𑁯. 𑀙𑀦𑁆𑀦𑀯𑀕𑁆𑀕𑁄

𑁧. 𑀧𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀁

𑁮𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘‘𑀮𑁄𑀓𑁄, 𑀮𑁄𑀓𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺? ‘‘𑀬𑀁 𑀔𑁄, 𑀆𑀦𑀦𑁆𑀤, 𑀧𑀮𑁄𑀓𑀥𑀫𑁆𑀫𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀮𑁄𑀓𑁄. 𑀓𑀺𑀜𑁆𑀘, 𑀆𑀦𑀦𑁆𑀤, 𑀧𑀮𑁄𑀓𑀥𑀫𑁆𑀫𑀁? 𑀘𑀓𑁆𑀔𑀼 𑀔𑁄, 𑀆𑀦𑀦𑁆𑀤, 𑀧𑀮𑁄𑀓𑀥𑀫𑁆𑀫𑀁, 𑀭𑀽𑀧𑀸 𑀧𑀮𑁄𑀓𑀥𑀫𑁆𑀫𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀧𑀮𑁄𑀓𑀥𑀫𑁆𑀫𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀧𑀮𑁄𑀓𑀥𑀫𑁆𑀫𑁄, 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸…𑀧𑁂… 𑀢𑀫𑁆𑀧𑀺 𑀧𑀮𑁄𑀓𑀥𑀫𑁆𑀫𑀁…𑀧𑁂… 𑀚𑀺𑀯𑁆𑀳𑀸 𑀧𑀮𑁄𑀓𑀥𑀫𑁆𑀫𑀸, 𑀭𑀲𑀸 𑀧𑀮𑁄𑀓𑀥𑀫𑁆𑀫𑀸, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀧𑀮𑁄𑀓𑀥𑀫𑁆𑀫𑀁, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀧𑀮𑁄𑀓𑀥𑀫𑁆𑀫𑁄, 𑀬𑀫𑁆𑀧𑀺𑀤𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸…𑀧𑁂… 𑀢𑀫𑁆𑀧𑀺 𑀧𑀮𑁄𑀓𑀥𑀫𑁆𑀫𑀁…𑀧𑁂… 𑀫𑀦𑁄 𑀧𑀮𑁄𑀓𑀥𑀫𑁆𑀫𑁄, 𑀥𑀫𑁆𑀫𑀸 𑀧𑀮𑁄𑀓𑀥𑀫𑁆𑀫𑀸, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀮𑁄𑀓𑀥𑀫𑁆𑀫𑀁, 𑀫𑀦𑁄𑀲𑀫𑁆𑀨𑀲𑁆𑀲𑁄 𑀧𑀮𑁄𑀓𑀥𑀫𑁆𑀫𑁄, 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀧𑀮𑁄𑀓𑀥𑀫𑁆𑀫𑀁. 𑀬𑀁 𑀔𑁄, 𑀆𑀦𑀦𑁆𑀤, 𑀧𑀮𑁄𑀓𑀥𑀫𑁆𑀫𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀮𑁄𑀓𑁄’’𑀢𑀺. 𑀧𑀞𑀫𑀁.

𑁨. 𑀲𑀼𑀜𑁆𑀜𑀢𑀮𑁄𑀓𑀲𑀼𑀢𑁆𑀢𑀁

𑁮𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄…𑀧𑁂… 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀼𑀜𑁆𑀜𑁄 𑀮𑁄𑀓𑁄, 𑀲𑀼𑀜𑁆𑀜𑁄 𑀮𑁄𑀓𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺? ‘‘𑀬𑀲𑁆𑀫𑀸 𑀘 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸? 𑀘𑀓𑁆𑀔𑀼 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸. 𑀭𑀽𑀧𑀸 𑀲𑀼𑀜𑁆𑀜𑀸 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸. 𑀬𑀲𑁆𑀫𑀸 𑀘 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀁𑀔𑀺𑀢𑁆𑀢𑀥𑀫𑁆𑀫𑀲𑀼𑀢𑁆𑀢𑀁

𑁮𑁬. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀦𑀦𑁆𑀤, 𑀘𑀓𑁆𑀔𑀼 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀭𑀽𑀧𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂’’…𑀧𑁂….

‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’…𑀧𑁂….

‘‘𑀚𑀺𑀯𑁆𑀳𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂’’…𑀧𑁂….

‘‘𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’…𑀧𑁂….

‘‘𑀏𑀯𑀁 𑀧𑀲𑁆𑀲𑀁, 𑀆𑀦𑀦𑁆𑀤, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀘𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀙𑀦𑁆𑀦𑀲𑀼𑀢𑁆𑀢𑀁

𑁮𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀘𑀼𑀦𑁆𑀤𑁄 𑀆𑀬𑀲𑁆𑀫𑀸 𑀘 𑀙𑀦𑁆𑀦𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀬𑁂𑀦 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀆𑀩𑀸𑀥𑀺𑀓𑁄 𑀳𑁄𑀢𑀺 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀘𑀼𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀸𑀫𑀸𑀯𑀼𑀲𑁄 𑀘𑀼𑀦𑁆𑀤, 𑀬𑁂𑀦𑀸𑀬𑀲𑁆𑀫𑀸 𑀙𑀦𑁆𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀕𑀺𑀮𑀸𑀦𑀧𑀼𑀘𑁆𑀙𑀓𑀸’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀘𑀼𑀦𑁆𑀤𑁄 𑀬𑁂𑀦𑀸𑀬𑀲𑁆𑀫𑀸 𑀙𑀦𑁆𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀦𑀺𑀲𑀚𑁆𑀚 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀢𑁂, 𑀆𑀯𑀼𑀲𑁄 𑀙𑀦𑁆𑀦, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀅𑀪𑀺𑀓𑁆𑀓𑀫𑁄’’𑀢𑀺?

‘‘𑀦 𑀫𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀔𑀫𑀦𑀻𑀬𑀁 𑀦 𑀬𑀸𑀧𑀦𑀻𑀬𑀁, 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀺𑀡𑁆𑀳𑁂𑀦 𑀲𑀺𑀔𑀭𑁂𑀦 [𑀔𑀕𑁆𑀕𑁂𑀦 (𑀓.)] 𑀫𑀼𑀤𑁆𑀥𑀦𑀺 [𑀫𑀼𑀤𑁆𑀥𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀪𑀺𑀫𑀢𑁆𑀣𑁂𑀬𑁆𑀬 [𑀅𑀪𑀺𑀫𑀦𑁆𑀣𑁂𑀬𑁆𑀬 (𑀲𑀻.)]; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀫𑀼𑀤𑁆𑀥𑀦𑀺 [𑀫𑀼𑀤𑁆𑀥𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀊𑀳𑀦𑀦𑁆𑀢𑀺 [𑀉𑀧𑀳𑀦𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀓.), 𑀉𑀳𑀦𑀦𑁆𑀢𑀺 (𑀓.)]. 𑀦 𑀫𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁…𑀧𑁂… 𑀦𑁄 𑀧𑀝𑀺𑀓𑁆𑀓𑀫𑁄. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀴𑁆𑀳𑁂𑀦 𑀯𑀭𑀢𑁆𑀢𑀓𑁆𑀔𑀡𑁆𑀟𑁂𑀦 𑀲𑀻𑀲𑁂 𑀲𑀻𑀲𑀯𑁂𑀞𑀁 𑀤𑀤𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀥𑀺𑀫𑀢𑁆𑀢𑀸 𑀲𑀻𑀲𑁂 𑀲𑀻𑀲𑀯𑁂𑀤𑀦𑀸. 𑀦 𑀫𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁…𑀧𑁂… 𑀦𑁄 𑀧𑀝𑀺𑀓𑁆𑀓𑀫𑁄. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸 𑀕𑁄𑀖𑀸𑀢𑀓𑀦𑁆𑀢𑁂𑀯𑀸𑀲𑀻 𑀯𑀸 𑀢𑀺𑀡𑁆𑀳𑁂𑀦 𑀕𑁄𑀯𑀺𑀓𑀦𑁆𑀢𑀦𑁂𑀦 𑀓𑀼𑀘𑁆𑀙𑀺𑀁 𑀧𑀭𑀺𑀓𑀦𑁆𑀢𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀓𑀼𑀘𑁆𑀙𑀺𑀁 𑀧𑀭𑀺𑀓𑀦𑁆𑀢𑀦𑁆𑀢𑀺. 𑀦 𑀫𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁…𑀧𑁂… 𑀦𑁄 𑀧𑀝𑀺𑀓𑁆𑀓𑀫𑁄. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀤𑁆𑀯𑁂 𑀩𑀮𑀯𑀦𑁆𑀢𑁄 𑀧𑀼𑀭𑀺𑀲𑀸 𑀤𑀼𑀩𑁆𑀩𑀮𑀢𑀭𑀁 𑀧𑀼𑀭𑀺𑀲𑀁 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀲𑀦𑁆𑀢𑀸𑀧𑁂𑀬𑁆𑀬𑀼𑀁 𑀲𑀫𑁆𑀧𑀭𑀺𑀢𑀸𑀧𑁂𑀬𑁆𑀬𑀼𑀁; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀥𑀺𑀫𑀢𑁆𑀢𑁄 𑀓𑀸𑀬𑀲𑁆𑀫𑀺𑀁 𑀟𑀸𑀳𑁄. 𑀦 𑀫𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁, 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄. 𑀲𑀢𑁆𑀣𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀆𑀳𑀭𑀺𑀲𑁆𑀲𑀸𑀫𑀺, 𑀦𑀸𑀯𑀓𑀗𑁆𑀔𑀸𑀫𑀺 [𑀦𑀸𑀧𑀺 𑀓𑀗𑁆𑀔𑀸𑀫𑀺 (𑀓.)] 𑀚𑀻𑀯𑀺𑀢’’𑀦𑁆𑀢𑀺.

‘‘𑀫𑀸 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀲𑀢𑁆𑀣𑀁 𑀆𑀳𑀭𑁂𑀲𑀺. 𑀬𑀸𑀧𑁂𑀢𑀸𑀬𑀲𑁆𑀫𑀸 𑀙𑀦𑁆𑀦𑁄, 𑀬𑀸𑀧𑁂𑀦𑁆𑀢𑀁 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀇𑀘𑁆𑀙𑀸𑀫. 𑀲𑀘𑁂 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀦𑀢𑁆𑀣𑀺 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺, 𑀅𑀳𑀁 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺. 𑀲𑀘𑁂 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀦𑀢𑁆𑀣𑀺 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀅𑀳𑀁 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺. 𑀲𑀘𑁂 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀦𑀢𑁆𑀣𑀺 𑀧𑀢𑀺𑀭𑀽𑀧𑀸 𑀉𑀧𑀝𑁆𑀞𑀸𑀓𑀸, 𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺. 𑀫𑀸 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀲𑀢𑁆𑀣𑀁 𑀆𑀳𑀭𑁂𑀲𑀺. 𑀬𑀸𑀧𑁂𑀢𑀸𑀬𑀲𑁆𑀫𑀸 𑀙𑀦𑁆𑀦𑁄, 𑀬𑀸𑀧𑁂𑀦𑁆𑀢𑀁 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀇𑀘𑁆𑀙𑀸𑀫𑀸’’𑀢𑀺.

‘‘𑀦 𑀫𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀦𑀢𑁆𑀣𑀺 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺; 𑀅𑀢𑁆𑀣𑀺 𑀫𑁂 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺. 𑀦𑀧𑀺 𑀫𑁂 𑀦𑀢𑁆𑀣𑀺 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺; 𑀅𑀢𑁆𑀣𑀺 𑀫𑁂 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺. 𑀦𑀧𑀺 𑀫𑁂 𑀦𑀢𑁆𑀣𑀺 𑀧𑀢𑀺𑀭𑀽𑀧𑀸 𑀉𑀧𑀝𑁆𑀞𑀸𑀓𑀸; 𑀅𑀢𑁆𑀣𑀺 𑀫𑁂 𑀧𑀢𑀺𑀭𑀽𑀧𑀸 𑀉𑀧𑀝𑁆𑀞𑀸𑀓𑀸. 𑀅𑀧𑀺 𑀘 𑀫𑁂, 𑀆𑀯𑀼𑀲𑁄, 𑀲𑀢𑁆𑀣𑀸 𑀧𑀭𑀺𑀘𑀺𑀡𑁆𑀡𑁄 𑀤𑀻𑀖𑀭𑀢𑁆𑀢𑀁 𑀫𑀦𑀸𑀧𑁂𑀦𑁂𑀯, 𑀦𑁄 𑀅𑀫𑀦𑀸𑀧𑁂𑀦. 𑀏𑀢𑀜𑁆𑀳𑀺, 𑀆𑀯𑀼𑀲𑁄, 𑀲𑀸𑀯𑀓𑀲𑁆𑀲 𑀧𑀢𑀺𑀭𑀽𑀧𑀁 𑀬𑀁 𑀲𑀢𑁆𑀣𑀸𑀭𑀁 𑀧𑀭𑀺𑀘𑀭𑁂𑀬𑁆𑀬 𑀫𑀦𑀸𑀧𑁂𑀦𑁂𑀯, 𑀦𑁄 𑀅𑀫𑀦𑀸𑀧𑁂𑀦. ‘𑀅𑀦𑀼𑀧𑀯𑀚𑁆𑀚𑀁 [𑀢𑀁 𑀅𑀦𑀼𑀧𑀯𑀚𑁆𑀚𑀁 (𑀩𑀳𑀽𑀲𑀼)] 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀲𑀢𑁆𑀣𑀁 𑀆𑀳𑀭𑀺𑀲𑁆𑀲𑀢𑀻’𑀢𑀺 𑁋 𑀏𑀯𑀫𑁂𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀥𑀸𑀭𑁂𑀳𑀻’’𑀢𑀺.

‘‘𑀧𑀼𑀘𑁆𑀙𑁂𑀬𑁆𑀬𑀸𑀫 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀓𑀜𑁆𑀘𑀺𑀤𑁂𑀯 [𑀓𑀺𑀜𑁆𑀘𑀺𑀤𑁂𑀯 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀤𑁂𑀲𑀁, 𑀲𑀘𑁂 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀑𑀓𑀸𑀲𑀁 𑀓𑀭𑁄𑀢𑀺 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺. ‘‘𑀧𑀼𑀘𑁆𑀙𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀸’’𑀢𑀺.

‘‘𑀘𑀓𑁆𑀔𑀼𑀁, 𑀆𑀯𑀼𑀲𑁄 𑀙𑀦𑁆𑀦, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀲𑀺…𑀧𑁂… 𑀚𑀺𑀯𑁆𑀳𑀁, 𑀆𑀯𑀼𑀲𑁄 𑀙𑀦𑁆𑀦, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀲𑀺…𑀧𑁂… 𑀫𑀦𑀁, 𑀆𑀯𑀼𑀲𑁄 𑀙𑀦𑁆𑀦, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺?

‘‘𑀘𑀓𑁆𑀔𑀼𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀺…𑀧𑁂… 𑀚𑀺𑀯𑁆𑀳𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀺…𑀧𑁂… 𑀫𑀦𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺.

‘‘𑀘𑀓𑁆𑀔𑀼𑀲𑁆𑀫𑀺𑀁, 𑀆𑀯𑀼𑀲𑁄 𑀙𑀦𑁆𑀦, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀓𑀺𑀁 𑀤𑀺𑀲𑁆𑀯𑀸 𑀓𑀺𑀁 𑀅𑀪𑀺𑀜𑁆𑀜𑀸𑀬 𑀘𑀓𑁆𑀔𑀼𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀲𑀺… 𑀚𑀺𑀯𑁆𑀳𑀸𑀬, 𑀆𑀯𑀼𑀲𑁄 𑀙𑀦𑁆𑀦, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀓𑀺𑀁 𑀤𑀺𑀲𑁆𑀯𑀸 𑀓𑀺𑀁 𑀅𑀪𑀺𑀜𑁆𑀜𑀸𑀬 𑀚𑀺𑀯𑁆𑀳𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀲𑀺… 𑀫𑀦𑀲𑁆𑀫𑀺𑀁, 𑀆𑀯𑀼𑀲𑁄 𑀙𑀦𑁆𑀦, 𑀫𑀦𑁄𑀯𑀺𑀜𑁆𑀜𑀸𑀡𑁂 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀓𑀺𑀁 𑀤𑀺𑀲𑁆𑀯𑀸 𑀓𑀺𑀁 𑀅𑀪𑀺𑀜𑁆𑀜𑀸𑀬 𑀫𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺?

‘‘𑀘𑀓𑁆𑀔𑀼𑀲𑁆𑀫𑀺𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀭𑁄𑀥𑀁 𑀤𑀺𑀲𑁆𑀯𑀸 𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬 𑀘𑀓𑁆𑀔𑀼𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀺…𑀧𑁂… 𑀚𑀺𑀯𑁆𑀳𑀸𑀬, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀭𑁄𑀥𑀁 𑀤𑀺𑀲𑁆𑀯𑀸 𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬 𑀚𑀺𑀯𑁆𑀳𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀺…𑀧𑁂… 𑀫𑀦𑀲𑁆𑀫𑀺𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀫𑀦𑁄𑀯𑀺𑀜𑁆𑀜𑀸𑀡𑁂 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀭𑁄𑀥𑀁 𑀤𑀺𑀲𑁆𑀯𑀸 𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬 𑀫𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀢𑀲𑁆𑀫𑀸𑀢𑀺𑀳, 𑀆𑀯𑀼𑀲𑁄 𑀙𑀦𑁆𑀦, 𑀇𑀤𑀫𑁆𑀧𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀦𑀺𑀘𑁆𑀘𑀓𑀧𑁆𑀧𑀁 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑁋 ‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁, 𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀺. 𑀘𑀮𑀺𑀢𑁂 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀦𑀢𑀺 𑀦 𑀳𑁄𑀢𑀺. 𑀦𑀢𑀺𑀬𑀸 𑀅𑀲𑀢𑀺 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺. 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁂 𑀅𑀲𑀢𑀺 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀘𑀼𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀲𑀢𑁆𑀣𑀁 𑀆𑀳𑀭𑁂𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀲𑁆𑀫𑀢𑀸, 𑀪𑀦𑁆𑀢𑁂, 𑀙𑀦𑁆𑀦𑁂𑀦 𑀲𑀢𑁆𑀣𑀁 𑀆𑀳𑀭𑀺𑀢𑀁. 𑀢𑀲𑁆𑀲 𑀓𑀸 𑀕𑀢𑀺 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺? ‘‘𑀦𑀦𑀼 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀙𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀼𑀔𑀸𑀬𑁂𑀯 𑀅𑀦𑀼𑀧𑀯𑀚𑁆𑀚𑀢𑀸 𑀩𑁆𑀬𑀸𑀓𑀢𑀸’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀧𑀼𑀩𑁆𑀩𑀯𑀺𑀚𑁆𑀚𑀦𑀁 [𑀧𑀼𑀩𑁆𑀩𑀯𑀺𑀘𑀺𑀭𑀁 (𑀲𑀻.), 𑀧𑀼𑀩𑁆𑀩𑀯𑀺𑀚𑁆𑀛𑀦𑀁 (𑀧𑀻.), 𑀧𑀼𑀩𑁆𑀩𑀚𑀺𑀭𑀁 (𑀫. 𑀦𑀺. 𑁩.𑁩𑁯𑁪] 𑀦𑀸𑀫 𑀯𑀚𑁆𑀚𑀺𑀕𑀸𑀫𑁄. 𑀢𑀢𑁆𑀣𑀸𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀫𑀺𑀢𑁆𑀢𑀓𑀼𑀮𑀸𑀦𑀺 𑀲𑀼𑀳𑀚𑁆𑀚𑀓𑀼𑀮𑀸𑀦𑀺 𑀉𑀧𑀯𑀚𑁆𑀚𑀓𑀼𑀮𑀸𑀦𑀻’’𑀢𑀺. ‘‘𑀳𑁄𑀦𑁆𑀢𑀺 𑀳𑁂𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀺𑀢𑁆𑀢𑀓𑀼𑀮𑀸𑀦𑀺 𑀲𑀼𑀳𑀚𑁆𑀚𑀓𑀼𑀮𑀸𑀦𑀺 𑀉𑀧𑀯𑀚𑁆𑀚𑀓𑀼𑀮𑀸𑀦𑀺. 𑀦 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀢𑁆𑀢𑀸𑀯𑀢𑀸 𑀲𑀉𑀧𑀯𑀚𑁆𑀚𑁄𑀢𑀺 𑀯𑀤𑀸𑀫𑀺. 𑀬𑁄 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀢𑀜𑁆𑀘 𑀓𑀸𑀬𑀁 𑀦𑀺𑀓𑁆𑀔𑀺𑀧𑀢𑀺, 𑀅𑀜𑁆𑀜𑀜𑁆𑀘 𑀓𑀸𑀬𑀁 𑀉𑀧𑀸𑀤𑀺𑀬𑀢𑀺, 𑀢𑀫𑀳𑀁 𑀲𑀉𑀧𑀯𑀚𑁆𑀚𑁄𑀢𑀺 𑀯𑀤𑀸𑀫𑀺. 𑀢𑀁 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀢𑁆𑀣𑀺. ‘𑀅𑀦𑀼𑀧𑀯𑀚𑁆𑀚𑀁 𑀙𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀢𑁆𑀣𑀁 𑀆𑀳𑀭𑀺𑀢’𑀦𑁆𑀢𑀺 𑁋 𑀏𑀯𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀸𑀭𑁂𑀳𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀼𑀡𑁆𑀡𑀲𑀼𑀢𑁆𑀢𑀁

𑁮𑁮. 𑀅𑀣 [𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 (?) 𑀫. 𑀦𑀺. 𑁩.𑁩𑁯𑁫 𑀧𑀲𑁆𑀲𑀺𑀢𑀩𑁆𑀩𑀁] 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀦𑁆𑀢𑀺 𑀔𑁄, 𑀧𑀼𑀡𑁆𑀡, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀢𑀁 𑀅𑀪𑀺𑀦𑀦𑁆𑀤𑀢𑁄 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻. ‘𑀦𑀦𑁆𑀤𑀺𑀲𑀫𑀼𑀤𑀬𑀸 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀧𑀼𑀡𑁆𑀡𑀸’𑀢𑀺 𑀯𑀤𑀸𑀫𑀺…𑀧𑁂… 𑀲𑀦𑁆𑀢𑀺 𑀔𑁄, 𑀧𑀼𑀡𑁆𑀡, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸…𑀧𑁂… 𑀲𑀦𑁆𑀢𑀺 𑀔𑁄, 𑀧𑀼𑀡𑁆𑀡, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀢𑀁 𑀅𑀪𑀺𑀦𑀦𑁆𑀤𑀢𑁄 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻. ‘𑀦𑀦𑁆𑀤𑀺𑀲𑀫𑀼𑀤𑀬𑀸 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀧𑀼𑀡𑁆𑀡𑀸’𑀢𑀺 𑀯𑀤𑀸𑀫𑀺.

‘‘𑀲𑀦𑁆𑀢𑀺 𑀔𑁄, 𑀧𑀼𑀡𑁆𑀡, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀢𑀁 𑀅𑀦𑀪𑀺𑀦𑀦𑁆𑀤𑀢𑁄 𑀅𑀦𑀪𑀺𑀯𑀤𑀢𑁄 𑀅𑀦𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀦𑀺𑀭𑀼𑀚𑁆𑀛𑀢𑀺 𑀦𑀦𑁆𑀤𑀻. ‘𑀦𑀦𑁆𑀤𑀺𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀧𑀼𑀡𑁆𑀡𑀸’𑀢𑀺 𑀯𑀤𑀸𑀫𑀺…𑀧𑁂… 𑀲𑀦𑁆𑀢𑀺 𑀔𑁄, 𑀧𑀼𑀡𑁆𑀡, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀢𑀁 𑀅𑀦𑀪𑀺𑀦𑀦𑁆𑀤𑀢𑁄 𑀅𑀦𑀪𑀺𑀯𑀤𑀢𑁄 𑀅𑀦𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀦𑀺𑀭𑀼𑀚𑁆𑀛𑀢𑀺 𑀦𑀦𑁆𑀤𑀻. ‘𑀦𑀦𑁆𑀤𑀺𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀧𑀼𑀡𑁆𑀡𑀸’𑀢𑀺 𑀯𑀤𑀸𑀫𑀺.

‘‘𑀇𑀫𑀺𑀦𑀸 𑀢𑁆𑀯𑀁 [𑀇𑀫𑀺𑀦𑀸 𑀘 𑀢𑁆𑀯𑀁], 𑀧𑀼𑀡𑁆𑀡, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑁂𑀦 𑀑𑀯𑀤𑀺𑀢𑁄 𑀓𑀢𑀫𑀲𑁆𑀫𑀺𑀁 [𑀓𑀢𑀭𑀲𑁆𑀫𑀺𑀁 (𑀫. 𑀦𑀺. 𑁩.𑁩𑁯𑁫)] 𑀚𑀦𑀧𑀤𑁂 𑀯𑀺𑀳𑀭𑀺𑀲𑁆𑀲𑀲𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀲𑀼𑀦𑀸𑀧𑀭𑀦𑁆𑀢𑁄 𑀦𑀸𑀫 𑀚𑀦𑀧𑀤𑁄, 𑀢𑀢𑁆𑀣𑀸𑀳𑀁 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺.

‘‘𑀘𑀡𑁆𑀟𑀸 𑀔𑁄, 𑀧𑀼𑀡𑁆𑀡, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸; 𑀨𑀭𑀼𑀲𑀸 𑀔𑁄, 𑀧𑀼𑀡𑁆𑀡, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸. 𑀲𑀘𑁂 𑀢𑀁, 𑀧𑀼𑀡𑁆𑀡, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀢𑁂, 𑀧𑀼𑀡𑁆𑀡, 𑀓𑀺𑀦𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺?

‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀫𑁂 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀲𑀼𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀬𑀁 𑀫𑁂 [𑀫𑀁 (𑀲𑀩𑁆𑀩𑀢𑁆𑀣)] 𑀦𑀬𑀺𑀫𑁂 𑀧𑀸𑀡𑀺𑀦𑀸 𑀧𑀳𑀸𑀭𑀁 𑀤𑁂𑀦𑁆𑀢𑀻’𑀢𑀺. 𑀏𑀯𑀫𑁂𑀢𑁆𑀣 [𑀏𑀯𑀫𑁆𑀫𑁂𑀢𑁆𑀣 (?)], 𑀪𑀕𑀯𑀸, 𑀪𑀯𑀺𑀲𑁆𑀲𑀢𑀺; 𑀏𑀯𑀫𑁂𑀢𑁆𑀣, 𑀲𑀼𑀕𑀢, 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑀘𑁂 𑀧𑀦 𑀢𑁂, 𑀧𑀼𑀡𑁆𑀡, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀧𑀸𑀡𑀺𑀦𑀸 𑀧𑀳𑀸𑀭𑀁 𑀤𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀧𑀦 𑀢𑁂, 𑀧𑀼𑀡𑁆𑀡, 𑀓𑀺𑀦𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺?

‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀧𑀸𑀡𑀺𑀦𑀸 𑀧𑀳𑀸𑀭𑀁 𑀤𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀫𑁂 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀲𑀼𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀬𑀁 𑀫𑁂 [𑀏𑀯𑀫𑁆𑀫𑁂𑀢𑁆𑀣 (?)] 𑀦𑀬𑀺𑀫𑁂 𑀮𑁂𑀟𑁆𑀟𑀼𑀦𑀸 𑀧𑀳𑀸𑀭𑀁 𑀤𑁂𑀦𑁆𑀢𑀻’𑀢𑀺. 𑀏𑀯𑀫𑁂𑀢𑁆𑀣, 𑀪𑀕𑀯𑀸, 𑀪𑀯𑀺𑀲𑁆𑀲𑀢𑀺; 𑀏𑀯𑀫𑁂𑀢𑁆𑀣, 𑀲𑀼𑀕𑀢, 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑀘𑁂 𑀧𑀦 𑀢𑁂, 𑀧𑀼𑀡𑁆𑀡, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀮𑁂𑀟𑁆𑀟𑀼𑀦𑀸 𑀧𑀳𑀸𑀭𑀁 𑀤𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀧𑀦 𑀢𑁂, 𑀧𑀼𑀡𑁆𑀡, 𑀓𑀺𑀦𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺?

‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀮𑁂𑀟𑁆𑀟𑀼𑀦𑀸 𑀧𑀳𑀸𑀭𑀁 𑀤𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀫𑁂 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀲𑀼𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀬𑀁 𑀫𑁂 𑀦𑀬𑀺𑀫𑁂 𑀤𑀡𑁆𑀟𑁂𑀦 𑀧𑀳𑀸𑀭𑀁 𑀤𑁂𑀦𑁆𑀢𑀻’𑀢𑀺. 𑀏𑀯𑀫𑁂𑀢𑁆𑀣, 𑀪𑀕𑀯𑀸, 𑀪𑀯𑀺𑀲𑁆𑀲𑀢𑀺; 𑀏𑀯𑀫𑁂𑀢𑁆𑀣, 𑀲𑀼𑀕𑀢, 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑀘𑁂 𑀧𑀦 𑀧𑀼𑀡𑁆𑀡, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀤𑀡𑁆𑀟𑁂𑀦 𑀧𑀳𑀸𑀭𑀁 𑀤𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀧𑀦 𑀢𑁂, 𑀧𑀼𑀡𑁆𑀡, 𑀓𑀺𑀦𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺?

‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀤𑀡𑁆𑀟𑁂𑀦 𑀧𑀳𑀸𑀭𑀁 𑀤𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀫𑁂 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀲𑀼𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀬𑀁 𑀫𑁂 𑀦𑀬𑀺𑀫𑁂 𑀲𑀢𑁆𑀣𑁂𑀦 𑀧𑀳𑀸𑀭𑀁 𑀤𑁂𑀦𑁆𑀢𑀻’𑀢𑀺. 𑀏𑀯𑀫𑁂𑀢𑁆𑀣, 𑀪𑀕𑀯𑀸, 𑀪𑀯𑀺𑀲𑁆𑀲𑀢𑀺; 𑀏𑀯𑀫𑁂𑀢𑁆𑀣, 𑀲𑀼𑀕𑀢, 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑀘𑁂 𑀧𑀦 𑀢𑁂, 𑀧𑀼𑀡𑁆𑀡, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀲𑀢𑁆𑀣𑁂𑀦 𑀧𑀳𑀸𑀭𑀁 𑀤𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀧𑀦 𑀢𑁂, 𑀧𑀼𑀡𑁆𑀡, 𑀓𑀺𑀦𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺?

‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀲𑀢𑁆𑀣𑁂𑀦 𑀧𑀳𑀸𑀭𑀁 𑀤𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀫𑁂 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀲𑀼𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀬𑀁 𑀫𑀁 𑀦𑀬𑀺𑀫𑁂 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀻’𑀢𑀺. 𑀏𑀯𑀫𑁂𑀢𑁆𑀣, 𑀪𑀕𑀯𑀸, 𑀪𑀯𑀺𑀲𑁆𑀲𑀢𑀺; 𑀏𑀯𑀫𑁂𑀢𑁆𑀣, 𑀲𑀼𑀕𑀢, 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑀘𑁂 𑀧𑀦 𑀢𑀁, 𑀧𑀼𑀡𑁆𑀡, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀧𑀦 𑀢𑁂, 𑀧𑀼𑀡𑁆𑀡, 𑀓𑀺𑀦𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺?

‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀦𑁆𑀢𑀺, 𑀢𑀢𑁆𑀭 𑀫𑁂 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀲𑀦𑁆𑀢𑀺 𑀔𑁄 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸 𑀓𑀸𑀬𑁂𑀦 𑀘 𑀚𑀻𑀯𑀺𑀢𑁂𑀦 𑀘 𑀅𑀝𑁆𑀝𑀻𑀬𑀫𑀸𑀦𑀸 𑀳𑀭𑀸𑀬𑀫𑀸𑀦𑀸 𑀚𑀺𑀕𑀼𑀘𑁆𑀙𑀫𑀸𑀦𑀸 𑀲𑀢𑁆𑀣𑀳𑀸𑀭𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀢𑀁 𑀫𑁂 𑀇𑀤𑀁 𑀅𑀧𑀭𑀺𑀬𑀺𑀝𑁆𑀞𑀜𑁆𑀜𑁂𑀯 𑀲𑀢𑁆𑀣𑀳𑀸𑀭𑀓𑀁 𑀮𑀤𑁆𑀥’𑀦𑁆𑀢𑀺. 𑀏𑀯𑀫𑁂𑀢𑁆𑀣, 𑀪𑀕𑀯𑀸, 𑀪𑀯𑀺𑀲𑁆𑀲𑀢𑀺; 𑀏𑀯𑀫𑁂𑀢𑁆𑀣, 𑀲𑀼𑀕𑀢, 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀧𑀼𑀡𑁆𑀡! 𑀲𑀓𑁆𑀔𑀺𑀲𑁆𑀲𑀲𑀺 𑀔𑁄 𑀢𑁆𑀯𑀁, 𑀧𑀼𑀡𑁆𑀡, 𑀇𑀫𑀺𑀦𑀸 𑀤𑀫𑀽𑀧𑀲𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀼𑀦𑀸𑀧𑀭𑀦𑁆𑀢𑀲𑁆𑀫𑀺𑀁 𑀚𑀦𑀧𑀤𑁂 𑀯𑀢𑁆𑀣𑀼𑀁. 𑀬𑀲𑁆𑀲 𑀤𑀸𑀦𑀺 𑀢𑁆𑀯𑀁, 𑀧𑀼𑀡𑁆𑀡, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀪𑀕𑀯𑀢𑁄 𑀯𑀘𑀦𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀼𑀦𑀸𑀧𑀭𑀦𑁆𑀢𑁄 𑀚𑀦𑀧𑀤𑁄 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀼𑀦𑀸𑀧𑀭𑀦𑁆𑀢𑁄 𑀚𑀦𑀧𑀤𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀲𑀼𑀦𑀸𑀧𑀭𑀦𑁆𑀢𑀲𑁆𑀫𑀺𑀁 𑀚𑀦𑀧𑀤𑁂 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀢𑁂𑀦𑁂𑀯𑀦𑁆𑀢𑀭𑀯𑀲𑁆𑀲𑁂𑀦 𑀧𑀜𑁆𑀘𑀫𑀢𑁆𑀢𑀸𑀦𑀺 𑀉𑀧𑀸𑀲𑀓𑀲𑀢𑀸𑀦𑀺 𑀧𑀝𑀺𑀯𑁂𑀤𑁂𑀲𑀺 [𑀧𑀝𑀺𑀧𑀸𑀤𑁂𑀲𑀺 (𑀲𑀻. 𑀧𑀻.), 𑀧𑀝𑀺𑀤𑁂𑀲𑁂𑀲𑀺 (𑀲𑁆𑀬𑀸. 𑀓𑀁.)]. 𑀢𑁂𑀦𑁂𑀯𑀦𑁆𑀢𑀭𑀯𑀲𑁆𑀲𑁂𑀦 𑀧𑀜𑁆𑀘𑀫𑀢𑁆𑀢𑀸𑀦𑀺 𑀉𑀧𑀸𑀲𑀺𑀓𑀸𑀲𑀢𑀸𑀦𑀺 𑀧𑀝𑀺𑀯𑁂𑀤𑁂𑀲𑀺. 𑀢𑁂𑀦𑁂𑀯𑀦𑁆𑀢𑀭𑀯𑀲𑁆𑀲𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀸𑀓𑀸𑀲𑀺. 𑀢𑁂𑀦𑁂𑀯𑀦𑁆𑀢𑀭𑀯𑀲𑁆𑀲𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑁄 𑀲𑁄, 𑀪𑀦𑁆𑀢𑁂, 𑀧𑀼𑀡𑁆𑀡𑁄 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑁂𑀦 𑀑𑀯𑀤𑀺𑀢𑁄, 𑀲𑁄 𑀓𑀸𑀮𑀗𑁆𑀓𑀢𑁄. 𑀢𑀲𑁆𑀲 𑀓𑀸 𑀕𑀢𑀺 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺?

‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀧𑀼𑀡𑁆𑀡𑁄 𑀓𑀼𑀮𑀧𑀼𑀢𑁆𑀢𑁄 [𑀓𑀼𑀮𑀧𑀼𑀢𑁆𑀢𑁄 𑀅𑀳𑁄𑀲𑀺 (𑀲𑀩𑁆𑀩𑀢𑁆𑀣)], 𑀧𑀘𑁆𑀘𑀧𑀸𑀤𑀺 [𑀲𑀘𑁆𑀘𑀯𑀸𑀤𑀻 (𑀲𑁆𑀬𑀸. 𑀓𑀁. 𑀓.)] 𑀥𑀫𑁆𑀫𑀲𑁆𑀲𑀸𑀦𑀼𑀥𑀫𑁆𑀫𑀁, 𑀦 𑀘 𑀫𑀁 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀳𑁂𑀲𑁂𑀲𑀺 [𑀯𑀺𑀳𑁂𑀞𑁂𑀲𑀺 (𑀲𑀻. 𑀲𑁆𑀬𑀸. 𑀓𑀁.)]. 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀪𑀺𑀓𑁆𑀔𑀯𑁂, 𑀧𑀼𑀡𑁆𑀡𑁄 𑀓𑀼𑀮𑀧𑀼𑀢𑁆𑀢𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀩𑀸𑀳𑀺𑀬𑀲𑀼𑀢𑁆𑀢𑀁

𑁮𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀩𑀸𑀳𑀺𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀩𑀸𑀳𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑀸𑀳𑀺𑀬, 𑀘𑀓𑁆𑀔𑀼 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀭𑀽𑀧𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂’’…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀯𑀁 𑀧𑀲𑁆𑀲𑀁, 𑀩𑀸𑀳𑀺𑀬, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀘𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀭𑀽𑀧𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀩𑀸𑀳𑀺𑀬𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀩𑀸𑀳𑀺𑀬𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀩𑀸𑀳𑀺𑀬𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀏𑀚𑀸𑀲𑀼𑀢𑁆𑀢𑀁

𑁯𑁦. ‘‘𑀏𑀚𑀸, 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀏𑀚𑀸 𑀕𑀡𑁆𑀟𑁄, 𑀏𑀚𑀸 𑀲𑀮𑁆𑀮𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀦𑁂𑀚𑁄 𑀯𑀺𑀳𑀭𑀢𑀺 𑀯𑀻𑀢𑀲𑀮𑁆𑀮𑁄. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑁂𑀧𑀺 𑀆𑀓𑀗𑁆𑀔𑁂𑀬𑁆𑀬 ‘𑀅𑀦𑁂𑀚𑁄 𑀯𑀺𑀳𑀭𑁂𑀬𑁆𑀬𑀁 [𑀯𑀺𑀳𑀭𑁂𑀬𑁆𑀬 (𑀲𑀻. 𑀧𑀻. 𑀓.)] 𑀯𑀻𑀢𑀲𑀮𑁆𑀮𑁄’𑀢𑀺, 𑀘𑀓𑁆𑀔𑀼𑀁 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀲𑁆𑀫𑀺𑀁 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬; 𑀭𑀽𑀧𑁂 𑀦 𑀫𑀜𑁆𑀜𑁂𑀬𑁆𑀬, 𑀭𑀽𑀧𑁂𑀲𑀼 𑀦 𑀫𑀜𑁆𑀜𑁂𑀬𑁆𑀬, 𑀭𑀽𑀧𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀭𑀽𑀧𑀸 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬; 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬; 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀫𑀺𑀁 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬. 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀫𑀺𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀢𑁄𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬.

‘‘𑀲𑁄𑀢𑀁 𑀦 𑀫𑀜𑁆𑀜𑁂𑀬𑁆𑀬…𑀧𑁂… 𑀖𑀸𑀦𑀁 𑀦 𑀫𑀜𑁆𑀜𑁂𑀬𑁆𑀬…𑀧𑁂… 𑀚𑀺𑀯𑁆𑀳𑀁 𑀦 𑀫𑀜𑁆𑀜𑁂𑀬𑁆𑀬, 𑀚𑀺𑀯𑁆𑀳𑀸𑀬 𑀦 𑀫𑀜𑁆𑀜𑁂𑀬𑁆𑀬, 𑀚𑀺𑀯𑁆𑀳𑀸𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀚𑀺𑀯𑁆𑀳𑀸 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬; 𑀭𑀲𑁂 𑀦 𑀫𑀜𑁆𑀜𑁂𑀬𑁆𑀬…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀦 𑀫𑀜𑁆𑀜𑁂𑀬𑁆𑀬…𑀧𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀁 𑀦 𑀫𑀜𑁆𑀜𑁂𑀬𑁆𑀬…𑀧𑁂… 𑀬𑀫𑁆𑀧𑀺𑀤𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀫𑀺𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀢𑁄𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬.

‘‘𑀓𑀸𑀬𑀁 𑀦 𑀫𑀜𑁆𑀜𑁂𑀬𑁆𑀬…𑀧𑁂… 𑀫𑀦𑀁 𑀦 𑀫𑀜𑁆𑀜𑁂𑀬𑁆𑀬, 𑀫𑀦𑀲𑁆𑀫𑀺𑀁 𑀦 𑀫𑀜𑁆𑀜𑁂𑀬𑁆𑀬, 𑀫𑀦𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀫𑀦𑁄 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬; 𑀥𑀫𑁆𑀫𑁂 𑀦 𑀫𑀜𑁆𑀜𑁂𑀬𑁆𑀬…𑀧𑁂… 𑀫𑀦𑁄 𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀫𑀺𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀢𑁄𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬; 𑀲𑀩𑁆𑀩𑀁 𑀦 𑀫𑀜𑁆𑀜𑁂𑀬𑁆𑀬, 𑀲𑀩𑁆𑀩𑀲𑁆𑀫𑀺𑀁 𑀦 𑀫𑀜𑁆𑀜𑁂𑀬𑁆𑀬, 𑀲𑀩𑁆𑀩𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀲𑀩𑁆𑀩𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬.

‘‘𑀲𑁄 𑀏𑀯𑀁 𑀅𑀫𑀜𑁆𑀜𑀫𑀸𑀦𑁄 𑀦 𑀓𑀺𑀜𑁆𑀘𑀺𑀧𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀏𑀚𑀸𑀲𑀼𑀢𑁆𑀢𑀁

𑁯𑁧. ‘‘𑀏𑀚𑀸, 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀏𑀚𑀸 𑀕𑀡𑁆𑀟𑁄, 𑀏𑀚𑀸 𑀲𑀮𑁆𑀮𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀦𑁂𑀚𑁄 𑀯𑀺𑀳𑀭𑀢𑀺 𑀯𑀻𑀢𑀲𑀮𑁆𑀮𑁄. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑁂𑀧𑀺 𑀆𑀓𑀗𑁆𑀔𑁂𑀬𑁆𑀬 ‘𑀅𑀦𑁂𑀚𑁄 𑀯𑀺𑀳𑀭𑁂𑀬𑁆𑀬𑀁 𑀯𑀻𑀢𑀲𑀮𑁆𑀮𑁄’𑀢𑀺, 𑀘𑀓𑁆𑀔𑀼𑀁 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀲𑁆𑀫𑀺𑀁 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀘𑀓𑁆𑀔𑀼 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬; 𑀭𑀽𑀧𑁂 𑀦 𑀫𑀜𑁆𑀜𑁂𑀬𑁆𑀬… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁… 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀫𑀺𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀢𑁄𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬. 𑀬𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀫𑀜𑁆𑀜𑀢𑀺, 𑀬𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀬𑀢𑁄 𑀫𑀜𑁆𑀜𑀢𑀺, 𑀬𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸. 𑀅𑀜𑁆𑀜𑀣𑀸𑀪𑀸𑀯𑀻 𑀪𑀯𑀲𑀢𑁆𑀢𑁄 𑀮𑁄𑀓𑁄 𑀪𑀯𑀫𑁂𑀯 𑀅𑀪𑀺𑀦𑀦𑁆𑀤𑀢𑀺…𑀧𑁂….

‘‘𑀚𑀺𑀯𑁆𑀳𑀁 𑀦 𑀫𑀜𑁆𑀜𑁂𑀬𑁆𑀬, 𑀚𑀺𑀯𑁆𑀳𑀸𑀬 𑀦 𑀫𑀜𑁆𑀜𑁂𑀬𑁆𑀬, 𑀚𑀺𑀯𑁆𑀳𑀸𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀚𑀺𑀯𑁆𑀳𑀸 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬; 𑀭𑀲𑁂 𑀦 𑀫𑀜𑁆𑀜𑁂𑀬𑁆𑀬… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀁… 𑀬𑀫𑁆𑀧𑀺𑀤𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀫𑀺𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀢𑁄𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬. 𑀬𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀫𑀜𑁆𑀜𑀢𑀺, 𑀬𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀬𑀢𑁄 𑀫𑀜𑁆𑀜𑀢𑀺, 𑀬𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸. 𑀅𑀜𑁆𑀜𑀣𑀸𑀪𑀸𑀯𑀻 𑀪𑀯𑀲𑀢𑁆𑀢𑁄 𑀮𑁄𑀓𑁄 𑀪𑀯𑀫𑁂𑀯 𑀅𑀪𑀺𑀦𑀦𑁆𑀤𑀢𑀺…𑀧𑁂….

‘‘𑀫𑀦𑀁 𑀦 𑀫𑀜𑁆𑀜𑁂𑀬𑁆𑀬, 𑀫𑀦𑀲𑁆𑀫𑀺𑀁 𑀦 𑀫𑀜𑁆𑀜𑁂𑀬𑁆𑀬, 𑀫𑀦𑀢𑁄 𑀦 𑀫𑀜𑁆𑀜𑁂𑀬𑁆𑀬, 𑀫𑀦𑁄 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬… 𑀫𑀦𑁄𑀯𑀺𑀜𑁆𑀜𑀸𑀡𑀁… 𑀫𑀦𑁄𑀲𑀫𑁆𑀨𑀲𑁆𑀲𑀁… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀫𑀺𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀢𑁄𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬. 𑀬𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀫𑀜𑁆𑀜𑀢𑀺, 𑀬𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀬𑀢𑁄 𑀫𑀜𑁆𑀜𑀢𑀺, 𑀬𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸. 𑀅𑀜𑁆𑀜𑀣𑀸𑀪𑀸𑀯𑀻 𑀪𑀯𑀲𑀢𑁆𑀢𑁄 𑀮𑁄𑀓𑁄 𑀪𑀯𑀫𑁂𑀯 𑀅𑀪𑀺𑀦𑀦𑁆𑀤𑀢𑀺.

‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸 𑀢𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀫𑀺𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀢𑁄𑀧𑀺 𑀦 𑀫𑀜𑁆𑀜𑁂𑀬𑁆𑀬, 𑀢𑀁 𑀫𑁂𑀢𑀺 𑀦 𑀫𑀜𑁆𑀜𑁂𑀬𑁆𑀬. 𑀲𑁄 𑀏𑀯𑀁 𑀅𑀫𑀜𑁆𑀜𑀫𑀸𑀦𑁄 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀤𑁆𑀯𑀬𑀲𑀼𑀢𑁆𑀢𑀁

𑁯𑁨. ‘‘𑀤𑁆𑀯𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁? 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀸 𑀘, 𑀲𑁄𑀢𑀜𑁆𑀘𑁂𑀯 𑀲𑀤𑁆𑀤𑀸 𑀘, 𑀖𑀸𑀦𑀜𑁆𑀘𑁂𑀯 𑀕𑀦𑁆𑀥𑀸 𑀘, 𑀚𑀺𑀯𑁆𑀳𑀸 𑀘𑁂𑀯 𑀭𑀲𑀸 𑀘, 𑀓𑀸𑀬𑁄 𑀘𑁂𑀯 𑀨𑁄𑀝𑁆𑀞𑀩𑁆𑀩𑀸 𑀘, 𑀫𑀦𑁄 𑀘𑁂𑀯 𑀥𑀫𑁆𑀫𑀸 𑀘 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁.

‘‘𑀬𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀫𑁂𑀢𑀁 𑀤𑁆𑀯𑀬𑀁 𑀧𑀘𑁆𑀘𑀓𑁆𑀔𑀸𑀬 𑀅𑀜𑁆𑀜𑀁 𑀤𑁆𑀯𑀬𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’𑀢𑀺, 𑀢𑀲𑁆𑀲 𑀯𑀸𑀘𑀸𑀯𑀢𑁆𑀣𑀼𑀓𑀫𑁂𑀯𑀲𑁆𑀲. 𑀧𑀼𑀝𑁆𑀞𑁄 𑀘 𑀦 𑀲𑀫𑁆𑀧𑀸𑀬𑁂𑀬𑁆𑀬. 𑀉𑀢𑁆𑀢𑀭𑀺𑀜𑁆𑀘 𑀯𑀺𑀖𑀸𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀤𑁆𑀯𑀬𑀲𑀼𑀢𑁆𑀢𑀁

𑁯𑁩. ‘‘𑀤𑁆𑀯𑀬𑀁, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘 𑀯𑀺𑀜𑁆𑀜𑀸𑀡𑀁 𑀲𑀫𑁆𑀪𑁄𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀯𑀺𑀜𑁆𑀜𑀸𑀡𑀁 𑀲𑀫𑁆𑀪𑁄𑀢𑀺? 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄. 𑀇𑀢𑁆𑀣𑁂𑀢𑀁 𑀤𑁆𑀯𑀬𑀁 𑀘𑀮𑀜𑁆𑀘𑁂𑀯 𑀩𑁆𑀬𑀣𑀜𑁆𑀘 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀳𑁂𑀢𑀼 𑀲𑁄𑀧𑀺 𑀧𑀘𑁆𑀘𑀬𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀅𑀦𑀺𑀘𑁆𑀘𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀓𑀼𑀢𑁄 𑀦𑀺𑀘𑁆𑀘𑀁 𑀪𑀯𑀺𑀲𑁆𑀲𑀢𑀺! 𑀬𑀸 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀲𑀗𑁆𑀕𑀢𑀺 𑀲𑀦𑁆𑀦𑀺𑀧𑀸𑀢𑁄 𑀲𑀫𑀯𑀸𑀬𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀧𑀺 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀳𑁂𑀢𑀼 𑀲𑁄𑀧𑀺 𑀧𑀘𑁆𑀘𑀬𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀅𑀦𑀺𑀘𑁆𑀘𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀓𑀼𑀢𑁄 𑀦𑀺𑀘𑁆𑀘𑁄 𑀪𑀯𑀺𑀲𑁆𑀲𑀢𑀺! 𑀨𑀼𑀝𑁆𑀞𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺. 𑀇𑀢𑁆𑀣𑁂𑀢𑁂𑀧𑀺 𑀥𑀫𑁆𑀫𑀸 𑀘𑀮𑀸 𑀘𑁂𑀯 𑀩𑁆𑀬𑀣𑀸 𑀘 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄. 𑀲𑁄𑀢𑀁…𑀧𑁂….

‘‘𑀚𑀺𑀯𑁆𑀳𑀜𑁆𑀘 𑀧𑀝𑀺𑀘𑁆𑀘 𑀭𑀲𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁. 𑀚𑀺𑀯𑁆𑀳𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻 [𑀯𑀺𑀧𑀭𑀺𑀡𑀸𑀫𑀺𑀦𑀻 𑀅𑀜𑁆𑀜𑀣𑀸𑀪𑀸𑀯𑀺𑀦𑀻 (?)]. 𑀭𑀲𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄. 𑀇𑀢𑁆𑀣𑁂𑀢𑀁 𑀤𑁆𑀯𑀬𑀁 𑀘𑀮𑀜𑁆𑀘𑁂𑀯 𑀩𑁆𑀬𑀣𑀜𑁆𑀘 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀳𑁂𑀢𑀼 𑀲𑁄𑀧𑀺 𑀧𑀘𑁆𑀘𑀬𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀅𑀦𑀺𑀘𑁆𑀘𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀓𑀼𑀢𑁄 𑀦𑀺𑀘𑁆𑀘𑀁 𑀪𑀯𑀺𑀲𑁆𑀲𑀢𑀺! 𑀬𑀸 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀲𑀗𑁆𑀕𑀢𑀺 𑀲𑀦𑁆𑀦𑀺𑀧𑀸𑀢𑁄 𑀲𑀫𑀯𑀸𑀬𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄. 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄𑀧𑀺 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀳𑁂𑀢𑀼 𑀲𑁄𑀧𑀺 𑀧𑀘𑁆𑀘𑀬𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀅𑀦𑀺𑀘𑁆𑀘𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄, 𑀓𑀼𑀢𑁄 𑀦𑀺𑀘𑁆𑀘𑁄 𑀪𑀯𑀺𑀲𑁆𑀲𑀢𑀺! 𑀨𑀼𑀝𑁆𑀞𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺. 𑀇𑀢𑁆𑀣𑁂𑀢𑁂𑀧𑀺 𑀥𑀫𑁆𑀫𑀸 𑀘𑀮𑀸 𑀘𑁂𑀯 𑀩𑁆𑀬𑀣𑀸 𑀘 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄. 𑀓𑀸𑀬𑀁…𑀧𑁂….

‘‘𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀫𑀦𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄. 𑀇𑀢𑁆𑀣𑁂𑀢𑀁 𑀤𑁆𑀯𑀬𑀁 𑀘𑀮𑀜𑁆𑀘𑁂𑀯 𑀩𑁆𑀬𑀣𑀜𑁆𑀘 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀳𑁂𑀢𑀼 𑀲𑁄𑀧𑀺 𑀧𑀘𑁆𑀘𑀬𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀅𑀦𑀺𑀘𑁆𑀘𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀓𑀼𑀢𑁄 𑀦𑀺𑀘𑁆𑀘𑀁 𑀪𑀯𑀺𑀲𑁆𑀲𑀢𑀺! 𑀬𑀸 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀲𑀗𑁆𑀕𑀢𑀺 𑀲𑀦𑁆𑀦𑀺𑀧𑀸𑀢𑁄 𑀲𑀫𑀯𑀸𑀬𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑁄. 𑀫𑀦𑁄𑀲𑀫𑁆𑀨𑀲𑁆𑀲𑁄𑀧𑀺 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀳𑁂𑀢𑀼 𑀲𑁄𑀧𑀺 𑀧𑀘𑁆𑀘𑀬𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀅𑀦𑀺𑀘𑁆𑀘𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁄 𑀫𑀦𑁄𑀲𑀫𑁆𑀨𑀲𑁆𑀲𑁄, 𑀓𑀼𑀢𑁄 𑀦𑀺𑀘𑁆𑀘𑁄 𑀪𑀯𑀺𑀲𑁆𑀲𑀢𑀺! 𑀨𑀼𑀝𑁆𑀞𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺. 𑀇𑀢𑁆𑀣𑁂𑀢𑁂𑀧𑀺 𑀥𑀫𑁆𑀫𑀸 𑀘𑀮𑀸 𑀘𑁂𑀯 𑀩𑁆𑀬𑀣𑀸 𑀘 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀯𑀺𑀜𑁆𑀜𑀸𑀡𑀁 𑀲𑀫𑁆𑀪𑁄𑀢𑀻’’𑀢𑀺. 𑀤𑀲𑀫𑀁.

𑀙𑀦𑁆𑀦𑀯𑀕𑁆𑀕𑁄 𑀦𑀯𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀮𑁄𑀓𑀲𑀼𑀜𑁆𑀜𑀸 𑀲𑀁𑀔𑀺𑀢𑁆𑀢𑀁, 𑀙𑀦𑁆𑀦𑁄 𑀧𑀼𑀡𑁆𑀡𑁄 𑀘 𑀩𑀸𑀳𑀺𑀬𑁄;

𑀏𑀚𑁂𑀦 𑀘 𑀤𑀼𑀯𑁂 𑀯𑀼𑀢𑁆𑀢𑀸, 𑀤𑁆𑀯𑀬𑁂𑀳𑀺 𑀅𑀧𑀭𑁂 𑀤𑀼𑀯𑁂𑀢𑀺.