦𑀸𑀢𑀺 𑀧𑀡𑁆𑀟𑀺𑀢𑁄.

‘‘𑀲𑁄 𑀯𑁂𑀤𑀦𑀸 𑀧𑀭𑀺𑀜𑁆𑀜𑀸𑀬, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀸𑀲𑀯𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀥𑀫𑁆𑀫𑀝𑁆𑀞𑁄, 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀺 𑀯𑁂𑀤𑀕𑀽’’𑀢𑀺. 𑀤𑀼𑀢𑀺𑀬𑀁;

𑁩. 𑀤𑀼𑀢𑀺𑀬𑀆𑀓𑀸𑀲𑀲𑀼𑀢𑁆𑀢𑀁

𑁨𑁬𑁧. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀓𑀸𑀲𑁂 𑀯𑀺𑀯𑀺𑀥𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀧𑀼𑀭𑀢𑁆𑀣𑀺𑀫𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺…𑀧𑁂… 𑀅𑀥𑀺𑀫𑀢𑁆𑀢𑀸𑀧𑀺 𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀓𑀸𑀬𑀲𑁆𑀫𑀺𑀁 𑀯𑀺𑀯𑀺𑀥𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀼𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀅𑀕𑀸𑀭𑀲𑀼𑀢𑁆𑀢𑀁

𑁨𑁬𑁨. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸𑀕𑀸𑀭𑀁. 𑀢𑀢𑁆𑀣 𑀧𑀼𑀭𑀢𑁆𑀣𑀺𑀫𑀸𑀬𑀧𑀺 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀧𑀘𑁆𑀙𑀺𑀫𑀸𑀬𑀧𑀺 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀉𑀢𑁆𑀢𑀭𑀸𑀬𑀧𑀺 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀤𑀓𑁆𑀔𑀺𑀡𑀸𑀬𑀧𑀺 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺. 𑀔𑀢𑁆𑀢𑀺𑀬𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀯𑁂𑀲𑁆𑀲𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀲𑀼𑀤𑁆𑀤𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀓𑀸𑀬𑀲𑁆𑀫𑀺𑀁 𑀯𑀺𑀯𑀺𑀥𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀼𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀸𑀫𑀺𑀲𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸𑀫𑀺𑀲𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸𑀫𑀺𑀲𑀸𑀧𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀦𑀺𑀭𑀸𑀫𑀺𑀲𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀭𑀸𑀫𑀺𑀲𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀭𑀸𑀫𑀺𑀲𑀸𑀧𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀆𑀦𑀦𑁆𑀤𑀲𑀼𑀢𑁆𑀢𑀁

𑁨𑁬𑁩. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀯𑁂𑀤𑀦𑀸, 𑀓𑀢𑀫𑁄 𑀯𑁂𑀤𑀦𑀸𑀲𑀫𑀼𑀤𑀬𑁄, 𑀓𑀢𑀫𑁄 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀓𑀢𑀫𑀸 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀓𑁄 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀦𑁆𑀢𑀺? 𑀢𑀺𑀲𑁆𑀲𑁄 𑀇𑀫𑀸, 𑀆𑀦𑀦𑁆𑀤, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀆𑀦𑀦𑁆𑀤, 𑀯𑁂𑀤𑀦𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄. 𑀬𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀬𑀁 𑀯𑁂𑀤𑀦𑀸𑀬 𑀆𑀤𑀻𑀦𑀯𑁄. 𑀬𑁄 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁. 𑀅𑀣 𑀔𑁄 𑀧𑀦𑀸𑀦𑀦𑁆𑀤, 𑀫𑀬𑀸 𑀅𑀦𑀼𑀧𑀼𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁄 𑀅𑀓𑁆𑀔𑀸𑀢𑁄. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀦𑀺𑀭𑀼𑀤𑁆𑀥𑀸 𑀳𑁄𑀢𑀺…𑀧𑁂… 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀦𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀤𑁄𑀲𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀫𑁄𑀳𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺. 𑀅𑀣 𑀔𑁄 𑀧𑀦𑀸𑀦𑀦𑁆𑀤, 𑀫𑀬𑀸 𑀅𑀦𑀼𑀧𑀼𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀯𑀽𑀧𑀲𑀦𑁆𑀢𑀸 𑀳𑁄𑀢𑀺…𑀧𑁂… 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺, 𑀤𑁄𑀲𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺, 𑀫𑁄𑀳𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺. 𑀅𑀣 𑀔𑁄 𑀧𑀦𑀸𑀦𑀦𑁆𑀤, 𑀫𑀬𑀸 𑀅𑀦𑀼𑀧𑀼𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀅𑀓𑁆𑀔𑀸𑀢𑀸. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑁄𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀫𑁄𑀳𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀆𑀦𑀦𑁆𑀤𑀲𑀼𑀢𑁆𑀢𑀁

𑁨𑁬𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑀸 𑀦𑀼 𑀔𑁄, 𑀆𑀦𑀦𑁆𑀤, 𑀯𑁂𑀤𑀦𑀸, 𑀓𑀢𑀫𑁄 𑀯𑁂𑀤𑀦𑀸𑀲𑀫𑀼𑀤𑀬𑁄, 𑀓𑀢𑀫𑁄 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀓𑀢𑀫𑀸 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀓𑁄 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀕𑀯𑀦𑁆𑀦𑁂𑀢𑁆𑀢𑀺𑀓𑀸 𑀪𑀕𑀯𑀫𑁆𑀧𑀝𑀺𑀲𑀭𑀡𑀸. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀜𑁆𑀜𑁂𑀯 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀆𑀦𑀦𑁆𑀤, 𑀲𑀼𑀡𑁄𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀢𑀺𑀲𑁆𑀲𑁄 𑀇𑀫𑀸, 𑀆𑀦𑀦𑁆𑀤, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀆𑀦𑀦𑁆𑀤, 𑀯𑁂𑀤𑀦𑀸…𑀧𑁂… 𑀨𑀲𑁆𑀲𑀲𑀫𑀼𑀤𑀬𑀸…𑀧𑁂… 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑁄𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀫𑁄𑀳𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀁

𑁨𑁬𑁫. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀢𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀯𑁂𑀤𑀦𑀸, 𑀓𑀢𑀫𑁄 𑀯𑁂𑀤𑀦𑀸𑀲𑀫𑀼𑀤𑀬𑁄, 𑀓𑀢𑀫𑁄 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀓𑀢𑀫𑀸 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀓𑁄 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺? ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄. 𑀬𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀬𑀁 𑀯𑁂𑀤𑀦𑀸𑀬 𑀆𑀤𑀻𑀦𑀯𑁄. 𑀬𑁄 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁.

‘‘𑀅𑀣 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀬𑀸 𑀅𑀦𑀼𑀧𑀼𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁄 𑀅𑀓𑁆𑀔𑀸𑀢𑁄. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀦𑀺𑀭𑀼𑀤𑁆𑀥𑀸 𑀳𑁄𑀢𑀺…𑀧𑁂… 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀤𑁄𑀲𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀫𑁄𑀳𑁄 𑀦𑀺𑀭𑀼𑀤𑁆𑀥𑁄 𑀳𑁄𑀢𑀺. 𑀅𑀣 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀬𑀸 𑀅𑀦𑀼𑀧𑀼𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀯𑀽𑀧𑀲𑀦𑁆𑀢𑀸 𑀳𑁄𑀢𑀺…𑀧𑁂… 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺, 𑀤𑁄𑀲𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺, 𑀫𑁄𑀳𑁄 𑀯𑀽𑀧𑀲𑀦𑁆𑀢𑁄 𑀳𑁄𑀢𑀺. 𑀙𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀤𑁆𑀥𑀺𑀬𑁄. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺. 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀺. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑁄𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀫𑁄𑀳𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀁

𑁨𑁬𑁬. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑀸 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸, 𑀓𑀢𑀫𑁄 𑀯𑁂𑀤𑀦𑀸𑀲𑀫𑀼𑀤𑀬𑁄, 𑀓𑀢𑀫𑁄 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀓𑀢𑀫𑀸 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀓𑁄 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸…𑀧𑁂…’’ ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸…𑀧𑁂… 𑀨𑀲𑁆𑀲𑀲𑀫𑀼𑀤𑀬𑀸…𑀧𑁂…. (𑀬𑀣𑀸 𑀧𑀼𑀭𑀺𑀫𑀲𑀼𑀢𑁆𑀢𑀦𑁆𑀢𑁂, 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.) 𑀅𑀝𑁆𑀞𑀫𑀁.

𑁯. 𑀧𑀜𑁆𑀘𑀓𑀗𑁆𑀕𑀲𑀼𑀢𑁆𑀢𑀁

𑁨𑁬𑁭. 𑀅𑀣 𑀔𑁄 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀉𑀤𑀸𑀬𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂 𑀉𑀤𑀸𑀬𑀺, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺? ‘‘𑀢𑀺𑀲𑁆𑀲𑁄 𑀔𑁄, 𑀣𑀧𑀢𑀺, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀔𑁄, 𑀣𑀧𑀢𑀺, 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄, 𑀪𑀦𑁆𑀢𑁂 𑀉𑀤𑀸𑀬𑀺, 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀤𑁆𑀯𑁂 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀬𑀸𑀬𑀁, 𑀪𑀦𑁆𑀢𑁂, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀦𑁆𑀢𑀲𑁆𑀫𑀺𑀁 𑀏𑀲𑀸 𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀧𑀜𑁆𑀘𑀓𑀗𑁆𑀕𑀁 𑀣𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄, 𑀣𑀧𑀢𑀺, 𑀤𑁆𑀯𑁂 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄, 𑀪𑀦𑁆𑀢𑁂 𑀉𑀤𑀸𑀬𑀺, 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀤𑁆𑀯𑁂 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀬𑀸𑀬𑀁, 𑀪𑀦𑁆𑀢𑁂, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀦𑁆𑀢𑀲𑁆𑀫𑀺𑀁 𑀏𑀲𑀸 𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀧𑀜𑁆𑀘𑀓𑀗𑁆𑀕𑀁 𑀣𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄, 𑀣𑀧𑀢𑀺, 𑀤𑁆𑀯𑁂 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄, 𑀪𑀦𑁆𑀢𑁂 𑀉𑀤𑀸𑀬𑀺, 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀤𑁆𑀯𑁂 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀬𑀸𑀬𑀁, 𑀪𑀦𑁆𑀢𑁂, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀦𑁆𑀢𑀲𑁆𑀫𑀺𑀁 𑀏𑀲𑀸 𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺. 𑀦𑁂𑀯 𑀲𑀓𑁆𑀔𑀺 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀧𑀜𑁆𑀘𑀓𑀗𑁆𑀕𑀁 𑀣𑀧𑀢𑀺𑀁 𑀲𑀜𑁆𑀜𑀸𑀧𑁂𑀢𑀼𑀁, 𑀦 𑀧𑀦𑀸𑀲𑀓𑁆𑀔𑀺 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀲𑀜𑁆𑀜𑀸𑀧𑁂𑀢𑀼𑀁. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀢𑁄 𑀉𑀤𑀸𑀬𑀺𑀲𑁆𑀲 𑀧𑀜𑁆𑀘𑀓𑀗𑁆𑀕𑁂𑀦 𑀣𑀧𑀢𑀺𑀦𑀸 𑀲𑀤𑁆𑀥𑀺𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀸𑀯𑀢𑀓𑁄 𑀆𑀬𑀲𑁆𑀫𑀢𑁄 𑀉𑀤𑀸𑀬𑀺𑀲𑁆𑀲 𑀧𑀜𑁆𑀘𑀓𑀗𑁆𑀕𑁂𑀦 𑀣𑀧𑀢𑀺𑀦𑀸 𑀲𑀤𑁆𑀥𑀺𑀁 𑀅𑀳𑁄𑀲𑀺 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

‘‘𑀲𑀦𑁆𑀢𑀫𑁂𑀯, 𑀆𑀦𑀦𑁆𑀤, 𑀧𑀭𑀺𑀬𑀸𑀬𑀁 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀩𑁆𑀪𑀦𑀼𑀫𑁄𑀤𑀺; 𑀲𑀦𑁆𑀢𑀜𑁆𑀘 𑀧𑀦𑀸𑀦𑀦𑁆𑀤, 𑀧𑀭𑀺𑀬𑀸𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀧𑀜𑁆𑀘𑀓𑀗𑁆𑀕𑀲𑁆𑀲 𑀣𑀧𑀢𑀺𑀦𑁄 𑀦𑀸𑀩𑁆𑀪𑀦𑀼𑀫𑁄𑀤𑀺. 𑀤𑁆𑀯𑁂𑀧𑀺 𑀫𑀬𑀸, 𑀆𑀦𑀦𑁆𑀤, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. 𑀢𑀺𑀲𑁆𑀲𑁄𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. 𑀧𑀜𑁆𑀘𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. 𑀙𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. 𑀅𑀝𑁆𑀞𑀸𑀭𑀲𑀸𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. 𑀙𑀢𑁆𑀢𑀺𑀁𑀲𑀸𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. 𑀅𑀝𑁆𑀞𑀲𑀢𑀫𑁆𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. 𑀏𑀯𑀁 𑀧𑀭𑀺𑀬𑀸𑀬𑀤𑁂𑀲𑀺𑀢𑁄 𑀔𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄. 𑀏𑀯𑀁 𑀧𑀭𑀺𑀬𑀸𑀬𑀤𑁂𑀲𑀺𑀢𑁂 𑀔𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁂 𑀬𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀮𑀧𑀺𑀢𑀁, 𑀦 𑀲𑀫𑀦𑀼𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀦 𑀲𑀫𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀺, 𑀦 𑀲𑀫𑀦𑀼𑀫𑁄𑀤𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀏𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺 [𑀯𑀺𑀳𑀭𑀺𑀲𑁆𑀲𑀦𑁆𑀢𑀺 (𑀲𑀻. 𑀧𑀻. 𑀓.)]. 𑀏𑀯𑀁 𑀧𑀭𑀺𑀬𑀸𑀬𑀤𑁂𑀲𑀺𑀢𑁄 𑀔𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄. 𑀏𑀯𑀁 𑀧𑀭𑀺𑀬𑀸𑀬𑀤𑁂𑀲𑀺𑀢𑁂 𑀔𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁂 𑀬𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀮𑀧𑀺𑀢𑀁 𑀲𑀫𑀦𑀼𑀫𑀜𑁆𑀜𑀺𑀲𑁆𑀲𑀦𑁆𑀢𑀺 𑀲𑀫𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀺 𑀲𑀫𑀦𑀼𑀫𑁄𑀤𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀏𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺.

‘‘𑀧𑀜𑁆𑀘𑀺𑀫𑁂, 𑀆𑀦𑀦𑁆𑀤, 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀬𑀁 𑀔𑁄, 𑀆𑀦𑀦𑁆𑀤, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀲𑀼𑀔𑀁. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸, 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸, 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸, ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫, ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫, ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀬𑁂 𑀔𑁄, 𑀆𑀦𑀦𑁆𑀤, 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀢𑀁𑀧𑀭𑀫𑀁 𑀲𑀦𑁆𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’𑀢𑀺 𑁋 𑀇𑀤𑀁 𑀦𑁂𑀲𑀸𑀳𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀓𑀢𑀫𑀜𑁆𑀘𑀸𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀏𑀢𑀫𑁆𑀳𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀡𑁄 𑀕𑁄𑀢𑀫𑁄 𑀆𑀳, 𑀢𑀜𑁆𑀘 𑀲𑀼𑀔𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀺. 𑀢𑀬𑀺𑀤𑀁 𑀓𑀺𑀁𑀲𑀼, 𑀢𑀬𑀺𑀤𑀁 𑀓𑀣𑀁𑀲𑀽’𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀆𑀦𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀦 𑀔𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀼𑀔𑀜𑁆𑀜𑁂𑀯 𑀯𑁂𑀤𑀦𑀁 𑀲𑀦𑁆𑀥𑀸𑀬 𑀲𑀼𑀔𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀺. 𑀬𑀢𑁆𑀣 𑀬𑀢𑁆𑀣, 𑀆𑀯𑀼𑀲𑁄, 𑀲𑀼𑀔𑀁 𑀉𑀧𑀮𑀩𑁆𑀪𑀢𑀺, 𑀬𑀳𑀺𑀁 𑀬𑀳𑀺𑀁 [𑀬𑀁 𑀳𑀺𑀬𑀁 𑀳𑀺 𑀲𑀼𑀔𑀁 (𑀲𑀻. 𑀧𑀻.), 𑀬𑀳𑀺𑀁 𑀬𑀳𑀺𑀁 𑀲𑀼𑀔𑀁 (𑀲𑁆𑀬𑀸. 𑀓𑀁. 𑀓.) 𑀫. 𑀦𑀺. 𑁨.𑁯𑁧], 𑀢𑀁 𑀢𑀁 𑀢𑀣𑀸𑀕𑀢𑁄 𑀲𑀼𑀔𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀻’’’𑀢𑀺. 𑀦𑀯𑀫𑀁.

𑁧𑁦. 𑀪𑀺𑀓𑁆𑀔𑀼𑀲𑀼𑀢𑁆𑀢𑀁

𑁨𑁬𑁮. ‘‘𑀤𑁆𑀯𑁂𑀧𑀺 𑀫𑀬𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦, 𑀢𑀺𑀲𑁆𑀲𑁄𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦, 𑀧𑀜𑁆𑀘𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦, 𑀙𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦, 𑀅𑀝𑁆𑀞𑀸𑀭𑀲𑀸𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦, 𑀙𑀢𑁆𑀢𑀺𑀁𑀲𑀸𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦, 𑀅𑀝𑁆𑀞𑀲𑀢𑀫𑁆𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. 𑀏𑀯𑀁 𑀧𑀭𑀺𑀬𑀸𑀬𑀤𑁂𑀲𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄. 𑀏𑀯𑀁 𑀧𑀭𑀺𑀬𑀸𑀬𑀤𑁂𑀲𑀺𑀢𑁂 𑀔𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀬𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀮𑀧𑀺𑀢𑀁 𑀦 𑀲𑀫𑀦𑀼𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀦 𑀲𑀫𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀺, 𑀦 𑀲𑀫𑀦𑀼𑀫𑁄𑀤𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀏𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺. 𑀏𑀯𑀁 𑀧𑀭𑀺𑀬𑀸𑀬𑀤𑁂𑀲𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄. 𑀏𑀯𑀁 𑀧𑀭𑀺𑀬𑀸𑀬𑀤𑁂𑀲𑀺𑀢𑁂 𑀔𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀬𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀮𑀧𑀺𑀢𑀁 𑀲𑀫𑀦𑀼𑀫𑀜𑁆𑀜𑀺𑀲𑁆𑀲𑀦𑁆𑀢𑀺 𑀲𑀫𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀺 𑀲𑀫𑀦𑀼𑀫𑁄𑀤𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀏𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸…𑀧𑁂… 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀡𑁄 𑀕𑁄𑀢𑀫𑁄 𑀆𑀳, 𑀢𑀜𑁆𑀘 𑀲𑀼𑀔𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀺. 𑀢𑀬𑀺𑀤𑀁 𑀓𑀺𑀁𑀲𑀼, 𑀢𑀬𑀺𑀤𑀁 𑀓𑀣𑀁𑀲𑀽’𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀦 𑀔𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀼𑀔𑀜𑁆𑀜𑁂𑀯 𑀯𑁂𑀤𑀦𑀁 𑀲𑀦𑁆𑀥𑀸𑀬 𑀲𑀼𑀔𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀺. 𑀬𑀢𑁆𑀣 𑀬𑀢𑁆𑀣, 𑀆𑀯𑀼𑀲𑁄, 𑀲𑀼𑀔𑀁 𑀉𑀧𑀮𑀩𑁆𑀪𑀢𑀺 𑀬𑀳𑀺𑀁 𑀬𑀳𑀺𑀁 [𑀬𑀁 𑀳𑀺 𑀬𑀁 𑀳𑀺 (𑀲𑀻. 𑀧𑀻.)], 𑀢𑀁 𑀢𑀁 𑀢𑀣𑀸𑀕𑀢𑁄 𑀲𑀼𑀔𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀻’’𑀢𑀺. 𑀤𑀲𑀫𑀁.

𑀭𑀳𑁄𑀕𑀢𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀭𑀳𑁄𑀕𑀢𑀁 𑀤𑁆𑀯𑁂 𑀆𑀓𑀸𑀲𑀁, 𑀅𑀕𑀸𑀭𑀁 𑀤𑁆𑀯𑁂 𑀘 𑀆𑀦𑀦𑁆𑀤𑀸;

𑀲𑀫𑁆𑀩𑀳𑀼𑀮𑀸 𑀤𑀼𑀯𑁂 𑀯𑀼𑀢𑁆𑀢𑀸, 𑀧𑀜𑁆𑀘𑀓𑀗𑁆𑀕𑁄 𑀘 𑀪𑀺𑀓𑁆𑀔𑀼𑀦𑀸𑀢𑀺.

𑁩. 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑀯𑀕𑁆𑀕𑁄

𑁧. 𑀲𑀻𑀯𑀓𑀲𑀼𑀢𑁆𑀢𑀁

𑁨𑁬𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀫𑁄𑀴𑀺𑀬𑀲𑀻𑀯𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑁄𑀴𑀺𑀬𑀲𑀻𑀯𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀢𑀺, 𑀪𑁄 𑀕𑁄𑀢𑀫, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’𑀢𑀺. 𑀇𑀥 [𑀇𑀥 𑀧𑀦 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀪𑀯𑀁 𑀕𑁄𑀢𑀫𑁄 𑀓𑀺𑀫𑀸𑀳𑀸’’𑀢𑀺?

‘‘𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀲𑀻𑀯𑀓, 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀸𑀫𑀫𑁆𑀧𑀺 𑀔𑁄 𑀏𑀢𑀁, 𑀲𑀻𑀯𑀓, 𑀯𑁂𑀤𑀺𑀢𑀩𑁆𑀩𑀁 [𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 (𑀲𑁆𑀬𑀸. 𑀓𑀁. 𑀓.)] 𑀬𑀣𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀮𑁄𑀓𑀲𑁆𑀲𑀧𑀺 𑀔𑁄 𑀏𑀢𑀁, 𑀲𑀻𑀯𑀓, 𑀲𑀘𑁆𑀘𑀲𑀫𑁆𑀫𑀢𑀁 𑀬𑀣𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀭, 𑀲𑀻𑀯𑀓, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’𑀢𑀺. 𑀬𑀜𑁆𑀘 𑀲𑀸𑀫𑀁 𑀜𑀸𑀢𑀁 𑀢𑀜𑁆𑀘 𑀅𑀢𑀺𑀥𑀸𑀯𑀦𑁆𑀢𑀺, 𑀬𑀜𑁆𑀘 𑀮𑁄𑀓𑁂 𑀲𑀘𑁆𑀘𑀲𑀫𑁆𑀫𑀢𑀁 𑀢𑀜𑁆𑀘 𑀅𑀢𑀺𑀥𑀸𑀯𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸𑀢𑀺 𑀯𑀤𑀸𑀫𑀺.

‘‘𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀑𑀧𑀓𑁆𑀓𑀫𑀺𑀓𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺𑀧𑀺 𑀔𑁄, 𑀲𑀻𑀯𑀓, 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀸𑀫𑀫𑁆𑀧𑀺 𑀔𑁄 𑀏𑀢𑀁, 𑀲𑀻𑀯𑀓, 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺𑀧𑀺 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀮𑁄𑀓𑀲𑁆𑀲𑀧𑀺 𑀔𑁄 𑀏𑀢𑀁, 𑀲𑀻𑀯𑀓, 𑀲𑀘𑁆𑀘𑀲𑀫𑁆𑀫𑀢𑀁. 𑀬𑀣𑀸 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺𑀧𑀺 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀢𑀢𑁆𑀭, 𑀲𑀻𑀯𑀓, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’𑀢𑀺. 𑀬𑀜𑁆𑀘 𑀲𑀸𑀫𑀁 𑀜𑀸𑀢𑀁 𑀢𑀜𑁆𑀘 𑀅𑀢𑀺𑀥𑀸𑀯𑀦𑁆𑀢𑀺 𑀬𑀜𑁆𑀘 𑀮𑁄𑀓𑁂 𑀲𑀘𑁆𑀘𑀲𑀫𑁆𑀫𑀢𑀁 𑀢𑀜𑁆𑀘 𑀅𑀢𑀺𑀥𑀸𑀯𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸𑀢𑀺 𑀯𑀤𑀸𑀫𑀻𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀫𑁄𑀴𑀺𑀬𑀲𑀻𑀯𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫 …𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’’𑀦𑁆𑀢𑀺.

‘‘𑀧𑀺𑀢𑁆𑀢𑀁 𑀲𑁂𑀫𑁆𑀳𑀜𑁆𑀘 𑀯𑀸𑀢𑁄 𑀘, 𑀲𑀦𑁆𑀦𑀺𑀧𑀸𑀢𑀸 𑀉𑀢𑀽𑀦𑀺 𑀘;

𑀯𑀺𑀲𑀫𑀁 𑀑𑀧𑀓𑁆𑀓𑀫𑀺𑀓𑀁, 𑀓𑀫𑁆𑀫𑀯𑀺𑀧𑀸𑀓𑁂𑀦 𑀅𑀝𑁆𑀞𑀫𑀻’’𑀢𑀺. 𑀧𑀞𑀫𑀁;

𑁨. 𑀅𑀝𑁆𑀞𑀲𑀢𑀲𑀼𑀢𑁆𑀢𑀁

𑁨𑁭𑁦. ‘‘𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑁄, 𑀥𑀫𑁆𑀫𑀧𑀭𑀺𑀬𑀸𑀬𑁄? 𑀤𑁆𑀯𑁂𑀧𑀺 𑀫𑀬𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦; 𑀢𑀺𑀲𑁆𑀲𑁄𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦; 𑀧𑀜𑁆𑀘𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦; 𑀙𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦; 𑀅𑀝𑁆𑀞𑀸𑀭𑀲𑀸𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦; 𑀙𑀢𑁆𑀢𑀺𑀁𑀲𑀸𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦; 𑀅𑀝𑁆𑀞𑀲𑀢𑀫𑁆𑀧𑀺 𑀫𑀬𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦. ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀯𑁂𑀤𑀦𑀸? 𑀓𑀸𑀬𑀺𑀓𑀸 𑀘 𑀘𑁂𑀢𑀲𑀺𑀓𑀸 𑀘 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀯𑁂𑀤𑀦𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑁂𑀤𑀦𑀸? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑁂𑀤𑀦𑀸? 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑁂𑀤𑀦𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀙 𑀯𑁂𑀤𑀦𑀸? 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀙 𑀯𑁂𑀤𑀦𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀸𑀭𑀲 𑀯𑁂𑀤𑀦𑀸? 𑀙 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸, 𑀙 𑀤𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸, 𑀙 𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀸𑀭𑀲 𑀯𑁂𑀤𑀦𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀙𑀢𑁆𑀢𑀺𑀁𑀲 𑀯𑁂𑀤𑀦𑀸? 𑀙 𑀕𑁂𑀳𑀲𑀺𑀢𑀸𑀦𑀺 [𑀕𑁂𑀳𑀲𑁆𑀲𑀺𑀢𑀸𑀦𑀺 (𑀅𑀝𑁆𑀞.)] 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 [𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸𑀦𑀺 (𑀅𑀝𑁆𑀞.)] 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀙𑀢𑁆𑀢𑀺𑀁𑀲 𑀯𑁂𑀤𑀦𑀸. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀲𑀢𑀁 𑀯𑁂𑀤𑀦𑀸? 𑀅𑀢𑀻𑀢𑀸 𑀙𑀢𑁆𑀢𑀺𑀁𑀲 𑀯𑁂𑀤𑀦𑀸, 𑀅𑀦𑀸𑀕𑀢𑀸 𑀙𑀢𑁆𑀢𑀺𑀁𑀲 𑀯𑁂𑀤𑀦𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀙𑀢𑁆𑀢𑀺𑀁𑀲 𑀯𑁂𑀤𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀲𑀢𑀁 𑀯𑁂𑀤𑀦𑀸. 𑀅𑀬𑀁, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀁

𑁨𑁭𑁧. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀯𑁂𑀤𑀦𑀸, 𑀓𑀢𑀫𑁄 𑀯𑁂𑀤𑀦𑀸𑀲𑀫𑀼𑀤𑀬𑁄, 𑀓𑀢𑀫𑀸 𑀯𑁂𑀤𑀦𑀸𑀲𑀫𑀼𑀤𑀬𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀓𑀢𑀫𑁄 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀓𑀢𑀫𑀸 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀓𑁄 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺?

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀼, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀼, 𑀯𑁂𑀤𑀦𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄. 𑀢𑀡𑁆𑀳𑀸 𑀯𑁂𑀤𑀦𑀸𑀲𑀫𑀼𑀤𑀬𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄; 𑀬𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀬𑀁 𑀯𑁂𑀤𑀦𑀸𑀬 𑀆𑀤𑀻𑀦𑀯𑁄; 𑀬𑁄 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀧𑀼𑀩𑁆𑀩𑀲𑀼𑀢𑁆𑀢𑀁

𑁨𑁭𑁨. ‘‘𑀧𑀼𑀩𑁆𑀩𑁂𑀯 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀓𑀢𑀫𑀸 𑀦𑀼 𑀔𑁄 𑀯𑁂𑀤𑀦𑀸, 𑀓𑀢𑀫𑁄 𑀯𑁂𑀤𑀦𑀸𑀲𑀫𑀼𑀤𑀬𑁄, 𑀓𑀢𑀫𑀸 𑀯𑁂𑀤𑀦𑀸𑀲𑀫𑀼𑀤𑀬𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀓𑀢𑀫𑁄 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀓𑀢𑀫𑀸 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀓𑁄 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀢𑀺𑀲𑁆𑀲𑁄 𑀇𑀫𑀸 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀯𑁂𑀤𑀦𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄. 𑀢𑀡𑁆𑀳𑀸 𑀯𑁂𑀤𑀦𑀸𑀲𑀫𑀼𑀤𑀬𑀕𑀸𑀫𑀺𑀦𑀻 𑀧𑀝𑀺𑀧𑀤𑀸…𑀧𑁂… 𑀬𑁄 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁. 𑀇𑀤𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡’’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀜𑀸𑀡𑀲𑀼𑀢𑁆𑀢𑀁