𑁧𑁮. 𑀲𑀫𑀼𑀤𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀲𑀫𑀼𑀤𑁆𑀤𑀲𑀼𑀢𑁆𑀢𑀁

𑁨𑁨𑁮. ‘‘‘𑀲𑀫𑀼𑀤𑁆𑀤𑁄, 𑀲𑀫𑀼𑀤𑁆𑀤𑁄’𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺. 𑀦𑁂𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀫𑀼𑀤𑁆𑀤𑁄. 𑀫𑀳𑀸 𑀏𑀲𑁄, 𑀪𑀺𑀓𑁆𑀔𑀯𑁂, 𑀉𑀤𑀓𑀭𑀸𑀲𑀺 𑀫𑀳𑀸𑀉𑀤𑀓𑀡𑁆𑀡𑀯𑁄. 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀲𑀫𑀼𑀤𑁆𑀤𑁄; 𑀢𑀲𑁆𑀲 𑀭𑀽𑀧𑀫𑀬𑁄 𑀯𑁂𑀕𑁄. 𑀬𑁄 𑀢𑀁 𑀭𑀽𑀧𑀫𑀬𑀁 𑀯𑁂𑀕𑀁 𑀲𑀳𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀭𑀺 𑀘𑀓𑁆𑀔𑀼𑀲𑀫𑀼𑀤𑁆𑀤𑀁 𑀲𑀊𑀫𑀺𑀁 𑀲𑀸𑀯𑀝𑁆𑀝𑀁 𑀲𑀕𑀸𑀳𑀁 𑀲𑀭𑀓𑁆𑀔𑀲𑀁; 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀚𑀺𑀯𑁆𑀳𑀸, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀲𑀫𑀼𑀤𑁆𑀤𑁄; 𑀢𑀲𑁆𑀲 𑀭𑀲𑀫𑀬𑁄 𑀯𑁂𑀕𑁄. 𑀬𑁄 𑀢𑀁 𑀭𑀲𑀫𑀬𑀁 𑀯𑁂𑀕𑀁 𑀲𑀳𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀭𑀺 𑀚𑀺𑀯𑁆𑀳𑀸𑀲𑀫𑀼𑀤𑁆𑀤𑀁 𑀲𑀊𑀫𑀺𑀁 𑀲𑀸𑀯𑀝𑁆𑀝𑀁 𑀲𑀕𑀸𑀳𑀁 𑀲𑀭𑀓𑁆𑀔𑀲𑀁; 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀫𑀦𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀲𑀫𑀼𑀤𑁆𑀤𑁄; 𑀢𑀲𑁆𑀲 𑀥𑀫𑁆𑀫𑀫𑀬𑁄 𑀯𑁂𑀕𑁄. 𑀬𑁄 𑀢𑀁 𑀥𑀫𑁆𑀫𑀫𑀬𑀁 𑀯𑁂𑀕𑀁 𑀲𑀳𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀭𑀺 𑀫𑀦𑁄𑀲𑀫𑀼𑀤𑁆𑀤𑀁 𑀲𑀊𑀫𑀺𑀁 𑀲𑀸𑀯𑀝𑁆𑀝𑀁 𑀲𑀕𑀸𑀳𑀁 𑀲𑀭𑀓𑁆𑀔𑀲𑀁; 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺. 𑀇𑀤𑀫𑀯𑁄𑀘…𑀧𑁂… 𑀲𑀢𑁆𑀣𑀸 𑁋

‘‘𑀬𑁄 𑀇𑀫𑀁 𑀲𑀫𑀼𑀤𑁆𑀤𑀁 𑀲𑀕𑀸𑀳𑀁 𑀲𑀭𑀓𑁆𑀔𑀲𑀁,

𑀲𑀊𑀫𑀺𑀁 𑀲𑀸𑀯𑀝𑁆𑀝𑀁 𑀲𑀪𑀬𑀁 𑀤𑀼𑀢𑁆𑀢𑀭𑀁 𑀅𑀘𑁆𑀘𑀢𑀭𑀺;

𑀲 𑀯𑁂𑀤𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄,

𑀮𑁄𑀓𑀦𑁆𑀢𑀕𑀽 𑀧𑀸𑀭𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀧𑀞𑀫𑀁;

𑁨. 𑀤𑀼𑀢𑀺𑀬𑀲𑀫𑀼𑀤𑁆𑀤𑀲𑀼𑀢𑁆𑀢𑀁

𑁨𑁨𑁯. ‘‘𑀲𑀫𑀼𑀤𑁆𑀤𑁄, 𑀲𑀫𑀼𑀤𑁆𑀤𑁄’𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺. 𑀦𑁂𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀫𑀼𑀤𑁆𑀤𑁄. 𑀫𑀳𑀸 𑀏𑀲𑁄, 𑀪𑀺𑀓𑁆𑀔𑀯𑁂, 𑀉𑀤𑀓𑀭𑀸𑀲𑀺 𑀫𑀳𑀸𑀉𑀤𑀓𑀡𑁆𑀡𑀯𑁄. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀫𑀼𑀤𑁆𑀤𑁄. 𑀏𑀢𑁆𑀣𑀸𑀬𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀲𑀫𑀼𑀦𑁆𑀦𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸 𑀓𑀼𑀮𑀕𑀡𑁆𑀞𑀺𑀓𑀚𑀸𑀢𑀸 [𑀕𑀼𑀴𑀸𑀕𑀼𑀡𑁆𑀞𑀺𑀓𑀚𑀸𑀢𑀸 (𑀲𑀻.), 𑀓𑀼𑀮𑀕𑀼𑀡𑁆𑀟𑀺𑀓𑀚𑀸𑀢𑀸 (𑀲𑁆𑀬𑀸. 𑀓𑀁.), 𑀕𑀼𑀡𑀕𑀼𑀡𑀺𑀓𑀚𑀸𑀢𑀸 (𑀧𑀻.), 𑀓𑀼𑀮𑀸𑀕𑀼𑀡𑁆𑀟𑀺𑀓𑀚𑀸𑀢𑀸 (𑀓.)] 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸, 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺…𑀧𑁂….

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸…𑀧𑁂… 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀫𑀼𑀤𑁆𑀤𑁄. 𑀏𑀢𑁆𑀣𑀸𑀬𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀲𑀫𑀼𑀦𑁆𑀦𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸 𑀓𑀼𑀮𑀕𑀡𑁆𑀞𑀺𑀓𑀚𑀸𑀢𑀸 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺.

‘‘𑀬𑀲𑁆𑀲 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀲𑁄 𑀇𑀫𑀁 𑀲𑀫𑀼𑀤𑁆𑀤𑀁 𑀲𑀕𑀸𑀳𑀁 𑀲𑀭𑀓𑁆𑀔𑀲𑀁, 𑀲𑀊𑀫𑀺𑀪𑀬𑀁 𑀤𑀼𑀢𑁆𑀢𑀭𑀁 𑀅𑀘𑁆𑀘𑀢𑀭𑀺.

‘‘𑀲𑀗𑁆𑀕𑀸𑀢𑀺𑀕𑁄 𑀫𑀘𑁆𑀘𑀼𑀚𑀳𑁄 𑀦𑀺𑀭𑀼𑀧𑀥𑀺, 𑀧𑀳𑀸𑀲𑀺 𑀤𑀼𑀓𑁆𑀔𑀁 𑀅𑀧𑀼𑀦𑀩𑁆𑀪𑀯𑀸𑀬;

𑀅𑀢𑁆𑀣𑀗𑁆𑀕𑀢𑁄 𑀲𑁄 𑀦 𑀧𑀼𑀦𑁂𑀢𑀺 [𑀦 𑀧𑀫𑀸𑀡𑀫𑁂𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀅𑀫𑁄𑀳𑀬𑀻, 𑀫𑀘𑁆𑀘𑀼𑀭𑀸𑀚𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺. 𑀤𑀼𑀢𑀺𑀬𑀁;

𑁩. 𑀩𑀸𑀴𑀺𑀲𑀺𑀓𑁄𑀧𑀫𑀲𑀼𑀢𑁆𑀢𑀁

𑁨𑁩𑁦. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀩𑀸𑀴𑀺𑀲𑀺𑀓𑁄 𑀆𑀫𑀺𑀲𑀕𑀢𑀩𑀴𑀺𑀲𑀁 𑀕𑀫𑁆𑀪𑀻𑀭𑁂 𑀉𑀤𑀓𑀭𑀳𑀤𑁂 𑀧𑀓𑁆𑀔𑀺𑀧𑁂𑀬𑁆𑀬. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀆𑀫𑀺𑀲𑀘𑀓𑁆𑀔𑀼 𑀫𑀘𑁆𑀙𑁄 𑀕𑀺𑀮𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀘𑁆𑀙𑁄 𑀕𑀺𑀮𑀺𑀢𑀩𑀴𑀺𑀲𑁄 𑀩𑀸𑀴𑀺𑀲𑀺𑀓𑀲𑁆𑀲 𑀅𑀦𑀬𑀁 𑀆𑀧𑀦𑁆𑀦𑁄 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀩𑀸𑀴𑀺𑀲𑀺𑀓𑀲𑁆𑀲.

𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀙𑀬𑀺𑀫𑁂 𑀩𑀴𑀺𑀲𑀸 𑀮𑁄𑀓𑀲𑁆𑀫𑀺𑀁 𑀅𑀦𑀬𑀸𑀬 𑀲𑀢𑁆𑀢𑀸𑀦𑀁 𑀯𑀥𑀸𑀬 [𑀩𑁆𑀬𑀸𑀩𑀸𑀥𑀸𑀬 (𑀲𑀻. 𑀧𑀻.)] 𑀧𑀸𑀡𑀺𑀦𑀁. 𑀓𑀢𑀫𑁂 𑀙? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀼, 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀺𑀢𑀩𑀴𑀺𑀲𑁄, 𑀫𑀸𑀭𑀲𑁆𑀲 𑀅𑀦𑀬𑀁 𑀆𑀧𑀦𑁆𑀦𑁄 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄…𑀧𑁂… 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸…𑀧𑁂….

𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀼, 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀺𑀢𑀩𑀴𑀺𑀲𑁄 𑀫𑀸𑀭𑀲𑁆𑀲 𑀅𑀦𑀬𑀁 𑀆𑀧𑀦𑁆𑀦𑁄 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄.

‘‘𑀲𑀦𑁆𑀢𑀺 𑀘, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀕𑀺𑀮𑀺𑀢𑀩𑀴𑀺𑀲𑁄 𑀫𑀸𑀭𑀲𑁆𑀲 𑀅𑀪𑁂𑀤𑀺 𑀩𑀴𑀺𑀲𑀁 𑀧𑀭𑀺𑀪𑁂𑀤𑀺 𑀩𑀴𑀺𑀲𑀁 𑀦 𑀅𑀦𑀬𑀁 𑀆𑀧𑀦𑁆𑀦𑁄 𑀦 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄 𑀦 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄…𑀧𑁂….

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸…𑀧𑁂…. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀕𑀺𑀮𑀺𑀢𑀩𑀴𑀺𑀲𑁄 𑀫𑀸𑀭𑀲𑁆𑀲 𑀅𑀪𑁂𑀤𑀺 𑀩𑀴𑀺𑀲𑀁 𑀧𑀭𑀺𑀪𑁂𑀤𑀺 𑀩𑀴𑀺𑀲𑀁 𑀦 𑀅𑀦𑀬𑀁 𑀆𑀧𑀦𑁆𑀦𑁄 𑀦 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄 𑀦 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄’’𑀢𑀺. 𑀢𑀢𑀺𑀬𑀁.

𑁪. 𑀔𑀻𑀭𑀭𑀼𑀓𑁆𑀔𑁄𑀧𑀫𑀲𑀼𑀢𑁆𑀢𑀁

𑁨𑁩𑁧. ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀅𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀅𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀅𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀅𑀧𑁆𑀧𑀳𑀻𑀦𑁄 𑀢𑀲𑁆𑀲 𑀧𑀭𑀺𑀢𑁆𑀢𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑁂𑀯𑀲𑁆𑀲 𑀘𑀺𑀢𑁆𑀢𑀁; 𑀓𑁄 𑀧𑀦 𑀯𑀸𑀤𑁄 𑀅𑀥𑀺𑀫𑀢𑁆𑀢𑀸𑀦𑀁! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑁄, 𑀲𑁄 𑀅𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀅𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀅𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀅𑀧𑁆𑀧𑀳𑀻𑀦𑁄…𑀧𑁂….

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀅𑀢𑁆𑀣𑀺…𑀧𑁂….

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀅𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀅𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀅𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀢𑀲𑁆𑀲 𑀧𑀭𑀺𑀢𑁆𑀢𑀸 𑀘𑁂𑀧𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑁂𑀯𑀲𑁆𑀲 𑀘𑀺𑀢𑁆𑀢𑀁; 𑀓𑁄 𑀧𑀦 𑀯𑀸𑀤𑁄 𑀅𑀥𑀺𑀫𑀢𑁆𑀢𑀸𑀦𑀁! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑁄, 𑀲𑁄 𑀅𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀅𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀅𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀅𑀧𑁆𑀧𑀳𑀻𑀦𑁄.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀔𑀻𑀭𑀭𑀼𑀓𑁆𑀔𑁄 𑀅𑀲𑁆𑀲𑀢𑁆𑀣𑁄 𑀯𑀸 𑀦𑀺𑀕𑁆𑀭𑁄𑀥𑁄 𑀯𑀸 𑀧𑀺𑀮𑀓𑁆𑀔𑁄 𑀯𑀸 𑀉𑀤𑀼𑀫𑁆𑀩𑀭𑁄 𑀯𑀸 𑀤𑀳𑀭𑁄 𑀢𑀭𑀼𑀡𑁄 𑀓𑁄𑀫𑀸𑀭𑀓𑁄. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀢𑀺𑀡𑁆𑀳𑀸𑀬 𑀓𑀼𑀞𑀸𑀭𑀺𑀬𑀸 𑀬𑀢𑁄 𑀬𑀢𑁄 𑀆𑀪𑀺𑀦𑁆𑀤𑁂𑀬𑁆𑀬 [𑀪𑀺𑀦𑁆𑀤𑁂𑀬𑁆𑀬 (𑀲𑁆𑀬𑀸. 𑀓𑀁. 𑀲𑀻. 𑀅𑀝𑁆𑀞.), 𑀅𑀪𑀺𑀦𑁆𑀤𑁂𑀬𑁆𑀬 (𑀓𑀢𑁆𑀣𑀘𑀺)] 𑀆𑀕𑀘𑁆𑀙𑁂𑀬𑁆𑀬 𑀔𑀻𑀭’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀬𑀜𑁆𑀳𑀺, 𑀪𑀦𑁆𑀢𑁂, 𑀔𑀻𑀭𑀁 𑀢𑀁 𑀅𑀢𑁆𑀣𑀻’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀅𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀅𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀅𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀢𑀲𑁆𑀲 𑀧𑀭𑀺𑀢𑁆𑀢𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑁂𑀯𑀲𑁆𑀲 𑀘𑀺𑀢𑁆𑀢𑀁; 𑀓𑁄 𑀧𑀦 𑀯𑀸𑀤𑁄 𑀅𑀥𑀺𑀫𑀢𑁆𑀢𑀸𑀦𑀁! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑁄 𑀲𑁄 𑀅𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀅𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀅𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀅𑀧𑁆𑀧𑀳𑀻𑀦𑁄…𑀧𑁂….

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀅𑀢𑁆𑀣𑀺…𑀧𑁂….

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀅𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀅𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀅𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀢𑀲𑁆𑀲 𑀧𑀭𑀺𑀢𑁆𑀢𑀸 𑀘𑁂𑀧𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑁂𑀯𑀲𑁆𑀲 𑀘𑀺𑀢𑁆𑀢𑀁; 𑀓𑁄 𑀧𑀦 𑀯𑀸𑀤𑁄 𑀅𑀥𑀺𑀫𑀢𑁆𑀢𑀸𑀦𑀁! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑁄 𑀲𑁄 𑀅𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀅𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀅𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀅𑀧𑁆𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀅𑀧𑁆𑀧𑀳𑀻𑀦𑁄.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀦𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀦𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀦𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀧𑀳𑀻𑀦𑁄, 𑀢𑀲𑁆𑀲 𑀅𑀥𑀺𑀫𑀢𑁆𑀢𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀓𑁄 𑀧𑀦 𑀯𑀸𑀤𑁄 𑀧𑀭𑀺𑀢𑁆𑀢𑀸𑀦𑀁! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑁄 𑀲𑁄 𑀦𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀦𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀦𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀧𑀳𑀻𑀦𑁄…𑀧𑁂….

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀦𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀦𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀦𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀧𑀳𑀻𑀦𑁄, 𑀢𑀲𑁆𑀲 𑀅𑀥𑀺𑀫𑀢𑁆𑀢𑀸 𑀘𑁂𑀧𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀓𑁄 𑀧𑀦 𑀯𑀸𑀤𑁄 𑀧𑀭𑀺𑀢𑁆𑀢𑀸𑀦𑀁! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑁄 𑀲𑁄 𑀦𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀦𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀦𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀧𑀳𑀻𑀦𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀔𑀻𑀭𑀭𑀼𑀓𑁆𑀔𑁄 𑀅𑀲𑁆𑀲𑀢𑁆𑀣𑁄 𑀯𑀸 𑀦𑀺𑀕𑁆𑀭𑁄𑀥𑁄 𑀯𑀸 𑀧𑀺𑀮𑀓𑁆𑀔𑁄 𑀯𑀸 𑀉𑀤𑀼𑀫𑁆𑀩𑀭𑁄 𑀯𑀸 𑀲𑀼𑀓𑁆𑀔𑁄 𑀓𑁄𑀮𑀸𑀧𑁄 𑀢𑁂𑀭𑁄𑀯𑀲𑁆𑀲𑀺𑀓𑁄. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀢𑀺𑀡𑁆𑀳𑀸𑀬 𑀓𑀼𑀞𑀸𑀭𑀺𑀬𑀸 𑀬𑀢𑁄 𑀬𑀢𑁄 𑀆𑀪𑀺𑀦𑁆𑀤𑁂𑀬𑁆𑀬 𑀆𑀕𑀘𑁆𑀙𑁂𑀬𑁆𑀬 𑀔𑀻𑀭’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀬𑀜𑁆𑀳𑀺, 𑀪𑀦𑁆𑀢𑁂, 𑀔𑀻𑀭𑀁 𑀢𑀁 𑀦𑀢𑁆𑀣𑀻’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀦𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀦𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀦𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀧𑀳𑀻𑀦𑁄, 𑀢𑀲𑁆𑀲 𑀅𑀥𑀺𑀫𑀢𑁆𑀢𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀓𑁄 𑀧𑀦 𑀯𑀸𑀤𑁄 𑀧𑀭𑀺𑀢𑁆𑀢𑀸𑀦𑀁! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑁄 𑀲𑁄 𑀦𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀦𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀦𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀧𑀳𑀻𑀦𑁄…𑀧𑁂….

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼…𑀧𑁂….

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀭𑀸𑀕𑁄 𑀲𑁄 𑀦𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀦𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀦𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀧𑀳𑀻𑀦𑁄, 𑀢𑀲𑁆𑀲 𑀅𑀥𑀺𑀫𑀢𑁆𑀢𑀸 𑀘𑁂𑀧𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀓𑁄 𑀧𑀦 𑀯𑀸𑀤𑁄 𑀧𑀭𑀺𑀢𑁆𑀢𑀸𑀦𑀁! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑁄 𑀲𑁄 𑀦𑀢𑁆𑀣𑀺, 𑀬𑁄 𑀤𑁄𑀲𑁄 𑀲𑁄 𑀦𑀢𑁆𑀣𑀺, 𑀬𑁄 𑀫𑁄𑀳𑁄 𑀲𑁄 𑀦𑀢𑁆𑀣𑀺, 𑀬𑁄 𑀭𑀸𑀕𑁄 𑀲𑁄 𑀧𑀳𑀻𑀦𑁄, 𑀬𑁄 𑀤𑁄𑀲𑁄 𑀲𑁄 𑀧𑀳𑀻𑀦𑁄, 𑀬𑁄 𑀫𑁄𑀳𑁄 𑀲𑁄 𑀧𑀳𑀻𑀦𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀁

𑁨𑁩𑁨. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁…𑀧𑁂… 𑀚𑀺𑀯𑁆𑀳𑀸 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁, 𑀭𑀲𑀸 𑀚𑀺𑀯𑁆𑀳𑀸𑀬 𑀲𑀁𑀬𑁄𑀚𑀦𑀁 …𑀧𑁂… 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦’’𑀦𑁆𑀢𑀺?

‘‘𑀦 𑀔𑁄, 𑀆𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁…𑀧𑁂… 𑀦 𑀚𑀺𑀯𑁆𑀳𑀸 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀲𑀸 𑀚𑀺𑀯𑁆𑀳𑀸𑀬 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁…𑀧𑁂… 𑀦 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀸𑀴𑁄 𑀘 𑀩𑀮𑀻𑀩𑀤𑁆𑀤𑁄 [𑀩𑀮𑀺𑀯𑀤𑁆𑀤𑁄 (𑀲𑀻. 𑀧𑀻.), 𑀩𑀮𑀺𑀩𑀤𑁆𑀤𑁄 (𑀲𑁆𑀬𑀸. 𑀓𑀁. 𑀓.)] 𑀑𑀤𑀸𑀢𑁄 𑀘 𑀩𑀮𑀻𑀩𑀤𑁆𑀤𑁄 𑀏𑀓𑁂𑀦 𑀤𑀸𑀫𑁂𑀦 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀲𑁆𑀲𑀼. 𑀬𑁄 𑀦𑀼 𑀔𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀸𑀴𑁄 𑀩𑀮𑀻𑀩𑀤𑁆𑀤𑁄 𑀑𑀤𑀸𑀢𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁, 𑀑𑀤𑀸𑀢𑁄 𑀩𑀮𑀻𑀩𑀤𑁆𑀤𑁄 𑀓𑀸𑀴𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦’𑀦𑁆𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀦 𑀔𑁄, 𑀆𑀯𑀼𑀲𑁄, 𑀓𑀸𑀴𑁄 𑀩𑀮𑀻𑀩𑀤𑁆𑀤𑁄 𑀑𑀤𑀸𑀢𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁, 𑀦 𑀑𑀤𑀸𑀢𑁄 𑀩𑀮𑀻𑀩𑀤𑁆𑀤𑁄 𑀓𑀸𑀴𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁. 𑀬𑁂𑀦 𑀘 𑀔𑁄 𑀢𑁂 𑀏𑀓𑁂𑀦 𑀤𑀸𑀫𑁂𑀦 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀲𑀁𑀬𑀼𑀢𑁆𑀢𑀸 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁.

‘‘𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀦 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁…𑀧𑁂… 𑀦 𑀚𑀺𑀯𑁆𑀳𑀸 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁…𑀧𑁂… 𑀦 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁.

‘‘𑀘𑀓𑁆𑀔𑀼 𑀯𑀸, 𑀆𑀯𑀼𑀲𑁄, 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁 𑀅𑀪𑀯𑀺𑀲𑁆𑀲, 𑀭𑀽𑀧𑀸 𑀯𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁, 𑀦𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀧𑀜𑁆𑀜𑀸𑀬𑁂𑀣 [𑀧𑀜𑁆𑀜𑀸𑀬𑀢𑀺 (𑀓.)] 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀬𑀲𑁆𑀫𑀸 𑀘 𑀔𑁄, 𑀆𑀯𑀼𑀲𑁄, 𑀦 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬…𑀧𑁂….

‘‘𑀚𑀺𑀯𑁆𑀳𑀸, 𑀆𑀯𑀼𑀲𑁄, 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁 𑀅𑀪𑀯𑀺𑀲𑁆𑀲, 𑀭𑀲𑀸 𑀯𑀸 𑀚𑀺𑀯𑁆𑀳𑀸𑀬 𑀲𑀁𑀬𑁄𑀚𑀦𑀁, 𑀦𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀧𑀜𑁆𑀜𑀸𑀬𑁂𑀣 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀬𑀲𑁆𑀫𑀸 𑀘 𑀔𑁄, 𑀆𑀯𑀼𑀲𑁄, 𑀦 𑀚𑀺𑀯𑁆𑀳𑀸 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀲𑀸 𑀚𑀺𑀯𑁆𑀳𑀸𑀬 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬…𑀧𑁂….

‘‘𑀫𑀦𑁄 𑀯𑀸, 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁 𑀅𑀪𑀯𑀺𑀲𑁆𑀲, 𑀥𑀫𑁆𑀫𑀸 𑀯𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦𑀁, 𑀦𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀧𑀜𑁆𑀜𑀸𑀬𑁂𑀣 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀬𑀲𑁆𑀫𑀸 𑀘 𑀔𑁄, 𑀆𑀯𑀼𑀲𑁄, 𑀦 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬.

‘‘𑀇𑀫𑀺𑀦𑀸𑀧𑁂𑀢𑀁, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀦 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁…𑀧𑁂… 𑀦 𑀚𑀺𑀯𑁆𑀳𑀸 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁…𑀧𑁂… 𑀦 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁.

‘‘𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀘𑀓𑁆𑀔𑀼. 𑀧𑀲𑁆𑀲𑀢𑀺 𑀪𑀕𑀯𑀸 𑀘𑀓𑁆𑀔𑀼𑀦𑀸 𑀭𑀽𑀧𑀁. 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑁄𑀢𑀁. 𑀲𑀼𑀡𑀸𑀢𑀺 𑀪𑀕𑀯𑀸 𑀲𑁄𑀢𑁂𑀦 𑀲𑀤𑁆𑀤𑀁. 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀖𑀸𑀦𑀁. 𑀖𑀸𑀬𑀢𑀺 𑀪𑀕𑀯𑀸 𑀖𑀸𑀦𑁂𑀦 𑀕𑀦𑁆𑀥𑀁. 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀚𑀺𑀯𑁆𑀳𑀸. 𑀲𑀸𑀬𑀢𑀺 𑀪𑀕𑀯𑀸 𑀚𑀺𑀯𑁆𑀳𑀸𑀬 𑀭𑀲𑀁. 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀓𑀸𑀬𑁄. 𑀨𑀼𑀲𑀢𑀺 𑀪𑀕𑀯𑀸 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁. 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀫𑀦𑁄. 𑀯𑀺𑀚𑀸𑀦𑀸𑀢𑀺 𑀪𑀕𑀯𑀸 𑀫𑀦𑀲𑀸 𑀥𑀫𑁆𑀫𑀁. 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸.

‘‘𑀇𑀫𑀺𑀦𑀸 𑀔𑁄 𑀏𑀢𑀁, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀦 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁. 𑀦 𑀲𑁄𑀢𑀁… 𑀦 𑀖𑀸𑀦𑀁… 𑀦 𑀚𑀺𑀯𑁆𑀳𑀸 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀲𑀸 𑀚𑀺𑀯𑁆𑀳𑀸𑀬 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁. 𑀦 𑀓𑀸𑀬𑁄… 𑀦 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀓𑀸𑀫𑀪𑀽𑀲𑀼𑀢𑁆𑀢𑀁

𑁨𑁩𑁩. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀆𑀬𑀲𑁆𑀫𑀸 𑀘 𑀓𑀸𑀫𑀪𑀽 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀦𑁆𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀓𑀸𑀫𑀪𑀽 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀓𑀸𑀫𑀪𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁…𑀧𑁂… 𑀚𑀺𑀯𑁆𑀳𑀸 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁, 𑀭𑀲𑀸 𑀚𑀺𑀯𑁆𑀳𑀸𑀬 𑀲𑀁𑀬𑁄𑀚𑀦𑀁…𑀧𑁂… 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦’’𑀦𑁆𑀢𑀺?

‘‘𑀦 𑀔𑁄, 𑀆𑀯𑀼𑀲𑁄 𑀓𑀸𑀫𑀪𑀽 [𑀓𑀸𑀫𑀪𑀼 (𑀲𑀻.) 𑀫𑁄𑀕𑁆𑀕𑀮𑁆𑀮𑀸𑀦𑁂 𑁬𑁫-𑀕𑁂 𑀯𑀸𑀢𑀺 𑀲𑀼𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀁], 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁…𑀧𑁂… 𑀦 𑀚𑀺𑀯𑁆𑀳𑀸 𑀭𑀲𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀲𑀸 𑀚𑀺𑀯𑁆𑀳𑀸𑀬 𑀲𑀁𑀬𑁄𑀚𑀦𑀁…𑀧𑁂… 𑀦 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦𑀁. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀸𑀴𑁄 𑀘 𑀩𑀮𑀻𑀩𑀤𑁆𑀤𑁄 𑀑𑀤𑀸𑀢𑁄 𑀘 𑀩𑀮𑀻𑀩𑀤𑁆𑀤𑁄 𑀏𑀓𑁂𑀦 𑀤𑀸𑀫𑁂𑀦 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀲𑁆𑀲𑀼. 𑀬𑁄 𑀦𑀼 𑀔𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀸𑀴𑁄 𑀩𑀮𑀻𑀩𑀤𑁆𑀤𑁄 𑀑𑀤𑀸𑀢𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁, 𑀑𑀤𑀸𑀢𑁄 𑀩𑀮𑀻𑀩𑀤𑁆𑀤𑁄 𑀓𑀸𑀴𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦’𑀦𑁆𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀦 𑀔𑁄, 𑀆𑀯𑀼𑀲𑁄, 𑀓𑀸𑀴𑁄 𑀩𑀮𑀻𑀩𑀤𑁆𑀤𑁄 𑀑𑀤𑀸𑀢𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁, 𑀦𑀧𑀺 𑀑𑀤𑀸𑀢𑁄 𑀩𑀮𑀻𑀩𑀤𑁆𑀤𑁄 𑀓𑀸𑀴𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁. 𑀬𑁂𑀦 𑀘 𑀔𑁄 𑀢𑁂 𑀏𑀓𑁂𑀦 𑀤𑀸𑀫𑁂𑀦 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀲𑀁𑀬𑀼𑀢𑁆𑀢𑀸, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀦 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁…𑀧𑁂… 𑀦 𑀚𑀺𑀯𑁆𑀳𑀸…𑀧𑁂… 𑀦 𑀫𑀦𑁄…𑀧𑁂… 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄, 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀉𑀤𑀸𑀬𑀻𑀲𑀼𑀢𑁆𑀢𑀁

𑁨𑁩𑁪. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀆𑀬𑀲𑁆𑀫𑀸 𑀘 𑀉𑀤𑀸𑀬𑀻 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀦𑁆𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋

‘‘𑀬𑀣𑁂𑀯 𑀦𑀼 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀬𑀁 𑀓𑀸𑀬𑁄 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀓𑁆𑀔𑀸𑀢𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑁋 ‘𑀇𑀢𑀺𑀧𑀸𑀬𑀁 𑀓𑀸𑀬𑁄 𑀅𑀦𑀢𑁆𑀢𑀸’𑀢𑀺, 𑀲𑀓𑁆𑀓𑀸 𑀏𑀯𑀫𑁂𑀯 𑀯𑀺𑀜𑁆𑀜𑀸𑀡𑀁 𑀧𑀺𑀤𑀁 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼𑀁 𑀧𑀜𑁆𑀜𑀧𑁂𑀢𑀼𑀁 𑀧𑀝𑁆𑀞𑀧𑁂𑀢𑀼𑀁 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀁 𑁋 ‘𑀇𑀢𑀺𑀧𑀺𑀤𑀁 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸’’’𑀢𑀺?

‘‘𑀬𑀣𑁂𑀯 𑀔𑁄, 𑀆𑀯𑀼𑀲𑁄 𑀉𑀤𑀸𑀬𑀻, 𑀅𑀬𑀁 𑀓𑀸𑀬𑁄 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀓𑁆𑀔𑀸𑀢𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑁋 ‘𑀇𑀢𑀺𑀧𑀸𑀬𑀁 𑀓𑀸𑀬𑁄 𑀅𑀦𑀢𑁆𑀢𑀸’𑀢𑀺, 𑀲𑀓𑁆𑀓𑀸 𑀏𑀯𑀫𑁂𑀯 𑀯𑀺𑀜𑁆𑀜𑀸𑀡𑀁 𑀧𑀺𑀤𑀁 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼𑀁 𑀧𑀜𑁆𑀜𑀧𑁂𑀢𑀼𑀁 𑀧𑀝𑁆𑀞𑀧𑁂𑀢𑀼𑀁 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀁 𑁋 ‘𑀇𑀢𑀺𑀧𑀺𑀤𑀁 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸’’’𑀢𑀺.

‘‘𑀘𑀓𑁆𑀔𑀼𑀜𑁆𑀘, 𑀆𑀯𑀼𑀲𑁄, 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀬𑁄 𑀘𑀸𑀯𑀼𑀲𑁄, 𑀳𑁂𑀢𑀼, 𑀬𑁄 𑀘 𑀧𑀘𑁆𑀘𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄 𑀘 𑀳𑁂𑀢𑀼, 𑀲𑁄 𑀘 𑀧𑀘𑁆𑀘𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑁂𑀬𑁆𑀬. 𑀅𑀧𑀺 𑀦𑀼 𑀔𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀇𑀫𑀺𑀦𑀸𑀧𑀺 𑀔𑁄 𑀏𑀢𑀁, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁂𑀦 𑀪𑀕𑀯𑀢𑀸 𑀅𑀓𑁆𑀔𑀸𑀢𑀁 𑀯𑀺𑀯𑀝𑀁 𑀧𑀓𑀸𑀲𑀺𑀢𑀁 𑁋 ‘𑀇𑀢𑀺𑀧𑀺𑀤𑀁 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸’’’𑀢𑀺…𑀧𑁂….

‘‘𑀚𑀺𑀯𑁆𑀳𑀜𑁆𑀘𑀸𑀯𑀼𑀲𑁄, 𑀧𑀝𑀺𑀘𑁆𑀘 𑀭𑀲𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡’’𑀦𑁆𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀬𑁄 𑀘𑀸𑀯𑀼𑀲𑁄, 𑀳𑁂𑀢𑀼 𑀬𑁄 𑀘 𑀧𑀘𑁆𑀘𑀬𑁄 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄 𑀘 𑀳𑁂𑀢𑀼, 𑀲𑁄 𑀘 𑀧𑀘𑁆𑀘𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀇𑀫𑀺𑀦𑀸𑀧𑀺 𑀔𑁄 𑀏𑀢𑀁, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁂𑀦 𑀪𑀕𑀯𑀢𑀸 𑀅𑀓𑁆𑀔𑀸𑀢𑀁 𑀯𑀺𑀯𑀝𑀁 𑀧𑀓𑀸𑀲𑀺𑀢𑀁 𑁋 ‘𑀇𑀢𑀺𑀧𑀺𑀤𑀁 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸’’’𑀢𑀺…𑀧𑁂….

‘‘𑀫𑀦𑀜𑁆𑀘𑀸𑀯𑀼𑀲𑁄, 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀬𑁄 𑀘𑀸𑀯𑀼𑀲𑁄, 𑀳𑁂𑀢𑀼, 𑀬𑁄 𑀘 𑀧𑀘𑁆𑀘𑀬𑁄 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄 𑀘 𑀳𑁂𑀢𑀼, 𑀲𑁄 𑀘 𑀧𑀘𑁆𑀘𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀇𑀫𑀺𑀦𑀸𑀧𑀺 𑀔𑁄 𑀏𑀢𑀁, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁂𑀦 𑀪𑀕𑀯𑀢𑀸 𑀅𑀓𑁆𑀔𑀸𑀢𑀁 𑀯𑀺𑀯𑀝𑀁 𑀧𑀓𑀸𑀲𑀺𑀢𑀁 𑁋 ‘𑀇𑀢𑀺𑀧𑀺𑀤𑀁 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸’’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀕𑀯𑁂𑀲𑀻 𑀲𑀸𑀭𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀢𑀺𑀡𑁆𑀳𑀁 𑀓𑀼𑀞𑀸𑀭𑀺𑀁 𑀆𑀤𑀸𑀬 𑀯𑀦𑀁 𑀧𑀯𑀺𑀲𑁂𑀬𑁆𑀬. 𑀲𑁄 𑀢𑀢𑁆𑀣 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀓𑀤𑀮𑀺𑀓𑁆𑀔𑀦𑁆𑀥𑀁 𑀉𑀚𑀼𑀁 𑀦𑀯𑀁 𑀅𑀓𑀼𑀓𑁆𑀓𑀼𑀓𑀚𑀸𑀢𑀁 [𑀅𑀓𑀼𑀓𑁆𑀓𑀼𑀝𑀓𑀚𑀸𑀢𑀁 (𑀲𑁆𑀬𑀸. 𑀓𑀁.), 𑀅𑀓𑀼𑀓𑁆𑀓𑀚𑀝𑀚𑀸𑀢𑀁 (𑀓.)]. 𑀢𑀫𑁂𑀦𑀁 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬; 𑀫𑀽𑀮𑁂 𑀙𑁂𑀢𑁆𑀯𑀸 𑀅𑀕𑁆𑀕𑁂 𑀙𑀺𑀦𑁆𑀤𑁂𑀬𑁆𑀬; 𑀅𑀕𑁆𑀕𑁂 𑀙𑁂𑀢𑁆𑀯𑀸 𑀧𑀢𑁆𑀢𑀯𑀝𑁆𑀝𑀺𑀁 𑀯𑀺𑀦𑀺𑀩𑁆𑀪𑀼𑀚𑁂𑀬𑁆𑀬 [𑀯𑀺𑀦𑀺𑀩𑁆𑀪𑀼𑀚𑁆𑀚𑁂𑀬𑁆𑀬 (𑀧𑀻.), 𑀯𑀺𑀦𑀺𑀩𑁆𑀪𑀚𑁆𑀚𑁂𑀬𑁆𑀬 (𑀲𑁆𑀬𑀸. 𑀓𑀁.)]. 𑀲𑁄 𑀢𑀢𑁆𑀣 𑀨𑁂𑀕𑁆𑀕𑀼𑀫𑁆𑀧𑀺 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, 𑀓𑀼𑀢𑁄 𑀲𑀸𑀭𑀁! 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀦𑁂𑀯𑀢𑁆𑀢𑀸𑀦𑀁 𑀦 𑀅𑀢𑁆𑀢𑀦𑀺𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁄 𑀏𑀯𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 [𑀏𑀯𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 (𑀲𑁆𑀬𑀸. 𑀓𑀁. 𑀓.)] 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀁

𑁨𑁩𑁫. ‘‘𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑁄, 𑀥𑀫𑁆𑀫𑀧𑀭𑀺𑀬𑀸𑀬𑁄? 𑀯𑀭𑀁, 𑀪𑀺𑀓𑁆𑀔𑀯𑁂, 𑀢𑀢𑁆𑀢𑀸𑀬 𑀅𑀬𑁄𑀲𑀮𑀸𑀓𑀸𑀬 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 [𑀲𑀜𑁆𑀚𑁄𑀢𑀺𑀪𑀽𑀢𑀸𑀬 (𑀲𑁆𑀬𑀸. 𑀓𑀁.)] 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁, 𑀦 𑀢𑁆𑀯𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄. 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀣𑀺𑀢𑀁 [𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 (𑀲𑁆𑀬𑀸. 𑀓𑀁. 𑀓.) 𑀫. 𑀦𑀺. 𑁩.𑁩𑁧𑁬-𑁩𑁧𑁭] 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀣𑀺𑀢𑀁 𑀯𑀸 𑀢𑀲𑁆𑀫𑀺𑀜𑁆𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀕𑀘𑁆𑀙𑁂𑀬𑁆𑀬 𑁋 𑀦𑀺𑀭𑀬𑀁 𑀯𑀸, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸. 𑀇𑀫𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀸𑀫𑀺.

‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀳𑁂𑀦 𑀅𑀬𑁄𑀲𑀗𑁆𑀓𑀼𑀦𑀸 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁, 𑀦 𑀢𑁆𑀯𑁂𑀯 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀲𑀤𑁆𑀤𑁂𑀲𑀼 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄. 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀣𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀣𑀺𑀢𑀁 𑀯𑀸 𑀢𑀲𑁆𑀫𑀺𑀜𑁆𑀘𑁂 𑀲𑀫𑀬𑁂 𑀓𑀸𑀮𑀗𑁆𑀓𑀭𑁂𑀬𑁆𑀬, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀕𑀘𑁆𑀙𑁂𑀬𑁆𑀬 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸. 𑀇𑀫𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀸𑀫𑀺.

‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀳𑁂𑀦 𑀦𑀔𑀘𑁆𑀙𑁂𑀤𑀦𑁂𑀦 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁, 𑀦 𑀢𑁆𑀯𑁂𑀯 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀕𑀦𑁆𑀥𑁂𑀲𑀼 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄. 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀣𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀣𑀺𑀢𑀁 𑀯𑀸 𑀢𑀲𑁆𑀫𑀺𑀜𑁆𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬. 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀕𑀘𑁆𑀙𑁂𑀬𑁆𑀬 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸. 𑀇𑀫𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀸𑀫𑀺.

‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀳𑁂𑀦 𑀔𑀼𑀭𑁂𑀦 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁, 𑀦 𑀢𑁆𑀯𑁂𑀯 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄. 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀣𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀣𑀺𑀢𑀁 𑀯𑀸 𑀢𑀲𑁆𑀫𑀺𑀜𑁆𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬. 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀕𑀘𑁆𑀙𑁂𑀬𑁆𑀬 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸. 𑀇𑀫𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀸𑀫𑀺.

‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀳𑀸𑀬 𑀲𑀢𑁆𑀢𑀺𑀬𑀸 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁, 𑀦 𑀢𑁆𑀯𑁂𑀯 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄. 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀣𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀣𑀺𑀢𑀁 𑀯𑀸 𑀢𑀲𑁆𑀫𑀺𑀜𑁆𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬. 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀕𑀘𑁆𑀙𑁂𑀬𑁆𑀬 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸. 𑀇𑀫𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀸𑀫𑀺.

‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀲𑁄𑀢𑁆𑀢𑀁. 𑀲𑁄𑀢𑁆𑀢𑀁 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀜𑁆𑀛𑀁 𑀚𑀻𑀯𑀺𑀢𑀸𑀦𑀁 𑀯𑀤𑀸𑀫𑀺, 𑀅𑀨𑀮𑀁 𑀚𑀻𑀯𑀺𑀢𑀸𑀦𑀁 𑀯𑀤𑀸𑀫𑀺, 𑀫𑁄𑀫𑀽𑀳𑀁 𑀚𑀻𑀯𑀺𑀢𑀸𑀦𑀁 𑀯𑀤𑀸𑀫𑀺, 𑀦 𑀢𑁆𑀯𑁂𑀯 𑀢𑀣𑀸𑀭𑀽𑀧𑁂 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀬𑁆𑀬 𑀬𑀣𑀸𑀭𑀽𑀧𑀸𑀦𑀁 𑀯𑀺𑀢𑀓𑁆𑀓𑀸𑀦𑀁 𑀯𑀲𑀁 𑀕𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬. 𑀇𑀫𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀜𑁆𑀛𑀁 𑀚𑀻𑀯𑀺𑀢𑀸𑀦𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀸𑀫𑀺.

‘‘𑀢𑀢𑁆𑀣, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀢𑀺𑀝𑁆𑀞𑀢𑀼 𑀢𑀸𑀯 𑀢𑀢𑁆𑀢𑀸𑀬 𑀅𑀬𑁄𑀲𑀮𑀸𑀓𑀸𑀬 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁. 𑀳𑀦𑁆𑀤𑀸𑀳𑀁 𑀇𑀤𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺 𑁋 𑀇𑀢𑀺 𑀘𑀓𑁆𑀔𑀼 𑀅𑀦𑀺𑀘𑁆𑀘𑀁, 𑀭𑀽𑀧𑀸 𑀅𑀦𑀺𑀘𑁆𑀘𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄, 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁’’’ [𑀅𑀦𑀺𑀘𑁆𑀘’’𑀦𑁆𑀢𑀺 (?)].

‘‘𑀢𑀺𑀝𑁆𑀞𑀢𑀼 𑀢𑀸𑀯 𑀢𑀺𑀡𑁆𑀳𑁂𑀦 𑀅𑀬𑁄𑀲𑀗𑁆𑀓𑀼𑀦𑀸 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁. 𑀳𑀦𑁆𑀤𑀸𑀳𑀁 𑀇𑀤𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺 𑁋 𑀇𑀢𑀺 𑀲𑁄𑀢𑀁 𑀅𑀦𑀺𑀘𑁆𑀘𑀁, 𑀲𑀤𑁆𑀤𑀸 𑀅𑀦𑀺𑀘𑁆𑀘𑀸, 𑀲𑁄𑀢𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁, 𑀲𑁄𑀢𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄, 𑀬𑀫𑁆𑀧𑀺𑀤𑀁 𑀲𑁄𑀢𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁.

‘‘𑀢𑀺𑀝𑁆𑀞𑀢𑀼 𑀢𑀸𑀯 𑀢𑀺𑀡𑁆𑀳𑁂𑀦 𑀦𑀔𑀘𑁆𑀙𑁂𑀤𑀦𑁂𑀦 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁. 𑀳𑀦𑁆𑀤𑀸𑀳𑀁 𑀇𑀤𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺 𑁋 𑀇𑀢𑀺 𑀖𑀸𑀦𑀁 𑀅𑀦𑀺𑀘𑁆𑀘𑀁, 𑀕𑀦𑁆𑀥𑀸 𑀅𑀦𑀺𑀘𑁆𑀘𑀸, 𑀖𑀸𑀦𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁, 𑀖𑀸𑀦𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄, 𑀬𑀫𑁆𑀧𑀺𑀤𑀁 𑀖𑀸𑀦𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁…𑀧𑁂… 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁.

‘‘𑀢𑀺𑀝𑁆𑀞𑀢𑀼 𑀢𑀸𑀯 𑀢𑀺𑀡𑁆𑀳𑁂𑀦 𑀔𑀼𑀭𑁂𑀦 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁. 𑀳𑀦𑁆𑀤𑀸𑀳𑀁 𑀇𑀤𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺 𑁋 𑀇𑀢𑀺 𑀚𑀺𑀯𑁆𑀳𑀸 𑀅𑀦𑀺𑀘𑁆𑀘𑀸, 𑀭𑀲𑀸 𑀅𑀦𑀺𑀘𑁆𑀘𑀸, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄, 𑀬𑀫𑁆𑀧𑀺𑀤𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁.

‘‘𑀢𑀺𑀝𑁆𑀞𑀢𑀼 𑀢𑀸𑀯 𑀢𑀺𑀡𑁆𑀳𑀸𑀬 𑀲𑀢𑁆𑀢𑀺𑀬𑀸 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁. 𑀳𑀦𑁆𑀤𑀸𑀳𑀁 𑀇𑀤𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺 𑁋 𑀇𑀢𑀺 𑀓𑀸𑀬𑁄 𑀅𑀦𑀺𑀘𑁆𑀘𑁄, 𑀨𑁄𑀝𑁆𑀞𑀩𑁆𑀩𑀸 𑀅𑀦𑀺𑀘𑁆𑀘𑀸, 𑀓𑀸𑀬𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁, 𑀓𑀸𑀬𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄, 𑀬𑀫𑁆𑀧𑀺𑀤𑀁 𑀓𑀸𑀬𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁…𑀧𑁂… 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁.

‘‘𑀢𑀺𑀝𑁆𑀞𑀢𑀼 𑀢𑀸𑀯 𑀲𑁄𑀢𑁆𑀢𑀁. 𑀳𑀦𑁆𑀤𑀸𑀳𑀁 𑀇𑀤𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺 𑁋 𑀇𑀢𑀺 𑀫𑀦𑁄 𑀅𑀦𑀺𑀘𑁆𑀘𑁄, 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁, 𑀫𑀦𑁄𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄, 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀅𑀦𑀺𑀘𑁆𑀘𑀁’’.

‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀘𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀭𑀽𑀧𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑁄, 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀳𑀢𑁆𑀣𑀧𑀸𑀤𑁄𑀧𑀫𑀲𑀼𑀢𑁆𑀢𑀁

𑁨𑁩𑁬. ‘‘𑀳𑀢𑁆𑀣𑁂𑀲𑀼, 𑀪𑀺𑀓𑁆𑀔𑀯𑁂, 𑀲𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀁 𑀧𑀜𑁆𑀜𑀸𑀬𑀢𑀺; 𑀧𑀸𑀤𑁂𑀲𑀼 𑀲𑀢𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑁄 𑀧𑀜𑁆𑀜𑀸𑀬𑀢𑀺; 𑀧𑀩𑁆𑀩𑁂𑀲𑀼 𑀲𑀢𑀺 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀧𑀜𑁆𑀜𑀸𑀬𑀢𑀺; 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀢𑀺 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀧𑀜𑁆𑀜𑀸𑀬𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀲𑁆𑀫𑀺𑀁 𑀲𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔𑀁…𑀧𑁂… 𑀚𑀺𑀯𑁆𑀳𑀸𑀬 𑀲𑀢𑀺 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔𑀁…𑀧𑁂… 𑀫𑀦𑀲𑁆𑀫𑀺𑀁 𑀲𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔𑀁…𑀧𑁂….

‘‘𑀳𑀢𑁆𑀣𑁂𑀲𑀼, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀁 𑀦 𑀧𑀜𑁆𑀜𑀸𑀬𑀢𑀺; 𑀧𑀸𑀤𑁂𑀲𑀼 𑀅𑀲𑀢𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑁄 𑀦 𑀧𑀜𑁆𑀜𑀸𑀬𑀢𑀺; 𑀧𑀩𑁆𑀩𑁂𑀲𑀼 𑀅𑀲𑀢𑀺 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀦 𑀧𑀜𑁆𑀜𑀸𑀬𑀢𑀺; 𑀓𑀼𑀘𑁆𑀙𑀺𑀲𑁆𑀫𑀺𑀁 𑀅𑀲𑀢𑀺 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀦 𑀧𑀜𑁆𑀜𑀸𑀬𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀲𑁆𑀫𑀺𑀁 𑀅𑀲𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀼𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔𑀁…𑀧𑁂… 𑀚𑀺𑀯𑁆𑀳𑀸𑀬 𑀅𑀲𑀢𑀺 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀼𑀧𑁆𑀧𑀚𑁆𑀚𑀢𑀺…𑀧𑁂… 𑀫𑀦𑀲𑁆𑀫𑀺𑀁 𑀅𑀲𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀼𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀳𑀢𑁆𑀣𑀧𑀸𑀤𑁄𑀧𑀫𑀲𑀼𑀢𑁆𑀢𑀁

𑁨𑁩𑁭. ‘‘𑀳𑀢𑁆𑀣𑁂𑀲𑀼, 𑀪𑀺𑀓𑁆𑀔𑀯𑁂, 𑀲𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀁 𑀳𑁄𑀢𑀺; 𑀧𑀸𑀤𑁂𑀲𑀼 𑀲𑀢𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑁄 𑀳𑁄𑀢𑀺; 𑀧𑀩𑁆𑀩𑁂𑀲𑀼 𑀲𑀢𑀺 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀳𑁄𑀢𑀺; 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀢𑀺 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀲𑁆𑀫𑀺𑀁 𑀲𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔𑀁…𑀧𑁂… 𑀚𑀺𑀯𑁆𑀳𑀸𑀬 𑀲𑀢𑀺…𑀧𑁂… 𑀫𑀦𑀲𑁆𑀫𑀺𑀁 𑀲𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔𑀁…𑀧𑁂….

‘‘𑀳𑀢𑁆𑀣𑁂𑀲𑀼, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀁 𑀦 𑀳𑁄𑀢𑀺; 𑀧𑀸𑀤𑁂𑀲𑀼 𑀅𑀲𑀢𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑁄 𑀦 𑀳𑁄𑀢𑀺; 𑀧𑀩𑁆𑀩𑁂𑀲𑀼 𑀅𑀲𑀢𑀺 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀦 𑀳𑁄𑀢𑀺; 𑀓𑀼𑀘𑁆𑀙𑀺𑀲𑁆𑀫𑀺𑀁 𑀅𑀲𑀢𑀺 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀦 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀲𑁆𑀫𑀺𑀁 𑀅𑀲𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀼𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔𑀁…𑀧𑁂… 𑀚𑀺𑀯𑁆𑀳𑀸𑀬 𑀅𑀲𑀢𑀺 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀼𑀧𑁆𑀧𑀚𑁆𑀚𑀢𑀺…𑀧𑁂… 𑀫𑀦𑀲𑁆𑀫𑀺𑀁 𑀅𑀲𑀢𑀺 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀼𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺. 𑀤𑀲𑀫𑀁.

𑀲𑀫𑀼𑀤𑁆𑀤𑀯𑀕𑁆𑀕𑁄 𑀅𑀝𑁆𑀞𑀭𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀲𑀫𑀼𑀤𑁆𑀤𑀸 𑀩𑀸𑀴𑀺𑀲𑀺𑀓𑁄, 𑀔𑀻𑀭𑀭𑀼𑀓𑁆𑀔𑁂𑀦 𑀓𑁄𑀝𑁆𑀞𑀺𑀓𑁄;

𑀓𑀸𑀫𑀪𑀽 𑀉𑀤𑀸𑀬𑀻 𑀘𑁂𑀯, 𑀆𑀤𑀺𑀢𑁆𑀢𑁂𑀦 𑀘 𑀅𑀝𑁆𑀞𑀫𑀁;

𑀳𑀢𑁆𑀣𑀧𑀸𑀤𑀽𑀧𑀫𑀸 𑀤𑁆𑀯𑁂𑀢𑀺, 𑀯𑀕𑁆𑀕𑁄 𑀢𑁂𑀦 𑀧𑀯𑀼𑀘𑁆𑀘𑀢𑀻𑀢𑀺.