𑁧𑁦. 𑀲𑀴𑀯𑀕𑁆𑀕𑁄

𑁧. 𑀅𑀤𑀦𑁆𑀢𑀅𑀕𑀼𑀢𑁆𑀢𑀲𑀼𑀢𑁆𑀢𑀁

𑁯𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀸 𑀅𑀤𑀦𑁆𑀢𑀸 𑀅𑀕𑀼𑀢𑁆𑀢𑀸 𑀅𑀭𑀓𑁆𑀔𑀺𑀢𑀸 𑀅𑀲𑀁𑀯𑀼𑀢𑀸 𑀤𑀼𑀓𑁆𑀔𑀸𑀥𑀺𑀯𑀸𑀳𑀸 𑀳𑁄𑀦𑁆𑀢𑀺. 𑀓𑀢𑀫𑁂 𑀙? 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀁 𑀅𑀤𑀦𑁆𑀢𑀁 𑀅𑀕𑀼𑀢𑁆𑀢𑀁 𑀅𑀭𑀓𑁆𑀔𑀺𑀢𑀁 𑀅𑀲𑀁𑀯𑀼𑀢𑀁 𑀤𑀼𑀓𑁆𑀔𑀸𑀥𑀺𑀯𑀸𑀳𑀁 𑀳𑁄𑀢𑀺…𑀧𑁂… 𑀚𑀺𑀯𑁆𑀳𑀸, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀁 𑀅𑀤𑀦𑁆𑀢𑀁 𑀅𑀕𑀼𑀢𑁆𑀢𑀁 𑀅𑀭𑀓𑁆𑀔𑀺𑀢𑀁 𑀅𑀲𑀁𑀯𑀼𑀢𑀁 𑀤𑀼𑀓𑁆𑀔𑀸𑀥𑀺𑀯𑀸𑀳𑀁 𑀳𑁄𑀢𑀺…𑀧𑁂… 𑀫𑀦𑁄, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀁 𑀅𑀤𑀦𑁆𑀢𑀁 𑀅𑀕𑀼𑀢𑁆𑀢𑀁 𑀅𑀭𑀓𑁆𑀔𑀺𑀢𑀁 𑀅𑀲𑀁𑀯𑀼𑀢𑀁 𑀤𑀼𑀓𑁆𑀔𑀸𑀥𑀺𑀯𑀸𑀳𑀁 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀨𑀲𑁆𑀲𑀸𑀬𑀢𑀦𑀸 𑀅𑀤𑀦𑁆𑀢𑀸 𑀅𑀕𑀼𑀢𑁆𑀢𑀸 𑀅𑀭𑀓𑁆𑀔𑀺𑀢𑀸 𑀅𑀲𑀁𑀯𑀼𑀢𑀸 𑀤𑀼𑀓𑁆𑀔𑀸𑀥𑀺𑀯𑀸𑀳𑀸 𑀳𑁄𑀦𑁆𑀢𑀺’’.

‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀸 𑀲𑀼𑀤𑀦𑁆𑀢𑀸 𑀲𑀼𑀕𑀼𑀢𑁆𑀢𑀸 𑀲𑀼𑀭𑀓𑁆𑀔𑀺𑀢𑀸 𑀲𑀼𑀲𑀁𑀯𑀼𑀢𑀸 𑀲𑀼𑀔𑀸𑀥𑀺𑀯𑀸𑀳𑀸 𑀳𑁄𑀦𑁆𑀢𑀺. 𑀓𑀢𑀫𑁂 𑀙? 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀁 𑀲𑀼𑀤𑀦𑁆𑀢𑀁 𑀲𑀼𑀕𑀼𑀢𑁆𑀢𑀁 𑀲𑀼𑀭𑀓𑁆𑀔𑀺𑀢𑀁 𑀲𑀼𑀲𑀁𑀯𑀼𑀢𑀁 𑀲𑀼𑀔𑀸𑀥𑀺𑀯𑀸𑀳𑀁 𑀳𑁄𑀢𑀺…𑀧𑁂… 𑀚𑀺𑀯𑁆𑀳𑀸, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀁 𑀲𑀼𑀤𑀦𑁆𑀢𑀁 𑀲𑀼𑀕𑀼𑀢𑁆𑀢𑀁 𑀲𑀼𑀭𑀓𑁆𑀔𑀺𑀢𑀁 𑀲𑀼𑀲𑀁𑀯𑀼𑀢𑀁 𑀲𑀼𑀔𑀸𑀥𑀺𑀯𑀸𑀳𑀁 𑀳𑁄𑀢𑀺…𑀧𑁂… 𑀫𑀦𑁄, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀁 𑀲𑀼𑀤𑀦𑁆𑀢𑀁 𑀲𑀼𑀕𑀼𑀢𑁆𑀢𑀁 𑀲𑀼𑀭𑀓𑁆𑀔𑀺𑀢𑀁 𑀲𑀼𑀲𑀁𑀯𑀼𑀢𑀁 𑀲𑀼𑀔𑀸𑀥𑀺𑀯𑀸𑀳𑀁 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀨𑀲𑁆𑀲𑀸𑀬𑀢𑀦𑀸 𑀲𑀼𑀤𑀦𑁆𑀢𑀸 𑀲𑀼𑀕𑀼𑀢𑁆𑀢𑀸 𑀲𑀼𑀭𑀓𑁆𑀔𑀺𑀢𑀸 𑀲𑀼𑀲𑀁𑀯𑀼𑀢𑀸 𑀲𑀼𑀔𑀸𑀥𑀺𑀯𑀸𑀳𑀸 𑀳𑁄𑀦𑁆𑀢𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸…𑀧𑁂… 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀲𑀴𑁂𑀯 [𑀙𑀴𑁂𑀯 (𑀓.)] 𑀨𑀲𑁆𑀲𑀸𑀬𑀢𑀦𑀸𑀦𑀺 𑀪𑀺𑀓𑁆𑀔𑀯𑁄,

𑀅𑀲𑀁𑀯𑀼𑀢𑁄 𑀬𑀢𑁆𑀣 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺;

𑀢𑁂𑀲𑀜𑁆𑀘 𑀬𑁂 𑀲𑀁𑀯𑀭𑀡𑀁 𑀅𑀯𑁂𑀤𑀺𑀲𑀼𑀁,

𑀲𑀤𑁆𑀥𑀸𑀤𑀼𑀢𑀺𑀬𑀸 𑀯𑀺𑀳𑀭𑀦𑁆𑀢𑀸𑀦𑀯𑀲𑁆𑀲𑀼𑀢𑀸.

‘‘𑀤𑀺𑀲𑁆𑀯𑀸𑀦 𑀭𑀽𑀧𑀸𑀦𑀺 𑀫𑀦𑁄𑀭𑀫𑀸𑀦𑀺,

𑀅𑀣𑁄𑀧𑀺 𑀤𑀺𑀲𑁆𑀯𑀸𑀦 𑀅𑀫𑀦𑁄𑀭𑀫𑀸𑀦𑀺;

𑀫𑀦𑁄𑀭𑀫𑁂 𑀭𑀸𑀕𑀧𑀣𑀁 𑀯𑀺𑀦𑁄𑀤𑀬𑁂,

𑀦 𑀘𑀸𑀧𑁆𑀧𑀺𑀬𑀁 𑀫𑁂𑀢𑀺 𑀫𑀦𑀁 𑀧𑀤𑁄𑀲𑀬𑁂.

‘‘𑀲𑀤𑁆𑀤𑀜𑁆𑀘 𑀲𑀼𑀢𑁆𑀯𑀸 𑀤𑀼𑀪𑀬𑀁 𑀧𑀺𑀬𑀸𑀧𑁆𑀧𑀺𑀬𑀁,

𑀧𑀺𑀬𑀫𑁆𑀳𑀺 𑀲𑀤𑁆𑀤𑁂 𑀦 𑀲𑀫𑀼𑀘𑁆𑀙𑀺𑀢𑁄 𑀲𑀺𑀬𑀸;

𑀅𑀣𑁄𑀧𑁆𑀧𑀺𑀬𑁂 𑀤𑁄𑀲𑀕𑀢𑀁 𑀯𑀺𑀦𑁄𑀤𑀬𑁂,

𑀦 𑀘𑀸𑀧𑁆𑀧𑀺𑀬𑀁 𑀫𑁂𑀢𑀺 𑀫𑀦𑀁 𑀧𑀤𑁄𑀲𑀬𑁂.

‘‘𑀕𑀦𑁆𑀥𑀜𑁆𑀘 𑀖𑀢𑁆𑀯𑀸 𑀲𑀼𑀭𑀪𑀺𑀁 𑀫𑀦𑁄𑀭𑀫𑀁,

𑀅𑀣𑁄𑀧𑀺 𑀖𑀢𑁆𑀯𑀸 𑀅𑀲𑀼𑀘𑀺𑀁 𑀅𑀓𑀦𑁆𑀢𑀺𑀬𑀁;

𑀅𑀓𑀦𑁆𑀢𑀺𑀬𑀲𑁆𑀫𑀺𑀁 𑀧𑀝𑀺𑀖𑀁 𑀯𑀺𑀦𑁄𑀤𑀬𑁂,

𑀙𑀦𑁆𑀤𑀸𑀦𑀼𑀦𑀻𑀢𑁄 𑀦 𑀘 𑀓𑀦𑁆𑀢𑀺𑀬𑁂 𑀲𑀺𑀬𑀸.

‘‘𑀭𑀲𑀜𑁆𑀘 𑀪𑁄𑀢𑁆𑀯𑀸𑀦 𑀅𑀲𑀸𑀤𑀺𑀢𑀜𑁆𑀘 𑀲𑀸𑀤𑀼𑀁,

𑀅𑀣𑁄𑀧𑀺 𑀪𑁄𑀢𑁆𑀯𑀸𑀦 𑀅𑀲𑀸𑀤𑀼𑀫𑁂𑀓𑀤𑀸;

𑀲𑀸𑀤𑀼𑀁 𑀭𑀲𑀁 𑀦𑀸𑀚𑁆𑀛𑁄𑀲𑀸𑀬 𑀪𑀼𑀜𑁆𑀚𑁂,

𑀯𑀺𑀭𑁄𑀥𑀫𑀸𑀲𑀸𑀤𑀼𑀲𑀼 𑀦𑁄𑀧𑀤𑀁𑀲𑀬𑁂.

‘‘𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀦 𑀲𑀼𑀔𑁂𑀦 𑀫𑀚𑁆𑀚𑁂 [𑀫𑀚𑁆𑀛𑁂 (𑀲𑁆𑀬𑀸. 𑀓𑀁. 𑀧𑀻.)],

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑁄𑀧𑀺 𑀦 𑀲𑀫𑁆𑀧𑀯𑁂𑀥𑁂;

𑀨𑀲𑁆𑀲𑀤𑁆𑀯𑀬𑀁 𑀲𑀼𑀔𑀤𑀼𑀓𑁆𑀔𑁂 𑀉𑀧𑁂𑀓𑁆𑀔𑁂,

𑀅𑀦𑀸𑀦𑀼𑀭𑀼𑀤𑁆𑀥𑁄 𑀅𑀯𑀺𑀭𑀼𑀤𑁆𑀥 𑀓𑁂𑀦𑀘𑀺.

‘‘𑀧𑀧𑀜𑁆𑀘𑀲𑀜𑁆𑀜𑀸 𑀇𑀢𑀭𑀻𑀢𑀭𑀸 𑀦𑀭𑀸,

𑀧𑀧𑀜𑁆𑀘𑀬𑀦𑁆𑀢𑀸 𑀉𑀧𑀬𑀦𑁆𑀢𑀺 𑀲𑀜𑁆𑀜𑀺𑀦𑁄;

𑀫𑀦𑁄𑀫𑀬𑀁 𑀕𑁂𑀳𑀲𑀺𑀢𑀜𑁆𑀘 𑀲𑀩𑁆𑀩𑀁,

𑀧𑀦𑀼𑀚𑁆𑀚 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀇𑀭𑀻𑀬𑀢𑀺.

‘‘𑀏𑀯𑀁 𑀫𑀦𑁄 𑀙𑀲𑁆𑀲𑀼 𑀬𑀤𑀸 𑀲𑀼𑀪𑀸𑀯𑀺𑀢𑁄,

𑀨𑀼𑀝𑁆𑀞𑀲𑁆𑀲 𑀘𑀺𑀢𑁆𑀢𑀁 𑀦 𑀯𑀺𑀓𑀫𑁆𑀧𑀢𑁂 𑀓𑁆𑀯𑀘𑀺;

𑀢𑁂 𑀭𑀸𑀕𑀤𑁄𑀲𑁂 𑀅𑀪𑀺𑀪𑀼𑀬𑁆𑀬 𑀪𑀺𑀓𑁆𑀔𑀯𑁄,

𑀪𑀯𑀢𑁆𑀣 [𑀪𑀯𑀣 (𑀲𑀻. 𑀲𑁆𑀬𑀸. 𑀓𑀁.)] 𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭𑀕𑀸’’𑀢𑀺. 𑀧𑀞𑀫𑀁;

𑁨. 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑀼𑀢𑁆𑀢𑀁

𑁯𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 [𑀫𑀸𑀮𑀼𑀗𑁆𑀓𑁆𑀬𑀧𑀼𑀢𑁆𑀢𑁄 (𑀲𑀻.)] 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

‘‘𑀏𑀢𑁆𑀣 𑀤𑀸𑀦𑀺, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀓𑀺𑀁 𑀤𑀳𑀭𑁂 𑀪𑀺𑀓𑁆𑀔𑀽 𑀯𑀓𑁆𑀔𑀸𑀫! 𑀬𑀢𑁆𑀭 𑀳𑀺 𑀦𑀸𑀫 𑀢𑁆𑀯𑀁, 𑀪𑀺𑀓𑁆𑀔𑀼, 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑀁 𑀬𑀸𑀘𑀲𑀻’’𑀢𑀺.

‘‘𑀓𑀺𑀜𑁆𑀘𑀸𑀧𑀸𑀳𑀁, 𑀪𑀦𑁆𑀢𑁂, 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁, 𑀅𑀧𑁆𑀧𑁂𑀯 𑀦𑀸𑀫𑀸𑀳𑀁 𑀪𑀕𑀯𑀢𑁄 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀁. 𑀅𑀧𑁆𑀧𑁂𑀯 𑀦𑀸𑀫𑀸𑀳𑀁 𑀪𑀕𑀯𑀢𑁄 𑀪𑀸𑀲𑀺𑀢𑀲𑁆𑀲 𑀤𑀸𑀬𑀸𑀤𑁄 𑀅𑀲𑁆𑀲’’𑀦𑁆𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀬𑁂 𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀅𑀤𑀺𑀝𑁆𑀞𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸, 𑀦 𑀘 𑀧𑀲𑁆𑀲𑀲𑀺, 𑀦 𑀘 𑀢𑁂 𑀳𑁄𑀢𑀺 𑀧𑀲𑁆𑀲𑁂𑀬𑁆𑀬𑀦𑁆𑀢𑀺? 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀬𑁂 𑀢𑁂 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸 𑀅𑀲𑁆𑀲𑀼𑀢𑀸 𑀅𑀲𑁆𑀲𑀼𑀢𑀧𑀼𑀩𑁆𑀩𑀸, 𑀦 𑀘 𑀲𑀼𑀡𑀸𑀲𑀺, 𑀦 𑀘 𑀢𑁂 𑀳𑁄𑀢𑀺 𑀲𑀼𑀡𑁂𑀬𑁆𑀬𑀦𑁆𑀢𑀺? 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀬𑁂 𑀢𑁂 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸 𑀅𑀖𑀸𑀬𑀺𑀢𑀸 𑀅𑀖𑀸𑀬𑀺𑀢𑀧𑀼𑀩𑁆𑀩𑀸, 𑀦 𑀘 𑀖𑀸𑀬𑀲𑀺, 𑀦 𑀘 𑀢𑁂 𑀳𑁄𑀢𑀺 𑀖𑀸𑀬𑁂𑀬𑁆𑀬𑀦𑁆𑀢𑀺? 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀬𑁂 𑀢𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸 𑀅𑀲𑀸𑀬𑀺𑀢𑀸 𑀅𑀲𑀸𑀬𑀺𑀢𑀧𑀼𑀩𑁆𑀩𑀸, 𑀦 𑀘 𑀲𑀸𑀬𑀲𑀺, 𑀦 𑀘 𑀢𑁂 𑀳𑁄𑀢𑀺 𑀲𑀸𑀬𑁂𑀬𑁆𑀬𑀦𑁆𑀢𑀺? 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀬𑁂 𑀢𑁂 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀅𑀲𑀫𑁆𑀨𑀼𑀝𑁆𑀞𑀸 𑀅𑀲𑀫𑁆𑀨𑀼𑀝𑁆𑀞𑀧𑀼𑀩𑁆𑀩𑀸, 𑀦 𑀘 𑀨𑀼𑀲𑀲𑀺, 𑀦 𑀘 𑀢𑁂 𑀳𑁄𑀢𑀺 𑀨𑀼𑀲𑁂𑀬𑁆𑀬𑀦𑁆𑀢𑀺? 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀬𑁂 𑀢𑁂 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀅𑀯𑀺𑀜𑁆𑀜𑀸𑀢𑀸 𑀅𑀯𑀺𑀜𑁆𑀜𑀸𑀢𑀧𑀼𑀩𑁆𑀩𑀸, 𑀦 𑀘 𑀯𑀺𑀚𑀸𑀦𑀸𑀲𑀺, 𑀦 𑀘 𑀢𑁂 𑀳𑁄𑀢𑀺 𑀯𑀺𑀚𑀸𑀦𑁂𑀬𑁆𑀬𑀦𑁆𑀢𑀺? 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀢𑁆𑀣 𑀘 𑀢𑁂, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂 𑀲𑀼𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀫𑀼𑀢𑁂 𑀫𑀼𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀬𑀢𑁄 𑀔𑁄 𑀢𑁂, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂 𑀲𑀼𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀫𑀼𑀢𑁂 𑀫𑀼𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺; 𑀢𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦 𑀢𑁂𑀦. 𑀬𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦 𑀢𑁂𑀦; 𑀢𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦 𑀢𑀢𑁆𑀣. 𑀬𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦 𑀢𑀢𑁆𑀣; 𑀢𑀢𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀦𑁂𑀯𑀺𑀥, 𑀦 𑀳𑀼𑀭𑀁, 𑀦 𑀉𑀪𑀬𑀫𑀦𑁆𑀢𑀭𑁂𑀦. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺.

‘‘𑀇𑀫𑀲𑁆𑀲 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺 𑁋

‘‘𑀭𑀽𑀧𑀁 𑀤𑀺𑀲𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 [𑀅𑀚𑁆𑀛𑁄𑀲𑀸𑀬 (𑀲𑀻.)] 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀭𑀽𑀧𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀁 𑀆𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀲𑀤𑁆𑀤𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀁 𑀆𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀕𑀦𑁆𑀥𑀁 𑀖𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀕𑀦𑁆𑀥𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀁 𑀆𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀭𑀲𑀁 𑀪𑁄𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀭𑀲𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀁 𑀆𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀨𑀲𑁆𑀲𑀁 𑀨𑀼𑀲𑁆𑀲 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀨𑀲𑁆𑀲𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀁 𑀆𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀥𑀫𑁆𑀫𑀁 𑀜𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀥𑀫𑁆𑀫𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀁 𑀆𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀦 𑀲𑁄 𑀭𑀚𑁆𑀚𑀢𑀺 𑀭𑀽𑀧𑁂𑀲𑀼, 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀬𑀣𑀸𑀲𑁆𑀲 𑀧𑀲𑁆𑀲𑀢𑁄 𑀭𑀽𑀧𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀦 𑀲𑁄 𑀭𑀚𑁆𑀚𑀢𑀺 𑀲𑀤𑁆𑀤𑁂𑀲𑀼, 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀬𑀣𑀸𑀲𑁆𑀲 𑀲𑀼𑀡𑀢𑁄 𑀲𑀤𑁆𑀤𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀦 𑀲𑁄 𑀭𑀚𑁆𑀚𑀢𑀺 𑀕𑀦𑁆𑀥𑁂𑀲𑀼, 𑀕𑀦𑁆𑀥𑀁 𑀖𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀬𑀣𑀸𑀲𑁆𑀲 𑀖𑀸𑀬𑀢𑁄 𑀕𑀦𑁆𑀥𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀦 𑀲𑁄 𑀭𑀚𑁆𑀚𑀢𑀺 𑀭𑀲𑁂𑀲𑀼, 𑀭𑀲𑀁 𑀪𑁄𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀬𑀣𑀸𑀲𑁆𑀲 𑀲𑀸𑀬𑀢𑁄 𑀭𑀲𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀦 𑀲𑁄 𑀭𑀚𑁆𑀚𑀢𑀺 𑀨𑀲𑁆𑀲𑁂𑀲𑀼, 𑀨𑀲𑁆𑀲𑀁 𑀨𑀼𑀲𑁆𑀲 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀬𑀣𑀸𑀲𑁆𑀲 𑀨𑀼𑀲𑀢𑁄 𑀨𑀲𑁆𑀲𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.

‘‘𑀦 𑀲𑁄 𑀭𑀚𑁆𑀚𑀢𑀺 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀁 𑀜𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀬𑀣𑀸𑀲𑁆𑀲 𑀚𑀸𑀦𑀢𑁄 𑀥𑀫𑁆𑀫𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀻’’𑀢𑀺.

‘‘𑀇𑀫𑀲𑁆𑀲 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢! 𑀲𑀸𑀥𑀼 𑀔𑁄 𑀢𑁆𑀯𑀁, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀲𑀺 𑁋

‘‘𑀭𑀽𑀧𑀁 𑀤𑀺𑀲𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀭𑀽𑀧𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀁 𑀆𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀺.…𑀧𑁂….

‘‘𑀦 𑀲𑁄 𑀭𑀚𑁆𑀚𑀢𑀺 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀁 𑀜𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

‘‘𑀬𑀣𑀸𑀲𑁆𑀲 𑀯𑀺𑀚𑀸𑀦𑀢𑁄 𑀥𑀫𑁆𑀫𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀫𑀼𑀘𑁆𑀘𑀢𑀻’’𑀢𑀺.

‘‘𑀇𑀫𑀲𑁆𑀲 𑀔𑁄, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀤𑀼𑀢𑀺𑀬𑀁.

𑁩. 𑀧𑀭𑀺𑀳𑀸𑀦𑀥𑀫𑁆𑀫𑀲𑀼𑀢𑁆𑀢𑀁

𑁯𑁬. ‘‘𑀧𑀭𑀺𑀳𑀸𑀦𑀥𑀫𑁆𑀫𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀧𑀭𑀺𑀳𑀸𑀦𑀥𑀫𑁆𑀫𑀜𑁆𑀘 𑀙 𑀘 𑀅𑀪𑀺𑀪𑀸𑀬𑀢𑀦𑀸𑀦𑀺. 𑀢𑀁 𑀲𑀼𑀡𑀸𑀣. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀲𑀭𑀲𑀗𑁆𑀓𑀧𑁆𑀧𑀸 [𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 (𑀲𑁆𑀬𑀸. 𑀓𑀁. 𑀧𑀻. 𑀓.) 𑀉𑀧𑀭𑀺 𑀆𑀲𑀻𑀯𑀺𑀲𑀯𑀕𑁆𑀕𑁂 𑀲𑀢𑁆𑀢𑀫𑀲𑀼𑀢𑁆𑀢𑁂 𑀧𑀦 ‘‘𑀆𑀓𑀼𑀲𑀮𑀸 𑀲𑀭𑀲𑀗𑁆𑀓𑀧𑁆𑀧𑀸’’ 𑀢𑁆𑀯𑁂𑀯 𑀲𑀩𑁆𑀩𑀢𑁆𑀣 𑀤𑀺𑀲𑁆𑀲𑀢𑀺] 𑀲𑀁𑀬𑁄𑀚𑀦𑀺𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 [𑀩𑁆𑀬𑀦𑁆𑀢𑀺𑀓𑀭𑁄𑀢𑀺 (𑀧𑀻.) 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 (𑀓.)] 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀧𑀭𑀺𑀳𑀸𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺…𑀧𑁂… 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀺𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀧𑀭𑀺𑀳𑀸𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀺𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀦 𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀅𑀧𑀭𑀺𑀳𑀸𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺…𑀧𑁂… 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀺𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀦 𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀅𑀧𑀭𑀺𑀳𑀸𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀺.

‘‘𑀓𑀢𑀫𑀸𑀦𑀺 𑀘, 𑀪𑀺𑀓𑁆𑀔𑀯𑁂, 𑀙 𑀅𑀪𑀺𑀪𑀸𑀬𑀢𑀦𑀸𑀦𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀺𑀬𑀸. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀅𑀪𑀺𑀪𑀽𑀢𑀫𑁂𑀢𑀁 𑀆𑀬𑀢𑀦𑀁’. 𑀅𑀪𑀺𑀪𑀸𑀬𑀢𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺…𑀧𑁂… 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀺𑀬𑀸. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀅𑀪𑀺𑀪𑀽𑀢𑀫𑁂𑀢𑀁 𑀆𑀬𑀢𑀦𑀁’. 𑀅𑀪𑀺𑀪𑀸𑀬𑀢𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺. 𑀇𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀙 𑀅𑀪𑀺𑀪𑀸𑀬𑀢𑀦𑀸𑀦𑀻’’𑀢𑀺. 𑀢𑀢𑀺𑀬𑀁.

𑁪. 𑀧𑀫𑀸𑀤𑀯𑀺𑀳𑀸𑀭𑀻𑀲𑀼𑀢𑁆𑀢𑀁

𑁯𑁭. ‘‘𑀧𑀫𑀸𑀤𑀯𑀺𑀳𑀸𑀭𑀺𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀜𑁆𑀘. 𑀢𑀁 𑀲𑀼𑀡𑀸𑀣. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺? 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀩𑁆𑀬𑀸𑀲𑀺𑀜𑁆𑀘𑀢𑀺 [𑀩𑁆𑀬𑀸𑀲𑀺𑀘𑁆𑀘𑀢𑀺 (𑀲𑀻. 𑀲𑁆𑀬𑀸. 𑀓𑀁.)]. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀢𑀲𑁆𑀲 𑀩𑁆𑀬𑀸𑀲𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀁 𑀦 𑀳𑁄𑀢𑀺. 𑀧𑀸𑀫𑁄𑀚𑁆𑀚𑁂 𑀅𑀲𑀢𑀺 𑀧𑀻𑀢𑀺 𑀦 𑀳𑁄𑀢𑀺. 𑀧𑀻𑀢𑀺𑀬𑀸 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺 𑀦 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀺𑀬𑀸 𑀅𑀲𑀢𑀺 𑀤𑀼𑀓𑁆𑀔𑀁 𑀳𑁄𑀢𑀺. 𑀤𑀼𑀓𑁆𑀔𑀺𑀦𑁄 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺. 𑀅𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀥𑀫𑁆𑀫𑀸𑀦𑀁 𑀅𑀧𑀸𑀢𑀼𑀪𑀸𑀯𑀸 𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺…𑀧𑁂… 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀩𑁆𑀬𑀸𑀲𑀺𑀜𑁆𑀘𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼, 𑀢𑀲𑁆𑀲 𑀩𑁆𑀬𑀸𑀲𑀺𑀢𑁆𑀢𑀘𑀺𑀢𑁆𑀢𑀲𑁆𑀲…𑀧𑁂… 𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺…𑀧𑁂… 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀩𑁆𑀬𑀸𑀲𑀺𑀜𑁆𑀘𑀢𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀩𑁆𑀬𑀸𑀲𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀁 𑀦 𑀳𑁄𑀢𑀺. 𑀧𑀸𑀫𑁄𑀚𑁆𑀚𑁂 𑀅𑀲𑀢𑀺 𑀧𑀻𑀢𑀺 𑀦 𑀳𑁄𑀢𑀺. 𑀧𑀻𑀢𑀺𑀬𑀸 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺 𑀦 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀺𑀬𑀸 𑀅𑀲𑀢𑀺 𑀤𑀼𑀓𑁆𑀔𑀁 𑀳𑁄𑀢𑀺. 𑀤𑀼𑀓𑁆𑀔𑀺𑀦𑁄 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺. 𑀅𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀥𑀫𑁆𑀫𑀸𑀦𑀁 𑀅𑀧𑀸𑀢𑀼𑀪𑀸𑀯𑀸 𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺? 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑀁𑀯𑀼𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀦 𑀩𑁆𑀬𑀸𑀲𑀺𑀜𑁆𑀘𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼, 𑀢𑀲𑁆𑀲 𑀅𑀩𑁆𑀬𑀸𑀲𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺. 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺. 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺…𑀧𑁂… 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀲𑀁𑀯𑀼𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀦 𑀩𑁆𑀬𑀸𑀲𑀺𑀜𑁆𑀘𑀢𑀺…𑀧𑁂… 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀲𑀁𑀯𑀼𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀦 𑀩𑁆𑀬𑀸𑀲𑀺𑀜𑁆𑀘𑀢𑀺, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀅𑀩𑁆𑀬𑀸𑀲𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺. 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺. 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀁𑀯𑀭𑀲𑀼𑀢𑁆𑀢𑀁

𑁯𑁮. ‘‘𑀲𑀁𑀯𑀭𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀲𑀁𑀯𑀭𑀜𑁆𑀘. 𑀢𑀁 𑀲𑀼𑀡𑀸𑀣. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄 𑀳𑁄𑀢𑀺? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀧𑀭𑀺𑀳𑀸𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺…𑀧𑁂… 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸…𑀧𑁂… 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀧𑀭𑀺𑀳𑀸𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑁄 𑀳𑁄𑀢𑀺? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀦 𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀅𑀧𑀭𑀺𑀳𑀸𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 …𑀧𑁂… 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸…𑀧𑁂… 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 𑀪𑀺𑀓𑁆𑀔𑀼𑀦𑀸 𑁋 ‘𑀦 𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀅𑀧𑀭𑀺𑀳𑀸𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑁄 𑀳𑁄𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀫𑀸𑀥𑀺𑀲𑀼𑀢𑁆𑀢𑀁

𑁯𑁯. ‘‘𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣. 𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀓𑀺𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺? ‘𑀘𑀓𑁆𑀔𑀼 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀭𑀽𑀧𑀸 𑀅𑀦𑀺𑀘𑁆𑀘𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀫𑀦𑁄 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀥𑀫𑁆𑀫𑀸… 𑀫𑀦𑁄𑀯𑀺𑀜𑁆𑀜𑀸𑀡𑀁… 𑀫𑀦𑁄𑀲𑀫𑁆𑀨𑀲𑁆𑀲𑁄… ‘𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣. 𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀧𑀝𑀺𑀲𑀮𑁆𑀮𑀸𑀦𑀲𑀼𑀢𑁆𑀢𑀁

𑁧𑁦𑁦. ‘‘𑀧𑀝𑀺𑀲𑀮𑁆𑀮𑀸𑀦𑁂 [𑀧𑀝𑀺𑀲𑀮𑁆𑀮𑀸𑀦𑀁 (𑀲𑀻. 𑀧𑀻. 𑀓.), 𑀧𑀝𑀺𑀲𑀮𑁆𑀮𑀻𑀦𑀸 (𑀲𑁆𑀬𑀸. 𑀓𑀁.)], 𑀪𑀺𑀓𑁆𑀔𑀯𑁂, 𑀬𑁄𑀕𑀫𑀸𑀧𑀚𑁆𑀚𑀣. 𑀧𑀝𑀺𑀲𑀮𑁆𑀮𑀻𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀓𑀺𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺? ‘𑀘𑀓𑁆𑀔𑀼 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀭𑀽𑀧𑀸 𑀅𑀦𑀺𑀘𑁆𑀘𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀧𑀝𑀺𑀲𑀮𑁆𑀮𑀸𑀦𑁂, 𑀪𑀺𑀓𑁆𑀔𑀯𑁂, 𑀬𑁄𑀕𑀫𑀸𑀧𑀚𑁆𑀚𑀣. 𑀧𑀝𑀺𑀲𑀮𑁆𑀮𑀻𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀧𑀞𑀫𑀦𑀢𑀼𑀫𑁆𑀳𑀸𑀓𑀁𑀲𑀼𑀢𑁆𑀢𑀁

𑁧𑁦𑁧. ‘‘𑀬𑀁 [𑀬𑀫𑁆𑀧𑀺 (𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁? 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀭𑀽𑀧𑀸 𑀦 𑀢𑀼𑀫𑁆𑀳𑀸𑀓𑀁. 𑀢𑁂 𑀧𑀚𑀳𑀣. 𑀢𑁂 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀲𑁄 𑀯𑁄 𑀧𑀳𑀻𑀦𑁄 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑁄𑀢𑀁 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑀤𑁆𑀤𑀸 𑀦 𑀢𑀼𑀫𑁆𑀳𑀸𑀓𑀁. 𑀢𑁂 𑀧𑀚𑀳𑀣. 𑀢𑁂 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀁 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑁄𑀢𑀲𑀫𑁆𑀨𑀲𑁆𑀲𑁄 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀲𑁄 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀬𑀫𑁆𑀧𑀺𑀤𑀁 𑀲𑁄𑀢𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀖𑀸𑀦𑀁 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀕𑀦𑁆𑀥𑀸 𑀦 𑀢𑀼𑀫𑁆𑀳𑀸𑀓𑀁. 𑀢𑁂 𑀧𑀚𑀳𑀣. 𑀢𑁂 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀖𑀸𑀦𑀯𑀺𑀜𑁆𑀜𑀸𑀡𑀁 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀖𑀸𑀦𑀲𑀫𑁆𑀨𑀲𑁆𑀲𑁄 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀲𑁄 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀬𑀫𑁆𑀧𑀺𑀤𑀁 𑀖𑀸𑀦𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺.

𑀚𑀺𑀯𑁆𑀳𑀸 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀲𑀸 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀭𑀲𑀸 𑀦 𑀢𑀼𑀫𑁆𑀳𑀸𑀓𑀁. 𑀢𑁂 𑀧𑀚𑀳𑀣. 𑀢𑁂 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀲𑁄 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀬𑀫𑁆𑀧𑀺𑀤𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺 …𑀧𑁂….

𑀫𑀦𑁄 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀲𑁄 𑀯𑁄 𑀧𑀳𑀻𑀦𑁄 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀥𑀫𑁆𑀫𑀸 𑀦 𑀢𑀼𑀫𑁆𑀳𑀸𑀓𑀁. 𑀢𑁂 𑀧𑀚𑀳𑀣. 𑀢𑁂 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀫𑀦𑁄𑀯𑀺𑀜𑁆𑀜𑀸𑀡𑀁 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀫𑀦𑁄𑀲𑀫𑁆𑀨𑀲𑁆𑀲𑁄 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀲𑁄 𑀯𑁄 𑀧𑀳𑀻𑀦𑁄 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀁 𑀇𑀫𑀲𑁆𑀫𑀺𑀁 𑀚𑁂𑀢𑀯𑀦𑁂 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀢𑀁 𑀚𑀦𑁄 𑀳𑀭𑁂𑀬𑁆𑀬 𑀯𑀸 𑀟𑀳𑁂𑀬𑁆𑀬 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬, 𑀅𑀧𑀺 𑀦𑀼 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀫𑁆𑀳𑁂 𑀚𑀦𑁄 𑀳𑀭𑀢𑀺 𑀯𑀸 𑀟𑀳𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀢𑀻’’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’?

‘‘𑀦 𑀳𑀺 𑀦𑁄 𑀏𑀢𑀁, 𑀪𑀦𑁆𑀢𑁂, 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀭𑀽𑀧𑀸 𑀦 𑀢𑀼𑀫𑁆𑀳𑀸𑀓𑀁… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀤𑀼𑀢𑀺𑀬𑀦𑀢𑀼𑀫𑁆𑀳𑀸𑀓𑀁𑀲𑀼𑀢𑁆𑀢𑀁

𑁧𑁦𑁨. ‘‘𑀬𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁? 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀭𑀽𑀧𑀸 𑀦 𑀢𑀼𑀫𑁆𑀳𑀸𑀓𑀁. 𑀢𑁂 𑀧𑀚𑀳𑀣. 𑀢𑁂 𑀯𑁄 𑀧𑀳𑀻𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀲𑁄 𑀯𑁄 𑀧𑀳𑀻𑀦𑁄 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀉𑀤𑀓𑀲𑀼𑀢𑁆𑀢𑀁

𑁧𑁦𑁩. ‘‘𑀉𑀤𑀓𑁄 [𑀉𑀤𑁆𑀤𑀓𑁄 (𑀲𑀻. 𑀧𑀻.)] 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀭𑀸𑀫𑀧𑀼𑀢𑁆𑀢𑁄 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀇𑀤𑀁 𑀚𑀸𑀢𑀼 𑀯𑁂𑀤𑀕𑀽, 𑀇𑀤𑀁 𑀚𑀸𑀢𑀼 𑀲𑀩𑁆𑀩𑀚𑀻 [𑀲𑀩𑁆𑀩𑀚𑀺 (𑀧𑀻.)], 𑀇𑀤𑀁 𑀚𑀸𑀢𑀼 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀡𑀺’𑀦𑁆𑀢𑀺. 𑀢𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀅𑀯𑁂𑀤𑀕𑀽𑀬𑁂𑀯 𑀲𑀫𑀸𑀦𑁄 ‘𑀯𑁂𑀤𑀕𑀽𑀲𑁆𑀫𑀻’𑀢𑀺 𑀪𑀸𑀲𑀢𑀺, 𑀅𑀲𑀩𑁆𑀩𑀚𑀻𑀬𑁂𑀯 𑀲𑀫𑀸𑀦𑁄 ‘𑀲𑀩𑁆𑀩𑀚𑀻𑀲𑁆𑀫𑀻’𑀢𑀺 𑀪𑀸𑀲𑀢𑀺, 𑀅𑀧𑀮𑀺𑀔𑀢𑀁𑀬𑁂𑀯 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀢𑀁 𑀫𑁂 ‘𑀕𑀡𑁆𑀟𑀫𑀽𑀮’𑀦𑁆𑀢𑀺 𑀪𑀸𑀲𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀇𑀤𑀁 𑀚𑀸𑀢𑀼 𑀯𑁂𑀤𑀕𑀽, 𑀇𑀤𑀁 𑀚𑀸𑀢𑀼 𑀲𑀩𑁆𑀩𑀚𑀻, 𑀇𑀤𑀁 𑀚𑀸𑀢𑀼 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀡𑀺’’’𑀦𑁆𑀢𑀺.