𑁧𑁯. 𑀆𑀲𑀻𑀯𑀺𑀲𑀯𑀕𑁆𑀕𑁄

𑁧. 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀁

𑁨𑁩𑁮. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸 𑀉𑀕𑁆𑀕𑀢𑁂𑀚𑀸 𑀖𑁄𑀭𑀯𑀺𑀲𑀸. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑁆𑀧𑀝𑀺𑀓𑀽𑀮𑁄. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀇𑀫𑁂 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸 𑀉𑀕𑁆𑀕𑀢𑁂𑀚𑀸 𑀖𑁄𑀭𑀯𑀺𑀲𑀸 𑀓𑀸𑀮𑁂𑀦 𑀓𑀸𑀮𑀁 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑀸, 𑀓𑀸𑀮𑁂𑀦 𑀓𑀸𑀮𑀁 𑀦𑁆𑀳𑀸𑀧𑁂𑀢𑀩𑁆𑀩𑀸, 𑀓𑀸𑀮𑁂𑀦 𑀓𑀸𑀮𑀁 𑀪𑁄𑀚𑁂𑀢𑀩𑁆𑀩𑀸, 𑀓𑀸𑀮𑁂𑀦 𑀓𑀸𑀮𑀁 𑀲𑀁𑀯𑁂𑀲𑁂𑀢𑀩𑁆𑀩𑀸 [𑀧𑀯𑁂𑀲𑁂𑀢𑀩𑁆𑀩𑀸 (𑀲𑁆𑀬𑀸. 𑀓𑀁. 𑀧𑀻. 𑀓.)]. 𑀬𑀤𑀸 𑀘 𑀔𑁄 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀉𑀕𑁆𑀕𑀢𑁂𑀚𑀸𑀦𑀁 𑀖𑁄𑀭𑀯𑀺𑀲𑀸𑀦𑀁 𑀅𑀜𑁆𑀜𑀢𑀭𑁄 𑀯𑀸 𑀅𑀜𑁆𑀜𑀢𑀭𑁄 𑀯𑀸 𑀓𑀼𑀧𑁆𑀧𑀺𑀲𑁆𑀲𑀢𑀺, 𑀢𑀢𑁄 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀲𑀺, 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀬𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀭𑀡𑀻𑀬𑀁 𑀢𑀁 𑀓𑀭𑁄𑀳𑀻’’’𑀢𑀺.

‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀪𑀻𑀢𑁄 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀉𑀕𑁆𑀕𑀢𑁂𑀚𑀸𑀦𑀁 𑀖𑁄𑀭𑀯𑀺𑀲𑀸𑀦𑀁 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑁂𑀣. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀇𑀫𑁂 𑀔𑁄, 𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀜𑁆𑀘 𑀯𑀥𑀓𑀸 𑀧𑀘𑁆𑀘𑀢𑁆𑀣𑀺𑀓𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸, 𑀬𑀢𑁆𑀣𑁂𑀯 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫 𑀢𑀢𑁆𑀣𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀸𑀢𑀺. 𑀬𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀭𑀡𑀻𑀬𑀁 𑀢𑀁 𑀓𑀭𑁄𑀳𑀻’’’𑀢𑀺.

‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀪𑀻𑀢𑁄 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀉𑀕𑁆𑀕𑀢𑁂𑀚𑀸𑀦𑀁 𑀖𑁄𑀭𑀯𑀺𑀲𑀸𑀦𑀁, 𑀪𑀻𑀢𑁄 𑀧𑀜𑁆𑀘𑀦𑁆𑀦𑀁 𑀯𑀥𑀓𑀸𑀦𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑁂𑀣. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀬𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀙𑀝𑁆𑀞𑁄 𑀅𑀦𑁆𑀢𑀭𑀘𑀭𑁄 𑀯𑀥𑀓𑁄 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀬𑀢𑁆𑀣𑁂𑀯 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀺 𑀢𑀢𑁆𑀣𑁂𑀯 𑀲𑀺𑀭𑁄 𑀧𑀸𑀢𑁂𑀲𑁆𑀲𑀸𑀫𑀻𑀢𑀺. 𑀬𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀭𑀡𑀻𑀬𑀁 𑀢𑀁 𑀓𑀭𑁄𑀳𑀻’’’𑀢𑀺.

‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀪𑀻𑀢𑁄 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀉𑀕𑁆𑀕𑀢𑁂𑀚𑀸𑀦𑀁 𑀖𑁄𑀭𑀯𑀺𑀲𑀸𑀦𑀁, 𑀪𑀻𑀢𑁄 𑀧𑀜𑁆𑀘𑀦𑁆𑀦𑀁 𑀯𑀥𑀓𑀸𑀦𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀁, 𑀪𑀻𑀢𑁄 𑀙𑀝𑁆𑀞𑀲𑁆𑀲 𑀅𑀦𑁆𑀢𑀭𑀘𑀭𑀲𑁆𑀲 𑀯𑀥𑀓𑀲𑁆𑀲 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀲𑁆𑀲 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑁂𑀣. 𑀲𑁄 𑀧𑀲𑁆𑀲𑁂𑀬𑁆𑀬 𑀲𑀼𑀜𑁆𑀜𑀁 𑀕𑀸𑀫𑀁. 𑀬𑀜𑁆𑀜𑀤𑁂𑀯 𑀖𑀭𑀁 𑀧𑀯𑀺𑀲𑁂𑀬𑁆𑀬 𑀭𑀺𑀢𑁆𑀢𑀓𑀜𑁆𑀜𑁂𑀯 𑀧𑀯𑀺𑀲𑁂𑀬𑁆𑀬 𑀢𑀼𑀘𑁆𑀙𑀓𑀜𑁆𑀜𑁂𑀯 𑀧𑀯𑀺𑀲𑁂𑀬𑁆𑀬 𑀲𑀼𑀜𑁆𑀜𑀓𑀜𑁆𑀜𑁂𑀯 𑀧𑀯𑀺𑀲𑁂𑀬𑁆𑀬. 𑀬𑀜𑁆𑀜𑀤𑁂𑀯 𑀪𑀸𑀚𑀦𑀁 𑀧𑀭𑀺𑀫𑀲𑁂𑀬𑁆𑀬 𑀭𑀺𑀢𑁆𑀢𑀓𑀜𑁆𑀜𑁂𑀯 𑀧𑀭𑀺𑀫𑀲𑁂𑀬𑁆𑀬 𑀢𑀼𑀘𑁆𑀙𑀓𑀜𑁆𑀜𑁂𑀯 𑀧𑀭𑀺𑀫𑀲𑁂𑀬𑁆𑀬 𑀲𑀼𑀜𑁆𑀜𑀓𑀜𑁆𑀜𑁂𑀯 𑀧𑀭𑀺𑀫𑀲𑁂𑀬𑁆𑀬. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀇𑀤𑀸𑀦𑀺, 𑀅𑀫𑁆𑀪𑁄 𑀧𑀼𑀭𑀺𑀲, 𑀇𑀫𑀁 𑀲𑀼𑀜𑁆𑀜𑀁 𑀕𑀸𑀫𑀁 𑀘𑁄𑀭𑀸 𑀕𑀸𑀫𑀖𑀸𑀢𑀓𑀸 𑀧𑀯𑀺𑀲𑀦𑁆𑀢𑀺 [𑀯𑀥𑀺𑀲𑁆𑀲𑀦𑁆𑀢𑀺 (𑀲𑀻. 𑀧𑀻.)]. 𑀬𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀭𑀡𑀻𑀬𑀁 𑀢𑀁 𑀓𑀭𑁄𑀳𑀻’’’𑀢𑀺.

‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀪𑀻𑀢𑁄 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀉𑀕𑁆𑀕𑀢𑁂𑀚𑀸𑀦𑀁 𑀖𑁄𑀭𑀯𑀺𑀲𑀸𑀦𑀁, 𑀪𑀻𑀢𑁄 𑀧𑀜𑁆𑀘𑀦𑁆𑀦𑀁 𑀯𑀥𑀓𑀸𑀦𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀁, 𑀪𑀻𑀢𑁄 𑀙𑀝𑁆𑀞𑀲𑁆𑀲 𑀅𑀦𑁆𑀢𑀭𑀘𑀭𑀲𑁆𑀲 𑀯𑀥𑀓𑀲𑁆𑀲 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀲𑁆𑀲, 𑀪𑀻𑀢𑁄 𑀘𑁄𑀭𑀸𑀦𑀁 𑀕𑀸𑀫𑀖𑀸𑀢𑀓𑀸𑀦𑀁 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑁂𑀣. 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀉𑀤𑀓𑀡𑁆𑀡𑀯𑀁 𑀑𑀭𑀺𑀫𑀁 𑀢𑀻𑀭𑀁 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀸𑀭𑀺𑀫𑀁 𑀢𑀻𑀭𑀁 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁. 𑀦 𑀘𑀲𑁆𑀲 𑀦𑀸𑀯𑀸 𑀲𑀦𑁆𑀢𑀸𑀭𑀡𑀻 𑀉𑀢𑁆𑀢𑀭𑀲𑁂𑀢𑀼 𑀯𑀸 𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀫𑀳𑀸𑀉𑀤𑀓𑀡𑁆𑀡𑀯𑁄 𑀑𑀭𑀺𑀫𑀁 𑀢𑀻𑀭𑀁 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀸𑀭𑀺𑀫𑀁 𑀢𑀻𑀭𑀁 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁, 𑀦𑀢𑁆𑀣𑀺 𑀘 [𑀦 𑀘𑀲𑁆𑀲 (𑀲𑀻. 𑀓.), 𑀦𑀢𑁆𑀣𑀲𑁆𑀲 (𑀲𑁆𑀬𑀸. 𑀓𑀁.)] 𑀦𑀸𑀯𑀸 𑀲𑀦𑁆𑀢𑀸𑀭𑀡𑀻 𑀉𑀢𑁆𑀢𑀭𑀲𑁂𑀢𑀼 𑀯𑀸 𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬. 𑀬𑀁𑀦𑀽𑀦𑀸𑀳𑀁 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀲𑀁𑀓𑀟𑁆𑀠𑀺𑀢𑁆𑀯𑀸 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀓𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑀫𑀸𑀦𑁄 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬’’’𑀦𑁆𑀢𑀺.

‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀲𑀁𑀓𑀟𑁆𑀠𑀺𑀢𑁆𑀯𑀸 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀓𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑀫𑀸𑀦𑁄 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 [𑀧𑀸𑀭𑀕𑀢𑁄 (𑀲𑀻. 𑀲𑁆𑀬𑀸. 𑀓𑀁.)] 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄.

‘‘𑀉𑀧𑀫𑀸 𑀔𑁄 𑀫𑁆𑀬𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀢𑀸 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬. 𑀅𑀬𑀜𑁆𑀘𑁂𑀢𑁆𑀣 [𑀅𑀬𑀁 𑀘𑁂𑀯𑁂𑀢𑁆𑀣 (𑀲𑀻.)] 𑀅𑀢𑁆𑀣𑁄 𑁋 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸 𑀉𑀕𑁆𑀕𑀢𑁂𑀚𑀸 𑀖𑁄𑀭𑀯𑀺𑀲𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑁂𑀢𑀁 𑀫𑀳𑀸𑀪𑀽𑀢𑀸𑀦𑀁 𑀅𑀥𑀺𑀯𑀘𑀦𑀁 𑁋 𑀧𑀣𑀯𑀻𑀥𑀸𑀢𑀼𑀬𑀸, 𑀆𑀧𑁄𑀥𑀸𑀢𑀼𑀬𑀸, 𑀢𑁂𑀚𑁄𑀥𑀸𑀢𑀼𑀬𑀸, 𑀯𑀸𑀬𑁄𑀥𑀸𑀢𑀼𑀬𑀸.

‘‘𑀧𑀜𑁆𑀘 𑀯𑀥𑀓𑀸 𑀧𑀘𑁆𑀘𑀢𑁆𑀣𑀺𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲.

‘‘𑀙𑀝𑁆𑀞𑁄 𑀅𑀦𑁆𑀢𑀭𑀘𑀭𑁄 𑀯𑀥𑀓𑁄 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀻𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

‘‘𑀲𑀼𑀜𑁆𑀜𑁄 𑀕𑀸𑀫𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀉𑀧𑀧𑀭𑀺𑀓𑁆𑀔𑀢𑀺 𑀭𑀺𑀢𑁆𑀢𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀢𑀼𑀘𑁆𑀙𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀲𑀼𑀜𑁆𑀜𑀓𑀜𑁆𑀜𑁂𑀯 𑀔𑀸𑀬𑀢𑀺…𑀧𑁂… 𑀚𑀺𑀯𑁆𑀳𑀸𑀢𑁄 𑀘𑁂𑀧𑀺 𑀦𑀁, 𑀪𑀺𑀓𑁆𑀔𑀯𑁂…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀉𑀧𑀧𑀭𑀺𑀓𑁆𑀔𑀢𑀺 𑀭𑀺𑀢𑁆𑀢𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀢𑀼𑀘𑁆𑀙𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀲𑀼𑀜𑁆𑀜𑀓𑀜𑁆𑀜𑁂𑀯 𑀔𑀸𑀬𑀢𑀺.

‘‘𑀘𑁄𑀭𑀸 𑀕𑀸𑀫𑀖𑀸𑀢𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀩𑀸𑀳𑀺𑀭𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀭𑀽𑀧𑁂𑀲𑀼; 𑀲𑁄𑀢𑀁, 𑀪𑀺𑀓𑁆𑀔𑀯𑁂…𑀧𑁂… 𑀖𑀸𑀦𑀁, 𑀪𑀺𑀓𑁆𑀔𑀯𑁂…𑀧𑁂… 𑀚𑀺𑀯𑁆𑀳𑀸, 𑀪𑀺𑀓𑁆𑀔𑀯𑁂, 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀭𑀲𑁂𑀲𑀼; 𑀓𑀸𑀬𑁄, 𑀪𑀺𑀓𑁆𑀔𑀯𑁂…𑀧𑁂… 𑀫𑀦𑁄, 𑀪𑀺𑀓𑁆𑀔𑀯𑁂, 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀥𑀫𑁆𑀫𑁂𑀲𑀼.

‘‘𑀫𑀳𑀸 𑀉𑀤𑀓𑀡𑁆𑀡𑀯𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑁂𑀢𑀁 𑀑𑀖𑀸𑀦𑀁 𑀅𑀥𑀺𑀯𑀘𑀦𑀁 𑁋 𑀓𑀸𑀫𑁄𑀖𑀲𑁆𑀲, 𑀪𑀯𑁄𑀖𑀲𑁆𑀲, 𑀤𑀺𑀝𑁆𑀞𑁄𑀖𑀲𑁆𑀲, 𑀅𑀯𑀺𑀚𑁆𑀚𑁄𑀖𑀲𑁆𑀲.

‘‘𑀑𑀭𑀺𑀫𑀁 𑀢𑀻𑀭𑀁 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

‘‘𑀧𑀸𑀭𑀺𑀫𑀁 𑀢𑀻𑀭𑀁 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

‘‘𑀓𑀼𑀮𑁆𑀮𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲𑁂𑀢𑀁 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀯𑀘𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀢𑀲𑁆𑀲 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀸𑀫𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

‘‘𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀞𑀫𑀁.

𑁨. 𑀭𑀣𑁄𑀧𑀫𑀲𑀼𑀢𑁆𑀢𑀁

𑁨𑁩𑁯. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽, 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺, 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻; 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁. 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺; 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁; 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻; 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺; 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁; 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀽𑀫𑀺𑀬𑀁 𑀘𑀸𑀢𑀼𑀫𑀳𑀸𑀧𑀣𑁂 𑀆𑀚𑀜𑁆𑀜𑀭𑀣𑁄 𑀬𑀼𑀢𑁆𑀢𑁄 𑀅𑀲𑁆𑀲 𑀞𑀺𑀢𑁄 𑀑𑀥𑀲𑁆𑀢𑀧𑀢𑁄𑀤𑁄 [𑀑𑀥𑀢𑀧𑀢𑁄𑀤𑁄 (𑀲𑁆𑀬𑀸. 𑀓𑀁.), 𑀑𑀥𑀲𑀢𑀧𑀢𑁄𑀤𑁄 (𑀧𑀻.)]. 𑀢𑀫𑁂𑀦𑀁 𑀤𑀓𑁆𑀔𑁄 𑀬𑁄𑀕𑁆𑀕𑀸𑀘𑀭𑀺𑀬𑁄 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀭𑀲𑁆𑀫𑀺𑀬𑁄 𑀕𑀳𑁂𑀢𑁆𑀯𑀸, 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀧𑀢𑁄𑀤𑀁 𑀕𑀳𑁂𑀢𑁆𑀯𑀸, 𑀬𑁂𑀦𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀲𑀸𑀭𑁂𑀬𑁆𑀬𑀧𑀺 𑀧𑀘𑁆𑀘𑀸𑀲𑀸𑀭𑁂𑀬𑁆𑀬𑀧𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑁂𑀲𑀁 𑀙𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀭𑀓𑁆𑀔𑀸𑀬 𑀲𑀺𑀓𑁆𑀔𑀢𑀺, 𑀲𑀁𑀬𑀫𑀸𑀬 𑀲𑀺𑀓𑁆𑀔𑀢𑀺, 𑀤𑀫𑀸𑀬 𑀲𑀺𑀓𑁆𑀔𑀢𑀺, 𑀉𑀧𑀲𑀫𑀸𑀬 𑀲𑀺𑀓𑁆𑀔𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑁋 ‘𑀦𑁂𑀯 𑀤𑀯𑀸𑀬, 𑀦 𑀫𑀤𑀸𑀬, 𑀦 𑀫𑀡𑁆𑀟𑀦𑀸𑀬, 𑀦 𑀯𑀺𑀪𑀽𑀲𑀦𑀸𑀬, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸, 𑀬𑀸𑀧𑀦𑀸𑀬, 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸, 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬, 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺, 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀯𑀡𑀁 𑀆𑀮𑀺𑀫𑁆𑀧𑁂𑀬𑁆𑀬 𑀬𑀸𑀯𑀤𑁂𑀯 𑀭𑁄𑀳𑀦𑀢𑁆𑀣𑀸𑀬 [𑀭𑁄𑀧𑀦𑀢𑁆𑀣𑀸𑀬 (𑀲𑀻. 𑀧𑀻.), 𑀲𑁂𑀯𑀦𑀢𑁆𑀣𑀸𑀬 (𑀲𑁆𑀬𑀸. 𑀓𑀁.), 𑀕𑁄𑀧𑀦𑀢𑁆𑀣𑀸𑀬 (𑀓.)], 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑁂𑀬𑁆𑀬 𑀬𑀸𑀯𑀤𑁂𑀯 𑀪𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬; 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑁋 ‘𑀦𑁂𑀯 𑀤𑀯𑀸𑀬, 𑀦 𑀫𑀤𑀸𑀬, 𑀦 𑀫𑀡𑁆𑀟𑀦𑀸𑀬, 𑀦 𑀯𑀺𑀪𑀽𑀲𑀦𑀸𑀬, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸, 𑀬𑀸𑀧𑀦𑀸𑀬, 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸, 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬, 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺, 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 𑀬𑀸𑀫𑀁 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀁 𑀬𑀸𑀫𑀁 𑀧𑀘𑁆𑀘𑀼𑀝𑁆𑀞𑀸𑀬 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀓𑀼𑀫𑁆𑀫𑁄𑀧𑀫𑀲𑀼𑀢𑁆𑀢𑀁

𑁨𑁪𑁦. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀓𑀼𑀫𑁆𑀫𑁄 𑀓𑀘𑁆𑀙𑀧𑁄 𑀲𑀸𑀬𑀦𑁆𑀳𑀲𑀫𑀬𑀁 𑀅𑀦𑀼𑀦𑀤𑀻𑀢𑀻𑀭𑁂 𑀕𑁄𑀘𑀭𑀧𑀲𑀼𑀢𑁄 𑀅𑀳𑁄𑀲𑀺. 𑀲𑀺𑀗𑁆𑀕𑀸𑀮𑁄𑀧𑀺 [𑀲𑀺𑀕𑀸𑀮𑁄𑀧𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀬𑀦𑁆𑀳𑀲𑀫𑀬𑀁 𑀅𑀦𑀼𑀦𑀤𑀻𑀢𑀻𑀭𑁂 𑀕𑁄𑀘𑀭𑀧𑀲𑀼𑀢𑁄 𑀅𑀳𑁄𑀲𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀫𑁆𑀫𑁄 𑀓𑀘𑁆𑀙𑀧𑁄 𑀲𑀺𑀗𑁆𑀕𑀸𑀮𑀁 𑀤𑀽𑀭𑀢𑁄𑀯 𑀕𑁄𑀘𑀭𑀧𑀲𑀼𑀢𑀁. 𑀤𑀺𑀲𑁆𑀯𑀸𑀦 𑀲𑁄𑀡𑁆𑀟𑀺𑀧𑀜𑁆𑀘𑀫𑀸𑀦𑀺 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂 𑀲𑀫𑁄𑀤𑀳𑀺𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑀼𑀡𑁆𑀳𑀻𑀪𑀽𑀢𑁄 𑀲𑀗𑁆𑀓𑀲𑀸𑀬𑀢𑀺. 𑀲𑀺𑀗𑁆𑀕𑀸𑀮𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀤𑁆𑀤𑀲 𑀓𑀼𑀫𑁆𑀫𑀁 𑀓𑀘𑁆𑀙𑀧𑀁 𑀤𑀽𑀭𑀢𑁄𑀯 𑀕𑁄𑀘𑀭𑀧𑀲𑀼𑀢𑀁. 𑀤𑀺𑀲𑁆𑀯𑀸𑀦 𑀬𑁂𑀦 𑀓𑀼𑀫𑁆𑀫𑁄 𑀓𑀘𑁆𑀙𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀼𑀫𑁆𑀫𑀁 𑀓𑀘𑁆𑀙𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀳𑁄𑀲𑀺 𑁋 ‘𑀬𑀤𑀸𑀬𑀁 𑀓𑀼𑀫𑁆𑀫𑁄 𑀓𑀘𑁆𑀙𑀧𑁄 𑀲𑁄𑀡𑁆𑀟𑀺𑀧𑀜𑁆𑀘𑀫𑀸𑀦𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀢𑀭𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀅𑀗𑁆𑀕𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑁆𑀲𑀢𑀺, 𑀢𑀢𑁆𑀣𑁂𑀯 𑀦𑀁 𑀕𑀳𑁂𑀢𑁆𑀯𑀸 𑀉𑀤𑁆𑀤𑀸𑀮𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’𑀢𑀺. 𑀬𑀤𑀸 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀫𑁆𑀫𑁄 𑀓𑀘𑁆𑀙𑀧𑁄 𑀲𑁄𑀡𑁆𑀟𑀺𑀧𑀜𑁆𑀘𑀫𑀸𑀦𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀢𑀭𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀅𑀗𑁆𑀕𑀁 𑀦 𑀅𑀪𑀺𑀦𑀺𑀦𑁆𑀦𑀸𑀫𑀺, 𑀅𑀣 𑀲𑀺𑀗𑁆𑀕𑀸𑀮𑁄 𑀓𑀼𑀫𑁆𑀫𑀫𑁆𑀳𑀸 𑀦𑀺𑀩𑁆𑀩𑀺𑀚𑁆𑀚 𑀧𑀓𑁆𑀓𑀸𑀫𑀺, 𑀑𑀢𑀸𑀭𑀁 𑀅𑀮𑀪𑀫𑀸𑀦𑁄.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀫𑀸𑀭𑁄 𑀧𑀸𑀧𑀺𑀫𑀸 𑀲𑀢𑀢𑀁 𑀲𑀫𑀺𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑁋 ‘𑀅𑀧𑁆𑀧𑁂𑀯 𑀦𑀸𑀫𑀸𑀳𑀁 𑀇𑀫𑁂𑀲𑀁 𑀘𑀓𑁆𑀔𑀼𑀢𑁄 𑀯𑀸 𑀑𑀢𑀸𑀭𑀁 𑀮𑀪𑁂𑀬𑁆𑀬𑀁…𑀧𑁂… 𑀚𑀺𑀯𑁆𑀳𑀸𑀢𑁄 𑀯𑀸 𑀑𑀢𑀸𑀭𑀁 𑀮𑀪𑁂𑀬𑁆𑀬𑀁…𑀧𑁂… 𑀫𑀦𑀢𑁄 𑀯𑀸 𑀑𑀢𑀸𑀭𑀁 𑀮𑀪𑁂𑀬𑁆𑀬’𑀦𑁆𑀢𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸 𑀯𑀺𑀳𑀭𑀣. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀫𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀺𑀦𑁄 𑀅𑀳𑀼𑀯𑀢𑁆𑀣, 𑀫𑀸 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀺𑀦𑁄. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀣, 𑀭𑀓𑁆𑀔𑀣 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀣. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀫𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀺𑀦𑁄 𑀅𑀳𑀼𑀯𑀢𑁆𑀣, 𑀫𑀸 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀺𑀦𑁄. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀣, 𑀭𑀓𑁆𑀔𑀣 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀣. 𑀬𑀢𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸 𑀯𑀺𑀳𑀭𑀺𑀲𑁆𑀲𑀣, 𑀅𑀣 𑀢𑀼𑀫𑁆𑀳𑁂𑀳𑀺𑀧𑀺 𑀫𑀸𑀭𑁄 𑀧𑀸𑀧𑀺𑀫𑀸 𑀦𑀺𑀩𑁆𑀩𑀺𑀚𑁆𑀚 𑀧𑀓𑁆𑀓𑀫𑀺𑀲𑁆𑀲𑀢𑀺, 𑀑𑀢𑀸𑀭𑀁 𑀅𑀮𑀪𑀫𑀸𑀦𑁄 𑁋 𑀓𑀼𑀫𑁆𑀫𑀫𑁆𑀳𑀸𑀯 𑀲𑀺𑀗𑁆𑀕𑀸𑀮𑁄’’𑀢𑀺.

‘‘𑀓𑀼𑀫𑁆𑀫𑁄 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂,

𑀲𑀫𑁄𑀤𑀳𑀁 𑀪𑀺𑀓𑁆𑀔𑀼 𑀫𑀦𑁄𑀯𑀺𑀢𑀓𑁆𑀓𑁂;

𑀅𑀦𑀺𑀲𑁆𑀲𑀺𑀢𑁄 𑀅𑀜𑁆𑀜𑀫𑀳𑁂𑀞𑀬𑀸𑀦𑁄,

𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀽𑀧𑀯𑀤𑁂𑀬𑁆𑀬 𑀓𑀜𑁆𑀘𑀻’’𑀢𑀺. 𑀢𑀢𑀺𑀬𑀁;

𑁪. 𑀧𑀞𑀫𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀁

𑁨𑁪𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁. 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀫𑀼𑀁 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀲𑀘𑁂 𑀲𑁄, 𑀪𑀺𑀓𑁆𑀔𑀯𑁂, 𑀤𑀸𑀭𑀼𑀓𑁆𑀔𑀦𑁆𑀥𑁄 𑀦 𑀑𑀭𑀺𑀫𑀁 𑀢𑀻𑀭𑀁 𑀉𑀧𑀕𑀘𑁆𑀙𑀢𑀺, 𑀦 𑀧𑀸𑀭𑀺𑀫𑀁 𑀢𑀻𑀭𑀁 𑀉𑀧𑀕𑀘𑁆𑀙𑀢𑀺, 𑀦 𑀫𑀚𑁆𑀛𑁂 𑀲𑀁𑀲𑀻𑀤𑀺𑀲𑁆𑀲𑀢𑀺, 𑀦 𑀣𑀮𑁂 𑀉𑀲𑁆𑀲𑀻𑀤𑀺𑀲𑁆𑀲𑀢𑀺, 𑀦 𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀆𑀯𑀝𑁆𑀝𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀅𑀦𑁆𑀢𑁄𑀧𑀽𑀢𑀺 𑀪𑀯𑀺𑀲𑁆𑀲𑀢𑀺; 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀤𑀸𑀭𑀼𑀓𑁆𑀔𑀦𑁆𑀥𑁄 𑀲𑀫𑀼𑀤𑁆𑀤𑀦𑀺𑀦𑁆𑀦𑁄 𑀪𑀯𑀺𑀲𑁆𑀲𑀢𑀺 𑀲𑀫𑀼𑀤𑁆𑀤𑀧𑁄𑀡𑁄 𑀲𑀫𑀼𑀤𑁆𑀤𑀧𑀩𑁆𑀪𑀸𑀭𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀫𑀼𑀤𑁆𑀤𑀦𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂, 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁄 𑀲𑀫𑀼𑀤𑁆𑀤𑀧𑁄𑀡𑁄 𑀲𑀫𑀼𑀤𑁆𑀤𑀧𑀩𑁆𑀪𑀸𑀭𑁄.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀲𑀘𑁂 𑀢𑀼𑀫𑁆𑀳𑁂𑀧𑀺 𑀦 𑀑𑀭𑀺𑀫𑀁 𑀢𑀻𑀭𑀁 𑀉𑀧𑀕𑀘𑁆𑀙𑀣, 𑀦 𑀧𑀸𑀭𑀺𑀫𑀁 𑀢𑀻𑀭𑀁 𑀉𑀧𑀕𑀘𑁆𑀙𑀣; 𑀦 𑀫𑀚𑁆𑀛𑁂 𑀲𑀁𑀲𑀻𑀤𑀺𑀲𑁆𑀲𑀣, 𑀦 𑀣𑀮𑁂 𑀉𑀲𑁆𑀲𑀻𑀤𑀺𑀲𑁆𑀲𑀣, 𑀦 𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀆𑀯𑀝𑁆𑀝𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀅𑀦𑁆𑀢𑁄𑀧𑀽𑀢𑀻 𑀪𑀯𑀺𑀲𑁆𑀲𑀣; 𑀏𑀯𑀁 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀸 𑀪𑀯𑀺𑀲𑁆𑀲𑀣 𑀦𑀺𑀩𑁆𑀩𑀸𑀦𑀧𑁄𑀡𑀸 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀺𑀩𑁆𑀩𑀸𑀦𑀧𑁄𑀡𑀸 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀑𑀭𑀺𑀫𑀁 𑀢𑀻𑀭𑀁, 𑀓𑀺𑀁 𑀧𑀸𑀭𑀺𑀫𑀁 𑀢𑀻𑀭𑀁, 𑀓𑁄 𑀫𑀚𑁆𑀛𑁂 𑀲𑀁𑀲𑀸𑀤𑁄 [𑀲𑀁𑀲𑀻𑀤𑁄 (𑀓.), 𑀲𑀁𑀲𑀻𑀤𑀺𑀢𑁄 (𑀲𑁆𑀬𑀸. 𑀓𑀁.)], 𑀓𑁄 𑀣𑀮𑁂 𑀉𑀲𑁆𑀲𑀸𑀤𑁄, 𑀓𑁄 𑀫𑀦𑀼𑀲𑁆𑀲𑀕𑁆𑀕𑀸𑀳𑁄, 𑀓𑁄 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄, 𑀓𑁄 𑀆𑀯𑀝𑁆𑀝𑀕𑁆𑀕𑀸𑀳𑁄, 𑀓𑁄 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑁄’’𑀢𑀺?

‘‘‘𑀑𑀭𑀺𑀫𑀁 𑀢𑀻𑀭’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. ‘𑀧𑀸𑀭𑀺𑀫𑀁 𑀢𑀻𑀭’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀙𑀦𑁆𑀦𑁂𑀢𑀁 𑀩𑀸𑀳𑀺𑀭𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. ‘𑀫𑀚𑁆𑀛𑁂 𑀲𑀁𑀲𑀸𑀤𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀦𑀦𑁆𑀤𑀻𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. ‘𑀣𑀮𑁂 𑀉𑀲𑁆𑀲𑀸𑀤𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀅𑀲𑁆𑀫𑀺𑀫𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀼, 𑀫𑀦𑀼𑀲𑁆𑀲𑀕𑁆𑀕𑀸𑀳𑁄? 𑀇𑀥, 𑀪𑀺𑀓𑁆𑀔𑀼, 𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 [𑀕𑀺𑀳𑀺𑀲𑀁𑀲𑀝𑁆𑀞𑁄 (𑀓.)] 𑀯𑀺𑀳𑀭𑀢𑀺, 𑀲𑀳𑀦𑀦𑁆𑀤𑀻 𑀲𑀳𑀲𑁄𑀓𑀻, 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀢𑁂𑀲𑀼 𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼, 𑀫𑀦𑀼𑀲𑁆𑀲𑀕𑁆𑀕𑀸𑀳𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀼, 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄? 𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑁋 ‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼, 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄. ‘𑀆𑀯𑀝𑁆𑀝𑀕𑁆𑀕𑀸𑀳𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀁.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀼, 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑁄? 𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺 𑀧𑀸𑀧𑀥𑀫𑁆𑀫𑁄 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄 𑀅𑀦𑁆𑀢𑁄𑀧𑀽𑀢𑀺 𑀅𑀯𑀲𑁆𑀲𑀼𑀢𑁄 𑀓𑀲𑀫𑁆𑀩𑀼𑀚𑀸𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼, ‘𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑁄’’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑀦𑁆𑀤𑁄 𑀕𑁄𑀧𑀸𑀮𑀓𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀦𑀦𑁆𑀤𑁄 𑀕𑁄𑀧𑀸𑀮𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀦 𑀑𑀭𑀺𑀫𑀁 𑀢𑀻𑀭𑀁 𑀉𑀧𑀕𑀘𑁆𑀙𑀸𑀫𑀺, 𑀦 𑀧𑀸𑀭𑀺𑀫𑀁 𑀢𑀻𑀭𑀁 𑀉𑀧𑀕𑀘𑁆𑀙𑀸𑀫𑀺, 𑀦 𑀫𑀚𑁆𑀛𑁂 𑀲𑀁𑀲𑀻𑀤𑀺𑀲𑁆𑀲𑀸𑀫𑀺, 𑀦 𑀣𑀮𑁂 𑀉𑀲𑁆𑀲𑀻𑀤𑀺𑀲𑁆𑀲𑀸𑀫𑀺, 𑀦 𑀫𑀁 𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀆𑀯𑀝𑁆𑀝𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀺, 𑀦 𑀅𑀦𑁆𑀢𑁄𑀧𑀽𑀢𑀺 𑀪𑀯𑀺𑀲𑁆𑀲𑀸𑀫𑀺. 𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀦𑀦𑁆𑀤, 𑀲𑀸𑀫𑀺𑀓𑀸𑀦𑀁 𑀕𑀸𑀯𑁄 𑀦𑀺𑀬𑁆𑀬𑀸𑀢𑁂𑀳𑀻’’𑀢𑀺 [𑀦𑀻𑀬𑁆𑀬𑀸𑀤𑁂𑀳𑀻𑀢𑀺 (𑀲𑀻.), 𑀦𑀺𑀬𑁆𑀬𑀸𑀤𑁂𑀳𑀻𑀢𑀺 (𑀲𑁆𑀬𑀸. 𑀓𑀁. 𑀧𑀻.)]. ‘‘𑀕𑀫𑀺𑀲𑁆𑀲𑀦𑁆𑀢𑀺, 𑀪𑀦𑁆𑀢𑁂, 𑀕𑀸𑀯𑁄 𑀯𑀘𑁆𑀙𑀕𑀺𑀤𑁆𑀥𑀺𑀦𑀺𑀬𑁄’’𑀢𑀺. ‘‘𑀦𑀺𑀬𑁆𑀬𑀸𑀢𑁂𑀳𑁂𑀯 𑀢𑁆𑀯𑀁, 𑀦𑀦𑁆𑀤, 𑀲𑀸𑀫𑀺𑀓𑀸𑀦𑀁 𑀕𑀸𑀯𑁄’’𑀢𑀺. 𑀅𑀣 𑀔𑁄 𑀦𑀦𑁆𑀤𑁄 𑀕𑁄𑀧𑀸𑀮𑀓𑁄 𑀲𑀸𑀫𑀺𑀓𑀸𑀦𑀁 𑀕𑀸𑀯𑁄 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀬𑁆𑀬𑀸𑀢𑀺𑀢𑀸 [𑀦𑀺𑀬𑁆𑀬𑀸𑀢𑀸 (𑀲𑁆𑀬𑀸. 𑀓𑀁. 𑀓. 𑀲𑀻. 𑀅𑀝𑁆𑀞.)], 𑀪𑀦𑁆𑀢𑁂, 𑀲𑀸𑀫𑀺𑀓𑀸𑀦𑀁 𑀕𑀸𑀯𑁄. 𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. 𑀅𑀮𑀢𑁆𑀣 𑀔𑁄 𑀦𑀦𑁆𑀤𑁄 𑀕𑁄𑀧𑀸𑀮𑀓𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀘 𑀧𑀦𑀸𑀬𑀲𑁆𑀫𑀸 𑀦𑀦𑁆𑀤𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄…𑀧𑁂… 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀦𑀦𑁆𑀤𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀁

𑁨𑁪𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀺𑀫𑀺𑀮𑀸𑀬𑀁 [𑀓𑀺𑀫𑁆𑀩𑀺𑀮𑀸𑀬𑀁 (𑀲𑀻. 𑀧𑀻.), 𑀓𑀺𑀫𑁆𑀫𑀺𑀮𑀸𑀬𑀁 (𑀲𑁆𑀬𑀸. 𑀓𑀁.)] 𑀯𑀺𑀳𑀭𑀢𑀺 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁. 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀫𑀼𑀁 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦’’𑀦𑁆𑀢𑀺? ‘‘𑀏𑀯𑀁 𑀪𑀦𑁆𑀢𑁂’’…𑀧𑁂… 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀑𑀭𑀺𑀫𑀁 𑀢𑀻𑀭𑀁…𑀧𑁂… 𑀓𑀢𑀫𑁄 𑀘, 𑀓𑀺𑀫𑀺𑀮, 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑁄. 𑀇𑀥, 𑀓𑀺𑀫𑀺𑀮, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀁𑀓𑀺𑀮𑀺𑀝𑁆𑀞𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀬𑀣𑀸𑀭𑀽𑀧𑀸𑀬 𑀆𑀧𑀢𑁆𑀢𑀺𑀬𑀸 𑀦 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀺𑀫𑀺𑀮, 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑁄𑀢𑀺. 𑀧𑀜𑁆𑀘𑀫𑀁.

𑁬. 𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀁

𑁨𑁪𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀸𑀧𑀺𑀮𑀯𑀢𑁆𑀣𑀯𑀸𑀦𑀁 𑀲𑀓𑁆𑀬𑀸𑀦𑀁 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 [𑀲𑀦𑁆𑀥𑀸𑀕𑀸𑀭𑀁 (𑀓.)] 𑀅𑀘𑀺𑀭𑀓𑀸𑀭𑀺𑀢𑀁 𑀳𑁄𑀢𑀺 𑀅𑀦𑀚𑁆𑀛𑀸𑀯𑀼𑀝𑁆𑀞𑀁 [𑀅𑀦𑀚𑁆𑀛𑀸𑀯𑀼𑀢𑁆𑀣𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀫𑀦𑀼𑀲𑁆𑀲𑀪𑀽𑀢𑁂𑀦. 𑀅𑀣 𑀔𑁄 𑀓𑀸𑀧𑀺𑀮𑀯𑀢𑁆𑀣𑀯𑀸 𑀲𑀓𑁆𑀬𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀓𑀸𑀧𑀺𑀮𑀯𑀢𑁆𑀣𑀯𑀸 𑀲𑀓𑁆𑀬𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀓𑀸𑀧𑀺𑀮𑀯𑀢𑁆𑀣𑀯𑀸𑀦𑀁 𑀲𑀓𑁆𑀬𑀸𑀦𑀁 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀅𑀘𑀺𑀭𑀓𑀸𑀭𑀺𑀢𑀁 [𑀅𑀘𑀺𑀭𑀓𑀸𑀭𑀺𑀢𑀁 𑀳𑁄𑀢𑀺 (𑀓.)] 𑀅𑀦𑀚𑁆𑀛𑀸𑀯𑀼𑀝𑁆𑀞𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀫𑀦𑀼𑀲𑁆𑀲𑀪𑀽𑀢𑁂𑀦. 𑀢𑀁, 𑀪𑀦𑁆𑀢𑁂, 𑀪𑀕𑀯𑀸 𑀧𑀞𑀫𑀁 𑀧𑀭𑀺𑀪𑀼𑀜𑁆𑀚𑀢𑀼. 𑀪𑀕𑀯𑀢𑀸 𑀧𑀞𑀫𑀁 𑀧𑀭𑀺𑀪𑀼𑀢𑁆𑀢𑀁 𑀧𑀘𑁆𑀙𑀸 𑀓𑀸𑀧𑀺𑀮𑀯𑀢𑁆𑀣𑀯𑀸 𑀲𑀓𑁆𑀬𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺. 𑀢𑀤𑀲𑁆𑀲 𑀓𑀸𑀧𑀺𑀮𑀯𑀢𑁆𑀣𑀯𑀸𑀦𑀁 𑀲𑀓𑁆𑀬𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀓𑀸𑀧𑀺𑀮𑀯𑀢𑁆𑀣𑀯𑀸 𑀲𑀓𑁆𑀬𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀩𑁆𑀩𑀲𑀦𑁆𑀣𑀭𑀺𑀁 [𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀢𑀁 (𑀓.)] 𑀲𑀦𑁆𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀮𑀧𑁆𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀩𑁆𑀩𑀲𑀦𑁆𑀣𑀭𑀺𑀲𑀦𑁆𑀣𑀢𑀁 [𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀢𑀁 (𑀲𑀻. 𑀧𑀻. 𑀓.)], 𑀪𑀦𑁆𑀢𑁂, 𑀲𑀦𑁆𑀣𑀸𑀕𑀸𑀭𑀁, 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺, 𑀉𑀤𑀓𑀫𑀡𑀺𑀓𑁄 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀢𑁂𑀮𑀧𑁆𑀧𑀤𑀻𑀧𑁄 𑀆𑀭𑁄𑀧𑀺𑀢𑁄. 𑀬𑀲𑁆𑀲 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀲𑀦𑁆𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀚𑁆𑀛𑀺𑀫𑀁 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀲𑀦𑁆𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺 𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸. 𑀓𑀸𑀧𑀺𑀮𑀯𑀢𑁆𑀣𑀯𑀸 𑀲𑀓𑁆𑀬𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀲𑀦𑁆𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑀸 𑀦𑀺𑀲𑀻𑀤𑀺𑀁𑀲𑀼 𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸. 𑀅𑀣 𑀔𑁄 𑀪𑀕𑀯𑀸 𑀓𑀸𑀧𑀺𑀮𑀯𑀢𑁆𑀣𑀯𑁂 𑀲𑀓𑁆𑀬𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸 𑀔𑁄, 𑀕𑁄𑀢𑀫𑀸, 𑀭𑀢𑁆𑀢𑀺. 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀓𑀸𑀧𑀺𑀮𑀯𑀢𑁆𑀣𑀯𑀸 𑀲𑀓𑁆𑀬𑀸 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀓𑀸𑀧𑀺𑀮𑀯𑀢𑁆𑀣𑀯𑁂𑀲𑀼 𑀲𑀓𑁆𑀬𑁂𑀲𑀼 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀧𑀝𑀺𑀪𑀸𑀢𑀼 𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀻 𑀓𑀣𑀸. 𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺; 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺, 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 𑁋 ‘‘𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀜𑁆𑀘 𑀯𑁄, 𑀆𑀯𑀼𑀲𑁄, 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀦𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀜𑁆𑀘. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 𑁋

‘‘𑀓𑀣𑀁, 𑀆𑀯𑀼𑀲𑁄, 𑀅𑀯𑀲𑁆𑀲𑀼𑀢𑁄 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 …𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀯𑀲𑁆𑀲𑀼𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼…𑀧𑁂… 𑀅𑀯𑀲𑁆𑀲𑀼𑀢𑁄 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀅𑀯𑀲𑁆𑀲𑀼𑀢𑁄 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼. 𑀏𑀯𑀁𑀯𑀺𑀳𑀸𑀭𑀺𑀜𑁆𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺 𑀮𑀪𑀢𑁂𑀯 𑀫𑀸𑀭𑁄 𑀑𑀢𑀸𑀭𑀁, 𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁…𑀧𑁂… 𑀚𑀺𑀯𑁆𑀳𑀸𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀮𑀪𑀢𑁂𑀯 [𑀮𑀪𑁂𑀣 (𑀓.)] 𑀫𑀸𑀭𑁄 𑀑𑀢𑀸𑀭𑀁, 𑀮𑀪𑀢𑀺 [𑀮𑀪𑁂𑀣 (𑀓.)] 𑀫𑀸𑀭𑁄 𑀆𑀭𑀫𑁆𑀫𑀡𑀁…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀮𑀪𑀢𑁂𑀯 𑀫𑀸𑀭𑁄 𑀑𑀢𑀸𑀭𑀁, 𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀦𑀴𑀸𑀕𑀸𑀭𑀁 𑀯𑀸 𑀢𑀺𑀡𑀸𑀕𑀸𑀭𑀁 𑀯𑀸 𑀲𑀼𑀓𑁆𑀔𑀁 𑀓𑁄𑀮𑀸𑀧𑀁 𑀢𑁂𑀭𑁄𑀯𑀲𑁆𑀲𑀺𑀓𑀁. 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀮𑀪𑁂𑀣𑁂𑀯 [𑀮𑀪𑁂𑀣 (𑀓.)] 𑀅𑀕𑁆𑀕𑀺 𑀑𑀢𑀸𑀭𑀁, 𑀮𑀪𑁂𑀣 𑀅𑀕𑁆𑀕𑀺 𑀆𑀭𑀫𑁆𑀫𑀡𑀁; 𑀧𑀘𑁆𑀙𑀺𑀫𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬…𑀧𑁂… 𑀉𑀢𑁆𑀢𑀭𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬…𑀧𑁂… 𑀤𑀓𑁆𑀔𑀺𑀡𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬…𑀧𑁂… 𑀳𑁂𑀝𑁆𑀞𑀺𑀫𑀢𑁄 𑀘𑁂𑀧𑀺 𑀦𑀁…𑀧𑁂… 𑀉𑀧𑀭𑀺𑀫𑀢𑁄 𑀘𑁂𑀧𑀺 𑀦𑀁… 𑀬𑀢𑁄 𑀓𑀼𑀢𑁄𑀘𑀺 𑀘𑁂𑀧𑀺 𑀦𑀁 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀮𑀪𑁂𑀣𑁂𑀯 𑀅𑀕𑁆𑀕𑀺 𑀑𑀢𑀸𑀭𑀁 𑀮𑀪𑁂𑀣 𑀅𑀕𑁆𑀕𑀺 𑀆𑀭𑀫𑁆𑀫𑀡𑀁. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀏𑀯𑀁𑀯𑀺𑀳𑀸𑀭𑀺𑀁 𑀪𑀺𑀓𑁆𑀔𑀼𑀁 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀮𑀪𑀢𑁂𑀯 𑀫𑀸𑀭𑁄 𑀑𑀢𑀸𑀭𑀁, 𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁…𑀧𑁂… 𑀚𑀺𑀯𑁆𑀳𑀸𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀮𑀪𑀢𑁂𑀯 𑀫𑀸𑀭𑁄 𑀑𑀢𑀸𑀭𑀁, 𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁. 𑀏𑀯𑀁𑀯𑀺𑀳𑀸𑀭𑀺𑀜𑁆𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀭𑀽𑀧𑀸 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀭𑀽𑀧𑁂 𑀅𑀥𑀺𑀪𑁄𑀲𑀺; 𑀲𑀤𑁆𑀤𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀲𑀤𑁆𑀤𑁂 𑀅𑀥𑀺𑀪𑁄𑀲𑀺; 𑀕𑀦𑁆𑀥𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀕𑀦𑁆𑀥𑁂 𑀅𑀥𑀺𑀪𑁄𑀲𑀺; 𑀭𑀲𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀭𑀲𑁂 𑀅𑀥𑀺𑀪𑁄𑀲𑀺; 𑀨𑁄𑀝𑁆𑀞𑀩𑁆𑀩𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀨𑁄𑀝𑁆𑀞𑀩𑁆𑀩𑁂 𑀅𑀥𑀺𑀪𑁄𑀲𑀺; 𑀥𑀫𑁆𑀫𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀥𑀫𑁆𑀫𑁂 𑀅𑀥𑀺𑀪𑁄𑀲𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀭𑀽𑀧𑀸𑀥𑀺𑀪𑀽𑀢𑁄, 𑀲𑀤𑁆𑀤𑀸𑀥𑀺𑀪𑀽𑀢𑁄, 𑀕𑀦𑁆𑀥𑀸𑀥𑀺𑀪𑀽𑀢𑁄, 𑀭𑀲𑀸𑀥𑀺𑀪𑀽𑀢𑁄, 𑀨𑁄𑀝𑁆𑀞𑀩𑁆𑀩𑀸𑀥𑀺𑀪𑀽𑀢𑁄, 𑀥𑀫𑁆𑀫𑀸𑀥𑀺𑀪𑀽𑀢𑁄, 𑀅𑀥𑀺𑀪𑀽𑀢𑁄, 𑀅𑀦𑀥𑀺𑀪𑀽, [𑀅𑀦𑀥𑀺𑀪𑀽𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀅𑀥𑀺𑀪𑀁𑀲𑀼 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀯𑀲𑁆𑀲𑀼𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘𑀸𑀯𑀼𑀲𑁄, 𑀅𑀦𑀯𑀲𑁆𑀲𑀼𑀢𑁄 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀦𑀯𑀲𑁆𑀲𑀼𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼…𑀧𑁂… 𑀅𑀦𑀯𑀲𑁆𑀲𑀼𑀢𑁄 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼. 𑀏𑀯𑀁𑀯𑀺𑀳𑀸𑀭𑀺𑀜𑁆𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀦𑁂𑀯 𑀮𑀪𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁…𑀧𑁂… 𑀚𑀺𑀯𑁆𑀳𑀸𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀦𑁂𑀯 𑀮𑀪𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀽𑀝𑀸𑀕𑀸𑀭𑀁 𑀯𑀸 𑀲𑀸𑀮𑀸 𑀯𑀸 𑀩𑀳𑀮𑀫𑀢𑁆𑀢𑀺𑀓𑀸 𑀅𑀤𑁆𑀤𑀸𑀯𑀮𑁂𑀧𑀦𑀸. 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀦𑁂𑀯 𑀮𑀪𑁂𑀣 𑀅𑀕𑁆𑀕𑀺 𑀑𑀢𑀸𑀭𑀁, 𑀦 𑀮𑀪𑁂𑀣 𑀅𑀕𑁆𑀕𑀺 𑀆𑀭𑀫𑁆𑀫𑀡𑀁…𑀧𑁂… 𑀧𑀘𑁆𑀙𑀺𑀫𑀸𑀬 𑀘𑁂𑀧𑀺 𑀦𑀁… 𑀉𑀢𑁆𑀢𑀭𑀸𑀬 𑀘𑁂𑀧𑀺 𑀦𑀁… 𑀤𑀓𑁆𑀔𑀺𑀡𑀸𑀬 𑀘𑁂𑀧𑀺 𑀦𑀁… 𑀳𑁂𑀝𑁆𑀞𑀺𑀫𑀢𑁄 𑀘𑁂𑀧𑀺 𑀦𑀁… 𑀉𑀧𑀭𑀺𑀫𑀢𑁄 𑀘𑁂𑀧𑀺 𑀦𑀁… 𑀬𑀢𑁄 𑀓𑀼𑀢𑁄𑀘𑀺 𑀘𑁂𑀧𑀺 𑀦𑀁 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀦𑁂𑀯 𑀮𑀪𑁂𑀣 𑀅𑀕𑁆𑀕𑀺 𑀑𑀢𑀸𑀭𑀁, 𑀦 𑀮𑀪𑁂𑀣 𑀅𑀕𑁆𑀕𑀺 𑀆𑀭𑀫𑁆𑀫𑀡𑀁. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀏𑀯𑀁𑀯𑀺𑀳𑀸𑀭𑀺𑀁 𑀪𑀺𑀓𑁆𑀔𑀼𑀁 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀦𑁂𑀯 𑀮𑀪𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀦𑁂𑀯 𑀮𑀪𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁. 𑀏𑀯𑀁𑀯𑀺𑀳𑀸𑀭𑀻 𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀭𑀽𑀧𑁂 𑀅𑀥𑀺𑀪𑁄𑀲𑀺, 𑀦 𑀭𑀽𑀧𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀲𑀤𑁆𑀤𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀲𑀤𑁆𑀤𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀕𑀦𑁆𑀥𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀕𑀦𑁆𑀥𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀭𑀲𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀭𑀲𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀨𑁄𑀝𑁆𑀞𑀩𑁆𑀩𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀨𑁄𑀝𑁆𑀞𑀩𑁆𑀩𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀥𑀫𑁆𑀫𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀥𑀫𑁆𑀫𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀭𑀽𑀧𑀸𑀥𑀺𑀪𑀽, 𑀲𑀤𑁆𑀤𑀸𑀥𑀺𑀪𑀽, 𑀕𑀦𑁆𑀥𑀸𑀥𑀺𑀪𑀽, 𑀭𑀲𑀸𑀥𑀺𑀪𑀽, 𑀨𑁄𑀝𑁆𑀞𑀩𑁆𑀩𑀸𑀥𑀺𑀪𑀽, 𑀥𑀫𑁆𑀫𑀸𑀥𑀺𑀪𑀽, 𑀅𑀥𑀺𑀪𑀽, 𑀅𑀦𑀥𑀺𑀪𑀽𑀢𑁄 [𑀅𑀦𑀥𑀺𑀪𑀽𑀢𑁄 𑀓𑁂𑀳𑀺𑀘𑀺 𑀓𑀺𑀮𑁂𑀲𑁂𑀳𑀺 (𑀓.)], 𑀅𑀥𑀺𑀪𑁄𑀲𑀺 𑀢𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀲𑀁𑀓𑀺𑀮𑁂𑀲𑀺𑀓𑁂 𑀧𑁄𑀦𑁄𑀩𑁆𑀪𑀯𑀺𑀓𑁂 𑀲𑀤𑀭𑁂 𑀤𑀼𑀓𑁆𑀔𑀯𑀺𑀧𑀸𑀓𑁂 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑁂. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀯𑀲𑁆𑀲𑀼𑀢𑁄 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀸𑀥𑀼 𑀲𑀸𑀥𑀼, 𑀫𑁄𑀕𑁆𑀕𑀮𑁆𑀮𑀸𑀦! 𑀲𑀸𑀥𑀼 𑀔𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀽𑀦𑀁 𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀜𑁆𑀘 𑀅𑀦𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀜𑁆𑀘 𑀅𑀪𑀸𑀲𑀻’’𑀢𑀺.

𑀇𑀤𑀫𑀯𑁄𑀘 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺. 𑀙𑀝𑁆𑀞𑀁.

𑁭. 𑀤𑀼𑀓𑁆𑀔𑀥𑀫𑁆𑀫𑀲𑀼𑀢𑁆𑀢𑀁

𑁨𑁪𑁪. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑁂𑀲𑀁𑀬𑁂𑀯 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀣𑀸 𑀔𑁄 𑀧𑀦𑀲𑁆𑀲 𑀓𑀸𑀫𑀸 𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀬𑀣𑀸𑀲𑁆𑀲 𑀓𑀸𑀫𑁂 𑀧𑀲𑁆𑀲𑀢𑁄, 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀧𑀭𑀺𑀴𑀸𑀳𑁄, 𑀲𑁄 𑀦𑀸𑀦𑀼𑀲𑁂𑀢𑀺. 𑀢𑀣𑀸 𑀔𑁄 𑀧𑀦𑀲𑁆𑀲 𑀘𑀸𑀭𑁄 𑀘 𑀯𑀺𑀳𑀸𑀭𑁄 𑀘 𑀅𑀦𑀼𑀩𑀼𑀤𑁆𑀥𑁄 𑀳𑁄𑀢𑀺, 𑀬𑀣𑀸 𑀘𑀭𑀦𑁆𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀦𑀼𑀲𑁂𑀦𑁆𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑁂𑀲𑀁𑀬𑁂𑀯 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺? ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺 𑁋 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑁂𑀲𑀁𑀬𑁂𑀯 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀓𑀸𑀫𑀸 𑀤𑀺𑀝𑁆𑀞𑀸 𑀳𑁄𑀦𑁆𑀢𑀺? 𑀬𑀣𑀸𑀲𑁆𑀲 𑀓𑀸𑀫𑁂 𑀧𑀲𑁆𑀲𑀢𑁄, 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀧𑀭𑀺𑀴𑀸𑀳𑁄, 𑀲𑁄 𑀦𑀸𑀦𑀼𑀲𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑀸𑀭𑀓𑀸𑀲𑀼 𑀲𑀸𑀥𑀺𑀓𑀧𑁄𑀭𑀺𑀲𑀸 𑀧𑀼𑀡𑁆𑀡𑀸 𑀅𑀗𑁆𑀕𑀸𑀭𑀸𑀦𑀁 𑀯𑀻𑀢𑀘𑁆𑀘𑀺𑀓𑀸𑀦𑀁 𑀯𑀻𑀢𑀥𑀽𑀫𑀸𑀦𑀁. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑀝𑀺𑀓𑀽𑀮𑁄. 𑀢𑀫𑁂𑀦𑀁 𑀤𑁆𑀯𑁂 𑀩𑀮𑀯𑀦𑁆𑀢𑁄 𑀧𑀼𑀭𑀺𑀲𑀸 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸, 𑀢𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀉𑀧𑀓𑀟𑁆𑀠𑁂𑀬𑁆𑀬𑀼𑀁. 𑀲𑁄 𑀇𑀢𑀺𑀘𑀻𑀢𑀺𑀘𑁂𑀯 𑀓𑀸𑀬𑀁 𑀲𑀦𑁆𑀦𑀸𑀫𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀜𑀸𑀢 [𑀜𑀸𑀡𑀁 (𑀓.)] 𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 [𑀧𑀼𑀭𑀺𑀲𑀲𑁆𑀲 𑀳𑁄𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀧𑀼𑀭𑀺𑀲𑀲𑁆𑀲 𑀳𑁂𑀢𑀼 𑀳𑁄𑀢𑀺 (𑀓.) 𑀫. 𑀦𑀺. 𑁨.𑁪𑁫] 𑀇𑀫𑀁 𑀘𑀸𑀳𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀧𑀧𑀢𑀺𑀲𑁆𑀲𑀸𑀫𑀺, 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀺𑀲𑁆𑀲𑀸𑀫𑀺 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀬𑀣𑀸𑀲𑁆𑀲 𑀓𑀸𑀫𑁂 𑀧𑀲𑁆𑀲𑀢𑁄, 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀧𑀭𑀺𑀴𑀸𑀳𑁄, 𑀲𑁄 𑀦𑀸𑀦𑀼𑀲𑁂𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀸𑀭𑁄 𑀘 𑀯𑀺𑀳𑀸𑀭𑁄 𑀘 𑀅𑀦𑀼𑀩𑀼𑀤𑁆𑀥𑁄 𑀳𑁄𑀢𑀺, 𑀬𑀣𑀸 𑀘𑀭𑀦𑁆𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀦𑀼𑀲𑁆𑀲𑀯𑀦𑁆𑀢𑀺 [𑀦𑀸𑀦𑀼𑀲𑁂𑀦𑁆𑀢𑀺 (𑀓.)]? 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀩𑀳𑀼𑀓𑀡𑁆𑀝𑀓𑀁 𑀤𑀸𑀬𑀁 𑀧𑀯𑀺𑀲𑁂𑀬𑁆𑀬. 𑀢𑀲𑁆𑀲 𑀧𑀼𑀭𑀢𑁄𑀧𑀺 𑀓𑀡𑁆𑀝𑀓𑁄, 𑀧𑀘𑁆𑀙𑀢𑁄𑀧𑀺 𑀓𑀡𑁆𑀝𑀓𑁄, 𑀉𑀢𑁆𑀢𑀭𑀢𑁄𑀧𑀺 𑀓𑀡𑁆𑀝𑀓𑁄, 𑀤𑀓𑁆𑀔𑀺𑀡𑀢𑁄𑀧𑀺 𑀓𑀡𑁆𑀝𑀓𑁄, 𑀳𑁂𑀝𑁆𑀞𑀢𑁄𑀧𑀺 𑀓𑀡𑁆𑀝𑀓𑁄, 𑀉𑀧𑀭𑀺𑀢𑁄𑀧𑀺 𑀓𑀡𑁆𑀝𑀓𑁄. 𑀲𑁄 𑀲𑀢𑁄𑀯 𑀅𑀪𑀺𑀓𑁆𑀓𑀫𑁂𑀬𑁆𑀬, 𑀲𑀢𑁄𑀯 𑀧𑀝𑀺𑀓𑁆𑀓𑀫𑁂𑀬𑁆𑀬 𑁋 ‘𑀫𑀸 𑀫𑀁 𑀓𑀡𑁆𑀝𑀓𑁄’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀓𑀡𑁆𑀝𑀓𑁄’’𑀢𑀺. 𑀇𑀢𑀺 𑀯𑀺𑀤𑀺𑀢𑁆𑀯𑀸 [𑀓𑀡𑁆𑀟𑀓𑁄. 𑀢𑀁 𑀓𑀡𑁆𑀟𑀓𑁄𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 (𑀲𑀻.)] 𑀲𑀁𑀯𑀭𑁄 𑀘 𑀅𑀲𑀁𑀯𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀸 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑁄 𑀳𑁄𑀢𑀺.

‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀘𑀭𑀢𑁄 𑀏𑀯𑀁 𑀯𑀺𑀳𑀭𑀢𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀲𑀢𑀺𑀲𑀫𑁆𑀫𑁄𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀺𑀬𑀸, 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄. 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 [𑀤𑀺𑀯𑀲𑀲𑀦𑁆𑀢𑀢𑁆𑀢𑁂 (𑀲𑀻.)] 𑀅𑀬𑁄𑀓𑀝𑀸𑀳𑁂 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀦𑀺𑀧𑀸𑀢𑁂𑀬𑁆𑀬. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀉𑀤𑀓𑀨𑀼𑀲𑀺𑀢𑀸𑀦𑀁 𑀦𑀺𑀧𑀸𑀢𑁄, 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀘𑀭𑀢𑁄, 𑀏𑀯𑀁 𑀯𑀺𑀳𑀭𑀢𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀲𑀢𑀺𑀲𑀫𑁆𑀫𑁄𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀺𑀬𑀸, 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄. 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀸𑀭𑁄 𑀘 𑀯𑀺𑀳𑀸𑀭𑁄 𑀘 𑀅𑀦𑀼𑀩𑀼𑀤𑁆𑀥𑁄 𑀳𑁄𑀢𑀺; 𑀬𑀣𑀸 𑀘𑀭𑀦𑁆𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀦𑀼𑀲𑁆𑀲𑀯𑀦𑁆𑀢𑀺. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀏𑀯𑀁 𑀘𑀭𑀦𑁆𑀢𑀁 𑀏𑀯𑀁 𑀯𑀺𑀳𑀭𑀦𑁆𑀢𑀁 𑀭𑀸𑀚𑀸𑀦𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸, 𑀪𑁄𑀕𑁂𑀳𑀺 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀼𑀁 𑁋 ‘𑀏𑀳𑀺 [𑀏𑀯𑀁 (𑀲𑀻.)], 𑀪𑁄 𑀧𑀼𑀭𑀺𑀲, 𑀓𑀺𑀁 𑀢𑁂 𑀇𑀫𑁂 𑀓𑀸𑀲𑀸𑀯𑀸 𑀅𑀦𑀼𑀤𑀳𑀦𑁆𑀢𑀺, 𑀓𑀺𑀁 𑀫𑀼𑀡𑁆𑀟𑁄 𑀓𑀧𑀸𑀮𑀫𑀦𑀼𑀘𑀭𑀲𑀺, 𑀏𑀳𑀺 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀲𑁆𑀲𑀼, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀳𑀻’𑀢𑀺. 𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀘𑀭𑀦𑁆𑀢𑁄 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀗𑁆𑀕𑀸 𑀦𑀤𑀻 𑀧𑀸𑀘𑀻𑀦𑀦𑀺𑀦𑁆𑀦𑀸 𑀧𑀸𑀘𑀻𑀦𑀧𑁄𑀡𑀸 𑀧𑀸𑀘𑀻𑀦𑀧𑀩𑁆𑀪𑀸𑀭𑀸. 𑀅𑀣 𑀫𑀳𑀸𑀚𑀦𑀓𑀸𑀬𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑁆𑀤𑀸𑀮-𑀧𑀺𑀝𑀓𑀁 𑀆𑀤𑀸𑀬 𑁋 ‘𑀫𑀬𑀁 𑀇𑀫𑀁 𑀕𑀗𑁆𑀕𑀁 𑀦𑀤𑀺𑀁 𑀧𑀘𑁆𑀙𑀸𑀦𑀺𑀦𑁆𑀦𑀁 𑀓𑀭𑀺𑀲𑁆𑀲𑀸𑀫 𑀧𑀘𑁆𑀙𑀸𑀧𑁄𑀡𑀁 𑀧𑀘𑁆𑀙𑀸𑀧𑀩𑁆𑀪𑀸𑀭’𑀦𑁆𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀔𑁄 𑀲𑁄 𑀫𑀳𑀸𑀚𑀦𑀓𑀸𑀬𑁄 𑀕𑀗𑁆𑀕𑀁 𑀦𑀤𑀺𑀁 𑀧𑀘𑁆𑀙𑀸𑀦𑀺𑀦𑁆𑀦𑀁 𑀓𑀭𑁂𑀬𑁆𑀬 𑀧𑀘𑁆𑀙𑀸𑀧𑁄𑀡𑀁 𑀧𑀘𑁆𑀙𑀸𑀧𑀩𑁆𑀪𑀸𑀭’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀕𑀗𑁆𑀕𑀸, 𑀪𑀦𑁆𑀢𑁂, 𑀦𑀤𑀻 𑀧𑀸𑀘𑀻𑀦𑀦𑀺𑀦𑁆𑀦𑀸 𑀧𑀸𑀘𑀻𑀦𑀧𑁄𑀡𑀸 𑀧𑀸𑀘𑀻𑀦𑀧𑀩𑁆𑀪𑀸𑀭𑀸; 𑀲𑀸 𑀦 𑀲𑀼𑀓𑀭𑀸 𑀧𑀘𑁆𑀙𑀸𑀦𑀺𑀦𑁆𑀦𑀸 𑀓𑀸𑀢𑀼𑀁 𑀧𑀘𑁆𑀙𑀸𑀧𑁄𑀡𑀸 𑀧𑀘𑁆𑀙𑀸𑀧𑀩𑁆𑀪𑀸𑀭𑀸. 𑀬𑀸𑀯𑀤𑁂𑀯 𑀘 𑀧𑀦 𑀲𑁄 𑀫𑀳𑀸𑀚𑀦𑀓𑀸𑀬𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀜𑁆𑀘𑁂 𑀪𑀺𑀓𑁆𑀔𑀼𑀁 𑀏𑀯𑀁 𑀘𑀭𑀦𑁆𑀢𑀁 𑀏𑀯𑀁 𑀯𑀺𑀳𑀭𑀦𑁆𑀢𑀁 𑀭𑀸𑀚𑀸𑀦𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸 𑀪𑁄𑀕𑁂𑀳𑀺 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀼𑀁 𑁋 ‘𑀏𑀳𑀺, 𑀪𑁄 𑀧𑀼𑀭𑀺𑀲, 𑀓𑀺𑀁 𑀢𑁂 𑀇𑀫𑁂 𑀓𑀸𑀲𑀸𑀯𑀸 𑀅𑀦𑀼𑀤𑀳𑀦𑁆𑀢𑀺, 𑀓𑀺𑀁 𑀫𑀼𑀡𑁆𑀟𑁄 𑀓𑀧𑀸𑀮𑀫𑀦𑀼𑀘𑀭𑀲𑀺, 𑀏𑀳𑀺 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀲𑁆𑀲𑀼, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀳𑀻’𑀢𑀺. 𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀘𑀭𑀦𑁆𑀢𑁄 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀯𑀺𑀯𑁂𑀓𑀦𑀺𑀦𑁆𑀦𑀁 𑀯𑀺𑀯𑁂𑀓𑀧𑁄𑀡𑀁 𑀯𑀺𑀯𑁂𑀓𑀧𑀩𑁆𑀪𑀸𑀭𑀁, 𑀢𑀣𑀸 [𑀓𑀜𑁆𑀘 (𑀲𑁆𑀬𑀸. 𑀓𑀁. 𑀓.)] 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀓𑀺𑀁𑀲𑀼𑀓𑁄𑀧𑀫𑀲𑀼𑀢𑁆𑀢𑀁

𑁨𑁪𑁫. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦 [𑀧𑀜𑁆𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 (𑀲𑁆𑀬𑀸. 𑀓𑀁. 𑀓.)], 𑀬𑁂𑀦𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦, 𑀬𑁂𑀦𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦, 𑀬𑁂𑀦𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸, 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀬𑁂𑀦𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀁 𑁋 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑁄 𑀪𑀺𑀓𑁆𑀔𑀼 𑀫𑀁 𑀏𑀢𑀤𑀯𑁄𑀘 𑁋 ‘𑀬𑀢𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’𑀢𑀺. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦, 𑀬𑁂𑀦𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀁 𑁋 ‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑁄 𑀪𑀺𑀓𑁆𑀔𑀼 𑀫𑀁 𑀏𑀢𑀤𑀯𑁄𑀘 𑁋 ‘𑀬𑀢𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁…𑀧𑁂… 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’𑀢𑀺. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁 ( ) [(𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀁) (𑀓.)]. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺?

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀧𑀼𑀭𑀺𑀲𑀲𑁆𑀲 𑀓𑀺𑀁𑀲𑀼𑀓𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑁄 𑀅𑀲𑁆𑀲. 𑀲𑁄 𑀬𑁂𑀦𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀓𑀺𑀁𑀲𑀼𑀓𑀲𑁆𑀲 𑀤𑀲𑁆𑀲𑀸𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀻𑀤𑀺𑀲𑁄, 𑀪𑁄 𑀧𑀼𑀭𑀺𑀲, 𑀓𑀺𑀁𑀲𑀼𑀓𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀸𑀴𑀓𑁄 𑀔𑁄, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀺𑀁𑀲𑀼𑀓𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀛𑀸𑀫𑀔𑀸𑀡𑀽’𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀼, 𑀲𑀫𑀬𑁂𑀦 𑀢𑀸𑀤𑀺𑀲𑁄𑀯𑀲𑁆𑀲 𑀓𑀺𑀁𑀲𑀼𑀓𑁄 𑀬𑀣𑀸𑀧𑀺 [𑀬𑀣𑀸 (𑀲𑀻. 𑀲𑁆𑀬𑀸. 𑀓𑀁.) 𑀤𑀼𑀢𑀺𑀬𑀯𑀸𑀭𑀸𑀤𑀻𑀲𑀼 𑀧𑀦 ‘‘𑀬𑀣𑀸𑀧𑀺’’𑀢𑁆𑀯𑁂𑀯 𑀤𑀺𑀲𑁆𑀲𑀢𑀺] 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀲𑁆𑀲𑀦𑀁. 𑀅𑀣 𑀔𑁄, 𑀲𑁄 𑀪𑀺𑀓𑁆𑀔𑀼, 𑀧𑀼𑀭𑀺𑀲𑁄 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦, 𑀬𑁂𑀦𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀓𑀺𑀁𑀲𑀼𑀓𑀲𑁆𑀲 𑀤𑀲𑁆𑀲𑀸𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀻𑀤𑀺𑀲𑁄, 𑀪𑁄 𑀧𑀼𑀭𑀺𑀲, 𑀓𑀺𑀁𑀲𑀼𑀓𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀮𑁄𑀳𑀺𑀢𑀓𑁄 𑀔𑁄, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀺𑀁𑀲𑀼𑀓𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀁𑀲𑀧𑁂𑀲𑀻’𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀼, 𑀲𑀫𑀬𑁂𑀦 𑀢𑀸𑀤𑀺𑀲𑁄𑀯𑀲𑁆𑀲 𑀓𑀺𑀁𑀲𑀼𑀓𑁄 𑀬𑀣𑀸𑀧𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀲𑁆𑀲𑀦𑀁. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀧𑀼𑀭𑀺𑀲𑁄 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦, 𑀬𑁂𑀦𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀓𑀺𑀁𑀲𑀼𑀓𑀲𑁆𑀲 𑀤𑀲𑁆𑀲𑀸𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀻𑀤𑀺𑀲𑁄, 𑀪𑁄 𑀧𑀼𑀭𑀺𑀲, 𑀓𑀺𑀁𑀲𑀼𑀓𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀑𑀘𑀻𑀭𑀓𑀚𑀸𑀢𑁄 [𑀑𑀚𑀻𑀭𑀓𑀚𑀸𑀢𑁄 (𑀲𑀻.), 𑀑𑀤𑀻𑀭𑀓𑀚𑀸𑀢𑁄 (𑀧𑀻.)] 𑀔𑁄, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀺𑀁𑀲𑀼𑀓𑁄 𑀆𑀤𑀺𑀦𑁆𑀦𑀲𑀺𑀧𑀸𑀝𑀺𑀓𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀲𑀺𑀭𑀻𑀲𑁄’𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀼, 𑀲𑀫𑀬𑁂𑀦 𑀢𑀸𑀤𑀺𑀲𑁄𑀯𑀲𑁆𑀲 𑀓𑀺𑀁𑀲𑀼𑀓𑁄, 𑀬𑀣𑀸𑀧𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀲𑁆𑀲𑀦𑀁. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀧𑀼𑀭𑀺𑀲𑁄 𑀅𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦, 𑀬𑁂𑀦𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀓𑀺𑀁𑀲𑀼𑀓𑀲𑁆𑀲 𑀤𑀲𑁆𑀲𑀸𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀻𑀤𑀺𑀲𑁄, 𑀪𑁄 𑀧𑀼𑀭𑀺𑀲, 𑀓𑀺𑀁𑀲𑀼𑀓𑁄’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀩𑀳𑀮𑀧𑀢𑁆𑀢𑀧𑀮𑀸𑀲𑁄 𑀲𑀦𑁆𑀤𑀘𑁆𑀙𑀸𑀬𑁄 [𑀲𑀡𑁆𑀟𑀘𑁆𑀙𑀸𑀬𑁄 (𑀲𑁆𑀬𑀸. 𑀓𑀁.)] 𑀔𑁄, 𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀺𑀁𑀲𑀼𑀓𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀺𑀕𑁆𑀭𑁄𑀥𑁄’𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀼, 𑀲𑀫𑀬𑁂𑀦 𑀢𑀸𑀤𑀺𑀲𑁄𑀯𑀲𑁆𑀲 𑀓𑀺𑀁𑀲𑀼𑀓𑁄, 𑀬𑀣𑀸𑀧𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀲𑁆𑀲𑀦𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀼, 𑀬𑀣𑀸 𑀬𑀣𑀸 𑀅𑀥𑀺𑀫𑀼𑀢𑁆𑀢𑀸𑀦𑀁 𑀢𑁂𑀲𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀺, 𑀢𑀣𑀸 𑀢𑀣𑀸 𑀔𑁄 𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀩𑁆𑀬𑀸𑀓𑀢𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀤𑀴𑁆𑀳𑀼𑀤𑁆𑀥𑀸𑀧𑀁 [𑀤𑀴𑁆𑀳𑀼𑀤𑁆𑀤𑀸𑀧𑀁 (𑀲𑀻. 𑀧𑀻.)] 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀁 𑀙𑀤𑁆𑀯𑀸𑀭𑀁. 𑀢𑀢𑁆𑀭𑀲𑁆𑀲 𑀤𑁄𑀯𑀸𑀭𑀺𑀓𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻, 𑀅𑀜𑁆𑀜𑀸𑀢𑀸𑀦𑀁 𑀦𑀺𑀯𑀸𑀭𑁂𑀢𑀸, 𑀜𑀸𑀢𑀸𑀦𑀁 𑀧𑀯𑁂𑀲𑁂𑀢𑀸. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀲𑀻𑀖𑀁 𑀤𑀽𑀢𑀬𑀼𑀕𑀁 𑀢𑀁 𑀤𑁄𑀯𑀸𑀭𑀺𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀳𑀁, 𑀪𑁄 𑀧𑀼𑀭𑀺𑀲, 𑀇𑀫𑀲𑁆𑀲 𑀦𑀕𑀭𑀲𑁆𑀲 𑀦𑀕𑀭𑀲𑁆𑀲𑀸𑀫𑀻’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀏𑀲𑁄, 𑀪𑀦𑁆𑀢𑁂, 𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑁄’𑀢𑀺. 𑀅𑀣 𑀔𑁄 𑀢𑀁 𑀲𑀻𑀖𑀁 𑀤𑀽𑀢𑀬𑀼𑀕𑀁 𑀦𑀕𑀭𑀲𑁆𑀲𑀸𑀫𑀺𑀓𑀲𑁆𑀲 𑀬𑀣𑀸𑀪𑀽𑀢𑀁 𑀯𑀘𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀬𑀣𑀸𑀕𑀢𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀲𑀻𑀖𑀁 𑀤𑀽𑀢𑀬𑀼𑀕𑀁…𑀧𑁂… 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬… 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀲𑀻𑀖𑀁 𑀤𑀽𑀢𑀬𑀼𑀕𑀁 𑀢𑀁 𑀤𑁄𑀯𑀸𑀭𑀺𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀳𑀁, 𑀪𑁄 𑀧𑀼𑀭𑀺𑀲, 𑀇𑀫𑀲𑁆𑀲 𑀦𑀕𑀭𑀲𑁆𑀲𑀸𑀫𑀻’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀏𑀲𑁄, 𑀪𑀦𑁆𑀢𑁂, 𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑁄’𑀢𑀺. 𑀅𑀣 𑀔𑁄 𑀢𑀁 𑀲𑀻𑀖𑀁 𑀤𑀽𑀢𑀬𑀼𑀕𑀁 𑀦𑀕𑀭𑀲𑁆𑀲𑀸𑀫𑀺𑀓𑀲𑁆𑀲 𑀬𑀣𑀸𑀪𑀽𑀢𑀁 𑀯𑀘𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀬𑀣𑀸𑀕𑀢𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬.

‘‘𑀉𑀧𑀫𑀸 𑀔𑁄 𑀫𑁆𑀬𑀸𑀬𑀁, 𑀪𑀺𑀓𑁆𑀔𑀼, 𑀓𑀢𑀸 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬. 𑀅𑀬𑀜𑁆𑀘𑁂𑀢𑁆𑀣 𑀅𑀢𑁆𑀣𑁄 𑁋 ‘𑀦𑀕𑀭’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀇𑀫𑀲𑁆𑀲𑁂𑀢𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀥𑀺𑀯𑀘𑀦𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲. ‘𑀙 𑀤𑁆𑀯𑀸𑀭𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. ‘𑀤𑁄𑀯𑀸𑀭𑀺𑀓𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. ‘𑀲𑀻𑀖𑀁 𑀤𑀽𑀢𑀬𑀼𑀕’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑁂𑀢𑀁 𑀅𑀥𑀺𑀯𑀘𑀦𑀁. ‘𑀦𑀕𑀭𑀲𑁆𑀲𑀸𑀫𑀻’𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀺𑀜𑁆𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. ‘𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀘𑀢𑀼𑀦𑁆𑀦𑁂𑀢𑀁 𑀫𑀳𑀸𑀪𑀽𑀢𑀸𑀦𑀁 𑀅𑀥𑀺𑀯𑀘𑀦𑀁 𑁋 𑀧𑀣𑀯𑀻𑀥𑀸𑀢𑀼𑀬𑀸, 𑀆𑀧𑁄𑀥𑀸𑀢𑀼𑀬𑀸, 𑀢𑁂𑀚𑁄𑀥𑀸𑀢𑀼𑀬𑀸, 𑀯𑀸𑀬𑁄𑀥𑀸𑀢𑀼𑀬𑀸. ‘𑀬𑀣𑀸𑀪𑀽𑀢𑀁 𑀯𑀘𑀦’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. ‘𑀬𑀣𑀸𑀕𑀢𑀫𑀕𑁆𑀕𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀅𑀭𑀺𑀬𑀲𑁆𑀲𑁂𑀢𑀁 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀯𑀘𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀯𑀻𑀡𑁄𑀧𑀫𑀲𑀼𑀢𑁆𑀢𑀁

𑁨𑁪𑁬. ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀉𑀧𑁆𑀧𑀚𑁆𑀚𑁂𑀬𑁆𑀬 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀫𑁄𑀳𑁄 𑀯𑀸 𑀧𑀝𑀺𑀖𑀁 𑀯𑀸𑀧𑀺 [𑀧𑀝𑀺𑀖𑀁 𑀯𑀸 (𑀲𑀻.)] 𑀘𑁂𑀢𑀲𑁄, 𑀢𑀢𑁄 𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀬𑁆𑀬. 𑀲𑀪𑀬𑁄 𑀘𑁂𑀲𑁄 𑀫𑀕𑁆𑀕𑁄 𑀲𑀧𑁆𑀧𑀝𑀺𑀪𑀬𑁄 𑀘 𑀲𑀓𑀡𑁆𑀝𑀓𑁄 𑀘 𑀲𑀕𑀳𑀦𑁄 𑀘 𑀉𑀫𑁆𑀫𑀕𑁆𑀕𑁄 𑀘 𑀓𑀼𑀫𑁆𑀫𑀕𑁆𑀕𑁄 𑀘 𑀤𑀼𑀳𑀺𑀢𑀺𑀓𑁄 𑀘. 𑀅𑀲𑀧𑁆𑀧𑀼𑀭𑀺𑀲𑀲𑁂𑀯𑀺𑀢𑁄 𑀘𑁂𑀲𑁄 𑀫𑀕𑁆𑀕𑁄, 𑀦 𑀘𑁂𑀲𑁄 𑀫𑀕𑁆𑀕𑁄 𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑁄. 𑀦 𑀢𑁆𑀯𑀁 𑀏𑀢𑀁 𑀅𑀭𑀳𑀲𑀻𑀢𑀺. 𑀢𑀢𑁄 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀭𑀽𑀧𑁂𑀳𑀺…𑀧𑁂… 𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀉𑀧𑁆𑀧𑀚𑁆𑀚𑁂𑀬𑁆𑀬 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀫𑁄𑀳𑁄 𑀯𑀸 𑀧𑀝𑀺𑀖𑀁 𑀯𑀸𑀧𑀺 𑀘𑁂𑀢𑀲𑁄 𑀢𑀢𑁄 𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀬𑁆𑀬. 𑀲𑀪𑀬𑁄 𑀘𑁂𑀲𑁄 𑀫𑀕𑁆𑀕𑁄 𑀲𑀧𑁆𑀧𑀝𑀺𑀪𑀬𑁄 𑀘 𑀲𑀓𑀡𑁆𑀝𑀓𑁄 𑀘 𑀲𑀕𑀳𑀦𑁄 𑀘 𑀉𑀫𑁆𑀫𑀕𑁆𑀕𑁄 𑀘 𑀓𑀼𑀫𑁆𑀫𑀕𑁆𑀕𑁄 𑀘 𑀤𑀼𑀳𑀺𑀢𑀺𑀓𑁄 𑀘. 𑀅𑀲𑀧𑁆𑀧𑀼𑀭𑀺𑀲𑀲𑁂𑀯𑀺𑀢𑁄 𑀘𑁂𑀲𑁄 𑀫𑀕𑁆𑀕𑁄, 𑀦 𑀘𑁂𑀲𑁄 𑀫𑀕𑁆𑀕𑁄 𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑁄. 𑀦 𑀢𑁆𑀯𑀁 𑀏𑀢𑀁 𑀅𑀭𑀳𑀲𑀻𑀢𑀺. 𑀢𑀢𑁄 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀥𑀫𑁆𑀫𑁂𑀳𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀺𑀝𑁆𑀞𑀁 𑀲𑀫𑁆𑀧𑀦𑁆𑀦𑀁. 𑀓𑀺𑀝𑁆𑀞𑀸𑀭𑀓𑁆𑀔𑁄 [𑀓𑀺𑀝𑁆𑀞𑀸𑀭𑀓𑁆𑀔𑀓𑁄 (𑀲𑀻.)] 𑀘 𑀧𑀫𑀢𑁆𑀢𑁄, 𑀕𑁄𑀡𑁄 𑀘 𑀓𑀺𑀝𑁆𑀞𑀸𑀤𑁄 𑀅𑀤𑀼𑀁 𑀓𑀺𑀝𑁆𑀞𑀁 𑀑𑀢𑀭𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀫𑀤𑀁 𑀆𑀧𑀚𑁆𑀚𑁂𑀬𑁆𑀬 𑀧𑀫𑀸𑀤𑀁 𑀆𑀧𑀚𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀅𑀲𑀁𑀯𑀼𑀢𑀓𑀸𑀭𑀻 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀬𑀸𑀯𑀤𑀢𑁆𑀣𑀁 𑀫𑀤𑀁 𑀆𑀧𑀚𑁆𑀚𑀢𑀺 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀺𑀝𑁆𑀞𑀁 𑀲𑀫𑁆𑀧𑀦𑁆𑀦𑀁 𑀓𑀺𑀝𑁆𑀞𑀸𑀭𑀓𑁆𑀔𑁄 𑀘 𑀅𑀧𑁆𑀧𑀫𑀢𑁆𑀢𑁄 𑀕𑁄𑀡𑁄 𑀘 𑀓𑀺𑀝𑁆𑀞𑀸𑀤𑁄 𑀅𑀤𑀼𑀁 𑀓𑀺𑀝𑁆𑀞𑀁 𑀑𑀢𑀭𑁂𑀬𑁆𑀬. 𑀢𑀫𑁂𑀦𑀁 𑀓𑀺𑀝𑁆𑀞𑀸𑀭𑀓𑁆𑀔𑁄 𑀦𑀸𑀲𑀸𑀬𑀁 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑁂𑀬𑁆𑀬. 𑀦𑀸𑀲𑀸𑀬𑀁 𑀲𑀼𑀕𑁆𑀕𑀳𑀺𑀢𑀁 𑀕𑀳𑁂𑀢𑁆𑀯𑀸 𑀉𑀧𑀭𑀺𑀖𑀝𑀸𑀬𑀁 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀉𑀧𑀭𑀺𑀖𑀝𑀸𑀬𑀁 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀤𑀡𑁆𑀟𑁂𑀦 𑀲𑀼𑀢𑀸𑀴𑀺𑀢𑀁 𑀢𑀸𑀴𑁂𑀬𑁆𑀬. 𑀤𑀡𑁆𑀟𑁂𑀦 𑀲𑀼𑀢𑀸𑀴𑀺𑀢𑀁 𑀢𑀸𑀴𑁂𑀢𑁆𑀯𑀸 𑀑𑀲𑀚𑁆𑀚𑁂𑀬𑁆𑀬. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂 …𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀕𑁄𑀡𑁄 𑀓𑀺𑀝𑁆𑀞𑀸𑀤𑁄 𑀅𑀤𑀼𑀁 𑀓𑀺𑀝𑁆𑀞𑀁 𑀑𑀢𑀭𑁂𑀬𑁆𑀬. 𑀢𑀫𑁂𑀦𑀁 𑀓𑀺𑀝𑁆𑀞𑀸𑀭𑀓𑁆𑀔𑁄 𑀦𑀸𑀲𑀸𑀬𑀁 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑁂𑀬𑁆𑀬. 𑀦𑀸𑀲𑀸𑀬𑀁 𑀲𑀼𑀕𑁆𑀕𑀳𑀺𑀢𑀁 𑀕𑀳𑁂𑀢𑁆𑀯𑀸 𑀉𑀧𑀭𑀺𑀖𑀝𑀸𑀬𑀁 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀉𑀧𑀭𑀺𑀖𑀝𑀸𑀬𑀁 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀤𑀡𑁆𑀟𑁂𑀦 𑀲𑀼𑀢𑀸𑀴𑀺𑀢𑀁 𑀢𑀸𑀴𑁂𑀬𑁆𑀬. 𑀤𑀡𑁆𑀟𑁂𑀦 𑀲𑀼𑀢𑀸𑀴𑀺𑀢𑀁 𑀢𑀸𑀴𑁂𑀢𑁆𑀯𑀸 𑀑𑀲𑀚𑁆𑀚𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀕𑁄𑀡𑁄 𑀓𑀺𑀝𑁆𑀞𑀸𑀤𑁄 𑀕𑀸𑀫𑀕𑀢𑁄 𑀯𑀸 𑀅𑀭𑀜𑁆𑀜𑀕𑀢𑁄 𑀯𑀸, 𑀞𑀸𑀦𑀩𑀳𑀼𑀮𑁄 𑀯𑀸 𑀅𑀲𑁆𑀲 𑀦𑀺𑀲𑀚𑁆𑀚𑀩𑀳𑀼𑀮𑁄 𑀯𑀸 𑀦 𑀢𑀁 𑀓𑀺𑀝𑁆𑀞𑀁 𑀧𑀼𑀦 𑀑𑀢𑀭𑁂𑀬𑁆𑀬 𑁋 𑀢𑀫𑁂𑀯 𑀧𑀼𑀭𑀺𑀫𑀁 𑀤𑀡𑁆𑀟𑀲𑀫𑁆𑀨𑀲𑁆𑀲𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑁄. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀢𑁄 𑀔𑁄 𑀪𑀺𑀓𑁆𑀔𑀼𑀦𑁄 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀘𑀺𑀢𑁆𑀢𑀁 𑀉𑀤𑀼𑀚𑀺𑀢𑀁 𑀳𑁄𑀢𑀺 𑀲𑀼𑀤𑀼𑀚𑀺𑀢𑀁, 𑀅𑀚𑁆𑀛𑀢𑁆𑀢𑀫𑁂𑀯 𑀲𑀦𑁆𑀢𑀺𑀝𑁆𑀞𑀢𑀺, 𑀲𑀦𑁆𑀦𑀺𑀲𑀻𑀤𑀢𑀺, 𑀏𑀓𑁄𑀤𑀺 𑀳𑁄𑀢𑀺, 𑀲𑀫𑀸𑀥𑀺𑀬𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀯𑀻𑀡𑀸𑀬 𑀲𑀤𑁆𑀤𑁄 𑀅𑀲𑁆𑀲𑀼𑀢𑀧𑀼𑀩𑁆𑀩𑁄 𑀅𑀲𑁆𑀲. 𑀲𑁄 𑀯𑀻𑀡𑀸𑀲𑀤𑁆𑀤𑀁 𑀲𑀼𑀡𑁂𑀬𑁆𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀫𑁆𑀪𑁄, 𑀓𑀲𑁆𑀲 [𑀓𑀺𑀲𑁆𑀲 (𑀲𑀻. 𑀧𑀻.)] 𑀦𑀼 𑀔𑁄 𑀏𑀲𑁄 𑀲𑀤𑁆𑀤𑁄 𑀏𑀯𑀁𑀭𑀚𑀦𑀻𑀬𑁄 𑀏𑀯𑀁𑀓𑀫𑀦𑀻𑀬𑁄 𑀏𑀯𑀁𑀫𑀤𑀦𑀻𑀬𑁄 𑀏𑀯𑀁𑀫𑀼𑀘𑁆𑀙𑀦𑀻𑀬𑁄 𑀏𑀯𑀁𑀩𑀦𑁆𑀥𑀦𑀻𑀬𑁄’𑀢𑀺? 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀏𑀲𑀸, 𑀔𑁄, 𑀪𑀦𑁆𑀢𑁂, 𑀯𑀻𑀡𑀸 𑀦𑀸𑀫, 𑀬𑀲𑁆𑀲𑀸 𑀏𑀲𑁄 𑀲𑀤𑁆𑀤𑁄 𑀏𑀯𑀁𑀭𑀚𑀦𑀻𑀬𑁄 𑀏𑀯𑀁𑀓𑀫𑀦𑀻𑀬𑁄 𑀏𑀯𑀁𑀫𑀤𑀦𑀻𑀬𑁄 𑀏𑀯𑀁𑀫𑀼𑀘𑁆𑀙𑀦𑀻𑀬𑁄 𑀏𑀯𑀁𑀩𑀦𑁆𑀥𑀦𑀻𑀬𑁄’𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀕𑀘𑁆𑀙𑀣 𑀫𑁂, 𑀪𑁄, 𑀢𑀁 𑀯𑀻𑀡𑀁 𑀆𑀳𑀭𑀣𑀸’𑀢𑀺. 𑀢𑀲𑁆𑀲 𑀢𑀁 𑀯𑀻𑀡𑀁 𑀆𑀳𑀭𑁂𑀬𑁆𑀬𑀼𑀁. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀬𑀁 𑀔𑁄 𑀲𑀸, 𑀪𑀦𑁆𑀢𑁂, 𑀯𑀻𑀡𑀸 𑀬𑀲𑁆𑀲𑀸 𑀏𑀲𑁄 𑀲𑀤𑁆𑀤𑁄 𑀏𑀯𑀁𑀭𑀚𑀦𑀻𑀬𑁄 𑀏𑀯𑀁𑀓𑀫𑀦𑀻𑀬𑁄 𑀏𑀯𑀁𑀫𑀤𑀦𑀻𑀬𑁄 𑀏𑀯𑀁𑀫𑀼𑀘𑁆𑀙𑀦𑀻𑀬𑁄 𑀏𑀯𑀁𑀩𑀦𑁆𑀥𑀦𑀻𑀬𑁄’𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀮𑀁 𑀫𑁂, 𑀪𑁄, 𑀢𑀸𑀬 𑀯𑀻𑀡𑀸𑀬, 𑀢𑀫𑁂𑀯 𑀫𑁂 𑀲𑀤𑁆𑀤𑀁 𑀆𑀳𑀭𑀣𑀸’𑀢𑀺. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀬𑀁 𑀔𑁄, 𑀪𑀦𑁆𑀢𑁂, 𑀯𑀻𑀡𑀸 𑀦𑀸𑀫 𑀅𑀦𑁂𑀓𑀲𑀫𑁆𑀪𑀸𑀭𑀸 𑀫𑀳𑀸𑀲𑀫𑁆𑀪𑀸𑀭𑀸. 𑀅𑀦𑁂𑀓𑁂𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀫𑀸𑀭𑀤𑁆𑀥𑀸 𑀯𑀤𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑁄𑀡𑀺𑀜𑁆𑀘 𑀧𑀝𑀺𑀘𑁆𑀘 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘 𑀤𑀡𑁆𑀟𑀜𑁆𑀘 𑀧𑀝𑀺𑀘𑁆𑀘 𑀉𑀧𑀥𑀸𑀭𑀡𑁂 𑀘 𑀧𑀝𑀺𑀘𑁆𑀘 𑀢𑀦𑁆𑀢𑀺𑀬𑁄 𑀘 𑀧𑀝𑀺𑀘𑁆𑀘 𑀓𑁄𑀡𑀜𑁆𑀘 𑀧𑀝𑀺𑀘𑁆𑀘 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘 𑀏𑀯𑀸𑀬𑀁, 𑀪𑀦𑁆𑀢𑁂, 𑀯𑀻𑀡𑀸 𑀦𑀸𑀫 𑀅𑀦𑁂𑀓𑀲𑀫𑁆𑀪𑀸𑀭𑀸 𑀫𑀳𑀸𑀲𑀫𑁆𑀪𑀸𑀭𑀸. 𑀅𑀦𑁂𑀓𑁂𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀫𑀸𑀭𑀤𑁆𑀥𑀸 𑀯𑀤𑀢𑀻’𑀢𑀺. 𑀲𑁄 𑀢𑀁 𑀯𑀻𑀡𑀁 𑀤𑀲𑀥𑀸 𑀯𑀸 𑀲𑀢𑀥𑀸 𑀯𑀸 𑀨𑀸𑀮𑁂𑀬𑁆𑀬, 𑀤𑀲𑀥𑀸 𑀯𑀸 𑀲𑀢𑀥𑀸 𑀯𑀸 𑀢𑀁 𑀨𑀸𑀮𑁂𑀢𑁆𑀯𑀸 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑁂𑀬𑁆𑀬. 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑀺𑀢𑁆𑀯𑀸 𑀅𑀕𑁆𑀕𑀺𑀦𑀸 𑀟𑀳𑁂𑀬𑁆𑀬, 𑀅𑀕𑁆𑀕𑀺𑀦𑀸 𑀟𑀳𑀺𑀢𑁆𑀯𑀸 𑀫𑀲𑀺𑀁 𑀓𑀭𑁂𑀬𑁆𑀬. 𑀫𑀲𑀺𑀁 𑀓𑀭𑀺𑀢𑁆𑀯𑀸 𑀫𑀳𑀸𑀯𑀸𑀢𑁂 𑀯𑀸 𑀑𑀨𑀼𑀦𑁂𑀬𑁆𑀬 [𑀑𑀧𑀼𑀦𑁂𑀬𑁆𑀬 (𑀲𑀻. 𑀧𑀻.), 𑀑𑀨𑀼𑀡𑁂𑀬𑁆𑀬 (?)], 𑀦𑀤𑀺𑀬𑀸 𑀯𑀸 𑀲𑀻𑀖𑀲𑁄𑀢𑀸𑀬 𑀧𑀯𑀸𑀳𑁂𑀬𑁆𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀲𑀢𑀻 𑀓𑀺𑀭𑀸𑀬𑀁, 𑀪𑁄, 𑀯𑀻𑀡𑀸 𑀦𑀸𑀫, 𑀬𑀣𑁂𑀯𑀁 𑀬𑀁 [𑀬𑀣𑁂𑀯𑀸𑀬𑀁 (𑀲𑀻.), 𑀬𑀣𑁂𑀯𑀬𑀁 (𑀧𑀻.)] 𑀓𑀺𑀜𑁆𑀘𑀺 𑀯𑀻𑀡𑀸 𑀦𑀸𑀫 𑀏𑀢𑁆𑀣 𑀘 𑀧𑀦𑀸𑀬𑀁 𑀚𑀦𑁄 [𑀏𑀢𑁆𑀣 𑀧𑀦𑀸𑀬𑀁 𑀚𑀦𑁄 (𑀲𑁆𑀬𑀸. 𑀓𑀁.), 𑀏𑀢𑁆𑀣 𑀘 𑀫𑀳𑀸𑀚𑀦𑁄 (𑀧𑀻. 𑀓.)] 𑀅𑀢𑀺𑀯𑁂𑀮𑀁 𑀧𑀫𑀢𑁆𑀢𑁄 𑀧𑀮𑀴𑀺𑀢𑁄’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀁 𑀲𑀫𑀦𑁆𑀯𑁂𑀲𑀢𑀺 [𑀲𑀫𑀦𑁆𑀦𑁂𑀲𑀢𑀺 (𑀲𑀻. 𑀲𑁆𑀬𑀸. 𑀓𑀁.), 𑀲𑀫𑀦𑁂𑀲𑀢𑀺 (𑀧𑀻.)] 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀕𑀢𑀺, 𑀯𑁂𑀤𑀦𑀁 𑀲𑀫𑀦𑁆𑀯𑁂𑀲𑀢𑀺 𑀬𑀸𑀯𑀢𑀸 𑀯𑁂𑀤𑀦𑀸𑀬 𑀕𑀢𑀺, 𑀲𑀜𑁆𑀜𑀁 𑀲𑀫𑀦𑁆𑀯𑁂𑀲𑀢𑀺 𑀬𑀸𑀯𑀢𑀸 𑀲𑀜𑁆𑀜𑀸𑀬 𑀕𑀢𑀺, 𑀲𑀗𑁆𑀔𑀸𑀭𑁂 𑀲𑀫𑀦𑁆𑀯𑁂𑀲𑀢𑀺 𑀬𑀸𑀯𑀢𑀸 𑀲𑀗𑁆𑀔𑀸𑀭𑀸𑀦𑀁 𑀕𑀢𑀺, 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀢𑀺 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀕𑀢𑀺. 𑀢𑀲𑁆𑀲 𑀭𑀽𑀧𑀁 𑀲𑀫𑀦𑁆𑀯𑁂𑀲𑀢𑁄 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀕𑀢𑀺, 𑀯𑁂𑀤𑀦𑀁 𑀲𑀫𑀦𑁆𑀯𑁂𑀲𑀢𑁄…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀢𑁄 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀕𑀢𑀺. 𑀬𑀫𑁆𑀧𑀺𑀲𑁆𑀲 𑀢𑀁 𑀳𑁄𑀢𑀺 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀅𑀲𑁆𑀫𑀻𑀢𑀺 𑀯𑀸 𑀢𑀫𑁆𑀧𑀺 𑀢𑀲𑁆𑀲 𑀦 𑀳𑁄𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀙𑀧𑁆𑀧𑀸𑀡𑀓𑁄𑀧𑀫𑀲𑀼𑀢𑁆𑀢𑀁

𑁨𑁪𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀭𑀼𑀕𑀢𑁆𑀢𑁄 𑀧𑀓𑁆𑀓𑀕𑀢𑁆𑀢𑁄 𑀲𑀭𑀯𑀦𑀁 𑀧𑀯𑀺𑀲𑁂𑀬𑁆𑀬. 𑀢𑀲𑁆𑀲 𑀓𑀼𑀲𑀓𑀡𑁆𑀝𑀓𑀸 𑀘𑁂𑀯 𑀧𑀸𑀤𑁂 𑀯𑀺𑀚𑁆𑀛𑁂𑀬𑁆𑀬𑀼𑀁, 𑀲𑀭𑀧𑀢𑁆𑀢𑀸𑀦𑀺 𑀘 𑀕𑀢𑁆𑀢𑀸𑀦𑀺 [𑀲𑀭𑀧𑀢𑁆𑀢𑀸𑀦𑀺 𑀧𑀓𑁆𑀓𑀕𑀢𑁆𑀢𑀸𑀦𑀺 (𑀲𑁆𑀬𑀸. 𑀓𑀁.), 𑀅𑀭𑀼𑀧𑀓𑁆𑀓𑀸𑀦𑀺 𑀕𑀢𑁆𑀢𑀸𑀦𑀺 (𑀧𑀻. 𑀓.)] 𑀯𑀺𑀮𑁂𑀔𑁂𑀬𑁆𑀬𑀼𑀁. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀕𑀸𑀫𑀕𑀢𑁄 𑀯𑀸 𑀅𑀭𑀜𑁆𑀜𑀕𑀢𑁄 𑀯𑀸 𑀮𑀪𑀢𑀺 𑀯𑀢𑁆𑀢𑀸𑀭𑀁 𑁋 ‘𑀅𑀬𑀜𑁆𑀘 𑀲𑁄 [𑀅𑀬𑀜𑁆𑀘 𑀔𑁄 (𑀧𑀻. 𑀓.), 𑀅𑀬𑀁 𑀲𑁄 (?)] 𑀆𑀬𑀲𑁆𑀫𑀸 𑀏𑀯𑀁𑀓𑀸𑀭𑀻 𑀏𑀯𑀁𑀲𑀫𑀸𑀘𑀸𑀭𑁄 𑀅𑀲𑀼𑀘𑀺𑀕𑀸𑀫𑀓𑀡𑁆𑀝𑀓𑁄’𑀢𑀺. 𑀢𑀁 𑀓𑀡𑁆𑀝𑀓𑁄𑀢𑀺 [𑀢𑀁 ‘‘𑀅𑀲𑀼𑀘𑀺𑀕𑀸𑀫𑀓𑀡𑁆𑀟𑀢𑁄’’𑀢𑀺 (𑀓.)] 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀲𑀁𑀯𑀭𑁄 𑀘 𑀅𑀲𑀁𑀯𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀙𑀧𑁆𑀧𑀸𑀡𑀓𑁂 𑀕𑀳𑁂𑀢𑁆𑀯𑀸 𑀦𑀸𑀦𑀸𑀯𑀺𑀲𑀬𑁂 𑀦𑀸𑀦𑀸𑀕𑁄𑀘𑀭𑁂 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀅𑀳𑀺𑀁 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀲𑀼𑀲𑀼𑀫𑀸𑀭𑀁 [𑀲𑀼𑀁𑀲𑀼𑀫𑀸𑀭𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀧𑀓𑁆𑀔𑀺𑀁 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀓𑀼𑀓𑁆𑀓𑀼𑀭𑀁 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀲𑀺𑀗𑁆𑀕𑀸𑀮𑀁 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀫𑀓𑁆𑀓𑀝𑀁 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀫𑀚𑁆𑀛𑁂 𑀕𑀡𑁆𑀞𑀺𑀁 𑀓𑀭𑀺𑀢𑁆𑀯𑀸 𑀑𑀲𑁆𑀲𑀚𑁆𑀚𑁂𑀬𑁆𑀬. 𑀅𑀣 𑀔𑁄, 𑀢𑁂, 𑀪𑀺𑀓𑁆𑀔𑀯𑁂, 𑀙𑀧𑁆𑀧𑀸𑀡𑀓𑀸 𑀦𑀸𑀦𑀸𑀯𑀺𑀲𑀬𑀸 𑀦𑀸𑀦𑀸𑀕𑁄𑀘𑀭𑀸 𑀲𑀓𑀁 𑀲𑀓𑀁 𑀕𑁄𑀘𑀭𑀯𑀺𑀲𑀬𑀁 𑀆𑀯𑀺𑀜𑁆𑀙𑁂𑀬𑁆𑀬𑀼𑀁 [𑀆𑀯𑀺𑀜𑁆𑀚𑁂𑀬𑁆𑀬𑀼𑀁 (𑀲𑀻.)] 𑁋 𑀅𑀳𑀺 𑀆𑀯𑀺𑀜𑁆𑀙𑁂𑀬𑁆𑀬 ‘𑀯𑀫𑁆𑀫𑀺𑀓𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺, 𑀲𑀼𑀲𑀼𑀫𑀸𑀭𑁄 𑀆𑀯𑀺𑀜𑁆𑀙𑁂𑀬𑁆𑀬 ‘𑀉𑀤𑀓𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺, 𑀧𑀓𑁆𑀔𑀻 𑀆𑀯𑀺𑀜𑁆𑀙𑁂𑀬𑁆𑀬 ‘𑀆𑀓𑀸𑀲𑀁 𑀟𑁂𑀲𑁆𑀲𑀸𑀫𑀻’𑀢𑀺, 𑀓𑀼𑀓𑁆𑀓𑀼𑀭𑁄 𑀆𑀯𑀺𑀜𑁆𑀙𑁂𑀬𑁆𑀬 ‘𑀕𑀸𑀫𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺, 𑀲𑀺𑀗𑁆𑀕𑀸𑀮𑁄 𑀆𑀯𑀺𑀜𑁆𑀙𑁂𑀬𑁆𑀬 ‘𑀲𑀻𑀯𑀣𑀺𑀓𑀁 [𑀲𑀺𑀯𑀣𑀺𑀓𑀁 (𑀓.)] 𑀧𑀯𑁂𑀓𑁆𑀔𑀸𑀫𑀻’𑀢𑀺, 𑀫𑀓𑁆𑀓𑀝𑁄 𑀆𑀯𑀺𑀜𑁆𑀙𑁂𑀬𑁆𑀬 ‘𑀯𑀦𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺. 𑀬𑀤𑀸 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀙𑀧𑁆𑀧𑀸𑀡𑀓𑀸 𑀛𑀢𑁆𑀢𑀸 𑀅𑀲𑁆𑀲𑀼 𑀓𑀺𑀮𑀦𑁆𑀢𑀸, 𑀅𑀣 𑀔𑁄 𑀬𑁄 𑀦𑁂𑀲𑀁 𑀧𑀸𑀡𑀓𑀸𑀦𑀁 𑀩𑀮𑀯𑀢𑀭𑁄 𑀅𑀲𑁆𑀲 𑀢𑀲𑁆𑀲 𑀢𑁂 𑀅𑀦𑀼𑀯𑀢𑁆𑀢𑁂𑀬𑁆𑀬𑀼𑀁, 𑀅𑀦𑀼𑀯𑀺𑀥𑀸𑀬𑁂𑀬𑁆𑀬𑀼𑀁 𑀯𑀲𑀁 𑀕𑀘𑁆𑀙𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀓𑀸𑀬𑀕𑀢𑀸𑀲𑀢𑀺 𑀅𑀪𑀸𑀯𑀺𑀢𑀸 𑀅𑀩𑀳𑀼𑀮𑀻𑀓𑀢𑀸, 𑀢𑀁 𑀘𑀓𑁆𑀔𑀼 𑀆𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀼, 𑀅𑀫𑀦𑀸𑀧𑀺𑀬𑀸 𑀭𑀽𑀧𑀸 𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺…𑀧𑁂… 𑀫𑀦𑁄 𑀆𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀅𑀫𑀦𑀸𑀧𑀺𑀬𑀸 𑀥𑀫𑁆𑀫𑀸 𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀸 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀙𑀧𑁆𑀧𑀸𑀡𑀓𑁂 𑀕𑀳𑁂𑀢𑁆𑀯𑀸 𑀦𑀸𑀦𑀸𑀯𑀺𑀲𑀬𑁂 𑀦𑀸𑀦𑀸𑀕𑁄𑀘𑀭𑁂 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀅𑀳𑀺𑀁 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀲𑀼𑀲𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀧𑀓𑁆𑀔𑀺𑀁 𑀕𑀳𑁂𑀢𑁆𑀯𑀸…𑀧𑁂… 𑀓𑀼𑀓𑁆𑀓𑀼𑀭𑀁 𑀕𑀳𑁂𑀢𑁆𑀯𑀸… 𑀲𑀺𑀗𑁆𑀕𑀸𑀮𑀁 𑀕𑀳𑁂𑀢𑁆𑀯𑀸… 𑀫𑀓𑁆𑀓𑀝𑀁 𑀕𑀳𑁂𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑁂𑀬𑁆𑀬. 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀤𑀴𑁆𑀳𑁂 𑀔𑀻𑀮𑁂 𑀯𑀸 𑀣𑀫𑁆𑀪𑁂 𑀯𑀸 𑀉𑀧𑀦𑀺𑀩𑀦𑁆𑀥𑁂𑀬𑁆𑀬. 𑀅𑀣 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀙𑀧𑁆𑀧𑀸𑀡𑀓𑀸 𑀦𑀸𑀦𑀸𑀯𑀺𑀲𑀬𑀸 𑀦𑀸𑀦𑀸𑀕𑁄𑀘𑀭𑀸 𑀲𑀓𑀁 𑀲𑀓𑀁 𑀕𑁄𑀘𑀭𑀯𑀺𑀲𑀬𑀁 𑀆𑀯𑀺𑀜𑁆𑀙𑁂𑀬𑁆𑀬𑀼𑀁 𑁋 𑀅𑀳𑀺 𑀆𑀯𑀺𑀜𑁆𑀙𑁂𑀬𑁆𑀬 ‘𑀯𑀫𑁆𑀫𑀺𑀓𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺, 𑀲𑀼𑀲𑀼𑀫𑀸𑀭𑁄 𑀆𑀯𑀺𑀜𑁆𑀙𑁂𑀬𑁆𑀬 ‘𑀉𑀤𑀓𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺, 𑀧𑀓𑁆𑀔𑀻 𑀆𑀯𑀺𑀜𑁆𑀙𑁂𑀬𑁆𑀬 ‘𑀆𑀓𑀸𑀲𑀁 𑀟𑁂𑀲𑁆𑀲𑀸𑀫𑀻’𑀢𑀺, 𑀓𑀼𑀓𑁆𑀓𑀼𑀭𑁄 𑀆𑀯𑀺𑀜𑁆𑀙𑁂𑀬𑁆𑀬 ‘𑀕𑀸𑀫𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺, 𑀲𑀺𑀗𑁆𑀕𑀸𑀮𑁄 𑀆𑀯𑀺𑀜𑁆𑀙𑁂𑀬𑁆𑀬 ‘𑀲𑀻𑀯𑀣𑀺𑀓𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺, 𑀫𑀓𑁆𑀓𑀝𑁄 𑀆𑀯𑀺𑀜𑁆𑀙𑁂𑀬𑁆𑀬 ‘𑀯𑀦𑀁 𑀧𑀯𑁂𑀓𑁆𑀔𑀸𑀫𑀻’𑀢𑀺. 𑀬𑀤𑀸 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀙𑀧𑁆𑀧𑀸𑀡𑀓𑀸 𑀛𑀢𑁆𑀢𑀸 𑀅𑀲𑁆𑀲𑀼 𑀓𑀺𑀮𑀦𑁆𑀢𑀸, 𑀅𑀣 𑀢𑀫𑁂𑀯 𑀔𑀻𑀮𑀁 𑀯𑀸 𑀣𑀫𑁆𑀪𑀁 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬𑀼𑀁, 𑀉𑀧𑀦𑀺𑀲𑀻𑀤𑁂𑀬𑁆𑀬𑀼𑀁, 𑀉𑀧𑀦𑀺𑀧𑀚𑁆𑀚𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀓𑀸𑀬𑀕𑀢𑀸𑀲𑀢𑀺 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸, 𑀢𑀁 𑀘𑀓𑁆𑀔𑀼 𑀦𑀸𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀼, 𑀅𑀫𑀦𑀸𑀧𑀺𑀬𑀸 𑀭𑀽𑀧𑀸 𑀦𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀸 𑀦𑀸𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀫𑀦𑁄 𑀦𑀸𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀅𑀫𑀦𑀸𑀧𑀺𑀬𑀸 𑀥𑀫𑁆𑀫𑀸 𑀦𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑁄 𑀳𑁄𑀢𑀺.

‘‘‘𑀤𑀴𑁆𑀳𑁂 𑀔𑀻𑀮𑁂 𑀯𑀸 𑀣𑀫𑁆𑀪𑁂 𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸𑀢𑀺𑀳 𑀯𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀓𑀸𑀬𑀕𑀢𑀸 𑀦𑁄 𑀲𑀢𑀺 𑀪𑀸𑀯𑀺𑀢𑀸 𑀪𑀯𑀺𑀲𑁆𑀲𑀢𑀺 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸’𑀢𑀺. 𑀏𑀯𑀜𑁆𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀲𑀫𑀁.

𑁧𑁧. 𑀬𑀯𑀓𑀮𑀸𑀧𑀺𑀲𑀼𑀢𑁆𑀢𑀁

𑁨𑁪𑁮. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀯𑀓𑀮𑀸𑀧𑀻 𑀘𑀸𑀢𑀼𑀫𑀳𑀸𑀧𑀣𑁂 𑀦𑀺𑀓𑁆𑀔𑀺𑀢𑁆𑀢𑀸 𑀅𑀲𑁆𑀲. 𑀅𑀣 𑀙 𑀧𑀼𑀭𑀺𑀲𑀸 𑀆𑀕𑀘𑁆𑀙𑁂𑀬𑁆𑀬𑀼𑀁 𑀩𑁆𑀬𑀸𑀪𑀗𑁆𑀕𑀺𑀳𑀢𑁆𑀣𑀸. 𑀢𑁂 𑀬𑀯𑀓𑀮𑀸𑀧𑀺𑀁 𑀙𑀳𑀺 𑀩𑁆𑀬𑀸𑀪𑀗𑁆𑀕𑀻𑀳𑀺 𑀳𑀦𑁂𑀬𑁆𑀬𑀼𑀁. 𑀏𑀯𑀜𑁆𑀳𑀺 𑀲𑀸, 𑀪𑀺𑀓𑁆𑀔𑀯𑁂, 𑀬𑀯𑀓𑀮𑀸𑀧𑀻 𑀲𑀼𑀳𑀢𑀸 𑀅𑀲𑁆𑀲 𑀙𑀳𑀺 𑀩𑁆𑀬𑀸𑀪𑀗𑁆𑀕𑀻𑀳𑀺 𑀳𑀜𑁆𑀜𑀫𑀸𑀦𑀸. 𑀅𑀣 𑀲𑀢𑁆𑀢𑀫𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀩𑁆𑀬𑀸𑀪𑀗𑁆𑀕𑀺𑀳𑀢𑁆𑀣𑁄. 𑀲𑁄 𑀢𑀁 𑀬𑀯𑀓𑀮𑀸𑀧𑀺𑀁 𑀲𑀢𑁆𑀢𑀫𑀸𑀬 𑀩𑁆𑀬𑀸𑀪𑀗𑁆𑀕𑀺𑀬𑀸 𑀳𑀦𑁂𑀬𑁆𑀬. 𑀏𑀯𑀜𑁆𑀳𑀺 𑀲𑀸 𑀪𑀺𑀓𑁆𑀔𑀯𑁂, 𑀬𑀯𑀓𑀮𑀸𑀧𑀻 𑀲𑀼𑀳𑀢𑀢𑀭𑀸 𑀅𑀲𑁆𑀲, 𑀲𑀢𑁆𑀢𑀫𑀸𑀬 𑀩𑁆𑀬𑀸𑀪𑀗𑁆𑀕𑀺𑀬𑀸 𑀳𑀜𑁆𑀜𑀫𑀸𑀦𑀸. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀘𑀓𑁆𑀔𑀼𑀲𑁆𑀫𑀺𑀁 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀳𑀺 𑀭𑀽𑀧𑁂𑀳𑀺…𑀧𑁂… 𑀚𑀺𑀯𑁆𑀳𑀸𑀬 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀳𑀺 𑀭𑀲𑁂𑀳𑀺…𑀧𑁂… 𑀫𑀦𑀲𑁆𑀫𑀺𑀁 𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀳𑀺 𑀥𑀫𑁆𑀫𑁂𑀳𑀺. 𑀲𑀘𑁂 𑀲𑁄, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀬 𑀘𑁂𑀢𑁂𑀢𑀺, 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀲𑀼𑀳𑀢𑀢𑀭𑁄 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀲𑀸 𑀬𑀯𑀓𑀮𑀸𑀧𑀻 𑀲𑀢𑁆𑀢𑀫𑀸𑀬 𑀩𑁆𑀬𑀸𑀪𑀗𑁆𑀕𑀺𑀬𑀸 𑀳𑀜𑁆𑀜𑀫𑀸𑀦𑀸.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 [𑀲𑀫𑀼𑀧𑀩𑁆𑀩𑀽𑀴𑁆𑀳𑁄 (𑀲𑀻. 𑀧𑀻.)] 𑀅𑀳𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀅𑀲𑀼𑀭𑁂 𑀆𑀫𑀦𑁆𑀢𑁂𑀲𑀺 𑁋 ‘𑀲𑀘𑁂, 𑀫𑀸𑀭𑀺𑀲𑀸, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁂 𑀲𑀫𑀼𑀧𑀩𑁆𑀬𑀽𑀴𑁆𑀳𑁂 𑀅𑀲𑀼𑀭𑀸 𑀚𑀺𑀦𑁂𑀬𑁆𑀬𑀼𑀁 𑀤𑁂𑀯𑀸 𑀧𑀭𑀸𑀚𑀺𑀦𑁂𑀬𑁆𑀬𑀼𑀁, 𑀬𑁂𑀦 𑀦𑀁 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀆𑀦𑁂𑀬𑁆𑀬𑀸𑀣 𑀅𑀲𑀼𑀭𑀧𑀼𑀭’𑀦𑁆𑀢𑀺. 𑀲𑀓𑁆𑀓𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘𑀲𑀘𑁂, 𑀫𑀸𑀭𑀺𑀲𑀸, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁂 𑀲𑀫𑀼𑀧𑀩𑁆𑀬𑀽𑀴𑁆𑀳𑁂 𑀤𑁂𑀯𑀸 𑀚𑀺𑀦𑁂𑀬𑁆𑀬𑀼𑀁 𑀅𑀲𑀼𑀭𑀸 𑀧𑀭𑀸𑀚𑀺𑀦𑁂𑀬𑁆𑀬𑀼𑀁, 𑀬𑁂𑀦 𑀦𑀁 𑀯𑁂𑀧𑀘𑀺𑀢𑁆𑀢𑀺𑀁 𑀅𑀲𑀼𑀭𑀺𑀦𑁆𑀤𑀁 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀆𑀦𑁂𑀬𑁆𑀬𑀸𑀣 𑀲𑀼𑀥𑀫𑁆𑀫𑀁 𑀤𑁂𑀯𑀲𑀪’𑀦𑁆𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀕𑀸𑀫𑁂 𑀤𑁂𑀯𑀸 𑀚𑀺𑀦𑀺𑀁𑀲𑀼, 𑀅𑀲𑀼𑀭𑀸 𑀧𑀭𑀸𑀚𑀺𑀦𑀺𑀁𑀲𑀼. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀯𑁂𑀧𑀘𑀺𑀢𑁆𑀢𑀺𑀁 𑀅𑀲𑀼𑀭𑀺𑀦𑁆𑀤𑀁 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀲𑀼𑀁 𑀲𑀼𑀥𑀫𑁆𑀫𑀁 𑀤𑁂𑀯𑀲𑀪𑀁. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑁄 [𑀩𑀦𑁆𑀥𑁄 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀳𑁄𑀢𑀺. 𑀬𑀤𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀲𑁆𑀲 𑀅𑀲𑀼𑀭𑀺𑀦𑁆𑀤𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀥𑀫𑁆𑀫𑀺𑀓𑀸 𑀔𑁄 𑀤𑁂𑀯𑀸, 𑀅𑀥𑀫𑁆𑀫𑀺𑀓𑀸 𑀅𑀲𑀼𑀭𑀸, 𑀇𑀥𑁂𑀯 𑀤𑀸𑀦𑀸𑀳𑀁 𑀤𑁂𑀯𑀧𑀼𑀭𑀁 𑀕𑀘𑁆𑀙𑀸𑀫𑀻’𑀢𑀺. 𑀅𑀣 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀫𑀼𑀢𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀤𑀺𑀩𑁆𑀩𑁂𑀳𑀺 𑀘 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀬𑀤𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀲𑁆𑀲 𑀅𑀲𑀼𑀭𑀺𑀦𑁆𑀤𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀥𑀫𑁆𑀫𑀺𑀓𑀸 𑀔𑁄 𑀅𑀲𑀼𑀭𑀸, 𑀅𑀥𑀫𑁆𑀫𑀺𑀓𑀸 𑀤𑁂𑀯𑀸, 𑀢𑀢𑁆𑀣𑁂𑀯 𑀤𑀸𑀦𑀸𑀳𑀁 𑀅𑀲𑀼𑀭𑀧𑀼𑀭𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺, 𑀅𑀣 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀤𑀺𑀩𑁆𑀩𑁂𑀳𑀺 𑀘 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀧𑀭𑀺𑀳𑀸𑀬𑀢𑀺. 𑀏𑀯𑀁 𑀲𑀼𑀔𑀼𑀫𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀩𑀦𑁆𑀥𑀦𑀁. 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀫𑀸𑀭𑀩𑀦𑁆𑀥𑀦𑀁. 𑀫𑀜𑁆𑀜𑀫𑀸𑀦𑁄 𑀔𑁄, 𑀪𑀺𑀓𑁆𑀔𑀯𑁂, 𑀩𑀤𑁆𑀥𑁄 𑀫𑀸𑀭𑀲𑁆𑀲, 𑀅𑀫𑀜𑁆𑀜𑀫𑀸𑀦𑁄 𑀫𑀼𑀢𑁆𑀢𑁄 𑀧𑀸𑀧𑀺𑀫𑀢𑁄.

‘‘‘𑀅𑀲𑁆𑀫𑀻’𑀢𑀺, 𑀪𑀺𑀓𑁆𑀔𑀯𑁂, 𑀫𑀜𑁆𑀜𑀺𑀢𑀫𑁂𑀢𑀁, ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, ‘𑀪𑀯𑀺𑀲𑁆𑀲’𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, ‘𑀦 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, ‘𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, ‘𑀅𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, ‘𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, ‘𑀅𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, ‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁. 𑀫𑀜𑁆𑀜𑀺𑀢𑀁, 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀫𑀜𑁆𑀜𑀺𑀢𑀁 𑀕𑀡𑁆𑀟𑁄, 𑀫𑀜𑁆𑀜𑀺𑀢𑀁 𑀲𑀮𑁆𑀮𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀅𑀫𑀜𑁆𑀜𑀫𑀸𑀦𑁂𑀦 [𑀅𑀫𑀜𑁆𑀜𑀺𑀢𑀫𑀸𑀦𑁂𑀦 (𑀧𑀻. 𑀓.)] 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺 𑁋 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘‘𑀅𑀲𑁆𑀫𑀻’𑀢𑀺, 𑀪𑀺𑀓𑁆𑀔𑀯𑁂, 𑀇𑀜𑁆𑀚𑀺𑀢𑀫𑁂𑀢𑀁, ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘𑀪𑀯𑀺𑀲𑁆𑀲’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘𑀦 𑀪𑀯𑀺𑀲𑁆𑀲’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘𑀅𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘𑀅𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁. 𑀇𑀜𑁆𑀚𑀺𑀢𑀁, 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀇𑀜𑁆𑀚𑀺𑀢𑀁 𑀕𑀡𑁆𑀟𑁄, 𑀇𑀜𑁆𑀚𑀺𑀢𑀁 𑀲𑀮𑁆𑀮𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀅𑀦𑀺𑀜𑁆𑀚𑀫𑀸𑀦𑁂𑀦 [𑀅𑀦𑀺𑀜𑁆𑀚𑀺𑀬𑀫𑀸𑀦𑁂𑀦 (𑀲𑁆𑀬𑀸. 𑀓𑀁. 𑀓.)] 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺 𑁋 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘‘𑀅𑀲𑁆𑀫𑀻’𑀢𑀺, 𑀪𑀺𑀓𑁆𑀔𑀯𑁂, 𑀨𑀦𑁆𑀤𑀺𑀢𑀫𑁂𑀢𑀁, ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀨𑀦𑁆𑀤𑀺𑀢𑀫𑁂𑀢𑀁, ‘𑀪𑀯𑀺𑀲𑁆𑀲’𑀦𑁆𑀢𑀺…𑀧𑁂… ‘𑀦 𑀪𑀯𑀺𑀲𑁆𑀲’𑀦𑁆𑀢𑀺… ‘𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺… ‘𑀅𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺… ‘𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺… ‘𑀅𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺… ‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀨𑀦𑁆𑀤𑀺𑀢𑀫𑁂𑀢𑀁. 𑀨𑀦𑁆𑀤𑀺𑀢𑀁, 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀨𑀦𑁆𑀤𑀺𑀢𑀁 𑀕𑀡𑁆𑀟𑁄, 𑀨𑀦𑁆𑀤𑀺𑀢𑀁 𑀲𑀮𑁆𑀮𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀅𑀨𑀦𑁆𑀤𑀫𑀸𑀦𑁂𑀦 [𑀅𑀨𑀦𑁆𑀤𑀺𑀬𑀫𑀸𑀦𑁂𑀦 (𑀲𑁆𑀬𑀸. 𑀓𑀁. 𑀓.)] 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺 𑁋 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘‘𑀅𑀲𑁆𑀫𑀻’𑀢𑀺, 𑀪𑀺𑀓𑁆𑀔𑀯𑁂, 𑀧𑀧𑀜𑁆𑀘𑀺𑀢𑀫𑁂𑀢𑀁, ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀧𑀧𑀜𑁆𑀘𑀺𑀢𑀫𑁂𑀢𑀁, ‘𑀪𑀯𑀺𑀲𑁆𑀲’𑀦𑁆𑀢𑀺…𑀧𑁂… ‘𑀦 𑀪𑀯𑀺𑀲𑁆𑀲’𑀦𑁆𑀢𑀺… ‘𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺… ‘𑀅𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺… ‘𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺… ‘𑀅𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺… ‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀧𑀧𑀜𑁆𑀘𑀺𑀢𑀫𑁂𑀢𑀁. 𑀧𑀧𑀜𑁆𑀘𑀺𑀢𑀁, 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀧𑀧𑀜𑁆𑀘𑀺𑀢𑀁 𑀕𑀡𑁆𑀟𑁄, 𑀧𑀧𑀜𑁆𑀘𑀺𑀢𑀁 𑀲𑀮𑁆𑀮𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀦𑀺𑀧𑁆𑀧𑀧𑀜𑁆𑀘𑁂𑀦 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺 𑁋 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘‘𑀅𑀲𑁆𑀫𑀻’𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀕𑀢𑀫𑁂𑀢𑀁, ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀫𑀸𑀦𑀕𑀢𑀫𑁂𑀢𑀁, ‘𑀪𑀯𑀺𑀲𑁆𑀲’𑀦𑁆𑀢𑀺 𑀫𑀸𑀦𑀕𑀢𑀫𑁂𑀢𑀁, ‘𑀦 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀸𑀦𑀕𑀢𑀫𑁂𑀢𑀁, ‘𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀸𑀦𑀕𑀢𑀫𑁂𑀢𑀁, ‘𑀅𑀭𑀽𑀧𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀸𑀦𑀕𑀢𑀫𑁂𑀢𑀁, ‘𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀸𑀦𑀕𑀢𑀫𑁂𑀢𑀁, ‘𑀅𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀸𑀦𑀕𑀢𑀫𑁂𑀢𑀁, ‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲’𑀦𑁆𑀢𑀺 𑀫𑀸𑀦𑀕𑀢𑀫𑁂𑀢𑀁. 𑀫𑀸𑀦𑀕𑀢𑀁, 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀫𑀸𑀦𑀕𑀢𑀁 𑀕𑀡𑁆𑀟𑁄, 𑀫𑀸𑀦𑀕𑀢𑀁 𑀲𑀮𑁆𑀮𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀦𑀺𑀳𑀢𑀫𑀸𑀦𑁂𑀦 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺 𑁋 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀏𑀓𑀸𑀤𑀲𑀫𑀁.

𑀆𑀲𑀻𑀯𑀺𑀲𑀯𑀕𑁆𑀕𑁄 𑀏𑀓𑀽𑀦𑀯𑀻𑀲𑀢𑀺𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀆𑀲𑀻𑀯𑀺𑀲𑁄 𑀭𑀣𑁄 𑀓𑀼𑀫𑁆𑀫𑁄, 𑀤𑁆𑀯𑁂 𑀤𑀸𑀭𑀼𑀓𑁆𑀔𑀦𑁆𑀥𑀸 𑀅𑀯𑀲𑁆𑀲𑀼𑀢𑁄;

𑀤𑀼𑀓𑁆𑀔𑀥𑀫𑁆𑀫𑀸 𑀓𑀺𑀁𑀲𑀼𑀓𑀸 𑀯𑀻𑀡𑀸, 𑀙𑀧𑁆𑀧𑀸𑀡𑀸 𑀬𑀯𑀓𑀮𑀸𑀧𑀻𑀢𑀺.

𑀲𑀴𑀸𑀬𑀢𑀦𑀯𑀕𑁆𑀕𑁂 𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑀢𑀲𑁆𑀲 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀦𑀦𑁆𑀤𑀺𑀓𑁆𑀔𑀬𑁄 𑀲𑀝𑁆𑀞𑀺𑀦𑀬𑁄, 𑀲𑀫𑀼𑀤𑁆𑀤𑁄 𑀉𑀭𑀕𑁂𑀦 𑀘;

𑀘𑀢𑀼𑀧𑀡𑁆𑀡𑀸𑀲𑀓𑀸 𑀏𑀢𑁂, 𑀦𑀺𑀧𑀸𑀢𑁂𑀲𑀼 𑀧𑀓𑀸𑀲𑀺𑀢𑀸𑀢𑀺.

𑀲𑀴𑀸𑀬𑀢𑀦𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.